མིང་ཐོས་ཙམ་གྱིས་གཞུང་དོན་རྟོགས་པའི་ཕྱིར། ༼ཀ༽ །ཐེམ་བྱང་ཡིད་འཕྲོག་མཐོང་བ་དོན་རྟོགས་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ཨུ་པ་ཚེས་ཀྱི་གྲངས་ཀའི་ཐེམ་བྱང་ཡིད་འཕྲོག་མཐོང་བ་དོན་རྟོགས་ཞེས་བྱ་བ་ཐེམ་ཡིག་མེད་པའི་གསང་རྒྱ་མ་བཞུགས་པའི་དབུ་ཕྱོགས་ལགས་སོ། །
ན་མོ་གུ་རུ་ཀརྨ་ཊཱཀྐི་ཡེ། ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ཀོའུ་རི་སེང་ཧ་དབང་ཕྱུག་ཉེར་བརྒྱད་སོགས། །མ་ཚོགས་ལས་བྱེད་ཊཱཀྐི་རྣམས་ལ་འདུད། །གསང་སྔགས་གསང་ཞེས་བྱ་བའི་གཏན་ཚིག་ནི། །ཆོས་དེ་སྦ་དགོས་སྐྱོན་ཡོད་མ་ཡིན་ཏེ། །སེང་གེའི་འོ་མ་རྫ་ཤིང་སྣོད་བླུགས་ན།། །སྣོད་ཀྱང་ཆག་ཅིང་བཅུད་ཀྱང་འབོ་བའི་དཔེ། །སྣོད་མིན་རྣམས་ལ་གསང་སྔགས་ཆོས་བཤད་ན། །ཁོ་ཡི་བློ་ལ་མི་ཤོང་ལོག་ལྟ་སྐྱེ། །གདམས་པའི་ངད་ཡལ་ཁོ་ཉིད་དམྱལ་བར་འགྲོ། །སེང་གེའི་འོ་མ་གསེར་གྱི་སྣོད་བླུགས་ལྟར། །
སྣོད་ལྡན་རྣམས་ལ་སྤེལ་ན་ཕན་ཐོགས་ཆེ། །དེ་ཕྱིར་གསང་དང་སྤེལ་ཚོད་སྣོད་ལ་བརྟགས། །སྤྱིར་ནི་གསང་སྔགས་གསང་ན་འགྲུབ་ཐག་ཉེ། །གསང་བར་བསྔགས་ཕྱིར་གསང་སྔགས་མིང་དུ་བཏགས། །མ་གསང་འཆལ་བར་བསྒྲིགས་ན་གསང་སྔགས་ཉམས། །ཚེ་འདིར་མཁའ་འགྲོའི་བཀའ་ཆད་ལུས་སྲོག་འཇོམས། །ཕྱི་མ་ངན་སོང་སྡུག་བསྔལ་མཐའ་མེད་སྤྱོད། །དེ་ལ་འཆད་མཁན་སློབ་དཔོན་རྟོགས་པའི་ཁྱད། །འཁོར་འདས་དབྱེར་མེད་ལྟ་བ་རྟོགས་པའི་མི། །རང་གི་སྣང་ངོར་སྣོད་མིན་མ་གྲུབ་སྟེ། །སངས་རྒྱས་སེམས་ཅན་དོན་ལ་མཉམ་པོར་
