གཏུམ་མོའི་བོགས་དབྱུང་།
ཨཚཀཀཚརཀྐའཛིགཚཀྐཚཀྐཚཀྐཚགཛག
གུ་རུ་པྲ་ཝ་ཀི་མ་ཧཱ་སུ་ཁ་ཡེ་ན་མོ། གཏུམ་མོ་བདེ་དྲོད་རང་འབར་གྱི་སྐབས་སུ་བདེ་བའི་བོགས་དབྱུང་བ་དང་། ཉོན་མོངས་འདོད་ཆགས་མི་སྤངས་ལམ་དུ་ཁྱེར་བའི་ཕྱིར། ཡིད་རིག་ཡེ་ཤེས་ཀྱི་ཕྱག་རྒྱ་བསྟེན་པ་ནི། རྩའི་སྟོང་ར་དང་རླུང་ཅུང་བསྒོམ་པར་བྱས་ལ་རང་ཉིད་པདྨ་འོད་འབར་སྐུ་གཅེར་བུ་རུས་པའི་རྒྱན་དྲུག་ཅན་རྩ་གསུམ་འཁོར་ལོ་བཞི་དང་བཅས་པ་གསལ་བཏབ། མདུན་དུ་ཡེ་ཤེས་ཀྱི་ཌཱཀི་མཚོ་རྒྱལ་མ་དེ་ཐ་མལ་གྱི་བུད་མེད་མཛེས་ཤིང་ཡིད་དུ་འོང་བ་ཕྱག་རྒྱ་པདྨ་ཅན་གྱི་མཚན་རྟགས་ཐམས་ཅད་ཚང་བ་ལ། རྣམ་པ་རང་གི་ཡིད་དུ་འོང་བ་གང་རུང་ཞིག་གི་ཆས་སུ་
བསྒོམ། དེ་ནས་དེ་ལ་ཆགས་པའི་གཏམ་དང་བརྩེ་བ་སོགས་བྱེད་པར་བསམས་ལ་དེའི་གཟུགས་ལ་ཆགས་པའི་ངོ་བོ་ལ་ལྟའོ། །དེ་ནས་རང་ཉིད་ཀྱི་རྡོ་རྗེ་ཧཱུྃ་ལས་རྡོ་རྗེ་རྩེ་གསུམ་བུ་ག་ཧཱུྃ་གིས་བགགས་པར་ཕྱག་རྒྱའི་པདྨ་དམར་པོ་འདབ་མ་གསུམ་པ་ཟེའུ་འབྲུ་ཕཊ་ཀྱིས་བཀག་པར་བསམས་ལ་རང་ཉིད་དང་སྙོམས་པར་ཞུགས་པས་རང་གི་སྤྱི་བོར་ཧཾ་ཡིག་མགོ་ཐུར་བསྟན་ལས་བྱང་སེམས་ཀྱི་རྒྱུན་བབས། སྤྱི་བོ་ནས་མགྲིན་པ་ཡན་ཆད་གང་བར་བསམ། དམིགས་པས་ཐིག་ལེ་འབེབས་དཀའ་ན་རང་གི་ལག་གི་སོར་མོར་གཡས་ལྔ་ཌཱཀི་ལྔར་བསམས་པས། མཆིལ་མས་བརླན་ལ་
རྡོ་རྗེ་རྩེ་མོར་ཉུག་ཉུག་བྱས་ཤིང་ལུས་སེམས་བདེ་བའི་ཉམས་ཅུང་ཟད་མགོ་བརྩམས་ན། དེའི་ངོ་བོ་ལ་བལྟས་པས་དགའ་བའི་ཡེ་ཤེས་སོ། །དེ་ནས་སྙིང་ཁ་གང་བདེ་བ་ཆེར་སྐྱེས་པའི་ངོ་བོ་ལ་བལྟས་པས་མཆོག་དགའི་ཡེ་ཤེས། དེ་ནས་ལྟེ་བར་བདེ་བ་རྒྱས་ངོ་བོ་ལ་བལྟས་པས་ཁྱད་པར་གྱི་དགའ་བ་རྒྱས་པའོ། །དེ་ནས་ལག་གཡོན་གྱི་གསང་གནས་དང་འོག་སྒོའི་བར་དུ་ཐིག་ལེ་རྒྱུ་བའི་ལམ་རྩ་བོ་ཆེ་ཡོད་པ་དམ་དུ་མནན་པ་ཐིག་ལེའི་ལམ་དགག་ཅིང་སྤྱོད་པས་གསང་བའི་རྩ་བར་བབས་པ་བདེ་བ་ཚད་མེད་པས་རྣམ་རྟོག །གཞན་ཐམས་ཅད་འགགས་ནས་རྟོགས་མེད་སྐད་ཅིག་ལ་འཆར། དེའི་ངོ་བོ་ལ་བལྟས་པས་ལྷན་ཅིག་སྐྱེས་པའི་ཡེ་ཤེས་ཕྱག་རྒྱ་ཆེན་པོ་དེ་ཡིན་པར་རྒྱུད་ཐམས་ཅད་ནས་གསུངས་སོ། །དེ་མ་ཐག་སྤྱི་བོར་རྣམ་ཤེས་གཏད་པས་ཧལ་ཧལ་ཞེས་དྲག་ཏུ་བརྗོད་པས་ཐིག་ལེ་ལྟེ་བར་བཟློག་ཧིང་ཧིང་ཞེས་སྙིང་ཁར་ཧིག་ཧིག་ཅེས་མགྲིན་པར་ཧག་ཧག་ཅེས་སྤྱི་བོར་བསྟིམས། འཁྲུལ་འཁོར་ལྟོ་བ་སྒལ་པར་སྦྱར། ལྕེ་ཡར་རྐན་མིག་གྱེན་ལ་ལྡོག་ཧྲིང་ཞེས་རླུང་གྱེན་ལ་འཐེན་ནོ། །དེ་ལྟར་རྡོ་རྗེའི་ངར་མ་ཞི་བར་བྱས། དེ་ནས་སོར་མོས་ཁ་སྣ་བཀག་ལ་རླུང་དྲག་ཏུ་རྔུབ་ཅིང་ལུས་རྟ་ལྟར་ལན་མང་དུ་སྤྲུག་
པས་ཐིག་ལེས་ལུས་ཐམས་ཅད་ཁྱབ་པར་བསྒོམས་ལ་དམིགས་མེད་ནམ་མཁས་གར་ཁྱབ་སེམས་ཀྱིས་ཁྱབ་པར་བསམས་ལ་ཡུན་རིང་བཞག་གོ །འདི་ཐིག་ལེ་མ་དྲངས་ན་གཅིན་དང་མཉམ་དུ་འབྱུང་འཁར་ན་མཁལ་ནད་སོགས་འབྱུང་བས་ལྡོག་བཀྲམ་ནན་ཏན་བྱའོ། །ཨོ་རྒྱན་གྱི་གསུངས་པ་དང་གསང་བ་ཐིག་ལེ་ནོར་བུའི་རྒྱུད་ཆེན་པོས་དོན་རྩ་གོ་བདེ་བར་བྱས། ཁ་ཐཾ་རྒྱ་རྒྱ་རྒྱ༔ ཧེ་ཧེ་ཅེས་པ་ཀརྨ་ཨ་རཱ་གས་བུ་ཨོ་རྒྱན་རིག་འཛིན་ལ་ཡང་གསང་མན་ངག་ཟབ་མོ་འདི་ཡིད་ཀྱི་བཀ་ཆཎ་གནང་བའོ། །དེ་ཉིད་ཀྱི་ཕྱག་བྲིས་བུ་ལས་བཤུས་སོ།། །། ཨོཾ༔ ཐུགས་རྗེ་ཆེན་པོ་སྐྱེའུ་ལུགས་ཀྱི་དམར་ཁྲིད་ཆོས་འབྲུ་བདུན་པ་ཇི་ལྟར་འཆད་པའི་སྤྲ་ཁྲིད་དང་བརྩམས་དོན་བཞུགས་སོ༔ ཨོྃ༔ མ་ཧཱ་ཀཱ་རུ་ཎི་ཀ་ཡེ་ན་མ༔ འདི་ལ་མདོ་ལུགས་ལྟར་ཁྲོམ་ཆོས་བྱ་ཚུལ་དང་༔ སྔགས་ལུགས་ལྟར་ཉུང་ཁྲིད་བྱ་ཚུལ་དང་༔ གསང་སྔགས་རྙིང་མ་ལུགས་ལྟར་དབང་ཁྲིད་སྦྲེལ་མ་བྱ་ཚུལ་དང་གསུམ་མོ༔ དང་པོ་ནི༔ གནས་དེར་བསང་དང་གསེར་སྐྱེམས་གྲུབ་ན་རབ༔ མ་གྲུབ་ན་གཞི་བདག་ལ་དཀར་གཏོར་བསྔོ་བགེགས་ལ་གླུད་གཏོར་སྦྱིན་ལ་བསྐྲད་དེ་སྲུང་འཁོར་བསྒོམ་མོ༔ ཁྲོམ་
