བོད་སྔ་རབས་པའི་གསང་ཆེན་རྙིང་མའི་ཆོས་འབྱུང་ལེགས་བཤད་གསར་པའི་དགའ་སྟོན་གྱི་དབུ་འདྲེན་གཞུང་དོན་ལེའུ་ངོས་འཛིན།
༄༅། །བོད་སྔ་རབས་པའི་གསང་ཆེན་རྙིང་མའི་ཆོས་འབྱུང་ལེགས་བཤད་གསར་པའི་དགའ་སྟོན་གྱི་དབུ་འདྲེན་གཞུང་དོན་ལེའུ་ངོས་འཛིན་བཞུགས།
ༀ་སྭསྟི། བོད་སྔ་རབས་པའི་རྙིང་མའི་ཆོས་འབྱུང་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས་འདི་ལ་ལེའུ་བརྒྱད་དུ་ཡོད་པ་ལས། ༈ ལེའུ་དང་པོས། ཀླད་ཀྱི་དོན་བསྟན་བཅོས་ཀྱི་མཚན་སྨོས་ཤིང༌། ཡུལ་དམ་པ་རྣམས་ལ་མཆོད་པར་བརྗོད་དེ་བརྩམ་པར་དམ་བཅས་པས་ཐོག་དྲངས། གཞུང་གི་དོན་དངོས་ཀྱི་ཐོག་མར་འཇིག་རྟེན་དུ་རྒྱལ་བའི་བསྟན་པ་རིན་པོ་ཆེ་བྱོན་ཚུལ་སྤྱིར་བཤད་པ་ལ། སྟོན་པ་སངས་རྒྱས་བྱོན་ཚུལ། བསྡུ་བ་པོས་བཀའ་བསྡུ་ཚུལ། བསྟན་པའི་གཏད་རབས། བསྟན་པ་བསྐྱངས་ཤིང་ཐེག་ཆེན་རྒྱས་ཚུལ་བཅས་བསྟན། ༈ ལེའུ་གཉིས་པས། གསང་སྔགས་རྡོ་རྗེ་ཐེག་པའི་བསྟན་པ་བྱོན་ཚུལ་བྱེ་བྲག་ཏུ་བཤད་པ་ལ། གསང་སྔགས་ཀྱི་ཆོས་འཁོར་གང་དུ་གང་གིས་བསྐོར་བ། བསྡུ་བ་པོ་རྣམས་ཀྱིས་ཇི་ལྟར་བསྡུས་པ། བསྟན་པ་དེ་ཉིད་འཇིག་རྟེན་མི་ཡུལ་དུ་བྱུང་ཚུལ་བཅས་བསྟན། ༈ ལེའུ་གསུམ་པས། བོད་ཡུལ་མུན་པའི་གླིང་དུ་རྒྱལ་བསྟན་སྣང་བའི་སྒྲོན་མེ་དེ་ཉིད་ཐོག་མར་བྱུང་ཚུལ་སྤྱིར་བཤད་པ་ལ། ཆོས་རྒྱལ་མེས་དབོན་རྣམ་གསུམ་གྱིས་བསྟན་པ་ཇི་ལྟར་བཙུགས་ཚུལ། བར་སྐབས་སུ་བསྟན་པའི་འཕེལ་འགྲིབ་བྱུང་ཚུལ། བསྟན་པ་ཕྱི་དར་གྱིས་གསོས་ཚུལ་བཅས་བསྟན། ༈ ལེའུ་བཞི་པས། གསང་སྔ་གས་ནང་རྒྱུད་སྡེ་གསུམ་གྱི་བསྟན་པའི་བབ་ཚུལ་བྱེ་བྲག་ཏུ་འཆད་པ་ལས། རྒྱུད་མ་ཧཱ་ཡོ་ག ལུང་ཨ་ནུ་ཡོ་ག མན་ངག་ཨ་ཏི་ཡོ་ག་སོ་སོའི་བབ་ཚུལ་དང༌། ཁྱད་པར་མན་ངག་སྙིང་ཐིག་ཆེན་པོའི་ལོ་རྒྱུས་དང་འབྲེལ་བར་བརྒྱུད་པའི་རྣམ་ཐར་རགས་རིམ་བཅས་བསྟན།
༈ ལེའུ་ལྔ་པས། རིང་བརྒྱུད་བཀའི་ཆུ་བོ་མ་ཉམས་པར་གནས་པ་མདོ་སྒྱུ་སེམས་གསུམ་གྱི་བབ་ཚུལ་ལ། བསྐྱེད་པ་མ་ཧཱ་ཡོ་གའི་སྤྱི་རྒྱུད་སྒྱུ་འཕྲུལ་དྲྭ་བ། སྒོས་རྒྱུད་སྒྲུབ་སྡེ་སོ་སོའི་རིམ་པ་དང༌། རྫོགས་པ་ཨ་ནུ་ཡོ་གའི་སྤྱི་མདོ་ དགོངས་པ 
