བསྟན་རྩིས་གསལ་བའི་མེ་ལོང་།
བསྟན་རྩིས་གསལ་བའི་མེ་ལོང་བཞུགས་སོ། །
ན་མཿཤྲཱི་ཀཱ་ལ་ཙཀྲ་ཡེ། སྲིད་ཞིའི་དཔལ་གྱུར་བཅོམ་ལྡན་འདས། །དཔལ་ལྡན་དུས་འཁོར་ལ་བཏུད་ནས། །བསྟན་རྩིས་རྣམ་གྲངས་མང་པོ་རྣམས། །གོ་བདེའི་ཚིག་གིས་ཉུང་བསྡུས་བརྗོད། །དཔལ་ལྡན་ཇོ་བོ་རྗེ་ཡི་ལུགས། །སྟོན་པ་ཤིང་གླང་ལ་འཁྲུངས་ནས། །ད་ལོ་ལྕགས་ཡོས་ཡན་ཆད་ལ། །སུམ་སྟོང་བརྒྱད་བརྒྱ་རེ་ལྔ་སོང་། ༈ །བཅོམ་ལྡན་རིག་དྲག་འཚོའི་དང་ཞིང་། །བཞེད་པ་འདི་དང་མཐུན་པ་ཡིན། །ཁ་ཆེ་པཎ་ཆེན་བཞེད་པ་ལ། །སྟོན་པ་མེ་བྱ་ལ་འཁྲུངས་ནས། །ད་ལོ་ལྕགས་ཡོས་ཡན་ཆད་ལ། །ཉིས་སྟོང་གཉིས་བརྒྱ་དོན་ལྔ་སོང་། ༈ །ས་
སྐྱ་པཎྜི་ཏ་ཡི་ལུགས། །སྟོན་པ་ས་འབྲུག་ལ་བལྟམས་ནས། །ད་ལོ་ཡན་གྱི་ལོ་གྲངས་ནི། །སུམ་སྟོང་བརྒྱད་བརྒྱ་རེ་བཞི་སོང་། །སྟོན་པ་ས་འབྲུག་ལ་འཁྲུངས་བ། །ནག་རྩིས་རྒྱུད་ཆེན་འགའ་ནས་གསུངས། ༈ །བུ་སྟོན་རིན་ཆེན་གྲུབ་ཀྱི་ལུགས། །སྟོན་པ་མེ་རྟ་ལ་འཁྲུངས་ནས། །ད་ལོ་ལྕགས་མོ་ཡོས་ལོ་ཡན། །གཉིས་སྟོང་ལྔ་བརྒྱ་རེ་དྲུག་སོང་། །དུས་ཞབས་དོན་འགྲུབ་ཀུན་དགའ་དང་། །མཁན་ཆེན་བསོད་ནམས་བཟང་པོ་དང་། །ལོ་ཆེན་ནམ་མཁའ་བཟང་པོ་དང་། །བྱང་བདག་རྣམ་རྒྱལ་གྲགས་པ་སོགས། །མཁས་པ་མང་པོ་བཞེད་པ་མཐུན། ༈
སྟོན་པ་མེ་ཡོས་ལ་འཁྲུངས་ནས། །ད་ལོ་ལྕགས་ཡོས་ཡན་གྱི་ལོ། །གཉིས་སྟོང་བཞི་བརྒྱ་ཉི་ཤུ་ལྔ། །སོང་བར་རང་བྱུང་རྡོ་རྗེའི་བཞེད། ༈ །ནེལ་པ་པཎྜི་ཏ་ཡི་ལུགས། །སྟོན་པ་ཆུ་བྱི་ལ་བལྟམས་ནས། །དེང་སང་ལྕགས་ཡོས་ཡན་ཆད་ལ། །སུམ་སྟོང་བརྒྱད་བརྒྱ་དོན་དགུ་སོང་། ༈ །གྲུབ་ཆེན་ཨོ་རྒྱན་པ་ཡི་ལུགས། །རྒྱལ་བ་ལྕགས་ཁྱི་ལ་འཁྲུངས་ནས། །ད་ལོ་ལྕགས་ཡོས་ཡན་གྱི་ལོ། །གཉིས་སྟོང་སུམ་བརྒྱ་གྱ་གཉིས་སོང་། ༈ །ཕ་རྒན་གཡུང་སྟོན་ཞིག་པོའི་ལུགས། །རྒྱལ་བ་ཤིང་བྱི་ལ་བལྟམས་ནས། །ད་ལྟ་ལྕགས་ཡོས་ཡན་ཆད་ལ། །གཉིས་སྟོང་དྲུག་བརྒྱ་དང་ནི་དགུ། །དཔའ་བོ་གཙུག་ལག་ཕྲེང་བས་བཞེད། །ཐུབ་དབང་ཤིང་གླང་ལ་འཁྲུངས་ནས། །ད་ལོ་ཡན་ལ་ལོ་ཡི་གྲངས། །གཉིས་སྟོང་དྲུག་བརྒྱ་དང་ནི་བརྒྱད། ༈ །རང་ས་ངག་དབང་གྲགས་པའི་ལུགས། །ཤིང་སྦྲུལ་སྟོན་པ་སྐུ་བལྟམས་ནས། །ལྕགས་ཡོས་ལོ་འདི་ཡན་ཆད་ལ། །གཉིས་སྟོང་གཉིས་བརྒྱ་ལོ་ངོ་དྲུག ༈ ། དཔལ་ལྡན་བླ་མ་དམ་པས་བཞེད། །མེ་ཡོས་ལ་བལྟམས་ད་ལོ་ཡན། །གཉིས་སྟོང་སུམི་བརྒྱ་ལོ་ངོ་ལྔ། ༈ །ཇོ་ནང་ཕྱིན་པ་རྣམ་རྒྱལ་ལུགས། །ཤཱཀ་ཐུབ་ཤིང་ཡོས་ལ་བལྟམས་
