བསྟན་འཛིན་དགེ་འདུན་སྡེ་རྣམས་རྒྱས་པའི་ཕྱིར། ༼ཞ༽ །དགེ་འདུན་འདུ་ཆོག་འཕགས་ཚོགས་རྒྱ་མཚོ་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། དཔལ་ལྡན་བླ་མ་དམ་པ་གར་དབང་རྡོ་རྗེ་འཆང་ཆེན་པོས་རྗེས་འབྲང་དགེ་འདུན་འདུ་བའི་ཆོ་ག་འཕགས་ཚོགས་རྒྱ་མཚོ་དབྱར་གྱི་ཆུ་བོ་ཞེས་བྱ་བ་བཞུགས་སོ། །ན་མོ་པདྨ་བཛྲ་དྷ་ར་ཡེ། གར་དབང་རྡོ་རྗེ་འཆང་ཆེན་མི་གཟུགས་ཅན། །དྷརྨ་ཤྭ་རའི་ཞབས་ལ་ཕྱག་འཚལ་ནས། །དགེ་འདུན་འདུ་བའི་ཆོ་ག་རྒྱུན་ཁྱེར་ནི། །ཉུང་དུ་ཚིག་གི་ཟབ་པ་རྒྱ་ཆེར་བྲི། །ཆོས་བདག་སྲུང་མས་བཀའ་གནང་བྱིན་གྱིས་རློབས། །དབེན་པའི་གནས་སུ་ཡར་ངོའི་ཚེས་བརྒྱད་ལ། །མགོ་
བརྩམ་རྒྱས་པར་ས་སྟེགས་སྤྱི་ལྟར་ལ། །བ་བྱུང་དྲི་བཟང་གླ་རྩི་གུར་གུམ་དང་། །ཛཱ་ཏི་ཆང་དང་བདུད་རྩི་ཙནྡན་དམར། །གཡོན་བསྐོར་བྱུག་སྟེ་རབ་ཀྱི་རྡུལ་ཚོན་བྲི། །ནང་དུ་པདྨ་འདབ་བརྒྱད་དེ་ཡི་ཕྱིར། །འདབ་མ་བཅུ་པོ་ཐམས་ཅད་དམར་པོའོ། །དེ་རྒྱབ་ཆོས་འབྱུང་གྲུ་གསུམ་གཉིས་བརྩེགས་བྲི། །དེ་རྒྱབ་རྒྱས་པར་གྲུ་བཞི་སྒོ་བཞི་སྟེ། །དུར་ཁྲོད་བརྒྱད་ཀྱིས་བསྐོར་བ་སྤྱི་ལྟར་རོ། །བསྡུ་ན་ཆོས་འབྱུང་རྒྱབ་ཏུ་ཐོད་ར་དང་། །རྡོ་རྗེ་མེ་རིས་བསྐོར་བ་བྲི་བར་བྱ། །ཡང་ན་རས་བྲིས་ཤོག་བུར་བྲིས་ཀྱང་རུང་། །ཐ་མ་གཞི་ནི་དམར་པོའི་སྟེང་དུ་ནི། །མེ་ཏོག་དམར་རམ་འབྲུ་ལ་མཚོན་བྱུག་པས། །ཚོམ་བུ་ལྷ་གྲངས་བཀོད་པ་འཐུས་པ་ཡིན། །དབུས་སུ་ཟངས་བུམ་རབ་ཡིན་མ་རྙེད་ན། །བུམ་པ་གང་རུང་རྗེས་ལྡན་ཁ་རྒྱན་དང་། །མགུལ་ཆིངས་དམར་པོ་འབྲས་བུ་མེ་ཏོག་སོགས། །དམར་པོའི་ཤིང་གིས་ཁ་རྒྱན་བྱ་བ་སྟེ། །ཙནྡན་དམར་པོ་གུར་གུམ་ཨ་མྲྀ་ཏ། །དྲི་བཟང་ཆུ་ཡིས་སུམ་གཉིས་བཀང་བར་བྱ། །དེ་སྟེང་མེ་ལོང་ཆང་གིས་བརླན་པ་ལ། །སིནྡྷ་ར་བྱུག་ཆོས་འབྱུང་ལྟེ་བ་ལ། །པདྨ་འདབ་བརྒྱད་དབུས་སུ་ཡི་གེ་ཧཱུྃ། །འདབ་མ་བརྒྱད་ལ་ཨཱ་ལི་གཡོན་བསྐོར་དང་། །ཆོས་འབྱུང་ཟུར་གསུམ་ཨོཾ་ཨཱཿཧཱུྃ་བྲིས་ཏེ། །སྔགས་མགོ་ནང་བསྟན་དར་དམར་ཁ་ཁེབ་བྱ། །དེ་མདུན་གཡོན་ངོས་ནང་མཆོད་བདུད་རྩི་བཤམ། །གཡས་ངོས་གཏོར་མ་ཟུར་གཉིས་འབྲི་མོག་བྱུག །ཤ་དམར་བརྒྱན་ཞིང་དར་དམར་གདུགས་ཆུང་བཙུགས། །དེ་མཐར་མཆོད་པ་རྣམ་ལྔ་བསྐོར་བཤམས་དང་། །
ཚོགས་འཁོར་དང་བཅས་བཤམས་ལ་བསྒྲུབ་དུས་སོ། །རྒྱུན་ཁྱེར་མཁའ་འགྲོ་གཏོར་མར་བསྔོ་ཆོག་ཅིང་། །མདུན་བསྐྱེད་དེ་ཡི་རྩེ་ལ་བསྒོམས་པས་རུང་། །བདག་འཇུག་མེད་ན་བུམ་པ་དབང་རྫས་བཤམས། །ཁྲུས་བྱས་གདན་དམར་སྟེང་དུ་ཕྱེད་སྐྱིལ་བཞུགས། །ནུབ་ཏུ་ཁ་གྲུ་གོས་ཟས་དམར་པོ་དང་། །ཙནྡན་དམར་པོ་ལ་སོགས་ཕྲེང་བ་བྱས། །དཔྲལ་བར་སིནྡྷ་རའམ་རྒྱ་སྐག་གིས། །ཐིག་ལེ་བྱ་བ་སྒྲུབ་པའི་སྟ་གོན་ནོ། །དེ་ནས་ཚིགས་བཅད་གྱེར་སྒོམ་སྦྲགས་པ་སྟེ། །ཌཱ་དྲིལ་ཡིན་གྱི་རྔ་བརྡུང་འགལ་བ་མེད། །ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སྭ་བྷ་ཝ་སོགས། སྟོང་པའི་ངང་ལས་ཡཾ་རཾ་ཨོཾ་ཨཱཿཧཱུྃ། །ཞུ་བ་ལས་བྱུང་རླུང་མེ་ཐོད་སྐྱེད་སྟེང་། །ཨཱཡིག་ལས་བྱུང་མཚན་ལྡན་ཀཱ་པ་ལར། །གོ་ཀུ་ད་ཧ་ན་ལས་ཤ་ཆེན་ལྔ། །བི་མུ་མ་ར་ཤུ་ལས་བདུད་རྩི་ལྔ། །དེ་སྟེང་ཧཱུཾ་ཨོཾ་ཛཾ་ཁཾ་ཧཱུྃ་ཡིག་རྣམས། །སངས་རྒྱས་ལྔ་ཡི་ངོ་བོར་གྱུར་པའི་སྟེང། །ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན། །དེ་ལས་འོད་འཕྲོས་རླུང་གཡོས་མེ་སྦར་བས། །ཐོད་པའི་རྫས་ཞུ་སྟེང་དུ་རྡོ་རྗེ་ལྷུང་། །ལན་གསུམ་དཀྲུགས་ནས་རྡོ་རྗེ་ཞུ་ནས་ཐིམ། །དྲི་མེད་ཤེལ་ལྟར་དྭངས་བའི་བདུད་རྩིར་གྱུར། །ལག་པ་གཡས་དང་གཡོན་གཉིས་ཀས་བྱ་ཁྱུང་གི་ཕྱག་རྒྱ་བསྟན་ཅིང་། ཨོཾ་ཨཱཿཧཱུྃ་ཧ་ཧོ་ཧི༔ ལན་གསུམ། ཧཱུཾ་ལས་རིན་ཆེན་སྣོད་དུ་ཨོཾ་
ཡིག་ལས། །གཏོར་མ་འདོད་པའི་ཡོན་ཏན་ཕུན་ཚོགས་པ། །ཨོཾ་ཨཱཧཱུྃ་གིས་ཟག་མེད་བདེ་བསྐྱེད་གྱུར། །ས་ཕྱོགས་འདིར་གནས་ས་བདག་ཡུལ་བདག་དང། །གནས་བདག་བགེགས་དང་འབྱུང་པོ་ཀུན་ལ་སྦྱིན། །སོ་སོར་ཚིམས་ནས་དགའ་མགུ་ཡི་རང་མཛོད། །བདག་གིས་གནས་འདིར་བྱང་ཆུབ་སྒྲུབ་པ་ལ། །ཀོ་ལོང་རུ་ང་འཕྲག་དོག་མ་མཛད་པར། །དཀར་ཕྱོགས་རྣམས་ཀྱིས་བདག་གི་སྡོང་གྲོགས་མཛོད། །ནག་ཕྱོགས་རྣམས་ནི་མ་འཚེ་གཞན་དུ་དེངས། །གལ་ཏེ་བསྒོ་བའི་བཀའ་ལ་མི་ཉན་ན། །རབ་འབར་ཡེ་ཤེས་རྡོ་རྗེ་མགོ་འགེམ་འགྱུར། །དེ་ཕྱིར་དོན་ཆུང་ཉེན་ཆེ་མ་བསྡོ་བར། །རང་ལུས་བསྲུང་ཞིང་བག་ཡོད་བྱ་བར་རིགས། །ཨོཾ་སརྦ་བྷུ་ཏ་བིགྷཱན་བྷ་ལི་ཏ་ཁཱ་ཧི་ཁཱ་ཧི། ཨུ་ཙ་ཏ་ཡ་ཕཊ། ཅེས་ཕྱི་རོལ་དོར། ཨཱཿ སྟོང་པའི་ངང་ལས་འོག་གཞི་རྡོ་རྗེའི་ས། །རབ་ཏུ་སྲ་མཁྲེགས་དུམ་བུ་གཅིག་གྱུར་པའི། །ལོགས་ཀུན་རྡོ་རྗེའི་རྭ་བ་ཟླུམ་པོའི་སྟེང་། །རྡོ་རྗེའི་མདའ་ཡི་དྲ་བ་ཕུབ་པའི་འོག །རྡོ་རྗེའི་བླ་བྲེ་བྲིས་ཤིང་ཕྱི་རོལ་ཀུན། །ཡེ་ཤེས་མེ་དཔུང་ཁ་དོག་ལྔ་ལྡན་གྱུར། །བསྐལ་པ་འཇིག་པའི་མེ་བཞིན་རབ་ཏུ་
འབར། །ཕྱོགས་མཚམས་སྟེང་འོག་བར་མེད་དུམ་བུར་ཅིག །ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཕཊ་སྭཱ་ཧཱ། ཨཱཿ རིན་ཆེན་སྣ་ཚོགས་ལས་གྲུབ་ཐོད་པའི་སྣོད། །དེ་ནང་ཧཱུྃ་ཡིག་ལས་བྱུང་རྡོ་རྗེ་ཡི། །ཕྱི་ནང་གསང་བའི་མཆོད་རྫས་དཔག་མེད་པ། །སེམས་དཔའ་ཀུན་ཏུ་བཟང་པོའི་རྣམ་ཐར་བཞིན། །སངས་རྒྱས་ཞིང་ཀུན་ཁྱབ་པའི་མཆོད་སྤྲིན་འཕྲོ། །དུས་ཀུན་རྒྱུན་མི་ཆད་པ་ནམ་མཁའི་མཛོད། །འཕགས་པ་ཀུན་གྱི་སྤྱན་སྔར་འབྱུང་བར་གྱུར། །ཨོཾ་བཛྲ་སྤ་ར་ཎ་ཁཾ། ་དུས་འདི་ནས་བཟུང་བླ་མེད་བྱང་ཆུབ་བར། །བླ་མ་དཀོན་མཆོག་གསུམ་དང་ཡི་དམ་ལྷ། །འཕགས་མ་སྒྲོལ་མའི་ཚོགས་ལ་སྐྱབས་སུ་མཆི། །ཇི་ལྟར་སྔོན་གྱི་རྒྱལ་བས་ཐུགས་བསྐྱེད་ལྟར། །བདག་གིས་བླ་མེད་བྱང་ཆུབ་སེམས་བསྐྱེད་དོ། །སྙིང་རྗེ་ཆེན་པོས་འགྲོ་ཀུན་དབང་བསྡུས་ནས། །བླ་མེད་བྱང་ཆུབ་ལམ་ལ་འགོད་པའི་ཕྱིར། །དབང་གི་ལྷ་མོ་བདག་གིས་བསྒྲུབ་པར་བྱ། །རང་ཉིད་སྐད་ཅིག་རིག་བྱེད་མར་གསལ་བའི། །ཐུགས་ཀའི་ཟླ་སྟེང་ཧྲིཝལས་འོད་འཕྲོས་པས། །འོག་མིན་མཁའ་སྤྱོད་བདེ་ཆེན་ཞིང་ཁམས་ནས། །ཀུ་རུ་ཀུལླེའི་ལྷ་ཚོགས་བཅོ་ལྔ་ལ། །སངས་རྒྱས་བྱང་
