རྫུ་འཕྲུལ་གྱི་སྡེ་ཚན།
སྡོམ་ལ། རྫུ་འཕྲུལ་སྟོན་པ་གསུམ་སྨྲ་དང་། །གཏུམ་བྱེད་རིག་པ་ག་ཡཱ་དང་། གང་གི་ཕྱིར་ནི་གནོད་པ་དང་། །སེམས་ཅན་རྣ་བ་ཁྱི་ཡིན་ནོ། །བཅོམ་ལྡན་འདས་རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་མུ་གེའི་དགོན་པ་ཉམ་ང་བ་སློང་མོ་བས་ཟས་རྙེད་པར་དཀའ་བ་བྱུང་ངོ་། །དེ་ན་དགེ་སློང་རྫུ་འཕྲུལ་ཐོབ་པ་གང་ཡིན་པ་དེ་རྣམས་ནི་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་དེ་ལས་ཤིང་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བ་ཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བཀོད་པར་བྱེད་དོ། །གཞན་ཡང་འདིའི་ཉེ་འཁོར་ན་བིལ་པའི་ཚལ་ལམ། ཀ་བིད་ཐའི་ཚལ་ལམ། སྐྱུར་རྩིའི་ཚལ་གང་ཡིན་པ་དེ་ལས་སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་
ཅིང་། ལྷག་མ་ཡང་དགེ་སློང་ཡོད་ཡོད་པ་རྣམས་ལ་བགོད་པར་བྱེད་དོ། །བྱང་གི་སྒྲ་མི་སྙན་གྱི་གླིང་དུ་དོང་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བཀེད་པར་བྱེད་དོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་དོང་ནས་ལྷའི་བདུད་རྩི་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོད་པར་བྱེད་དོ། །ཡུལ་ལྗོངས་འབྱོར་པ་དང་ཞེས་བྱ་བ་ནས། སྐྱེ་བོ་དང་། མི་མང་པོས་གང་བའི་བར་གང་ཡིན་པ་དེ་ནས་གཙང་ཞིང་བསོད་པའི་བཟའ་བ་དང་བཅའ་བས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོད་པར་བྱེད་དོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། ད་ལྟར་མུ་གེའི་དགོན་པ་ཉམ་ང་བ་སློང་མོ་པས་ཟས་རྙེད་པར་དཀའ་བ་བྱུང་བ་ལ། དགེ་སློང་རྫུ་འཕྲུལ་ཐོབ་པ་གང་ཡིན་པ་དེ་རྣམས་ནི་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་དེ་ལས་ཤིང་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ཀྱིས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོད་པར་བྱེད་དོ། །གཞན་ཡང་འདིའི་ཉེ་འཁོར་ན་བིལ་བའི་ཚལ་ལམ། ཀ་བིད་ཐའི་ཚལ་ལམ། སྐྱུར་རྩིའི་ཚལ་གང་ཡིན་པ་དེ་ལས་སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུམ་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོད་པར་བྱེད་དོ། །བྱང་གི་སྒྲ་མི་སྙན་གྱི་གླིང་དུ་དོང་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོད་པར་བྱེད་དོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་དོང་ནས་ལྷའི་བདུད་རྩི་ལས་ལྷུང་བཟེད་བཀང་སྟེ་
བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོད་པར་བྱེད་དོ་ཞེས་བྱ་བ་ནས་ཡུལ་ལྗོངས་འབྱོར་པ་དང་ཞེས་བྱ་བ་ནས། སྐྱེ་བོ་དང་མི་མང་པོས་གང་བའི་བར་གང་ཡིན་པ་དེ་ནས་གཙང་ཞིང་བསོད་པའི་བཟའ་བ་དང་བཅའ་བས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་ཀྱིས། གལ་ཏེ་བདག་གིས་ཀྱང་རྫུ་འཕྲུལ་ཞིག་ཐོབ་ན་བདག་གིས་ཀྱང་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་ལས་ཤིང་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །གཞན་ཡང་འདིའི་ཉེ་འཁོར་ན་བིལ་བའི་ཚལ་ལམ། ཀ་པི་ཐའི་ཚལ་ལམ། སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །བྱང་གི་སྒྲ་མི་སྙན་གྱི་གླིང་དུ་སོང་ལ་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་སོང་ལ་ལྷའི་བདུད་རྩི་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །ཡུལ་ལྗོངས་འབྱོར་བ་དང་ཞེས་བྱ་བ་ནས། སྐྱེ་བོ་དང་མི་མང་པོས་གང་བའི་བར་གང་ཡིན་པ་དེ་ནས་གཙང་ཞིང་བསོད་པའི་བཟའ་བ་དང་བཅའ་བས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་རྣམས་ལ་བགོ་བར་བྱ་ན། སུ་ཞིག་གིས་བདག་ལ་རྫུ་འཕྲུལ་གྱི་ལམ་ལུང་དབོག་པར་ནུས་སྙམ་མོ། །དེ་ནས་ལྷ་སྦྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་ཅིག་ཏུ་འདུག་ནས་བཅོམ་
ལྡན་འདས་ལ་ལྷ་སྦྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། དེ་ནས་བཅོམ་ལྡན་འདས་ཀྱིས་ལྷ་སྦྱིན་སྡིག་པའི་འདོད་པ་དེ་ལྟ་བུ་སྐྱེས་པར་གྱུར་པ་ཐུགས་སུ་ཆུད་ནས་ལྷ་སྦྱིན་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མ་ཁྱོད་ལྷག་པའི་ཚུལ་ཁྲིམས་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །གཽ་ཏ་མ་ཁྱོད་ལྷག་པའི་སེམས་ལ་ཚུལ་བཞིན་ཡིད་ལ་བྱོས་ཤིག་དག་ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །གཽ་ཏ་མ་ཁྱོད་ལྷག་པའི་ཤེས་རབ་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་བདག་ལ་རྫུ་འཕྲུལ་གྱི་ལམ་གྱི་ལུང་མ་ཕོག་གོ་སྙམ་དུ་བསམས་ནས་ཆས་ཏེ་ཚེ་དང་ལྡན་པ་ཀུན་ཤེས་ཀཽ་ཎྜི་ནྱ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་ཤེས་ཀཽ་ཎྜི་ནྱ་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། དེ་ནས་ཚེ་དང་ལྡན་པ་ཀུན་ཤེས་ཀཽ་ཎྜི་ནྱས་བཅོམ་ལྡན་འདས་ཀྱི་ཐུགས་དང་ལྷ་སྦྱིན་གྱི་ལ་བལྟས་ན་སྡིག་པ་འདོད་པ་དེ་ལྟ་བུ་སྐྱེས་པར་ཤེས་ནས་ལྷ་སྦྱིན་ལ་འདི་སྐད་ཅེས་སྨྲས་སོ། །ལྷ་སྦྱིན་ཁྱོད་གཟུགས་ལ་ཚུལ་བཞིན་ཡིད་ལ་བྱོས་ཤིག་དང་ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། གནས་བརྟན་ཀུན་ཤེས་ཀཽཎྜི་ནྱས་ཀྱང་བདག་ལ་རྫུ་འཕྲུལ་གྱི་ལམ་གྱི་ལུང་མ་ཕོག་གོ་སྙམ་དུ་བསམས་ནས། ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མ་མེད་པ་དང་། བ་ལང་བདག་དང་། ལག་བཟངས་དང་། གནས་བརྟན་ལྔ་བརྒྱ་གང་ན་བ་དེར་སོང་སྟེ་ཕྱིན་ནས་གནས་བརྟན་ལྔ་བརྒྱ་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། །དེ་ནས་གནས་བརྟན་ལྔ་བརྒྱ་པོས་བཅོམ་ལྡན་འདས་ཀྱི་ཐུགས་དང་། དགེ་སློང་གནས་བརྟན་གནས་བརྟན་རྣམས་དང་ལྷ་སྦྱིན་གྱི་ལ་བལྟས་ན་སྡིག་པའི་འདོད་པ་དེ་
ལྟ་བུ་སྐྱེས་པར་ཤེས་ནས་ལྷ་སྦྱིན་ལ་འདི་སྐད་ཅེས་སྨྲས་སོ། །ལྷ་སྦྱིན་ཁྱོད་གཟུགས་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །ལྷ་སྦྱིན་ཁྱོད་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། གནས་བརྟན་ལྔ་བརྒྱས་ཀྱང་བདག་ལ་རྫུ་འཕྲུལ་གྱི་ལམ་གྱི་ལུང་མ་ཕོག་ན། ཅི་ཚེ་དང་ལྡན་པ་འདི་དག་དང་བཅོམ་ལྡན་འདས་དང་ལྷན་ཅིག་སྔ་ཉིད་ནས་བགྲོས་སམ། འདི་ལྟར་བདག་ལ་སུས་ཀྱང་རྫུ་འཕྲུལ་གྱི་ལམ་གྱི་ལུང་མ་ཕོག་གོ་སྙམ་དུ་སེམས་ཏེ། སུ་ཞིག་བདག་ལ་རྫུ་འཕྲུལ་གྱི་ལམ་གྱི་ལུང་དབོག་པར་ནུས་སྙམ་མོ། །དེའི་ཚེ་ཚེ་དང་ལྡན་པ་འོད་སྲུང་སྟོབས་བཅུ་ལྡན་རྒྱལ་པོའ་ཁབ་ཀྱི་སྡེ་ཅན་གྱི་ཕུག་ན་འདུག་གོ །དེ་ནས་ལྷ་སྦྱིན་འདི་སྙམ་དུ་སེམས་ཏེ། གནས་བརྟན་འོད་སྲུང་སྟོབས་བཅུ་ལྡན་འདི་ནི་ཡུན་རིང་པོ་ནས་གཡོ་མེད་པ། སྒྱུ་ཅན་མ་ཡིན་པ། དྲང་པོར་བྱེད་པ། དྲང་པོའ་རང་བཞིན་ཅན་ཡིན་ལ། བདག་གི་ཉེ་མཚམས་ཀྱི་ཕུ་བོ་ཀུན་དགའ་བོའ་ཡང་མཁན་པོ་ཡིན་པས་གནས་བརྟན་འོད་སྲུང་སྟོབས་བཅུ་ལྡན་གྱིས་བདག་ལ་རྫུ་འཕྲུལ་གྱི་ལམ་གྱི་ལུང་དབོག་པར་ནུས་སོ་སྙམ་དུ་བསམས་ནས། ཚེ་དང་ལྡན་པ་འོད་སྲུང་སྟོབས་བཅུ་ལྡན་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ལྷ་སྦྱིན་གྱིས་ཚེ་དང་ལྡན་པ་འོད་སྲུང་སྟོབས་བཅུ་ལྡན་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། དེ་ནས་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་བཅོམ་ལྡན་འདས་ཀྱི་ཐུགས་དང་། དགེ་སློང་གནས་བརྟན་གནས་བརྟན་རྣམས་དང་། ལྷ་སྦྱིན་གྱི་ལ་བལྟས་ན་སྡིག་པའི་འདོད་པ་དེ་ལྟ་བུ་སྐྱེས་པར་གྱུར་པར་མ་རིག་ནས་ལྷ་སྦྱིན་ལ་རྫུ་འཕྲུལ་གྱི་ལམ་གྱི་ལུང་ཕོག་གོ །དེ་ནས་ལྷ་སྦྱིན་གྱིས་ནམ་གྱི་ཆ་སྟོད་དང་། ནམ་གྱི་ཆ་
