ང་ལས་ནུའི་སྡེ་སྡེ་ཚན།
བར་སྡོམ་ལ། ང་ལས་ནུ་དང་ལེགས་མཐོང་ཆེ། །དུས་དཔོག་ཀུ་ཤ་གདོལ་པ་དང་། །ལྷ་ཆེན་པོ་དང་མུ་ཁྱུད་རྒྱལ། །མེ་ལོང་གདོང་དང་ནོར་བཟངས་དང་། །ཐམས་ཅད་སྒྲོལ་དང་འདུམ་བྱེད་དོ། །རྒྱལ་པོ་ཆེན་པོ་སྔོན་བྱུང་བ་སྐྱེ་དགུ་རྣམས་ཀྱི་ཚེ་ལོ་དཔག་ཏུ་མེད་པ་ན་རྒྱལ་པོ་གསོ་སྦྱོང་འཕགས་ཞེས་བྱ་བ་བྱུང་བར་གྱུར་ཏེ། དེའི་སྤྱི་བོར་ཤ་རྨེན་འཇམ་ཞིང་ཤིན་ཏུ་འཇམ་པ་ཞིག་སྐྱེས་པ་དཔེར་ན་ཤིང་བལ་གྱི་འདའ་བའམ། རས་བལ་གྱི་འདའ་བ་ལྟ་བུར་གནོད་པ་
ཅུང་ཟད་ཀྱང་མི་སྐྱེད་དོ། །དེ་ཡོངས་སུ་སྨིན་ནས་རྡོལ་བ་ལས་གཞོན་ནུ་གཟུགས་བཟང་པོ་མཛེས་པ། བལྟ་ན་སྡུག་པ། པགས་པའི་མདོག་གསེར་འདྲ་བ། མགོ་གདུགས་ལྟར་འདུག་པ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། ཡན་ལག་དང་ཉིང་ལག་ཐམས་ཅད་དང་ལྡན་པ། སྐྱེས་བུ་ཆེན་པོའ་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པའི་ལུས་དང་ལྡན་པ་ཞིག་བྱུང་ངོ་། །བྱུང་མ་ཐག་ཏུ་བཙུན་མོའ་འཁོར་གྱི་ནང་དུ་བཀྲི་བ་དང་། རྒྱལ་པོ་གསོ་སྦྱོང་འཕགས་ཀྱི་བཙུན་མོ་བརྒྱད་ཁྲིས་གཞོན་ནུ་མཐོང་ནས་ནུ་མ་རྣམས་ལས་འོ་མ་ཟགས་པ་དང་། བུད་མེད་རེ་རེས་ཀྱང་ང་ལས་ནུ་ང་ལས་ནུ་ཞེས་སྨྲས་པས་དེའི་མིང་ང་ལས་ནུ་ང་ལས་ནུ་ཞེས་བྱ་བར་གྱུར་ཏོ། །གཞན་དག་ན་རེ་འདི་སྤྱི་བོ་ལས་སྐྱེས་པས་དེའི་ཕྱིར་གཞོན་ནུའི་མིང་སྤྱི་བོ་སྐྱེས་ཞེས་བྱའོ་ཞེས་ཟེར་ཏོ། །དེ་ན་ཁ་ཅིག་གིས་ནི་ང་ལས་ནུ་ཞེས་བྱ་བར་ཤེས་སོ། །ཁ་ཅིག་གིས་ནི་སྤྱི་བོ་སྐྱེས་ཞེས་བྱ་བར་ཤེས་སོ། །གཞོན་ནུ་ང་ལས་ནུ་གཞོན་ནུའི་རྩེད་མོས་རྩེ་བ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རྒྱལ་ཚབ་ལ་གནས་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །གཞོན་ནུ་ང་ལས་ནུ་ཡུལ་ཞིག་ཏུ་སོང་སྟེ། དེ་ཡུལ་དུ་ཕྱིན་པ་དང་རྒྱལ་པོ་གསོ་སྦྱོང་འཕགས་ན་བར་གྱུར་ནས་དེ་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་གྱིས་སྙེན་བཀུར་བྱས་ན་ཡང་ཕྱིར་ཐུ་བ་ཁོ་ནར་གྱུར་ནས་དེས་བློན་པོ་རྣམས་ལ་བསྒོ་བ། ཤེས་ལྡན་དག་མྱུར་དུ་གཞོན་ནུ་ལ་རྒྱལ་སྲིད་ཀྱི་དབང་བསྐུར་བས་དབང་བསྐུར་ཅིག །ལྷ་བཀའ་བཞིན་འཚལ་ཞེས་བློན་པོ་རྣམས་ཀྱིས་ཕོ་ཉ་བཀུག་སྟེ་རྒྱལ་པོ་གསོ་སྦྱོང་འཕགས་བསྙུང་ནས། དེས་གཞོན་ནུ་སྤྱན་དྲོངས་ལ་རྒྱལ་སྲིད་ཀྱི་དབང་བསྐུར་བ་ཉམས་སུ་མྱོང་བར་གྱིས་ཤིག་ཅེས་བཀའ་སྩལ་གྱིས། གཞོན་ནུ་མྱུར་དུ་བྱོན་པའི་རིགས་སོ་ཞེས་སྤྲིང་ངོ་། །དེ་ཆས་པ་དང་རྒྱལ་པོ་གསོ་སྦྱོང་འཕགས་ཤིའོ། །དེ་ནས་བློན་པོ་དག་གིས་ཡང་ཕོ་ཉ་གཞན་ཞིག་གཏོང་བ་ལ་གཞོན་ནུ་ཁྱོད་ཀྱི་ཡབ་ནི་ནོངས་ཀྱིས། ཚུར་སྦྱོན་རྒྱལ་སྲིད་བཞེས་ཤིག་ཅེས་སྤྲིང་ངོ་། །གཞོན་ནུ་ང་ལས་ནུས་བསམས་པ། གལ་ཏེ་བདག་གི་ཡབ་ནོངས་ན། དེར་སོང་ཡང་ཅི་ཕན་སྙམ་དུ་བསམས་ནས་དེ་ཉིད་ན་འདུག་གོ །བློན་པོ་རྣམས་ཡང་འདུས་ནས་བློན་པོ་ཞིག་ཕོ་ཉར་བཏང་
བ་དང་དེར་སོང་ནས་སྨྲས་པ། གཞོན་ནུ་རྒྱལ་སྲིད་བཞེས་ཤིག དེས་སྨྲས་པ། གལ་ཏེ་ཁོ་བོས་ཆོས་དང་མཐུན་པས་རྒྱལ་སྲིད་འཐོབ་པར་འགྱུར་ན་རྒྱལ་སྲིད་ཀྱི་དབང་བསྐུར་བ་འདི་ཉིད་དུ་འོང་བར་འགྱུར་རོ། །བློན་པོ་རྣམས་ཀྱིས་སྤྲིང་བ། ལྷ་རྒྱལ་སྲིད་ཀྱི་དབང་བསྐུར་བ་ལ་ནི་མང་དུ་འཚལ་ཏེ། རིན་པོ་ཆེའི་གཅལ་དང་། སེང་གེའི་ཁྲི་དང་། གདུགས་དང་། ཅོད་པན་དང་། དཔུང་རྒྱན་གྱིས་ཕོ་བྲང་གི་ནང་དུ་རྒྱལ་སྲིད་ཀྱི་དབང་བསྐུར་བར་བགྱི་འཚལ་བས་དེ་ལྟ་བས་ན་གཞོན་ནུ་འདི་ཉིད་དུ་བྱོན་པའི་རིགས་སོ། །དེས་སྨྲས་པ། ངས་ཆོས་དང་མཐུན་པར་རྒྱལ་སྲིད་འཐོབ་པ་ལྟ་ན་ཐམས་ཅད་འདི་ཉིད་དུ་འོང་བར་འགྱུར་རོ། །གཞོན་ནུ་ང་ལས་ནུའི་མདུན་ནས་འགྲོ་བ་གནོད་སྦྱིན་ལྷ་གནས་ཞེས་བྱ་བ་དེས་རིན་པོ་ཆེའི་གཅལ་དང་། སེང་གེའི་ཁྲི་དེ་ཉིད་དུ་བླངས་སོ། །ཕོ་བྲང་ན་གནས་པ་རྣམས་ཀྱིས་ཀྱང་གདུགས་དང་། ཅོད་པན་དང་། དཔུང་རྒྱན་ཁྱེར་ནས་རང་དེ་ཉིད་དུ་ལྷགས་ཏེ། ཕོ་བྲང་འཁོར་བ་རང་ལྷགས་པས་གནས་དེའི་མིང་གནས་བཅས་གནས་བཅས་ཞེས་བྱ་བར་གྲགས་སོ། །ཕྱིས་བློན་པོ་དེ་རྣམས་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་རྣམས་ཀྱིས་ནི་དབང་བསྐུར་བ་ཁྱེར་ཏེ་དོང་ནས་དེ་རྣམས་ཀྱིས་སྨྲས་པ། ལྷ་དབང་བསྐུར་བ་བཞེས་སུ་གསོལ། དེས་སྨྲས་པ། ང་མི་རྣམས་ཀྱིས་ཅོད་པན་བཅིང་ངམ། གལ་ཏེ་ཆོས་ཀྱི་རྒྱལ་སྲིད་འཐོབ་ན་མི་མ་ཡིན་པ་རྣམས་ཀྱིས་ཅོད་པན་འཆིང་གྲང་། ཇི་ཙམ་ན་དེ་མི་མ་ཡིན་པ་རྣམས་ཀྱིས་ཅོད་པན་བཅིངས་པ་དང་། དེའི་རིན་པོ་ཆེ་སྣ་བདུན་བྱུང་བ་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཉིད་དོ། །དེ་ལ་བུ་དཔའ་བ་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པར་བྱེད་པ་སྟོང་ཡང་ཚང་བར་བྱུང་ངོ་། །ཡངས་པ་ཅན་གྱི་ཉེན་ཀོར་ན་ནགས་ཚལ་སྟུག་པོ་དག་དགའ་དགའ་ལྟར་འདུག་པ་ཞིག་ཡོད་པ་དེ་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལྔ་བརྒྱ་བསམ་གཏན་བྱེད་དོ། །ནགས་ཚལ་སྟུག་པོ་དེ་ན་ཡང་བྱ་གར་རབ་ཏུ་མང་པོ་དག་ཅིག་ཀྱང་གནས་སོ། །བསམ་གཏན་གྱི་ཚེར་མ་ནི་
སྒྲ་ཡིན་པས་བྱ་གར་རྣམས་ལྡིང་ཞིང་སྐད་འབྱིན་པར་བྱེད་པ་དང་། དེ་ནས་དྲང་སྲོང་རང་བཞིན་ངན་ཞེས་བྱ་བ་ཞིག་ཡོད་པ་དེ་འཁྲུགས་ནས་དེས་བྱ་གར་རྣམས་ལ་འདབ་གཤོག་རྣམས་ལྷགས་པར་ཤོག་ཤིག་ཅེས་དམོད་པ་བོར་རོ། །དེ་རྣམས་དྲང་སྲོང་འཁྲུགས་པས་འདབ་གཤོག་རྣམས་ལྷགས་པར་གྱུར་ཏོ། །དེ་ནས་དེ་རྣམས་རྐང་པས་འགྲོ་བར་བརྩམས་པ་དང་། རྒྱལ་པོ་དེ་ཡང་ལྗོངས་རྒྱུར་སོང་བས་བྱ་གར་རྣམས་རྐང་པས་འགྲོ་བ་མཐོང་ངོ་། །དེ་ནས་དེས་བློན་པོ་རྣམས་ལ་དྲིས་པ་ཅིའི་ཕྱིར་བྱ་གར་འདི་རྣམས་རྐང་པས་འགྲོ་བར་འགྱུར། བློན་པོ་རྣམས་ཀྱིས་སྨྲས་པ། ལྷ་བསམ་གཏན་གྱི་ཚེར་མ་ནི་སྒྲ་ལགས་པས་དྲང་སྲོང་འཁྲུགས་པ་དག་གིས་འདི་རྣམས་ལ་དམོད་པ་བོར་བ་དང་། དེ་ནས་དྲང་སྲོང་འཁྲུགས་པས་འདི་རྣམས་ཀྱི་འདབ་གཤོག་རྣམས་ལྷགས་པར་གྱུར་ཏོ། །དེ་ནས་རྒྱལ་པོས་སྨྲས་པ། གང་དག་སེམས་ཅན་རྣམས་ལ་སྙིང་བརྩེ་བ་མེད་པའི་དྲང་སྲོང་འདི་ལྟ་བུ་ཡང་ཡོད་པ་ལྟ་ཞེས་སྨྲས་ནས། ཤེས་ལྡན་དག་དེང་ལ་དྲང་སྲོང་རྣམས་ལ་ཁྱེད་ཅག་ངའི་ཡུལ་ན་མ་འདུག་ཤིག་ཅེས་སྒོ་ཤིག་ཅེས་སྨྲས་སོ། །དེ་ནས་བློན་པོ་རྣམས་དྲང་སྲོང་གི་ཐད་དུ་དོང་ནས་བསྒོ་བ། རྒྱལ་པོའ་ཞལ་ནས་ཁྱེད་ཅག་ངའི་ཡུལ་ན་མ་འདུག་ཤིག་ཅེས་བཀའ་སྩལ་ཏོ། །དྲང་སྲོང་རྣམས་ཀྱིས་བསམས་པ། རྒྱལ་པོ་འདི་ནི་གླིང་བཞི་ལ་དབང་བ་ཡིན་པས་རི་རབ་ཀྱི་བང་རིམ་དུ་འགྲོའོ་སྙམ་ནས། དེ་རྣམས་དེར་དོང་སྟེ་གནས་སོ། །རྒྱལ་པོ་ང་ལས་ནུའི་མི་རྣམས་ནི་སེམས་པར་བྱེད་པ་དང་། འཇལ་བར་བྱེད་པ་དང་། ཉེ་བར་རྟོག་པར་བྱེད་པ་ཡིན་ཏེ། དེ་དག་གིས་བསམས་ཤིང་ཉེ་བར་བརྟགས་ནས་བཟོའ་གནས་དང་ལས་ཀྱི་གནས་ཐ་དད་པ་རྣམས་བྱ་བར་བརྩོན་པས་དེ་རྣམས་སེམས་པར་བྱེད་པ་དང་། འཇལ་བར་བྱེད་པ་དང་། ཉེ་བར་རྟོག་པར་བྱེད་པ་ཡིན་པའི་ཕྱིར་མིང་ཤེད་ལས་སྐྱེས་ཤེད་ལས་སྐྱེས་ཞེས་བྱ་བར་གྲགས་སོ། །དེ་རྣམས་ཀྱིས་ཞིང་ལས་དག་བྱ་བར་བརྩམས་པ་དང་། རྒྱལ་པོ་ལྗོངས་རྒྱུར་སོང་བས་མི་དེ་རྣམས་ཞིང་ལས་དག་བྱེད་པར་མཐོང་ནས་དེས་བློན་པོ་རྣམས་ལ་སྨྲས་པ། མི་འདི་རྣམས་ཅི་ཞིག་བྱེད། བློན་པོ་རྣམས་ཀྱིས་སྨྲས་པ། ལྷ་སྨན་དུ་འགྱུར་བར་བགྱི་བའི་སླད་དུ་ལོ་ཐོག་ལ་སོགས་པ་སྐྲུན་པ་ལགས་སོ། །རྒྱལ་པོས་སྨྲས་པ། ཅི་བདག་གི་རྒྱལ་སྲིད་ཀྱི་མི་རྣམས་ཞིང་ལས་
བྱེད་དམ། དེ་ནས་དེས་སྨྲས་པ། ལྷས་ས་བོན་གྱི་རིགས་ཉི་ཤུ་རྩ་བདུན་གྱི་ཆར་ཕོབ་ཤིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་ས་བོན་གྱི་རིགས་ཉི་ཤུ་རྩ་བདུན་གྱི་ཆར་ཕབ་བོ། །རྒྱལ་པོ་ང་ལས་ནུས་ཡུལ་མི་རྣམས་ལ་དྲིས་པ། འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །ཡང་མི་དེ་རྣམས་རས་བལ་གྱི་ཞིང་རྨོ་བར་བརྩམས་པ་དང་། ཡང་རྒྱལ་པོ་ང་ལས་ནུ་ལྗོངས་རྒྱུར་སོང་བས་མཐོང་ནས། དེས་བློན་པོ་རྣམས་ལ་སྨྲས་པ། མི་འདི་རྣམས་ཅི་ཞིག་བྱེད། བློན་པོ་རྣམས་ཀྱིས་སྨྲས་པ། ལྷ་མི་འདི་རྣམས་ནི་རས་བལ་གྱི་ཞིང་རྨེད་ལགས་སོ། །རྒྱལ་པོས་སྨྲས་པ། ཅི་ཞིག་ཏུ་དགོས། དེ་རྣམས་ཀྱིས་སྨྲས་པ། ལྷ་གོས་བགྱི་བའི་སླད་དུའོ། །དེ་ནས་རྒྱལ་པོ་ང་ལས་ནུས་སྨྲས་པ། ཅི་ངའི་རྒྱལ་སྲིད་ཀྱི་མི་རྣམས་རས་བལ་གྱི་ཞིང་རྨེད་དམ། ལྷས་རས་བལ་ཁོ་ནའི་ཆར་ཕོབ་ཅིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་རས་བལ་ཁོ་ནའི་ཆར་ཕབ་བོ། །རྒྱལ་པོས་ཡུལ་མི་རྣམས་ལ་དྲིས་པ། འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །ཡང་མི་དེ་རྣམས་རས་བལ་དེ་རྣམས་འཁལ་བར་བརྩམས་པ་དང་། རྒྱལ་པོས་སྨྲས་པ། མི་འདི་དག་ཅི་ཞིག་བྱེད། བློན་པོ་རྣམས་ཀྱིས་སྨྲས་པ། ལྷ་སྐུད་པ་འཚལ་བའི་སླད་དུ་རས་བལ་དེ་འཁལ་ལགས་སོ། །རྒྱལ་པོས་སྨྲས་པ། ཅི་ངའི་རྒྱལ་སྲིད་ཀྱི་མི་རྣམས་རས་སྐུད་འཁལ་ལམ། ལྷས་རས་སྐུད་ཀྱི་ཆར་ཁོ་ན་ཕོབ་ཤིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་རས་སྐུད་ཁོ་ནའི་ཆར་ཕབ་བོ། །རྒྱལ་པོ་དེས་སྨྲས་པ། འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །དེ་ནས་རིམ་གྱིས་རས་འཐག་པར་བརྩམས་པ་དང་། རྒྱལ་པོས་སྨྲས་པ། འདི་དག་ཅི་ཞིག་བྱེད། དེ་རྣམས་ཀྱིས་སྨྲས་པ། ལྷ་གོས་སུ་བགྱི་བའི་སླད་དུ་རས་འཐག་ལགས་སོ། །རྒྱལ་པོས་བསམས་པ། དེ་ཅི་ངའི་རྒྱལ་སྲིད་ཀྱི་མི་རྣམས་རས་འཐག་
གམ་སྙམ་ནས། ལྷས་རས་ཉིད་ཀྱི་ཆར་ཕོབ་ཤིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་རས་ཉིད་ཀྱི་ཆར་ཕབ་བོ། །རྒྱལ་པོས་དྲིས་པ་འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །རྒྱལ་པོས་བསམས་པ། མི་འདི་རྣམས་ནི་བདག་གི་བསོད་ནམས་དག་གི་མཐུ་རབ་ཏུ་མི་ཤེས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་ཡང་ཡོད། བདག་ལ་རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བཙུན་མོ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡང་ཡོད། བདག་ལ་བུ་དཔའ་བ་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པར་བྱེད་པ་སྟོང་ཡང་ཚང་བར་ཡོད་ཀྱིས། ཀྱེ་མ་བདག་གི་ཕོ་བྲང་གི་ནང་དུ་རིན་པོ་ཆེའི་ཆར་འབབ་ཅིང་དེ་ལས་ཕྱི་རོལ་དུ་ནི་ཀཱར་ཥཱ་པ་ཎ་འགའ་ཡང་མི་འབབ་པར་གྱུར་ཅིག་སྙམ་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ཕོ་བྲང་གི་ནང་དུ་ཞག་བདུན་དུ་རིན་པོ་ཆེའི་ཆར་བབ་ལ། ཕྱི་རོལ་དུ་ནི་ཀཱར་ཥཱ་པ་ཎ་འགའ་ཡང་མ་བབ་སྟེ། ཇི་ལྟར་མཐུན་ཆེན་པོ། རྫུ་འཕྲུལ་ཆེན་པོ་བསོད་ནམས་བྱས་པ། དགེ་བ་བྱས་པ་རང་གི་བསོད་ནམས་ཀྱི་འབྲས་བུ་སོ་སོར་ཉམས་སུ་མྱོང་བ་བཞིན་ནོ། །རྒྱལ་པོས་སྨྲས་པ་འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ལགས་སོ། །རྒྱལ་པོས་སྨྲས་པ། ཤེས་ལྡན་དག་ཁྱེད་ཀྱིས་ཉེས་ཏེ། གལ་ཏེ་ཁྱེད་ཀྱིས་ལྷའི་བསོད་ནམས་ཀྱིས་ལགས་སོ་ཞེས་སྨྲས་པ་དང་། ངས་འཛམ་བུའི་གླིང་མཐའ་དག་ཏུ་རིན་པོ་ཆེའི་ཆར་ཕབ་པར་འགྱུར་བ་ཞིག །འོན་ཀྱང་ཁྱེད་ལས་རིན་པོ་ཆེ་སུ་འདོད་པ་དེས་རིན་པོ་ཆེ་ཅི་འདོད་པ་དག་ལོང་ཤིག དེ་ནས་རྒྱལ་པོ་ང་ལས་ནུ་དེ་རྒྱལ་སྲིད་ཆེན་པོའ་དབང་བྱེད་དུ་འཇུག་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །ང་ལས་ནུའི་མདུན་ནས་འགྲོ་བ་གནོད་སྦྱིན་ལྷ་གནས་ཞེས་བྱ་བ་དེ་ལ་རྒྱལ་པོས་སྨྲས་པ། གང་ངས་བཀའ་སྩལ་དགོས་པ་བཀའ་འོག་ཏུ་མ་ཆུད་པའི་གླིང་གཞན་འགའ་ལྟ་ཡོད་དམ། ལྷ་གནས་ཀྱིས་སྨྲས་པ། ལྷ་ཤར་གྱི་ལུས་འཕགས་ཞེས་བགྱི་བའི་གླིང་
འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་མཆིས་ཀྱིས། ལྷ་དེར་གཤེགས་ཏེ་བཀའ་སྩལ་དུ་གསོལ། དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་ཡང་ཡོད། བདག་ལ་རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡང་ཡོད། བདག་ལ་བུ་དཔའ་ག་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་བབ་ན། ཤར་གྱི་ལུས་འཕགས་ཞེས་བྱ་བའི་གླིང་ཞིག་ཡོད་ཅེས་གྲག་གིས། མ་ལ་བདག་དེར་ཡང་སོང་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་ནམ་མཁའ་ལ་འཕགས་ཏེ། རྒྱལ་པོ་ང་ལས་ནུ་ཤར་གྱི་ལུས་འཕགས་ཀྱི་གླིང་དུ་ཆས་ནས་རྒྱལ་པོ་ང་ལས་ནུ་ཤར་གྱི་ལུས་འཕགས་ཀྱི་གླིང་དུ་གནས་ཏེ། རྒྱལ་པོ་ང་ལས་ནུས་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། མཐུ་ཆེན་པོ། རྫུ་འཕྲུལ་ཆེན་པོས་རང་གི་བསོད་ནམས་ཀྱི་འབྲས་བུ་ཉམས་སུ་མྱོང་བ་ལྟར་ཤར་གྱི་ལུས་འཕགས་ཀྱི་གླིང་དུ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་རྗེས་སུ་བསྟན་པར་བྱས་སོ། །དེ་ཤར་གྱི་ལུས་འཕགས་གླིང་ན་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །ཡང་རྒྱལ་པོ་ང་ལས་ནུས་གནོད་སྦྱིན་ལྷ་གནས་ལ་སྨྲས་པ། བཀའ་འོག་ཏུ་མ་ཆུད་པའི་གླིང་གཞན་འགའ་ལྟ་ཡོད་དམ། ལྷ་གནས་ཀྱིས་སྨྲས་པ། ལྷ་ནུབ་ཀྱི་བ་ལང་སྤྱོད་ཅེས་བྱ་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་མི་མང་པོས་གང་བ་མཆིས་ཀྱིས་ལྷ་དེར་ཡང་གཤེགས་ཏེ་རྗེས་སུ་བསྟན་དུ་གསོལ།། །།
