རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ཨུ་པ་ཚེས་ཀྱི་གྲངས་ལྡན་གྱི་ཞལ་ཤེས་གབ་པ་མངོན་ཕྱུང་།
རི་ཆོས་མཚམས་ཀྱི་ཞལ་གདམས་གཅིག་བརྒྱུད་ལས། ཨུ་པ་ཚེས་ཀྱི་གྲངས་ལྡན་གྱི་ཞལ་ཤེས་གབ་པ་མངོན་ཕྱུང་བཞུགས་སོ། །
རྩ་གསུམ་ལྷ་ཚོགས་སྲུང་མར་བཅས་པ་ལ། །གུས་པས་ཕྱག་འཚལ་བཀའ་གནང་བྱིན་གྱིས་རློབས། །སྐུ་བཞི་དབྱེར་མེད་སངས་རྒྱས་སྤྲུལ་པའི་སྐུ། །རྩ་བའི་བླ་མ་ཡིད་བཞིན་ནོར་བུ་དེས། །ལོ་ནི་བཅུ་གསུམ་སྒྲུབ་པ་མཐར་ཕྱིན་ནས། །ཕྱོགས་བཅུར་འགྲོ་དོན་ཆོས་འཁོར་བསྐོར་བའི་ཚེ། །སློབ་བུ་བདག་ཀྱང་རང་ལོ་ཉེར་གཅིག་དུས། །བསོད་ནམས་སྔོན་ལས་དབང་གིས་མཇལ་བ་དང་། །མདོ་སྔགས་ཕྱག་རྫོགས་དམ་ཆོས་དབང་ཁྲིད་དང་། །ཞལ་གདམས་མགུར་གསུངས་རྒྱ་མཚོ་ཐོབ་ན་ཡང་། །བདག་གིས་ཚེ་འདིར་བློས་བཏང་མ་ནུས་ཤིང་། །
གྲུབ་པ་ཐོབ་པའི་དམ་ཆོས་མ་འགྲུབ་ཀྱང་། །སྡོམ་གསུམ་རྩ་བ་མ་ཉམས་སེམས་བསྐྱེད་བཟང་། །མཚམས་སྒྲུབ་ཕྲན་བུ་འགའ་ཐོན་བླ་མའི་དྲིན། །དྲིན་ཆེན་རྩ་གསུམ་ལྷ་དང་དབྱེར་མེད་དེ། །བདག་ལ་སྐྱིད་སྡུག་ཇི་ལྟར་བྱུང་ན་ཡང་། །སྐད་ཅིག་ཙམ་ཡང་བརྗེད་མེད་སེམས་དང་འདྲེས། །ད་ལྟ་ཤི་ཡང་ངན་སོང་མི་འགྲོ་སྙམ། །ད་ལྟ་རང་ལོ་ཞེ་གསུམ་ལོན་པ་ཡིན། །རྗེ་དང་གསུང་གླེང་བྱུང་ཀུན་ཞལ་གདམས་ཉིད། །རང་ལོ་ཉེར་དྲུག་ཆུ་མོ་ཡོས་ཀྱི་ལོ། །ཆུ་སྟོད་ཟླ་བའི་ཡར་ཚེས་ནས་བཟུང་བས། །མེ་ཕོ་རྟ་ལོ་ཕག་ཟླ་ཚེས་ལྔའི་བར། །
གཅིག་བརྒྱུད་རི་ཆོས་དངོས་གཞི་གནང་བའི་སྐབས། །ཞལ་ཤེས་ཕྲན་ཚེག་ཐོར་བུར་གསུངས་པ་ནི། །ཕལ་ཆེར་ཡིད་ལ་མ་ངེས་བརྗོད་དམ་སྙམ། །མ་བརྗེད་ཡིད་ལ་ངེས་པ་མདོར་བསྡུས་ཤིག །ཡི་གེར་ཚིགས་སུ་བཅད་དེ་བཀོད་པ་ནི། །དྲིན་ཆེན་རྗེ་ལ་འདི་སྐད་ཅེས་གསོལ་ཏོ། །སྨུག་འཛིན་དཀར་དམར་ཆུ་སྦྱིན་བྱེད་པའི་དུས། །ཕྱི་སྒྲུབ་ནང་སྒྲུབ་གསང་སྒྲུབ་ཆུ་སྦྱིན་དང་། །ཕྱི་ནང་གསང་སྒྲུབ་དྲིལ་སྒྲུབ་ཆུ་འཁོར་དང་། །རླུང་འཁོར་དུ་འཁོར་རི་དང་ཐབ་ཀ་དང་། །ཁྱིམ་དུ་འཁོར་ལོ་སྦ་བའི་ཞལ་ཤེས་ནི། །གཞུང་དུ་མི་གསལ་ཡོད་དམ་མེད་ཞུས་པས། །དེ་ཚེ་ཞལ་ནས་གསུངས་པ་འདི་སྐད་དོ། །སྨུག་འཛིན་དཀར་དམར་ལ་སོགས་ཡེ་ཤེས་པའི། །རིགས་རྣམས་ཀུན་ལ་བདག་མདུན་གཉིས་ཀ་ནི། །ལྷ་ནི་གང་ཡིན་བསྒོམ་དུ་རུང་བ་ཡིན། །བསྙེན་སྒྲུབ་ཆུ་སྦྱིན་མེ་མཆོད་ལ་སོགས་ཚེ། །བདག་མདུན་གཉིས་ཀ་གང་འདོད་ནོར་སྐྱུག་བསམ། །རི་དང་ཆུ་དང་ཆུ་འཁོར་སྦ་འཁོར་དང་། །ཐབ་ཏུ་སྦ་བའི་འཁོར་ལོའི་ཡི་གེ་ལ། །བདག་མིང་གཞན་མིང་བྲི་བ་མི་འཐད་དོ། །དེ་བཞིན་ཆུ་འཁོར་ལ་ཡང་དེ་དང་མཚུངས། །རླུང་འཁོར་བདག་མིང་བྲི་བ་
འགལ་བ་མེད། །དུ་འཁོར་ཐོན་ན་བསྙེན་སྒྲུབ་ལས་གསུམ་བསྔགས། །གཞུང་གི་ཡི་གེར་གསལ་ལྟར་ཡིན་ནོ་གསུངས། །རིག་བྱེད་ལྷ་མོའི་ལས་སྦྱོར་བྱེད་པ་ན། །གང་འདོད་ངེས་ཅན་མིང་སྨོས་པ་ཤཾ་སྦྱར། །ཆོས་གམ་མི་ཆོག་བདག་གིས་ཞུས་པའི་ཚེ། །དྲིན་ཆེན་ཆོས་རྗེའི་ཞལ་ནས་འདི་སྐད་གསུངས། །རང་རང་འདོད་པའི་མཆོག་དམན་སྐྱ་སེར་དང་། །གྲྭ་སློབ་ངེས་ཅན་དབང་དུ་བསྡུ་མི་རུང་། །ཅི་ཡི་ཕྱིར་ནི་རང་འདོད་དབང་སྡུད་དེ། །རང་ལ་ཕན་གནོད་གང་བྱེད་ཚོད་མི་ཟིན། །དེ་ཕྱིར་རང་འདོད་མི་བྱ་སྤྱི་ཡི་མིང་། །ལོ་ཀ་པ་ཤཾ་འདི་ཀས་ཆོག་པའི་དོན། །ཡི་དམ་ལྷ་ལ་བསླུ་བ་མེད་པའི་ཕྱིར། །ཤུགས་ཀྱིས་བྱུང་བ་འཁྲུལ་མེད་དངོས་གྲུབ་ཡིན། །ཕྱི་རབས་ཆོས་ལ་མོས་པའི་སློབ་བུ་ཀུན། །སྨུག་འཛིན་དཀར་དམར་སོགས་ལ་ནན་ཏན་དུ། །བསྙེན་སྒྲུབ་ཁ་གྲོས་ཚན་ཆེན་འགའ་ཐོན་ན། །འདོན་མི་དགོས་པའི་དུས་ཤིག་འོང་ཞེས་གསུངས། །གཅིག་བརྒྱུད་ཟེར་བའི་རྒྱུ་མཚན་གང་ལྟར་ལགས། །ཨུ་པ་ཟེར་བའི་བརྡ་དོན་གང་ལྟར་ཡིན། །སྣོད་ལ་བཟང་ངན་བརྟག་ཐབས་ཇི་ལྟར་ལགས། །དེ་སྐད་ཞུས་པས་འདི་སྐད་བཀའ་ཞལ་ཤེས།
