ཞིང་བཅུ་ཚང་བའི་བསྟན་དགྲས་དོ་བསྡོས་ན། ༼ཀཾ༽ །མ་མགོན་གཏོར་ནག་སྲོག་གི་པར་བུ་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། གྲུབ་ཆེན་པཀིའི་ཡབ་ཆོས་མགོན་པོ་པར་ནག་གི་སྐོར་ལས། གཏོར་ནག་སྲོག་གི་པར་བུའི་ཟིན་བྲིས་ཡོད། ༈ ན་མོ་ཤྲཱི་མ་ཧཱ་ཀཱ་ལ་ཡེ། མ་མགོན་འཁོར་བཅས་ཞབས་ལ་ཕྱག་འཚལ་ལོ། །དགོངས་པ་གྲོལ་ཞིང་བཀའ་གནང་བསྩལ་དུ་གསོལ། །རུ་པ་སྔགས་འཆང་བརྩོན་འགྲུས་རྒྱ་མཚོ་བ། །ཆོས་འཁོར་གཉེན་པོ་འཇིག་ལ་ཐུགས་པའམ། །ཁ་ཙམ་མ་ཡིན་སྒོ་གསུམ་རྩེ་གཅིག་ཏུ། །དམ་ཆོས་ཚུལ་བཞིན་བསྒྲུབ་པའི་གང་ཟག་ལ། །དམ་ཉམས་དགྲ་བོས་བར་ཆད་བྱས་གྱུར་ན། །དེ་འདུལ་ཆོས་ཀྱི་བཀའ་སྲུང་གནོངས་ཤིག་ཅེས། །ཕྱག་དང་མཎྜལ་ཕུལ་ནས་ཞུས་པའི་ལན། །བཀའ་སྲུང་གཙོ་བོ་མ་མགོན་ལྕམ་དྲལ་ལས། །མར་ཇོ་རས་ཆེན་སོགས་ནས་བརྒྱུད་པ་ཡི། །ཕྱི་སྒྲུབ་པར་བུ་ནང་སྒྲུབ་ཛ་རྡུང་བསྐོར། །གསང་སྒྲུབ་ཕུར་བུ་གསུམ་ལ་ཆ་ལག་བཅས། །རྒྱ་ཆེར་བྱུང་བ་ཡབ་རྐྱང་ཁོ་ནའི་ལུགས། །དཔེ་ཆ་ལུང་རྒྱུན་ལ་སོགས་མང་མཆིས་ཀྱང་། །དཀའ་ཚེགས་ཆེ་ཕྱིར་ཕྱག་ལེན་བྱེད་མཁན་མེད། །ཡབ་ཡུམ་ཞལ་སྦྱོར་པར་ནག་ཅེས་གྲགས་པར། །དྲག་པོའི་ལྷ་རྒྱུད་གསང་བ་ནང་ནས་གསུངས། །ཨུ་རྒྱན་
ཆེན་པོའི་ཐུགས་ལ་མངའ་བ་ལགས། །དྲག་སྔགས་བཀའ་བབས་དྷ་ན་སཾ་སྐྲྀ་ཏས། །བེ་རོ་ཙ་ན་ལ་གནང་བཀའ་གཏེར་བརྒྱུད། །དེང་སང་ཀཿཐོག་ཕྱོགས་སུ་དར་བ་ལ། །མགོན་པོ་ཚོགས་བདག་ཅེས་བྱ་མཐུ་ཆེན་སྐད། །ཨོ་རྒྱན་ཆེན་པོ་སྲིན་ཡུལ་འབྱོན་ཀ་རུ། །རྒྱལ་པོས་རྫོང་བ་བྱས་ནས་གཟིམ་པའི་ནུབ། །མི་ནག་གཅིག་བྱུང་རྒྱལ་པོར་འདི་སྐད་ཞུས། །བསྒྲུབ་མི་དགོས་པའི་དྲག་སྔགས་བཅའ་ཆོག་གཅིག །སློབ་དཔོན་ལ་ཡོད་མི་ཞུ་ཅི་ཡིན་གསུངས། །སློབ་དཔོན་ལ་ནི་གནང་བར་ཞུས་པའི་ཚེ། །མ་མགོན་པར་ནག་གདམས་པ་བག་ཙམ་ཞིག །ངས་ཀྱང་སྲིན་པོ་འདུལ་ཕྱིར་མཁོ་བ་ཡིན། །གསུངས་ནས་མ་གནང་སློབ་དཔོན་བཞུད་པའི་རྗེས། །གསེར་དངུལ་རིན་ཆེན་བཀང་སྟེ་རྗེས་བསྙེག་ཚེ། །ཆུ་བོ་རི་སློབ་ཕྱག་འཚལ་མཎྜལ་ཕུལ། །སྤྱན་ཆབ་ཕྱུང་ཞིང་ཞུས་པས་འདི་ཉིད་གནང་། །ཁྱེད་རང་རིགས་ལ་མ་སྤེལ་སྐུ་སྲུང་གྱིས། །འདས་ཁོ་གཏེར་དུ་སྦོས་དང་སྲས་རྒྱུད་ལ། །ཕན་པར་འདུག་གསུངས་མཆོད་རྟེན་ནག་པོར་སྦས། །རྒྱལ་པོ་འདས་ཤིང་སློབ་དཔོན་གཤེགས་པའི་རྗེས། །སྲས་པོ་གསུམ་ཡོད་ཆེ་བ་དུག་
གིས་བཀྲོང་། །འབྲིང་བ་བློན་པོས་ངོ་ལོག་བྱས་ནས་བཀྲོང་། །ཆུང་བ་འཇིགས་ཡོན་སད་ན་ལེགས་དེ་ཡིས། །རྒྱལ་ས་མ་ཟིན་གྲབ་བྱུང་གཉིད་མ་ཁུག །མཚན་མོ་མཆོད་རྟེན་ནག་པོའི་རྩ་བ་དེར། །མེ་འབར་འོད་འཁྱུགས་ཆོ་འཕྲུལ་འབྱུང་བར་མཐོང་། །འདི་ན་ཡབ་དང་སློབ་དཔོན་གྱིས་སྦས་པའི། །ཕུང་འཚེང་ནུས་པའི་གཏེར་གཅིག་ཡོད་པར་ངེས། །རྒྱལ་ས་མི་ཟིན་ད་ནི་གཏེར་འདོན་ཟེར། །ནོར་གཏེར་གདའ་ན་ས་མཐར་ཁྱེར་ནས་འབྲོས། །ཆོས་གཏེར་གདའ་ན་ཉམས་ལེན་ཆོས་ཤིག་བྱེད། །མཐུ་གཏེར་གདའ་ན་མཆེད་ཡའི་ཤ་ལེན་བསམ། །བརྐོས་པས་མ་མགོན་པར་ནག་དྲག་སྔགས་དང་། །མགོན་པོ་དབྱུག་བརྡུང་དབྱུག་པར་བཅས་པ་ཐོན། །ཆོས་བློན་ཐུགས་མཐུན་བསྡུས་ནས་ལྐོག་ཏུ་ནི། །བསྒྲུབས་པས་ཟླ་གཅིག་གོང་དུ་ཁོང་གི་དགྲ། །ཞང་ནི་དབུ་རིང་ཕ་ཚན་བཅས་པ་བརླག །དེ་ནས་ཡབ་ཀྱི་ཁྲི་ནོན་རྒྱལ་ས་ཟིན། །འཛམ་གླིང་སུམ་གཉིས་དབང་བསྒྱུར་རྒྱལ་པོར་གྱུར། །ཁོང་ལ་སྲས་གསུམ་ཡོད་པའི་ཐ་ཆུང་དེ། །རྒྱལ་ས་མ་ཐོབ་མགོན་པོའི་སྒྲུབ་པ་བྱས། །ན་བཟའ་ཉི་མའི་སྲབ་མདར་འགེབ་པ་དང་། །འཇའ་ལ་འཇུས་
