དཔེ་དང་དོན་གྱི་ཡེ་ཤེས་ངོ་སྤྲོད་ཕྱིར། ༼ག༽ །ཕྱག་ཆེན་ངོ་སྤྲོད་སངས་རྒྱས་ལག་གཏད་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། །དཔེའི་ཡེ་ཤེས་ཕྱག་རྒྱ་ཆེན་པོ་དང་། དོན་གྱི་ཡེ་ཤེས་ཕྱག་རྒྱ་ཆེན་པོ་མངོན་སུམ་དུ་རྟོགས་པའི་གདམ་པ་སངས་རྒྱས་ལག་གཏད་ཅེས་བྱ་བ་བཞུགས་སོ།། ༈ ན་མོ་གུ་རུ་བཛྲ་དྷ་ར་ཡེ། བླ་མ་རྡོ་རྗེ་འཆང་ལ་ཕྱག་འཚལ་ལོ། །དཔེ་དང་དོན་གྱི་ཡེ་ཤེས་ངོ་སྤྲོད་བྲི། །ཆོས་བདག་མཁའ་འགྲོ་སྡེ་ལྔས་བཀའ་གནང་སྩོལ། །འགྲོ་བའི་མགོན་པོ་ས་སྐྱ་པཎྜི་ཏེས། །བཀའ་བརྒྱུད་ལུགས་ཀྱི་ཕྱག་ཆེན་བཀག་པའི་སྐབས། །ངེད་ཀྱི་ཕྱག་རྒྱ་ཆེན་པོ་ནི། །དབང་ལས་བྱུང་བའི་ཡེ་ཤེས་དང་། །རིམ་པ་གཉིས་ཀྱི་ཏིང་འཛིན་ཡིན། །གསུངས་པའི་དོན་གྱི་དགོངས་པ་འདི་ཡིན་ཕྱིར། །དཔེ་ཡི་ཕྱག་ཆེན་ཡེ་ཤེས་མ་མཐོང་ན། །དོན་གྱི་ཕྱག་རྒྱ་ཆེན་པོ་རྟོགས་མི་སྲིད། །དཔེ་ཡི་ཕྱག་རྒྱ་ཆེན་པོ་རྟོགས་པའི་ཐབས། །བླ་མེད་རྒྱུད་སྡེ་རྣམས་ནས་གསུངས་པ་ལྟར། །ཤེས་རབ་ཡེ་ཤེས་དབང་ནི་བསྐུར་བའི་ཚེ། །བླ་མ་ཆགས་ལམ་ཉམས་ལེན་རྣལ་འབྱོར་པས། །སློབ་མ་འདུལ་
ཁྲིམས་མ་ཞུས་ཁྱིམ་པ་ལ། །ཡོལ་བས་བར་བཅད་བླ་མའི་མདུན་དེ་རུ། །སློབ་མ་མུ་དྲ་དངོས་སུ་སྦྱོར་བའི་ཚེ། །མགྲིན་པ་སྙིང་ག་ལྟེ་བ་གསང་བ་རུ། །ཐིག་ལེ་བབ་ཚེ་དགའ་བཞིའི་ཡེ་ཤེས་འཆར། །ཐིག་ལེ་ཕྱེད་ཤོར་ཕྱེད་ཙམ་མ་ཤོར་སྐབས། །རླུང་རྣམས་དབུ་མར་ཚུད་པས་རྣམ་རྟོག་འགགས། །དེ་དུས་དེ་ངོ་ལྟོས་ཞེས་ངོ་སྤྲོད་པས། །དཔེ་ཡི་ཡེ་ཤེས་ཕྱག་རྒྱ་ཆེན་པོ་རྟོགས། །དཔེར་ན་ཡེ་ཤེས་ཕྱག་རྒྱ་ཆེན་པོ་ལ། །དེ་ལྟ་བུ་ཞིག་ཡོད་སྙམ་ངེས་ཤེས་འགྱུར། །དེ་ནས་རིམ་བཞིན་དབང་ནི་བཞི་པའི་དོན། །ཚིག་གིས་ངོ་ཟློསྤྲོད་བརྩོན་འགྲུས་ཆེར་གོམས་ནས། །དོན་གྱི་ཕྱག་རྒྱ་ཆེན་པོ་རྟོགས་པར་གྱུར། །འདི་ནི་བླ་མེད་རྒྱུད་ཀུན་དགོངས་པ་