སྨད་ལ་མི་ཉལ་བར་བརྩོན་པ་དང་ལྡན་པའི་གནས་པས་བསམ་གཏན་དང་པོ་ལ་བརྟེན་ཏེ་རྫུ་འཕྲུལ་མངོན་པར་བསྒྲུབས་ནས། དེ་གཅིག་ཏུ་གྱུར་ཅིང་མང་པོར་འགྱུར་བ་དང་། མང་པོར་གྱུར་ཅིང་གཅིག་ཏུ་འགྱུར་བ་དང་། སྣང་བར་གྱུར་ཅིང་མི་སྣང་བར་འགྱུར་བ་ཤེས་པ་མཐོང་པས་ཉམས་སུ་མྱོང་བར་བྱེད་དོ། །རྩིག་པ་ལ་ཡང་ཐད་ཀར་འགྲོ། རིལ་ཡང་ཐད་ཀར་འགྲོ །རབ་ལ་ཡང་ལུས་ཀྱིས་མི་ཐོགས་པར་ཐད་ཀར་འགྲོའོ། །འདི་ལྟ་སྟེ། ནམ་མཁའ་དང་ས་ལ་ཡང་སྟེང་དུ་འབྱུང་བ་དང་བྱིའུ་ཟུལ་བྱེད་དེ་དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ནུབ་པར་རྒྱུན་ཕྱོགས་སུ་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །སྐྱིལ་མོ་ཀྲུང་གིས་ནམ་མཁའ་ལ་འགྲོ་བར་བྱེད་དེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་། ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ལ་ཡང་ལག་པས་ཉུག་ཅིང་ཀུན་དུ་ཉུག་པར་བྱེད་དོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། ཅི་བདག་གིས་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་དེ་ལས་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། །ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ། གཞན་ཡང་འདིའི་ཉེ་འཁོར་ན་བིལ་བའི་ཚལ་ལམ། ཀ་བིད་ཐའི་ཚལ་ལམ། སྐྱུར་རྩིའི་ཚལ་གང་ཡིན་པ་དེ་ལས་སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བ་ཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ། བྱང་གི་སྒྲ་མི་སྙན་གྱི་གླིང་དུ་སོང་ལ་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་ཞེས་བྱ་བའི་བར་གོང་མ་བཞིན་དུའོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་ལ། ལྷའི་བདུད་རྩི་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློག་ཡོད་པ་རྣམས་ལ་བགོ་བར་བྱའམ། ཡུལ་ལྗོངས་འབྱོར་པ་དང་ཞེས་བྱ་བ་ནས་སྐྱེ་བོ་དང་
མི་མང་པོས་གང་བའི་བར་དེ་ནས་གཙང་ཞིང་བསོད་པའི་བཟའ་བ་དང་བཅའ་བ་ལྷུང་བཟེད་བཀང་སྟེ་བླངས་ནས་བདག་གིས་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ་སྙམ་མོ། །དེ་ནས་ཡང་ལྷ་སྦྱིན་འདི་སྙམ་དུ་སེམས་ཏེ། བདག་གིས་ཡུལ་མ་ག་འི་མི་གཙོ་བོ་གང་ཞིག་དབང་དུ་བྱས་ན་དེ་དབང་དུ་གྱུར་པས་སྐྱེ་བོའ་ཚོགས་ཆེན་པོ་ཚེགས་ཆུང་དུས་བདག་གི་དབང་དུ་འགྱུར་སྙམ་པ་དང་། དེ་ནས་ལྷ་སྦྱིན་འདི་སྙམ་དུ་སེམས་ཏེ། གཞོན་ནུ་མ་སྐྱེས་དགྲ་འདི་ཕ་ཤི་ནས་ཕའི་རྒྱལ་སྲིད་ཀྱི་དབང་ཕྱུག་ལ་བཞག་པར་འགྱུར་གྱིས། མ་ལ་བདག་གིས་གཞོན་ནུ་མ་སྐྱེས་དགྲ་དབང་དུ་འགྱུར་བར་བྱ་སྟེ། དེ་དབང་དུ་གྱུར་ན་སྐྱེ་བོའ་ཚོགས་ཆེན་པོ་ཚོགས་ཆུང་དུས་བདག་གི་དབང་དུ་འགྱུར་རོ་སྙམ་མོ། །དེ་ནས་ལྷ་སྦྱིན་གྱིས་གླང་པོ་ཅང་ཤེས་བཟང་པོ་དང་། རྟ་ཅང་ཤེས་བཟང་པོ་དང་། དགེ་སློང་སྐྲ་བྲེགས་ཤིང་སྣམ་སྦྱར་བགོས་པ་དར་ལ་བབ་པ་དག་ཏུ་བསྒྱུར་ནས་གཞོན་ནུ་མ་སྐྱེས་དགྲའི་སྒོ་ནས་ཞུགས་ཤིང་སྒེའུ་ཆུང་དུ་འབྱུང་བ་དང་། སྒེའུ་ཆུང་ནས་ཞུགས་ཤིང་སྒོར་འབྱུང་བར་བྱེད་དོ། །རེས་འགའ་གཞོན་ནུ་གསེར་གྱི་འོག་པག་གིས་བཅིངས་པར་བསྒྱུར་ནས་གཞོན་ནུ་མ་སྐྱེས་དགྲའི་པང་ན་འགྲེ་ལྡོག་པར་བྱེད་དོ། །མ་སྐྱེས་དགྲ་ཡང་གཞོན་ནུ་དེ་ལ་འཛིན་ཅིང་ཁ་སྤྲད་དེ་འཁྱུད་པར་བྱེད་དོ། །རེས་འགའ་ན་ཁར་མཆིལ་མའི་ཐལ་བ་བླུགས་ན་དེ་ཡང་ལྷ་སྦྱིན་མེད་པར་བྱེད་དོ། །འདི་ལྟ་སྟེ་རྙེད་པ་དང་བཀུར་སྟིས་ཟིལ་གྱིས་ནོན་པས་སེམས་གཏུགས་པའི་ཕྱིར་རོ། །དེ་ན་གཞོན་ནུ་མ་སྐྱེས་དགྲ་ལྷག་པར་ཡང་སྡིག་པ་ཅན་གྱི་ལྟ་བར་སོང་བ་ཐོབ་སྟེ། ཀྱེ་མ་སྟོན་པ་བས་ནི་འཕགས་པ་ལྷ་སྦྱིན་ཆེས་མཐུ་ཆེའོ་ཞེས་དད་པར་གྱུར་ཏོ། །དེ་ལ་དད་པར་གྱུར་ནས་ལྷག་པར་བྱ་བ་བྱེད་དེ། །ཤིང་རྟ་ལྔ་བརྒྱ་ཙམ་དང་ལྷན་ཅིག་སྔ་དྲོ་དང་ཕྱི་དྲོ་རིམ་གྲོ་བྱེད་དུ་འགྲོའོ། །དེ་ལ་གཡོས་ཀྱི་སྣ་རྫེའུ་ལྔ་བརྒྱ་ཙམ་ཡང་བཀད་ས་དང་བཀད་ས་དག་ཏུ་སྟོབས་པར་བྱེད་དོ། །ལྷ་སྦྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་བཀད་སའི་གུང་ལ་འདུག་པར་བྱེད་དོ། །དེ་ནས་དགེ་སློང་རབ་ཏུ་མང་པོ་སྔ་དྲོ་ཤམ་ཐབས་བགོས་
ལྟུང་བཟེད་དང་ཆོས་གོས་བླངས་ཏེ་རྒྱལ་པོའ་ཁབ་ཏུ་བསོད་སྙོམས་ལ་ཞུགས་སོ། །དགེ་སློང་རབ་ཏུ་མང་པོའ་ཁབ་ཏུ་བསོད་སྙོམས་སྤྱོད་པས་ལྷ་སྦྱིན་ལ་རྙེད་པ་དང་བཀུར་སྟི་འདི་ལྟ་བུ་དག་བྱུང་བར་གྱུར་ཏེ། མ་གའི་རྒྱལ་པོ་ལུས་འཕགས་མའི་བུ་མ་སྐྱེས་དགྲས་ཤིང་རྟ་ལྔ་བརྒྱ་ཙམ་དང་ལྷན་ཅིག་སྔ་དྲོ་དང་ཕྱི་དྲོ་རིམ་གྲོ་བྱེད་དུ་འགྲོ་ཞིང་། དེ་ལ་གཡོས་ཀྱི་སྣ་རྫེའུ་ལྔ་བརྒྱ་ཙམ་ཡང་བཀད་ས་དང་བཀད་ས་དག་ཏུ་སྟོབས་པར་བྱེད་དོ། །ལྷ་སྦྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་བཀད་སའི་གུང་ལ་འདུག་པར་བྱེད་དོ་ཞེས་ཐོས་སོ། །ཐོས་ནས་ཀྱང་རྒྱལ་པོའ་ཁབ་ཏུ་བསོད་སྙོམས་སྤྱད་དེ། ཟས་ཀྱི་བྱ་བ་བྱས་ཤིང་ཟས་ཕྱི་མའི་བསོད་སྙོམས་སྤངས་ནས་ཆོས་གོས་དང་ལྷུང་བཟེད་མཁོས་སུ་ཕབ་སྟེ་རྐང་པ་བཀྲུས་ནས་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོས་འདི་སྐད་ཅེས་གསོལ་ཏོ། །བཙུན་པ་འདིར་བདག་ཅག་དགེ་སློང་རབ་ཏུ་མང་པོ་སྔ་དྲོ་ཤམ་ཐབས་འཚལ་ལྷུང་བཟེད་དང་ཆོས་གོས་བླངས་ཏེ་རྒྱལ་པོའ་ཁབ་ཏུ་བསོད་སྙོམས་ལ་ཞུགས་ནས་བཙུན་པ་བདག་ཅག་དགེ་སློང་རབ་ཏུ་མང་པོ་རྒྱལ་པོའ་ཁབ་ཏུ་བསོད་སྙོམས་སྤྱད་པ་ན། ལྷ་སྦྱིན་ལ་རྙེད་པ་དང་བཀུར་སྟི་འདི་ལྟ་བུ་དག་བྱུང་བར་གྱུར་ཏེ། མ་གའི་རྒྱལ་པོ་ལུས་འཕགས་མའི་བུམ་སྐྱེས་དགྲས་ཤིང་རྟ་ལྔ་བརྒྱ་ཙམ་དང་ལྷན་ཅིག་སྔ་དྲོ་དང་ཕྱི་དྲོ་རིམ་གྲོ་བགྱིད་དུ་མཆི་ཞིང་། དེ་ལ་གཡོས་ཀྱི་སྣ་རྫེའུ་ལྔ་བརྒྱ་ཙམ་ཡང་བཀད་ས་དང་བཀད་ས་དག་ཏུ་སྟོབས་པར་བགྱིད་དོ། །ལྷ་སྦྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་བཀད་སའི་གུངལ་མཆིས་པར་བགྱིད་དོ་ཞེས་ཐོས་ལགས་སོ། །དགེ་སློང་དག་ཁྱེད་ལྷ་སྦྱིན་ཀྱི་རྙེད་པ་ངང་བཀུར་སྟི་ལ་དགའ་བར་མ་བྱེད་ཅིག །དེ་ཅིའི་ཕྱིར་ཞེ་ན། ལྷ་སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དགེ་སློང་དག་དཔེར་ན་ཆུ་ཤིང་གི་འབྲས་བུ་ཕྱུང་ནས་བརྙིས་པར་འགྱུར་ཞིང་། ཆུ་ཤིང་ནི་འབྲས་བུ་ཕྱུང་ནས་བསྐམས་པར་འགྱུར་བ་དེ་བཞིན་དུ་ལྷ་
སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དཔེར་ན་སྦ་དང་སྨྱུག་མ་ནི་འབྲས་བུ་ཕྱུང་ནས་བསྐམས་པར་འགྱུར་ཞིང་། སྦ་དང་སྨྱུག་མ་ནི་འབྲས་བུ་ཕྱུང་ནས་དུང་ཡག་ཏུ་འགྱུར་བ་དེ་བཞིན་དུ་ལྟ་སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དཔེར་ན་དྲེའུ་མོ་མངལ་དུ་བཟུང་ནས་འཆི་བར་འགྱུར་ཞིང་། དྲེའུ་མོ་ནི་མངལ་དུ་བཟུང་ནས་མ་རུང་བར་འགྱུར་བ་དེ་བཞིན་དུ་ལྷ་སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དགེ་སློང་དག་ལྷ་སྦྱིན་གྱི་རྙེད་པ་དང་བཀུར་སྟི་དེ་ལྟ་བུ་ཇི་སྙེད་བྱུང་བ་དེ་དག་ནི་སྐྱེས་བུ་གཏི་མུག་ཅན་དེ་ལ་ཡུན་རིང་པར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་རོ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། རྙེད་པ་དང་བཀུར་སྟི་གང་ཡིན་པ་ཟིལ་གྱིས་མནན་པར་བྱའི་རྙེད་པ་དང་བཀུར་སྟི་བྱུང་བ་ལ་སེམས་གཏུགས་ཏེ་གནས་པར་མི་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །ཆུ་ཤིང་འབྲས་བུ་སྨྱུག་འབྲས་དང་། །སྤ་ནི་འབྲས་བུས་སྐེམས་པ་དང་། །རང་གི་བུ་ཡིས་དྲེའུ་མོ་ལྟར། །སྐྱེས་བུ་ཐ་ཤལ་བཀུར་སྟིས་འཇོམས། །ཇི་སྲིད་བྱིས་པ་མངོན་བྱེད་པ། །དེ་སྲིད་དུ་ནི་ཕུང་བར་འགྱུར། །བྱིས་པའི་དཀར་བའི་ཆ་འཇོམས་པ། །རྩེ་མོ་ལས་ཀྱང་ལྟུང་བར་འགྱུར། །དེ་ནས་ལྷ་སྦྱིན་རྙེད་པ་དང་བཀུར་སྟིས་ཟིལ་གྱིས་ནོན་པ་སེམས་ཡོངས་སུ་གཏུགས་པ་ལ་སྡིག་པའི་འདོད་པ་འདི་ལྟ་བུ་སྐྱེས་པར་གྱུར་ཏེ། ད་ནི་བཅོམ་ལྡན་འདས་བགྲེས་འཁོགས་གཏུགས་ཏེ་འཁོར་བཞི་ལ་གདམས་ངག་དབོག་ཏུ་མཉེལ་བར་གྱུར་གྱིས། ཨེ་མའོ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་སྤངས་ཏེ་བདག་གིས་དགེ་སློང་གི་དགེ་འདུན་ཡོངས་སུ་དྲང་ཞིང་། བཅོམ་ལྡན་འདས་ནི་ཐུགས་ལས་ཆུང་དུར་མཐོང་བའི་ཆོས་ལ་བདེ་བར་གནས་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་ཀྱང་ཅི་མ་རུང་སྙམ་དུ་སེམས་བསྐྱེད་མ་ཐག་ཏུ་ལྷ་སྦྱིན་རྫུ་འཕྲུལ་དེ་ལས་ཡོངས་སུ་ཉམས་ཀྱང་བདག་ཡོངས་སུ་ཉམས་སོ་ཞེས་མི་ཤེས་སོ། །དེའི་ཚེ་བཅོམ་ལྡན་འདས་ཀྱི་ཉན་ཐོས་སྐྲོད་ངའི་བུ་དགེ་སློང་ནོག་ཅན་ཞེས་
