ཉམ་ཆུང་ཆོས་པར་དོ་བསྡོ་ཕོད་བཙུགས་ན། ༼ཨ༽ །པཀྵིའི་གིང་ནག་ཁྲེས་པོའི་ཁ་སྲུང་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། མགོན་པོ་བེར་ཅན་གྱི་ལས་མཐའ་མགོན་པོ་ཉིད་ཀྱིས་གྲུབ་ཆེན་ཀརྨ་པཀྵི་ལ་ཕུལ་བའི་གིང་ནག་པོའི་ཁྲེས་པོ་ཁ་སྲུང་ཞེས་བྱ་བའི་ཟིན་བྲིས་བཞུགས་སོ། ༈ །ན་མོ་ལོ་ཀི་ནཱ་ཐ་ཡེ། འཇིག་རྟེན་མགོན་པོ་
དྲེགས་བྱེད་བེར་ནག་ཅན། །བདུད་རྒྱལ་ཐོད་ཕྲེང་ཅན་ལ་ཕྱག་འཚལ་ལོ། །མན་ངག་ཟིན་བྲིས་བྲི་ལ་བཀའ་གནང་སྩོལ། །གྲུབ་ཆེན་པཀྴི་དབུས་སུ་མ་ཕེབས་གོང་། །མཚུར་ཕུའི་གདན་ས་སྒྲོག་ཅིང་འཇིག་ལ་ཐུག །དེ་དུས་པཀྴི་སྤུངས་རིར་བཞུགས་པའི་སྐབས། །ཆོས་སྐྱོང་བེར་ནག་ཅན་དེ་དངོས་སུ་བྱོན། །མཚུར་ཕུའི་གདན་ས་མེད་པས་འབྱོན་དགོས་ཟེར། །མི་འགྲོ་གསུངས་ཀྱང་ཅིས་ཀྱང་འབྱོན་དགོས་ཟེར། །སོང་ཡང་ཡོན་བདག་གཅིག་ཀྱང་རྙེད་ས་མེད། །ང་རྒྱལ་བྱེད་པར་ཆོག་པའི་མཐུ་ནི་མེད། །ཁྲེས་པོ་ཁ་སྲུང་གཅིག་ནི་ངས་མི་ཤེས། །གསུངས་པས་ཁྲེས་པོ་ཁ་སྲུང་ང་ཡིས་ཤེས། །ང་ནི་ལྷ་འདྲེ་ཀུན་གྱི་གཙོ་བོ་ཡིན། །ང་ལ་ལྷ་འདྲེ་ཀུན་གྱི་སྲོག་སྙིང་ཡོད། །ཁྱོད་ཀྱི་ཡོན་བདག་ང་ཡིས་བྱེད་པ་ཡིན། །ང་ཡི་སྲོག་སྙིང་ཁྱེད་ལ་འབུལ་ཟེར་རོ། །ཁྱོད་ཀྱི་སྲོག་སྙིང་ང་ལ་དགོས་པ་མེད། །དེ་བས་སྐད་ཅིག་ཉིད་ལ་རྟགས་འོང་པའི། །ཁྲེས་པོ་ཁ་སྲུང་ཡོད་ན་འདོད་གསུངས་པས། །དེ་ཡང་ང་ལ་ཡོད་པས་འབུལ་ལོ་ཟེར། །འོ་ན་ཁྱོད་ཀྱི་རོགས་ལ་ང་འགྲོ་ཟེར། །དེ་དུས་གདམས་ངག་འདི་ནི་ཕུལ་བར་བཤད། །
