ས་དཔྱད་རྣོན་མོ་མཛུབ་ཚུགས།
ས་དཔྱད་རྣོན་མོ་མཛུབ་ཚུགས་ཞེས་བྱ་བ་བཞུགས་སོ།
ས་དཔྱད་རྣོན་མོ་མཛུབ་ཚུགས་ལ། དང་པོ་ནམ་མཁའ་བར་སྣང་བརྟག་ཐབས་ནི། །ནམ་མཁའ་འཁོར་ལོ་རྩིབས་བརྒྱུད་འདྲ། །ཡང་ན་ཟླུམ་པོའམ་གྲུ་བཞི་ལ། །རྒྱ་ཆེ་ཉི་ཟླ་བགྲོད་ཐག་རིང་། །བྱང་ཕྱོགས་ནམ་མཁའ་མི་མངོན་ཞིང་། །ཤར་ལྷོ་ནུབ་གསུམ་གསལ་ན་བཟང་། །ཟླ་གམ་ནར་མོ་གྲུ་གསུམ་ངན། །གཅན་གཟན་སོ་བསྣོལ་འདྲ་བ་དང་། །བུག་དང་རལ་པ་ངན་པ་ཡིན། །ཉི་ཟླ་ཆུ་ཡིས་ཁྱེར་བ་དང་། །ཉི་ཟླས་སྐྱ་ལམ་བཏོད་པ་ངན། །ཉི་ཟླ་ཡང་ཤར་ཡང་འགྲིབ་དང་། །འཕྲལ་རྒུད་བར་ཆད་མང་བ་ཡིན། །བར་སྣང་ཟླ་གམ་འདུག་པ་
བཟང་། །གཉིས་པ་ས་གཞི་དཔྱད་པ་ལ། །ས་གཞི་པདྨ་འདབ་བརྒྱད་འདྲ། །བྱང་སྐྱབས་རྒྱབ་རི་ཉེ་ཞིང་མཐོ། །མདུན་དུ་ཆུ་མིག་འོལ་ཁ་བཀྲམ། །རི་བྲན་འདུད་འདྲ་མདུན་རི་འགྱང་། །དམའ་ལ་རྩེ་མོ་བྱོལ་པ་དགོས། །ཤར་ཕྱེས་ལྷོ་སྤུང་ནུབ་འདན་པ། །བྱང་རི་ཡོལ་བ་བྲེས་འདྲ་བཟང་། །ཕུ་མདའ་ནར་ལོ་ཚེ་རིང་ས། །དཀྱིལ་འཁོར་འདྲ་ན་བན་བོན་བཟང་། །རལ་གྲི་འདྲ་ན་སྐྱེས་པར་བཟང་། །གྲུ་བཞི་བྱིས་སྦ་རྒྱ་གྲམ་ནི། །བཙད་པོར་བཟང་ཞིང་རྡོར་དྲིལ་དབྱིབས། །བན་དྷེར་བཟང་ལ་འདུག་ཉལ་འདྲ། །ཕྱུགས་ནོར་འཕེལ་བའི་ས་ཡིན་ནོ། །ཕུ་ན་
སྤང་ལྗོངས་རྩི་ཤིང་ལྡན། །མདའ་རི་ཕྱག་རྒྱ་བསྣོལ་འདྲ་བཟང་། །ཡར་སྤུངས་འོག་བརྟན་ཅི་བསམ་འགྲུབ། ༈ །གསུམ་པ་རི་ཡི་བརྟག་ཐབས་ལ། །ལྷུན་སྟུག་ཁོད་སྙོམས་ཡ་ཡོ་མེད། །རྩེ་མཐོ་གཡའ་གངས་ནགས་གསུམ་འཛོམས། །རོང་དང་ཆུ་ལྡན་སྐད་ཤ་རྒྱས། །སྲོག་ཆགས་མཐའ་དག་དང་ལྡན་ཞིང་། །ཉི་མའི་མདངས་ཐོབ་ཟེར་ཡང་སྡུད། །མདོར་ན་མཚན་ཉིད་ཐམས་ཅད་ལྡན། །དེ་ནི་རི་ཡི་རྒྱལ་པོ་ཡིན། །རྒྱལ་པོའི་རྟགས་སུ་ལ་ཐོད་ནི། །དབྱར་མི་འཇུ་བའི་གངས་ཞིག་དགོས། །བཙུན་མོའི་རྟགས་སུ་བྲང་རྒྱན་ནི། །དགུན་མི་སྐམ་པའི་མཚོ་ཞིག་དགོས། །དེ་ནི་རི་ཡི་བཙུན་མོར་འདོད། །གདོན་དང་མཐུ་བ་འཛོམ་པ་གཅེས། །དེ་རྣམས་མེད་ན་འབངས་ཀྱི་རི། །བྲག་དགུ་མདུན་ལ་དགྱེ་བ་རྒྱབ། །ནགས་རི་མདུན་ལ་སྤང་རི་རྒྱབ། །མཐུ་བ་ཡོད་པ་མདུན་ལ་མེད་པ་རྒྱབ། །བྲག་ཆུ་ཡོད་པ་མདུན་ལ་མེད་པ་རྒྱབ། །མདོར་བསྡུས་རྩེ་མོ་གར་དགུ་མདུན། །རྒྱ་ཆེ་རྩེ་སྦོམ་ཕྲག་པ་རྒྱབ། །བྲག་ཆ་སྐད་ཆེ་ཕོ་རི་ཡིན། །རི་རྒྱ་ཆུང་ཞིང་རྩེ་མོ་ཕྲ། །བྲག་སྐེད་ཕྲ་བ་མོ་རི་ཡིན། །དེ་ལྟར་ཀུན་ལ་ཤེས་པར་བྱ། །བཞི་པ་ཀུན་དང་ལྡན་པའི་ས་ལྔ་ནི། །
རི་བཟང་རྩ་བ་ཆུ་ཡིས་བསྐོར། །གཡས་གཡོན་གཉིས་ནས་ཆུ་མིག་བབས། །རྩེ་ན་ན་བུན་རྒྱུན་མི་འཆད། །དམུ་ཐག་གནམ་དུ་འཐེན་པའི་ས། །བྲག་དཀར་རྩེ་ན་གངས་དཀར་ཐོད། །རི་སྣས་ཐང་བསྐོར་ཐང་མཐོར་འཁྱིལ། །དབུ་ཞྭ་རྐང་ལྷམ་འཛོམས་པའི་ས། །འོག་ཏུ་ཐང་ངམ་ཞིང་ཆེན་ལ། །ལམ་དང་རི་བྲག་མང་པོ་བརྩེགས། །རིན་ཆེན་གདན་ཐབས་ཕྱག་རྩེ་ལ། །མདུན་དུ་མཚོ་དང་མེ་ཏོག་རྒྱས། །རིན་ཆེན་མཎྜལ་ཚོམ་བུའི་ས། །ཡང་ན་འོག་ནས་དལ་འབུལ་མངོན། །གསང་ཤ་སྡེར་དུ་བཏོན་པའི་ས། །འདི་རྣམས་འཛོམ་པའི་སར་བཏབ་ན། །ཚེ་རིང་ནོར་རྣམས་འཕེལ་བའི་ས། །ལྔ་པ་བཟང་ཞིང་རིག་པ་ལྔ་བསྟན་པ་ནི། བཙན་གཉན་རྩེ་འཛིན་དག་ལ་རག །རྩེ་མཐོ་རྒྱ་ཆེ་བཟང་བ་ཡིན། །ཚེ་རིང་དམུ་ཐག་དག་ལ་རིག །སྒང་རྒྱུད་མ་ཆད་འབྲེལ་ན་བཟང་། །འཕན་རྨང་ས་དང་ཆུ་ལ་རག །ལུང་པ་ཆུ་བཟང་མང་འབབ་བཟང་། །ཕྱུག་དང་དབུལ་བ་ལེན་ལ་རག །ཆུ་མདོ་ཞིག་རལ་མེད་པ་བཟང་། །དཔའ་སྡར་སྲུང་མདའ་བཞི་ལ་རག །ཕྱོགས་བཞིར་སྲུང་བཞི་ཚང་ན་བཟང་། །དྲུག་པ་ཆེ་འཛིན་བདུན་བསྟན་པ་ནི། བྲག་དཀར་