སྩལ་ཏོ། །ལྷ་ཡི་མིག་དང་མངོན་ཤེས་མེད་པའི་ཕྱིར། །སློབ་མ་བཟང་ངན་ཚོད་ཟིན་ག་ལ་འོང་། །སྔོན་དུ་སློབ་མ་རེ་ཆེ་ལེགས་པོ་འགའ། །སེར་མཐའ་མི་ཐུབ་གང་མིན་ངན་པ་བྱུང་། །ཁ་ཐབས་མེད་པ་འགའ་ལ་ལེགས་པོ་བྱུང་། །དེ་ཕྱིར་རང་གི་གསང་སྔགས་བཀའ་རྒྱ་ཅན། །གསང་བར་འོས་པ་གནང་བའི་དུས་ཀྱི་ཚེ། །ཡི་དམ་ལྷ་ལ་ཚོགས་དང་མཎྜལ་ཕྱག །མང་དུ་བརྩལ་ཞིང་གནང་བར་རུང་མི་རུང་། །གསོལ་བ་རྩེ་གཅིག་བཏབ་ཚེ་རུང་བ་ཡི། །རྨི་ལྟས་བཟང་པོར་བྱུང་ན་བློ་ཚོད་དང་། །སྦྲགས་ཏེ་གདམས་པ་གནང་བ་མན་ངག་ཡིན། །ལར་ནི་དམ་ཚིག་སྡོམ་པ་སྲུང་ནུས་དང་། །ཆོས་དང་དད་ནུས་བསྟན་ལ་ཕན་སྙམ་པའི། །སློབ་མ་དད་ལྡན་ལ་ནི་ཆིག་རྒྱུད་གཏད། །གཅིག་ནས་རིམ་བཞིན་བརྒྱུད་དགོས་ངེས་པར་མཛོད། །སྣོད་དང་ལྡན་ན་མང་པོར་སྤེལ་ཡང་རུང་། །ཆིག་བརྒྱུད་ཟེར་བ་སྣོད་མིན་གསང་དགོས་དོན། །ཨུ་པ་ཟེར་བ་གསང་སྔགས་གབ་སྦས་དོན། །ཚེས་ཀྱི་གྲངས་ཀ་དཔེ་ཚན་སུམ་ཅུའི་བརྡ། །ལར་ནི་སྤེལ་ལུགས་ནོར་ལྷའི་སྐོར་རྣམས་ནི། །མང་དུ་སྤེལ་ན་རང་ལ་ཅུང་ཞིག་གནོད། །རིག་བྱེད་དམར་མོའི་སྐོར་
སོགས་ཝ་ཤཾ་རིགས། །མང་དུ་སྤེལ་ན་རང་འདོད་ཆགས་པའི་རྒྱུ། །ཆོས་སྐྱོང་སྒྲུབ་ཐབས་ལས་སྦྱོར་མང་སྤེལ་ན། །བསྟན་ལ་མི་སེམས་རང་འདོད་རང་དོན་མཚནི། །ཕྲན་བུ་ཙམ་ལ་ལས་སྦྱོར་མཐུ་བསྡིག་བྱེད། །སློབ་དཔོན་ཆོས་བརྒྱུད་ལའང་གཤེ་སྐུར་བལྟ། །དེ་སོགས་རིགས་པས་ཕྱེ་སྟེ་ཤེས་པར་བྱ། །རྒྱལ་བ་རྒྱ་མཚོའི་ཕྱི་སྒྲུབ་ཞལ་གདམས་ནི། །ཉམས་སུ་ལེན་ནུས་མང་དུ་སྤེལ་ཡང་རུང་། །དབང་སྡུད་ལས་སྦྱོར་དྲག་པོའི་ཕྲིན་ལས་སྐོར། །བརྒྱུད་པ་མ་ཆད་ཙམ་ཞིག་བྱུང་ན་ལེགས། །དེ་སྐད་ཅེས་གསུང་སླར་ཡང་སྐབས་གཞན་འགར། །མ་འོངས་རི་ཆོས་འགྲོ་དོན་ཆེ་ཆུང་ནི། །ཇི་ལྟར་འབྱུང་ལགས་ཞུས་པས་འདི་སྐད་གསུངས། །ངེད་རང་དཔོན་སློབ་བཞུགས་ཚེ་རི་ཆོས་སོགས། །ཞལ་གདམས་གང་གིའང་འགྲོ་དོན་ཕྲན་བུ་འབྱུང་། །དེ་ལས་ཀྱང་ནི་མ་འོངས་དུས་མཐའ་ཚུན། །གླེགས་བམ་ཞལ་གདམས་ཕལ་ཆེར་ཚད་མར་འཛིན། །ད་ལྟ་ལས་ནི་དེ་དུས་འགྲོ་དོན་ཆེ། །དེ་སྐད་ཅེས་གསུངས་སྐབས་ཤིག་འདི་སྐད་ཞུས། །རྗེ་ཉིད་བསྙེན་སྒྲུབ་ཡི་དམ་ཆེན་པོའི་ལྷ། །དབྱེར་མེད་འགྲུབ་པས་དགུང་ལོ་བརྒྱ་ཙམ་ལ། །
