གཙུག་ལག་རྩིས་ཀྱི་ཞལ་ཤེས་ཟིན་བྲིས་བལྟས་ཆོག་མཐོང་བ་ཀུན་གསལ།
གཙུག་ལག་རྩིས་ཀྱི་ཞལ་ཤེས་ཟིན་བྲིས་བལྟས་ཆོག་མཐོང་བ་ཀུན་གསལ་ཞེས་བྱ་བ་བཞུགས་སོ། །
ན་མོ་ཨཱརྱ་མཉྫའི་ཡེ། མཁྱེན་རབ་དཀྱིལ་འཁོར་ཡོངས་སུ་རྫོགས་པའི་སྐུ། །གསེར་གྱི་མདོག་ཅན་རལ་གྲི་པོ་ཏི་འཛིན། །བཅོམ་ལྡན་འཇམ་པའི་མགོན་ལ་ཕྱག་འཚལ་ནས། །གཙུག་ལག་རྩིས་ཀྱི་ཞལ་ཤེས་ཅུང་ཟད་བྲི། །དྲང་སྲོང་འབྱུང་བའི་ལྷ་རྣམས་གནང་བ་སྩོལ། །ཕྱོགས་ཞེན་ཨུ་ཚུགས་ཅན་རྣམས་རྣ་བ་ཁོབ། །བློ་གསལ་ཤེས་འདོད་ཡོད་ན་གུས་པར་ཉོན། །དེ་ཡང་རྒྱ་ནག་རི་བོ་རྩེ་ལྔ་རུ། །འཇམ་དབྱངས་ཉིད་ཀྱིས་གསུངས་པའི་རྒྱུད་རྣམས་དང་། དེའི་དོན་རྒྱ་ནག་གི་སློབ་དཔོན་རྣམས་ཀྱིས་མཛད་པ་མཐའ་ཡས་པ་ཡོད་པའི་ནང་ནས། བོད་དུ་ཡང་རྩིས་འགོ་
མང་ཞིག་འགྱུར་ཏེ། སྔོན་ཆོས་རྒྱལ་མེས་དབོན་རྣམ་གསུམ་སོགས་ཀྱི་རིང་ལ་རྩིས་རྙིང་ཡིན་ཏེ། གླང་དར་མས་བསྟན་པ་བསྣུབས་ནས་རྩིས་པ་ཐམས་ཅད་བསད་དཔེ་ཐམས་ཅད་ཕལ་ཆེར་བསྲེགས་ཤིང་འགའ་ཞིག་ལུས་པ་རྣམས་ཕྱིས་རྩིས་དཔེའི་སྟེང་ནས་སློབ་དཔོན་མེད་པར་ཤེས་རབ་ཅན་རྣམས་ཀྱིས་བརྩིས་བྱས་ནས། གོ་སླ་བ་རྣམས་ཇི་ལྟ་བར་རྩིས། གོ་དཀའ་བ་རྣམས་འོལ་ཚོད་ཙམ་དུ་བརྩིས་པའི་རྒྱུན་ལ་རྩིས་རྙིང་དུ་གྲགས་སོ། །འདི་བར་སྐབས་ཅིག་ཏུ། ཤིན་ཏུ་དར་སྲོལ་ཆེ་བར་བྱུང་ཞིང་ད་ལྟ་ཡང་དེ་ཡི་རྒྱུད་བྱེད་པ་ཤིན་ཏུ་མང་སྟེ། ཨོ་རྒྱན་རིན་པོ་ཆེའི་ལུང་བསྟན་
ལས། མི་རེའི་ལག་ན་རྩིས་ཀྱི་ཤོག་བཀྲ་རེ། །བོད་རྩིས་དྲུག་ཅུ་སྐོར་ཞེས་གསལ་སྒྲོན་ཞེས། །རྩིས་རྒྱུད་ཀུན་དང་མི་མཐུན་དར་བར་འབྱུང་། །ཞེས་གསུངས་སོ། །དེ་ནས་ཁམ་པ་ཁྲ་མོ་སོགས་ཀྱི་འགྱུར་མང་དུ་གསུངས་ཀྱང་དར་སྲོལ་ཆུང་སྟེ་རྩིས་གསར་ཞེས་བྱའོ། །དེ་ལྟར་གསར་རྙིང་གི་ཁྱད་པར་ཟུར་ཙམ་བཤད་ནས། དེང་སང་གི་རྩིས་པ་ཕལ་ཆེར་ནི། །རྒྱུད་རྒྱ་གཞུང་དེ་སྟོབས་ཆེ་བ་རྣམས་ནི་བློ་ལེན་འཆད་ཉན་ལྟ་ཅི་སྨོས། ཀློག་པ་ཙམ་ཡང་མི་ནུས་ཤིང་། གླེགས་བམ་མཐོང་ན་ཡང་སྐྲག་པ་སྐྱེ་ཞིང་འགྱིང་པ་ཅོག་སློབ་དཔོན་ངན་པའི་ངག་རྒྱན་དང་ཡིག་ཆ་མ་དག་པ་རྣམས་ལ་བློ་གཏད། ཤེས་རབ་དང་ལྡན་པ་དག་གིས་དེ་ལ་ཅུང་ཟད་དཔྱད་པ་བྱས་ན་རབ་ཏུ་ཁྲོས་ནས་ཚིག་རྩུབ་ཀྱི་མཚོན་ཆ་འདེབས་པ་དག་ཤིན་ཏུ་མང་སྦྱིན་བདག་བསོད་ནམས་དམན་པ་རྣམས་ཀྱིས་དེ་འདྲ་བ་དག་ལ་བློ་གཏད་པས། སྦྱིན་བདག་བཀྲ་མི་ཤིས་ཤིང་རྩིས་མཁན་ཡང་ངན་སོང་དུ་གཞོལ་བ་ས་སྟེང་ཁྱབ་པར་སྣང་བས། དེ་དག་ལ་ཕན་པའི་བསམ་པ་བསྐྱེད་ནས་སློབ་དཔོན་བསྟེན་མི་དགོས། རྒྱུད་རྒྱ་གཞུང་བལྟ་མི་དགོས་། ཐ་ན་སྡོམ་ཚིག་ཡང་བཟུང་མི་དགོས་པ་རྩིས་ལ་མཁས་པའི་ཟིན་བྲིས་
ནི་འདི་ལྟ་སྟེ། སྤྱིར་རྩིས་ཀྱི་སྡོམ་ཚིག་མང་དུ་འབྱུང་བ་ལ་ཕལ་ཆེར་ནི། རྩིས་གཞི་བཀོད་ཐབས། སྐར་ཡིག་བཀོད་ཐབས་སོགས་ཡིན་པས། རྩིས་གཞི་དང་སྐར་ཡིག་དག་པོ་གཅིག་ཡོད་ན། སྡོམ་ཚིག་དེ་རྣམས་ཕལ་ཆེར་མེད་ཀྱང་ཆོག་གོ །རྩིས་ཀྱི་ལོ་རྒྱུས་དང་ཕྱི་ནང་འབྱུང་བའི་ལོ་རྒྱུས་དང་ཕྱི་ནང་འབྱུང་བའི་སྦྱར་བཤད་རྩིས་ཀྱི་རྩོད་པ་འདྲ་༧འདུག །ལོ་ཡི་བྱུང་ཁུངས་སྤར་ཁའི་ཕུར་སྒྲུང་སྦེ་བའི་ཆད་ལུགས་སོགས་ནི་ཉམས་མཚར་བ་ཙམ་ལས་ཉེར་མཁོ་མེད་པས་འདིར་མི་བཀོད་དོ། །དེ་ནས་བརྩི་ཚུལ་ལ། གཤིན་རྩིས་ལ་བརྩི་གཞི་དང་རྡེའུ་གཞི་ནག་པོ་བཏིང་། གསོན་རྩིས་ལ་དཀར་པོ་བཏིང་། གཤིན་རྩིས་ལ་ཁྱད་མེད་གསོན་རྩིས་སྔ་དྲོ་བྱེད། བླ་མཁྱེན་ལ་རྒྱབ་གཏད། སྐྱབས་འགྲོ་སེམས་བསྐྱེད་རང་ཉིད་འཇམ་དཔལ་བསྒོམ། མདུན་གྱི་རྩིས་གཞི་མ་ཧཱ་གསེར་གྱི་རུ་སྦལ་གྱི་ལུས་ལ་འབྱུང་བའི་ལྷ་ཚོགས་ཐམས་ཅད་མེ་ལོང་གི་གཟུགས་བརྙན་ལྟར་གསལ་བར་བསྐྱེད་ལ། ཆུ་ཅ་ནེ་གང་སོལ་དུམ་བཅུག་ནས་བརྩི་གཞི་ལ་ལན་གསུམ་བསྐོར་ཞིང་རྨུ་གབ་དང་བགེགས་བསྐད་ལ་ཞལ་བུ་དེ་ཕྱི་སྒོ་ཕྱི་ནང་ཙམ་དུ་རྩིས་མ་ཚར་བར་དུ་བཞག །དེ་ནས་རྩིས་བདར་རྒྱས་པར་བྱ།
སྤྲོ་ན་རུ་སྦལ་གྱི་འདྲ་ལུགས་ལོའི་བྱུང་ཁུངས་སྤར་ཁའི་འཁྲུགས་གཞུང་རྣམས་ཐད་ཀ་ལྷ་ཞལ་བྱེད་པ་ལྟར་བཤད། རྩིས་ཀྱི་ཆོ་ལོ་ཡོད་ན་བཀྲམ། བརྩི་བྱ་གཤིན་པོའི་ལོའི་སྟེང་དུ་དུང་ག་ཏུ་ཁབ་གཅིག་བཙུགས། རང་གི་ལག་ཏུ་མདའ་ཆག་གས་མེད་པ་དར་གྱིས་བརྒྱན་ལ་ཐོགས། རྩིས་གཡོག་ལ་རྡེལ་བཀྲམ་བཅུག །དེ་ཡང་རྩིས་གང་བྱེད་ཀྱི་མ་བུ་དགྲ་གྲོགས་མ་ནོར་ཞིང་བློ་ལ་བྱང་བར་གལ་ཆེ་སྟེ། སྡོམ་ཚིག་ནི། ཤིང་གཅིག་མེ་གཉིས་ས་གསུམ་ལྕགས་དང་བཞི། །ཆུ་ནི་ལྔ་སྟེ་འབྱུང་བའི་གྲངས་སུ་འདོད། །ཐུར་དེད་བུ་ཡིན་གྱེན་དུ་དེད་པ་མ། །ཨ་ཕྱི་དགྲ་ཡིན་ཚ་བོ་གྲོགས་སུ་འགྱུར། །ཅེས་པའི་དོན་ནི། གབ་རྩེ་ལ་ཤིང་ལ་གཅིག་ཡིག །མེ་ལ་གཉིས་ཡིག་སོགས་འབྱུང་བས། །དངོས་སུ་འབྱུང་བའི་མིང་བྲིས་གོ་སླ་ཕྱིར། །ཡིན་ལ་རང་གཟུགས་བྲིས་པའི་མཐོང་ཕྱེའོ། །ཤིང་བུ་མེ་སོགས་ཐུར་དེད་བུ་ཡིན་ནོ། །བུ་དང་འཕྲད་ན་ནག་པོ་གཅིག །བཞག་སྟེ་འབྱུང་གར་སྐྱོབ་དགོས་ཤིང་། །ཚུར་གསུམ་དུ་བས་ནག་པོ་ཐོབ་པའོ། །ཆུ་མ་ལྕགས་སོགས་གྱེན་དུ་དེད་པ་དེ་མ་ཡར་དེད་དོ། །མ་དང་འཕྲད་ན་དཀར་པོ་གཉིས། །མས་ནི་བསྐྱེད་ཅིང་སྐྱོབས་པས་དཀར་
པོ་གཉིས་ཐོབ་པའོ། །ཤིང་དགྲ་ལྕགས་ལྕགས་དགྲ་མེ་སོགས་མའི་མ་ལ་ཨ་ཕྱི་ཟེར་བ་ལྟར། འདི་ཡང་ཨ་ཕྱི་གང་ཡིན་པ་དགྲ་རུ་གྱུར་པའོ། །དགྲ་དང་འཕྲད་ན་ནག་པོ་གཉིས། དགྲས་ནི་གསོད་ཅིང་འཇོམས་པའི་ཕྱིར་ནག་པོ་གཉིས་ཐོབ་བོ། །ཤིང་གྲོགས་ས་དང་ལྕགས་གྲོགས་ཤིང་སོགས་འཇིག་རྟེན་བུ་ཡི་བུ་ལ་ཚ་བོ་ཟེར་བ་ལྟར། །འདི་ཡང་ཚ་བོ་གང་ཡིན་པ་དེ་གྲོགས་སུ་འོང་ངོ་། །གྲོགས་དང་འཕྲད་ན་དཀར་པོ་གཅིག །གྲོགས་དང་འཕྲད་ན་མཐུན་རྐྱེན་འགྲུབ་པས་དཀར་པོ་གཅིག་ཐོབ་བོ། །དེ་ཡང་ཕར་ཐུབ་ན་དགྲ་ཡི་དཔུང་འཇོམས་པས་དེ་ཡི་མངའ་ཐང་རང་ལ་གྲོགས་སུ་འོང་བ་ལྟ་བུར། ཚུར་ཐུབ་ན་དགྲ་ཡིན་པས་དེ་གཉིས་གོ་མ་ལོག་པར་གལ་ཆེའོ། །རྩིས་གཞུང་འགའ་རེ་ན། བུ་དང་འཕྲད་ན་རྫུ་དཀར་པོ་གཅིག་བྱེད་སྐབས་ཀྱང་ཡོད་དོ། །སོ་སོའི་སྐབས་སུ་ཤེས་སོ།། ༈ ཤིང་ལྕགས་མེ་གསུམ་ནང་འཕྲད་ནག་པོ་གཅིག །ས་ཆུ་ནང་འཕྲད་དཀར་པོ་གཅིག །གཤིན་རྩིས་ལ་བྱའོ། །གསོན་རྩིས་ལ་འབྱུང་བ་ནང་འཕྲད་དཀར་ནག་གཉིས། དེ་བཅད་པ་དུ་ཧར་ནག་པོས་གསུངས་པའོ།། ༈ དེ་ནས་བརྩི་བྱའི་ལོ་གྲངས་ངོས་འཛིན་ནི། ལོ་གྲངས་བཅུ་
གསུམ་ཉེར་ལྔ་སོ་བདུན་དང་། ཞེ་དགུ་རེ་གཅིག་དོན་གསུམ་གྱི་ལྔ་དང་། དགུ་བཅུ་གོ་བདུན་རང་ལོ་སྟེང་དུ་ཕྱིན། ཉེར་བཞི་ཚུན་ལ་བཅུ་གསུམ་དང་། གོ་དྲུག་ཚུན་ལ་གྱ་ལྔ་ནས་བརྩམས་པས། ལོ་དུ་ལོན་ཤེས་སོ། །མི་འགའི་འབྱུང་བའི་སྙིགས་མ་ཤས་ཆེ་བས་ལོ་ཉུང་ཡང་རྒས་ཤ་ཆགས་པ་དང་། ལུས་འབྱུང་བའི་དྭངས་མ་ཤས་ཆེ་རྣམས་ལོ་མང་ཡང་གཞོན་ཤ་ཆགས་པ་ཡོད་པས་ལོ་སྐོར་ནོར་ཉན་ཡོད་པས་རྒྱུས་ཡོད་ན་མཉམ་སོགས་ལ་དྲི་བ་གལ་ཆེ་ཞིང་། ལོ་གསར་རྙིང་མཚམས་སུ་སྐྱེས་པ་སོགས་ཕ་མ་རྒྱུས་ཡོད་ཟླ་བའི་སྟོད་སྨད་གང་ཡིན་སོགས་དྲིས་ལ་གསར་རྙིང་གང་ཡིན་དཔྱད་པ་གལ་ཆེ་སྟེ། མི་ཕལ་པས་ལོ་གསར་རྙིང་མི་འབྱེད་ཅིང་རྡོལ་ཆོལ་དུ་སྨྲ་བ་མང་བའི་ཕྱིར་རོ། །བརྩི་བྱའི་དབང་ཐང་ངོས་འཛིན་ནི། གནམ་ལོ་ནས་ལོ་དུ་ལོན་བར་གྱེན་དུ་བགྲང་། ཤོག་བཀྲ་སློག་ནས་སླར་ཤོག་བཀྲ་མཇུག་ནས་ཡར་བགྲང་བས་ཤེས་ཏེ། མགྱོགས་འདོད་ན་བཅུ་གསུམ་རེའི་སོ་ནས་རང་ལོ་རེ་ཡོད་པའི་སྟེང་ནས་མཆོང་ཞིང་། གཅིག་བཅུ་གསུམ་ཉེར་ལྔ་སོ་བདུན་ཞེ་དགུ་རེ་གཅིག་དོན་གསུམ་གྱ་ལྔ་གོ་བདུན་སོགས་བགྲང་སྟེ། བློ་ནས་དབང་ཐང་ངོས་འཛིན་ནི། གནམ་ལོ་ཕོ་ལོ་ཤར་བའི་
དུས། གཅིག་བཅུ་རང་། གསུམ་གཉིས་མ། བཞི་ལྔ་དགྲ། དྲུག་བདུན་གྲོགས། བརྒྱད་དགུ་བུ་རུ་ཤེས་པར་བྱ། གནམ་ལོ་མོ་ལོ་ཤར་བའི་དུས། གཅིག་གཉིས་རང་། གསུམ་བཞི་མ། ལྔ་དྲུག་དགྲ་ལ། དྲུག་བདུན་བརྒྱད་གྲོགས། དགུ་བཅུ་བུ་རུ་ཤེས་པར་བྱ། གནམ་ལོ་སྲོག་ལུས་དབང་ཐང་སོགས་ཐམས་ཅད་ནི་གབ་རྩེའམ་བརྩི་གཞིའི་ནང་ལ་གསལ་ཞིང་ལོ་ལ་ཆད་ལྷག་མེད་པས་འཆུག་རྒྱུ་མེད་པའོ། །དེ་ལྟར་མ་བུ་དགྲ་གྲོགས་དང་རྡེའུ་བཞག་ལུགས་རྣམས་བློ་ལ་བྱང་བར་བྱས། བརྩི་བྱའི་འབྱུང་བ་ངོས་འཛིན་པར་བྱས་ནས། བརྩི་ཚུལ་མང་ན་ཡང་འདི་ཕྱོགས་སུ་གྲགས་ཆེ་བ་གཤིན་རྡེལ་ལྔ་བཅུ་ཆ་ལག་དང་བཅས་པ་བཤད་པར་བྱ་སྟེ། ༈ གནམ་ལོ་དང་གཅིག །ལོག་མེན་དང་གཉིས། སྤར་ཁ་དང་གསུམ། སྨེ་བ་དང་བཞི། དར་རྒུད་དང་ལྔ། ཟླ་བ་དང་དྲུག །ཉི་མ་དང་བདུན། དུས་ཚོད་དང་བརྒྱད། གཟའ་དང་དགུ། སྐར་མ་དང་བཅུ། རེ་རེ་ལ་རྡེལ་ལྔ་ལྔ་བརྒྱབས་པས་རྩ་བའི་རྡེལ་ལྔ་བཅུའོ། །དེ་ལ་རྡེལ་རྒྱོབ་ལུགས་གསུམ་ཡོད་པའི་ནང་ནས་དེང་སང་ནག་འགྲོས་གྲགས་ཆེ་བས་དང་པོ་བཤད། ༈ གནམ་
ལོ་དང་གཤིན་པོ་འཐབ་པ་ནགས་འགྲོས་གསུང་པའི་དོན་ནོ། །དེ་ཡང་བརྩི་བྱ་ལ་གནམ་ལོ་ཚུར་ཤར་རྒྱུ་ཡིན་པས་གོ་མ་ལོག་པ་གལ་ཆེའོ། །བརྩི་བྱའི་སྲོག་དང་གནམ་ལོའི་སྲོག་འཐབ། ལུས་དང་དབང་ཐང་རླུང་རྟ་དེ་བཞིན་འཐབ། རུས་ཁམས་གནམ་ལོའི་སྲོག་དང་འཐབས། འདི་གོ་སླ་རྩིས་གསར་རྙིང་ཁྱད་པར་ཅུང་ཟད་ཀྱང་མེད་དོ། ༈ །གཉིས་པ་ལོག་མེན་ལ་གསར་རྙིང་གཉིས་ཏེ། སྐྱེས་པ་མེ་ཕོ་སྟག་ནས་ཐུར་དུ་སྦུབས། བུད་མེད་ཆུ་མོ་སྤྲེལ་ནས་གྱེན་དུ་བཀན་ནས་བརྩི་སྟེ། རྡེལ་བཞག་པ་རྩིས་རྙིང་ངོ་། །ཡང་གནམ་ལོ་དབང་ཐང་གི་ལོའི་བུ་སྟག་ནས་སྐྱེས་པ་ཐུར་དུ་སྦུབས་པ་དང་། བུད་མེད་གནམ་ལོ་གང་ཤར་གྱི་དབང་ཐང་གི་མ་སྤྲེལ་ནས་གྱེན་དུ་བཀན་ནས་ལོ་དུ་ལོན་སྟེང་ནས་བགྲང་ནས་རྡེལ་རྒྱབ་པ་སྟེ་རྩིས་གསར་ལུགས། ༈ རུས་ཁམས་སྤར་ཁ་དང་འཐབ་པ་ཡོད་དེ། རུས་ཁམས་ལོག་མེན་སྲོག་དང་འཐབས་ན་ལེགས། རུས་ཁམས་ལྡོང་ས་ཁམས་པ་དེ་ཤ་བ་ལ་བླ། འགྲུ་ཆུ་ཁམས་པ་དེ་གཡག་ལ་བླ། དབྲ་ལྕགས་ཁམས་པ་དེ་རྐྱང་ལ་བླ། སྒོ་མེ་ཁམས་པ་དེ་ར་ལ་བླ། སྒ་ཤིང་ཁམས་པ་དེ་ལུག་ལ་བླ། དེ་ནི་འབྱུང་བའི་རུས་ཆེན་སྡེ་ལྔ་ཡིན། རུས་མི་ཤེས་པ་རྣམས་
ལྡོང་ལ་བརྩི་སྟེ། ཤ་བ་ལ་བླ་མཁན་མང་བའི་ཕྱིར་རོ། སླར་གཡག་སོགས་ལ་བླ་བ་ཕྱིས་ཤ་བ་ལ་སོགས་ལ་བླ་བ་ནི་མི་རྒྱུད་འཆུག་པ་སྟེ་དེ་འདྲ་རུས་ཐེམ་ཡོད་པ་རྣམས་ལྡོང་ལ་བྱས་ན་ལེགས། རུས་མེད་ཐམས་ཅད་ལྡོང་ལ་སྨྱོས་གསུངས་པའི་དོན་ནོ། །ཡང་སྤྱི་བོར་སྐུ་འཁྱིལ་གཅིག་ལས་མེད་ན་ཕ་གཅིག་ཏུ་ངེས། སྐྲ་འཁྱིལ་གཉིས་ཡོད་ན་ཕ་གཉིས་ཡོད་པར་བཤད་ཅིང་། མི་གཅིག་ལ་རུས་གཉིས་ཚང་བ་སོགས་རུས་འཆོལ་བས་ན་རུས་མེད་ཡིན་པས་ལྡོང་བྱའོ། ༈ །གསུམ་པ་སྤར་ཁ་ལ་གསར་ལུགས་དང་རྙིང་ལུགས་གཉིས་སོ། བརྩི་བྱའི་སྲོག་ལུས་དབང་ཐང་ཀླུང་རྟ་རུས་ཁམས་རྣམས་སྤར་ཁ་རང་ལ་འཐབས་པ་དེ་རྩིས་རྙིང་ངོ་། །འབྱུང་བ་སྐྱ་གཅིག་ཞགས་པས་བཅིང་ཞེས་བྱ། ལི་མེ་སྦྲུལ། །ཁོན་ས་ལུག །དྭ་ལྕགས་སྤྲེལ། ཁེན་ས་ཁྱི། ཁམ་ཆུ་ཕག །གིན་ས་གླང་། ཟིན་ཤིང་སྟག །ཟོན་ས་འབྲུག །བརྩི་བྱ་དེ་རྣམས་ལོ་དང་འཐབས། རུས་ཁམས་སྤར་ཁ་རང་ལ་འཐབས་པའོ། །འདི་བརྩི་ལུགས་ལེགས་མོད། འདིར་འཐབ་ལུགས་མང་བས་ལོང་བས་མཁར་བ་ལྟར་གར་འཐབས་ཆ་མེད་བྱེད་མཁན་མང་དུ་མཐོང་སྟེ། གོང་གི་ཚིག་དེ་ནི་བློ་ལ་མ་