འདུལ་བ་གཞི། བམ་པོ་བཞི་བཅུ་རྩ་གཅིག་པ། དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་ཡང་ཡོད། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་བབ། བདག་གིས་ཤར་གྱི་ལུས་འཕགས་ཀྱི་གླིང་དུ་ཡང་ཕྱིན། ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ཤར་གྱི་ལུས་འཕགས་ཀྱི་གླིང་དུ་རྗེས་སུ་བསྟན་ན། ནུབ་ཀྱི་བ་ལང་སྤྱོད་ཅེས་བྱ་བའི་གླིང་ཞིག་ཡོད་ཅེས་གྲག་གིས། མ་ལ་བདག་དེར་ཡང་སོང་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་སྟེང་གི་ནམ་མཁའ་ལ་འཕགས་ཏེ། རྒྱལ་པོ་ང་ལས་ནུ་ནུབ་ཀྱི་བ་ལང་སྤྱོད་ཀྱི་གླིང་དུ་ཆས་ནས་རྒྱལ་པོ་ང་ལས་ནུ་ནུབ་ཀྱི་བ་ལང་སྤྱོད་ཀྱི་གླིང་དུ་གནས་ཏེ། རྒྱལ་པོ་ང་ལས་ནུས་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། མཐུ་ཆེན་པོ། རྫུ་འཕྲུལ་ཆེན་པོས་རང་གི་བསོད་ནམས་ཀྱི་འབྲས་བུ་ཉམས་སུ་མྱོང་བ་ལྟར་ནུབ་ཀྱི་བ་ལང་སྤྱོད་ཀྱི་གླིང་དུ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་རྗེས་སུ་བསྟན་པར་བྱས་སོ། །དེ་ནུབ་ཀྱི་བ་ལང་སྤྱོད་ཀྱི་གླིང་ན་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །ཡང་རྒྱལ་པོ་ང་ལས་ནུས་གནོད་སྦྱིན་ལྷ་གནས་ལ་སྨྲས་པ། བཀའ་འོག་ཏུ་མ་ཆུང་བའི་གླིང་གཞན་འགའ་ལྟ་ཡོད་དམ། ལྷ་གནས་ཀྱིས་སྨྲས་པ། ལྷ་བྱང་གི་སྒྲ་མི་སྙན་ཅེས་བགྱི་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་ལ། གཞན་ཡང་མི་དེ་དག་ནི་བདག་གིར་བགྱི་བ་མ་མཆིས་པ། ཡོངས་སུ་འཛིན་པ་མ་མཆིས་བ་ཞིག་མཆིས་ཀྱིས། ཀྱེ་མ་ལྷ་དེར་ཡང་གཤེགས་ཏེ། ཉིད་ཀྱི་དཔུང་གི་ཚོགས་རྣམས་ལ་རྗེས་སུ་བསྟན་དུ་གསོལ། དེ་ནས་
རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་ཡང་ཡོད། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་བབ། བདག་ཤར་ཀྱི་ལུས་འཕགས་ཀྱི་གླིང་དུ་སོང་སྟེ་ཡང་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ཤར་གྱི་ལུས་འཕགས་ཀྱི་གླིང་དུ་རྗེས་སུ་བསྟན། བདག་ནུབ་ཀྱི་བ་ལང་སྤྱོད་ཀྱི་གླིང་དུ་ཡང་སོང་སྟེ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ནུབ་ཀྱི་བ་ལང་སྤྱོད་ཀྱི་གླིང་དུ་རྗེས་སུ་བསྟན་ན། བྱང་གི་སྒྲ་མི་སྙན་ཅེས་བྱ་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་ལ། གཞན་ཡང་མི་དེ་དག་ནི་བདག་གིར་བྱ་བ་མེད་པ། ཡོངས་སུ་འཛིན་པ་མེད་པ་ཞིག་ཡོད་ཅེས་གྲག་གིས། མ་ལ་བདག་དེར་ཡང་སོང་ལ་རང་གི་དཔུང་གི་ཚོགས་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་ནམ་མཁའ་ལ་འཕགས་ཏེ་ཆས་པ་དང་། རྒྱལ་པོ་ང་ལས་ནུས་རི་རབ་ཀྱི་ངོས་ལོགས་ནས་ས་ཕྱོགས་དཀར་ཞིང་དཀར་བ་དག་མཐོང་ངོ་། །མཐོང་ནས་ཀྱང་གནོད་སྦྱིན་ལྷ་གནས་ལ་སྨྲས་པ། ལྷ་གནས་ས་ཕྱོགས་དཀར་ཞིང་དཀར་བ་ཕ་བི་ཅི་ཞིག་ཡིན། ལྷ་དེ་ནི་བྱང་གི་སྒྲ་མི་སྙན་གྱི་མི་རྣམས་ཀྱི་མ་རྨོས་མ་བཏབ་པའི་འབྲས་སཱ་ལུའི་འབྲུ་ལགས་ཏེ། འདི་ལྟར་བྱང་གི་སྒྲ་མི་སྙན་པའི་མི་རྣམས་ནི་མ་རྨོས་མ་བཏབ་པའི་འབྲས་སཱ་ལུའི་འབྲུ་ལ་ལོངས་སྤྱོད་པ་ལགས་པས་ལྷ་ཡང་དེར་ཡང་གཤེགས་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ལ་ལོངས་སྤྱོད་པར་འགྱུར་ལགས་སོ། །རྒྱལ་པོ་ང་ལས་ནུས་ཐོས་ནས་ཀྱང་བློན་པོ་རྣམས་ལ་སྨྲས་པ། སྣ་བོ་དག་ཁྱེད་ཀྱིས་ས་ཕྱོགས་དཀར་ཞིང་དཀར་བ་དག་མཐོང་ངམ། ལྷ་
མཐོང་ལགས་སོ། །སྣ་བོ་དག་དེ་ནི་བྱང་གི་སྒྲ་མི་སྙན་གྱི་མི་རྣམས་ཀྱི་མ་རྨོས་མ་བཏབ་པའི་འབྲས་སཱ་ལུའི་འབྲུ་ཡིན་ཏེ། འདི་ལྟར་བྱང་གི་སྒྲ་མི་སྙན་པའི་མི་རྣམས་ནི་མ་རྨོས་མ་བཏབ་པའི་འབྲས་སཱ་ལུའི་འབྲུ་ལ་ལོངས་སྤྱོད་པ་ཡིན་པས། ཁྱེད་ཅག་ཀྱང་དེར་སོང་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ལ་ལོངས་སྤྱོད་པར་འགྱུར་རོ། རྒྱལ་པོ་ང་ལས་ནུ་ཆས་པ་ན་རི་རབ་ཀྱི་ངོས་ལོགས་ན་བཀྲ་ཞིང་བཀྲ་བའི་ལྗོན་པ་ཕྲེང་བ་བཀོད་པ་བཞིན་དུ་གྱུར་པ་དག་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཡང་གནོད་སྦྱིན་ལྷ་གནས་ལ་སྨྲས་པ། ལྷ་གནས་བཀྲ་ཞིང་བཀྲ་བའི་ལྗོན་པ་ཕྲེང་བ་བཀོད་པ་བཞིན་དུ་གྱུར་པ་ཕ་བི་ཅི་ཞིག་ཡིན། ལྷ་དེ་རྣམས་ནི་བྱང་གི་སྒྲ་མི་སྙན་གྱི་མི་རྣམས་ཀྱི་དཔག་བསམ་གྱི་ཤིང་ལགས་ཏེ། འདི་ལྟར་བྱང་གི་སྒྲ་མི་སྙན་གྱི་མི་རྣམས་ནི་དཔག་བསམ་གྱི་ཤིང་གི་གོས་འཚལ་ལགས་སོ། །རྒྱལ་པོ་ང་ལས་ནུས་ཐོས་ནས་ཀྱང་བློན་པོ་རྣམས་ལ་སྨྲས་པ། སྣ་བོ་དག་ཁྱེད་ཀྱིས་བཀྲ་ཞིང་བཀྲ་བའི་ལྗོན་པ་ཕྲེང་བ་བཀོད་པ་བཞིན་དུ་གྱུར་པ་དག་མཐོང་ངམ། ལྷ་མཐོང་ལགས་སོ། །སྣ་བོ་དག་དེ་རྣམས་ནི་བྱང་གི་སྒྲ་མི་སྙན་གྱི་མི་རྣམས་ཀྱི་དཔག་བསམ་གྱི་གོས་ཀྱི་ཤིང་ཡིན་ཏེ། འདི་ལྟར་བྱང་གི་སྒྲ་མི་སྙན་གྱི་མི་རྣམས་ནི་དཔག་བསམ་གྱི་ཤིང་གི་གོས་གྱོན་པ་ཡིན་གྱིས། ཁྱེད་ཀྱང་དེར་སོན་ནས་དཔག་བསམ་གྱི་ཤིང་གི་གོས་གྱོན་པར་འགྱུར་རོ། །རྒྱལ་པོ་ང་ལས་ནུ་བྱང་གི་སྒྲ་མི་སྙན་དུ་སོང་སྟེ། རྒྱལ་པོ་ང་ལས་ནུ་བྱང་གི་སྒྲ་མི་སྙན་དུ་འདུག་ནས། རྒྱལ་པོ་ང་ལས་ནུས་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། མཐུ་ཆེན་པོ། རྫུ་འཕྲུལ་ཆེན་པོས་རང་གི་བསོད་ནམས་ཀྱི་འབྲས་བུ་མྱོང་བ་ལྟར་བྱང་གི་སྒྲ་མི་སྙན་གྱི་གླིང་དུ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་རང་གི་དཔུང་གི་ཚོགས་རྣམས་ལ་རྗེས་སུ་བསྟན་ཏོ། །དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །ཡང་རྒྱལ་པོ་ང་ལས་ནུས་གནོད་སྦྱིན་ལྷ་གནས་ལ་སྨྲས་པ། བཀའ་འོག་ཏུ་མ་ཆུད་པའི་
གླིང་གཞན་འགའ་ལྟ་ཡོད་དམ། ལྷ་མ་མཆིས་སོ། །འོན་ཀྱང་ལྷ་སུམ་བཅུ་རྩ་གསུམ་པའི་ལྷ་ཚེ་རིང་བ། ཁ་དོག་དང་ལྡན་པ། བདེ་བ་མང་ཞིང་གཞལ་མེད་ཁང་མཐོན་པོ་ན་ཡུན་རིང་དུ་གནས་པ་དག་མཆིས་ཀྱིས། ཀྱེ་མ་ལྷ་སུམ་བཅུ་རྩ་གསུམ་པའི་ལྷ་རྣམས་ལ་གཟིགས་སུ་བཞུད་ཅིག །དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་ཡང་ཡོད། བདག་ལ་རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡང་ཡོད། བདག་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། པ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་ཕབ། བདག་ཤར་གྱི་ལུས་འཕགས་ཀྱི་གླིང་དུ་ཡང་སོང་སྟེ། ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ཤར་གྱི་ལུས་འཕགས་ཀྱི་གླིང་དུ་རྗེས་སུ་བསྟན། བདག་ནུབ་ཀྱི་བ་ལང་སྤྱོད་ཀྱི་གླིང་དུ་ཡང་སོང་སྟེ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ནུབ་ཀྱི་བ་ལང་སྤྱོད་ཀྱི་གླིང་དུ་རྗེས་སུ་བསྟན། བདག་བྱང་གི་སྒྲ་མི་སྙན་གྱི་གླིང་དུ་ཡང་སོང་སྟེ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་བྱང་གི་སྒྲ་མི་སྙན་གྱི་གླིང་དུ་རང་གི་དཔུང་གི་ཚོགས་ལ་རྗེས་སུ་བསྟན་ན། སུམ་བཅུ་རྩ་གསུམ་པའི་ལྷ་ཚེ་རིང་བ། ཁ་དོག་དང་ལྡན་པ། བདེ་བ་མང་ཞིང་གཞལ་མེད་ཁང་མཐོན་པོ་ན་ཡུན་རིང་དུ་གནས་པ་དག་ཅིག་ཡོད་ཅེས་གྲག་གིས། མ་ལ་བདག་སུམ་བཅུ་རྩ་གསུམ་པའི་ལྷ་རྣམས་བལྟ་བའི་ཕྱིར་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་