ནས་ནམ་མཁར་དངོས་སུ་བྱོན། །མཚན་ཡང་ལྷ་རྟགས་ནམ་མཁའི་ལྷ་བཟུང་ཞེས། །འདི་ཉིད་འབྲི་ཆུའི་འགྲམ་ཕེབས་བཞུགས་པའི་རྒྱུད། །སྔགས་པ་སྐུ་ཚེ་རིང་བ་བཅུ་གསུམ་དང་། །ཐུང་ཤོས་མི་རབས་བཅོ་ལྔ་བྱོན་པའི་མཚམས། །གྲུབ་ཆེན་པཀྵི་འཁྲུངས་བ་ཡན་ཆད་དུ། །མ་མགོན་བསྒྲུབ་པ་རྟགས་ཐོན་ཤ་སྟག་ལགས། །དེ་ཡི་གདམས་པ་པར་ནག་ཕྱི་ནང་གསུམ། །ཕྱི་ཡི་པར་ནག་བདག་གི་པར་བུ་དང་། །ནང་གི་པར་བུ་ཐོད་པའི་པར་བུ་དང་། །གསང་བའི་པར་ནག་གཏོར་མའི་པར་ནག་གསུམ། །ཕྱི་ནང་པར་བུ་དཀའ་ཚེགས་ཆེ་བ་བཞག །གསང་བ་གཏོར་མའི་པར་ནག་འདི་ཉིད་ནི། །འགྲོ་མགོན་རས་ཆེན་ལུགས་ཀྱི་ནང་སྒྲུབ་དང་། །ཕྱོགས་ཙམ་མཐུན་ཀྱང་དོན་ལ་འདྲ་བ་མིན། །སྟེགས་བུའམ་ནི་གཞི་མ་ནག་པོའི་སྟེང་། །ལྕགས་སྣོད་ཡངས་པའི་ནང་དུ་གཏོར་ཆེན་བཅའ། །གཏོར་མའི་སུམ་གཉིས་ཡན་ཆད་ཕྱིར་བཅད་ལ། །དེ་ལ་གྲུ་གསུམ་ཧོམ་ཁུང་གཟུགས་སུ་བྱ། །ཁྲག་བྱུག་ནང་དུ་དམིགས་པའི་ལིང་ག་ནི། །ཞལ་ཤེས་བཞིན་དུ་གཉིས་བྲིས་ཁ་སྦྱོར་སྡེབ། །འགུགས་གཞུག་ལྷ་དབྱེ་གཞུང་བཞིན་བྱས་པ་སྟེ། །
ཚོན་སྐད་དམ་ནི་ཁྱི་སྤུ་ར་བལ་བཅིངས། །དེ་སྟེང་གཏོར་མ་བཞག་ལ་ནག་པོ་བྱ། །སྤྲོ་ན་མར་གྱི་གཏོར་ཞིལ་འཇིགས་པ་བྱ། །མ་གྲུབ་མེ་རི་བྱ་ཞིང་ཙཀ་ལི་འཛུགས། །མཐའ་བསྐོར་གཏོར་ཆུང་བརྒྱད་བཀོད་ཤ་ཁྲག་བརྒྱན། །དབུ་རྩང་ཕྱག་རྩང་ཚེ་དང་ཡུངས་ཀར་བརྒྱན། །དར་གདུགས་ནག་པོའམ་ནི་མདའ་དར་བཙུགས། །སྨན་རཀ་དྲག་པོའི་མཆོད་པ་སྣ་བདུན་བསྐོར། །ཚོགས་དང་ཐུན་གཏོར་ཟན་ལིང་བཅས་པ་འཚག །གཏོར་མའི་སྟོད་ནི་མགོན་པོ་ཡབ་ཡུམ་བསྐྱེད། །སྐེད་པ་མཆོད་པ་སྨད་ནི་ལྕགས་ཁང་དང་། །དམིགས་བྱ་གང་ཡིན་དངོས་སུ་གསལ་བར་བསྐྱེད། །ཐུན་གྱི་གྲངས་དང་སྤྱིར་གྱི་འདོན་ལུགས་ནི། །དང་པོ་སྒྲུབ་པའི་དུས་དང་འདྲ་བ་ཡིན། །སྔོན་དུ་བསྒྲུབ་པ་རྟགས་ཐོན་མ་བྱས་པར། །འདི་ཉིད་བསྒྲུབས་པས་ནུས་པ་འབྱུང་བ་ཡིན། །ཐུན་མགོར་ཕྲེང་བསྐོར་རེ་རེའི་བསྙེན་པར་བྱ། །དེ་ཚེ་སྤྱན་འདྲེན་དམིགས་པ་ཁོ་ནར་འབད་སྒྲུབ་ཐབས་ནས་བཤད་ལྟར། དེ་ནས་གཏོར་མའི་པར་བུ་ལྕགས་ཁང་ནི། །དམིགས་བྱའི་ལིང་ག་དངོས་སུ་བསྐྱེད་པར་བྱ། །དེ་ནས་གཞུང་ལྟར་བཀུག་གཞུག་གསུམ་བདུན་བྱ། །དེ་རྗེས་རྩ་སྔགས་