བྱ་བས་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་དེ། ཚངས་པའི་གནས་པ་བཞི་བསྒོམས་ནས་འདོད་པ་རྣམས་ལ་འདོད་པའི་འདུན་པ་སྤང་བའི་ཕྱིར་དེ་ལ་མང་དུ་གནས་པས་ཚངས་པའི་འཇིག་རྟེན་དང་སྐལ་བ་མཉམ་པར་སྐྱེས་སོ། །དེའི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ངན་སྤོང་གི་ཆུ་སྲིན་བྱིས་པ་གསོད་ཀྱི་རི་ལ་འཇིགས་བྱེད་ཀྱི་ཚལ་གྱི་རི་དགས་ཀྱི་ནགས་ན་འདུག་གོ །དེ་ནས་ཚངས་པ་ནོག་ཅན་གྱིས་ལྷ་སྦྱིན་རྫུ་འཕྲུལ་དེ་ལས་ཡོངས་སུ་ཉམས་པར་ཤེས་ནས། དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ་བརྐྱང་པ་ལས་བསྐུམ་པ་ཙམ་གྱིས་ཚངས་པ་ནོག་ཅན་ཚངས་པའི་འཇིག་རྟེན་ནས་མི་སྣང་བར་བྱས་ཏེ་ངན་སྤོང་དུ་འོངས་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའ་མདུན་དུ་འདུག་གོ །དེ་ནས་ཚངས་པ་ནོག་ཅན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ཤེས་པར་གྱིས་ཤིག །ལྷ་སྦྱིན་རྙེད་པ་དང་བཀུར་སྟིས་ཟིལ་གྱིས་ནོན་པ་སེམས་གཏུགས་པ་ལ་སྡིག་པའི་འདོད་པ་འདི་ལྟ་བུ་སྐྱེས་ཏེ། ད་ནི་བཅོམ་ལྡན་འདས་བགྲེས་འཁོགས་གཏུགས་ཏེ་འཁོར་བཞི་ལ་གདམས་ངག་དབོག་ཏུ་མཉེལ་བར་གྱུར་གྱིས། ཨེ་མའོ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་སྤངས་ཏེ། བདག་གིས་དགེ་སློང་གི་དགེ་འདུན་ཡོངས་སུ་དྲང་ཞིང་། བཅོམ་ལྡན་འདས་ནི་ཐུགས་ལས་ཆུང་དུར་གནས་ཤིང་མཐོངབའི་ཆོས་ལ་བདེ་བར་གནས་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་ཀྱང་ཅི་མ་རུང་སྙམ་དུ་སེམས་བསྐྱེད་མ་ཐག་ཏུ་རྫུ་འཕྲུལ་དེ་ལས་སླར་ཡོངས་སུ་ཉམས་ཏེ། ཡོངས་སུ་ཉམས་ཀྱང་བདག་ནི་སླར་ཡོངས་སུ་ཉམས་སོ་ཞེས་མ་ཤེས་ཀྱིས། བཙུན་པ་མཽད་གལ་གྱི་བུ་སྙིང་བརྩེ་བ་ཉེ་བར་བཟུང་སྟེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་དོན་འདི་རྒྱས་པར་གསོལ་ན་ལེགས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པ་ནོག་ཅན་ལ་ཅང་མི་སྨྲ་བས་ཁས་བླངས་སོ། །དེ་ནས་ཚངས་པ་ནོག་ཅན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཅང་མི་སྨྲ་བས་ཁས་བླངས་པར་རིག་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་རྐང་
པ་གཉིས་ལ་མགོ་བོས་ཕྱག་འཚལ་ཏེ་དེ་ཉིད་དུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་ཚངས་པ་ནོག་ཅན་སོང་ནས་རིང་པོ་མ་ལོན་པར་ཤེས་ནས་ཇི་ལྟར་སེམས་མཉམ་པར་བཞག་ན་ངན་སྤོང་ནས་མི་སྣང་བར་གྱུར་ཏེ། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པ་ནོག་ཅན་དང་ལྷན་ཅིག་བར་སྐབས་ཀྱི་གཏམ་ཇི་སྙེད་གླེངས་པ་དེ་དག་ཐམས་ཅད་རྒྱས་པར་གསོལ་ཏེ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་སྔ་མོ་ཞིག་ཏུ་ལྷ་སྦྱིན་སེམས་ལ་བཀྲམ་ནས་རིག་པར་མ་བྱས་སམ་ཅི་ན་ད་གཟོད་ཚངས་པ་ནོག་ཅན་གྱིས་སྦྲན། བཙུན་པ་མད་ལགས་སོ། །བཅོམ་ལྡན་འདས་འདས་དང་ཚེ་དང་ལྡན་པ་མཽད་གལ་གྱི་བུ་ཐབས་ཅིག་ཏུ་བར་སྐབས་ཀྱི་གཏམ་འདི་གླེང་བར་མཛད་པ་ན། དེ་ནས་ལྷ་སྦྱིན་གྲོགས་དགེ་སློངབཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་རཀ་ཏི་ཥྱ་དང་། རྒྱ་མཚོས་བྱིན་དང་ལྷན་ཅིག་བཅོམ་ལྡན་འདས་གང་ན་བ་དེར་དོང་བ་དང་། བཅོམ་ལྡན་འདས་ཀྱིས་ལྷ་སྦྱིན་རྒྱང་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ལྷ་སྦྱིན་འོ་ནི་ད་ལྟར་འོང་གིས་ཚིག་སྲུངས་ཤིག་དང་། དེའུ་རེ་སྐྱེས་བུ་གཏི་མུག་འོ་ནི་བདག་ཉིད་ཀྱིས། བདག་ཉིད་ལུང་བསྟན་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཇི་ལྟར་སེམས་མཉམ་པར་བཞག་ན་འོད་མའི་ཚལ་ནས་མི་སྣང་བར་གྱུར་ཏེ། ངན་སྤོང་གི་ཆུ་སྲིན་བྱིས་པ་གསོད་ཀྱི་རིལ་འཇིགས་བྱེད་ཀྱི་ཚལ་གྱི་རི་དགས་ཀྱི་ནགས་སུ་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་
ཞུགས་སོ། །དེ་ནས་ལྷ་སྦྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། བཅོམ་ལྡན་འདས་ལ་ལྷ་སྦྱིན་གྱིས་འདི་སྐད་ཅེས་གསོལ་ཏོ། །ད་ནི་བཅོམ་ལྡན་འདས་བགྲེས་འཁོགས་གཏུགས་ཏེ་འཁོར་བཞི་ལ་གདམས་ངག་དབོག་ཏུ་མཉེལ་བར་གྱུར་གྱིས། ཨེ་མའོ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་སྤོངས་ཤིག་དང་། བདག་གིས་དགེ་སློང་གི་དགེ་འདུན་ཡོངས་སུ་དྲང་གིས། བཅོམ་ལྡན་འདས་ནི་ཐུགས་ལས་ཆུང་དུར་བདེ་བར་གནས་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་སུ་གསོལ། སྐྱེས་བུ་གཏི་མུག་རེ་ཞིག་ཤཱ་རིའི་བུ་དང་། མཽད་གལ་གྱི་བུ་ཚངས་པ་མཚུངས་པར་སྤྱོད་པ་དེ་དག་ལ་ཡང་ངས་དགེ་སློང་གི་དགེ་འདུན་མི་སྤོངས་ན། རོ་དང་འདྲ་བ་མཆིལ་མ་འཐུང་བ་ཁྱོད་ལ་ལྷག་ལ་སྤོང་། དེ་ནས་ལྷ་སྦྱིན་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཤཱ་རིའི་བུ་དང་མཽད་གལ་གྱི་བུ་ལ་ནི་བསྔགས་པ་གསུངས་ལ་བདག་ལ་ནི་རོ་དང་འདྲ་བ་མཆིལ་མ་འཐུང་བའོ་ཞེས་སྨད་པ་གསུངས་སོ་སྙམ་མོ། །དེ་ནས་བཅོམ་ལྡན་འདས་ལ་ལྷ་སྦྱིན་འཁྲུགས་པ་དང་། ཞེ་སྡང་དང་། ང་རྒྱལ་དང་། འཆབ་པ་དང་། བགྲོངས་པ་དང་། མི་བཟོད་པ་དང་། མ་དད་པ་བསྟན་ཏོ། །དེ་ནས་ལྷ་སྦྱིན་གྱིས་འཇལ་ཏོ་ཞེས་བྱས་ནས་མགོ་ལན་གསུམ་ལྕོགས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།འདུལ་བ་གཞི། བམ་པོ་དགུ་བཅུ་རྩ་བདུན་པ། དེའི་ཚེ་ཚེ་དང་ལྡན་པ་ཀུན་དགའ་བོ་བསིལ་ཡབ་ཐོགས་ཏེ་བཅོམ་ལྡན་འདས་ཀྱི་སྣམ་ལོགས་ན་བཅོམ་ལྡན་འདས་ལ་གཡོ་བཅིང་འདུག་གོ །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ཇི་སྙེད་ཉེ་བར་བརྟེན་ཏེ་གནས་པ་དེ་དག་ཐམས་ཅད་རིམ་གྲོའི་གནས་སུ་སྡུས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ཇི་སྙེད་ཉེ་བར་བརྟེན་ཏེ་གནས་པ་དེ་དག་ཐམས་
ཅད་རིམ་གྲོའི་གནས་སུ་བསོགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ཇི་སྙེད་ཉེ་བར་བརྟེན་ཏེ་མཆིས་པ་དེ་དག་ཐམས་ཅད་རིམ་གྲོའི་གནས་སུ་བསོགས་ལགས་ཏེ། བཅོམ་ལྡན་འདས་ད་ནི་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་རིམ་གྲོའི་གནས་གང་ན་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྟོན་པ་ལྔ་པོ་འདི་དག་འཇིག་རྟེན་ན་ཡོད་ཅིང་མངོན་ཏེ། ལྔ་གང་ཞེ་ན། འདི་ན་སྟོན་པ་གཅིག་ནི་ཚུལ་ཁྲིམས་ཡོངས་སུ་མ་དག་པ་ཡིན་བཞིན་དུ་བདག་གི་ཚུལ་ཁྲིམས་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདི་ནི་ཚུལ་ཁྲིམས་ཡོངས་སུ་མ་དག་པ་ཡིན་བཞིན་དུ་བདག་གི་ཚུལ་ཁྲིམས་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་པར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནང་གསོས་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ཚུལ་ཁྲིམས་ལས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ཚུལ་ཁྲིམས་ཀྱི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་སྟོན་པ་ཡོད་ཅིང་མངོན་པ་དང་པོ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་འཚོ་བ་ཡོངས་སུ་མ་དག་པ་ཡིན་བཞིན་དུ་བདག་གི་འཚོ་བ་
ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ཏེ། སྟོན་པ་ཤེས་ལྡན་འདི་ནི་འཚོ་བ་ཡོངས་སུ་མ་དག་པ་ཡིན་བཞིན་དུ་བདག་གི་འཚོ་བ་ཡོངས་སུ་དག་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་འཚོ་བའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་འཚོ་བའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་ཡོད་ཅིང་མངོན་པའི་སྟོན་པ་གཉིས་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ཤེས་པ་མཐོང་བ་ཡོངས་སུ་མ་དག་པ་ཡིན་བཞིན་དུ་བདག་གི་ཤེས་པ་མཐོང་བ་ཡོངས་སུ་དག་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདིའི་ཤེས་པ་མཐོང་པ་ཡོངས་སུ་མ་དག་པ་ཡིན་བཞིན་དུ་བདག་གི་ཤེས་པ་མཐོང་བ་ཡོངས་སུ་དག་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ཤེས་པ་མཐོང་བའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ཤེས་པ་མཐོང་བའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་
