ཐུགས་རྗེ་ཆེན་པོ་གསང་བ་འདུས་པའི་བརྒྱུད་འདེབས་ཐུགས་རྗེའི་སྤྲིན་ཕུང་།
ཐུགས་རྗེ་ཆེན་པོ་གསང་བ་འདུས་པའི་བརྒྱུད་འདེབས་ཐུགས་རྗེའི་སྤྲིན་ཕུང་བཞུགས་སོ། །ན་མོ་གུ་རུ། སྤྲོས་མེད་མཁའ་ལྟར་དག་པ་ཆོས་ཀྱི་དབྱིངས། །ནུབ་ཕྱོགས་བདེ་བ་ཅན་གྱི་ཞིང་ཁམས་སུ། །ཆོས་སྐུ་འོད་དཔག་མེད་ལ་གསོལ་བ་འདེབས། །སྟོང་ཉིད་ལྟ་བ་རྟོགས་པར་བྱིན་གྱིས་རློབས། །ཐུགས་རྗེའི་སྤྲིན་ཚོགས་འཁྲིགས་པ་རྒྱལ་བའི་ཞིང་། །ཤར་ཕྱོགས་པོ་ཏ་ལ་ཡི་གནས་མཆོག་ཏུ། །རྒྱལ་སྲས་ཐུགས་རྗེ་ཅན་ལ་གསོལ་བ་འདེབས། །བྱམས་དང་སྙིང་རྗེ་འབྱོང་བར་བྱིན་གྱིས་རློབས། །སྨོན་ལམ་རྣམ་པར་དག་པ་སྤྲུལ་པའི་ཞིང་། །དཔལ་རི་པདྨ་འོད་ཀྱི་ཞིང་ཁམས་སུ། །ཨོ་རྒྱན་རིན་པོ་ཆེ་ལ་གསོལ་བ་འདེབས། །དོན་གཉིས་མཐའ་རུ་ཕྱིན་པར་བྱིན་གྱིས་རློབས། །རང་བཞིན་རྣམ་པར་དག་པའི་མཁའ་སྤྱོད་ནས། །མཁའ་འགྲོ་འབུམ་ཚོ་འདུས་པའི་ཕོ་བྲང་དུ། །མ་གཅིག་མཚོ་རྒྱལ་ཞབས་ལ་གསོལ་བ་འདེབས། །བདེ་སྟོང་རྒྱུན་ཆད་མེད་པར་བྱིན་གྱིས་རློབས། །མཁའ་འགྲོ་འབུམ་ཚོ་འདུས་པ་གནས་ཀྱི་མཆོག །ཆོས་འཁོར་བདེ་ཆེན་གླིང་གི་དབེན་གནས་སུ། །རཏྣ་གླིང་པའི་ཞབས་ལ་གསོལ་བ་འདེབས། །ཉམས་རྟོགས་མཐའ་རུ་ཕྱིན་པར་བྱིན་
གྱིས་རློབས། །ཐུགས་རྗེ་ཆེན་པོས་བྱིན་གྱིས་བརླབས་པའི་གནས། །སྨོན་ལམ་ལས་འཕྲོ་ལྡན་པའི་ཕོ་བྲང་ན། །སྤྲུལ་སྐུས་རྗེས་བཟུང་གུ་རུ་བློ་གྲོས་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །ཐུགས་རྗེས་གང་འདུལ་སྤྲུལ་པའི་ཞིང་ཁམས་ན། །སྟོང་ཉིད་སྙིང་རྗེས་འགྲོ་སྒྲོལ་ཕོ་བྲང་དུ། །དྲིན་ཅན་རྩ་བརྒྱུད་བླ་མ་ལ་གསོལ་བ་འདེབས། དོན་གཉིས་མཐའ་རུ་ཕྱིན་པར་བྱིན་གྱིས་རློབས། །ལྷོ་བྲག་གནས་སྐས་ཅན་གྱི་གཏེར་གནས་སུ། །ཚེ་གཅིག་རྡོ་རྗེའི་སྐུ་འགྲུབ་ཟབ་མོའི་ལམ། །དམ་ཆོས་གསང་བ་འདུས་པ་ལ་གསོལ་བ་འདེབས། །སྒྲུབ་པ་མཐའ་རུ་ཕྱིན་པར་བྱིན་གྱིས་རློབས། །དངོས་གྲུབ་སྤྲིན་ལྟར་གཏིབས་པའི་གནས་མཆོག་ན། །དབང་བཞི་ཡོངས