འདུམ་བྱེད་ཀྱི་སྡེ་ཚན།
རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སྦྱིན་པ་དག་བྱིན། བསོད་ནམས་དག་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་བཱ་རཱ་ཎ་སཱི་ཞེས་བྱ་བའི་གྲོང་ཁྱེར་དུ་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དེ། འབྱོར་པ་དང་། རྒྱས་པ་དང་ཞེས་བྱ་བ་ནས་ཆོས་བཞིན་གྱིས་རྒྱལ་སྲིད་བྱེད་དོ་ཞེས་བྱ་བའི་བར་གོང་མ་བཞིན་དུའོ། །ཇི་ཙམ་ན་ལྟས་མཁན་དག་གི་བཱ་རཱ་ཎ་སཱིར་ལོ་བཅུ་གཉིས་སུ་ཆར་པ་མི་འབབ་བོ་ཞེས་ལུང་བསྟན་ཏོ། །དེ་ནས་རྒྱལ་པོ་ཚངས་སྦྱིན་གྱིས་རང་གི་ཡུལ་དུ་དྲིལ་སྒྲོགས་སུ་བཅུག་པ། ངའི་ཡུལ་ན་གནས་པའི་ཤེས་ལྡན་གྲོང་ཁྱེར་པ་དག་ཉོན་ཅིག །ལྟས་མཁན་དག་གིས་ལོ་བཅུ་གཉིས་སུ་ཆར་མི་འབབ་པར་ལུང་བསྟན་གྱིས། ཁྱོད་ཅག་ལས་གང་དག་ལ་ལོ་བཅུ་གཉིས་སུ་བཟའ་བ་དང་བཏུང་བ་ཡོད་པ་དེ་རྣམས་ནི་འདུག་ཤིག །གཞན་རྣམས་ནི་བཟའ་བ་དང་བཏུང་བ་མོད་པའི་ཡུལ་དུ་དེངས་ཤིག །ལོ་ལེགས་པར་གྱུར་པ་དང་སླར་ཡང་ཤོག་ཤིག །དེའི་ཚེ་བཱ་རཱ་ཎ་སཱིའི་གྲོང་ཁྱེར་ན་ཁྱིམ་བདག་འདུམ་བྱེད་ཅེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་སོ། །དེས་མངན་བཀུག་སྟེ་སྨྲས་པ། ཀྱེ་ནང་རྗེ་བང་བ་ན་བདག་འཁོར་གྱི་སྐྱེ་བོ་དང་བཅས་པ་ལོ་བཅུ་གཉིས་ཀྱི་རྒྱགས་ཐུབ་པ་ཡོད་དམ། འོན་ཏེ་མེད་དེས་སྨྲས་པ། ཇོ་བོ་མཆིས་སོ། །དེ་ནས་ཁྱིམ་བདག་འདུམ་བྱེད་འཁོར་དང་བཅས་པ་ནི་འདུག་གོ །སྐྱེ་བོའ་ཚོགས་གཞན་ནི་བཟའ་བ་དང་བཏུང་བ་མོད་པའི་ཡུལ་དུ་དོང་ངོ་། །སངས་རྒྱས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བསམ་ཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་བས་ཇི་ཙམ་ན་བཱ་རཱ་ཎ་སཱིའི་ཕྱོགས་གཅིག་ཏུ་རང་སངས་རྒྱས་ལྔ་བརྒྱ་གནས་སོ། །ཕྱོགས་གཞན་ཞིག་ཏུ་ཡང་རང་སངས་རྒྱས་ལྔ་བརྒྱའོ། །དེ་ནས་རང་སངས་རྒྱས་ལྔ་བརྒྱ་བོ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། ཁྱིམ་བདག་འདུམ་བྱེད་གང་ན་བ་དེར་དོང་སྟེ་ལྷགས་པ་དང་། ཁྱིམ་བདག་འདུམ་བྱེད་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཀྱིས་
རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་བསོད་སྙོམས་འབུལ་ནུས་སམ། དེས་སྨྲས་པ། འཕགས་པ་དག་རེ་ཞིག་མངན་ལ་རྨས་ཏེ་བགྱིའོ། །དེས་མངན་བཀུག་སྟེ་སྨྲས་པ། ཀྱེ་ནང་རྗེ་བདག་འཁོར་དང་བཅས་པ་དང་། རབ་ཏུ་བྱུང་བ་ལྔ་བརྒྱ་པོ་འདི་རྣམས་ཀྱི་ལོ་བཅུ་གཉིས་ཀྱི་རྒྱགས་ཐུབ་པ་ཡོད་དམ། དེས་སྨྲས་པ། ཇོ་བོ་མཆིས་སོ། །དེ་ནས་རང་སངས་རྒྱས་ལྔ་བརྒྱ་པོ་དེ་རྣམས་ལ་ཁས་བླངས་སོ། །ཇི་ཙམ་ན་ཕྱི་དྲོའི་དུས་སུ་རང་སངས་རྒྱས་ལྔ་བརྒྱ་པོ་གཞན་ཡང་ལྷགས་ནས་ཁྱིམ་བདག་འདུམ་བྱེད་ལ་ཁྱིམ་བདག་རང་སངས་རྒྱས་ལྔ་བརྒྱ་པོ་འདི་དག་ལ་ཁྱོད་ཀྱིས་ལོ་བཅུ་གཉིས་སུ་བསོད་སྙོམས་དབུལ་བར་ནུས་སམ་ཞེས་བསླངས་པ་དང་། དེས་སྨྲས་པ། འཕགས་པ་དག་ཁྱེད་ཅག་ལ་གཡར་གྱིས་བླངས་ལགས་ན་ཡང་བསླང་ཅི་འཚལ། དེ་རྣམས་ཀྱིས་སྨྲས་པ། ཁྱིམ་བདག་དེ་དག་ཀྱང་གཞན་ལ། བདག་ཅག་ཀྱང་གཞན་ཡིན་ནོ། །དེས་སྨྲས་པ། འཕགས་པ་དག་གལ་ཏེ་དེ་ལྟ་ན་རེ་ཞིག་མངན་ལ་རྨས་ཏེ་བགྱིའོ། །དེས་མངན་བཀུག་སྟེ་སྨྲས་པ། ཀྱེ་ནང་རྗེ་བདག་འཁོར་དང་བཅས་པ་དང་། རབ་ཏུ་བྱུང་བ་སྟོང་གི་ལོ་བཅུ་གཉིས་ཀྱི་རྒྱགས་ཐུབ་པ་ཡོད་དམ། དེས་སྨྲས་པ། ཇོ་བོ་མཆིས་སོ། །དེ་ནས་ཁྱིམ་བདག་དེས་རང་སངས་རྒྱས་ལྔ་བརྒྱ་བོ་དེ་རྣམས་ལ་ཁས་བླངས་ནས་ཞུས་པ། ཁྱེད་ཅག་གི་དུས་གང་ལགས། དེ་རྣམས་ཀྱིས་སྨྲས་པ། གུང་ཚིགས་མ་ཡོལ་བའོ། །དེ་ནས་ཁྱིམ་བདག་འདུམ་བྱེད་ཀྱིས་སྦྱིན་པའི་ཁང་པ་བརྩིགས་ནས་སྦྱིན་པའི་ཞལ་ཏ་པའི་མི་དག་ཀྱང་བསྐོས། དུས་ཚོད་བརྗོད་པ་དག་ཀྱང་བསྐོས་ཏེ། དེས་ཉི་མ་རེ་རེ་ཞིང་རང་སངས་རྒྱས་སྟོང་ལ་བསོད་སྙོམས་འབུལ་དུ་བཅུག་གོ །མུ་གེ་དེ་ཡང་ལོ་བསྟུད་མ་ཁོ་ནར་བར་ཡེ་མ་ཆད་ནས། དེ་ནས་ཁྱིམ་བདག་དེས་རང་སངས་རྒྱས་རྣམས་ལ་ཞུས་པ། འཕགས་པ་དག་ལྷས་ཆར་འབེབས་པར་འགྱུར་རམ། ཆར་འབེབས་པར་འགྱུར་རོ། །བདག་གིས་ས་བོན་སྩལ་ཏམ། ཐོབ་ཤིག །དེ་དག་གིས་ས་བོན་བཏབ་བོ། །ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་བསམས་པ་འཇིག་རྟེན་ན་ཡོན་གནས་གང་ཇི་སྙེད་པ་དེ་རྣམས་ཀྱི་མཆོག་ནི་རང་སངས་རྒྱས་
རྣམས་ཡིན་ལ། སྦྱིན་བདག་གང་ཇི་སྙེད་པ་དེ་རྣམས་ཀྱི་མཆོག་ནི་ཁྱིམ་བདག་འདུམ་བྱེད་ཡིན་གྱིས། བདག་གིས་འདི་དག་གི་གྲོགས་བྱའོ་སྙམ་ནས། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་དབང་པོ་ཆེན་པོའ་ཆར་ཕབ་པ་དང་། ལོ་ཏོག་དེ་རྣམས་ཀུ་བར་སྐྱེས་སོ། །དེ་ནས་སྐྱེ་བོའ་ཚོགས་དེ་རྣམས་ཀྱིས་རང་སངས་རྒྱས་རྣམས་ལ་ཞུས་པ། འཕགས་པ་དག་བདག་ཅག་གི་ལོ་ཐོག་བསྐྲུན་པ་གང་ལགས་པ་དེ་དག་ཀུ་བར་སྐྱེས་པར་གྱུར་ན་དེ་ལ་ཇི་ལྟར་བསྒྲུབ་པར་བགྱི། དེ་རྣམས་ཀྱིས་སྨྲས་པ། མ་བཅད་པར་སྐྲུན་ཅིག །དེ་རྣམས་ཀྱིས་བསྐྲུན་པ་ལས་མེ་ཏོག་དང་འབྲས་བུ་རྫ་མའི་ཚད་ཙམ་ཆགས་སོ། །དེ་ནས་དེ་རྣམས་ཀྱིས་རང་སངས་རྒྱས་དེ་དག་ལ་རྒྱས་པར་སྨྲས་པ་དང་། དེ་རྣམས་ཀྱིས་སྨྲས་པ། མ་བཅད་ཅིག་དང་། རང་ཉིད་སྨིན་ནས་གས་པར་འགྱུར་རོ། །ཇི་ཙམ་ན་དེ་རྣམས་སྨིན་ནས་གས་པ་དང་། གང་གིས་ས་བོན་ཇི་ལྟ་བུ་བཏབ་པ་དེའི་དེ་ཁོ་ན་ལྟ་བུ་ཤ་སྟག་གིས་གང་བར་གྱུར་ཏོ། །དེ་ནས་མུ་གེ་རྒྱུན་ཆད་དེ་ལོ་ལེགས་པར་གྱུར་ནས་ཡུལ་ཕྱོགས་སྣ་ཚོགས་ན་གནས་པའི་སྐྱེ་བོའ་ཚོགས་དང་། སྲོག་ཆགས་གང་དག་མུ་གེས་འཇིགས་སྐྲག་ནས་དོང་བ་རྣམས་ཀྱང་ཡུལ་བཱ་རཱ་ཎ་སཱིར་འོངས་སོ། །དེ་ནས་མུ་གེ་རྒྱུན་ཆད་དེ་ལོ་ལེགས་པར་གྱུར་ནས་ཁྱིམ་བདག་འདུམ་བྱེད་ཀྱིས་དེ་ན་རང་སངས་རྒྱས་སྟོང་ལ་གཙང་ཞིང་བསོད་པའི་བཟའ་བ་དང་བཅའ་བ་སྣ་ཚོགས་དང་། ཚོད་མ་རོ་དང་ལྡན་པ་རྣམས་ཀྱིས་ཚིམ་པར་བྱས་ཏེ་ཚིགས་སུ་བཅད་དེ་སྨྲས་པ། བློ་ལྡན་མཁས་པས་ནོར་དང་ནི། །དད་པ་ཤེས་རབ་རྙེད་ནས་ནི། །སྐྱེས་བུ་དེ་ཡིས་རྟག་པར་ཡང་། །འདོད་ཆགས་བྲལ་ལ་ཡོན་དབུལ་ལོ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་ལྡན་པའི། །བརྟན་རྣམས་གང་གིས་བཤོས་གསོལ་བ། དེ་ཡི་རིགས་ནི་བདེ་བར་འཕེལ། །དེ་ལྟས་ཚུལ་ཁྲིམས་ཕུན་ཚོགས་པའི། །ཡོན་གནས་དག་ལ་ཡོན་ཕུལ་ན། །འཇིག་རྟེན་འདི་དང་ཕ་རོལ་དུ། །བདེ་བ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་དེའི་ཚེ་དེའི་དུས་ན་ཁྱིམ་བདག་འདུམ་བྱེད་ཅིས་བྱ་བར་གྱུར་པ་གང་གིས་མུ་གེ་ལོ་བཅུ་གཉིས་སུ་བྱུང་བ་ན་རང་སངས་
རྒྱས་སྟོང་ལ་བསོད་སྙོམས་སྦྱར་ཅིང་དེའི་གྲོགས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱས་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མ་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་ཁྱིམ་བདག་འདུམ་བྱེད་ཅིས་བྱ་བ་དེར་གྱུར་ཏེ། ང་ཉིད་ཀྱིས་དེ་ན་མུ་གེ་ལོ་བཅུ་གཉིས་སུ་བྱུང་བ་ན་རང་སངས་རྒྱས་སྟོང་ལ་བསོད་སྙོམ་སྦྱར་བས་ངའི་གྲོགས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱས་སོ། །རྒྱལ་པོ་ཆེན་པོ་ངའི་སྦྱིན་པའམ། སྦྱིན་པའི་བགོ་བཤའ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་སྦྱིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །