གཙུག་ལག་རྩིས་ཀྱི་སྡོམ་ཚིག་ཉེར་མཁོ་མ་རིག་མུན་སེལ།
གཙུག་ལག་རྩིས་ཀྱི་སྡོམ་ཚིག་ཉེར་མཁོ་མ་རིག་མུན་སེལ་ཞེས་བྱ་བ་བཞུགས་སོ། །
ན་མོ་ཨཱརྱ་མཉྫའི་ཡེ། འཇམ་དཔལ་དབྱངས་ལ་ཕྱག་འཚལ་ནས། །གཙུག་ལག་རྩིས་ཀྱི་མན་ངག་འགའ། །ཕྱི་རབས་འགའ་ལ་ཕན་ཕྱིར་བྲི། །ཆོས་རྒྱལ་མེས་དབོན་རྣམ་གསུམ་གྱིས། །རྩིས་ལུགས་དར་རྒྱས་མཛད་ན་ཡང་། །རྒྱལ་པོ་གླང་གིས་རྩིས་པ་ཀུན། །བསད་པས་རྩིས་ཀྱི་སློབ་དཔོན་མེད། །དཔེ་ཆའི་སྟེང་ནས་ཚོད་ཀྱིས་བརྩིས། །དེ་ལ་རྩིས་རྙིང་ཞེས་གྲགས་སོ། །དེ་རྗེས་ཁམ་པ་ཁྲ་མོ་ཡིས། །རྒྱ་ནག་བ་གོང་དུ་ཤི་ཡ། །སློབ་དཔོན་ངག་རྒྱུད་གསར་བསྒྱུར་བས། །དེ་ལ་རྩིས་གསར་ཞེས་བྱ་ཟབ། །འདི་ནི་རྩིས་གསར་སོར་བཞག་གོ །ལོ་གྲངས་
བཅུ་གསུམ་ཉེར་ལྔ་སོ་བདུན་དང་། །ཞེ་དགུ་རེ་གཅིག་དོན་གསུམ་གྱི་ལྔ་དང་། །དགུ་བཅུ་གོ་བདུན་རང་ལོ་སྟེང་དུ་ཕྱིན། །དེ་ནས་བརྩིས་པས་ལོ་གྲངས་དུ་ལོན་ཤེས། །དེ་ནས་དེ་ཡི་དབང་ཐང་འབྱུང་བའི་ཁམས། །གནམ་ལོ་དེ་ལ་ཕོ་ལོ་དྲུག་ཤར་དུས། །གཅིག་བཅུ་ཐམས་ཅད་གནམ་ལོ་རང་དང་གཅིག །གཉིས་གསུམ་ཐམས་ཅད་གནམ་ལོའི་མ་དང་གཅིག །བཞི་ལྔ་ཐམས་ཅད་གནམ་ལོའི་དགྲ་དང་གཅིག །དྲུག་བདུན་ཐམས་ཅད་གནམ་ལོའི་གྲོགས་དང་གཅིག །བརྒྱད་པ་དགུ་པ་གནམ་ལོའི་བུ་དང་གཅིག །གནམ་ལོ་དེ་ཕོ་ལོ་དྲུག་ཤར་བའི་དུས། །གཅིག་
པ་གཉིས་པ་གནམ་ལོ་རང་དང་གཅིག །གསུམ་བཞི་ཐམས་ཅད་གནམ་ལོའི་མ་དང་གཅིག །ལྔ་དྲུག་ཐམས་ཅད་གནམ་ལོ་དགྲ་དང་གཅིག །བདུན་བརྒྱད་ཐམས་ཅད་གནམ་ལོའི་གྲོགས་དང་གཅིག །དགུ་བཅུ་ཐམས་ཅད་གནམ་ལོའི་བུ་དང་གཅིག །ལོ་རྒན་དྲུག་ཅུ་གང་རེད་ངོས་བཟུང་ནས། །དེ་ཡི་སྲོག་ལུས་ཀླུང་རྟ་སྐྱེ་བ་སོགས། །ལོག་མེན་གཤིན་པོའི་ལོག་མེན་དང་། །སྤར་སྨེ་དར་རྒུད་ཟླ་བ་དང་། །ཞག་དུས་གཟའ་སྐར་ཟླ་བ་དང་། །ཧལ་ཁྱི་བྱི་ལིང་ལ་སོགས་པ། །ཐམས་ཅད་གཤིན་པོ་དེ་དང་འཐབ། །དེ་ལ་རྡེལ་གྲངས་གོང་དང་འདྲ། །དེ་ནས་གསོན་པོའི་གནམ་ལོ་འཐབ། །ལོག་མེན་སྤར་སྨེ་དར་རྒུད་རྣམས། །གསོན་པོ་ཉིད་ནི་བརྩི་བ་སྟེ། །ཟླ་བ་ཞག་དང་གཟའ་སྐར་ཡང་། །རྩིས་བྱེད་ཉིན་པའི་དེ་དང་བརྩི། །དེ་བཞིན་ཧལ་ཁྱི་བྱི་ལིང་འདྲ། །དེ་ལ་རྡེལ་གྲངས་གོང་ལྟར་རོ། །དེ་ནི་བརྒྱ་འབོར་ཆུང་བའོ། །གསོན་པོ་གལ་ཆེའི་གདོས་བདག་པོ། །གཞན་རྣམས་གོང་དང་འདྲ་བ་ལ། །གསོན་པོ་ང་ཁྱིམ་གཅིག་པ་ཡིན། །ཡང་ན་སྤུན་གྲངས་གལ་ཆེ་བའི། །རྒན་པོ་མགོ་སེ་སོ་ཕ་སྟེ། །བྱིས་པའི་ཆུ་ནང་འཕྲད་པ་ཟེར། །དར་མ་རྩིས་ཅན་བཅས་པ་གསུམ། །
གཤིན་དང་འཐབ་པ་ཚར་གསུམ་བརྒྱབ། །དེ་ནི་རྒྱ་འབོར་འབྲིང་པོ་ཡིན། །དེ་སྟེང་སོ་འཕྲང་གཅེས་གསུམ་དེ། །གནམ་ལོ་དང་འཐབ་ཚན་གསུམ་བརྒྱབ། །དེ་ནི་རྒྱ་འབོར་ཆེན་པོ་ཡིན། །དེ་ལྟར་བསྡུས་འབྲིང་རྒྱས་གསུམ་གྱིས། །དང་པོ་གནམ་ལོའི་སྲོག་དེལ་རྣམས། །དཀར་ནག་གང་མང་བརྩིས་བྱས་ལ། །དཀར་པོ་མང་ན་དཀར་པོ་གཅིག ། ལོག་པོས་མང་ན་དཀར་པོ་གཉིས། །ནག་པོ་མང་ན་ནག་པོ་གཅིག །མཉམ་ན་དཀར་ནག་གཉིས་བཞག་སྟེ། །སྲོག་ལུས་དབང་ཐང་ཀླུང་རྟ་དང་། །རུས་ཁམས་ལ་ཡང་དེ་ཡིས་འགྲེས། །དེ་བཞིན་ལོག་མེན་ལ་སོགས་པ། །རྡེལ་བུ་ཉེར་ལྔ་ལོགས་སུ་བཀོད། །དེ་ལ་སྟང་གཅོད་རྡེལ་བུ་ཟེར། །དེ་ཡི་སྲོག་རྡེལ་དཀར་ནག་གི །གང་མང་རྩིས་ལ་རྡེལ་བཞག་སྟེ། །ལུས་དབང་རླུང་རྟ་རུས་ཁམས་དང་། །དོན་ནི་གནམ་ལོའི་རྡེལ་ལྔ་པོ། །དཀར་ནག་གང་མང་རྩིས་ལ་བཞག །དེ་བཞིན་རྡེལ་འཕྲེང་བཅུ་གསུམ་འགྲེས། །དེ་ལ་ཁ་དམར་རྡེལ་བུ་ཟེར། །བཟང་གཅིག་བཤད་པ་ཐམས་ཅད་ནི། །སྟང་ཆོདཁ་དམར་དབང་ཆེ་སྟེ། །གཞན་མ་ཐམས་ཅད་རྡེལ་རོ་ཡིན། །སྟངས་གཅོད་རྡེལ་བུ་ལྔ་བཅུ་ནས། །རེ་མིག་ཉེར་
ལྔ་ལོག་ན་ཕུད། །དེ་ནས་རྣོ་གཏང་བཞག་པར་བྱ།་།གཤིན་ཐང་ལྔ་བཅུའི་ངག་ཁྲིད་དོ། །ལྔ་བཅུ་རྐྱང་པས་ག་ལ་ཆོག་།ལྔ་བཅུ་རྐྱང་བར་བཤད་པ་ནི། །རྩིས་རྙིང་ཞལ་ཤེས་མེད་པའི་ལུང་། །དེ་བཞིན་བཅུ་གསུམ་ས་ལ་ཡང་། །གཤིན་རྗེལ་བཅུ་གསུམ་གཞུང་ལྟར་ལས། །གསོན་རྡེལ་སོ་འཕྲང་གཅེས་གསུམ་ལས། །རྡེལ་ཕྲེང་བཞི་པ་འཕྲད་དུ་རྩིས། །གང་མང་དཀར་ནག་མཁས་པ་ཡི། །རྡེའུ་བཅུ་གསུམ་དེ་ཉིད་ལ། །གཤིན་རྡེལ་བཤད་པའི་གཉར་གཅོད་བྱ། །བག་རྩིས་མན་ངག་གནད་ཆེན་པོ། །ཐམས་ཅད་འགྲིགས་པར་དཀའ་བའི་ཕྱིར། །སྲོག་དང་ཀླུང་རྟ་སྐྱེས་པ་རྒྱལ། །བུད་མེད་སྐྱེས་པ་ཕར་ཐུབ་པ། །ལུས་དང་དབང་ཐང་བུད་མེད་རྒྱལ། །མི་མཐུན་རང་གི་མཐུན་པོ་ཡིན། །བཅོ་བརྒྱད་ལོ་མ་ཁོན་ཐོག་དང་། །ལི་ལ་བག་མ་སོང་ན་ཕུང་། །གཟའ་དང་སྐར་མ་ནུས་པ་ཆུང་། །གནམ་ཁྱི་དབང་ཆེ་ཞིབ་ཏུ་བརྩིས། །ཕྱོགས་ཀྱི་ཟླ་བ་གནམ་ཁྱི་དང་། །ཧལ་ཁྱི་ཐེ་ཁྱིམ་གལ་ཆེའོ། ༈ བྱིས་པའི་བརྩས་སློང་རྩིས་ལ་ནི། །མི་ཚེ་དེ་ཡི་སྐྱིད་སྡུག་དེ། །དར་རྒུད་བཟང་ལ་སྐྱེས་པའི་མི། །སྐག་ཆེན་ཡོད་ཀྱང་ཉེས་མི་འབྱུང་། །དར་རྒུད་ངན་ལ་སྐྱེས་པའི་མི། །
སྐག་མེད་དུས་ཀྱང་སྐྱོན་ཅན་འབྱུང་། །རླུང་གི་དུར་ཕུག་མ་ཤེས་ན། །ཕན་གནོད་དམིགས་ནས་ཟིན་མི་འགྱུར། །གསུངས་པའི་གནད་དེ་དེ་ཡིན་ནོ། །ཚེ་སྟོད་ཕ་ཡི་དར་རྒུད་གཙོ། །ཚེ་སྨད་མ་ཡི་དར་རྒུད་གཙོ། །བར་དུ་རང་གི་དར་རྒུད་གཙོ། །ཕ་ཡི་སྲོག་དང་ཀླུང་རྟ་དང་། །མ་ཡི་ལུས་དང་དབང་ཐང་དང་། །ཁོ་རང་དར་རྒུད་བཟང་བ་ན། །གང་སྐྱེས་བུ་དེ་ཕུན་སུམ་ཚོགས། །བུ་དང་མ་གཉིས་སྲོག་རྒུད་དུ། །སྐྱེས་ན་ཚེ་ནི་ཐུང་བ་ཡིན། །ཕ་བུ་གཉིས་ཀ་ཀླུང་རྟ་རྒུད། །དེ་དུས་སྐྱེས་ན་མི་ཁ་ལྡང་། །མ་དང་བུ་ཡི་དབང་ཐང་དར། །དེ་དུས་སྐྱེས་ན་ནོར་ཕྱུགས་སོ། །མ་བུ་གཉིས་ཀ་དབང་ཐང་རྒུད། །དེ་དུས་སྐྱེས་ན་ནོར་དབུལ་ལོ། །མ་བུ་གཉིས་ཀའི་ལུས་དར་རྒུད། །དེ་ལ་ཐམས་ཅད་དཀོན་མོད་ལྟོས། །དེ་རྣམས་ཐམས་ཅད་དར་རྒུད་བརྩིས། །མི་འགྱུར་གསང་བའི་རྡེལ་གཅིག་ནི། །སྐྱེས་དུས་ཟླ་བ་ཞག་དུས་སོགས། །ཤེས་ན་རབ་སྟེ་མ་ཤེས་ན། །བུ་ཡི་ལོ་ལ་གཏུག་པས་ཆོག །དེ་ནི་སློབ་དཔོན་གསུང་རྒྱུན་གསལ། །མ་ནི་ལི་ཐོག་བུ་སྐྱེས་ན། །དེ་ནི་སོས་པར་དཀའ་བ་ཡིན། །དར་རྒུད་འབྲིང་དང་ཐ་མ་ལ། །སྐྱེས་པ་རྟག་བརྩིས་ཐིགས་
པ་ཡིན། །གཤིན་ཐང་རྩིས་དེ་གསོན་ལ་བརྒྱབ། །ཟླ་བ་ཞིག་དུས་སྐར་མ་རྣམས། །བརྩི་བྱའི་ཉི་མ་དུས་ཚོད་དེ། །ལོ་གཅིག་གིས་བསྐོར་སྐར་རྩིས་ཡིན། །ཟླ་བ་བཅུ་གཉིས་དང་འཐབས་པས། །གང་ལ་ངན་པ་ཟླ་བའི་སྐག །ཟླ་བ་དེ་ཡི་ཞག་དུས་ཚོད། །སོ་སོར་རྩིས་ལ་གང་རྩུབ་ལྟོས། །འཆི་འམ་མི་འཆི་སྲོག་རྡེལ་ཏེ། །ནད་ཀྱི་ཡང་ལྡི་ལུས་རྡེལ་ལྟོས། །གོད་ཁ་ཆེ་ཆུང་དབང་རྡེལ་ཡིན། །དགྲ་ངོ་ཡོད་མེད་རླུང་རྡེལ་ཡིན། །མདུན་ངོ་ཡོད་མེད་རུས་ཁམས་སོགས། །ཁྱད་པར་སྤར་ཁའི་ཞིབ་རྩིས་ནི། །ཕོ་ལི་མོ་ཁམ་སྤྱི་གཞུང་ཡིན། །བནྡེ་གིན་དང་བོན་པོ་ཁམ། །དགྲ་ཕྱུ་མི་རྒན་ཁོན་དང་ནི། །རྟ་ཕྱུ་ལི་དང་སྐྱེས་ཕྲན་དུ། །དེ་རྣམས་གཡས་སུ་བསྐོར་ནས་བརྩི། །བཟའ་དཔོན་ལོ་གྲངས་བརྩི་བར་གསུངས། །རྒན་མོ་ཁོན་དང་ན་སྟོད་ཟོན། །བུ་མོ་ལི་དང་དར་མ་ཟིན། །ལུག་ཕྱུ་ཁོན་དང་ར་ཕྱུ་དྭ། །ནོར་ཕྱུ་གིན་དང་གཡང་ཕྱུ་ཟོན། །ཁྱིམ་བདག་མོ་ཡི་ལོ་གྲངས་རྩིས། །ཐམས་ཅད་གཡོན་དུ་བསྐོར་ལ་རྩིས། །ཕོ་རིགས་ཡིན་ན་ཐམས་ཅད་གཡས། །མོ་རྐྱང་ཐམས་ཅད་གཡོན་དུ་བསྐོར། །དུར་མིག་དགྲ་ཐོག་བདུན་ཟུར་ངན། །ལྷ་བཞི་དཔལ་དང་མ་
ཐོག་དང་། །གྲོགས་ཐོག་བཟང་ལ་རང་ཐོག་ངན། །དཔྱད་ནི་མོ་དང་འདྲ་བ་སྟེ། །གོད་ངོ་དགྲ་ངོ་སྙིང་སྟོང་སོགས། །ཐམས་ཅད་གསལ་ཞིང་ཐིག་པའོ། །ཞལ་ཆེམས་ཤེས་རབ་ལས་རྩིས་གནས། །བསམ་ཞིང་སྤྲུལ་པ་གྲུབ་ཐོབ་དང་། །རབ་ཀྱི་རབ་རྩིས་མི་ཐིག་གི །ཐ་མའི་ཐ་མ་རྩིས་མི་ཐིག །སངས་རྒྱས་ཐབས་མཁས་ཐུགས་རྗེ་ཆེ། །ཐབས་ཀྱི་དགེ་ལ་བསྐུལ་ཕྱིར་ཡིན། །སྐྱེ་བ་སྔོན་དང་ཕྱི་མ་ལ། །དེ་འདྲ་ནམ་ཞིག་འགྱུར་བ་ལ། །དགོངས་ཀྱི་སྔོན་དང་ཕྱི་མ་མངར། །ངེས་ངེས་ཏིག་ཏིག་མེད་པའོ། །དེ་བཞིན་གཤིན་གྱི་ཞལ་ཆེམ་ཡང་། །ཁན་སྐྱེ་རྒན་རྒོན་བྱིས་པ་སོགས། །རིགས་པས་དཔྱད་སྟེ་སྨྲ་དགོས་སོ། །མདའ་ཚད་འདོན་དུ་མི་རུང་ངོ་། ༈ །གསོན་པོའི་སྐག་རྩིས་མན་ངག་ནི། །གཉོམ་ཆུང་རིམ་གྲོ་མི་འཛེམ་ལ། །འབྱོར་པ་དེ་དང་མི་བསྟུན་པའི། །བཀའ་བདེན་གདའ་ཚུལ་བརྗོད་མི་བྱ། །སྐྲག་ཅིང་རིམ་གྲོ་མི་ཐོན་པའི། །སྐག་རྩིས་ཉེས་པས་དམྱལ་བ་ནི། །སྒོ་ལྕགས་ཀྱི་ཚེར་མ་འབིགས་པ་རུ། །སྐྱེ་ཞེས་མདོ་ལས་གསུངས་པའོ། །རྩིས་རྒྱས་འཕགས་པའི་བཀའ་ལ་ཚོལ། །འབྱོར་པའི་དེ་དག་ཐོབ་ངེས་པའི། །ཆོས་དང་མཐུན་ཅིང་སྡིག་མེད་
པའི། །རིམ་གྲོ་ལུང་བསྟན་བྱས་པ་ཡི། །བར་ཆད་སེལ་ཞིང་དགེ་བསྐུལ་འགྲུབ། །རྩིས་ཀྱི་དགོངས་ཆ་དེ་ཡི་དོན། །ན་ཤིན་རྩིས་བཟུང་ཐང་མི་ཐུབ། །མི་ཐུན་གནོད་བྱས་མི་ཐོན་་། །ཟེར་བ་རྒྱ་ནག་ཧྭ་ཤང་ཡིན། །སེ་ཐན་ཞེས་བྱ་རྩིས་ལོག་སྟེ། །དེ་བཞིན་ལོ་མཉམ་བསད་པའི་སྐག །གང་གི་སྟེང་དུ་ཤི་བ་ཡི། །སྤར་ཁའི་སྐག་བརྒྱད་མང་པོ་ནི། །བཤས་པས་ཤི་སྒབ་ཆོད་ལ་སོགས། །རྩིས་ལོག་ཡིན་པས་སྤང་བར་བྱ། ༈ །ཁྱིམ་གཅིག་མཚམས་བཞི་ལོ་ཚང་ན། །ཕུང་ཁྲལ་འབྱུང་བ་ལོགས་སུ་ཡོད། །མི་རུང་བཞིན་དུ་བྱེད་དགོས་བྱུང་། །མཚམས་བཞི་ཤིང་ནི་ཚེར་མ་ཅན། །ཤར་དུ་གྲི་དང་ལྷོ་རུ་ཆུ། །ནུབ་ཏུ་མེ་དང་བྱང་དུ་ས། །བཀྲམ་ལ་སྣང་བརྒྱད་ཚར་མང་བཀླག །དག་པ་གསེར་ཐིག་བཀྲ་ཤིས་མདོ། །ཉེས་པ་ཀུན་སེལ་བཀླག་པར་བྱ། །དེ་ལྟར་འཕྲལ་དུ་གང་དྲན་ཙམ། །རྩིས་པ་རྣམས་ལ་ཕན་པའི་ཕྱིར། །སྙིགས་དུས་བྱུང་བ་རྩིས་པ་ནི། །༧ དྲང་སྲོང་རཱ་ག་ཨ་སྱས་བཀོད། །འདི་ཉིད་རྒྱ་ཆེར་འཕེལ་ནས་ཀྱང་། །ཡོན་བདག་ཀུན་ཀྱི་རྐྱེན་སེལ་ཞིང་། །འདི་ཕྱི་བདེ་ལེགས་འབྱུང་བར་ཤོག །མངྒ་ལཾ།། །།