ཤོག་ལྷེབ་ ༢༠༡ ནས་ ༣༠༠ བར།
མེད་དུད་འགྲོ་ཕྲན་བུ་ནི༔ སྐྱེ་བ་རྣམ་པ་བཞི་ལ་སྐྱེས་པ་ནི༔ རི་དྭགས་གཅན་གཟན་གྲོག་སྦུར་སྲིན་བུ་དང་༔ རྐང་མང་རྐང་མེད་འདབ་ཆགས་སྡེར་ཆགས་དང་༔ ཀླུ་ཡི་རིགས་བྱེད་དུད་འགྲོ་ཕྲ་སྦོམ་སོགས༔ ས་ཡི་སྟེང་ན་བསམ་གྱིས་མི་ཁྱབ་སྟེ༔ གཅིག་གིས་གཅིག་ལ་ཟ་བའི་སྡུག་བསྔལ་ཡོད༔ རྔོན་པས་རྒྱ་དང་འགགས་སྙི་བཙུགས་པ་ཡི༔ རྒྱུ་ཤད་སྐྱེར་ཚད་ལོག་པར་འགྲོ་བ་དང་༔ འགའ་ཞིག་ཞོར་ལ་འགགས་ནས་འཆི་བ་ཡོད༔ བཞི་པ་དུད་འགྲོ་ཁ་འཐོར་སྡུག་བསྔལ་ནི༔ མི་ལ་བསྟེན་པའི་དུད། འགྲོ་འདི་དག་ནི༔ ལས་སུ་ཁལ་འགེལ་རྨོ་རྨོ་ཞོ་བཞོ་དང་༔ སྤུ་འབྲེག་ཤ་འབྱིན་ཁྲག་འདོན་བཙོག་པ་དང་༔ ཞོ་ཤ་མི་སྲི་རྒལ་པ་རྡོལ་རྡོལ་ཁུལ༔ ཁོ་ལེ་མ་ལུས་རྭ་ཅོ་ཟད་ཟད་འབྲད༔ ལྤགས་པ་བཤུ་བར་འདུག་ཀྱང་ཚ་བསྲན་ནས༔ ལུས་པོ་འགས་པར་མཆིས་ཀྱང་སྙིང་རུས་བྱེད༔ བཀྲོད་གཟིར་གསོད་པའི་སྡུག་བསྔལ་དཔག་མེད་ཡོད༔ དེ་དག་སེམས་ཅན་དུད་འགྲོའི་སྡུག་བསྔལ་ཡིན༔ ཞེས་གསུངས་པ་དང་༔ རྒྱལ་པོ་སྲོང་བཙན་སྒམ་པོའི་ཞལ་ནས༔ བྱོལ་སོང་དུ་སྐྱེ་བ་ནི༔ ཤིན་ཏུ་གཏི་མུག་ཆེ་ལ་ཆོས་མ་ཐོས་པར་
སྐྱེ་སྟེ༔ གླིང་བར་ན་ཉི་ཟླའི་འོད་མེད་པ༔ རང་གི་གཟུགས་མི་མཐོང་བ༔ ཉིང་ཤ་ཉིང་གིས་ཟ་བ༔ གཡང་རྦབ་ཏུ་ལྟུང་བ་དང་༔ ལྟུང་གི་དོགས་པ་ལ་སོགས་པའི་སྡུག་བསྔལ་མང་པོ་ཡོད་དོ༔ དེ་དག་ཚེ་ཚད་རིང་བས་བར་གྱི་བསྐལ་པ་གཅིག་ཐུབ་བོ༔ བྱིང་ན་གནས་པའི་དུད་འགྲོ་བྱ་བ་ཕྱིའི་རྒྱ་མཚོ་ན༔ ཆང་འགགས་ཀྱི་སྦང་མ་བཞིན་གནས་ཏེ༔ ཆེན་པོས་ཆུང་དུ་ཟ་སྟེ་ཉིང་ཤ་ཉིང་གིས་ཟ་བ་ལ་སོགས་པ་དཔག་ཏུ་མེད་པ་ཡོད་དེ༔ ས་སྟེང་གི་དུད་འགྲོ་ཕྲའུ་ནི༔ རྐང་མང་རྐང་མེད་རྐང་གཉིས༔ འདབ་ཆགས་སྡེར་ཆགས་བསམ་གྱིས་མི་ཁྱབ་པ་ཡོད་དོ༔ བྱོལ་སོང་ཁ་འཐོར་བ་རྐང་བཞི་པ༔ གཅན་གཟན་དང་རི་དྭགས་ཀྱི་རིགས་གྲངས་མེད་དོ༔ དེ་རྣམས་ནི་གཅིག་གིས་གཅིག་མ་ཤི་བར་ཟ་བ་ལ་སོགས་པའི་སྡུག་བསྔལ་བསམ་གྱིས་མི་ཁྱབ་བོ༔ དེ་དག་གི་ནང་ནས་སྡུག་བསྔལ་ཆུང་ཤོས༔ རྟ་གནག་བ་ལང་ར་ལུག་ལ་སོགས་པ་མི་ནོར་མཐའ་དག་གི་བྱོལ་སོང་རྣམས་ནི༔ སྦྱིན་པ་སྣ་རེ་བཏང་ལ་ཚུལ་ཁྲིམས་མ་བསྲུང་བས་དུད་འགྲོར་སྐྱེས་པའོ༔ དེ་དག་ཀྱང་ཚེ་ཚད་ངེས་པ་མེད་ཚེ་ཐུང་༔ བཀོལ་སྤྱད་བསད་བཅད་ཀྱི་སྡུག་བསྔལ་ལས་མ་འདས་
སོ༔ ཚུལ་ཁྲིམས་ཉམས་པས་བྱོལ་སོང་ཀླུའི་རིགས་དང་༔ ཀླུའི་དུད་འགྲོར་སྐྱེས་ཏེ༔ སྡུག་བསྔལ་ནི་རྒྱལ་པོའི་ཆད་པས་འཇིགས་པ་དང་༔ བྱེ་ཚན་གྱི་ཆར་པས་འཇིགས་པ་དང་༔ ནམ་མཁའ་ལྡིང་གི་འཇིགས་པ་ལ་སོགས་པ་སྡུག་བསྔལ་ཚད་མེད་པ་ཡོད་དོ༔ ཚེ་ནི་རིང་སྟེ་བར་གྱི་བསྐལ་པ་ཐུབ་པ་ཡང་ཡོད་དོ༔ ཞེས་དང་༔ གུ་རུ་པདྨ་འབྱུང་གནས་ཀྱི་ཞལ་ནས༔ ཡང་དུད་འགྲོའི་རིགས་འདི་དག་མ་རིག་པས་གཏི་མུག༔ སྨྲས་པའི་གཏམ་མི་གོ༔ དཀོན་མཆོག་གསུམ་གྱི་སྒྲ་མི་གྲགསུ༔ རྨོས་རྨོ་སྤུ་བྲེག་རྒས་འཁོག་ཀྱང་༔ མི་ཐེག་པའི་ཁལ་འགེལ༔ འཕོང་ཤ་བཙོག་རུས་བཙོག་པུ་བརྡུང་༔ རྐེད་པ་ཉག་ཉག༔ འཕོང་ཀྱོག་ཀྱོག༔ འུ་ཐུག་འགྱེལ༔ ཉལ་རུང་རང་དབང་མེད་རྡུང་བ༔ ཅེས་དང་༔ ཡང་རིགས་གཅིག་ནི་ནད་ཅུང་ཟད་ཙམ་མེད་ཀྱང་ཧྲིལ་གྱིས་བསྒྲིལ༔ སྟེང་དུ་ཞོན་སྙིང་ལ་གྲི་བརྒྱབ་སུག་བཞི་ཡོབ་ཡོབ༔ ཁ་ཏང་ཏང་མིག་སྐྱ་ལོག་ལོག༔ བྲེད་བསྔངས་ན་ཚ་ནི་ཆེ༔ བྱ་ཐབས་ནི་མེད༔ སྐྱེ་ཁུག་ཁུག་འཆི་དགོས་པ་ཞེས་དང་༔ ཡང་རི་དྭགས་རྣམས་ནི་མི་ཁྱི་མང་པོས་རི་མེད་ཀླུང་མེད་དུ་དེད་ཤ་ཆད་སྤུ་ཆད་
བྲེད་བསྔངས༔ སྙིང་གས་པར་བྲོས་ཀྱང་གསོད༔ ཡང་འགའ་ཞིག་ནི་གཞོན་ནས་མ་རྒས་བར་རྨོ་རྨོས༔ སྤུ་དང་ཞོ་བྱིན་གཟའ་ཁྱིམ་གང་དཀར་མེར་རེ་སྣུམ་ཧྲུག་གེར་བསྐྱངས་བའི་ལན་དུ་རྒས་པ་དང་འཚོངས༔ རང་ཡུལ་གྱི་འདུ་ཤེས་སྐྱེས་ནས་བྲོས་འོང་ཡང་རློག༔ ཡང་ན་རྒས་པས་ཁས་ཟ་བདེ་མེད་ཟེར་ནས་དྲིན་མ་དང་མཉམ་ཡང་གསོད༔ དེ་ནས་བྱིང་ན་གནས་པའི་དུད་འགྲོ་རིའི་ཟོམ་དང་ཕྱིའི་རྒྱ་མཚོ་རྣམས་ན་ཆེ་བས་ཆུང་བ་ཐམས་ཅད་ཧབ་རེ་ལ་བྲ༔ ཆུང་བ་ཐམས་ཅད་ཀྱིས་ཆེ་བ་ཐམས་ཅད་ལ་རུབ་ནས་བྲཱ༔ གཏི་མུག་ཉིན་མཚན་ངོ་མི་ཤེས་སྨྲ་མི་ཤེས་དོན་མི་གོ༔ སླར་ཡང་སྡུག་བསྔལ་མཐའ་མེད་དུ་འཁྱམས༔ ཞེས་གསུངས་པ་ལྟ་བུའོ༔ དེ་ལྟར་དུད་འགྲོར་སྐྱེ་བའི་རྒྱུ་གཏི་མུག་ཤས་ཆེ་ཞིང་༔ མི་དགེ་ཆུང་དུ་བསགས་པ་སྟེ༔ དྲན་པ་ཉེར་བཞག་ལས༔ དུད་འགྲོ་འདྲ་སོགས་ངན་སྨྲ་དང་༔ དུས་གསུམ་གཡེལ་བའི་ལས་བྱས་དང་༔ མི་རིགས་སྟེར་དང་བྱོལ་སོང་ཁྲོ། ཕྱུགས་འདྲ་སོགས་ཀྱི་ངན་དུ་སྨ༔ འདི་བཅུ་དུད་འགྲོར་སྐྱེ་བར་འགྱུར༔ ཞེས་གསུངས་ཏེ༔ དུད་འགྲོའི་རིགས་མི་གཅིག་པ་བྱེ་བ་སུམ་ཅུ་རྩ་བཞི་ཡོད་པར་གསུངས་སོ༔ དེ་
ནས་རྡོ་རྗེའི་ཚིག་རྐང་ལས༔ དམྱལ་བ་ཚ་གྲང་༔ ཞེས་དང་དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ དམྱལ་བ་ནི་ཚ་གྲང་གི་སྡུག་བསྔལ་དང་༔ ཞེས་གསུངས་པའི་དོན་རྒྱས་པར་འཆད་ན༔ མདོ་དྲན་ཉེ་ལས༔ སེམས་ཅནདམྱལ་བ་དམྱལ་མེས་ཉམས༔ ཞེས་དང་༔ སྣོད་ཀྱི་འཇིག་རྟེན་བསྟན་པ་ལས༔ འདི་འོག་སྟོང་ཕྲག་ཉི་ཤུ་ན༔ མནར་མེད་པ་ཡང་དེ་ཙམ་མོ༔ དེ་ཡི་སྟེང་ན་དམྱལ་བ་བདུན༔ བརྒྱད་པོ་ཀུན་ལས་ལྷག་བཅུ་དྲུག༔ དེ་དག་གི་ནི་ཕྱོགས་བཞི་ན༔ མེ་མ་མུར་དང་ཚིག་རོ་མྱག་འདམ༔ སྤུ་གྲི་ལམ་སོགས་ཆུ་བོ་ཡིན༔ ཆུ་བུར་ཅན་སོགས་གྲང་བརྒྱད་གཞན༔ ཡང་སོས་ལ་སོགས་དྲུག་རིམ་བཞིན༔ འདོད་པའི་ལྷ་དང་ཉིན་ཞག་མཉམ༔ དེས་ན་དེ་དག་རྣམས་ཀྱི་ཚེ༔ འདོད་པའི་ལྷ་དང་མཉམ་པ་ཡིན༔ ཏིལ་སྦྱངས་ཁལ་ནི་བརྒྱད་ཅུ་གཅིག༔ ལོ་བརྒྱ་འདས་ཤིང་ཏིལ་གཅིག་ཕྱུང་༔ ཏིལ་ཟད་ཆུ་བུར་ཅན་གྱི་ཚེ༔ འོག་མ་འོག་མ་ཉི་ཤུ་འགྱུར༔ ཞེས་དང་༔ འཇིག་རྟེན་བཞག་པ་ལས༔ ཡང་སོས་དང་ནི་ཐིག་ནག་དང་༔ བསྡུས་འཇོམས་དང་ནི་ངུ་འབོད་གཉིས༔ ཚ་བ་དང་ནི་རབ་ཏུ་ཚ༔
ཐར་བར་དཀའ་བར་བསྟན་པ་སྟེ༔ ཉིན་མཚན་དུ་ནི་ཆོ་ངེས་འདེབས༔ ཉ་ནི་སྐམ་ལ་བོར་བཞིན་ནམ༔ འཕང་མདུང་གིས་ཕོག་གླང་ཆེན་བཞིན༔ འཇིག་རྟེན་དེ་ནི་དམྱལ་བ་ཡི༔ སེམས་ཅན་དུ་མ་སྐྱབས་མེད་པ༔ མེ་སྐྱེ་རྒྱ་མཚོའི་ནང་ན་འབར༔ ཞེས་དང་༔ མདོ་ལས༔ ལུས་ནི་ཤིན་ཏུ་ཆེ་ལ་ཚོར་བ་རགས༔ ཁ་ཅིག་རང་ལུས་མེ་དཔུང་བཞིན་དུ་འབར༔ ཁ་ཅིག་ལྕགས་ཁང་འབར་བའི་ནང་དུ་འཇུག༔ ཁ་ཅིག་ཀུན་ནས་བསྔངས་ཞིང་འདྲེ་ལྡོག་བྱེད༔ ཁ་ཅིག་ལྕགས་ལས་བྱས་པའི་སྣོད་ཆེན་དུ༔ སྤྱི་ཚུགས་འབྲས་ཀྱི་པུས་སྤེ་བཞིན་དུ་འཚོད༔ ཁ་ཅིག་ཐིག་ནག་བཏབ་ནས་སོག་ལེས་འདྲལ༔ སྟ་རེ་མི་བཟད་སོ་རྣོན་རྣམས་ཀྱིས་གཤགས༔ ཞེས་དང་༔ བཤེས་སྤྲིང་ལས༔ སེམས་ཅན་ཉེས་པ་སྤྱད་པ་སྤྱོད་པ་རྣམས༔ ཡང་སོས་ཐིག་ནག་རབ་ཏུ་ཚ་བ་དང་༔ བསྡུས་འཇོམས་ངུ་འབོད་མནར་མེད་ལ་སོགས་པ༔ དམྱལ་བ་རྣམས་སུ་རབ་ཏུ་སྡུག་བསྔལ་འགྱུར༔ འདི་ནི་མི་གཅིག་མདུང་ཐུང་ལྔ་བརྒྱ་ཡིས༔ རབ་ཏུ་དྲག་བཏབ་སྡུག་བསྔལ་གང་ལགས་ལ༔ དེ་ནི་དམྱལ་བའི་སྡུག་བསྔལ་ཆུང་ངུ་སྟེ༔ འོལ་ཡང་མ་ཡིན་ཆར་ཡང་མི་ཕོད་དོ༔
དམྱལ་བ་བྲིས་པ་མཐོང་དང་ཐོས་པ་དང་༔ དྲན་ནམ་བཀླག་གམ་གཟུགས་སུ་བགྱིས་པས་ཀྱང་༔ སྡུག་བསྔལ་སྐྱེ་བར་འགྱུར་ན་མི་བཟད་པའི༔ རྣམ་སྨིན་ཉམས་སུ་མྱོང་ན་སྨོས་ཅི་དགོས༔ ཞེས་དང་༔ མདོ་གཞན་ལས༔ ཚ་བའི་དམྱལ་བ་ཤིན་ཏུ་བཟོད་གླག་མེད༔ འཇིག་རྟེན་འདི་ཡི་མེ་ནི་ལན་གཅིག་མེའོ་ཙམ༔ དེ་བས་དམྱལ་བའི་མེ་ནི་དགུ་འགྱུར་ཙམ་གྱིས་ཚ༔ སྲ་བརྟན་ལྕགས་ཀྱི་ཐོ་ལུམ་བསྒྱུར་བ་ཡང་༔ སྐད་ཅིག་ཉིད་ལ་མར་ཁུ་བཞིན་དུ་ཞུ༔ གྲང་བའི་དམྱལ་བ་ཤིན་ཏུ་བཟོད་གླག་མེད༔ འཇིག་རྟེན་འདི་ཡི་རླུང་ནི་ལན་གཅིག་རླུང་ངོ་ཙམ༔ དེ་བས་དམྱལ་བའི་རླུང་ནི་དགུ་འགྱུར་ཙམ་གྱིས་གྲང་༔ སྲ་བརྟན་གསེར་གྱི་གོང་བུ་བསྒྱུར་བ་ཡང་༔ སྐད་ཅིག་ཉིད་ལ་ཨུཏྤལ་བཞིན་དུ་གས༔ ཞེས་དང་༔ རིག་འཛིན་ནཱ་ག་ཛུ་ནས༔ དེ་ལྟར་སྡུག་བསྔལ་ཤིན་ཏུ་མི་བཟད་ལོ༔ བྱེ་བ་ཕྲག་བརྒྱ་ཉམས་སུ་མྱོང་ཡང་ནི༔ ཇི་སྲིད་མི་དགེ་དེ་ཟད་མ་གྱུར་བར༔ དེ་སྲིད་སྲོག་དང་བྲལ་བར་མི་འགྱུར་རོ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ དམྱལ་བའི་གནས་ནི་འཛམ་གླིང་ས་ཡི་འོག༔ ཏི་སེའི་ཐད་ནས་དཔག་
ཚད་ཉི་ཁྲི་ན༔ སེམས་ཅན་དམྱལ་བ་ཆེན་པོའི་གནས་ཡོད་དོ༔ ལྕགས་ཀྱི་ཁང་པ་དཔང་དང་རྒྱ་རུ་ནི༔ དཔག་ཚད་ཉི་ཁྲི་ཉི་ཁྲི་ཡོད་པ་ལ༔ དེ་སྟེང་ཚ་དམྱལ་བརྒྱད་ཀྱི་ས་གཞི་ཡོད༔ རབ་ཏུ་ཚ་བ་དང་ནི་ཚ་བ་དང་༔ ངུ་འབོད་ཆེན་པོ་ངུ་འབོད་ཆུང་ངུ་དང་༔ བསྡུས་འཇོམས་ཐིག་ནག་ཡང་སོས་མནར་མེད་རྣམས༔ རིམ་པར་བར་བར་དཔག་ཚད་བཞི་སྟོང་ཡོད༔ རབ་ཏུ་ཚ་ན་གནོད་པའི་སྡུག་བསྔལ་གསུམ༔ གསལ་ཤིང་གནོད་པའི་གླང་རྗེ་རྫ་བུམ་ཡོད༔ ཚ་བ་ན་ནི་གནོད་པའི་སྡུག་བསྔལ་བཞི༔ དོང་དང་ལྕགས་དང་དབུག་དང་འཚོད་པ་དང་༔ ངུ་འབོད་ཆེན་པོར་གནོད་པའི་སྡུག་བསྔལ་གསུམ༔ ཤལ་མ་རི་དང་ཐག་རྒྱང་ཨ་ཆུ་དང་༔ ངུ་འབོད་ཆུང་ངུར་གནོད་པའི་སྡུག་བསྔལ་ལྔ༔ ཕུར་རྒྱང་ཤིང་རྟ་ཁྲབ་དང་ཁྲབ་རི་དང་༔ བསྡུས་འཇོམས་ན་ནི་གནོད་པའི་སྡུག་བསྔལ་བརྒྱད༔ ས་གཞི་མཐོ་བ་གཞང་ཁུ་ནགས་ཚལ་དང་༔ རི་སུལ་དབང་དང་འཛིན་འཆང་བྱེད་དང་རི༔ ཐིག་ནག་ན་ནི་གནོད་པའི་སྡུག་བསྔལ་དགུ༔ རལ་གྲི་ཤང་ལང་སྤུ་གྲི་སེན་མོ་དང་༔ མདུང་ཐུང་སྟེའུ་སྟ་རེ་སོག་ལེའི་འཇིབ༔ ཡང་སོས་ན་ནི་གནོད་པའི་སྡུག་བསྔལ་ལ༔ མནན་
བཙེར་དང་ནི་ཡང་ཤི་ཡང་སོས་དང་༔ མནར་མེད་ན་ནི་གནོད་པའི་སྡུག་བསྔལ་གསུམ༔ ལྤགས་ཤུ་སྣ་མ་གཅན་གཟན་ལྡད་པ་དང་༔ གློ་སྙིང་དག་ལ་མེ་ཆེན་འབར་བ་ཡོད༔ གྲང་དམྱལ་བརྒྱད་ནི་དམྱལ་བ་ཡང་སོས་ནས༔ བྱང་དུ་དཔག་ཚད་ཉི་ཤུ་གཞལ་བ་ན༔ ཆུ་བུར་ཅན་དང་ཆུ་བུར་རྡོལ་བ་དང་༔ སོ་ཐམ་པ་དང་ཀྱི་ཧུད་ཟེར་བ་དང་༔ ཨ་ཆུ་བ་དང་ཨུཏྤལ་ལྟར་གས་དང་༔ ཆེར་གས་པ་དང་པདྨ་ལྟར་ཆེར་གས༔ རིམ་པར་བར་བར་དཔག་ཚད་ཉིས་བརྒྱ་ཡོད༔ ཆུ་བུར་ཅན་ན་གནོད་པའི་སྡུག་བསྔལ་གསུམ༔ འཁྱག་དང་ཆུ་བུར་ཐག་ཐུགས་གསུམ༔ ཆུ་བུར་རྡོལ་ན་གནོད་པའི་སྡུག་བསྔལ་བཞི༔ གས་དང་ཆུ་སེར་རྨ་དང་ཆུ་སེར་རོ༔ སོ་ཐམ་པ་ན་གནོད་པའི་སྡུག་བསྔལ་ལྔ༔ སྐད་མི་ཐོན་དང་སོ་སྒྲ་བཏོན་པ་དང་༔ འཁྲིགས་དང་རེངས་དང་ཡན་ལག་འདར་བའོ༔ ཀྱི་ཧུད་ཟེར་ན་གནོད་པའི་སྡུག་བསྔལ་གསུམ༔ ལུས་འཁྱག་སེམས་དུབ་ངག་ཏུ་སྨྲེ་སྔགས་འདོན༔ ཨ་ཆུ་བ་ལ་གནོད་པའི་སྡུག་བསྔལ་གཉིས༔ ལུས་སྐམ་དབང་པོ་ལྔ་ནས་ཆུ་སེར་འཛག༔ ཨུཏྤལ་ལྟར་གས་གནོད་པའི་སྡུག་བསྔལ་བཞི༔ ལུས་ནི་ཚལ་པ་
བཞི་རུ་གས་པའོ༔ ཆེར་གས་པ་ན་གནོད་པའི་སྡུག་བསྔལ་བརྒྱད༔ ལུས་ནི་ཚལ་པ་བརྒྱད་དུ་གས་པའོ༔ པདྨ་ལྟར་གས་སྡུག་བསྔལ་བཅུ་དྲུག་སྟེ༔ ལུས་ནི་ཚལ་པ་བཅུ་དྲུག་གས་པའོ༔ ཉི་ཚེ་བ་ནི་ཉིན་རེ་ལན་རེ་འཆི༔ ཉིན་འཁོར་བ་ནི་ཉིན་བརྒྱ་མཚན་བརྒྱ་སྐྱེ༔ སྐྱེ་དང་འཆི་དང་སྡུག་བསྔལ་ཡུན་དུ་སྤྱོད༔ དམྱལ་ཁམས་བཅོ་བརྒྱད་བར་མཚམས་རེ་རེ་ན༔ འདོད་ཆགས་ཚ་མྱོང་དམྱལ་བ་ཞེས་བྱ་དང་༔ སྤྲིན་བཀྲ་མེ་འཁོར་ཅན་གྱི་དམྱལ་བ་ཞེས༔ མེ་འབར་འོབ་ལ་པུས་ནུབ་འགྲོ་བ་དང་༔ རོ་མྱག་འདམ་ལ་རྗེས་ནུབ་འགྲོ་བ་དང་༔ སྤུ་གྲིའི་ལམ་གྱིས་ཤ་རུས་གཅོད་པ་དང་༔ རལ་གྲིའི་ཆར་བབ་ལྕགས་ཤལ་རི་ལ་བཤལ༔ ཐལ་ཚན་ཆུ་བོ་རབ་མེད་ནང་དུ་ནི༔ ཤ་རུས་ཚིག་ཅིང་ཁར་འགྲོ་ས༔ གཏིང་འགྲོ་བྱེད༔ ཁྲོ་ཆུ་ཁོལ་མ་བྷ་གའི་ནང་དུ་བླུག༔ ཕོ་མཚན་ལྕགས་སྲེག་དམར་པོའི་བར་དུ་འཆིར༔ དེ་དག་ཐུན་མོང་སྤྱི་ཡི་དམྱལ་ཁམས་བརྒྱད༔ དེ་ལས་སྡུག་བསྔལ་བདུན་འགྱུར་ཆེ་བ་ནི༔ ཁྱད་པར་སྒོས་ཀྱི་རྡོ་རྗེ་དམྱལ་བ་ཞེས༔ པདྨ་ལྟར་དུ་གས་པའི་ལྷོ་ནུབ་ཏུ༔ དཔག་ཚད་བརྒྱ་འཇལ་ལྕགས་སྲེག་ས་གཞི་ཡོད༔ མི་ཤིགས་རྡོ་རྗེ་ཚ་བའི་
དམྱལ་ཁམས་བརྒྱད༔ ཚ་དམྱལ་བརྒྱད་ལས་བདུན་འགྱུར་ཚ་བ་ཡོད༔ རིམ་པར་བར་བར་དཔག་ཚད་ལྔ་སྟོང་ཡོད༔ ཤར་ལྷོ་མཚམས་ན་རྡོ་རྗེའི་གྲང་དམྱལ་བརྒྱད༔ གྲང་དམྱལ་བརྒྱད་ནི་བདུན་འགྱུར་གྲང་བ་ཡོད༔ རིམ་པར་བར་བར་དཔག་ཚད་བཞི་སྟོང་ཡོད༔ ནུབ་བྱང་མཚམས་ན་ཉི་ཚེ་ཉེ་འཁོར་བ༔ དམྱལ་བ་གོང་ལས་བདུན་འགྱུར་མང་བ་ཡོད༔ རིམ་པར་བར་བར་དཔག་ཚད་སུམ་སྟོང་ཡོད༔ བྱང་ཤར་དམྱལ་བ་ཤམྦྷ་ལ་ཞེས་པ༔ དམྱལ་བ་གཞན་གྱི་བདུན་འགྱུར་གནོད་པ་ལ༔ སྤྲུལ་པའི་དམྱལ་བ་ཚ་གྲང་འཐབ་པ་ཡོད༔ ཇི་སྲིད་ནམ་མཁའ་མ་ཞིག་བར་དུ་ནི༔ མི་འཇིག་པས་ན་རྡོ་རྗེ་དམྱལ་བའོ༔ དེ་དག་སེམས་ཅན་དམྱལ་བའི་སྡུག་བསྔལ་ཡིན༔ ཞེས་དང་༔ ཡང་གུ་རུ་རིན་པོ་ཆེ་པདྨ་འབྱུང་གནས་ཉིད་ཀྱིས་གསུངས་པ༔ ཀྱི་མ་ཚ་བའི་དམྱལ་བ་ལ་ལྕགས་ཁང་སུམ་རིམ་གྱི་ནང་དུ༔ ཕྱོགས་བཞི་ནས་མེ་ཆེན་པོ་བཞི་འབུད་ཅིང་༔ ལོ་གྲངས་མེད་བསྐལ་པར་བསྲེགས་ཤིང་༔ ལུས་ནག་རུལ་རུལ་དམར་ཁོག་ཁོག་སོང་རུང་ལས་ཀྱི་འཆི་རྒྱུ་མེད་པར༔ ཕ་འབོད་མ་འབོད་བཟའ་རོག་བུ་ཚ་ཉེ་རིང་ལ་འབོད༔ ཨ་ཚ་མ་རིང་
རིང་བྱེད་ཀྱང་ཕན་པ་མེད༔ ཅེས་དང་༔ ཡང་གྲང་བའི་དམྱལ་བ་ནི༔ གངས་སྟོང་རི་བྲག་འཁྱག་ཁྲོད་ཆུ་གླིང་རྣམས་ན་ལུས་འཁྱག་ཚལ་པར་གས༔ ནང་ཁྲོལ་ཕྱིར་ཐོན༔ འཁྱག་རུམ་ཚིང་ཚིང་༔ དོན་སྙིང་རྣམས་ཚལ་པ་ཤིག་ཤིག༔ ཁ་ཐམ་སོ་འཁྲིགས་ཁྲུ་གང་ཙམ་པ་ནས་འཕར་ཞིང་འདར༔ མིག་སྐྱ་ལོག་ལོག་པ་ལ༔ སྐབས་སུ་ཨ་ཤུ་ཨ་ཙ་མ་ཙིར་ཙིར་ལ༔ ལོ་དང་ཁུངས་མེད་བསྐལ་པར་སྡོད་དགོས༔ ཞེས་དང་༔ དེ་ལ་སོགས་པ་ཤལ་མ་རིའི་སྡོང་པོ༔ ཐལ་ཚན་རབ་མེད༔ རལ་གྲིའི་ནགས་ཚལ༔ ཡང་ཤི་ཡང་སོས་ལ་སོགས༔ ཞེས་གསུངས་པ་དང་༔ ཡང་དེ་དག་གིས་དོན་རྒྱས་པར་སྤྲུལ་པའི་རྒྱལ་པོ་སྲོང་བཙན་སྒམ་པོས་རྒྱ་ཆེར་གསུངས་པའི་དོན་ཉུང་ངུར་བསྡུས་ཏེ་བཤད་ན་འཛམ་གླིང་འདི་འོག་དཔག་ཚད་སྟོང་ཕྲག་ཉི་ཤུ་ན་ལྕགས་ཀྱི་ཁང་པ་ལོགས་རེ་རེར་དཔག་ཚད་བཅུ་གཉིས་རེ་ཡོད་པའི་ནང་སེང་གེའི་ཁྲི་ལ་གཤིན་རྗེ་ཆོས་ཀྱི་རྒྱལ་པོ་བཞུགས་པའི་དྲུང་དུ༔ མི་ཤི་བ་རྣམས་ལྷན་ཅིག་སྐྱེས་པའི་ལྷ་དང་འདྲེས་ཁྲིད་དེ༔ དགེ་སྡིག་མེ་ལོང་ལ་ལྟ་བ་དང་༔ རྒྱ་མ་ལ་འཇོག་པ་དང་༔ ཡིག་ཆུང་ལྟ་བ་སོགས་བྱས་པས་རྫུན་མི་ཚུད༔
དགེ་བ་མང་བ་ཁྲམ་ཤིང་དཀར་པོ་ལ་བཏབ་ནས་མཐོ་རིས་དང་༔ སྡིག་པ་མང་བ་ཁྲམ་ཤིང་ནག་པོ་ལ་བཏབ་ནས་ངན་སོང་དུ་གཏོང་༔ ལྕགས་ཁང་དེའི་ཕྱོགས་མཚམས་བརྒྱད་དུ་ལས་མཁན་སེང་གེ་དང་སྟག་དང་སྦྲུལ་དང་གླང་དང་དྲེད་དང་དོམ་དང་ཕག་དང་ཁྱུང་གི་མགོ་ཅན་རྣམས་ཡོད་དེ༔ བྲག་ལུག་ཐུག་གི་གདོང་པ་འདྲ་བའི་བར་དུ་བཅིར་བ་དང་༔ ལྕགས་ཀྱུས་འདྲེན་པ་དང་༔ ཐོ་བས་བརྡུང་བ་དང་༔ ཤ་སྦྲང་བྱེའུ་ཙམ་གྱིས་ཤ་ཟད་རུས་ཟད་དུ་ཟ་བ་དང་༔ ལྕགས་ཀྱི་སོག་ལེས་དྲ་བ་དང་༔ ཁྲོ་ཆུ་ཁོལ་མའི་ནང་དུ་ཤ་རུས་ཕྱེ་བ་དང་༔ རྐང་ལག་ཕུར་པས་བརྒྱངས་ནས་ཕྱོགས་བཞི་ནས་མེ་སྦར་ཏེ་སྦྱ་བ་ཚི་རི་རི་ཚིགས་པ་དང་༔ མུན་པའི་གླིང་དུ་བཀྱིག་ནས་ཀླད་པ་བྱ་ཁྲུས་བྲུ་བ་དང་༔ མིག་དང་དབང་པོ་བྲུ་བ་དང་༔ ལྕགས་ཀྱི་ཚེར་མའི་གསེབ་ཏུ་ལྕགས་ཀྱི་ཐོ་བས་བརྡུང་བ་དང་༔ ལུས་ལ་ཐིག་ནག་བཏབ་ནས་སྟ་རེ་དང་སོག་ལེས་དྲ་བ་དང་༔ ཁྲོ་ཆུ་ཁོལ་མ་ཁར་བླུག་ནས་ནང་གྲོལ་བསྲེགས་པ་དང་༔ ཤལ་མ་རིའི་སྡོང་པོ་ལྕགས་ཀྱི་ཚེར་མ་ཅན་ལ་འཛེག་འབབ་བྱེད་པ་དང་༔ ལྕགས་ཀྱི་ཕ་བོང་གིས་མནན་པའི་སྨད་ཕག་རྒོད་
ཀྱིས་ཟ་བ་དང་༔ ལྕགས་ཀྱི་གདན་སའི་སྟེང་དུ་མགོ་བཞག་ནས་ལྕགས་ཀྱི་ཕ་ཝང་གིས་བཅར་བ་དང་༔ ལྕགས་ཟངས་ཀྱི་ནང་དུ་བཙོ་བ་རྣམས་ཡོད་པར་གསུངས༔ ཚ་དམྱལ་བརྒྱད་ཀྱི་བར་བར་དུ་གྲང་བའི་དམྱལ་བ་རེ་རེ་ཡོད་དོ༔ ཡུངས་འཁྱག་པ་ལྟར་ཆུ་བུར་ཐུག་ཐུག་དང་༔ ཆུ་བུར་རྡོལ་བ་དང་༔ ཨ་ཆུའི་སྐད་འདོན་པདང་༔ ཀྱི་ཧུད་ཀྱི་སྐད་ལས་མི་ཐོན་པ་དང་༔ སོ་ཐམ་ཐམ་པ་དང་༔ ལུས་ཚལ་པ་བཞི་དང་བརྒྱད་དང་བཅུ་དྲུག་ཏུ་གས་པ་དང་༔ ཡང་ན་ཕྱོགས་བཞི་ན་མེ་མ་མུར་གྱི་འོབས་ལ་འབོག་པ་དང་༔ སྲིན་བུ་ལྕགས་མཆུས་ཤ་རུས་ཕུག་པ་དང་༔ སྤུ་གྲིའི་ལམ་ལ་འགྲོ་བ་དང་༔ རལ་གྲིའི་ནགས་ཚལ་གྱིས་གཤགས་པ་དང་༔ ཤུལ་མ་རིའི་ལྕགས་ཀྱི་ཚེར་མ་སོར་བཅུ་དྲག་པ་ལ་འཛེགས་པས་ལུས་ཐམས་ཅད་སྣད་པ་དང་༔ སྤྱི་བོ་ནས་ལྕགས་ཀྱི་བྱ་ཁྲས་ཀླད་པ་བཏོན་ཅིང་འོག་ནས་ཁྱི་སྲེ་བོས་ནང་གྲོལ་ཟ་བ་དང་༔ ཐལ་ཚན་གྱི་ཆུ་བོ་རབ་མེད་འབོག་པ་དང་༔ དཔག་ཚད་ལྔ་བརྒྱའི་ལྕེ་ལ་ལྕགས་ཀྱི་ཐོང་བཤོལ་གྱིས་རྨོ་བ་དང་༔ ལྕེ་ལ་ལྕགས་ཀྱི་ཕུར་པ་འདོམ་གང་པས་འདེབས་པ་དང་༔ ལྕགས་ཀྱི་བྲེ་བོ་ཆེར་ལུས་གཏུབ་ཅིང་འགེངས་པ་
དང་༔ ལྕགས་ཀྱི་སྲང་ལ་ལུས་གཏུབ་ཅིང་འཇལ་བ་དང་༔ ཉིན་རེ་ཐང་རེའམ་ཞག་རེ་ཐེབ་རེ་འཆི་ཞིང་སོས་པ་སོགས་སྡུག་བསྔལ་དཔག་ཏུ་མེད་པ་ཡོད་ཚུལ་རྒྱས་པར་གསུངས་ཤིང་༔ ཁྱད་པར་མདོ་སྡེ་འཇིག་རྟེན་བཞག་པ་ལས་ཤིན་ཏུ་རྒྱས་པར་གསུངས་སོ༔ ཚ་དམྱལ་གྱི་ཚེ་ཐུང་ཤོས་ཡང་སོས་ཏེ༔ མི་ལོ་བྱེ་བ་ཕྲག་འབུམ་དང་དྲུག་ཁྲི་ཉིས་སྟོང་ཐུབ་ཅིང་༔ འོག་མ་རྣམས་དེ་བས་ཚེ་དང་སྡུག་བསྔལ་ཉི་ཤུ་ཉི་ཤུའི་འགྱུར་ཡིན་ནོ༔ གྲང་དམྱལ་གྱི་ཚེ་ཚད་ནི་དཔག་ཏུ་མེད་དོ༔ དེ་དག་སོ་སོར་སྐྱེ་བའི་ལས་མང་དུ་བཤད་ཀྱང་དོན་བསྡུས་ན༔ ཞེ་སྡང་གི་སྒོ་ནས་མི་དགེ་བ་ཆེར་བྱས་པས་སྐྱེའོ༔ དེར་ཡང་ཚབས་ཆེ་ཆུང་དང་ཚེ་རིང་ཐུང་རྣམས་ཀྱང་རང་གི་སྡིག་ལས་ཀྱི་ཆེ་ཆུང་ལས་བྱུང་བའོ༔ དམ་ཚིག་ཉམས་པ་ནི་རྡོ་རྗེ་དམྱལ་བར་ལྟུང་སྟེ༔ འཇམ་དཔལ་སྒྱུ་འཕྲུལ་དྲྭ་བ་ལས༔ ཕྱི་ཡི་རྒྱ་མཚོ་ཆེན་པོ་ཡི༔ ཆུ་དེ་སྐུ་ཡིས་འདོར་ནུས་པ༔ དེ་ཡི་ཚད་དུ་སྡུག་བསྔལ་མྱོང་༔ རྡོ་རྗེ་དམྱལ་བར་གྲགས་པ་ཡིན༔ ཞེས་གསུངས་སོ༔ ཡང་གོས་སྔོན་པོ་ཅན་གྱི་རྒྱུད་ལས་ནི༔ གསང་སྔགས་ཀྱི་དམ་ཚིག་ཉམས་པ་རྡོ་རྗེ་དམྱལ་བར་སྐྱེ་སྟེ་ཚེ་ཚད་ནམ་
མཁའ་ཇིསྲིད་གནས་ཀྱི་བར་མི་ཐར་བར་གསུངས་ཏེ༔ དེ་ནི་བཤགས་པ་གཏན་ནས་མ་བྱས་པའོ༔ དེ་དག་གི་དོན་མདོར་བསྡུས་ན༔ ཨུ་རྒྱན་རིན་པོ་ཆེའི་ཞལ་ནས༔ དེ་ཡང་དམྱལ་བར་སྐྱེས་ན་ནི༔ བསྐལ་པ་མང་པོར་ཐར་དུས་ནི་མེད༔ དམྱལ་ཁམས་སུ་མི་འགྲོ་བའི་གདེང་ཚད་ཡང་བདག་ལ་ཅི་ཡོད༔ སྔར་ཡང་ཆོས་ཚུལ་བཞིན་མ་བྱས་པས་ད་རེས་ཀྱང་འཁྱེར་ཀ་འདི་ལས་མེད༔ སྔར་བསོད་ནམས་ཀྱི་ཚོགས་ཅུང་ཟད་བསགས་པའི་འབྲས་བུ་ནི་ད་རེས་ཀྱི་མི་ལུས་འདིས་ཟད༔ ད་ཚེ་འདིར་ཆོས་གཅིག་མེད་ན་འགྲོ་ས་ངན་སོང་ལས་འོས་མི་འདུག་པས་ད་ལྟ་རང་ནས༔ ཚད་ནད་སྐོམ་གྱིས་གདུང་བ་ལྟར་བརྩོན་འགྲུས་ལ་གཡེལ་བ་མེད་པར་དགེ་སྦྱོར་ལ་འབད་པར་བྱའོ༔ ཞེས་གསུངས་པ་ལྟར་ཉམས་སུ་ལོངས་ཤིག༔ སྡུག་བསྔལ་གྱི་སྡུག་བསྔལ་བཤད་པའི་སྐབས་ཏེ་ཆོས་ཐུན་བདུན་པའོ༔ དེ་ནས་འགྱུར་བའི་སྡུག་བསྔལ་བཤད་པ་ནི༔ རྡོ་རྗེའི་ཚིག་རྐང་ལས་མི་སྐྱེ་རྒ་ན་འཆི༔ ཞེས་སོགས་ཚིག་རྐང་ཕྱེད་དང་གཉིས་ཀྱིས་སྟོན་ཏེ༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱིས་གསུངས་པ་ལས༔ མིར་སྐྱེས་ན་ཡང་སྐྱེ་བ་
དང་རྒས་པ་དང་ན་བ་དང་འཆི་བའི་སྡུག་བསྔལ་བསམ་གྱིས་མི་ཁྱབ་སྟེ༔ ཞེས་གསུངས་པའི་དོན་རྒྱས་པར་བཤད་ན༔ མདོ་དྲན་པ་ཉེར་བཞག་ལས༔ མི་རྣམས་འཚོ་བ་ཐུང་བས་ཉམས༔ ཞེས་དང་༔ ཚོགས་ཀྱི་གཏམ་ལས༔ ངན་འགྲོའི་སྡུག་བསྔལ་མ་ལུས་པ༔ མི་རྣམས་ལ་ཡང་ཡོད་པར་སྣང་༔ སྡུག་བསྔལ་གཟིར་བ་དམྱལ་བ་ཉིད༔ དབུལ་བས་གཤིན་རྗེའི་འཇིག་རྟེན་པ༔ འདི་ཡི་དུད་འགྲོའི་སྡུག་བསྔལ་ཡང་༔ མཐུ་ལྡན་སྟོབས་ཀྱིས་མཐུ་མེད་པ༔ རྣམ་པར་གནོན་ཅིང་འཚེ་བ་དག༔ ཆུ་བོ་ལྟ་བུ་ཉིད་ཡིན་ནོ༔ ཁ་ཅིག་དབུལ་བ་ལས་གྱུར་དང་༔ གཞན་དག་ཆོག་མི་ཤེས་པ་འབྱུང་༔ ཡང་ཚོལ་སྡུག་བསྔལ་མི་བཟོད་པ༔ ཐམས་ཅད་འཁུ་ཞིང་གསོད་པ་ཡིན༔ ཞེས་གསུངས་པ་དང་༔ མངལ་འཇུག་གི་མདོ་ལས༔ དེ་བཞིན་ཏུ་སྐྱེ་བ་ཡང་སྡུག་བསྔལ་བ་ཡིན་ནོ༔ རྒས་པ་ཡང་སྡུག་བསྔལ་བ་ཡིན་ནོ༔ ན་བ་ཡང་སྡུག་བསྔལ་བ་ཡིན་ནོ༔ འཆི་བ་ཡང་སྡུག་བསྔལ་བ་ཡིན་ནོ༔ མི་སྡུག་པ་དང་འཕྲད་པ་ཡང་སྡུག་བསྔལ་བ་ཡིན་ནོ༔ གང་འདོད་པ་བཙལ་ཏེ་མ་རྙེད་པ་ཡང་སྡུག་བསྔལ་བ་ཡིན་ནོ༔ ཡོད་པ་བསྲུང་དཀའ་
བ་ཡང་སྡུག་བསྔལ་བ་ཡིན་ནོ༔ ཞེས་དང་༔ ས་སྡེ་ལས༔ མི་རྣམས་ལ་འདུ་བྱེད་ཀྱི་སྡུག་བསྔལ་བརྒྱད་ཡོད་དེ༔ གང་ཞེ་ན་སྐྱེ་བའི་སྡུག་བསྔལ་དང་༔ རྒས་པའི་སྡུག་བསྔལ་དང་༔ ན་བའི་སྡུག་བསྔལ་དང་༔ འཆི་བའི་སྡུག་བསྔལ་དང་༔ མི་སྡུག་པ་དང་ཕྲད་པའི་སྡུག་བསྔལ་དང་༔ སྡིག་པ་དང་བྲལ་བའི་སྡུག་བསྔལ་དང་༔ ཡོད་པ་བསྲུང་བའི་སྡུག་བསྔལ་དང་༔ མེད་པ་ཚོལ་ཞིང་འདོད་པས་འཕངས་པའི་སྡུག་བསྔལ་ལོ༔ ཞེས་དང་༔ སྐྱེ་བའི་སྡུག་བསྔལ་ནི༔ སློབ་སྤྲིང་ལས༔ ཤིན་ཏུ་མི་གཙང་དྲི་ང་གཅེར་བས་འགགས༔ རབ་ཏུ་དོག་པ་མུན་ནག་འཐིབ་པོར་འདུག་པ་ཡི༔ མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས༔ ལུས་ཀྱང་བསྐུམ་ལ་སྡུག་བསྔལ་ཆེན་པོ་མནག་དགོས་སོ༔ དེ་ནས་རིམ་གྱིས་ཏིལ་མར་བཙིར་སྤྱད་སྲ་བ་ཡིས༔ བཙིར་བ་ལྟར་བྱས་དེ་ནས་ཅི་ཞིག་ལྟར་ཏེ་བཙས༔ འོན་ཀྱང་མོད་ལ་དེ་སྲོག་མི་འདོར་གང་ཡིན་པ༔ སྡུག་བསྔལ་ཉེ་བར་སྤྱོད་པའི་རྣམ་པར་མཐོ་བརྩམ་མོད༔ མི་གཙང་དེ་ནས་གནས་བཅས་འགྲོ་བའི་ལུས་དེ་ནི༔ མངལ་གནས་རློན་པས་དཀྲིས་ཤིང་དྲི་ངད་མི་བཟད་ལྡན༔ གཟིར་བས་གནོད་
པ་བརྡ་སྟེ་རྨ་སྨིན་ཞིག་པ་བཞིན༔ སྐུགས་ལ་ཐུག་པ་བཞིན་དུ་སྔོན་གྱི་དྲན་པ་སྤངས༔ ཞེས་གསུངས་སོ༔ ཨོ་རྒྱན་ཆེན་པོའི་ཞལ་ནས་སྐྱེ་བའི་སྡུག་བསྔལ་གསུངས་པ་ནི༔ མི་ཡི་གནས་འདི་སྐྱིད་ཤོས་ཡིན་གྱུར་ཀྱང་༔ བརྒྱད་དང་འགྱུར་བའི་སྡུག་བསྔལ་དཔག་མེད་ཡོད༔ དང་པོ་ཕོ་མོ་རྒྱུ་རྐྱེན་སྤྲད་པའི་ཚེ༔ ཕ་མའི་ས་བོན་ཁུ་ཁྲག་འདྲེས་པ་སྟེ༔ རུལ་སུབ་མི་སྡོད་སྟོབས་ལྡན་འཕེལ་བར་བྱེད༔ རིམ་པར་ཆགས་ནས་ལྟེ་བའི་རྩ་མདུད་ནི༔ གྲུ་གསུམ་མ་རྩ་རྒྱལ་པོ་བ་གླང་མིག༔ སྦལ་པའི་སྒོ་ང་ཙམ་ཞིག་ཆགས་པའི་དུས༔ མ་ལ་ལྟོ་ནད་མིག་སོའི་ན་ཚ་ནི༔ སྙིང་རླུང་ཅན་ལ་སྦྱང་སྨོན་བླུད་པ་འདྲ༔ མགོ་བོ་ཟི་ལངས་ལུས་ལ་རྩེ་ཤུམ་བྱེད༔ ཡར་སྐྱུག་མར་འཇམ་སྐད་འགགས་སྡོད་སྙིང་འདོད༔ ཟླ་བ་དགུ་ན་ལུས་ཟུངས་བདུན་རྫོགས་ཏེ༔ མ་ཉིད་རྟོགས་དུས་གཡང་ལ་བཏང་བ་ལྟར༔ ལུས་འདར་ཕྱང་ཕྱོང་ལང་ལིང་སྔངས་སྐག་ཡོད༔ འགྲང་བའི་དུས་ན་བྲག་ལ་བཅར་བ་ལྟར༔ བསྒུལ་སྤྱོད་མི་ཤེས་ལུས་པོ་ཆ་ཆ་བསྡམ༔ ཕོ་མོ་འཁྲིག་དུས་མེ་མྱང་བཙོས་པ་འདྲ༔ ལུས་པོ་ཚ་ཡལ་བརྩེ་རུམ་ཚ་ཙག་བྱེད༔ མ་ཡི་ཕྱིན་དུས་རླུང་གིས་
སྤྱོད་པ་ལྟར༔ མཐོ་ལིང་དམའ་ལིང་སྒོར་སྒོར་ཐམ་ཐམ་བྱེད༔ མ་ཡི་ཉལ་དུས་རི་གསེབ་མནན་པ་ལྟར༔ ཁུ་ལུས་མ་ལུས་གང་ན་འདི་ན་མེད༔ མ་ཡི་ཕག་སེབ་ཕིབ་འོག་ཚུད་པ་ལྟར༔ ནག་ཐོམ་བྱེད་ཅིང་དབང་པོ་ལུས་སྐྱོན་འོང་༔ མ་ཡི་དྲག་ཤུལ་ལྡང་དུབ་བྱེད་ཙ་ན༔ ལུས་འགས་སྙིང་བཏོན་རྦབ་སྒྱུར་བྱེད་པ་ལྟར༔ མ་ལ་བཟའ་མེད་ལྷད་ཟས་འབག་འབོག་ཟོས༔ གོས་མེད་མལ་གྲང་སྡུག་བསྔལ་དམྱལ་བ་འདྲ༔ ཟླ་ངོ་བཅུ་སོང་ལུས་ཟུངས་རྫོགས་གྱུར་ཏེ༔ མགོ་ཞབས་ལོག་ནས་སྐྱེ་བར་འགྱུར་བའི་ཚེ༔ རྩ་སྒོ་ཡང་དོག་བྱེ་བྲག་ཐ་དད་ཀྱི༔ མ་དང་བུ་གཉིས་གཤིན་ཡུལ་གོམ་ཕྱེད་བོར༔ མ་བུ་གཉིས་ཀ་ན་ཚའི་སྡུག་བསྔལ་ཆེ༔ མ་ཡི་ཁ་རུས་མ་གཏོགས་རུས་མཚམས་བྱེ༔ ལུས་ནི་ཚལ་པ་སྟོང་དུ་གས་སྙམ་བྱེད༔ བུ་ཆུང་སུབ་ལ་ཁོང་ལྤགས་བཤུ་བ་ཙམ༔ ནུས་པ་ཡོད་ཚད་ཕྱི་རུ་བསྐྱེད་པ་ཡི༔ སེམས་ཀྱི་ལུས་སྡུག་གཏུན་ཁུང་བརྡུངས་པ་འདྲ༔ སྟན་ཁར་བྲུལ་དུས་ཆེར་ཕུང་གསེབ་སྐྱུར་ལྟར༔ གོས་སུ་དྲོ་འཇམ་ལྤགས་པ་བཀོན་གྱུར་ཀྱང་༔ མ་ཡི་མངལ་ནས་དྲོད་འཇམ་མ་ལས་ཏེ༔ ལུས་ལ་བྲེད་དང་ཟུག་དང་ན་ཚ་འོང་༔ མ་ཡི་དཔང་བླང་
བྱིའུ་ཕྲུག་ཁྲས་ཁྱེར་ལྟར༔ ལྟེ་བ་འབྲེག་པ་སྙིང་ལ་ཚེར་ཟུག་འདྲ༔ དེ་ནས་ཞག་སྐྱེད་ཟླ་སྐྱེད་ཆེར་གྱུར་ཀྱང་༔ འོག་ནས་དྲི་ཆུ་འབྱིན་དང་ལྟབ་མ་བདེ༔ ཁ་སྐོམ་ལུས་འཁྱགས་ལྟོ་ལྟོགས་ཡན་ལག་སྦྲིད༔ དབང་པོ་ལྔ་རུ་སྡུག་བསྔལ་སྔངས་སེམས་ཞུགས༔ བུ་རྫི་ཉ་ར་མ་བྱས་ཉེན་གྱུར་རྣམས༔ ཅི་བྱུང་འཆད་པར་མ་ཤེས་དུ་བ་ལས༔ མ་དེ་བརྩེ་ཞིང་བུ་ལ་བྱམས་ན་ཡང་༔ ནུ་ལྐོག་དེ་ཉིད་ཁར་བརྫ་ང་ཨ་འོ་ལས༔ ཁོ་ཡི་རེ་བ་བཀང་བར་མི་འགྱུར་རོ༔ ཞེས་གསུངས་སོ༔ དེ་ནས་རྒས་པའི་སྡུག་བསྔལ་ནི༔ རྒྱ་ཆེ་རོལ་པ་ལས༔ རྒ་བས་རྒ་བྱས་ན་ཚོད་ཡོལ་གྱུར་ན༔ སྡོང་པོ་གནམ་ལྕགས་ཀྱིས་ནི་བཅོམ་པ་བཞིན༔ རྒ་བས་འཁོག་ན་འཇིག་བཅས་ཁོང་རུལ་འདྲ༔ རྒ་ལས་འབྱུང་བ་ཐུབ་པ་ལྟར་དུ་སྨོས༔ བུད་མེད་སྐྱེས་པའི་ཚོགས་རྣམས་རྒ་བས་སྐེམ༔ འཁྲི་ཤིང་ས་ལའི་ཚོགས་ལ་རླུང་དམར་བཞིན༔ རྒ་བས་བརྩོན་འགྲུས་རྩལ་དང་ཤུགས་འཕྲོག་སྟེ༔ དཔེར་ན་སྐྱེས་བུ་འདམ་དུ་བྱིང་བ་བཞིན༔ རྒ་བས་གཟུགས་སྡུག་གཟུགས་ནི་མི་སྡུག་བྱེད༔ རྒ་བས་གཟི་བརྗིད་འཕྲོག་ཅིང་མཐུ་སྟོབས་འཕྲོགས༔ རྒ་བས་བདེ་བ་འཕྲོག་ཅིང་
བརྙས་པར་བྱེད༔ རྒ་བས་འཆི་བྱེད་རྒ་བས་མདངས་ཀྱང་འཕྲོག༔ ཅེས་དང་༔ ཨུ་རྒྱན་རིན་པོ་ཆེའི་ཞལ་ནས༔ གཉིས་པ་རྒས་པའི་སྡུག་བསྔལ་བསྟན་པ་ཡང་༔ ལོ་མང་ལོན་པས་འབྱུང་བ་རྙིང་སྟེ་རྒས༔ མཛེས་པའི་བཀྲག་ཉམས་སྡུག་པའི་མདངས་ཡལ་ཉམས༔ དྲང་པོར་སྐྱེས་པའི་ལུས་ནི་རྒུར་པོར་སོང་༔ ཡ་ཆ་ལག་སྐྱོགས་རྩ་དང་ཆུ་རྒྱུས་གསལ༔ ལུས་ཀྱི་སྟོབས་ཤོར་སེམས་ཀྱི་དཔའ་ཞི་བྱིང་༔ བསོད་ནམས་འཕེན་པ་ཟད་པས་མི་མི་བྱམས༔ ལེགས་པའི་ལང་ཚོ་རྒུད་པས་སྐྱུག་བྲོ་ལྟ༔ གཟིར་བའི་ནུས་པ་མེད་པས་རྔན་ཆད་བྱེད༔ མཐོང་བྱེད་ཀྱིས་མ་འཁྱངས་ལ་མིག་མི་གསལ༔ འབྱུང་བའི་དྭངས་མ་རུལ་བས་རྣ་བ་འོན༔ ཤ་བྲོས་མཁུར་ཚོས་ཁྲག་གི་མེ་ཏོག་ཡལ༔ རྩ་ཞར་འབུར་བ་འབུར་དོད་ཁུང་པར་ཁུང་༔ འགྲིགས་པོར་སྐྱེས་པའི་སོ་དོན་ཁ་ལྕེ་ལྡིབ༔ མགོ་བོ་དཀར་མདངས་སྟོན་པས་གདོངས་སྤུ་སྐྱེས༔ ཁ་ཚུལ་བཞིན་ཞིག་སྤོས་རྒྱའི་རི་མོ་ཤར༔ བྲང་ལ་སྡོང་སྐས་བྱུང་བས་སྐེ་རྩ་འཁྲེང་༔ རྐང་ལག་འཐེང་ཞིང་བཞིན་དུ་སྦོམ་ཕྲ་བྱེ༔ ལུས་ལ་གང་བལྟས་ཧེལ་གེ་གཅུས་བཞིན་སོང་༔ མནམ་ཞིང་ཁ་མི་བརྩེ་བས་ངོ་ཚ་བྱེད༔
ལངས་པ་མི་ཐེག་སྡོད་ན་ལུས་ནི་རྡེབ༔ སྤྲུགས་འདེབས་འུས་འདེབས་ཡ་ཡ་ཕ་མ་འབོད༔ མཚན་མོ་གཉིད་ཡལ་ནམ་ལ་ལངས་དུས་མེད༔ ཉིན་པར་བྱིང་རྨུགས་ཚ་གྲང་རྐྱེན་མི་ཐེག༔ བདེ་སར་བཞག་ཀྱང་ལྷུ་ཚིགས་ཁོལ་བུར་ན༔ དྲི་ཆུ་འདོར་དུ་མི་སྐྱེལ་གདན་ཁར་འཆོར༔ མི་སྙིང་མི་སྡུག་གཞོན་པས་བརྙས་བཅོས་བྱེད༔ གོས་བུད་གོན་པ་མི་ནུས་འཁྱགས་པ་བསྲན༔ ངོ་ཚའི་གནས་རྣམས་སྦེད་པར་མི་ཤེས་སྟོན༔ གཞོན་ནུ་ཀུན་གྱི་ལྟད་མོར་ཆེ་ཞིང་རྒོད༔ བསགས་པའི་ཟས་ནོར་མནའ་མའི་དབང་དུ་བྱས༔ སྐོམ་ལྟོགས་འོ་དོད་བོས་ཀྱང་གཅོས་མ་ཟེར༔ གཅེས་ཀྱང་སྡུག་རྒན་ཕུང་རྒན་གཅོས་མིང་འདོགས༔ འཆི་དུས་མི་འདུག་ཟེར་ཞིང་བློས་མི་ལོང་༔ བརྩེ་བ་རྣམས་ཀྱང་སུན་ནས་འཆི་རན་ཟེར༔ རྒན་རྒོག་ཡི་མུག་ག་ཆད་ལྕེབས་སྙིང་འདོད༔ སེམས་ལ་མ་ཡིན་པ་རྣམས་མི་ལ་འཆད༔ ངུ་ཞིང་ཡི་མུག་ལྟོ་དང་གོས་ཀྱིས་བཀྲེན༔ མེ་ཆུ་མི་འདུས་ལྟོ་གོས་གཡོག་མི་འོང་༔ རྒས་པའི་སྡུག་བསྔལ་སྨོན་ནེ་འཆི་བར་འདེབས༔ ཞེས་གསུངས་སོ༔ གསུམ་པ་ན་བའི་སྡུག་བསྔལ་ནི༔ བཅོམ་ལྡན་འདས་ཀྱིས༔ ན་བའི་སྡུག་
བསྔལ་ལུས་ནི་ནད་ཀྱིས་གདུང་༔ ཁ་ནི་སྐམ་བཞིན་ནི་འགྱུར་རྐང་ལག་ནི་གཡོབ༔ ཁ་ཆུ་དང་སྣབས་དང་གཅིན་དང་ངན་སྐྱུག་གིས་ལུས་ལ་གོས༔ སྨན་དང་ཁ་ཟས་ཐམས་ཅད་ནི་བོ༔ མལ་གྱི་ཐ་མལ་དུ་ནི་ཉལ༔ ཞེས་དང་༔ རྒྱ་ཆེ་རོལ་པ་ལས༔ ནད་བརྒྱ་མང་དང་ན་འཐིབ་སྡུག་བསྔལ་གྱིས༔ འགྲོ་བ་གཙེས་ཏེ་མི་ཡི་ཡི་དྭགས་བཞིན༔ རྒ་དང་ན་བས་བཅོམ་པའི་འགྲོ་ལྟོས་ལ༔ སྡུག་བསྔལ་ལས་ལ་བྱུང་བ་མྱུར་ཤོད་ཅིག༔ དཔེར་ན་དགུན་སྨད་རླུང་དང་ཁ་བ་ཆེ༔ རྩྭ་ཤིང་གེལ་པ་ནགས་སྨན་མདངས་ཡང་འཕྲོག་དེ་ལྟར་ནད་འདིས་འགྲོ་བའི་མདངས་འཕྲོག་ཅིང་༔ དབང་པོ་གཟུགས་དང་སྟོབས་ནི་ཉམས་པར་བྱེད༔ ནོར་བུ་ནོར་ཆེན་ཐ་མར་ཟད་པར་བྱེད༔ ནད་ནི་རྟག་ཏུ་འགྲོ་བ་བརྙས་པར་བྱེད༔ གནོད་པ་བྱེད་ཅིང་སྡུག་ལ་སྡང་བར་བྱེད༔ ཡོངས་སུ་གདུང་བྱེད་མཁའ་ལ་ཉི་མ་བཞིན༔ ཞེས་དང་༔ ཨོ་རྒྱན་རིན་པོ་ཆེས༔ གསུམ་པ་ན་བའི་སྡུག་བསྔལ་བསྟན་པ་ནི༔ ལུས་ཀྱི་འབྱུང་བཞི་ཆ་མ་སྙོམས་པ་ཡི༔ རླུང་དང་མཁྲིས་པ་བད་ཀན་འདུས་པ་ཡི༔ མ་རིག་པས་ནི་རྒྱུ་བྱས་ཡི་དྭགས་རྐྱེན༔ འབྲུམ་པ་རིམས་དང་རྒྱུ་གཟེར་གག་
ལྷོག་དང་༔ མཚོན་གྱིས་གཙེས་དང་གཅོང་ནད་སྡེ་བཞི་སོགས༔ བརྗོད་ཀྱིས་མི་ལོངས་ན་ཚའི་རིགས་བྱེད་ཀྱིས༔ ཚབས་ཆེན་བཏབ་སྟེ་ཉམ་ཐག་ནད་པ་དེ༔ ན་ཚའི་ཟུག་གཟེར་བསྲན་ཐབས་མ་ཚུགས་པས༔ སོ་དྲག་མཆུ་དྲག་རྐང་དྲག་ལག་དྲག་ཆགས༔ མིག་ཕུག་ཇིབ་ཅིང་བ་སྤུ་གྱེན་ལ་གཟེངས༔ ཁུང་རྒྱང་སྐད་ངན་འདོན་ཅིང་མལ་ཚིག་ཟ༔ མཛེས་པའི་བཞིན་མདངས་ཉམས་པས་ཡི་དྭགས་འདྲ༔ རྒྱུ་མ་རྣལ་འབྱར་ཤ་ཁྲག་རུས་མིག་དིམ༔ ཟས་སྐོམ་ཁར་བཅུག་ལྕེ་ལ་བྲོ་བ་མེད༔ ལུས་ཀྱི་ཟུངས་ཟད་སེམས་ཀྱི་དྲན་པ་གཏོར༔ ལྡང་དང་བསྐྱར་བར་མི་ནུས་གདན་ལ་འབྱར༔ འབོལ་བར་བཏིང་བའི་གདན་ནི་རྡོ་ལས་མཁྲེག༔ བདེ་མོར་བཅུག་པའི་སྔས་ནི་ཤིང་ལས་རེངས༔ འཇམ་པོར་གཡོག་པའི་གོས་ནི་ཚེར་ལས་རྩུབ༔ བསྲུང་ན་སྙོལ་ཟེར་ཉལ་ན་ཡར་བསླང་ཟེར༔ ནད་དབང་སོང་ནས་ངོ་ཚ་ཁྲེལ་འཛེམ་ཤོར༔ སྐྲ་ཉག་རེ་ལ་རྡུལ་ནི་ཐིག་རེ་འཛག༔ ཉིན་མོ་ཉིན་རིང་མཚན་མོ་མཚན་ཡང་རིང་༔ ཉི་མ་རྒས་དུས་ནམ་ལ་ལངས་དུས་མེད༔ ཟས་སྐོམ་མ་བྱིན་མཐོང་བ་ཙམ་གྱིས་སྐྱུགས༔ ཟས་དང་བྲལ་བས་
