ལོག་ལྟ་ཅན་རྣམས་ཆོས་ལ་འཛུད་པའི་ཕྱིར། ༼འ༽ །མན་ངག་ཤིན་ཏུ་གསང་བ་གཅིག་བརྒྱུད་གབ། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། འཕགས་མ་སྒྲོལ་མ་རིག་བྱེད་མའི་མན་ངག་ཤིན་ཏུ་གསང་བ་ཟབ་གནད་བཀའ་རྒྱ་མ་བརྒྱུད་འཛིན་ལ་གཅིག་བརྒྱུད་བྱ་ཞིང་སྣོད་མིན་སོགས་མང་པོ་ལ་མི་སྤེལ་བ་དམ་ཚིག་གོ །དཔལ་ལྡན་བླ་མ་གར་དབང་རྡོ་རྗེ་འཆང་། །འོད་མཚན་ཅོད་པན་ཅན་དེ་ཡིད་མཚོར་གསལ། །རང་འདོད་སྐོར་ལས་མ་ཡིན་སེམས་ཅན་ཀུན། །བླ་མེད་བྱང་ཆུབ་མཆོག་ལ་འགོད་འདོད་བློས། །བྱམས་པའི་ལྕགས་ཀྱུ་སྙིང་རྗེའི་ཞགས་པ་ཡིས། །འགྲོ་ཀུན་དབང་བསྡུས་བྱང་ཆུབ་ལམ་འགོད་ནས། །སེམས་དཔའ་ཆེན་པོའི་སྤྱོད་པ་བླ་ན་མེད། །དཔེར་ན་འགྲོ་མགོན་ཆོས་རྒྱལ་འཕགས་པ་བཞིན། །འདི་འདྲའི་གདམས་ངག་མཆོག་དང་མི་ལྡན་ན། །
ཡིད་བཞིན་ནོར་བུར་འབུ་སྲིན་མི་འཁོར་ཞིང་། །མི་གཙང་དྲི་མར་ཐམས་ཅད་འདུ་བ་ལྟར། །བྱང་ཆུབ་ལུང་བསྟན་མཚན་ལྡན་བླ་མ་ལ། །སྙིགས་དུས་མི་རྣམས་མི་དད་མ་འདུ་།ལྟར་སྣང་ལེགས་ཤིང་ལོངས་སྤྱོད་གང་ཆེར་འདུ། །བསྒྲུབ་བྱ་བླ་མེད་བྱང་ཆུབ་མི་སེམས་པར། །ཚེ་འདིས་འབྲུ་ནོར་མངའ་ཐང་སྙན་གྲགས་བསྒྲུབ། །དེ་ལ་དགའ་རབ་དང་ཕྱུག་རབ་ཏུ་དགའ། །དེ་ཡིས་འདོད་དོན་བསྒྲུབ་ལ་བརྩོན་བྱེད་ཚུལ། །ཐུབ་པས་མདོ་སྡེ་རྣམས་ནས་ལུང་དུ་བསྟན། །བདུད་ཀྱིས་བྱིན་རླབས་མངའ་ཐང་རབ་འཕེལ་ཚེ། །འདོད་པ་སེམས་ལ་ཁེང་བའི་དུས་མེད་པས། །གཞན་ཕྱོགས་བརླག་པའི་ཞེ་སྡང་མེ་ལྟར་འབར། །རང་ཕྱོགས་སྐྱོང་བའི་འདོད་ཆགས་ཆུ་ལྟར་འཁྲུགས། །གཏི་མུག་༈ རྨོངས་པས་བསྟན་དང་བསྟན་འཛིན་ལ། །ལོག་ལྟ་ངན་སེམས་མཚམས་མེད་སྡིག་ལ་སྤྱོད། །དེ་ཚེ་བདུད་རྒྱལ་སྡིག་ཏོ་ལྡན་པ་རྣམས། །དགའ་མགུ་ཡི་རང་དེ་ཡི་བསྟན་པ་་སྲུང། །འཇིག་རྟེན་ཐམས་ཅད་ལོག་ལམ་དེ་རུ་སྦྱོར། །བྱང་ཆུབ་སྐྱོན་མེད་ལམ་རྣམས་རིམ་བཞིན་ནུབ། །འདི་དག་བདུད་ཀྱི་སྨོན་ལམ་མཐུ་ལས་འབྱུང་། །དེ་ཚེ་སྒྲོལ་མ་མྱུར་
