རྒྱ་ནག་པོའི་ལུགས་མཁས་པ་ཁྱུང་གི་མན་ངག་གཤིན་རྩིས་རྒྱ་མོ་དར་ཚགས།
རྒྱ་ནག་པོའི་ལུགས་མཁས་པ་ཁྱུང་གི་མན་ངག་གཤིན་རྩིས་རྒྱ་མོ་དར་ཚགས་བཞུགས་སོ། །
རྒྱ་ནག་སྐད་དུ། གམ་བུ་ལི་ཙ་ཙན་དུ། བོད་སྐད་དུ། གཤིན་རྩིས་རྒྱ་མོ་དར་ཚགས་ཞེས་བྱ་བ། དང་པོ་ལོ་གཤེད་རྩི་བ་ནི། བྱི་བ་ལོ་པ་ཤི་ན། ཟ་འདྲེ་མེ་ལོང་སོགས་རྫས་འོད་ཅན་ལ་གབ་ཡོད། འབྲུག་ལོ་དང་རྟ་ལོ་བ་ཁྲིད་ཟེར། བཟའ་མི་བཞི་པ་ཁྱི་དང་རྟ་སྔོན་པོ་ཡོད་པ་གཅིག་ལ་སོགས། བན་བོན་གཉིས་གསུམ་གྱི་གཤེད་དབྱུང་། ཞག་ལྔ་ཚུན་ཆད་ལ་རིན་པོ་ཆེའི་གླུད་དུ་ཐོང་། རིམ་གྲོ་ལ་ཐང་འབུམ་དྲག་པོ་གྱིས། མ་བྱས་ཟླ་བ་བཞིའི་ཁོང་དུ་གཤེད་ཐབ་མྱུར་དུ་འོང་ནས་གཟབ་ཟེར། གླང་ལོ་བ་ཤི་ན། གཤེད་མི་རྒྱུད་ལ་སོང་། སྦྲུལ་དང་ལུག་ལོ་པ་
ཁྲིད་ཟེར། བཟའ་ཚང་ལྔ་པའམ། གླང་ཁམས་པའི། ཁྱི་ཁམས་པ་ཡོད་པ་ལ་སོགས། སེམས་སེར་པོའི་རིག་ཡོད་པ་ལ་འགྲོའོ། །སྐྱེའམ་སྒྲོ་བའི་ནང་དུ་རྫས་ཁ་དོག་མི་མཐུན་པའམ། ཟས་མི་གཙང་བ་ཡོད་པའི་ནང་དུ་གཤེད་གབ་ཡོད། དེ་ལ་བན་བོན་གསུམ་གྱི་ར་སྤུས་སྦྱིན་སྲེག་བྱ། ཀོང་ཙེ་གཏོ་བསྒྱུར་བྱ། དེ་ལྟར་མ་བྱས་ན་ཟླ་བ་གསུམ་གྱི་ཁོང་གཤེད་ཤུལ་དུ་བཟློག །སྟག་ལོ་པ་ཤི་ན། སྲིང་མོའམ་བུད་མེད་བར་མ་ལ་སོང་། བུད་མེད་ཡིན་ན་མིང་པོའམ་བུ་བར་མ་ལ་སོང་། གླང་དང་བྱ་ལོ་བ་ཁྲིད་ཟེར། སླ་ང་ལ་གཤེད་གབ་ནས་ཡོད་པའི་རུས་མི་
གཅིག་པའི་བན་བོན་ལྔས་སླ་ངའམ། ལུག་ལྤགས་གསོབ་ཀྱི་སྟེང་དུ་གཤེད་སྒྲོལ། མགོ་བོ་བྱང་དུ་བཏང་། སུག་བཞི་མལ་དུ་ཤུལ་ཐང་བུ་བྱའམ་སླ་ང་རྩིས་མཁན་ལ་སྦྱིན། བརྒྱ་བཞིའི་ཆོ་ག་བྱ། མ་བྱས་ན་ཟླ་བ་བཞིའི་ཁང་དུ་གཤེད་བཟློག །ཡོས་ལོ་ཤི་ན། གཤེད་ཁ་གསུམ་དུ་ཡོད་པའི། གཅིག་རྟ་ལོ་བ་གཅིག་ལ་སོགས། གཅིག་བུད་མེད་ཤ་དཀར་ལ་བོང་ཁེ་ཐུང་བ་གཅིག་ལ་སོགས་གཅིག་མི་འཕན་པར་གྲགས་པ་གཅིག་ལ་སོགས། བན་བོན་གསུམ་གྱི་ར་ཁྱི་ཕག་གསུམ་གྱི་ཐོད་པར་གཤེད་གསོད། དེ་ནས་བྱ་གཅིག་གཡས་སུ་སྟེང་། དེ་ནས་གཏོ་བཟློག་བྱ། དེ་ལྟར་མ་བྱས་ན་དབྱར་ར་བ་གཤེད་བཟློག །འབྲུག་ལོ་བ་ཤི་ན། སྤྲེའུ་དང་ཁྱི་ལོ་པས་ཁྲིད་ཟེར། གཡུའམ་མར་ལ་གཤེད་གབ་ཡོད། བདེན་པ་གསུམ་གྱི་ཁྱི་ཐོད་ཀྱིས་འཁོར་ལོའི་གཤེད་བསྒྲལ། ཁྱི་ལུག་གཡས་སུ་ཐོང་། ཀླུ་འབུམ་འདོན། གཙུག་ཏོར་ཐོན། ཤ་བ་རུས་རྒྱས་གཏོང་། ས་བདག་འཁྲུགས་གཏོ་གཏོང་། དེ་ལྟར་བྱས་ན་གཤེད་མི་བཟློག་གོ །སྦྲུལ་ལོ་བ་ཤི་ན། བྱ་ཕག་ལོ་པ་ཁྲིད་ཟེར། སྒྲོ་བ་ནག་པོ་ཁ་རལ་བའམ། སྣོད་ནག་པོའི་ནང་ནས་རྒའམ་སྣམ་བུའམ། བཟོ་རས་དམར་
པོའམ། ལྤགས་པའི་ནང་ལ་གཤེད་གབ་ཡོད་པས། བན་བོན་གསུམ་གྱི་གཡའ་རོག་གམ་ར་རོག་གི་སྟེང་དུ་གཤེད་གསོད། མགོ་བྱང་དུ་བཏོན། ལག་པ་གཡས་ཤར་དུ་བཏང་། ལག་པ་གཡོན་ནུབ་ཏུ་བཏོན། རྒལ་རུས་ས་ལ་གཏུག །མདོ་དང་གཙུག་ཏོར་ཐོན། ཚེ་གཡང་འགུགས། མཚོ་སྨན་གུར་མདོས་བྱ། དེ་ལྟར་མ་བྱས་ན་བུད་མེད་ཤ་མདོག་དམར་པོ་སྒོ་ཁྱི་དམར་པོ་ཡོད་པ་ལ་འགྲོའོ། །རྟ་ལོ་པ་ཤི་ན་བྱི་བ་ལོ་པ་དང་ཡོས་ལོ་པས་ཁྲིད་ཟེར། བུད་མེད་མིང་ལྷ་ལ་གྲས་པའམ། དེའི་བུ་འབྲིང་པོ་བ་ཟལ་མོ་ཡོད་པ་ལ་སོང་། དེ་ཕག་ནག་དང་བྱིས་བའི་ཐོད་པར་གཤེད་བསྒྲལ། དེ་ནས་སྒོ་ལྷོ་ལ་ལྟ་བས་བུད་མེད་སྦྲུམ་མ་ཁྱིའམ་རྟ་དམར་པོ་ཡོད་པ་ལ་འགྲོའོ། །ལུག་ལོ་པ་ཤི་ན་གླང་ལུག་ལོ་པས་ཁྲིད་ཟེར། མིང་འབྲུག་ལོ་གྲས་པ་ལ་ཟ་འདྲེ་སོང་། སྒྲོ་བ་རྙིང་པ་གཅིག་གི་ནང་ན་སྣམ་བུའམ་ཀོ་བའམ་ལྷམ་སོགས་སམ་ཀྲས་མདོང་མ་དག་པ་གཅིག་གཉིས་འདུག་པ་དེ་ལ་གབ་ཡོད། དེ་བན་བོན་གསུམ་གཡའ་རོག་དང་། ལུག་ནག་ལྤགས་པའི་སྟེང་དུ་གཤེད་གསོད། རུས་མི་གཅིག་དགུའི་ཆོས་འདོན། གཡང་འགུགས་ཚ་ཚ་མང་དུ་བཏབ། གཤེད་
བཞིའི་གཏོ་ཆོས་བྱ། ལུང་དགུའི་ཆུ་བརྒལ། དེ་ནས་ནུབ་ཕྱོགས་སུ་བུད་མེད་གདོང་བ་གཉེར་མ་ཡོད་པ་བཟའ་མི་གསུམ་པ་ལ་འགྲོ་ཟེར་རོ། །སྤྲེའུ་ལོ་བ་ཤི་ན། སྟག་དང་ཕག་གི་ལོ་བ་ལ་ཟ་འདྲེ་ཁ་འཕོ། ཁྱི་ལོ་པས་ཁྲིད་ཟེར་རོ། །ཁྱད་པར་ཁྱིའི་མིང་ཅན་ལ་འགྲོ་ཉེན་ཆེ། ཟ་འདྲེ་སླ་ང་ལ་གབ་ཡོད། བན་བོན་བདུན་གྱི་གཤེད་དཔྱད་མཆོད་རྟེན་ལ་ན་བཟའ་གསོལ། སྲི་གནོན་དང་སྐག་བཟློག་བྱ། ཀོང་ཙེ་གཏོ་བསྒྱུར་བྱ། སྤྱིར་ཕ་མེས་ཀྱི་དུར་འདྲེ་རྙིང་པ་ལང་བས་གནོད། དེ་ནས་ཟ་འདྲེ་བྱང་ལ་སོང་། ཕ་སྤུན་ཆུང་རྒྱུད་ལ་གཤེད་སོང་བས་བུ་ཚ་ཆུང་བ་ལ་ངན། བྱ་ལོ་པ་ཤི་ན་ཡོས་དང་གླང་ལོ་པས་ཁྲིད་ཟེར་རོ། །སྐྱེའམ་ཕད་ཆུང་མཚན་མ་ཅན་གྱི་ནང་དུ་ཀོ་བའམ་བལ་སྟན་བ་སྤུ་རིགས་སོགས་ཡོད་པ་ལ་གཤེད་།གབ་ཡོད། དེ་རྣམས་བན་བོན་ལ་བྱིན། ཡོན་འབུལ་བར་བྱ། མ་བྱས་ན་ཟླ་བ་གཅིག་ནས་ལྡོག །ནལ་ཕྲུག་དང་མི་བྱེས་སུ་ཤི་བ་ཡོད་ན་ཐུབ། མེད་ན་ལུག་གྲོ་མོའི་ཐོད་པའི་ནང་དུ་གཤེད་གསོད། བསང་ཐོང་། དུར་ཁ་གསུམ་དུ་སྦས་སོ། །བཙན་མདོས་བྱའོ། །འདྲེ་མདོས་ཚེ་འགུགས་རྣམས་བྱའོ། །ཁྱི་ལོ་པ་ཤི་ན། འབྲུག་ལོ་དང་ལུག་ལོ་པས་ཁྲིད་