མནམ་ཞིང་ཡིད་མི་འོང་༔ སྨན་དཔྱད་མི་འཛུགས་ཅི་བྱས་གནོད་པར་འགྱུར༔ འདྲེ་ཆོས་རིམ་གྲོ་བྱས་ཀྱང་ནད་མ་སོལ༔ སྐོམ་ཡང་ཟ་ཚོད་འཐུང་ཚོད་སྨན་པས་འཛིན། གཉིད་བསྲུང་མལ་བསྲུང་འགྲུལ་འཁྲུལ་རེ་མོས་ཤོར༔ རྒན་པས་གཡོག་བྱས་གཞོན་པས་འདྲེ་བརྡུང་གཟིར༔ ནད་ཉམས་ཅན་གྱིས་ནད་ཀྱི་མཚང་བཤད་ནས༔ བྱ་ཐབས་འདུག་ཆད་མལ་ན་མི་འགྱོད་བསྐྱལ༔ ཆོས་ཀྱི་མཐུན་བཟུང་བན་ཆོག་བོན་ཆོག་གྱེར༔ སྔས་སྲུང་སྨན་པ་མོ་མ་མགྲོན་དུ་བསགས༔ གཉེན་བཤེས་མང་པོས་ན་ཚ་དེ༔ འགོགས་དང་བགོ་རུ་མ་བཏུབ་སྟེ༔ སུས་ཀྱང་མི་གཏོང་སྡུག་བསྔལ་གཅིག་པུས་མྱོང་༔ གཏར་སྲེག་དཔྱད་བྱས་ལྕི་ཡང་ན་ཚ་སྲེན༔ སེམས་ཅན་ན་བའི་སྡུག་བསྔལ་བསམ་མི་ཁྱབ༔ ཅེས་གསུངས་སོ༔ དེ་ནས་འཆི་བའི་སྡུག་བསྔལ་ནི༔ རྒྱ་ཆེ་རོལ་པ་ལས༔ འཆི་དང་འཕོ་དང་འཆི་འཕོའི་དུས་བྱེད་པ༔ འཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ༔ ཕྱིར་མི་འོང་ཞིང་འཕྲད་པར་འགྱུར་མ་ཡིན༔ ཤིང་ལས་ལོ་འབྲུལ་འདྲ་ཞིང་རླུང་རྒྱུན་མཚུངས༔ འཆི་བ་དབང་ཡོད་པ་དག་དབང་མེད་བྱེད༔ འཆི་བ་འཕྲོག་བྱེད་ཆུ་བོས་ཤིང་དེ་བཞིན༔
མི་ནི་གཉིས་མིན་གྲོགས་མེད་གཅིག་པུར་འགྲོ༔ རང་ལ་འབྲས་བུ་ལྡན་པས་དབང་ཡང་མེད༔ འཆི་བས་སྲོག་ཆགས་མང་པོ་འཛིན་བྱེད་ཅིང་༔ འབྱུང་པོའི་ཚོགས་ལ་རྒྱ་མཚོའི་ཆུ་སྲིན་བཞིན༔ ཀླུ་ལ་མཁའ་ལྡིང་གླང་ཆེན་སེང་གེ་འདྲ༔ རྩྭ་ཤིང་འབྱུང་པོའི་ཚོགས་ལ་མེ་དང་མཚུངས༔ ཞེས་དང་༔ གསལ་རྒྱལ་ལ་གདམས་པ་ལས༔ རྒྱལ་པོ་ཆེན་པོ་འཆི་བདག་གི་གསལ་ཤིང་གིས་ཟུག་སྟེ༔ རྒྱགས་པ་དང་ནི་བྲལ༔ གཤིས་ནི་ཞིག༔ ཚིགས་ཐམས་ཅད་ནི་བྱེ་བྲལ༔ ཤ་དང་ཁྲག་ནི་སྐམ༔ ཞེས་དང་༔ ཨུ་རྒྱན་རིན་པོ་ཆེས་འཆི་བའི་སྡུག་བསྔལ་གསུང་པ་ནི༔ གཅེས་པར་བྱས་པའི་ལུས་པོ་འབོར་བའི་རྟགས༔ བྱད་ཀྱི་མདངས་ཡལ་ཧཾ་པ་རེངས་ཏེ་འགྲོ༔ སོ་དྲག་ནག་པོ་ཆགས་ཏེ་ལྕེ་གཞུང་ནག༔ ལུས་ལྕི་ཤེས་པ་གཏིང་བྱིང་གྲང་ཤུམ་བྱེད༔ ཁ་ཆུ་སྣ་ཆུ་འཛག་ཅིང་ཡར་འཐེན་ཟེར༔ མལ་ཚུགས་མ་ཐུབ་ཡར་སླང་མར་སྙོལ་ཟེར༔ ས་ཆུ་མེ་རླུང་འབྱུང་བ་ཐིམ་པའི་རྟགས༔ ཤེས་པ་བྱིང་ནས་མར་ཐིམ་ཡར་ཁྱོག་ཟེར༔ རིག་པ་འཁྲུལ་ནས་ཁ་འཆལ་གླག་གཅོལ་སྨྲ༔ དབུགས་ནི་ཁར་འཚངས་ཕྱི་ནང་ཕུལ་མི་ནུས༔ རྩ་ཞིག་འབྱུང་བ་
ཐིམ་པ་རྐན་ལྕེ་ལྡིག༔ བཞིན་མདངས་ཉམས་ཤིང་ཁ་སྣ་གྲེ་ཕུག་སྐམ༔ སྣ་ཞོམ་ནག་ཧཾ་བལ་ལུད་ཚང་གིས་འགྲོ༔ རྣམ་ཤེས་སྙིང་ཐུམ་མི་ངོ་མི་ཤེས་ཤིང་༔ དབུགས་སྡུད་མི་ཤེས་བོས་ཀྱང་ལན་མི་ཐོན༔ ཕྱི་རྒྱུ་ནང་རྒྱུ་ངར་ངར་ཁག་ཁག་ཟེར༔ ལྕེ་སྐམ་ཕུག་བྲོས་སེམས་ནི་ཚིག་པ་ཟ༔ སྣ་སྒོ་ཕྱི་ནང་དབུགས་ཀྱི་རྒྱུ་འགྲུལ་ཆད༔ ནད་པ་ཤོར་ཟེར་བྲང་བརྡུང་འོ་དོད་འབོད༔ ལུས་ལ་འཇུས་ནས་བརྩེ་བས་ཁ་གཏུགས་ཀྱང་༔ ཁོ་ལ་ཉན་དང་ལྟ་བའི་དབང་མེད་པར༔ རྣམ་པར་ཤེས་པ་སྙིང་གི་དཀྱིལ་དུ་བརྒྱལ༔ གློ་བས་སྙིང་གཡོག་དབུགས་ནི་ཕྱིར་ཤོག་སོང་༔ ཞག་གསུམ་ནག་ཐུམ་དྲན་མེད་བྱ་བཞིན་བརྒྱལ༔ མཆན་འོག་གཉིས་ན་དྲོད་ནི་ཨེན་ཙམ་ཞིག༔ གཞན་རྣམས་གྲང་ཐག་ཆོད་དེ་ས་རྡོ་བཞིན༔ ནད་གཡོག་ཉེ་འཁོར་སྡུག་བསྔལ་རོས་ནོན་ནས༔ ཤི་བར་བྱེད་ཅིང་གྲོས་འདུན་བློ་བསྡུར་བྱེད༔ རོ་དེ་མ་མཁོ་ཅི་བྱེད་ལ་དོར་ནས༔ བླ་སློབ་ཟབ་མོ་གཏམ་གླེང་མི་ཡི་མཐའ༔ རྗེ་འབངས་དཀའ་བའི་མཐུན་འཇུག་མི་ཡི་མཐའ༔ ཁྱོ་ཆུན་མཐུན་པོར་འགྲོགས་པ་མི་ཡི་མཐའ༔ ཞེས་སོགས་གསུངས་སོ༔ ས་སྡེ་ལས༔ སྤྱིར་ལུས་ཅན་ཐམས་
ཅད་དང་༔ ཁྱད་པར་མི་རྣམས་ལ་སྡུག་བསྔལ་རྣམ་གྲངས་བརྒྱད་ཅུ་ཡོད་པར་གསུངས་སོ༔ དེ་དག་གི་དོན་ཨོ་རྒྱན་ཆེན་པོས་བསྡུས་ཏེ་གསུངས་པ་ནི༔ དེ་ནས་ཆེར་ལོང་ལང་ཚོ་དར་ལ་བབ༔ ཡོད་པ་སྣ་ལེན་མེལ་ཚེ་བྱེད་བྱེད་ནས༔ བྲེལ་ལ་ཁ་སྐོམ་ལུས་སེམས་གཉིས་ཀ་རྡུགས༔ དགོས་ཆུང་ཚེ་སྦྱར་བསྲུང་གིས་མི་ལོང་སྟེ༔ ཞེ་སོགས་ཡོད་པ་ཚོལ་སྐྱོང་དང་མེད་པ་ཚོལ་ཁྲོའི་སྡུག་བསྔལ་དཔག་ཏུ་མེད་པ་གསུངས་ཏེ༔ ཀུན་གྱི་ཤེས་ལྟར་ཡིན་པས་བཤད་མི་དགོས་སོ༔ དེར་སྐྱེ་བའི་རྒྱུ་ནི་དྲན་ཉེ་ལས༔ འཆི་ཁར་བདེན་པའི་ཆོས་བསྟན་དང་༔ མགུ་ཞིང་དཀོན་མཆོག་མཐོང་བ་དང་༔ ཆོས་ཐོས་ཆོས་རྟོགས་གྱུར་ཅིག་ཅེས་སྨོན་ལམ་འདེབས་པས་མིར་སྐྱེའོ༔ ཞེས་གསུངས་སོ༔ དེ་ནས་རྡོ་རྗེའི་ཚིག་རྐང་ལས༔ ལྷ་མིན་འཐབ་རྩོད༔ ཅེས་དང་དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ལྷ་མིན་དུ་སྐྱེས་ན་ཡང་འཐབ་རྩོད་ཀྱི་སྡུག་བསྔལ་ཞེས་གསུངས་པའི་དོན་དྲན་པ་ཉེར་བཞག་ལས༔ ལྷ་མིན་འཐབ་ཅིང་རྩོད་པས་ཉམ༔ ཞེས་དང་༔ བཤེས་སྤྲིང་ལས༔ ལྷ་མིན་གནས་ནའང་རང་བཞིན་གྱིས་ལྷ་ཡི༔
དཔལ་ལ་སྣང་ཕྱིར་ཡིད་ཀྱི་སྡུག་བསྔལ་ཆེ༔ དེ་དག་བློ་དང་ལྡན་ཡང་འགྲོ་བ་ཡི༔ སྒྲིབ་པས་བདེན་པ་མཐོང་བ་མ་མཆིས་སོ༔ ཞེས་དང་༔ ཨུ་རྒྱན་རིན་པོ་ཆེས༔ ལྷ་མ་ཡིན་གྱི་གནས་སུ་སྐྱེས་ན་ཡང་༔ འཐབ་རྩོད་སྡུག་བསྔལ་བརྗོད་ཀྱིས་མི་ལོང་སྟེ༔ ཕྲག་དོག་ཀུན་བསླང་མི་དགེ་བཅུ་སྤྱད་པས༔ ལྷ་མ་ཡིན་དུ་མཚམས་སྦྱོར་སྐྱེ་བ་ལེན༔ ལྷ་རྣམས་བསོད་ནམས་ལོངས་སྤྱོད་ཆེ་བ་ལ༔ ལྷ་མ་ཡིན་རྣམས་ཕྲག་དོག་སྐྱེས་ནས་འཐབ༔ ལྷ་དང་ལྷ་མིན་གཡུལ་བཤམས་འཁྲུག་པའི་དུས༔ ཕན་ཚུན་འཐབ་རྩོད་ལས་སུ་གོ་མཚོན་ཏེ༔ མཚོན་ཆའི་འཁོར་ལོ་གནོད་པ་འབའ་ཞིག་སྐྱེལ༔ ལུས་ནི་སྨྲས་ནས་འགྲད་དང་ཤི་བ་དང་༔ ངག་ཏུ་མི་སྙན་རྒྱོབ་སོད་སྒྲ་ཡང་སྒྲོག༔ མ་ཤི་བ་ལ་མེར་བསྲེགས་ཆུ་ལ་བསྐྱལ༔ མགོ་འབྲེག་སྙིང་འདོན་ནང་ལྟོ་བླུག་པར་བྱེད༔ ཉིན་འཁྲུག་མཚན་འཁྲུག་ལས་ཀ་དམག་ལ་བྱེད༔ འཐབ་རྩོད་སྡུག་བསྔལ་མི་བཟོད་དཔག་མེད་ཡོད༔ ཅེས་གསུངས་པ་དང་༔ དྲན་པ་ཉེར་བཞག་ལས༔ རྟག་པར་གཡོ་དང་སྒྱུ་སྤྱོད་ཅིང་༔ སྡིག་པ་ཆེན་པོ་མ་བྱས་ལ༔ འཐབ་ལ་དགའ་ཞིང་སྦྱིན་བྱེད་པ༔ དེ་ནི་ལྷ་མིན་དབང་ཕྱུག་
འགྱུར༔ ཞེས་གསུངས་སོ༔ དེ་ནས་ལྷ་ཕམ་ལྟུང་སྡུག་བསྔལ་བཤད་པ་ནི༔ རྡོ་རྗེའི་ཚིག་རྐང་ལས༔ ལྷ་ཡི་སྡུག་བསྔལ་ཡོད༔ ཅེས་དང་༔ དེའི་འགྲེལ་པ་ཐུགས་རྗེ་ཆེན་པོས་གསུངས་པ་ལས༔ ལྷ་ཡི་ཕམ་ལྟུང་གི་སྡུག་བསྔལ་དཔག་ཏུ་མེད་པ་ཡོད་དོ༔ ཞེས་གསུངས་པའི་དོན་ནི༔ མདོ་དྲན་པ་ཉེར་བཞག་ལས༔ ལྷ་རྣམས་བག་མེད་པ་ཡིས་ཉམས༔ ཞེས་དང་༔ བཤེས་སྤྲིང་ལས༔ ལུས་ཀྱི་ཁ་དོག་མི་སྡུག་འགྱུར་བ་དང་༔ སྟན་ལ་མི་དགའ་མེ་ཏོག་ཕྲེང་རྙིང་དང་༔ གོས་ལ་དྲི་མ་ཆགས་དང་ལུས་ལ་ནི༔ སྔོན་ཆད་མེད་པའི་རྔུལ་འབྱུང་ཞེས་བྱ་ནི༔ མཐོ་རིས་འཆི་འཕོ་སྦོན་བྱེད་སྔ་ལྟས་ལྡ༔ ལྷ་ཡུལ་གནས་པའི་ལྷ་རྣམས་ལ་འབྱུང་སྟེ༔ དགེ་བའི་བློ་དང་ལྡན་ཀྱང་འགྲོ་བ་ཡི༔ སྒྲིབ་པས་བདེན་པ་མཐོང་བ་མ་ཡིན་ནོ༔ ལྷ་ཡི་འཇིག་རྟེན་དག་ནས་འཕོས་པ་ཡང་༔ གལ་ཏེ་དགེ་བའི་ལྷག་མ་འགའ་མེད་ན༔ དེ་ནས་བཟུང་སྟེ་དམྱལ་བ་ཡི་དྭགས་དང་༔ དུད་འགྲོར་གནས་པ་གང་ཡང་རུང་བ་ཡིན༔ ཞེས་དང་༔ ཨུ་རྒྱན་རིན་པོ་ཆེས༔ མཐོ་རིས་གནས་གསུམ་བདེ་བ་བཀོད་དེ་ཡང་༔ དངོས་ན་མཐོ་རིས་ན་ཡང་
བདེ་བ་མེད༔ དགེ་བཅུ་སྤྱད་པས་ལྷ་ཡི་ལུས་ལེན་ཡང་༔ སྔ་ལྟས་ལོག་པ་བཅུ་གསུམ་སྡུག་བསྔལ་ཡོད༔ གཞལ་ཡས་ཁང་གི་འོད་ཤོར་ཁ་དོག་ཉམས༔ དཔག་བསམ་ཤིང་འགྱེལ་ཁྲུས་ཀྱི་རྫིང་བུ་སྐམ༔ མེ་ཏོག་སད་ཁྱེར་མ་རྨོས་ལོ་ཏོག་མེད༔ ཅང་ཤེས་རྟ་ཤི་འདོད་འཇོའི་བ་ཡང་ཤི༔ ལུས་ཀྱི་འོད་ཉམས་དྲི་མི་ཞིམ་པ་ལང་༔ རྒྱན་ཆ་མེ་ཏོག་ཕྲེང་བ་རྣམས་ཀྱང་རྙིང་༔ མཆན་ཁུང་གཉིས་རུལ་ཆུང་མས་སླས་ལ་བོར༔ ལྷ་གྲོགས་མི་ཉེ་རིང་དུ་གནས་པ་དང་༔ འཆི་བར་ཤེས་ནས་སྡུག་བསྔལ་དཔག་ཏུ་མེད༔ མི་ལོ་ལྔ་བཅུ་ཕྲག་གཅིག་ལྟས་འབྱུང་འཆི༔ ཕྱི་མ་གར་སྐྱེ་ལྷ་ཡི་མིག་གིས་མཐོང་༔ བསགས་པའི་བསོད་ཟད་སྡིག་འཕེལ་ངན་སོང་སྐྱེ༔ སྡུག་བསྔལ་སྔ་མ་མ་སང་ཕྱི་མས་མནན༔ གར་སྐྱེ་ལུས་ཀྱི་སྡུག་བསྔལ་མངོན་ཤེས་ཡོད༔ ཅེས་གསུངས་སོ༔ དེར་སྐྱེ་བའི་རྒྱུ་ཡང་མདོ་དྲན་པ་ཉེར་བཞག་ལས༔ སྦྱིན་དང་ཚུལ་ཁྲིམས་རྣམ་པར་དག༔ ཆོས་ཉན་ལ་སྤྲོ་དགེ་བཅུ་སྤྱོད༔ འཆི་ཁར་སྐུ་གཟུགས་མཐོང་བ་ནི༔ ལྷ་ཡི་ནང་དུ་སྐྱེ་བར་འགྱུར༔ ཞེས་གསུངས་སོ༔ དེ་ལྟར་བདེ་འགྲོ་ལྷ་རྣམས་ལ་གནས་སྐབས་བདེ་སྐྱིད་ལོངས་སྤྱོད་དཔག་ཏུ་མེད་
པ་ཡོད་ཀྱང་མཐར་ལྟུང་༔ ལྷ་མ་ཡིན་ལ་ཡང་ལོངས་སྤྱོད་བདེ་སྐྱིད་ལྷ་དང་འདྲ་བ་ཡོད་ཀྱང་༔ ལོ་རེ་ལན་གཉིས་འཁྲུག་པ་ཆེན་པོས་སྡུག་བསྔལ་ཆེ༔ སེམས་ནི་རྟག་ཏུ་མི་བདེ༔ མི་རྣམས་ལ་ཡང་གནས་སྐབས་བདེ་སྐྱིད་ཡོད་ཀྱང་༔ སྐྱེ་རྒ་ན་འཆི་བཞིའི་འཕྲང་ལ་འགྲིམས༔ མིའི་ནང་ནས་འཁོར་ལོས་སྒྱུར་རྒྱལ༔ འདོད་ཁམས་ཀྱི་ལྷ་ལ་བརྒྱ་བྱིན༔ གཟུགས་ཁམས་ཀྱི་ལྷ་ལ་ཚངས་པ་སྟེ༔ དེ་གསུམ་ལས་ལྷག་པ་མེད་དེ༔ དེ་ཡང་མཐར་ལྟུང་༔ གཟུགས་ཁམས་ཀྱི་ལྷ་ལ་སྡུག་བསྔལ་མེད་ཀྱང་༔ མཐར་ཡང་ལྟུང་བར་འགྱུར་ཏེ༔ བཤེས་སྤྲིང་ལས༔ བསམ་གཏན་བཞི་པ་རབ་ཀྱི་མཐར་སོན་ཡང་༔ མནར་མེད་མེ་ཡི་བུད་ཤིང་བྱེད་པ་མཐོང་༔ ཚངས་ཉིད་ཆགས་བྲལ་བདེ་བ་ཐོབ་སླར༔ མནར་མེད་མེ་ཡི་བུད་ཤིང་འགྱུར་བ་ཡི༔ སྡུག་བསྔལ་རྒྱུན་མི་ཆད་པ་བསྟན་འཚལ་ལོ༔ འཁོར་ལོས་སྒྱུར་རྒྱལ་ཉིད་དུ་གྱུར་ན་ཡང་༔ སླར་ཡང་འཁོར་བའི་ཡང་བྲན་ཉིད་དུ་འགྱུར༔ བརྒྱ་བྱིན་མཆོད་འོས་ཉིད་དུ་གྱུར་ན་ཡང་༔ ལས་ཀྱི་དབང་གིས་སླར་ཡང་ས་སྟེང་ལྟུང་༔ ཞེས་གསུངས་སོ༔ དེ་ལྟར་འགྱུར་བའི་སྡུག་བསྔལ་བཤད་
ནས༔ སྤྱིར་འཁོར་བའི་ཉེས་དམིགས་བཤད་པ་ནི༔ རྡོ་རྗེའི་ཚིག་རྐང་རྩ་འགྲེལ་གྱི་ཚིག་ཟུར་ལས༔ རིགས་དྲུག་འཁྱམས་ཞེས་དང་༔ སྡུག་བསྔལ་ཡོད༔ ཅེས་དང་༔ སྡུག་བསྔལ་བསམ་གྱིས་མི་ཁྱབ་པ་ཡོད་དོ༔ ཞེས་པའི་དོན་ཏེ༔ རྒྱ་ཆེ་རོལ་པ་ལས༔ འཇིག་རྟེན་མ་རིག་དབང་གི་སྐྱེ་བོ་རྣམས༔ མི་དང་ལྷ་དང་ལྷ་མིན་ངན་སོང་གསུམ༔ འགྲོ་བ་དྲུག་པོ་དག་ཏུ་རྟག་ཏུ་འཁོར༔ དཔེར་ན་རྫ་མཁན་འཕང་ལོ་འཁོར་བ་བཞིན༔ ཞེས་དང་༔ སྲིད་གསུམ་སྐྱེ་རྒ་ནད་ཀྱིས་སྡུག་བསྔལ་དང་༔ འཆི་མེད་རབ་འབར་འདི་ནི་གཞོམ་མེད་པར༔ སྲིད་ལས་འབྱུང་འགྱུར་འགྲོ་ལ་རྟག་ཏུ་རྨོངས༔ བུམ་པར་ཆུད་པའི་བུང་བ་འཁོར་བ་བཞིན༔ ཞེས་དང་༔ མདོ་ལས༔ འདོད་པའི་ཁམས་ནི་སྐྱོན་དང་བཅས་པ་སྟེ༔ གཟུགས་ཀྱི་ཁམས་ཀྱང་སྐྱོན་དང་བཅས་པའོ༔ དེ་བཞིན་གཟུགས་མེད་ཁམས་ཀྱང་སྐྱོན་དང་བཅས༔ མྱ་ངན་འདས་པ་འབའ་ཞིག་སྐྱོན་མེད་མཐོང་༔ ཞེས་དང་༔ དྲན་པ་ཉེར་བཞག་ལས༔ འཁོར་བ་ཁབ་ཀྱི་རྩེ་ཙམ་ལ༔ བདེ་བ་ནམ་ཡང་ཡོད་མ་ཡིན༔ ཞེས་གསུངས་སོ༔ འཁོར་བའི་གནས་ཀྱི་བདེ་བ་ལ་སྙིང་པོ་མེད་དེ༔
བཤེས་སྤྲིང་ལས༔ མཐོ་རིས་བུ་མོའི་ནུ་མ་རྐེད་པ་ལ༔ རེག་པའི་བདེ་བ་ཡུན་རིང་མྱོང་ནས་སླར༔ དམྱལ་བར་ཐག་གཅོད་བྱེད་པའི་འཁྲུལ་འཁོར་གྱི་རེག་པ་ཤིན་ཏུ་མི་བཟད་བསྟེན་འཚལ་ལོ༔ རྐང་པའི་རེག་པ་ནེམ་པའི་བདེ་བཟོད་པའི༔ ལྷུན་པོའི་སྤོ་ལ་ཡུན་རིང་གནས་ནས་ནི༔ སླར་ཡང་མེ་མུར་རོ་མྱགས་རྒྱུ་བ་ཡི༔ སྡུག་བསྔལ་མི་བཟད་ཕོག་སྙམ་བགྱིད་འཚལ་ལོ༔ མཐོ་རིས་བུ་མོ་འབྲང་ཞིང་དགའ་བ་དང་༔ རྣམ་པར་མཛེས་ཚལ་སོང་ཞིང་བརྗེས་ནས་སླར༔ འདབ་མ་རལ་གྲི་འདྲ་ཚལ་ནགས་རྣམས་ཀྱིས༔ རྐང་ལག་རྣ་བ་རྣམས་གཅོད་ཐོབ་པར་འགྱུར༔ དལ་གྱིས་འབབ་པ་ལྷ་ཡི་བུ་མོ་ནི༔ གདོང་མཛེས་གསེར་གྱི་པདྨའི་གདན་བཞུགས་ནས༔ སླར་ཡང་དམྱལ་བའི་ཆུ་བོ་རབ་མེད་ལས༔ ཚྭ་སྒོ་བཟོད་གླགས་ཆུ་ཚན་འཇུག་འཚལ་ལོ༔ ཞེས་གསུངས་སོ༔ ལྷའི་བུ་ཉི་མ་དང་ཟླ་བའི་ལུས་ཐོབ་ཀྱང་སྙིང་པོ་མེད་དེ༔ བཤེས་སྤྲིང་ལས༔ ཉི་མ་ཟླ་བ་ཉིད་ཐོབ་རང་ལུས་ཀྱི༔ འོད་ཀྱིས་འཇིག་རྟེན་མཐའ་དག་སྣང་བྱས་ཏེ༔ སླར་ཡང་མུན་པ་སྨག་ཏུ་ཕྱིན་གྱུར་ནས༔ རང་གི་ལག་པ་བརྐྱང་ཡང་མཐོང་མི་འགྱུར༔ ཅེས་
གསུངས་སོ༔ འཁོར་བར་དགྲ་གཉེན་ངེས་པ་མེད་དེ༔ ནཱ་ག་ཛུ་ནས༔ ཕ་ནི་བུ་ཉིད་དགྲ་ནི་ཆུང་མ་ཉིད༔ སྐྱེ་བོ་དགྲར་གྱུར་པ་ཡང་བཤེས་ཉིད་ལ༔ བཟློག་པ་ཉིད་དུ་མཆི་བས་དེ་སྐད་དུ༔ འཁོར་བ་དག་ན་ངེས་པ་འགའ་མ་མཆིས༔ ཞེས་དང་༔ བྲམ་ཟེའི་རྟོགས་བརྗོད་སྡེ་ལས༔ བཅོམ་ལྡན་འདས་ཀྱིས་བཀའ་སྩལ་པ༔ ཕ་མ་དེ་བཞིན་ཕུ་ནུ་དང་༔ དེ་བཞིན་ཉེ་དུ་མཛའ་བཤེས་བུ༔ ངེས་མེད་བདག་གིར་འཛིན་བྱེད་པ༔ དེ་ནི་འཇིག་རྟེན་ཕྱིན་ཅི་ལོག༔ མར་གྱུར་པ་ཡང་ཆུང་མར་འགྱུར༔ ཆུང་མར་གྱུར་པ་མནའ་མར་འགྱུར༔ མནའ་མར་གྱུར་པ་བྲན་མོར་འགྱུར༔ དགྲ་ཡང་ཁྱིམ་གྱི་བདག་པོར་འགྱུར༔ ཕར་གྱུར་པ་ཡང་བུ་ཕོར་འགྱུར༔ བུ་ཕོར་གྱུར་པ་དགྲ་བོར་འགྱུར༔ དགྲར་གྱུར་པ་ནི་བྲན་འགྱུར་ཏེ༔ མངག་གཞུག་ལས་མི་གྱུར་དེ་བཞིན༔ རྒྱལ་པོར་གྱུར་པ་ཚལ་ཟར་འགྱུར༔ ཚལ་ཟར་གྱུར་པ་བཀྲེན་པ་དང་༔ གྲོང་མི་ངན་པ་དམན་པ་དང་༔ འཇིག་རྟེན་རྣམས་ཀྱིས་སྨད་པར་འགྱུར༔ བྲམ་ཟེར་གྱུར་པ་རྒྱལ་རིགས་འགྱུར༔ རྒྱལ་རིགས་རྗེ་རིགས་ཉིད་དུ་སྟེ༔ རྗེ་རིགས་གྱུར་པ་དམངས་རིགས་དང་༔ དེ་བཞིན་གདོལ་པ་
གཡུང་པོར་འགྱུར༔ གང་དག་ཁྱོད་ཀྱི་བུར་སྐྱེས་པ༔ སྟོང་གི་ཕྲག་དང་བརྒྱ་ཕྲག་དང་༔ ཁྲག་ཁྲིག་ཕྲག་ནི་དུ་མ་དང་༔ དུས་གཞན་དུ་ནི་དགྲ་བོར་འགྱུར༔ ཞེས་གསུངས་པས་སྐྱེ་བ་འདིར་དགྲ་ཡིན་པ་སྐྱེ་བ་གཞན་དུ་བུར་སྐྱེ་བ་སོགས་མ་ངེས་སོ༔ ཚེ་འདིར་ཡང་དགྲ་གཉེན་ངེས་པ་མེད་དེ༔ དཔུང་བཟང་གིས་ཞུས་མདོར༔ རེ་ཞིག་གཅིག་ན་དགྲ་ཡང་མཛའ་བོར་འགྱུར༔ མཛའ་བོ་ཡང་ནི་དེ་བཞིན་དགྲ་རུ་འགྱུར༔ དེ་བཞིན་ཁ་ཅིག་ཀྱང་ནི་བར་མར་འགྱུར༔ བར་མ་དེ་ཉིད་ཀྱང་ནི་དགྲ་བོར་འགྱུར༔ དེ་བཞིན་མཛའ་བཤེས་འགྱུར་བར་རིག་ནས་ནི༔ བློ་གྲོས་ལྡན་པས་ནམ་ཡང་ཆགས་མི་བྱ༔ གཉེན་ལ་དགའ་བའི་སེམས་ཀྱི་རྣམ་རྟོག་དག༔ བཟློག་ནས་དགེ་ལ་ཅི་བདེར་བཞག་པར་བྱ༔ ཞེས་གསུངས་སོ༔ འཁོར་བར་དགྲ་འདུལ་གཉེན་བསྐྱང་བྱས་པ་ལ་སྙིང་པོ་མེད་དེ༔ མྱ་ངན་བསལ་བ་ལས༔ ཡང་དང་ཡང་དུ་དམྱལ་བ་ན༔ ཟངས་ཞུན་བཀོལ་བ་གང་འཐུང་བ༔ རྒྱ་མཚོ་ནང་གི་ཆུ་ལ་ཡང་༔ དེ་ཡི་ཚད་ཙམ་ཡོད་མ་ཡིན༔ ཁྱི་དང་ཕག་ཏུ་གྱུར་པ་ན༔ མི་གཙང་པ་ནི་གང་ཟོས་པ༔ རི་ཡི་རྒྱལ་པོ་ལྷུན་པོ་ཡི༔
ཚད་ལས་ཤིན་ཏུ་ལྷག་པར་འགྱུར༔ མཛའ་བཤེས་རབ་ཏུ་བྲལ་བ་ཡི༔ འཁོར་བའི་གནས་སུ་གང་ངུས་པ༔ མིག་གི་མཆི་མའི་ཐིགས་པ་ཡི༔ སྣོད་དུ་རྒྱ་མཚོ་རུང་མ་ཡིན༔ ཕན་ཚུན་དག་ཏུ་རྩོད་པའི་ཕྱིར༔ མགོ་བོ་བཅད་པ་གང་ཡིན་པ༔ སྤུངས་ན་དེ་ལྟར་མཐོ་བ་ཡི༔ ཚངས་པའི་འཇིག་རྟེན་ལས་ཀྱང་ཐལ༔ སྲིན་བུར་གྱུར་ཅིང་རབ་བཀྲེས་པས༔ ས་ལུད་ཟོས་པ་གང་ཡིན་པ༔ འོ་མའི་རྒྱ་མཚོ་ཆེ་ནང་དུ༔ དེ་ཡིས་བཀང་ན་ཤིན་ཏུ་འགང་༔ ཞེས་གསུངས་སོ༔ རང་ཅག་རྣམས་འགྲོ་བ་རིགས་དྲུག་ལ་མ་སྐྱེས་པ་གཅིག་ཀྱང་མེད་དེ༔ སློབ་སྤྲིང་ལས༔ འགྲོ་བ་ལན་བརྒྱར་མ་སོང་འགྲོ་འདི་གང་ཞིག་ཡོད༔ སྔོན་ཆད་ལན་མང་མ་མྱོང་བདེ་གང་ཞིག༔ རྔ་ཡབ་དཀར་མཛེས་ལྟ་བུའི་དཔལ་གང་མ་ཐོབ་པ༔ དེ་ཡང་གང་ཞིག་ཡོད་ན་འོན་ཀྱང་འདོད་ཆགས་འཕེལ༔ སྔོན་ཆད་ལན་མང་མ་མྱོང་སྡུག་བསྔལ་དེ་ཡོད་མིན༔ འགྲོ་བ་གང་གིས་ཚིམ་གྱུར་འདོད་པ་དེ་ཡང་མེད༔ གང་ཞིག་ལྟོར་མ་ཉལ་བའི་སེམས་ཅན་དེ་མེད་ན༔ འོན་ཀྱང་ཅི་ལྟར་འཁོར་བ་པ་ལ་ཆགས་བྲལ་མེད༔ ཅེས་གསུངས་སོ༔ ཚེ་རབས་དེ་དང་དེ་དག་ཏུ་བདེ་སྐྱིད་ལོངས་
