སྒྲུབ་པ་མ་ཐོན་གསར་བུའི་རྐྱེན་ཟློག་ལ། ༼ཁཾ༽ །སྲུང་ཟློག་སེར་གར་ཕན་པའི་ཁྱི་ཚིལ་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ངན་སྔགས་ཀྱི་སྒོ་ནས་སྲུང་ཟློག་བྱ་ཐབས་སེར་གར་ཕན་པའི་ཁྱི་ཚིལ་མ་ཞེས་བྱ་བ་བཞུགས་སོ། ༈ །ན་མོ་ཤཱཀྱ་མུ་ནེ་ཡེ། ་དེང་སང་དུས་ངན་སྙིགས་མའི་མཐའ་ལ་ཐུག །དབང་ལུང་ཐོབ་ཅིང་གདམས་ངག་མང་ཤེས་ཀྱང་། །ཡེ་ཤེས་ལྷ་ནི་འགྲུབ་རྟགས་རིང་བའི་ཕྱིར། །ཡུན་རིང་མ་བསྒྲུབ་བྱིན་རླབས་ནུས་མི་འབྱུང་། །ཡུན་རིང་སྒྲུབ་པའི་ལོང་མེད་བར་ཆད་མང་། །དེ་བས་འཇིག་རྟེན་མྱུར་མགྱོགས་དྲེགས་པའི་ལྷ། །དེ་ཡི་སྲུང་ཟློག་བྱས་ན་འཕྲལ་དུ་རྣོ། །ཕྱི་རོལ་ལྷར་གྱུར་བདུད་དང་དབང་ཕྱུག་དང་། །དེ་ཡི་སྤྲུལ་པ་ཡིན་པར་མ་ཤེས་ན། །དེ་ལ་སྐྱབས་ཞུས་སྐྱབས་སྡོམ་ཞུས་པ་ཉམས། །སྤྲུལ་པ་ཤེས་ན་དེ་ཡང་དགེ་འདུན་གྲལ། །ཡིན་པས་སྐྱབས་སྡོམ་ཞུས་ན་མི་འགལ་བ། །བཀའ་གདམས་ལམ་རིམ་ནང་ནས་གསུངས་པ་ཡིན། །དེ་ནས་འདོད་པའི་
དབང་ཕྱུག་ཅེས་བྱ་བ། །བདུད་ནི་སྡིག་ཏོ་ཅན་ཞེས་བྱ་བ་སྟེ། །ཁོ་ཡི་མིང་ནི་དགའ་རབ་དབང་ཕྱུག་ཡིན། །གཞན་འཕྲུལ་དབང་བྱེད་ལྷ་མཉམ་ཡུལ་ན་ཡོད། །དེ་མན་མནར་མེད་ཡན་ཆད་ཁོ་ཡི་འཁོར། །ནགས་ཕྱོགས་བདུད་རིགས་ཡན་ཆད་ཁོ་ཡི་གཡོག །ཁོ་ཡི་སྟོབས་ཆེ་འཇིག་རྟེན་གསུམ་ན་མེད། །སྡིག་སྟོབས་ཆེན་པོ་རྣམས་ལ་ཁོ་དགའ་ནས། །དེ་ཡི་བསམ་པ་ཐམས་ཅད་འགྲུབ་པར་བྱེད། །ཁྲོ་བོ་འདོད་པའི་རྒྱལ་པོའི་སྤྲུལ་པ་ཡིན། །དེ་ཕྱིར་སྙན་གྲགས་དབང་དུ་བསྡུ་བའི་མཆོག །ཁྲོ་བོ་འདོད་རྒྱལ་དམར་པོའི་སྒྲུབ་ཐབས་ཞེས། །ས་སྐྱ་པ་ཡི་གསེར་ཆོས་གྲྭ་གཅིག་ཡིན། །མདོ་སྡེ་ཆེན་པོ་མྱ་ངན་འདས་ཆེན་ལས། །ཐུབ་པ་དོ་དགོང་མྱ་ངན་འདས་རྒྱུ་ཡི། །དེ་རིང་གུང་ཚིགས་སུ་ཡིས་དྲངས་བ་དེ། །བསོད་ནམས་དཔག་ཏུ་མེད་པ་ཐོབ་གསུངས་པས། །ལྷ་ཀླུ་སྡེ་བརྒྱད་དཔལ་མགོན་བདུན་ཅུ་དང་། །སེམས་དཔའ་མཐུ་ཆེན་ཀུན་གྱི་རྫུ་འཕྲུལ་གྱིས། །སྟོང་གསུམ་འཇིག་རྟེན་གང་བའི་མཆོད་པ་བཤམས། །དེ་ཚེ་དགའ་རབ་དབང་ཕྱུག་ཕྲག་དོག་སྐྱེས། །དེ་བས་ལྷག་པའི་མཆོད་པ་ཁོས་བཤམས་ནས། །ང་ཡི་གུང་ཚིགས་མཆོད་པ་བཞེས་
ཞུས་པས། །སྡིག་ཅན་ཁྱོད་ཀྱི་གུང་ཚིགས་ངས་མི་བཞེས། །མ་འོངས་ང་ཡི་རྗེས་འཇུག་བཙུན་པ་རྣམས། །སྲུང་ཞིང་སྐྱོབ་པའི་མན་ངག་ཟབ་མོ་ཞིག །ཁྱོད་ལ་ཡོད་པ་ཕུལ་ན་དེ་བཞེས་གསུངས། །སྔགས་ཀྱང་འབུལ་གྱིས་གུང་ཚིགས་བཞེས་དགོས་ཞུས། །དེ་དུས་ཁོ་ཡིས་རིག་སྔགས་འདི་ཉིད་ཕུལ། །དེ་ནས་སྟོང་གསུམ་གང་བའི་མཆོད་པ་ཀུན། །དུས་གཅིག་སྐད་ཅིག་ཉིད་ལ་ཐམས་ཅད་གསོལ། །འདི་ལ་ཁོ་ཡི་སྐུ་སོགས་བསྒོམ་མི་དགོས། །ཁོ་ཡི་སྟོབས་དང་དམ་བཅའ་དྲན་བྱས་ལ། །ཙོག་ཀྱེ་ཏ་ཏ་ལ་ཙོག་ཀྱེ་ལོ་ཧ་ལེ། མ་ཧཱ་ལོ་ཧ་ལེ། ཨ་ཙ་ལེ་ཏ་ལ་སྭཱ་ཧཱ། འདོད་པའི་དབང་ཕྱུག་སྡིག་ཏོ་ཅན་གྱིས་བདག་གམ་རྨེ་མོ། འཇིགས་པ་ཆེན་པོ་ཧྥེ་ལས་སྐྱོབས་ཤིག །སྟོབས་ཐོངས་ཤིག །མེ་ཆུ་གཅན་གཟན་དགྲ་ཡི་འཇིགས་པ་དང་། །ནད་གདོན་དགྲ་ཡི་འཇིགས་པ་ལ་སོགས་པ། །བདུད་ཀྱིས་སྲུངས་ཤིག་བདུད་ཀྱི་སྟོབས་སྦྱིན་པས། །ལྷ་ཆེན་དབང་ཕྱུག་ཆེན་པོ་ཞེས་བྱ་བ། །བར་ཆད་གང་གིས་མི་ཚུགས་མདོ་ལས་གསུངས། །དེ་ནི་བདུད་ཀྱི་སྒོ་ནས་བསྲུང་བ་ཡིན། །ཨྠ྄ྀི། ལྷ་ཆེན་དབང་ཕྱུག་ཆེན་པོ་ཞེས་བྱ་བ། །དོན་ལ་
སྤྱན་རས་གཟིགས་ཀྱི་སྤྲུལ་པ་སྟེ། །མུ་སྟེགས་པ་ཡི་ལྷ་ཡི་གཙོ་བོ་ཡིན། །ལྷ་འདྲེ་འབྱུང་པོ་ཀུན་གྱི་གཙོ་བོ་ལགས། །དེ་ཕྱིར་འབྱུང་པོའི་དབང་ཕྱུག་ཅེས་ཀྱང་བྱ། །དེ་ཡི་སྒོ་ནས་གཞན་དག་སྲུང་བའི་ཐབས། །རང་ཉིད་མུ་སྟེགས་དབང་ཕྱུག་ནག་པོ་ནི། །གཅེར་བུ་རྒྱན་མེད་ལིང་ག་གྱེན་དུ་བསྒྲེང་། །ཕྱག་གཉིས་རྭ་ཡི་མདའ་གཞུ་འགེང་བར་བསྒོམ། །སྲུང་སྐུད་ནག་པོར་མདུད་པ་དགུ་རྒྱབ་བསྔགས། །མདུད་པ་རེ་ལ་གནམ་ལྕགས་སྡིག་པ་རེ། །མགོ་དགུ་ཁ་གདང་མེ་ཡི་ཚྭ་ཚྭ་འཕྲོ། །དྲི་མ་མི་ཞིམ་དཔག་ཚད་ཁྱབ་པར་བསྒོམས། །ཨོཾ་མ་ཧཱ་དེ་ཝ་ཧཱུཾ། ཨོ་ཧ་བ་དེ་བ་ཧཱུཾ། ཨོ་ད་བ་དེ་ཝ་ཧཱུཾ། ཞེས་པ་བརྒྱ་སོགས་མང་ཉུང་ཅི་ནུས་བསྔགས། །ནོར་འཕག་འོ་མ་མི་སྟེར་སྐམ་འགོང་ཞུགས། །ཞོ་ལད་ཆང་ལད་འོ་མ་རྒྱུན་དུ་རུལ། །ནད་པ་འགྲུལ་སྣ་བྱིས་པ་མཚན་དུ་བྱེད། །ལམ་འདྲེས་བཏབ་དང་ཆང་སྨྱོ་སྲོག་རླུང་བྱེད། །རྟ་ནོར་གདོན་བཏབ་བརྡུང་ཕྲག་མི་ཟིན་པ། །དེ་དག་ཀུན་ལ་ཤིན་ཏུ་ཕན་པ་ཡིན། །ལན་གྲངས་སྟོང་ཙམ་མྱོང་བས་གྲུབ་པ་ཡིན། །མུ་སྟེགས་སྒོ་ནས་བསྲུང་བ་སྤྱི་རྒྱ་ཟབ། །གདོན་ཚན་ཆུང་བའི་སྨོན་པ་འགའ་ཞིག་ནི། །
འདི་ཉིད་ཁོ་ནས་ཕན་པ་ལན་མང་འགྲུབ།། ཨོཾ༔ ཡང་གནམ་ཆོས་ལུགས་ཀྱི་བསྲུང་བ་ནི། །རང་ཉིད་དབང་ཕྱུག་སྔོན་པོ་ཞལ་གཅིག་པ། །ཕྱག་གཡས་ལྕགས་ཀྱུ་གཡོན་པས་སྡིགས་མཛུབ་ཞགས། །རྒྱན་མེད་རལ་པ་ཁམས་ནག་གྱེན་དུ་འབར། །རླུང་གི་དཀྱིལ་འཁོར་སྟེང་བཞུགས་མེ་དཔུང་འབར། །དེ་ལྟར་བསྒོམ་ལ་སྔགས་ནི་ཅི་ནུས་བཟླས། །ཨོ་ཆུམ་ཏི་ནན་སེ་སྭཱ་ཧཱ། རང་གི་བཟླས་པས་འགོས་ནད་བསྲུང་བའི་མཆོག །སྔགས་ཆུས་སྔགས་མར་བྱེད་དམ་ཕུས་བཏབ་ན། །འདི་ཡིས་མི་ཕན་ནད་རིགས་གང་ཡང་མེད། །མུ་སྟེགས་སྒོ་ནས་བསྲུང་བ་སྤྱི་རྒྱ། འདི་སྣོད་མིན་མང་པོ་ལ་མི་སྤེལ་བ་དམ་ཚིག་གོ །རང་ཉིད་མུ་སྟེགས་དབང་ཕྱུག་ཆེན་པོ་ནི། །མདོག་ནག་ལིང་ག་དམར་པོ་གྱེན་དུ་བསྒྲེང་། །ཁྲག་གི་རལ་པས་བར་སྣང་ཁྱབ་པར་བསྒོམས། །སྲིན་ལག་རལ་གྲི་མཐེ་བོང་སྤུ་གྲི་ཡིས། །གནོད་བྱེད་བྱད་མའི་མགོ་ལུས་ཧྲུག་ཧྲུག་བཅད། །འོག་གཞི་ལྕགས་སྲེག་ས་གཞིའི་སྟེང་སོང་བས། །གཞོབ་ཐུལ་བསྲེགས་ནས་རྡུལ་ཕྲན་སོང་བསམས་ནས། །མཐེབ་སྲིན་བར་དུ་ཕྲེང་བ་ཕྱིར་ལ་འདྲེན། །སྔགས་འབྲུ་གཉིས་པོ་
བརྒྱ་ལས་མི་མང་བཟླས། །ཀི་ཡ་ཀི་ས། རྗེས་ནས་ཐལ་མོ་ལན་གསུམ་བརྡབ་པར་བྱ། །བྱད་མ་རང་མཐུ་རང་ལ་ལོག་ནས་འཆི། །ཉེར་དགུ་ལ་སོགས་དུས་གཉེན་བཟླས་པས་ཆོག །རྒྱུན་དུ་བཟླས་ན་སྟོང་གསུམ་སྔགས་པ་རླག །དེ་ཕྱིར་རྒྱུན་དུ་བཟླ་བར་མི་རུང་གསུངས། །ངན་སྔགས་སྒོ་ནས་བཟློག་པ་ཨི་ཐི་རྒྱ། །སྡིག་ཏོ་ཅན་ཞེས་བདུད་ཀྱི་རྒྱལ་པོ་དང་། །མུ་སྟེགས་དབང་ཕྱུག་ནག་པོའི་སྲུང་ཟློག་སྐོར། །འདི་ནི་ངན་སྔགས་ཡིན་ཕྱིར་མང་མི་སྤེལ། །བློ་གཏད་ཐུབ་པའི་མི་ལ་སྤེལ་ཡང་རུང་། །དུས་ངན་མི་རྣམས་ཕན་ལན་གནོད་པས་འཇལ། །འདི་ཡི་ཕན་ཡོན་ནུས་པ་བྱིན་རླབས་ཀུན། །ངན་སྔགས་ཡིན་ཞེས་རང་ལ་འབར་ཉེན་ཡོད། །དེ་ཕྱིར་སྤེལ་དང་མི་སྤེལ་སྣོད་ལ་བརྟགས། བདུད་དང་མུ་སྟེགས་སྐྱབས་སུ་མི་འཛིན་ཡང་། །བཙན་སླད་ཕན་ན་ལྷམ་ཚང་བདུག་པའི་དཔེ། །དེ་ཕྱིར་ལོ་རྒན་དྲུག་ཅུའི་ནང་ནས་ཀྱང་། །གདུག་པ་ཆེ་བ་མེ་ཕོ་རྟ་ཡི་ལོ། །མུ་སྟེགས་དབང་ཕྱུག་དར་བ་ཁྱི་ཟླ་ཡི། །ཟླ་མཚམས་མུན་ཆུ་རུབ་པའི་དུས་ཚོད་ལ། །སྔགས་ནག་རཱ་ག་ཨ་སྱས་སྨྲས་པ་སྟེ། །བརྩོན་འགྲུས་རྒྱ་མཚོས་ཡི་གེར་བཀོད་པའོ། རྫོགས་སོ།། །།མངྒ་ལཾ། །