ཅུང་ཟད་མ་རྫོགས་ཚེ་ལ་འུ་བའི་རྣམ་ཐར་ལུང་དང་༔ རིམས་ནད་ཞི་བའི་ཕྱིར་ལོ་མ་གྱོན་མའི་རྗེས་གནང་གྲུབ་ན་ལེགས༔ མ་འགྲུབ་ཀྱང་སྒོམ་ལུང་བྱིན་ལ་སྔགས་འུར་འདོན་བྱ་བ་ཁྲོམ་གྱི་སྲུང་བའོ༔ དེ་ནས་བདུན་གསུམ་བྱེད་ན་ཆོས་ཐུན་རེ་རེ་ཉི་མ་གསུམ་ལ་བཤད་ཝིག་བྱེད་ཅིང་༔ ཉིན་གསུམ་རེས་མོས་སུ་ལུང་འདྲེན་རྣམས་ལ་འགྲེལ་པ་རྒྱབ་ཅིང་བཤད་དེ༔ བདུན་གཉིས་བྱེད་ན་ཉི་མ་གཉིས་ལ་ཆོས་ཐུན་རེ་རེ་བཤད་ཝིག་དང་འགྲེལ་པ་གང་འོས་བཤད༔ བདུན་ཁྲིད་གཅིག་ལས་མི་ཚུགས་ན་ཉིན་རེ་རེ་ལ་ཆོས་ཐུན་རེ་རེ་སྟེ༔ མཇུག་གི་དམིགས་མེད་དེ་ལན་གཉིས་སམ་གསུམ་རྣམ་ཝིག་ལ་ཟུན་ངེས་བྱའོ༔ མཇུག་ཉིན་གཅིག་གནས་ཆོས་ལྟར་ཚོགས་ཆེན་དང་ཚེ་དབང་འགྲུབ་ན་ལེགས༔ མ་གྲུབ་ན་བསྔོ་བ་བཀྲ་ཤིས་ཕྱག་ནས་འཐོར་བ་སོགས་བྱའོ༔ གོང་དུ་དང་པོ་ཐུགས་རྗེ་ཆེན་པོ་འགྲོ་འདུལ་མ་རྒྱལ་བ་རྒྱ་མཚོ་ལྟ་བུའི་རྗེས་གནང་འགྲུབ་ན་ལེགས༔ མ་གྲུབ་ན་གནམ་ཆོས་འབུ་སུ་ཀུའི་ཏིང་འཛིན་གྱི་དབང་ནི་ངེས་པར་དགོས་སོ༔ ༈ ཉུང་ཁྲིད་བྱེད་ན་དང་པོ་སྐྱེའུ་པའི་རྣམ་ཐར་ལུང་བྱ༔ སྐྱེའུ་ལུགས་ཀྱི་དབང་བསྐུར་གཞུང་ལྟར་རྒྱས་པར་བྱའོ༔ གལ་ཏེ་མ་གྲུབ་ན་ལྷ་ལྔའམ༔ སྐྱེའུ་ལུགས་གཟུངས་
དབང་དུ་བཅུག་ཀྱང་མི་འགལ༔ དེ་ནས་བདུན་ཁྲིད་བྱེད་མཚན་པ་རེ་རེ༔ བདུན་གཉིས་སམ་གསུམ་བྱེད་ན་ཡང་གོང་ལྟར་ཝིག༔ དེ་ཚེ་བཀའ་སྲུང་ལ་གཏོར་མ་བསྔོ༔ རྗེས་ནས་བསྔོ་བ་བཀྲ་ཤིས་སོགས་བྱའོ༔ ༈ དབང་ཁྲིད་སྦྲེལ་ན་ཆོས་བདག་སུ་ངེས་ཤིང་བརྒྱུད་པ་གསར་དུ་ཡོད་པའི་གནས་ཀྱིས་ཐུགས་རྗེ་ཆེན་པོ་གསང་འདུས་ཀྱི་སྒྲུབ་ཆེན་ལོགས་སུ་མངོན་རྟོགས་སྐྱེའུ་ལུགས་ལ་ལས་བྱང་གནམ་ཆོས་རྩ་གསུམ་ལས་བྱང་༔ བཀའ་སྲུང་གནམ་ཆོས་ཀྱི་བཀའ་སྲུང་བྱེད་པ་མ་གཏོགས་གསང་འདུས་ལྟར་བྱ༔ སྔགས་རྒྱུན་འཛོམས་ན་རབ་མེད་ཀྱི་དམིགས་པ་འབོགས་ནས་ཡིག་བཅུ་འུར་འདོན་བྱ༔ ཡུན་རིང་ཐུང་དང་དཔག་ལ་དབང་ཚན་པ་རེ་རེ་གཉིས་རེ་གང་འོས་བྱ་ཞིང་༔ ཆོས་མཐུན་རེ་རེ་བསྒྲགས་པར་བྱའོ༔ རྒྱལ་ཐོ་ནས་ཚེ་འགུགས་ཡན་སྒྲུབ་ཆེན་ཇི་ལྟ་བ་བྱའོ༔ འདི་ནི་ཅུང་ཞིག་གཉེན་ནོ༔ ཕྱི་མདོ་ལུགས་ཀྱི་ཁྲོམ་ཆོས་ནི་འགྲོ་དོན་ཆེ་རྩུབ་ཆ་ནི་མེད་དོ༔ ༈ ཡང་འདི་ལ་པཎྜི་ཏའི་དཔེ་ཁྲིད༔ སྒོམ་ཆེན་གྱི་དམར་ཁྲིད༔ རྒན་མོའི་མཛུབ་ཁྲིད༔ སྐུ་ཆེན་གྱི་སྤོམ་ཁྲིད༔ འདོན་པོ་ཆེའི་དཔུང་ཁྲིད་གང་ཡང་རུང་སྟེ༔ སློབ་མ་ཆོས་སྤྱིའི་དོན་ལ་མཁས་པ་རིག་པའི་
གནས་ཀུན་ལ་རྟོགས་པ་བཅུག་པ་གོ་བ་ཤེས་རབ་ཕུན་སུམ་ཚོགས་པ་དག་ལ་ཆོས་ཐུན་རེ་བཤད་ནས་དཔེ་ལག་ཏུ་མ་བཞག་པས་མི་ཚིམ༔ ཆོས་ཐུན་རེ་རེ་དེ་བཤད་ནས་དེས་སྟག་སྐྲུན་ཐ་མཚམས་སུ་བྱས་ནས་གཏད་པ་དང་༔ སློབ་མ་དེས་དེའི་དོན་རྣམས་ལེགས་པར་དཔྱད་ནས་མ་གོ་བ་ལ་སྤྱི་རྟགས་བྱས༔ གཞུང་ཚིག་བློར་བཟུང་༔ དེ་ནས་སློབ་དཔོན་ལ་འདི་ཡི་དོན་འདི་སྐད་བྱ་བ་ཡིན་ནམ་ཞེས་ཡར་ཞུས༔ མ་གོ་བ་དེ་ཅི་ལགས་འདྲི༔ སློབ་དཔོན་དེས་ཀྱང་ཡར་ཞུར་པས་མ་རྟོགས་པ་དང་ལོགས་པར་རྟོགས་པ་དང་ཕྱོགས་ཙམ་རྟོགས་པ་གང་འདུག་བཅོས༔ སླར་ཆོས་ཐུན་གཅིག་བཤད་དཔེ་བསྐུར་ལ་བལྟ་བཅུག༔ དེས་བལྟས་པ་ན་གཞུང་ཚིག་ལ་སྐྱོན་འདུག་སྙམ་པ་དང་༔ མདོ་རྒྱུད་དར་མི་མཐུན་པར་གོ་བ་དང་༔ རིགས་པས་ཚོ་མི་ཐུབ་བར་འདུག་སྙམ་པ་གང་བྱུང་སློབ་དཔོན་ཞུ༔ དེ་རྣམས་ཀྱི་གོ་བ་བསྐྱེད༔ དེལ་གཞན་དག་དེ་སྐད་ཟེར་ན་ལན་འདི་སྨོས་ཟེར་བ་དེ་བསླབ༔ དེའི་མི་ལ་ཆོས་ཐུན་རྣམས་བཤད་པས༔ ཁྲིད་རྫོགས་པ་དང་སློབ་མས་གཞན་ལ་བཤད་ཀྱང་སློབ་དཔོན་བྱས་ཆོག་པ་ཞིག་འོང་བ་དེ་ལ་པཎྜི་ཏའི་དཔེ་ཁྲིད་ཟེར༔ དེང་སོང་མཚན་ཉིད་པའི་འཆད་ཉན་བཏང་ཟེར་བ་དེ་ཡིན་