སྤྱོད་བསྒྲུབ་པའི་ཆེད་དུ་ཤི་བ་ཡང་གྲངས་མེད་དེ༔ འདོད་པ་ལ་གདམས་པའི་མདོ་ལས༔ འདོད་པ་ཚོལ་ཞིང་སྤྱོད་པ་ན་ཡུན་རིང་པོར་སེང་གེ་རྣམས་ཀྱི་ཁར་ཆུད་ནས་ཤི་བའི་མཐའ་ཡང་མི་མངོན་ནོ༔ བ་ལང་གསོད་ཅིང་བ་ལང་གི་ཤ་ཟ་བའི་ཁར་ཆུད་པའི་མཐའ་ཡང་མི་མངོན་ནོ༔ སྦལ་པར་གྱུར་ནས་སྦྲུལ་རྒྱགས་ཀྱི་ཁར་ཆུད་པའི་མཐའ་ཡང་མི་མངོན་ནོ༔ ཆུ་གནས་སུ་སྐྱེས་ཏེ་ཆུ་སྲིན་གྱི་ཁར་ཆུད་ནས་ཤི་བའི་མཐའ་ཡང་མི་མངོན་ནོ༔ སྡུག་བསྔལ་དྲག་ལ་རྩུབ་པ་མི་བཟོད་པ་ཉམས་སུ་མྱོང་ནས་ཤི་བའི་ཁྲག་བསགས་པ་ནི༔ རྒྱ་མཚོ་ཆེན་པོའི་ཆུ་བས་ཀྱང་མང་ངོ་༔ རུས་པ་སྤངས་པ་ནི་རིའི་རྒྱལ་པོ་རི་རབ་བས་ཀྱང་མཐོའོ༔ ཞེས་གསུངས་སོ༔ དེ་ལྟར་འཁོར་བར་འཁོར་ཚེ་ལྷ་དང་མིའི་རྒྱལ་སྲིད་ཐོབ་ཅིང་བདེ་སྐྱིད་དཔག་མེད་ཐོབ་དུས་ཀྱང་བྱུང་སྟེ༔ བདེ་སྐྱིད་ལོངས་སྤྱོད་དེས་ཚིམ་པ་དང་ཆོག་ཤེས་པ་མེད་དེ༔ རྒྱ་ཆེ་རོལ་པ་ལས༔ རྒྱལ་པོ་ལྷ་ཡི་འདོད་པ་གང་ཡིན་པ་དང་༔ མིའི་འདོད་པ་གང་ཡིན་པ་དང་༔ འདོད་པ་ཐམས་ཅད་མི་གཅིག་གིས་ཐོབ་ཀྱང་༔ དེ་ལ་ཆོག་པ་མེད་དེ་ཡང་ཚོལ་ལོ༔ ཞེས་དང་༔ བཅོམ་ལྡན་འདས་ཀྱིས༔ ས་
འདི་རི་དང་བཅས་ཤིང་རྒྱ་མཚོར་བཅས༔ རིན་ཆེན་ཀུན་དང་བཅས་པ་སྐྱང་གྱུར་ཀྱང་༔ མི་ནི་ནམ་ཡང་ངོམ་པར་མི་འགྱུར་ཏེ༔ སོས་ཀ་ཚ་དུས་ཤིང་ལ་མེ་བཞིན་ནོ༔ ཞེས་གསུངས་སོ༔ དེ་ལྟར་བསྐལ་པ་དཔག་ཏུ་མེད་པ་ནས་རང་རེ་རྣམས་འཁོར་བ་འདིར་འཁྱམས་པ་ལ༔ སྔོན་སངས་རྒྱས་གྲངས་མེད་པ་བྱོན་ཡང་རང་རེ་རྣམས་གྲོལ་མ་ཐུབ་པ་འདི་ལ་སྐྱོ་བ་བསྐྱེད་དེ༔ སྤྱོད་འཇུག་ལས༔ སེམས་ཅན་རྣམས་ལ་ཕན་མཛད་པའི༔ སངས་རྒྱས་གྲངས་མེད་བྱོན་གྱུར་ཀྱང་༔ བདག་ནི་རང་གི་ཉེས་པ་དེས༔ གསོ་བའི་སྤྱོད་ཡུལ་མ་གྱུར་ཏོ༔ ད་དུང་དེ་བཞིན་བདག་བྱེད་ན༔ ངན་འགྲོར་ན་དང་འཆི་བ་དང་༔ བཅད་དང་གཤེགས་སོགས་མྱོང་བར་འགྱུར༔ བདག་གི་སྤྱོད་པ་འདི་འདྲས་ནི༔ མི་ཡི་ལུས་ཀྱང་ཐོབ་མི་འགྱུར༔ མི་ཡི་ལུས་ཐོབ་མ་གྱུར་ན༔ སྡིག་པ་འབའ་ཞིག་དགེ་བ་མེད༔ དེས་ན་ངན་སོང་མུ་མཐའ་མེད༔ འོག་ནས་འོག་ཏུ་ལྟུང་བར་འགྱུར༔ ཞེས་གསུངས་དེ་ལྟར་འཁོར་བའི་ཉེས་དམིགས་བསྒོམ་པ་གལ་ཆེ་སྟེ༔ རིག་འཛིན་ནཱ་ག་ཛུ་ནས༔ རབ་ཏུ་ཚ་ཞིང་གྲང་བ་ཡི༔ དམྱལ་བ་ཉི་མ་གཅིག་བཞིན་དྲན༔ བཀྲེས་སྐོམ་དག་
གིས་རིད་པ་ཡི༔ ཡི་དྭགས་དག་ཀྱང་དྲན་པར་བྱ༔ རྨོངས་པའི་སྡུག་བསྔལ་རབ་མང་བའི༔ བྱོལ་སོང་དག་ཀྱང་དྲན་པར་བྱ༔ དེ་རྒྱུ་རྣམས་སྤངས་བདེ་རྒྱུ་སྤྱད༔ ཐོབ་དཀའ་འཛམ་གླིང་མི་ཡི་ལུས༔ དེ་ཐོབ་དུས་སུ་ངན་སོང་རྒྱུ༔ རིབ་ཏུ་སྒྲིམ་སྟེ་བཅད་པར་བྱ༔ ཞེས་གསུངས་ཤིང་༔ བདེ་འགྲོ་འགྱུར་བའི་སྡུག་བསྔལ་ཡང་བསྒོམ་སྟེ༔ བཞི་བརྒྱ་པར༔ མཁས་པ་རྣམས་ལ་མཐོ་རིས་ཀྱང་༔ དམྱལ་བ་དང་མཚུངས་འཇིགས་བསྐྱེད་འགྱུར༔ རྣམ་པ་ཀུན་ཏུ་དེ་རྣམས་ལ༔ སྲིད་གང་འཇིགས་པ་མི་སྐྱེད་མེད༔ ཅེས་གསུངས་སོ༔ དེས་ན་འཁོར་བ་འདི་ནི་སྡུག་བསྔལ་རྒྱ་ཆེ་ཞིང་གཏིང་ཟབ་པ༔ རྒྱ་མཚོ་ཆེན་པོ་དང་འདྲ་སྟེ༔ བཞི་བརྒྱ་པར༔ སྡུག་བསྔལ་རྒྱ་མཚོ་འདི་ལ་མཐའ༔ རྣམ་པ་ཀུན་ཏུ་ཡོད་མིན་ན༔ བྱིས་ཁྱོད་འདིར་ནི་བྱིང་བ་ལ༔ འཇིགས་པ་ཅི་ནས་སྐྱེ་མི་འགྱུར༔ ཞེས་གསུངས་སོ༔ ཡབ་སྲས་མཇལ་མདོ་ལས༔ འཁོར་བའི་ཉེས་དམིགས་མཐོང་བ་ན༔ སྐྱོ་བའི་སེམས་ནི་རབ་ཏུ་སྐྱེ༔ ཁམས་གསུམ་བརྩོན་རར་འཇིགས་པས་ན༔ བརྩོན་པའི་སེམས་ཀྱིས་སྤང་བར་བྱ༔ ཞེས་གསུངས་པ་དང་༔ ནཱ་
ག་ཛུ་ནས༔ འཁོར་བ་དེ་འདྲ་ལགས་པས་ལྷ་མིན་དང་༔ དམྱལ་བ་ཡི་དྭགས་དུད་འགྲོ་རྣམས་དག་ཏུ༔ སྐྱེ་བ་བཟང་པོ་མ་ལགས་སྐྱེ་བ་ནི༔ གནོད་པ་དུ་མའི་གནོད་པ་ལགས་མཁྱེན་མཛོད༔ ཅེས་དང་རྒྱ་ཆེ་རོལ་པ་ལས༔ བྱིས་པ་རྣམས་འཁོར་བ་འདི་ལ་ཆགས་ཤིང་དགའ་བ་ནི༔ ཕག་མི་གཙང་བ་ལ་ཆགས་པ་ལྟ་བུའོ༔ འདི་ན་སེམས་ཅན་རྣམས་བྱིང་བ་ནི༔ གླང་པོ་ཆེ་འདམ་དུ་བྱིང་བ་ལྟ་བུའོ༔ འདི་ན་སེམས་ཅན་རྣམས་ཆགས་པ་ནི༔ ཁྱི་ཀེང་རུས་ལ་ཆགས་པ་ལྟ་བུའོ༔ འདི་ན་སེམས་ཅན་རྣམས་བཅིང་བ་ནི་བཙོན་ར་ལྟ་བུའོ༔ འདི་ན་སེམས་ཅན་རྣམས་ལྟུང་བ་ནི་ཕྱེ་མ་ལེབ་མར་མེར་ལྟུང་བ་ལྟ་བུའོ༔ འདི་ན་སེམས་ཅན་རྣམས་བསྟམ་པ་ནི་ཉ་རྒྱ་ཡིས་བསྟུམ་པ་ལྟ་བུའོ༔ འདི་ན་སེམས་ཅན་རྣམས་འཁོར་བ་ནི་རྫ་མཁན་གྱི་འཁོར་ལོ་ལྟ་བུའོ༔ འདི་ན་སེམས་ཅན་རྣམས་བསླུས་པ་ནི་གཡོ་ཅན་གྱིས་བྱིས་པ་ཁྲིད་པ་ལྟ་བུའོ༔ ཞེས་གསུངས་ཤིང་༔ དེ་རྣམས་ཀྱི་དོན་ཨུ་རྒྱན་ཆེན་པོས་གསུངས་པ༔ ཐར་མེད་ལས་ཀྱི་གྲོང་ཁྱེར་དྲུག་པོ་འདིར༔ གཅིག་ནས་གཅིག་ཏུ་ཟོ་ཆུའི་འཁྱུད་མོ་བཞིན༔ མཐའ་མེད་འཁོར་བའི་འགྲོ་རྣམས་སྙིང་རེ་རྗེ༔
ཞེས་དང་༔ དེ་ལྟར་འགྲོ་བ་རིགས་དྲུག་སེམས་ཅན་རྣམས༔ སྡུག་བསྔལ་རང་བཞིན་ལས་ནི་མ་འདས་པས༔ ཅིས་ཀྱང་དགོས་མེད་བླ་མའི་རྣལ་འབྱོར་ཐོསྒོམས༔ ཞེས་གསུངས་སོ༔ དེས་ན་བསྒོམ་བྱའི་གཙོ་བོ་ནི༔ འཁོར་བའི་གནས་མཐོ་དམན་གར་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པར་གདའ་བས༔ ད་རེས་འཁོར་།བའི་སྡུག་བསྔལ་འདི་ལས་ཐར་བའི་ཐབས་ཤིག་ཅིས་ཀྱང་བྱ་དགོས་སྙམ་པའི་བློ་ཐག་ཆོད་པ་གལ་ཆེའོ༔ དེས་འགྱུར་བའི་སྡུག་བསྔལ་དང་༔ སྤྱིར་འཁོར་བའི་ཉེས་དམིགས་བཤད་པའི་སྐབས་ཏེ༔ དེས་ཐུན་མོང་གི་སྔོན་འགྲོ་བཞི་སོང་བ་སྟེ༔ ཆོས་ཐུན་བརྒྱད་པའོ༔ དེ་ནས་ཁྱད་པར་གྱི་སྔོན་འགྲོ་བཞི་ནི༔ བྱང་ཆུབ་ཀྱི་ལམ་དུ་འགྲོ་བ་སྐྱབས་འགྲོ་སེམས་བསྐྱེད་ཀྱི་ཁྲིད༔ ཚོགས་གཉིས་མྱུར་དུ་རྫོགས་པ་མཎྜལ་གྱི་ཁྲིད༔ སྡིག་སྒྲིབ་དག་པ་རྡོ་རྗེ་སེམས་དཔའི་སྒོམ་བཟླས༔ བྱིན་རླབས་འཇུག་པ་བླ་མའི་རྣལ་འབྱོར་དང་བཞིའོ༔ དང་པོ་ལ་ཡང་སྐྱབས་འགྲོ་སེམས་བསྐྱེད་གཉིས་ལས༔ དང་པོ་སྐྱབས་འགྲོའི་ཞོར་ལ་བསྔོ་བ་བཤད་པ་ནི༔ དགེ་བ་ཐམས་ཅད་ཆུད་
མི་ཟ་བའི་གདམས་པའོ༔ དེ་ལ་གོང་དུ་བཤད་པའི་འཁོར་བའི་སྡུག་བསྔལ་དེ་སུ་ཞིག་གིས་སྐྱབས་ཐུབ་སྙམ་ན༔ དེ་ནི་བྱམས་ཤིང་བརྩེ་བའི་ཕ་མ་དང་༔ འཇིག་རྟེན་ན་དྲག་རྩ་ལ་ཆེ་བའི་ལྷ་འདྲེ་མཐུ་བོ་ཆེ་དང་༔ འདོད་ཁམས་དང་གཟུགས་ཁམས་ཀྱི་ལྷ་ཚེ་རིང་པོ་དང་༔ ཀླུ་ཆེན་པོ་ལ་སོགས་གང་གིས་ཀྱང་སྐྱབས་མི་ཐུབ་སྟེ༔ ཁོང་རང་རྣམས་ཀྱང་འཁོར་བའི་སྡུག་བསྔལ་ལས་མ་ཐར་བའི་ཕྱིར་རོ༔ དེ་ལྟར་ཡང་མདོ་རྒྱལ་མཚན་དམ་པ་ལས༔ འཇིགས་པས་ཉན་པའི་མི་རྣམས་ནི༔ ཕལ་ཆེར་རི་དང་ནགས་ཚལ་དང་༔ ལྗོན་ཤིང་སོགས་ལ་སྐྱབས་འགྲོ་སྟེ༔ སྐྱབས་དེ་མཆོག་གྱུར་མ་ཡིན་པས༔ སྐྱབས་དེ་དག་ལ་བརྟེན་ནས་ནི༔ འཇིགས་པ་ཀུན་ལས་གྲོལ་མི་འགྱུར༔ ཞེས་དང་༔ མདོ་ལས། འཇིག་རྟེན་རྣམས་ནི་རི་དང་ནི༔ ནགས་ཚལ་དང་ནི་མཆོད་གནས་ཀྱི༔ ཀུན་དགའ་དང་ནི་རྡོ་བ་དང་༔ ལྗོན་ཤིང་ལྷ་ལ་སྐྱབས་འགྲོ་བ༔ སྐྱབས་དེ་གཙོ་བོ་མ་ཡིན་ཞིང་༔ ཞེས་དང་༔ འཇམ་དཔལ་རྣམ་པར་རོལ་པའི་མདོ་ལས༔ ཕ་མ་ཁྱོད་ཀྱི་སྐྱབས་མ་ཡིན༔ མཛའ་བཤེས་རྩ་ལག་རྣམས་ཀྱང་མིན༔ དེ་དག་གིས་ནི་ཁྱོད་བོར་ནས༔ ཅི་ལྟར་
འདོད་པ་བཞིན་དུ་འགྲོ༔ ཞེས་གསུངས་སོ༔ འོ་ན་སུ་ཞིག་གིས་སྐྱབས་ནུས་སྙམ་ན༔ མདོ་དེ་ཉིད་ལས༔ སངས་རྒྱས་ཆོས་དང་དགེ་འདུན་ཏེ༔ ཐར་པ་འདོད་པ་རྣམས་ཀྱི་སྐྱབས༔ ཞེས་དང་༔ འཇམ་དཔལ་རྣམ་པར་རོལ་པ་ལས༔ འཇིགས་འགྱུར་འཇིགས་པ་སེལ་མཛད་ཕྱིར༔ སྐྱབས་མེད་སྐྱོབ་པའི་སངས་རྒྱས་དང་༔། ཆོས་དང་ཚོགས་མཆོག་དགེ་འདུན་ལ༔ རྟག་པར་སྐྱབས་སུ་འགྲོ་བར་གྱིས༔ གང་དག་དེ་ལ་སྐྱབས་སོང་བ༔ འཇིགས་པ་ཀུན་ལས་ཐར་བར་འགྱུར༔ ཞེས་དང་༔ ལེགས་པར་གྲུབ་པའི་རྒྱུད་ལས༔ སྲིད་གསུམ་འདི་ན་དཀོན་མཆོག་གསུམ་པོ་གཙོ༔ འདི་གསུམ་བསོད་ནམས་འཕེལ་བའི་རྒྱུ་ཡིན་ཅིང་༔ ཡོན་ཏན་བླ་མེད་བསྐྱེད་པའི་རྟེན་ཡིན་པས༔ དངོས་གྲུབ་འདོད་པས་གསང་སྔགས་མགོ་ལ་ཐོན༔ ཞེས་གསུངས་སོ༔ དེ་ལྟར་དཀོན་མཆོག་གསུམ་སྐྱབས་གནས་ཡིན་པ་ཅིའི་ཕྱིར་ཞེ་ན༔ དཀོན་མཆོག་དྲི་མ་མེད་པའི་མདོ་ལས༔ རྐང་གཉིས་གཙོ་བོ་མ་གཏོགས་པ༔ འཇིག་རྟེན་དག་ན་སྐྱབས་གཞན་མེད༔ སྐྱོན་མེད་ཡོན་ཏན་རབ་རྫོགས་ཕྱིར༔ ཐུབ་པ་སྐྱབས་མེད་རྣམས་ཀྱི་སྐྱབས༔ ཞེས་
གསུངས་སོ༔ སྐྱབས་གསུམ་ཡོད་པའི་རྒྱུ་མཚན་ནི་རྒྱུད་བླ་མ་ལས༔ སྟོན་པ་བསྟན་པ་སློབ་དོན་གྱིས༔ ཐེག་པ་གསུམ་དང་བྱེད་གསུམ་ལ༔ མོས་པ་རྣམས་ཀྱི་དབང་བྱས་ནས༔ སྐྱབས་གསུམ་རྣམ་པར་བཞག་པ་ཡིན༔ ཞེས་གསུངས་སོ༔ དེ་ལྟར་སྐྱབས་གསུམ་དཀོན་མཆོག་གསུམ་ལ་མ་གུས་པའི་ཉེས་དམིགས་ཀྱང་༔ ཡུལ་འཁོར་སྐྱོང་གི་མདོ་ལས༔ སངས་རྒྱས་ལ་ཡང་མོས་པ་ཡོད་མིན་ལ༔ ཆོས་དང་ཚོགས་ལའང་དེ་ནི་མོས་པ་མེད༔ བསླབ་པ་སྦྱང་བ་དག་ལ་དེ་མི་མོས༔ སྡིག་པའི་བློ་ཅན་ངན་སོང་གསུམ་ཕྱོགས་པ༔ དེ་ནི་མི་ཡི་ནང་ནས་ཤི་འཕོས་ནས༔ ལས་ཀྱི་དབང་གིས་མི་མཁས་རྣམ་པར་རྨོངས༔ དམྱལ་བའམ་འོན་ཏེ་དུད་འགྲོའི་འགྲོ་རྣམས་སམ༔ ཡི་དྭགས་འགྲོ་བ་རྣམས་སུ་སྡུག་བསྔལ་རྙེད༔ ཅེས་དང་༔ དཀོན་མཆོག་དྲི་མ་མེད་པའི་མདོ་ལས༔ གང་ཞིག་སངས་རྒྱས་ཆོས་དང་ནི༔ དགེ་འདུན་བསྟན་ལ་མི་བརྟེན་པ༔ དེ་དག་འཇིག་རྟེན་ཕྱི་རོལ་ཞེས༔ ལྷ་དང་བཅས་པ་ཀུན་གྱིས་སྨད༔ ཅེས་དང་༔ དྲན་པ་ཉེར་བཞག་ལས༔ སངས་རྒྱས་དང་ནི་བྲལ་བ་ཡི༔ གསོན་པ་གསོན་པ་མིན་པར་འདོད༔ ཆོས་དང་རྣམ་
པར་བྲལ་བ་ཡི༔ གསོན་པ་གསོན་པ་མིན་པར་འདོད༔ དགེ་འདུན་རྣམ་པར་སྤངས་པ་ཡི༔ གསོན་པ་གསོན་པ་མིན་པར་འདོད༔ ཅེས་གསུངས་སོ༔ སྐྱོན་དག་ཡོན་ཏན་ཐམས་ཅད་རྫོགས་ཕྱིར་སངས་རྒྱས་ནི་གཏན་གྱི་སྐྱབས༔ དེར་འགྲོ་བའི་ལམ་ཡིན་པས་ཆོས་དང་༔ ཆོས་སྒྲུབ་པའི་གྲོགས་དགེ་འདུན་ཡིན་པས་གཉིས་པོ་གནས་སྐབས་ཀྱི་སྐྱབས་ཡིན་ཏེ༔ རྒྱལ་བ་བྱམས་པས༔ སྤངས་ཕྱིར་བསླུ་བའི་ཆོས་ཅན་ཕྱིར༔ མེད་ཕྱིར་འཇིགས་དང་བཅས་པའི་ཕྱིར༔ ཆོས་རྣམ་གཉིས་དང་འཕགས་པའི་ཚོགས༔ གཏན་གྱི་སྐྱབས་མཆོག་མ་ཡིན་ནོ༔ དམ་པའི་དོན་དུ་འགྲོ་བ་ཡི༔ སྐྱབས་ནི་སངས་རྒྱས་ཉག་གཅིག་ཡིན༔ ཐུབ་པ་ཆོས་ཀྱི་སྐུ་ཅན་ཕྱིར༔ ཚོགས་ཀྱང་དེ་ཡི་མཐར་ཐུག་ཕྱིར༔ འབྱུང་བ་དཀོན་ཕྱིར་དྲི་མེད་ཕྱིར༔ མཐུ་ལྡན་ཕྱིར་དང་འཇིག་རྟེན་གྱི༔ རྒྱན་གྱུར་ཕྱིར་དང་མཆོག་ཉིད་ཕྱིར༔ འགྱུར་བ་མེད་ཕྱིར་དཀོན་མཆོག་ཉིད༔ ཅེས་འོ་ན་སྐྱབས་གནས་དཀོན་མཆོག་གསུམ་པོ་དེ་ཡི་རང་བཞིན་ཅི་ལྟར་ཡིན་ཞེ་ན༔ རྒྱལ་བ་བྱམས་པས༔ འདུས་མ་བྱས་ཤིང་ལྷུན་གྱིས་གྲུབ༔ གཞན་གྱི་རྐྱེན་གྱིས་
རྟོགས་མིན་པ༔ མཁྱེན་དང་བརྩེ་དང་ནུས་པར་ལྡན༔ དོན་གཉིས་ལྡན་པའི་སངས་རྒྱས་ཉིད༔ ཅེས་དང་༔ བསམ་མེད་གཉིས་མེད་རྟོག་མེད་པ༔ དག་གསལ་གཉེན་པོའི་ཕྱོགས་ཉིད་ཀྱི༔ གང་ཞིག་གང་གིས་ཆགས་བྲལ་བ༔ བདེན་གཉིས་མཚན་ཉིད་ཅན་དེ་ཆོས༔ ཞེས་དང་༔ ཇི་ལྟ་ཇི་སྙེད་ནང་གི་ནི༔ ཡེ་ཤེས་གཟིགས་པ་དག་པའི་ཕྱིར་བླ་མེད་ཡོན་ཏན་དང་ལྡན་ཉིད༔ བློ་ལྡན་ཕྱིར་མི་ལྡོག་པའི་ཚོགས༔ ཞེས་གསུངས་སོ༔ དེ་ནི་ཕྱིའི་སྐྱབས་གནས་དཀོན་མཆོག་གསུམ་ཡིན་ལ༔ ནང་གི་སྐྱབས་གནས་བླ་མ་ཡི་དམ་མཁའ་འགྲོ་གསུམ་ཡིན་ལ༔ གསང་བའི་སྐྱབས་ཡུལ་རང་སེམས་སྐྱེ་བ་མེད་པ་ཆོས་ཀྱི་སྐུ་ཡིན་ཚུལ་རྒྱས་པར་ཨོ་རྒྱན་རིན་པོ་ཆེས་གསུངས་ཤིང་༔ དེ་དག་གི་དོན་ནི༔ དོན་ཏྲིག་འགྲོ་བ་ཀུན་གྲོལ་གྱི་རྒྱུད་ལས༔ བླ་མ་དཀོན་མཆོག་སྐྱབས་གནས་ལ༔ བྱང་ཆུབ་བར་དུ་སྐྱབས་སོང་ནས༔ ཞེས་དང་༔ སམྦུ་ཊི་ལས༔ སྟོང་ཉིད་སྙིང་རྗེ་དབྱེར་མེད་པའི༔ གང་དུ་སེམས་ནི་རྣམ་བསྒོམ་པ༔ དེ་ནི་སངས་རྒྱས་དང་ཡང་ཆོས༔ དགེ་འདུན་ཞེས་སུ་བསྟན་པ་ཡིན༔ ཞེས་དང་༔ རྣམ་སྣང་མངོན་བྱང་ལས༔ དང་པོའི་སེམས་
ནི་སངས་རྒྱས་ཏེ༔ གཉིས་པ་ཡང་ནི་ཆོས་ཤེས་བྱ༔ དེ་དང་ལྷན་ཅིག་འབྱུང་བའི་སེམས༔ དགེ་འདུན་ཞེས་སུ་བསྟན་པ་ཡིན༔ ཞེས་གསུངས་སོ༔ དེ་ལྟར་དོན་གྱི་དཀོན་མཆོག་གསུམ་འགྲོ་བ་ཡོངས་ལ་གནས་ཀྱང་༔ ལས་ཀྱི་བསྒྲིབས་པས་མངོན་དུ་མ་གྱུར་པས༔ མོས་པའི་སྣང་ངོར་ཕྱི་དང་ནང་གི་དཀོན་མཆོག་གསུམ་ལ་སྐྱབས་འཆ་སུ་འགྲོ༔ དགོས་པར་ཨུ་རྒྱན་རིན་པོ་ཆེས་གསུངས་སོ༔ ཁྱད་པར་བཀའ་རྫོགས་པ་ཆེན་པོ་ལ་སོགས་པ་གསང་སྔགས་བླ་ན་མེད་པའི་ལུགས་འདི་ལ༔ སྐྱབས་གནས་དཀོན་མཆོག་རྣམས་གཞན་དུ་མི་བལྟ་སྟེ༔ མཚན་ཉིད་དང་ལྡན་པའི་རང་གི་རྩ་བའི་བླ་མ་དེའི་ཐུགས་སངས་རྒྱས་གསུང་དམ་ཆོས་སྐུ་དགེ་འདུན༔ བླ་མ་དཀོན་མཆོག་ཀུན་འདུས་སུ་ཤེས་པར་བྱའོ༔ དེ་ལ་སྐྱབས་སུ་འགྲོ་བ་དངོས་བཤད་པ་ནི༔ རྡོ་རྗེའི་ཚིག་རྐང་ལས༔ མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱིས་སྐྱབས་སུ་མཆི༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོས་དངོས་སུ་གསུངས་པ་
ལས༔ ད་རང་གི་མདུན་གྱི་ནམ་མཁར་ཆོས་སྐུ་ཀུན་ཏུ་བཟང་པོ་བཞུགས་པ་ལ༔ འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་ཁྲོམ་ལྟར་བསྐོར་བར་བསྐྱེད་དོ༔ ཀུན་ཏུ་བཟང་པོ་རྒྱལ་བ་སྲས་དང་བཅས་པ་བཞུགས་པ་ཐམས་ཅད་ལ༔ བདག་ནི་རྩེ་གཅིག་ཡིད་ཀྱི་སྐྱབས་སུ་མཆིའོ༔ ཞེས་གསུངས་པའི་དོན་ནི༔ ཁྱེད་རང་རྣམས་ཀྱི་དམིགས་པ་འདི་བཞིན་དུ་མཛོད་ཅིག༔ མདུན་གྱི་གཞི་འདིར་ཡན་ལག་བརྒྱད་དང་ལྡན་པའི་བདུད་རྩིའི་རྒྱ་མཚོ་ཆེན་པོ༔ མཐའ་མ་ནེའུ་སིང་དང་གསེར་གྱི་བྱེ་མ་བརྡལ་བ༔ ཆུ་བྱ་སྣ་ཚོགས་ཀྱི་སྐད་སྙན་པར་སྒྲོག་ཅིང་རིན་པོ་ཆེ་དང་མེ་ཏོག་སྣ་ཚོགས་གཅལ་དུ་བཀྲམ་པ༔ མཚོའི་དབུས་སུ་པཾ་ལས་པདྨའི་སྡོང་པོ་ཡལ་འདབ་ཕྱོགས་བཅུར་རྒྱས་ཤིང་འབྲས་བུ་ལ་བཀྲ་ཤིས་པའི་རྟགས་བརྒྱད་སོགས་རིན་ཆེན་སྣ་ཚོགས་སུ་འཁྲུངས་པའི་རྩེར༔ རིན་པོ་ཆེ་སྣ་ཚོགས་ཀྱི་རྒྱུ་ལས་གྲུབ་པའི་མེ་ཏོག་པདྨ་འདབ་མ་བཞི་པ་རྒྱ་ཁྱོན་སྟོང་གསུམ་དང་མཉམ་པ་ཞིག་བསྒོམ༔ དེའི་ཟེའུ་འབྲུ་དང་འདབ་མ་བཞི་ལ་རིན་པོ་ཆེའི་ཁྲི་རེ་རེ་བསྒོམ་པའི་ཁྲི་དབུས་མར༔ པདྨ་དང་ཟླ་བའི་གདན་ལ་རྩ་བའི་བླ་མ་དང་དབྱེར་མེད་པའི་ཆོས་སྐུ་ཀུན་ཏུ་