རྟོགས། །སེམས་ཅན་ཐམས་ཅད་ཡི་དམ་ལྷ་སྐུར་གསལ། །དེ་ལྟར་ནམ་མཁའ་ལྟ་བུའི་རྣལ་འབྱོར་པས། །ཁྲོམ་ལ་བཤད་ཀྱང་གསང་དམ་མི་ཉམས་པས། །སྣོད་མིན་རྣམས་ཤུལ་ཡེ་གསང་ཐག་གིས་ཆོད། །བཤད་ཀྱང་དེ་དོན་ཁོ་ཡིས་རྟོགས་མི་འགྱུར། །དེ་འདྲ་རྫོགས་ཆེན་རྒྱུད་ལས་བཤད་མོད་ཀྱང་། །དེ་འདྲའི་རྟོགས་པ་ཐོབ་པ་ཤིན་ཏུ་དཀོན། །གྲུབ་ཐོབ་ཆེན་པོ་གླིང་རྗེ་རས་པ་ཡིས། །ཁྲོམ་ལ་གསང་སྔགས་ཟབ་མོའི་ཆོས་འཆད་ཚེ། །དམ་ཚིག་ཉམས་པའི་མི་གཅིག་གསར་དུ་ཕྱིན། །དེ་མ་ཐག་ཏུ་ཚེམས་འགྲིགས་གསུང་འགགས་ནས། །དེ་ཡིས་རྐྱེན་བྱས་འདས་ཚུལ་བསྟན་པ་དེ། །ཕྱི་རབས་གསང་སྔགས་གསང་དགོས་ཟེར་བའི་བརྡའ། །ཆུ་བོ་གང་གཱས་བཅད་པ་ཚུན་ཆད་ལ། །ཁོང་ལས་རྟོགས་པ་མཐོ་བ་མེད་པར་གྲགས། །དེ་ཕྱིར་ངོ་སྤྲོད་ཞལ་གདམས་འདི་རྣམས་ཀྱང་། །སྟོན་ནམ་མི་སྟོན་སློབ་མའི་རྒྱུད་ཚོགས་བརྟགས། །ངོ་སྤྲོད་མ་བྱས་བར་དུ་དཔེ་མི་བསྟན། །དཔེ་རྒྱུད་འཆར་མི་འཇུག་པའི་བཀའ་རྒྱས་བཏབ། །རྒྱས་པའི་ལས་དང་དབང་གི་སྒྲུབ་སྐོར་ནི། །སྤེལ་བས་སྐྱོན་གཞན་ཡོད་པ་མ་ཡིན་ཏེ། །ཡིད་བཞིན་ནོར་བུ་མི་ལ་བྱིན་པས་
ན། །རང་ཉིད་དབུལ་པོར་འགྲོ་བའི་དཔེ་བཞིན་དུ། །གཡང་ཉམས་བསོད་ནམས་བྲི་བས་གཡང་ཁ་སྡམ། །མ་མགོན་པར་ནག་ལ་སོགས་དྲག་སྔགས་རྣམས། །བསྟན་པའི་དོན་དུ་བསྒྲུབ་རྒྱུ་ཡིན་མོད་ཀྱང་། །རང་འདོད་དུག་ལྔ་ཧྲགས་ཕྱིར་སྡིག་རྐྱེན་འགྱུར། །ཧེ་ལོ་འཚོང་དང་འདྲ་བས་རྣམ་སྨིན་སོམས། །སྣོད་ལྡན་གཅིག་བརྒྱུད་ཙམ་ལས་མ་སྤེལ་ན། །གསང་སྔགས་ཕྱག་ལེན་བརྒྱུད་པ་རབས་ཆད་འགྱུར། །དེ་ཕྱིར་བརྩོན་འགྲུས་རྒྱ་མཚོ་ཁྱོད་ལ་གདམས། །ངོ་ཆེན་གལ་ཆེན་སྤེལ་དགོས་ནན་ཏན་ན། །ལྷ་དེར་གསོལ་བ་ཐོབ་ལ་རྨི་ལམ་བརྟགས། །གནང་བའི་ལྟས་བྱུང་སྤེལ་ཡང་འགལ་མེད་ཙམ། །དེ་མིན་གཅིག་བརྒྱུད་ཁོ་ན་བྱ་བ་ལེགས། །ཐེམ་ཡིག་མེད་སྐོར་ཡིན་ཡང་འཆོལ་དོགས་ནས། །ཐེམ་ཡིག་གྲངས་ཀ་རྩིས་སུ་མནན་པ་ནི། །མིང་ཐོས་ཙམ་གྱིས་གཞུང་དོན་རྟོགས་པའི་ཕྱིར། ༼ཀ༽ །ཐེམ་བྱང་ཡིད་འཕྲོག་མཐོང་བ་དོན་རྟོགས་ཡོད། །ལྷ་གཅིག་སྔགས་གཅིག་ཡི་དམ་ཀུན་འགྲུབ་ཕྱིར། ༼ཁ༽ །རྒྱུད་སྡེ་སྤྱི་སྒྲུབ་རྒྱལ་བ་རྒྱ་མཚོ་ཡོད། །དཔེ་དང་དོན་གྱི་ཡེ་ཤེས་ངོ་སྤྲོད་ཕྱིར། ༼ག༽ །ཕྱག་ཆེན་ངོ་
སྤྲོད་སངས་རྒྱས་ལག་གཏད་ཡོད། །དགའ་བཞི་ཡེ་ཤེས་དངོས་སུ་ངོ་སྤྲོད་ཕྱིར། ༼ང༽ །གདམས་ངག་ཡེ་ཤེས་མཁའ་འགྲོའི་གསང་ཚིག་ཡོད། །སྡིག་ཅན་རྒྱལ་པོས་ཆད་པ་གཅོད་པའི་ཚེ། ༼ཅ༽ །བཙན་ཐབས་འཕོ་བ་བཙོན་ནས་ཐར་ཐབས་ཡོད། །བསོད་ནམས་ལོངས་སྤྱོད་མངའ་ཐང་རྒྱས་པའི་ཕྱིར། ༼ཆ༽ །སྨུག་འཛིན་དཀར་པོ་ལྷ་ལྔའི་ལོ་རྒྱུས་ཡོད། །རྣམ་གཡེང་དབང་གིས་མཚམས་སྒྲུབ་མ་ལྕོགས་ན། ༼ཇ༽ །རྒྱུན་ཁྱེར་མངོན་རྟོགས་ཟིན་བྲིས་ཟབ་མོ་ཡོད། །དབུལ་ཕོངས་སྒྲུབ་པའི་ཡོ་བྱད་མི་འཛོམ་ན། །༼ཉ༽ །ཆུ་ལ་བརྟེན་ནས་ཕྱི་ལྟར་སྒྲུབ་པ་ཡོད། །མཆོད་གཏོར་འཛོམས་ཤིང་རྫས་གཞན་མི་འཛོམ་ན། ༼ཏ༽ །གཏོར་མ་ལ་བརྟེན་ནང་ལྟར་སྒྲུབ་པ་ཡོད། །ཤེས་རབ་བརྩོན་འགྲུས་སྒྲུབ་རྫས་འཛོམ་པ་ལ། ༼ཐ༽ །གའུ་ལ་བརྟེན་གསང་བར་སྒྲུབ་པ་ཡོད། སྒྲུབ་རྫས་ཀུན་འཛོམ་ཏིང་འཛིན་གསལ་བ་ལ། ༼ད༽ །ཕྱི་ནང་གསང་གསུམ་དྲིལ་ཏེ་སྒྲུབ་པ་ཡོད། །ཕྱི་ནང་གསང་གསུམ་སྒྲུབ་པ་རྟགས་ཐོན་ནས། ༼ན༽ །ལས་ཚོགས་སྒྲུབ་པ་ཆེན་པོའི་ཟིན་བྲིས་ཡོད། །སྨུག་འཛིན་རྩེ་གཅིག་ཡི་དམ་བྱེད་པ་པོས།