་རྫོགས་ལུས་ཀྱི་དཀྱིལ་འཁོར་དུ། །གསང་འདུས་ཞི་ཁྲོའི་ལྷ་ཚོགས་ལ་གསོལ་བ་འདེབས། །སྐུ་གསུམ་ལྷུན་གྱིས་གྲུབ་པར་བྱིན་གྱིས་རློབས། །བདེ་སྟོང་སྒྱུ་མ་ལྟ་བུའི་ཕོ་བྲང་ན། །ཕྲིན་ལས་རྣམ་བཞི་འགྲུབ་པའི་དཀྱིལ་འཁོར་དུ། །མ་ཚོགས་མཁའ་འགྲོ་རྣམས་ལ་གསོལ་བ་འདེབས། །སྣང་བ་དབང་དུ་འདུ་བར་བྱིན་གྱིས་རློབས། །ཕྲིན་ལས་དྲག་རྩ་ལ་ལྡན་པའི་བཀའ་ཆོས་
ན། །ཕྲིན་ལས་ཐོགས་མེད་འགྲུབ་པའི་ཕོ་བྲང་དུ། །བཀའ་སྲུང་དམ་ཅན་རྣམས་ལ་གསོལ་བ་འདེབས། །ཕྱི་ནང་བར་ཆད་ཞི་བར་བྱིན་གྱིས་རློབས། །སྨོན་ལམ་ལས་འཕྲོ་དག་པ་རྒྱལ་བའི་ཞིང་། །རང་གཞན་དོན་གཉིས་སྤྱོད་པའི་སྐྱེས་བུ་མཆོག །མཆེད་གྲོགས་ཆོས་མཛད་རྣམས་ལ་གསོལ་བ་འདེབས། །སྒྲུབ་པའི་རྒྱལ་ས་འཛིན་པར་བྱིན་གྱིས་རློབས། །ཐུགས་རྗེའི་སྐྱབས་གནས་བརྩེ་ཆེན་ཁྱེད་རྣམས་ཀྱིས། །བདག་སོགས་གསོལ་བ་འདེབས་པའི་བུ་རྣམས་ལ། །ཐུགས་རྗེའི་སྤྲིན་ཚོགས་དུས་འདིར་གཏིབས་ནས་ཀྱང་། །བྱིན་རླབས་ཆར་བཞིན་འབེབས་པར་མཛད་དུ་གསོལ། །སྙིང་མ་ལྔ་བདོ་བསྟན་པའི་མར་གཤམ་འདིར། །སེམས་ཅན་ཉོན་མོངས་ལས་ཀྱིས་མནར་བ་ལ། །བརྩེ་ཆེན་ཁྱེད་ཀྱི་ཐུགས་རྗེའི་དབལ་སྐྱེད་ལ། །བདག་སོགས་ཐར་པའི་གནས་སུ་འདྲེན་དུ་གསོལ། །ཚེ་འདི་བློས་བཏང་དབེན་པའི་རི་ཁྲོད་དུ། །སྐྱོ་ཤས་ངེས་འབྱུང་རྟག་ཏུ་མི་འབྲལ་བར། །ཡོན་ཏན་ཉམས་རྟོགས་ཟླ་བ་ཡར་ངོ་བཞིན། །གོང་ནས་གོང་དུ་འཕེལ་བར་བྱིན་གྱིས་རློབས། །བདག་སོགས་ཉོན་མོངས་སྙིང་རྗེའི་ཡུལ་རྣམས་ལ། །
བྱམས་མགོན་ཁྱེད་ཀྱི་ཐུགས་རྗེའི་འོད་ཟེར་གྱིས། །ལས་དང་ཉོན་མོངས་མ་རིག་བསལ་ནས་ཀྱང་། །ཡེ་ཤེས་སྣང་བ་རྒྱས་པར་བྱིན་གྱིས་རློབས། །གསོལ་བ་འདེབས་སོ་བཀའ་བརྒྱུད་དྲིན་ཅན་རྣམས། །རྗེས་འཇུག་བདག་ཅག་བྱང་ཆུབ་བསྒྲུབ་པ་ལ། །ཚེ་དང་སྒྲུབ་པ་མཐའ་རུ་ཕྱིན་པ་དང་། །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །ཞེས་པའང་སྤྲུལ་སྐུ་རཏྣ་གླིང་པས་མཛད་པ་ལ་བརྒྱུད་པའི་ཁ་འགེངས་ཕྲན་བུ་ཡོད་པའོ།། །།