ནས། །དེང་སང་བར་དུ་ལོ་ཡི་གྲངས། །གཉིས་སྟོང་ལྔ་བརྒྱ་ལྔ་བཅུ་བདུན། ༈ །ཇོ་ནང་ཆེ་མགོན་པ་ཡི་ལུགས། །སྟོན་མཆོག་མེ་ལུག་ལོ་ལ་འཁྲུངས། །དེང་ནས་ད་ལོ་ལྕགས་ཡོས་ཡིན། །གཉིས་སྟོང་ལྔ་བརྒྱ་རེ་ལྔའོ། ༈ །འགོས་ལོ་གཞོན་ནུ་དཔལ་གྱི་ལུགས། །ཤིང་སྟག་ལོ་ལ་ཐུབ་པ་འཁྲུངས། །དེང་སང་ལྕགས་ཡོས་ལོ་ཡི་བར། །སུམ་སྟོང་དང་ནི་ཉེར་བརྒྱད་སོང་། ༈ །མཁས་པ་ལྷུན་གྲུབ་རྒྱལ་པོའི་ལུགས། །ལྕགས་སྤྲེལ་ལ་འཁྲུངས་ལྕགས་ཡོས་བར། །གཉིས་སྟོང་དྲུག་བརྒྱ་ལོ་བཅུ་གཉིས། ༈ །དྭགས་རམ་ཆོས་རྒྱལ་བསྟན་པའི་ལུགས། །ཆུ་ཕག་སྟོན་པ་འཁྲུངས་པ་ནས། །ད་ལོ་ལྕགས་ཡོས་བར་དུ་ནི། །ཉིས་སྟོང་དྲུག་བརྒྱ་ལོ་བཅུ་གཅིག ༈ །མཁས་མཆོག་བྱམས་པ་གླིང་པའི་ལུགས། །སྟོན་པ་མེ་ལུག་ལ་བལྟམས་ནས། །དེང་སང་ལྕགས་ཡོས་བར་དག་ཏུ། །ཉིས་སྟོང་ལྔ་བརྒྱ་རེ་ལྔ་སོང་། ༈ །ཆོས་རྒྱལ་སྲོང་བཙན་སྒམ་པོའི་ལུགས། །ཐུབ་དབང་ལྕགས་འབྲུག་ལ་བལྟམས་ནས། །ད་ལྟ་ལྕགས་མོ་ཡོས་ལོ་ཡན། །བཞི་སྟོང་གཅིག་བརྒྱ་ང་གཅིག་སོང་། །འདི་དང་རྙིང་མའི་ཕྱོགས་ཙམ་མཐུན། ༈ །རྒྱ་ནག་ཙནྡན་ཇོ་བོ་ཡི། །
ལོ་རྒྱུས་ལྟར་ན་ཐུབ་པ་ཉིད། །ཤིང་འབྲུག་ལ་བལྟམས་ད་ལོའི་བར། །ཉིས་སྟོང་ལྔ་བརྒྱ་གྱ་གཉིས་སོང་། ༈ །རྒྱ་ནག་ཐང་ཧུ་ཐུ་རན་ཆེན། །ཞེས་པའི་ཡིག་ཚང་ལུགས་ལ་ནི། །སྟོན་པ་ཤིང་སྟག་ལ་བལྟམས་ནས། །ལྕགས་མོ་ཡོས་ལོ་འདིས་ཡན་ལ། །ཉིས་སྟོང་ལྔ་བརྒྱ་ང་བདུན་སོང་། ༈ །ཀུན་མཁྱེན་མི་བསྐྱོད་རྡོ་རྗེ་དང་། །རྒྱལ་བ་གཡུང་སྟོན་ཆེན་པོ་དང་། །སྒྲ་པ་ཤེས་རབ་རིན་ཆེན་དང་། །གངས་དཀར་རྡོ་རྗེ་གདན་པ་རྣམས། །དགོངས་པ་མཐུན་པར་འདི་ལྟར་བཅད། །ཆུ་ཕག་ཆུ་སྟོད་བཅོ་ལྔ་ལ། །དམ་པ་ཏོག་དཀར་དགའ་ལྡན་ནས། །འཕོས་ཏེ་ཡུམ་གྱི་ལྷུམས་སུ་ཞུགས། །དེ་ནས་ད་ལྟ་ལྕགས་ཡོས་བར། །ལོ་ནི་ཉིས་སྟོང་དྲུག་བརྒྱ་དང་། །ལོ་ངོ་དགུ་ནི་སོང་བ་ཡིན། །དེ་ཡི་ལུགས་ལ་དན་བཅས་ན། །དེ་ཡི་ཕྱིར་ལོ་ཤིང་བྱི་ཡི། །ས་གའི་ཚེས་བརྒྱད་རྒྱལ་ལ་བལྟམས། །དགུང་ལོ་སོ་ལྔའི་ས་ཁྱིའི་ལོ། །ས་ག་ཟླ་བའི་བཅོ་ལྔ་ཡི། །ཐོ་རངས་མངོན་པར་རྫོགས་སངས་རྒྱས། །དགུང་ལོ་བརྒྱད་ཅུ་ཆུ་ལུག་གིས། །ནག་དཀར་དཔལ་ལྡན་འབྲས་སྤུངས་སུ། །ཟླ་བ་བཟང་པོར་དུས་འཁོར་གསུངས། །ས་གའི་ཉ་ལ་མྱ་ངན་འདས། །དེ་ནས་ལོ་གཉིས་
ཤིང་མོ་བྱར། །ཟླ་བ་བཟང་པོའི་རྒྱུད་འགྲེལ་བརྩམ། །དུས་འཁོར་བློས་སླང་བཞེངས་ནས་ནི། །རང་སྲས་ས་སྙིང་སྤྲུལ་པ་ནི། །ལྷ་དབང་སེང་ཁྲི་བསྐོས་ནས་འདས། །དེ་ནས་ལོ་ནི་དྲུག་བརྒྱའི་བར། །ཆོས་རྒྱལ་ལྷ་དབང་གཟི་བརྗིད་ཅན། །ཟླ་བས་བྱིན་དང་ལྷོའི་དབང་ཕྱུག །སྣ་ཚོགས་གཟུགས་དང་ལྷའི་དབང་ལྡན། །དྲུག་གིས་རིམ་པར་ཆོས་གསུང་ཞིང་། ༈ །ཤིང་སྤྲེལ་ལོ་ལ་འཇམ་དཔལ་གྱིས། །དམ་པའི་ཆོས་ནི་བསྟན་པ་ཡིན། །དེ་ནས་ལོ་བརྒྱ་ཤིང་བྱིའི་ལོར། །རྒྱུད་བསྡུས་དྲང་སྲོང་རྣམས་བཏུལ་ནས། །དུས་འཁོར་ཆོས་ལ་བཙུད་མཛད་ནས། །པདྨ་དཀར་པོ་ཁྲིར་བསྐོས་ནས། །འཇམ་དཔལ་ཞིར་གཤེགས་པ་ཡི་ལོ། །དེ་ནས་བརྒྱ་འདས་ཤིང་འབྲུག་ལ། །འགྲེལ་ཆེན་བརྩམས་ནས་ཞིར་གཤེགས་སོ། །དེ་ནས་ལོ་ནི་བདུན་བརྒྱའི་བར། །ཤམ་བྷ་ལ་རུ་འཇམ་དཔལ་གྱི། །གདུང་རབས་བརྒྱད་ནི་སོང་བ་སྟེ། །པད་དཀར་རིགས་ལྡན་བཟང་པོ་དང་། །རྣལ་རྒྱལ་བཤེས་གཉེན་བཟང་པོ་དང་། །ཕྱག་དམར་ཁྱབ་མཇུག་སྦས་པ་དང་། །ཉི་མ་གྲགས་དང་ཤིན་ཏུ་བཟང་། །དེ་ནས་ཤིང་སྤྲེལ་ལོ་དེ་ལ། །མ་ཁའི་ཡུལ་དུ་ཀླ་ཀློ་
ཡི། །བསྟན་དར་མུ་སྟེགས་བྱེད་རྩིས་བརྩམས། །རིགས་ལྡན་རྒྱ་མཚོ་རྣམ་རྒྱལ་ཉིད། །དེ་ལོ་ཁྲི་ལ་ཕེབས་པ་ཡིན། །དེ་ནས་བརྒྱ་དང་གྱ་གསུམ་པ། །མེ་ཁྱི་ལོ་ལ་རིགས་ལྡན་ནི། །རྒྱལ་དཀས་དེ་དུས་གྱ་གཉིས་བཞེས། །རྒྱུད་ཀྱི་བྱེད་རྩིས་ཕྱག་ལེན་མཛད། །དེ་ནས་ཉིས་བརྒྱ་ཉེར་གཉིས་པ། །མེ་ཡོས་ལོ་ལ་རྒྱ་གར་དུ། །ཤམ་བྷ་ལ་ནས་བྱེད་རྩིས་དར། །རྒྱུད་འགྲེལ་འདི་བས་སྔ་ནས་དར། །ཀླ་ཀློས་དགོན་སྡེ་གཙུག་ལག་བཤིགས། །བཅོ་བརྒྱད་འདས་པའི་ཆུ་ཡོས་ལ། །རིགས་ལྡན་རྒྱལ་དཀའ་ཞི་བར་གཤེགས། །དེ་ནས་ལོ་ནི་ལྔ་བརྒྱ་ལ། །ལོ་ངོ་གསུམ་ནི་མ་ཚང་བར། །རིགས་ལྡན་ཉི་མ་སྣ་ཚོགས་གཟུགས། །ཟླ་བའི་འོད་དང་མཐའ་ཡས་དང་། །ས་སྐྱོང་དཔལ་སྐྱོང་སེང་གེ་ཡིས། །དམ་པའི་ཆོས་བསྟན་རྣམ་པར་གནོན། །མེ་སྤྲེལ་ལོ་ལ་སེང་ཁྲིར་ཕེབས། ༈ །གོང་དུ་མེ་ཡོས་ལོ་དེ་ལ། །བྱེད་རྩིས་རྒྱ་གར་དུ་དར་ནས། །ལོ་ནི་བདུན་ཅུ་མེ་འབྲུག་ལ། །ནཱ་རོ་པཎ་ཆེན་སྐུ་འཁྲུངས་ཟེར། །དེ་ནས་ལོ་ནི་ཞེ་ལྔ་པ། །ལྕགས་བྱིའི་ལོ་ལ་མར་པ་འཁྲུངས། །དེ་ནས་ཞེ་གཅིག་ལྕགས་འབྲུག་ལ། །མི་ལ་རས་པ་སྐུ་འཁྲུངས་སོ། །དེ་ནས་བཞི་བཅུ་ས་ལུག་ལ། །
