འོད་མའི་ཚལ་གྱི་སྡེ་ཚན།
སྡོམ་ལ། འོད་མ་དང་ནི་དབུས་ཀྱི་གྲོང་། །མི་ཐི་ལ་དང་ལུས་འཕགས་དང་། །སཱ་ལ་ཁྲོན་པ་ངན་སྤོང་བུ། །ངུར་སྨྲིག་གཙུག་ཕུད་བསྔགས་ལྡན་དང་། །གནག་ལྷས་དང་ནི་སྡིག་ཅན་དང་། །ཀུ་ཤའི་གྲོང་ཁྱེར་ཐ་མ་ཡིན། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འོད་མ་ཅན་གྱི་གྲོང་གང་ན་བར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། དེ་ནས་བཅོམ་ལྡན་འདས་སྤོང་བྱེད་ནས་ལྗོངས་རྒྱུ་ཞིང་གཤེགས་པ་དང་འོད་མ་ཅན་གྱི་གྲོང་དུ་བྱོན་ནས། འོད་མ་ཅན་གྱི་གྲོང་གི་བྱང་ཕྱོགས་ཀྱི་གྲོང་ཤིང་ཤ་པའི་ཚལ་ན་བཞུགས་སོ། །དེའི་ཚེ་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་བ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ལྟར་འདིར་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་བ་བྱུང་གིས། དགེ་སློང་དག་ཚུར་ཁྱེད་ལས་སྨོས་འདྲི་ན་ཇི་ལྟ་བུ་ཡོད་པ་དང་། གཏམ་འདྲེས་པ་ཇི་ལྟ་བུ་ཡོད་པ་དང་། འགྲོགས་བཤེས་ཇི་ལྟ་བུ་ཡོད་པ་དེ་དག་ནི་ཡངས་པ་ཅན་གྱི་ཉེ་འཁོར་གྱི་སྤོང་བྱེད་ཀྱི་གྲོང་དུ་དབྱར་གནས་པར་དམ་ཆོས་ཤིག །
ང་ཡང་བསྙེན་བཀུར་བ་དགེ་སློང་ཀུན་དགའ་བོ་དང་། འོད་མ་ཅན་གྱི་གྲོང་འདི་ཉིད་དུ་དབྱར་བཞུགས་པར་དམ་བཅས་ན་ཐམས་ཅད་བསོད་སྙོམས་ཀྱིས་ཕོངས་པར་མི་འགྱུར་གྲང་། བཙུན་པ་བཀའ་བཞིན་འཚལ་ཞེས་དགེ་སློང་དེ་རྣམས་ཀྱིས་བཅོམ་ལྡན་འདས་ཀྱི་ལྟར་མཉན་ནས་སྨོས་འདྲི་ན་ཇི་ལྟ་བུ་ཡོད་པ་དང་། གཏམ་འདྲེས་པ་ཇི་ལྟ་བུ་ཡོད་པ་དང་། འགྲོགས་བཤེས་ཇི་ལྟ་བུ་ཡོད་པ་དག་ནི་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་དམ་བཅས་སོ། །བཅོམ་ལྡན་འདས་ཀྱང་བསྙེན་བཀུར་བ་དགེ་སློང་ཀུན་དགའ་བོ་དང་། འོད་མ་ཅན་གྱི་གྲོང་ཁྱེར་དེ་ཉིད་དུ་དབྱར་བཞུགས་པར་དམ་བཅས་སོ། །དབྱར་གྱི་གནས་དེར་བཅོམ་ལྡན་འདས་སྙུན་ཚབས་ཆེན་པོ་མི་བཟད་པ་དྲག་པ་གྲོངས་ལ་ཐུག་པ་ཞིག་གིས་ཐེབས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་ནད་ཚབས་ཆེན་པོ་མི་བཟད་པ་དྲག་པ་ཤི་ལ་ཐུག་པས་ཐེབས་ལ། དགེ་སློང་གི་དགེ་འདུན་ཡང་འཐོར་བར་གྱུར་ན། དགེ་སློང་གི་དགེ་འདུན་འཐོར་བ་ན། བདག་ཡོངས་སུ་མྱ་ངན་ལས་འདའ་བ་ནི་བདག་གི་ཆ་མ་ཡིན་གྱིས། མ་ལ་བདག་གིས་ཚོར་བ་གཅིག་པོ་དེ་བརྩོན་འགྲུས་ཀྱིས་བཅིལ་ལ། མཚན་མ་ཐམས་ཅད་ཡིད་ལ་མི་བྱ་བར་སེམས་ཀྱི་ཏིང་ངེ་འཛིན་མཚན་མ་མེད་པ་ལ་ལུས་ཀྱིས་མངོན་སུམ་དུ་བསྒྲུབས་ཏེ་གནས་པར་བྱའོ། །སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་ཚོར་བ་གཅིག་པོ་དེ་བརྩོན་འགྲུས་ཀྱིས་སླར་བཅིལ་ནས། མཚན་མ་ཐམས་ཅད་ཡིད་ལ་མི་མཛད་པས་སེམས་ཀྱི་ཏིང་ངེ་འཛིན་མཚན་མ་མེད་པ་སྐུས་མངོན་སུམ་དུ་མཛད་དེ་བསྒྲུབས་ནས་བཞུགས་ཏེ། དེ་ནས་བཅོམ་ལྡན་འདས་ལྷག་པར་སྤྱོད་པ་དང་ལྷག་པར་འཚོ་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་དགོངས་ཀ་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཙུན་བ་བཅོམ་ལྡན་འདས་སྙུན་ཚབས་ཆེན་པོ་མི་བཟད་པ་དྲག་པ་གྲོངས་ལ་ཐུག་པས་ཐེབས་པར་གློ་བར་ཆུད་ནས་བདག་གི་ལུས་དུག་འཚལ་བ་བཞིན་དུ་ཕྱོགས་ཀྱང་བསླད། བདག་གིས་ཐོས་པའི་ཆོས་རྣམས་ཀྱང་བསྐྱུད་པར་གྱུར་ལགས་ཏེ། དེ་ལ་བདག་གློ་བ་རེ་བར་ན་རེ་ཞིག་བཅོམ་ལྡན་འདས་ཀྱིས་དགེ་སློང་གི་དགེ་འདུན་གྱི་སླད་དུ་ཞལ་ཆེམས་ཅུང་ཟད་བཀའ་མ་སྩལ་གྱི་བར་དུ་ཡོངས་སུ་མྱ་ངན་ལས་མི་འདའོ་སྙམ་དུ་བགྱིད་དོ། །ཀུན་དགའ་བོ་གང་ཞིག་འདི་སྙམ་དུ་དགེ་སློང་གི་དགེ་འདུན་ནི་བདག་ཡིན་ཏེ། བདག་གིས་དགེ་སློང་གི་དགེ་འདུན་བསྟན་པར་བྱའོ། །བདག་གིས་དགེ་སློང་གི་དགེ་འདུན་དྲང་ངོ་སྙམ་དུ་སེམས་པ་དེ་ནི་དགེ་སློང་གི་དགེ་འདུན་གྱི་ཕྱིར་ཁ་ཆེམས་ཅུང་ཟད་སྨྲ་བར་འགྱུར་བ་ཉིད་ན། ཀུན་དགའ་བོ་ང་ལ་འདི་སྙམ་དུ་དགེ་སློང་གི་དགེ་འདུན་ནི་ངའི་ཡིན་ཏེ། ངས་དགེ་སློང་གི་དགེ་འདུན་བསྟན་པར་བྱའོ། །ངས་དགེ་སློང་གི་དགེ་འདུན་དྲང་ངོ་སྙམ་དུ་དགོངས་པ་མི་མངའ་ན། ངས་དགེ་སློང་གི་དགེ་འདུན་གྱི་ཕྱིར་ཞལ་ཆེམས་ཁོ་ན་ཅུང་ཟད་བསྟན་དུ་ཅི་ཡོད། གཞན་ཡང་ཀུན་དགའ་བོ་ང་ལ་དགེ་སློང་གི་དགེ་འདུན་གྱི་རག་ལུས་པ་ཅི་ཞིག་ཡོད། ཀུན་དགའ་བོ་ངས་རྟག་ཏུ་གོམས་པར་བྱ་བའི་ཆོས་འདི་ལྟ་སྟེ། དྲན་པ་ཉེ་བར་གཞག་པ་བཞི་པ་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕག་པའི་ལམ་ཡན་ལག་བརྒྱད་པ་ནི་བཤད་ཟིན་ཏོ།། །།འདུལ་བ་གཞི། བམ་པོ་ཉི་ཤུ་དགུ་པ། ཀུན་དགའ་བོ་དེ་བཞིན་གཤེགས་པ་ལ་ནི་གང་ཞིག་གཞན་དག་གིས་ཤེས་ན་མི་རུང་བས་དེ་བཞིན་གཤེགས་བས་བཅབ་བོ་སྙམ་དུ་དགོངས་པའི་སློབ་དཔོན་གྱི་དཔེ་མཁྱུད་མི་མངའོ། །ཀུན་དགའ་བོ་འོན་ཀྱང་གང་གི་ཚེ་དེ་བཞིན་གཤེགས་པ་སྙུན་ཚབས་ཆེན་པོ་མི་བཟད་པ་དྲག་པོས་གྲོངས་ལ་ཐུག་པས་ཐེབས་པ་དེ་ལ་ང་འདི་སྙམ་དུ་སེམས་ཏེ། བདག་ནད་ཚབས་ཆེན་པོ་མི་བཟད་པ་དྲག་པ་ཤི་ལ་ཐུག་པས་ཐེབས་ལ། དགེ་སློང་གི་དགེ་འདུན་ཡང་འཐོར་བར་གྱུར་
ན་དགེ་སློང་གི་དགེ་འདུན་འཐོར་བ་ན། བདག་ཡོངས་སུ་མྱ་ངན་ལས་འདའ་བ་ནི་བདག་གི་ཆ་མ་ཡིན་གྱིས། མ་ལ་བདག་གིས་ཚོར་བ་གཅིག་པོ་དེ་བརྩོན་འགྲུས་ཀྱིས་སླར་བཅིལ་ལ། མཚན་མ་ཐམས་ཅད་ཡིད་ལ་མི་བྱ་བར་སེམས་ཀྱི་ཏིང་ངེ་འཛིན་མཚན་མ་མེད་པ་ལ་ལུས་ཀྱིས་མངོན་སུམ་དུ་བསྒྲུབས་ཏེ་གནས་པར་བྱའོ་སྙམ་ནས་ངས་ཚོར་བ་གཅིག་པོ་དེ་བརྩོན་འགྲུས་ཀྱིས་སླར་བཅིལ་ནས་མཚན་མ་ཐམས་ཅད་ཡིད་ལ་མི་མཛད་པར་སེམས་ཀྱི་ཏིང་ངེ་འཛིན་མཚན་མ་མེད་པ་སྐུས་མངོན་སུམ་དུ་བསྒྲུབས་ནས་བཞུགས་ཏེ། དེས་ན་དེ་བཞིན་གཤེགས་པ་ལྷག་པར་སྤྱོད་པ་དང་ལྡན་ཞིང་ལྷག་པར་འཚོ་བར་གྱུར་ཏོ། །གཞན་ཡང་ཀུན་དགའ་བོ་ད་ནི་དེ་བཞིན་གཤེགས་པ་ན་ཚོད་ལོ་བརྒྱད་བཅུ་ལོན་པས་སྐུ་བགྲེས་འཁོགས་གཏུགས་པར་གྱུར་ཏེ། རྣམ་པ་གཉིས་ལ་བརྟེན་ནས་འཚོའོ། །དཔེར་ན་ཤིང་རྟ་རྙིད་པ་རྣམ་པ་གཉིས་ལ་བརྟེན་ནས་བརྟན་པ་དེ་བཞིན་དུ། དེ་བཞིན་གཤེགས་པ་ཡང་ན་ཚོད་ལོ་བརྒྱད་བཅུ་ལོན་པས་སྐུ་བགྲེས་འཁོགས་གཏུགས་པར་གྱུར་ཏེ། རྣམ་པ་གཉིས་ལ་བརྟེན་ནས་འཚོའོ། །དེ་ལྟ་བས་ན་ཀུན་དགའ་བོ་ཁྱོད་མྱ་ངན་མ་བྱེད་ཅིག །ཉོན་མོངས་པར་མ་བྱེད་ཅིག །སྨྲེ་སྔགས་མ་འདོན་ཅིག །སྐྱེ་བ་དང་། བྱུང་བ་དང་། བྱས་པ་དང་། འདུས་བྱས་པ་དང་། བསགས་པ་གང་ཡིན་པ་དེ་རྟེན་ཅིང་འབྲེལ་པར་འབྱུང་བ་རྣམ་པར་འགྱེས་པའི་ཆོས་ཅན་དེ་ལ་མི་འཇིག་པ་དེ་ལྟ་བུ་ལྟ་ག་ལ་རྙེད་དེ། དེ་ནི་གནས་མེད་དོ། །ཀུན་དགའ་བོ་གང་ཡང་ངས་ཁྱོད་ལ་སྡུག་པ་དང་། ཕངས་པ་དང་། དགའ་བ་དང་། ཡིད་དུ་འོང་བ་ཐམས་ཅད་དང་འབྲལ་བ་དང་། འཇིག་པ་དང་། འགྱེས་པ་དང་། མི་ལྡན་པར་འགྱུར་བར་སྔ་ནས་བཤད་ཟིན་ཏོ། །ཀུན་དགའ་བོ་དེ་ལྟ་བས་ནད་ལྟའམ། ང་འདས་ཀྱང་རུང་། བདག་ཉིད་གླིང་དང་། བདག་ཉིད་སྐྱབས་དང་། ཆོས་ཀྱི་གླིང་དང་། ཆོས་ཀྱི་སྐྱབས་ཀྱིས་གནས་པར་བྱའོ་གླིང་གཞན་དང་སྐྱབས་གཞན་གྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོང་ལྟའམ། ང་འདས་ཀྱང་རུང་གང་སུ་དག་བདག་ཉིད་གླིང་དང་། བདག་ཉིད་སྐྱབས་དང་། ཆོས་ཀྱི་གླིང་དང་ཆོས་
ཀྱི་སྐྱབས་ཀྱིས་གནས་པར་བྱེད་ཀྱི། གླིང་གཞན་དང་། སྐྱབས་གཞན་གྱིས་ནི་མ་ཡིན་དེ་དག་ནི་འདི་ལྟ་སྟེ། ངའི་ཉན་ཐོས་བསླབ་པ་འདོད་པ་རྣམས་ཀྱི་མཆོག་ཡིན་ནོ། །ཀུན་དགའ་བོ་ཇི་ལྟར་ན་དགེ་སློང་གིས་བདག་ཉིད་གླིང་དང་། བདག་ཉིད་སྐྱབས་དང་། ཆོས་ཀྱི་གླིང་དང་། ཆོས་ཀྱི་སྐྱབས་ཀྱིས་གནས་པར་བྱའི། གླིང་གཞན་དང་། སྐྱབས་གཞན་གྱིས་ནི་མ་ཡིན་ཞེ་ན། ཀུན་དགའ་བོ་འདི་ལ་དགེ་སློང་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་བརྩོན་འགྲུས་དང་། ཤེས་བཞིན་དང་། དྲན་པ་དང་ལྡན་པས་འཇིག་རྟེན་ལ་གནོད་སེམས་དང་ཡིད་མི་བདེ་བ་སྤངས་ནས་གནས་སོ། །ནང་གི་ལུས་དང་། ཕྱིའི་ལུས་དང་། ནང་དང་ཕྱིའི་ལུས་དང་། ནང་གི་ཚོར་བ་རྣམས་དང་། ཕྱིའི་ཚོར་བ་རྣམས་དང་། ནང་དང་ཕྱིའི་ཚོར་བ་རྣམས་དང་། ནང་གི་སེམས་དང་། ཕྱིའི་སེམས་དང་། ནང་དང་ཕྱིའི་སེམས་དང་། ནང་གི་ཆོས་རྣམས་དང་། ཕྱིའི་ཆོས་རྣམས་དང་། ནང་དང་ཕྱིའི་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་བརྩོན་འགྲུས་དང་། ཤེས་བཞིན་དང་། དྲན་པ་དང་ལྡན་པས་འཇིག་རྟེན་ལ་གནོད་སེམས་དང་། ཡིད་མི་བདེ་བ་སྤངས་ནས་གནས་པ་སྟེ། ཀུན་དགའ་བོ་དགེ་སློང་འདི་ལྟ་བུ་ནི་བདག་ཉིད་གླིང་དང་། བདག་ཉིད་སྐྱབས་དང་། ཆོས་ཀྱི་གླིང་དང་། ཆོས་ཀྱི་སྐྱབས་ཀྱིས་གནས་ཀྱི། གླིང་གཞན་དང་། སྐྱབས་གཞན་གྱིས་ནི་མ་ཡིན་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དབུས་ཀྱི་གྲོང་གང་ན་བར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་ཀྱིས་ཕྱོགས་གཞན་ཞིག་ཏུ་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་འབྱུང་ཞིང་ཁ་ཅིག་ནི་འོག་ཏུ་འགྲོའོ། །ཁ་ཅིག་ནི་སྟེང་དུ་འགྲོའོ། །གང་དག་འོག་ཏུ་སོང་བ་དེ་དག་ནི་ཡང་སོས་དང་།
ཐིག་ནག་དང་། སྡུད་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་བ་དང་། སོ་ཐམས་ཐམས་དང་། ཀྱི་ཧུད་ཟེར་བ་དང་། ཨ་ཅུ་ཟེར་བ་དང་། ཨུཏྤལ་ལྟར་གས་པ་དང་། པདྨ་ལྟར་གས་པ་དང་། པདྨ་ལྟར་གས་པ་ཆེན་པོའ་སེམས་ཅན་དམྱལ་བ་རྣམས་སུ་སོང་ནས་ཚ་བའི་སེམས་ཅན་དམྱལ་བ་གང་དག་ཡིན་པ་དེ་དག་ལ་ནི་བསིལ་བར་འབབ་བོ། །གྲང་བའི་སེམས་ཅན་དམྱལ་བ་གང་དག་ཡིན་པ་དེ་དག་ལ་ནི་དྲོ་བར་འབབ་བོ། །དེས་སེམས་ཅན་དེ་རྣམས་ཀྱི་གནོད་པའི་ཁྱད་པར་དག་སོ་སོར་བཅིལ་ལོ། །དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ་འོན་ཏེ་གཞན་དུ་སྐྱེས་སྙམ་པ་དང་། དེ་རྣམས་དད་པ་བསྐྱེད་པའི་ཕྱིར་བཅོམ་ལྡན་འདས་ཀྱིས་སྤྲུལ་པ་ཞིག་བཏང་ངོ་། །དེ་རྣམས་ཀྱིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་ནི་འདི་ནས་ཤི་འཕོས་པ་ཡང་མེད་ལ། གཞན་དུ་སྐྱེས་པ་མེད་མོད་ཀྱི། འོན་ཀྱང་སྔོན་མ་མཐོང་བའི་སེམས་ཅན་འདིའི་མཐུས་བདག་ཅག་གི་སྡུག་བསྔལ་གྱི་ཁྱད་པར་རྣམས་སོ་སོར་བཅིལ་ལོ། །ཞེས་དེ་རྣམས་སྤྲུལ་པ་ལ་སེམས་མངོན་པར་དད་པར་གྱུར་པས་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་རྣམས་ཀྱི་སྣོད་དུ་རུང་བར་འགྱུར་བ་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་བཟུང་ངོ་། །གང་དག་སྟེང་དུ་སོང་བ་དེ་དག་ནི་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་པ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་པ་ཆེན་པོ་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་བ་དང་། ཤིན་ཏུ་མཐོང་བ་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་།
སྟོང་པ་ཉིད་དང་། བདག་མེད་པའི་དབྱངས་སྒྲོག་ཅིང་ཚིགས་སུ་བཅད་པ་གཉིས་ཀྱིས་ཀྱང་བསྒྲགས་སོ། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པས། །ཆོས་འདུལ་འདི་ལ་བརྩོན་གྱུར་ན། །སྐྱེ་བའི་འཁོར་བ་རབ་སྤངས་ནས། ། སྡུག་བསྔལ་ཐ་མར་བྱེད་པར་འགྱུར། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའ་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཀྱི་རྗེས་བཞིན་དུ་འགྲོའོ། །དེ་ལ་གལ་ཏེ་བཅོམ་ལྡན་འདས་ཀྱིས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པ་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར་རོ། །དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར་རོ། །དུད་འགྲོར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་རྟིང་པར་ནུབ་པར་འགྱུར་རོ། །ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར་རོ། །མིར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་པུས་མོར་ནུབ་པར་འགྱུར་རོ། །སྟོབས་ཀྱི་འཁོར་ལོས་སྒྱུར་བའི་རྒྱལ་པོར་ལུང་སྟོན་པར་བཞེད་ན་ནི་ཕྱག་གཡོན་པའི་མཐིལ་དུ་ནུབ་པར་འགྱུར། འཁོར་ལོས་སྒྱུར་བའི་རྒྱལ་པོར་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་གྱི་ནང་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་དབུའི་གཙུག་ཏུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ནས་ཞུས་པ། ཁ་དོག་
སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་ནང་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་དུ་སྣང་བར་བགྱིས། །ཡང་ཚིགས་སུ་བཅད་པ་དག་གིས་གསོལ་ཏོ། །རྒོད་བྲལ་ཞུམ་དང་རྒྱགས་པ་སྤངས་པ་ཡིས། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པ། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བའི་ཉན་པ་པོ་རྣམས་ཀྱི། །ཐེ་ཙོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུའི་རི་བོ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་གློ་བུར་འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་ཁྱོད་ཀྱིས་ས་ཕྱོགས་འདི་མཐོང་ངམ། བཙུན་པ་འདི་མཐོང་ལགས་སོ། །ཀུན་དགའ་བོ་ཕྱོགས་འདིར་ཡང་དག་པར་རྫོགས་པའི་སངས་རྒྱས་གསུམ་བཞུགས་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་མྱུར་བ་མྱུར་བར་བླ་གོས་བཞི་ལྷབ་ཏུ་བྱས་ཏེ་བཏིང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཤམས་པ་ཁོ་ན་ལ་བཞུགས་ཤིག་དང་། ས་ཕྱོགས་འདི་ཡང་དག་པར་རྫོགས་པའི་སངས་རྒྱས་བཞིས་ཡོངས་སུ་ལོངས་སྤྱད་པར་འགྱུར་ལགས་སོ། །བཅོམ་ལྡན་འདས་གདན་བཤམས་པ་ཉིད་ལ་བཞུགས་སོ། །སྐད་ཅིག་གཅིག་བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གྲོང་ཁྱེར་མི་ཐི་ལ་གང་ན་བར་འདོང་ངོ་།བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་ལུས་འཕགས་ཀྱི་ལྗོངས་
རྒྱུ་ཞིང་གཤེགས་པ་ན་མི་ཐི་ལར་བྱོན་ནས། མི་ཐི་ལའི་ལྷ་ཆེན་པོའ་ཨ་མྲའི་ཚལ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་ས་ཕྱོགས་གཞན་ཞིག་ཏུ་འཛུམ་པ་མཛད་དོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན་བཙུན་པ་བཅོམ་ལྡན་འདས་འཛུམ་པ་མཛད་པ་དེའི་རྒྱུ་གང་ལགས་རྐྱེན་གང་ལགས། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་སྔོན་བྱུང་བ་མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པར་གྱུར་ཏེ། མི་ཚེ་ལོ་བརྒྱད་ཁྲི་པ་རྣམས་ཀྱི་འཛམ་བུའི་གླིང་འདི་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་མི་མང་པོས་གང་བ། གྲོང་དང་། གྲོང་རྡལ་དང་། ཡུལ་འཁོར་དང་། རྒྱལ་པོའ་ཕོ་བྲང་གི་བར་བྱ་གག་གི་འཕུར་སྟབས་ཀྱིས་ཆོད་པ་བྱུང་བར་གྱུར་ཏོ། །མི་ཚེ་ལོ་བརྒྱད་ཁྲི་པ་རྣམས་ལ་ལུས་ཀྱི་གནོད་པ་ནི་འདི་ལྟ་བུ་དག་འབྱུང་སྟེ། འདི་ལྟ་སྟེ་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། འདོང་པ་དང་། ཡི་ག་འཆུས་པ་དང་། རྒ་བ་ཡིན་ནོ། །མི་ཚེ་ལོ་བརྒྱད་ཁྲི་པ་རྣམས་ཀྱི་བུ་མོ་ནི་བཙས་ནས་ལོ་ལྔ་བརྒྱ་ལོན་པ་དང་ཁྱོ་ལ་གཏོང་བར་བྱེད་དེ། དཔེར་ན་ད་ལྟར་གྱི་ལོ་བཅྭོ་ལྔའམ་ལོ་བཅུ་དྲུག་ལོན་པ་བཞིན་ནོ། །ཀུན་དགའ་བོ་མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་འཁོར་ལོས་སྒྱུར་བའི་རྒྱལ་པོ་ལྷ་ཆེན་པོ་ཞེས་བྱ་བ་མཐའ་བཞིར་རྣམ་པར་རྒྱལ་བ་ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་ངོ་། །དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་བྱུང་སྟེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཉིད་ཡིན་
ནོ། །དེ་ལ་ཡང་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་བར་བྱུང་སྟེ། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་སོ། །དེ་ནས་རྒྱལ་པོ་ལྷ་ཆེན་པོའ་སྐྲ་དང་ཁ་སྤུ་འབྲེག་མཁན་གྱི་མིས་སྐྲ་དང་ཁ་སྤུ་འཆོས་པ་ན་འབྲེག་མཁན་གྱི་མི་ལ་སྨྲས་པ། ཀྱེ་ནང་རྗེ་ངའི་དབུ་ལ་སྐྲ་དཀར་པོ་སྐྱེས་པ་ཁྱོད་ཀྱིས་མཐོང་དང་ལྷའི་ཕོ་ཉ་བྱུང་བ་ཡིན་གྱིས་དེའི་ཚེ་ངའི་སྙན་དུ་གསོལ་ཅིག །ལྷ་བཀའ་བཞིན་འཚལ་ཞེས་འབྲེག་མཁན་གྱི་མིས་རྒྱལ་པོ་ལྷ་ཆེན་པོའ་ལྟར་མཉན་ཏོ། །དུས་གཞན་ཞིག་ན་འབྲེག་མཁན་གྱིས་རྒྱལ་པོ་ལྷ་ཆེན་པོའ་སྐྲ་དང་ཁ་སྤུ་འཆོས་པ་ན་རྒྱལ་པོ་ལྷ་ཆེན་པོའ་མགོ་ལ་སྐྲ་དཀར་པོ་སྐྱེས་པས་ལྷའི་ཕོ་ཉ་བྱུང་བར་མཐོང་ངོ་། །མཐོང་ནས་ཀྱང་རྒྱལ་པོ་ལྷ་ཆེན་པོ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། ཁྱོད་ཀྱི་དབུ་ལ་དབུ་སྐྲ་དཀར་པོ་སྐྱེས་པས་ལྷའི་ཕོ་ཉ་བྱུང་ལགས་སོ། །དེས་སྨྲས་པ། ཀྱེ་ནང་རྗེ་ཁྱོད་ཀྱིས་སྐྲ་དཀར་པོ་དེ་དག་མི་བྲེག་པར་དལ་བུ་དལ་བུས་ཕྱུང་ལ་ངའི་ལག་ཏུ་བྱིན་ཅིག །ལྷ་བཀའ་བཞིན་འཚལ་ཞེས་འབྲེག་མཁན་གྱིས་རྒྱལ་པོ་ལྷ་ཆེན་པོའ་ལྟར་མཉན་ནས་སྐྲ་དཀར་པོ་དེ་གསེར་གྱི་སྨང་ཚེར་གྱིས་མི་དྲག་པར་དལ་གྱིས་དལ་གྱིས་ཕྱུང་ནས་རྒྱལ་པོ་ལྷ་ཆེན་པོའ་ལག་པར་བཞག་གོ །དེ་ནས་རྒྱལ་པོ་ལྷ་ཆེན་པོས་སྐྲ་དཀར་པོ་དེ་ལག་པ་གཉིས་ཀྱིས་དྲངས་ནས་ཚིགས་སུ་བཅད་དེ་སྨྲས་པ། ད་ནི་བདག་གི་མགོ་བོ་ལ། །ན་ཚོད་འཇོམས་པའི་སྐྲ་སྐྱེས་ཏེ། །ལྷ་ཡི་ཕོ་ཉ་བྱུང་གྱུར་པས། །བདག་གི་རབ་བྱུང་དུས་ལ་བབ། །བདག་གིས་མི་རྣམས་ཀྱི་འདོད་པ་ནི་སྤྱད་ཟིན་གྱིས་བདག་གིས་ལྷའི་འདོད་པ་དག བཙལ་བའི་དུས་ལ་བབ་ཀྱིས། མ་ལ་བདག་གིས་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་ལ་རྒྱལ་པོའ་དྲང་སྲོང་གི་ཚངས་པར་སྤྱད་དོ་སྙམ་ནས། དེ་ནས་རྒྱལ་པོ་ལྷ་ཆེན་པོས་གཞོན་ནུ་ཕོ་ཉས་བཀུག་ནས་འདི་སྐད་ཅེས་སྨྲས་སོ། །བུ་གཞོན་ནུ་ཤེས་པར་གྱིས་ཤིག །