ཟིན་སློབ་དཔོན་གྱི་ཞལ་ཤེས་དང་བྲལ་བའི་སྐྱོན་ནོ། ༈ །དེ་ལ་མ་འཁྲུལ་བ་ནི་འདི་ལྟ་སྟེ། སྲོག་རང་། ལུས་དགྲ། དབང་ཐང་མ། ཀླུང་རྟ་བུ། རུས་ཁམས་སྤར་ཁའི་གྲོགས་ལ་འཐབ་པ་ནི། ལུགས་སྔ་མ་འདི་དོན་ལ་ཤིན་ཏུ་འཐད་ཅིང་། ཕྱི་མ་འདི་མན་ངག་གི་རྩིས་ཏེ་གོ་དོན་ཆུང་ཡང་རྣོ་བ་ཡིན་ནོ།་༈ །བཞི་པ་སྨེ་བ་ལ་ཡང་གསར་རྙིང་གཉིས་ཏེ། བརྩི་བྱའི་སྲོག་ལུས་དབང་ཐང་ཀླུང་རྟ་བཞིའི་སྨེ་བ། གནམ་ལོའི་སྲོག་ལུས་དབང་ཐང་ཀླུང་རྟ་བཞིར་འཐབས། རུས་ཁམས་གནམ་ལོའི་སྲོག་དང་འཐབ་པ་ནི་རྩིས་རྙིང་ཡིན་ལ། རུས་ཁམས་དང་བརྩི་བྱའི་སྲོག་འཐབ་པ་ནི་རྩིས་རྙིང་རང་ཡང་ནོར་བའོ། བཞི་པོ་གོང་ལྟར་ལས་རུས་ཁམས་འཕུར་སྨེ་དང་འཐབ་པ་ཡང་ཡོད་དེ། ད་རུང་ཡང་རྩིས་རྙིང་ཤས་ཆེའོ། །རྩིས་གསར་ལ་ཡང་ལུགས་གཉིས་ཏེ། རྩིས་ཕྱི་འགྱུར་དང་སྔ་འགྱུར་གཉིས་སོ། །དང་པོ་བརྩི་བྱའི་སྲོག་སྨེ་འཕུར་བའི་འཕུར་སྨེ་དེ་དང་སྲོག་སྨེ་ཁོ་རང་འཐབ་ལ་རྡེལ་གཅིག་རྒྱབ་དེ་བཞིན་དུ་ལུས་སྨེ་དང་ལུས་སྨེའི་འཕུར་སྨེ་འཐབ། དབང་སྨེ་དང་དབང་སྨེའི་འཕུར་སྨེ་འཐབ། ཀླུང་སྨེ་དང་ཀླུང་སྨེའི་འཕུར་སྨེ་འཐབ། གནམ་ལོའི་སྐྱེས་སྨེ་དང་རུས་ཁམས་འཐབ། སྐྱེས་སྨེ་
ནི་རྟ་སྦྲུལ་གྱི་སྐྱེས་སྨེ་དགུ་དམར། ལུག་གི་གཉིས་ནག །བྱ་སྤྲེལ་བདུན་དམར། བྱི་ཕག་གཅིག་དཀར། གླང་གི་བརྒྱད་དཀར། ཁྱི་དྲུག་དཀར། སྟག་ཡོས། གསུམ་མཐིང་། འབྲུག་བཞི་ལྗང་ཡིན་ཟེར་བ་ཡོད་ཀྱང་། འདི་ནི་མ་ཀླུང་སྐབས་ཀྱི་སྨེ་བ་འདི་ཡིན་ཀྱང་། གཤིན་ཐང་ལྔ་བཅུའི་རྩིས་རྡེལ་དང་ཤེས་རབ་ལས་ཀྱི་རྩིས་ཀྱི་སྐྱེས་སྨེ་ནི། །ཤིང་བྱི་བཞི་ལྗང་དང་ཆུ་ཕག་བརྒྱད་དཀར་བར་དེ་ཡིན་པས། འདི་འགྱུར་དུ་ནམ་ཡང་མེད་དོ། །འོན་ཀྱང་སྲོག་སྨེ་ལུས་སྨེ་དབང་སྨེ་གསུམ་སྨེ་འཕྲེང་གསུམ་ལ་རེས་མོས་ཡིན། སྲོག་སྨེ་དང་སྐྱེས་སྨེ་སོ་སོ་ཡིན། འདི་གསུམ་ཁ་གསུམ་འགྱུར་གྱི་སྨེ་བ་ཟེར། བརྒྱ་དང་བརྒྱད་ཅུའི་སྐོར་མགོ་ཟེར། དེ་ལ་སྨེ་བའི་ཆད་མཐུད་ཤེས་དགོས་ཏེ། སྨེ་བ་ཆད་ལྷག་ནམ་ཡང་མེད་པར་བསྐལ་པ་ཇི་སྲིད་འཁོར་དགོས་པ་ལས། ཤིང་བྱི་བཞི་ལྗང་དང་ཆུ་ཕག་གི་བརྒྱད་དཀར་བར་ནས་གསུམ་ཆད། ཤིང་བྱིའི་གཅིག་དཀར་དང་ཆུ་ཕག་ལྔ་སེར་བར་ནས་གསུམ་ཤིང་བྱིའི་བདུན་དམར་དང་ཆུ་ཕག་གཉིས་ནག་བར་ནས་གསུམ་ཆད་དོ། །ཤིང་ཕོ་བྱི་བའི་ལོ་ལ་རྒྱ་ནག་ཡུལ་དུ་ཤིང་འཛམ་བུ་སྟག་ཤིང་གི་ལྦ་བ་ལ། འཇམ་དབྱངས་སྐུ་
འཁྲུངས་ལོ་དེའི་ཤིང་ཕོ་བྱི་བའི་སྲོག་སྨེ་བཞི་ལྗང་ཡིན། ཡར་བཞི་ལུས་ཀྱི་སྨེ་བ་ཡིན་པས་ལུས་སྨེ་བདུན་དམར་མར་བཞི་དབང་ཐང་སྨེ་བ་ཡིན་པས་དབང་སྨེ་གཅིག་དཀར་ཡིན་ནོ། །དྲུག་ཅུ་སྐོར་དེ་རྫོགས་ནས། ཤིང་བྱའི་སྲོག་སྨེ་བདུན་དམར། ལུས་སྨེ་གཅིག་དཀང་། དབང་སྨེ་བཞི་ལྗང་། ཡང་དྲུག་ཅུ་སྐོར་དེ་རྫོགས་ནས། ཤིང་བྱིའི་སྲོག་སྨེ་གཅིག་དཀར། །ལུས་སྨེ་བཞི་ལྗང་། དབང་སྨེ་བདུན་དམར་ཡིན་ནོ། །དེའི་དོན་ཆུ་ཕག་གི་བརྒྱད་དཀར་ནས། ཤིང་བྱིའི་བདུན་དམར་སྟེང་དུ་འཕོས་པས་ཆད་ལྷག་མེད། ཆུ་ཕག་ལྔ་སེར་ནས་ཤིང་བྱིའི་བཞི་ལྗང་སྟེང་དུ་འཕོས། ཆུ་ཕག་གི་གཉིས་ནག་ནས། ཤིང་བྱིའི་གཅིག་དཀར་སྟེང་དུ་འཕོས་པས་སྨེ་བའི་ཆད་པ་སབ་སྟེ། འདི་རྩིས་གསར་མན་ངག་ཡིན་ཀྱང་རྒྱུད་སྡོང་པོ་དགུ་འདུས་ནས་ཀྱང་གསལ་བར་གསུངས་སོ། །འདིའི་ལུགས་ནག་རྩིས་རང་རྐང་ཡིན་ལ་ཤིང་བྱི་ལ་འཇམ་དབྱངས། འབྲུག་ལ་སྟོན་པ་ཤཱཀྱ་ཐུབ་པ་སྐུ་བལྟམས་པར་བཤད་པས། དེའི་བར་དྲུག་ཅུ་སྐོར་དུ་སོང་ཤེས་དགོས་པར་སྣང་ལ། དེ་ལ་རྙིང་མའི་ལུགས་ལ་སྟོན་པ་འདས་ནས་ལོ་བཅུ་གཉིས་ནས་ཨོ་རྒྱན་འཁྲུངས་ཏེ། རྒྱ་གར་དུ་སུམ་སྟོང་བོད་དུ་ལོ་བརྒྱ་དང་བཅུ་
གཅིག་བཞུགས་ནས། སྲིན་ཡུལ་དུ་བྱོན་ནས་ལོ་བདུན་བརྒྱ་ལྷག་ཙམ་ནས་རཏྣ་གླིང་པ་བྱོན་པར་བཞེད་པ་དང་། ས་སྐྱའི་བསྟན་རྩིས་དང་བུ་སྟོན་གྱི་བསྟན་རྩིས་རྣམས་༈ ཕལ་ཆེར་མཐུན། འོན་ཀྱང་པཎ་ཆེན་ཤཱཀྱ་ཤྲཱིའི་ལུགས་བཀའ་བརྒྱུད་པའི་བསྟན་རྩིས་ལྟར་ན། སྟོན་པ་འདས་ནས་ལོ་ཉིས་སྟོང་ཉིས་བརྒྱ་ལྔ་བཅུ་ལ་ཞྭ་དམར་དྲུག་པས་རང་ལོ་བཅུ་གསུམ་ལ་ཟ་དམ་རྨང་བཏིང་བར་གསུངས་པའི་ལུགས་རྒྱབ་མ་འདི་བྱས་ན། ཞྭ་དམར་པ་འཁྲུངས་པའི་ལོ་སྐོར་དེ་ལ། ཤིང་བྱིའི་སྲོག་སྨེ་བཞི་ལྗང་ཡིན་པར་སྣང་ལ། ད་ལྟའི་དྲུག་ཅུ་སྐོར་འདི་ལ་བདུན་དམར་གྱི་སྨེ་ཕྲེང་སྲོག་ལྕེ་འོང་བ་འདྲ་སྙམ་ནས། བློ་དང་ལྡན་པ་རྣམས་ཀྱིས་ལེགས་པར་བརྟག་པར་བྱའོ། །ཡང་ས་སྐྱ་པ་སོགས་མཁས་པ་འགའ་ཞིག་གིས་པཎ་ཆེན་ཤཱཀྱ་ཤྲཱིའི་ལུགས་དེ་ནི་མ་དག་པ་ཡིན་ཏེ། སྔར་གྱི་ལོ་རྒྱུས་ཐམས་ཅད་མི་མཐུན་པས་དེ་ནས་རྡོ་རྗེ་གདན་གྱི་རྟེན་བྱང་ཆུབ་ཆེན་པོ་བཞེངས་པའི་དུས་དང་སྟོན་པ་འདས་དུས་གཉིས་ནོར་བ་ཡིན། རྡོ་རྗེ་གདན་དུ་དགེ་བསྐོས་རྣམས་ཀྱིས་དགེ་འདུན་རྣམས་མདོ་བསྐུལ་དུས་སྟོན་པ་འདས་ནས་ལོ་ཟླ་ཞག་དུས་འདི་སོང་ཞེས་ཉིན་གཅིག་ཏུ་ཚོགས་གཏམ་བྱེད་སྲོལ་ཡོད་དགེ་བསྐོས་
ཀྱི་ནོར་བ་ཡིན་གསུངས་ཀྱང་། པཎ་ཆེན་ཤཱཀྱ་ཤྲཱི་ནི་རྡོ་རྗེ་གདན་གྱི་གདན་ས་ལོ་དུ་མར་མཛད་པ་ཡིན་པ་དང་། མ་འོངས་སངས་རྒྱས་བདུན་པ་ཡིན་པས་འཁྲུལ་པ་མེད་དོ་སྙམ་མོ། །སྨེ་བ་བརྒྱད་ཅུ་རྩ་གཅིག་གིས་སྐོར་མགོ་ཞེས་བྱ་བ་སྨེ་བ་འཕུར་ལུགས་ནི། སྔོན་རྒྱལ་པོ་ཁྲི་སྲོང་ལྡེའུ་བཙན་ལ་སློབ་དཔོན་པདྨས་རྟ་མགྲིན་དབང་གི་རྒྱལ་པོའི་དབང་བསྐུར་བས། འཛམ་གླིང་སུམ་གཉིས་དབང་དུ་བསྡུས་པའི་རྒྱལ་པོ་ཆེན་པོར་གྱུར་ནས། ཞང་པོ་རྒྱ་ཡང་བོད་རྒྱལ་པོ་ལ་ཤིན་ཏུ་སྐྲག་ཅིང་། བོད་རྒྱལ་པོས་ལོ་རེ་ལ་རྒྱ་ནག་ལ་དམག་འདྲེན་ནོ། །དེ་དུས་བོད་ཀྱི་ལོ་ཙཱ་བ་བཞི་རྒྱ་ནག་ཏུ་རྩིས་བསླབ་ཏུ་བཏང་བས། རྒྱ་ནག་ཁྲིམས་ཆེ་བས་རྩིས་བསླབས་སམ་མི་བསླབ་རྒྱལ་པོ་ལ་ཞུས་པས། རྒྱལ་བློན་བཀའ་བགྲོས་ནས། བོད་ཀྱི་རྒྱལ་པོ་གདུག་པ་ཆེ་བས་མ་བསླབས་ན་དམག་འོང་། རྩིས་ཚང་བར་བསླབ་ན་བོད་བསོད་ནམས་ཆེར་སོང་ན་རྒྱ་ཡུལ་འཇོམས་ཤིང་རྒྱལ་སྲིད་འཕྲོག་པའི་ཉེན་ཡོད་པས། རྩིས་གཞན་རྣམས་སློབ་ལ། སྨེ་བ་རུས་པའི་གཏིང་འདྲ་བ་འདི་གལ་ཆེ་བས། འདི་དཀྲུག་ལ་ལོག་པར་སློབས་ཤིག །འདི་སུས་ཀྱང་ཇི་ལྟ་བར་བསླབ་ན་མི་རུང་ངོ་། །ཞེས་ཁྲིམས་བྱས་སོ། །དེ་ལ་བརྩི་
ལུགས་བསླབས་ནས་བཀོད་ལུགས་དག་པར་མ་བསླབ་སྟེ། དབུས་ནས་གནམ་ལྕགས་རི་བོ་ལ། །མེ་ཆུ་ས་ཤིང་རླུང་བསྐྱོད་དབུས་སུ་འཕུར། །ཞེས་པ་འདིའི་དོན་ནི་དཔེར་ན་བཞི་ལྗང་ལྟ་བུ་དབུས་སུ་བཞག་ནས། ནུབ་བྱང་དུ་གསུམ་བྲི། ནུབ་ཏུ་གཉིས། བྱང་ཤར་དུ་གཅིག །ལྷོར་དགུ། བྱང་དུ་བརྒྱད། ལྷོ་ནུབ་ཏུ་བདུན། ཤར་དུ་དྲུག །ཤར་ལྷོར་ལྔ་བྲི་རྒྱུ་ཡིན་ཏེ། སྨེ་བ་ཐུར་དུ་བརྩི་ནས། དགུ་བརྒྱད་བདུན་དྲུག་ལྔ་བཞི་གསུམ་གཉིས་གཅིག་ཟེར་བ་ཡིན་པ་ལྟར། དཀྲུག་ནས་གྱེན་དུ་བཀོད་དེ། དཔེར་ན་བཞི་ལྗང་དབུས་སུ་བཞག་ནས། ནུབ་བྱང་དུ་ལྔ། ནུབ་ཏུ་དྲུག །བྱང་ཤར་དུ་བདུན། ལྷོར་བརྒྱད། བྱང་དུ་དགུ། །ལྷོ་ནུབ་ཏུ་གཅིག །ཤར་དུ་གཉིས། ཤར་ལྷོར་གསུམ་བཀོད་དེ་ཞེས་གྱེན་དུ་དཀྲུགས་ནས་བཀོད་པས་འཁྲུལ་སྨེ་ཞེས་བྱའོ། །འདི་རྩིས་རྙིང་ཐམས་ཅད་དཀྲུགས་ནས་ཡོད་དེ་མ་དག་པའོ། །ཐུར་དུ་རྩིས་ནས་བཀོད་པ་རྩིས་གསར་ཏེ། ཁམ་པ་ཁྲ་མོ་ཕྱིས་རྒྱ་ཡུལ་དུ་བྱོན་ནས། མཁས་པ་རཱ་ཧུ་ལ་དམར་པོ་དང་། ཨ་ཙ་ར་ཟླ་བ་ནག་པོ་སོགས་རྒྱ་ཡི་མཁས་པ་མང་པོ་ལ་གཏུགས་པས། དེ་དུས་ནས་བོད་མངའ་ཐང་ཉམས་ཏེ། །
བོད་ཕལ་ཆེར་རྒྱ་ཡི་དབང་བསྒྱུར་བས། མཐོ་དོགས་མེད་པའི་ཕྱིར་གཞུང་སྨེ་མ་འཕྱུགས་པར་བསླབས་པས། གཞུང་དང་མཐུན་གཞུང་སྨེ་ཞེས་བྱ་བ་ཡིན་ནོ། །སྨེ་བ་འཕུར་ལུགས་ནི་དབུས་ནས་གནམ་ལྕགས་རི་བོ་ཟེར་བའི་དོན་དེ་ནི་རང་ལུགས་ནི། བྱིས་པ་ཆུང་ངུའི་དུས་ནས་སྨེ་སྒོ་ཤར་བྱེད་ནས་འཕུར་ཏེ། ཕོ་ལོ་དྲུག་ནི་གཡས་སྐོར་བྱེད་ནས་བྱང་ཤར་ནས་དབུས་སུ་ཞུགས་ཀྱང་ཤར་ནས་ཕྱིར་ཐོན། མོ་ལོ་དྲུག་གི་ལོ་པ་ནི། གཡོན་སྐོར་བྱེད་ནས་ཤར་ལྷོ་ནས་དབུས་སུ་མཇུག་ནས་ཤར་ནས་ཕྱིར་ཐོན་པ་ཡིན་ལ། བརྩི་བྱ་ལོ་མང་པོ་མགྱོགས་རྩིས་ནི་དབུས་སུ་བཅུ་ཤར་དུ་ཉི་ཤུ་སོགས་ལིང་ཙེ་རེ་རེ་ལ་སུམ་ཅུ་བཞི་བཅུ་ལྔ་བཅུ་སོགས་བརྗོད་ཅིང་། ང་གཅིག་ཅེས་བརྗོད་པ་ནི་རྩིས་པས་མགྱོགས་ཀྱང་དབུས་སུ་དགུ་བརྗོད་ཟེར་བ་ནི། རྟོག་དཔྱོད་ཅུང་ཟད་ཀྱང་མི་ཤེས་པ་ནི་འཁྲུལ་ཚབ་ཅན་ནོ། ༈ ཡང་སྨེ་བའི་མན་ངག་རྡེལ་རྒྱོབ་ལུགས། སྨེ་བའི་སྲོག་ལུས་དབང་ཐང་། ཀླུང་རྟ་བླ་གཟའ་ལྔ་པོ་ནི། སྲོག་རང་ལུས་མ་དབང་ཐང་བུ། རླུང་རྟ་སྲོག་ལ་བླ་གཟའ་དགྲ་ཞེས་པའི་དོན་ནི། བརྩི་བྱའི་སྐྱེས་སྨེ་གང་ཡིན་པ་དེ་འཕུར་ལ། དེ་གང་ལ་བབ་པའི་འཕུར་སྨེ་དེ་དང་། བརྩི་བྱའི་
སྲོག་སྨེ་འཐབ། བརྩི་བྱའི་ལུས་སྐྱེ་དེ་དང་འཕུར་སྨེ་འབྱུང་བ་གང་ཡིན་དེའི་མ་དེ་དང་འཐབ། བརྩི་བྱའི་དབང་ཐང་སྨེ་བ་དང་འཕུར་སྨེའི་འབྱུང་བའི་བུ་དེ་འཐོབ། །བརྩི་བྱའི་རླུང་སྨེ་དང་འཕུར་སྨེའི་གྲོགས་དེ་འཐབ།། བརྩི་བྱའི་རུས་ཁམས་དང་འཕུར་སྨེའི་དགྲ་དེ་འཐབས་པ་ཡིན་ནོ། །དེ་ལྟར་སྨེ་བའི་སྐོར་འདི་ལ་འཁྲུལ་བ་མང་ཞིང་དཀའ་གནད་ཆེ་བས། རྩིས་པ་ཕལ་ཆེར་འདིའི་སྐབས་ལ་ཞལ་ཉུང་བ་ཡིན་ནོ། ༈ །དེ་ནས་ལྔ་པ་དར་རྒུད་ནི། སྲོག་ལུས་དབང་ཀླུང་རུས་ཁམས་འབྱུང་བ་གང་ཡིན་འདི་ལྟར་རོ། །ཤིང་དབུགས་སྤྲེལ་ནས་རྒྱུ། མེ་དབུགས་ཕག །ལྕགས་དབུགས་སྟག །ས་ཆུ་གཉིས་སྦྲུལ་ནས་དབུགས་རྒྱུའོ། །མངལ་གནས། །ལུས་རྫོགས། བཙས་པ། ཁྲུས་བྱེད། གོས་གྱོན། ལས་བྱེད། དར་བ། ད་པ། ན་བ། ཤི་བ། དུར་དུ་ཞུགས་པའོ། །རིམ་པ་ལྟར་ལོ་བཅུ་གཉིས་ཀྱི་སྟེང་དུ་བགྲང་སྟེ། སྲོག་ནི་གནམ་ལོའི་སྟེང་། ལུས་པ། ཟླ་བ། དབང་ཐང་ཞག །རླུང་རྟ་དུས་ཚོད། རུས་ཁམས་སྤར་ཁ་ལ་གཏུགས་པའོ། །དེ་ཚིག་འཕྲོ་བཟང་ངན་གྱི་རྡེལ་བཞག་པ་ཡིན་ཏེ། གོས་གྱོན་དར་བ་ལས་བྱེད་གསུམ་ལ་
དཀར་པོ་གཉིས་རེ། ལུས་རྫོགས་བཙས་པ་ཁྲུས་བྱེད་གསུམ་ལ་དཀར་པོ་གཅིག་རེ་སྟེ། ཉིན་གྱི་རྡེལ་དཀར་རྡེལ་དྲུག་ཅེས་བྱའོ། །ན་ཤི་དུར་ཞུགས་གསུམ་ལ་རྡེལ་ནག་གཉིས་རེ། །རྒུད་པ་དབུགས་རྒྱུ་མངལ་གནས་གསུམ་ལ་རྡེལ་ནག་གཅིག་རེ་སྟེ། སྲིབ་ཀྱི་རྡེལ་ནག་རྡེལ་དྲུག་ཅེས་ཟེར་རོ། །རྩིས་པ་འགའ་ཞིག་ན་རེ། དབུགས་རྒྱུ་བ་ལ་དཀར་པོ་གཅིག ། མངལ་གནས་པ་ལ་དཀར་ནག་གཉིས། རྒུད་པ་ལ་དཀར་གཉིས་ཟེར་བ་ནི། དར་རྒུད་ཀྱི་གོ་བ་ཙམ་མ་ཆགས་པ་སྟེ། དར་རྒུད་བཅུ་གཉིས་རྟེན་འབྲེལ་བཅུ་གཉིས་ངོ་བོ་དང་གཅིག་སྟེ། སྐྱེ་འཆི་གནས་གསུམ་བར་དོ་དང་བཞི་ཚང་བ་ཡིན་ཏེ། དབུགས་རྒྱུ་བ་དང་དབུགས་ལེན་ཞེས་པ་འགྱུར་གྱིས་ཁྱད་ཙམ་ཡིན་ཏེ་ངོ་བོ་གཅིག །ཚེ་སྔ་མ་ཤི་ནས་དབུགས་སོང་བ་དེ་ཡིན་པས། དཀར་པོ་ཐོབ་དོན་ཅི་ལ་ཡོད། མངལ་གནས་ཞེས་པ་ནི་མའི་མངལ་དུ་ཞུགས་པ་ཡིན་པས། བར་དོ་དག་པའི་སྒྱུ་ལུས་དེ་མ་དག་འཁོར་བའི་མངལ་དུ་ཚུད་པས་ནག་པོ་ཐོབ་རྒས་པ་དང་རྒུད་པ་འགྱུར་ཁྱད་ངོ་བོ་གཅིག །གཤིན་རྩིས་ལ་རྡེའུ་དཀར་ནག་གཉིས་བྱས་ལ་རྡེལ་རོ་མི་གསོལ་མི་རུང་བར་བཤད་དོ། ༈ །དྲུག་པ་ཟླ་བའི་རྩིས་ནི། ལོ་དང་ཟླ་བ་