མ་དཔལ་མོ་ཡི། །ཐུགས་རྗེས་བསྐུལ་ན་སྐལ་ལྡན་ལ་ལ་ཞིག །ལོག་ལམ་མི་ལྟུང་བྱང་ཆུབ་ལམ་དུ་འགྲོ། །དེ་ཕྱིར་གདམས་ངག་འདི་ནི་རྒྱལ་བ་དང་། །མཁས་གྲུབ་དུ་མས་ཐུགས་ལ་བརྟག་པའོ། །སྐལ་ལྡན་བྱང་ཆུབ་སེམས་ལྡན་མ་ལག་པ། །ཕར་ལ་བསྟན་ན་ལོག་ལམ་གྲོགས་སུ་འགྲོ། །དེ་ཕྱིར་གསང་བ་རྒྱ་ཡིས་གདབ་པའོ། །ཙན་དན་དམར་པོས་བྱུག་པའི་དཀྱིལ་འཁོར་སོགས། །མདུན་བསྐྱེད་རྟེན་རྣམས་གཞུང་གི་ཆོ་ག་ལྟར། །བདག་བསྐྱེད་ལ་བརྟེན་བསྙེན་པའི་གྲངས་ཐེམས་ནས། །མདུན་བསྐྱེད་ཆོ་ག་བཞིན་དུ་བསྐྱེད་པ་དང་། །མཆོད་བསྟོད་ཐུན་སོགས་ཐུན་གསུམ་ཐུན་བཞིར་འབད། །དེ་ཚེ་ཟབ་གསང་སྔགས་དང་དམིགས་པ་ནི། །བདག་བསྐྱེད་ཐུགས་ལས་འོད་ཟེར་དམར་པོ་འཕྲོས། །མདུན་བསྐྱེད་ཐུགས་ཀར་ཐིམ་པས་ཐུགས་བརྒྱུད་བསྐུལ། །མདུན་བསྐྱེད་འོད་ཟེར་ཉི་མ་ཤར་བ་བཞིན། །འཁོར་ཀུན་ཁྱབ་པས་གཙོ་འཁོར་ཐམས་ཅད་ཀྱི། །སྐུ་ལས་ལྷ་མོ་དམར་མོ་ཞལ་གཅིག་མ། །འཛུམ་མཛེས་ལྕགས་ཀྱུ་ཞགས་པ་ཐོགས་པ་ཡི། །ཞལ་གཅིག་ཕྱག་གཉིས་དར་དང་རིན་ཆེན་བརྒྱན། །དེ་འདྲ་
གྲངས་མེད་ནམ་མཁའ་ཁྱབ་པར་འཕྲོས། །རྒྱལ་པོ་བློན་པོ་དགེ་བཤེས་ལ་སོགས་པ། །གང་འདོད་འགྲོ་བ་སྤྱིའམ་གཅིག་ཀྱང་རུང་། །སྙིང་ཁར་ལྕགས་ཀྱུ་བཏབ་ཅིང་མགྲིན་པ་ནས། །ཨུཏྤལ་དམར་པོའི་ཞགས་པས་བཅིངས་བཞིན་དུ། །རླུང་ལྟར་མགྱོགས་པའི་ཤུགས་ཀྱིས་བཀུག་ནས་ཀྱང་། །མདུན་གྱི་མཎྜལ་སྟེང་དུ་གན་རྐྱལ་འགྱེལ། །དེ་ལ་ལྷ་མོ་ལྕགས་ཀྱུ་ཅན་གྱིས་བསྐོར། །ཕོ་ཡི་སྙིང་ག་མོ་ཡི་གསང་གནས་སུ། །ལྕགས་ཀྱུ་བཏབ་པས་རྐྱེན་བྱས་བདག་ཉིད་ལ། །རང་དབང་མེད་པར་དད་ཅིང་ཆགས་སེམས་སྐྱེས། །བཀྲག་མདངས་བསོད་ནམས་འོད་ཟེར་དམར་པོ་རུ། །རང་ལ་ཐིམ་པའི་དམིགས་པ་སྐབས་སུ་བྱ། །ཨོ་ཀུ་རུ་ཀུལླེ་ཧྲཱིཿ སརྦ་ལོ་ཀ་པ་ཤཾ་ཀུ་རུ་ཧོ་སྭཱ་ཧཱ༔ དེ་ལྟར་ཞག་བདུན་བཅུའམ་ཉེར་གཅིག་ཙམ། །བསྒྲུབ་ཅིང་ཐུན་མཚམས་ཚོགས་གཏོར་མཆོད་པ་བྱ། །རྨི་ལམ་བུད་མེད་གཞོན་ནུ་མཛེས་མའི་ཚོགས། །བདག་ལ་དགའ་ཞིང་གུས་ཚུལ་བཀུར་སྟི་བྱེད། །མེ་ཏོག་དམར་པོའི་ཕྲེང་བ་རྒྱན་དང་གོས། །བདུད་རྩི་ལ་སོགས་དངོས་གྲུབ་རྫས་རྣམས་སྟེར། །སྐྱེ་བོ་མང་པོ་ཁྲོམ་དུ་འཚོགས་པ་ཡིས། །ཕྱག་དང་བཀུར་སྟི་ཡང་ཡང་