ཟེར། གཤེད་བན་བོན་ཟླར་ཡོང་། བཟའ་མི་ལྔ་ཡོད་པའམ། སྤུན་ལྔ་བ་མིང་དཔལ་དང་འབྲུག་ལ་གྲས་པ་ལ་སོང་། ཕག་ཁྲ་བོ། ར་ཁྲའི་སྟེང་དུ་གཤེད་བསད། ཁྱི་ཐོད་ལ་གབ། རཀཱ་དགྲ་མདོས་དང་གཏོར་ཟློག་བྱ། དེ་མི་སྐད་འགག་པའམ། སྒོ་ཤར་དང་ལྷོར་བལྟས་པ་ལ་གཟབ་དགོས། ཕག་ལོ་བ་ཤི་ན། ཕག་དང་ཡོས་ལོ་བ་ཁྲིད་ཟེར་རོ། །བུད་མེད་དབྱངས་ལ་གྲས་པའམ། ཕོ་ཧྲིང་མོ་ཧྲིང་ངམ། ཕ་སྤུན་ཆེ་རྒྱུད་རིགས་ལ་སོགས། རོ་བདག་ནད་ཡམས་འབྱུང་ཉན་ཡོད་པས་ཆུ་གཏོར་ཐོན། དབང་ཕྱུག་ལས་བྱང་བྱ། སྣང་བརྒྱད་ཀྱི་གཟུངས་ཐོན། ས་བདག་བསྒྱུར་གཏོ་གྱིས། བྱང་ཕྱོགས་ཀྱི་སྐྱེས་ནག་དང་རྫས་ནག་གི་ལེན། བླ་བཙན་གྱིས་ཁྱེར། གཤིན་རྩིས་རྒྱ་མོ་དར་ཚགས་ལས་ལོ་གཤེད་པའི་ལེའུ་སྟེ་དང་པོའོ།། །། ༈ ན་མ་ཤི་ཀ་ལ་ཙཀྲ་ཡེ། འདིར་བཅོས་ཐབས་བསྟན་པར་བྱའོ། །གཟའ་ཉི་མ་ལ་ཤི་ན་དགུའམ་བདུན་ལ་དགོས། སྒྲིབ་ཨན་གྲོད་པའི་ནང་དུ་ཆུ་བླུག་ལ་ཉི་མའི་དལ་བྲིས། ཕག་ཐོད་ནམ་མཁར་ཕྱར་བས་ཐུབ། གཏོ་བཅོས་ཚིག་མའི་གླུད་གཟུགས་དགུ་ཆུ་སྐྱོགས་དགུ་ལྷོ་རུ་གཏོར་རོ། །ཆུ་གཏོར་ལེན་བཞི་
བཏང་། ཁྱུང་བཟློག་བྱ། ཉི་མ་རླུང་བདུད་སྤྱོད་པའི་གཏོ་ཡིན། །དེ་བྱས་ན་ལེགས་པར་འབྱུང་། །དར་ན་བཟང་། གུད་ན་ཡུགས་ས་རོ་ཁུར་ཡིན། ཟླ་བ་ལ་ཤི་ན། མག་པ་བུ་སྲིང་ལ་གདོས་སྲན་ཁ་དང་ཁམ་པ་བསྲེས་ལ་ཉའོ་གསུམ་བྱེད་ལྷོ་ནུབ་ཏུ་སྦས་སོ། །དེའི་སྟེང་དུ་ཚ་ཚ་གསུམ་བཞག་ན་བཟའ་སེར་པོ་གསོལ། གཟུངས་ཆོག་དང་ཚ་ཚ་མང་དུ་འདེབས། ཟླ་བ་ཉ་བདུན་བཅོས་པའི་གཏོ། དར་ན་བཟང་། གུད་ན་གླང་བུ་འདམ་བྱིང་ཡིན། སྒྲིབ་ན་རས་སྐྱེའི་ནང་དུ་ས་སེར་བླུག །ལུག་ཐོད་དར་སྣས་བརྒྱན་པས་ཐུབ། མིག་དམར་ལ་ཤི་ན། ཤུལ་དུ་ངན་པས། ཆུ་གཏོར་ལན་གསུམ་ཐོན། ཁྱི་ཐོད་ཁྲག་གི་བཀང་ཐེམ་པའི་འོག་ཏུ་སྦས་སོ། །འོམ་བུ་མགལ་བ་སྟེང་དུ་བཞག་གོ །དེའི་སྟེང་དུ་འོམ་བུའི་མེ་བུའི་དེ་ཆུའི་གསོད། དར་ན་བཟང་། རྒུད་ན་དམག་དཔོན་མནའ་ཟོས་ཡིན། སྒྲིབ་ན་བྱི་བའི་ཐོད་པའི་ནང་དུ་ཆུ་བླུག་བླུད་བུར་ནམ་མཁར་ཕྱར་བས་ཐུབ། ལྷག་པ་ལ་ཤི་ན། ལྔ་ལ་བཟློག་པས། ལྕགས་ཀྱི་མི་ཆུང་གཅིག་རོའི་རྣ་བར་སྦོས། སྲིན་ལག་དར་སྐུད་ཀྱིས་སྡམ། ཡན་ལག་བཞི་བོར་གཤིན་པོའི་མིང་མཚལ་གྱིས་བྲིས། དེ་ལྟར་བྱས་པས་
ཤི་སྒབ་ཆོད། སྒྲིབ་ན་གླང་ཐོད་གནམ་དུ་ཕྱར་ཞིང་། ལུག་ཐོད་ལག་པའི་བཙོན་དུ་བཟུང་བས་ཐུབ། དེ་ཡང་དར་ན་བཟང་བར་བཤད། རྒུད་ན་དམེ་ལག་འཐོར་བྱེད་ཡིན། ཕུར་བུ་ལ་ཤི་ན་ནག་མོ་བུ་ལ་དར་རྒན་རྒོག་ལ་ངན། དར་ན་བཟང་། རྒུད་ན་གྲྭ་ཏོག་གསེར་གསུམ་གཟུངས་འདུས་སྒྲོག །གཡང་སྐྱབས་གཡང་ལེན་གཡང་ཁ་བསྡོམ་པ་ཝ་སངས་ལ་ཤི་ན། བདུན་ལ་བདོས། དར་བ་དང་ཐུག་ན་གང་ཡང་མི་དགོས། རྒུད་ན་ལྕགས་ཀྱི་མི་ཆུང་ལྔ་རོའི་མཐའ་ལ་བསྐོར་དེའི་སྟེང་དུ་ཤིང་མེ་བཏང་། དེ་ལྟར་བྱས་ན་ལེགས་པ་འོང་། སྤེན་པ་ལ་ཤི་ན། ལྔ་ལ་བཟློག་པའི་ངན་ཐག་ཆོད། བྲ་འོ་སྲན་མ་ལ་བྱས་པའི་མི་གཟུགས་རོའི་མཐའ་ལ་བསྐོར། ཁྱི་ཐོད་དང་མགལ་བ་ནུབ་བྱང་དུ་སྦས། ཕྱིར་ལོག་པ་གཟའ་དང་མི་ཡི་ཁམས་དང་བསྟུན་པར་བྱའོ། །གཏོ་མཁན་རང་ཡང་གཟབ་པ་གལ་ཆེའོ། །དེ་ལྟར་གཟའ་བདུན་བཅོས་ལུགས་སོ། ༈ །དར་རྒུད་ལེགས་པར་བརྟག་པར་གཅེས། དར་བ་རབ་ཡིན་གྱོད་པ་འབྲིང་། །ཞུད་པ་འབྲིང་སྨད་རྒུད་པ་ངན། །དེ་ལྟར་ཀུན་ལ་ཤེས་པར་གྱིས། །གཟའ་ཡི་ཁ་དམར་པ་མ་ཏ། །ཡང་རྒྱུ་སྐར་ཉེར་བརྒྱད་
ཀྱི་རྩིས་ལ། སྐར་མ་སྨིན་དྲུག་ལ་ཤི་ན། ཕ་སྤུན་ནམ། བུ་སྲིང་མག་པ་ལ་ངན། ཡུལ་དེར་རོ་དྲུག་འོང་བས། བཅོས་ལ་མགལ་བ་དྲུག་ཐོད་སྣ་དྲུག་དང་ཁུང་དྲུག་ཏུ་སྦའོ། །ཁབ་མིག་ཅན་དྲུག་དུར་སར་སྦས་ངན་ཐུབ། སྣར་མོ་ལ་ཤི་ན། བུ་ཆེ་བའམ་ཚ་ཞང་དང་ཕ་སྤུན་ལ་ངན། བཅོས་ལ་རོ་དེའི་ཁར་ས་བྲེ་གང་བཞག་ལ། ཡང་དེ་ཚུར་བླངས་ནས་གཅན་གཟན་གྱི་གཟུགས་མང་པོ་བྱ། སྲི་མནན་མི་རུང་ནག་པོ་མགོ་གསུམ་གཏོང་། གཏོར་ཟློག་དང་བཟློག་པ་ལ་འབད་དོ། །མགོ་ལ་ཤི་ན། སྐྱེས་དར་མར་ངན་ཞིང་། གཞན་ཡང་མི་གཡང་ཉམས་དོགས་ཡོད་པས། སྲི་མནན་མེ་ཐུང་ནག་པོ་མགོ་གསུམ་གཏོང་། གཏོར་ཟློག་དང་བཟློག་པར་འབད། ལག་པ་ལ་ཤི་ན། སྤུན་ཉེའམ་ཕྱོགས་ངན། གཟའ་ཕུར་བུ་དང་འཛོམ་ན་བཟང་། ནབས་སོ་ལ་ཤི་ན། མི་ནོར་གཉིས་ཀ་ལ་ངན། བཅོས་ལ་རོ་རྐྱལ་ས་ནས་ས་བྲེ་གང་བླང་ནས་གཡང་སྐྱབས་བྱ་དགོས། རྒྱལ་ལ་ཤི་ན། ནོར་གཡང་ཉམས་པས་ནོར་རྒྱུན་མ་འདོན་པ་དང་། གཡང་སྐྱབས་དང་གཡང་ལེན་བྱེད་དགོས། སྐག་ལ་ཤི་ན་རོ་བདག་ཡུལ་མི་ཀུན་ལ་བཟང་། མཆུ་ལ་ཤི་ན། ཕ་སྤུན་ལ་ངན། རོ་བདག་ཤི་སྒབ་
རྟ་གྲིས་ཆོད་པས་བཟང་། རྟ་ཆུང་ལ་ཤི་ན། བྱིས་པ་ཆུང་ངུ་ལ་ངན་པས། བྱིའུ་ཆུང་འཕུར་མདོས་བྱ། ཟན་གྱི་མི་བྱང་དུ་སྦས། རྐང་གི་མི་ཤར་དུ་སྦས། མར་གྱི་མི་ལྷོར་སྦས། ཚེར་མ་ཅན་གྱི་མི་མེར་བསྲེགས། ཁྲ་ལ་ཤི་ན། བུད་མེད་ལུས་མ་ལ་ངན་པས། རོའི་ཁ་མར་སྟོན་ནས་དགོང་ཁ་སྲས་ངན་ཐུབ། བྱ་མ་ལ་ཤི་ན་བཟང་། བྱེའུ་ལ་ཤི་ན། ཁུང་མདོས་མང་དུ་བྱེད། ངར་མི་དགུ་མགལ་བ་དགུ་དུར་སའི་འོག་ཏུ་སྦས་སོ། །ས་རི་ལ་ཤི་ན། མི་ཁའི་གནམ་སྒོ་བྱེ་སྟེ་ངན། ཁྱུང་བཟློག་ལན་གསུམ་བྱ། །མགལ་བ་ཁ་ནག་དགུ་སྦས། གཟུངས་འདུས་ཚར་དགུ་འདོན་སྦྱིན་སྲེག་བྱེད་ཕུང་པོ་བསྲེགས། ས་ག་ལ་ཤི་ན། གནམ་སྒོ་བྱེ་སྟེ་ངན་པས། གནམ་སྒོ་གཅོད་དགོས་སོ། །ལག་སོར་ལ་ཤི་ན། ཕྱུགས་ལ་གོད་ཁ་འོང་ཞིང་མི་ལྔ་ལ་ངན། ཁུང་ཟློག་ལྔ་བྱེད། མགལ་བ་ལྔ་གནོན། གཤིན་པོའི་ལྷམ་ནང་དུ་དབང་པོ་ལག་པ་བླུག །ཁྱི་ཐོད་ཁྲག་གིས་བྱུག་ལ་ཨ་ཐེམ་པའི་འོག་ཏུ་སྦས་སོ། །ནུབ་ཏུ་རོ་མི་སྐྱེལ། གདུ་གུ་ལ་ཤི་ན། ཕ་ཚན་ཡོངས་ལ་ངན་པས། བཅོས་ལ་བྱ་སྲོག་གཅིག་སྨྲས་པས་ཐུབ་བོ། །སོག་པ་ལ་ཤི་ན། ཡུལ་མི་བྱིང་
