ངང་པའི་སྡེ་ཚན།
སྡོམ་ནི། ངང་པ་གད་རྒྱངས་དབྱུང་བ་དང་། །རི་དགས་རུལ་དང་སྤྲེའུ་དང་ནི། །གླང་པོ་ཆེ་དང་བྱི་ལ་དང་། །བ་ལང་ཟླ་བ་རྡོ་བ་དང་། །གླང་ཆེན་ཝ་དང་བྲམ་ཟེའོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་དགེ་སློང་ལྔ་བརྒྱས་ཡོངས་སུ་བཏང་ན་ཚེ་དང་ལྡན་པ་ཀུན་དགའ་བོས་ཡོངས་སུ་མ་བཏང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ཀུན་དགའ་བོ་འདིས་ང་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་མཚོ་ཆེན་པོ་མ་དྲོས་པ་ན་ངང་པའི་དཔོན་པོ་ཡུལ་འཁོར་སྐྱོང་ཞེས་བྱ་བར་གྱུར་ཏོ། །དེ་ལ་བུ་གཉིས་ཡོད་ལ། གང་བ་དང་། བཞིན་རྒྱས་ཞེས་བྱ་སྟེ། གང་བ་ནི་ཕུ་བོ་ཡིན་ནོ། །བཞིན་རྒྱས་ནི་ནུ་བོ་ཡིན་ནོ། །དེ་གཉིས་ལས་གང་བ་ནི་གཏུམ་པ། བརླང་བ། གཟུ་ལུམས་ཅན་ཞིག་སྟེ་རྟག་ཏུ་ངང་པ་རྣམས་ལ་སྡིགས་པར་བྱེད་དེ། ཁ་ཅིག་ལ་སྒྲོ་འབྱིན་། ཁ་ཅིག་ལ་ནི་སྡེར་མོས་རྨ་འབྱིན་པར་བྱེད་ཅིང་དེ་ལྟ་བུ་དང་གཞན་ཡང་གནོད་པ་བརྒྱ་ཕྲག་དག་བྱེད་དེ། ངང་པ་རྣམས་ཉི་མ་རེ་རེ་ཞིང་དང་པ་རྣམས་ཀྱི་དཔོན་པོ་ཡུལ་འཁོར་སྐྱོང་གི་གན་དུ་སོང་སྟེ་རིག་པར་བྱེད་ནས་དེས་བསམས་པ། གང་བ་གཏུམ་པ། བརླང་བ། གཟུ་ལུ་མས་ཅན་ཡིན་པས་གལ་ཏེ་བདག་གིས་འདི་རྒྱལ་ཚབ་ལ་བཞག་ན་བདག་ཤི་ནས་འདིས་ངང་པའི་ཚོགས་བཤིག་པར་འགྱུར་གྱིས། དེ་ལ་ཐབས་ཤིག་བཤམ་པར་བྱའོ་སྙམ་མོ། །དེས་གང་བ་དང་བཞིན་རྒྱས་གཉིས་བཀུག་ནས་བསྒོ་བ། འབབ་ཆུའི་དངོ་དང་མཚོ་དང་མཆོའུ་རྣམས་
བལྟས་ནས། ངའི་དྲུང་དུ་ཐོག་མར་སུ་འོངས་པ་དེ་དང་བ་རྣམས་ཀྱི་དཔོན་པོར་གཞུག་གོ །དེ་གཉིས་ཀྱང་གཅིག་ལ་གཅིག་འགྲན་པའི་ཕྱིར་འཁོར་ལྔ་བརྒྱ་ལྔ་བརྒྱ་དང་དོང་སྟེ། དེ་གཉིས་ཀྱིས་ཕན་ཚུན་གྱི་འབབ་ཆུའི་དངོ་དང་མཚོ་དང་མཚེའུ་རྣམས་བལྟས་ནས་མཐར་གྱིས་གྲོང་ཁྱེར་བཱ་རཱ་ཎ་སཱིར་ཕྱིན་ཏོ། །དེའི་ཚེ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་མ། ལོ་ལེགས་པ་དང་། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེས་བཱ་རཱ་ཎ་སཱིའི་སྐྱེད་མོས་ཚལ་དང་ཧ་ཅང་ཡང་མི་རིང་བ་ཞིག་ཏུ་ཚངས་ལྡན་ཞེས་བྱ་བའི་རྫིང་མཚེའུ་བས་ཆེས་ཁྱད་པར་དུ་འཕགས་པ་ཞིག་རྐོར་བཅུག་སྟེ། དེར་ཆུ་ནས་སྐྱེས་པའི་མེ་ཏོག་རྣམ་པ་སྣ་ཚོགས་བསྐྱེད་དོ། །འགྲམ་དང་ཕྱོགས་བཞི་ཀུན་ཏུ་ཡང་མེ་ཏོག་དང་འབྲས་བུའི་ཤིང་སྟོང་ཕྲག་དུ་མ་བསྐྱེད་དོ། །དེར་ཨུཏྤ་ལ་དང་། བད་མ་དང་། ཀུ་མུད་དང་། པད་མ་དཀར་པོས་ཡོག་པར་བྱས་ཤིང་ཤིང་ཚང་ཚིང་དུ་མས་མཛེས་པ། བྱ་སྣ་ཚོགས་མང་པོ་སྐད་འབྱིན་པའི་འབྱོར་པ་དེ་ལྟ་བུ་དེ་མཐོང་ནས་ངང་པ་གང་བ་འཁོར་ལྡ་བརྒྱས་ཡོངས་སུ་བསྐོར་ཏེ་བབས་ནས་ཅི་དགའ་བའི་སྤྱོད་པ་རྩེ་བར་བརྩམས་སོ། །བཞིན་རྒྱས་ལ་རང་རང་གི་ཚོགས་ཀྱིས་སྨྲས་པ། ཁྱོད་ཀྱང་བོབས་ལ་རྩེད་མོ་གྱི་ཤིག །དེས་སྨྲས་བ། རེ་ཞིག་རྒྱལ་སྲིད་བླངས་ལ་དེ་ནས་ཕྱིས་ལོག་སྟེ་རྩེ་བར་བྱའོ་ཞེས་དེ་རིངས་བ་རིངས་པར་སོང་སྟེ་རྒྱས་སྲིད་བླངས་སོ། །དེ་ནས་དེ་དང་བ་ལྔ་བརྒྱས་ཡོངས་སུ་བསྐོར་ཏེ་བཱ་རཱ་ཎ་སཱིར་འོངས་ནས་ཚངས་ལྡ་གྱི་རྫིང་དུ་བབས་ཏེ་བག་རྐྱོང་ཞིང་གནས་པས་རྩེ་བར་བརྩམས་སོ། །དེ་དེ་ལྟར་བག་ཡོང་པས་གནས་པ་སྐྱེ་བོའ་ཚོགས་ཀྱིས་མཐོང་ནས་མཆོག་ཏུ་ངོ་མཚར་སྐྱེས་ཏེ། ཀྱེ་མ་ངང་པའི་དཔོན་པོ་མཆོག་ཏུ་གཟུགས་བལྟ་ན་སྡུག་པ་གང་ནས་འདིར་འོངས་ཏེ། གཟུགས་བཟང་པོས་ཆུན་རྒྱུ་བའི་འདབ་ཆགས་ཐམས་ཅད་ཟིལ་གྱིས་མནན་ནས་ཚངས་ལྡན་གྱི་རྫིང་གི་རྒྱན་བྱེད་ཅིང་དགའ་པར་གནས་ཤིང་འཇིག་རྟེན་དགའ་བ་སྐྱེད་བར་བྱེད། བཱ་རཱ་ཎ་སཱི་ན་གནས་པའི་སྐྱེ་བོའ་ཚོགས་ཐམས་ཅད་ཀྱིས་ཀྱང་ཐོས་ནས་ཚངས་ལྡན་གྱི་རྫོང་ཀུན་ནས་བསྐོར་ཏེ། དེའི་
གཟུགས་བཟང་པོ་དང་། བག་རྐྱེང་ཞིང་གནས་པ་ན་རྟོག་ཅིང་འཁོད་དོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་དང་པ་རྣམས་ཀྱི་དཔོན་པོ་ཞིག་ག་ཞིག་ནས་འདིར་མཆིས་ཏེ་ཚངས་ལྡན་གྱི་རྫིང་དུ་བབས་ནས་ངང་པ་བརྒྱ་ཕྲག་དུ་མས་ཡོངས་སུ་བསྐོར་ཅིང་གཟུགས་བཟང་པོས་ཆབ་ན་རྒྱུ་བའི་འདབ་ཆགས་ཐམས་ཅད་ཟིལ་གྱིས་མནན་ནས་འཇིག་རྟེན་དགའ་བ་བསྐྱེད་ཅིང་བག་རྐྱོང་ཞིང་མཆིས་ལགས་སོ། །རྒྱལ་པོས་སྨྲས་པ། ཤེས་ལྡན་དག་ག་ལ་ཏེ་དེ་ལྟ་ན་བྱ་པ་རྣམས་ཁུག་ཤིག །དེ་རྣམས་ཀྱིས་བཀུག་པ་དང་རྒྱལ་པོས་བསྒོ་བ། ཤེས་ལྡན་དག་ཚངས་ལྡན་གྱི་རྫིང་ན་དང་པའི་དཔོན་པོ་གཟུགས་མཆོག་ཏུ་བལྟ་ན་སྡུག་པ་ཞིག་གཞིག་ནས་འོངས་སོ་ཞེས་ཐོས་ཀྱིས་ཁེད་ཀྱིས་དེ་གཅིག་པུ་རྙིས་མ་སྣད་པར་ཟུད་ལ་ང་ལ་ཕུལ་ཅིག །དེ་རྣམས་ཀྱིས་དེ་མཆོག་ཏུ་སྙི་འཇམ་པོས་མ་སྣད་པར་གཟུང་བ་དང་དེས་ཚིགས་སུ་བཅད་དེ་སྨྲས་པ། །ཁོ་བོ་སྙིས་ནི་དམ་པོར་བཟུང་ཟིན་ཏེ། །མི་ཡི་དབང་དུ་སོང་བས་ཁོ་བོ་ལ། །ཅི་བྱར་མེད་ཀྱིས་ངང་པའི་ཚོགས་དེང་དེ། །མ་དྲོས་པར་ནི་མྱུར་དུ་འདོང་བར་གྱིས། །ངང་པ་གཅིག་གིས་ལྔ་བརྒྱར་མ་ཚང་བ་ནི་བྲོས་སོ། །གཅིག་པུ་ཞིག་སྙིས་ཟིན་པ་དེ་ཉིད་ལ་མྱ་ངན་བྱེད་ཅིང་འདུག་པ་དེ་བྱ་པ་རྣམས་ཀྱིས་མཐོང་ནས་མཆོག་ཏུ་ངོ་མཚར་སྐྱེས་ཞིང་རྒྱལ་པོས་སྐྲག་ནས་མ་བཟུང་མ་བསད་དེ། །དེ་རྣམས་ཀྱིས་ངང་པའིདཔོན་པོ་དེ་ཁྱེར་ནས་རྒྱལ་པོའ་དྲུང་དུ་སོང་བ་དང་། ཅིག་ཤོས་མ་བཟུང་བ་དེ་ཡང་ཆགས་པའི་སྙིས་བཟུང་བས་རང་ཉིད་འོངས་སོ། །ངང་པའི་དཔོན་པོ་རྒྱལ་པོ་ལ་ཕུལ་བ་དང་། རྒྱལ་པོས་སྨྲས་པ། ཤེས་ལྡན་དག་ཅིག་ཤོས་འདི་ཅིའི་ཕྱིར་ཁྱེར་ཏེ་འོངས་དེ་རྣམས་ཀྱིས་སྨྲས་པ། ལྷ་བདག་ཅག་གིས་འདི་མ་བཟུང་མོད་ཀྱི་རང་ཉིད་མཆིས་ལགས་སོ། །རྒྱལ་པོ་མཆོག་ཏུ་ངོ་མཚར་སྐྱེས་ཏེ་སྨྲས་པ། གདོན་མི་ཟ་བར་འདི་ནི་དེའི་ཆུང་མ་ཡིན་པས་འོགས་ཀྱིས་ངང་པའི་དཔོན་པོ་འདི་དང་སྤ་ཤུག་ལྷན་ཅིག་ཐོང་ལ་ཁྱེད་ཅག་སུ་ཡང་འདི་གཉིས་མ་གསོད་ཅིག །བྱ་པ་རྣམས་ཀྱིས་སྨྲས་པ། ལྷ་གཞན་གྱིས་བཀུམ་དུ་མཆིས་བཀའ་སྩལ་དུ་གསོལ། རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་གྲོང་ཁྱེར་བཱ་རཱ་ཎ་སཱིར་
དྲིལ་སྒྲོགས་སུ་ཆུག་སྟེ། ལྷ་ཉིད་ཀྱིས་བཀའ་སྩལ་པ། དའི་ཡུལ་ན་གནས་པ་སུས་ཀྱང་ཆུ་ན་རྒྱུ་བའི་འདས་ཆགས་རྣམས་མ་གསད་ཅིག་ཅེས་སྒྲོགས་ཤིག །དེ་རྣམས་ཀྱིས་དྲིལ་བསྒྲགས་སོ། །དགེ་སློང་དག་ཇི་སྙམ་དུ་སེམས། དེའིཚེ་དེའི་དུས་ཀྱི་གང་པའི་དཔོན་པོ་བཞིན་རྒྱས་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་ཆུང་མ་གང་ཡིན་པ་དེ་ནི་ཀུན་དགའ་བོ་ཡིན་ནོ། །དང་པ་གཅིག་གིས་ལྔ་བརྒྱར་མཚང་བ་གང་ཡིན་པ་དེ་ནི་དགེ་སློང་ལྔ་བརྒྱར་གཅིག་གིས་མ་ཚང་བ་འདི་དག་ཉིད་ཡིིན་ཏེ། དེ་ན་ཡང་འདི་རྣམས་ངང་པར་གྱུར་པ་ན་ད་ཡོངས་སུ་བཏང་སྟེ། ཀུན་དགའ་བོ་དང་པར་གྱུར་པས་ནི་ང་ཡོངས་སུ་མ་བཏང་ངོ་། །ད་ལྟར་ཡང་ང་འདི་དག་གིས་ཡོངས་སུ་བཏང་གི་དགེ་སློང་ཀུན་དགའ་བོས་ནི་ཡོངས་སུ་མ་བཏང་ངོ་། །དགེ་སློང་དག་གཞན་ཡང་ཇི་ལྟར་འདི་དག་གིས་ང་ཡོངས་སུ་བཏང་ན་དགེ་སློང་ཀུན་དགའ་བོས་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་གང་རྒྱངས་ཅན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་སྐྱེ་བོའ་ཚོགས་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ །དེ་ལ་བློན་པོ་ལྔ་བརྒྱ་ཡོད་དེ། དེ་རྣམས་ཀྱི་མཐུས་མཚམས་ཀྱི་རྒྱལ་པོ་རྣམས་ཀྱིས་ཟིལ་གྱིས་མི་ནོན་ཏོ། །ཇི་ཙམ་ན་ལྷོ་ཕྱོགས་ཀྱི་ལམ་ནས་བྱ་མ་བུམ་གྱི་དབྱུག་གུ་ཅན་ཞེས་བྱ་བ་དམག་སྟོང་ཐུབ་པ་ཞིག་འོངས་ནས། དེ་བློན་པོ་གཞན་ཞིག་གིས་རྒྱལ་པོ་ལ་ཕུལ་ཏེ། ལྷ་བྱ་མ་བུམ་གྱི་དབྱུག་གུ་ཅན་ཞེས་བགྱི་བ་དམག་སྟོང་ཐུབ་པ་འདི་ལྷའི་སླད་དུ་ལྷོ་ཕྱོགས་ཀྱི་ཤུལ་ནས་མཆིས་ཀྱིས། ལྷས་འདི་ཡོགས་སུ་བཟུང་བའི་རིགས་སོ། །རྒྱལ་པོས་དེ་ཡོངས་སུ་བཟུང་ནས་ལོངས་སྤྱོད་ཀྱི་བགོ་བཤའ་ཡང་བྱས་སོ། །ཇི་ཙམ་དུས་གཞན་ཞིག་ན་རྒྱལ་པོ་གང་རྒྱངས་ཅན་གྱི་ཡུལ་གཞན་གྱི་རྒྱལ་པོ་རྣམས་མཐུ་དང་དཔུང་ཆེན་པོར་གྱུར་ཏོ། །དེ་རྣམས་དཔུང་གི་ཚོགས་ཡན་ལག་བཞི་པོ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་རྒྱལ་པོ་གད་རྒྱངས་ཅན་དང་གཡུལ་སྤྲད་པའི་ཕྱིར་འོངས་སོ། །རྒྱལ་པོ་གད་རྒྱངས་ཅན་གྱིས་ཀྱང་དཔུང་གི་ཚོགས་ཡན་ལག་བཞི་པོ་གླང་པོ་ཆེ་
པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་ས་གཞན་གྱི་རྒྱལ་པོ་རྣམས་དང་གཡུལ་སྤྲད་པའི་ཕྱིར་སྤགས་ཏེ་བསུའོ། །རྒྱལ་པོ་གད་རྒྱངས་ཅན་གྱིས་ས་གཞན་གྱི་རྒྱལ་པོ་རྣམས་བཅོམ། བྲེད་པར་བྱས། ཐག་བཅུག །པས་པར་བྱས། རྒྱབ་ཀྱིས་བལྟས་པར་བྱས་ཏེ། རང་རང་གི་ཡུལ་དུ་དོང་ངོ་། །དེ་རྣམས་སླར་ཡང་འདུས་ནས་རྒྱལ་པོ་གད་རྒྱངས་ཅན་གྱི་བློན་པོ་ལྔ་བརྒྱ་ལ་ཁྱེད་ཅག་ཚུར་ཤེག་ཤིག་དང་། ཁྱེད་ཅག་ལས་ལོངས་སྤྱོད་ཆེས་ཁྱད་པར་དུ་འཕགས་པ་དག་གིས་བགོ་བཤའ་བྱའོ་ཞེས་ཡོ་བྱད་ཀྱིས་ཁ་དྲངས་པ་དང་དེ་རྣམས་ཀྱིས་ཁས་བླངས་སོ། །དེ་ནས་ས་གཞན་གྱི་རྒྱལ་པོ་རྣམས་ཀྱིས་སླར་ཡང་དབུང་གི་ཚོགས་ཡན་ལག་བཞི་པོ་གླང་པོ་ཆེ་པའི་ཚོགས་དང་། རྟ་པའི་ཆོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་རྒྱལ་པོ་གད་རྒྱངས་ཅན་དང་གཡུལ་སྤྲད་པའི་ཕྱིར་འོངས་སོ། །རྒྱལ་པོ་གད་རྒྱངས་ཅན་གྱིས་ཀྱང་དཔུང་གི་ཚོགས་ཡན་ལག་བཞི་པོ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་ས་གཞན་གྱི་རྒྱལ་པོ་རྣམས་དང་གཡུལ་སྤྲད་པའི་ཕྱིར་སྤགས་ཏེ་བསུའོ། །གད་རྒྱངས་ཅན་གྱི་བློན་པོ་ལྔ་བརྒྱ་གཡུལ་སྤྲད་པ་ན་ཕྱིར་ལོག་ནས་བྱ་མ་བུམ་གྱི་དབྱུག་གུ་ཅན་དམག་སྟོང་ཐུབ་དང་ལྷན་ཅིག་གཡུལ་འགྱེད་པར་བརྩམས་པ་རྒྱལ་པོས་མཐོང་ནས་བག་ཚ་བར་གྱུར་པ་དང་། བྱ་མ་བུམ་གྱི་དབྱུག་གུ་ཅན་དམག་སྟོང་ཐུབ་ཀྱིས་ཚིགས་སུ་བཅད་དེ་སྨྲས་པ། ཁྱེད་ནི་བྱ་མ་བུམ་ཡི་དབྱུག །གྲོགས་པོ་གཅིག་པུས་མ་བཏང་གི །ཡུན་རིང་པོ་ནས་གནང་བ་ཡིམ། །གྲོགས་པོ་ཀུན་གྱིས་ཁྱོད་བཏང་ངོ་། །དེས་དེ་དག་ཐམས་ཅད་ཁ་བཏག་གོ །དགེ་སློང་དག་ཇི་སྙམ་དུ་སེམས། དེའིཚེ་དེའི་དུས་ཀྱི་རྒྱལ་པོ་གད་རྒྱངས་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱ་མ་བུམ་གྱི་དབྱུག་གུ་ཅན་གང་ཡིན་པ་དེ་ནི་ཀུན་དགའ་བོ་ཡིན་ནོ། །བློན་པོལྔ་བརྒྱ་པོ་གང་ཡིན་པ་དེ་དག་ནི་དགེ་སློངལྔ་བརྒྱ་པོ་འདི་དག་ཉིད་ཡིན་ནོ། དེ་ན་ཡང་འདི་དག་གིས་ང་ཡོངས་སུ་བཏང་ངོ་། །ད་ལྟར་ཡང་འདི་
དག་གིས་ང་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །གཞན་ཡང་ཇི་ལྟར་འདི་དག་གིས་ང་ཡོངས་སུ་བཏང་གི་ཀུན་དགའ་བོས་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་བོ་ལ་གནས་པ་ན་རིའི་ཕྱོགས་ཤིག་ན་རི་དགས་ཀྱི་དཔོན་པོ་སེང་གེར་གྱུར་ཏེ། དེའི་ལྷག་མ་ཟ་བ་ཝ་ལྔ་བརྒྱ་རྗེས་བཞིན་དུ་འབྲང་ཞིང་རིལ་ཉེ་བར་བརྟེན་ཏེ་གནས་སོ། །སེང་གེས་སྲོག་ཆགས་རྣམས་བསད་དེ་ཤའི་དམ་པ་དང་བྲག་གི་དམ་པ་དེ་འཐུངས་ནས་བོར་ཏེ་འགྲོ་བས་དེ་རྣམས་དེ་ལྟ་བུས་དུས་རིང་མོ་ཞིག་འདས་པར་གྱུར་ཏོ། །ཇི་ཙམ་དུས་གཞན་ཞིག་ན་རི་དགས་ཀྱི་རྒྱལ་པོ་སེང་གེ་མཚན་མོ་སྲོག་ཆགས་ཚོལ་བ་ན་ཁྲོན་པར་ལྷུང་བ་དང་ཝ་ལྔ་བརྒྱ་པོ་དེ་རྣམས་ལས་ཝ་ལྔ་བརྒྱར་གཅིག་གིས་མཚང་བ་སོ་སོར་དོང་སྟེ། ཝ་གཅིག་བུ་ཞིག་སེང་གེ་ལ་རྟོག་ཅིང་ཁྲོན་པའི་ཁར་འདུག་སྟེ་གང་གིས་ན་འདི་ཕྱིན་པར་འགྱུར་བའི་ཐབས་དེ་ཅི་ཡོད་སྙམ་སེམས་ཤིང་དེ་ཁྲོན་པའི་ཉེན་ཀོར་ཕན་ཚུན་སོང་བ་ལས་ཇི་ཙམ་ན་ཁྲོན་པ་དང་ཧ་ཅང་ཡང་མི་རིང་བ་ཞིག་ན་མཚེའུ་ཞིག་མཐོང་ནས། དེས་བརྟགས་ནས་ཕྱོགས་གཅིག་ནས་འོག་བྲུས་བཅུག་སྟེ་ཁྲོན་པར་མཚེའུའི་ཆུས་བཀང་བ་དང་། སེང་གེ་རང་ཉིད་བྱུང་བར་གྱུར་ཏོ། །ལྷས་ཚིགས་སུ་བཅད་དེ་སྨྲས་པ། སྟོབས་ཆེ་བ་འམ་གཞན་ཀྱང་རུང་། །གྲོགས་བོ་ངག་ཏུ་བྱ་དགོས་ཏེ། །ཝས་ནི་ཁྲོན་པ་རྙིང་པ་ནས། །སེང་གེ་ཕྱུང་བར་གྱུར་ལ་ལྟོས། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སེང་གེ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཝ་གཅིག་པོ་གང་ཡིན་པ་དེ་ནི་དགེ་སློང་ཀུན་དགའ་བོ་ཡིན་ནོ། །ཝ་གཅིག་གིས་ལྔ་བརྒྱར་མ་ཚང་བ་གང་ཡིན་པ་དེ་ནི་དགེ་སློང་ལྔ་བརྒྱ་པོ་འདི་དག་ཡིན་ཏེ། དེན་ཡང་འདི་དག་གིས་ང་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །ད་ལྟར་ཡང་འདི་དག་གིས་ང་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །གཞན་ཡང་ཇི་ལྟར་འདི་དག་གིས་ང་ཡོངས་སུ་བཏང་ན་ཀུན་དགའ་བོས་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་ན་ཕྱོགས་ཤིག་ན་རིི་དགས་ལྔ་བརྒྱའི་རི་དགས་ཀྱི་དཔོན་པོར་གྱུར་ཏོ། །ཇི་ཙམ་ན་རྔོན་པ་ཞིག་གིས་རི་དགས་
རྣམས་བཤོར་བའི་ཕྱིར་མཛོལ་དང་། རྙི་དང་། རྙོང་རབ་ཏུ་མང་པོ་དག་བཙུགས་སོ། །རི་དགས་ཀྱི་དཔོན་པོ་དེ་བག་རྐྱོང་ཞིང་གནས་པས་འཁོར་ལྔ་བརྒྱ་དང་རི་དགས་ཀྱི་ནགས་ན་རྒྱུ་ཞིང་དེ་རི་དགས་ཀྱི་ཚོགས་རྣམས་ཀྱི་སྣ་ལ་འགྲོ་བ་ན་རྙིང་ཟིན་ཏོ། །རྙིས་ཟིན་པ་དེ་མཐོང་ནས་རི་དགས་ཐམས་ཅད་ནི་བྲོས་སོ། །རི་དགས་མོ་གཅིག་པུ་ཞིག་ཚོགས་ཀྱི་དཔོན་པོའ་དྲུང་ན་འདུག་གོ །རི་དགས་ཀྱི་དཔོན་པོ་དེ་འབད་ཀྱང་རྙི་གཅད་པར་མ་ནུས་ཤིང་དེ་དེ་ལྟར་ཕྲ་ཤགས་བྱེད་པའི་རི་དགས་མོ་དེས་མཐོང་ནས་ཚིགས་སུ་བཅད་དེ་སྨྲས་པ། རྙི་འདི་གང་གིས་བཙུགས་པ་ཡི། །རྔོག་པ་དེ་ནི་མཆི་ལགས་ཀྱིས། །སྐལ་ཆེན་པོ་ནི་འབད་མཛོད་ཅིག །རི་དགས་དམ་པ་འབད་མཛོད་ཅིག །དེས་ཀྱང་ཚིགས་སུ་བཅད་དེ་སྨྲས་པ། རྨིག་པ་སར་བཙུགས་འཐེན་ཀྱང་ནི། །འབྲེང་བའི་སྙི་ནི་དམ་པོ་ཡིས། །བདག་གིས་རྐང་པ་རབ་སྨས་ཀྱི། གཅད་མི་ནུས་ན་ཅི་བྱར་ཡོད། །དེ་ནས་རྔོན་པ་དེ་མདའ་དང་གཞི་ལག་པར་ཐོགས་ཤིང་གོས་དུར་སྨྲིག་བགོས་ནས་ཕྱོགས་དེར་ཕྱིན་ཏོ། །རི་དགས་མོ་དེས་རྔོན་པ་དེ་རི་དགས་ཀྱི་དཔོན་པོ་དེ་བསད་པའི་ཕྱིར་བསྒྲིམས་པས་ཉེ་བར་འོངས་པ་མཐོང་ངོ་། །མཐོང་ནས་ཀྱང་རིངས་པ་རིངས་པར་ཚིགས་སུ་བཅད་དེ་སྨྲས་པ། སྙི་འདི་གང་གིས་བཙུགས་པ་ཡི། །རྔོན་པ་དེ་ནི་མཆིས་ལགས་ཀྱི། །སྐལ་ཆེན་ད་ནི་འབད་མཛོད་ཅིག །རི་དགས་དམ་པ་འབད་མཛོད་ཅིག །དེས་ཀྱང་ཚིགས་སུ་བཅད་དེ་སྨྲས་པ། རྨིག་པ་རབ་བཙུགས་འཐེན་ཀྱང་ནི། །འབྲེང་བའི་སྙི་ནི་དམ་པོ་ཡིས། །བདག་གི་རྐང་པ་རབ་སྨས་ཀྱིས། །བཅད་མི་ནུས་ན་ཅི་བྱར་ཡོད། །དེ་ནས་རི་དགས་མོ་དེ་སྙིང་སྟོངས་ནས་རྔོན་པ་དེའི་མདུན་དུ་མངོན་དུ་སོང་སྟེ། དེ་ལ་བསྙེན་ནས་ཚིགས་སུ་བཅད་དེ་སྨྲས་པ། རྔོན་པ་གཞུ་ནི་ཕོབ་མཛོད་ལ། །རྔོན་པར་ལ་གྲི་བླང་མཛོད་དེ། །ཐོག་མར་བདག་ཁུམ་དེ་ནས་ནི། །རི་དགས་དཔོན་པོ་ལ་མཛོད་ཅིག །དེ་ནས་རྔོན་པ་དེ་ངོ་མཚར་གྱིས་བསྡུས་པའི་བློས་བསམས་པ་འདི་ཁྱོད་ཀྱི་ཅིར་འོང་། དེས་སྨྲས་པ། ཁྱིམ་ཐབ་བོ། །དེས་དེ་ལ་ཚིགས་སུ་བཅད་དེ་སླར་སྨྲས་པ། བདག་གིས་ཁྱོད་ཀྱང་མི་བསད་ལ། །རི་དགས་དཔོན་པོའང་མི་བསད་པར། །སྙིང་དུ་སྡུག་པའི་