སེམས་དཔག་མེད་བསྐོར་བ་དང་། །སྟེང་དུ་བླ་མ་འོད་དཔག་མེད་མགོན་བཅས། །ནམ་མཁར་སྤྱན་དྲངས་བཛྲ་ས་མཱ་ཛ། །སྒོ་གསུམ་གུས་པས་ཕྱག་འཚལ་ན་མོ་ཧཱུྃ། །ཕྱི་ནང་གསང་བའི་མཆོད་སྤྲིན་རྒྱ་མཚོ་འབུལ།། །ཐོག་མེད་དུས་ནས་བསགས་པའི་སྡིག་ཀུན་བཤགས། །འཕགས་རྣམས་ཚོགས་གཉིས་བསགས་ལ་རྗེས་ཡི་རང་། །རྒྱལ་ཀུན་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་པར་གསོལ་བ་འདེབས། །དགེ་བས་འགྲོ་ཀུན་སངས་རྒྱས་ཐོབ་ཕྱིར་བསྔོ། །དཀོན་མཆོག་གསུམ་ལ་རྟག་པར་སྐྱབས་སུ་མཆི། །སྨོན་དང་འཇུག་པའི་བྱང་ཆུབ་སེམས་བསྐྱེད་དོ། །སངས་རྒྱས་རིགས་ལྔའི་ཕྱི་ནང་གསང་བ་ཡི། །སྡོམ་པ་དམ་ཚིག་རྣམས་ཀྱང་བདག་པོ་བཟུང་། །འཁོར་བའི་སེམས་ཅན་ཐར་པའི་ལམ་ལ་བཀོད། །ཉན་རང་རྣམས་ཀྱང་ཐེག་ཆེན་ས་ལ་བཞག །ཀུན་ཀྱང་རྫོགས་བྱང་ཉིད་ལ་འགོད་པར་བགྱི། །ཚོགས་ཞིང་ལྷ་ཚོགས་རང་གི་སྙིང་ཁར་ཐིམ། །སེམས་ཅན་ཐམས་ཅད་བདེ་བའི་རྒྱུ་འབྲས་ལྡན། །སྡུག་བསྔལ་རྒྱུ་འབྲས་ཀུན་དང་བྲལ་གྱུར་ཅིག །དུས་རྣམས་རྟག་ཏུ་བདེ་བ་ཚད་མེད་པ། །
དེ་ལ་ཕྱོགས་རིས་མེད་པར་བདག་སེམས་སྙོམས། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨཀོཉཧཾ། ཆོས་རྣམས་ཡེ་ནས་བརྗོད་བྲལ་སྟོང་པ་ཉིད། །ཨེ་ལས་ཆོས་འབྱུང་དཀར་པོ་ཆོས་དབྱིངས་ཁྱབ། །དེ་ནང་འབྱུང་བ་རིམ་བརྩེགས་རི་རབ་སྟེང་། །སྣ་ཚོགས་པདྨ་འབུམ་ལྡན་ཉི་མའི་སྟེང་། །སྣ་ཚོགས་རྡོ་རྗེའི་ལྟེ་བར་ཧཱུཾ་ཡིག་ལས། །རིན་ཆེན་སྣ་ཚོགས་ལས་གྲུབ་གཞལ་ཡས་ཁང་། །ནང་ནས་རིམ་བཞིན་དམར་ལྗང་སྔོན་པོ་དང་། །སེར་པོ་དཀར་པོ་རྩིག་པ་རིམ་པ་ལྔ། །དེ་སྟེང་གསེར་གྱི་ཕོ་གུ་ཕྲ་ཡིས་མཛེས། །རིན་ཆེན་བྲེ་ཕུལ་གསེར་གྱི་སྐེ་རགས་བཞི། །ཆུ་སྲིན་ཁ་ནས་དྲྭ་བ་དྲྭ་ཕྱེད་དང་། །རྔ་ཡབ་མེ་ཏོག་ཕྲེང་བ་མེ་ལོང་དང་། །ཟླ་བ་རླུང་གིས་བསྐྱོད་པས་རྣམ་པར་མཛེས། །བྱ་འདབ་ལས་འཕྱང་རིན་ཆེན་ཤར་བུ་དང་། །སྟེང་དུ་མདའ་ཡབ་པདྨ་ཕྱེད་པའི་དབྱིབས། །དེ་དག་བར་དུ་རྒྱལ་མཚན་བ་དན་དང་། །རྔ་ཡབ་གདུགས་དང་དར་དཔྱང་རྒྱན་གྱིས་སྤྲས། །ཕྱི་ཡི་སྣམ་བུར་མཆོད་པའི་ལྷ་མོའི་བསྐོར། །སྟེང་ནི་ཕྱུར་བུ་རིན་ཆེན་ཏོག་གིས་བརྒྱན། །གྲུ་བཞི་སྒོ་བཞི་སྒོ་ཁྱུད་མཚམས་དང་ཟུར། །ཟླ་ཕྱེད་ལ་གནས་རྡོ་རྗེ་ནོར་བུས་སྤྲས། །སྒོ་བཞིའི་
མདུན་དུ་སྟེགས་བུ་གྲུ་བཞིའི་སྟེང་། །རྟ་བབས་སྣམ་བུ་བཅུ་གཅིག་རྩེ་མོ་ལ། །པདྨ་ལ་གནས་རི་དྭགས་ཆོས་འཁོར་བཅས། །ཕྱི་ཡི་ས་གཞི་རིན་ཆེན་འདོད་ཡོན་གང་། །པད་འདབ་རྡོ་ར་ཡེ་ཤེས་མེ་རིས་བསྐོར། །ཡེ་ཤེས་དཀྱིལ་འཁོར་ཆེན་པོ་དེ་ཡིས་རྒྱབ། །ཕྱོགས་མཚམས་འཇིག་རྟེན་རབ་འཇིགས་དུར་ཁྲོད་བརྒྱད། །རི་བརྒྱད་མཚོ་བརྒྱད་ཤིང་བརྒྱད་མཆོད་རྟེན་བརྒྱད། །མེ་བརྒྱད་སྤྲིན་བརྒྱད་ཀླུ་བརྒྱད་ཞིང་སྐྱོང་བརྒྱད། །རྣལ་འབྱོར་བརྒྱད་དང་ཕྱོགས་སྐྱོང་ཆེན་པོ་བརྒྱད། །རོ་ལང་ཀེང་རུས་ཤ་ཟ་འབྱུང་པོས་གང་། །དེ་རུ་འཚོགས་ཀུན་ལོག་པར་མི་ལྟུང་བའི། །རང་བྱུང་ཧེ་རུ་ཀ་ཡི་གནས་མཆོག་གོ །ཕོ་བྲང་ནང་གི་ས་གཞི་ཤར་ཕྱོགས་དཀར། །ལྷོ་སེར་ནུབ་སྔོ་བྱང་ལྗང་དབུས་དམར་བའི། །དབུས་དང་ཕྱོགས་བཞི་ཕྱོགས་མཚམས་སྟེང་འོག་ཏུ། །པདྨ་དམར་དང་རོ་ཉི་ཟླ་བའི་གདན། །དབུས་དམར་ཧྲིཡིག་དམར་པོའི་འཕྲོ་འདུ་ལས། །སྐད་ཅིག་བཅོམ་ལྡན་འདས་མ་རིག་བྱེད་མ། །པདྨ་རཱ་གའི་མདོག་ཅན་གཟི་འོད་འབར། །ཞལ་གཅིག་ཕྱག་བཞི་དང་པོས་ཨུཏྤལ་གྱིས། །མདེལ་ཅན་མདའ་དང་མེ་ཏོག་དམར་པོ་ཡི། །
གཞུ་གཉིས་འགེངས་པ་སྙན་གྱི་ཐད་དུ་བཀང་། །གཡས་འོག་ལྕགས་ཀྱུ་དམར་པོ་གཡོན་འོག་ཏུ། །ཨུཏྤལ་དམར་པོའི་ཞགས་པ་འདེབས་པའི་ཚུལ། །དབུ་སྐྲ་དམར་སེར་གྱེན་བརྗེས་ཐོད་སྐམ་བརྒྱན། །སྤྱན་གསུམ་དམར་ཟླུམ་གཡོན་དུ་ཡོ་བར་གཟིགས། །ཞལ་གདངས་མཆེ་གཙིགས་ལྗགས་འདྲིལ་ཁྲོ་མོའི་སྐུ། །ཐོད་རློན་དོ་ཤལ་ཕྱག་རྒྱ་ལྔ་ཡིས་བརྒྱན། །རིན་ཆེན་དར་དཔྱངས་སྟག་གིས་ཤམ་ཐབས་ཅན། །སྐྱིལ་ཀྲུང་ཕྱེད་པའི་གར་གྱིས་པད་ཉི་དང་། །དབང་ཕྱུག་ཨུ་མོ་སྒྲ་ཅན་སྙིང་གར་མནན། །ཡེ་ཤེས་རང་འོད་འཁྲུགས་པའི་ཀློང་ན་འགྱིང་། །དེ་ཡི་ཕྱོགས་བཞིར་ཤར་དུ་མཁའ་འགྲོ་མ། །ལྷོ་རུ་གསང་བའི་གོ་རི་ནུབ་ཏུ་ནི། །མཆུ་མ་བྱང་དུ་རྡོ་རྗེ་མཁའ་འགྲོ་མ། །མཚམས་བཞིར་བུམ་ཡེ་པའི་སྟེང་དུ་ཐོད་པ་བཞི། །དེ་རྒྱབ་ཕྱོགས་བཅུར་ཤར་དུ་གོ་རི་མ། །ལྷོ་རུ་ཙོ་རི་ནུབ་ཏུ་བེ་ཏ་ལི། །བྱང་དུ་གྷསྨ་རི་དང་དབང་ལྡན་དུ། །པུཀྐ་སི་དང་ཤར་ལྷོར་ཤ་ཝ་རི། །ལྷོ་ནུབ་ཙན་ལི་དང་ནུབ་བྱང་དུ། །ཌོམྦྷི་ནི་དང་སྟེང་དུ་མཁའ་སྤྱོད་མ། །འོག་ཏུ་ས་སྤྱོད་མ་རྣམས་སྐུ་མདོག་དམར། །ཞལ་གཅིག་ཕྱག་གཉིས་ཨུཏྤལ་མདའ་གཞུ་འགེངས། །
བརྐྱང་བསྐུམ་གར་སོགས་ཆ་ལུགས་གཙོ་མོ་འདྲ། །ཀུན་གྱི་གནས་གསུམ་ཨོཾ་ཨཱཧཱུྃ་གསུམ་འཕྲོས། །གཙོ་བོའི་ཐུགས་ཀར་རང་འདྲའི་ཡེ་ཤེས་སེམས། །དེ་ཡི་ཐུགས་ཀར་ཏིང་འཛིན་སེམས་དཔའ་ཧཱུྃ། །འཁོར་ཀུན་ཐུགས་ཀར་མིང་ཡིག་དང་པོ་ལ། །ཐིག་ལེས་བརྒྱན་པ་རྣམས་ལས་འོད་ཟེར་འཕྲོས། །འོག་མིན་གནས་དང་རང་འདྲ་ཡེ་ཤེས་པ། །ནམ་མཁར་སྤྱན་དྲངས་བཛྲ་ས་མཱ་ཛ། །རང་གི་ཐུགས་ལས་སྤྲུལ་པའི་མཆོད་པ་ནི། །རྒྱ་མཚོས་མངོན་པར་མཆོད་དོ་པཱུ་ཛ་ཧོ། །ཛཧཱུྃ་བཾ་ཧོས་དམ་ཡེ་དབྱེར་མེད་འདྲེས། །སླར་ཡང་དབང་ལྷ་རིགས་ལྔ་འཁོར་དང་བཅས། །ནམ་མཁར་སྤྱན་དྲངས་སྣ་ཚོགས་མཆོད་པས་མཆོད། །བདག་ལ་ཡེ་ཤེས་ལྔ་ཡི་དབང་བསྐུར་སྩོལ། །གསོལ་བཏབ་མོད་ལ་རིགས་ལྔས་བྱིན་གྱིས་བརླབས། །ཡུམ་ལྔས་བདུད་རྩི་བུམ་པས་དབང་བསྐུར་བས། །དྲི་མ་ཀུན་དག་བདུད་རྩིས་སྐུ་ལུས་གང་། །ཆུ་ལྷག་ཡར་ལུད་གཙོ་བོར་འོད་།དཔག་མེད། །འཁོར་རྣམས་ཀུན་ལ་གཙོ་མོས་དབུ་བརྒྱན་གྱུར། །རང་གི་ཐུགས་ལས་སྤྲུལ་པའི་ལྷ་མོའི་ཚོགས། །ནམ་མཁའ་གང་བས་ཉེར་སྤྱོད་འདོད་ཡོན་ལྔ། །སྣ་ཚོགས་
