ཀཽཎྜི་ནྱའི་སྡེ་ཚན།
སྡོམ་ལ། ཀཽཎྜི་ནྱ་དང་རིལ་བའི་དབྱིབས། །ཐམས་ཅད་སྐྱོབ་ནོར་ཤིང་རྟ་དང་། །གདུགས་དང་སྲིན་བུ་ཀི་ཏ་ཀ། །བྱམས་པའི་དྲིལ་སྒྲོགས་བཅུག་པ་དང་། །དགའ་སྐྱོང་ལ་དུ་བཏུད་བ་དང་། །སྣུམ་ཁུར་གནས་འཇོག་སྦྲང་རྩི་ཅན། །འདུལ་བ་འཛིན་མཆོག་བགྲང་བའོ། །གང་གི་ཚེ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་བཅོམ་ལྡན་འདས་ཀྱིས་ཀྱང་ཀྱང་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་བསྟན་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན་ངེས་ན་བཅོམ་ལྡན་འདས་ཀྱིས་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་ཤེས་ཀཽཎྜ་ནྱི་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་དགེ་སློང་ཀཽཎྜི་ནྱ་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་
ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པ་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀཡི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་ཡང་དག་པ་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སུང་ཞེས་བྱ་བ་བྱུང་སྟེ། དེ་གྲོང་ཁྱེར་བཱ་རཱ་ཎ་སཱ་རི་ཉེ་བར་བརྟེན་ནས་རི་བོ་རིལ་བའི་དབྱིབས་ཞེས་བྱ་བ་ལ་བཞུགས་སོ། །ཇི་ཙམ་དུས་གཞན་ཞིག་ན་ཡང་དག་པར་རྫོགས་པའི་སངས་རྒྱས་འོད་སྲུང་སྔ་དྲོ་ན་བཟའ་ཤམ་ཐབས་མནབས་ཆོས་གོས་དང་ལྷུང་བཟེད་བསྣམས་ཏེ། བཱ་རཱ་ཎ་སཱ་རི་བསོད་སྙོམས་ལ་ཞུགས་པ་དང་། དགེ་འདུན་ལྔ་བརྒྱ་ཙམ་དོང་བའི་དགེ་འདུན་དེ་རྣམས་ཀྱིས་སངས་རྒྱས་བཅོམ་ལྡན་འདས་འདས་སྐྱེས་བུ་ཆེན་པོའ་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། སྐུ་དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། འོད་འདོམ་གང་གིས་བརྒྱན་པ། འོད་ཟེར་ཉི་མ་སྟོང་བས་ལྷག་པའི་འོད་ཅན། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པར་མཐོང་ངོ་། །མཐོང་མ་ཐག་ཏུ་དད་པ་བསྐྱེད་ནས་གྲོས་བྱ་བར་བརྩམས་པ། ཤེས་ལྡན་དག་བདག་ཅག་འདི་ལས་རབ་ཏུ་འབྱུང་བར་བྱའོ་ཞེས་དེ་རྣམས་ཀྱིས་དེ་ལྟར་གྲོས་བྱས་པ་ལས་ཁ་ཅིག་ནི་རྒྱ་མཚོ་ཆེན་པོར་ཞུགས་སོ། །ཁ་ཅིག་ནི་ཡུལ་གྱི་མཐོང་དོང་ངོ་། །ཁ་ཅིག་ནི་ཤི་བའི་ཆོས་དང་ལྡན་པར་གྱུར་ཏེ། སྐྱེ་བོ་བཅུ་དྲུག་ཞིག་ལུས་པ་དེ་རྣམས་རི་བོ་རིལ་བའི་དབྱིབས་ལ་དོང་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལས་རབ་
ཏུ་བྱུང་སྟེ། དེ་རྣམས་དེ་ན་བསམ་གཏན་དང་། ཀློག་པ་དང་། རྣལ་འབྱོར་གྱིས་གནས་སོ། །ཇི་ཙམ་དུས་གཞན་ཞིག་ན་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཤིང་ཟད་པའི་མེ་བཞིན་དུ་དྲང་སྲོང་སྨྲ་བ་རི་དགས་ཀྱི་ནགས་སུ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་རྣམས་ལ་ལྷ་རྣམས་ཀྱིས་སྨྲས་པ། ཤེས་ལྡན་དག་ཡང་དག་པར་རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་ཏེ། དེ་ཡོངས་སུ་མྱ་ངན་ལས་འདས་ནས་དེ་རིང་དུ་ཞག་བདུན་ལོན་ཏེ། དེའི་བསྟན་པ་ཡང་ནུབ་ན་ཁྱེད་ཅག་འབྲས་བུ་མེད་པའི་སྦུན་པ་འབྲུ་ཞིང་འདུག་སྟེ། ཅི་རུང་ཞེས་བྱས་པ་ཐོས་ནས་བྱ་བ་མ་བྱས་པའི་སྡུག་བསྔལ་ཆེན་པོས་གདུངས་སོ། །དེ་ནས་ལྔ་ནི་ཐོས་མ་ཐག་ཏུ་རི་བོ་རིལ་བའི་དབྱིབས་ལས་བབས་ནས་བཱ་རཱ་ཎ་སཱིར་ཞུགས་སོ། །དྲུག་གིས་ནི་དེ་ཉིད་དུ་ཡིད་བྱུང་བས་བརྩོན་འགྲུས་བརྩམས་ནས་རང་བྱང་ཆུབ་མངོན་སུམ་དུ་བྱས་སོ། །ཕྱི་ནས་ལྔ་ཡང་བབས་ནས་བཱ་རཱ་ཎ་སཱི་ཉིད་དུ་འཇུག་པར་བརྩམས་པ་ན་ཇི་ཙམ་ན་ཤིང་རྟས་འཚོ་པ་དག་འགྲོ་བ་ན་ཤིང་རྟས་འཚོ་བ་ཅིག་གི་གླང་དག་ཉམ་ཆུང་བཞིན་དུ་དེ་དག་ལ་དེས་ལྕག་གཟེར་བུ་ཅན་གྱིས་ཡང་ནས་ཡང་དུ་གཞུས་ཏེ། དེ་རྣམས་ཉམ་ཆུང་བས་ཤིལ་ཐུག་ཅིང་འགྲོ་མི་ནུས་བཞིན་དུ་ཤིང་རྟས་འཚོ་བའི་སྣ་ལ་འགྲོ་བ་དང་། དེ་ལ་དགེ་སློང་དེ་རྣམས་ཀྱིས་སྨྲས་པ། ཀྱེ་ཤིང་རྟས་འཚོ་བ་ཁྱོད་ཀྱི་གླང་ཉམ་ཆུང་བ་འདི་རྣམས་ལ་ལྕག་གཟེར་བུ་ཅན་གྱིས་ཡང་ནས་ཡང་དུ་གཞུས་ཏེ་ཅི་རུང་། གལ་ཏེ་འགྲོ་མི་ནུས་ན་དལ་བུས་འགྲོར་ཆུག་ལ་ཕྱི་ནས་སོང་ངོ་ཅོག །དེས་སྨྲས་པ། བདག་སྣ་ལ་ཤིང་རྟས་འཚོ་བའི་ཚོང་པ་དང་ལྷན་ཅིག་མཆི་མི་ནུས་ཞེས་གལ་ཏེ་བདག་ཕྱི་ནས་ཆས་ན་གདོན་མི་ཟ་བར་ཤིང་རྟས་འཚོ་བའི་ཚོང་པ་འདིས་བདག་བོར་ནས་དོང་བར་འགྱུར་རོ། །དེ་རྣམས་ཀྱིས་ཤིང་རྟས་འཚོ་བ་དེ་ལས་བཟུར་བཟུར་ནས་མི་དགའ་སྟེ། གཅིག་ལ་གཅིག་སྨྲས་པ། ཤེས་ལྡན་དག་ཡང་དག་པར་རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་ཏེ་བདག་ཅག་ལུས་ན་འདིས་ཀྱང་བདག་ཅག་ལ་
སྐུལ་མ་བཏབ་ཀྱིས། མ་ལ་བདག་གིས་བརྩོན་འགྲུས་བརྩམ་པར་བྱའོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། ཐུབ་པ་ཆེན་པོ་འོད་སྲུང་གི །གལ་ཏེ་ཆོས་ནི་ནུབ་གྱུར་ཀྱང་། །ཡང་དག་པར་སངས་རྒྱས་ཀྱིས་བཤད་པའི། །བརྩོན་འགྲུས་འདོར་བར་མི་བྱའོ། །བདག་ཅག་གི་ནི་ཟག་པ་ཡང་། །གལ་ཏེ་ཟད་པར་མ་གྱུར་ན། །ཤཱཀྱ་སེང་གེ་སྐྱོབ་པ་ཡི། །ཉན་ཐོས་མཆོག་ཏུ་འགྱུར་བར་བྱ། །དེ་རྣམས་བཱ་རཱ་ཎ་སཱ་རི་ཞུགས་ནས་བསོད་སྙོམས་སྤྱད་དེ་སླར་ཡང་རི་བོ་རིལ་བའི་དབྱིབས་ལ་དོང་ནས་བསམ་གཏན་དང་། ཀློག་པ་དང་། རྣལ་འབྱོར་གྱིས་གནས་པ་ན་དེ་རྣམས་ལས་བཞི་ཤིའོ། །གཅིག་ཅིག་ལུས་པ་དེ་མི་དགའ་བ་སྐྱེས་ཤིང་ཡིད་བྱུང་བས་ཆེད་དུ་བརྗོད་པ་ཆེད་དུ་བརྗོད་པ། རི་བོ་རིལ་བའི་དབྱིབས་གང་ཡིན་པ་འདི་ཉིད་ལ་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱས་ལ་དེའི་དགེ་སློང་ཉི་ཁྲི་ཡང་མཐོང་ན། བདག་འབའ་ཞིག་འཛམ་བུའི་གླིང་མཐའ་དག་ན་སྣམ་སྦྱར་གྱི་རྒྱལ་མཚན་འཛིན་པ་ལྟ་ཞིག་སྙམ་ནས། དེས་སྨོན་ལམ་གདབ་པར་བརྩམས་པ། འདི་ལྟར་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལས་འདི་སྲིད་དུ་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་ཆུང་ཟད་ཀྱང་མ་རྟོགས་ཀྱིས། དགེ་བའི་རྩབ་འདིས་བདག་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲ་ཟེའི་ཁྱེའུ་བླ་མ་ཞེས་བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་འགྱུར་རོ་ཞེས་ལུང་བསྟན་པ་དེའི་བསྟན་པ་ལས་བདག་རབ་ཏུ་བྱུང་ནས། དེར་ཐོག་མར་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས། བཅོམ་ལྡན་འདས་ཤཱཀྱ་ཐུབ་པ་དེས་བདག་སྣམ་སྦྱར་གྱིས་རྒྱལ་མཚན་འཛིན་པ་རྣམས་ཀྱི་མཆོག་ཏུ་བསྟན་བར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་ཡོངས་སུ་མྱ་ངན་ལས་འདས་པའ་ིདགེ་སློང་ཉི་ཁྲི་
ཡོད་པ་ལས་དགེ་སློང་གཅིག་ལུས་པས་འཛམ་བུའི་གླིང་མཐའ་དག་ན་སྣམ་སྦྱར་གྱི་རྒྱལ་མཚན་བཟུང་སྟེ། རི་བོ་རིལ་བའི་དབྱིབས་གང་ན་བ་དེར་སོང་ནས་སྨོན་ལམ་བཏབ་པ་གང་ཡིན་པ་དེ་ནི་དགེ་སློང་ཀུན་ཤེས་ཀཽཎྜི་ནྱ་འདི་ཉིད་ཡིན་ཏེ། དེའི་སྨོན་ལམ་གྱི་དབང་གིས་ད་ལྟར་ཡང་བཅོམ་ལྡན་འདས་ཀྱིས་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས་དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜིི་ནྱ་ལ་ཆོས་བཤད་ནས་ཡང་དང་ཡང་དུ་རྨེད་པར་མཛད་དེ། ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ལགས་སོ་ཞེས་གསོལ་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན། དེས་ན་བཅོམ་ལྡན་འདས་ཀྱིས་ཆོས་བཤད་ནས་ཡང་དང་དུ་རྨེད་པ་མཛད་དེ། ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ལགས་སོ་ཞེས་གསོལ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀཽཎྜི་ནྱ་འདི་ཉིད་ཀྱིས་ལས་བྱས་ཞིང་བསགས་པ། ཚོགས་རྙེད་པ་ཞེས་བྱ་བ་ནས་ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཏ་སཱ་རི་རྒྱལ་པོ་ཚངས་སྦྱིན་ཞེས་བྱ་བ་འབྱོར་བ་དང་། རྒྱས་པ་དང་། བདེ་བ་དང་། ལོ་ལེགས་
པ་སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེ་དུས་གཞན་ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་གཟུགས་བཟང་ཞིང་མཛེས་པ། བལྟ་ན་སྡུག་པ། ཡན་ལག་གི་མཆོག་ཐམས་ཅད་དག་ལྡན་པ་ཞིག་བཙས་སོ། །བཙས་ནས་དེའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིངའདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ཡུལ་དབུས་ཀྱི་ཡུལ་ཆོས་ཀྱིས་ནི་གཟུགས་བཟང་ཞིང་མཛེས་པ་བལྟ་ན་སྡུག་པ་ལགས་ན་དེ་མཛེས་དགའ་ཞེས་འདོགས་ལགས་ལ། ཁྱེའུ་འདི་ཡང་གཟུགས་བཟང་ཞིང་མཛེས་པ་བལྟ་ན་སྡུག་ཅིང་ཡུལ་ཀ་ཤིའི་རྒྱལ་པོའ་སྲས་ཀྱང་ལགས་པས་ཁྱེའུ་འི་མིང་ཀ་ཤི་མཛེས་དགའ་ཞེས་བགྱི་བར་གདགས་སོ་ཞེས་དེའི་མིང་ཀ་ཤི་མཛེས་དགའ་ཞེས་བྱ་བར་བཏགས་སོ། །ཁྱེའུ་ཀ་ཤི་མཛེས་དགའ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ་མ་མ་བརྒྱད་ལ་རྗེས་སུ་གཏད་ནས་དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་པོ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོདག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །ཡང་རྒྱལ་པོ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་ཏེ། གང་གི་ཉི་མ་ལ་བཙས་པ་དེ་ཉིད་ཀྱི་ཉི་མ་ལ་བཱ་རཱ་ཎ་སཱིར་ཡུལ་མི་དང་གྲོང་མི་འཐབ་མོ་ཆེན་པོ་བྱུང་ངོ་། །དེ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །བཙུན་མོའ་ཚོགས་ཀྱིས་སྨྲས་པ། ལྷ་འདི་བཙས་པ་ན་བཱ་རཱ་ཎ་སཱ་རི་གྲོང་མི་དང་ཡུལ་མི་རྣམས་
བ་མོ་ཆེན་པོ་བྱུང་བས་དེའི་བས་དེའི་སླད་དུ་ཁྱེའུའི་མིང་འཐབ་མོ་སྐྱེས་སུ་གདགས་སོ་ཞེས་བཏགས་སོ། །རྒྱལ་པོ་ཚངས་སྤྱིན་ནི་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་སྟེ། གཞོན་ནུ་ཀ་ཤིམ་ཛེས་དགའ་ས་ཕ་ཆོས་མ་ཡིན་པས་རྒྱལ་སྲིད་བྱེད་དུ་འཇུག་པ་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་ཀྱང་ཡབ་འདས་ན་རྒྱལ་པོར་འགྱུར་ཞིང་བདག་གིས་ཀྱང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ནས་དམྱལ་བར་གཞོལ་བར་འགྱུར་གྱིས། མ་ལ་བདག་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས་དེ་ཕའི་དྲུང་དུ་སོང་སྟེ་རྐང་པ་ལ་གཏུགས་ཏེ་སྨྲས་པ། ཡབ་གནང་བར་མཛད་དུ་གསོལ། བདག་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ལགས་སོ། །དེས་སྨྲས་པ། བུ་གང་གི་དོན་དུ་མཆོད་སྦྱིན་མཆོད་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་རྒྱལ་སྲིད་ཁྱོད་ཀྱི་ལག་ཏུ་འོངས་ན་ཅིའི་ཕྱིར་རྒྱལ་སྲིད་སྤངས་ཏེ་རབ་ཏུ་འབྱུང་། དེས་ཚིགས་སུ་བཅད་པས་སྨྲས་པ། ནགས་ན་ཤིང་ཤུན་རྩ་གྱོན་ཞིང་། །རྩབ་འབྲས་བུ་འཆའ་བ་དང་། །རི་དགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིག་བྱེད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་བཅིང་དང་རྡེག་པ་དག །བགྱིད་པ་དེ་ལྟ་མ་ལགས་སོ། །རྒྱལ་པོས་སྨྲས་པ། གཞོན་ནུ་ཤེས་པར་གྱིས་ཤིག །ཁྱོད་ནི་ངའི་བུ་གཅིག་པ་སྡུག་པ། ཡིད་དུ་འོང་བ། བཟོད་པ། མི་མཐུན་པ་མེད་པ་ཡིན་ཏེ། ང་ཤི་བར་གྱུར་ན་མི་འདོད་བཞིན་དུ་ཁྱོད་དང་འབྲལ་གྲང་། གསོན་བཞིན་དུ་ལྷ་ག་ལ་བཏང་། གཞོན་ནུ་ཀ་ཤི་མཛེས་དགའ་ས་སྨྲས་པ། ཡབ་གལ་ཏེ་གནང་ན་དེ་ལྟ་ན་ལེགས། གལ་ཏེ་མི་གནང་ན་འཚལ་མ་ཡང་མི་འཚལ། ཕྱག་ཡང་མི་འཚལ་ལོ། །དེ་ན་གཞོན་ནུ་ཀ་ཤི་མཛེས་དགའ་ས་ཉི་མ་གཅིག་ཀྱང་ཟན་གཅད་པ་བྱས་པ་ནས། གཉིས་དང་། གསུམ་པ་དང་། དྲུག་གི་བར་དུ་ཟན་གཅད་པ་བྱས་སོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །བུ་གཞོན་ནུ་
ཤེས་པར་གྱིས་ཤིག །ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་བྱ་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའ་བར་དུ་རི་དགས་གདུག་པ་རྣམས་དང་ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའ་བར་དུ་གཞན་གྱིས་བྱིན་པས་འཚོ་བར་བྱ་དགོས་སོ། །ཁྱོད་ཀྱིས་ཇི་སྲིད་འཚོའ་བར་དུ་མིའི་འདོད་པ་དག་ལས་དབེན་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའ་བར་དུ་མིའི་དགའ་བ་དང་། རྩེད་མོ་དག་ལས་དབེན་པར་བྱ་དགོས་སོ། །བུ་གཞོན་ནུ་ཁྱོད་ཚུར་ཤོག །འདི་ཉིད་དུ་འདུག་ལ་རྒྱལ་ཚབ་བྱོས་ཏེ་འདོད་པ་དག་ལ་ཡང་སྤྱོད་ཅིག །སྦྱིན་བདག་ཀྱང་བྱིན་ཅིག །བསོད་ནམས་དག་ཀྱང་བྱོས་ཤིག །དེ་སྐད་ཅེས་སྨྲས་ཀྱང་གཞོན་ནུ་ཀ་ཤི་མཛེས་དགའ་ཅང་མི་སྨྲའོ། །དེ་ནས་རྒྱལ་པོ་ཚངས་སྦྱིན་གྱིས་བཙུན་མོ་དང་། བློན་པོ་དང་། མདུན་ན་འདོན་ལ་བསྒོ་བ། ཤེས་ལྡན་དག་རེ་ཞིག་གཞོན་ནུ་སློང་ཤིག །ལྷ་བཀའ་བཞིན་འཚལ་ཞེས་བཙུན་མོ་དང་། བློན་པོ་དང་། མདུན་ན་འདོན་རྣམས་གཞོན་ནུ་ཀ་ཤི་མཛེས་དགའ་གང་ན་བ་དེར་དོང་སྟེ་ལྷགས་ནས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པ་དགའ་བར་བགྱི་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་། བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་
འཚོའ་བར་དུ་རི་དགས་གདུག་པ་དག་དང་ལྷག་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའ་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའ་བར་དུ་མིའི་དགའ་བའི་རྩེད་མོ་རྣམས་ལས་དབེན་པར་བགྱི་འཚལ་ལོ། །སྲས་གཞོན་ནུ་ཁྱོད་ཚུར་སྤྱོན། འདི་ཉིད་དུ་བཞུགས་ལ་རྒྱལ་ཚབ་མཛོད་དེ། འདོད་པ་རྣམས་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་གྱིས་གྱིས་ཤིག་ཅེས་དེ་སྐད་སྨྲས་པ་ན། གཞོན་ནུ་ཀ་ཤི་མཛེས་དགའ་ཅང་མི་སྨྲ་བར་འདུག་གོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ཀ་ཤི་མཛེས་དགའ་དང་ལྷན་ཅིག་རྡུལ་ཁྲོད་ན་རྩེ་རྩེ་བའི་བློན་པོའ་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞན་ཡང་གཞོན་ནུ་རྣམས་ལ་བསྒོ་བ་གཞོན་ནུ་དག་ཚུར་རེ་ཞིག་གཞོན་ནུ་ཀ་ཤི་མཛེས་དགའ་སློང་ཤིག །དེ་ནས་བློན་པོའ་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞོན་ནུ་རྣམས་ཀྱིས་རྒྱལ་པོ་ཚངས་སྦྱིན་ལས་མཉན་ན། གཞོན་ནུ་ཀ་ཤི་མཛེས་དགའ་གང་ན་བ་དེར་དོང་སྟེ་ལྷགས་ནས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །གཞོན་ནུ་དེས་པ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པས་སྡུག་བསྔལ་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་། །བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའ་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། ཁྱོད་ཀྱིས་ཇི་སྲིད་འཚོའ་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའ་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའ་བ་དུ་མིའི་དགའ་བའི་རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་ཁྱོད་ཚུར་སྤྱོན། འདི་ཉིད་དུ་བཞུགས་ལ་རྒྱལ་ཚབ་མཛོད་དེ། འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་གྱིས་ཤིག་ཅེས་སྨྲས་པ་ན། གཞོན་ནུ་ཀ་ཤི་མཛེས་དགའ་ཅད་མི་སྨྲ་བར་འདུག་གོ །དེ་ནས་བློན་པོའ་བུ་རྣམས་དང་། མདུན་ན་འདོན་གྱི་བུ་
རྣམས་དང་། གཞོན་ནུ་རྣམས་རྒྱལ་པོ་ཚངས་སྦྱིན་གང་ན་བ་དེར་སོང་སྟེ་ཕྱིན་ནས་རྒྱལ་པོ་ཚངས་སྦྱིན་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །གཞོན་ནུ་དེས་པ་ཀ་ཤི་མཛེས་དགའ་གུམ་ན་ཅི་རུང་། འདི་ལྟར་རབ་ཏུ་བྱུང་བ་ནི་མཁས་པ་རྣམས་ཀྱིས་བསྔགས་པ་ལགས་ཏེ། གལ་ཏེ་དེ་ལ་མངོན་པར་དགའ་བར་གྱུར་ན་གསོན་པོར་དེ་ལ་གཟིགས་པར་འགྱུར་རོ། །གལ་ཏེ་མངོན་པར་དགའ་བར་མ་གྱུར་ཏེ། སླར་ཡང་དྲང་སྲོང་རྣམས་ལས་ལོག་པར་གྱུར་ན་བུའི་གནས་ནི་ཕ་དང་མ་མ་ལགས་པ་གཞན་གང་དུ་མཆི་བར་འགྱུར། རྒྱལ་པོ་ཚངས་སྦྱིན་གྱིས་སྨྲས་པ། གཞོན་ནུ་དག་གལ་ཏེ་དེ་ལྟ་ན་གནང་བ་བྱའོ། །དེ་ནས་བློན་པོའ་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞོན་ནུ་རྣམས་གཞོན་ནུ་ཀ་ཤི་མཛེས་དགའ་གང་ན་བ་དེར་སོང་སྟེ་ཕྱིན་ནས། གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །གཞོན་ནུ་དེས་པ་མཁྱེན་པར་མཛོད་ཅིག །རབ་ཏུ་འབྱུང་བར་གནང་སྟེ་གཞོན་ནུ་ད་ནི་དེའི་དུས་མཁྱེན་པར་མཛོད་ཅིག །དེ་ནས་གཞོན་ནུ་ཀ་ཤི་མཛེས་དགའ་བཅུད་ཀྱི་ཁུ་བའི་རིམ་གྱིས་ལུས་ཀྱི་མཐུ་དང་། སྟོབས་དང་། །བརྩོན་འགྲུས་བསྐྱེད་དེ་བཱ་རཱ་ཎ་སཱི་ནས་བྱུང་ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་ངོ་། །དེས་བརྩོན་པ་དང་། འབང་པ་དང་། བརྩལ་བ་བྱས་པས་འདོད་པ་རྣམས་ལས་འདོད་ཆགས་དང་བྲལ་བར་བྱས་ནས་བྱམས་པའི་ཏིང་ངེ་འཛིན་ཐོབ་སྟེ། དེ་ཤིན་ཏུ་སེམས་ཅན་རྣམས་ལ་བརྩེ་བ་དང་ལྡན་པར་གྱུར་ནས། དེའི་བྱམས་པ་དེས་ནི་རི་དགས་གདུག་པ་རྣམས་ཀྱང་བསྟི་གནས་སུ་འདྲིས་པར་གྱུར་ཏེ། གནོད་པ་མི་བྱ་པས་དེའི་མིང་བཟོད་པ་སྨྲ་བ་བཟོད་པ་སྨྲ་བཞེས་བྱ་བར་གྱུར་ཏོ། །ཇི་ཙམ་དུས་གཞན་ཞིག་ན་རྒྱལ་པོ་ཚངས་སྦྱིན་ཤི་ནས་འཐབ་མོ་སྐྱེས་རྒྱལ་སྲིད་ལ་བཞག་སྟེ། དེ་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་གོ །དྲང་སྲོང་བཟོད་པ་སྨྲ་བས་སྨྲས་པ། མཁན་པོ་བདག་གི་ལུས་ནི་ཁ་ཟས་དང་བཏུང་བས་བསྐྱེད་པས་དགོན་པའི་སྨན་གྱིས་འཚོ་བར་རྔོ་མི་ཐོག་གིས་གྲོང་མཐར་གནས་སུ་མཆི་ལགས་སོ། །དེས་སྨྲས་པ། བུ་གྲོང་ངམ་དགོན་པར་གནས་
ཀྱང་རུང་སྟེ། དྲང་སྲོང་རྣམས་ནི་དབང་པོ་རྣམས་སྲུང་བར་བྱེད་ཀྱིས། སོང་ལ་བཱ་རཱ་ཎ་སཱིའི་ཉེ་འཁོར་དུ་སོང་ནས་ལོ་མ་དང་འདབ་མའི་སྤྱིལ་བུ་བྱོས་ལ་གནས་པར་གྱིས་ཤིག །དེ་མཁན་པོ་ལས་ལུང་ཐོབ་ནས་བཱ་རཱ་ཎ་སཱིར་སོང་སྟེ། ཞི་བའི་གནས་བཙལ་བའི་ཕྱིར་ཕན་ཚུན་དུ་རྒྱུ་ཞིང་རིམ་གྱིས་ཕའི་སྐྱེད་མོས་ཚལ་དུ་སོང་སྟེ། དེས་དེར་གནས་བཙལ་བ་ལས་ཞི་བའི་ཕྱོགས་ཤིག་མཐོང་ནས་དེ་དེ་ན་གནས་སོ། །ཇི་ཙམ་དུས་གཞན་ཞིག་ན་རྒྱལ་པོ་འཐབ་མོ་སྐྱེས་སོ་གའི་དུས་ལ་བབ་པ་ན་ནགས་ཚང་ཚིང་མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དག ཤང་ཤང་ཏེའུ་རྣམས་ཀྱང་སྐད་འབྱིན་པའི་སྐྱེད་མོས་ཚལ་གྱི་ས་གཞིར་བཙུན་མོ་དང་ལྷན་ཅིག་དོང་ནས་དེས་སྐྱེད་མོས་ཚལ་དེར་བདེ་བ་ཉམས་སུ་མྱོང་བས་དུབ་པར་གྱུར་ཏེ་གཉིད་ལོག་པ་དང་། བུད་མེད་ནི་མེ་ཏོག་དང་འབྲས་བུ་ལ་དགའ་བ་ཡིན་པས་སྐྱེད་མོས་ཚལ་དེ་ཉིད་ནས་ཕན་ཚུན་དུ་རྒྱུ་བར་བརྩམས་པ་ལས། ཅི་ཙམ་ན་དྲང་སྲོང་བཟོད་པ་སྨྲ་བ་སྤྱོད་ལམ་ཞི་བས་མཐའ་གཅིག་ན་འདུག་པ་མཐོང་ངོ་། །མཐོང་ནས་ཀྱང་བླ་མར་བྱ་བའི་སེམས་བསྐྱེད་ནས་དྲང་སྲོང་དེ་ལ་ཕྱག་བྱས་ཏེ་བསྐོར་ནས་འཁོད་དོ། །དྲང་སྲོང་བཟོད་པ་སྨྲ་བས་བུད་མེད་རྣམས་མཐོང་ནས་ལྷག་པར་སྤྱོད་ལམ་ཞི་བས་ཆོས་བཤད་པར་བརྩམས་སོ། །ཇི་ཙམ་ན་རྒྱལ་པོ་འཐབ་མོ་སྐྱེས་གཉིད་ཀྱི་སྙོམས་པས་དུབ་པ་ལས་སངས་པ་ན། བཙུན་མོའ་འཁོར་གྱི་བུད་མེད་མ་མཐོང་ནས། དེས་རལ་གྲི་བླངས་ཏེ་བཙུན་མོའི་འཁོར་གྱི་བུད་མེད་བཙལ་བར་བརྩམས་པ་དང་། ཇི་ཙམ་ན་དྲང་སྲོང་བཟོད་པ་སྨྲ་བ་བསྐོར་ནས་འཁོད་པ་མཐོང་ངོ་། །མཐོང་ནས་ཀྱང་ཕྲག་དོག་བསྐྱེད་དེ། བདག་ཉིད་ཁྲོས་པའི་ཀུན་ནས་དཀྲིས་པའི་རང་བཞིན་གྱིས་དྲང་སྲོང་དེའི་དྲུང་དུ་སོང་བ་དང་། བཙུན་མོའ་ཚོགས་ཀྱིས་དེ་ཁྲོས་པའི་གནས་སྐབས་མཐོང་ནས་སྐྲག་སྟེ་བྱེར་རོ། །རྒྱལ་པོ་སྙེམས་པ་ཅན་གྱིས་བཟོད་པ་སྨྲ་བ་ལ་སྨྲས་པ། ཀྱེ་ནང་རྗེ་ཁྱོད་སུ་ཞིག་དེས་སྨྲས་པ། བཟོད་པ་སྨྲ་བའོ། །རྒྱལ་པོ་འཐབ་མོ་སྐྱེས་ཀྱིས་སྨྲས་པ། ཁོ་བོ་འཁྲུགས་པ་ལ་ཡང་བཟོད་པ་
སྨྲ་བར་བདག་ཉིད་ཁས་འཆེ་བ་ཡིན་ནམ། ད་ནི་ཁྱོད་བཟོད་པ་སྨྲ་བ་ཡིན་ནམ་མ་ཡིན་ཤེས་པར་བྱའོ་ཞེས་དེས་དེའི་ལག་པ་གཉིས་བཅད་ནས་ཡང་དྲིས་པ། ཁྱོད་སུ་ཡིན། དེས་སྨྲས་པ། བཟོད་པ་སྨྲ་བའོ། །དེས་དེའི་རྐང་པ་བཅད་ཅིང་ཡན་ལག་དང་ཉིང་ལག་རྣམས་ཀྱང་བཅད་པ་དང་། དེས་ཚིགས་སུ་བཅད་པ་སྨྲས་པ། གལ་ཏེ་བདག་གི་ལུས་ལ་ནི། །ཏིལ་འབྲུ་ཙམ་དུ་གཏུབ་པ་ཡི། །ལུས་ནི་ཕྱེ་མ་བརྒྱར་གཏུབས་ནས། །ས་ལ་གཏོར་ཀྱང་བཟོད་མི་སྤོང་། །གང་ཕྱིར་བདག་གིས་བྱམས་དགེ་བའི། །སེམས་ནི་རྟག་ཏུ་གོམས་བྱས་པས། །བུ་སྡུག་ལྟ་བུའི་སྐྱེ་བོ་ལ། །བཟོད་པ་དེ་གཏོང་སྤྲོ་བ་མེད། །ཅེས་ཚིགས་སུ་བཅད་པའི་དབྱངས་དེ་ལྟ་བུས་ཚོར་བ་བསལ་ནས་སྨོན་ལམ་གདབ་པར་བརྩམས་པ། ཇི་ལྟར་རྒྱལ་པོ་འདི་ཉོན་མོངས་པ་ལ་ཞེན་པའི་བློས་བདག་ལ་ཡང་དང་ཡང་དུ་རྨས་ནས་ཡན་ལག་དང་ཉིང་ལག་རྣམས་གཏུབས་པ་དེ་བཞིན་དུ་བདག་བཟོད་པ་དང་དེས་པ་དང་ལྷན་ཅིག་པར་གྱུར་པའི་དགེ་བའི་རྩ་བ་འདིས་བདག་ཉིད་ཀྱི་ཉོན་མོངས་པའི་ཚོགས་རྣམས་བཅོམ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན། དེ་ལ་ཤེས་རབ་ཀྱི་རལ་གྲིས་ཡང་དང་ཡང་དུ་རྨེད་ཅིང་ཐོག་མར་དེའི་ཉོན་མོངས་བ་གཅོད་པར་གྱུར་ཅིག་ཅེས་བཏབ་བོ། །དེ་ནས་བཟོད་པ་སྨྲ་བ་ལ་མངོན་པར་དད་པའི་ལྷ་གང་ཡིན་པས་བསམས་པ། རྒྱལ་པོ་སྡིག་ཅན་འདིས་དྲང་སྲོང་འདི་ཉེས་པ་མེད་ཅིང་གནོད་པ་མ་བྱས་པར་རྐང་པ་དང་ལག་པ་དང་ཕྲལ་ཏེ་བོར་གྱིས། ཅི་ནས་ཀྱང་བདག་གིས་འདི་ལ་གནོད་པར་བྱའོ་སྙམ་དུ་རིག་ནས་ཁྲོ་བོ་དྲག་པོའ་ཀུན་ནས་དཀྲིས་པས་བཟོད་པ་སྨྲ་བའི་མདུན་དུ་འདུག་སྟེ་ཚིགས་སུ་བཅད་པས་སྨྲས་པ། འཐབ་སྐྱེས་བུ་དང་བུ་མོར་བཅས། །གཉེན་གྱི་ཚོགས་བཅས་གྲོང་ཁྱེར་དང་། །ལྗོངས་བཅས་འཇིག་རྟེན་འཚོ་བ་ཀུན། །ཐལ་པར་བགྱི་ཡིས་བཀའ་སྩོལ་ཅིག །དེས་སླར་ཚིགས་སུ་བཅད་དེ་སྨྲས་པ། གང་གིས་བདག་ལུས་ལག་པ་རྐང་པ་དང་། །སྣ་དང་ཕྲལ་ནས་མ་རུང་བྱས་གྱུར་པ། །དེ་ལའང་སྡིག་པ་ཅུང་ཟད་མི་འདོད་ན། །ཉེས་མེད་འགྲོ་བ་རྣམས་ལ་སྨོས་ཅི་དགོས། །
དེ་ནས་བཱ་རཱ་ཎ་སཱིའི་ལྷ་གང་ཡིན་པ་དེས་ཡམས་ཀྱི་ནད་དང་། བྱི་བ་དང་། བྱེ་བ་དང་། ནེ་ཙོ་རྣམས་བཏང་ཞིང་ལྷས་ཆར་མ་ཕབ་པས་སྐྱེ་བོའ་ཚོགས་རྣམས་ཤི་བར་གྱུར་ཏོ། །རྒྱལ་པོས་ལྟས་མཁན་རྣམས་བཀུག་ནས་སྨྲས་པ། ཤེས་ལྡན་དག་ཅིའི་ཕྱིར་ལྷ་ཆར་མི་འབེབས་ཤིང་བྱི་བ་དང་། བྱེ་བ་དང་། ནེ་ཙོ་རྣམས་རབ་ཏུ་མང་པོར་གྱུར་ལ་སྐྱེ་བོའ་ཚོགས་རྣམས་ཀྱང་ཤི་བར་གྱུར། དེ་རྣམས་ཀྱིས་སྨྲས་པ། ལྷ་དང་དྲང་སྲོང་བཟོད་པ་སྨྲ་བ་ལ་མངོན་པར་དད་པའི་ལྷ་གང་ལགས་པའི་ལྷ་དེ་རབ་ཏུ་འཁྲུགས་ཏེ། དེ་འཁྲུགས་པས་དེས་ཡམས་ཀྱི་ནད་འདི་བཏང་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེ་ལ་ཇི་ལྟར་བསྒྲུབ་པར་བྱ། ལྟས་མཁན་རྣམས་ཀྱིས་སྨྲས་པ། ལྷ་གཏོར་མ་དང་། མེ་ཏོག་ཕྲེང་དང་། ཡོ་བྱང་རྣམས་ཀྱིས་ལྷ་རབ་ཏུ་འཁྲུགས་པ་མཉེས་པར་འགྱུར་བས་གཏོར་མ་དང་། མེ་ཏོག་ཕྲེང་དང་། ཡོ་བྱད་རྣམས་སྦྱར་ལ་ལྷ་དང་དྲང་སྲོང་དེ་ལ་ཡང་བཟོད་པ་གསོལ་བར་བགྱིའོ། །དེ་ནས་རྒྱལ་པོས་བཱ་རཱ་ཎ་སཱིར་དྲིལ་སྒྲོགས་སུ་བཅུག་པ། གྲོང་ཁྱེར་བཱ་རཱ་ཎ་སཱི་ན་གནས་པའི་ཤེས་ལྡན་དག་ཉོན་ཅིག །སྐྱེད་མོས་ཚལ་ན་གནས་པའི་ལྷ་དྲང་སྲོང་བཟོད་པ་སྨྲ་བ་ལ་མངོན་པར་དད་པ་དེས་ཡམས་ཀྱི་ནང་བཏང་ཞིང་དེས་ཆར་མི་འབེབས་པ་དང་། བྱི་བ་དང་། བྱེ་བ་དང་། ནེ་ཙོ་རྣམས་རབ་ཏུ་མང་པོར་བྱས་ཏེ་སྐྱེ་བོའ་ཚོགས་ཀྱང་ཤིར་བར་གྱུར་གྱིས། ཡམས་ཀྱི་ནད་དེ་ཉེ་བར་ཞི་བར་བྱ་བའི་ཕྱིར་ཁྱེད་ཅག་སང་གཏོར་མ་དང་། མེ་ཏོག་ཕྲེང་དང་། ཡོ་བྱད་རྣམས་དང་ཆས་ཏེ་སྐྱེད་མོས་ཚལ་དེར་དེང་ལ་མཆོད་པ་བྱོས་ཤིག །སྐྱེ་བོའི་ཚོགས་ཀྱིས་དེ་ཉིད་ཀྱི་ནུབ་མོ་ནས་གཏོར་མ་དང་། མེ་ཏོག་ཕྲེང་དང་། ཡོ་བྱད་རྣམས་སྟ་གོན་བྱས་ཏེ་སྐྱེད་མོས་ཚལ་དེར་རྒྱལ་པོ་དང་། བཙུན་མོ་དང་ལྷན་ཅིག་ཏུ་དོང་ངོ་། །དེ་ནས་སྐྱེ་བོའ་ཚོགས་ཆེན་པོས་ལྷ་དེ་ལ་བརྟེན་ནས་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་རྣམས་ལ་སྦྱིན་པ་དག་བྱིན་ནས་ལྷའི་གནས་སུ་མཆོད་པ་ཆེན་པོ་བྱས་ཏེ་ལྷ་དེ་ལ་ཡང་བཟོད་པར་གསོལ་ཏོ། །དེ་ནས་རྒྱལ་པོ་དྲང་སྲོང་བཟོད་པ་སྨྲ་བའི་དྲུང་དུ་སོང་ནས་རྐང་པ་ལ་གཏུགས་ཏེ་བཟོད་པ་
