རྩོད་པའི་གཞི་འཆད་པ།
རྩོད་པ་ཞི་བར་བྱེད་པའི་གཞིའི་སྡོམ་ལ། འཐབ་དང་འགྱེད་པའི་རྩོད་པ་དང༌། །རྩ་བ་གང་དང་དགེ་བ་གང༌། །འགྱེད་པ་ཡིན་ལ་རྩོད་མིན་དང༌། །འགྱེད་བ་དུས་ནི་ཞི་བ་དང༌། །འགྱེད་པ་མངོན་སུམ་ཞི་བ་དང༌། །ཚུལ་ཤིང་དག་ནི་བླང་བ་ཡིས། །གདམས་ངག་མེད་པ་མངོན་སུམ་དང༌། །དྲན་དང་མ་མྱོས་འདུལ་འོས་དང༌། །དེ་ཡི་ངོ་བོ་ཚོལ་གཞུག་དང༌། རྩྭ་བཀྲམ་ལྟ་བུར་འོས་པ་ཡིས། །དགེ་འདུན་དག་ནི་མཐུན་པ་ཡིས། །དེ་བཞིན་བྱ་བའི་རྩོད་པ་ནི། །ཉེ་བར་ཞི་བར་བྱའོ་ཞེས། །དྲང་སྲོང་ཆེན་པོས་རབ་ཏུ་གསུངས། །སངས་རྒྱས་བཅོམ་ལྡན་འདས་ཡུལ་སེར་སྐྱའི་གཞི་ནྱ་
གྲོ་དྷའི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ཤཱཀྱ་རྣམས་བདེན་པ་ལ་བཀོད་པ་དེའི་ཚེ་དེ་རྣམས་བཅོམ་ལྡན་འདས་ལ་བལྟ་བའི་ཕྱིར་དུས་གསུམ་དུ་འདོང་བར་བྱེད་དོ། །བཅོམ་ལྡན་འདས་ཀྱིས་ཀྱང་དེ་རྣམས་ལ་ཡང་དང་ཡང་དུ་ཆོས་འཆད་པར་མཛད་དོ། །རྒྱལ་པོ་ཟས་གཙང་གི་ཀུན་དུ་སྤྱོད་པ་ནི་ཤཱཀྱའི་ཚོགས་ཀྱིས་བསྐོར་ནས་བཅོམ་ལྡན་འདས་ལ་བལྟ་བའི་ཕྱིར་དུས་གསུམ་དུ་འགྲོ་བར་བྱེད་དོ། །ཇི་ཙམ་ན་དུས་གཞན་ཞིག་ན་བཅོམ་ལྡན་འདས་འཁོར་བརྒྱ་ཕྲག་དུ་མའི་གུང་ལ་བཞུགས་ནས་སྦྲང་མའི་སྦྲང་རྩི་དངས་མ་ལྟ་བུའི་ཆོས་བཤད་པ་ན་འཁོར་བརྒྱ་ཕྲག་དུ་མ་དབང་པོ་རྣམས་མི་གཡོ་བས་བཅོམ་ལྡན་འདས་ལས་སྙན་པ་སྙན་པའི་ཆོས་ཉན་པར་བྱེད་དོ། །རྒྱལ་པོ་ཟས་གཙང་ཡང་ཆོས་མཉན་པའི་ཕྱིར་རྒྱལ་པོའི་འབྱོར་པ་ཆེན་པོ་དང༌། རྒྱལ་པོའི་མཐུ་ཆེན་པོས་ཤཱཀྱའི་ཚོགས་ཀྱིས་བསྐོར་ནས་བཅོམ་ལྡན་འདས་ཀྱི་སྤྱན་སྔར་སོང་སྟེ། དེས་ཆོས་མཉན་ནས་སོང་ངོ༌། །དེ་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ཏེ་དད་པ་སྐྱེས་ནས་རང་གི་ཁྱིམ་དུ་སོང་སྟེ་སྨྲས་པ། ཀྱེ་མའོ་སངས་རྒྱས། ཀྱེ་མའོ་ཆོས། ཀྱེ་མའོ་དགེ་འདུན། སངས་རྒྱས་བྱུང་བ་ནི་བདག་འབྲས་བུ་དང་བཅས་པ་ཡིན་ནོ། །མིང་ཆེན་གྱི་ཆུང་མ་དམ་པས་སྨྲས་པ། རྗེའི་སྲས་དེ་ཅི་ལགས། དེས་སྨྲས་པ། དེང་བཅོམ་ལྡན་འདས་ཀྱིས་འཁོར་བརྒྱ་ཕྲག་དུ་མའི་མདུན་དུ་འདི་འདྲ་བའི་ཆོས་བཤད་པ་མཛད་དེ། དེ་ཐོས་པས་སྲོག་ཆགས་བརྒྱ་སྟོང་ཕྲག་དུ་མས་ཁྱད་པར་ཆེན་པོ་རྟོགས་སོ། །དེས་སྨྲས་པ། རྗེའི་སྲས་སངས་རྒྱས་བྱུང་བ་ནི་བདག་འབྲས་བུ་དང་བཅས་པ་ཡིན་ནོ་ཞེས་གསུངས་པ་གང་ལགས་པ་དེ་མད་དེ། སངས་རྒྱས་བྱུང་བ་ནི་ཁྱེད་ཅག་ཁོ་ན་ལ་འབྲས་བུ་དང་བཅས་པ་ལགས་ཀྱི་བདག་ཅག་ལ་ནི་མ་ལགས་སོ། །ཅིའི་ཕྱིར་འདི་ལྟར་བཅོམ་ལྡན་འདས་འཇིག་རྟེན་དུ་བྱུང་བ་ནི་སྐྱེས་པ་རྣམས་ཀྱི་ཕྱིར་ལགས་ཀྱི་བུད་མེད་རྣམས་ཀྱི་ཕྱིར་ནི་མ་ལགས་སོ། །དེས་སྨྲས་པ། བཟང་མོ་དེ་སྐད་མ་སྨྲ་ཤིག །བཅོམ་ལྡན་འདས་ནི་སེམས་ཅན་ཐམས་ཅད་ལ་ཕན་པ་དང༌། ཐུགས་བརྩེ་བ་ཡིན་གྱིས་སོང་ཤིག་དང༌། ཁྱོད་ཀྱིས་ཀྱང་བཅོམ་ལྡན་
འདས་ཀྱི་སྤྱན་སྔ་ནས་ཆོས་ཐོས་པར་འགྱུར་རོ། །དེས་སྨྲས་པ། ལྷ་ཤཱཀྱའི་ཚོགས་ཀྱིས་བསྐོར་ནས་བཅོམ་ལྡན་འདས་ལ་བལྟ་བའི་ཕྱིར་དུས་གསུམ་དུ་བཞུད་ལ། ལྷའི་མདུན་དུ་མངོན་སུམ་དུ་བདག་གིས་ཆོས་མཉན་པ་གཡར་ཚ་ལགས་སོ། །འདི་ལྟར་གལ་ཏེ་ལྷ་སྔ་དྲོ་བཞུད་ན་བདག་གིས་ཀྱང་སླད་དྲོ་བཅོམ་ལྡན་འདས་ལས་ཆོས་མཉན་པར་བགྱིའོ། །ཤཱཀྱ་མིང་ཆེན་གྱིས་བསམས་པ། ལྷ་ལ་གསོལ་གྱིས་འགྲོའི་སྙམ་པ་ལས་ཡང་བསམས་པ། རང་གི་ཆུང་མའི་ཆེད་ལ་ལྷ་ལ་གསོལ་བ་བྱེད་མི་ཕོད་ཀྱིས། ལྷ་ནི་སྐྱེ་དགུའི་བདག་མོ་ཆེན་མོ་ལ་བཀུར་སྟི་མང་དུ་བྱེད་དེ། དེའི་ཚིག་ཉན་པར་འགྱུར་བས་དེ་ལ་དོན་འདི་རིག་པར་བྱའོ་སྙམ་ནས། དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་གང་ན་བ་དེར་སོང་སྟེ་ཕྱིན་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་དོན་དེ་སྨྲས་པ་དང༌། དེས་སྨྲས་པ། བཀའ་བཞིན་འཚལ། ལྷ་ལ་གསོལ་བར་བགྱིའོ། །དེ་ནས་ཤཱཀྱ་མིང་ཆེན་ཁྱིམ་དུ་སོང་ནས་ཤཱཀྱ་རྣམས་ཀྱི་ཆུང་མ་རྣམས་ལ་སྨྲས་པ་དང༌། དེ་ནས་ཤཱཀྱ་རྣམས་ཀྱི་ཆུང་མ་དང༌། གཞན་དག་གི་ཆུང་མ་རྣམས་སྐྱེ་དགུའི་བདག་མོ་ཆེན་མོ་གང་ན་བདེར་སོང་སྟེ་ཕྱིན་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །གཽ་ཏ་མཱི་མཁྱེན་པར་མཛོད་ཅིག་བདག་ཅག་གིས་བཅོམ་ལྡན་འདས་འཁོར་བརྒྱ་ཕྲག་དུ་མའི་མདུན་དུ་སྙན་པ་སྙན་པའི་ཆོས་སྦྲང་མའི་སྦྲང་རྩི་དངས་མ་ལྟ་བུ་བཤད་པ་ན་འཁོར་བརྒྱ་ཕྲག་དུ་མའི་དབང་པོ་རྣམས་མི་གཡོ་བས་བཅོམ་ལྡན་འདས་ལས་སྙན་པ་སྙན་པའི་ཆོས་ཉན་ཏོ་ཞེས་ཐོས་ནས་བདག་ཅག་ཀྱང་བཅོམ་ལྡན་འདས་ལས་ཆོས་དེ་ཐོས་པར་འཚལ་གྱིས་བདག་ཅག་གི་ཕྱིར་ལྷ་ལ་ཅི་ནས་ཀྱང་ལྷ་ནི་སྔ་དྲོ་བཅོམ་ལྡན་འདས་ཀྱི་སྤྱན་སྔར་བཞུད་ལ། བདག་ཅག་ཀྱང་སླད་དྲོ་མཆི་བར་གསོལ་ཅིག །དེས་སྨྲས་པ། ཕུ་ནུ་མོ་དག་ཁྱེད་ཀྱིས་སེམས་བསྐྱེད་པ་ལེགས་ཏེ། རྒྱལ་པོ་ཟས་གཙང་ལ་བརྟག་གིས་སྐད་ཅིག་སྡོད་ཅིག །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་རྒྱལ་པོ་ཟས་གཙང་གང་ན་བ་དེར་སོང་སྟེ་ཕྱིན་ནས། རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ། །ལྷ་མཁྱེན་པར་
མཛོད་ཅིག །བདག་གིས་བཅོམ་ལྡན་འདས་འཁོར་བརྒྱ་ཕྲག་དུ་མའི་གུང་ལ་བཞུགས་ནས་སྙན་པ་སྙན་པའི་ཆོས་སྦྲང་མའི་སྦྲང་རྩི་དངས་མ་ལྟ་བུ་བཤད་པ་ན་འཁོར་བརྒྱ་ཕྲག་དུ་མ་དབང་པོ་རྣམས་མི་གཡོ་བས་བཅོམ་ལྡན་འདས་ལས་སྙན་པ་སྙན་པའི་ཆོས་ཉན་ཏོ་ཞེས་ཐོས་སོ། །ཤཱཀྱའི་མཆིས་འབྲང་རྣམས་ཀྱིས་ཀྱང་དེ་སྐད་ཐོས་ནས་དེ་རྣམས་ཆོས་ཉན་པར་འཚལ་ན་ལྷ་ནི་སྔ་དྲོ་བཅོམ་ལྡན་འདས་ཀྱི་སྤྱན་སྔར་གཤེགས་པའི་རིགས་སོ། །བདག་གིས་ཀྱང་ཤཱཀྱའི་མཆིས་འབྲང་རྣམས་དེད་དེ་བཅོམ་ལྡན་འདས་ཀྱི་སྤྱན་སྔར་སླད་དྲོ་མཆི་བར་བགྱིའོ། །དེ་ཅིའི་ཕྱིར་ཞེ་ན། སྔ་དྲོ་ནི་དེ་རྣམས་བསྡུམ་པའི་བགྱི་བ་དག་བགྱིད་པས་བཅོམ་ལྡན་འདས་ཀྱི་སྤྱན་སྔར་མཆི་བའི་སྐབས་མ་མཆིས་སོ། །རྒྱལ་པོ་ཟས་གཙང་མའི་ཀུན་དུ་སྤྱོད་པ་ནི་གང་གི་ཚེ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཚིག་སྨྲས་པ་དེའི་ཚེ། ལུས་ཀྱི་བ་སྤུ་ཟིང་ཞེས་བྱེད་ནས་ལངས་ཏེ། རེ་ཞིག་སྐྱེ་དགུའི་བདག་མོ་ཆེན་མོའི་ཚིག་གི་ལན་མ་བྱིན་པ་དེའི་བར་དུ་མི་འདུག་པ་ཡིན་བས་དེས་མགོ་བོས་བཏུད་དེ་སྨྲས་པ། གཽ་ཏ་མཱི་བཀའ་བཞིན་འཚལ། དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ཤཱཀྱའི་ཆུང་མ་ལྔ་བརྒྱས་ཡོངས་སུ་བསྐོར་ཏེ། བཅོམ་ལྡན་འདས་ཀྱི་སྤྱན་སྔར་ཆོས་ཉན་པའི་ཕྱིར་ནྱ་གྲོ་དྷའི་ཀུན་དགའ་ར་བར་སོང་ངོ༌། །ཇི་ཙམ་ན་ཤཱཀྱ་མིང་ཆེན་གྱི་ཆུང་མ་ཡང་རྒྱན་ཐམས་ཅད་ཀྱིས་བརྒྱན་ནས་དེ་དང་ལྷན་ཅིག་སོང་སྟེ། གཟུགས་དང་ལང་ཚོ་དང་ལྡན་ཞིང་རྒྱན་ཐམས་ཅད་ཀྱིས་བརྒྱན་པས་འདོད་ཆགས་དང་མ་བྲལ་བ་དག་ཆགས་པ་སྐྱེ་བར་ཞུགས་པ་དེ་ཚེ་དང་ལྡན་པ་ཀུན་དགའ་བོས་མཐོང་ནས་སྨྲས་པ། སྲིང་མོ་རེ་ཞིག་ཁྱོད་ཀྱི་རང་བཞིན་གྱི་གཟུགས་ཉིད་ཀྱང་བཟང་མོ་བལྟ་ན་སྡུག་པ་མཛེས་པ་ཡིན་ན་རྒྱན་ཐམས་ཅད་ཀྱིས་བརྒྱན་པ་ལྟ་སྨོས་ཀྱང་ཅི་དགོས། ཁྱོད་རྒྱན་གྱིས་བརྒྱན་པ་འདིར་འོངས་པ་གང་ཡིན་པ་དེ་ནི་མ་ལེགས་པ་ཞིག་བྱས་ཏེ། བདག་ཉིད་ཆེན་པོ་འདི་དག་ནི་ཐམས་ཅད་འདོད་ཆགས་དང་བྲལ་བ་ཁོ་ན་ཡང་མ་ཡིན་ནོ་ཞེས་དེ་ལ་དེ་སྐད་སྨྲས་པ་དང༌། ངོ་ཚ་བ་སྙིང་ལ་ཕོག་པས་སྤྱི་པོ་སྨད་ནས་མཐའ་གཅིག་ཏུ་སོང་སྟེ། རྒྱན་རྣམས་བཀྲོལ་ནས་སེམས་ཁོང་དུ་ཆུད་ཅིང་འདུག་པ་ལས། དེའི་མངག་གཞུག་མ་བུ་མོ་
བསྐྱེད་མ་ཞེས་བྱ་བ་དང༌། དེ་ལྷན་ཅིག་ཆོས་མཉན་པའི་ཕྱིར་འོངས་པས་དེས་དེ་ལ་བོས་ཏེ་སྨྲས་པ། བསྐྱེད་མ་སོང་ལ་རྒྱན་འདི་དག་ཁྱིམ་དུ་ཞོག་ལ་ཤོག་ཤིག །དེ་རིངས་པར་སོང་ནས་དེས་ཁྱིམ་དུ་བཞག་སྟེ་སླར་འོངས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་ལྔ་བརྒྱ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ཀྱིས་ཀྱང་ཆོས་བཤད་པ་མཛད་དོ། །ཆོས་བཤད་པ་དེ་མཛད་པ་དེའི་ཚེ་ཇི་ཙམ་ན་ཤཱཀྱའི་བུ་མོ་ཞིག་མགུལ་པ་ན་མུ་ཏིག་གི་དོ་ཤལ་བཏགས་པ་ལ་མྱུར་བ་མྱུར་བར་ལྟ་ཞིང་ལག་པས་ནོམ་པར་བྱེད་དོ། །དེ་ནས་བཅོམ་ལྡན་འདས་ཀྱིས་མི་རྟག་པ་དང་ལྡན་པའི་ཆོས་བཤད་པར་བརྩམས་སོ། །འོན་ཀྱང་དེ་ཆོས་ལ་མི་གཏོད་ཀྱི་མུ་ཏིག་གི་དོ་ཤལ་ཁོ་ན་ལ་རྟོག་པར་བྱེད་དོ། །མིང་ཆེན་གྱི་ཆུང་མ་དམ་པས་ཤཱཀྱའི་བུ་མོ་མགུལ་པ་ན་མུ་ཏིག་གི་དོ་ཤལ་བཏགས་པ་ལ་མྱུར་བ་མྱུར་བར་རྟོག་པར་བྱེད་པ་མཐོང་ངོ༌། །མཐོང་ནས་ཀྱང་འདི་སྙམ་དུ་སེམས་ཏེ། ཉོན་མོངས་འདི་འདུ་བྱེད་རྣམས་འདི་ལྟར་མི་རྟག་པར་བཤད་ན་མུ་ཏིག་གི་དོ་ཤལ་འདི་ལ་ལྷག་པར་ཆགས་ཏེ་མྱུར་བ་མྱུར་བར་བརྟག་ཏུ་ཅི་ཡོད། གལ་ཏེ་བདག་གི་མུ་ཏིག་གི་ཕྲེང་བ་མཐོང་ན་འདིའི་རྒྱགས་པ་ཐམས་ཅད་དང་བྲལ་བར་འགྱུར་རོ་སྙམ་དུ་བསམས་ནས་མངག་གཞུག་མའི་བུ་མོ་བསྐྱེད་མ་ལ་སྨྲས་པ། བསྐྱེད་མ་སོང་ལ་ཁོ་མོའི་མུ་ཏིག་གི་དོ་ཤལ་མྱུར་དུ་ཁྱེར་ཏེ་ཤོག་ཤིག །དེ་ཆོས་ཉན་པ་དེ་ལ་སེམས་བསྡུས་པས་དེ་འདི་སྙམ་དུ་སེམས་ཏེ། ཀྱི་ཧུད་འདི་འདྲ་བའི་ཆོས་འཆད་ན་བདག་ཇོ་མོས་མདགས་པས་ཆོས་ཀྱི་བར་ཆད་བྱུང་བར་གྱུར་ཏེ། མདོར་ན་བྲན་གྱི་རང་བཞིན་དུ་གྱུར་པ་ནི་རེ་སྡུག་སྙམ་དུ་བསམས་ནས་སྡུག་བསྔལ་དང་ཡིད་མི་བདེ་བས་གདུངས་པས་ཚིགས་སུ་བཅད་པས་སྨྲས་པ། གང་ཡང་སྡིག་པས་དེ་རིང་རྒྱལ་ཞལ་བལྟ་བ་དང༌། །བདེ་གཤེགས་ཞལ་ནས་དྲི་མེད་ཆོས་མཉན་མི་འཐོབ་པ། །བྲན་དངོས་གཞན་དབང་སྡུག་བསྔལ་མང་པོ་ཐ་ཆད་དེ། །
བདག་གི་འཚོ་བ་སྔོན་བྱས་ལས་ཀྱིས་ཐོབ་པ་ངན། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བུ་མོ་བསྐྱེད་མ་འདི་ནི་སྔོན་གྱི་སངས་རྒྱས་རྣམས་ལ་ལྷག་པར་བྱ་བ་བྱས་པ་ཡིན་མོད་ཀྱི། ཚེ་ཆུང་ཞིག་ཡོད་པས་འདི་འཁོར་བའི་བཙོན་ར་ནས་དབྱུང་བར་བྱའོ་སྙམ་དུ་དགོངས་ནས། རྫུ་འཕྲུལ་གྱིས་གྲོ་ག་ལ། དགེ་མ་སྐྱེ་བ་བྱུང་ན་ནི། །འཇིག་པ་ཡིན་བར་བསམས་ནས་སུ། །ངས་གསུངས་པ་ཡི་དགེ་བ་ལ། །བརྩོན་འགྲུས་བསྐྱེད་ནས་མཉན་པར་བྱ། །ཞེས་བྲིས་ནས་བྱིན་ནོ། །དེ་ནས་བུ་མོ་བསྐྱེད་མ་དགའ་བ་དང༌། མགུ་བ་དང༌། རངས་པ་དང༌། ཡིད་བདེ་བ་སྐྱེས་ནས་ཚིགས་སུ་བཅད་པ་སྨྲས་བཞིན་སངས་རྒྱས་ལ་དམིགས་པའི་སེམས་ཁོ་ནས་སོང་བ་དང༌། ལས་རྣམས་བསྐལ་པ་བརྒྱར་ཡང་ནི། །ཆུང་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །ཅེས་བྱ་བ་ཡིན་པས་ཚེ་ཆུང་ཞིག་ཡོད་པའི་ལས་ཚོགས་པ་རྙེད་པ་དེ་བ་དྲུས་མ་ཞིག་གིས་བསད་དོ། །དེ་སངས་རྒྱས་ལ་སེམས་མངོན་པར་དད་པར་བྱས་ཏེ་ཤི་བས་སིང་ག་ལའི་གླིང་དུ་སིང་ག་ལའི་རྒྱལ་པོའི་བཙུན་མོ་དམ་པའི་མངལ་དུ་སྐྱེས་པར་གྱུར་ཏེ། གང་གི་ཉི་མ་ལ་ཉིང་མཚམས་སྦྱར་བ་དེ་ཁོ་ནའི་ཉིན་པར་མུ་ཏིག་གི་ཆར་བ་བབ་བོ། །རྒྱལ་པོས་ལྟས་མཁན་རྣམས་བཀུག་སྟེ་སྨྲས་པ་དང༌། དེ་རྣམས་ཀྱིས་སྨྲས་པ། ལྷ་འདི་ནི་སེམས་ཅན་ཞིག་བཙུན་མོའི་ལྷུམས་སུ་ཞུགས་པ་དེའི་མཐུ་ལགས་སོ། །ཇི་ཙམ་ན་མངལ་གྱི་སྨིན་པར་བྱ་བའི་ཕྱིར་དེ་སྒྲ་ཡིད་དུ་མི་འོང་བ་ཅུང་ཟད་ཀྱང་མི་གྲག་ཅིང་གྲང་བ་ན་གྲང་བའི་ཡོ་བྱད་དང༌། དྲོ་བ་ན་དྲོ་བའི་ཡོ་བྱད་དང༌། སྨན་པས་བསྟན་པའི་ཁ་ཟས་ཧ་ཅང་ཁ་བ་མ་ཡིན་པ་དང༌། ཧ་ཅང་སྐྱུར་བ་མ་ཡིན་པ་དང༌། ཧ་ཅང་ལན་ཚྭ་ཅན་མ་ཡིན་པ་དང༌། ཧ་ཅང་མངར་བ་མ་ཡིན་པ་དང༌། ཧ་ཅང་རྩུབ་པ་མ་ཡིན་པ་དང༌། ཧ་ཅང་བསྐ་བ་མ་ཡིན་པ་དང༌། ཁ་བ་དང༌། སྐྱུར་བ་དང༌། ལན་ཚྭ་དང༌། མངར་བ་དང༌། རྩུབ་པ་དང༌། བསྐ་བ་རྣམས་སྤངས་པའི་ཁ་ཟས་ཀྱིས་བསྙེན་བཀུར་བྱེད་ཅིང་དོ་ཤལ་དང་སེ་མོ་དོས་ལུས་བརྒྱན་ནས་ལྷའི་བུ་མོ་དགའ་
ཚལ་ན་རྒྱུ་བ་བཞིན་དུ་ཁྲི་ནས་ཁྲི་དང༌། ཁྲིའུ་ནས་ཁྲིའུར་འགྲོ་ཞིང་འོག་གི་སལ་འབབས་པར་མི་བྱེད་དོ། །དེ་ཟླ་བ་བརྒྱད་དམ་དགུ་འདས་ནས་བུ་མོ་གཟུགས་བཟང་བ་མཛེས་པ་བལྟ་ན་སྡུག་པ་ཞིག་བཙས་ཏེ། གང་གི་ཉི་མ་ལ་བཙས་པ་དེ་ཉིད་ཀྱི་ཉིན་པར་ཡང་མུ་ཏིག་གི་ཆར་བབ་ནས་རྒྱལ་པོས་བསམས་པ། འདི་ལྟར་བུ་མོའི་མཐུས་མུ་ཏིག་གི་ཆར་འབབ་པ་ནི་དེ་ཉིད་ཀྱི་མུ་ཏིག་ཏུ་འགྱུར་རོ་ཞེས་དེས་དེ་ཉིད་ལ་བྱིན་ནོ། །དེ་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་དེའི་བཙས་སྟོན་རྒྱ་ཆེར་བྱས་ནས་བུ་མོའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། གང་གི་ཕྱིར་འདིའི་མཐུས་མུ་ཏིག་གི་ཆར་བབ་པས་དེ་བས་ན་བུ་མོ་འདིའི་མིང་མུ་ཏིག་ཅན་ཞེས་གདགས་སོ་ཞེས་དེའི་མིང་མུ་ཏིག་ཅན་ཞེས་བྱ་བར་བཏགས་ཏེ། །བུ་མོ་མུ་ཏིག་ཅན་མ་མ་བརྒྱད་ལ་གཏད་དེ། པང་ན་འཚོ་བའི་མ་མ་གཉིས་དང༌། ནུ་མ་སྣུན་པའི་མ་མ་གཉིས་དང༌། དྲི་མ་འཕྱི་བའི་མ་མ་གཉིས་དང༌། རྩེན་གྲོགས་ཀྱི་མ་མ་གཉིས་ཏེ། དེ་མ་མ་བརྒྱད་པོ་དག་གིས་འོ་མ་དང༌། ཞོ་དང༌། མར་དང༌། ཞུན་མར་དང༌། མར་གྱི་སྙིང་པོ་དང༌། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིད་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་མོར་གྱུར་པ་དེའི་ཚེ་རང་གི་རིགས་དང་མཐུན་པའི་སྦྱོད་བ་དང༌། གནས་པས་རྒྱལ་པོ་ནང་མི་དང་བཅས་པས་ལྷག་པར་བཀུར་སྟི་བྱེད་དོ། །ཇི་ཙམ་དུས་གཞན་ཞིག་ན་མཉན་ཡོད་ཀྱི་ཚོང་པ་རྣམས་ཀྱིས་ནོར་བསྒྲུབ་པའི་ཕྱིར་རྒྱ་མཚོའི་གྲུ་བོ་ཆེ་བསྒྲུབས་ཏེ། རྒྱ་མཚོ་ཆེན་པོར་ཞུགས་པ་དང་དེ་རྣམས་གྲུ་བོ་ཆེ་ཕན་ཕུན་མེད་པར་རླུང་གི་ཤུགས་ཀྱིས་སིང་ག་ལའི་གླིང་དུ་ཕྱིན་ཏོ། །དེ་ནས་སྣོད་རྣམས་མཁོས་སུ་ཕབ་སྟེ། རྒྱལ་པོའི་ཕོ་བྲང་དང་ཧ་ཅང་ཡང་མི་རིང་བ་ཞིག་ཏུ་འབྲང་བཏབ་པོ། །དེ་རྣམས་ཀྱིས་མཚན་མོའི་ཐུན་ཐ་མ་ལ་ཆེད་དུ་བརྗོད་པ་དང༌། ཕ་རོལ་འགྲོ་བྱེད་དང༌། བདེན་པ་མཐོང་བ་དང༌། གནས་བརྟན་གྱི་ཚིགས་སུ་བཅད་
པ་དང༌། གནས་བརྟན་མའི་ཚིགས་སུ་བཅད་པ་དང༌། རི་གནས་ཀྱི་ཚིགས་སུ་བཅད་པ་དང༌། ཐུབ་པའི་ཚིགས་སུ་བཅད་པ་དང༌། དོན་གྱི་ཚོམས་ཀྱི་མདོ་སྡེ་རྣམས་རྒྱས་པར་འདོན་པ་ལ་ཞུགས་པ་མུ་ཏིག་ཅན་ཁྱིམ་གྱི་ནང་ན་འདུག་པས་སྐར་ཁུང་ནས་ཐོས་ནས། དེ་ནས་དེས་རྒྱལ་པོ་ལ་སྨྲས་པ། ལྷ་ཡུལ་དབུས་ཀྱི་ཚོང་པ་རྣམས་མཆིས་ནས་མཆིད་སྙན་པར་ལེན་ཏོ། །རྒྱལ་པོས་བློན་པོ་དག་ལ་བསྒོ་བ། ཤེས་ལྡན་དག་གླུ་མཁན་རྣམས་ཁུག་ཤིགཐདེ་རྣམས་བཀུག་པ་དང་མུ་ཏིག་ཅན་གྱིས་སྨྲས་པ། ཤེས་ལྡན་དག་ཡུལ་དབུས་ཀྱི་རོལ་མོ་ཅི་འདྲ་བ་ཁོ་མོས་མཉན་གྱིས་ལོང་ཤིག །དེ་རྣམས་ཀྱིས་སྨྲས་པ། ལྷ་མོ་བདག་ཅག་ནི་རོལ་མོ་མཁན་མ་ལགས་ཏེ། བདག་ཅག་ནི་མཉན་ཡོད་ཀྱི་ཚོང་བ་རླུང་གི་ཤུགས་ཀྱིས་འདིར་མཆིས་པ་ལགས་ཏེ། བདག་ཅག་གིས་མཚན་མོའི་ཐུན་ཐ་མ་ལ་སངས་རྒྱས་ཀྱི་གསུང་བཏོན་ཏོ། །མུ་ཏིག་ཅན་གྱིས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་དེ་ཐོས་ནས་སྙིང་དགའ་བས་བ་སྤུ་ཐམས་ཅད་ཟིད་ཞེས་བྱེད་དེ། དེ་ངོ་མཚར་སྐྱེས་ནས་དྲིས་པ། སངས་རྒྱས་ཞེས་བྱ་བ་འདི་ཅི་ཡིན། དེ་རྣམས་ཀྱིས་སངས་རྒྱས་ཀྱི་ཆེ་བའི་བདག་ཉིད་རྒྱས་པར་སྨྲ་བར་བརྩམས་ཏེ། ལྷ་མོ་ཤཱཀྱ་རྣམས་ཀྱི་གཞོན་ནུ་གངས་རིའི་ངོས་དང་ཉེ་བ། ཆུ་བོ་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་སྟེ། དེ་བྲམ་ཟེ་མཚན་མཁན་རྣམས་དང༌། ལྟས་མཁན་རྣམས་ཀྱིས་གལ་ཏེ་ཁྱིམ་པ་ཁྱིམ་ན་གནས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་འདི་ལྟ་བུ་དག་འབྱུང་བར་འགྱུར་བ་འདི་ལྟ་སྟེ། འཁོར་ལོ་རིན་པོ་ཆེ་དང༌། གླང་པོ་རིན་པོ་ཆེ་དང༌། རྟ་རིན་པོ་ཆེ་དང༌། ནོར་བུ་རིན་པོ་ཆེ་དང༌། བུད་མེད་རིན་པོ་ཆེ་དང༌། ཁྱིམ་བདག་རིན་པོ་ཆེ་དང༌། བདུན་པ་བློན་པོ་རིན་པོ་ཆེའོ། །དེ་ལ་
བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་བར་འགྱུར་ཞིང༌། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྔོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་ལུང་བསྟན་ཏེ། དེ་ལྟ་བུ་དེ་ནི་སངས་རྒྱས་ཞེས་བགྱི་བ་ལགས་སོ། །མུ་ཏིག་ཅན་གྱིས་སྨྲས་པ། གང་གི་ཚེ་ཁྱེད་ཅག་ཡུལ་དུ་འདོད་བ་དེའི་ཚེ་ཁོ་མོ་ལ་སྦྲོན་ཅིག །དེ་རྣམས་ཀྱིས་སྨྲས་པ། ལྷ་མོ་བཀའ་བཞིན་འཚལ། སྦྲན་བར་བགྱིའོ། །ཇི་ཙམ་ན་དེ་རྣམས་ཡུལ་དུ་འདོང་བའི་དུས་ལ་བབ་ནས་དེ་རྣམས་ཀྱིས་མུ་ཏིག་ཅན་ལ་སྦྲན་པ་དང༌། དེས་བཅོམ་ལྡན་འདས་ལ་ཡི་གེ་གསོལ་པ། ལྷ་དང་ལྷ་མིན་མི་ཡིས་ཕྱག་བགྱིས་པ། །སྐྱེ་དང་སྙུན་དང་བསྙེངས་ལས་ངེས་བྱུང་ཞིང༌། །གཙོ་བོ་གྲགས་པ་རྒྱ་ཆེན་རབ་གྲགས་པ། །དྲང་སྲོང་བདུད་རྩིའི་ཆ་ལས་ཐུགས་རྗེས་གནོང༌། །ཞེས་གསོལ་ཏོ། །དེ་ནས་ཡི་གེ་དེ་ཚོང་པ་དེ་རྣམས་ཀྱིས་ཁྱེར་ནས་རིམ་གྱིས་མཉན་ཡོད་དུ་ཕྱིན་པ་དང༌། ལམ་གྱིས་དུ་བ་པ་ངལ་སོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་མཉན་ཡོད་ཀྱི་ཚོང་པ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་སིང་ག་ལའི་གླིང་ན་སིང་ག་ལའི་རྒྱལ་པོའི་བུ་མོ་དེས་མཆིད་ཡི་གེ་གསོལ་བ་འདི་ལགས་སོ། །བཅོམ་ལྡན་འདས་ཀྱིས་མུ་ཏིག་ཅན་གྱི་འདུལ་བའི་དུས་མཁྱེན་ནས་ཉིད་ཀྱིས་བླངས་ཏེ་བཀླགས་སོ། །བཀླགས་ནས་བཀའ་སྩལ་པ། གང་གི་ཚེ་ཁྱེད་ཅག་སླར་འདོང་བར་གྱུར་པ་དེའི་ཚེ་
ངའི་སྙན་དུ་གསོལ་ཅིག །བཙུན་པ་བཀའ་བཞིན་འཚལ་ཞེས་ཚོང་པ་རྣམས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་དོང་ངོ༌། །དེ་ནས་ཟོང་བསྒྱུར་ཏེ་བསྒྱུར་བའི་ཟོང་ཐོགས་ནས་བཅོམ་ལྡན་འདས་ཀྱི་སྤྱན་སྔར་སོང་སྟེ་གསོལ་པ། བཅོམ་ལྡན་འདས་བདག་ཅག་མཆི་ན་བདག་ཅག་གིས་མུ་ཏིག་ཅན་ལ་ཇི་སྐད་བགྱི་བཀའ་སྩལ་པར་གསོལ། བཅོམ་ལྡན་འདས་ཀྱིས་བཀའ་སྩལ་བ། ཤིན་ཏུ་ལེགས་པར་བྱི་དོར་བྱས་པའི་རས་དང་རི་མོ་མཁན་དག་ཁུག་ཤིག །དེ་རྣམས་ཀྱིས་རས་དང་རི་མོ་མཁན་དག་བཀུག་ནས་ཕུལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། རས་ལ་དེ་བཞིན་གཤེགས་པའི་སྐུའི་གཟུགས་བརྙན་བྲིས་ཤིགཐརི་མོ་མཁན་རྣམས་ཀྱིས་སངས་རྒྱས་ཀྱི་སྐུའི་གཟུགས་བརྙན་བྲི་བར་བརྩམས་པ་ལས་དེ་བཞིན་གཤེགས་པ་ནི་བསོད་ནམས་བརྒྱ་ཕྲག་དུ་མས་བསྒྲུབས་པ་ཡིན་པས་རི་མོ་མཁན་རྣམས་ཀྱིས་བཅོམ་ལྡན་འདས་ཀྱི་སྐུའི་གཟུགས་བརྙན་བྲི་བར་མ་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། རས་སྟོན་ཅིག་དང་འོད་གཏང་ངོ༌། །དེ་རྣམས་ཀྱིས་རས་བསྟན་པ་དང་བཅོམ་ལྡན་འདས་ཀྱིས་འོད་བཏང་བ་ལ་རི་མོ་མཁན་རྣམས་ཀྱིས་ཚོན་རྩི་སྣ་ཚོགས་ཀྱིས་རྒྱས་པར་བྱས་སོ། །དེ་ནས་བཅོམ་ལྡན་འདས་ཀྱིས་སྐུའི་གཟུགས་བརྙན་གྱི་འོག་ཏུ་གསུམ་ལ་སྐྱབས་སུ་འགྲོ་བ་དང༌། བསླབ་པའི་གཞི་ལྔ་རྣམས་དང༌། རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་པོ་ལུགས་དང་མཐུན་པ་དང༌། ལུགས་དང་མི་མཐུན་པ་དང༌། འཕགས་པའི་ལམ་ཡན་ལག་བརྒྱད་པ་བྲིས་སོ། །གོང་དུ་ནི་ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་བར་བྱ། །གང་ཞིག་རབ་ཏུ་བག་ཡོད་པས། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྲིས་ནས་སིང་ག་ལའི་རྒྱལ་པོ་ལ་བཀའ་ཡིག་སྤྲིང་པ། རས་ལ་རི་མོར་བྲིས་པ་ངས་མུ་ཏིག་ཅན་
ལ་སྐྱེས་སུ་བསྐུར་བ་ཡིན་གྱིས། ཁྱོད་ཀྱིས་དེ་ལས་ཕྱོགས་ཡངས་ཤིང་རྒྱ་ཆེ་བར་སིང་ག་ལའི་གླིང་ན་གནས་བའི་སྐྱེ་བོའི་ཚོགས་བསྡུས་ལ། བཀུར་སྟི་ཆེན་པོས་རས་འདི་ཁྲོམ་ཤིགཐཚོང་པ་དེ་རྣམས་ལ་བཀའ་སྩལ་པ། གལ་ཏེ་མུ་ཏིག་ཅན་འདི་ཅི་ཡིན་ཞེས་འདྲི་ན། འདི་ནི་བཅོམ་ལྡན་འདས་དེའི་སྐུའི་གཟུགས་བརྙན་ཡིན་ནོ་ཞེས་བརྗོད་པར་བྱའོ། །གལ་ཏེ་འོག་མ་འདི་ཅི་ཡིན་ཞེས་འདྲི་ན་དེ་དག་ནི་གསུམ་ལ་སྐྱབས་སུ་འགྲོ་བ་དང༌། བསླབ་པའི་གཞི་ལྔ་རྣམས་དང༌། ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བར་འགྲོ་བར་འཇུག་པ་དང་ལྡོག་པའོ། །འདི་ནི་བདུད་རྩི་རྟོགས་པའི་འཕགས་པའི་ལམ་ཡན་ལག་བརྒྱད་པ་ཡིན་ནོ་ཞེས་བརྗོད་པར་བྱའོ། །གལ་ཏེ་གོང་མ་འདི་ཅི་ཡིན་ཞེས་འདྲི་ན་སྤྲོ་བར་བྱ་བ་ཡིན་ཏེ། གང་ཞིག་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་ཏེ། ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བ་འདི་ལ་རྟོག་ཅིང་བརྩོན་འགྲུས་རྩོམ་པ་དེ་བདུད་རྩི་རྟོགས་པའི་འཕགས་པའི་ལམ་ཐོབ་ནས་སྡུག་བསྔལ་ཐམས་ཅད་ལས་གྲོལ་བར་འགྱུར་བ་ཡིན་ནོ་ཞེས་བརྗོད་པར་བྱའོ། །བཙུན་པ་བཀའ་བཞིན་འཚལ་ཞེས་ཚོང་པ་དེ་རྣམས་ཀྱིས་བཅོམ་ལྡན་འདས་ལས་མཉན་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ༌། །དེ་ནས་དགེ་མཚན་དང༌། བཀྲ་ཤིས་དང༌། བདེ་ལེགས་སུ་འགྱུར་བ་དག་བྱས་ཏེ། ཟོང་ཁྱེར་ནས་སིང་ག་ལའི་གླིང་དུ་སོང་སྟེ། རིམ་གྱིས་སིང་ག་ལའི་གླིང་དུ་ཕྱིན་ནས་ལམ་གྱིས་དུབ་བ་ངལ་སོས་ཏེ། རྒྱལ་པོའི་དྲུང་དུ་སོང་ནས་རྐང་པ་གཉིས་ལ་གཏུགས་ཏེ་ཡི་གེ་བྱིན་ནོ། །རྒྱལ་པོས་ཡི་གེ་བཀླགས་ཏེ་བཀླགས་ནས་གྲོང་ཁྱེར་དེ་རྡོ་བ་དང༌། གསེག་མ་དང༌། གྱོ་མོ་བསལ་ནས་ཙན་དན་གྱི་ཆུས་ཆག་ཆག་བཏབ། རྒྱལ་མཚན་དང་བ་དན་བསྒྲེང༌། དར་གྱི་ཆུན་འཕྱང་མང་པོ་བཏགས། ཤིན་ཏུ་དྲི་ཞིམ་པོའི་པོག་པོར་ཉེ་བར་བཞགཐམེ་ཏོག་སྣ་ཚོགས་བཀྲམ་སྟེ། སིང་ག་ལའི་གླིང་ན་གནས་པའི་སྐྱེ་བོའི་ཚོགས་བསོགས་ནས། དེ་ནས་བཀུར་སྟི་ཆེན་པོ་བྱས་ཏེ་གྲོང་ཁྱེར་གྱི་དབུས་སུ་རིན་པོ་ཆེ་སྣ་བཞི་ལས་བྱས་པའི་སེང་གེའི་ཁྲི་བཤམས་ཏེ། རས་ཕྱེ་བ་དང་སྐྱེ་བོའི་ཚོགས་ཆེན་པོས་སངས་རྒྱས་
ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་གསང་བསྟོད་དེ་སྨྲས་སོ། །དེ་ནས་རྒྱལ་པོའི་བུ་མོ་མུ་ཏིག་ཅན་དད་པ་དྲག་པོས་གཏད་པའི་སྙིང་གིས་བ་སྤུ་ཟིང་ཞེས་བྱེད་ཅིང་མིག་མཆི་མས་གང་བས་ཞབས་གཉིས་ལ་གཏུགས་ཏེ་ཚོང་པ་རྣམས་ལ་དྲིས་པ། ཤེས་ལྡན་དག་འདི་ཅི་ཡིན། དེ་རྣམས་ཀྱིས་སྨྲ་བར་བརྩམས་པ། འདི་ནི་བཅོམ་ལྡན་འདས་དེའི་སྐུའི་གཟུགས་བརྙན་ལགས་སོ། །འོག་མ་འདི་དག་ཅི་ཡིན། འདི་ནི་གསུམ་ལ་སྐྱབས་སུ་འགྲོ་བ་དང་བསླབ་པའི་གཞི་ལྔ་རྣམས་དང༌། ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བ་འགྲོ་བར་འཇུག་པ་དང་ལྡོག་པའོ། །འདི་ནི་བདུད་རྩི་རྟོགས་པའི་འཕགས་པའི་ལམ་ཡན་ལག་བརྒྱད་པ་ལགས་སོ། །གོང་མ་འདི་ཅི་ཡིན། སྤྲོ་བར་བགྱི་བ་ལགས་ཏེ། གང་ཞིག་སྐྱབས་སུ་སོང་ནས་བསླབ་བའི་གཞི་རྣམས་བླངས་ཏེ་ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པ་འདི་ལ་རྟོག་ཅིང་བརྩོན་འགྲུས་རྩོམ་པ་དེ་བདུད་རྩི་རྟོགས་པའི་ལམ་ཐོབ་ནས་སྡུག་བསྔལ་ཐམས་ཅད་ལས་གྲོལ་བར་འགྱུར་བ་ལགས་སོ། །དེ་ནས་མུ་ཏིག་ཅན་གྱིས་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པ་ལུགས་དང་མཐུན་པ་དང་ལུགས་དང་མི་མཐུན་པ་བསམ་པར་བརྩམས་ཏེ། ཇི་སྲིད་ལན་སུམ་དུ་མ་བཟླས་པ་དེའི་བར་དུ་དེས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། ངེས་བདེན་པ་མཐོང་ནས་ཚིགས་སུ་བཅད་པས་སྨྲས་པ། རིང་ན་བཞུགས་པའི་སངས་རྒྱས་ཀྱིས། །ཤེས་རབ་མིག་ནི་རྣམ་སྦྱངས་པས། །གང་ལ་འདི་འདྲའི་གསོས་མངའ་བ། །སྨན་མཁས་དེ་ལ་ཕྱག་འཚལ་ལོ། །རིང་ན་བཞུགས་པའི་སངས་རྒྱས་ཀྱིས། །ལྟ་བའི་རི་བོ་དྲུངས་ཕྱུང་སྟེ། །ལྟ་བའི་ཟུང་རྔུ་སེལ་མཛད་པ། །སྨན་མཁས་དེ་ལ་ཕྱག་འཚལ་ལོ། །ཞེས་ཚིགས་སུ་བཅད་པས་སྨྲས་ནས་ཚོང་པ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅག་ནམ་འདོང་བ་དེའི་ཚེ་ཁོ་མོ་ལ་སྦྲོན་ཅིགཐདེ་ནས་ཚོང་པ་རྣམས་ཀྱིས་ཟོང་རྣམས་བསྒྱུར་ཏེ་
བསྒྱུར་བའི་ཟོང་རྣམས་ཁྱེར་ནས་མུ་ཏིག་ཅན་གྱི་དྲུང་དུ་སོང་སྟེ། ལྷ་མོ་བདག་ཅག་མཆི་ན་བདག་ཅག་གིས་ཅི་ཞིག་བགྱི་བར་བཀའ་སྩལ་པར་གསོལ། །དེས་སྨྲས་པ། ཁོ་མོའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚོལ་ལ་གནོད་པ་ཆུང་ངམ། ཉམ་ང་བ་ཉུང་ངམ། འཚོའམ། བསྐྱོད་པ་ཡང་ངམ། སྟོབས་དང་བདེ་བ་དང༌། སྐུ་ཉམས་དང་ལྡན་ནམ་རེག་པར་གནས་སམ་ཞེས་ཞུས་ལ་འདི་སྐད་ཅེས། བཙུན་པ་དགེ་བའི་བཤེས་གཉེན་གྱིས་བགྱི་བ་གང་ལགས་པ་དེ་བཅོམ་ལྡན་འདས་ཀྱིས་མཛད་དེ། བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་སེམས་ཅན་དམྱལ་བ་དང༌། དུད་འགྲོ་དང༌། ཡི་དགས་རྣམས་ལས་ནི་རྐང་པ་ཕྱུང༌། ལྷ་དང་མི་རྣམས་སུ་ནི་བཞགཐའཁོར་བ་ལས་ནི་རྒྱང་བསྲིངས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་ནི་བསྐུམ། མཐོ་རིས་ཐར་པའི་སྒོ་ནི་ཕྱེ། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ནི་འཕགས་སོ། །མངོན་པར་འཕགས་སོ། །བདག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོ་བའི་བར་དུ་སྲོག་དང་ཡང་བསྔོས་དེ་སྐྱབས་སུ་མཆི་བར་མངོན་པར་དད་ལགས་སོ། །ཞེས་གསོལ་ལ། མུ་ཏིག་བྲེ་གསུམ་པོ་འདི་ཁྱེར་ལ་ཆ་གཅིག་ནི་སངས་རྒྱས་ལ། ཆ་གཅིག་ནི་ཆོས་ལ། ཆ་གཅིག་ནི་དགེ་འདུན་ལ་ཕུལ་ཅིགཐདེ་ནས་ཚོང་པ་དེ་རྣམས་ཀྱིས་ཟོང་དང་སྐྱེས་བསྐུར་བ་ཡང་ཁྱེར་ཏེ་དོང་ནས་རིམ་གྱིས་མཉན་ཡོད་དུ་ཕྱིན་པ་དང༌། ལམ་གྱིས་དུབ་པ་ངལ་སོས་ནས་བཅོམ་ལྡན་འདས་གང་ན་བ་དེར་སོང་སྟེ་ཞབས་གཉིས་ལ་གཏུགས་ནས་ཇི་སྐད་སྤྲིང་བ་བཞིན་བཅོམ་ལྡན་འདས་ལ་གསོལ་ནས་འདི་སྐད་ཅེས་ཀྱང་གསོལ་ཏོ། །བཙུན་པ་སྐྱེས་སུ་ཕུལ་བའི་མུ་ཏིག་བྲེ་གསུམ་པོ་འདི་ལགས་ཏེ། མུ་ཏིག་ཆ་གཅིག་
ནི་སངས་རྒྱས་ལ། ཆ་གཅིག་ནི་ཆོས་ལ། ཆ་གཅིག་ནི་དགེ་འདུན་ལ་ཕུལ་ལགས་སོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཞུས་པ། བཙུན་པ་སྐྱེས་འདི་གང་ནས་མཆིས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ཤཱཀྱ་མིང་ཆེན་གྱི་མངག་གཞུག་མ་བསྐྱེད་མ་ཞེས་བྱ་བ་ང་ལས་ཆོས་མཉན་ནས་སོང་བ་ལས། ལམ་ཀར་བ་དྲུས་མས་བསད་པ་མཐོང་ངམ། བཙུན་པ་མཐོང་ལགས་སོ། །དེས་ང་ལ་སེམས་དང་བ་བསྐྱེད་དེ་ཤི་བས་སིང་ག་ལའི་རྒྱལ་པོའི་བུ་མོ་མུ་ཏིག་ཅན་ཞེས་བྱ་བར་གྱུར་ཏེ། བདེན་པ་མཐོང་ནས་དེས་སྐྱེས་བསྐུར་བ་འདི་ཡིན་ནོ། །འདི་ལས་སངས་རྒྱས་ཀྱི་སྐལ་བ་གང་ཡིན་པ་དེས་དྲི་གཙང་ཁང་གི་ཞལ་ཞལ་བྱོས་ཤིགཐཆོས་ཀྱི་གང་ཡིན་པ་དེ་ནི་ཆོས་འཛིན་པའི་གང་ཟག་རྣམས་ལའོ། །དགེ་འདུན་གྱི་གང་ཡིན་པ་དེ་ནི་དགེ་འདུན་གྱིས་མཉམ་པར་བགོས་ཤིགཐདགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་མུ་ཏིག་ཅན་གྱིས་ལས་ཅི་ཞིག་བགྱིས་ན་དེས་ན་བྲན་མོར་གྱུར་ལགས། ལས་ཅི་ཞིག་བགྱིས་ན་དེས་རྒྱལ་པོ་ཕྱུག་པོའི་རིགས་སུ་སྐྱེས་ཤིང་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མུ་ཏིག་ཅན་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་མུ་ཏིག་ཅན་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་དག་བྱས་ཤིང་བསགས་པ་དག་ནི་ཟིན་པའི་ཕུང་པོ་དང༌། ཁམས་དང༌། སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་
རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་བ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་སྟོན་པ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་ནས། དེས་སངས་རྒྱས་ཀྱི་མཛད་པ་མཐའ་དག་མཛད་ནས་བུད་ཤིང་ཟད་པའི་མེ་བཞིན་དུ་བཱ་རཱ་ཎ་སཱིར་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་བ་དང༌། རྒྱལ་པོ་ཀྲྀ་ཀཱིས་དེའི་སྐུ་དྲི་ཞིམ་པོའི་ཤིང་ཐམས་ཅད་ཀྱིས་སྤུངས་ཏེ། སྤུངས་ནས་བཀུར་སྟི་ཆེན་པོས་བསྲེགས་ཏེ་མེ་དེ་འོ་མས་བསད་ནས་སྐུ་གདུང་དེ་རྣམས་གསེར་གྱི་བུམ་པར་བླུགས་ཏེ། ལམ་པོ་ཆེའི་བཞི་མདོར་རིན་པོ་ཆེ་སྣ་བཞི་ལས་བྱུང་བའི་མཆོད་རྟེན་ཁོ་ར་ཁོར་ཡུག་ཏུ་དཔག་ཚད་གཅིག་ཡོད་ལ། འཕང་དུ་དཔག་ཚད་ཕྱེད་པ་ཞིག་བརྩིགས་ནས་དུས་མཆོད་ཆེན་པོ་བཙུགས་སོ། །བཱ་རཱ་ཎ་སཱིན་ཚོང་དཔོན་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་ཡོད་པ་དེས། རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱང་དེ་ལ་བུ་ཕོ་ཡང་མེད་བུ་མོ་ཡང་མེད་ནས། དེ་ལག་པ་འགྲམ་པ་ལ་གཏད་ནས་བདག་གི་ཁྱིམ་དུ་ནོར་ཕལ་པོ་ཆེ་བསགས་ཀྱང་བདག་ལ་བུ་ཕོ་ཡང་མེད་བུ་མོ་ཡང་མེད་པས་བདག་ཤི་ནས་བདོག་པ་ཐམས་ཅད་བུ་མེད་དོ་ཞེས་བྱས་ཏེ་རྒྱལ་པོས་དབང་བྱས་པར་གྱུར་རོ་སྙམ་ནས་སེམས་ཁོང་དུ་ཆུད་ཅིང་འདུག་པ་དེ་ལ་དགེ་སློང་དང་བྲམ་ཟེ་དང༌། གྲོགས་པོ་དང་མཛའ་བཤེས་དང༌། ཉེ་དུ་དང༌། ལྟས་མཁན་རྣམས་ཀྱིས་སྨྲས་པ། ལྷ་མཉེས་པར་བྱོས་ཤིག་དང་ཁྱོད་ལ་བུ་ཡོད་པར་འགྱུར་རོ། །དེ་བུ་མེད་དེ་བུ་མངོན་པར་
འདོད་པས་ཞི་བ་དང༌། ཆུ་ལྷ་དང༌། ལུས་ངན་དང༌། བརྒྱ་བྱིན་དང༌། ཚངས་པ་ལ་སོགས་པ་གཞན་ཡང་ལྷ་ཁྱད་པར་ཅན་རྣམས་ལ་གསོལ་བ་འདེབས་པ་འདི་ལྟ་སྟེ། ཀུན་དགའ་ར་བའི་ལྷ་དང༌། ནགས་ཚལ་གྱི་ལྷ་དང༌། བཞི་མདོའི་ལྷ་དང༌། སུམ་མདོའི་ལྷ་དང༌། གཏོར་མ་ལེན་པའི་ལྷ་དང༌། ལྷན་ཅིག་སྐྱེས་པའི་ལྷ་དང༌། ཆོས་མཐུན་བ་པ་དང༌། རྟག་ཏུ་རྗེས་སུ་འབྲང་བའི་ལྷ་ལ་ཡང་གསོལ་བ་འདེབས་སོ། །འདི་ལྟར་གསོལ་བ་འདེབས་པའི་རྒྱུས་བུ་ཕོ་དང་བུ་མོ་སྐྱེ་བར་འགྱུར་རོ་ཞེས་འཇིག་རྟེན་ན་དེ་སྐད་དུ་གྲགས་པ་ཡོད་དེ། དེ་ཡང་དེ་ལྟ་མ་ཡིན་ཏེ། གལ་ཏེ་དེ་ལྟར་འགྱུར་ན་ནི་རེ་རེ་ཡང་དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འོན་ཀྱང་གནས་གསུམ་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་ཏེ། གནས་གསུམ་གང་ཞེ་ན་ཕ་དང་མ་གཉིས་ཆགས་པར་གྱུར་ཅིང་ལྷན་ཅིག་འདུས་པ་དང༌། མ་མངལ་རུང་བར་གྱུར་ཅིང་ཟླ་མཚན་དང་ལྡན་པ་དང༌། དྲི་ཟ་ཉེ་བར་གནས་པར་གྱུར་པ་སྟེ། གནས་དེ་གསུམ་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་བ་ཡིན་ན་དེས་བུ་ཡོད་པའི་ལས་མ་བྱས་པས་དེས་ན་དེ་ལ་བུ་ཕོ་དང་བུ་མོ་མེད་དོ། །ཇི་ཙམ་ན་དེ་ནད་ཀྱིས་ཐེབས་ནས་དེ་རྩ་བ་དང༌། སྡོང་བུ་དང༌། ལོ་མ་དང༌། མེ་ཏོག་དང༌། འབྲས་བུའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏོ། །དེ་ནས་དེའི་ཆུང་མས་བསམས་པ། བདག་གི་ཁྱིམ་ན་ནོར་ཕལ་མོ་ཆེ་བསགས་པ་ནི་བདག་ལ་བུ་ཕོ་ཡང་མེད་བུ་མོ་ཡང་མེད་ལ། བདག་གི་ཁྱིམ་ཐབ་འདི་ནི་འཆི་བར་འགྱུར་གྱིས། ད་ནི་གལ་ཏེ་འཇིག་རྟེན་ཕ་རོལ་གྱི་ལམ་རྒྱགས་མ་བླངས་ན་ནོར་ཟས་འདི་ཐམས་ཅད་བདག་ལ་བུ་མེད་དོ་ཞེས་བྱས་ནས་རྒྱལ་པོས་དབང་བྱས་པར་འགྱུར་རོ་སྙམ་ནས། དེའི་མུ་ཏིག་གི་དོ་ཤལ་བརྒྱ་སྟོང་རི་བ་མགུལ་ན་ཐོགས་པ་དེས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་དེ་ལ་དྲི་དང་བྱུག་པས་བྱུགས་ནས་མཆོད་པ་བྱས་ཏེ་བཏགས་ནས་དད་པ་དྲག་པོས་དྲུང་དུ་གཏུགས་ཏེ་སྨོན་ལམ་བཏབ་པ། སྦྱིན་པའི་ཆོས་ཡོངས་སུ་བཏང་བ་དང་སེམས་བསྐྱེད་
པའི་དགེ་བའི་རྩ་བ་འདིས་བདག་ཕྱུག་པོའི་རིགས་སུ་སྐྱེས་ཤིང་ཡོན་ཏན་འདི་ལྟ་བུ་ཡང་ཐོབ་ཅིང་སྟོན་པ་འདི་ལྟ་བུ་མཉེས་པར་བྱེད་ཀྱི། མི་མཉེས་པར་མ་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཚོང་དཔོན་གྱི་ཆུང་མ་གང་ཡིན་པ་དེ་ནི་མུ་ཏིག་ཅན་འདི་ཉིད་ཡིན་ཏེ། འདིས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བྱ་བ་བྱས་ནས། སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ཕྱུག་པོའི་རིགས་སུ་སྐྱེས་ཤིང་བཙས་པ་ན་མུ་ཏིག་གི་ཆར་བབ་བོ། །ངའི་བསྟན་པ་ལ་ཡང་དད་པ་བསྐྱེད་པས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །གཞན་ཡང་ཚོང་དཔོན་ནོར་མང་དུ་བསགས་པ་དེའི་ཆུང་མར་གྱུར་བ་ན་དེ་ན་འདིས་དབང་ཕྱུག་གི་གྲགས་པས་རྒྱགས་ནས་སྤྱོད་ཡུལ་ན་གནས་པའི་འཇིག་རྟེན་ཐམས་ཅད་ལ་ཚིག་ཏུ་བྲན་མོའི་བུ་ཞེས་སྨྲས་པས། དེའི་ལས་ཀྱི་རྣམ་པར་སྨིན་པས་ཚེ་རབས་མང་པོར་བྲན་མོར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ཞིང༌། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་ལ། འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དེ་བས་ན་དགེ་སློང་དག་གཅིག་ཏུ་གནག་པའི་ལས་རྣམས་དང༌། འདྲེན་མ་རྣམས་ནི་སྤངས་ལ། གཅིག་ཏུ་དཀར་བའི་ལས་ཁོ་ན་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །བཅོམ་ལྡན་འདས་ཀྱིས་ཆོས་ཀྱི་ཆ་གང་ཡིན་པ་དེ་ནི་ཆོས་སྨྲ་བའི་གང་ཟག་རྣམས་ཀྱི་ཡིན་ནོ་ཞེས་གསུངས་པ་དང༌། དེ་ནས་མདོ་སྡེ་འཛིན་པ་རྣམས་ཀྱིས་སྨྲས་པ། ཁོ་བོ་ཅག་ནི་བཅོམ་ལྡན་འདས་ཀྱི་མདོ་སྡེ་མཐའ་དག་འཛིན་པས། ཁོ་བོ་ཅག་ཆོས་འཛིན་པ་ཡིན་པས་རྙེད་པ་འདི་ནི་ཁོ་བོ་ཅག་དབང་ངོ༌། །འདུལ་བ་འཛིན་པ་རྣམས་ཀྱིས་སྨྲས་པ། ཁོ་བོ་ཅག་ནི་བཅོམ་ལྡན་འདས་ཀྱི་ནང་གི་མཛོད་སྲུང་ཞིང་ཁོ་བོ་ཅག་འདུལ་བ་མཐའ་དབ་འཛིན་པས། ཁོ་བོ་ཅག་ཆོས་འཛིན་པ་ཡིན་པས་རྙེད་པ་འདི་ནི་ཁོ་བོ་ཅག་དབང་ངོ༌། །མ་མོ་འཛིན་པ་རྣམས་ཀྱིས་སྨྲས་པ།
ཁོ་བོ་ཅག་ནི་མདོ་སྡེ་དང་འདུལ་བའི་རང་གི་མཚན་ཉིད་དང་སྤྱིའི་མཚན་ཉིད་འཛིན་པས། ཁོ་བོ་ཅག་ཆོས་འཛིན་པ་ཡིན་པས་རྙེད་པ་འདི་ནི་ཁོ་བོ་ཅག་དབང་ངོ་ཞེས་དེ་ན་མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་རྣམས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མ་འཐབ་ཤིགཐམཚང་མ་འདྲུ་ཞིགཐའཐབ་མོ་མ་བྱེད་ཅིགཐམ་འགྱེད་ཅིག །དགེ་སློང་དག་བཞི་པོ་འདི་དག་ནི་རྩོད་པ་ཡིན་ཏེ། བཞི་གང་ཞེ་ན། འགྱེད་པའི་རྩོད་པ་དང༌། གདམས་ངག་མེད་པའི་རྩོད་པ་དང༌། ལྟུང་བའི་རྩོད་པ་དང༌། བྱ་བའི་རྩོད་པའོ། །འགྱེད་པའི་རྩོད་པ་གང་ཞེ་ན། དགེ་འདུན་སྣ་ཚོགས་སུ་སྨྲ་པ། འགལ་བར་སྨྲ་བ། རིགས་མི་འཕྲོད་པར་སྨྲ་བ། མི་མཐུན་པ་ཀུན་ཏུ་མི་དགའ་བ། རྒྱུད་གཅིག་ཏུ་མ་གྱུར་པ་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་འགྱེད་པའི་རྩོད་པ་ཞེས་བྱའོ། །གདམས་ངག་མེད་པའི་རྩོད་པ་གང་ཞེ་ན། དགེ་འདུན་གྱི་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་གཞག་པ་གང་ཡིན་པ་དེ་ལས་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་གདམས་ངག་མེད་པའི་རྩོད་པ་ཞེས་བྱའོ། །ལྟུང་བའི་རྩོད་པ་གང་ཞེ་ན། ལྟུང་བ་ལྔ་ནི་ལྟུང་བའི་ཕུང་པོ་ལྔ་ཞེས་བྱ་སྟེ། ལྔ་གང་ཞེ་ན། ཕས་ཕམ་པ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་གང་ཡིན་པ་དེ་ལས་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་ལྟུང་བའི་རྩོད་པ་ཞེས་བྱའོ། །བྱ་བའི་རྩོད་པ་གང་ཞེ་ན། དགེ་འདུན་གྱི་བྱ་བ་གསོལ་བ་དང༌། གསོལ་བ་དང་གཉིས་དང༌། གསོལ་བ་དང་བཞིའི་ལས་གང་ཡིན་པ་དེ་ལས་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་བྱ་བའི་