གངས་དཀར་རྩེ་རྣོ་བཟང་། །སྤང་རི་རྒྱ་ཆེ་ལྷུན་སྟུག་ལེགས། །གཡའ་རི་རྫ་རི་རྒྱ་ཆེ་འབྲིང་། །བྲག་དམར་ཟུར་དང་རྩེ་རྣོ་འབྲིང་། །བྲག་ནག་རྟ་སོ་མདུང་རྩེ་ངན། །ས་སྔོན་ས་སེར་གཡའ་མ་ཅན། །རུང་ཙམ་ཡིན་ཕྱིར་བཟང་པོ་བླངས། །བདུན་པ་གདབ་པའི་ཐབས་ལྔ་ནི། །ཚེ་རིང་འདོད་ན་བྲག་ལ་གདབ། །ལྷུན་འཐུག་རྩེ་མོ་རྣོ་ན་བཟང་། །རྨང་པོ་འཕེན་འདོད་ཤིང་ལ་གདབ། །ཚལ་འཐུག་རྒྱ་ཆེ་སྐྱོན་མེད་བཟང་། །དབུལ་པོ་ཕྱུག་འདོད་ན་བར་གདབ། །རྒྱ་ཆེ་ཕོ་ཁ་བསྒྱུར་འདྲ་བཟང་། །བརྟན་པར་འདོད་ན་ཐང་ལ་གདབ། །ཤས་འཐུག་འདེབས་དམིགས་འབུར་ན་བཟང་། །སྲིད་ཀྱི་འགྱོག་སོ་ཆུ་ལ་གདབ། །མདུན་འབབས་རྒྱུན་ཆད་མེད་ན་བཟང་། །བརྒྱད་པ་གཅེས་པའི་ས་རྣམས་བསྟན་པ་ནི། གངས་རི་བྲག་དཀར་རྒྱུད་རིང་ཞིང་། ལྷུན་འཐུག་རྩེ་མོ་རྣོ་བ་དེ། །རྒྱལ་རིགས་གྲགས་པའི་ས་རུ་གཅེས། །ནམ་མཁའ་གྲུ་བཞི་གནས་པ་ནི། སྐུ་རྒྱན་བརྩེགས་པའི་ས་རུ་གཅེས། །གཡའ་རི་སྨུག་པོ་ལྷུན་ཆགས་པ། །རྗེ་རིགས་བློན་པོའི་ས་རུ་གཅེས། །ནགས་རི་སོག་ཁ་འདྲ་བ་ནི། །བག་མ་བརྩེ་ཆེན་ས་རུ་གཅེས། །འབྲུ་ཡི་ཕུང་པོ་སྤུངས་འདྲ་བ། །རྒན་པོ་
རྣམས་ཀྱི་ས་རུ་གཅེས། །ན་བ་རྒྱ་ཆེ་ཤས་བཟང་བ། །ཕྱུག་པོ་ནོར་འདོད་ས་རུ་གཅེས། །ནེའུ་སིང་རྟ་གནག་གཉིས་ཀྱི་ས། །སོ་རིང་ཕར་ཚུར་འདུག་པ་ནི། །བེའུ་ལུག་ཕྱུགས་ཕྲན་ས་རུ་གཅེས། །བྲག་བཟང་རི་བོ་རྩེ་རྒྱལ་ནི། །དཔལ་རྩལ་ཅན་གྱི་ས་རུ་གཅེས། །ཆུ་མིག་ལུ་མ་དྲག་འབབ་པ། །བུ་སྲིང་སྨན་གྱི་ས་རུ་གཅེས། །གངས་དཀར་ལེའུ་བརྩེགས་པ་ནི། །ཡིག་ཚང་གསེར་གཡུ་ས་རུ་གཅེས། །མདུན་དུ་མགྱོགས་པོའི་ཆུ་འབབ་པ། །མི་འཕེན་སྲིད་ཀྱི་ས་རུ་གཅེས། །དགུ་པ་བཟང་བདུན་བསྟན་པ་ནི། །ཕོ་ཡི་དུར་ས་མཁར་གྱི་ས། །མཐོ་ལ་རིམ་པ་བཟང་བ་ཡིན། །མོ་ཡི་དུར་ས་ཁང་པའི་ས། །དམའ་ལ་དབྱིབས་པ་བཟང་བ་ཡིན། །ཕྱག་རྩེ་གསུམ་བརྩེགས་གདན་ཐོག་དེ། །དགེ་བཤེས་རྒྱལ་རྒྱུད་ས་རུ་བཟང་། །མཆོད་རྟེན་པོ་ཏི་བརྩེགས་འདྲ་དེ། །རབ་བྱུང་བཙུན་པའི་ས་རུ་བཟང་། །གཡུང་དྲུང་རྔ་གཤང་བསྒྲིགས་འདྲ་དེ། །ཕྱག་རྒྱལ་བོན་གྱི་ས་རུ་བཟང་། །མཐོ་ཞིང་ཡངས་པའི་ས་མིག་དེ། །ཚེ་རིང་བཀྲ་རྒན་ས་རུ་བཟང་། །དམའ་ལ་ཡངས་པའི་ས་མིག་དེ། །བུད་མེད་རྒན་པའི་ས་རུ་བཟང་། །ཚེ་རིང་བུ་མང་རིམ་པར་
བསྟོད། །ཤི་ལུགས་བཟང་ངན་དག་ལའང་དཔག །དེའང་ཁང་དུར་ཀུན་ལའོ། །བཅུ་པ་མི་ཐུབ་ས་རྣམས་བརྟན་པ་ནི། །དགོས་ཕྱིར་གདབ་པ་རྒྱལ་ལ་བཤད། །འབྲོང་གི་རྭ་བར་འདྲ་བ་འམ། བྱ་ཁྱུང་ནོར་བུ་རྨ་བྱའི་མདོངས། །ཆེ་བཙན་ལྡན་པ་མ་ཡིན་པའི། །སྐྱེ་བོ་གཞན་གྱིས་ཐུབ་དཀའ་ཡང་། །དཔལ་རྩལ་འདོད་ན་དེ་ལ་གདབ། །རྒྱལ་མཚན་རྩེ་དང་གདུགས་ཀྱི་ཏོག །བུམ་པའི་ཁ་རྒྱན་འདྲ་བ་གསུམ། །དགེ་བའི་བཤེས་གཉེན་མ་ཡིན་པའི། །བཙུན་པ་ཕལ་གྱིས་ཐུབ་པར་དཀའ། །དཔུངས་པ་ཞན་ན་དེ་ལ་གདབ། །རྒྱལ་པོའི་ཐུགས་ཀ་གླང་ཆེན་གཙུགས། །སེང་གེའི་གཡུ་རལ་རྣམ་པ་གསུམ། །རྒྱལ་རིགས་ས་བདག་མ་ཡིན་པའི། །བློན་འབངས་གཞན་གྱིས་ཐུབ་པར་དཀའ། །མི་དཔུང་ངན་ན་དེ་ལ་གདབ། །སྟག་གི་འཛུམ་དང་ཁྲ་ཡི་གཤོག །གཅན་གཟན་གདུག་པའི་སྙིང་ག་གསུམ། །དྲག་རྩལ་ལྡན་པ་མ་ཡིན་པའི། །ཕལ་པ་གཞན་གྱིས་ཐུབ་པར་དཀའ། །ཡ་རབ་འདོད་ན་དེ་ལ་གདབ། །རྨ་བྱའི་མདངས་འདྲ་མི་ཐུབ་སྟེ། །དུག་འཁྲིས་མང་དང་བཀྲག་མེད་དང་། །གཟི་བྱིན་མེད་ན་དེ་ལ་གདབ། །རྟ་ཡི་རྔོག་མ་མི་ཐུབ་སྟེ། །རྟ་གྲི་མང་ན་དེ་ལ་
