གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་འཕགས་པ་སྤྱན་རས་གཟིགས་ཁྲོས་པ་ཁྲོ་བོ་རོ་ཟའི་ལས་བྱང་གསོལ་མཆོད་བསྐང་བཟློག་སྦྲག་མ།
གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ འཕགས་པ་སྤྱན་རས་གཟིགས་ཁྲོས་པ་ཁྲོ་བོ་རོ་ཟའི་ལས་བྱང་གསོལ་མཆོད་བསྐང་བཟློག་སྦྲག་མ་ཡོད་ལགས་སོ༔
བླ་མ་དཀོན་མཆོག་གསུམ་རྣམས་ལ༔ བདག་ནི་རྟག་པར་སྐྱབས་སུ་མཆི༔ མི་དགེ་བཅུ་དང་མཚམས་མེད་ལྔ༔ སྡིག་བྱས་ཐམས་ཅད་མཐོལ་ལོ་བཤགས༔ འགྲོ་བ་སེམས་ཅན་ཐམས་ཅད་ཀྱི༔ དགེ་བྱས་ཀུན་ལ་རྗེས་ཡི་རང་༔ ཕྱོགས་བཅུར་བཞུགས་པའི་སངས་རྒྱས་རྣམས༔ ཆོས་སྟོན་མཛད་པར་བདག་གིས་བསྐུལ༔ རྫོགས་པའི་སངས་རྒྱས་ཐམས་ཅད་ནི༔ མྱ་ངན་མི་འདའ་བཞུགས་པར་འཚལ༔ བདག་གིས་དེ་ལྟར་གསོལ་བཏབ་པའི༔ དགེ་བ་སེམས་ཅན་ཀུན་ལ་བསྔོ༔ ཨ༔ སྟོང་པའི་ངང་ལས་པཾ་ཡིག་ལས༔ པདྨ་མཚོན་ཆའི་སོ་འདྲ་
ཤིན་ཏུ་ནག་པ་ཟུར་གསུམ་གཟུགས༔ དེ་སྟེང་སུར་ལས་ཉི་མའིགདན༔ ཚ་ཞིང་གཟི་བརྗིད་རབ་ཆེ་བ༔ ཉི་མའི་འོད་ཟེར་རེ་རེ་ཡང་༔ མདའ་མདུང་རལ་གྲི་མཚོན་ཆ་རེ༔ དེ་སྟེང་བམ་ལས་མི་རོ་ནི༔ སྲ་ཞིང་རིང་བ་ཁྲག་རྒྱུན་ཅན༔ དེ་སྟེང་ཁྲོ་བོ་རོ་ཟ་ནི༔ སྐུ་མདོག་ནག་པོ་ཆར་སྤྲིན་མདོག༔ ཞལ་ནི་ཟུར་གསུམ་རྟག་ཏུ་གདངས༔ ལྗགས་ནི་ཟུར་གསུམ་གློག་ལྟར་འཁྱུག༔ མཆེ་བ་ཟུར་གསུམ་བཞི་པོ་ཡིས༔ བདུད་བཞི་ཆེམ་ཆེམ་ཉིལ་ཉིལ་གསོལ༔ སོ་ཞིབ་ཟུར་གསུམ་བཞི་བཅུ་ཡིས༔ མི་རོ་རེངས་པ་ཁར་བཅུག་ནས༔ ཆེམ་ཆེམ་ཆིལ་
