སྐག་གསུམ་རགས་རིམ་བརྩི་བའི་ཚུལ་གསལ་བར་བཀོད་པ་འཕྲུལ་གྱི་མེ་ལོང་།
སྐག་གསུམ་རགས་རིམ་བརྩི་བའི་ཚུལ་གསལ་བར་བཀོད་པ་འཕྲུལ་གྱི་མེ་ལོང་ཞེས་བྱ་བ་བཞུགས་པའི་དབུ་ཕྱོགས།
ན་མོ་ཨཱརྱ་མཉྫ་ཤི་ཡེ། རྒྱ་ནག་རི་བོ་རྩེ་ལྔའི་ཤེལ་ཁང་ནས། །མཁྱེན་རབ་མངའ་བདག་འཕགས་པ་འཇམ་དཔལ་གྱི། །གཙུག་ལག་རྩིས་ཀྱི་རྒྱུད་སྡེ་དཔག་མེད་གསུངས། །གནམ་དང་ས་དང་བར་སྣང་གབ་རྩེ་ནས། །སུམ་བརྒྱ་དྲུག་ཅུ་ཚན་གསུམ་གཏན་ལ་ཕབ། །དེ་ཚེ་འཇིག་རྟེན་ལེགས་ཉེས་སྐྱིད་སྡུག་ཀུན། མངོན་ཤེས་འདྲ་བར་གསལ་ཞིང་རྟོགས་པ་འབྱུང་། །དེ་ཚེ་རྒྱ་ནག་མི་རྣམས་ཐམས་ཅད་ཀྱིས། །དེ་ལ་དགའ་ཞིང་དེ་ཉིད་སློབ་པ་ལ། །བྱ་བ་གཞན་རྣམས་སྒྱུར་བ་འདྲ་ཞིག་བྱུང་། །དེ་ཚེ་རྗེ་བཙུན་འཕགས་པ་འཇམ་དཔལ་གྱིས། །རྒྱ་ནག་ཀུན་རྫོབ་
རྩིས་འདི་དགའ་དྲགས་པས། །ངེས་དོན་ཐུབ་པས་གསུངས་པའི་དམ་པའི་ཆོས། །རྒྱ་ནག་ཡུལ་དུ་དར་བར་མི་མཛད་དགོངས། །རྫུ་འཕྲུལ་སྟོབས་ཀྱིས་རྩིས་རྣམས་ཐམས་ཅད་བསྡུས། །རི་བོ་རྩེ་ལྔའི་བྱང་ཤར་མཚམས་སུ་སྦས། །དེ་ཚེ་ལོ་ཟླ་ཞག་དུས་འབྱུང་བའི་ལྷ། །ཐམས་ཅད་མ་དགའ་འཛམ་གླིང་ཐམས་ཅད་དུ། །བཀྲ་མི་ཤིས་པའི་རྟགས་མཚན་ངན་དགུ་བྱུང་། །དེ་ཚེ་སློབ་དཔོན་པདྨ་འབྱུང་གནས་ཀྱིས། །ལྷ་ཆེན་ཚངས་པ་གདོང་བཞིར་སྤྲུལ་ནས་བྱོན། །སླར་ཡང་རྩིས་རྒྱུད་གསུངས་དགོས་ཞུ་བ་ཕུལ། །དེ་ཚེ་ལྷ་མོ་རྣམ་རྒྱལ་མ་ལ་སོགས། །འཇིག་རྟེན་ལྷ་ཀླུ་
མི་ཚོགས་དཔག་མེད་འདུས། །སྡོང་པོ་ཀུན་འདུས་ཤིང་གི་རྒྱུད་དང་གཅིག །སྣང་གསལ་སྒྲོན་མེ་མེ་ཡི་རྒྱུད་དང་གཉིས། །རིན་ཆེན་ཀུན་འདུས་ས་ཡི་རྒྱུད་དང་གསུམ། །ས་ལ་པ་ཏྲ་ལྕགས་ཀྱི་རྒྱུད་དང་བཞི། །བདུད་རྩི་བུམ་པ་ཆུ་ཡི་རྒྱུད་ལྔ་གསུངས། །ཀོང་ཙེ་འཕྲུལ་གྱི་རྒྱལ་པོ་ལ་སོགས་པ། །འཕྲུལ་གྱི་མི་ལྔས་དེ་དོན་གཏན་ལ་ཕབ། །ས་རྩིས་གཏོ་ཆོག་རྒྱ་གཞུང་དཔག་མེད་མཛད། །སྲོང་བཙན་སྒམ་པོའི་དུས་སུ་རྒྱ་བཟའ་དང་། །ཁྲི་སྲོང་ལྡེའུ་བཙན་དུས་སུ་ལོཙྪ་བཞི། །དེ་དག་རྣམས་ཀྱིས་བོད་དུ་དཔག་མེད་བསྒྱུར། །སྔ་འགྱུར་འགའ་ཞིག་གཏེར་དུ་སྦས་པ་རྣམས། །ཁམས་པ་ཉི་མ་གྲགས་པ་སོགས་ཀྱིས་བཏོན། །བར་སྐབས་རྒྱ་ནག་ཡུལ་དུ་བདུད་སྤྲུལ་ནས། །ཧྭ་ཤང་སེ་ཐན་བྱ་བས་རྩིས་ལོག་བརྩམ། །དེ་ཡི་རྗེས་འབྲང་སྐར་ཡིག་ཝ་མགོ་མ། །སྤར་ཁ་གང་ཤི་དེ་ཡི་ནོར་བརྒྱད་པོ། །དུར་གྱི་སྟེང་དུ་བཤའ་ནས་དུར་ཁ་གཅོད། །རྒྱལ་པོ་ལ་སོགས་མི་ཆེན་སྐག་ཆེ་དུས། །དེ་དང་ལོ་མཉམ་ཡིན་པའི་མི་གཅིག་ལ། །རྒྱལ་པོའི་ཞུ་གོས་བསྐོན་ནས་ངར་མི་བསྔོ། །མི་དེ་བསད་པས་རྒྱལ་པོའི་སྐག་འགྱུར་ཟེར། །གཤིན་རྩིས་རྡེའུ་འགའ་ཞིག་ནག་པ་ན། །རྗེས་ནས་རྡོ་ཟན་མི་
