སྤར་ཁའི་སྐག་བཅོས་རིམ་གྲོ་བྱ་ཚུལ་བལྟས་ཆོག་ཏུ་བཀོད་པ།
སྤར་ཁའི་སྐག་བཅོས་རིམ་གྲོ་བྱ་ཚུལ་བལྟས་ཆོག་ཏུ་བཀོད་པ་བཞུགས་སོ།། ན་མོ་ཨརྱ་མཉྫ་ཤི་ཡེ། ལྕགས་ཀྱི་ལོ་སྐོར་བཅུ་གཉིས་ལོར། །གང་རུང་ལི་ལ་ཕྱིན་པ་རྩུབ། །དེ་ལ་རྒྱ་གར་མེ་ལོས་བྱ། །མར་མེ་ཏིང་ལོ་ལོ་གྲངས་རྣམས། །དུར་གྱི་སྟེང་དུ་བསྲེགས་ལོས་བྱ། །ཚེ་མདོ་རྣམ་འཇོམས་བསྐང་བ་འདོན། །ཡང་ན་ལི་ཡི་སྲུང་སྔགས་བཟླས། །ཨོཾ་མ་མ་རཾ་རཾ་ཡེ་སྭཱ་ཧཱ། དཀྱིལ་འཁོར་ཞལ་བསྒྱུར་བཙན་མདོས་བཀར། །སྨར་ལོ་རྒྱས་དང་ཤིང་ལོ་བྲུལ། །སྤང་ཁ་སེར་དུས་སྐག་ཐོག་ཡིན། །དགུན་ཟླ་ར་བར་ནད་ངོ་ཡོད། །ཁོན་ཐོག་པ་དང་གིན་ཐོག་པ། །ཆུ་ཡི་ལོ་སྐོར་བཅུ་གཉིས་རྩུབ། །ཁོན་གིན་བོད་ཀྱི་ས་ལོས་བྱ། །ལུང་པ་ཐུར་རྒྱུ་དགུ་ཡི་ས། །ཡང་ན་སྲང་འགགས་དགུ་ཡི་ས། །མི་དེའི་ཁ་ལག་བཀྲུས་པས་སྦྲུ། །མི་གཟུགས་བྱས་ལ་བསྲེགས་ལོས་བྱ། །ཁོན་ལ་སྨོས་གཉིས་བར་ལ་རྩུབ། །ས་བདག་བཅོས་ཤིང་ས་སྒོ་གཅོད། །གྲྭ་ལྔ་བགྲེས་མོས་ཞུས་མདོ་འདོན། །དགུན་ཟླ་ཐ་ཆུང་ནད་ངོ་ཡོད། །ཡང་ན་ཁོན་གྱི་སྲུང་སྔགས་བཟླ། །ཨོཾ་མ་མ་སུ་སུ་ཏཾ་ཏཾ་ཡེ་སྭཱ་ཧཱ། དྲ་ཐོག་ཤིང་གི་ལོ་བཅུ་གཉིས། །གང་རུང་ཕྱིན་ན་རྩུབ་པའི་ཕྱིར། །དཔྱིད་ཟླ་ར་བར་ནད་ངོ་
ཡོད། །བལ་པོའི་རྡོ་ལོས་འདི་ལྟར་བྱ། །དུར་རྡོ་བརྒྱ་ལ་གཅིག་དགུ་དང་། །ཆངས་བུ་ངར་མི་ལོ་གྲངས་རྣམས། །བསྲེགས་ལོས་བྱས་ན་འགྱུར་བ་ཡིན། །ཁྱེའུ་ཞུས་མདོ་འོད་མདོ་དང་། །དཀོན་མཆོག་བརྩེགས་པ་འདོན་པར་བྱ། །ཏོག་དང་མཚན་བརྗོད་འདོན་པ་དང་། །བཙན་བདུད་བཀར་ཞིང་དགྲ་བླ་མཆོད། །འཁྱག་གཞུང་རལ་དུས་སྐག་ངོ་ཡོད། །ཡང་ན་དྭ་ཡི་སྲུང་སྔགས་བཟླས། །ཨོཾ་མ་མ་ཀ་ར་ཀ་ར་ཡེ་སྭཱ་ཧཱ། ཁེན་ལ་ཆུ་ལ་བཅུ་གཉིས་སམ། །རྟ་སྦྲུལ་ལོ་པ་ཕྱིན་ན་རྩུབ། །དེ་ལ་མུ་སྟེགས་ཤ་ལོས་བྱེད། །ཤ་དང་མོན་ལུགས་སྲེག་ལོས་བྱེད། །གསེར་འོད་སྣང་བརྒྱད་ལང་གཤེགས་འདོན། །གནམ་སྒོ་གཅོད་ཅིང་རྒྱལ་པོ་བཀར། །ཕོ་ལྷ་གསོལ་ཞིང་ཁེན་གྱི་སྔགས། །ཨོཾ་མ་མ་ཞུང་ཞུང་ཡེ་སྭཱ་ཧཱ། ས་སྔོ་གནམ་སྔོ་ལྗང་བུ་བྱ་ནུབ་དང་། །དཔྱིད་ཟླ་ཐ་ཆུང་ནད་ངོ་ཡོད། །ཁམ་ལ་མེ་ལོ་བཅུ་གཉིས་རྩུབ། །དེ་ལ་མེ་ཉག་ཆུང་ལོས་བྱ། །གྲོད་པ་ནང་ན་ལུང་པ་དགུའི། །ཆུ་སྣ་བླུག་ཅིང་ངར་མི་དང་། །ཆངས་བུ་ལོ་གྲངས་བླུགས་བྱས་ལ། །ཆུ་ལ་བསྐྱུར་རམ་ཆུ་ཕར་ཁར། །བསྲེགས་ལོས་བྱས་ན་འགྱུར་བ་ཡིན། །མྱ་ངན་འདས་མདོ་སྤྲིན་ཆེན་དང་། །རྡོ་རྗེ་མཆུ་
དང་རྣམ་འཇོམས་འདོན། །འདྲེ་མནན་མཚོ་སྨན་གུར་མདོས་བྱ། །དུས་ནི་ཆུ་བོ་གཞུང་རྒྱས་རྩུབ། །ཁམ་གྱི་སྲུང་སྔགས་འདི་བཟླས་སོ། །ཨོཾ་མ་མ་ཀ་ར་ཀ་རུ་ཡེ་སྭཱ་ཧཱ། གིན་ལ་གསུང་མཆོག་གཏོར་མ་གཏོང་། །གླང་རུ་ལུང་བསྟན་དཀོན་བརྩེགས་དང་། །རྨ་བྱ་ཆེན་མོའི་གཟུངས་ཀྱང་སྒྲོག །ཚེ་མདོ་མ་མོའི་མདོས་དང་ནི། །བེ་གར་མདོས་དང་ས་བདག་བཅོས། །ས་འཁྱགས་རྡོ་འཁྱགས་ན་འགྲམ་སྔོ། །རྩུབ་པས་གིན་གྱི་སྲུང་སྔགས་བཟླས། །ཨོཾ་མ་མ་ཀུ་རུ་ཡེ་སྭཱ་ཧཱ། ཟིན་ལ་ས་ལོ་བཅུ་གཉིས་རྩུབ། །དེ་ལ་རྒྱ་ནག་ཤིང་ལོས་བྱ། །སུར་ནག་ལྕོགས་སྒྲོམ་བྱས་པ་ཡི། །ཤིང་གི་ངར་མི་ལུས་ཚད་གཅིག །གླུད་དང་བཅས་པས་བསྲེགས་ལོས་བྱ། །ཉེར་ལྔ་སྡོང་རྒྱན་གསེར་འོད་འདོན། །ཤེར་སྙིང་མཚན་བརྗོད་འདོན་པར་བྱ། །དུས་ནི་ཤིང་ལོ་ཁ་འབུར་རྩུབ། །ཟིན་གྱི་སྲུང་སྔགས་འདི་བཟླས་སོ། །ཨོཾ་མ་མ་ཡང་ཡང་ཡེ་སྭཱ་ཧཱ། ཟོན་ལ་ས་ལོ་བཅུ་གཉིས་རྩུབ། །དེ་ལ་སྟོང་པའི་རླུང་ལོས་བྱ། །རྒྱལ་བའི་ཕྱི་ལ་སྨེ་བ་དགུ། །སྤར་ཁ་ལོ་གྲངས་བཅུ་གཉིས་བྲིས། །ནང་དུ་ཤ་རུས་ངར་མི་དང་། །ཆངས་བུ་ལོ་གྲངས་བཅུག་བྱས་ལ། །དུར་ཐོག་བཏབ་བམ་