༼པ༽ ལས་ཚོགས་འཐོར་བུ་སྒྲུབ་པའི་ཟིན་བྲིས་ཡོད། །བློ་གཏད་ལིངས་སྒྱུར་བྱས་པའི་སློབ་བུ་ལ། ༼ཕ༽ །སྔགས་བྱང་སྙན་བརྒྱུད་ཡི་གེ་མེད་པ་ཡོད། །གའུ་སོ་སོར་སྒྲུབ་བམ་དྲིལ་སྒྲུབ་ཀྱི། ༼བ༽ །སྔགས་བྱང་གཏོར་མའི་བཅའ་ཐབས་གུད་དུ་གབ། །འགྲུབ་དང་མི་འགྲུབ་དངོས་གྲུབ་འབྱུང་མི་འབྱུང་། ༼མ༽ །ཤེས་ཕྱིར་ཚོད་འཛིན་རྟགས་ཀྱི་ཡི་གེ་ཡོད། །རྣམ་གཡེང་ཆེན་པོའི་སྒྲུབ་ལོང་མ་བྱུང་ན། ༼ཙ༽ །སྒྲུབ་པ་རླུང་ལ་བཅོལ་ཐབས་གུད་དུ་གབ། །རྨོངས་པ་རྣམས་ཀྱིས་ཉམས་ལེན་བདེ་བའི་ཕྱིར། །༼ཚ༽ །ཙཀྲ་ལྔ་ཡི་དཔེའུ་རིས་གསལ་བ་ཡོད། །གནམ་ཆོས་སྐོར་ལས་དངོས་གྲུབ་འབྱུང་འདོད་ན། ༼ཇ༽ །སྤྲོས་མེད་ཛམ་དམར་ཟིན་བྲིས་གུད་དུ་སྦས། །ཡིད་ཆེས་དང་བ་བསྐྱེད་པར་བྱ་བའི་ཕྱིར། ༼ཝ༽ །སྒྲོལ་མ་དམར་མོའི་ལོ་རྒྱུས་ཕན་ཡོན་ཡོད། །བསྟན་འཛིན་དགེ་འདུན་སྡེ་རྣམས་རྒྱས་པའི་ཕྱིར། ༼ཞ༽ །དགེ་འདུན་འདུ་ཆོག་འཕགས་ཚོགས་རྒྱ་མཚོ་ཡོད། །མཆོག་དང་ཐུན་མོང་དངོས་གྲུབ་ཀུན་འགྲུབ་ཕྱིར། ༼ཟ༽ །དངོས་གཞི་སྒྲུབ་པ་ཆེན་མོའི་ལོ་རྒྱུས་ཡོད། །ལོག་ལྟ་ཅན་རྣམས་ཆོས་ལ་འཛུད་
པའི་ཕྱིར། ༼འ༽ །མན་ངག་ཤིན་ཏུ་གསང་བ་གཅིག་བརྒྱུད་གབ། །འགུགས་དང་སྲུང་དང་ལོངས་སྤྱོད་འཕེལ་རྒྱས་སོགས། ༼ཡ༽ །ཙཀྲའི་སྒོ་ནས་མན་ངག་ལས་སྒྲུབ་གབ། །བསོད་ནམས་བསྐྱེད་ཅིང་ལོངས་སྤྱོད་རྒྱས་པའི་ཕྱིར། ༼ར༽ །ལས་ཚོགས་གསང་སྒྲུབ་དཔག་བསམ་ཤིང་སྒྲུབ་ཡོད། །འཇིག་རྟེན་མཁའ་འགྲོ་ལས་ལ་བསྐུལ་བའི་ཕྱིར། ༼ལ༽ །བཀའ་སྡོད་གནོད་སྦྱིན་ཕོ་མོའི་སྒྲུབ་པ་ཡོད། །སྟོབས་ཆེན་སྒྲུབ་བྱ་ཆོས་སྒོར་དབང་སྡུད་ཐབས། ཤ༽ །དབང་གི་སྦྱིན་སྲེག་ཞལ་གདམས་གུད་དུ་གབ། །དར་རས་ལྷ་མོའི་སྐུ་ལ་བསྟེན་པ་སོགས། ས༽ །ལས་ཚོགས་ཉེར་མཁོའི་སྐོར་ཚོགས་ཉུང་བསྡུས་ཡོད། །མི་ངན་ཨར་བས་ཆོམ་ཕྲོགས་བྱས་པ་ན། ༼ཧ༽ །གློ་བུར་ཐན་འགྱེད་དུག་མདའ་ནག་པོ་ཡོད། །ཉམ་ཆུང་ཆོས་པར་དོ་བསྡོ་ཕོད་བཙུགས་ན། ༼ཨ༽ །པཀིའི་གིང་ནག་ཁྲེས་པོའི་ཁ་སྲུང་ཡོད། །ཞིང་བཅུ་ཚང་བའི་བསྟན་དགྲས་དོ་བསྡོས་ན། ༼ཀཾ༽ །མ་མགོན་གཏོར་ནག་སྲོག་གི་པར་བུ་ཡོད། །སྒྲུབ་པ་མ་ཐོན་གསར་བུའི་རྐྱེན་ཟློག་ལ། ༼ཁཾ༽ །སྲུང་ཟློག་སེར་གར་ཕན་པའི་ཁྱི་ཚིལ་
ཡོད། །གློ་བུར་དགྲ་བྱུང་ཡོན་བདག་འདྲེས་བཏབ་ན། ༼གཾ༽ །ལ་བཙས་གཟའ་འགྱེད་དམ་པའི་ལྕགས་དྲྭ་ཡོད། །དད་ལྡན་སློབ་བུའི་ཉམས་རྟོགས་ཞུས་པའི་ལན།་་བཅ་ས་ག་རས་མཆན། ༼ངཾ༽ །གོ་བ་རྟོགས་པ་དབྱེ་གསལ་ངོ་སྤྲོད་ཡོད། །སྡོམ་གསུམ་བསྐྱེད་རྫོགས་སྒོམ་བཟླས་རྩེ་གཅིག་ཏུ། ༼ཅཾ༽ །ཚུལ་བཞིན་ཉམས་སུ་ལེན་ཚུལ་ཞལ་གདམས་ཡོད། །རི་ཆོས་དངོས་གཞི་རྒྱབ་ཆོས་འགྲུབ་པའི་སྐབས། །སྨོན་ལམ་ཕྱག་བྲིས་རང་དོན་བཅའ་ཡིག་ཡོད། །དེ་ལྟར་སྦས་ཆོས་ཚན་པ་སུམ་ཅུ་ལྔ། །འཁོར་བའི་ཆུ་བོ་སྒྲོལ་བའི་གྲུ་ཆེན་ཡིན། །མཆོག་ཐུན་དངོས་གྲུབ་ཀུན་འབྱུང་ནོར་བུ་ཡིན། །བར་ཆད་བགེགས་ཚོགས་སྲུང་བའི་གོ་ཁྲབ་ཡིན། །ཁམས་གསུམ་དབང་སྡུད་དོན་ཡོད་ཞགས་པ་ཡིན། །དགྲ་བགེགས་ཚར་གཅོད་རལ་གྲི་བསམ་གཅོད་ཡིན། །སེང་གེའི་གཡུ་རལ་ཁྱི་ལ་མི་མཛེས་ཏེ། །རིག་འཛིན་བརྒྱུད་པའི་སེང་ཕྲུག་རྣམས་ལ་དགོས། །དེ་ཕྱིར་རུ་པ་བརྩོན་འགྲུས་རྒྱ་མཚོར་གདམས། །གསང་སྔགས་བརྒྱུད་པ་བྱིན་རླབས་མི་ཉམས་ཤིང། །སྒྲུབ་བརྒྱུད་བསྟན་པ་མཛེས་པའི་རྒྱན་དུ་ཤོག །ཐེམ་ཡིག་མེད་པའི་ཐེམ་
ཡིག་འདི་རྣམས་ཀྱང་། ། ༧ རཱ་ག་ཨ་སྱས་ཇི་ལྟར་སྨྲས་པ་ལྟར། །བརྩོན་འགྲུས་རྒྱ་མཚོས་འཕྲལ་དུ་ཡི་གེར་བཀོད། །མངྒ་ལཾ།།