ལ་ངན། ཁུང་བཟློག་གསུམ་བྱ། ར་ཁྱི་ཕག་གསུམ་ཐོད་པ་ལམ་བཞི་མདོར་མནན་དེས་ཐུབ། བྲེ་ལ་ཤི་ན། གཡང་ཉམས་འགྲོ་བས་གཡང་སྐྱབས་བྱ། ཕུལ་ལ་ཤི་ན། སྟོན་མོ་བྱེད་པ་ལ་ངན་པས་བྲེ་ལ་ནས་མ་བླུག་པར་ས་བྲེ་གང་ཕུང་པོའི་ཁར་བཞག །དབོ་ལོ་ཤི་ན། བུད་མེད་ལ་ངན་པས་སྒ་ཟན་ཕུང་པོའི་ཁ་རུ་བཞག །སྒྲོག་སྟོད་ལ་ཤི་ན། བྱིས་པ་ལ་ངན་པས་གཡང་སྐྱབས་བྱ། སྒྲོག་སྨད་ལ་ཤི་ན། ཡུགས་ས་ལ་ངན་ནོར་རྒྱུན་མ་འདོན། ཁྲུམས་སྟོད་ལ་ཤི་ན། གཤིན་སྐར་བྱ་བ་ཡིན་པས། ཚེ་ཚད་རྫོགས་པར་འདུག །བོན་པོ་ལ་བཟང་། ཁྲུམས་སྨད་ལ་ཤི་ན་འབྲིང་ཡིན་ཏེ་བཅོས་མི་དགོས་སོ། །ནམ་གྲུ་ལ་ཤི་ན་རྩིས་མཁན་དང་ནོར་ལ་ངན་གཞན་བཟང་བཅོས་མི་དགོས་སོ། །ཐ་སྐར་ལ་ཤི་ན། ཡུལ་པ་ལ་ངན་པས་བཅོས་ཤིང་སྣ་གསུམ་གྱི་དབྱུག་པ་བཅད་ཁུང་བདུན་ལ་མགལ་པ་བདུན་སྦས་པས་ཐུབ་བོ། །བྲོ་ཉེ་ལ་ཤི་ན། ཚ་ཞང་གཤིན་པོ་ལ་ངན་པས་ཁུང་བཟློག་གསུམ་བྱ། ཤ་བའི་ཐོད་པ་རོའི་མཆན་ཁུང་དུ་བཅུག་རོ་མགོ་མཇུག་ལྡོག་སྦས་ན་དེས་ཐུབ། ཤི་མིག་གསོན་ལ་ལྟ་བ་ནི་སྐྱེས་བདུན་ཟུར། བུད་མེད་མཐུན་གསུམ། རྒན་རྒོག་བྱིས་པ་བཞི་གཤེད། །
མཚེ་མ་སྤུན་ལ་ངན་ལུགས་གསལ་བར་བསྟན་པ་ཡོད། བཅོས་ལ་བྱ་བ་གང་བྱེད་ཅིང་འདི་ག་ཡིན། ཨུལ་པོ་ལག་སྟོང་ཉི་མའི་ལི་བཅོས་ལ། ཕྱུག་པོ་དགུའི་ཞིང་ས། བཙན་པོ་དགུ་ཡི་ནོར་སྣ། བུ་མང་པོའི་ཁང་པ། བསོད་ནམས་ཅན་གྱི་དར་སྣ། སྤུ་སྟག་ཅན་གྱི་སྤུ་སྣ། ཞིང་སོ་ནམ་ཅན་གྱི་ཞིང་ས་དགུ། བཙན་པོ་དགུ་ཡི་ཟས་དང་བསྲེས་ལ་རུས་སྦལ་གཟུགས། བྱིས་སྦ་ལོ་བརྒྱད་པའི་ལག་མགོ་ཙམ་ཞིག་བྱས་ལ་མཛོད་དུ་འཇུག །ཉི་མ་ནག་ཆེན་བཅོས་ལ་མདུང་ལ་རྔ་མ་ནག་པོ་དང་དར་སྔོ་ནག་ཁ་གང་ལ་ཤིང་ཀུན་ཐུམ་ཅིག་སྦ་ཚིགས་གསུམ་པ་གཅིག་བརྟག་ནས་ཉི་མའི་བདུན་ཟུར་དུ་འཇུག །ཉི་མ་ནག་ཆུང་བཅོས་ལ། ལྷོར་སྟག །ནུབ་ཏུ་རྟ། བྱང་དུ་ལུག །ཤར་དུ་ཁྱི་དེ་རྣམས་གཟུགས་ནག་པོ་རེ་རེ་ཕྱོགས་ཕྱོགས་ལ་བཞག་གོ །ས་བདག་ཟིན་ཕུང་བཅོས་ལ། བག་ཕྱེ་ལ་མི་ལུས་ར་ཡི་མགོ་བོ་ཅན། དེའི་ཁོག་པར་སྤུ་སྣ་མི་གཅིག་པ་དགུ་དང་བག་ཕྱེ་བསྲེས་ལ་རིལ་བུ་ཡཱ་རི་བོང་རིལ་མ་ཙམ་པ་དགུ། དེའི་ཁོག་པར་བཅུག་ནས་ནི། ཉི་མ་གང་ཤར་རྣམས་ཀྱི་བདུན་ཟུར་ལ་འཇུག་པའོ། །ཀིང་ཀང་བཅོས་ལ་རྩྭ་ཀུ་ཤ་རྨ་བྱའི་མདངས། རལ་གྲི་ལ་སྦྱར་
ནས་རེ་བས་དྲིལ། ཉི་མ་གང་ཤར་རྣམས་སྟེང་དུ་འཇུག །ཕུང་ཟོར་བཅོས་ལ། མི་ལུས་ར་མགོ་ཅན་ཅིག་བཅོས། ལག་ཏུ་ཟོར་བ་ཐོགས་པ་གཡས་སུ་སྟག་གདོང་། གཡོན་གཟིག་ཤུབས་ཐོགས་པ་བྱ། ཟོར་བ་མདུང་གི་མགུལ་དུ་བཏགས་མདུང་ཀས་རུ་གཡས་པ་འདོགས། པི་ལིང་བཅོས་པ་ནི། ཟན་ཉག་སུམ་ཅུ་སོ་གཅིག་ལ་རའི་གྲོད་པ་བཏགས། །བཤོལ་ལྕགས་དང་བསྒྲག་ནས་རང་འཐག་ཡ་ཁབ་དང་གཡམ་པས་བནན་ནས་ཁང་པའི་ཐོག་བྱང་ཕྱོགས་སུ་བན་ཀན་བཞག །དེ་ནས་ཉི་མ་བཅུ་གཉིས་ཀྱི་ལོ་ནི། སྟག་གི་ཉི་མ་ལ་ཤི་ན་ཞག་བཅུའི་བར་དུ་རྟའི་ལུས་ལེན། ཕྱི་མ་མི་གཅིག་པོར་སྐྱེས། བྱའི་ཉི་མ་ལ་སྲོག་གཅོད་ཟེར། ཡོས་ཀྱི་ཉི་མ་ལ་ཤི་ན། ཚེ་སྔ་མ་ཤར་ཕྱོགས་སུ་བྱའི་ལུས་བླང་། ཕྱི་མ་མི་གཅིག་པོར་རིགས་སུ་སྐྱེས། འབྲུག་གི་ཉི་མ་ལ་ཤི་ན། ཚེ་སྔ་མ་སྦྲུལ་གྱི་ལུས་བླངས། ད་གླང་དུ་སྐྱེ། སྦྲུལ་གྱི་ཉི་མ་ལ་ཤི་ན། སྤྲེའུ་ཟླ་བ་སྲོག་བཅད་ཟེར། ཚེ་སྔ་མ་གླང་ལུས་བླངས། །ཕྱི་མ་ཉི་མ་ལྷོ་ཕྱོགས་སུ་བཟའ་བ་གསར་བ་གཉིས་ཀྱི་བུ་རུ་སྐྱེས་ཟེར་རོ། །རྟའི་ཉི་མ་ལ་ཤི་ན་བྱའི་ཟླ་བར་སྲོག་གཅོད། ཚེ་སྔ་མ་ལ་སྲིན་པོའི་ལུས་བླངས། ད་ནི་རྒན་རྒོག་གཉིས་ཀྱི་
བུ་རུ་སྐྱེས། ལུག་གི་ཉི་མ་ལ། ལུག་གི་ཟླ་བ་སྲོག་གཅོད། ཚེ་སྔ་མ་ལ་སྦྲུལ་སྐྱེ། ད་ནི་མི་ལུས་བླངས་ནས་རབ་ཏུ་བྱུང་རྒྱུ་ཡིན་ཟེར། སྤྲེའུ་ཉི་མ་ལ། ཁྱིའི་ཟླ་བ་སྲོག་གཅོད། ཚེ་སྔ་མ་བྱང་ཕྱོགས་སུ་བྱི་བར་སྐྱེ། ད་ཕྱི་མ་མི་ལུས་བླངས་ཀྱང་ཕོ་ཧྲིང་པོར་གྱུར། བྱ་ཡི་ཉི་མ་ལ། ཚེ་སྔ་མར་བྱ་ངང་སེར་སྐྱེས། ཕྱི་མ་བུ་སྤུན་གསུམ་གྱི་འབྲིང་པོར་སྐྱེས། ཕྱི་མ་རྒྱལ་པོའི་བློན་པོ་སྐྱེ། བྱི་བའི་ཉི་མ་ལ། ཚེ་སྔ་མར་སྦྲུལ་དུ་སྐྱེས། ད་ཕྱི་མ་མི་ལུས་ཆོས་ལྡན་གཅིག་ཏུ་སྐྱེས་ཟེར། གླང་གི་ཉི་མ་ལ། ཚེ་སྔ་མ་མི་ལུས་བླངས། ཕྱི་མ་བློན་པོ་ལེགས་པ་གཅིག་ཏུ་སྐྱེས། ཤུལ་དུ་ཉེ་བ་གཅིག་ཏུ་ངན། གཤིན་རྩིས་རྒྱལ་མོ་དར་ཚགས་ལས། ཉི་ཁྱིམ་བཅུ་གཉིས་རྩིས་པའི་ལེའུ་སྟེ་གཉིས་པའོ།། །།དེ་ནས་དུས་གཤེད་བརྩི་བ་ནི། ནམ་ལངས་ཡོས་བུ་དུས་ལ་ཤི་ན། གཤེད་རྫ་ས་དཀར་པོའམ། དུང་ངམ། སྣལ་མ་དཀར་པོའི་རིགས་གཅིག་ལ་གབ་ཡོད་པས། སྐྱེས་པ་བུད་མེད་སྤྱན་གསུམ་པའམ། ཡང་ན་ཕྱུགས་སྤྲུལ་དཀར་མཚན་ཅན་ལ་ངན་པས། ཁྱད་པར་ཤར་ཕྱོགས་ནས་མི་ཁའམ་རྣ་བ་སྨེ་བ་ཡོད་པ་ལ་ངན་པས་གཤེད་ཟློག་དྲག་པོ་བྱ། ཡོན་ལ་རྫས་དཀར་པོ་ཕུལ་ནས་བཟློག་དགོས། ལུག་གི་
ཟླ་བ་ལ་ང་ཡི་བླ་བདུད་ཀྱིས་ཁྱེར། ཤར་ཕྱོགས་ཀྱི་བྲག་ལ་ཆུ་ཐབ་ཡོད་པའི་ས་ནས་མི་མང་ཚོགས་ལང་བྱས་པའི་ས་ནས་བླ་ཁྱེར། གྲི་པ་དང་བཙན་གྱི་སྲོག་གཅོད། རས་སམ་ཕྱིང་པའམ་སྣམ་བུའམ། རྫས་དཀར་པོའི་རིགས་གཅིག་ལ་ད་ལྟར་གཤེད་གབ་ཡོད། དེའང་ཁྱིམ་གྱི་བྱང་ངོས་ན་ཡོད་དོ། །ཉི་ཤར་འབྲུག་གི་དུས་ལ་ཤི་ན་ཁྱི་ཟླ་བ་ལ་བླ་ཁྱེར། ཟ་འདྲེ་སྐྱེ་མོའི་བྱང་ཕྱོགས་ན་ཆས་སེར་པོའམ་ལྤགས་པ་ལ་གབ་ཡོད་པའི་ཕྱིར་སྐྱོལ་དེ་མ་བྱས་ན་སྙེད་དེ་མ་བྱས་ནས། བུ་ཆུང་ལ་ངན། ཞག་བཅུ་བདུན་བར་དུ་གླང་གི་ལུས་ལེན། བྱ་གླང་ལོ་པ་ལ་ངན། ཟ་འདྲེ་སྦྲུལ་གྱི་གཟུགས་སུ་ཡོད། སའི་སྦྲུལ་གཟུགས་བཅས་ནས་བསད། དེ་ལམ་རྒྱ་གྲམ་དུ་གནོན། ཟ་འདྲེ་དེ་ད་ལྟར་ཤར་ངོས་ཀྱི་སིལ་པོའམ་རྐྱལ་པའི་རྒྱབ་ན་ཡོད་དོ། །ཉི་དྲོས་སྦྲུལ་གྱི་དུས་ལ་ཤི་ན། ཟ་འདྲེ་བྱང་ན་འགྲོ། ད་ལྟ་ཁྱིའམ་ནུབ་རིག་ན་སའི་ཀོག་སམ། རྐྱལ་པའི་ནང་ན་བསྡད་འདུག །དེ་རོ་བདག་ལ་གནོད་པའི་ཟ་འདྲེ་ཁ་བསྒྱུར་དང་གཏོར་ཟློག་བྱ། གླང་གཟུགས་བཅོས་ལ་མནན། སྣང་བརྒྱད་ཐོན། དེ་ལྟར་མ་བྱས་ལ་སླར་བྱི་བ་ལོ་པ་དང་ཕག་ལོ་བ་བྱིས་སྦ་ཆུང་བ་ལ་ངན། དེ་ཡང་ཤར་ཕྱོགས་སུ་སྐྱེས་པ་