གསོལ་བར་བརྩམས་པ། དྲང་སྲོང་ཆེན་པོ་བདག་གིས་ཡུལ་ཞིག་ལ་ལྷག་པར་ཞེན་པས་ཁྲོ་བའི་ཀུན་ནས་དཀྲིས་པའི་བློ་གྲོས་ཀྱིས་ཁྱོད་ལ་གནོད་པ་བགྱིས་པ་བཟོད་པར་གསོལ་ལོ། །བཟོད་པ་སྨྲ་བས་སྨྲས་པ། རྒྱལ་པོ་ཆེན་པོ་བཟོད་དོ། །སུས་འཚལ། །དེས་ཚིགས་སུ་བཅད་པས་སྨྲས་པ། ལུས་ལ་མཚོན་གྱིས་འདེབས་པ་ནའང་། །བདག་ནི་སེམས་ཅན་ཀུན་ལ་བྱམས། །གལ་ཏེ་ཁྱོད་ཡིད་མི་ཆེས་ན། །བདག་གི་ཁྲག་འཛག་པ་ལ་ལྟོས། །དེའི་ཁྲག་འོ་མའི་ཐིགས་པར་འཛག་པའི་ཆོ་འཕྲུལ་རྒྱལ་པོ་སྡིག་པའི་ལས་བྱེད་པ་དེ་ལ་བསྟན་ན། འོན་ཀྱང་ཡིད་ཆེས་པར་མ་གྱུར་ནས་དེས་ཡང་སྨྲས་པ། དྲང་སྲོང་ཆེན་པོ་བཟོད་པར་གསོལ་ལོ། །རྒྱལ་པོ་ཆེན་པོ་བཟོད་དོ། །སུས་འཚལ། དེས་ནས་བྱང་ཆུབ་སེམས་དཔས་ཡན་ལག་དང་ཉིང་ལག་གཏུབས་པའི་གནས་རྣམས་ཇི་ལྟ་བ་བཞིན་དུ་བཞག་ནས་བདེན་པ་གསོལ་བའི་ཕྱིར་ཚིགས་སུ་བཅད་དེ་སྨྲས་པ། རྒྱལ་པོ་ཁྱོད་ཀྱིས་བདག་གི་ལུས། །གཏུབས་ཀྱང་ཤིན་ཏུ་ཕྲ་བ་ཡི། །ཞེ་སྡང་འདི་ལྟར་ཡོད་མིན་ན། །བདག་ལུས་ཇི་ལྟར་སྔོན་བཞིན་ཤོག །དེས་བདེན་པའི་ཚིག་གསོལ་བས་ལུས་སྔོན་གྱི་ཇི་ལྟ་བ་བཞིན་དུ་གྱུར་ཏོ། །དེ་ནས་རྒྱལ་པོ་ཡ་མཚན་གྱིས་མིག་ཕྱི་ནས་ཚིགས་སུ་བཅད་པས་སྨྲས་པ། ཀྱེ་མའོ་ཆོས་ལ་ལེགས་གནས་པས། །ཀྱེ་མ་བརྟུལ་ཞུགས་འདི་གྲུབ་སྟེ། །ལུས་ལ་གཏུབ་པར་བྱེད་པ་ན། །ཁྱོད་ལ་མི་དགའ་ཅི་ཡང་མེད། །རྒྱལ་པོ་འཐབ་མོ་སྐྱེས་བཙུན་མོ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པས་དྲང་སྲོང་དེའི་རྐང་པ་ལ་མགོ་བོས་ཕྱག་བྱས་ཏེ་དོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་བཟོད་པ་སྨྲ་བ་གང་ཡིན་པ་དེ་ནི་ང་ཉིད་ཡིན་ནོ། །རྒྱལ་པོ་འཐབ་མོ་སྐྱེས་གང་ཡིན་པ་དེ་ནི་དགེ་སློང་ཀཽཎྜི་ནྱ་འདི་ཉིད་ཡིན་ཏེ། ངས་དེ་ལ་བྱམས་པའི་སེམས་བསྐྱེད་ཅིང་སྨོན་ལམ་དུ་དགེ་བའི་རྩ་བ་འདིས་བདག་གིས་དེ་ལ་ཡང་ནས་ཡང་དུ་རྨེད་ཅིང་ཉོན་མོངས་པ་གཅོད་པར་གྱུར་ཅིག་ཅེས་བཏབ་པའི་སྨོན་ལམ་གང་ཡིན་པ་དེའི་དབང་གིས། ད་ལྟར་ཡང་དེ་བཞིན་གཤེགས་པ་དེ་ལ་ཆོས་བཤད་ནས་ཡང་
ནས་ཡང་སུ་སྨྲས་སོ། །དགེ་སློང་དག་ད་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །གང་གི་ཚེ་བཅོམ་ལྡན་འདས་ཀྱིས་ལྷ་བརྒྱད་ཁྲི་ཆོས་ཀྱི་རོས་ཡང་དག་པར་བསྡུས་བདེན་པ་རྣམས་ལ་རབ་ཏུ་བཀོད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྷ་བརྒྱད་ཁྲི་ཆོས་ཀྱི་རོས་ཡང་དག་པར་བསྡུས་ཏེ་བདེན་པ་རྣམས་ལ་རབ་ཏུ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ངས་འདི་རྣམས་ཚོང་པ་བརྒྱད་ཁྲིར་གྱུར་པ་ན་ཟང་ཟིང་གིས་ཡང་དག་པར་བསྡུས་ནས་བརྟུལ་ཞུགས་ལྔའི་གཞི་རྣམས་ལ་རབ་ཏུ་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་དེད་དཔོན་གཉིས་ཞིག་བྱུང་སྟེ། ཐམས་ཅད་སྐྱོབ་དང་། ལེགས་གྲུབ་ཅེས་བྱ་སྟེ། རེ་རེ་ལ་ཡང་ཚོང་པའི་འཁོར་བཞི་ཁྲི་བཞི་ཁྲི་ཡོད་དོ། །དེ་ལ་ལེགས་གྲུབ་ངེས་པར་འབྱུང་བ་ལ་མངོན་པར་དགའ་ནས་དེ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་སྟེ། དེས་མཐའ་གཅིག་ཏུ་བརྩོན་འགྲུས་ལ་གནས་ནས་མཁན་པོ་དང་སློབ་དཔོན་མེད་པར་རང་བྱང་ཆུབ་མངོན་སུམ་དུ་བྱས་སོ། །དེའི་ཚོང་པ་དེ་རྣམས་དེད་དཔོན་མ་མཐོང་ནས་ཕན་ཚུན་དུ་བཙལ་བར་བརྩམས་པ་ན། གང་གི་ཚེ་རྣམ་པ་ཐམས་ཅད་དུ་མ་རྙེད་པ་དེའི་ཚེ་དེད་དཔོན་ཐམས་ཅད་སྐྱོབ་ཀྱི་དྲུང་དུ་དོང་ནས་སྨྲས་པ། དེད་དཔོན་དེད་དཔོན་དེས་ནི་བདག་ཅག་ལ་མ་བལྟས་པར་མཆིས་ཏེ། བདག་ཅག་གིས་བཙལ་ན་ཡང་མ་རྙེད་ན་དེ་ལ་ཇི་ལྟར་བསྒྲུབ་པར་བགྱི། དེས་སྨྲས་པ། ཡི་བློང་བར་མ་བྱེད་པར་འཁོད་ཅིག་དེད་དཔོན་དེ་བཙལ་ལོ། །དེ་ནས་དེད་དཔོན་ཐམས་ཅད་སྐྱོབ་ཚོང་པ་བརྒྱད་ཁྲིས་ཡོངས་སུ་བསྐོར་ནས། དེད་དཔོན་ལེགས་གྲུབ་སྐྱེད་མོས་ཚལ་དང་། འདུག་གནས་དང་། དཀའ་ཐུབ་ཀྱི་ནགས་སུ་བཙལ་བར་བརྩམས་པ་ན་དེས་དེ་མཐོང་ནས་དྲིས་པ། ཁྱོད་ཀྱིས་ཅིའི་ཕྱིར་ཚོང་པ་རྣམས་སྤངས་ཏེ་རབ་
ཏུ་བྱུང་། བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་འཆད་ཀྱིས། ངག་གིས་མ་ཡིན་པས་དེད་དཔོན་འཁོར་དང་བཅས་པ་དེ་ལ་འབར་བ་དང་། གསལ་བ་དང་། ཆར་འབབ་པ་དང་། གློག་འབྱིན་པའི་ཆོ་འཕྲུལ་གྱིས་དད་པར་བྱས་སོ། །དེས་ཚོང་པ་བརྒྱད་ཁྲི་པོ་དེ་ཟང་ཟིང་གིས་བསྡུ་བས་བསྡུས་ནས་སྨྲས་པ། འདིའི་ཕྱིར་བྱ་བ་བྱོས་ཤིག །འདི་ལ་བྱ་བ་བྱས་ན་གདོན་མི་ཟ་བར་འབྲས་བུ་སྨིན་པར་འགྱུར་རོ། །དེ་རྣམས་ཀྱིས་དེ་ལ་བྱ་བ་རྣམ་པ་དུ་མ་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དེད་དཔོན་ཐམས་ཅད་སྐྱོབ་གང་ཡིན་པ་དེ་ནི་ང་ཉིད་ཡིན་ནོ། །ཚོང་པ་བརྒྱད་ཁྲི་པོ་གང་ཡིན་པ་དེ་དག་ནི་ལྷ་བརྒྱད་ཁྲི་པོ་འདི་དག་ཉིད་ཡིན་ཏེ། དེ་ན་ཡང་ངས་ཟང་ཟིང་གིས་ཉེ་བར་བསྡུས་ནས་བརྟུལ་ཞུགས་ལྔའི་གཞི་རྣམས་ལ་རབ་ཏུ་བཀོད་དོ། །འདི་དག་ད་ལྟར་ཡང་ངས་ཆོས་ཀྱི་རོས་ཡང་དག་པར་བསྡུས་ནས་བདེན་པ་རྣམས་ལ་རབ་ཏུ་བཀོད་དོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ན་གཅིག་ཏུ་དཀར་བ་ཡིན་ལ། འདྲེན་མ་རྣམས་ཀྱི་ནི་འདྲེན་མ་ཡིན་པས་ཞེས་བྱ་བ་ནས་དགེ་སློང་ཁྱོད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །གང་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་རིན་པོ་ཆེ་རྣམས་བགོ་བཤའ་མཛད་ནས། དམ་པའི་ཆོས་ཀྱི་རོས་ཚིམ་པར་མཛད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ་དམ་པའི་ཆོས་ཀྱི་རོས་ཚིམ་པར་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་
པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ། ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ་དམ་པའི་ཆོས་ཀྱི་རོས་ཚིམ་པར་མཛད་པ་དེ་ལ་ངོ་མཚར་ཅི་ཞིག་ཆེ། འདས་པའི་དུས་ན་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག་གདང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་ཏེ། དེད་དཔོན་དུ་གྱུར་པ་ན་ལྔ་པོ་དག་འབྲོག་དགོན་པའི་ལམ་དུ་ཆུ་མེད་པས་སྲོག་དང་བྲལ་བའི་སྡུག་བསྔལ་དོག་པ་ཉམ་ང་བ་ཐོབ་པ་ན་ལྷ་རྣམས་ལ་བདེན་པ་གསོལ་ནས་དབང་ཕྱུག་ཆེན་པོས་ཆེར་ཕབ་པའི་ཆུས་ཚིམ་པར་བྱས་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་དེད་དཔོན་ཐམས་ཅད་སྐྱོབ་ཅེས་བྱ་བ་ཚོང་པ་ལྔ་བརྒྱ་དང་ལྷན་ཅིག་ཏུ་ཚོང་བྱེད་ཅིང་འབྲོག་དགོན་པའི་ལམ་ཆུ་ཆུང་བ་ཞིག་ཏུ་ཞུགས་ནས་རིམ་གྱིས་འབིགས་བྱེད་ཅེས་བྱ་བའི་དགོན་པར་ཕྱིན་པ་དང་། ཚོང་པ་དེ་རྣམས་དེར་ཆུ་ཐམས་ཅད་ཀྱི་ཐམས་ཅད་དུ་ཟད་ནས་ཆུ་དང་བྲལ་ཡང་མནགས་ཏེ་དོང་བ་ལས། ཚོང་པ་ལྔ་ཙམ་ཆུ་མ་རྙེད་པས་ལྷག་པར་ཡི་བློང་བར་གྱུར་པའི་རྣམ་པ་དེ་ལྟ་བུ་དེ་དག་དེད་དཔོན་ཐམས་ཅད་སྐྱོབ་ཀྱིས་མཐོང་ནས་སྙིང་རྗེས་སེམས་བསྐྱོད་པས་ཁ་གྱེན་དུ་བལྟས་ཏེ་ལྷ་རྣམས་ལ་གསོལ་བ་བྱ་བར་བརྩམས་པ། ཞི་བ་དང་། ཆུ་ལྷ་དང་། ལུས་ངན་དང་། ཁྱབ་འཇུག་ལ་སོགས་པ་ལྷ་ཤེས་ལྡན་དག་གསོན་ཅིག །བདག་སེམས་ཅན་རྣམས་ལ་མཉམ་པར་སེམས་པའི་བདེན་པ་དང་བདེན་པའི་ཚིག་གང་ཡིན་པའི་བདེན་པ་དང་བདེན་པའི་ཚིག་འདིས་དབང་ཕྱུག་ཆེན་པོའ་ལྷས་ཆར་འབེབས་པར་གྱུར་ཅིག །བྱང་ཆུབ་སེམས་དཔའི་མཐུས་དབང་ཕྱུག་ཆེན་པོའ་གནས་གཡོས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་བསམས་པ། སུ་ཞིག་གིས་དབང་ཕྱུག་ཆེན་
པོའི་གནས་གཡོས་པར་བྱས་སྙམ་ན། བྱང་ཆུབ་སེམས་དཔའི་མཐུ་ཡིན་པར་མཐོང་ནས་དེས་དབང་ཕྱུག་ཆེན་པོའ་ཆར་གྱི་རྣམ་བ་དེ་ལྟ་བུ་དག་བབ་སྟེ། དེས་ཚོང་པ་དེ་རྣམས་ཚིམ་པར་བྱས་ནས་འབྲོག་དགོན་པའི་ལམ་ནས་བསྒྲལ་ཏོ། །དགེ་སློང་དེ་ཅི་སྙམ་དུ་སེམས། དེའི་ཚེ་དེའི་དུས་ཀྱི་དེད་དཔོན་ཐམས་ཅད་སྐྱོབ་གང་ཡིན་པ་དེ་ནི་ང་ཉིད་ཡིན་ནོ། །ཚོང་བ་ལྔ་པོ་ཆུ་དང་བྲལ་བས་ལྷག་པར་ཡི་བློང་པར་གྱུར་པ་དེ་དག་ནི་ལྔ་སྡེའི་དགེ་སློང་འདི་དག་ཡིན་ཏེ། དེ་ན་ཡང་ངས་འདི་དག་ཆུས་ཚིམ་པར་བྱས་ནས་འབྲོག་དགོན་པ་ནས་བསྒྲལ་ཏོ། །ད་ལྟར་ཡང་ངས་འདི་དག་དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ནས་བསྒྲལ་ཏོ། །གང་གི་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ནས་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་གི་རིན་པོ་ཆེ་རྣམས་ཀྱི་བགོ་བཤའ་མཛད་ཆེ་རྣམས་ཀྱི་བགོ་བཤའ་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ། ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་རྣམས་ཀྱི་བགོ་བཤའ་མཛད་པ་དེ་ལ་ངོ་མཚར་ཅི་ཞིག་ཚེ། འདས་པའི་དུས་ནང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་།
མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་ཏེ། དེད་དཔོན་དུ་གྱུར་པ་ན་རང་གི་སྲོག་ཡོངས་སུ་བཏང་ནས་འདི་དག་རྒྱ་མཚོ་ཆེན་པོ་ནས་བཏོན་ཏེ་རིན་པོ་ཆེ་རྣམས་ཀྱི་བགོ་བཤའ་བྱས་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་ན་དེད་དཔོན་ནོར་གྱི་ཤིང་རྟ་ཞེས་བྱ་བ་ཞིག་བྱུང་སྟེ། དེ་ཚོང་པ་ལྔ་ཞིག་དང་ལྷན་ཅིག་རྒྱ་མཚོ་ཆེན་པོར་དོང་པ་ན་དེ་རྣམས་དང་དེད་དཔོན་དེས་ཕན་ཚུན་བཤེས་པའི་གཏམ་སྨྲ་བར་བྱེད་པས་མཛའ་བར་གྱུར་ཏོ། །ཇི་ཙམ་ན་མཐར་གྱིས་རྒྱ་མཚོའ་འགྲམ་དུ་ཕྱིན་ནས་གྲུ་སོ་སོ་སྟ་གོན་བྱས་ནས་འཇུག་པའི་ཚེ་དེ་རྣམས་ཀྱིས་དེད་དཔོན་ནོར་གྱི་ཤིང་རྟ་ལ་སྨྲས་པ། དེད་དཔོན་བདག་ཅག་ནི་ཁྱོད་དང་བྲལ་ན་དགའ་བར་མི་འགྱུར་ལགས་སོ། །དེས་སྨྲས་པ། གལ་ཏེ་དེ་ལྟ་ན་འདིར་ཞུགས་ཤིག་དང་གྲུ་དོར་རོ། །དེ་རྣམས་དེར་ཞུགས་པ་དང་རླུང་ལངས་ནས་སྐྲག་པར་གྱུར་ཏོ། །ནོར་གྱི་ཤིང་རྟས་སྨྲས་པ། ཤེས་ལྡན་དག་མ་འཇིགས་ཤིག །གང་གི་ཚེ་གྲུ་ཞིག་པར་གྱུར་པ་དེའི་ཚེ་བདག་གི་མགུལ་དུ་འཇུས་ཤིག་དང་། བདག་གིས་ཁྱེད་ཅག་གདོན་ཏོ། །བྱང་ཆུབ་སེམས་དཔའ་རྣམས་ནི་བཟོའ་གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་པས་དེས་ནི་རིན་པོ་ཆེ་ཆེན་པོ་ལ་འོས་པ་དག་མཆན་ཁུང་དུ་བཏགས་ནས་གྲུ་ཞིག་པ་ན་དེ་རྣམས་དེད་དཔོན་དེའི་མགུལ་དུ་འཇུས་ནས། དེས་དེ་རྣམས་ལུས་དུ་བ་ཅིང་སྲོག་གི་ལྷག་མ་ཅུང་ཟད་ཅིག་ལུས་ཏེ་རྒྱ་མཚོའ་འགྲམ་དུ་ཕྱིན་པར་བྱས་སོ། །དེ་རྣམས་སྐམ་ལ་ཕྱིན་ཏེ་དེ་བཏང་བ་དང་། དེ་དབུགས་གཏན་ཆད་ནས་ཤིའོ། །དེ་རྣམས་ཀྱིས་དེ་ཆུ་ནས་སྐམ་ལ་ཕྱུང་བ་དང་། ཇི་ཙམ་ན་མཆན་ཁུང་ན་རིན་པོ་ཆེ་ཆེན་པོ་ལ་འོས་པ་དག་མཐོང་ནས་དེ་རྣམས་ཀྱིས་དེ་ཁྱེར་ཏེ་དོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དེད་དཔོན་ནོར་གྱི་ཤིང་རྟ་གང་ཡིན་པ་དེ་ནི་ཉིད་ཡིན་ནོ། །ཚོང་པ་དེ་རྣམས་ནི་དགེ་སློང་ལྔ་པོ་འདི་དག་ཉིད་ཡིན་ཏེ། དེ་ན་ཡང་ངས་འདི་དག་རྒྱ་མཚོ་ཆེན་པོ་ནས་བཏོན་ཏེ་རིན་པོ་ཆེ་རྣམས་ཀྱི་བོག་བཤའ་བྱས་སོ། །ད་ལྟར་ངས་འདི་དག་འཁོར་བའི་འབྲོག་དགོན་པ་ནས་བཏོན་ནས་དབང་པོ་དང་།
སྟོབས་དང་། བྱང་ཆུབ་ཀྱི་ཡན་ལག་གི་རིན་པོ་ཆེ་རྣམས་ཀྱི་བགོ་བཤའ་བྱས་སོ།། །།འདུལ་བ་གཞི། བམ་པོ་དགུ་བཅུ་རྩ་གསུམ་པ། ཡང་གང་གི་ཚེ་ཚེ་དང་ལྡན་པ་ཀུན་ཤེས་ཀཽཎྜི་ནྱ་རྒན་པའི་ངང་ལ་འདུག་པ་དེའི་ཚེ་འཁོར་ལ་གདུགས་ལྟ་བུར་བྱས་ཏེ་འདུག་གོ །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་འཁོར་ལ་གདུགས་ལྟ་བུར་བགྱིས་ཏེ་མཆིས་ལགས། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཀུན་ཤེས་ཀཽཎྜི་ནྱ་འདི་ཉིད་ཀྱིས་ལས་བྱས་ཤིང་བསགས་པ་ཚོགས་རྙེད་པ་དག་ནི་ཞེས་བྱ་བ་ནས་ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་ནོ། །དགེ་སློང་དགེ་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་ཁྱིམ་བདག་སྡུམས་བྱེད་ཅེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་སོ། །དེའི་ཚེ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་པ་ལས་ཇི་ཙམ་ན་ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་པོ་ཞེས་བསྟན་ཏོ། །རྒྱལ་པོ་ཚངས་སྦྱིན་གྱིས་རང་གི་ཡུལ་དུ་དྲིལ་སྒྲོགས་སུ་བཅུག་པ། ངའི་ཡུལ་ན་གནས་པའི་ཤེས་ལྡན་གྲོང་མི་དག་ཉོན་ཅིག །ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་བོ་ཞེས་བསྟན་གྱིས། དེ་ལ་ཁྱེད་ཅག་ལས་ལོ་བཅུ་གཉིས་ཀྱི་བཟའ་བ་དང་བཏུང་བ་ཡོད་བ་དེ་དག་ནི་ངའི་ཡུལ་ན་གནས་པར་གྱིས་ཤིག །གཞན་ནི་ཕྱོགས་སྣ་ཚོགས་སུ་དེང་ལ་ལོ་བཅུ་གཉིས་འདས་ནས་སླར་ཤོག་ཤིག །དེ་ནས་ཁྱིམ་བདག་སྡུམས་བྱེད་ཀྱིས་མངན་ལ་སྨྲས་པ། ཀྱེ་ནང་རྗེ་བང་མཛོད་ན་བདག་འཁོར་དང་བཅས་པའི་ལོ་བཅུ་གཉིས་ཀྱི་བཟའ་བ་དང་བཏུང་བ་དག་ཡོད་དམ། དེས་སྨྲས་པ། དཔོན་པོ་མཆིས་སོ། །དེ་ནས་
ཁྱིམ་བདག་སྡུམས་བྱེད་འཁོར་དང་བཅས་པ་ནི་འདུག་གོ །སྐྱེ་བོའི་ཚོགས་ནི་ཀུན་དུ་དོང་ངོ་། །མུ་གེ་ཆེན་པོ་ཉམ་ང་བ། དགོན་པ་སློང་མོ་པས་ཟས་རྙེད་པར་དཀའ་བ་བྱུང་བ་ལ་སངས་རྒྱས་བཅོམ་ལྡན་འདས་རྣམས་འབྱུང་བ་མེད་པ་ན་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་བརྟེན་པ། འཇིག་རྟེན་གྱི་ཡོན་གནས་གཅིག་པུ་དག་འཇིག་རྟེན་དུ་འབྱུང་བར་འགྱུར་བས་དེའི་ཚེ་བཱ་རཱ་ཎ་སཱི་དང་ཧ་ཅང་ཡང་མི་རིང་བའི་བསྟི་གནས་ཞིག་ཏུ་རང་སངས་རྒྱས་ལྔ་བརྒྱ་གནས་སོ། །གང་གི་ཚེ་མུ་གེའི་དུས་ཀྱི་འཆི་བའི་འཇིགས་སུ་རུང་བས་སྐྱེ་བོའ་ཚོགས་སྐྲག་ནས་ཀུན་དུ་དོང་བ་དེའི་ཚེ་དེ་རྣམས་ཀྱི་བསོད་སྙོམས་ཆད་ནས་དེ་དག་ཐམས་ཅད་འདུས་ཏེ་ཁྱིམ་བདག་སྡུམས་བྱེད་གང་ན་བ་དེར་དོང་ནས་སྨྲས་པ། ཁྱིམ་བདག་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་བསོད་སྙོམས་རྒྱུན་དུ་སྦྱོར་རམ། དེས་སྨྲས་པ། མངན་ལ་རྨས་ཏེ་བགྱིའོ་ཞེས་དེས་མངན་བྱེད་པའི་མི་ལ་སྨྲས་པ། ཀྱེ་ནང་རྗེ་བདག་ཅག་གི་བང་མཛོད་ན་བདག་ཅག་དང་རབ་ཏུ་བྱུང་བ་ལྔ་བརྒྱ་པོ་གང་ཡིན་པ་འདི་རྣམས་ཀྱི་ལོ་བཅུ་གཉིས་ཀྱི་བཟའ་བ་དང་བཏུང་བ་ཡོད་དམ། དེས་སྨྲས་པ། དཔོན་པོ་མཆིས་སོ། །དེ་ནས་རང་སངས་རྒྱས་ལྔ་བརྒྱ་པོ་དེ་རྣམས་ལ་ཁས་བླངས་སོ། །ཁྱིམ་བདག་སྡུམས་བྱེད་ཀྱིས་རབ་ཏུ་བྱུང་བ་ལྔ་བརྒྱའི་བསོད་སྙོམས་སྦྱར་ཏོ་ཞེས་རང་སངས་རྒྱས་ལྔ་བརྒྱ་གཞན་དག་གིས་ཐོས་ནས་ཁྱིམ་བདག་སྡུམས་བྱེད་ཀྱི་དྲུང་དུ་དོང་སྟེ་ཕྱིན་ནས་ཁྱིམ་བདག་སྡུམས་བྱེད་ལ་འདི་སྐད་ཅེས་སྨྲས་སོ། །ཁྱིམ་བདག་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་བསོད་སྙོམས་ཀུན་དུ་སྦྱོར་རམ། དེས་སྨྲས་པ། འཕགས་པ་དག་ཕུལ་ལགས་བཞིན་དུ་ཡང་བསླང་ཅི་འཚལ། ཁྱིམ་བདག་རྣམས་ཀྱང་གཞན་ཡིན་ལ་བདག་ཅག་ཀྱང་གཞན་ཡིན་ནོ། །དེས་སྨྲས་པ། འཕགས་པ་གལ་ཏེ་དེ་ལྟ་ན་མངན་ལ་སྨྲས་ཏེ་བགྱིའོ་ཞེས་དེས་མངན་བྱེད་པའི་མི་ལ་སྨྲས་པ། ཀྱེ་ནང་རྗེ་བདག་ཅག་གི་བང་མཛོད་ན་བདག་ཅག་དང་རབ་ཏུ་བྱུང་བ་སྟོང་པོ་གང་ཡིན་པ་འདི་རྣམས་ཀྱི་ལོ་བཅུ་གཉིས་ཀྱི་བཟའ་བ་དང་། བཏུང་བ་ཡོད་དམ། དེས་སྨྲས་པ། དཔོན་པོ་
མཆིས་སོ། །དེར་རང་སངས་རྒྱས་དེ་རྣམས་ལ་སྨྲས་པ། འཕགས་པ་རྣམས་བཞུགས་ཤིག་ཁྱེད་ཀྱི་གདུགས་ཚོད་ཀྱི་དུས་གང་ལགས། དེ་རྣམས་ཀྱིས་སྨྲས་པ། ཁྱིམ་བདག་ཉི་མ་ཕྱེད་མ་ཡོལ་བར་རོ། །དེ་ནས་ཁྱིམ་བདག་སྡུམས་བྱེད་ཀྱིས་སྦྱིན་གཏོང་གི་ཁང་པ་རྩིག་ཏུ་བཅུག་ནས་སྦྱིན་གཏོང་གི་ཞལ་ཏ་བྱེད་པའི་མི་དང་དུས་ཚོད་སྤྲོན་པ་ཡང་བཞག་ནས་དེ་རྣམས་ཉི་མ་རེ་རེ་ཞིང་ལྷགས་ནས་ཟས་ཀྱི་བྱ་བ་བྱེད་དོ། །དགྲ་བཅོམ་པ་སྟོང་པོ་དེའི་དགེ་འདུན་གྱི་གནས་བརྟན་གང་ཡིན་པ་དེ་ལྷག་པར་མཛེས་པ་མགོ་གདུགས་ལྟར་འདུག་པས་འཁོར་དེ་ལ་གདུགས་ལྟར་བྱས་ཏེ་གནས་སོ། །ཁྱིམ་བདག་སྡུམས་བྱེད་ཀྱི་བུ་མོས་དགེ་འདུན་གྱི་གནས་བརྟན་དེའི་མགོ་གདུགས་ལྟར་འདུག་ཅིང་ཁ་དོག་རྒྱས་པ་མཆོག་དང་ལྡན་པར་མཐོང་ནས་ཀྱང་ལྷག་པར་དད་པ་སྐྱེས་སོ། །ཇི་ཙམ་དུས་གཞན་ཞིག་ན་དྲོལ་བབ་པ་དང་ལྷས་ཆར་དབབ་པར་བརྩམས་སོ། །དེ་ནས་བུ་མོ་དེས་དགེ་འདུན་གྱི་གནས་བརྟན་གྱི་སྤྱོ་བོར་གདུགས་བཟུང་ནས་ཟོས་ཟིན་པ་དང་། རྐང་པ་གཉིས་ལ་གཏུགས་ཏེ་སྨོན་ལམ་བཏབ་པ། དགེ་བའི་རྩ་འདིས་ཇི་ལྟར་འཕགས་པ་འདི་ཡོན་ཏན་གྱི་ཚོགས་ཅི་འདྲ་བའི་རྣམ་པ་འདི་ལྟ་བུ་དག་ཐོབ་པས་འདི་འཁོར་ལ་གདུགས་ལྟ་བུར་བྱས་ཏེ་གནས་པ་དེ་བཞིན་དུ་བདག་ཀྱང་འཁོར་ལ་གདུགས་ལྟ་བུར་བྱས་ཏེ་གནས་པར་གྱུར་ཅིག་ཅེས་བཏབ་པོ། །དགེ་སློང་དག་ཇི་སྙམ་དུ་སེམས། ཁྱིམ་བདག་སྡུམས་བྱེད་ཀྱི་བུ་མོ་གང་ཡིན་པ་དེ་དགེ་སློང་ཀུན་ཤེས་ཀཽཎྜི་ནྱ་འདི་ཉིད་ཡིན་ཏེ། དེ་ན་འདི་གཞེན་ནུ་མར་གྱུར་པ་ན་རང་སངས་རྒྱས་ཀྱི་དགེ་འདུན་གྱི་གནས་བརྟན་གྱི་གདུགས་བཟུང་ནས་སྨོན་ལམ་དུ་ཡོན་ཏན་གྱི་ཚོགས་འདི་ལྟ་བུ་ཐོབ་ནས་འཁོར་ལ་གདུགས་ལྟ་བུར་བྱས་ཏེ་གནས་པར་གྱུར་ཅེས་བཏབ་པོ། །དེས་ན་ད་ལྟར་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་ཀྱང་འཁོར་ལ་གདུགས་ལྟ་བུར་བྱས་ཏེ་གནས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་དེ་ལྟ་བུ་ལ་ཁྱེད་ཀྱིས་བསླབ་པར་བྱའོ་ཞེས་
བྱ་བའི་བར་གོང་མ་བཞིན་དུའོ། །གང་གི་ཚེ་བཅོམ་ལྡན་འདས་ཀྱིས་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་བརྟེན་ནས་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་བརྟེན་ནས་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གང་གི་ཕྱིར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ་ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ཀུན་ཤེས་ཀཽཎྜི་ནྱ་ལ་བརྟེན་ཏེ་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་དེ་ལ་ངོ་མཚར་ཅི་ཞིག་ཆེ། འདས་པའི་དུས་ནང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་བགྲོལ་ཏེ། དུད་འགྲོ་བྱོལ་སོང་གི་ལུས་སུ་སྐྱེས་པ་ན། ཀཽཎྜི་ནྱ་སྲིན་བུ་ཀི་ཏ་ཀར་གྱུར་པ་ལ་བརྟེན་ནས་སྲིན་པུ་ཀི་ཏ་ཀ་བརྒྱད་ཁྲི་རང་གི་ཤས་ཚིམ་པར་བྱས་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་ཏེ་རྒྱ་མཚོ་ཆེན་པོའ་རུས་སྤལ་རྣམས་ཀྱི་ནང་དུ་སྐྱེས་ནས་དེ་རྣམས་ཀྱི་གཙོ་བོ་གྱུར་ཏོ། །ཇི་ཙམ་ན་ཚོང་པ་ལྔ་བརྒྱ་རྒྱ་མཚོ་ཆེན་པོའ་གྲུ་བོ་ཆེ་བསྒྲུབས་ནས་རྒྱ་མཚོ་ཆེན་པོར་ཞུགས་ཏེ། དེ་ནས་རིན་པོ་ཆེ་སྣ་ཚོགས་བླངས་ནས་སླར་ལོག་པ་ལས་འདི་ལྟར་གྲུ་བོ་ཆེ་ཆུ་སྲིན་ཉའི་རིགས་ཀྱི་ཚན་གྱིས་ཕུག་སྟེ། དེ་ན་ཀུ་ཅོ་ཆེན་པོ་བྱུང་བའི་སྒྲ་དེ་རུས་སྤལ་གྱིས་ཐོས་ནས་རྒྱ་མཚོ་ཆེན་པོ་ནས་ལངས་ཏེ། དེ་དེ་རྣམས་ཀྱི་དྲུང་དུ་སོང་
ནས་སྨྲས་པ། ཤེས་ལྡན་དག་བག་ཚ་བ་བོར་ལ་ཁོ་བོའ་རྒྱབ་ཏུ་ཞོན་ཅིག་དང་ཁོ་བོས་བསྒྲལ་བར་བྱའོ། །དེ་ནས་ཚོང་པ་དེ་རྣམས་ཤི་པ་ལས་སོས་པ་བཞིན་དུ་ཐམས་ཅད་རུས་སྦལ་གྱི་རྒྱབ་ཏུ་ཞོན་ཏེ། དེས་དེ་རྣམས་ཁྱེར་ནས་རྒྱ་མཚོའ་འགྲམ་དུ་ཕྱོགས་ཏེ་ཆས་པ་ན་ཁུར་གྱིས་ཤིན་ཏུ་བཙིར་ཀྱང་བརྩོན་འགྲུས་ལ་གནས་ཤིང་སྙོམ་པ་མ་བསྐྱེད་དེ། དེ་ལུས་དུབ་པས་དེ་རྣམས་ལེགས་པར་བསྒྲལ་ཏེ་མགྲིན་པ་བརྐྱང་ནས་གཉིད་ལོག་གོ །དེ་དང་ཧ་ཅང་ཡང་མི་རིང་བཞིག་ན་སྲིན་བུ་ཀི་ཏ་ཀ་རྣམས་ཀྱི་ཚང་ཡོད་པས་དེ་ནས་ཀི་ཏ་ཀ་གཅིག་རྒྱུ་ཞིང་སོང་པ་ན་དྲི་ཚོར་ཏེ་དེའི་དྲུང་དུ་སོང་བ་དང་། དེ་ནས་ལུས་ཆེན་པོ་དེ་གཉིད་ལོག་པར་མཐོང་ནས་རིངས་པའི་འགྲོས་ཀྱིས་སྲིན་བུ་ཀི་ཏ་ཀའི་ཚང་དུ་སོན་ཏེ། རང་རང་གི་བརྡས་ཀི་ཏ་ཀ་རྣམས་ལ་གོ་བར་བྱས་ནས་སྲིན་བུ་ཀི་ཏ་ཀ་བརྒྱད་ཁྲི་དེད་དེ་རུས་སྦལ་གྱི་དྲུང་དུ་དོང་ངོ་། །དེ་ནས་དེ་གཉིད་ལོག་སྟེ་ཤི་བ་བཞིན་དུ་སེམས་མེད་པ་ལ་བཟའ་བར་བརྩམས་ཏེ། གང་གི་ཚེ་དེའི་ཤ་ཆེན་པོ་རྣམས་ལས་ཟོས་ནས་ངལ་བས་དུབ་སྟེ་གཉིད་སྟུག་པོས་ནོན་པས་མཚོར་རོ། །ཇི་ཙམ་གནད་རྣམས་ཀྱི་ཤ་རྣམས་ཟ་བདེའི་ཚེ་སད་ན་སྲིན་བུ་ཀི་ཏ་ཀ་ཐམས་ཅད་ཀྱིས་ལུས་ཡོག་པར་མཐོང་ནས་དེས་བསམས་པ། གལ་ཏེ་ལུས་བསྒུལ་ལམ་བསྒྱུར་ན་གདོན་མི་ཟ་བར་འདི་རྣམས་འཆི་བར་འགྱུར་ཏེ། སྲོག་ཆགས་གཞན་ལག་གནོད་བར་བྱེད་པ་བས་ནི་སྲོག་དང་བྲལ་ཡང་བླའོ་སྙམ་དུ་བསམས་ནས། གནད་རྣམས་སུ་ཕུག་ཅིང་ཚིགས་རྣམས་ཕྲལ་བ་ན་སྨོན་ལམ་གདབ་པར་བརྩམས་པ། ཇི་ལྟར་སྲིན་བུ་ཀི་ཏ་ཀ་བརྒྱད་ཁྲི་པོ་འདི་རྣམས་ལ་ཤ་དང་ཁྲག་གིས་ཚིམ་པར་བྱས་པ་དེ་བཞིན་དུ་བདག་མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ཡང་དེ་རྣམས་ཆོས་ཀྱི་རོས་ལ་ཚིམ་པར་བྱེད་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱ་ིརུས་སྤལ་གྱི་གཙོ་བོ་གང་ཡིན་པ་དེ་ནི་ང་ཉིད་ཡིན་ནོ། །སྲིན་བུ་ཀི་ཏ་ཀ་དེ་རྣམས་ལ་ལམ་སྟོན་པ་གང་ཡིན་པ་དེ་ནི་དགེ་སློང་ཀཽཎྜི་ནྱ་འདི་ཉིད་ཡིན་ནོ། །དེ་ལ་བརྟེན་ནས་ཤ་དང་ཁྲག་གིས་ཚིམ་
པར་བྱས་པའི་སྲིན་བུ་ཀི་ཏ་ཀ་བརྒྱད་ཁྲི་པོ་གང་དག་ཡིན་པ་དེ་དག་ནི་ལྷ་བརྒྱད་ཁྲི་པོ་འདི་དག་ཉིད་ཡིན་ཏེ། དེ་ན་ཡང་ངས་རང་གི་ཁྲག་གིས་ཚིམ་པར་བྱས་སོ། །ད་ལྟར་ཡང་ངས་དེ་རྣམས་དམ་པའི་ཆོས་ཀྱི་རོས་ཚིམ་པར་མཛད་དོ། །དགེ་སློང་དག་དེ་ལྟ་བས་ན་གཅིག་ཏུ་གནག་པ་རྣམས་ཀྱི་ལས་ཀྱི་རྣམ་པར་སྨིན་པ་ནི་ཞེས་བྱ་བ་ནས་དགེ་སློང་དག་ཁྱིད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །གང་གི་ཚེ་བཅོམ་ལྡན་འདས་ཀྱི་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ་ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ། ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེ་ལ་ངོ་མཚར་ཅི་ཞིག་ཆེ། འདས་པའི་དུས་ནང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་མགྲོལ་