མཐུན། །དགེ་སློང་ཡིན་ཡང་དབང་ནི་བསྐུར་བའི་ཚེ། །དགའ་བའི་ཡེ་ཤེས་ངོ་ནི་འཕྲོད་པའི་ཕྱིར། །ཕྱག་རྒྱ་བསྟེན་ཀྱང་སྡོམ་པ་མི་འཆོར་ཞེས། །སྨྲ་བ་ཨ་ཙར་དམར་པོའི་ཆོས་ལོག་ཡིན། །མི་རུང་དུས་འཁོར་རྒྱུད་ནས་བཀག་པའི་ཕྱིར། །ཇོ་བོ་རྗེ་ཡིས་རྒྱ་ཆེར་བཀག་པར་མཛད། །འོ་ན་དཔེ་ཡི་ཡེ་ཤེས་ཀྱིས་རྟོགས་ན། །མཁས་གྲུབ་འགས་མཛད་ཆོས་དྲུག་རྒྱས་བཤད་ལས། །མ་དག་གསེར་ཕུར་ལ་
སོགས་བརྡ་ཡིས་གསུང་། །དོན་དེ་བཙུན་ཆུང་མཛེས་ཤིང་གསང་ཐུབ་པར། །རྨ་གཉིས་གང་རུང་སྤྱོད་ཅིང་ཡེ་ཤེས་བཟུང་། །ཟེར་བ་འདུག་ཀྱང་འདི་ཉིད་མི་རུང་སྟེ། །འདུལ་ཁྲིམས་ཉིད་ལས་འགལ་ཚབས་ཆེ་ཕྱིར་རོ། །རྣལ་འབྱོར་གཟུགས་ངན་ཕྱག་རྒྱ་མི་རྙེད་པ། །དུད་འགྲོ་ཡིན་ཡང་ཕྱག་རྒྱ་བསྟེན་རུང་ཞེས། །འཇའ་ཚོན་སྙིང་པོའི་གཏེར་ཁ་ནས་བྱུང་བ། །ཀུ་ཀུ་རི་པའི་རྣམ་ཐར་གསལ་ན་ཡང་། །དེ་དག་རྣལ་འབྱོར་ཁྱིམ་པའི་ལུགས་སུ་སྣང་། །རབ་བྱུང་ཡིན་ན་སྡོམ་པ་འཆོར་ཕྱིར་སྤང་། །སློབ་བུ་འབྱོར་པར་ལྡན་ན་ཚོགས་འཁོར་བསྐོར། །མཎྜལ་བརྒྱ་རྩ་ཕྱག་དང་བསྐོར་བ་བྱ། །འབྱོར་པ་མེད་ན་ཕྱག་དང་མཎྜལ་ཆོག །ནམ་མཁའ་དྭངས་དུས་དབེན་པའི་གནས་གཅིག་ཏུ། །བླ་མའི་མདུན་དུ་སློབ་བུས་ཆོས་བདུན་བཅལ། །དངོས་སམ་ཡིད་ཀྱིས་གུས་པར་གསོལ་བ་བཏབ། །སློབ་བུས་རླུང་རོ་བུས་ལ་འཇམ་རླུང་བཟུང་། །སེམས་ནི་ཉམས་ལེན་ངང་ལ་བཞག་བཞིན་དུ། །ལག་པ་གཡས་གཡོན་གང་བདེ་གཅིག་གིས་ནི། །མགྲིན་པ་གཡས་གཡོན་འཕར་རྩ་གཉིས་པོ་དེ། །དང་པོ་དལ་བུས་དེ་ནས་དྲག་ཏུ་མནན། །ལན་རེ་ཙམ་
བརྒྱད་བྱས་ཤིང་རྩ་མནན་ཡུན་ཐུང་ན་ཤིན་ཏུ་ལེགས། རྩ་མནན་ཡུན་རིང་ན་མི་རུང་སྟེ་གེགས་དང་གོལ་ས་ཡོད་ཚུལ་ཞལ་ལས་ཤེས། མཆན། དེ་ཚེ་རྟོགས་པ་སྔར་དང་མི་འདྲ་བར། །རྣམ་རྟོག་མི་འགྱུ་གནས་ཉམས་མེ་རེ་བ། །དེ་ཡི་ངོ་བོ་རང་གི་མཐོང་བཞིན་དུ། །བཟང་ངན་རྟོགས་པ་ཅི་ཡང་མེད་པ་འཆར།་།དེ་ནི་དཔེ་ཡི་ཡེ་ཤེས་ཕྱག་ཆེན་ཡིན། །རིགས་ཀྱི་བུ་ཁྱོད་ད་ལྟའི་རྟོགས་པ་འདི། །རྣམ་རྟོག་ཅི་ཡང་མེད་ཅིང་མི་རྟོག་པ། །རང་ངོ་རང་གིས་ཤེས་ཀྱང་དྲན་བསམ་མེད། །འདི་ནི་དཔེ་ཡི་ཡེ་ཤེས་ཞེས་བྱ་བ། །མི་རྟོག་ཕྱག་རྒྱ་ཆེན་པོ་ཡིན་ནོ་ཀྱེ། །ཅེས་བརྗོད་དེ་ཉིད་རྟོགས་སམ་མ་རྟོགས་དྲིས། །མ་རྟོགས་ལན་འགའ་བསླབ་ཅིང་ལེན་འགའ་ཝིག །རོ་རྐྱང་གཉིས་པོའི་ཡར་སྣེ་སྣ་བུག་སྟེ། །དེ་ནས་རླུང་ནི་རྒྱུ་བ་དང་བསྒྲགས་ཏེ། །རྣམ་རྟོག་སྣ་ཚོགས་ཕྱིར་ལ་འགྱུ་བ་ཡིས། །སེམས་ནི་མི་འདྲ་རླུང་ནི་རྟ་དང་འདྲ། །སྐྱ་མི་རྟ་བཟུང་མི་དེ་འགྲོ་རྒྱུ་མེད། །དེ་བཞིན་རླུང་བཟུང་ནས་ནི་སེམས་ཟིན་ཏེ། །ནཱ་རོ་པཎྜི་ཏ་ཡི་བཞེད་པ་ཡིན། །རླུང་ནི་དབུ་མར་ཚུད་པའི་དུས་ཀྱི་ཚེ། །མི་རྟོག་ཡེ་ཤེས་ཕྱག་རྒྱ་ཆེན་པོ་དེ། །མངོན་སུམ་འཆར་བ་བླ་མེད་རྒྱུད་ཀུན་མཐུན། །རོ་རྐྱང་གཉིས་
ཀྱི་ཡར་སྣེ་རྩེའུ་ཆུང་གཉིས། །མནན་པས་རླུང་ནི་ཕྱི་རུ་རྒྱུ་བ་ཆད། །ནང་དུ་རྒྱུ་བས་དབུ་མར་ཡུད་ཙམ་ཞུགས། །དེ་ཚེ་མི་རྟོག་ཡེ་ཤེས་དངོས་སུ་འཆར། །མངོན་སུམ་ངོ་སྤྲོད་འདི་ཉིད་མ་ཐོབ་ན། །ཤེས་རབ་ཡེ་ཤེས་དབང་བསྐུར་ཐོབ་ན་ཡང་། །དབང་དོན་ཡེ་ཤེས་རྒྱུད་ལ་མི་སྐྱེ་བས། །ཚིག་རྒྱུད་ཙམ་ཡིན་དོན་ལ་ཐོབ་པ་མིན། །འདི་ནི་ད་ལྟ་ངོ་སྤྲོད་དུས་དང་ནི། །སྐབས་སུ་ལན་རེ་ཙམ་ལས་འགལ་བ་མེད། །མང་ན་སྐེ་ནད་འབྱུང་ཕྱིར་མང་མི་བྱ། །དེ་ཡང་རན་ཙམ་ཡུད་ཙམ་བྱ་བ་ལས། །དྲག་མནན་ཡུན་རིང་བརྒྱལ་ནས་འགྲོ་ཉན་ཡོད། །སྣོད་ལྡན་སློབ་མར་ངོ་སྤྲོད་མ་གཏོགས་པ། །གཞན་ལ་སྨྲས་ན་ཐུགས་ཀྱི་དམ་ཚིག་ཉམས། །ལས་ཀྱི་མཁའ་འགྲོས་སྙིང་ཁྲག་འཐུང་བར་བཤད། །དེ་ཕྱིར་ཤིན་ཏུ་གསང་བ་དམ་ཚིག་ཡིན། །ཨྠ྄ྀི། དེ་ནས་དོན་གྱི་ཡེ་ཤེས་ངོ་སྤྲོད་ནི། །རྩེ་གཅིག་རྟགས་ཐོན་ཉམས་ལེན་ཡུན་རིང་བསྐྱང་། །བོགས་སྐྱེད་ཆུང་བས་ངོ་བོ་མ་མཐོང་དང་། །བདེ་གསལ་མི་རྟོག་ཉམས་ནི་བཟང་དྲགས་པས། །དེ་ལ་ཆགས་ཞེན་གཞན་ལ་དག་མི་སྟེར། །ངོ་བོ་རྗེན་པར་མཐོང་བར་མ་གྱུར་ན། །ཐ་མལ་