འབུམ་དང་། ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་སྟེང་གི་ནམ་མཁའ་ལ་འཕགས་ཏེ་ཆས་སོ། །རིའི་རྒྱལ་པོ་རི་རབ་ནི་གསེར་གྱི་རི་བོ་བདུན་གྱིས་བསྐོར་བ་ཡིན་པས། དེ་ནས་རྒྱལ་པོ་ང་ལས་ནུ་གསེར་གྱི་རི་བོ་མུ་ཁྱུད་འཛིན་ལ་གནས་ཏེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རི་བོ་མུ་ཁྱུད་འཛིན་ནས་གསེར་གྱི་རི་བོ་རྣམ་པར་འདུད་ལ་འདུག་སྟེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རི་བོ་རྣམ་པར་འདུད་ནས་གསེར་གྱི་རི་བོ་རྟ་རྣ་ལ་འདུག་སྟེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རི་བོ་རྟ་རྣ་ནས་གསེར་གྱི་རི་བོ་བལྟ་ན་སྡུག་ལ་འདུག་སྟེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རི་བོ་བལྟ་ན་སྡུག་ནས་གསེར་གྱི་རི་བོ་སེང་ལྡེང་ཅན་ལ་འདུག་སྟེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རི་བོ་སེང་ལྡེང་ཅན་ནས་གསེར་གྱི་རི་བོ་གཤོལ་མདའ་འཛིན་ལ་འདུག་སྟེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །རི་བོ་གཤོལ་མདའ་འཛིན་ནས་གསེར་གྱི་རི་བོ་གཉའ་ཤིང་འཛིན་ལ་འདུག་སྟེ། དེ་དེ་ན་རང་གི་དཔུང་གི་ཚོགས་ལ་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ།། །།བར་སྡོམ་ལ། མུ་ཁྱུད་འཛིན་དང་རྣམ་པར་འདུད། །དེ་བཞིན་རི་བོ་རྟ་རྣ་དང་། །བལྟ་ན་སྡུག་དང་སེང་ལྡེང་ཅན། །གཤོལ་མདའ་འཛིན་དང་གཉའ་ཤིང་འཛིན། །རི་བོ་གཉའ་ཤིང་འཛིན་ནས་སྟེང་གི་ནམ་མཁའ་ལ་འཕགས་ཏེ་ཆས་པ་ན་རི་རབ་ཀྱི་བང་རིམ་དེ་ལ་དྲང་སྲོང་ལྔ་བརྒྱ་པོ་དེ་རྣམས་གནས་ཏེ། དེ་རྣམས་ཀྱིས་རྒྱལ་པོ་དེ་འོང་བ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་རྒྱལ་པོ་འཐབ་ཀྲོལ་ཅན་འདི་འོང་ངོ་། །དེ་ན་དྲང་སྲོང་བཞིན་ངན་ཞེས་བྱ་བ་དེས་སྐྱོར་བར་ཆུ་བླུགས་ཏེ་གཏོར་བས་དཔུང་གི་ཚོགས་རྣམས་ཐོགས་པར་གྱུར་པ་དང་། དེའི་མདུན་ནས་བློན་པོ་རིན་པོ་
ཆེ་འགྲོ་བས་དེས་དྲང་སྲོང་དེ་རྣམས་ལ་སྨྲས་པ། བྲམ་ཟེ་ཁྲོ་བ་དོར་བར་གྱིས། །འདི་ནི་ཀུན་ལ་འགྲུབ་པ་ཡིན། །འདི་ནི་མི་དབང་ང་ལས་ནུ། །བྱ་གར་དེ་དག་མ་ཡིན་ནོ། །ཇི་ཙམ་ན་རྒྱལ་པོ་ང་ལས་ནུ་ཕྱོགས་དེར་ཕྱིན་ནས་སྨྲས་པ། དཔུང་གི་ཚོགས་འདི་སུ་ཞིག་གིས་བཀག །བློན་པོ་རིན་པོ་ཆེས་སྨྲས་པ། དྲང་སྲོང་རྣམས་ཀྱིས་སོ། །རྒྱལ་པོས་སྨྲས་པ། དྲང་སྲོང་འདི་རྣམས་ནང་ན་ཅི་ཞིག་ལ་དགའ། དེས་སྨྲས་པ། ལྷ་རལ་པ་ལ་དགའ་ལགས་སོ། །རྒྱལ་པོས་སྨྲས་པ། འདི་རྣམས་རལ་པ་བྱི་ནས་བདག་གི་མདུན་ནས་འགྲོ་བར་གྱུར་ཅིག་ཅེས་བྱས་པ་དང་། དེ་ནས་དེ་རྣམས་ཀྱི་རལ་པ་བྱི་ནས་ལག་ན་མདའ་གཞུ་ཐོགས་ཏེ་མདུན་དུ་བརྒྱུག་པར་བརྩམས་པ་དང་། བུད་མེད་རིན་པོ་ཆེས་རྒྱལ་པོ་ལ་གསོལ་པ། ལྷ་དྲང་སྲོང་འདི་རྣམས་ནི་དཀའ་ཐུབ་ཅན་ལགས་ན་འདི་དག་ཅི་བགྱི་ཐོང་ལགས། རྒྱལ་པོས་བཏང་བ་དང་། དེ་རྣམས་ཀྱིས་སླར་ཡང་བརྩོན་འགྲུས་ལ་གནས་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །རྒྱལ་པོ་ང་ལས་ནུ་ཡང་དཔུང་གི་ཚོགས་དང་ནམ་མཁའ་ལ་འཕགས་ཏེ་ཆས་སོ། །རི་རབ་རིའི་རྒྱལ་པོ་དཔག་ཚད་བརྒྱད་ཁྲི་ནི་འོག་ཏུ་གསེར་གྱི་ས་གཞི་ལ་ཐུག་པར་འདུག་གོ །དཔག་ཚད་བརྒྱད་ཁྲི་ནི་ཆུའི་སྟེང་དུ་བྱུང་སྟེ། དེ་ལྟར་དཔག་ཚད་འབུམ་དྲུག་ཁྲི་ཡོད་དོ། །དེའི་ངོས་རེ་རེ་ལ་ཡང་དཔག་ཚད་བརྒྱད་ཁྲི་ཡོད་དེ། དེ་ནི་ཁོར་ཁོར་ཡུག་ཏུ་དཔག་ཚད་སུམ་འབུམ་ཉི་ཁྲི་ཡོད་དོ། །རིན་པོ་ཆེ་སྣ་བཞིའི་རང་བཞིན་བཟང་པོ་མཛེས་པ། བལྟ་ན་སྡུག་པ་ཡིན་ནོ། །དེའི་སྟེང་ན་ལྷ་སུམ་བཅུ་རྩ་གསུམ་པ་རྣམས་གནས་ཏེ། སུམ་བཅུ་རྩ་གསུམ་པའི་ལྷ་རྣམས་ཀྱི་སྲུང་མ་ལྔ་པོ་ཆུ་ལ་གནས་པའི་ཀླུ་རྣམས་དང་། གནོད་སྦྱིན་ལག་ན་ཡོལ་གོ་ཐོགས་པ་རྣམས་དང་། ཕྲེང་ཐོགས་རྣམས་དང་། རྟག་ཏུ་མྱོས་རྣམས་དང་། རྒྱལ་པོ་ཆེན་པོ་བཞི་རྣམས་བཀོད་པ་ལ། ཆུ་ན་གནས་པ་རྣམས་ཀྱིས་རྒྱལ་པོ་ང་ལས་ནུའི་དཔུང་གི་ཚོགས་རྣམས་བཀག་པ་དང་། ཇི་ཙམ་ན་རྒྱལ་པོ་ང་ལས་ནུ་ཕྱོགས་དེར་ཕྱིན་ནས་སྨྲས་པ། དཔུང་གི་ཚོགས་འདི་སུ་ཞིག་གིས་བཀག །དེ་རྣམས་ཀྱིས་སྨྲས་པ། ལྷ་ཆབ་ན་གནས་པའི་ཀླུ་རྣམས་ཀྱིས་སོ། །རྒྱལ་
པོས་སྨྲས་པ། བདག་དུད་འགྲོ་རྣམས་དང་གཡུལ་འགྱེད་དམ། དེས་སྨྲས་པ། ཆུ་ལ་གནས་པའི་ཀླུ་འདི་དག་ཉིད་བདག་གི་མདུན་ནས་འགྲོ་བར་གྱུར་ཅིག་ཅེས་བྱས་པ་དང་། དེ་རྣམས་རྒྱལ་པོ་པ་ལས་ནུའི་མདུན་ནས་འགྲོ་བར་ཆས་སོ། །ཇི་ཙམ་ན་ཀླུ་དེ་རྣམས་རྒྱལ་པོ་ང་ལས་ནུའི་མདུན་ནས་རྒྱུག་ཅིང་། ལྷ་ལག་ན་ཡོལ་གོ་ཐོགས་ཀྱི་དྲུང་དུ་ཕྱིན་པ་དང་། དེ་རྣམས་ཀྱིས་དེ་དག་ལ་དྲིས་པ། ཤེས་ལྡན་དག་ཅི་སྟེ་རྒྱུག །དེ་རྣམས་ཀྱིས་སྨྲས་པ། འདིར་མིའི་རྒྱལ་པོ་འོང་ངོ་། །དེ་ནས་ཀླུ་དེ་རྣམས་དང་། ལྷ་ལག་ན་ཡོལ་གོ་ཐོགས་རྣམས་ལོག་ནས་ཡང་དཔུང་གི་ཚོགས་དེ་ཐོགས་པར་བྱས་སོ། །ཇི་ཙམ་ན་རྒྱལ་པོ་ང་ལས་ནུ་འོངས་ནས་དེས་སྨྲས་པ། དཔུང་གི་ཚོགས་འདི་སུ་ཞིག་གིས་བཀག ། དེས་སྨྲས་པ། ལྷ་ལྷ་ལག་ན་ཡོལ་གོ་ཐོགས་འདི་རྣམས་ཀྱིས་དཔུང་གི་ཚོགས་བཀག་ལགས་སོ། །རྒྱལ་པོ་ང་ལས་ནུས་སྨྲས་པ། ལྷ་ལག་ན་ཡོལ་གོ་ཐོགས་འདི་དག་ཉིད་བདག་གི་མདུན་ནས་འགྲོ་བར་གྱུར་ཅིག་དེ་ནས་དེ་རྣམས་མདུན་ནས་རབ་ཏུ་བརྒྱུགས་ཏེ། ཇི་ཙམ་ན་ཀླུ་དེ་རྣམས་དང་ལྷན་ཅིག་ལྷ་ཕྲེང་ཐོགས་རྣམས་ཀྱི་དྲུང་དུ་ཕྱིན་པ་དང་། དེ་རྣམས་ཀྱིས་དེ་དག་ལ་དྲིས་པ། ཤེས་ལྡན་དག་ཅི་སྟེ་རྒྱུག་དེ་དག་གིས་སྨྲས་པ། མིའི་རྒྱལ་པོ་འདིར་འོང་ངོ་། །དེ་ནས་ལྷ་དང་། ཀླུ་དེ་རྣམས་ཡང་ལོག་ནས་དཔུང་གི་ཚོགས་ཐོགས་པར་བྱས་པ་དང་། རྒྱལ་པོ་ཕྱོགས་དེར་ཕྱིན་ནས་དེས་སྨྲས་པ། དཔུང་གི་ཚོགས་འདི་སུ་ཞིག་གིས་བཀག་དེས་སྨྲས་པ། ལྷ་ལྷ་ཕྲེང་ཐོགས་རྣམས་ཀྱིས་སོ། །རྒྱལ་པོས་སྨྲས་པ། ལྷ་ཕྲེང་ཐོགས་འདི་དག་ཉིད་བདག་གི་མདུན་ནས་འགྲོ་བར་གྱུར་ཅིག །དེ་ནས་དེ་རྣམས་མདུན་ནས་བརྒྱུག་པར་བརྩམས་སོ། །དེ་རྣམས་ཀྱིས་བརྒྱུགས་ནས་ལྷ་རྟག་ཏུ་མྱོས་རྣམས་ཀྱི་དྲུང་དུ་ཕྱིན་པ་དང་། དེ་རྣམས་ཀྱིས་དེ་དག་ལ་དྲིས་པ། ཤེས་ལྡན་དག་ཅི་སྟེ་རྒྱུག །དེ་རྣམས་ཀྱིས་སྨྲས་པ། མིའི་རྒྱལ་པོ་འདིར་འོང་ངོ་། །དེ་ནས་དེ་རྣམས་ལོག་ནས་ཡང་དཔུང་གི་ཚོགས་དེ་ཐོགས་པར་བྱས་པ་དང་། རྒྱལ་པོ་ཕྱོགས་དེར་ཕྱིན་ནས་དེས་སྨྲས་པ། དཔུང་གི་ཚོགས་འདི་སུ་ཞིག་གིས་བཀག་དེས་སྨྲས་པ། ལྷ་ལྷ་རྟག་ཏུ་མྱོས་རྣམས་ཀྱིས་སོ། །རྒྱལ་
