སྡོམ་གསུམ་བསྐྱེད་རྫོགས་སྒོམ་བཟླས་རྩེ་གཅིག་ཏུ། ༼ཅཾ༽ །ཚུལ་བཞིན་ཉམས་སུ་ལེན་ཚུལ་ཞལ་གདམས་ཡོད། །
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ཐེམ་མེད་དགོན་སྡེར་སྡོད་ཚེ་རང་དོན་གྱི་བཅའ་ཡིག་བཞུགས་སོ། །བླ་མ་རིན་པོ་ཆེ་ལགས། དགོན་སྡེར་བླ་མར་བྱེད་དགོས་བྱུང་ན་བཅའ་ཡིག་གལ་ཆེ་བས། རང་གཞན་ལ་ཕན་ཕྱིར་གནང་བར་ཞུ་ལགས་ཞེས་ཞུས་པས། རིན་པོ་ཆེའི་ཞལ་ནས། གཟིམས་ཁང་དུ་བུད་མེད་འོང་ས་མེད་པར་སྒོ་རྩར་ཐོ་དང་བཀའ་བསྒོ་དམ་བཞག་བྱེད་པ་
དང་། ཆང་མི་འཐུང་བར་ཚོགས་ཆང་ཡང་ཉིན་གཅིག་ཇ་ནེ་གང་བས་མི་འཐུང་བའི་དམ་བཅའ་ཆོས་སྐྱོང་དཔང་དུ་བཙུགས། རང་རེ་རྩ་རླུང་བསྒོམས་པས་གཞན་གྲོགས་བསྟེན་པ་སོགས་ཐིག་ལེ་མི་སྤང་བའི་དམ་བཅའ། ནད་ན་དུས་མ་གཏོགས་དགོང་བཅད་དེ་ཚོགས་རྫས་མ་གཏོགས་ཤ་མི་ཟ། ངག་མཚམས་དུས་མ་གཏོགས་ཆབ་ལེན་ལྷམ་ཕུད་བྱ། གཞན་དག་གི་གནོད་འཚེ་དང་སྐུར་སོགས་མི་འཚམས་པ་བྱུང་ངམ་དགོན་པའི་ཁྲིམས་ལ་གནོད་པ་སོགས་ཅི་བྱུང་ཡང་། རེ་ཞིག་བཟང་ངན་ཅི་ཡང་མི་སྨྲ། ངོ་བོ་སྐྱོང་རྗེས་ལེགས་པར་དཔྱད་ཡག་བྱས་ལ་གཏམ་སྨྲ། ཡུད་ཙམ་མི་བྱ་བར་གསུངས་པ་ལྟར། དགའ་ཙ་སྡུག་མགྱོགས་མི་བྱ། དགའ་སྡུག་ཅི་བྱུང་ཡང་རེ་ཞིག་ངོ་བོ་བསྐྱང་ལ་རྗེས་ནས་དལ་བུས་ཟསྨྲས་གལ་ཆེ་ནན་ཐུག་མ་གཏོགས་མནའ་མི་སྐྱེལ་བའི་དམ་བཅའ་བྱ། ལར་ཀ་ཆ་ཟས་ནོར་ཐམས་ཅད་ལ་ཆེན་ཆོས་ཕྱོགས་ཅི་འགྲུབ་རྒྱང་སྲུང་མ་གཏོགས་ཕྲན་བུ་རེ་ལ་མིག་དོག་པར་བྱ། སྤྱིར་དོན་ལ་བཏང་དགོས་ལག་བཀྱག །མི་བྱེད་ཀ་མེད་ཁོ་རང་ཆུད་ཟ་དོགས་ན་མ་གཏོགས་གྲྭ་འཁོར་ལ་ཚིག་རྩུབ་མི་བྱ། ངག་འཇམ་པར་བྱ། རང་ལ་རེ་ལྟོས་
བཅས་པ་ཐམས་ཅད་ལ་འདི་ཕྱིར་གང་ཕན་གྱིས་མགོ་འདོན། རང་ལ་ཁ་ཐབས་གང་ཡོད་ཅིག་ཆོག །གྲྭ་འཁོར་ལ་ཉེ་རིང་རྩིས་ཆེ་ཆུང་མེད་པར་ལ་ཆེན་སེམས་མཉམ་པར་བཞག །དེ་དག་བསླབ་བྱ་གལ་ཆེ་རིམ་བརྗེད་ཐོ་ཡིན། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཟིན་གནོན་གྱི་ལོ་ཐ་སྐར་ཟླ་བའི་ཚེས་བརྒྱད་ལ་རིན་པོ་ཆེ་རཱ་ག་ཨ་སྱའི་ཞལ་སྔ་ནས་བརྩམས་པའི་ཟིན་བྲིས་ཀརྨ་བཱིརླ་སཱ་ག་ར་ལ་གནང་བ་མངྒ་ལཾ།།