རྩོད་པ་ཞེས་བྱའོ། །དགེ་སློང་དགའ་འགྱེད་པའི་རྩོད་པ་ནི་ཅི་ཞིག་གི་རྩ་བ་ཅན་ཡིན་ཞིང་འགྱེད་པའི་རྩོད་པའི་རྩ་བ་ནི་ཅི་ཡིན་ཞེ་ན། འགྱེད་པའི་རྩ་བ་དྲུག་དང༌། འགྱེད་པར་བྱེད་པའི་གཞི་བཅུ་བཞི་སྟེ། འགྱེད་པའི་རྩ་བ་དྲུག་གང་ཞེ་ན། འདི་ལྟར་འདི་ན་ལ་ལ་ཁྲོ་བ་ཡིན་ཞིང་ཁོན་དུ་འཛིན་པ་ཡིན་ཏེ་ཁྲོ་ཞིང་ཁོན་དུ་འཛིན་པ་གང་ཡིན་པ་དེ་ནི་སྟོན་པ་ལ་བཀུར་སྟི་མི་བྱེད། བླ་མར་མི་བྱེད། རི་མོར་མི་བྱེད། མཆོད་པར་མི་བྱེད་དོ། །སྟོན་པ་ལ་བཀུར་སྟི་མ་བྱས། བླ་མར་མ་བྱས། རི་མོར་མ་བྱས། མཆོད་པར་མ་བྱས་པས་ཆོས་མི་མཐོང་ངོ༌། །ཆོས་མ་མཐོང་བས་དགེ་སྦྱོང་གི་ཚུལ་ལ་མི་ལྟའོ། །དགེ་སྦྱོང་གི་ཚུལ་ལ་མི་ལྟ་ན་དགེ་འདུན་ལ་འདི་ལྟ་བུའི་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་འབྱིན་པར་བྱེད་དོ། །འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་དེ་ནི་སྐྱེ་བོ་མང་པོ་ལ་ཕན་བ་མ་ཡིན་པ་དང༌། སྐྱེ་བོ་མང་པོ་ལ་གནོད་པ་དང༌། སྐྱེ་བོ་མང་པོ་སྡུག་བསྔལ་བ་དང༌། ལྷ་དང་མི་རྣམས་ལ་མི་ཕན་པ་དང༌། གནོད་པ་དང༌། སྡུག་བསྔལ་བར་བྱེད་པ་ཡིན་ནོ། །དགེ་སློང་དག་གལ་ཏེ་ཁྱེད་ཀྱིས་འགྱེད་པའི་རྩ་བ་དེ་ལྟ་བུ་ནང་གིའམ་ཕྱི་རོལ་གྱི་ཡང་རུང་མ་སྤངས་པར་ཡང་དག་པར་མཐོང་ན། དེ་ལ་ཁྱེད་ཅག་ལྷན་ཅིག་མཐུན་ཞིང་ཀུན་དུ་དགའ་བ་དང༌། འགྱེད་པ་མེད་པས་འདུན་པ་དྲག་པོ་དང༌། བརྩོན་འགྲུས་དང༌། འབད་པ་དང༌། སྤྲོ་བ་དང༌། སྒྲིམ་པ་དང༌། མི་བཟློག་པའི་དྲན་པ་དང༌། ཤེས་བཞིན་གྱིས་ཇི་ཙམ་འགྱེད་པའི་རྩ་བ་བྱུང་བ་དེ་ཉིད་སྤངས་ཀྱི་བར་དུ་བརྩོན་པར་བྱའོ། །དེ་ལྟར་ན་ཁྱེད་ཀྱིས་འགྱེད་པའི་རྩ་བ་དེ་ཡང་སྤོངས་པར་འགྱུར་རོ། །དགེ་སློང་དག་གལ་ཏེ་ཁྱེད་ཀྱིས་འགྱེད་པའི་རྩ་བ་དེ་ལྟ་བུ་ནང་གི་ཡང་རུང༌། ཕྱིའི་ཡང་རུང་ལེགས་པར་སྤངས་པར་ཡང་དག་པར་མཐོང་ན། དེ་ལ་ཁྱེད་ཅག་ལྷན་ཅིག་མཐུན་ཞིང་ཀུན་དུ་དགའ་བ་དང༌། འགྱེད་པ་མེད་པས་འདུན་པ་དྲག་པོ་དང༌། བརྩོན་འགྲུས་དང༌། འབད་པ་དང༌། སྤྲོ་བ་དང༌། སྒྲིམ་པ་དང༌། མི་བཟློག་པའི་དྲན་པ་དང༌། ཤེས་བཞིན་གྱིས་ཇི་ནས་ཀྱང་རྩོད་པའི་རྩ་བ་སྤངས་པ་དེ་ཉིད་ཕྱིས་ཀྱང་མི་
འབྱུང་བར་བརྩོན་པར་བྱ་སྟེ། དེ་ལྟར་ན་ཁྱེད་ཀྱིས་འགྱེད་པའི་རྩ་བ་དེ་དག་ཡང་དག་པར་ལེགས་པར་བསལ་བས་ཕྱིས་སྐྱེ་བར་མི་འགྱུར་རོ།། །།འདུལ་བ་གཞི། བམ་པོ་བདུན་བཅུ་བརྒྱད་པ། ཁྲོ་ཞིང་ཁོན་དུ་འཛིན་པ་ཇི་ལྟ་བ་བཞིན་དུ་འཆབ་ཅིང་འཚིག་པ་དང༌། ཕྲག་དོག་བྱེད་ཅིང་སེར་སྣ་ཅན་དང༌། གཡོ་བྱེད་ཅིང་སྒྱུ་ཅན་དང༌། ངོ་ཚ་མེད་ཅིང་ཁྲེལ་མེད་པ་ཡང་དེ་དང་འདྲའོ། །གཞན་ཡང་འདི་ན་ལ་ལ་རང་གི་ལྟ་བ་མཆོག་ཏུ་འཛིན་པ་ཡིན་ཞིང་འཆལ་བ་འཛིན་པ་དང༌། སྨྲས་པ་ལ་དང་ན་ཐེན་བྱེད་པ་ཡིན་ཏེ། རང་གི་ལྟ་བ་མཆོག་ཏུ་འཛིན་པ། འཆལ་པ་འཛིན་པ། སྨྲས་པ་ལ་དང་ན་ཐེན་བྱེད་པ་གང་ཡིན་པ་དེ་ནི་སྟོན་པ་ལ་བཀུར་སྟི་མི་བྱེད། བླ་མར་མི་བྱེད། རི་མོར་མི་བྱེད། མཆོད་པར་མི་བྱེད་དོ། །དེ་སྟོན་པ་ལ་བཀུར་སྟི་མ་བྱས། བླ་མར་མ་བྱས། རི་མོར་མ་བྱས། མཆོད་པར་མ་བྱས་པས་ཆོས་མི་མཐོང་ངོ༌། །ཆོས་མ་མཐོང་བས་དགེ་སྦྱོང་གི་ཚུལ་ལ་མི་ལྟའོ། །དགེ་སྦྱོང་གི་ཚུལ་ལ་མི་ལྟ་ན་དགེ་འདུན་ལ་དེ་ལྟ་བུའི་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་དག་འབྱིན་པར་འགྱུར་རོ། །འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་དེ་ནི་སྐྱེ་བོ་མང་པོ་ལ་ཕན་པ་མ་ཡིན་བ་དང༌། སྐྱེ་བོ་མང་པོ་ལ་གནོད་པ་དང༌། སྐྱེ་བོ་མང་པོ་ལ་སྡུག་བསྔལ་བ་དང༌། ལྷ་དང་མི་རྣམས་ལ་མི་ཕན་པ་དང༌། གནོད་པ་དང༌། སྡུག་བསྔལ་བར་བྱེད་པ་ཡིན་ནོ། །དགེ་སློང་དག་གལ་ཏེ་ཁྱེད་ཀྱིས་འགྱེད་པའི་རྩ་བ་དེ་ལྟ་བུ་ནང་གི་ཡང་རུང་ཕྱིའི་ཡང་རུང་མ་སྤངས་པར་ཡང་དག་པར་མཐོང་ན། དེ་ལ་ཁྱེད་ཅག་ལྷན་ཅིག་མཐུན་ཞིང་ཀུན་དུ་དགའ་བ་དང༌། འགྱེད་པ་མེད་པས་འདུན་པ་དྲག་པོ་དང༌། བརྩོན་འགྲུས་དང༌། འབད་པ་དང༌། སྤྲོ་བ་དང༌། སྒྲིམ་པ་དང༌། མི་བཟློག་པའི་དྲན་པ་དང༌། ཤེས་བཞིན་གྱིས་ཇི་ཙམ་འགྱེད་པའི་རྩ་བ་བྱུང་བ་དེ་ཉིད་སྤོངས་པའི་བར་དུ་བརྩོན་པར་བྱ་སྟེ། དེ་ལྟར་ན་ཁྱེད་ཀྱིས་འགྱེད་པའི་རྩ་བ་དེ་སྤོངས་པར་འགྱུར་རོ། །དགེ་སློང་དག་གལ་ཏེ་ཁྱེད་ཀྱིས་འགྱེད་པའི་རྩ་བ་དེ་ལྟ་བུ་ནང་གི་ཡང་རུང༌། ཕྱིའི་ཡང་རུང༌། ལེགས་པར་སྤངས་པར་ཡང་དག་པར་མཐོང་ན། དེ་ལ་ཁྱེད་ཅག་ལྷན་ཅིག་
མཐུན་ཞིང་ཀུན་དུ་དགའ་བ་དང་འགྱེད་པ་མེད་པས་འདུན་པ་དྲག་པོ་དང༌། བརྩོན་འགྲུས་དང༌། འབད་པ་དང༌། སྤྲོ་བ་དང༌། སྒྲིམ་པ་དང༌། མི་བཟློག་པའི་དྲན་པ་དང༌། ཤེས་བཞིན་གྱིས་ཅི་ནས་ཀྱང་འགྱེད་པའི་རྩ་བ་སྤངས་པ་དེ་ཉིད་ཕྱིས་ཀྱང་མི་འབྱུང་བར་བརྩོན་པར་བྱ་སྟེ། དེ་ལྟར་ན་ཁྱེད་ཀྱིས་འགྱེད་པའི་རྩ་བ་དེ་ཡང་དག་པར་ལེགས་པར་བསལ་བས། ཕྱིས་སྐྱེ་བར་མི་འགྱུར་རོ། །འདི་དག་ནི་འགྱེད་པའི་རྩ་བ་དྲུག་ཅེས་བྱའོ། །འགྱེད་པར་བྱེད་པའི་གཞི་བཅུ་བཞི་གང་ཞེ་ན། འདི་ལྟ་སྟེ། ཆོས་སོ་ཞེའམ། ཆོས་མ་ཡིན་ནོ་ཞེའམ། འདུལ་བའོ་ཞེའམ། འདུལ་བ་མ་ཡིན་ནོ་ཞེའམ། ལྟུང་བའོ་ཞེའམ་ལྟུང་བ་མ་ཡིན་ནོ་ཞེའམ། ལྕི་བའམ། ཡང་བའམ། ལྷག་མ་དང་བཅས་པའམ། ལྷག་མ་མེད་པའམ། བཤགས་པར་བྱ་བའམ། བསྡམ་པར་བྱ་བའམ། ཉེས་བར་བཤད་པར་གཏོགས་པའམ། ལེགས་པར་བཤད་པར་གཏོགས་པ་སྟེ། འདི་དག་ནི་འགྱེད་པར་བྱེད་པའི་གཞི་བཅུ་བཞི་ཞེས་བྱའོ། །དགེ་སློང་དག་འགྱེད་པའི་རྩོད་པ་ནི་དེའི་རྩ་བ་ཡིན་ཞིང་འགྱེད་པའི་རྩོད་པའི་རྩ་བ་ནི་དེ་ཡིན་ནོ། །དགེ་སློང་དག་གདམས་ངག་མེད་པའི་རྩོད་པ་ནི་ཅི་ཞིག་གི་རྩ་བ་ཅན་ཡིན་ཞིང་གདམས་ངག་མེད་པའི་རྩོད་པའི་རྩ་བ་ནི་ཅི་ཡིན་ཞེ་ན། དགེ་འདུན་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་གཞག་པ་གང་ཡིན་པ་དེ་ལ་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་སྟེ། དགེ་སློང་དག་གདམས་ངག་མེད་པའི་རྩོད་པ་ནི་དེའི་རྩ་བ་ཅན་ཡིན་ཞིང་གདམས་ངག་མེད་པའི་རྩོད་པའི་རྩ་བ་ནི་དེ་ཡིན་ནོ། །དགེ་སློང་དག་ལྟུང་བའི་རྩོད་པ་ནི་ཅི་ཞིག་གི་རྩ་བ་ཅན་ཡིན་ཞིང་ལྟུང་བའི་རྩོད་པའི་རྩ་བ་ནི་ཅི་ཡིན་ཞེ་ན། ལྟུང་བའི་རིས་ལྔ་ནི་ལྟུང་བའི་རིས་དང་ལྟུང་བའི་ཕུང་པོ་ཞེས་བྱ་སྟེ། ལྔ་གང་ཞེ་ན། ཕས་ཕམ་པ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་སོ། །གཞན་ཡང་ལུས་ཀྱི་ལྟུང་བ་ཡིན་གྱི་ངག་གི་མ་ཡིན་སེམས་ཀྱི་མ་ཡིན་པ་ཡང་ཡོད། ངག་གི་ཡིན་གྱི་ལུས་ཀྱི་མ་ཡིན་སེམས་ཀྱི་
མ་ཡིན་པ་ཡང་ཡོད། ལུས་ཀྱི་དང་སེམས་ཀྱི་ཡིན་གྱི་ངག་གི་མ་ཡིན་པ་ཡང་ཡོད། ལུས་དང་ངག་དང་སེམས་ཀྱི་ཡིན་པ་ཡང་ཡོད་དོ། །ལུས་ཀྱི་ལྟུང་བ་ཡིན་གྱི་ངག་གི་མ་ཡིན། སེམས་ཀྱི་མ་ཡིན་པ་གང་ཞེ་ན། འདི་ལྟ་སྟེ། དགེ་སློང་ཁྱིམ་པའམ། བསྙེན་པར་མ་རྫོགས་པ་ཕྱིར་མ་བྱུང་བར་ཁྱིམ་པའམ། བསྙེན་པར་མ་རྫོགས་པ་ཕྱིར་བྱུང་ངོ་སྙམ་ནས་ཉལ་བར་བྱེད་པ་ན། དེ་གཉིད་ལོག་པ་དང༌། བུད་མེད་ཉལ་བའམ། གཉིད་ལོག་ནས་ཁྲི་སྟན་ཆེན་པོའི་སྟེང་དུ་བཞག་པ་སྟེ། འདི་ནི་ལུས་ཀྱི་ལྟུང་བ་ཡིན་གྱི་ངག་གི་མ་ཡིན་སེམས་ཀྱི་མ་ཡིན་ནོ། །ངག་གི་ལྟུང་བ་ཡིན་གྱི་ལུས་ཀྱི་མ་ཡིན། སེམས་ཀྱི་མ་ཡིན་པ་གང་ཞེ་ན། འདི་ལྟ་སྟེ། དགེ་སློང་བུད་མེད་ལ་ཆོས་ཚིག་ལྔ་འཆད་པ་ལས་ཆེད་དུ་མ་བསམས་པར་ཚིག་དྲུག་ཏུ་ཐལ་བའམ། ཚིག་དྲུག་འཆད་པ་ན་ཚིག་བདུན་དུ་ཐལ་བ་སྟེ། འདི་ནི་ངག་གི་ལྟུང་བ་ཡིན་གྱི་ལུས་ཀྱི་མ་ཡིན་སེམས་ཀྱི་མ་ཡིན་ནོ། །ལུས་དང་སེམས་ཀྱི་ལྟུང་བ་ཡིན་གྱི་ངག་གི་མ་ཡིན་པ་གང་ཞེ་ན། འདི་ལྟ་སྟེ་དགེ་སློང་གིས་ཆེད་དུ་བསམས་ཏེ་དུད་འགྲོའི་སྐྱེ་གནས་སུ་སོང་བའི་སྲོག་ཆགས་སྲོག་དང་ཕྲལ་ནས་འདི་སྐད་ཅེས་ཇི་ལྟར་བདག་གིས་བསད་པ་དེ་བཞིན་དུ་སྲོག་ཆགས་སྲོག་དང་འབྲལ་བར་བྱ་སྟེ། དེ་ལྟར་བསད་པ་ནི་ལེགས་པར་བསད་པ་ཡིན་ནོ་ཞེས་མི་སྨྲ་ཞིང་མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། མྱོས་པར་འགྱུར་བ་འཐུང་ལ་འདི་སྐད་ཅེས་ཇི་ལྟར་བདག་གིས་འཐུངས་པ་དེ་བཞིན་དུ་མྱོས་པར་འགྱུར་བ་བཏུང་བར་བྱ་སྟེ། དེ་ལྟར་མཐུངས་པ་ནི་ལེགས་པར་འཐུངས་པ་ཡིན་ནོ་ཞེས་མི་སྨྲ་བ་སྟེ། འདི་ནི་ལུས་དང་སེམས་ཀྱི་ལྟུང་བ་ཡིན་གྱི་ངག་གི་མ་ཡིན་ནོ། །ལུས་དང་ངག་དང་སེམས་ཀྱི་ལྟུང་བ་ཡིན་པ་གང་ཞེ་ན། འདི་ལྟ་སྟེ་དགེ་སློང་གིས་ཆེད་དུ་བསམས་ཏེ་དུད་འགྲོའི་སྐྱེ་གནས་སུ་སོང་བའི་སྲོག་ཆགས་སྲོག་དང་ཕྲལ་ལ་འདི་སྐད་ཅེས་ཇི་ལྟར་བདག་གིས་བསད་པ་དེ་བཞིན་དུ་སྲོག་ཆགས་སྲོག་དང་འབྲལ་བར་བྱ་སྟེ། དེ་ལྟར་བསད་པ་ནི་ལེགས་པར་བསད་པ་ཡིན་ནོ་ཞེས་སྨྲ་ཞིང་མ་བྱིན་པར་ལེན་པ་
དང༌། འདོད་པས་ལོག་པར་གཡེམ་པ་དང༌། མྱོས་པར་འགྱུར་བའི་ཆང་འཐུང་ལ་འདི་སྐད་ཅེས་ཇི་ལྟར་བདག་གིས་འཐུངས་པ་དེ་བཞིན་དུ་མྱོས་པར་འགྱུར་བ་བཏུང་པར་བྱ་སྟེ། དེ་ལྟར་མྱོས་པར་འགྱུར་བ་འཐུངས་པ་ནི་ལེགས་པར་འཐུངས་པ་ཡིན་ནོ་ཞེས་སྨྲ་བ་སྟེ། འདི་ནི་ལུས་དང་ངག་དང་སེམས་ཀྱི་ལྟུང་བ་ཡིན་ཏེ། དགེ་སློང་དག་ལྟུང་བའི་རྩོད་པ་ནི་དེའི་རྩ་བ་ཅན་ཡིན་ཞིང་ལྟུང་བའི་རྩོད་པའི་རྩ་བ་ནི་དེ་ཡིན་ནོ། །དགེ་སློང་དག་བྱ་བའི་རྩོད་པ་ནི་ཅི་ཞིག་གི་རྩ་བ་ཅན་ཡིན་ཞིང་བྱ་བའི་རྩོད་པའི་རྩ་བ་ནི་ཅི་ཡིན་ཞེ་ན། དགེ་འདུན་གྱི་བྱ་བ་གང་ཡིན་པ་གསོལ་པ་དང་གསོལ་བ་དང་གཉིས་དང༌། གསོལ་བ་དང་བཞིའི་ལས་གང་ཡིན་པ་སྟེ། དགེ་སློང་དག་བྱ་བའི་རྩོད་པ་ནི་དེའི་རྩ་བ་ཅན་ཡིན་ཞིང་བྱ་བའི་རྩོད་པའི་རྩ་བ་ནི་དེ་ཡིན་ནོ། །དགེ་སློང་དག་འགྱེད་པའི་རྩོད་པ་ནི་དགེ་བ་ཞེས་བརྗོད་པར་བྱ། མི་དགེ་བ་ཞེས་བརྗོད་པར་བྱ། ལུང་དུ་མ་བསྟན་པ་ཞེས་བརྗོད་པར་བྱ་སྟེ། དགེ་བ་གང་ཞེ་ན། དགེ་འདུན་དོན་སྒྲུབ་ཅིང་དོན་སེམས་ལ། དགེ་བའི་དོན་སྒྲུབ་ཅིང་དགེ་བ་སེམས་པའི་དོན་སྣ་ཚོགས་སུ་སྨྲ་བ། འགལ་བར་སྨྲ་བ། རིགས་མི་མཐུན་པར་སྨྲ་བ་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་དགེ་བ་ཡིན་ནོ། །མི་དགེ་བ་གང་ཞེ་ན། དགེ་འདུན་དོན་མི་སྒྲུབ་ཅིང་དོན་མི་སེམས་ལ། དགེ་བའི་དོན་མི་སྒྲུབ་ཅིང་དགེ་བ་མི་སེམས་པའི་དོན་སྣ་ཚོགས་སུ་སྨྲ་བ། འགལ་བར་སྨྲ་བ། རིགས་མི་འཐུན་པར་སྨྲ་བ་གང་ཡིན་པ་དེ་ལས་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་དེ་ནི་མི་དགེ་བ་ཡིན་ནོ། །ལུང་དུ་མ་བསྟན་པ་གང་ཞེ་ན། དགེ་འདུན་དོན་སྒྲུབ་པ་ཡང་མ་ཡིན། དོན་མ་ཡིན་པ་སྒྲུབ་པ་ཡང་མ་ཡིན་ཞིང་དོན་སེམས་པ་ཡང་མ་ཡིན། དོན་མ་ཡིན་པ་སེམས་པ་ཡང་མ་ཡིན་ལ། དགེ་བའི་དོན་སྒྲུབ་པ་ཡང་མ་ཡིན། མི་དགེ་བའི་དོན་སྒྲུབ་པ་ཡང་མ་ཡིན་ཞིང་དགེ་བ་སེམས་པ་ཡང་མ་ཡིན། མི་དགེ་བ་སེམས་པ་ཡང་མ་ཡིན་པའི་སྣ་ཚོགས་སུ་སྨྲ་བ། འགལ་བར་སྨྲ་བ། རིགས་མི་
མཐུན་པར་སྨྲ་བ་གང་ཡིན་པ་དེ་ལས་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་ལུང་དུ་མ་བསྟན་པ་ཡིན་ནོ། །གདམས་ངག་མེད་པའི་རྩོད་པ་ནི་དགེ་བ་ཞེས་བརྗོད་པར་བྱ། མི་དགེ་བ་ཞེས་བརྗོད་པར་བྱ། ལུང་དུ་མ་བསྟན་པ་ཞེས་བརྗོད་པར་བྱ་སྟེ། དགེ་བ་གང་ཞེ་ན། དགེ་འདུན་དོན་སྒྲུབ་ཅིང་དོན་སེམས་ལ། དགེ་བའི་དོན་སྒྲུབ་ཅིང་དགེ་བའི་དོན་སེམས་པའི་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་འཇོག་པ་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་དགེ་བ་ཡིན་ནོ། །མི་དགེ་བ་གང་ཞེ་ན། དགེ་འདུན་དོན་མི་སྒྲུབ་ཅིང་དོན་མི་སེམས་ལ། དགེ་བའི་དོན་མི་སྒྲུབ་ཅིང་དགེ་བ་མི་སེམས་པའི་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་འཇོག་པ་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་མི་དགེ་བ་ཡིན་ནོ། །ལུང་དུ་མ་བསྟན་པ་གང་ཞེ་ན། དགེ་འདུན་དོན་སྒྲུབ་པ་ཡང་མ་ཡིན། དོན་མ་ཡིན་པ་སྒྲུབ་པ་ཡང་མ་ཡིན་ཞིང་དོན་སེམས་པ་ཡང་མ་ཡིན། དོན་མ་ཡིན་པ་སེམས་པ་ཡང་མ་ཡིན་ལ། དགེ་བའི་དོན་སྒྲུབ་པ་ཡང་མ་ཡིན། མི་དགེ་བའི་དོན་སྒྲུབ་པ་ཡང་མ་ཡིན་ཞིང༌། དགེ་བ་སེམས་པ་ཡང་མ་ཡིན། མི་དགེ་བ་སེམས་པ་ཡང་མ་ཡིན་པའི་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་འཇོག་པ་གང་ཡིན་པ་དེ་ལས་བརྟེན་ནས་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་ལུང་དུ་མ་བསྟན་པ་ཡིན་ནོ། །ལྟུང་བའི་རྩོད་པ་ནི་མི་དགེ་བ་ཞེས་བརྗོད་པར་བྱ། ལུང་དུ་མ་བསྟན་པ་ཞེས་བརྗོད་པར་བྱ་སྟེ། མི་དགེ་བ་གང་ཞེ་ན། སངས་རྒྱས་ཀྱིས་བསླབ་པ་བཅས་པ་དང༌། དགེ་འདུན་གྱིས་ཁྲིམས་སུ་བཅས་པ་ལས་ཆེད་དུ་བསམས་ཏེ་འདས་པ་གང་ཡིན་པ་འདི་ནི་མི་དགེ་བ་ཡིན་ནོ། །ལུང་དུ་མ་བསྟན་པ་གང་ཞེ་ན། སངས་རྒྱས་ཀྱིས་བསླབ་པ་བཅས་པ་དང༌། དགེ་འདུན་གྱིས་ཁྲིམས་སུ་བཅས་པ་ལས་
ཆེད་དུ་མ་བསམས་པར་འདས་པ་གང་ཡིན་པ་འདི་ནི་ལུང་དུ་མ་བསྟན་པ་ཡིན་ནོ། །བྱ་བའི་རྩོད་པ་ནི་དགེ་བ་ཞེས་བརྗོད་པར་བྱ། མི་དགེ་བ་ཞེས་བརྗོད་པར་བྱ། ལུང་དུ་མ་བསྟན་པ་ཞེས་བརྗོད་པར་བྱ་སྟེ། དགེ་བ་གང་ཞེ་ན། དགེ་འདུན་དོན་སྒྲུབ་ཅིང་དོན་སེམས་ལ། དགེ་བའི་དོན་སྒྲུབ་ཅིང་དགེ་བ་སེམས་བའི་གསོལ་བ་དང༌། གསོལ་བ་དང་གཉིས་དང༌། གསོལ་བ་དང་བཞིའི་ལས་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་དགེ་བ་ཡིན་ནོ། །མི་དགེ་བ་གང་ཞེ་ན། དགེ་འདུན་དོན་མི་སྒྲུབ་ཅིང་དོན་མི་སེམས་ལ། དགེ་བའི་དོན་མི་སྒྲུབ་ཅིང་དགེ་བ་མི་སེམས་པའི་གསོལ་པ་དང་གསོལ་བ་དང་གཉིས་དང༌། གསོལ་པ་དང་བཞིའི་ལས་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་མི་དགེ་བ་ཡིན་ནོ། །ལུང་དུ་མ་བསྟན་པ་གང་ཞེ་ན། དགེ་འདུན་དོན་སྒྲུབ་པ་ཡང་མ་ཡིན། དོན་མ་ཡིན་པ་སྒྲུབ་པ་ཡང་མ་ཡིན་ཞིང༌། དོན་སེམས་པ་ཡང་མ་ཡིན། དོན་མ་ཡིན་པ་སེམས་པ་ཡང་མ་ཡིན་ལ། དགེ་བའི་དོན་སྒྲུབ་པ་ཡང་མ་ཡིན། མི་དགེ་བའི་དོན་སྒྲུབ་པ་ཡང་མ་ཡིན་ཞིང་དགེ་བ་སེམས་པ་ཡང་མ་ཡིན་ལ། མི་དགེ་བ་སེམས་པ་ཡང་མ་ཡིན་པའི་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པ་འདི་ནི་ལུང་དུ་མ་བསྟན་པ་ཡིན་ནོ། །འགྱེད་བ་གང་ཡིན་པ་དེ་རྩོད་པ་ལགས་ལ་རྩོད་པ་གང་ལགས་པ་དེ་འགྱེད་པ་ལགས་སམ། བཀའ་སྩལ་པ། འགྱེད་པ་ཡིན་ལ་རྩོད་པ་མ་ཡིན་པ་ཡང་ཡོད། །རྩོད་པ་ཡིན་ལ་འགྱེད་པ་མ་ཡིན་པ་ཡང་ཡོད། འགྱེད་པ་ཡང་ཡིན་རྩོད་པ་ཡང་ཡིན་པ་ཡང་ཡོད། འགྱེད་པ་ཡང་མ་ཡིན་རྩོད་པ་ཡང་མ་ཡིན་པ་ཡང་ཡོད་དོ། །རེ་ཞིག་འགྱེད་པ་ཡིན་ལ་རྩོད་པ་མ་ཡིན་བ་ནི། དགེ་འདུན་སྣ་ཚོགས་སུ་སྨྲ་བ། འགལ་བར་སྨྲ་བ། རིགས་མི་མཐུན་པར་སྨྲ་བ་གང་ཡིན་པའོ། །རྩོད་པ་ཡིན་ལ་འགྱེད་པ་མ་ཡིན་པ་ནི་རྩོད་པ་གསུམ་པོ་གདམས་ངག་མེད་པའི་རྩོད་པ་དང༌། བྱ་བའི་རྩོད་པ་དང༌། ལྟུང་བའི་རྩོད་པའོ། །རྩོད་
པ་ཡང་ཡིན་ལ་འགྱེད་པ་ཡང་ཡིན་པ་ནི་དགེ་འདུན་སྣ་ཚོགས་སུ་སྨྲ་བ། འགལ་བར་སྨྲ་བ། རིགས་མི་འཕྲོད་པར་སྨྲ་བ། མི་མཐུན་པ་ཀུན་དུ་མི་དགའ་བ། རྒྱུད་གཅིག་ཏུ་མ་གྱུར་པ་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པའོ། །འགྱེད་པ་ཡང་མ་ཡིན་རྩོད་པ་ཡང་མ་ཡིན་པ་ནི་རྣམ་པ་དེ་དག་མ་གཏོགས་པའོ། །གདམས་ངག་མ་མཆིས་པ་གང་ལགས་པ་དེ་རྩོད་པ་ལགས་ལ། རྩོད་པ་གང་ལགས་པ་དེ་གདམས་ངག་མ་མཆིས་པ་ལགས་སམ། བཀའ་སྩལ་པ། གདམས་ངག་མེད་པ་ཡིན་ལ་རྩོད་པ་མ་ཡིན་པ་ཡང་ཡོད། རྩོད་པ་ཡིན་ལ་གདམས་ངག་མེད་པ་མ་ཡིན་པ་ཡང་ཡོད། གདམས་ངག་མེད་པ་ཡང་ཡིན་ལ་རྩོད་པ་ཡང་ཡིན་པ་ཡང་ཡོད། གདམས་ངག་མེད་པ་ཡང་མ་ཡིན་ལ་རྩོད་པ་ཡང་མ་ཡིན་པ་ཡང་ཡོད་དོ། །རེ་ཞིག་གདམས་ངགམེད་པ་ཡིན་ལ་རྩོད་པ་མ་ཡིན་པ་ནི་དགེ་འདུན་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་འཇོག་པ་གང་ཡིན་པའོ། །རྩོད་པ་ཡིན་པ་གདམས་ངག་མེད་པ་མ་ཡིན་པ་ནི་རྩོད་པ་གསུམ་པོ་འགྱེད་པའི་རྩོད་པ་དང་ལྟུང་བའི་རྩོད་པ་དང༌། བྱ་བའི་རྩོད་པའོ། །གདམས་ངག་མེད་པ་ཡང་ཡིན་ལ་རྩོད་པ་ཡང་ཡིན་པ་ནི་དགེ་འདུན་གདམས་ངག་མི་ལེན་པ་དང༌། གདམས་ངག་མི་སྦྱིན་པ་དང༌། གདམས་ངག་འཇོག་པ་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པའོ། །གདམས་ངག་མེད་པ་ཡང་མ་ཡིན་ལ་རྩོད་པ་ཡང་མ་ཡིན་པ་ནི་རྣམ་པ་དེ་དག་མ་གཏོགས་པའོ། །ལྟུང་བ་གང་ལགས་པ་དེ་རྩོད་པ་ལགས་ལ། རྩོད་པ་གང་ལགས་པ་དེ་ལྟུང་བ་ལགས་སམ། བཀའ་སྩལ་པ། ལྟུང་བ་ཡིན་ལ་རྩོད་པ་མ་ཡིན་པ་ཡང་ཡོད། རྩོད་པ་ཡིན་ལ་ལྟུང་པ་མ་ཡིན་པ་ཡང་ཡོད། ལྟུང་བ་ཡང་ཡིན་ལ་རྩོད་པ་ཡང་ཡིན་པ་ཡང་ཡོད། ལྟུང་བ་ཡང་མ་ཡིན་ལ་རྩོད་པ་ཡང་མ་ཡིན་པ་ཡང་ཡོད་དོ། །རེ་ཞིག་ལྟུང་བ་ཡིན་ལ་རྩོད་པ་མ་ཡིན་པ་ནི་ལྟུང་བ་རིས་ལྔ་ནི་ལྟུ་བའི་རིས་དང༌། ལྟུང་བའི་ཕུང་པོ་ཞེས་བྱ་སྟེ། ཕས་ཕམ་པ་དང༌། དགེ་
འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་ཡིན་ནོ། །རྩོད་པ་ཡིན་ལ་ལྟུང་བ་མ་ཡིན་པ་ནི་རྩོད་པ་གསུམ་པོ་འགྱེད་པའི་རྩོད་པ་དང་གདམས་ངག་མེད་པའི་རྩོད་པ་དང༌། བྱ་བའི་རྩོད་པའོ། །ལྟུང་བ་ཡང་ཡིན་ལ་རྩོད་པ་ཡང་ཡིན་པ་ནི་ལྟུང་བའི་རིས་ལྔ་པོ་ནི་ལྟུང་བའི་རིས་དང༌། ལྟུང་བའི་ཕུང་པོ་ཞེས་བྱ་སྟེ། ཕས་ཕམ་པ་དང༌། དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང༌། ཉེས་བྱས་གང་ཡིན་བ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པའོ། །ལྟུང་བ་ཡང་མ་ཡིན་ལ་རྩོད་པ་ཡང་མ་ཡིན་པ་ནི་རྣམ་པ་དེ་དག་མ་གཏོགས་པའོ། །བྱ་བ་གང་ལགས་པ་དེ་རྩོད་པ་ལགས་ལ། རྩོད་པ་གང་ལགས་པ་དེ་ཡང་བྱ་བ་ལགས་སམ། བཀའ་སྩལ་པ། བྱ་བ་ཡིན་ལ་རྩོད་པ་མ་ཡིན་པ་ཡང་ཡོད། རྩོད་པ་ཡིན་ལ་བྱ་བ་མ་ཡིན་པ་ཡང་ཡོད། བྱ་བ་ཡང་ཡིན་ལ་རྩོད་པ་ཡང་ཡིན་པ་ཡང་ཡོད། བྱ་བ་ཡང་མ་ཡིན་ལ་རྩོད་པ་ཡང་མ་ཡིན་པ་ཡང་ཡོད་དོ། །རེ་ཞིག་བྱ་བ་ཡིན་ལ་རྩོད་པ་མ་ཡིན་པ་ནི་དགེ་འདུན་གྱི་གསོལ་བ་དང༌། གསོལ་བ་དང་གཉིས་དང༌། གསོལ་བ་དང་བཞིའི་ལས་གང་ཡིན་པའོ། །རྩོད་པ་ཡིན་ལ་བྱ་བ་མ་ཡིན་པ་ནི་རྩོད་པ་གསུམ་པོ་འགྱེད་པའི་རྩོད་པ་དང༌། གདམས་ངག་མེད་པའི་རྩོད་པ་དང༌། ལྟུང་བའི་རྩོད་པའོ། །བྱ་བ་ཡང་ཡིན་ལ་རྩོད་པ་ཡང་ཡིན་པ་ནི་དགེ་འདུན་གྱི་བྱ་བ་གསོལ་བ་དང༌། གསོལ་བ་དང་གཉིས་དང༌། གསོལ་པ་དང་བཞིའི་ལས་གང་ཡིན་པ་དེ་ལས་བརྟེན་ཏེ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་གང་ཡིན་པའོ། །བྱ་བ་ཡང་མ་ཡིན་ལ་རྩོད་པ་ཡང་མ་ཡིན་པ་ནི་རྣམ་པ་དེ་དག་མ་གཏོགས་པའོ། །དགེ་སློང་དག་འགྱེད་པའི་རྩོད་པ་ལ་རྩོད་པ་ཞི་བར་བྱེད་པའི་ཆོས་དུ་ཞིག་གིས་འདུལ་བར་བྱ། ཞི་བར་བྱ། ཉེ་བར་ཞི་བར་བྱ་ཞེ་ན། བཀའ་སྩལ་པ། གཉིས་ཀྱིས་ཏེ། མངོན་སུམ་དུ་འདུལ་བར་འོས་པ་དང༌། གང་ཡང་ཚུལ་ཤིང་མང་པོ་བླང་བས་སོ། །མངོན་སུམ་དུ་འདུལ་བ་ནི་ཇི་ལྟར་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་
ཅིག་གི་རྩོད་པ་རྣམས་འདི་ལྟ་སྟེ་མངོན་སུམ་དུ་འདུལ་བར་འོས་པའི་རྩོད་པ་ཞི་བར་བྱེད་པས་འདུལ་བ་དང༌། ཞི་བ་དང༌། ཉེ་བར་ཞི་བར་བྱེད་པ་ཡིན་ཞེ་ན། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱར་བཞུགས་པར་ཞལ་གྱིས་བཞེས་སོ། །དེའི་ཚེ་དགེ་སློང་རབ་ཏུ་མང་པོ་དག་ལྗོངས་ཤིག་ཏུ་དབྱར་གནས་པར་དམ་བཅས་པ་ལས་དེ་རྣམས་དབྱར་གྱི་ནང་ལོགས་སུ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་བྱུང་ནས། དེ་རྣམས་ཀྱིས་རྩོད་པ་དེ་ཚེ་དང་ལྡན་པ་ཤཱ་རིའི་བུ་དང༌། མཽད་གལ་གྱི་བུ་ལ་གཏད་པ་དང༌། དེ་གཉིས་ཀྱིས་སྟོན་པའི་བསྟན་པའི་ཆོས་འདུལ་བས་རྩོད་པ་ཞི་བར་བྱས་སོ། །དེ་ནས་དགེ་སློང་རབ་ཏུ་མང་པོ་ལྗོངས་སུ་དབྱར་གནས་པའི་དབྱར་གྱི་ཟླ་བ་གསུམ་པོ་དག་འདས་པ་དང༌། ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ནས་ལྷུང་བཟེད་དང་ཆོས་གོས་བླངས་ཏེ་མཉན་ཡོད་གང་ན་བ་དེར་རྒྱུ་ཞིང་དོང་ནས། རིམ་གྱིས་རྒྱུ་ཞིང་དོང་བ་དང་མཉན་ཡོད་དུ་ཕྱིན་ཏོ། །དེ་ནས་དགེ་སློང་རབ་ཏུ་མང་པོས་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་བཀྲུས་ཏེ། བཅོམ་ལྡན་འདས་གང་ན་བ་དེར་དོང་ནས་ལྷགས་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ནི་བློ་བུར་པའི་དགེ་སློང་རྣམས་ལ་སོ་སོར་ཡང་དག་པར་དགའ་བར་མཛད་པ་འདིས་སོ་སོར་ཡང་དག་པར་དགའ་བར་མཛད་པ་ཡིན་པས། བཅོམ་ལྡན་འདས་ཀྱིས་སོ་སོར་ཡང་དག་པར་དགའ་བར་མཛད་པས་དགེ་སློང་རབ་ཏུ་མང་པོ་ལ་ཀྱེ་དགེ་སློང་དག་ཁྱེད་ཅག་གང་ནས་འདིར་འོངས། གང་དུ་ཁྱེད་ཅག་དབྱར་གནས། བཙུན་པ་བདག་ཅག་ནི་ལྗོངས་ཤིག་ནས་འདིར་མཆིས་ཏེ། ལྗོངས་ཤིག་ན་བདག་ཅག་དབྱར་གནས་ལགས་སོ། །དགེ་སློང་དག་ཁྱེར་ཅག་ཇི་ག་ལྗོངས་སུ་བདེ་བ་ལ་རེག་པར་དབྱར་གནས་སམ། ཁྱེད་བསོད་སྙོམས་ཀྱིས་ཕོངས་པར་མ་གྱུར་ཏམ། བཙུན་པ་མེད་པར་བདག་ཅག་ལྗོངས་སུ་བདེ་
བ་ལ་རེག་པར་གནས་པས་དབྱར་གནས་ཤིང་བདག་ཅག་བསོད་སྙོམས་ཀྱིས་ཀྱང་ཕོངས་པར་མ་གྱུར་ཏོ། །དེ་ལྟ་ལགས་མོད་ཀྱི་བདག་ཅག་དབྱར་གྱི་ནང་ལོགས་སུ་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་བྱུང་ནས་བདག་ཅག་གིས་རྩོད་པ་དེ་ཚེ་དང་ལྡན་པ་ཤཱ་རིའི་བུ་དང༌། མཽད་གལ་གྱི་བུ་ལ་གཏད་པ་དང༌། དེ་གཉིས་ཀྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བགྱིས་ལགས་སོ། །བཅོམ་ལྡན་འདས་ཀྱིས་དགོངས་པ། ཀྱེ་མའོ་ངའི་ཉན་ཐོས་སྐམ་ལ་གནས་པ་དག་གིས་ནི་སྟོན་པའི་བསྟན་པ་ཆོས་འདུལ་བས་རྩོད་པ་སྐྱེས་ཤིང་བྱུང་བ་ཞི་བར་ནུས་སོ་སྙམ་ནས། དགེ་སློང་དག་དེ་ལྟ་བས་ན་སྐམ་ལ་གནས་པའི་དགེ་སློང་རྣམས་ཀྱིས་སྟོན་པའི་བསྟན་པ་ཆོས་འདུལ་བས་རྩོད་པ་སྐྱེས་ཤིང་བྱུང་བ་ཞི་བར་བྱའོ། །དགེ་སློང་རྣམས་ཀྱིས་སྐམ་ལ་གནས་པ་དང་དུ་ཡིན་པ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་དགེ་འདུན་ལ་མི་ལྟོས་པར་རྩོད་པ་སྐྱེས་ཤིང་བྱུང་བ་ཞི་བར་ནུས་པའོ། །དེ་ཡང་གསུམ་སྟེ། སྐམ་ལ་གནས་པ་ལུས་ཀྱིས་བསྡམས་པ་མ་ཡིན་ཞིང་ངག་གིས་ཀྱང་མ་ཡིན་པ་ཡང་ཡོད། ལུས་ཀྱིས་བསྡམས་ལ་ངག་གིས་མ་ཡིན་པ་ཡང་ཡོད། ལུས་དང་ངག་གིས་བསྡམས་པ་ཡང་ཡོད་དོ། །ལུས་ཀྱིས་བསྡམས་པ་མ་ཡིན་ཞིང་ངག་གིས་ཀྱང་མ་ཡིན་པ་གང་ཞེ་ན། འདི་ལྟ་སྟེ། སྐམ་ལ་གནས་པ་དགེ་སློང་འཐབ་པར་གྱུར། མཚང་འདྲུ་བར་གྱུར། འཐབ་མོ་བྱུང༌། འགྱེད་པར་གྱུར་ནས་ཕྱོགས་དང་ཕྱོགས་གཞན་དུ་གནས་པ་རྣམས་ཀྱི་དྲུང་དུ་བདག་ཉིད་སོང་ནས་འདི་སྐད་ཅེས་ཚེ་དང་ལྡན་པ་དག་ལེགས་སོ། །རྩོད་པ་འདི་ནི་ལེགས་པར་བཟུང་བ་ཡིན་གྱི་ཉེས་པར་བཟུང་བ་མ་ཡིན། ལེགས་པར་སྦྱར་བ་ཡིན་གྱི་ཉེས་པར་སྦྱར་བ་མ་ཡིན། ལེགས་པར་བརྟགས་པ་ཡིན་གྱི་ཉེས་པར་བརྟགས་པ་མ་ཡིན་པས་འདི་དང་འདི་ནི་སྨྲོས་ཤིགཐའདི་དང་འདི་ནི་མ་སྨྲ་ཤིགཐཚེ་དང་ལྡན་པ་དག་ཕ་རོལ་པོ་དག་ཆོམ་ཤིགཐཕ་རོལ་པོ་དག་གིས་ཆོམས་ས་རེ། བདག་ནི་ཚེ་དང་ལྡན་པ་དག་གི་ཕྱོགས་དང་དཔུང་དང་གྲོགས་
བྱེད་པ་ཡིན་ནོ་ཞེས་སྨྲ་ཞིང༌། ཕྱོགས་ཅིག་ཤོས་ཀྱི་དྲུང་དུ་ཡང་བདག་ཉིད་སོང་ནས་འདི་སྐད་ཅེས། ཚེ་དང་ལྡན་པ་དག་ལེགས་སོ། །རྩོད་པ་འདི་ནི་ལེགས་པར་བཟུང་བ་ཡིན་གྱི་ཉེས་པར་བཟུང་བ་མ་ཡིན། ལེགས་པར་སྦྱར་བ་ཡིན་གྱི་ཉེས་པར་སྦྱར་བ་མ་ཡིན། ལེགས་པར་བརྟགས་པ་ཡིན་གྱི་ཉེས་པར་བརྟགས་པ་མ་ཡིན་པས་འདི་དང་འདི་ནི་སྨྲོས་ཤིག །འདི་དང་འདི་ནི་མ་སྨྲ་ཤིག །ཚེ་དང་ལྡན་པ་དག་གིས་ཕ་རོལ་པོ་དག་ཆོམ་ཤིག །ཕ་རོལ་པོ་དག་གིས་ཆོམས་ས་རེ། བདག་ནི་ཚེ་དང་ལྡན་པ་དག་གི་ཕྱོགས་དང༌། དཔུང་དང༌། གྲོགས་ཡིན་ནོ་ཞེས་སྨྲ་བ་སྟེ། འདི་ནི་སྐམ་ལ་གནས་པ་ལུས་ཀྱིས་བསྡམས་པ་མ་ཡིན་ཞིང་དག་གིས་ཀྱང་མ་ཡིན་པའོ། །སྐམ་ལ་གནས་པ་ལུས་ཀྱིས་བསྡམས་ལ་ངག་གིས་མ་ཡིན་པ་གང་ཞེ་ན། འདི་ལྟ་སྟེ། སྐམ་ལ་གནས་པའི་དགེ་སློང་འཐབ་པར་གྱུར། མཚང་འདྲུ་བར་གྱུར། འཐབ་མོ་བྱུང༌། འགྱེད་པར་གྱུར་ནས་གནས་ཤིང་ཕྱོགས་དང་ཕྱོགས་གཞན་དུ་གནས་པ་རྣམས་ཀྱིས་ཕྱོགས་གཅིག་ཏུ་བདག་ཉིད་མི་འགྲོ་མོད་ཀྱི་ཕོ་ཉ་བཏང་ནས་ཚེ་དང་ལྡན་པ་དག་ལེགས་སོ། །རྩོད་པ་འདི་ནི་ལེགས་པར་བཟུང་བ་ཡིན་གྱི་ཉེས་བར་བཟུང་བ་མ་ཡིན། ལེགས་པར་སྦྱར་བ་ཡིན་གྱི་ཉེས་པར་སྦྱར་བ་མ་ཡིན། ལེགས་པར་བརྟགས་པ་ཡིན་གྱི་ཉེས་པར་བརྟགས་པ་ནི་མ་ཡིན་བས་འདི་དང་འདི་ནི་སྨྲོས་ཤིག །འདི་དང་འདི་ནི་མ་སྨྲ་ཤིག །ཚེ་དང་ལྡན་བདག་གིས་ཕ་རོལ་པོ་དག་ཆོམ་ཤིག །ཕ་རོལ་པོ་དག་གིས་ཆོམས་ས་རེ། བདག་ནི་ཚེ་དང་ལྡན་པ་དག་གི་ཕྱོགས་དང་། དཔུང་དང༌།
གྲོགས་ཡིན་ནོ། །ཕྱོགས་ཅིག་ཤོས་སུ་ཡང་བདག་ཉིད་མི་འགྲོ་མོད་ཀྱི་ཕོ་ཉ་བཏང་ནས་ཚེ་དང་ལྡན་པ་དག་ལེགས་སོ། །རྩོད་པ་ནི་ལེགས་པར་བཟུང་བ་ཡིན་གྱི་ཉེས་པར་བཟུང་བ་མ་ཡིན། ལེགས་པར་སྦྱར་བ་ཡིན་གྱི་ཉེས་པར་སྦྱར་བ་མ་ཡིན། ལེགས་པར་བརྟགས་པ་ཡིན་གྱི་ཉེས་པར་བརྟགས་པ་མ་ཡིན་བས་འདི་དང་འདི་ནི་སྨྲོས་ཤིག །འདི་དང་འདི་ནི་མ་སྨྲ་ཤིག །ཚེ་དང་ལྡན་པ་དག་གིས་ཕ་རོལ་པོ་དག་ཆོམ་ཤིག །ཕ་རོལ་པོ་དག་གིས་ཆོམས་ས་རེ། བདག་ནི་ཚེ་དང་ལྡན་པ་དག་གི་ཕྱོགས་དང༌། དཔུང་དང༌། གྲོགས་ཡིན་ནོ་ཞེས་ཟེར་བ་སྟེ། འདི་ནི་སྐམ་ལ་གནས་པ་ལུས་ཀྱིས་བསྡམས་པ་ངག་གིས་མ་ཡིན་པ་ཡིན་ནོ། །སྐམ་ལ་གནས་པ་ལུས་དང་ངག་གིས་བསྡམས་པ་གང་ཞེ་ན། འདི་ལྟ་སྟེ། སྐམ་ལ་གནས་པ་དགེ་སློང་འཐབ་པར་གྱུར། མཚང་འདྲུ་བར་གྱུར། འཐབ་མོ་བྱུང༌། འགྱེད་པར་གྱུར་ནས་གནས་ཤིང་ཕྱོགས་གཞན་དང་གཞན་ལ་གནས་པ་རྣམས་ཀྱིས་ཕྱོགས་གཅིག་ཏུ་བདག་ཉིད་མི་འགྲོ་ཞིང་ཕོ་ཉ་ཡང་གཏོང་བར་མི་བྱེད་ལ། ཕྱོགས་ཅིག་ཤོས་སུ་ཡང་བདག་ཉིད་མི་འགྲོ་ཞིང་ཚིག་གིས་ཕོ་ཉ་ཡང་གཏོང་བར་མི་བྱེད་པའོ། །དེ་ལ་སྐམ་ལ་གནས་པ་ལུས་ཀྱིས་བསྡམས་པ་མ་ཡིན་ཞིང་ངག་གིས་ཀྱང་མ་ཡིན་པ་གང་ཡིན་པ་དེ་ལྟ་བུའི་སྐམ་ལ་གནས་པ་ཡང་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །དེ་ཅིའི་ཕྱིར་ཞེ་ན། དེ་ལྟ་བུ་སྐམ་ལ་གནས་པ་ལ་བརྟེན་ནས་དགེ་འདུན་ལ་རྩོད་པ་མ་བྱུང་བ་རྣམས་ནི་འབྱུང་ལ། བྱུང་བ་རྣམས་ནི་སྟོན་པའི་བསྟན་པ་ཆོས་འདུལ་བས་མྱུར་དུ་ཞི་བར་མི་འགྱུར་རོ། །དེ་ལ་སྐམ་ལ་གནས་པ་ལུས་ཀྱིས་བསྡམས་ལ་ངག་གིས་མ་ཡིན་པ་གང་ཡིན་པ་དེ་ལྟ་བུའི་སྐམ་ལ་གནས་པ་ཡང་མ་བསྐོས་པ་ནི་བསྐོ་པར་མི་བྱའོ། །བསྐོས་བ་ནི་དབྱུང་བར་བྱའོ། །དེ་ཅིའི་ཕྱིར་ཞེ་ན། དེ་ལྟ་བུའི་སྐམ་ལ་གནས་པ་ལ་བརྟེན་ནས་ཀྱང་དགེ་འདུན་ལ་རྩོད་པ་མ་བྱུང་བ་རྣམས་ནི་འབྱུང་ལ། བྱུང་བ་རྣམས་ནི་སྟོན་པའི་བསྟན་པ་ཆོས་འདུལ་བས་མྱུར་དུ་ཞི་བར་མི་འགྱུར་རོ། །དེ་ལ་སྐམ་ལ་གནས་པ་ལུས་དང་ངག་གིས་བསྡམས་པ་གང་ཡིན་པ་དེ་ལྟ་བུའི་སྐམ་ལ་གནས་པ་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །དེ་ཅིའི་ཕྱིར་ཞེ་ན། དེ་ལྟ་བུའི་སྐམ་ལ་གནས་པ་ལ་བརྟེན་ནས་དགེ་འདུན་ལ་རྩོད་པ་མ་བྱུང་བ་རྣམས་ནི་མི་འབྱུང་ལ། བྱུང་བ་རྣམས་ནི་སྟོན་པའི་བསྟན་པ་ཆོས་འདུལ་བས་མྱུར་དུ་ཞི་བར་འགྱུར་རོ། །དགེ་སློང་དག་དེ་ལྟ་བུའི་སྐོམ་ལ་གནས་པ་ནི་རྩོད་པ་ཞི་བར་བྱེད་པ་ཡིན་གྱི། གཞན་དག་ནི་མ་ཡིན་ནོ། །དེ་ལྟ་བུ་སྐམ་ལ་གནས་པ་རྣམས་ཀྱིས་རྩོད་པ་སྐྱེས་ཤིང་བྱུང་བ་ཞི་བར་བྱ་སྟེ། དེ་ལྟ་བུའི་སྐམ་ལ་གནས་པ་རྣམས་ཀྱིས་རྩོད་པ་ཞི་བར་བྱས་པ་ནི་མངོན་
སུམ་དག་པ་ཡིན་ནོ། །དེ་ལ་མངོན་སུམ་ཇི་ལྟ་བུ་ཞེ་ན། མངོན་སུམ་ནི་གཉིས་ཏེ། གང་ཟག་མངོན་སུམ་དང༌། ཆོས་མངོན་སུམ་མོ། །གང་ཟག་མངོན་སུམ་གང་ཞེ་ན། གང་དག་གིས་རྩོད་པ་དེ་ཞི་པར་བྱེད་པ་དང༌། གང་དག་གིས་རྩོད་པ་དེ་ཞི་བར་བྱ་བ་དེ་དག་ཐམས་ཅད་འདུས་པར་གྱུར་ཅིང་མངོན་སུམ་དུ་གྱུར་པ་སྟེ། འདི་ནི་གང་ཟག་མངོན་སུམ་ཞེས་བྱའོ། །ཆོས་མངོན་སུམ་གང་ཞེ་ན། སྟོན་པའི་བསྟན་པ་གང་དང༌། ཆོས་གང་དང༌། འདུལ་བ་གང་དང་གང་གིས་རྩོད་པ་དེ་ཞི་བར་འགྱུར་བ་སྟོན་པའི་བསྟན་པ་དེ་དང༌། ཆོས་དེ་དང༌། འདུལ་བ་དེས་རྩོད་པ་དེ་ཞི་བར་བྱེད་པ་འདི་ནི་ཆོས་མངོན་སུམ་ཞེས་བྱའོ། །གལ་ཏེ་དགེ་སློང་སྐམ་ལ་གནས་པ་དག་གིས་རྩོད་པ་དེ་ཞི་བར་བྱེད་མི་ནུས་ན་དེ་རྣམས་ཀྱིས་རྩོད་པ་དེ་དགེ་འདུན་ལ་གཏད་པར་བྱ་ཞིང༌། དགེ་འདུན་གྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱའོ། །དགེ་འདུན་གྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱས་ན་ལེགས་པར་ཞི་བར་བྱས་པའོ་ཞེས་བརྗོད་པར་བྱ་སྟེ། མངོན་སུམ་དག་པ་ཡིན་ནོ། །དེ་ལ་མངོན་སུམ་ཇི་ལྟ་བུ་ཡིན་ཞེ་ན། མངོན་སུམ་ནི་གསུམ་སྟེ། དགེ་འདུན་མངོན་སུམ་དང༌། གང་ཟག་མངོན་སུམ་དང༌། ཆོས་མངོན་སུམ་མོ། །དགེ་འདུན་མངོན་སུམ་གང་ཞེ་ན། མཚམས་ན་གནས་པའི་དགེ་སློང་བྱ་བར་འོས་པ་ཇི་སྙེད་བ་དེ་དག་ཐམས་ཅད་འདུས་ཤིང་མངོན་སུམ་དུ་གྱུར་པ་དང༌། འདུན་པ་བླང་བར་འོས་པ་རྣམས་ལས་འདུན་པ་བླངས་པ་དང༌། དགེ་སློང་རྣམས་འདུས་ཤིང་མངོན་སུམ་དུ་གྱུར་ཀྱང་མི་བཏུབ་ཅིང་གཤེ་བ་གང་དག་གིས་གཤེ་བར་འོས་པ་རྣམས་མི་བཏུབ་པ་མེད་ཅིང་མི་གཤེ་ལ་ལས་དག་བྱེད་པ་འདི་ནི་དགེ་འདུན་མངོན་སུམ་ཞེས་བྱའོ། །གང་ཟག་མངོན་སུམ་གང་ཞེ་ན། གང་དག་གིས་རྩོད་པ་དེ་ཞི་བར་བྱེད་པ་དང༌། གང་དག་གི་རྩོད་པ་དེ་ཞི་བར་བྱ་བ་དེ་ཐམས་ཅད་འདུས་ཤིང་མངོན་སུམ་དུ་གྱུར་པ་སྟེ། འདི་ནི་གང་ཟག་མངོན་སུམ་ཞེས་བྱའོ། །ཆོས་མངོན་སུམ་གང་ཞེ་ན། སྟོན་པའི་བསྟན་པ་གང་དང༌། ཆོས་གང་དང༌། འདུལ་བ་གང་གིས་རྩོད་པ་དེ་ཉེ་བར་ཞི་བར་འགྱུར་བའི་སྟོན་པའི་བསྟན་པ་དེ་དང༌། ཆོས་དེ་
དང༌། འདུལ་བ་དེས་རྩོད་པ་དེ་ཞི་བར་བྱེད་པ་འདི་ནི་ཆོས་མངོན་སུམ་ཞེས་བྱའོ། །གལ་ཏེ་དགེ་འདུན་གྱིས་རྩད་པ་དེ་ཞི་བར་བྱ་མི་ནུས་ན་དེའི་འོག་ཏུ་དགེ་འདུན་གྱིས་དགེ་སློང་གསལ་བ་བཅུའམ་བཅུ་གཉིས་བསྐོ་བར་བྱའོ། །བསྐོ་བ་ནི་འདི་ལྟར་བྱ་སྟེ། གནས་མལ་བཤམས་ནས་གཎྜཱི་བརྡུངས་ལ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང༌། རེ་ཞིག་ཐོག་མར་སྤྲོ་བར་བྱ་སྟེ། སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་ཁྱོད་གསལ་བ་ཡིན་ན་མཚམས་ཀྱི་ཕྱི་ལོགས་སུ་དོང་ནས་དགེ་འདུན་གྱི་རྩོད་པ་ཞི་བར་སྤྲོའམ། གལ་ཏེ་སྤྲོ་བར་གྱུར་ན་དེ་རྣམས་ཀྱིས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་འདི་རྣམས་གསལ་བ་ལགས་ཏེ་མཚམས་ཀྱི་སླད་རོལ་དུ་མཆིས་ནས་དགེ་འདུན་གྱི་རྩོད་པ་ཞི་བར་བགྱི་བར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་ལྟར་དགེ་འདུན་གྱིས་སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་གསལ་བ་རྣམས་བསྐོས་ཏེ། སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་གསལ་བ་མཚམས་ཀྱི་སླད་རོལ་དུ་མཆིས་ནས་དགེ་འདུན་གྱི་རྩོད་པ་ཞི་བར་བགྱིད་པར་འགྱུར་རོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ། སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་འདི་རྣམས་གསལ་བ་ལགས་ཏེ་མཚམས་ཀྱི་སླད་རོལ་དུ་མཆིས་ནས་དགེ་འདུན་གྱི་རྩོད་པ་ཞི་བར་བགྱི་བར་སྤྲོ་ནས། དེའི་སླད་དུ་དགེ་འདུན་གྱིས་སངས་རྒྱས་སྐྱོང་དང་ཆོས་སྦྱིན་དང༌། དགེ་འདུན་སྡེ་གསལ་བ་རྣམས་བསྐོས་ཏེ། སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་གསལ་བ་རྣམས་མཚམས་ཀྱི་སླད་རོལ་དུ་མཆིས་ནས་དགེ་འདུན་གྱི་རྩོད་པ་ཞི་བར་བགྱིད་ན། ཚེ་དང་ལྡན་པ་གང་དག་སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་གསལ་བ་རྣམས་བསྐོས་ཏེ། སངས་རྒྱས་སྐྱོང་དང༌། ཆོས་སྦྱིན་དང༌།
དགེ་འདུན་སྡེ་གསལ་བ་མཚམས་ཀྱི་སླད་རོལ་དུ་མཆིས་ནས་དགེ་འདུན་གྱི་རྩོད་པ་ཞི་བར་བགྱི་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་སངས་རྒྱས་སྐྱོང་དང༌། ཆོས་སྦྱིན་དང༌། དགེ་འདུན་སྡེ་གསལ་བ་དེ་རྣམས་མཚམས་གྱི་སླད་རོལ་དུ་མཆིས་ནས་དགེ་འདུན་ཀྱི་རྩོད་པ་ཞི་བར་བགྱི་བར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གསལ་བ་རྣམས་ཀྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱའོ། །གསལ་བ་རྣམས་ཀྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱས་ན་ལེགས་པར་ཞི་བར་བྱས་པར་བརྗོད་པར་བྱ་སྟེ། མངོན་སུམ་དག་པ་ཡིན་ནོ། །དེ་ལ་མངོན་སུམ་དག་པ་ཇི་ལྟ་བུ་ཞེ་ན། མངོན་སུམ་ནི་གཉིས་ཏེ། གང་ཟག་མངོན་སུམ་དང༌། ཆོས་མངོན་སུམ་མོ། །གང་ཟག་མངོན་སུམ་གང་ཞེ་ན། གང་དག་གིས་རྩོད་པ་དེ་ཞི་བར་བྱེད་པ་དང༌། གང་དག་གི་རྩོད་པ་དེ་དག་ཞི་བར་བྱ་བ་དེ་ཐམས་ཅད་འདུས་ཤིང་མངོན་སུམ་དུ་གྱུར་པ་སྟེ། འདི་ནི་གང་ཟག་མངོན་སུམ་ཞེས་བྱའོ། །ཆོས་མངོན་སུམ་གང་ཞེ་ན། སྟོན་པའི་བསྟན་པ་གང་དང༌། ཆོས་གང་དང༌། འདུལ་བ་གང་གིས་རྩོད་པ་དེ་ཞི་བར་འགྱུར་བའི་སྟོན་པའི་བསྟན་པ་དེ་དང༌། ཆོས་དེ་དང༌། འདུལ་བ་དེས་རྩོད་པ་དེ་ཞི་བར་བྱེད་པ་འདི་ནི་ཆོས་མངོན་སུམ་ཞེས་བྱའོ། །གལ་ཏེ་དགེ་སློང་གསལ་བ་རྣམས་ཀྱིས་རྩོད་པ་དེ་ཞི་བར་མི་ནུས་ན་དེ་རྣམས་ཀྱིས་དགེ་སློང་གསལ་བ་བས་ཀྱང་གསལ་བ་བརྒྱད་དམ་དགུ་བསྐོ་བར་བྱ་སྟེ། གསལ་བ་བས་ཀྱང་གསལ་བ་རྣམས་ཀྱང་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱའོ། །གསལ་བ་བས་ཀྱང་གསལ་བ་རྣམས་ཀྱིས་རྩོད་པ་དེ་ཞི་བར་བྱས་ན་ལེགས་པར་ཞི་བར་བྱས་པར་བརྗོད་པར་བྱའོ། །གལ་ཏེ་དགེ་སློང་གསལ་བ་བས་ཀྱང་གསལ་བ་རྣམས་ཀྱིས་རྩོད་པ་དེ་ཞི་བར་བྱ་མི་ནུས་ན་དེ་རྣམས་ཀྱིས་རྩོད་པ་དེ་དགེ་འདུན་ལ་གཏད་པར་
བྱའོ། །དེ་ནས་དགེ་འདུན་གྱིས་དགེ་སློང་རྩོད་པ་དེ་སྦེད་པ་བསྐོ་བར་བྱའོ། །ཆོས་ལྔ་དང་ལྡན་པའི་དགེ་སློང་རྩོད་པ་སྦེད་པ་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ལྔ་གང་ཞེ་ན། འདུན་པས་འགྲོ་བ་དང༌། ཞེ་སྡང་གིས་འགྲོ་བ་དང༌། གཏི་མུག་གིས་འགྲོ་བ་དང༌། འཇིགས་པས་འགྲོ་བ་དང༌། རྩོད་པ་སྦོས་པ་དང་མ་སྦོས་པ་མི་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་རྩོད་པ་སྦེད་པ་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ཆོས་ལྔ་དང་ལྡན་པའི་དགེ་སློང་རྩོད་པ་སྦེད་པ་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །ལྔ་གང་ཞེ་ན། འདུན་པས་མི་འགྲོ་བ་དང༌། ཞེ་སྡང་གིས་མི་འགྲོ་བ་དང༌། གཏི་མུག་གིས་མི་འགྲོ་བ་དང༌། འཇིགས་པས་མི་འགྲོ་བ་དང༌། རྩོད་པ་སྦོས་པ་དང་མ་སྦོས་པ་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་རྩོད་པ་སྦེད་པ་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །བསྐོས་བ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང༌། རེ་ཞིག་ཐོག་མར་སྤྲོ་བར་བྱ་སྟེ། ཚེ་དང་ལྡན་པ་ཁྱོད་དགེ་འདུན་གྱི་རྩོད་པ་སྦེད་བ་སྤྲོའམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། རྩོད་པ་སྦེད་པའི་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་རྩོད་པ་སྦེད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང༌། བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་ལྟར་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་རྩོད་པ་སྦེད་པར་བསྐོས་ཏེ། རྩོད་པ་སྦེད་པའི་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་རྩོད་པ་སྦེད་པར་འགྱུར་རོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ། རྩོད་པ་སྦེད་པའི་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་རྩོད་པ་སྦེད་པར་སྤྲོ་ནས། དེའི་སླད་དུ་དགེ་འདུན་གྱིས་དགེ་
སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ཏེ། རྩོད་པ་སྦེད་པའི་དགེ་སློང་མིང་འདི་ཞེས་བགྱི་བ་དགེ་འདུན་གྱི་རྩོད་པ་སྦེད་པར་བགྱི་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ཏེ། རྩོད་པ་སྦེད་བའི་དགེ་སློང་མིང་འདི་ཞེས་བགྱི་བ་དགེ་འདུན་གྱི་རྩོད་པ་སྦེད་པར་བགྱི་བར་བཟོད་པ་དེ་དག་ནི་ཅང་མ་གསུང་ཤིགཐགང་དག་མི་བཟོད་པ་དེ་དག་ནི་གསུང་ཤིགཐདགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་རྩོད་པ་སྦེད་པ་མིང་འདི་ཞེས་བགྱི་བ་དགེ་འདུན་གྱི་རྩོད་པ་སྦེད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་རྩོད་པ་སྦེད་བའི་དགེ་སློང་གི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། རྩོད་པ་སྦེད་པའི་དགེ་སློང་གིས་རྩོད་བ་དེ་གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་ལ་གཏད་པར་བྱ་ཞིང་རྒན་རབས་ཇི་ལྟ་བ་བཞིན་དུ་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། རྩོད་པ་འདི་གནས་ག་གེ་མོ་ཞིག་ཏུ་གཞི་འདི་ལས་བྱུང་ནས་དུས་འདི་སྲིད་ཅིག་ལོན་ཏེ། རྩོད་པ་དེ་སྐམ་ལ་གནས་པའི་དགེ་སློང་རྣམས་ཀྱིས་ཞི་བར་བགྱི་བར་རྔོ་མ་ཐོག་ནས། དེ་རྣམས་ཀྱིས་དགེ་འདུན་ལ་གཏད་པ་ལས་དགེ་འདུན་གྱིས་ཀྱང་མ་སྤྱོད་ནས། དེས་གསལ་བའི་དགེ་སློང་རྣམས་བསྐོས་པ་ལས་དགེ་སློང་གསལ་བ་རྣམས་ཀྱིས་རྔོ་མ་ཐོག་ནས། དེ་རྣམས་ཀྱིས་ཀྱང་དགེ་སློང་གསལ་བ་བས་ཀྱང་གསལ་བ་རྣམས་བསྐོས་བ་ལས་དགེ་སློང་གསལ་བ་བས་ཀྱང་གསལ་བ་དེ་རྣམས་ཀྱིས་ཀྱང་རྔོ་མ་ཐོག་ནས། དེ་རྣམས་ཀྱིས་ཀྱང་དགེ་འདུན་ལ་གཏད་པ་དང༌། དགེ་འདུན་གྱིས་ཀྱང་བདག་དགེ་སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ནས། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་གནས་བརྟན་དང་བཅས། སོ་སོར་ཐར་
པ་དང་བཅས་པའི་དགེ་འདུན་ལ་དབུལ་གྱིས། དགེ་འདུན་བཙུན་པ་རྣམས་ཀྱིས་འདི་ནས་བཟུང་སྟེ་རྩོད་པ་འདི་ཟླ་བ་དྲུག་གི་མཐའི་བར་གྱིས་ཞི་བར་མཛད་དུ་གསོལ། གནས་བརྟན་དང་བཅས་སོ་སོར་ཐར་པ་དང་བཅས་པའི་དགེ་འདུན་གྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱའོ། །གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་གྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱས་ན་ལེགས་པར་ཞི་བར་བྱས་པར་བརྗོད་པར་བྱ་སྟེ། མངོན་སུམ་དག་པ་ཡིན་ནོ། །དེ་ལ་མངོན་སུམ་ཇི་ལྟ་བུ་ཞེ་ན། མངོན་སུམ་ནི་གསུམ་སྟེ། དགེ་འདུན་མངོན་སུམ་དང༌། གང་ཟག་མངོན་སུམ་དང༌། ཆོས་མངོན་སུམ་མོ། །དགེ་འདུན་མངོན་སུམ་གང་ཞེ་ན། མཚམས་ན་གནས་པའི་དགེ་སློང་བྱ་བར་འོས་པ་ཇི་སྙེད་པ་དེ་དག་ཐམས་ཅད་འདུས་ཤིང་མངོན་སུམ་དུ་གྱུར་པ་དང༌། འདུན་པ་བླང་བར་འོས་པ་རྣམས་ལ་འདུན་པ་བླངས་པ་དང༌། དགེ་སློང་རྣམས་འདུས་ཤིང་མངོན་སུམ་དུ་གྱུར་ཀྱང་མི་བཏུབ་ཅིང་གཤེ་བ་གང་དག་གི་གཤེ་བ་འོས་པ་རྣམས་མི་བཏུབ་པ་མེད་ཅིང་མི་གཤེ་ལ། ལས་དག་བྱེད་པ་འདི་ནི་དགེ་འདུན་མངོན་སུམ་ཞེས་བྱའོ། །གང་ཟག་མངོན་སུམ་གང་ཞེ་ན། གང་དག་གིས་རྩོད་པ་དེ་ཞི་བར་བྱེད་པ་དང༌། གང་དག་གི་རྩོད་པ་དེ་ཞི་བར་བྱ་བ་དེ་དག་ཐམས་ཅད་འདུས་ཤིང་མངོན་སུམ་དུ་གྱུར་པ་འདི་ནི་གང་ཟག་མངོན་སུམ་ཞེས་བྱའོ། །ཆོས་མངོན་སུམ་གང་ཞེ་ན། སྟོན་པའི་བསྟན་པ་གང་དང༌། ཆོས་གང་དང༌། འདུལ་བ་གང་གིས་རྩོད་པ་དེ་ཞི་བར་གྱུར་པའི་སྟོན་པའི་བསྟན་པ་དེ་དང༌། ཆོས་དེ་དང༌། འདུལ་བ་དེས་རྩོད་པ་དེ་ཞི་བར་བྱེད་པ་འདི་ནི་ཆོས་མངོན་སུམ་ཞེས་བྱའོ། །གལ་ཏེ་གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་གྱིས་རྩོད་པ་དེ་ཞི་བར་བྱེད་མི་ནུས་ན་དེས་རྩོད་པ་དེ་རྩོད་པ་སྦེད་པའི་དགེ་སློང་ཉིད་ལ་གཏད་པར་བྱའོ། །རྩོད་པ་སྦེད་པའི་དགེ་སློང་གིས་མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ལ་གཏད་པར་བྱ་ཞིང་རྒན་རིམས་ཇི་ལྟ་བ་བཞིན་ལ་བརྗོད་པར་བྱ་སྟེ། ཤེས་ལྡན་མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་གསན་དུ་གསོལ། རྩོད་པ་འདི་ནི་གནས་ག་གེ་མོ་ཞིག་ཏུ་གཞི་འདི་ལས་བྱུང་ནས་དུས་འདི་སྲིད་ཅིག་ལོན་ཏེ། རྩོད་པ་དེ་སྐམ་ལ་གནས་པའི་དགེ་སློང་རྣམས་ཀྱིས་ཞི་བར་བྱེད་མ་ནུས་ནས། དེ་རྣམས་ཀྱིས་དགེ་འདུན་ལ་གཏད་པ་ལས་དགེ་འདུན་གྱིས་ཀྱང་མ་སྤྱོད་ནས། དེས་ཀྱང་དགེ་སློང་གསལ་བ་རྣམས་བསྐོས་བ་ལས་དགེ་སློང་གསལ་བ་རྣམས་ཀྱིས་ཀྱང་མ་ནུས་ནས། དེ་རྣམས་ཀྱིས་ཀྱང་
དགེ་སློང་གསལ་བ་བས་ཀྱང་གསལ་བ་རྣམས་བསྐོས་པ་ལས་དགེ་སློང་གསལ་བ་བས་ཀྱང་གསལ་བ་རྣམས་ཀྱིས་ཀྱང་མ་ནུས་ནས། དེ་རྣམས་ཀྱིས་ཀྱང་དགེ་འདུན་ལ་གཏད་པ་དང༌། དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ཏེ། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་ལ་གཏད་པ་ལས། གནས་བརྟན་དང་བཅས། སོ་སོར་ཐར་པ་དང་བཅས་བའི་དགེ་འདུན་གྱིས་མ་སྤྱོད་ནས། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བ་ལ་གཏད་དེ། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ལ་གཏད་ཀྱིས། ཤེས་ལྡན་མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ཀྱིས་འདི་ནས་བཟུང་སྟེ། རྩོད་པ་འདི་ལོ་གཅིག་གི་མཐའི་བར་གྱིས་ཞི་བར་མཛོད་ཅིགཐམདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ཀྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱའོ། །མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ཀྱིས་རྩོད་པ་དེ་ཞི་བར་བྱས་ན་ལེགས་པར་ཞི་བར་བྱས་པར་བརྗོད་པར་བྱ་སྟེ། མངོན་སུམ་དག་པ་ཡིན་ནོ། །དེ་ལ་མངོན་སུམ་ཇི་ལྟ་བུ་ཞེ་ན། མངོན་སུམ་ནི་གཉིས་ཏེ། གང་ཟག་མངོན་སུམ་དང༌། ཆོས་མངོན་སུམ་མོ། །གང་ཟག་མངོན་སུམ་གང་ཞེ་ན། གང་དག་གིས་རྩོད་པ་དེ་ཞི་བར་བྱེད་པ་དང༌། གང་དག་གི་རྩོད་པ་ཞི་བར་བྱ་བ་དེ་ཐམས་ཅད་འདུས་ཤིང་མངོན་སུམ་དུ་གྱུར་པ་འདི་ནི་གང་ཟག་མངོན་སུམ་ཞེས་བྱའོ། །ཆོས་མངོན་སུམ་གང་ཞེ་ན། སྟོན་པའི་བསྟན་པ་གང་དང༌། ཆོས་གང་དང༌། འདུལ་བ་གང་གིས་རྩོད་པ་དེ་ཞི་བར་འགྱུར་བའི་སྟོན་པའི་བསྟན་པ་དེ་དང་ཆོས་དེ་དང༌། འདུལ་བ་དེས་རྩོད་པ་དེ་ཞི་བར་བྱེད་པ་འདི་ནི་ཆོས་མངོན་སུམ་ཞེས་བྱའོ། །གལ་ཏེ་མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ཀྱིས་རྩོད་པ་དེ་ཞི་བར་བྱེད་མི་ནུས་ན་དེ་རྣམས་ཀྱིས་རྩོད་པ་སྦེད་པའི་དགེ་སློང་ཉིད་ལ་གཏད་པར་བྱའོ། །རྩོད་པ་སྦེད་པའི་དགེ་
སློང་གིས་གནས་གང་ན་དགེ་སློང་གནས་བརྟན་གནས་བརྟན་གང་ཡང་རུང་བའམ། ཤེས་ཉེན་ཅན་ཤེས་ཉེན་ཅན་གང་ཡང་རུང་བའམ། གཙོ་བོ་གཙོ་བོ་གང་ཡང་རུང་བ་ཡོད་པ་དེ་ལ་གཏད་པར་བྱ་ཞིང་རྒན་རིམས་ཇི་ལྟ་བ་བཞིན་ལ་བརྗོད་པར་བྱ་སྟེ། གནས་བརྟན་དག་གསོན་ཅིགཐརྩོད་པ་འདི་ནི་གནས་ག་གེ་མོ་ཞིག་ཏུ་གཞི་འདི་ལས་བྱུང་ནས་དུས་འདི་སྲིད་ཅིག་ལོན་ཏེ། རྩོད་པ་དེ་སྐམ་ལ་གནས་པའི་དགེ་སློང་རྣམས་ཀྱིས་ཞི་བར་བྱེད་མ་ནུས་ནས། དེ་རྣམས་ཀྱིས་དགེ་འདུན་ལ་གཏད་པ་དང༌། དགེ་འདུན་གྱིས་ཀྱང་མ་སྤྱོད་ནས། དེས་ཀྱང་དགེ་སློང་གསལ་བ་རྣམས་བསྐོས་པ་ལས་དགེ་སློང་གསལ་བ་རྣམས་ཀྱིས་ཀྱང་མ་ནུས་ནས། དེ་རྣམས་ཀྱིས་ཀྱང་དགེ་སློང་གསལ་བ་བས་ཀྱང་གསལ་བ་བསྐོས་པ་ལས་དགེ་སློང་གསལ་བ་བས་ཀྱང་གསལ་བ་རྣམས་ཀྱིས་ཀྱང་མ་ནུས་ནས། དེ་རྣམས་ཀྱིས་ཀྱང་དགེ་འདུན་ལ་གཏད་པ་ལས་དགེ་འདུན་གྱིས་བདག་དགེ་སློང་མིང་འདི་ཞེས་བགྱི་བ་རྩོད་པ་སྦེད་པར་བསྐོས་ནས། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་ལ་གཏད་པ་ལས། གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་འདུན་གྱིས་ཞི་བར་མ་སྤྱོད་ནས། དེས་ཀྱང་བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བ་ལ་གཏད་ནས། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་མདོ་སྡེ་དང༌། འདུལ་བ་དང༌། མ་མོ་འཛིན་པའི་དགེ་སློང་རྣམས་ལ་གཏད་པ་དང༌། མདོ་སྡེ་དང༌། འདུལ་བ་དང༌། མ་མོ་འཛིན་པ་རྣམས་ཀྱིས་ཀྱང་མ་ནུས་ནས། དེ་རྣམས་ཀྱིས་ཀྱང་བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བ་ལ་གཏང་ནས། བདག་དགེ་སློང་རྩོད་པ་སྦེད་པ་མིང་འདི་ཞེས་བགྱི་བས་རྩོད་པ་འདི་གནས་བརྟན་ལ་འབུལ་ན། གནས་བརྟན་གྱིས་འདི་ནས་བཟུང་སྟེ། རྩོད་པ་འདི་ཇི་ཙམ་གྱིས་མཐར་ཕྱིན་གྱི་བར་དུ་ཞི་བར་མཛད་དུ་གསོལ་ཞེས་བརྗོད་པར་བྱའོ། །ངས་དགེ་སློང་གནས་བརྟན་གྱི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། དགེ་སློང་གནས་བརྟན་གྱིས་རྒོལ་བ་དང་ཕྱིར་རྒོལ་བའི་དགེ་སློང་རྣམས་སོ་ཤིང་སྟོབས་ན་བདག་
གིར་མི་བྱ་སྟེ། བའི་ལྕི་བ་སྟོབས་ན་མ་ཡིན། འདག་འཆལ་སྟོབས་ན་མ་ཡིན་ཞིང༌། གདོན་པ་དང་འདྲི་བ་ཡང་བྱེད་དུ་མི་གཞུག་སྟེ། གཞན་དུ་ན་མདུན་ནམ་རྒྱབ་ཏུ་འདུག་ནས་ཚིག་འདི་སྐད་ཅེས། ཚེ་དང་ལྡན་པ་དག་མ་འཐབ་ཤིགཐམཚང་མ་འདྲུ་ཤིགཐའཐབ་མོ་མ་བྱེད་ཅིགཐམ་འགྱེད་ཅིགཐདེ་ཅིའི་ཕྱིར་ཞེ་ན། ཚེ་དང་ལྡན་པ་དག་རྩོད་པ་ལ་གཉིས་ཀ་རྒྱལ་བ་མེད་གྱི། འོན་ཀྱང་གཅིག་རྒྱལ་གཅིག་ཕམ་པར་འགྱུར་རོ། །འགྱེད་པ་ལ་གཉིས་ཀ་རྒྱལ་བ་མེད་ཀྱི། འོན་ཀྱང་གཅིག་རྒྱལ་གཅིག་ཕམ་པར་འགྱུར་རོ་ཞེས་བྱ་ཞིང༌། དགེ་སློང་གནས་བརྟན་གྱིས་སྟོན་པའི་བསྟན་པ་ཆོས་འདུལ་བས་རྩོད་པ་དེ་ཞི་བར་བྱའོ། །དགེ་སློང་གནས་བརྟན་གྱིས་རྩོད་པ་ད་ཞི་བར་བྱས་ན་ལེགས་པར་ཞི་བར་བྱས་པར་བརྗོད་པར་བྱའོ། །དགེ་སློང་དག་དེ་ལྟར་ན་མངོན་སུམ་དུ་འདུལ་བར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ཁ་ཅིག་གི་རྩོད་པ་རྣམས་འདི་ལྟ་སྟེ། མངོན་སུམ་དུ་འདུལ་བར་འོས་བའི་རྩོད་པ་ཞི་བར་བྱེད་པས་འདུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་གང་ཚུལ་ཤིང་མང་པོ་བླང་བའི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། གང་ཚུལ་ཤིང་མང་པོ་བླང་བའི་རྩོད་པ་ཞི་བར་བྱེད་པས་འདུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། སྐམ་ལ་གནས་པ་ནས་བཟུང་སྟེ་གནས་བརྟན་གྱི་བར་གོང་མ་བཞིན་དུ་སྟེ། གལ་ཏེ་དགེ་སློང་གནས་བརྟན་གྱིས་རྩོད་པ་དེ་ཞི་བར་བྱེད་མི་ནུས་ན་རྩོད་པ་དེ་རྩོད་པ་སྦེད་པའི་དགེ་སློང་དེ་ཉིད་ལ་གཏད་པར་བྱའོ། །དེས་ཀྱང་རྩོད་པ་དེ་དགེ་འདུན་ལ་གཏད་པར་བྱའོ། །དགེ་འདུན་གྱིས་རྩོད་པ་དེ་གང་ཚུལ་ཤིང་མང་པོ་བླང་བའི་རྩོད་པ་ཞི་བས་ཞི་བར་བྱའོ། །རྒྱུ་ལྔས་གང་ཚུལ་ཤིང་མང་པོ་ལེན་པའི་རྩོད་པ་ཞི་བ་ནི་རྩུབ་པ་དང༌། གདུག་པ་དང༌། དམ་པོ་དང༌། དབྱེ་བའི་བསམ་པ་དང༌། སྦྱོར་བ་གཞན་དུ་མི་འགྱུར་བ་ཅན་ཡིན་ནོ། །རྩུབ་པ་ཇི་ལྟ་བུ་ཞེ་ན། རྒོལ་བ་དང་ཕྱིར་རྒོལ་བའི་དགེ་སློང་རྣམས་ཀྱིས་རྩུབ་བོ་རབ་ཏུ་བཟུང་བ་ཡིན་ཏེ། དེ་ལྟར་ན་རྩུབ་པོ་ཅན་ཡིན་ནོ། །གདུག་པ་ཇི་ལྟ་བུ་ཞེ་ན། རྒོལ་བ་དང་ཕྱིར་རྒོལ་བའི་དགེ་སློང་རྣམས་གདུག་པ་དང༌། རྣམ་
པར་གནོན་པ་ཡིན་ཏེ། དེ་ལྟར་ན་གདུག་པ་ཅན་ནོ། །དམ་པོ་ཇི་ལྟ་བུ་ཞེ་ན། རྒོལ་བ་དང་ཕྱིར་རྒོལ་བའི་དགེ་སློང་རྣམས་ཀྱིས་དམ་པོར་རབ་ཏུ་བཟུང་བ་ཡིན་ཏེ། དེ་ལྟར་ན་དམ་པོ་ཅན་ཡིན་ནོ། །དབྱེ་བའི་བསམ་པ་ཇི་ལྟ་བུ་ཞེ་ན། དབྱེ་བར་བྱེད་པའི་གཞི་བཅུ་བཞི་ལས་འབྱེད་པར་བྱེད་པའི་གཞི་གང་ཡང་རུང་བ་ཞིག་ལེགས་པར་ཤིན་ཏུ་རབ་ཏུ་བཟུང་བ་ཡིན་ཏེ། དེ་ལྟར་ན་དབྱེ་བའི་བསམ་པ་ཅན་ཡིན་ནོ། །སྦྱོར་བ་གཞན་དུ་མི་འགྱུར་བ་ཅན་ཇི་ལྟ་བུ་ཞེ་ན། སྐམ་ལ་གནས་པ་ནས་བཟུང་ནས་གནས་བརྟན་གྱི་བར་གྱིས་ཏེ། དེ་ལྟར་ན་སྦྱོར་བ་གཞན་དུ་མི་འགྱུར་བ་ཅན་ཡིན་ཏེ། ཆོས་འདི་ལྔ་དང་ལྡན་པས་ན་གང་ཚུལ་ཤིང་མང་པོ་བླང་པའི་ཞི་བ་ནི་རྩུབ་པ་དང༌། གདུག་པ་དང༌། དམ་པོ་དང༌། དབྱེ་བའི་བསམ་པ་དང༌། སྦྱོར་བ་གཞན་དུ་མི་འགྱུར་བ་ཅན་ཡིན་ནོ། །དེས་ན་ཚུལ་ཤིང་འབྲིམ་པའི་དགེ་སློང་བསྐོ་བར་བྱ་སྟེ། ཆོས་ལྔ་དང་ལྡན་པའི་དགེ་སློང་ཚུལ་ཤིང་འབྲིམ་པར་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ལྔ་གང་ཞེ་ན། འདུན་པས་འགྲོ་བ་དང༌། ཞེ་སྡང་གིས་འགྲོ་བ་དང༌། གཏི་མུག་གིས་འགྲོ་བ་དང༌། འཇིགས་པས་འགྲོ་བ་དང༌། ཚུལ་ཤིང་བྲིམས་པ་དང་མ་བྲིམས་པ་མི་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་ཚུལ་ཤིང་འབྲིམ་པར་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ཆོས་ལྔ་དང་ལྡན་པའི་དགེ་སློང་ཚུལ་ཤིང་འབྲིམ་པར་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །ལྔ་གང་ཞེ་ན། འདུན་བས་མི་འགྲོ་བ་དང༌། ཞེ་སྡང་གིས་མི་འགྲོ་བ་དང༌། གཏི་མུག་གིས་མི་འགྲོ་བ་དང༌། འཇིགས་པས་མི་འགྲོ་བ་དང༌། ཚུལ་ཤིང་བྲིམས་པ་དང་མ་བྲིམས་པ་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་ཚུལ་ཤིང་འབྲིམ་པར་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །ཚུལ་ཤིང་བྲིམ་པ་ནི་བཞི་སྟེ། བཞི་གང་ཞེ་ན། སྲ་བ་དང༌། མངོན་པ་དང༌། རྣ་དྲུང་དུ་གཤུབ་པ་དང་བཅས་པ་དང༌། དགེ་འདུན་ཐམས་ཅད་པའོ། །སྦ་བའི་ཚུལ་ཤིང་བྲིམ་པ་གང་ཞེ་ན། འདི་ལྟ་སྟེ་ཚུལ་ཤིང་འབྲིམ་པའི་དགེ་སློང་འདི་སྙམ་
དུ་སེམས་ཏེ། གནས་འདི་ན་དགེ་སློང་གནས་བརྟན་གནས་བརྟན་རབ་ཏུ་མང་པོ་དག་ནི་ཆོས་མ་ཡིན་པ་སྨྲ་ལ། དགེ་སློང་གསར་བུ་ཉུང་ཟད་ཅིག་ནི་ཆོས་སྨྲ་བས། གལ་ཏེ་བདག་གིས་ཚུལ་ཤིང་མངོན་པར་བྲིམས་ན་དགེ་སློང་གསར་བུ་དགེ་སློང་གནས་བརྟན་རྣམས་ཀྱི་རྗེས་སུ་བྱེད་པ་རྣམས་ཆོས་མ་ཡིན་པའི་ཚུལ་ཤིང་རབ་ཏུ་མང་པོ་ལེན་པར་འགྱུར་བའི་གནས་གང་ཡིན་པ་དེ་ཡོད་ཀྱིས། མ་ལ་བདག་གིས་ཚུལ་ཤིང་སྦས་ཏེ་བྲིམ་མོ་སྙམ་ནས། དེ་ཚུལ་ཤིང་སྦས་ནས་འབྲིམ་པ་སྟེ། འདི་ནི་སྦ་བའི་ཚུལ་ཤིང་འབྲིམ་པ་ཞེས་བྱའོ། །མངོན་པའི་ཚུལ་ཤིང་འབྲིམ་པ་གང་ཞེ་ན། འདི་ལྟ་སྟེ། ཚུལ་ཤིང་འབྲིམ་པའི་དགེ་སློང་འདི་སྙམ་དུ་སེམས་ཏེ། གནས་འདི་ན་དགེ་སློང་གནས་བརྟན་རབ་ཏུ་མང་པོ་དག་ནི་ཆོས་སྨྲ་ལ། དགེ་སློང་གསར་བུ་ཉུང་ཟད་གཅིག་ནི་ཆོས་མ་ཡིན་པ་སྨྲ་བས། གལ་ཏེ་བདག་གིས་ཚུལ་ཤིང་སྦས་ཏེ་བྲིམས་ན་དགེ་སློང་གསར་བུ་རྣམས་ཆོས་མ་ཡིན་པའི་ཚུལ་ཤིང་ལེན་པར་འགྱུར་བ་གང་ཡིན་པའི་གནས་དེ་ཡོད་ཀྱིས། མ་ལ་བདག་གིས་ཚུལ་ཤིང་མངོན་པར་བྲིམ་མོ། །བདག་གིས་ཚུལ་ཤིང་གསལ་བར་བྲིམས་ན་དགེ་སློང་གསར་བུ་དགེ་སློང་གནས་བརྟན་རྣམས་ཀྱི་རྗེས་སུ་བྱེད་པ་རྣམས་ཆོས་ཀྱི་ཚུལ་ཤིང་རབ་ཏུ་མང་པོ་ལེན་པར་འགྱུར་བ་གང་ཡིན་པའི་གནས་དེ་ཡོད་དོ་སྙམ་ནས་དེ་ཚུལ་ཤིང་མངོན་པར་འབྲིམ་པ་སྟེ། འདི་ནི་མངོན་པའི་ཚུལ་ཤིང་འབྲིམ་པ་ཞེས་བྱའོ། །རྣ་དྲུང་དུ་གཤུབ་པ་དང་བཅས་པའི་ཚུལ་ཤིང་འབྲིམ་པ་གང་ཞེ་ན། འདི་ལྟ་སྟེ་ཚུལ་ཤིང་འབྲིམ་པའི་དགེ་སློང་གིས་རྣ་དྲུང་དུ་གཏུགས་ཏེ་གཤུབས་ལ་ཚེ་དང་ལྡན་བ་ཁྱོད་ཀྱི་མཁན་པོས་ཆོས་ཀྱི་ཚུལ་ཤིང་བླངས་ཀྱིས་ཁྱོད་ཀྱིས་ཀྱང་ཆོས་ཀྱི་ཚུལ་ཤིང་ལོང་ཤིགཐཁྱོད་ཀྱི་སློབ་དཔོན་དང༌། མཁན་པོ་གཅིག་པ་དང༌། སློབ་དཔོན་གཅིག་པ་དང༌། གཏམ་འདྲེས་པ་དང་ཕེབས་པར་སྨྲ་བ་དང༌། སྨོས་འདྲིན་དང༌། འགྲོགས་བཤེས་ཀྱིས་ཆོས་ཀྱི་ཚུལ་ཤིང་བླངས་ཀྱིས། ཁྱོད་ཀྱིས་ཀྱང་ཆོས་ཀྱི་ཚུལ་ཤིང་ལོང་ཤིག་ཅེས་སྨྲ་བ་སྟེ། འདི་ནི་རྣ་དྲུང་དུ་གཤུབ་པ་དང་བཅས་པའི་ཚུལ་ཤིང་འབྲིམ་པ་ཞེས་བྱའོ། །དགེ་འདུན་ཐམས་ཅད་པའི་ཚུལ་ཤིང་འབྲིམ་པ་གང་ཞེ་ན། འདི་
