བདུད་འཇོམས་ཆོས་འབྱུང་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས།
མཆོད་བརྗོད་དང་བརྩམས་པར་དམ་བཅའ་བ།
༄༅། །གངས་ལྗོངས་རྒྱལ་བསྟན་ཡོངས་རྫོགས་ཀྱི་ཕྱི་མོ་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་ཇི་ལྟར་བྱུང་བའི་ཚུལ་དག་ཅིང་གསལ་བར་བརྗོད་པ་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས་ཞེས་བྱ་བ་བཞུགས་སོ།།
སྤྲོས་པའི་སྨག་དང་ནམ་ཡང་མི་མཛའ་བ། །ཀུན་མཁྱེན་ཡེ་ཤེས་ཉི་མ་ཉག་གཅིག་སྟེ། །རྟེན་འབྱུང་སྲིད་པ་སྒྱུ་མའི་གྲོང་ཁྱེར་དུ། །ཕན་བདེའི་འོད་སྟོང་ཅི་ཡང་འགྱེད་དེས་སྐྱོངས། །ཀུན་རྨོངས་མི་བཟད་ཚ་གདུང་སེལ་བའི་སྐྱེས། །ཞི་བསིལ་ག་བུར་བདུད་རྩིས་མཚོན་མིན་པ། །སྲིད་པའི་རིམས་ནད་གཞིལ་བའི་སྨན་ཆེན་པོ། །ལུང་རྟོགས་དམ་ཆོས་རིན་ཆེན་གཙུག་ན་རྒྱལ། །ལྷག་བསམ་གསེར་གྱི་ཡུ་བ་ལ་བརྟེན་པའི། །རྣམ་དག་བསླབ་གསུམ་གོས་བཟང་འཕུར་ལྡིང་ཅན། །བཤད་སྒྲུབ་ནོར་བུའི་ཏོག་གིས་མངོན་མཛེས་པ། །ཚོགས་མཆོག་བསྟན་པའི་རྒྱལ་མཚན་བླ་ན་བསྟོད། །ཡེ་ནས་རྣམ་དག་གཉུག་མའི་དེ་ཉིད་ལྷག་པའི་ཆོས་སྐུ་མཁའ་ཁྱབ་སྙིང་པོ་ངོ་བོ་རིག་སྟོང་ཀུན་ཏུ་བཟང༌། །རྣམ་འགྱུར་མ་འགག་ཡེ་ཤེས་རོལ་རྩལ་སྒྱུ་འཕྲུལ་དྲྭ་བའི་སྤྲིན་དུ་ཡོངས་ཤར་རང་བཞིན་བདེ་སྟོང་རྡོ་རྗེ་སེམས། །དམིགས་པ་མེད་ཀྱང་བརྩེ་བའི་སྙིང་རྗེ་དུས་ལས་མི་ཡོལ་གང་འདུལ་དེར་སྟོན་ཐུགས་རྗེ་སྣང་སྟོང་རྡོ་རྗེ་འཛིན། །སྐུ་གསུམ་དབྱེར་མེད་ཐེག་མཆོག་སྟོན་པ་དགོངས་བརྡ་སྙན་སོགས་དྲུག་ལྡན་བརྒྱུད་པའི་བླ་མ་རྣམས་ལ་གུས་ཕྱག་བགྱི། །བདེ་བ་མཆོག་ལྡན་གསང་བ་དམ་པའི་དཀྱིལ་འཁོར་ཆེར་ནི་ཐམས་ཅད་བདག་ཉིད་རྟག་པ་ཉིད་དུ་དགྱེས་རོལ་པ། །རྣམ་མང་གདུལ་བྱའི་རྗེས་སུ་རབ་ཞུགས་གདུག་པ་ཅན་ངོར་འབར་བའི་སྐུ་སྟེ་ཞི་དང་ཆགས་ལའང་དེ་བཞིན་སྣང༌། །ཕ་མཐའ་དང་བྲལ་སྐུ་དང་ཞིང་ཁམས་ཟུང་འཇུག་རོལ་མོའི་སྤྲིན་ཆེན་བཀོད་ལས་གྲུབ་གཉིས་འདོད་རྒུའི་གྲུ་ཆར་འབེབས། །ཧེ་རུ་ཀ་དཔལ་དཔའ་བོ་ཆེན་པོས་བདག་ནི་རབ་བཟུང་སྐུ་གསུང་ཐུགས་ཀྱི་རྡོ་རྗེ་ཉིད་དུ་ཡོངས་སྒྲུབས་ཤིག །སྟོང་ཉིད་མཛེས་མའི་ཕྱག་རྒྱས་མ་བཅིང་བརྟན་གཡོའི་དངོས་འགའ་གང་དུའང་ཡོད་མིན་དེར་མ་བསྟེན་པའི་སངས་རྒྱས་སུ། །མི་འགྱུར་མཆོག་བདེའི་ཡེ་ཤེས་འདི་ནི་ཐབས་འདིས་མཚོན་ཅེས་རྣམ་བཅས་རྗེས་ཆགས་དགའ་མའི་ཟོལ་གྱིས་ལྷགས་པ་བཞིན། །མཆོག་དངོས་འདོད་པའི་ཕོ་ཉ་མོ་སྟེ་སྐལ་བཟང་བདག་གི་འཁོར་ལོའི་དབང་ཕྱུག་མ་གཅིག་རྡོ་རྗེ་བཙུན་མོ་ཀྱེ། །འདིར་ནི་ལྷན་སྐྱེས་རོ་མཉམ་རྟོགས་པའི་ཕྱག་གིས་འདུད་དོ་བདེ་ཆེན་རྩེ་འཇོས་དམ་པོར་འཁྱུད་དེ་རྗེས་བརྩེར་མཛོད། །རྒྱལ་བའི་བསྟན་ལ་རྒྱལ་བའི་ཕྲིན་ལས་ཅན། །རྒྱལ་བ་དངོས་མཚུངས་ཀླུ་ཐོགས་རྣམ་གཉིས་སོགས། །དགོངས་པ་འགྲེལ་མཛད་གྲུབ་མཐའི་མཐར་སོན་པའི། །འཕགས་ཡུལ་པཎ་ཆེན་ཚོགས་རྣམས་སྤྱི་བོས་མཆོད། །རྡོ་རྗེའི་ལམ་ལས་རྡོ་རྗེའི་ས་བགྲོད་དེ། །རྡོ་རྗེ་འཆང་དང་དགོངས་པ་མཉམ་གནས་པ། །ས་ར་ཧ་དང་ལཱུ་ནག་དྲིལ་གསུམ་སོགས། །དཔག་ཡས་གྲུབ་ཆེན་ཚོགས་ལ་བདག་ཕྱག་བགྱི། །ཁྱད་པར་གངས་ཅན་མཐའ་འཁོབ་མུན་གླིང་དུ། །རྒྱལ་བསྟན་སྐྱ་རེངས་ཐོག་མར་འདྲེན་མཛད་མགོན། །སྲོང་བཙན་སྒམ་པོ་ཞེས་གྲགས་འཇིག་རྟེན་དབང༌། །ཁྱོད་ཞབས་བྱང་ཆུབ་ཐོབ་ཀྱང་སུ་ཞིག་སྤོང༌། །བདེ་ལྡན་ཞིང་མགོན་མཁྱེན་བརྩེའི་ཡེ་ཤེས་ཧྲཱིཿཡིག་ཐིག་ལེ་སིན་དྷཱུའི་མཚོ་གླིང་པད་སྦུབས་ལས་གྲོལ་མཚན་དཔེའི་སྐུ། །འཁོར་བ་ཇི་སྲིད་སྐྱེ་འཆི་མི་མངའ་བདེ་ཆེན་རྡོ་རྗེའི་བརྟུལ་ཞུགས་གར་གྱིས་ས་གསུམ་པོ་ཡི་ཡིད་ཅན་ཀུན། །ཚར་གཅོད་རྗེས་འཛིན་ཐོགས་མེད་ནུས་རྩལ་སྲིད་འདིར་དཔེར་འོས་རང་ཉིད་ཙམ་སྟེ་རྒྱལ་ཀུན་འགྲོ་ལ་བརྩེར་མཚུངས་ཀྱང༌། །ཉམ་ཐག་བོད་འབངས་ལྷག་པར་སྐྱོང་བའི་བཀའ་དྲིན་ཅན་དེ་ཐོད་ཕྲེང་རྩལ་ཁྱོད་ཁོ་ན་ལགས་ཕྱིར་སྙིང་ནས་གུས། །ཤཱཀྱའི་རྒྱལ་པོའི་ཐུགས་ཀྱི་སྲས་གཅིག་གསང་བདག་དཔའ་བོ་སྡོམ་བརྩོན་ཚུལ་འཛིན་བྱང་ཆུབ་སེམས་དཔའ་ཆེར་གྲགས་པ། །གཟུངས་སྤོབས་མཐའ་ཡས་དབང་བཅུར་མངའ་བརྙེས་ཁ་བ་ཅན་གྱི་སྒྲོན་མེ་མཛད་ཕྱིར་བསམ་བཞིན་མི་ལོ་དགུ་བརྒྱར་གནས། །སྡེ་སྣོད་གསུམ་གྱི་བསྟན་པའི་རྒྱལ་མཚན་གངས་ཅན་དབུས་འགྱུར་རྒྱན་དུ་ལེགས་བཙུགས་སྔོན་མེད་རྒྱལ་བའི་གདུང་རབས་བསྐྲུན། །བོད་ཡུལ་ཐོག་མའི་མཆོད་གནས་ཉིད་དུ་བསོད་ནམས་བགོ་སྐལ་ཞི་བ་འཚོ་ཁྱོད་ལེགས་པར་ཐོབ་སྙམ་དད་ཕྱག་བརྩེགས། །བསིལ་ལྗོངས་རྨོངས་མུན་