བ་ན། འདི་དག་ལ་རང་གི་ཁྲག་གིས་ཚིམ་པར་བྱས་ནས་བརྟུལ་ཞུགས་ལྔའི་གཞི་རྣམས་ལ་བཀོད་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་རྡོ་རྗེའི་དཔུང་པ་ཞེས་བྱ་བ་འབྱོར་པ་དང་ཞེས་བྱ་བ་ནས་སྐྱེ་བོ་དང་མི་མང་པོས་གང་བ་ན་རྒྱལ་སྲིད་བྱེད་དུ་འཇུག་སྟེ་ཞེས་བྱ་བའི་བར་དུ་སྟེ། རྒྱལ་པོ་དེ་ཡང་དད་པ་བཟང་བ། དགེ་བའི་རྩ་བ་ཅན། བདག་ལ་ཕན་པ་དང་གཞན་ལ་ཕན་པར་ཞུགས་པ། སྙིང་རྗེའི་བདག་ཉིད་ཆེན་པོ། ཆོས་འདོད་པ་སྐྱེ་དགུ་ལ་བྱམས་པ། ཐམས་ཅད་སྦྱིན་པ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། གཏོང་བ་ཆེན་པོ་ལ་གནས་པ་སྟེ། དེ་ལྷག་པར་བྱམས་པ་ལ་ཤིན་ཏུ་གོམས་པས་དེ་ཉིན་གཅིག་ལ་ལན་གསུམ་བྱམས་པ་ལ་སྙོམས་པར་འཇུག་པར་བྱེད་དེ། དེ་བྱམས་པ་ལ་སྙོམས་པར་ཞུགས་པ་ན། སློང་བའི་སྐྱེ་བོས་ཕོངས་པར་གྱུར་ནས་དེས་བློན་པོ་རྣམས་ལ་བསྒོ་བ། ཤེས་ལྡན་དག་གྲོང་ཁྱེར་བཱ་རཱ་ཎ་སཱིའི་གྲོང་ཁྱེར་གྱི་བསྒོ་བཞི་རྣམས་སུ་སྦྱིན་གཏོང་གི་ཁང་པ་རྩིག་ཏུ་བཅུག་ལ་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་དང་། ལམ་དུ་འཇུག་པའི་སློང་མོ་པ་གང་དག་ཅི་དོན་དུ་གཉེར་པ་དེ་དག་བྱིན་ཅིག །ལྷ་བཀའ་བཞིན་འཚལ་ཟས་དང་། སྐོམ་དང་། གོས་དང་། གནས་མ་ལ་དང་། དབྱིག་དང་། གསེར་དང་། ནོར་བུ་དང་། མུ་ཏིག་དང་། བཻཌཱུ་་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། རྡོའི་སྙིང་པོ་དང་། སྤུག་དང་། པད་མ་རཱ་ག་དང་། གཡས་སུ་འཁྱིལ་བ་ལ་སོགས་ཏེ་ནོར་མང་པོས་སློང་མོ་པའི་སྐྱེ་བོ་ཚིམ་པར་བྱ་བའི་ཕྱིར་ཕུང་པོར་སྤུངས་སོ། །ཇི་ཙམ་དུས་གཞན་ཞིག་ན་རྒྱལ་པོ་རྣམ་ཐོས་ཀྱི་བུས་རྒྱལ་པོའ་ཕོ་བྲང་ལྕང་ལོ་ཅན་ནས་མདངས་འཕྲོག་པའི་གནོད་སྦྱིན་ལྔ་སྦྱུགས་ཏེ། ཕན་ཚུན་འཕྱན་པ་ལས་བཱ་རཱ་ཎ་སཱིར་ཕྱིན་ནས་དེ་རྣམས་ཀྱིས་བ་ལང་རྫི་དང་། ལུག་རྫི་དང་། རྩྭ་ཐུན་དང་། ཤིང་ཐུན་དང་། ལམ་གྱིས་འཚོ་བ་དང་། ལམ་གོལ་བས་འཚོ་བའི་མི་རྣམས་མཐོང་ནས་སྨྲས་པ། ཤེས་ལྡན་དག་
ཁྱེད་ཅག་ཁོ་བོ་ཅག་གིས་མི་འཇིགས་སམ། ཤེས་ལྡན་དག་གང་གི་ཕྱིར་ཁོ་བོ་ཅག་གི་རྒྱལ་པོ་བྱམས་པ་དང་སྙིང་རྗེའི་བདག་ཉིད་ཅན་སེམས་ཅན་ལ་ཕན་པའི་བསམ་པས་ཉིན་གཅིག་ལ་ལན་གསུམ་དུ་བྱམས་པ་ལ་སྙོམས་པར་ཞུགས་པ་ཡོད་ན་ཅིའི་ཕྱིར་འཇིགས། དེ་ནས་དེ་རྣམས་བྲམ་ཟེའི་ཆ་བྱད་དུ་མངོན་པར་སྤྲུལ་ནས་གྲོང་ཁྱེར་བཱ་རཱ་ཎ་སཱིའི་སྒོ་བཞི་རྣམས་སུ་སྦྱིན་གཏོང་གི་ཁང་པ་རྣམས་ལ་བརྟགས་ཏེ་རྒྱལ་པོ་རྡོ་རྗེའི་དཔུང་པ་བྱམས་པ་ལས་ལངས་པར་ཤེས་དུལ་བའི་ཆ་བྱད་ཀྱིས་རྒྱལ་པོའ་དྲུང་དུ་སོང་ངོ་། །སོང་ནས་རྒྱལ་བ་དང་ཚེ་སྤེལ་བ་དག་རྒྱལ་པོ་ལ་བྱས་ནས་སྨྲས་པ། ལྷ་བདག་ཅག་བཀྲེས་ལགས་ན་གཡར་ཟས་ཀྱིས་རྗེས་སུ་གཟུང་དུ་གསོལ། རྒྱལ་པོས་བློན་པོ་རྣམས་བཀུག་སྟེ་སྨྲས་པ། ཤེས་ལྡན་དག་བྲམ་ཟེ་འདི་རྣམས་ཁ་ཟས་བསོད་པས་ཚིམ་པར་བྱོས་ཤིག །དེ་རྣམས་ཀྱིས་སྨྲས་པ། བདག་ཅག་ནི་ཤ་དང་ཁྲག་འཚལ་ལགས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་ཤ་དང་ཁྲག་གི་འབྱོར་པ་མེད་ན་ཚོང་འདུས་ནས་ཆོས་བཞིན་གྱིས་རྙེད་པའི་ཁྲག་བྱིན་ཅིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་མོད་ལ་བཀུམ་པའི་ཤ་དང་ཁྲག་འཚལ་ན། མོད་ལ་བཀུམ་པའི་ཤ་དང་ཁྲག་གིས་རྗེས་སུ་གཟུང་བར་མཛོད་ཅིག །རྒྱལ་པོས་བསམས་པ། གཞན་ལ་གནོད་པ་མ་བྱས་པར་མོད་ལ་བསད་པའི་ཤ་དང་ཁྲག་གལ་རྙེད་ཀྱིས་ཅི་ནས་ཀྱང་འདི་རྣམས་ལ་བདག་གིས་རང་གི་ཁྲག་སྦྱིན་པར་བྱའོ་སྙམ་སྟེ། དེ་ནས་དཔྱད་མཁན་རྣམསབཀུག་སྟེ་སྨྲས་པ། ཤེས་ལྡན་དག་ངའི་ཡན་ལག་གི་རྩ་ཐམས་ཅད་ཆོད་ཅིག་དང་། སློང་མོ་པའི་སྐྱེ་བོ་ཆིམ་པར་བྱའོ། །དཔྱད་མཁན་རྣམས་ཀྱིས་སྨྲས་པ། ལྷ་མི་ཕལ་པ་རྣམས་ཀྱི་ཕྱིར་བདག་ཅག་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་ནི་བཟོའ་གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་པས་དེས་རང་ཉིད་ཀྱིས་ལུས་ཀྱི་ཡན་ལག་ལྔ་མཚོན་གྱིས་གཏར་ཏེ། དེ་ནས་རག་གི་ཁྲག་གིས་ཚིམ་པར་བྱས་ནས་དེ་རྣམས་ལ་དེ་ལྟ་བུའི་ཆོས་བཤད་དེ། དེ་ཐོས་པས་གནོད་སྦྱིན་དེ་རྣམས་བརྟུལ་ཞུགས་ལྔའི་གཞི་རྣམས་ལ་
བཀོད་དོ། །དགེ་སློང་དག་ཇི་སྣམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་རྡོ་རྗེའི་དཔུང་པ་ཞེས་བྱ་བར་གྱུར་པ་དེ་ནི་ང་ཉིད་ཡིན་ནོ། །མདངས་འཕྲོག་པའི་གནོད་སྦྱིན་ལྔ་པོ་གང་དག་ཡིན་པ་དེ་དག་ནི་ལྔ་སྡེའི་དགེ་སློང་འདི་དག་ཉིད་ཡིན་ཏེ། དེ་ན་ཡང་ངས་འདི་རྣམས་རང་གི་ཁྲག་གིས་ཚིམ་པར་བྱས་ནས་བརྟུལ་ཞུགས་ལྔའི་གཞི་རྣམས་ལ་བཀོད་དོ། །ད་ལྟར་ཡང་ངས་འདི་རྣམས་དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ནས་བཏོན་ཏེ། ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་དོ། །གང་གི་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་ཞེས་བྱ་བ་ནས་ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ཞེས་བྱ་བའི་བར་དུ་སྟེ། ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེ་ལ་ངོ་མཚར་ཅི་ཞིག་ཆེ། ང་འདས་པའི་དུས་ན་འདོད་ཆགས་དང་བཅས་ཞེས་བྱ་བ་ནས་སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་བ་ན་ཞེས་བྱ་བའི་བར་གོང་མ་བཞིན་དུ་སྟེ། འདི་རྣམས་རང་གི་ཤས་ཚིམ་པར་བྱས་ནས་བརྟུལ་ཞུགས་ལྔའི་གཞི་རྣམས་ལ་བཀོད་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་
གྲོང་ཁྱེར་བཱ་རཱ་ཎ་སཱི་ན་རྒྱལ་པོ་བྱམས་པའི་སྟོབས་ཞེས་བྱ་བ་འབྱོར་པ་དང་ཞེས་བྱ་བ་ནས་སྐྱེ་བོ་དང་མི་མང་པོ་ཡོད་པ་རྒྱལ་སྲིད་བྱེད་དུ་འཇུག་སྟེ་ཞེས་བྱ་བའི་བར་དུ་སྟེ། བྱམས་པའི་བདག་ཉིད་སྙིང་རྗེ་ཅན་བདག་ཉིད་ཆེན་པོ་སེམས་ཅན་ཐམས་ཅད་ལ་བྱམས་པ་དང་ལྡན་པ་ཞིག་ཡོད་དེ། ཇི་ཙམ་དུས་གཞན་ཞིག་ན་རྒྱལ་པོ་རྣམ་ཐོས་ཀྱི་བུས་རྒྱལ་པོའ་ཕོ་བྲང་ལྕང་ལོ་ཅན་ནས་མདངས་འཕྲོག་པའི་གནོད་སྦྱིན་ལྔ་ཉེས་པ་འགའ་ཞིག་གི་ཕྱིར་སྤྱུགས་ནས། དེ་རྣམས་ལྗོངས་དེ་ནས་རྒྱུ་ཞིང་བཱ་རཱ་ཎ་སཱིར་ཕྱིན་ནས་དེ་རྣམས་ལ་སུས་ཀྱང་གཏོར་མའམ། མེ་ཏོག་ཕྲེང་དང་། ཡོ་བྱད་དག་མ་བྱིན་ནས། དེ་རྣམས་ཁྲོས་པས་ཡམས་ཀྱི་ནད་བཏང་སྟེ་བཱ་རཱ་ཎ་སཱིའི་སྐྱེ་བོའ་ཚོགས་ཤི་བར་གྱུར་ཏོ། །བློན་པོ་རྣམས་ཀྱིས་རྒྱལ་པོ་བྱམས་པའི་སྟོབས་ལ་སྨྲས་པ། ལྷ་བཱ་རཱ་ཎ་སཱིའི་སྐྱེ་བོའ་ཚོགས་ཏེ་བོར་འགུམ་ལགས་སོ། །རྒྱལ་པོས་དེ་རྣམས་ལ་བསྒོ་བ། དེང་ལ་བཱ་རཱ་ཎ་སཱི་ཁོ་ནར་དྲིལ་སྒྲོགས་སུ་བཅུག་ལ། ཤེས་ལྡན་དག་རྒྱལ་པོ་བྱམས་པའི་སྟོབས་ཀྱིས་བཀའ་སྩལ་པ། ང་སེམས་ཅན་ཐམས་ཅད་ལ་ཕན་པའི་བསམ་པ་ལ་ལྷག་པར་རྩོམ་པའི་ཡིད་ཀྱིས་ཉ་ནི་མཚན་འདའ་བར་བྱེད་ཀྱིས། དེ་ལ་ཁྱེད་ཅག་གིས་ཀྱང་སེམས་ཅན་ཐམས་ཅད་ཀྱི་རྗེས་སུ་སོང་བའི་བྱམས་པ་ཡིད་ལ་བྱོས་ཤིག་དང་། དེ་ལྟ་ན་ཞི་བར་འགྱུར་རོ། །དེ་རྣམས་སེམས་ཅན་ཐམས་ཅད་ཀྱི་རྗེས་སུ་སོང་བའི་བྱམས་པ་ཡིད་ལ་བྱེད་པ་ལ་ཞུགས་པ་ན་མདངས་འཕྲོག་པའི་གནོད་སྦྱིན་རྣམས་ཀྱིས་བཱ་རཱ་ཎ་སཱིའི་ཉེ་འཁོར་དུ་རྒྱུ་བར་བརྩམས་ན་འཇུག་མ་ནུས་སོ། །དེ་རྣམས་ཀྱིས་འཇུག་མ་ནུས་པས་གླགས་མ་རྙེད་དོ། །གླགས་མ་རྙེད་པས་བ་ལང་རྫི་དང་། ལུག་རྫི་དང། རྩ་ཐུན་དང་། ཤིང་ཐུན་དང་། ལམ་གྱིས་འཚོ་བ་དང་། ལམ་གོལ་བས་འཚོ་བའི་མི་རྣམས་མཐོང་ནས་དྲིས་པ། ཤེས་ལྡན་དག་ཁྱེད་ཅག་ཁོ་བོ་ཅག་གིས་མི་འཇིགས་སམ། དེ་རྣམས་ཀྱིས་སྨྲས་པ། མི་འཇིགས་སོ། །ཅིའི་ཕྱིར། འདི་ལྟར་བདག་ཅག་གི་རྒྱལ་པོ་བྱམས་པའི་སྟོབས་དགོངས་པ་གང་ཡིན་པ་དེ་སེམས་པས་སོ། །རྒྱལ་པོ་བྱམས་པའི་སྟོབས་ཅི་
དགོངས། སེམས་ཅན་ཐམས་ཅད་ཀྱི་རྗེས་སུ་སོང་བའི་བྱམས་པའོ། །དེ་རྣམས་ཀྱིས་བསམས་པ། འདིར་རྒྱུ་འདིས་ན་ད་ལྟར་བདག་ཅག་གིས་གླགས་མ་རྙེད་དོ་སྙམ་ནས་དེ་རྣམས་བཱ་རཱ་ཎ་སཱིའི་སྒོ་ནས་སྒོར་རྒྱུ་ཞིང་རྒྱལ་པོ་བྱམས་པའི་སྟོབས་ནམ་ཞིག་མཐོང་སྙམ་མོ། །ཇི་ཙམ་དུས་གཞན་ཞིག་ན་རྒྱལ་པོ་བྱམས་པའི་སྟོབས་ཕྱི་རོལ་དུ་སྐྱེད་མོས་ཚལ་དུ་ཆས་པ་དང་། དེ་ནས་དེ་རྣམས་བྲམ་ཟེའི་ཆ་བྱད་དུ་བདག་ཉིད་མངོན་པར་སྤྲུལ་ནས་སྤྱོད་ལམ་ཞི་བས་རྒྱལ་པོའ་དྲུང་དུ་ཉེ་བར་དོང་སྟེ་རྒྱལ་བ་དང་ཚེ་སྤེལ་བདག་བྱས་ནས་སྨྲས་པ། ལྷ་བདག་ཅག་བཀྲེས་ལགས་ན་གཡར་ཟས་ཀྱིས་རྗེས་སུ་གཟུང་དུ་གསོལ། རྒྱལ་པོས་བློན་པོ་རྣམས་བཀུག་སྟེ་བསྒྲོ་བ། ཤེས་ལྡན་དག་བྲམ་ཟེ་འདི་རྣམས་ཁ་ཟས་བསོད་པས་ཚིམ་པར་བྱོས་ཤིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་ཤ་དང་ཁྲག་འཚལ་ལགས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་ཤ་དང་ཁྲག་འབྱོར་བ་མེད་ན་ཚོང་འདུས་ནས་བཞིན་གྱིས་རྙེད་པའི་ཤ་དང་ཁྲག་བྱིན་ཅིག །ལྷ་བདག་ཅག་ནི་མོད་ལ་བ་ཀུམ་པའི་ཤ་དང་ཁྲག་འཚལ་ན་མོད་ལ་བཀུམ་པའི་ཤ་དང་ཁྲག་གིས་རྗེས་སུ་གཟུང་དུ་གསོལ། རྒྱལ་པོས་བསམས་པ། སེམས་ཅན་གཞན་ལ་གནོད་པ་མ་བྱས་པར་ནི་མོད་ལ་བསད་པའི་ཤ་དང་ཁྲག་ག་ལ་རྙེད་ཀྱིས། ཅི་ནས་ཀྱང་འདི་རྣམས་ལ་བདག་གིས་རང་གི་ཁྲག་སྦྱིན་བར་བྱའོ་སྙམ་སྟེ། དེ་ནས་དཔྱད་མཁན་རྣམས་བཀུག་ནས་སྨྲས་པ། ཤེས་ལྡན་དག་ངའི་ཡན་ལག་གི་རྩ་ཐམས་ཅད་ཆོད་ཅིག་དང་སློང་མོ་བའི་སྐྱེ་བོ་ཚིམ་པར་བྱའོ། །དཔྱད་མཁན་གྱིས་སྨྲས་པ། ལྷ་མི་ཕལ་པ་རྣམས་ཀྱི་ཕྱིར་བདག་ཅག་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་ནི་བཟོའ་གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་པས་ངེས་རང་ཉིད་ཀྱི་ཡན་ལག་ལྔ་མཚོན་གྱིས་གཏར་ཏེ། དེ་ནས་རང་གི་ཁྲག་གིས་ཚིམ་པར་བྱས་ནས་དེ་རྣམས་ལ་དེ་ལྟ་བུའི་ཆོས་བཤད་དེ། གང་ཐོས་པས་གནོད་སྦྱིན་དེ་རྣམས་བརྟུལ་བཞུགས་ལྔའི་གཞི་རྣམས་ལ་བཀོད་དོ། །དགེ་
སློང་དག་ཇི་སྣམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་བྱམས་པའི་སྟོབས་གང་ཡིན་པ་དེ་ནི་ང་ཉིད་ཡིན་ནོ། །མདངས་འཕྲོག་པའི་གནོད་སྦྱིན་ལྔ་པོ་གང་དག་ཡིན་པ་དེ་དག་ནི་ལྔ་སྡེའི་དགེ་སློང་འདི་ཉིད་ཡིན་ཏེ། དེ་ན་ཡང་ངས་འདི་རྣམས་རང་གི་ཁྲག་གིས་ཚིམ་པར་བྱས་ཏེ་བརྟུལ་ཞུགས་ལྔའི་གཞི་རྣམས་ལ་བཀོད་དོ། །ད་ལྟར་ཀྱང་ངས་འདི་རྣམས་དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་དོ། །གང་གི་ཚེ་བཅོམ་ལྡན་འདས་ཀྱིས་ལོ་དྲུག་ཏུ་དཀའ་བ་སྤྱད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་ནས་བཱ་རཱ་ཎ་སཱིར་གཤེགས་ཏེ། ཆོས་ཀྱི་འཁོར་ལོ་བསྐོར་ནས་ལྔ་སྡེ་དང་། ཉེ་ལྔའི་སྡེ་དང་། དྲུག་བཅུའི་ཚོགས་བཟང་པོ་རྣམས་བཏུལ་བས་དགེ་སློང་མང་དུ་གྱུར་བ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན་ཕྲིན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་དགུང་ལོ་དྲུག་ཏུ་དཀའ་བ་སྤྱད་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་སྐུ་ཚེ་གཞན་རྣམས་སུ་ཕྲིན་ལས་བྱས་ཤིང་བསགས་པ་དང་། ཚོགས་རྙེད་པ་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་འབྱོར་བ་དང་ཞེས་བྱ་བ་ནས་སྐྱ་བོ་དང་མི་མང་པོ་ཡོད་པ་ཞེས་བྱ་བའི་བར་དུ་སྟེ། དགེ་སློང་དག་བཻ་བྷི་ཊིང་གའི་གྲོང་ཁྱེར་གྱི་གྲོང་རྔལ་ན་བྲམ་ཟེའི་ཤིང་སཱ་ལ་ཆེན་པོ་ལྟ་བུ་ནྱ་གྲོ་ངྷ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་བྱུང་སྟེ། བཻ་བྷི་ཊིང་གའི་འདུ་ཏང་དང་བཅས། ས་དང་། ཤིང་དང་། ཆུར་བཅས་པར་རྒྱལ་པོ་ཀྲི་ཀིས་བྲམ་ཟེའི་སྦྱིན་པར་བྱིན་ནས་འབྱོར་པ་ན་ཡོངས་སུ་ལོངས་སྤྱོད་དོ། །དགེ་སློང་དག་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་ངྷའི་སློབ་མ་བྲམ་ཟེའི་ཁྱེའུ་བླ་མ་ཞེས་བྱ་བ་ཕ་དང་མའི་རིགས་དང་ལྡན་པ། མོ་ཕྱོགས་
ནས་དག་པ། མེས་པོའི་ཕྱོགས་དང་། ཕྱི་མོའ་ཕྱོགས་ཟུང་བདུན་རྒྱུད་ཀྱིས་བཟུང་སྟེ་རིགས་ལ་གཏམ་གྱི་མ་ཕོག་པ། ཀློག་ཏུ་འཇུག་པ། གསང་ཚིག་འཛིན་པ། རིག་བྱེད་གསུམ་པོ་སྒྲ་ངེས་པར་སྦྱོར་བ་དང་། ཤེས་གསལ་དང་བཅས་པ་དང་། ཡི་གེ་རབ་ཏུ་འབྱེད་བ་དང་བཅས་པ་དང་ལྔ་པོ་དེ་ལྟ་བུ་བྱུང་བ་ཅན་རྣམས་ཀྱི་ཕ་རོལ་དུ་ཕྱིན་ཅིང་ལུང་སྟོན་པར་བྱེད་པ། གཟུགས་བཟང་པོ་བལྟ་ན་སྡུག་པ་མཛེས་པ་ཞིག་ཡོད་དེ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་ངྷའི་བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ །དགེ་སློང་དག་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་ན་རྫ་མཁན་དགའ་སྐྱོང་ཞེས་བྱ་བ་སངས་རྒྱས་ལ་མངོན་པར་དད་པ། ཆོས་དང་དགེ་འདུན་ལ་མངོན་པ་དད་པ། སངས་རྒྱས་ལ་སྐྱབས་སུ་སོང་བ། ཆོས་དག་དགེ་འདུན་ལ་སྐྱབས་སུ་སོང་བ། སངས་རྒྱས་ལ་གཅིག་ཏུ་བྱེད་པ། ཆོས་དང་དགེ་འདུན་ལ་གཅིག་ཏུ་བྱེད་པ། སངས་རྒྱས་ལ་ཡིད་གཉིས་དང་ཐེ་ཚོམ་མེད་པ། ཆོས་དང་དགེ་འདུན་དང་། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་ལ་ཡིད་གཉིས་ཐེ་ཚོམ་མེད་པ། བདེན་པ་མཐོང་བ། འབྲས་བུ་ཐོབ་ཅིང་རྟོགས་པ། ལོ་མ་དང་གཏུན་སྤངས་པ་ཞིག་གནས་ཏེ། གཞན་དུ་ན་དེ་གང་ན་ཆུས་བརྐོས་པའམ། བྱི་བྲུན་མ་གཏོགས་པ་རང་གི་ལག་གིས་ས་མི་རྐོ་ཞིང་བརྐོར་མི་འཇུག་གོ །དེ་ནས་ས་ལུས་ཀྱིས་བླངས་ནས་སྲོག་ཆགས་མེད་པའི་ཆུས་སྤྲུས་ཏེ། སྣོད་རྣམས་བྱས་ཤིང་མཐའ་གཅིག་ཏུ་བཞག་ནས་འདི་སྐད་ཅེས་འཕགས་པ་དག་ཚུར། བཞིན་བཟངས་དག་ཚུར། ཏིལ་ལམ། འབྲས་སམ། མོན་སྲན་སྡེའུ་ལ་སོགས་པའམ། མོན་སྲན་གྲེའུ་ལ་སོགས་པ་མཐའ་གཅིག་ཏུ་ཞོག་ལ་ཁྱེད་ཅག་ལས་གང་ཞིག་སྣོད་གང་དོན་དུ་གཉེར་བ་དེ་ལོང་ལ་དེང་ཤིག་ཅེས་སྨྲས་ཤིང་དེས་དེ་ལས་ཕ་མ་ལོང་བ་གཉིས་གསོ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་དུས་སུ་བསོད་སྙོམས་འབུལ་ལོ། །བྲམ་ཟེའི་ཁྱེའུ་བླ་མའི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ཡང་ཡིན་
ནོ། །དེ་ནས་རྫ་མཁན་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་རྫ་མཁན་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་གིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལགས་ནས་སོང་ངོ་། །དེའི་ཚེ་བྲམ་ཟེའི་ཁྱེའུ་བླ་མ་ཤིང་རྟ་ཐམས་ཅད་ནས་དཀར་བ་རྟ་རྒོད་མ་དང་ལྡན་པའི་ནང་དུ་ཞུགས། གསེར་གྱི་ཁར་བ་དང་རིལ་བ་ཐོགས་ཏེ། བྲམ་ཟེའི་ཁྱེའུའི་ཚོགས་ཀྱིས་ཡོངས་སུ་བསྐོར་ཅིང་བྲམ་ཟེའི་ཁྱེའུའི་ཚོགས་ཀྱིས་མདུན་གྱིས་བལྟས་ཏེ། བཻ་བྷི་ཊིང་གའི་ཕྱི་རོལ་དུ་བྲམ་ཟེའི་ཁྱེའུ་རྣམས་གསང་ཚིག་ཀློག་ཏུ་གཞུག་པར་འདོད་ནས་བཻ་བྷི་ཊིང་གནས་བྱུང་བ་དང་བྲམ་ཟེའི་ཁྱེའུ་བླ་མས་རྫ་མཁན་དགའ་སྐྱོང་། རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་གང་ནས་འདིར་འོངས། དེས་པ་བླ་མ་བདག་ནི་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱས་ནས་ད་གཟོད་འདིར་འོངས་ཀྱིས། དེས་པ་བླ་མ་ཚུར། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །དེས་པ་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལྟ་བ་ཐོང་ཤིག །བསྙེན་བཀུར་བྱ་བ་ཐོང་ཤིག །དེ་ཅིའི་ཕྱིར་ཞེ་ན། དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ། །དེས་པ་བླ་མ་ཁྱོད་འདི་སྐད་ཅེས་དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད།
བྱང་ཆུབ་ནི་མཆོག་ཏུ་དཀའ་བ་ཡིན་ནོ་ཞེས་མ་སྨྲ་ཤིག །འདི་ལྟར་བཅོམ་ལྡན་འདས་དེ་ཉིད་སངས་རྒྱས་ཡིན་ཏེ། དེས་ཆོས་ཐམས་ཅད་སངས་རྒྱས་སོ། །རྫ་མཁན་དགའ་སྐྱོང་གིས་ལན་གཉིས་ལན་གསུམ་དུ་ཡང་བྲམ་ཟེའི་ཁྱེའུ་བླ་མ་ལ་འདི་སྐད་ཅེས་སྨྲས་སོ། །དེས་པ་བླ་མ་ཚུར། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །བྲམ་ཟེའི་ཁྱེའུ་བླ་མས་ལན་གཉིས་ལན་གསུམ་དུ་ཡང་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལྟ་བ་ཐོང་ཤིག །བསྙེན་བཀུར་བྱ་བ་མཐོང་ཤིག །དེ་ཅིའི་ཕྱིར་ཞེ་ན། དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད། །བྱང་ཆུབ་ནི་མཆོག་ཏུ་དཀའ་བ་ཡིན་ནོ། །དེས་པ་བླ་མ་ཁྱོད་འདི་སྐད་ཅེས་དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ་ཞེས་མ་སྨྲ་ཤིག །འདི་ལྟར་བཅོམ་ལྡན་འདས་དེ་ཉིད་སངས་རྒྱས་ཡིན་ཏེ། དེས་ཆོས་ཐམས་ཅད་སངས་རྒྱས་སོ། །དེ་ནས་རྫ་མཁན་དགའ་སྐྱོང་གི་བྲམ་ཟེའི་ཁྱེའུ་བླ་མའི་ཤིང་རྟའི་ནང་དུ་འཛེགས་ནས་བྲམ་ཟེའི་ཁྱེའུ་བླ་མའི་སྐྲ་ལས་བཟུང་སྟེ། བྲམ་ཟེའི་ཁྱེའུ་བླ་མ་ལ་འདི་སྐད་ཅེས་སྨྲས་སོ། །དེས་པ་བླ་མཚུར། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །དེ་ནས་བྲམ་ཟེའི་ཁྱེའུ་བླ་མ་འདི་སྙམ་དུ་སེམས་ཏེ། ཀྱེ་མ་སངས་རྒྱས་མཆོག་མ་ཡིན་པ་ཡང་མ་ཡིན་ཞིང་ཆོས་བཤད་པ་ཡང་མཆོག་མ་ཡིན་པ་མ་ཡིན་ཏེ། དེས་ན་ད་ལྟར་རྫ་མཁན་དགའ་སྐྱོང་ཡུན་རིང་པོ་ནས་ཁྲོ་བ་མ་ཡིན། གཏུམ་པ་མ་ཡིན། བརླང་བ་མ་ཡིན། གཟུ་ལུམས་ཅན་མ་ཡིན་པ་དེས་ཀྱང་སྐྲ་ལས་བཟུང་བ་ཡན་ཆད་བྱས་སོ་སྙམ་དུ་བསམས་ནས་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་དེ་ཙམ་བྱ་བ་ལ་ཐུག་གམ། དེས་པ་བླ་མ་དེ་ཙམ་བྱ་བ་ལ་ཐུག་ཅེས་སོ། །དེས་བ་དགའ་སྐྱོང་
ཅི་དེ་ཙམ་བྱ་བ་ལ་ཐུག་གམ། དེས་པ་བླ་མ་དེ་ཙམ་བྱ་བ་ལ་ཧ་ཅང་ཐུག་ཅེས་སོ། །དེས་པ་དགའ་སྐྱོད་དེའི་ཕྱིར་ཐོང་ཤིག་དང་། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །དེ་ནས་བྲམ་ཟེའི་ཁྱེའུ་བླ་མ་དང་རྫ་མཁན་དགའ་སྐྱོང་ཤིང་རྟ་གཅིག་གི་ནང་དུ་ཞུགས་ནས་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་དོང་སྟེ། དེ་གཉིས་ཀྱིས་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་ཡང་དག་པར་རྫོགས་པའི་སངས་རྒྱས་འོང་སྲུང་གདན་བ་དེར་དོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་རྫ་མཁན་དགའ་སྐྱོང་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལ་འདི་སྐད་ཅེས་གསོལ་ཏོ། །བཙུན་པ་བྲམ་ཟེའི་ཁྱེའུ་བླ་མ་འདི་ནི་སངས་རྒྱས་ལ་མངོན་པར་མ་དད། ཆོས་དང་དགེ་འདུན་ལ་མངོན་པར་མ་དད་ལགས་ཀྱིས། །བཅོམ་ལྡན་འདས་ཇི་ལྟར་བྲམ་ཟེའི་ཁྱེའུ་བླ་མ་འདི་སངས་རྒྱས་ལ་མངོན་པར་དད་པ་དང་། ཆོས་དང་དགེ་འདུན་ལ་མངོན་པར་དད་པར་འགྱུར་བ་དེ་ལྟ་བུའི་ཆོས་ལེགས་པར་བཤད་དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཅང་མི་གསུང་བས་གནང་ངོ་། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་བྲམ་ཟེའི་ཁྱེའུ་བླ་མས་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ལེགས་པར་གསུངས་པའི་ཆོས་འདུལ་བ་གྱ་ནོམ་པ་འདི་ལྟ་བུ་ཐོས་ན་ཁྱོད་དང་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་ཅིའི་ཕྱིར་རབ་ཏུ་མ་བྱུང་།
དེས་པ་བླ་མ་ཇི་ལྟར་ཁོ་བོ་ཕ་མ་ལོང་བ་གཉིས་གསོ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་སུ་བསོད་སྙོམས་འབུལ་བར་ཁྱོད་མི་ཤེས་སམ། དེས་པ་དགའ་སྐྱོང་ཁྱོད་རབ་ཏུ་བྱུང་ཡང་རུང་མ་བྱུང་ཡང་རུང་། རེ་ཞིག་ཁོ་བོ་ནི་རབ་ཏུ་འབྱུང་ངོ་། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྫ་མཁན་དགའ་སྐྱོང་གིས་འདི་སྐད་ཅེས་གསོལ་ཏོ། །བཙུན་པ་བྲམ་ཟེའི་ཁྱེའུ་བླ་མ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ། དེ་རབ་ཏུ་དབྱུང་བ་དང་བསྙེན་པར་རྫོགས་པར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཅང་མི་གསུང་བས་གནང་ངོ་། །དེ་ནས་རྫ་མཁན་དགའ་སྐྱོང་གིས་ཡང་དག་པར་རྫོགས་པའི་སངས་རྒྱས་འོད་སྲུང་ཅང་མི་གསུང་བས་གནང་བར་རིག་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་སྟན་ལས་ལངས་ནས་སོང་ངོ་། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་སོང་ནས་རིང་པོ་མ་ལོན་པར་ཐུགས་སུ་ཆུད་ནས་བྲམ་ཟེའི་ཁྱེའུ་བླ་མ་རབ་ཏུ་ཕྱུང་བསྙེན་པར་རྫོགས་པར་མཛད་དེ། བཻ་བྷི་ཊིང་གར་ཇི་ཙམ་བཞེད་ཀྱི་བར་དུ་བཞུགས་ནས་བཱ་རཱ་ཎ་སཱི་ཀ་ཤི་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་བཱ་རཱ་ཎ་སཱིར་བྱོན་ནས་བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ། །རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་ཀ་ཤི་ནས་ལྗོངས་རྒྱུ་ཞིང་གཤེགས་པ་དང་། བཱ་རཱ་ཎ་སཱིར་བྱོན་ནས། བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་བཱ་རཱ་ཎ་སཱི་ནས་བྱུང་སྟེ། ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་སོང་ནས་ཕྱིན་པ་དང་། ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་
གཅིག་ཏུ་འདུག་པ་དང་། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་རྒྱལ་པོ་ཀྲི་ཀི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། །ཡང་དག་པར་རྫོགས་པའི་སངས་རྒྱས་འོད་སྲུང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་རྒྱལ་པོ་ཀྲི་ཀི་ལ་ཅང་མི་གསུང་བས་གནང་ངོ་། དེ་ནས་རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་ཅང་མི་གསུང་བས་གནང་བར་རིག་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ནས་སླ་ལས་ལངས་ཏེ་སོང་ངོ་། དེ་ནས་རྒྱལ་པོ་ཀྲི་ཀིས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་པར་སྔ་ལངས་ཏེ་གདན་བཤམས་ནོར་བུའི་ཆུ་སྣོད་བཞག་ནས། ཡང་དག་པར་རྫོགས་པའི་སངས་རྒྱས་འོད་སྲུང་ལ་སྤྱན་འདྲེན་གྱིས་དུས་ཚོད་གསོལ་པ། བཙུན་པ་གདུགས་ཚོད་ལགས་ཏེ། བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་སྔ་དྲོན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ་དགེ་སློག་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་ཚོགས་ཀྱིས་མདུན་དུ་བདར་ནས། རྒྱལ་པོ་ཀྲི་ཀིའི་བཀད་ས་གང་ན་བདེར་གཤེགས་ཏེ་བྱོན་ནས་
དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཀྲི་ཀིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས་ཞལ་ཟས་གསོལ་ཟིན་ཏེ། ཕྱག་བཅབས་ལྷུང་བཟེད་གྱུ་བར་རིག་ནས་གསེར་གྱི་བྱ་མ་བུམ་བླངས་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་གསོལ་བ་བཏབ་པ། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་བདག་གིས་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་དང་། བཅོམ་ལྡན་འདས་ཀྱི་སླད་དུ་གཙུག་ལག་ཁང་ལྔ་བརྒྱ་རྩིག་ཏུ་སྩལ་ཅིང་ཁྲི་དང་། ཁྲིའུ་དང་། ལ་བ་དང་། སྟན་ནང་ཚངས་ཅན་དང་། དབུ་རྟེན་དང་། གོར་བུ་ལྔ་བརྒྱ་འཇོག་ཏུ་སྩལ་ཅིང་། འབྲས་སོག་མའི་སྦུབས་སུ་སྨིན་པ་དེ་ལྟ་བུས་བཅོམ་ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་བགྱིད་ལགས་ན་གནང་བར་མཛད་དུ་གསོལ། རྒྱལ་པོ་ཆེན་པོ་སེམས་མངོན་པར་དད་པ་དེ་ཉིད་ཀྱིས་བྱས་པ་ཡིན་གྱིས་ཆོག་གོ །ཡང་དག་པར་རྫོགས་པའི་སངས་རྒྱས་འོད་སྲུང་ལ་རྒྱལ་པོ་ཀྲི་ཀིས་ལན་གཉིས་ལན་གསུམ་དུ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་བདག་གིས་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་དང་། བཅོམ་ལྡན་འདས་ཀྱི་སླད་དུ་གཙུག་ལག་ཁང་ལྔ་བརྒྱ་རྩིག་ཏུ་སྩལ་ཅིང་། ཁྲི་དང་། ཁྲིའུ་དང་། ལ་བ་དང་། སྟན་ནང་ཚངས་ཅན་དང་། དབུ་རྟེན་དང་། གོར་བུ་ལྔ་བརྒྱ་ལྔ་བརྒྱ་འཇོག་ཏུ་སྩལ་ཅིང་། འབྲས་སོག་མའི་སྦུབས་སུ་སྨིན་པ་དེ་ལྟ་བུས་བཅོམ་ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་