གོས་ནག་གྱོན་པ་ལ་ངན། བུད་མེད་ཡིན་ན་ཕ་མིང་ལ་གཤེད་ཞྭ་ལ་གབ་ཡོད་པས། བཟློག་པ་དང་ཐང་འབུམ་བཟློག་པ་གྱིས། ཉིན་ཕྱེད་རྟ་ཡི་དུས་ཚོད་ལ་ཤི་ན། །ལུག་གི་ཤའམ་ནང་ཆ་ལ་གཤེད་གབ་ཡོད། ཟ་འདྲེ་ནུབ་བྱང་མཚམས་ནས་འོང་། ད་ལྟ་ལུག་ལྤགས་གཅིག་གི་ནང་བསྡད་ཡོད། བྱི་བ་ལོ་པ་དང་། བུད་མེད་སྦྲུམ་མའི་རྟ་ཕྱུགས་དཀར་མཚན་ཅན་ལ་ངན། སྲིན་གྱི་གཟུགས་བཅོས་ལ་དེ་གྲིས་གཏུབ་ལ། དེ་ལུག་ཐོད་ནང་དུ་བཅུག་ལ་གནོན། གཙུག་ཏོར་ཐོན། ཟོར་བཟློག་དང་བཟློག་པའི་ཆོ་ག་བྱ། ཕྱེད་ཡོལ་ལུག་གི་དུས་ལ་ཤི་ན། གཤེད་བུའམ་སྒྲོ་བའི་ནང་ལ། སྟེང་ན་ཡོད་ཡང་ན་མཆོད་རའི་ནང་ལ་ཡོད། ང་ནི་ལུག་གི་ཟླ་བ་ལ་བླ་ཁྱེར་བ་ཡིན། ད་ལུག་གི་གཟུགས་ནག་པོ་གཅིག་བཅོས་ནས་མནན་པ་གྱིས། དེ་མ་བྱས་ན་སྐྱེས་པ་ཡིན་ན་ཕ་སྤུན་ལ་ངན། བུད་མེད་ཡིན་ན་མོ་ཉེ་ལ་ངན། དགོང་ཆེན་སྤེལ་དུས་སུ་ཤི་ན། གཤེད་སྣོད་མཐིལ་རྡོལ་ལམ་ཟོ་བ་ལ་ཡགབ་འདུག་པའི་རོ་བདག་ལ་ངན། དེ་ནས་ཤར་ཕྱོགས་སུ་བཟའ་མི་བརྒྱད་ཡོད་པ་ལ་འགྲོ་ཞིང་། ཁྱད་པར་ཕ་སྤུན་ལ་ངན་པས་གཤེད་བཟློག་དྲག་པོ་གྱིས། ཟ་འདྲེ་བྱང་ནས་འོང་།
ཁྱི་ཡི་ཟླ་བ་ལ་ང་ཡི་སྲོག་གཅོད། ད་ལྟ་སླ་ངའམ་ལྷམ་ལ་གབ་ཡོད་པས། ཁྱིམ་མཚེས་བཟའ་མི་བརྒྱད་ཡོད་པའམ། ཡང་ན་བུ་ཆུང་ཟླ་བ་བརྒྱད་པ་ལོན་པའམ། བཅོ་བརྒྱད་ལོ་བརྒྱད་དམ་བརྒྱད་ལོན་པ་ལ་ངན། ཁྱད་པར་སྟག་ཡོས་ལོ་པ་ལ་ངན་པས། ས་བདག་འཁྲུགས་གཏོར་བྱས་ན་ལེགས། ཉི་ནུབ་བྱའི་དུས་ཤི་ན། གཤེད་རང་འཐག་གམ། གོས་ཕུ་དུང་ཅན་ལ་གབ་ཡོད་པས། རོ་བདག་གི་བུད་མེད་ལ་ངན། གཤེད་བུད་མེད་སྦྲུམ་མ་གོས་ངན་ཅན་ཅིག་ལ་སོང་བའི་ནོར་དང་བུ་སྲིང་མ་དང་། མག་པ་ལ་སོགས། ཟ་འདྲེ་ཤར་ནས་འོང་། ད་ལྟ་ཞིབ་མའམ་རང་འཐག་ལ་གབ་འདུག་ཡོད། རོ་བདག་གི་བུ་ཚ་ཆེ་བ་ལ་ངན། སྦྲུལ་གྱི་ཟླ་བ་ལ་ང་ཡི་བླ་ཁྱེར་། བུད་མེད་དམ་བུ་མོ་ལ་ངན། ཆོས་འདོན་དང་རིམ་གྲོ་གང་དྲག་གྱིས། སྲོད་ཁྱིའི་དུས་སུ་ཤི་ན། གཤེད་ལྷམ་ལ་གབ་འདུག་པས་སྐྱེས་པ་ཡིན་ན་བན་བོན་དང་ཉེ་བ་ལ་ངན། བུད་མེད་ཡིན་ན་ཟ་འདྲེ་ཁམ་བུ་ལ་གབ་ཡོད་པས་འབུད་དགོས། བུ་ཚ་ཡིན་ན་རྒྱང་ལོག་ཡོངས་པས་གཟབ་དགོས། ཟ་འདྲེ་ནུབ་ནས་ཡོང་། འབྲུག་གི་ཟླ་བར་བླ་ཁྱེར། ཕྱུགས་དཀར་པོའམ། ཆོས་དཀར་པོ་ལ་སྙད་བྱས་པས་སྐྱེས་པ་
ལ་ངན། ཚེ་གཟུངས་དང་གཙུག་ཏོར་ཐོན། མ་ཏྲཾ་གྱིས། སྲོག་འཁོར་ཕག་གི་དུས་ལ་ཤི་ན། གཤེད་དང་པོ་ལ་གབ་ཡོད་པས། རྟ་ཕྱུགས་དམར་པོ་ལ་ངན། སླར་ཁྱིམ་ནང་འཁོར་ཉེན་ཡོད་པས་ཆོས་ཐོན་ཚ་ཚ་ཐོབ་དེས་བཟློག །བུད་མེད་ཀྱིས་འགྲུལ་དང་ཆེས་སྙད་བྱས་ནས། གླང་གི་ཟླ་བ་ལ་བླ་ཁྱེར། ཟ་འདྲེ་ཟོ་བའམ་ཀོ་བའམ་ཕོར་སྐྱོང་ནང་ལ་འདུག །ལྷོ་ཕྱོགས་མི་དམར་རྟ་དམར་ཅན་གྱི་བྱ་ལ་འབྲང་ནས། ལུག་ལོ་པ་ལ་ངན་པས། ཁྲོ་བོ་རོལ་པའི་གཏོར་ཟློག་གྱིས། ནམ་གུང་བྱི་བའི་དུས་སུ་ཤི་ན། རྟ་དཀར་གླང་དཀར་ལ་གཤེད་གབ་ནས། རོ་བདག་གོས་དཀར་ཅན་ལ་གནོད། བྱང་ཕྱོགས་ཀྱི་མི་ལྔ་ཡོད་པ་གཅིག་ལ་ན། གཏོར་ཟློག་དྲག་པོ་གྱིས། ཟ་འདྲེ་དེ་ནི་ཤར་རི་ལྷོ་ནས་འོང་། རྟ་དཀར་གླང་དཀར་ལ་སྙད་བྱས། ན་ནིང་ཟླ་བ་ལྔ་བ་ང་ཡི་བླ་ཁྱེར། ད་ལྟརའང་ཟ་འདྲེ་དཀར་མཚན་ཅན་གྱི་གཅིག་ལ་གབ་ཡོད་པས། བཟློག་པ་གང་དྲག་གྱིས། ཁྱིམ་ཨཱ་མཚེས་བཟའ་མི་བཞི་པའམ། བྱི་བ་ཟླ་བཞི་པའམ། ལོ་བཅུ་བཞི་སོགས། ཡང་ན་ཉི་ཤུ་རྩ་བཞི་པ་ལ་ངན། དེ་ནས་བུད་མེད་གོས་ནག་པོ་གྱོན་པ་ལ་སོགས། དེའི་རྟ་སྦྲུལ་ལོ་པ་
ལ་ངན་པས་ཁྲོ་རོལ་བྱའོ། །ཕྱེད་ཡོལ་གླང་གི་དུས་སུ་ཤི་ན། རྫས་སེར་པོར་གཤེད་གབ་ཡོད། སྐྱེས་པ་ཡིན་ན་ཕ་མའམ་སྲིང་མོ་ལ་ངན། བུད་མེད་ཡིན་ན་མོ་ཆགས་ལ་ངན། །གཤེད་ཕོ་ཧྲིང་མོ་ཧྲིང་ལ་འགྲོ་བཟློག་པ་གྱིས། ཐོ་རངས་སྟག་གི་དུས་སུ་ཤི་ན། གཤེད་སྐྱེ་ཁྲ་བོའམ། སྒྲོ་བའམ་མདའ་གཞུ་ལ་གབ་ཡོད། གཤེད་དེ་བུད་མེད་གདོང་པར་སྨེ་བ་ཡོད་པའམ། རྟ་ཕྱུགས་དམར་པོའམ། ཁྱི་དམར་པོ་ཡོད་སར་འགྲོ། ང་ཡི་སྲོག་གཟའ་དང་རྒྱལ་པོས་བཅད། ཟ་འདྲེ་ད་ལྟ་སྐྱེའམ་ཕད་བུའི་ནང་བསྡད་ཡོད་པས། དེ་ཤར་ཕྱོགས་སུ་བསྐྱལ་ན། བཟའ་མི་གཉིས་པའམ། །ལོ་གཉིས་པའམ། ལོ་བཅུ་གཉིས་པ་ཉི་ཤུ་རྩ་གཅིག་འགྲོ་གདོང་ལ་སྨེ་བ་ཡོད་པ་ཅིག་ལ་ངན། སྤྲེལ་ལོ་བ་ཡོད་ན་ངན་པས། རོ་ལ་གོས་དཀར་པོ་གཡོགས། ཟ་འདྲེ་ཁ་བསྒྱུར་གྱིས། ཁྲོ་རོལ་ཤར་ཕྱོགས་སུ་ཐོངས་ལ་བཟློག་པ་གྱིས། གཤིན་རྩིས་རྒྱལ་མོ་དར་ཚགས་ལས། དུས་གཤེད་རྩིས་པའི་ལེའུ་སྟེ་གསུམ་པའོ།། །།དེ་ལྟར་སྤར་ཁའི་གཤེད་རྩིས་ནས། ལི་ལ་ཤི་ན། མགོ་ལ་གཡུ་ཆེན་པོ་ཡོད་པ་ལ་སེམས་ཆགས། བུད་མེད་ཡིན་ན་ཚང་ཟླའམ་ཞོ་དང་མར་ལ་སེམས་ཆགས། ང་ནི་ཕ་མིང་དང་འཕྲད་འདོད་
དེ། རྟ་དང་ཞྭ་ལྷམ་མེད་ཟེར་རོ། །ངས་ཤི་མཇུག་གཅོད་ཟེར་རོ། །སྐྱེས་པ་ཡིན་ན་བུ་སྲིང་དང་འཕྲད་འདོད། ཕྱུགས་སེར་སེར་་ཆགས། གོས་དམར་ཅན་ལ་ངན། ཁ་ལྷོའམ་བྱང་དུ་བསྟན་ལ་ཤི དམར་ངོ་དང་མཚོན་ཕོག །བཙན་དང་རྒྱལ་པོས་ཁྱེར། ནམ་ཕྱེད་དང་ཉིན་ཕྱེད་ལ་ཤི། མགོ་དང་རོ་སྟོད་རྐང་པ་ན་བས་ཤི །གཤེད་མི་ཆེན་ནམ་བོན་པོ་ལ་འགྲོ། ལྷོ་ཕྱོགས་ན་ཁྱི་དམར་པོ་ཅན་ནམ་ཞང་པོ་ལ་ངན། ད་ལྟ་ཞིབ་མའམ་རྐྱལ་པའི་ཕྱིང་བའམ་བུད་མེད་ཀྱི་རྒྱུན་གང་རུང་ལ་གབ་ཡོད། ཕག་ཐོད་ནང་དུ་ཆུ་སྣ་བླུགས་པས་ཟ་འདྲེ་མནན་དགོས། ཁོན་ལ་ཤི་ན། སྐྱེས་པ་ཡིན་ན་བུད་མེད་དང་འཕྲད་འདོད་ནག་མོ་ལ་ངན། བུད་མེད་ཡིན་ན་ཤ་གཞུག་ཆད། ངའི་བླ་ས་བདག་གིས་ཁྱེར། ཁ་ལྷོའམ་བྱང་ལ་གཏད་ནས་ཤི། འཁོན་དང་སྐྱེས་ནག་འཕྲད་པས་ལེན། རྒན་ཁོག་དང་ཕྱུགས་ལ་སེམས་ཆགས། སྐྱེས་པ་ཡིན་ན་ཟ་འཕྲོ་འཐུང་འཕྲོ་ལུས། མདའ་གཞུ་དང་གྲི་ལ་སེམས་ཆགས་ཡོད། ད་ལྟ་སྐྱེས་ནག་གི་གསེབ་ན་ཟ་འདྲེ་བསྡད་ཡོད། ལམ་བཞི་མདོར་བསྐད་ན། རྒན་ཁོག་གཉིས་ལ་འགྲོ། ཡོས་ལོ་པ་ཡིན་ན་ཐང་མཐོང་བའི་ཤིང་སྣ་རོའི་སྟེང་
དུ་བཞག་ན་ལེགས། སྤར་ཁ་དྭ་ཐོག་ལ་ཤི་ན། ང་སྤུན་ཟླ་དང་མ་འཚམས། སྐེ་རགས་དང་གྲི་ལ་ཆགས། ང་ཡི་སྲོག་བཙན་གྱིས་བཅད། ལྕགས་ཆ་ཉོས་པས་ལེན། ང་ཡི་སྙིང་གཏམ་སྲིང་མོ་ལ་འཇོག །བུད་མེད་ཡིན་ན་མིང་པོ་ལ་ཆགས། ང་ཡི་གོས་དང་ནོར་གཡུ་ལ་སེམས་ཆགས། ང་མིང་པོ་དང་འཕྲད་འདོད་མ་འཕྲད་པར་ཡུན་རིང་པོར་སོང་། །སྐྱེས་པ་ཡིན་ན། ང་ནི་ནོར་རྫས་དང་གོ་མཚོན་ལ་སེམས་ཆགས། ཟ་འདྲེ་བྱིས་སྦ་ཆུང་ལ་སོགས། ལར་ངས་མི་ཆོག་སྙིང་དང་འདྲ་བ་ལ་ངན་པས། སྙིང་འགྲམ་གྱི་ཆོ་ག་བྱས་ན་བཟང་། བཟློག་པ་དྲག་པོ་གྱིས། ཁེན་ཐོག་ལ་ཤི་ན། ང་ཡི་སྲོག་རྒྱལ་པོས་བཅད། ཁ་ལྷོའམ་བྱང་དུ་བསྟན་ནས་ཤི་ཟ་འཕྲོ་འཐུང་འཕྲོ་ལ་སེམས་ཆགས། མགོ་དང་རྒྱལ་བ་ན་ནས་ཤི།་མགར་བ་ཡིན་ན་ཤི་གཞུག་ཆོད། ཞྭ་ལྷམ་མལ་བཅས་སེམས་ཆགས། མིང་སྲིང་དང་ཞང་པོ་དང་འཕྲད་འདོད། ཟ་འདྲེ་དང་རྒན་རྒོག་དང་། ཕྱོགས་ནུབ་དང་བྱང་གི་ཕྱུགས་དམར་པོ་ཡོད་པ་ལ་འགྲོ་བས། གནམ་སྒོ་བསྡོམ་པ་གལ་ཆེའོ། །སྤར་ཁ་ཁཾ་ལ་ཤི་ན་སྐྱས་ནག་དང་བུད་མེད་ཡུགས་ས་མོ་ཡོངས་བས་ཕྱི་ལ་སྤང་ནག་འབྲིང་ནག་སྲོག་བཅད།
བུད་མེད་ཡིན་ན་གོས་ལྷམ་མེད་ཟེར། དོར་མ་དང་གོས་ལྷམ་ལ་སེམས་ཆགས། སྐྱེས་པ་ཡིན་ན་ང་ལ་གྲི་མེད་ཟེར། མ་དང་བུ་སྲིང་བུ་མོ་ལ་སེམས་ཆགས། ཞིང་ངམ་ཟོག་གཅེས་པ་དེ་མི་ལ་བཙོང་བས་ལེན་ཞིབ་མའམ་སྒོ་བ་ནོར་སྤྱོད་ཟ་འཕྲོ་ལ་སེམས་འཕྲེང་། ཟ་འདྲེ་བྱིས་པ་ཆུང་བ་ལ་སོང་བས་སྒོ་ཐེམས་ཐུམས་དཔེ་ཐུབ། སྤར་ཁ་གིན་ཐོག་ལ་ཤི་ན། བོན་གྱི་ཕྱི་ལ་འབྲིང་བའི་རྒྱལ་པོས་སྲོག་བཅད། ས་གཉན་བརྐོས་པས་ལེན། བུ་ཆེ་བ་དང་མ་འཕྲད། ང་ཡི་ཟས་ཟ་འཕྲོ་ལ་སེམས་ལུས། བ་གླང་མི་ལ་བཏང་བས་ལེན། དེར་མ་དང་ལྷམ་མེད་ཟེར། ཟ་འདྲེ་གླང་ནག་ཅན་ལ་སོགས། གཤེད་ཕ་སྤྱན་རབས་ཆད་ནག་མོ་ལ་སོགས་ཡོད་དོ། །སྤར་ཁ་ཟིན་ཐོག་ཤི་ན། སྙིང་དང་འདྲ་བའི་མི་ལ་བཟློས། བུད་མེད་དང་བྱིས་པ་ཆུང་བ་ལ་ངན། ཟ་འདྲེ་ཕ་སྤུན་ནམ། བུད་མེད་སྦྲུམ་མའི་བུ་སྲིང་ལ་སོགས། རི་མཐོ་པོའི་བཙན་གྱིས་ཁྱེར། ཤ་རུ་གཡོན་པ་དང་སྙིང་འགྲམས་པས་ཆོ་ག་གྱིས། སྤར་ཁ་ཟོན་ཐོག་ཤི་ན། བུད་མེད་ཡུགས་ས་མོ་དང་བྱི་མོའི་ཕྱི་ལ་ཡོངས་བའི་རྒྱལ་པོ་དང་། སྤྱད་ནག་ཕོ་འདྲེའི་སྲོག་གཅོད་ཁང་ཞིང་བུ་ཚ་དང་། གསེར་དང་གཡུ་
དང་ཕྱིང་པ་རྣམས་ལ་སེམས་ཆགས། ཟ་འདྲེ་མི་ཆེན་དང་དཔོན་ཆེན་ལ་སོགས། ཡང་བུད་མེད་སྦྲུམ་མའམ། ཁྱིམ་མཚེས་ཀྱིས་མི་རལ་པ་ཅན་ལ་སོགས་པས་ར་ཐོད་དང་ཤིང་གི་ཕུར་པས་གནོན། གཤིན་རྩིས་རྒྱལ་མོ་དར་ཚགས་ལས། སྤར་ཁ་གཤེད་རྩིས་པའི་ལེའུ་སྟེ་བཞི་པའོ།། །།དེ་ནས་སྨེ་བ་དར་ཚགས་ནི། གཅིག་དཀར་ལ་ཤི་ན། བྱིས་པ་ཆུང་བ་ལ་ངན་བན་བོན་གསུམ་གྱིས་རིམ་གྲོ་གྱིས། བྱིས་པ་དེ་ཞང་ཕྱོགས་སུ་སྐྱོལ། འཁོན་དང་མི་གཙང་བ་ལ་འཛེམ། སྔར་ཡང་མི་གཙང་བས་ལན། རྟ་མའི་གཟུགས་དམར་པོ་རོའི་ཁར་བཞག་གོ །གཉིས་ནག་ལ་ཤི་ན། །ཆང་ངམ་ཆུ་བཞིའི་ལན། བུད་མེད་ལ་ངན། ཞྭ་ནག་དང་གོས་ནག་གྱོན་པ་གསུམ་གྱིས་རོ་གཡོག་བྱ། བདུད་མདོས་ནག་པོ་མགོ་གསུམ་གྱིས། གསུམ་མཐིང་ལ་ཤི་ན་ཕ་མྱེས་ཀྱི་རོ་དུར་ནས་གནོད་པས། ལུས་མགོ་དང་ལྤགས་སྣ་ཚ་ཚ་སེར་པོ་རྣམས་རོ་ཡི་ཁར་བཞག་གོ །བཞི་ལྗང་ལ་ཤི་ན། ནད་བདག་ཀླུ་ཡིས་བྱས་པས་ཁྱེར། ཟ་འདྲེ་ཆུ་རྒྱུད་ལ་འགྲོ་བུ་སྲིང་གི་ཕྱི་ལ་སོང་། ལྕགས་སྣ་རོའི་ཁར་བཞག་གོ །དེ་ནས་ཀླུ་འབུམ་འདོན། ཀླུ་བདུད་ལྕགས་བཀྲོལ་བྱ། ལྔ་སེར་ལ་ཤི་ན། ཟ་འདྲེ་ཕྱི་རྒྱུད་བུ་སྲིང་གི་ཕྱི་ལ་
སོང་། རྟེན་གསུམ་གྱི་ཚ་ཚ་གདབ། སྔགས་པས་གཏོར་ཟློག་གྱིས། དྲུག་དཀར་ལ་ཤི་ན། གོ་བུར་དང་གྲིབ་ཀྱི་རྐྱེན་བྱས། ལྷ་དང་བཙན་གྱིས་ཁྱེར། །གཤེད་ཀ་བ་ལ་གབ་ཡོད་པ་གྲིབ་སེལ་བྱ། བདུན་དམར་ལ་ཤི་ན། མི་རྒྱུད་ལ་ངན་པས་མི་ཁ་བཅོས་ཆོག་དང་གཏོ་བསྒྱུར་བྱ། ཟ་འདྲེ་རྡུབ་གོག་ལ་གབ་ཡོད་པས་རྡུབ་གོག་ཕྱིར་ཐོན། བརྒྱད་དཀར་ལ་ཤི་ན། ཕ་སྤུན་སྙིང་འདྲ་བ་ལ་ངན། ཟ་འདྲེ་མར་ལ་གབ་པས་སྤྲང་པོ་ལ་མར་དང་ཟས་བྱིན་ན་ཟློག །ལྷ་ལ་གྲིབ་ཕོག་འདུག་པས་བསང་དང་གྲིབ་སེལ་གྱིས། དགུ་དམར་ལ་ཤི་ན། ཟ་འདྲེ་དེ་ལྷན་པ་དམར་པོའམ་ཆས་དམར་པོའི་རིགས་ཤིག་ལ་གབ་ཡོད་པས་དེ་ཕྱིར་ཐོན། དམར་པོ་ཟེར་མདོས་དང་གཡང་འགུགས་ཁྲག་མདོས་གྱིས། གཤིན་རྩིས་རྒྱལ་མོ་དར་ཚགས་ལས། སྨེ་བའི་གཤིན་རྩིས་ལེའུ་སྟེ་ལྔ་པའོ།། །།ཡང་སྐར་མའི་གཤིན་རྩིས་བསྟན་པ་ནི། སྨིན་དྲུག་ལ་ཤི་ན་ཞག་བདུན་གྱི་བར་རོ་མི་སྦས། ཁུར་ཡང་མི་རུང་གླང་ཨམའི་བྱང་བུ་བཅོ་བརྒྱད་ལ་རོ་མིང་བྲིས་ལ། ཁྱི་ཐོད་དང་བཅས་རོའི་འོག་ཏུ་སྦས། མིང་རུས་མི་གཅིག་པ་གསུམ་གྱིས་ཤར་ཕྱོགས་སུ་བསྐྱལ་ལོ། །རོ་ལ་ཐིག་དྲུག་གཏབ་དུམ་བུ་དྲུག་