ཡོད་ཅིང་མངོན་པའི་སྟོན་པ་གསུམ་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ལུང་སྟོན་པ་ཕུན་སུམ་ཚོགས་པ་མ་ཡིན་བཞིན་དུ་བདག་གིས་ལུང་སྟོན་པ་ནི་ཕུན་སུམ་ཚོགས་པ་ཡིན་ཏེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདི་ནི་ལུང་སྟོན་པ་ཕུན་སུམ་ཚོགས་པ་མ་ཡིན་བཞིན་དུ་བདག་གི་ལུང་སྟོན་པ་ནི་ཕུན་སུམ་ཚོགས་པ་ཡིན་ཏེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་ཅེས་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་དེ་བདག་ཅག་གིས་གླེངས་ཏེ་ཅི་རུང་སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་དང་། ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ལུང་སྟོན་པ་ཕུན་སུམ་ཚོགས་པའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ལུང་སྟོན་པ་ཕུན་སུམ་ཚོགས་པའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ཡོད་ཅིང་མངོན་པའི་སྟོན་པ་བཞིན་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ཆོས་འདུལ་བ་ཉེས་པར་འཆད་བཞིན་དུ་བདག་གི་ཆོས་འདུལ་བ་ནི་ལེགས་བར་བཤད་པ་ཡིན་ཏེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདི་ནི་ཆོས་འདུལ་པ་ཉེས་པར་འཆད་བཞིན་དུ་བདག་གི་ཆོས་འདུལ་བ་ནི་ལེགས་པར་བཤད་པ་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མ་འོང་བར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་འདི་བདག་ཅག་ལ་འདི་ལྟ་སྟེ་ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་དང་། ཡོ་བྱད་རྣམས་
ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ཆོས་འདུལ་བ་ལེགས་པར་བཤད་པའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ཆོས་འདུལ་བ་ལེགས་པར་བཤད་པའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་ཡོད་ཅིང་མངོན་པའི་སྟོན་པ་ལྔ་པ་ཡིན་ནོ། །དགེ་སློང་དག་ང་ནི་ཚུལ་ཁྲིམས་ཡོངས་སུ་དག་པ་ཁོ་ན་ཡིན་པས་ང་ཚུལ་ཁྲིམས་ཡོངས་སུ་དག་པ་སྟེ་ཉོན་མོངས་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ཚུལ་ཁྲིམས་ཀྱི་སྒོ་ནས་རྗེས་སུ་སྲུང་བར་བསམ་ཡང་མི་དགོས་ལ་ང་ཡང་ཉན་ཐོས་རྣམས་ཀྱིས་ཚུལ་ཁྲིམས་ཀྱི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་འཚོ་བ་ཡོངས་སུ་དག་པ་ཁོ་ན་ཡིན་པས་ངའི་འཚོ་བ་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་འཚོ་བའི་སྒོ་ནས་རྗེས་སུ་སྲུང་བར་བསམ་ཡང་མི་དགོས་ལ། ང་ལ་ཡང་ཉན་ཐོས་རྣམས་ཀྱིས་འཚོ་བའི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་ཡེ་ཤེས་གཟིགས་པ་ཡོངས་སུ་དག་པ་ཁོ་ན་ཡིན་པས་ང་ཡེ་ཤེས་གཟིགས་པ་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ཡེ་ཤེས་གཟིགས་པའི་སྒོ་ནས་རྗེས་སུ་སྲུང་བར་བསམ་ཡང་མི་དགོས་ལ་ང་ཡང་ཉན་ཐོས་རྣམས་ཀྱིས་ཡེ་ཤེས་གཟིགས་པའི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་ལུང་སྟོན་པ་དང་ལྡན་པ་ཁོ་ན་ཡིན་པས་ངའི་ལུང་སྟོན་པ་ཕུན་སུམ་ཚོགས་ཏེ་ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ལུང་སྟོན་པ་ཕུན་སུམ་ཚོགས་པའི་སྒོ་ནས་རྗེས་སུ་བསྲུང་བར་བསམ་ཡང་མི་དགོས་ལ། ང་ཡང་ཉན་ཐོས་རྣམས་ཀྱིས་ལུང་སྟོན་པ་དང་ལྡན་པ་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ངའི་ཆོས་འདུལ་བ་ནི་ལེགས་པར་གསུངས་པ་ཁ་ན་ཡིན་པས་ངའི་ཆོས་འདུལ་བ་ལེགས་པར་གསུངས་པ་སྟེ། ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ཆོས་འདུལ་བ་ནི་ལེགས་པར་གསུངས་པའི་སྒོ་ནས་རྗེས་སུ་བསྲུང་བར་བསམ་མི་དགོས་ལ། ང་ཡང་ཉན་ཐོས་
རྣམས་ཀྱིས་ཆོས་འདུལ་བ་ལེགས་པར་གསུངས་པའི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་ཀྱེད་ལ་ཚར་བཅད་ཅིང་ཚར་བཅད་ཅིང་། ཐག་བཅུག་ཅིང་ཐག་བཅུག་ཅིང་རབ་ཏུ་སྨྲའི་ཁྱེད་ལ་ངོ་ནི་མི་བྱེད་དེ། རྫ་མཁན་གྱིས་རྫ་མ་ཚོས་པ་རྣམས་ལ་བྱ་བ་བཞིན་དུ་གང་རུང་བ་དེ་འཇོག་པར་ཟད་པས་ངའི་ཚིག་གི་ལམ་རྣམས་བཟོད་པར་ཡང་གྱིས་ཤིག །དེ་ནས་ལྷ་སྦྱིན་གྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་ལ་སྨྲས་པ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་དག་ཆུར། དགེ་སྦྱོང་གཽ་ཏ་མ་འདུག་བཞིན་དུ་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་དབྱེ་བར་བྱའོ། །དེས་ན་བདག་ཅག་ཤི་སྟེ་འདས་ན་ཡང་། དགེ་སྦྱོང་གཽ་ཏ་མ་དེ་ལྟར་རྫུ་འཕྲུལ་ཆེ་བ། དེ་ལྟར་མཐུ་ཆེ་བ་འདུག་བཞིན་དུ་ལྷ་སྦྱིན་དང་། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་གྱིས་ཉན་ཐོས་ཀྱི་དགེ་འདུན་མཐུན་པ་ཕྱེ་བ་དང་། འཁོར་ལོ་ཕྱེ་བ་བྱས་སོ་ཞེས་ཕྱོགས་དང་ཕྱོགས་མཚམས་སུ་གྲགས་པ་དང་། སྒྲ་དང་ཚིགས་སུ་བཅད་པ་སྙན་པ་རྒྱ་ཆེར་འབྱུང་བར་འགྱུར་རོ། །དེ་རྣམས་ཀྱིས་སྨྲས་པ། ལྷ་སྦྱིན་བདག་ཅག་གིས་ནི་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་། འཁོར་ལོ་དབྱེ་བར་བྱ་མི་ནུས་སོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ལྷ་སྦྱིན་བཅོམ་ལྡན་འདས་ཀྱི་ཉན་ཐོས་རྫུ་འཕྲུལ་ཆེ་བ་མཐུ་ཆེ་བ་ལྷའི་མིག་དང་ཕ་རོལ་གྱི་སེམས་རིག་པ་དག་ཡོད་ལ། དེ་དག་ནི་རྒྱང་རིང་པོ་ནས་ཀྱང་མཐོང་ལ། དྲུང་ན་འདུག་ཀྱང་མི་སྣང་བ་དག་ཡིན་ཏེ། དེ་རྣམས་ཀྱི་སེམས་ཀྱིས་སེམས་ཁྱབ་པར་བྱས་ནས། ཡིད་ཀྱིས་ཡིད་རྣམ་པར་ཤེས་ཀྱི། དེ་རྣམས་ཀྱིས་བདག་ཅག་བསྐྱོད་པ་ཉིད་ཀྱིས་ཤེས་པར་འགྱུར་རོ། །དེས་སྨྲས་པ། ཀོ་ཀ་ལི་ཀ་དག་ཚུར་ཐབས་ཡོད་ཀྱིས་བདག་ཅག་དགེ་སློང་གནས་བརྟན་གནས་བརྟན་རྣམས་ཀྱི་དྲུང་དུ་སོང་ལ་གནས་བརྟན་དག་ཐུགས་ལས་ཆུང་དུར་མཛོད་ཅིག་དང་། བདག་ཅག་གིས་གནས་བརྟན་རྣམས་ལ་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ་ཞེས་ཡོ་བྱད་ཐམས་ཅད་ཀྱིས་བསྟབ་པར་བྱ་ཞིང་དགེ་སློང་གསར་བུ་རྣམས་ལ་ཡང་
ལྷུང་བཟེད་དང་། ཆོས་གོས་དང་། ལྷུང་བཟེད་ཀྱི་སྣོད་དང་། ཆུ་ཚགས་དང་། སྐ་རགས་དང་། ལུང་འབོགས་པ་དང་། ཀློག་ཏུ་གཞུག་པ་དང་། འདོན་དུ་གཞུག་པ་དང་། རྣལ་འབྱོར་དང་། ཡིད་ལ་བྱེད་པས་ཉེ་བར་བསྡུ་ཞིང་རིམ་གྲོ་བྱའོ། །ཚེ་དང་ལྡན་པ་ལྷ་སྦྱིན་ཐབས་དེ་ནི་བདེན་པ་ཞིག་ཡོད་དོ། །དེ་ན་ལྷ་སྦྱིན་ནི་དགེ་འདུན་མཐུན་པ་དབྱེ་བའི་སླད་དུ་རྟུལ་བ་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་ལྷ་སྦྱིན་དང་། དེ་ལྟ་བུ་དང་མཐུན་པ་གཞན་སུ་ཡང་རུང་བ་ལ་བཞམས་ཏེ་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ། མི་རྩོད། མཆོག་གི་གཅིག་འདོན་པ་གཅིག་ཅིང་། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་བསྒོ་ཤིག །དགེ་སློང་དེ་རྣམས་ཀྱིས་ལྷ་སྦྱིན་བཞམས་ཏེ་བསྒོ་བ་དང་། དེ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་ནོ་ཞེས་རྗེས་སུ་ཐ་སྙད་འདོགས་པར་བྱེད་ནས། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ལ། བཙུན་པ་བདག་ཅག་གིས་ལྷ་སྦྱིན་ལ་བཞམས་ཏེ་བསྒོ་ལགས་ན། དེ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་ཐ་སྙད་འདོགས་པར་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་ལྷ་སྦྱིན་དང་།
གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་དང་། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། ལྷ་སྦྱིན་འདི་དགེ་འདུན་མཐུན་པ་དབྱེ་བའི་སླད་དུ་རྟུལ་ཏེ་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ན། འདི་ལ་དགེ་སློང་མང་པོས་བཞམས་ཏེ་བསྒོ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ལས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་པར་མ་བྱེད་ཅིག །དབྱེ་ན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ལྷ་སྦྱིན་འདི་དགེ་འདུན་མཐུན་པ་དབྱེ་བའི་སླད་དུ་རྟུལ་ཏེ་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ནས་འདི་ལ་དགེ་སློང་མང་པོས་བཞམས་ཏེ་བསྒོ་བ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙེད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་ལྷ་སྦྱིན་ལ་ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་
བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་དུ་དགའ་མི་རྩོད། མཆོག་གཅིག །འདོན་པ་གཅིག་ཅིང་ཆུ་དང་། འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་དུ་དགའ་མི་རྩོད། མཆོག་གཅིག །འདོན་པ་གཅིག་ཅིང་ཆུ་དང་། འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་ལྷ་སྦྱིན་ལ་གསོལ་བ་དང་བཞིིའི་ལས་ཀྱིས་བསྒོ་བར་མཛད་ན། ཚེ་དང་ལྡན་པ་གང་དག་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལས་བརྗོད་པ་གཉིས་པ་དང་གསུམ་པའི་བར་དུ་བྱའོ། །དགེ་འདུན་དེ་རྣམས་ཀྱིས་ལྷ་སྦྱིན་ལ་གསོལ་བ་དང་། བཞིའི་ལས་ཀྱིས་བསྒོ་ན། བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་ནོ་ཞེས་རྗེས་སུ་ཐ་སྙད་འདོགས་སོ། །དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའ་ིདགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཆོས་བྱིན་ཏེ། དེ་རྣམས་ཀྱིས་ཀྱང་དགེ་སློང་རྣམས་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་འདི་ནི་ཆོས་སྨྲ་བ་འདུལ་བ་སྨྲ་བ། དགེ་སློང་འདི་ནི་ཆོས་དག་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།
དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ། བཙུན་པ་བདག་ཅག་གིས་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་ན། བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ལགས་སོ། །དེའི་གྲོགས་བགྱིད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་དེ་རྣམས་ཀྱང་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་བཟོད་ཅིང་འདོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་ལ་བཞམས་ཏེ་བསྒོ་བར་བྱའོ། །བཞམས་ཏེ་བསྒོ་བ་ཡང་འདི་ལྟར་བྱ་སྟེ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་མཐུན་པར་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པའི་གྲོགས་བྱེད་ཅིང་མི་མཐུན་པར་རྗེས་སུ་ཕྱོགས་པར་མ་བྱེད་ཅིག །དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།
དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་བར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །ཚེ་དང་ལྡན་པ་ཁྱེད་ཅག་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་ཁྱེད་ཅག་དགེ་འདུན་མཐུན་པར་སྨྲ་བ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ་མི་རྩོད། མཆོག་གཅིག །འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོ་ཤིག །དགེ་སློང་དེ་རྣམས་ཀྱིས། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་བཞམས་ཏེ་བསྒོ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་ཏན་གྱིས་མཆོག་ཏུ་བཟུང་ཞིག་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་དོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བདག་ཅག་གིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏིཥྱ་དང་། རྒྱ་མཚོས་བྱིན་རྣམས་ལ་བཞམས་ཏེ་བསྒོ་ལགས་ན། བསྒོ་ཡང་གཞི་དེ་ཉིད་ནན་གྱིས་མཆོག་ཏུ་བཟུང་ཞིང་མངོན་བར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་དང་གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ནི་འདི་ལྟར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་དང་། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་
པ་རྣམས་གསན་དུ་གསོལ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་འདི་དག་འཚལ་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་གྱུར་ནས་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་བཟོད་ཅིང་འདོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མཆིས་ནས། འདི་དག་ལ་དགེ་སློང་མང་པོས་བཞམས་ཏེ་བསྒོ་ན་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཎྱ་དང་། རྒྱ་མཚོས་བྱིན་ཁྱེད་ཅག་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེ་ན་བྱེད་པར་གྱུར་པའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི་ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང་། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག །ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་བསྒོ་བ་མཛད་ན། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ཀོ་ཀ་ལི་ཀ་དང་། ཁ་ཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་འདི་དག་འཚལ་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་གྱུར་ནས་དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་ནི་ཆོས་སྨྲ་བ། འདུལ་བ་སྨྲ་པ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་
བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་
ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མཆིས་ནས། འདི་དག་ལ་དགེ་སློང་མང་པོས་བཞམས་ཏེ་བསྒོ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དོ། །དེའི་སླད་དུ་དགེ་འདུན་གྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་ཁྱེད་ཅག་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང་། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །ཚེ་དང་ལྡན་པ་དག་དགེ་འདུན་འབྱེད་འདོད་པར་མ་
བྱེད་པར། ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱི། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོའོ། །དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ཀོ་ཀ་ལི་ཀ་དང་། ཁ་ཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་། བཞིའི་ལས་ཀྱིས་བསྒོའོ། །དགེ་སློང་དེ་རྣམས་ཀྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་ན། དེ་རྣམས་དགེ་སློང་རྣམས་ཀྱིས་གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས། འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་དོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བདག་ཅག་གིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱལ་མཚོས་བྱིན་ལ་གསོལ་པ་དང་།
བཞིའི་ལས་ཀྱིས་བསྒོ་ལགས་ན། བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལྷ་སྦྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་དབྱེ་བར་བྱ་ནུས་ཏེ། འདི་ལྟར་འདིའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཡིན་པས་སོ། །ལྷ་སྦྱིན་གྱིས་བདག་ལ་དགེ་སྦྱོང་གཽ་ཏ་མས་ལྷ་སྦྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་དབྱེ་བར་བྱ་ནུས་ཏེ། འདི་ལྟར་འདིའི་གྲོགས་བྱེད་ཅིང་མི་མཐུན་པར་སྨྲ་བརྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྞ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཡིན་པས་སོ་ཞེས་ལུང་བསྟན་པ་ཐོས་སོ། །ཐོས་ནས་ཀྱང་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་སྨྲས་པ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་དག་ཤེས་པར་གྱིས་ཤིག །དགེ་སྦྱོང་གཽ་ཏ་མས་ཁོ་བོ་ལ་ལྷ་སྦྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་། འཁོར་ལོ་དབྱེ་བར་བྱ་ནུས་ཏེ། འདི་ལྟར་འདིའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཡིན་པས་སོ་ཞེས་ལུང་བསྟན་ཏོ། །མ་ལ་ཁོ་བོས་ལྷག་པར་ཡང་དགེ་འདུན་དབྱེ་བར་བྱ་བའི་ཕྱིར་རྟུལ་བར་བྱའོ་ཞེས་དེ་དགེ་སློང་ལྔ་བརྒྱ་དང་ལྷན་ཅིག་ཀུན་དགའ་ར་བའི་ནང་དུ་ཚོགས་ཤིང་ཟ་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེ་བཞིན་གཤེགས་པས་ཅིའི་ཕྱིར་གསུམ་ནི་ཟ་བར་རྗེས་སུ་གནང་ལ། ཚོགས་ཤིང་
