རྒྱ་དཀར་ནག་གི་འབྱུང་བ་བརྩི་ལུགས་ཤིན་ཏུ་གསལ་བ།
རྒྱ་དཀར་ནག་གི་འབྱུང་བ་བརྩི་ལུགས་ཤིན་ཏུ་གསལ་བ་བཞུགས་པའི་དབུ་ཕྱོགས་ལགས་སོ།།
ན་མོ་གུ་རུ་མཉྫནཱ་ཐ་ཡ། བྱང་ཕྱོགས་རྒྱུད་དུ་བྱུང་བའི་པཎྜི་ཏ། །འཇམ་དབྱངས་བླ་མའི་ཞབས་ལ་ཕྱག་འཚལ་ལོ། །ཕྱི་ནང་སྣོད་བཅུད་འཁོར་འདས་ཐམས་ཅད་ནི། །འབྱུང་བའི་དགྲ་གྲོགས་ཁོ་ནའི་བྱེད་ལས་ཏེ། །ཕྱི་ཡི་འབྱུང་བ་མཁའ་རླུང་མེ་ཆུ་ས། །དེ་དག་གཅིག་གྲོགས་གཅིག་གིས་བྱས་པ་སྟེ། །བསྐལ་པ་ཆགས་དང་ཡར་དར་གནས་པ་འབྱུང་། །དེ་དག་གཅིག་དགྲ་གཅིག་གིས་བྱས་པ་ལས། །བསྐལ་པ་མར་འགྲིབ་འཇིག་རྟེན་ཞིག་ཅིང་སྟོང་། །ནང་གི་འབྱུང་བ་སེམས་དབུགས་དྲོད་ཁྲག་ཤ། །དེ་དག་གཅིག་གྲོགས་གཅིག་གིས་བྱེད་པ་ལས། །སྐྱེ་ཞིང་ཡར་ཚར་
གཞོན་དང་ལུས་པོ་བདེ། །དེ་དག་གཅིག་གྲོགས་གཅིག་གིས་བྱས་པ་ལས། །རྒས་རྒོག་ན་དང་འཆི་དང་ཕུང་པོ་འཐོར། །གསང་བ་སེམས་ཉམས་རང་རྩལ་འབྱུང་བ་ལྔ། །སེམས་ཉིད་ངོ་བོ་སྟོང་པ་ནམ་མཁའི་ཁམས། །སྣ་ཚོགས་འཕྲོ་ཞིང་གཡོ་བ་རླུང་གི་ཁམས། །རིགས་པ་རྒྱུན་ཆད་མེད་པ་ཆུ་ཡི་ཁམས། །སེམས་ཉིད་མེ་ཡིན་ཤི་ནས་དྲོད་མི་གནས། །སེམས་ཉིད་ས་ཡིན་མི་ནི་ཆུར་འཕང་ཏིག །སེམས་ཉིད་རོ་ཡིན་ཆུ་ཡི་ཁ་རུ་ལྡིང་། །དེ་དག་དགྲ་རུ་གྱུར་པ་དུག་ལྔ་སྟེ། །དེ་ཡིས་འཁོར་བར་འཁྱམས་ཤིང་སྡུག་བསྔལ་བསྐྱེད། །གྲོགས་སུ་གྱུར་ན་ཡེ་ཤེས་ལྔ་བསྐྱེད་
པས། །རིགས་ལྔའི་གོ་འཕང་ཐོབ་ཅིང་རྫོགས་སངས་རྒྱས། །འདི་དོན་འཇིག་རྟེན་རྒྱ་ནག་གཙུག་ལག་གཞུང་། །ཕྱི་ནང་ཐུན་མོང་སྒྲ་ཡི་གཞུང་རྣམས་དང་། །དུས་འཁོར་ལ་སོགས་གསར་རྙིང་རྒྱུད་སྡེ་ནས། །རྒྱ་ཆེར་གསུངས་ཕྱིར་ཀུན་གྱི་སྤྱི་བོར་ལེན། །དེ་ཡང་རྒྱལ་བའི་གསུང་གིས་གསང་བ་དང་། །འགྲོ་བའི་ངག་དང་རྩ་ཡིག་འབྱུང་བའི་སྒྲ། །ཡིག་འབྲུའི་གཟུགས་སུ་སྣང་བ་ཤེས་པ་ཏེ། །ཨ་ཨ་ཀ་ཁ་ག་གྷ་ང་ཧ་ཀཽཎཱཀྵ། །མགྲིན་པ་སྟོང་པ་ནས་འབྱུང་ནམ་མཁའི་ཁམས། །སུ་ལའང་མི་དགྲ་ཀུན་དང་གྲོགས་ཡིན་ནོ། །ཞེ་སྡང་འཇོམས་ཤིང་མེ་ལོང་ཡེ་ཤེས་བསྐྱེད། །ཨི་ཨི་ཨེ་ཨེ་ཙ་ཚ་ཛ་ཛྷ་ཉ་ཡ་ཤ། །ལྕེ་སོ་སྐན་ལས་བྱུང་སྟེ་ལྕེ་དེ་ཡང་། །རླུང་ལྟར་བསྐྱེད་པས་རླུང་གི་ཁམས་ཡིན་ནོ། །དགྲ་རུ་གྱུར་ན་རླུང་ནད་རླུང་དགྲ་གནོད། །གྲོགས་སུ་གྱུར་ན་ང་རྒྱལ་འཇོམས་པ་དང་། །མཉམ་ཉིད་ཡེ་ཤེས་བསྐྱེད་པར་བྱེད་པ་ཡིན། །རི་རི་ཊ་ཋ་ཌ་ཌྷ་ཎ་ར་ཥ། །ལྕེ་རྩེ་རྐན་དང་སྤྱི་བོ་ནས་འབྱུང་སྟེ། །ལྕེ་རྩེ་མེ་ལྟར་གྱེན་འབར་མེ་ཡི་ཁམས། །དགྲ་འགྱུར་མཁྲིས་པ་རིམས་ཚད་མེ་དགྲ་གནོད། །གྲོགས་སུ་གྱུར་ན་གཏི་མུག་འཇོམས་པ་དང་། །ཆོས་དབྱིངས་ཡེ་ཤེས་བསྐྱེད་པར་བྱེད་པ་
ཡིན། །ཨུ་ཨུ་ཨོ་ཨོ་པ་ཕ་བ་བྷ་མ་ཝ་སྤ་སྤ། །མཆུ་གཉིས་སྦྱར་ལས་འབྱུང་ཞིང་མཆུ་ཡང་ནི། །ཆུ་ལྟར་མཐུར་དུ་འབབ་པས་ཆུ་ཡི་ཁམས། །དགྲར་གྱུར་གྲང་བཞི་ཆུ་ནད་ཆུ་དགྲ་འབྱུང་། །གྲོགས་སུ་གྱུར་ན་ཕྲག་དོག་འཇོམས་པ་དང་། །བྱ་གྲུབ་ཡེ་ཤེས་བསྐྱེད་པར་བྱེད་པ་ཡིན། །ལི་ལཱི་ཏ་ཐ་ད་དྷ་ན་མ་ས། །ལྕེ་རྩེ་སོ་རྣམས་འཐབ་པ་ལས་འབྱུང་སྟེ། །ལྕེ་རྐན་འཐབ་པར་སྦྱར་བ་ས་ཡི་ཁམས། །དགྲར་གྱུར་བད་ཀན་ས་ཡི་གནོད་པ་འབྱུང་། །གྲོགས་སུ་གྱུར་ན་འདོད་ཆགས་འཇོམ་པ་དང་། །སོ་སོར་རྟོགས་པའི་ཡེ་ཤེས་༈ བསྐྱེད་པར་བྱེད། །ལེགས་སྦྱར་གཞུང་ལ་བོད་ཡིག་དྲུག་མེད་ཀྱང་། །ཅ་ཆ་ཇ་ཉ་ཙ་ཚ་ཛ་མཚུར་རླུང་། །ཞ་ཟ་འ་གསུམ་ནམ་མཁའི་ཡི་གེ་ཞེས། །མར་པས་ཞུས་ཕྱིར་ནཱ་རོ་པ་ཡིས་གསུངས། །དབྱངས་གསལ་བོད་ཡིག་ཀུན་བརྩི་འབྱུང་ཆེན་ཏེ། །ཐམས་ཅད་བརྩི་བས་འབྱུང་བ་ཆེན་པོར་གྲགས། །སྔགས་ཀྱི་ཐོག་མ་རང་གི་མིང་རྣམས་ལ། །དབྱངས་ཡིག་དང་ནི་བུ་དྲུག་ཡོད་པ་ན། །དེ་ལ་འབྱུང་ཆུང་བརྩི་རྒྱུ་མེད་པ་ཡིན། །གཉིས་ཀ་གསལ་བྱེད་སྡེ་ལྔའི་གྲ་ཡིན་ན། །དེ་ལ་འབྱུང་ཆུང་བརྩི་བར་བྱ་བ་སྟེ། །ཆེ་ཆུང་གཉིས་ཀ་མཐུན་ན་རབ་
ཡིན་ཅིང་། །གདམས་ངག་བྱུང་ན་འབྱུང་ཆུང་དབང་ཆེན་གསུངས། །འབྱུང་ཆུང་ཀ་ཙ་ཊ་ཏ་པ་ས་ཡིག །ཁ་ཚ་ཋ་ཐ་ཕ་རྣམས་ཆུ་ཡིག་སྟེ། །ག་ཛ་ཌ་ད་བ་རྣམས་མེ་ཡིག་གོ །གྷ་ཛྷ་ཌྷ་དྷ་བྷ་རྣམས་རླུང་ཡིག་སྟེ། །ང་ཉ་ཎ་ན་མ་རྣམས་ནམ་མཁའོ། །བུ་དྲུག་གསལ་བྱེད་རྣམས་ལ་དབྱངས་ཞུགས་པས། །དབྱངས་ནི་སྲོག་ཡིན་དེ་ཉིད་དབང་ཆེར་བརྩི། །ར་ཏཱ་གི་གུ་ཅན་ནི་མེ་ཡིག་སྟེ། །དཔེར་ན་དྷིཡིག་མེ་རུ་བརྩི་དང་མཚུངས། །ཐིག་ལེ་ཀླད་སྐོར་ནམ་མཁའི་ཁམས་ཡིན་ཏེ། །དཔེར་ན་བྷཾ་ནི་ནམ་མཁར་བརྩི་བའོ། །བོད་ཡིག་སྲོག་དང་ལྡན་ན་དེ་ཉིད་ཏེ། །སྲོག་མེད་ལ་སོགས་ལེགས་སྦྱར་སྐད་དུ་གྱུར། །དཔེར་ན་འཇིག་རྟེན་ལོ་དཀར་བསྒྱུར་ལྟར་རོ། །མིང་ཡིག་ཐོག་མ་བརྩེགས་སམ་བརྟན་འཕུལ་ཅན། །དེ་ཡི་ཡིག་འབྲུ་ཐོག་མ་བརྩི་བྱ་སྟེ། །རྒྱལ་མཚན་ར་དང་བསོད་ནམས་ལ་ནི་བ། །ཕུལ་བརྩེགས་མེད་ན་ཐོག་མའི་ཡི་གེ་བརྩི། །སྔགས་མགོ་ཨོཾ་དང་ན་མོ་ཏད་ཡ་ཐ། །སདྱ་ཐེ་དན་མི་བརྩི་དེ་འཕྲོའི་སྔགས། །ཡིག་འབྲུ་དང་པོ་རང་གི་ཡིག་འབྲུ་ཡི། །དགྲའམ་གྲོགས་སམ་ཐ་མལ་འགྱུར་ཞེས་བརྟག །དབྱངས་ཡིག་དགྲ་རུ་གྱུར་ན་ཚེ་ཐུང་ཞིང་། །གསལ་བྱེད་དགྲ་རུ་གྱུར་ན་ནད་
མང་འགྱུར། །ཐ་མལ་གྱུར་ན་བཟླས་ཀྱང་ནུས་པ་མེད། །ས་དགྲ་མེ་ཡིན་མེ་ཡི་དགྲ་ནི་ཆུ། །ཆུ་དགྲ་རླུང་ཡིན་རླུང་གི་དགྲ་ནི་ས། །དགྲ་རུ་གྱུར་ན་ཤིན་ཏུ་གནོད་པ་ཆེ། །གནོད་ལུགས་ཅི་འབྱུང་སྔོན་དུ་བཤད་ལྟར་རོ། །ས་ཆུ་གཉིས་ནི་ཕན་ཚུན་གྲོགས་ཡིན་ཏེ། །མེ་རླུང་གཉིས་ཀྱང་ཕན་ཚུན་གྲོགས་པོ་ཡིན། །ནམ་མཁའ་ཀུན་གྲོགས་ཀུན་ཀྱང་ནམ་མཁའི་གྲོགས། །གྲོགས་སུ་གྱུར་ན་དངོས་གྲུབ་ཅི་འདོད་འབྱུང་། །ཉོན་མོངས་གང་ཞི་ཡེ་ཤེས་གང་བསྐྱེད་པ། །གོང་དུ་བཤད་པའི་དོན་གྱི་ཤེས་པར་འགྱུར། །ས་ནི་མེ་ལ་ནུས་མེད་ཐ་མལ་པ། །དེ་བཞིན་མེ་ནི་ཆུ་ལ་ནུས་པ་མེད། །ཆུ་ནི་རླུང་ལ་ནུས་པ་མེད་པ་སྟེ། །དེ་བཞིན་རླུང་ནི་ས་ལ་ནུས་པ་མེད། །ཕར་ལ་བསད་ཕྱིར་ཚུར་ལ་ནུས་པ་མེད། །སྔགས་བཟླས་ན་ཡང་འབྲས་བུ་མེད་པར་འགྱུར། །ཆུ་ནང་འཕྲད་ན་ཞི་བའི་ལས་ཀུན་འགྲུབ། །ས་ནང་འཕྲད་ན་རྒྱས་པའི་ལས་ཀུན་འགྲུབ། །མེ་ནང་འཕྲད་ན་དབང་དང་དྲག་པོ་འགྲུབ། །རླུང་ནང་འཕྲད་ནས་དྲག་པོའི་ལས་ཀུན་འགྲུབ། །ནམ་མཁའ་ནང་འཕྲད་མཆོག་གི་དངོས་གྲུབ་ཐོབ། །འདི་ཡི་རིགས་པས་མིང་ཡིག་དང་པོ་གཉིས། །དགྲ་གྲོགས་ཅི་འགྱུར་ལེགས་
