ལེའུ་བརྒྱད་པ་བསྟན་པའི་གནས་ཚད་བསྟན་པ།

ད་ནི་བསྟན་པའི་བབ་ཚུལ་སོགས་དང་འབྲེལ་བར་དུས་ཚིགས་ཀྱི་ངེས་པ་ཅི་རིགས་ལ་ཅུང་ཟད་དཔྱད་ཅིང་བསྟན་པའི་གནས་ཚད་བསྟན་པར་བྱ་སྟེ། དེ་ལ་བསྐལ་བཟང་ཞིང་གི་བསྟན་པ་འདིའི་སྟོན་པ་མཉམ་མེད་རྣམ་འདྲེན་བཞི་པ་འདི་ཉིད་གདུལ་བྱ་ཐུན་མོང་བ་རྣམས་ཀྱི་སྣང་ངོར་སྐུ་བལྟམས་པ་དང༌། མངོན་པར་བྱང་ཆུབ་པ་དང༌། མྱ་ངན་ལས་འདས་པ་རྣམས་ཀྱི་ལོའི་ངེས་པ་ནི་བསམ་གྱིས་མི་ཁྱབ་པའི་གནས་ལུགས་ཉིད་ཀྱིས་རྒྱ་བོད་མཁས་པ་རྣམས་ཀྱི་བཞེད་གཞུང་མི་མཐུན་པ་མང་ཞིང༌། མྱ་ངན་ལས་འདས་ནས་ཅི་ཙམ་སོང་གི་དུས་ཀྱང་ཚུལ་དེ་དང་འདྲ་བར་སྣང་ལ། དེ་བཞིན་རྒྱལ་བའི་བསྟན་པ་ཇི་ཙམ་གནས་པའི་ཡུན་ཚད་ཀྱང་དགོངས་པའི་དབང་གིས་རྣམ་གྲངས་དུ་མ་ཅན་དུ་བྱུང་སྟེ། འདུལ་བ་ལུང་ཕྲན་ཚེགས་དང༌། གསེར་ཅན་གྱི་རྟོགས་བརྗོད། མདོ་སྡེ་བསྐལ་པ་བཟང་པོ། སྤྲིན་ཆེན་པོའི་མདོ། བློ་གྲོས་མི་ཟད་པས་བསྟན་པའི་མདོ་འགྲེལ། མཛོད་འགྲེལ་རྣམས་མཐུན་པར་བསྟན་པ་དངོས་དང༌། བཏགས་པ་ལྔ་བརྒྱ་རེ་བྱས་པ་ལོ་སྟོང་དུ་གནས་པར་གསུངས་པ་དང༌། སྙིང་རྗེ་པད་དཀར་ནས་དངོས་སྟོང༌། བཏགས་པ་ལྔ་བརྒྱ་དང༌། ཆོས་ཉིད་རང་ངོ་མི་གཡོ་བ་ཐ་དད་སྣང་བའི་མདོར་ཉིས་སྟོང་ལྔ་བརྒྱ་དང༌། བྱང་ཆུབ་སེམས་དཔའ་ཟླ་བའི་སྙིང་པོས་ཞུས་པའི་མདོ་ད་ལྟའི་དཔེ་ཉིས་སྟོང་བྱས་པ་མང་ཡང་སུམ་སྟོང་བྱས་པ་ཡོད་ཅེས་དམ་པ་མཆོག་དག་གིས་གསུངས་པས་ངེས་པ་ཉིད་དང༌། བྱམས་པ་ལུང་བསྟན་གྱི་མདོ་ཐར་ལོའི་འགྱུར་དང༌། དབྱིག་གཉེན་གྱི་གནོད་འཇོམས་དང༌། མཆེ་སྡེའི་འབུམ་ཊཱིཀ་སོགས་སུ་ལྔ་སྟོང་བཤད་པ་སོགས་མིའི་གདུལ་བྱ་སྤྱིར་བཏང་གཙོ་བོ་དང༌། མི་མ་ཡིན་ཕལ་པ་དང་བཅས་པའི་སྣང་ངོ་ལ་དགོངས་ཤིང༌། གཞན་དུ་མི་མ་ཡིན་ཆེན་པོ་ཀླུའི་རྒྱལ་པོ་རྒྱ་མཚོའི་གནས་དང༌། སུམ་ཅུ་རྩ་གསུམ་དང༌། དགའ་ལྡན་གྱི་གནས་རྣམས་སུ་ནི་སངས་རྒྱས་སྟོང་གི་བསྟན་པ་བསྐལ་པ་ཆེན་པོ་འདི་མ་རྫོགས་ཀྱི་བར་དུ་ཆོས་ཀྱང་ནུབ་པར་མི་འགྱུར་བར་ཀླུའི་རྒྱལ་པོ་རྒྱ་མཚོས་ཞུས་པའི་མདོར་གསུངས་པ་སོགས་ཀྱིས་མཚོན་པ་དང༌། ཐེག་ཆེན་ངེས་དོན་འཁོར་ལོ་གསུམ་པའི་ནང་ཚན་གསེར་འོད་དམ་པ་མདོ་སྡེའི་དབང་པོ་དང༌། སྔགས་བླ་མེད་སྒྱུ་འཕྲུལ་རྡོ་རྗེ་སེམས་དཔའ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ཞེས་དང༌། ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོ། །ཇི་སྲིད་རྣམ་པར་གནས་དེ་སྲིད། །སངས་རྒྱལ་སྤྲུལ་པ་རྒྱུན་མི་ཆད། །གྲོལ་བའི་ཆོས་ཀྱང་ནུབ་པ་མེད། །ཅེས་སོགས་སྔགས་ཀྱི་རྒྱུད་སྡེ་རྣམས་ནས་བསྟན་པའི་གནས་ཚད་ངེས་ཅན་དང༌། ངེས་པ་མེད་པ་དང༌། ནུབ་པ་མེད་པར་གསུངས་པ་སོགས་མང་དུ་འབྱུང་བའི་ལུང་ཚིག་རྒྱས་པར་འདིར་མི་སྤྲོ་ལ།

དེ་ལྟར་བསྟན་པའི་གནས་ཚད་དེ་དག་གི་སྟེང་ནས་སྔོན་ཆད་དུས་ཇི་ཙམ་ཞིག་སོང་སྙམ་ན། དེ་ལ་ཡང་འདོད་པ་མི་འདྲ་བ་མང་དུ་བྱུང་བ་ལས། འདིར་རྫོགས་པའི་སངས་རྒྱས་བཅོམ་ལྡན་འདས་ཉིད་ཀྱིས་འདུལ་བའི་ལུང་དང་མདོ་སྡེ་རྣམས་དང༌། དཔལ་མཆོག་དང་པོའི་སངས་རྒྱས་དུས་ཀྱི་འཁོར་ལོའི་རྒྱུད་དང༌། གཞན་ཡང་སྔགས་རྒྱུད་ཁྱད་པར་མཆོག་ཏུ་འཕགས་ཤིང་དྲི་མ་མེད་པ་རྣམས་ནས་ཟླ་བ་དང་ལོའི་ངེས་པ་གསལ་བར་བསྟན་པ་དང༌། དེ་བཞིན་དུ་གསུང་རྡོ་རྗེ་ཨོ་རྒྱན་གྱི་སློབ་དཔོན་ཆེན་པོ་པདྨ་ཀཱ་ར་དང༌། མ་ཧཱ་པཎྜི་ཏ་བི་མ་ལ་མི་ཏྲ་དང༌། ལོ་ཙཱ་བ་བཻ་རོ་ཙ་ན་རྣམས་ཀྱི་གསུང་དྲི་མ་མེད་པ་ཐུན་མོང་མ་ཡིན་པ་རྣམས་ལ་བརྟེན་ཞིང༌། དེའང་སྐར་རྩིས་ཀྱི་རི་མོ་རྣམ་པར་དག་པའི་ལམ་ནས་གཞལ་བ་ན་བོད་ཡུལ་གྱི་དུས་འཁོར་མཁན་སྤྱི་དང་ཁྱད་པར་རྒྱལ་བས་ལུང་བསྟན་པའི་ཤིང་རྟ་ཆེན་པོར་གྱུར་པ་དག་གི་བཞེད་པ་དང་ཤིན་ཏུ་མཐུན་པར་གྱུར་པས་ན་གཞན་དག་ཐེ་ཚོམ་ཆུང་ཞིང་ཚུལ་དེ་ལེགས་པར་རྟོགས་པས་སྐབས་འདི་ཉིད་དུ་དེ་བཞིན་བརྗོད་པར་བྱ་སྟེ། དེ་ཡང་བདག་ཅག་གི་སྟོན་པ་འདི་ཉིད་དོན་གྲུབ་ཅེས་པ་ས་མོ་ལུག་གི་ལོ་ཆུ་སྟོད་ཟླ་བའི་ཚེས་བཅོ་ལྔའི་མཚན་གུང་རྒྱུ་སྐར་རྒྱལ་ནུབ་པའི་དུས་སྦྱོར་ལ་ཡུམ་ལྷ་མོ་སྒྱུ་འཕྲུལ་གསོ་སྦྱོང་ལ་གནས་པའི་ལྷུམས་སུ་ཞུགས། དེ་ནས་ཟླ་བ་དགུ་དང་ཞག་ཉི་ཤུ་རྩ་གསུམ་སྟེ་ཟླ་ངོ་བཅུ་འདས་པ་དྲག་པོ་ལྕགས་སྤྲེལ་ས་གའི་དཀར་ཕྱོགས་ཚེས་བདུན་གྱི་སྔ་དྲོ་རེས་འགྲོགས་ཟླ་བའི་སྐར་མ་རྒྱལ་དང་ལྡན་ཞིང་རྒྱལ་འཆར་བའི་རྐང་པ་དང་པོར་བབས་པའི་སྐབས་སུ་ལུམྦིའི་ཚལ་དུ་སྐུ་བལྟམས། དགུང་ལོ་ཉེར་དགུ་པ་ཀུན་འཛིན་ས་བྱི་སྨིན་དྲུག་ཟླ་བའི་ཚེས་བརྒྱད་ཀྱི་ནམ་གྱི་ཆ་སྟོད་དུ་གྲགས་འཛིན་མ་ལ་རིགས་ཀྱི་ས་བོན་བསྐྲུན་ཅིང་ནམ་གུང་རྒྱུ་སྐར་རྒྱལ་འཆར་བ་གཟིགས་པའི་དུས་སུ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་ལོ་དྲུག་ཏུ་དཀའ་བ་སྤྱད། དགུང་ལོ་སུམ་ཅུ་སོ་ལྔ་བཞེས་པ་ཤིང་རྟ་ས་གའི་ཉ་ལ་བྱང་ཆུབ་ཤིང་དྲུང་དུ་གཤེགས་ཏེ་སྲོད་ལ་བདུད་བཏུལ། ནམ་གྱི་གུང་ཡོལ་རྡོ་རྗེ་ཟླ་བ་སྒྲ་གཅན་དང་སྙོམས་པར་ཞུགས་པའི་སྐབས་སུ་མཉམ་པར་བཞག ཟླ་བ་སྒྲ་གཅན་ལས་གྲོལ་ལ་ཁད་སྐད་ཅིག་གཅིག་གིས་ཐོགས་པ་ཐོ་རངས་སྐྱ་རེངས་འཆར་བ་རྒྱལ་རྔ་བརྡུང་དུ་ཉེ་བའི་ཚེ་ན་མངོན་པར་རྫོགས་པར་སངས་རྒྱས་ཏེ། སྲས་སྒྲ་གཅན་འཛིན་ཡང་ཡུམ་གྱི་མངལ་དུ་ལོ་དྲུག་བཞུགས་ནས་དུས་དེར་བཙས་ཤིང༌། དེའི་བཙས་སྟོན་གྱིས་སྐྱེ་བོ་ཀུན་དགའ་བར་གྱུར་པ་ན་ཀུན་དགའ་བོའང་བཙས་སོ། །འདིའི་ཟླ་འཛིན་ནམ་གུང་ཡོལ་མ་ཐག་པ་གླང་དུས་སྔ་ཆར་ཟླ་བའི་བྱང་ཤར་ཉེའི་ཕྱོགས་ནས་དུས་མེས་ཟླ་དཀྱིལ་དྲུག་ཆ་གཅིག་མ་གཏོགས་བསྒྲིབས་པ་ལས་བསྒྲིབས་མནན་གྲོལ་ཡུན་ཆུ་ཚོད་བཅུ་གསུམ་ལྷག་ཙམ་ན་སླར་ཉ་རྒྱས་ཡོངས་སུ་གང་བ་ཡིན་ནོ།།