ཟ་བ་ནི་བཀག་པ་མཛད་ཅེ་ན། རིགས་འབར་བ་ལ་བརྟེན་པ་དང་། གང་ཟག་སྡིག་པ་འདོད་པ་རྣམས་ཀྱི་ཕྱོགས་གཞོམ་པའི་དོན་གཉིས་གཟིགས་པ་སྟེ། གང་ཟག་སྡིག་པ་འདོད་པ་རྣམས་དགེ་འདུན་ཁོ་ན་ལ་བརྟེན། དགེ་འདུན་ཁོ་ནའི་ཆེད་དུ་བྱས། དགེ་འདུན་ཁོ་ན་མ་ཤེས་ཤིང་ཡ་མཚན་ཅན་ལྟ་བུར་བྱས་ནས་དགེ་འདུན་ཁོ་ན་དང་ལྷན་ཅིག་རྩོད་པ་བཟུང་ནས་གནས་པར་འགྱུར་དུ་འོང་ངོ་སྙམ་པས་སོ། །གང་གི་ཚེ་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་ལྷ་སྦྱིན་ལ་རྫུ་འཕྲུལ་གྱི་ལམ་གྱི་ལུང་ཕོག་པ་དེའི་ཚེ། དེ་ལ་དགེ་སློང་རྣམས་ཀྱིས་སྨྲས་པ། གནས་བརྟན་ཁྱོད་ཀྱིས་ཅིའི་ཕྱིར་ལྷ་སྦྱིན་ལ་རྫུ་འཕྲུལ་གྱི་ལམ་གྱི་ལུང་ཕོག །དེས་སྨྲས་པ། ཚེ་དང་ལྡན་པ་དག་བདག་གིས་དེ་སྡིག་པ་འདོད་པར་མ་ཤེས་མོད། གལ་ཏེ་བདག་གིས་ཤེས་ན་དེ་ལ་བདག་གིས་རྫུ་ཞེས་བྱ་བ་ཙམ་གྱི་ལུང་ཡང་མི་དབོག་ན་རྫུ་འཕྲུལ་གྱི་ལམ་ལྟ་སྨོས་ཀྱང་ཅི་དགོས། དེ་ནས་ལྷ་སྦྱིན་ལ་དགེ་སློང་རྣམས་ཀྱིས་གཅུགས་པས་སྨྲས་པ། ལྷ་སྦྱིན་ཁྱོད་ཀྱི་དཔལ་དང་སྐལ་བ་ཕུན་སུམ་ཚོགས་པ་ཅི་ཡོད་པ་དེ་ཐམས་ཅད་ནི་གནས་བརྟན་འོད་སྲུང་སྟོབས་བཅུ་ལྡན་ལ་བརྟེན་ཏེ་ཡིན་ན་ཁྱོད་དེའི་དྲུང་དུ་མི་འགྲོ་འམ། དེ་རྣམས་ཀྱིས་བསམས་པ། བདག་ཅག་གིས་འདི་བསྐུལ་ན་དེའི་དྲུང་དུ་འགྲོ་ཞིང་དེས་འདི་སླར་ཟློག་པར་འགྱུར་རོ་སྙམ་མོ། །དེ་ལ་དེ་ལྟར་བསྐུལ་བ་ན་སྨྲས་པ། ཁོ་བོ་ལ་དེས་ཅི་ཞིག་བྱས། ཁོ་བོས་བརྩོན་འགྲུས་ལ་གནས་ཏེ་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་པས་གནས་ནས་བསམ་གཏན་དང་པོ་ལ་བརྟེན་ཏེ་རྫུ་འཕྲུལ་འགྲུབ་པར་མ་བྱས་སམ་ཞེས་དེའི་ཚིག་སྨྲས་མ་ཐག་ཁོ་ནར་བྱས་པ་མི་གཟོ་བས་རྫུ་འཕྲུལ་ལས་ཉམས་པར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་བྱས་པ་མི་གཟོ་བས་རྫུ་འཕྲུལ་ལས་ཉམས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདི་འདས་པ་ན་ཡང་བྱས་པ་མི་གཟོ་བས་རིག་སྔགས་ལས་ཉམས་པ་དེ་ཉོན་ཅིག་
དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་བ་དང་། ཞེས་བྱ་བ་ནས་སྐྱེ་བོ་དང་། མི་མང་པོས་རབ་ཏུ་གང་བས་རྒྱལ་སྲིད་བྱེད་དུ་འཇུག་གོ་ཞེས་བྱ་བའི་བར་དུ་སྟེ། དེ་ལ་རིག་སྔགས་དང་གསང་སྔགས་འཆང་གདོལ་པ། རིག་སྔགས་དང་གསང་སྔགས་སུ་མཁས་པ་ཞིག་ཡོད་དེ། དེས་ས་འཛིན་གྱི་རིག་སྔགས་སྦྱར་ནས་རྫུ་འཕྲུལ་གྱིས་རི་བོ་སྤོས་ཀྱི་ངད་ལྡང་ལས་དུས་མ་ཡིན་པ་དང་། དུས་ཚིགས་མ་ཡིན་པའི་མེ་ཏོག་དང་འབྲས་བུ་དག་བླངས་ནས་རྒྱལ་པོ་ཚངས་སྦྱིན་ལ་འབུལ་བ་བྱེད་དོ། །རྒྱལ་པོ་ཚངས་སྦྱིན་དེ་ལ་མངོན་པར་དགའ་ནས་བྱ་དགའ་སྦྱིན་པར་བྱེད་དོ། ཇི་ཙམ་ན་བྲམ་ཟེའི་ཁྱེའུ་ཞིག་གསང་སྔགས་ངོན་དུ་གཉེར་ཞིང་གསང་སྔགས་ཚོལ་བ་ན་བརྒྱུད་པ་ལས་ཐོས་ནས་ཡུལ་ནས་བཱ་རཱ་ཎ་སིར་སོན་ཏེ། དེ་ནས་ལམ་གྱིས་དུབ་པ་ངལ་སོས་ནས་རིག་སྔགས་དང་གསང་སྔགས་འཆང་གདོལ་པ་དེའི་དྲུང་དུ་སོང་སྟེ་ཕྱིན་ནས་སྨྲས་པ། མཁན་པོ་ལ་བདག་བསྙེན་བཀུར་བགྱིད་པར་འཚལ་ལོ། །ཅིའི་ཕྱིར། རིག་སྔགས་ཀྱི་སླད་དུའོ། །དེས་ཚིགས་སུ་བཅད་པས་སྨྲས་པ། རིག་སྔགས་སུ་ལའང་མི་སྦྱིན་ཏེ། །རིག་སྔགས་དང་ནི་ལྷན་ཅིག་འཆི། །ཡང་ན་རིག་གདོལ་པ་དེའི་དྲུང་དུ་སོང་སྟེ་ཕྱིན་ནས་སྨྲས་པ། མཁན་པོ་ལ་བདག་བསྙེན་བཀུར་བགྱིད་པར་འཚལ་ལོ། །ཅིའི་ཕྱིར། རིག་སྔགས་ཀྱི་སླད་དུའོ། །དེས་ཚིགས་སུ་བཅད་པས་སྨྲས་པ། རིག་སྔགས་སུ་ལའང་མི་སྦྱིན་ཏེ། །རིག་སྔགས་དང་ནི་ལྷན་ཅིག་འཆི། །ཡང་ན་རིག་དང་བསྙེན་བཀུར་དང་། ནོར་གྱིས་རིག་སྔགས་སྦྱིན་པར་བྱ། །དེས་སྨྲས་པ། མཁན་པོ་གལ་ཏེ་དེ་ལྟ་ལགས་ན་བདག་ཅག་བསྙེན་བཀུར་བགྱིད་ན་དུས་ཇི་ཙམ་གྱི་བར་དུ་བགྱི། དེས་སྨྲས་པ། ལོ་བཅུ་གཉིས་ཀྱི་བར་དུ་བསྙེན་བ་ཀུར་བྱས་ན་སྦྱིན་ནམ་མི་སྦྱིན་དུ་ཟད་དོ། །དེ་ཤིན་ཏུ་རིག་སྔགས་ངོན་དུ་གཉེར་བ་ཞིག་པས་ཁས་བླངས་སོ། །དེ་ནས་མགུ་བར་བྱ་བ་ལྷུར་བླངས་ནས་གུས་པར་བྱས་ཏེ་བསྙེན་བཀུར་བྱ་བར་བརྩམས་སོ། །ཇི་ཙམ་དུས་གཞན་ཞིག་ན་གདོལ་པ་དེ་ཆང་གིས་མྱོས་ནས་ཁྱིམ་དུ་འོངས་སོ། །བྲམ་ཟེའི་ཁྱེའུ་དེས་བསམས་པ། མཁན་པོ་འདི་མ་འོས་པར་ཆང་གེས་མྱོས་ཀྱིས་འདིའི་གློར་ཉལ་བར་བྱའོ་སྙམ་མོ། །ཇི་ཙམ་ན་གདོལ་པ་དེ་མ་ལ་ནས་འགྲེ་བར་བརྩམས་ཏེ་དེ་འགྲེས་པ་དང་ཁྲིའི་ངོས་ཆག་པ་བྲམ་ཟེའི་ཁྱེའུ་ཡིས་ཐོས་ནས་སད་དེ་དེས་བསམས་པ། མཁན་པོ་སྡུག་བསྔལ་ཞིང་ཉལ་བར་འགྱུར་གྱིས། མལ་བདག་གིས་
ཁྲིའི་ངོས་སུ་རྒྱབ་གཏད་དོ་སྙམ་ནས། དེས་ཁྲིའི་ངོས་སུ་རྒྱབ་གཏད་ནས་འདུག་གོ །འདི་ནི་ཆོས་ཉིད་ཡིན་ཏེར་རོ་བ་རྣམས་ལས་གང་སྟོབས་དང་ལྡན་པ་དེ་ནི་ཐུན་དང་པོས་མྱོས་པ་སངས་པར་འགྱུར་ན། དེ་ཆང་ལུ་བའི་ཤུགས་ཀྱིས་བྲམ་ཟེའི་ཁྱེའུའི་རྒྱབ་ལ་སྐྱུགས་བས་གཏོར་ཏོ། །དེས་བསམས་པ། གལ་ཏེ་བདག་གིས་ལུས་བསྒུལ་ཏམ་ཚིག་ཕྱུང་ན་མཁན་པོས་ཐོས་ཏེ་སད་ནས་སླར་གཉིད་ལྡོག་པར་མི་འགྱུར་བ་གང་ཡིན་པའི་གནས་འདི་ཡོད་དོ་སྙམ་ནས་དེ་མནགས་ནས་འདུག་གོ །ཇི་ཙམ་ན་གདོལ་པ་དེ་རང་ཉིད་སད་པ་དང་དེ་ལྟ་བུའི་ངན་པ་དེ་མཐོང་ནས་དེ་ནས་དྲིས་པ་འདི་སུ་ཡིན་དེས་སྨྲས་པ། མཁན་པོ་བདག་ནི་བདེ་བའི་ཟླ་བ་ལགས་སོ། །བུ་འདི་ལྟར་འདུག་སྟེ་ཅི་བྱེད། དེས་ཇི་ལྟར་གྱུར་པ་རྣམས་སྨྲས་པ་དང་། དེ་ཡང་ལྷག་པར་དགའ་ནས་སྨྲས་པ། བུ་ཁོ་བོ་མགུ་བར་གྱུར་གྱིས་སོང་ལ་ཁྲུས་བྱོས་ཏེ་ཤོག་ཤིག་དང་ཁྱོད་ལ་རིག་སྔགས་སྦྱིན་ནོ། །དེས་ཁྲུས་བྱས་ཏེ་འོངས་པ་དང་དེས་དེ་ལ་རིག་སྔགས་བྱིན་ནོ། །བྲམ་ཟེ་རྣམས་ནི་རྒོད་བག་ཅན་ཡིན་པས་དེས་ནོགས་མ་ཐུབ་སྟེ་བསམས་པ། རེ་ཞིག་སྔགས་འདི་འདི་ཉིད་དུ་སད་ལ་དེ་ནས་གཞན་དུ་འགྲོའོ་སྙམ་ནས། དེས་རིག་སྔགས་དེ་སྦྱར་ཏེ་ནམ་མཁའ་ལ་འཕངས་ནས་མྱུར་བར་རི་བོ་སྤོས་ཀྱི་གད་ལྡང་ལ་སོང་སྟེ་དུས་མ་ཡིན་པ་དང་དུས་ཚིགས་མ་ཡིན་པའི་མེ་ཏོག་དང་། འབྲས་བུ་དག་བླངས་ཏེ་འོངས་ནས་དེས་དེ་དག་རྒྱལ་པོའ་མདུན་ན་འདོན་ལ་བྱིན་ནོ། །དེས་ཀྱང་རྒྱལ་པོ་ཚངས་སྦྱིན་ལའོ། །རྒྱལ་པོས་སྨྲས་པ། ཁྱོད་ཀྱིས་འདི་སུ་ལས་འོངས། དེས་སྨྲས་པ། ཡུལ་ཐག་རིང་པོ་ནས་བྲམ་ཟེའི་ཁྱེའུ་ཞིག་མཆིས་ཏེ། དེས་འདི་དག་བདག་ལ་སྩལ་ཏོ། །དེ་ནི་ལྷག་པར་རིག་སྔགས་དང་གསང་སྔགས་འཆང་ཞིང་བྲམ་ཟེ་འདོད་པ་ཆུང་བ་ལགས་ཀྱིས། གདོལ་པ་འཇིག་རྟེན་ཐམས་ཅད་ཀྱིས་སྨད་པ་འདིས་ཅི་ཞིག་བགྱི། དེ་དབང་བའི་འཚོ་བ་བཀུམ་སྟེ་བྲམ་ཟེའི་ཁྱེའུ་འདི་ལ་སྩལ་དུ་གསོལ། རྒྱལ་པོས་སྨྲས་པ། དེ་བཞིན་དུ་གྱིས་ཤིག །དེ་ནས་མདུན་ན་འདོན་གྱིས་གདོལ་པའི་འཚོ་བ་བཅད་ནས་བྲམ་ཟེའི་ཁྱེའུ་དེ་ལ་བྱིན་ནོ། །དེ་བྱས་པ་མི་གཟོ་བ་དེས་རིག་སྔགས་