ཆིལ་གསོལ་བར་བྱེད༔ ཤངས་ནི་ཟུར་གསུམ་དྲག་པོ་ཡིས༔ ཤངས་རླུང་ཐོག་དང་སེར་བ་འབེབས༔ སྤྱན་གསུམ་ཟུར་གསུམ་གཟིགས་ཙམ་གྱིས༔ འཇིག་རྟེན་ཐམས་ཅད་ཡམ་ཡམ་བྱེད༔ སྙན་ནི་ཟུར་གསུམ་བསྟན་ཙམ་གྱིས༔ རི་རབ་དེ་ཡང་ཡམ་ཡམ་ནུས༔ དབུ་སྐྲ་ཉག་མ་རེ་རེ་ཡང་ཟུར་གསུམ་ཚྭ་ཚྭ་སི་ལི་ལི༔ ནམ་མཁའི་དབྱིངས་སུ་གཟིགས་པ་ན༔ ལྷ་རྣམས་བལྟ་བར་མི་བཟོད་དོ༔ ཨག་ཙོམ་ཉག་མ་རེ་རེ་ཡང་༔ ཟུར་གསུམ་མེ་འབར་ཡ་ལ་ལ༔ ཕྱག་ནི་གཡས་གཡོན་ཟུར་དང་ལྡན༔ ཕྱག་ཞབས་མཛུབ་གུ་ཟུར་གསུམ་ལ༔ དང་པོ་གཉིས་ཀྱིས་ཐལ་མོ་སྦྱར༔ ཐལ་མོ་སྦྱར་བ་ཟུར་གསུམ་གཟུགས༔ དེ་འོག་གཉིས་ཀྱིས་ཐུགས་ཀ་རུ༔ ཐལ་མོ་བརྡབས་པས་དགྲ་བགེགས་བརླགས༔ ཞལ་ནི་ཟུར་གསུམ་བརྗེས་པ་ཡིས༔ སྣང་སྲིད་ཐམས་ཅད་ཡོ་ཡོ་ནུས༔ སྐུ་རྒྱུན་སྦྲུལ་ནི་ཟུར་གསུམ་བརྒྱན༔ རྒྱུ་མ་ཟུར་གསུམ་དོ་ཤལ་ལ༔ དགྲ་མགོ་ཁམ་པས་རབ་ཏུ་བརྒྱན༔ དགྲ་མགོའི་ཁ་ནི་ཟུར་གསུམ་ལས༔ མེ་ཡི་ཚྭ་ཚྭ་སི་ལི་ལི༔ དབུ་ལ་ཐོད་སྐམ་ལྔ་ཡིས་བརྒྱན༔ སྟག་ཤམ་ཟུར་གསུམ་གཟུགས་སུ་མནབ༔ མི་ལྤགས་གླང་
ལྤགས་ཟུར་གསུམ་གཟུགས༔ སྐུ་ལ་མནབས་ཤིང་ཕྱ་ར་ར༔ སྐུ་ལས་མེ་དཔུང་འབར་བ་ཡང་༔ མེ་ལྕེ་ཟུར་གསུམ་གཟུགས་སུ་ལྡན༔ ཕྱོགས་བཞིར་རྒྱལ་པོ་ཆེན་པོ་བཞི༔ ཕྱོགས་མཚམས་སྡེ་བརྒྱད་འཁོར་གྱིས་བསྐོར༔ བདག་མདུན་ཐུགས་ཀར་ཧཱུྃ་མཐིང་ནག༔ དེ་ལས་འོད་ཟེར་དཔག་མེད་འཕྲོས༔ དཔེར་ན་ཉི་མའི་འོད་ཟེར་བཞིན༔ དུ་མ་འཕྲོས་པས་རོ་ཟ་ནི༔ བསྒོམ་པ་འདྲ་བ་དུ་མ་རྣམས༔ སྤྱན་དྲངས་བདག་མདུན་རྣམས་ལ་ཐིམ༔ བཛྲ་ཨ་ཝེ་ཤ་ཡ་ཨཱ༔ ཛ༔ཧཱུྃ་བཾ་ཧོ༔ ཏིཥྛ་ལྷན༔ ཨ་ཏི་པཱུ་ཧོ༔ པྲ་ཏི་ཛ་ཧོ༔ གཏོར་མ་འདོད་ཡོན་ཕུན་ཚོགས་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ཨོཾ་ཨཱཿཧཱུྃ་ལོ་ཀེ་ཤྭ་ར་ཀྲོ་དྷ་ཧཱུྃ་ཕཊ༔ ཨོཾ་དྷྲིཥྚཱ་རཱཥྚཱ་ཡ༔ བེ་རུ་ཌྷ་ཀཱ་ཡ༔ བི་རུ་པཀྵ་ཡ༔ བཻ་ཤྲ་མ་ཎ་ཡ༔ ཨ་ཡ་མ་དུ་རུ་ཙ་ཤ་ན༔ ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ གསུམ༔ ཨ་མྲྀ་ཏ་རཀྟ་ཁཱ་ཧི༔ ཨརྒྷཾ་སོགས༔ ཧཱུྃ༔ བཅོམ་ལྡན་ཁྲོ་བོ་རོ་ཟ་ནི༔ ཞལ་གཅིག་ཕྱག་བཞི་ཁྲོ་བོའི་གཟུགས༔ དང་པོས་ཐལ་སྦྱར་འོག་མ་ཡིས༔ ཐལ་མོ་རྡེབ་པ་མངོན་སུམ་གསལ༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་
ཐུགས་དམ་བསྐང་༔ བདེ་དྲོད་མེ་ལྟར་འབར་བ་དང་༔ མཆོག་གི་དངོས་གྲུབ་བསྩལ་དུ་གསོལ༔ ཧཱུྃ༔ ཤར་ཕྱོགས་རྒྱལ་ཆེན་ཡུལ་འཁོར་སྲུང་༔ ཤེལ་གྱི་ཁྲབ་རྨོག་ཟངས་སེ་ཟང་༔ གཡས་ན་ཤེལ་གྱི་པི་ཝང་འཛིན༔ གཡོན་ན་ཤེལ་གྱི་ཕུར་པ་འཛིན༔ ཞབས་ལ་རིན་ཆེན་ཤེལ་ལྷམ་གསོལ༔ དབུ་ལ་མེ་འབར་ལམས་སེ་ལམ༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཕྱི་ནང་འཁྲུག་རྩོད་ཞི་བར་མཛོད༔ ཧཱུྃ༔ ལྷོ་ཕྱོགས་གཤིན་རྗེ་འཕགས་སྐྱེས་པོ༔ བཻཌཱུར་ཁྲབ་རྨོག་ཟངས་སེ་ཟང་༔ གཡས་ན་བཻཌཱུར་རལ་གྲི་བསྣམས༔ གཡོན་ན་བཻཌཱུར་ཕུར་པ་འཛིན༔ བཻཌཱུར་ཨག་ཙམ་རིང་དང་ལྡན༔ ཞབས་ལ་བཻཌཱུར་ཡ་ཡི་ལྷམ༔ དབུ་ལ་མེ་འབར་ཡ་ལ་ལ༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ དུས་མིན་འཆི་བ་བཟློག་ཏུ་གསོལ༔ ཧཱུྃ༔ ནུབ་ཕྱོགས་ཀླུ་རྒྱལ་སྤྱན་མི་བཟང་༔ བྱི་རུའི་ཁྲབ་རྨོག་ཟངས་སེ་ཟང་༔ གཡས་ན་བྱི་རུའི་སྦྲུལ་ཞགས་བསྣམས༔ གཡོན་ན་བྱི་རུའི་ཕུར་པ་བསྣམས༔ སྤྱན་མིག་བྱི་རུའི་མདངས་དང་ལྡན༔ ཞབས་ལ་
བྱི་རུའི་ལྷམ་གསོལ་བ༔ དབུ་ལ་མེ་འབར་ལམས་སེ་ལམ༔ འདིར་གཤེགས་བརྒྱན་པའི་གཏོར་མ་བཞེས། གསོལ་ལོ་མཆོད་དོ་ཐུགས་དམ་བསྐང་༔ བཀྲ་ཤིས་ནོར་ཕྱུགས་འཕེལ་བ་མཛོད༔ ཧཱུྃ༔ བྱང་ཕྱོགས་གནོད་སྦྱིན་རྣམ་ཐོས་སྲས༔ གསེར་གྱི་ཁྲབ་རྨོག་ཟངས་སེ་ཟང་༔ གཡས་ན་གསེར་གྱི་རྒྱལ་མཚན་འཛིན༔ གཡོན་ན་གསེར་གྱི་ཕུར་པ་འཛིན༔ རྨོག་རྩེར་གསེར་གྱི་ཁྱུང་ཆེན་ལྡིང་༔ ཞབས་ལ་རིན་ཆེན་གསེར་ལྷམ་གསོལ༔ དབུ་ལ་མེ་འབར་ལམས་སེ་ལམ༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ བསོད་ནམས་ལོངས་སྤྱོད་རྒྱས་པར་མཛོད༔ ཧཱུྃ༔ ཤར་ཕྱོགས་ལྷ་ཡི་རྒྱལ་པོ་སྟེ༔ དངུལ་གྱི་བེར་ཆེན་ལྷུབས་སེ་ལྷུབ༔ གཡས་ན་དངུལ་གྱི་ཨ་ཡིག་འཛིན༔ གཡོན་གྱི་དངུལ་གྱི་ཕུར་པ་འཛིན་དངུལ་གྱི་ལྷ་གཡག་ལ་ཞོན་ནས༔ ལྷ་རྣམས་ཀུན་གྱི་རྒྱལ་པོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ལྷ་ཡི་རྩུབ་རིམས་ཞི་བར་མཛོད༔ ཧཱུྃ༔ ལྷོ་ཕྱོགས་གཤིན་རྗེའི་རྒྱལ་པོ་སྟེ༔ བེཌཱུར་བེར་ཆེན་ལྷུབས་
སེ་ལྷུབ༔ གཡས་ན་བེཌཱུར་རལ་གྲི་འཛིན༔ གཡོན་ན་བེཌཱུར་ཕུར་པ་བསྣམས༔ བེཌཱུར་ཡ་ཡི་མ་ཧེ་ཞོན༔ ཞོན་ནས་གཤིན་རྗེའི་རྒྱལ་པོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ གཤིན་རྗེའི་ཁྲམ་ཁ་བཟློག་ཏུ་གསོལ༔ ཧཱུྃ༔ ནུབ་ཕྱོགས་མ་མོའི་རྒྱལ་པོ་སྟེ༔ ཤེལ་གྱི་བེར་ཆེན་ལྷུབས་སེ་ལྷུབ༔ གཡས་ན་ཤེལ་གྱི་མེ་ལོང་བསྣམས༔ གཡོན་ན་ཤེལ་གྱི་ཕུར་པ་བསྣམས༔ ཤེལ་གྱི་འབྲུག་གི་སྟེང་བཞུགས་ནས༔ མ་མོ་ཀུན་གྱི་རྒྱལ་མོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས་གསོལ་ལོ་མཆོད་དོ་ཐུགས་དམ་བསྐང་༔ མ་མོའི་རིམས་ནད་ཞི་བར་མཛོད༔ ཧཱུྃ༔ བྱང་ཕྱོགས་བདུད་ཀྱི་རྒྱལ་པོ་སྟེ༔ རྡོ་སོལ་བེར་ཆེན་ལྷུབས་སེ་ལྷུབ༔ གཡས་ན་རྡོ་སོལ་ཁྲམ་ཤིང་འཛིན་གཡོན་ན་རྡོ་སོལ་ཕུར་པ་འཛིན༔ ཆིབས་སུ་རྡོ་སོལ་རྟ་ནག་ཆིབས༔ བདུད་ཀྱི་ཚོགས་ཀྱི་རྒྱལ་པོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ བདུད་ཀྱི་ཞགས་པ་འདེབས་པ་ཟློག༔ ཧཱུྃ༔ ཤར་ལྷོར་བཙན་གྱི་རྒྱལ་པོ་སྟེ༔ ཟངས་ཀྱི་བེར་ཆེན་