མཆོད་པས་བདག་བསྐྱེད་ལྷ་རྣམས་མཆོད། །ཀུ་རུ་ཀུལླེ་སརྦ་པཱུ་ཛ་ཧོ༔ རྡོར་ཕྲེང་ནས་བསྟོད་པ་ནི། བརྩེ་བས་རྗེས་ཆགས་པདྨ་རཱ་གའི་མདོག །ཞལ་གཅིག་ཕྱག་བཞི་ཞབས་གཉིས་མཛེས་པའི་སྐུ། །མདའ་གཞུ་ཨུཏྤལ་དབང་གི་ལྕགས་ཀྱུ་འཛིན། །བཅོམ་ལྡན་རིག་བྱེད་མ་ལ་ཕྱག་འཚལ་བསྟོད། །ནང་མཆོད་མཐེབ་སྲིན་གྱིས་གཏོར་ཞིང་། །རྡོ་རྗེ་འཆང་ཆེན་ཡེ་ཤེས་མཁའ་འགྲོ་མ། །རྡོ་རྗེ་གདན་པ་རསྨི་རཀཱི་ཏི། །བིཀཱ་དེ་ཝ་པཎ་ཆེན་ཤཱཀྱ་ཤྲཱི། །པཎ་ཆེན་བྷཱུ་མི་ཤྲཱི་དང་བི་མ་ཤརའི། །རིག་འཛིན་པཎ་གྲུབ་ཞལ་དུ་ཨོཾ་ཨཱཧཱུཾ། །ཟངས་དཀར་ལོཙྪ་སྐྱི་སྟོན་འཇམ་དབྱངས་གྲགས། །ཀུན་མཁྱེན་དོལ་བུ་མ་ཏི་པཎྜིཏ། །གཞོན་ནུ་བློ་གྲོས་ངོར་ཆེན་རྡོ་རྗེ་འཆང་། །གུ་ཎ་ཤི་དང་དཔལ་འབྱོར་དོན་གྲུབ་དང་། །སྤྱན་སྔ་ཆོས་གྲགས་རིན་ཆེན་ཕུན་ཚོགས་པ། །ཆོས་རྒྱལ་ཕུན་ཚོགས་དཀོན་མཆོག་རཏྣ་དང་། །རྗེ་བཙུན་དཀོན་མཆོག་ཕྲིན་ལས་རྣམ་རྒྱལ་དང་། །ཀརྨ་ཆགས་མེད་བརྩོན་འགྲུས་རྒྱ་མཚོ་སོགས། །རྩ་བརྒྱུད་བླ་མའི་ཞལ་དུ་ཨོཾ་ཨཱཧཱུཾ། །ཡི་དམ་བཅོམ་ལྡན་འདས་མ་རིག་བྱེད་མ། །རྡོ་རྗེ་མ་སོགས་ལྷ་མོ་བཅུ་བཞིའི་བསྐོར། །རྒྱུད་ཀྱི་སྲུང་མ་མགོན་པོ་གྲི་ཐོད་
ཅན། །ལྷ་མོའི་བཀའ་སྡོད་གནོད་སྦྱིན་མོ་ལ་སོགས། །ཡི་དམ་ཆོས་སྐྱོང་ཞལ་དུ་ཨོཾ་ཨཱཿཧཱུྃ། །བདུད་རྩིས་མཉེས་ནས་མཆོག་ཐུན་དངོས་གྲུབ་སྩོལ། །ཨོ་ཀུ་རུ་ཀུལླེ་ཀཱ་ཡ་ཝཱཀྐ་ཙིཏྟ་སིདྡྷི་ཧཱུྃ། ཅེས་བདུད་རྩི་ལྕེ་ལ་བཞག་གོ །རང་གི་ཐུགས་ཀར་ཡེ་ཤེས་སེམས་དཔའ་ཡི། །ཐུགས་ཀར་ཉི་སྟེང་ཧཱི༔ཡིག་དམར་པོའི་མཐར། །སྔགས་ཕྲེང་གཡས་སུ་བཀོད་པ་གཡོན་དུ་འཁོར། །པདྨ་རཱ་གའི་ཕྲེང་བ་འཁོར་བ་བཞིན། །དེ་ལས་འོད་ཟེར་དམར་པོ་གློག་ལྟ་བུ། །ཕྱོགས་བཅུའི་འཇིག་རྟེན་ཁམས་རྣམས་ཁྱབ་པར་འཕྲོས། །སངས་རྒྱས་བྱང་སེམས་ཀུན་གྱི་བྱིན་རླབས་དང་། །ལྷ་མི་འགྲོ་བ་ཀུན་གྱི་ཚེ་བསོད་ནམས། །འཇིག་རྟེན་ཁམས་ཀྱི་རྩི་སྨན་རིན་ཆེན་ཚོགས། །ཉི་ཟླ་ནོར་བུའི་བཅུད་རྣམས་ཐམས་ཅད་བསྡུས། །བདག་ལ་ཐིམ་པས་བསོད་ནམས་གཟི་བརྗིད་སྟོབས། །ཡར་ངོའི་ཟླ་བཞིན་འཕེལ་ཞིང་རྒྱས་པར་གྱུར། །ཨོ་ཀུ་རུ་ཀུལླེ་ཧཱུྃསྭཱ་ཧཱ། །ཙནྡན་དམར་པོའི་ཕྲེང་བ་བགྲང་བྱ་ཞིང་། །འབུམ་ཕྲག་བཟླས་པ་གྲངས་ཀྱི་བསྙེན་པ་སྟེ། །དུས་ངན་བསོད་ནམས་དམན་ཕྱིར་བཞི་འགྱུར་གསུངས། །ཟླ་བ་དྲུག་གམ་ཟླ་གཅིག་དུས་བསྙེན་ཏེ། །རྟགས་ནི་རྨི་ལམ་དངོས་ཉམས་ཞལ་མཐོང་ངམ། །གསུང་ཐོས་
ལུང་སྟོན་ཁྲི་ལ་འདུག་པ་དང་། །དར་ཕྱར་རོལ་མོ་སྐད་བཟང་ཡུན་རིང་སྒྲོག །གོས་གདན་དམར་པོ་བཟང་པོའི་སྟེང་འདུག་སོགས། །སྤྱི་དང་མཚུངས་པར་རིགས་པས་ཤེས་པར་བྱ། །ཐུན་མཚམས་སམ་ནི་དུས་བཟང་མཆོད་པའམ། །བདག་ཉིད་འཇུག་གམ་སློབ་མ་རྗེས་འཛིན་དང་། །བསྒྲུབ་པའི་དུས་སུ་བདག་མདུན་བུམ་བསྐྱེད་བྱ། ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སྭ་བྷ་ཝ་སོགས། ཧཱུྃ་ལས་མཚན་ཉིད་ཡོངས་རྫོགས་བུམ་པའི་ནང་། །ཨོ་ཏབྷེ་ཏབྷེ་མ་ཧཱ་ཏབྷེ་སྭཱ་ཧཱ། ལྷ་ཆུ་དལ་འགྲོས་བུམ་པར་འཁྱིལ་ནང་དང་། །མདུན་བསྐྱེད་དཀྱིལ་འཁོར་མི་དམིགས་ངང་ཉིད་ལས། །ཨེ་ལས་ཆོས་འབྱུང་དཀར་པོ་ཆོས་དབྱིངས་ཁྱབ། །དེ་ནང་འབྱུང་བ་རིམ་བརྩེགས་རི་རབ་སྟེང་། །སྣ་ཚོགས་པདྨ་འབུམ་ལྡན་ཉི་མའི་སྟེང་། །སྣ་ཚོགས་རྡོ་རྗེའི་ལྟེ་བར་ཧཱུཾ་ཡིག་ལས། །རིན་ཆེན་སྣ་ཚོགས་ལས་གྲུབ་གཞལ་ཡས་ཁང་། །ནང་ནས་རིམ་བཞིན་དམར་ལྗང་སྔོན་པོ་དང་། །སེར་པོ་དཀར་པོ་རྩིག་པ་རིམ་པ་ལྔ། །དེ་སྟེང་གསེར་གྱི་ཕ་གུ་ཕྲ་ཡིས་མཛེས། །རིན་ཆེན་བྲེ་ཕུལ་གསེར་གྱི་སྐེ་རགས་བཞི། །ཆུ་སྲིན་ཁ་ནས་དྲ་བ་དྲ་ཕྱེད་དང་། །རྔ་ཡབ་མེ་ཏོག་ཕྲེང་བ་མེ་ལོང་དང་། །ཟླ་བ་རླུང་གིས་བསྐྱོད་པས་རྣམ་པར་མཛེས། །བྱ་འདབ་ལས་འཕྱང་རིན་ཆེན་
ཤར་བུ་དང་། །སྟེང་དུ་མདའ་ཡབ་པདྨ་ཕྱེད་པའི་དབྱིབས། །དེ་དག་བར་དུ་རྒྱལ་མཚན་བ་དན་དང་། །རྔ་ཡབ་གདུགས་དང་དར་དཔྱང་རྒྱན་གྱིས་སྤྲས། །ཕྱི་ཡི་སྣམ་བུར་མཆོད་པའི་ལྷ་མོའི་བསྐོར། །སྟེང་ནི་ཕྱུར་བུ་རིན་ཆེན་ཏོག་གིས་བརྒྱན། །གྲུ་བཞི་སྒོ་བཞི་སྒོ་ཁྱུད་མཚམས་དང་ཟུར། །ཟླ་ཕྱེད་ལ་གནས་རྡོ་རྗེ་ནོར་བུས་སྤྲས། །སྒོ་བཞིའི་མདུན་དུ་སྟེགས་བུ་གྲུ་བཞིའི་སྟེང་། །རྟ་བབས་སྣམ་བུ་བཅུ་གཅིག་རྩེ་མོ་ལ། །པདྨ་ལ་གནས་རི་དྭགས་ཆོས་འཁོར་བཅས། །ཕྱི་ཡི་ས་གཞི་རིན་ཆེན་འདོད་ཡོན་གང་། །པད་འདབ་རྡོ་ར་ཡེ་ཤེས་མེ་རིས་བསྐོར། །ཡེ་ཤེས་དཀྱིལ་འཁོར་ཆེན་པོ་དེ་ཡིས་རྒྱབ། །ཕྱོགས་མཚམས་འཇིག་རྟེན་རབ་འཇིགས་དུར་ཁྲོད་བརྒྱད། །རི་བརྒྱད་མཚོ་བརྒྱད་ཤིང་བརྒྱད་མཆོད་རྟེན་བརྒྱད། །མེ་བརྒྱད་སྤྲིན་བརྒྱད་ཀླུ་བརྒྱད་ཞིང་སྐྱོང་བརྒྱད། །རྣལ་འབྱོར་བརྒྱད་དང་ཕྱོགས་སྐྱོང་ཆེན་པོ་བརྒྱད། །རོ་ལང་ཀེང་རུས་ཤ་ཟ་འབྱུང་པོས་གང་། །དེ་རུ་འཚོགས་ཀུན་ལོག་པར་མི་ལྟུང་བའི། །རང་བྱུང་ཧེ་རུ་ཀ་ཡི་གནས་མཆོག་གོ །ཕོ་བྲང་ནང་གི་ས་གཞི་ཤར་ཕྱོགས་དཀར། །ལྷོ་སེར་ནུབ་སྔོ་བྱང་ལྗང་དབུས་