རུང་ན་ཚ་འོང་། །རྗེས་ནས་དགེ་བ་བྱས་ཀྱང་མི་ཐོབ་ཟེར། །དེ་འདྲ་འཇམ་དབྱངས་གསུང་ནི་མ་ཡིན་ཞིང་། །ཧྭ་ཤང་སེ་ཐན་ལུགས་ཀྱི་རྩིས་ལོག་ཡིན། །རྩིས་གཞུང་འགའ་ལའང་རྩིས་ལོག་ཅུང་ཞིག་འདྲེས། །བོད་དུ་རྒྱལ་པོ་གླང་དར་བསྟན་པ་བསྣུབས། །རྩིས་པ་ཐམས་ཅད་བསད་ཀྱང་རྩིས་དཔེ་ལུས། །རྒྱ་ལ་མི་རྗེས་སློབ་དཔོན་མེད་ན་ཡང་། །ཤེས་རབ་ཅན་གྱིས་དཔེ་ཆ་སྟེང་ནས་རྩིས། །ལ་ལ་ཤེས་ཞིང་ལ་ལ་འཁྲུལ་གྱུར་པའི། །རྒྱུད་པ་རྒྱ་ཆེར་འཕེལ་ལ་རྩིས་རྙིང་ཟེར། །དེང་སང་སྔགས་པ་ཕལ་ཆེར་དེ་ཡི་ལུགས། །དུས་ཕྱིས་ཁམ་པ་ཁྲ་མོ་རྒྱ་ནག་བྱོན། །དེ་ཡི་བརྒྱུད་པ་ཤིན་ཏུ་དག་ན་ཡང་། །དེ་ཡི་ལུགས་དེ་ཤེས་མཁན་ཉུང་ངུ་ཙམ། །ཆོས་དང་བོན་དང་རྩིས་དང་སྨན་དང་བཞི། །འཕྲུལ་གྱི་མི་བཞི་འཛམ་གླིང་ས་ཡི་མིག །འདི་ཕྱིས་བདེ་ལེགས་ཐམས་ཅད་དེ་ལས་བྱུང་། །དེ་བཞི་མེད་ན་དུད་འགྲོའི་གླིང་དང་འདྲ། །དེ་བཞི་ཡོད་པས་གླིང་བཞི་གཞན་རྣམས་ལས། །འཛམ་བུ་གླིང་འདིར་གླིང་བཞི་གླིང་མཆོག་ཟེར། །མཁས་མང་ཚོགས་པའི་འདུན་ས་དབུས་གཙང་དུ། །རྒྱལ་པོ་མི་ཆེན་བླ་ཆེན་ཐམས་ཅད་ཀྱང་། །སྐུ་སྐག་ཡོད་མེད་སྐུ་
རིམ་ཅི་དགོས་སོགས། །མོ་དང་རྨི་ལམ་མངོན་ཤེས་མཐོང་བ་དང་། །ལྷ་དང་དཀོར་བདག་འབབ་པའི་ལུང་བསྟན་སོགས། །དཔག་མེད་ཡོད་ཀྱང་བློ་གཏད་བྱེད་སྲོལ་མེད། །འཇམ་དབྱངས་གསུངས་པ་རྒྱལ་བའི་བཀའ་ཡིན་ཕྱིར། །ཀུན་གྱིས་རྩིས་ལ་ཡིད་ཆེས་བློ་གཏད་པར། །རེས་འགའ་མི་ཐིག་པ་རེ་བྱུང་ན་ཡང་། །རྩིས་ཀྱི་མ་ཐིག་པ་ནི་མ་ཡིན་ཏེ། །མ་ཀླུང་དར་རྒུད་བཟང་ངན་ཁྱད་པར་ཡིན། །མ་ཀླུང་དར་རྒུད་བཟང་པོར་སྐྱེས་པ་ནི། །ལོ་དང་སྤར་ཁ་རྩུབ་ཀྱང་ཉེས་སྐྱོན་མེད། །བསོད་ནམས་ཆེན་པོའི་མི་རྣམས་དེ་འདྲར་སྐྱེས། མ་ཀླུང་དར་རྒུད་ངན་དུས་སྐྱེས་པའི་མི། །ལོ་དང་སྤར་ཁ་འཇམ་ཡང་ངན་དགུ་འབྱུང་། །བསོད་ནམས་ཟད་པའི་མི་དེ་དེ་འདྲར་སྐྱེས། །དེ་ཉིད་བརྩི་ནས་མ་ཀླུང་བརྩི་ཤེས་དགོས། །བྱིས་པ་སྐྱེས་དུས་ཕ་མས་ལོ་དུ་ལོན། །སྐྱེས་དུས་ཟླ་བ་ཞག་དང་དུས་ཚོད་དང་། །གཟའ་དང་སྐར་མ་རྣམས་ཀྱང་ཤེས་དགོས་ཏེ། །དབུས་གཙང་དཔོན་རིགས་རྣམས་ལ་སྲས་འཁྲུངས་དུས། །དེ་དག་ཡི་གེར་བྲིས་ནས་བཞག་སྲོལ་ཡོད། །དེ་ལ་དགོངས་ནས་དྲུང་མཚོའི་སྨན་མོ་ཚོས། །ནག་རྩིས་འདི་ཉིད་ཐིག་པར་བྱེད་པ་ལ། །སྐར་མར་རང་གི་བྱིན་པ་གཅིག་
དགོས་གསུངས། །དེ་འདྲར་ཤེས་པ་དཀའ་ཞིང་བརྩི་མི་དར། །འོན་ཀྱང་འཇམ་རྩུབ་རིམ་གྲོ་ཅི་དགོས་སོགས། །འཇམ་དབྱངས་གསུངས་བཞིན་བཤད་ལ་ཉེས་སྒྲིབ་མེད། །འོན་ཀྱང་འབྱོར་པ་མེད་པའི་དབུལ་པོ་ཡིས། །རིམ་གྲོ་ལ་སོགས་ཅི་ཡང་མི་འགྲུབ་ན། །རྩུབ་པར་འདུག་ཀྱང་བརྗོད་པར་མི་རུང་སྟེ། །འཇིགས་སྐྲག་ཆེ་ཞིང་བྱ་ཐབས་མེད་པའི་ཕྱིར། །འཇིག་རྟེན་ཁམས་ན་སྐག་རྣམས་བརྩི་བ་ནི། །ལྕགས་ཀྱི་ཚེར་མས་འབིག་པའི་དམྱལ་བར་སྐྱེ། །གསུངས་པའི་དོན་ཡང་དེ་ལ་དགོངས་པ་ཡིན། །འབྱོར་པ་ཡོད་ཅིང་རྩུབ་ལ་རྩུབ་ཚུལ་བརྗོད། །ཆོས་འདོན་ལ་སོགས་རིམ་གྲོ་ལུང་བསྟན་པས། །ཚེ་འདིར་ཕན་ཅིང་ཕྱི་མ་བདེ་བ་ཐོབ། །ཕན་དང་བདེ་བ་སངས་རྒྱས་བསྟན་པ་ཡིན། །ཞིབ་པར་སྐག་རིགས་སུམ་བརྒྱ་དྲུག་ཅུ་སྟེ། །སྐག་ཕྲན་རེ་རེ་མེད་དུས་མེད་པའི་ཕྱིར། །ཐམས་ཅད་བརྗོད་པར་མི་བྱ་བརྗོད་ན་ནི། །སྤར་ཁ་སྐག་ཁ་རྩུབ་ཁའི་མིང་ངན་དགོས་དོགས་མཆིས། ༈ གནམ་ལོ་རྒྱལ་པོ་ཡིན་ཕྱིར་དབང་ཡང་ཆེ། །ཀུན་གྱི་རྩ་བ་སྤར་ཁ་ཡིན་གསུང་ཕྱིར། །ལོ་དང་སྤར་ཁ་འཇམ་རྩུབ་ཀུན་ལ་གྲགས། །གནམ་ལོ་རང་ལོ་ཤར་དུས་རང་སྐག་རྩུབ།
གནམ་ལོ་བདུན་ཟུར་ཤར་དུས་བདུན་ཟུར་སྐག །གནམ་ལོ་དུར་དང་འཕྲད་དུས་དུར་སྐག་སྟེ། །རྟ་སྦྲུལ་ཁྱི་དང་བྱ་སྤྲེལ་གླང་གི་ལོ། །སྟག་ཡོས་ལུག་དང་ཁྱི་འབྲུག་གླང་ལུག་བཞི། །བྱི་ཕག་འབྲུག་ལོ་ཤར་དུས་དུར་མིག་ཡིན། །ལོ་སྐག་མང་ཡང་དེ་གསུམ་ཙམ་ཞིག་གཙོ། །དེ་ཡི་བཅོས་ནི་སྤར་ཁ་གང་བབ་ཀྱི། །བཅོས་རྣམས་བྱས་པས་སྐག་དེ་འགྱུར་བ་ཡིན། །བྱི་རྟ་རུ་ཆོད་གླང་ལུག་ཕུང་གྱོད་དང་། །སྟག་སྤེལ་བདུན་ཟུར་བྱ་ཡོས་བྱེ་བྲལ་དང་། །ཁྱི་འབྲུག་ཐོག་བརྫིས་ཕག་སྦྲུལ་ལྕེ་མདུང་རྣམས། །ཕན་ཚུན་གནོད་པ་སྐྱེལ་བའི་བདུན་ཟུར་ཟེར། །དེ་ལ་ཕྱི་སྐག་གནམ་ལོའི་སྐག་ཅེས་བྱ། །ནང་སྐག་སྤར་ཁའི་སྐག་ནི་བརྩི་བའི་ཚུལ། །ཕོ་རྣམས་ཐམས་ཅད་ལི་ནས་གཡས་སུ་བསྐོར། །མོ་རྣམས་ཐམས་ཅད་ཁམ་ནས་གཡོན་དུ་བསྐོར། །སྤར་ཁའི་སྐག་ཕྲན་མང་པོ་བརྗོད་མི་ལོང་། །དགྲ་ཐོག་དུར་མིག་གཉིས་ནི་གཙོ་བོ་ཡིན། ༼ལི༽ །བྱ་སྤྲེལ་ལི་ལ་ཕྱིན་ན་དགྲ་ཐོག་ཡིན། །ཁྱི་འབྲུག་གླིང་ལུག་མ་ཐོག་ཡིན་པས་འཇམ། །འཛེམ་བྱ་མང་ཡང་ཐམས་ཅད་འཛེམ་པར་དཀའ། །སྦྱིན་སྲེག་མི་བླུག་ཤི་ཡང་བསྲེག་མི་རུང་། །དུས་ཚོད་སྤང་ཁ་སེར་དུས་རྩུབ་པ་སྟེ། །དེ་ཕན་ཚེ་
དབང་ཚེ་སྒྲུབ་ཞུ་བ་དང་། །རྣམ་འཇོམས་ཟབ་ཁྲུས་ཚེ་མདོ་འདོན་པ་དང་། །བཙན་མདོས་བྱས་ན་ལོ་གསུམ་ཚེ་ཤུག་འོང་། །དེ་སྐད་སྤར་ཁའི་ཞལ་ཆེམས་ནང་ན་གསལ། །ཚེ་དབང་བརྒྱའམ་ལོ་གྲངས་བཅུ་གསུམ་དང་། །བདུན་བརྩེགས་སུམ་བརྩེགས་ལ་སོགས་སྐབས་དང་བསྟུན། །ཚེ་ཆོག་གྲངས་ཀ་ཡང་ནི་དེ་དང་འདྲ། །རྣམ་འཇོམས་དབང་དང་བྱབ་ཁྲུས་གཟའ་ཡུམ་དབང་། །པདྨ་གཙུག་ཏོར་དབང་ཡང་བསྐུར་བར་བྱ། །ལང་ཀར་གཤེགས་པ་ཚེ་མདོ་ཚེ་གཟུངས་དང་། །འཇམ་དཔལ་རྩ་རྒྱུད་མཚན་བརྗོད་མདོ་བསྡུས་པ། །གཙུག་ཏོར་རྣམ་རྒྱལ་གཙུག་ཏོར་གདུགས་དཀར་དང་། །གཙུག་ཏོར་དྲི་མེད་རྡོ་རྗེ་རྣམ་འཇོམས་དང་། །ཚར་གྲངས་དུ་ཐོན་འབྱོར་པ་དེ་དང་དཔག །གཏོར་མ་བཏང་ཞིང་བསྐང་བ་བཅའ་བ་དང་། །གསས་མཁར་ལ་བཙས་བསྟོད་ཅིང་གཏོར་སྐུ་བཙུགས། །ཤ་རུ་བཀྱག་དང་འདྲེ་མོ་རྫ་མདོས་བྱ། །དབང་ཕྱུག་མ་ཡི་ཟོར་མདོས་བྱ་བ་ཡིན། །བུག་གམ་སྤུངས་ན་མདུན་ངོ་བསང་མང་བྱ། །ནུབ་ནས་འདྲེ་ལྔ་བྱང་དུ་བདུད་གཅོད་ཡོད། །དེ་དག་ཕྱོགས་སུ་མདོས་གླུད་བཏང་བ་ལེགས། །མགོ་ལ་ཁྲག་ནི་གཏར་བར་མི་རུང་ཟེར། །