པོས་སྨྲས་པ། ལྷ་ལྟག་ཏུ་མྱོས་འདི་དག་ཉིད་བདག་གི་མདུན་ནས་འགྲོ་བར་གྱུར་ཅིག །དེ་ནས་དེ་རྣམས་མདུན་མ་ནས་རྒྱུག་སོ། །དེ་རྣམས་ཀྱིས་བརྒྱུག་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་དྲུང་དུ་ཕྱིན་པ་དང་། དེ་རྣམས་ཀྱིས་དེ་དག་ལ་དྲིས་པ། ཤེས་ལྡན་དག་ཅི་སྟེ་རྒྱུག་མིའི་རྒྱལ་པོ་འདིར་འོང་ངོ་། །རྒྱལ་ཆེན་བཞིའི་རྣམས་ཀྱི་བསམས་པ། སེམས་ཅན་འདི་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་ཏེ་དེ་དག་ག་པར་མི་ནུས་སོ་སྙམ་ནས། དེ་ནས་རྒྱལ་ཆེན་བཞིའི་རིས་ཀྱི་ལྷ་དེ་རྣམས་ཀྱིས་སུམ་བཅུ་རྩ་གསུམ་པའི་ལྷ་རྣམས་ལ་འདིར་མིའི་རྒྱལ་པོར་ལས་ནུ་འོད་དོ་ཞེས་སྦྲན་ཏོ། སུམ་བཅུ་རྩ་གསུམ་པའི་ལྷ་རྣམས་ཀྱིས་བསམ་པ། སེམས་ཅན་འདི་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་པས་དེ་བཟློག་པར་མི་བྱའི་མཆོད་ཡོན་གྱིས་བསུ་བར་བྱའོ་སྟམ་ནས། དེ་ནས་སུམ་བཅུ་རྩ་གསུམ་པའི་ལྷ་དེ་རྣམས་ཀྱིས་མཆོད་ཡོན་གྱིས་བསུའོ། །རྒྱལ་པོ་ང་ལས་ནུ་རི་རབ་ཀྱི་རྩེ་ལ་འཛེག་པ་ན་ཚལ་སྔོ་ཞིང་སྔ་བའི་ཕྲེང་བ་སྤྲ་ནི་ལུངས་པ་ལྟ་བུ་མཐོན་པོ་དག་མཐོང་ངོ་། །མཐོང་ནས་ཀྱང་གནོད་སྦྱིན་ལྷ་གནས་ལ་སྨྲས་པ། ལྷ་གནས་ཚལ་སྔོ་ཞིང་སྔོ་བའི་ཕྲེང་བ་སྤྲ་ནི་དཔུངས་པ་ལྟ་བུ་མཐོན་པོ་ཕབདིག་ཅི་ཞིག་ཡིན། ལྷ་དེ་ནི་སུམ་ཅུ་རྩ་གསུམ་ལྷ་རྣམས་ཀྱི་ཤིང་ཡོངས་འདུས་བརྟོལ་ཞེས་བགྱི་བ་ལགས་ཏེ། སུམ་བཅུ་རྩ་གསུམ་པའི་ལྷ་རྣམས་དབྱར་ཟླ་བ་བཞི་ལྷའི་འདོད་པའི་ཡོན་ཏན་ལྔ་དང་འབྱོར་ཅིང་ལྡན་པར་དེ་ན་རྩ་བར་བགྱིད། དགའ་བར་བགྱིད། དགའ་མགུར་སྤྱོད་པ་བགྱིད་དོ། །ལྷ་ཡུང་དེར་བྱོན་ནས་ལྷའི་འདོད་པའི་ཡོན་ཏན་ལྔ་དང་འབྱོར་ཅིང་ལྡན་པར་རོལ་བར་མཛད། དགྱེས་པར་མཛད། དགྱེས་མགུར་སྤྱད་པར་མཛོད་ཅིག་རྒྱལ་པོར་ལས་ནུས་ཐོས་ནས་ཀྱང་བློན་པོ་རྣམས་ལ་སྨྲས་པ། སྣ་བོ་དག་ཁྱེད་ཅག་གིས་ཚལ་སྔོ་ཞིང་སྔོ་བའི་ཕྲེང་བ་སྤྲིན་སྤུངས་པ་ལྟ་བུ་མཐོན་པོ་དག་མཐོང་ངམ། ལྷ་མཐོང་ལགས་སོ། །སྣ་བོ་དག་དེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་ཤིང་ཡོངས་འདུས་བརྟོལ་ཅེས་བྱ་བ་ཡིན་ཏེ། སུམ་བཅུ་རྩ་གསུམ་པའི་ལྷ་རྣམས་དབྱར་ཟླ་བ་བཞི་ལྷའི་འདོད་པའི་ཡོན་
ཏན་ལྔ་དང་འབྱོར་ཅིང་ལྡན་པར་དེ་ན་རྩེ་བ་བྱེད། དགའ་བར་བྱེད། དགའ་མཏུར་སྤྱོད་པར་བྱེད་ཀྱིས། སྣ་བོ་དག་ཁྱེད་ཅག་ཀྱང་དེར་ཕྱིན་ནས་འདོད་པའི་ཡོན་ཏན་ལྔ་དང་འབྱོར་ཅིང་ལྡན་པར་བརྩེ་བར་གྱིས། དགའ་བར་གྱིས་དགའ་མགུར་སྤྱད་པ་གྱིས་ཤིག་ཡང་རྒྱལ་པོར་ལས་ནུས་རི་རབ་གྱི་རྩེ་ན་དཀར་ཞིང་དཀར་བ་སྤྲིན་སྤུངས་པ་ལྟ་བུ་མཐོན་པོ་ཞིག་མཐོང་ངོ་། །མཐོང་ནས་ཀྱང་སྣོད་སྦྱིན་ལྷ་གནས་ལ་སྨྲས་པ། ལྷ་གནས་དཀར་ཞིང་དཀར་བ་སྤྲིན་སྤུངས་པ་ལྟ་བུ་མངོན་པོ་ཕ་བི་ཅི་ཞིག་ཡིན། །ལྷ་དེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་མདུ་ནས་ཆོས་བཟང་ལགས་ཏེ་སུམ་བཅུ་རྩ་གསུམ་པའི་ལྷ་རྣམས་དང་། རྒྱལ་ཆེན་བཞི་རྣམས་དེར་འདུས་ཤིང་ཚོགས་ནས་ལྷ་དང་མི་རྣམས་ཀྱི་དོན་སེམས་པར་བགྱིད། འཇལ་བར་བགྱིད། ཉེ་བར་རྟོག་པར་བགྱིད་དེ། ལྷ་ཡང་དེར་བཞུད་པར་གྱུར་རོ། །རྒྱལ་པོ་ང་ལས་ནུས་ཐོས་ནས་བློན་པོ་རྣམས་ལ་སྨྲས་པ། སྣ་བོ་དག་ཁྱེད་ཅག་གིས་དཀར་ཞིང་དཀར་བ་སྤྲིན་སྤུངས་པ་ལྟ་བུ་མཐོན་པོ་མཐོང་ངམ། ལྷ་མཐོང་ལགས་སོ། སྣ་བོ་དག་དེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་མདུ་ནས་ཆོས་བཟང་ཞེས་བྱ་བ་ཡིན་ཏེ། སུམ་བཅུ་རྩ་གསུམ་པའི་ལྷ་རྣམས་དང་། རྒྱལ་ཆེན་བཞི་རྣམས་དེར་འདུས་ཤིང་ཚོགས་ནས་ལྷ་དང་མི་རྣམས་ཀྱི་དོན་སེམས་པར་བྱེད། འཇལ་བར་བྱེད། ཉེ་བར་རྟོག་པར་བྱེད་དེ། སྣ་བོ་དག་ཁྱེད་ཅག་ཀྱང་དེ་འགོ་བར་འགྱུར་རོ། སུམ་བཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་བལྟན་སྡུག་ཅེས་བྱ་བ་ནི་ཆུང་ང་ཞེང་དུ་དཔག་ཚད་ཉིས་སྟོང་ལྔ་བརྒྱ་ཡོད་དེ། ཁོ་ར་ཁོར་ཡུག་ཏུ་དཔག་ཚད་ཁྲི་ཡོད་པ། གསེར་གྱི་རབ་རིམ་པ་བདུན་གྱིས་ཡོངས་སུ་བསྐོར་བ་སྟེ། རབ་དེ་རྣམས་ཀྱི་འཕང་དུ་ནི་དཔག་ཚེད་ཕྱེད་དང་གསུམ་ཡོད་དོ། རབ་དེ་རྣམས་ལ་ཅོག་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻདཱུ་་ལས་བྱས་པ་དང་། ཤེས་ལས་བྱས་པ་དག་བཏགས་སོ། སྐར་བུང་ཁ་ཡར་ལྟ་བ་དང་། མར་བལྟ་བ་དག་ཀྱང་བཏོང་ངོ་། །གྲོང་ཁྱེར་བལྟ་ན་སྡུག་གི་ནང་གི་སའི་ཕྱོགས་ནི་བཟང་པོ།
མཛེས་པ། བལྟ་ན་སྡུག་པ། བཀྲ་བ་ཤིན་དུ་བཀྲ་པ། ཚོན་བརྒྱ་རྩ་གཅིག་གིས་བཀྲ་བར་བྱས་པ་དཔེར་ན་རས་བལ་གྱི་འདའ་བའམ་ཞིང་བལ་གྱི་འདབ་བ་ལྟ་བུར་མཇམ་པ། ཤིན་དུ་འཇམ་པ། རྐང་བས་མནན་ནེམས་ཤོས་བྱེད་ལ། རྐང་བ་བཏེག་ན་པར་ཞེས་བྱེད་པ། ལྷའི་མེ་ཏོག་མན་དཱ་རའི་ཕང་པོ་པུས་མོ་ནུབ་ཙམ་བཀྲམ་བ་སྟེ། རླུང་ལངས་པས་མེ་ཏོག་རྙིངཔ་རྣམས་ཁྱེར་ལོ་མ་ཏོག་ས་རབ་རྣམས་འབབ་པར་བྱེད་དོ། །བལྟ་ན་སྡུག་གི་ཁྲོང་ཁྱེར་ལ་སྒོ་དགུ་བརྒྱ་དགུ་བཅུ་རྩ་དགུ་ཡོད་དེ། སྒོའི་རིན་གནོད་སྦྱིན་གསོ་སྔོན་པོ་ཅན་གོ་ཅག་གོངས་པ། །མདའ་གཞུ་སྐྱེ་བསྐོར་ཐོགས་ལྔ་བརྒྱའི་ལྷནསུམ་བཅུ་རྩ་གསུམ་པའི་ལྷ་རྣམས་པ་སྲུང་བ་དང། བསྐྱབ་པ་དང་། མཛེས་པར་བྱ་བ་ཕྱིར་གནས་སོ། །གྲོང་ཁྱེར་བལྟ་ན་སྡུག་གི་སྲང་གི་སྲིད་དུ་ནི་དཔག་ཚད་ཉིས་སྟོང་ལྔ་བརྒྱ་ཡོད་ལ་རྒྱར་ནི་དཔག་ཚད་བཅུ་གཉིས་ཡོད་དེ་བཟང་པོ་མཛེས་པ། །བལྟ་ན་སྡུག་པ། གསེར་གྱི་བྱེ་མས་བརྡལ་བ། ཙན་དན་གྱི་ཆུས་ཆག་ཆག་བཏབ་པ། གསེར་གྱི་དྲ་བ་བྲེས་པ། །དེའི་ཕྱོགས་ཀུན་ན་རྫིང་བུ་རྣམ་པ་སྣ་ཚོགས་ཡོད་དེ། རྫིང་བུ་རྣམས་ཕ་གུ་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། ཤེལ་ལས་བྱས་པས་བསྐོར་ཏོ། རྫིང་བུ་དེ་རྣམས་ཀྱི་ཐེམ་སྐས་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻདཱུ་་ལས་བྱས་པ་དང། ཤེལ་ལས་བྱས་པ་ཡིན་ནོ། རྫིང་བུ་དེ་རྣམས་ལན་ཀན་རྣམ་པ་བཞི་བོ་གསེར་ལས་བྱས་པ་དང། དངུལ་ལས་བྱས་པ་དང་། བཻདཱུ་་ལས་བྱས་པ་དང་། ཤེལ་ལས་བྱས་པ་བསྐོར་ཅིང་། གསེར་ལས་བྱས་པའི་ལན་ཀན་གྱི་གཟུངས་གཟེར་དང། གདང་བུ་དང། ལན་ཀན་གྱི་རྟེན་མ་དངུལ་ལས་བྱས་པ་དང་། དངུལ་ལས་བྱས་པའི་ལན་ཀན་གྱི་གཟུངས་གཟེར་དང་། གདང་བུ་དང་། ལན་
ཀན་གྱི་རྟེན་མ་གསེར་ལས་བྱས་པ་དང་། བཻདཱུ་་ལས་བྱས་པའི་ལན་ཀན་གྱི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་ཤེལ་ལས་བྱས་པ་དང་། པད་མ་དཀར་པོས་གང་ཞིང་ཚུལ་གནས་པའི་བྱ་རྣམ་པ་སྣ་ཚོགས་འདོད་དགུར་སྒྱུར་བའི་གཟུགས་ཅན་རྣམས་ཀྱིས་སྙན་ཅིང་འཇེབས་ལ་ཡིད་ཏུ་འོང་བའི་སྒྲ་སྐད་འབྱིན་པར་བྱེད་དོ། །དེའི་ཕྱོགས་ཀུན་ནས་མེ་ཏོག་གི་ཤིང་དང་། འབྲས་བུའི་ཤིང་དང་། དབུ་རྒྱན་སྐྱེབ་དག་ཤིན་དུང་བྱིབས་ལེགས་ཤིང་ལེགས་པར་སྐྱེས་པ་ནི་དཔེར་ན་ཕྲེང་བ་མཁན་ནམ་ཕྲེང་བ་མཁན་གྱི་སློབ་མ་མཁས་པ་ཞིག་གིས་རྣ་རྒྱན་དུ་བྱ་བའི་ཕྱིར་མེ་ཏོག་གི་ཕྲེང་བ་ལེགས་པར་བརྒྱས་པ་བཞིན་ནོ། ཐང་ལ་གནས་པའི་བྱ་རྣམ་པ་སྣ་ཚོགས་འདོད་དགུར་སྒྱུར་པའི་གཟུགས་ཅན་རྣམས་ཀྱང་སྙན་ཅིང་འཇེབས་པའི་སྒྲ་སྐད་འབྱིན་ཏོ། གྲོང་ཁྱེར་བལྟ་ན་སྡུག་ན་དཔག་བསམ་གྱི་གོས་ཀྱི་ཤིང་ལྗོན་པ་རྩམ་པ་བཞི་པོ་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ལས་དཔག་བསམ་གྱི་ཤིང་ལྗོན་པ་ལས་བྱུང་བའི་གོས་རྣམ་པ་བཞི་པོ་སྔོན་པོ་དང་སེར་པོ་དང། དམར་པོ་དང། དཀར་པོ་རྣམས་ཏེ་ལྷའམ་ལྷའི་བུ་མོ་དག་ཇི་ལྟ་བུ་འདོད་པ་སེམས་བསྐྱེད་མ་ཐག་ཏུ་དེ་ལྟ་བུ་ལག་ཏུ་འཐོབ་པར་འགྱུར་རོ། །རྒྱན་གྱི་ཤིང་རྣམ་པ་བཞི་པོ་རྣམས་ལས་རྒྱན་རྣམ་པ་བཞི་པོ་ལག་པའི་རྒྱན་དང་། རྐད་པའི་རྒྱན་དང་། སྨད་ཀྱི་རྒྱན་དང་། སྣང་བར་བྱ་བའི་རྒྱན་ནོ། །ལྷའི་བུའམ་ལྷའི་བུ་མོ་དག་ཇི་ལྟ་བུ་འདོད་པའི་སེམས་བསྐྱེད་མ་ཐག་ཏུ་དེ་ལྟ་བུ་ལག་ཏུ་འཐོབ་པར་འགྱུར་རོ། །རོལ་མོའ་ཆ་སྦྱང་རྣམ་པ་བཞི་པོ་པི་བང་དང་། གླིང་བུ་དང་། མི་བང་རྒྱུད་གསུམ་པ་དང་། སྒྲ་སྙན་རྣམས་ལས་ལྷའམ་ལྷའི་བུ་མོས་ཇི་ལྟར་བུ་འདོད་པ་སེམས་པ་སྐྱེད་མ་ཐག་ཏུ་འཐོབ་པར་འགྱུར་རོ། ལྷའི་ཁ་ཟས་རྣམ་པ་བཞི་པོ་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ལས་ལྷའམ་ལྷའི་བུ་མོས་ཇི་ལྟ་བུ་འདོད་པ་སེམས་བསྐྱེད་མ་ཐག་ཏུ་དེ་ལྟ་བུ་ལག་ཏུ་འཐོད་པར་འགྱུར་རོ། །ཁད་པ་དང་། ཁད་པ་རྩེག་མ་དང་། བསིལ་ཁང་དང་། ཁྱམས་དང་། སྐར་ཁུང་དང་། མཐོངས་ཁུང་
ཅན་གུང་མེད་ཀྱི་ཚོགས་རྣམས་དང་། ལྷ་མོའ་ཚོགས་རྣམས་འདུ་བའི་གནས་དག་ཡོད་དེ། དེ་ན་བཏུད་པ་སྦྲང་རྩིའི་བཏུང་བ་དང་། མདྷ་བའི་བཏུང་བ་དང་། ཀང་མ་བྷ་རའི་བཏུད་པ་དང་། རོལ་མོའ་སྒྲ་སྐད་རྣམས་ཀྱི་སུམ་བཅུ་རྩ་གསུམ་པའི་ལྷ་རྣམས་རྩེ་བར་བྱེད། དགའ་བ་བྱེད། དགའ་མགུར་སྤྱོད་པར་བྱེད་དེ། རང་གི་བསོད་ནམས་ཀྱི་འབྲས་བུ་ཉམས་སུ་མྱོང་བ་བྱེད་དོ། །སུམ་བཅུ་རྩ་གསུམ་པའི་ལྷ་རྣམས་ཀྱི་ལྷའི་མདུ་ནས་ཆོས་བཟང་ཞེས་བྱ་བ་སྲིད་དུ་དཔག་ཚད་སུམ་བརྒྱ། རྒྱར་དཔག་ཚད་སུམ་བརྒྱ་སྟེ། ཁོ་ར་ཁོར་ཡུག་ཏུ་དཔག་ཚད་དགུ་བརྒྱས་ངོག་བཟང་པོ། །མཛེས་པ། བལྟ་ན་སྡུག་པ། ཤེལ་ཀྱི་རྒྱུ་ལས་བྱུང་བ་སྟེ། གྲོང་ཁྱེར་དེ་ལས་དཔག་ཚད་ཕྱེད་དང་བཞི་གྱེན་དུ་འཕགས་སོ། དེར་སུམ་བཅུ་རྩ་གསུམ་པའི་ལྷ་རྣམས་ཀྱི་སྟན་བཤམས་པ་ནི་ཉེ་དབང་པོ་སུམ་བཅུ་རྩ་གཉིས་དང་། སུམ་བཅུ་རྩ་གསུམ་པའི་ལྷ་རྣམས་ཀྱི་དབང་པོ་བརྒྱ་བྱིན་གྱི་ལྷན་དག་སོ་སོར་བཤམས་སོ། དེ་ན་སེམས་ཅན་བསོད་ནམས་ཀྱི་རྣམ་པར་སྨིན་པས་དབང་ཆེ་བར་གགས་གང་ཡིན་འདེད་པ་ནི་རིམ་གྱིས་ནངདུ་ཞུགས་སོ། །ལྷག་མ་རྣམས་ནི་ཕྱི་རོལ་ན་འཁོད་པ་དང་། རྒྱལ་པོ་ང་ལས་ནུས་པ་སེམས་པ། སཧན་བཤམས་པ་གང་དག་ཡིན་པ་འདི་རྣམས་ལས་སྟན་ཐམ་གང་ཡིན་འདི་ནི་གདོན་མི་ཟ་བར་བདག་གི་སཧན་ཡིན་ནོ་སྡམ་ནས། དེ་ནས་རྒྱལ་པོ་ང་ལས་ནུ་འདི་སྙམ་དུ་ཀྱེ་མའོ་ལྷ་རྣམས་ཀྱི་དབང་པོ་བརྒྱ་བྱིན་གྱིས་སཧན་ཕྱེད་བདག་ལ་བལྟབས་ཀྱང་ཅི་མ་རུང་སྙམ་དུ་བསམས་པ་དང་། སེམས་བསྐྱེད་མ་ཐག་ཏུ། རྒྱལ་པོ་ཆེན་པོ་ལྷ་རྣམས་ཀྱི་དབང་པོ་བརྒྱ་བྱིན་གྱིས་རྒྱལ་པོ་ང་ལས་ནུས་བསྟན་ཕྱེད་བསྟབས་ནས། རྒྱལ་པོ་ང་ལས་ནུ་ལྷ་རྣམས་ཀྱི་དབང་པོ་བརྒྱ་བྱིན་གྱིས་སྟན་ཕྱེད་ཝ་འདུག་གོ རྒྱལ་པོ་ཆེན་པོ་རྒྱལ་པོ་ང་ལས་ནུ་དང་ལྷ་རྣམས་རྣམས་ཀྱི་དབང་པོ་བརྒྱ་བྱིན་སྟན་གཅིག་འདུག་པ་ན་འདི་སྟ་སྟེ་སྲིད་དུའམ། ཞེང་དུའམ། ཁ་དོག་རྒྱལ་བའམ།
སྨྲ་དང་གསལ་ཁྱད་པར་འམ། བསམ་པའམ། ཐ་དད་དུ་བྱ་བཅུང་ཟད་ཀྱང་མེད་དེ། གཞན་དུ་མ་ལྷ་རྣམས་ཀྱི་དབང་པོ་བརྒྱ་བྱིན་ནི་མིག་མི་འཛུམས་སོ། །རྒྱལ་པོ་ཆེན་པོ་རྒྱལ་པོ་ང་ལས་ནུ་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་ན་འདུག་པ་ལ་བརྒྱ་བྱིན་སུམ་བཅུ་རྩ་དྲུག་ཤི་འཕོས་པ་ལོན་ནོ། །ཡང་དེ་ན་ལྷ་རྣམས་ལ་ལྷ་དང་ལྷ་མ་ཡིན་གཡུལ་འགྱེད་པ་འབྱུང་སྟེ། དེ་ལ་གལ་ཏེ་ལྷ་མ་ཡིན་རྣམས་ཕམ་པར་གྱུར་ན་ནི་ལྷ་མ་ཡིན་དེ་རྣམས་གྲོང་ཁྱེར་གྱི་སྒོ་བཅད་ནས་ར་བའི་ཁ་བསྐོར་ནས་འདུག་གོ །འོན་ཏེ་ལྷ་རྣམས་བསམ་པ་གྱུར་ན་ནི་ལྷ་དེ་རྣམས་ཀྱང་ཁང་བའི་སྒོ་རྣམས་བཅད་ནས་ར་བའི་ཁ་སྐོར་ནས་འདུག་གོ། །ཇི་ཙམ་ན་ལྷ་མ་ཡིན་རྣམས་དཔུང་གི་ཚོགས་པ་ཡན་ལག་བཞི་བགོ་བསྒོན་ནས་གཅན་རིམ་པ་ལྔ་དྲལ་ཏེ་ལྷ་རྣམས་ཀྱི་དབངཔོར་རྒྱ་བྱིན་གྱི་དྲུང་དུག་ཡུལ་འགྱེད་དུ་འདོས་པ་དང་། གནོད་སྦྱིན་རྣམས་ཀྱིས་ལྷ་རྣམས་དབང་པོ་བརྒྱ་བྱིན་ལ་སྨྲས་པ། ཀཽ་ཤི་ཀ་མཁྱེན་པར་མཛོད་ཅིག །ལྷ་མ་ཡིན་ན་རྣམས་ཀྱིས་གཅན་རིམ་པ་ལྔ་དྲལ་ཏེ་ཉེ་བར་མཆིས་ཀྱིས། ཁྱོད་ཀྱི་བགྱི་བ་དང་བཤམས་པ་གང་ལག་བདེ་མཛོག་ཅིག །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དཔུང་གི་ཚོགས་པན་ལག་བཞི་བགོ་བགོས་ནས་ལྷ་མ་ཡིན་དང་གཡུལ་སྤྲང་བའི་ཕྱིར་སྤགས་པ་རྒྱལ་པོ་ང་ལས་ནུས་མཐོང་ནས་སྨྲས་པ། བཞུགས་ཤིག་བདག་ཉིད་མི་ཆོལ་བརྒྱ་བྱིན་གྱིས་སྨྲས་པ། དེ་བཞིན་མཛོད་ཅིག །དེ་ནས་རྒྱལ་པོ་ང་ལས་ནུ་དཔུང་གི་ཚོགས་བྱེད་བ་བརྒྱད་འབུམ་དང་སྟེང་གི་ནམ་མཁའ་ལ་འཕགས་ནས་གཞུ་རྒྱུད་ཀྱི་སྒྲ་སྦྲེངས་སོ། །ལྷ་མ་ཡིན་རྣམས་ཀྱིས་དེ་ཐོས་ནས་སྨྲས་པ། འདི་སུའི་གཞུ་རྒྱུད་གྱི་སྒྲ་ཡིན། དེ་རྣམས་ཀྱིས་འདི་ནི་རྒྱལ་པོ་ང་ལས་ནུའི་གཞུ་རྒྱུད་སྒྲ་ཡིན་ནོ་ཞེས་ཐོས་སོ། །ཤོས་ནས་ངོ་མཚར་སྐྱེས་པར་གྱུར་ཏོ། ཇི་ཙམ་ན་རྒྱལ་པོ་ང་ལས་ནུས་སྤགས་པ་དང་།ཚེས་ཉིད་གྱིས་ལྷ་རྣམས་དང་ལྷ་མ་ཡིན་དེ་རྣམས་གཡུལ་འགྱཀུད་པའི་ཤིང་རྟ་དག་ནམ་མཁའ་ལ་ཐད་ཀར་འདུག་སྟེ། གང་གི་ཡང་མཐོན་དམན་མེད་པ་ཡིན་པ་ལས་རྒྱལ་པོ་ང་ལས་ནུའི་ནི་ལྷ་མ་ཡིན་ཐམས་ཅད་ཀྱི་ལྷག་