མཉམ་མེད་དྭགས་པོ་ལྷ་རྗེ་བལྟམས། །དེ་ནས་ལོ་དྲུག་ཤིང་གླང་ལ། །མར་པ་གྱ་དྲུག་བཞེས་ཏེ་གཤེགས། །དེ་ནས་ལོ་ངོ་བཅུ་གཉིས་པ། །མེ་བྱིར་ཚུལ་ཁྲིམས་དཔལ་བ་འཁྲུངས། །དེ་ནས་བཅུ་ཡི་ལྕགས་སྟག་ལ། །ཕག་གྲུ་དུས་མཁྱེན་གཉིས་ཀ་འཁྲུངས། །དེ་ནས་བཅུ་གསུམ་ཆུ་སྟག་ལ། །སྐྱེ་མེད་ཞང་སྟོན་སྐུ་བལྟམས་སོ། །དེ་ཡི་ཕྱིར་ལོ་ཆུ་ཡོས་ལ། །མི་ལ་གྱ་བཞི་བཞེས་ཏེ་གཤེགས། །དེ་ནས་ལོ་ལྔ་ལྕགས་སྤྲེལ་ལ། །གྲུབ་ཐོབ་གླིང་རྗེ་རས་པ་འཁྲུངས། །དེ་ནས་ལོ་བཅུ་ཆུ་བྱི་ལ། །ཚུལ་ཁྲིམས་དཔལ་བ་ཞིང་ཁམས་གཤེགས། །དེ་ཡི་ཕྱིར་ལོ་ཆུ་གླང་ལ། །ནམ་མཁའ་འོད་ནི་སྐུ་བལྟམས་སོ། །དེ་ནས་ལོ་དགུ་ཆུ་ཁྱི་ལ། །རྗེ་བཙུན་བསོད་ནམས་རྩེ་མོ་དང་། །སྟག་ལུང་ཐང་པ་གཉིས་ཀ་འཁྲུངས། །དེ་ཡི་ཕྱིར་ལོ་ཆུ་ཕག་ལ། །འབྲི་གུང་འཇིག་རྟེན་མགོན་པོ་འཁྲུངས། །དེ་ནས་ལོ་བཞི་མེ་ཡོས་ལ། །རྗེ་བཙུན་གྲགས་པ་རྒྱལ་མཚན་འཁྲུངས། །དེ་ཡི་ཕྱིར་ལོ་ས་ཨཱལ་འབྲུག་ལ། །འགྲོ་མགོན་རས་ཆེན་སྐུ་བལྟམས་སོ། །དེ་ནས་ལོ་ལྔ་ཆུ་བྱ་ལ། །དྭགས་པོའི་དོན་ལྔ་བཞེས་ཏེ་གཤེགས། །དེ་ནས་ལོ་ལྔ་ས་སྟག་ལ། །ཕག་གྲུས་གདན་ས་ཐེལ་
བཏབ་བོ། །དེ་ནས་བཅུ་གསུམ་ལྕགས་སྟག་ལ། །ཕག་གྲུ་རེ་གཅིག་བཞེས་ཏེ་གཤེགས། །དེ་ནས་ལོ་ལྔ་ཤིང་ལུག་ལ། །སྤྱན་སྔ་གྲགས་པ་འབྱུང་གནས་འཁྲུངས། །དེ་ནས་ལོ་བདུན་ཆུ་སྟག་ལ། །ས་སྐྱ་པཎ་ཆེན་སྐུ་འཁྲུངས་སོ། །དེ་ལོ་བསོད་ནམས་རྩེ་མོ་ཉིད། །བདེ་བ་ཅན་དུ་དངོས་སུ་བྱོན། །དེ་ནས་བཅུ་གཅིག་ཆུ་གླང་ལ། །དུས་མཁྱེན་གྱ་བཞི་བཞེས་ཏེ་གཤེགས། །ཞིང་གི་དོན་གཉིས་བཞེས་ཏེ་འདས། །དེ་ནས་ལོ་དྲུག་ས་ལུག་ལ། །རེ་བདུན་བཞེས་ཚེ་ནམ་མཁའ་འོད། །ལོངས་སྤྱོད་པ་ཡི་ཞིང་དུ་གཤེགས། །དེ་ནས་ལོ་གཉིས་ལྕགས་བྱ་ལ། །བཀྲ་ཤིས་གྲགས་པ་སྐུ་འཁྲུངས་སོ། །དེ་ནས་ལོ་ལྔ་མེ་སྟག་ལ། །ཀརྨ་པཀྴི་སྐུ་བལྟམས་སོ། །དེ་ཡི་ཕྱིར་ལོ་ཤཱཀྱ་རི། །ས་སྐྱར་དབྱར་གནས་བསྟན་རྩིས་མཛད། །དེ་ནས་ལོ་དགུ་མེ་བྱི་ལ། །རྗེ་བཙུན་གྲགས་པ་རྒྱལ་མཚན་དང་། །འབྲི་གུང་འཇིག་རྟེན་གསུམ་མགོན་གཤེགས། །དེ་ཡི་ཕྱིར་ལོ་མེ་གླང་ལ། །འགྲོ་མགོན་རས་ཆེན་ཞི་བར་གཤེགས། །དེ་ནས་བཅུ་གསུམ་ལྕགས་སྟག་ལ། །གྲུབ་ཐོབ་ཨོ་རྒྱན་པ་ཉིད་འཁྲུངས། །དེ་ནས་སོ་ལྔ་ཤིང་ལུག་ལ། །འགྲོ་མགོན་ཆོས་རྒྱལ་འཕགས་པ་འཁྲུངས། །
དེ་ནས་ཞེ་བརྒྱད་ཆུ་རྟ་ལ། །གྱ་གསུམ་བཞེས་ཚེ་བཀྲ་ཤིས་གྲགས། །ཞི་བའི་དབྱིངས་སུ་བཞུགས་ཚུལ་སྟོན། །དེ་ཡི་ཕྱིར་ལོ་ཆུ་ལུག་ལ། །དོན་བརྒྱད་བཞེས་ཚེ་པཀྴི་གཤེགས། །དེ་ལོ་རྟོགས་ལྡན་གྲོགས་སོགས་འཁྲུངས། །དེ་ཡི་ཕྱིར་ལོ་ཤིང་སྤྲེལ་ལ། །རང་བྱུང་རྡོ་རྗེ་སྐུ་བལྟམས་སོ། །དེ་ནས་ཉེར་ལྔ་ས་བྱ་ལ། །གྲུབ་ཆེན་ཨོ་རྒྱན་པ་གཤེགས་སོ། །དེ་ནས་ལོ་དྲུག་ཤིང་ཡོས་ལ། །རང་བྱུང་རྡོ་རྗེས་བསྟན་རྩིས་བརྩམས། །དེ་ནས་ལོ་གསུམ་ས་རྟ་ལ། །རང་བྱུང་ཞབས་ཀྱིས་དུས་འཁོར་གྱི། །མན་ངག་སྣང་བ་ཞེས་བྱ་བརྩམས། །དེ་ནས་ཉེར་གཅིག་ས་ཡོས་ལོ། །རང་བྱུང་ང་དྲུག་བཞེས་པ་གཤེགས། །དེ་ཡི་ཕྱིར་ལོ་ལྕགས་འབྲུག་ལ། །རོལ་པའི་རྡོ་རྗེ་སྐུ་བལྟམས་སོ། །དེ་ནས་ལོ་དགུ་ས་གླང་ལ། །གྲགས་སེང་རེ་བདུན་བཞེས་ཚེ་གཤེགས། །དེ་ཡི་ཕྱིར་ལོ་ལྕགས་སྟག་ལ། །རྟོགས་ལྡན་མཁའ་སྤྱོད་དབང་པོ་འཁྲུངས། །དེ་ནས་སུམ་ཅུ་སོ་བཞི་པ། །ཆུ་མོ་ཕག་ལ་ཞེ་བཞི་པར། །རོལ་པའི་རྡོ་རྗེ་དབྱིངས་སུ་ཐིམ། །དེ་ཡི་ཕྱིར་ལོ་ཤིང་བྱི་ལ། །དེ་བཞིན་གཤེགས་པ་སྐུ་བལྟམས་སོ། །དེ་ནས་ཉེར་གཉིས་ཤིང་བྱ་ལ། །ང་དྲུག་བཞེས་ཚེ་མཁའ་
སྤྱོད་དབང་། །ལོངས་སྤྱོད་རྫོགས་པའི་སྐུར་བཞེངས་སོ། །དེ་ཡི་ཕྱིར་ལོ་མེ་ཁྱི་ལ། །ཆོས་དཔལ་ཡེ་ཤེས་སྐུ་འཁྲུངས་སོ། །དེ་ནས་ལོ་དགུ་ཤིང་མོ་ལུག །དེ་བཞིན་གཤེགས་པ་སོ་གཉིས་གཤེགས། །དེ་ཡི་ཕྱིར་ལོ་མེ་སྤྲེལ་ལ། །མཐོང་བ་དོན་ལྡན་སྐུ་འཁྲུངས་སོ། །དེ་ནས་སོ་དྲུག་ཆུ་སྤྲེལ་ལ། །ཆོས་དཔལ་ཡེ་ཤེས་ཞིང་དུ་གཤེགས། །དེ་ཡི་ཕྱིར་ལོ་ཆུ་བྱ་ལ། །དོན་ལྡན་སོ་བརྒྱད་བཞེས་པར་གཤེགས། །དེ་ལོ་སྤྱན་སྔ་ཆོས་གྲགས་འཁྲུངས། །དེ་ཡི་ཕྱིར་ལོ་ཤིང་ཁྱི་ལ། །ཆོས་གྲགས་རྒྱ་མཚོ་སྐུ་བལྟམས་སོ། །དེ་ནས་ལོ་བདུན་ཤིང་སྟག་ལ། །ཞེ་བརྒྱད་བཞེས་ཚེ་མི་བསྐྱོད་ཞབས། །སྤྲུལ་སྐུ་ཆོས་ཀྱི་དབྱིངས་སུ་བསྡུས། །དེ་ནས་