གདམས་ངག་འདི་ནི་སུལའང་མ་གནང་སྟེ། །ན་བུན་དབང་རྡོར་བ་དང་ཤེས་རབ་འོད། །འདི་གཉིས་ང་ལ་དྲིན་ཆེ་གསུངས་ནས་གནང་། །གཞུང་གི་དཔེ་འདི་པོད་གཞུང་ཀུན་ལ་ཡོད། །འོན་ཀྱང་ཕྱག་ལེན་མི་གསལ་སྡུམ་སྡུམ་འདྲ། །དེ་ཕྱིར་ཡོད་པ་ཙམ་ལས་ཕན་མ་ཐོགས། །འདི་ཉིད་ཉམས་སུ་ལེན་པའི་ཟིན་བྲིས་ནི། །འདི་ཡི་རྟེན་རྫས་སྔར་ནས་བསགས་དགོས་ཏེ། །སྨྱུག་རྒོད་གཙང་མ་གཅིག་ལ་རྟེན་མདའ་བཟོས། །དེ་ལ་ཕོ་རོག་དང་རུ་གཡས་པ་བསྒྲོན། །དེ་ལ་མེ་ཡི་མི་བཤུལ་སྒྲོ་རྒོད་བྱ། །དེ་ལ་གྲི་ལྕགས་ལས་བྱས་མདེའུ་སྦྱར། །མདའ་མགུལ་ནག་པོ་མདའ་ལྟོང་དམར་པོ་བྱ། །བདུད་མདའ་ལྟོང་དམར་ཞེས་བྱའི་དོན་ཡིན་ནོ། །མདའ་བཟོས་ཚར་ནས་མི་བསིལ་མི་བསྒྲིལ་ལོ། །དར་ནག་སོ་མ་ཁ་གང་མ་ཉམས་པར། །གསེར་རམ་མཚལ་གྱིས་ཧཱུྃ་ཡིག་ནག་པོ་ནི། །ཁོང་གསེང་ཡོད་པ་དཀྱིལ་བྲིས་མདའ་ལ་བཏགས། །ཁྱི་ནག་སྙིང་དང་ལུག་ནག་སྙིང་གཉིས་ལ། །རྩ་སྦུབ་ཤིང་གིས་བརྒྱངས་ནས་ལེགས་པར་སྐམ། །རྩ་སྦུབ་གཉིས་སུ་དེ་ཝ་རཀྟ་དང་། །ཤ་ས་ན་དང་ཧུ་ར་ཧེར་ནི་དང་། །ཡབ་ཡུམ་ཞལ་སྦྱོར་སྔགས་རིང་ལ་སོགས་
པ། །གསེར་རམ་མཚལ་ལམ་རྒྱ་སྣག་གིས་བྲིས་པའི། །ཤོག་དྲིལ་རྩ་སྦུབ་ནང་བཅུག་ལ་ཆས་བསྒར། །དམ་པོར་བཏུམ་ལ་མགོ་མཇུག་མ་ལོག་པར། །གཉིས་ཀ་མདའ་ཡི་མགུལ་དུ་བཏགས་པར་བྱ། །དར་ནག་གམ་ནི་ཤོག་གུར་ཙཀ་ལི་ལ། །མགོན་པོའི་སྐུ་དང་ལས་མཁན་ཤན་པ་བཞི། །འོག་གི་མངོན་རྟོགས་བཞིན་བྲིས་དེ་ཡི་རྒྱབ། །བཟླ་བྱའི་སྔགས་རིང་བྲིས་ལ་བཏགས་པར་བྱ། །དེ་ནི་སྔར་ནས་རང་གིས་འཚགས་བྱ་སྟེ། །བསྐང་གསོལ་ནམ་བྱེད་མི་གཤེགས་དེ་ལ་བསྟིམ། །ཁྱད་པར་འཁོར་གྱི་དྲེགས་བྱེད་ཕོ་ཉའི་ཚོགས། །གིང་ཀ་ར་ཡི་ཚོགས་བཅས་ཐིམ་པར་དམིགས། །མུ་ཟི་ནག་པོ་གུ་གུལ་ནག་པོ་དང་། །ཁྱི་ནག་ཁྲག་བསྲེས་སྣག་བརྡར་གཙང་མ་གཅིག །དྲི་མ་མ་སོང་ཤོག་གུར་བཏུམ་ལ་འཚགས། །མགོན་པོའི་བསྙེན་པ་སྔོན་དུ་སོང་བའི་མིས། །ལིང་ག་སྤྱི་མཐུན་མིང་དང་བཅས་པ་བྲིས། །ཐ་མ་བཟླ་བྱའི་སྔགས་རིང་མགོ་ནང་བསྟན། །སྔགས་མཇུག་ཕྱིར་ཕུད་ཐ་མ་ཛཁྲམ་བསྐོར། །རྐུན་མ་ལ་སོགས་གདམས་ངག་ཞལ་ལས་ཤེས། །ཞེ་སྡང་མ་ཡལ་འཕྲལ་དུ་བྱས་ན་མྱུར། །ཕུང་རེ་ཡོད་ན་ཤིན་ཏུ་
ལེགས་པའོ། །མེད་ན་རེ་བ་ནག་པོའི་གདན་གྱི་སྟེང་། །ནས་ཀྱིས་མཎྜལ་ཟུར་གསུམ་བྲི་བར་བྱ། །དེ་ཕྱིར་ལིངྒ་མགོ་ཕྱིར་བསྟན་ལ་བཏིང་། །མཉྫི་འམ་ནི་ཨོ་ཆུང་བྱས་པའི་སྟེང་། །དཀར་རྒྱན་མེད་པའི་དམར་གཏོར་གཅིག་བཅའ་བཞག །དེ་ཡི་མཉམ་དེར་སྔོན་གྱི་མདའ་དར་བཙུགས། །ཡི་དམ་གཏོར་བསྔོས་ཐམས་ཅད་ཆག་མེད་རིགས། །དེ་ནི་སྔ་བར་ཐམས་ཅད་ཚང་བར་བསགས། །དེ་ནས་ཕུགས་གཏོར་ལ་སོགས་བྲན་བྱས་ལ། །གསོལ་ཀ་རྒྱས་པ་བསྐང་བ་བསྡུས་པར་བཅས། །དེ་ཚེ་བདག་མདུན་མ་མགོན་བསྒོམ་པ་སོགས། །སྤྱན་འདྲེན་དམིགས་པ་དང་བཅས་ཕྲེང་བསྐོར་བསྙེན། །དཀར་གཏོར་བསྔོས་ཤིང་མགོན་པོའི་གཏོར་འབུལ་གྱི། །བཀུག་གཞུག་སྐབས་དེར་ལིང་ག་བཀུག་གཞུག་ནི། །གསུམ་མམ་བདུན་བྱ་འགུགས་སྔགས་ཉེར་གཅིག་བརྗོད། །ལྷ་དབྱེའི་གཏོར་མ་བྱིན་ལ་ལྷ་དབྱེའི་སྔགས། །གསུམ་མམ་བདུན་བརྗོད་ལྷ་དང་བྲལ་བར་བསམ། །དེ་ནས་གཏོར་འབུལ་བསྐུལ་པ་མི་བྱ་བར། །བདག་བསྐྱེད་མ་མགོན་སྟོང་པ་ཉིད་དུ་བསྡུ། །མདུན་སྐྱེད་ལྷ་ཚོགས་སྔོན་ལྟར་བཞུགས་པར་བསམ། །འདི་སྐབས་མདུན་བསྐྱེད་དེ་
ནི་མདའ་དར་ཡིན། །དེ་ནས་རང་ཉིད་སྐད་ཅིག་དྲན་རྫོགས་སུ། །མགོན་པོའི་བཀའ་སྡོད་ལས་ཀྱི་ཤན་པ་ནི། །མདོག་ནག་སྤྱན་གསུམ་རལ་པ་བར་སྣང་གཟིང་། །གཅེར་བུ་རྒྱན་མེད་ཉ་སུག་ཧྲིང་ངེ་བ། །གཡས་ཀྱི་ལྕགས་ཀྱུས་དགྲ་བོའི་སྙིང་ནས་འདྲེན། །ཁ་གདང་མཆེ་གཙིགས་ཞེ་སྡང་མེ་ལྟར་འབར། །ཁ་ནས་དགྲ་བོའི་སྙིང་རྗེན་རློན་པ་འཆའ། །སྐོམ་དུ་དགྲ་བོའི་སྐེ་ཁྲག་དྲོད་མོ་འཐུང་། །ཁ་ནས་ནད་ཀྱི་ཚྭ་ཚྭ་མེ་སྟག་འཕྲོ། །ལུས་ལ་ནད་ཀྱི་རླངས་པ་རླུང་དམར་འཚུབ། །ནད་རིགས་སྨྱོ་འབོག་ཆོ་འཕྲུལ་གཏོང་བར་བྱེད། །འབྱུང་པོ་ཐམས་ཅད་ལས་ལ་འབྱེད་པར་བསམ། །རང་གི་ངག་ནས་སྔགས་འདི་དྲག་བརྗོད་པས། །མདུན་གྱི་ལྷ་ཚོགས་ཀུན་གྱིས་རབ་བུ་བཀྱག ། ལྷ་ཚོགས་སྐུ་ལས་འཕྲོ་བའི་འོད་ཟེར་གྱིས། །ལིང་ག་དགྲ་བོ་དངོས་སུ་དབྱེར་མེད་ཅིང་། །རེ་བ་ནས་ཀྱི་མཎྜལ་ཟུར་གསུམ་ནི། །དགྲ་བོ་ཡུལ་ཁང་དགྲ་དང་དབྱེར་མེད་བསམ། །ནད་ཡམས་སྨྱོ་བརྒྱལ་ལྟས་ངན་བརྒྱད་ཅུའི་ཚོགས། །ཆར་བཞིན་བབས་ནས་སྔངས་སྐྲག་སྨྱོ་བརྒྱལ་བསམ། །སྔགས་འདི་ཤུབ་བུར་མ་ཡིན་དྲག་ཏུ་བཟླས། །བཟླ་
རོགས་མང་པོ་ཡོད་ན་འུར་འདོན་བཅུག །ཨོཾ་ཤྲཱི་མ་ཧཱ་ཀཱ་ལ་ཡཱ། ཨ་ཀརྨ་ཡ་ཨ་ཀཎ་ཡ་འདིར་ཤོག་འདིར་ཤོག་གནོད་བྱེད་ཀྱི་སྙིང་ལ་ཨ་ཀརྨ་ཡ། གནོད་པར་བྱེད་པའི་དགྲ་བོ་འདིའི་ཚད་དང་མཚན་མ་བོར། ཚད་དང་ཉི་ཟེར་བཙུགས། དུས་དང་དུས་ཚོད་བཙུག །ལས་དང་རྟགས་ཐོན་དུས་ལ་བབ། །ཨོ་གིང་ཀ་ར་གིང་ཀ་ར། དགྲ་བོའི་སྙིང་ལ་གིང་ཀ་ར་གིང་ཀ་ར། སྲོག་ལ་གིང་ཀ་ར་གིང་ཀ་ར། ཨོ་ཏིག་ཏིག་སྲོག་རྩ་ཆོད་ཆོད་རྦད་རྦད། གཏུབ་གཏུབ། རྦད་རྦད། ཆོད་ཆོད། ལྡིབ་ལྗིབ། ནོན་ནོན། །ཞེས་པའི་སྔགས་དེ་བསྒྲུབ་མི་གཅིག་ཡིན་ན། །བརྒྱ་རེའི་མཚམས་དང་ཡང་ན་སྟོང་རེའི་མཚམས། །མདའ་དར་དེ་ལ་ཕུ་ཡིས་བཏབ་ལ་སྔགས། །མང་ན་ལག་འགྲིམ་མི་བྱ་ཕུ་འགྲིམ་བྱ། །མཆོད་གཡོག་པ་ཡིས་འཛིན་ན་ལག་ལྕིབས་དགོས། །དེ་རྗེས་མདེལ་དེ་ཤོག་བུའི་ལིང་གའི་སྟེང་། །བརྒྱབ་པའི་ཚུལ་དུ་གཏུག་གཏུག་ལན་དགུ་བྱ། །དམར་གཏོར་དེ་ནི་སྔགས་ཀྱིས་མི་བསྔོ་བར། །ཡིད་ཀྱིས་ལས་མཁན་གིང་ཀ་ར་ལ་བསྔོ། །དེ་ལྟར་སྔ་དྲོ་ནས་བཟུང་སྲོད་ཀྱི་བར། །ཇི་ལྟར་ནུས་པ་སྔགས་དང་དམིགས་པ་སྤྲད། །