གདབ། །རྨོག་གི་སྤྱི་བོ་མི་ཐུབ་སྟེ། །མཚོན་གྲི་མང་ན་དེ་ལ་གདབ། །འཁོར་ལོའི་ལྟེ་བ་མི་ཐུབ་སྟེ། །གཉའ་ནོན་མང་ན་དེ་ལ་གདབ། །མཆོད་རྟེན་བུམ་པ་མི་ཐུབ་སྟེ། །མཐོན་པོ་མར་ལྷུང་དེ་ལ་གདབ། །ཁྱུང་གི་གཤོག་རུ་མི་ཐུབ་སྟེ། །མཛེ་ཕོ་མང་ན་དེ་ལ་གདབ། །ཕྱག་རྩེ་གསུམ་བརྩེགས་གདན་ཁྲི་དེ། །ཡོན་ཏན་ལྡན་པ་མ་གཏོགས་པ། །ཡོན་ཏན་མེད་པས་ཐུབ་པར་དཀའ། །མཐོ་ཡངས་གཉན་པའི་ས་མིག་དེ། །ཚེ་རིང་བཀྲ་རྒན་མ་གཏོགས་པ། །གཞོན་ནུ་ཕལ་གྱིས་ཐུབ་པ་དཀའ། །སྤང་ཐང་ན་བ་ཆེན་པོ་དེ། །ཕྱུག་པོ་ནོར་ལྡན་མ་གཏོགས་པ། །དབུལ་པོ་ཕལ་གྱིས་ཐུབ་པར་དཀའ། །ནགས་ཚལ་འཐུག་པོའི་སྤང་གཤོང་དེ། །འཕན་པོ་བུ་མང་མ་གཏོགས་པ། །རྨང་པོ་རྣམས་ཀྱིས་ཐུབ་པར་དཀའ། །ས་བདག་ཀླུ་གཉན་བཟང་པོའི་གནས། །མི་རྒྱུད་གཙང་བ་མ་ཡིན་པའི། །སྐྱོན་ཅན་རྣམས་ཀྱིས་ཐུབ་པར་དཀའ། །རི་ཞབས་ཐང་མཐའ་ཆུས་བསྐོར་བ། །ན་རིགས་ངོན་པ་མ་གཏོགས་པ། །ཡ་རབ་དྲ་མས་ཐུབ་པར་དཀའ། །དེ་ཡང་ཁ་དུར་ཀུན་ལ་འོ། ༈ །བཅུ་གཅིག་ཕོ་མོ་བརྟགས་པ་ནི། །རི་ཡི་ཕོ་མོ་རྩེ་མོས་དབྱེ། །རི་རྩེ་
སྦོམ་པ་ཕོ་ལ་ཕྲ་བ་མོ། ཤིང་གི་ཕོ་མོ་འབྲས་བུའི་དབྱེ། །འབྲས་བུ་ཡོད་པ་ཕོ་ལ་མེད་པ་མོ། །རྡོ་བྲག་ཕོ་མོ་ཟུར་གྱི་དབྱེ། །ཟུར་ཅན་ཕོ་ལ་ཟུར་མེད་མོ། །ཆུ་ཡི་ཕོ་མོ་འབབ་འཁྱིལ་དབྱེ། །དྲག་འབབ་ཕོ་ལ་དལ་འཁྱིལ་མོ། །ལམ་ནི་ཁ་དབྲག་དག་གི་དབྱེ། །ལམ་གཅིག་ཕོ་ལ་ཁ་དབྲག་མོ། །ན་བ་ཕོ་མོ་ཆུ་ཡིས་དབྱེ། །མགོ་ཉུང་ཕོ་ལ་མགོ་ལང་མོ། །ས་ཆའི་ཕོ་མོ་འབུར་གཤོང་དབྱེ། །འབུར་བ་ཕོ་ལ་གཤོང་བ་མོ། །འདེབས་ཀྱི་ཕོ་མོ་གཡས་གཡོན་དབྱེ། །འདེབས་ཀྱི་གཡས་ཕོ་གཡོན་པ་མོ། །བྱིས་པ་ཕོ་མོ་འགྱོགས་པ་སྤྱད། །བཅུ་གཉིས་ཆུ་ཡི་བརྟག་ཐབས་ནི། །བྱང་ནས་ལྷོ་འབབ་དཔལ་གྱི་ཆུ། །ནུབ་ནས་ཤར་འབབ་དབང་ཐང་ཆུ། །ལྷོ་ནས་བྱང་འབབ་ནོར་གྱི་ཆུ། །ཤར་ནས་ནུབ་འབབ་ཅུང་ཟད་ངན། །རེས་འབབ་རེས་སྐམ་དར་རྒུད་ཆེ། །འཁོར་ཞིང་འཁྱིལ་ན་གཡང་གི་ཆུ། །ཤག་ཤག་འགྲོ་བ་མགྲོན་གྱི་ཆུ། །དཀར་ལ་གྲིམ་པ་སྲིད་ཀྱི་ཆུ། །དམར་ལ་རྒོད་པ་སྲིད་ཀྱི་ཆུ། །སེར་ལ་ཁམ་པ་ཆུ་སེར་ཆུ། །ནག་ལ་རྙོག་པ་གཅོང་གི་ཆུ། །ཁ་ནས་བབས་པ་དཔལ་གྱི་ཆུ། །སྙིང་ག་ནས་འབབ་དངོས་གྲུབ་ཆུ། །མིག་ནས་བབས་པ་ཉེས་ལྟུག་ཆུ། །
མཚན་མ་ནས་འབབ་མི་ནོར་འཕེལ། །གཡས་གཡོན་ཆུ་འབབ་བཟང་བར་བཤད། །གཡོན་ནས་འབབ་ཅིང་མདུན་དུ་འཁྱིལ། །ཞག་གི་མཚོ་མོ་འཁྱིལ་བ་ཡིན། །རྩེ་འཛིན་རྩེ་མོ་ང་ཆུ་རྡོལ་ན། །མི་རྒྱུད་སྤྲང་པོར་འགྲོ་བར་བཤད། །ཆུ་སྐད་ཆད་ན་རྒྱུད་སྐད་ཆད། །སྐྱེད་འབྲི་ཆེ་ན་བསོད་ནམས་དང་རྒུད་ཆེ། །ན་ཆུ་ཆུ་རུལ་མྱ་ངན་ངོ་། །གཡས་གཡོན་ཆུ་སྐྱུག་མིག་གི་མཆི་མ་ཡིན། །ཞབས་སུ་ཆུ་རྡོལ་ངན་པའི་ཐ། །མགོ་མང་རྡོལ་ན་བརྒྱ་སྟོང་འཕེལ། །བྲག་ལས་ཆུ་འབབ་མི་འབྲུ་ས། །ལྷོ་རྡོལ་བུ་སྲིང་ཕ་མ་མཚོ། གཡས་རྡོལ་ཆེ་རྒྱུད་གཡོན་རྡོལ་བུ། །དབུས་རྡོལ་འབྲིང་རྒྱུད་འཕེལ་བའི་ཆུ། །རི་བྲག་ཁ་འདྲ་ནས་འབེབས་ཆུ། །སྒྲ་བཟང་དབང་ཐང་ཆེ་བར་བཤད། །མཇེ་འདྲ་ནས་འབབ་བུ་ཚ་འཕེལ། །རྣ་བ་ནས་འབབ་དཔལ་རྩལ་ཆེ། །ནུ་འདྲ་ནས་འབབ་མི་ནོར་འཕེལ། །གཡས་གཡོན་ཆུ་གཉིས་མདུན་འཁྱིལ་བཟང་། །དུར་གྱི་དབྱིངས་ལས་ཆུ་རྡོལ་ངན། །དོང་དུ་སོང་ན་ཡུལ་མི་བརླག །སྟ་འདྲ་ནས་འབབ་ནལ་མ་མང་། །ཤིན་ཏུ་སྒྲ་ཆེ་གྱོད་ཆུ་ཡིན། །རྐུབ་འདྲ་ནས་བབ་དག་དིབ་མང་། །རྫིང་ཁྲོད་དབྱར་སྐྱེས་དགུན་སྐམ་དང་། །ངམ་གྲོག་