བཞུགས་ནས་ད་དུང་འགྲོ་དོན་བྱེད་ལགས་སམ། །དེ་ནས་སྐུ་ཚེ་མཐའ་རུ་ཕྱིན་པའི་དུས། །མ་འོངས་སྐུ་སྐྱེ་འབྱོན་ནམ་མི་འབྱོན་ཞུས། །ཞལ་ནི་འཛུམ་བག་མཛད་ནས་འདི་སྐད་གསུང། །ཧེ་ཧེ་ང་ལ་མངོན་ཤེས་མེད་པའི་ཕྱིར། །ནམ་འཆི་མ་ཤེས་ལོ་བརྒྱ་འདུག་ནས་ནི། །རྒན་པོས་འགྲོ་དོན་བྱེད་པའི་སྐབས་མིན་ནོ། །སྔ་སོར་ལོ་གསུམ་འགྲོ་དོན་བྱེད་པ་དང་། །དེ་ནས་ཚེ་མཚམས་ཐོན་ན་གྱ་བརྒྱད་ཙམ། །འདུག་པའི་རྟེན་འབྲེལ་ཐུགས་དམ་བརྟག་པ་ཡིན། །འོན་ཀྱང་ལོ་བདུན་འགྲོ་དོན་ཅུང་ཞིག་འགྱང་། །ཚེ་མཚམས་ལ་ཡང་གྲོལ་དགོས་འབྱུང་སྲིད་པས། །བདུན་ཅུ་ཁ་ཡན་ངོ་མཐོང་རྟེན་འབྲེལ་བརྟགས། །དུས་སྙིགས་མཐའ་འཁོབ་དུས་སུ་སྐུ་སྐྱེ་ལ། །ཡིད་སྨོན་མ་བྱེད་འགྲོ་དོན་ག་ལ་ནུས། །ད་ལྟ་སངས་རྒྱས་དངོས་སུ་བྱོན་རྣམས་ཀྱང་། །འགྲོ་དོན་འབྱུང་སྐབས་མི་སྣང་ངེད་རང་ཚོ། །བྱ་བྲལ་རེ་ཡི་སྐུ་སྐྱེ་འོང་ནས་ནི། །བདག་རྒྱུད་ཅི་ཡོད་འགྲོ་དོན་ག་ལ་འོང་། །སྐྱེ་འཆིའི་སྡུག་བསྔལ་དེ་འདྲ་འདོད་པ་མེད། །བུ་ཁྱོད་མ་ཡེངས་ཡིད་ལ་འདི་ལྟར་ཞོག །ང་ནི་ནམ་ཞིག་ལུས་སེམས་བྲལ་མ་ཐག །ཞིང་ཁམས་བདེ་བ་ཅན་དུ་ཏ་ལེར་འགྲོ། །
སྤྲུལ་པས་འགྲོ་དོན་བྱེད་པར་ཐེ་ཚོམ་མེད། །ཁྱེད་ཅག་རྗེས་འཇུག་ང་ལ་མོས་པ་རྣམས། །འོད་དཔག་མེད་དང་སྤྱན་རས་གཟིགས་དབང་ལ། །རྩེ་གཅིག་འཆི་གསོལ་ཐོབ་སྒྲུབ་པ་དང་དུ་ལོངས། །བདེ་སྨོན་རྒྱས་བསྡུས་གང་རིགས་ཁ་ཐོན་གྱིས། །བདེ་ཆེན་སྐྱེ་བར་སྨོན་ལམ་རྒྱུན་དུ་ཐོབ། །ཆོས་སྤངས་མཚམས་མེད་ལྔ་བསགས་མ་གཏོགས་པ། །སྨོན་ལམ་སུས་བཏབ་ཐེ་ཚོམ་མེད་པར་སྐྱེ། །དེ་ནི་འོད་དཔག་མེད་པའི་སྨོན་ལམ་སྟོབས། །བུ་ཁྱོད་སྐུ་སྐྱེར་ཡིད་སྨོན་མ་བྱེད་ཅིག །བདེ་ཆེན་སྐྱེས་ནས་སངས་རྒྱས་ཐོབ་པའི་ཚེ། །ད་ལྟ་སྨོན་ལམ་གང་བཏབ་འདྲེན་པར་ནུས། །དེ་ཕྱིར་སེམས་བསྐྱེད་སྨོན་ལམ་རྒྱ་མ་ཆུང་། །སྙིང་གཏམ་གཞན་ལ་མ་སྨྲ་ཡིད་ལ་ཞོག །ཅེས་སོགས་སོག་ཟམ་ངོས་སུ་འགྲོ་ཁ་རུ། །རི་ཆོས་ཡོངས་རྫོགས་འགྲུབ་པའི་དུས་ལ་སོགས། །དུས་གཞན་ཡང་ཡང་ཞུ་གནང་བྱུང་བའི་ཚེ། །འཁྲུལ་མེད་ཚིགས་སུ་བཅད་པ་མ་གཏོགས་པ། །རང་འདོད་རང་བཟོ་རྫུན་གྱི་ཚིག་མ་འདྲེས། །རྗེ་ཡི་ཞལ་ནས་ཚིག་གཅིག་གང་གསུངས་པ། །ཐེག་དགུའི་ཡང་རྩེ་དམ་ཆོས་བླ་ན་མེད། །གསང་སྔགས་རྡོ་རྗེ་ཐེག་ཆེན་སྟོན་པ་
དངོས། །ཡིན་ལ་ཡིན་ཤེས་སློབ་བུའི་ཐ་ཤལ་པ། །རུ་པའི་བུ་ནི་བཱིརླ་སཱ་ག་རས། །རྩ་བའི་བླ་མ་རྫོགས་པའི་སངས་རྒྱས་ཀྱི། །གསུང་རྒྱུན་ངོ་མ་ནོར་འཁྲུལ་མེད་པ་འདི། །ས་མོ་ལུག་ལོ་སྦྲུལ་ཟླའི་བཅུ་དགུའི་ཉིན། །མ་ཡེངས་རང་སེམས་ངོ་བོའི་ཀློང་ནས་བྲིས། །དགེ་བཤེས་ཡིད་བཞིན་ནོར་བུ་དགྱེས་པར་སྨོན། །སུ་ལ་བསྟན་རྒྱུ་མི་འཐད་སྦ་ཐབས་ཞུ། །བབ་ཐོབ་འོལ་ཚོད་བརྩམས་ཆོས་རྫུན་ཚིག་མཁན། །དཔེ་ལ་བལྟས་ནས་ཡས་མགོ་མས་གཤམ་སྦྲེལ། །འདི་ཚོ་བླ་མའི་གསུང་ནི་ག་ལ་ཡིན། །སློབ་མའི་རྫུན་ཚིག་ཡིན་ཞེས་འབར་ཉན་ཡོད། །དེ་དོན་ཐུགས་ཀྱིས་དགོངས་འཚལ་མངྒ་ལཾ། །རི་ཆོས་གསང་བ་ཨུ་པ་ཚེས་གྲངས་ཀྱི། །རྒྱལ་བ་རྒྱ་མཚོའི་སྤྱི་སྒྲུབ་མན་ཆད་ནས། །རིག་བྱེད་ལྷ་མོའི་ཟིན་བྲིས་རྫོགས་སོ་ཡན། །དངོས་བསྟན་ལྟར་ཡིན་ཞལ་ཤེས་ཅུང་ཟད་མེད། །ཆོས་སྐྱོང་སྐོར་གྱི་ཞལ་ཤེས་འགའ་ཟུང་ནི། །ཤོག་གུར་བྲི་དང་སྣོད་མིན་ལ་བཤད་ན། །དམ་ཚིག་ཆགགསུངས་བཀའ་རྒྱ་དམ་པའི་ཕྱིར། །ཡི་གེར་བྲི་དང་གཞན་ལ་བཤད་མི་སྤོབས། །ཞལ་ཤེས་རིབ་ཙམ་ལན་གཅིག་གསུངས་པ་ནི། །རྗེ་ཡི་བཀའ་གནོང་ཁྱེད་ཀྱི་བཀའ་
ནོད་དོན། །བདག་གིས་རྩེ་གཅིག་གུས་པས་འདིར་བཀོད་ལ། །བླ་མ་མཁའ་འགྲོ་ཆོས་སྐྱོང་དམ་ཅན་སོགས། །བཀའ་སྲུང་རྣམས་ཀྱིས་གནང་བ་བསྩལ་དུ་གསོལ། །ཐན་འགྱེད་དུག་མདའི་སྐོར་ལ་ཞལ་ཤེས་མེད། །འོན་ཀྱང་དགྲ་བོ་རྒེ་ཐན་ཕོབ་ཅེས། །ངྒེ་ཞེས་སར་དགྲ་ཡི་མིང་བརྗོད་དགོས། །ངེས་མེད་དགྲ་ལ་ཀ་ཆ་ཤོར་བའམ། །དགྲ་མིང་མི་ཤེས་ནའང་ཀ་ཆ་སོགས། །གང་ཤོར་ས་ཆ་དེ་ཡི་མིང་བརྗོད་ལ། །ཡུལ་རྨེ་ནས་ཀ་ཆ་འདི་ཞེས་ཁྱེར་མིའམ། །གནོད་འཚེ་སྒེ་སྐྱེལ་མི་ལ་ཐན་ཕོབ་ཕོབ་སོགས། །བསྒྱུར་ཁ་བྱ་ཞིང་གཞུང་གི་སྔགས་རིང་འདོན། །ཤར་ཕྱོགས་དམག་གི་རྒྱལ་མོ་སོགས་བསྐུལ་ཚེ། །རྡུལ་ཏུ་རློགས་ཞེས་མི་བརྗོད་ཆོ་འཕྲུལ་ཕོབ། །ཅེས་དང་མགོན་པོའི་མཚལ་མ་འདོན་དགོས་གསུངས། །དེ་ནས་ཁྲེས་པོ་ཁ་སྲུང་གབ་པ་ལ། །རྐུན་མ་སོགས་ལ་གདམས་ངག་ཞལ་ལས་ཤེས། །ཞེས་པ་སྤྱི་མཐུན་ལིངྒ་བྲི་བ་ལ། །དེ་ཡང་དགྲ་ལ་ངོ་འཛིན་མེད་པའམ། །མིང་མི་ཤེས་སམ་དགྲ་རྐུན་ལྟ་བུ་ལ། །ཀ་ཆ་དཀོར་ནོར་ས་ཆའི་མིང་བརྗོད་ཚེ། །ས་ཆ་འདི་ནས་ནོར་འདི་ཁྱེར་མི་ཞེས། །ལིངྒའི་མིང་ཡིག་
མལ་དུ་བྲི་བ་དང་། །འགུགས་གཞུག་དུས་དང་གཏོར་མ་འཕེན་ཚེ་སོགས། །རྗེ་ཟེར་བ་རྣམས་ལ་དེ་རིགས་འགྲེས། །སྦྱིན་སྲེག་སྔགས་དམིགས་བསྒྱུར་ཁ་ཞལ་ལས་ཤེས། །ཞེས་གསུངས་དྲག་པོའི་སྦྱིན་སྲེག་སྤྱི་ལྟར་ལས། །ལྷ་སྔགས་ཤམ་དུ་ཡམ་ཤིང་སྔགས་ཀྱི་མཐར། །དགྲ་བོ་ཆེའི་གཟི་བརྗིད་ཕུན་སུམ་ཚོགས་པ་མཱ་ར་ཡ་ཕཊ༔ ཅེས་སོགས་རིགས་འགྲེས་དེའི་ཤེས་པར་བྱ། །བསྲེག་རྫས་ཡམ་ཤིང་མར་ཁུ་ཉ་བོ་དང་། །ཤོག་ལིང་བསྒྲལ་དུམ་ཡུངས་ཀར་གང་རིགས་འབུལ། །དམིགས་པའི་རི་ཆོས་གཞུང་གི་སྦྱིན་སྲེག་གི །ཟིན་བྲིས་བསྡུས་པ་དྲག་པོའི་སྐབས་དང་མཐུན། །ཕུང་རེ་ཟེར་བ་དགྲ་འདྲེའི་བསྟབ་པ་ཡིས། །བདག་པོ་མེད་པའི་རེ་དུམ་རྙེད་ནའོ། །གཏོར་མའི་པར་ནག་ལིང་གའི་ཞལ་ཤེས་དང། །གཉིས་བྲི་ཁ་སྦྱོར་གསུངས་པ་ལིངྒ་ཡི། །དཔྲལ་བར་རུས་དང་སྙིང་གར་མིང་ཡིག་བྲི། །འདོམས་སུ་བླ་དགས་རུས་ལ་ངེས་མེད་ལ། །དོན་མེད་མི་ལ་ལས་སྦྱོར་བྱས་པས་ཕུང་། །བླ་ནི་གདོང་ལ་ཤ་བར་བླ་བ་སོགས། །བླ་རྟགས་གང་ཡིན་བྲི་བར་གསུང་ན་ཡང་། །དེ་ལ་ངེས་པ་མེད་དེ་ཤེས་མི་དཀོན། །མ་ཤེས་བཞིན་དུ་ལས་སྦྱོར་ཉེས་པ་
ཆེ། །དེ་ཕྱིར་གལ་ཏེ་རུས་ནི་མ་ཤེས་ན། །རུས་ཀྱི་མལ་དུ་ཕ་ཡི་མིང་དེ་སྨོས། །བླ་རྟགས་མ་ཤེས་བ་ལ་གང་མིང་སྨོས། །དེ་ཡང་ཕ་ནི་འདི་ཞེས་བྱ་བའི་བུ། །མ་འདི་ཞེས་པའི་བུ་འདི་བྱ་བ་བྲིས། །འགུགས་གཞུག་ལྷ་དབྱེ་གཞུང་བཞིན་གསུངས་པ་ནི། །མགོན་པོའི་ལས་འགྲིགས་ནང་དུ་གསལ་ལྟར་རོ། །ལིང་ག་གཉིས་བྲི་ཁ་སྦྱོར་སྡེབ་པ་ནི། །བསམ་བློ་ཇི་ལྟར་བཏང་ཡང་མ་དྲན་པས། །གབ་སྐུང་སྦ་སྲི་ལ་སོགས་བྱས་རེ་ཀན། །བསྡུས་པར་ལིང་ག་སྤྱི་མཐུན་མིང་ཡིག་ཅན། །གཅིག་བྲི་གཏོར་མའི་ཞབས་སུ་བཞག་འཐུས་གསུངས། །གཞུང་གི་མ་མགོན་སྤྱི་དྲིལ་སྔགས་རིང་དེ། །ཤུབ་བུར་མ་ཡིན་སིལ་བུ་དྲག་ཏུ་བཟླས། །དེ་ཡི་སྔགས་ཐེམ་མན་ངག་ཞལ་ཤེས་ལ། སྔགས་རིང་ལས་བྱང་གཞུང་གི་བསྙེན་སྔགས་ལ། །དགྲ་བགེགས་མཱ་ར་ཡ་ཧཱུྃ་ཕཊ་ཀྱི་ཚེ། །བགེགས་ཞེས་མི་བརྗོད་ཕ་རོལ་དགྲ་མིང་བརྗོད། །ཡང་ན་དགྲ་བོ་མཱ་ར་ཡ་ཞེས་འདོགས། སྦྱིན་སྲེག་སྔགས་ཀྱི་ཁ་བསྒྱུར་ཞལ་ལས་ཤེས། །ཞེས་པའི་དོན་ནི་གོང་དུ་བཤད་པ་ལྟར། །རོ་གཡམ་རྡོ་རྗེ་རྒྱ་གྲམ་བཀབ་ཅེས་པ། །དུར་ནང་རྡོ་ལེབ་རྡོ་རྗེ་རྒྱ་གྲམ་བྲིས། །
གཏིང་རྡོ་བཏགས་ནས་མཚོ་གཉན་ནང་དུ་འཕངས། །དེ་བྱེད་ཆོག་པའི་མན་ངག་ཞལ་ལས་ཤེས། །དེ་སྐད་གསུངས་པའི་དོན་ནི་འདི་ལྟ་སྟེ། །རི་གཉན་མཚོ་གཉན་དགྲ་བོར་གཏད་པའི་སྐྱོན། །ས་བདག་ཀླུ་གཉན་ཞེ་ནག་གདུག་རྩུབ་ཆེ། །དང་པོ་དགྲ་བོ་ཕོ་རྒྱུད་མོ་རྒྱུད་ནི། །མིང་ཙམ་མེད་པར་མ་ཟད་བར་དུ་ཟ། །དེ་ནས་གཏད་མནན་མཁན་གྱི་སྔགས་པ་ཡི། །ཕོ་རྒྱུད་མོ་རྒྱུད་རུས་རིགས་མཐུན་ཚད་ཟ། །རང་གཞན་གཉིས་ཀ་ཕུང་བར་ཐེ་ཚོམ་མེད། །སྔར་ཡང་དེ་འདྲ་མཐོང་ཐོས་མང་བའི་ཕྱིར། །གཏད་མནན་འདི་ལ་ཡག་ཉེས་ཆེན་པོ་ཡོད། །ཁ་ལག་འབྲེལ་ཚད་དམྱལ་བར་ལྟུང་བའི་ཕྱིར། །མཚམས་མེད་ལྔ་ལས་ཀྱང་ནི་འདི་སྡིག་ཆེ། །དེ་ཕྱིར་མཐུ་གཏད་ངན་སྔགས་གཏད་མནན་སོགས། །རང་ལ་གག་ཐུག་སྡུག་བསྔལ་ཅི་བྱུང་ཡང་། །ཡིད་ལ་དྲན་པར་མི་རུང་བྱ་དགོས་མེད། །ཅི་ཕྱིར་མི་ལུས་ཐོབ་པ་ཉིན་སྐར་ཙམ། ཤེས་བཞིན་དམྱལ་བར་ལྟུང་ལས་བྱེད་ཕོད་དམ། །ཆོས་སྐྱོང་ལས་སྦྱོར་འདི་དག་རུང་མི་རུང་། །ཞིང་བཅུ་ཚང་བའི་བསྟན་དགྲ་ཡིན་ན་རུང་། །དེ་ཡང་རང་གཞན་མང་པོར་མི་གནོད་ཅིང་། །ཞིང་བཅུ་ཚང་བའི་སྤྱི་དགྲ་
གཅིག་པུ་ཡི། །ལིང་ག་མིང་ཡིག་བྲིས་ལ་འདི་ཟོ་ཞིག །དེ་ནས་ས་ཟོ་རྡོ་ཟོ་ཟེར་བ་བྲིས། །མན་ངག་འདི་ལྡན་རང་ལ་མི་གནོད་ཅིང་། །ཕ་རོལ་དོན་མེད་མིལའང་མི་གནོད་པའི། །མན་ངག་འདི་ནི་གླིང་བཞི་བཙལ་ཡང་དཀོན། །འོན་ཀྱང་དགོས་པ་སྤུ་ཙམ་མེད་ན་ཡང་། །མན་ངག་ཕྱག་ལེན་བརྒྱུད་པ་མ་ཆད་ཙམ། །བྱང་ཆུབ་སེམས་ལྡན་སྣོད་ལྡན་རེ་རེ་ལ། །མང་དུ་སྤེལ་དང་རླུང་ཕྱོགས་བརྗོད་མི་རུང་། །དེ་བས་སེར་གར་ཕན་པའི་ཁྱི་ཚིས་ལས། །གསུངས་པའི་སྔགས་དམིགས་རང་ལ་གག་ཐུག་དུས། །དགོས་དུས་བྱུང་ན་ནུས་པ་ཆེ་བས་རུང་། །དམ་པའི་ལྕགས་དྲ་ཞལ་གདམས་ངོ་སྤྲོད་སོགས། །དངོས་བསྟན་ལྟར་ཡིན་ཞལ་ཤེས་གང་ཡང་མེད། །དེ་ལྟར་ཆིག་བརྒྱུད་གདམས་པའི་སྐོར་ཚོ་ལས། །དྲིན་ཅན་རྗེ་ཡིས་ལན་གཅིག་གསུངས་པ་ཡི། །གབ་ཚིག་ཞལ་ཤེས་གབ་སྐུང་ཕུད་ནས་ནི། །འཁྲུལ་མེད་ཚིགས་སུ་བཅད་དེ་བྲིས་པའི་དུས། །ལོ་ནི་བཅུ་གསུམ་བཅུ་བཞི་རླུང་ཕྱོགས་ཙམ། །བཀའ་རྒྱས་གདམས་པར་བྲི་བར་ལྟ་ཅི་སྨོས། །སུ་ལའང་མ་སྨྲ་འདི་ནི་དམ་ཚིག་ཡིན། །སློབ་བུ་བདག་ཀྱང་གཅོང་ནད་འཆི་ལ་
ཉེ། །ཆོས་སྐྱོང་བསྒྲུབ་དང་ལས་སྦྱོར་འདོད་པ་མེད། །སྒོ་གསུམ་གཡེལ་བས་ཁ་སྒྱུ་ཞེན་པ་དང་། །ཚེ་འདིའི་ལྟོ་རྒྱབ་དབང་དུ་སོང་བའི་ཕྱིར། །ཆོས་སྐྱོང་སྒྲུབ་པ་ལ་སོགས་མ་ཐོན་ཀྱང་། །གཏོར་བསྔོས་བསྐང་བ་མ་ཆག་ཙམ་ཞིག་ཡིན། །ཅེས་པ་ས་མོ་ལུག་ལོ་ནག་ཟླ་ཡི། །དམར་པོའི་ཚེས་བརྒྱད་ཉིན་པར་སྐད་ཅིག་ལ། །མཎྜལ་བརྒྱ་རྩ་ཕུལ་ནས་རི་ཆོས་ཀྱིས། །ཞུ་བ་པོ་ཡིས་བྲིས་པ་ཉེས་མཆིས་ན། །ཆོས་སྐྱོང་བཀའ་སྲུང་རྒྱ་མཚོའི་ཚོགས་ལ་བཤགས། །དགེ་བས་ཆོས་བརྒྱུད་བསྟན་པ་མཐའ་རྒྱས་ཤིང་། །ཕྲིན་ལས་རྣམ་བཞི་འགྲུབ་པའི་བཀྲ་ཤིས་ཤོག །ཅེས་པ་འདི་ནི་རྗེ་ཉིད་ཀྱི་དབོན་དུ་གྱུར་པ། བླ་མ་ནམ་མཁའ་དཔོན་སློབ་ཀྱིས་ཡང་ཡང་དུ་འདིའི་ཞལ་ཤེས་བྲི་དགོས་ཞེས་ནན་ཏན་ཆེན་པོས་བསྐུལ་བ་དང་། བདག་བཱིརྱ་ས་ག་ར་ལ་གཅོང་ནད་ཀྱིས་ལྡང་བའི་སྟབས་ཀྱིས། གསང་སྔགས་ཀྱི་བརྒྱུད་པ་གཏད་པའི་ཕྱིར་ཡི་གེར་བྲིས་ནས་ཕུལ་བའོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།