སྤར་ཁའི་སྒྲོན་ཆུང་།
ན་མོ་ཨཱརྱ་མཉྫ་ཤྲཱི་ཡེ། རྒྱ་ནག་རི་བོ་རྩེ་ལྔའི་ཤེལ་ཁང་ནས། །མཁྱེན་རབ་མདའ་བདག་འཕགས་པ་འཇམ་དཔལ་གྱིས། །གཙུག་ལག་རྩིས་ཀྱི་རྒྱུད་སྡེ་དཔག་མེད་གསུངས། །དེ་དང་སྤར་ཁའི་སྒྲོན་ཆུང་གསལ་བཀོད་བྲི། །རི་གསུམ་རྩེ་ནས་ཉིལ་བའི་སྐག །སྤར་ཁའི་སྟོད་གསུམ་སྟོང་པ་ཡིན། །ཐང་གསུམ་མཐའ་ནས་བསྡུས་པ་དེ། །སྤར་ཁའི་སྒོ་གསུམ་སྟོང་པ་ཡིན། །གནམ་ས་གཞུང་ཤག་རལ་བའི་སྐག །ལི་ཁཾ་གཉིས་པོ་སྟོང་པ་ཡིན། །སྐྱིད་ལ་སྐྱེད་ཆད་འོང་བའི་སྐག །དྭ་ཟིན་གཉིས་པོ་སྟོང་ན་ཡིན། །རྩ་བཞི་མཐའ་འཁུམ་བྱུང་བའི་སྐག །སྤར་ཁའི་མཚམས་བཞི་སྟོང་ན་ཡིན། །བདུད་བཞིའི་སྒོ་བཞི་བྱེ་བའི་སྐག །སྤར་ཁའི་ཕྱོགས་བཞི་སྟོང་ན་ཡིན། །སྤར་ཁའི་ཕྱོགས་ཡོ་བྱུར་གྱི་སྐག ། གཡས་ཕྱོགས་གཡོན་ཕྱོགས་ཡོ་ན་ཡིན། །སྤྱི་བོ་གང་གི་གནམ་རྡིབ་དེ། །ལི་བུག་གཞན་རྣམས་གང་ན་ཡིན། །རྐང་པ་འོག་གི་ས་རྡིབ་དེ། །ཁམ་བུག་གཞན་རྣམས་གང་བ་ཡིན། །གནམ་སྒོ་བྱེ་བ་རྒན་པོའི་དུར། །ཁེན་བུག་གཞན་རྣམས་གང་བ་ཡིན། །ས་སྒོ་བྱེ་བ་བསྒྲེས་མོའི་དུར། །ཁོན་བུག་གཞན་རྣམས་གང་བ་ཡིན། །སྡུག་གི་ཁུ་རུ་ཁུར་བའི་སྐག །ལི་ལ་
མང་དུ་སྤུང་བ་ཡིན། །འོན་ལོང་སྐྱོན་ནད་བྱུང་བ་དེ། །ཁོན་ལ་མང་དུ་སྤུང་བ་ཡིན། །དགྲ་ངོ་གྲི་ངོ་རྨེ་ཡི་ངོ་། །དྭ་ལ་མང་དུ་སྤུང་བ་ཡིན། །འགུལ་འཚེར་བསྒྲེས་པོ་ལ་ཁར་ཕྱིན། ཁེན་ལ་མང་དུ་སྤྱང་པ་ཡིན། །ཆུ་ཆེན་འགྲམ་དུ་ངུ་འབོད་དེ། །ཁམ་ལ་མང་དུ་སྤུང་བ་ཡིན། །རྒྱལ་འགོང་ཕུགས་སུ་ཚང་བཅས་དེ། །གིན་ལ་མང་དུ་སྤུང་བ་ཡིན། །གཟའ་འཐབ་གཉའ་བཅིང་འགགས་འདྲེ་དེ། །ཟིན་ལ་མང་དུ་སྤུང་པ་ཡིན། །སྨྱོ་འབོག་བྱད་ཁ་ཟུག་པ་དེ། །ཟོན་ལ་མང་དུ་སྤུང་བ་ཡིན། ༈ །ལི་ལ་རྟ་ཤ་རྐྱང་ཤ་མི་ཟ། །ཞྭ་དང་ཕྱིང་པ་མི་ལེན་ནོ། །རྟ་དམར་དངོས་རྫས་འོད་ཆེན་འཛེམ། །ནུབ་ཀྱི་ཕྱོགས་སུ་མི་འགྲོའོ། །སྤང་ཁ་སེར་དུས་སྐག་ཡིན་ནོ། །སྟག་ཡོས་ལོ་པའི་འཆི་སྐག་སྟེ། །བྱི་ཕག་ལོ་པའི་བདུན་ཟུར་ཡིན། །བྱ་སྤྲེལ་ལོ་པའི་དགྲ་སྐག་ཡིན། །རྟ་སྦྲུལ་ལོ་པའི་རང་སྐག་ཡིན། །དར་དམར་མེ་ལོང་གིས་བསྲུང་བ་བཅུག ༈ །ཁོན་ལ་ལུག་མགོ་ལག་གཡོན་ཤ་མི་ཟ། །གླང་ཤ་དུར་ཟས་མི་ཟའོ། །ཁང་ནག་བཤུས་འགེབ་སྤང་བར་བྱ། །མཁར་ལས་བྱེད་སར་མི་འགྲོའོ། །གྱོང་མཁན་ཁྱིམ་དུ་མི་འབོད་ལ། །བྱང་གི་ཕྱོགས་སུ་མི་འགྲོའོ། །སྐག་ནི་རུལ་ཁ་ནག་པའི་དུས། །ལུག་
ལོ་པ་ཡི་རང་སྐག་ལ། །རྟ་སྦྲུལ་ལོ་པའི་ན་སྐག་སྟེ། །སྟག་ཡོས་ལོ་པའི་དུར་སྐག་ཡིན། །བྱི་ཕག་ལོ་པའི་དགྲ་སྐག་ཡིན། །དར་སེར་མ་མོ་མགོ་སེར་ཐོད་སྤུས་བསྲུང་། ༈ །དྭ་ལ་ར་དང་བོང་བུ་མི་ཉོ། །གོ་ཁྲབ་མགར་བ་མགར་ཚང་འཛེམ། །ཤར་གྱི་ཕྱོགས་སུ་མི་འགྲོའོ། །འཁྱག་འགོ་ཁྲལ་ཁྲོལ་དུས་སྐག་ཡིན། །བྱ་སྤྲེལ་ལོ་པའི་རང་སྐག་ལ། །རྟ་སྦྲུལ་ལོ་པའི་འཆི་སྐག་ཡིན། །སྟག་ཡོས་ལོ་པའི་བདུན་ཟུར་ཡིན། །དར་དཀར་ཁྲབ་བྱང་དག་གིས་བསྲུང་། ༈ ཁེན་ལ་མི་རྒན་མགོ་སེའམ། །བོན་པོ་མཐིང་པོ་རྒུར་བུ་འཛེམ། །ལྷོ་ཡི་ཕྱོགས་སུ་མི་འགྲོའོ། །ས་སྔོན་གནམ་སྔོན་དུས་སྐག་ཡིན། །ཁྱི་ལོ་པ་ཡི་རང་སྐག་ཡིན། །འབྲུག་ལོ་པ་ཡི་བདུན་ཟུར་ཡིན། །རྟ་སྦྲུལ་ལོ་པའི་དུར་སྐག་ཡིན། །དར་སེར་ཤེལ་སྒོང་དག་གིས་བསྲུང་། ༈ །ཁམ་ལ་སྒྲ་ནག་སྐྱེས་ནག་དང་། །སྤྱད་ནག་མོ་མགྲོན་ཁྱིམ་ནག་འཛེམ། །ལྷོ་ཡི་ཕྱོགས་སུ་མི་འགྲོའོ། །ཆུ་བོ་གཞུང་རྒྱས་དུས་སྐག་ཡིན། །བྱི་ཕག་ལོ་པའི་རང་སྐག་ལ། །བྱ་སྤྲེལ་ལོ་པའི་འཆི་སྐག་ཡིན། །རྟ་སྦྲུལ་ལོ་པའི་བདུན་ཟུར་ཡིན། །དར་སྔོན་གཡུ་ཡི་བསྲུང་བ་བཅུག ༈ །གིན་ལ་བང་བ་བཤིག་པའམ། །ས་
ཕུག་དག་གི་ས་མི་རྐོ། །རྡོ་རྗེ་དྲིལ་བུ་མི་ཉོ་ལ། །བསེ་ཐེབ་ཅན་ལ་སྐྱབས་མི་ཞུ། །ཤར་ལྷོའི་ཕྱོགས་སུ་མི་འགྲོའོ། །ནེའུ་སིང་སྔོ་དུས་སྐག་ཡིན་ནོ། །གླང་ལོ་པ་ཡི་རང་སྐག་ཡིན། །མཚམས་བཞི་ལོ་པའི་ན་སྐག་སྟེ། །བྱ་སྤྲེལ་ལོ་པའི་དུར་མིག་སྐག །ལུག་ལོ་པ་ཡི་བདུན་ཟུར་ཡིན། །དར་སེར་ར་གན་གསེར་གྱིས་བསྲུང་། ༈ །ཟིན་ལ་གཅན་གཟན་ལྤགས་མི་ཉོ། །ཤིང་མ་དང་ནི་ཤིང་མི་གཅོད། །ཉི་མ་ནུབ་ཕྱོགས་སུ་མི་འགྲོ། །སྟག་མ་ཁ་འབུར་དུས་སྐག་ཡིན། །སྟག་ཡོས་ལོ་པའི་རང་སྐག་ཡིན། །བྱི་ཕག་ལོ་པའི་འཆི་སྐག་སྟེ། །མཚམས་བཞི་ལོ་པའི་དགྲ་སྐག་དང་། །བྱ་སྤྲེལ་ལོ་པའི་བདུན་ཟུར་ཡིན། །དར་ལྗང་སྤུ་ཤུན་དུམ་བུའི་བསྲུང་། ༈ །ཟོན་ལ་སྔགས་བག་ཟས་མི་ཟ། །མཛོ་ཤ་སྨྱོ་ཤ་རན་ཐག་འཛེམ། །ནུབ་བྱང་མཚམས་སུ་མི་འགྲོའོ། །སྦྱར་མ་གནམ་གཡེང་དུས་སྐག་ཡིན། །འབྲུག་ལོ་པ་ཡི་རང་སྐག་ལ། །སྟག་ཡོས་ལོ་པའི་ན་སྐག་སྟེ། །ཁྱི་ལོ་པ་ཡི་བདུན་ཟུར་སྐག །མཚམས་བཞི་ལོ་པའི་དུར་སྐག་ཡིན། །བྱི་ཕག་ལོ་པའི་དུར་མིག་ཡིན། །དར་སེར་རིན་ཆེན་བསྲུང་བཅུག་གོ ༈ །བཅོས་ཐབས་རིམ་གྲོ་འདི་ལྟར་རོ། །ལི་ལ་ཚེ་མདོ་མཚན་བརྗོད་འདོན། །རྣམ་འཇོམས་
བྱབ་ཁྲུས་གཟའ་ཡུམ་དང་། །ཚེ་སྒྲུབ་བྱ་ཞིང་སྐོང་གསོལ་འདོན། །ཚེ་དབང་ཚེ་གཟུངས་གདུགས་དཀར་དང་། །དབང་ཕྱུག་ཟོར་མདོས་བཙན་མདོས་བྱ། །གསས་མཁར་དག་གི་ཁ་བསྟོད་བྱ། །ཁོན་ལ་ཀུན་རིག་གཤེད་དམར་དབང་། །བརྒྱད་སྟོང་པ་དང་སྣང་བརྒྱད་འདོན། །སྐལ་བཟང་གསེར་འོད་བསྒྲེས་ཞུས་མདོ། །བརྒྱ་བཞི་ས་བདག་འཁྲུག་བཅོས་དང་། །འདྲེ་མོ་རྫ་མདོས་རྣམས་བྱའོ། ༈ །དྭ་ལ་རྟ་མགྲིན་ཚེ་དབང་དང་། །སྤྲིན་ཆེན་ཁྱེའུ་ཞུས་མདོ་དང་། །གྲྭ་ལྔ་བསྲེག་ལོས་དགྲ་ཆོས་བྱ། ༈ །ཁེན་ལ་ཁྲོས་ནག་འབྱུང་འདུལ་དང་། །གསེར་འོད་ཤེར་སྙིང་ནམ་སྙིང་འདོན། །གཟའ་མགྱོགས་རྒྱལ་མགྱོགས་བསྲེག་ལོས་བྱ། ༈ །ཁམ་ལ་རྣམ་འཇོམས་ཕྱག་རྡོར་དབང་། །སྤྲིན་ཆེན་ཀླུ་འབུམ་སྤང་སྐོང་ཡུམ་གཟུངས་འདོན། །མཚོ་སྨན་གུར་མདོས་གྲུ་ཟིང་ཆུར་བསྐུར་བྱ། ༈ །གིན་ལ་ཐུབ་པའི་དབང་བསྐུར་དང་། །གཤེད་དམར་རྟ་མགྲིན་དབང་ཡང་ཞུ། །དཀོན་མཆོག་བརྩེགས་པ་རྣམ་རྒྱལ་མ། །གདུགས་དཀར་གླང་རུ་ལུང་བསྟན་འདོན། །བརྒྱ་བཞི་འཁྲུག་བཅོས་རྒྱལ་མགྱོགས་བྱ། ༈ །ཟིན་ལ་གུ་རུ་ཞི་དྲག་དབང་། །སྤྱན་རས་
གཟིགས་ཀྱི་དབང་བསྐུར་ཞུ། །སྡོང་པོ་བརྒྱན་མདོས་གདུགས་དཀར་འདོན། །འབར་མོའི་བསྐང་གསོལ་མགོན་པོའི་བེང་བཟློག་བྱ། ༈ །ཟོན་ལ་གཤེད་དམར་གཙུག་ཏོར་གདུགས་དཀར་དབང་། །ཉི་ཁྲི་ཕལ་ཆེན་སྟོབས་པོ་ཆེ། །གཤིན་རྗེའི་གཙང་བཟློག་མགོ་གསུམ་བྱ། ༈ །དེ་དག་ཀུན་ལ་བརྒྱ་བཞི་སྡོང་རྒྱན་མདོས། །ཁ་འབར་མ་དང་ས་བདག་འཁྲུག་བཅོས་དང་། །གཏོར་ཟློག་མགོ་གསུམ་ལ་སོགས་ཀུན་ལ་ཕན། །འབྱོར་པ་མེད་ལ་ཀོང་ཙེའི་གཏོ་བསྒྱུར་ཟབ། །འབུམ་དང་དུར་ལོས་སྤར་ཁ་ཀུན་ལ་ཕན། །ཚེ་དབང་ཚེ་སྒྲུབ་ཚེ་གཟུངས་སྲོག་མཐུན་ཡིན། །དེ་དག་ཀུན་ལ་ཡོངས་སུ་གྲགས་པ་ཡིན། །ཀུན་ལ་མཐོང་ཐོས་མེད་པའི་གཏོ་བཅོས་སོགས། །མང་དུ་བཤད་ཀྱང་མི་འཛོམ་དགོས་པ་ཆུང་། །སྐག་ཆེན་མེད་ཀྱང་སྐག་ཕྲན་མེད་དུས་མེད། །སྤར་ཁའི་གཏོ་ནི་འགའ་ཟུང་ལུང་བསྟན་རུང་། །རིམ་གྲོ་དགོས་ཀྱང་འབྱོར་པ་ཆུང་བ་ལ། །དེ་ཡི་གཟུངས་སྔགས་ཙམ་ནི་བརྗོད་ཀྱང་རུང་། །དེ་དག་རྟེན་འབྲེལ་གཏོ་གཅོས་ཟབ་མོ་ཡིན། །ཅེས་པ་འདི་ནི་༧རཱ་ག་ཨ་སྱས་སྦྱར། །ཉེས་འགལ་མཆིས་ན་འབྱུང་བའི་ལྷ་ལ་བཤགས། དགེའོ། །བཀྲ་ཤིས་ཞལ་དྲོ།། །།