ཤེས་པ་མངོན་སུམ་མཐོང་བ་དང་། །མི་རྟོག་གདིང་པོ་སྟོང་ཉམས་ཧད་པོ་རྣམས། །གང་ཡིན་མི་འབྱེད་ཚོད་མ་ཟིན་པ་དང་། །རིག་པ་རྣོ་ཞིང་ཤེས་རབ་ཆེ་བ་འགས། །ཉམས་རྟོགས་མཐོ་དམན་གོལ་ས་མང་བཤད་པས། །གོལ་སར་མ་ཤོར་འཁྲུལ་མེད་སླད་མེད་ཀྱི། །ཕྱག་རྒྱ་ཆེན་པོའི་ཡེ་ཤེས་དངོས་དེ་ལ། །ཅི་འདྲ་ཞིག་ནི་ཡོད་སྙམ་ལྟ་འདོད་ན། །ཕྱག་དང་མཎྜལ་ཕུལ་ནས་བླ་མའི་དྲུང་། །རྣམ་སྣང་ཆོས་བདུན་མ་གཡོ་ལེགས་པར་བཅའ། །མགྲིན་པ་ཅུང་བཀུག་མིག་འབྲས་གྱེན་དུ་ལྡོག །མཛོད་སྤུའི་ཐད་ཀྱི་བར་སྣང་སྟོང་པ་ལ། །རིག་པ་གཏད་ལ་ངོ་བོ་སྐྱོང་བར་གྱིས། །དེ་ཚེ་རྣམ་རྟོག་རགས་པ་ཐམས་ཅད་འགག །བདེ་དང་གསལ་དང་སྟོང་པའི་འཛིན་པ་མེད། །རང་ངོ་ཤེས་པའི་ངང་ལ་ཧད་དེ་བ། །འདི་བསམ་མེད་པར་དྲན་པ་གཏོར་བ་བཞིན། །དོན་གྱི་ཡེ་ཤེས་ཕྱག་རྒྱ་ཆེན་པོ་དེ། །འདི་ཉིད་ཡིན་ནོ་སྐལ་ལྡན་རིགས་ཀྱི་བུ། །འདི་དོན་ཀྱི་རྡོ་རྗེའི་རྒྱུད་ནས་གསུངས། །ཆོས་ཀྱི་ཚད་ནི་འདི་ཡིན་ཏེ། །མིག་ཕྱེད་གྱེན་དུ་ལྡོག་པས་འགྲུབ། །ཅེས་པའི་དོན་ཡང་དེ་ལ་དགོངས་པ་ཡིན། །དེ་དོན་རྫོགས་ཆེན་རྣམས་ནས་གསུངས་པའི་
དོན། །རྒྱུད་སྡེ་འོག་མ་ཀུན་ལས་གྲགས་ཡི། །ཡེ་ཤེས་རྩྭ་མཆོག་བྷ་སནྟུ་ཞེས་པ། །དབྱིབས་ནི་གཡེར་མ་ཁ་ཕྱེ་ལྟ་བུ་ཞིག །ལུས་ཅན་རྣམས་ཀྱི་སྙིང་གི་དཀྱིལ་དུ་ཡོད། །དུད་འགྲོ་ཐུར་དུ་ཁ་བསྟན་གཏི་མུག་ཆེ། །མི་ལ་ཕྲད་དུ་ཁ་བྱེ་ཤེས་རིག་བཀྲ། །སངས་རྒྱས་བྱང་སེམས་རྣམས་ཀྱི་རྩ་དེ་ནི། །གྱེན་དུ་ཁ་བྱེ་ཡེ་ཤེས་འཆར་བ་ཡིན། །རྩ་དེ་སྣེ་མོ་མིག་ལ་ཟུག་ཡོད་པ། །ལུས་གནད་བསྲང་སྟེ་མིག་ནི་གྱེན་ལྡོག་པས། །རྩ་དེ་འཐེན་ནས་གྱེན་དུ་ཁ་བྱེ་འགྱུར། །དེ་ཚེ་ཡེ་ཤེས་དངོས་སུ་འཆར་བ་ཡིན། །དེ་ཕྱིར་སངས་རྒྱས་བྱང་སེམས་ཐམས་ཅད་ཀྱི། །སྤྱན་འབྲས་གྱེན་དུ་ལྡོག་པ་དེ་ཡི་དོན། །དེ་ཕྱིར་སློབ་དཔོན་པདྨ་འབྱུང་གནས་ཀྱི། །རང་བྱུང་རྒྱལ་བ་ལུང་བསྟན་སྐབས་སུ་ཡང་། །སྤྱན་ནི་ཆོས་ཉིད་དོན་ལ་གཟིགས་ཞེས་གསུངས། །ངོ་བོ་རྗེན་པར་མ་མཐོང་གང་ཟག་གིས། །ཕྱག་རྒྱ་ཆེན་པོའི་ཡེ་ཤེས་འཆར་འདོད་ན། །དབེན་པའི་གནས་སུ་དེ་ལྟར་ཡང་ཡང་བལྟ། །ཉམས་དང་རྟོགས་པ་གང་ཡིན་མ་འབྱེད་ན། །དེ་ལྟར་བལྟས་ལ་དེ་ལ་ཨེ་མཚུངས་ལྟ། །མཚུངས་ན་རྟོགས་པ་དངོས་དེ་ཡིན་པའི་རྟགས། །དེ་དང་མི་
མཚུངས་ཇི་ལྟར་བཟང་ན་ཡང་། །རྟོགས་པ་མ་ཐོབ་ཉམས་ཀྱི་གཡོས་ཡིན་ནོ། །དེ་ནས་སློབ་མས་མཎྜལ་ཕུལ་བྱས་ལ། །སྣོད་ལྡན་ངོ་སྤྲོད་བསྟན་དུས་མ་རྟོགས་པ། །གཞན་ལ་བཤད་ན་གསང་བའི་དམ་ཚིག་ཉམས། །མཚམས་མེད་ལྔ་མཚུངས་མཁའ་འགྲོའི་བཀའ་ཆད་འབྱུང་། །ཡེ་ཤེས་ཕྱག་ཆེན་དངོས་སུ་རྟོགས་པའི་ཐབས། །གདམས་ངག་ཟབ་མོ་འདི་དང་མ་ལྡན་ན། །སྨྲ་བསམ་བརྗོད་དུ་མེད་པའི་ཡེ་ཤེས་དེ། །ཇི་བཞིན་བླ་མས་བརྗོད་དུ་ཡོད་པ་མིན། །སློབ་མས་གོ་ཡང་དངོས་སུ་མི་རྟོགས་སོ། །ཡེ་ཤེས་དངོས་སུ་ངོ་སྤྱོད་ཟབ་མོ་རྒྱ། །དེ་བཞིན་རྫོགས་ཆེན་ཐོད་རྒལ་སྐབས་སུ་ཡང་། །འཇའ་འོད་ཐིག་ལེར་ཆགས་ཞེན་མི་སྐྱེད་པར། །ངོ་བོ་བལྟས་པས་གསལ་སྟོང་ཟུང་དུ་འཇུག །ཁྲེགས་ཆོད་ཟུང་འཇུག་ཐེག་པ་དགུ་ཡི་རྩེ། །དེ་ལས་ཟབ་པའི་ཉམས་ལེན་གདམས་ངག་ནི། །གསར་རྙིང་བཀའ་གཏེར་བན་བོན་གང་ལའང་མེད། །དེ་ཕྱིར་སྙིང་ལ་ཆོངས་ཤིག་རིགས་ཀྱི་བུ། །དེ་སྐད་སྒོམ་ཆེན་རཱ་ག་ཨ་སྱ་ཡིས། །སློབ་བུ་བརྩོན་འགྲུས་རྒྱ་མཚོར་གདམས་པ་དེ། །འཕྲལ་དུ་ཡི་གེར་བཀོད་པའི་དུས་ཚོད་ནི། །རྟ་ལོ་ཐ་སྐར་ཟླ་བའི་ཚེས་གཅིག་
ཉིན། །དཔལ་རིའི་རྩེ་ཡི་མཚམས་ཁང་ཕུག་སྒོ་རུ། །དད་ལྡན་བླ་མ་བིརླ་སཱ་ག་རས། །ཕྱག་དང་མཎྜལ་བརྒྱ་རྩ་ཕུལ་ནས་བྲིས། །མངྒ་ལཾ།། །།