སྨེ་བའི་སྒང་རྩིས།
སྨེ་བའི་སྒང་རྩིས་བཞུགས་པའི་དབུ་ཕྱོགས་ལགས་སོ། །
ཨེ་མ་ཧོ། འཇམ་པའི་དབྱངས་ལ་ཕྱག་འཚལ་ལོ། །སྣང་གསལ་སྒྲོན་མེའི་བཅུད་ཕྱུང་བ། །སྨེ་བའི་སྒང་རྩིས་ཆེན་མོ་ལས། །དགུ་ལིང་རྣམ་པ་ལྔ་རུ་བཤད། །ལུས་སྨེ་སྲོག་སྨེ་དབང་དང་གསུམ། །ཀླུང་རྟེ་མ་རླུང་གཉིས་དང་ལྔ། །ལུས་སྨེ་དགུ་ལིང་ལྷོ་རུ་བྱ། །སྲོག་སྨེ་དགུ་ལིང་དབུས་སུ་བྱ། །དབང་སྨེ་དགུ་ལིང་བྱང་དུ་བྱ། །ཀླུང་རྟའི་སྨེ་བ་ཤར་དུ་བྱ། །མ་རླུང་དགུ་ལིང་ནུབ་ཏུ་བྱ། །དེ་ལྟར་དགུ་ལིང་ལྔ་ཙམ་ལ། །དང་པོ་ལུས་ཀྱི་སྨེ་བ་ལེན། །གང་ཤར་དགུ་ལིང་དབུས་སུ་བཞག །སྨེ་བ་ལོ་ཡི་ཕོ་མོ་ཡིན། །ཕོ་དྲུག་གིན་ལ་མོ་དྲུག་ཟོན། །གང་བབ་ལོ་ལ་བརྩི་
བ་ཤེས། །དབུས་བཞག་ལུས་ཀྱི་སྨེ་བ་དང་། །གར་བབ་སྨེ་བ་འཐབ་པ་ཡིན། །སྨེ་སྒོ་ཤར་ལ་སྨེ་ཕུག་ནུབ། །དེ་ནས་ཤར་གྱི་སྨེ་བ་ལེན། །གང་ཤར་དགུ་ལིང་དབུས་སུ་བཞག །ལོ་གྲངས་རྩིས་ལ་ཤེས་པར་བྱ། །དགུ་ལིང་དེ་ཡི་གར་བབ་འཐད། །དེ་ནས་ཤར་ལྷོའི་སྨེ་བ་ལེན། །གང་ཤར་དགུ་ལིང་དབུས་སུ་བཞག །གར་བབ་དེ་དང་འཐབ་པ་ཡིན། །གཉིས་པ་སྲོག་གི་སྨེ་བ་ལེན། །གསུམ་པ་དབང་ཐང་སྨེ་བ་ལེན། །བཞི་པ་ཀླུང་རྟའི་སྨེ་བ་ལེན། །ལྔ་པ་མ་རླུང་རྨེ་བ་ལེན། །གང་བླངས་སྨེ་བ་དབུས་སུ་བཞག །སྨེ་བརྒྱད་དང་པོ་སྒོ་ནས་ལེན། །དེ་
ནས་ཤར་ལྷོའི་སྨེ་བ་ལེན། །གང་བླངས་རང་རང་ཕྱོགས་སུ་བཞག །ཕོ་མོ་གཉིས་ལ་དབྱེ་བ་མེད། །གཡས་སྐོར་བྱེད་ནས་ལེན་པ་ཡིན། །དགུ་མིག་པ་ལ་སྒང་རྩིས་སྤང་། །དེ་ལྟར་སྨེ་བའི་སྒང་རྩིས་ལ། །རྟེལ་བུ་བཞི་བཅུ་ཞེ་ལྔ་བཤད། །མ་བུ་དགྲ་གྲོགས་གཉིས་དང་བཞི། །འབྱུང་བ་ནང་འཕྲད་ལྔ་དང་དགུ། །མ་འཕྲད་རྡེའུ་དཀར་པོ་གཉིས། །བུ་འཕྲད་རྡེའུ་དཀར་ནག་གཉིས། །གྲོགས་འཕྲད་རྡེའུ་དཀར་པོ་གཅིག །དགྲ་འཕྲད་རྡེའུ་ནག་པོ་གཉིས། །ས་ཆུ་ནང་འཕྲད་དཀར་པོ་གཅིག །མེ་ལྕགས་ཤིང་གསུམ་ནང་འཕྲད་ནག་པོ་རེ། །མ་ལོ་མ་ཤེས་སྤར་སྨེ་ལེན། །དེ་ནས་རྡེའུ་རྫོགས་པ་དང་། །སྨེ་བའི་སྒང་རྩིས་དཔྱད་པ་ལ། །ལྷོ་ཕྱོགས་ལུས་ཀྱི་སྨེ་བ་འདི། །མཐོན་པོ་དགུང་གི་སྐོར་ཕྱུ་ཡིན། །གནམ་གྱི་ཀ་བ་མ་འགྱེལ་དགོས། །ལུས་རྡེལ་དགྲ་འཕྲད་འགྱེལ་བ་ཡིན། །ཉི་མ་ཟླ་བ་སྐར་མ་གསུམ། །དུས་གཅིག་གཟའ་ཡིས་མ་འབྱངས་དགོས། །ནག་གསུམ་འཛོམ་ན་འབྱུང་བ་ཡིན། །དབུས་མ་སྲོག་གི་སྨེ་བ་འདི། །རི་རྒྱལ་ལྷུན་པོའི་སྐུ་ཕྱུ་ཡིན། །རི་རྒྱལ་ཐོག་གིས་མ་བཤིག་དགོས། །དབུས་རྡེལ་དགྲ་འཕྲད་བཤིག་པ་ཡིན། །ཡམས་ཀྱི་སྒོ་མོ་མ་ཁྲིད་
དགོས། །ནག་གསུམ་འཛོམ་ན་ཁྲིད་པ་ཡིན། །བྱང་ཕྱོགས་དབང་ཐང་སྨེ་བ་འདི། །དང་མོ་ས་ཡི་གཞི་ཕྱུ་ཡིན། །ས་ལ་ས་ཟད་མ་བྱུང་དགོས། །དབུས་རྡེལ་དགྲ་འཕྲད་ཟད་ཞིག་འབྱུང་། །རྩི་ཐོག་སད་ཀྱིས་མ་ཁྱེར་དགོས། །ནག་གསུམ་འཛོམ་ན་ཁྱེར་བ་ཡིན། །ཤར་ཕྱོགས་ཀླུང་རྟའི་སྨེ་བ་འདི། །སྙིང་སྟོང་མདུན་ངོ་མ་བྱུང་དགོས། །ནག་གསུམ་འཛོམ་ན་བྱུང་བ་ཡིན། །ནུབ་ཕྱོགས་མ་ཀླུང་སྨེ་བ་འདི། །ཁ་མཆུ་གླེང་གཞི་མ་བྱུང་དགོས། །ནག་གསུམ་འཛོམ་ན་བྱུང་བ་ཡིན། །ཤར་ཕྱོགས་དུང་རི་དཀར་པོ་ལ། །དུང་སེང་གཡུ་རལ་མ་གོག་དགོས། །སྟོད་གསུམ་ནག་ན་གོག་པ་ཡིན། །ལྷོ་ཕྱོགས་གཡུ་རི་སྔོན་པོ་ལ། །གཡུ་འབྲུག་སྒྲ་སྐད་མ་ལྐུག་དགོས། །སྟོད་གསུམ་ནག་ལ་ལྐུག་པ་ཡིན། །ནུབ་ཕྱོགས་ཟངས་རི་དམར་པོ་ལ། །མཚལ་བྱའི་གཤོག་པ་མ་ཆད་དགོས། །བར་གསུམ་ལྷག་ན་ཆད་པ་ཡིན། །བྱང་ཕྱོགས་གཡུ་མཚོ་སྔོན་མོ་ལ། །ཉ་སྲམ་ཆབ་དང་མ་བྲལ་དགོས། །སྨད་གསུམ་ནག་ན་བྲལ་བ་ཡིན། །གནམ་གྱི་འཇུ་ཐག་མ་ཆད་དགོས། །ཡར་དེད་དགུ་ལ་རྡེལ་ནག་གཉིས། །གནམ་གྱི་འཇུ་ཐག་ཆད་པ་ཡིན། །མར་དེད་དགུ་ལ་
རྡེལ་ནག་གཉིས། །ས་ཡི་རྟེན་ཕུར་བུད་པ་ཡིན། །བརྟེན་པའི་ཀ་བཞི་མ་འགྱེལ་དགོས། །དབུས་རྡེལ་བཞི་པོ་ནག་པ་ན། །བརྟེན་པའི་ཀ་བཞི་ནག་འགྱེལ་ཡིན། །གདུང་མ་བརྒྱད་པོ་མ་ཡོ་དགོས། །ནག་པོ་མང་ན་ཡོ་བ་ཡིན། །བར་འཁྱམས་བཅུ་གཉིས་མ་འཁྱམས་དགོས། །ནག་པོ་མང་ན་འཁྱམས་པ་ཡིན། །ཕྱི་ར་ཉི་ཤུ་མ་འཐོར་དགོས། །ནག་པོ་མང་ན་འཐོར་བ་ཡིན། །དབུས་ཀྱི་ཀ་ཆེན་མ་འགྱེལ་དགོས། །དགྲ་དང་འཕྲད་ན་འགྱེལ་བ་ཡིན། །ད་ནི་གདན་ས་དབྱེ་བ་ལ། །ལུས་སྨེ་སྟོད་ཀྱི་རྡེལ་གསུམ་འདི། །ཆེ་རྒྱུད་ནང་ཟློགི་ཆེ་རྒྱུད་ས། །