འབྱུང་བ་སྦྲགས་མ་ཡིན། ཅེས་པའི་དོན་ནི། ལོ་ཟླ་བ་གཉིས་འདྲ་བར་ཕོ་ལོ་མོ་ལོ་གཉིས་དབང་ཐང་མཐུན་པར་འོང་སྟེ། ལོ་མ་ལ་ཟླ་བ་བུར་ཚེས་ཞེས་པས། གནམ་ལོ་ལ་ཤིང་ཤར་ན། དཔྱིད་ར་བ་འབྲིང་པོ་གཉིས་མེ་སྟག་མེ་ཡོས་ཏེ་དེས་འགྲེས་སོ། །ཟླ་བ་གང་ཡིན་ངོས་བཟུང་ནས། བརྩི་བྱའི་སྲོག་ལུས་དབང་ཐང་རླུང་རྟ་དང་ཟླ་བའི་ཡང་དེར་འཐབ། རུས་ཁམས་ཟླ་བའི་སྲོག་དང་འཐབ། དེ་ཡང་དཔྱིད་ར་བ་སྟག་ཡིན་པ་ཁ་མཉམ་ཡང་། ཟླ་བ་དེ་ཁ་མི་མཉམ་སྟེ། ནག་རྩིས་ལ་མིང་བཏགས་པའི་འདྲ་མིན་བཞི་འབྱུང་ངོ་། དབུས་གཙང་གི་སྐར་ཡིག་ཕལ་ཆེར་དང་ཁམས་སུ་ཡང་རེ་རེ་ཙམ་སྣང་བ་ལ། མགོ་ཟླ་ལ་དཔྱིད་ཟླ་སྟག་སུ་རྩིས་ནས། ཐམས་ཅད་དེ་ལྟར་བྱས་པས་སྐར་མ་དང་ས་བདག་རྒྱུ་ཐེབས་དང་གཟའ་ཉི་མ་ཐམས་ཅད་བརྩི་ཚུལ་མགོ་ཟླ་ཡོད། འདི་ནི་སྔོན་མངའ་བདག་ཁྲི་རལ་པ་ཅན་གྱི་དུས་རྒྱ་བོད་གཉིས་གཡུལ་གཏུགས་པའི་དུས་ཆ་བྱས་དུས། རྒྱ་ན་རེ། ལོ་སར་དུས་གཡུལ་གཏུག་བྱེད་ཟེར། ལོ་སར་ནམ་ཡིན་སྨྲས་པས། ལོ་ཨེ་སར་སྐར་མ་རྒྱལ་ལ་ལྟོས། ཟླ་བ་དེ་ཉིད་སྨྲས་པ་ལ། བོད་ཀྱི་གསང་དམག་བྱས་ནས་སོང་སྟེ། མགོ་ཟླ་ལ་
བརྒྱབས་པས་བོད་རྒྱལ་ནས། རྒྱུ་ན་རེ། ཁྱོད་བོད་ཀྱི་མགོ་གཡོག་གསང་དམག་བྱས་ནས་རྒྱལ་བས་རྒྱལ་གོ་མི་ཆོད་ཟེར་བས། བོད་རྒྱལ་པོ་ན་རེ། གསང་དམག་མིན་ངེད་བོད་ཀྱི་ནི་ཟླ་བ་འདི་ལ་ལོ་སར་བྱེད་པ་ཡིན། ཞེས་རྒྱ་ལ་སྨྲས། བོད་འབངས་རྣམས་ལ་ཁྲིམས་བསྒྲགས་ནས། ཟླ་བ་འདི་ལ་རྒྱ་ནག་ལུགས་ཀྱི་ལོ་གསར་ཡང་མིན་ཏེ། དམག་གི་དུས་ཆད་བྱས་དུས་རྒྱ་ན་རེ། ལོ་ཨེ་སར་སྐར་མ་རྒྱལ་ལ་ལྟོས། དམག་གི་ཟླ་བ་འདིའི་སྔ་མ་ཡིན་ཟེར་རོ། །ཞེས་རྫུན་སྨྲས་ནས། རྒྱལ་པོའི་མཚང་འགེབ་བྱས་ནས། བོད་རྒྱལ་པོའི་ལུགས་ཞེས་ཀྱང་སྶ། བོད་རྩིས་ཞེས་ཀྱང་བྱའོ། ཕྱིས་སུས་ཀྱང་རྩིས་མགོ་ཡིན་པར་ཤེས་ཀྱང་། བོད་རྒྱལ་ནས་བཀྲ་ཤིས་པའི་འཕྲག་ལམ་ཡོད་ཅེས་མ་བསྣུབས་པར་བཞག་གོ །ཡང་རྒྱ་ནག་གི་ཡུལ་དུ་ཧཱ་ཤང་དེ་བ་དང་། རྒྱ་ནག་སེ་ཐན་བྱ་བའི་བདུད་ཀྱི་སྤྲུལ་པའི་ཧྭ་ཤང་གཉིས་བྱུང་བ་དེས། འཇམ་དབྱངས་ཀྱི་གསུང་དང་མི་མཐུན་པའི་རྩིས་ལོག་མང་དུ་བརྩམས་ཏེ་དེའི་རྩིས་མང་པོ་ད་ལྟའི་རྩིས་རྣམས་ལ་འདྲེས་ནས་ཡོད་དོ། །གཤིན་རྩིས་འགའ་ཞིག་ལ་རྡེལ་ནག་འགའ་ཞིག་བྱུང་བ་ལ་བརྟེན་ནས། རྗེས་ནས་ཆོས་བྱས་ཀྱང་མ་བྱེད་ཟེར་བ་དང་།
འདུར་ཐུབ་མི་ཐུབ་རྩིས་ནས་འདུར་མི་ཐུབ་པ་རྗེས་ནས་དགེ་བ་ཤིག་བྱས་ན་རྗེས་མ་བཀྲ་མི་ཤིས་ཟེར་བ་དང་། རྒྱལ་པོ་སོགས་མི་ཆེན་ལ་སྐག་ཡོད་ན་དེའི་སྐག་འགྱུར་བས་གླུད་བཏང་སྟེ། དེ་དང་ལོ་མཉམ་པ་གཅིག་བསད་ནས་སྐག་འགྱུར་ཟེར་བ་སོགས། ཆོས་ལོག་རྩིས་ལོག་དུ་མ་དང་། དེ་བཞིན་དུ་དྲང་སྲོང་ཕུག་པ་དགུ་སྐོར་ཞེས་ཕུག་པ་ཁ་བྱང་དུ་གྱུ་བའམ། ཉི་ཟླ་ལ་རྒྱབ་གཏད་ནས་རང་གང་རང་ཐག་བྱས་ནས་བཙུག་ན་ཤི་སྒབ་ཆད། ཡང་ན་མ་གང་ན་རེ་འོང་ཞེས་སོགས་པ་རྩིས་ལོག་དུ་མ་བརྩམ་མོ། །དེ་རྣམས་སྤང་ན་ཤཱིལེགས་དེ་ནས་ཕྱིས་རྗེ་མི་བསྐྱོད་རྡོ་རྗེ་གདན་འདྲེན་ལ་རྒྱ་ནག་གི་རྒྱལ་པོས་བློན་པོ་ཐའི་རྐྱེན་ཞེས་བྱ་བ་དམག་འབུམ་དང་བཅས་པ་བཏང་ནས། ཀརྨ་པ་རབ་སྒང་ཕྱོགས་སུ་མཇལ་དུས། བློན་པོའི་འཁོར་དུ་རྩིས་པ་མང་པོ་ཡོད་པ་མི་བསྐྱོད་རྡོ་རྗེས། དེང་བོད་དུ་རྒྱ་ནག་གི་རྩིས་མང་དུ་ཡོད་པས། རྒྱ་ནག་གི་སྟག་ཟླ་བ་མ་འཆུག་པ་དེ་གང་ཡིན་གསུངས་པས་མ་འཆུག་པ་དེ་མཆུ་ཟླ་བ་སྟག་ཟླར་རྩིས་པས་སྐར་ཡིག་ཝ་མགོ་མ་འདི་བྱུང་སྟེ། ད་ལྟ་ཡང་སྒར་པའི་ལོ་སར་ཆེན་མོ་ཡང་འདི་ལ་བྱེད་པ་ཤིན་ཏུ་གྲགས་ཆེ་མོད། འདི་ཡང་ཧྭ་ཤང་དེ་ཝ་དང་། རྒྱ་ནག་
སེ་ཐན་གྱིས་བྱས་པའི་རྩིས་ལོག་ཡིན་པར་མཁས་པ་རྣམས་ཀྱི་གསུང་དང་ཡིག་ཆ་ནས་བྱུང་སྟེ། ཟླ་བ་ཕོ་མོ་ནོར་ན་ཉི་མ་དང་གཟའ་ནོར་སྐར་སྐྱོན་ཐམས་ཅད་ནོར་ཏེ་ཡོད་དོ། །ཨོ་རྒྱན་གྱི་ལུང་བསྟན་ལས་རྩིས་ལོག་འབྱུང་བར་ལུང་བསྟན་པ་དང་མཐུན་པར་སེམས་སོ། །དེས་ན་རང་ལུགས་ནི་དཔྱིད་ར་བ་སྟག་ཟླ་ནི་རྒྱལ་ཟླ་བ་ལ་ངོས་འཛིན་ཏེ། དྲངས་ལྡན་ལྷ་མོའི་ཞུས་པ་སོགས་ནག་རྩིས་ཀྱི་རྒྱུད་དང་། ཨོ་རྒྱན་རིན་པོ་ཆེ་ལྷ་ཚངས་པར་སྤྲུལ་ནས་རྩིས་ཀྱི་ཞུ་བ་པོ་མཛད་ནས་ནག་རྩིས་ཐམས་ཅད་ཀྱི་ཕུག་ལྟ་བུ་ཡིན་པས། ཨོ་རྒྱན་རིན་པོ་ཆེས་དགོངས་འདུས་སྐར་མཛོད་ན་ཡང་རྒྱལ་ཟླ་བ་སྟག་ཟླར་མཛད་པས་ཡིད་ཆེས་སོ། །མཚུར་ཕུ་འཇམ་དབྱངས་ཆེན་པོས་ནག་རྩིས་ཤོག་བཀྲ་ལ་ཡང་རྒྱལ་ཟླ་བ་སྟག་ཟླར་མཛད། དེ་ནི་ནག་རྩིས་རང་སྐད་ཡིན་གྱི། གཞན་འདུལ་བ་སོགས་གཞན་ལ་སྟག་ཡོས་སོགས་ལོ་མིང་མེད་པས་གཞན་ལུགས་དང་བསྟུན་པས་མི་འཐད་དོ། །དུས་འཁོར་བས་ནག་པ་ཟླ་བ་དཔྱིད་ར་བར་རྩིས་དང་། གསོ་རིག་པས་མཆུ་ཟླ་བ་དཔྱིད་ཟླ་དང་པོར་བརྩི་བར་གསུངས་ཀྱང་། ནག་རྩིས་སྐབས་སུ་དེ་མི་རུང་ངོ་། །ནག་རྩིས་ལུགས་འགའ་ཞིག་ལ་སྟག་ལ་དཔྱིད་བཞི། སྦྲུལ་ལ་
དབྱར་བཞི། སྤྲེལ་ལ་སྟོན་བཞི། ཕག་ལ་དགུན་བཞི་འབྱུང་ཞེས་ལ་ར་བ་བཞི་ལ་ཟླ་བ་ར་བ་བཞི་ལྷག་པར་བཤད་ཀྱང་། འདི་དུས་འཁོར་སོགས་གཞན་དང་མི་མཐུན་ཞིང་རྩིས་རྙིང་ཤས་ཆེ་བས་མི་ལེགས། ཟླ་བ་མ་མཐུན་ན་རྩིས་ཐམས་ཅད་འཕྱུགས་ནས་འགྲོ་སྟེ། ཨོ་རྒྱན་རིན་པོ་ཆེའི་ལུང་བསྟན་ལས། གཟའ་སྐར་ཚེས་གྲངས་མི་མཐུན་ཞིང་འཕྱུགས་པས་རྟེན་འབྲེལ་གྱི་ཕན་ཐོགས་ཟད། ཅེས་གསུང་པ་ལྟར་འོང་བ་ཡིན་པས། དེ་ནས་ཟླ་ལྷག་ནི། བྱི་རྟ་བྱ་ཡོས་བཞི་ལ་ཟླ་ལྷག་བྱུང་བས་དུས་འཁོར་དང་ཡང་མཐུན་པས་འདི་ལེགས་སོ། །དེ་ལ་བྱི་བ་ལ་དཔྱིད་འབྲིང་གཉིས། ཡོས་ཀྱི་ལོ་ལ་དབྱར་འབྲིང་གཉིས། །བྱ་ཡི་ལོ་ལ་དགུན་འབྲིང་གཉིས། །རྟ་ཡི་ལོ་ལ་སྟོན་འབྲིང་གཉིས། ༈ །བདུན་པ་ཉི་རྒྱུ་མའི་རྩིས་ནི། ཕོ་དྲུག་སྟག་ཚེས་འབྲུག་ཉ་ལུག་ལ་སྟོང་། མོ་དྲུག་སྤེལ་ཚེས་ཁྱི་ཉ་གླང་ལ་སྟོང་། ཟླ་བ་མ་ལ་ཞག་བུར་ཚེས་ཞེས། ཟླ་བའི་དབང་ཐང་ཤིང་ཡིན་ན། ཤིང་བུ་མེ་ཡིན་པས་ཚེས་གཅིག་གི་དབང་ཐང་མེ་ཡིན་ནོ། །ཞག་དང་དུས་ཚོད་འབྱུང་བ་རྐྱང་དད་ཡིན་པས་ཚེས་གཉིས་མེ་བུ་ས་དེས་འགྲེས་ཤེས་པར་བྱའོ། །དེ་ཅི་ཡི་ཕྱིར་ཞེ་ན། ལོ་ཟླ་གཉིས་
འབྱུང་བ་གཅིག་དཀྲུགས་སྦྲགས་ཏེ་ཡོད་པས་འབྱུང་ཆེན། ཞག་དུས་ཚོད་གཉིས་འབྱུང་བ་ཅིག་རྐྱང་དེ་འབྱུང་ཆུང་ཡིན་ནོ། །དེ་ལྟར་དབང་ཐང་ངོས་བཟུང་ནས། དེ་ལྟར་ལོ་རྒན་ནང་ན་འབབ་སྟེ། བརྩི་བྱའི་སྲོག་ལུས་དབང་ཐང་ཀླུང་རྟ་ཡི། ཞག་གི་སྲོག་ལུས་དབང་ཐང་ཀླུང་དང་འཐབས། རུས་ཁམས་ཞིག་གི་སྲོག་དང་འཐབས། ཚེས་ཀྱི་ཚད་ལྷག་ནི། བྱ་ཡོས་གཉིས་ཀྱི་ཚེས་དྲུག་དང་། ཞེས་སོགས་ནག་རྩིས་ནས་ཆད་ལྷག་ཧང་བ་གཅིག་གསུངས་ཀྱང་། འདི་ཞིབ་པར་བྱས་ན་མི་འཐད་དོ། །བྱ་ཡོས་ཟླ་ཚེས་དྲུག་རྟག་ཏུ་ཆད་ན། སྐར་ཡིག་ལིང་ཚེ་གཅིག་བྲི་ནས་དགོས་པ་མེད་པའི་ཕྱིར་རོ། །ཞིབ་པར་ཆད་ལྷག་ས་རིས་དང་བསྟུན་ན་ལེགས། ནག་རྩིས་རྐྱང་པ་བྱེད་ན། ཆད་ལྷག་ནི་ཟླ་བའི་ཚེས་ཚོད་གང་ཚོད་བྲི་ཚོད་ལ་དཔང་པོ་བྱེད་དགོས་སོ། །ས་ཆ་ཡང་ན་ཚེས་གཉིས་ཟླ་བ་ཤིན་ཏུ་ཕྲ་བ་ཡིན་འབྱུང་། ཚེས་གཉིས་ནས་ཚེས་གསུམ་ཟླ་བ་བྱུང་ན་ཚེས་ཞར་བ་ཞེས་བྱ་སྟེ། ཚེས་གཅིག་གམ་གནམ་གང་ཆད་པར་བརྩིའོ། །ཉ་ཞོམ་ཞེས་བྱ་སྟེ་ཚེས་བཅོ་ལྔ་ལ་ཟླ་བ་ཉ་ལ་རྒྱས་ན། བཅུ་གཉིས་བརྩམས་པས་འགྲིག་སྟེ། ཡར་ངོ་ལ་ཚེས་ལྷག་པ་ཡིན་ནོ། །ཡར་ངོའི་ཚེས་བརྒྱད་ལ་ཟོ་
ཞབས་བཀས་འདྲ་དང་། ཡར་ངོའི་གང་ཚོད་མར་ངོའི་བྲི་ཚོད་མཉམ་པ་ཞིབ་ཏུ་བརྩི་བར་བྱའོ། །ཟླ་བ་ཕོ་དྲུག་ལ་གནམ་གང་ཡོད་པ་དང་། ཟླ་བ་མོ་དྲུག་ལ་གནམ་གང་མེད་པ་གཅིག་བཅས། ས་རིས་དང་དོན་མཐུན་པར་འདོད་པ་མྱོང་རྩིས་ཡིན་གསུངས་ཏེ། ས་རིས་མི་མཁྱེན་པ་རྣམས་ཀྱིས་འདི་བྱས་ན་ལེགས་སོ་སྙམ་མོ། ༈ བརྒྱད་པ་དུས་ཚོད་ནི། དབྱར་ར་བ་སྦྲུལ་དང་དགུན་ར་བ་ཕག་གཉིས་ནི་དཔྱིད་ཙམ་དུ་ཉིན་མཚན་མཉམ་པའི་དུས་ཡིན་ལ། ནམ་ལངས་ཡོས། ཉི་ཤར་འབྲུག་ནས་རིམ་པར་བརྩི་བར་བྱའོ། །དེ་ཡང་ས་རིས་ལུགས་ལ་འདོད་པ་བཅུ་གསུམ་ལ་དབུགས་གཅིག །དབུགས་དྲུག་ལ་ཆུ་སྲང་གཅིག །ཆུ་སྲང་དྲུག་ཅུ་ལ་ཆུ་ཚོད་གཅིག །ཆུ་ཚོད་དྲུག་ཅུ་ལ་ཉིན་ཞག་གཅིག་ཏུ་བརྩི་བ་ཡིན་ཀྱང་ནག་རྩིས་ལ་དེ་འདྲ་བ་ཞིབ་ཆ་ནི་མ་བཤད་ཀྱང་། ཞག་གཅིག་ལ་ཆུ་ཚོད་དྲུག་ཅུ་ཙམ་བཤད་ཀྱང་། དགུན་ཉི་མ་ལྡོག་ནས་ཉི་མ་ཇེ་རིང་མཚན་ཇེ་ཐུང་ལ་འགྲོ་བ་དང་། དབྱར་ཉི་ལོག་ནས་ཉིན་ཐུང་ཞིང་མཚན་ཇེ་རིང་ལ་འགྲོ་བའི་ཚུལ་ཧང་བ་ཙམ་རྩིས་དཀར་ནག་མཐུན་ནོ། །དེས་ན་འདུལ་བ་མངོན་པ་སོགས་ནས་སྐྱ་རེངས་ལ་རིམ་པ་བཞི་སྟེ། སྔོ་རེངས་དང་སྐྱ་
རེངས་དང་སེར་རེངས་དམར་རེངས་བཞི་བཞིར་གསུང་སྟེ། སྐྱ་རེངས་དང་པོ་ཤར་ནས་རི་ཤིན་ཏུ་མཐོ་བའི་རྩེར་ཉི་མ་མ་ཕོག་གི་བར་དེར་ནམ་ལངས་ཡོས་ཀྱི་དུས་ཚོད། རི་ཤིན་ཏུ་མཐོ་བའི་རྩེར་གསེར་ཞུ་གྱོན་ནས་ལུང་པའི་མཐིལ་དུ་ཉི་མ་མ་ཤར་བ་ནི་འབྲུག །ཉི་མ་ཤར་གྱི་ཕྱི་བ་ཐམས་ཅད་ལ་ཤར་ནས་རྡེའུ་གྲོས་ཐུབ་པའི་བར་ནི་སྦྲུལ་ནས་རིམ་པར་བརྩི་བས་ཤེས་སོ། །ཉིན་མཚན་རིང་ཐུང་སོགས་འབྱུང་ཚུལ་རིགས་པས་བརྟག་ཤེས་པར་བྱའོ། །ཞག་མ་ལ་དུས་ཚོད་བུར་ཚེས་པ་ནི། ཞག་དེའི་དབང་ཐང་ཤིང་ཡིན་ན། ཤིང་བུ་མེ་ཡིན་པས། །ནམ་ལངས་ཀྱི་ཡོས་མེ་ཡོས། ཞག་དང་ཟ་མ་འབྱུང་བ་རྐྱང་དེད་ཅེས་པས། ཟ་མ་དུས་ཚོད་གཉིས་ནི་མིང་གི་རྣམ་གྲངས་ཡིན་ནོ། །ཉི་ཤར་མེ་བུ་ཡིན་པས་ས་འབྲུག །དེས་འགྲེས་སོ། །དེ་ལྟར་དུས་ཚོད་དབང་ཐང་ངོས་འཛིན་ནི། ལོ་རྒན་ནང་དུ་འབེབས། དེ་ནས་བརྩི་བྱའི་སྲོག་ལུས་དབང་ཐང་རླུང་རྟ། དུས་ཚོད་ཀྱི་སྲོག་ལུས་དབང་ཐང་རླུང་རྟ་ལ་འཐབ། རུས་ཁམས་དུས་ཚོད་སྲོག་ལ་འཐབ་བོ། །དགུ་པ་གཟའ་ཡི་རྩིས་ལ། རྩིས་དཀར་ནག་གཉིས་ཀ་མཁྱེན་པ་འགའ་ཞིག་ན་རེ། གཟའ་སྐར་མ་གཉིས་ས་རིས་སྤང་ཆ་ཆེ་ནས་ས་རིས་
ལུགས་ལྟར་བྱེད་ཟེར་ནས། ས་རིས་ལུགས་ཀྱི་གཟའ་སྐར་གང་རེད་དང་འཐབ་ནས་རྡེལ་རྒྱབ་པ་མཐོང་། དེ་ནས་ཤིན་ཏུ་མི་འཐད་དོ། །ས་རིས་དང་ནག་རྩིས་གཉིས་གཟའི་བརྩི་ཚུལ་གཏན་ནས་མི་གཅིག་པའི་ཕྱིར་རོ། །ནག་རྩིས་ལ་ནི་ཟླ་བ་སོ་སོའི་བླ་གཟའ་དེས་ངེས་པར་ཚེས་དགོས་པ་སྟེ། སྟག་རྟ་ཁྱི་གསུམ་སྤེན་པ་ཚེས་ཟེར་བ་སོགས་ནས་གང་ལ་ཚེས་པ་དེ་ལ་ནི་ཉ། ཞེས་གསུངས་པ་ལྟར་རོ། །ས་རིས་ལ་ཕུར་བུ་རླུང་དང་པ་སངས་ས་ཡིན་ལ། ནག་རྩིས་ལ་ཕུར་བུ་ཤིང་དང་པ་སངས་ལྕགས་ཡིན་པའི་ཕྱིར་ཡང་མི་མཐུན་ནོ། །དེ་ནས་རྩིས་རང་ལུགས་གཟའ་གང་ཡིན་གྱི་འབྱུང་བ་རྐྱང་པ་དེ་དང་བརྩི་བྱའི་སྲོག་ལུས་དབང་ཐང་རླུང་རྟ་རུས་ཁམས་འཐབ་སྟེ།་གཟའི་འབྱུང་བ་ནི་ཉི་མ་མིག་དམར་མེ་ཡི་ཁམས། །ཟླ་བ་ལྷག་པ་ཆུའི་ཁམས། ཕུར་བུ་ཤིང་པ་སངས་ལྕགས་སྤེན་པ་ས་ཡིན་ནོ།། ༈ བཅུ་པ་སྐར་མའི་རྩིས་ལ་ས་རིས་ལུགས་ལ་བྱི་བཞིན་གྲོ་བཞིན་གཉིས་གཅིག་ཏུ་བརྩི་བས་རྒྱུ་སྐར་ཉེར་བདུན། ནག་རྩིས་ལ་སོ་སོར་བྱས་པས་ཉེར་བརྒྱད་ཡིན་ལ་འོན་ཀྱང་ཚེས་གྲངས་ཀྱི་སྐར་འབྲས་ཧ་ལམ་མཐུན་ཡོང་གི་ས་རིས་ལུགས་ཀྱི་སྐར་མ་བྱས་ཀྱང་རུང་ངོ་། །ས་
རིས་མི་མཁྱེན་ནག་རྩིས་རང་སྐད་ནི། དཔྱིད་ར་བ་རྒྱལ་ཉ་དཔྱད་འབྲིང་མཆུ་ཡི་ཉ། དཔྱིད་ཐ་སྦོ་ཉ་དབྱར་དང་ས་རིས་ཉ། དབྱར་འབྲིང་ལྷ་མཚམས་དབྱར་ཐ་སྣོན། སྟོན་ར་གྲོ་བཞིན་སྟོན་འབྲིང་མོན་གྲེ་ཉ། སྟོན་ཐ་ཁྲུམས་སྟོད་དགུན་ར་དབྱུག་གུ་ཉ། དགུན་འབྲིང་སྨིན་དྲུག་དགུན་ཐ་མགོ་ཡི་ཉ། བདུན་ཟུར་རྣམས་ལ་ཉ་ཚེས་གོ་ལྡོག་འགྱུར་སྐར་ཁང་མང་དོགས་ཡོད་པས་མིག་སྐར་བསྟུན་ཉ་སྒོ་ཚེས་སྒོ་སྤྱད་པས་ལྷག་ཆད་བཙལ་ལོ་ཞེས་པའི་དོན་ནི། ཕལ་ཆེར་གོ་སླ་མོད་འོན་ཀྱང་མིག་སྐར་ནི། དེང་སང་འབྲོག་པ་སོགས་རྒན་རྒོན་དོན་མ་གོ་བ་འགའ་ཟླ་བ་དང་སྐར་མ་ལྷན་ཅིག་ཏུ་འདུག་པ་ཙམ་ལ་དོན་དུ་བཟུང་ནས། ས་རིས་དང་ནག་རྩིས་བཀའ་ཆད་པ་གསོད་པ་མང་པོ་མཐོང་སྟེ། དེ་ལ་སྐར་མ་དང་ཟླ་བའི་འཕྲོད་ལུགས་རིམ་པ་གསུམ་སྟེ། ཟླ་བ་ནི་གཟའ་དང་ངོ་བོ་གཅིག་པར་ཡབ་ཀྱི་ཚུལ་དང་སྐར་མ་ནི་རྒྱུ་སྐར་གྱི་ལྷ་མོ་སྟེ། དེ་གཉིས་སྙོམས་པར་ཞུགས་པའི་ཚུལ་ཡིན་ལ། དེ་ལ་བེའུ་འཇུག་པ་དང་། །སྙོམས་འཇུག་གི་འཇུག་པ་དང་། ཁྱུ་མཆོག་གི་འཇུག་པའོ། །ཟླ་བ་སྔོན་ནས་འགྲོ་ཞིང་སྐར་མ་རྗེས་ན་འདུག་པ་ནི་བེའུ་འཇུག་པའོ། །སྔོན་ནས་ཚུར་ནུ་བ་ལྟ་བུའོ། །སྐར་མ་སྔོན་
ནས་འགྲོ་ཞིང་ཟླ་བ་རྗེས་ནས་འགྲོ་བ་ནི་ཁྱུ་མཆོག་སྦྱོར་བའོ། །གླང་གི་བ་ལ་རྗེས་ནས་སྤྱོད་པ་སྤྱོད་པ་ལྟ་བུའོ། །གཟའ་སྐར་ལྷན་ཅིག་ཏུ་འཛོམ་པ་ནི་སྙོམས་འཇུག་གི་སྦྱོར་བའོ། །རྒྱལ་ཆེན་རིགས་བཞིའི་ལྷ་དང་གླིང་བཞིའི་མི་རྣམས་སྙོམས་པར་འཇུག་ནས་ལྷན་ཅིག་སྟེང་དུ་འཛོམ་པ་ལྟ་བུའོ། །དེ་ནས་ཉ་སྐར་འཕྲོད་ལུགས་གསུམ་སྟེ་ཤར་སྐར་བདུན་ལ་ཤར་དུ་ཉ་དེ་གཙོ་ཆེ། ནུབ་ཀྱི་སྐར་མ་ལ་ནུབ་ཏུ་ཉེ་བ་དེ་གཙོ་ཆེ། ལྷོ་བྱང་གཉིས་པོ་ནམ་མཁའི་དཀྱིལ་དུ་འཛོམ་པ་གནད་ཆེ། དེ་ལྟར་ན་ཉ་སྐར་མ་འཆུག་པ་གལ་ཆེ། ཉི་སྐར་ཧ་ཅང་འཆུག་ན་ཟླ་ལྷག་ཡོད་པའི་རྟགས་སོ། །དེ་ནས་སྐར་ཡིག་དང་མིག་སྐར་བསྟུན་པ་ཤི་སྐར་ངོས་ཟིན་ངེས་བྱས་ནས། སྐར་མའི་འབྱུང་བ་མ་འཆུག་པར་བྱས་ནས་བརྩི་བྱའི་སྲོག་ལུས་དབང་ཐང་ཀླུང་རྟ་རུས་ཁམས་ལྔ་དང་སྐར་མ་རྐྱང་པ་འཐབ་བོ། །དེ་ཡན་གྱི་གཤིན་རྡེལ་རྩ་བ་ལྔ་བཅུ་ཚང་ངོ་། ༈ །དེ་ནས་ཧལ་ཁྱི་ནི་ལྕགས་ཡིན་པས། ལྕགས་ཁོ་ན་དང་སྲོག་ལུས་དབང་ཐང་རླུང་རྟ་རུས་ཁམས་ལྔ་འཐབས་པས་རྡེལ་ལྔ་བརྒྱབ། གྱི་ལིང་དང་བྱི་ལིང་པི་ལིང་རྣམས་དོན་གཅིག་ཏུ་འགྱུར་ཁྱད་ཡིན་ཏེ། །གྱི་ལིང་འཕུར་རྩིས་ཚེས་ལ་འཁོར། །པི་ལིང་
སྲོག་ནི་ས་ཡིན་ཏེ། །འཕུར་ནས་ཕྱོགས་མདོག་འབྱུང་བར་འགྱུར། །པི་ལིང་ཤར་གནས་ཤིང་ལ་ལྷོ་གནས་མེ། །ནུབ་གནས་ལྕགས་ལ་བྱང་གནས་ཆུ། །མཚམས་བཞིར་གནས་པ་ས་ཡིན་ནོ། །པི་ལིང་མ་འཕུར་བར་པ་ཡིན་ཀྱང་འཕུར་ནས་ཕྱོགས་མདོག་གོ །འཕུར་ལུགས་ནི་ཕག་ལུག་ཡོས་གསུམ་ལྷོ་ནས་ཚེས། །མེ་ས་རླུང་ལྕགས་ཤིང་དང་ནི། །གནམ་རི་ཆུ་ནས་མེ་རུ་འོང་། །སྟག་རྟ་ཁྱི་གསུམ་ཤར་ནས་ཚེས། །ཤིང་རླུང་རི་དང་མེ་ཆུ་ས། །གནམ་ལྕགས་ཡང་གཅིག་ཟིན་དུ་འོང་། །བྱི་འབྲུག་སྤྲེལ་གསུམ་ནུབ་ནས་ཚེས། །ལྕགས་རི་གནས་ས་ཆུ་མེ་རི་རླུང་། །ཤིང་ནས་ཡང་གཅིག་ལྕོགས་སུ་འོང་། །བྱ་གླང་སྦྲུལ་གསུམ་བྱུང་ནས་ཚེས། །ཆུ་རི་གནམ་ཟིན་ལྕགས་རླུང་དང་། །མེ་ནས་ཡང་གཅིག་ཆུ་རུ་འོང་། །ཞེས་གསུངས་པ་ལྟར། འཕུར་ནས་འབྱུང་བ་གང་ཡིན་དེ། བརྩི་བྱའི་སྲོག་ལུས་དབང་ཐང་རླུང་རྟ་རུས་ཁམས་ལྔ་འཐབས་པས་རྡེལ་ལྔ་རྒྱབ་སྟེ། ཚེས་གྲངས་ནམ་ཤི་བའི་ཉིན་པར་བརྩིའོ། །ནམ་ཤི་བའི་ཟླ་བ་དེར་བརྩི་སྟེ། ཟླ་སྟོད་ས་ལ་ཟླ་སྨད་ལྕགས། ཞེས་གསུངས་པའི་སའམ་ལྕགས་གང་རེད་དེ་དང་། བརྩི་བྱའི་སྲོག་ལུས་དབང་ཐང་རླུང་རྟ་རུས་ཁམས་ལྔ་
འཐབ་ལ་རྡེལ་ལྔ་བརྒྱབ་བོ། །དེ་ལྟར་ཧལ་ཁྱི་བྱི་ལིང་ཟླ་བ་གསུམ་ལ་རྡེལ་བཅོ་ལྔའོ། །དེ་ནས་སོ་འཕྲང་གཅེས་གསུམ་ནི། གསོན་པོ་ཕོ་ངོ་དུ་ཡོད་ཆེ་བ་མགོ་སེ་བ་གཅིག་དང་ཆུང་ངུ་གཞོན་ནུ་རྟིང་དམར་དང་འབྲིང་བ་སྐྱེས་དར་མ་གསུམ་ཞེས་གསུངས་པའི་དོན་ནོ། །ཕ་ཚན་ཕོ་ངོས་དུ་ཡོད་ན། ཕོ་ངེས་ཁོ་ནའི་ནང་ནས་སོ་འཕྲང་གཅེས་གསུམ་ཕུད། དུད་སྙོམས་ལྟ་བུ་ཕོ་ངོས་ཁོ་ན་དེ་གསུམ་མ་ཚང་ན་དུད་དེ་ཡི་ཕོ་མོ་སྤྱི་སོ་ནས་སོ་འཕྲང་གཅེས་གསུམ་ཕུད་དེ། རྒྱ་འབོར་ཆུང་བ་འདི་ལ་གཤིན་པོའི་སྲོག་ལུས་དབང་ཐང་རླུང་རྟ་བླ་གཟའ་ལྔ་དང་གསོན་པོའི་སྲོག་ལུས་དབང་ཐང་རླུང་རྟ་རུས་ཁམས་འཐབ་སྟེ། བརྩི་བྱའི་གསོན་པོ་ཡིན་པའི་ཕུག་གཤིན་པོ་ཚུར་ཤར་རྒྱུ་ཡིན་ནོ། །དེ་ལྟར་སོ་འཕྲང་གཅེས་གསུམ་ལ་རྡེལ་བཅོ་ལྔའོ། །གཤིན་པོས་བླ་གཟའ་དང་གསོན་པོའི་བླ་གཟའ་འཐབ་པ་ཡང་ཡོད་དེ། གཤིན་པོས་བླ་གཟའ་དང་གསོན་པོའི་རུས་ཁམས་འཐབ་ན་ལེགས། ཡང་འགའ་ཞིག་གིས་གཤིན་པོ་བརྩི་བྱ་བྱེད་ནས་གཤིན་པོ་ལ་གསོན་པོ་བར་འཆར་རྒྱུ་བྱེད་མཁན་མང་ཡང་། དེ་ནས་གོ་བ་མ་ཐོབ་སྟེ། རྒྱ་འབོར་ཆུང་བའི་སྐབས་སུ་དེ་མི་རུང་། གཤིན་པོས་གསོན་པོ་བཅད་ན་དེ་མི་
རུང་ན་ཚ་འོང་རྒྱུ་ཡིན་ལ། གསོན་པོས་གཤིན་པོ་བཅད་ན་ལེགས་རྒྱུ་ཡིན་པས་གོ་བ་ལེགས་པས་དེ་རུང་ངོ་། །བརྒྱ་འབོར་ཆེན་པོ་རྒྱབ་ན་ནི་འགྲོས་གསུམ་ཁ་ཡི་རྡེལ་སོས་འབྲད་ལ་ཡང་བརྒ་དགོས་སོ། །དེ་ནས་གསོན་པོའི་ཁོང་ནས་གཤིན་འདོན་པ་ནི། ༈ གནམ་གྱི་འཇུག་ཐག་ཆད་དང་མ་ཆད་ལྟ་བ་ནི། བརྩི་བྱའི་ལོག་མེན་ཞེས་པ་གནམ་ལོའི་ཚབ་བརྩི་བྱའི་དབང་ཐང་གི་བུ་སྟག་ནས་སྐྱེས་པ་ཐུར་སྦུབ། བུད་མེད་དབང་ཐང་གི་མ་སྤྲེལ་ནས་གྱེན་བགྲང་བརྩི་བྱའི་ལོག་མེན་སྐོར་ལ་ལོག་མེན་གར་བབས་དེ་ཉིད་ཐེ་བའི་ཡར་ལྔའི་སྲོག་ལུས་དབང་ཐང་རླུང་རྟ་ཁམས་དང་ལྔ། བརྩི་བྱའི་སྲོག་ལུས་དབང་ཐང་རླུང་རྟ་ཁམས་དང་ལྔ་འཐབ་བོ། །འདི་ཉིད་གཞན་དང་མི་འདྲའི་ཁྱད་པར་བརྩི་བྱའི་རུས་ཁམས་དང་ལོག་མེན་དབང་ཐང་འཐབ། ཁམས་ཞེས་བྱ་བ་ནི་དབང་ཐང་དང་དོན་གཅིག་གོ །ཡང་ས་ཡི་བརྟན་ཕུར་བུད་མ་བུད་ནི། ལོག་མེན་དང་བཅས་པ་མར་ལྔ་སྲོག་ལུས་དབང་ཐང་རླུང་རྟ་ཁམས་དང་ལྔ། །བརྩི་བྱའི་སྲོག་ལུས་དབང་ཐང་རླུང་རྟ་ཁམས་དང་ལྔ་འཐབ། ༈ དབུས་ཀྱི་རི་རབ་འགྱེལ་མ་འགྱེལ་ནི། ལོག་མེན་དེ་ཉིད་སླར་རྒྱབ་ཞིག་བྱེད་པར་བཤད་ཀྱང་། བརྩི་བྱའི་ལོའི་
བདུན་ཟུར་ནི། བརྩི་བྱ་ཤིང་བྱི་ཡིན་ན་ལྕགས་རྟ་ནས་སྐྱེས་པ་ཡིན་ན་སྒྲུབ། བུད་མེད་ཡིན་ན་གྱེན་དུ་བརྩི་སྟེ། ལོ་གྲངས་གར་བབ་དེ་བརྩི་བྱའི་སྲོག་ལུས་དབང་ཐང་རླུང་རྟ་ཁམས་དང་ལྔ་འཐབ། རུས་ཁམས་དེ་ཡི་སྲོག་དང་འཐབ་བོ། །འདི་ནི་མན་ངག་ལུགས་སོ། །དེ་ལྟར་འཇུ་ཐག་བརྟན་ཕུར་རིམ་གསུམ་སྟེ། གསོན་ཁོང་ནས་གཤིན་འདོན་པའི་རྡེལ་བཅོ་ལྔའོ། དེ་ནས་གཤིན་ཁོང་ནས་གསོན་འདོན་པའི་དུར་གཤེད་མཚང་ཚོལ་གྱི་རྡེལ་ལྔ་ནི། །དང་པོ་གཅེས་པའི་ལོག་མེན་འཐབ་པའི་རྡེལ་ལྔ། ཞེས་པ་ནི་བརྩི་བྱའི་ལོག་མེན་བསྐོར་ལ། སྐྱེས་དར་མ་ཡིན་ན་སྲོག །རྒན་རྒོན་བྱིས་སྔ་ཡིན་ན་ལུས། བྱིས་སྦ་བུད་མེད་ཡིན་ན་དབང་ཐང་། ཡོན་ཏན་ཅན་ཡིན་ན་རླུང་རྟ་དང་འཐབ་སྟེ། དེ་བཞི་གང་བྱེད་ཀྱང་རྡེལ་གཅིག་བཞག་གོ །སྐྱེས་པའི་རླུང་རྟ་འཐབ་པའི་རྡེལ་གཅིག་དང་གཉིས། ཞེས་པ་ནི་བརྩི་བྱའི་མ་དེ་ཡོད་དམ་མེད་ཀྱང་རུང་སྟེ། །ད་ལྟ་ཡོད་ན་ལོ་དུ་ལོན་བརྩིས་ལ་དེའི་ནང་ནས་བརྩི་བྱའི་ལོ་དུ་ལོན་ནས་གཅིག་མ་གཏོགས་ཕྲིས་ནས། མ་དེ་ལོ་དུའི་སྟེང་དུ་རྩིས་བུ་དེ་སྐྱེས་པ་ཡིན་ཤེས་སོ། །དེ་ནས་མ་དེའི་སྤར་ཁ་བསྐོར་བས་སྤར་ཁ་གང་ལ་བུ་གཅིག་བཞག་
རྒྱུ་ཡིན་ན་ཡང་བརྩི་བྱ་དེ་རྩིས་ཞེས་པས། སྤར་ཁ་དེ་བརྩི་བྱའི་སྐྱེས་རླུང་ཡིན་པ་དེ་དང་། གནམ་ལོའི་སྐྱེས་རླུང་ནི། རྟ་སྦྲུལ་ཡིན་ན་ལི་སྟེ་མེ། བྱ་སྤྲེལ་དྲ་ལྕགས་ཡིན་དེ་གཉིས་འཐབ་ནས་རྡེལ་གཅིག་བཞག་རྒྱུ་ཡིན་ན་ཡང་བརྩི་བྱ་སྒས་པའི་སྟབས་ཀྱིས་མའི་ལོ་མ་ཤེས་ན། གནམ་ལོའི་སྐྱེས་རླུང་སྟེ་ལོ་ཡི་དབང་སྐལ་གྱིས་སྤར་ཁ་དེ་དང་། བརྩི་བྱའི་སྐྱེས་པ་སྟེ་དར་མ་སྲོག་དང་རྒན་རྒོག་དང་བྱིས་སྦ་ལུས། བུད་མེད་དབང་ཐང་ཡོན་ཏན་ཅན་དང་། སྡེ་དཔོན་ལ་ཀླུང་རྟ་དང་འཐབ་ལ་རྡེལ་གཅིག་བཞག་གོ །དེ་ནས་བརྩི་བྱའི་སྐྱེས་སྨེ་དང་སྲོག་སྨེ་གཉིས་འཐབ་སྟེ། སྐྱེས་སྨེ་ཉིད་བརྩི་བྱར་བྱས་ལ་རྡེལ་གཅིག་བཞག་གོ ༈ །བརྩི་བྱའི་བླ་གཟའ་དང་གཤིན་གཟའ་སྟེ། ཤི་ཉིན་གྱི་གཟའ་འཐབ་པའི་རྡེལ་གཅིག་བཞག་སྟེ། བླ་གཟའ་ཉིད་བརྩི་བྱར་བྱའོ། །བརྩི་བྱའི་བླ་སྐར་དང་ཤི་ཉིན་གྱི་ཤི་སྐར་གཉིས་འཐབ་པའི་རྡེལ་གཅིག་བཞག་པ་དང་རྡེལ་ལྔའོ། །སྐྱེས་སྨེ་ལ་རིགས་མང་ན་ཡང་འདི་སྐབས་ཀྱི་སྐྱེས་སྨེ་ནི་གནས་པ་ཡུལ་གྱི་སྨེ་བ་ལ་ངོས་འཛིན་ཏེ། རྟ་སྦྲུལ་གྱི་སྐྱེས་སྨེ་དགུ་དམར་ལུག་གཉིས་ནག །བྱ་སྤྲེལ་བདུན་དམར། ཁྱི་དྲུག་དཀར། བྱི་ཕག་གཅིག་དཀར། གླིང་
བརྒྱད་དཀར། སྟག་ཡོས་གསུམ་མཐིང་། འབྲུག་བཞི་ལྗང་ཡིན་ཏེ་མ་རླུང་དང་མཐུན་ནོ། །བླ་སྐར་ནི་སྐར་ཡིག་ཕལ་ཆེར་ན་ཡོད་པས་འདིར་བྲི་མི་དགོས་སོ། །དེ་ལྟར་རྩ་བའི་རྡེལ་ལྔ་བཅུ་ཧལ་ཁྱི་བྱི་ལིང་ཟླ་བ་གསུམ་ལ་རྩ་བའི་རྡེལ་བཅོ་ལྔའོ། །སོ་འཕྲང་གཅེས་གསུམ་ལ་བཅོ་ལྔ་དང་། སུམ་ཅུ་ཐམ་པའོ། །གསོན་ཁོང་ནས་གཤིན་བཏོན་པའི་རྡེལ་བཅོ་ལྔའོ། །གཤིན་ཁོང་ནས་གསོན་བཏོན་པའི་རྡེལ་ལྔ་དང་ཉི་ཤུ། དེ་རྣམས་བསྡོམས་པས་ལྔ་བཅུའོ། །གཤིན་ཐང་རྩ་བའི་རྡེལ་ལྔ་བཅུ། ཡན་ལག་གི་རྡེལ་ལྔ་བཅུ་ཐམ་པ་འདི་བརྒྱ་འབོར་ཆུང་བ་ཡིན་ཏེ་རྡེལ་ཕྲེང་ཉི་ཤུ་སོ་སོར་བགྲངས་ལ་དཀར་པོ་མང་ན་དཀར་རོ། ནག་པོ་མང་ན་ནག་པོ་བཞག་པས་རྡེལ་ཉི་ཤུ། འཕྲེད་དུ་སྲོག་ལུས་དབང་ཐང་རུས་ཁམས་ཀྱི་རྡེལ་བརྩིས་ནས་དཀར་ནག་གང་མང་གིས་ཁ་དམར་གྱི་རྡེལ་བཞག་པས་ཁ་དམར་གྱི་རྡེལ་ཉེར་ལྔ་ཕུད་པས་རྡེལ་སུམ་ཅུ་སྟེ། དེ་ལྟར་བརྒྱ་འབོར་ཆུང་བ་ལ་ཡང་དྲིལ་རྡེལ་བརྒྱ་དང་ལྔ་བཅུ་བརྒྱབ་ལ། དཔྱད་དོན་བདུན་མས་ཁོག་ཕུབ། རེ་མིག་དང་ཁ་དམར་རྡེའུ་རྣོ་སྟངས་གཅོད་པར་བྱའོ། །སྤྱི། ད་ནི་བརྒྱ་འབོར་འབྲིང་བ་རྒྱབ་ལུགས་ནི། གཞུང་ལས། གནམ་
ལོ་དང་གསོན་པོ་འཐབ་པ་དཀར་འགྲོས། ཞེས་གསུངས་པའི་དོན་ནི། གསོན་པོའི་ནང་ནས་གལ་གང་ཆེ་བ་གཅིག་བརྩི་བྱར་བྱས་ནས་གནམ་ལོ་དང་འཐབ་པའི་རྡེལ་ལྔ་བརྩི་བྱ་དེ་ཡི་ལོག་མེན་སྐོར་ལ་རྡེལ་ལྔ་རྩིས་ཀྱི་སྤར་ཁའི་རྡེལ་ལྔ། བརྩི་བྱའི་སྨེ་བ་རྡལ་ལྔ། བརྩི་བྱའི་དར་རྒུད་ནི་སྲོག་གནམ་ལོ་ལུས་ཟླ་བ་དང་། དབང་ཐང་བརྩི་བྱའི་ཉིད་ཀྱི་ཉི་མ་རླུང་རྟ་རྩིས་བྱེད་དུས་ཀྱི་དུས་ཚོད་ལ་གཏུགས་པས། ཟླ་བ་རྩིས་བྱེད་དུས་ཀྱི་ཟླ་བ་ཉི་མ་རྩིས་བྱེད་ཉིན། དུས་ཚོད་རྩིས་བྱེད་ཀྱི་དུས། སྐར་མ་རྩིས་བྱེད་དུས། གཟའ་རྩིས་བྱེད་ཉིན་གྱི་གཟའ་དང་འཐབ་སྟེ་རྡེལ་ལྔ་བཅུ་རྐྱེབ། རྒྱབ་ལུགས་ཐམས་ཅད་གོང་དང་འདྲ། འདིར་དཀར་འགྲོས་ཏེ་གསོན་པོ་ལ་རྒྱབ་རུང་ངོ་། །དེ་ནས་གསོན་པོ་དང་གཤིན་པོ་འཐབ་པ་ཁྲ་འགྲོས་གསུངས་པའི་དོན། གསོན་པོ་གལ་གང་ཆེ་བ་གཅིག་བརྩི་བྱར་བྱས་ལ། གཤིན་པོའི་ལོ་སྙིང་དང་གསོན་པོ་འཐབ་པའི་རྡེལ་ལྔ། གཤིན་པོའི་ལོག་མེན་གར་བབ་དང་གསོན་པོ་འཐབ་པའི་རྗེལ་ལྔ། གཤིན་པོའི་སྤར་ཁ་དང་གསོན་པོ་འཐབ་པའི་རྡེལ་ལྔ། གཤིན་པོའི་སྲོག་ལུས་དབང་ཐང་རླུང་གི་འཕུར་སྨེ་དང་། གསོན་པོའི་སྲོག་ལུས་དབང་ཐང་འཕུར་སྨེ་བཅས་ལ་
འཐབ། གཤིན་པོའི་སྐྱེས་སྨེའི་འཕུར་སྨེ་དང་གསོན་པའི་རུས་ཁམས་འཐབ་པའི་རྡེལ་ལྔ། གསོན་པོའི་སྲོག་གནམ་ལོ་ལ་གཏུག །ལུས་གཤིན་པོ་ཤི་དུས་ཀྱི་ཟླ་བ་ལ་གཏུག་གོ །དབང་ཐང་གཤིན་པོ་ཤི་བའི་ཉི་མ་ལ་གཏུག །རླུང་རྟ་ཤི་བའི་དུས་ཚོད་ལ་གཏུག་གོ །རུས་ཁོམས་གཤིན་པོའི་སྤར་ཁའི་དབང་སྐར་ལོ་ལ་གཏུག །གསོན་པོའི་སྲོག་ལུས་དབང་ཐང་རླུང་རྟ་རུས་ཁམས་ལྔ། གཤིན་པོ་ཤི་ཉིན་སྲོག་ལུས་དབང་ཐང་རླུང་རྟ་སྲོག་དང་ལྔ་འཐབ། གསོན་པོའི་སྲོག་ལུས་དབང་རླུང་དང་རུས་ཁམས་ལྔ། གཤིན་པོ་ཤི་བའི་དུས་ཚོད་སྲོག་ལུས་དབང་ཀླུང་སྲོག་དང་ལྔ་འཐབ། གཟའ་ཡང་ཤི་དུས་གྱི་གཟའ་སྐར་མ་ཡང་གསོན་པོའི་བརྩི་བྱ་འཐབ་ཅིང་རྡེལ་རྒྱོབ་ལུགས་གོང་དང་འདྲའོ། །དེ་ལྟར་དཀར་འགྲོས་ནག་འགྲོས་ཁྲ་འགྲོས་གསུམ་བསྒྲིགས་ནས་བརྒྱབས་པས་ལྔ་བཅུ་ཚན་གསུམ་དང་། ཡན་ལག་གོང་དང་བཤད་པའི་ལྔ་བཅུ་དང་གཉིས་བརྒྱབ་བོ། །དེ་ནས་གཤིན་ཟངས་ཁྱམ་དུ་བརྩི་ན། ཁ་དམར་གྱི་རྡེལ་ཉི་ཤུ་སྟེ་བརྩི་བྱའི་སྲོག་གི་མ་བུ་དགྲ་གྲོགས་དང་གནམ་ལོའི་སྲོག་གི་མ་བུ་དགྲ་གྲོགས་ཞེས་པ་ནི། སྲོག་དང་གནམ་ལོའི་སྲོག་འཐབ། བརྩི་བྱའི་སྲོག་གི་མ་དང་
གནམ་ལོའི་སྲོག་གི་མ་འཐབ། བརྩི་བྱའི་སྲོག་གི་བུ་དང་གནམ་ལོའི་སྲོག་གི་བུ་འཐབ། བརྩི་བྱའི་སྲོག་གི་དགྲ་དང་གནམ་ལོའི་སྲོག་གི་དགྲ་འཐབ། བརྩི་བྱའི་སྲོག་གི་གྲོགས་དང་གནམ་ལོ་སྲོག་གི་གྲོགས་འཐབ། དེ་བཞིན་དུ་བརྩིའི་བྱའི་ལུས་ཀྱི་མ་བུ་དགྲ་གྲོགས་དང་ཟླ་བའི་མ་བུ་དགྲ་གྲོགས་འཐབ། བརྩི་བྱའི་དབང་ཐང་མ་བུ་དགྲ་གྲོགས་དང་། ཞག་གི་མ་བུ་དགྲ་གྲོགས་འཐབ། བརྩི་བྱའི་རླུང་རྟའི་མ་བུ་དགྲ་གྲོགས་དང་དུས་ཚོད་མ་བུ་དགྲ་གྲོགས་འཐོབ། བརྩི་བྱའི་རུས་ཁམས་མ་བུ་དགྲ་གྲོགས་སྤར་ཁ་གང་བབ་མ་བུ་དགྲ་གྲོགས་འཐབ་རྡེལ་ཉི་ཤུའོ། །དེ་ལ་ཁམས་རྡེའུ་འོག་ཏུ་བཀྲམ་ནས། རྡེལ་ཕྲེང་བཞི་ལ་རྡེལ་ལྔ་རེ་ཚང་བར་བྱས་ན་ལེགས་སོ། །དེ་ནས་དེ་ལྟར་བཞི་བཅུ་ཞེ་བཞི་རྩ་བའི་རྡེལ་གཉིས་བརྒྱ་ཉི་ཤུ་ལ། ཁ་དམར་གྱི་རྗེལ་བཞག་ལུགས་ནི། འཕྲེད་དུ་སྲོག་ལུས་དབང་ཐང་རླུང་རྟ་རུས་ཁམས་ལྔ་ཡི་ཁ་དམར་རྡེལ་བཞག་ལུགས། གྱི་ལིང་ཧལ་ཁྱི་སོགས་ཡན་ལག་གི་རྡེལ་ལྔ་བཅུ་ཁ་དམར་གང་རེད་དུ་རྗེལ་བཅུ་རེ་བཞག །དེ་ནས་བརྩི་བའི་རྡེལ་ལྔ་རེ་བཞག །བཅུ་ལ་ཚོ་གསུམ་རེ་ཡོད་པ་དེ། དང་པོ་གནམ་ལོའི་རྡེལ་གསུམ་དཀར་ནག་གང་མང་ལྟོས་ལ། དཀར་པོ་མང་ན་
དཀར་རོ། ནག་པོ་མང་ན་ནག་པོ་བཞག །དེ་བཞིན་དུ་གནམ་ལོའི་ལུས་གསུམ་དབང་ཐང་གསུམ། རླུང་རྟ་གསུམ་རུས་ཁམས་གསུམ་རྣམས་དཀར་ནག་བལྟས་ལ་ཁ་དམར་བཞག །དེ་ཡི་དུས་ལོག་མེན་སྤར་ཁ་སྨེ་བ། དར་རྒུད་ཟླ་བ་ཞག་དུས་ཚོད་གཟའ་སྐར་མ་རྣམས་རྡེལ་ཚན་གསུམ་པོ་བསྡུར་ནས་ཁ་དམར་གྱི་རྡེལ་ལྔ་བཅུ་ཐམ་པ་ལོགས་ཤིག་ཏུ་བཞག་གོ །ཁ་དམར་གྱི་རྡེལ་ལྔ་བཅུ་དེ་ལ་ཡང་གནམ་ལོའི་རྡེལ་ལྔ་དེ་བརྩིས་ལ་ཡང་ཁ་དམར་གཅིག་བཞག །དེ་བཞིན་དུ་རྡེལ་ཕྲེང་བཅུ་ལ་ཁ་དམར་བཅུ་བཞག །དེ་ལ་མཐུད་ནས་གོང་གི་བྱི་ལིང་སོགས་ཡན་ལག་གི་ཁ་དམར་འདིར་བཞག་ཀྱང་རུང་། སྲོག་ལུས་དབང་རླུང་གི་ཁ་དམར་དེ་ཡང་འདི་ཡི་སྐར་མའི་རྒྱབ་ནས་ཐུར་དུ་བཞག །དེ་ནས་དཔྱད་དོན་བདུན་མ་དང་གཞུང་གི་རྡེལ་བཤད་ཐམས་ཅད་ཁ་དམར་རྡེལ་བྱེད་ཅིང་། གཞན་རྡེལ་རོ་ཡིན་པས་ནུས་པ་མེད་དོ། །དེ་ནས་རེ་མིག་ཀྱང་ཁ་དམར་རྡེལ་ནས་ཕུད་དོ། །དེ་ལྟར་རྩ་བའི་རྡེལ་ཉིས་བརྒྱ་དང་ཡན་ལག་ཉི་ཤུ་དང་། ཁོ་དམར་གྱི་རྡེལ་བདུན་ཅུ་དོན་ལྔ་རེ་མིག་ཉེར་ལྔ་སྟེ་བསྡོམས་པས་བརྒྱ་འབོར་འབྲིང་བ་ལ་རྡེལ་སུམ་བརྒྱ་དང་ཉེར་བཞི་ཡོད་དོ། །སྤྱི། ༈ དེ་ལ་
བརྒྱ་འབོར་ཆེན་མོ་རྒྱས་པར་འདོད་ན། གནམ་ལོ་དང་གཤིན་པོ་འཐབ་པ་ནག་འགྲོས། གསོན་པོ་དང་གཤིན་པོ་འཐབ་པ་ཁྲ་འགྲོས། གཤིན་ཐང་ལྔ་བཅུ་དཀར་ནག་ཁྲ་གསུམ་ལྔ་བཅུ་ཚན་གསུམ་རྐྱེབ་ལུགས་གོང་དང་འདྲ་བ་ལས། ཡན་ལག་གི་རྡེལ་ལྔ་བཅུ་ནག་འགྲོས་ལྟར་རྒྱབ་ལུགས་གོང་ལྟར་ཡིན་ལ། དཀར་འགྲོས་ལྟར་རྒྱབ་ལུགས་ནི། གསོན་པོ་གལ་ཆེ་བ་གཅིག་དང་། ཧལ་ཁྱི་འཐབ་པའི་རྡེལ་ལྔ་རྩིས་བྱེད་ཉིན་གྱི་བྱི་ལིང་གར་བབ་རྩིས་གསོན་པོ་དང་འཐབ་པའི་རྡེལ་ལྔ། ཟླ་སྟོད་ས་ལ་ཟླ་སྨད་ལྕགས་རྩིས་བྱེད་དུས་ཀྱི་ཟླ་བ་དང་གསོན་པོ་འཐབས་པའི་རྡེལ་ལྔ་དང་བཅོ་ལྔའོ། །དེ་ནས་རྒན་པོ་གཞོན་ནུ་དར་མ་སྟེ་སོ་འཕྲང་གཅེས་གསུམ་གྱི་སྲོག་ལུས་དབང་ཐང་རླུང་རྟ་རུས་ཁམས་ལྔ། གནམ་ལོའི་སྲོག་ལུས་དབང་རླུང་སྲོག་དང་ལྔ་འཐབ་པའི་རྡེལ་བཅོ་ལྔའོ། །དེ་ནས་གསོན་པོ་བརྩི་བྱ་དེ་ཡི་ལོག་མེན་སྐོར་ལ། ཡར་ལྔ་དང་འཐབ་པའི་རྡེལ་ལྔ། མར་ལྔ་དང་འཐབ་པའི་རྡེལ་ལྔ། བརྩི་བྱ་ཡིན་ན་གསོན་པོའི་དེའི་ལོའི་བདུན་ཟུར་ཏེ། དཔེར་ན་གསོན་པོ་ཤིང་སྟག་ཡིན་ན་ལྕགས་སྤྲེལ་ལྟ་བུའོ། །ལོ་བདུན་ཟུར་དབང་ཐང་དགྲ་ཡིན་པའི་སྟེང་ནས། ཕོ་སྦུབས་མོ་བཀན་ལ། གར་
བབ་དེ་དང་བརྩི་བྱ་འཐབ་པའི་རྡེལ་ལྔ། འཐབ་ལུགས་གོང་དུ་གསལ། དེ་ལྟར་འཇུ་ཐག་དང་རྟེན་ཕུར་རི་རབ་གསུམ་ལ་བཅོ་ལྔའོ། །དེ་ནས་གསོན་པོའི་ལོག་མེན་༈ སྐོར་ལ་སྐྱེས་དར་མ་ཡིན་ན་སྲོག་དང་སྲོག་འཐབ། རྒན་དང་བྱིས་སྦྲ་ལ་ལུས་འཐབ། བུད་མེད་ཡིན་ན་དབང་ཐང་། ཡོན་ཏན་ཅན་དང་ཡ་རབས་ལ་ཀླུང་རྟ་དང་ཀླུང་རྟ་འཐབ་ལ་རྡེལ་གཅིག་བཞག །བརྩི་བྱ་གསོན་པོའི་སྐྱེས་རླུང་དང་གནམ་ལོའི་སྐྱེས་རླུང་འཐབ་པའི་གནམ་ལོའི་སྐྱེས་རླུང་དང་བརྩི་བྱའི་སྲོག་སོགས་གང་གཅེས་པ་འཐབ་སྟེ། གཅེས་པ་ནི། དར་མའི་སྲོག་གཅེས། རྒན་པ་བྱིས་སྦའི་ལུས། བུད་མེད་དབང་ཐང་། ཡོན་ཏན་ཅན་ལ་ཀླུང་རྟ་གཅེས། ཀུན་ལ་གཅེས་པ་སྲོག་ཡིན་ནོ། །དེ་ལྟར་གནམ་ལོའི་སྐྱེས་རླུང་དང་བརྩི་བྱའི་གཅེས་པ་འཐབ་ལ་རྡེལ་གཅིག་བརྒྱབ། དེ་ནས་བརྩི་བྱ་གསོན་པོ་དེ་ཡི་སྐྱེས་སྨེ་འཕུར་ལ་སྐྱེས་སྨེ་དང་འཕུར་སྨེ་འཐབ་པའི་རྡེལ་གཅིག་བཞག །བརྩི་བྱའི་བླ་གཟའ་དང་རྩིས་བྱེད་ཉིན་གྱི་གཟའ་འཐབས་ལ་རྡེལ་གཅིག་བརྒྱབ། གསོན་པོ་བརྩི་བྱའི་བླ་སྐར་དང་རྩིས་བྱེད་ཉིན་གྱི་སྐར་མ་འཐབ་ལ་རྡེལ་གཅིག་དེ་ལྟར་རྡེལ་ལྔའོ། །དེ་ནས་ཁ་དམར་གྱི་རྡེལ་ཉི་ཤུ་ནི། བརྩི་
བྱའི་སྲོག་གི་མ་བུ་དགྲ་གྲོགས་དང་། གནམ་ལོའི་མ་བུ་དགྲ་གྲོགས་འཐབ་པའི་རྡེལ་བཞི། གསོན་པོ་ལུས་ཀྱི་མ་བུ་དགྲ་གྲོགས། བརྩི་ཉིན་ཟླ་བའི་མ་བུ་དགྲ་གྲོགས་འཐབ་པའི་རྡེལ་བཞི་བརྩི་བྱའི་དབང་ཐང་མ་བུ་དགྲ་གྲོགས་དང་། རྩིས་བྱེད་ཉིན་གྱི་ཉི་མའི་མ་བུ་དགྲ་གྲོགས་འཐབ་པའི་རྡེལ་བཞི། གསོན་པོའི་རླུང་རྟའི་མ་བུ་དགྲ་གྲོགས་དང་བརྩི་ཉིན་དུས་ཚོད་མ་བུ་དགྲ་གྲོགས་འཐོབ་པའི་རྡེལ་བཞི། གསོན་པོའི་རུས་ཁམས་མ་བུ་དགྲ་གྲོགས་དང་། སྤར་ཁའི་གར་བབ་མ་བུ་དགྲ་གྲོགས་རྡེལ་བཞི་སྟེ་རྡེལ་རྣམས་ཀྱི་མཇུག་འཕྲེད་དུ་བཞག་པ་ཡིན་ནོ། །དེ་ལྟར་ཡན་ལག་གི་རྡེལ་ལྔ་བཅུ་ཟངས་ཁྱམས་ཀྱི་རྡེལ་ཉི་ཤུ་རྣམས་དཀར་འགྲོས་ལྟར་བརྒྱབས་ནས། ད་ཁྲ་འགྲོས་ལྟར་བརྒྱབ་ལུགས་ནི། ཧལ་ཁྱི་དང་གསོན་པོ་འཐབ་པའི་རྗེལ་ལྔ། གཤིན་པོ་ཤི་བའི་ཉིན་པར་གྱི་བྱི་ལིང་གར་བབ་འཐབ་པའི་རྡེལ་ལྔ། ཤི་དུས་ཀྱི་ཟླ་སྟོད་ཟླ་སྨད་གང་ཡིན་འཐབ་པའི་རྡེལ་ལྔ་སྟེ་བཅོ་ལྔའོ། །དེ་ནས་སོ་པ་འཕྲང་པ་གཅེས་པ་གསུམ་གྱི་སྲོག་ལུས་དབང་རླུང་རུས་ཁམས་ལྔ་དང་། གཤིན་པོའི་སྲོག་ལུས་དབང་རླུང་སྲོག་དང་འཐབ་པའི་རྡེལ་བཅོ་ལྔ་སྟེ་གསོན་པོར་བརྩི་བྱར་བྱའོ། །དེ་ནས་གཤིན་པོའི་
ལོག་མེན་སྐོར་ལ་གང་བབ་དེའི་ཡར་ལྔ་དང་། གསོན་པོའི་རྩིས་བྱ་འཐབ་པའི་རྡེལ་ལྔ། མར་ལྔ་དང་རྩིས་བྱ་འཐབ་པའི་རྡེལ་ལྔ། གཤིན་པོའི་སྲོག་ལུས་དབང་རླུང་སྲོག་དང་ལྔའོ། །བརྩི་བྱ་གསོན་པོའི་སྲོག་ལུས་དབང་རླུང་ཁམས་དང་ལྔ་འཐབ་པའི་རྡེལ་རེ་བཅོ་ལྔའོ། །དེ་ནས་གཤིན་པོའི་ལོའི་བདུན་ཟུར་དབང་ཐང་དགྲ་གཤེད་ཀྱི་ཐོག་ནས་ཕོ་སྦུབ་མོ་བཀན་ལ་གང་བབ་དེ་དང་། གསོན་པོ་བརྩི་བྱ་འཐབ་པའི་རྡེལ་གཅིག་བཞག །དེ་ལ་དར་མ་སྲོག་རྒན་བྱིས་ལུས། བུད་མེད་དབང་ཐང་། ཡོན་ཏན་ཅན་ལ་ཀླུང་རྟ་འཐབ་བོ། །དེ་ནས་བརྩི་བྱ་གསོན་པོ་དང་གཤིན་པོ་གཉིས་ཀྱི་མ་ལ་སྐྱེས་དུས་ཀྱི་རླུང་རྟ་འཐབ། དེ་མི་ཤེས་ན་གསོན་གཤིན་གྱི་ལོ་ཡི་སྐྱེས་རླུང་གཉིས་འཐབ་སྟེ་གསོན་པོའི་བརྩི་བྱའོ། །སྐྱེས་རླུང་དང་ལོ་ཡི་སྐྱེས་རླུང་ནི་གོང་དུ་གསལ། དེ་ནས་གསོན་པོའི་སྐྱེས་སྨེ་དང་། གཤིན་པོའི་སྲོག་སྨེའི་འཕུར་སྨེ་དང་འཐབ་པའི་རྡེལ་གཅིག །གསོན་པོའི་བླ་གཟའ་དང་ཤི་ཉིན་ཀྱི་གཤིན་གཟའ་གཉིས་འཐབ་པའི་རྡེལ་གཅིག །གསོན་པོའི་བླ་སྐུར་དང་ཤི་ཉིན་ཀྱི་གཤིན་སྐར་གཉིས་འཐབ་པའི་རྡེལ་ལྔའོ། ༈ །དེ་ནས་ཟངས་ཁྱམས་རྡེའུ་ཉི་ཤུ་ནི། བརྩི་བྱའི་སྲོག་
གི་མ་བུ་དགྲ་གྲོགས་དང་། གཤིན་པོའི་སྲོག་གི་མ་བུ་དགྲ་གྲོགས་དང་འཐབ་པའི་རྡེའུ་བཞི། གསོན་པོའི་ལུས་ཀྱི་མ་བུ་དགྲ་གྲོགས་དང་། གཤིན་པོ་ཤི་དུས་ཟླ་བའི་ལུས་ཀྱི་མ་བུ་དགྲ་གྲོགས་འཐབས། གསོན་པོའི་དབང་ཐང་མ་བུ་དགྲ་གྲོགས་དང་། གཤིན་པོ་ཤི་ཉིན་གྱི་ཉི་མའི་དབང་ཐང་མ་བུ་དགྲ་གྲོགས་འཐབས། གསོན་པོའི་རླུང་རྟའི་མ་བུ་དགྲ་གྲོགས་དང་། གཤིན་པོ་ཞི་དུས་ཀྱི་རླུང་རྟའི་མ་བུ་དགྲ་གྲོགས་འཐབས། དེ་ལྟར་རྡེལ་བཅུ་དྲུག་གི་མཇུག་དེར་གསོན་པོའི་རུས་ཁམས་མ་བུ་དགྲ་གྲོགས་དང་གཤིན་པོའི་ཁམས་ཀྱི་མ་བུ་དགྲ་གྲོགས་།འཐབས་ཁམས་དང་དབང་ཐང་ངོ་བོ་གཅིག །རུས་ཁམས་ཀྱི་རྡེལ་བཞི་དང་རྡེལ་ཚར་བཞིའི་མཇུག་ཏུ་འཕྲེད་ལ་བཀོད་དོ། །དེ་ཁྲ་འགྲོས་ཀྱི་རྩ་བའི་རྡེལ་ལྔ་བཅུ་གོང་དུ་གསལ་ལོ། །དེ་ལྟར་ཡན་ལག་རྡེལ་ལྔ་བཅུ་དང་བརྒྱ་ཐམ་པ་བརྒྱབ། ༈ དེ་ཡང་ནག་འགྲོས་ཀྱི་བཞག་ལུགས་བརྒྱ་འབོར་ཆུང་བའི་སྐབས་སུ་བཤད་པ་ལྟར་ཡིན་ལ། བརྒྱ་འབོར་ཆེ་བའི་སྐབས་དང་ཆུང་བའི་སྐབས་གཉིས་ལ་ནག་འགྲོས་མི་འདྲ་བ་ཅུང་ཟད་ཅིག་ཡོད་པ་ནི། སོ་འཕྲང་གཅེས་གསུམ་གྱི་སྐབས་སུ་བརྒྱ་འབོར་ཆེ་བ་བྱེད་ན། ནག་འགྲོས་སྐབས་སུ་གཤིན་པོ་
