གནམ་ཆོས་སྐོར་ལས་དངོས་གྲུབ་འབྱུང་འདོད་ན། ༼ཛ༽ །སྤྲོས་མེད་ཛམ་དམར་ཟིན་བྲིས་གུད་དུ་སྦས། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། གནམ་ཆོས་སྐོར་ནས་བྱུང་བའི་སྨུག་འཛིན་དམར་པོའི་ཟིན་བྲིས་བཞུགས་སོ། ༈ །ན་མོ་ཨཱརྱ་ཛཾ་བྷ་ལ་ཡེ། གནམ་ཆོས་ཐུགས་ཀྱི་གཏེར་ཁ་ལས། ཛཾ་ལྷ་རིགས་དགུའི་སྒྲུབ་པ་གསུངས། །རྒྱུད་སྡེ་གསང་སྔགས་བླ་མེད་སྡེ། །རཏྣ་རྩལ་ཆེན་འདུས་རྒྱུད་ལས། །ནོར་ལྷ་སྤྱི་ཡི་རྒྱུད་ཆེན་པོ། །ལེའུ་བརྒྱ་དང་རྩ་བརྒྱད་གསུངས། །དེ་ཡི་དོན་དང་དགོངས་པ་ལགས། །པད་འབྱུང་ཛམ་ལྷ་སོ་སོ་ཡི། །སྐུ་རུ་བཞེངས་ནས་དངོས་སུ་གསུངས། །བརྒྱུད་པ་ཉེ་ཞིང་འགྲུབ་རྟགས་མྱུར། །རིགས་དགུའི་ནང་ནས་དམར་པོ་འདི། །དཀྱིལ་འཁོར་འཁོར་ལོ་གཏོར་མ་སོགས། །སྒྲུབ་རྫས་མི་དགོས་སྟབས་བདེ་བ། །ཤིན་ཏུ་སྤྲོས་མེད་ཨ་ཏིའི་ལུགས། །དྲན་པ་ཙམ་གྱིས་རྫོགས་པ་ཉིད། །ལྟ་བ་གྱད་ཀྱི་ལྷ་ཞེས་བྱ། །རང་ལུས་ཡེ་ནས་དམ་ཚི་ལྷ། །རང་སེམས་ཡེ་ནས་ཡེ་ཤེས་ལྷ། །ཡིན་ལ་ཡིན་བཞིན་གསལ་བཏབ་ནས། །གདོད་ནས་
དམ་ཡེ་དབྱེར་མི་ཕྱེད། །ཡེ་ཤེས་སྤྱན་འདྲེན་མི་དགོས་ཏེ། །ཆུ་ཟླ་མེ་ལོང་གཟུགས་བཞིན་དུ། །གར་དམིགས་དེ་རུ་ཡེ་ཤེས་པའི། །ལྷ་ནི་དེ་རུ་སྣང་བ་སྟེ། །ནམ་མཁས་གར་ཁྱབ་སྣང་སྲིད་ཀུན། །རྒྱལ་བའི་སྐུ་གསུང་ཐུགས་ཀྱིས་ཁྱབ། །རྣམ་པར་རྟོག་པ་མི་མངའ་ཕྱིར། །གཤེགས་དང་བཞུགས་པའི་མཚན་མ་མེད། །དེ་འདྲ་ཨ་ཏི་རྫོགས་ཆེན་ལུགས། །གསར་མའི་བླ་མེད་རྒྱུད་དང་མཐུན། །བདག་མདུན་སྐད་ཅིག་དྲན་རྫོགས་ལ། །མངོན་རྟོགས་གཅིག་གིས་དུས་གཅིག་བསྐྱེད། །སོ་སོའི་ཐུགས་ཀར་ཟླ་བའི་སྟེང་། །བྱི་རུ་ལྟ་བུ་ཛཾ་ཡིག་དམར། །སྔགས་ཕྲེང་གཡས་སུ་འཁོར་བ་ལས། །འོད་ཟེར་དམར་པོ་ཕྱོགས་བཅུར་འཕྲོས། །རྒྱལ་བ་ཀུན་གྱི་དངོས་གྲུབ་བསྡུས། །ཐམས་ཅད་འོད་ཞུ་བདག་ལ་ཐིམ། །འོད་ཀྱིས་རེ་ག་པས་ཐམས་ཅད་མཉེས། །ཟག་མེད་བདེ་བས་སྐུ་ལུས་ཚིམ། །འོད་ཟེར་འགྲོ་དྲུག་ཀུན་ལ་ཕོག །སྡིག་སྒྲིབ་།དག་ནས་ཛ་དམར་གྱུར། །ཀུན་ཀྱང་བུང་བ་ཚང་ཞིག་ལྟར། །འུར་འུར་དིར་དིར་སྔགས་སྒྲ་སྒྲོག །དེ་ནི་བདག་བསྐྱེད་དམིགས་པའོ། །རང་གི་ཐུགས་ལས་སྔགས་ཕྲེང་