པར་བཏང་ཤེས་ན། །ཡུལ་དང་ཁང་པ་མཚེར་ས་འཕྲག་མི་འཕྲག །རྟ་དྲེལ་ནོར་ལུག་འཕེལ་དང་གོད་ཁ་འོང་། །བཟའ་ཚང་སློབ་དཔོན་གྲོགས་ཁ་མཐུན་མི་མཐུན། །ཁ་མཆུ་འཐབ་རྩོད་སུ་ཕམ་སུ་རྒྱལ་སོགས། །ཞིབ་པར་བརྟགས་ན་ཟག་བཅས་མངོན་ཤེས་འཆར། །གཙོ་ཆེན་དུས་འཁོར་རྒྱུད་ཀྱི་དགོངས་པ་ལགས། །བདག་གིས་སློབ་དཔོན་མཁས་པ་མང་པོར་གཏུག །དེ་ཙམ་གཅིག་ལ་ཐམས་ཅད་ཞལ་འཆམ་ཡང་། །རང་མིང་ཡི་གེ་དང་པོ་ཞལ་མ་འཆམ། །ལ་ལས་རང་མིང་རྒྱ་སྐད་བསྒྱུར་དགོས་ཟེར། །འོ་ན་ནཱ་རོ་བོད་ཡིག་དྲུག་པོ་ཡི། །འབྱུང་བ་གསུངས་པ་དེ་ཡང་དགོས་མེད་འགྱུར། །མས་ཕུལ་ཡོད་ན་མ་གཏོགས་བསྒྱུར་མི་དགོས། །ལ་ལས་རང་གི་གསང་མཚན་བརྩི་དགོས་ཟེར། །དབང་བསྐུར་མང་པོ་ཐོབ་པས་གསང་མཚན་མང་། །འདི་བརྩི་དེ་བརྩི་མེད་དེ་འབྲེལ་མེད་འབྱུང་། །ལ་ལས་ཀར་ལུགས་ཀ་དང་དགེ་ལུགས་བློ། །ས་ལུགས་ཀུན་དང་སྟག་འབྲུག་ངག་དབང་རྣམས། །སྤྱི་མིང་ཡིན་པས་བརྩིས་པས་ཕན་མེད་དེ། །རང་གི་མིང་གི་དངོས་གཞི་བརྩི་དགོས་གསུངས། །ལ་ལས་མིང་ཡིག་རྒྱས་པས་མགོ་བརྩི་ཟེར། །ཐག་ཆོད་མེད་པར་ཐམས་ཅད་ཧད་དེ་
ལུས། །དེ་ཚེ་བདག་གི་ལུང་དང་རིགས་པས་དཔྱད། །འདི་ནི་ཀུན་རྫོབ་བདེན་པ་གཙོ་ཆེ་སྟེ། །ང་དང་བདག་ཏུ་འཛིན་པ་མིང་གི་བྱས། །མིང་དེ་བཟླས་ན་ཨ་ལན་བྱེད་ཤོར་ཤིང་། །མིང་དེ་སྨོད་པར་ཐོས་ནས་ཁོང་ཁྲོ་སྐྱེ། །མིང་དེ་བསྟོད་པར་ཐོས་ན་ཡིད་དགའ་བ། །ཀུན་གྱི་ཤེས་ཤིང་ཀུན་གྱི་བརྗོད་པ་ཡི། །རང་གཞན་ཀུན་ལ་བསྒྲུང་བའི་མིང་དེ་བརྩི། །གལ་ཏེ་མིང་ཡིག་ལྷ་དང་མ་མཐུན་ན། །བླ་ཆེན་སྟོབས་ཆེན་མངའ་ཐང་ཆེ་རྣམས་ཀྱིས། །ངག་དབང་ལ་སོགས་ཀུན་དང་མཐུན་པ་ཡིས། །རང་གི་རང་ལ་མཚན་ནི་གསར་པ་གསོལ། །རང་གི་དེར་འཛིན་རྩོམ་ཆོས་མཇུག་ཏུ་བྲི། །གྲྭ་སློབ་རྣམས་ལ་མཚན་གསར་བརྗོད་འཇུག་སྲོལ། །ཐ་མལ་པ་ཡང་ས་མིང་དགྲར་གྱུར་པས། །ན་ཚ་མང་ལ་ཕན་པའི་མིང་གཞན་བཏགས། །རང་གི་མིང་གསར་དེ་ལ་བདག་བཟུང་ནས། །ཀུན་གྱི་མིང་གསར་བརྗོད་པར་གྱུར་ན་ཕན། །མིང་རྙིང་དོར་ནས་བདག་བཟུང་མེད་གལ་ཆེ། །མགོ་རུ་ཨོཾ་དང་མཇུག་ཏུ་ཧཱུྃ་ཕཊ་དེ། །སྭཱ་ཧཱ་སྦྱར་བའི་བར་དུ་ལྷ་ཡི་མིང་། །སྦྱར་བ་དེ་ནི་སྔགས་སུ་འགྱུར་བ་སྟེ། །མིང་གི་ཐོག་མའི་ཡི་གེ་ཐུགས་རྡོ་རྗེ། །མིང་ཡིག་རྐྱང་པ་ལྷ་དེའི་གསུང་རྡོ་རྗེ། །
ཡོངས་སུ་རྫོགས་པ་ལྷ་དེའི་སྐུ་རྡོ་རྗེ། །བྱུང་ནི་ས་བོན་ལྷ་ཉིད་བསྒོམ་པའི་རྟེན། །གསུང་ནི་མཆོད་པའི་སྔགས་མགོར་སྦྱར་བར་བྱ། །སྐུ་ཡི་རྡོ་རྗེ་བཟླས་བྱའི་སྔགས། །འོན་ཀྱང་སྔགས་རིགས་གསུམ་པོ་དེ། །འབུམ་ཕྲག་རེ་ནི་བཟླས་པར་གསུང་པའང་ཡོད། །ཐུགས་ཀྱི་རྡོ་རྗེ་ཐིག་ལེས་བརྒྱན། །ཨོཾ་ནས་སྭ་ཧཱའི་བར་དུ་བཅུག །དེས་ཀྱང་འགྲུབ་པར་མ་གྱུར་ན། །འབྱུང་བའི་ཡི་གེ་གནད་ལ་དབབ། །ཨོཾ་གྱི་མགོ་དང་སྔགས་ཀྱི་མགོར། །ཧ་དང་ཕཊ་སྦྱར་བཟླས་པ་ན། །ལྷ་དེ་མཚོན་གྱིས་བསྣུན་འགྱུར་ཏེ། །བརྒྱལ་ཞིང་རང་གི་དབང་དུ་འདུས། །ནམ་མཁའི་ཡི་གེས་མནན་པའོ། ཧཱུཾ་སྦྱར་ནས་བཟླས་པ་ན། །ལྷ་དེ་རང་ལ་ཕེབས་པར་འགྱུར། །རླུང་གི་མནན་པས་ཕེབས་པའོ།། ར༔ བོ་ཥཊ་སྦྱར་བཟླས་པ་ན། །མེ་ཡིག་ཀྱིས་མནན་ལྷ་བསྲེགས་འགྱུར། ཝན་མ་སྦྱར་བཟླས་པ་ན། །ཆུ་ཡི་ལྷ་ཉིད་གསོས་པར་འགྱུར། ལསཱ་ཧཱ། སྦྱར་བཟླས་པའི། ས་ཡི་ཡི་གེ་ལྷ་རྒྱས་འགྱུར། ཐིག་ལེས་མནན་པའི་ལྷ་མཉེས་ནས། །མཆོག་གི་དངོས་གྲུབ་སྟེར་བའི་ཐབས། །མིང་ཡིག་དང་པོ་ཐིག་ལེས་བརྒྱན། །དཔེར་ན་སྒྲོལ་མ་ལྟ་བུ་ལ། །ཏཾ་ཝ་ཥཊ་སྦྱར་བཟླས་པའོ། །
ཁྱད་པར་ཆོས་སྐྱོང་ལ་སོགས་བསྒྲུབ་པའི་དུས། །མང་པོ་མ་ནོན་རྩུབ་འཁྲུགས་ཆེ་བ་ན། །མགོ་མེད་མགོ་བོ་བཏགས་ཏེ་བཟླས་པའོ། །ཨོཾ་ཨཱཿཧཱུྃ་གསུམ་སྦྱར་ནས་བཟླས་པས་འཇོམས། །ཧ་ཀྱང་འཇམ་ཐལ་རྟགས་མཚན་ཀྱང་མེད་ན། །ཨོཾ་དེ་བསྐྱུར་ནས་བཟླས་པས་རྣོ་ལ་མྱུར། །མགོ་ཅན་མགོ་བོ་བཅད་དེ་བཟླས་པའོ། །ལན་དགུ་བསྒྲུབ་ཀྱང་མ་འགྲུབ་རྟགས་མེད་ན། །གནད་ལ་དབབ་ནས་ཤི