བརྩི་བྱར་བྱས་ལ། གསོན་པོའི་སོ་འཕྲང་གཅེས་གསུམ་ལ་སྲོག་ལུས་དབང་རླུང་ལ་འཐབ། གཤིན་པོའི་རུས་ཁམས་དང་གསོན་པོའི་སྲོག་འཐབ་པའི་རྡེལ་བཅོ་ལྔའོ། །ཟངས་ཁྱམས་རྡེའུ་ཉི་ཤུ་ནག་འགྲོས་སྐབས་སུ། གཤིན་པོའི་སྲོག་གི་མ་བུ་དགྲ་གྲོགས་དང་། གནམ་ལོའི་སྲོག་གི་མ་བུ་དགྲ་གྲོགས་འཐབ། གཤིན་པོའི་ལུས་ཀྱི་མ་བུ་དགྲ་གྲོགས་དང་། ཟླ་བའི་ལུས་ཀྱི་མ་བུ་དགྲ་གྲོགས་འཐབ། བརྩི་བྱའི་དབང་ཐང་མ་བུ་དགྲ་གྲོགས་དང་། ཉི་མའི་དབང་ཐང་མ་བུ་དགྲ་གྲོགས་འཐབ། གཤིན་པོའི་རླུང་རྟའི་མ་བུ་དགྲ་གྲོགས་དང་དུས་ཚོད་རླུང་རྟའི་མ་བུ་དགྲ་གྲོགས་འཐབ། གཤིན་པོའི་རུས་ཁམས་མ་བུ་དགྲ་གྲོགས་དང་སྤར་ཁའི་མ་བུ་དགྲ་གྲོགས་འཐབ། དེ་དག་གི་མཇུག་ཏུ་འཕྲེད་ལ་བཞག །དེ་རྒྱུ་ལྟར་ནག་འགྲོས་ལ་ཡང་རྗེལ་བརྒྱ་དང་ཉི་ཤུ་ཐམ་པ། དེ་ལྟར་ནག་འགྲོས་ཀྱི་རྩ་བའི་རྡེལ་ལྔ་བཅུ། ཡན་ལག་གི་རྡེལ་ལྔ་བཅུ། ཁ་དམར་གྱི་རྗེལ་ཉི་ཤུ་སྟེ། དེ་ལྟར་ཡར་དྲིལ་ནག་འགྲོས་ཀྱི་རྡེལ་བརྒྱ་དང་ཉི་ཤུ། ཁྲ་འགྲོས་ཀྱི་རྡེལ་བརྒྱ་དང་ཉི་ཤུ། དཀར་འགྲོས་ཀྱི་རྡེལ་བརྒྱ་དང་ཉི་ཤུ། །རྣམས་འཕྲད་དུ་བསྒྲིགས་ནས་བཞག་པས་རྡེལ་སུམ་བརྒྱ་དང་དྲུག་ཅུ།
རྡེལ་ཚར་བདུན་ཅུ་དོན་གཉིས་ཡོད་པའི་ནང་ནས། དང་པོ་གནམ་ལོའི་སྲོག་རྡེལ་གསུམ་དཀར་པོ་མང་ན་དཀར་པོ། ནག་པོ་མང་ན་ནག་པོ་བཞག་སྟེ་དེ་བཞིན་དུ་གནམ་ལོའི་སྲོག་ལུས་དབང་རླུང་རུས་ཁམས་ཀྱི་རྡེལ་རྣམས་དཀར་ནག་གང་མང་གི་ཁ་དམར་ལོག་ཏུ་བཞག །དེ་ལྟ་བུ་ལོག་མེན། སྤར་ཁ། སྨེ་བ། དར་རྒུད། ཟླ་བ། ཞག་དུས་ཚོད། །གཟའ་སྐར་མ་ཧལ་ཁྱི། པི་ལིང་། ཟླ་བ། སོ་འཕྲང་གཅེས་གསུམ། འཇུ་དག་རྟེན་ཕུར། རི་རབ་མཚང་ཚོལ། །ཁ་དམར་ཉི་ཤུ་རྡེའུ་ཐམས་ཅད་ཚན་གསུམ་པོ་བསྡུར་ནས་བཞག་པས་ཁ་དམར་རྡེའུ་བརྒྱ་ཉི་ཤུ་རྣམས་རྡེལ་གསུམ་ཁ་བརྩིས་ནས་ཁ་དམར་ཉི་ཤུ་བཞག་པ་སོགས་རྡེལ་ཚར་ཉེར་བཞི། ཁ་དམར་ཉེར་བཞི། དེ་ནས་སྲོག་ཐམས་ཅད་ཕྱོགས་གཅིག་ཏུ་བརྩིས་པའི་ཁ་དམར་བཞག །དེ་བཞིན་དུ་ལུས་དབང་ཐང་རླུང་རྟའི་རུས་ཁམས་ལྔ་ལ་ཁ་དམར་གྱི་རྡེལ་ལྔ་བཞག །ཁ་དམར་སྟངས་གཅོད་ཀྱི་རྡེལ་བརྒྱ་དང་ཞེ་དགུའོ། །དེ་ནས་བཟང་ངན་གྱི་བཤད་པ་ཐམས་ཅད་གཞུང་བཤད་ཐམས་ཅད་ཀྱི་སྟངས་གཅོད་ཀྱི་བརྒྱ་དང་ཞེ་དགུ་པ་འདི་ལ་བྱེད་ཅིང་། གོང་གི་རྡེལ་སུམ་བརྒྱ་དྲུག་ཅུས་ཕན་ཐོགས་མི་ནུས་སོ། །འོ་དེ་
བརྒྱབ་ན་དགོས་པ་མེད་དོ་སྙམ་ན། སུམ་བརྒྱ་དྲུག་ཅུ་ནི་མ་བརྒྱབ་པར་ཁ་དམར་སྟངས་གཅོད་ཀྱི་རྡེལ་བརྒྱ་དང་ཞེ་དགུ་པོ་མི་ཤེས་པའི་ཐབས་མེད་དོ། །འདི་ལྟ་བུའི་གནད་ཅི་ཡང་མ་གོ་བར་སྙིགས་དུས་ཀྱི་རྩིས་པར་སློབ་པའི་རྟིར་རྒན་ཡ་སོ་ཅན་གྱི་བ་གླང་གི་རིགས་ཅན་འགའ་ཞིག་ན་རེ། རྗེལ་མང་བརྒྱབས་ཀྱང་བཤད་པ་གཞུང་གི་འདི་ལས་ལྷག་མོ་མི་འདུག་ཟེར་འདི་རང་རེས་ཟེར་ནས་རྡེལ་མང་བ་ལ་དགོས་པ་མེད་པ་སྐད་སྨྲས་པ་ཡོད་དེ། འཇམ་དབྱངས་ཉིད་ཀྱི་གསུང་ལས། སྤྱིར་རྡེའུ་མང་བརྒྱབ། ཁ་དམར་ཉུང་ལ་དྲིལ་བ་གདའ། དཔེར་ན་བྱ་བ་ཁག་ཆེ་བ་གཅིག་གིས་སྟངས་གཅོད་ནས། རྒྱལ་བློན་ཡུལ་གྱི་གཙོ་བོ་ཐམས་ཅད་བསྒོས་ཏེ་ཡུལ་གྱི་མི་རེའི་ཁར་མི་བཏང་བར། རྒྱལ་བློན་འབངས་འཁོར་ཐམས་ཅད་ཞལ་གང་ལ་འཆམས་པ་ཞིག་ལ་ཐག་གཅོད་པ་དང་འདྲའོ། །དེ་ནས་རེ་མིག་ཉེར་ལྔ་ཡང་ཁ་དམར་སྟོང་གཅོད་ཀྱི་རྡེའུ་ལྔ་བཅུའི་ནང་ནས་བུད་པར་བྱའོ། །བརྒྱ་འབོར་ཆེན་མོ་ལ་རྩ་བའི་རྡེལ་སུམ་བརྒྱ་དྲུག་ཅུ། ཁ་དམར་སྟོང་གཅོད་རྡེལ་བརྒྱ་དང་ཞེ་དགུ། དེ་ལས་བསྡུས་པའི་རེ་མིག་གི་རྡེལ་ཉི་ཤུ་རྩ་ལྔ། ཡང་དྲིལ་རྡེལ་ལྔ་བརྒྱ་དང་སོ་བཞི་ཡོད་དོ། །
གཤིན་ཐང་ལྔ་བཅུ་ནག་ན་ཨི་བདེན་སྟོང་གཅོད་ཀྱི་རྡེལ་ལྔ་བཅུ། གཤིན་ཐང་ལྔ་བཅུའི་བསྡུ་དོན་དུར་གཤེད་ཚང་ཚོལ་ཡན་ལག་ལྔའི་རྩིས་ལྡེའུ་ཉེར་ལྔ་དང་རྡེལ་བདུན་ཅུ་དོན་ལྔ་པོ་ནི་རྒྱབ་དགོས་པ་དང་མི་དགོས་པ་གཉིས་ཡོད་དེ། དེ་ཐམས་ཅད་དྲིལ་ནས་གཤིན་ཐང་གི་རྩིས་ཆ་ལག་དང་བཅས་པ་འདི་ལ་རྡེལ་དྲུག་བརྒྱ་དང་དགུ་བཅུ་ཡོད་པར་ཤེས་པར་བྱའོ། ༈ །དེ་ནས་བརྒྱ་འབོར་ཆུང་བ་ཡིན་ན། ནག་འགྲོས་ཀྱི་རྩ་རྡེལ་ལྔ་བཅུ་ལ་དཔྱད་ཅིང་བརྒྱ་འབོར་འབྲིང་བ་དང་ཆེ་བ་ཡིན་ན་ཁ་དམར་གྱི་རྡེལ་ལྔ་བཅུ་ལ་དཔྱད་དེ། དེ་ཡང་དཔྱད་དོན་བདུན་མ་ལ་སྐར་མ་ཕན་བཅད་ཐིག་གི་ཕར་བཅད་དེ། དཔྱད་ལུགས་ནི་དཔེའུ་རིས་ཁོ་བོས་བྱས་པ་ལ་གསལ་ལོ། །དེ་ནས་ལོགས་ཤིག་ཏུ་རེ་མིག་ཉེར་ལྔ་བྲིས་ལ། བརྒྱ་འབོར་ཆུང་བ་ཡིན་ན་ནག་འགྲོས་ཀྱི་རྩ་རྡེལ་ལྔ་བཅུ། བརྒྱ་འབོར་འབྲིང་བ་དང་ཆེ་བ་ཡིན་ན་སྟོང་གཅོད་ཀྱི་ལྡེའུ་ལྔ་བཅུ་ལ་མ་ནོར་བར་བལྟ་ཞིང་། རེ་མིག་ཉེར་ལྔའི་རྡེལ་བཞག་གཞུང་གིས་རྡེལ་ཚུར་ལན་སྲོལ་ཡོད་ཀྱང་དེ་བླངས་ན་དཔྱད་མི་བདེ་བས། རྡེལ་ལོགས་ནས་གསར་དུ་བཞག་པ་ལེགས་སོ། །རྡེལ་ཐུར་དུ་བཞག་ན་ནོར་སླ་བས། འཕྲད་དུ་རིམ་པར་བཞག་ན་བདེའོ། །ལོའི་
སྲོག་རྡེལ། ཟླ་བའི་སྲོག །ཉི་མའི་སྲོག །དུས་ཚོད་སྲོག །སྐར་མའི་སྲོག་རྣམས་བཞག །དེ་འོག་ཏུ་ཟླ་བའི་ལུས། ལོ་ཡི་ལུས། དུས་ཚོདཀྱི་ལུས། ཉི་མའི་ལུས། སྤར་ཁའི་ལུས། བར་མ་ལ་ཉི་མའི་དབང་ཐང་། དུས་ཚོད་ཀྱི་དབང་ཐང་། གཟའི་དབང་ཐང་། ཟླ་བའི་དབང་ཐང་། ལོ་ཡི་དབང་ཐང་དེ་ཡི་འོག་ཏུ་དུས་ཚོད་རླུང་རྟ། སྨེ་བའི་རླུང་རྟ། ཟླ་བའི་རླུང་རྟ། སྤར་ཁའི་ཀླུང་རྟ། སྐར་མའི་ཀླུང་རྟའོ། །ཁ་ཅིག་ནས་ལོའི་ཀླུང་རྟ་ཟེར་བ་དང་། ཁ་ཅིག་ནས་ཉི་མའི་ཀླུང་རྟ་ཟེར་བ་འདྲ་མིན་བྱུང་ན་ཡང་། སྐར་མའི་ཀླུང་རྟ་བྱེད་མཁན་མང་། འོག་ལ་ལོའི་དར་རྒུད། ཟླ་བའི་དར་རྒུད། ཉི་མའི་དར་རྒུད། དུས་ཚོད་དར་རྒུད། སྐར་མའི་དར་རྒུད་རྣམས་ཏེ། སྐར་མའི་དར་རྒུད་ནི་རུས་ཁམས་ཀྱི་དར་རྒུད་དེ། དོན་ལ་འོག་གི་རྡེལ་ཕྲེང་འདི་དར་རྒུད་ཀྱི་རྗེལ་ལྔ་པོ་འཕྲད་དུ་བཞག་པ་ཡིན་པའི་ཕྱིར་རོ། །དེ་ཡན་ཆོད་ཀྱི་གཤིན་རྩིས་ལྔ་བཅུ་པ་བརྒྱ་འབོར་ཆེ་འབྲིང་ཆུང་གསུམ་རྒྱོབ་ལུགས་ཞིབ་པར་བཤད་ཚར་རོ། །སྤྱི། དེ་ནས་ངེས་པར་ཨི་བདེན་སྟོང་གཅོད་མན་ངག་གི་རྡེའུ་ལྔ་བཅུ་བཤད་པར་བྱ་སྟེ། ༈ གནམ་ལོའི་རྡེལ་བུ་ནག་ན་
ས་མཁན་ཨེ་རྩུབ་ཟེར་བ་དེ་ངེས་པར་ཨེ་རྩུབ་ལྟ་བ་ནི། ས་མཁན་དེ་ཉིད་ཀྱི་སྲོག་ལུས་དབང་ཐང་དང་རླུང་རྟ་དང་ལྔ་ཡི་དར་རྒུད་རྩིས་སྟེ། ལྔ་ཁོ་གནམ་ལོ་ལ་གཏག་ནས་རྗེལ་ལྔ་བརྒྱབ། རྡེལ་ལྔ་དེ་ཡང་རྩིས་ལ་ཁ་དམར་གྱི་རྡེལ་གཅིག་བཞག་ལ། འདི་དང་སྔོན་མ་གཉིས་ཀ་ནག་ན་ངེས་པར་རྩུབ་པས་དེ་ནི་ས་མཁན་རང་གིས་མི་བྱའོ། །དེ་ཡང་ཞིབ་པར་དཔྱད་ན་གནམ་ལོའི་ལུས་རྗེལ་སྔ་ཕྱི་གཉིས་ངན་པ་དང་ཀླུང་རྟའི་སྔ་ཕྱིའི་གཉིས་ནག་ན་ས་མཁན་བྱེད་མི་བཏུབ་ལ། དེ་གཉིས་དཀར་ལ་སྲོག་དབང་ཐང་ཁམས་རྡེལ་རྣམས་ནག་པ་ནི། ས་དགྲ་ངན་ཅིང་ས་བཟང་པོ་མི་རྙེད་པའམ། དེར་ས་བཟང་ཡང་ས་བདག་གདུག་པ་ཅན་ནི་ཕྲག་དོག་བྱེད་པ་ལྟ་བས་རང་ཅུང་ཟད་དྲག་གོ །དེ་བཞིན་དུ་འོག་མ་ཐམས་ཅད་ལ་ཡང་སྤྱིར་ནི་དང་པོར་སོ་སོར་སྲོག་ལུས་དབང་ཀླུང་ཁམས་རྡེལ་དཔྱད་པར་ཞིབ་པར་བྱས་ནས་ཐིག་ངེས་པའི་ལུང་འབོགས་པ་གལ་ཆེའོ། །ལོག་མེན་འཕྲལ་གྱི་སྐྱོན་ཡོན་བརྩི། །དེ་ཡི་རྡེལ་བུ་ནག་པ་ན། །ངན་པ་ཨེ་རེད་སྟོང་གཅོད་ནི། །ཞེས་སོགས་གསུངས་པའི་དོན་ནི། གཤིན་པོའི་ལོའི་བདུན་ཟུར་དབང་ཐང་གི་དགྲ་དཔེར་ན་གཤིན་པོ་ཤིང་བྱི་ཡིན་ན་ལྕགས་རྟ་ནས།
གཤིན་པོ་དེ་ཕོ་ཡིན་ན་སྦུབས། མོ་ཡིན་ན་བཀན་ལ། གཤིན་པོ་ཉིད་ལོ་དུ་ལོན་བར་བརྩི། གར་བབ་དེ་དང་གསོན་པོའི་བརྩི་བྱའི་བཟའ་དཔོན་གལ་ཆེ་བ་དེ་ཡི་སྲོག་ལུས་དབང་ཐང་ཀླུང་རྟ་འཐབ། རུས་ཁམས་ལོ་དེའི་སྲོག་དང་འཐབ་ལ་རྡེའུ་ལྔ། རྡེལ་ལྔ་དེ་ཡི་ཁ་དམར་དང་དྲུག་བརྒྱབ། སྔ་ཕྱིའི་ཁ་དམར་དེ་གཉིས་ཀ་དེ་ངན་ན་ངེས་པར་ངན། རྒྱབ་ཐ་དཀར་ན་རིམ་གྲོ་ཅུང་ཟད་ཀྱིས་འགྱུར་རོ། །དེ་ཡང་སྔ་ཕྱིའི་སྲོག་ལུས་ནག་ན་སྡེའི་བདག །དབང་རྡེལ་མནའ་མ་བུ་སྲིང་ཀླུང་རྡེལ་ཞང་ཉེ། ཁམས་རྡེལ་ནོར་ལ་བརྩི་་བས་གང་ལ་རྩུབ་སྨྲ་བར་བྱའོ། །གང་ལ་རྩུབ་པ་དེ་ལ་རིགས་པས་དཔག་ན་རིམ་གྲོའི་ལུང་རྒྱབ་པར་བྱའོ། ༈ །སྤར་ཁ་ཀུན་ལ་ཁྱབ་པ་རྩིས། །ནག་ལ་ཨི་བདེན་སྟོང་གཅོད་ནི། །རྒྱུ་དོ་བདག་གལ་ཆེ་བ་གཅིག་གིས་སྲོག་ལུས་དབང་ཀླུང་རུས་ཁམས་ལྔ། གཤིན་པོའི་སྤར་ཁ་རང་དང་སྤར་ཁའི་དགྲ་དང་མ་བུ་དང་གྲོགས་དང་ལྔ་འཐབ་ལ་གོང་ལྟར་བལྟའོ། ༈ །སྨེ་བས་ད་ཕྲུག་ཡུགས་ས་རྩིས། ནག་ན་ཨི་བདེན་སྟོང་གཅོད་ནི། །གནམ་ལོའི་སྲོག་ལུས་དབང་ཀླུང་གི་སྨེ་བ་དང་། ཡུགས་སའམ་ད་ཕྲུག་གལ་གང་ཆེ་བའི་སྲོག་ལུས་དབང་ཀླུང་གི་སྨེ་བ་
འཐབ། །རུས་ཁམས་གནམ་ལོའི་སྐྱེས་སྨེ་དང་འཐབ། །དར་རྒུད་ཀྱི་མི་རྒྱུད་དར་རྒུད་བརྩི་སྟེ། ནག་ན་ཨི་བདེན་སྟོང་གཅོད་ནི། གསོན་པོ་དོ་བདག་སྐྱེས་མ་གཅིག་གིས་སྲོག་ལུས་དབང་ཀླུང་རུས་ཁམས་དང་ལྔའི་དར་རྒུད་ནི་གཤིན་པོའི་སྤར་ཁའི་ལོ་དེ་ལ་གཏུག་ནས་དར་རྒུད་བསྐོར་ནས་རྡེལ་ལྔ་བརྒྱབ་བོ། །སྤར་ཁའི་ལོ་ནི་ལི་སྦྲུལ་དུ་སྤྲེལ་ཁམ་ཕག་ཟིན་སྟག་མཚམས་བཞི་གོ་སླའོ། །དེ་ཡང་ཆེ་རྒྱུད་ཆུང་རྒྱུད་སོགས་གཞུང་ལྟར་བསྐྱེད་དོ། ༈ །ཟླ་བ་བློན་པོ་གྲོས་བྱེད་བརྩི། ནག་ན་ཨི་བདེན་ནི། བརྩི་བྱ་གསོན་པོ་དོ་བདག་དེའི་སྲོག་ལུས་དབང་ཀླུང་རུས་ཁམས་ལྔའི་དར་རྒུད་བསྐོར་ལ་གཤིན་པོ་ཤི་དུས་ཀྱི་ཟླ་བ་ལ་གཏུགས་ལ་རྡེལ་ལྔ་བརྒྱབ་ཁ་དམར་དང་དྲུག །སྔ་ཕྱི་ཨི་མཚུངས་དཔྱད་དོ། ༈ །ཞག་གི་དམག་མི་བོང་ཆེན་བརྩི། ནག་ན་ཨི་བདེན་སྟོང་གཅོད་ནི། བརྩི་བྱ་གསོན་པོའི་སྲོག་ལུས་དབང་ཀླུང་རུས་ཁམས་ལྔའི་དར་རྒུད་ཤི་ཉིན་ཉི་མ་ལ་གཏུག་ལ་རྡེལ་ལྔ། ཁ་དམར་དང་དྲུག་བཞག་ལ་སྔ་ཕྱི་ཨི་མཚུངས་དཔྱད། ༈ དུས་ཚོད་མཁས་པ་སྟག་ཐོག་བརྩི། ནག་ན་ཨི་བདེན་སྟོང་གཅོད་ནི། བརྩི་བྱ་གསོན་པོའི་སྲོག་ལུས་དབང་ཀླུང་གི་དར་རྒུད་བསྐོར་ལ། གཤིན་པོ་ཤི་
བའི་དུས་ཚོད་ལ་གཏུག་ལ་རྡེལ་ལྔ་ཁ་དམར་དང་དྲུག་བཞག་ལ་སྔ་ཕྱི་ཨི་མཚུངས་དཔྱད། ༈ གཟའི་ཁྱིམ་གཅིག་བཟའ་མི་བརྩི། དེའི་རྡེའུ་ནག་པ་ན། དེ་ངེས་པ་ཨི་རེད་སྟོང་གཅོད་ནི། ཤི་ཉིན་གྱི་གཟའ་དེ་དར་ན་གཟའ་དེའི་འབྱུང་བ་དང་འཐབ། གཟའ་དེ་རྒུད་ན་གཟའ་དེའི་དགྲ་དང་འཐབ། གཟའ་དེ་ཞུད་ན་གཟའ་དེའི་བུ་དང་འཐབ། །གཟའ་དེ་གྱོད་ན་གཟའ་དེའི་གྲོགས་དང་འཐབ། བརྩི་བྱའི་སྲོག་ལུས་དབང་ཀླུང་རུས་ཁམས་ལྔ་དང་འཐབ། བརྩི་བྱའི་ཁྱིམ་དེའི་བཟའི་ཕ་གལ་གང་ཆེ་བ་བརྩི། ༈ །སྐར་མས་ཡུལ་་མི་ཁྱིམ་ཚེས་བརྩི། ནག་ན་ཨི་བདེན་སྟོང་གཅོད་ནི། ཤི་ཉིན་གྱི་བྱི་ལིང་འཕར་མ་དེ་འཕུར་ལ། ཤར་ཤིང་ལྷོ་མེ་ནུབ་ལྕགས་བྱང་ཆུ། མཚམས་བཞིར་བབ་ན་སར་བརྩིས་ལ། །ཡང་ཡུལ་མི་གང་དྲག་པ་དེའི་སྲོག་ལུས་དབང་ཀླུང་རུས་ཁམས་ལྔ་འཐབ་པའི་རྡེལ་ལྔ་ཁ་དམར་དང་དྲུག་བརྒྱབ་ལ་སྔ་ཕྱི་གཉིས་ཨི་མཚུངས་དཔྱད་མཚུངས་ན་ངེས་པར་བདེན་ནོ། །དཀར་ན་བཟང་ངེས་གཉིས་ཀ་ནག་ན་ངན་ངེས་སོ། ས། འདི་ཁྲ་འགྲོས་ལྟར་བྱས་ན་འདི་ཟབ་པར་མཐོང་ནས་བྲིས་པ་ཡིན་ནོ། །ཡང་འགའ་ཞིག་ནག་འགྲོས་ལྟར་བྱེད་ན། གཤིན་པོ་ཁོ་ན་