དམར་བའི། །དབུས་དང་ཕྱོགས་བཞི་ཕྱོགས་མཚམས་སྟེང་འོག་ཏུ། །པདྨ་དམར་དང་རོ་ཉི་ཟླ་བའི་གདན། །དབུས་དམར་ཧཱིཡིག་དམར་པོའི་འཕྲོ་འདུ་ལས། །སྐད་ཅིག་བཅོམ་ལྡན་འདས་མ་རིག་བྱེད་མ། །པདྨ་རཱ་གའི་མདོག་ཅན་གཟི་བརྗིད་འབར། །ཞལ་གཅིག་ཕྱག་བཞི་དང་པོའི་ཨུཏྤལ་གྱིས། །མདེལ་ཅན་མདའ་དང་མེ་ཏོག་དམར་པོ་ཡི། །གཞུ་གཉིས་འགེངས་པ་སྙན་གྱི་ཐད་དུ་བཀང་། །གཡས་འོག་ལྕགས་ཀྱུ་དམར་པོ་གཡོན་འོག་ཏུ། །ཨུཏྤལ་དམར་པོའི་ཞགས་པ་འདེབས་པའི་ཚུལ། །དབུ་སྐྲ་དམར་སེར་གྱེན་བརྫེས་ཐོད་སྐམ་བརྒྱན། །སྤྱན་གསུམ་དམར་ཟླུམ་གཡོན་དུ་ཡོ་བར་གཟིགས། །ཞལ་གདངས་མཆེ་གཙིགས་ལྗགས་འདྲིལ་ཁྲོ་མོའི་སྐུ། །ཐོད་རློན་དོ་ཤལ་ཕྱག་རྒྱ་ལྔ་ཡིས་བརྒྱན། །རིན་ཆེན་དར་དཔྱང་སྟག་གི་ཤམ་ཐབས་ཅན། །སྐྱིལ་ཀྲུང་ཕྱེད་པའི་གར་གྱི་པད་ཉི་དང་། །དབང་ཕྱུག་ཨུ་མ་སྒྲ་ཅན་སྙིང་གར་མནན།་།ཡེ་ཤེས་རང་འོད་འཁྲུགས་པའི་ཀློང་ན་འགྱིང་། །དེ་ཡི་ཕྱོགས་བཞིར་ཤར་དུ་མཁའ་འགྲོ་མ། །ལྷོ་རུ་གསང་བའི་གོ་རི་ནུབ་ཏུ་ནི། །མཆུ་མ་བྱང་དུ་རྡོ་རྗེ་མཁའ་འགྲོ་མ། །མཚམས་བཞིར་བུམ་
པའི་སྟེང་དུ་ཐོད་པ་བཞི། །དེ་རྒྱབ་ཕྱོགས་བཅུར་ཤར་དུ་གོ་རི་མ། །ལྷོ་རུ་ཙོ་རི་ནུབ་ཏུ་བེ་ཏ་ལི། །བྱང་དུ་གྷསྨ་རི་དང་དབང་ལྡན་དུ། །པུཥ་སི་དང་ཤར་ལྷོར་ཤ་ཝ་རི། །ལྷོ་ནུབ་ཙནྡ་ལི་དང་ནུབ་བྱང་དུ། །ཌོམྦྷི་ནི་དང་སྟེང་དུ་མཁའ་སྤྱོད་མ། །འོག་ཏུ་ས་སྤྱོད་མ་རྣམས་སྐུ་མདོག་དམར། །ཞལ་གཅིག་ཕྱག་གཉིས་ཨུཏྤལ་མདའ་གཞུ་འགེངས། །བརྐྱང་བསྐུམ་གར་སོགས་ཆ་ལུགས་གཙོ་མོ་འདྲ། །ལས་བུམ་ནང་དུ་ངོ་བོ་རྟ་མགྲིན་ལ། །རྣམ་པར་བདུད་རྩི་འཁྱིལ་པ་སྐུ་མདོག་ལྗང་། །རྒྱ་གྲམ་སྡིགས་མཛུབ་ཁྲོ་ཆས་ཡོངས་སུ་རྫོགས། །ཀུན་གྱི་གནས་གསུམ་ཨོཾ་ཨཱཿཧཱུྃ་གསུམ་འཕྲོས། །གཙོ་བོའི་ཐུགས་ཀར་རང་འདྲའི་ཡེ་ཤེས་སེམས། །དེ་ཡི་ཐུགས་ཀར་ཏིང་འཛིན་སེམས་དཔའ་ཧཱུྃ། །འཁོར་ཀུན་ཐུགས་ཀར་མིང་ཡིག་དང་པོ་ལ། །ཐིག་ལེས་བརྒྱན་པ་རྣམས་ལས་འོད་ཟེར་འཕྲོས། །འོག་མིན་གནས་དང་རང་འདྲ་ཡེ་ཤེས་པ། །ནམ་མཁར་སྤྱན་དྲངས་བཛྲ་ས་མཱ་ཛ༔ འཕགས་བཞི་སྐྱེད་བྱེད་ཆོས་སྐུ་ཡུམ་ཆེན་མོ། །གཟུགས་ཀྱི་སྐུར་སྟོན་འཕགས་མ་རིག་བྱེད་མ། །གཤེགས་དང་བཞུགས་པའི་མཚན་མ་མི་
མངའ་ཡང་། །ཆུ་ཟླ་བཞིན་དུ་གནས་འདིར་སྣང་བར་མཛོད། །པདྨ་གར་གྱི་དབང་ཕྱུག་གསང་བའི་ཡུམ། །སོ་སོར་རྟོག་པའི་ཡེ་ཤེས་ངོ་བོ་ཉིད། །པདྨ་རིགས་ཀྱི་ལྷ་མོ་ཀུན་གྱི་གཙོ། །བདེ་ཆེན་དག་པའི་ཞིང་ནས་གཤེགས་སུ་གསོལ། །སྒྲོལ་མ་མྱུར་མ་སྤྱན་ནི་གློག་ལྟར་མྱུར། །འཇིག་རྟེན་དབང་ཕྱུག་ཡུམ་གཅིག་གསང་ཡེ་མ། །དབང་བྱེད་སྒྲོལ་མ་འཇིགས་པ་ཀུན་སྐྱོབ་མ། །པོ་ཊ་ལ་ཡི་གནས་ནས་གཤེགས་སུ་གསོལ། །ཌཱཀྐི་འབུམ་གྱི་གཙོ་མོ་མཛད་པའི་ཚེ། །པདྨ་མཁའ་འགྲོ་དབང་གི་ལྷ་མོ་མཆོག །གོ་རི་མ་སོགས་ལྷ་མོ་བཅུ་བཞིར་བཅས། །མཁའ་སྤྱོད་ཨོ་རྒྱན་གནས་ནས་གཤེགས་སུ་གསོལ། །འཇིག་རྟེན་འདས་ཀྱང་འཁོར་བའི་ཆ་ལུགས་ཅན། །རྒྱ་གར་ཀུ་རུ་ཀུལླེའི་རི་བོ་ཡི། །ཕུག་པའི་དབུས་སུ་རྟག་ཏུ་གནས་བཅས་མ། །ལྷ་མོ་ཀུ་རུ་ཀུལླེ་གཤེགས་སུ་གསོལ། །ཕོ་བྲང་གཞལ་ཡས་པད་ཉི་བདུད་བཞིའི་སྟེང་། །རང་རང་གཙོ་འཁོར་སོ་སོའི་གདན་སྟེང་དུ། །བརྗིད་ཅིང་རྒྱས་པའི་ཚུལ་གྱིས་གཤེགས་སུ་གསོལ། །ཨོ་ཀུ་རུ་ཀུལླེ་ས་པཱ་རི་ཝཱ་ར་བཛྲ་ས་མཱ་ཛ་ཛ༔ ཛཧཱུྃ་བཾ་ཧོ༔ པདྨ་ཀ་མ་ལཱ་ཡེ་ཧཱུཾ། ཨནྡྷཾ་པྲ་ཏིཙྪ་སྭཱ་ཧཱ། དབང་ལྷ་སྤྱན་
དྲངས་དབང་བསྐུར་དྲི་མ་དག །ཆུ་ལྷག་ཡར་ལུད་རིགས་བདག་དབུ་བརྒྱན་གྱུར། །བདག་ལུས་ཞིང་གི་རྡུལ་སྙེད་རབ་སྤྲུལ་ཏེ། །ལུས་ངག་ཡིད་གསུམ་དང་བས་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །རབ་འབྱམས་རྒྱལ་བའི་ཞིང་ཁམས་ཐམས་ཅད་ནས། །བདག་པོའི་བཟུང་དང་མ་བཟུང་མཆོད་པའི་།ལྷ་ཡི་བདུད་རྩི་དཀར་སེར་ལྗང་དམར་དང་། །ཡན་ལག་བརྒྱད་ལྡན་ཁྲུས་ཀྱི་རྫིང་བུ་མཚོ། །པདྨ་ཀུ་མུཏ་ཏ་དང་ཨུཏྤལ་ཚལ། །ཧ་རི་སྦྲུལ་སྙིང་གླང་པོ་རྟ་མཆོག་སྟེ། །ཉི་ཟླ་ནོར་བུ་བརྒྱ་བྱིན་ཚངས་པའི་འོད། །གངྒའི་ཆུ་རྒྱུན་ཨོ་རྒྱན་མཆོད་སྦྱིན་ཆུ། །ལྷ་དབང་མི་དབང་ཞལ་ཟས་རོ་བརྒྱ་པ། །དྲི་ཟའི་རྒྱལ་པོ་བྱེ་བའི་རྒྱུད་མང་སྒྲ། །སུམ་རྩེན་བྱེ་བ་ཕྲག་བརྒྱའི་ལྟད་མོ་མཛེས། །ཚངས་པའི་རྒྱལ་པོ་སྟོང་གི་བསྟོད་དབྱངས་སྙན། །ཟག་མེད་ཚུལ་ཁྲིམས་དྲི་ཡིས་ཞིང་ཀུན་ཁྱབ། །ཡེ་ཤེས་བདུད་རྩིས་ཟག་མེད་བདེ་སྐྱིད་རོ། །དཔག་བསམ་ཤིང་ལས་འཕྱང་བའི་ལྷ་རྫས་གོས། །ཤེས་བྱེད་རྫ་ས་མཆོག་བརྒྱད་དང་རྒྱལ་སྲིད་བདུན། །ནོར་བུ་ཆ་བདུན་རྒྱལ་པོའི་ཉེར་སྤྱོད་ཚོགས། །བཀྲ་
ཤིས་གྲུབ་པའི་རྟགས་མཚན་ངོ་མཚར་བརྒྱད། །གླིང་བཞི་རི་རབ་བྱེ་བ་ཕྲག་བརྒྱ་དང་། །ལྷ་ཀླུ་མི་ཡི་ལོངས་སྤྱོད་འདོད་ཡོན་ཚོགས། །ཐམས་ཅད་བློ་ཡིས་བླངས་ཏེ་འབུལ་ལགས་ན། །བདག་ལ་ཕན་ཕྱིར་ཉིད་ཀྱི་མཐུས་བཞེས་ཤིག །པདྨ་རིགས་ཀྱི་རྗེ་བཙུན་སྒྲོལ་མ་ལ། །དུག་ལྔ་ངོ་བོ་དག་པ་ཡི། །ཟུག་འཇུག་ཡེ་ཤེས་བདེ་བའི་མཆོད་པ་འབུལ། །ཀུན་ཏུ་བདེ་བས་མཆོད་པས་མཉེས་གྱུར་ཅིག །གཞན་ཡང་རླུང་མེ་ཐོད་སྐྱེད་ཀཱ་པ་ལར། །ཤ་ལྔ་བདུད་རྩི་ལྔ་དང་ཡེ་ཤེས་ལྔ། །ཞུ་ཞིང་ཁོལ་བའི་ཡེ་ཤེས་བདུད་རྩིའི་མཚོ། །འདོད་ཡོན་སྣ་ཚོགས་རླངས་པས་ཞིང་ཀུན་ཁྱབ། །དམ་རྫས་གཏོར་ཆེན་འབར་བའི་མཆོད་པ་འདི། །རིག་བྱེད་ལྷ་མོ་བཅོ་ལྔས་དགྱེས་པར་རོལ། །དངོས་བཤམས་ཡིད་སྤྲུལ་མཆོད་གཏོར་འདི་བཞེས་ལ། །བདག་གི་རླུང་སེམས་སྣང་བ་དབང་བསྡུས་ནས། །ཚེ་གཅིག་སངས་རྒྱས་ཐོབ་པར་མཛད་དུ་གསོལ། །མཁས་གྲུབ་བཤེས་གཉེན་ཐམས་ཅད་དབང་བསྡུས་ནས། །ཐུབ་བསྟན་དར་ཞིང་རྒྱས་པར་མཛད་དུ་གསོལ། །རིགས་བཟང་བློ་གསལ་ཐམས་ཅད་དབང་བསྡུས་ནས། །བཤད་སྒྲུབ་བསྟན་པ་དར་
