ཐུགས་རྗེ་ཆེན་པོའི་ཟབ་ལམ་དམར་ཁྲིད་ཀྱི་སྔོན་འགྲོའི་ངག་འདོན་ཐར་ལམ་ཐེམ་སྐས།
ཐུགས་རྗེ་ཆེན་པོའི་ཟབ་ལམ་དམར་ཁྲིད་ཀྱི་སྔོན་འགྲོའི་ངག་འདོན་ཐར་ལམ་ཐེམ་སྐས་ཤེས་བྱ་བ་བཞུགས་སོ།
ན་མོ་གུ་རུ་པདྨ་ཀཱ་ར་ཡེ། སྣང་མཐའི་མཁའ་ལ་སྤྱན་གཟིགས་ཉིན་བྱེད་ཤར། །པད་འབྱུང་འོད་ཟེར་འགྲོ་དེར་དངོས་སྣང་བ། །ཀརྨ་ཆགས་མེད་ཞབས་ལ་གུས་འདུད་དེ། །ཐུགས་རྗེ་ཆེན་པོའི་ཟབ་ལམ་དམར་ཁྲིད་ཀྱི། །སྔོན་འགྲོའི་ངག་འདོན་ཐར་ལམ་ཐེམ་སྐས་སྤེལ། །འདིར་བླ་མ་ཁྲིད་འཆད་ནུས་པ་ཡོན་ཏན་དང་ལྡན་པའི་མདུན་ནས། ཐུགས་རྗེ་ཆེན་པོའི་དམར་ཁྲིད་ལེགས་པར་ཐོབ་པའི་གང་ཟག་གིས་ཐུན་དྲུག་གམ་བཞི། ཐ་ནའང་ཉིན་བཞིན་ཉམས་ལེན་བགྱིད་འདོད་པས། ཀྱེ་མ་ཀྱེ་ཧུད་སྐལ་ལྡན་རིགས་ཀྱི་བུ། །མ་རིག་གཏི་མུག་དབང་གིས་མ་ནོན་པར། །བརྩོན་འགྲུས་ངར་བསྐྱེད་ད་ལྟ་ཡར་ལོངས་ལ། །ཐོག་མེད་
དུས་ནས་ད་ལ་ཐུག་གི་བར། །མ་རིག་གཏི་མུག་ངང་ཉལ་དེ་ཀས་ཆོག །ད་ནི་མ་ཉལ་སྒོ་གསུམ་དག་ལ་འབད། །ཅེས་པས། ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན། །ཀུན་འདུས་བསླུ་མེད་སྐྱབས་གནས་པད་འབྱུང་རྗེ། །རྒྱལ་བ་ཁྱེད་ལ་ཐུགས་རྗེས་སྟོབས་མངའ་བ། །བདག་སོགས་རིགས་དྲུག་འཁོར་བ་སྡུག་བསྔལ་ལས། །ད་ལྟ་ཉིད་དུ་ཐར་བར་བྱིན་གྱིས་རློབས། །དེ་དག་གི་དོན་དྲན་བཞིན་དུ་ཚར་གསུམ་བརྗོད། དེ་ནས་ངག་བྱིན་བརླབ་ནི། ཨོཾ་ཨཱཿཧཱུྃ་སྭཱ་ཧཱ། ཨོཾ་བཛྲ་སཏཱ་ས་མཱ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་ཌོ་ལྷོ་མེ་བྷ་ཝ། སུ་ཏོཥྱོ་མེ་བྷ་
ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ༔ སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡ༔ ཀུ་རུ་ཧཱུཾ། ཧ་ཧ་ཧ་ཧ་ཧོ༔ བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲ་བྷ་ཝ་མ་ཧཱ་ས་མ་ཡ་སཏྭ་ཨཱ༔ ཅེས་ཡིག་བརྒྱ། ཨ་ཨཱ། ཨི་ཨཱི། ཨུ་ཨཱུ། རྀ་རཱི། ལི་ལཱི། ཨེ་ཨཻ། ཨོ་ཨཽ། ཨཾ་ཨཱ། དབྱངས་ཡིག་དང་། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། གསལ་བྱེད་དང་། ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་དུནྟེ་ཥཱནྟ་ཐཱ་ག་ཏོ་ཧྱ་ཝ་དཏ་ཏེ་ཥཉྩཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎ༔ ཚར་བདུན་བརྗོད། གང་གི་མི་ལུས་རིན་ཆེན་འདི། །རྒྱུ་འབྲས་ངོ་བོ་དེ་དོན་གྱིས། །དལ་འབྱོར་རྙེད་དཀའི་དོན་སྒོམ་བཞིན། །བརྩོན་འགྲུས་ཆེར་བསྐྱེད་ཉམས་ལེན་བྱ། །ཞེས་དང་། བསགས་པ་ཀུན་གྱི་མཐའ་འཛད་ཅིང་། །བསླང་བའི་མཐའ་ནི་འགྱེལ་བ་སྟེ། །འཕྲད་པའི་མཐའ་ནི་བྲལ་བའོ། །གསོན་པའི་མཐའ་ནི་འཆི་བ་ཡིན། །ཞེས་དང་། །ན་ནིང་ད་ལོ་ནམ་ཟླ་སྟོད་སྨད་དང་། །ཞག་དང་ཟ་མ་སྐད་ཅིག་མི་རྟག་པ། །ལེགས་པར་བསམ་ན་རང་ཉིད་འཆི་ལ་ཐུག །སྒྲུབ་ལ་སྙིང་རུས་ནུས་
པར་བྱིན་གྱིས་རློབས། །ཞེས་དང་། མི་དགེའི་འབྲས་བུ་སྡུག་བསྔལ་ཏེ། །དགེ་བའི་ལས་ནི་བདེ་བ་ཐོབ། །འདྲེས་མས་བདེ་སྡུག་འདྲེས་འབྱུང་བས། །དགེ་སྡིག་ཆུང་ནས་བླང་དོར་བྱ། །ཞེས་དང་། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །ལྷ་རྣམས་བག་མེད་དག་གིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །དེ་ལྟར་ཐུན་མོང་སྔོན་འགྲོ་བཞིའི་དོན་ཡིད་ལ་དྲན་ཅིང་རང་ལ་འདྲེས་ངེས་པར་ཚིག་གིས་གསལ་འདེབས་ཤིང་དོན་བསྒོམ་མོ། །དེ་ནས་སྐྱབས་ཡུལ་ཚོགས་ཞིང་བསྒོམ་ལུགས་རྒྱས་བསྡུས་གཉིས་ལས་འདི་ནི་བསྡུས་པ་སྡེ། མདུན་གྱི་ནམ་མཁར་རིན་པོ་ཆེའི་ཁྲི། །རྨ་བྱ་བརྒྱད་བཏེག་པདྨ་ཟླ་བའི་གདན། །རྩ་བའི་བླ་མ་དང་ནི་དབྱེར་མེད་པ། །པད་འབྱུང་ཆོས་སྐུ་སངས་རྒྱས་འོད་དཔག་མེད། །སྐུ་མདོག་དམར་པོ་ཆོས་གོས་རྣམ་གསུམ་གསོལ། །རྡོ་རྗེ་སྐྱིལ་ཀྲུང་གིས་བཞུགས་མཉམ་གཞག་གི །ཕྱག་རྒྱས་ལྷུང་བཟེད་འཛིན་པ་ཞལ་འཛུམ་བཅས། །མཛོད་སྤུ་དཀར་པོ་སྤྱན་གཉིས་ཞི་བས་ནི། །བདག་ལ་གཟིགས་ཤིང་དེ་ཡི་སྐུ་དགེ་འདུན། །གསུང་ནི་དམ་ཆོས་ཐུགས་ཉིད་སངས་རྒྱས་ཏེ། །ཡོན་
ཏན་ཡི་དམ་ཕྲིན་ལས་མཁའ་འགྲོ་དང་། །ཆོས་སྐྱོང་ཀུན་འདུས་ངོ་བོར་བསྒོམ་པ་ལ། །འདི་ཕྱི་བར་གསུམ་ཅི་མཛད་ཁྱེད་ཤེས་ཀྱི། །བློ་སྙིང་ལིང་གིས་གཏད་ནས་སྐྱབས་འགྲོ་བྱ་། །པད་འབྱུང་ཆོས་སྐུ་རྒྱལ་བ་འོད་དཔག་མེད། །དབྱེར་མེད་དྲིན་ཅན་རྩ་བའི་བླ་མ་དང་། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གི་བསྐྱེད་རྫོགས་སྒོམ་པའི་བསོད་ནམས་ཀྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་སྐྱབས་སེམས་ཕྱོགས་བསྡམས་ལན་ཉེར་གཅིག་གམ་བརྒྱ་སྟོང་གང་འགྲུབ་མཚམས་ཐུན་བསྡུ་དུས། མདུན་གྱི་སྐྱབས་ཡུལ་འོད་ཞུ་བདག་ལ་ཐིམ། །རང་གི་ལུས་ངག་ཡིད་དང་སྐྱབས་ཡུལ་གྱིས། །སྐུ་གསུམ་ཐུགས་གསུམ་དབྱེར་མེད་རོ་གཅིག་ནས། །བསྐྱབ་བྱ་སྐྱབས་ཡུལ་སྐྱོབ་མཁན་རང་གི་སེམས། །ཇི་བཞིན་འཁྲུལ་མེད་རྟོགས་ན་དོན་གྱི་སྐྱབས། །མ་བཅོས་ཡེངས་མེད་ངང་ལ་ཅི་གནས་བཞག །ཅེས་མཉམ་པར་བཞག་གོ །དེ་ནས་གོང་གི་བྱང་ཆུབ་སེམས་བསྐྱེད་ཀྱི་དོན་རྩ་དང་ནི། བྱམས་དང་སྙིང་རྗེ་ལ་རག་ལས་ཏེ། དོན་རང་བྱང་ཆུབ་སེམས་ཀྱི་བདེ་བ་ཕར་བཏང་སྡུག་བསྔལ་ཚུར་ལེན་པའི་དམིགས་པ་འདི་གཙོ་བོ་ཡིན། རང་ཉིད་སྐད་ཅིག་ཐུགས་རྗེ་ཆེན་
པོ་དཀར། །ཞལ་གཅིག་ཕྱག་བཞི་གཞུང་ལྟར་ཝལ་གྱིས་བསྒོམ། །རླུང་གཅིག་ཕར་བུས་རང་གི་བདེ་སྐྱིད་དང་། །དགེ་རྩ་ཅི་ཡོད་སེམས་ཅན་ཐམས་ཅད་ལ། །སིབ་སིབ་ཐིམ་པས་སེམས་ཅན་ཐམས་ཅད་ཀྱི། །བདེ་རྒྱུ་བསོད་ནམས་ཡེ་ཤེས་ཚོགས་གཉིས་རྫོགས། །བདེ་སྐྱིད་ཕུན་སུམ་ཚོགས་པ་ལྡན་པར་བསམ། །མཁའ་མཉམ་སེམས་བདེ་དང་ལྡན་གྱུར་ཅིག །དེ་ནི་བྱམས་པ་ཚད་མེད་ཅེས་སོ། །རླུང་ཞིག་ཚུར་རྔུབ་མཁའ་ཁྱབ་སེམས་ཅན་གྱི། །སྡུག་བསྔལ་ཐམས་ཅད་རུབ་ཀྱིས་བསྡུས་ནས་ཀྱང་། །རང་ལ་ཐིམ་པས་མེ་ལ་ཤིང་བསྣན་ལྟར། །རང་ཉིད་བཀྲག་མདངས་གཟི་བརྗིད་སྔར་ལས་རྒྱས། །རིགས་དྲུག་འཁོར་བའི་སྡུག་བསྔལ་རྒྱུ་དག་ནས། །ཉོན་མོངས་ཤེས་བྱའི་སྒྲིབ་གཉིས་བྱང་བར་བསྒོམ། །དུས་རྣམས་རྟག་ཏུ་སྡུག་བསྔལ་མེད་པར་ཤོག །ཅེས་སྙིང་རྗེ་ཚད་མེད་ཡིན། དོན་དེ་བསྒོམ་བཞིན་བཏང་ལེན་དམིགས་པ་ཉེར་གཅིག་ལས་མིང་ཉུང་བ་བརྒྱ་སྟོང་དང་། འབུམ་ཐེར་སོགས་འགྲུབ་ན་ལེགས། ཐུན་བསྡུ་ཁར་དེ་ལྟར་སེམས་ཅན་ཐམས་ཅད་བདེ་བ་དང་ལྡན་བཞིན་དུ་གནས་ན། བུ་གཅིག་པུ་གཡུལ་ལས་མགོ་ཐོན་པ་དང་འཕྲད་པའི་མ་ལྟ་བུའི་དགའ་བས། བདེ་སྐྱིད་ཕུན་སུམ་ཚོགས་དང་མི་འབྲལ་
བཀའ་གཏེར་རྩ་གཞུང་། ཚིག་དེ་ལན་གསུམ་སོགས་གསལ་འདེབས་པ་དགའ་བ་ཕུན་སུམ་ཚོགས་པའོ། །མདོར་ན་འཁོར་བར་འཁྱམས་ཏེ་སྡུག་བསྔལ་མྱོང་བུའི་རྒྱུ་ནི་ཉེ་རིང་ཆགས་སྡང་ཁོ་ན་ཡིན་པས་དེ་དང་འབྲེལ་བར་གྱུར་ཅིག་བསམས་པས། ཉེ་རིང་ཆགས་སྡང་མེད་པའི་བཏང་སྙོམས་ཤོག །ཅེས་པ་ནི་བཏང་སྙོམས་ཚད་མེད་པ་སྟེ་ལན་གསུམ་སོགས་ཞེ་ཐག་པ་ནས་བརྗོད། དེ་དག་ནི་ཀུན་རྫོབ་སེམས་བསྐྱེད་ཡིན་ཞིང་། དོན་དམ་སེམས་བསྐྱེད་ནི། དེ་ལྟར་དགེ་རྩ་བཏང་དང་སྡིག་སྒྲིབ་བླང་། །སེམས་བསྐྱེད་མཁན་དང་སྐྱབས་ཡུལ་སེམས་ཅན་རྣམས། །མ་བཅོས་སེམས་ཉིད་ངང་དུ་རོ་གཅིག་པས། །དེ་ལྟར་མ་རྟོགས་འགྲོ་རྣམས་སྙིང་རྗེ་བས། །རང་སེམས་མ་ཡེངས་གང་ཤང་ངང་དུ་བཞག །ཅེས་མཉམ་པར་གཞག་གོ ༈ །དེ་ནས་སྡིག་སྒྲིབ་སྦྱོང་བྱེད་རྡོར་སེམས་སྒོམ་བཟླས་ནི། སྡིག་པ་སྟོབས་བཞིའི་སྒོ་ན་བཤགས་དགོས་པར་གསུངས་པས། རང་ཉིད་ཐ་མལ་གནས་པའི་སྤྱི་གཙུག་ཏུ། །རྩ་བའི་བླ་མ་པད་འབྱུང་དབྱེར་མེད་པ། །རྟེན་གྱི་སྟོབས་གྱུར་བཅོམ་ལྡན་རྡོ་རྗེ་སེམས། །དཀར་གསལ་ཞལ་གཅིག་ཞི་འཛུམ་ཕྱག་གཡས་ཀྱི། །རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ། །དཀུར་བརྟེན་སྟོད་གཡོགས་དར་དཀར་ཤམ་ཐབས་ཅན། །དབུ་རྒྱན་ལ་སོགས་ལོངས་སྤྱོད་རྫོ་གས་པ་
ཡི། །ཆས་རྫོགས་ཞབས་གཉིས་སེམས་དཔའི་སྐྱིལ་ཀྲུང་བཞུགས། །ཐུགས་ཀར་ཟླ་སྟེང་ཧཱུྃ་ལ་ཡིག་དྲུག་དང་། །ཡིག་བརྒྱས་གཡས་བསྐོར་དེ་ལས་འོད་ཟེར་འཕྲོས། །ཕྱོགས་བཅུའི་དཀོན་མཆོག་རྩ་གསུམ་སྤྱན་དྲངས་ཐིམ། །དཀོན་མཆོག་ཀུན་འདུས་བོ་ངོར་གསལ་བར་གྱུར། །རང་གིས་སྔར་བྱས་སྡིག་ལ་འགྱོད་སེམས་ནི། །བཙན་དུག་ཁོང་དུ་ཟོས་ལྟར་བསམ་པ་ནི། །སུན་འབྱིན་སྟོབས་ཀྱིས་དད་པས་གསོལ་བ་བཏབ། །ཅེས་ཡིད་ལ་གསལ་བཏབ་ལ། རྩ་བའི་བླ་མ་པད་འབྱུང་རྡོར་སེམས་ཀྱིས། །བདག་དང་མཁའ་མཉམ་སེམས་ཅན་ཐམས་ཅད་ཀྱི། །སྡིག་སྒྲིབ་དམ་ཚིག་ཉམས་ཆག་མ་ལུས་པ། །མྱུར་དུ་བྱང་ཞིང་དག་པར་མཛད་དུ་གསོལ། །ཞེས་གསོལ་བ་ལན་གསུམ་བཏབ་བོ། །སྔགས་ལས་བདུད་རྩིའི་རྒྱུན་བབ་སྐུ་ལུས་གང་། །ཞབས་གཡས་མཐེ་བོང་ནས་ཐོན་ཚངས་བུག་ཞུགས། །ལུས་གང་སྡིག་སྒྲིབ་ཀུན་དག་རང་ལུས་ནི། །ཤེལ་གོང་དབྱ་དག་ལྟ་བུར་གྱུར་བསྒོམ་ཞིང་། །གཉན་པོ་ཀུན་ཏུ་སྤྱོད་པའི་ཡིག་བརྒྱ་བཟླ། །ཞེས་བསྒོམ་སྟེ་མ་ཡེངས་པར། ཨོཾ་བཛྲ་སཏཱ་ས་མཱ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། ཌ་དྷོ་མེ་
བྷ་ཝ། སུ་ཏོཁྱོ་མེ་བྷ་ཝ། ཨ་ནུ་རཀྟ་མེ་བྷ་ཝ། སུ་པོབྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ༔ སརྦ་ཀརྨ་སུ་ཙ་མེ། ཙིཏྟཾ་ཤེ་ཡ་ཀུ་རུ་ཧཱུཾ། ཧ་ཧ་ཧ་ཧ་ཧོ༔ བྷ་ག་བཱ་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲ་བྷ་ཝ་མ་ཧཱ་ས་མ་ཡ་སཏྭ་ཨཱ༔ ཞེས་ཡིག་བརྒྱ་དང་། ཨོཾ་བཛྲ་སཏྭ་ཧཱུྃ། ཞེས་ཡིག་དྲུག་ཅི་འགྲུབ་བཟླས་ལ། མགོན་པོ་བདག་ནི་མི་ཤེས་རྨོངས་པ་ཡི། །སྡོམ་གསུམ་རྒྱལ་བའི་བཀའ་ལས་འགལ་གྱུར་པའི། །སྡིག་སྒྲིབ་ཐམས་ཅད་འགྱོད་པས་མཐོལ་བཤགས་ནས། །ཆུར་ལོན་སླན་ཆད་མི་བགྱིད་དམ་བཅའ་བས། །མྱུར་དུ་མངོན་སངས་རྒྱས་པར་བྱིན་གྱིས་རློབས། །རྡོ་རྗེ་སེམས་དཔའི་ཞལ་ནས་བུ་ཁྱོད་ཀྱི། །སྡིག་སྒྲིབ་དག་གོ་གསུང་ནས་འོད་དུ་ཞུ། །རང་ལ་ཐིམ་ནས་དབྱེར་མེད་རོ་གཅིག་གྱུར། །དེ་བས་ཟབ་ཁྲིད་འདི་ཉིད་ཀྱི་ཟབ་ཁྱད་སྒྲིབ་སྦྱངས་ཧྲི༔ཡིག་སྦྱོར་བ་བཞི་བསྒོམ་པ་ནི། རང་ཉིད་ཐ་མར་སྤྱི་གཙུག་ཧྲིདཀར་པོ། །ཚེག་དྲག་དང་བཅས་འོད་ཟེར་འཕྲོ་བ་ལས། །བདུད་རྩི་འོ་རྒྱུན་ལྟར་བབ་ལུས་ནང་གང་། །སྡིག་སྒྲིབ་ཐམས་ཅད་དུད་སོལ་ཁུ་བ་ལྟར། །ཕྱིར་ཐོན་རང་ལུས་ཤེལ་སྒོང་ལྟར་དུ་གྱུར། །ཞེས་གསལ་བཏབ་ལ། ཧཱུྃཁོ་ན་བཟླ་བར་བྱའོ། །ཐུན་མཐར་རང་ལུས་འོད་ཞུ་ཡར་