ངའི་མགོ་ལ་སྐྲ་དཀར་པོ་སྐྱེས་པས་ལྷའི་ཕོ་ཉ་བྱུང་བར་གྱུར་ཏེ། ངས་མི་རྣམས་ཀྱི་འདོད་པ་ནི་སྤྱད་ཟིན་པས་ངས་ལྷའི་འདོད་པ་དག་བཙལ་བའི་དུས་ལ་བབ་སྟེ། ངས་བུ་གཞོན་ནུ་ཁྱོད་ལ་རྒྱ་མཚོའ་མཐས་ཀླས་པའི་ས་ཆེན་པོ་འདི་གཏད་ཀྱིས་དེ་ཁྱོད་ཀྱིས་ཆོས་བཞིན་གྱིས་རྗེས་སུ་བསྐྱང་བར་བྱའི་ཆོས་མ་ཡིན་པས་ནི་མ་ཡིན་ནོ། །འགའ་ཞིག་ཆོས་མ་ཡིན་པ་སྤྱོད་དམ་འདྲེན་མར་སྤྱོད་ན་ཁྱོད་ཀྱིས་ཡུལ་འཁོར་དུ་གནས་སུ་མ་གཞུག་ཤིག །བུ་གཞོན་ནུ་གང་གི་ཚེ་ཁྱོད་ཀྱང་མགོ་ལ་སྐྲ་དཀར་པོ་སྐྱེས་པ་མཐོང་བ་དང་ལྷའི་ཕོ་ཉ་འོངས་པ་ཡིན་གྱིས། དེའི་ཚེ་ཁྱོད་ཀྱིས་ཀྱང་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་ཆུག་ལ་རྒྱལ་པོའ་དྲང་སྲོང་གི་ཚངས་པར་སྤྱད་པ་སྤྱོད་ཅིག །འདི་ལྟར་བུ་གཞོན་ནུ་ཁྱོད་ཀྱི་དགེ་བའི་ལམ་ངེས་པ་སྲོལ་དོད་པ་དེ་ལྟ་བུའི་རྗེས་བསབ་པར་བྱའི་རྒྱུན་ཆད་པར་མ་བྱེད་ཅིག །སྐྱེས་བུ་ཐ་ཤལ་དུ་གྱུར་ཏ་རེ། བུ་གཞོན་ནུ་འགའ་ཞིག་འདི་ལྟ་བུའི་སྐྱེས་བུ་བཟང་པོ་རྒྱུད་དུ་བྱུང་བའི་དགེ་བའི་ལམ་ངེས་པ་སྲོལ་དོད་པ་དེ་ལྟ་བུའི་རྗེས་མི་འཚོབ་པ་གང་ཡིན་པ་དེ་དེ་རྣམས་ཀྱི་རྒྱུན་གཅོད་པ་ཡིན་ཞིང་དེ་དེ་རྣམས་ཀྱི་ནང་ན་སྐྱེས་བུ་ཐ་ཤལ་དུ་གྱུར་པ་ཡིན་ནོ། །དེ་ལྟ་བས་ན་ད་ཁྱོད་ལ་འདི་སྐད་ཅེས། གང་གི་ཚེ་ཁྱོད་ཀྱིས་འདི་ལྟ་བུའི་སྐྱེས་བུ་བཟང་པོ་རྒྱུད་དུ་བྱུང་བའི་དགེ་བའི་ལམ་ངེས་པ་སྲོལ་དོད་པ་དེ་ལྟ་བུའི་རྗེས་སོབས་ལ་རྒྱུན་ཆད་པར་མ་བྱེད་ཅིག །སྐྱེས་བུ་ཐ་ཤལ་དུ་གྱུར་པར་མ་བྱེད་ཅིག་ཅེས་སྨྲའོ། །དེ་ནས་རྒྱལ་པོ་ལྷ་ཆེན་པོས་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་ནས་མི་ཐི་ལའི་ལྷ་ཆེན་པོའ་ཨ་མྲའི་ཚལ་དེ་ཉིད་དུ་རྒྱལ་པོའ་དྲང་སྲོང་གི་ཚངས་པར་སྤྱོད་པ་སྤྱད་དོ། །ཀུན་དགའ་བོ་རྒྱལ་པོ་ལྷ་ཆེན་པོས་གཞོན་ནུ་ཐུ་བོ་གང་ཡིན་པ་དེ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་པ་དེའི་མིང་ཡང་འཁོར་ལོས་སྒྱུར་བའི་རྒྱལ་པོ་ལྷ་ཆེན་པོ་ཞེས་བྱ་བ་མཐའ་བཞིར་རྣམ་པར་རྒྱལ་བ་ཞེས་བྱ་བ་ནས་གནས་སོ་ཞེས་བྱ་བའི་བར་གོང་མ་བཞིན་དུའོ། །དེ་ནས་རྒྱལ་པོ་ལྷ་ཆེན་པོའ་སྐྲ་དང་ཁ་སྤུ་འབྲེག་མཁན་གྱི་མིས་སྐྲ་དང་ཁ་སྤུ་འཆོས་པ་ན་ཞེས་བྱ་བ་ནས། དེ་དེ་རྣམས་ཀྱི་ནང་ན་སྐྱེས་བུ་ཐ་ཤལ་དུ་གྱུར་
བ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །དེ་ནས་རྒྱལ་པོ་ལྷ་ཆེན་པོས་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་ནས་རྒྱལ་པོའ་དྲང་སྲོང་གི་ཚངས་པར་སྤྱོད་པ་སྤྱད་དོ། །ཀུན་དགའ་བོ་བུ་དང་། ཚ་བོ་དང་། ཡང་ཚ་དང་། སུམ་ཚ་ལ་སོགས་པ་དེ་ལྟར་བརྒྱུད་པས་ལྷ་ཆེན་པོ་བརྒྱད་ཁྲི་བཞི་སྟོང་མི་ཐི་ལའི་ལྷ་ཆེན་པོའ་ཨ་མྲའི་ཚལ་འདི་ཉིད་དུ་རྒྱལ་པོའ་དྲང་སྲོང་གི་ཚངས་པར་སྤྱོད་པ་སྤྱད་དོ། །དེ་རྣམས་ཀྱི་ཐ་མ་རྒྱལ་པོ་མུ་ཁྱུད་ཅེས་བྱ་བ་ཆོས་ཀྱི་རྒྱལ་པོ་ཆོས་དང་ལྡན་པ་ཆོས་ལ་གནས་པའི་རྒྱལ་པོ་ཆེན་པོ་ཞིག་བྱུང་སྟེ། དེ་བཙུན་མོ་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་དག་དང་ཆོས་སྤྱོད་དེ་སྦྱིན་པ་དག་གཏོང་། བསོད་ནམས་དག་བྱེད་ཅིང་བསྙེན་གནས་ལ་གནས་ཏེ་ཚུལ་ཁྲིམས་ཡང་དག་པར་བླངས་ནས་འདུག་གོ །དེའི་ཚེ་ལྷའི་དབང་པོ་བརྒྱ་བྱིན་ལྷའི་འདུན་ས་ཆོས་བཟང་དུ་སུམ་བཅུ་རྩ་གསུམ་པའི་ལྷ་འདུས་ཤིང་འཁོད་པ་རྣམས་ཀྱི་མདུན་དུ་བསྔགས་པ་རྗོད་པར་བྱེད་དེ། གྲོགས་པོ་དག་ལུས་འཕགས་ཀྱི་མི་རྣམས་ཀྱིས་རྙེད་པ་ལེགས་པར་རྙེད་དེ། ལུས་འཕགས་ཀྱི་མི་དེ་རྣམས་ཀྱི་རྒྱལ་པོ་མུ་ཁྱུད་ནི་ཆོས་ཀྱི་རྒྱལ་པོ་ཆོས་དང་ལྡན་པ་ཆོས་ལ་གནས་པའི་རྒྱལ་པོ་ཆེན་པོ་དེ་བཙུན་མོ་དང་ཞེས་བྱ་བ་ནས་ཚུལ་ཁྲིམས་ཡང་དག་པར་བླངས་ཏེ་འདུག་གོ་ཞེས་བྱ་བའི་བར་གོང་མ་བཞིན་དུའོ། །གྲོགས་པོ་དག་ཁྱེད་ཅག་རྒྱལ་པོ་མུ་ཁྱུད་ལྟ་བར་འདོད་དམ། ཀཽ་ཤི་ཀ་ཤིན་ཏུ་འཚལ་ལོ། །གྲོགས་པོ་དག་དེའི་ཕྱིར་ཁྱེད་ཅག་སྡོད་ཅིག་དང་ཁོ་བོས་རེ་ཞིག་རྒྱལ་པོ་མུ་ཁྱུད་བལྟའོ། །དེ་ནས་ལྷའི་དབང་པོ་བརྒྱ་བྱིན་དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་ཙམ་གྱིས་སུམ་བཅུ་རྩ་གསུམ་པའི་ལྷ་རྣམས་ཀྱི་ལྷའི་འདུན་ས་ཆོས་བཟང་ནས་མི་སྣང་བར་གྱུར་ཏེ། མི་ཐི་ལར་རྒྱལ་པོ་མུ་ཁྱུད་ཀྱི་ཁང་བཟངས་སུ་འདུག་གོ །འདི་སྐད་ཅེས་ཀྱང་སྨྲས་ཏེ། མུ་ཁྱུད་ཁྱོད་ལ་ལྷའི་འདུན་ས་ཚོས་བཟང་དུ་སུམ་བཅུ་རྩ་གསུམ་པའི་ལྷ་འདུས་ཤིང་འདུག་པ་རྣམས་བསྔགས་པ་རྗོད་པ་ནི་ཁྱོད་
ཀྱིས་རྙེད་པ་ལེགས་པར་རྙེད་དོ། །གྲོགས་པོ་ལུས་འཕགས་ཀྱི་མི་རྣམས་ཀྱིས་རྙེད་པ་ཞེས་བྱ་བ་ནས་ཚུལ་ཁྲིམས་ཡང་དག་པར་བླངས་ཏེ་འདུག་པར་བྱེད་དོ་ཞེས་བྱ་བའི་བར་གོང་མ་བཞིན་དུའོ། །མུ་ཁྱུད་ཁྱོད་སུམ་བཅུ་རྩ་གསུམ་པའི་ལྷ་རྣམས་བལྟ་བའི་ཕྱིར་འགྲོ་འདོད་དམ། ཀཽ་ཤི་ཀ་བདག་སུམ་བཅུ་རྩ་གསུམ་པའི་ལྷ་རྣམས་བལྟ་བའི་ཕྱིར་མཆི་བར་འཚལ་ལོ། །མུ་ཁྱུད་དེའི་ཕྱིར་སྡོད་ཅིག་དང་རེ་ཞིག་ཁོ་བོས་ཁྱོད་ལ་རྟ་ཅང་ཤེས་སྟོད་དང་ལྡན་པའི་ཤིང་རྟ་བསྐུར་གྱིས་དེའི་ནང་དུ་ཁྱོད་ཞུགས་ལ་མ་གཡོ་བར་ཤོག་ཤིག །དེ་བཞིན་དུ་བགྱིའོ་ཞེས་རྒྱལ་པོ་མུ་ཁྱུད་ཀྱིས་ལྷའི་དབང་པོ་བརྒྱ་བྱིན་གྱི་ལྟར་མཉན་ཏོ། །དེ་ནས་ལྷའི་དབང་པོ་བརྒྱ་བྱིན་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་ནས་ཁ་ལོ་སྒྱུར་བ་མ་ལ་གདུ་ལ་སྨྲས་པ། མ་ལ་གདུ་ཁྱོད་སོང་པ་མྱུར་བ་ཁོ་ནར་རྟ་ཅང་ཤེས་སྟོང་དང་ལྡན་པའི་ཤིང་རྟ་ཤོམས་ཏེ་རྒྱལ་པོ་མུ་ཁྱུད་གང་ན་བ་དེར་སོང་ལ་ཕྱིན་ནས་འདི་སྐད་ཅེས། མུ་ཁྱུད་ཁྱོད་ལ་ལྷའི་དབང་པོ་བརྒྱ་བྱིན་གྱིས་རྟ་ཅང་ཤེས་སྟོང་དང་ལྡན་པའི་ཤིང་རྟ་བསྐུར་བ་འདི་ཡིན་གྱིས། འདིར་ཁྱོད་ཞུགས་ལ་མ་གཡོ་བར་ཤོག་ཤིག་ཅེས་སྨྲོས་ཤིག །ཀཽ་ཤི་ཀ་ཁྱོད་ཀྱིས་གསུངས་པ་ཤིན་ཏུ་བཟང་ངོ་ཞེས་ཁ་ལོ་སྒྱུར་བ་མ་ལ་གདུས་ལྷའི་དབང་པོ་བརྒྱ་བྱིན་གྱི་ལྟར་མཉན་ནས་མྱུར་བ་ཁོ་ནར་རྟ་ཅང་ཤེས་སྟོད་དང་ལྡན་པའི་ཤིང་རྟ་བཤམས་ནས་རྒྱལ་པོ་མུ་ཁྱུད་གང་ན་བ་དེར་སོང་སྟེ་ཕྱིན་པ་དང་འདི་སྐད་ཅེས་སྨྲས་སོ། །མུ་ཁྱུད་ཁྱོད་ལ་ལྷའི་དབང་པོ་བརྒྱ་བྱིན་གྱིས་རྟ་ཅང་ཤེས་སྟོད་དང་ལྡན་པའི་ཤིང་རྟ་བསྐུར་བ་འདི་ཡིན་གྱིས། འདིར་ཁྱོད་ཞུགས་ལ་མ་གཡོ་བར་ཤོག་ཤིག་ཅེས་ཟེར་རོ། །ཀུན་དགའ་བོ་རྒྱལ་པོ་མུ་ཁྱུད་རྟ་ཅང་ཤེས་སྟོད་དང་ལྡན་པའི་ཤིང་རྟའི་ནང་དུ་མི་གཡོ་བར་ཞུགས་པ་དང་། དེ་ནས་ཁ་ལོ་སྒྱུར་བ་མ་ལ་གདུག་རྒྱལ་པོ་མུ་ཁྱུད་ལ་འདི་སྐད་ཅེས་སྨྲས་སོ། །མུ་ཁྱུད་ཁྱོད་ཀྱི་ཤིང་རྟ་གང་ལོགས་སུ་དྲང་། གང་ན་སེམས་ཅན་སྡིག་པའི་ལས་ཅན་རྣམས་སྡིག་པ་མི་དགེ་བའི་ལས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་བ་ལོགས་སུའམ། གང་ན་སེམས་ཅན་དགེ་བའི་ལས་ཅན་རྣམས་ལས་དགེ་བའི་རྣམ་པར་སྨིན་པ་སོ་སོར་ཉམས་སུ་མྱོང་བ་ལོགས་སུ་དྲང་། མ་ལ་གདུ་དེའི་ཕྱིར་ཁོ་བོས་གང་དུ་གཉི་ག་མཐོང་བར་འགྱུར་བ་གང་ན་སེམས་ཅན་སྡིག་པའི་ལས་ཅན་རྣམས་སྡིག་པ་མི་དགེ་བའི་ལས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་བ་དག་ཡོད་པ་དང་། གང་ན་སེམས་ཅན་དགེ་བའི་ལས་ཅན་རྣམས་ལས་དགེ་བའི་
རྣམ་པར་སྨིན་པ་སོ་སོར་ཉམས་སུ་མྱོང་བ་དག་ཡོད་པ་དེར་ཤིང་རྟ་དྲོངས་ཤིག །དེ་ནས་ཁ་ལོ་སྒྱུར་བ་མ་ལ་གདུས་རྒྱལ་པོ་མུ་ཁྱུད་ཀྱི་ཤིང་རྟ་རྒྱལ་པོ་མུ་ཁྱུད་ཀྱིས་གང་ན་སེམས་ཅན་སྡིག་པའི་ལས་ཅན་རྣམས་སྡིག་པ་མི་དགེ་བའི་ལས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་བ་དག་ཡོད་པ་དང་། གང་ན་སེམས་ཅན་དགེ་བའི་ལས་ཅན་རྣམས་ལས་དགེ་བའི་རྣམ་པར་སྨིན་པ་སོ་སོར་ཉམས་སུ་མྱོང་བ་དག་ཡོད་པ་གཉི་ག་རྒྱལ་པོ་མུ་ཁྱུད་ཀྱིས་ཇི་ལྟར་མཐོང་བར་འགྱུར་བ་དེ་ལྟར་དྲངས་སོ། །ཀུན་དགའ་བོ་རྒྱལ་པོ་མུ་ཁྱུད་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་ནས་རྒྱལ་པོ་མུ་ཁྱུད་ལྷའི་འདུན་ས་ཆོས་བཟང་དུ་ཞུགས་པ་དང་། ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་ལ་སྟན་ཕྱེད་བསྟབས་ནས་རྒྱལ་པོ་མུ་ཁྱུད་དང་ལྷའི་དབང་པོ་བརྒྱ་བྱིན་སྟན་ཕྱེད་ཕྱེད་ལ་འཁོད་དོ། །ཀུན་དགའ་བོ་རྒྱལ་པོ་མུ་ཁྱུད་དང་ལྷའི་དབང་པོ་བརྒྱ་བྱིན་སྟན་ཕྱེད་ཕྱེད་ལ་འཁོད་པ་ན་ཁྱད་པར་རམ་བསམ་པའམ་ཐ་དད་དུ་བྱ་བ་མེད་ཀྱི། གཞན་དུ་ན་ལྷའི་དབང་པོ་བརྒྱ་བྱིན་ནི་མིག་འཛུམས་པར་མི་བྱེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་ལ་འདི་སྐད་ཅེས་སྨྲས་སོ། །མུ་ཁྱུད་འདི་ཉིད་དུ་འདུག་ལ་མུ་ཁྱུད་ཁྱོད་དགའ་བར་སྤྱོད་ཅིག །འདོད་པའི་ཡོན་ཏན་ལྔ་འབྱོར་ཅིང་ལྡན་པ་ལ་རྩེད་མོ་བྱོས་ཤིག །དགའ་བར་སྤྱོད་ཅིག །དགའ་མགུར་སྤྱོད་ཅིག །དེ་ནས་རྒྱལ་པོ་མུ་ཁྱུད་ཀྱིས་དེའི་ཚེ་ཚིགས་སུ་བཅད་དེ་སྨྲས་པ། ཇི་ལྟར་སྣོད་དང་ཤིང་རྟ་དག །རེ་ཞིག་དུས་ཀྱི་བརྙན་པོ་ལྟར། །གཞན་དག་དབང་སྒྱུར་གང་ཡིན་པའི། །གནས་ཀྱང་དེ་དང་འདྲ་བ་ཡིན། །འདི་ནས་མི་ཐི་ལར་སོང་ལ། །དགེ་བ་མང་པོ་རྣམས་བྱ་སྟེ། །བསོད་ནམས་བྱས་ཤིང་འབྱོར་བྱས་ནས། །མཐོ་རིས་སུ་ནི་འགྲོ་བར་བྱ། །ཀུན་
དགའ་བོ་དེའི་ཚེ་དེའི་དུས་ན་རྒྱལ་པོ་ལྷ་ཆེན་པོ་ཞེས་བྱ་བ་གང་གིས་དགེ་བའི་ལམ་ངེས་པ་དེ་ལ་ཞུགས་ཤིང་། གང་དགེ་བའི་ལམ་ངེས་པ་ལ་ཞུགས་པ་ལ་བརྟེན་ནས་ལྷ་ཆེན་པོ་བརྒྱད་ཁྲི་བཞི་སྟོང་མི་ཐི་ལའི་ལྷ་ཆེན་པོའ་ཨ་མྲའི་ཚལ་འདི་ཉིད་དུ་རྒྱལ་པོའ་དྲང་སྲོང་གི་ཚངས་པར་སྤྱོད་པ་སྤྱད་པར་གྱུར་པ་བྱུང་བ་གང་ཡིན་པ་དེ་གཞན་ཡིན་པ་སྙམ་དུ་སེམས་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ཉིད་དེའི་ཚེ་དེའི་དུས་ན་རྒྱལ་པོ་ལྷ་ཆེན་པོ་ཞེས་བྱ་བར་གྱུར་ཏེ། ང་ཉིད་ཀྱིས་དགེ་བའི་ལམ་ངེས་པ་དེ་སྲོལ་བཏོད་ཅིང་དགེ་བའི་ལམ་ངེས་པ་སྲོལ་དོད་པ་ལ་བརྟེན་ནས་ལྷ་ཆེན་པོ་བརྒྱད་ཁྲི་བཞི་སྟོང་གིས་མི་ཐི་ལ་འདི་ཉིད་ན་ལྷ་ཆེན་པོའ་ཨ་མྲའི་ཚལ་འདི་ཉིད་དུ་རྒྱལ་པོའ་དྲང་སྲོང་གི་ཚངས་པར་སྤྱོད་པ་སྤྱད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་དེའི་ཚེ་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག དང་བཅས་པར་གྱུར་ཏེ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་མ་གྲོལ་ཞིང་སྡུག་བསྔལ་ལས་ཡོངས་སུ་མ་གྲོལ་ལོ་ཞེས་གསུང་ངོ་། །ཀུན་དགའ་བོ་ང་ནི་ང་འཇིག་རྟེན་དུ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་བྱུང་ནས་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་བས་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་གྲོལ་ཞིང་སྡུག་བསྔལ་ལས་ཡོངས་སུ་གྲོལ་ལོ་ཞེས་གསུང་ངོ་། །ཀུན་དགའ་བོ་ད་ལྟར་ན་ཡང་ངས་དགེ་བའི་ལམ་ངེས་པ་སྲོལ་བཏོད་པ་དེ་ལ་བརྟེན་ནས་སེམས་ཅན་སྐྱེ་བའི་ཆོས་ཅན་རྣམས་ནི་སྐྱེ་བའི་ཆོས་ཉིད་ལས་ཡོངས་སུ་གྲོལ་བར་འགྱུར། སེམས་ཅན་རྒ་བ་དང་། ན་བ་དང་། འཆི་
བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པའི་ཆོས་ཅན་རྣམས་ནི་འཁྲུག་པའི་ཆོས་ཉིད་ལས་ཡོངས་སུ་གྲོལ་བར་འགྱུར། ངས་དགེ་བའི་ལམ་ངེས་པ་ལ་ཞུགས་ཤིང་དགེ་བའི་ལམ་ངེས་པ་ལ་ཞུགས་པ་དེ་ལ་བརྟེན་ནས་སེམས་ཅན་སྐྱེ་བའི་ཆོས་ཅན་ནས་སེམས་ཅན་འཁྲུག་པའི་ཆོས་ཅན་གྱི་བར་དག་འཁྲུག་པའི་ཆོས་ཉིད་ལས་ཡོངས་སུ་གྲོལ་བར་འགྱུར་བ་དེ་གང་ཡིན་ཞེ་ན་འདི་ལྟ་སྟེ། འཕགས་པའི་ལམ་ཡན་ལག་བརྒྱད་པ་ཡིན་ཏེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏེ། འདི་ནི་ངས་དགེ་བའི་ལམ་ངེས་པ་ལ་ཞུགས། དགེ་བའི་ལམ་ངེས་པ་ལ་ཞུགས་པ་དེ་ལ་བརྟེན་ནས་སེམས་ཅན་སྐྱེ་བའི་ཆོས་ཅན་ནས་གོང་མ་བཞིན་དུ་འཁྲུག་པའི་ཆོས་ཉིད་ལས་ཡོངས་སུ་གྲོལ་བར་འགྱུར་བའི་བར་ཡིན་ནོ། །ཀུན་དགའ་བོ་ཁྱོད་ཀྱིས་ཀྱང་དེ་བཞིན་དུ་དགེ་བའི་ལམ་ངེས་པ་སྲོལ་དོད་པ་དེ་ལྟ་བུའི་རྗེས་བསབ་པར་བྱའི་རྒྱུན་ཆད་པར་མ་བྱེད་ཅིག །སྐྱེས་བུ་ཐ་ཤལ་དུ་གྱུར་པར་མ་བྱེད་ཅིག །ཀུན་དགའ་བོ་གང་ལ་ལ་དེ་ལྟ་བུའི་ཉན་ཐོས་བཟང་པོ་རྒྱུད་དུ་བྱུང་བའི་དགེ་བའི་ལམ་ངེས་པ་སྲོལ་དོད་པ་དེ་ལྟ་བུའི་རྗེས་མི་འཚོབ་པ་དེ་ནི་དེ་རྣམས་ཀྱི་རྒྱུན་གཅོད་པ་ཡིན་ཞིང་། དེ་དེ་རྣམས་ཀྱི་སྐྱེས་བུ་ཐ་ཤལ་དུ་གྱུར་བ་ཡིན་ནོ། །དེ་བས་ན་ང་ཁྱོད་ལ་འདི་སྐད་དུ་ཅི་ནས་ཀྱང་ཁྱོད་ཀྱིས་དེ་ལྟ་བུའི་ཉན་ཐོས་བཟང་པོ་རྒྱུད་དུ་བྱུང་བའི་ལམ་ངེས་པ་སྲོལ་དོད་པ་དེ་ལྟ་བུ་དེའི་རྗེས་སོབས་ཤིག །རྒྱུན་ཆད་པར་མ་བྱེད་ཅིག །སྐྱེས་བུ་ཐ་ཤལ་དུ་གྱུར་པར་མ་བྱེད་ཅིག་ཅེས་སྨྲའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ལུས་འཕགས་གང་ན་བ་དེར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་ལུས་འཕགས་སུ་བྱོན་ནས་ལུས་འཕགས་