དུ་གཏུབ་ན་ཐུབ། ཕྱུགས་ནག་པོའི་ཕྱི་ལ་འབྲིང་བས་འདྲེས་ཁྱེར། ཆུ་མིག་བྲུས་སམ་ས་རྐོས་རློག་བྱས་པས་ལན། ས་བདག་གནོད་པས་ས་བདག་གི་ཆོ་ག་བྱས་ན་ཕན་ཟེར་རོ། །སྣར་མ་ལ་ཤི་ན། ཕྱུགས་དཀར་མཚན་ཅན་གྱི་ཕྱི་ལ་ཡོངས་བའི་འདྲེས་ཁྱེར། ཕྱུགས་ལ་བཏང་བས་ལེན། བྱིས་པ་ཤི་ན། བུད་མེད་ལ་ངན། བྱ་ཕོ་དཀར་པོ་དང་ལྕགས་སྣ་རོའི་ཁར་ཞོག །མགོ་ལོ་ཤི་ན། ཞག་ལྔ་ཡི་བར་དུ་མི་སྦས། མི་དགུའམ་རྒན་རྒོན་ལ་ངན་གཡག་རུ་རོ་ཡི་ཁར་བཞག་གོ །ལག་ལ། བཙན་དང་སྤྱད་ནག་གི་ཁྱེར། མི་གཉིས་ལ་ངན། རོའི་ཟུར་ནས་མར་ནག་དང་ནས་འབྲས་གྲོའམ། འབྲུ་སྣ་གང་འབྱོར་བླུག །ཚ་ཚ་དཀར་པོ་སྙིང་གར་བཞག །ནབས་སོ་ལ། ཁང་སྟོང་དང་ལྷ་ཁང་གོག་པོའི་རྒྱལ་པོ་ཁྱེར། ཐབ་དང་གཞོབ་ཀྱིས་ལེན། བུད་མེད་ཤི་ན་བུ་སྲིང་གི་འགྲུལ་གྱིས་ལེན། རྒྱལ་ལ་རྒྱལ་པོས་ཁྱེར། གཡག་དང་ལུག་གི་ཐོད་པས་གནོན། དེ་མ་བྱས་ན་སྐྱེས་དར་མ་ལ་ངན། ལྕགས་སྣ་ཤར་ཕྱོགས་སུ་བཏང་བས་ཐུབ། སྐག་ེལ་ཐབ་དང་དམར་གྱི་ལན། བུད་མེད་ཤི་ན་ཤི་ཁ་བྱེ། བྱིས་པ་ཆུང་ངུ་ལ་ངན། རྒོག་གཙང་དང་གྲོ་བླུག །མཆུ་ལ། །
ཤར་ཕྱོགས་ཀྱི་བུད་མེད་ཀྱིས་ཕྱི་ལ་ཡོངས་བའི་གཟའ་སྤྱང་ཕོ་འདྲེ་བཙན་གྱིས་ཁྱེར་ཁུང་དུ་ར་ཁྱི་ཕག་གསུམ་གྱིས་ཐུན་བླུག་སྟེ་ས་སྦས། སྟ་རེ་རོའི་ཁར་བཞག་བྱིས་པ་ཆུང་ངུ་ཤི་ན་ཆུང་སྲི་ཁ་བསྒྱུར་བྱའོ། །བྲེ་ལ་ཡས་གདོན་དང་བཙན་གནོད་བུ་སྲིང་གི་ཕྱིར་ཡོངས་བའི་འདྲེས་ཁྱེར། བུད་མེད་ཤི་ན་བྱིས་པ་ཆུང་ངུ་ལ་ངན་པས། བོང་ཐོད་དང་རྟ་ཐོད་མཛོ་ཐོད་རྣམས་རོའི་ཁར་བཞག་གོ །དབོ་ལ་གཟའ་བདུད་ཀྱིས་ཁྱེར། ཕ་མྱེས་ཀྱི་དུར་འདྲེ་རྙིང་པས་གནོད། བུ་ཚ་ཤི་ན་ནག་པོ་དུར་སྲི་མནན། གཡང་འདྲེན་བྱ། མེ་བཞི་ལ། སྐྱེས་ནག་གི་ལན། ཁྱིམ་མཚེས་ཀྱིས་འདྲེས་ཁྱེར། རོ་ཞག་བཞི་ལ་སྨྲ། བྱ་ཕོ་ཅིག་རོ་ཁར་བཞག །ར་ཁྱི་ཕག་གསུམ་གྱི་གཏོ་བཅོས་བྱ། བྱིས་པ་ཤི་ན་བྱ་རོ་ཁྱི་ལ་བྱིན། ནག་པ་ལོ། ཤིང་གི་ཕྱི་ལ་ཡོངས་བའི་འདྲེ་ཁྱེར། མི་ཕྱུགས་ཁྲག་རྣམས་རོའི་ཁར་བཞག །བྱིས་སྦ་ཤི་ན་ནག་པོའི་འདུར། ས་རི་ལ། ས་གཉན་བརྐོས་པ་དང་བུ་སྲིང་གི་ཟས་དང་འགྲུལ་གྱི་ལན། ནག་པ་ལ་བསྡུར་ན་བཟང་། ས་གོ་ལ་ཀླུ་བདུད་བཙན་གྱིས་ཁྱེར། མ་དྲག་པོ་གཅིག་ལ་རྩུབ། སྐྱེས་དར་མ་གཅིག་ལ་རྩུབ། མདོ་དང་གཙུག་ཏོར་ཐོན། བུད་
མེད་རྒན་མོ་ཤི་ན་ཤི་སྒབ་ཆོད། ལྷག་མཚམས་ལ། གཟའ་དང་རྒྱལ་པོས་ཁྱེར། ཞང་ཉེས་འགྲུལ་དང་སྐར་མའི་བས་པས་ལན། རྫས་ནག་དང་། མགར་ནག་གི་ཞུ་ནག་དང་། གླང་བུའི་ཐོད་པ་ལག་སོར་ཕྱོགས་སུ་སྦས་སོ། །སྐར་བཟློག་བྱ། གདུ་བུ་སྣོན་ལ། བུ་སྲིང་ཕྱི་ལ་ཤི་འདྲེ་ཡོངས་བའི་རྒྱབ་རྒྱལ་པོ་བྱས་པས་ཁྱེར། སྤྲེལ་ལོ་བ་དང་བྱ་ལོ་བ་རྩུབ་པས་རྒྱལ་མདོས་བྱ། ར་ཕག་གི་ཐོད་པ་སྟེང་དུ་བཞག །ཁྲི་བརྒྱད་སྟོང་པ་བཏོན་ན་བཟང་། སོག་པ་སྣུབ་ལ། ཐབ་དང་ཁོན་གྱི་ལན། འདྲེ་གུད་ས་བདག་གིས་ཁྱེར། ཕག་ཐོད་ཟློསྟེང་དུ་བཞག །ཁྲོ་ཆུ་སྟོད་ལ། རྨེ་ཟས་དང་འགྲུལ་གྱི་ལེན་གྲིབ་བསང་དང་བཟློག་པའི་ཆོ་ག་གྱིས། ཕུལ་ལ་་ཆུ་སྨད། ཕོ་མོ་གང་ཤི་ནའང་ཤི་ཁ་ཆོད་པས་བཟང་། བོན་ལ་་་གྲོ་བཞིན། བུད་མེད་ལ་ངན་པས། ཁྱི་ཕག་གི་ཐོད་པའི་སྟེང་ན་གནོན། བྱི་བཞིན་ལ། མ་རྟ་ཟླ་བ་དང་སྔོན་པོའི་འགྲུལ་གྱི་ལན། ས་སྣ་ལྔ་ཡི་ཚ་ཚ་སྟེང་དུ་བཞག་གོ །རབོས་ཆད་ཤི་ན་བྲ་ཉེ་ལ་སྦའོ། །མོན་གྲི་ལ། རྟ་ཕྱུགས་གསུམ་ལ་ངན། ས་སེར་རེ་རེ་ཚ་ཚ་སེར་པོས་མནན། ས་བདག་ཆོ་ག་དང་སྐར་བཟློག་བྱའོ། །མོན་གྲུ་ལ། མི་རྟ་ཕྱུགས་གསུམ་ལ་
ངན། ས་རྐོས་རྡོ་རློག་བྱས་པས་ལེན། ས་བདག་འཁྲུགས་གཏོ་དང་། ཀླུ་བདུད་ལྕགས་གྲོལ་བཟློག་པའི་ཆོ་ག་བྱས་པས་ཕན། ཁྲུམས་སྟོད་ལ། བུད་མེད་ལ་ངན། གཟའ་བདུད་དང་བཙན་གྱིས་ཁྱེར། མ་ཏྲ་དང་། རུས་བསྡུང་ཆོ་ག་བྱ། ཁྲུམས་སྨད་ལ། ཀླུ་དང་ས་བདག་གིས་ཁྱེར། འཁྲུགས་གཏོ་དང་གཏོར་ཟློག་བྱའོ། །ནམ་གྲུ་ལ། རོ་བདག་ལ་ངན་པས་ཆོས་དང་ནག་པོ་མགོ་གསུམ་ཟ་འདྲེ་ཁ་བསྒྱུར་བྱའོ། །ཐ་སྐོར་ལ། ཡུལ་ལ་ངན་པས་བཅོས་ལ་ཤིང་སྣ་མི་གཅིག་པ་གསུམ་བཅད་ལ། དུམ་བུ་བདུན་དུ་གཏུབ་ནས་ཁུང་བདུན་དུ་སྦས་པས་ཐུབ། བྲ་ཉེ་ལ། ཆེ་བ་གསུམ་དང་། བུད་མེད་ལ་ངན། གྲིར་ཤི་ན་གྲི་འདུལ་བྱ། རྟ་ཡིས་གྲལ་ལ་སབ་པས་ལེན། གླང་མའི་བྱང་བུ་གསུམ་ལ་བུད་མེད་གཟུགས་བྲིས་ལ་རོ་ཁུང་དུ་སྦ། མི་གཟུགས་དཀར་པོ་གཅིག་རོའི་སྟེང་དུ་བཞག །གཤིན་རྩིས་རྒྱ་མོ་དར་ཚགས་ལས། སྐར་མ་གཤིན་རྩིས་པའི་ལེའུ་སྟེ་བདུན་པའོ།། །།ད་ནི་རོ་འདོན་པའི་ཕྱོགས་བརྩི་བ་ནི། ས་བདག་བླ་མཁྱེན་དང་། ཧལ་ཁྱི་དང་། ཟངས་ཁྱི་དམར་པོ་དང་། གཤིན་པོའི་ཕྱོགས་ནི། ནག་ཆེན། རྩིས་པ་རང་གི་ལོ་ཐོག །ལོ་གཤེད་དང་
རླུང་རྟ་རྣམས་ཀྱི་ཐོག་ཏུ་མི་བཏང་བ་གལ་ཆེའོ། །དཔེར་ན་རང་རེ་ཤིང་མོ་བྱ་ཡིན་ན། ལྕགས་སྦྲུལ་གྱི་ཐོག་ཏུ་མི་བཏང་། ཤིང་བྱ་ཐོག་ཏུ་མི་བཏང་། ཕག་ཐོག་ཏུ་མི་བཏང་། །ལྕགས་སྦྲུལ་དེ་རང་གི་དགྲ་ཡིན་པས་དེར་འཛེམ་དགོས་པའོ། །དེ་ཀུན་ལ་འགྲེ་སྟེ། ཕྱོགས་ངན་ལ་འཛེམ་པ་གལ་ཆེའོ། །གཤིན་པོའི་ལུས་ལ་དགྲ་དར་ན་རོ་ཁུར་མི་རུང་། རོ་འདྲེན་པའི་སྒོ་ཕྱོགས་དང་། སྨེ་བ་གཉིས་ནག་གམ་ཧལ་ཁྱི་སོགས་སྡིག་ན། རྩིས་མཁན་དང་ཕུང་པོ་ཁུར་མི་རྣམས་འགྲོགས་ནས་འགྲོ་དགོས་པའོ། །ཞེས་པ་འདི་ཡང་གལ་ཆེ་བ་ཞིག་གིས་གནད་འདི་ཡིན་ནོ། །གཤིན་རྩིས་རྒྱལ་མོ་དར་ཚགས་ཞེས་བྱ། གསོན་གཤིན་གཉིས་ཀ་ལ་གཅེས་པའམ་གདམས་པ། མཁས་པ་ཁྱུང་གིས་མན་ངག་རྒྱ་ནག་ལུགས་ལགས་སོ། །འགྲམ་ཆེན་བཞིའི་རྩིས་ཉུང་ངུ་བསྡུས་པ་ཡོད་པ་ལགས་སོ། །འགྲམ་བཞིའི་རྩིས་ལ། ཁྱི་རྟ་སྟག་གསུམ་ཟིན་ཐོག་ཏུ་ཤི་ན། ས་བདག་སྙིང་འགྲམས་ཡིན་པས། རོ་གཅིག་འོང་། བྱི་འབྲུག་སྤེལ་གསུམ་ཁམ་ཐོག་ཏུ་ཤི་ན། ས་བདག་གི་དུར་འགྲམས་ཡིན་པས། རོ་གསུམ་འོང་། བྱ་གླང་སྦྲུལ་གསུམ་དྭ་ཐོག་ཏུ་ཤི་ན། ས་བདག་སྙིང་འགྲམས་ཡིན་པས་རོ་ལྔ་འོང་། །ཕག་