དེ་ལྟར་སངས་རྒྱས་ནས་ཞག་བདུན་ཕྲག་བདུན་འདས་པ་ན་ཝ་ར་ཎཱ་སིར་བདེན་པ་བཞི་ཡི་ཆོས་ཀྱི་འཁོར་ལོ་དང་པོ་བསྐོར་ཞིང༌། དེ་ནས་རིམ་པར་བྱ་རྒོད་ཕུང་པོའི་རིར་བཀའ་བར་པ་མཚན་ཉིད་མེད་པ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། མ་ལ་ཡ་དང་གྱད་ཀྱི་ཡུལ་ལ་སོགས་པ་གནས་སྣ་ཚོགས་པར་ཕྱིར་མི་ལྡོག་པ་ངེས་དོན་སྙིང་པོའི་ཐེག་པ་སྟེ། གདུལ་བྱའི་དབང་པོ་དང་འཚམས་པར་འཁོར་ལོ་རིམ་པ་གསུམ་དུ་བསྟན་པར་མཛད་པ་ཡིན་ལ། འཁོར་ལོ་གསུངས་པའི་ལོ་འདི་ཙམ་ཞེས་དམ་པ་འགའ་ཞིག་གིས་གྲངས་ནས་སྨོས་ཀྱང་རྣམ་པ་ཙམ་ལས་ཇི་བཞིན་དཔག་པར་དཀའ་ཞིང༌། སྤྱིར་ཡང་ཐེག་པའི་གོ་རིམ་ལས་དུས་སྔ་ཕྱི་ཁོ་ནར་ཡང་འདོད་མི་ནུས་སོ། །དེ་བཞིན་གཤེགས་པ་དགུང་ལོ་ཧྲིལ་པོ་བརྒྱད་ཅུ་རྩ་གཅིག་བཞེས་ཤིང་སངས་རྒྱས་ནས་ལོ་བཞི་བཅུ་རྩ་བདུན་ལ་འཁོད་པ་གནམ་གནོན་ལྕགས་འབྲུག་དཔྱིད་ཟླ་འབྲིང་པོ་ནག་པའི་ཚེས་བཅོ་ལྔའི་ཉི་མ་ཕྱི་དྲོ་བདུད་འཇོམས་འཇིག་རྟེན་གསུམ་ལས་རྣམ་པར་རྒྱལ་བའི་དུས་སྦྱོར་དང་ལྡན་པའི་ཆ་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་དུ་དཔལ་མཆོག་དང་པོའི་སངས་རྒྱས་སོགས་བླ་མེད་ཀྱི་ཐེག་པ་མཐའ་ཡས་པ་གསུངས། དེའི་ཟླ་བ་ཕྱི་མ་ས་གའི་ཚེས་བཅོ་ལྔའི་མཚན་མོའི་ཐུན་ཐ་མའི་འགོ་ལ་གྱད་ཀྱི་ཡུལ་རྩྭ་ཅན་དུ་གཟུགས་སྐུ་ཆོས་ཀྱི་དབྱིངས་སུ་ལྷག་མ་མེད་པར་གཤེགས་སོ། །གཞན་ནི་སྨིན་དྲུག་ཟླ་བའི་ཚེས་བརྒྱད་ཀྱི་ནམ་གུང་ལ་ཆོས་ཀྱི་སྐུར་གཤེགས་ཞེས་རྒྱ་གར་གྱི་སློབ་དཔོན་ཚུལ་ཁྲིམས་བསྐྱང་དང་པཎ་ཆེན་ཤཱཀྱ་ཤྲཱིའི་བཞེད་པ་ཡིན་ལ། བོད་ཀྱི་མཁས་མཆོག་བུ་སྟོན་སོགས་ཀྱིས་ཀྱང་འདི་ཉིད་ཁས་བླངས། ཡང་ཁ་ཅིག་ནས་དཔྱིད་ཟླ་འབྲིང་པོའི་ཚེས་བཅོ་ལྔ་ལ་མྱ་ངན་ལས་འདའ་བར་བཞེད་པ་དང༌། ཁ་ཅིག་ཆུ་སྟོད་ཟླ་བའི་ཚེས་བཅོ་ལྔ་ཡིན་པར་འདོད་པའང་བྱུང་ངོ༌། །འདི་ལ་བར་སྐབས་ཀྱི་བསྟན་རྩིས་མཁན་ཁ་ཅིག་མྱ་ངན་ལས་འདས་པའི་ལོ་ཕྱི་མ་ནས་བགྲང་བ་ཡོད་ཀྱང་མཁས་པ་ཆེན་པོར་གྱུར་པ་རྣམས་ཀྱིས་མྱ་ངན་ལས་འདས་པའི་ལོ་ཉིད་ནས་བགྲང་བར་མཛད་པས། ཇི་སྐད་དུ། རྒྱལ་བ་མྱ་ངན་འདས་པའི་ལོ། །དེ་ནི་འདས་ལོའི་ཐོག་མ་ཡིན། །ཞེས་སྨྲ་བ་འཐད་པ་ཉིད་དོ།།

དེ་ལྟར་སངས་རྒྱས་མྱ་ངན་ལས་འདས་པའི་ལྕགས་འབྲུག་ནས་བགྲང་སྟེ་ད་ལྟ་རབ་བྱུང་བཅུ་དྲུག་པའི་དགེ་བྱེད་ཆུ་སྟག་བརྩིས་པ་ཡན་ལ་མི་ལོ་ཉིས་སྟོང་བརྒྱད་བརྒྱ་བཞི་བཅུ་རྩ་གསུམ་འདས་པར་གྱུར་ལ། སླད་ཀྱི་འདས་ལོའི་རྣམ་གཞག་གཞན་རྣམས་ཀྱང་འདི་ཁོ་ནས་བརྩི་བར་བྱ་སྟེ། བསྟན་རྩིས་ཞིབ་པར་ཤམྦྷ་ལའི་ཆོས་རྒྱལ་རིགས་ལྡན་རྣམས་ཀྱི་རབས་དང་སྦྱར་ནས་འཆད་པར་འོས་ཀྱང་འདིར་ཡིག་ཚོགས་ཀྱི་ངལ་བས་འཇིགས་ཏེ་སྐབས་དོན་འགའ་ཞིག་ཁོལ་བུར་བཏོན་ནས་འཆད་ན། རྒྱལ་བའི་འདས་ལོ་ལྔ་པ་ཤིང་སྤྲེལ་སྣྲོན་ཟླའི་ཚེས་བཅུའི་ཉི་ཤར་སིན་དྷུའི་མཚོ་གླིང་པདྨའི་སྙིང་པོ་ལས་སངས་རྒྱས་གཉིས་པ་པདྨ་འབྱུང་གནས་སྐུ་བལྟམས་ནས་ད་ལྟའི་བར་ལོ་ཉིས་སྟོང་བརྒྱད་བརྒྱ་སུམ་ཅུ་སོ་བརྒྱད། འདས་ལོ་ཉེར་དགུ་པ་ས་སྤྲེལ་ལ་རི་མ་ལ་ཡ་གནམ་ལྕགས་ཡོད་པའི་རྩེ་མོར་དམ་པའི་རིགས་ཅན་དྲྭ་མ་ལྔ་ལ་གསང་བདག་དཔའ་བོས་ཆོས་ཀྱི་འཁོར་ལོ་བསྐོར་ཞིང༌། ས་ཧོ་རའི་རྒྱལ་པོ་ཛཿལ་ཏནྟྲའི་གླེགས་བམ་བབས་ནས་ལོ་ཉིས་སྟོང་བརྒྱད་བརྒྱ་བཅུ་བཞི། བརྒྱ་ཐམ་པའི་ངོ་མཐོང་ས་ལུག་ལ་ཆོས་རྒྱལ་མྱ་ངན་མེད་འཁྲུངས་ནས་ལོ་ཉིས་སྟོང་བདུན་བརྒྱ་ཞེ་གསུམ། བརྒྱ་ཐམ་པ་འདས་པའི་ལྕགས་སྤྲེལ་ཁ་བ་ཅན་གྱི་མཚོ་བྲི་ཞིང་སཱ་ལའི་ཚལ་སོགས་སྣོད་བཅུད་ཆགས་ནས་ལོ་ཉིས་སྟོང་བདུན་བརྒྱ་ཞེ་བཞི། བརྒྱ་དང་བཅུ་གཅིག་པ་ལྕགས་རྟ་ལ་བཀའ་བསྡུ་བར་པ་བྱས་ནས་ལོ་ཉིས་སྟོང་བདུན་བརྒྱ་སུམ་ཅུ་སོ་གསུམ། བརྒྱ་དང་དྲུག་ཅུ་རེ་དྲུག་པ་ཤིང་གླང་ལ་ཐེག་མཆོག་སྟོན་པ་དགའ་རབ་རྡོ་རྗེ་འཁྲུངས་ནས་ལོ་ཉིས་སྟོང་དྲུག་བརྒྱ་བདུན་ཅུ་དོན་བརྒྱད། བཞི་བརྒྱ་འདས་པའི་ལྕགས་སྤྲེལ་འཕགས་པ་ཀླུ་སྒྲུབ་འཁྲུངས་ནས་ལོ་ཉིས་སྟོང་བཞི་བརྒྱ་བཞི་བཅུ་ཞེ་གསུམ། གོང་གི་ལྕགས་སྤྲེལ་ཁ་བ་ཅན་གྱི་སྣོད་བཅུད་ཆགས་པ་ནས་མ་སངས་སྤུན་དགུ་དང་རྒྱལ་ཕྲན་སིལ་མ་བཞི་བཅུ་སོགས་བོད་ཡུལ་དབང་བྱས་པའི་ཡུན་ལ་ལོ་ལྔ་བརྒྱ་སུམ་ཅུ་སོ་བཞི་འདས་པའི་ཤིང་སྟག་ལ་རྗེ་གཉའ་ཁྲི་བཙན་པོ་བོད་སྤྱི་ལ་དབང་བའི་རྗེ་བོར་བྱོན་ནས་ལོ་ཉིས་སྟོང་ཉིས་བརྒྱ་དང་དགུ། སངས་རྒྱས་ཀྱི་འདས་ལོ་བརྒྱད་བརྒྱ་བརྒྱད་ཅུ་གྱ་གཅིག་པ་ལྕགས་སྤྲེལ་ལ་ཕྱི་གླིང་པའི་སྟོན་པ་ཡེ་ཤུ་མ་ཤི་ཀའི་འདས་ལོ་དང་པོ་ཚུགས་ནས་ལོ་ཆིག་སྟོང་དགུ་བརྒྱ་དྲུག་ཅུ་རེ་གསུམ། འདི་ནས་རིམ་པར་གོ་བདེ་བར་བསྡུས་ཏེ་བརྗོད་ན། ཤིང་སྟག་གཉའ་ཁྲི་ནས་བརྩིས་པའི་བོད་ཀྱི་རྒྱལ་རབས་ཉི་ཤུ་རྩ་བདུན་གྱི་རིང་ལ་ལོ་དྲུག་བརྒྱ་བཅུ་དགུ་འདས་པའི་ཤིང་ཁྱི་ལ་ལྷ་ཐོ་ཐོ་རི་གཉན་བཙན་འཁྲུངས་ཤིང༌། དེ་ཉིད་དྲུག་ཅུ་བཞེས་པའི་ཆུ་བྱ་ལ་མཁར་སྟེང་དུ་གཉན་པོ་གསང་བ་བབས་ཏེ་བོད་ལ་དམ་པའི་ཆོས་ཀྱི་དབུ་ཐོག་མར་བརྙེས། སངས་རྒྱས་ཀྱི་འདས་ལོ་ཆིག་སྟོང་ལྔ་བརྒྱ་འདས་པའི་ལྕགས་འབྲུག་ལ་རྒྱལ་བའི་བསྟན་པ་ལྔ་བརྒྱ་ཕྲག་བཅུ་ལས་འབྲས་བུའི་དུས་ལྔ་བརྒྱ་ཕྲག་གསུམ་རྫོགས་ཏེ་སྒྲུབ་པའི་དུས་ཐོག་མར་སླེབས། ཆུ་བྱ་བོད་དུ་དམ་པའི་ཆོས་ཀྱི་དབུ་བརྙེས་ནས་ལོ་བརྒྱ་དང་བརྒྱད་ཅུ་གྱ་ལྔ་པ་མེ་གླང་ལ་ཆོས་རྒྱལ་སྲོང་བཙན་སྒམ་པོ་སྐུ་བལྟམས།

