དགའ་བཞི་ཡེ་ཤེས་དངོས་སུ་ངོ་སྤྲོད་ཕྱིར། ༼ང༽ །གདམས་ངག་ཡེ་ཤེས་མཁའ་འགྲོའི་གསང་ཚིག་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། དགའ་བཞི་ཡེ་ཤེས་དངོས་སུ་ངོ་སྤྲོད་པའི་ཐབས་ཤེས་རབ་ཡེ་ཤེས་ཀྱི་ཉམས་ལེན། དངོས་གཞི་ཡེ་ཤེས་མཁའ་འགྲོའི་ཉམས་ལེན་གསང་ཚིག་ཅེས་བྱ་བ་བཞུགས་སོ། །ན་མོ་གུ་རུ་ཛྙཱ་ན་ཌཀྐི་ཡེ། གནས་གསུམ་ཌཱཀྐིའི་ཞབས་ལ་ཕྱག་འཚལ་ལོ། །དགོངས་པ་གྲོལ་ཞིང་བྱིན་གྱིས་བརླབ་ཏུ་གསོལ། །འཁོར་བའི་གནས་སུ་སྐྱེ་བ་རྣམ་བཞི་རུ། །སྐྱེ་བའི་རྩ་བ་འདོད་ཆགས་ཁོ་ན་སྟེ། །དེ་མེད་འཁོར་བར་མི་སྐྱེ་མྱ་ངན་འདས། །རྟ་དང་རྒོད་དང་ལག་བཅང་གཉིས་གཉིས་འཁྱུད། །འདོད་པའི་འདོད་ཆགས་བཞི་པོ་འདུལ་བའི་ཕྱིར། །སྟོན་པས་རྒྱུད་སྡེ་རྣམ་བཞི་གསུངས་པ་ཡིན། །སྐྱེ་བོ་ཕལ་པས་མི་ཚངས་སྤྱོད་པ་ནི། །མི་དགེ་བཅུ་ཡི་གཅིག་ཡིན་ཡི་དྭགས་རྒྱུ། །དེ་ཡང་བཙུན་མ་མ་སྲིང་སྤྱོད་པ་དང་། །ཁ་དང་བཤང་ལམ་དུད་འགྲོ་སྤྱོད་པ་དང་། །གཞན་གྱི་བུད་མེད་སྤྱོད་པ་སྡིག་ཆེ་
གསུངས། །རབ་བྱུང་གིས་སྤྱོད་དེ་བས་འབུམ་འགྱུར་ལྗི། །དག་བདེན་བཞི་ཆོས་ཀྱི་འཁོར་ལོའི་དོན། །རབ་དུ་བྱུང་བས་བུད་མེད་སྤྱོད་པ་ནི། །སྡོམ་པ་འཆོར་བས་དགེ་འདུན་གྲལ་མི་ཚུད། །དེ་ནི་འདུལ་ཁྲིམས་སྡོམ་པའི་རྩ་བ་ཡིན། །རབ་བྱུང་ཁྱེའུ་ཁ་དང་བཤང་ལམ་སྤྱོད། །རྟེན་ནི་བུད་མེད་མིན་ཕྱིར་ཅུང་དྲགས་ཀྱང་། །བུད་མེད་ལ་སྤྱོད་པ་དང་འདྲ་བ་ཡིན། །མཆན། །ཉེས་པ་དག་ནི་ཡང་ལྗི་འདྲ་བ་ཡིན། །ཅི་ཕྱིར་རྨ་གསུམ་ཁྱད་པར་མེད་ཕྱིར་རོ། །ཚུལ་ཁྲིམས་ལྡན་པས་ཡིད་ལ་བུད་མེད་བསྒོམས། །ཆགས་པ་སྐྱེས་ཤིང་ཐིག་ལེ་ཉམས་པ་ཡང་། །ཚུལ་ཁྲིམས་གཙང་བར་མི་འགྱུར་སྡིག་ཆེ་ཞེས། །འཁྲིག་པ་བདུན་པོའི་མདོ་ལས་རྒྱ་ཆེར་བཤད། །ཁུ་བ་རང་གི་འབྱིན་ནམ་འབྱིན་བཅུག་པ། །དེ་ཡི་སྡོམ་པ་འཆོར་བ་མི་འགྱུར་ཏེ། །དགེ་འདུན་ལྷག་མའི་ལྟུང་བ་ཤིན་ཏུ་ལྡི། །གསོ་སྦྱོང་གིས་ཀྱང་དག་པར་མི་འགྱུར་ཏེ། །ལྟུང་བ་འཕེལ་བར་མི་འགྱུར་ཙམ་ཞིག་ནུས། །དེ་དག་མདོ་དང་འདུལ་བའི་དགོངས་པ་སྟེ། །ཐབས་ཀྱིས་མ་ཟིན་འདོད་ཆགས་རིང་ཁ་ལ། །རྣལ་འབྱོར་མཁའ་སྤྱོད་དབང་པོའི་ཞལ་ནས་ཀྱང་། །ཐབས་ཀྱིས་ཟིན་ན་དུག་ཀྱང་བདུད་རྩི་
མཆོག །དཔལ་ལྡན་ཀྱེ་ཡི་རྡོ་རྗེའི་རྒྱུད་ལས་ཀྱང་། །འདོད་ཆགས་ཉིད་ཀྱིས་འདོད་ཆགས་འཇོམས་པར་བཤད། །དེ་ལ་གང་ཟག་ས་ལམ་མཐོ་དམན་ཁྱད། །རྩ་རླུང་ལས་རུང་ས་ཐོབ་ཡན་ཆད་ཀྱིས། །བུད་མེད་བསྟེན་ཀྱང་སྡོམ་པ་འཆོར་བ་མིན། །དཔེར་ན་རྒྱ་བོད་མཁས་གྲུབ་ཐམས་ཅད་བཞིན། །བསྟན་ལ་མི་གནོད་རྫུ་འཕྲུལ་སྣ་ཚོགས་སྟོན། །རྫུ་འཕྲུལ་སྣ་ཚོགས་སྟོན་པར་མི་ནུས་ན། །རྩ་རླུང་ལས་སུ་རུང་ཀྱང་བསྟེན་མི་རུང་། །སངས་རྒྱས་བསྟན་ལ་གནོད་ལས་སྡིག་ཆེ་གང་། །བཙུན་པ་ཕན་ཚུན་ཁུ་བ་འབྱིན་པ་ནི། །དེང་སང་ཆོས་སྡེ་ཀུན་ལ་དར་ཆེ་ཞིང་། །སྡོམ་པ་ཤོར་བའི་གྲ་རུ་མི་འགྲོ་ཞིང་། །དམྱལ་བའི་སྡུག་བསྔལ་དཔག་མེད་མྱོང་གྱུར་པས། །བསླབ་པ་ཀུན་ལས་བཏུས་པ་རྒྱ་ཆེར་བཤད། །ཁྱེའུ་ལ་ནི་བུད་མེད་ཡིན་ལྟ་བ། །འདི་ནི་འདོད་ཆགས་ལོག་ལྟ་གཉིས་ཀ་སྟེ། །མཚམས་མེད་ལྔ་ལས་སྡིག་པ་ལྗི་བའི་ཚུལ། །མཉན་པས་བཞེད་ལྟར་མི་བསྐྱོད་རྒྱལ་བས་གསུངས། །དེ་མཐོང་ཐུགས་སྐྱོ་སྙིང་རྗེས་མ་བཟོད་ནས། །ཉིན་མཚན་མེད་པར་བཤུམ་གསུངས་འདུལ་ཊཱིཀ་གསལ། །དཔལ་ལྡན་དུས་ཀྱི་འཁོར་