ཡིག་འབྲུ་བཅུ་གསུམ་ལ། །ལས་འགྲིག་ནང་གི་བཀུག་གཞུག་སྔགས་རིང་དེ། །ཕྲེང་སྐོར་ཙམ་ཞིག་བཟླས་རྗེས་དམིགས་པ་ནི། །རང་ཉིད་སྔགས་བརྗོད་སྐུ་ལས་འོད་ཟེར་ནི། །མཐིང་ནག་ཚ་ཞིང་རྩུབ་པ་མདུན་བསྐྱེད་ཕོག །རབ་ཏུ་འཕྲོས་ནས་འགུགས་སྔགས་མཉམ་དུ་གསུངས། །ཡབ་ཡུམ་སྐུ་ལས་སྤྲུལ་པའི་མགོན་པོ་དང་། །ལྷ་མོ་གཅེར་བུ་དཔག་མེད་ཕྱོགས་བཅུར་འཕྲོས། །དམིགས་ཡུལ་ལིང་ག་བྲིས་པ་གང་ཡིན་པ། །ལྕགས་ཀྱུས་སྙིང་བཟུང་ཞགས་པས་སྐེ་ནས་ཁྲིད། །རང་དབང་མེད་པར་ལིང་གར་ཐིམ་པར་དམིགས། །ལན་གཅིག་མ་ཡིན་སྔགས་འདི་བཟླ་རིང་བྱ། །དེ་ནས་རང་གི་ཐུགས་ཀའི་འོད་ཟེར་གྱིས། །བདག་དང་འགྲོ་བ་ཀུན་གྱི་སྡིག་སྒྲིབ་དང་། །ལས་ངན་རྣམ་སྨིན་ཀུན་བསྡུས་ཁོ་ལ་ཐིམ། །ཁོ་ཉིད་ཉོན་མོངས་དུག་ལྔ་རབ་ཏུ་རྒྱས། །གཙུག་ལག་ཁང་དང་གླེགས་བམ་ཐམས་ཅད་བཤིགས། །སློབ་དཔོན་དགེ་འདུན་དགྲ་བཅོམ་ཐམས་ཅད་བསད། །བསྒྲལ་བའི་ཞིང་བཅུ་ཁོ་ལ་ཚང་བར་དམིགས། །དཔལ་ལྡན་བདེར་གཤེགས་ཐུབ་པ་ལ་སོགས་པ། །སངས་རྒྱས་ཀུན་ལ་གཟུ་དཔང་ཚིག་དེ་ཞུ། །གང་ཞིག་ལ་
སོགས་གནང་བ་བྱིན་པར་བསམ། །ནམ་མཁའ་གང་བའི་སངས་རྒྱས་བྱང་སེམས་ལ། །ཐམས་ཅད་གཟིགས་སོགས་གཟུ་དཔང་ཚིག་དེ་ཞུ། །གཞུང་ལྟར་ལྷ་དབྱེའི་གཏོར་མ་གཅིག་བཤམས་འབུལ། །ཨོཾ་ཤྲཱི་མ་ཧཱ་ཀཱ་ལ་ཡ་ཞེས་སོགས། ལྷ་དབྱེའི་སྔགས་རིང་བརྒྱའམ་ཉེར་གཅིག་བརྗོད། །ཐ་མ་བདུན་ལས་ཉུང་ན་མི་དགོས་ཏེ། །ཕ་རོལ་ནུས་ལྡན་ཡིན་ན་རིགས་པས་དཔགས། །ཁོ་ལ་བསྲུང་ཞིང་སྐྱོབ་པའི་ལྷ་ཀུན་ལ། །ཁོ་རང་དུག་ལྔ་རྒྱས་པས་ཕུར་པ་བཏབ། །དམ་ཚིག་ཉམས་པས་ལྷ་ཀུན་བྲོས་པར་བསམ། །དེ་ནས་སྟེང་གི་མ་མགོན་ཐུགས་ཀ་ནས། །ཧཱུྃ་ནག་ཛ་དམར་གཉིས་ནི་ཕྱིར་ལ་འཕྲོས། །ཁོ་ཡི་ཚངས་བུག་བཤང་ལམ་གཉིས་ནས་ཞུགས། །སྙིང་ཁར་ཕྱིན་པས་ཟངས་ལྕགས་འཁོར་ལོར་གཉིས། །རྩིབས་བརྒྱད་གྲི་གུག་དབྱིབས་འདྲ་ཤིན་ཏུ་རྣོ། །སྟེང་མ་ལྕགས་འཁོར་གཡས་དང་ཟངས་འཁོར་གཡོན། །དྲག་ཏུ་འཁོར་བས་ཤ་ཁྲག་དམར་ཉིལ་གཏུབ། །མ་མགོན་འཁོར་ཚོགས་ལས་བྱེད་ཐམས་ཅད་ཀྱི། །ལ་ལས་མཚོན་ཆ་སྣ་ཚོགས་ཆར་འབེབས་ཤིང་། །ལ་ལས་ཤ་ཁྲག་རུས་པ་ཧབ་ཐོབ་ཟོས། །བྱ་རྒོད་ཐེད་ལ་རུབ་པ་ལྟར་བསྒོམ་
ཞིང་། །གཞུང་གི་མ་མགོན་སྤྱི་དྲིལ་སྔགས་རིང་དེ། །ཤུབ་བུར་མ་ཡིན་སིལ་བུར་དྲག་ཏུ་བཟླས། །དེ་ཡི་སྔགས་་་་སྔགས་སྟོང་རེའི་མཚམས་སུ་ཡུངས་ཀར་གྱིས་བྲབ་པ་ཡིན་གསུངས། མཆན། ཐིམ་མན་ངག་ཞལ་ལས་ཤེས། །སྐབས་སུ་ཡུངས་ཀར་ལ་སོགས་ཐུན་རྫས་ལ། །ཁ་རླངས་མ་བཏང་ཕུ་ཡིས་བཏབ་བྱས་ལ། །གཏོར་མའི་སྟོད་ཆར་མི་བཏབ་སྨད་ཆར་བྲབ། །ཐུན་མཚམས་ལིང་ཆུང་བཀུག་གཞུག་ཉུང་བ་བྱ། །གྲི་གུག་གམ་ནི་མི་བསད་མཚོན་གྱིས་གཏུབ། །རོལ་མོ་དང་བཅས་གསོན་ཅིག་མ་བཏོན་ལ། །དབུགས་ལེན་ཡབ་ཡུམ་དྲེགས་པ་དོན་གཉིས་བསྐུལ། །པར་ནག་འདི་ཡི་བསྐུལ་བ་དངོས་ཡིན་པས། །དེ་གཉིས་རེས་མོས་བྱས་ལ་བསྐུལ་པ་བྱ། །དམིགས་པའི་ཕྱོགས་སུ་ཟོར་དུ་འཕེན་པའམ། །རྒྱུ་ལྡོག་མ་འགྲིག་ན་ཡང་དེ་ཕྱོགས་འབུལ། །གཏོར་མ་འབུལ་མི་མི་ནག་གཅེར་བུར་བསྒོམས། །གཏོར་མ་གྲི་གུག་མེ་འབར་དམར་ལིང་ལིང་། །འཁོར་ཞིང་འགྲོ་སྟེ་ཕུལ་ལམ་འཕང་བ་ཡིས། །བར་སྣང་གཟའ་རྒོད་རྒྱུག་པ་ལྟ་བུར་སོང་། །ཁོ་རང་གར་ཡོད་དེ་ཡི་སྙིང་ཁར་ཕོག །ཐོག་རྒྱབ་ལྟ་བུར་རྗེས་མེད་སོང་བར་བསམ། །དེ་ནས་
