སྤར་ཁའི་བཤད་པ་མདོར་བསྡུས།
སྤར་ཁའི་བཤད་པ་མདོར་བསྡུས་བཞུགས་ལགས་སོ། །
ན་མོ་ཨརྱ་མཉྫའི་ཡེ། འཇམ་པའི་དབྱངས་ལ་ཕྱག་འཚལ་ནས། །སྤར་ཁའི་བཤད་པ་མདོར་བསྡུས་བྲི། །ལི་ལ་སྤང་ཁ་སེར་དུས་སྐག །མིག་ཚ་རོ་སྟོད་ན་ན་ཐང་། །རོ་སྲེག་མེ་ཧོམ་སར་མི་འགྲོ། །མེ་ལོང་རྟ་མགོ་རྟ་དམར་འཛེམ། །ཞུ་ཕྱིང་རྟ་ལྕགས་ལེན་མི་བྱ། །མི་ནི་རྨ་སྒྲོའི་གསོ་མར་ཅན། །རྟ་དམར་ཅན་དང་མོ་མགྲོན་འཛེམ། །བུད་མེད་གཞོན་ནུའི་ལག་ཟས་དང་། །ཆུ་རྩེའི་ཤ་ལ་རབ་ཏུ་འཛེམ། །སྤང་ཁ་སེར་དུས་ཕན་ཆད་ལ། །ཚེ་སྒྲུབ་ཚེ་དབང་ཆེ་མདོ་གཟུངས། །ལོས་དང་གསས་མཁར་རྣམ་འཇོམས་འདོན། །དེ་ཡིས་ལོ་གསུམ་ཆེ་ཤུགས་
འོང་། །ལང་དཀར་གཤེགས་དང་འཇམ་དཔལ་འདོན། །གནམ་ཐེལ་དགྲ་བླའི་མདོས་དང་ནི། །མ་མོའི་ཁྲག་མདོས་ཤ་རུ་བཀྱག །རྟ་ཤ་ཕྱི་ཤ་མི་ཟ་ཞིང་། །གོས་དཀར་གྱོན་ནས་བྱང་དུ་སྔས། །ལོང་བ་རྫ་མཁན་དག་ལ་འཛེམ། །སྤུང་ན་བུད་མེད་གཞོན་ནུ་ངན། །ཁོན་ལ་རུལ་ཁ་ནག་དུས་སྐག །འཁོན་དང་མ་ཞུའི་ལག་ཟས་ལུག་ཤ་དང་། །ལྐུག་པ་སྨྱོ་མཁན་ཐག་ཤ་དང་། །གསེར་གཡུ་གླང་ལུག་བླང་ལེན་སྤང་། །ཁང་ནག་བཤིག་སར་འགྲོ་མི་བྱ། །ཆུ་བོ་གཞུང་ཆེན་འབྲེལ་དུས་ཕན། །སྐྱབས་གནས་ཐེག་འདོན་ཚེ་ཐར་བཏང་། །ལོས་བྱ་ལམ་
འཕྲང་བཅོས་བྱས་ན། །ཚེ་ཤུགས་འོངས་ཏེ་ཚེ་མཐར་ཕྱིན། །ལོ་དུར་མི་སྤོ་གཅན་ཐད་སྤང་། །མོ་མགྲོན་སྤྱད་ནག་འཁོན་ལ་འཛེམ། །སྤུང་ན་མ་ཕྱི་དག་ལ་ངན། །གོས་ལྗང་སྔས་ནི་ནུབ་བྱང་བསྟན། །དཀོན་མཆོག་གསེར་འོད་བགྲེས་མོས་ཞུས། །སྐལ་བཟང་གྲྭ་ལྔ་ཀླུ་མཆོད་བྱ། །བནྡེ་སྔགས་པ་གླིང་ཁྲི་དང་། །ལུག་མགོ་བླང་བར་མི་བྱའོ། །གོས་དམར་པས་བྱང་བསྟན་ན་ཤིས། །བདུད་ཀྱི་ཁྲམ་མདོས་སྤྱི་མདོས་བྱ། །དྲ་ལ་འཁྱགས་པ་ཁྲལ་ཁྲོལ་སྐག །དམེ་ཕོ་སྤྲེའུ་རིལ་གྲི་ཁྲག །མགར་བ་ཧོམ་སྤར་བྱ་དྲིའི་ཐང་། །ལྕགས་སྤྱད་འཛེམ་ཞིང་མེ་ལས་སྤང་། །གསེར་ནད་དང་ནི་གྲི་ངོ་ཡོད། །འཁྱགས་པ་ཁྲལ་ཁྲོལ་ཕན་ཆད་ལ། །ཕར་ཕྱིན་གྲྭ་ལྔ་འུར་འདོན་དང་། །ལོས་དང་ཤ་རུ་བཙན་མཁར་བྱ། །དེ་ཡི་ཚེ་ཤུག་ཚེ་མཐར་ཕྱིན། །རྒྱུ་རོལ་གསེར་འོད་སྤྲིན་ཆེན་དང་། །གྲྭ་ལྔ་རྡོ་རྗེ་མཆུ་གཟུངས་འདོན། །ཁམ་པ་སྐྱ་ཟོར་བྲག་བཙན་མཆོད། །བཙན་གྱི་ཁྲམ་མདོས་བྱས་པས་ཕན། །སྤྱང་ན་གྲི་ངོ་སྐྱེས་པར་རྩུབ། །ཁེན་ལ་ས་སྔོན་གནམ་སྔོན་དུས། །ཁྱི་དང་གཅན་ཐད་ཕྱི་བའི་ཤ། །བྲ་ཟན་བྱིན་ན་ཟ་མི་རུང་། །རྐང་པ་ནའམ་ཁྱིས་ཕུག་ངོ་། །རྒད་པོ་སིལ་མཁན་
ཐད་པ་དང་། །ཁྱི་སེར་སྤྱད་ནག་ལེན་པ་སྤངས། །གོས་དམར་སྔས་མགོ་ལྷོ་ནུབ་བསྟན། །མཚན་བརྗོད་གདུགས་དཀར་ཁྲི་བརྒྱད་པ། །གནམ་ལྕགས་མཆུ་དང་སྤྲིན་ཆེན་འདོན། །མཁར་ལས་མཁར་བཤིག་སར་མི་འགྲོ། །དམ་ཅན་ཆོས་སྐྱོང་མཆོད་པར་བྱ། །གནམ་སྔོན་ས་སྔོན་ཕན་ཆེད་ལ། །དབང་ཞུས་ལོས་བྱས་ཚེ་མཐར་ཕྱིན། །ཁམི་ལ་ཆུ་བོ་གཞུང་རྒྱས་དུས། །ཡུགས་ས་བུ་སྲིང་མོ་མགྲོན་འཛེམ། །སྤྱད་ནག་རྟ་ནག་ཕག་པ་དང་། །ཉ་ཤ་ཕག་ཤ་ཡུགས་སའི་ཟས། །གྲུ་ཕ་མཛེ་ཕོ་སྦྲ་ནག་འཛེམ། །གྲུ་དང་ཟམ་ལ་འགྲོ་འདུག་སྤང་། །གསེར་འོད་ཀླུ་འབུམ་སྤྲིན་ཆེན་དང་། །སྣང་བརྒྱད་འཛམ་དཔལ་མྱང་འདས་འདོན། །ཀླུ་སྨན་མཚོ་སྨན་གུར་མདོས་བྱ། །ཆུ་དར་ཕན་ལ་ཆུ་གཏོར་དང་། །ལོས་དང་ཆུ་སྦྱིན་མང་པོ་དང་། །རྣམ་འཇོམས་འུར་འདོན་གུར་མདོས་རྣམས། །བྱས་ན་ཚེ་ཤུགས་ཚེ་མཐར་ཕྱིན། །གིན་ལ་ནེའུ་སིང་སྔོ་དུས་སྐག །གྲགས་དང་མཛེ་ཤུ་འོང་དོགས་ཡོད། །རྡུལ་པོ་མི་བླང་རྡུལ་ཤ་ཤང་། །བང་བ་བཤིག་སར་མི་འགྲོ་ཞིང་། །ས་ཕུག་རྐོ་དང་ས་ལས་སྤང་། །རི་རྩེར་ས་རྐོ་རྡོ་རློག་དང་། །བོན་པོ་ཀ་ལོག་མཆོད་ཆ་
འཛེམ། །སྣང་བརྒྱད་དཀོན་བརྩེགས་རྣམ་རྒྱལ་མ། །གླང་རི་ལུང་བསྟན་འདོད་བྱའི་ཆོས། །གྲོ་ཕྱེ་རྔ་བྲན་ཤ་དང་ནི། །རབས་ཆད་སྒོམ་ཆེན་ཟས་ནོར་སྤང་། །ས་བདག་འཁྲུག་བཅོས་གཟའ་མདོས་དང་། །གཤིན་རྗེ་ས་བདག་མཆོད་མདོས་དང་། །བེར་དཀར་མཆོད་མདོས་བྱས་ན་བཟང་། །ནེའུ་སིང་སྔོ་དུས་ཕན་ཆོད་ལ། །མཆོད་རྟེན་འགྲོ་ཤེས་གཙིགས་དང་ནི། །ཚ་ཚ་གང་འགྲུབ་ཕར་ཕྱིན་འདོན། །རྒྱལ་མདོས་གཙིག་དང་སྤང་ལོས་དང་། །མཆོད་རྟེན་དཀར་རྩི་གསོལ་བྱས་ན། །ལོ་བདུན་ཚེ་ཤུགས་འོང་བར་བཤད། །སྤྱང་ན་བུ་ཆེན་བནྡེར་ངན། །གོས་དམར་སྔས་ནི་ནུབ་ཏུ་བསྟན། །ཟིན་ལ་སྟག་མ་ཁ་འབུར་དུས། །འགག་ནད་གཟེར་ན་གློ་བུར་དང་། །རྒྱལ་པོའི་ནད་ནི་འབྱུང་དུས་ཡིན། །ཤིང་བཟོ་ཤིང་སྤྱད་བང་བ་དང་། །དྲེལ་དང་སྐེ་རགས་སྤུ་ཤུན་འཛེམ། །རྨེ་ཕོ་དགག་འདྲེ་བག་སྣ་འཛེམ། །ཁྲ་བོའི་རྫས་དང་རབས་ཆད་ཟས། །རི་བོང་ཤ་དང་ཆེད་སྣ་དང་། །བུ་སྲིང་ལག་ཟས་ཡུས་ངན་སྤང་། །མེ་ལོང་དར་ཟབ་དེ་བཞིན་ནོ། །གདུགས་དཀར་བརྒྱད་སྟོང་རི་རབ་བརྩེགས། །སྡོང་རྒྱན་གཟའ་ཀླུའི་མདོས་བྱའོ། །གོས་སེར་སྔས་མགོ་བྱང་དུ་འོ། །སྤུང་ན་
མོ་བཙུན་དར་མ་ངན། །གཡུ་མཐའ་གཡོག་པའི་དུས་ཚོད་ལ། །ཤིང་སྤུན་བཏུ་བར་མི་བྱའོ། །ཤིང་ལོ་སྔོ་དུས་ཕན་ཆོད་ལ། །འབུམ་བསྒྲགས་ལོས་ནི་དྲག་པོ་། བྱས། །ལོ་བཅུའི་ཚེ་ཤུག་འོང་བ་ཡིན། །ཟོན་ལ་ཕུབ་མ་རླུང་ཁྱེར་དུས། །སྨྱོ་ནད་རླུང་ནད་སྙིང་མི་དགའ། །ལྷ་ཁང་འདྲེ་ཅན་དར་ཟབ་དང་། །ནལ་དང་ཕན་པའི་སར་མི་འགྲོགས། །མཛོ་རུལ་མི་བླང་ཤ་མི་ཟ། །བནྡེ་སྔགས་པ་བག་སྣ་དང་། །རྔ་དང་རན་ཐག་ལེན་པ་སྤང་། །འབུམ་དང་ཕལ་ཆེན་གདུགས་དཀར་དང་། །སྤྲིན་ཆེན་འདོན་ཅིང་རྒྱལ་མདོས་བྱ། །སྨྱོན་པ་སྔགས་པའི་ནོར་ལ་འཛེམ། །གོས་དམར་སྔས་ནི་ལྷོ་ནུབ་བསྟན། །རླུང་ལྷ་དཀར་པོ་བདག་མཆོད་མདོས། །བདུད་རྒྱལ་བཀར་མདོས་བྱས་ན་བཟང་། །དབེན་གནས་རྙིང་པའི་ས་བྱས་དང་། །བྱེ་བྲལ་ཅན་གྱི་ཟས་ལ་འཛེམ། །སྟོན་ཀ་ཕན་ལ་འབུམ་འདོན་དང་། །མདོས་དང་བཟློག་པ་རྒྱལ་མདོས་བྱས། །ལོ་བཅུའི་ཚེ་ཤུགས་འོང་་བར་གསུངས། །རྒྱ་ཡི་གར་ཆེ་ཆེན་མོ་དང་། །སློབ་དཔོན་ཤེའུ་ཧཱུྃ་ཆེན་དང་། །མཁས་པ་དུ་ཧར་ནག་པོ་དང་། །ཨ་ཙ་ར་ཟླ་བ་ནག་པོས་མཛད་པའི་སྤར་ཁའི་ཞལ་ཆེམས་སོགས་
བསྡུས་ནས་རང་གཞན་ལ་ཕན་པའི་ཕྱིར་༧རཱ་གའི་མིང་ཅན་དེས་བྲིས་སོ། །མངྒ་ལཾ།། །།