ལྟ་སྟེ་ཚུལ་ཤིང་འབྲིམ་པའི་དགེ་སློང་འདི་སྙམ་དུ་སེམས་ཏེ། གནས་འདི་ན་དགེ་སློང་ནད་པ་རབ་ཏུ་མང་བས། གལ་ཏེ་བདག་གིས་དགེ་འདུན་མ་ཚོགས་ཤིང་མ་འདུས་པར་ཚུལ་ཤིང་བྲིམས་ན་དགེ་སློང་རབ་ཏུ་མང་པོས་ཆོས་མ་ཡིན་པའི་ཚུལ་ཤིང་ལེན་པར་འགྱུར་བ་གང་ཡིན་པའི་གནས་དེ་ཡོད་ཀྱིས། མ་ལ་བདག་གིས་དགེ་འདུན་ཐམས་ཅད་ཚོགས་ཤིང་འདུས་པ་དང་ཚུལ་ཤིང་བྲིམ་པར་བྱའོ་སྙམ་ནས། དགེ་འདུན་ཐམས་ཅད་ཚོགས་ཤིང་འདུས་པ་དང་ཚུལ་ཤིང་འབྲིམ་པ་དེ། འདི་ནི་དགེ་འདུན་ཐམས་ཅད་པའི་ཚུལ་ཤིང་འབྲིམ་པ་ཞེས་བྱའོ། །ཆོས་མ་ཡིན་པའི་ཚུལ་ཤིང་ལེན་པ་བཅུ་དང༌། ཆོས་ཀྱི་བཅུའོ། །ཆོས་མ་ཡིན་པའི་ཚུལ་ཤིང་ལེན་པ་བཅུ་གང་ཞེ་ན། ཆོས་མ་ཡིན་པས་ཚུལ་ཤིང་ལེན་པ་དང༌། མི་མཐུན་པས་ཚུལ་ཤིང་ལེན་པ་དང༌། ཆུང་བ་བས་ཀྱང་ཆུང་བས་ཚུལ་ཤིང་ལེན་པ་དང༌། དབྱེ་བའི་བསམ་པས་ཚུལ་ཤིང་ལེན་པ་དང༌། སྦྱོར་བ་གཞན་དུ་མ་གྱུར་པས་ཚུལ་ཤིང་ལེན་པ་དང༌། རྟེན་ཁ་ལོ་སྒྱུར་བ་དང་མི་སྟུན་པས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་འདུན་བྱེ་ཡང་ཅི་མ་རུང་སྙམ་དུ་བསམས་པས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་གྱུར་ཀྱང་ཅི་མ་རུང་སྙམ་ནས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་འདུན་འབྱེ་བར་འགྱུར་བར་ཤེས་བཞིན་དུ་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་སློང་རབ་ཏུ་མང་པོ་དག་ཆོས་མ་ཡིན་པ་སྨྲ་བར་འགྱུར་བར་ཤེས་བཞིན་དུ་ཚུལ་ཤིང་ལེན་པའོ།། །།འདུལ་བ་གཞི། བམ་པོ་བདུན་བཅུ་དགུ་པ། ཆོས་མ་ཡིན་པས་ཚུལ་ཤིང་ལེན་པ་ཇི་ལྟ་བུ་ཞེ་ན། འདུལ་བ་དང་མཐུན་པ་མ་ཡིན་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཆོས་མ་ཡིན་པས་ཚུལ་ཤིང་ལེན་པ་ཡིན་ནོ། །མི་མཐུན་པས་ཚུལ་ཤིང་ལེན་པ་ཇི་ལྟ་བུ་ཞེ་ན། དགེ་འདུན་མི་མཐུན་པས་ཚུལ་ཤིང་ལེན་པ་སྟེ། དེ་ལྟ་བུ་ནི་མི་མཐུན་པས་ཚུལ་ཤིང་ལེན་པ་ཡིན་ནོ། །ཆུང་བ་བས་ཀྱང་ཆུང་བས་ཚུལ་ཤིང་ལེན་པ་ཇི་ལྟ་བུ་ཞེ་ན། བསྡམ་པར་བྱ་བར་དང་བཤགས་པར་བྱ་བ་ཡིན་ནོ་སྙམ་ནས་ཚུལ་ཤིང་ལེན་པ་སྟེ། དེ་ལྟ་བུ་
ནི་ཆུང་བ་བས་ཀྱང་ཆུང་བས་ཚུལ་ཤིང་ལེན་པ་ཡིན་ནོ། །དབྱེ་བའི་བསམ་པས་ཚུལ་ཤིང་ལེན་པ་ཇི་ལྟ་བུ་ཞེ་ན། དབྱེ་བར་བྱེད་པའི་གཞི་བཅུ་བཞི་ལས་དབྱེ་བར་བྱེད་པའི་གཞི་གང་ཡང་རུང་བ་ཞིག་ལེགས་པར་ཤིན་ཏུ་རབ་ཏུ་བཟུང་བ་དེ་ལྟ་བུ་ནི་དགེ་འདུན་དབྱེ་བའི་བསམ་པས་ཚུལ་ཤིང་ལེན་པ་ཡིན་ནོ། །སྦྱོར་བ་གཞན་དུ་མ་གྱུར་པས་ཚུལ་ཤིང་ལེན་པ་ཇི་ལྟ་བུ་ཞེ་ན། སྐམ་ལ་གནས་པ་མ་ཡིན་པ་ནས་བཟུང་ནས་གནས་བརྟན་གྱིས་མ་ཡིན་པ་ཞེས་བྱ་བའི་བར་དུ་སྟེ། དེ་ལྟ་བུ་ནི་སྦྱོར་བ་གཞན་དུ་མ་གྱུར་པས་ཚུལ་ཤིང་ལེན་པ་ཡིན་ནོ། །རྟེན་ཁ་ལོ་སྒྱུར་བ་དང་མི་སྟུན་པས་ཚུལ་ཤིང་ལེན་པ་ཇི་ལྟ་བུ་ཞེ་ན། དགེ་སློང་མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པར་གྱུར་པ་གང་དག་ཡིན་པ་དེ་དག་ནི་ཆོས་འདུལ་བ་འདི་ལ་རྟེན་དང་ཁ་ལོ་སྒྱུར་བ་ཞེས་བྱ་སྟེ། དེ་རྣམས་ལ་མ་བརྟགས་པར་ཚུལ་ཤིང་ལེན་པ་སྟེ། འདི་ལྟ་བུ་ནི་རྟེན་ཁ་ལོ་སྒྱུར་བ་དང་མི་སྟུན་པས་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་པས་དགེ་འདུན་བྱེ་བར་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཇི་ལྟ་བུ་ཡིན་ཞེ་ན། ཚུལ་ཤིང་བླངས་པས་དགེ་འདུན་བྱེ་བར་གྱུར་ཀྱང་ཅི་མ་རུང་ཞེས་དེ་སྙམ་དུ་བསམས་ནས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་འདུན་བྱེ་བར་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པར་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་བླངས་ནས་འཇུག་པར་འགྱུར་ཡང་ཅི་མ་རུང་སྙམ་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་
པས་དགེ་འདུན་འབྱེ་བར་འགྱུར་བར་ཤེས་བཞིན་དུ་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་འདུན་འབྱེ་བར་འགྱུར་བར་ཤེས་ཤིང་དེ་ལྟར་བསམས་ནས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་འདུན་འབྱེ་བར་འགྱུར་བར་ཤེས་བཞིན་དུ་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་འགྱུར་བར་ཤེས་བཞིན་དུ་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་བླངས་ནས་འཇུག་པར་འགྱུར་བར་ཤེས་ཤིང་དེ་ལྟར་བསམས་ནས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་འགྱུར་བར་ཤེས་བཞིན་དུ་ཚུལ་ཤིང་ལེན་པ་སྟེ། འདི་དག་ནི་ཆོས་མ་ཡིན་པའི་ཚུལ་ཤིང་ལེན་པ་བཅུ་ཡིན་ནོ། །ཆོས་ཀྱི་ཚུལ་ཤིང་ལེན་པ་བཅུ་གང་ཞེ་ན། ཆོས་ཀྱིས་ཚུལ་ཤིང་ལེན་པ་དང༌། མཐུན་པས་ཚུལ་ཤིང་ལེན་པ་དང༌། ཆུང་བ་བས་ཀྱང་ཆུང་བ་མ་ཡིན་པས་ཚུལ་ཤིང་ལེན་པ་དང༌། མི་འབྱེ་བའི་བསམས་པས་ཚུལ་ཤིང་ལེན་པ་དང༌། སྦྱོར་བ་གཞན་དུ་འགྱུར་བས་ཚུལ་ཤིང་ལེན་པ་དང༌། རྟེན་ཁ་ལོ་སྒྱུར་བ་དང་སྟུན་པས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་འདུན་བྱེ་བར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་འདུན་འབྱེ་བར་མི་ཤེས་པས་ཚུལ་ཤིང་ལེན་པ་དང༌། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་འགྱུར་བར་མི་ཤེས་པས་ཚུལ་ཤིང་ལེན་པ་ཡིན་ནོ། །ཆོས་ཀྱི་ཚུལ་ཤིང་ལེན་པ་ཇི་ལྟ་བུ་ཞེ་ན། འདུལ་བ་དང་མཐུན་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཆོས་ཀྱི་ཚུལ་ཤིང་ལེན་པ་ཡིན་ནོ། །མཐུན་པས་ཚུལ་ཤིང་ལེན་པ་ཇི་ལྟ་བུ་ཞེ་ན། དགེ་འདུན་མཐུན་པས་ཚུལ་ཤིང་ལེན་པ་སྟེ། དེ་ལྟ་བུ་ནི་མཐུན་པས་ཚུལ་ཤིང་ལེན་པ་ཡིན་ནོ། །ཆུང་བ་བས་ཀྱང་ཆུང་བ་མ་ཡིན་བས་ཚུལ་ཤིང་ལེན་པ་ཇི་ལྟ་བུ་ཞེ་ན། བསྡམ་པར་བྱ་བ་མ་ཡིན་པ་དང༌། བཤགས་པར་བྱ་བ་མ་ཡིན་ནོ་སྙམ་དུ་བསམས་ནས་ཚུལ་ཤིང་ལེན་པ་སྟེ། དེ་ལྟ་བུ་ནི་ཆུང་བ་བས་ཀྱང་ཆུང་བ་མ་ཡིན་བས་ཚུལ་ཤིང་ལེན་པ་ཡིན་ནོ། །མི་འབྱེ་བའི་བསམ་པས་ཚུལ་ཤིང་ལེན་པ་ཇི་ལྟ་བུ་ཞེ་ན། འབྱེ་བར་བྱེད་བའི་གཞི་བཅུ་བཞི་ལས་འབྱེ་བར་བྱེད་པའི་གཞི་གང་ཡང་རུང་བ་ལེགས་པར་ཤིན་ཏུ་རབ་ཏུ་མ་བཟུང་བ་སྟེ། དེ་ལྟ་བུ་ནི་མི་འབྱེ་བའི་བསམ་པས་ཚུལ་
ཤིང་ལེན་པ་ཡིན་ནོ། །སྦྱོར་བ་གཞན་དུ་གྱུར་པས་ཚུལ་ཤིང་ལེན་པ་ཇི་ལྟ་བུ་ཞེ་ན། སྐམ་ལ་གནས་པ་ནས་བཟུང་ནས་གནས་བརྟན་གྱི་བར་གྱིས་ཏེ། དེ་ལྟ་བུ་ནི་སྦྱོར་བ་གཞན་དུ་གྱུར་པས་ཚུལ་ཤིང་ལེན་པ་ཡིན་ནོ། །རྟན་ཁ་ལོ་སྒྱུར་བ་དང་སྟུན་པས་ཚུལ་ཤིང་ལེན་པ་ཇི་ལྟ་བུ་ཞེ་ན། དགེ་སློང་མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་གང་དག་ཡིན་པ་དེ་དག་ནི་ཆོས་འདུལ་བ་འདི་ལ་རྟེན་དང་ཁ་ལོ་སྒྱུར་བ་ཞེས་བྱ་སྟེ། དེ་རྣམས་ལ་བརྟགས་ནས་ཚུལ་ཤིང་ལེན་པ་དེ་ལྟ་བུ་ནི་རྟེན་ཁ་ལོ་སྒྱུར་བ་དང་སྟུན་པས་ཚུལ་ཤིང་ལེན་པ་ཡིན་ནོ། ཚུལ་ཤིང་བླངས་པས་དགེ་འདུན་བྱེ་བར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་འདུན་བྱེ་བར་གྱུར་ཀྱང་ཅེ་མ་རུང་ཞེས་དེ་ལྟར་མི་སེམས་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་འདུན་བྱེ་བར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པས་བླངས་ཏེ་འཇུག་པར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་བར་མ་གྱུར་ཀྱང་ཅི་མ་རུང་སྙམ་པས་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་པས་དགེ་འདུན་འབྱེ་བར་འགྱུར་བར་མི་ཤེས་པས་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་འདུན་འབྱེ་བར་འགྱུར་བར་མི་ཤེས་ཤིང་དེ་ལྟར་མི་སེམས་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་འདུན་འབྱེ་བར་འགྱུར་བར་མི་ཤེས་པས་ཚུལ་ཤིང་ལེན་པ་ཡིན་ནོ། །ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་སྨྲ་པར་འགྱུར་བར་མི་ཤེས་པས་ཚུལ་ཤིང་ལེན་པ་ཇི་ལྟ་བུ་ཞེ་ན། ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་ཡིན་པ་བླངས་ནས་སྤྱོད་པར་མི་ཤེས་ཤིང་དེ་ལྟར་མི་སེམས་པས་ཚུལ་ཤིང་ལེན་པ་སྟེ། དེ་ལྟ་བུ་ནི་ཚུལ་ཤིང་བླངས་པས་དགེ་སློང་རབ་ཏུ་མང་པོ་ཆོས་མ་
ཡིན་པ་སྨྲ་བར་འགྱུར་བར་མི་ཤེས་པས་ཚུལ་ཤིང་ལེན་པ་སྟེ། འདི་ནི་ཆོས་ཀྱི་ཚུལ་ཤིང་ལེན་པ་བཅུ་ཡིན་ནོ། །ངས་དགེ་སློང་ཚུལ་ཤིང་འབྲིམ་པའི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། དགེ་སློང་ཚུལ་ཤིང་འབྲིམ་པས་ཚུལ་ཤིང་རྣམ་པ་གཉིས་བཤམ་པར་བྱ་སྟེ། ཆོས་ཀྱི་ཚུལ་ཤིང་དང༌། ཆོས་མ་ཡིན་པའི་ཚུལ་ཤིང་ངོ༌། །ཆོས་ཀྱི་ཚུལ་ཤིང་རྣམས་ནི་ཡ་ཡོ་མེད་པ། ཀྱག་ཀྱོག་མེད་པ། ཀྱར་ཀྱོར་མེད་པ། ཁ་དོག་བཟང་བ། རེག་ན་བདེ་བར་བྱའོ། །ཆོས་མ་ཡིན་པའི་ཚུལ་ཤིང་རྣམས་ནི་ཡ་ཡོ་དང༌། ཀྱག་ཀྱོག་དང༌། ཀྱར་ཀྱོར་དང༌། ཁ་དོག་ངན་པ་དང༌། རེག་ན་མི་བདེ་བར་བྱའོ། །དེ་ནས་དགེ་སློང་ཚུལ་ཤིང་འབྲིམ་བས་ལག་པ་གཡས་པས་ཆོས་ཀྱི་ཚུལ་ཤིང་རྣམས་བླངས་ལ་གཡོན་པས་ཆོས་མ་ཡིན་པའི་ཚུལ་ཤིང་རྣམས་བླངས་ནས་དགེ་འདུན་གྱིས་གནས་བརྟན་གྱི་མདུན་དུ་འདུག་སྟེ། ཆོས་ཀྱི་ཚུལ་ཤིང་རྣམས་ཀྱི་བསྔགས་པ་དང༌། ཆོས་མ་ཡིན་པའི་ཚུལ་ཤིང་རྣམས་ཀྱི་བསྔགས་པ་མ་ཡིན་པ་བརྗོད་པར་བྱ་སྟེ། གནས་བརྟན་འདི་དག་ནི་ཆོས་ཀྱི་ཚུལ་ཤིང་ལགས་ཏེ། ཡ་ཡོ་མ་མཆིས་པ། ཀྱག་ཀྱོག་མ་མཆིས་པ། ཀྱར་ཀྱོར་མ་མཆིས་པ། ཁ་དོག་བཟང་བ། རེག་ན་བདེ་བ་ལགས་ཀྱིས་བཞེས་ཤིགཐའདི་དག་ནི་ཆོས་མ་ཡིན་པའི་ཚུལ་ཤིང་ལགས་ཏེ། ཡ་ཡོ་དང་ཀྱག་ཀྱོག་དང༌། ཀྱར་ཀྱོར་དང༌། ཁ་དོག་ངན་ལ་རེག་ན་མི་བདེ་བ་ལགས་ན་བཞེས་ཤིགཐགལ་ཏེ་ཆོས་མ་ཡིན་པའི་ཚུལ་ཤིང་གང་ན་བ་དེ་ལོགས་སུ་ལག་པ་ཟེད་ན་ཚིག་དང་པོ་ལ་ཡང་སྦྱིན་པར་མི་བྱ། གཉིས་པ་ལ་ཡང་སྦྱིན་པར་མི་བྱ། གསུམ་པ་ལ་སྦྱིན་པར་བྱ་སྟེ། དགེ་འདུན་གྱི་གནས་བརྟན་གྱིས་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་པར་བྱའོ། །དེ་བཞིན་དུ་དགེ་འདུན་གསར་བུའི་བར་གྱི་མདུན་དུ་འདུག་ནས་ཆོས་ཀྱི་ཚུལ་ཤིང་རྣམས་ཀྱི་བསྔགས་པ་དང༌། ཆོས་མ་ཡིན་པའི་ཚུལ་ཤིང་རྣམས་ཀྱི་བསྔགས་པ་མ་ཡིན་པ་བརྗོད་པར་བྱ་སྟེ། འདི་དག་ནི་ཆོས་ཀྱི་ཚུལ་ཤིང་ལགས་ཏེ། ཡ་ཡོ་མ་མཆིས་པ། ཀྱག་ཀྱོག་མ་མཆིས་པ། ཀྱར་ཀྱོར་མ་མཆིས་པ། ཁ་དོག་བཟང་བ། རེག་ན་བདེ་བ་ལགས་ཀྱིས་བཞེས་ཤིག །འདི་དག་ནི་ཆོས་མ་ཡིན་པའི་
ཚུལ་ཤིང་ལགས་ཏེ། ཡ་ཡོ་དང༌། ཀྱག་ཀྱོག་དང༌། ཀྱར་ཀྱོར་དང༌། ཁ་དོག་ངན་པ། རེག་ན་མི་བདེ་བ་ལགས་ན་བཞེས་ཤིགཐགལ་ཏེ་ཆོས་མ་ཡིན་པའི་ཚུལ་ཤིང་གང་ན་བ་དེ་ལོགས་སུ་ལག་པ་ཟེད་ན་ཚིག་དང་པོ་ལ་སྦྱིན་པར་མི་བྱ། གཉིས་པ་ལ་སྦྱིན་པར་མི་བྱ། གསུམ་པ་ལ་སྦྱིན་པར་བྱ་སྟེ། དེ་བཞིན་དུ་དགེ་འདུན་གསར་བུས་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་པར་བྱའོ། །གལ་ཏེ་ཆོས་ཀྱི་ཚུལ་ཤིང་ཉུང་བར་གྱུར་ན་ཀུན་ཤེས་ཀཽཎྜི་ནྱའི་ཚུལ་ཤིང་བླང་བར་བྱའོ། །གལ་ཏེ་ཆོས་ཀྱི་ཚུལ་ཤིང་གཅིག་གིས་ལྷག་པར་གྱུར་ན་ཡང་དེ་ལྟ་ན་འདི་ལྟ་སྟེ་ཆོས་ཀྱིས་རྩོད་པ་དེ་ཉེ་བར་ཞི་བ་ཡིན་ནོ། །དེ་ལྟར་རྩོད་པ་དེ་ཞི་བར་བྱས་པ་ལ་གལ་ཏེ་འགའ་ཞིག་སྐྱོ་སྡོགས་བྱེད་ན་ལྟུང་བྱེད་དུ་འགྱུར་རོ། །དེ་བཞིན་དུ་གལ་ཏེ་ཆོས་མ་ཡིན་པའི་ཚུལ་ཤིང་གཅིག་གིས་ལྷག་པར་གྱུར་ན་ཡང་དེ་ལྟ་ན་འདི་ལྟ་སྟེ་ཆོས་མ་ཡིན་པས་རྩོད་པ་དེ་ཞི་བར་བྱས་པ་ཡིན་ནོ། །དེ་ལྟར་རྩོད་པ་དེ་ཞི་བར་བྱས་པ་ལ་འགའ་ཞིག་སྐྱོ་སྡོགས་བྱེད་ན་ཉེས་བྱས་སུ་འགྱུར་རོ། །དེ་ལྟར་ན་གང་ཚུལ་ཤིང་མང་པོ་བླངས་པས་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། གང་ཚུལ་ཤིང་མང་པོ་བླང་བའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་འགྱེད་པའི་རྩོད་པ་ལ་རྩོད་བ་ཞི་བར་བྱེད་པ་གཉིས་ཀྱིས་དུལ་བར་བྱ། ཞི་བར་བྱ། ཉེ་བར་ཞི་བར་བྱ་བ་ནི་འདི་ལྟ་སྟེ། མངོན་སུམ་དུ་འདུལ་བར་འོས་པ་དང༌། གང་ཚུལ་ཤིང་མང་པོ་བླང་བས་སོ། །དགེ་སློང་དག་གདམས་ངག་མེད་པའི་རྩོད་པ་ལ་རྩོད་པ་ཞི་བར་བྱེད་པའི་ཆོས་གསུམ་གྱིས་དུལ་བར་བྱ། ཞི་བར་བྱ། ཉེ་བར་ཞི་བར་བྱའོ། །གསུམ་གང་ཞེ་ན། མངོན་སུམ་དུ་འདུལ་བ་དང༌། དྲན་པས་འདུལ་བ་དང༌། མ་མྱོས་པས་འདུལ་བའོ། །དགེ་སློང་དག་ཇི་ལྟར་ན་མངོན་སུམ་གྱིས་འདུལ་བ་ནི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། མངོན་སུམ་དུ་འདུལ་བའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། སྐམ་ལ་གནས་པ་ནས་བཟུང་ནས་གནས་བརྟན་གྱི་བར་གྱིས་གོང་མ་བཞིན་དུ་སྟེ། དགེ་སློང་དག་དེ་ལྟར་ན་མངོན་སུམ་
དུ་འདུལ་བ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། མངོན་སུམ་དུ་འདུལ་བའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་ཇི་ལྟར་ན་དྲན་པས་འདུལ་བ་ནི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་རྩོད་པ་རྣམས་འདི་ལྟ་སྟེ། དྲན་པས་འདུལ་བའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། དཔེར་ན་ཚེ་དང་ལྡན་པ་གྱད་བུ་ནོར་ལ་དགེ་སློང་མ་མཛའ་མོས་མི་བདེན་པས་སྐུར་པ་བཏབ་པ་དེ་ལ་དགེ་སློང་རྣམས་གླེང་བར་བྱེད་དེ། གཞི་དེས་གླེང་བ་ན་ངོ་ཚའོ་ཞེས་བྱ་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གྱད་བུ་ནོར་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་དྲན་པས་འདུལ་བར་འོས་པ་བྱིན་ཅིགཐསྦྱིན་པ་ནི་འདི་ལྟར་སྦྱིན་བར་བྱ་སྟེ། གནས་མལ་བཤམས་ལ་གཎྜཱི་བརྡུངས་ནས་དྲིས་པའི་ཚིག་གིས་དགེ་སློང་རྣམས་ལ་ཡང་དག་བར་བསྒོ་ལ་དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང་གྱད་བུ་ནོར་གྱིས་བླ་གོས་ཕྲག་པ་གཅིག་ཏུ་གཟར་ཏེ། རྒན་རིམས་ཇི་ལྟ་བ་བཞིན་དུ་འདུད་པ་བྱས་ལ་རྒན་པའི་མཐར་ཙོག་ཙོག་པོར་འདུག་ནས་ཐལ་མོ་སྦྱར་ཏེ་ཚིག་འདི་སྐད་ཅེས། དགེ་འདུན་བཙུན་པ་རྣམས་གསན་དུ་གསོལ། བདག་གྱད་བུ་ནོར་ལ་དགེ་སློང་མ་མཛའ་མོས་མི་བདེན་པས་སྐུར་པ་བཏབ་པས་བདག་ལ་དགེ་སློང་རྣམས་གཞི་དེས་གླེང་བར་བགྱིད་དེ། འདི་ལ་གཞི་དེས་གླེང་བར་བགྱིད་པ་དགེ་
འདུན་ལ་དྲན་པས་འདུལ་བ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་གྱད་བུ་ནོར་ལ་དྲན་པས་འདུལ་བ་སྩལ་དུ་གསོལ། དེ་སྐད་ལན་གཉིས་ལན་གསུམ་དུ་བརྗོད་པར་བྱའོ། །དེ་ནས་དགེ་སློང་གཅིག་གིས་གསོལ་པ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། གྱད་བུ་ནོར་འདི་ལ་དགེ་སློང་མ་མཛའ་མོས་མི་བདེན་པས་སྐུར་པ་བཏབ་པས་འདི་ལ་དགེ་སློང་རྣམས་གཞི་དེས་གླེང་བར་བགྱིད་དེ། འདི་ལ་གཞི་དེས་གླེང་བར་བགྱིད་བ་དགེ་འདུན་ལས་དྲན་པས་འདུལ་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་ལྟར་དགེ་འདུན་གྱིས་གྱད་བུ་ནོར་ལ་དྲན་བས་འདུལ་བ་སྩོལ་བར་མཛད་དོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ། གྱད་བུ་ནོར་འདི་ལ་དགེ་སློང་མ་མཛའ་མོས་མི་བདེན་པས་སྐུར་པ་བཏབ་པས་འདི་ལ་དགེ་སློང་རྣམས་གཞི་དེས་གླེང་བར་བགྱིད་དེ། འདི་ལ་གཞི་དེས་གླེང་བར་བགྱིད་པ་ན་དགེ་འདུན་ལས་དྲན་པས་འདུལ་བ་གསོལ་ཏེ། དེའི་སླད་དུ་དགེ་འདུན་གྱིས་གྱད་བུ་ནོར་ལ་དྲན་པས་འདུལ་བ་སྩོལ་བར་མཛད་ན། ཚེ་དང་ལྡན་པ་གང་དག་གྱད་བུ་ནོར་ལ་དྲན་པས་འདུལ་བ་སྩོལ་བར་བཟོད་པ་དེ་དག་ནི་ཅང་མ་གསུང་ཤིགཐགང་དག་མི་བཟོད་པ་དེ་དག་ནི་གསུང་ཤིགཐའདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལས་བརྗོད་པ་གཉིས་པ་དང་གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་གྱད་བུ་ནོར་ལ་དྲན་བས་འདུལ་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ནོ། །ཆོས་མ་ཡིན་པའི་དྲན་པས་འདུལ་བ་སྦྱིན་པ་གསུམ་དང༌། ཆོས་ཀྱི་གསུམ་མོ། །ཆོས་མ་ཡིན་པའི་དྲན་པས་འདུལ་བ་སྦྱིན་པ་གསུམ་གང་ཞེ་ན། འདི་ལྟ་སྟེ། དགེ་སློང་ཕས་ཕམ་པའི་ལྟུང་བ་བྱུང་བ་དེ་ལ་དགེ་སློང་རྣམས་གཞི་དེས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན། དགེ་འདུན་ལས་དྲན་པས་འདུལ་བ་གསོལ་ཏེ། དེ་ལ་དགེ་འདུན་གྱིས་དྲན་པས་འདུལ་བ་སྦྱིན་པ་ནི་ཆོས་མ་ཡིན་པའི་དྲན་པས་འདུལ་བ་སྦྱིན་པ་ཡིན་ཏེ། དེ་ཅིའི་ཕྱིར་ཞེ་ན། དེ་ནི་བསྙིལ་བར་འོས་པའི་ཕྱིར་རོ། །འདི་ལྟ་སྟེ་དགེ་སློང་དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པ་དང༌། ཉེས་བྱས་ཀྱི་ལྟུང་བ་བྱུང་བ་དེ་ལ་དགེ་སློང་རྣམས་གཞི་དེས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན་དགེ་འདུན་ལས་དྲན་པས་འདུལ་བ་གསོལ་ཏེ། དགེ་འདུན་གྱིས་དེ་ལ་དྲན་པས་འདུལ་བ་སྦྱིན་པ་ནི་ཆོས་མ་ཡིན་པའི་དྲན་པས་འདུལ་བ་སྦྱིན་པ་ཡིན་ཏེ། དེ་ཅིའི་ཕྱིར་ཞེ་ན།
དེ་ནི་བཤགས་པར་འོས་པའི་ཕྱིར་རོ། །འདི་ལྟ་སྟེ་དགེ་སློང་བྱེ་མ་སྐྱེས་སྨྱོས། སེམས་འཁྲུགས། ཚོར་བས་ཉེན་ཏེ་སྒྲེན་མོར་བྱུང་ནས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ་མང་དུ་སྤྱད། སྨྲས་བརྩལ་ནས་ཁ་ཆུ་ཟགས། མིག་བགྲད། བཞིན་གྱུར་ཏེ་གཉིད་ཀྱིས་མ་ལོག་པར་གཉིད་ཀྱིས་ལོག་གོ་སྙམ་དུ་ཤེས། ཕ་རོལ་གྱིས་མ་སྨྲས་པར་སྨྲས་སོ་སྙམ་དུ་ཤེས་སོ། །དུས་གཞན་ཞིག་ན་དེས་རང་གི་སེམས་སླར་སོར་ཆུད་པ་དང༌། དེ་ལ་གཞི་དེས་དགེ་སློང་རྣམས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན་དགེ་འདུན་ལས་དྲན་པས་འདུལ་བ་གསོལ་ཏེ། དགེ་འདུན་གྱིས་དེ་ལ་དྲན་པས་འདུལ་བ་སྦྱིན་པ་ནི་ཆོས་མ་ཡིན་པའི་དྲན་པས་འདུལ་བ་སྦྱིན་པ་ཡིན་ཏེ། དེ་ཅིའི་ཕྱིར་ཞེ་ན། དེ་ནི་མ་མྱོས་པས་འདུལ་བར་འོས་པའི་ཕྱིར་རོ། །འདི་ལྟ་སྟེ་དགེ་སློང་གཞི་ལྡན་དགེ་འདུན་གྱི་ནང་དུ་ལྟུང་བ་ཉིད་ཤེས་པ་ལས་བརྗེད་ནས་ཕྱིས་དྲན་ཏེ་ཤེས་པ་ལས་ཀྱང་བརྗེད་པ་དང༌། དགེ་འདུན་གྱིས་དེ་ལ་དྲན་པས་འདུལ་བ་སྦྱིན་པ་ནི་ཆོས་མ་ཡིན་པའི་དྲན་པས་འདུལ་བ་སྦྱིན་པ་ཡིན་ཏེ། དེ་ཅིའི་ཕྱིར་ཞེ་ན། དེ་ནི་དེའི་ངོ་བོ་ཉིད་ཚོལ་དུ་གཞུག་པར་འོས་པའི་ཕྱིར་ཏེ། འདི་དག་ནི་ཆོས་མ་ཡིན་པའི་དྲན་པས་འདུལ་བ་སྦྱིན་པ་གསུམ་ཡིན་ནོ། །ཆོས་ཀྱི་དྲན་པས་འདུལ་བ་སྦྱིན་པ་གསུམ་གང་ཞེ་ན། འདི་ལྟ་སྟེ། གྱད་བུ་ནོར་ལ་དགེ་སློང་མ་མཛའ་མོས་མི་བདེན་པས་སྐུར་བ་བཏབ་པ་དེ་ལ་དགེ་སློང་རྣམས་གཞི་དེས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན་དགེ་འདུན་ལ་དྲན་པས་འདུལ་བ་གསོལ་ཏེ། དགེ་འདུན་གྱིས་དེ་ལ་དྲན་པས་འདུལ་བ་སྦྱིན་པ་ནི་ཆོས་ཀྱི་དྲན་པས་འདུལ་བ་སྦྱིན་པ་ཡིན་ནོ། །འདི་ལྟ་སྟེ་དགེ་སློང་ཞིག་ལ་ལྟུང་བ་གཞན་ཁོ་ན་ཞིག་བྱུང་བར་གྱུར་པ་དེ་ལ་དགེ་སློང་རྣམས་ཀྱིས་གཞི་གཞན་གྱིས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན་དགེ་འདུན་ལས་དྲན་པས་འདུལ་བ་གསོལ་ཏེ། དགེ་འདུན་གྱིས་དེ་ལ་དྲན་པས་འདུལ་བ་སྦྱིན་པ་ནི་ཆོས་ཀྱི་དྲན་པས་འདུལ་བ་སྦྱིན་པ་ཡིན་ནོ། །འདི་ལྟ་སྟེ་དགེ་སློང་ཞིག་ལྟུང་བ་བྱུང་བར་གྱུར་ལ་དེས་དེ་དགེ་སློང་གི་མདུན་དུ་བཤགས་པ་བྱིན་གྱིས་བརླབས་པར་གྱུར་པ་དེ་ལ་