དེ་ནས་ལོ་ཉི་ཤུ་རྩ་ལྔ་པ་ལྕགས་གླང་ལ་ར་ས་འཁྲུལ་སྣང་སོགས་བཏབ་ཅིང་དམ་པའི་ཆོས་དང་ཡི་གེའི་སྲོལ་གཏོད། དེ་ནས་ལོ་བརྒྱ་དང་ལྔ་བཅུ་པ་ལྕགས་རྟ་ལ་ཆོས་རྒྱལ་ཁྲི་སྲོང་ལྡེའུ་བཙན་སྐུ་འཁྲུངས། དེ་ནས་ཉེར་གཅིག་པ་ལྕགས་སྟག་ལ་སློབ་དཔོན་ཆེན་པོ་བོད་དུ་ཕེབས་ཤིང་ཆོས་འཁོར་དཔལ་གྱི་བསམ་ཡས་བཏབ། དེ་ནས་བཅོ་བརྒྱད་པ་མེ་ལུག་ལ་སད་མི་མི་བདུན་རབ་ཏུ་བྱུང་ཞིང་མདོ་སྔགས་དམ་ཆོས་སྒྲ་བསྒྱུར་བཤད་སྒྲུབ་ཀྱི་བསྟན་པ་གཞིར་བཞེངས་སུ་བཙུགས། དེ་ནས་སོ་བརྒྱད་པ་ཤིང་སྤྲེལ་ལ་སློབ་དཔོན་ཆེན་པོ་རྔ་ཡབ་གླིང་དུ་གཤེགས། དེ་ནས་གསུམ་པ་མེ་ཁྱི་ལ་མངའ་བདག་ཁྲི་རལ་པ་ཅན་འཁྲུངས། འདི་ནས་ཉེར་བདུན་པ་ཆུ་བྱི་ལ་བླ་ཆེན་དགོངས་པ་རབ་གསལ་འཁྲུངས། དེ་ནས་བཅུ་ཐམ་པ་ལྕགས་བྱ་ལ་གླང་དར་མས་དབུས་གཙང་གི་བསྟན་པ་བསྣུབས། དེ་ནས་ལོ་དྲུག་པ་མེ་སྟག་ལ་ལྷ་ལུང་དཔལ་རྡོར་གྱིས་གླང་དར་བསྒྲལ། དེ་ནས་ཉེར་བཞི་པ་ས་གླང་ལ་ཁེངས་ལོག་གིས་བོད་ཀྱི་རྒྱལ་ས་སིལ་བུར་འཐོར། དེ་ནས་ཉེར་ལྔ་པ་ཆུ་གླང་ལ་བླ་ཆེན་དང་དབུས་གཙང་གི་མི་བཅུས་ཁམས་ནས་དབུས་སུ་བསྟན་པ་ཕྱི་དར་གྱི་འགོ་ཚུགས། དེ་ནས་ལོ་དྲུག་པ་ས་རྟ་ལ་གསར་མའི་ལོ་ཙཱ་བ་ཐམས་ཅད་ཀྱི་ཐོག་མ་ལོ་ཆེན་རིན་ཆེན་བཟང་པོ་འཁྲུངས། དེ་ནས་ཉེར་གཅིག་པ་ས་སྟག་ལ་མཁས་གྲུབ་ཁྱུང་པོ་རྣལ་འབྱོར་ཚུལ་ཁྲིམས་མགོན་པོ་འཁྲུངས། དེ་ནས་ལྔ་པ་ཆུ་རྟ་ལ་དཔལ་ལྡན་ཇོ་བོ་རྗེ་ཨ་ཏི་ཤ་སྐུ་འཁྲུངས། དེ་ནས་ཉེར་གསུམ་པ་ཤིང་འབྲུག་ལ་འབྲོམ་སྟོན་རྒྱལ་བའི་འབྱུང་གནས་འཁྲུངས། དེ་ནས་ལོ་དགུ་པ་ཆུ་བྱི་ལ་མར་པ་ལོ་ཙཱ་དང༌། གཏེར་སྟོན་གྲྭ་པ་མངོན་ཤེས་འཁྲུངས། དེ་ནས་ལོ་གསུམ་པ་ཤིང་སྟག་ལ་ཟུར་ཆུང་པ་འཁྲུངས། དེ་ནས་བཅུ་བཞི་པ་མེ་ཡོས་ལ་དུས་འཁོར་རྒྱུད་འགྲེལ་བོད་དུ་ཐོག་མར་ཕེབས་ཤིང་རབ་བྱུང་དང་པོ་འདི་ནས་བརྩིས་སྟེ། དེ་ནས་བཟུང་ད་ལྟའི་བར་གྱི་རབ་བྱུང་སྐོར་རེའི་ནང་དུ་གྲགས་ཆེ་བའི་སྐྱེས་ཆེན་འགའ་ཞིག་གི་དགུང་ལོའི་ཚད་དང༌། དུས་ཀྱི་འཕོ་འགྱུར་ཆེ་ལོང་ཇི་ལྟར་བྱུང་བ་བཅས་སྦྱར་ཏེ་གོ་བདེ་བར་བཤད་ན།

༈ རབ་བྱུང་དང་པོ་ཤར་བ་ན། ལོ་ཆེན་རིན་ཆེན་བཟང་པོ་དགུང་ལོ་བདུན་ཅུ་ཐམ་པ། ཁྱུང་པོ་རྣལ་འབྱོར་ལྔ་བཅུ་ཐམ་པ། ཇོ་བོ་རྗེ་ཞེ་དྲུག འབྲོམ་སྟོན་ཉེར་བཞི། མར་པ་དང༌། གྲྭ་པ་མངོན་ཤེས་བཅུ་དྲུག ཟུར་ཆུང་བཅུ་བཞི་པའོ། །རབ་བྱུང་དང་པོ་འདིའི་ནང་དུ་ཇོ་བོ་ཡབ་སྲས་ཀྱི་ཆོས་བརྒྱུད་ལས་ཆོས་མིང་བརྒྱུད་འཛིན་ལ་ཐོགས་ཏེ་བཀའ་གདམས་པ་ཞེས་པའི་རིང་ལུགས་ཐོག་མར་བྱུང་ལ། སློབ་དཔོན་ཆེན་པོའི་དངོས་སློབ་འཁོན་ཀླུ་དབང་སྲུང་བ་ནས་འཁོན་རོག་ཤེས་རབ་ཚུལ་ཁྲིམས་ཀྱི་བར་གདུང་བརྒྱུད་བཅུ་ཙམ་གྱི་རིང་ལ་སྔགས་རྙིང་མ་བ་ཡིན་ཡང༌། འཁོན་དཀོན་མཆོག་རྒྱལ་པོས་འབྲོག་མི་ཤཱཀྱ་ཡེ་ཤེས་སོགས་གསར་མའི་ལོ་ཙཱ་བ་ལས་ཆོས་མང་པོ་གསན་པ་ནས་སྔགས་གསར་མ་བར་གནས་འགྱུར་ཞིང༌། དེ་ཉིད་ཀྱིས་སྤང་པོ་རིའི་ངོས་འགྲམ་ས་དཀར་དབུས་ཀྱི་ལོགས་སུ་རབ་བྱུང་དང་པོའི་ཆུ་གླང་ལོར་སྒོ་རུམ་གྱི་གཙུག་ལག་ཁང་བཏབ་པ་ནས་བཟུང་ཡུལ་མིང་ཆོས་ལ་ཐོགས་ཏེ་ས་སྐྱ་པ་ཞེས་པའི་རིང་ལུགས་དེ་བྱུང༌། འདི་དང་དུས་ཐོག་མཚུངས་པར་མཁས་གྲུབ་ཁྱུང་པོས་ཤངས་པའི་གསེར་ཆོས་དང༌། མར་པ་ལོ་ཙཱས་བཀའ་བརྒྱུད་ཀྱི་བསྟན་པའི་ཆུ་འགོ་བོད་དུ་དྲངས་སོ།།