བགྱིད་ལགས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་ལན་གཉིས་ལན་གསུམ་དུ་ཡང་རྒྱལ་པོ་ཀྲི་ཀི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་སེམས་མངོན་པར་དད་པར་བྱས་པ་གང་ཡིན་པ་དེ་ཉིད་ཀྱིས་བྱས་ཟིན་པས་ཆོག་གོ །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྒྱལ་པོ་ཀྲི་ཀིས་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་རིམ་གྲོ་བགྱིད་པ་དཔེར་ན་ད་ལྟར་གྱི་བདག་འདྲ་བ་གཞན་ཞིག་མཆིས་ལགས་སམ། རྒྱལ་པོ་ཆེན་པོ་ཡོད་དེ། །ཁྱོད་ཀྱི་ཡུལ་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་དེ་ན་རྫ་མཁན་དགའ་སྐྱོང་ཞེས་བྱ་བ་སངས་རྒྱས་ལ་མངོན་པར་དད་པ། ཆོས་དང་དགེ་འདུན་ལ་མངོན་པར་དད་པ། སངས་རྒྱས་ལ་སྐྱབས་སུ་སོང་བ། ཆོས་དང་དགེ་འདུན་ལ་སྐྱབས་སུ་སོང་བ། སངས་རྒྱས་ལ་གཅིག་ཏུ་བྱེད་པ། ཆོས་དང་དགེ་འདུན་ལ་གཅིག་ཏུ་བྱེད་པ། སངས་རྒྱས་ལ་ཡིད་གཉིས་དང་ཐེ་ཚོམ་མེད་པ། ཆོས་དང་། དགེ་འདུན་དང་། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་ལ་ཡིད་གཉིས་དང་ཐེ་ཚོམ་མེད་པ། བདེན་པ་མཐོང་བ། འབྲས་བུ་ཐོབ་ཅིང་རྟོགས་པ། ལོ་མ་དང་གཏུན་སྤངས་པ་ཞིག་གནས་ཏེ། དེ་གཞན་དུན་ཆུས་བརྐོས་པའམ། བྱི་བྲུན་མ་གཏོགས་པར་རང་གི་ལག་གིས་ས་མི་རྐོ་ཞིང་བརྐོར་མི་འཇུག་གོ །དེ་ནས་ས་ལུས་ཀྱིས་བླངས་ནས་སྲོག་ཆགས་མེད་པའི་ཆུས་སྦྲུས་ཏེ། སྣོད་རྣམས་བྱས་ཤིང་མཐའ་གཅིག་ཏུ་བཞག་ནས་འདི་སྐད་ཅེས། འཕགས་པ་དག་ཚུར། བཞིན་བཟངས་དག་ཚུར། ཏིལ་ལམ། འབྲས་སམ། མོན་སྲན་སྡེའུ་ལ་སོགས་པའམ། མོན་སྲན་གྲེའུ་ལ་སོགས་པ་མཐའ་གཅིག་ཏུ་ཞོག་ལ། ཁྱེད་གང་ཞིག་སྣོས་གང་དོན་དུ་གཉེར་བ་དེ་དེས་ལོང་ལ་དེང་ཤིག་ཅེས་སྨྲ་ཞིང་། དེས་དེ་ལས་ཕ་མ་ལོང་བ་གཉིས་གསོ་བ་དང་། ང་ལ་ཡང་དུས་སུ་བསོད་སྙོམས་འབུལ་བར་བྱེད་དོ། །རྒྱལ་པོ་ཆེན་པོ་ང་དུས་གཅིག་གཅིག་ན་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་ན་ཉེ་བར་རྟེན་ཅིང་བཞུགས་པ་ན་སྔ་དྲོན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་དུ་བསོད་སྙོམས་ལ་ཞུགས་ཏེ། རིམ་
གྱིས་བསོད་སྙོམས་ལ་རྒྱུ་བ་ན་རྫ་མཁན་དགའ་སྐྱོང་གི་ཁྱིམ་གང་ན་བ་དེར་གཤེགས་ཏེ་བྱོན་ནས་སྒོ་འཕར་ལ་མི་དྲག་པར་དལ་བུས་བརྡབས་པ་དང་། དེའི་ཚེ་རྫ་མཁན་དགའ་སྐྱོང་ནི་དགོས་པ་འགའ་ཞིག་གི་ཕྱི་རོལ་དུ་སོང་བར་གྱུར་ནས། རྫ་མཁན་དགའ་སྐྱོང་གི་ཕ་མས་སྒོ་འཕར་བརྡབས་པའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྒོ་འཕར་ལ་མི་དྲག་པ་དལ་བུ་དལ་བུས་རྡེབས་པའི་འཕགས་པ་དེ་སུ་ཞིག །བཞིན་བཟངས་དེ་སུ་ཞིག་ཅེས་སྨྲས་སོ། །ངས་དེ་གཉིས་ལ་འདི་སྐད་ཅེས་བཀའ་སྩལ་ཏོ། །ང་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཡིན་ཏེ་བསོད་སྙོམས་བཞེད་དོ། །དེ་གཉིས་ཀྱིས་འདི་སྐད་ཅེས་སྨྲས་སོ། །འཕགས་པ་ནང་དུ་སྤྱོན་ཅིག །བཞིན་བཟངས་དག་ནང་དུ་སྤྱོན་ཅིག །ཕྲུ་བ་འདི་རྣམས་ན་བཤོས་དྲོན་པོ་དང་། རྫེའུ་ན་སྲན་ཚོད་མཆིས་མོད་ཀྱི་ཁྱོད་ལ་བསྙེན་བཀུར་བགྱིད་པ་ནི་སླད་རོལ་དུ་མཆིས་ལགས་ཀྱིས། གལ་ཏེ་བཞེད་ན་ཉིད་ཀྱིས་བཞེས་ཏེ་ཡོངས་སུ་ལོངས་སྤྱད་དུ་གསོལ། །རྒྱལ་པོ་ཆེན་པོ་ངས་བྱང་གི་སྒྲ་མི་སྙན་གྱི་དུས་བྱིན་གྱིས་བརླབས་ནས་ཉིད་ཁོ་ནས་ཕྲུ་བའི་ནང་ནས་ཟན་དྲོན་དང་། རྫེའུ་ན་སྲན་ཚོད་ཡོད་པ་བླངས་ནས་ཡོངས་སུ་ལོངས་སྤྱད་དོ། །དེ་ནས་ཕྱི་ཞིག་ནས་རྫ་མཁན་དག་སྐྱོང་འོངས་ནས་རྫ་མཁན་དགའ་སྐྱོང་གིས་ཕྲུ་བའི་ནང་ན་ཟན་དྲོན་དང་། རྫེའུ་ན་སྲན་ཚོད་ཡོད་པ་ཟོས་པར་མཐོང་ངོ་། །མཐོང་ནས་ཀྱང་ཕ་མ་ལོང་བ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་ཕྲུལ་བའི་ནང་ན་ཟན་དྲོན་དང་། རྫེའུ་ན་སྲན་ཆོད་མཆིས་པ་འདི་སུ་ཞིག་གིས་གསོལ། དེ་གཉིས་ཀྱིས་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་སོང་ནས་རིང་པོ་མ་ལོན་པར་འདིར་སྒོ་འཕར་ལ་རྡེབས་པའི་སྒྲ་ཞིག་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །སྒོ་འཕར་ལ་མི་དྲག་པར་དལ་བུ་དལ་བུས་རྡེབས་པའི་འཕགས་པ་དེ་སུ་ཞིག །བཞིན་བཟངས་དེ་སུ་ཞིག །དེས་འདི་སྐད་ཅེས། ང་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཡིན་ཏེ་བསོད་སྙོམས་བཞེད་དོ་ཞེས་གསུངས་ནས་དེ་ལ་འདི་སྐད་ཅེས། འཕགས་པ་ནང་དུ་སྤྱོན་ཅིག །བཞིན་བཟངས་ནང་དུ་སྤྱོན་ཅིག །ཕྲུ་བ་འདིའི་ནང་ན་བཤོས་དྲོན་པོ་དང་། རྫེའུ་ན་སྲན་ཚོད་མཆིས་མོད་
ཀྱི། ཁྱོད་ལ་བསྙེན་བཀུར་བགྱིད་པ་ནི་སླད་རོལ་དུ་མཆིས་ལགས་ཀྱིས་གལ་ཏེ་བཞེད་ན་ཉིད་ཀྱིས་བཞེས་ཏེ་ཡོངས་སུ་ལོངས་སྤྱད་དུ་གསོལ་ཞེས་གསོལ་པ་དང་། དེས་ཕྲུ་བའི་ནང་ན་ཟན་དྲོན་ཡོད་པ་དང་། རྫེའུ་ན་སྲན་ཆོད་ཡོད་པ་དེ་དག་གསོལ་བ་ལྟ་ཞིག །དེ་ནས་རྫ་མཁན་དགའ་སྐྱོང་འདི་སྙམ་དུ་སེམས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་ལེགས་པར་བག་ཕབ་ཅིང་འདྲིས་པར་གྱུར་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་དུ་རིག་ནས་དགའ་བ་དང་བདེ་བ་དེ་ཉིད་ཀྱིས་སྐྱིལ་མོ་ཀྲུང་གཅིག་གིས་ཞག་བདུན་འདས་པར་བྱས་སོ། །ཟླ་བ་ཕྱེད་ཀྱི་བར་དུ་ཡང་དེའི་ལྷན་ཅིག་ལྡན་པའི་དྲན་པ་ལུས་མི་འདོར་ཞིང་དེ་རྟག་ཏུ་ལུས་ལ་བར་ཆད་མེད་པར་གནས་སོ། །ཞག་བདུན་གྱི་བར་དུ་ཕ་མའི་ཕྲུ་བ་ན་ཟན་དྲོན་པོ་ཡོང་པ་དང་། རྫེའུ་ན་སྲན་ཚོད་ཡོད་པ་ཇི་ལྟ་བ་དེ་བཞིན་དུ་ཕྲུ་བ་ན་ཡང་ཟན་དྲོན་ཡོད་ལ། རྫེའུ་ན་ཡང་སྲན་ཚོད་ཡོད་དོ། །རྒྱལ་པོ་ཆེན་པོ་དངུས་གཅིག་ཅིག་ན་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་དུ་ཉེ་བར་བརྟེན་ཏེ་དབྱར་བཞུགས་པར་ཞལ་གྱིས་བཞེས་པ་ལས་ང་ལ་དེར་ཐོག་མར་ལྷས་ཆར་ཕབ་པས་གཙུག་ལག་ཁང་ཟགས་པར་གྱུར་ཏོ། །དེའི་ཚེ་རྫ་མཁན་དགའ་སྐྱོང་གི་ལས་བྱེད་པའི་ཁང་པ་རྩྭ་སར་པས་གཡོགས་སོ། །ངས་དགེ་སློང་ཞབས་འབྲིང་བྱེད་པ་རྣམས་ལ་བཀའ་སྩལ་པ། དགེ་སློག་དག་ཁྱེད་ཅག་དེང་ལ་རྫ་མཁན་དགའ་སྐྱོང་གི་ལས་བྱེད་པའི་ཁང་པ་གཡོགས་པའི་རྩྭས་ར་པ་ཤུས་ལ་ངའི་གཙུག་ལག་ཁང་གཡོགས་ཤིག །དེ་རྣམས་ཀྱིས་བཀའ་བཞིན་འཚལ་ཞེས་ག་ལས་མཉན་ནས་རྫ་མཁན་དགའ་སྐྱོང་གི་ལས་བྱེད་པའི་ཁང་པ་རྩྭ་སར་པས་གཡོགས་པ་འཆུ་བར་བྱེད་དོ། །དེའི་ཚེ་རྫ་མཁན་དགའ་སྐྱོང་དགེ་དགོས་པ་འགའ་ཞིག་གི་ཕྱིར་ཕྱི་རོལ་དུ་སོང་བར་གྱུར་ཏོ། །རྫ་མཁན་དགའ་སྐྱོང་གི་ཕ་མ་ལོང་བས་ལས་ཀྱི་ཁང་པ་ཐོག་འཆུ་བའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །རྫ་མཁན་དགའ་སྐྱོང་གི་ལས་ཀྱི་ཁང་པ་རྩྭ་སར་པས་གཡོགས་པ་འཆུ་བའི་འཕགས་པ་དེ་སུ་ཞིག །བཞིན་བཟངས་དེ་སུ་ཞིག །དེ་རྣམས་ཀྱིས་འདི་སྐད་ཅེས་སྨྲས་སོ། །ཁོ་བོ་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་འབྲིང་བ་དགེ་སློང་རྣམས་ཡིན་ཏེ། ཡང་དག་པར་
རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་དེར་ཐོག་མར་ལྷས་ཆར་ཕབ་པས་ཟགས་པར་གྱུར་ནས། ཁོ་བོ་ཅག་རྫ་མཁན་དགའ་སྐྱོང་གི་ལས་བྱེད་པའི་ཁང་པ་གཡོགས་ཕ་རྩྭ་སར་པ་བཤུས་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་གཡོག་གོ །དེ་རྣམས་ལ་འདི་སྐད་ཅེས་སྨྲས་སོ། །ཁྱེད་ལ་བསྙེན་བཀུར་བགྱིད་པ་ནི་སླད་རོལ་དུ་མཆིས་ལགས་ཀྱིས། འཕགས་པ་དག་སྣོམས་ཤིག །བཞིན་བཟངས་དག་སྣོམས་ཤིག །དེ་རྣམས་ཀྱིས་དེ་བཤུས་ཏེ་ངའི་གཙུག་ལག་ཁང་གཡོགས་སོ།། །།འདུལ་བ་གཞི། བམ་པོ་དགུ་བཅུ་རྩ་བཞི་པ། དེ་ནས་ཕྱི་ནས་རྫ་མཁན་དགའ་སྐྱོང་འོངས་ནས་རྫ་མཁན་དགའ་སྐྱོང་གིས་ལས་ཀྱི་ཁང་པ་གཡོགས་པའི་རྩྭ་སར་པ་བཤུས་པར་མཐོང་ངོ་། །མཐོང་ནས་ཀྱང་ཕ་མ་ལོང་བ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་ལས་ཀྱི་ཁང་པ་གཡོགས་པའི་རྩྭ་སར་པ་དེ་རྣམས་སུ་ཞིག་གིས་བཤུས་ལགས། དེ་གཉིས་ཀྱིས་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་སོང་ནས་རིང་པོ་མ་ལོན་པ་འདིར་ལས་ཀྱི་ཁང་པ་གཡོགས་པའི་རྩྭ་སར་པ་འཆུ་བ་ཐོས་སོ། །ཐོས་ནས་ཀྱང་འདི་སྐད་ཅེས་ལས་ཀྱི་ཁང་པ་གཡོགས་པའི་རྩྭ་སར་པ་འཆུ་བའི་འཕགས་པ་དེ་སུ་ཞིག །བཞིན་བཟངས་དེ་སུ་ཞིག་ཅེས་སྨྲས་པ་དང་། དེ་དག་གིས་འདི་སྐད་ཅེས། ཁོ་བོ་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་འབྲིང་བ་དགེ་སློང་རྣམས་ཡིན་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་དེར་ཐོག་མར་ལྷས་ཆར་ཕབ་པས་ཟགས་པར་གྱུར་ནས་ཁོ་བོ་ཅག་རྫ་མཁན་དགའ་སྐྱོང་གི་ལས་ཀྱི་ཁང་པ་གཡོགས་པའི་རྩྭ་སར་པ་བཤུས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་གཡོག་གོ་ཞེས་སྨྲས་ནས་དེ་དག་ལ་འདི་སྐ་ཅེས། ཁྱེད་ལ་བསྙེན་བཀུར་བགྱིད་བ་ནི་སླད་རོལ་དུ་མཆིས་ལགས་ཀྱི་འཕགས་པ་དག་སྣོམས་ཤིག །བཞིན་བཟངས་དག་སྣོམས་ཤིག་ཅེས་སྨྲས་པས་དེ་རྣམས་ཀྱིས་ལས་ཀྱི་ཁང་པའི་རྩྭ་དེ་དག་བཤུས་པར་གྱུར་གྲང་། དེ་ནས་རྫ་མཁན་དགའ་སྐྱོང་འདི་སྙམ་དུ་སེམས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་
ཤིན་ཏུ་བག་ཕབ་ཅིང་འདྲིས་པར་གྱུར་བ་ནི་བདག་གིས་རྙེད་པ་ལེགས་པར་རྙེད་དོ་སྙམ་དུ་རིག་ནས་དགའ་བ་དང་བདེ་བ་དེ་ཉིད་ཀྱིས་སྐྱིལ་མོ་ཀྲུང་གཅིག་གིས་ཞག་བདུན་འདས་པར་བྱས་སོ། །ཟླ་བ་ཕྱེད་ཀྱི་བར་དུ་ཡང་དེའི་ལྷན་ཅིག་ལྡན་པའི་དྲན་པ་རྟག་ཏུ་ལུས་ལས་མ་འདོར་ཞིང་། ཞག་བདུན་དུ་ཕ་དང་མའི་ལུས་ལ་ཡང་དེ་བར་ཆད་མེད་པར་འདུག་གོ །དབྱར་གྱི་གནས་དེར་རྫ་མཁན་དགའ་སྐྱོང་གི་ལས་བྱེད་པའི་ཁང་པ་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་ཆར་ཐིགས་པ་གཅིག་ཀྱང་མ་བབ་པོ། །རྒྱལ་པོ་ཆེན་པོ་ཁྱོད་ནི་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཟླ་བ་གསུམ་དུ་བདག་གིས་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་འབུལ་ན་གནང་ངོ་ཞེས་སེམས་གཞན་དུ་འགྱུར་གྱི། རྫ་མཁན་དགའ་སྐྱོང་ནི་ལས་བྱེད་པའི་ཁང་པ་གཡོགས་པའི་རྩྭ་སར་པ་བཤུས་ཀྱང་སེམས་གཞན་དུ་མ་གྱུར་ཏོ། །བཙུན་པ་རྫ་མཁན་དགའ་སྐྱོང་གིས་ནི་རྙེད་པ་ལེགས་པར་རྙེད་དེ། བཅོམ་ལྡན་འདས་ཀྱིས་དེའི་སྡུམ་པར་ཤིན་ཏུ་བག་ཕབ་ཅིང་འདྲིས་པར་མཛད་ལགས་སོ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀིའི་སྦྱིན་པ་དེ་ལ་རྗེས་སུ་ཡི་རང་བ་འདིས་རྗེས་སུ་ཡི་རང་བར་མཛད་དེ། །སྦྱིན་སྲེག་མཆོད་སྦྱིན་རྣམས་ཀྱི་མཆོག །སྡེབ་སྦྱོར་མཆོག་ནི་ཉི་མའི་ལྷ། །མི་ཡི་མཆོག་ནི་རྒྱལ་པོ་སྟེ། །རྒྱ་མཚོ་ཆུ་བོ་རྣམས་ཀྱི་མཆོག །ཟླ་བ་རྒྱུ་སྐད་རྣམས་ཀྱི་གཙོ། །ཉི་མ་སྣང་བྱེད་རྣམས་ཀྱི་གཙོ། །སྟེང་དང་འོག་དང་ཐར་ཀར་ཡང་། །འགྲོ་བའི་འགྲོ་བ་ཇི་སྙེད་པ། །ལྷ་དང་བཅས་པའི་འཇིག་རྟེན་ན། །སྨྲ་བའི་མཆོག་ནི་རྫོགས་སངས་རྒྱས། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོང་པར་མཛད། ཡང་དག་པར་
རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་གཤེགས་ནས་རིང་པོ་མ་ལོན་པར་ཤེས་ནས་མི་ཞིག་ལ་སྨྲས་པ། །ཀྱེ་ནང་རྗེ་ཚུར་ཤོག །ཁྱོད་ཀྱིས་འབྲས་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་ཁོང་ལ་རྫ་མཁན་དགའ་སྐྱོང་གང་ན་བ་དེར་སོང་སྟེ་ཕྱིན་ནས་རྫ་མཁན་དགའ་སྐྱོང་ལ་འདི་སྐད་ཅེས། དེས་པ་དགའ་སྐྱོང་ཁྱོད་ལ་རྒྱལ་པོ་ཀྲི་ཀིས་འབྲས་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་པོ་བསྐུར་བ་འདི་དག་ཡིན་གྱིས། དེ་ལས་ཁྱོད་བདག་ཉིད་དང་ཁྱོད་ཉིད་ཀྱི་ཕ་མ་ཡང་དག་པའི་བདེ་བས་ཚིམ་པར་བྱ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་ཡང་དུས་སུ་བསོད་སྙོམས་ཕུལ་ཅིག་ཅེས་གསུང་ངོ་ཞེས་སྨྲོས་ཤིག །ལྷ་བཀའ་བཞིན་འཚལ་ལོ་ཞེས་མི་དེས་རྒྱལ་པོ་ཀྲི་ཀི་ལས་མཉན་ནས་འབྲས་སོག་མའི་སྦུབས་སུ་སྨིན་པས་ཤིང་རྟ་ལྔ་བརྒྱ་ཙམ་བཀང་སྟེ། རྫ་མཁན་དགའ་སྐྱོང་གང་ན་བ་དེར་སོང་ནས་ཕྱིན་པ་དང་། རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་ལ་རྒྱལ་པོ་ཀྲི་ཀིས་འབྲས་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་པོ་བསྐུར་བ་འདི་དག་ཡིན་གྱིས། དེ་ལས་ཁྱོད་བདག་ཉིད་དང་ཁྱོད་ཀྱི་ཕ་མ་ཡང་དག་པའི་བདེ་བས་ཚིམ་པར་བྱ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་ཡང་དུས་དུས་སུ་བསོད་སྙོམས་ཕུལ་ཅིག་ཅེས་གསུང་ངོ་། །ཀྱེ་ནང་རྗེ་རྒྱལ་པོ་རྣམས་ནི་བྱ་བ་སྒྲུབ་པ་མང་པོ་ཞེས་སྨྲས་ནས་ལེན་དུ་མ་བཏུབ་བོ། །དགེ་སློང་དག་འདི་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་བླ་མ་གང་ཡིན་པ་དེ་ནི་ང་ཡིན་ཏེ། ངས་དགེ་སྦྱོང་མགོ་རེག་དེ་ལ་བྱང་ཆུབ་གལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ་ཞེས་ཡང་དག་པར་རྫོགས་པའི་སངས་རྒྱས་འོད་སྲུང་ལ་ངག་རྩུབ་པོ་ཕྱུང་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་ད་ལྟར་ངས་དཀའ་བ་ལོ་དྲུག་སྤྱད་དོ། །གལ་ཏེ་ངས་བྱང་ཆུབ་ལ་སྐུར་པ་བཏབ་པར་གྱུར་ན་སླར་ཡང་ངས་བྱང་ཆུབ་ཀྱི་ཆེད་དུ་བསྐལ་པ་གྲངས་མེད་པ་གསུམ་དུ་བདག་ཉིད་དུབ་པར་བྱས་པར་འགྱུར་རོ། །དགེ་སློང་དག་ཁྱེད་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་
གཅིག་ཏུ་གནག་པ་ཡིན་ལ་ཞེས་བྱ་བ་ནས་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །གང་གི་ཉི་མ་ལ་བྱང་ཆུབ་སེམས་དཔའ་ཕྱིར་བྱུང་བ་དེ་ཉིད་ཀྱི་ཉི་མ་ལ་གྲགས་འཛིན་མ་སེམས་ཅན་དང་ལྡན་པར་གྱུར་ཏོ། །གང་གི་ཚེ་བྱང་ཆུབ་སེམས་དཔའ་དཀའ་བ་སྤྱད་པ་དེའི་ཚེ་བཙུན་མོ་ཡང་དཀའ་བ་སྤྱད་པ་ལ་ཞུགས་པས་གྲགས་འཛིན་མ་མངལ་ཞུམ་པར་གྱུར་ཏོ། །གང་གི་ཚེ་བཅོམ་ལྡན་འདས་ཀྱིས་དཀའ་བ་སྤྱད་པ་དོན་མེད་པར་ཐུགས་སུ་ཆུད་ནས་ཅི་བདེར་དབུགས་འབྱིན་པ་དང་། ཅི་བདེར་དབུགས་རྡུབ་པ་དང་། འབྲས་ཆན་དང་ཟན་དྲོན་གྱི་ཞལ་ཟས་མང་པོ་གསོལ་ཞིང་། མར་དག་ཏིལ་མར་གྱིས་སྐུ་བྱུགས་ནས་ཆུ་འཇམ་པོས་སྐུ་འཁྲུ་བར་མཛད་པ་དེའི་ཚེ་བཙུན་མོ་ཡང་ཅི་བདེར་དབུགས་འབྱིན་པ་དང་། ཅི་བདེར་དབུགས་རྡུབ་པ་དང་། འབྲས་ཆན་དང་ཟན་དྲོན་གྱི་ཁ་ཟས་མང་པོ་ཟ་ཞིང་། མར་དང་ཏིལ་མར་གྱིས་ལུས་བྱུགས་ནས་ཆུ་འཇམ་པོས་ལུས་འཁྲུ་བར་བྱེད་པ་དེའི་ཚེ་མངལ་དེ་ཡང་སླར་རྒྱས་པར་གྱུར་ཏོ། །དེའི་མངལ་གྱི་མཚན་མ་སྐྱེས་པར་གྱུར་པ་དང་། ཤཱཀྱ་རྣམས་ཀྱིས་ཅོ་དྲི་བ་དང་བཅས་པར་སྨྲས་པ། བྱང་ཆུབ་སེམས་དཔའ་དཀའ་ཐུབ་ཀྱི་ནགས་སུ་བཞུང་ནས་ཁྱོད་ཀྱིས་བྱི་ཕྱིན་ཏོ། །དེས་སྨྲས་པ། ཁོ་མོའ་སྡིག་པ་ཞི་བས་བྱི་མ་ཕྱིན་ཏོ། །ཇི་མངོན་ཁྱོད་ཡིད་ཆེས་པར་བྱའོ། །ཇི་ཙམ་ཞིག་ན་དེ་ཁྱེའུ་ཞིག་བཙས་ཏེ། དེ་ཉི་མ་གང་ལ་བཙས་པའི་ཉི་མ་དེ་ཉིད་ལ་ཟླ་བ་སྒྲ་ཅན་གྱིས་ཟིན་ཏོ། །དེ་བཙས་པའི་བཙས་སྟོན་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེའི་ཉེ་དུ་རྣམས་ཀྱིས་སྨྲས་པ། འདི་བཙས་པ་ན་ཟླ་བ་སྒྲ་ཅན་གྱིས་ཟིན་པས་དེ་བསན་ཁྱེའུའི་མིང་ནི་སྒྲ་ཅན་ཟིན་དུ་གདགས་སོ་ཞེས་བཏགས་སོ། །གཞོན་ནུ་བཙས་པ་ན་ཤཱཀྱ་རྣམས་ཡང་དང་ཡང་དུ་གླེང་བ་ཁོ་ནར་བྱེད་ནས། དེས་བདེན་པ་གསོལ་བ་བྱས་ཏེ། སྒྲ་ཅན་ཟིན་བཟང་པོ་བྱང་ཆུབ་སེམས་དཔའི་བང་ཚད་ཀྱི་རྡོལ་ཞོན་ནས་རོལ་པ་རྫིང་གི་ནང་དུ་བཅུག་སྟེ། གལ་ཏེ་འདི་བྱང་ཆུབ་སེམས་དཔའ་ལས་སྐྱེས་པ་ཡིན་ན་འཕྱོ་བར་གྱུར་ཅིག་ཅེས་དེ་བཅུག་པ་དང་། དེ་ཕ་རོལ་དུ་བྱུང་ངོ་། །དེས་ཕ་རོལ་ནས་ཚུ་རོལ་དུ་འོང་བར་གྱུར་ཅིག་ཅེས་སྨྲས་པ་དང་།
དེ་ཕ་རོལ་ནས་ཚུ་རོལ་དུ་འོངས་ནས་དེ་རྣམས་ངོ་མཚར་སྐྱེས་པར་གྱུར་ཏོ། །གྲགས་འཛིན་མས་སྨྲས་པ། ཤེས་ལྡན་དག་ཇི་ལྟར་བྱང་ཆུབ་སེམས་དཔའ་ལས་སྐྱེས་པ་ཡིན་ཞིང་ཁོ་མོས་བྱི་མ་ཕྱིན་པར་ཡང་ཡིད་ཆེས་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ལོ་དྲུག་གིས་མངོན་པར་རྫོགས་པར་སངས་རྒྱས་ཏེ་ལོ་བཅུ་གཉིས་འདས་པ་ན་སེར་སྐྱའི་གཞིར་བྱོན་ནས་ཉི་མ་གཅིག་ནི་རྒྱལ་པོའི་ཕོ་བྲང་དུ་གདུགས་ཚོད་གསོལ། ཉི་མ་གཅིག་ནི་བཙུན་མོའ་ནང་དུ་གསོལ་བ་དེའི་ཚེ་གྲགས་འཛིན་མ་འདི་སྙམ་དུ་སེམས་ཏེ། གང་གིས་ན་བཅོམ་ལྡན་འདས་བདག་གིས་དབང་དུ་འགྱུར་བའི་ཐབས་ལེགས་པ་ཅི་ཞིག་ཡོད་སྙམ་མོ། །སེར་སྐྱའི་གཞིན་ཀུན་དུ་རྒྱུ་མོ་དབང་དུ་བྱ་བ་ལ་སོགས་པ་ལས་རྣམས་ལ་ཤིན་ཏུ་མཁས་པ་ཞིག་ཡོད་དེ། གྲགས་འཛིན་མས་དེ་ལ་ཀཱ་རཱ་ཥ་པ་ཎ་ལྔ་བརྒྱ་བྱིན་ནས་ཆེ་ཞེ་ཀཱ་རཱ་ཥ་པ་ཎ་འདི་རྣམས་ལས་དབང་དུ་བྱ་བ་བྱོས་ལ་སྐུར་ཅིག །དེས་དབང་དུ་བྱ་བའི་ལ་དུ་ཞིག་གྲགས་འཛིན་མ་ལ་བསྐུར་བ་དང་། གྲགས་འཛིན་མས་སྒྲ་ཅན་ཟིན་གྱི་ལག་ཏུ་བྱིན་ནས་སྨྲས་པ། བུ་ཁྱོད་ཀྱི་ཡབ་གང་ཡིན་པ་དེ་ལ་ཕུལ་ཅིག །སངས་རྒྱས་བཅོམ་ལྡན་འདས་རྣམས་ཀྱིས་དེ་ལྟ་བུ་མི་མཁྱེན་པ་དང་། མི་གཟིགས་པ་དང་། ཐུགས་སུ་མི་ཆུད་པ་དང་། རྣམ་པར་མི་རིག་པ་ཅི་ཡང་མི་མངའ་བས་བཅོམ་ལྡན་འདས་ཀྱིས་དགོངས་པ། གྲགས་འཛིན་མ་ལ་མི་སྙན་པ་གྲག་གིས་དེ་སྤང་བར་བྱའོ་སྙམ་ནས་བཅོམ་ལྡན་འདས་ཀྱིས་སངས་རྒྱས་ལྔ་བརྒྱ་སྤྲུལ་པ་དང་། སྒྲ་ཅན་ཟིན་གྱིས་སངས་རྒྱས་ཐམས་ཅད་ལ་བརྟགས་ནས་བཅོམ་ལྡན་འདས་རྒན་པའི་ངང་ལས་བཞུགས་པ་ལ་ཕུལ་ལོ། །བཅོམ་ལྡན་འདས་ཀྱིས་བཞེས་ནས་སླར་ཡང་དེ་ལ་བྱིན་ཏེ་སྒྲ་ཅན་ཟིན་གྱིས་ཟོས་སོ། །བཅོམ་ལྡན་འདས་ཀྱིས་ཡོན་ཏན་བསྔོ་བ་མཛད་ནས་གཤེགས་པ་དང་། བཅོམ་ལྡན་འདས་ཀྱི་རྗེས་བཞིན་གཞོན་ནུ་སྒྲ་ཅན་ཟིན་བཟང་པོ་འབྲང་ནས་སླར་བཟློག་ཀྱང་དུས་ཏེ་སླར་ལྡོག་ཏུ་མ་བཏུབ་པོ། །བཅོམ་ལྡན་འདས་ཀྱིས་དགོངས་པ། སེམས་ཅན་འདི་ནི་སྲིད་པ་ཐམ་པ་ཡིན་པས་འདིས་ཁྱིམ་གྱི་གནས་པས་གནས་མི་ཕོད་དོ་སྙམ་མོ། །སྒྲ་ཅན་ཟིན་གྱིས་བཅོམ་ལྡན་འདས་ཀྱི་ཞལ་འཚོས་པ་དང་། རྒྱལ་པོ་ཟས་གཙང་བཙུན་མོའ་བུད་མེད་དང་ཤཱཀྱ་
ནམས་དང་བཅས་པ་ངོ་མཚར་སྐྱེས་ནས། གྲགས་འཛིན་མ་ལ་ལྷག་པར་མངོན་པར་དགའ་བར་གྱུར་ཏོ། །དེ་ནས་གྲགས་འཛིན་མའི་མི་སྙན་པ་ཐམས་ཅད་ཀྱི་ཐམས་ཅད་དུ་མེད་པར་གྱུར་ཏོ། །བཅོམ་ལྡན་འདས་ཀྱིས་གཞོན་ནུ་སྒྲ་ཅན་ཟིན་བཟང་པོ་རབ་ཏུ་དབྱུང་བར་བརྩམས་པ། རྒྱལ་པོ་ཟས་གཙང་གིས་ཐོས་ནས་དེ་བཅོམ་ལྡན་འདས་ཀྱི་དྲུང་དུ་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་གཞོན་ནུ་སྒྲ་ཅན་ཟིན་བཟང་པོ་རབ་ཏུ་འབྱིན་པར་མཛད་པར་ངེས་པར་ལྟ་ན། དེང་གི་གདུགས་གཅིག་ལ་མཆིས་སུ་གསོལ་ཅིག་དང་། འདིལ་དེའི་བར་དུ་བདག་གིས་མཆོད་པ་བགྱིའོ། །རྒྱལ་པོ་ཟས་གཙང་གིས་སྒྲ་ཅན་ཟིན་གྱི་སྐྱེ་བོའ་དུས་སྟོན་ཆེན་པོ་བྱས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། །ཤཱ་རིའི་བུ་གཞོན་ནུ་སྒྲ་ཅན་ཟིན་རབ་ཏུ་ཕྱུང་ཤིག །བཙུན་པ་པ་བཀའ་བཞིན་འཚལ་ཞེས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལས་མཉན་ནས་གཞོན་ནུ་སྒྲ་ཅན་ཟིན་བཟང་པོ་རབ་ཏུ་ཕྱུང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། །བཙུན་པ་ཚེ་དང་ལྡན་པ་སྒྲ་ཅན་ཟིན་གྱིས་སྐྱེ་བོའ་ཚོགས་ཆེན་པོའ་དབུས་སུ་བཅོམ་ལྡན་འདས་ལ་དུས་ཞལ་འཚོས་པར་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། །དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་མེ་ཏོག་གི་ཕྲེང་བས་ངོ་ཤེས་པར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ན་ཁྱིམ་བདག་ཅིག་གནས་པ་ངེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་ནས་དེས་ཆུང་མ་ལ་སྨྲས་པ། བཟང་མོ་བདག་ཅག་གིས་བུ་ལོན་དེད་པ་དང་ནོར་འཕྲོག་པ་སྐྱེས་ཀྱིས་ཟོང་ཐོགས་ཏེ་རྒྱ་མཚོ་ཆེན་པོར་འཇུག་ཏུ་འགྲོའོ། །དེས་སྨྲས་པ། རྗེའི་སྲས་དེ་བཞིན་དུ་མཛོད་ཅིག །དེ་ཟོང་ཐོགས་ཏེ་རྒྱ་མཚོ་ཆེན་པོར་ཞུགས་པ་ལས་དེ་ཉིད་དུ་ཤིའོ། །དེ་ནས་དེའི་ཆུང་མས་མྱ་ངན་བསང་བ་བྱས་ནས་ལག་
ལས་ཀྱི་མཐུ་དང་གཉེན་གྱི་མཐུས་བསྣུན་བསྐྱངས་ཏེ་བསྐྱེད་དོ། །དེ་དང་ཧ་ཅང་ཡང་མི་རིང་བཞིག་ན་ཐག་པ་རང་གི་བཟོལ་མཁས་པ་ཞིག་གནས་ཏེ། དེ་རང་གི་བཟོས་ཐམས་ཅད་གྲུབ་པར་འགྱུར་རོ། །དེས་དེའི་རང་གི་བཟོས་འབྱོར་པ་འགྲུབ་པ་མཐོང་ནས་སྨྲས་པ། །ཐ་གའི་ལས་ནི་མཆོག་ཡིན་གྱི། རྒྱ་མཚོར་འཇུག་པ་ནི་དེ་ལྟ་བུ་མ་ཡིན་ཏེ། དེར་སོང་ན་ཚུལ་མ་ཡིན་པས་སྡུག་བསྔལ་བར་འགྱུར་རོ། །དེས་ཐ་ག་པ་དེ་ལ་སྨྲས་པ། མིང་པོ་དཔོན་པོ་འདི་ཡང་ཐག་པའི་ལས་སློབས་ཤིག །དེས་སྨྲས་པ། རུང་གིས་དེ་བཞིན་དུ་བྱའོ་ཞེས་དེས་དེ་ལ་བསླབ་པར་བརྩམས་པ་ན་དེ་སྒྲིན་པོ་གཡེར་བག་ཅན་ཞིག་པས་དེས་དུས་ཐུང་དུ་ཞིག་གིས་ཐག་པའི་ལས་རྣམས་ལོ་བས་སོ། །ཐག་པ་དེ་ནི་བཟང་པོས་འཁྲུ་བ་དང་། བཟང་པོ་གྱོན་པ་དང་། ཁ་ཟས་བཟང་པོ་ཟ་ནས་ཁྱེའུ་དེས་སྨྲས་པ། ཞང་པོ་ཁྱོད་ཀྱང་ལས་འདི་ཁོ་ན་བྱེད་ལ་བདག་ཅག་ཀྱང་འདི་ཁོ་ན་བྱེད་པ་ལས་ཅིའི་ཕྱིར་ཁྱོད་ནི་བཟང་པོས་འཁྲུ། བཟང་པོ་གྱོན། ཟས་བཟང་པོ་ལ་ཡོངས་སུ་ལོངས་སྤྱོད་ལ། བདག་ནི་མི་འགྲུབ། དེས་སྨྲས་པ། ཚ་བོ་བདག་ནི་ལས་གཉིས་བྱེད་དེ། ཉིན་པར་ནི་ཐག་པའི་ལས་སོ། །ནུབ་མོ་ནི་རྐུན་པོ་བྱེད་དོ། །དེས་སྨྲས་པ། ཞང་པོ་གལ་ཏེ་དེ་ལྟ་ན་བདག་ཀྱང་རྐུན་པོ་བགྱིའོ། །ཚ་བོ་ཁྱོད་ཀྱིས་རྐུན་པོ་བྱེད་མི་ནུས་སོ། །ཞང་པོ་ནུས་སོ། །དེས་བསམས་པ། རེ་ཞིག་འདི་བགམ་པར་བྱའོ་སྙམ་ནས་དེ་ཁྲིད་དེ་ཚོང་འདུས་སུ་སོང་ནས་ངེས་དེར་རི་བོང་ཞིག་ཉོས་ཏེ་དེ་ལ་གཏད་ནས་ཚ་བོ་རེ་ཞིག་སྲེགས་ཤིག་དང་། དེའི་བར་དུ་བདག་ཁྲུས་བྱས་ནས་འོང་ངོ་ཞེས་དེ་ཁྲུས་བྱེད་དུ་སོང་བ་དང་། དེས་དེ་མྱུར་བ་མྱུར་བ་ཞིག་ཏུ་བསྲེགས་ནས་གཟུགས་གཅིག་ཟོས་སོ། །ཐག་པ་དེ་ཁྲུས་བྱས་ནས་འོངས་ཏེ་ཚ་བོ་རི་བོང་བསྲེགས་སམ། ཞང་པོ་བསྲེགས་སོ། །འོ་ན་བལྟའོ། །དེས་དེ་བྱིན་པ་དང་རྐང་ལག་གསུམ་མཐོང་ནས་སྨྲས་པ། ཚ་བོ་རི་བོང་འདིའི་གཟུགས་བཞི་པ་ཤོས་གར་སོང་། དེས་སྨྲས་པ། ཞང་པོ་རི་བོང་ལ་གཟུགས་བཞི་པ་ཡོད་ཡང་མེད་ན་གར་འགྲོ། དེས་བསམས་པ། རེ་ཞིག་བདག་ཀྱང་རྐུན་མ་ཡིན་ན། འདི་ནི་རྐུན་ཆེན་ཡིན་ནོ་སྙམ་ནས། དེས་དེ་དང་རི་བོང་གཟུགས་གསུམ་པོ་ཁྱེར་ཏེ་
ཆང་འཚོང་གི་ཁྱིམ་ཞིག་ཏུ་ཞུགས་ནས་ཚ་བོ་ཆང་བཏུང་ངམ། བཏུང་ངོ་། །དེ་གཉིས་ཀྱིས་འཐུངས་ནས་ཐག་པས་སྨྲས་པ། ཚ་བོ་ཆང་རིན་ནི་གྱ་གྱུས་དགང་ངོ་། །དེས་སྨྲས་པ། ཞང་པོ་སུས་འཐུངས་པ་དེ་གྱ་གྱུ་བྱེད་གྲང་། བདག་གིས་ནི་མ་འཐུངས་པས་གྱ་གྱུ་བྱར་ཅི་ཡོད། ཐག་པ་དེས་བསམས་པ། འདི་ནི་རྐུན་ཆེན་ཡིན་པས་ལྷན་ཅིག་རྐུན་མ་བྱ་ནུས་སོ་སྙམ་ནས་དེ་དེ་དང་ལྷན་ཅིག་ཁྱིམ་འབིགས་པའི་རྐུན་མ་ལ་ཞུགས་ཏེ། དེ་གཉིས་ཀྱི་ཁྱིམ་ཕུག་ནས་ཐག་པ་དེས་བུ་གར་མགོ་བཅུག་པ་དང་དེས་སྨྲས་པ། ཞང་པོ་ཁྱོད་རྐུན་མ་བྱེད་ཀྱང་ཐབས་མི་ཤེས་ཏེ། ཐོག་མར་རྐང་པ་གཞུག་པར་བྱའི་མགོ་ནི་མ་ཡིན་ནོ། །གལ་ཏེ་མགོ་བཅད་པར་གྱུར་ན་ངོ་ཤེས་པས་རིགས་ཐམས་ཅད་བརླག་པར་འགྱུར་གྱིས་རྐངཔ་ཆུག་ཤིག །དེས་རྐང་པ་བཅུག་པ་དང་། ཚོར་ནས་རྐུན་པོ་ཞེས་ཀུ་ཅོ་བཏོན་ནས་སྐྱེ་བོའ་ཚོགས་ཆེན་པོས་རྐང་པ་གཉིས་ནས་བཟུང་ནས་འཐེན་ཏོ། །དེ་ནི་གཅིག་པུ་ཡིན་པས་སླར་འདྲེན་མ་ནུས་ནས་མགོ་བཅད་དེ་ཁྱེར་ཏེ་སོང་ངོ་། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་རྐུན་པོ་གཅིག་པུ་གར་ཞུགས་པ་ལས་ཟིན་ན། དེའི་མགོ་གཅིག་གིས་བཀུམ་ནས་འཚལ་ཏེ་མཆིས་སོ། །རྒྱལ་པོས་སྨྲས་པ། ཤེས་ལྡན་དག་མགོ་བཅད་དེ་ཁྱེར་ཏེ་སོང་བ་གང་ཡིན་པ་དེ་ནི་རྐུན་ཆེན་ཡིན་ནོ། །དེང་ལ་རོ་མགོ་རྡུམ་དེ་ལམ་པོ་ཆེའི་བཞི་མདོར་ཞོག་སྟེ་ཕྱོགས་དབེན་པར་འཁོད་དང་། དེ་ལས་བཟུང་སྟེ་ཆོ་ངེས་འདེབས་པ་ཡོད་ན་དེ་ནི་རྐུན་པོ་ཡིན་གྱིས་དེ་ཟུང་ཤིག །དེ་ནས་རྒྱལ་པོའ་མི་དེ་རྣམས་ཀྱིས་རོ་མགོ་རྡུམ་དེ་ལམ་པོ་ཆེའི་བཞི་མདོར་བཞག་ནས་ཕྱོགས་དབེན་པར་བསྡད་དོ། །རྐུན་པོ་ཅིག་ཤོས་དེས་བསམས་པ། བདག་གི་ས་ཞང་པོའ་མགུལ་ནས་འཇུས་ཏེ་དུང་མོས་མི་གདབ་པ་ལྟ་མི་སྲིད་དོ་སྙམ་ནས། དེས་བདག་ཉིད་སྨྱོན་པའི་ཆ་བྱད་དུ་ཞུགས་ནས་བུད་མེད་ཀྱི་མགུལ་ནས་ཀྱང་འཇུས། སྐྱེས་པ་དང་། ཤིང་རྟ་དང་། རྟ་དང་། ཁྱུ་མཆོག་དང་། མ་ཧེ་དང་། ར་དང་། ཁྱིའི་མགུལ་ནས་ཀྱང་འཇུ་བར་བརྩམས་ནས་གང་གི་ཚོ་འཇིག་རྟེན་གྱིས་སྨྱོས་པར་ཤེས་པ་དེའི་ཚོ་རོ་མགོ་རྡུམ་པང་དུ་བླངས་ཏེ་ཇི་ཙམ་འདོད་ཀྱི་བར་དུ་དུས་ནས་སོང་ངོ་། །རྒྱལ་པོའ་མི་རྣམས་ཀྱིས་རྒྱལ་པོ་ལ་