སྲོད་ལ་བབ་ཚེ་མགོན་པོའི་དམར་གཏོར་ལ། །གང་ཞིག་བླ་མ་ལ་སྨོད་བསྐུལ་པ་དང་། །བཙན་བདུད་ཀླུ་གསུམ་མགོན་པའི་བསྐུལ་པ་འདོན། །དེ་ནས་སྔོན་འགྲོ་དཀར་གཏོར་གསེར་སྐྱེམས་འབུལ། །དེ་ནས་ལིང་ག་ཤིང་གི་སྐམ་པར་བཅུག །རེ་བ་ནས་དང་དམར་གཏོར་དང་བཅས་ཁྱེར། །དེ་རྗེས་མགོན་པོའི་དམར་གཏོར་དར་ནག་ཁྱེར། །ནམ་ཕྱེད་མི་ཡིས་མི་མཐོང་དགྲ་ཡི་ཕྱོགས། །མཁའ་འགྲོ་གཟའ་སོགས་གདོང་ནི་མ་ཐུག་པར། །གོམ་པ་དྲུག་ཅུ་རེ་བཞིའི་ཕ་རོལ་འགྲོ། །མ་མགོན་ལྷ་ཚོགས་མཚན་དང་སྔགས་ནས་འབོད། །ལས་མཁན་གིང་ཀ་ར་ཡང་ལན་གསུམ་འབོད། །དགྲ་བོ་རྨེ་ཞེས་བྱ་བ་ལ་སྨྱོ་འབོག་ནད་ཡམས་ལྟས་ངན་བརྒྱད་ཅུའི་ཆར་པ་ད་ལྟ་ཉིད་དུ་ཕོབ་ཅིག །བརྗོད་དེ་རྗེས་ལིང་ག་ས་ལ་དྲག་ཏུ་བརྡབ། །གིང་ཀ་ར་རྒྱུག་བརྗོད་པ་དེ་བཞིན་ཏུ། །ལིང་གའི་སྟེང་དུ་དམར་གཏོར་ཆུང་བ་བརྒྱབ། །དེ་རྗེས་རེ་བ་ནས་དང་བཅས་པ་བརྡབ། །དེ་སྟེང་མདའ་དར་དེ་ཉིད་ལན་དགུ་བརྡེབ། །དེ་རྗེས་གོང་གི་སྔགས་རིང་བརྗོད་བཞིན་དུ། །མགོན་པོའི་དམར་གཏོར་བརྒྱབ་ཅིང་དར་ནག་བརྡབ། །དེ་སྟེང་ཆོས་
གོས་སམ་རང་གི་དུག་པོ་ནི། །མགོ་མཇུག་བསྒྱུར་ནས་ལན་དགུ་བརྡབ་པར་བྱ། །རང་གིས་བསྒོམ་པའི་གིང་ནི་ནག་པོ་དང་། །མགོན་པོ་འཁོར་བཅས་དགྲ་ཡུལ་སོང་བར་བསམ། །རང་ཉིད་སྐད་ཅིག་རྣམ་འཇོམས་བསྐྱེད་རིམ་བྱ། །ལིངྒ་ཚུར་ཁྱེར་ཕྱི་མིག་མི་བལྟ་འོང་། །ལིང་ག་དེ་ཉིད་གཏོར་སྒམ་འོག་ཏུ་བཅུག །གདམས་ངག་འདི་ཉིད་སྔ་དྲོ་བྱས་པ་ན། །ཕྱི་དྲོ་དགྲ་ལ་རྟགས་དང་ཆོ་འཕྲུལ་ནི། །འབྱུང་བར་མགོན་པོ་ཉིད་ཀྱིས་དམ་བཅས་སོ། །ཕ་རོལ་བསོད་ནམས་ཆེ་དང་སྲུང་ཟློག་མང་། །དེ་ལ་འཕྲལ་དུ་རྟགས་མཚན་མ་བྱུང་ན། །ཉི་ནག་མེ་གདོང་དྲག་སྔགས་ཐེབ་པའི་དུས། །དགྲ་ཕྱོགས་གཏོར་མ་འཕེན་པར་རུང་བའི་དུས། །སྔོན་ནས་བརྩིས་པ་སྔོན་ལྟར་ཉིན་བསྒྲུབ་རེ། །ལན་གསུམ་བསྐྱལ་ན་ཐེ་ཚོམ་མེད་པར་འབྱུང་། །ལྟས་ངན་བྱུང་དང་ནད་ཡམས་སྨྱོ་འབོག་དང་། །གྲི་རུ་འཆི་འམ་གཟའ་སོགས་ཧུར་ཐུམ་འཆི། །དེ་དག་གང་བྱུང་ཕ་རོལ་པོ་དེ་ཡི། །ཆག་སྒོ་སྲུང་ཟློག་བསོད་ནམས་ཁྱད་པར་ཡིན། །རྟགས་ཤིག་མི་འབྱུང་སྲིད་པར་མི་འགྱུར་རོ། །རྗེས་ནས་ཞུ་བཤགས་ཕུལ་ཞིང་དུམ་བྱས་ན། །ལིང་ག་རྣམ་འཇོམས་གཟུངས་
ཆུས་བཀྲུ་བར་བྱ། །མ་དུམ་ད་རུང་བསྒྲལ་བར་མ་ནུས་ན། །ལིང་ག་དེ་ལ་དྲག་པོའི་སྦྱིན་སྲེག་བྱ། །སྦྱིན་སྲེག་ཁ་བསྒྱུར་སྔགས་དམིགས་ཞལ་ལས་ཤེས། །སྲོག་དང་ཆོ་འཕྲུལ་སྨྱུག་འབོག་ལ་སོགས་པ། །གཅིག་ཆོག་ཉིན་གཅིག་བསྒྲུབ་པའི་རླུང་སྒྲུབ་འདི། །སྔོན་ཆད་ཟིན་བྲིས་གསལ་པོ་མེད་ན་ཡང་། །སྙིགས་དུས་མགོན་པོ་བེར་ནག་ཅན་འདི་ལ། །མཐུ་དང་ནུས་པ་མེད་ཅེས་ཀུན་གྱིས་སྨད། །དཀོན་མཆོག་དབུ་འཕང་ཆུང་བས་དམའ་བར་འགྱུར། །དེ་ལ་སྙིང་གིས་བཟོད་ཐབས་མ་བྱུང་ནས། །ཤུགས་འཆང་ཅང་ཤེས་རྒྱལ་པོ་མེ་འབར་ལོ། །ཞེ་སྡང་མེ་ཁྱི་དམར་པོའི་ཟླ་བ་ཡི། །གནམ་གང་མགོན་པོ་ལན་གསུམ་རྒྱུ་བའི་ཉིན། །སྔགས་རྒན་རཱ་ག་ཨ་སྱས་སྨྲས་པ་ལྟར། །རུ་པ་སྔགས་ནག་བརྩོན་འགྲུས་ཞེས་བྱས་བྲིས། །བརྩེ་བ་བྲལ་བའི་བསྟན་བཅོས་འདི་ཉིད་ཀྱིས། །སེམས་ཅན་གནོད་པར་བྱུང་ན་མཐོལ་ལོ་བཤགས། །དགེ་བས་མགོན་པོ་བེར་ཅན་སྐོར་གསུམ་ལ། །གཤེ་སྐུར་མེད་པ་ཀུན་གྱིས་བསྟོད་ཅིང་བསྔགས། །འཛམ་གླིང་འདི་ན་འགྲན་ཟླ་བྲལ་བར་ཤོག །མངྒ་ལཾ།