ས་དཔྱད་རིན་ཆེན་གཏེར་མཛོད།
ས་དཔྱད་རིན་ཆེན་གཏེར་མཛོད་ཅེས་བྱ་བ་བཞུགས་སོ།
ན་མོ་ཨརྱ་མཉྫའི་ཡེ། འཇམ་དཔལ་དབྱངས་ལ་ཕྱགས་འཚལ་ནས། །ས་དཔྱད་ཉུང་བསྡུས་གསལ་བཤད་བྱ། །ཕན་ཡོན་ཉེས་དམིགས་སྤྱི་བྱེ་བྲག །གདབ་ལུགས་དང་བཅས་བསྡོམས་ལྔའོ། །དང་པོ་ས་ཡི་ཕན་ཡོན་ནི། །ཕ་མྱེས་ཤི་བའི་རུས་པ་ལ། །གསོན་པོའི་བླ་ཆེ་བརྟན་པར་བྱེད། །ས་དཔལ་བཟང་དང་ལྡན་གྱུར་ན། །གསོན་པོ་བཀྲ་ཤིས་བདེ་སྐྱིད་ལྡན། །འཇིག་རྟེན་འདི་ན་མི་དར་ཞིང་། །བཙན་ཕྱུག་ནོར་དང་ལྡན་པར་འགྱུར། །ཉེ་འཁོར་བྲན་ཡང་རྒྱས་པར་འགྱུར། །དེ་དག་སྣང་གསལ་སྒྲོན་མེར་གསུངས། །མཁས་པ་མི་བཞིས་འདི་སྐད་གསུངས།
ཀུན་རྫོབ་བདེན་པའི་ས་དཔྱད་འདི། །དཀར་ནག་ཕྱེ་བའི་སྒྲོན་མེ་ཡིན། །བདེན་རྫུན་འབྱེད་པའི་ལྡེ་མིག་ཡིན། །སྲིད་རྣམས་འཕེལ་བའི་རྩ་དཀར་ཡིན། །ནོར་རྣམས་འཕེལ་བའི་ནོར་ལྷ་ཡིན། །ནད་རྣམས་འཇོམས་པའི་སྨན་བླ་ཡིན། །བགེགས་རྣམས་འདུལ་བའི་དགྲ་བླ་ཡིན། །ལོངས་སྤྱོད་ཕྱུག་པའི་བང་མཛོད་ཡིན། །ཅི་བསམ་འགྲུབ་པའི་ནོར་བུ་ཡིན། །དེ་བས་ས་ལ་ཡོན་ཏན་ཚང་། །ཞེས་གསུངས་སོ། །གཉིས་པ་ཉེས་དམིགས་བཤད་པ་ནི། ས་རྒྱུད་ངན་སར་བཏབ་གྱུར་ན། །བླ་ཆེ་ཉམས་པས་སྡུག་བསྔལ་འགྱུར། །བྱོལ་སོང་དག་གི་དུར་བཏབ་
ཀྱང་། །མི་ཐོགས་མྱུར་དུ་ཕུང་བར་འགྱུར། །གླིང་བཞི་མི་ལ་སྨོས་ཅི་དགོས། །སྣང་གསལ་སྒྲོན་མེའི་གཞུང་ལས་གསུངས། །དེ་ཕྱིར་ལེགས་པར་དཔྱད་པར་བྱ། །དང་པོ་སྤྱི་ལ་དཔྱད་པ་ནི། །ནུབ་སྨད་ནུབ་བྱང་བྱང་སྟོད་སྨད། །འདི་བཞི་རྒྱབ་ཀྱི་གཏད་ས་ཡིན། །ཤར་སྨད་ཤར་ལྷོ་ལྷོ་སྟོད་སྨད། །འདི་བཞི་ཁ་ཡི་རྒྱུ་ས་ཡིན། །དེ་མ་ཡིན་པར་མི་རུང་ངོ་། །ནམ་མཁའ་ཟླུམ་ལ་ཕྱོགས་མཚམས་རྣམས། །འཁོར་ལོའི་རྩིབས་ལྟར་ཅུང་ཟད་གསལ། །ས་གཞི་ལྷུན་འཐུག་མདུན་རྒྱབ་འཇམ། །ཤར་ཕྱེས་ལྷོ་སྤུངས་ནུབ་འདེན་པ། །བྱང་ཕྱོགས་མཐོ་ཞིང་བསྐྱོལ་བ་ནི། །ས་ཡི་ཀ་བ་བཞི་ཞེས་བྱ། །ཤར་སྟོད་ལམ་ནི་སྟག་སྐྱ་བོ། །ལྷོ་ཡི་ཆུ་ནི་གཡུ་འབྲུག་སྟེ། །ནུབ་ཀྱི་ས་བྲག་བྱ་དམར་མོ། །བྱང་གི་རྫ་བྲག་རུ་སྔལ་ཡིན། །སྲུང་བཞི་འཛོམས་ན་དཔའ་རྒོད་འཇོམ། །རྒྱབ་རི་རྩེ་རྒྱལ་རི་རྒྱུད་བཟང་། །གཡས་གཡོན་ཆུ་གཉིས་མདུན་དུ་འཁྱིལ། །ཐད་དུ་ཆུ་ཤིང་ལམ་གསུམ་འཛོམས། །རྫ་འམ་སྤང་འབུར་ན་བ་རྒྱས། །དེ་འདྲར་བཏབ་ན་ཕུན་སུམ་ཚོགས། །དེ་རྣམས་ཀུན་ལ་འཛོམ་དགོས་སོ། །ཀུན་ལ་གནོད་པའི་ས་དགྲ་ནི། །གནམ་མཆེ་ས་མཆེ་ཟུག་པ་དང་། །
གད་པ་མདུང་འདྲ་ས་ཕུག་དང་། །བྲག་གི་སྐར་ཁུང་བྲག་ཕུག་དང་། །ཆུ་སྒྲོན་ཉི་མའི་ཟེར་འོད་ཅན། །ཤིང་ནག་གཡབ་མོ་བྱེད་འདྲ་དང་། །ཚུར་ལ་འཇིབ་འདྲའི་ཕ་ཝང་རྣམས། །ས་མལ་གང་བྱུང་དེ་ལ་གནོད། །བྱང་ཕྱོགས་ཤོ་དང་བྱང་ལམ་དོད། །ལུང་མདའ་ཤོ་ན་བཀྲ་མི་ཤིས། །ནུབ་ཕྱོགས་ཕྱེས་ཤིང་ནུབ་ལམ་ཟུག །ཤར་ཕྱོགས་མཐོ་ན་ནི་ཚ་རྒོད། །སྟེང་ལམ་གོང་གི་ཡུར་བས་བཅད། །མི་རྒྱུད་ཆད་དམ་ཁ་ཉེས་འོང་། །སྟེང་དང་འོག་གི་ཆུ་མིག་དང་། །གཡས་གཡོན་ཐད་ཀྱི་ལུང་སྟོང་དང་། །ཆུ་ཆད་ལམ་ཆད་མང་པོ་དང་། །འབབ་ཆུ་རེས་འབབ་རེས་སྐམ་དང་། །ཐད་ཀྱི་ས་ཕུག་གྲོགས་རལ་དང་། །ས་གཞི་བྱེ་སག་སྐྱ་བཀྲེན་རྣམས། །དར་གུད་དབུལ་ཕོངས་ཡོང་བའི་ས། །གཡས་གཡོན་ནུབ་ཀྱི་ཤིང་གཅིག་དང་། །ལམ་ཕྲན་མང་པོའི་སྣ་ཟུག་དང་། །ལམ་ལ་རྒྱ་གྲམ་མང་པོ་དོད། །ཐད་ནས་རི་སྣ་བྲག་ཟུར་ཟུགས། །བྲག་དམར་ཁ་འདྲ་བྱུང་བ་ནི། །ཁ་སྨྲས་་འོང་ངམ་གྲི་ངོ་ཡིན། །གལ་ཏེ་ས་དཔལ་ཅི་བཟང་ཡང་། །མཚོ་གཉན་ཆུ་མིག་གཉན་པོ་དང་། །ལྷ་འདྲེ་དྲག་པོ་གནས་པའི་རྩར། །བཏབ་ན་མི་རུང་སྣ་དགུ་འབྱུང་། །དེ་རྣམས་
ཀུན་ལ་འཛེམ་པར་བྱ། །བྱེ་བྲག་འབྱུང་བའི་དུར་རིགས་གཉིས། །རྒྱབ་རིའི་འབྱུང་བ་དཔྱད་པ་ནི། །ནགས་རི་ཤིང་ལ་སྤང་རི་ས། །བྲག་དམར་རི་དམར་མེ་ཡི་ཁམས། །གཡའ་སྔོན་ཆུ་སྔོན་ཆུ་ཡི་ཁམས། །རྫ་བྲག་དཀར་པོ་ལྕགས་ཀྱི་ཁམས། །དབང་ཐང་རུས་ཁམས་གཙོ་ཆེར་བརྩི། །སྤྱིར་ནི་རང་རིར་བཏབ་ན་བཟང་། །མ་རིར་བཏབ་ན་ཚེ་རིང་ཞིང་། །བུ་རིར་བཏབ་ན་བུ་རྒྱུད་འཕེལ། །གྲོགས་རིར་བཏབ་ན་ནོར་ཕྱུགས་འཕེལ། །སྐྱབ་རི་ཞེས་བྱ་དགྲ་རི་སྟེ། །ཤི་ཁ་ཆེན་པོ་བྱེ་ན་བཏབ། །དེ་མིན་བཏབ་ཏུ་མི་རུང་ངོ་། །མི་རྒྱུད་ཕྲ་ཚུན་སྲོག་ལ་བརྩི། །ན་བུ་མང་ན་ལུས་ལ་རྩི། །ཟས་ནོར་དབུལ་ན་དབང་ཐང་རྩི། །ཡོན་ཏན་ཅན་ལ་རླུང་རྟར་རྩི། །དེ་དག་འབྱུང་བའི་དཔྱད་ཡིན་ནོ། །ལོ་སྐོར་བཅུ་གཉིས་ས་དཔྱད་པ། །ཤར་གྱི་ནགས་འཐུག་ཤིང་གཅིག་ནི། །མཚམས་བཞི་ལོ་པའི་ས་དགྲ་ཡིན། །ལྷོ་ཡི་བྲག་དམར་ས་དམར་ནི། །བྱ་སྤྲེལ་ལོ་པའི་ས་དགྲ་ཡིན། །མཚམས་བཞི་ལྷ་ཁང་གྱང་རལ་དང་། །ལྷོ་ནུབ་ཐང་ཆེན་གྲུ་བཞི་ནི། །བྱི་ཕག་ལོ་པའི་ས་དགྲ་ཡིན། །ནུབ་ཀྱི་བྲག་དཀར་ཆེ་ཆུང་ནི། །སྟག་ཡོས་ལོ་པའི་ས་དགྲ་ཡིན། །བྱང་གི་ཆུ་བོ་རྒྱུན་འབབ་
ནི། །རྟ་སྦྲུལ་ལོ་པའི་ས་དགྲ་ཡིན། །ཤི་གསོན་གཉིས་ཀའི་ལོ་སྙིང་ལ། །ས་དགྲ་དེ་དག་མེད་པར་གཅེས། །ད་ནི་སོ་སོའི་ས་མལ་བཤད། །ཤར་སྟོད་ཆེ་རྒྱུད་སྟག་ལོ་པ། །ཤར་དབུས་འབྲིང་རྒྱུད་ས་མལ་ཡིན། །ཤར་སྨད་ཆུང་རྒྱུད་ཡོས་ལོའི་ས། །ཤར་ལྷོ་འབྲུག་དང་བུ་སྲིང་ས། །ལྷོ་སྟོད་རྟ་དྲེལ་སྦྲུལ་ལོའི་ས། །ལྷོ་དབུས་ནོར་གྱི་ས་ཡིན་ནོ། །ལྷོ་སྨད་ར་ལུག་རྟ་ལོའི་ས། །ལྷོ་ནུབ་མ་ཕྱི་དགྲ་ཁམས་དང་། །ལུག་ལོ་པ་ཡི་ས་མལ་ཡིན། །ནུབ་སྟོད་མནའ་མ་ཆེ་བ་དང་། །སྤྲེལ་ལོ་པ་ཡི་ས་མལ་ཡིན། །ནུབ་དབུས་མནའ་མ་འབྲིང་བ་དང་། །དཀོར་ནོར་རྣམས་ཀྱི་ས་ཡིན་ནོ། །ནུབ་སྨད་མནའ་མ་ཆུང་བ་དང་། །བྱ་ལོ་པ་ཡི་ས་མལ་ཡིན། །ནུབ་བྱང་བྲན་དང་དང་སྒོ་ཁྱི་དང་། །ཁྱི་ལོ་པ་ཡི་ས་མལ་ཡིན། བྱང་སྟོད་ཕག་དང་བོང་བུ་དང་། །ཕག་ལོ་པ་ཡི་ས་མལ་ཡིན། །བྱང་དབུས་གཙོ་བོ་དཔོན་གྱི་ས། །བྱང་སྨད་བྱི་ལོ་ཞང་ཉེའི་ས། །བྱང་ཤར་མག་པ་གླང་ལོའི་ས། །དེ་རྣམས་ཕྱོགས་མཚམས་ས་མལ་ཡིན། །ས་མིག་འདེབས་སའི་ས་མལ་ནི། །གཡས་སྟོད་སྐྱེས་པ་ཆེ་རྒྱུད་ས། །གཡས་སྨད་མ་སྲིང་བུ་མོར་དབང་། །གཡོན་སྟོད་སྐྱེས་པ་
ཆུང་རྒྱུད་ས། །གཡོན་སྨད་མནའ་མའི་ས་མལ་ཡིན། །དཀྱིལ་སྟོད་འབྲིང་རྒྱུད་ས་ཡིན་ལ། །འོག་ནས་རིམ་བཞིན་རྟ་ནོར་ལུག །བ་ར་བྲན་དང་སྒོ་ཁྱི་དབང་། །དེ་རྣམས་རྒྱབ་ཀྱི་ས་མལ་ཡིན། །ལེན་གྱི་རྩེ་མོ་དགྲ་ས་ཡིན། །ལེན་དཀྱིལ་གྲོགས་ས་འཆུག་མེད་ཡིན། །གཞན་རྣམས་གཡས་གཡོན་དཀྱིལ་དང་གསུམ། །རྒྱབ་རི་ལྟ་བུར་དཔྱད་པ་འདྲ། །ས་མལ་དེ་དང་དེ་རྣམས་ལ། །ས་དགྲ་གང་བྱུང་དེ་ལ་ངན། །ཆུ་དཔལ་ན་དཔལ་ཤིང་དཔལ་དང་། །ལམ་དཔལ་རྡོ་ཤལ་དེའུ་མགོ་དང་། །ནོར་བུ་དཔལ་བེའུ་འདྲ་བ་དང་། །བཟང་པོའི་ས་དཔལ་གང་བྱུང་བ། །ས་མལ་གང་བྱུང་དེ་ལ་བཟང་། །དུར་རིགས་བཀྲ་དང་སྲི་གཉིས་ཏེ། །དཔོན་རིགས་རྒྱུད་དང་ཡོན་ཏན་ཅན། །དྲུག་ཅུ་ཡར་འདས་བཀྲ་རིགས་ཏེ། །ས་མིག་མཐོ་སར་བཞག་པར་བྱ། །ཇི་ལྟར་ལོ་གྲངས་ཉུང་བ་བཞིན། །ས་མིག་དམའ་བའི་ས་རུ་བཞག །རབས་ཆད་གྲི་བོ་མཛེ་ཅན་དང་། །གདུག་པའི་ནད་ཀྱིས་ཤི་བ་རྣམས། །གཉའ་གནོན་ཆེ་ཞིང་དམའི་སར་གདབ། །ཁྱད་པར་ཆུང་དུར་ས་དཔྱད་ནི། ལམ་དང་བྲེ་གུས་གཉའ་གནོན་བྱ། །གཉའ་གནོན་ཆེ་ན་སྲི་སྒབ་ཆད། །ཡང་ན་ཕ་ལ་ངན་པ་ཡིན། །
ཤི་གྲངས་མང་ན་ཆེ་བར་བྱ། །གཡས་ན་འབྲས་བུ་ཅན་གྱི་ཤིང་། །སྲུང་མདའ་ཡིན་པས་དགོས་པར་བཤད། །འོག་ཏུ་སྤང་ཐང་འདོམ་གང་ངམ། །བརྒྱད་ལས་ཡངས་བར་མི་བྱའོ། །མ་པང་ཡིན་པས་འཇམ་ན་བཟང་། །ཐད་གར་ཆུ་དཔལ་སྒྲ་ཆེན་འབབ། །གཡུ་འབྲུག་མ་བུ་བསྣུན་བསྲེས་ཏེ། །ཆུ་བྲན་ཆུ་ཆེན་འདྲེས་པ་དགོས། །ཆུ་སྐད་བཟང་ན་བུ་འབྱུང་ཞིང་། །སྐད་མེད་འཁྱིལ་ན་བུ་མོ་ཡོང་། །གཡས་གཡོན་ཕ་བོང་རྡོ་མཆུ་ནི། །སྲེ་མོང་ཚུར་ལ་འཇབ་འདྲ་ངན། །ཕ་བོང་རྡོ་ལ་རག་རྒྱུག་ནི། ཆུང་དུར་ཚོགས་འདུས་ཡིན་ཟེར་བཟང་། །དེ་ནས་ནོར་ཕྱུགས་གོད་སྲི་ལ། །བྱ་དཀར་སྤྲེལ་དཀར་སྦྲུལ་དཀར་དང་། །ཁྱི་དཀར་ལ་སོགས་འདྲ་བ་ཡི། །དྲེའུ་དཀར་པོས་གཉའ་གནོན་བྱ། །མདུན་དུ་ན་བ་ཆུ་དཔལ་དང་། །ཤིང་སྣ་ཚོགས་པའི་ས་རུ་ཐོབ། །དེ་ཡང་དམའ་ཞིང་དོག་པར་བྱ། །བྲག་ནག་བྲག་དམར་ས་ཤིས་དམར། །ཚུར་ལ་འཇབ་འདྲའི་ཕ་བོང་རྣམས། གོད་ངོ་ཡིན་པས་རབ་ཏུ་འཛེམ། །སེ་བ་ཤུག་པ་རྟ་ཡི་ཤིང་། །ཉ་སྦྱིད་ཐང་ཤིང་ནོར་ལ་རྩི། །སྤེན་ནེ་གླིང་མ་བ་དང་གླང་། །སྨྲ་ག་སྟག་པ་ར་ཡིན་ནོ། །སུ་རུ་ལུག་གི་བླ་ཤིང་
ཡིན། །རང་རང་བླ་ཤིང་མང་སར་གདབ། །དེ་ཡན་བྱེ་བྲག་ས་དཔྱད་ཐལ། །ད་ནི་གདབ་ལུགས་ཅུང་ཟད་བཤད། །སྤྱིར་ནི་ས་དཔྱད་བཟང་ན་ཡང་། །གདབ་པའི་ས་མིག་འདི་ལྟར་ཏེ། །འབུར་གྱི་གཤོང་དང་གཤོང་གི་འབུར། །བུད་མེད་སྦྲུམ་མའི་ལྟོ་འདྲ་བའི། །དབུས་ནི་ཅུང་ཟད་དམའ་བའི་ས། །རྩུབ་པའི་འཇམ་དང་འཇམ་པའི་རྩུབ། །དེ་དག་ས་མིག་ཡིན་པས་གདབ། །གྱེན་དུ་མདའ་རྒྱང་མན་ཆོད་དུ། །ཐུར་དུ་རྒྱུག་འདྲའི་བྲག་ཕ་ཝོང་། །ཤིང་གཅིག་ཤིང་སྐམ་བྱུང་བ་ན། །ས་མཁན་རང་གི་ལྟག་བདུད་ཡིན། །འོག་ཏུ་མདའ་རྒྱང་ཡན་ཆོད་དུ། །ཡར་ལ་འཇབ་འདྲིའི་ཕ་ཝོང་ནི། །རྐུན་ངོ་ཡིན་ཏེ་རྟ་ལ་གནོད། །མར་ལ་འཇབ་འདྲ་སྒོ་ཁྱི་ཡིན། །སྟེང་དུ་བྲག་ལེབ་ཡོད་པ་ནི། །སྤྱི་བོའི་གཡའ་ལེབ་ཡིན་པས་ངན། །འོག་གི་བྲག་ལེབ་བཤས་གདན་ཡིན། །སྒྲོན་ནི་ཆུང་ཡང་གནོད་པ་ཆེ། །བྲ་བ་བྱི་བ་ཙམ་ཡང་གནོད། །དེ་ཕྱིར་ཞིབ་ཏུ་དཔྱད་བྱས་ནས། །དེ་ནས་ས་འབེབས་རྒྱས་པར་བྱ། །སྣང་བརྒྱད་དག་པ་གསེར་ཐིག་དང་། །ཉེས་པ་ཀུན་སེལ་བཀྲ་ཤིས་བརྩེགས། །ཧོ་ཡི་ཕྱག་རྒྱ་ལ་སོགས་བཀླག །དཀར་གཏོར་འབུལ་ཞིང་ཤེལ་ཚིགས་གཏོར། །