ལྷུབས་སེ་ལྷུབ༔ གཡས་ན་ཟངས་ཀྱི་མདའ་གཞུ་འཛིན༔ གཡོན་ན་ཟངས་ཀྱི་ཕུར་པ་འཛིན༔ ཟངས་ཀྱི་རྟ་དམར་ལ་ཞོན་ནས༔ བཙན་རྣམས་ཀུན་གྱི་རྒྱལ་པོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ བཙན་གྱི་ཤྭ་རྡེལ་གཏོར་བ་ཟློག༔ ཧཱུྃ༔ ལྷོ་ནུབ་རྒྱལ་པོ་བེ་དཀར་ཁྱོད༔ དུང་གི་བེར་ཆེན་ལྷུབས་སེ་ལྷུབ༔ གཡས་ན་དུང་གི་གསེར་སྤར་འཛིན༔ གཡོན་ན་དུང་གི་ཕུར་པ་འཛིན་དུང་སེང་དཀར་མོའི་སྟེང་བཞུགས་ནས༔ རྒྱལ་པོ་ཀུན་གྱིའང་རྒྱལ་པོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས་གསོལ་ལོ་མཆོད་དོ་ཐུགས་དམ་བསྐང་༔ རྒྱལ་པོའི་སྨྱོ་འབོག་གཏོང་བ་ཟློག༔ ཧཱུྃ༔ ནུབ་བྱང་གནོད་སྦྱིན་རྒྱལ་པོ་སྟེ༔ སྤོས་ཤེལ་བེར་ཆེན་ལྷུབས་སེ་ལྷུབ༔ གཡས་ན་སྤོས་ཤེལ་ཤ་ཡིག་འཛིན༔ གཡོན་ན་སྤོས་ཤེལ་ཕུར་པ་བསྣམས༔ སྤོས་ཤེལ་སྟག་མོ་ལ་ཞོན་ནས༔ གནོད་སྦྱིན་ཀུན་གྱི་རྒྱལ་པོ་བྱེད༔ འདིར་གཤེགས་བརྒྱན་གྱི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ གནོད་སྦྱིན་གཟེར་ནད་བཟློག་ཏུ་གསོལ༔ ཧཱུྃ༔ བྱང་ཤར་ཀླུ་ཡི་
རྒྱལ་པོ་སྟེ༔ མར་གད་བེར་ཆེན་ལྷུབས་སེ་ལྷུབ༔ གཡས་ན་མར་གད་སྦྲུལ་ཞགས་འཛིན་༔ གཡོན་ན་མར་གད་ཕུར་པ་བསྣམས༔ མར་གད་ཆུ་སྲིན་རྣམས་ཀུན་གྱི་རྒྱལ་པོ་བྱེད༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཀླུ་ཡི་ཞ་གྲུམ་མཛེ་ནད་ཟློག༔ ཧཱུྃ༔ རོ་ཟ་ནི༔ སྐུ་སྟོད་བར་སྣང་ཁམས་སུ་ཁྱབ༔ དབུ་ཡིས་ཚངས་པ་བརྒྱ་བྱིན་ཡང་༔ མྱུར་དུ་ཟིལ་གྱིས་གནོན་པར་བྱེད༔ སྐུ་སྨད་བར་པས་ས་གཞི་ཁྱབ༔ ཞབས་ཀྱིས་དམྱལ་ཁམས་དཀྲུག་པར་བྱེད༔ བདག་ཅག་རྣམས་ལ་གནོད་པ་ཡི༔ གནོད་བྱེད་རྒྱ་མཚོའི་ཕ་རོལ་སྒྲོལ༔ མ་ཉན་བཀའ་ལས་འདས་གྱུར་ན༔ དཔལ་ཆེན་ཁྲོ་བོ་རོ་ཟ་ཡི༔ ཞལ་ནི་ཟུར་གསུམ་ཧཾ་ཁུང་དུ༔ ཆེམ་ཆེམ་ཉིལ་ཉིལ་ཟ་བར་བྱེད༔ དེ་བས་མ་འདུག་ཕྱིར་དེངས་ཤིག༔ གལ་ཏེ་དམ་ལས་འདས་ནས་ནི༔ བསྐལ་པའི་མེ་འདིས་སྲེག་པར་བྱེད༔ རྒྱལ་ཆེན་བཞི་ཡི་མེ་དཔུང་གིས༔ ཡན་ལག་བཞི་ནི་མུས་མུས་བསྲེག༔ ཁྲོ་བོ་རོ་ཟའི་མེ་དཔུང་གིས༔ མགོ་བོ་ནས་ནི་མྱུར་དུ་བསྲེག༔ རྡོ་རྗེ་དམྱལ་བར་ལྟུང་བར་བྱེད༔
རིགས་དྲུག་ཚ་དམྱལ་བརྒྱད་དང་ནི༔ གྲང་དམྱལ་བརྒྱད་དང་དམྱལ་ཕྲན་སོགས༔ ཐམས་ཅད་ཁྱོད་ཀྱིས་བསྐྱོད་པར་དགོས༔ དེ་བས་དམ་ལ་མ་འདའ་ཞིག༔ ས་མ་ཡཱ༔ ས་མ་ཡ༔ གནོད་བྱེད་ཨུ་ཙ་ཏ་ཡ་ཕཊ༔ བདག་བསྐྱེད་གཙོ་རྐྱང་མདུན་བསྐྱེད་འཁོར་མང་བྷཻཾ༔ ཚར་གྲངས་བརྒྱ་རྩ་ལོ་གྲངས་ཉེར་གཅིག་གམགང་འགྲུབ་བཏོན་ནས་གཙང་སར་ཕུལ་བའོ༔ རྒྱུན་ཁྱེར་ཡི་དམ་བྱས་ན་ཤིན་ཏུ་ལེགས༔ བླ་མ་ཡི་དམ་དབྱེར་མེད་སྤྱན་རས་གཟིགས༔ རྒྱལ་ཆེན་སྡེ་བཞིའི་སྟོབས་དང་མངའ་ཐང་བསྐྱེད༔ སྡེ་བརྒྱད་རྣོ་མྱུར་ཕྲིན་ལས་མྱུར་དུ་འགྲུབ༔ རང་གཞན་འདི་ཕྱིའི་དོན་གཉིས་འདི་ཀས་འགྲུབ་འདི་ནི་རླུང་ཁྲིད་འཛུགས་དང་དབྱེར་མེད་སོགས༔ འདི་ཡི་ལས་ཚོགས་གང་དང་གང་བསྒྲུབ་ཀྱང་༔ འདི་ཡི་གསོལ་མཆོད་ཤིན་ཏུ་གལ་ཆེ་བས༔ དེ་སྔོན་ལན་གཉིས་བསྒྲིགས་ཀྱང་དཔེ་ཆ་རྣམས༔ སློབ་བུ་སོ་སོས་ཁྱེར་བས་འདིར་མ་མཆིས༔ སྔ་ཕྱི་ཚིག་ཟུར་འདྲ་མིན་བྱུང་སྲིད་ཀྱང་༔ དོན་ལ་ཁྱད་མེད་ཐེ་ཚོམ་སྤང་བར་བྱ༔ གཏོར་མ་བཅའ་ཐབས་དཔེའུ་རིས་ལྟར་རོ༔ འབྲི་གུང་ཡང་ཟབ་ལས་བྱང་མེད་པ་ལ༔ གཏེར་སྟོན་ཉིད་ཀྱིས་གསར་དུ་བསྒྲིགས་པ་ལྟར༔ འདི་ཡང་གཏེར་བློན་ར་ག་ཨ་སྱས་བསྒྲིགས༔ དགེའོ༔ ༔ ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།