རྣལ་འབྱོར་པ་སྒྲུབ་པའི་བར་ཆད་སེལ་བའི་སྨོན་ལམ།
རྣལ་འབྱོར་པ་སྒྲུབ་པའི་བར་ཆད་སེལ་བའི་སྨོན་ལམ་བཞུགས་སོ། །ན་མོ་རཏྣ་ཏྲ་ཡཱ་ཡ། བདེན་གྲུབ་བདེན་པར་སྨྲ་བའི་པདྨ་འབྱུང་། །རྒྱལ་བ་དགོངས་བརྒྱུད་རིག་འཛིན་བརྡ་ཡི་བརྒྱུད། །གང་ཟག་སྙན་བརྒྱུད་བླ་མའི་བདེན་པ་དང་། །ཞི་ཁྲོ་རབ་འབྱམས་མཁའ་འགྲོ་རྒྱ་མཚོ་དང་། །བསྟན་སྲུང་དམ་ཅན་རྒྱ་མཚོའི་བདེན་པའི་མཐུས། །རྣལ་འབྱོར་བདག་གིས་བསྒྲུབ་པའི་དམ་བཅའ་རྣམས། །བར་ཆད་མེད་ཅིང་མཐའ་རུ་ཕྱིན་པར་ཤོག །རྩ་བརྒྱུད་བླ་མ་རིག་འཛིན་རྒྱ་མཚོ་ཡིས། །དུས་རྣམས་ཀུན་ཏུ་བྱིན་གྱིས་རླབས་པར་ཤོག །ཡི་དམ་ཞི་ཁྲོ་རྒྱལ་བ་རྒྱ་མཚོ་ཡིས། །རྒྱུན་ཆད་མེད་པར་དངོས་གྲུབ་སྟེར་བར་ཤོག །མ་སྲིང་མཁའ་འགྲོ་དམ་ཅན་རྒྱ་མཚོ་ཡིས། །དུས་རྣམས་ཀུན་ཏུ་བར་ཆད་སེལ་བར་ཤོག །དབེན་པར་སོ་གསོད་ལྐོག་ཉལ་མི་བྱེད་པར། །བརྩོན་འགྲུས་མོས་གུས་ལྟེམ་རྐྱང་མེད་པར་ཤོག །ཚེ་འདིའི་དོན་དུ་རྟོག་པ་མི་འཕྲོ་བར། །རྩེ་གཅིག་ཞི་གནས་བསམ་གཏན་སྐྱེ་བར་ཤོག །ཞི་གནས་དགའ་བདེའི་རོ་ལ་མི་ཆགས་པར། །རང་རིག་ལྷག་མཐོང་ཡེ་ཤེས་སྐྱེ་བར་ཤོག །གེགས་སེལ་བོགས་འདོན་ལོགས་ནས་མི་འཚོལ་
བར། །གསོལ་འདེབས་མོས་གུས་གནད་དུ་བསྣུན་པར་ཤོག །བསྒོམ་བྱ་སྒོམ་བྱེད་ལོགས་ནས་མི་འཚོལ་བར། །གང་ཤར་ངང་དུ་བཟོ་མེད་འཇོག་པར་ཤོག །ཇི་ལྟར་ཤར་ཡང་དགག་སྒྲུབ་མི་བྱེད་པར། །གང་ཤར་ཐམས་ཅད་སྒོམ་དུ་འཆར་བར་ཤོག །བཅོས་མའི་ཀུན་བཏགས་ལྷ་གཟུགས་མི་སྒོམ་པར། །གདོད་ནས་སྣང་སྲིད་ལྷ་རུ་འཆར་བར་ཤོག །རྩ་རླུང་ཐིག་ལེའི་གེགས་སྐྱོན་མི་འབྱུང་ཞིང་། །བདེ་སྟོང་ཡེ་ཤེས་རང་ལ་འཆར་བར་ཤོག །སྤྱོད་པ་བག་མེད་ཐོ་ཅོ་མི་བྱེད་པར། །འབྲས་བུ་བསླུ་མེད་དོན་ལ་འཕྲིགས་ཚུད་ཤོག །རང་དོན་ཞི་བདེའི་བསམ་ཆུང་མི་སྐྱེ་བར། །གཞན་དོན་བྱམས་དང་སྙིང་རྗེ་འབྱོངས་བར་ཤོག །འབྲས་བུ་ཡིད་སྨོན་ཙམ་དུ་མ་ལུས་པར། །སྐུ་གསུམ་འབྲས་བུ་རང་ལ་རྙེད་པར་ཤོག །ཆོས་ཉིད་རང་བཞིན་རྣམ་པར་དག་པ་དང་། །ཆོས་ཀུན་ཀུན་རྫོབ་བསླུ་བ་མེད་པ་དང་། །འགོག་པའི་བདེན་དང་ལམ་གྱི་བདེན་པ་དང་། །བདེན་ལྡན་ཇི་སྙེད་རྣམས་ཀྱི་བདེན་པའི་མཐུས། །སྨོན་ལམ་འདི་དག་གེགས་མེད་མྱུར་འགྲུབ་ཤོག །ཅེས་སྒྲུབ་ལ་བར་ཆད་ཞི་བའི་སྨོན་ལམ་འདི། ༧ ཨ་རཱ་གས་སོ། །སརྦ་མངྒ་ལཾ། །