ཧཱུར་ཐིམ། དེ་ཡང་ར་ཏ་ཧ་མགོ་གི་གུ་རིམ། །མས་ནས་ཡར་ཡལ་དམིགས་མེད་ངང་དུ་བཞག །དེ་ནས་ཚོགས་གཉིས་རྫོགས་པར་བྱེད་པ་མཎྜལ་ནི། མདུན་གྱི་ནམ་མཁར་རྨ་བྱ་བརྒྱད་བཏེག་ཁྲིར། །པད་ཟླའི་གདན་ལ་པད་འབྱུང་ཆོས་ཀྱི་སྐུ། །རྩ་བའི་བླ་མ་དཀོན་མཆོག་ཀུན་འདུས་པ། །སངས་རྒྱས་འོད་དཔག་མེད་པ་སྐུ་མདོག་དམར། །གཙུག་ཏོར་མཛོད་སྤུ་དཀར་སོགས་མཚན་དཔེ་རྫོགས། །ཆོས་གོས་གསུམ་གསོལ་རྡོ་རྗེ་སྐྱིལ་ཀྲུང་བཞུགས། །ཕྱག་གཉིས་མཉམ་བཞག་ལྷུང་བཟེད་བདུད་རྩིའི་བཀང་། །འོད་དང་གཟི་བརྗིད་ཉི་མ་འབུམ་བཞིན་འབར། །དེ་ནས་ཚོགས་ཞིང་དེའི་མདུན་དུ་ཕྱི་ནང་གསང་བའི་མཎྜལ་གསུམ་ལས། རྒྱས་བསྡུས་རང་གི་འདོན་གང་ཤེས་བརྗོད་པས་ཆོག་ཅིང་། གྲངས་བསོགས་པ་ལ་ཐོག་མར་ཕྱག་ལེན་ལྟར་བཀོད་ལ། སོ་བདུན་མ་ཚར་གང་འགྲུབ་འདོན་ཏེ། ཕྱིའི་མཎྜལ་ཡིན། ཨོཾ་བཛྲ་བྷ་མི་ཨཱཿཧཱུྃ། གཞི་རྣམ་པར་དག་པ་དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུཾ། ཕྱི་ལྕགས་རི་འཁོར་ཡུག་གི་ར་བས་ཡོངས་སུ་བསྐོར་བའི་དབུས་སུ་རིའི་རྒྱལ་པོ་རི་བོ་མཆོག་རབ། ཤར་ལུས་འཕགས་པོ། ལྷོ་ཛམ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། ལུས་
དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག །འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། །དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་མ་ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། །དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ། རབ་འབྱམས་རྒྱ་མཚོའི་རྡུལ་གྱི་གྲངས་ལས་འདས་པ་མངོན་པར་བཀོད་དེ། བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བྱིས་གྱིས་བརླབ་ཏུ་གསོལ། རྒྱུན་ཁྱེར་བྱེད་དམ་བསྡུ་ན། ཨོཾ་ཨཱཿཧཱུྃ། སྟོང་ཉིད་
གིས་བཏེག །ཆུ་རྔམས་འབུམ་ཕྲག་བཅུ་གཅིག་རྒྱ་མཚོའི་སྟེང་། །གསེར་གྱི་ས་གཞི་རི་རབ་གླིང་བཞི་དང་། །གླིང་ཕྲན་ཉི་ཟླ་ལྷ་མིའི་འདོད་ཡོན་བཅས། །ཀུན་བཟང་མཆོད་སྤྲིན་ཚོམ་བུར་བཀོད་བྱས་ནས། །རྩ་བའི་བླ་མ་པད་འབྱུང་དབྱེར་མེད་པ། །སངས་རྒྱས་འོད་དཔག་མེད་ལ་འབུལ་བར་བགྱི། །ཚོགས་གཉིས་ཡོངས་སུ་པར་བྱིན་གྱིས་རློབས། །ཞེས་གྲངས་གང་འགྲུབ་བྱ་བའོ། །ནང་གི་མཎྜལ་ནི། སྐྱབས་གནས་པད་འབྱུང་རྩ་བའི་བླ་མ་དང་། །དབྱེར་མེད་སངས་རྒྱས་འོད་དཔག་མེད་མགོན་ལ། །བདག་ལུས་ལོངས་སྤྱོད་ཉེ་དུ་འཁོར་གཡོག་བཅས། །མཎྜལ་གཅིག་ཏུ་བསྡུས་ཏེ་དབུལ་བར་བགྱི། །དཔེར་ན་འབུལ་བ་ཚར་བའི་ཡོན་བདག་བཞིན། །ཆགས་ཞེན་འཁྲི་བ་ཆོད་པར་བྱིན་གྱིས་རློབས། །དེ་ལྟར་གྲངས་གང་འགྲུབ་སོང་ནས། དེ་དག་ནི་རྒྱུ་བསོད་ནམས་ཀྱི་ཚོགས་བསགས་པའོ། །དེ་རྣམས་འབྲས་བུ་ཡེ་ཤེས་ཀྱི་ཚོགས་བསགས་པ། གསང་བའི་མཎྜལ་ནི། མདུན་གྱི་ཚོགས་ཞིང་འོད་ཞུ་བདག་ལ་ཐིམ། །མཆོད་ཡུལ་མཆོད་བྱ་མཆོད་མཁན་ཐམས་ཅད་ནི། །སེམས་ཀྱི་འདུ་བྱེད་ལས་གཞན་མ་མཆིས་པས། །མ་བཅོས་ཡེངས་མེད་རང་གསལ་ངང་དུ་
བཞག ཅེས་ཅི་གནས་སུ་མཉམ་པར་བཞག་གོ །དེ་ནས་གོ་རིམ་བྱས་ན་བླ་མའི་རྣལ་འབྱོར་སྔོན་ལ་ཡིན་ཡང་། རང་ལུས་ལྷར་མ་བསྒོམས་ན་བླ་མའི་བྱིན་རླབས་འཇུག་དཀའ་བས། རྒྱལ་པར་ན་འདི་ཉིད་རྒྱལ་བ་རྒྱ་མཚོའི་འབྲེལ་བ་ཡིན་པས་རྒྱལ་རྒྱམ་ལྷ་དགུ་ལྷ་ལྔ་གང་རིགས་ཀྱི་བསྐྱེད་རིམ་ཕྱི་ནང་གསང་བའི་སྒྲུབ་ཐབས་དང་བཅས་པ་སྦྲེལ་དགོས་རྒྱུ་ཡིན་པར་སྣང་ཡང་བསྡུ་ན། ཀུན་མཁྱེན་ཨ་རཱ་ག་ཉིད་ཀྱི་བཞེད་པ་ལྟར་གྱི་ཐུགས་རྗེ་ཆེན་པོའི་ཁྲོམ་ཆོས་དཀོན་མཆོག་ཡན་ལག་གི་ཚིགས་བཅད་དུ་ཕབ་པ་ནི། བྱང་ཆུབ་མཆོག་ཏུ་སེམས་བསྐྱེད་ཅིང་། །རང་གི་རྣམ་ཤེས་ཧཱིཝཡིག་དཀར། །འོད་ཟེར་དཀར་པོ་འཕྲོ་བ་ཡི། །སེམས་ཅན་ཀུན་གྱི་སྡིག་སྒྲིབ་དག ། ཕྱི་སྣོད་གཞལ་ཡས་ནང་བཅུད་ལྷ། །འོད་ཟེར་ཚུར་འདུས་ཧྲིལ་ཐིམ། །པདྨ་ཉི་ཟླའི་གདན་གྱི་སྟེང་། །ཧཱི༔ཡིག་འོད་དུ་ཞུ་བ་ལས། །རང་ཉིད་ཐུགས་རྗེ་ཆེན་པོར་གྱུར། །སྐུ་མདོག་དཀར་པོ་ཞལ་གཅིག་པ། །པདྨ་རྒྱས་ལྟར་འཛུམ་མདངས་ཅན། །རལ་པའི་ཐོར་ཚུགས་བཅིངས་པ་ལ། །རིན་ཆེན་ལྔ་ཡི་རྩེ་བྲན་ཅན། །དར་གྱི་ཅོད་པན་གྱིས་བརྒྱན་པ། །ཕྱག་བཞི་དང་པོའི་ཐལ་མོ་སྦྱར། །གཡས་འོག་མུ་ཏིག་ཕྲེང་བ་འཛིན། །གཡོན་གྱི་འོག་མས་པདྨ་འཛིན། །རིན་ཆེན་སྣ་ཚོགས་མགུལ་དོ་དང་། །སེ་མོ་དོ་དང་དོ་ཤལ་
དང་། །དོ་ཤལ་ཕྱེད་པས་ཡང་དག་བརྒྱན། །ཕྱི་དང་ནང་ནི་སྒྲིབ་མེད་གསལ། །ཞབས་གཉིས་སྐྱིལ་མོ་ཀྲུང་གིས་བཞུགས། །འོད་ཟེར་སྣ་ཚོགས་འཕྲོ་བ་ནི། །དམ་ཚིག་སེམས་དཔའི་རང་བཞིན་ནོ། །ཐུགས་ཀར་ཟླ་བའི་དཀྱིལ་འཁོར་སྟེང་། །ཧཱི༔ཡིག་ཡི་གེ་དཀར་པོ་ལ། །ཡི་གེ་དྲུག་པས་གཡས་སུ་བསྐོར། །དེ་ནི་ཏིང་འཛིན་སེམས་དཔའ་འོ། །ཨོཾ་མ་ཎི་པདྨེ་ཧཱུཾ། ཞེས་པ་ངག་ཏུ་བརྗོད་པའི་མཐུས། །དུས་གསུམ་བདེ་གཤེགས་ཐམས་ཅད་ནི། །ཐུགས་རྗེ་ཆེན་པོའི་ངོ་བོ་རུ། །གྱུར་ཏེ་ཆར་ལྟར་རང་ལ་ཐིམ། །ཡེ་ཤེས་སེམས་དཔའི་ཡོངས་རྫོགས་པ། །སྣོད་བཅུད་ཐམས་ཅད་ལྷ་རུ་གྱུར། །སྣང་བ་སྐུ་ཡི་ཁྱེར་སོ་ཡིན། །སྒྲ་སྐད་ཐམས་ཅད་ཡི་གེ་དྲུག །གྲག་པ་གསུང་གི་ཁྱེར་སོ་ཡིན། །སེམས་ནི་ཟུང་འཇུག་རང་བྱུང་སྟེ། །དྲན་རྟོགས་ཐུགས་ཀྱི་ཁྱེར་སོ་ཡིན། །ཨོཾ་མ་ཎི་པདྨེ་ཧཱུཾ། ཞེས་ཅི་འགྲུབ་ཏུ་བཟླས་པའོ། །དེ་ནས་ཉམས་ལེན་ཐམས་ཅད་ཀྱི་བླ་མའི་རྣལ་འབྱོར་ནི། རང་ཉིད་ཡི་དམ་ལྷར་གསལ་སྤྱི་གཙུག་གི །ཁྲུ་གང་ནམ་མཁར་འོད་ལྔའི་གུར་ཁྱིམ་དབུས། །སེང་གེ་བརྒྱད་བཏེག་པདྨ་ཉི་ཟླའི་ཁྲིར། །རྩ་བའི་བླ་མ་པད་འབྱུང་
སྤྲུལ་སྐུའི་ཚུལ། །བཅུ་དྲུག་ན་ཚོད་དཀར་དམར་མདངས་དང་ལྡན། །ཆོས་གོས་ཟབ་བེར་ཕོད་ཀ་པད་ཞུ་མཛེས། །ཕྱག་གཡས་རྡོ་རྗེ་གཡོན་པར་བྷན་དྷ་འཛིན། །ཁ་ཊཾ་མཆན་བཅུག་འོད་ཟེར་སྟོང་ཁམས་ཁེངས། །ཞལ་གཅིག་ཞི་འཛུམ་བརྩེ་བས་བདག་ལ་གཟིགས། །གནས་གསུམ་འབྲུ་གསུམ་འོད་ཀྱིས་བདེ་ཆེན་སོགས། །ཕྱོགས་བཅུའི་ཞིང་ནས་སྐྱབས་གསུམ་རྩ་བ་གསུམ། །སྤྱན་དྲངས་ཐིམ་པས་ཀུན་འདུས་ངོ་བོར་གྱུར། །ཧཱུྃ་ཧཱི༔ སྔོན་གྱི་བསྐལ་པའི་དང་པོ་ལ། །ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོའི་བསྐོར། །ཁྱེད་ཀྱི་རྗེས་སུ་བདག་བསྒྲུབ་ཕྱིར། །བྱིན་གྱིས་བརླབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། མཆོག་དང་ཐུན་མོང་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མཱ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ ཧཱིམ་ཧ་རི་ནི་ས་ར་ཙ་ཧཱི་ཡ་
ཙིཏྟ་ཧྲི་ཧྲི་ཛ་ཛ༔ གསོལ་འདེབས་ཚར་མང་དུ་བརྗོད་རྗེས། སྐྱབས་གནས་ཀུན་འདུས་པདྨ་འབྱུང་གནས་དང་། །དབྱེར་མེད་རྩ་བའི་བླ་མ་འོད་དཔག་མེད། །དད་པས་སྤྱན་དྲོངས་དགྱེས་པའི་གདན་ལ་བཞུགས། །གུས་པས་ཕྱག་འཚལ་སྙིང་ནས་སྐྱབས་སུ་མཆི། །བདག་ལུས་ལོངས་སྤྱོད་དུས་གསུམ་དགེ་རྩས་མཆོད། །ཐོག་མེད་ནས་བསགས་སྡིག་བཤགས་ཕྱིན་ཆད་སྡོམ། །མགོན་པོའི་མཛད་པར་ཡི་རང་ཆོས་འཁོར་བསྐུལ། །མྱ་ངན་མི་འདར་གསོལ་འདེབས་དུས་གསུམ་དགེ །མཁའ་ཁྱབ་འགྲོ་བ་སངས་རྒྱས་ཐོབ་ཕྱིར་བསྔོ། །ཞེས་ཡན་ལག་བཅུ་པའི་ཚིག་དོན་དྲན་བཞིན་ཚར་གསུམ་བརྗོད། སྤྱི་བོའི་རྩ་བའི་བླ་མ་སྙིང་ཐག་ནས། །གློ་སྙིང་གཏད་དེ་དད་པས་གསོལ་བ་འདེབས། །འདིར་སྤྲོ་ན་རྫོགས་ཆེན་རྙིང་ལུགས་གསོལ་འདེབས་འཐུས་ཆེ་ལེའུ་བདུན་མའི་སྤྲོས་བྲལ་བདེ་ཆེན་མ་དང་། གསར་ལུགས་ཕྱག་ཆེན་གསོལ་འདེབས་འགྱུར་ཆེ་རྡོ་རྗེ་འཆང་ཆེན་མ་འདོན་ཅིང་། དེ་ཙམ་མི་ནུས་ན་ནི་རང་གཞུང་དམར་ཁྲིད་རིང་བརྒྱུད་ཀྱི་གསོལ་འདེབས་རང་འདོད་མོས་བློའི་བཟོས་པ་ནི། ན་མོ་གུ་རུ་པདྨ་ཀ་ར་ཡེ། ཐོག་མའི་སངས་རྒྱས་ཀུན་བཟང་འོད་དཔག་མེད། །རྡོ་རྗེ་འཆང་ཆེན་འཕགས་པ་ནམ་མཁའི་རྒྱལ། །རྡོར་སེམས་
དགའ་རབ་རྡོ་རྗེ་ཤྲཱི་སེང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །པད་འབྱུང་སློབ་དཔོན་རིན་ཆེན་ས་ར་ཧ། །ཏེ་ལོ་ནཱ་རོ་གྲུབ་ཆེན་ཤ་བ་རི། །མེ་ཏྲེ་རྗེ་འབངས་ཉེར་ལྔ་མར་མི་གཉིས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་པ་ཕྱག་རྫོགས་གཉིས་སོ། །ཐུབ་དབང་འཇམ་དཔལ་བྱམས་པ་ཀླུ་སྒྲུབ་དང་། །ཐོགས་མེད་དབྱིག་གཉེན་གྲོལ་སྡེ་རྣམ་གཉིས་ཞབས། །ཞི་ལྷ་གསེར་གླིང་ཨ་ཏི་ཤ་དང་འབྲོམ། །རྒྱལ་སྲས་མཆེད་གསུམ་ལྕགས་རི་པ་རྣམས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བློ་སྦྱོང་བརྒྱུད་པའོ། །སྤྱན་རས་གཟིགས་དབང་དགེ་སློང་མ་དཔལ་མོ། །པདྨ་བཛྲ་ཛ་ལེནྡྷ་རི་པ། །མི་ཏྲ་ཛོ་ཀི་གྲུབ་རྒྱལ་ཏི་པུ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དམར་ཁྲིད་བརྒྱུད་པའི་ཕུག །དེ་ལྟར་གྱི་བརྒྱུད་པ་རྣམས་རིམ་པར་ཀཾ་ཚང་དོན་བརྒྱུད་འདུས་ཚུལ་ནི།་ཟླ་འོད་གཞོན་ནུ་རས་ཆུང་དངོས་གྲུབ་པ། །ཉང་རལ་བྲག་དཀར་བ་དང་དུས་གསུམ་མཁྱེན། །ཟངས་རི་རས་པ་རས་ཆེན་སྤོམ་བྲག་པ། །བྱམས་པ་འབུམ་དང་པཀྴི་ཨོ་རྒྱན་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དགེ་
འདུན་འབུམ་དང་པདྨ་ལས་འབྲེལ་རྩལ། །ལེགས་ལྡན་རང་བྱུང་རྡོ་རྗེ་གཡུང་སྟོན་པ། །རོལ་རྡོར་མཁའ་སྤྱོད་དབང་དང་དེ་བཞིན་གཤེགས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སངས་རྒྱས་གླིང་པ་བླ་མ་ཡེ་ཤེས་པ། །རཏྣ་བྷ་དྲ་མཐོང་བ་དོན་ལྡན་དང་། །ཚེམ་བུ་ཟླ་བ་རྒྱལ་མཚན་འཇམ་དཔལ་བཟང་། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དཔལ་འབྱོར་དོན་གྲུབ་རཏྣ་གླིང་པ་དང་། །ཆོས་གྲགས་རྒྱ་མཚོ་སངས་རྒྱས་མཉན་པའི་མཚན། །མི་བསྐྱོད་རྡོ་རྗེ་དཀོན་མཆོག་ཡན་ལག་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གྲགས་པ་མཆོག་དབྱངས་ཆོས་ཀྱི་རྒྱལ་མཚན་་་སི་ཏུ་པ། ཞབས། །དཀོན་མཆོག་དཔལ་འབྱོར་བཀྲ་ཤིས་དཔལ་གྲུབ་་་སྟག་ལུང་པ། པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གཏེར་སྟོན་ཡིན། ཕྲིན་ལས་རྣམ་རྒྱལ་འབྲི་གུང་པ། ཀརྨ་བསྟན་འཕེལ་་་འབྲུག་པ། མཚན། །སྒྲུབ་བརྒྱུད་བསྟན་པ་རྣམ་རྒྱལ་ལ་སོགས་པའི། །བརྒྱུད་པའི་བླ་མ་གྲུབ་ཐོབ་རྒྱ་མཚོ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཀུན་མཁྱེན་དེ་དག་