་ས་བསྟན་པ་ནི། །སྔགས་དེ་མཇུག་ནས་གྱེན་ལ་འབྲུ་བཟློག་བཟླས། །ཧ་ཅང་མི་མང་མང་ན་རང་སྲོག་འཆད། །པད་གླིང་རཏྣའི་གཏེར་ཁ་ཨོ་རྒྱན་གསུངས། །ནཱ་རོ་འཇམ་དབྱངས་རལ་གྲི་རྣམ་ཐང་བ། །ཞལ་ལུ་ལ་སོགས་མཁས་པའི་གཞུང་རྣམས་དང་། །དུས་འཁོར་རྒྱུད་འགྲེལ་སྒྲ་ཡི་གཞུང་རྣམས་དང་། །སློབ་དཔོན་མཁས་པ་མང་པོས་ཞལ་ཕྱེས་ཤིང་། །རང་གི་ལེགས་པར་བརྟགས་ཤིང་ཉམས་མྱོང་བསྟུན། །དེ་ཕྱིར་འདི་ལ་ཡིད་ཆེས་བྱ་བར་རིག །ཀུན་ལ་མ་བསྒྲགས་གདམས་ངག་ཁྱད་པར་ཅན། །རྒྱ་ནག་རི་བོ་རྩེ་ལྔའི་ཤེལ་ཁང་དུ། །མཁྱེན་རབ་བདག་པོ་འཕགས་པ་འཇམ་དཔལ་གྱིས། །རྒྱ་ནག་རྩིས་ཀྱིས་འདུལ་བའི་དུས་དགོངས་ནས། །གནམ་དང་ས་དང་
བར་སྣང་གབ་རྩེ་ནི། །སུམ་བརྒྱ་དྲུག་ཅུ་ཚན་གསུམ་གཏན་ལ་ཕབ། །དེ་ཉིད་དར་ཆེ་དམ་ཆོས་མི་དར་དོགས། །ཐམས་ཅད་གཏེར་དུ་སྦས་པས་བཀྲ་མི་ཤིས། །སླར་ཡང་རྩ་བའི་དོན་བསྡུས་རྒྱུད་ལྔ་གསུངས། །སྡོང་པོ་ཀུན་འདུས་སྣང་གསལ་སྒྲོན་མེ་དང་། །རིན་ཆེན་ཀུན་འདུས་ས་ལ་པ་ཏྲ་དང་། །བདུད་རྩི་བུམ་པ་ལ་སོགས་རྒྱུད་ལྔ་ལ། །བརྟེན་པ་འཕྲུལ་གྱི་མི་བཞི་ལ་སོགས་པ། །རྒྱ་ནག་ཡུལ་གྱི་སློབ་དཔོན་མང་པོ་ཡི། །བྱིས་པ་བཙས་ལྷུང་བག་མ་ཁ་བསྒོས་དང་། །ཤི་བ་དུར་མཛོད་གསོན་པོ་སྟག་རྩིས་དང་། །ཕན་ཡོན་གཏོ་ཡི་ཆོ་ག་མང་དུ་མཛད། །ལོ་ཙཱ་རྣམས་ཀྱིས་བོད་དུ་ལན་དགུ་བསྒྱུར། །སོ་སོར་མི་སྤེལ་གསང་བའི་གདམས་ངག་མང་། །དེ་ལ་སྡོང་པོ་ཀུན་འདུས་རྒྱུད་ཀྱི་དོན། །ཤིན་ཏུ་ཟབ་པས་མ་སྤེལ་་གསང་རྒྱ་ཅན། །གཞན་ལ་མ་གྲགས་ཀཐོག་ཕྱོགས་སུ་དར། །དུས་ཕྱིས་སྤྲུལ་སྐུ་མི་འགྱུར་རྡོ་རྗེ་ཉིད། །ཀཐོག་བླ་མ་ཀུན་གྱི་བླ་མར་གྱུར། །དེ་དུས་ཕུལ་ནི་འདུག་ཕྱིར་བདག་གིས་ཤེས། །དེ་ཡི་མན་ངག་རྩ་ཚིག་འདི་ལྟ་སྟེ། །ལྷ་ཡི་སྐུ་མདོག་འབྱུང་བའི་ཁ་དོག་དང་། །རང་གི་ལོ་རུས་འབྱུང་བ་ཨི་མཐུན་བརྩི། །ཚེ་སྒྲུབ་ལྷ་ནི་སྲོག་དང་ཨི་མཐུན་བརྩི། །
ཡི་དམ་སྐུ་མདོག་སྐྱེས་སྨེ་ཨི་མཐུན་བརྩི། །ནོར་ལྷ་སྐུ་མདོག་དབང་ཐང་ཨི་མཐུན་བརྩི། །ཆོས་སྐྱོང་སྐུ་མདོག་རླུང་རྟ་ཨི་མཐུན་བརྩི། །ལུས་ཀྱི་བརྩི་ཚུལ་གསལ་བར་མ་གསུངས་ཀྱང་། །ནད་ལ་ཕན་ཕྱིར་བསྙེན་པ་ན། །ལྷ་ཡི་སྐུ་མདོག་ལུས་དང་ཨི་མཐུན་བརྩི། །འབྱུང་བ་ལྗང་གུ་ཤིང་ཡིན་དམར་པོ་མེ། །ས་གསེར་ལྕགས་དཀར་ཆུ་ནི་སྔོན་པོ་སྟེ། །སྲོག་ནི་སྟག་ཡོས་ཤིང་ལ་རྟ་སྦྲུལ་མེ། །བྱ་སྤྲེལ་ལྕགས་ཡིན་བྱི་ཕག་སྲོག་ནི་ཆུ། །ཁྱི་འབྲུག་གླང་ལུག་བཞི་ཡི་སྲོག་ནི་ས། །ཁྱི་རྟ་སྟག་གསུམ་རླུང་རྟ་ལྕགས་ཏེ་དཀར། །བྱི་འབྲུག་སྤྲེལ་གསུམ་རླུང་རྟ་ཤིང་ཡིན་ལྡང་། །ཕག་ལུག་ཡོས་གསུམ་རླུང་རྟ་མེ་སྟེ་དམར། །བྱ་གླང་སྦྲུལ་གསུམ་རླུང་རྟ་ཆུ་ཡིན་སྔོ། །གབ་རྩེ་ཕྲེང་གསུམ་དྲུག་ཅུ་ཐམ་པ་ཡི། །གནམ་ལོ་གང་ཡིན་མ་འཆུག་དེ་ཉིད་ནི། །རང་གི་ལོ་གྲངས་དུ་ལོན་གྱེན་དུ་བརྩི། །གབ་རྩེ་ཟད་ནས་ལྷར་ཡང་མཇུག་ནས་ཡར། །རྩིས་པས་རང་གི་ལོ་སྙིང་གང་ཡིན་ཤེས། །སྟེང་མ་ལུས་དང་བར་མ་དབང་ཐང་ཡིན། །འོག་མ་རང་ཉིད་སྐྱེས་པའི་སྨེ་བ་སྟེ། །སྨེ་བ་གཅིག་དཀར་དྲུག་དཀར་བརྒྱད་དཀར་ལྕགས། །བདུན་དམར་དགུ་དམར་གཉིས་ནི་མེ་ཡིན་ལ། །བཞི་
ལྗང་ཤིང་ལ་གཉིས་ནག་གསུམ་མཐིང་ཆུ། །ལྔ་སེར་ས་སྟེ་ཁ་དོག་སེར་པོ་ཡིན། །ཤིང་བུ་མེ་ལ་མེ་བུ་ས་ཡིན་ཏེ། །ས་བུ་ལྕགས་ཡིན་ལྕགས་བུ་ཆུ་ཡིན་ནོ། །ཆུ་བུ་ཤིང་སྟེ་མཐུར་དུ་དེད་པའི་བུ། །ཤིང་མ་ཆུ་ཡིན་ཆུ་ཡི་མ་ནི་ལྕགས། །ལྕགས་མ་ས་ལ་ས་མ་མེ་ཡིན་ཏེ། །མེ་མ་ཤིང་ཡིན་གྱེན་དུ་དེད་པའི་མ། །ཤིང་གཅིག་མེ་གཉིས་ས་གསུམ་ལྕགས་ནི་བཞི། །ཆུ་དང་ལྔ་སྟེ་འབྱུང་བའི་གྲངས་སུ་འདོད། །ཨ་ཕྱི་དགྲ་ཡིན་ཚ་བོ་གྲོགས་སུ་འགྱུར། །གྱེན་དེད་མ་ཡིན་ཐུར་དེད་བུ་རུ་གྱུར།། །ཤིང་དགྲ་ལྕགས་ལ་ལྕགས་ཀྱི་དགྲ་ནི་མེ། །མེ་དགྲ་ཆུ་ལ་ཆུ་ཡི་དགྲ་ནི་ས། །ས་དགྲ་ཤིང་ཡིན་ཚུར་ལ་གནོད་པའི་དགྲ། །ཤིང་གྲོགས་ས་ཡིན་ས་ཡི་གྲོགས་ནི་ཆུ། །ཆུ་གྲོགས་མེ་ཡིན་མེ་ཡི་གྲོགས་ནི་ལྕགས། །ལྕགས་གྲོགས་ཤིང་ཡིན་ཕར་ལ་ཐུབ་པས་བཟང་། །མ་རུ་གྱུར་ན་མཆོག་ཡིན་དཀར་པོ་གཉིས། །གྲོགས་དང་འཕྲད་ན་བཟང་བའི་དཀར་པོ་གཅིག །དེ་ལྟར་འགྲིག་ན་ཡིད་བཞིན་ནོར་བུ་འདྲ། །ཇི་ལྟར་འདོད་པའི་དོན་དེ་ངེས་པར་འགྲུབ། །དགྲ་འཕྲད་ཤིན་ཏུ་ངན་པས་ནག་པོ་གཉིས། །དགྲ་འཕྲད་ལྕུག་ཕྲན་ཟོར་བས་བརྔས་པ་ལྟར། །རི་བོ་ཡིན་ཡང་ཐར་བར་བརླག་པ་དང་། །རྒྱ་
མཚོ་ཡིན་ཡང་སྐམ་པར་འཇམ་དབྱངས་གསུངས། །བུ་འཕྲད་ཅུང་ཙམ་ངན་པས་ནག་པོ་གཉིས། །འབྱུང་བ་ནང་འཕྲད་འབྲིང་སྟེ་དཀར་ནག་གཉིས། །ཞིབ་རྩིས་ས་ཆུ་ནང་འཕྲད་དཀར་པོ་གཅིག །མེ་ལྕགས་ཤིང་གསུམ་ནང་འཕྲད་ནག་པོ་གཉིས། །ལ་ཆེན་བུ་འཕྲད་ནང་འཕྲད་འགལ་བ་ཆུང་། །གལ་ཏེ་མ་མཐུན་ན་ཡང་སྤང་མི་དགོས། །ལྷ་ལ་ཁ་དོག་རིགས་ལྔ་ཀུན་ལ་ཡོད། །གང་མཐུན་དེ་ཉིད་བསྒོམས་པས་ཆོག་པ་སྟེ། །དཔེར་ན་བྱ་སྤྲེལ་ལོ་པས་ཚེ་སྒྲུབ་དུས། །ཚེ་དཔག་དམར་སེར་ལི་ཁྲིའི་མདོག་ཅན་ལ། །རྒྱན་དང་ན་བཟའ་གསེར་མདོག་བསྒོམས་པས་འཐུས། །སྟག་ཡོས་ལོ་པས་སྒྲོན་དཀར་ཚེ་སྒྲུབ་དུས། །སྐུ་མདོག་དཀར་ལ་སྔ་བ་ཆུ་ཤེལ་མདོག །སྟོད་གཡོགས་སྨད་གཡོགས་དར་དཔྱང་མཐིང་ཁ་བསྣམས། །དེ་ནི་བསྒྱུར་ཁ་རིགས་པས་ཤེས་པར་བྱ། །འདི་ཡང་ཟབ་ཁྱད་གནད་ཀྱི་གདམས་པ་ཡིན། །རྒྱ་གར་རྒྱ་ནག་ལུགས་ཀྱི་འབྱུང་བའི་རྩིས། །ཚིག་མི་མཐུན་ཡང་དོན་ལ་མཐུན་པ་སྟེ། །ཤིང་དང་རླུང་གི་ངོ་བོ་གཅིག་པ་དང་། །ལྕགས་དང་ནམ་མཁའ་དོན་ལ་གཅིག་པར་བཤད། །འབྱུང་བ་ཆེ་ཆུང་བརྩི་ཐབས་ཡི་གེའི་ཚོགས། །ས་སྟེང་ཁྱབ་ཅིང་ཀུན་གྱི་
སྨྲ་ན་ཡང་། །ཇ་གྲལ་རྣམས་སུ་བླ་བོ་བརྗོད་ཅི་ལས། །ལག་བླང་རང་ཉམས་བླང་བ་དཀའ་མཐོང་ནས། །དགེ་བའི་བཤེས་གཉེན་ཀརྨ་ས་ག་རས། །གལ་ཆེན་མཎྜལ་བཟང་པོ་དང་བཅས་བསྐུལ། །འདི་ལ་གོམས་པ་རཱ་ག་ཨ་སྱ་ཡིས། །གབ་སྦས་སྤང་སྟེ་སྙིང་ཕྱུངས་ལག་པས་བཀོད། །ཕྱི་རབས་ལྷ་སྒོམ་སྔགས་བཟླས་བྱེད་ཀུན་ལ། །བཞག་པ་མི་ཆུང་ཆེའོ་དགའ་བ་བསྒོམ། །འཁྲུལ་པ་མེད་པས་བཤགས་བྱ་ཅུང་མ་མཆིས། །ཀུན་ཁྱབ་ཀུན་ལ་ཕན་པའི་བཀྲ་ཤིས་ཤོག །ཤུ་བྷཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།