བཟང་པོ་སྐུ་མདོག་མཐིང་ཁ་མཉམ་གཞག་གི་ཕྱག་རྒྱ་ཅན༔ རྡོ་རྗེའི་སྐྱིལ་ཀྲུང་གིས་བཞུགས་ཤིང་༔ ཡུམ་ཀུན་ཏུ་བཟང་མོ་དང་གཉིས་སུ་མེད་པར་འཁྲིལ་བ༔ དེ་ལ་རྒྱལ་བ་རིགས་ལྔ་ཡབ་ཡུམ༔ དྲུག་པ་རྡོ་རྗེ་འཆང་ལ་སོགས་པ་ལོངས་སྤྱོད་རྫོགས་སྐུའི་སངས་རྒྱས་གྲངས་མེད་པས་བསྐོར་བ་ཐམས་ཅད་ཡབ་ཡུམ་འཁྲིལ་སྦྱོར་དུ་བཞུགས་པ༔ དེའི་སྟེང་གི་ཆ་ལ་རྒྱལ་བ་དགོངས་བརྒྱུད་རིག་འཛིན་བརྡའ་བརྒྱུད་གང་ཟག་སྙན་བརྒྱུད་ཀྱི་བླ་མ་ཐམས་ཅད་དང་༔ རྒྱ་གར་གྱི་རིག་འཛིན་བརྒྱད༔ བོད་ཀྱི་རྗེ་འབངས་ཉེར་ལ༔ རིག་འཛིན་གཏེར་སྟོན་བརྒྱ་རྩ་ལ་སོགས་པ་ཐམས་ཅད༔ སྐུ་གཅེར་བུ་རུས་པའི་རྒྱན་དྲུག་གིས་བརྒྱན་ཅིང་༔ ཕྱག་ཌ་མ་རུ་དང་དྲིལ་བུ་འཛིན་ཅིང་སྟག་ལྤགས་ཀྱི་ཤམ་ཐབས་དང་༔ གླང་ཆེན་གྱི་ལྤགས་པའི་བླ་གོས་ཅན༔ བྲོ་ཁྲིག་ཁྲིག་གར་ཁྱུག་ཁྱུག་མཛད་ནས་སྐལ་ལྡན་བྱིན་གྱིས་བརླབས་པའི་དགོངས་པ་ལ་བཞུགས་པ༔ གཡས་ཀྱི་ཁྲི་ལ་སྟོན་པ་ཤཱཀྱ་ཐུབ་པ་ལ༔ འཁོར་སངས་རྒྱས་རབ་བདུན་བསྐལ་བཟང་གི་སངས་རྒྱས་སྟོང་རྩ་གཉིས་ཐམས་ཅད་སྤྲུལ་སྐུའི་ཆ་ལུགས་ཆོས་གོས་གསུམ་གྱིས་བཀླུབས་ཤིང་ས་གནོན་
མཉམ་གཞག་ཅན༔ མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་ཅིང་འོད་དང་འོད་ཟེར་འབར་བ༔ རྒྱབ་ཀྱི་ཁྲི་ལ་སྡེ་སྣོད་གསུམ་དང་རྒྱུད་སྡེ་དྲུག་གི་མདོ་རྒྱུད་ཐམས་ཅད་དང་ཁྱད་པར་བཀའ་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ཐམས་ཅད་བཀའ་པོ་ཏི་གླེགས་བམ་གྱི་ཚུལ་དུ་གསེར་གདོང་ཁྲ་ཆེམ་མེ་བཞུགས་པ༔ གཡོན་གྱི་ཁྲི་ལ་གུ་རུ་པདྨ་སཾ་བྷ་དགེ་སློང་གི་ཆ་ལུགས་སྐྱབས་སྦྱིན་པད་ཕོར་འཛིན་པ༔ ཉེ་སྲས་བརྒྱད་དང་སེམས་དཔའ་བཅུ་དྲུག་ལ་སོགས་པ་དང་༔ ལམ་ལ་བཞུགས་པའི་བྱང་ཆུབ་སེམས་དཔའ་ཐམས་ཅད་དང་༔ ཉན་ཐོས་མཆོག་བརྒྱད་རང་རྒྱལ་བཅུ་གཉིས་འཕགས་པ་གནས་བརྟན་བཅུ་དྲུག་དགྲ་བཅོམ་ཁྲི་དྲུག་སྟོང་བཞི་བརྒྱ་ལ་སོགས་པ་ཐེག་པ་ཆེ་ཆུང་གི་དགེ་འདུན་ཐམས་ཅད་དེ༔ བྱང་ཆུབ་སེམས་དཔའ་ཐམས་ཅད་ནི་ལྷ་བུ་གཞོན་ནུའི་ཚུལ་ཅན་དར་དང་རིན་པོ་ཆེའི་བརྒྱན་པ༔ ཉན་ཐོས་ཐམས་ཅད་དབུ་རེག་ཞབས་རྗེན་ཆོས་གོས་རྣམ་གསུམ་གསོལ་བའོ༔ མདུན་གྱི་ཁྲི་ལ་རང་རེ་བོད་ཀྱི་ལྷ་སྐལ་ཡི་དམ་ཐུགས་རྗེ་ཆེན་པོ་ལ༔ འཁོར་བཀའ་དགོངས་ཕུར་གསུམ་ལ་སོགས་པ་རྒྱུད་སྡེ་ཆེན་པོ་དྲུག་གི་ལྷ་
ཚོགས་ཐམས་ཅད་དང་༔ དེ་དག་གི་བར་མཚམས་རྣམས་སུ་ཡུལ་ཉི་ཤུ་རྩ་བཞིའི་དཔའ་བོ་དང་དྷཱ་ཀི༔ ཡེ་ཤེས་ཀྱི་མགོན་པོ་མ་ནིང་སྡེ་ལྔ་ལ་སོགས་མགོན་ཆེན་བཞི་བཅུ་རྩ་ལྔ༔ དཔལ་ལྡན་ལྷ་མོ་དཔོན་གཡོག་སྤྲུལ་པ་སྟོང་རྩ་བརྒྱད་དང་བཅས་པ་ཐམས་ཅད་སྤྲིན་གྱི་ཕུང་པོ་གཏིབས་པ་ལྟར་མངོན་སུམ་དུ་བཞུགས་པར་སྒོམས་ཤིག༔ དེ་ཡང་ཐེག་པ་ཆུང་ངུའི་ལུགས་ལ་དུས་དེང་ནས་ཇི་སྲིད་འཚོའི་བར་དུ་སྐྱབས་སུ་འགྲོ་བ་ཡིན་ཀྱང་༔ འདིར་ཐེག་ཆེན་ལུགས་ལ་ཇི་སྲིད་སངས་རྒྱས་མ་ཐོབ་ཀྱི་བར་དུ་སྐྱབས་སུ་འགྲོ་བ་ཡིན༔ ཐེག་དམན་ལུགས་ལ་རང་ཉིད་གཅིག་པུ་སྐྱབས་སུ་འགྲོ་བ་ཡིན་ཡང་༔ འདིར་ཐེག་ཆེན་ལུགས་ལ་བདག་དང་སེམས་ཅན་ཐམས་ཅད་སྐྱབས་སུ་འགྲོ་བ་ཡིན༔ ཐེག་དམན་ལུགས་ལ་འཁོར་བའི་འཇིགས་པ་ལ་སྐྲག་ནས་དེ་སྐྱོབ་ཕྱིར་སྐྱབས་སུ་འགྲོ་བ་ཡིན་ཀྱང་༔ འདིར་ནི་འཁོར་བའི་འཇིགས་པ་དང་རང་ཞི་བདེ་འདོད་པ་དང་ཐེག་པ་དམན་པ་དང་༔ རྩ་རླུང་ཐིག་ལེ་ལྟ་སྒོམ་སྤྱོད་པའི་གེགས་དང་གོལ་ས་ཐམས་ཅད་ལས་སྐྱོབ་ཕྱིར་སྐྱབས་སུ་འགྲོ་བ་ཡིན་པས༔ ཨུ་རྒྱན་རིན་པོ་ཆེའི་ཞལ་ནས༔ མོས་པའི་སྣང་ངོར་མདུན་གྱི་ནམ་
མཁར་སྐྱབས་གནས་ཐམས་ཅད་སྤྲིན་ཕུང་བཞིན་གཏིབས་པར་བསམ་ལ༔ རང་དང་ཕ་མས་གཙོ་བྱས་སེམས་ཅན་ཐམས་ཅད་དགྲ་མི་ཤ་བ་བཙོན་དོང་ནས་ཐར་བར་འདོད་པ་ལྟ་བུའི་གདུང་བས༔ ཁ་ཙམ་མ་ཡིན་པར་བྱེད་པ་ཡིན་ནོ༔ ཞེས་གསུངས་པ་ལྟར་སྐྱབས་འགྲོ་རང་གིས་གང་ཤེས་རྒྱས་བསྡུས་གང་ཡང་རུང་མོད་ཀྱི༔ ད་རེས་བྱིན་རླབས་ཆེ་བའི་དབང་དུ་བྱས་ནས་རྡོ་རྗེའི་ཚིག་རྐང་ལས་བྱུང་བའི་སྐྱབས་འགྲོ་ཤོ་ལོ་ཀ་འདིའི༔ ཚིག་དང་པོ་གཉིས་ཀྱིས་སྐྱབས་ཡུལ་གསལ་ཐོབ༔ རྗེས་མ་གཉིས་སྐྱབས་སུ་འགྲོ་བ་དངོས་ཡིན་པས་འདིའི་རྗེས་ཟློས་ལན་གསུམ་མཛོད༔ མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱིས་སྐྱབས་སུ་མཆི༔ གསུམ༔ འོ་དེས་ཁྱེད་རང་རྣམས་ཀྱི་རྒྱུད་ལ་སྐྱབས་འགྲོའི་སྡོམ་པ་སྔར་མ་ཐོབ་ན་ཡང་སྐྱེ༔ ཐོབ་པ་ཡིན་ཡང་འཕེལ༔ ཉམས་པ་ཡང་སོར་ཆུད་པར་འགྱུར་བ་ཡིན་ནོ༔ དེ་ལྟར་ཐེག་ཆེན་སྐྱབས་འགྲོའི་སྡོམ་པ་ཐོབ་ནས༔ དེའི་སྡོམ་པ་བསྲུང་དགོས་ཏེ༔ སྐྱབས་གསུམ་བདུན་ཅུ་པ་ལས༔ གསུམ་
ལ་སྐྱབས་འགྲོའི་དགེ་བསྙེན་ནམ༔ དེ་ནི་སྡོམ་བརྒྱད་རྩ་བ་ཡིན༔ ཞེས་དང་༔ མྱ་ངན་འདས་ཆེན་ལས༔ གང་ཞིག་སངས་རྒྱས་སྐྱབས་འགྲོ་བ༔ དེ་ནི་ཡང་དག་དགེ་བསྙེན་ཏེ༔ ནམ་དུའང་ལྷ་ནི་གཞན་དག་ལ༔ སྐྱབས་སུ་འགྲོ་བ་མ་ཡིན་ནོ༔ དམ་པའི་ཆོས་ལ་སྐྱབས་སོང་བ༔ འཚེ་ཞིང་གསོད་པའི་སེམས་དང་བྲལ༔ དགེ་འདུན་དག་ལ་སྐྱབས་སོང་བ༔ མུ་སྟེགས་ཅན་ལ་ཕྱག་མི་བྱ༔ ཞེས་དང་༔ མདོ་རྩ་བར༔ ལྷ་གཞན་ལ་ཕྱག་མི་འཚལ༔ མཆོད་པ་མི་བྱ་བཀུར་སྟི་མི་བྱའོ༔ གནས་སུ་ཕྱིན་ན་མངོན་སུམ་དུ་འགྲེང་སྟེ་གཙུག་ལག་གི་ཚིགས་སུ་བཅད་པ་འདོན་པས་དེ་ལ་ཕན་གདགས་པར་བྱའོ༔ ཞེས་དང་༔ སྐྱབས་གསུམ་བདུན་ཅུ་པར༔ གང་ཞིག་གསུམ་ལ་སྐྱབས་འགྲོ་བའི༔ དགེ་བསྙེན་དུ་ནི་དམ་བཅས་པས༔ སྐྱབས་ནི་གསུམ་པོ་བསྲུང་བར་བྱ༔ མུ་སྟེགས་ཀུན་ལ་གུས་པ་ཡིས༔ མཆོད་དང་ཕྱག་འཚལ་མི་བྱའོ༔ ཞེས་དང་༔ སྐྱབས་འགྲོ་ཡན་ལག་དྲུག་པར༔ སྐུ་གཟུགས་ཚིགས་སུ་བཅད་པ་དང་༔ ལྷན་པ་སེར་པོ་བཏབ་པ་ལ༔ དད་མོས་སྒོ་ནས་སྟོན་པར་བར༔ ཞལ་ནས་གསུང་པ་མཐའ་དག་
ལ༔ སྐུར་པ་མི་གདབ་སྤྱི་བོར་བླང་༔ གང་ཟག་དག་དང་མ་དག་ལ༔ དམ་པར་ལྟ་བར་བྱ་བ་ཡིན༔ ཅེས་དང་༔ བཤེས་སྤྲིང་ལས༔ ཅི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་༔ བགྱིས་པ་ཅི་འདྲ་ཡང་རུང་མཁས་པས་མཆོད༔ ཅེས་དང་༔ ལྷའི་དབང་པོས་ཞུས་མདོར༔ ཁེ་ཕྱིར་ཚོང་དང་གྲོགས་ཕྱིར་བསླས༔ དེ་ཡི་གཅོད་སྦྱང་བྱེད་པ་རྣམས༔ མནར་མེད་ལ་སོགས་དམྱལ་བར་ནི༔ སྐྱེས་བུས་མདའ་འཕང་བཞིན་དུ་འགྲོ༔ ཞེས་གསུངས་པས་སྐུ་གསུང་ཐུགས་རྟེན་བཤིགས་པ་དང་ཉོ་ཚོང་བྱས་ན་ཉེས་པ་ཆེ་ཞིང་སྐབས་སྡོམ་ཉམ༔ ཆེད་དུ་བརྗོད་པའི་ཚོམས་ལས༔ ཐུབ་པའི་དུར་སྨྲིག་རྒྱལ་མཚན་ནི༔ ཚངས་དང་བརྒྱ་བྱིན་ལ་སོགས་པ༔ འཇིག་རྟེན་ཆེན་པོ་རྣམས་ཀྱིས་ཀྱང་༔ བོའི་ཅོད་པན་རྩེར་བླངས་པར༔ མཆོད་པའི་གནས་སུ་བཞག་པ་ཡིན༔ ཅེས་དང་༔ བཅོམ་ལྡན་འདས་ཀྱི་ཞལ་ནས༔ མེ་ཏོག་ཙམ་པ་ཀ་ནི་རྙིང་གྱུར་ཀྱང་༔ མེ་ཏོག་ཕལ་པ་རྣམས་ཀྱིས་དོ་ཟླ་མིན༔ ང་ཡི་དགེ་སློང་ཚུལ་ཁྲིམས་འཆལ་གྱུར་ཀྱང་༔ མུ་སྟེགས་ཕལ་པ་རྣམས་ཀྱིས་དོ་ཟླ་མིན༔ ཅེས་དང་༔ སྔོན་མི་ཞིག་རྒྱལ་པོའི་ཁྲིམས་ལ་འགལ་ནས་
དུར་ཁྲོད་དུ་བསྐྱལ་བའི་མགུལ་དུ་གོས་ངུར་སྨྲིག་གི་ཚལ་པ་ཞིག་ཡོད་པས༔ སྲིན་པོས་མ་ཟོས་ཤིང་ཕྱག་འཚལ་བ་དང་༔ ཡང་རྔོན་པས་གོས་ངུར་སྨིག་གྱོན་པ་གླང་པོ་ཆེས་རྒྱལ་པོས་གནོད་པ་ལས་སྐྱབས་ཤིང་གུས་པར་བྱས་པ་སོགས་ལོ་རྒྱུས་དུ་མ་འབྱུང་བས་གོས་སེར་མོ་གྱོན་ཙམ་ལ་ཡང་གུས་པར་བྱ་དགོས༔ སངས་རྒྱས་ཀྱི་སྐུ་གཟུགས་བྱོན་ལེགས་མ་ལེགས་གང་ལ་ཡང་གུས་པར་བྱ༔ ཆོས་ཡི་གེ་འབྲུ་གཅིག་ཡན་ཆད་ལ་གུས་པར་བྱ༔ ཕྱི་རོལ་པའི་ལྷ་ལ་ཕྱག་མི་འཚལ༔ གྲོགས་མུ་སྟེགས་ཅན་དང་མི་འགྲོགས༔ སེམས་ཅན་ལ་གནོད་པ་སྤངས༔ ནངས་ནུབ་སྐྱབས་འགྲོ་ལ་བརྩོན་པར་བྱ༔ བཟའ་བཏུང་ཕུད་ཀྱིས་དཀོན་མཆོག་གསུམ་མཆོད༔ ན་ཚ་སྡུག་བསྔལ་ཅི་བྱུང་ཡང་དཀོན་མཆོག་ལས་གཞན་པའི་སྐྱབས་མི་ཚོལ་བ་དང་བསླབ་བྱ་དགུ་པོ་དེ་མ་ཉམས་པར་བསྲུང་བ་གལ་ཆེ༔ དེ་ལྟར་བསྲུངས་ན་ཕན་ཡོན་དཔག་ཏུ་མེད་དེ༔ མདོ་སྡེ་རྒྱན་ལས༔ སྐྱབས་སུ་འགྲོ་བ་འདིར་སོང་དོན་ཆེ་སྟེ༔ དེ་ནི་ཚད་མེད་ཡོན་ཏན་ཚོགས་འཕེལ་འགྱུར༔ འགྲོ་བ་འདི་ལ་སྙིང་རྗེའི་བསམ་པས་ཁྱབ༔ མཚུངས་མེད་འཕགས་ཆེན་ཆོས་ཀྱང་རྒྱས་
པར་བྱེད༔ ཅེས་དང་༔ རྟག་ཏུ་ཉོན་མོངས་ཚོགས་ཀུན་དང་༔ ཉེས་པར་སྤྱོད་པ་ཐམས་ཅད་དང་༔ རྒ་དང་འཆི་བ་དག་ལས་ཀྱང་༔ སངས་རྒྱས་ཉིད་ནི་ཡོངས་སུ་སྐྱོབ་འཚེ་བ་དག་ནི་ཐམས་ཅད་དང་༔ ངན་སོང་དང་ནི་ཐབས་ཡིན་དང་༔ འཇིགས་ཚོགས་ཐེག་པ་དམན་དག་ལས༔ སྐྱོབ་ཕྱིར་སྐྱབས་ཀྱི་དམ་པའོ༔ ཞེས་དང་༔ འཇིག་རྟེན་ཇི་སྲིད་སེམས་ཅན་གྱི༔ གནོད་དང་ཕུན་སུམ་ཚོགས་པ་ཀུན༔ བཟློག་ཅིང་འབྱོར་པར་བྱ་བའི་ཕྱིར༔ སངས་རྒྱས་སྐྱབས་ཆེན་ཉིད་དུ་འདོད༔ ཅེས་དང་༔ སངས་རྒྱས་ཉིད་དེ་སྐྱབས་ནི་དཔེ་མེད་མཆོག་ཏུ་འདོད༔ སྦྱོར་བས་འཇིགས་འགྱུར་འཇིགས་ཚོགས་ཀུན་དང་ཐེག་པ་དང་༔ ངན་སོང་རྣམ་མང་སྡུག་བསྔལ་ཐབས་མིན་སོང་བ་རྣམས༔ སྐྱེ་དང་འཆི་དང་ཉོན་མོངས་ལས་རྣམས་ཀུན་ལས་སྲུང་༔ ཞེས་དང་༔ མདོ་ལས༔ གང་ཞིག་སངས་རྒྱས་ཆོས་དང་ནི༔ དགེ་འདུན་དག་ལ་སྐྱབས་སོང་ན༔ ལྷ་དང་དྲི་ཟ་ལྷ་མ་ཡིན༔ ཀླུ་དང་གནོད་སྦྱིན་ལ་སོགས་པ༔ འཇིགས་པ་ཀུན་ལས་ཐར་བར་འགྱུར༔ ཞེས་དང་༔ མདོ་ཉི་མའི་སྙིང་པོ་ལས༔ སངས་རྒྱས་སྐྱབས་སུ་སེམས་ཅན་སུ་འགྲོ་བ༔
བདུད་རྣམས་བྱེ་བས་བསད་པར་མི་ནུས་ཏེ༔ ཚུལ་ཁྲིམས་ཉམས་ཤིང་བློ་ནི་འཁྲུགས་ཟིན་ཀྱང་༔ དེ་ནི་ངེས་པར་སྐྱེ་བའི་ཕ་རོལ་འགྲོ༔ ཞེས་དང་༔ དྲན་པའི་ཚོམས་ལས༔ གང་ཞིག་ཉིན་དང་མཚན་རྣམས་སུ༔ སངས་རྒྱས་རྗེས་སུ་དྲན་བྱེད་ཅིང་༔ གང་དག་སངས་རྒྱས་སྐྱབས་སོང་བ༔ དེ་དག་མི་ཡི་རྙེད་པ་ཡིན༔ ཆོས་དང་དགེ་འདུན་ལ་ཡང་དེ་བཞིན་དུ་གསུངས་སོ༔ པཎྜི་ཏ་དཔའ་བོའི་ཕར་ཕྱིན་བསྡུས་པར༔ སྐྱབས་སོང་བསོད་ནམས་གཟུགས་མཆིས་ན༔ སྟོང་གསུམ་འདི་ཡང་སྣོད་དུ་ཆུང་༔ རྒྱ་མཚོ་ཆེན་པོ་ཆུ་ཡི་གཏེར༔ ཕུལ་ལ་གཞལ་ཡང་ལངས་མི་འགྱུར༔ ཅེས་དང་༔ ཕག་མོའི་རྟོགས་བརྗོད་ལས༔ གང་ཞིག་སངས་རྒྱས་སྐྱབས་འགྲོ་བ༔ དེ་ནི་ངན་འགྲོར་མི་འགྲོ་སྟེ༔ ལྷ་ཡི་ལུས་ནི་སྤང་ནས་ཀྱང་༔ ལྷ་ཡི་ལུས་སུ་སྐྱེ་བར་འགྱུར༔ ཆོས་དང་དགེ་འདུན་ལ་ཡང་དེ་བཞིན་སྦྱར་ནས་གསུངས་སོ༔ ཉེས་ལྟུང་བཤགས་པ་ཡང་སྐྱབས་འགྲོ་ཟབ་སྟེ༔ སྡུད་པ་ལས༔ གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་༔ སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ༔ སངས་རྒྱས་བསྒྲུབ་བྱ་སྙམ་
དུ་ཀུན་མཁྱེན་ཡིད་བྱེད་ན༔ མཁས་པས་ཚུལ་ཁྲིམས་ཕ་རོལ་ཕྱིན་གནས་རིག་པར་བྱ༔ ཞེས་གསུངས་སོ༔ སྐྱབས་འགྲོ་བྱས་པས་སྡིག་པ་ཡང་དག་སྟེ༔ བཅོམ་ལྡན་འདས་ཀྱི་ཞལ་ནས༔ རྩྭ་སྐམ་ཕུང་པོ་རི་རབ་ཙམ༔ མེ་སྟག་ཆུང་ངུས་བསྲེགས་པ་ལྟར༔ དཀོན་མཆོག་གསུམ་ལ་སྐྱབས་སོང་ན༔ སྡིག་པ་རི་རབ་ཙམ་ཡང་བྱང་༔ ཞེས་གསུངས་སོ༔ སྡོམ་པ་ཐམས་ཅད་ཀྱི་གཞི་རྟེན་ཡང་སྐྱབས་འགྲོ་ཡིན་ཏེ༔ མཛོད་ལས༔ བསྙེན་གནས་གཞན་ལ་ཡོད་མོད་ཀྱི༔ སྐྱབས་སུ་མ་སོང་བ་ལ་མེད༔ ཅེས་གསུངས་སོ༔ མདོ་རྒྱུད་ཐམས་ཅད་ནས་སྐྱབས་འགྲོའི་ཕན་ཡོན་མཐའ་ཡས་པར་གསུངས་པ་རྣམས་བསྡུས་ན་བརྒྱད་དུ་འདུས་ཏེ༔ ནང་པ་སངས་རྒྱས་པར་ཚུད་པའི་ཕན་ཡོན་དང་༔ སྡོམ་པ་ཐམས་ཅད་ཀྱི་རྟེན་དུ་འགྱུར་བ་དང་༔ མི་དང་མི་མ་ཡིན་པའི་གནོད་པས་མི་ཚུགས་པ་དང་༔ སྡིག་པ་དང་སྒྲིབ་པ་ཐམས་ཅད་བྱང་ཞིང་སྲབ་པར་འགྱུར་བ་དང་༔ རྒྱུད་ལ་བསོད་ནམས་ཀྱི་ཚོགས་རྒྱ་ཆེན་པོ་གསོག་ཅིང་འཕེལ་བ་དང་༔ ཤི་ནས་ངན་སོང་ངན་འགྲོ་ལོག་པར་མི་ལྟུང་བ་དང་༔ ལམ་ཁྱད་པར་འཕགས་པ་རྒྱུད་ལ་སྐྱེ་བ་དང་༔ མཐར་བླ་ན་མེད་
པའི་བྱང་ཆུབ་འཐོབ་པའི་ཕན་ཡོན་དང་བརྒྱད་ཡོད་པར་གསུངས་སོ༔ དེ་ཡང་སྔོན་ལྷ་ཡི་བུ་ཞིག་ཚེ་ཟད་ནས་ཕག་ཅིག་ཏུ་སྐྱེ་བ་མཐོང་ནས་འཇིགས་ཤིང་སྐྲག་པ་ལ༔ བརྒྱ་བྱིན་གྱིས་སྐྱབས་འགྲོ་ཕོག་པས་དགའ་ལྡན་གྱི་ལྷར་སྐྱེས་པ་དང་༔ སྔོན་གནོད་སྦྱིན་ཞིག་སྟག་ཅིག་ཏུ་སྤྲུལ་ནས་མི་རྣམས་རེས་མོས་སུ་ཟ་བ་ལ༔ རྒན་མོ་མ་སྨད་གཉིས་ཀྱིས་སྐྱབས་འགྲོ་བྱས་པས༔ མེ་དཔུང་དུ་མཐོང་སྟེ་གནོད་སྦྱིན་གྱིས་ཟ་མ་ནུས་པ་དང་༔ དགེ་བསྙེན་མ་ཟླ་བ་བཟང་མོས༔ སྐྱབས་འགྲོ་བྱེད་ཅིང་དུར་ཁྲོད་འཇིགས་སུ་རུང་བ་གཅིག་ཏུ་མཚན་མོ་སོང་བ་ལ༔ གཅན་གཟན་དང་མི་མ་ཡིན་རྣམས་ཀྱིས་མེ་དཔུང་དུ་མཐོང་ནས་མ་ཟོས་པ་དང་༔ བུ་མོ་རྡོ་རྗེ་བྱ་བས་སྐྱབས་འགྲོ་བྱས་པས་གཟུགས་ངན་པའི་ལས་སྒྲིབ་དག་ནས༔ མཚན་དང་ལྡན་པའི་ལུས་སུ་གྱུར་པ་དང་༔ སྔོན་ལྷས་སྦྱིན་ངན་སོང་གི་གནས་སུ་སྡུག་བསྔལ་བར་གྱུར་པ་ལ༔ བཅོམ་ལྡན་འདས་ཀྱི་དཀོན་མཆོག་གསུམ་ལ་སྐྱབས་སུ་འགྲོ་བཅུག་པས༔ སངས་རྒྱས་དང་ཆོས་ལ་སྐྱབས་སུ་སོང་བས་བསྐལ་པ་གྲངས་མེད་པ་གཉིས་ཀྱི་སྡུག་བསྔལ་ལས་ཐར༔ ཕྲག་དོག་གི་དབང་གིས་དགེ་འདུན་ལ་སྐྱབས་
སུ་འགྲོ་མ་འདོད་པས༔ བསྐལ་པ་གྲངས་མེད་པ་གཅིག་གི་བར་དུ་སྡུག་བསྔལ་མྱོང་དགོས་པར་གསུངས་སོ༔ དེ་ལྟར་ཆོས་ཉན་པའི་བསོད་ནམས་དང་༔ ཆོས་ཐོས་པའི་བསོད་ནམས་དང་༔ སྐྱབས་སུ་སོང་བའི་ཕན་ཡོན་བསམ་གྱིས་མི་ཁྱབ་ཀྱང་༔ བསོད་ནམས་དེ་མི་ཉམས་པའི་གདམས་ངག་མེད་ན་ཁོང་ཁྲོ་གཅིག་སྐྱེས་ན་བསོད་ནམས་ཐམས་ཅད་འཇོམས་ཏེ༔ བྱང་ཆུབ་སེམས་པའི་སྡེ་སྣོད་ལས༔ ཁོང་ཁྲོ་བ་ཞེས་བྱ་བ་ནི་བསྐལ་པ་སྟོང་དུ་བསགས་པའི་དགེ་བའི་རྩ་བ་འཇོམས་པ་སྟེ༔ ཞེས་དང་༔ སྤྱོད་འཇུག་ལས༔ བསྐལ་པ་སྟོང་དུ་བསགས་པ་ཡི༔ སྦྱིན་དང་བདེར་གཤེགས་མཆོད་ལ་སོགས༔ ལེགས་སྤྱད་གང་ཡིན་དེ་ཀུན་ཡང་༔ ཁོང་ཁྲོ་གཅིག་གིས་འཇོམས་པར་བྱེད༔ ཅེས་གསུངས་སོ༔ དེའི་གནད་ཀྱིས་སྐྱབས་འགྲོ་ནས་བཟུང་སྟེ་དགེ་སྦྱོར་ཐམས་ཅད་དེ་མ་ཐག་ཏུ་བསྔོ་བས་རྒྱས་བཏབ་ན་བྱང་ཆུབ་མ་ཐོབ་ཀྱི་བར་དུ་དགེ་རྩ་དེ་མི་ཟད་པ་དང་༔ དགེ་བ་ཆུང་དུ་ཞིག་ཡིན་ཀྱང་བསྔོ་བས་རྒྱས་བཏབ་ན་ཞག་རེ་ལ་སྐྱེད་རེ་འཕེལ་ཏེ་དགེ་བ་རྒྱ་ཆེན་པོར་འགྱུར་བ་ཡིན་པའི་ཕྱིར༔ རྡོ་རྗེའི་ཚིག་རྐང་ལས་བསྔོ་བ་ཚིག་རྐང་གཅིག་གསུངས་ནས་དེའི་
འགྲེལ་པ་ཐུགས་རྗེ་ཆེན་པོས་གསུངས་པ་ལས༔ དེ་ལྟར་སྐྱབས་སུ་སོང་བའི་དགེ་བ་དེ་བདག་གིས་མ་རྒན་འགྲོ་དྲུག་སེམས་ཅན་ཀུན་ལ་བསྔོ༔ ཞེས་གསུངས་སོ༔ དེའི་དོན་རྒྱས་པར་འཆད་ན༔ བློ་གྲོས་རྒྱ་མཚོས་ཞུས་པའི་མདོ་ལས༔ ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྟུང་༔ རྒྱ་མཚོ་མ་ཟད་བར་དུ་དེ་མི་ཟད༔ དེ་བཞིན་བྱང་ཆུབ་ཡོངས་བསྔོས་དགེ་བ་ཡང་༔ བྱང་ཆུབ་མ་ཐོབ་བར་དུ་དེ་མི་ཟད༔ ཅེས་དང་༔ འཇམ་དཔལ་ཞིང་བཀོད་ལས༔ ཆོས་རྣམས་ཐམས་ཅད་རྐྱེན་བཞིན་དུ༔ འདུན་པའི་རྩེ་ལ་རབ་ཏུ་གནས༔ གང་གིས་སྨོན་ལམ་ཅི་བཏབ་པ༔ འབྲས་བུའང་དེ་འདྲ་ཉིད་དུ་འབྱུང་༔ ཞེས་དང་༔ རྡོ་རྗེ་རྒྱལ་མཚན་གྱི་མདོ་ལས༔ འགྲོ་ཀུན་དགེ་བ་ཇི་སྙེད་ཡོད་པ་དང་༔ ཕྱོགས་བཅུའི་འཇིག་རྟེན་ཁམས་གང་ཡོད་པ་ཡི༔ དགེ་བའི་རྩ་བ་ཡང་དག་བསྒྲུབས་པས་ན༔ འགྲོ་བ་ཀུན་ལ་ཕན་དང་བདེ་སེམས་ཀྱི༔ ཡེ་ཤེས་མཁས་པ་དེ་དག་ཡོངས་སུ་བསྔོ༔ ཞེས་དང་༔ བཟང་པོ་སྤྱོད་པ་སྨོན་ལམ་གྱི་མདོ་ལས་ཀྱང་༔ རྒྱལ་བ་ཀུན་གྱི་སྲས་ཀྱི་ཐུ་བོ་པ༔ གང་གི་མིང་ནི་ཀུན་ཏུ་བཟང་ཞེས་བྱ༔ མཁས་པ་དེ་དང་