གཞན་ཡང་སྤར་ཁའི་འཛེམ་བྱ་མང་ན་ཡང་། །འཛེམ་བྱ་མི་ཐུབ་རྣམ་རྟོག་ལང་བའི་རྒྱུ། །དེ་ཕྱིར་བརྗོད་པར་མི་བྱ་ཕྱག་སྲོལ་ཡིན། ༼ཁོན༽ །བྱི་ཕག་ཁོན་ལ་ཕྱིན་ན་དགྲ་ཐོག་རྩུབ། །སྟག་ཡོས་ལོ་པའི་དུར་མིག་ཡིན་པས་རྩུབ། །བྱ་སྤྲེལ་ལོ་པའི་མ་ཐོག་ཡིན་པས་འཛམ། །ཀུན་རིག་ཚེ་དབང་ཡུམ་ཆེན་སེར་མོ་དང་། །ཁྲོ་གཉེར་ཅན་དང་གཤེད་དམར་དབང་བསྐུར་བྱ། །བསྐལ་བཟང་གསེར་འོད་གྲྭ་ལྔ་སྒྲོལ་མའི་རྒྱུད། །ཉི་ཁྲི་བསྒྲེས་མོས་ཞུས་མདོ་ཀླུ་འབུམ་དང་། །བཟང་སྤྱོད་རྣམས་ནི་འདོན་པའི་ཆོས་ཡིན་ནོ། །བརྒྱ་བཞི་ཆོ་ག་གླིང་བཞི་སྤྱི་མདོས་དང་། །ས་བདག་འཁྲུགས་བཅོས་འདྲེ་མོ་རྫ་མདོས་དང་། །བུག་གམ་སྤུང་ན་དུར་ངོ་ས་སྒོ་བཅད། །དུས་ཚོད་རོལ་ཁ་ནག་་་་ཞིང་རྨོ་དུས་རྩུབ་པ་ཡིན། །ཤར་ལྷོ་འདྲེ་ལྔ་བྱང་དུ་བདུད་གནས་སོ། །ཆུ་བོ་གཞུང་ལ་ཞུགས་དུས་ཕན་ཆད་ལ། །དབང་དང་སྐྱབས་གནས་ཞུ་ཞིང་ཚེ་ཆོག་བྱ། །བསྲེགས་ལོས་བྱ་ཞིང་ཚེ་ཐར་བཏང་བ་དང་། །ལམ་འཕྲང་བཅོས་ཞིང་ཆོས་འདོན་བྱས་པ་ན། །ལོ་གསུམ་བར་གྱི་ཆེ་ཤུག་འོང་བར་བཤད། ༼དཱ༽ །སྟག་ཡོས་དྭ་ལ་ཕྱིན་པ་དགྲ་ཐོག་རྩུབ། །བྱི་ཕག་ལོ་པ་མ་ཐོག་ཡིན་པས་འཇམ། །
བུག་གམ་སྤུང་ན་དགྲ་ངོ་གྲི་ངོ་ཡོད། །འཇམ་དབྱངས་གཤེད་དམར་གསང་འདུས་ཕྱག་རྡོར་དབང་། །ཕྱག་རྡོར་འཆི་བདག་འཇོམས་པ་ལ་སོགས་པ། །ཚེ་དཔག་མེད་ཀྱི་དཀྱིལ་འཁོར་དབང་གཅིག་ཞུ། །རྒྱ་ཆེར་རོལ་པ་སྤྲིན་ཆེན་མཚན་བརྗོད་དང་། །ཏོག་དང་གསེར་འོད་ཁྱེའུ་ཞུས་མདོ་དང་། །གཟུངས་འདུས་རྣམས་ནི་གང་རྙེད་ཅི་འགྲུབ་འདོན། །ཚེ་སྒྲུབ་ཚེ་ཆོག་དམ་ཅན་གསོལ་ཁ་བྱ། །དུས་ཚོད་འཁྱག་པ་ཆལ་ཆོལ་དུས་སུ་རྩུབ། །ཤར་དུ་བདུད་དང་ལྷོ་རུ་འདྲེ་ལྔ་གནས། །འཁྱག་པ་ཁྲལ་ཁྲོལ་ཕན་ཆད་བསྲེག་ལོས་དང་། །ཕར་ཕྱིན་གྲྭ་ལྔ་འུར་འདོན་བྱས་པ་ན། །ལོ་གསུམ་བར་གྱི་ཚེ་ཤུག་འོང་བར་བཤད། །འདི་ལ་དགྲ་ཆོས་དགྲ་ཟློག་དགོས་གསུངས་པ། །རྒྱས་པར་གཤིན་རྗེ་ཀིང་ཀང་མདོས་གསུངས་པ། །བསྡུ་ན་དགྲ་ཆོས་བསྡུས་པ་ཚར་མང་འདོན། ༼ཁེན༽ །ཁེན་ལ་རྟ་སྦྲུལ་ལོ་པ་དུར་མིག་རྩུབ། །ཀུན་རིག་གཤེད་དམར་གཟའ་ཡུམ་ཁྱུང་ཁྲའི་དབང་། །ཁྲི་བརྒྱད་ཨ་པ་དང་གསེར་འོད་རྡོར་གཅོད་དང་། །མཆུ་སྡེ་ལྔ་དང་གཟའ་ཡུམ་ཤེར་སྙིང་དང་། །ཤེས་རབ་ཁྲི་པ་ནམ་མཁའི་སྙིང་པོའི་མདོ། །དེ་རྣམས་མང་ཉུང་གང་ཐོན་འབྱོར་པར་བསྟུན། །
དུས་ཚོད་གནམ་སྔོ་ས་སྔོ་དུས་སུ་ཆུབ། །བུག་གམ་སྤུང་ན་གཟའ་ནད་ཐོག་སེར་འོང་། །གཟའ་སྲུང་ཐོག་སྲུང་ལ་སོགས་བཏགས་ན་ལེགས། །ཤར་དུ་འདྲེ་ལྔ་ལྷོ་རུ་བདུད་གཅོད་གནས། །ཆོས་སྐྱོང་དང་ནི་དམ་ཅན་གསོལ་ཁ་བྱ། །གནམ་སྒོ་བཅད་ཅིང་གཟའ་འགྱོགས་རྒྱལ་འགྱོགས་བྱ། །གནམ་སྔོ་ས་སྔོ་དུས་ནི་ཕན་ཆོད་ལ། །འབུམ་ལ་འུར་འདོན་རྒྱལ་མདོས་བསྲེག་ལོས་བྱ། །ཚེ་དབང་ཞུས་ན་ལོ་གསུམ་ཚེ་ཤུག་འོང་། ཁཾ༽ །ཁམ་ལ་རྟ་སྦྲུལ་ལོ་པ་དགྲ་ཐོག་རྩུབ། །སྟག་ཡོས་ལོ་པ་མ་ཐོག་ཡིན་པས་འཇམ། །བུག་གམ་སྲུང་ན་བྱིས་པའི་དུར་ངོ་ཡིན། །བྱིས་པའི་གདོན་ཆེན་བཅོ་ལྔའི་མདོས་བྱའོ། །རྡོ་རྗེ་རྣམ་འཇོམས་དབང་དང་ཟབ་ཁྲུས་བྱ། །གོས་སྔོན་ཅན་དང་ཁྲོས་མ་ནག་མོའི་དབང་། །ཕྱག་བརྒྱད་བསྐོར་བའི་དཀྱིལ་འཁོར་དབང་། །མྱ་ངན་འདས་མདོ་སྤྲིན་ཆེན་ཀླུ་འབུམ་དང་། །ཀླུ་ཡི་སྤང་སྐོང་རྣམ་འཇོམས་ཀླུ་གཟུངས་འདོན། །ཀླུ་གཏོར་མཚོ་སྨན་གུར་མདོས་མགོ་གསུམ་དང་། །ཀླུ་མཆོད་དང་ནི་མཚོ་འབུལ་བྱ་བ་ཡིན། །ཆུ་བོ་གཞུང་རྒྱུས་དུས་སུ་རྩུབ་པ་ཡིན། །ཆུ་བོ་ཟམ་ཆད་ཕན་ལ་ཆུ་གཏོར་དང་། །ཀླུ་གཏོར་མང་བཏང་རྣམ་འཇོམས་འུར་
འདོན་བྱ། །ལོས་དང་གུར་མདོས་བྱས་ན་ཚེ་ཤུག་འོང་། །ལྷོ་ནུབ་བདུད་དང་བྱང་ཤར་འདྲེ་ལྔ་གནས། ༼གིན༽ །གིན་ལ་བྱ་སྤྲེལ་ལོ་པའི་དུར་མིག་སྟེ། །བཟང་དང་ངན་གཉིས་འཛོམ་ཕྱིར་ཅུང་ཞིག་དྲག །བནྡེ་གིན་ལ་ཕྱིན་ན་རྩུབ་པར་བརྩི། །ཐུབ་པའི་དབང་དང་གཤེད་དམར་ཀུན་རིག་དབང་། །རྟ་མགྲིན་ཕྱག་རྡོར་རྣམས་ཀྱི་དབང་ཞུའོ། །ཁྲོ་རོལ་འཆར་དཀར་བྱད་ཟློག་སུན་ཟློག་དང་། །བརྒྱ་བཞི་ས་བདག་རྒྱལ་གསོལ་རྒྱལ་འགྱོགས་གཉིས། །སྔར་ནས་བྱེད་སྲོལ་གང་ཡོད་དེ་བྱའོ། །རི་རབ་བརྩེགས་མདོས་བྱ་བ་རྒྱུད་ནས་གསུངས། །དཀོན་མཆོག་བརྩེགས་པ་གླང་རི་ལུང་བསྟན་དང་། །རྣམ་རྒྱལ་མ་དང་གདུགས་དཀར་གསེར་འོད་དང་། །ཚེ་གཟུངས་རྣམས་ནི་འབྱོར་པ་དང་བསྟུན་འདོན། །བྱང་དུ་འདྲེ་ལྔ་ཤར་ལྷོར་བདུད་ཡོད་དོ། །བུག་གམ་སྤུང་ན་རྒྱལ་འགོང་ཁྱིམ་དུ་ཞུགས། །དུས་ཚོད་ན་འགྲམ་སྔོ་དུས་ཡིན་པས་ན། །དེ་ཕན་མཆོད་རྟེན་འགྲོ་ཤེས་གཅིག་བཞེངས་ཤིག །མཆོད་རྟེན་བྱིན་རླབས་ཅན་ལ་དཀར་རྩི་གསོལ། །ཕར་ཕྱིན་འུར་འདོན་རྒྱལ་མདོས་བསྲེགས་ལོས་བྱ། །དེ་བྱས་ལོ་གསུམ་ཚེ་ཤུག་འོང་བར་གསུངས། །མཇལ་མ་
མྱོང་བའི་ལྷ་ཁང་མཆོད་རྟེན་ནི། །མཇལ་མི་རུང་ཞིང་བསྐོར་ལམ་མེད་ཅེས་བརྗོད། ༼ཟིན༽ །ཟིན་ལ་ཁྱི་འབྲུག་གླང་ལུག་བཞི་པོ་ནི། །སྤར་ཁ་དགྲ་ཐོག་ཡིན་པས་ཤིན་ཏུ་རྩུབ། །རྟ་སྦྲུལ་ལོ་པ་མ་ཐོག་ཡིན་པས་འཇམ། །མི་གཡོ་བ་དང་རི་ཁྲོད་ལོ་མ་ཅན། །གུ་རུ་ཞི་དྲག་སྤྱན་རས་གཟིགས་དབང་ཞུ། །སྡོང་པོ་རྒྱན་པའི་མདོ་དང་སྡོང་རྒྱན་གཟུངས། །དཀོན་མཆོག་བརྩེགས་པ་ལྟུང་བཤགས་གདུགས་དཀར་དང་། །ཀླུ་ཡི་སྤང་སྐོང་གཟུངས་འདུས་མཚན་བརྗོད་དང་། །སྡོང་པོ་རྒྱན་མདོས་ལྷ་མོའི་གསང་མདོས་དང་། །བསྐང་མདོས་མགོན་པོའི་བེང་བཟློག་ཤ་རུ་བཙན། །བུག་གམ་ང་ན་ནང་འཛིང་འོང་བའི་ངོ་། །རྒྱལ་མགྱོགས་ལ་སོགས་འགོང་པོ་བཀར་བར་བྱ། །ནུབ་བྱང་འདྲེ་ལྔ་ནུབ་ཏུ་བདུད་གནས་སོ། །ཤིང་ལོ་ཁ་འབུར་དུས་སུ་རྩུབ་པ་ཡིན། །དེ་དུས་ཕན་ལ་ལོས་བྱས་འབུམ་བཏོན་ན། །དེ་ཡིས་ཆེ་ཤུག་འོང་བར་གསུངས་པ་ཡིན། ༼ཟོན༽ །ཟོན་ལ་ཁྱི་འབྲུག་གླང་ལུག་བཞི་པོ་དང་། །བྱི་ཕག་ལོ་པའི་ལོ་བདུད་ཡིན་པས་རྩུབ། །ཡུམ་ཆེན་མོ་དང་གཤེད་དམར་ཀུན་རིག་དབང་། །གཙུག་ཏོར་གདུགས་དཀར་མོ་ཡི་དབང་ཞུའོ། །འདི་རུ་བུག་གམ་སྲུང་ན་སྨྱོ་འབོག་
འོང་། །རྒྱལ་མགྱོགས་ལ་སོགས་དེ་ཡི་བཅོས་ཀྱང་བྱ། །འབུམ་དང་ཏོག་གཟུངས་གདུགས་དཀར་གྲྭ་ལྔ་དང་། །ཉི་ཁྲི་ཕལ་པོ་ཆེ་དང་གསེར་འོད་དང་། །སྟོབས་པོ་ཆེ་ཡི་གཟུངས་རྣམས་གང་རྙེད་འདོན། །ཕུར་མདོས་གཤིན་རྗེའི་བཟློག་མདོས་མགོ་གསུམ་བྱ། །རྒྱལ་གསོལ་རྒྱལ་མགྱོགས་གཉིས་པོ་སྲོལ་གང་ཡོད། །ལྷོ་ནུབ་འདྲེ་ལྔ་བྱང་ཤར་བདུད་གནས་སོ། །ཕུབ་མ་རླུང་ཁྱེར་དུས་སུ་སྐག་ཡིན་པས། །དེ་ཕན་འབུམ་ལ་འུར་འདོན་བཟློག་པ་དང་། །རྒྱལ་མགྱོགས་བསྲེགས་ལོས་བྱས་ན་ཚེ་ཤུག་འོང་། ༈ ཁྱིམ་གཅིག་ཡིན་པའི་ཕོ་མོ་ཐམས་ཅད་བརྩི། །བརྒྱད་ཁ་གང་ན་ཤིན་ཏུ་ངན་པ་སྟེ། །བཅོ་ལྔའི་ཟླ་རྒྱས་འགྲིབ་པའི་ལས་ཞེས་བྱ། །དེ་ལ་མེ་འགོ་སོ་སོར་བསྡུས་ན་ཕན། །ལི་ཁམ་སྟོང་ན་གནམ་ས་གཞུང་རལ་ཟེར། །རལ་བ་རྒྱུན་གྱི་གྲུབ་ཟེར་འབུམ་རྒྱུན་བྱ། །མ་འགྲུབ་ཟབ་མདོ་ལ་སོགས་རྒྱུན་ཀྱང་རུང་། །དྭ་ཟིན་སྟོང་ན་སྐྱིད་ལ་སྐྱེད་ཆད་འབྱུང་། །ཕྱོགས་བཞི་སྟོང་ན་བདུད་ཀྱི་སྒོ་བཞི་བྱེ། །མཚམས་བཞི་སྟོང་ན་རྩ་བཞི་མཐའ་ནས་འཁུམ། །སྟོད་གསུམ་སྟོང་ན་རི་གསུམ་རྩེ་ནས་ཉིལ། །སྨད་གསུམ་སྟོང་ན་ཐང་གསུམ་མཐའ་ནས་བསྡུས། །གདན་
གསུམ་འཛོམ་ན་བར་མ་ཡར་ཅེས་ཟེར། །ཕོ་མོ་གཉིས་འཛོམ་ཟམ་ཐུག་བྱུང་ཞེས་ཟེར། །གལ་ཆེན་མི་ལ་སྤར་ཁ་མི་རྩུབ་ཀྱང་། །སྤྱི་ལ་རྩུབ་ན་གང་ལ་འབོ་སྲིད་པས། །ཞེས་པའི་མི་ལ་རིམ་གྲོ་ཟབ་ཅེས་ཟེར། །དེ་དག་གང་ཡང་བརྒྱ་བཞི་སྡོང་རྒྱན་དང་། །ཁ་འབར་མ་དང་ས་བདག་འཁྲུགས་བཅོས་དང་། །འབུམ་དང་གཏོར་ཟློག་མགོ་གསུམ་ཀུན་ལ་ཕན། །འབྱོར་པ་མེད་ན་ཀོང་ཙེ་གཏོ་བསྒྱུར་ཟབ། །རྩུབ་ཅིང་ཅེས་པའི་མི་ལ་འཆི་བསླུ་བྱ། །འབུམ་དང་དུར་ལོས་སྤར་ཁ་ཀུན་ལ་ཕན། །ཚེ་དབང་ཚེ་སྒྲུབ་བསྙེན་པ་ཚེ་ཆོག་དང་། །ཚེ་མདོ་ཚེ་གཟུངས་སྲོག་གི་མདུད་མ་ཡིན། །དེ་དག་ཀུན་ལ་ཡོངས་སུ་གྲགས་པ་ཡིན། །ཀུན་གྱི་མཐོང་ཐོས་མེད་པའི་གཏོ་ཕྲན་སོགས། །མང་དུ་བཤད་ཀྱང་མི་འཛོམས་དགོས་པ་མེད། །རྩིས་སྐྱར་འཕགས་པའི་བཀའ་ལ་འཆོལ་གསུངས་པ། །དབང་དང་ཆོས་དང་གཟུངས་ཀྱི་མང་ཉུང་སོགས། །ཚར་གྲངས་ཕལ་ཆེར་འབྱོར་པའི་སྟོབས་དང་བསྟུན། །འབྱོར་པ་ཆེ་ཞིང་རིམ་གྲོ་བརྩོན་པ་ནི། །སྐག་ཆེན་མེད་ཀྱང་སྐག་ཕྲན་མེད་དུས་མེད། །སྤར་ཁའི་བཅོས་ནི་འགའ་ཟུང་ལུང་སྟོན་རུང་། །རིམ་གྲོ་དགོས་ཀྱང་འབྱོར་པ་ཆུང་བ་ལ། །སྤར་ཁའི་ཆོས་ཆུང་
གཟུངས་ཆུང་ལོ་གྲངས་ཙམ། །དབང་ཡང་རེ་ཟུང་ཙམ་རེ་ལུང་སྟོན་བྱ། །འབྱོར་པ་མེད་ན་ཤེས་རབ་ཆེ་བ་ལས། །སྤར་ཁ་གང་ཡིན་སོ་སོའི་དབང་བསྐུར་ནས། །དེ་ཡི་སྔགས་ཐུང་བྱེ་བ་ཁས་ལེན་བྱ། །དེས་ན་ཁོ་ཡི་རྐྱེན་བཟློག་མཆོག་ཏུ་འགྱུར། །དེ་རྣམས་ཡོངས་གྲགས་སྤར་ཁ་སྤྱི་ཡི་ལུགས། ༈ །ཀུན་ལ་མ་གྲགས་མན་ངག་སྤར་ཁ་ནི། །ཕོ་ཕྱུ་རྟ་ཕྲུ་ལི་ནས་གཡས་སུ་བསྐོར། །དགྲ་ཕྱུ་མི་རྒན་ཁོན་ནས་གཡས་སུ་བསྐོར། །ནོར་ཕྱུ་བནྡེ་གིན་ནས་གཡས་སུ་བསྐོར། །སྐྱེས་ཕྲན་དར་མ་དྭ་ནས་གཡས་སུ་བསྐོར། །བོན་པོ་བུ་ཆུང་ཁམ་ནས་གཡོན་དུ་བསྐོར། །དགྲ་ཕྱུ་རྟ་ཕྱུ་ནོར་ཕྲུ་གསུམ་པོ་ནི། །བཟའ་དཔོན་དེ་ཡི་ལོ་གྲངས་ཙམ་ཞིག་བསྐོར། །ལུག་ཕྱུ་རྒན་མོ་ཁོན་ནས་གཡོན་དུ་བསྐོར། །བུད་མེད་ན་སྟོད་གྲོགས་ཕྲུ་ཟོན་གཡོན་བསྐོར། །བུད་མེད་དར་མ་མོ་ཕྲུ་ཟིན་གཡོན་བསྐོར། །ཕོ་རིགས་ཡིན་ན་ཐམས་ཅད་གཡས་སུ་བསྐོར། །མོ་རྐྱང་ཡིན་ན་ཐམས་ཅད་གཡོན་ནས་བསྐོར། །དེ་ལྟར་སྤར་ཁ་བརྒྱད་ལ་བསྐོར་མགོ་བརྒྱད། །རང་རང་བསྐོར་མགོའི་སྟེང་དུ་ཕྱིན་དུས་རྩུབ། །དགྲ་ཐོག་བདུན་ཟུར་དུར་མིག་ཡིན་དུས་རྩུབ། །རྩུབ་དུས་ཕྱིན་ན་སོ་སོའི་གཏོ་བཅོས་
ཏེ། །རྟ་ཕྱུ་ངན་ན་རྟ་གཟུངས་རྟ་གཏོ་བྱ། །ཕོ་ཕྱུ་ངན་ན་ཕོ་ལྷའི་གསོལ་མཆོད་གཟབ། །མི་རྒན་ངན་ན་ཚེ་དབང་ཚེ་མདོ་འདོན། །དགྲ་ཕྱུ་ངན་ན་འོད་ཟེར་ཅན་མའི་གཟུངས། །དེ་བཞིན་དགྲ་ཆོས་དགྲ་བཟློག་རྣམས་ཀྱང་བཅའ་བར་བྱ། །རྒན་མོ་ལ་ངན་རྒན་མོའི་ཚེ་དབང་ཞུ། །ལུག་ཕྱུ་ངན་ན་ལུག་གཟུངས་གསེར་འོད་འདོན། །བུ་ཆུང་ལ་ངན་གདོན་ཆེན་བཅོ་ལྔའི་མདོས། །བན་བོན་ལ་ངན་རང་རང་ལྷ་སྲུང་གསོལ། །ནོར་ཕྱུ་གྲོགས་ཕྲུ་ལ་ངན་གཡང་སྐྱོབ་བྱ། །སྐྱེས་པ་བུད་མེད་དར་མ་གང་རྩུབ་ཀྱང་། །ཚེ་རྟ་མགོ་འབྲེལ་གཤེད་དམར་དབང་ཞུའོ། །འདི་ནི་མདོ་དང་འདྲ་སྟེ་དེ་བས་ནོ། །དེ་ཡི་ནང་སྐག་སྤར་ཁའི་མཐོ་ཐོག་སོང་། ༈ །དེ་ནས་གསང་སྐག་སྨེ་བ་བརྩི་བའི་ཚུལ། །ཕོ་བྲང་ལིང་དགུ་དགུ་དགུ་བརྒྱད་ཅུ་གཅིག ༣༡ ༢ ༣༤༥༦༧༨༩ །གྱེན་དུ་བཀོད་པ་རྩིས་རྙིང་མ་དག་སྟེ། །འཁྲུགས་སྨེ་ཞེས་བྱ་རྒྱ་ཡི་ངན་བསླབ་སྟེ། ༩༨༧༦༥༤ ༣༢༡ །ཐུར་དུ་བཀོད་པ་རྩིས་གསར་དག་པ་སྟེ། དབུས་ནས་ནུབ་བྱང་ནུབ་དང་བྱང་ཤར་དང་། །ལྷོ་དང་བྱང་དང་ལྷོ་ནུབ་ཤར་ཤར་ལྷོ། །དེ་ལྟར་བཀོད་པ་དེ་ཡི་སྟེང་ནས་བརྩི། །རང་རང་སྐྱེས་པའི་སྨེ་བའི་དབུས་བཞག་སྟེ། །དེ་
ལྟར་བཀོད་ལུགས་གོང་ལྟར་བྱས་ནས་ཀྱང་། །སྨྲ་སྒོ་ཤར་ཡིན་རྒྱུན་དུ་ཤར་དུ་འབུད། ༈ །བྱི་སྟག་འབྲུག་རྟ་སྤྲེལ་ཁྱི་ཕོ་ལོ་དྲུག །གཡས་སུ་བསྐོར་ཞིང་གིན་ནས་དབུས་སུ་འཇུག །གླང་ཡོས་སྦྲུལ་ལུག་བྱ་ཕག་དྲུག་ནི་མོ། །གཡོན་དུ་བསྐོར་ཏེ་ཟོན་ནས་དབུས་སུ་འཇུག །མགྱོགས་རྩིས་ལིང་རྩི་རེ་ལ་བཅུ་ཚོ་བསྒྲངས། །དེ་ནས་རྩིས་པས་སྤར་ཁ་དུས་དང་འདྲ། །བྱིས་པ་གཅིག་དཀར་སྐྱེས་པ་གསུམ་མཐིང་རྩུབ། །ཡུགས་ས་བཞི་ལྗང་བནྡེ་ལྔ་སེར་རྩུབ། །བོན་པོ་དྲུག་དཀར་བུད་མེད་བདུན་དམར་རྩུབ། །གཙོ་བོ་བརྒྱད་དཀར་རྒྱལ་པོ་དགུ་དམར་རྩུབ། །གཉིས་ནག་དབུས་ཚུད་གཉིས་ནི་ཀུན་ལ་རྩུབ། །དེ་དག་སོ་སོའི་གཏོ་བཅོས་མདོར་བསྡུས་ནི། །གཅིག་དཀར་གཟའ་མགྱོགས་རྒྱལ་མགྱོགས་རྣམ་འཇོམས་ཁྲུས། །གཉིས་ནག་བདུད་མདོས་མ་མོའི་ཁྲག་མདོས་བྱ། །གསུམ་མཐིང་ལ་ནི་མཚོ་སྨན་གུར་མདོས་བྱ། །བཞི་ལྗང་ལ་ནི་ཀླུ་མཆོད་ཀླུ་གཏོར་བཏང་། །ལྔ་སེར་རྒྱལ་མགྱོགས་མ་མོའི་ཁྲག་མདོས་བྱ། །དྲུག་དཀར་རང་གི་ལྷ་སྲུང་གསོལ་ཁ་དང་། །སྤང་ཀོང་ཕྱག་རྒྱ་པ་འདོན་ཚེ་སྒྲུབ་འདོན། །བདུན་དམར་བཙན་མདོས་བྱ་ཞིང་དམར་གཏོར་འབུལ། །
བརྒྱད་དཀར་ལྷ་གསོལ་དགྲ་ཆོས་དགྲ་བྲུབ་བྱ། །དགུ་དམར་མ་མོས་མདོས་བྱ་ནོར་རྒྱུན་འདོན། །དེ་དག་སྐྱེ་བའི་བཅོས་ཀ་མདོར་བསྡུས་ཏེ། ༈ །ལོ་དང་སྤར་ཁ་སྨེ་བ་གསུམ་ཀ་རྩུབ། །རྩུབ་གསུམ་འཛོམ་ན་རིམ་གྲོ་ཆེན་པོ་དགོས། །འབུམ་རྒྱུན་བསྲེགས་ལོས་འཆི་བསྒྲགས་ཀུན་ལ་བསྔགས། །སྐྱེས་སྨེ་སྲོག་སྨེ་ཞེས་པ་སྨེ་ཕྲེང་གོང་མ་སྟེ། །དེ་ཉིད་དབུས་བཞག་སྐོར་བ་གཙོ་ཆེ་སྟེ། །ཁྱིམ་གང་ནག་པ་ཀུན་གྱི་སྨེ་བ་བསྐོར། །བདུན་དམར་སྟེང་ན་ཕྱིན་མཁན་མང་ན་ནི། །ངེས་པར་རོ་གཅིག་འབྲུལ་བའི་དུར་ངོ་ཡིན། །རོ་འཁྱམས་གཞན་ཚུལ་འཇུ་རོགས་བྱས་ན་ཐུབ། །གཉིས་ནག་མང་ན་བྱིས་པ་འཆི་བའི་ངོ་། །བྱིས་པ་ཡོད་ན་བྱིས་ཁྲ་སྤར་འགྱེད་བྱ། །འབྱོར་པ་མེད་ཀྱང་གདམས་ངག་གཏོ་བཅོས་ནི། །སྤར་ཁ་མང་དུས་གཅིག་ཏུ་སྤྱང་པ་ལ། །བགོས་བྱ་ཞག་གསུམ་མེ་མགོ་སོ་སོར་བསྡུ། །རང་འཐག་ཁ་ཕྱེས་ཞག་གསུམ་སོ་སོར་འཕེན། །གཞུང་རལ་བྱུང་ན་བསང་བྱ་བཅའ་ཁྲི་བརྩེགས། །སྐྱེད་ཆད་བྱུང་ན་ཟམ་བཙུགས་ལམ་ངན་གསོ། །རྩ་བཞི་འཁུམ་ན་ཚ་ཚ་བརྒྱ་བཏབ་ལ། །དུམ་བུ་བཞི་བགོས་མཚམས་བཞིའི་ཕྱོགས་སུ་སྤུང་། །སྒོ་བཞི་བྱེ་ན་ཕྱོགས་བཞིར་གླུད་བཞི་
འཕེན། །རི་བོ་རྩེ་ནས་ཉིལ་ན་བསང་བཅུ་གསུམ། །གསས་མཁར་གཏོར་སྐུ་ལི་ཡི་བཅོས་རྣམས་བྱ། །ཐང་གསུམ་མཐའ་ནས་སྟོང་སྟེ་སྡུད་པ་ལ། །དུར་ལོས་དང་ནི་མགོ་གསུམ་ས་སྒོ་བཅད། །གཡས་སུ་སྤུང་ངམ་གཡོན་དུ་སྤུང་བ་ལ། །ཁལ་ནི་ཡོ་སྟེ་ཡོ་བ་འབུམ་འདོན་བསྲང་། །གཞན་ཡང་སྤར་ཁ་སྨེ་བ་རྩུབ་ཆེ་ན། །ཕུ་ཡི་གྲོག་མ་མདའ་ཡི་ཉ་མོ་གསོ། །འདབ་ཆགས་བརྒྱ་ལ་སྟོན་མོ་ཞེས་བྱ་བ། །ཟན་གྱི་རིལ་བུ་མང་པོ་ཁང་ཐོག་གཏོར། །ཁྱིམ་ནི་ཕྱི་ནང་བསྒྱུར་བ་ཞེས་བྱ་བ། །དུད་པ་ཐམས་ཅད་བསྡུས་ཏེ་ཁང་ཐོག་བཏབ། །སྐག་ཆེན་མི་དེ་ཤི་ཞེས་གཏམ་ངན་བསྒྲགས། །ཞག་པོ་གསུམ་གྱི་བར་དུ་བྱ་སྤང་བྱ། །དེ་དག་རྒྱུ་བཏང་མི་དགོས་འགྱུར་ཆེ་བས། །དབུལ་པོ་རྣམས་ལ་ཕན་ཐོགས་ཆེ་བ་ཡིན། །དེ་བཞིན་སྤར་ཁ་གདན་འཛོམ་ཟམ་ཐུག་ལའང་། །ཕོ་གྲལ་མོ་གྲལ་གཡས་གཡོན་སྤོ་ཞེས་པ། །ཞག་གསུམ་བར་དུ་གོ་ཁའི་འདུག་ས་བརྗེ། །དེ་དག་རྟེན་འབྲེལ་གཏོ་བཅོས་ཟབ་མོ་ཡིན། །བླ་མ་པདྨ་འགྲོ་དོན་གྱིས་བསྐུལ་ནས། །སྙིགས་དུས་རྩིས་མཁན་རཱ་ག་ཨ་སྱ་ཡིས། །འཕྲལ་དུ་ངག་ནས་སྨྲས་པ་ཇི་ལྟ་བ། །རྩིས་མཁན་བིརྱ་ཞེས་བྱས་ཡི་
གེར་བཀོད། །འགལ་འཁྲུལ་མཆིས་ན་མཁས་པ་རྣམས་ལ་བཤགས། །དགེ་བས་མ་འོངས་རྐང་གཉིས་མི་རྣམས་ཀུན། །ནད་གདོན་དུས་མིན་འཆི་བའི་སྐག་ལས་ཐར། ཕྱིན་ཅིང་བཀྲ་ཤིས་བདེ་ལེགས་ཤོག །སརྦ་མངྒ་ལཾ། དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།