སླར་ཡང་ཐུན་བཟུང་ལ་སོགས་པ། །སྔ་མ་བཞིན་དུ་ཐུན་བཞིར་འབད་པར་བྱ། །གཅིག་མིན་མང་པོས་བསྒྲུབས་ན་མྱུར་བ་སྟེ། །གཞུང་བསྲང་དེ་དག་དྲག་རིམ་གསུམ་ཙམ་བྱ། །མང་བས་སྔགས་རྒྱུན་མ་ཆད་བྱུང་ན་མཆོག །ཉུང་ན་སྔགས་རྒྱུན་མི་དགོས་ཅི་ནུས་བཟླས། །སྔགས་ལ་གྲངས་མེད་རྟགས་དང་དུས་ཀྱི་ཚད། །དུས་ནི་རབ་ཀྱི་ཞག་བདུན་འབྲིང་བཅུ་བཞི། །ཐ་མས་ཀྱང་ནི་ཉེར་གཅིག་ངེས་པར་འགྲུབ། །ཐུན་པར་མང་ཉུང་དམིགས་པ་གསལ་མི་གསལ། །ཕ་རོལ་སྟོབས་དང་བསོད་ནམས་ཆེ་ཆུང་བསྐྱེད། །ལྷ་མེད་བསོད་ནམས་ཆུང་ལ་བདུན་རེས་ཆོག །ཐུན་པ་མང་ན་ཞག་གསུམ་ཙམ་གྱིས་འོང་། །བྱ་དང་རི་དྭགས་གཅན་གཟན་དགྲ་དངོས་སོགས། །བཟུང་དང་བཅིག་དང་བཅིང་སོགས་ཁུག་པའི་རྟགས། །དམག་ཇག་ཕར་ལ་འགྲོ་དང་རི་དྭགས་དང་། །དེ་ནི་རྦད་རན་དགྲ་ལ་ཆས་པའི་རྟགས། །བཤའ་བསད་མགོ་སྙིང་ནང་རོལ་གཏོང་བ་དང་། །ཤ་ཁྲག་ལོངས་སྤྱོད་བྱེད་པ་སོད་པའི་རྟགས། །ལན་རེ་མ་ངེས་ལན་གསུམ་བྱུང་ན་ངེས། །ཤ་བཙོས་རུས་པ་བརྡུང་དང་པགས་པ་རྙེད། །དེ་བྱུང་སྲུང་ཟློག་རིམ་གྲོས་ཀྱང་མི་བསླུ། །
ནང་རྟགས་མ་བྱུང་ཕྱི་རྟགས་འབྱུང་མི་སྲིད། །དུས་དང་གྲངས་ཚད་མ་ངེས་རང་རྟགས་གཙོ། །དེ་ནས་གཟའ་སྐར་ཐེབས་པའི་དུས་དང་བསྟུན། །གཏོར་མའི་སྟོད་ཆ་སྣོད་གཙང་ནང་དུ་བཞག །སྨད་ཆ་ཚུར་ལ་མི་ལེན་ཕར་འགྲོ་སྟེ། །ལས་འགྲིགས་ནང་གི་ཕུར་འདེབས་རྒྱས་པར་བྱ། །ལས་འགྲིགས་ནང་གི་སྔགས་རིང་བརྗོད་བཞིན་དུ། །ཐུན་རྫས་གང་ཡོད་རྣམས་ཀྱིས་ལིང་ག་བྲབ། །ལིང་ག་གཉིས་ལས་མེད་དེ་མང་ཡངརུང་། །གཞན་རྣམས་བཞག་ལ་གཅིག་ནི་གཏུབས་བྱས་ཏེ། །རྐང་པ་གཡོན་པའི་མཐེའུ་ཆུང་ནས་བཟུང་སྟེ། །གྲི་གུག་གམ་ནི་མི་བསད་མཚོན་གྱིས་གཏུབ། །ཤོག་དུམ་ཐོད་པའམ་ནི་ལྕགས་སྣོད་བླུགས། །དེ་འཕྲོ་ལིང་ག་ཧོམ་ཁུང་ཡོད་པའི་སྟེང་། །སྔར་ལྟར་ལྷ་བསྐྱེད་གཏོར་མ་མནན་ལ་བཞག །ཤོག་ལིང་བྱེད་དང་ཟན་ལིང་མང་པོ་དང་། །ཤ་ཁྲག་ཡམ་ཤིང་མར་ཁུ་ལ་སོགས་པ། །དྲག་པོའི་སྦྱིན་སྲེག་བྱ་ཚུལ་སྤྱི་དང་མཚུངས། །སྦྱིན་སྲེག་སྔགས་ཀྱི་ཁ་བསྒྱུར་ཞལ་ལས་ཤེས། །ཐབ་ཏུ་མ་མགོན་བསྐྱེད་པ་སྤྱི་དང་མཚུངས། །དེ་ནས་ཐལ་བ་ཁྲག་ཆུས་གཞིལ་བར་བྱ། །ཐལ་བ་དེ་ལ་མང་ཉུང་