ལོའི་རྒྱུད་ལས་ཀྱང་། །ཐིག་ལེ་ལན་གཅིག་ཉམས་ན་སྐྱེ་བ་དེར། །མཆོག་གི་དངོས་གྲུབ་ཐོབ་པར་མི་འགྱུར་གསུངས། །རང་བྱུང་རྡོ་རྗེའི་དམ་ཚིག་རྒྱ་མཚོ་ལས། །བྱང་ཆུབ་ལྟསེམས་དཔའི་རྩ་ལྟུང་འདི་ཡིན་གསུངས། །ས་སྐྱ་པ་ཡིས་མིན་པར་བཞེད་ན་ཡང་། །རྩ་རླུང་ཉམས་སུ་ལེན་པའི་གང་ཟག་གིས། །རྩ་ལྟུང་ཡིན་པར་ཐམས་ཅད་ཞལ་མཐུན་ནོ། །ཁྱད་པར་སྒོམ་ཆེན་རྣམས་ཀྱིས་འདི་བྱས་ན། ་ཉོན་མོངས་མགོ་བོ་གཏན་ནས་མ་ནོན་རྟགས། །མཚང་དང་ངོ་ཚ་དེ་ལས་ཆེ་བ་མེད། །ཁྱད་པར་བླ་མ་ཡིན་པས་འདི་སྤྱོད་སྨྱོན། །གྲྭ་སློབ་མགོ་མི་ནོན་ཞིང་འཁྲུག་པའི་རྒྱུ། །བླ་མ་བླ་མར་མི་མཐོང་བཟའ་ཚང་མཐོང་། །དད་གུས་མི་སྐྱེ་འཁོར་སློབ་གྲོལ་མི་ནུས། །བྱིན་རླབས་བརྒྱུད་པ་ཆད་པའི་གེགས་ཆེན་ཡིན། །དེ་ཕྱིར་བུད་མེད་བསྟེན་པ་ལྟ་ཅི་སྨོས། །ཉེ་གནས་ལ་སོགས་གྲྭ་འཁོར་སུ་མཛེས་ཀྱང་། །དེ་ལ་མི་སྤྱོད་དམ་བཅའ་དྲག་པོ་བཟུང་། །འདོད་པའི་ཁམས་འདིར་འདོད་ཆགས་ཤུགས་ཆེ་བས། །ཉེས་ལྟུང་དྲན་དང་མི་སྡུག་བསྒོམ་པ་དང་། །ངོ་བོ་བལྟས་པས་ཞི་བར་མ་ནུས་ན། །རི་ཆོས་གཞུང་ཆེན་ནང་གི་དུག་འཇོམས་རྨ་བྱ་ཆེན་མོ་ལྟར་ཉམས་སུ་ལེན་
ཅིང་། ཁྱད་པར་དུག་ལྔའི་རྟོགས་པ་ནམ་ཤར་བའི་ཚེ་རང་སེམས་ངོ་བོ་སྐྱོང་བ་ལ་ནན་ཏན་བྱ། དུག་ལྔ་སེམས་ཀྱི་ཆོ་འཕྲུལ་ཡིན་པས་དེ་དུས་དུག་ལྔ་རང་སར་ཞི་བར་ཐེ་ཚོམ་མེད་དོ། །དེས་ཀྱང་ཉོན་མོངས་མ་ཞི་ན་སྣོད་ལྡན་གྱི་སློབ་མ་ལ་འདིའི་མན་ངག་འདི་བསླབ་པ་ཤིན་ཏུ་ཟབ་པ་ཡིན་ཞེས་གསུངས་པས་སྣོད་མིན་ལ་དཔེ་འདི་གར་ཐོད་ཐོད་དུ་མི་བསྟན་པ་དམ་ཚིག་ཤིན་ཏུ་གནད་ཆེའོ། མཆན། །དེ་ནས་འདོད་ཆགས་མ་སྤངས་ལམ་ཁྱེར་ནི། །ཚུལ་ཁྲིམས་མི་འཆལ་གཏན་ལ་མི་གནོད་ཅིང་། །ཉེས་ལྟུང་མི་འབྱུང་ཉམས་རྟོགས་བོགས་འདོན་ཐབས། །རང་ལུས་ཐབས་ལྡན་གདམས་ངག་ཉམས་སུ་ལེན། །མདོ་ལས་བུད་མེད་ཡིད་ལ་དྲན་པ་ཡི། །ཉེས་པ་བཤད་ཀྱང་འདི་གཉིས་མི་གཅིག་སྟེ། །ལྷ་རུ་གསལ་དང་སྔགས་ཀྱི་སྤྱོད་པ་དང་། །ཉམས་རྟོགས་བོགས་འདོན་གསུམ་གྱི་ཁྱད་པར་འཕགས། །འདི་ཉིད་གང་ལས་གསུངས་པ་ཡིན་ཞེ་ན། །གསང་བ་ནོར་བུ་ཐིག་ལེའི་རྒྱུད་ཅེས་པ། །འདི་ཉིད་ཁོ་ན་སྟོན་པ་གསེར་འོད་ཙམ། །ས་པཎ་གྱིས་བསྒྱུར་རྒྱུད་འབུམ་ཀུན་ན་ཡོད། །ཞི་ཁྲོའི་འོག་སྒོ་བདེ་ཆེན་རང་གྲོལ་དང་། །རཏྣའི་གཏེར་ཁ་ཟབ་ལམ་གསང་འདུས་དང་། །དབང་ནི་གསུམ་པའི་ཉམས་ལེན་ཞེས་བྱ་དང་། །པཎ་ཆེན་དྷ་ན་
ཤྲཱིའི་རྒྱ་གཞུང་ལས། །དོན་འདི་ཤིན་ཏུ་གསལ་བར་རྒྱ་ཆེར་བཤད། །དོན་ལ་གསང་སྔགས་དབང་བཞི་ཐོབ་ཕྱི་ནས། །ཤེས་རབ་ཡེ་ཤེས་དབང་དོན་བསྒོམ་རྒྱུ་ཡིན། །རྩ་བའི་ཉམས་ལེན་འདི་ཉིད་ཁོ་ན་ཡིན། །ཞག་རེ་ཆག་ན་དམ་ཚིག་ཉམས་པའི་ཕྱིར། །ཡི་དམ་ཞལ་སྦྱོར་བསྒོམ་པ་དེ་ཡི་གནད། །ལུས་དང་རྩ་ཡི་སྟོང་ར་བསྒོམ་པ་དང་། རི་ཆོས་གཞུང་ཆེན་ནང་གི་ཡང་གསང་སྒྲུབ་བདེ་ཆེན་རབ་འབར་ལས་བྱུང་བ་ལྟར་ཡིན་གསུངས། མཆན། རླུང་ལ་ཅུང་ཞིག་བྱང་བ་གལ་ཆེ་སྟེ། །དེ་མིན་ནད་དུ་འགྱུར་བའི་ཉེས་ཡོད་གསུངས། །འདི་ལ་དབང་པོ་རབ་དང་ཐ་མའི་ལུགས། །རབ་ལ་རང་ཉིད་ཡི་དམ་ཡབ་དང་ཡུམ། །ཞལ་སྦྱོར་བསྒོམ་པ་སོ་སོའི་མངོན་རྟོགས་བཞིན། །ཡབ་ཀྱི་གསང་བར་ཧཱུྃ་ལས་རྡོ་རྗེ་ནི། །རྩེ་ལྔ་བུ་ག་ཧཱུཾ་གིས་བཀག་པར་བསྒོམ། །ཡུམ་གྱི་གསང་བར་ཨཱལས་པདྨ་ནི། །དམར་པོ་འདབ་བཞི་བུ་ག་ཕཊ་ཀྱིས་བཀག །རྡོ་རྗེས་པདྨ་དྲག་ཏུ་དཀྲུགས་པ་ཡིས། །ཆགས་པའི་མེ་ཡིས་སྤྱི་བོར་ཧཾ་ཡིག་ཞུ། །དབུ་མའི་ལམ་ནས་སྤྱི་མགྲིན་རྩ་གནས་གང་། །ལུས་སེམས་ཡིད་ཙམ་དགའ་བའི་ཆགས་པ་སྐྱེས། །ངོས་མ་ཟིན་ན་འདོད་ཆགས་སྐྱེས་པ་སྟེ། །དེ་ཡི་ངོ་བོར་
བལྟས་པས་སྟོང་པར་རྟོགས། །དེ་ནི་དགའ་བའི་ཡེ་ཤེས་ངོས་བཟུང་ངོ་། །དེ་ནས་རྡོ་རྗེས་པདྨ་དྲག་དཀྲུགས་པས། །བྱང་སེམས་མར་བབ་སྙིང་ཁའི་རྩ་འདབ་གང་། །ལུས་སེམས་དགའ་བདེ་མེར་གྱིས་གང་སྙམ་བྱེད། །ངོས་མ་ཟིན་ན་འདོད་ཆགས་ཆེར་གཡོས་ཡིན། །དེ་ཡི་ངོ་བོ་ལྟས་པས་སྟོང་པར་རྟོགས། །བདེ་སྟོང་དབྱེར་མེད་མཆོག་དགའི་ཡེ་ཤེས་ཡིན། །དེ་ནས་སྲུབ་དང་སྲུབ་པའི་སྦྱོར་བ་ཡིས། །བྱང་སེམས་ལྟེ་བའི་རྩ་འདབ་གང་བ་ཡི། །ཆགས་པ་ཆེར་སྐྱེས་རྣམ་རྟོག་རགས་པ་འགག །དགའ་རྒྱུདང་མི་དགའི་འཛིན་པར་སྟོར་སྙམ་བྱེད། །ངོས་མ་ཟིན་ན་འདོད་ཆགས་ཆེན་པོ་སྟེ། །ངོ་བོ་བལྟས་པས་བདེ་སྟོང་གཅིག་ཏུ་འདྲེས། །དེ་ནི་དགའ་བྲལ་དགའ་བའི་ཡེ་ཤེས་ཟེར། །དེ་ནས་སྤྱོད་པས་ཐིག་ལེ་མར་བབས་པས། །དགའ་བདེ་ཚད་མེད་བཟོད་བླག་མེད་པ་འབྱུང་། །ངོ་བོར་བལྟས་པས་བདེ་སྟོང་ཟུང་དུ་འཇུག །དེ་ནི་ལྷན་ཅིག་སྐྱེས་དགའི་ཡེ་ཤེས་སོ། །འདི་སྐབས་མེ་ཏྲི་པ་ཡིས་བཞེད་པ་ལས། །ཐིག་ལེ་ཕྱེད་ཤོར་ཕྱེད་ནི་ནང་གནས་སྐབས། །དེ་ཚེ་སྐད་ཅིག་སེ་གོལ་ཡུན་ཙམ་ལ། །ལྷན་ཅིག་སྐྱེས་དགའི་ཡེ་
ཤེས་འཆར་བར་བཤད། །ཐིག་ལེ་ཕྱེད་དེ་ཉམས་ན་མི་རུང་བས། །མུ་སྟེགས་ལུགས་དང་མཚུངས་ཞེས་བཀག་པའང་ཡོད། །ནཱ་རོའི་ལུགས་ལ་རྡོ་རྗེའི་སྐེད་པ་རུ། །ཐིག་ལེ་བབ་ཚེ་ཡེ་ཤེས་འཆར་བར་བཞེད། །ཞི་ཁྲོའི་འོག་སྒོ་བདེ་ཆེན་རང་གྲོལ་ལས། །རྡོ་རྗེའི་རྩེ་ནས་ཐིག་ལེ་ལྡོག་དགོས་གསུངས། །དེ་ཡང་གོམས་ཆ་ཆེ་བའི་དབང་ཡིན་གྱིས། དང་པོ་ལྟེ་བ་ཙམ་ནས་མ་ལྡོག་ན། །མར་ལ་ཉེ་ན་ཐིག་ལེ་འཆོར་ཉེན་ཡོད། །སྐྱེས་པ་རྣམས་ནི་བུད་མེད་ལ་དགའ་བ། །དེ་ལ་དགའ་ནས་བདེ་བ་སྤྱོད་ཕྱིར་མིན། །དེ་ནི་ལོག་པར་ལྟ་བ་ཡིན་པ་སྟེ། །དེ་དོན་བྱམས་པས་ཐིག་ཆེན་རྒྱུད་བླ་མར། །ཁྱིས་ནི་རུས་པ་སྐམ་པོ་ཁར་བཅུག་ནས། །རང་གི་ཁྲག་ལ་དེ་རུ་མངོན་པར་ཞེན། །དེ་བསྲུང་གཞན་ལ་མངོན་པར་ལྡང་བ་ལྟར། །འཇིག་རྟེན་ལོག་པར་སྤྱོད་པའང་དེ་དང་མཚུངས། །གསུང་ཕྱིར་ཁྱེའུ་བུད་མེད་གཟུགས་མཛེས་པར། །དེ་ལ་སྤྱོད་པས་བདེ་བ་སྐྱེས་པ་དེ། །ལུས་ལ་བདེ་བ་བྱུང་བ་མིན། །ཁྱི་ཡི་ཀན་ནི་རུས་པས་གཤག་པ་ཡི། །ཁྲག་ནི་ཞིམ་པར་རུས་པར་མུར་སྙམ་མཚུངས། །རང་གི་དབུ་མའི་མར་སྣེ་དུང་ཅན་རྩ། །དེ་ཡི་སྣེ་མོ་རྡོ་