སྨྲས་པ། སྨྱོན་པ་ཞིག་གིས་རོ་མགོ་རྡུམ་མ་དེ་པང་དུ་བླངས་ཏེ་ཇི་ཙམ་འཚལ་གྱི་བར་དུ་དུས་ནས་མཆིས་སོ། །རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་མ་ཅིག་ཤོས་ཡིན་། དེ་མ་བཟུང་བམ་ལེགས་པ་ཞིག་བྱས་ཀྱིས་དེ་ཟུང་ཤིག །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོ་ལ་བསྐུར་སྟི་མི་བྱ་བ་ལྷ་མི་སྲིད་དོ་སྙམ་ནས་ངེས་ཤིང་རྟ་པའི་ཆ་བྱད་དུ་བྱས་ནས་ཤིང་རྟ་ཤིང་སྐམ་གྱིས་བཀང་སྟེ། ཕྱོགས་དེར་འོངས་ནས་དེའི་སྟེང་དུ་ཤིང་རྟ་ཤིང་སྐམ་གྱིས་བཀང་བ་བཞག་སྟེ་གླང་བཀྲོལ་ནས་ཤིང་རྟ་མེས་བཏང་སྟེ་སོང་བ་དང་། མེ་དེས་རོ་མགོ་རྡུམ་དེ་ཡང་ཚིག་གོ །རྒྱལ་པོའ་མི་རྣམས་ཀྱིས་རྒྱལ་པོ་ལ་སྨྲས་པ། ལྷ་རྐུན་པོ་གཅིག་པོ་དེ་བསྲེགས་ལགས་སོ། །སུས་དེ་དག་གིས་ཇི་ལྟར་གྱུར་བ་རྣམས་སྨྲས་པ་དང་རྒྱལ་པོས་སྨྲས་པ། ཤེས་ལྡན་དག་ཤིང་རྟ་པ་གང་ཡིན་པ་དེ་ཉིད་རྐུན་པོ་ཅིག་ཤོས་ཡིན་ཏེ། དེ་མ་བཟུང་བམ་ལེགས་པ་ཞིག་བྱས་ཀྱིས་ཟུང་ཤིག །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོ་ལ་དུས་ཁྲོད་དུ་མཚུན་གྱི་བྱ་བ་མ་བྱས་པ་ནི་མི་སྲིད་དོ་སྣམ་ནས། དེས་བྲམ་ཟེའི་ཆ་བྱད་དུ་བྱས་ནས་ཁྱིམ་ནས་ཁ་སློང་ཞིང་བརྒྱུས་ཏེ་བསླངས་པ་དེ་ལས་དེའི་ཕངས་ཤ་ལྔ་བྱས་ནས་དུར་ཁྲོད་དུ་བཞག་སྟེ་སོང་ངོ་། །རྒྱལ་པོའི་མི་རྣམས་ཀྱིས་རྒྱལ་པོ་ལ་སྨྲས་པ། ལྷ་བྲམ་ཟེ་ཞིག་གིས་ཁྱིམ་ནས་སློང་ཞིང་བརྒྱུས་ཏེ་ཕྱོགས་གང་དུ་རོ་མགོ་རྡུམ་བསྲེགས་པ་དེར་དེས་ཕངས་ཤ་ལྔ་བགྱིས་སྟེ་བཞག་སྟེ་མཆིས་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་པོ་ཅིག་ཤོས་ཡིན་ན། དེ་མ་བཟུང་བ་ནི་མ་ལེགས་པ་ཞིག་བྱས་སོ། །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོའ་རུས་པ་རྣམས་གང་གཱར་མི་འདོར་བ་ལྟ་མི་སྲིད་དོ་སྙམ་ནས། དེས་ཐོད་པ་ཅན་གྱི་ཆ་བྱད་དུ་བྱས་ཏེ་ཕྱོགས་དེར་སོང་ནས་དེས་དེར་ལུས་ཐལ་བས་བྱུགས་ཤིང་རུས་པ་དང་ཐལ་བས་ཐོད་པ་བཀང་ནས་གང་གཱར་ཕོ་སྟེ་སོང་ངོ་། རྒྱལ་པོའ་མི་རྣམས་ཀྱིས་རྒྱལ་པོ་ལ་ཇི་ལྟར་གྱུར་པ་སྨྲས་པ་དང་། རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་པོ་ཅིག་ཤོས་ཡིན་ན་དེ་མ་བཟུང་བ་ནི་མ་ལེགས་པ་ཞིག་བྱས་སོ། །མདོར་
ན་ཁྱེད་འདུག་ཤིག་དང་། ངས་དེ་གཟུང་ངོ་ཞེས་རྒྱལ་པོས་གང་གཱའི་གྲུའི་ནང་དུ་སྐྱེད་མོས་ཚལ་བྱེད་དུ་བཅུག་སྟེ། འགྲམ་གཉིས་སུ་སྲུང་མའི་མི་དག་བཀོད་ནས་རྒྱལ་པོའི་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་ཆུའི་སྐྱེད་མོས་ཚལ་དེར་བཞག་སྟེ་བསྒོ་བ། གལ་ཏེ་ཁྱོད་ལ་འགའ་ཞིག་གིས་བཟུང་དང་སྐད་ཕྱུང་ཤིག །སྲུང་མའི་མི་རྣམས་ལ་ཡང་བསྒོ་བ། གང་གི་ཚེ་སྐད་འབྱིན་པ་དེའི་ཚེ་ཁྱེད་ཅག་ཆུའི་སྐྱེད་མོས་ཚལ་དུ་དེང་ཤིག །དེ་ན་གལ་ཏེ་མི་འགའ་ཞིག་ཡོད་པ་དང་། དེ་བཟུང་ལ་ང་ལ་ཕུལ་ཅིག །རྐུན་པོ་ཅིག་ཤོས་ཀྱིས་བསམས་པ། བདག་གིས་རྒྱལ་པོའི་བུ་མོ་དང་ལྷན་ཅིག་དགའ་མགུར་མ་སྤྱད་དུ་མི་གཏོང་ངོ་སྙམ་ནས་དེ་གང་གཱའི་འབབ་ཕྱོགས་ཞིག་ཏུ་འདུག་སྟེ། དེས་དེར་རྫུའུ་སྟོང་པ་ཞིག་ཏུ་ཆུ་བསྐུར་བར་བརྩམས་སོ། །གཅིག་བསྐུར་བ་དང་སྲུང་མའི་མི་རྣམས་ཀྱིས་རྐུན་པོའོ་སྙམ་ནས་བསྙགས་ཏེ་དེ་དག་གིས་དེ་ལ་ཐལ་མོ་གཅིག་བསྣུན་ནས་བཅག་གོ །གཉིས་པ་ཤོས་བསྐུར་བ་དང་། དེ་ཡང་བཅག་གོ །གསུམ་པ་ཤོས་བསྐུར་བ་དང་། དེ་ཡང་བཅག་ནས་སྲུང་མ་དག་ན་རེ་འདི་དག་ནི་རྫེའུ་སྟོང་པ་ཆུས་ཁྱེར་བ་ཡིན་ནོ་ཞེས་བག་བོར་ཏེ་འདུག་གོ །དེ་ནས་རྐུན་པོ་ཅིག་ཤོས་པོ་དེས་རྫེའུ་ཞིག་གི་ནང་དུ་མགོ་བཅུག་ནས་རྒྱུན་ཕྱོགས་སུ་བརྐྱལ་ཏེ། ཕྱོགས་དེར་ཕྱིན་པ་དང་དེ་ནས་གྲུ་ལ་འཛེགས་ནས་བུ་མོ་ལ་སྨྲས་པ། ཁྱོད་བསད་ད་རེ་སྒྲ་མ་འབྱིན་ཅིག །དེ་སྐྲག་ནས་ཅང་མི་སྨྲ་བར་འདུག་པ་དང་། དེ་དེ་དང་ལྷན་ཅིག་དགའ་མགུར་སྤྱད་ནས་སོང་ངོ་། །དེས་དུ་བར་བརྩམས་ཏེ། ཤེས་ལྡན་དག་རྐུན་པོ་ཅིག་ཤོས་ཀྱིས་ཁོ་མོ་ལ་དགའ་མགུར་སྤྱད་ནས་སོང་ངོ་། །སྲུང་མ་རྣམས་ཀྱིས་སྨྲས་པ། གང་གི་ཚེ་དགའ་མགུར་སྤྱད་པ་དེའི་ཚེ་ཅང་མི་སྨྲ་བར་འདུག་ལ། གང་གི་ཚེ་དགའ་མགུར་སྤྱད་ནས་སོང་བ་དེའི་ཚེ་དུས་ན་ད་གང་དུ་བཙལ་བར་བྱ། །སྲུང་མ་རྣམས་ཀྱིས་རྒྱལ་པོ་ལ་ཇི་ལྟར་གྱུར་པ་སྨྲས་སོ། །རྒྱལ་པོས་སྨྲས་པ། དེ་མ་བཟུང་བ་ནི་མ་ལེགས་པ་ཞིག་བྱས་སོ། །བུ་མོ་དེ་རྐུན་པོ་དང་ལྷན་ཅིག་དགའ་མགུར་སྤྱད་པས་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་འདས་པ་ན་ཁྱེའུ་ཞིག་བཙས་སོ་
ཞེས་རྐུན་པོ་ཅིག་ཤོས་ཀྱིས་ཐོས་ནས་དེས་བསམས་པ། བདག་གི་བུ་བཙས་པའི་དགའ་སྟོན་མ་བྱས་པར་མི་བཏང་ངོ་སྙམ་ནས། དེས་ནང་ཀོར་མའི་ཆ་བྱད་དུ་བྱས་ནས་རྒྱལ་པོའ་ཕོ་བྲང་ནས་ཕྱིར་བྱུང་སྟེ་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་ལྷའི་ཞལ་ནས་ཚོང་རྡལ་དུ་ཕྲོག་རློམ་གྱིས་ཤིག་ཅེས་བཀའ་སྩལ་ཏོ། །དེ་རྣམས་ཀྱིས་བསམས་པ། རྒྱལ་པོའ་དཔོན་པོ་བཙས་པས་དེས་ན་བདག་ཅག་ཚོང་རྔལ་དུ་ཕྲོག་རློམ་བྱེད་དུ་བཅུག་གོ་སྙམ་ནས། དེ་རྣམས་ཕྲོག་རློམ་བྱ་བར་བརྩམས་པ་ན་སྒྲ་མཐོན་པོ་དང་སྒྲ་ཆེན་པོ་བྱུང་ནས་རྒྱལ་པོས་སྨྲས་པ་དེ་ཅི་ཡིན། བློན་པོ་རྣམས་ཀྱིས་རྒྱས་པར་སྨྲས་སོ། །དེས་སྨྲས་པ། གལ་ཏེ་དེ་ལྟ་ན་ང་ཡང་དེས་བསླུས་པར་གྱུར་གྱིས། རྒྱལ་སྲིད་དོར་བའམ་དེ་ཆད་པས་གཅད་པ་ཞིག་བྱའོ། །སྙམ་དུ་བསམས་ནས། དེར་འཁོར་གྱི་ཁྱམས་རྩིག་ཏུ་བཅུག་སྟེ། དུས་ཆུང་དུ་ཞིག་བསྔད་ནས་ངེས་བློན་པོ་རྣམས་ལ་བསྒོ་བ། ཤེས་ལྡན་དག་ཡུལ་འཁོར་དུ་དྲིལ་འདི་སྐད་དུ་སྒྲོགས་སུ་ཆུག་ཤིག །ཡུལ་འཁོར་ན་སྐྱེས་པ་ཇི་སྙེད་གནས་པ་དེ་དག་ཐམས་ཅད་སྙད་མ་འདོགས་པར་འཁོར་གྱི་ཁྱམས་སུ་འདུས་ཤིག །སུམ་འདུས་པ་དེ་ནི་ཆད་པས་གཅད་དོ་ཞེས་སྒྲོགས་ཤིག །བློན་པོ་རྣམས་ཀྱིས་དྲིལ་སྒྲོགས་སུ་བཅུག་ནས་ཡུལ་འཁོར་ན་གནས་པའི་སྐྱེས་པ་ཐམས་ཅད་འདུས་པ་དང་། དེ་ནས་རྒྱལ་པོས་ཁྱེའུ་དེ་ལ་མེ་ཏོག་གི་ཕྲེང་བ་ཞིག་བྱིན་ནས་བསྒོ་བ། ཁྱོད་ཀྱི་ཕ་གང་ཡིན་པ་དེ་ལ་བྱིན་ཅིག །སྲུང་མའི་སྐྱེས་པ་རྣམས་ལ་བསྒོ་བ། ཁྱེའུ་འདིས་སུ་ལ་མེ་ཏོག་ཕྲེང་བ་བྱིན་པ་དེ་ཁྱེད་ཅག་གིས་ཟུང་ལ་ང་ལ་ཕུལ་ཅིག །དེ་ནས་ཁྱེའུ་དེ་མེ་ཏོག་གི་ཕྲེང་བ་དེ་ཁྱེར་ནས་སྐྱེ་བོའ་ཚོགས་ལ་རྟོག་ཅིང་རྒྱུ་བ་ན་དེས་རྐུན་པོ་ཅིག་ཤོས་པོ་དེ་མཐོང་ངོ་། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པ་ཡིན་པས་དེས་དེ་ལ་མེ་ཏོག་ཕྲེང་བ་བྱིན་པ་དང་། རྒྱལ་པོའི་མི་རྣམས་ཀྱིས་རྐུན་པོ་ཅིག་ཤོས་པོ་དེ་བཟུང་ནས་རྒྱལ་པོ་ལ་ཕུལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ལ་ཇི་ལྟར་བསྒྲུབ་པར་བྱ། དེ་རྣམས་ཀྱིས་སྨྲས་པ།
ལྷ་དགུམ་ལགས་སོ། །རྒྱལ་པོས་སྨྲས་པ། ཤེས་ལྡན་དག་སྐྱེས་བུ་འདི་ལྟ་བུའི་དཔའ་བོ་ག་ལ་གསད། འདི་ལ་སྤྱན་རས་ཀྱིས་བཙའ་བར་བྱའོ་ཞེས་དེས་བུ་མོ་རྒྱན་ཐམས་ཅད་ཀྱིས་བརྒྱན་ནས་དེ་ལ་ཆུང་མར་བྱིན་ཏེ། རྒྱལ་སྲིད་ཕྱེད་ཀྱང་བགོས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱིས་རྐུན་པོ་ཅིག་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་བུ་གང་ཡིན་པ་དེ་ནི་སྒྲ་ཅན་ཟིན་འདི་ཉིད་ཡིན་ཏེ། དེ་ན་ཡང་ང་ལ་འདིས་མེ་ཏོག་གི་ཕྲེང་བས་ངོ་ཤེས་སོ། །ད་ལྟར་ཡང་འདིས་ང་ལ་དུས་ངོ་ཤེས་པར་བྱས་སོ། །དགེ་སློང་དག་དེ་ལྟ་བས་ན་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མ་ཁྱབ་པས་ལས་ཀྱི་གནས་པ་ལ་གོམས་པར་བྱའོ། །གྲགས་འཛིན་མས་བསམས་པ། གལ་ཏེ་སྒྲ་ཅན་ཟིན་གྱི་ཡབ་ཕོ་བྲང་དུ་གཤེགས་དང་། ཇི་ལྟར་ཡང་སླར་གཤེགས་པར་མི་འགྱུར་བ་དེ་ལྟ་བུར་སྤྱད་པར་བྱའོ་སྙམ་ནས། དེ་ནས་བདག་ཉིད་དང་། ས་འཚོ་མ་དང་། རི་དགས་སྐྱེས་ལ་སོགས་པ་བུད་མེད་དྲུག་ཁྲི་རྒྱན་སྣ་ཚོགས་ཀྱིས་བརྒྱན་ཅིང་ཤིན་དུ་དྲི་ཞིམ་པོའ་མེ་ཏོག་གི་ཕྲེང་བ་དང་། བདུག་པས་བསྒོས་པའི་གོས་རྣམས་ཀྱིས་བཀླུབས་སོ། །དེ་ནས་བཅོམ་ལྡན་འདས་ཀྱིས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་དུ་བདར་ཏེ་འདུལ་བའི་སྐྱེ་བོ་ལ་གཟིགས་ནས་ཕོ་བྲང་གི་ནང་དུ་ཞུགས་སོ། །དེ་ནས་གྲགས་འཛིན་མ་དང་། རི་དགས་སྐྱེས་དང་། ས་འཚོ་མ་ལ་སོགས་ཏེ་བུད་མེད་དྲུག་ཁྲི་གཟུགས་དང་། ལང་ཚོ་དང་། དྲེགས་པའི་རྒྱགས་པས་ཟིན་ཅིང་ཡིད་ལ་གཅགས་པས་གཡེན་སྤྱོ་ཞིངབསྐྱོད་པ་ན་གསེར་གྱི་འོག་པག་ལྷོད་པར་བཅིངས་པ་མང་པོ་འཁྲོལ་ཞིང་སྒྲ་འབྱིན་ལ། འཛུམ་པའི་གླུ་དབྱང་སྙན་པ་དང་། མིག་དང་སྨིན་མ་སྐྱོད་ཅིང་ནུ་མ་དང་། ཡན་ལག་རྣམས་གསལ་བར་སྟོན་པ། བུད་མེད་ཀྱི་ཚུལ་གྱི་སྟེག་ཆོས་རྣམས་བསྟན་ཏོ། །དེ་ནས་བཅོམ་ལྡན་འདས་ཀྱིས་འདི་སྙམ་དུ་དགོངས་ཏེ། གལ་ཏེ་གདུགས་ཆོད་གསོལ་
ན་འདུལ་བའི་སྐྱེ་བོའ་དུས་ལས་ཀྱང་འདས་པར་འགྱུར་ལ། བུད་མེད་འདི་རྣམས་ཀྱང་འདོད་ཆགས་ཀྱིས་གདུངས་པས་བདེན་པའི་སྣོད་དུ་མི་འགྱུར་གྱིས་འདི་ལྟར་སོ་སོའ་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་མ་ལངས་ཕོ་བྲང་དུ་རྫུ་འཕྲུལ་གྱི་ཆོ་འཕྲུལ་བསྟན་པས་དད་པར་བྱའོ་སྙམ་དུ་དགོངས་ཏེ། ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་མཛད་དེ། །འདི་ལྟ་སྟེ་འཆག་པ་དང་། བཞེངས་པ་དང་། བཞུགས་པ་དང་། མནལ་བ་མཛད་དོ། །མེའི་ཁམས་ལ་ཡང་སྙོམས་པར་འཇུག་པར་མཛད་དེ། མེའི་ཁམས་ལ་སྙོམས་པར་ཞུགས་པ་ན་སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་རྣམ་པ་སྣ་ཚོགས་དག་འབྱིན་པར་མཛད་དེ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་དག་གོ །གཞན་ཡང་ཆོ་འཕྲུལ་ཟུང་དུ་སྟོན་པར་བྱེད་དེ། སྐུའི་སྨད་ནས་འབར་བར་མཛད་ལ་སྐུའི་སྟོད་ནས་ཆུ་གྲང་མོའ་རྒྱུན་འབེབས་པར་མཛད་དེ། སྐུའི་སྟོད་ནས་འབར་བར་མཛད་ལ་སྐུའི་སྨད་ནས་ཆུ་གྲང་མོའ་རྒྱུན་འབེབས་པར་མཛད་དོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་གྱི་ཆོ་འཕྲུལ་མངོན་པར་འདུ་མཛད་པ་སླར་བསྡུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་བུད་མེད་དེ་རྣམས་ཀྱིས་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་དག་མཐོང་ནས་དད་པར་གྱུར་ཏེ། ཤིང་རྩ་བ་ནས་བཅད་པ་བཞིན་དུ་བཅོམ་ལྡན་འདས་ཀྱི་ཞབས་ལ་གཏུགས་ཏེ་ཆོས་མཉན་པའི་ཕྱིར་སྤྱན་སྔ་ན་འཁོད་དོ། །དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉམ་བ་དང་། ཁམས་དང་། རང་བཞིན་མཁྱེན་ནས། གང་ཐོས་པས་འཕགས་པའི་བདེན་པ་བཞི་སོ་སོར་ཡང་དག་པར་ཁོང་དུ་ཆུང་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། ས་འཚོ་མ་དང་། རི་དགས་སྐྱེས་ལ་སོགས་པ་
བུད་མེད་དྲུག་ཁྲིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །གྲགས་འཛིན་མ་ནི་ལྷག་པར་འདོད་ཆགས་ཀྱིས་ཟིལ་གྱིས་ནོན་པས་བདེན་པ་མཐོང་བར་མ་བྱས་ཏེ། དེ་འདི་སྙམ་དུ་སེམས་ཏེ། མ་ལ་བདག་གིས་བཅོམ་ལྡན་འདས་རོའ་སྲེད་པས་དབང་དུ་བྱའོ་སྣམ་དུ་བསམས་ནས། རང་ཉིད་ཀྱིས་བཅོམ་ལྡན་འདས་ཀྱི་ཆེད་དུ་བཟའ་བ་དང་བཏུང་བ་དག་གཡོས་ནས་བདག་རང་གི་ལག་ནས་བཅོམ་ལྡན་འདས་ལ་དབུལ་བར་བྱའོ་ཞེས་པ་དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ལ་གྲགས་འཛིན་མ་ནི་རང་གི་ལག་ནས་བགྱིས་པའི་རོའ་སྲེད་པས་དབང་དུ་བགྱི་བར་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ང་སྔོན་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་པས་རོ་སོ་སོར་ཉམས་སུ་མྱོང་ཞིང་རོ་སོ་སོའ་ཆགས་པ་ཉམས་སུ་མྱོང་བ་ལས་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཏེ། རོ་སོ་སོར་ཉམས་སུ་མྱོང་ཡང་རོ་ལ་སོ་སོར་ཆགས་པར་འགྱུར་བའི་ཉམས་སུ་མྱོང་བ་མེད་ན། དང་ལ་གྲགས་འཛིན་མས་རོའ་སྲེང་པས་ཇི་ལྟར་དབང་དུ་བྱ། དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་གྲགས་འཛིན་མས་དབང་དུ་བགྱི་བའི་སླད་དུ་ལ་དུས་དབང་དུ་བགྱི་པར་བརྩམས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ད་ལྟར་གྱི་འབའ་ཞིག་ཏུ་མ་ཟད་ཀྱི་ཇི་ལྟར་འདིས་འདས་པའི་དུས་ན་ཡང་དགའ་བར་འགྱུར་བས་དབང་དུ་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་རྔལ་མེད་པའི་དགོན་པའི་གནས་མེ་ཏོག་དང་། འབྲས་བུ་དང་། ཆུ་དང་། རྩ་བ་ཕུན་སུམ་ཚོགས་པ་ཞིག་ན་དྲང་སྲོང་དཀའ་ཐུབ་དྲག་པ་རྩ་བ་དང་། འབྲས་བུ་དང་། ཆུ་ལ་ལོངས་སྤྱོད་པ། པགས་པ་དང་ལོ་མ་གྱོན་པ་ཞིག་གནས་ཏེ། དེས་མངོན་པར་ཤེས་པ་ལྔ་མངོན་སུམ་དུ་བྱས་པས་དེ་ལ་རི་དགས་གདུག་པ་རྣམས་ཀྱང་འདྲིས་པའི་གནས་པས་བསྟི་གནས་ན་གནས་སོ། །དེ་ཕྱོགས་གཞན་ཞིག་ཏུ་གཅི་བའི་ཕྱིར་སོང་བ་ན་རི་དགས་མོ་ཞིག་རྗེས་
བཞིན་རྗེས་བཞིན་དུ་འབྲེང་ངོ་། །དེས་ཁུ་བ་དང་བཅས་པར་གཅིས་པ་དེ་རི་དགས་མོ་དེས་འཐུངས་ནས་ལྕེས་མོ་མཚན་ལ་བལྡགས་སོ། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པ་ཡིན་པས་སེམས་ཅན་དང་ལྡན་པར་གྱུར་ཏོ། །དེ་འབྱུང་བའི་དུས་སུ་ཕྱོགས་དེར་འོངས་ནས་ཁྱེའུ་ཞིག་བྱུང་བ་དང་དེས་དྲི་བསྣམས་ན་རིས་མི་མཐུན་པའི་སེམས་ཅན་ཡིན་ཏེ། སྐྲག་ནས་གཅིན་རྟུག་ཤོར་ནས་བོར་ཏེ་སོང་ངོ་། །ཇི་ཙམ་ཞིག་དྲང་སྲོང་དེ་ཕྱོགས་དེར་ཕྱིན་པ་དང་། དེས་ཁྱེའུ་དེ་མཐོང་ནས་འདི་སུའི་བུ་ཡིན་སྙམ་པའི་བསམ་པ་ལ་ཞུགས་པ་ན། བདག་ཉིད་ཀྱི་ཡིན་པར་མཐོང་ནས་དེས་དེ་བསྟི་གནས་སུ་ཁྱེར་ཏེ་བསྣུན་བསྙོད་ནས་བསྐྱེད་དེ། དེ་ཆེན་པོར་གྱུར་པ་དང་མགོ་ལ་རི་དགས་ཀྱི་རྭ་སྐྱེས་པར་གྱུར་ཏེ། དེ་ལ་རི་དགས་ཀྱི་རྭ་འདྲ་བ་ཡོད་པས་དྲང་སྲོང་རྭ་ཅན་དྲང་སྲོང་རྭ་ཅན་ཞེས་བྱ་བར་གྱུར་ཏོ། །ཇི་ཙམ་ན་དྲང་སྲོང་དེ་ནད་ཀྱིས་ཐེབས་པར་གྱུར་ནས། དྲང་སྲོང་དེ་དང་མཐུན་པའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏེ། གང་གི་ཚེ་དེ་འཆི་བ་ལ་ཐུག་པའི་ཚོར་བ་སྐྱེས་ནས་རིང་པོ་མི་ཐོགས་པར་འཆི་བར་འགྱུར་བ་དེའི་ཚེ་དེས་བུ་དེ་ལ་སྨྲས་པ། བུ་བསྟི་གནས་འདིར་ཕྱོགས་སྣ་ཚོགས་ན་གནས་པའི་དྲང་སྲོང་རྣམས་དུས་དུས་སུ་འོང་གིས་ཁྱོད་ང་ལ་དགའ་བས་དེ་རྣམས་ལ་ཀུན་དུ་སྤྱོད་པའི་ཆོས་ཀྱིས་འོངས་པ་ལེགས་སོ་ཞེས་བརྗོད་པས་ཡང་དག་པར་དགའ་བར་བྱ་ཞིང་། སྟན་ལ་མགྲོན་དུ་བོས་ལ་རྩ་བ་དང་། འབྲས་བུ་ཅི་ནུས་པར་སྟོབས་ཤིག་ཅེས་སྨྲས་ནས། བསགས་པ་ཀུན་གྱི་མཐའ་ཟང་ཅིང་། །མཐོན་པོ་ཀུན་གྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །དེས་དེ་དྲང་སྲོང་གི་ཆོས་བཞིན་དུ་བསྲེགས་ཏེ། དེ་ཕ་དང་བྲལ་བའི་མྱ་ངན་གྱིས་ནོན་པས་སྐྱོ་བ་སྐྱེས་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེས་དུས་གཞན་ཞིག་ན་ཆུའི་དོན་དུ་བུམ་པ་ཁྱེར་ནས་སོང་བ་ན་ལྷས་ཆར་དབབ་པར་བརྩམས་སོ། །དེ་ཆུས་བུམ་པ་བཀང་ནས་ཁྱེར་ཏེ་འོང་བ་འགྲེད་ནས་རྡེག་འཆོས་སོ། །དྲང་སྲོང་རྣམས་ནི་མྱུར་
དུ་ཁྲོ་བ་ཡིན་པས་དེས་ཆུ་ཉུང་ཞིག་བླངས་ཏེ་གཏོར་ནས་དམོད་པ་བོར་བ་སྤྱོད་པ་ངན་པ་ཅན་ཁྱོད་ཀྱིས་བུམ་པ་ཆུས་བཀང་བ་ཆག་པར་བྱས་ཀྱིས། དེ་ལྟ་བས་ན་ཁྱོད་ཉི་མ་འདི་ནས་བཟུང་སྟེ་ལོ་བཅུ་གཉིས་སུ་ཆར་མི་འབེབས་པར་གྱུར་ཅིག་ཅེས་བྱས་པས་ལྷ་ཆར་མི་འབེབས་པར་གྱུར་ཏོ། །བཱ་རཱ་ཎ་སཱིར་མུ་གེ་ཆེན་པོ་བྱུང་ནས་སྐྱེ་བོའི་ཚོགས་ཀུན་དུ་དོང་ངོ་། །རྒྱལ་པོས་ལྟས་མཁན་རྣམས་བཀུག་སྟེ་སྨྲས་པ། ཤེས་ལྡན་དག་སུ་ཞིག་གི་མཐུས་ན་ལྷ་ཆར་མི་འབེབས། དེ་རྣམས་ཀྱིས་སྨྲས་པ། དྲང་སྲོང་ཁྲོས་པས་ལགས་སོ། །ཇི་སྟེ་དྲང་སྲོང་དེ་དཀའ་ཐུབ་དེ་ལ་བསྐྱོད་པར་ནུས་ན་ལྷ་དེ་བཞིན་དུ་ཆར་འབེབས་ཀྱི་གཞན་དུ་ན་ནི་མ་ལགས་སོ། །རྒྱལ་པོ་སེམས་ཁོང་དུ་ཆུད་ཅིང་འདུག་པ་དང་། བཙུན་མོ་དང་། བློན་པོ་དང་། གཞོན་ནུ་རྣམས་ཀྱིས་སྨྲས་པ། ལྷ་ཅིའི་སླད་དུ་ཐུགས་མི་དགྱེས། དེས་སྨྲས་པ། དྲང་སྲོང་ཁྲོས་པས་ལྷ་ཆར་མི་འབེབས་ལ་ལྷས་མཁན་རྣམས་ཀྱང་འདི་སྐད་ཅེས་གལ་ཏེ་དྲང་སྲོང་དེ་དཀའ་ཐུབ་དེ་ལས་བསྐྱོད་ན་དེ་བཞིན་དུ་ལྷ་ཆར་འབེབས་ཀྱི། གཞན་དུ་ན་མ་ཡིན་ནོ་ཞེས་ཟེར་ཏེ། དཀའ་ཐུབ་དེ་ལ་སུ་ཞིག་གིས་བསྐྱོད་པར་ནུས་པ་མི་ཤེས་སོ། །རྒྱལ་པོ་དེའི་བུ་མོ་ཞི་ལྡན་མ་ཞེས་བྱ་བ་དེས་སྨྲས་པ། ལྷ་གལ་ཏེ་དེ་ལྟ་ན་ཐུགས་ལས་ཆུང་དུར་མཛོད་ཅིག་དང་། བདག་གིས་དྲང་སྲོང་དེ་དཀའ་ཐུབ་དེ་ལས་ཇི་ནས་ཀྱང་གཡོས་པར་གྱུར་པ་དེ་ལྟར་བགྱིའོ། །དེས་སྨྲས་པ། ཐབས་ཅི་ཞིག་གིས་བྱ། དེས་སྨྲས་པ། བདག་དང་བུད་མེད་གཞན་རྣམས་བྲམ་ཟེ་རྣམས་ལགས་ང་ཚིག་འདོན་དུ་སྩོལ་ཅིག །གྲུ་ཟམ་གྱི་བསྟི་གནས་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་བགྱིད་དུ་སྩོལ་ཅིག །དེས་དེ་དང་བུད་མེད་གཞན་དག་ཀྱང་བྲམ་ཟེ་ལ་གསང་ཚིག་སློབ་ཏུ་བཅུག་གོ། །གྲུ་ཟམ་གྱི་བསྟི་གནས་ཀྱང་བྱེད་དུ་བཅུག་གོ། །དེ་ནས་དེས་དབང་དུ་བྱ་བའི་རྫས་དང་ཆང་གིས་བཀང་བའི་འབྲས་བུ་དེ་དག་དང་། གཞན་ཡང་འབྲས་བུ་རྣམ་པར་བཀྲ་བ་སྣ་ཚོགས་བྱེད་དུ་བཅུག་ནས། དྲང་སྲོང་གི་ཆ་བྱད་དུ་བྱས་ཏེ། དེ་རྩྭ་དང་ཤིང་ཤུན་གྱོན་ནས་བུད་མེད་རྣམས་དང་ལྷན་ཅིག་བྲམ་ཟེ་རྣམས་ལ་གསང་ཚིག་འདོན་ཅིང་དེའི་བསྟི་གནས་
སུ་ལྷགས་པ་དང་། དྲང་སྲོང་ལ་སློབ་མ་རྣམས་ཀྱིས་སྨྲས་པ། མཁན་པོ་ཁྱོད་ཀྱི་བསྟི་གནས་སུ་དྲང་སྲོང་མང་དུ་ལྷགས་སོ། །དྲང་སྲོང་རྣམས་ལྷགས་པ་ལེགས་ཀྱིས་ནང་དུ་ཤོག་ཤིག །དེ་རྣམས་ནང་དུ་ཞུགས་པ་དེས་མཐོང་ནས་ཚིགས་སུ་བཅད་པས་སྨྲས་པ། བརྟགས་པ་མེད་པར་འགྱིད་ཞིང་འགྲོ་བ་དང་། །བཞིན་ཡང་ཁ་སྤུ་རྣམས་དང་བྲལ་གྱུར་ཅིང་། །འདི་རྣམས་བྲང་ནི་མཐོང་དམན་གྱུར་པ་སྟེ། །ཨེ་མ་དྲང་སྲོང་ཆ་བྱད་སྔོན་མ་བྱུང་། །དེ་དེ་རྣམས་ལ་ཐེ་ཚོམ་གྱི་ཀུན་ནས་དཀྲིས་པའི་བློས་རྩ་བ་དང་འབྲས་བུ་བསྟབས་སོ། །དེ་རྣམས་ཀྱིས་དེ་དག་ཟོས་ནས་དྲང་སྲོང་དེ་ལ་སྨྲས་པ། ཁྱོད་ཀྱི་འབྲས་བུ་འདི་དག་ནི་རྩུབ་པ་ཁ་བ་བསྐ་བ་ཡིན་གྱི། བདག་ཅག་གི་ཆུ་ནང་གི་བསྟི་གནས་དོན་ཡོད་པའི་འབྲས་བུ་རྣམས་ནི་བདུད་རྩི་དང་འདྲ་བ་ཡོད་དེ། འདི་ལྟར་ཁྱོད་བདག་ཅག་གི་བསྟི་གནས་སུ་སྤྱན་འདྲེན་ཏོ། །དེས་ཁས་བླངས་ནས་དེ་དེ་རྣམས་དང་གྲུ་ཟམ་གྱི་སྐྱེད་མོས་ཚལ་དུ་ཞུགས་ནས་ངེས་དེ་ལ་དབང་དུ་བྱ་བའི་རྫས་ཆང་གིས་བཀང་བ་དང་ལྡན་པའི་ན་ལི་ཀེ་རའི་འབྲས་བུ་རྣམས་དང་། གཞན་དག་ཀྱང་བྱིན་ནོ། །དེ་ཆང་གིས་མྱོས་པ་དང་དབང་དུ་བྱ་བའི་རྫས་ཀྱི་སྦྱོར་བས་དེ་དེ་དང་ལྷན་ཅིག་མི་ཚངས་པར་སྤྱད་པས་རྫུ་འཕྲུལ་ཡོངས་སུ་ཉམས་སོ། །ཆར་ལ་མངོན་པར་དགའ་བའི་ལྷས་སྤྲིན་ཀུན་ནས་བསྡུས་པ་དང་དྲང་སྲོང་དེས་བཀག་གོ །ཞི་ལྡན་མས་སྨྲས་པ། ད་དུང་ཁྱོད་ཀྱིས་བདག་ཉིད་སུ་ཡིན་པ་མི་ཤེས་སམ། དེས་དེའི་འདོད་ཆགས་ཀྱི་ཞགས་པས་བཅིངས་ནས་རྒྱལ་པོ་ལ་ཕུལ་ནས་ལྷ་དྲང་སྲོང་དེ་ནི་འདི་ལགས་སོ། །དེ་ནས་ལྷས་ཆར་དབབ་པར་བརྩམས་ནས་ལོ་ལེགས་པར་གྱུར་ཏོ། །རྒྱལ་པོས་ཞི་ལྡན་མ་འཁོར་དང་བཅས་ཏེ་དྲང་སྲོང་དེ་ལ་ཆུང་མར་བྱིན་ནོ། །དེས་ཞི་ལྡན་མ་སྤངས་ནས་གཞན་དག་དང་ལྷན་ཅིག་དགའ་མགུར་སྤྱོད་པ་ལ་ཞུགས་པ་ན། དེ་ལ་ཞི་ལྡན་མ་ཕྲག་དོག་གི་ཀུན་ནས་དཀྲིས་པའི་སྙིང་གིས་དེ་ལ་བཀུར་སྟི་མ་ཡིན་པ་བྱ་བར་བརྩམས་པ་དང་། དེ་ནས་ཕར་ཅིག་ཚུར་ཅིག་རྩོད་པས་མཆིལ་ལྷ་མ་དང་བཅས་པའི་རྡོག་པས་མགོར་
བསྣུན་པ་དང་། དེས་བསམས་པ། སྤྲིན་གྱི་འབྲུག་སྒྲ་ཡང་བདག་གིས་མནགས་པར་མི་བཟོད་ནད་ནི་འདོད་ཆགས་ཀྱི་ཞགས་པས་བཅིངས་ན་བུད་མེད་ཙམ་གྱིས་ཀྱང་བརྙས་སམ་སྙམ་ནས་དེས་བརྩོན་འགྲུས་ལ་གནས་པས་སླར་ཡང་མངོན་སུམ་དུ་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །ཞི་ལྡན་མ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་ཡང་འདིས་ང་རོའ་སྲེད་པས་དབང་དུ་བྱས་སོ། །ད་ལྟར་ཡང་འདིས་ལ་དུས་དབང་དུ་བྱ་བ་ལ་ཞུགས་སོ། །གང་གི་ཚེ་བཅོམ་ལྡན་འདས་ཕོ་བྲང་དུ་གདུགས་ཚོད་གསོལ་ནས་ཕྱི་རོལ་དུ་བྱུང་བ་དེའི་ཚེ་གྲགས་འཛིན་མ་ཁྱིམ་ཐབ་ཀྱི་བྱམས་པ་དང་བྲལ་ལོ་སྙམ་སྟེ་རེ་ཐག་ཆད་ནས་ཁང་ཐོག་ཏུ་འཛེགས་ཏེ་བདག་ཉིང་མཆོངས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་བཅོམ་ལྡན་འདས་ཀྱི་རྫུ་འཕྲུལ་གྱིས་དེ་བླངས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་སླད་དུ་གྲགས་འཛིན་མ་ཁང་ཐོག་ནས་བདག་ཉིད་མཆོངས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་ངའི་ཕྱིར་བདག་ཉིད་བོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱིན་རྒྱལ་པོ་ཚངས་སྦྱིན་ཞེས་བྱ་བ་ཞིག་བྱུང་སྟེ། དེ་དུས་གཞན་ཞིག་ན་རི་དགས་ཤོར་ཞིང་རིམ་གྱིས་སོང་སྟེ་རི་སུལ་ཞིག་ཏུ་ཕྱིན་པ་དང་། དེས་དེ་ན་མེ་འམ་ཅི་ཕོ་དང་། མི་འམ་ཅི་མོ་གཉིས་ལས་མི་འམ་ཅི་ཕོན་ཉི་ལ། མིའམ་ཅི་མོ་ནི་མ་ཉལ་བ་ཞིག་མཐོང་ནས་རྒྱལ་པོས་གཞུ་རྣ་དྲུང་དུ་བཀང་བའི་མངས་མིའམ་ཅི་ཕོ་གནད་དུ་བསྣུན་ནས་སྲོག་དང་ཕྲལ་ཏེ། རྒྱལ་པོས་མི་འམ་ཅི་མོ་ཆུང་མའི་དོན་དུ་བཟུང་ནས་ཁྲིད་དེ་སོང་བ་ལས་དེས་སྨྲས་པ། ལྷ་རེ་ཞིག་གཞེས་ལ་དེའི་བར་དུ་བདག་གིས་མི་འམ་ཅིའི་རོ་ལ་མཆོད་པ་བགྱིད་ན་གནང་བར་མཛད་དུ་གསོལ། རྒྱལ་པོས་སྨྲས་པ། རེ་ཞིག་གང་དུ་འགྲོ་བར་འགྱུར།
དེ་ལ་མཆོད་པ་ཇི་ལྟར་བྱེད་པ་བལྟའོ་སྙམ་ནས་དེས་དེ་ལ་གནང་ངོ་། །དེ་ནས་དེས་མི་འམ་ཅིའི་རོ་དེ་ལ་ཤིང་གི་ཕུང་པོ་བྱས་ནས་མེ་སྤར་ཏེ་བདག་ཉིད་མཆོངས་སོ། །ལྷས་ཚིགས་སུ་བཅད་པས་སྨྲས་པ། མིའམ་ཅི་མོ་དགའ་སྤྱད་ཅེས། །དོན་གཞན་དུ་ནི་བསམས་པ་ལས། །གཞན་དུ་ཡོངས་སུ་བསྒྱུར་བྱས་པས། །སྲོག་ཆགས་གཉིས་ནི་བསད་པར་གྱུར། །དགེ་སློང་དག་ཇི་སྣམ་དུ་སེམས། དེའི་ཚེ་དེའི་དུས་ཀྱི་མི་འམ་ཅི་གང་ཡིན་པ་དེ་ནི་ང་ཉིད་ཡིན་ནོ། །མིའམ་ཅི་མོ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་ཡང་འདིས་ངའི་ཕྱིར་བདག་ཉིད་མེ་ཕུང་དུ་མཆོངས་སོ། །ད་ལྟར་ཡང་འདིས་ངའི་ཕྱིར་ཁང་ཐོག་ནས་བདག་ཉིད་མཆོངས་སོ། །བཅོམ་ལྡན་འདས་ཀྱིས་དགོངས་པ། །ད་ནི་གྲགས་འཛིན་མ་གདུལ་བའི་དུས་ལ་བབ་ཀྱིས། མ་ལ་འདི་ངས་འཁོར་བའི་འབྲོག་དགོན་པ་ནས་བསྒྲལ་བར་བྱའོ་སྙམ་དུ་དགོངས་ནས་དེ་ལ་གང་ཐོས་པས་འཕགས་པའི་བདེན་པ་བཞི་ཡང་དག་པར་ཁོང་དུ་ཆུད་པར་འགྱུར་པ་དེ་ལྟ་བུའི་ཆོས་བཤད་པ་མཛད་དེ། གྲགས་འཛིན་མ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཇི་ཙམ་ན་དགྲ་བཅོམ་མར་གྱུར་པ་དང་། དེ་རང་གི་རིགས་རྒྱུད་དང་མཐུན་པར་བྱ་བ་དང་། འཕགས་པའི་ལམ་ཐོབ་པས་དགེ་སློང་མ་རྣམས་ཀྱི་ནང་དུ་དགོས་པ་བྱུང་བ་རྣམས་ལ་ཤིན་ཏུ་འཛེམ་པ་དང་ལྡན་ནོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་མ་རྣམས་ལ་འཛེམ་པ་དང་ལྡན་པའི་མཆོག་ནི་འདི་ལྟ་སྟེ་སྒྲ་ཅན་ཟིན་གྱི་མ་གྲགས་འཛིན་མ་འདི་ཡིན་ནོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གྲགས་འཛིན་མས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མངལ་དུ་ལོ་དྲུག་བཟུང་ལགས།