མཚུངས་པར་སྤྱད་པའི་ཕྱིར༔ དགེ་བ་འདི་དག་ཐམས་ཅད་རབ་ཏུ་བསྔོ༔ ཞེས་པ་ནས༔ བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི༔ ཞེས་པའི་བར་དུ་གསུངས་སོ༔ ཤེར་ཕྱིན་སྟོང་ཕྲག་ཉེར་ལྔ་པ་ལས་བསྔོ་བའི་ཕན་ཡོན་མཐའ་ཡས་པ་ཞིག་གསུངས་པའི་དོན་བསྡུས་ཏེ་བཤད་ན༔ སྟོང་གསུམ་གྱི་འཇིག་རྟེན་ཁམས་ཀྱི་སེམས་ཅན་ཐམས་ཅད་དགེ་བ་བཅུ་དང་བསམ་གཏན་བཞི་དང་༔ ཚད་མེད་པ་བཞི་དང་མངོན་ཤེས་ལྔ་ཐོབ་པའི་བསོད་ནམས་ལས༔ དགེ་བ་བྱང་ཆུབ་ཏུ་བསྔོས་ན་བསོད་ནམས་ཆེ་བ་དང་༔ སྟོང་གསུམ་ཁམས་ཀྱི་སེམས་ཅན་ཐམས་ཅད་རྒྱུན་ཏུ་ཞུགས་པ་དང་༔ ལན་གཅིག་ཕྱིར་འོང་བའི་འབྲས་བུ་དང་ཕྱིར་མི་འོང་བ་དང་དགྲ་བཅོམ་པ་ཐོབ་པ་ལ་བསྙེན་བཀུར་རྒྱ་ཆེན་པོ་བྱས་པའི་བསོད་ནམས་ལས་ཀྱང་༔ དགེ་བ་བྱང་ཆུབ་ཏུ་བསྔོས་ན་བསོད་ནམས་ཆེ་བ་དང་༔ སྟོང་གསུམ་གྱི་སེམས་ཅན་ཐམས་ཅད་རང་སངས་རྒྱས་སུ་གྱུར་པ་ལ་བསྙེན་བཀུར་རྒྱ་ཆེན་པོ་བྱས་པ་བས་ཀྱང་དགེ་བ་བྱང་ཆུབ་ཏུ་བསྔོས་ན་བསོད་ནམས་ཆེ་བ་དང་༔ སྟོང་གསུམ་གྱི་སེམས་ཅན་ཐམས་ཅད་བྱང་ཆུབ་སེམས་དཔར་གྱུར་པ་ལ༔ ཕྱོགས་བཅུའི་འཇིག་རྟེན་གྱི་ཁམས་གངྒཱ་ཀླུང་གི་
བྱེ་མ་སྙེད་རེ་རེས་ཀྱང་བྱང་ཆུབ་སེམས་དཔའ་དེ་དག་ལ་མཆོད་པ་དང་བསྙེན་བཀུར་ཕུན་སུམ་ཚོགས་པ་བྱས་པ་བས་ཀྱང་༔ དགེ་རྩ་བྱང་ཆུབ་ཏུ་བསྔོ་བས་རྒྱས་བཏབ་ན་བསོད་ནམས་ཆེ་བར་གསུངས་སོ༔ དེ་ལྟ་བུའི་ཕན་ཡོན་རྒྱ་ཆེ་བའི་བསྔོ་བ་ནི་འཁོར་གསུམ་མི་དམིགས་པར་བསྔོ་བ་ཡིན་ཏེ༔ མངོན་རྟོགས་རྒྱན་ལས༔ ཡོངས་སུ་བསྔོ་བ་ཁྱད་པར་ཅན༔ དེ་ཡི་བྱེད་པ་མཆོག་ཡིན་ནོ༔ དེ་ནི་མི་དམིགས་རྣམ་པ་ཅན༔ ཕྱིན་ཅི་མ་ལོག་མཚན་ཉིད་དོ༔ ཞེས་གསུངས་པ་དང་༔ སྡུད་པ་ལས༔ གང་དུ་ཡོངས་སུ་བསྔོ་བ་དེ་ཡང་ཟད་པ་དང་༔ གང་གིས་ཡོངས་སུ་བསྔོ་བ་དེ་ཡང་ཟད་པ་དང་༔ ཆོས་ཀྱི་ཆོས་ལ་ནམ་ཡང་མི་བསྔོ་ཤེས་གྱུར་ན༔ དེ་ལྟར་ཡོངས་སུ་བསྔོ་བས་བྱང་ཆུབ་བསྔོ་བ་ཡིན༔ ཞེས་དང་༔ བློ་གྲོས་རྒྱ་མཚོས་ཞུས་པར༔ བྱང་ཆུབ་སེམས་དཔའ་དགེ་བ་མང་དུ་བསགས་པ་ཡང་༔ ཐམས་ཅད་མཁྱེན་པ་ཉིད་དུ་མ་བསྔོས་ན༔ ཕ་རོལ་ཏུ་ཕྱིན་པའི་མིང་ཡང་མི་ཐོབ་ཀྱི༔ དགེ་བའི་རྩ་བ་ཉིད་ཀྱི་གྲངས་སུ་འགྲོའོ༔ གང་གི་ཚེ་ཐམས་ཅད་མཁྱེན་པ་ཉིད་དུ་བསྔོས་པ་དེ་ཚེ་ཕ་རོལ་ཏུ་ཕྱིན་པའི་མིང་འཐོབ་བོ༔ དེས་ན་དགེ་བ་ཅི་
བ་དང་ཅི་བསགས་ཐམས་ཅད་མཁྱེན་པ་ཉིད་དུ་བསྔོའོ༔ ཞེས་དང་༔ ནམ་མཁའ་མཛོད་ལས༔ ཐ་དད་ཕྱོགས་ནི་ཆུ་ཀླུང་མང་པོ་དག༔ རྒྱ་མཚོ་ཆེར་འབབ་རོ་གཅིག་གྱུར་པ་ལྟར༔ ཐ་དད་ཕྱོགས་ནས་དགེ་བ་བསགས་བྱས་པ༔ བྱང་ཆུབ་བསྔོས་པ་རྣམས་ཀྱང་རོ་གཅིག་འགྱུར༔ ཞེས་དང་༔ སྤྱོད་འཇུག་ལས༔ དངོས་སམ་ཡང་ན་རྒྱུད་ཀྱང་རུང་༔ སེམས་ཅན་དོན་ལས་གཞན་མི་སྤྱད༔ སེམས་ཅན་ཁོ་ནའི་དོན་གྱི་ཕྱིར༔ ཐམས་ཅད་བྱང་ཆུབ་ཕྱིར་བསྔོའོ༔ ཞེས་གསུངས་སོ༔ འདི་ལྟར་བསྔོ་བའི་གདམས་པ་འདི༔ བཅོམ་ལྡན་འདས་ཀྱིས་བསྟན་པ་འདིའི་མན་ངག་ཟབ་མོ༔ འཇིག་རྟེན་གྱི་བསྟན་བཅོས་ལས་མ་གྲགས་པ་ཡིན་ཏེ༔ སློབ་དཔོན་དཔའ་བོས༔ བསོད་ནམས་བྱས་པའི་དངོས་པོ་ནི༔ སེམས་ཅན་རྣམས་ལ་ཡོངས་བསྔོ་བ༔ བཅོམ་ལྡན་ཁྱོད་ཀྱིས་གང་གསུངས་པ༔ དེ་གཞན་བསྟན་བཅོས་ལས་མ་བཤད༔ ཅེས་གསུངས་སོ༔ འོ་ན་བྱང་ཆུབ་ཏུ་བསྔོ་བ་དེ་ཅི་ལྟར་ཡིན་ཞེ་ན༔ འཕགས་པ་སྡུད་པ་ལས༔ བྱང་ཆུབ་སེམས་དཔའ་ཤེས་རབ་མཆོག་བསྒོམ་སྟེ༔ དེ་ལས་ལངས་ནས་གོས་པ་མེད་པའི་ཆོས་བརྗོད་ཅིང་༔ དེ་ཡང་
འགྲོ་བའི་དོན་དུ་བྱང་ཆུབ་རྒྱུར་བསྔོ་ན༔ དགེ་བ་དེ་དང་མཉམ་པ་འཇིག་རྟེན་གསུམ་ན་མེད༔ སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་༔ བསམ་གཏན་ཤེས་རབ་བྱང་ཆུབ་ཡོངས་སུ་བསྔོ་བར་གྱིས༔ གལ་ཏེ་མཚན་མར་བྱེད་ན་བྱང་ཆུབ་བསྔོ་བ་མིན༔ ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན༔ ཞེས་དང་༔ རྡོ་རྗེ་རྒྱལ་མཚན་མདོ་ལས༔ དེ་བཞིན་ཉིད་ཀྱི་ངང་ཚུལ་ཅི་འདྲ་དང་༔ དེ་བཞིན་ཉིད་ཀྱི་རང་བཞིན་ཅི་འདྲ་དང་༔ དེ་བཞིན་ཉིད་ཀྱི་མཚན་ཉིད་ཅི་འདྲ་བར༔ དེ་འདྲར་ལས་རྣམས་ཀུན་ཀྱང་ཡོངས་སུ་བསྔོ༔ ཞེས་དང་༔ རྒྱན་སྟུག་པོ་བཀོད་པའི་མདོ་ལས༔ ནོར་བུ་ཆུ་དང་མེ་ཤེལ་དག༔ ཉི་ཟླའི་འོད་ཀྱིས་ཕོག་པ་ན༔ འདི་དག་སོ་སོའི་ཡོན་ཏན་འབྱིན༔ དེ་བཞིན་ཀུན་གཞིའི་རྣམ་ཤེས་འདི༔ བདེ་གཤེགས་སྙིང་པོའི་ཁམས་དགེ་བ༔ བསྔོས་པར་འགྱུར་ན་འབྲས་བུ་འབྱིན༔ ཞེས་གསུངས་པས་རབ་སྟོང་ཉིད་ཉམས་ལེན་གྱི་ངང་ནས་བསྔོ་བ་བྱ༔ འབྲིང་ཡང་སྒྱུ་མ་རྨི་ལམ་ལྟ་བུ་དངོས་པོར་མ་གྲུབ་པའི་ཉམས་ལེན་ངང་ནས་བསྔོ༔ དེ་ལྟ་བུ་མི་ཤེས་ནའང་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་དང་༔
དུས་གསུམ་གྱི་རྒྱལ་བ་རྣམས་ཀྱིས་ཇི་ལྟར་བསྔོས་པ་ལྟར༔ དགེ་བ་འདི་ཡང་དེ་ལྟར་བསྔོ་སྙམ་པའི་འདུན་པ་རྩེ་གཅིག་པས་བསྔོ་བ་ཡིན་ཏེ༔ ཕུང་པོ་གསུམ་པའི་མདོ་ལས༔ འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་༔ ཞེས་སོགས་གསུངས་སོ༔ གསང་སྔགས་བསྐྱེད་རྫོགས་སྒོམ་བཟླས་དང་ཚོགས་ཀྱི་མཆོད་པ་སོགས་ཀྱང་བསྔོ་བས་རྒྱས་འདེབས་པ་གལ་ཆེ་སྟེ༔ སྡོམ་པ་འབྱུང་བའི་རྒྱུད་ལས༔ དེ་ནས་དཀྱིལ་འཁོར་མདུན་ཉིད་དུ༔ སྙིང་གར་ཐལ་མོ་རབ་སྦྱར་ཏེ༔ སྦྱིན་བདག་གིས་ནི་སྨོན་ལམ་གདབ༔ ཡོངས་སུ་བསྔོ་བ་ཉིད་དུ་བྱས༔ ཞེས་དང་༔ གསང་བ་ཁ་སྦྱོར་ཐིག་ལེའི་རྒྱུད་ལས༔ རྡོ་རྗེ་ཐལ་མོ་སྦྱར་བྱས་ནས༔ རང་གི་སྙིང་གར་བཞག་ནས་སུ༔ སེམས་ཅན་ཐམས་ཅད་ལ་དམིགས་ཏེ༔ སྨོན་ལམ་དག་ནི་གདབ་པར་བྱ༔ ཞེས་དང་༔ ཨོ་རྒྱན་རིན་པོ་ཆེས༔ བསོད་ནམས་བསགས་དང་དེ་ཡི་འབྲས༔ བསྔོ་དང་བསྔོ་བ་ལ་སོགས་རྣམས༔ རང་བཞིན་མེད་པར་ཡོངས་ཤེས་ནས༔ བླ་མེད་མཆོག་གི་བསྔོ་བའོ༔ ཞེས་དང་༔ ལྷའམ་བླ་མ་ལ་སོགས་པ༔ དཀོན་མཆོག་གསུམ་དང་རྟེན་དྲུང་དུ༔
བསམ་འདུན་དད་པས་ཚོགས་བསགས་ཤིང་༔ སྨོན་ལམ་རྒྱ་ཆེན་གདབ་པར་བྱ༔ དེ་ཡི་ཡོན་ཏན་བརྗོད་ལས་འདས༔ ཞེས་དང་༔ ཉ་སྟོང་བརྒྱད་གསུམ་ལ་སོགས་དུས༔ དགེ་རྩ་དཀོན་མཆོག་དྲུང་དུ་བསྔོ༔ ཞེས་གསུངས་པའི་དོན་ཡིན་པས༔ མདུན་གྱི་ནམ་མཁར་སྐྱབས་ཡུལ་སྔར་སྨོས་པ་དེ་དག་གསལ་ཐོབ༔ དེ་དག་དུ༔ ཆོས་ཉན་པའི་བསོད་ནམས་དང་༔ སྐྱབས་སུ་འགྲོ་བའི་སྡོམ་པ་ཞུས་པའི་བསོད་ནམས་དང་༔ ད་ལྟ་ཡང་སྐྱབས་སུ་འགྲོ་བའི་དགེ་བའི་རྩ་བ་དེ་ཐམས་ཅད༔ ཕ་མས་ཐོག་དྲངས་སེམས་ཅན་ཐམས་ཅད་ལ་བསྔོའོ༔ དེའི་དགེ་བས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་མྱུར་དུ་ཐོབ་པར་གྱུར་ཅིག་བསམ་པ་གྱིས་རྡོ་རྗེའི་ཚིག་རྐང་ལས་གསུངས་པའི་བསྔོ་བ་ཚིག་གཅིག་པོ་འདིའི་རྗེས་ཟློས་ལན་གསུམ་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ གསུམ༔ དེ་ནས་ནམ་མཁར་བསྒོམས་པའི་སྐྱབས་ཡུལ་ཐམས་ཅད་འོད་དུ་ཞུ་ནས་ཁྱེད་རང་རྣམས་ལ་ཐིམ་པས༔ འཕགས་པ་དཀོན་མཆོག་གསུམ་གྱི་སྐྱབས་འོག་དམ་པར་ཚུད་ངེས་སྙམ་པའི་ངེས་ཤེས་མཛོད་
ལ༔ སེམས་མ་བཅོས་པར་མཉམ་པར་ཞོག༔ དེ་ནི་དོན་དམ་པའི་སྐྱབས་འགྲོ་ཡང་ཡིན་ཏེ༔ མ་དྲོས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་ཐམས་ཅད་བདག་མེད་པ་སེམས་ཅན་མེད་པ་སྲོག་མེད་པ་གང་ཟག་མེད་པར་ཤེས༔ གཟུགས་སུ་མ་ཡིན་མཚན་དུ་མ་ཡིན༔ ཆོས་སུ་མ་ཡིན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྗེས་སུ་མཐོང་བ་དེ་ལྟ་བུ་ནི༔ ཟང་ཟིང་མེད་པའི་སེམས་ཀྱིས་སངས་རྒྱས་ལ་སྐྱབས་སུ་སོང་བ་ཡིན་ནོ༔ དེ་བཞིན་གཤེགས་པའི་ཆོས་ཉིད་གང་ཡིན་པ་དེ་ནི་ཆོས་ཀྱི་དབྱིངས་སོ༔ ཆོས་ཀྱི་དབྱིངས་གང་ཡིན་པ་དེ་ནི་ཆོས་ཐམས་ཅད་ཀྱི་རྗེས་སུ་སོང་བ་ཞེས་བྱ་སྟེ༔ དེ་ལྟར་ཆོས་ཐམས་ཅད་ཀྱི་དབྱིངས་སུ་སོང་བ་མཐོང་སྟེ༔ དེ་ལྟར་མཐོང་བ་དེ་ལྟ་བུ་ནི་ཟང་ཟིང་མེད་པའི་སེམས་ཀྱི་ཆོས་ལ་སྐྱབས་སུ་སོང་བ་ཡིན་ནོ༔ གང་ཆོས་ཀྱི་འདུས་མ་བྱས་པར་བསྒོམ་པ་དང་༔ ཉན་ཐོས་ཀྱི་ཐེག་པ་འདུས་མ་བྱས་པར་བསྟན་པ་དང་༔ འདུས་བྱས་དང་འདུས་མ་བྱས་པ་གཉིས་སུ་མེད་པ་འདི་ལྟ་བུ་ནི་ཟང་ཟིང་མེད་པའི་སེམས་ཀྱིས་དགེ་འདུན་ལ་སྐྱབས་སུ་སོང་བ་ཡིན་ནོ༔ ཞེས་དང་༔ ཨོརྒྱན་རིན་པོ་ཆེའི་ཞལ་ནས༔ ཡེ་
ནས་སྟོང་ཉིད་སྤྲོས་དང་བྲལ་བ་ལ༔ སྤྲོས་མེད་སྤྲོས་བྲལ་འདུས་མ་བྱས་པའི་སྐུ༔ འཛིན་མེད་བློ་འདས་ངང་དུ་སྐྱབས་སུ་མཆི༔ ངོ་བོ་རང་བཞིན་ཐུགས་རྗེ་ཀ་ནས་དག༔ མཉམ་རྫོགས་ཀློང་ཡངས་ཆེན་པོའི་རང་བཞིན་ལ༔ རྟོག་མེད་རང་གསལ་རྗེན་པར་སྐྱབས་སུ་མཆི༔ ཞེས་གསུངས་སོ༔ དེས་ན་དུས་རྒྱུན་དུའམ༔ ནངས་ནུབ་སྐྱབས་ཡུལ་གསལ་ཐོབ་ལ༔ སྐྱབས་འགྲོ་གང་ཤེས་མཛོད་ལ༔ མཐར་སྐྱབས་ཡུལ་རང་ལ་བསྟིམ་ནས་སེམས་མ་བཅོས་པར་རང་ལུགས་སུ་ཀློད་ལ་ཞོག་ཅིག༔ དེས་ཁྱད་པར་གྱི་སྔོན་འགྲོ་བཞིའི་དང་པོའི་དང་པོ་སྐྱབས་འགྲོའི་ཁྲིད་དེ༔ ཆོས་ཐུན་དགུ་པའོ༔ ༈ དེ་ནས་བྱང་ཆུབ་ཏུ་སེམས་བསྐྱེད་པ་ནི་རྡོ་རྗེའི་ཚིག་རྐང་ལས༔ སེམས་ཅན་དོན་དུ་བྱང་ཆུབ་སེམས་བསྐྱེད་དོ༔ ཞེས་དང་༔ དེའི་འགྲེལ་པ་ཐུགས་རྗེ་ཆེན་པོ་ཉིད་ཀྱི་རང་འགྲེལ་ལས༔ སེམས་ཅན་ཐམས་ཅད་ཀྱི་དོན་དུ་བདག་གིས་བྱང་ཆུབ་ཆེན་པོར་མཆོག་ཏུ་སེམས་བསྐྱེད་པར་བྱེད་དེ༔ ཞེས་གསུངས་པའི་དོན་རྒྱས་པར་འཆད་ན༔ ཕལ་པོ་ཆེ་ལས༔ གང་གིས་ཕྱོགས་བཅུའི་རྒྱལ་བ་བལྟ་བར་འདོད་པ་
དང་༔ གང་ཞིག་སྦྱིན་གཏོང་བསོད་ནམས་མི་ཟད་མཛོད་འདོད་དང་༔ འགྲོ་བ་ཀུན་གྱི་སྡུག་བསྔལ་མི་ཟད་རྟོགས་འདོད་ན༔ དེས་ནི་ཡོན་ཏན་མཐའ་ཡས་བྱང་ཆུབ་སེམས་བསྐྱེད་བྱ༔ ཞེས་དང་༔ བསླབ་བཏུས་ལས༔ སྡུག་བསྔལ་མཐར་ཕྱིན་འདོད་པ་དང་༔ བདེ་བའི་མཐར་ཡང་འགྲོ་འདོད་པས༔ དད་པའི་རྩ་བ་བརྟན་བྱས་ཏེ༔ བྱང་ཆུབ་ཏུ་ནི་བློ་བརྟན་བྱ༔ ཞེས་དང་༔ ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས༔ འོད་སྲུང་ལྷག་པའི་བསམ་པ་ལ་ཞུགས་པ་ལ་བྱང་ཆུབ་འགྲུབ་པ་དཀའ་བ་མ་མཆིས་སོ༔ དེ་ཅིའི་ཕྱིར་ཞེ་ན༔ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི༔ སེམས་བསྐྱེད་པ་ལ་རགས་ལས་ཏེ༔ བྱང་ཆུབ་ཏུ་སེམས་བསྐྱེད་མ་ཐག་ཏུ༔ སངས་རྒྱས་དང་སངས་རྒྱས་ཀྱི་ཆོས་རྣམས་བཟུང་བར་འགྱུར་རོ༔ ཞེས་དང་༔ བསོད་ནམས་ཐམས་ཅད་བསྡུས་པའི་མདོར༔ སྲེད་མེད་ཀྱི་བུ་དཔེར་ན༔ ཆུ་ཀླུང་དང་ཆུ་མིག་དང་ཆུ་བྲན་དང་འབབ་ཆུ་ཐམས་ཅད་ནི༔ རྒྱ་མཚོ་ཆེན་པོའི་ཁོངས་སུ་འདུ་ཞིང་རྗེས་སུ་ཞུགས་པར་རིག་པར་བྱའོ༔ དེ་བཞིན་དུ་བསོད་ནམས་བྱ་བའི་དངོས་པོ་གང་ཅི་ཡང་རུང་བ༔ སྦྱིན་པ་ལས་བྱུང་བ་དང་༔
ཚུལ་ཁྲིམས་དང་བསྒོམ་པ་ལས་བྱུང་བ་དང་༔ ཟག་པ་དང་བཅས་པ་དང་ཟག་པ་མེད་པ་དང་༔ འཇིག་རྟེན་དང་འཇིག་རྟེན་ལས་འདས་པའི་བསོད་ནམས་ཇི་སྙེད་པ་དེ་དག་ཐམས་ཅད་བྱང་ཆུབ་ཀྱི་སེམས་ཀྱི་ཁོངས་སུ་འདུ་ཞིང་རྗེས་སུ་ཞུགས་པ་དག་གོ༔ སྲེད་མེད་ཀྱི་བུ་དེའི་ཕྱིར་བསོད་ནམས་ཐམས་ཅད་ཡོངས་སུ་བཟུང་བར་འདོད་པའི་རིགས་ཀྱི་བུའམ་རིགས་ཀྱི་བུ་མོས་བླ་ན་མེད་པ་ཡང་དག་པར་རྫོ་གས་པའི་བྱང་ཆུབ་ཏུ་སེམས་བསྐྱེད་པར་བྱའོ༔ ཞེས་དང་༔ ངེས་པ་དང་མ་ངེས་པའི་ཕྱག་རྒྱ་ལ་འཇུག་པའི་མདོར༔ འཇམ་དཔལ་གང་དང་གང་གིས་བྱང་ཆུབ་ཏུ་སེམས་བསྐྱེད་པ་དེའི་ཕྱིར༔ སེམས་དེ་ལ་མི་དགེ་བའི་ལས་རྣམས་ལ་མ་སྤངས་པ་ཅི་ཡང་མེད་ལ༔ དེ་ཡང་སངས་རྒྱས་ཀྱི་ཆོས་རྣམས་ལ་མ་བཟུང་པ་གང་ཡང་མེད་པའི་ཕྱིར༔ འཇམ་དཔལ་བྱང་ཆུབ་སེམས་དཔའ་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ༔ ཞེས་དང་༔ དཀོན་མཆོག་ཏཱ་ལའི་མདོར༔ རྒྱལ་དང་རྒྱལ་བའི་ཆོས་ལ་དད་གྱུར་ཅིང་༔ སངས་རྒྱས་སྲས་ཀྱི་ཆོས་ལ་དད་བྱེད་པ༔ བྱང་ཆུབ་བླ་ན་མེད་ལ་ཡིད་ཆེས་ན༔ སྐྱེས་བུ་དམ་པ་རྣམས་ཀྱི་
སེམས་སྐྱེའོ༔ རྒྱལ་བ་ཀུན་དང་ཆོས་དང་དགེ་འདུན་དང་དེ་བཞིན་བླ་མར་གྱུར་པ་ཐམས་ཅད་ལ༔ དད་དང་མོས་དང་དགའ་བ་བསྐྱེད་བྱས་ཏེ༔ སྲིད་ཞུའི་མཆོད་བྱ་བྱང་ཆུབ་སེམས་ཀྱང་སྐྱེ༔ རྒྱལ་དང་བདེ་གཤེགས་ཆོས་ལ་ཡིད་ཆེས་ན༔ རྒྱལ་སྲས་སྤྱོད་པ་རྣམས་ལ་ཡིད་ཆེས་ན༔ བྱང་ཆུབ་བླ་ན་མེད་ལ་ཡིད་ཆེས་ན༔ སྐྱེས་བུ་དམ་པ་རྣམས་ཀྱི་སེམས་སྐྱེའོ༔ ཞེས་དང་༔ བྱམས་པས་ཞུས་པའི་མདོ་ལས༔ བྱང་ཆུབ་སེམས་དཔའ་ཆོས་གཅིག་དང་ལྡན་ན༔ ངན་སོང་ཐམས་ཅད་སྤངས་ཤིང་༔ སྡིག་པའི་གྲོགས་པོའི་ལག་ཏུ་མི་འགྲོ་ལ༔ མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ༔ ཆོས་གཅིག་པོ་དེ་གང་ཞེ་ན་འདི་ལྟ་སྟེ༔ ལྷག་པའི་བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ ཞེས་དང་༔ རྣམ་སྣང་མངོན་བྱང་ལས་ཀྱང་ཐམས་ཅད་མཁྱེན་པའི་རྒྱུ་དང་རྩ་བ་བཤད་པའི་སྐབས་སུ༔ རྒྱུ་ནི་བྱང་ཆུབ་ཀྱི་སེམས་སོ༔ ཞེས་གསུངས་སོ༔ བྱང་ཆུབ་སེམས་དཔའི་སྡེ་སྣོད་ལས་བྱང་ཆུབ་སེམས་དཔའ་ཆོས་གཅིག་དང་ལྡན་ན་སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་
ཡོངས་སུ་འཛིན་ཏོ༔ ཆོས་གཅིག་པུ་གང་ཞེ་ན་འདི་ལྟ་སྟེ༔ བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ ཞེས་དང་༔ འཕགས་པ་ནཱ་ག་ཛུ་བདག་ཉིད་དང་ནི་འཇིག་རྟེན་འདིས༔ བླ་མེད་བྱང་ཆུབ་ཐོབ་འདོད་ན༔ དེ་ཡི་རྩ་བ་བྱང་ཆུབ་སེམས༔ ཞེས་དང་༔ རྫོགས་པ་ཆེན་པོའི་རྒྱུད་རྣམས་ཀྱི་དོན་བསྡུས་པ་ཌཱ་ཀི་སྙིང་ཐིག་ལས༔ དེ་ནས་སྔོན་འགྲོ་བྱང་ཆུབ་སེམས་སྦྱོང་དགོས་པ་ནི༔ བྱམས་དང་སྙིང་རྗེ་ཆོས་སྤྱིའི་ལམ༔ ཐེག་པ་ཆེན་པོར་འཇུག་ཕྱིར་དུ༔ ཞེས་དང་༔ ཨུ་རྒྱན་རིན་པོ་ཆེའི་ཞལ་ནས༔ ཤེས་རབ་ཟབ་མོ་སྟོང་ཉིད་མངོན་དུ་གྱུར་ཀྱང་༔ ཐབས་མཁས་ཐུགས་རྗེ་སྙིང་རྗེས་སེམས་བསྐྱེད་མེད་ན༔ ཐེག་དམན་ཉན་རང་དུ་འགྲོ་བས་སྙིང་རྗེས་བྱང་མི་ཆུབ་ཏུ་སེམས་བསྐྱེད༔ ཅེས་གསུངས་སོ༔ འོ་ན་སེམས་བསྐྱེད་དེ་ཅི་ལྟ་བུ་ཞེ་ན༔ མངོན་པར་རྟོགས་པའི་རྒྱན་ལས༔ སེམས་བསྐྱེད་པ་ནི་གཞན་དོན་ཕྱིར༔ ཡང་དག་རྫོགས་པའི་བྱང་ཆུབ་འདོད༔ ཅེས་གསུངས་སོ༔ སེམས་བསྐྱེད་དེ་ལ་དཔེའི་སྒོ་ནས་དབྱེ་ན༔ ས་ལྟ་བུའི་སེམས་བསྐྱེད་ལ་སོགས་པ་དབྱེ་བ་ཉི་ཤུ་རྩ་གཉིས་ཏེ༔ མངོན་རྟོགས་
