དད་ལྡན་སློབ་བུའི་ཉམས་རྟོགས་ཞུས་པའི་ལན།་་བཅ་ས་ག་རས་མཆན། ༼ངཾ༽ །གོ་བ་རྟོགས་པ་དབྱེ་གསལ་ངོ་སྤྲོད་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། གོ་བ་རྟོགས་པའི་དབྱེ་བ་ཆོས་སྐུ་མཛུབ་ཚུགས་ངོ་སྤྲད་པའི་ཞལ་གདམས་ཤིན་ཏུ་གསང་བའི་ཡང་ཞུན་སྙིང་གི་མུན་སེལ་ཞེས་བྱ་བ་བཞུགས་སོ། ༈ །ན་མོ་མ་ཧཱ་མུ་དྲ་ཡེ། རང་སེམས་ཉམས་དང་རྟོགས་པ་གཉིས། །མཚམས་དབྱེ་བསལ་དཀའ་ན་ཡང་། །བདག་གིས་བསམ་པ་འདི་ལྟར་ལགས། །བལྟ་བྱ་ལྟ་བྱེད་ཅི་ཡང་མེད། །འདི་ཡིན་དེ་ཡིན་ཅི་ཡང་མེད། །འདི་བསམ་དེ་བསམ་ཅི་ཡང་མེད། །བདེ་གསལ་མི་རྟོག་ངེས་ཤེས་མེད། །ཐ་མལ་སེམས་ངོ་མི་ཤེས་དང་། །འདྲ་ལ་ཁད་ཀྱང་ཅུང་མི་འདྲ། །ཤོར་ས་གོལ་སར་ཤོར་རོ་སྙམ། །སྔར་གྱི་ངེས་ཤེས་ཡོད་པ་ཡལ། །ཉམས་ལེན་ཞན་དུ་སོང་ངམ་སྙམ། །སྐབས་སུ་ཐེ་ཚོམ་ཁུ་འཕྲིག་དང་། །སྔར་ལྟར་བདེ་གསལ་མི་རྟོག་པ། །ཉམས་ལེན་བཟང་པོ་ཨེ་སྐྱེ་ལྟ། །མཚམས་བཅད་ལུས་གནད་གཟབ་ན་ཡང་། །སྔར་ལྟར་མི་སྐྱེ་ཡི་མུག་ལྡང་། །སྔར་དང་ད་གཉིས་མི་འདྲ་བས། །གང་རུང་ཞིག་དེ་ཡིན་པར་འདུག །སྙམ་དུ་ཁུ་འཕྲིག་འགའ་རེ་འབྱུང་། །མི་འདྲའི་ལུགས་དེ་ཇི་ལྟར་ན། །སྔར་དུས་བལྟ་བྱ་ལྟ་བྱེད་ཡོད། །ས་ལེ་སེང་ངེ་ཡི་རེ་བ། །ད་ནི་ལྟ་མི་ལྟ་རྒྱུ་མེད། །རང་གར་བཞག་པ་འདྲ་བ་དང་། །ཁ་རོག་བསྡད་པ་འདྲ་བ་
ལས། །ཅི་ཡང་བྱ་རྒྱུ་མ་རྙེད་པ། །ངོ་བོ་དང་པོ་མཐོང་བ་སྟེ། །ཐ་མལ་ཤེས་པ་མིང་དུ་བཏགས། །དེ་ཡི་ངང་ལ་གནས་ཙམ་ན། །གཟུགས་སྒྲ་དྲི་རོ་རེག་བྱ་སོགས། །ཚོགས་དྲུག་སྣང་བ་གང་ཤར་ལ། །མ་འགགས་སོ་སོར་གསལ་མོད་ཀྱང་། །དེ་རུ་དེ་དང་འཛིན་པ་མེད། །གཟུགས་རྣམས་སྣ་ཚོགས་གང་མཐོང་ཡང་། །བྱིས་སྦས་ལྷ་ཁང་མཇལ་བ་བཞིན། །སྣ་ཚོགས་མཐོང་ཡང་དེར་འཛིན་མེད། །སྙན་དང་མི་སྙན་སྒྲ་རྣམས་ཀྱང་། །སོ་སོར་མཐོང་ཡང་ཆགས་སྡང་མེད། །བྲག་རི་ཁྲོད་ཀྱི་སྒྲ་སྐད་བཞིན། །འཛིན་མེད་འཛིན་པ་མ་ཞུགས་པས། །འོན་ཀྱང་ཡེངས་བའི་དུས་རྣམས་སུ། །དེ་ལྟར་མི་མཐོང་ཐ་མལ་མཐོང་། །ཆགས་སྡང་དུག་ལྔ་རང་རྒྱུད་པ། །འདི་སྐབས་དྲན་པས་གསལ་འདེབས་གཅེས། །བསྒོམས་དང་མ་བསྒོམ་ཁྱད་པར་ནི། །ཡེངས་དང་མ་ཡེངས་ཁྱད་པར་ཙམ། །མ་ཡེངས་གང་ཟག་བདག་མེད་དེ། །སྟོང་ཉིད་ཕྱེད་པོ་ཡིན་པ་འཛིན་པའི་སེམས་ཉིད་སྟོང་པར་རྟོགས། །བཟུང་བའི་ཡུལ་ལ་འཕྲིག་མ་ཚུད། །དེ་ནས་བློ་བཟོ་མ་ཡིན་པར། །གང་ཤར་གཟུགས་སྒྲ་དྲི་རོ་རེག །སྣ་ཚོགས་སྣང་བའི་ངོ་བོ་
ཀུན། །ཆུ་ནང་ཤར་བའི་ཟླ་གཟུགས་ལྟར། །རྣམ་པ་སོ་སོར་གསལ་ན་ཡང་། །ངོ་བོ་སྟོང་པ་ཉིད་དུ་སྣང་། །རྣམ་རྟོག་མང་ཡང་དེ་དང་འདྲ། །གནས་འགྱུ་ངོ་བོ་ཁྱད་མེད་པས། །རང་གྲོལ་ཆུ་དང་ཆུ་རླབས་བཞིན། །ཆོས་ཀྱི་བདག་མེད་དེ་ལ་ཟེར། །སྟོང་ཉིད་ཡོངས་རྫོགས་རྟོགས་མོད་ཀྱང་། །ད་རུང་ཡེངས་སྐབས་བརྗེད་སྐབས་མང་། །ཡེངས་ཚེ་ཐ་མལ་འཁྲུལ་པ་དེ། །ཉོན་མོངས་གང་སྐྱེས་ཐ་མལ་པ། །རྗེས་ནས་དྲན་པས་སླེབ་པ་ཙམ། །ཡེངས་བས་མ་ལེགས་བསམ་ཞིང་འགྱོད། །ཡེངས་ཚེ་ཉོན་མོངས་རྣམ་རྟོག་ལ། །ཕྱི་ལྟས་བྱེད་འདྲ་ལྟས་པ་ན། །སྔར་ལྟར་སྟོང་ཉིད་རྗེན་པར་མཐོང་། །འདི་སྐབས་དྲན་པས་ཡང་དང་ཡང་། །གསལ་འདེབས་བྱེད་གལ་ཆེ་བར་སྣང་། །ཡེངས་དང་མ་ཡེངས་ཁྱད་པར་མེད།། །དྲན་དང་མ་དྲན་ཁྱད་པར་མེད། །འཁྲུལ་དང་མ་འཁྲུལ་ཁྱད་པར་མེད། །ཐམས་ཅད་སྟོང་པར་འདུག་སྙམ་པའི། །གོ་བའི་སྐྱ་རིས་རེས་འགའ་འབྱེད། །དེ་ལ་གདེང་བཅས་ལྷོད་དྲག་ན། །ཐ་མལ་ཉིད་དུ་འཆོར་ཉན་ཡོད། །གོ་བ་རྟོགས་པ་དབྱེ་བ་གཅེས། །དཔེ་རྒྱུད་གོ་བ་རྒྱབ་ཏུ་སྐྱུར། །གདེང་ནས་