ཏེ༔ འོན་ཀྱང་གོ་བ་ཙམ་ལས་ཉམས་རྟོགས་སྐྱེ་དཀའ་བ་ཡིན་ནོ༔ སྒོམ་ཆེན་གྱི་དམར་ཁྲིད་ཞེས་པ་བླ་མ་དེ་ཡང་རྣམ་གཡེང་སྤངས་ནས་མཚམས་ཡུན་རིང་ལྟ་བུ་བཞུགས་པའམ་སློབ་མ་ཆོས་དད་ཆེ་བས་ཡུན་རིང་རྗེས་སུ་འབྲང་ན༔ ཆོས་ཐུན་རེ་རེ་བཤད་ནས་དེའི་དོན་རྒྱུད་ལ་མ་སྐྱེས་བར་དུ་བསྒོམ་མ་གསལ་ན་སྐབས་སུ་གསལ་འདེབས༔ དེ་ནས་སློབ་མས་རྟོགས་པ་རེ་རེ་ཕུལ༔ དེ་མ་ལེགས་ནས་བཅོས༔ གོ་བ་མིན་པར་རྒྱུད་ལ་སྐྱེ་ངེས་རེད་ན་ཡང་ཆོས་ཐུན་རྗེས་མ་བཤད༔ དེ་ལྟར་ཁྲིད་ལོ་ཟླར་བསྐྱངས་བ་ནི་ཁྲིད་རྫོགས་པ་དང་མཉམ་དུ་རྟོགས་པ་རྒྱུད་ལ་སྐྱེས་པ་དུས་མཉམ་དུ་འོང་བ་ཡིན་པར་འདུག་སྟེ༔ རྗེ་གོང་མ་དབང་གྲག་རྒྱ་མཚོ་སོགས་ཀྱིས་དེ་ལྟར་མཛད་ཅིང་ཀཐོག་ངོས་ན་སློབ་གཉེར་གཞན་མི་བྱེད་པ༔ ལོ་གསུམ་ཁྲིད་ཞུ་དེ་ནས་ལོ་གསུམ་སྒྲུབ་པ་བྱེད་དེ་ནས་བླ་མའི་མིང་འདོགས་པ་ཡིན་སྐད་དེ་ལེགས་པར་གདའོ༔ རྒན་མོའི་མཛུབ་ཁྲིད་ཞེས་པ་བླ་མ་རྟོགས་པར་ལྡན་ཡང་སློབ་གཉེར་བྱས་པས་རྒྱུད་ལུང་འཆད་མི་དགོངས་པའམ༔ དགོངས་ཀྱང་སློབ་མ་མི་ནག་ཐ་མལ་པས་གསུང་རབ་ཀྱི་སྐད་དོན་ཡེ་མི་གོ་བའི་རིགས་ལ་ལུང་འདྲེན་མེད་པར་ཐ་མལ་གྱི་ཁ་དལ་ལྟར་
གང་དྲན་དྲན་ངོ་སྤྲོད་དང་གསལ་འདེབས་བྱས་པས༔ བླུན་ཚིག་འདྲ་བར་གྱུར་ཀྱང་ཕ་རོལ་པོས་དོན་གོ་ཞིང་ཉམས་རྟོགས་ཀྱང་སྐྱེ་བར་འདུག་པ་དེང་སང་རྒྱུད་པའི་བྱ་བྲལ་ཕལ་ཆེར་ཁྲིད་འཛུག་ཡང་དེ་ལྟར་དུ་སྣང་ངོ༔ སྐུ་ཆེན་གྱི་སྤོམ་ཁྲིད་ནི་བླ་ཆེན་དང་སྡེ་དཔོན་དང་སྐུ་སྐྱེ་སོགས་ཁྲིད་ཐོབ་ཐོབ་མང་དུ་འདོད་ཀྱང་ཉན་མི་ཁོམ་པ་དག་ལ༔ ཁྲིད་དཔེའི་ལུང་ཞིག་བྱས་ཏེ༔ གལ་ཆེ་རྣམས་ངག་ནས་ཀྱང་གསལ་བཏབ༔ མཇུག་ཏུ་དོན་གྱི་དམིགས་རིམ་འདི་རྣམས་སྒོམས་ཤིག་བརྗོད་ནས་འགགས་བསྡུ༔ སློབ་མས་ཀྱང་ཁྲིད་དཔེ་བཅད་ནས་དཔེ་ཐོག་ནས་ཉམས་ལེན་གང་འགྲུབ་དང་གཞན་ལའང་ཆད་པའོ༔ འདོད་པོ་ཆེའི་སྤུང་ཁྲིད་ན་ཡོན་ཏན་རྒྱ་ཆེ་བའི་དགེ་བཤེས་དག༔ ཁྲིད་ཀྱི་རྣམ་གྲངས་དཔག་ཏུ་མེད་པ་དག་ཐོབ་པར་འདོད༔ དཔེ་མང་པོའི་ལུང་ཡང་ཉན་མི་ཁོམ་པ་ལ༔ ཁྲིད་རྣམས་ཀྱི་རྩ་ཚིག་ལུང་བྱས༔ ཁྲིད་དཔེ་རྒྱས་པའི་དཔེ་དབང་བྱང་ཡང་ལེགས་མེད་ཀྱང་ཆོག་སྟེ༔ ཁྲིད་ཀྱི་དོན་ངག་ནས་ཀྱང་ངོ་སྤྲོད་ཧྲིག་སྡུས་བྱས་པས་ཁྲིད་མང་པོ་དུས་གཅིག་ཐོབ་པ་སྟེ༔ རང་གིས་ཉམས་སུ་ལེན་དང་གཞན་ལ་ཆད་པའི་ཁྲིད་རྒྱུན་མ་ཆད་རྩམ་པ་ཀླག་ལུང་ལས་ལྷག་པ་ཙམ་འོང་བ་ཡིན༔ དེ་ལ་འགའ་ཞིག་གི་
བཀླག་ལུང་ཐོབ་པས་ཁྲིད་རྒྱུན་མེད་ན་ཁྲིད་འཇུག་པ་མི་འཐད་ཟེར༔ དེའི་བཀག་པ་ལུང་ཚད་ལྡན་ལས་ནི་མ་མཐོང་ལ༔ ཁྲིད་གང་རུང་གཅིག་ལ་སེམས་ཀྱི་ངོ་བོ་གསལ་པོར་མཐོང་ནས༔ ཁྲིད་དཔེ་ལུང་ཐོབ་ཚད་འཇུག་རུང་བ་དང་༔ དེ་ཡང་རྩ་ཚིག་ཐོབ་ནས་རྒྱས་བཤད་བློ་ནས་སམ་དཔེ་ཐོག་ནས་འཆད་རུང་བ་དེང་སང་བསྟན་པ་སྤྱིའི་ཕྱག་ལེན་ནོ༔ དེ་ལ་ཡང་བླ་མ་དེས་སྒོམ་མེད་རྟོགས་ན་སློབ་མས་གསལ་བ་བཏབ་པ་དང་ཞལ་མཐོང་བ་ཙམ་ནས་རྟོགས་པ་སྐྱེ་ནུས༔ རོ་གཅིག་རྟོགས་ནའང་རྒྱས་པར་བཤད་མི་དགོས་བརྡའམ༔ ཅུང་ཟད་ཆོས་བཤད་ཙམ་གྱིས་རྟོགས་པ་སྐྱེ༔ སྤྲོས་བྲལ་རྟོགས་ནས་ཁྲིད་རྒྱས་པར་བཤད་པས་རྟོགས་པ་སྐྱེ་བ་ཡིན༔ རྩེ་གཅིག་ཙམ་གྱིས་རྒྱུད་བྱིན་གྱིས་བརླབས་མི་ནུས་ངོ་བོ་མ་མཐོང་བས་ཁྲིད་འཆད་ཀྱང་མི་ལ་མི་ཕན༔ རང་གི་ཉམས་རྟོགས་སྐྱེ་འཕེལ་འགགས་པའི་རྒྱུ་ཡིན་པས་དུས་ལ་མ་བབས་པར་མི་བཤད༔ འོན་ཀྱང་གཞན་ཕན་གྱི་སེམས་བསྐྱེད་བཟང་ན་འོན་པས་དུང་བུས་པ་ལྟར་གཞན་ལ་ཅུང་ཟད་ཕན་ཡང་སྲིད་པར་གསུངས༔ ཉམས་རྟོགས་བཟང་ན་ཤུགས་འབྱུང་གིས་བྱམས་སྙིང་རྗེ་སྐྱེ་མོད༔ ཉམས་རྟོགས་མེད་ཅིང་ཟང་ཟིང་