བར་མཛད་དུ་གསོལ། །ཚུལ་ཁྲིམས་ལྡན་པ་ཐམས་ཅད་དབང་བསྡུས་ནས། །དགེ་འདུན་སྡེ་ཆེན་ཚུགས་པར་མཛད་དུ་གསོལ། །རྒྱལ་པོ་རྒྱལ་ཕྲན་ཐམས་ཅད་དབང་བསྡུས་ལ། །ཡུལ་ཁམས་ཆོས་ལ་བསྒྱུར་བར་མཛད་དུ་གསོལ། །འབྱོར་ལྡན་ཁྱིམ་བདག་ཐམས་ཅད་དབང་བསྡུས་ནས། དགེ་འདུན་བཀུར་སྟི་འཕེལ་བར་མཛད་དུ་གསོལ། །ལྷ་ཀླུ་གཞི་བདག་ཐམས་ཅད་དབང་བསྡུས་ནས། །བཀྲ་ཤིས་བདེ་ལེགས་འཕེལ་བར་མཛད་དུ་གསོལ། །སྐྱེ་འགྲོ་ཕོ་མོ་ཐམས་ཅད་དབང་བསྡུས་ནས། །ལུས་སེམས་དགེ་ལ་སྦྱོར་བར་མཛད་དུ་གསོལ། །བདུད་རིགས་ལོག་ལྟ་ཅན་ཀུན་དབང་བསྡུས་ནས། །བསྟན་ལ་བར་ཆད་མེད་པར་མཛད་དུ་གསོལ། །འབྲུ་ནོར་ལོངས་སྤྱོད་མཁོ་དགུ་དབང་བསྡུས་ནས། །དཔལ་འབྱོར་འབད་མེད་ལྷུན་གྱིས་གྲུབ་པར་མཛོད། །ཨོ་བྷ་ག་ཝ་ཏེ་ཀུ་རུ་ཀུལླེ་ས་པཱ་རི་ཝཱ་ར། ཨི་དཾ་པུབྦེ་དྷཱུ་པེ་དཱི་པཾ་གནྡྷེ་བ་ལི་གྷིཏྟ་སརྦ་ཨརྒྱ། མ་ཀ་ར་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལན་གསུམ་དང་། སྤྲོ་ན། ཨ་ཀཱ་རོས་་དུར་ཁྲོད་ཞིང་སྐྱོང་ལ་བསྔོའོ། ཧྲཱིཿལས་བྱུང་བའི་དབང་གི་ཁ་དོག་ཅནཾ། །ཆོས་ཀུན་རོ་གཅིག་སྟོན་ཕྱིར་ཞལ་
གཅིག་མ། །དུས་གསུམ་མཁྱེན་ཕྱིར་སྤྱན་གསུམ་འགྲོ་ལ་གཟིགས། །བདུད་བཞི་རྩད་ནས་གཅོད་ཕྱིར་མཆེ་བཞི་གཙིགས། །རིགས་ལྔ་མཚོན་ཕྱིར་ཐོད་སྐམ་ལྔ་ཡིས་བརྒྱན། །ཚད་མེད་རྣམ་བཞི་མཚོན་པའི་ཕྱག་བཞི་ཡི། །དང་པོས་ཐབས་ཤེས་ཟུང་འཇུག་མདའ་གཞུ་འགེང་། །གཡས་འོག་བྱམས་པའི་ལྕགས་ཀྱུས་སྲིད་གསུམ་འགུགས། །གཡོན་འོག་སྙིང་རྗེས་ཞགས་པས་འགྲོ་བ་འཛིན། །སྲིད་པར་མི་འཁྲུལ་ཞབས་གཡས་བསྐུམ་པའི་ཚུལ། །ཞི་བར་མི་གནས་ཞབས་གཡོན་བརྐྱང་བའི་གར། །འཇིག་རྟེན་ཟིལ་གནོད་སྲིད་གསུམ་བདག་མོ་མཛད། །འདུ་བྱེད་དག་ཕྱིར་ཐོད་རློན་ཕྲེང་བ་དང་། །ང་རྒྱལ་རྣམ་དག་སྟག་གི་ཤམ་ཐབས་ཅན། །འདོད་ཆགས་རྣམ་དག་དར་དཔྱང་དམར་པོས་སྤྱིས། ཡོན་ཏན་ཀུན་རྫོགས་རིན་ཆེན་རུས་པས་བརྒྱན། །ཉི་མ་བྱེ་བའི་འོད་འཕྲོ་གཟི་བརྗིད་འབར། །བསྒོམ་པ་ཙམ་གྱིས་འཇིག་རྟེན་གསུམ་པོ་རྣམས། །དབང་དུ་སྡུད་མཛད་ལྷ་མོའི་སྐུ་ལ་བསྟོད། །ལྷ་མོའི་སྙིང་པོ་གསང་སྔགས་འབྲུ་བརྒྱད་པ། །ཁྲི་ཡིས་འཇིག་རྟེན་ཕལ་པ་ཐམས་ཅན་དབང་། །འབུམ་ཕྲག་གཅིག་གིས་མི་ཡི་རྒྱལ་པོ་རྣམས། །དེ་བཞིན་
འབུམ་ཕྲག་གཉིས་ཀྱིས་ལྷ་རྣམས་ཏེ། །འབུམ་ཕྲག་བདུན་གྱིས་ལྷ་མ་ཡིན་རྣམས་དང་། །བྱེ་བས་འཁོར་ལོས་སྒྱུར་རྒྱལ་གནོད་སྦྱིན་ཚོགས། །རིགས་དྲུག་སེམས་ཅན་ཐམས་ཅད་དབང་བསྡུད་པའི། །གསུང་མཆོག་ནུས་པར་ལྡན་ལ་ཕྱག་འཚལ་བསྟོད། །ལྷ་མོའི་ཐུགས་ནི་སྟོང་ཉིད་ཆོས་ཀྱི་སྐུ། །མཐའ་བཞི་སྐྱེ་འགག་གནས་བྲལ་ཊ་ཕྱག་རྒྱ་ཆེ། །ཉན་ཐོས་རང་རྒྱལ་སར་ནས་སེམས་དཔའི་ཚུལ། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །ཤེས་རབ་ཕ་རོལ་ཕྱིན་མ་ཡུམ་ཆེན་མོ། །ཟབ་ཅིང་རྒྱ་ཆེ་ལྷ་མོའི་ཐུགས་ལ་བསྟོད། །གང་ཞིག་འཕགས་མ་སྒོམ་བཟླས་བྱེད་པ་ན། །དུག་གི་ནད་དང་དུག་གིས་འཆི་བ་དང་། །ཤུ་བ་གཡེམ་པ་མཛེ་སོགས་ནད་ཀྱི་རིགས། །དུས་མ་ཡིན་པ་འཆི་བ་ཐམས་ཅད་ཞི། །ཀླུ་དང་དུག་སྦྲུལ་སྟག་སོགས་གཅན་གཟན་དང་། །དགྲ་དང་མཚོན་ཆ་དབུལ་ཕོངས་འཇིགས་པ་སྐྱོབ། །སྣ་ཚོགས་གཏེར་དང་གསེར་དངུལ་སྣ་ཆ་དང་། །གོས་ལ་སོགས་པའི་ནོར་རྣམས་གང་འདོད་པ། །ཐམས་ཅད་ཀུན་ལ་དབང་བསྒྱུར་ལོངས་སྤྱོད་པའི། །ཡོན་ཏན་ཀུན་འབྱུང་མ་ལ་ཕྱག་འཚལ་བསྟོད། །གླང་རྒོད་
སྟག་རྒོད་དུག་སྦྲུལ་ཆུ་སྲིན་དང་། །སྟག་དང་བསེ་དང་ཆུ་གླང་ལ་སོགས་པའི། །རིག་སྔགས་ཀྱིས་བཀུག་བཞོན་པར་བྱ་རུང་ཞིང་། །དྲག་ལྡན་ལྷ་ཀླུ་མི་ཡི་རྒྱལ་པོ་ཡང་། །གུས་ཤིང་འདུད་པས་མངག་གཞུག་ལས་བྱེད་པའི།་།ཕྲིན་ལས་ཐོགས་མེད་ལྷ་མོ་རིག་བྱེད་མ། །ཁྱེད་ཀྱིས་མཁའ་མཉམ་འགྲོ་བ་འདི་དག་ཀུན། །རང་དབང་མེད་པར་དབང་དུ་བསྡུས་ནས་ཀྱང་། །རྫོགས་པའི་སངས་རྒྱས་གོ་འཕང་ལ་བཞག་པར། །ཐུགས་བསྐྱེད་ཐུགས་དམ་སྨོན་ལམ་དེ་དག་ནི། །བདག་གིས་འདོད་དང་ཁྱོད་ཀྱིས་ཐུགས་དམ་ཅིག ། ཁྱོད་ཀྱིས་ཐུགས་བཞེད་ཕྲིན་ལས་བདག་གིས་བསྒྲུབ། །དེ་ཕྱིར་མ་གཅིག་བུ་བཞིན་བརྩེ་བས་དགོངས། །བདག་གིས་གང་གསོལ་ཕྲིན་ལས་མྱུར་འགྲུབ་མཛོད། །དེ་ནས་རྒྱས་པར་འདོད་ན། ཨོཾ། དགེ་བ་ཅན་ནི་གཟི་བརྗིད་ཆེ། །འཇིག་རྟེན་གསོ་བྱེད་སྙན་པ་ཆེ། །དབྱངས་ཅན་མ་ནི་སྤྱན་ཡངས་མ། །ཤེས་རབ་དཔལ་དང་བློ་འཕེལ་མ། །གསོ་བྱེད་མ་དང་རྒྱས་བྱེད་མ། །སྭཱ་ཧཱ་ཨོཾ་དང་འདོད་གཟུགས་མ། །སེམས་ཅན་ཀུན་ལ་ཕན་པར་བརྩོན། །གཡུལ་ལས་སྒྲོལ་བྱེད་རྒྱལ་བ་མོ། །ལྷ་མོ་ཤེས་རབ་ཕ་རོལ་ཕྱིན། །
འཕགས་མ་སྒྲོལ་མ་ཡིད་འོང་མ། རྡོ་རྔ་དུང་ནི་རྒྱས་པ་མོ། །རིག་པའི་ལྷ་མོ་ཚིག་སྙན་མ། །ཟླ་བའི་མདོག་ཅན་དཀར་མོ་ཆེ། །མི་ཕམ་གོས་ནི་སེར་མོ་ཅན། །སྒྱུ་མ་ཆེན་པོ་དཀར་ཆེན་མོ། །སྟོབ་མོ་ཆེ་ལ་ཕ་རོལ་ཕྱིན། །རྩུབ་མོ་ཆེན་མོ་གཏུམ་པ་ཆེ། །སྡང་བའི་སེམས་ཅན་བརླག་བྱེད་མ། །རབ་ཏུ་ཞི་བ་ཞི་བའི་གཟུགས། །རྣམ་པར་རྒྱལ་མ་འབར་བའི་འོད། །གློག་གི་ཕྲེང་བའི་རྒྱལ་མཚན་ཅན། །རལ་གྲི་འཁོར་ལོ་གཞུ་ཐོགས་མཚོན། །ཚོལ་བྱེད་རིག་བྱེད་ནག་མོ་ཆེ། །མཚན་མོ་ནག་མོ་མཚན་སྤྱོད་མ། །སྲུང་བྱེད་རྨོང་བྱེད་ཞི་བ་མོ། །མཛེས་མ་དགེ་བ་འགྲོ་ལྡིང་མ། །ཚངས་པ་མོ་དང་རིག་བྱེད་མ། །གསང་བ་མོ་ནི་བྲག་ཕུག་གནས། །བཀྲ་ཤིས་དོན་བྱེད་ཞི་བ་མོ། །སྐྱེས་གནས་རིག་བྱེད་ཡིད་འཕྲོག་མ། །ཐོད་པ་ཅན་ནི་ཤུགས་ཆེན་མ། །ཚངས་པ་བདེ་མ་གཞན་མི་རྒྱལ། །དང་པོ་ཆེན་པོར་སྙིང་རྗེར་གནས། །ཆུད་ཟོས་ལམ་ནི་རབ་ཟློག་མ། །མཆོག་སྟེར་དོན་བྱེད་བསྟན་པ་མོ། །བུད་མེད་གཟུགས་ལ་དཔག་མེད་གནོན། །རི་ཁྲོད་མ་དང་རྣལ་འབྱོར་མ། །གྲུབ་མོ་གཏུམ་མོ་བདུད་རྩིའི་མོ། །
ངེས་མ་ནོར་ཅན་བསོད་ནམས་མ། །སྐལ་ཆེན་སྐལ་བཟང་མཛེས་སྟོན་མ། །མཐར་བྱེད་སྐྲག་བྱེད་འཇིགས་བྱེད་མ། །དྲག་དང་བརྟུལ་ཞུགས་ཆེན་མོ་དག །འགྲོ་ལ་གཅིག་ཏུ་ཕན་བརྩོན་མ། །སྐྱབས་མེད་གུས་ལ་གསང་བ་མོ། །ངག་གི་དབང་ཕྱུག་ཞི་ཕྲ་མོ། །རྟག་པར་ཀུན་གྲོལ་རྗེས་འགྲོ་མ། །དོན་ཀུན་གྲུབ་བྱེད་བཟང་པོ་མ། །གཙང་བྱེད་གསོད་བྱེད་ནོར་གཏེར་མ། །མི་འཇིགས་བསོད་ནམས་གོ་ཏ་མ། །སྤྱན་རས་གཟིགས་དབང་གིས་གསུངས་པའི། །མཚན་བརྒྱ་རྩ་བརྒྱད་འདི་དག་གིས། །བཅོམ་ལྡན་འདས་མ་ཁྱོད་ལ་བསྟོད། །ཅེས་མཚན་བརྒྱ་རྩ་དེ་དག་གིས་བསྟོད་པ་དེ་རུང་སྟེ། ཚངས་པ་མོ་དང་རིག་བྱེད་མོ། །གསང་བ་མོ་ནི་བྲག་ཕུག་གནས། །ཞེས་གསུངས་སོ། །ཕྱག་འཚལ་ཉེར་གཅིག་ཡང་རུང་སྟེ། འདི་དབང་བྱེད་སྒྲོལ་མའོ། །ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །སོགས་བྱའོ། །བདག་མདུན་ཐུགས་ཀར་ཡེ་ཤེས་སེམས་དཔའ་ཡི། །ཐུགས་ཀར་ཉི་སྟེང་ཏིང་འཛིན་སེམས་དཔའ་ཧི། །དེ་མཐར་སྔགས་ཕྲེང་གཡོན་དུ་དྲག་ཏུ་འཁོར། །རང་གི་ཐུགས་ཀའི་སྔགས་ཕྲེང་འོད་ཟེར་ལས། །སྔགས་ཕྲེང་བྱི་རུའི་ཕྲེང་བ་ལྟ་བུར་ལང་། །སྣ་བུག་གཡོན་ནས་