ཡེངས་དང་མ་ཡེངས་གཉིས། །ཁྱད་པར་མེད་པའི་རྟོགས་པ་སྐྱེ། །དོན་ལ་དེ་ཉིད་ཡིན་ན་ཡང་། །ད་རུང་དྲན་པའི་གསལ་འདེབས་ནི། །མ་བརྗེད་ཡང་དང་ཡང་དུ་དགོས། །ཅི་ཕྱིར་ཞེ་ན་དུག་ལྔ་ཡི། །རྟོགས་པ་མ་ནོན་ཚིག་ངན་སོགས། །ཐོས་ཚེ་དེའི་ལན་སྒྲ་ཤོར་སོགས། །བྱུང་བ་ཡེངས་བའི་སྐྱོན་དུ་ངེས། །དེས་ན་དྲན་རྗེས་ཡང་ཡང་དགོས། །ད་རུང་གསལ་དང་མི་གསལ་ཡོད། །མི་གསལ་དུས་སུ་ལྟ་སྟངས་བྱ། །འདི་བསྒོམ་མེད་པའི་ངོ་བོ་ལ། །སྟོང་དང་ཆམ་མེ་འདི་ཡིན་མེད། །དེ་ཡིས་ཚིམས་པར་མ་གྱུར་ན། །རྟོགས་པ་ཉམས་སུ་ཤོར་བ་ཡིན། །ཉམས་ལ་བཟང་ངན་གདམས་ཀ་མེད། །གང་ཤར་དེས་ཆོག་སྙིང་ལ་འཆང་། །ཡེངས་དང་མ་ཡེངས་ཁྱད་མེད་ཀྱང་། །མ་ཡེངས་དྲན་པའི་གསལ་འདེབས་བྱ། །དེ་ཙམ་འཕྲལ་དུ་གང་དྲན་སྨྲས། །བརྩོན་འགྲུས་རྒྱ་མཚོས་གསལ་འདེབས་མཛོད། །འདི་ཡན་ཕྱག་བྲིས། འདི་མན་སློབ་བུས་ཚིག་གོ །ཞེས་པ་ཆུ་མོ་ཡོས་ཀྱི་ལོར། །ཆུ་སྟོད་ཟླ་བའི་ཡར་ཚེས་ལ། །རིན་ཆེན་གནས་དང་ཉེ་བའི་སར། །འདྲ་ཐང་སྒར་རྒྱབ་ཞག་གཅིག་བཞུགས། །དེ་ཚེ་བདག་གིས་མཇལ་བའི་ཚེ། །དངོས་འབྱོར་
བཀྲ་ཤིས་ཁ་བཏག་དང་། །མཚལ་སྲང་བཅུ་ཡིས་མཎྜལ་ཕུལ། །དགེ་འདུན་རྣམས་ལ་མང་ཇ་དྲངས། །ཁ་ཙམ་མིན་པའི་མོས་གུས་དང་། །སྒོ་གསུམ་དད་པས་ཕྱག་འཚལ་ནས། །རང་སེམས་ཉམས་དང་རྟོགས་པ་ནི། །འདི་ལྟར་ཡོད་ཅེས་གསོལ་བཏབ་ཚེ། །སྤྱན་རས་གཟིགས་དངོས་སྤྲུལ་པའི་སྐུ། །དྲིན་ཆེན་རཱ་ག་ཨ་སྱ་ཡིས། །ཞལ་གདམས་སྙིང་གི་མུན་སེལ་འདི། །ཕྱག་བྲིས་མཛད་ནས་གནང་བ་ཡིན། །གསང་སྔགས་སྙན་བརྒྱུད་ཡིད་བཞིན་གྱི། །ནོར་བུ་རིན་ཆེན་འདི་འདྲ་བ། །འཇིག་རྟེན་གསུམ་དུ་བཙལ་ན་ཡང་། །ཤིན་ཏུ་རྙེད་པར་དཀའ་འོ་སྙམ། །བརྩོན་འགྲུས་རྒྱ་མཚོའི་སྙིང་དང་འདྲ། །མ་འོངས་སྐལ་ལྡན་དུང་ཕྱུར་ཕྲག །མང་པོའི་འགྲོ་དོན་འོང་བསམ་ནས་།ཐེམ་ཡིག་མེད་པ་གུད་དུ་བཀོད། །སྣོད་ལྡན་མ་གཏོགས་སྣོད་མིན་ལ། །འདི་ནི་གསང་བ་དམ་ཚིག་གོ །མངྒ་ལཾ།།