དོན་དུ་གཉེར་བས་ཁྲིད་དཔེ་གང་མཐོང་ཐ་ན་ལུང་རྒྱུན་ཡང་མེད་པར་འཆད་པ་དག་ནི་ཆོས་བཙོང་པ་དང་སེམས་ཅན་མགོ་བསྐོར་བའི་ཉེས་པས་མནར་མེད་དུ་ལྟུང་སྟེ༔ བདུད་ཀྱི་ལས་ཡིན་པར་ཤེས་པར་བྱའོ༔ དབང་ལུང་གི་རྒྱུན་མེད་པར་དབང་ལུང་བྱེད་པ་ཡང་དེ་དང་འདྲའོ༔ དེས་ན་འདི་ལྟར་མཁར་འགྲོའི་ཁ་རླངས་མ་ཡལ་བའི་ཁྲིད་ནི་ཤིན་ཏུ་ཟབ་བོ༔ འདི་བཤད་ཆོས་མ་ཡིན་ཉམས་ལན་གྱི་ཆོས་ཡིན་པས་འདོད་བཞེད་མང་པོ་དང་༔ དགག་བཞག་དང་ས་བཅད་མང་དུ་བྱེད་རྒྱུ་ཡོད་ཀྱང་མ་བྱས་པར༔ ཡོན་ཏན་ཅན་རྣམས་མགུ་ཕྱིར་མདོ་རྒྱུད་ཀྱི་ལུང་སྐབས་སུ་འབྱོར་ངེས་སུ་བསྐོད༔ རྨོངས་པས་ཟིན་སླ་ཕྱིར་དམིགས་པ་བསྡུས་ཏེ་བཀོད་དོ༔ སྤྲུལ་སྐུས་སློབ་དཔོན་ཆགས་མེད་ཁྱོད་སྡོན་སྐྱེའུ་པའི་སློབ་མ་ཡིན་ཀྱང་ཐུགས་རྗེ་ཆེན་པོ་འདི་ལ་ཉམས་ལེན་ཆེར་མ་བྱས༔ ད་ལམ་མོས་པར་འདུག་པས་གྱིས་གསུང་ཕྱིར༔ ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་ཁྱད་པར་ཆོས་འབྲུ་བདུན་པ་མགོ་རྟོགས་ཅུང་ཟད་བྱུང་བ་ལ་གཞིར་བྱས་ཏེ༔ བཀའ་གཏེར་གྱི་ལུང་གིས་བརྒྱན་ནས་རང་གཞན་ལ་ཕན་པའི་ཆེད་དུ་བཀོད་པ་སྟེ༔ འདི་ལ་བརྟེན་ནས་གནམ་ཆོས་ཐུགས་ཀྱི་གཏེར་ཁའི་སྒྲུབ་རྒྱུད་འཕེལ་ཞིང་རྒྱས་ལ་ཡུན་
རིང་དུ་གནས་པ་དང་༔ སྤྲུལ་སྐུ་རིན་པོ་ཆེ་ཞབས་པད་བརྟན་ཞིང་ཕྲིན་ལས་རྒྱས་པར་གྱུར་ཅིག༔ མངྒ་ལཾ༔ ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅོས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་ ༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
རི་མོ་ཡོད།