༈ རབ་བྱུང་གཉིས་པ་ཤར་བ་ན། མ་གཅིག་ལབ་སྒྲོན་ལྕགས་ལུག་ང་བདུན། གླིང་རྗེ་གེ་སར་ས་སྟག་ལྔ་བཅུ་ཐམ་པ། རྗེ་བཙུན་མི་ལ་ལྕགས་འབྲུག་ཞེ་བརྒྱད། རྔོག་ལོ་ཙཱ་བ་ལྕགས་ཕག་བཅུ་བདུན། གསང་བདག་སྒྲོ་ཕུག་པ་ཤིང་སྟག་བཅུ་བཞི། དྭགས་པོ་ཟླ་འོད་གཞོན་ནུ་ས་ལུག་དགུ་པའོ། །དྭགས་པོའི་སློབ་མ་ཁམས་པ་མི་གསུམ་སོགས་ལས་རིམ་པར་བཀའ་བརྒྱུད་ཆེ་བཞི་ཆུང་བརྒྱད་དུ་གྱེས་ཏེ་རྒྱ་ཆེར་འཕེལ་ལོ།།

༈ རབ་བྱུང་གསུམ་པ་ཤར་བ་ན། བྱ་འདུལ་འཛིན་ཆེན་པོ་ལྕགས་ལུག་ང་བདུན། ལོ་འདིར་དམ་པ་སངས་རྒྱས་དིང་རིར་ཕེབས། ས་ཆེན་ཀུན་དགའ་སྙིང་པོ་ཆུ་སྤྲེལ་ང་དྲུག ཕག་མོ་གྲུ་པ་དང༌། ཀརྨ་པ་དུས་གསུམ་མཁྱེན་པ་ལྕགས་སྟག་སོ་བརྒྱད། ཀཿཐོག་དམ་པ་བདེ་གཤེགས་དང་ཞང་དར་མ་གྲགས་ཆུ་སྟག་ཉེར་དྲུག མངའ་བདག་ཉང་རལ་ཤིང་འབྲུག་ཉེར་བཞི། ས་སྐྱའི་རྗེ་བཙུན་བསོད་ནམས་རྩེ་མོ་དང༌། དཔལ་སྟག་ལུང་ཐང་པ་ཆུ་ཁྱི་དྲུག་པ། འབྲི་གུང་སྐྱོབ་པ་ཆུ་ཕག་ལྔ་པའོ། །གོང་གི་ས་གླང་ལོར་བོད་ཀྱི་རྒྱལ་ས་འཐོར་ནས་རྒྱལ་རྒྱུད་སིལ་ཆད་རྣམས་ཀྱིས་མངའ་རིས་ཁོལ་བུ་ཁོལ་བུར་སྲིད་བསྐྱངས་སྟེ་གནས་པའི་ཡུན་ལ་ལོ་ཉིས་བརྒྱ་སུམ་ཅུ་སོ་བདུན་སོང་བ་ལས། རབ་བྱུང་གསུམ་པ་འདིའི་ཤིང་བྱ་ལོར་རྒྱ་དོར་རྟ་ནག་པོའི་དམག་དཔུང་བོད་དུ་ལྷགས་ཏེ་བོད་ཁ་བ་ཅན་པ་རྒྱའི་བཙན་འོག་ཏུ་བསྡུས།

༈ རབ་བྱུང་བཞི་པ་ཤར་བ་ན། གུ་རུ་ཆོས་དབང་ཆུ་སྤྲེལ་ང་དྲུག མཁས་པ་ཉི་འབུམ་ས་སྟག་ལྔ་བཅུ་ཐམ་པ། གླིང་རས་པངྨ་རྡོ་རྗེ་དང་ཇོ་མོ་སྨན་མོ་ས་སྤྲེལ་ཉི་ཤུ། ས་སྐྱ་པཎ་ཆེན་ཆུ་སྟག་ཉེར་དྲུག སྟག་ལུང་སངས་རྒྱས་ཡར་བྱོན་ཆུ་ཕག་ལྔ་པའོ། །འདིའི་ཆུ་གླང་ལོ་ནས་བླ་ཆེན་ས་སྐྱ་པས་བོད་ཆོལ་ཁ་གསུམ་ཡོངས་རྫོགས་ལ་དབང་བསྒྱུར།

༈ རབ་བྱུང་ལྔ་པ་ཤར་བ་ན། གཙང་པ་རྒྱ་རས་ལྕགས་སྦྲུལ་ཞེ་བདུན། གྲུབ་ཆེན་ཨོ་རྒྱན་པ་ལྕགས་སྟག་སོ་བརྒྱད། འགྲོ་མགོན་ཆོས་རྒྱལ་འཕགས་པ་ཤིང་ལུག་སོ་གསུམ། གྲུབ་ཆེན་མེ་ལོང་རྡོ་རྗེ་ཆུ་ཡོས་ཉེར་ལྔ། རིག་འཛིན་ཀུ་མཱ་རཱ་ཛ་མེ་སྟག་དགུང་ལོ་གཉིས་པའོ།།

༈ རབ་བྱུང་དྲུག་པ་ཤར་བ་ན། ཀརྨ་པ་རང་བྱུང་རྡོ་རྗེ་དང༌། གཡུང་སྟོན་རྡོ་རྗེ་དཔལ་ཤིང་སྤྲེལ་ཞེ་བཞི། བུ་སྟོན་ཐམས་ཅད་མཁྱེན་པ་ལྕགས་སྟག་སོ་བརྒྱད། ཇོ་ནང་ཀུན་གཟིགས་དོལ་པོ་པ་ཆུ་འབྲུག་སོ་དྲུག ཀུན་མཁྱེན་ཀློང་ཆེན་རབ་འབྱམས་ས་སྤྲེལ་ཉི་ཤུ་ཐམ་པའོ། །འདིའི་ས་གླང་ནས་ཕག་གྲུ་ཏཱ་སིས་བོད་ཁམས་ལ་དབང་བསྒྱུར།

༈ རབ་བྱུང་བདུན་པ་ཤར་བ་ན། གཏེར་ཆེན་སངས་རྒྱས་གླིང་པ་ལྕགས་འབྲུག་ཞེ་བརྒྱད། རྡོ་རྗེ་གླིང་པ་མེ་ཁྱི་ཞེ་གཉིས། འཇམ་མགོན་བློ་བཟང་གྲགས་པ་མེ་བྱ་སོ་གཅིག བོ་དོང་ཀུན་མཁྱེན་འཇིགས་བྲལ་ཤིང་ཡོས་བཅུ་གསུམ། ཀརྨ་པ་དེ་བཞིན་གཤེགས་པ་ཤིང་བྱི་བཞི་པ། གྲུབ་ཆེན་ཐང་སྟོང་རྒྱལ་པོ་ཤིང་གླང་དགུང་ལོ་གསུམ་པའོ། །འདིའི་ཤིང་ཡོས་ནས་སྡེ་སྲིད་རིན་སྤུངས་པས་བོད་ཁམས་ལ་དབང་བསྒྱུར། རྗེ་ཙོང་ཁ་པས་བཀའ་གདམས་པའི་གཞུང་དང་གསར་མའི་སྔགས་རྒྱུད་ཟུང་དུ་འཇུག་པའི་བཤད་སྒྲུབ་ཀྱི་ཕྲིན་ལས་རྒྱ་ཆེར་སྤེལ་ཞིང་འདིའི་ས་གླང་ལོར་འབྲོག་རི་བོ་དགའ་ལྡན་གྱི་ཆོས་སྡེ་བཏབ་ནས་གདན་སའི་མིང་ཆོས་བརྒྱུད་ལ་ཐོགས་ཏེ་དགེ་ལུགས་སུ་གྲགས་པའི་རིང་ལུགས་དེ་བྱུང༌།

༈ རབ་བྱུང་བརྒྱད་པ་ཤར་བ་ན། རྒྱ་མཚོ་རྣམ་གསུམ་དུ་གྲགས་པས་སྐར་རྩིས་ཀྱི་བསྟན་བཅོས་པད་དཀར་ཞལ་ལུང་བརྩམས། པཎ་ཆེན་དགེ་འདུན་གྲུབ་པ་ལྕགས་ལུག་ང་བདུན། འགོས་ལོ་གཞོན་ནུ་དཔལ་ཆུ་སྤྲེལ་ང་དྲུག གཏེར་ཆེན་རཏྣ་གླིང་པ་ཆུ་ལུག་ཞེ་ལྔ། ཀརྨ་པ་མཐོང་བ་དོན་ལྡན་མེ་སྤྲེལ་སོ་གཉིས། པཎ་ཆེན་ཤཱཀྱ་མཆོག་ལྡན་ས་སྤྲེལ་ཉི་ཤུ་ཐམ་པ། ཆོས་རྗེ་གོ་རམས་པ་ས་བྱ་བཅུ་དགུ། ཞ་ལུ་ལོ་ཆེན་ཆོས་སྐྱོང་བཟང་པོ་ལྕགས་བྱ་དགུང་ལོ་བདུན་པའོ།།

༈ རབ་བྱུང་དགུ་པ་ཤར་བ་ན། ཀརྨ་པ་བརྒྱད་པ་མི་བསྐྱོད་རྡོ་རྗེ་དང༌། རྗེ་བཙུན་ཀུན་དགའ་གྲོལ་མཆོག་སྐུ་བལྟམས། གཏེར་ཆེན་པདྨ་གླིང་པ་ལྕགས་རྟ་ང་བརྒྱད། གཙང་སྨྱོན་སངས་རྒྱས་མཚན་ཅན་ཆུ་སྤྲེལ་ང་དྲུག དཔའ་བོ་གཙུག་ལག་ཕྲེང་བ་ཤིང་ཁྱི་ང་བཞི། འབྲུག་སྨྱོན་ཀུན་དགའ་ལེགས་པ་ཤིང་ཕག་ང་གསུམ། དབུས་སྨྱོན་ཀུན་དགའ་བཟང་པོ་ས་སྟག་ལྔ་བཅུ་ཐམ་པ། པཎ་ཆེན་དགེ་འདུན་རྒྱ་མཚོ་མེ་སྤྲེལ་སོ་གཉིས་པའོ། །འདིའི་ཤིང་གླང་ནས་སྡེ་སྲིད་གཙང་པས་བོད་ཁམས་ལ་དབང་བསྒྱུར།

༈ རབ་བྱུང་བཅུ་པ་ཤར་བ་ན། སྒམ་པོ་པ་བཀྲ་ཤིས་རྣམ་རྒྱལ་ཆུ་སྤྲེལ་ང་དྲུག ཟུར་མཁར་འཚོ་བྱེད་བློ་གྲོས་རྒྱ་མཚོ་ས་འབྲུག་དྲུག་ཅུ་ཐམ་པ། གཏེར་ཆེན་ཤེས་རབ་འོད་ཟེར་མེ་གླང་ང་གཅིག འབྲུག་པ་ཀུན་མཁྱེན་པདྨ་དཀར་པོ་མེ་ཕག་ཞེ་གཅིག སོག་ཟློག་པ་བློ་གྲོས་རྒྱལ་མཚན་ཆུ་བྱི་བཅུ་དྲུག ཀརྨ་པ་དབང་ཕྱུག་རྡོ་རྗེ་ཤིང་སྟག་བཅུ་བཞིའོ།།