ལུག་ཡོས་གསུམ་ལི་ཐོག་ཏུ་ཤི་ན། ས་བདག་གི་མིག་འགྲམས་ཡིན་པས་རོ་དྲུག་འོང་། དེ་རྣམས་གཏོ་ལ་གང་དགོས་བྱ། གུ་གུང་བཞི་ལ་འགྲམས་ཆེན་བརྒྱད་བསྟན་པ་ནི། ལི་ལ་རྟ་སྦྲུལ་ལོ་པ་ཤི་ན། རྟ་སྦྲུལ་སོགས་གཤེད་དང་འགྲམས་ན། དཔྲལ་བའི་མིག་ལོང་། རྗེས་སུ་རོ་བདུན་འོང་། མིག་ཐམས་ཅད་བསྡུས་ནས་མིག་བཅོས་བྱས། བན་མཆོད་བྱ། ཁོན་ལ་གླང་ལུག་ལོ་པ་ཤི་ན། ལོ་ཟླ་བ་དུས་ཚོད་དང་ཐུག་ན། གུ་གུང་ནག་པོ་རྗེས་ངན་ཡིན། རོ་དྲུག་འོང་རྒན་མོ་མགོ་སེ་མ་གཅིག་ལྟོག་གྲིའི་མ་འཆི་བར་དུ་མའི་ཆོད། གསེར་འོད་འདོན། རྭ་ཅོ་མང་པོས་འགྲམས་བཅོས་བྱ། དྭ་ལ་བྱ་སྤྲེལ་ལོ་པ་ཤི་ན། ལོ་ཟླ་བ་ཉི་མ་དུར་ཕུན་འགྲམས་ན་ས་བདག་སྙིང་འགྲམས་ཡིན་བདུན་པར་སྙིང་སྤྲེལ་གྱི་བཅོས། སྙིང་འདྲ་བར་ངན། ཁེན་ལ་ཁྱི་འབྲུག་ལོ་པ་ཤི་ན། ལོ་ཟླ་ཉི་མ་དུར་ཕུན་འགྲམས་ན་གུ་གུང་ནག་པོ་རྗེས་ངན། བདུན་ལ་ངན། གནམ་སྒོ་བཅད། སྣང་ཨཱ་བརྒྱད་འདོན། ཁམ་ལ་བྱི་ཕག་ལོ་པ་ཤི་ན། ལོ་ཟླ་ཉི་མ་དུར་ཕུག་འགྲམས་ནས། རྗེས་སུ་རོ་བདུན་འོང་། ས་བདག་གི་ཁོན་འགྲམས་ཡིན། རྒྱ་མཚོ་གདེང་འཁྲུགས་སོ། །རྔ་
རྩེ་མང་པོས་འགྲམས་བཅོས་བྱ། རྣམ་འཇོམས་བྱ། གིན་ལ་གླིང་ལུག་ལོ་པ་ཤི་ན། ལོ་ཟླ་བ་ཉི་མ་དུར་ཕུབ་འགྲམས་ན། གུ་གུང་ནག་པོ་རྗེས་ངན་ཡིན། རྗེས་སུ་མ་གསུམ་ལ་ངན། གཤེད་བཅོས་བྱས། ཆོས་ཆེན་ཀློག །ཚ་ཚ་བཞག །ཟིན་ལ་སྟག་ཡོས་ལོ་པ་ཤི་ན། ལོ་ཟླ་བ་ཉི་མ་དུར་ཕུབ་འགྲམས་ན། སྐྱེས་པ་ཡིན་ན་སྙིང་འདྲ་བ་ལ་ངན། །བསམ་པའི་སྙིང་འགྲམས་པ་ཡིན། སྡོང་པོའི་རྒྱན་མདོས་དང་སྙིང་བཅོས་བྱ། ཟོན་ལ། ཁྱི་འབྲུག་ལོ་པ་ཤི་ན། ལོ་ཟླ་བ་ཉི་མ་དུར་ཕུབ་འགྲམས་ན། གུ་གུང་ནག་པོ་རྗེས་ནག་ཡིན། རྗེས་སུ་མི་ལྔ་ལ་ངན། འབུམ་འདོན། འགྲམས་ཆེན་ཉི་ཤུ་རྩ་ལྔ་ལ་ཕྱི་རྩིས་ཉི་ཤུ་རྩ་བདུན་འདི་ལྟར་རོ། །འདི་ལ་ནི་ཕག་ལོ་པ་ཤི་ན། དཔྲལ་བའི་མིག་རྡོལ་བ་ཡིན། ལྕགས་ཀྱི་བྱ་སྤྲེལ་ལོ་པ་ཤི་ན་ལྕགས་ཀྱི་སྡོང་པོ་ལ་བསྐལ་པའི་མེ་ཤོར་བ་ཡིན། རོ་བསྲེགས་མི་ཉན། ཁོན་ལ་སྟག་ཡོས་ལོ་པ་ཤི་ན། དུར་གཤེད་ཆེ་བ་འགྲམ་པ་ཡིན། བྱ་སྤྲེལ་ལོ་པ་ཤི་ན། །དུར་གཤེད་ཆུང་བ་འགྲམས་པ་ཡིན། དྭ་ལ་སྟག་ཡོས་ལོ་པ་ཤི་ན། བལ་གྱི་ཕོ་ལམ་སྲ་བས་བྲག་བཀས། རྟ་སྦྲུལ་ལོ་པ་ཤི་ན། ལྕགས་ལ་མེ་ཤོར་བ་ཡིན། ཁེན་ལ་རྟ་སྦྲུལ་ལོ་པ་
ཤི་ན། དུར་གཤེད་ཆེ་བ་འགྲམས་པ་ཡིན། བྱི་ཕག་ལོ་པ་ཤི་ན། དུར་གཤེད་ཆུང་བ་འགྲམས་པ་ཡིན། ཤིང་བྱི་ལོ་པ་ཤི་ན། མར་ནང་གི་རུས་པས་གཉན་གྱི་ཕུག་འགྲིམས་པ་ཡིན། ཁམ་ལ་རྟ་སྦྲུལ་ལོ་པ་ཤི་ན། རྒྱ་མཚོ་མཐའ་ནས་སྐམ། ལྕགས་མེའི་རྔ་མ་གཡུགས་པས་རྒྱ་མཚོའི་གཏིང་ནས་དཀྲུགས་པ་ཡིན། གིན་ལ་བྱ་སྤྲེལ་ལོ་པ་ཤི་ན། དུར་གཤེད་ཆེ་བ་འགྲམས། སྟག་ཡོས་ལོ་པ་ཤི་ན། དུར་གཤེད་ཆུང་བ་འགྲམས། ཡོས་བུ་ལོ་པ་ཤི་ན། རི་བོང་གི་ལག་པ་གཡས་པས་གླང་པོ་ཆེའི་སྐད་པ་ཕུད་པ་ཡིན། །ཟིན་ལ་བྱ་སྤྲེལ་ལོ་པ་ཤི་ན། དུར་འགྲམས་ཡིན། ལྕགས་ཀྱི་བྱ་སྤྲེལ་ལོ་པ་ཤི་ན། གཡུ་ཡི་གདུང་མ་སྐེད་ནས་ཆག་པའི་འགྲམས་ཡིན། ཟོན་ལ་ཁྱི་འབྲུག་གླང་ལུག་བཞི་ཤི་ན། །དུར་གཤེད་ཆེ་བ་འགྲམས། རྟ་སྦྲུལ་ལོ་པ་ཤི་ན། དུར་གཤེད་ཆུང་བ་འགྲམས་པ་ཡིན། སྤར་ཁ་རང་ཐོག་ལ་རུ་ཤི་ན། རང་འགྲམས། དགྲ་ཐོག་ཏུ་ཤི་ན་དགྲ་འགྲམས། ཁོན་ཟོན་ཐོག་གཉིས་དགྲ་འགྲམས་ཡིན། གིན་ཁོན་གཉིས་ལ་འགྲམས། དྭ་ཟིན་གཉིས་སྙིང་འགྲམས། ལི་མིག་འགྲམས། ཁམ་ཁོན་འགྲམ། བཅོས་ཀ་སོ་སོར་བྱ་བ་རྫོགས་སོ།། །།
སྲིད་པའི་སྙིང་མིག་འགྲམ་བཅོས་ལ། ས་བདག་བསྒྱུར་སླེབ་བྱེད། མིག་འབྲས་གང་རྙེད་བསོད་ལ་འགྲམས་བཅོས་བྱེད། རྟ་ཐོད་ལ་མིག་དགུ་བྱས་ལ་གཡུ་དགུ་བཅུག །མི་མགོ་དག་ཚིག་སྐྱེད། ལག་ཏུ་མདུང་བཟུང་བཅུག་ལ། སུ་ཤི་བ་དང་དེ་ཡི་ལོ་གྲངས་གི་གོམ་པ་སྤོ་ལ་བསྐྱལ་ལོ། ༈ །གཅེས་པའི་སྙིང་འགྲམ་གྱི་གཏོ་ལ། སྙིང་ཞོ་ཤ། བྱ་སྤྲེལ་ར་གསུམ་གྱི་སྙིང་སྐུད་པས་རྒྱུན་ལ་སྤར་ཁ་དྭ་ཡི་ཕྱག་རྒྱ་དང་། ཤི་བས་སྐེ་རགས་དང་ཤ་རྩིབ་མ་གཡོན་དང་། ཨོཾ་ཀྲེ་དུ་བཟློག་ཤེའུ་བཟློག་བྱ་བ་བྲིས་ལ་རོ་ཡི་ནུ་མ་གཡོན་མ་ལ་ལྷེན། །རྟ་ཐོད་ལ་ལི་ཡི་ཕྱག་རྒྱ། ཨོཾ་ཁ་ར་ཏི་བཟློག །མ་མ་རཾ་རཾ་ཡེ་སྭཱ་ཧཱ། བྱ་བ་བྲིས་ལ་དུར་ཁ་བཅད། རྡོ་ལེབ་ལ་ལིའི་ཕྱག་རྒྱ་བྲིས་ལ་དུར་ཁར་བཞག ༈ །འདྲེན་པའི་སྙིང་འགྲམས་ཀྱི་གཏོ་ལ། སྙིང་ཞོ་ཤ་འབྲི་བོང་བུ་རི་བོང་བྱ་སྤྲེལ་མིན་པའི་སྙིང་རྙེད་ཚད་སྐུད་པ་ལ་རྒྱུན་ལ་ཟིན་གྱི་ཕྱག་རྒྱ་དང་། ཨོཾ་མ་ར་ཡ་ཟློག ཨོཾ་ཀ་ན་ཀ་ཏ་ཟློག །ཅེས་བྲིས་ནུ་མ་གཡོན་ལ་གླན། རྭ་ཐོད་ལ་དྭ་ཡི་ཕྱག་རྒྱ་དང་། ཨོཾ་ཤེའུ་ཤའུ་བཟློག ༼ཨོཾ་མ་མ་ཀ་རོ་ཀ་རོ་ཡ་སྭཱ་ཧཱ། ཞེས་བྲིས་ལ་དུར་ཐོག་ཏུ་གནོན། ཁོན་ལ་གླང་ལུག་ཤི་ན་སྟག་གི་ཕུར་བུ་ལ། ཨ་ཀརྨ་
ཀཱི་ལི་ཀི་ལ་ཡ་སྭཱ་ཧཱ། བྱ་བ་བྲིས་ལ་རོ་ཡི་ཁར་བཅུག །ལུག་ལ་གསེར་གཡུ་བཏགས་ལ་ལྷོ་ནུབ་ཏུ་འགྲམས་བཅོས་བྱ། སྣང་བརྒྱད་ཐོན། རྣམ་འཇོམས་དང་འབུམ་འདོན། གླང་ལུག་བ་གསུམ་གྱི་དུར་ཁ་བཅད། ཁེན་ལ་ཁྱི་འབྲུག་ཤི་ན། སྐྱེར་པའི་ཕུར་པ་ལ། ༀ་ཙ་རྒྱུན་ཀཱི་ལི་ཀི་ལ་ཡ་སྭཱ་ཧཱ། བྱ་བ་བྲིས་ལ་རོའི་ཁར་བཅུག །གཙུག་ཏོར་སྐུ་བཙུགས། །ཡར་འབུམ་དང་རྩེ་བཀྱག །མདུང་དར་ནག་པོ། ལྕགས་གསེར་དང་ཚེ་གཏོར་མ། ཞེས་ནུབ་བྱང་ལྕགས་ཐོག་ཏུ་དུར་འདེབས་བཅོས་སོ། །གིན་ལ་ཚ་རུས་ཕུར་བུ་དང་། ཨོཾ་རཀ་ཤི་ཀཱི་ལི་ཀི་ལ་སྭཱ་ཧཱ། བྱ་བ་བྲིས་ལ་བཅུག་གོ །གླང་པོ་བྱིལ་གྱི་ཤུན་པའམ། གསོབ་དང་དམི་པ་བརྒྱ་ཤུག་པས་ཕུར་བུ།་ཕོ་རོག་བརྒྱད། ངར་མི་དཀར་པོའི་ལག་ཏུ་དར་མདུང་དཀར་པོ་བཟུང་བཅུག་རྩེ་ལ་གླང་རུ་བཀོན། གོང་མེ་གསོབ་དང་། དེ་རྣམས་བྱང་ཤར་དུ་འགྲམས་བཅོས་བྱ། ཟོན་ལ་ཤུག་པའི་ཕུར་བུ་ལ། ཨོཾ་བཛྲ་ཀི་ལི་ཀི་ལ་ཨཱསཱ་ཧཱ།། བྱ་བ་བྲིས་ལ་རོའི་ཁར་བཅུག །ཤིང་ལེབ་ལ་འབྲུག་གི་གཟུགས་བྲིས་ལ་ར་དགུ་བཏགས། ཕྱོགས་བཅུ་གཉིས་གཡུ་དངུལ་བཏང་། བསམ་པའི་ཕོ་བྲང་བེར་བསྐྱོན། རྔ་
མོང་བསྐྱོན། དངུལ་བཏགས། རྨིད་པ་ཅི་རྙེད་དང་། ཤར་ལྷོ་མཚམས་སུ་བཅོས། གུ་གུང་བཞིའི་བཅོས་པ་རྫོགས་སོ།། །།ཡང་ནམ་མཁའི་རོ་ལམ་ནི། ཤིང་གིས་ནུབ་བསྲུང་། ལྕགས་ཀྱིས་ཤར་བསྲུང་། མེས་བྱང་བསྲུང་། ཆུས་མཚམས་བཞི་བསྲུང་། ཡང་ན་སས་ཤར་སྲུང་། བར་སྣང་གི་རོ་ལམ་ནི། རོ་ཁུར་ལ་ངན། ཉི་དྲོས་ཤར། །དྲོས་ཆེན་དང་ཕྱེད་ཡོལ་ལྷོར། སྲོད་འཁོར་སྐྱ་རེངས་ཤར་དུ་བྱང་ཤར། དེར་རོ་ཁུར་ལ་གནོད། ས་ལ་ཀོ་ལོང་བསྡོམ་པའི་མི་དགུ་ཡོད། གཙུག་ལག་སྤྱི་ཡི་ལྷ་དགུ། གནས་ཆེན་པོ་བརྒྱད་ཕོ་བྲང་ཆེན་པོ་བཞི་རྩ་གཉིས་ཡིན། ཡང་རོ་ལམ་བྱིས་སྦ་དུས་ཚོད་དང་། བྱང་དུ་མི་དྲོང་ངོ་། །བདུན་ཟུར་དང་གཤེད་བཟློག་པའི་སྔགས། བྱི་ལོ་པ་ཤི་ན། རྟའི་ཁོག་པར། བྷེ་ཏས་ཧ་སྟིས་ཨ་བྷ་ཏ་ཀན་སྭཱ་ཧཱ། གླང་ལོ་པ་ཤི་ན། ལུག་གི་ཁོག་གི་ཁོག་པར། ཏྲི་སྣས་ཧ་སྟས་སང་ཀ་གན་སྭཱ་ཧཱ། སྟག་ལོ་པ་ཤི་ན། སྤྲེལ་གྱི་ཁོག་པར། ཨོཾ་བུ་ཏ་ས་ཏ་ཡ་ཕཊ། ཡོས་བུ་ལོ་པ་ཤི་ན། བྱ་ཡི་ལྟོ་བར། བྷ་ཀིན་ཧ་སྟ་ན་ལེ་ཏུ་པ་ཀན་སྭཱ་ཧཱ། འབྲུག་ལོ་པ་ཤི་ན། བྱི་བའི་ལྟོ་བར། བྱ་ཏས་ཧ་སྟི་བ་ཏ་ན་གན་སྭཱ་ཧཱ། ལུག་ལོ་པ་
ཤི་ན། གླང་གི་ལྟོ་བར། སང་སྐར་ར་ཧ་ཧ་ས་ཏྲི་སྣ་ཀན་སྭཱ་ཧཱ། སྤྲེལ་ལོ་པ་ཤི་ན། སྟག་གི་ལྟོ་བར། ན་བ་ཏུ་བི་ཧ་སྟ་བྷ་ཀ་ཀན་སྭཱ་ཧཱ། བྱ་ལོ་པ་ཤི་ན། །ཡོས་བུ་ལྟོ་བར། ཨོཾ་དྷེ་བ་གྷ་ཏི་ཕཊ་ཕཊ་སྭཱ་ཧཱ། ཁྱི་ལོ་པ་ཤི་ན། འབྲུག་གི་ལྟོ་བར། ཤ་ར་ཏ་ན་ཧ་ཀན་སྭཱ་ཧཱ། ཕག་ལོ་པ་ཤི་ན། སྦྲུལ་གྱི་ལྟོ་བར། ཨ་རྫ་ཤེས་ཧ་སྟ་འཛི་ར་མ་ཤ་ཀན་སྭཱ་ཧཱ། ཞེས་མ་ནོར་པ་སྔགས་རྣམས་བྲིས་ནས་སྒོ་སྐར་ལ་བཏགས་ལ་གཤེད་ཁོག་པ་ཐེ་ཚོམ་མེད། ད་ནི་འདྲེ་ངོས་འཛིན་པ་ནི། གཟའ་ཉི་མ་ལ་བབས་པའི་དུས་སུ། མི་ཁྱོད་ལ་གཞོན་འདྲེ་དང་། དལ་ཁ་གནོད། ཤར་ནུབ་ཀྱི་བྱད་ཀས་གནོད། ཁྱི་དང་ཕྱུགས་དཀར་པོ་ཡོད། ཁ་ཟས་དཀར་པོ་ཟོས། འགྲུལ་པ་མི་རྟ་དཀར་པོ་དང་འཕྲད་པས་ལེན་ནོ། །ཟླ་བ་ལ་བབས་པའི་དུས་སུ། མི་ཁྱོད་དང་ཡུགས་ས་དང་། ཁྱིམ་ན་ཕྱུགས་ནག་པོ་ཡོད། ཁ་ཟས་མི་གཙང་བ་ཟོས་པས་ལེན་ནོ། །དམག་དཔོན་ལ་བབ་པའི་དུས་སུ། །ལུང་པ་ཁ་ནུབ་ཕྱོགས་ལ་བལྟས་པས་སྔགས་དང་འདྲེས་སམ། སྣ་ཟོས་བསམ་དམར་ཁ་ཕྱེ་བས་ལེན་ནོ། །མི་རྟ་དམར་པོ་བཞོན་པ་དང་འཕྲད་པས་ལེན་ནོ། །ལྷག་པ་ལ་བབ་པའི་
དུས་སུ་བུ་སྲིང་གི་ཟས་མི་གཙང་བ་ཟོས་པས་ཀླུ་སྲིན་གནོད། བུད་མེད་གོས་སྔོན་གྱོན་པ་དང་འཕྲད་པས་ལེན་ནོ། །ཕུར་བུ་ལ་བབ་པའི་དུས་སུ། འཁྲུལ་འདྲེན་སྙིང་པ་གནོད། །བན་སྔགས་རྟ་ཁྲ་ཅན་གྱི་འགྲུལ་དང་འཕྲད། པ་སངས་ལ་བབ་པའི་དུས་སུ། བྲག་ནག་པོ་ཡོད་པའི་ས་ནི། མགར་བས་སྨྱོ་འདྲེ་དང་དྲི་མ་གནོད། ཁ་ཟས་དཀར་པོ་ཟོས། ཚོང་ཕྱུགས་དེད་པའི་འགྲུལ་གྱི་ལེན་ནོ། །སྤེན་པ་ལ་བབ་པའི་དུས་སུ། ས་བདག་ས་སྲིན་གནོད། ཟས་ཁུར་བ་ཟོས་སམ་སྐྱས་ནག་ཐུག་པས་ལེན་ནོ། །ད་ནི་རྐུན་མ་ངོས་འཛིན་པ་ནི་འདི་ན་ལགས། གཟའ་ཉི་མ་ལ་བབ་པའི་དུས་སུ། གཏོར་མ་བྱུང་ན་རྐུན་མ་དེ་གདོང་པ་དཀར་བ། མིག་གཏིང་ན་སྨེ་བ་ཡོད་པ། གོས་སེར་པོའམ་ཁམ་པ་བདུན་ནམ་ཡང་ན་མི་གསུམ་ཡོད། བྱང་ཤར་དུ་ཁྱེར་ཕྱི་ལ་ཕྱེ། གཟའ་ཟླ་བ་ལ་བབ་པའི་དུས་སུ། རྐུན་མ་དེ་གདོང་སྟེ་ནག་པོ། གོས་ནག་པོ་གྱོན་པ། རྟ་ཕྱུགས་དང་། ཁྱི་ནག་པོ་ཡོད་པ་གཅིག་གི་བྱུང་ངམ་ནུབ་ཏུ་ཁྱེར། ནང་མ་ཡོད། ཡུགས་ས་མའི་ནང་དུ་བསྐུང་། བུད་མེད་དམ་བྲན་གཡོག་གི་སྨྲ་བ་ཡོད། དམག་དཔོན་ལ་བབ་པའི་དུས་སུ། རྐུན་མ་དེ་བྱེ་ཟུར་ཡོད་པ། རྨང་
པོ་བུ་གཅིག་གིས་ལྷོའམ་ནུབ་ཏུ་ཁྱེར། ལྷག་པ་ལ་བབ་པའི་དུས་སུ། རྐུན་པ་དེ་རྒས་པ་སྡུམ་བུ་འབྲུག་གཅིག་གིས་བྱང་དུ་ཁྱེར། ནས་ཆོལ་བས་གསེབ་ཏུ་སྦས་སོ། །ཕུར་བུ་ལ་བབ་པའི་དུས་སུ། གདོང་པ་ཤིང་མདོག་བཞིན་སྐྱ་བ་འདུག་པ། རྟ་ཕྱུགས་དང་སྒོ་ཁྱི་སྐྱ་བོ་ཡོད་པ་གཅིག་གིས་ཤར་དུ་ཁྱེར། ཆོས་པས་སྐུང་། རྐང་ལག་སྐྱོན་ཡོད་ཅིང་གསེབ་ཏུ་སྦས་སོ། །ཟླ་གཅིག་རྩད་ཆོད་ཡོང་། པ་སངས་ལ་བབས་པའི་དུས་སུ། རྐུན་མ་དེས་བྱེད་དཀར་པོ་ཡོད་པ་ལུང་པ་ཁ་ལྷོ་ནུབ་ཏུ་ལྟ་བ་ཕུ་དོགས་པ། མདོ་ཡངས་པ་ཡར་ཕྱེས་པ་བྱེའི་གཉན་གདབ་བོ། །སྤེན་པ་ལ་བབ་པའི་དུས་། རྐུན་མ་དེ་ཁོང་པ་བདེ་བ་འགྲོས་གྲུལ་བ་ཁ་འཇམ་པ་བདག་གི་མ་གསུམ་ཅན། བྲོ་སྔོན་ཏུ་བཟུང་བའི་ནང་མ་ཡིན། །མངྒ་ལཾ། རྒྱ་མོ་དར་ཚགས། རཱ་ག་ཨ་སྱས་གོ་བདེ་གཞུང་གསལ་བ་བསྒྲིགས་པ་དགེ་ལེགས་འཕེལ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།