ཕར་སོང་མདུན་བསྐྱེད་ཀྱི། །ཤངས་བུག་གཡས་ཞུགས་ཐུགས་ཀའི་ཧཱུྃཡིག་ལ། །གཡོན་དུ་བསྐོར་བ་གཅིག་བྱས་ཐུགས་རྒྱུད་བསྐུལ། །སྐུ་ལས་འོད་ཟེར་གློག་འོད་ལྟར་བུར་འཕྲོས། །འཁོར་རྣམས་བསྐུལ་བས་འཁོར་ཀུན་འོད་ཟེར་ནི། །དམར་པོ་ལྕགས་ཀྱུ་ལྟ་བུར་ཕྱོགས་བཅུར་འཕྲོས། །སྣང་སྲིད་འཁོར་འདས་ཚེ་བསོད་དཔལ་གྲགས་རྣམས། །འོད་ཟེར་དམར་པོའི་རྣམ་པར་ཚུར་བསྡུས་ནས། །གཙོ་མོའི་ཐུགས་ཀའི་སྔགས་ཕྲེང་ལ་ཐིམ་པས། །སྔགས་ཕྲེང་གཙོ་མོའི་ཤངས་བུག་གཡོན་ནས་ཐིམ། །བདག་གི་སྣ་བུག་གཡས་ཞུགས་ཐུགས་ཀར་ཐིམ། །བྱིན་རླབས་སྣང་སྲིད་དབང་དུ་བསྡུས་པ་དང་། །ཕྲིན་ལས་འགྲོ་བ་འདུལ་བའི་དངོས་གྲུབ་ཐོབ། །བདག་མདུན་བར་དུ་མ་སྔགས་ཕྲེང་མགལ་མེ་ཡི། །འཁོར་ལོ་བཞིན་དུ་བར་མེད་འཁོར་བར་གྱུར། །ཨོ་ཀུ་རུ་ཀུལླེ་ཧཱུྃསྭཱ་ཧཱ། ཞེས་མདུན་བསྐྱེད་དམིགས་པ་དང་བཟླས་པ་ནི་སྒྲུབ་པའོ། །རང་གི་ཐུགས་ཀའི་སྔགས་ཕྲེང་གཟུངས་ཐག་ལ། །འཁྲིལ་ཏེ་བུམ་བསྐྱེད་ཐུགས་ཀར་ཐིམ་པ་ཡི། །བུམ་པའི་ཐུགས་ཀའི་སྔགས་ཕྲེང་དྲག་ཏུ་འཁོར། །འོད་ཟེར་དམར་པོ་ཕྱོགས་བཅུར་ཁྱབ་པར་
འཕྲོས། །རྒྱལ་བ་སྲས་བཅས་དཔའ་བོ་རྣལ་འབྱོར་མ། །འཇིག་རྟེན་ལྷ་ཀླུ་འགྲོ་བ་ཐམས་ཅད་ཀྱི། །བྱང་སེམས་དཀར་དམར་བདུད་རྩི་སྤྱན་དྲངས་ནས། །ཐོད་པའི་བདུད་རྩི་དང་ནི་བུམ་ལྷར་ཐིམ། །ཟག་མེད་བདེ་བས་བུམ་ལྷ་ཐུགས་དགྱེས་ཏེ། །སྐུ་ལས་བདུད་རྩིའི་རྒྱུན་བབས་བུམ་པ་གང་། །ཨོཾ་ཀུ་རུ་ཀུལླེ་ཧཱུྃསྭཱ་ཧཱ། བུམ་སྔགས་བརྒྱ་རྩ་ལས་མི་ཉུང་བ་བཟླས་ཤིང་། ལས་བུམ་ཁྲོ་བོའི་སྐུ་ལས་བདུད་རྩིའི་ཆུ། །ཆུ་རྡུལ་ཕྲ་རགས་རྡོ་རྗེའི་རང་བཞིན་ཅན། །བགེགས་རིགས་ཀུན་འཇོམས་དག་བྱེད་བདུད་རྩིར་གྱུར། །ཨོཾ་ཨ་མྲྀ་ཏེ་ཧཱུཾ་ཕཊ་ཅེས་བརྒྱའམ་ཉེར་གཅིག་ལས་མི་ཉུང་བ་བཟླའོ། །ཨོ་ཀུ་རུ་ཀུལླེ་ས་པཱ་རི་ཝཱ་ར་བཛྲ་ཀྲོ་དྷ་ཨ་མྲྀ་ཏ་ཨབྷཾ་སོགས། ་སྒྲོལ་མ་ལས་སྣ་ཚོགས་འབྱུང་བའི་རྒྱུད་ལས་ཀུ་རུ་ཀུལླེ་ལ་བསྟོད་པ་ནི། ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་གཅལ་དུ་བཀྲམ། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་བསྟོད། །ཅེས་གསུངས་སོ། །བཅོམ་ལྡན་བདུད་རྩི་ཐལ་མོ་ལེགས་སྦྱར་ནས། །བྱང་སེམས་སྤྱི་བོར་གཤེགས་བའི་མཐུ་སྟོབས་ཀྱིས། །བདུད་བཞི་རྩད་ནས་གཅོད་པའི་དགྲ་ཐབས་
མཁན། །བཅོམ་ལྡན་ཁྲོ་བོ་ཆེན་པོར་ཕྱག་འཚལ་བསྟོད། །ཅེས་པ་གཅིག་ཤེས་ཀུན་གྲོལ་ནས་སོ། །དུང་ཆོས་ཀྱི་ཆུ་བུམ་པར་བླུགས་ལ། དུང་ཆོས་ནང་དུ་མེ་ལོང་གཟུགས་བརྙན་ལྟར། །ལྷ་ཚོགས་གསལ་བ་བུམ་ལྷ་ལ་ཐིམ་པས། །རྐྱེན་བྱས་བུམ་ལྷ་བྱང་སེམས་ངོ་བོར་ཞུ། །གསེར་འགྱུར་རྩི་ལྟར་བུམ་ཆུས་གང་རེག་ལ། །སྨིན་ཅིང་གྲོལ་བའི་ནུས་ལྡན་བདུད་རྩིར་གྱུར། །ལས་བུམ་ཁྲོ་བོས་བར་ཆད་བགེགས་བསྲུང་ཕྱིར། །བྱ་བ་མ་རྫོགས་བར་དུ་བཞུགས་པར་གསོལ། །དེ་ནས་སློབ་མ་བཞུགས་ནས། བགེགས་གཏོར་བཏང་། །རྒྱུ་མཚམས་གཅོད་སྲུང་འཁོར་བསྒོམ་པ་དང་། །མཎྜལ་དབང་བཤད་སྤྱི་ལྟར་བྱ། །བདག་འཇུག་ལ་ནི་མཎྜལ་བསྡུས་ཙམ་བྱ་སྟེ། བདག་བསྐྱེད་ཐུགས་ཀ་ནས་རང་ཐ་མལ་པའི་ལུས་སུ་ཐོན་ནས། ཤར་སྒོའི་དྲུང་དུ་འཁོད་ནས་བླ་མ་དང་མདུན་བསྐྱེད་དབྱེར་མེད་པ་ལ་ཞུ་བ་དང་། སློབ་མ་བཞུགས་ཀྱང་རང་གཙོ་རྐྱང་དུ་ཐོན་ནས་ཤར་སྒོའི་དྲུང་དུ་འཁོད་ནས་སློབ་དཔོན་གྱི་བྱ་བ་བྱེད་པའོ། །ཨོ་ཙཀྵ་བྷན་ཝ་མ་ཎ་ཡེ་སྭཱ་ཧཱ། མིག་དར་དང་། ཨོཾ་ཨ་ཁཾ་ཝི་ར་ཧཱུྃ། མེ་ཏོག་གཏད་ལ། སྐྱེ་དང་འཆི་དང་རྒས་པ་དང་། །ཆུ་སྲིན་ལ་སོགས་འཇིགས་པ་ལས། །སྲིད་པའི་མཚོ་ལས་བདག་གྲོལ་མཛོད། །ལན་གསུམ། དཀོན་མཆོག་གསུམ་ལ་
བདག་སྐྱབས་མཆི། །བྱང་ཆུབ་མཆོག་ཏུ་སེམས་བསྐྱེད་ནས། །རྟག་ཏུ་སློབ་དཔོན་བདག་གྱུར་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང། །འགྲོ་ཀུན་སངས་རྒྱས་ས་ལ་འགོད། །ཚིག་རྗེས་མ་ལན་གསུམ་རེ་བྱ། གནས་གསུམ་ཡིག་འབྲུ་གསུམ་གྱིས་མཚན། །ཨོ་ཨཱཧཱུཾ། རྡོ་རྗེས་རེག །བླ་མེད་སྔགས་ཀྱི་དམ་ཚིག་རྣམས། །བསྲུང་ཕྱིར་དམ་ཚིག་བདུད་རྩི་འཐུང་། །ཨོཾ་པཉྩ་ཨ་མྲྀ་ཏ་ཨུ་ད་ཀ་ཁ། དུང་ཆོས་ཀྱི་ཆུ་སྦྱིན། མདུན་བསྐྱེད་སྐུ་ལས་འོད་འཕྲོས་པས། །སློབ་མའི་ལུས་གང་སྒྲིབ་པ་དག །ལུས་དེ་འོད་ཀྱི་ཕུང་པོར་གྱུར། །དེ་ནས་སྐད་ཅིག་ལྷ་མོའི་སྐུ། །དམར་མོ་ཞལ་གཅིག་ཕྱག་བཞི་མ། །མདའ་གཞུ་ལྕགས་ཀྱུ་ཞགས་པའི་ཕྱག །རྒྱན་ལྡན་གར་གྱི་རྣམ་པར་འགྱིང་། །ས་བོན་འོད་ཟེར་ལྷོ་ཕྱོགས་འཕྲོས། །ཀུ་རུ་ཀུལླེའི་རི་བོ་ནས། །ལྷ་མོའི་ཐུགས་རྒྱུད་བསྐུལ་བྱས་ནས། །སྐུ་ལས་འོད་ཟེར་དམར་པོ་དང་། །སྔགས་ཕྲེང་ཕྱག་མཚན་དཔག་མེད་པ། །སྤྱན་དྲངས་སློབ་མའི་ལུས་ལ་ཐིམ། །ཨོ་ཀུ་རུ་ཀུལླེ་ཧྲཱིཿཧྲཱིཿཧྲཱིཿཨཱ་ཝེ་ཤ་ཡ་ཨཱ་ཝེ་ཤ་ཡ་ཧྲཱིཿཧྲཱིཿཧྲཱིཿགུ་གུལ་དང་སྤོས་བསྲེག་རོལ་མོ་བྱ། རྡོ་རྗེ་སྤྱི་བོ་བཞག །