བསྲེགས་ལོས་བྱ། །གདུགས་དཀར་སྟོང་ཕྲག་བརྒྱ་པ་འདོན། །གཙུག་ཏོར་སྟོང་བཟློག་ཀླུ་མཆོད་བྱ། །འདྲེ་མོའི་སྤྱི་མདོས་གཡང་སྐྱབས་བྱ། །དུས་ནི་འཁྱགས་པར་སས་འདེབས་དུས། །རྩུབ་པས་ཟོན་གྱི་སྲུང་སྔགས་བཟླས། །ཨོཾ་ཨ་ཀ་ནི་ནི་ཀ་ནི་ཨ་བྷ་ལ་མཎྜ་ལ་མ་ཡེ་སྭཱ་ཧཱ། སྤར་ཁ་སྤྱི་ཡི་བཅོས་ལུགས་ནི། །ལི་ཁམ་སྟོང་ན་གཞུང་རལ་ཡིན། །བསང་དང་གསས་མཁར་གནམ་སྒོ་གཅོད། །ས་སྒོ་གཅོད་ཅིང་སཱཙྪ་བཏབ། །དྲ་ཟིན་སྟོང་ན་སྐེད་ཆེད་ཡིན། །འབུམ་ལ་སོགས་པའི་གསུང་རབ་འདོན། །ཁེན་གིན་སྤྱང་ངམ་སྟོང་པ་ན། །རྐང་པ་གཉིས་ཀྱིས་དོང་བྲུ་ཡིན། །ས་བདག་ཡོ་བཅོས་མདོས་བསྐང་སོགས། །ཀླུ་དང་ས་བདག་བཅོས་པར་བྱ། །ཁོན་ཟོན་སྤུང་ངམ་བུག་ན་ནི། །ལག་པ་གཉིས་ཀྱིས་བྲང་རྡུང་ཡིན། །དེ་ལ་ཀླུ་མཆོད་བྱ་བ་དང་། །ཁ་ལེན་མེད་པའི་སྟོན་མོ་བྱ། །གསུམ་བཞི་སྤུང་ན་མདོས་བསྐང་བོ། །འབུམ་དང་བརྒྱད་སྟོང་མགོ་གསུམ་བྱ། །ཀུན་ལ་བསྐང་གསོལ་ཆུ་གཏོར་དང་། །སཱཙྪ་གསུང་རབ་ཀློག་པ་ཤེས། །ལི་ལ་སྤུང་ན་གནམ་སྒོ་བྱེ། །ཁེན་ལ་སྤྱང་ན་གནམ་སྒོ་བྱེ། །ཁམ་ལ་སྤུང་ན་མྱ་ངན་སྒོ། །གིན་ལ་སྤྱང་ན་དུར་སྒོ་བྱེ། །ཟིན་ལ་
སྤྱང་ན་གློ་བུར་སྒོ། །ཟོན་ལ་སྤུང་ན་སྙིང་སྟོང་སྒོ། །སོ་སོའི་སྒོས་བཅོས་དྲག་ཏུ་བྱ། །མེ་ལ་ཆུ་ཡི་དགྲ་དར་ན། །རིན་ཆེན་སྣ་ལྔའི་སྲོག་གཏའ་བསྡམ། །སྦྱིན་སྲེག་ཞི་བསང་མང་དུ་བྱ། །སཱཙྪ་ལོ་གྲངས་སུམ་འགྱུར་བཏབ། །ཤིང་ལ་ལྕགས་ཀྱི་དགྲ་དར་ན། །རལ་གྲི་ཆུ་གྲིའི་གཟུགས་དང་ནི། །རི་བོང་གསོབ་དང་ར་དཀར་དང་། །ལུག་དང་བོང་བུའི་ཐོད་པ་དང