ཁྱིམ་ཐབ་དང་། །ཁྱོད་ནི་ལྷན་ཅིག་འགྲོགས་པར་བྱ། །དེས་ཀྱང་ཚིགས་སུ་བཅད་པས་སྨྲས་པ། ཇི་ལྟར་རྔོན་པ་བདག་དང་ནི། །སྡུག་པའི་ཁྱིམ་ཐབ་དགའ་བ་ལྟར། །དེ་བཞིན་རྔོན་པ་གཉེན་ཀུན་དང་། །ལྷན་ཅིག་ཏུ་ནི་དགར་གྱུར་ཅིག །དེ་ནས་རྔོན་པ་དེ་ལྷག་པར་ཡང་ངོ་མཚར་སྐྱེས་ནས་རི་དགས་དེ་བཀྲོལ་ནས་ལྷན་ཅིག་དོང་ངོ་། །དགེ་སློང་དག་ཇི་སྙམ་དུ་སེམས། དེའིཚེ་དེའི་དུས་ཀྱི་རི་དགས་ཀྱི་དཔོན་པོ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རི་དགས་མོ་གང་ཡིན་པ་དེ་ནི་ཀུན་དགའ་བོ་ཡིན་ནོ། །རི་དགས་གཅིག་གིས་ལྔ་བརྒྱར་མ་ཚང་བ་བྲོས་པ་གང་ཡིན་པ་དེ་དག་ནི་དགེ་སློང་གཅིག་གིས་ལྔ་བརྒྱར་མ་ཚང་བ་འདི་དག་ཉིད་ཡིན་ཏེ། དེ་ན་ཡང་ང་འདི་དག་གིས་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །ད་ལྟར་ཡང་ང་འདི་དག་གིས་ཡོངས་སུ་བཏང་གི་དགེ་སློང་ཀུན་དགའ་བོས་ནི་ཡོངས་སུམ་བཏང་ངོ་། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་རུལ་པ་རྙེད་པ་དང་བཀུར་སྟི་རུལ་པས་བཅོམ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་རུལ་པ་འདི་རྙེད་པ་དང་བཀུར་སྟི་རུལ་པས་བཅོམ་པ་དེ་ཉོན་ཅིག །དགེ་སློང་དག་སྔོན་བྱུང་བ་རིའི་ཕྱོགས་གཅིག་ཅིག་ན་པད་མའི་རྫིང་ཆེན་པོ་ཞིག་ཡོད་དེ། །དེ་དང་ཉེ་བ་ན་གླང་པོ་ཆེ་ཞིག་གནས་སོ། །ཕྱོགས་གཞན་ཞིག་ན་ཝ་ཞིག་ཀྱང་གནས་སོ། །ཇི་ཙམ་དུས་གཞན་ཞིག་ན་གླང་པོ་ཆེ་པད་མའི་རྫིང་དེ་ནས་ཆུ་འཐུངས་ནས་འགྲོ་བ་དང་ཝ་འོང་བ་དེས་གླང་པོ་ཆེ་ལ་སྨྲས་པ། །འཐབ་མོ་བྱའམ་ལམ་ལས་འཛུར། གླང་པོ་ཆེས་བསམས་པ། རུལ་པ་ཉོན་མོངས་སྤྱི་རྟོལ་ཅན་འདི་གལ་ཏེ་བདག་གིས་རྐང་ལག་གིས་སམ། སྣས་སམ། མཆེ་བས་བསད་ན་མི་གཙང་བས་མ་རུང་བར་འགྱུར་བས་མདོར་ན་རུལ་པ་འདི་ནི་རུལ་པ་ཁོ་ནས་བསད་དོ་སྙམ་དུ་བསམས་ནས་ཚིགས་སུ་བཅད་དེ་སྨྲས་པ། ཁྱོད་ནི་རྐང་ལག་གིས་མི་བསད། །མཆེ་བས་མ་ཡིན་སྣམ་མ་ནི་ཏེ། །རུལ་པ་རུལ་པས་བསད་བྱ་བས། །ཁྱོད་ནི་རུལ་པས་བསད་པར་བྱ། །གླང་པོ་ཆེས་བསམས་པ། ལམ་བཟུར་ཏེ་སོང་དང་
གདོན་མི་ཟ་བར་འདི་བདག་གི་རྗེས་བཞིན་འོང་ངོ་སྙམ་ནས། དེས་ལམ་བཟུང་ནས་མྱུར་བ་མྱུར་བར་སོང་བ་དང་། ཝས་བསམས་པ། ཚིག་ཙམ་ཁོ་ནས་བདག་གིས་འདི་བཅོམ་པ་ཡིན་ཏེ། དེས་ན་མྱུར་མ་མྱུར་བར་བྲོས་སོ་སྙམ་ནས། །དེའི་རྗེས་བཞིན་རྗེས་བཞིན་འབྲེངས་པ་དང་། གླང་པོ་ཆེས་ཉེ་བར་འོངས་པར་ཤེས་ནས་ཤུགས་དྲག་པོས་དེའི་སྟེང་དུ་རྟུག་པ་བོར་བས་ཕོག་ནས་ཤི་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་རུལ་པ་འདི་རུལ་པས་བཅོམ་མོ། །ད་ལྟར་ཡང་རུལ་པ་འདི་རྙེད་པ་དང་བཀུར་སྟི་རུལ་པས་བཅོམ་མོ། །གཞན་ཡང་དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་བ་སངས་རྒྱས་བཅོམལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་གཟིགས་པའི་རྗེས་སུ་མཐུན་པར་གྱུར་པ་གང་ལགས་པ་དེ་དག་ནི་འཁོར་བའི་འཇིགས་པ་ཆེན་པོ་ལེགས་པར་རྒལ་བར་གྱུར་ལ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ལགས་པ་དེ་དག་ནི་ཚུལ་མ་ལགས་བས་མ་རུང་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ངའི་ཚིག་ཉན་པ་གང་ཡིན་པ་དེ་དག་ནི་འཇིགས་པ་ཆེན་པོ་ལས་ཐར་ལ་ལྷ་སྦྱིན་གྱི་ཚིག་ཉན་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུང་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་དང་ཉེ་བ་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་བ་ན་སྤྲེའུའི་ཚོགས་ཀྱི་དཔོན་པོ་གཉིས་ཤིག་གནས་ཏེ། རེ་རེ་ལ་ཡང་འཁོར་ལྔ་བརྒྱ་ལྔ་བརྒྱ་ཡོད་དོ། །དེ་ན་ཚོགས་ཀྱི་དཔོན་པོ་ཅིག་ཤོས་གཉིད་ལོག་པའི་རྨི་ལམ་ན་བདག་གསོན་པོ་ཉིད་དུ་འཁོར་ལྔ་བརྒྱ་དང་ཟངས་སུ་བཅུག་པ་མཐོང་ངོ་། །མཐོང་ནས་ཀྱང་སྐྲག་སྔངས་བྲེད་དེ་སྐྱི་བུང་ཞེས་བྱེད་ནས་ནམ་དོ་མ་ནངས་ཏེ་ནངས་པ་དང་སྤྲེའུ་རྣམས་བསོགས་ཏེ་རྨི་ལམ་བཟླས་པར་བརྩམས་པ། ཤེས་ལྡན་དག་མདང་སུམ་ངས་རྨི་ལམ་ངན་པ་ཞིག་མཐོང་གིས། གནས་འདི་ནས་འདིར་འདོང་ངོ་། །སྤྲེའུ་རྣམས་ཀྱིས་སྨྲས་པ། དེ་བཞིན་དུ་བགྱིས་ཏེ་འབྲོས་པར་བགྱིའོ། །བྱང་ཆུབ་སེམས་དཔའ་
རྣམས་ནི་རྨི་ལམ་རྣོ་བ་ཡིན་པས་བདག་ཉིད་ཆེན་པོ་དེས་ཚོགས་ཀྱི་དཔོན་པོ་ཅིག་ཤོས་ལ་སྨྲས་པ། བདག་གིས་རྨིལམ་འདི་འདྲ་བ་རྨིས་ནས་འདོད་ན་གཞན་དུ་འདོང་ངམ། དེ་ཡིད་མ་ཆེས་ནས་སྨྲས་པ། ཅི་རྨི་ལམ་དུ་རྨིས་སོ་ཅོག་བདེན་པར་འགྱུར་རམ། གལ་ཏེ་ཁྱོད་འགྲོ་ན་སོང་ཤིག ཁོ་བོ་ནི་སྦྱོད་ཡུལ་ཆེས་ཡངས་པར་འགྱུར་བས་མི་འགྲོའོ། །དེས་དེ་ཡིད་མཆེས་བར་རིག་ནས་བདག་ཉིད་ཀྱིས་ཚོགས་དང་དེ་དོང་ངོ་། །ཇི་ཙམ་དུས་གཞན་ཞིག་ན་རི་འོར་དེ་ན་བྲན་མོ་ཞིག་ཐབ་ན་ཡོས་རྡོད་ན་མ་སྟེས་པས་ལུག་ཅིག་འཁྱམ་ཞིང་ཕྱོགས་དེར་བྱིན་ནས་དེ་ནས་དག་བཟའ་བར་བརྩམས་པ་དང་དེ་འགལ་དུམ་གྱིས་བསྣུས་པས་མེ་འབར་བཞིན་རྒྱལ་པོའ་གླང་པོ་ཆེའི་བྲེས་སུ་ཞུགས་པ་དང་འབར་བ་དེས་གླང་པོ་ཆེའི་བྲེས་བ་སྲེགས་ཏེ་གླང་པོ་ཆེ་མང་པོ་ཞིག་ཚིག་གོ །རྒྱལ་པོས་སྨན་པ་བཀུག་སྟེ་སྨྲས་པ། གླང་པོ་ཆེ་མེས་ཚིག་པ་རྣམས་ལ་དཔྱད་ཅི་ཡོད། སྨན་པ་དེའི་ནས་ཀྱི་ཞིང་སྤྲེའུ་རྣམས་ཀྱིས་མ་རུང་བར་བྱས་པས་དེས་བསམས་པ། སྤྲེའུ་འདི་རྣམས་ལ་ཤ་གཉེར་བའི་དུས་ལ་བབ་བོ་སྙམ་དུ་བསམས་ནས་སྨྲས་པ། ལྷ་སྤྲེའུའི་ཞག་གིས་གླང་པོ་ཆེ་རྣམས་བསྐུས་ན་གསོས་པར་འགྱུར་རོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་སྤྲེའུའི་ཞག་སྟ་གོན་གྱིས་ཤིག །དེ་རྣམས་ཀྱིས་ཀྱང་རྔོན་པ་རྣམས་ལ་བསྒོ་བ་དང་། རྔོན་པ་རྣམས་ཀྱིས་རི་འོང་གྱི་ཉེ་འཁོར་ན་གནས་པའི་སྤྲེའུ་ཐམས་ཅད་བཟུང་སྟེ་ཕུལ་ལོ། །སྨན་པ་ཡུན་རིང་པོ་ནས་ཤ་ཁོན་རྗེས་སུ་འབྲེལ་བས་གསོན་པོ་ཉིད་དུ་ཟངས་སུ་བཅུག་གོ །ལྷས་ཚིགས་སུ་བཅད་དེ་སྨྲས་པ། གྲོང་རྔལ་དང་ནི་གྲོང་ཁྱེར་ན། །མི་མཐུན་ཡོད་པར་གནས་མི་བྱ། །ལུག་དང་བྲན་མོ་མི་མཐུན་པས། །སྤྲེའུ་རྣམས་དག་ནི་བརླག་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྤྲེའུའི་ཚོགས་ཀྱི་དཔོན་པོ་རྨི་ལམ་རྣོ་བ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཚོགས་ཀྱི་དཔོན་པོ་ཅིག་ཤོས་གང་ཡིན་བ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངའི་ཚིག་ཉན་པ་གང་ཡིན་པ་དེ་དག་ནི་འཇིགས་པ་ཆེན་པོ་ལས་རབ་ཏུ་ཐར་རོ། །ལྷ་སྦྱིན་གྱི་ཚིག་ཉན་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུངས་པར་གྱུར་ཏོ། །ད་ལྟར་ཡང་ངའི་ལྟ་བའི་རྗེས་
སུ་མཐུན་པར་ཡུར་པ་གང་ཡིན་པ་དེ་དག་ནི་འཁོར་བའི་འཇིགས་པ་ཆེན་པོ་ལས་རབ་ཏུ་ཐར་ཏེ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུངས་པར་གྱུར་ཏོ། །གཞན་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་ལེགས་སུ་དོང་བར་གྱུར་ཅིང་། ལྷ་སྦྱིན་གྱི་ཏ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་དུ་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་ཤིག་ན་སྤྲེའུའི་ཚོགས་ཀྱི་དཔོན་པོ་འཁོར་ལྔ་བརྒྱ་ལྔ་པ་གཉིས་ཤིག་ནས་སོ། །དེ་ན་ཅིག་ཤོས་ཚོགས་དང་ལྷན་ཅིག་ལྗོགས་སུ་དོང་སྟེ་རིམ་གྱིས་རི་འོང་ཞིག་ཏུ་ཕྱིན་པ་དང་། རི་འོང་དེ་ན་ཤིང་ཀི་མ་པ་ཀ་ཞེས་བྱ་བ་འབྲས་བུས་ཡལ་ག་གཡུར་ཟ་བར་འདུག་ནས་སྤྲེའུ་རྣམས་ཀྱིས་ཚོགས་ཀྱི་དཔོན་པོ་ལ་སྨྲས་པ། ཚོགས་ཀྱི་དཔོན་པོ་ལྗོན་ཤིང་ལྷག་པར་འབྲས་བུ་ཆགས་པ་འབྲས་བུས་ཡལ་ག་གཡུར་ཟ་བ་ཞིག་མཆིས་ཀྱིས་འོ་སྐོལ་དུབ་པ་འབྲས་བུ་རྣམས་གསོལ་ལོ། །ཚོགས་ཀྱི་དཔོན་པོས་ཤིང་དེལ་བརྟགས་ནས་ཚིགས་སུ་བཅད་དེ་སྨྲས་པ། གྲོང་གི་དྲུང་ན་འདུག་ཀྱང་ནི། །བྱིས་པས་འདི་ལམ་ཟོས་པས། །རྗེས་སུ་དཔགས་ན་ཤིང་འདི་ཡི། །འབྲས་བུ་བཟར་མི་རུང་བར་ཤེས། །ཞེས་སྨྲས་ནས་དོང་ངོ་། །ཚོགས་ཀྱི་དཔོན་པོ་ཅིག་ཤོས་ཀྱང་ཚོགས་དེ་ཉིད་ཀྱི་རྗེས་བཞིན་འབྲངས་ནས་རིམ་གྱིས་རི་འོང་དེར་ཕྱིན་པ་དང་། སྤྲེའུ་རྣམས་ཀྱིས་ཀི་མ་པ་ཀའི་ལྗོན་ཤིང་དེ་མཐོང་ནས་དེ་རྣམས་ཀྱིས་ཚོགས་ཀྱི་དཔོན་པོ་ལ་སྨྲས་པ། ཚོགས་ཀྱི་དཔོན་པོ་ལྗོན་ཤིང་གི་འབྲས་བུ་མཆིས་ཀྱིས་འོ་སྐོལ་དུབ་པ་འབྲས་བུ་རྣམས་ལ་གསོལ་ལ་བདེ་བར་བཞུད་དོ། །དེས་སྨྲས་པ། ལེགས་ཀྱིས་དེ་བཞིན་དུ་གྱིས་ཤིག །དེ་རྣམས་ཀྱིས་ཟོས་པ་དང་ཐམས་ཅད་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཚོགས་ཀྱི་དཔོན་པོ་དང་པོ་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚོ་དེའི་དུས་ཀྱི་དཔོན་པོ་གཉེས་པ་ཤོས་གང་ཡིན་པ་དེ་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་ལེགས་སུ་དོང་ངོ་། །ལྷ་སྦྱིན་གྱི་
ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་ལེགས་སུ་འཁོར་བའི་རྒྱ་མཚོ་ཆེན་པོ་ལས་རྒལ་ཏོ། །ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུངས་པར་གྱུར་ཏོ། །གང་གི་ཚེ་ལྷ་སྦྱིན་གྱིས་བཅོམ་ལྡན་འདས་ལ་བགྲོགས་པའི་ཕྱིར་རྡོ་འཕངས་པ་དེའིཚེ་བྲམ་ཟེ་དང་ཁྱིམ་བདག་རྣམས་འཁྲུགས་ནས་ལྷ་སྦྱིན་བསད་ཀྱིས་འདོང་ངོ་ཞེས་བྱས་པ་དང་། འཇིག་རྟེན་ནི་མཛའ་བ་དང་། མི་མཛའ་བ་དང་། བར་མ་དག་ཡོད་པས་གཞན་ཞིག་ལྷ་སྦྱིན་ལ་སྦྲན་ནས་དེ་སྐྲག་ནས་ཤིང་དྲུང་ཞིག་ཏུ་བརྟེན་ཏེ་སྤྱོད་ལམ་ཞི་བས་འདུག་གོ །དེ་རྣམས་ཀྱིས་དེ་ལྟར་སྤྱོད་ལམ་ཞི་བ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་ལྷ་སྦྱིན་བདག་ཉིད་ཆེན་པོ་འདི་བཅོམ་ལྡན་འདས་བགྲོངས་པར་ག་ལ་འགྱུར། ཁ་ཅིག་གིས་བདག་ཅག་བསླུས་ཀྱིས་ཚུར་འདོང་ངོ་ཞེས་དེ་རྣམས་དོང་ངོ་། །དགེ་སློང་རྣམས་ཀྱིས་ལྷ་སྦྱིན་དེ་ལྟ་བུའི་སྤྱོད་ལམ་གྱིས་གནས་པས་དེས་ན་གྲོང་མི་འཁྲུགས་ཀྱང་མ་བསད་དོ། །ཞེས་ཐོས་ནས་དེ་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་བ། བཙུན་པ་ལྷ་སྦྱིན་གྱི་ཆོས་ལྟ་བུའི་སྒོ་ནས་འཇིག་རྟེན་བསླུས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདི་ཆོས་ལྟ་བུའི་སྒོ་ནས་བྱི་བ་རྣམས་བྲིད་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་ཤིག་ན་བྱི་བ་རྣམས་ཀྱི་ཚོགས་ཀྱི་དཔོན་པོ་འཁོར་ལྔ་བརྒྱ་པ་ཞིག་གནས་སོ། །བྱི་ལ་མེ་སྐྱེས་ཞེས་བྱ་བ་ཞིག་ཡོད་དོ། གཞོན་པའི་གནས་སྐབས་ན་ཕྱོགས་གང་དུ་གནས་པའི་ཉེ་འཁོར་དུ་དེས་བྱི་བ་ཐམས་ཅད་བསད་དོ། །དེ་ཡང་དུས་གཞན་ཞིག་ན་རྒས་པར་གྱུར་ཏེ་རྒས་པས་ཕ་རོལ་གནོན་པས་བྱི་བ་གཟུང་མི་ནུས་ནས་དེས་བསམས་པ། སྔོན་བདག་གཞོན་པའི་གནས་སྐབས་ན་ནི་ཕ་རོལ་གནོན་པས་བྱི་བ་འཛིན་ནུས་ན་ད་ནི་མི་ནུས་ཏེ་འོན་ཀྱང་ཐབས་ཤིག་བཤམས་ལ་བཟའོ་སྙམ་ནས་དེ་འཇབ་ཅིང་བྱི་བ་རྣམས་བཙལ་བར་བརྩམས་ཏེ། དེས་བཙལ་
བ་ན་བྱི་བ་ལྔ་བརྒྱའི་ཚོགས་ཡོད་པར་ཤེས་ནས། དེ་བྱི་བ་དེ་རྣམས་ཀྱི་ཁུང་བུ་དང་ཧ་ཅང་ཡང་མི་རིང་བ་ཞིག་ཏུ་ངན་གཡོའི་དཀའ་ཐུབ་ཀྱིས་དཀའ་ཐུབ་བྱེད་པ་ན། བྱི་བ་རྣམས་ཕན་ཚུན་འཁྱམས་པས་སྤྱོད་ལམ་ཞི་བས་གནས་པ་དེ་མཐོང་ནས། དེ་རྣམས་ཀྱིས་རྒྱང་རིང་པོར་འདུག་ནས་སྨྲས་པ། ཞང་པོ་ཅི་བྱེད། དེས་སྨྲས་པ། ཁོ་བོ་གཞོན་པའི་གནས་སྐབས་ན་བསོད་ནམས་མ་ཡིན་པ་མང་དུ་བྱས་པས་དེ་ཟད་པར་བྱ་བའི་ཕྱིར་དཀའ་ཐུབ་སྤྱོད་དོ། །དེ་རྣམས་ཀྱིས་འདིས་དམ་པ་མ་ཡིན་པའི་ཆོས་སྡིག་པ་སྤངས་སོ་ཞེས་དེལ་ཆོས་ཀྱི་རྒྱུ་ལས་བྱུང་བའི་དད་པ་སྐྱེས་པར་གྱུར་ཏོ། །དེ་རྣམས་དེ་ལ་ཉི་མ་རེ་རེ་ཞིང་བསྐོར་བ་བྱས་ནས་ཁུང་དུ་འཇུག་པ་ན། དེས་དེ་རྣམས་ཀྱི་ནང་གི་ཐ་མ་བཟུང་ཞིང་བཟུང་ཞིང་ཟའོ། །ཇི་ཙམ་ན་ཚོགས་དེ་འགྲིམས་ནས་ཚོགས་ཀྱི་དཔོན་པོས་བསམས་པ། བདག་གི་བྱི་བ་རྣམས་ནི་ཉུང་བར་གྱུར་ལ་བྱི་ལ་འདི་ནི་ཉམ་སྐྱེས་པར་གྱུར་པས་འདིལ་ནི་རྒྱུ་ཞིག་ཡོད་པར་འགྱུར་རོ་སྙམ་ནས། དེས་བྱི་ལ་དེ་ལ་བརྟག་པར་བརྩམས་པ་དང་། ཇི་ཙམ་ན་རྟུག་པ་སྤུ་ཅན་དུ་མཐོང་ནས་དེས་བསམས་པ། གདོན་མི་ཟ་བར་འདིས་བྱི་བ་རྣམས་བསད་པར་གྱུར་གྱིས། མ་ལ་བདག་གིས་ནི་མངོན་སུམ་དུ་བབ་པར་བྱའོ་སྙམ་ནས། དེས་དེ་མི་མངོན་པའི་ས་ནས་བརྟག་པ་ལྷུང་ལེན་ཅིང་གནས་པ་ན། ཇི་ཙམ་ན་དེས་དེ་ཐ་མའི་བྱི་བ་ཟབ་མཐོང་ནས་དེ་དེ་ལོགས་སུ་སྟེ་རྒྱང་རིང་པོར་འདུག་ནས་ཚིགས་སུ་བཅད་དེ་སྨྲས་པ། ཞང་པོའ་ཡན་ལག་རྒྱས་གྱུར་ཅིང་། །བདག་གི་ཚོགས་ནི་འགྲིབས་གྱུར་ལ། །འབྲས་བུ་རྩ་བ་ཟ་བ་ཡི། །རྟུག་པ་སྤུ་ཅན་མི་འབྱུང་བས། །དཀའ་ཐུབ་འདི་ཆོས་དཀའ་ཐུབ་མིན། །དཀའ་ཐུབ་འདི་ནི་དོན་ཕྱིར་ཏེ། །བྱི་བ་རྣམས་ནི་འགྲིབས་གྱུར་པས། །མེ་སྐྱེས་ཁྱོད་ནི་བཀྲ་ཤིས་ཤོག །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྱི་ལ་མེ་སྐྱེས་ཞེས་བྱ་བ་གང་ཡིན་པ་དེ་ནི་དེའིཚེ་དེའི་དུས་ན་ལྷ་སྦྱིན་ཡིན་ཏེ། དེ་ན་ཡང་འདིས་ཆོས་ལྟ་བུའི་སྒོ་ནས་བྱི་བ་རྣམས་ཟོས་སོ། །ད་ལྟར་ཡང་འདིས་ཆོས་ལྟ་བུའི་སྒོ་ནས་འཇིག་རྟེན་བསླུས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་
རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་གཟིགས་པའི་རྗེས་སུ་མཐུན་པར་གྱུར་པ་གང་ལགས་པ་དེ་དག་བདེ་བ་དང་ལེགས་པར་འཁོར་བའི་འབྲོག་དགོན་པ་ལས་རྒལ་ཅིང་། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ལགས་པ་དེ་དག་ནི་ཚུལ་མ་ལགས་བར་སྡུག་བསྔལ་བར་གྱུ་ར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་ཀྱི་ཇི་ཏར་འདས་པའི་དུས་ན་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་བ་དང་ལེགས་པར་འབྲོག་དགོན་པ་ནས་ཐར་ལ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་ཚོང་དཔོན་གཉིས་ཤིག་ཤིང་རྟ་ལྔ་བརྒྱ་དང་ལྷན་ཅིག་ཚོང་སྒྱུར་ཞིང་དགོན་པའི་ལམ་ཞིག་ཏུ་ཞུགས་ཏེ། དེ་གཉིས་དགོན་པའི་ལམ་དུ་ཞུགས་ནས་གླང་རྣམས་རེས་འགའ་ནི་རྩྭ་ཉུང་། རེས་འགའ་ནི་ཆུ་ཉུང་། རེས་འགའ་ནི་མེད་དོ། །དེ་ནས་ཚོང་པ་དེ་གླང་རྣམས་དང་བཅས་ཏེ་ལྷག་པར་དུབ་པར་སྡུག་སྔལ་གྱིས་དགོན་པའི་ལམ་དུ་ཞུགས་པ་ལས་ཕྱོགས་ཤིག་ན་གསིང་མ་དང་ཆུ་ཕུན་སུམ་ཚོགས་པ་མཐོང་ནས་ཚོང་པ་རྣམས་ཀྱིས་དེར་གླང་རྣམས་གཏང་རང་རང་ཁྲུས་བྱས་ནས་ཆུ་མང་དུ་འཐུངས་སོ། །དེ་ནས་གླང་ཆུ་ཉུངས་པ་དང་། རྩྭ་ཉུངས་པས་ཡོངས་སུ་དུབ་པ་དེ་རྣམས་གྱིས་རྩྭ་འགྲངས་བར་ཟོས་ཆུ་འཐུངས་ཏེ་ངལ་སོས་པ་དང་། དེ་རྣམས་ཀྱི་ནང་ན་གླང་གཙོ་བོ་གང་ཡིན་པ་དེས་དེ་རྣམས་ལ་ཤེས་པར་བྱས་པ། ཤེས་ལྡན་དག་བདག་ཅག་རྩྭ་ཉུང་དུ་དང་། ཆུ་ཉུང་དུས་ཡོངས་སུ་དུབ་པ་ལས་ཕྱོགས་འདི་ནི་གསིང་མ་དང་། ཆུ་ཕུན་སུམ་ཚོགས་པ་ཡིན་གྱིས། གལ་ཏེ་ཁྱེད་ཅག་འདོད་ན་འདི་ཉིད་དུ་འཐེན་ཏེ་འདུག་པར་བྱའོ། །གླང་གཙོ་བོ་ཅིག་ཤོས་ཀྱིས་རང་གི་ཚོགས་རྣམས་ལ་སྨྲས་པ། ཤེས་ལྡན་དག་མི་རྣམས་ནི་མཐུ་དང་ལྡན་ཞིང་གདུལ་དཀའ་བ་འདུལ་བར་བྱེད་པ་ཡིན་གྱིས་གནོད་པ་འཐོབ་པར་འགྱུར་དུ་འོང་བས་བདག་ཅག་ཁལ་ཇི་ལྟར་བཀལ་བ་དེ་བཞིན་དུ་ཁྱེར་ཅིག །དེ་སྐད་ཅེས་སྨྲས་པ་དང་། གླང་
གཙོ་བོ་ཅིག་ཤོས་ཁྲོས་ནས་རང་གི་ཚོགས་རྣམས་ལ་སྨྲས་པ། ཤེས་ལྡན་དག་ཟླ་བའི་རྒྱབ་སུས་མཐོང་། །འདི་དག་ཁལ་ཁྱེར་ལ་རག །ཡུ་པུས་ནི་མི་བསྐུར་རོ། །ཇི་ཙམ་མན་ཚོང་པ་རྣམས་ཀྱིས་གླང་རྣམས་གཏད་པར་བརྩམས་པ་ན་གླང་དེ་རྣམས་ཕྱི་ལང་བྱེད་ཅིང་འདུག་པ་དང་། ཚོང་པ་རྣམས་ཀྱིས་མང་དུ་བརྡེགས་ཤིང་ལྕག་གཟེར་བུ་ཅན་གྱིས་གཞུས་པས་ཁྲག་འཛག་ཅིང་ཤིང་རྟ་དང་སྦྱར་ཏོ། །གཞན་ནི་ཅང་མི་བྱེད་པར་ཁལ་མ་ནོས་བས་དེ་དག་ལ་ཅུང་ཟད་ཀྱང་མ་བྱས་སོ། །ལྷས་ཚིགས་སུ་བཅད་དེ་སྨྲས་པ། གླང་གིས་བ་ལང་འདི་དག་ནི། །ལོག་པ་དག་ཏུ་བཏམས་པས་ན། །རྨ་དག་འབྱུང་ཞིང་ཁྲག་འཛག་ལ། །ལྟོགས་ཤིང་སྐོམ་པར་ལྡན་ལ་ལྟོས། །གླང་གིས་བ་ལང་འདི་དག་ནི། །ལེགས་པ་དག་ཏུ་བཏམས་པས་ན། །དེ་རྣམས་དགོན་པ་ལས་རྒལ་ནས། །བསིལ་བའི་ཆུ་ལ་འཐུང་ལ་ལྟོས། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གླང་གཙོ་བོ་ལེགས་པར་སྟོན་བ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་གླང་གཙོ་བོ་བསླུ་བར་བྱེད་པ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངའི་ཚིག་ཉན་པ་གང་ཡིན་པ་དེ་དག་ནི་བདེ་བ་དང་ལེགས་བར་དགོན་པ་ནས་རྒལ་ཏོ། །ལྷ་སྦྱིན་གྱི་ཚིག་ཉན་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་བ་དང་ལེགས་པར་འཁོར་བའི་འབྲོག་དགོན་པ་ནས་རྒལ་ཏོ། །ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་བླུན་ཞིང་འཁོར་བླུན་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ལྷ་སྦྱིན་བླུན་ཞིང་འཁོར་བླུན་པ་དེ་ཉོན་ཅིག །དགེ་སློང་དག་སྔོན་བྱུང་བ་དགོན་བའི་གནས་ཞིག་ནས་སྤྲེའུའི་ཚོགས་ཤིག་གནས་ཏེ། དེ་འཁྱམས་པ་ན་
ཁྲོན་པར་ཟླ་བའི་གཟུགས་བརྙན་ཤར་བ་དེ་མཐོང་ནས་ཚོགས་ཀྱི་དཔོན་པོས་སྨྲས་པ། ཤེས་ལྡན་དག་ཟླ་བ་ཁྲོན་པར་ལྷུང་གིས་འཇིག་རྟེན་ཟླ་བ་མེད་པར་བྱ་འམ་ཅི་དབྱུང་ངོ་། །དེ་རྣམས་ཀྱིས་སྨྲས་པ། ལེགས་ཀྱིས་དབྱུང་ངོ་། །དེ་རྣམས་ཀྱིས་གྲོས་བྱ་བར་བརྩམས་པ། དེ་ཇི་ལྟར་དབྱུང་བར་བྱ། གཞན་དག་གིས་སྨྲས་པ། ཅི་མི་ཤེས་སམ། སྤྲེའུ་བརྒྱུས་ལ་དབྱུང་མོད་ཅེས་དེ་རྣམས་ཀྱིས་སྤྲེའུ་བརྒྱུས་ཏེ་དང་མོ་བས་ཤིང་གི་ཡལ་ག་ལ་འཇུས་ནས་དེའི་མཇུག་མ་ལ་གཞན་གྱི་འཇུས་ཤིང་དེའི་ལའང་གཞན་གྱིས་འཇུས་ཏེ། དེ་བཞིན་དུ་ཐམས་ཅད་འཇུས་པས་ཡལ་ག་ལྷག་པར་གཡུར་ཟོས་སོ། །ཆུ་གློངས་པ་དང་ཟླ་བའི་གཟུགས་བརྙན་ཡང་མི་མངོན་པར་གྱུར། ཡལ་ག་ཡང་ཆག་ནས་ཐམས་ཅད་ཁྲོན་པར་ལྷུན་སྟེ། ཚུལ་མ་ཡིན་པས་སྡུག་བསྔལ་བར་གྱུར་ཏོ། །ལྷས་ཚིགས་སུ་བཅད་དེ་སྨྲས་བ། འདི་ན་བླུན་ཕོ་གང་དག་ལ། །འདྲེན་པ་བླུན་པོ་ཡོད་གྱུར་པ། །དེ་དག་ཐམས་ཅད་བརླག་འགྱུར་ཏེ། །ཟླ་བ་འབྱིན་པའི་སྤྲེའུ་བཞིན། །དགེ་སློང་དག་ཇི་སྙམ་དུ་སེམས། དེའིཚོ་དེའི་དུས་ཀྱི་སྤྲེའུའི་ཚོགས་ཀྱི་དཔོན་པོ་གང་ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་འདི་བླུན་ཞིང་འཁོར་ཡང་བླུན་བ་ཡིན་ནོ། །ད་ལྟར་ཡང་འདི་བླུན་ཞིང་འཁོར་ཡང་བླུན་པ་ཡིན་ནོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེས་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། དེ་བཞིན་གཤེགས་བ་ཉིད་ཀྱིས་ལས་བྱས་ཤིང་ཚོགས་རྙེད་བ། རྐྱེན་ཡོངས་སུ་བསྒྱུར་བ། འོང་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་ང་ཉིད་ཀྱིས་ལས་བྱིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །གདོན་མི་ཟ་བར་ལྷ་སྦྱིན་གྱིས་དེ་བཞིན་གཤེགས་པའི་དགེ་འདུན་འབྱེད་པར་འགྱུར་རོ། །རྒྱུ་ལྔས་
ན་དགེ་འདུན་བྱེ་བར་མི་འགྱུར་ཏེ། རེ་ཞིག་དང་པོར་སངས་རྒྱས་འཇིག་རྟེན་དུ་འབྱུང་བའི་ཚེ་དགེ་འདུན་བྱེ་བར་མི་འགྱུར་ཏེ། ཀྱེ་མའོ་གྲོགས་པོ་དག་སངས་རྒྱས་འཇིག་རྟེན་དུ་འབྱུང་ཞེས་གྲག་གོ་ཞེས་བྱ་བའི་འཇིག་རྟེན་དེ་ལ་ཕྱོགས་པས་སོ། །སྟོན་པ་ཡོངས་སུ་མྱ་ངན་ལས་འདས་ནས་དགེ་འདུན་བྱེ་བར་མི་འགྱུར་ཏེ། གང་ལ་ལ་ཞིག་འདི་སྐད་དུ་ང་ཉིད་སྟོན་པ་ཡིན་ནོ་ཞེས་ཟེར་ན་དེ་ལ་གང་གི་ཚེ་བཅོམ་ལྡན་འདས་ཞལ་བཞུགས་ཤིང་འཚོ་ལ་གཞེས་པ་དེའི་ཚོ་ཁྱོད་གར་སོང་ཞེས་བརྗོད་པར་ཟད་པས་སོ། །ལྟ་བའི་ཉེས་པ་དང་། ཚུལ་ཁྲིམས་གྱི་ཉེས་པ་མ་བྱུང་བའི་ཚེ་དང་། ཉན་ཐོས་ཟུང་མཆོག་ཏུ་མ་བསྟན་པ་དེའི་ཚེ་དགེ་འདུན་བྱེ་བར་མི་འགྱུར་ཏེ། དེ་ཅིའི་ཕྱིར་ཞེ་ན། དགེ་འདུན་བྱེ་བ་གདོན་མི་ཟ་བར་ཉན་ཐོས་ཟུང་གིས་སྡུམ་པར་བྱེད་པས་སོ། །མཚམས་མ་བཅད་པ་ན་དགེ་འདུན་བྱེ་བར་མི་འགྱུར་ཏེ། དེ་ཅིའི་ཕྱིར་ཞེ་ན། མཚམས་ཀྱི་ནང་དུ་དགེ་འདུན་འབྱེད་པར་འགྱུར་གྱི་མཚམས་ཀྱི་ཕྱི་རོལ་དུ་ནི་མ་ཡིན་ནོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངའི་དགེ་སློང་གི་དགེ་འདུན་སྐྱོན་མེད་པ་ལས་ཚུལ་ཁྲིམས་ཀྱི་སྐྱོན་དང་ལྟ་བའི་སྐྱོན་གྱི་སྐྱོན་བྱུང་སྟེ། ཚུལ་ཁྲིམས་ཀྱི་སྐྱོན་ནི་ཀ་ལན་དཀའི་བུ་བཟང་བྱིན་ལས་བྱུང་ངོ་། །ལྟ་བའི་སྐྱོན་ཡང་དགེ་སློང་འཆི་ལྟས་ཀྱིས་ཕྱུང་བས་གདོན་མི་ཟ་བར་ལྷ་སྦྱིན་གྱིས་དགེ་འདུན་འབྱེད་པར་འགྱུར་གྱིས། མ་ལ་ང་རྒྱལ་པོའ་ཁབ་ཏུ་དབྱར་བཞུགས་པར་དམ་བཅའོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། སློབ་པ་དང་མི་སློབ་པའི་གང་ཟག་རྣམས་དང་། ཐབས་ཅིག་རྒྱལ་པོའ་ཁབ་ཏུ་གཤེགས་ན། ལྷ་སྦྱིན་གྱིས་དགེ་འདུན་གྱི་དབྱེན་བྱ་བར་མི་ནུས་ཀྱིས། མ་ལ་ང་སོ་སོའ་སྐྱེ་བོའ་དགེ་བའི་གང་ཟག་རྣམས་དང་ཐབས་ཅིག་འགྲོའོ་སྙམ་སྟེ། མཉན་ཡོད་དུ་ཇི་ཙམ་བཞེད་ཀྱི་བར་དུ་བཞུགས་ནས་རིམ་གྲོ་བྱེད་པ་ཚེ་དང་ལྡན་བ་སྒྲ་ཅན་ཟིན་དང་། དགེ་སློང་ལྔ་བརྒྱ་ཐབས་ཅིག་ཏུ་རྒྱལ་པོའ་ཁབ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་ན་རྒྱལ་པོའ་ཁབ་ཏུ་བྱོན་ཏོ། །འདུལ་བ་གཞི། བམ་པོ་བརྒྱ་རྩ་ལྔ་པ། སངས་རྒྱས་
བཅོམ་ལྡན་འདས་རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པར་དབྱར་བཞུགས་པར་ཞལ་གྱིས་བཞེས་སོ། །དེའི་ཚེ་མུ་གེ་ཉམ་ང་བ་དགོན་བ་སློང་མོ་པས་ཟས་རྙེད་པར་དཀའ་བ་བྱུང་ངོ་། །དེ་ནས་བཅོམལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་དབྱར་གྱི་ཟླ་བ་གསུམ་པོ་འདི་ལ་ནང་དུ་ཡང་དག་པར་འཇོག་པར་བཞེད་ཀྱིས། བསོད་སྙོམས་སྟོབས་པ་དང་། གསོ་སྦྱོང་དེ་ཉིད་ཀྱི་ཚེ་མ་གཏོགས་པར་དགེ་སློང་སུ་ཡང་ངའི་སྦྱན་སྔར་མ་འོགས་ཤིག །དགེ་སློང་གི་དགེ་འདུན་གྱིས་ཀྱང་ཁྲིམས་སུ་བཅས་པ། ཚེ་དང་ལྡན་པ་དག་དབྱར་གྱི་ཟླ་བ་གསུམ་པོ་འདི་ལ་བསོད་སྙོམས་སྟོབས་པ་དང་། གསོ་སྦྱོང་དེ་ཉིད་ཀྱི་ཚེ་མ་གཏོགས་པར་བཅོམ་ལྡན་འདས་ལ་བལྟ་བའི་ཕྱིར་བདག་ཅག་སུ་ཡང་འགྲོ་བར་མི་བྱའོ་ཞེས་བཅས་སོ། །དེའི་ཚེ་ཚེ་དང་ལྡན་བ་ཤཱ་རིའི་བུ་དང་། མཽག་གལ་གྱི་བུ་གཉིས་ནི་ལྷོ་ཕྱོགས་ཀྱི་རིལ་དབྱར་གནས་པར་དམ་བཅས་སོ། །ལྷ་སྦྱིན་གྱིས་ཟླ་བ་གསུམ་དུ་དགེ་སློང་གི་དགེ་འདུན་ལ་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྟབས་ཏེ་ཟླ་བ་གསུམ་འདས་པ་དང་། དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་དགེ་སྦྱོང་གཽ་ཏ་མ་ནི་ཉན་ཐོས་རྣམས་ལ་འདི་སྐད་ཅེས་དགེ་སློང་དགོན་པ་པ་ཉིད་ཀྱིས་ནི་དག་བ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་བ་ལས་འདའ་བ་དང་། བདེ་བ་དང་སྡུག་བསྔལ་ལས་འདས་པ་ཡང་ཐོབ་པར་འགྱུར་རོ། །བསོད་སྙོམས་པ་ཉིད་དང་། ཕྱག་དར་ཁྲོད་པ་ཉིད་དང་། ཆོས་གོས་གསུམ་པ་ཉིད་དང་། བླ་གབ་མེད་བ་ཉིད་ཀྱིས་ནི་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་ལས་འདའ་བ་དང་། བདེ་བ་དང་སྡུག་བསྔལ་ལས་འདས་པ་ཐོབ་པར་འགྱུར་རོ་ཞེས་ཆོས་འཆད་ཀྱིས། ཚེ་དང་ལྡན་པ་དག་གང་སུ་དག་བརྟུལ་ཞུགས་ཀྱི་གཞི་ལྔ་པོ་འདི་དག་མི་འདོད་པ་དང་། མི་བཟོད་པ་དང་། ཡིད་ལ་མི་འབབ་པ་དེ་ནི་དགེ་སྦྱོང་གཽ་ཏ་མ་ལས་རིང་དུ་འགྱུར། ཐག་རིང་དུ་འགྱུར་གྱིས་དེ་ཚུལ་ཤིང་ལོང་ཤིག་ཅེས་བྱས་པ་དང་། དགེ་
སློང་ལྔ་བརྒྱས་ཚུལ་ཤིང་བླངས་ཏེ་ལྷ་སྦྱིན་སྟན་ལས་ལངས་ཏེ་སོང་བའི་རྗེས་བཞིན་རྗེས་བཞིན་དུ་དགེ་སློང་ལྔ་བརྒྱ་འབྲང་ངོ་། །ཚེ་དང་ལྡན་བ་སྒྲ་ཅན་ཟིན་སྒོ་ན་འདུག་པ་དེས་དེ་དག་ལྷ་སྦྱིན་གྱི་རྗེས་བཞིན་རྗེས་བཞིན་དུ་འབྲང་བ་མཐོང་ནས་དེས་སྨྲས་པ། ཚེ་དང་ལྡན་པ་དག་ཅིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་བའི་སངས་རྒྱས་སྤངས་ཏེ་སྡིག་བ་འདོད་པ་འདིའི་རྗེས་བཞིན་རྗེས་བཞིན་དུ་འབྲང་། དེ་རྣམས་ཀྱིས་སྨྲས་པ། ཚེ་དང་ལྡན་པ་སྒྲ་ཅན་ཟིན་མུ་གེའི་དགོན་པ་ཉམ་ང་བ་འདི་འདྲ་བྱུང་བ་ན། བཅོམ་ལྡན་འདས་ནི་མི་སྣང་བ་ན་བཞུགས་ཏེ། བདག་ཅག་ལྷ་སྦྱིན་གྱི་མཐུས་སྲོག་དང་མ་བྲལ་མོད། གལ་ཏེ་ལྷ་སྦྱིན་གྱིས་ཟླ་བ་གསུམ་དུ་དགེ་སློང་གི་དགེ་འདུན་མ་གསོས་པར་གྱུར་ན། དགེ་སློང་གཅིག་ཀྱང་གསོན་པར་མི་འགྱུར་རོ། །གང་གི་ཚེ་ལྷ་སྦྱིན་གྱིས་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མཐུན་པ་ཕྱེ་བ་དེའི་ཚེས་ཆེན་པོ་འདི་གཡོས་བར་གྱུར། སྐར་མདའ་ལྷུང་། ཕྱོགས་རྣམས་དམར་པོར་གྱུར། བར་སྣང་ལ་ལྷ་རྣམས་རྔའི་སྒྲ་འབྱིན་ངེས་པ་ལམ་ཞུགས་པ་རྣམས་ངེས་པ་ལ་མི་འཇུག །འབྲས་བུམི་འཐོབ། འདོད་ཆགས་དང་བྲལ་བར་མི་འགྱུར། ཟག་པ་རྣམས་ཟད་པར་མི་འགྱུར། ལུང་མི་འབོག །མི་ཀློག །མི་འདོན། མདོ་སྡེ་དང་། འདུལ་བ་དང་། ཆོས་མངོན་བ་འཛིན་པ་དང་། དགོན་པ་པ་རྣམས་མདོ་སྡེ་དང་། འདུལ་བ་དང་། ཆོས་མངོན་པ་དང་། དགོན་པ་སེམས་པ་ལ་རབ་ཏུ་སྦྱོར་བར་མི་བྱེད། ཉན་ཐོས་ཀྱི་བྱང་ཆུབ་ཀྱིས་བོན་སྐྱོད་པར་མི་བྱེད་ཅིང་། རང་སངས་རྒྱས་ཀྱི་བྱང་ཆུབ་ཀྱི་མ་ཡིན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་མ་ཡིན་ནོ། །ལྷ་དང་མིར་བཅས་བའི་འགྲོ་བ་ཡང་འཁྲུགས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའ་འཇིག་རྟེན་གྱི་ཁམས་ན་ཆོས་ཀྱི་འཁོར་ལོ་རྒྱུན་ཆད་དེ། སེམས་ཅན་གྱི་རྒྱུད་པ་མི་འབྱུང་ངོ་། །ཚེ་དང་ལྡན་པ་ཤཱ་རིའི་བུ་དང་། མོད་གལ་གྱི་བུས་བསམས་པ། ཅིའི་ཕྱིར་ས་ཆེན་པོ་འདི་གཡོས་པར་གྱུར་སྙམ་མོ། །དགྲ་བཅོམ་པ་རྣམས་ནི་མ་བསམས་པར་ཤེས་བ་མཐོང་བར་མི་འཇུག་པས་དེ་གཉིས་ཀྱིས་བསམ་པ་ལ་ཞུགས་ན། ལྷ་
སྦྱིན་གྱིས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ཕྱེ་བར་མཐོང་ནས་དེ་གཉིས་འདི་སྙམ་དུ་སེམས་ཏེ། སོང་ལ་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དང་སླར་སྡུམས་བྱའོ་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་ཀྱིས་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ནས་ཆོས་གོས་དང་ལྷུང་བཟེད་ཐོགས་ཏེ། རྒྱལ་པོའི་ཁབ་གང་ན་བ་དེར་རྒྱུ་ཞིང་དོང་ནས་རིམ་གྱིས་རྒྱུ་ཞིང་དོང་བ་དང་རྒྱལ་པོའ་ཁབ་ཏུ་ཕྱིན་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུས་ཆོས་གོས་དང་ལྷུང་བཟེད་མཁོས་སུ་ཕབ་ནས་རྐང་པ་གཉིས་ཀྲུས་ཏེ་བཅོམ་ལྡན་འདས་གང་ན་བ་དེར་དོང་ངོ་། །དེའི་ཚེ་ཚེ་དང་ལྡན་པ་སྒྲ་ཅན་ཟིན་སྒོ་ན་འདུག་གོ །དེ་ནས་ཚེ་དང་ལྡན་པ་སྒྲ་ཅན་ཟིན་གྱིས་ཚེ་དང་ལྡན་པ་ཤཱརིའི་བུ་ལ་འདི་སྐད་ཅེས་སྨྲས་སོ། །མཁན་པོ་ལྷ་སྦྱིན་གྱིས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ཕྱེའོ། །དེས་སྨྲས་པ། ཚེ་དང་ལྡན་པ་བདག་ཅག་དོན་འདི་ཁོ་ནའི་ཕྱིར་འོངས་ཀྱིས། ཁྱོད་སེམས་ལས་ཆུང་དུར་མཛོད་ཅིག །སླར་སྡུམས་བྱའོ་ཞེས་སྨྲས་ནས། བཅོམ་ལྡན་འདས་ཀྱི་སྤྱན་སྔར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུས་འདི་སྐད་ཅེས་གསོལ་ཏོ། །བཙུན་པ་བདག་ཅག་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བགྱིད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དང་མཽད་གལ་གྱི་བུ་དག་ལེགས་སོ་ལེགས་སོ། །གང་ཞིག་དེ་བཞིན་གཤེགས་བའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བྱེད་པ་དེ་ནི་བསོད་ནམས་མང་པོཚད་མེད་ཅིང་གྲངས་མེད་པ་སྐྱེད་པར་འགྱུར་རོ། །དཔེར་ན་འགའ་ཞིག་གི་སྐྲ་དུམ་བུ་བརྒྱར་གཏུབས་པ་འཕྲོ་དང་འཕྲོར་སྦྱོར་བར་བྱེད་པ་དེ་བཞིན་དུ་གང་ཞིག །དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བྱེད་ན་དེ་ནི་བསོད་ནམས་མང་པོ་ཚད་མེད་ཅིང་གྲངས་མེད་པ་སྐྱེད་པར་འགྱུར་རོ། །ཤཱ་
རིའི་བུ་དང་མཽད་གལ་གྱི་བུ་གང་ཟག་བཞི་པོ་འདི་དག་ནི་ཚངས་པའི་བསོད་ནམས་སྐྱེད་པར་འགྱུར་རོ། །བཞི་གང་ཞེ་ན་གང་ཟག་གང་ཞིག་སྔོན་མི་བཞུགས་པའི་ས་ཕྱོགས་སུ། དེ་བཞིན་གཤེགས་པའི་སྐུ་གདུང་གི་མཆོད་རྟེན་གནས་པར་བྱེད་པ་འདི་ནི་ཚངས་པའི་བསོད་ནམས་སྐྱེད་པའི་གང་ཟག་དང་པོ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །གཞན་ཡང་གང་ཟག་གང་ཞིག་སྔོན་མེད་པའི་ས་ཕྱོགས་སུ་ཕྱོགས་བཞིའི་དགེ་སློང་གི་དགེ་འདུན་གྱི་གཙུག་ལག་ཁང་བྱེད་དུ་འཇུག་པ་འདི་ནི་ཚངས་པའི་བསོད་ནམས་སྐྱེད་པའི་གང་ཟག་གཉིས་པ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །གཞན་ཡང་གང་ཟག་གང་ཞིག་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བྱེད་པ་འདི་ནི་ཚངས་པའི་བསོད་ནམས་སྐྱེད་པའི་གང་ཟག་གསུམ་པ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །གཞན་ཡང་གང་ཟག་གང་ཞིག་བྱམས་པ་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ་རྒྱ་ཆེན་པོར་གྱུར་པ། ཚད་མེད་པ། ཤིན་དུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་ཤིང་དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་། འོག་དང་། ཐད་ཀར་རྣམ་པ་ཐམས་ཅད་དུ་ཐམས་ཅད་དང་ལྡན་པའི་འཇིག་རྟེན་འདི་བྱམས་པ་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་བ། ཚད་མེད་པ། ཤིན་ཏུ་བསྒོམས་པས་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་པ་དང་། དེ་བཞིན་དུ་སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ། ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་ཤིང་དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་། འོག་དང་། ཐད་
ཀར་རྣམས་ཐམས་ཅད་དང་ལྡན་པའི་འཇིག་རྟེན་འདི་བཏང་སྙོམས་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ་ཤིན་ཏུ་བསྒོམས་པས་མོས་ཏེ། ཁྱབ་པར་བྱས་ནས་རྫོགས་པར་བྱས་ཏེ། གནས་པ་འདི་ནི་ཚངས་པའི་བསོད་ནམས་སྐྱེད་པའི་གང་ཟག་བཞི་པ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔ་ནས་ཆས་ཏེ་ལྷ་སྦྱིན་གང་ན་བ་དེར་དོང་ངོ་། །དེའི་ཚེ་ལྷ་སྦྱིན་ལྷོ་ཕྱོགས་ཀྱི་རིལ་ཀོ་ཀ་ལི་ཀ་ནི་གཡས་སུ་བཞག །ཁཎ་ཌ་དྲབ་བྱ་ནི་གཡོན་དུ་བཞག་ནས་སངས་རྒྱས་ལྟར་འཆོས་ཤིང་འཆད་པ་ན། ལྷ་སྦྱིན་གྱིས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་བསམས་པ། བདག་གིས་ཉན་ཐོས་ཆེན་པོ་དག་ཀྱང་དབང་དུ་བྱས་པས་ད་ནི་བདག་ཐམས་ཅད་མཁྱེན་པ་ཡིན་ནོ་སྙམ་ནས། ཀོ་ཀ་ལི་ཀ་དང་། ཁཎ་ཌ་དྲབ་བྱ་ལ་ལོངས་ཤིག་ལོངས་ཤིག །ཅེས་གྲུ་ཕུགས་བྱ་པ་དང་། དེ་གཉིས་ཀྱིས་བསམས་པ། བདག་ཅག་གིས་འདི་ལྟར་འདི་དགེ་འདུན་འབྱེད་པའི་གྲོགས་བྱས་པ་དེ་ཉིད་བདག་ཅག་གིས་ཉེས་ཏེ། འདི་མཐུ་དང་ལྡན་པ་ཡིན་པས་གལ་ཏེ་བདག་ཅག་བརྡེགས་ན་གདོན་མི་ཟ་བར་འཆི་བར་འགྱུར་གྱིས་ལྡང་ངོ་སྙམ་ནས་དེ་གཉིས་ལངས་པ་དང་། ཚེ་དང་ལྡན་པ་ཤཱ་རིའི་བུ་ནི་གཡས་ཕྱོགས་སུ་འདུག་གོ །ཚེ་དང་ལྡན་པ་མཽད་གལ་གྱི་བུ་ཆེན་པོ་ནི་གཡོན་ཕྱོགས་སུ་འདུག་གོ །དེ་ནས་ལྷ་སྦྱིན་གྱིས་ཚེ་དང་ལྡན་པ་ཤཱ་རིའི་བུ་ལ་སྨྲས་པ། ཤཱ་རིའི་བུ་ང་རྒྱབ་ན་ཐུགས་མི་བདེ་སྟེ་རེ་ཞིག་དེ་བསལ་གྱིས་ཁྱོད་དགེ་སློང་རྣམས་ལ་ཆོས་ཀྱི་གཏམ་སྤོབས་པར་གྱིས་ཤིག །ཚེ་དང་ལྡན་པ་ཤཱ་རིའི་བུས་ཀྱང་མི་སྨྲ་བས་ལྷ་སྦྱིན་ལ་ཁས་བླངས་སོ། །དེ་ནས་ལྷ་སྦྱིན་བླ་གོས་བཞི་བལྟ་བ་ཏུ་བཏིང་། སྣམ་སྦྱར་བལྟབ་སྟེ་སྔས་སུ་བཅུག་ནས་གློ་གཡས་པ་ཕབ་སྟེ་གཉིད་ལོག་པ་ལས་ཚེ་དང་ལྡན་པ་ཤཱ་རིའི་བུས་ཇི་ལྟར་
ལུས་གན་རྐྱལ་གྱིས་སྡུར་བའི་སྒྲ་འབྱིན་ཅིང་འདུག་པ་དེ་ལྟ་བུར་བྱིན་གྱིས་བརླབས་སོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་སྟོན་པ་ལུས་གན་རྐྱལ་གྱིས་སྡུར་ཅིང་གཉིད་ལོག་པའི་གནས་སྐབས་ལ་ལྟོས། དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་འཁོར་རྣམས་སྐྱོ་བསྐྱེད་ཅིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཇི་ལྟར་སེམས་མཉམ་པར་བཞག་ན་ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་བྱེད་དེ། འཆག་བ་དང་། འགྲེང་བ་དང་། འདུག་པ་དང་། ཉལ་བར་བྱེད་དོ། །མེའི་ཏིང་ངེ་འཛིན་ལའང་སྙོམས་པར་འཇུག་སྟེ། མིའི་ཏིང་ངེ་འཛིན་ལ་སྙོམས་པར་ཞུགས་པ་ན། ཚེ་དང་ལྡན་པ་མཽད་གལ་གྱི་བུ་ཆེན་པོའ་ལུས་ལས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོད་ང་། བཙོད་ཀ་དང་། ཤེལ་གྱི་ཁ་དོག་དག་འབྱིན་པར་བྱེད་དོ། །ཆོ་འཕྲུལ་ཟུང་དུ་ཡང་སྟོན་པར་བྱེད་དེ། ལུས་ཀྱི་སྨད་ནས་མེ་འབར་བར་བྱེད་ཅིང་། ལུས་ཀྱི་སྟོད་ནས་ཆུ་གྲང་མོའ་རྒྱུན་འབེབས་པར་བྱེད་དོ། །ལུས་ཀྱི་སྟོད་ནས་མེ་འབར་བར་བྱེད་ཅིང་། ལུས་ཀྱི་སྨད་ནས་ཆུ་གྲང་མོའ་རྒྱུན་འབེབས་པར་བྱེད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་དེ་བཞིན་ཏེ། ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་བ་བཞི་བསྟན་ནས་རྫུ་འཕྲུལ་གྱི་མངོན་པར་འདུ་བྱེད་པ་དེ་དག་བསྡུས་ཏེ་སྟན་བཤམས་པ་ཉིད་ལ་འདུག་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོས་དགེ་སློང་རྣམས་སྐྱོ་བ་བསྐྱེད་དོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ཀྱིས་གང་ཐོས་ན་ལྷ་སྦྱིན་སྤོང་བར་འགྱུར་བ་དེ་ལྟ་བུའི་ཆོས་བཤད་ནས་ཡང་སྨྲས་པ། ཚེ་དང་ལྡན་པ་དག་ཁྱེར་ཅག་ལས་གང་དག་སྟོན་པ་ལ་དགའ་བ་དེ་དག་ནི་ལོངས་ཤིག་འདོང་ངོ་ཞེས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཆས་པ་ན་དགེ་སློང་དེ་རྣམས་ཀྱང་དེའི་རྗེས་བཞིན་རྗེས་བཞིན་དུ་འབྲང་ངོ་། །ཀོ་ཀ་ལི་ཀས་ལྷ་སྦྱིན་བསླང་བ།
ལོངས་ལོངས་ཉན་ཐོས་ཆེན་པོ་དག་གིས་ཁྱོད་ཀྱི་འཁོར་ཕྲོགས་སོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། གལ་ཏེ་ལྷ་སྦྱིན་གྱིས་འཁོར་མ་མཐོང་བར་ཁྲིད་ན་ཁྲག་དྲོན་དུ་སྐྱུགས་ནས་འཆི་བར་འགྱུར་བའི་གནས་གང་ཡིན་པ་འདི་ཡོད་ཀྱིས། མདོར་ན་མཐོང་བ་ཁོ་ནར་བྱས་ལ་བཀྲིའོ་སྙམ་ནས་དེ་དག་དལ་གྱིས་འགྲོ་བའི་སྤྱོད་ལམ་གྱིས་དགེ་སློང་གི་དགེ་འདུན་ལྷན་ཅིག་དོང་བ་དང་། ལྷ་སྦྱིན་ཀུན་ནས་དཀྲིས་པ་དྲག་པོས་མིག་སྡོག་ཅིང་བསྙགས་པ་ལས་ཚེ་དང་ལྡན་པ་ཤཱ་རིའི་བུས་འོབས་མཆོག་ཏུ་འཇིགས་སུ་རུང་བ་སའི་གཏིང་མི་སྣང་བ་ཞིག་སྤྲུལ་པ་དང་ལྷ་སྦྱིན་ཀོ་ཀ་ལི་ཀ་དང་། ཁཎ་ཌ་དྲབ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་དང་ལྷན་ཅིག་འོབས་དེའི་མཐར་ཀུན་དུ་བསྐོར་བར་བརྩམས་པ་ན་རྒལ་མ་ནུས་ནས་དེས་བསམས་པ། འཁོར་མི་འཐོབ་པར་མ་ཟད་ཚུལ་མ་ཡིན་པས་སྡུག་བསྔལ་བར་འགྱུར་རོ་སྙམ་དུ་བསམས་ནས་སླར་ལོག་གོ །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུས་ཀྱང་དགེ་སློང་གི་དགེ་འདུན་ཁྲིད་ནས་བཅོམ་ལྡན་འདས་གང་ན་བ་དེར་དོང་ངོ་། །དེ་ནས་དགེ་སློང་དེ་རྣམས་བདག་ཅག་གིས་བཅོམ་ལྡན་འདས་ཡོན་ཏན་ཚད་མེད་པ་དང་ལྡན་པ་སྤངས་ལ། ལྷ་སྦྱིན་སྡིག་པ་ཅན་ལ་རྟེན་པ་ཅི་ཐ་ཚིག་ཅེས་འགྱོད་པ་སྐྱེས། ཡིད་ལ་གཅགས་པ་སྐྱེས། ཡུལ་ཡུལ་པོར་བྱས། ཕྲག་པ་བཅུམ། མགོ་སྨད་དེ་བཅོམ་ལྡན་འདས་ཀྱི་སྤྱན་སྔར་དོང་ངོ་། །དེ་ནས་བཅོམ་ལྡན་འདས་ཀྱི་ཐུགས་ཀྱིས་དགེ་སློང་དེ་རྣམས་ཀྱི་སེམས་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་འོངས་པ་ལེགས་སོ། །རབ་ཏུ་བྱུང་བ་ལེགས་སོ། །ཁྱེད་ཀྱིས་མིའི་རྙེད་པ་ནི་ལེགས་པར་རྙེད་པ་ཡིན་ཏེ། བརྒྱ་ལམ་ན་ལན་འགའ་འཕགས་པའི་གནས་སུ་སྐྱེ་བ་དང་། དབང་པོ་མ་ཚང་བ་མ་ཡིན་པ་དང་། གླེན་པ་མ་ཡིན་པ་དང་། ལུག་ལྟར་ལྐུགས་པ་མ་ཡིན་པ་དང་། ལག་བརྡ་བྱེད་པ་མ་ཡིན་ཞིང་ལེགས་པར་སྨྲས་པ་དང་། ཉེས་པར་སྨྲས་པ་རྣམས་ཀྱིས་ཆོས་ཀྱི་དོན་ཤེས་པར་ནུས། བརྒྱ་ལམ་ན་ལན་འགའ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་
བརྒྱ་ལམ་ན་འགའ་དེ་བཞིན་གཤེགས་པས་གསུངས་པའི་ཆོས་འདུལ་བ་འཇིག་རྟེན་ལ་ཆོས་བཤད་པ་སྣང་ངོ་། །དགེ་སློང་དག་དེ་ལྟ་བས་ན་རྙེད་པར་དཀའ་བབས་ཀྱང་ཤིན་དུ་དཀའ་བ་ནི་འདི་ཡིན་ཏེ། འདི་ལྟ་སྟེ་འཕགས་པའི་གནས་སུ་སྐྱེ་བ་དང་། དབང་པོ་མ་ཚང་བ་མ་ཡིན་པ་དང་། གླེན་པ་མ་ཡིན་པ་དང་། ལུས་ལྟར་སྐུགས་པ་མ་ཡིན་པ་དང་། ལག་བརྡ་བྱེད་པ་མ་ཡིན་ཞིང་ལེགས་པར་སྨྲས་པ་དང་ཉེས་པར་སྨྲས་པ་རྣམས་ཀྱིས་ཆོས་ཀྱི་དོན་ཤེས་པར་ནུས་པའོ། །ད་ལྟར་འཇིག་རྟེན་དུ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དབྱུང་ཞིང་ཆོས་བཤད་པ་ཉེ་བར་ཞི་བར་འགྱུར་བ། ཡོངས་སུ་མྱ་ངན་ལས་འདའ་བར་འགྱུར་བ། མངོན་པར་བྱང་ཆུབ་པར་འགྱུར་བ། བདེ་བར་གཤེགས་པས་རབ་ཏུ་གསུངས་པ་འདི་ལྟ་སྟེ། འདི་ཡོད་པས་འདི་འབྱུང་ལ། འདི་སྐྱེས་པས་འདི་སྐྱེ་བ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་དང་། ཡིད་མི་བདེ་བ་དང་འཁྲུགས་པ་རྣམས་འབྱུང་བར་འགྱུར་ཏེ། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ་འདི་མེད་པས་འདི་མི་འབྱུང་ལ། འདི་འགགས་པས་འདི་འགག་པར་འགྱུར་བ་འདི་ལྟ་སྟེ་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་བས་སྐྱེ་མཆེད་དྲུག་
འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་འགག་པར་གྱུར་ཏེ། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་དེ་ལྟ་བས་ན་བདག་གི་དོན་དང་། གཞན་གྱི་དོན་དང་། གཉི་གའི་དོན་ལ་རྗེས་སུ་ལྟ་བ་རྣམས་ཀྱིས་ནི་འདི་ལ་རབ་ཏུ་བསླབ་པར་བྱ་སྟེ། ཅི་ནས་ཀྱང་རབ་ཏུ་བྱུང་བ་དོན་ཡོད་པ་དང་། འབྲས་བུ་དང་བཅས་པ་དང་། བདེ་བ་སྐྱེད་པ་དང་། རྣམ་པར་སྨིན་པ་བདེ་བ་དང་། གང་དག་གིས་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་རྣམས་ཡོགས་སུ་ལོངས་སྤྱོད་པ་དེ་དག་ལ་ཅི་ནས་ཀྱང་དེ་དག་གིས་ཕན་བཏགས་པའི་འབྲས་བུ་ཤིན་ཏུ་ཆེ་བ་དང་། ཕན་ཡོན་ཆེ་བ་དང་། གཟི་བརྗིད་ཆེ་བ་དང་། ཡངས་ཤིང་རྒྱ་ཆེ་བར་འགྱུར་བ་དེ་ལྟར་དགེ་སློང་དག་ཁྱེད་ཀྱིས་བསླབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་དེ་རྣམས་འོངས་པ་ལེགས་སོ་ཞེས་བྱ་བ་དང་རབ་ཏུ་བྱུང་བ་ལེགས་སོ་ཞེས་བྱ་བ་གསུངས་པ་དེའི་ཚེ་དེ་རྣམས་ཀྱི་ཞུམ་པ་དང་། མི་དགའ་བ་དང་། འགྱོད་པ་དང་། རྣམ་པར་འགྱོད་པ་དང་། ཡིད་ལ་གཅགས་པ་གང་ཡིན་པ་དེ་དག་ཐམས་ཅད་ཀྱི་ཐམས་ཅད་དུ་བྲལ་བར་གྱུར་ཏོ། །དེ་ནས་དགེ་སློང་གཞན་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་བྱེ་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ཕྲིན་ལས་བྱས་ཤིང་བསགས་པ་དང་ཚོགས་རྙེད་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་
བསྟི་གནས་རྩ་བ་དང་། ལོ་མ་དང་། མེ་ཏོག་དག་དང་། འབྲས་བུ་དང་། ཆུ་ཕུན་སུམ་ཚོགས་པ། ཤིང་སྣ་ཚོགས་ཀྱིས་མཛེས་པར་བྱས་པ། བྱའི་ཚོགས་དུ་མས་བསྟེན་པ་གཞན་ཞིག་ན་དྲང་སྲོང་ལྔ་བརྒྱའི་གཙོ་བོ་དྲང་སྲོང་ཞིག་གནས་སོ། །ཇི་ཙམ་ན་དྲང་སྲོང་གཞན་ཞིག་ལྗོངས་རྒྱུ་ཞིང་སོང་བ་ན་བསྟི་གནས་དེར་ཕྱིན་ན་དྲང་སྲོང་དེས་དེ་ལ་བཀུར་སྟི་ལེགས་པར་མ་བྱས་པས་དེ་མི་བཟོད་པ་སྐྱེས་ནས་དེའི་འཁོར་འབྱེད་པར་བྱེད་དེ། དྲང་སྲོང་སྡིག་པ་འདོད་པ་འདི་ཅུང་ཟད་ཀྱང་མི་ཤེས་ན་ཅི་སྟེ་དེའི་དྲུང་དུ་འདུག །ཚུར་ཁོ་བོ་དང་ལྷན་ཅིག་འདོང་ཁོ་བོས་ཁྱེད་མངོན་པར་ཤེས་པ་ལྔ་རྣམས་ལ་རབ་ཏུ་དགོད་དོ་ཞེས་དེས་དེ་རྣམས་ལ་ཕྱེ་བས་དྲང་སྲོང་དེའི་གདམས་ངག་ཉན་དུ་མི་བཏུབ་བོ། །དྲང་སྲོང་དེས་བསམས་པ། སྡིག་པ་བྱེད་པ་འདིས་བདག་གི་དྲང་སྲོང་འདི་རྣམས་ཕྱེའོ་སྙམ་ནས། དེས་དེ་ལ་བཞམས་ཏེ་སྨྲ་བར་བརྩམས་པ། ཚེ་དང་ལྡན་པ་འཁོར་འབྱེད་པར་མ་བྱེད་ཅིག འདི་ནི་དྲང་སྲོང་གི་ཆོས་མ་ཡིན་ནོ། །འོན་ཀྱང་དེ་འབྱེད་བཞིན་ཏེ་འདུག་ཏུ་མ་བཏུབ་ནས་དྲང་སྲོང་དེ་ཡིད་མི་བདེ་ཞིང་ཐབས་ཅིག་སེམས་ཤིང་གནས་སོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་རྣམས་འབྱུང་བར་འགྱུར་པས། དེ་ནས་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན་དྲང་སྲོང་དེའི་བསྟི་གནས་སུ་ཕྱིན་པ་དང་། དྲང་སྲོང་དེས་དེའི་ལུས་མཛེས་པ་དང་སྤྱོད་ལམ་ཞི་བ་མཐོང་ངོ་། །མཐོང་ནས་དེས་དེ་ལ་དད་པ་བསྐྱེད་ནས་དེས་དེ་ལ་བྱ་བ་བྱས་ཏེ་སྨོན་ལམ་ལོག་པར་བཏབ་པ། དྲང་སྲོང་སྡིག་ཅན་གང་ཡིན་པ་འདིས་བདག་གི་འཁོར་ཕྱེ་བས་བདག་གིས་འདི་ཤེས་བྱས་ཐམས་ཅད་ལ་དབང་ཐོབ་པ་ན་ཡང་འཁོར་འབྱེད་པར་བྱེད་པར་གྱུར་ཅིག་བྱས་སོ། །དགེ་སློང་དག་ཇི་སྙམ་དུ་སེམས། དེའིི་ཚེ་དེའི་དུས་ཀྱི་ལྗོངས་ཀྱི་དྲང་སྲོང་གང་གིས་དེའི་འཁོར་ཕྱེ་བ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་གཉུག་མར་གནས་པའི་དྲང་སྲོང་གང་ཡིན་པ་དེ་ནི་ལྷ་སྦྱིན་ཡིན་ཏེ། ངས་དེའི་འཁོར་ཕྱེ་བའི་ལས་ཀྱི་རྣམ་པར་སྨིན་པ་གང་ཡིན་པ་དེས་ན་སྨོན་ལམ་ལོག་པར་བཏབ་པས་འདིས་ངའི་དགེ་འདུན་ཕྱེ་བ་
ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས། དགེ་སློང་དག་ཁྱོད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གྱིས་ཕྱི་པ་དག་ནི་ནང་པར་བགྱིས། ནང་པ་དག་ནི་ཕྱི་པར་བགྱིས་པས་འཁོར་ཕྲོགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་དུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ཕྱི་བ་དག་ནི་ནང་པར་བྱས། ནང་པ་དག་ནི་ཕྱི་པར་བྱས་པས་འཁོར་ཕྲོགས་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་ཤིག་ན་སྲོག་ཆགས་ཝ་ཞིག་གནས་ཏེ་དེ་ཤིན་ཏུ་བརྐམ་ཆགས་ཅན་ཞིག་པས་དགོན་པར་ཡང་རྒྱུ་གྲོང་འདབ་ཏུ་ཡང་རྒྱུའོ། །དེ་མཐར་གྱིས་རྒྱུབ་ན་རིམ་གྱིས་བཙོ་བླག་མཁན་ཞིག་གི་ཁྱིམ་དུ་ཞུགས་པ་ལས་རམས་ཀྱི་རྫ་མར་ལྷུང་ནས་དེ་སྐྱུག་བྲོ་བར་གྱུར་ཏེ་དེ་དེ་དང་ཧ་ཅང་ཡང་མི་རིང་བ་ན་ཚྭ་སྒོའི་ཕུང་པོ་ཞིག་འདུག་པ་དེ་ལ་ཉལ་ནས་གློས་འགྲེས་པ་ལས་དེ་བས་ཀྱང་ལྷག་པར་ལུས་མ་རུང་བར་གྱུར་ཏེ། ཆུའི་ནང་དུ་ཞུགས་ནས་ལངས་ཏེ་སོང་བ་དང་ཉི་མའི་ཟེར་གྱིས་ཕོག་པས་ནོར་བུ་གཟིའི་ཁ་དོག་ལྟར་གྱུར་པ་ཇི་ཙམ་ན་ཝ་རྣམས་ཀྱིས་མཐོང་ནས། དེ་རྣམས་ཕྱོགས་ཕྱོགས་སུ་བྲོས་ཏེ་རྒྱང་རིང་པོར་འཁོད་ནས་སྨྲས་པ། ཁྱོད་སུ་ཞིག་གང་ནས་འདིར་འོངས། དེས་སྨྲས་པ། ཁོ་བོ་ནི་བརྒྱར་འགྲོ་ཞེས་བྱ་སྟེ། ལྷ་རྣམས་ཀྱི་དབང་པོ་བརྒྱ་བྱིན་གྱིས་རྐང་བཞི་བ་རྣམས་ཀྱི་རྒྱལ་བོར་དབང་བསྐུར་ཏོ། །ཝ་རྣམས་ཀྱིས་བསམས་པ། །འདིའི་ལུས་ཀྱི་ཁ་དོག་སྔོན་མ་མཐོང་བ་ལས་ན་གདོན་མི་ཟ་བར་དེ་ཁོ་ན་ཡིན་ནོ་སྙམ་ནས། ཝ་རྣམས་ཀྱིས་རྐང་བཞི་པ་ཐམས་ཅད་ལ་རིག་པར་བྱས་སོ། །སེང་གེ་རྣམས་ཀྱིས་བསམས་པ། བདག་ཅག་ལས་ཁྱད་པར་དུ་འཕགས་པ་སུ་ཞིག་ཡོད་ན་དེ་རྐང་བཞི་པ་རྣམས་ཀྱི་རྒྱལ་པོར་གྱུར་རེ་ཞིག་དོང་ལ་རང་གི་ཚོགས་ཀྱི་དཔོན་པོ་ལ་རིག་པར་བྱའོ་སྙམ་ནས། དེ་རྣམས་ཀྱི་ཚོགས་ཀྱི་དཔོན་པོ་རལ་པ་ཅན་ཞིག་རིའི་ཕྱོགས་ཞིག་ན་གནས་པ་དེ་ལ་དེ་རྣམས་ཀྱིས་སྨྲས་པ་དང་། དེས་རྐང་བཞི་པ་གཞན་ཞིག་ལ་བསྒོ་བ། སོང་ལ་རྐང་བཞི་པའི་དཔོན་པོ་དེ་རྐང་བཞི་པ་འགའ་
ཞིག་གིས་མཐོང་ངམ། མ་མཐོང་རྟོགས་ཤིག །དེ་དེའི་དྲུང་དུ་སོང་སྟེ་བརྟགས་ན་སྔོན་མ་མཐོང་བ་ཡིན་ཞིང་སེང་གེ་རྣམས་མ་གཏོགས་པར་རྐང་བཞི་པ་ཐམས་ཅད་ཀྱིས་ཡོངས་སུ་བསྐོར་བར་གྱུར་ནས་དེ་དེའི་དྲུང་དུ་སོང་སྟེ་ཇི་ལྟར་མཐོང་བདག་སྨྲས་པ་དེས་ཐོས་ནས་སེང་གེའི་ཚོགས་ཀྱིས་ཡོངས་སུ་བསྐོར་ཏེ་དེའི་དྲུང་དུ་དོང་ངོ་། །དེ་ནི་རྐང་བཞི་པ་དུ་མས་ཡོངས་སུ་བསྐོར་ཅིང་གླང་པོ་ཆེ་ལ་ཞོན་ནས་རྒྱུ་བ་ན་དེ་སེང་གེ་རྣམས་ཀྱིས་ཡོངས་སུ་བསྐོར་ཅིང་། དེ་ནས་ནི་སྟག་རྣམས་སོ། །དེ་ནས་ནི་རྐང་བཞི་པ་རྣམས་སོ། །དེ་རྣམས་ཀྱི་ཕྱི་རིམ་རྒྱང་རིང་པོ་ནས་ནི་ཝ་རྣམས་འདོང་ངོ་། །དེའི་མ་རི་སུལ་ཞིག་ན་གནས་པ་དེ་ལ་དེས་ཝ་ཞིག་མངགས་ཏེ་བུས་རྒྱལ་སྲིད་ཉམས་སུ་མྱོང་གིས་ཚུར་སྤྱོན་ཅིག་ཅེས་སྤྲིང་བ་དང་། དེས་སྨྲས་པ། དེའི་འཁོར་ཅི་འདྲ་བ་ཞིག་དེས་སྨྲས་པ། དེའི་འཁོར་ནང་བ་ནི་སེང་གེ་དང་། སྟག་དང་། གླང་པོ་ཆེ་དག་ཡིན་ནོ། །ཕྱི་པ་ནི་བདག་ཅག་ཉིད་ཡིན་ནོ། །དེས་སྨྲས་བ། མ་རུང་ཟིན་གྱིས་སོང་ཤིག །དེས་ཚིགས་སུ་བཅད་པས་ཀྱང་སྨྲས་པ། བདག་ནི་རི་འདིའི་སུལ་ན་བདེར་གནས་ཤིང་། །བསིལ་བའི་ཆུ་ལ་བསོད་ཉམས་འཐུང་བར་བྱེད། །དེ་ནི་ཇི་སྲིད་ཝ་སྒྲ་མི་གྲག་པ། །དེ་སྲིད་གླང་པོ་ཆེ་ཡིས་བདེར་འགྲོ་འགྱུར། །དེ་སོང་སྟེ་དེས་ཝ་རྣམས་ལ་སྨྲས་པ། རྐང་བཞི་པ་རྣམས་ཀྱི་རྒྱལ་པོ་འདི་ནི་ཝ་ཁོ་ན་ཡིན་ཏེ། བདག་གིས་དེའི་མ་རི་སུལ་ག་གེ་མོ་ཞེས་བྱ་བ་ན་འདུག་པ་མཐོང་ངོ་། །དེ་རྣམས་ཀྱིས་སྨྲས་པ། གལ་ཏེ་དེ་ལྟ་ན་དེ་ཝ་ཡིན་ནམ་མ་ཡིན་པ་བདག་ཅག་གིས་བརྟག་གོ །ཆོས་ཉིད་ཀྱིས་ཝ་རྣམས་ནི་གང་ཞིག་གིས་ཝ་སྐད་ཐོས་ནས་སྐད་མ་བྱུང་ན་དེའི་སྤུ་རྣམས་འབྱི་བར་འགྱུར་བས་ཝ་སྐད་དབྱུང་བར་བརྩམས་ནས་དེས་བསམས་པ། གལ་ཏེ་བདག་གིས་སྐད་མ་ཕྱུང་ན་ནི་གདོན་མི་ཟ་བར་བདག་གི་སྤུ་རྣམས་འབྱི་བར་འགྱུར་ལ། གལ་ཏེ་གླང་པོ་ཆེ་ལས་བབས་ནས་སྐད་ཕྱུང་ན་ནི་འདིས་བདག་བསད་དུ་འོང་གིས་འདི་ཉིད་དུ་སྐད་དབྱུང་ངོ་སྙམ་ནས་དེས་གླང་པོ་ཆེ་ལ་ཞོན་བཞིན་སྐད་དབྱུང་བར་བརྩམས་པ་དང་། གླང་པོ་ཆེས་ཤེས་ནས་ཝས་བདག་ལ་བཞོན་ནམ་ཞེས་དེས་དོ་བོར་ཏེ་རྐང་པས་
བརྫིས་སོ། །ལྷས་ཚིགས་སུ་བཅད་དེ་སྨྲས་པ། གང་དག་ནང་བ་ཕྱི་པ་དང་། །ཕྱི་བ་ནང་པར་བྱེད་དེ་དག །འདི་འདྲ་བར་ནི་བརླག་འགྱུར་ཏེ། །གླང་པོ་ཆེ་ཡིས་ཝ་བཞིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། །དེ་ན་ཡང་འདིས་ནང་པ་དག་ནི་ཕྱི་རོལ་པར་བྱས། ཕྱི་རོལ་པ་དག་ནི་ནང་པར་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདིས་ནང་པ་དག་ནི་ཕྱི་རོལ་པར་བྱས། ཕྱི་རོལ་པ་དག་ནི་ནང་པར་བྱས་པས་འཁོར་རྣམས་ཕྲོགས་པར་གྱུར་ཏོ། །གང་གི་ཚེ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་གྱི་འཁོར་ཕྲོགས་པ་དེའི་ཚེ། ལྷ་སྦྱིན་གྱི་ཀོ་ཀ་ལི་ཀ་དང་། ཁཎ་ཌ་དྲབ་བྱ་དང་། ཁྱེད་གཉིས་ཀྱིས་ངའི་འཁོར་འཕྲོག་ཏུ་བཅུག་གོ་ཞེས་བརྡེགས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གྱི་འཁོར་ནི་གཞན་གྱིས་ཕྲོགས་ལ། གཞན་ལ་འདིས་སྡུག་བསྔལ་བསྐྱེད་པ་ལ་གཟུགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདིའི་ཆུང་མ་གཞན་གྱིས་ཕྲོགས་ལ་གཞན་དག་ལ་ཚུལ་མ་ཡིན་བའི་སྡུག་བསྔལ་བསྐྱེད་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་གཞན་ཞིག་ན་གླང་པོ་ཆེའི་ཚོགས་ཤིག་གནས་སོ། །དེ་ན་གླང་པོ་ཆེ་ཞིག་བལ་གླང་མོ་ཞིག་ལ་སྡུག་པར་འཛིན་པ་དང་། དེ་ནི་གླང་པོ་ཆེའི་ཕྲུ་གུ་གཞན་ཞིག་ཡོད་པ་ལ་ལྷག་པར་ཆགས་ནས་དེས་གླང་པོ་ཆེའི་ཕྲུ་གུ་དེ་ལ་སྨྲས་པ། ཚོར་དུ་འོང་གིས་བདག་ཅག་འབྲོས་སམ་དེ་ནས་གླང་པོ་ཆེའི་ཕྲུ་གུ་དེས་སྨྲས་པ། གང་གིས་ན་བདག་ཅག་འབྲོས་པའི་ཐབས་ཅི་ཡོད། །དེས་སྨྲས་པ། བདག་གིས་ཐབས་ཤིག་ཤེས་སོ་ཞེས་དེས་གླང་པོ་ཆེ་དེ་ལ་སྨྲས་པ། ཁྲུས་བྱ་བའི་ཕྱིར་རྫིང་དུ་འཇུག་པར་བྱའོ། །དེ་ཞུགས་པ་དང་དེས་སྨྲས་པ། བདག་ཅག་ལས་སུ་ཡུན་རིང་དུ་ནུབ་པར་འདུག་པར་བལྟའོ་བླུན་པོའ་ཕུང་པོ་ཅན་དེ་དེ་དང་ལྷན་ཅིག་ཆུ་ནང་དུ་ནུབ་བར་འདུག་པ་ན་དེ་ལངས་ཏེ་གླང་བོ་ཆེའི་ཕྲུ་གུ་དང་ལྷན་ཅིག་
བྲོས་སོ། །གླང་པོ་རིང་ཞིག་འདུག་ནས་ལངས་ན་མི་སྣང་ནས་དེས་བསམས་པ། བདག་ཕམ་པར་འགྱུར་དུ་འོང་གིས་སླར་ཡང་ནུབ་པར་བྱའོ་སྙམ་ནས། དེ་སླར་ཡང་ནུབ་པར་བྱས་ནས་མཆེ་བ་ས་ལ་བཙུགས་ཏེ་འདུག་གོ །དེ་རིང་ཞིག་ལོན་ནས་དབུགས་དེ་ཆད་དེ་ལངས་ནས་གླང་པོ་ཆེ་མོ་དེ་མ་མཐོང་ནས་དེས་རྫིང་བུ་དེ་ཕན་ཚུན་དུ་དཀྲུག་པར་བརྩམས་པ་དང་། དེས་དེར་ཉ་དང་། རུས་སྦལ་དང་། སྦལ་པ་ལ་སོགས་པ་སྲོག་ཆགས་མང་པོ་ཚུལ་མ་ཡིན་པས་སྡུག་བསྔལ་བར་བྱས་སོ། །ལྷས་ཚིགས་སུ་བཅད་བས་སྨྲས་པ། ཀྱེ་མའོ་ཤ་ཡི་ཕུང་པོ་ཆེ་། །འདི་ལ་ཤེས་རབ་ཡོད་མ་ཡིན། །གཞན་གྱིས་ཆུང་མ་ཕྲོགས་གྱུར་ན། །གཞན་ལ་སྡུག་བསྔལ་སྟེན་པར་བྱེད། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་གླང་པོ་ཆེ་དམ་པ་གང་ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་ཆུང་མ་གཞན་གྱིས་ཕྲོགས་ལ་གཞན་ལ་ཚུལ་མ་ཡིན་པའི་སྡུག་བསྔལ་བསྐྱེད་དོ། །ད་ལྟར་ཡང་འཁོར་གཞན་གྱིས་ཕྲོགས་ལ་གཞན་ལ་ཚུལ་མ་ཡིན་པའི་སྡུག་བསྔལ་བསྐྱེད་དོ། །