ཀྱི་ཕྱོགས་གཞན་ཞིག་ཏུ་འཛུམ་པ་མཛད་དོ་ཞེས་བྱ་བ་ནས་སངས་རྒྱས་བཞིའི་གདན་ཡིན་ནོ་ཞེས་བྱ་བ་དང་། སྐད་ཅིག་གཅིག་བཞུགས་ནས་ཞེས་བྱ་བ་རྒྱས་པར་གོང་མ་བཞིན་ནོ། །ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ས་ལ་གང་ན་བར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་སྤོང་བྱེད་ནས་ལྗོངས་རྒྱུ་ཞིང་གཤེགས་པ་དང་ས་ལར་བྱོན་ནས་ས་ལའི་བྲམ་ཟེའི་གྲོང་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོན་བཟའ་ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ཏེ་ས་ལར་བསོད་སྙོམས་ལ་ཞུགས་སོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་འདིས་ས་ལའི་བྲམ་ཟེའི་གྲོང་ན་འདུག་སྟེ། དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་ས་ལར་བསོད་སྙོམས་ལ་ཞུགས་ཀྱིས། མ་ལ་བདག་གིས་ས་ལའི་བྲམ་ཟེ་དང་ཁྱིམ་བདག་རྣམས་ཇི་ལྟར་དགེ་སྦྱོང་གཽ་ཏ་མས་ཇི་ལྟར་ལྷུང་བཟེད་བཀྲུས་ཏེ་ས་ལར་བསོད་སྙོམས་ལ་ཞུགས་པ་བཀྲུས་པ་དེ་ཁོ་ན་བཞིན་བསོད་སྙོམས་ཁམ་འགའ་ཡང་མ་རྙེད་པར་ཕྱིར་ལྡོག་པ་དེ་ལྟར་དེ་ལྟར་བྱིན་གྱིས་བརླབ་བོ་སྙམ་མོ། །དེ་ནས་བདུད་སྡིག་ཅན་གྱིས་ས་ལའི་བྲམ་ཟེ་དང་ཁྱིམ་བདག་རྣམས་ཇི་ལྟར་བཅོམ་ལྡན་འདས་ཀྱིས་ཇི་ལྟར་ལྷུང་བཟེད་པ་ཀྲུས་ཏེ་ས་ལར་བསོད་སྙོམས་ལ་ཞུགས་པ་བཀྲུས་པ་དེ་ཁོ་ན་བཞིན་དུ་བསོད་སྙོམས་ཁམ་འགའ་ཡང་མ་རྙེད་པར་སླར་བྱོན་པ་དེ་ལྟར་དེ་ལྟར་བྱིན་གྱིས་བརླབས་སོ། །དེ་ནས་བདུད་སྡིག་ཅན་གྱིས་བདག་ཉིད་བྲམ་ཟེའི་ཁྱེའུའི་ཆ་བྱད་དུ་མངོན་པར་སྤྲུལ་ནས་བཅོམ་ལྡན་འདས་ཀྱི་རྗེས་བཞིན་དུ་འབྲང་ཞིང་འདི་སྐད་ཅེས་ཀྱང་སྨྲས་སོ། །དགེ་སྦྱོང་བསོད་སྙོམས་ཁམ་འགའ་ཡང་མ་རྙེད་དམ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མ་ཉེ་བར་འོངས་པ་འདི་ནི་བདུད་སྡིག་ཅན་ཡིན་ཏེ། འདི་ལྟ་སྟེ་རྣམ་པར་དཀྲུག་པའི་ལས་བྱེད་དོ་སྙམ་དུ་ཐུགས་སུ་ཆུད་ནས་ཚིགས་སུ་བཅད་དེ་བཀའ་སྩལ་པ། དེ་བཞིན་གཤེགས་ལ་ཁྱད་བསད་པས། །ཁྱོད་ཀྱིས་
བསོད་རྣམས་མིན་མང་བསགས། །སངས་རྒྱས་རྣམས་ནི་བརྒལ་དཀའ་བར། །སྡིག་ཅན་ཅི་ག་མི་ཤེས་སམ། །དགེ་སྦྱོང་དེའི་ཕྱིར་སླར་ཡངས་ལར་བསོད་སྙོམས་ལ་བཞུད་ཅིག་དང་ཅི་ནས་ཀྱང་བསོད་སྙོམས་རྙེད་པ་དེ་ལྟར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། ང་ལ་ཅི་ཡང་མི་བདོག་པ། །ཀྱེ་མ་ཤིན་ཏུ་བདེར་འཚོ་སྟེ། །འོད་གསལ་ལྷ་རྣམས་ཇི་ལྟ་བར། །དགའ་བ་ཡི་ནི་ཟས་བཟའོ། །ང་ལ་ཅི་ཡང་མི་བདོག་པ། །ཀྱེ་མ་ཤིན་ཏུ་བདེར་འཚོ་སྟེ། །འཇིག་ཚོགས་ལྟ་ལ་མི་རྟེན་བས། །དགའ་བ་ཡི་ནི་ཟས་བཟའོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མའི་སེམས་ཀྱིས་བདག་གི་བསམ་པ་ཤེས་སོ་སྙམ་དུ་རིག་ནས་སྡུག་བསྔལ་དང་ཡིད་མི་བདེ་བ་དང་འགྱོད་པས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྲོན་པ་ཅན་གང་ན་བར་འདོང་ངོ་། །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་པ་ཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་ཁྲོན་པ་ཅན་དུ་བྱོན་ཏོ། །ཁྲོན་པ་ཅན་ན་བུད་མེད་གཞན་ཞིག་ཕྱང་ཐག་དང་ཆུ་དང་ཆུ་སྣོད་ཁྱེར་ཏེ་ཁྲོན་པའི་དྲུང་དུ་སོང་བ་དང་། སྐྱེས་པ་གཞན་ཞིག་དེ་ལ་ཆགས་པའི་ཀུན་ནས་དཀྲིས་པའི་སེམས་ཀྱིས་རྗེས་བཞིན་རྗེས་བཞིན་དུ་འབྲང་བ་དང་། དེ་ཡང་ལྷག་པར་དེ་ལ་ཆགས་པས་དེ་གཉིས་ཕན་ཚུན་དུ་འཐམ་ཞིང་ཁྲོན་པར་དོང་ངོ་། །དེའི་བུ་ཁྱེའུ་ཆུང་ངུ་མ་ཞིག་དེ་དང་ལྷན་ཅིག་ཕྱི་བཞིན་འབྲང་ཞིང་སོང་ངོ་། །དེ་ནས་དེ་སྐྱེས་པ་ལ་རྟོག་ཅིང་ཆུ་སྣོད་གཏང་ངོ་སྙམ་སྟེ། ཁྱེའུ་ཆུང་དུ་དེའི་མགུལ་ནས་ཐག་པས་བཏགས་ཏེ་བཏང་བ་ལས་ཤི་བར་གྱུར་ཏོ། །དེས་སྔོན་མ་ཐོས་པའི་ཚིགས་སུ་བཅད་པ་ཐོས་པ། འདོད་པ་ཁྱོད་རྩ་ངས་ཤེས་ཏེ། །རྟོག་པ་ལས་ནི་འདོད་པ་སྐྱེ། །ཁྱོད་ལ་རྟོག་པ་མ་བྱས་དང་། །དེ་ནས་ང་ལ་མི་འབྱུང་ངོ་། །བཅོམ་ལྡན་འདས་ཀྱང་ལམ་དེ་ནས་གཤེགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་
སྩལ་པ། ཀུན་དགའ་པོ་ཚིགས་སུ་བཅད་པ་འདི་ཟུང་ཤིག །ཚིགས་སུ་བཅད་པ་འདི་ནི་འདས་པའི་ཡང་དག་པར་རྫོགས་པའི་སངས་རྒྱས་ཀྱིས་གསུངས་པ་ཡིན་ཏེ། འདི་ནི་སོ་སོའ་སྐྱེ་བོའ་ལག་ཏུ་འོངས་པས་མི་སྣང་མི་གསལ། རྣམ་པར་མི་གསལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ངས་ཇི་ལྟར་སེམས་འདི་མྱུར་དུ་འགྱུར་བ་དེ་ལྟ་བུའི་ཆོས་ནི་གཅིག་ཀྱང་མ་མཐོང་ངོ་། །དེ་ནས་བུད་མེད་དེ་བུའི་མྱ་ངན་གྱིས་གདུང་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་པ་དང་། བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་དེ་དང་མཐུན་པའི་ཆོས་བཤད་པ་མཛད་དེ། དེ་ཐོས་པས་བུད་མེད་དེས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ལ་འདི་ལྟ་བུ་ནི་མས་མ་བགྱིས་ཏེ། ཕས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྔ་མ་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེ་རྣམས་ཀྱིས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས་པ་གང་ལགས་པ་བཅོམ་ལྡན་འདས་ཀྱིས་བདག་ལ་མཛད་དེ། བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་ངན་སོང་རྣམས་ཀྱི་སྒོ་ནི་བཀུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཞག །འཁོར་བ་ལས་ནི་ཐག་བསྲིངས། །ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ནི་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ནི་འཕགས་སོ། །མངོན་པར་འཕགས་སོ། །བདག་བཅོམ་ལྡན་འདས་དང་།
ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའ་བར་དུ་སྲོག་དང་ཡང་བསྔོས་ཏེ་སྐྱབས་སུ་མཆི་བར་མངོན་པར་དང་ལགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ང་བྱང་ཆུབ་སེམས་དཔར་གྱུར་པ་ན་ཕྱོགས་འདི་ཉིད་དུ་དྲང་སྲོང་ངན་སྤོང་གི་བུས་གདན་དང་རྩ་བ་དང་འབྲས་བུ་ལ་སྤྱན་དྲངས་སོ། །ཕྱོགས་གཞན་ཞིག་ཏུ་ཡང་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ང་བྱང་ཆུབ་སེམས་དཔར་གྱུར་པ་ན་རྒ་བ་ལ་སོགས་པས་ཡིད་བྱུང་སྟེ། ཕྱོགས་འདི་ཉིད་དུ་ལྷའི་དབང་པོ་བརྒྱ་བྱིན་རྔོན་པའི་ཆ་བྱད་དུ་བྱས་པ་ལ་ཀ་ཤིག་ཀའི་རས་ཕྲན་བྱིན་ནས་གོས་ངུར་སྨྲིག་བླངས་པ་ཡིན་ཏེ། བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་ངུར་སྨྲིག་བླངས་པ་ཞེས་བྱ་བའི་མཆོད་རྟེན་བརྩིགས་ཏེ། ད་དུང་དུ་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་བྱེད་དོ། །ལྷའི་དབང་པོ་བརྒྱ་བྱིན་གྱིས་ཀྱང་ཀ་ཤི་ཀའི་རས་ཕྲན་སུམ་བཅུ་རྩ་གསུམ་པའི་ལྷའི་ནང་དུ་ཁྱེར་ཏེ་བཞག་ནས་ཀ་ཤི་ཀའི་དུས་མཆོད་ཆེན་པོ་བཙུགས་ཏེ། ད་དུང་དུ་ཡང་དེ་ལ་སུམ་བཅུ་རྩ་གསུམ་པའི་ལྷ་དག་བྱ་བ་བྱེད་དོ། །ཕྱོགས་གཞན་ཞིག་ཏུ་ཡང་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོང་བྱང་ཆུབ་སེམས་དཔར་གྱུར་པ་ན་ཕྱོགས་འདིར་རལ་གྲི་ཨུཏྤ་ལ་སྔོན་པོ་འདྲ་བས་དབུ་སྐྲ་བྲེགས་ནས་སྟེང་གི་ནམ་མཁའ་ལ་འཕངས་པ་ཡིན་ཏེ། བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་དབུ་སྐྲ་བླངས་པ་ཞེས་བྱ་བའི་མཆོད་རྟེན་མ་རྩིགས་ཏེ། ད་དུང་དུ་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་བྱེད་དོ། །ལྷའི་དབང་པོ་བརྒྱ་བྱིན་གྱིས་ཀྱང་དབུ་སྐྲ་སུམ་བཅུ་རྩ་གསུམ་པའི་ལྷའི་ནང་དུ་ཁྱེར་ཏེ་བཞག་ནས་གཙུག་ཕུད་ཀྱི་དུས་མཆོད་ཆེན་པོ་བཙུགས་ཏེ། ད་དུང་དུ་ཡང་དེ་ལ་སུམ་བཅུ་རྩ་གསུམ་པའི་ལྷ་རྣམས་བྱ་བ་བྱེད་དོ། །ཕྱོགས་གཞན་ཞིག་ཏུ་ཡང་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཕྱོགས་འདིར་རྟའི་རྒྱལ་པོ་བསྔགས་ལྡན་འདུན་པས་བཀྲི་ནས་སླར་བཏང་བ་ཡིན་ཏེ། བྲམ་ཟེ་དང་
ཁྱིམ་བདག་དད་པ་ཅན་རྣམས་ཀྱིས་བསྔགས་ལྡན་སླར་བཏང་བ་ཞེས་བྱ་བའི་མཆོད་རྟེན་བརྩིགས་ཏེ། ད་དུང་དུ་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་བྱེད་དོ། །དེ་ནས་བཅོམ་ལྡན་འདས་ཡུལ་གནག་ལྷས་ཅན་དུ་བྱོན་ནས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གནག་ལྷས་ཅན་འདིར་རིགས་ཀྱི་བུ་འདུན་པ་བཙས་ནས་འདི་ཉིད་དུ་ཆེན་པོར་གྱུར་ཏོ། །དེ་ནས་བཅོམ་ལྡན་འདས་སྡིག་ཅན་དུ་བྱོན་ཏེ། སྡིག་ཅན་གྱི་གྱད་རྣམས་ཀྱིས་བཅོམ་ལྡན་འདས་སྡིག་ཅན་དུ་གཤེགས་སོ་ཞེས་ཐོས་སོ། །ཐོས་ནས་ཀྱང་རྒན་རབས་རྒན་རབས་ནམས་ཀྱིས་སྨྲས་པ། གཞོན་ནུ་གང་ཡིན་པ་དེ་དག་གིས་ནི་ལམ་བཟང་པོར་བྱོས་ཤིག །བདག་ཅག་གིས་ནི་གྲོང་ཁྱེར་བཟང་པོར་བྱའོ། །དེ་ནས་གཞོན་ནུ་རྣམས་ཀྱིས་ལམ་བཟང་པོར་བྱ་བར་བརྩམས་པ་ན། དེ་རྣམས་ཀྱིས་ཕ་བོང་ཞིག་མཐོང་ནས་དེ་རྣམས་ཀྱིས་དེ་དོར་བར་བརྩམས་པ་ལས་དོར་བར་མ་ནུས་སོ། །བཅོམ་ལྡན་འདས་ཀྱང་ཕྱོགས་དེ་ཉིད་དུ་གཤེགས་ནས་བཀའ་སྩལ་པ། གནས་འཇོག་དག་འདི་ཅི་བྱ། བཅོམ་ལྡན་འདས་ཀྱི་སླད་དུ་ཤུལ་བཟང་པོར་བགྱི་ལགས་ན་ཕ་བོང་འདི་དོར་བར་རྔོ་མ་ཐོག་གོ །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་ལྟ་ན་ངས་དོར་རམ། བཅོམ་ལྡན་འདས་དོར་དུ་གསོལ། དེ་ནས་བཅོམ་ལྡན་འདས་ཀྱི་ཞབས་གཡས་པའི་མཐེ་བོས་ཕ་བོང་སྟེང་གི་ནམ་མཁའ་ལ་འཕགས་ཏེ་མིག་རྒྱང་གིས་ཀྱང་མི་སོད་པར་བོར་བ་དང་དེའི་སྒྲས་གྱད་རྣམས་སྡངས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། གནས་འཇོག་དག་མ་འཇིགས་ཤི། །དེ་ནས་བཅོམ་ལྡན་འདས་ཀྱི་རྫུ་འཕྲུལ་གྱི་སྟོབས་ཀྱིས་ཕ་བོང་དེ་ཕྱེ་མར་བརླགས་ནས་རྡུལ་འབབ་པར་བརྩམས་སོ། །གྱད་རྣམས་ཀྱིས་གསོལ་པ། བཅོམ་ལྡན་འདས་རྡུལ་ག་ལས་འབབ་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པས་བོང་དེ་ཕྱེ་མར་བརླགས་པ་ཡིན་ནོ། །བཅོམ་ལྡན་འདས་མ་ལེགས་པ་ཞིག་བགྱིས་སོ། །
ཅི་སླར་མཚམས་སྦྱར་རམ། བཅོམ་ལྡན་འདས་སླར་མཚམས་སྦྱར་དུ་གསོལ། དེ་ནས་བཅོམ་ལྡན་འདས་ཀྱིས་མོས་པའི་སྟོབས་ཀྱིས་སླར་སྦྱར་ནས་གནས་ཇི་ལྟ་བ་བཞིན་དུ་བཞག་སྟེ། བཅོམ་ལྡན་འདས་ཀྱང་དེ་ཉིད་ན་བཞུགས་སོ། །གྱད་ལྔ་བརྒྱ་པོ་དེ་དག་ཀྱང་དེ་ཉིད་དུ་ཚོགས་ནས་གསོལ་པ། བཅོམ་ལྡན་འདས་བཅོམ་ལྡན་འདས་ཀྱིས་ཕ་བོང་དེ་སྟོབས་གང་གིས་འཕངས་ལགས། བཅོམ་ལྡན་འདས་ཀྱིས་བཀའ་སྩལ་པ། གནས་འཇོག་དག་ཡབ་དང་ཡུམ་ལས་བྱུང་བའི་སྟོབས་ཀྱིས་སོ། །དེ་རྣམས་ཀྱིས་གསོལ་པ། སྟོབས་གང་གིས་ཕྱེ་མར་བརླགས་ལགས། བཅོམ་ལྡན་འདས་ཀྱིས་བཀའ་སྩལ་པ། རྫུ་འཕྲུལ་གྱི་སྟོབས་ཀྱིས་སོ། །གང་གིས་སླར་མཚམས་སྦྱར་ལགས། མོས་པའི་སྟོབས་ཀྱིས་སོ། །བཅོམ་ལྡན་འདས་ཀྱི་ཡབ་དང་ཡུམ་ལས་བྱུང་བའི་སྟོབས་ཀྱི་ཚད་ཇི་ཙམ་ལགས། གནས་འཇོག་དག་མི་བཅུའི་སྟོབས་གང་ཡིན་པ་དེ་ནི་གླང་ཕལ་པ་གཅིག་གི་ཡིན་ནོ། །གླང་ཕལ་པ་བཅུའི་སྟོབས་གང་ཡིན་པ་དེ་ནི་བ་མེན་སྔོན་པོ་གཅིག་གི་ཡིན་ནོ། །བ་མེན་སྔོན་པོ་བཅུའི་སྟོབས་གང་ཡིན་པ་དེ་ནི་གླང་པོ་ཆེ་ཕྲུ་གུ་གཅིག་གི་ཡིན་ནོ། །གླང་པོ་ཆེ་ཕྲུ་གུ་བཅུའི་གང་ཡིན་པ་དེ་ནི་གླང་པོ་ཆེ་མོ་གཅིག་གི་ཡིན་ནོ། །གླང་པོ་ཆེ་མོ་བཅུའི་གང་ཡིན་པ་དེ་ནི་གླང་པོ་ཆེ་ཕལ་གཅིག་གི་ཡིན་ནོ། །གླང་པོ་ཆེ་ཕལ་བཅུའི་གང་ཡིན་པ་དེ་ནི་གླང་པོ་ཆེ་མཆེ་བ་མེད་གཅིག་གི་ཡིན་ནོ། །གླང་པོ་ཆེ་མཆེ་བ་མེད་བཅུའི་གང་ཡིན་པ་དེ་ནི་སྔོན་པོ་གཅིག་གི་ཡིན་ནོ། །སྔོན་པོ་བཅུའི་གང་ཡིན་པ་དེ་ནི་སེར་པོ་གཅིག་གི་ཡིན་ནོ། །སེར་པོ་བཅུའི་གང་ཡིན་པ་དེ་ནི་དམར་པོ་གཅིག་གི་ཡིན་ནོ། །དམར་པོ་བཅུའི་གང་ཡིན་པ་དེ་ནི་དཀར་པོ་གཅིག་གི་ཡིན་ནོ། །དཀར་པོ་བཅུའི་གང་ཡིན་པ་དེ་ནི་འབིགས་བྱེད་ཀྱི་གླང་པོ་ཆེ་གཅིག་གི་ཡིན་ནོ། །འབིགས་བྱེད་ཀྱི་གླང་པོ་ཆེ་བཅུའི་གང་ཡིན་པ་དེ་ནི་སྤོས་ཀྱི་གླང་པོ་ཆེ་གཅིག་གི་ཡིན་ནོ། །སྤོས་ཀྱི་གླང་པོ་ཆེ་བཅུའི་གང་ཡིན་པ་དེ་ནི་ཚན་པོ་ཆེ་གཅིག་གི་ཡིན་ནོ། །ཚན་པོ་ཆེ་བཅུའི་གང་ཡིན་པ་དེ་ནི་ཚན་པོ་ཆེ་ཆེན་པོ་གཅིག་གི་ཡིན་ནོ། །ཚན་པོ་ཆེ་ཆེན་པོ་བཅུའི་གང་ཡིན་པ་དེ་ནི་རབ་གནོན་
གཅིག་གི་ཡིན་ནོ། རབ་གནོན་བཅུའི་གང་ཡིན་པ་དེ་ནི་སྟོབས་མཆོག་གཅིག་གི་ཡིན་ནོ། །སྟོབས་མཆོག་བཅུའི་གང་ཡིན་པ་དེ་ནི་སྲེད་མེད་ཀྱི་བུའི་སྟོབས་ཕྱེད་དོ། །སྲེད་མེད་ཀྱི་བུའི་སྟོབས་ཕྱེད་གཉིས་གང་ཡིན་པ་དེ་ནི་སྲེད་མེད་ཀྱི་བུའི་སྟོབས་ཡིན་ཏེ། དེ་དེ་བཞིན་གཤེགས་པའི་ཚིགས་ཕྲན་དག་ན་ཡོད་པས་གནས་འཇོག་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྲེད་མེད་ཀྱི་བུའི་སྟོབས་ཀྱི་ཚོགས་ཅན་ཡིན་ནོ། །བར་སྡོམ་ལ། མི་དང་གླང་དང་བ་མེན་དང་ནི་དེ་བཞིན་གླང་ཆེན་ཕྲུ་གུ་དང་། །གླང་ཆེན་མོ་དང་ཕལ་དང་མཆེ་བ་མེད་དང་དེ་བཞིན་བཞི་ཚན་དང་། །འབིགས་བྱེད་གླང་ཆེན་སྦོས་ཀྱི་གླང་ཆེན་དང་ནི་ཚན་པོ་ཆེ་གཉིས་དང་། །རབ་གནོན་དང་ནི་སྟོབས་མཆོག་དག་དང་སྲེད་མེད་བུ་ཡི་སྟོབས་གཉིས་སོ། །སྲེད་མེད་ཀྱི་བུའི་སྟོབས་གང་ལགས་པ་འདི་དེ་བཞིན་གཤེགས་པའི་ཡབ་དང་ཡུམ་ལས་བྱུང་བའི་སྟོབས་ལགས་ན། བཙུན་པ་ཡབ་དང་ཡུམ་ལས་བྱུང་བའི་སྟོབས་དང་ཏིང་ངེ་འཛིན་གྱི་སྟོབས་དང་། མོས་པའི་སྟོབས་ལས་སྟོབས་གཞན་མཆིས་ལགས་སམ། གནས་འཇོག་དག་ཡོད་དེ། འདི་ལྟ་སྟེ་བསོད་ནམས་ཀྱི་སྟོབས་ཞེས་བྱ་བ་ཡིན་ཏེ། གནས་འཇོག་དག་བསོད་ནམས་ཀྱི་སྟོབས་དང་ལྡན་པས་དེ་བཞིན་གཤེགས་པས་བྱང་ཆུབ་ཀྱི་ཤིང་དྲུང་དུ་བདུད་འཁོར་འབྱུང་པོ་བྱེ་བ་སུམ་བཅུ་རྩ་དྲུག་ཅན་བཅོམ་ནས་བླ་ན་མེད་པའི་ཡེ་ཤེས་བརྙེས་སོ། །བཙུན་པ་ཡབ་དང་ཡུམ་ལས་བྱུང་བའི་སྟོབས་དང་། ཏིང་ངེ་འཛིན་གྱི་སྟོབས་དང་། མོས་པའི་སྟོབས་དང་། བསོད་ནམས་ཀྱི་སྟོབས་འདི་བས་ལྷག་པའི་སྟོབས་གཞན་ལྟ་མཆིས་ལགས་སམ། གནས་འཇོག་དག་ཡོད་དེ། འདི་ལྟ་སྟེ་ཡེ་ཤེས་ཀྱི་སྟོབས་ཞེས་བྱ་བ་ཡིན་ཏེ། ཡེ་ཤེས་ཀྱི་སྟོབས་དང་ལྡན་པས་དེ་བཞིན་གཤེགས་པས་ཐོག་མ་མེད་པའི་དུས་ནས་བསགས་པའི་ཉོན་མོངས་ཚོགས་བོར་སྤངས་བསལ་ཏེ་སོ་སོར་སྤངས་སོ། །བཙུན་པ་ཡབ་དང་ཡུམ་ལས་བྱུང་བའི་སྟོབས་དང་ཏིང་ངེ་འཛིན་གྱི་སྟོབས་དང་། མོས་པའི་སྟོབས་དང་། བསོད་ནམས་ཀྱི་སྟོབས་
དང་། ཡེ་ཤེས་ཀྱི་སྟོབས་འདི་བས་ལྷག་པའི་སྟོབས་གཞན་ལྟ་མཆིས་ལགས་སམ། གནས་འཇོག་དག་ཡོད་དེ། འདི་ལྟ་སྟེ་རྫུ་འཕྲུལ་གྱི་སྟོབས་ཞེས་བྱ་བ་ཡིན་ཏེ། གནས་འཇོག་དག་རྫུ་འཕྲུལ་གྱི་སྟོབས་དང་ལྡན་པས་དེ་བཞིན་གཤེགས་པས་འོད་སྲུང་རྫོགས་བྱེད་ལ་སོགས་པ་སྟོན་པ་དྲུག་པོ་ཐམས་ཅན་མཁྱེན་པ་མ་ཡིན་པར་ཐམས་ཅན་མཁྱེན་པར་མངོན་པའི་ང་རྒྱལ་བྱེད་པ་དག་སྤོབས་པ་མེད་པར་བྱས་སོ། །བཙུན་པ་འདི་ལྟར་ཡབ་དང་ཡུམ་ལས་བྱུང་བའི་སྟོབས་དང་ཏིང་ངེ་འཛིན་གྱི་སྟོབས་དང་། མོས་པའི་སྟོབས་དང་། བསོད་ནམས་ཀྱི་སྟོབས་དང་། ཡེ་ཤེས་ཀྱི་སྟོབས་དང་། རྫུ་འཕྲུལ་གྱི་སྟོབས་འདི་བས་ལྷག་པའི་སྟོབས་གཞན་ལྟ་མཆིས་ལགས་སམ། གནས་འཇོག་དག་ཡོད་དེ། འདི་ལྟ་སྟེ་མི་རྟག་པའི་སྟོབས་ཞེས་བྱ་བ་ཡིན་ཏེ། གནས་འཇོག་དག་མི་རྟག་པའི་སྟོབས་དང་ལྡན་པས་དེ་བཞིན་གཤེགས་པའི་ཡབ་དང་ཡུམ་ལས་བྱུང་བའི་སྟོབས་གང་ཡིན་པ་དང་། བསོད་ནམས་ཀྱི་སྟོབས་གང་ཡིན་པ་དང་། ཏིང་ངེ་འཛིན་གྱི་སྟོབས་གང་ཡིན་པ་དང་། མོས་པའི་སྟོབས་གང་ཡིན་པ་དང་། ཡེ་ཤེས་ཀྱི་སྟོབས་གང་ཡིན་པ་དང་། རྫུ་འཕྲུལ་གྱི་སྟོབས་གང་ཡིན་པ་དེ་དག་ཐམས་ཅན་ཤིང་སཱ་ལ་ཟུང་གི་བར་དུ་གཟི་མེད་པར་འགྱུར་རོ། ཚིགས་སུ་བཅད་དེ་ཡང་བཀའ་སྩལ་པ། ཡེ་ཤེས་སྟོབས་དང་བསོད་ནམས་སྟོབས་དང་ནི། །རྫུ་འཕྲུལ་སྟོབས་དང་སྐུ་ཡི་སྟོབས་པས་ཀྱང་། །ང་ཡི་གཟི་འརྗིད་འཇོམས་པར་བྱེད་པ་ཡི། །མི་རྟག་ཉིད་ནི་ཆེས་སྟོབས་ལྡན་པར་འདོད། །གང་དུ་གསེར་གྱི་རི་དབང་རྩེ་མོ་ལྟ་བུར་འདུག་པའི་སྐུ། །འདི་འདྲ་མི་རྟག་ཉིད་ཀྱི་གཟི་ཡིས་བཅོམ་ནས་འཇིག་འགྱུར་བ། །མི་རྟག་ཤིན་ཏུ་སྟོབས་དང་ལྡན་པར་མཁས་པས་ཤེས་བྱ་སྟེ། །གང་དུ་མེ་རྟག་ཉིད་ཀྱིས་རྗི་བ་མེད་པ་དེ་ཐོབ་བྱ།། །།འདུལ་བ་གཞི། བམ་པོ་སུམ་བཅུ་པ། གནས་འཇོག་དག་ད་ལྟར་གྱི་མི་རྣམས་ཚེ་དང་། ཁ་དོག་དང་། སྟོབས་དང་། ལོངས་སྦྱོད་ཀྱི་བར་དག་ཉམས་པ་ལ་ལྟོས། རྡོ་འདི་ནི་བསྐལ་པ་དང་པོའ་མི་རྣམས་ཀྱི་ཕང་
ཚད་ཀྱི་རྡོ་ཡིན་ཏེ། འདི་ལ་ལག་རྗེས་ཀྱང་སྣང་ངོ་། །དེ་རྣམས་ཤིན་ཏུ་ཡ་མཚན་སྐྱེས་ནས་དེ་རྣམས་ཀྱི་སྟོབས་ཀྱི་དྲེགས་པ་གང་ཡིན་པ་དེ་མེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་གྱད་དེ་རྣམས་ཀྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་དེ་དང་མཐུན་པའི་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་བཤད་པ་མཛད་དེ། དེ་ཐོས་ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་རྣམས་ཀྱིས་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་འདི་ལྟ་བུ་ནི་བདག་ཅག་ལ་མས་མ་བགྱིས་ཏེ། ཕས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྔོན་གྱི་འདས་པས་མ་ལགས། དགེ་སྦྱོང་དང་བྲམ་ཟེས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས་པ་གང་ལགས་པ་བདག་ཅག་ལ་མཛད་དེ། བདག་ཅག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་གནས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཀོད། འཁོར་བ་ལས་ནི་རིང་དུ་མཛད། ཐོག་མ་མེད་པ་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ཅག་ནི་འཕགས་སོ། །མངོན་པར་འཕགས་སོ། །དེ་ལྟ་བས་ན་བདག་ཅག་ནི་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའ་བར་དུ་སྲོག་དང་ཡང་བསྔོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཀུ་ཤའི་གྲོང་ཁྱེར་གང་ན་བར་འདོང་ངོ་། །བཙུན་པ་བཀའ་བཞིན་འཚལ་
ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །དེ་ནས་བཅོམ་ལྡན་འདས་གྲོང་ཁྱེར་སྡིག་ཅན་དུ་མ་བཞུད་པར་ཀུ་ཤའི་གྲོང་ཁྱེར་གང་ན་བར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་ཀུ་ཤའི་གྲོང་ཁྱེར་དུ་བྱོན་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཀུ་ཤའི་གྲོང་ཁྱེར་འདིར་ཤིང་སཱ་ལ་ཟུང་གི་བར་དུ་རིང་པོ་མི་ཐོགས་པ་ཁོ་ནར་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ། །