རྒྱན་ལས༔ དེ་ཡང་ས་གསེར་ཟླ་བ་མེ༔ གཏེར་དང་རིན་ཆེན་འབྱུང་གནས་མཚོ༔ རྡོ་རྗེ་རི་སྨན་བཤེས་གཉེན་དང་༔ ཡིད་བཞིན་ནོར་བུ་ཉི་མ་ཀླུ༔ རྒྱལ་པོ་མཛོད་དང་ལམ་པོ་ཆེ༔ བཞོན་པ་བཀོད་པའི་ཆུ་དང་ནི༔ སྒྲ་སྙན་ཆུ་བོ་སྤྲིན་རྣམས་ཀྱི༔ རྣམ་པ་ཉི་ཤུ་རྩ་གཉིས་སོ༔ ཞེས་གསུངས་སོ༔ དེ་ནི་ལས་དང་པོ་ནས་སངས་རྒྱས་ཀྱི་སའི་བར་གྱི་བསྐྱེད་ཡིན་ལ༔ མཚན་ཉིད་སྒོ་ནས་དབྱེ་ན༔ དོན་དམ་དང་ཀུན་རྫོབ་གཉིས་ཏེ༔ དགོངས་པ་ངེས་འགྲེལ་ལས༔ བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ༔ དོན་དམ་བྱང་ཆུབ་ཀྱི་སེམས་དང་༔ ཀུན་རྫོབ་བྱང་ཆུབ་ཀྱི་སེམས་སོ༔ ཞེས་གསུངས་སོ༔ ཀུན་རྫོབ་བྱང་ཆུབ་ཀྱི་སེམས་ལ་ཡང་སྨོན་པ་དང་འཇུག་པ་གཉིས་ཏེ༔ སྤྱོད་འཇུག་ལས༔ བྱང་ཆུབ་སེམས་དེ་མདོར་བསྡུས་ན༔ རྣམ་པ་གཉིས་སུ་ཤེས་བྱ་སྟེ༔ བྱང་ཆུབ་སྨོན་པའི་སེམས་དང་ནི༔ བྱང་ཆུབ་འཇུག་པ་ཉིད་ཡིན་ནོ༔ ཞེས་གསུངས་སོ༔ དེ་གཉིས་ཀྱི་ཁྱད་པར་ཇི་ལྟར་ཞེ་ན༔ སྤྱོད་འཇུག་ལས༔ འགྲོ་བར་འདོད་དང་འགྲོ་བ་ཡི༔ བྱེ་བྲག་ཇི་བཞིན་ཤེས་པ་ལྟར༔ དེ་བཞིན་མཁས་པས་འདི་གཉིས་ཀྱི༔ བྱེ་བྲག་
རིམ་བཞིན་ཤེས་པར་བྱ༔ ཞེས་གསུངས་སོ༔ སེམས་བསྐྱེད་པའི་རྒྱུ་ནི་ཆོས་བཅུ་པའི་མདོ་དང་བྱང་ཆུབ་སེམས་དཔའི་ས་དང་༔ མདོ་སྡེ་རྒྱན་སོགས་ནས་མང་དུ་གསུངས་ཀྱང་༔ ད་ལམ་ནི་སེམས་བསྐྱེད་ཀྱི་ཕན་ཡོན་ཐོས་པ་དང་དགེ་བའི་བཤེས་གཉེན་གྱིས་བསྐུལ་བ་གཙོ་བོ་ཡིན་ནོ༔ བྱང་ཆུབ་སེམས་བསྐྱེད་བླང་བའི་ཡུལ་ནི་སློབ་དཔོན་ཡོད་པའི་ལུགས་དང་མེད་པའི་ལུགས་གཉིས་ལས༔ ད་རེས་སློབ་དཔོན་ཡོད་པའི་ལུགས་སུ་བླངས་ནས༔ རྗེས་ནས་རྒྱུན་དུ་སངས་རྒྱས་བྱང་སེམས་ཡིད་ཀྱིས་དམིགས་ཏེ་བླང་བར་བྱའོ༔ དེ་ཡང་རང་ཉིད་ངན་སོང་ལས་ཐར་ནས་མཐོ་རིས་ཀྱི་བདེ་སྐྱིད་ཐོབ་པར་འདོད་པ་ནི༔ ལེགས་སྨོན་ཙམ་སྟེ་ཆོས་པའི་གྲངས་སུ་ཡང་མི་འགྲོ་སྟེ་དམན་པ་ལྷ་མིའི་ཐེག་པ་ཞེས་རང་ཉིད་འཁོར་བའི་སྡུག་བསྔལ་ཐམས་ཅད་ལས་ཐར་ནས་བྱང་ཆུབ་ཐོབ་འདོད་པ་ནི་ཐེག་དམན་ཉན་ཐོས་ཀྱི་ལམ༔ རང་ཉིད་འཁོར་བའི་སྡུག་བསྔལ་ལས་ཐར་ནས༔ སློབ་དཔོན་གཞན་གྱི་དྲིན་ལ་མ་ལྟོས་པར་བྱང་ཆུབ་ཐོབ་པར་འདོད་པ་ནི་རང་སངས་རྒྱས་ཀྱི་ལམ་སྟེ༔ ཐེག་པ་དམན་པ་ཡིན༔ དེ་ནི་ལམ་གྱི་གོལ་ས་ཆེན་པོ་ཡིན་ནོ༔ སེམས་
ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་ཐོབ་པར་འདོད་པ་ནི་ཐེག་པ་ཆེན་པོ་ཡིན༔ དེ་ཅིའི་ཕྱིར་ཞེ་ན༔ བཤེས་སྤྲིང་ལས༔ མ་ཡི་ཐོག་མཐའ་རྒྱ་ཤུག་ཚི་གུ་ཙམ། རིལ་བུར་བགྲང་ཡང་ས་ཡིས་ལངས་མི་འགྱུར༔ ཞེས་དང་༔ གང་གི་ལྟོར་མ་ཉལ་བའི་སེམས་ཅན་གཅིག་མེད་ཅིང་༔ གང་གི་ནོར་རྫས་བྱིན་དང་བསྲུང་ལ་སོགས༔ བདག་གི་དོན་དུ་དཀའ་བ་མ་སྤྱད་སེམས་ཅན་ནི༔ གཅིག་ཀྱང་མེད་ཕྱིར་ཀུན་ལ་སྙོམས་པར་བྱ༔ ཞེས་དང་སློབ་སྤྲིང་ལས༔ བྱིས་པ་པང་ནས་བཙའ་བ་ཅི་ཡང་མི་ནུས་པ༔ གང་གི་ནུ་ཞོ་བྱམས་པའི་ཤུགས་ཀྱིས་ཟག་བཏུང་བ༔ ངལ་བ་མང་བསྟེན་བྱམས་པས་བསྟེན་པ་དེ་དག་འདིར༔ ཤིན་ཏུ་མ་རིག་ཞིག་ནའང་སྤང་བར་སུ་ཞིག་སྤྲོ༔ ཞེས་གསུངས་པས༔ སེམས་ཅན་ཐམས་ཅད་རང་གི་ཚེ་རབས་དཔག་ཏུ་མེད་པའི་ཕ་དང་མ་ཤ་སྟག་ཡིན་པས༔ དེ་ཐམས་ཅད་སྐྱོན་ཟད་ཡོན་ཏན་རྫོགས་པའི་སངས་རྒྱས་ཀྱི་སར་འགོད་དགོས༔ དེ་ད་ལྟ་རང་ཅག་གིས་མི་ཐུབ་ཀྱང་༔ རང་ཉིད་རྫོགས་པའི་བྱང་ཆུབ་དེ་སྒྲུབ་ནས་སེམས་ཅན་ཐམས་ཅད་ཀྱང་སངས་རྒྱས་ཀྱི་སར་བདག་ཁོ་ནས་འགོད་པར་བྱ་སྙམ་པའི་བསམ་པ་རྣམ་པར་
དག་པ་དེ་ཡོད་ན་ཐེག་པ་ཆེན་པོ་ཡིན་ནོ༔ ཐར་པ་ཆེན་པོའི་མདོ་ལས༔ ཐེག་ཆེན་དཔེ་ཚད་རྒྱ་མཚོ་བཞིན༔ ཐེག་པ་ཆུང་ངུ་བ་ལང་རྗེས༔ ཐེག་ཆེན་དཔེ་བ་ལྷུན༔ ཐེག་པ་ཆུང་ངུ་གྲོག་མའི་མཁར༔ ཐེག་ཆེན་དཔེ་ཚད་ཉི་ཟླ་བཞིན༔ ཐེག་པ་ཆུང་དུ་མེ་སྟག་ཙམ༔ ཞེས་གསུངས་སོ༔ དེ་ལ་སེམས་བསྐྱེད་ཡུལ་ད་ལྟ་སློབ་དཔོན་ཉིད་ལས་བླང་བས་འཐུས་མོད་ཀྱང་༔ རྒྱུན་དུ་ཉམས་ལེན་གྱི་དོན་ཡང་ཡིན་པས་དམིགས་པ་འདི་བཞིན་དུ་སྒོམས་ཤིག༔ མདུན་གྱི་ནམ་མཁར་ཀུན་ཏུ་བཟང་པོ་ལ༔ སངས་རྒྱས་བྱང་སེམས་དཔག་ཏུ་མེད་པས་བསྐོར༔ ཞེས་རྡོ་རྗེའི་ཚིག་རྐང་ལས་གསུངས་པ་དང་༔ དེའི་རང་འགྲེལ་ཐུགས་རྗེ་ཆེན་པོས་གསུངས་པ་ལས༔ ད་རང་གི་མདུན་གྱི་ནམ་མཁར་ཆོས་སྐུ་ཀུན་ཏུ་བཟང་པོ་བཞུགས་པ་ལ༔ འཁོར་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་ཁྲོམ་ལྟར་དུ་བསྐོར་བར་བསྐྱེད་དོ༔ ཞེས་གསུངས་པས༔ ཁར་སང་སྨོས་པ་ལྟར་སྐྱབས་ཡུལ་ཐམས་ཅད་སྤྲིན་འཁྲིགས་པ་ལྟ་བུར་བསྒོམ་ལ༔ སངས་རྒྱས་ཀྱི་ཞིང་ཐམས་ཅད་ནས་ཀུན་བཟང་རྒྱལ་བ་རིགས་ལྔ་ལ་སོགས་སངས་རྒྱས་བྱང་
སེམས་དཔག་ཏུ་མེད་པ་ཁ་བ་བུ་ཡུག་ལྟར་བྱོན་ནས༔ མདུན་གྱི་བསྐྱེད་པ་དེ་རྣམས་ལ་ཐིམ་པར་སྒོམས་ཤིག༔ དེ་ནས་དེ་དག་ལ་ཕྱག་འཚལ་བ་དང་༔ ཡིད་ཀྱིས་སྤྲུལ་པའི་མཆོད་པ་དཔག་ཏུ་མེད་པ་འབུལ་བ་དང་༔ སྔར་བྱས་ཀྱི་སྡིག་པ་ཐམས་ཅད་བཤགས་པ་དང་༔ སོ་སོ་སྐྱེ་བོ་དང་འཕགས་པ་རྣམས་ཀྱི་དགེ་བའི་རྩ་བ་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་སྐོར་བར་བསྐུལ་བ་དང་༔ སེམས་ཅན་གྱི་དོན་དུ་བསྐལ་པ་དུ་མར་མྱ་ངན་ལས་མི་འདའ་བར་གསོལ་བ་འདེབས་པ་དང་༔ དེ་ལྟ་བུའི་དགེ་རྩ་དེ་སེམས་ཅན་ཐམས་ཅད་ཆོས་སྐུ་ཀུན་ཏུ་བཟང་པོའི་གོ་འཕང་ཐོབ་པའི་ཕྱིར་དུ་བསྔོ་སྙམ་པ་གྱིས་ལ་འདིའི་རྗེས་ཟློས་མཛོད༔ ཧཱུྃ༔ རྒྱལ་བ་རྒྱ་མཚོའི་ལྷ་ཚོགས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ པདྨ་ཉི་ཟླའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ རྒྱལ་བ་རྒྱ་མཚོའི་ཚོགས་བཅས་ལ༔ དཀར་གསུམ་མངར་གསུམ་བདུད་རྩི་མཆོད༔ རྒྱལ་བ་རྒྱ་མཚོའི་ཚོགས་བཅས་ལ༔ སྡིག་སྒྲིབ་ཉམས་ཆག་ཐམས་ཅད་བཤགས༔ དགེ་བསོད་ཀུན་ལ་རྗེས་ཡི་རང་༔ ཆོས་ཀྱི་འཁོར་ལོ་སྐོར་བར་
འཚལ༔ མྱ་ངན་མི་འདའ་བཞུགས་གསོལ་འདེབས༔ འགྲོ་བ་སེམས་ཅན་མ་ལུས་ཀུན༔ ཀུན་ཏུ་བཟང་པོའི་ས་ཐོབ་ཤོག༔ འོ་དེས་སེམས་བསྐྱེད་པའི་སྦྱོར་བའི་ཆོ་ག་དེ་སོང་བ་ཡིན་ལ༔ ཁྱད་པར་དུ་སེམས་བསྐྱེད་པའི་རྟེན་བསོད་ནམས་དགེ་བའི་དངོས་པོ་ཞིག་དགོས་ཏེ༔ དཀོན་མཆོག་ཏཱ་ལའི་མདོ་ལས༔ རྒྱལ་བ་ཀུན་དང་ཆོས་དང་བདགེ་འདུན་དང་དེ་བཞིན་བླ་མར་གྱུར་པ་ཐམས་ཅད་ལ༔ དད་དང་མོས་དང་དགའ་བ་བསྐྱེད་བྱས་ཏེ༔ སྲིད་ཞུས་མཆོད་ན་བྱང་ཆུབ་སེམས་ཀྱང་སྐྱེ༔ ཞེས་གསུངས་པས་མཎྜལ་ཞིག་འབུལ་དགོས༔ དེ་ཡང་སྔོན་བྱང་ཆུབ་སེམས་དཔའ་འབྱོར་པ་ཆེ་བ་རྣམས་ཀྱིས་གླིང་བཞི་དང་གཙུག་ལག་ཁང་བྱེ་བ་ཕུལ་ནས་སེམས་བསྐྱེད་པ་ཡང་ཡོད་དེ༔ མདོ་སྡེ་བསྐལ་བཟང་ལས༔ བདེ་གཤེགས་སྐྱེ་དབང་འཁོར་ལོས་སྒྱུར་རྒྱལ་ཚེ༔ དེ་བཞིན་གཤེགས་པ་ཀུན་ཏུ་འོད་ཟེར་ལ༔ གླིང་བཞི་དག་གི་དབུལ་བ་བྱས་ནས་ཀྱང་༔ དང་པོར་།བྱང་ཆུབ་ཏུ་ནི་སེམས་བསྐྱེད་དོ༔ ཞེས་དང་༔ བདེ་གཤེགས་གྲོགས་སྦྱིན་འཛམ་གླིང་རྒྱལ་པོའི་ཚེ༔ དེ་བཞིན་གཤེགས་པ་ཟླ་བའི་ཏོག་དེ་ལ༔ གཙུག་ལག་ཁང་ནི་བྱེ་བ་ཕུལ་
ནས་ཀྱང་༔ དང་པོར་བྱང་ཆུབ་ཏུ་ནི་སེམས་བསྐྱེད་དོ༔ ཞེས་གསུངས་སོ༔ འབྱོར་པ་མེད་ན་ཐབས་ཆག་པ་མ་ཡིན་ཏེ༔ སྔོན་བྱང་ཆུབ་སེམས་དཔའ་འབྱོར་པ་མེད་པ་རྣམས་ཀྱིས༔ དངོས་པོ་ཅུང་ཟད་ཕུལ་བ་དང་ཕྱག་སྐོར་བ་སོགས་ལ་བརྟེན་ནས་སེམས་བསྐྱེད་པ་ཡིན་ཏེ༔ བདེ་གཤེགས་འོད་འཕྲོ་གྲོང་ཁྱེར་བརྟེན་པའི་ཚེ༔ དེ་བཞིན་གཤེགས་པ་མཐའ་ཡས་འོད་དེ་ལ༔ རྩྭ་ཡི་སྒྲོན་མེ་དག་ནི་ཕུལ་ནས་ཀྱང་༔ དང་པོར་བྱང་ཆུབ་ཏུ་ནི་སེམས་བསྐྱེད་དོ༔ ཞེས་དང་༔ དེ་བཞིན་གཤེགས་པ་ཡོན་ཏན་ཕྲེང་ལྡན་གྱིས༔ དེ་བཞིན་གཤེགས་པ་འགྱིང་ལྡན་བཞུད་དེ་ལ༔ སངས་རྒྱས་ཕྱག་འཚལ་ཐལ་མོ་ལན་གསུམ་སྦྱར༔ དང་པོ་བྱང་ཆུབ་ཏུ་ནི་སེམས་བསྐྱེད་དོ༔ ཞེས་དང་༔ བདེ་གཤེགས་ཡེ་ཤེས་གྱ་ནོམ་རྒྱལ་པོ་ནི༔ ཕོ་ཉའི་ཚེ་ན་བདེ་གཤེགས་རྒྱལ་བ་ཡི༔ བཤེས་གཉེན་དེ་ལ་ལན་གཅིག་བསྐོར་བྱས་ནས༔ དང་པོར་བྱང་ཆུབ་ཏུ་ནི་སེམས་བསྐྱེད་དོ༔ ཞེས་སོགས་ཕྱག་འཚལ་བ་ཙམ་དང་ཐལ་མོ་ཡ་ཅིག་བསླང་བ་ཙམ་དང་༔ རས་ཀྱི་ཁ་ཚར་ཕུལ་བ་ཙམ་དང་༔ ཉིན་གཅིག་སྲོག་བཅད་སྡོམ་པ་བླང་བ་ཙམ་ལ་བརྟེན་ནས་དང་པོར་བྱང་ཆུབ་ཏུ་སེམས་
བསྐྱེད་པ་ཡིན་ནོ༔ དེས་ན་ད་ལམ་བླ་མ་དང་དཔལ་ཀུན་ཏུ་བཟང་པོ་སངས་རྒྱས་བྱང་སེམས་ནམ་མཁའ་གང་བའི་མདུན་དུ༔ སྟོང་གསུམ་གྱི་འཇིག་རྟེན་གླིང་བཞི་རི་རབ་དང་བཅས་པ་བྱེ་བ་ཕྲག་བརྒྱ༔ དེའི་སྟེང་དུ་བདག་དང་ཕ་མས་གཙོར་བྱས་སེམས་ཅན་ཐམས་ཅད་ཀྱི་དགེ་རྩ་ཐམས་ཅད་བསྡུས་ཏེ༔ མཆོད་པའི་སྤྲིན་འདོད་པའི་ཡོན་ཏན་སྣ་ཚོགས་པ་ཀུན་ཏུ་བཟང་པོའི་སྤྲིན་ལྟ་བུར་ཡིད་ཀྱིས་དམིགས་ནས༔ བླ་མ་དང་དབྱེར་མེད་པའི་ཆོས་སྐུ་ཀུན་ཏུ་བཟང་པོ་རྒྱལ་བ་རིགས་ལྔ་སངས་རྒྱས་བྱང་སེམས་ཐམས་ཅད་ལ་བྱང་ཆུབ་ཏུ་སེམས་བསྐྱེད་པ་ཞུ་བའི་ཡོན་དུ་འབུལ་སྙམ་པ་གྱིས༔ ལག་པ་ཐལ་མོ་སྦྱོར་ལ་རྗེས་ཟློས་མཛོད༔ བླ་མ་ཀུན་བཟང་དབྱེར་མེད་ལ༔ འཇིག་རྟེན་རིན་ཆེན་མཎྜལ་སྟེང་༔ ཕ་མས་གཙོ་བྱས་སེམས་ཅན་ཀུན༔ དུས་གསུམ་བསགས་པའི་དགེ་རྩ་རྣམས༔ ཐམས་ཅད་བསྡུས་ཏེ་བཀྲམ་པར་བྱ༔ ཀུན་བཟང་ལྷ་ཚོགས་རྣམས་ལ་འབུལ༔ ད་ནི་སེམས་ཅན་ཐམས་ཅད་ཀྱི་དོན་དུ་བདག་གིས་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཐོབ་པར་བྱ༔ དེ་ཐོབ་ནས་སེམས་ཅན་ཐམས་ཅད་ཀྱང་བདག་ཁོ་ནས་བླ་ན་མེད་
པའི་བྱང་ཆུབ་ལ་འགོད་པར་བྱ༔ དེའི་ཆེད་དུ་དཔལ་ཀུན་ཏུ་བཟང་པོ་ལ་སངས་རྒྱས་བྱང་སེམས་ཀྱིས་བསྐོར་བ་ཡིད་ཀྱི་ཡུལ་དུ་གསལ་བཏབ་པ་དང་༔ དངོས་སུ་སློབ་དཔོན་གྱི་དྲུང་ནས་བྱང་ཆུབ་ཏུ་སེམས་བསྐྱེད་བསམ་པ་རྩེ་གཅིག་ཏུ་མཛོད་ལ་འདིའི་རྗེས་ཟློས་ལན་གསུམ་མཛོད༔ ཀུན་བཟང་རྒྱལ་བ་སྲས་བཅས་ཐམས་ཅད་ལ༔ བདག་ནི་རྩེ་གཅིག་ཡིད་ཀྱིས་སྐྱབས་སུ་མཆི༔ སེམས་ཅན་དོན་དུ་བྱང་ཆུབ་སེམས་བསྐྱེད་དོ༔ གསུམ༔ དེ་ནི་སྨོན་འཇུག་སྟབས་གཅིག་ཏུ་ལེན་པའི་ལུགས་ཡིན་ཏེ༔ རྗེ་བཙུན་འཇམ་དཔལ་སྔོན་རྒྱལ་པོ་ནམ་མཁའ་ཞེས་བྱ་བར་གྱུར་པའི་ཚེ༔ སངས་རྒྱས་འབྲུག་སྒྲ་དབྱངས་ཀྱི་རྒྱལ་པོའི་སྤྱན་སྔར་སེམས་བསྐྱེད་དང་སྡོམ་པ་སྟབས་གཅིག་ཏུ་བླངས་པ་དང་མཚུངས་པ་ཡིན་ནོ༔ དེ་ལྟར་སེམས་བསྐྱེད་ནས་དེའི་བསླབ་པ་བསྲུང་དགོས༔ དེ་མ་བསྲུངས་ན་ཉེས་པ་ཆེ་སྟེ༔ སྤྱོད་འཇུག་ལས༔ གལ་ཏེ་དེ་དག་དམ་བཅས་ནས༔ ལས་ཀྱིས་བསྒྲུབ་པ་མ་བྱས་ན༔ སེམས་ཅན་དེ་དག་ཀུན་བསླུས་པས༔ བདག་ནི་འགྲོ་བ་ཅི་འདྲར་འགྱུར༔ ཞེས་གསུངས་སོ༔ དེ་ལ་བསླབ་བྱ་ནི་དང་པོ་སྨོན་པ་སེམས་བསྐྱེད་ཀྱི་བསླབ་བྱ་ནི༔ སེམས་ཅན་
བློས་མི་བཏང་བ་ནི་སེམས་ཅན་གཅིག་ཀྱང་བློས་མི་བཏང་བ་སྟེ༔ མི་གཅིག་གིས་གནོད་པ་སྣ་ཚོགས་བྱས་ནའང་༔ དེ་ལ་ད་ཕྱིན་ཆད་ཕན་འདོགས་གཅིག་ཀྱང་མི་བྱའོ་སྙམ་ན་སེམས་བསྐྱེད་འཆོར་བས༔ དེ་ལ་ཚེ་འདིར་ཕན་བཏགས་པའི་སྐབས་མེད་ཀྱང་༔ ཕྱི་མའམ་དུས་ནམ་ཞིག་ཕན་བདེ་བྱང་ཆུབ་ཀྱི་ལམ་ལ་འགོད་བསམ་པ་གལ་ཆེ༔ སེམས་བསྐྱེད་ཀྱི་ཕན་ཡོན་ཡང་ཡང་དྲན་པར་བྱ༔ བསོད་ནམས་དང་ཡེ་ཤེས་ཀྱི་ཚོགས་བསགས་པ་ལ་འབད༔ སེམས་བསྐྱེད་ཚིག་ཉུང་ངུ་དེ་ཉིན་རེ་ལན་གསུམ་འདོན་ཅིང་བྱམས་ང་རྗེ་བསྒོམ༔ རང་གིས་སྡོམ་པ་གང་ཞུས་དེ་གཙང་བར་བསྲུང་ཞིང་སེམས་ཅན་ལ་ཕན་པ་སྒྲུབ་བོ༔ ནག་པོའི་ཆོས་བཞི་སྤངས་ཏེ༔ བླ་མ་དང་མཆོད་འོས་མི་བསླུ་བ་དང་༔ རང་གཞན་གྱི་བསོད་ནམས་སོགས་དགེ་བ་བྱས་པ་ལ་འགྱོད་པ་མི་བསྐྱེད་པ་དང་༔ བྱང་ཆུབ་སེམས་དཔའ་ལ་ཞེ་སྡང་གི་ཚིག་ངན་མི་བརྗོད༔ སེམས་ཅན་ལ་གཡོ་སྒྱུ་མི་བྱའོ༔ དཀར་པོའི་ཆོས་བཞི་བསྒྲུབ་སྟེ༔ ཤེས་བཞིན་དུ་རྫུན་མི་སྨྲ༔ སེམས་ཅན་ཐམས་ཅད་ཐེག་པ་ཆེན་པོ་ལ་བཀོད༔ སེམས་བསྐྱེད་པའི་བྱང་ཆུབ་སེམས་དཔའ་ལ་སངས་རྒྱས་ཀྱི་འདུ་
ཤེས་བསྐྱེད་ཅིང་ཡོན་ཏན་བརྗོད༔ སེམས་ཅན་ཐམས་ཅད་ལ་གཡོ་སྒྱུ་མེད་པར་ལྷག་པའི་བསམ་པ་ལ་གནས་པར་བྱའོ༔ སྨོན་འཇུག་སྟབས་གཅིག་ཏུ་བླང་བ་ཡིན་པས༔ འཇུག་པ་སེམས་བསྐྱེད་ཀྱི་བསླབ་བྱ་ནི་བསླབ་པ་གསུམ་ཡིན་ལ༔ དེ་ཡང་ཕར་ཕྱིན་དྲུག་ཏུ་འདུས་ཏེ༔ མདོ་སྡེ་རྒྱན་ལས༔ བསླབ་གསུམ་དབང་དུ་མཛད་ནས་ནི༔ རྒྱལ་བས་ཕ་རོལ་ཕྱིན་པ་དྲུག༔ ཡང་དག་བཤད༔ ཅེས་གསུངས་སོ༔ དེ་ལ་སྦྱིན་པ་ཚུལ་ཁྲིམས་བཟོད་པ་གསུམ་དགེ་བའི་ཕན་ཡོན་སྐབས་སུ་ཅུང་ཟད་བཤད་པས་འཐུས༔ བརྩོན་འགྲུས་གེགས་སེལ་སྐབས་སུ་དང་༔ བསམ་གཏན་ཞི་གནས་ཡིན་ལ༔ ཤེས་རབ་ལྷག་མཐོང་ཡིན་ཕྱིར་དོན་གྱིས་ཚང་བས་འདིར་བཤད་མ་དགོས་སོ༔ འདིར་སྐབས་སུ་བབ་པ་སེམས་བསྐྱེད་དེའི་ཕན་ཡོན་འཆད་པར་བྱ་སྟེ༔ སྡོང་པོ་བཀོད་པ་ལས་འཕགས་པ་བྱམས་པས་ནོར་བཟང་ལ་གསུངས་པ༔ རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ༔ དཀར་པོའི་ཆོས་ཐམས་ཅད་འཕེལ་བར་བྱེད་པས་ཞིང་ས་ལྟ་བུའོ༔ འཇིག་རྟེན་ཐམས་ཅད་བརྟེན་པས་ས་ལྟ་བུའོ༔ དབུལ་བ་ཐམས་ཅད་ཡང་དག་པར་
གཅོད་པས་རྣམ་ཐོས་ཀྱི་བུ་ལྟ་བུའོ༔ རེ་བ་ཐམས་ཅད་བསྐང་བས་དཔག་བསམ་གྱི་ཤིང་ལྟ་བུའོ༔ དོན་ཐམས་ཅད་འགྲུབ་པས་ཡིད་བཞིན་གྱི་ནོར་བུ་ལྟ་བུའོ༔ ཞེས་སོགས་རྒྱ་ཆེར་གསུངས་སོ༔ དྲིན་ལན་བསབ་མདོར༔ གལ་ཏེ་བྱང་ཆུབ་ཏུ་སེམས་མ་བསྐྱེད་ན༔ ནམ་དུའང་འཐོབ་པར་མི་འགྱུར་ཏེ༔ དེ་བས་ན་བྱང་ཆུབ་ཏུ་སེམས་བསྐྱེད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ༔ ཞེས་དང་༔ རྒྱལ་པོ་སེང་གེའི་ཞུས་པའི་མདོ་ལས༔ སེམས་ཅན་ཐམས་ཅད་ཐར་བྱའི་ཕྱིར། བྱང་ཆུབ་ཏུ་ནི་སེམས་བཏུད་པས༔ དེ་ནི་ཆོས་རྣམས་སྡུད་པའི་མཆོག༔ དེ་ནི་དགའ་བ་ཐོབ་པར་འགྱུར༔ ཞེས་དང་༔ དེ་བཞིན་གཤེགས་པའི་གསང་བའི་མདོ་ལས༔ བྱང་ཆུབ་སེམས་ཀྱི་བསོད་ནམས་གང་༔ དེ་ལ་གལ་ཏེ་གཟུགས་མཆིས་ན༔ ནམ་མཁའི་ཁམས་ནི་ཀུན་གང་སྟེ༔ དེ་ནི་དེ་བས་ལྷག་པར་འགྱུར༔ སེམས་ཅན་ཀུན་གྱི་བསོད་ནམས་ཀྱི༔ ཕུང་པོ་ཅི་སྙེད་ཡོངས་བཟུང་བ༔ དེ་སྙེད་བྱང་ཆུབ་སེམས་དཔའ་ཡི༔ བྱང་ཆུབ་སེམས་ལ་རབ་ཏུ་འབྱུང་༔ ཞེས་དང་༔ དཔལ་སྦྱིན་གྱིས་ཞུས་མདོར༔ གང་གཱའི་བྱེ་
མའི་གྲངས་སྙེད་ཀྱི༔ སངས་རྒྱས་ཞིང་ཀུན་མི་གང་གིས༔ རིན་ཆེན་བདུན་གྱིས་ཡོངས་བཀང་ཞིང་༔ འཇིག་རྟེན་མགོན་ལ་ཕུལ་བ་བས༔ གང་གིས་ཐལ་མོ་སྦྱར་བྱས་ཏེ༔ བྱང་ཆུབ་སེམས་ནི་བསྐྱེད་པ་ན༔ མཆོད་པ་འདི་ནི་ཁྱད་འཕགས་ཏེ༔ དེ་ལ་མཐའ་ནི་མ་མཆིས་སོ༔ ཞེས་དང་༔ བློ་གྲོས་རྒྱ་མཚོས་ཞུས་མདོར༔ གསུམ་པོ་འདི་དག་དེ་བཞིན་གཤེགས་པ་ལ་མཆོད་པ་བླ་ན་མེད་པ་སྟེ༔ བྱང་ཆུབ་ཏུ་སེམས་བསྐྱེད་པ་དང་༔ དམ་པའི་ཆོས་འཛིན་པ་དང་༔ སྲོག་ཆགས་རྣམས་ལ་སྙིང་བརྩེ་བའོ༔ ཞེས་དང་༔ སྤྱོད་འཇུག་ལས༔ བྱང་ཆུབ་སེམས་བསྐྱེད་གྱུར་ན་སྐད་ཅིག་ལ༔ འཁོར་བའི་བཙོན་རར་བསྡམས་པའི་ཉམ་ཐག་རྣམས༔ རྒྱལ་བ་རྣམས་ཀྱི་སྲས་ཞེས་རབ་བརྗོད་དེ༔ འཇིག་རྟེན་ལྷ་མིར་བཅས་པས་ཕྱག་བྱར་འགྱུར༔ གསེར་འགྱུར་རྩི་ཡི་རྣམ་པ་མཆོག་ལྟ་བུ༔ མི་གཙང་ལུས་འདི་བོར་ནས་རྒྱལ་བའི་སྐུ༔ རིན་ཆེན་རིན་ཐང་མེད་པར་བསྒྱུར་བས་ན༔ བྱང་ཆུབ་སེམས་ཞེས་བྱ་བ་རབ་བརྟན་བཟུང་༔ དགེ་བ་གཞན་ཀུན་ཆུ་ཤིང་བཞིན་དུ་ནི༔ འབྲས་བུ་བསྐྱེད་ནས་ཟད་པར་འགྱུར་བ་ཉིད༔ བྱང་ཆུབ་སེམས་ཀྱི་ལྗོན་ཤིང་རྟག་པར་
ཡང་༔ འབྲས་བུ་འབྱིན་པས་མི་ཟད་འཕེལ་བར་འགྱུར༔ སྡིག་པ་ཤིན་མི་བཟད་བྱས་ན་ཡང་༔ དཔའ་ལ་བརྟེན་ནས་འཇིགས་པ་ཆེན་པོ་ལྟར༔ གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ༔ དེ་ལ་བག་ཅན་རྣམས་ཀྱིས་ཅིས་མི་བརྟེན༔ དེས་ནི་དུས་མཐའི་མེ་བཞིན་སྡིག་ཅན་རྣམས༔ སྐད་ཅིག་གཅིག་གིས་ངེས་པར་སྲེག་པར་བྱེད༔ འགྲོ་བའི་འཆི་བདག་འཇོམས་བྱེད་པའི༔ བདུད་རྩི་མཆོག་ཀྱང་འདི་ཉིད་ཡིན༔ འགྲོ་བའི་དབུལ་བ་སེལ་བྱེད་པའི༔ མི་ཟད་གཏེར་ཡང་འདི་ཉིད་ཡིན༔ འགྲོ་བའི་ཉོན་མོངས་གདུང་སེལ་བའི༔ སེམས་ཀྱི་ཟླ་བ་ཤར་བ་ཡིན༔ འགྲོ་བའི་མི་ཤེས་རབ་རིབ་དག༔ དཔྱིས་འབྱིན་ཉི་མ་ཆེན་པོ་ཡིན༔ ཞེས་དང་༔ དེང་ནས་བཟུང་སྟེ་གཉིད་ལོག་གམ༔ བག་མེད་གྱུར་ཀྱང་བསོད་ནམས་ཤུགས༔ རྒྱུན་མི་འཆད་པར་དུ་མ་ཞིག༔ ནམ་མཁའ་མཉམ་པར་རབ་ཏུ་འབྱུང་༔ རྒྱལ་སྲས་རྣམས་ལ་དོ་གལ་ཆེ་བ་སྟེ༔ སྡིག་པ་མི་འབྱུང་དགེ་བ་ངང་གིས་འཕེལ༔ དེ་ཚེ་བདག་གི་འབྲས་བུ་ཡོད༔ མི་ཡི་སྲིད་པ་ལེགས་པར་ཐོབ༔ དེ་རིང་སངས་རྒྱས་རིགས་སུ་སྐྱེས༔ རྒྱལ་བའི་སྲས་སུ་ད་གྱུར་ཏོ༔
འདི་ནི་བྱང་ཆུབ་སེམས་སྟོབས་ཀྱི༔ སྔོན་གྱི་བསོད་ནམས་ཀུན་གྱི་གཏེར༔ དེ་ནི་རྒྱལ་སྲས་ཆགས་མེད་རབ་ཏུ་འཐོབ༔ ཅེས་གསུངས་སོ༔ དེས་ན་དེ་རིང་ཁྱེད་རང་རྣམས་ཀྱི་བྱང་ཆུབ་སེམས་བསྐྱེད་ལེགས་པར་ཐོབ་པས་དེང་ནས་བྱང་ཆུབ་སེམས་དཔའི་གྲངས་སུ་ཚུད་ཅིང་ལྷ་དང་བཅས་པའི་འཇིག་རྟེན་ཐམས་ཅད་ཀྱི་ཕྱག་འཚལ་བའི་གནས་སུ་གྱུར་པ་ཡིན༔ མི་ལུས་ཐོབ་པ་དོན་དང་ལྡན་རྙེད་པ་ཆེན་པོ་ཐོབ་པ་ཡིན་པས་དགའ་བ་ལེགས་པར་སྒོམས་ལ༔ མདུན་གྱི་ནམ་མཁར་བསྐྱེད་པའི་ཀུན་བཟང་རྒྱལ་བ་རིགས་ལྔ་ལ་སོགས་སེམས་ཟློབསྐྱེད་ཡུལ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འོད་དུ་ཞུ་ནས་ཁྱེད་རང་རྣམས་ལ་ཐིམ་པར་སྒོམས་ལ༔ སེམས་མ་བཅོས་པར་རང་བབས་སུ་ཀློད་ལ་ཞོག་ཅིག༔ དེའི་དོན་ཡང་བྱང་ཆུབ་ཏུ་སེམས་བསྐྱེད་པའི་མདོར༔ བཅོས་ལྡན་འདས་ཀྱིས་བཀའ་སྩལ་པ༔ འོད་སྲུང་ཆོས་ཐམས་ཅད་ནམ་མཁའ་ལྟར་ཚད་མེད་ཅིང་ཡེ་ནས་འོད་གསལ་བ་རྣམ་པར་དག་པ་དེ་ནི་བྱང་ཆུབ་ཅེས་བྱའོ༔ དོན་དང་མཐུན་པའི་སེམས་སྔ་མ་བསྐྱེད་པའི་སེམས་རིན་པོ་ཆེ་བསྐྱེད་པ་ནི་བྱང་ཆུབ་ཏུ་སེམས་བསྐྱེད་པ་ཞེས་བྱའོ༔ ཞེས་དང་༔ དེ་བཞིན་
གཤེགས་པ་ཀ་རུ་ན་ཆེན་པོའི་མདོར༔ རིགས་ཀྱི་བུ་བྱང་ཆུབ་ཅེས་བྱ་བ་ནི་སྟོང་པའོ༔ གང་སྟོང་པ་ཞེས་བྱ་བ་དེ་ནི་མངོན་པར་ཞེན་པ་མེད་ཅིང་ཡོངས་སུ་འཛིན་པ་མེད་པའི་ཚིག་བླ་དགས་སོ༔ ཞེས་སོགས་གསུངས་ཏེ༔ དོན་དམ་སེམས་བསྐྱེད་ནི་སྟོང་པ་ཉིད་ཀྱི་དོན་རྟོགས་པ་ལ་ཟེར་བ་ཡིན་པས༔ རྒྱས་པར་ལྷག་མཐོང་ངོ་སྤྲད་དུས་འབྱུང་ངོ་༔ དེ་ལྟར་སེམས་བསྐྱེད་ནས་ཉམས་ལེན་གྱི་གཙོ་བོ་བྱམས་སྙིང་རྗེ་བསྒོམ་པ་ཡིན་པས༔ དེ་བཤད་ན་བྱམས་པ་མེད་ན་སྙིང་རྗེ་སྐྱེ་དཀའ་བས་བྱམས་པའི་ཕན་ཡོན་བཤད་ན༔ རྒྱ་ཆེ་རོལ་པ་ལས༔ བྱམས་སེམས་ལྡན་པ་དུག་དང་མཚོན་མི་ཚུགས༔ རོ་ལངས་དང་ནི་འཇིགས་པ་གཞན་མི་འབྱུང་༔ བྱམས་སེམས་ལྡན་པ་གཞན་གྱིས་གནོད་མི་འགྱུར༔ དཔུང་བཅས་བདུད་རྣམས་རྒྱལ་མཚན་སྡེར་བཅས་པའི༔ ནག་པོའི་རྩ་ལག་བྱམས་པའི་སྟོབས་ཀྱིས་འཇོམས༔ བླ་མེད་བྱང་ཆུབ་ཞི་བར་སངས་ཀྱང་རྒྱ༔ ཞེས་དང་༔ ཐར་པ་ཆེན་པོའི་མདོ་ལས༔ གང་ཞིག་འཇིག་རྟེན་རྣམ་དག་ན༔ བསྐལ་པ་གཅིག་གི་བར་དག་ཏུ༔ ཚུལ་ཁྲིམས་དམ་པ་བསྲུང་བ་བས༔ སྐྱེས་བུ་དེ་ནི་སྐད་ཅིག་
ཙམ༔ དེ་བས་བྱམས་པ་བསྒོམ་པ་མཆོག༔ གང་ཞིག་འཇིག་རྟེན་ས་འདི་རུ༔ ལུས་ངག་ཡིད་ཀྱིས་སྡིག་བསགས་པས༔ ངན་སོང་གསུམ་དུ་སྐྱེ་ངེས་ཀྱང་༔ བྱམས་པའི་སེམས་དེས་འཕྲལ་དུ་འབྱངས༔ ཞེས་དང་༔ ཏིང་ངེ་འཛིན་རྒྱལ་པོ་དང་དཔལ་སྦྱིན་གྱིས་ཞུས་མདོར༔ བྱེ་བ་ཁྲག་ཁྲིག་གཏམས་པའི་ཞིང་རྣམས་སུ༔ མཆོད་པ་རྣམ་མང་ཇི་སྙེད་དཔག་མེད་པས༔ སྐྱེས་མཆོག་རྣམས་ལ་ཉིན་རེ་རྟག་མཆོད་པས༔ བྱམས་པའི་སེམས་ལ་གྲངས་དང་ཆར་མི་ཕོད༔ ཅེས་དང་༔ དཀོན་མཆོག་བརྩེགས་པ་དང་རིན་ཆེན་ཕྲེང་བ་གཉིས་ཀ་ལས༔ རྗེའུ་ཚོད་སུམ་བརྒྱའི་ཁ་ཟས་དག༔ ཉིན་རེ་དུས་གསུམ་བྱིན་པ་བས༔ བྱམས་པ་ཡུད་ཙམ་ཐང་ཅིག་གི༔ བསོད་ནམས་དག་ལ་ཆར་མི་ཕོད༔ ལྷ་མི་བྱམས་པར་འགྱུར་བ་དང་༔ དེ་དག་ཀྱང་ནི་བསྲུང་བ་དང་༔ ཡིད་བདེ་བ་དང་བདེ་མང་དང་༔ དུག་དང་མཚོན་གྱིས་གནོད་མེད་དང་༔ འབད་པ་མེད་པར་དོན་ཐོབ་དང་༔ ཚངས་པའི་འཇིག་རྟེན་སྐྱེ་འགྱུར་ཏེ༔ གལ་ཏེ་གྲོལ་བར་མ་གྱུར་ཀྱང་༔ བྱམས་ཆོས་ཡོན་ཏན་བརྒྱད་ཐོབ་བོ༔ ཞེས་དང་༔ ཨོ་རྒྱན་རིན་པོ་ཆེའི་ཞལ་ནས༔ ཁྱད་པར་དུ་སྙིང་
རྗེ་བྱམས་པའི་གཙོ་བོ་ནི་ལུས་བསྐྱེད་པའི་མ་ཡིན་ལ༔ དེའི་དྲིན་ནི་འཁོར་བའི་ཚད་མེད་མུ་མེད་པས་འདི་ལ་བྱམས་སྙིང་རྗེ་ཚད་མེད་པ་བསྒོམ་ཞེས་གསུངས་པ་དང་༔ བརྒྱད་སྟོང་པ་ལས༔ མ་འདིས་ནི་བདག་ཅག་བསྐྱེད་པ༔ འདིས་ནི་དཀའ་བ་བྱེད་པ༔ བདག་ཅག་གི་སྲོག་བྱིན་པ༔ འཇིག་རྟེན་ཀུན་སྟོན་པ་ཡིན་ནོ༔ ཞེས་གསུངས་པས་མ་འདི་ལ་དྲིན་ཆེན་པོ་བཞི་དང་ལྡན་པ་ཡིན་པས༔ བདག་གི་མ་འདི་འཁོར་བ་དང་ངན་སོང་དུ་འཁྱམས་པ་འདི་བློས་མི་བཟོད་པས༔ འདི་ལ་གནས་སྐབས་དང་མཐར་ཐུག་ཏུ་བདེ་བ་དང་ལྡན་ན་ཅི་མ་རུང་༔ བདེ་བ་དང་ལྡན་པར་གྱུར་ཅིག་སྙམ་དུ་ཞེ་ཐག་པ་ནས་བསྒོམ་པར་བྱའོ༔ དེ་ནས་སེམས་ཅན་ཐམས་ཅད་ཀྱང་མར་མ་གྱུར་པ་མེད་པས༔ སེམས་ཅན་ཐམས་ཅད་ལ་དེ་ལྟར་བྱམས་པ་བསྒོམ་མོ༔ བྱམས་པ་ཁ་ཞེ་མེད་པར་མཆི་མ་འཁྲུགས་པ་བྱུང་ན་བྱམས་པ་ཆེན་པོ༔ དེ་སེམས་ཅན་ཐམས་ཅད་ལ་མཉམ་པར་གྱུར་ན་བྱམས་པ་ཚད་མེད་པ་ཡིན་ནོ༔ དེ་ནས་སྙིང་རྗེ་བསྒོམ་པ་ནི༔ དང་པོ་སྙིང་རྗེའི་ཕན་ཡོན་ནི༔ ཆོས་ཡང་དག་པར་སྡུད་པའི་མདོ་ལས༔ བཅོམ་ལྡན་འདས་འདི་ལྟ་སྟེ༔
འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིས་སོ༔ བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་གང་དུ་མཆིས་པ་དེར༔ སངས་རྒྱས་ཀྱི་ཆོས་ཐམས་ཅད་མཆིའོ༔ ཞེས་དང་༔ གསང་བའི་མདོ་ལས༔ གསང་བའི་བདག་པོ་ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན་ནོ༔ ཞེས་དང་༔ རྣམ་སྣང་མངོན་བྱང་ལས་ཀྱང་༔ ཐམས་ཅད་མཁྱེན་པའི་ཡེ་ཤེས་ཀྱི་རྩ་བ་ནི་སྙིང་རྗེ་ཆེན་པོའོ༔ ཞེས་གསུངས་སོ༔ བྱང་ཆུབ་སེམས་དཔའི་སྡེ་སྣོད་ལས༔ ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་དང་ལྡན་ན༔ སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་ཡོངས་སུ་འཛིན་ཏོ༔ ཆོས་གཅིག་པུ་གང་ཞེ་ན་འདི་ལྟ་སྟེ༔ བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ༔ གསོལ་བ་བཅོམ་ལྡན་འདས་བསམ་པ་ཇི་ལྟ་བུ༔ བྱང་ཆུབ་ཀྱི་སེམས་ཇི་ལྟ་བུ༔ བཀའ་སྩལ་པ༔ ཤཱ་རིའི་བུ་བསམ་པ་ཞེས་བྱ་བ་ནི་མི་ཕྱེད་པའི་སྙིང་རྗེའོ༔ མི་གཡོ་བའི་སྙིང་རྗེ་བརྟན་པའོ༔ ཞེས་དང་༔ བློ་གྲོས་མི་ཟད་པས་ཞུས་པའི་མདོར༔ བཙུན་པ་ཤ་ར་དྭ་
ཏིའི་བུ་བྱང་ཆུབ་སེམས་དཔའི་སྙིང་རྗེ་ཆེན་པོ་མི་བཟད་པ་སྟེ༔ ཅིའི་ཕྱིར་ཞེ་ན་སྔོན་དུ་འགྲོ་བའི་ཕྱིར་རོ༔ འདི་ལྟ་སྟེ་དཔེར་ན་དབུགས་ཕྱིར་དབྱུང་བ་དང་རྔུབ་པ་ས་བུའི་སྲོག་གི་དབང་པོའི་སྔོན་དུ་འགྲོའོ༔ དེ་བཞིན་དུ་ཐེག་པ་ཆེན་པོ་ཡང་དག་པར་བསྒྲུབ་པའི་ཕྱིར༔ བྱང་ཆུབ་སེམས་དཔའི་སྙིང་རྗེ་ཆེན་པོས་སྔོན་དུ་འགྲོའོ༔ ཞེས་སོགས་དང་༔ བྱང་ཆུབ་ཀྱི་སེམས་ལས་བྱུང་བའི་སྙིང་རྗེ་ཆེན་པོས་ཕ་རོལ་བསྲུང་བའོ༔ བདག་གིས་སེམས་ཡོངས་སུ་དག་པ་ལས་བྱུང་བའི་སྙིང་རྗེ་ཆེན་པོས་སེམས་བསྲུང་བའོ༔ ཞེས་སོགས་རྒྱ་ཆེར་གསུངས་སོ༔ ཨུ་རྒྱན་རིན་པོ་ཆེའི་ཞལ་ནས༔ ཐར་མེད་ལས་ཀྱི་རྒྱ་མཚོ་དང་རིང་དུ༔ ལས་ཀྱིས་མནར་བའི་འགྲོ་རྣམས་སྙིང་རེ་རྗེ༔ ཞེས་དང་༔ ཡང་ཨོ་རྒྱན་རིན་པོ་ཆེས༔ སེམས་ཅན་རེ་རེས་ཕ་མ་བྱས་པ་ཡང་གྲངས་མེད་ན་བདག་གི་ཕ་མ་དྲིན་ཅན་འདི་རྣམས་ཐབས་གང་གིས་བདེ་བ་ལ་སྦྱར༔ ངན་སོང་གི་སྡུག་བསྔལ་ལ་རྟག་ཏུ་སྤྱོད་པའི་ཕ་མ་དྲིན་ཅན་རྣམས་སྙིང་རེ་རྗེ༔ སྙིང་རེ་རང་རྗེ་སྙམ་དུ་ཡང་ཡང་བསྒོམ་མོ༔ ཞེས་གསུངས་པ་ལྟར་དང་པོ་རང་གི་རྩ་བའི་མ་འདི་སྡུག་བསྔལ་ཐམས་ཅད་དང་བྲལ་ན་ཅི་
མ་རུང་སྙམ་དུ་ཞེ་ཐག་པ་ནས་བསྒོམ༔ དེ་ནས་སེམས་ཅན་ཐམས་ཅད་ལ་དེ་ལྟར་བསྒོམས་པས༔ སྙིང་རྗེའི་དབང་གིས་བ་སྤུ་གཡོ་ཞིང་མཆི་མ་འཁྲུགས་ན་སྙིང་རྗེ་ཆེན་པོ་ཡིན་ལ༔ དེ་སེམས་ཅན་ཐམས་ཅད་ལ་ཕྱོགས་རིས་མེད་ན་སྙིང་རྗེ་ཚད་མེད་ཡིན་ནོ༔ དེ་ལྟར་བྱམས་སྙིང་རྗེ་གཉིས་ལ་དགའ་བ་བཏང་སྙོམས་ཡང་འདུས་མོད་ཀྱི༔ སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དམ་པ་དང་མ་བྲལ་ན་སྙམ་པ་ནི་དགའ་བ་དང་༔ དེ་ལ་ཉེ་རིང་དང་ཕྱོགས་རིས་མེད་པར་སྙམ་པ་ནི་བཏང་སྙོམས་ཏེ༔ ཚད་མེད་པ་བཞི་ནི་ཐེག་པ་ཆེན་པོའི་ལམ་གྱི་གཞུང་ཤིང་༔ གསང་སྔགས་ཀྱི་ཉམས་ལེན་ཐམས་ཅད་ཀྱི་སྔོན་འགྲོ་ཡིན་པས་གལ་ཆེ༔ དེ་ལྟར་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཀུན་སློང་བཟང་པོ་མེད་པར་གསང་སྔགས་ཀྱི་བསྐྱེད་རྫོགས་བསྒོམས་ཀྱང་༔ ཚེ་འདིའི་རྐྱེན་སེལ་ཙམ་མ་གཏོགས་བྱང་ཆུབ་ཀྱི་ལམ་དུ་འགྲོ་དཀའོ༔ དེ་ལ་ཐེག་ཆེན་གྱི་རྩ་བ་བྱམས་སྙིང་རྗེ་གཉིས་གཅིག་ཏུ་དྲིལ་ཏེ་བསྒོམ་པ་གལ་ཆེ་བ་སྟེ༔ བློ་གྲོས་མི་ཟད་པའི་མདོ་ལས༔ བྱང་ཆུབ་སེམས་དཔའ་སྙིང་རྗེ་ཆེན་པོ་ལ་གནས་པས་བདག་གི་བདེ་བ་ལ་མི་ཆགས་པར་སེམས་ཅན་ལ་
བཏང་བའོ༔ སེམས་ཅན་གྱི་སྡུག་བསྔལ་གྱི་ཚེགས་དང་དུ་ལེན་པ་ལ་དཀའ་བ་མེད་པའོ༔ ཞེས་དང་༔ སྤྱོད་འཇུག་ལས༔ འཇིག་རྟེན་བདེ་བ་ཇི་སྙེད་པ། དེ་ཀུན་གཞན་བདེ་འདོད་ལས་བྱུང་༔ འཇིག་རྟེན་སྡུག་བསྔལ་ཇི་སྙེད་པ༔ དེ་ཀུན་རང་བདེ་འདོད་ལས་བྱུང་༔ མང་དུ་སྨོས་པས་ཅི་ཞིག་དགོས༔ བྱིས་པས་རང་དོན་བྱེད་པ་དང་༔ ཐུབ་པས་གཞན་གྱི་དོན་མཛད་པ༔ འདི་གཉིས་ཀྱི་ནི་ཁྱད་པར་ལྟོས༔ བདག་བདེ་གཞན་གྱི་སྡུག་བསྔལ་དག༔ ཡང་དག་བརྗེ་བ་མ་བྱས་ན༔ སངས་རྒྱས་ཉིད་དུ་མི་འགྲུབ་ཅིང་༔ འཁོར་བ་ན་ཡང་བདེ་བ་མེད༔ དེ་ལྟར་བདག་གནོད་ཞི་བ་དང་༔ གཞན་གྱི་སྡུག་བསྔལ་ཞི་བའི་ཕྱིར༔ བདག་ཉིད་གཞན་ལ་བཏང་བར་བྱ༔ གཞན་རྣམས་བདག་བཞིན་བསྲུང་བར་བྱ༔ ཞེས་གསུངས་པས་རང་གི་བདེ་སྐྱིད་བསོད་ནམས་དགེ་རྩ་ཐམས་ཅད་སེམས་ཅན་ལ་སྦྱིན༔ སེམས་ཅན་ཐམས་ཅད་ཀྱི་སྡུག་བསྔལ་སྡིག་སྒྲིབ་རང་གིས་ལེན་དགོས༔ འོན་ཀྱང་དེ་ས་མ་ཐོབ་ཀྱི་བར་དུ་དངོས་སུ་མི་ནུས་པས་ཡིད་ཀྱིས་བདག་གཞན་བརྗེ་བར་བསྒོམས་པས་ཀྱང་བསོད་ནམས་རྒྱ་ཆེན་པོ་ཐོབ་སྟེ༔ སྤྱོད་འཇུག་
ལས༔ གང་ཞིག་བདག་དང་གཞན་རྣམས་ནི༔ མྱུར་དུ་སྐྱབས་པར་འདོད་པ་དེས༔ བདག་དང་གཞན་དུ་བརྗེ་བ་ཡི༔ གསང་བའི་དམ་པ་སྤྱོད་པར་བྱ༔ ཞེས་དང་༔ ཨུ་རྒྱན་རིན་པོ་ཆེས༔ འགྲོ་དྲུག་ཕ་མ་རྣམས་ལ་སྙིང་རྗེ་བཟོད་གླགས་མེད་པར་བསྒོམས་ནས༔ བདག་གཞན་བརྗེ་ཕོད་པ་ཆེན་པོ་ཡིས་རྩེ་གཅིག་མ་ཡེངས་པར༔ ཞེས་གསུངས་པ་ལྟར༔ རང་གི་སྣ་བུག་ནས་རླུང་ཕར་རྒྱུ་བའི་ཚེ༔ རང་གི་བསོད་ནམས་དང་དགེ་བའི་རྩ་བ་ཅི་ཡོད་པ་དེ་ཐམས་ཅད་སེམས་ཅན་ཐམས་ཅད་ལ་སིབ་ཀྱིས་ཐིམ་པས༔ སེམས་ཅན་ཐམས་ཅད་བདེ་བ་ཚད་མེད་པ་དང་ལྡན་པར་བསྒོམ༔ རང་གི་སྣ་བུག་ནས་རླུང་ཚུར་རྔུབ་པའི་ཚེ༔ སེམས་ཅན་ཐམས་ཅད་ཀྱི་སྡིག་སྒྲིབ་སྡུག་བསྔལ་ཐམས་ཅད་གཅིག་ཀྱང་མ་ལུས་པ་རང་ལ་སིབ་ཀྱིས་ཐིམ་པས་སེམས་ཅན་ཐམས་ཅད་སྡུག་བསྔལ་ཐམས་ཅད་དང་བྲལ་བར་བསྒོམ་མོ༔ དེ་ལྟར་ཉིན་རེ་ཡང་ལན་ཉེར་གཅིག་གམ་ཐ་མ་བདུན་རེ་མ་ཆག་པར་བསྒོམ་ན༔ འཕྲལ་དུ་ནད་གདོན་བར་ཆད་གང་གིས་ཀྱང་མི་ཚུགས་པ་དང་མཐར་རྫོ་གས་པའི་སངས་རྒྱས་ཐོབ་པའི་ཕན་ཡོན་མཐའ་ཡས་པ་འཐོབ་བོ༔ དེ་ཡང་བྱམས་སྙིང་རྗེ་སོགས་ཚད་
མེད་པ་བཞི་པོ་ལ་ཡང་དབྱེ་ན་གསུམ་རེ་སྟེ་བློ་གྲོས་མི་ཟད་པའི་མདོ་ལས༔ སེམས་ཅན་ལ་དམིགས་པའི་བྱམས་པ་ནི༔ སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམས་ཀྱིའོ༔ ཆོས་ལ་དམིགས་པའི་བྱམས་པ་ནི༔ སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱིའོ༔ དམིགས་པ་མེད་པའི་བྱམས་པ་ནི༔ མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་རྣམས་ཀྱིའོ༔ ཞེས་དང་༔ བྱང་ཆུབ་སེམས་དཔའི་སྡེ་སྣོད་ལས་ཀྱང་༔ སྙིང་རྗེ་རྣམ་པ་གསུམ་གང་ཞེ་ན་འདི་ལྟ་སྟེ༔ སེམས་ཅན་ལ་དམིགས་པའི་སྙིང་རྗེ་དང་ཆོས་ལ་དམིགས་པའི་སྙིང་རྗེ་དང་དམིགས་པ་མེད་པའི་སྙིང་རྗེའོ༔ ཞེས་གསུངས་པ་ལྟར༔ ད་ལྟ་སྐབས་སུ་བབས་པ་གོང་དུ་བཤད་པའི་སེམས་ཅན་ལ་དམིགས་པའི་བྱམས་སྙིང་རྗེ་སོགས་ཚད་མེད་བཞི་བསྒོམ་པར་བྱའི༔ ཆོས་ལ་དམིགས་པ་དང་དམིགས་པ་མེད་པའི་བྱམས་སྙིང་རྗེ་ནི་བོགས་འདོན་ཀྱི་སྐབས་སུ་འཆད་པར་བྱ་བ་ཡིན་ནོ༔ དེ་ལྟར་ཁྱེད་རང་རྣམས་བྱང་ཆུབ་ཏུ་སེམས་བསྐྱེད་པ་དང་༔ བྱམས་སྙིང་རྗེའི་ཁྲིད་ཞུས་པ་དང་༔ དེའི་དོན་ཉམས་སུ་ལེན་པར་འདོད་པའི་བསོད་ནམས་དེ་མི་
ཉམས་པར་བྱ་བའི་ཕྱིར་བྱང་ཆུབ་ཏུ་བསྔོ་སྙམས་པ་གྱིས་ལ་འདིའི་རྗེས་ཟློས་མཛོད༔ དགེ་བ་མ་རྒན་འགྲོ་དྲུག་ཀུན་ལ་བསྔོ༔ ལན་གསུམ༔ དེས་ཐེག་ཆེན་སེམས་བསྐྱེད་དང་བྱམས་སྙིང་རྗེའི་ཁྲིད་དེ་ཆོས་ཐུན་བཅུ་པའོ༔ ༈ ག་དེ་ནས་ཁྱད་པར་གྱི་སྔོན་འགྲོ་གཉིས་པ་མཎྜལ་གྱི་ཁྲིད་འཆད་པ་ནི༔ ཁྲིད་གཞན་ལ་རྡོར་སེམས་སྔོན་ལ་ཡོད་ཀྱང་འདིར་མཎྜལ་སྔོན་ལ་བྱུང་བའི་རྒྱུ་མཚན་ནི༔ སྐྱབས་ཡུལ་དང་སེམས་བསྐྱེད་ཡུལ་མཎྜལ་འབུལ་ཡུལ་གསུམ་པོ་དམིགས་པ་གཅིག་དང་འདྲ་བར་ཡོད་པས༔ ལས་དང་པོ་པས་ཟིན་སླ་བ་དང་༔ རྒྱུན་ཁྱེར་དུས་དུས་གཅིག་བསྐྱེད་པས་གསུམ་ཀའི་གོ་ཆོད་དུ་འགྱུར་བས་སྟབས་བདེ་བ་ལ་དགོངས་པའོ༔ དེ་ཡང་པདྨ་ཟབ་པའི་རྒྱུད་ལས༔ མཎྜལ་འབུལ་དང་མཆོད་པ་དང་༔ ཞེས་དང་༔ མཎྜལ་སྐུ་མདོག་མི་འདྲ་བ༔ བྱེ་བ་འབུམ་ཚོ་ཞེ་དྲུག་ནི༔ སངས་རྒྱས་པདྨ་རབ་རྒྱས་དང་༔ འཕགས་པ་སྤྱན་རས་གཟིགས་ལ་ཕུལ༔ ཞེས་དང་༔ གཤིན་རྗེ་གཤེད་གདོང་དྲུག་གི་རྒྱུད་ལས༔ འཛམ་བུ་གླིང་དང་གླིང་གཞན་རྣམས༔ ནོར་བུ་རིན་ཆེན་གྱིས་བཀངས་ཏེ༔ སྟོང་གསུམ་ལ་སོགས་མ་