རྗེར་ཟུག་པ་སྟེ། །དེ་ལ་བཤུད་ཅིང་དྲུད་པས་ཐིག་ལེ་བབ། །ཐིག་ལེ་བབ་པས་བདེ་བ་སྐྱེས་པ་ཡིན། །བདེ་སྟོང་ངོས་མ་ཟིན་ན་འདོད་ཆགས་ཏེ། །ངོ་བོ་བལྟས་པས་བདེ་སྟོང་གཅིག་འདྲེས་པ། །སྔགས་ནས་གསུངས་པའི་ཕྱག་རྒྱ་ཆེན་པོ་ཡིན། །བདེ་བ་མེད་པའི་སྟོང་པ་ཁ་རྐྱང་ནི། མདོ་ནས་བཤད་པའི་དབུ་མའི་ལྟ་བ་སྟེ། །སྔགས་ཀྱི་ཕྱག་ཆེན་མིན་པར་ས་པཎ་བཞེད། །ལུས་ཟུང་རྒྱས་དང་ན་སོ་གཞོན་པ་དང་། །དམིགས་པ་གསལ་ཞིང་ཆགས་པ་་་་དབང་པོ་ཐ་མ་ཆགས་པ་ཆེ་བའི་རིགས། མཆན། ཆེ་བའི་རིགས། །དམིགས་པ་ཁོ་ནས་ཐིག་ལེ་འབེབས་པར་ནུས། །ཐིག་ལེ་ཕེབས་ན་བདེ་བ་མི་སྐྱེ་མེད། །དེ་ཡིས་མི་ཕེབ་དྲང་སྲོང་འདུག་སྟངས་བྱ། །པུས་མོ་གཉིས་ལ་ལག་པས་དམ་དུ་འཁྱུད། །ལོང་བུའི་བར་དུ་བཛྲ་བཀྲོལ་བས་འབེབས། །ལུས་རྒུད་ཆགས་པ་ཆུང་བའི་གང་ཟག་ལ། །ཧ་ཏའི་སྙིང་ལག་ཌཀྐིའི་ལྔ་རུ་བསྐྱེད། །བཛྲ་ཤིནྟཾཉུག་ཅིང་བསོར་བས་འབེབ། །རྗེ་བཙུན་མི་ལ་རས་པའི་ཞལ་ནས་ཀྱང་། །འབེབས་པ་རུ་སྦལ་འགྲོས་ཀྱིས་འབེབས་གསུངས་པས། །རིམ་པར་རྩ་གནས་ཡེ་ཤེས་ངོས་ཟིན་བྱ། །བྱང་སེམས་གནས་
བཞིར་འབབ་ཚེ་དགའ་བཞི། མཆན། །བཛྲ་རྩར་སླེབ་སྐད་ཅིག་ཉིད་ལ་ལྡོག །འཆོར་དོགས་ཆུ་སྲིན་གྲེ་འགག་འཁྲུལ་འཁོར་ནི། །གསང་བཤང་བར་ནས་ཐིག་ལེ་རྒྱུ་བའི་རྩ། །མཛུག་མོས་དྲག་མནན་ཐེམ་བུས་བཀག་དང་མཚུངས། །སྲིན་ཞལ་ལྷོད་ཅིང་གྱད་བཞི་དྲག་ཏུ་བསྐུལ། །འོག་རླུང་གྱེན་འདྲེན་ལྟོ་བ་སྒལ་པར་སྦྱར། །འོག་སྒོ་གཉིས་ཀྱང་ཤུགས་ཀྱིས་བསྡམས་བྱས་ཏེ། །ལྕེ་ནི་ཡ་སྐན་ལ་སྦྱར་མིག་གྱེན་ལྡོག །རླུང་ནི་ཁོག་པའི་ནང་ནས་གྱེན་འདྲེན་ཕྱིར། །ཧཱུཾ་རིང་ཧི༔རིང་ཧཱུྃརིང་དྲག་ཏུ་སྦྱང་། །རིག་པ་ནམ་མཁའི་དབྱིངས་སུ་གཏད་བྱ་ཞིང་། །དམིགས་པ་གསང་བའི་རྩ་ནས་ཐིག་ལེ་རྣམས། །ཆུ་ཆེན་རྦ་རླབས་གྱེན་དུ་ལོག་པ་བཞིན། །ལྟེ་བར་ཕྱིན་པས་དགའ་བ་དང་པོ་དང་། །སྙིང་ཁར་གཉིས་པ་མགྲིན་པར་གསུམ་པ་དང་། །སྤྱི་བོར་སླེབས་པས་མས་བརྟེན་དགའ་བ་བཞི། །དེ་ཚེ་ཉམས་ལེན་རྩི་དང་མ་བྲལ་ན། །མས་བརྟེན་དགའ་བ་བཞི་ཞེས་མིང་དུ་འདོགས། །དེ་ནས་རིག་པ་ནམ་མཁའི་དབྱིངས་སུ་འཕང་། །ནམ་མཁའ་བཞིན་དུ་རྒྱ་བསྐྱེད་ངོ་བོར་ལྟ། །གོང་གི་འཁྲུལ་འཁོར་རྣམས་ཀྱང་དྲག་ཏུ་སྦྱང་། །ཐིག་ལེ་གཏོང་རེ་ན་ར་ཀན་དུ་
བསམ། །དེ་བསམ་ཤོར་ཡང་རྩ་ལྟུང་འབྱུང་བ་མིན། །ལྡོག་རྟགས་བཛྲ་སྲད་བུ་བཞིན་དུ་འགྱུར། །སེམས་ལ་བདེ་བ་འཆར་ཞིང་ཡིད་དགའ་འོ། །དེ་ནས་། སེང་གེ་རྣམ་རོལ་འཁྲུལ་འཁོར་རམ། །རྟ་རྒོད་སྤྲུགས་སེལ་ལྟ་བུའི་ལུས་སྤྲུགས་བྱ། །བྱང་སེམས་བདུད་རྩི་ལུས་ཀུན་གང་བར་དམིགས། ཐིག་ལེ་ཡུངས་ཀར་འབྲུ་ཙམ་མ་ཉམས་པར། །ཡས་བརྟེན་མས་རྟེན་དགའ་བཞི་ངོས་ཟིན་ན། །མཆན། །ཕན་ཡོན་ལུས་བདེ་ཁམས་དྭངས་རིག་པ་གསལ། །དཔའ་བོ་མཁའ་འགྲོ་ཐམས་ཅད་སྤྲིན་བཞིན་འདུ། །ཉམས་རྟོགས་ཡོན་ཏན་ཡར་ངོའི་ཟླ་བཞིན་འཕེལ། །ལྷ་འདྲེ་མི་གསུམ་ཟས་ནོར་ལོངས་སྤྱོད་འདུ། །རྩ་རླུང་ཐིག་ལེའི་ཡོན་ཏན་ཐམས་ཅད་ཐོབ། །དེ་དོན་འོག་སྒོ་བདེ་ཆེན་རང་གྲོལ་ལས། །དེ་ནི་རང་ལུས་ཐབས་ལྡན་ཞེས་བྱ་སྟེ། །དེ་སྐབས་ཀྱང་ནི་བདེ་བ་ཆེར་འཕེལ་ནས། །བདེ་སྟོང་ཟག་མེད་མཆོག་གི་ཏིང་འཛིན་ཐོབ། །ཁྱད་པར་འདུལ་བ་འཛིན་པའི་དགེ་སློང་གིས། །གཞན་ལུས་བསྟེན་ན་གཞན་གྱིས་སྒྲོ་སྐུར་འགྱུར། །དེ་ཕྱིར་རང་ལུས་ཐབས་ལྡན་འདི་ལ་འབད། །ཅེས་གསུངས་འདི་ནི་གནད་ཀྱི་མན་ངག་ལ། །རྩ་ནི་ཁྱིམ་དང་རླུང་
ནི་བདག་པོ་དང་། །ཐིག་ལེ་ནོར་གྱི་ཚུལ་དུ་གནས་པ་སྟེ། །རྩ་ཡི་སྟོང་ར་གསལ་ན་མོ་རིག་འདུ། །རྩ་ནི་ནང་གི་མཁའ་འགྲོ་ཡིན་པའི་ཕྱིར། །ཕྱི་ཡི་མ་མོ་མཁའ་འགྲོ་ཤུགས་ཀྱིས་འགྲུབ། །རླུང་ནི་ནང་གི་དཔའ་བོ་ཆོས་སྐྱོང་ཚོགས། །ཡིན་ཕྱིར་རླུང་ལ་བྱང་ན་ཕོ་རིག་འདུ། །ཐིག་ལེ་ནང་གི་བསོད་ནམས་ནོར་ཡིན་ཕྱིར། །མ་ཉམས་འཕེལ་ན་བསོད་ནམས་ལོངས་སྤྱོད་འདུ། །རྟེན་ནི་རྒྱུ་ཡི་བྱང་སེམས་དཀར་དམར་ལ། །བརྟེན་པ་ཡེ་ཤེས་ཐིག་ལེ་ཕྱག་ཆེན་གནས། །དཔེ་ནི་རྟེན་དང་བརྟེན་པའི་ཐིག་ལེ་གཉིས། རྟེན་རྒྱུའི་ཐིག་ལེ་བྱང་སེམས་བརྟེན་པ་ནི། ཡེ་ཤེས་ཀྱི་ཐིག་ལེ་ནི་ཕྱག་རྒྱ་ཆེན་པོའོ། །མཆན། ཉམས་ན་མཉམ་ཉམས་འཕེལ་ན་མཉམ་འཕེལ་ཡིན། །འདུལ་ཁྲིམས་བསྲུང་བས་མི་འཕེལ་སྐམ་པར་འགྱུར། །དེ་ལྟར་སྦྱོང་བས་མི་ཉམས་འཕེལ་བ་འགྱུར། །དོན་མེད་མི་བསམ་དོན་དེ་ཤེས་པར་བྱ། །བཟུང་བསམ་མེད་པར་བཏང་ན་རྩ་ལྟུང་ཆེ། །བཟུང་ཡང་མ་ཐུབ་ཤོར་བས་ཉེས་པ་ཆུང་། །དྭངས་སྙིགས་ཁྱད་པར་བཟུང་རྒྱུ་ཡོད་མེད་སོགས། །མཁའ་འགྲོ་སྙིང་ཐིག་ནང་ནས་གསུངས་པ་ལྟར། །མི་བསྐྱོད་རྡོ་རྗེའི་གསུངས་དང་དགོངས་པ་མཐུན། །དེ་ལྟར་
རང་ལུས་ཐབས་ལྡན་ཉམས་ལེན་ཚེ། །ཐིག་ལེ་ལྡོག་གམ་མ་ལྡོག་ལྟ་བའི་ཕྱིར། །ལྡོག་པའི་དམིགས་པ་འཁྲུལ་འཁོར་མང་བྱས་རྗེས། །ཆུ་སྲིན་གྲེ་འགག་བཏང་ལ་ལག་མཐིལ་བླུག །དཀར་པོ་ཞོ་འདྲའི་དཀྱིལ་དུ་ཡུངས་འབྲུ་ཙམ། །དངུལ་ཆུའི་མདོག་འདྲ་ལྡོག་པོ་ཐལ་ཐོར་ནི། །དྭངས་མའི་དྭངས་མ་བྱིས་སྦ་འབྱུང་བའི་རྒྱུ། །ཉམས་ན་སྐྱོན་ཆེ་བཟུང་ན་ཡོན་ཏན་འཕེལ། །དེ་འདྲ་གདའ་ན་གཏན་ནས་མ་ལྡོག་རྟགས། །ཨ་མྲྀ་ཏ་ཡི་སརྦ་པའི་སྔགས། །བཟླས་ཤིང་དྲོད་མ་ཡལ་བར་བཏུང་བར་བྱ། །དེ་ཡི་ཉམས་པའི་ཉེས་པ་མི་འབྱུང་སྟེ། །དམིགས་པ་མ་གསལ་ཆགས་པས་ཤོར་ན་ཡང་། །དེ་ཕྱིར་རྩ་ལྟུང་ཉེས་པ་མ་འབྱུང་བ། །དགྱེས་རྡོར་རྒྱུད་ལས་རྒྱ་ཆེར་གསལ་བར་བཤད། །དེ་ཡང་གྲོད་མ་ཡལ་བར་བཏུང་དགོས་ཀྱིས། །དྲོད་ཡལ་ནས་ནི་ནད་དུ་འགྱུར་བར་བཤད། །དེ་ལ་བཙོག་པའི་འདུ་ཤེས་མ་བཏུང་ན། །གསང་བའི་དབང་གི་དམ་ཚིག་ཉམས་པ་སྟེ། །ནང་གི་བདུད་རྩི་མཆོག་ནི་བྱང་སེམས་ཡིན། །དེ་ཡང་རྩ་ལྟུང་རྣམ་པ་གཉིས་སུ་འགྱུར། །དཀར་པོ་ཞི་བ་སྣབ་ཀྱི་དབྱིབས་འདྲ་བ། །དེ་ནི་དྭངས་མའི་
སྙིགས་མ་ཡིན་པ་སྟེ། །བཟུང་ན་ལུས་ཤ་རྒྱས་ཙམ་ཡོན་ཏན་ཡོད། །ཉམས་ཀྱང་ཉེས་པ་ཅུང་ཟད་ཆུང་བར་གསུངས། །སྙིགས་མའི་སྙིགས་མ་བ་གླང་ཁ་ཆུ་འདྲ། །ཉག་མ་ཡོད་། པའི་བརླན་ཅིག་འབྱུང་བ་ནི། །བཟུང་ནས་མི་ཟིན་བཏང་ན་ཉེས་པ་མེད། །བཟུང་བའི་དམིགས་པ་གསང་བའི་བུ་ག་ནས། །ཧཱུྃ་ཡིག་སུམ་བརྩེགས་ཁྲིག་གིས་བཀག་པ་དང་། །ལྡོག་པའི་དམིགས་པ་སྤྱི་བོའི་ཧཾ་ཡིག་ལས། །ཐིག་ལེ་ཐམས་ཅད་སྐར་མདའ་ཆད་པ་བཞིན། །ཡར་འཕྲོས་ཧཾ་ལ་སིབ་སིབ་ཐིམ་པར་བསྒོམ། །བཟུང་དང་ལྡོག་དང་བཀྲམ་པ་གསུམ་ཀ་ལ། །རིག་པ་ནམ་མཁའི་དབྱིངས་འཕང་ངོ་བོ་སྐྱོང་། །ནམ་མཁའ་བཞིན་དུ་རྒྱ་བསྐྱེད་བཞག་པ་ཟབ། །ཐིག་ལེ་འབེབས་པ་གནད་ཀྱི་གདམས་པ་ནི། །དབང་པོ་།དམན་པའི་ཐ་མལ་གང་ཟག་གིས། །ཡི་དམ་ཡུམ་ལ་ཆགས་པ་མི་སྐྱེ་བས། །དང་པོ་རང་ཉིད་ཡི་དམ་བསྒོམ་པ་དེ། །འོད་ཞུ་ངོ་བོ་ཡི་དམ་ཡིན་པ་ལ། །རྣམ་པ་ཨོ་རྒྱན་གཅེར་བུ་ཕྱག་གཉིས་པ། །ཡི་དམ་ཡུམ་དེ་འོད་དུ་ཞུ་བ་ལས། །ངོ་བོ་ཕག་མོ་རྣམ་པ་ཐ་མལ་གྱི། །བུད་མེད་རང་གི་ཡིད་མཐུན་གཅིག་ཏུ་བསྒོམ། །དབེན་པའི་གནས་སུ་རང་དང་
མཉམ་དུ་འཁོད། །ཕན་ཚུན་གཟུགས་ལ་ལྟ་ཞིང་ཆགས་པར་བསྒོམ། །དེ་ཡི་ངོ་བོར་བལྟས་པས་སྣང་སྟོང་འཆར། །ལྟ་བས་ཚིམ་པའི་ཆགས་པ་སྦྱངས་བ་ཡིན། །དེ་ནས་རྒོད་ཅིང་ཆགས་པའི་གཏམ་སྨྲ་བསམ། །ངོ་བོར་བལྟས་པས་གྲག་སྟོང་ཉིད་དུ་འཆར། །རྒོད་པས་ཚིམ་པའི་ཆགས་པ་སྦྱངས་བ་ཡིན། །དེ་ནས་རྩེ་ཀྱུ་ལག་པ་སྦྲེལ་བ་དང་། །ལུས་ལ་བྱུག་ཅིང་འཕུར་དང་འོ་བྱེད་བསམ། །ངོ་བོར་བལྟས་པས་རེག་བྱ་མྱང་སྟོང་འཆར། །ལག་པ་བཅང་བས་ཚིམ་པའི་ཆགས་པ་སྦྱངས། །དེ་ནས་ཕན་ཚུན་ལུས་པོ་འཁྱུད་བྱས་ཏེ། །རྡོ་རྗེ་པདྨ་མཉམ་པར་སྦྱོར་བར་བསམ། །དེ་ནས་ཡུམ་གྱིས་མ་བཟོད་འགུལ་བསྐྱོད་བྱས། །བདེ་བའི་སྐད་འབྱིན་ཡབ་ཡུམ་བདེ་བ་རྒྱས། །རྩ་གནས་བཞི་ལ་དགའ་བཞི་ངོས་བཟུང་སྟེ། །ལྡོག་དང་བཀྲམ་པའི་དམིགས་པ་གོང་དང་མཚུངས། །ཁྱད་པར་ཡུམ་དེ་རང་གི་སྤྱི་བོར་བྱོན། །ཇེ་མཐོ་ཇེ་མཐོཨོ་ནམ་མཁའི་དབྱིངས་སོང་བ། །དེ་ཡི་བྷ་གར་རིག་པ་རྩེ་གཅིག་གཏད། །ཐིག་ལེ་ལྡོག་པའི་དམིགས་པ་དེ་རང་ཟབ། །གལ་ཏེ་རླུང་གི་ནུས་པ་མ་ཐོན་ན། །ཐིག་ལེ་དབབ་པའི་འདོད་ཆགས་བདེ་བ་
དེས། །ལྡོག་པར་མ་ནུས་འཆོར་བར་འདུག་པ་ན། །རང་ཉིད་ཡུམ་དང་མཉམ་པོར་སྦྱོར་བསྒོམ་པ། །ཡུམ་གྱི་བྷ་གར་ཡི་དམ་དཀྱིལ་འཁོར་བསྐྱེད། །དེ་ལ་གསང་བའི་མཆོད་པ་ཕུལ་དམིགས་ཤིང་། །ཡི་དམ་རྩ་སྔགས་མཇུག་ཏུ་སྔགས་འདི་སྦྱར། །མ་ཧཱ་སུ་ཁ་གུ་ཧྱ་པཱུ་ཛ་ཧོཿ ཞེས་བརྗོད་གྲེ་འགག་བཏང་ལ་ལག་མཐིལ་ཟེད། །འདི་ལ་ཉ་ཕྱིས་སྣོད་དང་དུང་ལ་སོགས། །སྣོད་གཞན་མི་རུང་བརྟག་གཉིས་རྒྱུད་ལས་གསུངས། །དྲོད་མ་ཡལ་བར་ལྕེ་བཞག་མིད་བྱ་སྟེ། །འཁོར་ལོ་ལྔ་ཡི་རྩ་གནས་ཐམས་ཅད་ཀྱི། །དཔའ་བོ་མཁའ་འགྲོ་བདེ་བའི་མཆོད་པས་མཉེས། །བདག་ལུས་བདེ་ཆེན་ཡེ་ཤེས་འབར་བར་བསྒོམ། །དེ་ཡིས་བྱང་སེམས་ཉམས་པའི་ཉེས་པ་མེད། །དེ་པ་མཐུན། །ཧ་ལྟར་ཅུང་ཟད་གསོལ་བའི་ལྷག་མ་རྣམས། །དཔྲལ་མགྲིན་སྙིང་ཁ་ལྟེ་བར་ཐིག་ལེ་བྱས། །ཡི་དམ་རྩ་སྔགས་ཤམ་བུར་སྔགས་འདི་བཏགས། །ཀཱ་ཡ་བཛྲ་རཀྵ་རཀྟ་ཨོ། ཝཱཀ་བཛྲ་རཀྵ་རཀྟ་ཨཱཿཙིཏྟ་བཛྲ་རཀྵ་རཀྵ་ཧཱུཾ། སརྦ་བཛྲ་རཀྵ་རཀྵ་ཧཱུྃ༔ ཞེས་བརྗོད་གནས་བཞིར་ཨོ་དཀར་ཨཱཿདམར་པོ། །ཧཱུཾ་མཐིང་ཧྲི་ཡིག་ལྗང་གུ་བཞིར་གྱུར་
ཏེ། །དེ་ལས་འོད་ཟེར་ཕྱོགས་བཅུར་འཕྲོས་པ་ཡིས། །སངས་རྒྱས་ཀུན་གྱི་སྐུ་གསུང་ཐུགས་རྡོ་རྗེ། །ཡེ་ཤེས་རྡོ་རྗེ་བཞི་ཡི་བཅུད་བསྡུས་བསྟིམ། །དེ་ནི་བྱང་སེམས་བསྲུང་བ་ཟབ་མོ་སྟེ། །ཁྲོ་ཆུ་ལ་སོགས་གཤིན་རྗེའི་རྒྱུད་ནས་གསུངས། །དེ་ནས་འདི་ཡི་ལས་ཚོགས་བཤད་པ་ནི། །དཔེར་ན་ཐ་མལ་བུད་མེད་གཞོན་ནུ་རྣམས། །རྡོ་ཇེ་སྦོམ་ཞིང་ཤུགས་དྲག་ལྡན་པ་དེས། །བསྣུན་ན་སྐྱེས་པ་གཞན་དག་མི་འདོད་ཅིང་། །རང་གི་མི་བདག་དེ་དང་འབྲལ་མི་ཕོད། །དེ་བཞིན་ཡེ་ཤེས་ལས་དང་འཇིག་རྟེན་གྱི། །མ་མོ་དང་ནི་མཁའ་འགྲོ་ཐམས་ཅད་དང་། །ཡི་དམ་ལྷར་བསྒོམ་སྦྱོར་བ་བྱེད་དམིགས་པའི། །རྣལ་འབྱོར་དེ་ལ་དགའ་བཞི་དངོས་གྲུབ་སྦྱིན། །དེ་དོན་ཐིག་ལེ་ནོར་བུའི་རྒྱུད་ལས་གསུངས། །ཁྱད་པར་མཁའ་འགྲོ་འབུམ་ཕྲག་མང་པོ་ཞིག །མ་འོངས་ཡིད་ཀྱིས་སྦྱོར་བ་བྱེད་སྒོམ་པའི། །ཆུང་མ་བྱེད་ཅིང་དངོས་གྲུབ་སྦྱིན་ནོ་ཞེས། །ཕྱག་ན་རྡོ་རྗེའི་སྤྱན་སྔར་དམ་བཅས་ནས། །ཀ་མ་རུ་ཡི་གནས་སྐོར་གནས་པར་བཤད། །ཀ་མ་རུ་ནི་ཀམ་པོ་གངས་ར་ཡིན། །དཔེར་ན་རང་ཉིད་རྒྱལ་བ་རྒྱ་མཚོར་བསྒོམ། །ཕག་མོ་ཡུམ་དང་སྦྱོར་
བ་བྱེད་པ་ཆེ། །ཚིགས་པའི་སྒྲ་ནི་ཧ་ཧ་སི་སི་དོན། །ཀུན་ཏུ་ར་སོགས་སྒྲ་སྐད་བསྒྲགས་པ་ཡིས། །ཕྱོགས་བཅུ་སངས་རྒྱས་བྱང་སེམས་ཐམས་ཅད་བྱོན། །ཡབ་རྣམས་ཡབ་ཞལ་ཡུམ་རྣམས་ཡུམ་ཞལ་ཞུགས། །བྱུང་སེམས་ངོ་བོར་ཞུ་བས་རྩ་གནས་བརྒྱུད། །ཡབ་ཡུམ་སྐུ་ལུས་བདེ་བས་རབ་ཏུ་རྒྱས། །ཡབ་ཡུམ་བྱང་སེམས་དཀར་དམར་བྷ་གར་བབ། །ཧཱི༔ཡིག་དམར་པོར་གྱུར་པའི་འོད་ཟེར་གྱིས། །སེམས་ཅན་གཏི་མུག་ཅན་རྣམས་སྒྲིབ་པ་སྦྱང་། །འོད་ཟེར་ཚུར་འདུས་ཧྲུལ་ཐིམ་པ་ཡིས། །བདེ་གཤེགས་སྐུ་ཡི་རིགས་ཀྱི་སྤྱན་རས་གཟིགས། །ཆ་ལུགས་བདག་ཉིད་ཡབ་ཡུམ་འདྲ་བར་གྱུར། །དེ་ལས་རང་འདྲའི་སྤྲུལ་པས་འཇིག་རྟེན་གང་། །སེམས་ཅན་ཀུན་གྱི་གཏི་མུག་སྒྲིབ་པ་སྦྱོང། །མཛད་པ་བཅུ་གཉིས་སྒོ་ནས་འགྲོ་དོན་མཛད། །སངས་རྒྱས་ཀུན་གྱི་སྐུ་ཡི་བྱིན་རླབས་བསྡུས། །ཐམས་ཅད་ཚུར་འདུས་ཡུམ་གྱི་བྷ་གར་ཐིམ། །འོད་ཞུ་བྱང་སེམས་དཀར་དམར་བདུད་རྩིར་གྱུར། །དེ་ནས་འདྲེན་གྱིས་རླུང་ལ་འཁྲུལ་འཁོར་བཅས། །སྦུ་གུས་འོ་མ་འཇིབ་པ་ཇི་བཞིན་དུ། །རྡོ་རྗེའི་ལམ་ནས་ཡར་དྲང་བདག་ལུས་གང་། །སྐུ་
ཡི་དངོས་གྲུབ་ཐོབ་བསྒོམ་མི་དམིགས་བཞག །དེ་བཞིན་བདག་ཉིད་རྡོ་རྗེ་སྤྱན་རས་གཟིགས། །ཡབ་ཡུམ་སྦྱོར་བས་ཐུགས་ཀྱི་དངོས་གྲུབ་བསྡུས། །རང་ཉིད་རིན་ཆེན་འབྱུང་ལྡན་སྤྱན་རས་གཟིགས། །ཡབ་ཡུམ་སྦྱོར་བས་ཡོན་ཏན་དངོས་གྲུབ་བསྡུས། །རང་ཉིད་པདྨ་རིགས་ཀྱི་སྤྱན་རས་གཟིགས། །ཡབ་ཡུམ་སྦྱོར་བས་གསུང་གི་དངོས་གྲུབ་བསྡུས། །རང་ཉིད་ལས་ཀྱི་རིགས་ཀྱི་སྤྱན་རས་གཟིགས། །ཡབ་ཡུམ་སྦྱོར་བས་ཕྲིན་ལས་དངོས་གྲུབ་བསྡུས། །དེ་བཞིན་རང་ཉིད་འཕགས་པ་སྤྱན་རས་གཟིགས། །སྒྲོལ་དཀར་དང་སྦྱོར་ཚེ་ཡི་དངོས་གྲུབ་བསྡུས། །སྒྲོལ་སྔོན་དང་སྦྱོར་འཇིགས་པ་བཅུ་དྲུག་ཞི། །ལོ་མ་ཅན་སྦྱོར་རིམས་ནད་ཞི་བར་བྱེད། །ལྷ་མོ་ཙན་དང་སྦྱོར་ནད་ཀུན་ཞི། །ཁྲོ་གཉེར་ཅན་དང་སྦྱོར་བས་འཇིགས་པ་སྐྱོབ། །དེ་བཞིན་རང་ཉིད་རྟ་མགྲིན་ཏིང་འཛིན་གྱིས། །ཀུ་རུ་ཀུལླེ་དང་སྦྱོར་སྦྱོར་མཚམས་གྱི། །འོད་ཟེར་སྤྲོ་བསྡུས་སྣང་སྲིད་དབང་དུ་བྱེད། །རང་ཉིད་བེར་ཆེན་མགོན་པོའི་ཏིང་འཛིན་གྱིས། །རང་བྱུང་མ་དང་སྦྱོར་བས་ལྷ་མོ་འགྲུབ། །ངེས་པར་ལྷ་མོ་བསྒྲུབ་པའི་རྣལ་འབྱོར་པས། །ཟླ་ངོ་རེ་ལ་ལན་རེ་མ་
བསྒོམས་ན། །དམ་ཚིག་ཆགས་པ་ལྷ་མོའི་རྒྱུད་ནས་གསལ། །དེ་བཞིན་བླ་མེད་ཡབ་ཡུམ་གང་དང་གང་། །གོང་ལྟར་ཐིག་ལེ་དབབ་ལྡོག་བཀྲམ་པ་དང་། །རྩ་གནས་བཞི་ལ་དགའ་བཞི་མྱོང་བ་སོགས། །ཐམས་ཅད་ཀུན་ལ་ཁྱད་པར་མེད་པ་སྟེ། །ཞལ་སྦྱོར་བསྒོམ་པའི་དོན་རྩ་དེ་རང་ཡིན། །ཡིད་ཀྱིས་རིག་མ་བསྟེན་པར་བསྒོམ་པ་ལ། །ཡིད་རིག་ཡེ་ཤེས་ཕྱག་རྒྱ་ཞེས་བྱའོ། །རང་ཉིད་སློབ་དཔོན་པདྨའི་ང་རྒྱལ་གྱིས། །ཨ་ཕྱི་ཚེ་རིང་མ་དང་བརྟན་མ་སོགས། །སྦྱོར་བར་བསྒོམས་པས་དེ་ཉིད་སྒྲུབ་ཐབས་ཟབ། །མཛའ་ལྟར་བསྟེན་པའི་མན་ངག་གནད་ཆེ་འོ། །དབང་ནི་གསུམ་པའི་ཉམས་ལེན་གཙོ་བོ་སྟེ། །འོན་ཀྱང་གསང་སྔགས་ཐོས་རྒྱ་ཆུང་བ་ཡི། །འདི་ཐོས་གསང་སྔགས་ཆོས་ལ་སྐུར་འདེབས་པས། །ཆོས་སྤང་ལས་ཀྱིས་ཁོ་ཉིད་དམྱལ་བར་འགྲོ། །རང་ཉིད་གསང་བ་ཐུགས་ཀྱི་དམ་ཚིག་ཉམས། །ཚེ་འདིར་མཁའ་འགྲོའི་བཀའ་ཆད་དྲག་པོས་མནར། །བཤགས་པ་མ་ཐེང་རྡོ་རྗེའི་དམྱལ་བར་འགྲོ། །བཤགས་པ་ཐེང་ན་དམྱལ་བར་མི་འགྲོ་ཡང་། །སྐྱེ་བ་ལྔ་བརྒྱ་སྨྱོ་འབོག་ནད་ཀྱིས་ཐེབས། །དེ་ཕྱིར་སྣོད་མིན་རྣམས་ལ་གསང་དམ་
བཅའ། །སྣོད་ལྡན་སྙིང་གི་བུ་ལ་མ་བསྟན་ན། །དགའ་བཞི་ཡེ་ཤེས་དངོས་སུ་མི་སྐྱེ་བས། །གསང་སྔགས་ཚིག་རྣམས་གོ་བ་སྐམ་པོར་ལུས། །བྱིན་རླབས་ཉམས་དང་རྟོགས་པའི་བརྒྱུད་པ་ཆད། །དེ་ཕྱིར་སྣོད་ལྡན་རྣམས་ལ་བསྟན་པར་བྱ། །དེ་སྐད་རྣལ་འབྱོར་རཱ་ག་ཨ་སྱ་ཡིས། །རྟ་ལོ་ཁྲུམས་ཟླའི་ཚེས་གཅིག་སྔ་དྲོར་སྨྲས། །རྡོ་རྗེ་འཛིན་པ་བརྩོན་འགྲུས་རྒྱ་མཚོས་བྲིས། །སྙན་བརྒྱུད་ཡི་གེར་བྲིས་པའི་ཉེས་མཆིས་ན། །ཌཱ་ཀི་བྱེ་བ་འབུམ་གྱི་དྲུང་དུ་བཤགས། །དགེ་བས་གསང་སྔགས་བསྟན་པ་མཐའ་རྒྱས་ཏེ། །དགེ་སློང་ཁྲིམས་ལྡན་རྡོ་རྗེ་འཛིན་པའི་ཚོགས། །སྐར་ཚོགས་ལྟ་བུར་བསྟན་པ་མཛེས་བྱེད་ཤོག །མངྒ་ལཾ། །