༈ རབ་བྱུང་བཅུ་གཅིག་པ་ཤར་བ་ན། རྗེ་བཙུན་ཏཱ་ར་ནཱ་ཐ་ཤིང་ཕག་ང་གསུམ། རིག་འཛིན་འཇའ་ཚོན་སྙིང་པོ་ཤིང་བྱ་ཞེ་གསུམ། ལྷོ་འབྲུག་ཞབས་དྲུང་ངག་དབང་རྣམ་རྒྱལ་ཤིང་རྟ་སོ་བཞི། ལྷ་བཙུན་ནམ་མཁའ་འཇིགས་མེད་མེ་བྱ་སོ་གཅིག གསུང་སྤྲུལ་ཚུལ་ཁྲིམས་རྡོ་རྗེ་ས་ཁྱི་སུམ་ཅུ་ཐམ་པ། སྒམ་པོ་པ་ནོར་བུ་བརྒྱན་པ་ས་ཕག་ཉེར་དགུ། ཀརྨ་པ་ཆོས་དབྱིངས་རྡོ་རྗེ་ཤིང་སྦྲུལ་ཉེར་གསུམ། གསང་བདག་ཕྲིན་ལས་ལྷུན་གྲུབ་ལྕགས་ཕག་བཅུ་བདུན། གཏེར་ཆེན་བདུད་འདུལ་རྡོ་རྗེ་ཤིང་ཡོས་བཅུ་གསུམ། རྒྱལ་མཆོག་ལྔ་པ་བློ་བཟང་རྒྱ་མཚོ་མེ་སྦྲུལ་བཅུ་གཅིག་གོ །འདིའི་ལྕགས་སྦྲུལ་ལོར་སོག་པོའི་དཔུང་གིས་ཀར་གཙང་གི་ཆོས་སྲིད་ལ་ཉམས་ཉེས་ཆེན་པོ་བྱུང་ཞིང༌། ཆུ་རྟ་ནས་དགའ་ལྡན་ཕོ་བྲང་པས་བོད་ཁམས་ཡོངས་རྫོགས་ལ་དབང་བསྒྱུར།

༈ རབ་བྱུང་བཅུ་གཉིས་པ་ཤར་བ་ན། བྱང་བདག་པདྨ་ཕྲིན་ལས་དང༌། པད་གླིང་ཐུགས་སྲས་བསྟན་འཛིན་འགྱུར་མེད་རྡོ་རྗེ་ལྕགས་སྦྲུལ་ཞེ་བདུན། སྨིན་གླིང་གཏེར་ཆེན་འགྱུར་མེད་རྡོ་རྗེ་མེ་ཁྱི་ཞེ་གཉིས། ལོ་ཆེན་དྷརྨ་ཤྲཱི་ཤིང་རྟ་སོ་བཞི། ཀརྨ་པ་བཅུ་གཅིག་པ་ཡེ་ཤེས་རྡོ་རྗེ་མེ་འབྲུག་བཅུ་གཉིས། ཁམས་སྤྲུལ་གསུམ་པ་ངག་དབང་ཀུན་དགའ་བསྟན་འཛིན་ལྕགས་སྤྲེལ་བརྒྱད་པའོ། །འདིའི་མེ་བྱ་ལོར་ཇུན་གར་པའི་དམག་དཔུང་གིས་རྙིང་མའི་བསྟན་དགོན་ལ་གནོད་འཚེ་ཆེན་པོ་བྱུང༌།

༈ རབ་བྱུང་བཅུ་གསུམ་པ་ཤར་བ་ན། རིག་འཛིན་ཚེ་དབང་ནོར་བུ་ས་སྟག་ལྔ་བཅུ་ཐམ་པ། སི་ཏུ་ཆོས་ཀྱི་འབྱུང་གནས་ལྕགས་འབྲུག་ཞེ་བརྒྱད། རྒྱལ་མཆོག་བདུན་པ་བསྐལ་བཟང་རྒྱ་མཚོ་ས་བྱི་བཞི་བཅུ་ཐམ་པ། རིག་འཛིན་འཇིགས་མེད་གླིང་པ་ས་བྱ་བཅུ་དགུ། ཀརྨ་པ་བཅུ་གསུམ་པ་བདུད་འདུལ་རྡོ་རྗེ་ཆུ་གླང་བཅོ་ལྔ། རྫོགས་ཆེན་རྒྱལ་སྲས་གཞན་ཕན་མཐའ་ཡས་ལྕགས་སྤྲེལ་བརྒྱད་པ། རྡོ་གྲུབ་འཇིགས་མེད་ཕྲིན་ལས་འོད་ཟེར་ཤིང་གླང་གསུམ་པའོ།།

༈ རབ་བྱུང་བཅུ་བཞི་པ་ཤར་བ་ན། ཆོས་གླིང་གར་དབང་འཆི་མེད་རྡོ་རྗེ་ཆུ་ལུག་ཞེ་ལྔ། སྒམ་པོ་པ་ཨོ་རྒྱན་འགྲོ་འདུལ་གླིང་པ་དང༌། རིག་འཛིན་རྡོ་རྗེ་ཐོགས་མེད་གཉིས་ཀྱང་འདི་དང་དུས་མཉམ་ཞིང༌། སྦས་ཡུལ་པདྨ་བཀོད་ཀྱི་གནས་སྒོ་འབྱེད་པའི་སྤྲུལ་སྐུ་རིག་འཛིན་རྣམ་གསུམ་དུ་གྲགས། རྒྱལ་དབང་དགུ་པ་ལུང་རྟོགས་རྒྱ་མཚོ་ཤིང་གླང་གསུམ་པའོ། །འདིའི་ཤིང་ཡོས་ལོར་གོརྵའི་དཔུང་དམག་གིས་བོད་ལ་རྒོལ་འཚེ་བྱུང༌།

༈ རབ་བྱུང་བཅོ་ལྔ་པ་ཤར་བ་ན། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་ས་འབྲུག་དྲུག་ཅུ་ཐམ་པ། འཇམ་མགོན་བློ་གྲོས་མཐའ་ཡས་ཆུ་བྱ་ང་ལྔ། འཇམ་དབྱངས་མཁྱེན་བརྩེའི་དབང་པོ་ལྕགས་འབྲུག་ཞེ་བརྒྱད། མཆོག་གྱུར་བདེ་ཆེན་གླིང་པ་ས་གླང་སོ་དགུ། གཏེར་ཆེན་བདུད་འཇོམས་གླིང་པ་ཤིང་ལུག་སོ་གསུམ། མི་ཕམ་རྣམ་རྒྱལ་རྒྱ་མཚོ་མེ་རྟ་ཉེར་གཉིས། གྲུབ་དབང་ཤཱཀྱ་ཤྲཱི་ཆུ་གླང་བཅོ་ལྔ། གཏེར་སྟོན་ལས་རབ་གླིང་པ་མེ་འབྲུག་བཅུ་གཉིས་སོ། །འདིའི་ས་བྱི་ལོར་དབྱིན་ཇི་བོད་དུ་ཐོག་མར་སླེབས་ཤིང༌། ཤིང་འབྲུག་ལོར་དབྱིན་བོད་འཁྲུགས་ཟིང་དང༌། ལྕགས་ཁྱི་ལོར་རྒྱ་དམག་གི་དཔུང་རྒོལ་བྱུང༌། ཤིང་སྟག་ལོར་འཛམ་གླིང་དམག་ཆེན་དང་པོ་ལངས།

༈ རབ་བྱུང་བཅུ་དྲུག་པ་ཤར་བ་ན། ཀརྨ་པ་བཅོ་ལྔ་པ་མཁའ་ཁྱབ་རྡོ་རྗེ་ལྕགས་ལུག་ང་བདུན། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ་ཆུ་སྤྲེལ་ང་དྲུག རྒྱལ་མཆོག་བཅུ་གསུམ་པ་ཐུབ་བསྟན་རྒྱ་མཚོ་མེ་བྱི་ང་གཉིས། ཀཿཐོག་སི་ཏུ་ཆོས་ཀྱི་རྒྱ་མཚོ་ལྕགས་འབྲུག་ཞེ་བརྒྱད། པཎ་ཆེན་ཆོས་ཀྱི་ཉི་མ་ཆུ་ལུག་ཞེ་ལྔའོ།།

འདིའི་ས་ཡོས་ལོར་འཛམ་གླིང་དམག་ཆེན་གཉིས་པ་བྱུང་ཞིང༌། ལྕགས་སྟག་ལོར་བོད་དུ་རྒྱ་ནག་དམར་པོའི་གཡོ་འཁྲུགས་ཀྱི་འཚུབ་མ་ལྡང་འགོ་ཚུགས། སླད་འཛེས་བྱེད་ཆུ་ཡོས་ནས་ཟད་པ་མེ་སྟག་གི་བར་ལོ་གྲངས་ཉེར་བཞི་འདས་པའི་རབ་བྱུང་བཅུ་བདུན་པ་འཆར་བ་ན། ཀརྨ་པ་བཅུ་དྲུག་པ་རིག་པའི་རྡོ་རྗེ་ཤིང་བྱི་རེ་བཞི། སྨིན་གླིང་ཁྲི་གདུང་ཀུན་བཟང་དབང་རྒྱལ་ལྕགས་ལུག་ང་བདུན། བདག་ཅག་རྣམས་ཀྱི་གཙུག་གི་ནོར་བུ་རྒྱལ་མཆོག་ཕྱག་ན་པདྨོ་བཅུ་བཞི་པ་བསྟན་འཛིན་རྒྱ་མཚོ་ཤིང་ཕག་ང་གསུམ། ས་སྐྱ་སྒྲོལ་མ་ཕོ་བྲང་པའི་བདག་ཁྲི་ཀུན་དགའ་ཕྲིན་ལས་དབང་རྒྱལ་ཤིང་བྱ་ཞེ་གསུམ་པའི་ཐོག་ཏུ་ཕེབས་པར་འགྱུར་བ་སྟེ། སྐྱེས་བུ་ཆེན་པོ་དེ་རྣམས་ཀྱི་ཞབས་པད་བསྐལ་པ་རྒྱ་མཚོར་བརྟན་ཅིང་བསྟན་འགྲོའི་དོན་ཆེན་མཛད་ཕྲིན་རྟག་ཁྱབ་ལྷུན་གྱིས་འགྲུབ་པར་གསོལ་བ་འདེབས་སོ།།

སྔར་གྱི་ཆོས་འབྱུང་དང་བསྟན་རྩིས་འགའ་ཞིག་ཏུ་ཡིག་སྐྱོན་བྱུང་བའམ། དུས་རབས་དང་མ་བསྟུན་པའི་ཧང་ཟོམ་ཤོར་བའམ། གང་ལྟར་གཉའ་ཁྲི་བོད་རྗེར་བྱོན་ལོ་ནས་བསྟན་པ་ཕྱི་དར་གྱི་བར་ལ་ལོ་ཁམས་སོགས་མི་མཐུན་པ་ཅི་རིགས་སྣང་མོད། འདིར་ནི་སངས་རྒྱས་ཀྱི་འདས་ལོ་ནས་བགྲངས་ཤིང་བོད་ཀྱི་རྒྱལ་རབས་ཆོས་འབྱུང་ཁུངས་ལྡན་དག་དང་བསྒྲིགས་ཏེ་ཤིན་ཏུ་ངེས་པ་རྙེད་པའི་ལུགས་སུ་བཀོད་པར་བྱས་ཤིང༌། སྤྱིར་ཡང་བོད་དུ་སྔོན་ཆད་སྲིད་ཕྱོགས་སུ་འཕོ་འགྱུར་ཇི་སྙེད་ཅིག་བྱུང་མོད་ཀྱང༌། ཆོས་ཕྱོགས་སུ་སྟོན་པ་རང་ཉིད་ཀྱིས་བསྟན་པ་བྱང་ནས་བྱང་དུ་རྒྱས་པར་ལུང་བསྟན་པའི་བདེན་དོན་མངོན་དུ་གྱུར་ཏེ། གངས་ལྗོངས་གདུལ་བྱའི་བསོད་ནམས་ཀྱི་ཉེར་ལེན་དང༌། རྒྱལ་རྣམས་ཐུགས་རྗེའི་འཇུག་པ་དུས་ལས་མི་ཡོལ་བའི་མཐུས། སྔོན་བསྟན་པ་བཙུགས་པ་ནས་ད་ལྟའི་བར་བསྟན་འཛིན་གྱི་སྐྱེས་བུ་མཁས་བཙུན་གྲུབ་པའི་རྣམ་ཐར་བསམ་གྱིས་མི་ཁྱབ་པ་ལ་དབང་འབྱོར་བ་ཤ་སྟག་བརྒྱུད་མར་བྱོན་ནས་བསྟན་པ་རིན་པོ་ཆེ་བསྐྱངས་དང་སྐྱོང་བཞིན་པའི་ཕྱིར་བོད་ཀྱི་ཆོས་རྒྱུན་ལ་ཉམས་རྒུད་ཡེ་བྱུང་མ་མྱོང་བས་ན། འདས་ལོའི་རྣམ་གྲངས་སུ་སྨོས་པ་འདི་རྣམས་ལའང་ནོར་འཁྲུལ་ཡོང་བའི་དོན་མ་མཆིས་སོ།།

འབྱུང་འགྱུར་ད་ལྟའི་ཆུ་སྟག་ནས་བརྩིས་པའི་ལོ་བཞི་བརྒྱ་དྲུག་ཅུ་རེ་གསུམ་འདས་པ་ཤིང་ཕོ་སྤྲེའུའི་ལོ་འཆར་བ་ན། ཤམྦྷ་ལ་ནས་རིགས་ལྡན་དྲག་པོ་ལྕགས་འཁོར་ཅན་སྤྲུལ་པའི་དཔུང་ཚོགས་དང་བཅས་པ་ལྗོངས་འདིར་ལྷགས་ཏེ། ཀླ་ཀློའི་སྡེ་དཔུང་མ་ལུས་པ་ལྷག་མེད་དུ་བཅོམ་པར་མཛད་ནས་དུས་བཞི་ཕྱི་མའི་རྫོགས་ལྡན་འཆར་བར་འགྱུར་ལ། གསང་སྔགས་རྡོ་རྗེ་ཐེག་པའི་ཆོས་ཚུལ་སྤྱི་དང་བྱེ་བྲག་བཀའ་གསང་རྫོགས་པ་ཆེན་པོའི་བསྟན་པའི་གནས་ཚད་ཀྱང༌། སྤྱིར་ཚེ་ལོ་དཔག་མེད་ནས་ཚེ་ལོ་སྟོང་གི་བར་ནི་སྐུའི་བསྟན་པའི་དུས། དེ་ནས་བདུན་ཅུའི་བར་གསུང་གི་བསྟན་པ། དེ་ནས་བཅུ་པའི་བར་ཐུགས་ཀྱི་བསྟན་པའི་དུས་ཏེ་སྤྱིར་བཏང་ཡིན་ལ། བྱེ་བྲག་ཏུ་བསྟན་པ་དངོས་ཀྱི་ཚད་ནི། སྐུའི་བསྟན་པ་ལོ་ལྔ་བརྒྱ་ལྔ་སྟོང་ཕྲག་གསུམ། གསུང་དང་ཐུགས་ནི་ལྔ་བརྒྱ་སྟོང་ཕྲག་རེར་གསུངས། སྒྲོན་མེའི་བསྟན་པ་ཐ་མ་ད་ལྟའི་འདི་ཉིད་འཛིན་པ་པོའང་སྒྲ་ཐལ་འགྱུར་རྩ་བའི་རྒྱུད་ལས།

ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདིས་ནི་དམ་པའི་བསྟན་པ་འཛིན། །ཞེས་དགའ་རབ་རྡོ་རྗེ་ནས་བཟུང་རིམ་པར་ལུང་བསྟན་པའི་མཐའ་མར། དེ་ནས་མཁའ་འགྲོ་དཔལ་འཛིན་མས། བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་པའི་དུས་ལ་དར། །དེ་ནས་མི་གནས་རང་ས་འོ། །ཞེས་ཚེ་ལོ་བཅུ་པའི་འོག་ཏུ་འདིའི་གདུལ་བྱ་རྫོགས་ནས་བསྟན་པའི་བཙས་དང་བཅས་ཏེ་མཛེས་ལྡན་བཀོད་པའི་ཞིང་དང༌། ཡངས་པ་སྤྱོད་པའི་ཞིང་དང༌། གཙུག་ཕུད་དབྱངས་ལྡན་གྱི་ཞིང་རྣམས་སུ་རིམ་པར་འཕར་ཞིང༌། དེ་རྣམས་ཀྱི་བསྟན་པ་བདུན་ཚར་རེ་རྫོགས་ནས་སྤྲུལ་སྐུའི་ཞིང་གངས་ཆེན་མཚོའི་ཐུགས་དཔལ་བེའུའི་ཐད་ཀྱི་འཇིག་རྟེན་སྟོངས་ཏེ་རྡོ་རྗེ་འཆང་ཆེན་པོའི་མཛད་པ་སྐོར་གཅིག་རྫོགས་ལ། སླར་དེའི་འཇིག་རྟེན་འོག་མ་ལ་བསྐལ་པ་ས་ཡ་དྲུག་འབུམ་དུ་འཕེལ་འགྲིབ་མེད་པར་གནས་པ་སོགས་ནམ་མཁའ་སྐྱེ་འགག་མེད་པ་ལ་སྤྲིན་སྐྱེ་འགག་དང་བཅས་པ་མི་འགལ་བའི་ཚུལ་གྱིས་ནམ་མཁའ་ཇི་སྲིད་པ་དེ་སྲིད་དུ་ཕྲིན་ལས་རྒྱུན་མི་འཆད་པར་གསུངས་སོ། །སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་ཇི་ལྟར་བྱུང་བའི་ཚུལ་བརྗོད་པ་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས་ཞེས་བྱ་བ་ལས། ཐེག་པའི་བབ་ཚུལ་སོགས་དང་འབྲེལ་བར་དུས་ཚིགས་ཀྱི་ངེས་པ་ཅི་རིགས་ལ་ཅུང་ཟད་དཔྱད་ཅིང་བསྟན་པའི་གནས་ཚད་སྨོས་པའི་བདག་ཉིད་ཅན་གྱིས་རེ་ཞིག་བཤད་ཟིན་ཏོ།། །།