ཏིཥྛ་བཛྲ། མེ་ཏོག་དོར་ཞིང་། པུཥྛ་པྲ་ཏིཙྪ་ཧོ༔ མིག་ཕྱེས་ལ། ཨོཾ་ཙཀ་པྲ་ཝེ་ཤ་ཡ་ཕཊ། དཀྱིལ་འཁོར་ལ་ལྟ་ཞིང་། ཨོཾ་བཛྲ་པུཥཱ་ཧོ། ཕྱག་འཚལ་ནས། ཨོཾ་ན་མོ་ཧཱུྃ། །ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམས་འཇོམས་པ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། གསུམ། དབང་རྫས་རིགས་ལྔ་ཡབ་ཡུམ་སྐད་ཅིག་གསལ། །འོད་དུ་ཞུ་བས་དབང་རྫས་སོ་སོ་ཡི། །རིགས་ཀྱི་བུ་ལ་རིགས་ལྔས་དབང་བསྐུར་རོ། །བུམ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཚྭ། བདུད་རྩིས་ལུས་གང་འོད་དཔག་དབུ་བརྒྱན་གྱུར། །དབང་རྫས་མེད་ན་ཕྱག་རྒྱའམ་ཡིད་ཀྱིས་བསྒོམ་ཞིང་། དབུ་རྒྱན། ཨོ་རཏྣ་མུ་གུ་ཧཱུྃ་ཨ་བྷི་ཥིཉྩ་མཱི། རྡོ་རྗེ། ཨོ་བཛྲ་ཨ་བྷི་ཥིཉྩལཾ། །དྲིལ་བུ། ཨོཾ་བཛྲ་གནྡྷེ་ཨ་བྷི་ཥིཉྩ་མཱི། རྡོར་དྲིལ་མཉམ་དུ། ཨོཾ་བཛྲ་ན་མ་ཨ་བྷི་ཥིཉྩ་མཱི། ཐོད་པར་གནས་པའི་བྱང་སེམས་དཀར་དམར་རྒྱུན། །མགྲིན་པ་ནས་ཞུགས་ལུས་གང་བདེ་སྟོང་འབར། །ཨོཾ་བཛྲ་པཉྩ་ཨ་མྲྀ་ཏ་ཨ་བྷི་ཥིཉྩ་མཱི། སིན་དྷ་ར་ལས་བཅོམ་ལྡན་འདས་མ་འཕྲོས། །ལྟེ་བར་ཐིམ་པས་གཏུམ་མོའི་མེ་འབར་བས། །སྤྱི་བོར་ཧཾ་ཡིག་ཞུ་ནས་
དགའ་བཞི་མྱོང་། །ཨོཾ་བཛྲ་ཌཱཀྐི་ནི་པྲཛྙཱ་ཨ་བྷི་ཥིཉྩནྟཾམཱཾ། གང་ལ་ཐོགས་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །འདི་ནི་བདེ་བ་མཆོག་གྱུར་པ། །བདག་མེད་གཞན་ཡང་མེད་པ་ཡིན། །ཡི་གེ་སྔགས་རྣམས་རྣམ་པར་སྤངས། །འདི་ནི་མཆོག་ཏུ་བདེ་ཆེན་ཉིད། །བདག་མེད་གཞན་ཡང་མེད་པ་ཡིན། །ཅེས་པ་ཚིག་དབང་དང་བཞིའོ། །ཕྱག་མཚན་བྱིན་ལ། ཐབས་དང་ཤེས་རབ་མདའ་གཞུ་ཡིས། །མི་ཤེས་མ་རིག་འབིག་པར་བྱེད། །མདའ་གཞུ་རྣ་བའི་དྲུང་དུ་བཀང་། །སློབ་མའི་ས་བོན་འོད་དམར་པོ། །མདའ་ལྟོང་ནས་ཞུགས་ཨུཏྤལ་གྱི། །མདེལ་རྩེ་ནས་ཐོན་འཇིག་རྟེན་གང་། །ལྷ་ཀླུ་གནོད་སྦྱིན་མི་ལ་སོགས། །འཇིག་རྟེན་ཐམས་ཅད་འོད་དམར་ཞུ། །མདེའུ་ནས་ཞུ་སྟོང་ནས་ཐོན། །རྣ་བ་གཡས་ནས་སྙིང་གར་ཐིམ། །སྣང་སྲིད་དབང་བསྡུས་དབང་ཐོབ་ཤོག །ཨོཾ་བཛྲ་ཌཱཀྐི་ནཱི་སརྦ་ཨབྷི་ཥིཉྩནྟཾ། སརྦ་ཏ་ཐཱ་ག་ཏ་ས་མ་ཡེ་ཧཱུྃ། ཨུཏྤལ་མཛེས་པ་ལྷ་མོའི་ཕྱག་མཚན་ཉིད། །དེ་རིང་བུ་ཁྱོད་ལ་ནི་སྦྱིན་པར་བྱ། །འཁོར་བའི་འདམ་ནས་འདྲེན་བྱེད་པ། །རྒྱལ་བའི་ཕྱག་མཚན་ལྕགས་ཀྱུ་ཟུང་། །ཨོཾ་བཛྲ་ཌཱཀྐི་ནཱི་སརྦ་ཨབྷི་ཥིཉྩམཱཾ།
མཾ། སརྦ་ཏ་ཐཱ་ག་ཏ་ས་མ་ཡེ་ཧཱུཾ། རྡོ་རྗེ་འཁོར་ལོ་རིན་པོ་ཆེ། །པདྨ་རྡོ་རྗེ་རྒྱ་གྲམ་རྣམས། །མཁའ་འགྲོ་རྣམས་ཀྱི་ཕྱག་མཚན་ཏེ། །དེ་རིང་ཁྱོད་ཀྱི་བཟུང་བར་བྱ། །རྟག་ཏུ་མཁའ་འགྲོས་བྱིན་རླབས་གྱུར། །ཨོཾ་བཛྲ་ཌཱཀྐི་ནཱི་སརྦ་ཨ་བྷི་ཥིཉྩམཱཾ། སརྦ་ཏ་ཐཱ་ག་ཏ་ས་མ་ཡེ་ཧཱུྃ། མེ་ཏོག་དམར་པོའི་ཕྲེང་བ་ཕུལ་བའི་མོས་པས། བཅོམ་ལྡན་འདས་མ་བདག་ལ་སྩལ་ལགས་ཀྱི། །བཅོམ་ལྡན་འདས་མས་བདག་ལ་བྱིན་གྱིས་རློབས། གསུམ་མམ་གཅིག །སློབ་དཔོན་ཐུགས་ཀའི་སྔགས་ཕྲེང་སློབ་མ་ཡི། །ཞལ་དུ་ཞུགས་ནས་ཐུགས་ཀར་ཐིམ་པ་ལས། །འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་། །བྱང་སེམས་ཀུན་གྱི་རྫུ་འཕྲུལ་མ་འདྲེས་ཆོས། །ཡེ་ཤེས་ཡོན་ཏན་ཉན་རང་འཇིག་རྟེན་སྐྱོང་། །པཎྜི་ཏ་དང་གྲུབ་ཐོབ་མཐུ་ནུས་ཀུན། །སྔགས་ཕྲེང་རྣམ་པར་སྤྱན་དྲངས་སློབ་མར་ཐིམ། །ཨོ་ཀུ་རུ་ཀུལླེ་ཧཱུྃསྭཱ་ཧཱ། ཞེས་ལན་གསུམ། རྗེས་ཟློས། སི་ར་གནས་གསུམ་དུ་སྲིན་ལག་གཡོན་པས་བྱུགས་ཤིང་། །སིནྡྷ་ར་ཡི་མཎྜལ་སྟེང་ཉིད་ནས། །ལྷ་མོ་འཁོར་བཅས་སློབ་མར་སིབ་སིབ་ཐིམ། །ཨོཾ་ཨཱཧཱུཾ། ཡེ་ཤེས་ཆེན་པོ་ཁྱོད་སོང་བས། །དེང་ནས་རྡོ་རྗེ་སྐྱེ་
འཆི་མེད། །ཟབ་ཅིང་རྒྱ་ཆེའི་ཆོས་རྣམས་ལ། །བློ་གྲོས་ལྡན་པས་སྤྱོད་པར་གྱིས། །ཅེས་བརྗོད་ནས། གཙོ་བོས་ཇི་ལྟར་བཀའ་སྩལ་སོགས་ནས། དེ་ནས་བདག་ཉིད་དཀྱིལ་འཁོར་གྱི་ཤར་སྒོ་ནས། བདག་བསྐྱེད་ཀྱི་ཐུགས་ཀར་ཞུགས་པས་དབྱེར་མེད་པའི་ང་རྒྱལ་གྱིས། ཨོ་ཌཱཀྐི་ནཱི་ཀཱ་ཡ་ཝཱཀྐ་ཙིཏྟ་པྲ་བྷ་ཝ་ཨཱཏྨ་ཀོཉཧཾ། དེ་ནས་ཚོགས་འཁོར་བདུད་རྩི་ལྟར་བྱིན་གྱིས་བརླབས་ལ། གནས་འོག་མིན་ཆོས་དབྱིངས་ཞིང་ཁམས་ནས། །ཕ་བླ་མ་གར་དབང་རྡོ་རྗེ་འཆང་། །སྐུ་དམར་གསལ་དར་དང་རིན་ཆེན་བརྒྱན། །ཕྱག་རྡོ་རྗེ་དྲིལ་བུ་ཐུགས་ཀར་བསྣོལ། །གདན་པད་ཟླ་ཁྱུང་ཆེན་ཁྲི་ལ་བཞུགས། །འཁོར་རྩ་བརྒྱུད་བླ་མ་སྤྲིན་ལྟར་གཏིབས། །སྐུ་འཇའ་འོད་ཐིག་ལེ་ཤིགས་སེ་ཤིག །གསུང་གསང་སྔགས་ཆོས་སྒྲ་དི་རི་རི། །ཐུགས་བརྩེ་བའི་འཛུམ་མདངས་ཤིགས་སེ་ཤིག །ངེད་བུ་སློབ་ཚོགས་ཀྱི་དཔོན་ལ་བྱོན། །བཅུད་འཆི་མེད་བདུད་རྩི་ཚོགས་མཆོད་བཞེས། །དོན་ཕྱག་རྒྱ་ཆེན་པོའི་དངོས་གྲུབ་གནོངས། །ཕ་ཁྱེད་དང་དགོངས་པ་མཉམ་པ་ཞིག །དུས་ད་ལྟ་ཉིད་དུ་བྱིན་གྱིས་རློབས། །ནུབ་བདེ་ཆེན་འབར་བའི་ཞིང་ཁམས་ནས། །དཔལ་རིགས་ཀྱི་མགོན་པོ་འོད་དཔག་མེད། །སྐུ་དམར་
གསལ་མཚན་དང་དཔེ་བྱད་འབར། །ཕྱག་ལྷུང་བཟེད་ཚེ་ཡི་བུམ་པ་བསྣམས། །གདན་མཛེས་བྱེད་རྨ་བྱའི་ཁྲི་ལ་བཞུགས། །འཁོར་སེམས་དཔའ་སེམས་མ་སྤྲིན་ལྟར་འཁྲིགས། །སྐུ་འོད་ཟེར་སངས་རྒྱས་ཞིང་ཀུན་གསལ། །གསུང་ཚངས་དབྱངས་དྲུག་ཅུ་སྙན་པའི་སྒྲ། །ཐུགས་འགྲོ་བ་ཀུན་ལ་རྟག་ཏུ་དགོངས། །ངེད་འདིར་འཚོགས་ཚོགས་ཀྱི་དཔོན་ལ་བྱོན། །ཚོགས་ཟག་མེད་བདུད་རྩིའི་མཆོད་པ་བཞེས། །དོན་འཆི་མེད་ཚེ་ཡི་དངོས་གྲུབ་གནོངས། །བདག་འཕོས་ཚེ་ཁྱོད་ཀྱི་ཞིང་ཁམས་སུ། །དེར་སྐྱེ་བར་ད་ལྟར་བྱིན་གྱིས་རློབས། །ལྷོ་ཀུ་རུ་ཀུལླེའི་རི་ཕུག་ནས། །ཡུམ་བཅོམ་ལྡན་ལྷ་མོ་རིག་བྱེད་མ། །སྐུ་པདྨ་རཱ་གའི་རི་བོ་འདྲ། །ཕྱག་མདའ་གཞུ་ལྕགས་ཀྱུ་ཨུཏྤལ་བསྣམས། །གདན་དབང་ཕྱུག་དགྲ་ཅན་ཞབས་ཀྱིས་མནན། །འཁོར་གནས་གསུམ་མཁའ་འགྲོ་སྤྲིན་ལྟར་གཏིབས། །སྐུ་རིན་ཆེན་རུས་རྒྱན་ཁྲ་ལ་ལ། །གསུང་རིག་སྔགས་འབྲུག་སྒྲ་འུ་རུ་རུ། །ཐུགས་སྣང་སྲིད་དབང་བསྡུད་ཧྲི་ལི་ལི། །མ་འདིར་གཤེགས་བུ་ཡི་ཚོགས་དཔོན་མཛོད། །ཚོགས་ཤ་ལྔ་བདུད་རྩི་ལྔ་པོ་བཞེས། །དོན་ཁམས་གསུམ་དབང་བསྡུད་