གཏིང་རིང་ཆུ་འབབ་དང་། །རྩ་དང་ཀོ་མོག་བ་ཚྭ་ཅན། །ངན་ཆུ་བསགས་དངམདུན་ཆུ་དང་། །རླན་ཅན་སར་བཏབ་བུ་ཚ་གླེན། །གངས་ལས་ཆུ་འབེབས་འཕེལ་ཀྱང་སྙི། །བཟང་བའི་ཆུ་རྣམས་ཐམས་ཅད་ནི། གཙང་པོར་སླེབ་དགོས་མ་སླེབ་མིན། །བཅུ་གསུམ་ཤིང་གི་བརྟག་ཐབས་ནི། །རྩེ་འཛིན་རྒྱབ་རི་གང་རུང་ལ། །ཤིང་སྐམ་གཅིག་སྐྱེས་བདུད་མདའ་ངན། །སྟེང་གི་ཤིང་སྐམ་རྐང་གཅིག་ངན། །གཡས་གཡོན་ནུབ་ཀྱི་ཤིང་སྐམ་གཅིག །ངན་པ་ཡིན་ཞེས་ཞབས་ཀྱི་ཤིང་། །རློན་པ་སྐྱེས་ན་བཟང་བར་རབ། །སྐམ་པོ་གཅིག་སྐྱེས་བཟང་བའི་ཐ། །ཁང་པའི་ཤར་དུ་ཤིང་བྱུང་བཟང་། །ཕུ་རུ་ཤོལ་པོ་བྱུང་ཀྱང་ངོ་། །དུར་སར་ཤིང་སྐྱེས་མི་གྲངས་འཕེལ། །ཤར་དུ་འོམ་བུ་སེང་ལྡིང་བཟང་། །ལྷོ་རུ་ཀ གླང་མ་ཐང་ཤིང་ལེགས། །མཚམས་སུ་ཤོལ་པོ་སྐྱེས་པ་དགེ །ས་དགྲ་ངན་པར་ཤིང་སྐྱེས་ཐུབ། །ཆུ་ཁམས་ལྷོ་ནུབ་ཤིང་སྐྱེས་ལེགས། །ཤིང་ཁམས་ནུབ་སྐྱེས་མེ་ཁམས་བྱང་། །སར་ཤར་ལྕགས་ཁམས་ལྷོ་སྐྱེས་ཤིང་། །དེ་ཡིས་དགྲ་བཞི་ཐུབ་པར་ངེས། །ཤར་ཤིང་ཁང་པར་འཕྲད་ན་ངན། །ཁམས་ལྔའི་གྲོགས་ཕྱོགས་སྐྱེས་པར་ངན། །ཁང་ལྟག་དུག་ཤིང་
སྐྱེས་པ་ངན། །སྐྱོག་མོ་འགོ་འཛིངས་མགོ་སྡུམ་དང་། །དུག་ཤིང་སྐམ་པོ་སྦ་བ་ཅན། །མགུལ་པ་མགུལ་ཉལ་རྩ་བ་རུལ། །ཕྱེད་སྐམ་འབྲུ་སྐམ་ཚེར་མ་ཅན། རོ་བ་ཆག་པོ་སྲིན་རྗེས་ཅིན། དེ་སོགས་ཁང་དུར་གང་རུང་ངན། །ལན་དང་མདུན་རི་ཤིང་སྤྱན་བཟང་། །སེ་བ་རྟ་བཟང་ཉ་ཁྲིད་གནག །སུ་རུ་ལུག་ལ་སྟག་མ་ར། །གླིང་མ་སྤྱན་མ་བ་དང་གླང་། །ཤིང་སྣ་ཀུན་ཚོགས་ཕུན་སུམ་ཚོགས། །ཤུག་པ་གསེབ་ཀྱི་ཤིང་ཡན་གཅིག །བྱུང་ན་ངན་ཅིང་ཤིང་ནག་ནི། །ལོ་མ་མེད་པ་དེ་ཡང་ངོ་། །ཤིང་མེད་ཡུལ་ན་ཤིང་མི་དཔྱད། །ཤིང་གཅིག་སྐྱེས་པ་མན་ངག་ཡིན། །ཆུ་བྲན་ལུང་པ་དེ་བཞིན་ནོ། །ཤིང་སྒྲོན་ལ་སོགས་གཞན་ནས་འབྱུང་། །བཅུ་བཞི་བྲག་གི་བཟང་ངན་བཤད། །མདུན་རྒྱབ་གོང་བྱུང་བྲག་རི་ནི། །དགུ་ན་སེང་གེ་ཡིན་པར་དཔྱད། །དབྱེ་ན་རྒྱལ་པོ་ཡིན་པར་དཔྱད། །དེ་བཞིན་དགྱེ་དགུ་བྱེ་བྲག་ནི། །སེར་པོ་སྟག་དང་བློན་པོར་དཔྱད། །དམར་པོ་འཕར་སྤང་དམག་མིར་འདོད། །ནག་པོ་དོམ་དྲེད་འབངས་སུ་དཔྱད། །སྟེང་གི་ཕ་ཝང་ལེབ་མོ་ནི། །སྤྱི་བོའི་རྡོ་ལེབ་བྱ་བ་ཡིན། །སྟེང་དུ་བྲག་ཐེམ་ཡོད་པ་ལ། །སྣ་གཉིས་མར་ལ་གུག་
པ་ནི། །ས་མཁན་ལྟག་བདུད་ཡིན་པས་སྤང་། །གཡས་གཡོན་ཕ་ཝང་སྒོ་ཉལ་དེ། །འོག་གི་བྲེ་གུ་སྒོ་ཁྱིའ། །སྟེང་གི་བྲག་གདོང་གྱེན་སོང་བཟང་། །བྲག་གདོང་དུར་ཟུག་གཟུ་ལུང་ངན། །འོག་ནས་འཇབ་འདྲ་རྐུན་ངོ་དང་། །བརྟེན་པ་འདྲ་ན་རྟེན་ཕུར་བཟང་། །བྱེ་བྲག་མི་ངོའི་བྲག་ངན་ནི། །ཁ་དོག་དམར་ཁ་གྲི་ངོ་དང་། དམར་ལ་རྩུབ་པ་རྨ་ཁྲག་ངོ་། །སྤྱང་ལྟོགས་འདྲ་ན་ཆུང་སྲི་ལྡང་། །སྔོ་སྐྱ་ཐལ་སྐྱ་བསེ་རག་གདོང་། །སེར་ནག་ལྟུག་པ་གཅོང་ནད་ལྡང་། །དཀར་གསེབ་ནག་པོའི་འབངས་རྗེ་གསོད། །ནག་གསེབ་དཀར་པོ་དེ་ལས་ལྡོག །སྐྱ་བོ་བཟང་རིང་ལྷ་ཡི་གདོན། །དཀར་སེར་སྔོ་དང་འདྲེས་པ་བྱོལ། །དབྱིབས་གཟུགས་མི་ཧྲིང་ཁུས་འདེབས་ངན། །ཕག་མོ་དུས་འདྲ་སྲིན་གྱི་གདོན། །གཅན་གཟན་མཆེ་དང་ངུས་པའི་མཆི། །སྡེར་མོའི་རྗེས་སོགས་ངན་པར་བཤད། །འབྲང་རྒྱས་འདྲ་ན་ཚེ་སྟོད་བདེ། །ཚེ་སྨད་སྡུག་བསྔལ་འབའ་ཞིག་འབྱུང་། །རྩེ་གཉིས་དཀར་དམར་ཕ་སྤུན་འཁྲུག །གཤིན་རྗེ་ཁྲོས་འདྲ་ཕུང་བའི་བྲག །སྤྱང་པོས་ཟོ་བ་ཐོག་འདྲ་ངན། །མི་ཧྲིང་ཁྲག་ཁུར་སྦྲང་ཟན་ནི། །འཐོར་འདྲ་ཤ་རོ་རྒོག་པ་འདྲ། །མི་རྒབ་ཆད་འགྱུར་
སྤྲེལ་གདོང་འདྲ། །ནང་དམེ་འོང་བྲག་ཟངས་རྒོག་སྦུབ། །དེ་འདྲ་ཤིན་ངན་སྒོ་ཐད་ནས། །གོམ་པ་ཉེར་ལྔ་ཝ་འཇབ་འདྲ། །ཕུང་སྲི་ཡིན་བཤད་ཁང་དུར་གཉར། །སྤྱང་འདྲ་དེ་ཡང་དེ་ལྟར་རོ། །ཁམས་ལྔའི་དགྲ་སོགས་མདུང་རྩེ་འདྲ། །ཤིག་ཤིག་གས་གྲུམ་མགོ་གཏུམ་ངན། །གཟུགས་ལ་ལེགས་པ་ཟུར་རྣོ་བ། །བྲག་ཆད་ལྷུང་ལ་ཁད་པ་དང་། །ཡུགས་ས་ཙོག་གེར་འདུག་འདྲ་དང་། །ཁ་གདངས་ཤོར་འདྲ་ཕན་ཚུན་དུ། །འཐབ་འདྲ་སྤྱང་ཀི་ལུག་འཇབ་འདྲ། །སྡོམ་སྡིག་སྦལ་སྦྲུལ་ཉ་འདྲ་བའི། །ཁ་ཟུར་འདྲ་བར་ཁང་དུར་བཏབ། །མི་ཤེས་འབྱུང་བ་ཐེ་ཚོམ་མེད། །དེ་དག་གཟུགས་ངན་ཁོངས་འཐུས་ཀྱང་། །ས་འབུམ་དགོངས་པ་བཞིན་དུ་སྤྲོས། །བཅོ་ལྔ་ལམ་གྱི་ལེགས་ཉེན་ནི། །ཤར་གྱི་ལམ་དེ་གྲོགས་ལམ་ཡིན། །ལྷོ་ཡི་ལམ་དེ་དཔལ་གཡང་ལམ། །ནུབ་ལམ་བྱང་ལམ་གཤིན་དགྲའི་ལམ། །སྟེང་དུ་ལམ་བྱུང་གཉའ་ཤིང་ངན། །འོག་ནས་འཕྲད་ཟུག་ཕྱག་བརྩེགས་བཟང་། །འོག་ནས་ཐུར་སོང་ཐག་སྣ་ཟུག །ལམ་སྣ་མང་ཟུག་ཞལ་ལྕེ་དང་། །ཁ་སྨྲས་མང་ཞིང་ཁང་དུར་གཉར། །རྒྱ་གྲམ་ལམ་བྱུང་ཤིན་ཏུ་ངན། །ལམ་གྱི་ཁ་དབྲག་སྐུ་ཚུད་
ངན། །ཤར་ལྷོའི་ལམ་དམར་རྟ་ལ་ངན། །བཅུ་དྲུག་ལུང་བའི་བཟང་ངན་ནི། །སྟེང་དང་འོག་དང་གཡས་གཡོན་གྱིས། །ལུང་སྐམ་ཐུར་ཕྲད་ཟུག་ཀུན་ངན། །ལར་ནི་ལུང་སྐམ་མང་བ་དེ། །མི་རྒྱུད་སྤྲང་པོར་འགྲོ་བ་ཡིན། །འོབ་དང་རྐོ་དོང་རི་གདོང་སོགས། །ས་ཡི་དུག་རལ་མང་ན་ངན། །སྤྱིར་ན་ལུང་པ་ས་གཞི་དཔྱད་པས་འགྲུབ། །བཅུ་བདུན་ཟད་དང་ངན་པའི་དཔྱད། །རི་ཐང་གཉིས་ཀྱི་མཚམས་སུ་ཟད། །སྐམ་གཤེར་གཉིས་ཀྱི་མཚམས་སུ་ཟད། །ཉིན་སྲིབ་གཉིས་ཀྱི་མཚམས་སུ་ཟད། །རི་བོའི་རྩེ་དང་ཐང་གི་དཀྱིལ། །གངས་རྒྱུད་སྣེ་དང་གཡའ་གངས་མཚམས། །གཡའ་སྤང་སྤང་བྲག་བྲག་སྣའི་མཚམས། །ས་ཟད་གད་པའི་མཚམས་སུ་ཟད། །གླ་བ་རྦབ་སྡོད་འདྲ་བ་དང་། །སྤྲེའུ་དམེ་སྡོད་འདྲ་བ་དང་། །ཡུགས་ས་ཁྱོ་སྡོད་འདྲ་རྣམས་སུ། །ཁང་དུར་བཏབ་ན་བརླག་པར་འགྱུར། །བཅོ་བརྒྱད་ས་ཡི་སྐད་ཆད་ནི། །སྟེང་དུ་མཆོད་རྟེན་པུ་ཏི་མནན། །སྒང་རྒྱུད་སྐྱེད་པར་མཚོ་སྐམ་ཡོད། །ཆུ་སྐད་ས་རྡོ་ཟམ་གྱིས་བཅད། །རི་བྲན་རི་ཆེན་མ་སླེབ་དང་། །ཆུ་བྲན་ཆུ་ཆེན་མ་སླེབ་ལྔ། །སྐྱེད་ལ་སྐད་ཆད་འབྱུང་བ་ཡིན། །བཅུ་དགུ་ཕུང་བའི་རི་བརྒྱད་དང་། །