་འདུས་པ་རྩ་བ་ཡན་ལག་དང་བཅས་པ། རྫོགས་ཆེན་ཨ་ཏི་ཡོ་ག་སེམས་ཀློང་མན་ངག་གི་སྡེ་ཡོངས་སུ་རྫོགས་པའི་བབ་ཚུལ་རིག་འཛིན་བརྒྱུད་པའི་ལོ་རྒྱུས་རགས་རིམ་དང་འབྲེལ་ད་ལྟའི་བར་དུ་བསྟན་པ་ཇི་ལྟར་བསྐྱངས་ཚུལ་བཅས་བསྟན། ༈ ལེའུ་དྲུག་པས། ཤིན་ཏུ་ཟབ་པ་ཉེ་བརྒྱུད་གཏེར་མའི་ལོ་རྒྱུས་ལ། གཏེར་གྱི་མཚན་ཉིད་དང་དབྱེ་བ། དགོས་ཆེད་ཁྱད་ཆོས། གཏེར་ནས་བྱོན་པའི་ཆོས་ནོར་དམ་རྫས་སོགས་ཀྱི་ངེས་བརྗོད་དང་འབྲེལ་གཏེར་འབྱིན་སྐྱེས་མཆོག་རགས་རིམ་གྱི་རྣམ་ཐར་བཅས་བསྟན། ༈ ལེའུ་བདུན་པས། སྔ་འགྱུར་རྙིང་མའི་ཕྱོགས་འདིར་སྔོན་གྱི་དུས་སུ་ལོག་པར་བསྟན་པའི་རིགས་འགའ་ཤས་བྱུང་བའི་སྐྱོན་སྤོང་དང་འབྲེལ་གོ་དོན་གསལ་འདེབས་བསླབ་བྱར་བསྙད་པ་མདོ་ཙམ་བསྟན། ༈ ལེའུ་བརྒྱད་པས། བསྟན་པའི་བབ་ཚུལ་དེ་རྣམས་ཀྱང་འདས་ལོའི་དུས་ཚིགས་དང་སྦྱར་ཏེ་རགས་རིམ་ཙམ་དཔྱད་ནས་གོ་བདེ་བར་སྨོས་ཤིང༌། སླད་ཀྱི་བསྟན་པའི་གནས་ཚད་བསྟན་པ་བཅས་ཀྱིས་གཞུང་གི་དོན་ཡོངས་སུ་ཚང་ནས། མཇུག་གི་དོན་ལ། འཆད་བྱའི་ཁུངས་གང་ལ་བརྟེན་ནས། དགོས་ཆེད་ཅིའི་ཕྱིར་བརྩམས་པ་དང༌། རྒྱུ་མཚན་བརྗོད་པའི་སྒོ་ནས་སྨོན་ཚིག་སྦྱར་བྱང་དང་བཅས་པས་ལེགས་པར་གྲུབ་བོ། །བོད་དུ་སྐྱེས་པའི་མི་རྒན་བདུད་འཇོམས་བདག །བོད་ཆོས་མིང་གཞི་གསང་སྔགས་སྔ་འགྱུར་བའི། །བོད་ཞེན་འཐུག་པོ་སངས་པར་མ་ནུས་ཏེ། །བོད་ཀྱི་ཆོས་འབྱུང་རྒྱ་གར་ཡུལ་དུ་བྲིས། །མང་ཐོས་ཤེས་བྱའི་མཐའ་རྒྱ་མ་ཆོད་ཀྱང༌། །ཟབ་དོན་རྒྱུད་ལུང་མན་ངག་ཕ་ཕོག་ཏུ། །རང་དབང་ཐོབ་པས་ཡིད་ཚིམས་བློ་བདེ་ངས། །གུ་ཡངས་མི་ཚད་བསྐྱལ་བའི་ལག་རྗེས་ཡིན། །གཟིགས་པར་དགོངས་རྣམས་ཅི་ནས་གཟིགས་མཛོད་དང༌། །ལོ་རྒྱུས་རྙིང་པས་ངེས་ཤེས་གསར་
པ་སྐྱེ། །གཟིགས་མ་དགོངས ་ན་ཨུ་ཚུགས་ཅི་སྟེ་ཞུ། །ཀུན་ལ་བྲིན་སྙམ་རེ་བའང་བདག་ལ་མེད། །འོན་ཀྱང་སྒྲུང་གཏམ་ཕལ་དང་མི་འདྲ་བར། །ཆོས་ཚུལ་བྱུང་བ་བརྗོད་པའི་ཡི་གེ་ནི། །ཁྲོ་མེད་སློབ་དཔོན་འདིར་བསྟེན་མོས་ལྡན་འགའི། །ཡིད་ལ་ཀུན་དགའི་དགའ་སྟོན་མྱོང་ཡང་སྲིད། །འདི་ཀོ་རང་གཞན་སྡིག་པའི་ས་བོན་དུ། །ནམ་ཡང་མི་འགྱུར་དག་པའི་སྣང་ཆེན་དང༌། །ཉེར་འགྲོགས་དོན་ལྡན་བཟང་པོ་སྤྱོད་ལ་བཀྲི། །བསྟན་སྲོག་བཙས་སུ་སྨིན་པར་སྙིང་ནས་སྨོན། །རྗོད་བྱེད་ཚིག་ལ་སྙན་འཇེབས་མི་ལྡན་ཡང༌། །བརྗོད་བྱའི་དོན་ལ་ནོར་འཁྲུལ་མེད་ངེས་ཤིང༌། །བརྒྱུད་གསུམ་ དགོངས་པའི་འདྲ་འབག་ཁོ་ནའི་ཕྱིར། །གླེགས་བམ་འདི་ཡང་ཆོས་སྐུའི་མཆོད་སྡོང་ཉིད། །ཆོས་ཀྱི་རིང་བསྲེལ་གཏན་པ ་མེད་འཇོ་བ། །ཆོས་མཐུན་གྲོགས་རྣམས་དགྱེས་པའི་སྐྱེས་བཟང་སྟེ། །ཆོས་མཆོག་འཛིན་སྐྱོང་སྤེལ་བའི་ཕྱག་མཚན་ཆེར། །ཆོས་མཛད་གཅེས་པའི་དབྱིག་ཏུ་བཟུང་མཛད་གསོལ། །ཞེས་ཀྱང་སྨྲས་སོ།། །།