༈ དེ་ལྟར་ན་འདིར་ཇི་སྐད་བཤད་པའི་ཁུངས་ནི་རྙིང་མ་བཀའ་མའི་ལོ་རྒྱུས་ནང་ཚན་སྤྱི་དང་ཁྱད་པར། ཀུན་མཁྱེན་ཀློང་ཆེན་པའི་སྙིང་ཐིག་མ་བུའི་ལོ་རྒྱུས་སྟོང་ཐུན་ཆེན་མོ། ལོ་ཆེན་དྷརྨ་ཤྲཱིའི་འདུས་པ་མདོའི་དབང་གི་སྤྱི་དོན་རྒྱུད་ལུང་མན་ངག་གི་གནད་གསལ་བྱེད་སྒྲོན་མེ། གཡག་སྡེ་འདུལ་འཛིན་མཁྱེན་རབ་རྒྱ་མཚོའི་ཆོས་འབྱུང་དྲིས་ལན་ནོར་བུའི་བང་མཛོད། མཁས་མཆོག་ངག་དབང་བློ་གྲོས་ཀྱི་སྔ་འགྱུར་ཆོས་ཀྱི་འབྱུང་ཁུངས་མཁས་པ་དགའ་བྱེད། འགོས་ལོ་གཞོན་ནུ་དཔལ་གྱི་དེབ་ཐེར་སྔོན་པོ་དང༌། དཔའ་བོ་གཙུག་ལག་ཕྲེང་བའི་ཆོས་འབྱུང་མཁས་པའི་དགའ་སྟོན་གྱི་རྙིང་མའི་སྐབས། འབྲུག་པ་ཀུན་མཁྱེན་པདྨ་དཀར་པོའི་ཆོས་འབྱུང་བསྟན་པ་རྒྱས་པའི་ཉིན་བྱེད། རྗེ་བཙུན་ཏཱ་ར་ནཱ་ཐའི་ཨོ་རྒྱན་རྣམ་ཐར་ཡིད་ཆེས་གསུམ་ལྡན། ཀུན་མཁྱེན་འཇིགས་མེད་གླིང་པའི་རྙིང་རྒྱུད་དཀར་ཆག་འཛམ་གླིང་ཐ་གྲུར་ཁྱབ་པའི་རྒྱན། ཀཿཐོག་པཎྜི་ཏ་འགྱུར་མེད་ཚེ་དབང་མཆོག་གྲུབ་ཀྱི་རྒྱུད་འབུམ་དཀར་ཆག་ལྷའི་རྔ་བོ་ཆེ་ལྟ་བུའི་གཏམ། འཇམ་མགོན་བློ་གྲོས་མཐའ་ཡས་ཀྱི་གཏེར་སྟོན་བརྒྱ་རྩའི་རྣམ་ཐར་རིན་ཆེན་བཻ་ཌཱུརྱའི་ཕྲེང་མཛེས། མི་ཕམ་རྣམ་པར་རྒྱལ་བའི་ལེགས་བཤད་རྒྱ་མཚོའི་ཆ་ཤས་སོགས་ཚད་མར་གྱུར་པའི་ཡིག་ཆ་རྣམས་ལས་ལེགས་པར་བཏུས་ཤིང༌། ཀུན་གཟིགས་ལྔ་པའི་གསན་ཡིག་ཆེན་མོ་དང༌། སྨིན་གླིང་གཏེར་ཆེན་རིན་པོ་ཆེའི་གསན་ཡིག རིག་འཛིན་ཚེ་དབང་ནོར་བུའི་བསྟན་རྩིས་ཀྱི་རྣམ་གཞག་སོགས་ལའང་ཞིབ་པར་གཏུགས། ཚོད་ཡོད་ཀྱི་འོལ་སྤྱི་དང་རང་འདོད་ཀྱི་སྟོང་ལྡིར་སོགས་སྒྲོ་སྐུར་གྱི་དྲི་མས་ཆ་ཙམ་མ་བསླད་ཅིང༌། རང་ཉིད་མཁས་འདོད་དང་གྲགས་འདོད་སོགས་ཀུན་སློང་མ་དག་པའི་བློ་ངན་རིང་དུ་སྤངས་ནས། དེང་སང་ཡུལ་དུས་ཀྱི་དབང་ལས་སྔ་མའི་ཆོས་འབྱུང་མཐའ་དག་གི་དཔེ་རྒྱུན་ལག་ཏུ་འབྱོར་བར་དཀའ་ཞིང་ད་ལྟའི་བར་གྱི་ལོ་རྒྱུས་རྣམས་ཀྱང་ཕྱོགས་གཅིག་ཏུ་མི་གསལ་བར་བརྟེན། བྱ་ལམ་རྗེས་མེད་དུ་མི་འགྲོ་བར་ཆོས་ཀྱི་རྗེས་སུ་འབྲངས་པའི་སྐྱེ་བོ་དོན་གཉེར་ཅན་རྣམས་ལ་སྨན་པའི་རེ་བ་དང༌། དུས་ཀྱི་ཐ་མའི་ཚེ་ན་གསང་ཆེན་བསྟན་པའི་བྱུང་ཚུལ་ལོ་རྒྱུས་ཙམ་ཡང་ཡི་གེའི་ལམ་དུ་སའི་སྟེང་ན་ཡུན་དུ་གནས་པར་གྱུར་ན་ཅི་མ་རུང་སྙམ་པའི་ལྷག་བསམ་འབའ་ཞིག་གིས་ཀུན་ནས་བསླངས་ཏེ། ཁོ་བོ་རང་ཉིད་བྱང་ཕྱོགས་ཁ་བ་ཅན་ནས་ལྷོ་ཕྱོགས་འཕགས་ཡུལ་གྱི་ལྗོངས་སུ་བཙན་བྱོལ་དུ་བརྟོལ་ཏེ་གནས་པའི་སྐབས་བརྩོན་པ་ཆེན་པོས་ཡིད་གཞུངས་པའི་སྒོ་ནས་སྦྱར་བ་འདི་ཉིད་དག་གཙང་འདུས་གསལ་ལྟ་བུར་རློམ་པ་ཡིན་པས་ཀུན་གྱིས་ངེས་པར་ཡིད་རྟོན་དུ་རུང་བར་ཡོད་དོ།། །།

སླར་སྨྲས་པ།

གང་ཞིག་རྒྱལ་བའི་ཆོས་མཛོད་ཀུན་གྱི་རྩེ་མོར་ཡོངས་བསྔགས་སྲིད་འདིར་འབྱུང་དཀའ་ཞིང་ཁམས་རྒྱ་མཚོར་གྲགས་སྙན་པ། །ངེས་གསང་ཐེག་མཆོག་བསྟན་པ་རིན་ཆེན་ཇི་བཞིན་སྣང་མཛད་ངོ་མཚར་ཕུལ་བྱུང་ཨུ་དུམ་ཝ་རར་ཅོ་འདྲི་བའི། །བགྲང་ཡས་ཡོན་ཏན་ཡལ་འདབ་ལྷུན་སྟུག་སྨིན་གྲོལ་བྱེ་བའི་འཁྲི་ཤིང་གིས་འཁྱུད་གྲུབ་གཉིས་འབྲས་བཟང་གཡུར་ཟ་བ། །རྨད་བྱུང་དམ་པའི་དཔག་བསམ་དགའ་ཚལ་བསིལ་ལྗོངས་གདུལ་བྱའི་ཉེར་འཚོར་ཐོབ་གང་ཨེ་མ་བསོད་ནམས་སྐལ་བ་སྦོམ། །གསང་ཆེན་རིག་འཛིན་སྡེ་སྣོད་མཐོ་རིས་ཀླུང༌། །བརྒྱུད་གསུམ་མེས་པོའི་རལ་པར་བསྒྱིངས་པ་ལས། །མཁན་སློབ་ཆོས་རྒྱལ་ཐུགས་བསྐྱེད་རྩོལ་བ་བརྒྱས། །གངས་ཅན་སྐལ་བཟང་བདུད་རྩིའི་རྒྱུད་དུ་དྲངས། །ངོ་མཚར་བཤད་སྒྲུབ་ལམ་ཆེན་གྱིས་ཕྱེ་བའི། །དོན་བརྒྱུད་དངོས་གྲུབ་འོད་ཟེར་སྟོང་འབར་བ། །ཆོས་མཆོག་ཉིན་བྱེད་འདྲེན་པའི་ཤིང་རྟ་རྣམས། །བཀའ་དྲིན་མཁའ་མཐའི་མུ་ཁྱུད་སུ་ཡིས་བརྒལ། །མངོན་སུམ་དགོངས་བརྒྱུད་ཕབས་རྩིས་ཉེར་བསླངས་པའི། །མན་ངག་ཛ་གད་ཉིང་ཁུའི་རོ་བཅུད་ལ། །སྤྱོད་པའི་སྐལ་ཆེན་དེ་ཀུན་ཉམས་རྟོགས་ཀྱིས། །རབ་མྱོས་འཕོ་ཆེན་གར་གྱིས་རྩེན་ཞེས་གྲགས། །ཕ་ཕོར་གཙང་ཞེན་བླུན་པོའི་ངག་ཚིག་གིས། །གྲགས་སྐམ་བརྗོད་པ་ཙམ་མིན་སྔ་འགྱུར་བསྟན། །མདོ་སྔགས་ལམ་བཟང་ཚང་ལ་མ་འཁྲུལ་གནད། །མཁས་གྲུབ་བྱེ་བའི་བཤུལ་ལམ་སྣང་དེས་སྟོན། །གང་ཚུལ་འོད་ཀྱི་དོ་ཤལ་གྱིས་རེག་པས། །རྨོངས་མུན་ཉེས་པའི་ཀུ་མུཏ་ཉམས་བྱས་ནས། །དད་གསུམ་ཆུ་གཏེར་ལས་སྐྱེས་ངེས་ཤེས་ཀྱི། །པད་དཀར་འཛུམ་རྒྱ་དེ་ཡི་ཕྱོགས་སུ་གྲོལ། །གཞལ་དཀའི་ཟོང་གིས་རིན་དུ་ཁུག་མིན་པ། །ཆོས་འབྱུང་གཏམ་གྱི་བདུད་རྩིའི་ཆ་ཤས་ཙམ། །ཐོས་པའི་རྣ་བ་དེ་ཡི་སྐལ་བཟང་ནི། །ལེགས་བྱས་ཡོན་ཏན་འབུམ་གྱིས་འཁྱུད་ལ་ལྟོས། །མི་བཟད་སྙིགས་དུས་རྒུད་པའི་འཐོར་རླུང་གིས། །རྒྱལ་བསྟན་གྲུ་གཟིངས་འཇིག་ལ་མངོན་ཕྱོགས་འདིར། །བློ་ཆུང་དེད་དཔོན་བདག་ཀྱང་ལྷག་བསམ་གྱིས། །ཐབས་མཁས་སྒྱུ་རྩལ་འགྱེད་རློམ་འདི་བགྱིས་སོ། །བསིལ་ལྗོངས་ཐུབ་བསྟན་ལྷ་ལམ་སྔ་འགྱུར་གྱི། །མཁས་གྲུབ་རྒྱུ་སྐར་བྱེ་བས་མཛེས་བྱས་མོད། །ཆེར་སྙིགས་དུས་ཀྱི་ནམ་མཐའ་བཏེགས་པ་ན། །སྨྲ་འདོད་སྐར་རྗེན་ལུས་པ་ཁོ་བོ་ཙམ། །ཚིག་སྦྱོར་བྱད་ཀྱི་མཚར་སྡུག་མི་ཆེ་ཡང༌། །དོན་བཟང་ལང་ཚོ་དར་བའི་འཇོ་སྒེག་མོས། །ཟོལ་སྤངས་སྨྲ་བའི་འཛུམ་དཀར་དམུལ་བ་ན། །བློ་གསལ་མཁས་གཞོན་ཡིད་དབང་འཕྲོག་ཀྱང་སྲིད། །ཚུལ་འདིས་མོས་ལྡན་ཀུན་ལ་བལྟ་བའི་མིག།མང་ཐོས་དམ་པ་རྣམས་ཀྱི་མགྲིན་པའི་རྒྱན། །དོན་བརྒྱུད་འཛིན་ལ་སྙིང་གི་བདུད་རྩི་སྟེ། །ཡིད་བཞིན་ནོར་བུའི་བྱ་བ་བྱེད་པ་སྙམ། །འབྱུང་ལུས་བགྲང་བྱའི་ཁུར་མང་བརྩེགས་མོད་ཀྱང༌། །སེམས་ཀྱི་གཞོན་པ་བློ་ཤེད་མ་བྲི་བས། །ད་དུང་ཆོས་མཆོག་སྣང་བའི་སྐྱེད་ཚལ་ན། །འཆད་རྩོམ་སྒྱུ་རྩལ་ཅི་ཡང་རྩེ་སྙིང་འདོད། །སྔོན་བྱོན་ཚོགས་རྣམས་འབད་བརྒྱས་ལེགས་བཙལ་བའི། །ངེས་གསང་ཐེག་མཆོག་རིང་ལུགས་ཡིད་བཞིན་ནོར། །བཤད་སྒྲུབ་རྒྱལ་མཚན་རྩེ་མོར་མཆོད་པའི་ཁུར། །འུ་ཅག་རྗེས་འཇུག་ལ་བབ་མཁྱེན་འཚལ་ལོ།།

དེ་ལྟར་ཅུང་ཞིག་འབད་པའི་ལེགས་བྱས་མ་དྲོས་འཇིངས་ལས་བསོད་ནམས་མཐའ་ཡས་ཆུ་འཛིན་ཕུང་པོ་ཆོས་དབྱིངས་ལྷ་ལམ་ཁྱོན་ཀུན་ཁེངས་པར་དཀྲིགས་ལས་འདིར། །ངོ་མཚར་ཕན་བདེ་སྤྲིན་གྱི་མེ་ཏོག་ཅི་དགར་འཇོ་བས་འཇིག་རྟེན་རྒུད་པའི་ཐ་བ་བརླན་བྱས་ཕུན་ཚོགས་དཔལ་འབྱོར་མཐོ་རིས་སྨན་ལྗོངས་སྐྱེད་བསྲིངས་ཤིང༌། །ཡང་དག་ལྟ་བའི་པད་རྫིང་ཉེར་བརྟེན་རྣམ་དཀར་གེ་སར་རྡུལ་མང་རབ་འཛག་དམ་པའི་ཆུ་སྐྱེས་ནགས་ཀླུང་དར་བབ་ཀུན་དགའི་དྲི་བསུང་ཕྱོགས་བརྒྱར་འཐུལ། །མཆོག་གསུམ་ཉིན་བྱེད་སྣང་བས་ཡོངས་བཟུང་སྲིད་ཞིའི་དགེ་མཚན་གསེར་གྱི་སྙེ་མ་གཡུར་དུ་ཟ་བ་རྫོགས་ལྡན་དགའ་སྟོན་སླར་ཡང་འཆར་བས་མངོན་འཚོ་ཤོག །འདྲེན་པ་ཐུབ་མཆོག་མི་ཡི་སེང་གེའི་རིང་ལུགས་དྲི་མེད་སྨྲ་བའི་ཤིང་རྟ་ལྷ་རྣམས་དབང་པོས་ཚད་མ་གསུམ་ལྡན་ཞོ་འཐུང་རུས་པའི་མཚོན་ཆེན་གྱིས། །ལོག་རྟོག་ལྟ་ངན་ཀླ་ཀློའི་ཀླད་པ་གཅིག་ཅར་འགེམས་བྱས་མེ་ཏོག་མདའ་ཅན་དཔུང་དང་བཅས་པའི་གཡུལ་ལས་རབ་རྒྱལ་མཐའ་བྲལ་ལྟ་བའི་དབྱུ་གུ་ཡིས། །ཟབ་དོན་ཆོས་ཀྱི་རྔ་བོ་ཆེ་ཉིད་ཀུན་ཏུ་བརྡུངས་ལས་མི་ཤེས་སྟུག་པོའི་གཉིད་ཀྱི་མུན་པ་ཆེན་པོར་འཐོམས་པའི་འགྲོ་བ་རྣམ་མང་ཇི་སྙེད་པ། །གསུང་རབ་འབྲུག་སྒྲ་ལྷ་ཡི་དབྱངས་སྙན་ཐོས་ཙམ་ཉིད་ནས་ཡོངས་སུ་སད་དེ་མི་ཟད་གནས་བཏང་ཆོས་རབ་རྣམ་འབྱེད་བློ་གྲོས་ཆེན་པོའི་དགའ་ཐོབ་ཤོག །གསང་ཆེན་ཆོས་ཚུལ་རྒྱ་མཚོའི་བྱུང་བ་ཇི་བཞིན་བརྗོད་པ་རྡོ་རྗེ་དབྱངས་ཀྱི་མགྲིན་པའི་རྒྱུད་མངས་ཡི་གེའི་གཟུགས་སུ་ཉེ་བར་འཕོས་པ་འདི་ཀོ་ཡང༌། །མཐའ་ཡས་སྐྱེ་རྒུའི་གདུང་སེལ་ཉིད་དུ་ནམ་ཞིག་ཞིང་འདིར་རྣམ་འདྲེན་ལྔ་པའི་ཆོས་རྔ་སྒྲོག་པ་དེ་སྲིད་མི་ནུབ་རྟག་ཁྱབ་ཕྲིན་ལས་དཔལ་དུ་འབར། །རྩོལ་མེད་ཐེག་རྒྱལ་ལྷུན་གྲུབ་སྣང་བཞིའི་ལྟེ་བ་མངོན་མཐོ་སྤྲོས་བྲལ་ཀ་དག་རྩིབས་སྟོང་རྣམ་བཀྲ་ཕར་ཕྱིན་སྤྱོད་པའི་མུ་ཁྱུད་ཀུན་ནས་བཟང་འཁྲིལ་ལྡན། །རྡོ་རྗེ་སྙིང་པོ་གསེར་གྱི་འཁོར་ལོ་ཐུབ་བསྟན་གླིང་བཞིའི་མཁའ་ལ་ཡོངས་འཕགས་ས་གསུམ་བཀྲ་ཤིས་བདེ་ལེགས་ལྷུན་པོ་ནམ་ཡང་གཡོ་བ་མེད་གྱུར་ཅིག།

དེ་ལྟར་གངས་ལྗོངས་རྒྱལ་བསྟན་ཡོངས་རྫོགས་ཀྱི་ཕྱི་མོ་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་ཇི་ལྟར་བྱུང་བའི་ཚུལ་དག་ཅིང་གསལ་བར་བརྗོད་པ་ལྷ་དབང་གཡུལ་ལས་རྒྱལ་བའ་ིརྔ་བོ་ཆེའི་སྒྲ་དབྱངས་ཞེས་བྱ་བ་འདི་ནི། འོད་གསལ་གནམ་གྱི་ལྷ་བྱ་ཁྲི་བཙན་པོས་སྤུ་བོ་རོང་གི་ཞིང་ཁམས་བདག་གིར་བཟུང་བ་ལས་ཡུལ་གྱི་རྗེ་བོ་ཀཿགནམ་ཆོས་རྒྱལ་དུ་གྲགས་པའི་རིགས་རྒྱུད་དྲི་མ་མེད་པའི་མྱུ་གུ་ལས་སྐྱེས་ཏེ་ལུས་ཀྱི་ལྟེ་བ་སྦས་ཡུལ་པདྨ་བཀོད་པའི་ལྗོངས་སུ་བཅད་པ། ཨོ་ཌཱི་ཡ་ནའི་སློབ་དཔོན་ཆེན་པོའི་ཐུགས་རྗེའི་ཉི་ཟེར་སྙིང་ལ་འཕོས་པས་བློ་གྲོས་ཀྱི་པདྨོ་ཅུང་ཟད་ཁ་བྱེ་བར་རློམ་པའི་ཤཱཀྱའི་དགེ་བསྙེན་རིག་སྔགས་འཆང་བ་འཇིགས་བྲལ་ཡེ་ཤེས་རྡོ་རྗེ་དགེ་ལེགས་རྣམ་པར་རྒྱལ་བའི་སྡེའམ། བརྡ་སྤྲོད་ཀྱི་བཏགས་མིང་མཚོ་བྱུང་དགྱེས་པའི་ལང་ཚོ་གཙུག་ལག་སྨྲ་བའི་ཉི་མ་ཞེས་སུ་འབོད་ཅིང༌། སྲང་མདོའི་ཁྲོད་ན་ཡོངས་གྲགས་སུ་བདུད་འཇོམས་སྤྲུལ་སྐུར་གླེང་བའི་རྒྱལ་ཁམས་པས། རང་ལོ་བཅུ་ཕྲག་ལྔ་དང་ཉག་མ་བཀྲ་ཤིས་པའི་གྲངས་ཀྱིས་མདུན་ནས་བསུས་པ་རབ་བྱུང་བཅུ་དྲུག་པའི་དགེ་བྱེད་ཆུ་ཕོ་སྟག་གི་ལོ། གཉིས་སུ་མེད་པ་རྒྱུད་ཀྱི་རྒྱལ་པོའི་གསང་ཚིག་བདུད་རྩི་ཐོག་མར་ལེན་པའི་སྐལ་བཟང་འཛིན་པ་ནག་པ་ཅན་གྱི་ཉ་ལ་དབུ་བརྩམ་སྟེ། རྒྱུ་དང་མི་རྒྱུའི་འགྲོ་རྣམས་ཕུན་ཚོགས་དབྱར་གྱི་དགའ་སྟོན་ལ་སྤྱོད་ཅིང་འབྲས་བུ་བཅུད་དུ་སྨིན་པའི་དུས་ཀྱིས་ཀུན་ནས་ཉེ་བར་བརྟེན་པ་དབང་ཆེན་སྤྲེལ་ཟླའི་ཡར་ངོའི་ཚེས་བཅུ་ལ། རྒྱ་གར་ཟ་ཧོར་རཏྣ་པཱུ་རིའི་གྲོང་ཁྱེར་བདེ་བ་ཆེན་པོ་པདྨ་སམྦྷ་ཝས་ལས་ཅན་རྒྱལ་པོ་གཙུག་ལག་འཛིན་ཚོམ་བུར་བཅས་པ་དཔལ་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་དུ་སྨིན་པར་མཛད་དེ་ཕྱག་རྒྱ་ཆེན་པོ་ཡེ་ཤེས་སྒྱུ་མའི་ཟློས་གར་མཁའ་ཁྱབ་ཏུ་རྩེན་པའི་གནས་མཆོག་ག་ལ་བ་ཉིད་དུ་ཡོངས་སུ་གྲུབ་པར་བགྱིས་པ་ལས། ཐོག་མའི་གླེགས་བམ་དུ་འབེབས་པ་པོ་ན་ིལྷོ་མོན་ཤིང་ལོའི་ཚལ་གྱི་སྔགས་སྟོན་རིག་བྱེད་སྨྲ་བ་ཆོས་གྲགས་རྒྱ་མཚོས་གུས་ཤིང་བརྩོན་པའི་རིམ་གྲོ་དང་བཅས་པར་ལེགས་པར་བསྒྲུབས་པའོ། །འདིས་ཀྱང་རྒྱལ་བའི་བསྟན་པ་རིན་པོ་ཆེ་སྤྱི་དང་བྱེ་བྲག་གསང་ཆེན་སྙིང་པོའི་རིང་ལུགས་དྲི་མ་མེད་པ་འདི་ཉིད་ཕྱོགས་དང་དུས་དང་གནས་སྐབས་ཀུན་ཏུ་དར་ཞིང་རྒྱས་ལ་མི་ནུབ་ཡུན་དུ་གནས་པ་ལས། སྐྱེ་རྒུ་མཐའ་དག་བཀྲ་ཤིས་བདེ་ལེགས་ཕུན་སུམ་ཚོགས་པའི་དགའ་སྟོན་བཟང་པོས་དུས་རྟག་ཏུ་འཚོ་བའི་གཞིར་གྱུར་ཅིག། །།

༈ མཁན་སློབ་ཆོས་གསུ༵མ་རིང་ལུགས་ཆེ།།

འཛམ་གླིང་ས་གསུ༵མ་ཁྱབ་པར་འཕེལ།།

འགྲོ་རྒྱུད་མཆོག་གསུ༵མ་སྣང་བ་དང༌།།

མི་འབྲལ་དུས་གསུ༵མ་དགེ་ལེགས་ཤོག །ཛ་ཡནྟུ།། །།

མ་དཔེའི་ནང་ལོ་ཚིགས་མི་མཐུན་པ་འགའ་འདུག་པ་ལས་འདིར་བཀའ་འབུམ་ཕྱག་བྲིས་མ་གཞིར་བཅོལ་ནས་བཀོད་པ་ཡིན་ལགས།