བྱེད་པ་ནི། །དེ་ཡི་འགྲུབ་པའི་རྟགས་སུ་ཤེས་གསུངས་པ་སྟེ། །རོལ་མོ་སྐད་བཟང་སྒྲོག་པ་སྙན་གྲགས་ལྟས། །དེ་སོགས་རྟགས་ཡིག་གཞན་ལྟར་རིགས་པས་དཔྱད། །སྒྲུབ་པ་ཚར་ནས་བདག་འཇུག་བླངས་པ་དང་། །སིནྡྷ་ར་ནི་གནས་གསུམ་ཐིག་ལེ་བྱ། །བདུད་རྩི་འཐུང་ཞིང་གཏོར་མ་མི་འཆར་བྱ། །སྒྲུབ་རྫ་ས་མི་མངོན་བྱས་ལ་གསང་དམ་བཅས། །དེ་ནས་ཆོས་བཤད་དབང་བསྐུར་ལ་སོགས་པ། །དུས་ཀུན་གཙོ་མོ་རྐྱང་བའི་ང་རྒྱལ་བཟུང་། །རྒྱུན་དུ་དྲན་རྫོགས་བསྐྱེད་རིམ་བསྒོམ་པ་དང་། །བསྙེན་པ་གང་འགྲུབ་གཏོར་བསྔོས་ཁཱ་ཧི་སྦྱར། །ཡར་མར་ཚེས་བརྒྱད་སོགས་ལ་ཆོ་ག་ཡི། །དུས་མཆོད་བཟུང་ལ་ཚོགས་དང་གཏོར་མ་འབུལ། །འགྲུབ་སྦྱོར་ལ་སོགས་དུས་ཚོད་བཟང་པོ་ལ། །དབང་གི་སྦྱིན་སྲེག་སྤྱི་ལྟར་ཡང་ཡང་བྱ། །དེས་ནི་འཇིགས་པ་ཀུན་ལས་གྲོལ་བ་དང་། །མི་ཀུན་བྱམས་ཤིང་མི་ཁ་མེད་པ་དང་། །འགྲོ་དོན་འཕེལ་སོགས་གཞུང་གི་ཕན་ཡོན་དང་། །ཙན་དན་དམར་པོའི་མཎྜལ་ལ་བརྟེན་ནས། །སྒྲུབ་པ་འདི་ནི་སྒྲུབ་པའི་དངོས་གཞི་ཡིན། །སྒྲུབ་པ་ལས་སྦྱོར་གཉིས་ཀ་གཅིག་ཡིན་ནོ། །འདི་བྲིས་
སྦས་འོས་གསལ་བཀོད་ཉེས་པ་རྣམས། །ཡི་དམ་འཕགས་མ་འཁོར་དང་བཅས་ལ་བཤགས། །དགེ་བས་བྱང་ཆུབ་སེམས་ལྡན་དགེ་བཤེས་རྣམས། །མཛད་ཕྲིན་ནམ་མཁའི་མཐའ་ལས་ཁྱབ་གྱུར་ཅིག །ཅེས་པ་བརྩོན་འགྲུས་རྒྱ་མཚོས་ཕྱག་དང་མཎྜལ་བརྒྱ་རྩ་བརྒྱད་ཕུལ་ནས་རྩེ་གཅིག་ཏུ་གསོལ་བ་བཏབ་ནས། མེ་ཕོ་རྟའི་ལོ་འབུམ་འགྱུར་ཟླ་བའི་ཡར་ཚེས་བརྒྱད་ཀྱི་དགོང་མོ་དབང་གི་དུས་སུ་སྒྲོལ་མ་ཉིད་ཀྱིས་རིག་བདག་དང་དབྱེར་མེད་པའི་སྤྲུལ་སྐུ་རཱ་ག་ཨ་སྱ་རིན་པོ་ཆེའི་ཞལ་སྔ་ནས་བརྩལ་ཞིང་ཕྱག་བྲིས་སུ་མཛད་ནས་གནང་བའོ། །བསྟན་འཛིན་དམ་ཚིག་དང་ལྡན་པ་མང་པོ་ལ་ཕན་པར་སྨོན་ནོ། །ས་མ་ཡཱ༔ །ཨྠ྄ྀི།