འཕྲོས། །ཞལ་ནས་ཐོན་ནས་མདུན་བསྐྱེད་ཀྱི། །ཞལ་ཞུགས་ཐུགས་རྒྱུད་རབ་ཏུ་བསྐུལ། །སྔགས་ཕྲེང་ལྟེ་བ་ནས་ཚུར་བྱོན། །རང་གི་ཐུགས་ཀར་ཐིམ་པ་དེས། །ཕར་མཆོད་ཚུར་ལ་དངོས་གྲུབ་བསྡུ། །མགལ་མེའི་འཁོར་ལོ་འཁོར་བ་བཞིན། །དམར་དང་ཀྱིལ་ཀྱིལ་འཁོར་བར་བསྒོམ། །ཕྱག་གཡོས་བྷནྡྷའི་ནོར་བུ་ལས། །འོད་འཕྲོས་ཟས་ཀྱི་དངོས་གྲུབ་རྣམས། །འོད་ཀྱིས་བསྡུས་ནས་རང་ལ་ཐིམ། །ཟས་བཅུད་ཐོད་པའི་ནང་ཐིམ་པས། །ལོངས་སྤྱོད་ཆར་ལྟར་འབེབས་པར་དམིགས། །བར་མའི་ལྕགས་ཀྱུ་ཞགས་པ་ལས། །འོད་ཟེར་དམར་པོ་ལྕགས་ཀྱུ་དང་། །ཞགས་པའི་དབྱིབས་ཅན་ཕྱོགས་བཅུར་འཕྲོས། །གང་འདོད་ཐམས་ཅད་བཀུག་ཅིང་བསྡུས། །གཡས་འོག་ནོར་བུ་རིན་ཆེན་ལས། །འབྲུ་ཡི་ཆར་པ་འབེབས་པ་དང་། །གཡོན་གྱི་ནེའུ་ལེ་གཉིས་འཛིན། །རིན་ཆེན་རྣམ་པ་སྣ་ཚོགས་དང་། །གང་འདོད་དངོས་གྲུབ་སྐྱག་པ་ཡིས། །རང་གནས་ཁྲ་ཆེམ་གང་བར་དམིགས། །མཐར་ནི་མདུན་བསྐྱེད་བདག་ལ་ཐིམ། །བདག་ཀྱང་མི་དམིགས་སྟོང་པའི་ངང་། །གཏོར་བསྔོས་ལ་སོགས་བྱ་བ་ནི། །གནམ་ཆོས་ཛམ་ལྷ་སྤྱི་ཡི་
ནི། །ལས་བྱང་འདི་ཉིད་འདོན་པ་སྟེ། །སྒེའི་མལ་དུ་ཛི་དམར་འཛུད། །བསྐྱེད་ཆོག་བྱ་བར་མ་གསུངས་ཏེ། །སྤྱན་འདྲེན་བརྗོད་པས་རང་བཞིན་གྱིས། །གནས་དང་ལྕང་ལོ་ཅན་སོགས་དང་། །བདེ་བ་ཅན་སོགས་ཞིང་ཁམས་ནས། །ཛམ་དམར་བྱོན་ནས་མདུན་བཞུགས་པར། །གཞུང་ཚིག་ལྟར་དུ་དངོས་འབྱོར་དང་། །ཡིད་སྤྲུལ་བཀྲ་ཤིས་རྒྱལ་སྲིད་དང་། །འགྲོ་བའི་དཔལ་འབྱོར་བློས་བླང་འབུལ། །བསྟོད་པ་བརྗོད་ནས་རང་ཉིད་ལ། །སྐུ་གསུང་ཐུགས་བཅས་ཐིམ་པར་བསྒོམ། །ཆུ་སྦྱིན་ཀྱང་ཟངས་གཞོང་དུ། །སྐད་ཅིག་བསྐྱེད་དེ་སྔགས་ཀྱིས་འབུལ། །བསྟོད་པ་ལས་བྱང་ཤོ་ལོས་བསྟོད། །རྟགས་ནི་ནོར་ལྷ་སྤྱི་དང་འདྲ། །བརྩོན་འགྲུས་རྒྱ་མཚོས་བསྐུལ་བྱས་ནས། །རཱ་ག་ཨ་སྱས་ཟིན་བྲིས་བྱས། །ཐེམ་མེད་ཡིན་ཡང་གཅིག་བརྒྱུད་ནང་འདིར་བྲིས། །བསྟན་འཛིན་དབུལ་སེལ་ནོར་བུ་རིན་པོ་ཆེ་ཡིས་ཟས་གོས་ནོར་གསུམ་སྙན་གྲགས་དཔལ་འབྱོར་ལོངས་སྤྱོད་མངའ་ཐང་སིདྡྷི་ཕ་ལ་ཧོ༔ ཨྠ྄ྀི། འདི་འདྲའི་མན་ངག་འཇིག་རྟེན་གསུམ་ན་དཀོན། སྣོད་མིན་དམ་ཚིག་མེད་ལ་གབ་པ་ཅེས། མངྒ་ལཾ།།