་། །ངར་མི་དཀར་པོ་ལུས་ཚད་ལ། །ལྕགས་ཀྱི་སྲོག་ཤིང་བཅས་པ་བཏགས། །ས་ལ་ཤིང་གི་དགྲ་དར་ན། །བླ་བསླུ་ཞལ་བསྒྱུར་ཁྲོམ་བཟློག་བྱ། །ལུས་་ཚད་ཤིང་ལ་ལོ་གྲངས་ཀྱི། །ཁྲམ་བཏབོ་དགྲ་ཡི་ཕྱོགས་སུ་བསྐྱལ། །བརྗེ་འབྲུ་བདུན་ཆོ་ག་བྱ། །ལྕགས་ལ་མེ་ཡི་དགྲ་དར་ན། །རྡོ་རྗེ་མཆུ་དང་སྤང་སྐོང་འདོན། །བླ་བསླུ་དགྲ་སྲི་མནན་པར་བྱ། །ཆུ་ལ་ས་ཡི་དགྲ་དར་ན། །ཁམ་ས་སྐྱ་ཟོར་བཏགས་པ་དང་། །དེ་ཡི་ཕྱོགས་སུ་མདོས་ཆེན་བཏང་། །གཅིག་དཀར་ཐོག་ཏུ་བབས་པ་ན། །ཁྲུས་དང་ལྷ་གསོལ་སྐོང་བཤགས་དང་། །ཀླུ་མཆོད་རྒྱལ་མདོས་རྒྱལ་སྲུང་བཏགས། །གཉིས་ནག་བདུད་ཟློག་མ་མོའི་མདོས། །གསུམ་མཐིང་སཱཙྪ་བརྒྱ་བཞི་དང་། །གཙུག་ཏོར་བསེ་མོའི་དགུ་མདོས་
བྱ། །བཞི་ལྗང་གཉན་བཅོས་ཀླུ་མཆོད་དང་། །ཀླུ་འབུམ་ཀླུ་གཟུངས་འདོན་པར་བྱ། །ལྔ་སེར་ཚོགས་དང་སཱཙྪ་རྒྱལ་མདོས་བྱ། །དྲུག་དཀར་ཁྲུས་དང་ལྷ་གསོལ་དང་། །དགྲ་བླ་གསོལ་ཞིང་སྐོང་བཤགས་བྱ། །བདུན་དམར་དགྲ་བླ་མཆོད་པ་དང་། །བཙན་བཀར་བྱས་ན་བཟང་བའོ། །བརྒྱད་དཀར་ལྷ་གསོལ་མཚུན་བཅོས་དང་། །བན་བོན་ཡིན་ན་སྐོང་མདོས་བྱ། །དགུ་དམར་གཡང་སྐྱབས་དགྲ་བླ་གསོལ། །དུར་སྲི་མནན་ཅིང་བཙན་མདོས་བྱ། །དགུ་གཅིག་གཡུ་སྦྲང་གཤོག་པ་ཆད། །བཅོ་བརྒྱད་གཡང་གི་ཟོ་ཞབས་ཕུད། །ཉེར་བདུན་བྱ་རྒོད་མདོས་ལ་ཟིན། །སོ་དྲུག་གནམ་སྨན་སང་ནས་བུད། །ཞེ་ལྔ་སེང་གེ་དོང་དུ་ལྷུང་། །ང་བཞི་གཡུ་ལྗང་མེ་ཏོག་སྐམ། །རི་གསུམ་སྡོང་རྒན་རྩ་ནས་འགྱེལ། །དོན་གཉིས་ཁང་ཁྱིམ་ཕུག་རླུང་ལངས། །གྱ་གཅིག་ཁང་ཁྱིམ་མེ་ལ་ཤོར། །སྤར་སྨེ་གང་བབ་བཅོས་ཀ་དང་། །དགུ་མིག་གཏོ་ཡི་བཅོས་ཀ་བྱ། །ཞེས་པ་འདི་ཡང་ཨ་རཱ་གས་ཕྱི་རབས་དོན་དུ་ཞལ་གདམས་ལགས་སོ།། །།