རྒྱུན་དུ་ཕུང་བའི་ས་ཡང་བསྟན། །མི་རྒན་དཔྲལ་བ་འདྲ་བ་དང་། །ཡུགས་སས་ཕྱར་ཧྲུལ་གྱོན་འདྲ་བ། །སྐུ་ལ་སྣུམ་མེད་ས་གཞི་བཀྲེན། །ངར་གདོང་འདྲ་དང་འབབ་ཚུ་མེད། །སྦྲུལ་ནག་འཁྱུག་འདྲ་ཕག་གི་ཚེངས། །རྒྱུག་འདྲ་ཝ་གཞུག་འཁྱོག་པོ་འདྲ། །སྐམ་ལུང་མང་ན་བུག་ངལ་མང་། །རྩི་ཤིང་མེད་ཅིང་ས་མིག་མེད། །དེ་ནས་ཕུང་བར་བྱེད་པའི་ས། །ཉི་ཤུ་བཟང་པོ་རྒྱུན་མི་ཆད་པའི་ས། །དཀྱིལ་འཁོར་མཆོད་རྟེན་ཁྲི་འཕང་དང་། །རྔ་དང་པུ་ཏི་འདྲ་བ་བཞི། །དགེ་བཤེས་རྒྱུན་མི་ཆད་པའི་ས། །གཡུ་དྲུང་གསས་མཁར་རྔ་ཤང་དང་། །གཤོག་པ་བཙུགས་པ་འདྲ་བ་བཞི། །བོན་པོ་རྒྱུན་མི་ཆད་པའི་ས། །རི་དཀར་རྩེ་མོ་བྱུང་རྒྱལ་ལ། །རི་བྲན་མང་པོའི་བསྐོར་བ་ནི། །ཞང་བློན་རྒྱུན་་མི་ཆད་པའི་ས། །ཁྲེ་གུ་སྟག་སྣ་སྤྱང་ཐོད་འདྲ། །མདུང་དང་རལ་གྲི་འདྲ་བ་བཞི། །དཔའ་བོ་རྒྱུན་མི་ཆད་པའི་ས། །གཡས་ཀྱི་ས་འགོས་གཡོན་ཕྱོགས་མནན། །ཕ་སྤྱན་ནང་དུ་རྒྱལ་བའི་ས། །དེ་ལས་ལྡོག་པར་རང་ཉིད་ཕམ། །ཉེར་གཅིག་ས་འབྲིང་པོ་རྒྱུན་མི་ཆད་པའི་ས་ལྔ་བསྟན་པ་ནི། བྲེ་གུ་དཀར་ནག་མང་པོ་འདྲེས། །མགར་བ་རྒྱུན་མི་ཆད་པའི་
ས། །ཕྱར་བའི་དབུས་ན་ཆུ་གྲིའི་གཟུགས། །བཟོ་བོ་རྒྱུན་མི་ཆད་པའི་ས། །ས་རྡོ་རི་བྲག་མང་པོ་འདྲེས། །འཐབ་མཁོན་རྒྱུན་མི་ཆད་པའི་ས། །ཝ་སྐྱེས་ཕྱི་ལྟས་བྱས་འདྲ་དེ། །སྡར་མ་རྒྱུན་མི་ཆད་པའི་ས། །ས་བྲག་དམར་པོ་ཞིག་རལ་ཅན། །སྟེང་དུ་ལམ་འཕྲང་གུ་གུའི་གཟུགས། །ཐོག་གྲི་རྒྱུན་དུ་འབབ་པའི་ས། །ཉེར་གཉིས་པ་ངན་པ་རྒྱུན་མི་ཆད་པའི་ས། །ས་བྲག་དམར་རྩུབས་སལ་སུལ་མང་། དགྲ་བོ་རྒྱུན་མི་ཆད་པའི་ས། །སྤྲེལ་དམར་ཁྲིད་པ་འདྲ་བ་ནི། །དམེ་ཕོ་རྒྱུན་མི་ཆད་པའི་ས། །རི་རྡུམ་མགོ་ལེབ་རི་རྒྱུད་ཆད། །རབས་ཆད་རྒྱུན་མི་ཆད་པའི་ས། །ས་རྡོ་སྐྱ་དཀྲེན་བྱེ་ཕྱག་ཅན། །བསེ་རག་རྒྱུན་མི་ཆད་བའི་ས། །བྲག་གི་འོག་ཏུ་ཆུ་ལྐུག་མང་། །རྐུན་མ་རྒྱུན་མི་ཆད་པའི་ས། །ཕ་ཝང་དིལ་འབུལ་ཤིང་ཟུང་འགྲོགས། །མཚེ་མ་རྒྱུན་མི་ཆད་པའི་ས། །ས་ཆུ་དཀར་ནག་སྔོན་པོ་འདྲེས། །ནལ་མོ་རྒྱུན་མི་ཆད་པའི་ས། །རྒྱབ་ཀྱི་དིལ་འབུར་ལར་ཆད་དེ། །དྭ་ཕྲུག་རྒྱུན་མི་ཆད་པའི་ས། །ཕ་ཝང་བྲེ་གུ་གང་རུང་མགོར། །ཆུ་བྲན་འབབས་རྒྱུན་མེད་པ་ནི། །མུག་ཕྲུག་རྒྱུན་མི་ཆད་པའི་ས། །ཉེར་གསུམ་འཕྲལ་དུ་བར་ཆད་འབྱུང་བའི་ས། །མཐོ་ལ་
གཉན་པའི་ས་མིག་དང་། །མཚོ་གཉན་འགྲམ་དང་ཆུ་མིག་མགོ །ས་རྡོ་རྟགས་ཅན་སོགས་སུ་འང་སྤང་། །ཉེར་བཞི་དུར་སའི་མི་གྲངས་བཟུང་བ་ནི། བྲག་གི་སྒང་རྒྱུད་དིལ་འབུར་དང་། །ཤིང་རྡོ་ལམ་གསུམ་དཀོན་པའི་སར། །ཤིང་གཅིག་ཕ་ཝང་ལམ་ཕྲན་རྣམས། །དེ་ཀུན་ལན་ལ་མི་གྲངས་བཟུང་། །ཐོག་མར་བུ་ཕོ་སྐྱེས་ནག་མོ་ནི། །འཇོག་པོ་ཕོ་མོ་དག་ལ་དཔྱད། །ཕོ་མོ་གང་ཡང་སྐྱེ་བ་རིམ་པ་ཉན། །དེ་རྣམས་སྐྱེས་ན་མ་ནིང་སྐྱེས། །དེ་རྣམས་འདྲེས་པར་དཔྱད་པ་དུར་སའི་གྲངས་བཟུང་། ཉེར་ལྔ་ཁམས་ལྔའི་དུར་ས་བཏབ་པ་ནི། །ནགས་ཚལ་འཐུག་དང་ཤིང་ཕྱུག་སྐྱེས། ཤིང་ཁམས་པ་ཡི་བླ་རི་ཡིན། །ས་བྲག་དམར་པོ་རྩེ་རྣོ་བ། །མེ་ཁམས་པ་ཡི་བླ་རི་ཡིན། །ས་སེར་གྲུ་བཞི་ལྷུན་ཆགས་པ། །ས་ཁམས་པ་ཡི་བླ་རི་ཡིན། །ས་བྲག་དཀར་པོ་རྫ་རི་ནི། །ལྕགས་ཁམས་པ་ཡི་བླ་རི་ཡིན། །རང་རང་རི་ལ་དུར་བཏབ་ན། །དབང་ཐང་རི་ཡིན་བཟང་བར་བཤད། །མ་རིར་བཏབ་ན་ཚེ་རིང་འགྱུར། །བུ་རིར་བཏབ་ན་མི་གྲངས་འཕེལ། །གྲོགས་རི་ལ་བཏབ་ཟས་ནོར་འཕེལ། །དགྲ་རི་ལ་བཏབ་དགྲ་སྣ་མང་། །ཀུན་ལ་མ་བུ་དགྲ་གྲོགས་