ཆ་གསུམ་བགོས། །མང་བ་གཉན་སར་དྲག་པོའི་རླུང་ལ་ཕྱར། །དེ་མ་འཛོམས་ན་རྒྱ་གྲམ་ལམ་དཀྱིལ་བླུགས། །ཆུང་བ་ཆ་གཅིག་གཏོར་མདོས་ནང་དུ་བླུག །ཐེབས་ལྡོག་ཕྱོགས་དང་དགྲ་ཕྱོགས་འགྲིགས་པའི་དུས། །གསེར་སྐྱེམས་དཀར་གཏོར་བཏང་བ་སྔོན་སོང་ནས། །གཏོར་མའི་ལྷ་དེ་ནམ་མཁར་བཏེག་བྱས་ལ། །གཏོར་མ་མེ་འབར་མཚོན་ཆའི་ཕུང་པོར་གྱུར། །གསོན་ཅིག་མ་དང་བཞེས་འབོད་བཏོན་ལ་འཕང་། །དུག་པོ་དར་ནག་བརྡབ་ཅིང་རྟ་བྲོ་བརྡུང་། །ནང་དུ་ཕྱིན་ནས་གཞུང་ལྟར་གཡུལ་རྒྱལ་གྱེར། །ཐལ་བ་ཆ་རེ་ལིང་ག་དང་བཅས་པ། །ལྷ་འདྲེ་མ་རུངས་གདུག་པ་གནས་པའི་སར། །བྲག་སྣ་ཆུ་མིག་ཤིང་གཅིག་དྲུང་ལ་སོགས། །ལྟོ་འཕྱེ་རྒྱུ་ཕྱོགས་ཤེས་པས་ས་བརྐོས་ལ། །ཧ་ཀྱང་རིང་ན་རང་ལ་ལྡོག་ཉེས་དང་། །གྲུ་གང་ལས་ཐུང་ཕན་གནོད་མེད་པར་བཤད། །གྲུ་གང་སོར་བཞིའམ་ཚད་དེ་མནན་བྱས་ཏེ། །སྦྱིན་སྲེག་ཐལ་བ་ལིང་ག་མཉམ་དུ་མནན། །འགུགས་གཞུག་ལན་གསུམ་བྱས་རྗེས་ཐུན་གྱིས་བྲབ། །ཡུལ་དེས་ལྷ་འདྲེ་བོས་ལ་དཀར་གཏོར་སྦྱིན། །ང་ཉིད་མ་ལེན་ཁོ་ཉིད་ལེན་པའི་ཚུལ། །མི་ལ་བཤད་
བཞིན་ལྷ་འདྲེ་ཡོས་རྡོར་བྱེད། །ངུ་འབོད་མཆི་མ་བཏང་ཚུལ་བྲང་ཡང་བརྡུང་། །ལྷ་འདྲེ་ཁྱོད་ལ་མཐུ་རྩལ་སྟོབས་ཡོད་ན། །ཞག་བདུན་ཟླ་གཅིག་ལ་སོགས་དུས་ཚོད་འདིར། །འདི་ལ་རྟགས་སྟོན་གལ་ཏེ་རྟགས་མེད་ན། །ཁྱེད་ལ་མཐུ་རྩལ་མེད་ཅེས་འཇིག་རྟེན་འཕྱ། །ལྷ་འདྲེ་ཀུན་གྱིས་སྡུན་ན་ངོ་ཡང་ཚ། །མཐུ་རྩལ་ཅི་འདུག་ད་ལྟ་རེམ་ཞེས་བརྗོད། །འདི་རུ་དམར་གཏོར་གཅིག་གམ་གསུམ་བཤམས་ལ། །གཞུང་གི་བཙན་བདུད་ཀླུ་གསུམ་བསྐུལ་བ་བྱ། །དགྲ་ཕྱོགས་གཏོར་མ་ཕུལ་བའི་ཁྲག་རྗེས་བསྟོད། །དེ་ནས་སས་གཡོགས་རོ་གཡམ་རྒྱ་གྲམ་བཀབ། །དམ་དུ་བརྡུང་ཞིང་མི་ཡིས་མི་མངོན་བྱ། །ཕྱི་མིག་མི་ལྟ་ཚུར་ལ་འོང་བའི་ལམ། །ཐོ་བརྩེགས་བྱ་ཁྱུང་བསྒོམ་ལ་བོན་སྐོར་བྱ། །སྒབ་མར་ཚེར་མ་དྲུད་ཅིང་ཁྱུང་སྔགས་བཟླས། །ཁྱིམ་དུ་ཕྱིན་ནས་རྣམ་འཇོམས་གཟུངས་ཆུས་བཀྲུ། །ཤིན་ཏུ་མྱུར་དགོས་ལིང་ག་མང་བྱས་ལ། །གཉེན་ས་མང་པོར་བྱས་ན་ཤིན་ཏུ་མྱུར། །ས་རུ་སྦས་པས་མཐོང་དོགས་མི་ཕོད་ན། །རྭ་ཅོར་བཅུག་ལ་ཤིང་དང་ལ་ཆས་བསྒར། །རེ་ཞིག་ནང་དུ་ཆུ་ཡང་མི་འགྲོ་བྱ། །གཏིང་རྡོ་བཏགས་
ལ་མཚོ་གཉན་ནང་དུ་འཕང་། །དེ་བྱེད་ཆོག་པའི་གདམས་ངག་ཞལ་ལས་ཤེས། །དེ་ལྟར་མ་མགོན་གཏོར་ནག་པར་བུ་ཡི། །སྲོག་སྒྲུབ་མནན་བསྲེགས་འཕང་གསུམ་མཐའ་བསྡུད་བཅས། །སྔོན་ཆད་ཡི་གེར་མ་གྲགས་སྙན་དུ་བརྒྱུད། །སངས་རྒྱས་བསྟན་པ་སྲུང་བའི་མཚོན་ཆ་འདི། །སྙིང་གི་བུ་མཆོག་བརྩོན་འགྲུས་ཁྱོད་ལ་གདམས། །རང་ལ་རྩ་བའི་བླ་མར་འཛིན་པ་དང་། །ཆོས་ལུགས་འདི་ཡི་བསྟན་ལ་ཕན་ངེས་པ། །མ་གཏོགས་གཞན་ལ་སྤེལ་བར་བྱ་བ་དང་། །བསྟན་དོན་དེ་ལ་ཕན་པ་མ་ཡིན་པའི། །རང་འདོད་རང་དོན་ཁོ་ནར་འདི་བསྒྲུབས་ན། །ལས་ཀྱི་མཐའ་ཟློག་མནར་མེད་དམྱལ་བར་འགྲོ། །མ་མགོན་སྲུང་མ་རྣམས་ཀྱི་ཐུགས་ཀྱིས་ཁྲེལ། །འཁོར་གྱི་བཀའ་སྡོད་རྣམས་ཀྱིས་བཀའ་ཆད་ཕོག །དེ་སྐད་ཤུགས་འཆང་མེ་ཕོ་རྟ་ཡི་ལོ། །ཞེ་སྡང་མེ་འབར་ཁྱི་ཡི་ཟླ་བ་ཡི། ཉེར་དགུའི་དགོང་མོ་ལྷ་འདྲེ་གློག་འགྱུའི་དུས། །སྔགས་ནག་རཱ་ག་ཨ་སྱས་སྨྲས་པ་སྟེ། །རུ་པ་སྔགས་ནག་བརྩོན་འགྲུས་རྒྱ་མཚོས་བྲིས། །བརྩེ་བ་བྲལ་བའི་བསྟན་བཅོས་འདི་བརྩམས་པས། །ཉེས་ལྟུང་ཡེ་ཤེས་སྲུང་མ་རྣམས་ལ་བཤགས། །དགེ་བས་དཀོན་མཆོག་
དབུ་འཕང་མཐོ་བར་ཤོག །མངྒ་ལཾ།། གནད་འགག་གང་ཆེ་བ་ཞལ་ཤེས་གདའ་བས་དཔེ་འདི་ཁོ་ནས་མི་ཆོག སྤེལ་རུང་མི་རུང་ཡང་གོང་དུ་གསལ་བས་ཤེས་པར་བྱོས་ཤིག །ཅེས་མཆན་བུ་འདི་སློབ་བུའི་བྱས་སོ། །མངྒ་ལཾ།།