བསོད་ནམས་བསྐྱེད་ཅིང་ལོངས་སྤྱོད་རྒྱས་པའི་ཕྱིར། ༼ར༽ །ལས་ཚོགས་གསང་སྒྲུབ་དཔག་བསམ་ཤིང་སྒྲུབ་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ལྷ་མོ་རིག་བྱེད་མའི་ལས་ཚོགས་དཔག་བསམ་ཤིང་གི་བསྒྲུབ་པ་སོགས་མན་ངག་ཤིན་ཏུ་གསང་བ་གཅིག་བརྒྱུད་ལས་ཚོགས་གསང་རྒྱ་ཅན་བཞུགས་སོ། །ན་མོ་ཨཱརྱ་ཏཱ་རེ་ཡེ། རིན་ཆེན་ཡིད་བཞིན་ནོར་བུ་ལྟར། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །དཔག་བསམ་ཤིང་གི་བསྒྲུབ་པ་ནི། །རྒྱུད་ལས་གསུངས་པའི་དོན་གསལ་བྱ། །རང་ཉིད་ཀུ་རུ་ཀུལླེ་བསྒོམ། །རང་གི་གཡོན་དུ་ཡི་གེ་བྲི། །དེ་ཉིད་ཞུ་བས་ཨུཏྤལ་དམར། །དེ་ལས་འོད་འཕྲོས་སངས་རྒྱས་མཆོད། །སེམས་ཅན་ཀུན་གྱི་དབུལ་ཕོངས་བསལ། །དེ་ཉིད་ཡོངས་སུ་གྱུར་པ་ལས། །དཔག་བསམ་ལྗོན་ཤིང་སྡོང་པོ་ནི། །ཡལ་
ག་ལོ་འདབ་རབ་ཏུ་རྒྱས། །རིན་ཆེན་སྣ་ཚོགས་ཡལ་ག་ལ། །ལྷ་རྫས་གོས་ཀྱི་ལོ་མ་ཅན། །བཀྲ་ཤིས་རྫས་རྟགས་རིན་ཆེན་བདུན། །རང་བཞིན་མེ་ཏོག་སྣ་ཚོགས་བཀྲ། །ནོར་བུ་རིགས་བྱེད་དུ་མ་ཡི། །འབྲས་བུ་སིལ་ཐོག་ལེགས་པར་བརྒྱན། །རང་གི་ཐུགས་ཀའི་འོད་ཟེར་གྱིས། །གླིང་བཞིའི་སེམས་ཅན་ཐམས་ཅད་བཀུག །ཁྲོམ་ལྟར་ས་ཕྱོགས་གང་བ་ལ། །རང་གི་ཐུགས་ཀའི་འོད་ཟེར་ནི། །རླུང་གི་ཤུགས་ཀྱིས་དཔག་བསམ་བསྒུལ། །དེ་ལས་ཟས་གོས་རིན་པོ་ཆེ། །ནོར་སོགས་འདོད་ཡོན་ཆར་འབེབས་པས། །གླིང་བཞིའི་སེམས་ཅན་ལ་སོགས་པ། ནམ་མཁའི་མཐར་ཐུག་འགྲོ་ཀུན་ལ། །གསེར་དངུལ་རིན་ཆེན་མུ་ཏིག་ཚོགས། །ཟས་གོས་ལོངས་སྤྱོད་དཔག་མེད་བྱིན། །ཐམས་ཅད་འདོད་པས་ཚིམ་པར་བསྒོམ། །དཔག་བསམ་ཤིང་ལས་མཆོད་པའི་རྫས། །བསམ་གྱིས་མི་ཁྱབ་སྤྲིན་བཞིན་འཕྲོས། །ཕྱོགས་བཅུའི་སངས་རྒྱས་ཞིང་ཀུན་ཁྱབ། །སངས་རྒྱས་ཐམས་ཅད་མཆོད་པས་མཉེས། །རང་ཉིད་བསོད་ནམས་ཚོགས་རྫོགས་དམིགས། །སླར་ཡང་ཤིང་ལས་གང་འདོད་པའི། །འབྲུ་དང་རིན་ཆེན་ཇ་དར་
གོས། །ཆར་ཆེན་ཕབ་པས་རང་གནས་དང་། །ས་ཕྱོགས་ཐམས་ཅད་གང་བ་ཡི། །གང་འདོད་དངོས་གྲུབ་ཐོབ་བསྒོམ་ཞིང་། །ཨོཾ་ཀུ་རུ་ཀུལླེ་ཧྲིབཱ་སུ་པུ་ཀུ་རུ་སྭཱ་ཧཱ། །བསྒོམ་དང་བཟླས་པ་ལ་བརྩོན་ན། །རང་ཉིད་ལོངས་སྤྱོད་ཕུན་སུམ་ཚོགས། །ནོར་གྱི་བདག་པོ་ཆེན་པོར་འགྱུར། །བསོད་ནམས་མངའ་ཐང་ཇེ་ཆེར་འཕེལ། །རྒྱུད་ལས་གསུངས་པའི་མན་ངག་བསྡེབས། །སྔགས་དང་དམིགས་པས་ཆོག་པ་ཡིན། །གདམས་ངག་ཟབ་མོ་ཡིད་བཞིན་གྱི། །ནོར་བུ་གསེར་དང་བརྗེ་བ་འཕངས། །དཔག་བསམ་ཤིང་གི་བསྒྲུབ་པ་རྫོགས། །ཟབ་བོ། །ཨྠ྄ྀི། ས་མ་ཡ། ཀྱེ་མ་གལ་ཏེ་མུ་གེ་བྱུང་བའི་དུས། །ལྷུང་བཟེད་ལ་ནི་རབ་ཏུ་བསྔགས་བྱས་ནས། །ལྷུང་བཟེད་དེ་ཉིད་ཐོགས་ཏེ་ཕྱིན་པ་ན། །འཚོ་བ་བསོད་སྙོམས་གཞན་ལས་བཟང་བ་རྙེད། །གལ་ཏེ་ལྷུང་བཟེད་མེད་པར་གྱུར་ན་ནི། །ཁ་ཕོར་ལ་ཡང་བསྔགས་པས་ཟས་འདུའོ། །ཨོ་ཀུ་རུ་ཀུལླེ་ཧཱི༔ ན་ན་ཁ་དྷེ་སིདྡྷི་པ་ཤཾ་ཀུ་རུ་ཧོ་སྭཱ་ཧཱ། བྱ་བཏང་དགེ་སློང་རྣམས་ལ་ཕན་ཕྱིར་གསུངས། །ཨྠ྄ྀི། ཚོང་ཟོག་ཀ་ཆའམ་དུད་འགྲོ་གང་ཡང་རུང་། །བརྒྱའམ་སྟོང་
སོགས་སྔགས་བཏབ་བསྐུར་པ་ན། །འགྲིམ་ཞིང་ཁེ་ནི་ཆེན་པོ་ཐོབ་པར་འགྱུར། །དེ་ཡི་སྔགས་ཀྱི་ཤམ་བུ་ངག་ཁྲིད་བཅས། །ཨོ་ཀུ་རུ་ཀུལླེ་ཧཱུྃ༔ སརྦ་རཏྣ་སིདྡྷི་པ་ཤཾ་ཀུ་རུ་ཧོ་སྭཱ་ཧཱ། དགེ་འདུན་སྤྱི་དོན་ཚོང་ལ་ཕན་ཕྱིར་གསུངས། །རང་གི་རྒས་གནོག་བདག་རྒྱལ་གཞན་ཕམ་པའི། །ཕྱིར་དུ་གསུང་མིན་དེ་དོན་བག་ཡོད་མཛོད། །ཙནྡན་དམར་པོ་རྒྱ་སྐག་སིན་དྷུ་ར། །གུར་གུམ་གྷི་ཝཾ་ཞིབ་བཏགས་དར་དམར་བཏུམ། །མེ་ལོང་སྟེང་དུ་བཞག་ནས་ངག་བཅད་ལ། །མངོན་རྟོགས་བསྒོམ་སྟེ་རྫས་དེ་མདུན་བསྐྱེད་རྟེན། །རྩ་སྔགས་ཡི་གེ་འབྲུ་ནི་བརྒྱད་པའི་མཐར། །ཨོཾ་ཨཱ་ཀྱི་མོ་དྷ་ནི་བྷ་ས་བྷ་ཝ་ཀུ་རུ་ཧོ་སྭཱ་ཧཱ། རབ་ཀྱིས་བཞི་ཁྲི་འབྲིང་གིས་སུམ་ཁྲི་དང་། །ཐ་མ་ཁྲི་ཕྲག་སྔགས་ཤིང་རྫ་ས་ལ་བཏབ། །མདུན་བསྐྱེད་འོད་ཞུ་རྫ་ས་ལ་ཐིམ་པར་བསམ། །རྫས་རྣམས་འཚག་ལ་ནམ་དགོས་རང་ཉིད་ཀྱིས། །དཔྲལ་བར་ཐིག་ལེ་ཅུང་ཟད་ཙམ་བྱས་ཏེ། །རང་ཉིད་ལྷ་མོའི་ང་རྒྱལ་བརྟན་པོ་ཡིས། །ཨོ་ཀུ་རུ་ཀུལླེ་ཧྲིསརྦ་ལོ་ཀ་པ་ཤཾ་ཀུ་རུ་ཧོ་སྭཱ་ཧཱ། །ཞེས་པའི་ཤཾ་བུ་བཟླས་ཤིང་ཕར་ལྟས་པས། །མཐོང་ཚད་ཐམས་ཅད་དབང་དུ་འདུ་
བར་གསུངས། །རང་ལ་མི་དགའ་བ་རྣམས་དགའ་བོ་དང་། །ཁྲོས་པ་རྣམས་ཀྱང་ཁྲོ་བ་ཞི་བར་འགྱུར། །གཞུང་དང་མན་ངག་བསྡེབས་པ་སྤྱི་རྒྱུ། ཏིང་འཛིན་འདི་ཡི་ནང་གི་་ཐེམ་མེད་གསང་རྒྱ་ཅན་ཡིན། མཆན། ཁོ་ནས་དབང་དུ་བྱེད་པ་ནི། །རང་ཉིད་བཅོམ་ལྡན་འདས་མ་ནམ་མཁའ་ཁྱབ། །དེ་ཡི་ཐུགས་ཀར་རང་གི་སེམས་ཉིད་ནི། །རང་འདྲའི་བཅོམ་ལྡན་འདས་མ་དེ་བས་ཆུང་། །དེ་ལས་འོད་འཕྲོས་གང་ཡིན་མི་དེ་ནི། །གཅིག་གམ་བཅུ་ཙམ་ཧ་ཅང་མི་མང་བ། །ཡཾ་ལས་རླུང་གི་དཀྱིལ་འཁོར་སྟེང་གནས་པ། །སྤྲུལ་པའི་ལྷ་མོ་ལྕགས་ཀྱུ་ཞགས་པ་ཅན། །ཕྱག་གཉིས་མང་པོས་རང་དབང་མེད་པར་བཀུག །རང་གི་རྐང་པའི་དྲུང་དུ་འགྱེལ་བ་དེ། །ཐུགས་ཀའི་ལྷ་མོའི་གྷིཡིག་འོད་ཟེར་ནི། །གློ་འདྲ་ལྕགས་ཀྱུའི་དབྱིབས་ཅན་འཕྲོས་པ་དེས། །ཕྱི་ཡི་ལྷ་མོའི་བྷ་ག་ནས་ཡར་དྲངས། །ལྟེ་བའི་ཐད་དུ་ཐལ་སྦྱར་གནས་པ་ལ། །ཐུགས་ཀའི་ལྷ་མོའི་གསང་བའི་བྷ་ག་ན། །བྱང་སེམས་དམར་པོ་མཚལ་ཁུ་ལྟར་བབས་པས། །ཁོ་ལ་ཁྲུས་བྱས་ལུས་གང་བདེ་བས་ཁྱབ། །རང་གི་ཐུགས་ཀའི་ལྷ་མོ་དེ་ཉིད་ལ། །དད་གུས་ཆགས་པས་མྱོས་ནས་འདུན་
བསྒོམ་ཞིང་། །ཨོཾ་ཀུ་རུ་ཀུ་ལླེ་ཧྲཱིཿ སརྦ་ལོ་ཀ་པ་ཤཾ་ཀུ་རུ་ཧོ་སྭཱ་ཧཱ། གཅིག་ལ་བྱེད་པ་སརྦ་ལོ་ཀའི་མལ། །གང་ཡིན་རྒེ་ཞེས་བྱའི་མིང་སྦྱར་རོ། །རྐང་པས་འགུགས་དང་གང་བྱས་འགུགས་པ་ཟེར། །ཟབ་ཅིང་གོ་དཀའ་སྙན་ངག་ཚུལ་གསུངས་པ། །འདི་རུ་བརྩེ་བས་རྗེན་པར་བརྗོད་པ་སྟེ། །སྣོད་མིན་ལ་བསྟན་ཌཱཀྐིས་ཆད་པ་ཆོད། །དེ་ལྟར་ཉེར་མཁོ་སྤྲོས་མེད་སྟབས་བདེ་བའི། །གཅིག་བརྒྱུད་ཟབ་མོའི་ལས་ཚོགས་ལྔ་པོ་འདི། །སྙིང་གི་བུ་མཆོག་བརྩོན་འགྲུས་རྒྱ་མཚོ་ཡི། །སྙིང་ནས་ནན་ཆེར་བསྐུལ་ཕྱིར་གབ་འཁྲུགས་བསལ། །རཱ་ག་ཨ་སྱས་ཙིཏྟ་ལག་ཏུ་བཞག །སྦོས་ཤིག་གསང་ཤིག་དམ་ཚིག་ས་མ་ཡ། བརྡ་ཐིམ། ལྷ་མོ་འདི་འགྲུབ་རྟགས་ཐོན་པ་དང་། རྒྱུན་གྱི་ཡི་དམ་བྱེད་མཁན་གྱིས་འདི་དག་བྱས་པ་མ་གཏོགས། རང་འདོད་ཉོན་མོངས་ཅན་གྱིས་བསྒྲུབ་ཀྱང་འགྲུབ་པར་དཀའ་གསུངས་སོ། །མཆན།