ལུས་སྨེ་བར་གྱི་རྡེལ་གསུམ་འདི། །ཆེ་རྒྱུད་ནང་གི་འབྲིང་རྒྱུད་ས། །ལུས་སྨེ་སྨད་ཀྱི་རྡེལ་གསུམ་འདི། །ཆེ་རྒྱུད་ནང་གི་ཆུང་རྒྱུད་ས། །སྲོག་སྨེ་སྟོད་ཀྱི་རྡེལ་གསུམ་འདི། །འབྲིང་རྒྱུད་ནང་གི་ཆེ་རྒྱུད་ས། །སྲོག་སྨེ་བར་གྱི་རྡེལ་གསུམ་འདི། །འབྲིང་རྒྱུད་ནང་གི་འབྲིང་རྒྱུད་ས། །སྲོག་སྨེ་སྨད་ཀྱི་རྡེལ་གསུམ་འདི། །འབྲིང་རྒྱུད་ནང་གི་ཆུང་རྒྱུད་ས། །དབང་ཐང་སྨེ་བའི་སྟོད་གསུམ་འདི། །ཆུང་རྒྱུད་ནང་གི་ཆེ་རྒྱུད་ས། །དབང་ཐང་སྨེ་བའི་བར་གསུམ་འདི། །ཆུང་རྒྱུད་ནང་གི་འབྲིང་རྒྱུད་ས། །དབང་ཐང་སྨེ་བའི་སྨད་
གསུམ་འདི། །ཆུང་རྒྱུད་ནང་ནས་ཆུང་རྒྱུད་ས། །ཀླུང་རྟའི་སྨེ་བའི་སྟོད་གསུམ་འདི། །ཕ་སྤུན་ནང་གི་ཆེ་རྒྱུད་ས། །ཀླུང་རྟའི་སྨེ་བའི་བར་གསུམ་འདི། །ཕ་སྤྱན་ནང་གི་འབྲིང་རྒྱུད་ས། །ཀླུང་རྟའི་སྨེ་བའི་སྨད་གསུམ་འདི། །ཕ་སྤུན་ནང་གི་ཆུང་རྒྱུད་ས། །མ་རླུང་རྨེ་བའི་སྟོད་གསུམ་འདི། །མྱེས་བཙུན་ནང་གི་ཆེ་རྒྱུད་ས། །མ་རླུང་རྨེ་བའི་བར་གསུམ་འདི། །སྐྱེས་བཙུན་ནང་གི་འབྲིང་རྒྱུད་ས། །མ་རླུང་རྨེ་བའི་སྨད་གསུམ་འདི། །མྱེས་བཙུན་ནང་གི་ཆུང་རྒྱུད་ས། །དེ་ལྟར་གདན་ས་བཅོ་ལྔ་ལ། །ནག་པོ་བྱུང་ན་ངན་པ་ཡིན། །དཀར་པོ་བྱུང་ན་བཟང་བར་བཤད། །གཡས་གསུམ་ཐམས་ཅད་ལྷ་ས་ཡིན། །བཙང་ཕོད་ལྷ་ཡིས་མ་བཙང་དགོས།་།དཀར་པོ་མང་ན་མ་བཙང་ངོ་། །ནག་པོ་མང་ན་བཙང་བ་ཡིན། །དེ་ཡི་གཏོ་ལ་འདི་ལྟར་གྱིས། །ཕོ་སྐོར་མགོ་ལ་ཞྭ་ནག་གྱོན། །རྐང་ལ་རེ་བའི་ལྷམ་ནག་གྱོན། །ཡུལ་དགུ་དག་ཏུ་སྤང་བ་དང་། །རུས་པ་མི་གཅིག་བོན་གསུམ་གྱིས། །གཤིན་རྗེའི་ཚང་བཟློག་མགོ་གསུམ་དང་། །ཀུན་རིག་ཆོ་ག་གྱིས་དང་འགྱུར། །གཡོན་གསུམ་ཐམས་ཅད་འདྲེ་ས་ཡིན། །ཉེ་ཕོད་འདྲེ་ཡིས་མ་ཉེ་དགོས། །ནག་པོ་མང་ན་
ཉེ་བ་ཡིན། །དཀར་པོ་མང་ན་མ་ཉེས་སོ། །ཚེ་བདུད་ནག་པོའི་བཟློག་མདོས་གྱིས། །ཡང་ན་གཤིན་རྗེའི་ཚང་བཟློག་དང་། །བདུད་བཟློག་ཐང་གསུམ་རྒྱས་པར་གྱིས། །གཡས་གཡོན་དཀར་ནག་ཆ་མཉམ་ལ། །ལྷ་ས་གཅིག་གམ་གཉིས་ནག་ཤི། །འདྲེ་ས་གཅིག་གམ་གཉིས་ནག་ན། །ལྷ་འདྲེས་ཉོ་ཚང་གཏམ་འདོད་ཡིན། །དེ་ལ་དུར་ཁ་ཚེ་བཟློག་དང་། །གཤིན་རྗེའི་ཚང་བཟློག་གྱིས་དང་ལེགས། །དཀར་ནག་ཆ་མཉམ་ལྷ་མཆོད་ཅིང་། །མར་ལ་འདྲེ་ཡང་བཀར་ན་བཟང་། །རུས་པ་མི་གཅིག་བོན་གསུམ་གྱིས། །མགོ་ཞྭ་མི་འདྲ་གསུམ་གྱོན་ནས། །དགྲ་བྲུབ་དང་ནི་གྲི་བྲུབ་གྱིས། །ཁ་མང་བརྒྱ་ཡི་ཁ་ཁོག་ལ། །མིག་མང་བརྒྱ་ཡི་མིག་གཡོར་ཅིག །མཚན་བརྗོད་སྟོང་ཙམ་བརྗོད་པ་དང་། །ཐུགས་རྗེ་ཆེན་པོ་འུར་འདོན་གྱིས། །ཡར་གྱི་གནམ་སྒོ་བྱེ་བ་དང་། །འཁྲི་འཕང་བཅུ་གསུམ་རྩེ་མོ་རུ། །ཁྱི་མགོས་གནམ་གྱི་དར་སྒོ་ཆོད། །ས་སྒོ་བྱེ་ན་ངར་མི་ཚང་། །དཀྱིལ་གསུམ་ཐམས་ཅད་མི་ས་ཡིན། །དཀར་ནག་འདྲེས་མ་བྱུང་ན་བཟང་། །ལུས་སྨེའི་དཀྱིལ་མ་ལག་པ་ཡིན། །བསྙབས་པའི་ལག་པ་མ་ཆག་དགོས། །ཆག་ན་མགོ་དཔོན་བཟའ་དཔོན་དང་། །ཕོ་ཡི་
རྒན་རིམ་གཅིག་ལ་ངན། །འདབས་ཆགས་བརྒྱ་ལ་སྟོན་མོ་གྱིས། །ཟན་གྱི་རིལ་བུ་གྲངས་མེད་གཏོར། །ཡར་ལ་བསང་སྒོ་བཅུ་གསུམ་གྱིས། །ལྷག་པར་ཕོ་དང་ཕོ་ཡི་ས། །སྤྱི་བོ་གང་གི་གནམ་རྡིབ་ཟེར། །དེ་ལ་ཚེ་རིང་གསས་མཁར་བརྩིགས། །མགོན་པོ་བྱ་གདོང་མངའ་གསོལ་བྱ། །ཡར་དུ་མཉན་རྒྱལ་ཤ་རུ་ཁྱོག །མ་སྐོར་གནམ་གྱི་མདུན་ཞྭ་ཕུད། །ཕ་སྐོར་མདའ་ཁ་གྲི་འཛིན་གྱིས། །གྲི་སྐེད་ཐུམ་ལ་གྲི་མདོས་གྱིས། །ཕ་དང་རྒས་རིམ་སྒོམ་ཆེན་གྱིས། །མར་མེ་ཚེ་འབར་ལོ་གྲངས་གསོས། །ཡུལ་དགུ་སྤྱང་ལ་ཁྱིམ་མཚེས་ཀྱི། །ཁྱི་རྣམས་བསྡུས་ལ་སྟོན་མོ་གྱིས། །དེ་གོང་གཏོ་འགྱུར་དམོད་བཅོལ་གྱིས། །གོང་གི་གཏོ་རྣམས་མ་འཕྲོད་ན། །གཏོ་ནག་དེ་ལྟར་གྱིས་དང་འགྱུར། །སྲོག་སྨེའི་དཀྱིལ་ན་ལྟ་བའི་མིག །ལྟ་བའི་སྤྱན་མིག་མ་ལང་དགོས། །ལང་ན་རང་དང་བུ་ལ་ངན། །མཚན་བརྗོད་གྲངས་མེད་རྒྱུན་ལ་བསང་། །ཚེ་འབར་མར་མེ་ལོ་གྲངས་གསོས། །སྐོར་བ་ལོ་ཡི་གྲངས་ཙམ་གྱིས། །བདུད་བཟློག་རྒྱས་པ་གཅིག་གིས་ནི། །སྟེང་དུ་དུང་སྐས་ཐེམ་པ་བཅུ་གསུམ་བྱ། །ཡང་ན་གྲོག་ཚང་གྲངས་མེད་ཐམས་ཅད་དུ། །བྲ་ཕྱེ་བླུག་ལ་འདི་སྐད་
བརྗོད། །བདག་མིང་འདི་ཞེས་བྱ་བ་ཡི། །སྟོན་མོ་ཚོགས་བསོགས་བྱེད་པ་ཡིན། །བདག་གིས་འཆི་བཟློག་བདུད་བཟློག་བྱ། །གློ་བུར་ནད་རྣམས་ད་སོལ་ཅིག །དེ་ལྟར་བཀའ་བསྒོ་གང་ཤེས་བྱ། །དབང་ཐང་སྨེ་བའི་དཀྱིལ་མ་འདི། །འགྲོ་བར་བྱེད་པའི་རྐང་པ་ཡིན། །འགྲོ་བའི་རྐང་པ་མ་ཆག་དགོས། །ཆག་ན་ཆུང་རྒྱུད་བུ་ལ་ངན། །ཞ་བོ་བརྒྱ་ལ་སྟོན་མོ་གྱིས། །ཞྭ་ཚང་ནང་དུ་བྲ་ཕྱེ་བླུགས། །ཆུ་ནང་ཉ་ལྕོང་གྲངས་མེད་ལ། །ཟན་གྱི་རིལ་བུ་གྲངས་མེད་གྱིས། །ཆོས་སྒོར་ཞུགས་པའི་དགེ་འདུན་ལ། །རྒྱ་བོ་ཁ་སེར་ཁྱེད་རྣམས་ལ། །བདག་མིང་འདི་ཞེས་བགྱིས་པ་ཡིས། །སྟོན་མོ་ཚོགས་སོགས་བྱས་པ་ཡིས། །བདག་གི་རྒྱལ་པོས་ལོ་སྐག་སྒྱུར། །སྲིན་པོའི་ལོ་སྐག་ད་བསྒྱུར་ཅིག །ས་བདག་ལོ་སྐག་ད་བསྒྱུར་ཅིག །བཙན་བདུད་ལོ་སྐག་ད་བསྒྱུར་ཅིག །སྤར་ཁའི་ལོ་སྐག་ད་བསྒྱུར་ཅིག །སྨེ་བའི་ལོ་སྐག་ད་བསྒྱུར་ཅིག །ཞེས་པའི་ཚིགས་བཅད་ཁ་ཐོན་གྱིས། །ཡང་ན་བྱིས་ཚང་ལོ་གྲངས་ཀྱི། །སྟེང་དུ་ངར་མི་ལོ་གྲངས་བཅུག །ལོ་བདུད་སྟེང་དུ་བསྲེག་ལོས་གྱིས། །གོང་གི་གཏོ་རྣམས་མ་འཕྲོད་ན། །གཏོ་ནག་དེ་ལྟར་གྱིས་དང་འགྱུར། །བསམ་པའི་སྙིང་
ནི་མ་བུད་དགོས། །བུད་ན་སྐྱེས་པ་དར་མར་ངན། །ཡ་རབ་ཡིན་ན་སྤང་དག་གྱིས། །ཀུན་རིག་ཆོ་ག་བརྒྱ་རྩ་དང་། །དཀྱིལ་འཁོར་ཞལ་བསྒྱུར་ལྔ་རྩེག་དང་། །ཨུཥྞི་ཥ་ཡི་བཟློག་བསྒྱུར་དང་། །རིན་པོ་ཆེ་ཡི་ཤ་རྒྱས་ཆོག །གསོན་གཤིན་གྱིས་ལ་ཡུལ་དགུ་སྤྲང་། །རྟ་ནོར་ལམ་སྟོན་སྤྲིལ་ཤིག་གྱིས། །དེ་རྣམས་མ་འཕྲོད་འདི་རྣམས་གྱིས། །ཕོ་སྐྱེས་ཡིན་ན་ཞྭ་ཡི་ནང་། །ནག་མོ་ཡིན་ན་བལ་འཕང་ནང་། །ངར་མི་སྤར་ཁའི་ཁ་དོག་གྱིས། །ཆངས་སྤྱད་བརྒྱད་ཅུ་རྩ་གཅིག་པ། །ལོ་གྲངས་དགུ་ཡིས་བསྐོར་ལ་ཞོག །ཕོ་ལ་མདའ་སྟེ་མོ་ལ་འཕང་། །ལོ་ཁྲམ་བྲིས་ལ་གཡས་སུ་བཞག །རྟ་ནོར་ཆ་སྤྱད་བཅས་པ་ཡི། །གླུད་འཇལ་ཚང་མ་སྣོད་དུ་བཅུག །བརྒྱ་ལམ་མདོ་རུ་བསྐྱལ་ཏེ་བོར། །ཡང་ན་བསྲེགས་ལོས་གྱིས་དང་བཟང་། །བརྟེན་པའི་མཆིན་པ་མ་བུད་དགོས། །བུད་ན་ཕ་སྤུན་རང་ལ་ངན། །རླུང་རྟ་ཕ་སྤུན་ས་ཡིན་པས། །དགྲ་འཕྲད་ནག་པོ་མང་གྱུར་ན། །དོན་མཆོག་བརྩེགས་པ་སྡོང་རྒྱན་མདོས། །ཁྲོ་བོ་རོལ་པའི་བཟློག་པ་དང་། །ཚེ་བདུད་ནག་པོའི་བཟློག་པ་དང་། །ཁ་འབར་མ་ཡི་བཟློག་པ་དང་། །རྒྱ་ནག་ངན་བཟློག་སྐག་བཟློག་
དང་། །རྒྱ་ནག་ཚུལ་བཟློག་བརྒྱ་བཞིའི་མདོས། །ཐང་འབུམ་དུར་ཁ་ཚེ་བཟློག་དང་། །འབྱུང་བ་ལམ་སེལ་གྱིས་དང་འགྱུར། །ཡང་ན་འབྲུ་ནག་བསྲེས་པ་ཡི། །ངར་མི་གླུད་ཟན་ཆངས་སྤྱད་ནི། །གྲངས་མེད་གྱིས་ལ་སྟོན་མོ་དྲོངས། །ལན་ཆགས་ཆུ་སྦྱིན་གཏོར་མ་ཐོང་། །ཚ་ཚ་་གྱིས་ལ་སྣང་བརྒྱད་ཐོན། །མཆོད་རྟེན་བརྩིགས་ལ་དཀར་ཆབ་གསོལ། །ལྷ་ཁང་རྣམས་ལ་ཚེ་འབར་གསོས། །ལམ་ངན་གསོ་ཤིང་ཟམ་པ་ཚུགས། །མ་ཀླུང་འགྲོ་བའི་རྐང་པ་ཡིན། །རྐང་མར་བུད་ན་ཨ་ཕྱི་དང་། །ལྷག་པར་མ་ལ་ངན་པ་ཡིན། ཡང་ན་འོག་རྟ་འགེལ་མཛོ་དང་། །སྒོ་ཡི་ནོར་ལ་ངན་པར་ངེས། །གཏོ་ལ་གསོན་གཤིན་འཆི་བསླུ་གྱིས། །མཆོད་རྟེན་བརྩེགས་ལ་སྣང་བཞི་ལུགས། །ཤ་རྒྱས་ཆོ་ག་སྦྱིན་སྲེག་བླུགས། །རྒྱལ་མོ་ཝ་ཤིག་རྩུབ་གྱུར་གྱིས། །སྟོང་བྲུབ་མི་ཁ་བྲུབ་མནན་གྱིས། །དགྲ་སྲི་བྲུབ་ལ་དཔལ་ཁྲུས་གྱིས། །གནམ་ས་སྣང་བརྒྱད་བརྒྱ་ཚར་ཐོན། །གསེར་འོད་ཐོན་ལ་གཡང་སྐྱབས་བྱ། །དེ་ལྟར་རྒྱས་པ་མ་འཕྲོད་ན། །ཆོས་དཀོར་དང་ནི་འོག་རྟ་དང་། །ཁལ་མཛོ་སེམས་ཅན་ཀུན་གྱི་སར། །འགགས་པ་སོལ་འགགས་མདུད་པ་ཁྲོལ། །དབང་ཐང་གཡང་གི་ར་
བ་ཡིན། །ངན་ན་ཟ་ཁ་བསེ་རག་ཞུགས། །དབང་ཐང་བདུད་རྩིའི་འོ་མ་ཕོས། །ཡར་ལ་མཚུན་བཅོས་གཡང་ལེན་བྱ། །ཆུ་སྦྱིན་ནག་པོ་སྟོང་བསྔོའོ། །ཨ་རོ་ལི་ཀའི་ཆུ་གཏོར་དང་། །ཕོ་མ་རུ་རིང་གྲེ་སེལ་གྱིས། །ཕོ་ལམ་བྱེ་བྲལ་བྱུང་བ་དང་། །མི་ནག་གཡག་ཁམ་བཀལ་བ་དང་། །ར་ལུག་དཀར་ནག་ཕྱེ་གསལ་དང་། །གླང་པོ་ཆེ་ཡི་སྣ་བསྒྱུར་དང་། །མི་ནག་མགོ་གསུམ་བཟློག་པ་གྱིས། །གནམ་གྱི་འཇུ་ཐག་ཆད་པ་ན། །བསྐང་བཤགས་གྱིས་ལ་གཡག་ནག་དང་། །ར་ལུག་ནག་པོ་རྩེན་ནི་བཟང་། །གསས་མཁར་བརྩེགས་ལ་ཚེ་སྒྲུབ་གྱིས། །ཚེ་དབང་ལ་སོགས་དབང་བསྐུར་ཞུས། །ས་ཡི་རྟེན་ཕུར་བུད་པ་ན། །མཚོ་སྨན་རྒྱལ་མོའི་གུར་མདོས་གྱིས། །མཆོད་རྟེན་སྤང་ཐུབ་བརྩེགས་ན་བཟང་། །རྒྱ་ཡི་ཐག་པ་ཆད་པ་ནི། །ཤ་རྒྱས་ཆོ་གས་འགག་པ་སེལ། །ཚེ་འཛིན་རྐང་པ་བུད་པ་ན། །བུ་ཚ་མིང་སྲིང་འགྲུལ་པ་དང་། །བུ་དང་ཚ་བོ་མང་ས་ལ། །ཕྱེ་མར་གྱིས་ལ་སྟོན་མོ་དྲོངས། །ཀླུ་མཆོད་གྱིས་ལ་སྲིད་སློང་གྱིས། །རྩ་དཀར་གྱིས་བྱ་སྒོང་བལྟས་ན་འགྱུར། །ད་ནི་ཡར་དེད་སྤྱད་པ་ནི། །གཅིག་པ་བདག་གི་ས་ཡིན་པས། །ནད་བཀག་
ནད་ངོ་མ་བབ་དགོས། །གཉིས་པ་བུ་ཡི་ས་ཡིན་པས། །ལུས་ཀྱི་རྩེ་ར་མ་སྟོང་དགོས། །གསུམ་པ་བུད་མེད་ས་ཡིན་པས། །བུད་མེད་འཕང་ར་མ་སྟོང་དགོས། །མགོ་ལ་མདུན་ཞུ་མ་གྱོན་དགོས། །ཐག་ཆ་སྐེད་ནས་མ་ཡལ་དགོས། །བཞི་པ་ཕ་སྤུན་ས་ཡིན་པས། །གཤེད་ཀྱི་དགྲ་ངོ་མ་ལང་དགོས། །ལྔ་པ་མྱེས་པོའི་ས་ཡིན་པས། །ལྔ་མཐུན་བྱེ་བྲལ་མ་བྱུང་དགོས། །དྲུག་པ་ཡང་མྱེས་སྤྱན་གྱི་ས། །འདྲེ་ཡི་འདྲེ་མགྱོགས་མ་བབ་དགོས། །བདུན་པ་ཕ་ཕྱོགས་ཞང་པོའི་ས། །བདུན་ཟུར་གྱོད་ངོ་མ་ལང་དགོས། །བརྒྱད་པ་བུད་མེད་ཞང་པོའི་ས། །རྒྱ་མ་འཐེང་སྡོད་མ་བབ་དགོས། །དགུ་པ་བུ་ཆུང་ཞང་པོའི་ས། །གསེར་གྱི་ཟམ་པ་མ་ཆག་དགོས། །བཅུ་པ་མང་འཁོར་བྲན་གྱི་ས། །རོ་འཛིན་དཔུང་པ་མ་བརྫིས་དགོས། །བཅུ་གཅིག་དགྲ་བླའི་ས་ཡིན་པས། །ལྷ་ངོ་ཁྱི་ཡིས་མ་བརྫིས་དགོས། །བཅུ་གཉིས་འོག་རྟའི་ས་ཡིན་པས། །གཤིན་གྱི་དོ་མ་མ་ཆག་དགོས། །བཅུ་གསུམ་ཁལ་མཛོའི་ས་ཡིན་པས། །དགྲ་རྐུན་ཐག་མདའ་མ་ཕོག་དགོས། །བཅུ་བཞི་སྲིད་ཀྱི་ས་ཡིན་པས། །མི་ནོར་བླ་མཚོ་མ་སྐམ་དགོས། །བཅོ་ལྔ་འདྲེ་ཡི་འགྲིམ་ལམ་ཡིན། །ལྷ་འདྲེའི་ཆོ་འཕྲུལ་
མ་བསྟན་དགོས། ༈ །ཡང་ཅིག་ཡར་དེད་བྱེད་པ་ལ། །གཅིག་པ་བདག་གི་ས་ཡིན་པས། །བྱི་བ་ལོ་པའི་ལོ་མཛོད་ཡིན། །བྱི་རྟའི་རུ་ཆོད་མ་བབ་དགོས། །གཉིས་པ་བུ་ཡི་ས་ཡིན་པས། །གླང་ལོ་པ་ཡི་ལོ་མཛོད་ཡིན། །གླང་ལུག་ཕུང་འགྱོད་མ་བྱུང་དགོས། །གསུམ་པ་ཆུང་མའི་ས་ཡིན་པས། །སྟག་ལོ་པ་ཡི་ལོ་མཛོད་ཡིན། །སྟག་སྤྲེལ་བདུན་ཟུར་མ་བྱུང་དགོས། །བཞི་པ་ཕ་སྤྱན་ས་ཡིན་པས། །ཡོས་བུ་ལོ་པའི་ལོ་མཛོད་ཡིན། །བྱ་ཡོས་བྱེ་བྲལ་མ་བྱུང་དགོས། །ལྔ་པ་སྐྱེས་སྤྱན་ས་ཡིན་པས། །འབྲུག་ལོ་པ་ཡི་ལོ་མཛོད་ཡིན། །ཁྱི་འབྲུག་གནམ་སྒོ་མ་བྱེ་དགོས། །དྲུག་པ་ཡང་མྱེས་སྤུན་གྱི་ས། །སྦྲུལ་ལོ་པ་