བརྩི། །ཉེར་དྲུག་ལོ་སྐོར་བཅུ་གཉིས་དུར་ས་བཟང་བ་ནི། །སྟག་ཡོས་གཉིས་ཀྱི་ས་དགྲ་ནི། །ནུབ་ཕྱོགས་བྲག་དཀར་བྱ་སྤྲེལ་འདྲ། རྟ་སྦྲུལ་གཉིས་ཀྱི་ས་དགྲ་ནི། །བྱང་ཕྱོགས་མཚོ་དང་ཆུ་ཆེན་འབབ། །བྱ་སྤྲེལ་གཉིས་ཀྱི་ས་དགྲ་ནི། །ལྷོ་ཕྱོགས་བྲག་དམར་ས་དམར་ཡོད། །བྱི་ཕག་གཉིས་ཀྱི་ས་དགྲ་ནི། མཚམས་བཞིར་ལྷ་ཁང་མཆོད་རྟེན་ཡོད། །ཁྱི་འབྲུག་གླང་ལུག་ས་དགྲ་ནི། །ཤར་ཕྱོགས་ནགས་ཚལ་ཤིང་གཅིག་ཡོད། །དེར་བཏབ་ཉེས་པ་སྣ་ཚོགས་འོང་། །ཤི་གསོན་གཉིས་ཀྱི་ལོ་ལ་རྩི། །ཉེར་བདུན་འབྱུང་བ་ལྔའི་བརྟག་ཐབས་བརྟན་པ་ནི། དཀར་སྒྲོན་དཀར་ནག་གཉིས་ཡོད་དེ། །དཀར་པོ་གནམ་གྱི་མཆེ་བ་ཡིན། །ནག་པོ་ཕུག་པ་སྐར་ཁུང་ཡིན། །ས་སྒྲོན་གད་པ་མདུང་རྩེ་ཅན། །ཤིང་སྒྲོན་རླུང་གི་གཡབ་མོ་ཅན། །ཆུ་སྒྲོན་ཉི་མའི་མཚོན་ཆ་ཅན། །དེ་ལྟར་འབྱུང་བ་ལྔའི་སྒྲོན། །སྤྱིར་ནི་གང་དུ་བྱུང་ཡང་ངན། །ཁྱད་པར་རང་ཕྱོགས་བྱུང་བ་ངན། །དེ་རྣམས་སྤང་བའི་ས་མིག་ཡིན། །ཉེར་བརྒྱད་དུར་ས་འདེབས་པའི་ས་མིག་རྩལ་བ་ནི། རི་དང་ཐང་གཉིས་གང་ཡང་རུང་། །གཟར་བ་རྣམས་ཀྱི་བདེ་བ་དང་། །བདེ་བ་རྣམས་ཀྱི་གཟར་བ་དང་། །འཇམ་
པ་རྣམས་ཀྱི་རྩུབ་པ་དང་། །རྩུབ་པ་རྣམས་ཀྱི་འཇམ་པ་དང་། །འབུར་བ་རྣམས་ཀྱི་གཤོང་བ་དང་། །གཤོང་བ་རྣམས་ཀྱི་འབུར་བ་དང་། །དེ་ལ་སོགས་པ་རིམ་པར་དཔྱད། །ཉེར་དགུ་བྱེ་བྲག་ས་མིག་བསྩལ་ཐབས་བསྟན་པ་ནི། སྤང་ལུང་གཤོང་བའི་ནང་དུ་ནི། །མེ་ལོང་རྒྱབ་ལྟར་འབུར་བ་དང་། །ས་དབྱིབས་འབུར་བའི་དཀྱིལ་མའི་དཀྱིལ། །མེ་ལོང་ནང་ལྟར་འཇམ་པ་དང་། །སྒང་རྒྱུད་རིང་པོ་མ་ཆད་དཀྱིལ། །འབུར་བའམ་ནི་གཤོང་བ་དང་། །ཐང་ཆེན་དཀྱིལ་དུ་འབྲང་རྒྱས་ལྟར། །མཐོ་འམ་ཡང་ན་དམའ་བ་དང་། །ཤིང་ནག་འཐུག་པོའི་དཀྱིལ་དུ་ནི། །སྤང་འཇམ་ཕྱིང་པ་བཏིང་འདྲ་དང་། །བྲག་རི་ཆེ་བའི་མདུན་རྒྱབ་ཏུ། །སྤང་གི་གཡོགས་པའི་འབུར་གཤོང་དང་། །ཉིན་རེའི་ངོས་་ནས་ཕྱིང་པ་ཙམ། །ཁ་བ་མི་འགྱུ་སྲིབ་བལྟས་དང་། སྲིབ་རིའི་ངོས་ནས་ཕྱིང་པ་ཙམ། །ཉིན་བལྟས་ཁ་བ་འགྱུ་བ་དང་། །གཡའ་སྤང་མཚམས་སུ་ཕྱིང་པ་ཙམ། །རྩུབ་པའི་ནང་དུ་འཇམ་པ་ལྟར། །སྤང་དང་ན་བའི་མཚམས་སུ་ནི། །གུར་ཆུང་འདྲ་བའི་དིལ་འབུར་དང་། །མོ་བཙུན་འདྲ་བའི་ལྟེ་བ་རུ། །ཐེ་ཚོམ་མེད་པར་གདབ་པར་བྱ། །སུམ་ཅུ་ཞིང་སའི་
ལེགས་ཉེས་བསྟན། །ས་ནག་སོ་ནམ་བྱེད་མི་དགོས། །དམར་པོ་སོ་ནམ་བྱེད་པ་ན། །སྔོན་པོ་བྱས་ན་སྐྱེ་བ་ཙམ། །ཞིང་ལ་ཕོ་མིང་མོ་མིང་ལ། གྲུ་བཞི་ཟས་ནོར་ཟླུམ་པོ་དེས། །མི་ཁ་བྱམས་ལ་ཟླ་གམ་ནི། །དཔའ་རྩལ་ཆེ་ཞིང་ཞིང་ལ་ནི། །མོ་མིང་དཔལ་ཆེ་བུ་མོ་མང་། །ཁ་དོག་དཀར་སེར་ངན་པར་བཤད། །ཟུར་གསུམ་སྐད་ཉག་ཞིང་དཀྱིལ་དུ། །ན་བ་ནེའུ་སིང་ཡོད་པ་ངན། །ནར་རིང་སྦལ་ལྕོང་ཉ་གཟུགས་ངན། །ཞིང་དཀྱིལ་ཆུ་མིག་དུག་ཤིང་དང་། །ལམ་དོད་གཤའ་སྣ་ཟུག་པ་ངན། །ཞིང་རྩེ་དགུ་འདུས་ངན། །སོ་གཅིག་ས་དཔལ་གང་རུང་རུ། །ཕྱོགས་བཞིར་འབྱུང་བའི་དགྲ་ཡོད་དཔྱད། །དེ་ཡི་བཅོས་ཐབས་རག་ཙམ་བཤད། །ཤར་ཕྱོགས་ཤིང་གི་དགྲ་བྱུང་ན། །དེ་ལ་གྲི་ལྕགས་འཛེར་བུ་བསྣུན། །ལྷོ་ཕྱོགས་ས་དམར་བྲག་དམར་ལ། །ལུང་དགུའི་ཆུ་བླུག་ནུབ་ཕྱོགས་ན། བྲག་དཀར་བྱུང་ན་དར་མདར་ཕྱར། །ཡང་ན་རྡོ་དམར་བཞག་ཀྱང་ཟེར། །བྱང་ཕྱོགས་ཆུ་ཡི་དགྲ་བྱུང་ན། །རི་བོ་གསུམ་གྱི་ས་སྣ་བླུག །མཚམས་བཞིར་ས་ཡི་དགྲ་བྱུང་ན། །སྐྱེས་ཤིང་བཙུགས་པས་ཕན་པར་བཤད། །ས་ཆ་ཤོ་རལ་བྱུང་བ་ན། །མ་ཎི་ཚ་