གི་ནམ་མཁའ་ལ་འཕགས་ནས་འདུག་གོ། །ལྷ་མ་ཡིན་དེ་རྣམས་ཀྱིས་སྨྲས་པ། བདག་ཅག་གི་ལྟག་ན་ནམ་མཁའ་ལ་སྤགས་ཏེ་འདུག་པ་འདི་སུ་ཞིག་ཡིན། དེ་རྣམས་ཀྱིས་འདི་ནི་མིའི་རྒྱལ་པོ་ང་ལས་ནུ་ཞེས་བྱ་བ་ཡིན་ནོ་ཞེས་ཐོས་སོ། །ཐོས་ནས་དེ་རྣམས་ཀྱིས་བསམས་པ། གང་གི་ཤིང་རྟ་བདག་ཅག་གི་ལྟག་ཏུ་ནམ་མཁའ་ལས་འགྲོ་བའི་སེམས་ཅན་འདི་ནི་བསོད་ནམས་ཀྱི་རྣམ་པར་སྨིན་པས་དབང་ཆེ་བར་གྲགས་པ་ཡིན་ནོ་སྙམ་ནས། དེ་རྣམས་ཕམ་པར་གྱུར་ཏེ་འཇིགས་སྐྲག་ཅིང་བཅོམ་པས་རྒྱབ་བསྟན་ནས་ལྷ་མ་ཡིན་རྣམས་ཀྱི་གནས་ཞུགས་སོ། །རྒྱལ་པོ་ང་ལས་ནུས་སྨྲས་པ། གང་རྒྱལ་བློན་པོ་རྣམས་ཀྱིས་སྨྲས་པ། ལྷ་རྒྱལ་ལགས་སོ། །རྒྱལ་པོས་བསམས་པ། སུམ་བཅུ་རྩ་གསུམ་པའི་ལྷ་རྣམས་པས་ནི་བདག་ལྷག་གོ་སྙམ་མོོ། །དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོང་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ཡང་ཡོད། བདག་ལ་ཤར་གྱི་ལུས་འཕགས་དང་། ནུབ་ཀྱི་བ་ལང་སྤྱོད་དང་། བྱང་གི་སྒྲ་མི་སྙ་གྱི་གླིང་ཡང་ཡོད། བདག་ལ་རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བཙུན་མོ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡང་ཡོད། བདག་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པར་བྱེད་པ་སྟོང་ཡང་ཚང་བར་ཡོད། བདག་གི་ཕོ་བྲང་གི་ནང་དུ་ཡང་གསེར་གྱི་ཆར་ཞག་བདུན་དུ་བབ། བདག་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་ཡང་ཕྱིན་ལྷའི་འདུན་ས་ཆོས་བཟང་དུ་ཡང་ཞུགས། ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་བདག་ལ་སྟན་ཕྱེད་བསྟབས་ཀྱིས་ཀྱེ་མའོ་བདག་གིས་ལྷ་རྣམས་ཀྱི་དབང་པོ་བརྒྱ་བྱིན་གནས་འདི་ནས་ཕྱུང་ལ། བདག་ཁོ་ནས་ལྷ་དང་མི་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ཆེན་པོ་རྒྱལ་པོ་ང་ལས་ནུ་འབྱོར་པ་དེ་ལས་ཉམས་ཏེ། འཛམ་བུའི་གླིང་
དུ་འོངས་ནས་ནད་ཚབས་པོ་ཆེ་ཞིག་གིས་ཐེབས་ཏེ་སྡུག་བསྔལ་མི་བཟད་པ་འཆི་བ་ལ་ཐུག་པ་མྱོང་བ་དང་། དེ་ནས་རྒྱལ་པོ་ང་ལས་ནུའི་བློན་པོ་དང་། རྩིས་པ་དང་། རྒྱལ་སྲིད་འབུལ་བའི་སྣ་ཆེན་པོ་ལ་གཏོགས་པ་དང་། གསང་སྔགས་ཀྱིས་ལྷན་ཅིག་འཚོ་བར་བྱེད་པ་རྣམས་རྒྱལ་བོང་ལས་ནུ་གང་ན་བ་དེར་སོང་སྟེ་ཕྱིན་པ་དང་། རྒྱལ་པོ་ང་ལས་ནུ་ལ་འདི་སྐད་ཅེས་སྨྲས་སོ། །ལྷ་འདས་ནས་ཡུལ་འཁོར་གྱི་མི་སླད་མ་རྣམས་ཤེས་ལྡན་དག་རྒྱལ་པོ་ང་ལས་ནུས་ནོངས་པའི་དུས་ཀྱི་ཚེ་ཅི་ཞིག་གསུངས་ཞེས་འདྲི་ན། དེ་སྐད་དུ་འདྲི་བ་དེ་དག་ལ་བདག་ཅག་གིས་ཇི་སྐད་དུ་ལན་གདབ་པར་བགྱི། སྣ་བོ་དགང་འདས་ནས་གལ་ཏེ་ཁྱེད་ཅག་ལ་སྐྱེ་བོ་ཕྱི་མ་རྣམས་ཉེ་བར་འོངས་ནས་དེ་སྐད་དུ་འདྲི་བར་བྱེད་ན། འདྲི་བ་དེ་དག་ལ་ཁྱེད་ཀྱིས་ལན་འདི་སྐད་ཅེས་ཐོབ་ཤིག །ཤེས་ལྡན་དག་རྒྱལ་པོ་ང་ལས་ནུ་ནི་རིན་པོ་ཆེ་སྣ་བདུན་དང་ཡང་ལྡན། མིའི་འབྱོར་པ་རྣམ་བཞིས་གླིང་བཞིར་རྒྱལ་སྲིད་ཀི་དབང་ཕྱུག་ལ་ཡང་དབང་བྱེད་དུ་བཅུག །སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་ཡང་སོང་ནས་འདོད་པའི་ཡོན་ཏན་རྣམ་པ་ལྔ་པོ་དག་གིས་མ་ངོམས་བཞིན་དུ་ནོངས་སོ་ཟེར་རོ་ཞེས་གྱིས་ཤིག །ཚིགས་སུ་བཅད་པ་དག་ཀྱང་སྨྲས་པ། ཀཱར་ཥཱ་པ་ཎའི་ཆར་བབ་ཀྱང་། །འདོ་པ་དག་ལ་ངོམས་པ་མེད། །མཁས་པས་འདོད་པ་མནོག་ཆུང་ཞིང་། །སྡུག་བསྔལ་མང་པོར་ཤེས་ནས་ནི། །ལྷ་ཡི་འདོད་པ་རྣམས་ལ་ཡང་། །དགའ་བར་འགྱུར་བ་མེད་པ་ཉིད། །ཡང་དག་རྫོགས་པའི་སངས་རྒྱས་ཀྱི། །ཉན་ཐོས་སྲེད་པ་ཟད་ལ་དགའ། །གང་ཀྱི་རི་དང་མཉམ་བ་ཡི། །གསེར་གྱི་རི་བོར་གྱུར་ཀྱང་ནི། །གཅིག་གི་ནོར་དུའང་དེས་ནི་ཆོག །མཁས་པས་དེ་ལྟར་ཤེས་པར་བྱ། །གང་ཞིག་གཞི་འདིས་སྡུག་བསྔལ་རྟོག་པ་དེ། །འདོ་པ་དག་ལ་གཞར་ཡང་ཇི་ལྟར་དགའ། །འཇིག་རྟེན་ནོར་དག་ཟུག་རྡུར་རྟོགས་ནས་ནི། །བརྟན་པས་དེ་ཉིད་གདུལ་ཕྱིར་བསླབ་པར་བྱ། །རྒྱལ་པོ་ཆེན་པོ་དེ་ལྟ་བས་ན་རྣམ་གྲངས་འདིས་ཁྱོད་ཀྱིས་འདི་ལྟར་གང་མིའི་འཇིག་རྟེན་ན་འདོད་པའི་ཡོན་ཏན་ལྔས་ངོམ་ཤིང་ཆོག་ཤེས་ཏེ་འཆི་བར་འགྱུར་བའི་མི་གང་དག་ཡིན་པ་དེ་དག་ནི་ཉུང་ལ། མིའི་འཇིག་རྟེན་ན་འདོད་པའི་ཡོན་ཏན་ལྔས་
མི་ངོམས་ཤིང་ཆོག་མི་ཤེས་ཏེ་འཆི་བར་འགྱུར་བ་ནི་ཆེས་མང་བར་རིག་པར་བྱའོ། །དེ་ནས་རྒྱལ་པོ་ང་ལས་ནུས་གཏན་པ་མེད་པའི་མཆོད་སྦྱིན་བཏང་ནས་ཚིགས་དུ་བཅད་དེ་སྨྲས་པ། །འཇིག་རྟེན་ཕ་རོལ་ཡང་ཞིག་པ། ཚེ་ཐུང་བ་ནི་ཤེས་བྱས་སན། །བསོད་ནམས་དག་ནི་བྱ་བ་སྟེ། །བསོད་ནསམ་མ་བྱས་སྡུག་བསྔལ་འགྱུར། །དེ་བས་བསོད་ནམས་འདོད་པ་ཡིས། །སྦྱིན་པ་ཚུལ་བཞིན་བཏང་བྱས་ན། །འཇིག་རྟེན་འདི་དང་ཕ་རོལ་དུ། །སྦྱིན་པ་བྱས་པ་དགའ་བར་འགྱུར། །ཇི་ཙམ་ན་གྲོ་མིང་དང་ཡུལ་མི་རྣམས་ཀྱིས་རྒྱལ་པོ་ངལས་ནུ་ན་སྟེ་ཤི་ལ་ཐུག་ཅིང་འདུག་གོ་ཞེས་ཐོས་སོ། །ཐོས་ནས་ཀྱང་ཡང་སྲོག་ཆགས་བརྒྱ་སྟོང་ཕྲག་དུ་མ་དག་རྒྱལ་པོ་ང་ལས་ནུ་བལྟ་བའི་ཕྱིར་ཉེ་བར་སོང་བ་དང་། རྒྱལ་པོས་སྐྱེ་བོའ་ཚོགས་རྣམས་ལ་འདོད་པ་རྣམས་ཀྱི་ཉེས་དམིགས་ཀྱི་གཏམ་ཡང་བྱས་ཁྱིམ་ན་གནས་པའི་ཉེས་དམིགས་དང་། དེ་བཞིན་དུ་འདོད་པ་སྨད་པ་ཡང་བཤད་དེ། དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མ་དག་གཁྱིམ་གྱི་གནས་སྤངས་ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་སྟེ། ནགས་ཚལ་དུ་འདུག་ནས་ཚངས་པའི་གནས་པ་བཞི་བསྒོམས་པས་འདོད་པ་རྣམས་ལ་འདུན་པ་སྤངས་ཏེ། དེ་ལམ་དུ་གནས་པས་ཚངས་པའི་འཇིག་རྟེན་དུ་སྐལ་བ་མཉམ་པར་སྐྱེས་སོ། །རྒྱལ་པོ་ཆེན་པོ་རྒྱལ་བོད་ལས་ནུས་ཇི་སྲིད་་རྒྱལ་ཚབ་བྱས་པ་དང་། ཇི་སྲིད་འཛམ་བུའི་གླིང་དུ་རྒྱལ་སྲིད་ཆེན་པོ་བྱས་པ་དང་། ཇི་སྲིད་ཤར་ཀྱི་ལུས་འཕགས་དང་། ནུབ་ཀྱི་བ་ལང་སྤྱོད། བྱང་གི་སྒྲ་མི་སྙན་དང། གསེར་ཀྱི་རི་བོ་བདུན་ལ་གནས་པ་དང་། །ཇི་སྲིད་སུམ་བཅུ་རྩ་གསུམ་གྱི་ལྷ་རྣམས་ཀྱི་གནས་སུ་སོང་སྟེ་གནས་པ་དེའི་བར་ལ་བརྒྱ་བྱིན་བརྒྱ་རྩ་བཅུ་བཞི་ཤི་འཕོས་པ་ལོན་ནོ། །རྒྱལ་པོ་ཆེན་པོ་ལྷ་རྣམས་ཀྱི་དབང་པོ་བརྒྱ་བྱིན་གྱི་ཚེའི་ཚད་ནི་མི་རྣམས་ཀྱི་ལོ་བརྒྱ་དག་ཡིན་པ་དེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་ཉིན་ཞག་གཅིག་ཡིན་ནོ། ཉིན་ཞག་དེ་སུམ་བཅུ་ལ་ཟླ་བ་གཅིག །ཟླ་བཅུ་གཉིས་ལ་ལོ་གཅིག་ཏུ་བརྩིས་པའི་ལྟ་རྣམས་ཀྱི་ཚེའི་ཚད་ཡིན་ཏེ། དེ་ལ་མིའི་ལྟར་བ་གྲང་ན་ལོ་བྱེ་བ་ཕྲག་གསུམ་དང་དྲུག་ཁྲི་ཡོད་དོ། རྒྱལ་པོ་ཆེན་
པོ་གང་གི་ཚེ་རྒྱལ་པོ་ང་ལས་ནུས་སུམ་བཅུ་རྩ་གསུམ་པའི་ལྷ་རྣམས་གྱི་ནང་དུ་སོང་སྟེ་འདི་སྐད་ཅེས་ཀྱེ་མའོ་བདག་ལ་ལྟ་རྣམས་གྱི་དབང་པོ་རྒྱ་བྱིན་གྱིས་སྟན་ཕྱེད་བསྟབས་ཀྱངཅི་མ་ཏུང་སྙམ་དུ་སེམས་བསྐྱེད་པ་དེའི་ཚེ་དེའི་དུས་ཀྱི་བརྒྱ་བྱིན་ནི་དགེ་སློང་འོད་སྲུང་ཡིན་ནོ། །གང་གི་ཚེ་རྒྱལ་པོ་ང་ལས་ནུས་འདི་ལྟ་བུའི་སེམས་བསྐྱེད་དེ། མ་ལ་བདག་གིས་ལྷ་རྣམས་ཀྱི་དབང་པོ་བརྒྱ་བྱིན་གནས་འདི་ནས་ཕྱུང་ལ། བདག་ཉིད་ལྷ་དང་མི་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱའོ། །སྙམ་པ་དེའི་ཚེ་དེའི་དུས་ཀྱི་ལྷ་རྣམས་ཀྱི་དབང་པོ་བརྒྱ་བྱིན་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཡིན་ཏེ། སེམས་ཅན་ཤིན་ཏུ་དབང་ཆེ་བར་གྲགས་པ་ལ་ངན་སེམས་བསྐྱེད་པ་དེས་ན་འབྱོར་བ་དེ་ལས་ཉམས་ནས་འཛམ་བུའི་གླིང་དུ་འོངས་ཏེ་ནད་ཚབས་ཆེན་པོས་ཐེབས་ཤིང་འཆི་བ་ལ་ཐུག་པའི་ཚོར་བ་མི་བཟད་པ་མྱོང་བར་གྱུར་ཏོ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ང་ལས་ནུ་གང་ཡིན་པ་དེ་ནི་ང་ཉིད་ཡིན་ཏེ། གང་ཡང་ངས་སེམས་ཅན་དེ་སྙེད་ཅིག་ལ་ཕན་པ་བྱས་ན། དེས་བླ་ན་མེད་པའི་ཡེ་ཤེས་མ་ཐོབ་བོ། །འོན་ཀྱང་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་ང་ལས་ནུས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་སེམས་བསྐྱེད་མ་ཐག་ཏུ་དགུང་བདུན་དུ་ཕོ་བྲང་ནང་དུ་གསེར་གྱི་ཆར་བབ་ལགས། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་འཇིག་རྟེན་དུ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཐམས་ཅད་ཟིལ་གནོན་ཅེས་བྱ་བ་བྱུང་སྟེ། དེའི་ཚེ་ཚོང་དཔོན་གྱི་བུ་ཁྱིམ་ཕུབ་ནས་རིང་པོ་མ་ལོན་པ་ཞིག་གནས་སོ། །ཡུལ་དེ་ན་ཆོས་ལུགས་ཀྱིས་བག་མར་བཏང་ནས། རིང་པོ་མ་ལོན་པར་བག་རྫོངས་བཏབ་སྟེ། ཁྱིམ་
ཐབ་ལ་གཏོང་བའི་བག་མ་གང་ཡིན་པ་དེ་རིན་པོ་ཆེ་སྣ་བཞི་ལས་བྱས་པའི་མེ་ཏོག་གིས་བརྒྱན་ནས་ཁྱིམ་ཐབ་ལ་གཏོང་ལ། ཁྱིམ་ཐབ་དེས་ཀྱང་དེ་ཁྲིད་ནས་རང་གི་ཁྱིམ་དུ་འགྲོ་བས་ཚོང་དཔོན་གྱི་བུ་དེས་རིན་པོ་ཆེ་སྣ་བཞི་ལས་བྱས་པའི་མེ་ཏོག་ཐོགས་ནས་བཞོན་པ་ལ་ཞོན་ཏེ་རང་གི་ཁྱིམ་དུ་ཆས་སོ། །དེ་ཆས་པ་ལས་རེ་ཞིག་ཅིག་ན་ལམ་ན་ཚུར་ཡང་དག་པར་རྫོགས་པའི་སངས་རྒྱས་ཐམས་ཅད་ཟིལ་གནོན་ལྗོངས་རྒྱུ་ཞིང་བྱོན་ཏོ། །དེས་དེ་སྐྱེས་བུ་ཆེན་པོའ་མཚན་སུམ་བཅུ་རྩ་གཉིས་ཀྱིས་བརྒྱན་བ། བལྟ་བས་ཆོག་མི་ཤེས་པ་མཐོང་ནས་ཤིན་དུ་དད་པ་སྐྱེས་སོ། །དེ་ནས་དེ་དད་པས་བརླན་པའི་སེམས་ཀྱིས་བཞོན་པ་ལས་བབས་ནས་རིན་པོ་ཆེ་སྣ་བཞི་ལས་བྱས་པའི་མེ་ཏོག་དེ་རྣམས་ཀྱིས་ཡང་དག་པར་རྫོགས་པའི་སངས་རྒྱས་ཐམས་ཅད་ཟིལ་གནོན་ལ་གཏོར་ཏོ། །ཡང་དག་པར་རྫོགས་པའི་སངས་རྒྱས་ཐམས་ཅད་ཟིལ་གནོན་གྱིས་མེ་ཏོག་དེ་དག་ཇི་ལྟར་ཤིང་རྟའི་འཕང་ལོ་ཙམ་ཤ་སྟག་ཏུ་གྱུར་ནས། གཤེགས་ན་ཡང་ཕྱི་བཞིན་འོང་ཞིང་བཞུགས་ན་ཡང་འདུག་པ་དེ་ལྟ་བུར་བྱིན་གྱིས་བརླབས་པ་དང་། དེ་དད་པ་སྐྱེས་ནས་ཚིགས་སུ་བཅད་དེ་སྨྲས་པ། སྦྱིན་པ་ཆེན་པོར་གྱུར་པ་འདི་ཡིས་ནི། །འགྲོ་བའི་ནང་དུ་རང་བྱུང་སངས་རྒྱས་ཤོག །རྒྱལ་ནས་སྔོན་གྱི་རྒྱལ་བས་མ་བསྒྲལ་བའི། །སྐྱེ་བོའ་ཚོགས་རྣམས་བདག་གིས་སྒྲོལ་གྱུར་ཅིག །དྲང་སྲོང་ཆེ་ཀུན་ཟིལ་གནོན་བཅོམ་ལྡན་ལ། །ང་ཡིས་གསེར་གྱི་མེ་ཏོག་བཟང་གཏོར་ནས། །གོ་འཕང་མཆོག་འདི་འདོད་ནས་དེ་ཡི་ཚེ། །ང་ཡིས་སྨོན་ལམ་རྒྱ་ཆེན་བཏབ་པ་ཡི། །བསོད་ནམས་དེ་ཉིད་ཀྱི་ནི་རྣམ་སྨིན་གྱིས། །ལེགས་མཐོང་ཆེན་པོ་དེ་ཡི་གྲོང་ཁྱེར་ཡང་། །གསེར་ལས་བྱས་པ་དགའ་དགའ་ལྟར་འདུག་པ། །ཕོ་བྲང་རྩྭ་ཅན་ཞེས་ནི་བྱ་བར་གྱུར། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཚོང་དཔོན་གྱི་བུ་དེ་ནི་ང་ཉིད་ཡིན་ནོ། །གང་ཡང་ངས་ཡང་དག་པར་རྫོགས་པའི་སངས་རྒྱས་ཐམས་ཅད་ཟིལ་གནོན་ལ་སེམས་དད་པ་བསྐྱེད་ནས། རིན་པོ་ཆེ་སྣ་བཞིའི་མེ་ཏོག་གིས་གཏོར་བའི་ལས་དེའི་རྣམ་པར་སྨིན་པས་ངའི་ཕོ་བྲང་གི་ནང་དུ་ཞག་བདུན་དུ་གསེར་གྱི་ཆར་བབ་བོ། །བཙུན་པ་རྒྱལ་པོ་ང་ལས་ནུས་ལས་ཅི་ཞིག་བགྱིས་ན་ལས་དེའི་རྣམ་པར་
སྨིན་པས། གླིང་བཞི་པ་རྣམས་སུ་རྒྱལ་སྲིད་ཀྱི་དབང་ཕྱུག་ལ་དབང་བགྱིས་པ་ནས་སུམ་བཅུ་རྩ་གསུམ་པའི་ལྷ་རྣམས་ཀྱི་བར་དུ་མཆིས་ལགས། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་འཇིག་རྟེན་དུ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་པ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྣམ་པར་གཟིགས་ཞེས་བྱ་བ་བྱུང་སྟེ། དེ་ལྗོངས་རྒྱུ་ཞིང་གཤེགས་པ་ན་རིམ་གྱིས་རྒྱལ་པོའ་ཕོ་བྲང་གཉེན་ལྡན་དུ་བྱོན་ཏོ། །དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སྔ་དྲོ་ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ནས་རྒྱལ་པོའ་ཕོ་བྲང་གཉེན་ལྡན་དུ་བསོད་སྙོམས་ལ་ཞུགས་སོ། །དེ་ན་འབྲུ་འཚོང་བའི་ཚོང་པ་ཞིག་གིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེ་བལྟ་བས་ཆོག་མི་ཤེས་པ་མཐོང་ནས་ལྷག་པར་དད་པ་སྐྱེས་ཏེ། དེ་དད་པ་སྐྱེས་ནས་སྲན་མུད་ག་ལ་སྦར་བས་བཅུས་ཏེ་ལྷུང་བཟེད་དུ་བླུགས་པ་དང་། དེ་ལས་སྲན་མུད་ག་འབྲུམ་བུ་བཞི་ཞིག་ལྷུང་བཟེད་དུ་སོང་ངོ་། །འབྲུམ་བུ་གཅིག་ནི་ལྷུང་བཟེད་ཀྱི་ཁར་ཕོག་ནས་ས་ལ་ལྷུང་ངོ་། །ལྷག་མ་རྣམས་ནི་ལྷུང་བཟེད་ཀྱི་ནང་དུ་མ་སོང་བ་ཉིད་དུ་ས་ལ་བོའོ། །དེ་ནས་ཚོང་པ་དེ་དད་པ་སྐྱེས་ནས་སྨོན་ལམ་བཏབ་པ། སྦྱིན་པ་ཆེན་པོར་གྱུར་པ་འདི་ཡིས་ནི། །འགྲོ་བའི་ནང་དུ་རང་བྱུང་སངས་རྒྱས་ཤོག །རྒྱལ་ནས་སྔོན་གྱི་རྒྱལ་བས་མ་བསྒྲལ་བའི། །སྐྱེ་བོའ་ཚོགས་རྣམས་བདག་གིས་སྒྲོལ་གྱུར་ཅིག །ཅེས་བཏབ་བོ།། །།འདུལ་བ་གཞི། བམ་པོ་བཞི་བཅུ་གཉིས་པ། རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་འབྲུ་འཚོང་བའི་ཚོང་པ་གང་ཡིན་པ་དེ་ནི་ང་ཉིད་ཡིན་ཏེ། ངས་དེ་ན་གང་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་དད་པ་སྐྱེས་ཏེ། སྲན་མུད་ག་ལ་སྦར་བས་བཅུས་ནས་ལྷུང་བཟེད་དུ་བླུགས་པ་དང་། དེ་ལས་སྲན་མུད་ག་འབྲུམ་བུ་བཞི་ཞིག་ལྷུང་བཟེད་དུ་སོང་ངོ་། །ལྷག་མ་རྣམས་ནི་ས་ལ་བོའོ། །ལས་དེའི་རྣམ་པར་སྨིན་པས་གླིང་བཞི་རྣམས་སུ་རྒྱལ་སྲིད་ཀྱི་དབང་ཕྱུག་
ལ་དབང་བྱས་སོ། །གང་ཡང་དེ་ན་སྲན་མུད་ག་འབྲུམ་བུ་གཅིག་གིས་ལྷུང་བཟེད་ཀྱི་ཁར་ཕོག་ནས་ས་ལ་ལྷུང་བའི་ལས་ཀྱི་རྣམ་པར་སྨིན་པས་སུམ་བཅུ་རྩ་གསུམ་པའི་ལྷ་རྣམས་ཀྱི་བར་དུ་སོན་ཏོ། །རྒྱལ་པོ་ཆེན་པོ་གལ་ཏེ་སྲན་མུད་ག་ལྷུང་བཟེད་དུ་བླུགས་པ་ས་ལ་མ་ལྷུང་ན་ལས་དེའི་རྣམ་པར་སྨིན་པས་ལྷ་དང་མི་རྣམས་ཀྱི་བར་ལ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་འགྱུར་རོ། །དེའི་ཚེ་དེའི་དུས་ཀྱི་འབྲུ་འཚོང་བའི་ཚོང་པ་གང་ཡིན་པ་དེ་ནི་ང་ལས་ནུ་དེ་ཉིད་ཡིན་ནོ། །དེ་ལྟར་ན་རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ཅན་ལ་བྱ་བ་བྱས་པ་ནི་འབྲས་བུ་དང་ཕན་ཡོན་ཤིན་ཏུ་ཆེན་པོར་འགྱུར་རོ། །རྒྱལ་པོ་ཆེན་པོ་དེ་ལྟ་བས་ན་འདི་ལྟར་སངས་རྒྱས་བཅོམ་ལྡན་འདས་ལ་བྱ་བ་བྱའོ་ཞེས་བསླབ་པར་བྱའོ། །