ཡི་ལོ་མཛོད་ཡིན། །ཕག་སྦྲུལ་ས་སྒོ་མ་བྱེ་དགོས། །བདུན་པ་ཕ་ཕྱོགས་ཞང་པོའི་ས། །རྟ་ལོ་པ་ཡི་ལོ་མཛོད་ཡིན། །བརྒྱད་པ་མ་ཕྱོགས་ཞང་པོའི་ས། །ལུག་ལོ་པ་ཡི་ལོ་མཛོད་ཡིན། །དགུ་པ་བུ་ཆུང་ཞང་པོའི་ས། །སྤྲེལ་ལོ་པ་ཡི་ལོ་མཛོད་ཡིན། །བཅུ་པ་ཡང་འཁོར་བྲན་གྱི་ས། །བྱ་ལོ་པ་ཡི་ལོ་མཛོད་ཡིན། །བཅུ་གཅིག་དགྲ་བླའི་ས་ཡིན་པས། །ཁྱི་ལོ་པ་ཡི་ལོ་མཛོད་ཡིན། །བཅུ་གཉིས་འོག་རྟའི་ས་ཡིན་པས། །ཕག་ལོ་པ་ཡི་
ལོ་མཛོད་ཡིན། །དེ་རྣམས་བདུན་ཟུར་ནང་འཕྲད་ངན། །དགྲ་འཕྲད་རྡེའུ་ནག་ན་ངན། །བསྙབས་པའི་ལག་པ་ཆགས་ན་ཆེ་རྒྱུད་ལ་ངན། །ལྟ་བའི་མིག་ལོང་ན་རང་ལ་ངན། འགྲོ་བའི་རྐང་པ་བུད་ན་ཆུང་རྒྱུད་དང་བྲན་གཡོག་ལ་ངན། །གཡས་ཕ་སྤུན་ས་ནས་ཕར་བརྩི། །གཡོན་མྱེས་སྤུན་ས་ནས་ཚུར་ལ་བརྩི། །མྱེས་པོའི་ས་ནས་ནག་པོ་གཉིས་བབ་ན་ངན། །སྤྱིར་ཐམས་ཅད་ལན་དང་བཅས་པས་དཔྱད་དོ། །དཀར་པོ་འབྱམ་ཐལ་བྱུང་ན་སྐྱིད་ལ་བརྒལ་བས་ངན། །ནག་པོ་བྱུང་ཐལ་ན་སྡུག་ལ་ལུས་པས་ངན། རྡེལ་ནག་མང་ན་ནག་པོ་མགོ་གསུམ་དང་དགྲ་བྲུབ་དྲག་པོ་བྱ། རྡེའུ་དཀར་ནག་ཆ་མཉམ་ནས། དཀར་པོ་གསུམ་བརྩེགས་མང་ན་བཟང་ངོ་། །སྨེ་བའི་སྒང་རྩིས་ཆེན་མོ་རྫོགས་སོ།། །།རྒྱ་ཁྱི་ཐན་གྱི་ལ་ཁར་གསེར་མཎྜལ་གྲུ་གང་བ་གཅིག་ལ་མེ་ཤེལ་ཆུ་ཤེལ་གྱིས་བརྒྱན་དེ། མུ་ཏིག་གི་ཕྲེང་བ་བརྒྱ་ཕྲག་ཕུལ་ནས་ཞུས་པ་ཡིན། འདི་ནི་བརྩིས་ཀྱི་རྒྱུད་ལྔ་ཡང་སྙིང་ཡིན་ཅིང་གར་ཐོད་ཐོད་མི་བྱ། བྱས་ན་འབྱུང་བ་ལྔ་དང་ལྷ་འདྲེ་ཀུན་གྱི་ཆད་པ་འོང་། །དམ་ཚིག་གཡོ་རུ་ཅན་ལ་མ་སྤེལ་ཅིག །ང་ཆེ་ང་མཁས་ཅན་ལ་མ་སྤེལ་ཅིག །རྫུན་མ་མགོ་སྐོར་ཅན་མ་མ་སྤེལ་
ཅིག །དམ་ཚིག་དངོས་ལྐོག་ཅན་ལ་མ་སྤེལ་ཅིག །གཅིག་རྒྱུད་མ་གཏོགས་གལ་ཏེ་སྤེལ་གྱུར་ན། །ལྷ་འདྲེ་ཀུན་གྱིས་ཆོ་འཕྲུལ་འོང་བར་ངེས། །འདི་བྲིས་དགེ་བས་འབྲས་བུ་བཟང་པོ་ཀྱིས། །བདག་དང་མཐའ་ཡས་སེམས་ཅན་མ་ལུས་ཀུན། །བཅོམ་ལྡན་འཇམ་དཔལ་ཐུགས་རྗེའི་བཟུང་སླད་དུ། །རྣམ་མཁྱེན་རྒྱལ་བའི་གོ་འཕང་ཐོབ་གྱུར་ཅིག །ཅེས་པ་ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།