ཁང་བྱས་པས་ཕན། །གནམ་སྒྲོན་གཤིན་རྗེའི་མཆེ་བ་ཡིན། །ཆུ་རྡོར་དངུལ་གྱི་རྒྱ་གྲམ་བྲིས། །རབ་གནས་ས་དགྲར་བསྟན་བཞག་ཕན། །གད་པ་མདུང་རྩེར་ཡང་ཕན་ནོ། །ཤིང་སྒྲོན་རེ་གཡབ་བཅད་པར་བྱ། །ཆུ་སྒྲོན་བསུ་བསམ་ས་སྣ་བླུག །རླུང་སྒྲོན་མཆོད་རྟེན་སཱ་ཚས་བཅད། །དེ་སོགས་བཅོས་ཐབས་མཐའ་ཡས་ཀྱང་། །ཡང་གསང་མན་ངག་གདམ་པ་ནི། །ལྕགས་གཞིར་ཟངས་ཀྱི་ཆུ་སྲིན་བྲིས། །ཁང་དུར་ཤར་བཞག་ཤར་ཕྱོགས་ཀྱི། །ས་དགྲ་ཐམས་ཅད་ཐུབ་ངེས་ཡིན། །ཆུ་རྡོར་དངུལ་གྱིས་སེང་གེ་བྲིས། །ལྷོར་བཞག་དེ་ཡང་དེ་ལྟར་རོ། །ཟངས་གཞིར་སྣ་ཚས་འབྲུག་གཟུགས་བྲིས། །ཁང་དུར་ནུབ་བཞག་ནུབ་དགྲ་ཐུབ། །གསེར་རྡོར་གསེར་གྱི་རུ་སྦལ་བྲིས། །བྱུང་བཞག་བྱང་གི་ས་དགྲ་ཐུབ། །བྱང་ཤར་ངན་པ་རྡོ་རྗེའི་ཐོབ། །ཤར་ཕྱོགས་ས་དགྲ་ཡོད་ས་ནས། །རྡོ་བླངས་ངན་པ་ཁྱེར་ཞེས་བྲིས། །ངག་ཏུའང་བརྗོད་བཞིན་བཞག་པས་ཐུབ། །ཤར་ལྷོ་སཱཙྪ་སྣ་ལྔས་ཟློག །ལྷོ་དང་ལྷོ་ནུབ་འང་དེས་ཐུབ་ངེས། །རྐུབ་འདྲ་མི་ཡི་མཚན་མས་ཐུབ། །ནུབ་བྱང་བྱང་གཉིས་མཆོད་རྟེན་ཟློག །ཡང་ན་མོ་མཚན་འདྲ་བ་ནི། །ཚུལ་ཁྲིམས་
འཆལ་སྐྱོན་དེ་ཕྱོགས་ལ། །རྡོ་ཡི་དབང་ཕྱུག་བཞག་པས་ཕན། །རི་སྒྲོན་ལ་ཕག་ནས་ཚུར་ལ། །བལྟས་པ་འདྲ་ན་རྡོ་བཙོན་བཟུང་། །དེ་ཕྱོགས་སྦས་པས་ཐུབ་པར་བཤད། །སོ་གཉིས་ས་དམིགས་དེ་དག་ཏུ། །ཁང་དུར་ལ་སོག་གང་བྱས་ཀྱང་། །བསང་དང་གསེར་སྐྱེམས་གཏོར་མ་འབུལ། །འདོད་དོན་གསོལ་ལ་ས་སློང་བྱ། །རྨི་ལམ་བརྟག་ལ་གནང་་བལྟས་བྱུང་། །དེ་ཚེ་ཁང་དུར་བྱ་བར་འབེབས། །མ་བྱུང་སླར་སློང་ས་དེ་ཡི། །གཞན་དུ་རྟགས་ཅན་རྡོ་ཤིང་རྩར། །ཁམ་ཕུར་རིན་ཆེན་འབྲུ་སྨན་ཟབ། །དེ་ཡི་ས་རྡོར་བཅས་པ་བཞག །དེ་ཉིད་ཉམས་དགའི་ཚལ་དུ་བསམ། །དེ་ཡི་གནས་བདག་དེར་འཕོས་བསྒོམ། །ངག་ཏུ་ཁྱེད་རྣམས་འདིར་བཞུགས་ཤིག །བདག་ལ་ཕ་གི་སློང་ཞེས་དང་། །འཐད་པའི་སྨེང་ཚིག་མང་དུ་ལབ། །ཁམས་ཕོར་ཁ་བཅད་སྦས་པས་འོང་། །ས་བསེན་དག་གིས་མ་བྱིན་ཚེ། །གཏོར་མ་བྱིན་ལ་བདེན་སྟོབས་བརྗོད། །མ་རུང་ས་བདག་སྔགས་དང་ནི། ཏིང་ངེ་འཛིན་གྱིས་བསྐྱད་ནས་སུ། །ཁང་དུར་ལ་སོགས་བྱ་བར་བརྩམ། །དེ་ཡང་དུར་འདེབས་སྐབས་ཡིན་ན། །བླ་ཕོར་བླ་བྱང་བླ་རྡོ་ཡིས། །ས་དེ་མནན་པར་བྱ་བ་ཡིན། །དེ་
ཡང་ས་ཡི་བླ་ཕོར་ནི། །མི་འགྱུར་ཕོ་ཤིང་སྟག་པ་ལ། །སྦོམ་ཕྲ་ལག་ངར་ཙམ་ཞིག་ལ། །རིང་ཐུང་ཁྲུ་གང་པ་གཅིག་ལ། །མགོ་མཇུག་མ་ནོར་གྲུ་བཞིར་གཞོག །རྩ་བ་ཟུར་གསུམ་བྱས་པའམ། །ཟུར་གསུམ་པ་བྱས་ཕྱེད་བཤགས་ལ། །ནང་དུ་ངོས་གཅིག་སྟོད་ལ་ནི། །ཁྱོད་ཡི་མིང་རུས་གཤམ་དུ་ནི། །གནམ་གྱི་ལྷ་ལ་ཕོག་པ་རྣམས། །ལྷ་ལྟར་འཕན་དར་འབྱུང་བར་ཤོག །ས་ཡི་ཀླུ་ལ་ཕོག་པ་རྣམས། །ཀླ་ལྟར་འཕེལ་བ་ཉིད་གྱུར་ཅིག །བདུད་ལ་ཕོག་ན་བདུད་ལྟར་དུ། །དར་ཞིང་རྒྱས་ལ་བཙན་ཕོག་ན། །བཙན་ལྟར་མི་ངོ་རག་པར་ཤོག །ཞེས་བྲིས་ནང་དུ་གཙུག་ཏོར་གྱི། །ཡང་སྙིང་འབྲུ་གསུམ་བྲིས་ཟབ་བཅུག །ཁ་སྦྱར་སྣམ་ཕྲུག་དག་གིས་དྲིལ། །ཕྱི་ལ་བུད་མེད་ཚ་ལྷབས་དཀྲིས། །ཕྱོགས་མཚམས་དབུས་གུར་གདབ་པར་བྱ། །བླ་གཟུགས་ཁམས་ལྔ་འདྲ་བ་ལ། །རྒྱས་པར་བྱ་ཕྱིར་བཅའ་བར་བྱ། །བླ་རྡོ་ཁམས་ལྔ་རིམ་པ་བཞིན། །ས་ཆུ་མེ་ལྕགས་ཤིང་ལྔ་ལ། །གསེར་དངུལ་ཟངས་ལྕགས་གཡུ་རིམ་བཞིན། །བླ་གཟུགས་བྲིས་ལ་བླ་རྟེན་བཅའ། །དེ་དག་བཅས་པས་དུར་ས་ནོན། །སོ་གསུམ་ས་འབེབ་བྱ་བ་ནི། ཞེས་པ་ལོ་
མཚམས་འདོན་ཆའི་གྲལ་ཟུར་དུ་བྲིས་ཡོད་པ་དགེ། ཞེས་པ་ཀརྨ་ཨ་རཱ་གས་ཉེར་མཁོར་སྦྱར་བ་སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།