བོད་ཀྱི་ས་དཔྱད་ཨ་རཱ་གས་མཛད་པ།
བོད་ཀྱི་ས་དཔྱད་ཨ་རཱ་གས་མཛད་པ་བཞུགས་སོ། །
ན་མོ་ཨཱརྱ་མཉྫའི་ཡེ། མི་རྣམས་ཚེ་ལོ་བརྒྱ་པའི་དུས། །དང་པོ་མགོ་ཟུག་དུས་མཉམ་དུས། །ཤིང་ཕོ་བྱི་བའི་ལོ་ལ་ནི། །རྒྱ་ནག་རི་བོ་རྩེ་ལྔ་ཡི། །དཔག་བསམ་ཤིང་གི་ལྦ་བ་ལ། །གསེར་མདོག་བྱིས་སྦ་ལོ་བརྒྱད་པ། །འཕགས་པ་འཇམ་དཔལ་སྐུ་འཁྲུངས་ཏེ། །ལྷ་ཆེན་ཚངས་པ་གདོང་བཞི་དང་། །ཀླུ་རྒྱལ་སྦྲུལ་མགོ་ཅན་དང་ནི། །འཕྲུལ་གྱི་མིབཞི་ལ་སོགས་པས། །རྩིས་དང་ས་ཡི་རྒྱུད་རྣམས་གསུངས། །མིའུ་རིན་ཆེན་ཤི་བའི་དུས། །སྲོག་ནི་གཤེད་མ་འདྲེ་ཡིས་ཁྱེར། །རྣམ་ཤེས་ལས་ཀྱི་རྗེས་སུ་འབྲང་། །བླ་ནི་དུར་ས་དེ་ལ་གནས། །དུར་ས་བཟང་ན་
བླ་ཡང་སྐྱིད། །གསོན་པོ་རྣམས་ལ་ཁ་འཛིན་བྱེད། །དུར་ས་ངན་ན་བླ་ཡང་རྒུད། །གསོན་ལ་སྐྱབས་འཚོལ་མི་ཁྱག་པས། །ན་ཚ་ཤི་ཆད་དར་རྒུད་འོང་། །དེ་ཕྱིར་དུར་ས་ངན་པ་ན། །དུད་འགྲོ་ཡིན་ཡང་བརླག་པར་གསུངས། །ས་དགྲ་ཡོད་ན་ཁང་པ་འགྱེལ། །ཉིན་མཚན་ཚེ་དང་བསོ་ད་ནམས་ལ། །ཟ་ཞིང་རྐུ་བའི་བླ་རུ་འོང་། །དེ་ཕྱིར་ས་འདི་གལ་ཆེའོ། །རྒྱལ་པོ་ཁྲི་སྲོང་ལྡེའུ་བཙན་གྱིས། །ལོ་ཙྩ་བཞི་ལ་རིན་ཆེན་གསེར། །མང་དུ་བསྐུར་ནས་རྒྱ་ཡུལ་བཏང་། །ཧྭ་ཤང་མཁས་པ་མང་པོ་ལ། །གསེར་དངུལ་ཕུལ་ནས་གདམས་ངག་ཞུས། །ས་དཔྱད་སྤོ་མགོ་
མདོ་སྡེ་དང་། །ནག་པོ་སྟག་ཤམ་ས་གཞུང་དང་། །གལ་པོ་ལ་བྱང་ཞེས་བྱ་དང་། །བྱང་ས་གསེར་གཞུང་ཞེས་བྱ་དང་། །ཁྲ་བོ་རི་རྩིས་ཞེས་བྱ་དང་། །རྒན་མོ་མཛུབ་ཚུགས་ཞེས་བྱ་དང་། །བྱེ་མ་ལག་ཁྲིད་ཅེས་བྱ་སོགས། །ཕན་བྱའི་ས་དཔྱད་མང་པོ་དང་། །ནག་པོ་འབུམ་ནག་ཅེས་བྱ་དང་། །གདུག་པའི་ལྕེ་མདུང་དགུ་སྐོར་སོགས། །གནོད་པའི་ས་དཔྱད་མང་པོ་བསླབ། །བོད་དུ་འོང་ནས་རྒྱལ་པོའི་དྲུང་། །ས་མཁན་མང་ར་ལག་སྡུག་དང་། །ལྕོགས་རོ་ཞར་བ་ལ་སོགས་པ། །མཁས་པ་མི་བཞིས་འདི་སྐད་ཞུས། །ཀྱེ། རྒྱལ་པོ་ཆེན་པོ་སྙན་གསོན་དང་། །ཀུན་རྫོབ་བདེན་པའི་ས་དཔྱད་འདི། །དཀར་ནག་འབྱེད་པའི་སྒྲོན་མེ་ཡིན། །སྲིད་རྣམས་འཕེལ་བའི་རྩ་དཀར་ཡིན། །ནོར་རྣམས་སྲུང་བའི་ནོར་ལྷ་ཡིན། །ནད་རྣམས་འཇོམས་པའི་སྨན་པ་ཡིན། །དགྲ་བགེགས་འདུལ་བའི་དགྲ་བླ་ཡིན། །འབྲུ་དང་ལོངས་སྤྱོད་བང་མཛོད་ཡིན། །ཅི་བསམ་འགྲུབ་པའི་ནོར་བུ་ཡིན། །ས་ལ་ཡོན་ཏན་ཀུན་ཚང་ལགས། །ཞུས་པས་རྒྱལ་པོ་རབ་ཏུ་མཉེས། །དེ་ནས་བོད་དུ་དར་བར་བྱས། །གསོན་པོའི་ཁང་པ་གཤིན་དུར་ས། །ལ་ཆེན་ས་དཔྱད་ཐམས་ཅད་འདྲ། །བྱང་
གི་སྟོད་སྨད་ནུབ་བྱང་མཚམས། །དེ་ལ་རྒྱབ་ཀྱི་སྟོན་ས་ཡི་ན། །ཤར་སྨད་ཤར་ལྷོ་ལྷོ་སྟོད་གསུམ། །མདུན་གྱི་སྟོན་ས་བཟང་བ་ཡིན། །ཤར་སྟོད་བྱང་ཤར་གཡོན་ཟུར་བསྟན། །ལྷོ་སྨད་ལྷོ་ནུབ་གཡས་ཟུར་བསྟན། །དེ་འདྲའི་ལུང་པ་ས་རྙེད་སླ། །ཁ་ཡི་རྒྱུ་ཕྱོགས་ལོག་པ་ན། །དཔལ་ཁ་ཡོད་ཀྱང་ཕན་པ་མེད། །ཤར་ནི་ཕྱེས་པ་འདྲ་བ་གཅིག །ལྷོ་ནི་སྤུངས་པ་འདྲ་བ་གཉིས། །ནུབ་ནས་རི་ཡིས་སྐྱོར་འདྲ་གསུམ། །བྱང་ནས་ཡོལ་བ་བྲེས་འདྲ་བཞི། །ས་ཡི་ཀ་བ་རྣམ་བཞི་ཡིན། །དེ་ནི་ཀུན་ལ་གལ་ཆེའོ། ཤར་གྱི་ལམ་ནི་སྟག་སྐྱ་བོ། །གད་པས་བཅད་ན་ས་མདའ་ཕོག །ལྷོ་ཡི་ཆུ་ནི་གཡུ་འབྲུག་སྔོ། །དམའ་དྲགས་མི་མཐོ་དོང་དུ་ལྷུང་། །ནུབ་ཀྱི་བྲག་དམར་བྱ་དམར་མོ། །ལམ་གྱིས་འཕྲད་གཏུབ་རྙི་ཡིས་ཟིན། །བྱང་གི་བྲག་གམ་ཕ་བོང་ནི། །རུས་སྦལ་རྒྱ་བོ་དེ་ཡི་དྲུང་། །ཆུ་མགོ་ལོང་རོ་ཚྭ་ཆུས་འགྲངས། །སྲུང་བཞི་ཚང་ཞིང་སྐྱོན་བཞི་མེད། །མི་ནི་རྒོད་པོ་ཡ་རབ་སྐྱེ། །སྐྱོན་དེས་ཟིན་ན་ནད་པ་འོངས། །གནམ་ནི་གདུག་ཕུབ་འདྲ་བའམ། །འཁོར་ལོ་རྩིབས་བརྒྱད་འདྲ་བ་བཟང་། །ཡོ་དང་ཟུར་གསུམ་བྱུང་བ་ངན། །གནམ་གྱི་མཆེ་བ་ས་ལ་
ཟུགས། །བུད་མེད་དར་མ་འཆི་བ་ཡིན། །ས་ཡི་མཆེ་བ་གནམ་ལ་ཟུགས། །སྐྱེས་པ་དར་མ་འཆི་བ་ཡིན། །སྦོམ་ན་འཁོར་ལོའི་རྩིབས་ཡིན་ཏེ། །ཕྲ་ན་གཤིན་རྗེའི་མཆེ་བ་ཡིན། །ཤར་ནས་བྱུང་ན་གཉེན་ལམ་སྟེ། །ཧ་ཅང་གནོད་པ་མ་ཡིན་ནོ། །ཤར་ལྷོའི་གནམ་ནི་མདའ་སྟོང་འདྲ། །ས་མཁན་ཟ་ཁ་བྱེ་བས་བཟང་། །ཆུ་སྒྲོན་ཉི་མའི་ཟེར་དང་འཐབས། །བྲག་སྒྲོན་ཕུག་པ་སྐར་ཁུང་འདྲ། །ས་སྒྲོན་གད་པ་མདུང་རྩེ་འདྲ། །གནམ་སྒྲོན་བཞི་པོ་སྒྲོན་ཆེན་བཞི། །ཐམས་ཅད་ཀུན་ལ་གནོད་པའོ། །མདུན་དུ་ཆུ་ཤིང་ན་བ་རྒྱས། །རྫ་དང་ཞིང་རྣམས་ཕྱུག་རྩི་ཡིན། །ཤར་ལམ་གྲོགས་ཡིན་ལྷོ་ལམ་གཡང་། །ནུབ་ལམ་ན་ཚ་བྱང་ལམ་དགྲ། །གཡས་གཡོན་ཆུ་གཉིས་བཟང་པོ་སྟེ། །ཆུ་ནི་ལྷོ་འབབས་ནུབ་འབབས་བཟང་། །ཤར་འབབས་ཉི་ཟླ་ཆུ་ཁྱེར་འབྲིང་། །མདུན་རི་རྒྱབ་རི་གཉིས་ཀ་ཡི། །རྩེ་ནི་ཕ་ཁུ་རྒན་རབས་ཏེ། །སྐྱེད་པ་དར་མ་སྨན་ཆུང་གསུམ། །གཡས་ནི་ཆེ་རྒྱུད་གཡོན་ཆུང་རྒྱུད། །བར་ནི་འབྲིང་རྒྱུད་ས་ཡིན་ཏེ། །བཟང་ངན་གང་བྱུང་དེ་ཡིས་ཐོབ། །རྒྱབ་རི་ཕོ་དང་མདུན་རི་མོ། །ཤར་ལྷོ་བུ་མོ་མག་པའི་ས། །དེ་ནས་ལོ་ཁའི་ས་འདེབས་
ནི། །ཤར་གྱི་ཤིང་གཅིག་ནགས་འཐུགས་ནི། །སྟག་ཡོས་ལོ་པའི་ཚེ་བསྲིང་སྟེ། །ཁྱི་འབྲུག་གླང་ལུག་སྲོག་དགྲ་ཡིན། །ལྷོ་ཡི་རྫ་བྲག་དམར་པོ་ནི། །རྟ་སྦྲུལ་སྲོག་བཟུང་བྱ་སྤྲེལ་འཆི། །ནུབ་ཀྱི་བྲག་དཀར་ཆེ་ཆུང་རྣམས། །བྱ་སྤྲེལ་སྲོག་བཟུང་སྟག་ཡོས་འཆི། །བྱང་ནས་ཆུ་བོ་རྒྱུན་འབབ་ནི། །བྱི་ཕག་ཚེ་བསྲིང་རྟ་སྦྲུལ་གསོད། །མཚམས་བཞིའི་ཐང་ཆུང་གྲུ་བཞི་ནི། །ཁྱི་འབྲུག་གླང་ལུག་ཚེ་བསྲིང་སྟེ། །བྱི་ཕག་ལོ་པའི་སྲོག་དགྲ་ཡིན། །མི་རྩ་ཕྲའམ་ན་ཚ་རྒོད། །དེ་ལ་སྲོག་ནི་བརྩི་བར་བྱ། དབུལ་ན་དབང་ཐང་བརྩི་བར་བྱ། །ནད་མང་ལུས་ནི་བརྩི་བར་བྱ། །རུས་དང་དབང་ཐང་ལུས་ཁམས་རྩི། །རང་རང་བླ་རི་བཟང་བ་སྟེ། །དགྲ་རི་ཡིན་ན་དགྲ་བདུད་འོང་། །གྲོགས་ཀྱི་རི་ལ་ནོར་ཕྱུགས་འཕེལ། །ཤིང་ཁམས་པ་ལ་སྒ་ཡི་རུས། །ནགས་རི་རྩེ་རྒྱལ་བླ་རི་སྟེ། །ས་ཁམས་པ་དང་གདོང་གི་དགྲ། །ལྕགས་ཁམས་པ་དང་འབྲུ་ཡི་གྲོགས། །བྲག་དམར་རྫ་དམར་ས་དམར་ནི། །སྒོ་དང་མེ་ཁམས་བླ་རི་སྟེ། །འགྲུ་དང་ལྕགས་ཁམས་པ་ཡི་དགྲ། །ཆུ་དང་ས་ཁམས་དགྲ་ཡི་གྲོགས། །བྲག་དཀར་རྫ་རི་དཀར་པོ་ནི། །ལྕགས་ཁམས་འགྲུ་
ཡི་བླ་རི་སྟེ། །མེ་ཁམས་སྒོ་ཡི་གྲོགས་རི་ཡིན། །ཤིང་ཁམས་སྒ་ཡི་དགྲ་རིའོ། །གཡའ་སྔོན་བྲག་སྔོན་མཚོ་དང་ཆུ། །དབྲ་དང་ཆུ་ཁམས་བླ་རིའོ། །མེ་ཁམས་སྒ་ཡི་དགྲ་རི་སྟེ། །ས་ཁམས་གདོང་གི་གྲོགས་རི་ཡིན། །དེ་རྣམས་རྒྱབ་ཀྱི་དཔྱད་ཡིན་ཏེ། །བླ་རི་རིང་རི་གཅིག་ཡིན་པས། །རང་རི་ལ་བཏབ་ཚེ་རིང་ལ། །གྲོགས་རི་ལ་བཏབ་ནོར་ཕྱུགས་ཤིང་། །དགྲ་རི་ལ་བཏབ་དགྲ་མང་ངམ། །ཚེ་ཐུང་ནད་མང་འབྱུང་བའོ། །རྒས་དུར་དམའ་ན་གཞོན་ཤི་མང་། །གཞོན་དུར་མཐོ་ན་དེ་དང་འདྲ། །མཐོ་དམན་ལོ་གྲངས་མང་ཉུང་དང་། །རུས་ཀྱི་ཆེ་ཆུང་ལ་ཡང་བརྟག །མི་ཡི་གྲལ་དང་འདྲ་བ་ཡི། །ཆུང་དུར་དང་ནི་གོད་ཆོད་ལ། །དམའ་ཞིང་ལུང་པ་དོག་པར་བྱ། །རྒས་དུར་གཡས་གཡོན་ཤིང་གཅིག་ནི། །ཕྱགས་མ་ཡིན་ཏེ་ངན་ན་ཡང་། །ཆུང་དུར་སྲུང་མདའ་ཡིན་པས་བཟང་། །སྟེང་ན་ལམ་གཅིག་གཉའ་ཤིང་ངན། །ཆུང་དུར་གཉའ་ནོན་དགོས་པས་བཟང་། །ཆུང་དུར་ཐད་ཀྱི་ཆུ་མདུད་དེ་།པང་དུ་འོང་འདྲ་སྲིད་མྱུར་ཏེ། །རྦ་རླབས་སྐྱ་ཕྱུར་བུ་ཡིན་ལ། །རྦ་རླབས་ནག་ན་བུ་མོ་འོང་། །གཉན་ནོན་ཆེ་ཆུང་ཤི་གྲངས་དཔྱད། །ཧ་ཅང་ཆེ་ན་ཕ་འཆི་འོ། །འོག་གི་མ་
པང་བདེ་མོ་དགོས། །ཧ་ཅང་ཆེ་ན་མ་འཆི་འོ། །ཐུ་བ་ལྡེམ་ཁུག་ཡེ་མེད་ན། །མ་པང་མེད་ཕྱིར་མི་སོས་སོ། །གོད་གཅོད་གཉའ་ནོན་བྲག་དཀར་པོ། །ཅོག་བུ་གུར་ཙམ་མཁར་ཙམ་བཟང་། །རི་དམར་ས་དམར་གོད་ཡིན་སྤངས། །བྲག་ནག་བྲག་དམར་བརྒྱན་མི་རུང་། བཙན་བདུད་ཤ་ལ་དགའ་བས་ཡིན། །ཆུང་དུར་དང་ནི་གོད་གཅོད་ལ། །སྤྱི་ཡི་ས་དཔྱད་ཚོལ་མི་དགོས། །མདུན་དུ་ཆུ་ཤིང་ན་བ་གཏད། །ན་ཆེན་ན་སོའི་ཕྱུག་པོའི་ས། །ཤུག་པ་སྟག་མ་ཐང་ཤིང་ནོར། །སུ་རུ་ལུག་ལ་སྨྲ་གོ་ར། །སྤེན་ནེ་བ་དང་གླང་ངེའོ། །གླང་མ་མང་ན་འབྲི་མོ་ཕྱུག །གླང་མ་མང་པོ་ཕྱུགས་མང་ངོ་། །གྲོ་བ་ཤུག་པ་ཕོ་བེའུ་མང་། །འོམ་བུ་རྟ་དང་དྲེལ་གྱི་བླ། །མགྱོགས་པའི་ཐད་ཀྱི་ཆུ་ཤིང་ལམ། །སྤྱི་ཡི་ས་དཔྱད་ཐམས་ཅད་ལ། །ལུང་སྟོང་མང་ན་སྤྲང་པོ་འོང་། །ཆུ་ཤིང་ན་བ་ཤིང་ཡོད་ན། །དེ་ནི་ལུང་པ་སྟོང་པ་མིན། །ཁྱད་པར་གསས་མཁར་བརྩེག་པའི་ས། །ས་མཁན་མཁས་པ་མི་བཞི་ཡིས། །ཁྱུང་རྒོད་ནམ་མཁའ་ལྡིང་ཞེས་པའི། །ཁྱད་ཆོས་མན་ངག་དམ་པ་སྟེ། །རི་གསུམ་འདུས་པའི་རྩེ་མོ་ན། །རི་མགོ་མང་པོ་ཞབས་སུ་ཚུད། །དགུ་ཐིག་
དམུ་ཐག་འཐེན་པ་འདྲ། །སྐར་ཚོགས་ས་ཡི་དཔལ་ཁ་འདྲ། །ཕྱོགས་བཞི་གཟའ་ནི་སྒོ་སྲུང་འདྲ། །ཉི་ཟླ་གསལ་བའི་སྒྲོན་མེ་འདྲ། །དེར་བརྩེགས་འགྲོ་དྲུག་བྲན་དུ་ཁོལ། །རྫ་རི་ཆེན་པོའི་དཀྱིལ་སྟོང་ན། །ས་དཔལ་བཟང་པོ་ཡོད་པར་གཅེས། །ལོངས་སྤྱོད་ལྷུན་གྱིས་གྲུབ་པ་ཡིན། །སྤང་རྒྱུད་བཟང་བའི་སྒང་རྒྱུད་ལ། །ས་དཔལ་ཆུ་དཔལ་བཟང་བར་གཅེས། །རྒྱལ་པོའི་བཀའ་བགྲོས་དར་རྒྱས་ས། །ཀ་བ་གནམ་དུ་བཙུགས་འདྲའི་རི། །རྩེ་ལྐོག་ས་དཔལ་བཟང་བར་གཅེས། །ལྷོ་ཕྱོགས་གཡང་ར་བསྐྱིལ་འདྲ་ན། །ནགས་དང་རྫ་རི་འདྲེས་གདའ་ན། །ནོར་ལུག་ཕུན་སུམ་ཚོགས་པ་ཡིན། །སྒང་རྒྱུད་གནམ་དུ་འཐེན་འདྲ་ན། །ཤར་གྱི་ཆུ་ལམ་མགྱོགས་པོ་མང་། །རྨང་པོ་སྲིད་ལས་གྲོལ་བ་ཡིན། །རི་མཐོ་རྩེ་ལ་འགྲོ་ས་མེད། །ཡང་ན་གསེར་མཁར་མི་ལེན་དགོས། །དེ་ཡི་མདུན་གྱི་ས་ཡི་དཔལ། །བཟང་བར་བརྩེག་པ་མན་ངག་ཡིན། །གསས་མཁར་ཡག་དང་དཀར་རྩི་ཡག །མི་རབ་བཅུ་གསུམ་ཡར་ལ་འགྲོ། །ངན་ནའང་དེ་ལྟར་ངན་པ་ཡིན། །ས་ཡི་དཔལ་ཁ་ས་ཡི་དགྲ། །གང་བྱུང་ལོ་སྙིང་དེ་ལ་ངན། །ཤར་སྟོད་སྨིན་དྲུག་ཤར་ས་སྟག །ཤར་སྨད་དགུན་
ཉི་འཆར་ས་ཡོས། །དགུན་ཉི་ལྡོག་དུས་འཆར་ས་ནི། །ཤར་ལྷོ་འབྲུག་གི་ས་མལ་ཡིན། །དེ་བཞིན་ལག་སོར་འཆར་སའི་ལས། །ལྷོ་ཕྱོགས་སྦྲུལ་ཡིན་ཐལ་ས་དང་། །ཉེ་ས་ལྷོ་སྨད་རྟ་རུ་བརྩི། །དགུན་ཉི་ལྡོག་ཉིན་ཐལ་ས་དེ། །ལྷོ་ནུབ་ལུག་ཏུ་བརྩི་བ་དང་། །དགུན་ཉི་ཐལ་ས་ནུབ་སྟོད་སྤེལ། །དབྱར་ཉི་ཐལ་ས་ནུབ་སྨད་བྱ། །དབྱར་ཉི་ལྡོག་དུས་འཆར་ས་ནི། །ནུབ་བྱང་ཁྱི་ཡི་ས་ཡིན་ནོ། །རྔོན་པ་མི་བདུན་ཐལ་ས་ནི། །བྱང་སྟོད་ཕག་གི་ས་ཡིན་ཏེ། །འཆར་ས་བྱང་སྨད་བྱི་བ་ཡིན། །དབྱར་ཉི་ལྡོག་ཉིན་འཆར་འཚམས་ནི། །བྱང་ཤར་གླང་གི་ས་རུ་འདོད། །དེ་དག་སོ་སོའི་ས་མལ་ནི། །ས་དཔལ་བྱུང་ན་སོ་སོར་བཟང་། །ས་དགྲ་ཆུང་ན་གཡུ་ཆུང་དར། །བྱིས་སྦྲ་གཡུ་ཕུད་ཅན་ཞིག་འཆི། །ས་དགྲ་ཆེ་བ་ཁྲབ་ཅན་ཙམ། །སྐྱེས་པ་ཁྲབ་ཆོག་འཆི་བ་ཡིན། །འདུག་ན་བརྒྱ་རེ་ཤོང་ཙམ་ཡིན། །ཆེ་ན་སྒྲོན་ནི་ཅུང་ཟད་དྲག །ནུབ་ཏུ་བསྟན་འདྲ་བཟང་འདྲ་ཡིན། །ཉི་ཟླས་སྐྱ་ལམ་བསྟན་པ་ངན། །སྟེང་དུ་འཕྲུ་བཙུགས་འདྲ་བ་དང་། །བྱ་མཆུ་འདྲ་བ་ས་མཁན་འཆི། །མདུན་གྱི་གཡས་གཡོན་མདའ་འཕེན་ཚུན། །ཚུར་ལ་མཆུ་ཡོད་བྲག་ཕ་
བོང་། །ས་མཁན་རྟ་ནི་འཆི་འམ་བོར། །འོག་ནས་ཕྱིར་ལ་འཇབ་འདྲ་ནི། །སྒོ་ཁྱི་ཡིན་བཟང་ཕར་འཇབ་ན། །རྐུན་ངོ་ཡིན་པས་ནོར་དོགས་བྱ། །བླ་མ་ཡོན་ཏན་གྱིས་བསྐུལ་བས། །ཉེར་མཁོ་གོ་བར་བདེ་བ་འདིས། །འགྲོ་བ་བདེ་ལེགས་རྒྱས་གྱུར་ཅིག །དེ་སྐད་རྭ་ཨ་སྱ་ཡིས། །ཤིང་འབྲུག་ཁྲུམས་སྟོད་ཚེས་གཅིག་ལ། །གང་དྲན་འཕྲལ་དུ་བྲིས་པའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།