ཀུན་གྱི་ཐུགས་ཀྱི་བཅུད། །གཅིག་བསྡུས་ཀུན་བཟང་དགོངས་པ་མངོན་གྱུར་པ། །པད་འབྱུང་འགྲོ་ངོར་དངོས་ཤར་ཆགས་མེད་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་རིང་བརྒྱུད་དེ། འདི་ཕྱིན་བདག་ཀརྨ་བདེ་ཆེན་ལྟར་ན། བརྩོན་འགྲུས་རྒྱ་མཚོ་པདྨ་དོན་གྲུབ་མཚན། །འདྲེན་མཆོག་དམ་པ་པདྨ་ལྷུན་གྲུབ་དང་། །བཀའ་དྲིན་ཟླ་མེད་རྩ་བའི་བླ་མ་མཆོག །ཀརྨ་སུ་ཌ་གནྡྷའི་ཞབས་དེ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ལྟར་གསོལ་བ་བཏབ་པའི་བྱིན་རླབས་ཀྱི། །མི་རྟག་འཆི་དྲན་ལོང་མེད་རྒྱུད་ལ་སྐྱེས། །བདག་འཛིན་བློས་ཐོངས་དགོས་མེད་ཞེན་པ་ལོག །ཆོས་བརྒྱད་མགོ་བོ་སྙོམ་པར་བྱིན་གྱིས་རློབས། །དུག་ལྔ་ལམ་ཁྱེར་རང་སེམས་སྐྱེ་མེད་རྟོག །འཁྲུལ་པ་རང་སངས་སྣང་སྲིད་ཆོས་སྐུར་ཤར། །སྣང་བཞི་ཟད་འཁྱོལ་ཉིན་མཚན་འོད་གསལ་འདྲེས། །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །འབྲེལ་ཚད་དོན་ལྡན་འདི་ནས་འཕོས་མ་ཐག །སྐྱེ་མཁན་བར་མ་ཆོད་པར་བདེ་ཆེན་སྐྱེས། །ས་ལམ་མཐར་ཕྱིན་སླར་ཡང་འགྲོ་བའི་དོན། །སྤྱན་རས་གཟིགས་དང་མཉམ་པར་བྱིན་གྱིས་རློབས། །ཞེས་
བརྒྱུད་པའི་གསོལ་འདེབས་རྒྱས་པ་དང་། ཉེ་བར་དོན་བརྒྱུད་རང་ནི། མཁའ་ཁྱབ་ཐོག་མའི་མགོན་པོ་འོད་དཔག་མེད། །ལྔ་ལྡན་ལོང་སྐུའི་ཞིང་བདག་སྤྱན་རས་གཟིགས། །གང་འདུལ་སྤྲུལ་སྐུ་གུ་རུ་པད་འབྱུང་རྗེ། །འགྲོ་ངོར་དངོས་ཤར་ཀརྨ་ཆགས་མེད་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བརྩོན་འགྲུས་རྒྱ་མཚོ་པདྨ་དོན་གྲུབ་མཚན། །འདྲེན་མཆོག་དམ་པ་པདྨ་ལྷུན་གྲུབ་དང་། །བཀའ་དྲིན་ཟླ་མེད་བདེ་ཆེན་སྙིང་པོ་སོགས། །རྩ་བར་བརྒྱུད་པའི་རྣམ་འདྲེན་མ་ལུས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ལྟར་གསོལ་བ་བཏབ་པའི་ཐུགས་རྗེ་ཡིས། །གནས་ལུགས་མངོན་མཐོང་འདི་ནས་འཕོས་མ་ཐག །སྐྱེ་གཞན་བར་མ་ཆོད་པར་བདེ་ཆེན་སྐྱེས། །ས་ལམ་མཐར་ཕྱིན་སླར་ཡང་འགྲོ་བའི་དོན། །སྤྱན་རས་གཟིགས་དང་མཉམ་པར་བྱིན་གྱིས་རློབས། །ཞེས་མོས་གུས་དྲག་པོས་གསོལ་བ་ཡང་ཡང་བཏབ་ནས། །དེ་ལྟར་མོས་གུས་དྲག་པོས་གསོལ་བཏབ་པས། །སྤྱི་བོའི་བླ་མའི་སྐུ་ཡི་གནས་བཞི་ནས། །འོད་ཟེར་དཀར་དམར་མཐིང་སེར་བཞི་འཕྲོས་པས། །བདག་གི་གནས་བཞིར་ཐིམ་པས་ལུས་ངག་ཡིད། །
ཤེས་བྱའི་སྒྲིབ་དག་བུམ་གསང་ཤེར་ཡེ་དང་། །ཚིག་དབང་ཐོབ་ཅིང་བསྐྱེད་རིམ་རྩ་རླུང་དང་། །ཕོ་ཉའི་ཕྱག་ཆེན་ལམ་བསྒོམ་ལ་དབང་ཞིང་། །ཆོས་ལོངས་སྤྲུལ་དང་ངོ་བོ་ཉིད་སྐུ་འགྲུབ་། །ཅེས་པས་གསལ་འདེབས་བཞིན་དུ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་གྲངས་ཅི་རིགས་པར་བཟླས་ལ། མཐར་ནི་བླ་མ་འོད་ཞུ་རང་ལ་ཐིམ། །རང་སེམས་དབྱེར་མེད་འདྲེས་པས་རང་གི་སེམས། །སེམས་ལ་སེམས་ཀྱི་ལྟ་བ་མ་གཏོགས་པ། །བཅོས་བསླད་མེད་པར་རང་བབ་མཉམ་པར་བཞག །ཅེས་དང་། གཉིས་མེད་ཐུགས་རྒྱུད་འཕོ་བའི་ངང་དེ་ལ། །སྟོན་སེར་ནམ་མཁའ་བཞིན་དུ་གསལ་དྭངས་བཞག །སྨྲར་མེད་ཡིད་ཤེས་འདི་བཞིན་བརྗོད་བྱ་བྲལ། །འདི་འདྲའི་ཡིན་ལུགས་མ་མཐོང་མཐོང་རྒྱུ་ཞིག །ས་ལེར་རང་གསལ་གསལ་ལེ་རྗེན་ནེ་བ། །དེ་ཚེ་རང་བྱུང་བླ་མའི་རང་ཞལ་མཇལ། །འགྲོ་མགོན་བླ་མའི་བྱིན་རླབས་དེ་ཚེ་ཞུགས། །དེ་ཡི་དོན་རྟོགས་རྒྱུན་དུ་དེ་ལྟར་བསྒོམ། །ཞེས་མཉམ་པར་བཞག་གོ །དེ་ནི་གཞི་ཁྲེགས་ཆོད་ཕྱག་རྒྱ་ཆེན་པོ་ལྔ་ལྡན་ཐམས་ཅད་ཀྱི་ཡ་རྒྱལ་བཞི་པའོ། །དེ་ནས་ཁྱད་ཆོས་འདུས་པ་དྲུག་ལྡན་རྫོགས་པ་ཆེན་པོ་ཐོད་རྒལ་གྱི་ཁྲིད་ནི། རང་སེམས་སྐད་ཅིག་ཡེངས་མེད་སྐྱོང་ངང་
ནས། །འདུག་སྟངས་གསུམ་བཅས་དབྱ་དག་ནམ་མཁའ་ལ། །མེ་ཡེངས་བལྟས་པས་ཆོས་སྐུ་མངོན་སུམ་མཐོང་། །སྣང་བཞི་མཐར་ཕྱིན་འཇའ་ལུས་ཆོས་ཀྱི་སྐུ། །ཀུན་བཟང་དགོངས་པ་ཚེ་གཅིག་ཉིད་དུ་འགྲུབ། །ལམ་མྱུར་ངེས་དོན་ལམ་མཆོག་ཨེ་མ་ཧོ། །ཞེས་མ་ཡེངས་པར་བལྟའོ། །གྲོང་ལ་རྣམ་གཡེང་འཕེལ་བས་དགོན་པར་སྡོད། །ཀླུང་ལ་འདུ་འཛི་མང་བས་རི་ཁྲོད་བརྟེན། །ནོར་ལ་སེར་སྣ་འཕེལ་བས་ངན་ངོམ་ཙམ། །བློ་མ་མ་དང་འདྲ་སྟེ་འབྲལ་མེད་བསྟེན། །ན་ཚ་རྣམ་རྟོག་ཡིན་པས་ངོ་བོར་ལྟོས། །སྐྱིད་འདོད་འདྲེ་གདོན་ཡིན་པས་གདེང་ནས་ཟློག །སྙན་གྲགས་བདུད་པོ་ཡིན་པས་རྗེས་མ་འབྲང་། །སྙོམས་ལས་དགྲ་བོ་ཡིན་པས་རིང་དུ་སྤངས། །དེ་ལྟར་བསྒྲུབ་ན་འགལ་རྐྱེན་མེད་པ་དང་། །མཐུན་རྐྱེན་ཡིད་ལ་བསམ་པ་འགྲུབ་ནས་ནི། །ཚེ་དང་སྒྲུབ་པ་མཉམ་ན་དྭགས་པོ་ཡིན། །བཀའ་བརྒྱུད་རིན་པོ་ཆེ་རྣམས་འགྲུབ་གྱུར་ཅིག །དེ་ནས་བསྔོ་བ་སྨོན་ལམ་ནི། ཕྱོགས་དུས་རྒྱལ་བ་སྲས་བཅས་དགོངས༔ ཚོགས་གཉིས་རྫོགས་ལ་རྗེས་ཡི་རང་༔ བདག་གི་དུས་གསུམ་དགེ་བསགས་པ༔ དཀོན་མཆོག་གསུམ་ལ་མཆོད་པ་འབུལ༔
རྒྱལ་བའི་བསྟན་པ་འཕེལ་གྱུར་ཅིག་དགེ་བ་སེམས་ཅན་ཀུན་ལ་བསྔོ༔ འགྲོ་ཀུན་སངས་རྒྱས་ཐོབ་གྱུར་ཅིག༔ དགེ་རྩ་ཐམས་ཅད་གཅིག་བསྡུས་ནས༔ བདག་གི་རྒྱུད་ལ་སྨིན་གྱུར་ཅིག༔ སྒྲིབ་གཉིས་དག་ནས་ཚོགས་རྫོགས་ཏེ༔ ཚེ་རིང་ནད་མེད་ཉམས་རྟོགས་འཕེལ༔ ཚེ་འདིར་ས་བཅུ་ནོན་གྱུར་ཅིག༔ ནམ་ཞིག་ཚེ་འཕོས་གྱུར་མ་ཐག༔ བདེ་བ་ཅན་དུ་སྐྱེ་བར་ཤོག༔ སྐྱེས་ནས་པདྨ་ཁ་བྱེ་ནས༔ ལུས་རྟེན་དེ་ལ་སངས་རྒྱས་ཤོག༔ བྱང་ཆུབ་ཐོབ་ནས་ཇི་སྲིད་དུ༔ སྤྲུལ་པས་འགྲོ་བ་འདྲེན་པར་ཤོག༔ ཅེས་དང་ཨེ་མ་ཧོ༔ ངོ་མཚར་སངས་རྒྱས་སྣང་བ་མཐའ་ཡས་དང་༔ གཡས་སུ་ཇོ་བོ་ཐུགས་རྗེ་ཆེན་པོ་དང་༔ གཡོན་དུ་སེམས་དཔའ་མཐུ་ཆེན་ཐོབ་ལ་སོགས༔ སངས་རྒྱས་བྱང་སེམས་དཔག་མེད་འཁོར་གྱིས་བསྐོར༔ བདེ་སྐྱིད་ངོ་མཚར་དཔག་ཏུ་མེད་པ་ཡི༔ བདེ་བ་ཅན་ཞེས་བྱ་བའི་ཞིང་ཁམས་དེར༔ བདག་ནི་འདི་ནས་ཚེ་འཕོས་གྱུར་མ་ཐག༔ སྐྱེ་བ་གཞན་གྱི་བར་མ་ཆོད་པ་རུ༔ དེ་རུ་སྐྱེས་ནས་མཐའི་ཞལ་མཐོང་ཤོག༔ དེ་སྐད་བདག་གི་སྨོན་ལམ་བཏབ་པའི་མཐུས༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས༔
གེགས་མེད་འགྲུབ་པར་བྱིན་གྱིས་བརླབ་ཏུ་གསོལ༔ ཏདྱ་ཐཱ༔ པཉྩནྡྲི་ཡ་ཨ་ཝ་བོ་དྷི་ན་སྭཱ་ཧཱ། ཞེས་སོགས་འདོན་ནོ། །ཞེས་རྒྱལ་བ་ཀུན་འདུས་ཨོ་རྒྱན་གྱི་སློབ་དཔོན་རིན་པོ་ཆེ་མངོན་སུམ་དུ་མི་གཟུགས་འཛིན་པ་འགྲན་འབྲལ་དམ་པ། ༧ ཀརྨ་ཆགས་མེད་རིན་པོ་ཆེའི་ཟབ་ཁྲིད་ཐམས་ཅད་གཅིག་ཏུ་བསྡུས་པ་དམར་ཁྲིད་མཐོང་བ་དོན་ལྡན་འདི་ཉིད་ཀྱི་སྒོ་ནས་དུང་ཕྱུར་བདུན་བདེ་བ་ཅན་དུ་སྐྱེ་བར་ལུང་བསྟན་ཐོབ་པར་གསུངས་པས། འདི་ལས་ཟབ་པ་བཅོམ་ལྡན་འདས་ཤཱཀྱ་ཐུབ་པས་གསུངས་པའི་ཆོས་ཚུལ་ཐམས་ཅད་ལ་མེད་པ་ཐེག་པ་ཀུན་གྱི་ཡང་རྩེ་ཡིན། དེའི་ལག་ལེན་བདེ་ཞིང་ངག་འདོན་ལྟ་བུ་དེ་སྔོན་མ་བྱུང་ཞིང་། རྗེ་དབོན་རིན་པོ་ཆེ་ཤེས་རབ་གྲགས་པས་བསྒྲིགས་པ་གཅིག་སྣང་ཡང་ལུང་རྒྱུན་མི་འདུག་པས། འདིར་ཀརྨ་རབ་འབྱོར་གྱིས་དོན་གཉེར་ཆེན་པོས་བསྐུལ་ལྟར་ངག་འདོན་དུ་གནས་མདོ་ཀརྨ་བདེ་ཆེན་སྙིང་པོ་རང་གི་ལྷག་བསམ་མ་བཅོས་པས་དཀའ་བ་དང་དུ་བླངས་ནས་བྲིས་པ་ཡིན་པས། ཉེས་འགལ་མཆིས་ན་པད་འབྱུང་རིན་པོ་ཆེ་ཨ་རཱ་ག་དབྱེར་མེད་མདུན་མཐོལ་ལོ་བཤགས་ཤིང་། དགེ་བས་ཡིག་ཆ་འདི་ཉིད་མཐོང་ཐོས་དྲན་རེག་ཐམས་ཅད་བདེ་བ་ཅན་དུ་སྐྱེ་བར་གྱུར་ཞིང་། སངས་རྒྱས་པདྨ་འབྱུང་གནས་ཀྱི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ལ་སྲིད་འདིར་ཡུན་རིང་དུ་གནས་པར་གྱུར་ཅིག །དགེའོ། །དགེའོ། །དགེའོ། །སརྦ་དཱ་མངྒ་ལཾ། བྷ་ཝནྟུ།