ལྟར་འཐབ་པ་མང་ཞིང་དཀར་འགྲོས་ལྟར་གསོན་པོ་དང་རྩིས་བྱེད་དུས་ཀྱི་ཉི་མ་དུས་ཚོད་འཐབ་པ་ཡང་ཡོད་ལ། ནག་འགྲོས་ལྟར་བྱེད་ན་སྤར་སྨེ་གཉིས་རྩིས་རྙིང་གསུམ་འཐབ་པར་བཤད་དོ། །འདི་གསུམ་གང་རུང་གཅིག་ལས་གསུམ་ཁ་བྱེད་སྲོལ་མེད་ཅིང་གོ་བའི་དབང་གི་ཁྲ་འགྲོས་འདི་ལེགས་སོ། །འདི་ཤིན་ཏུ་ཞིབ་པར་བྱེད་ན་དཔེར་ན་སྐར་མའི་རྡེའུ་རྣམས་ནག་ན་དེ་ཨི་བདེན་སྟོང་གཅོད་རྡེལ་བཞག་དུས་ཀྱི་བྱི་ལིང་དང་འཐབ་པ་དེ་སྲོག་རྡེལ་དེ་ཡུལ་གྱི་གཙོ་བོའི་སྲོག་དང་འཐབ་ཅིང་གཙོ་བོ་མང་པོ་ཡོད་ན་ཐམས་ཅད་དང་འཐབ། གཙོ་བོ་སུ་ལ་གཞན་གྱི་རྨོ་སྟོང་གཅོད། དེ་བཞིན་དུ་སྨེ་བའི་ལུས་རྡེལ་ཡུལ་མི་དར་མའི་ལུས་འཐབ། དབང་རྡེལ་ཡུལ་དེའི་བག་མའི་དབང་ཐང་དང་འཐབ། ཀླུང་རྡེལ་ཡུལ་དེའི་བྱིས་སྦའི་ཀླུང་རྟ་དང་འཐབ། ཁམས་རྡེལ་ཁྱིམ་ཚེས་ཀྱི་རུས་ཁམས་དང་གཤིན་པོ་ཤི་ཉིན་གྱི་བྱི་ལིང་འཐབ། དེ་ལྟར་བྱས་པས་གོང་གི་གཞུང་རྡེལ་ནག་པ་དེ་རྗེས་ནས་ནག་ན་ཨི་བདེན་སྟོང་གཅོད་འདི་གཉིས་ཀ་ནག་ན་ངེས་པར་ངན་པས་བསྲུང་རིམ་ཚོའི་ལུང་བརྒྱབ་བོ། །ཡང་ཁྱིམ་ཚེས་མང་ན་ཁྱིམ་ཚེས་ཀྱི་བཟའ་དཔོན་རྣམས་རེ་རེ་ནས་རྩིས་ལ་ངན་སྟོང་གཅོད་པ་ཡིན་ནོ། ༈ །དེ་
བཞིན་དུ་རྡེལ་ལྔ་བཅུ་བཤད་པ་དང་བསྟུན་ནས། སོ་སོར་ཞིབ་བརྩིས་ན་ཡ་མཚན་པའི་མངོན་ཤེས་འཕྲུལ་གྱི་མེ་ལོང་མངོན་སུམ་དུ་འཆར་ལ་བཅོམ་ལྡན་འདས་འཇམ་༈ དཔལ་དབྱངས་ཀྱི་དགོངས་པ་ཡང་དག་པའོ། །འདི་རྒྱས་པར་བྲིས་ན་མཐའ་ཡས་པར་གདའ་བས་ཡི་གེའི་འཇིགས་པས་མ་བྲིས་ཀྱང་། ཤེས་རབ་ཅན་རྣམ་ལ་དེ་ཙམ་ཁོག་ཁྲོལ་བར་ངེས། ཤེས་རབ་རྨོངས་པ་རྣམས་ལ་ཧ་ཅང་རྒྱས་པར་བྲིས་ལ་སླར་མགོ་སྦོས་པའི་སྐྱོན་དུ་འགྱུར་དགོངས་པའོ། །སྤྱི། ༈ ཡང་རྒྱས་པར་གཤིན་ཐང་ལྔ་བཅུ་བརྒྱབས་ནས་རྡེལ་གཞི་ལྷམ་སྒྲོག་འདྲ་བ་གཅིག་ལོགས་སུ་བཏིང་ནས། གཤིན་རྗེལ་བཅུ་གསུམ་བཞག་སྲོལ་ཡོད་ལ། ཡང་ལྔ་བཅུ་པ་སོགས་རྒྱས་པ་མ་ལྕོགས་ན། བཅུ་གསུམ་པ་ཙམ་ཁོ་ན་བྱེད་སྲོལ་ཡོད་པས། ༈ གཤིན་རྗེལ་བཅུ་གསུམ་བཞག་ལུགས་ནི། གཤིན་པོའི་སྲོག་ལུས་དབང་ཀླུང་བླ་གཟའ་ལྔ་དང་། གནམ་ལོའི་སྲོག་ལུས་དབང་རླུང་བླ་གཟའ་ལྔ་འཐབས་པས་རྡེལ་ལྔ། །སྤར་ཁ་ལི་ཡིན་ན་མེ་སྦྲུལ། དྭ་ལ་ལྕགས་སྤྲེལ། ཟིན་ལ་ཤིང་སྟག ཁམས་ལ་ཆུ་ཕག །ཟོན་ལ་ས་འབྲུག །ཁོན་ལ་ས་ལུག །ཁེན་ལ་ས་ཁྱི། གིན་ས་གླང་གི་སྲོག་ལུས་
དབང་ཀྲུང་དང་བརྩི་བྱའི་སྲོག་ལུས་དབང་ཀླུང་འཐབས་པས་རྗེལ་དགུའོ། །འདིར་འགའ་ཞིག་ན་རེ། བརྩི་བྱའི་སྲོག་སྨེ་འཕུར་སྨེ་དེ་དང་གནམ་ལོའི་སྲོག་འཐོབ་པ་ཡིན་ཟེར་བ་མང་ན་ཡང་བརྩི་བྱའི་སྐྱེས་སྦེ་དཔེར་ན་ཤིང་བྱི་ཡིན་ན་བཞི་ལྗང་ལྟ་བུ་དེ་འཕུར་ལ། སྐྱེས་སྨེ་དེ་དང་འཕུར་སྨེ་གར་བབ་དེ་འཐབ་པ་དེ་ལེགས་སོ། །བཅུ་གཅིག་པ་བརྩི་བྱའི་སྲོག་སྨེ་དང་གནམ་ལོའི་སྲོག་སྨེ་འཐབ། ཡར་བཞི་མར་བཞི་ཟེར་བ་ནི་དོན་ལ། བརྩི་བྱའི་ལུས་སྨེ་དང་གནམ་ལོའི་ལུས་སྨེ་འཐབ། བརྩི་བྱ་གཤིན་པོའི་དབང་སྨེ་དང་གནམ་ལོའི་དབང་སྨེ་འཐབ་པ་དང་བཅུ་གསུམ་ཡོད་འདི་རྐྱང་པའི་བཤད་པ་བྱ། གཤིན་རྗེལ་འདི་ལ་སོ་འཕྲང་གཅེས་གསུམ་ཕུད་མཁན་ཡོད་ཀྱང་དེ་མི་ལེགས། །སོ་འཕྲང་གཅེས་གསུམ་ཕུད་ན། རྡེལ་གཞི་དཀར་པོའི་སྟེང་དུ་གསོན་རྗེལ་བཅུ་གསུམ་ལ་སོ་འཕྲང་གཅེས་གསུམ་ཕུད་དེ་ཁྱིམ་དེའི་རྒན་པ་གཅིག་དར་མ་གཅིག་དང་བྱིས་པ་དང་གསུམ་ལ་བཅུ་གསུམ་པ་ཚར་གསུམ་བརྒྱབ་ལ་དེ་གསུམ་ཁ་གཤིན་དང་གཤིན་རྗེལ་དང་བཞི་ཀ་རྩི་ས་ལ་ཁ་དམར་གྱི་རྡེལ་བཅུ་གསུམ་བཞག་ནས་ཁ་དམར་གྱི་རྡེལ་དེ་ལ་གསོན་རྡེལ་གྱི་བཤད་པ་བྱའོ། །དེ་ལྟར་བཅུ་གསུམ་པ་ཆ་ལག་དང་བཅས་པ་
ལ་རྡལ་དྲུག་ཅུ་རེ་ལྔའོ། ༈ །གསོན་རྗེལ་རྒྱོབ་ལུགས་ནི། གནམ་ལོའི་སྲོག་ལུས་དབང་ཐང་ཀླུང་རྟ་བླ་གཟའ་ལྔ་དང་བརྩི་བྱའི་སྲོག་ལུས་དབང་ཀླུང་བླ་གཟའ་ལྔ་འཐབ་རྗེལ་ལྔའོ། །ལི་མེ་སྦྲུལ་སོགས་གོང་ལྟར་བྱས་ལ་སྤར་ཁའི་སྲོག་ལུས་དབང་ཀླུང་བླ་གཟའ་དང་བརྩི་བྱའི་དེ་ལྔ་འཐབ་པས་རྡེལ་བཅུའོ། །ལོག་མེན་རྩིས་གསར་ལྟར་བསྐོར་ནས་བརྩི་བྱ་གསོན་པོ་དེའི་སྲོག་དང་། ལོག་མེན་སྲོག་དང་འཐབས་པས་བཅུ་གཅིག་གོ །ལོག་མེན་གང་བབ་དེའི་མ་ལྔ་དང་། བརྩི་བྱ་རང་ནས་རང་ཐེ་བའི་མར་ལྔ་དང་བརྩིས་པ། །སྲོག་དང་སྲོག་འཐབ། བརྩི་བྱའི་ཡར་ལྔ་དང་ལོག་མེན་གྱི་ཡར་ལྔ་གཉིས་སྲོག་དང་སྲོག་འཐབས་པས་བཅུ་གསུམ་མོ། །ཡང་འགའ་ཞིག་བརྩི་བྱ་མི་བརྩི་བ་ཡར་ལྔ་མར་ལྔ་བྱེད་པས་་ནི། བརྩི་བྱའི་ཡར་ལྔ་མར་ལྔ་དང་བརྩི་བྱ་འཐབ་པ་ནི། ཚེ་རབས་བསྟན་རྩིས་སྐབས་སུ་ཡིན་གྱིས་འདིར་མི་འཐད་དོ། །བཅུ་གསུམ་པའི་བཤད་པ་ནི་གཞུང་ནས་ཁ་ཤིན་ཏུ་གསལ་བར་ཡོད་པས་བཤད་མི་དགོས་སོ། །སྤྱི། ཡང་རྩིས་པ་མཁས་ཀྱང་ཡོན་བདག་འབྱོར་བ་དམན་པས་ཉིན་གཅིག་ཁོ་ན་ལས་རྩིས་འདུལ་གསུམ་ཚང་བར་བྱེད་དགོས་ཤིང་རྡེལ་མ་བརྒྱབ་ན་
བློ་ཁ་མི་རྫོགས་པའི་རིགས་ལ། གཤིན་ཐང་ལྔ་བཅུའི་དོན་བསྡུས། དུར་གཤེད་ཚང་ཚོལ་ཡན་ལག་ལྔའི་རྩིས་འདི་བྱ་སྟེ། སྲོག་ནི་རྒྱལ་པོའི་དྲུང་ཏུ་སྐྱབས། །བློན་པོ་རྣམས་ལ་བཀའ་གྲོས་དྲི། །འབངས་མ་དམག་དཔོན་དམ་དུ་བསྡུས། །ཐལ་དུ་བསྣོག་པ་རབ་ཏུ་གཅེས། །རྒྱལ་པོའི་བཀའ་ཐོབ་ཟླ་བ་བློན་པོ་གྲོས་བྱེད། ཞག་དམག་མའི་ལས་བྱེད། མཚོན་ཆ་རྣོན་པོ་ཞེས་པའི་དོན་ནི། གནམ་ལོའི་སྲོག་ལུས་དབང་ཀླུང་གཤིན་པོའི་སྲོག་ལུས་དབང་ཀླུང་སྲོག་དར་རྒུད་གནམ་ལོ་ལ་གཏུག་པ་དང་རྡེལ་ལྔ། ཟླ་བའི་སྲོག་ལུས་དབང་ཀླུང་དང་གཤིན་པོའི་སྲོག་ལུས་དབང་ཐང་འཐབ། ལུས་དར་རྒུད་ཟླ་བ་ལ་གཏུག་པ་དང་ལྔའོ། །ཉི་མའི་སྲོག་ལུས་དབང་ཀླུང་གཤིན་པོ་དང་འཐབ། དབང་ཐང་དར་རྒུད་ཉི་ལ་གཏུག་པ་དང་ལྔ། དུས་ཚོད་སྲོག་ལུས་དབང་ཀླུང་གཤིན་པོ་དང་འཐབ། རླུང་རྟ་དར་གུད་དུས་ཚོད་ལ་གཏུག་པ་ལྔ། ལོག་མེན་རྩིས་གསར་ལྟར་བསྐོར་བའི་སྲོག་དང་གཤིན་པོའི་སྲོག་འཐབ། ལུས་དང་ལུས་འཐབ། སྐྱེས་སྨེ་དང་འཕུར་སྨེ་འཐབ། ཤི་གཟའ་དང་གཤིན་པོའི་སྲོག་འཐབ། ཤི་སྐར་དང་གཤིན་པོའི་སྲོག་འཐབ་པས་རྡེལ་ལྔ་སྟེ། རྡེལ་ཉེར་ལྔ་བརྒྱབ་ལ་བཤད་
པ་ནི་གཤིན་ཐང་ལྔ་བཅུའི་ནང་ནས་ཚུར་ཐུ་ཤེས་པར་བྱའོ། །སྤྱི། ༈ དེ་ཡན་གྱི་གཤིན་རྡེལ་རྒྱས་འབྲིང་བསྡུས་གསུམ་རྡེལ་རྒྱབ་ལུགས་རྒྱས་པར་བཤད་ནས། ད་ནི་རྡེལ་བཤད་དང་དཔྱད་དོན་ཁ་དམར་རྣོ་སྟོང་གཅོད་ཚུལ་ཞལ་ཤེས་ཅུང་ཟད་བཤད་པ་ནི། རྩིས་མདའ་སྒྲོ་ནས་བཟུང་ནས་མདེའུ་བཙུགས་ཤིང་བཤད། གནམ་ལོ་ས་མཁན་དར་འཛིན་ལ། ཞེས་སོགས་ནས་སྐར་མའི་རྡེའུ་ནག་པ་ན་ཞེས་སོགས་བར་ནི། ཁ་དམར་རྡེལ་ཁོ་ནའི་བཤད་པ་ཡིན་པས། རྒྱ་འབོར་ཆུང་བ་བྱེད་ན་གཞུང་གི་ཁ་དམར་རྡེལ་ལ་བཤད་དཔྱད། བརྒྱ་འབོར་ཆེ་འབྲིང་གཉིས་ལ་ཁ་དམར་རྡེལ་ལྔ་བཅུ་ཁོ་ན་དཔྱད། སྲོག་གི་རྡེལ་བུ་དཀར་བ་ན་ཞེས་སོགས་མི་རྟག་སྡུག་གི་འཁོར་ལོ་ཡིན། ཞེས་པའི་བར་ཁ་དམར་རྡེལ་ལྔ་རྒྱལ་དཔྱད། དེ་ལྟར་སྟོང་གཅོད་རྡེའུ་ལྔ་བཅུ་ཞེས་པ་ནས་ཚེ་རབས་ཆུང་ཐོག་སྐམ་པ་ཡིན། ཞེས་པའི་བར་ནི། རྡེལ་ལྔ་བཅུ་སྤྱི་ཡི་དཔྱད་ཡིན་ཏེ། བརྒྱ་འབོར་ཆུང་བ་ལ་གཞུང་རྡེལ་སྤྱི་ལ་དཔྱད། བརྒྱ་འབོར་ཆེ་འབྲིང་གཉིས་ལ་ཁ་དམར་གྱི་མང་ས་ལ་དཔྱད་དོ། །གནམ་ལོའི་དབང་རྡེལ་ནས་སྐར་མའི་ཀླུང་རྡེལ་བར་དེར་རྡེལ་དཀར་པོའི་བཤད་པ་ཆད་པ་དེ་ནི། ནག་
པོའི་བཤད་པ་ལ་རྗེས་སུ་དཔག་ན་དཀར་པོ་བཤད་པ། ཤེས་རབ་ཀྱིས་རྩལ་གྱི་བསྒྱུར་ཤེས་དགོས་ཏེ། སློབ་དཔོན་མི་བསྟེན་རྡེལ་ཆོས་འཇུག་དོགས་པའི་ཕྱིར་ཞལ་ཤེས་སུ་བཞག་པ་ཡིན་ནོ། །ཧལ་ཁྱི་བྱི་ལིང་ཟླ་བ་གསུམ་ཡང་དེ་དང་འདྲ་སྟེ། ནག་བཤད་ལ་བསྟན་ནས་དཀར་བཤད་རིགས་པས་དཔག་ཤེས་པར་བྱའོ། །སྤྱི། ༈ དཔྱད་དོན་བདུན་མའི་ཞལ་ཤེས་ལ། ནམ་མཁའ་ས་གཞི་ལྟར་དཔྱད་ན། གནམ་ལོའི་རྡེལ་ཕྲེང་ཤར། སྲོག་གི་རྡེལ་ཕྲེང་ལྷོ། གཟའི་རྡེལ་ཕྲེང་ནུབ། རུས་ཁམས་རྡེལ་ཕྲེང་བྱང་། རི་རབ་ལྟ་བུར་དཔྱད་བློན་གནམ་ལོའི་དབང་རྗེལ་ལྗོན་ཤིང་གི་རྩེ་མོ། གཟའི་དབང་རྡེལ་རི་རབ་ཀྱི་རྩ་བ་ཡིན་ནོ། གཙུག་ལག་ལྟ་བུ་དང་རུས་སྦལ་ལྟ་བུར་དཔྱད་པའི་ཡི་གེ་མང་དོགས་པས་ཤོག་ཁྲ་ལ་ལྟོས་ཤིག །མཆོད་རྟེན་ལྟ་བུ་དང་རི་རབ་ལྟ་བུ་དཔྱད་ལུགས་འདྲའོ། །ཡར་དེད་བརྒྱད་ནི་ལོག་མེན་སྲོག་རྡེལ། མར་དེད་བརྒྱད་ནི་དུས་ཚོད་སྲོག་རྡེལ་ལོ། །ཤར་ཕྱོགས་རྡེལ་ཚན་གནམ་རྗེལ་ལྔ། ཁམས་རྡེལ་བྱང་གི་ཚན་ཡིན་རིགས་པས་འཆར་བའོ། །དེ་ཡན་ནི་དཔྱད་དོན་བདུན་མ་རྫོགས་སོ། །སྲོག་གི་དོ་བདག་བནེ་ནི། རྡེའུ་བཅུ་པ་གཅིག་ལ་དཔྱད་ཟེར་
བ་ནི། སྲོག་རྡེལ་ཁ་དམར་རྡེའུ་གཅིག་པ་དེ་ལ་དཔྱད། དེ་བཞིན་དུ་ལུས་དབང་ཐང་རླུང་རྟ་རུས་ཁམས་ལྡེའུ་གཅིག་པ་ཟེར་བ་ནི། ཁ་དམར་གྱི་རྡེའུ་ལྔ་པོ་དེ་ཡིན་ནོ། །གནས་ཀྱི་རྡེའུ་ནི་སྲོག་རྡུལ་ལྔ་པ་དེ་ལ་བྱའོ། །གནས་ཀྱི་རྡེའུ་ཆེ་ཚད་བརྟགས་པ་ནི། བརྒྱ་འབོར་གྱི་བཤད་པ་སྟེ། ༈ གཅིག་གནམ་ལོའི་སྲོག་རྡེལ། བཅུ་ལོག་མེན་ཉི་ཤུ་སྨེ་བ། སུམ་ཅུ་ཟླ་བ། བཞི་བཅུ་དུས་ཚོད། ལྔ་བཅུ་སྐར་མའི་སྲོག་རྡེལ། དྲུག་ཅུ་བྱི་ལིང་། བདུན་ཅུ་སོ་པའི། བརྒྱད་ཅུ་འཕྲད་པའི་རྟེན་ཕུར། སྲོག་རྡེལ་དགུ་བཅུ་ལ་བརྩི་བ་ཡིན་ནོ། །སྲོག་རྡེལ་ཡ་ཐ་གསུམ་ནི་གནམ་ལོ་ལོག་མེན། སྤར་ཁ་གསུམ་གྱི་སྲོག་རྡེལ། རླུང་རྡེལ་ཡན་དེ་ལྟ་བུ་ཡིན་ནོ། །བརྒྱ་འབོར་ཆུང་བ་ལ་གཞུང་ལ་དཔྱད། བརྒྱ་འབོར་ཆེ་འབྲིང་གཉིས་ལ་ཁ་དམར་གྱི་རྡེལ་ཞེ་ལྔ་ལ་དཔྱད་དོ། །སྲོག་གི་ཤི་དུས་བྱུང་བ་ནི། ཁ་དམར་རྡེལ་ལྔའི་བཤད་པ་ཡིན་ནོ། །སྟོང་གསུམ་རྡེའུ་ནི་ལོ་ལོག་མེན་སྤར་ཁ་གསུམ་གྱི་ཁ་དམར་ལ་བརྩི། གཟའ་ཡན་འགྲེས་ཤེས་པར་བྱའོ། །ཀླུང་རྟ་སྨད་ཀྱི་རྡེའུ་གཅིག་དཀར་ན་ལོ་གཅིག་ལུས་ལ་ནད་མེད་ཟེར་བ་ནི། ཞག་གི་ཀླུང་རྟ་རྡེའུ་ཡིན། གསུམ་ཀ་དཀར་ན་
ལུག་གི་ར་བ་གང་ཟེར་བ་ནི། ཞག་དུས་ཚོད་གཟའ་གསུམ་གྱི་ཀླུང་རྟ་ཡིན་ནོ། །བརྒྱ་འབོར་ཆུང་བ་ཡིན་གཞུང་རྡེལ་ལ་དཔྱད། ཆེ་བ་གཉིས་ལ་ཁ་དམར་རྡེལ་ཞེ་ལྔ་དཔྱད་དགོས་སོ། །བརྒྱ་འབོར་ཆེ་ཆུང་གཉིས་མི་མཚུངས། བཤད་པ་ལ་ཁྱད་མེད། ཅི་ཡིན་སྙམ་ན། རྣ་མི་རྣོའི་ཁྱད་ཡིན་ཏེ། བརྒྱ་འབོར་ཆེ་བ་རྣོ། གཞུང་རྡེལ་ལྔ་བཅུ་དང་བརྒྱ་འབོར་ཆུང་བ་རྣམས་ཕྱོགས་འགྲོ་ཙམ་ཡིན་ལ། མི་རྣོ་བའི་ཁྱད་ཡོད་དེ། རགས་རྩིས་དང་ཞིབ་རྩིས་ཀྱི་ཁྱད་ཡིན་ནོ། །རགས་རྩིས་ཞེས་པ་རགས་རིམ་ཙམ་བརྩི་བར་རགས་བརྩིས་སོ། །ཁམས་ཀྱི་རྗེའུ་གཅིག་པ་ནི་གནམ་ལོའི་རུས་ཁམས་རྡེའུ་ནས་ཐུར་དུ་བརྩིས་ལ། དགུ་པ་གཟའི་རུས་ཁམས་རྡེའུ་བར་དུ་ཡིན་ཏེ། འདི་ཡང་ཆེན་པོ་བྱེད་དང་འབྲིང་པོ་བྱེད་ན་ཡང་ཁ་དམར་རྗེལ་ལྔ་བཅུའི་ཁ་དམར་རྡེལ་ལ་དཔྱད་དོ། ༈ །གཅིག་གསུམ་དྲུག་ལ་སོགས་དཀར་ནག་དགྲ་མེད་ཟེར་བ་ནི། བརྒྱ་འབོར་ཆེན་པོའི་བཤད་པ་སྟེ། བརྒྱ་འབོར་ཆེན་པོ་ལ་རུས་ཁམས་ཀྱི་རྗེལ་བདུན་ཅུ་དོན་གཉིས་ཡོད་པ་སྟེ། ལོའི་རུས་ཁམས་ནས་ཐུར་དུ་བསྒྲངས་ནས། གཅིག་བཅུ་གཅིག་ནས་དོན་གཅིག་གི་བར། དྲུག་ཅུ་དྲུག་ཉེར་དྲུག་སོ་དྲུག །ཞེ་
དྲུག །ང་དྲུག །རེ་དྲུག་རྣམས་དཀར་ན་དགྲ་མེད་ཟེར་བའོ། །དེ་མན་ཆད་དགུ་ཡན་ཆོད་ནུག་ན་ཤི་ཁ་བྱེ་ཟེར་བ་ནི། དེ་རྣམས་ནག་པ་ནི་སྟེང་དུ། དགུ་བཅུ་དགུ་ཉེར་དགུ་སོ་དགུ་ཞེ་དགུ་དགུ་རེ་དགུ་རྣམས་ནག་ལ་ཤི་ཁ་བྱེ་ཟེར་བའི་དོན་ཡིན་ནོ། །བརྒྱ་འབོར་བརྒྱ་པ་ལ་དགོས་མེད་བཤད་པ་ལྷག་མོའི་མིང་འདུག་ཟེར་མཁན་ཚོས་དཔྱད་དོན་བདུན་མའི་གཞུང་ཚིག་ཚོ་ལ་གོ་བ་ཅུང་ཟད་མ་ཐེབས་པའི་རང་མཚང་སྟོན་པའོ། །དཔྱད་དོན་བདུན་མའི་ཞལ་ཤེས་ཚར་རོ། །སྤྱི། ༈ ད་ནི་གཤིན་ཟངས་ཁྱམས་སུ་བརྩི་བ་ནི། ཟངས་ཁྱམས་ཁྲ་མོའི་རྡེལ་རོ་ནས། རེ་མིག་ཉེར་ལྔའི་ཞལ་ཤེས་ལས། །སྟོད་ཀྱི་རེ་མིག་ལྔ་ནི་སྲོག་རྡེལ་གཅིག་པ། ལུས་ལྔ་གཉིས་པ། དབང་རྡེལ་ལྔ་གསུམ་པ། རླུང་རྡེལ་ལྔ་བཞི་པ། དར་རྒུད་རྡེལ་ལྔ་པའོ། །རྡེལ་ནག་གསུམ་ནང་ན་དཀར་པོ་གཅིག་བྱུང་ན་མཐུན་གསུམ་ལོ་པ་གཅིག་འཆི་ཟེར་བ་དང་། དཀར་པོ་གསུམ་ནང་ན་ནག་པོ་གཅིག་བྱུང་ན་བུད་།མེད་གཅིག་འཆི་ཟེར་ལ་རྡེལ་ཕྲེང་འཕྲད་དུ་དཔྱད་ལ། སྟོད་ཀྱི་རྡེལ་ཕྲེང་བྱུང་ན་སྐུ་རྒན་མཐུན་གསུམ་ལོ་པ་འཆི། དེ་འོག་ལ་བྱུང་ན་སྐྱེས་དར་མའམ་བུད་མེད་མཐུན་གསུམ་ལོ་པ་འཆི།
དེ་འོག་ལ་བྱུང་ན་བྱིས་པ་མཐུན་གསུམ་ལོ་པ་འཆི། བཞི་པ་ལ་བྱུང་ན་ཡུལ་གྱི་མཐུན་གསུམ་ལོ་པ་འཆི། ལྔ་པ་ལ་བྱུང་ན་བུ་སྲིང་ངམ་མག་པ་ཞང་ཉེ་མཐུན་གསུམ་ལོ་པ་འཆི་བས་དུར་ངོ་ཡིན་པས། ༈ དེ་དག་སོ་སོ་ལ་དུར་ལོས་ཚེ་དབང་ཚེ་ཐར་ཚེ་འབར་སོགས་ལུང་བརྒྱབ་བོ། རྡེལ་རོ་མང་དུ་བྱུང་ན་ཟེར་བ་རྡེལ་རོ་ནི། ནག་པོ་གསུམ་གྱི་ནང་དཀར་པོ་གཅིག་བྱུང་ན་རྡེལ་རོ། །དཀར་པོ་གསུམ་གྱི་ནང་ན་ནག་པོ་གཅིག་བྱུང་ན་རྡེལ་རོ། །དེ་གཉིས་ཀ་རེ་མིག་འཕྲད་དུ་དཔྱད་དགོས་སོ། །འགའ་ཞིག་རེ་མིག་ཐུར་དུ་དཔྱད་ཟེར་བ་ནི་ཧ་མ་གོ་བའོ། །གོང་དུ་བཀྲ་རྒན་སོགས་རེ་མིག་ལྔ་གསུངས་པ་དེ་མ་གོ་བར་ཡིན་ནོ། །ཕྱོགས་བཞི་ནག་པོ་ཁོལ་རྒྱུག་གང་བྱུང་ཕྱོགས་ནས་དགྲ་ངོ་ཡིན་ཟེར་བ་ནི། ཉི་མའི་དབང་ཐང་ཤར། ཉི་མའི་སྲོག་ལྷོ། ལོའི་དབང་ཐང་ནུབ། ཉི་མའི་དར་རྒུད་བྱང་། མཚམས་བཞིར་ཤུགས་ལས་ཤེས་སོ། །སྤྱི། ༈ གཤིན་རྗེལ་བཅུ་གསུམ་ནི་གཞུང་ན་གསལ་བས་ཞལ་ཤེས་མི་དགོས་སོ། །གསོན་རྩིས་བཅུ་གསུམ་པའི་སོ་འཕྲང་ཕུད་ནས་ཡོད་ན་ཁ་དམར་ལ་བཤད་པ་བྱའོ། །ནད་པ་ལྟ་བུ་ཡིན་ན་གཞུང་རྡེལ་ལ་བཤད་པར་བྱའོ། །གཅིག་ལེན་ལ་དྲུག་ཟེར་བ་
ནི། གཅིག་ནག་ན་དྲུག་དཀར་ལ་སྐྱོན་མེད། དྲུག་ནག་ན་ཡང་གཅིག་དཀར་ན་སྐྱོན་མེད། དེའི་འགྲེས། བྱི་རྟའི་རུ་ཆོད་སོགས་རིགས་པས་དཔྱད་པས་ཆོག །སྟོད་སྨད་རྡེལ་སོགས་མི་ཤེས་པ་མེད། དེ་ཅིའི་ཕྱིར་ན། བཅུ་གསུམ་དཔག་བསམ་ཤིང་གི་རྩེ་ཡིན་གསུངས་སོ། །བཅུ་གསུམ་པའི་བཤད་པ་ཚང་ངོ་། །སྤྱི། དེ་ནས་ཡན་ལག་ལྔའི་ཞལ་ཆེམས་རྡེལ་ཉེར་ལྔ་པ་ཡིན་ན་བཤད་པ་ཐམས་ཅད་གཤིན་ཐང་གཞུང་ནས་ཚུར་ཐུ་ཤེས་པར་བྱའོ། སྤྱི། དེ་ནས་སྤར་ཁའི་ཞལ་ཆེམས་གཟའི་ཞལ་ཆེམས་སྐར་མའི་ཞལ་ཆེམས་ཉི་མའི་ཞལ་ཆེམས་འདོན་ཤེས་པར་བྱའོ། །ཤིན་ཏུ་གལ་ཆེའོ། །ཞལ་ཆེམས་ཀྱི་གཞུང་ཚིག་ཐམས་ཅད་འདོན་མི་རུང་ངོ་། །དཔེར་ན་ལི་ཐོག་པའི་ཤི་རྩ་ན། ཡུགས་ས་མོ་བུད་མེད་རྒྱུ་ལུས་མི་གཙང་བའི་གོས་དམར་ཅན་ངོ་ལ་སྒྲོ་ཡོད་པ་དང་རྟ་དམར་ཅན་སོགས་དེ་འདྲ་ཞིག་གིས་བྱས་ཟེར་བ་སྲིང་མོ་དང་སྤྱན་ཡ་མེད་ན་འཕྲོད་འདོད་ཟེར་བ་མི་རྒྱུད་ཡོད་ན་ཟེར་བ་ཡིན། བུ་ཚ་བོ་རྟ་ལ་སེམས་ཆགས་ཟེར་བ་ཡང་མེད་པའི་རིགས་ལ་མི་བརྗོད། ཟ་འཕྲོ་ཞྭ་གོས་སོགས་ལ་སེམས་ཆགས་ཟེར་བ་ཡང་དེ་དང་འདྲ། གང་རུང་ཞིག་ཡིན། ཐམས་ཅད་ཚང་དགོས་པ་
མེད། དུར་བཅོས་གཤེད་ཕུད་ཐབས་ཐམས་ཅད་ཞལ་ཆེམས་ལས་བྱུང་བ་ལྟར་ནན་ཏན་བྱས་ལ་ཕན་ཆེའོ། །སྤར་ཁ་རང་ཐོག་བརྒྱད་ལ་ཤི་བ་དང་། སྤར་ཁ་བདུན་ཟུར་དང་དགྲ་ཐོག་ཏུ་ཤི་འགྲམ། དགུ་གཅིག་ལི་ནས་བརྒྱད་ཅུ་རྩ་གཅིག་བར་དེ་རྣམས་རྗེས་སུ་ངན་ཞིང་རོ་མང་དུ་འོང་། འགྲམ་འཁྲུགས་དགུ་མིག་གི་ཁྲམ་ལས་བྱུང་བ་ལྟར་མན་ངག་གི་བཅོས་རྣམས་ནན་ཏན་བྱའོ། །སྤྱིར་རིམ་གྲོ་འབྱོར་བ་དང་བསྟུན་པ་གལ་ཆེ། རིམ་གྲོ་ཆེན་པོ་བྱས་ན་འགྱུར་བ་ལག་བླངས་སོ། །དེ་ཞལ་ཆེམས་འདོན་པའི་ཞལ་ཤེས་སོ། །སྤྱི། ༈ །སྨེ་བའི་ཚེ་རབས་ལས་རྩིས་ལ་ཚེ་སྔ་ཕྱི་བར་གསུམ་གྱི་བཤད་པ། སྐྱེ་སྒོ་བཅད་ཐབས་ཡོད་པས། སྐྱེས་སྨེའི་བཤད་པ་བྱ་སྟེ། ཤིང་བྱིའི་བཞི་ལྗང་ནས་ཆུ་ཕག་གི་བརྒྱད་དཀར་བར། དེ་སྐྱེས་སྦེ་ཡིན་ནམ་ཡང་མི་འཆུག་གོ །སྐྱེས་བུ་དམ་པ་ས་ཐོབ་པ་དང་། མཚམས་མེད་ལྔ་བྱས་པ་ལོ་འདྲ། སྨེ་བ་འདྲ་ན་སྐྱེས་གནས་གཅིག་ཟེར་བ་མང་ཡང་དེ་དོན་རྩ་བ་ནས་མ་གོ་བའི་གཏམ་ཡིན་ནོ། །ཏིར་རྒན་ཁྱོད་ཀྱིས་འཇམ་དཔལ་གྱི་དགོངས་པ་མ་རྟོགས་སོ། །རབ་ཀྱིས་རབ་ལ་བརྩི་བ་སྤང་། ཐ་མས་ཐ་མ་བརྩི་བ་སྤང་། ཞེས་གསུངས་པ་དེ་ཁྱོད་ཀྱིས་སྒྲ་
འཛིན་གྱི་བུ་གར་མ་ཐོས་སམ། རབ་ཀྱི་རབ་ས་ཐོབ་པའི་སྐྱེས་བུའམ་འབྱུང་བ་ལྔ་ལ་རང་དབང་ཐོབ་པའི་གྲུབ་ཐོབ་རྣམས་ལ་ཤེས་རབ་ལས་རྩིས་མི་རུང་བར་གསུངས། ཚེ་རབས་ལས་རྩིས་ཀྱིས་ཞལ་ཤེས་སོ། ༈ །གཤིན་རྩིས་ལ་གཤིན་པོའི་ལོ་རྙིང་ལ་བཙུགས་པའི་ཁབ་དེ་དོ་བདག་གི་ནས་འབྲུ་དང་མཉམ་དུ་སྙིང་གར་བཟུང་ནས། འཇམ་དཔལ་འབྱུང་བའི་ལྷ་ཚོགས་རྣམས་ཀྱིས་བདེན་པས་ཟ་འདྲེ་ཤི་གཤེད་འགྲོ་བའི་ལམ་སྟོན་ཅིང་དམོད་བོར་ལ་རྩིས་གཞི་ལ་དོར་ཏེ་ཁབ་ཀྱི་སོ་གང་དུ་བསྟན་པའི་ཕྱོགས་དེར་གཤེད་འགྲོ་བར་ཤེས་པ་ནི་རྟེན་འབྲེལ་བརྟགས་པའོ། །དེ་ནས་སྔར་མཚམས་བཅད་བྱས་པའི་སྒོ་རྩ་ན་བཞག་པའི་ཆུ་ཕོར་དེ་ཡར་བླངས་བའི་སྟེང་དུ་བརྩི་གཞི་ལག་པའི་སྟེང་དུ་བརྡབ་ཅིང་སྤྲུག །བདེན་པ་བདར་ནས། དེ་ཕྱིན་ཆད་ཡོན་བདག་འདི་ཞེས་བྱ་བས་གཤིན་རྩིས་ངན་པ་བྱེད་པའི་སྒབ་ཆོད་ཅིག །ཅེས་བརྗོད་ལ་ཆུ་ཕོར་སོལ་བ་དང་བཅས་པ་ལུང་པའི་མདའ་ཕྱོགས་སུ་དོར་རོ། །དེ་ནས་རྡེལ་དཀར་ནག་ཕྱེས་ལ། དཀར་པོ་མཐོངས་ཀའི་ལུང་པའི་རྒྱབ་རི་ངོས་སུ་བསྐྱལ་བཅུག་ལ་ཡར་གྱི་གནམ་སྒོ་ཆོད་ཅིག་བརྗོད། ནག་པོ་ཐུར་དུ་བསྐྱལ་ལ་མར་གྱི་ས་སྒོ་ཆོད་ཅིག་
བརྗོད་། གསོན་རྩིས་ཡིན་ན་བཀྲ་ཤིས་བརྗོད། གཤིན་རྩིས་ཡིན་ན་རོ་ལམ་གྱི་སྐོར་རྣམས་དང་རོ་རིགས་དཀར་ནག་གི་བཞག་ལུགས། མེ་དུར་ཆུ་དུར་གྱི་ཐོབ་ཐང་རྣམས་གོ་སླ་ཞིང་། དཔེ་དང་ཤོག་བཀྲ་ལ་གསལ་བས་འདིར་མ་སྤྲོས་སོ། །འོན་ཀྱང་ད་ལྟའི་རྩིས་པ་རྣམས་ཀྱིས་མ་ཐོས་པའི་གལ་ཆེ་བ་ནི། གཤིན་པོའི་ལོ་རྙིང་དེའི་མ་ཕྱོགས་དང་གྲོགས་ཕྱོགས་སུ་རོ་འདྲེན་རུང་ལ། དགྲ་ཕྱོགས་སུ་དྲངས་མི་རུང་བ་དང་། གཟའ་དང་གདོང་མ་ཐུག་པ་དང་། ཡུལ་དེའི་མཚོ་གཉན་ཤིང་གཉན་བྲག་གཉན་གསས་མཁར་སོགས་ལ་མི་འཁྱེར་བ་གལ་ཆེའོ། །གཞན་ལོ་ཟླ་ཞག་དུས་ཀྱི་ས་བདག་དང་། སྨེ་བའི་ཕོ་བྲང་གླིང་དགུ་གནམ་ཐིག་སེར་ནག་སོགས་བརྩི་བ་ནི། ཐམས་ཅད་ལ་གྲགས་པས་བཤད་མི་དགོས་སོ། །དེ་ནས་གཤིན་རྩིས་ཀྱི་ཞལ་ཤེས་གབ་སྦས་མེད་པར་རྒྱས་པར་བཤད་ཚར་རོ། །སྤྱི། ༈ ཨེ་མ་ཧོ། སྙིགས་དུས་རྩིས་པ་རཱ་གའི་མིང་ཅན་བདག །སྔོན་ལས་དབང་གི་ཡོན་ཏན་འདི་དང་འཕྲད། །ལོ་བཅུ་ལོན་ནས་གཙུག་ལག་རྩིས་ལ་སྦྱངས། །སྒྲོན་ཆུ་ལ་སོགས་རྩིས་གཞུང་ཕྲན་བུ་འགའ། །བློ་རུ་བཟུང་ནས་ལོ་འགའ་ཁ་ཐོན་བྱས། །རྒྱུད་ཀྱི་རྒྱལ་པོ་སྡོང་པོ་དགུ་འདུས་དང་། །
རིན་ཆེན་ཀུན་འདུས་ལ་སོགས་རྒྱུད་ཆེན་དང་། །སྣང་གསལ་སྒྲོན་མེའི་གཞུང་འགྲེལ་ཡང་འགྲེལ་སོགས། །རྒྱུད་དང་རྒྱ་གཞུང་རྩོད་མེད་མང་དུ་བལྟས། །དར་རྒུད་་གསེར་ཕྲེང་སྨེ་བའི་སྒང་རྩིས་སོགས། །ནད་པ་ཐང་ཤིང་བྱིས་པ་བཙས་རླུང་རྩིས། །སྲིད་པ་བ་སྦལ་ཁྱུང་གསུམ་རྩིས་དང་ནི། །ཇི་གང་ཁུག་པ་བག་རྩིས་རིན་ཆེན་ཕྲེང་། །དེ་སོགས་རྩིས་ཀྱི་གཞུང་ལུགས་མང་པོ་རྣམས། །སློབ་དཔོན་མཁས་པ་རྣམས་ལ་ཞུས་ཤིང་བསླབས། །རིན་པོ་ཆེ་པ་དཀོན་མཆོག་དཔལ་འབྱོར་དང་། །སྒར་ཆེན་སྨན་མོ་ཆེ་བ་ལ་སོགས་ལ། །རྩིས་ཀྱི་གདམས་པ་ཕར་ཕུར་ཚུར་ལ་བསླབས། །རབ་འབྱམས་གཞུང་ལུགས་སྨྲ་བ་མང་པོ་ལ། །གཙུག་ལག་རྩིས་ཀྱི་རིག་པ་ཕུལ་བར་བྱས། །རྩིས་མཁན་མཆོག་དམན་བར་མ་སུ་མཐོང་ཡང་། །མཐོང་བ་ཙམ་གྱིས་འཛུམ་གྱིས་བསུས་ནས་སུ། །ཕན་ཚུན་འཕྲད་ནས་རྩིས་ཀྱི་གླེང་མོར་བྱས། །མན་ངག་རྐུ་ཐབས་འདོད་པ་འགའ་ཞིག་ལ། །དཔེ་འཁྱུད་མ་བྱས་་ཕན་སེམས་ལྷུག་པར་བཤད། །འཇམ་དཔལ་རྩིས་གཞུང་བདུད་རྩིའི་ཆུ་གཏེར་ལས། །རྣམ་དཔྱོད་བློ་ཡི་བུམ་པོས་ལེགས་བཅུས་ཏེ། །བློ་གསལ་རྨོངས་པའི་དྲི་མ་འཁྲུད་ནས་སུ། །
ཅུང་ཟད་མཐུ་ལྡན་ཁོ་བོའི་རྩལ་ཡིན་བསམ། །དེ་ཚེ་དཀར་ནག་རྩིས་ལེགས་སྦྱངས་བ་ཡིས། །སྦས་པའི་རྣལ་འབྱོར་པྲ་བའི་མིང་ཅན་སོགས། །ཤེས་འདོད་བློ་གསལ་དུ་མས་བསྐུལ་བའི་ཕྱིར། །ཟིན་བྲིས་མཐོང་བ་ཀུན་གསལ་མཁས་པའི་དཔལ། །གབ་སྦས་མེད་པར་གོ་བདེའི་ཚིག་གིས་བྲིས། །འོན་ཀྱང་བདག་ཅག་སོ་སྐྱེའི་དབང་གྱུར་པས། །མ་རྟོགས་ལོག་རྟོག་འཁྲུལ་པའི་ཆ་མཆིས་ན། །འཇམ་དཔལ་འབྱུང་བའི་ལྷ་ཚོགས་རྣམས་ལ་བཤགས། །འདི་བྲིས་དགེ་བས་བདག་ཅག་སྒྲུབ་པ་པོ། །འདི་ཉིད་མཐོང་ཐོས་དྲན་རེག་འགྲོ་བ་རྣམས། །སྐྱེ་བ་ཀུན་ཏུ་འཇམ་དཔལ་རྗེས་བཟུང་ནས། །མ་འོངས་པ་ན་མགོན་པོ་ཀུན་གཟིགས་ཀྱིས། །གསུང་གི་བདུད་རྩི་ངོམས་མེད་འཐུངས་ནས་ཀྱང་། །ཞིང་མཆོག་དེ་ཡི་དཔལ་ལ་ལོངས་སྤྱོད་ཅིང་། །རྫོགས་བྱང་གོ་འཕང་མངོན་དུ་བྱེད་ཕྱིར་བསྔོ། །ཀྱེ་ཀྱེ་བློ་གསལ་ཤེས་འདོད་རྣམས། །སློབ་དཔོན་ངན་པའི་ངག་རྒྱུན་དང་། །མན་ངག་རྩིས་ཡིག་ཕྱོགས་དེ་ལ། །ཧ་ཅང་རྨོངས་ཞེན་མ་ཆེ་བར། །ཟིན་བྲིས་འདི་ལ་ལྟ་རྟོགས་མཛོད། །མཁས་པར་འབྱུང་ངོ་སྙིང་གི་གཏམ། །ཨི་བདེན་ཟིན་བྲིས་དཔེ་འདི་ལ། །ལན་བདུན་ཀློག་དང་གསལ་ནས་
འོང་། །འགྲོ་བ་བདེ་སྐྱིད་འབྱུང་བའི་ཕྱིར། །གཙུག་ལག་རྩིས་ཀྱི་བསྟན་པ་འདི། །ཕྱོགས་མཚམས་ཀུན་ཏུ་དར་བར་ཤོག །བློ་དམན་རྩིས་ལ་སྦྱོང་འདོད་རྣམས། །དཔེ་འདི་སློབ་དཔོན་ཚུལ་དུ་བསྟེན། །རྩ་བ་བློ་ལ་ལེན་པ་གཅེས། །འདི་ཡང་ཕན་སེམས་སྙིང་གི་གཏམ། །རཱ་གའི་མིང་ཅན་དེ་ཡིས་སྨྲས། །གུ་བྱ། བཀྲ་ཤིས། །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།