སྨེ་བའི་སྒང་རྩིས་གསལ་བྱེད།
སྨེ་བའི་སྒང་རྩིས་གསལ་བྱེད་ཅེས་བྱ་བ་བཞུགས་སོ། །ན་མོ་མཉྫ་ཤྲཱི་ཡེ། འཇམ་དཔའི་དབྱངས་ལ་ཕྱག་འཚལ་ལོ། །སྨེ་བའི་སྒང་རྩིས་གསལ་བྱེད་བརྗོད། །ཕོ་བྲང་ལིང་དགུ་བརྒྱ་བཅུ་གཅིག །དབུས་ནས་གནམ་ལྕགས་རི་བོ་ལ། །མེ་ཆུ་ས་ཤིང་རླུང་བསྐྱོད་དབུས་སུ་འཕུར། །གསུངས་པ་ཕོ་བྲང་ལིང་དགུ་བཀོད་ལུགས་ཏེ། །རང་རང་སྨེ་བ་གང་ཡིན་དབུས་བཞག་ལ། །དེ་ནས་གྱེན་དུ་བརྩི་བ་འཁྲུལ་སྨེ་སྟེ། ༡༢ ༣༤༥༦༧༨༩ །དེང་སང་རྩིས་གཞི་ཀུན་ལ་དེ་ལྟར་ཡོད། །དེ་ནི་རྩིས་ལོག་རྒྱ་ཡི་ངན་བསླབ་ཡིན། །རྩིས་གསར་འཁྲུལ་མེད་མཁས་པ་ཁྲ་མོའི་ལུགས། ༩༨༧༦༥༤ ༣ ༢༡ །དེ་ལྟར་བཀོད་པའི་རྩིས་གཞིའི་སྟེང་ནས་རྩིས། ༈ །དེ་ནས་སྨེ་བའི་སྒང་རྩིས་རྡེལ་བཞག་ནི། །དགུ་གླིང་ལྔ་པོ་རྩམ་པ་སོགས་ཀྱིས་བྲིས། །དང་པོ་བརྩི་བྱའི་ལུས་ཀྱི་སྨེ་བ་དེ། །དབུས་སུ་བཞག་པའི་དགུ་གླིང་སྟེང་ནས་བརྩི། །སྨེ་སྒོ་ཤར་ནས་སྨེ་ཕུག་ནུབ་ཡིན་ཏེ། །སྨེ་བ་ལོ་ཡི་ཕོ་མོ་ཡིན་པའི་ཕྱིར། །སྟག་འབྲུག་རྟ་སྤྲེལ་ཁྱི་དང་བྱི་ལོ་པ། །དབུས་ནས་ཤར་དང་ཤར་ནས་ཤར་ལྷོ་ནས། །གཡས་སུ་བསྐོར་ཏེ་གིན་ནས་དབུས་སུ་འཇུག །ཡོས་སྦྲུལ་ཕག་ལུག་བྱ་ཕག་གླང་ལོ་པ། །དབུས་
ནས་ཤར་དང་ཤར་ནས་བྱང་ཤར་ཏེ། །གཡོན་དུ་བསྐོར་ནས་ཟིན་ནས་དབུས་སུ་མཇུག །མགྱོགས་རྩིས་ལིང་ཚེ་རེ་ལ་བཅུ་བཅུ་བསྒྲངས། །དེ་ནས་བཅུ་གཅིག་བཅུ་གཉིས་ལ་སོགས་པ། །བསྒྲུང་བ་སྐྱེ་བའི་སྐོར་ལུང་བསྟན་པའོ། ༈ །དང་པོ་བརྩི་བྱའི་ལུས་ཀྱི་སྨེ་བ་དེ། །དགུ་ལིང་དབུས་སུ་གང་འདུག་སྟེང་ནས་བརྩིས། །དེ་དང་གར་བབ་འཕུར་སྨེ་དེ་ཉིད་འཐབ། །མ་དང་འཕྲད་ན་རྡེའུ་དཀར་པོ་གཉིས། །གྲོགས་དང་འཕྲད་ན་རྡེའུ་དཀར་པོ་གཅིག་།བུ་དང་འཕྲད་ན་རྡེའུ་ནག་པོ་གཅིག །དགྲ་དང་འཕྲད་ན་རྡེའུ་ནག་པོ་གཉིས། །ས་ཆུ་ནང་འཕྲད་རྡེའུ་དཀར་པོ་གཅིག །མེ་ལྕགས་ཤིང་གསུམ་ནང་འཕྲད་ནག་པོ་གཅིག །དེ་ནི་རྗེས་མ་ཀུན་ལ་རིགས་འགྲེས་སོ། ༈ །དེ་ནས་ལུས་སྨེའི་ཤར་གྱི་སྨེ་བ་དེ། །དབུས་སུ་བཞག་པའི་ལིང་ཚེ་སྟེང་ནས་འཕུར། །དེ་ཡི་འཕུར་སྨེ་གར་བབ་དེ་ཉིད་དེ། །དང་པོ་རྩ་བའི་ལུས་སྨེ་འཐབ་རྒྱུ་ཡིན། །དབུས་བཞག་ཉིད་དང་འཐབ་རྒྱུ་མིན་པའི་གནད། །དང་པོ་ལུས་སྨེ་དེ་ཉིད་རྡེའུ་དེ། །ལྷོ་ཡི་དགུ་ལིང་དབུས་སུ་བཞག་པར་བྱ། །དེ་རྗེས་དེ་ནི་ལྷོ་ཡི་ཤར་དུ་བཞག །དེ་བཞིན་ལུས་སྨེ་ཤར་ལྷོའི་སྨེ་བ་འཕུར། །དེ་ཡི་གར་བབ་ལུས་སྨེ་ཉིད་དང་
འཐབ། །དེ་བཞིན་རྡེལ་དེ་དེ་ཡི་ཤར་ལྷོར་བཞག །དེ་བཞིན་ལྷོ་དང་ལྷོ་ནུབ་ནུབ་བྱང་དང་། །བྱང་ཤར་རྡེའུ་དགུ་རྫོགས་ཏེ། །དེ་ནས་སྲོག་གི་སྨེ་བ་སྔར་ལྟར་འཕུར། །དབུས་ཀྱི་རྡེའུ་དགུ་པོ་རྒྱབ་པར་བྱ། །དེ་ནས་དབང་ཐང་སྨེ་བ་སྔར་ལྟར་འཕུར། །བྱང་གི་རྡེའུ་དགུ་པོ་བརྒྱབ་པར་བྱ། །དེ་ནས་རླུང་རྟའི་སྨེ་བ་སྔར་ལྟར་འཕུར། ཤར་གྱི་རྡེའུ་དགུ་པོ་བརྒྱབ་པར་བྱ། །དེ་ནས་མ་རླུང་རྨེ་བ་ཞེས་བྱ་བ། །མ་ཡི་ལོ་གྲངས་དུ་ལོན་ཤེས་དགོས་ཏེ། །མ་ཡི་ལོ་གྲངས་དུ་ལོན་བརྩི་བར་བྱས། །མ་ཡི་ལོ་གྲངས་དུ་ལོན་དེ་ནང་ནས། །གཅིག་ནི་མ་གཏོགས་བུ་ཡི་ལོ་གྲངས་ཕྲིས། །ལོ་གྲངས་དུ་ལོན་བུ་དེ་སྐྱེས་པའི་ཕྱིར། །མ་ཡི་སྐྱེས་སྨེ་གང་ཡིན་དབུས་བཞག་པའི། །སྨེ་བ་འཕུར་ལ་མ་ཡི་འཕུར་སྨེ་སྟེ། །གར་བབ་དེ་ནི་མ་རླུང་རྨེ་བ་ཡིན། །དེ་ཉིད་འཕུར་ལ་ནུབ་ཕྱོགས་རྡེལ་དགུ་བརྒྱབ། །གལ་ཏེ་མ་ཡི་ལོ་གྲངས་མ་ཤེས་ན། །བརྩི་བྱའི་སྤར་ཁ་གང་ལ་བབ་པ་ཡིས། །གནས་པ་ཡུལ་གྱི་སྨེ་བ་དེས་ཚབས་བྱས། །ལི་དགུ་ཁོན་གཉིས་དྭ་བདུན་ཁེན་དང་དྲུག །ཁམ་གཅིག་གིན་བརྒྱད་ཟིན་གསུམ་ཟོན་དང་བཞི། །དེ་ནས་སྤར་སྨེ་ཞེས་བྱ་ཡིན། །དགུ་མིག་ས་ལ་སྒང་
རྩིས་མི་སྤངས་གསུངས། །དཔེར་ན་བཅུ་དགུ་ཉེར་བརྒྱད་ལ་སོགས་པ། །སྨེ་བའི་དབུས་སུ་ཚུད་པ་དེ་ལ་ནི། །སྒང་རྩིས་མི་བྱ་བྱས་ཀྱང་འཐབ་རྒྱུ་མེད། །འོན་ཀྱང་དབུས་ཚུད་སྨེ་བའི་སྐག་ཆེན་ཡིན། །གསང་སྐག་སྨེ་བའི་སྐག་ཆེན་ཞེས་བྱའོ། །འོན་ཀྱང་རྡེའུ་བཞི་བཅུ་ཞེ་ལྔ་ལས། །རེ་མིག་དགུ་ལ་དབུས་ལྔ་གལ་ཆེ་སྟེ། །རྩིས་མིག་རྣམ་པ་ལྔ་ཞེས་བྱ་བ་ཡིན། །དཔྱད་ལུགས་ལ་སོགས་རྩིས་གཞུང་ཉིད་ལ་ལྟོས། །ལྷ་བཟོ་ཚེ་དབང་རྒྱལ་གྱིས་བསྐུལ་བའི་ངོར། །རྣམ་གཡེང་ཆེ་སྐབས་རཱ་ག་ཨ་སྱས་སྨྲས། །དགེ་སློང་བིརྱ་ཞེས་བྱས་ཡི་གེར་བཀོད། །རྣམ་གཡེང་སྐྱོན་གྱི་འགའ་འཁྲུལ་བྱུང་ན་བཤགས། །རྩིས་མཁན་གསར་བུ་འགའ་ཡི་མིག་ཕྱེས་ནས། །འབྱོར་ལྡན་སྦྱིན་བདག་འགའ་ཡི་རྐྱེན་སེལ་ཤོག། །།