དེ་ནས་དམར་དུར་ཡིན་ན་ནི། །མགོ་བོ་བྱང་གི་ཕྱོགས་སུ་བསྟན། །གཞོགས་གཡས་འོག་ཏུ་བཙུགས་ནས་ནི། །ཁ་ནི་ནུབ་ཏུ་རྒྱུ་བ་དང་། །ཡང་ན་ས་དཔལ་བཟང་བར་བསྒྱུར། །ཤིང་ཤུན་ཐག་པས་དམ་བཏགས་ནས། །མཆིན་ཁྲག་དེ་ངུ་འབོ་བར་བྱ། །རྗེས་ནས་རུས་པའི་ཕྲེང་བ་བསྡུས། །ས་མིག་སྟེང་དུ་སྤུང་ངམ་བརྡུང་། །ཐལ་སོལ་ཡིན་ན་སར་སྦས་སམ། །ཡང་ན་རྡོ་ནི་སྤུངས་བྱས་ལ། །རླུང་གིས་གཞན་དུ་མི་གཏོར་བའི། །གཞུག་པ་དེ་རུ་ཐིམ་པར་བྱ། །དཀར་རྩི་ཡིན་ན་རྫ་བུམ་ལ། །བཀྲ་ཤིས་རྟགས་བརྒྱད་སྲུང་བཞི་བྲི། །ནང་དུ་བླ་ཤིང་གྲུ་བཞི་ལ། །ཨོཾ་ཨཱཿཧཱུྃ་སོགས་བྲིས་པ་ལ། །དབྱངས་གསལ་རྟེན་འབྲེལ་སྙིང་པོ་དང་། །བཀྲ་ཤིས་ཚིགས་བཅད་བྲིས་པས་དྲིལ། །འབྲུ་སྣ་རིན་ཆེན་སྣ་ཚོགས་བཅས། །རུས་པ་མི་ཡི་ཆགས་རིམ་ལྟར། །མགོ་མཇུག་མ་ནོར་པ་རུ་བླུག །རུས་མཁར་འདོན་ལ་གྲུ་གང་སར། །གྲོ་ཤུན་ཤུག་ཤུན་ལྕིབ་བྱས་ལ། །སྲུང་བཞི་་ཕྱོགས་ནི་མ་ལོག་པར། །ཤར་སྟག་ལྷོ་འབྲུག་ཡོད་པར་བྱ། །ནུབ་བྱ་རུས་སྦལ་བྱང་ལ་བསྟན། །སས་གཡོགས་མི་ཡིས་མི་མཐོང་སྦ། །རབ་ཏུ་བཅགས་ཤིང་དམ་པར་བརྡུང་། །
སྤང་གི་གྲས་མཚམས་ལེགས་པར་བསྒྲིགས། །བཙལ་ཡང་མི་ཚེལ་པ་ཞིག་བྱ། །ས་ལ་རྒྱབ་པའི་ས་མིག་གསུབ། །གལ་ཏེ་ས་དེ་བཟང་གྱུར་ཀྱང་། །རྗེས་ནས་སྟེང་དུ་ས་ཤུས་དང་། །བྲག་ཞིག་བྱུང་ན་སྤྲོ་བར་བྱ། །མི་རྒན་གཡང་ཅན་ཡང་ཚ་མཐོང་། །བྱེ་བྲལ་མ་བྱུང་མི་ཚེར་སྐྱིད། །དེ་འདྲའི་དཀར་རྩི་མཛོད་ཕུག་ཏུ། །མཚུན་བཅོས་གཡང་སྐྱབས་བྱས་ལ་བཞག །ས་གཞུང་མང་དུ་མཐོང་བ་དང་། །ཞལ་ཤེས་འགའ་ཞིག་ཡོད་པ་རྣམས། །ཚིག་ཉུང་དོན་འདུས་གོ་བདེ་བར། །༧ རཱ་གའི་མིང་ཅན་དྲང་སྲོང་གིས། །བློ་གསལ་རྣམས་ལ་ཕན་སྙམ་ནས། །ཐུན་མཚམས་ཞིག་ལ་ཚང་བར་བྲིས། །འགལ་འཁྲུལ་མཁས་པའི་དྲུང་དུ་བཤགས། །དགེ་བས་འགྲོ་བ་བདེ་ལྡན་ཤོག །སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།