དངོས་གྲུབ་གནོངས། །མ་ཁྱེད་ལྟར་སྣང་སྲིད་ཟིལ་གནོན་པར། །བུ་ད་ལྟ་ཉིད་དུ་བྱིན་གྱིས་རློབས། །ནུབ་ཨོ་རྒྱན་སྤྲུལ་པའི་ཞིང་ཁམས་ནས། །འཁོར་གོའུ་རི་ལྷ་མོ་བཅུ་བཞི་པོ། །སྐུ་མཚལ་མདོག་རུས་རྒྱན་དར་དཔྱང་འཕུར། །ཕྱག་ཨུཏྤལ་མདའ་གཞུ་ཝངས་སེ་ཝང་། །གདན་པད་ཉི་བམ་གྱི་སྟེང་ལ་འགྱིང་། །འཁོར་ཌཱ་ཀི་བྱེ་བ་སྤྲིན་ལྟར་གཏིབས། །སྐུ་བྱིན་རླབས་མེ་དཔུང་འུ་རུ་རུ། །གསུང་ཕོ་ཕོ་ཨ་ར་ལི་ཡི་སྒྲ། །ཐུགས་བསྒྲུབ་པ་པོ་ལ་དུངས་སེ་དུང་། །ངེད་འདིར་འཚོགས་ཚོགས་ཀྱི་དཔོན་ལ་བྱོན། །ཚོགས་བདུད་རྩིར་བྱིན་རློབས་དགྱེས་པར་རོལ། །དོན་མཆོག་དང་ཐུན་མོང་དངོས་གྲུབ་གནོངས། །སྲིང་ཁྱེད་དང་སྐལ་པ་མཉམ་པ་ཞིག །དུས་ད་ལྟ་ཉིད་དུ་བྱིན་གྱིས་རློབས། །ཡུལ་ཉི་ཤུ་རྩ་བཞིའི་གནས་མཆོག་ནས། །རྒྱུད་བཀའ་ཡི་སྲུང་མ་གྲི་ཐོད་ཅན། །སྐུ་མཐིང་ནག་ཆར་སྤྲིན་གཏིབས་པ་འདྲ། །ཕྱག་ཟངས་གྲི་ཐོད་པ་ཟང་སེ་ཟང་། །གདན་པད་ཉི་བམ་ཆེན་གདན་ལ་བཞུགས། །འཁོར་ཌཀྐི་བྱེ་བ་བསམ་མི་ཁྱབ། །སྐུ་དུར་ཁྲོད་རྒྱན་ཆ་སྤུངས་སེ་སྤུང་། །གསུང་དྲག་སྔགས་འབྲུག་སྒྲ་དི་རི་རི། །ཐུགས་གསང་
སྔགས་བསྟན་པ་དུངས་སེ་དུང་། །འདིར་ཚོགས་ཀྱི་མཆོད་པ་བཞེས་ཕྱིར་བྱོན། །དགྲ་གདོན་བགེགས་ཚོགས་སུ་བསྟིམས་ལ་རོལ། །དོན་ཕྲིན་ལས་རྣམ་བཞིའི་དངོས་གྲུབ་གནོངས། །མི་བདག་གི་ཅི་བསམ་འགྲུབ་པ་ཞིག །དུས་ད་ལྟ་ཉིད་དུ་ཕྲིན་ལས་མཛོད། །དེ་ནས་ཚོགས་ཕུད་གཏོར་མ་བྲན། ཨོ་གུ་རུ་བཛྲ་དྷ་ར་ཨི་དཾ་བྷ་ལིཾ་ཏ་ཁཱ་ཧི། ཨོ་ཀུ་རུ་ཀུལླེ་ཧིས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁཱ་ཧི། ༀ་མ་ཧཱ་ཀཱ་ལ་སརྦ་ཀི་ནཱི་ཨི་དཾ་བྷ་ལཾ་ཏ་ཁཱ་ཧི། ཚོགས་དྲངས་ལ། རྫས་ཤ་ཆེན་ལྔ་དང་བདུད་རྩི་ལྔ། །ཡེ་གདོད་ནས་རྣམ་དག་བདུད་རྩི་སྟེ། །དེ་མ་གཏོགས་འཁྲུལ་པས་གཙང་སྨེར་འཛིན། །ད་ཆོས་དབྱིངས་མཉམ་ཉིད་ཨ་ལ་ལ་ཧོ། །ཞེས་ཕུལ། ཧོ༔ སྤང་བྱ་དུག་ལྔའི་ཕ་རོལ་ན། །བླང་བྱའི་ཡེ་ཤེས་ལྔ་པོ་མེད། །ངེད་མ་བཅོས་ལྷུག་པའི་བདུད་རྩིའི་བླང་། །དོན་མཉམ་ཉིད་བདེ་ཆེན་ཨེ་མ་ཧོ། །ཞེས་བརྗོད་ནས་རོལ་ཏེ་ལྷག་མ་བྲན། ཨ་ཀཱ་རོས་བྱིན་གྱིས་བརླབས་ནས། །གནས་ཆེན་པོ་ཉི་ཤུ་རྩ་བཞི་དང་། །ཡུལ་ཆེན་པོ་སུམ་ཅུ་སོ་གཉིས་ན། །དོན་སངས་རྒྱས་དགོངས་པ་ཡིན་མོད་ཀྱང་། །སྐུ་ཆ་ལུགས་མཛད་པ་འཁོར་བའི་ཚུལ། །མདོག་དཀར་
སེར་དམར་ལྗང་སྔོ་དང་སྨུག །རྒྱན་རུས་པ་མགོ་ཕྲེང་ཁྲག་ཞག་ཐིག །གོས་མི་ལྤགས་སྟག་ལྤགས་གླང་ཆེན་ཀོ །ཕྱག་གྲི་ཐོད་ཁ་ཊཾ་ཌཱ་མ་རུ། །སྐུ་རླུང་ནག་འཚུབ་ཅིང་མེ་དཔུང་འབར། །ལམ་བར་སྣང་ཁམས་སུ་སྐར་མ་བཞིན། །ཡར་མཐོ་རིས་གནས་སུ་ལྟད་མོ་ལྟ། །མར་ངན་སོང་སྐྱིད་སྡུག་ས་ལེར་མཐོང་། །གནས་ཚོགས་ཁང་དུར་ཁྲོད་གནས་བརྒྱད་ཉུལ། །ལས་འཇིག་རྟེན་བདེན་རྫུན་ཤན་ཡང་འབྱེད། །ཕོ་སྐྱེས་པ་ཀུན་གྱི་བླ་ཡིད་ཁྱེར། །མོ་མཛེས་མ་ཀུན་གྱི་བཀྲག་མདངས་ལེན། །སྒོམ་ཉམས་ལེན་མཁའ་གྱི་དྲོད་ཚད་ཉུལ། །ཆོས་གསང་སྔགས་བསྟན་པ་ཡིད་ལ་འཆར། །ལྷ་དཀྱིལ་འཁོར་ཀུན་གྱི་མཐའ་ལ་གནས། །ཚོགས་མཆོད་པ་ཀུན་གྱི་ལྷག་མ་སྡུད། །བཀའ་སྣང་སྲིད་ལྷ་འདྲེ་ཕོ་ཉར་འགྱེད། །གདོན་སྟོང་ཕྲག་བརྒྱད་ཅུ་རོལ་དུ་ཁྲིད། །ནད་བཞི་བརྒྱ་རྩ་བཞིའི་ས་བོན་འདེབས། །མི་དམ་ཉམས་རྣམས་ལ་ཆད་པ་གཅོད། །ཟས་བསྟན་དགྲའི་ཤ་ཁྲག་ཟས་སུ་ཟ། །ཁྱེད་དགའ་བའི་ལྷག་གཏོར་བཤམས་ནས་འབུལ། །ང་རྣལ་འབྱོར་བདག་གི་ཕྲིན་ལས་སྒྲུབས། །རྐྱེན་བར་ཆད་ནད་རིམས་དལ་ཁ་ཟློག །སྔོན་ཁས་བླངས་
བཞིན་དུ་ཕྲིན་ལས་མཛོད། །ཨོཾ་ཨུཙྪིཥྚ་བྷ་ལི་ཏ་ཁཱ་ཧི། ཞེས་ལྷག་གཏོར་ཕུལ། སྒྲུབ་པ་ཡིན་ན་གྲོལ་ཁ་བར་རྗེས་ཆོག་མི་བྱ། གྲོལ་ཁ་བདག་འཇུག་རྒྱས་པ་བླང་ལ། བུམ་ཆུ་བཏུང་བ་དང་ཁྲུས་བྱ། སིནྡྷར་གནས་གསུམ་དུ་བྱུག །མེ་ལོང་ལ་བལྟས་ནས་ཆོས་ཐམས་ཅད་མེ་ལོང་གི་གཟུགས་བརྙན་ལྟར་བསམ། བདུད་རྩི་བཏུང་བ་རྣམས་དངོས་གྲུབ་ལེན་ཆོག་ཡིན། དུས་མཆོད་སོགས་ལ་འཕྲལ་དེར་རྗེས་ཆོག་བྱ་སྟེ། ཨོ་ཀུ་རུ་ཀུལླེ་ས་པཱ་རི་ཝཱ་ར་ཨབྷཾ་སོགས། གཅིག་ཤེས་ཀུན་གྲོལ་ནས་གསུངས་པའི་བསྟོད་པ་དང་། གང་གི་དྲན་པ་ཙམ་གྱིས་ནི། །ལྷ་དང་ལྷ་མིན་མི་བཅས་རྣམས། །ངེས་པར་མངག་གཞུག་བྱེད་གྱུར་པའི། །སྒྲོལ་མ་དེ་ལ་ཕྱག་འཚལ་བསྟོད། །རབ་དཀར་ཆོས་སྤྱོད་བཅུ་དང་དགེ་བ་བཅུ། །མཁས་པའི་བྱ་བ་གསུམ་དང་ཐོས་བསམ་བསྒོམ། །བསླབ་པ་གསུམ་གྱི་དྲི་བསུང་རབ་འཕྲོ་བའི། །འདུས་པའི་པདྨོ་འདབ་སྟོང་ལྡན་གྱུར་ཅིག །ཅེས་ཆོས་ཀྱི་དབང་ཕྱུག་གིས་གསུངས་པ་དང་། སྤྲོ་ན་ཆོས་སྤྱོད་ནས། དགེ་འདུན་སྡེ་རྒྱས་སོགས༴ ཤོ་ལོ་ཀ་གཉིས་ཆོས་གྲགས་རྒྱ་མཚོས་གསུངས་པ་དང་། ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་
ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །ཅེས་དང་། བདག་མདུན་ཐུགས་ཀའི་ཧཱུྃལས་འོད་ཟེར་འཕྲོས། །སྣོད་བཅུད་ལ་ཕོག་ཐམས་ཅད་འོད་དམར་ཞུ། །མེ་ལོང་ལ་ནི་ཧས་བཏབ་ཡལ་བ་བཞིན། །ཐམས་ཅད་བདག་ཐིམ་བདག་ཀྱང་ཧྲིལ་ཐིམ། །དེ་ཡང་རིམ་གྱིས་འདུས་ནས་སྟོང་པ་ཉིད། །སླར་ཡང་ཟུང་འཇུག་གཙོ་མོ་རྐྱང་པའི་སྐུ། །འཁོར་བ་ཇི་སྲིད་འགྲོ་བའི་དོན་བྱའོ། །དགེ་བས་བདག་གཞན་འབྲེལ་ཐོགས་ཐམས་ཅད་ཀུན། །བདེ་ཆེན་ཞིང་གི་དཔལ་ལ་སྤྱོད་པར་ཤོག །ཅེས་པ་ཀྱི་རྡོ་རྗེའི་བརྟག་པ་གཉིས་པ་དང་སཾ་བྷུ་ཊའི་རྒྱུད་གཉིས་ཀ་ལས་གསུངས་པའི་དོན་པཎྜིཏ་རྡོ་རྗེ་གདན་པ་ཆེན་པོས་དབང་རྡོ་རྗེ་ཕྲེང་བའི་གྲལ་ལྷ་མོ་བཅོ་ལྔའི་དཀྱིལ་འཁོར་གསུངས་པ་དང་། སྒྲུབ་ཐབས་རྒྱ་མཚོ་བརྒྱ་རྩ་སོགས་རྒྱ་གཞུང་གཙོ་རྐྱང་ཤིན་ཏུ་མང་བ་དང་། །གཅིག་ཤེས་ཀུན་གྲོལ་ལས་བྱུང་བ་དང་། རྗེ་ཆོས་ཀྱི་དབང་ཕྱུག་གིས་མཛད་པའི་ཆོ་ག་ཐམས་ཅད་ཀྱི་དོན་བསྡུས་ཏེ། འདོན་ཆ་ཚིགས་སུ་བཅད་པ་ཁྱེར་བདེ་བ་འདི་ནི་བླ་མ་ཀརྨ་བརྩོན་འགྲུས་རྒྱ་མཚོས་ནན་ཏན་ཆེན་པོས་བསྐུལ་བ་ལ་བརྟེན་ནས་དགེ་སློང་རཱ་ག་ཨ་སྱས་ཤུགས་འཆང་རྟའི་ལོ་རྒྱལ་གྱི་ཟླ་བའི་ཡར་ཚེས་བརྒྱད་ལ་ཡོངས་སུ་གྲུབ་པར་སྦྱར་བ་མངྒ་ལཾ།