སྟུག་པོའི་ཁྲོད་ན་མཁྱེན་རབ་རལ་གྲིའི་འཁྲི་ཤིང་ཅན་དེ་མི་ཡི་ལྷ་རུ་ཡོངས་བརྫུས་ཏེ། །རྒྱལ་བསྟན་རིན་ཆེན་སྣང་བའི་སྒྲོན་མེ་གསར་དུ་སྦར་ལས་མཐའ་ཁོབ་ཞིང་འདི་འཕགས་ཡུལ་ལས་ཀྱང་སྐལ་བཟང་དུ། །བསྒྲུབས་པའི་ངོ་མཚར་བཀའ་དྲིན་ཕུང་པོ་གཟུགས་སུ་གྲུབ་ན་སྲིད་ཁམས་ཁྱོན་ཡང་སྣོད་དུ་ཆུང་སྟེ་ད་ལྟའང་འདིར། །ཟབ་དོན་ཡིད་བཞིན་ནོར་བུའི་མཛོད་ལ་ཅི་དགར་སྤྱོད་གང་ཁྲི་སྲོང་རྗེ་ཁྱོད་ཁོ་ནའི་མཐུར་ཤེས་བདག་དད་དོ། །དྲི་མེད་རྒྱལ་བའི་གསུང་རབ་དགོངས་འགྲེལ་བཅས། །མ་ནོར་ཇི་བཞིན་བསྒྱུར་ཞུས་གཏན་ཕབ་སྟེ། །གངས་ལྗོངས་ཕན་བདེའི་སྒོ་བརྒྱ་འབྱེད་མཛད་པ། །འཕགས་བོད་ལོ་པཎ་ཚོགས་རྣམས་ལན་བརྒྱར་བསྔགས། །བརྒྱུད་གསུམ་དགོངས་བཅུད་མན་ངག་བདུད་བརྩིའི་རོས། །རབ་མྱོས་ཅིར་སྣང་བདེ་ཆེན་མནྜ་ལར། །དགྱེས་རོལ་འཕོ་ཆེན་རྡོ་རྗེའི་གདུང་འཛིན་པའི། །གྲུབ་མཆོག་རིག་འཛིན་ཚོགས་ལ་སྙིང་ནས་དད། །གཞན་ཡང་མཁས་བཙུན་གྲུབ་པའི་རྣམ་ཐར་གྱིས། །རིས་སུ་མ་ཆད་བསྟན་འགྲོའི་དཔལ་གྱུར་པའི། །འདྲེན་པ་རྒྱལ་བའི་ཕྲིན་ལས་པར་སྣང་བ། །དེ་ཀུན་གུས་པའི་བློ་ཡིས་འདིར་བསྟོད་དོ། །གསང་འཛིན་ཌཱ་ཀི་བཀའ་ཡི་ཆོས་སྲུང་ཚོགས། །ཟབ་དོན་ལོ་རྒྱུས་འཆད་ལ་མ་འཁྲེན་པར། །བསྟན་གཞུག་མནལ་དུ་ཉེ་བ་འདིར་དགོངས་ནས། །དགྱེས་པའི་འཛུམ་གྱིས་གནང་བའི་སྐབས་ཕྱེས་ཤིག །ཆེར་སྙིགས་དུས་ཀྱི་རྒུད་པའི་ཆར་སྤྲིན་ངམ་གནག་གཡོ་བས་རྒྱལ་བསྟན་སྣང་བྱེད་བཞིན་རས་འགེབ་ལ་མངོན་ཕྱོགས་ཤིང༌། །ཐུན་མོང་མ་ཡིན་གྲུབ་པའི་སྐྱེས་བུའི་བརྟེན་བྱ་ཉིད་གྱུར་མཆོག་གསང་ཐེག་པའི་རིང་ལུགས་བག་ལ་ཞ་ཉེ་བས། །རྟོགས་པའི་རྣམ་ཐར་ཉམས་འོག་ཆུད་པ་དེང་དུས་འདི་ན་སྲིད་པ་ཙམ་སྟེ་དེ་ཡི་ལོ་རྒྱུས་སྨྲ་བ་ཡང༌། །ཆེས་དཀོན་གྱུར་ཕྱིར་སྔོན་བྱུང་གཏམ་གྱི་ཆ་ཤས་ཙམ་ཡང་ནུབ་པར་འཕངས་ཏེ་བདག་ནི་འབད་པས་འདི་བརྩམ་བྱ། །དེའང་སྟོན་པ་བདེ་བར་གཤེགས་པའི་བསྟན་པ་ཐམས་ཅད་ཀྱི་སྙིང་པོ་གསང་ཆེན་བླ་ན་མེད་པ་རྡོ་རྗེ་ཐེག་པའི་ཆོས་ཚུལ་རིན་པོ་ཆེ་འདི་ཉིད་འཇིག་རྟེན་གྱི་ཁམས་སྤྱི་དང་ཁྱད་པར་ཁ་བ་ཅན་གྱི་ལྗོངས་སུ་ཇི་ལྟར་བྱུང་ཞིང་རྒྱས་པར་གྱུར་པའི་ཚུལ་དག་ཅིང་གསལ་བའི་ངག་གིས་མདོ་ཙམ་འཆད་པར་སྤྲོའོ།།