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གྲགས་འཛིན་མ་འདི་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་གནག་ལྷས་ཞིག་ན་ཕྱུགས་རྫིམ་དང་། བུ་མོ་མ་སྨད་གཉིས་ཞིག་གནས་ཏེ། དེ་གཉིས་དར་བའི་བུམ་པ་ཐོགས་ཏེ། རྒྱུན་དུ་གྲོང་མཐར་འགྲོ་བ་ན། དེ་གཉིས་ལས་བུ་མོ་ནི་ངན་གཡོའ་རང་བཞིན་ཅན་ཡིན་ནོ། །མ་ནི་དྲང་བ་ཞིག་ཡིན་ནོ། །བུ་མོས་སྨྲས་པ། ཡུམ་རེ་ཞིག་དར་བའི་བུམ་པ་སྣོམས་ཤིག་བཤང་བ་ཞིག་བགྱིད་དོ། །དེས་ཐོགས་ཏེ་སོང་ངོ་། །དེ་ནི་ངན་གཡོའ་རང་བཞིན་ཅན་ཡིན་པས་ཕྱིན་སྡོད་ཅིང་དེའི་རྗེས་སླེབས་པར་མ་སོང་སྟེ། དེ་དེ་ལྟར་བྱེད་པ་ན་མ་དེས་དར་བའི་བུམ་པ་རྒྱད་གྲགས་དྲུག་གི་བར་དུ་ཁྱེར་རོ། །དགེ་སློག་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཕྱུགས་རྫི་བུ་མོ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་འདིས་མ་ལ་ངན་གཡོའ་སྤྱོད་པས་རྒྱང་གྲགས་དྲུག་ཏུ་དར་བའི་བུམ་པ་བསྐུར་རོ། །ལས་དེའི་རྣམ་པར་སྨིན་པས་འདིས་སྒྲ་ཅན་ཟིན་ལོ་དྲུག་ཏུ་མངལ་དུ་བཟུང་ངོ་། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་སྒྲ་ཅན་ཟིན་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ལོ་དྲུག་ཏུ་མའི་མངལ་ན་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒྲ་ཅན་ཟིན་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། སྒྲ་ཅན་ཟིན་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར།
དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བཱ་རཱ་ཎ་སཱི་དང་ཧ་ཅང་མི་རིང་བ་ན་མེ་ཏོག་དང་འབྲས་བུ་ཕུན་སུམ་ཚོགས་པའི་བསྟི་གནས་བྱ་སྣ་ཚོགས་སྐད་འབྱིན་ཅིང་བྱ་དང་རི་དགས་འདྲིས་པར་བསྟེན་པ་ཞིག་ཡོད་དེ། དེ་ན་དྲང་སྲོང་འབྲས་བུ་དང་། རྩ་བ་དང་ཆུ་ལ་ལོངས་སྤྱོད་པ། །པགས་པ་དང་ལོ་མ་གྱོན་པ། དུང་དང་བྲིས་པ་ཞེས་བྱ་བ་སྤུན་གཉིས་ཞིག་གནས་ཏེ། དུང་ནི་མཁན་པོ་བྱེད་དོ། །བྲིས་པ་ནི་སློབ་མ་བྱེད་དེ། དེ་གཉིས་བཱ་རཱ་ཎ་སཱིའི་འཇིག་རྟེན་ཐམས་ཅད་ལ་ཡང་གྲགས་སོ། །རྒྱལ་པོ་ཚངས་སྦྱིན་གྱིས་ཀྱང་སྐྱེད་མོས་ཚལ་ག་གེ་མོ་ཞེས་བྱ་བར་དྲང་སྲོང་དུང་དང་བྲིས་པ་སྤུན་གཉིས་གནས་ཏེ། དེ་ལ་དུང་ནི་མཁན་པོ་བྱེད་དོ། །བྲིས་པ་ནི་སློབ་མ་བྱེད་དོ་ཞེས་ཐོས་སོ། །ཇི་ཙམ་དུས་གཞན་ཞིག་ན་དུང་གིས་རིལ་བ་ཆུས་བཀང་ནས་རྩ་བ་དང་འབྲས་བུའི་ཆེད་དུ་ནགས་ཁྲོད་དུ་སོང་ངོ་། །བྲིས་པ་ཡང་དེ་ཉིད་ནས་ནང་པར་སྔར་ལངས་ཏེ་སོང་ནས་དེས་མེ་ཏོག་དང་འབྲས་བུ་དག་བླངས་ཏེ་རིངས་པར་འོངས་ནས་རང་གི་རིལ་བ་ལས་བརྟགས་ནས་ཆུ་ཉུང་ནས་དེ་སྐོམ་པས་ཉེན་པས་བསམས་པ། མཁན་པོའ་ཆུ་བཏུང་ངོ་སྙམ་ནས་དེས་འཐུངས་སོ། །ཇི་ཙམ་ན་དྲང་སྲོང་དུང་རྩ་བ་དང་འབྲས་བུ་དག་བླངས་ནས་སྐོམ་པས་ཉེན་པའི་རང་བཞིན་གྱིས་བསྟི་གནས་སུ་ཕྱིན་ནས་རིལ་བ་ལ་བརྟགས་ན་སྟོང་པར་མཐོང་ནས་དེ་མི་བཟོད་པ་སྐྱེས་ཏེ་སྨྲས་པ། ཁོ་བོའ་ཆུ་རྐུན་མ་སུ་ཞིག་གིས་བརྐུས། བྲིས་པས་སྨྲས་པ། མཁན་པོ་རྐུན་མ་ནི་བདག་ལགས་ཏེ། བདག་གིས་འཚལ་གྱིས་བདག་ལ་ཆད་པས་དགུམ་དུ་གསོལ། དེས་སྨྲས་པ། ཁྱོད་ནི་ཁོ་བོ་དང་སྤུན་ཡིན་ལ་སློབ་མ་ཡང་ཡིན་པས་གལ་ཏེ་འཐུངས་ན་འཐུངས་པས་ལེགས་ཀྱིས་ཅི་བདེར་སྤྱོད་ཅིག །དེས་སྨྲས་པ་མཁན་པོ་འགྱོད་པ་འདི་བདག་
གིས་བསལ་བར་རྔོ་མི་ཐོག་གིས་ཆོམ་རྐུན་པ་ལ་གཅོད་པའི་ཆད་པ་ལྕི་བག་ཆགས་པས་བདག་ལ་དགུམ་དུ་གསོལ་ཞེས་དེ་སྐད་སྨྲས་པ་དང་། དྲང་སྲོང་དུང་ཁྲོས་ནས་སྨྲས་པ། ཁོ་བོ་ཆད་པ་མི་གཅོད་ཀྱིས་ཅི་སྟེ་ཁྱོད་ཆད་པ་དོན་དུ་གཉེར་ན་རྒྱལ་པོའ་དྲུང་དུ་སོང་ཤིག །ཡང་དེའི་ཚེ་རྒྱལ་པོ་རི་དགས་འཆོར་བའི་ཕྱིར་ཆས་པ་དེ་ལ་དེས་རྒྱལ་བ་དང་ཚེ་སྤེལ་བ་དག་ཀྱང་བྱས་ནས་ཚིགས་སུ་བཅད་པས་གསོལ་བ་བཏབ་པ། རྒྱལ་ཆེན་གང་ཕྱིར་མ་སྩལ་ཆབ། །འཚལ་བས་བདག་ནི་རྐུན་མ་ལགས། །ཆོམ་རྐུན་གཅད་པ་གང་ལགས་པའི། །ཆད་པའི་ལྕི་བས་བདག་ལ་ཁུམ། །རྒྱལ་པོས་སྨྲས་པ། །ཆུ་ལ་ནི་མ་བྱིན་པར་ལེན་པ་མེད་ན་འོན་ཀྱང་སུ་དབང་བའི་ཆུ་ཁྱོད་ཀྱིས་བརྐུས། དེས་ཇི་ལྟར་གྱུར་པ་རྣམས་སྨྲས་པ་དང་། རྒྱལ་པོས་སྨྲས་པ། ཁྱོད་དང་དེ་སྤུན་ཡིན་ཞིང་མཁན་པོ་ཡང་ཡིན་པས་ཆད་པས་གཅད་པར་མི་འོས་ཀྱིས་སོང་ཤིག །དེས་སྨྲས་པ། ལྷ་བདག་གིས་འགྱོད་པ་བསལ་བར་རྔོ་མི་ཐོག་གིས་ཆོམ་རྐུན་པ་ལ་འགུམ་པའི་ཆད་པ་ལྕི་བ་གང་ལགས་པས་བདག་ལ་དགུམ་དུ་གསོལ་ཞེས་དེ་སྐད་སྨྲས་པ་དང་། རྒྱལ་པོ་ཁྲོ་བའི་ཀུན་ནས་དཀྲིས་པ་ལ་གནས་པའི་ཀུན་ནས་དཀྲིས་པ་དྲག་པོས་སྨྲས་པ། གལ་ཏེ་དེ་ལྷ་ན་འདི་ཉིད་དུ་འདུག་ལ་རེ་ཞིག་ང་སླར་མ་ལོག་གི་བར་དུ་ཁྱོད་མ་འགྲོ་ཤིག རྒྱལ་པོ་དེས་རི་དགས་བཤོར་ནས་ཆེད་དུ་བསམས་ཏེ་སྒོ་གཞན་ནས་ཕྱིར་ཡང་མ་བྱུང་ངོ་། །བློན་པོ་རྣམས་ཀྱིས་ཞག་དྲུག་གི་ཉིན་པར་རྒྱལ་པོ་ལ་སྨྲས་པ། ལྷ་དྲང་སྲོང་དེ་ཕྱོགས་དེ་ཁོ་ན་ཉིད་ན་མཆིས་ནས་དེང་དུ་དགུང་དྲུག་ལགས་ཀྱིས་བཀའ་སྩལ་པའི་རིགས་སོ། །རྒྱལ་པོས་སྨྲས་པ། ཆད་པ་ནས་ཕྱུང་ལ་དེའི་ཆད་པ་ནི་དེ་ཁོ་ན་ཡིན་གྱིས་སོང་ཤིག །བློན་པོ་རྣམས་ཀྱིས་དྲང་སྲོང་དེ་ལ་སྨྲས་པ། དྲང་སྲོང་ལྷའི་ཞལ་ནས་ཆང་པ་ནས་ཕྱུང་ལ་དེའི་ཆད་པ་ནི་དེ་ཁོ་ན་ཡིན་གྱིས་སོང་ཤིག་ཅེས་གསུང་ངོ་། །དེ་འགྱོད་པ་དང་བྲལ་ཏེ་སོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཚངས་སྦྱིན་གང་ཡིན་པ་དེ་ནི་སྒྲ་ཅན་ཟིན་འདི་ཉིད་ཡིན་ཏེ། དེ་ན་འདིས་སེམས་གདུག་པས་དྲང་སྲོང་ལ་ཕྱོགས་འདི་ཉིད་དུ་འདུག་ལ་མ་འགྲོ་ཤིག་ཅེས་སྨྲས་པ་དེའི་ལས་ཀྱི་རྣམ་པར་སྨིན་པས་མའི་མངལ་དུ་ལོ་དྲུག་གོ །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་
རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ།། །།འདུལ་བ་གཞི། བམ་པོ་དགུ་བཅུ་རྩ་ལྔ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་བཟང་ལྡན་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མི་གཙོ་བོ་རྣམས་ཀྱི་རྒྱལ་པོར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བཟང་ལྡན་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་བཟང་ལྡན་གྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་མུ་ལྟོ་བ་ཞིག་ལྗོངས་ཤིག་ནས་བཱ་རཱ་ཎ་སཱིར་འོངས་པ་དང་། དེ་ན་གཉུག་མར་གནས་པའི་མུ་ལྟོ་བ་ཕྲག་དོག་གི་རང་བཞིན་ཅན་རྣམས་ཀྱིས་དེ་ལྟག་དབྱུག་དང་ཐག་ལྕག་དང་། དབྱུག་པ་ལ་སོགས་པས་ཤིན་ཏུ་བརྡེགས་ནས་བསྐྲད་དེ་དེ་བཱ་རཱ་ཎ་སཱིའི་ཕྱི་རོལ་ན་རྒྱལ་པོའི་སྐྱེད་མོས་ཚལ་ཞིག་ཡོད་པ་ན་གནས་སོ། །ཇི་ཙམ་ན་རྒྱལ་པོ་ཚངས་སྦྱིན་སོ་གའི་དུས་ལ་བབ་སྟེ། མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཀྲུང་ཀྲུང་དང་། རྨ་བྱ་དང་། ནེ་ཙོ་དང་། རི་སེགས་དང་ཁུ་བྱུག་དང་། །ཤང་ཤང་ཏེའུ་རྣམས་སྐད་འབྱིན་པའི་ནགས་ཚལ་སྟུག་པོའ་སྐྱེད་མོས་ཚལ་གྱི་གཞིར་བཙུན་མོ་དང་ལྷན་ཅིག་སོང་ནས་དེ་སྐྱེད་མོས་ཚལ་དེ་ན་བཙུན་མོ་དང་ལྷན་ཅིག་བདེ་བ་ཉམས་སུ་མྱོང་བར་བྱས་ནས་གཉིད་ལོག་གོ །བུད་མེད་ནི་མེ་ཏོག་དང་འབྲས་བུ་ལ་དགའ་
བ་ཡིན་པས། མེ་ཏོག་དང་འབྲས་བུ་ཚོལ་ཞིང་ཕན་ཚུན་འཁྱམ་པ་ལ་ཞུགས་སོ། །ཇི་ཙམ་རྒྱལ་པོ་ཚངས་སྦྱིན་གཉིད་ཀྱིས་དུབ་པ་སངས་ནས་རིངས་པ་རིངས་པར་བཱ་རཱ་ཎ་སཱིར་ཞུགས་སོ། །བཙུན་མོའ་བུད་མེད་རྣམས་ཀྱང་རིངས་པ་རིངས་པར་དོང་ངོ་། །ཇི་ཙམ་ན་བུད་མེད་གཞན་ཞིག་རྟབས་པས་མུ་ཏིག་གི་དོ་ཤལ་པོར་ཏེ་སོང་ངོ་། །ཇི་ཙམ་ན་མུ་ལྟོ་བ་དེ་སྐྱེད་མོས་ཚལ་དེར་རྒྱུ་བར་བརྩམས་པ་ན། དེས་མུ་ཏིག་གི་དོ་ཤལ་དེ་མཐོང་ནས། དེས་བམསས་པ། བདག་ལ་འདི་ཅི་དགོས་འདིིའི་ཕྱིར་གནོད་པར་འགྱུར་བའི་གནས་གང་ཡིན་པ་དེ་ཡོད་སྙམ་ནས་དེེས་དེ་སུའི་ཡིན་པ་དེ་ལེན་པར་འགྱུར་གྲང་ཞེས། དེ་སྐྱེད་མོས་ཚལ་ཉིད་དུ་ཤིང་གི་ཡལ་ག་ཞིག་ལ་བཏགས་ཏེ་བཞག་གོ །ཇི་ཙམ་ན་བཙུན་མོ་རྣམས་ཀྱིས་རྒྱལ་པོ་ལ་གསོལ་པ། ལྷ་བཙུན་མོ་ཆེ་གེ་མོ་ཞེས་བགྱི་བའི་མུ་ཏིག་གི་དོ་ཤལ་སྐྱེད་མོས་ཚལ་དུ་ལུས་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་མུ་ཏིག་གི་དོ་ཤལ་སྐྱེད་མོས་ཚལ་དུ་ལུས་པ་ཚོལ་ཅིག །དེ་རྣམས་སྐྱེད་མོས་ཚལ་དུ་དོང་ནས་བཙལ་བར་བརྩམས་པ་དང་། ཇི་ཙམ་ན་ཤིང་གི་ཡལ་གཞི་ལ་བཏགས་པ་མཐོང་ནས་དེ་རྣམས་ཀྱིས་བསམས་པ། རེ་ཞིག་འདི་སུས་བཏགས་དཔྱད་པར་བྱའོ་སྙམ་ནས་དེ་རྣམས་སྐྱེད་མོས་ཚལ་ན་རྒྱུ་བར་བརྩམས་པ་དང་། ཇི་ཙམ་ན་མུ་ལྟོ་བ་ཞིག་མཐོང་ནས་དེ་རྣམས་ཀྱིས་དེ་ལ་སྨྲས་པ། ཀྭའི་ནང་རྗེ་མུ་ཏིག་གི་དོ་ཤལ་འདི་སུ་ཞིག་གིས་ཡལ་ག་ལ་བཏགས་ཏེ་བཞག །དེས་ཇི་ལྟར་གྱུར་པ་དེ་རྣམས་ལ་སྨྲས་པ་དང་། བློན་པོ་རྣམས་ཀྱིས་རྒྱལ་པོ་ལ་མུ་ཏིག་གི་དོ་ཤལ་ཕུལ་ནས་ཇི་ལྟར་གྱུར་པ་སྨྲས་སོ། །རྒྱལ་པོས་སྨྲས་པ། ཤེས་ལྡན་དག་མུ་ལྟོ་བ་དེ་ལྟས་ཁུག་ཤིག་དེ་རྣམས་ཀྱིས་བཀུག་ནས་རྒྱལ་པོས་སྨྲས་པ། ཀྭའི་ནང་རྗེ་ཁྱོད་ཀྱིས་ཅིའི་ཕྱིར་མུ་ཏིག་གི་དོ་ཤལ་ཤིང་གི་ཡལ་ག་ལ་བཏགས་ཏེ་བཞག་ནས་རང་གིར་མ་བྱས། དེས་སྨྲས་པ། ལྷ་འདིའི་སྐལ་བ་བདག་ལ་མ་མཆིས་ཀྱི་ལྷ་ཁོ་ན་ལ་འོས་པའི་སླད་དུའོ། །རྒྱལ་པོ་དགའ་བར་གྱུར་ནས་སྨྲས་པ། ཀྭའེ་ནང་རྗེ་ཁྱོད་ནི་དམ་པ་འོས་པ་ཡིན་པས་དམ་པ་གང་འདོད་པ་གསོལ་ཅིག་སྦྱིན་ནོ། །དེས་སྨྲས་པ། གལ་ཏེ་ལྷ་བདག་ལ་དགྱེས་པར་གྱུར་ན་མུ་ལྟོ་བ་རྣམས་འཚལ་མ་སྩལ་ཅིང་དེ་རྣམས་རེ་རེ་ལ་
རས་ཟུང་རེ་བསྐོན་ནས་བདག་དཔོན་པོར་བསྐོ་བར་གསོལ། རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ཁྱེད་ཅག་གིས་མུ་ལྟོ་བ་ཐམས་ཅད་ཟན་བྱིན་ལ་རེ་རེ་ལ་རས་ཟུང་རེ་བསྐོན་ཏེ་འདི་དེ་རྣམས་ཀྱི་དཔོན་པོར་ཆུག་ཤིག །དེ་རྣམས་ཀྱིས་པཱ་རཱ་ཎ་སཱིར་དྲིལ་སྒྲོགས་སུ་བཅུག་པ། ལྷས་བཀའ་སྩལ་གྱིས་བཱ་རཱ་ཎ་སཱིའི་མུ་ལྟོ་བ་ཇི་སྙེད་པ་ཐམས་ཅད་སྐྱེད་མོས་ཚལ་ཆེ་གེ་མོ་ཞིག་ཏུ་འདུས་ཤིག །ངས་མུ་ལྟོ་བ་རྣམས་ལ་ཟས་སྦྱིན་ཞིང་རེ་རེ་ལ་ཡང་རས་ཟུང་རེ་བསྐོན་ནོ་ཞེས་བསྒྲགས་པ་དང་། དེ་དག་ཐམས་ཅད་འདུས་ནས་བློན་པོ་རྣམས་ཀྱིས་ཁ་ཟས་བསོད་པས་ཚིམ་པར་བྱས་ནས་རེ་རེ་ལ་ཡང་རས་ཟུང་རེ་བསྐོན་ཏེ་བསྒོ་བ། ལྷས་བཀའ་སྩལ་པ། དེང་ཕན་ཆད་ཁྱེད་ཅག་གི་རྒྱལ་པོར་མུ་ལྟོ་བ་འདི་བསྐོས་ཀྱིས། ཁྱེད་ཅག་གིས་འདིའི་ཚིག་བཞིན་དུ་བྱོས་ཤིག །དེ་རྣམས་ཁ་ཟས་བསོད་པས་ཚིམ་པར་བྱས་པ་དང་། རས་ཟུང་རེ་བསྐོན་པས་ཡི་རངས་ནས་སྨྲས་པ། ལྷས་ཇི་སྐད་བཀའ་སྩལ་པ་བཞིན་དུ་འཚལ་ལོ་ཞེས་མུ་ལྟོ་བ་དེ་དཔོན་པོར་གྱུར་ཏོ། །མུ་ལྟོ་བ་རྣམས་ནི་རང་བཞིན་གྱིས་བཀྲེས་སྐོམ་པས་ཟིལ་གྱིས་ནོན་པ་ཡིན་པས་ཚོང་འདུས་ནས་བཟའ་བ་དང་བཏུང་བ་འཕྲོག་པར་བྱེད་དོ། །དེ་རྣམས་རྒྱལ་པོས་བཀུར་ནས་ནི་ལྷག་པར་ཡང་དབྲོག་པར་བརྩམས་སོ། །ཚོང་རྡལ་གྱིས་འཚོ་བའི་ཚོགས་འཁྲུགས་ནས་དེས་རྒྱལ་པོ་ལ་གསོལ་པ་དང་། རྒྱལ་པོས་སྨྲས་པ། ཁྱེད་ཅག་སྲུང་བ་ལ་བག་ཡོད་པར་བྱོས་ལ་དེ་རྣམས་ལ་ནི་མ་རྡེག་ཤིག །ཇི་ཙམ་ན་མི་ཞིག་སྣུམ་ཁུར་དག་ཁྱེད་ནས་ཚོང་འདུས་ཀྱི་དབུས་ནས་སོང་བ་ལས་མུ་ལྟོ་བའི་དཔོན་པོ་དེས་དེ་ལ་ཕྲོགས་ནས་དེ་ཁྱེར་ཏེ་ཕྱོགས་དབེན་པ་ཞིག་ཏུ་སོང་བ་དང་། མུ་ལྟོ་བ་རྣམས་ཀྱིས་ཕྱིར་འབྲངས་ཏེ་དེ་རྣམས་ཀྱིས་དེ་རྣམས་ཀྱིས་དེ་ལ་གླགས་བལྟས་པ་ན་འབབ་ཆུ་བ་རི་ཀ་རྒལ་ནས་ཤིང་ཞིག་གི་དྲུང་དུ་འདུག་གོ །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་། ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་བ་ཡིན་པས། ཇི་ཙམ་ན་རང་སངས་རྒྱས་ཞིག་སྟེས་ཏེ་ཕྱོགས་དེར་འོངས་པ་དང་། དེས་དེ་ལུས་མཛེས་ཤིང་སེམས་དང་བ་དང་། སྤྱོད་ལམ་ཞི་བར་མཐོང་ནས་དེས་
བསམས་པ། གདོན་མི་ཟ་བར་བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་མ་བྱས་པ་དེས་ན་བདག་མི་ཐོབ་ན་ཡང་མུ་ལྟོ་བར་སྐྱེས་ཀྱིས། གལ་ཏེ་བདག་ཉིད་ཆེན་པོ་འདི་བདག་ལས་སྣུམ་ཁུར་བཞེས་པར་གྱུར་ན་བདག་གིས་དེ་དབུལ་ལོ་སྙམ་མོ། །དེ་ནས་རང་སངས་རྒྱས་དེའི་སེམས་ཀྱིས་དེའི་བསམ་པ་ཤེས་ནས། ཕ་རོལ་རྗེས་སུ་བཟུང་བའི་ཆེད་དུ། དེ་ལ་ལྷུང་བཟེད་བཟེད་དོ། །དེས་དེ་ལ་གུས་པས་སྣུམ་ཁུར་ཕུལ་ལོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ངག་གིས་མ་ཡིན་པས་དེ་སྟེང་གི་བར་སྣང་ལ་འཕགས་ཏེ། འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའ་སྐྱེ་བོ་རྣམས་ནི་རྫུ་འཕྲུལ་ལ་མྱུར་དུ་སེམས་གཏོང་བ་ཡིན་པས་དེ་ཤིང་རྩ་བ་ནས་བཅད་པ་བཞིན་དུ་རང་སངས་རྒྱས་རྐང་པ་ལ་གཏུགས་ནས་སྨོན་ལམ་གདབ་པར་བརྩམས་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་མི་གཙོ་བོ་རྣམས་ཀྱི་རྒྱལ་པོར་གྱུར་ལ། འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཀྱི་མི་མཉེས་པར་མི་བྱེད་པར་གྱུར་ཅིག་ཅེས་བཏབ་བོ། །དེ་ནས་མུ་ལྟོ་བ་རྣམས་ལྷགས་ནས་སྨྲས་པ། བདག་ཅག་ལ་ཡང་སྣུམ་ཁུར་སྩོལ་ཅིག །དེས་སྨྲས་པ། ངས་དེ་བདག་ཉིད་ཆེན་པོའི་དྲང་སྲོང་དེ་ལ་ཕུལ་ལོ། །དེ་རྣམས་ཀྱིས་སྨྲས་པ། ཕུལ་ན་ཁྱོད་ཀྱིས་སྨོན་ལམ་ཇི་སྐད་བཏབ། དེས་སྨྲས་པ། མི་གཙོ་བོ་རྣམས་ཀྱི་རྒྱལ་པོར་གྱུར་ཅིག་ཅེས་བྱས་སོ། །དེ་རྣམས་ཀྱིས་སྨྲས་པ། བདག་ཅག་ཁོ་ན་ཁྱོད་ཀྱི་མི་གཙོ་བོ་རྣམས་སུ་གྱུར་ཅིང་། དེ་རྣམས་ཀྱི་རྒྱལ་པོར་ཁྱོད་གྱུར་ཅིག །དེས་སྨྲས་པ། ལེགས་ཀྱིས་དེ་བཞིན་དུ་གྱུར་ཅིག །ཁྱེད་ཅག་གིས་ཅི་དྲང་སྲོང་གི་ཞབས་ལ་གཏུགས་ཏེ་སྨོན་ལམ་མི་གདབ་བམ། དེ་རྣམས་ཀྱིས་རང་སངས་རྒྱས་དེའི་རྐང་པ་ལ་གཏུགས་ཏེ་སྨོན་ལམ་བཏབ་པ། བདག་ཅག་ཁྱོད་ཀྱི་མི་གཙོ་བོ་རྣམས་སུ་གྱུར་ཅིང་དེ་རྣམས་ཀྱི་རྒྱལ་པོར་ཁྱོད་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་མུ་ལྟོ་བའི་དཔོན་པོ་གང་ཡིན་པ་དེ་ནི་ཤཱཀྱའི་རྒྱལ་པོ་བཟང་ལྡན་འདི་ཉིད་ཡིན་ནོ། །མུ་ལྟོ་བ་དེ་རྣམས་
ནི་ཤཱཀྱ་ལྔ་བརྒྱ་པོ་འདི་དག་ཡིན་ཏེ། འདི་དག་དང་བཟང་ལྡན་མུ་ལྟོ་བར་གྱུར་པ་ན་རང་སངས་རྒྱས་ལ་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་ཤཱཀྱ་ལྔ་བརྒྱ་པོ་འདི་རྣམས་ཀྱི་རྒྱལ་པོར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །སངས་རྒྱས་བཅོམ་ལྡན་འདས་སྒྲ་ཅན་གྱི་དྲང་སྲོང་ཀུན་རྫི་ཀའི་གནས་ན་བཞུགས་སོ། །དེའི་ཚེ་ལྷུང་བཟེད་རབ་ཏུ་མང་པོ་དང་། བཅོམ་ལྡན་འདས་ཀྱིས་ལྷུང་བཟེད་བླ་གབ་མེད་པར་བཞག་གོ །དེ་ནས་སྤྲེའུ་ཤིག་ཤིང་སཱ་ལ་ལས་བབས་ནས་ལྷུང་བཟེད་རྣམས་གང་ན་ཡོད་པ་དེར་སོང་བ་དང་། དགེ་སློང་རྣམས་ཀྱིས་ལྷུང་བཟེད་རྣམས་བཅག་ཏུ་འོང་ཞེས་དེ་བཟློག་གོ །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྤྲེའུ་འདིས་ལྷུང་བཟེད་རྣམས་བཅག་པར་མི་འགྱུར་གྱིས་འདི་ལམ་བཟློག་ཤིག །དེ་ནས་སྤྲེའུ་དེ་བཅོམ་ལྡན་འདས་ཀྱི་ལྷུང་བཟེད་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ལྷུང་བཟེད་ཁྱེར་ཏེ་ཤིང་སཱ་ལ་དེ་ལ་འཛེགས་ནས་སྦྲང་བུའི་སྦྲང་རྩིའི་དངས་མས་བཀང་སྟེ་རིམ་གྱིས་དལ་བུ་དལ་བུས་ཤིང་སཱ་ལ་ལས་བབས་ནས་བཅོམ་ལྡན་འདས་ལ་ཕུལ་བ་དང་། བཅོམ་ལྡན་འདས་ཀྱིས་དེ་སྲོག་ཆགས་དང་བཅས་པ་ཡིན་པས་མ་བཞེས་སོ། །དེ་ནས་སྤྲེའུ་དེས་མཐའ་གཅིག་ཏུ་སོང་ནས་སྲོག་ཆགས་བསལ་ཏེ་བཅོམ་ལྡན་འདས་ལ་ཕུལ་བ་དང་། བཅོམ་ལྡན་འདས་ཀྱིས་དེ་བརྟགས་པ་མ་ཡིན་ནོ་ཞེས་མ་བཞེས་སོ། །དེ་ནས་སྤྲེའུ་དེ་མཐའ་གཅིག་ཏུ་སོང་སྟེ་ཆུ་གྲང་མོས་བཏབ་ནས་བཅོམ་ལྡན་འདས་ལ་ཕུལ་བ་དང་། བཅོམ་ལྡན་འདས་ཀྱིས་དེ་བརྟགས་པ་བྱས་སོ་ཞེས་བཞེས་སོ། །དེ་ནས་སྤྲེའུ་དེ་བཅོམ་ལྡན་འདས་ཀྱིས་བདག་གི་སྦྲང་རྩིའི་ལྷུང་བཟེད་བཞེས་སོ་སྙམ་དུ་རིག་ནས། དགའ་བ་དང་། མགུ་བ་དང་། དགའ་བ་རྒྱ་ཆེན་པོ་དང་། ཡིད་བདེ་བ་སྐྱེས་ནས་ཐལ་མོ་ཁོང་སྟོང་དུ་སྦྱར་བ་བྱས་ཏེ་ཕྱི་ནུར་དུ་གར་བྱེད་ཅིང་ཕྱག་འཚལ་བ་ལས་དེ་བཅོམ་ལྡན་འདས་ལ་དད་པ་སྐྱེས་ནས་བཅོམ་ལྡན་འདས་ལ་རྟོག་ཅིང་རྒྱབ་ཏུ་མ་བལྟས་
པས་ཁྲོན་པར་ལྷུང་ནས་ཤི་སྟེ་སྒྲ་ཅན་ཉིད་ཀྱི་བྲམ་ཟེ་ལས་དྲུག་ལ་བརྩོན་པ་ཞིག་གི་ཁྱིམ་དུ་སྐྱེས་སོ། གང་གི་ཉི་མ་ཁོ་ན་ལ་ཉིང་མཚམས་སྦྱོར་བ་བླངས་པ་དེ་ཁོ་ནའི་ཉི་མ་ལ་སྦྲང་རྩིའི་ཆར་བབ་པོ། །དེའི་པས་ལྟས་མཁན་རྣམས་བཀུག་ནས་སྨྲས་པ་དང་། དེ་རྣམས་ཀྱིས་སྨྲས་པ། སེམས་ཅན་འདིའི་མཐུ་ཡིན་ནོ། །ཇི་ཙམ་ན་བྲམ་ཟེ་མོ་དེ་ཟླ་བ་བརྒྱད་དམ་དགུ་འདས་ནས་ཁྱེའུ་ཞིག་བཙས་སོ། །གང་གི་ཉི་མ་ཁོ་ན་ལ་བཙས་པ་དེ་ཁོ་ནའི་ཉི་མ་ལ་སྦྲང་རྩིའི་ཆར་བབ་བོ། །དེའི་ཉེ་དུ་རྣམས་ཚོགས་ཤིང་འདུས་ནས་ཉི་མ་བདུན་གསུམ་ཉི་ཤུ་གཅིག་ཏུ་དེའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། ཁྱེའུ་འདི་དག་གི་ཉི་མ་ཁོ་ན་ལ་མའི་རུམ་དུ་ཞུགས་པ་དེ་ཁོ་ནའི་ཉི་མ་ལ་སྦྲང་རྩིའི་ཆར་བབ་ལ། གང་གི་ཉི་མ་ཁོ་ན་ལ་བཙས་པ་དེ་ཁོ་ནའི་ཉི་མ་ལ་ཡང་སྦྲང་རྩིའི་ཆར་བབ་ལ། གནས་འཇོག་དང་ཡང་རུས་གཅིག་པས་དེ་བས་ན་ཁྱེའུའི་མིང་གནས་འཇོག་གི་བུ་སྦྲང་རྩི་ཅན་ཞེས་བྱ་བར་གདགས་སོ་ཞེས་དེའི་མིང་གནས་འཇོག་གི་བུ་སྦྲང་རྩི་ཅན་ཞེས་བྱ་བར་བཏགས་སོ། །དེ་བསྲིངས་བསྐྱེད་ནས་ཆེན་པོར་གྱུར་ཏོ། །གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་སྟེ། དེ་རབ་ཏུ་བྱུང་ནས་ཀྱང་ཉི་མ་རེ་རེ་ཞིང་སྦྲང་རྩི་ལྷུང་བཟེད་གསུམ་གསུམ་གྲུབ་པར་གྱུར་ཏེ། དེས་དེ་རྣམས་ལས་གཅིག་ནི་བཅོམ་ལྡན་འདས་ལ་འབུལ་ལོ། །གཉིས་པ་ནི་དགེ་འདུན་ལའོ། །གསུམ་པ་འགྲོགས་བཤེས་དང་ལྷན་ཅིག་ལོངས་སྤྱོད་པར་བྱེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གནས་འཇོག་གི་བུ་སྦྲང་རྩི་ཅན་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་གདུགས་རེ་རེ་ཞིང་སྦྲང་རྩི་ལྷུང་བཟེད་གསུམ་གསུམ་གྲུབ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གནས་འཇོག་གི་བུ་སྦྲང་རྩི་ཅན་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་
བའི་བར་གོང་མ་བཞིན་དུའོ། །དགེ་སློང་དག་ཁྱེད་ཀྱིས་དེ་བཞིན་གཤེགས་བ་ལ་སྦྲང་རྩིའི་ལྷུང་བཟེད་འབུལ་བའི་སྦྲེའུ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །དེའི་ཚེ་དེའི་དུས་ཀྱི་སྤྲེའུ་གང་ཡིན་པ་དེ་ནི་གནས་འཇོག་གི་བུ་སྦྲང་རྩི་ཅན་འདི་ཉིད་ཡིན་ཏེ། དེས་ན་འདིས་དེ་བཞིན་གཤེགས་པ་ལ་སྦྲང་རྩིའི་ལྷུང་བཟེད་ཕུལ་བ་དེའི་ལས་ཀྱི་རྣམ་པར་སྨིན་པས་བྲམ་ཟེ་ལས་དྲུག་ལ་བརྩོན་པའི་ཁྱིམ་དུ་སྐྱེས་ཤིང་ཉིང་མཚམས་སྦྱོར་བ་བླངས་པ་དང་བཙས་པ་ན་ཡང་སྦྲང་རྩིའི་ཆར་བབ་པོ། །དའི་ལྟར་ད་ལྟར་ཡང་ཉི་མ་རེ་རེ་ཞིང་སྦྲང་རྩི་ལྷུང་བཟེད་གསུམ་གསུམ་འགྲུབ་པར་འགྱུར་རོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམ་པར་སྨིན་པ་ནི་གཅིག་ཏུ་གནག་པ་ཞེས་བྱ་བ་ནས་ལས་གཅིག་ཏུ་དཀར་བ་ལས་བརྩལ་བར་བྱའོ་ཞེས་བྱ་བའི་བར་གོང་མ་བཞིན་དུའོ། །དེ་ཅིའི་ཕྱིར་ཞེ་ན། གལ་ཏེ་དགེ་སློང་གནས་འཇོག་གི་བུ་སྦྲ་རྩི་ཅན་གྱིས་ཤར་གྱི་རྒྱ་མཚོ་ཆེན་པོ་ལ་སྦྲང་རྩིར་མོས་ཤིང་། ལྷོ་དང་། ནུབ་དང་། བྱང་གི་རྒྱ་མཚོ་ཆེན་པོ་སྦྲང་རྩིར་མོས་ན་དེ་དག་ཀྱང་སྦྲང་རྩིར་འགྱུར་ཏེ། དགེ་སློང་དག་དེ་ལྟར་ན་ཡོན་གནས་དེ་བཞིན་གཤེགས་པ་ནི་དཔག་ཏུ་མེད་པ་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་བ་འཁོར་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་རྒྱལ་པོའ་འབྲེག་མཁན་དུ་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཉེ་བ་འཁོར་འདི་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་བྱས་ཤིང་བསགས་པ་དང་ཚོགས་རྙེད་པ་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བརྒྱལ་པོའ་འབྲེག་མཁན་ཞིག་ཡོད་པའི་དྲུང་དུ་རང་སངས་རྒྱས་ཤིས་སོང་ནས་བཞིན་བཟངས་པའི་སྐྲ་བྲེགས་ཤིག་དང་། ཁྱོད་ལ་བསོད་ནམས་སུ་འགྱུར་རོ། །དེ་ཡང་རྒྱལ་པོའ་ཕོ་བྲང་དུ་ཆས་པས་དེས་ཚ་བོ་ལ་སྨྲས་པ། ཚ་བོ་རབ་ཏུ་བྱུང་བ་འདིའི་དབུ་རེགས་ཤིག །ཁོ་བོ་རྒྱལ་པོའ་ཁབ་ཏུ་འགྲོ་དགོས་ཀྱིས། ཇི་ལྟར་རྒྱལ་
པོ་ལ་བྱ་བ་དེ་བཞིན་དུ་རེགས་ཤིག །དེས་བསམས་པ། ཞང་པོས་ཇི་སྐད་སྨྲས་པ་ལས་ན་གདོན་མི་ཟ་བར་འདི་ལ་བསོད་ནམས་ཡོད་དོ་སྙམ་ནས། དེས་གུས་པར་བྱ་ཏེ་དེའི་སྐྲ་དང་ཁ་སྤུ་བྲེགས་སོ། །རང་སངས་རྒྱས་ཀྱིས་བསམས་པ། སེམས་ཅན་འདིས་བསོད་ནམས་མང་དུ་བསྐྱེད་ཀྱིས་འདི་དགེ་བ་བསྐྱེད་པར་བྱའོ་སྙམ་དུ་བསམས་ནས་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་བར་སྣང་ལ་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའ་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་ཤིང་རྩ་བ་ནས་བཅད་བ་བཞིན་དུ་རྐང་པ་གཉིས་ལ་གཏུགས་ཏེ་སྨོན་ལམ་གདབ་པར་བརྩམས་པ། དགེ་བའི་རྩ་བ་འདིས་ཇི་ལྟར་བདག་གི་ཞང་པོ་རྒྱལ་པོའ་འབྲེག་མཁན་བྱེད་པ་དེ་བཞིན་དུ་བདག་ཀྱང་རྒྱལ་པོའ་འབྲེག་མཁན་དུ་གྱུར་ཅི་གཅེས་བྱས་སོ། །དགེ་སློང་དག་ཇི་སྙམ་དུ་སེམས། རྒྱལ་པོའི་འབྲེག་མཁན་གྱི་ཚ་བོ་གང་ཡིན་པ་དེ་ནི་དགེ་སློང་ཉེ་བར་འཁོར་འདི་ཉིད་ཡིན་ཏེ། དེ་ན་འདིས་རང་སངས་རྒྱས་ཀྱི་སྐྲ་དང་ཁ་སྤུ་བྲེགས་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་རྒྱལ་པོའི་འབྲེག་མཁན་དུ་གྱུར་ཏོ། །གཞན་ཡང་འདིས་སྨོན་ལམ་བཏབ་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་ཏེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ། །ཡང་དེ་རྩེ་བར་བྱེད། །དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ་ཞེས་བྱ་བ་ནས། རིམ་གྱིས་ཁྱེའུ་བདུན་བཙས་སོ་ཞེས་བྱ་བའི་བར་དུའོ། །དེའི་ནེའུ་ཟླ་རྒྱལ་པོའི་འབྲེག་མཁན་ཞིག་ཡོད་པ་དེ་བུ་མེད་པས་ལག་པ་ལ་འགྲམ་པ་གཏད་དེ། བདག་ལ་བུ་ཕོ་ཡང་མེད། བུ་མོ་ཡང་མེད་པས་བདག་ཤིན་བདོག་བ་ཐམས་ཅད་བུ་མེད་དོ་ཞེས་རྒྱལ་པོས་མངའ་མཛད་པར་འགྱུར་རོ་སྙམ་དུ་སེམས་ཁོང་དུ་ཆུད་ཅིང་འདུག་པ་དེ་ཁྱིམ་བདག་དེས་མཐོང་ནས་སྨྲས་པ། ནེའུ་ཟླ་ཅིའི་ཕྱིར་སེམས་
ཁོང་དུ་ཆུད། དེས་སྨྲས་པ། ནེའུ་ཟླ་ཁོ་བོ་ལ་ནོར་གྱི་རིགས་འདི་སྙེད་ཡོད་ན་བུ་ཕོ་ཡང་མེད། བུ་མོ་ཡང་མེད་པས་ཁོ་བོ་ཤི་ནས་འདི་དག་ཐམས་ཅད་རྒྱལ་པོས་མངའ་མཛད་པར་འགྱུར་ན་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། དེས་སྨྲས་པ། གལ་ཏེ་དེ་ལྟ་ན་ཁོ་བོའ་བུ་འདི་དག་ཐམས་ཅད་ཀྱི་ནུ་བོ་ཤོས་དེ་ཁོ་བོས་ཁྱོད་ལ་སྦྱིན་ནོ། །དེས་དེ་བླངས་སོ། །ཇི་ཙམ་ན་ཁྱིམ་བདག་དེ་ཤི་བ་དང་། དེའི་བུ་དེ་རྣམས་གང་གི་ཚེ་ཁ་ཅིག་དང་ལྷན་ཅིག་འཐབ་མོ་འགྱེད་པ་དེའི་ཚེ་དེས་གང་དག་གི་སྤུ་འབྲེག་མཁན་ཡིན་པ་ཁྱེད་ཀྱང་འཐབ་མོ་རྒོལ་ལམ་ཞེས་ཁ་ཟེར་བར་བྱེད་དོ། །དེ་རྣམས་ཡིད་མི་བདེ་བ་སྐྱེས་ནས་བསམས་པ། བདག་ཅག་བརྙས་པ་ཅི་ཡང་རུང་བ་གང་ཡིན་པ་དེ་ཐམས་ཅད་ནི་ནུ་བོ་འདིའི་སྐྱོན་ལས་གྱུར་གྱིས་ཐམས་ཅད་དུ་དབྲོག་གོ་སྙམ་ནས་དེ་རྣམས་ཀྱིས་དེ་ཕྲོགས་པ་དང་། འབྲེག་མཁན་ཁྲོས་ནས་དེས་འབྲེག་མཁན་ཐམས་ཅད་ལ་ཁྲིམས་སུ་བཅས་པ། ཁྱིམ་བདག་ཆེ་གེ་མོ་ཞེས་བྱ་བའི་རྣམས་ཀྱི་ཁ་སྤུ་བཅོས་པའི་ལས་སུས་ཀྱང་མི་བྱའོ་ཞེས་བཅས་སོ། །དེ་རྣམས་སྐྲ་དང་། ཁ་སྤུ་དང་། སེན་མོ་རིང་པོར་སྐྱེས་པ་དེ་རྣམས་རྒྱལ་པོས་མཐོང་ནས་སྨྲས་པ། ཤེས་ལྡན་དག་ཁྱེད་ཅག་གིའི་ཕྱིར་སྐྲ་དང་། ཁ་སྤུ་དང་། སེན་མོ་རིང་པོར་འདུག །དེ་རྣམས་ཀྱིས་སྨྲས་པ། ལྷ་འབྲེག་མཁན་འདིས་འབྲེག་མཁན་ཐམས་ཅད་ལ་དེ་རྣམས་ཀྱི་ཁ་སྤུ་བཅོས་པའི་ལས་སུ་ཡང་མ་བགྱིད་ཅིག་ཅེས་བཀག་ལགས་སོ། །ཅིའི་ཕྱིར། དེ་རྣམས་ཀྱིས་ཇི་ལྟར་གྱུར་པ་སྨྲས་པ་དང་། རྒྱལ་པོས་སྨྲས་པ། ཕས་བུ་བྱིན་ན་ཁྱེད་ཅག་གིས་ཅིའི་ཕྱིར་དབྲོག །དེ་ལ་སླར་བྱིན་ཅིག །དེ་རྣམས་ཀྱིས་མི་འདོད་བཞིན་དུ་སླར་བཏང་ངོ་། །དེ་རྣམས་ཡིད་མི་བདེ་བསྐྱེས་ཏེ་འཇིག་རྟེན་གྱིས་སྨད་པས་འཇིགས་ནས་དེ་གསད་པར་འདོད་དོ། །འཇིག་རྟེན་ལ་ནི་མཛའ་བ་དང་མི་མཛའ་བ་དང་། བར་མ་ཡོད་པས་དེ་ལ་གཞན་དག་གིས་སྦྲན་པ་དང་། དེས་འབྲེག་མཁན་དེ་ལ་སྨྲས་པ། དེ་རྣམས་བདག་ལ་གསད་པར་འཚལ་གྱིས་གནང་བར་མཛོད་ཅིག་དང་རབ་ཏུ་འབྱུང་ངོ་། །དེས་བསམས་པ། དེ་རྣམས་ཀྱིས་སྲོག་དང་བྲལ་བ་བས་ནི་རབ་ཏུ་བྱུང་བ་
བླའོ་སྙམ་དུ་བསམས་ནས་སྨྲས་པ། བུ་གལ་ཏེ་དེ་ལྟ་ན་སོང་ལ་རབ་ཏུ་བྱུང་ཤིག །གང་གི་ཚེ་ཡོན་ཏན་ཀྱི་ཚོགས་ཅུང་ཟད་ཐོབ་པ་དེའི་ཚེ་བདག་ལ་སྨྲོས་ཤིག །དེ་གནང་བ་ཐོབ་ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་ཏེ། དེས་མཁན་པོ་མེད་པ་དང་སློབ་དཔོན་མེད་པར་རང་བྱུང་ཆུབ་མངོན་སུམ་དུ་བྱས་ནས་དེས་བསམས་པ། བདག་གིས་ཕ་དེ་ལ་སྔོན་ཁས་བླངས་པའི་དམ་བཅས་པ་དེ་སྟོན་དུ་འགྲོའོ་སྙམ་ནས་དེ་དེའི་དྲུང་དུ་སོང་སྟེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའ་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་ཤིང་རྩ་བ་ནས་བཅད་པ་བཞིན་དུ་རྐང་པ་གཉིས་ལ་གཏུགས་ནས་སྨོན་ལམ་གདབ་པར་བརྩམས་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པ་གང་ཡིན་པའི་དགེ་བའི་རྩྭ་བ་འདིས་བདག་རྒྱལ་པོའ་འབྲེག་མཁན་དུ་གྱུར་ཅིག །གཞན་ཡང་འདིས་རང་སངས་རྒྱས་ལྔ་བརྒྱ་ལ་བྱ་བ་བྱས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་རྒྱལ་པོའ་འབྲེག་མཁན་དུ་གྱུར་ཅིག །གཞན་ཡང་ཡང་དག་པར་རྫོགས་པའི་སངས་རྒྱས་བཞི་ལ་བྱ་བ་བྱས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་རྒྱལ་པོའ་འབྲེག་མཁན་དུ་གྱུར་ཅིག་ཅེས་བཏབ་པའི་ལས་དེའི་རྣམ་པར་སྨིན་པས་ལན་མང་དུ་རྒྱལ་པོའ་འབྲེག་མཁན་དུ་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་བ་འཁོར་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་འདུལ་བ་འཛིན་པ་རྣམས་ཀྱིས་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་བཏབ་པ་ཉིད་ཀྱིས་སོ། །གང་དུ་སྨོན་ལམ་བཏབ་ལགས། དགེ་སློང་ངག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ་ཞེས་བྱ་བ་ནས། དེ་གྲོང་ཁྱེར་བཱ་རཱ་ཎ་སཱིར་ཉེ་བར་བརྟེན་ཏེ་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ་ཞེས་བྱ་བའི་བར་གོང་མ་
བཞིན་དུ་སྟེ། དེའི་བསྟན་པ་ལ་འདི་རབ་ཏུ་བྱུང་བར་གྱུར་ཏེ། རབ་ཏུ་འབྱིན་པའི་དགེ་སློང་གང་ཡིན་པ་དེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་ཏོ། །དེ་ལ་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེ་ན་འདི་འཆི་བའི་དུས་ལ་བབ་པ་ན་སྨོན་ལམ་བཏབ་པ། བདག་གིས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ཀྱིས། དགེ་བའི་རྩ་བ་གང་ཡིན་པ་འདིས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པར་གྱུར་པ་དེའི་བསྟན་པ་ལ་བདག་རབ་ཏུ་བྱུང་ཞིང་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་བྱས་ནས། ཇི་ལྟར་བདག་གི་མཁན་པོ་ཡང་དག་པར་རྫོགས་པའི་སངས་རྒྱས་འོད་སྲུང་གིས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་བ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ་དེས་འདུལ་པ་འཛིན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་བཏབ་པ་དེའི་སྨོན་ལམ་གྱི་དབང་གིས་ད་ལྟར་དེ་བཞིན་གཤེགས་པས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་བརྩལ་བར་བྱ་སྟེ། དགེ་སློང་དག་དེ་ལྟ་བུ་ལ་ཁྱེད་ཀྱིས་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །གང་གི་ཚེ་བཅོམ་ལྡན་འདས་ཀྱིས་བདུད་འབྱུང་པོ་འཁོར་དང་བཅས་པ་བྱེ་བ་ཕྲག་སུམ་བཅུ་རྩ་དྲུག་བཅོམ་ནས་བླ་ན་མེད་པའི་ཡེ་ཤེས་བརྙེས་པ་དེའི་ཚེ་བདུད་ཀྱི་རིས་ཀྱི་ལྷ་རྣམས་ཀྱིས་གྲོང་ཁྱེར་སེར་སྐྱའི་གཞིར་རྒྱལ་པོ་བཙུན་མོ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པ་ལ་དགེ་སྦྱོང་གཽ་ཏ་མ་ནི་དེ་རིང་ཤིའོ་ཞེས་བསྒྲགས་སོ། །དེ་ནས་རྒྱལ་པོ་ཟས་གཙང་བཙུན་མོ་དང་།
གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པས་མྱ་ངན་བྱ་བར་བརྩམས་པ་དང་། ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་གནས་གཙང་མའི་རིས་ཀྱི་ལྷ་རྣམས་ཀྱིས་སྨྲས་པ། བཅོམ་ལྡན་འདས་མ་ནོངས་ཏེ། འདི་ལྟར་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་སོ། །དེ་ནས་རྒྱལ་པོ་ཟས་གཙང་གིས་ཀུན་དགའ་བ་བྱས་ཏེ་ཀུན་དགའ་བར་གྱུར་བ་དེའི་ཚེ་བདུད་རྩི་ཟས་ཀྱི་ཁྱེའུ་ཞིག་བཙས་ཏེ། དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། ཁྱེའུ་འདི་ཀུན་དགའ་བར་གྱུར་པ་ན་བཙས་པས་ཁྱེའུའི་མིང་ཀུན་དགའ་བོ་ཞེས་གདགས་སོ་ཞེས་དེའི་མིང་ཀུན་དགའ་བོ་ཞེས་བྱ་བར་བཏགས་སོ། །ཁྱེའུ་ཀུན་དགའ་བོ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དེ། དེ་མ་མའི་པང་ན་འཚོ་བ་ན་མཚན་མཁན་རྣམས་ཀྱིས་ཁྱེའུ་འདིས་ནི་བཅོམ་ལྡན་འདས་ཤཱཀྱ་ཐུབ་པའི་རིམ་གྲོ་བྱེད་པར་འགྱུར་རོ་ཞེས་ལུང་བསྟན་ཏོ། །བདུད་རྩི་ཟས་ཀྱིས་ཁྱེའུ་མཚན་མཁན་རྣམས་ཀྱིས་ལུང་བསྟན་ཏོ་ཞེས་ཐོས་ནས་དེས་བསམས་པ། །གལ་ཏེ་དེ་ལྟ་ན་བཅོམ་ལྡན་འདས་ཀྱིས་རབ་ཏུ་ཕྱུང་དུའོང་ངོ་ཞེས་སྤྱན་སྔར་མི་འབབ་པར་བྱའོ་སྙམ་ནས། གང་གི་ཚེ་བཅོམ་ལྡན་འདས་སེར་སྐྱའི་གཞིར་གཤེགས་པ་དེའི་ཚེ་དེ་ཡངས་པ་ཅན་དུ་སྐྱེལ་ལོ། །གང་གི་ཚེ་བཅོམ་ལྡན་འདས་ཡངས་པ་ཅན་དུ་གཤེགས་པ་དེའི་ཚེ་སླར་ཡང་སེར་སྐྱའི་གཞིར་ཁྱེར་རོ། །སངས་རྒྱས་བཅོམ་ལྡན་འདས་རྣམས་ནི་དེ་ལྟ་བུ་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་རིག་པ་ཅུང་ཟད་ཀྱང་མི་མངའོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། ཟླ་མེད་པ། གཉིས་སུ་མི་གསུང་བ། ཞི་གནས་དང་། ལྷག་མཐོང་གིས་བཞུགས་པ། དུལ་བའི་གནས་གསུམ་གྱི་གཞིལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་བ་བཞིའི་ཞབས་ལེགས་པར་གནས་པ། བསྡུ་བའི་
དངོས་པོ་བཞི་ལ་ཡུན་རིང་པོ་ནས་གོམས་པ། ཡན་ལག་ལྔ་སྤངས་པ། འགྲོ་བ་ལྔ་ལས་འདས་པ། ཡན་ལག་དྲུག་དང་ལྡན་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ་བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ནི་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་འགྱུར། གང་ནི་གནོད་པར་འགྱུར། གང་ནི་ཉམ་ང་བར་འགྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་ལས་བསླར་སྟེ་མཐོ་རིས་དང་ཐར་པ་ལ་གཞག་པར་བྱ། གང་གི་དགེ་བའི་རྩ་བ་མ་བསྐྱེད་པ་དག་ནི་བསྐྱེད་པར་བྱ། གང་གི་བསྐྱེད་པ་དག་ནི་ཡོངས་སུ་སྨིན་པར་བྱ། གང་གི་སྨིན་པ་ནི་གྲོལ་བར་བྱ། ཞེས་མཁྱེན་པ་དང་གཟིགས་པ་འཇུག་གོ །ཡང་སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །བཅོམ་ལྡན་འདས་ཀྱིས་དགོངས་པ། གཞོན་ནུ་ཀུན་དགའ་བོ་ནི་སྲིད་པ་ཐ་མ་པ་ཡིན་པས་དེ་ངའི་བསྟན་པ་ལ་རབ་ཏུ་འབྱུང་སྟེ། རབ་ཏུ་བྱུང་ནས་ངའི་རིམ་གྲོ་བྱེད་ཅིང་གསུང་རབ་འཛིན་པ་དང་། ང་ཡོངས་སུ་མྱ་ངན་ལས་འདས་ནས་བདུད་རྩི་ཐོབ་པར་འགྱུར་གྱིས། མ་ལ་ངས་གཞོན་ནུ་ཀུན་དགའ་བོ་བསྟན་པ་ལ་གཞུག་པར་བྱའོ་སྙམ་ནས་མཚོར་བ་ཁོ་ནར་གྲོང་ཁྱེར་སེར་སྐྱའི་གཞིར་བྱོན་ནས་བདུད་རྩི་ཟས་ཀྱི་གནས་ཁང་དུ་གཤེགས་ཏེ་གདན་བཤམས་པ་ཉིད་ལ་བཞུགས་སོ། །བདུད་རྩི་ཟས་ཀྱིས་གཞོན་ནུ་ཀུན་དགའ་བོ་ཁང་ཕྲན་གཞན་ཞིག་གི་ནང་དུ་བཅུག་སྟེ་བཞག་གོ །བཅོམ་ལྡན་འདས་ཀྱིས་གང་གི་ཚེ་ན་སྒོ་རང་བྱེ་བར་འགྱུར་བ་དེ་ལྟར་བྱིན་གྱིས་བརླབས་ནས་ཐོག་མ་ཁོ་ནར་
བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བསིལ་ཡབ་བླངས་ནས་བཅོམ་ལྡན་འདས་ཀྱི་སྣམ་ལོགས་ནས་བོཅམ་ལྡན་འདས་ལ་གཡོ་བ་ཅིང་འདུག་གོ །དེ་ནས་བདུད་རྩི་ཟས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་བདུད་རྩི་ཟས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་བཞུད་དོ། །རྒྱུའི་སྟོབས་ཆེ་ཡང་རྐྱེན་གྱི་སྟོབས་ལ་ལྟོས་དགོས་པས་སྲིད་པ་ཐ་མ་པའི་སེམས་ཅན་ཀུན་དགའ་བོ་བཅོམ་ལྡན་འདས་ཀྱི་རྗེས་བཞིན་རྗེས་བཞིན་འབྲང་བ་ན། བདུད་རྩི་ཟས་ཆུང་མའི་འཁོར་དང་བཅས་པས་བཟློག་པར་མ་ནུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདི་ནི་སྲིད་པ་ཐམ་པའི་སེམས་ཅན་ཡིན་པས་ཁྱེད་ཀྱིས་བཟློག་པར་མི་ནུས་ཀྱིས་མ་ཟློག་ཤིག །བདུད་རྩི་ཟས་ཀྱིས་གསོལ་པ། བཅོམ་ལྡན་འདས་གལ་ཏེ་དེ་ལྟར་གྱུར་ན་འདི་ལ་རིམ་པ་བཞིན་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་བྱོས་ཤིག །དེ་ནས་བདུད་རྩི་ཟས་ཀྱིས་དགེ་སྤྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་དང་། འགྲོ་བར་ཆས་པའི་སློང་བ་པ་རྣམས་ཀྱི་ཕྱིར་སྦྱིན་པ་དག་གཏོངདུ་བཅུག །བསོད་ནམས་དག་བྱེད་དུ་བཅུག །རང་གི་སྐྱེ་བོ་དང་གཉེན་གྱི་ཚོགས་རྣམས་ལ་ཡང་བཟོད་པ་གསོལ་དུ་བཅུག་ནས་རྒྱན་ཐམས་ཅད་ཀྱིས་བརྒྱན་ཏེ། གླང་པོ་ཆེ་ལ་ཞོན་ནས་སྐྱེ་བོ་དུ་མས་ཡོངས་སུ་བསྐོར་ཏེ། ནྱ་གྲོ་ངྷའི་ཀུན་དགའ་ར་བ་ལོགས་སུ་ཕྱོགས་ཏེ་བཅོམ་ལྡན་འདས་ཀྱི་སྤྱན་སྔར་བཏང་ངོ་། །དེ་ཡང་སྲང་གི་དབུས་ནས་འགྲོ་བ་ན་གླང་པོ་ཆེས་ཨུཏྤ་ལའི་ཆུན་པོ་ཞིག་ཟོས་སོ། །མཚན་མཁན་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། གཞོན་ནུ་འདི་ནི་ཐོས་པ་འཛིན་པ་
རྣམས་ཀྱི་མཆོག་ཏུ་འགྱུར་རོ། །དེ་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་ཁོ་ནས་ནྱ་གྲོ་ངྷའི་ཀུན་དགའ་ར་བར་ཞུགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །བཅོམ་ལྡན་འདས་ཀྱིས་འོད་སྲུང་གཞོན་ནུ་རབ་ཏུ་ཕྱུང་ཤིག་ཅེས་འོད་སྲུང་སྟོབས་བཅུ་ལྡན་ལ་གཏད་ནས་དེས་དེ་རབ་ཏུ་ཕྱུང་བསྙེན་པར་རྫོགས་པར་བྱས་སོ། །དེ་ནས་བཅོམ་ལྡན་འདས་སེར་སྐྱའི་གཞིར་ཇི་ཙམ་བཞེད་ཀྱི་བར་དུ་བཞུགས་ནས་རྒྱལ་པོའ་ཁབ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་རྒྱལ་པོའ་ཁབ་ཏུ་བྱོན་ནས་རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །ཚེ་དང་ལྡན་པ་ཀུན་དགའ་བོའ་སྤྱི་བོར་ཕོལ་མིག་བྱུང་ནས་བཅོམ་ལྡན་འདས་ཀྱིས་འཚོ་བྱེད་ལ་བཀའ་སྩལ་པ། དགེ་སློང་ཀུན་དགའ་བོ་ལ་དཔྱད་བྱོས་ཤིག །བཙུན་པ་བཀའ་བཞིན་འཚལ་ཞེས་འཚོ་བྱེད་གཞོན་ནུས་བསྐྱེད་ཀྱིས་བཅོམ་ལྡན་འདས་ལས་མཉན་ཏོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ནས་ཆོས་འཆད་དོ། །ཚེ་དང་ལྡན་པ་ཀུན་དགའ་བོ་ཡང་ཆོས་མཉན་པའི་ཕྱིར་དེ་ཉིད་ན་འདུག་གོ །འཚོ་བྱེད་གཞོན་ནུས་བསྐྱེད་ཀྱིས་བསམས་པ། འདི་ཆོས་ལ་དད་པ་བདོ་བར་གྱུར་པས་མི་ཚོར་གྱིས་དཔྱད་བྱ་བའི་དུས་ལ་བབ་པོ་སྙམ་ནས། དེས་དེའི་ཕོལ་མིག་སྨིན་པར་འགྱུར་བདག་བསྐུས་ནས་དེ་ཉིད་དུ་དྲན་ཏེ་དེ་ཉིད་དུ་སོས་པར་བྱས་སོ། །དེ་ན་ཆོས་བཤད་པ་རྫོགས་ནས་འཚོ་བྱེད་ཀྱིས་གསོལ་པ། བཅོམ་ལྡན་འདས་བདག་གིས་འཕགས་པ་ཀུན་དགའ་བོ་འདི་ཉིད་ན་མཆིས་བཞིན་དུ་ཕོལ་མིག་སྨིན་པར་བགྱིས་ཏེ་བརྟོལ་ནས་སོས་པར་བགྱིས་ལགས་སོ། །ཚེ་དང་ལྡན་པ་ཀུན་དའག་བོས་སྨྲས་པ། གལ་ཏེ་བདག་གི་ལུས་ཏིལ་འཕྲུ་ཙམ་དུ་གཏུབས་པར་གྱུར་ཀྱང་བདག་གིས་མི་ཚོར་ལགས་སོ། །བཅོམ་ལྡན་འདས་ཀྱི་ཆོས་ལས་བྱུང་བའི་དད་པས་བསམ་པ་བསྡུས་པ་ལ་འཚོ་བྱེད་མཆོག་ཏུ་ཡ་མཚན་སྐྱེས་སོ། །དགེ་སློང་རྣམས་ཐེ་ཚོམ་
སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན། དེས་ན་སྤྱི་བོར་ཕོལ་མིག་བྱུང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དའག་བོ་འདི་ཉིད་ཀྱིས་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་ཡུལ་མཐའ་འཁོ་བཅིག་ན་རྒྱལ་པོ་ཀི་ར་ཏ་ཞེས་བྱ་བ་གནས་སོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་བདག་འབྱུང་བར་འགྱུར་བས་དེ་ནས་རང་སངས་རྒྱས་ཞིག་དེ་དེར་རྒྱུ་བ་ན་ཀི་ར་ཏའི་གྲོང་ཁྱེར་དུ་ཕྱིན་ནས་དེ་དེར་བསོད་སྙོམས་ཀྱི་ཕྱིར་ཀི་ར་ཏའི་རྒྱལ་པོའ་ཁྱིམ་དུ་ཞུགས་པ་དང་། དེ་དེ་ལ་མི་བཟོད་པ་སྐྱེས་ཏེ་སེམས་གདུག་པས་འཇིམ་རིལ་གྱི་ངན་ཀོང་གིས་རྒྱབ་ཏུ་བསྣུན་པ་ལས་བདག་ཉིད་ཆེན་པོ་དེ་དྲེགས་པ་དང་ང་རྒྱལ་བཅོམ་པ་ཡིན་པས་དེ་སྣོད་དུ་མ་གྱུར་པར་ཤེས་ནས་སོང་ངོ་། །དགེ་སློང་དག་ཇི་སྙམ་དུ་སེམས། ཀི་ར་ཏའི་རྒྱལ་པོ་གང་ཡིན་པ་དེ་ནི་དགེ་སློང་ཀུན་དགའ་བོ་དེ་ཉིད་ཡིན་ཏེ། གང་འདིས་རང་སངས་རྒྱས་ལ་མི་བཟོད་པ་སྐྱེས་ཏེ་སེམས་གདུག་པས་འཇིམ་རིལ་གྱི་ངན་ཀོང་གིས་རྒྱབ་ཏུ་བསྣུན་པ་དེའི་ལས་ཀྱི་རྣམ་པར་སྨིན་པས་ཚེ་རབས་ལྔ་བརྒྱར་གང་དག་གང་དུ་སྐྱེས་པ་དེ་དང་དེར་སྤྱི་བོར་ཕོལ་མིག་བྱུང་བར་གྱུར་ཏོ། །འདི་ལྟར་ད་ལྟར་འདིའི་སྲིད་པ་ཐ་མལ་ཡང་སྤྱི་བོར་ཕོལ་མིག་བྱུང་ངོ་། །གང་གི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་དང་ཐབས་ཅིག་འགྲོ་བ་དེའི་ཚེ་བཅོམ་ལྡན་འདས་ལ་ལྷག་པར་དད་པ་དང་། གུས་པ་དང་། ཁྲེལ་ཡོད་པ་དང་། ངོ་ཚ་ཤེས་པ་དང་། འཛེམ་པ་ཉིད་ཀྱིས་ཉེ་བར་གནས་སོ། །གང་གི་ཚེ་སྤྲུལ་པ་ཡིན་ན་ནི་དད་པ་དང་། གུས་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། འཛེམ་པ་དེ་འདྲ་བ་དག་གིས་མི་གནས་སོ། །ཇི་ཙམ་ན་ཁྱིམ་བདག་ཅིག་གིས་སངས་
རྒྱས་ལ་སོགས་པ་དགེ་སློང་གི་དགེ་འདུན་རག་གི་ཁྱིམ་དུ་གདུགས་ཚོད་ལ་སྤྱན་དྲངས་པ་དང་། བཅོམ་ལྡན་འདས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱི་མདུན་གྱིས་བལྟས་ནས་ཁྱིམ་བདག་དེའི་ཁྱིམ་དུ་གཤེགས་ཏེ། གདུགས་ཚོད་གསོལ་ནས་སླར་གཤེགས་སོ། །དགེ་སློང་རྣམས་ཀྱིས་ཚེ་དང་ལྡན་པ་ཀུན་དགའ་བོ་ལ་དྲིས་པ། ཚེ་དང་ལྡན་པ་ཀུན་དགའ་བོ་ཅི་དེ་རིང་ཁྱོད་བཅོམ་ལྡན་འདས་དང་ཐབས་ཅིག་སོང་ངམ། འོན་ཏེ་སྤྲུལ་པ་དང་། དེས་སྨྲས་པ། བཅོམ་ལྡན་འདས་དང་ཐབས་ཅིག་སོང་གིས་སངས་རྒྱས་ཀྱི་སྤྲུལ་དང་ནི་མ་ཡིན་ནོ། །ཅི་མངོན་གང་གི་ཚེ་ཁོ་བོ་བཅོམ་ལྡན་འདས་དང་ཐབས་ཅིང་འགྲོ་བ་དེའི་ཚེ་བདག་བཅོམ་ལྡན་འདས་ལ་ལྷག་པར་དད་པ་དང་། གུས་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། འཛེམ་པས་ཉེ་བར་གནས་པ་ཡིན་ནོ། །གང་གི་ཚེ་སངས་རྒྱས་ཀྱི་སྤྲུལ་པ་ཡིན་པ་དེའི་ཚེ་དེ་ལྟར་མི་འགྱུར་རོ། །དགེ་སློང་དག་ཕན་ཚུན་སྨྲས་པ། ཚེ་དང་ལྡན་པ་ཀུན་དགའ་བོ་ནི་མཚན་མ་ལ་མཁས་སོ། །ཕྱོགས་དང་ཕྱོགས་མཚམས་རྣམས་སུ་དགེ་སློང་ཀུན་དགའ་བོ་མཚན་མ་ལ་མཁས་སོ་ཞེས་བྱ་བའི་སྒྲ་བསྒྲགས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོའ་ཁབ་ཏུ་ཇི་ཙམ་བཞེད་ཀྱི་བར་དུ་བཞུགས་ནས་མཉེན་ཡོད་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་མཉན་ཡོད་དུ་བྱོན་ནས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་བ་ཀུན་དགའ་བོ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་པ་བྲམ་ཟེ་ཞིག་གིས་མཐོང་ནས་བསམས་པ། དགེ་སྦྱོང་གཽ་ཏ་མའི་ཉན་ཐོས་དགེ་སློང་ཀུན་དགའ་བོ་མཚན་ལ་མཁས་སོ། །ཞེས་ཐོས་པ་གང་ཡིན་པ་དེ་ནི་འདི་ཡིན་གྱིས་རེ་ཞིག་ཤིང་ཤ་པ་ཞེས་བྱ་བ་འདི་ལ་འདབ་མ་དུ་ཡོད་པ་དྲིའོ་སྙམ་ནས་དེས་དེ་ལ་དྲིས་པ། འཕགས་པ་ཤིང་ཤ་པ་འདི་ལ་འདབ་མ་ཇི་སྙེད་མཆིས། དེས་སྨྲས་པ། བརྒྱ་
དང་། སྟོང་དང་། ཁྲི་ཕྲག་འདི་སྙེད་ཡོད་དོ་ཞེས་སྨྲས་ནས་སོང་ངོ་། །བྲམ་ཟེ་དེས་དེ་ལ་ལོ་མ་དག་ཅིག་བཏོགས་ནས་བགྲངས་ཏེ་བོར་རོ། །ཚེ་དང་ལྡན་པ་ཀུན་དགའ་བོས་བསོད་སྙོམས་སྤྱད་དེ་སླར་ལོག་པ་དང་། བྲམ་ཟེ་དེས་ཡང་སྨྲས་པ། འཕགས་པ་ད་ལྟར་ཤིང་ཤ་པ་འདི་ལ་འདབ་མ་ཇི་སྙེད་མཆིས་མཁྱེན་ཏམ། དེས་སྨྲས་པ། སྔར་ནི་བརྒྱ་དང་། སྟོང་དང་། ཁྲི་ཕྲག་འདི་སྙེད་ཡོད་པ་ལས་དེ་ལས་འདི་སྙེད་ཅིག་བཏོགས་སོ། །བྲམ་ཟེ་དེ་འཕགས་པ་ནི་རྩིས་ལ་ཡང་དེ་ལྟར་མཁས་པ་ལྟ་ཞེས་མཆོག་ཏུ་ངོ་མཚར་སྐྱེས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་དེས་ན་མཚན་མ་ལ་མཁས་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་བྲམ་ཟེ་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དག་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ་ཞག་བདུན་གསུམ་ཉི་ཤུ་གཅིག་ཏུ་དེ་བཙས་པའི་བཙས་སྟོན་རྒྱ་ཆེར་བྱས་ཏེ་རིགས་དང་མཐུན་པའི་མིང་བཏགས་ནས་གསོས་བསྐྱེད་དེ་ཆེན་པོར་གྱུར་ཏོ། །དེ་ཡུལ་གཞན་དུ་སོང་སྟེ་མཚན་མའི་བསྟན་ཆོས་དྲུག་ཁྲི་བསླབས་སོ། །དེ་བཞིན་དུ་ཚེ་རབས་ལྔ་བརྒྱའི་བར་དུ་འཁོར་བ་ན་འཁོར་བའི་ཚེ་མཚན་མའི་བསྟན་ཆོས་དྲུག་ཁྲི་བསླབས་ཤིང་གཞན་ལ་ཡང་བསྟན་པའི་རྒྱུ་དེ་དང་རྐྱེན་དེས་གང་དང་གང་དུ་སྐྱེས་པ་དེ་དང་དེར་མཚན་མཁན་རྣམས་ཀྱི་མཆོག་ཏུ་བྱུང་ངོ་། །འདི་ལྟར་ད་ལྟར་གྱི་སྲིད་པ་ཐ་མ་ལ་ཡང་མཚན་མཁན་རྣམས་ཀྱི་མཆོག་ཏུ་བྱུང་ངོ་། །ཀོ་ས་ལའི་རྒྱལ་པོ་གསལ་རྒྱལ་ལ་ཡང་ཉི་མ་རེ་རེ་ཞིང་དྲོ་ཀའི་དུས་སུ་གཞོང་པར་འབྲས་སཱ་ལུའི་ཆན་དང་། བུ་རམ་ཤུང་གི་སྡོང་བུ་ཞིག་དང་། སྲེག་པ་གཉིས་ལྷུང་ལ་དེ་གཉིས་ལས་གཅིག་ནི་གཞོང་པའི་སྟེང་དུ་འབབ། ཅིག་ཤོས་ནི་ས་ལའོ། །དེས་ཚེ་དང་ལྡན་པ་ཀུན་དགའ་བོ་ལ་རིག་པར་བྱས་ཏེ། དེས་ཀྱང་དགེ་སློང་རྣམས་ལའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀོས་ལའི་རྒྱལ་པོ་གསལ་རྒྱལ་གྱིས་ལས་ཅི་ཞིག་འགྱིས་ན། དེས་ན་འཚལ་མའི་དུས་སུ་གཞོང་པར་འབྲས་སཱ་ལུའི་ཆན་དང་།
བུ་རམ་ཤིང་གི་སྡོང་བུ་ཞིག་དང་། སྲེག་པ་གཉིས་ལྷུང་ལ། དེ་གཉིས་ལས་གཅིག་ནི་གཞོང་པའི་སྟེང་དུ་འབབ། ཅིག་ཤོས་ནི་ས་ལ་ལྷུང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཀོ་ས་ལའི་རྒྱལ་པོ་གསལ་རྒྱལ་འདི་ཉིད་ཀྱིས་སྔོན་གྱི་ཚེ་རབས་གཞན་དག་ཏུ་ལས་བྱས་ཤིང་བསགས་ཏེ། དེས་ན་འདིའི་ཟས་ཀྱི་དུས་སུ་གཞོང་པར་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་དང་། སྲེག་པ་གཉིས་ལྷུང་ལ། དེ་གཉིས་ལས་གཅིག་ནི་གཞོང་པའི་སྟེང་དུ་འབབ། ཅིག་ཤོས་ནི་ས་ལ་ལྷུང་བར་གྱུར་པ་ནི་དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱིན་ཁྱིམ་བདག་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་གནས་ཏེ། དེའི་མངག་གཞུག་པ་རྣམས་ཀྱིས་ཞིང་པའི་གྲོང་ནས་འབྲས་སཱ་ལུས་སར་པ་ཞིག་དང་། སྲེག་པ་གཉིས་དང་། བུ་རམ་ཤིང་གི་སྡོང་བུ་ཞིག་ཁྱེར་ཏེ་འོངས་སོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་པ་དག་འབྱུང་བར་འགྱུར་བས་དེ་ནས་རང་སངས་རྒྱས་ཞིང་བཱ་རཱ་ཎ་སཱིར་འོངས་ནས་དེ་སྔ་དྲོ་ན་བཟའ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ཏེ་བསོད་སྙོམས་ལ་ཁྱིམ་བདག་དེའི་ཁྱིམ་དུ་ཞུགས་པ་ན་དེས་དེ་ལུས་དེ་མཛེས་པ་དང་། སེམས་དད་པར་མཐོང་ནས་དེས་དེར་དེ་ལ་ཐོག་མར་ལོ་ཏོག་སར་པ་འོན་ཅིག་ཅེས་བྱས་ནས་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་ཞིག་དང་། སྲེག་པ་གཉིས་
ཕུལ་བ་ལས། དེ་ལས་གཅིག་ནི་ལྷུང་བཟེད་དུ་ལྷུང་ངོ་། །ཅིག་ཤོས་ནི་ས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློག་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གང་ཡིན་པ་དེ་ནི་རྒྱལ་པོ་གསལ་རྒྱལ་འདི་ཉིད་ཡིན་ཏེ། འདིས་རང་སངས་རྒྱས་ལ་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་དང་། སྲེག་པ་གཉིས་ཕུལ་བ་དེའི་ལས་ཀྱི་རྣམ་པར་སྨིན་པས་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་མིའི་བདེ་བ་ཉམས་སུ་མྱོང་ངོ་། །ད་ལྟར་ཡང་འདིའི་ཟས་ཀྱི་དུས་སུ་གཞོང་པར་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་དང་། སྲེག་པ་གཉིས་ལྷུང་སྟེ། དེ་ལས་གཅིག་ནི་གཞོང་པའི་སྟེང་དུ་ལྷུང་ལ། ཅིག་ཤོས་ནི་ས་ལའོ། །ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་བདག་གི་ལས་ཀྱི་རྒྱུ་བ་གཅིག་ལུང་བསྟན་པས་སྔོན་གྱི་མཐའི་ནི་ལས་ཀྱི་རྣམ་པར་སྨིན་པའི་འབྲས་བུ་ནི་ཡོད་དོ་སྙམ་དུ་རིག་ནས་ཉན་ཐོས་ཀྱི་དགེ་འདུན་དང་བཅས་པ་ལ་མངོན་པར་དད་དེ་དེ་ལྟར་ལས་ཀྱི་རྣམ་པར་སྨིན་པ་ལ་ཡིད་ཆེས་པའི་བློ་གྲོས་ཀྱིས་གནས་སོ། །ལྟས་མཁན་རྣམས་ཀྱིས་འཕགས་པ་ཀུན་དགའ་བོ་ནི་ཅོད་པན་གྱིས་བཅིངས་པར་འགྱུར་རོ་ཞེས་ལུང་བསྟན་པས་ཅི་ཙམ་ནམ་ནངས་པ་དང་། ཚེ་དང་ལྡན་བ་ཀུན་དགའ་བོའ་འཕྲལ་བར་ཕོལ་མིག་བྱུང་ངོ་ཞེས་ཀོ་ས་ལའི་རྒྱལ་པོ་གསལ་རྒྱལ་གྱིས་ཐོས་ནས་དེ་འདི་སྙམ་དུ་སེམས་ཏེ། ཡོན་གནས་རྣམས་ལ་བྱ་བ་བྱས་ན་བསོད་ནམས་ཀྱི་འབྲས་བུ་ཁྱད་པར་མེད་པར་མི་འགྱུར་བསམ་ལ་བདག་གིས་འདི་ལ་རང་ཉིད་ཀྱིས་བཀུར་སྟི་བྱའོ་སྙམ་ནས། དེས་སྨན་པ་ཐམས་ཅད་བཀུག་སྟེ། འཕགས་པ་ཀུན་དགའ་བོའ་དཔྱད་གྱིས་ཤིག །དེའི་དཔྱད་གསལ་བ་ན་བྱ་བར་བརྩམས་པ་དང་། ཀོ་ས་ལའི་རྒྱལ་པོ་གསལ་རྒྱལ་གྱིས་ཚེ་དང་ལྡན་པ་ཀུན་དགའ་བོ་ལ་རང་ཉིད་ཀྱིས་རྩིབས་བརྒྱ་ཡོད་པའི་གདུགས་བཟུང་ཞིང་། འཕྲལ་བའི་རྩ་འདེབས་པ་ན་ཅོད་པན་གྱིས་བཅིངས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་
བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་བ་ཀུན་དགའ་བོས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཀོས་ལའི་རྒྱལ་པོ་གསལ་རྒྱལ་གྱིས་ཚེ་དང་ལྡན་པ་ཀུན་དགའ་བོ་ལ་རང་ཉིད་ཀྱིས་རྩིབས་བརྒྱ་མཆིས་པའ་ིགདུགས་བཟུང་ཞིང་རང་ཉིད་ཀྱིས་ཅོད་པན་དཀར་པོས་བཅིངས་ཏེ་བསྙེན་བཀུར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་སྔོན་གྱི་ཚེ་རབས་གཞན་དག་ཏུ་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་སྨན་པ་ཞིག་གནས་པའི་དྲུང་དུ་རང་སངས་རྒྱས་ནད་པ་ཞིག་སོང་བ་དང་། དེས་དེ་ལ་ཡོ་བྱད་ཐམས་ཅད་ཀྱིས་བསྟབས་ཏེ་རང་ཉིད་ཀྱིས་སྨན་དཔྱད་དང་བཀུར་སྟི་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྨན་པ་གང་ཡིན་པ་དེ་ནི་དགེ་སློང་ཀུན་དགའ་བོ་འདི་ཉིད་ཡིན་ཏེ། དེ་ན་འདིས་རང་སངས་རྒྱས་ལ་བྱ་བ་བྱས་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་ལོ་བརྒྱ་ཕྲག་དུ་མ་དང་། ལོ་སྟོང་ཕྲག་དུ་མར་རྒྱལ་པ་དང་། བློན་པོ་དང་། བྲམ་ཟེ་དང་། ཁྱིམ་བདག་རྣམས་ཀྱིས་འདི་ལ་བསྙེན་བཀུར་བྱས་སོ། །ཇི་ལྟར་ད་ལྟར་ཀྱང་འདི་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་རྩིབས་བརྒྱ་ཡོད་པའི་གདུགས་སྤྱི་བོར་བཟུང་ཞིང་རང་ཉིད་ཀྱིས་བསྙེན་བཀུར་བྱས་སོ། །དེ་ནས་བཅོམ་ལྡན་འདས་མཉན་ཡོད་ན་ཇི་ཙམ་བཞེད་ཀྱི་བར་དུ་བཞུགས་ནས་ཤིང་སཱ་ལ་ཅན་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་སཱ་ལ་ཅན་དུ་བྱོན་ནས་སཱ་ལ་ཅན་གྱི་བྲམ་ཟེའི་གྲོང་ཁྱེར་ན་བཞུགས་སོ། །དེའི་ཚེ་འདི་ལྟ་བུའི་ཉན་ཐོས་ཆེན་པོ་གནས་བརྟན་གནས་བརྟན་རྣམས་བཅོམ་ལྡན་འདས་ཀྱི་ཉེ་འཁོར་ན་ཉེ་བར་བརྟེན་ཅིང་འདུག་པ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽ་ཎྜི་ནྱ་དང་། ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མ་མེད་པ་དང་། བ་ལང་བདག་དང་། ལག་བཟངས་དང་། ཚེ་དང་ལྡན་པ་ཤཱ་རིའི་བུ་དང་། ཚེ་
དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་ཀ་བི་ན་ཆེན་པོ་དང་། ཚེ་དང་ལྡན་པ་མ་འགགས་པ་དང་། དགའ་ཡོང་དང་། ཀིམ་པི་ལ་དང་། ས་ལ་ན་གནས་པའི་གནས་བརྟན་གྲགས་ལྡན་དང་། ཡུལ་ཆུ་མིག་ཅན་ན་གནས་པའི་གནས་པའི་བརྟན་གང་པོ་དང་། དེ་དག་དང་གཞན་ཡང་གནས་བརྟན་ཉན་ཐོས་ཅེན་པོ་རྣམས་བཅོམ་ལྡན་འདས་ཀྱི་ཉེ་འཁོར་ན་ཉེ་བར་བརྟེན་ཏེ་གནས་སོ།། །།འདུལ་བ་གཞི། བམ་པོ་དགུ་བཅུ་རྩ་དྲུག་པ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ནི་ང་རྒས་འཁོགས་གཏུགས་ཏེ་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་གདམས་ངག་དབོག་ཏུ་དུབ་ཀྱིས་དགེ་སློང་དག་ངའི་རིམ་གྲོལ་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པས་རིམ་གྲོ་བྱེད་ཅིང་བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བའི་དགེ་སློང་ཞིག་སྤྲོ་བ་སྐྱེད་ཅིག །དེ་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་བཅོམ་ལྡན་འདས་ལ་ཐུགས་ལ་མི་འཐད་པ་མ་ལགས་ཀྱི། ཐུགས་ལ་འཐད་པས་རིམ་གྲོ་བགྱིད་ཅིང་བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ལགས་སོ། །ཀཽཎྜི་ནྱ་ཁྱོད་རེ་ཞིག་རྒས་འཁོགས་གཏུགས་པས་ཁྱོད་ཉིད་ལ་རིམ་གྲོ་བ་དགོས་ཀྱིས་རེ་ཞིག་ཀཽཎྜི་ནྱ་ཁྱོད་ཉིད་ཀྱི་སྟན་ཇི་ལྟ་བ་བཞིན་ལ་འདུག་ཤིག །ཚེ་དང་ལྡན་བ་ཀུན་ཤེས་ཀཽ་ཎྜི་ནྱ་རང་གི་སྟན་ཇི་ལྟ་བ་ལ་འདུག་གོ །དེ་ནས་ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མ་མེད་པ་དང་། བ་ལང་བདག་དང་། ལག་བཟངས་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་
དང་ལྡན་པ་གསུས་པོ་ཆེ་དང་། ཚེ་དང་ལྡན་པ་ཀ་པི་ན་ཆེན་པོ་དང་། ཚེ་དང་ལྡན་པ་མ་འགགས་པ་དང་། དགའ་ཡོད་དང་། ཀིམ་པི་ལ་དང་། ས་ལ་ན་གནས་པའི་གནས་བརྟན་གྲགས་པ་དང་། ཡུལ་ཆུ་མི་གཅན་གྱི་གནས་བརྟན་གང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་བཅོམ་ལྡན་འདས་ལ་ཐུགས་ལ་མི་འཐད་པ་མ་ལགས་ཀྱི་ཐུགས་ལ་འཐད་པས་རིམ་གྲོ་བགྱིད་ཅིང་། བཀའ་སྩལ་པ་འཛིན་པ་དང་། བདག་གི་དོན་ཡང་ཉམས་པར་མི་འགྱུར་བ་ལགས་སོ། །གང་པོ་ཁྱོད་ཀྱང་རྒས་འཁོགས་གཏུགས་ཏེ། ཁྱོད་ཉིད་ལ་རིམ་གྲོ་པ་དགོས་ཀྱིས་རེ་ཞིག་གང་པོ་ཁྱོད་ཉིད་ཀྱི་སྟན་ཇི་ལྟ་བ་བཞིན་ལ་འདུག་ཤིག །ཚེ་དང་ལྡན་བ་གང་པོ་རང་གི་སྟན་ཇི་ལྟ་བ་ལ་འདུག་གོ །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་འདི་སྙམ་དུ་སེམས་ཏེ། བཅོམ་ལྡན་འདས་དགེ་སློང་གང་ཞིག་རིམ་གྲོ་པར་བཞེད་པར་འགྱུར། མ་ལ་བདག་གིས་ཇི་ལྟར་སེམས་མཉམ་པར་གཞག་ན་བཅོམ་ལྡན་འདས་ཀྱི་ཐུགས་ལ་ལྟ་བར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་འཇུག་པར་བྱའོ་སྙམ་མོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཇི་ལྟར་སེམས་མཉམ་པར་བཞག་ན་བཅོམ་ལྡན་འདས་ཀྱི་ཐུགས་ལ་ལྟ་བར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་ཐུགས་ལ་བལྟས་ན་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ཡིན་ནོ་ཞེས་བཅོམ་ལྡན་འདས་ཀྱི་ཐུགས་ཚེ་དང་ལྡན་བ་ཀུན་དགའ་བོ་ལ་གཏད་པ་མཐོང་ངོ་། །མཐོང་ནས་ཀྱང་ཏིང་ངེ་འཛིན་དེ་ལས་ལངས་ཏེ་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཤེས་པར་གྱིས་ཤིག །བཅོམ་ལྡན་འདས་ཀྱི་ཐུགས་ལ་བལྟས་ན་དགེ་སློང་ཀུན་དགའ་བོས་ངའི་རིམ་གྲོ་བྱས་ན་ཐུགས་ལ་མི་འཐད་པ་མ་
ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ཡིན་ནོ་ཞེས་ཚེ་དང་ལྡན་པ་ཀུན་དགའ་བོ་ལ་གཏད་དོ། །དཔེར་ན་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་བྱང་ཕྱོགས་སུ་རིང་བ་ཤར་ཕྱོགས་སུ་སྐར་ཁུང་བཏོད་པ། ཤར་ཕྱོགས་སུ་སྐར་ཁུང་ནས་ཉི་མའི་འོད་ཟེར་ཤར་བ་ནུབ་ཕྱོགས་ཀྱི་རྩིག་པའི་ངོས་ལ་འབབ་པ་དེ་བཞིན་དུ་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ཡིན་ནོ་ཞེས་བཅོམ་ལྡན་འདས་ཀྱི་ཐུགས་ཚེ་དང་ལྡན་པ་ཀུན་དགའ་བོ་ལ་གཏད་ཀྱིས་ཚུར་བདག་ཅག་དོང་ལ་སྤྲོ་བར་བྱའོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་བ་མཽད་གལ་གྱི་བུ་ཆེན་པོ་ཚེ་དང་ལྡན་པ་ཀུན་དགའ་བོ་གང་ན་པ་དེར་སོང་སྟེ་ཕྱིན་ནས། ཚེ་དང་ལྡན་པ་ཀུན་དགའ་བོ་དང་ལྷན་ཅིག་མངོན་དུ་ཡང་དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཙེས་སྨྲས་སོ། །ཚེ་དང་ལྡན་པ་ཀུན་དགའ་བོ་ཁྱོད་བཅོམ་ལྡན་འདས་ཀྱི་རིམ་གྲོ་པར་སྤྲོའམ། བདེ་བར་གཤེགས་པ་ལ་བསྙེན་བཀུར་བྱ་བ་ནི་ཁྱོད་ལ་དོན་ཆེན་པོར་འགྱུར་རོ། །ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་རིམ་གྲོ་པར་བདག་མི་སྤྲོའོ། །དེ་ཅིའི་ཕྱིར་ཞེ་ན། འདི་ལྟར་སངས་རྒྱས་བཅོམ་ལྡན་འདས་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །འདི་ལྟ་སྟེ་དཔེར་ན་མེ་འབར་བའི་མེ་ཕྲག་ནི་བསྙེན་པར་དཀའ་ཞིང་བཟོད་ཕར་དཀའ་བ་ཡིན་ནོ། །དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བསྙེན་པར་དཀའ་བས་ཞིང་བཟོད་པ་དཀའ་བས་བཅོམ་ལྡན་འདས་ཀྱི་རིམ་གྲོ་པར་བདག་མི་སྤྲོའོ། །འདི་ལྟ་སྟེ་དཔེར་ན་གཅན་གཟན་གྱི་རྒྱལ་པོ་སེང་གེ་རི་ཕུག་ན་གནས་པའི་སོ་ཕྲག་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །འདི་ལྟ་སྟེ་དཔེར་ན་མ་ཏང་གའི་གླང་པོ་ཆེའི་རྒྱལ་པོ་ལོ་དྲུག་བཅུ་ལོན་པ་དར་ལ་བབ་པ། གྲགས་པ། མཆེ་བ་གཤོལ་མདའ་ཙམ་ཡོད་པ། བྲང་གི་ཕེལ་ཀ་ཆེ་བ། གཡུལ་མྱོང་བ། གཡུལ་ངོར་སོན་པའི་མཆེ་བའི་ཕྲག་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །
དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བསྙེན་པར་དཀའ་ཞིང་བཟོད་པར་དཀའ་བས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་རིམ་གྲོ་པར་བདག་མི་སྤྲོའོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤེས་པར་གྱིས་ཤིག །བཅོམ་ལྡན་འདས་ནི་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་བ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་རོ་ཞེས་ཚེ་དང་ལྡན་པ་ཀུན་དགའ་བོ་ལ་ཐུགས་གཏད་དེ་དཔེར་ན་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་བྱང་ཕྱོགས་སུ་རིང་བ་ཤར་ཕྱོགས་སུ་སྐར་ཁུང་བཏོད་པ་ཤར་ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་ཤར་བ་ནུབ་ཕྱོགས་ཀྱི་རྩིག་པའི་ངོས་ལ་འབབ་པ་དེ་བཞིན་དུ་བཅོམ་ལྡན་འདས་ནི་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་རོ་ཞེས་ཚེ་དང་ལྡན་པ་ཀུན་དགའ་བོ་ལ་ཐུགས་གཏད་ན་ཚེ་དང་ལྡན་པ་ཀུན་དགའ་བོ་ཁྱོད་བཅོམ་ལྡན་འདས་ཀྱི་རིམ་གྲོ་པར་སྤྲོའམ། བདེ་བར་གཤེགས་པ་ལ་བསྙེན་བཀུར་བྱ་བ་ནི་ཁྱོད་ལ་དོན་ཆེན་པོར་འགྱུར་རོ། །ཚེ་དང་ལྡན་པ་མཽད་གལ་གྱི་བུ་བདག་གིས་དེ་བཞིན་དུ་བགྱི་སྟེ། བཅོམ་ལྡན་འདས་ཀྱི་རིམ་གྲོ་བགྱི་བར་སྤྲོ་བར་བགྱིད་ན། གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་པོ་བཅོམ་ལྡན་འདས་ཀྱི་ན་བཟའ་སྨད་གཡོགས་དང་ཆོས་གོས་བདག་གིས་མི་བཅང་བ་དང་། བཅོམ་ལྡན་འདས་ཀྱི་ཕྱིར་གང་ཟག་པའི་མགྲོན་དུ་འབོད་ན་
བདག་གིས་བདག་གིར་མི་བྱ་བ་དང་། བདག་བཅོམ་ལྡན་འདས་བལྟ་བ་དང་། བཀུར་སྟི་བྱ་བའི་ཕྱིར་ཉེ་བར་འགྲོ་བ་ལ་དུས་མ་ཡིན་པ་ཅུང་ཟད་ཀྱང་མེད་པར་གནང་ངམ། ཚེ་དང་ལྡན་པ་མཽད་གལ་གྱི་བུ་ཆེན་པོ་གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་གནང་བ་ལྟ་ན་བདག་དེ་བཞིན་དུ་བཅོམ་ལྡན་འདས་ཀྱི་རིམ་གྲོ་བགྱིད་པར་སྤྲོའི་གཞན་དུ་ན་མ་ལགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་རིམ་གྲོ་པར་སྤྲོ་བ་བསྐྱེད་ནས། བཅོམ་ལྡན་འདས་གང་ན་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱི་རིམ་གྲོ་བགྱིད་པའི་དགེ་སློང་བདག་ཅག་གིས་སྤྲོ་བ་བསྐྱེད་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོ་ལགས་ན། དེའི་མཆིད་ནས་འདི་སྐད་ཅེས་ཚེ་དང་ལྡན་པ་མཽད་གལ་གྱི་བུ་ཆེན་པོ་བདག་གིས་དེ་བཞིན་དུ་བཅོམ་ལྡན་འདས་ཀྱི་རིམ་གྲོ་བགྱིད་པར་སྤྲོ་བར་བགྱི་ན། གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་པོ་བཅོམ་ལྡན་འདས་ཀྱི་ན་བཟའ་སྨད་གཡོགས་དང་ཆོས་གོས་བདག་གིས་མི་བཅང་བ་དང་། བཅོམ་ལྡན་འདས་ཀྱི་ཕྱིར་གང་ཟག་པའི་མགྲོན་དུ་འབོད་ན་བདག་གིས་བདག་གིར་མི་བྱ་བ་དང་། བདག་བཅོམ་ལྡན་འདས་ལ་བལྟ་བ་དང་བཀུར་སྟི་བྱ་བའི་ཕྱིར་ཉེ་བར་འགྲོ་བ་དུས་མ་ཡིན་བ་ཅུང་ཟད་ཀྱང་མེད་པ་གནང་ངམ། གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་གནང་བ་ལྟ་ན་བདག་དེ་བཞིན་དུ་བཅོམ་ལྡན་འདས་ཀྱི་རིམ་གྲོ་བགྱིད་པར་སྤྲོའོ་ཞེས་མཆི་ལགས་སོ། །མཽད་གལ་གྱི་བུ་ཆེན་པོ་ལེགས་སོ་ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ཏེ། དེས་མ་འོངས་པ་ན་ཚངས་པ་མཚུངས་པར་སྤྱོད་པ་རྣམས་ལས་རྩོད་ཅིང་རྗེས་སུ་རྩོད་པ་སྨད་པའི་གནས་ཀྱི་ཆོས་འབྱུང་ལ། གཞི་འདིས་བདག་ལ་ཚངས་པ་མཚུངས་པར་སྤྱོད་པ་རྣམས་དགེ་སློང་ཀུན་དགའ་བོ་ནི་ཆོས་གོས་ཀྱི་རྒྱུས་སྟོན་པ་ལ་བཀུར་སྟི་བྱེད་དོ་ཞེས་ཁ་ཟེར་
བར་འགྱུར་བ་མཐོང་སྟེ། མཽད་གལ་གྱི་བུ་འདི་ནི་དགེ་སློང་ཀུན་དགའ་བོའི་ངོ་མཚར་རྨད་དུ་བྱུང་བའི་ཆོས་ཡིན་ནོ། །མཽད་གལ་གྱི་བུ་ལེགས་སོ། །ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ཏེ། དེས་མ་འོངས་པ་ན་ཚངས་པ་མཚུངས་པར་སྤྱོད་པ་རྣམས་ལས་རྩོད་ཅིང་རྗེས་སུ་རྩོད་པའི་སྨད་པའི་གནས་ཀྱི་ཆོས་འབྱུང་ལ། གཞི་འདིས་བདག་ལ་ཚངས་པ་མཚུངས་པར་སྤྱོད་པ་རྣམས་དགེ་སློང་ཀུན་དགའ་བོ་ནི་ཁ་ཟས་ཀྱི་རྒྱུས་སྟོན་པ་ལ་བཀུར་སྟི་བྱེད་དོ་ཞེས་ཟེར་བར་འགྱུར་བ་མཐོང་སྟེ། མཽད་གལ་གྱི་བུ་འདི་ནི་དགེ་སློང་ཀུན་དགའ་བོའ་ངོ་མཚར་རྨད་དུ་བྱུང་བའི་ཆོས་ཡིན་ནོ། །མཽད་གལ་གྱི་བུ་ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ཏེ། དུས་ཤེས་ཤིང་དུས་རིག་པས་དེ་འདི་ནི་བདག་གིས་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན། འདི་ནི་དུས་མ་ཡིན། འདི་ནི་དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་གྱི་དུས་ཡིན། འདི་ནི་གཞན་མུ་སྟེགས་ཅན་དང་། ཀུན་ཏུ་རྒྱུ་དག་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན། འདི་ནི་དུས་མ་ཡིན། གཞན་མུ་སྟེགས་ཅན་དང་། ཀུན་ཏུ་རྒྱུ་འདི་དག་ནི་བཅོམ་ལྡན་འདས་ཀྱི་བཀའ་ལ་སྤོབས་པ་དང་ལྡན་པར་འགྱུར། འདི་དག་ནི་བཀའ་ལ་སྤོབས་པ་དང་ལྡན་པར་མི་འགྱུར། བཟའ་བ་དང་བཅའ་བ་འདི་ནི་བཅོམ་ལྡན་འདས་ལ་བདེ་བ་སྐྱེད་པར་འགྱུར། འདི་ནི་བདེ་བ་སྐྱེད་པ་མ་ཡིན་ནོ་ཞེས་ཤེས་ཏེ། མཽད་གལ་གྱི་བུ་དགེ་སློང་ཀུན་དགའ་བོ་ནི་མཁས་པ་ཡིན་ཏེ། དུས་ཤེས་ཤིང་དུས་རིག་པས་དེ་འདི་ནི་བདག་གིས་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན་ནོ། །འདི་ནི་དུས་མ་ཡིན་ནོ། །འདི་ནི་དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་གྱི་དུས་ཡིན་ནོ། །འདི་ནི་གཞན་མུ་སྟེགས་ཅན་དང་། ཀུན་ཏུ་རྒྱུ་དག་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན་ནོ། །འདི་ནི་དུས་མ་ཡིན་ནོ། །གཞན་མུ་སྟེགས་ཅན་དང་། ཀུན་ཏུ་རྒྱུ་འདི་དག་ནི་བཅོམ་ལྡན་འདས་
ཀྱི་བཀའ་ལ་སྤོབས་པ་དང་ལྡན་པར་འགྱུར་རོ། །འདི་དག་ནི་བཀའ་ལ་སྤོབས་དང་ལྡན་པར་མི་འགྱུར་རོ། །བཟའ་བ་དང་བཅའ་བ་འདི་ནི་བཅོམ་ལྡན་འདས་ལ་བདེ་བ་སྐྱེད་པར་འགྱུར་རོ། །འདི་ནི་བདེ་བ་སྐྱེད་པ་མ་ཡིན་ནོ་ཞེས་པ་གང་ཡིན་པ་འདི་ནི་མཽད་གལ་གྱི་བུ་དགེ་སློང་ཀུན་དགའ་བོའ་ངོ་མཚར་རྨད་དུ་བྱུང་བའི་ཆོས་ཡིན་ནོ། །མཽད་གལ་གྱི་བུ་ལེགས་སོ་ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ནོ། །དེ་སེམས་ཀྱི་རྣམ་གྲངས་ལ་མཁས་པ་ཡིན་ཏེ། དེ་བཞིན་གཤེགས་པ་ཕྱི་མ་འབྲེད་ནང་དུ་ཡང་དག་འཇོག་ལས་བཞེངས་པ་མཚན་མའམ་གསུང་བསྟན་པས་ཤེས་པར་འགྱུར་ཞིང་བདེ་བའི་གནས་པ་འདི་དང་འདིས་བཅོམ་ལྡན་འདས་མང་དུ་བཞུགས་སོ། །གནས་པ་འདི་དང་འདིས་བདེ་བར་གཤེགས་པ་མང་དུ་བཞུགས་སོ་ཞེས་སྟོན་པར་འདོད་ན་ཇི་སྐད་བསྟན་པ་དེ་དག་ཐམས་ཅད་དེ་བཞིན་དུ་འགྱུར་ཏེ། གཞན་དུ་མི་འགྱུར་བ་གང་ཡིན་པ་འདི་ནི་མཽད་གལ་གྱི་བུ་དགེ་སློང་ཀུན་དགའ་བོའ་རྨད་དུ་བྱུང་བའི་ཆོས་ཡིན་ཏེ། དེས་དེ་བཞིན་གཤེགས་པའི་རིམ་གྲོ་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་རོ། །མཽད་གལ་གྱི་བུ་དེ་བཞིན་གཤེགས་པའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་གང་ཡིན་པ་འདི་ནི་དགེ་སློང་ཀུན་དའག་བོའ་རྨད་དུ་བྱུང་བའི་ཆོས་ཡིན་ནོ། །གང་གི་ཚེ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་རིམ་གྲ་བར་སྤྲོ་བ་བསྐྱེད་པ་ན། བཅོམ་ལྡན་འདས་ཀྱིས་རྗེས་སུ་བསྔགས་པ་མཛད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་མཆེད་དུ་གྱུར་ཅིང་ཐོས་པ་མང་བ་དང་། ཐོས་པ་འཛིན་པ་དང་། ཐོས་པ་བསགས་པའི་
རིམ་གྲོ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་འོད་ཟེར་ཞེས་བྱ་བ་འབྱོར་པ་དང་ཞེས་བྱ་བ་ནས། སྐྱེ་བོ་དང་། མི་མང་པོ་ཡོད་པ་ན་རྒྱལ་སྲིད་བྱེད་དུ་འཇུག་སྟེ་ཞེས་བྱ་བའི་བར་དུ་སྟེ། དེ་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ་དེའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། འདིའི་ཡབ་འོད་ཟེར་ལགས་པས་དེའི་སླད་དུ་ཁྱེའུའི་མིང་འོད་ཟེར་ཅན་དུ་གདགས་སོ་ཞེས་དེའི་མིང་འོད་ཟེར་ཅན་དུ་བཏགས་ནས། བསྲིངས་བསྐྱེད་དེ་ཆེན་པོར་གྱུར་པ་དང་ཕས་རྒྱལ་ཚབ་ཏུ་དབང་བསྐུར་ཏོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་ནས་དེའི་བཙས་སྟོན་རྒྱ་ཆེར་བྱས་ཏེ་འོད་ཟེར་ལྡན་ཞེས་བྱ་བར་མིང་བཏགས་སོ། །གཞོན་ནུ་འོད་ཟེར་ཅན་ངེས་པར་འབྱུང་བ་ལ་མངོན་པར་དགའ་ཞིང་དེས་ཕ་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་པ་མཐོང་ནས་དེས་བསམས་པ། བདག་ཀྱང་ཡབ་འདས་ནས་རྒྱལ་པོར་འགྱུར་ཏེ་བདག་གིས་ཀྱང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ནས་དམྱལ་བར་གཞོལ་བར་འགྱུར་རོ་སྙམ་ནས། དེ་ཕའི་དྲུང་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། ལྷ་མཁྱེན་པར་མཛད་དུ་གསོལ། རབ་ཏུ་འབྱུང་ལགས་སོ། །དེས་སྨྲས་པ། བུ་གང་གི་དོན་དུ་མཆོད་སྦྱིན་མཆོད་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་རྒྱལ་སྲིད་དེ་ཁྱོད་ཀྱི་ལག་ཏུ་འོངས་ན་ཅིའི་ཕྱིར་རབ་ཏུ་འབྱུང་ཞེས་དེ་བཟློག་ཀྱང་མ་བཏུབ་པོ། །རྒྱལ་པོས་གདོན་མི་ཟ་བར་གལ་གྱིས་འཆུ་བར་ཤེས་ནས་གནང་བ་དང་། དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་
ཏུ་བྱུང་ངོ་། རྒྱལ་པོས་གཞོན་ནུ་འོད་ཟེར་ལྡན་རྒྱལ་ཚབ་ཏུ་དབང་བསྐུར་ཏོ། །འོད་ཟེར་ཅན་དྲང་སྲོང་རྣམས་ཀྱི་ནང་དུ་རབ་ཏུ་ཕྱུང་སྟེ། མཐའ་གཅིག་ཏུ་སོང་ནས་མཁན་པོ་མེད་པ་དང་། སློབ་དཔོན་མེད་པར་རང་བྱང་ཆུབ་མངོན་སུམ་དུ་བྱས་སོ། །དེ་དུས་གཞན་ཞིག་ན་ནད་ཀྱིས་ཐེབས་པར་གྱུར་ནས་ཕན་ཚུན་འཁྱམ་པ་ན་བཱ་རཱ་ཎ་སཱིར་ཕྱིན་ཏོ། །རྒྱལ་པོ་འོད་ཟེར་གྱིས་འོད་ཟེར་ཅན་རང་བྱང་ཆུབ་མངོན་སུམ་དུ་བྱས་ཏེ་དེ་དེར་འོངས་སོ་ཞེས་ཐོས་ནས་དེ་དེའི་དྲུང་དུའོང་སྟེ་རྐང་པ་ལ་གཏུགས་ནས་སྨྲས་པ། དྲང་སྲོང་ཆེན་པོ་ཁྱོད་ནི་བསོད་སྙོམས་དོན་དུ་གཉེར་བ་ལགས་ལ། བདག་ནི་བསོད་ནམས་འཚལ་བ་ལགས་ཀྱིས་བདག་གི་སྐྱེད་མོས་ཚལ་འདི་ཉིད་དུ་བཞུགས་ཤིག་དང་ཁྱོད་ལ་བདག་གིས་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །དེས་ཁས་བླངས་པ་དང་རྒྱལ་པོས་དེའི་རིམ་གྲོ་བར་གཞོན་ནུ་འོད་ཟེར་ལྡན་བྱིན་ཏེ་དེས་དེའི་རིམ་གྲོ་བྱ་བ་ལ་ཞུགས་པ་ན་རང་སངས་རྒྱས་ཀྱིས་དེ་ཞག་བདུན་ན་འཆི་བར་འགྱུར་བའི་མཚན་སྨིན་པ་མཐོང་ནས་དེས་དེ་ལ་སྨྲས་པ། ནུ་བོ་ཅིའི་ཕྱིར་རབ་ཏུ་མི་འབྱུང་། དེས་སྨྲས་པ། དྲང་སྲོང་ཆེན་པོ་རབ་ཏུ་འབྱུང་ངོ་། །གལ་ཏེ་དེ་ལྟར་གྱུར་ན་སོང་ལ་ཡབ་ལ་རྟོགས་ཤིག །དེ་རྒྱལ་པོའ་དྲུང་དུ་སོང་ནས་ལྷ་མཁྱེན་པར་མཛད་དུ་གསོལ། བདག་རབ་ཏུ་འབྱུང་ལགས་སོ། །རྒྱལ་པོས་སྨྲས་པ། ཁྱོད་ཀྱི་ཕུ་བོ་རབ་ཏུ་བྱུང་བས་ང་འདས་ན་ཁྱོད་ཁོ་ན་རྒྱལ་པོ་ཡིན་ན་ཅིའི་ཕྱིར་རབ་ཏུ་འབྱུང་ཞེས་དེས་རབ་ཏུ་འབྱུང་བ་མ་ཐོབ་པོ། །རང་སངས་རྒྱས་དེ་ཉིད་རྒྱལ་པོའ་དྲུང་དུ་སོང་སྟེ་སོང་ནས་ཚིགས་སུ་བཅད་པས་སྨྲས་པ། འོད་ཟེར་འོད་ཟེར་ལྡན་ཐོང་དང་། །འོད་ཟེར་ལྡན་པ་རབ་ཏུ་འབྱུང་། །འོད་ཟེར་རབ་ཏུ་བྱུང་བ་ལེགས། །འདི་ལྟར་རྒྱལ་བ་རྣམས་ཀྱིས་བསྔགས། །རྒྱལ་པོས་སྨྲས་པ། དྲང་སྲོང་ཆེན་པོ་ཁྱོད་རབ་ཏུ་བྱུང་བས་དེ་ནི་བདག་འདས་ན་རྒྱལ་པོར་འགྱུར་ཏེ་འདི་ཉིད་དུ་སྦྱིན་པ་དག་སྩོལ་པ་དང་། བསོད་ནམས་དག་བགྱིད་པར་འགྱུར་ན་ཅིའི་ཕྱིར་རབ་ཏུ་འབྱུང་། རང་སངས་རྒྱས་ཀྱིས་ཚིགས་སུ་བཅད་དེ་སྨྲས་པ། འོད་ཟེར་ཚེ་ནི་ཅུང་ཞིག་སྟེ། །རེ་ལྟར་ཐོགས་ན་ཞག་བདུན་ཉིད། །དོན་གཞན་ཆེད་དུ་བསམས་བསམ་
པ། གཞན་ཉིད་དུ་ནི་ཡོངས་སུ་འགྱུར། །དྲང་སྲོངཆེན་པོ་འདིའི་ཚེ་ཞག་བདུན་ལགས་སམ། རང་སངས་རྒྱས་ཀྱིས་སྨྲས་པ། ཞག་བདུན་ཡིན་ནོ། །རྒྱལ་པོས་སྨྲས་པ། དྲང་སྲོང་ཆེན་པོ་གལ་ཏེ་དེ་ལྟ་ན་གནང་བར་བགྱིས་རབ་ཏུ་ཕྱུང་ཤིག །དེ་བདག་ལ་ཚེ་ཅུང་ཞིག་ཡོད་པར་ཤེས་ནས་དད་པ་དྲག་པོས་དེ་ལ་བཀུར་སྟི་བྱ་བར་བརྩམས་སོ། །རང་སངས་རྒྱས་དེ་རླུང་ནད་ཅན་ཞིག་པས་དེས་ལྷུང་བཟེད་ལག་ཏུ་བླངས་ནས་ཟ་བ་ན་རླུང་གིས་ལག་པ་འདར་བར་གྱུར་ཏོ། །དེ་ནས་རྒྱལ་བུ་གཞོན་ནུ་དེ་གདུ་བུ་ཕྱུང་ནས་ལྷུང་བཟེད་ཀྱི་གཞིར་བཞག་པ་དང་དེ་ལ་ལྷུང་བཟེད་མི་གཡོ་བར་འདུག་གོ །དེས་དེ་མཐོང་ནས་སྨོན་ལམ་གདབ་པར་བརྩམས་པ། ཇི་ལྟར་འདི་ལ་ལྷུང་བཟེད་མི་གཡོ་བ་དེ་བཞིན་དུ་དགེ་བའི་རྩ་བ་འདིས་བདག་གི་རྒྱུད་ལ་ཆོས་ཅི་ཡོད་པ་དེ་དག་མི་གཡོ་བར་གནས་པར་གྱུར་ཅིག་ཅེས་བཏབ་པོ། །དེ་དེ་ལ་སྔོན་ཡི་གེ་དང་ཚིག་རན་པར་ན་པར་ཆོས་འཆད་པ་ཡིན་པས་དེས་སྨྲས་པ། ཁྱོད་སྔོན་ཁྱིམ་པར་གྱུར་པ་ན་ཡི་གེ་དང་ཚིག་རན་པ་རན་པར་ཆོས་འཆད་པ་ལགས་ན། ད་རང་བྱང་ཆུབ་མངོན་སུམ་དུ་བགྱིས་ན་ཅིའི་ཕྱིར་ཆོས་མི་བཤད། དེས་སྨྲས་པ། ཁོ་བོ་ཆོས་མི་འཆད་དོ། །འོ་ན་སུ་འཆད་ལགས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་གང་ཡིན་པ་སྟེ། སངས་རྒྱས་བཅོམ་ལྡན་འདས་དེ་དག་ནི་ཚིག་དང་ཡི་གེ་རན་པ་རན་པར་ཆོས་འཆད་དོ། །དེས་སྨོན་ལམ་བཏབ་པ། སངས་རྒྱས་བཅོམ་ལྡན་འདས་ཚིག་དང་ཡི་གེ་རན་པ་རན་པར་ཆོས་འཆད་པ་གང་ཡིན་པ་དེའི་མཆེད་དང་རིམ་གྲོ་པར་བདག་གྱུར་ཅིག་ཅེས་བཏབ་པོ། རང་སངས་རྒྱས་དེས་རབ་ཏུ་ཕྱུངནས་སྨྲས་པ། ཁྱོད་ཞག་བདུན་འདས་ནས་འཆི་བར་འགྱུར་བ་དེ་ཁོ་ན་ཁྱོད་ཀྱིས་ཡིད་ལ་བྱོས་ཤིག །དེས་ཞག་བདུན་ལོན་ན་ཅུང་ཟད་ཀྱང་མ་རྟོགས་ནས་དེའི་འཆི་བའི་ཚེ་སྨོན་ལམ་བཏབ་པ། དགེ་བའི་རྩ་བ་འདིས་བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་བསྟན་པ་ལ་རབ་ཏུ་བྱུང་ནས་ཐོས་པ་མང་པ་དང་། ཐོས་པ་འཛིན་པ་དང་། ཐོས་པ་བསགས་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས།
རྒྱལ་བུ་གཞོན་ནུ་རང་སངས་རྒྱས་ཀྱི་ནུ་བོར་གྱུར་པ་གང་ཡིན་པ་དེ་ནི་དགེ་སློང་ཀུན་དགའ་བོ་འདི་ཉིད་ཡིན་ཏེ། དེ་ན་ཡང་འདིས་རང་སངས་རྒྱས་ཕུ་བོ་ཤོས་ཀྱི་རིམ་གྲོ་བྱས་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་བཅོམ་ལྡན་འདས་ཀྱི་མཆེད་དུ་གྱུར་ཅིང་། ཐོས་པ་མང་བ་དང་། ཐོས་པ་འཛིན་པ་ཐོས་པ་བསགས་པའི་རིམ་གྲོ་པར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དང་ཚོགས་རྙེད་པ་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་ཡང་དག་པ་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་ཞེས་བྱ་བ་ནས། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ་ཞེས་བྱ་བའི་བར་དུ་སྟེ། དེ་གྲོང་ཁྱེར་བཱ་རཱ་ཎ་སཱིར་ཉེ་བར་བརྟེན་ནས་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ན་དེ་ན་འདིས་ཡོན་ཏན་གྱི་ཚོགས་ཅུང་ཟད་ཀྱང་མ་ཐོབ་པོ། །འདི་རབ་ཏུ་འབྱིན་པ་གང་ཡིན་པ་དེ་ནི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་པ་ཡིན་པས་དེ་འཆི་བའི་ཚེ་སྨོན་ལམ་བཏབ་པ། བདག་གིས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་ཅུང་ཟད་ཀྱང་མཐོབ་ཀྱིས། དགེ་བའི་རྩ་བ་གང་ཡིན་པ་འདིས་བདག་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་
བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་ཇི་ལྟར་བདག་གི་མཁན་པོ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་པ་དེ་བཞིན་དུ་བདག་ཀྱང་ཤཱཀྱའི་རྒྱལ་པོའ་ཡང་རྒྱལ་པོ་བཅོམ་ལྡན་འདས་ཤཱཀྱ་ཐུབ་པ་དེས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་པར་གྱུར་ཅིག་ཅེས་བཏབ་པོ། །སྨོན་ལམ་དེའི་དབང་གིས་ད་ལྟར་ངས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །