དར་རས་ལྷ་མོའི་སྐུ་ལ་བསྟེན་པ་སོགས། ས༽ །ལས་ཚོགས་ཉེར་མཁོའི་སྐོར་ཚོགས་ཉུང་བསྡུས་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ཌཱཀྐི་སུརླའི་མདོག་ཅན་གྱི་ལས་ཚོགས་ཉེར་མཁོའི་བསྐོར་ཉུང་ངུ་བསྡུས་པ་བཞུགས་སོ། །ན་མོ་ཨཱརྨ་ཏཱ་རེ་ཡེ། བསྙེན་པ་བྱེད་དུས་མེ་ལོང་སྟེང་བྱུག་པའི། །སིན་དྷུ་ར་དང་བྱང་སེམས་དམར་པོ་དང་། །མ་རྙེད་བྲག་ཞུན་གྱིས་ཚབ་རུང་བ་ཡིན། །རས་སམ་དར་ལ་ལྷ་མོའི་སྐུ་གཅིག་བྲིས། །སྐུད་དམར་དཀྲིས་ལ་སྲིན་ལག་གཡོན་པར་བཅིངས། །རང་ཉིད་ལྷ་མོའི་ང་རྒྱལ་དང་བཅས་པའི། །དབང་དུ་བསྡུ་བྱའི་སྙིང་གར་ཧཱིདམར་བསམ། །ཨོ་ཀུ་རུ་ཀུལླེ་ཧི༔ ཧཱུྃ་ཧཱུྃ་བྷད་ཏྲི་ཨུ་ཙ་ཏ་ཡ་
ཧཱུྃཿཕཊ་ཕཊ། ཅེས་བཟླས་སྐབས་སུ་རས་བྲིས་སྐུ་དེ་ལ། །མེ་ཏོག་དམར་པོ་དང་ནི་ཚོགས་འཁོར་མཆོད། །འཕྲལ་དུ་དབང་སྡུད་སྔགས་བཟླས་སྐུད་བཅིངས་བསམ། །མི་དགོས་སྐབས་སུ་སྣོད་དུ་སྦས་པས་ཆོག །ཀུ་རུ་ཀུལླེ་གཞོན་ནུའི་བསྒྲུབ་པ་ཟེར། །དེ་ནི་ཞོར་ལ་བསྒྲུབ་པས་ཆོག་པར་གསུངས། །ཨྠ྄ྀི། སྔོན་དུས་བསྙེན་པ་ལེགས་པར་ཐོན་པའི་མིས། །དྲི་ཞིམ་སྔགས་ཏེ་རང་གི་ལུས་བྱུག་ན། །སྐྱེ་བོ་ཐམས་ཅད་བྱམས་ཤིང་དགའ་བར་འགྱུར། །དེ་ཉིད་དཔའ་བོ་གཅིག་བསྒྲུབ་རྒྱུད་ནས་གསུངས། ཕར་ལ་གཏད་རྒྱུའི་ཟས་སྐོམ་ལ་སོགས་པར། །ཆས་ཀ་གང་རུང་སྔགས་བཏབ་བྱིན་གྱུར་ན། །བྱིན་པ་དེ་ཉིད་དབང་དུ་འདུ་བར་གསུངས། །དེ་ཡང་རྒྱུད་ལ་གསལ་ཞིང་གབ་བསྐུང་མེད། །ཨྠ྄ྀི། དབང་གི་སྦྱིན་སྲེག་སྤྱི་ལྟར་བྱས་པའི་ཚེ། །བསྲེག་རྫས་གཙོ་བོ་མེ་ཏོག་དམར་པོ་ལ། །རྩ་སྔགས་ཆེ་གེ་ཝ་ཤཾ་ཀུ་རུ་ཧོ། །སྦྱར་ནས་བརྒྱ་སྟོང་ཅི་མང་བསྲེགས་བྱས་པས། །མྱུར་དུ་དབང་དུ་འདུས་པར་རྒྱུད་ནས་གསུངས། །སྟབས་བདེ་བླ་མའི་མན་ངག་ཟབ་མོ་རྒྱ། །ཨྠ྄ྀི། རང་ངམ་ནད་པའི་སྤྱི་བོར་པད་ཟླའི་སྟེང་། །
ཧཱི༔ཡིག་དཀར་པོ་སྔགས་ཕྲེང་དཀར་པོས་བསྐོར། །དེ་ལས་བདུད་རྩིའི་རྒྱུན་ནི་དཀར་པོ་བབ། །ཚངས་བུག་ནས་ཞུགས་ནད་ཀུན་དག་པར་བསྒོམ། །ཨོཾ་ཀུ་རུ་ཀུལླེ་ཧཱི༔ བྷི་ཤ་ཤཱནྟི་ཀུ་རུ་སྭཱ་ཧཱ། སྒོམ་དང་བཟླས་པས་དུག་ནད་སེལ་བར་བྱེད། །རྒྱུད་དང་རྒྱ་གཞུང་མན་ངག་གསལ་བྱས་ཡོད། །ཨྠ྄ྀི། རང་ཉིད་ལྷ་མོ་གསལ་བའི་ལྕེ་ཡི་རྩེར། །དྷཱི༔ཡིག་དམར་པོ་མེ་ལྟར་འབར་བ་ཡི། །དེ་ལས་འོད་འཕྲོས་སངས་རྒྱས་བྱང་སེམས་དང། །པཎྜི་ཏ་ཡི་ཤེས་རབ་ཐམས་ཅད་བསྡུས། །རང་གི་ཁོང་དུ་ཐེམ་པར་བསྒོམ་བྱ་ཞིང་། །ཨོ་ཀུ་རུ་ཀུལླེ་ཧྲི༔ པྲཛྙཱ་པ་ཤཾ་པུཊྚི་ཀུ་རུ་སྭཱ་ཧཱ། ཞེས་བཟླས་ཤེས་རབ་འཕེལ་ཞིང་འཆད་བཟང་ངོ་། །ཨྠ྄ྀི། དེ་དག་རྣམས་ནི་ལྷ་མོ་རིག་བྱེད་བསྐོར། །ཕལ་ཆེར་བྲིས་སྐུ་ཆ་ཚང་་ལ་སོགས་པར། །རྫས་མི་རྙེད་པ་ཉམས་སུ་ལེན་དཀའ་བ། །མང་པོ་བྲི་བ་ཚག་ཆེ་དགོས་པ་གཏོར། །སྔོན་ཚེ་དཔལ་ལྡན་འབྲུག་པ་པད་དཀར་གྱིས། །དབང་བསྡུད་སྣང་བ་དགུ་འགྱུར་རྫ་ས་བསྒྲུབས་ནས། །འཇའ་ཚུགས་རིལ་བུའི་རུ་རྩི་ལ་བསྲེས་པས། །འབྲུག་པར་མི་ཀུན་དད་པ་ཡིན་ནོ་ཞེས། །འཇའ་ཚུགས་རིལ་བུར་ཕལ་ཆེར་རྣམ་རྟོག་བྱེད། །
འོན་ཀྱང་སྣང་བ་ཆོས་ལ་འགྱུར་བའི་ཕྱིར། །ཡིན་པས་ལོག་ལྟ་བྱ་བར་མི་རུང་ངོ་། །འདི་ནི་ལྷ་མོ་འདིའི་ལས་ཚོགས་ལའང་། །རྫས་སྦྱོར་དབང་སྡུད་བྱས་ཀྱང་རྙེད་དཀའ་ཞིང་། །རྫས་དེ་མི་གཙང་རྫས་སུ་འདུག་པའི་ཕྱིར། །བྱ་བར་མི་རུང་ཡིད་ལ་དྲན་བྱ་མིན། །དེ་མིན་བདེ་ཞིང་ལེགས་དང་རྫས་སླ་བའི། །ལས་སྦྱོར་སྒྲུབ་སྐོར་མ་ཚང་མེད་པ་འདི། །བླ་མ་བཱིརླ་ས་ག་རས་བསྐུལ་ནས། །རཱ་ག་ཨ་སྱས་རྒྱུད་དང་རྒྱ་གཞུང་སོགས། །མན་ངག་རྒྱ་མཚོའི་བཅུད་བསྡུས་གབ་འཁྲུགས་བསལ།། །གབ་སྦས་མེད་པར་ཉམས་སུ་བླང་བདེར་བཀོད། །འདི་བྲིས་སྦ་འོས་གསལ་བཀོད་ཉེས་པའི་ཚོགས། །ཆོས་བདག་ཌཱཀྐི་ཆོས་སྐྱོང་རྣམས་ལ་བཤགས། །ངེས་པར་བརྒྱུད་པ་འཛིན་ངེས་རེ་རེ་ལས། །མང་དུ་སྤེལ་ན་ཌཱཀྐིས་ཆད་པ་ཆོད། །དགེ་བས་འགྲོ་ཀུན་བྱང་ཆུབ་ལམ་འགོད་ཤོག །མངྒ་ལཾ། །