དེ་ལས་ཡོངས་སུ་ཉམས་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གདོལ་པ་གང་ཡིན་པ་དེ་ནི་འོད་སྲུང་སྟོབས་བཅུ་ལྡན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་རིག་སྔགས་ལས་ཡོངས་སུ་ཉམས་པར་གྱུར་ཏོ། །ད་ལྟར་ཡང་འདི་རྫུ་འཕྲུལ་ལས་ཡོངས་སུ་ཉམས་པར་གྱུར་ཏོ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། ཅི་ནས་ཀྱང་བྱས་པ་གཟོ་བ་དང་བྱས་པ་ཚོར་བ་ཅན་དུ་བྱ་སྟེ། ཆུང་དུ་བྱས་པ་ཡང་ཆུད་མི་གཟན་ན་མང་པོ་ལྟ་སྨོས་ཀྱང་ཅི་དགོས་ཏེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དེ་ནས་བཅོམ་ལྡན་འདས་ཇི་ཙམ་བཞེད་ཀྱི་བར་དུ་རྒྱལ་པོའ་ཁབ་ཏུ་བཞུགས་ནས། དགེ་སློང་རྣམས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱི་མདུན་དུ་བདར་ནས་ག་ཡཱ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་ག་ཡཱ་ར་བྱོན་ནས་ག་ཡཱ་ན་བཞུགས་སོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་འབྲས་སཱ་ལུ་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་དབུལ་བ་བཏང་བ་དང་། ལྷ་སྦྱིན་གྱིས་མ་སྐྱེས་དགྲ་ལ་སྨྲས་པ། རྒྱལ་པོ་བགྲེས་པོ་དགེ་སྦྱོང་གཽ་ཏ་མ་ལ་ཅི་འདྲ་བར་བྱ་བ་བྱེད་པ་གཟིགས་ལ། བདག་ཅག་ལྗོངས་རྒྱུ་ཞིང་མཆི་བ་ན་བདག་ཅག་ལ་ཡང་བསོད་སྙོམས་ཀྱིས་མི་བྲེལ་བར་གྱིས་ཤིག །ལྷ་སྦྱིན་ཡང་འཁོར་ལྔ་བརྒྱས་བསྐོར་ཏེ་ལྗོངས་རྒྱུ་ཞིང་འདོང་བ་དང་། ལྷ་སྦྱིན་ལ་རྒྱལ་པོ་མ་སྐྱེས་དགྲས་འབྲས་སཱ་ལུ་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ལམ་དུ་བསྐུར་བ་དགེ་སློང་རྣམས་ཀྱིས་མཐོང་ནས་བསམས་པ། ཤིང་རྟ་ལྔ་བརྒྱ་ཙམ་པོ་འདི་སུ་ཞིག་ལས་འོངས་སྙམ་སྟེ། དེ་རྣམས་ངོ་མཚར་སྐྱེས་ནས་ལམ་ནས་འགྲོ་བའི་མི་དག་ལ་དྲིས་པ་དང་དེ་རྣམས་ཀྱིས་རྒྱས་པར་སྨྲས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ་བཙུན་པ་རྒྱལ་པོ་མ་སྐྱེས་དགྲ་སྣོད་མ་ལགས་པས་སྣོད་མ་ལགས་པར་ཆར་ཕབ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་མ་སྐྱེས་
དགྲ་སྣོད་མ་ཡིན་པས་སྣོད་མ་ཡིན་པར་ཆར་ཕབ་པ་ད་ལྟར་གྱི་འབའ་ཞིག་ཏུ་མ་ཟད་དེ་ཇི་ལྟར་འདིས་འདས་པ་ན་ཡང་སྣོད་མ་ཡིན་པར་ཆར་ཕབ་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་རྡལ་མེད་པའི་དགོན་པའི་གནས་ཞིག་ན་དྲང་སྲོང་རྣམས་ཀྱི་བསྟི་གནས་མེ་ཏོག་དང་འབྲས་བུ་སྣ་ཚོགས་དང་ལྡན་པ་ཞིག་ཡོད་དེ། དེ་ན་དྲང་སྲོང་ཟས་སུ་རྩ་བ་དང་། ཆུ་དང་། འབྲས་བུ་ཟ་བ། རལ་པ་ཅན་ཤིང་ཤུན་གྱོན་པ། འབྲས་བུ་ལྷུང་བ་ལ་ལོངས་སྤྱོད་པ་དག་གནས་སོ། །ཇི་ཙམ་ན་བསྟི་གནས་དེ་ན་ཡོད་པའི་ཤིང་ཨ་མྲའི་ཡལ་ག་འབྲས་བུ་ཅན་དག་འབྲས་བུ་སྨིན་པས་གཡུར་ཟ་ཞིང་འདུག་གོ །དྲང་སྲོང་རྣམས་ཀྱིས་འབྲས་བུ་བསླངས་པ་ན་ཤིང་དེ་ལ་གནས་པའི་ལྷ་གང་ཡིན་པ་དེ་སེར་སྣའི་ཟིལ་གྱིས་ནོན་པས་མ་བྱིན་ནོ། །དེ་ནས་དྲང་སྲོང་དེ་རྣམས་ཀྱིས་དྲང་སྲོང་གཅིག་བསྟི་གནས་སུ་འདུག་ཏུ་བཅུག་ནས་རྩ་བ་དང་འབྲས་བུའི་ཕྱིར་འཁྱམ་དུ་དོང་མ་ཐག་ཏུ་ཆོམ་རྐུན་པ་ལྔ་བརྒྱ་བསྟི་གནས་སུ་ལྷགས་ནས་དེ་རྣམས་ཀྱིས་ཤིང་དེ་མཐོང་སྟེ། དེ་རྣམས་ཀྱིས་སྨྲས་པ། བདག་ཅག་གིས་འབྲས་བུ་ཇི་ལྟར་ལོངས་སྤྱོད་པར་བྱ། ཆོམ་རྐུན་པའི་སྡེ་དཔོན་གྱིས་སྨྲས་པ། སྟ་རེས་ཤིང་རྩ་ནས་བཅད་ལ་འབྲས་བུ་རྣམས་བཟའོ་ཞེས་དེ་སྐད་ཅེས་སྨྲས་པ་དང་། ལྷས་འབྲས་བུ་ཐམས་ཅད་ས་ལ་བླགས་ནས་ཆོམ་རྐུན་རྣམས་ཀྱིས་ཇི་ཙམ་འདོད་པ་ཟོས་ནས་དོང་ངོ་། །དྲང་སྲོང་རྣམས་ལྷགས་ནས་དྲིས་པ། ཤིང་ཨ་མྲའི་འབྲས་བུ་རྣམས་སུས་ཟོས། དྲང་སྲོང་དེས་ཚིགས་སུ་བཅད་པས་སྨྲས་པ། ཞི་བ་ཚངས་པར་སྤྱོད་རྣམས་ལ། ཤིང་གྱི་འབྲས་བུ་མ་བྱིན་གྱི། །རྐུན་པོ་སྡིག་བྱེད་དེ་དག་ལ། །འབྲས་བུ་རྣམས་ནི་བྱིན་པར་གྱུར། །དེ་རྣམས་ཀྱིས་དྲིས་པ། དྲང་སྲོང་དེ་ཇི་ལྟ་བུ་ཡིན། །དེས་ཇི་ལྟར་གྱུར་པ་སྨྲས་པ་དང་དེ་རྣམས་ཀྱིས་སྨད་པར་བརྩམས་པ། སེར་སྣའི་ཟིལ་གྱིས་ནོན་པའི་ལྷས་འབྲས་བུ་དྲང་སྲོང་རྣམས་ལ་མ་བྱིན་གྱི། སྣོད་མ་ཡིན་པའི་རྐུན་པོ་རྣམས་ལ་བྱིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། །དེའི་ཚེ་དེའི་དུས་ཀྱི་ལྷ་གང་ཡིན་པ་དེ་ནི་མ་སྐྱེས་དགྲ་
འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ཆོམ་རྐུན་པའི་སྡེ་དཔོན་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེའི་ཚེ་ན་ཡང་མ་སྐྱེས་དགྲ་འདི་ལྟར་གྱུར་པ་ན་སྣོད་མ་ཡིན་པས་སྣོད་མ་ཡིན་པར་ཆར་ཕབ་པོ། །ད་ལྟར་ཡང་སྣོད་མ་ཡིན་པ་འདིས་སྣོད་མ་ཡིན་པར་ཆར་ཕབ་པོ། །དེ་ནས་བཅོམ་ལྡན་འདས་ཡུལ་མ་ག་་ནས་ལྗོངས་རྒྱུ་ཞིང་གཤེགས་པ་ན་རྒྱལ་པོའ་ཁབ་ཏུ་བྱོན་ནས། རྒྱལ་པོའ་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །ལྷ་སྦྱིན་ནི་རྒྱལ་པོའི་ཁབ་ཏུ་གནས་པའི་སྐྱེ་བོའ་ཚོགས་ལ་རྒྱུན་ཁོ་ནར་འཚེ་བར་བྱེད་དོ། །གང་དང་གང་གཙེས་པ་དེ་བཅོམ་ལྡན་འདས་ཀྱི་སྙན་དུ་གསོལ་བ་གཏོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྣམ་སྦྱར་ཁྱེར་ལ་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་སོང་ལ་རྒྱལ་པོའི་ཁབ་ཀྱི་ལམ་པོ་ཆེ་དང་སྲང་དང་། བཞི་མདོ་དང་། སུམ་མདོ་རྣམས་སུ་ཁྱིམ་བདག་དང་བྲམ་ཟེ་རྣམས་ལ་ལྷ་སྦྱིན་ནམ་ལྷ་སྦྱིན་གྱི་ཕྱོགས་ཀྱིས་འཚེར་བཅུག་པ་གང་ཡིན་པ་དེ་རྣམས་ནི་སངས་རྒྱས་སམ། ཆོས་སམ། དགེ་འདུན་གྱི་དང་འབྲེལ་བ་མ་ཡིན་ནོ་ཞེས་སྒོ་ཤིག །གལ་ཏེ་ལྷ་སྦྱིན་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡི་ནོ་ཞེས་ཟེར་ན་མཐུ་ཆེན་པོར་གྱུར་བ་ལས་ད་ནི་རྫུ་འཕྲུལ་དེ་ལས་ཡོངས་སུ་ཉམས་སོ་ཞེས་སྨྲས་ཤིག །དེ་སོང་ནས་རྒྱལ་པོའ་ཁབ་ཀྱི་གྲོང་ཁྱེར་གྱི་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་བྲམ་ཟེ་དང་ཁྱིམ་བདག་རྣམས་ལ་བསྒོ་ནས་དེ་རྣམས་ཕྱིན་ཆད་བཅོམ་ལྡན་འདས་ཀྱི་སྙན་དུ་གསོལ་བ་མི་གཏོང་ངོ་། །བཅོམ་ལྡན་འདས་སྙུན་གྱིས་ཐེབས་ནས་འཚོ་བྱེད་ཀྱིས་སྨན་མར་ལྕགས་མངའ་ཞེས་བྱ་བ་བཅོམ་ལྡན་འདས་ལ་ཕུལ་ལོ། །དེ་ནས་བཅོམ་ལྡན་འདས་ཀྱིས་སྨན་པའི་རྒྱལ་པོ་འཚོ་བྱེད་ལ་བཀའ་སྩལ་པ། འཚོ་བྱེད་ངོ་མཚར་ཆེའམ། བཅོམ་ལྡན་འདས་ངོ་མཚར་ཆེ་ལགས་སོ། །འཚོ་བྱེད་ཡ་མཚན་ཆེའམ། བཅོམ་ལྡན་འདས་ཡ་མཚན་ཆེ་ལགས་སོ། །འཚོ་བྱེད་ཤེས་སམ། བཅོམ་ལྡན་འདས་འཚལ་ལགས་སོ། །འཚོ་བྱེད་མི་ཤེས་སམ། བདེ་བར་གཤེགས་པ་མ་འཚལ་ལགས་སོ། །
འཚོ་བྱེད་ངོ་མཚར་ཆེ་བ་ཅི་ཡིན། བཅོམ་ལྡན་འདས་པ་རྣམས་རན་སྤྱོད་ཅིང་ཆབ་འཚལ་བ་དེ་ལས་བདུད་རྩི་འདི་འབྱུང་ལ། དེ་ལས་ཀྱང་བསྒྲལ་བའི་སྨན་མར་ལྕགས་མདའ་ཞེས་བགྱི་བ་འབྱུང་ལགས་སོ། །འཚོ་བྱེད་ཡ་མཚན་ཆེ་བ་ཅི་ཡིན། བཅོམ་ལྡན་འདས་སངས་རྒྱས་བྱུང་བ་དང་། དམ་པའི་ཆོས་བཤད་པ་དང་། དགེ་འདུན་ལེགས་པར་སྒྲུབ་པ་ལགས་སོ། །ཤེས་པ་ཅི་ཡིན། བཅོམ་ལྡན་འདས་སྐྱེ་བ་མཆིས་ན་གདོན་མི་འཚལ་བར་འགུམ་ལགས་སོ། །མི་ཤེས་པ་ཅི་ཡིན། བཅོམ་ལྡན་འདས་གང་ཞིག་གང་དུ་འགུམ་པ་དེ་མ་འཚལ་ལགས་སོ། །དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་དགོངས་ཏེ་བཀའ་སྩལ་པ་འཚོ་བྱེད་ཀྱིས་འཚལ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པ་ན་ཡང་འདིས་དའི་དགོངས་ཏེ་བཀའ་སྩལ་པ་ཤེས་པར་གྱུར་བ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་པ་དང་བུ་མོ་ཞིག་བཙས་ནས་ཉི་མ་བདུན་གསུམ་ཉི་ཤུརྩ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་གདུ་བུ་ཅན་ཞེས་བྱ་བར་མིང་བཏགས་སོ། །དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ། དེ་ཡང་རིགས་དང་མཐུན་པར་མིང་བཏགས་སོ། །དེས་བསམས་པ། བདག་ཅག་ལ་བུ་ལོན་དེད་པ་དང་ནོར་འཕྲོག་པ་བཙས་ཀྱིས་ཟོང་ཁྱེར་ཏེ་ཡུལ་གྱི་མཐར་འགྲོའོ། །དེས་ཡང་བསམས་པ། བདག་གི་ཆུང་མ་འདི་དར་ལ་བབ་པའི་གཟུགས་དང་ལང་ཚོ་ལ་བབ་པས། བདག་གིས་འདི་ལ་ཀཱར་ཥཱ་པ་ཎ་མང་པོ་གཏད་དེ་སོང་ན་སྐྱེས་