དགེ་སློང་རྣམས་གཞི་དེས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན། དགེ་འདུན་ལས་དྲན་པས་འདུལ་བ་གསོལ་ཏེ། དགེ་འདུན་གྱིས་དེ་ལ་དྲན་པས་འདུལ་བ་སྦྱིན་བ་ནི་ཆོས་ཀྱི་དྲན་པས་འདུལ་བ་སྦྱིན་པ་ཡིན་ཏེ། གསུམ་པོ་འདི་དག་ནི་ཆོས་ཀྱི་དྲན་པས་འདུལ་བ་སྦྱིན་པ་ཡིན་ནོ། །དགེ་སློང་དག་དེ་ལྟར་ན་དྲན་པས་འདུལ་བར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། དྲན་པས་འདུལ་བར་འོས་པའི་རྩོད་པ་ཞི་བར་བྱེད་པས་དུལ་བ་དང་ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་ཇི་ལྟར་ན་མ་སྨྱོས་བས་འདུལ་བར་འོས་པ། རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། མ་སྨྱོས་པས་འདུལ་བར་འོས་བའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། འདི་ལྟ་སྟེ། དགེ་སློང་བྱེ་མ་སྐྱེས་སྨྱོས། སེམས་འཁྲུགས། ཚོར་བས་ཉེན་ནས་སྒྲེན་མོར་བྱུང་སྟེ་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ་མང་དུ་སྤྱད། སྨྲས། བརྩལ་ནས་ཁ་ཆུ་ཟགས། མིག་གྱུར། བཞིན་གྱུར་ཏེ་གཉིད་ཀྱིས་མ་ལོག་པར་གཉིད་ཀྱིས་ལོག་གོ་སྙམ་དུ་ཤེས། ཕ་རོལ་གྱིས་མ་སྨྲས་པར་སྨྲས་སོ་སྙམ་དུ་ཤེས་སོ། །དུས་གཞན་ཞིག་ན་དེས་རང་གི་སེམས་སོར་ཆུད་པ་དང༌། དེ་ལ་དགེ་སློང་རྣམས་གཞི་དེས་གླེང་བར་བྱེད་དེ། དེ་ལ་གཞི་དེས་གླེང་བར་བྱེད་པ་ན་དགེ་འདུན་ལ་མ་སྨྱོས་པས་འདུལ་བ་གསོལ་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་བྱེ་མ་སྐྱེས་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་མ་སྨྱོས་པས་འདུལ་བ་བྱིན་ཅིགཐསྦྱིན་པ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ། དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང༌། དགེ་སློང་བྱེ་མ་སྐྱེས་ཀྱིས་བླ་གོས་ཕྲག་པ་གཅིག་ཏུ་གཟར་ཏེ། རྒན་པ་ཇི་ལྟ་བ་བཞིན་དུ་གདུང་པ་བྱས་ལ་རྒན་པའི་མཐར་ཙོག་ཙོག་པོར་འདུག་སྟེ་ཐལ་མོ་སྦྱར་ལ་ཚིག་འདི་སྐད་ཅེས། དགེ་འདུན་བཙུན་པ་རྣམས་གསན་དུ་གསོལ།
བདག་དགེ་སློང་བྱེ་མ་སྐྱེས་སྨྱོས། སེམས་འཁྲུགས། ཚོར་བས་ཉེན་ནས་སྒྲེན་མོར་བྱུང་སྟེ་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ་མང་དུ་སྤྱད། སྨྲས། བརྩལ་ནས་ཁ་ཆུ་ཟགས། མིག་གྱུར། བཞིན་གྱུར་ཏེ། གཉིད་ཀྱིས་མ་ལོག་པར་གཉིད་ཀྱིས་ལོག་གོ་སྙམ་དུ་འཚལ། ཕ་རོལ་གྱིས་མ་སྨྲས་པར་སྨྲས་སོ་སྙམ་དུ་འཚལ་བ་ལས་དུས་གཞན་ཞིག་ན་བདག་སེམས་སོར་ཆུད་པ་དང་བདག་ལ་དགེ་སློང་རྣམས་གཞི་དེས་གླེང་བར་བགྱིད་ཅིང༌། བདག་ལ་གཞི་དེས་གླེང་བར་བགྱིད་པ་དགེ་འདུན་ལ་མ་སྨྱོས་པས་འདུལ་བ་གསོལ་ན། དགེ་འདུན་བཙུན་པ་རྣམས་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་བྱེ་མ་སྐྱེས་ལ་མ་སྨྱོས་པས་འདུལ་བ་སྩལ་དུ་གསོལ། དེ་སྐད་ལན་གཉིས་ལན་གསུམ་དུ་བརྗོད་པར་བྱའོ། །དེ་ནས་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་བྱེ་མ་སྐྱེས་འདི་སྨྱོས། སེམས་འཁྲུགས། ཚོར་བས་ཉེན་ནས་སྒྲེན་མོར་བྱུང་སྟེ་དགེ་སྦྱོང་གི་ཚུལ་མ་ལགས་པ། རྗེས་སུ་མཐུན་པ་མ་ལགས་པ་མང་དུ་སྤྱད། སྨྲས། བརྩལ་ནས་ཁ་ཆུ་ཟགས། མིག་གྱུར། བཞིན་གྱུར་ཏེ་གཉིད་ཀྱིས་མ་ལོག་པར་གཉིད་ཀྱིས་ལོག་གོ་སྙམ་དུ་འཚལ། ཕ་རོལ་ཀྱིས་མ་སྨྲས་པར་སྨྲས་སོ་སྙམ་དུ་འཚལ་བ་ལས་དུས་གཞན་ཞིག་ན་འདིས་རང་གི་སེམས་སོར་ཆུད་པ་དང་འདི་ལ་དགེ་སློང་རྣམས་གླེང་བར་བགྱིད་ཅིང༌། འདི་ལ་གཞི་དེས་གླེང་བར་བགྱིད་པ་དགེ་འདུན་ལ་མ་སྨྱོས་པས་འདུལ་བ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དེའི་སླད་དུ་དགེ་འདུན་གྱིས་དགེ་སློང་བྱེ་མ་སྐྱེས་ལ་མ་སྨྱོས་པའི་འདུལ་བ་སྩོལ་བར་མཛད་དོ། །འདི་ནི་གསོལ་བའོ། །ལས་བྱ་བ་ནི། དགེ་འདུན་བཙུན་པ་རྣམས་གསན་དུ་གསོལ་དགེ་སློང་བྱེ་མ་སྐྱེས་འདི་སྨྱོས། སེམས་འཁྲུགས། ཚོར་བས་ཉེན་ནས་སྒྲེན་མོར་བྱུང་སྟེ་དགེ་སྦྱོང་གི་ཚུལ་མ་ལགས་པ། རྗེས་སུ་མཐུན་པ་མ་ལགས་པ་མང་དུ་སྤྱད། སྨྲས། བརྩལ་ནས་ཁ་ཆུ་ཟགས། མིག་གྱུར། བཞིན་གྱུར་ཏེ་གཉིད་ཀྱིས་མ་ལོག་པར་གཉིད་ཀྱིས་ལོག་ག་སྙམ་དུ་འཚལ།
ཕ་རོལ་གྱིས་མ་སྨྲས་པར་སྨྲས་སོ་སྙམ་དུ་འཚལ་བ་ལས་དུས་གཞན་ཞིག་ན་འདིས་རང་གི་སེམས་སོར་ཆུད་པ་དང་འདི་ལ་དགེ་སློང་རྣམས་གཞི་དེས་གླེང་བར་བགྱིད་ཅིང༌། འདི་ལ་གཞི་དེས་གླེང་བར་བགྱིད་པ་དགེ་འདུན་ལས་མ་སྨྱོས་པས་འདུལ་བ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་བྱེ་མ་སྐྱེས་ལ་མ་སྨྱོས་པས་འདུལ་བ་སྩལ་བར་མཛད་ན། ཚེ་དང་ལྡན་པ་གང་དག་དགེ་སློང་བྱེ་མ་སྐྱེས་ལ་མ་སྨྱོས་པས་འདུལ་བ་སྩོལ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིགཐགང་དག་མི་བཟོད་པ་དེ་དག་ནི་གསུང་ཤིགཐའདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལས་བརྗོད་པ་གཉིས་པ་དང་གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས། དགེ་སློང་བྱེ་མ་སྐྱེས་ལ་མ་སྨྱོས་པས་འདུལ་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ཆོས་མ་ཡིན་པའི་མ་སྨྱོས་པས་འདུལ་བར་འོས་པ་སྦྱིན་པ་གཅིག་དེ་ལ་ཆོས་ཀྱི་གཅིག་གོ །ཆོས་མ་ཡིན་པའི་གཅིག་གང་ཞེ་ན། འདི་ལྟ་སྟེ། དགེ་སློང་མ་སྨྱོས་པར་བདག་ནི་སྨྱོས་སོ། །སེམས་མ་འཁྲུགས་པར་སེམས་འཁྲུགས་སོ་སྙམ་དུ་ཤེས་པ་དང༌། དགེ་འདུན་གྱིས་དེ་ལ་མ་སྨྱོས་པར་འདུལ་བར་འོས་པ་སྦྱིན་པ་ནི་ཆོས་མ་ཡིན་པའི་མ་སྨྱོས་པས་འདུལ་བར་འོས་པ་སྦྱིན་པ་ཡིན་ཏེ། འདི་ནི་ཆོས་མ་ཡིན་པའི་གཅིག་ཡིན་ནོ། །ཆོས་ཀྱི་གཅིག་གང་ཞེ་ན། འདི་ལྟ་སྟེ་དགེ་སློང་བྱེ་མ་སྐྱེས་སྨྱོས། སེམས་འཁྲུགས། ཚོར་བས་ཉེན་ནས་སྒྲེན་མོར་བྱུང་སྟེ་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ་མང་དུ་སྤྱད། སྨྲས། བརྩལ་ནས་ཁ་ཆུ་ཟགས། མིག་གྱུར། བཞིན་གྱུར་ཏེ་དེ་གཉིད་ཀྱིས་མ་ལོག་པར་གཉེད་ཀྱིས་ལོག་གོ་སྙམ་དུ་ཤེས། ཕ་རོལ་གྱིས་མ་སྨྲས་པར་སྨྲས་སོ་སྙམ་དུ་ཤེས་པ་ལས་དུས་གཞན་ཞིག་ན་དེས་རང་གི་སེམས་སོར་ཆུད་པ་དང༌། དེ་ལ་དགེ་སློང་རྣམས་གཞི་དེས་གླེང་བར་བྱེད་ཅིང༌། དེ་ལ་གཞི་དེས་གླེང་བར་བྱེད་པ་ན་དགེ་འདུན་ལ་མ་སྨྱོས་པས་འདུལ་བར་འོས་པ་གསོལ་ཏེ། དགེ་འདུན་གྱིས་དེ་ལ་མ་སྨྱོས་པས་འདུལ་བར་འོས་པ་སྦྱིན་པ་ནི་ཆོས་ཀྱི་མ་སྨྱོས་པས་འདུལ་བར་འོས་པ་སྦྱིན་པ་སྟེ། འདི་ནི་ཆོས་ཀྱི་གཅིག་ཡིན་ནོ། །དགེ་
སློང་དག་དེ་ལྟར་ན་མ་སྨྱོས་པས་འདུལ་བར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་གདམས་ངག་མེད་པའི་རྩོད་པ་ལ་རྩོད་པ་ཞི་བར་བྱ་བའི་ཆོས་འདི་གསུམ་གྱིས་དུལ་བར་བྱ། ཞི་བར་བྱ། ཉེ་བར་ཞི་བར་བྱ་བ་ནི་འདི་ལྟ་སྟེ། མངོན་སུམ་དུ་འདུལ་བར་འོས་པ་དང༌། དྲན་བས་འདུལ་བར་འོས་པ་དང༌། མ་སྨྱོས་པས་འདུལ་བར་འོས་པས་སོ། །དགེ་སློང་དག་ལྟུང་བའི་རྩོད་པ་ལ་རྩོད་པ་ཞི་བར་བྱེད་པའི་ཆོས་བཞིས་དུལ་བར་བྱ། ཞི་བར་བྱ། ཉེ་བར་ཞི་བར་བྱའོ། །བཞི་གང་ཞེ་ན། ཁས་བླང་བར་འོས་པ་དང༌། མངོན་སུམ་དུ་འདུལ་བར་འོས་པ་དང༌། དེའི་ངོ་བོ་ཉིད་ཚོལ་དུ་གཞུག་པར་འོས་པ་དང༌། རྩྭ་བཀྲམ་པ་ལྟ་བུར་འོས་པས་སོ། །དགེ་སློང་དག་ཇི་ལྟར་ན་ཁས་བླང་བར་འོས་པ་ནི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། ཁས་བླང་བར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། འདི་ལྟ་སྟེ་དགེ་སློང་ལྟུང་བ་བྱུང་བར་གྱུར་པ་དེ་ལ་གཞི་དེས་གླེངས་ཀྱང་རུང་མ་གླེངས་ཀྱང་རུང༌། དྲན་པར་བྱས་ཀྱང་རུང་དྲན་པར་མ་བྱས་ཀྱང་རུང༌། དགེ་སློང་ཞིག་གི་མདུན་དུ་འདུག་ནས་འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་ལ་ལྟུང་བ་འདི་ལྟ་བུ་ཞིག་བྱུང་བ་དེ་བདག་གིས་ཚེ་དང་ལྡན་པའི་མདུན་དུ་མཐོལ་ཞིང་བཤགས་པར་བགྱིའོ། །ང་དག་གིས་མཐོལ་ཞིང་བཤགས་ན་བདེ་བ་ལ་རེག་པར་འགྱུར་གྱི། མ་མཐོལ་མ་བཤགས་ན་ནི་མ་ལགས་སོ། །དེས་ལྟུང་བ་མཐོང་ངམ་ཞེས་བརྗོད་པར་བྱའོ། །དེས་ཀྱང་ལྟུང་བ་མཐོང་ངོ་ཞེས་བརྗོད་པར་བྱའོ། །སྔ་མ་ཤོས་ཀྱིས་ཕྱིས་སྡོམ་པར་བྱེད་དམ་ཞེས་བརྗོད་པར་བྱའོ། །ཕྱི་མ་ཤོས་ཀྱིས་བགྱིད་དོ་ཞེས་བརྗོད་པར་བྱ་སྟེ། འདི་ནི་ཁས་བླང་བའོ། །ཆོས་མ་ཡིན་པའི་ཁས་བླང་བ་སྦྱིན་པ་བཅུ་དང༌། ཆོས་ཀྱི་བཅུའོ། །ཆོས་མ་ཡིན་པའི་ཁས་བླང་བ་སྦྱིན་པ་བཅུ་གང་ཞེ་ན། འདི་ལྟ་སྟེ། དགེ་སློང་ཕས་ཕམ་པའི་ལྟུང་བ་བྱུང་ལ་བདག་ལ་མ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་མ་ཡིན་པའི་ཁས་ལེན་པ་སྦྱིན་པ་ཡིན་ནོ། །དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པ་དང༌། ཉེས་བྱས་ཀྱི་ལྟུང་བ་བྱུང་བ་ལ་བདག་ལ་མ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་མ་ཡིན་པའི་ཁས་ལེན་དུ་སྦྱིན་པ་ཡིན་ནོ། །འདི་ལྟ་སྟེ་དགེ་སློང་ཕས་ཕམ་པའི་ལྟུང་བ་མ་བྱུང་བ་ལ་བདག་ལ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་མ་ཡིན་པའི་ཁས་ལེན་པ་སྦྱིན་པ་ཡིན་ནོ། །དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པ་དང༌། ཉེས་བྱས་ཀྱི་ལྟུང་བ་མ་བྱུང་བ་ལ་བདག་ལ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་
འཇུག་པ་ནི་ཆོས་མ་ཡིན་པའི་ཁས་ལེན་པ་སྦྱིན་པ་སྟེ། འདི་དག་ནི་ཆོས་མ་ཡིན་པའི་ཁས་ལེན་པ་སྦྱིན་པ་བཅུ་ཡིན་ནོ། །ཆོས་ཀྱི་ཁས་ལེན་པ་སྦྱིན་པ་བཅུ་གང་ཞེ་ན། འདི་ལྟ་སྟེ་དགེ་སློང་ཕས་ཕམ་པའི་ལྟུང་བ་བྱུང་ལ་བདག་ལ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་ཀྱི་ཁས་ལེན་པ་སྦྱིན་པ་ཡིན་ནོ། །དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པ་དང༌། ཉེས་བྱས་ཀྱི་ལྟུང་བ་བྱུང་བ་ལ་བདག་ལ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་ཀྱི་ཁས་ལེན་པ་སྦྱིན་པ་ཡིན་ནོ། །འདི་ལྟ་སྟེ་དགེ་སློང་ཕས་ཕམ་པའི་ལྟུང་བ་མ་བྱུང་བ་ལ་བདག་ལ་མ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་ཀྱི་ཁས་ལེན་པ་སྦྱིན་པ་ཡིན་ནོ། །དགེ་འདུན་ལྷག་མ་དང༌། ལྟུང་བྱེད་དང༌། སོ་སོར་བཤགས་པ་དང༌། ཉེས་བྱས་ཀྱི་ལྟུང་བ་མ་བྱུང་ལ་བདག་ལ་མ་བྱུང་ངོ་སྙམ་དུ་ཤེས་པ་དེ་ལ་དགེ་འདུན་གྱིས་ཁས་ལེན་དུ་འཇུག་པ་ནི་ཆོས་ཀྱི་ཁས་ལེན་པ་སྦྱིན་པ་སྟེ། འདི་དག་ནི་ཆོས་ཀྱི་ཁས་ལེན་པ་སྦྱིན་པ་བཅུ་ཡིན་ནོ། །དགེ་སློང་དག་དེ་ལྟར་ན་ཁས་བླང་བར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། ཁས་བླང་བར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །སངས་རྒྱས་བཅོམ་
ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་རི་དགས་འཛིན་གྱི་བུ་ནག་པོ་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་འདུག་གོ །དེ་ལ་བརྟེན་ནས་ཡངས་པ་ཅན་གྱི་ལིཙྪ་བཱི་རྣམས་སངས་རྒྱས་དང༌། ཆོས་དང༌། དགེ་འདུན་ལ་ལྷག་པར་བྱ་བ་བྱེད་པ་དང༌། ཡངས་པ་ཅན་གྱི་དགེ་སློང་རྣམས་ཀྱིས་བསམས་པ། ཚེ་དང་ལྡན་པ་རི་དགས་འཛིན་གྱི་བུ་ནག་པོ་འདི་གཞན་ཉིད་དུ་བཙས་ལ་གཞན་དུ་ཆེན་པོར་གྱུར་པ་སྟེ། མཉན་ཡོད་དུ་སྐྱེས་པ་དེ་ལ་ཡངས་པ་ཅན་གྱི་ལིཙྪ་བཱི་རྣམས་ལྷག་པར་དད་པར་བྱེད་ཀྱིས། དེ་ལ་གནས་ནས་དབྱུང་བའི་ལས་བྱ་སྟེ། དེས་ན་དེ་ལ་ཡངས་པ་ཅན་གྱི་ལིཙྪ་བཱི་རྣམས་མ་དད་པ་སྐྱེས་པར་འགྱུར་རོ་སྙམ་དུ་བསམས་ནས་དེ་ལ་ཀླན་ཀ་ཚོལ་བར་གྱུར་ཏོ། །ཇི་ཙམ་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བསྲོ་ཁང་གི་ཁྲུས་ལ་སྤྱན་དྲངས་པ་དང༌། དགེ་སློང་རྣམས་ཀྱིས་གཟར་ཐག་ལ་ཆོས་གོས་རྣམས་བཀལ་ཏེ་ཁྲུས་བྱ་བར་བརྩམས་སོ། །ཚེ་དང་ལྡན་པ་རི་དགས་འཛིན་གྱི་བུ་ནག་པོས་ཀྱང་ཤེས་བཞིན་གྱིས་མཐའ་གཅིག་ཏུ་ཆོས་གོས་བཞག་ནས་ཁྲུས་བྱ་བར་བརྩམས་སོ། །དགེ་སློང་གཞན་ཞིག་གིས་ཀྱང་ཕྱོགས་དེ་ཉིད་དུ་ཆོས་གོས་བཞག་གོ །དེ་ནས་ཚེ་དང་ལྡན་པ་རི་དགས་འཛིན་གྱི་བུ་ནག་པོས་ཁྲུས་བྱས་ནས་འདི་ཉིད་བདག་ཉིད་ཀྱི་ཆོས་གོས་ཡིན་ནོ་སྙམ་ནས་དགེ་སློང་དེའི་ཆོས་གོས་བགོས་ཏེ་སོང་ངོ༌། །ཇི་ཙམ་ན་དགེ་སློང་དེ་ལངས་ན་རང་གི་ཆོས་གོས་མི་སྣང་ནས་དེས་དགེ་སློང་རྣམས་ལ་དྲིས་པ། ཚེ་དང་ལྡན་པ་དག་ཁོ་བོའི་ཆོས་གོས་སུས་བརྐུས། ཇི་ཙམ་ན་ཕྱོགས་དེ་ན་ཚེ་དང་ལྡན་པ་རི་དགས་འཛིན་གྱི་བུ་ནག་པོའི་ལྷན་ཅིག་གནས་པ་འདུག་པ་དེས་ཐོས་ནས་དེས་སྨྲས་པ། ཚེ་དང་ལྡན་པ་མཁན་པོས་ཕྱོགས་འདིར་ཆོས་གོས་བཞག་ན་དེས་ནོར་ཏེ་ཁྱེར་བར་མ་གྱུར་གྲང༌། རེ་ཞིག་ཁོ་བོས་སོང་ལ་མཁན་པོ་ལ་དྲིའོ་ཞེས་དེས་མཁན་པོའི་དྲུང་དུ་སོང་སྟེ་སྨྲས་པ། མཁན་པོ་ཁྱོད་ཀྱིས་སུ་ཞིག་གི་ཆོས་གོས་བླངས། དེས་སྨྲས་པ།
བུ་ཁོ་བོའི་འོ། །མཁན་པོ་དགེ་སློང་ཆེ་གེ་མོ་ཞིག་གི་ཆོས་གོས་ཕྱོགས་དེ་ཉིད་དུ་བཞག་པ་དེ་ཁ་མཆིས་ལགས་སོ། །བུ་གལ་ཏེ་དེ་ལྟ་ན་ཆོས་གོས་དེ་དག་ཁྱེར་ཏེ་ཤོག་ཤིག་བལྟའོ། །དེས་ཁྱེར་ཏེ་འོངས་ནས་མཁན་པོ་ཆོས་གོས་འདི་ངོ་མཁྱེན་པར་མཛོད་ཅིགཐདེས་ངོ་ཤེས་ནས་བུ་ངས་ནོར་བར་ཁྱེར་ཏེ་འོངས་ཀྱིས། དགེ་སློང་དེའི་འདི་དག་ཡིན་གྱིས་སྐྱོལ་ཅིགཐདེས་ཁྱེར་ཏེ་དགེ་སློང་དེའི་དྲུང་དུ་སོང་ནས་སྨྲས་པ། ཚེ་དང་ལྡན་པ་ཆོས་གོས་འདི་དག་མཁན་པོས་ནོར་ཏེ་ཁྱེར་རོ། །དེས་སྨྲས་པ། དེས་རྐུ་སེམས་ཀྱིས་བླངས་པས་ཕས་ཕམ་པའི་ལྟུང་བ་བྱུང་ངོ༌། །དེ་ནས་གླགས་ཚོལ་བའི་དགེ་སློང་རྣམས་ཀྱིས་དེ་ལ་གླེང་བ་མ་བྱས་དྲན་པར་མ་བྱས་པར་མཐུས་གནས་ནས་དབྱུང་བའི་ལས་བྱས་སོ། །ཚེ་དང་ལྡན་པ་རི་དགས་འཛིན་གྱི་བུ་ནག་པོས་བསམས་པ། བྲམ་ཟེ་དང་ཁྱིམ་བདག་རྣམས་དད་པ་སྐྱེ་བར་ནི་དཀའ་ལ་མ་དད་པ་སྐྱེ་བར་ནི་བླ་བས་གལ་ཏེ་འདུག་པར་གྱུར་ན་གདོན་མི་ཟ་བར་ཡངས་པ་ཅན་གྱི་ལིཙྪ་བཱི་རྣམས་མ་དད་པ་སྐྱེ་བར་འགྱུར་གྱིས། མདོར་ན་མཉན་ཡོད་ཁོ་ནར་འགྲོའོ་སྙམ་ནས། དེས་ཡངས་པ་ཅན་གྱི་ལིཙྪ་བཱི་རྣམས་ལ་མ་བལྟས་པར་དེས་ལྷུང་བཟེད་དང་ཆོས་གོས་བླངས་ནས་མཉན་ཡོད་གང་ན་བ་དེར་རྒྱུ་ཞིང་སོང་སྟེ། རིམ་གྱིས་རྒྱུ་ཞིང་སོང་བ་ན་མཉམ་ཡོད་དུ་ཕྱིན་པ་དང༌། དེ་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་ནག་པོ་འོངས་པ་ལེགས་སོ། །འོངས་པ་ལེགས་སོ། །ཁྱོད་མཐོང་བ་ནི་ཁོ་བོ་ཅག་དགའ་ན་འོངས་པ་མ་ཡིན་ནོ། །ཅིའི་ཕྱིར་འདི་ལྟར་ཁྱོད་ལ་བརྟེན་ནས་ཡངས་པ་ཅན་གྱི་ལིཙྪ་བཱི་རྣམས་སངས་རྒྱས་ལ་མངོན་པར་དད། ཆོས་དང༌། དགེ་འདུན་ལ་མངོན་པར་དད་པས་སངས་རྒྱས་དང༌། ཆོས་དང༌། དགེ་འདུན་ལ་ལྷག་པར་བྱ་བ་བྱེད་དོ། །དེས་སྨྲས་པ། དེ་ནི་མང་མོད་ཀྱི་ཡངས་པ་ཅན་གྱི་དགེ་སློང་རྣམས་ཀྱིས་བདག་ལ་གླེང་བ་མ་བྱས་དྲན་པར་མ་བྱས་པར་མཐུས་གནས་ནས་དབྱུང་བའི་ལས་བྱས་སོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདུག་ཤིག །ཁྱོད་ངས་ཆོས་ཀྱིས་བསླང་བར་བྱའོ། །དེ་ནས་བཅོམ་
ལྡན་འདས་ཀྱིས་ཆོས་ཀྱིས་བསླང་ངོ༌། །ཡངས་པ་ཅན་གྱི་དགེ་སློང་རྣམས་བདག་ཅག་གིས་དགེ་སློང་ནག་པོ་སྐྱོན་མེད་པ་གནོད་པ་མ་བྱས་པ་ལ་མཐུས་གནས་ནས་དབྱུང་བའི་ལས་བྱས་པ་གང་ཡིན་པ་ནི་མ་ལེགས་པ་ཞིག་བྱས་སོ་ཞེས་འགྱོད་པ་སྐྱེས་ནས། དེ་རྣམས་ལྷུང་བཟེད་དང་ཆོས་གོས་བླངས་ཏེ་མཉན་ཡོད་གང་ན་བ་དེར་རྒྱུ་ཞིང་སོང་བ་ལས། དེ་རྣམས་ཀྱིས་ལམ་ཀར་དགེ་སློང་ཞིག་མཐོང་ནས་སྨྲས་པ། ཚེ་དང་ལྡན་པ་ཁྱོད་གང་ནས་འོངས། མཉན་ཡོད་ནས་སོ། །ཁྱོད་ཀྱིས་རི་དགས་འཛིན་གྱི་བུ་ནག་པོ་མཐོང་ངམ། མཐོང་ངོ༌། །དེ་ཅི་བྱ། ཁོ་བོ་ཅག་གིས་དེ་སྐྱོན་མེད་པ་གནོད་པ་མ་བྱས་པ་ལ་གླེང་བ་མ་བྱས། དྲན་པར་མ་བྱས་པར་མཐུས་གནས་ནས་དབྱུང་བའི་ལས་བྱས་སོ། །བསླང་ཟིན་ནོ། །སུས། བཅོམ་ལྡན་འདས་ཀྱིས་སོ། །དེ་ན་ཁ་ཅིག་གིས་ནི་འདི་སྐད་ཅེས་སྨྲས་སོ། །བསླང་བ་ནི་མ་ཡིན་གྱི་ཐག་བསྲིད་བར་བསླང་བ་ཡིན་ཏེ། འདི་ལྟར་དེ་བདག་ཅག་གིས་གནས་ནས་དབྱུང་བའི་ལས་བྱས་ལ། བདག་ཅག་གིས་མངོན་སུམ་དུ་མ་གྱུར་པར་དེ་བསླང་བ་ནི་རིགས་པ་མ་ཡིན་ནོ། ཁ་ཅིག་གིས་སྨྲས་པ། གལ་ཏེ་བཅོམ་ལྡན་འདས་ཆོས་ཀྱི་རྗེ། བདེ་བར་གཤེགས་པ་ཆོས་ཀྱི་རྗེས་བསླང་ན་ལེགས་པར་བསླང་བ་ཡིན་ནོ། །དེ་རྣམས་རིམ་གྱིས་མཉན་ཡོད་དུ་ཕྱིན་པ་དང་ལྷུང་བཟེད་དང༌། ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཡངས་པ་ཅན་གྱི་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་བདག་ཅག་བྱིས་པ། བླུན་པ། མི་གསལ་པ། མི་མཁས་པ་རྣམས་ཀྱིས་རི་དགས་འཛིན་གྱི་བུ་ནག་པོ་སྐྱོན་མ་མཆིས་པ་གནོད་པ་མ་བགྱིས་པ་ལ་གླེང་བ་མ་བགྱིས། དྲན་པར་མ་བགྱིས་པར་མཐུས་གནས་ནས་དབྱུང་བའི་ལས་བགྱིས་པ་བདག་ཅག་འགྱོད་པ་སྐྱེས་ནས་རི་དགས་འཛིན་གྱི་བུ་ནག་པོ་ལ་བཟོད་པ་གསོལ་དུ་འདིར་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྩོད་པ་དེ་
དེ་བཞིན་གཤེགས་པས་འདི་ལྟ་སྟེ་ཆོས་ཀྱིས་བསླང་ཟིན་ནོ། །བཙུན་པ་བདག་ཅག་གིས་ཤུལ་ཀར་དགེ་སློང་ཞིག་ལས་བཅོམ་ལྡན་འདས་ཀྱིས་རྩོད་པ་དེ་འདི་ལྟ་སྟེ། ཆོས་ཀྱིས་བསླང་ལགས་སོ་ཞེས་ཐོས་ཏེ། དེ་ལྟ་ལགས་མོད་ཀྱི་བདག་ཅག་གི་ནང་ན་ཁ་ཅིག་གི་མཆིད་ནས་འདི་སྐད་ཅེས། བསླང་བ་མ་ལགས་ཀྱི་ཐག་བསྲིང་བར་བསླང་བ་ལགས་ཏེ། འདི་ལྟར་དེར་བདག་ཅག་མངོན་སུམ་དུ་མ་གྱུར་ཏོ་ཞེས་མཆིའོ། །གཞན་དག་ནི་གལ་ཏེ་བཅོམ་ལྡན་འདས་ཆོས་ཀྱི་རྗེ། བདེ་བར་གཤེགས་པ་ཆོས་ཀྱི་རྗེས་བསླང་བ་ནི་ལེགས་པར་བསླང་བ་ལགས་སོ་ཞེས་མཆིའོ། །བཅོམ་ལྡན་འདས་ཀྱིས་དགོངས་པ། ཀྱེ་མའོ་ངའི་ཉན་ཐོས་རྣམས་ནི་འདི་ལྟ་སྟེ། སྟོན་པའི་བསྟན་པ་ཆོས་འདུལ་བས་རྩོད་པ་སྐྱེས་ཤིང་བྱུང་བ་ཞི་བར་བྱ་བར་འདོད་དོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་ཇི་ལྟར་ན་མངོན་སུམ་དུ་འདུལ་བར་འོས་པ་ནི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། མངོན་སུམ་དུ་འདུལ་བར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། དགེ་སློང་དག་འདི་ལ་ཆོས་འདུལ་བས་གང་ཟག་གིས་གང་ཟག་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་གཉིས་ཀྱིས་མང་པོ་དང༌། དགེ་འདུན་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་གང་ཟག་གཉིས་ཀྱིས་གང་ཟག་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་གང་ཟག་གཉིས་ཀྱིས་གཉིས་དང་མང་པོ་དང༌། དགེ་འདུན་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་གང་ཟག་མང་པོས་གང་ཟག་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་གང་ཟག་མང་པོས་གཉིས་དང༌། མང་པོ་དང༌། དགེ་འདུན་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་དགེ་འདུན་གྱིས་གང་ཟག་ལ་མིག་བཞི་མངོན་སུམ་དུ་གླེང་བ་དང༌། ཆོས་འདུལ་བས་དགེ་འདུན་གྱིས་གཉིས་དང་མང་པོ་དང༌། དགེ་འདུན་ལ་མིག་བཞི་མངོན་སུམ་དུ་གླེང་བའོ། །ཆོས་མ་ཡིན་པའི་མངོན་སུམ་དུ་འདུལ་བར་འོས་
པ་སྦྱིན་པ་བཅུ་དྲུག་དང༌། ཆོས་ཀྱི་བཅུ་དྲུག་གོ །ཆོས་མ་ཡིན་པའི་བཅུ་དྲུག་གང་ཞེ་ན། གང་ཟག་ཆོས་དང་མི་མཐུན་པས་གང་ཟག་ཆོས་དང་མཐུན་པ་དང༌། གང་ཟག་ཆོས་དང་མི་མཐུན་པ་གཉིས་ཀྱིས་གང་ཟག་ཆོས་དང་མཐུན་པ་དང༌། གང་ཟག་ཆོས་དང་མི་མཐུན་པ་མང་པོས་གང་ཟག་ཆོས་དང་མཐུན་པ་དང༌། དགེ་འདུན་ཆོས་དང་མི་མཐུན་པས་གང་ཟག་ཆོས་དང་མཐུན་པ་དང༌། གང་ཟག་ཆོས་དང་མི་མཐུན་པ་གཉིས་ཀྱིས་གང་ཟག་ཆོས་དང་མཐུན་པ་དང༌། གང་ཟག་ཆོས་དང་མི་མཐུན་པ་གཉིས་ཀྱིས་གང་ཟག་ཆོས་དང་མཐུན་པ་གཉིས་དང༌། གང་ཟག་ཆོས་དང་མི་མཐུན་པ་གཉིས་ཀྱིས་གང་ཟག་ཆོས་དང་མཐུན་པ་མང་པོ་དང༌། གང་ཟག་ཆོས་དང་མི་མཐུན་པ་གཉིས་ཀྱིས་དགེ་འདུན་ཆོས་དང་མཐུན་པ་དང༌། གང་ཟག་ཆོས་དང་མི་མཐུན་པ་མང་པོས་གང་ཟག་ཆོས་དང་མཐུན་པ་དང༌། གང་ཟག་ཆོས་དང་མི་མཐུན་པ་མང་པོས་གང་ཟག་ཆོས་དང་མཐུན་པ་གཉིས་དང༌། གང་ཟག་ཆོས་དང་མི་མཐུན་པ་མང་པོས་གང་ཟག་ཆོས་དང་མཐུན་པ་མང་པོ་དང༌། གང་ཟག་ཆོས་དང་མི་མཐུན་པ་མང་པོས་དགེ་འདུན་ཆོས་དང་མཐུན་པ་དང༌། དགེ་འདུན་ཆོས་དང་མི་མཐུན་པས་གང་ཟག་ཆོས་དང་མཐུན་པ་དང༌། དགེ་འདུན་ཆོས་དང་མི་མཐུན་པས་གང་ཟག་ཆོས་དང་མཐུན་པ་གཉིས་དང༌། དགེ་འདུན་ཆོས་དང་མི་མཐུན་པས་གང་ཟག་ཆོས་དང་མཐུན་པ་མང་པོ་དང༌། དགེ་འདུན་ཆོས་དང་མི་མཐུན་པས་དགེ་འདུན་ཆོས་དང་མཐུན་པ་སྟེ། འདི་དག་ནི་ཆོས་མ་ཡིན་པའི་མངོན་སུམ་དུ་འདུལ་བར་འོས་པ་སྦྱིན་པ་བཅུ་དྲུག་ཡིན་ནོ། །ཆོས་ཀྱིས་མངོན་སུམ་དུ་འདུལ་བར་འོས་པ་སྦྱིན་པ་བཅུ་དྲུག་གང་ཞེ་ན། གང་ཟག་ཆོས་དང་མཐུན་པས་གང་ཟག་ཆོས་དང་མི་མཐུན་པ་དང༌། གང་ཟག་ཆོས་དང་མཐུན་པས་གང་ཟག་ཆོས་དང་མི་མཐུན་པ་གཉིས་དང༌། གང་ཟག་ཆོས་དང་མཐུན་པས་གང་ཟག་ཆོས་དང་མི་མཐུན་པ་མང་པོ་དང༌། གང་ཟག་ཆོས་དང་མཐུན་པས་དགེ་འདུན་ཆོས་དང་མི་མཐུན་པ་དང༌། གང་ཟག་ཆོས་དང་མཐུན་པ་གཉིས་
ཀྱིས་གང་ཟག་ཆོས་དང་མི་མཐུན་པ་དང༌། གང་ཟག་ཆོས་དང་མཐུན་པ་གཉིས་ཀྱིས་གང་ཟག་ཆོས་དང་མི་མཐུན་པ་གཉིས་དང༌། གང་ཟག་ཆོས་དང་མཐུན་པ་གཉིས་ཀྱིས་གང་ཟག་ཆོས་དང་མི་མཐུན་པ་མང་པོ་དང༌། གང་ཟག་ཆོས་དང་མཐུན་པ་གཉིས་ཀྱིས་དགེ་འདུན་ཆོས་དང་མི་མཐུན་པ་དང༌། གང་ཟག་ཆོས་དང་མཐུན་པ་མང་པོས་གང་ཟག་ཆོས་དང་མི་མཐུན་པ་དང༌། གང་ཟག་ཆོས་དང་མཐུན་པ་མང་པོས་གང་ཟག་ཆོས་དང་མི་མཐུན་པ་གཉིས་དང༌། གང་ཟག་ཆོས་དང་མཐུན་པ་མང་པོས་གང་ཟག་ཆོས་དང་མི་མཐུན་པ་མང་པོ་དང༌། གང་ཟག་ཆོས་དང་མཐུན་པ་མང་པོས་དགེ་འདུན་ཆོས་དང་མི་མཐུན་པ་དང༌། དགེ་འདུན་ཆོས་དང་མཐུན་པས་གང་ཟག་ཆོས་དང་མི་མཐུན་པ་དང༌། དགེ་འདུན་ཆོས་དང་མཐུན་པས་གང་ཟག་ཆོས་དང་མི་མཐུན་པ་གཉིས་དང༌། དགེ་འདུན་ཆོས་དང་མཐུན་པས་གང་ཟག་ཆོས་དང་མི་མཐུན་པ་མང་པོ་དང༌། དགེ་འདུན་ཆོས་དང་མཐུན་པས་དགེ་འདུན་ཆོས་དང་མི་མཐུན་པ་སྟེ། འདི་དག་ནི་ཆོས་ཀྱི་མངོན་སུམ་དུ་འདུལ་བར་འོས་པ་སྦྱིན་པ་བཅུ་དྲུག་ཡིན་ནོ། །དགེ་སློང་དག་དེ་ལྟར་ན་མངོན་སུམ་དུ་འདུལ་བར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། མངོན་སུམ་དུ་འདུལ་བར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་ཇི་ལྟར་ན་དེའི་ངོ་བོ་ཉིད་ཚོལ་དུ་གཞུག་པར་འོས་པ་ནི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། དེའི་ངོ་བོ་ཉིད་ཚོལ་དུ་གཞུག་པར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། འདི་ལྟ་སྟེ། དགེ་སློང་མེ་བཞི་དགེ་འདུན་གྱི་ནང་དུ་ལྟུང་བ་བརྗེད་པ་ལས། བརྗེད་པ་སླར་དྲན་ཏེ་ཤེས་པ་ལས་ཡང་བརྗེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་མེ་བཞི་དང༌། གཞན་ཡང་དེ་ལྟ་བུ་དང་མཐུན་པ་སུ་
ཡང་རུང་བ་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་བྱིན་ཅིགཐསྦྱིན་པ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ཚོགས་ཤིང་མཐུན་པར་གྱུར་པ་དང༌། དགེ་སློང་མེ་བཞིས་བླ་གོས་ཕྲག་པ་གཅིག་ཏུ་གཟར་ནས་རྒན་པའི་མཐར་ཙོག་ཙོག་པོར་འདུག་ལ་ཐལ་མོ་སྦྱར་ཏེ་དེའི་ངོ་བོ་ཉིད་ཚོལ་དུ་གཞུག་པར་འོས་པ་གསོལ་བ་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་མེ་བཞི་དགེ་འདུན་གྱི་ནང་དུ་ལྟུང་པ་བསྐྱུད་པ་ལས། བསྐྱུད་པ་སླར་དྲན་ཏེ་འཚལ་བ་ལས་ཡང་བསྐྱུད་ནས་དགེ་འདུན་ལ་བདག་དེའི་ངོ་བོ་ཉིད་ཚོལ་དུ་གཞུག་པར་འོས་པ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་དགེ་སློང་མེ་བཞི་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྩལ་དུ་གསོལ། དེ་སྐད་ལན་གཉིས་ལན་གསུམ་དུ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མེ་བཞི་འདི་དགེ་འདུན་གྱི་ནང་དུ་ལྟུང་བ་བསྐྱུད་པ་ལས་བསྐྱུད་པ་སླར་དྲན་ཏེ་འཚལ་བ་དང༌། ཡང་བསྐྱུད་ནས་དགེ་སློང་མེ་བཞི་འདི་དགེ་འདུན་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། འདི་ལྟར་དགེ་འདུན་གྱིས་དགེ་སློང་མེ་བཞི་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མེ་བཞི་འདི་དགེ་འདུན་གྱི་ནང་དུ་ལྟུང་བ་བསྐྱུད་པ་ལས། བསྐྱུད་པ་སླར་དྲན་ཏེ་འཚལ་བ་དང་ཡང་བསྐྱུད་ནས་འདི་ལྟར་དགེ་འདུན་གྱིས་དགེ་སློང་མེ་བཞི་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྩོལ་བར་མཛད་ན། ཚེ་དང་ལྡན་པ་གང་དག་དགེ་སློང་མེ་བཞི་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྩོལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་
བཟོད་པ་དེ་དག་ནི་གསུང་ཤིགཐའདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལས་བརྗོད་པ་གཉིས་པ་དང༌། གསུམ་གྱི་བར་དུ་བརྗོད་པར་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མེ་བཞི་ལ་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་དེའི་ངོ་བོ་ཉིད་ཚོལ་དུ་གཞུག་པར་འོས་པ་བྱིན་པའི་དགེ་སློང་གི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། དེའི་ངོ་བོ་ཉིད་ཚོལ་དུ་གཞུག་པར་འོས་པ་བྱིན་པའི་དགེ་སློང་གིས་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་མི་སྦྱིན། དགེ་ཚུལ་གཞག་པར་མི་བྱ། འདིས་ལས་མི་བྱ། ལས་བྱེད་པར་བསྐོ་བར་མི་བྱ། འདིས་དགེ་སློང་མ་ལ་གདམས་ངག་སྦྱིན་པར་མི་བྱ། དགེ་སློང་མའི་གདམས་ངག་སྟོན་པར་བསྐོ་བར་མི་བྱ། སྔོན་བསྐོས་ན་ཡང་དགེ་སློང་མ་ལ་གདམས་ངག་སྦྱིན་པར་མི་བྱ། འདིས་དགེ་སློང་ལ་ཚུལ་ཁྲིམས་ཉམས་པ་དང༌། ལྟ་བ་ཉམས་པ་དང༌། སྤྱོད་པ་ཉམས་པ་དང༌། འཚོ་བ་ཉམས་པས་གླེང་བར་མི་བྱ། དྲན་པར་མི་བྱ་སྟེ། འདིས་གདམས་ངག་དབོག་པར་མི་བྱ། གསོ་སྦྱོང་ལ་མ་ཡིན། དགག་དབྱེ་ལ་མ་ཡིན། གསོལ་བ་ལ་མ་ཡིན། གསོལ་བ་དང་གཉིས་ལ་མ་ཡིན། གསོལ་བ་དང་བཞིའི་ལས་ལ་མ་ཡིན་ཞིང༌། གང་དག་འདུལ་བ་འཛིན་པ་གཞན་ཡོད་ན་དགེ་འདུན་གྱི་ནང་དུ་འདུལ་བ་གདོན་པར་ཡང་མི་བྱའོ། །དེའི་ངོ་བོ་ཉིད་ཚོལ་དུ་གཞུག་པར་འོས་པ་བྱིན་པའི་དགེ་སློང་གིས་ཀུན་དུ་སྤྱོད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །ཆོས་མ་ཡིན་པའི་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྦྱིན་པ་ཆོས་མ་ཡིན་པ་གཅིག་དང་ཆོས་ཀྱི་གཅིག་གོ །ཆོས་མ་ཡིན་པའི་གཅིག་གང་ཞེ་ན། འདི་ལྟ་སྟེ་དགེ་སློང་གཞི་ཅན་དགེ་འདུན་གྱི་ནང་དུ་ལྟུང་བ་དྲན་ཏེ་ཤེས་པ་ལས་བརྗེད་པ་དེ་བརྗེད་ན་ཡང་དྲན་པ་དེ་ལ་དགེ་འདུན་གྱིས་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྦྱིན་པ་ནི་ཆོས་མ་ཡིན་པའི་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྦྱིན་པ་སྟེ། འདི་ནི་ཆོས་མ་ཡིན་པའི་གཅིག་ཡིན་ནོ། །ཆོས་ཀྱི་གཅིག་
གང་ཞེ་ན། འདི་ལྟ་སྟེ། དགེ་སློང་གཞི་ཅན་དགེ་འདུན་གྱི་ནང་དུ་ལྟུང་བ་བརྗེད་པ་ལས་བརྗེད་པ་སླར་དྲན་ཏེ་ཤེས་པ་དང་ཡང་བརྗེད་པ་དེ་ལ་དགེ་འདུན་གྱིས་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྦྱིན་པ་ནི་ཆོས་ཀྱིས་དེའི་ངོ་བོ་ཉིད་ཚོལ་དུ་གཞུག་པར་འོས་པ་སྦྱིན་པ་སྟེ། འདི་ནི་ཆོས་ཀྱི་གཅིག་ཡིན་ནོ། །དགེ་སློང་དག་དེ་ལྟར་ན་དེའི་ངོ་བོ་ཉིད་ཚོལ་དུ་གཞུག་པར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། དེའི་ངོ་བོ་ཉིད་ཚོལ་དུ་གཞུག་པར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ནོ། །དགེ་སློང་དག་ཇི་ལྟར་ན་རྩྭ་བཀྲམ་པ་ལྟ་བུར་འོས་པ་ནི་རྩོད་པ་ཞི་བར་བྱེད་པ་ཡིན། ཇི་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། རྩྭ་བཀྲམ་པ་ལྟ་བུར་འོས་པའི་རྩོད་པ་ཞི་བར་བྱེད་པས་དུལ་བ་དང༌། ཞི་བ་དང༌། ཉེ་བར་ཞི་བ་ཡིན་ཞེ་ན། འདི་ལྟ་སྟེ་དགེ་སློང་རྣམས་འཐབ་པར་གྱུར་ཅིང་མཚང་འདྲུ་བ་དང༌། འཐབ་མོ་དང༌། འགྱེད་པར་གྱུར་ནས་གནས་ཤིང་ཕྱོགས་དང་ཕྱོགས་གཞན་དུ་རྣམ་པར་གནས་ན། ཕྱོགས་གཅིག་ན་དགེ་སློང་གནས་བརྟན་གནས་བརྟན་གང་ཡང་རུང་བ། ཤེས་ཉེན་ཅན་ཤེས་ཉེན་ཅན་གང་ཡང་རུང་བ། གཙོ་བོ་གཙོ་བོ་གང་ཡང་རུང་བ་ཡོད་པ་གང་ཡིན་པ་དེས་རང་གི་ཕྱོགས་ཀྱི་དྲུང་དུ་སོང་སྟེ་ཚིག་འདི་སྐད་ཅེས་ཚེ་དང་ལྡན་པ་དག་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འཐབ་པར་གྱུར་ཅིང་མཚང་འདྲུ་བ་དང༌། འཐབ་མོ་དང༌། འགྱེད་པར་གྱུར་པ་ནི། བདག་ཅག་གིས་རྙེད་པ་རྙེད་པ་མ་ཡིན་ཏེ། ཉེས་པ་རྙེད་ཀྱི་ལེགས་པ་མ་རྙེད་པས་ཚེ་དང་ལྡན་པ་དག་གཞི་འདི་ལ་ཁོ་བོ་དང་ཁྱོད་ཀྱི་ལྟུང་བ་བྱུང་བ་གང་ཡིན་པ་ལས་ཁ་ན་མ་ཐོ་བ་སྦོམ་པོའམ། ཁྱིམ་ན་གནས་པ་ལས་བརྟེན་པ་མ་གཏོགས་པར་ཁོ་བོས་བདག་དང་ཁྱོད་ཀྱི་ཆེད་དུ་ཚེ་དང་ལྡན་པ་དེ་དག་གི་དྲུང་དུ་མི་བཅབ་པར་མཐོལ་ཞིང་གཤགས་པར་སྤྲོའོ་ཞེས་སྨྲ་བར་བྱའོ། །གལ་ཏེ་དགེ་སློང་དེ་ལ་རང་གི་ཕྱོགས་ནས་དགེ་སློང་གཅིག་གིས་ཀྱང་སྨྲས་པ་མ་བཟློག་ཅིང་མི་གཤེ་ན། དེ་ནས་དགེ་སློང་དེས་ཕྱོགས་ཅིག་ཤོས་ཀྱི་དྲུང་དུ་སོང་ནས་བླ་གོས་ཕྲག་པ་
གཅིག་ཏུ་གཟར་ཏེ་རྒན་རིམས་ཇི་ལྟ་བ་བཞིན་དུ་འདུད་པ་བྱས་ལ་ཙོག་ཙོག་པོར་འདུག་སྟེ་ཚིག་འདི་སྐད་ཅེས། ཚེ་དང་ལྡན་པ་དག་ཁོ་བོ་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འཐབ་པར་གྱུར་ཅིང་མཚང་འདྲུ་བ་དང༌། འཐབ་མོ་དང༌། འགྱེད་པར་གྱུར་པ་ནི་ཁོ་བོ་ཅག་གིས་རྙེད་པ་རྙེད་པ་མ་ཡིན་ཏེ། ཉེས་པ་རྙེད་ཀྱི་ལེགས་པ་མ་རྙེད་པས་གཞི་འདི་ལ་ཁོ་བོ་དང་ཚེ་དང་ལྡན་པ་དེ་དག་གི་ལྟུང་བ་བྱུང་བ་གང་ཡིན་པ་ལས་ཁ་ན་མ་ཐོ་བ་སྦོམ་པོའམ། ཁྱིམ་ན་གནས་པ་ལས་བརྟེན་པ་མ་གཏོགས་པར་ཁོ་བོས་བདག་དང་ཚེ་དང་ལྡན་པ་དེ་དག་གི་ཆེད་དུ་ཁྱེད་ཀྱི་དྲུང་དུ་མི་བཅབ་པར་མཐོལ་ཞིང་བཤགས་པར་སྤྲོའོ་ཞེས་སྨྲ་བར་བྱའོ། །ཕྱོགས་ཅིག་ཤོས་ན་དགེ་སློང་གནས་བརྟན་གནས་བརྟན་གང་ཡང་རུང་བ། ཤེས་ཉེན་ཅན་ཤེས་ཉེན་ཅན་གང་ཡང་རུང་བ། གཙོ་བོ་གཙོ་བོ་གང་ཡང་རུང་བ་ཡོད་པ་གང་ཡིན་པ་དེས་ཀྱང་རང་གི་ཕྱོགས་ཀྱི་དྲུང་དུ་སོང་སྟེ་ཚིག་འདི་སྐད་ཅེས། ཚེ་དང་ལྡན་པ་དག་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འཐབ་པར་གྱུར་ཅིང་མཚང་འདྲུ་བ་དང༌། འཐབ་མོ་དང༌། འགྱེད་པར་གྱུར་པ་ནི་བདག་ཅག་གིས་རྙེད་པ་རྙེད་པ་མ་ཡིན་ཏེ། ཉེས་པ་རྙེད་ཀྱིས་ལེགས་པ་མ་རྙེད་པས། ཚེ་དང་ལྡན་པ་དག་གཞི་འདི་ལ་ཁོ་བོ་དང་ཁྱེད་ཀྱི་ལྟུང་བ་བྱུང་བ་གང་ཡིན་པ་ལས་ཁ་ན་མ་ཐོ་བ་སྦོམ་པོའམ། ཁྱིམ་ན་གནས་པ་ལས་བརྟེན་པ་མ་གཏོགས་པར་ཁོ་བོས་བདག་དང་ཁྱེད་ཀྱི་ཆེད་དུ་ཚེ་དང་ལྡན་པ་དེ་དག་གི་དྲུང་དུ་མི་བཅབ་པར་མཐོལ་ཞིང་བཤགས་པར་སྤྲོའོ་ཞེས་སྨྲ་བར་བྱའོ། །གལ་ཏེ་དགེ་སློང་དེ་ལ་རང་གི་ཕྱོགས་ནས་དགེ་སློང་གཅིག་གིས་ཀྱང་སྨྲས་པ་མ་བཟློག་ཅིང་མི་གཤེ་ན། དེ་ནས་དགེ་སློང་དེས་ཕྱོགས་ཅིག་ཤོས་ཀྱི་དྲུང་དུ་སོང་ནས་བླ་གོས་ཕྲག་པ་གཅིག་ཏུ་གཟར་ཏེ་རྒན་རིམས་ཇི་ལྟ་བ་བཞིན་འདུད་པ་བྱས་ལ་ཙོག་ཙོག་པོར་འདུག་སྟེ་ཚིག་འདི་སྐད་ཅེས། ཚེ་དང་ལྡན་པ་དག་ཁོ་བོ་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འཐབ་པར་གྱུར་ཅིང་མཚང་འདྲུ་བ་དང༌། འཐབ་མོ་དང༌། འགྱེད་པར་གྱུར་པ་ནི་ཁོ་བོ་ཅག་གིས་རྙེད་པ་རྙེད་པ་མ་ཡིན་ཏེ། ཉེས་པ་རྙེད་ཀྱིས་ལེགས་
པ་མ་རྙེད་པས་གཞི་འདི་ལ་ཁོ་བོ་དང་ཚེ་དང་ལྡན་པ་དེ་དག་གི་ལྟུང་བ་བྱུང་བ་གང་ཡིན་པ་ལས་ཁ་ན་མ་ཐོ་བ་སྦོམ་པོའམ། ཁྱིམ་ན་གནས་པ་ལ་བརྟེན་པ་མ་གཏོགས་པར་ཁོ་བོས་བདག་དང་ཚེ་དང་ལྡན་པ་དེ་དག་གི་ཆེད་དུ་ཁྱེད་ཀྱི་དྲུང་དུ་མི་འཆབ་པར་མཐོལ་ཞིང་བཤགས་པར་སྤྲོའོ་ཞེས་སྨྲ་བར་བྱའོ། །གང་གི་ཚེ་ཕྱོགས་ཅིག་ཤོས་ཀྱིས་ཅིག་ཤོས་ལའམ། ཅིག་ཤོས་ཀྱིས་ཅིག་ཤོས་ལ་སྤུས་ལ་ལྟུང་བ་ལྟ་བུར་བྱེད། འབྱུང་བར་སྐྱོང༌། མཚུངས་པར་ཉེ་བར་སྟོན་པར་བྱེད་ཀྱི་ཕན་ཚུན་དུ་ལྟུང་བ་སྒྲོགས་པར་གླེང་བར་མི་བྱེད་ན་དེ་ལྟར་ན་རྩོད་པ་དེ་འདི་ལྟ་སྟེ། རྩྭ་བཀྲམ་པ་ལྟ་བུར་འོས་པས་ཞི་བ་ཡིན་ཏེ། དགེ་སློང་དག་དེ་ལྟར་ན་རྩྭ་བཀྲམ་པ་ལྟ་བུར་འོས་པ་ནི་རྩོད་པ་ཞི་བར་བྱེད་པ་ཡིན་ཞིང༌། དེ་ལྟར་ན་འདི་ན་ཁ་ཅིག་གི་རྩོད་པ་རྣམས་འདི་ལྟ་སྟེ། རྩྭ་བཀྲམ་པ་ལྟ་བུར་འོས་པའི་རྩོད་པ་ཞི་བར་བྱེད་པས་དུལ་བ་དང་ཞི་བ་དང་ཉེ་བར་ཞི་བ་ཡིན་ནོ། །དགེ་སློང་དག་ལྟུང་བའི་རྩོད་པ་ནི་ཞི་བར་བྱེད་པའི་ཆོས་བཞི་པོ་འདིས་དུལ་བར་བྱ། ཞི་བར་བྱ། ཉེ་བར་ཞི་བར་བྱ་བ་ནི་འདི་ལྟ་སྟེ། ཁས་བླང་བར་འོས་པ་དང༌། མངོན་སུམ་དུ་འདུལ་བར་འོས་པ་དང༌། དེའི་ངོ་བོ་ཉིད་ཚོལ་དུ་གཞུག་པར་འོས་པ་དང༌། རྩྭ་བཀྲམ་པ་ལྟ་བུར་འོས་པས་སོ། །དགེ་སློང་དག་བྱ་བའི་རྩོད་པ་ནི་དགེ་འདུན་མཐུན་པས་ཞི་བར་བྱའོ། །དགེ་སློང་དག་གནས་གང་ན་དགེ་སློང་ཞིག་གནས་པ་དེ་ན་འཐབ་པ་མེད། མཚང་འདྲུ་བ་མེད། འཐབ་མོ་མེད། འགྱེད་པ་མེད་དོ། །གང་ན་གཉིས་ཡོད་པ་དེ་ན་ཡང་འཐབ་པ་མེད། མཚང་འདྲུ་བ་མེད། འཐབ་མོ་མེད། འགྱེད་པ་མེད་དོ། །གང་ན་གསུམ་ཡོད་པ་དེ་ན་ཡང་འཐབ་པ་མེད། མཚང་འདྲུ་བ་མེད། འཐབ་མོ་མེད། འགྱེད་པ་མེད་དོ། །གང་ན་དགེ་སློང་བཞིའམ་ལྷག་པ་གནས་པ་དེ་ན་ནི་འཐབ་པ་དང༌། མཚང་འདྲུ་བ་དང༌། འཐབ་མོ་དང༌། འགྱེད་པ་ཡོད་དོ། །དགེ་སློང་དགཐཚངས་པ་ཇི་བཞིན་གཅིག་དེ་བཞིན། །བརྒྱ་བྱིན་ཇི་བཞིན་གཉིས་དེ་བཞིན། །རྒྱལ་པོ་ཇི་བཞིན་གསུམ་དེ་བཞིན། །དེ་ལས་ལྷག་པ་འཁྲུག་པར་འགྱུར། །དགེ་སློང་དག་དེ་ལྟ་བས་ན་རྗེས་སུ་གནང་སྟེ། ཚིག་
བཞི་པའི་ཚིགས་སུ་བཅད་པ་གཅིག་འཛིན་པ་གང་ཡིན་པ་དེ་ལ་ཡང་ཆོས་ཀྱི་རྙེད་པ་སྦྱིན་པར་བྱ་ཞིང༌། དེས་ཀྱང་ལོངས་སྤྱད་པར་བྱ་སྟེ། འདི་ལ་ནི་འགྱོད་པར་ནི་མི་བྱའོ། །རྩོད་པའི་གཞི་རྫོགས་སོ།། །།