ལོ་གཉིས་མེ་འབྲུག་ལ། །དབང་ཕྱུག་རྡོ་རྗེ་སྐུ་བལྟམས་གྱུར། །དེ་ནས་ལོ་བཅུ་མེ་སྟག་ལ། །གཙུག་ལག་ཕྲེང་བ་རེ་གསུམ་གཤེགས། །དེ་ནས་ལོ་གཉིས་ས་འབྲུག་ལ། །དཔའ་བོ་གཙུག་ལག་རྒྱ་མཚོ་འཁྲུངས། །དེ་ནས་བཅོ་ལྔ་ཆུ་ལུག་ལ། །དཀོན་མཆོག་ཡན་ལག་ཞི་བར་གཤེགས། །དེ་ཡི་ཕྱིར་ལོ་ཤིང་སྤྲེལ་ལ། །གར་དབང་ཆོས་ཀྱི་དབང་ཕྱུག་བལྟམས། །དེ་ནས་བཅུ་དགུ་མེ་ཡོས་ལ། །ཞེ་བརྒྱད་བཞེས་ཚེ་ཀརྨ་པ། །དབང་ཕྱུག་རྡོ་རྗེ་
གཟུགས་སྐུར་བསྡུས། །དེ་ཡི་ཕྱིར་ལོ་ཤིང་འབྲུག་ལ། །རྒྱལ་དབང་ཆོས་དབྱིངས་རྡོ་རྗེ་བལྟམས། །དེ་ནས་ཉེར་དྲུག་ལྕགས་རྟ་ལ། །གར་དབང་ཆོས་ཀྱི་དབང་ཕྱུག་མཆོག །ཞེ་བདུན་བཞེས་ཚེ་གཟུགས་སྐུ་བསྡུས། །དེ་ནས་ལུག་གམ་སྤྲེལ་ལོ་ནས། །སྤྲུལ་པའི་སྐུ་ནི་བལྟམས་ཞེས་ཐོས། །དེ་ནས་ལོ་ནི་ཉི་ཤུ་པ། །ལྕགས་མོ་ཡོས་ཀྱི་ལོ་ལ་ནི། །བདག་གིས་བསྟན་རྩིས་གོ་བདེ་བཀོད། །དེ་ནས་མི་བསྐྱོད་རྡོ་རྗེ་ཡིས། །བཞད་པ་འདི་ཉིད་གཙོར་བྱས་ན། །ཤཱཀ་ཐུབ་བལྟམས་ནས་ད་ལོ་བར། །ལོ་ནི་ཉིས་སྟོང་དྲུག་བརྒྱ་དང་། །ད་ལོ་ཕར་བརྒྱབ་ལོ་དགུ་སོང་། །དེ་ནས་ཡུས་ཀྱི་སྟེན་ཤེས་བྱ། །འོན་ཀྱང་མི་ལ་ཡན་གྱི་ལོ། །དགོངས་བཞེད་མི་འདྲ་སྣ་ཚོགས་འདུག །དྭགས་པོ་འཁྲུངས་ནས་ད་ལོའི་བར། །འཁྲུལ་མེད་ངེས་ཤེས་ལྡན་ནས་ཡིན། ༈ །གསང་སྔགས་རྙིང་མའི་བཞེད་པ་ལ། །སྟོན་པ་ཤིང་གླང་ལ་འཁྲུངས་ནས། །དགུང་ལོ་བརྒྱད་ཅུ་ཤིང་སྤྲེལ་གྱི། །ས་གའི་ཨབཅོ་ལྔར་མྱ་ངན་འདས། །དེ་ནས་ལོ་ནི་བཅུ་གཉིས་པ། །མེ་སྤྲེལ་ལོ་ལ་ཨོ་རྒྱན་འཁྲུངས། །རྒྱ་གར་རྒྱ་ནག་ཨོ་རྒྱན་སོགས། །ཡུལ་གྲུ་རྣམ་པ་སྣ་ཚོགས་སུ། །དགུང་ལོ་སུམ་སྟོང་
ཐམ་པ་བཞུགས། །བོད་དུ་བརྒྱ་དང་བཅུ་གཅིག་བཞུགས། །སྲིན་ཡུལ་བཞུད་ནས་བདུན་བརྒྱ་དང་། །རེ་ལྔ་འདས་ཚེ་རཏྣ་གླིང་། །ལྕགས་མོ་ལུག་ལ་སྐུ་བལྟམས་ཏེ། །གཏེར་སྟོན་འཁྲུངས་ནས་ད་ལྟའི་བར། །ཉིས་བརྒྱ་དང་ནི་ལོ་གཅིག་སོང་། །པད་འབྱུང་འཁྲུངས་ནས་ད་ལྟའི་བར། །བཞི་སྟོང་དང་ནི་དོན་བདུན་སོང་། །རྔ་ཡབ་བྱོན་ནས་ད་ལྟའི་བར། །དགུ་བརྒྱ་དང་ནི་རེ་དྲུག་སོང་། །གཏེར་སྟོན་འདས་ནས་ད་ལྟའི་བར། །བརྒྱ་དང་ཉི་ཤུ་རྩ་ལྔ་སོང་། ༈ །རྙིང་མ་བཀའ་མའི་ལུགས་ལ་ནི། །བི་མ་མི་ཏྲ་གླང་ལོར་འཁྲུངས། །སུམ་བརྒྱ་བཞེས་ཚེ་བོད་དུ་བྱོན། །འཁྲུངས་ནས་དེང་སང་ལྕགས་ཡོས་ཡིན། །སྟོང་དང་བདུན་བརྒྱ་ཞེ་བདུན་སོང་། ༈ །སྟག་ལུང་ཐང་པ་བཞི་བཅུ་པར། །སྟག་ལུང་བཏབ་ནས་ལྕགས་ཡོས་བར། །ལོ་ནི་བཞི་བརྒྱ་དོན་གསུམ་སོང་། །སྐུ་ཡལ་དགུང་ལོ་སོ་ལྔ་དུས། །མཆོད་ཁང་དམར་པོ་བཞེངས་ནས་ནི། །ད་ལོ་བར་ལ་ལོ་ཡི་གྲངས། །བཞི་བརྒྱ་དང་ནི་ཉེར་དགུ་སོང་། །སངས་རྒྱས་དབོན་པོས་ཉེར་ལྔ་དུས། །མེ་གླང་ལོ་ལ་མར་ཐང་བཏབ། །དེ་ནས་ད་ལོ་ལྕགས་ཡོས་བར། །ལོ་ནི་སུམ་བརྒྱ་དོན་གཉིས་སོང་།
ཨོ་རྒྱན་མགོན་པོ་ཉེར་བརྒྱད་དུས། །ལྷ་ཁང་བཞེངས་ནས་ད་ལོ་ཡན། །སུམ་བརྒྱ་དང་ནི་སོ་གཉིས་སོང་། །ལྕགས་མོ་ཡོས་ཀྱི་ལོ་འདི་ལ། །ཞྭ་དམར་བདུན་པ་སེང་གེའི་ཁྲིར། །ཕེབ་པ་ཡིན་ཞེས་གཏམ་སྙན་ཐོས། །དེ་ནས་བསྟན་པའི་གནས་ཚད་ལ། །བཞེད་པ་མི་འདྲ་མང་ན་ཡང་། །འབུམ་ཐིག་ལུང་གི་རྗེས་འབྲང་ནས། །ཡོངས་གྲགས་ལྔ་བརྒྱ་ཕྲག་བཅུར་བཞེད། །ལྔ་བརྒྱ་ཕྲག་དགུ་བསྟན་པ་དངོས། །ལྔ་བརྒྱ་ཐ་མ་རྟགས་ཙམ་འཛིན། །ལྟ་སྤྱོད་རྣལ་མ་མེད་པར་གོ །མཆོད་རྟེན་སྐུ་གཟུགས་གླེགས་བམ་སོགས། །མི་རྣམས་ཚེ་ལོ་ཡར་འཕེལ་ནས། །དྲུག་བརྒྱ་ཐུབ་དུས་སྒང་བར་གནས། །དེ་དུས་གནས་བརྟན་བཅུ་དྲུག་པོ། །དངོས་སུ་རྡོ་རྗེ་གདན་དུ་བྱོན། །སྐལ་ལྡན་འགའ་ཞིག་རབ་ཏུ་བྱུང་། །ལོ་ཤེས་ཐང་ཅིག་བསྟན་པ་དར། །དེ་ནས་གནས་བརྟན་བཅུ་དྲུག་གི །བསྟན་པ་བསྡུས་ནས་ཞི་བར་གཤེགས། །ཤཱཀ་ཐུབ་བསྟན་པ་ལྷག་མེད་ནུབ། །དེ་ནས་ཚེ་ཨཱལོ་ཡར་འཕེལ་ཚེ། །རྫོགས་པའི་སངས་རྒྱས་མི་འབྱོན་ཏེ། །འཁོར་ལོས་སྒྱུར་རྒྱལ་མང་དུ་འབྱུང་། །དེ་ནས་ཚེ་ལོ་མར་འགྲིབ་ནས། །བརྒྱད་ཁྲིའི་དུས་སུ་བྱམས་པ་འབྱོན། །དེང་
སང་བཞི་བཅུ་ཁ་རལ་ཞེས། །གཏེར་ཡིག་རྣམས་ནས་གསུངས་པ་ཡིན། །ད་རུང་བསྟན་པའི་གནས་ཚད་ལ། །མི་བསྐྱོད་ཞབས་སོགས་བཤད་པ་ལ། །དེ་སྔ་ལྔ་བརྒྱ་ཕྲག་ལྔ་དང་། །ཉི་ཤུ་རྩ་དགུའི་ལོ་གྲངས་སོང་། །ད་རུང་ལྔ་བརྒྱ་ཕྲག་བཞི་དང་། །བཞི་བརྒྱ་དོན་གཅིག་སླར་འདུས་སོ། །གསང་སྔགས་རྙིང་མའི་ལུགས་ལ་ནི། །ཐུབ་བསྟན་ལྔ་བརྒྱ་ཕྲག་བརྒྱད་དང་། །ལོ་ནི་གྱ་དགུ་སོང་བ་ཡིན། །བསྟན་པ་ལོ་ནི་བཞི་བརྒྱ་དང་། །བཅུ་གཅིག་ཡོད་ཅིང་དེའི་སྟེང་དུ། །རྟགས་ཙམ་འཛིན་པ་ལྔ་བརྒྱ་ཡོད། །ཁ་ཆེ་པཎ་ཆེན་ལུགས་ལ་ནི། །ལོ་ནི་ལྔ་བརྒྱ་ཕྲག་བཞི་དང་། །བརྒྱ་དང་གོ་ལྔ་སོང་བ་སྟེ། །ད་རུང་ལྔ་བརྒྱ་ཕྲག་དྲུག་དང་། །སུམ་བརྒྱ་དང་ནི་ལོ་ལྔ་ཡོད། །དེ་ཡི་རིག་པ་ལུགས་གཞན་ཡང་། །གོ་བར་སླ་ཕྱིར་མ་བྲིས་སོ། །རྟགས་ཙམ་འཛིན་པའི་དུས་སུ་ཡང་། །ལྟ་སྤྱོད་རྣལ་མ་མི་ལྡན་ཡང་། །མར་མེ་འཆི་ཁ་གསལ་བ་བཞིན། །བསྟན་པ་ཤིན་ཏུ་རྒྱས་པར་གསུངས། །བསྟན་པ་ལྔ་བརྒྱ་ཕྲག་བཅུ་ནི། །མདོ་ལུགས་སྟོན་པའི་གནས་ཚད་ཡིན། །སྔགས་ལུགས་བསྟན་པའི་གནས་ཚད་ནི། །བྱ་རོག་ཆེན་པོའི་རྒྱུད་ལས་གསུངས། །སྐུ་གསུང་ཐུགས་ཀྱི་བསྟན་པ་གསུམ། །
ལྔ་བརྒྱ་ཕྲག་ནི་རེ་རེ་གནས། །ཡོན་ཏན་ལྔ་བརྒྱ་ཕྲག་གཉིས་ལ། །ཕྲིན་ལས་ལྔ་བརྒྱ་ཕྲག་གཉིས་གནས། །དེ་རྗེས་ཆོས་སྐྱོང་མགོན་པོ་ཡི། །ཕྲིན་ལས་བཞི་པོ་རེ་རེ་ལ། །ལྔ་བརྒྱ་ཕྲག་ནི་རེ་རེ་སྟེ། །ལྔ་བརྒྱ་ཕྲག་ནི་བཅུ་གཅིག་ཡིན། །དེ་ནས་དེང་སང་གནས་སྐབས་འདིར། །སྲོང་བཙན་སྒམ་པོའི་ལུགས་དང་བསྟུན། །ལྔ་བརྒྱ་ཕྲག་བརྒྱད་འདས་ནས་ནི། །ཆོས་སྐྱོང་གསུངས་པའི་བསྟན་པ་ལ། །ལོ་གྲངས་དོན་གཅིག་སོང་བ་ཡིན། །ཁྱད་པར་རྫོགས་ཆེན་བསྟན་པ་ནི། །སྐུ་ཡི་བསྟན་པ་ལྔ་བརྒྱ་དང་། །ལྔ་སྟོང་ཕྲག་གསུམ་གནས་པ་ཡིན། །གསུང་དང་ཐུགས་ནི་ལྔ་བརྒྱ་དང་། །ལྔ་སྟོང་ཕྲག་རེ་གནས་པ་ཡིན། །ཚེ་ལོ་དྲུག་ཅུ་ནས་བཟུང་སྟེ། །བཅུ་པའི་བར་དུ་ཐུགས་བསྟན་ཡིན། །ཐུགས་ཀྱི་དུས་འདིར་བསྟན་པའི་རྩ། །རང་བྱུང་སྐུ་ནི་ལྷ་ཡི་གནས། །སུམ་རྩེན་ལག་ན་རྡོ་རྗེ་ཡི། །ཁང་བརྩེགས་ཡང་ཐོག་དག་ཏུ་བཞུགས། །གླེགས་བམ་རབ་འཕྲོས་དྲང་སྲོང་ཕུག །རྡོ་རྗེ་རྡོ་རྗེ་གདན་གྱི་མཁར། །དེ་དག་རྣམས་སུ་བཞུགས་པར་གསུངས། །ཚེ་ལོ་བཅུ་པའི་མགོ་མ་ལ། །མཁའ་འགྲོ་དཔལ་འཛིན་ཞེས་བྱ་བས། །རྫོགས་ཆེན་མཛད་པ་བཅུ་པའི་
མཐར། །རྫོགས་ཆེན་བསྟན་པ་ཞིང་གཞན་འབོད། །ཤཱཀ་ཐུབ་འདས་ནས་ལོ་ཡི་གྲངས། །བྱེ་བ་ང་ལྔ་ས་ཡ་བདུན། །སོང་ཚེ་བྱམས་པ་འབྱོན་པར་བཤད། །དེ་ལྟར་བསྟན་རྩིས་མདོར་བསྡུས་འདི། །ཁ་གསལ་དོན་འདུས་གོ་བདེ་བར། །རཱ་གའི་མིང་ཅན་དེ་ཡིས་བཀོད། །ལྕགས་ཡོས་ལོ་ལ་བརྩིས་པ་ཡིན། །འགལ་འཁྲུལ་མཁས་པ་རྣམས་ལ་བཤགས། །དགེ་བས་ཐུབ་བསྟན་འཕེལ་བར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།