པ་གཞན་དང་ལྷན་ཅིག་ཆུད་གསོན་པར་བྱེད་པར་འགྱུར་བའི་གནས་གང་ཡིན་པ་དེ་ཡོད་ཀྱིས་མ་ལ་བདག་གིས་འདི་ལ་ཀཱར་ཥཱ་པ་ཎ་ཉུང་ཞིག་བྱིན་ལ་འགྲོའོ་སྙམ་ནས། དེས་དེ་ལ་ཀཱར་ཥཱ་པ་ཎ་ཉུང་ཞིག་བྱིན་ནས་ལྷག་མ་རྣམས་གསེར་གྱི་བུམ་པའི་ནང་དུ་བླུགས་ཏེ། དེའི་མགྲིན་པ་མུ་ཏིག་གི་ཕྲེང་བས་བཅིངས་ནས་དུར་ཁྲོད་ཀྱི་ཤིང་རྟ་རྣ་ཞེས་བྱ་བའི་དྲུང་དུ་སྦས་ནས་ཟོང་ཐོགས་ཏེ་ཡུལ་གྱི་མཐར་སོང་ངོ་། །དེ་དེ་ན་རྙེད་པ་མང་པོ་དང་ལྡན་པས་དེས་དེ་ཉིད་དུ་བུད་མེད་གཅིག་བླངས་ཏེ་འདུག་ནས་དེ་ལ་བུ་ཡང་མང་དུ་བཙས་སོ། །དེ་ནས་ཆུང་མ་སྔ་མ་དེས་གདུ་བུ་ཅན་དང་ཁྱེའུ་གཉིས་ལག་ལས་དང་གཉེན་གྱི་མཐུས་གསོས་བསྐྱེད་དོ། །དེ་གཉིས་ཀྱིས་སྨྲས་པ། བདག་ཅག་གི་ཕ་གར་མཆིས། དེས་སྨྲས་པ། བུ་ཡུལ་ཆེ་གེ་མོ་ཞེས་བྱ་བའི་གྲོང་ག་གེ་མོ་ཞེས་བྱ་བ་དེ་ན་དེ་ནོར་ཆེན་པོ་དང་ལྡན་ཞིང་འདུག་གོ་ཞེས་ཐོས་ཀྱིས་སོང་དང་གལ་ཏེ་ཅུང་ཟད་བྱིན་ན་ཁྱེད་ཀྱི་འཚོ་བའི་རྐྱེན་དུ་འགྱུར་རོ།། །།འདུལ་བ་གཞི། བམ་པོ་དགུ་བཅུ་རྩ་བརྒྱད་པ། དེ་ཕ་ཚོལ་ཞིང་རིམ་གྱིས་དེའི་དྲུང་དུ་ཕྱིན་ནས་དེ་སྲང་ན་འཁྱམ་པ་ན་ཕས་བཞིན་རས་ལས་ངོ་ཤེས་ནས་བོས་ཏེ་སྨྲས་པ། ཁྱོད་གང་ནས་འོངས། གང་དུ་འགྲོ་འདོད། །དེས་རྒྱས་པར་སྨྲས་པ་དང་དེས་བསམས་པ། བདག་གི་བུ་དེ་ནི་འདི་ཁོ་ན་ཡིན་ནོ་ཞེས་དེས་དེ་བཟུང་སྟེ། བུ་ཁྱོད་སུ་ལ་ཡང་འདི་བདག་གི་ཕ་ཡིན་ནོ་ཞེས་མ་སྨྲ་ཤིག་ཅེས་སྨྲས་ནས་དེ་དེ་ལ་ཤིན་ཏུ་སྡུག་པར་བྱེད་དོ། །དེ་ནས་བུ་གཞན་རྣམས་ཀྱིས་སྨྲས་པ། ཡབ་ཁྱེའུ་འདི་སུའི་ལགས། དེས་སྨྲས་པ། འདི་ངའི་གྲོགས་པོ་ཞིག་གི་བུ་ཡིན་ནོ། །དེ་རྣམས་ཀྱིས་བསམས་པ། ཇི་ལྟར་འདི་ལ་ཤིན་ཏུ་སྡུག་པར་བྱེད་པ་ལས་ན་གདོན་མི་ཟ་བར་འདི་ཉིད་ཀྱི་བུ་ཡིན་ནོ་སྙམ་ནས་དེ་རྣམས་ཀྱིས་ཕན་ཚུན་གྲོས་བྱ་བར་བརྩམས་པ། འདི་ནི་མས་དབྱེན་གྱི་སྤུན་ཡིན་ནོ་སྙམ་མོ། །དེས་བསམས་པ། ཤ་འཁོན་རྣམས་ཀྱི་ནང་ན་ནི་འདི་ལྟ་སྟེ། ཆེན་ཆུན་ནི་ཐ་ཆད་ཡིན་པས་འདི་བསད་པར་འགྱུར་བའི་གནས་གང་ཡིན་པ་འདི་ཉིད་ཡོད་ཀྱིས་གཏང་ངོ་། །གལ་ཏེ་ཅུང་ཟད་བརྫངས་ན་ནོར་ལ་སོགས་པའི་ཕྱིར་ལམ་ཀར་བསད་པར་འགྱུར་གྱིས། །མ་
ལ་བདག་གིས་འདི་ལ་བརྗེད་བྱང་ཅིག་བྱིན་ཏེ་གཏང་ངོ་སྙམ་དུ་བསམས་ནས་བྲིས་པ། གྲོང་ཁྱེར་གྱི་ནི་གྲོང་རྡལ་རྟ་རྣའི་དྲུང་། །ས་ཡི་ཤར་དུ་དཔག་ཚད་ཀྱིས་བཅད་པར། །མཁས་པས་བག་ཡོད་པར་ནི་བརྐོ་བྱས་ན། །བདག་གི་ནོར་གྱི་སྐལ་བ་འཐོབ་འགྱུར་གྱིས། །མགུལ་ཆིངས་གང་ཡིན་དེ་ནི་གདུབ་ཅན་བྱིན། །དེས་བརྗེད་བྱང་དེ་ཁྱེར་ཏེ་སོང་བ་དང་ལམ་ཀར་མས་དབྱེན་གྱི་སྤུན་རྣམས་ཀྱིས་བཟུང་ནས་སྨྲས་པ། ཁྱོད་ཀྱིས་ཡབ་ལས་ཅི་ཐོབ། དེས་སྨྲས་པ། འདི་ནི་བརྗེད་བྱང་ཡིན་ཏེ་ཅི་ཡང་མེད་དོ། །དེ་རྣམས་ཀྱིས་བསམས་པ། ཕས་འདི་བྲིད་ནས་བཏང་ངོ་ཞེས་དེ་རྣམས་ཀྱིས་དེ་བཏང་ངོ་། །རིམ་གྱིས་རང་གི་ཁྱིམ་དུ་ཕྱིན་ནས་ལམ་གྱིས་དུབ་པ་ངལ་སོས་པ་དང་མས་སྨྲས་པ། ཁྱོད་ཀྱིས་ཕ་ལས་ཆུང་ཟད་ཅི་ཐོབ། དེས་སྨྲས་པ། འདི་ནི་བརྗེད་བྱང་ཡིན་ཏེ་ཅི་ཡང་མེད་དོ། །དེས་སྨྲས་པ། བུ་ཁྱོད་དེས་བསླུས་ཏེ་ལམ་གྱི་ཚེགས་ཕྱུང་བར་ཟད་ཀྱི་ཆུད་ཟད་ཀྱང་མ་རྙེད་དོ། །དེས་སྨྲས་པ། ཡུམ་བདག་ཉིད་ཆེན་པོ་དེ་བདག་ལ་མི་འདྲིད་དོ་ཞེས་བྱས་ནས་དེས་བརྗེད་བྱང་དེ་དཔྱད་པར་བརྩམས་ཏེ། གྲོང་ཁྱེར་ཞེས་བྱ་བ་ནི་གང་དུ་བཙས་པ་དེ་ནི་གྲོང་ཁྱེར་དུ་འདོད་དོ། །གྲོང་རྔལ་ཞེས་བྱ་བ་ནི་གང་དུ་རོ་བསྲེགས་པའོ། །རྟ་རྣའི་དྲུང་ཞེས་བྱ་བ་ལ་རྟ་ཞེས་བྱ་བ་ནི་རྟ་རྣམས་ཏེ་དེའི་རྣ་བ་ཞེས་བྱ་བའི་ཤིང་ནི་རྟ་ན་སྟེ། དེའི་དྲུང་ན་ཞེས་སྨྲས་པ་ཡིན་ནོ། །སའི་ཤར་དུ་ཞེས་བྱ་བ་ནི་ཤར་ཕྱོགས་སུའོ། །དཔག་ཚད་ཀྱིས་བཅད་པར་ཞེས་བྱ་བ་ནི་གཉའ་ཤིང་གང་ཙམ་གྱིས་བཅད་པར་རོ། །དེས་དེ་ལྟར་ཚིགས་བཅད་ཀྱི་དོན་དཔྱད་ནས་མུན་ཚབ་ཚུབ་ཙམ་ན་དུར་ཁྲོད་དུ་སོང་སྟེ་དེའི་ཉེ་འཁོར་དུ་དེས་བལྟས་ན་ཤིང་རྟ་རྣ་ཞིག་ཡོད་པ་དེའི་ཤར་གྱི་ངོས་སུ་གཉའ་ཤིང་གང་གཅའ་ཏེ་བརྐོས་པ་དང་། ཅི་ཙམ་ན་གསེར་གྱི་བུམ་པ་མགུལ་མུ་ཏིག་གི་ཕྲེང་བས་བཅིངས་པ་ཞིག་མཐོང་ནས། དེ་མགུ་བས་དེ་བླངས་ནས་ཁྱིམ་དུ་སོང་སྟེ་མུ་ཏིག་གི་ཕྲེང་བ་ནི་བཀྲོལ་ཏེ་གདུ་བུ་ཅན་ལ་བྱིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་བུ་གང་ཡིན་པ་དེ་ནི་འཚོ་བྱེད་འདི་ཉིད་ཡིན་ཏེ། དེ་ན་ཡང་འདིས་ངའི་བསམས་ཏེ་
སྨྲས་པ་ཤེས་སོ། །ད་ལྟར་ཡང་འདིས་ངའི་དགོངས་ཏེ་བཤད་པ་ཤེས་སོ། །འཚོ་བྱེད་ཀྱིས་བསམས་པ། བཅོམ་ལྡན་འདས་ནི་རྡོ་རྗེའི་སྐུ་མངའ་ལ་སྐུ་ཆེ་བ་ཡིན་པས་དེ་ལ་མར་ཉུང་དུས་ནི་གདངས་པར་བྱ་མི་ནུས་སོ་སྙམ་དུ་བརྟགས་ནས་དེས་མར་སྲང་སུམ་བཅུ་རྩ་གཉིས་སྲད་ལ་བཅལ་ཏེ་ལྷུང་བཟེད་བཟེད་ནས་བཅོམ་ལྡན་འདས་ལ་གསོལ་ཏེ། །བཅོམ་ལྡན་འདས་ཀྱིས་ལྷུང་བཟེད་ཀྱི་ལྷག་མ་དགེ་སློང་རྣམས་ལ་འབྲིམ་དུ་བཅུག་པ་དང་། འཚོ་བྱེད་དགེ་སློང་རྣམས་ཀྱིས་བཅོམ་ལྡན་འདས་ཀྱིས་ལྷུང་བཟེད་ཀྱི་ལྷག་མ་བོར་རོ་ཞེས་བྱས་ནས་ཕྱག་བྱས་སོ། །ལྷ་སྦྱིན་གྱིས་བསམས་པ། བདག་གིས་ཀྱང་མར་བཏུང་ངོ་སྙམ་ནས་དེས་འཚོ་བྱེད་ལ་དྲིས་པ། འཚོ་བྱེད་དགེ་སྦྱོང་གཽ་ཏ་མས་མར་ཇི་ཙམ་གྱི་ཚད་ཅིག་གསོལ། དེས་སྨྲས་པ། སྲང་སུམ་བཅུ་སོ་གཉིས་སོ། །དེས་སྨྲས་པ། ཁོ་བོས་ཀྱང་སྲང་སུམ་བཅུ་རྩ་གཉིས་བཏུང་ངོ་། །འཚོ་བྱེད་ཀྱིས་སྨྲས་པ། བཅོམ་ལྡན་འདས་ནི་རྡོ་རྗེའི་སྐུ་མངའ་ལ་སྐུ་ཆེ་བས་འདི་ཙམ་ཡང་འཇུ་བར་སྤྱོད་ཀྱི། ཁྱོད་ཀྱིས་ནི་འཇུ་བར་མི་ནུས་སོ། །དེས་སྨྲས་པ། ཁོ་བོ་ཡང་རྡོ་རྗེའི་ལུསཅན་ཡིན་ན་ཅིའི་ཕྱིར་མི་འཇུ། དེས་མར་སྲང་སུམ་བཅུ་རྩ་གཉིས་ལྷུང་བཟེད་ནས་འཐུངས་སོ། །བཅོམ་ལྡན་འདས་ཀྱིས་ནི་ལེགས་པར་ཞུའོ། །ལྷ་སྦྱིན་གྱིས་ནི་མ་ཞུའོ། །ཕྱི་དེ་ཉིན་པར་འཚོ་བྱེད་ཀྱིས་བཅོམ་ལྡན་འདས་ལ་འཇམས་གསོལ་ཏོ། །ལྷ་སྦྱིན་གྱིས་ང་རྒྱལ་བསྐྱེད་ནས་བཅོམ་ལྡན་འདས་ཀྱིས་ཀྱང་གསོལ་ཏོ་ཞེས་མར་མ་ཞུ་བཞིན་དུ་ཐུག་པ་འཐུངས་པས། སྤོས་གཟེར་ནས་གནད་དུ་གནོད་པའི་ཚོར་བ་ཉམས་སུ་མྱོང་བས་དེ་རྒྱུ་དེས་ན་སྡུག་བསྔལ་ཉམ་ང་བརྩུབ་པ། དོག་པ། ཡིད་དུ་མི་འོང་བའི་ཚོར་བ་ཉམས་སུ་མྱོང་ཞིང་ཉིན་དང་མཚན་དུ་གཉིད་མི་འོང་ངོ་། །ཚེ་དང་ལྡན་བ་ཀུན་དགའ་བོ་ནི་གཉེན་ལ་གདུང་བ་ཡིན་པས་དེས་གླེང་གཞི་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱི་ཕྱག་གླང་པོ་ཆེའི་སྣ་ལྟ་བུ་འཁོར་ལོ་དང་། བཀྲ་ཤིས་དང་། གཡུང་དྲུང་འཁྱིལ་པ་ཅན་བསོད་ནམས་བརྒྱ་ཕྲག་དུ་མས་བསྒྲུབས་པ། འཇིགས་པ་རྣམས་ཀྱི་དབུགས་འབྱིན་པར་མཛད་པའི་ཕྱག་མངོན་དུ་བརྐྱང་སྟེ་བྱ་རྒོད་ཀྱི་ཕུང་
པོའི་རི་བུག་ནས་ལྷ་སྦྱིན་གྱི་སྤྱི་བོར་བཞག་སྟེ་བདེན་པ་གསུངས་པ། ཇི་ལྟར་ང་བུ་གཅིག་པ་སྒྲ་ཅན་ཟིན་བཟང་པོ་ལ་དགོགས་པ་དེ་བཞིན་དུ་ལྷ་སྦྱིན་ལ་ཡང་ལྷག་ཆད་མེད་པ་ཡིན་ཞེ་ན། བདེན་པ་དེས་ནད་ཞི་བར་གྱུར་ཅིག་ཅེས་བདེན་པའི་ཆིག་གསུངས་མ་ཐག་ཁོ་ནར་ལྷ་སྦྱིན་གྱི་ནད་ཞི་བར་གྱུར་ཅིང་དེ་དབུགས་ཆད་པ་ལས་སླར་དབུགས་བྱུང་ནས་བཅོམ་ལྡན་འདས་ཀྱི་ཕྱག་ལ་གཏད་ནས་བརྟགས་ཏེ་དེས་ཤེས་ནས་དེས་བསམས་པ། དགེ་སྦྱོང་གཽ་ཏ་མའི་ལག་པ་ཡིན་ནོ་སྙམ་ན་དེ་བསྐལ་པ་མི་ཉུང་བར་ངན་གཡོའ་ཀུན་ཏུ་སྤྱོད་པ་དྲེགས་པའི་མཐུས་བསྒྲུབས་པའི་བསམ་པ་ཅན་ཡིན་པས་དེ་ལྟར་སངས་རྒྱས་བདག་ཉིད་ཆེན་པོས་ཚོར་བཞི་བར་མཛད་པ་དང་སྨྲས་པ། དོན་གྲུབ་ཁྱོད་སྨན་དཔྱད་ཁོང་དུ་ཆུད་པ་ནི་ལེགས་ན་འདིས་འཚོ་བར་ནུས་སམ། ཀུན་ཏུ་བཅོམ་ལྡན་འདས་ཀྱི་བདེན་པའི་གསུང་གིས་ལྷ་སྦྱིན་ཚོང་བ་དྲག་པོས་ཉེན་པས་སྲོག་དང་སྲོག་དང་འབྲལ་བ་ན་སོས་པར་མཛད་དོ། །ཞེས་སྒྲ་གྲགས་པ་དེ་ལྷ་སྦྱིན་གྱི་ཕྱོགས་ཤིན་ཏུ་ཞེན་པ་རྣམས་ཀྱིས་ཀྱང་ཐོས་ནས། བཅོམ་ལྡན་འདས་ལ་ཀྱེ་མའོ་འདི་ནི་བྱམས་པ་ཡང་དག་པ་དང་ལྡན། ཀྱེ་མ་འདི་ནི་སེམས་ཅན་རྣམས་ལ་ཐུགས་རྗེ་ལེགས་པར་བསྒོམས་པ་ཡིན་ནོ་ཞེས་ངོ་མཚར་དུ་འཛིན་པར་གྱུར་ཏོ། །དགེ་སློང་རྣམས་ཀྱིས་ལྷ་སྦྱིན་ལ་སྨྲས་པ། ལྷ་སྦྱིན་ཁྱོད་ནི་བཅོམ་ལྡན་འདས་ཀྱིས་སོས་པར་མཛད་ཀྱི་གཞན་དུ་ན་སྲོག་དང་བྲལ་བར་འགྱུར་རོ། །དེས་སྨྲས་པ། དེ་ནི་དབང་དུ་བྱེད་པའི་སྒྱུ་བ་ཤེས་ཏེ་དེས་འཇིག་རྟེན་དབང་དུ་བྱེད་དོ། །དགེ་སློང་རྣམས་ཀྱིས་སྨྲས་པ། ལྷ་སྦྱིན་ཁས་རླབས་དེ་ཐོང་ལ་རང་གི་སེམས་གཏན་ལ་ཕོག་ཤིག །ཁྱོད་ནི་བཅོམ་ལྡན་འདས་ཀྱིས་གསོས་སོ། །དེས་སྨྲས་པ། མར་ཞུ་ནས་ནད་ཞི་བར་ཟད་མོད་དེས་ཁོ་བོ་ལ་ཅི་ཞིག་བྱས། འདི་ནི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ་ཞེས་བྱས་ནས་དེ་རྣམས་ཆས་ཏེ། བཅོམ་ལྡན་འདས་གང་ན་བ་དེར་དོང་ནས་ལྷགས་བ་དང་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ།
བཙུན་པ་ལྷ་སྦྱིན་བྱ་པ་མི་གཟོ་བ་དང་། བྱས་པ་མི་ཚོར་བ་ལ་གཟིགས། བཅོམ་ལྡན་འདས་ཀྱི་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ་ཇི་ལྟར་འདས་པའི་དུས་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །