ཕམ་པར་འགྱུར་བ་དང་པོ་བཤད་པ།
བསྐལ་པ་བྱེ་བ་རྣམས་སུ་ཡང་། །འདུལ་བ་ཐོས་པར་འགྱུར་བ་དང་། །གཟུང་དང་འཛིན་པ་རྙེད་དཀའ་སྟེ། །བསྒྲུབ་པའང་ཤིན་ཏུ་རྙེད་པར་དཀའ། །སངས་རྒྱས་རྣམས་ནི་འབྱུང་བ་དང་། །ཆོས་བསྟན་པ་ཡང་བདེ་བ་ཡིན། །དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །འཕགས་པ་རྣམས་ནི་མཐོང་བ་བདེ། །དམ་པ་དག་དང་འགྲོགས་པ་བདེ། །བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །ཚུལ་ཁྲིམས་ལྡན་པ་མཐོང་བ་བདེ། །མང་དུ་ཐོས་པ་མཐོང་བ་བདེ། །ཡང་སྲིད་རྣམ་པར་གྲོལ་པ་ཡི། །དགྲ་བཅོམ་པ་དག་མཐོང་བ་བདེ། །འཇུག་ངོགས་བདེ་བའི་ཆུ་ཀླུང་བདེ། །ཆོས་ལ་གོམས་པའི་སྐྱེ་བོ་བདེ། །ཤེས་རབ་ཐོབ་པར་གྱུར་པ་བདེ། །ང་འོ་ང་རྒྱལ་ཟད་པ་བདེ། །ངེས་པར་བྱས་ཤིང་དབང་པོ་ཐུལ་བ་དག །དགོན་པ་ཞི་བ་རྣམས་སུ་རྒས་གྱུར་དང་། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ཀྱིས་གནས་པ་བདེ། །ཤཱཀྱ་སེང་གེ་དེ་ལ་ནི། །སོར་མོ་བཅུ་ཡི་ཐལ་སྦྱར་ཏེ། །འདུལ་བ་རབ་ཏུ་གདོན་པར་བྱས། །གདུལ་བའི་དོན་དུ་ང་ལ་ཉོན། །ཐོས་ནས་དྲང་སྲོང་ཆེན་པོ་ཡིས། །ཇི་སྐད་གསུངས་བཞིན་བསྒྲུབ་བྱ་ཞིང་། །ཁ་ན་མ་ཐོ་ཕྲ་རྣམས་ལ། །བརྟུན་ཅིང་བྱེད་པ་ཉིད་དུ་གྱིས། །རྟག་ཏུ་འབད་པས་འདའ་བ་ཡི། །སེམས་རྟ་ཁ་བླན་དཀའ་བ་ལ། །མཐུན་པ་གཟེར་རྣོན་བརྒྱ་བ་ཡི། །སྲབ་ནི་འདུལ་བ་འདི་ཡིན་ནོ། །ཆེ་བ་གང་དག་ངག་ཙམ་གྱིས། །ལྡོག་ཅིང་མཚམས་ལས་མི་འདའ་བ། །དེ་དག་མི་རྟ་བཟང་པོ་སྟེ། །ཉོན་མོངས་གཡུལ་ལས་ངེས་རྒྱལ་འགྱུར། །སུ་ལ་སྲབ་འདི་མེད་པ་དང་། །ནམ་དུའང་འདོད་པར་མི་འགྱུར་ལ། །དེ་དག་ཉོན་མོངས་གཡུལ་གྱིས་དཀྲུགས། །འཇོག་བྲལ་རྣམ་པར་འཁྱམ་པར་འགྱུར། །བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལོ་བཅུ་གཉིས་སུ་སྐྱོན་མེད་ཅིང་ཆུ་བུར་མེད་ལ་བཅོམ་ལྡན་འདས་ཀྱིས་ཉན་ཐོས་རྣམས་ཀྱི་སོ་སོར་ཐར་པའི་མདོ་གདོན་པ་ཡང་མདོར་བསྡུས་ཏེ། སྡིག་པ་ཐམས་ཅད་མི་བྱ་སྟེ། །དགེ་བ་ཕུན་
སུམ་ཚོགས་པར་བྱ། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པའང་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཏེ། །ལུས་ཀྱི་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་སྦྱངས་ན། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བཏོན་པར་གྱུར་ཏོ། །ལོ་བཅུ་གསུམ་ལ་བབ་པ་ན་སངས་རྒྱས་བཅོམ་ལྡན་འདས་ཡུལ་སྤོང་བྱེད་དག་ན་ཀ་ལན་ད་ཀའི་གྲོང་ན་བཞུགས་སོ། །དེའི་ཚེ་ན་ཀ་ལན་ད་ཀའི་གྲོང་ན་ཀ་ལན་ད་ཀའི་བུ་བཟང་བྱིན་ཞེས་བྱ་བ་ཕྱུག་པ། ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིང་། དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག །མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལོག་གོ་།དེ་དད་པ་སྔ་མ་དེ་ཉིད་རྗེས་སུ་སྤེལ་ཞིང་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་དེ་ལྟར་རབ་ཏུ་བྱུང་ནས་འདི་ལྟ་སྟེ། སྔོན་ཁྱིམ་པ་བཞིན་དུ་ཉེ་དུ་རྣམས་དང་ལྷན་ཅིག་འདྲེ་ཞིང་གནས་སོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འདི་སྙམ་དུ་སེམས་ཏེ། བདག་ལེགས་པར་གསུངས་པའི་ཆོས་འདུལ་
བ་ལ་རབ་ཏུ་བྱུང་ནས་འདི་ལྟ་སྟེ། སྔོན་ཁྱིམ་པ་བཞིན་དུ་ཉེ་དུ་རྣམས་དང་ལྷན་ཅིག་འདྲེ་ཞིང་གནས་པ་ནི་བདག་གིས་མ་རྙེད་དེ་རྙེད་པ་མ་ཡིན་ཞིང་། ཉེས་པ་རྙེད་དེ་ལེགས་པར་རྙེད་པ་མ་ཡིན་གྱིས། བདག་ཉེ་དུ་རྣམས་དང་འབྲལ་བའི་ཕྱིར་ལྷུང་བཟེད་དང་། ཆོས་གོས་ཐོགས་ཏེ། ལྗོངས་རྒྱུར་འགྲོའོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཉེ་དུ་རྣམས་དང་འབྲལ་བའི་ཕྱིར། ལྷུང་བཟེད་དང་། ཆོས་གོས་ཐོགས་ཏེ། ལྗོངས་རྒྱུར་སོང་ངོ་། །དེའི་ཚེ་ན་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་། བྱ་བར་སེམས་པ་དཀའ་ན་སློང་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ངོ་། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འདི་སྙམ་དུ་སེམས་ཏེ། ད་ལྟར་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་ལ་ཟས་སྦྱིན་པ་དང་། བྱ་བར་སེམས་པ་དཀའ་ན། སློང་མོ་པ་དག་ལྟ་ལ་སྨོས་ཀྱང་ཅི་དགོས་པ་བྱུང་ལ། བདག་ལ་ཉེ་དུ་ལོངས་སྤྱོད་ཆེན་པོ་དང་ལྡན་པ་དག་ཡོད་པས་བདག་ཀ་ལན་ད་ཀའི་གྲོང་དུ་སོང་སྟེ། ཉེ་དུ་རྣམས་ཀྱི་གན་དུ་སོང་ལ་དགེ་འདུན་ལ་ཟས་དག་སྦྱོར་དུ་གཞུག་ཅིང་། དགེ་འདུན་ལ་སྐྱོ་མ་དག་དང་ཐུག་པའི་བཏུང་བ་དག་དང་རྟག་རེས་འཁོར་དག་དང་མགྲོན་དུ་བོས་པ་དག་དང་། བརྒྱད་སྟོན་དང་བཅུ་བཞི་སྟོན་དང་ཉ་སྟོན་དང་སྤྱན་གཟིགས་ཕྲན་ཚེགས་སྦྱོར་དུ་གཞུག་གོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལྗོངས་སུ་ཇི་དགར་འདུག་ནས། ལྷུང་བཟེད་དང་ཆོས་གོས་ཐོགས་ཏེ་ཀ་ལན་ད་ཀའི་གྲོང་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་བའི་ཚེ། ཀ་ལན་ད་ཀའི་གྲོང་དུ་ཕྱིན་ནས་ཀ་ལན་ད་ཀའི་གྲོང་ན་དགོན་པའི་སྤྱིལ་བུ་ན་གནས་སོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཉེ་དུ་རྣམས་ཀྱི་གན་དུ་སོང་སྟེ་ཕྱིན་ནས་དེ་དག་གི་མདུན་དུ་སངས་རྒྱས་དང་ཆོས་དང་དགེ་འདུན་གྱི་བསྔགས་པ་བརྗོད་དེ། དགེ་འདུན་ལ་ཟས་དག་སྦྱོར་དུ་འཇུག་ཅིང་། དགེ་འདུན་ལ་སྐྱོ་མ་དག་དང་ཐུག་པའི་བཏུང་བ་དག་དང་རྟག་རས་
འཁོར་དག་དང་། མགྲོན་དུ་བོས་པ་དག་དང་། བརྒྱད་སྟོན་དང་བཅུ་བཞི་སྟོན་དང་། ཉ་སྟོན་དང་སྤྱན་གཟིགས་ཕྲན་ཚེགས་སྦྱོར་དུ་འཛུད་དོ། །དེའི་ཆེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་དགོན་པ་པ་ཆོས་གོས་གསུམ་པ་ཕྱག་དར་ཁྲོད་པ་བསོད་སྙོམས་པ་མཐར་ཆགས་ཀྱིས་རྒྱུ་བར་གྱུར་ཏོ། །དེ་དུས་གཞན་ཞིག་ན་དང་པོ་ཁོ་ནར་དགེ་སློང་གི་དགེ་འདུན་ཐུག་པ་བསོད་པས་ཚིམ་པར་བྱས་ནས་སྔ་དྲོ་ཤམ་ཐབས་བགོས་ཏེ་ལྷུང་བཟེད་དང་ཆོས་གོས་ཐོགས་ནས། ཀ་ལན་ད་ཀའི་གྲོང་དུ་བསོད་སྙོམས་ལ་ཞུགས་པ་ན་མཐར་གྱིས་ཀ་ལན་ད་ཀའི་གྲོང་དུ་བསོད་སྙོམས་ལ་རྒྱུ་བའི་ཚེ་རང་གི་ཁྱིམ་དུ་ཕྱིན་ཏོ། །དེ་རང་གི་ཁྱིམ་ནས་སྦྱིན་པ་་ཕྱིར་གཏོང་བ་མ་ཐོབ་པར་མྱུར་བ་མྱུར་བར་ཕྱིར་སོང་ངོ་། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་བྱ་བ་འགའ་ཞིག་ལ་ཕྱི་རོལ་ཏུ་སོང་བར་གྱུར་ཏོ། །བྲན་མོ་རྙིང་པ་རྒན་མོ་ཞིག་གིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་རང་གི་ཁྱིམ་ནས་སྦྱིན་པ་མ་ཐོབ་ཕྱིར་གཏོང་བ་མ་ཐོབ་པར་མྱུར་བ་མྱུར་བར་ཕྱིར་སོང་བ་མཐོང་ངོ་། །མཐོང་ནས་ཀྱང་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཇོ་མོ་མཁྱེན་པར་མཛོད་ཅིག །ཇོ་བོ་བཟང་བྱིན་འཕྱི་བ་འཕྱི་བར་རང་གི་ཁབ་ཏུ་བྱོན་ནས་དེ་རང་གི་ཁབ་ནས་སྦྱིན་པ་མ་བརྙེས་སླར་གཏོང་བ་མ་བརྙེས་པར་མྱུར་བ་མྱུར་བར་སླར་བཞུད་དོ། །དེ་ནས་ཀ་
ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་འདི་སྙམ་དུ་སེམས་ཏེ། ཀྱེ་མ་མ་ལ་ཀ་ལན་ད་ཀའི་བུ་བཟང་སྦྱིན་འདོད་པའམ། མངོན་པར་མི་དགའ་བའམ་རྣམ་པར་འཁྱམ་འདོད་པར་གྱུར་ཅིང་། དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའམ། གཅིག་ཏུ་མ་གྱུར་གྲང་སྙམ་དུ་སེམས་ཤིང་རིག་ནས། ཀ་ལན་ད་ཀའི་གྲོང་ནས་བྱུང་སྟེ། ཀ་ལན་ད་ཀའི་བུ་ཚེ་དང་ལྡན་པ་བཟང་སྦྱིན་ག་ལ་བ་དེར་སོང་སྟེ་ཕྱིན་ནས་ཀ་ལན་དཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །བུ་བཟང་བྱིན་གལ་ཏེ་ཁྱོད་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། ཁྱོད་དགེ་སྦྱོང་གི་ཚུལ་ཡོངས་སུ་གཏོང་འདོད་པ་ལྟ་ན། བུ་བཟང་བྱིན་བུད་མེད་རྣམས་ཀྱི་བུད་མེད་ནོར་ཞེས་བྱ་བའམ། བུད་མེད་ཀྱི་བག་རྫོངས་ཞེས་བྱ་བའམ། བུད་མེད་དབང་བའི་རྫས་ཞེས་བྱ་བ་གང་ཡིན་པ་དེ་ནི་ཁྱོད་ཀྱི་མའི་དབྱིག་དང་གསེར་གྱི་ཕུང་པོ་ཆེན་པོ་གང་ལ་མཐའ་གཅིག་ན་འགྲེང་བའི་མིས་མཐའ་གཅིག་ན་འདུག་པའི་མི་མི་མཐོང་ལ། མཐའ་གཅིག་ན་འདུག་པའི་མིས་མཐའ་གཅིག་ན་འགྲེང་བའི་མི་མི་མཐོང་བ་ཡིན་ཏེ། དེ་ནི་ཁྱོད་ཀྱི་མའི་ཡིན་ནོ། །གཞན་ཡང་ཁྱེད་ཀྱི་ཕའི་དབྱིག་དང་གསེར་མཚན་མ་བཏབ་པ་ཡང་བརྒྱ་ཕྲག་དུ་མ་དང་། སྟོང་ཕྲག་དུ་མ་དང་། བརྒྱ་སྟོང་ཕྲག་དུ་མ་དག་ཡོད་ན་གཞན་དང་ཕལ་ལྟ་སྨོས་ཀྱང་ཅི་དགོས། བུ་བཟང་བྱིན་ཚུར་ཤོག །ཁྱོད་འདུག་ལ་འདོད་པ་ལ་ཡང་ལོངས་སྤྱོད་ཅིང་།སྦྱིན་པ་དག་ཀྱང་བྱིན་ཅིག །བསོད་ནམས་དག་ཀྱང་གྱིས་ཤིག །དེ་སྐད་ཅེས་སྨྲས་པ་དང་། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་མ་ལ་འདི་སྐད་ཅེས་སྨྲས་སོ། །ཡུམ་བདག་ནི་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འཚལ་ཞིང་དགེ་སྦྱོང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་འཚལ་བའམ། སྨོད་པའམ། བདག་དགེ་སྦྱོང་གི་ཚུལ་ཡོངས་སུ་གཏོང་བ་མི་བགྱིད་དོ། །དེ་ནས་ཀ་ལན་ད་ཀའི་བུ་ཆེ་དང་ལྡན་པ་བཟང་བྱིན་གྱི་མ་འདི་སྙམ་དུ་སེམས་ཏེ། བདག་གིས་དེ་སྐད་བྱས་ཀྱང་བུ་བཟང་བྱིན་ཕྱིར་བཟློག་པར་མ་ནུས་ཀྱིས། བདག་ཁྱིམ་དུ་སོང་ལ་འདིའི་བག་སར་སྦད་པར་བྱའོ་སྙམ་མོ། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ཁྱིམ་དུ་སོང་སྟེ། མནའ་མ་ལ་འདི་སྐད་ཅེས་སྨྲས་སོ། །ཀྱེ་སྲུ་ཁྱོད་གང་གི་ཚེ་དུས་ལ་བབ་ཅིང་ཟླ་མཚན་དང་ལྡན་
པ་དེའི་ཚེ་ཁོ་མོ་ལ་སྦྲིན་ཅིག །ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མས་ཡུམ་བཀའ་བཞིན་འཚལ་ཞེས་སྒྱུག་མོ་ལས་མཉན་ཏོ། །དེ་ནས་དུས་གཞན་ཞིག་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མ་དུས་ལ་བབ་ཅིང་། ཟླ་མཚན་དང་ལྡན་པར་གྱུར་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཡུམ་ངན་བུ་དུས་ལ་བབ་ཅིང་། ཟླ་མཚན་དང་ལྡན་པར་གྱུར་ན། བདག་གིས་ཅི་བགྱི་བ་དེ་མཁྱེན་པར་མཛོད་ཅིག །སྲུ་དེའི་ཕྱིར་ཁྱོད་ཀྱིས་སྐུ་མཉེ་ཇི་ལྟ་བུས་བསྐུ་མཉེ་བྱས་པ་དང་། ཁྲུས་ཇི་ལྟ་བུས་ཁྲུས་བྱས་པ་དང་། དྲི་དང་ཕྲེང་བ་རྒྱུ་དང་བདུག་སྤོས་དང་། ཕྱེ་མ་དང་གོས་དང་། རྒྱན་ཇི་ལྟ་བུ་དག་གིས་བརྒྱན་ན་བུ་བཟང་བྱིན་སྔོན་ཁྱིམ་པ་ཉིད་ན་དགའ་བ་དང་། ཡིད་དུ་འོང་བར་གྱུར་པ་དེ་ལྟ་བུའི་སྐུ་མཉེས་སྐུ་མཉེ་གྱིས་ཤིག །དེ་ལྟ་བུའི་ཁྲུས་ཀྱིས་ཁྲུས་གྱིས་ཤིག །དེ་ལྟ་བུའི་དྲི་དང་ཕྲེང་བ་རྒྱུ་དང་བདུག་སྤོས་དང་། ཕྱེ་མ་དང་གོས་དང་། རྒྱན་དག་གིས་བརྒྱན་པར་གྱིས་ཤིག །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་སྔོན་གྱི་ཆུང་མས་སྒྱུག་མོ་ལས་མཉན་ཏེ། སྐུ་མཉེ་ཇི་ལྟ་བུས་སྐུ་མཉེ་བྱས་པ་དང་། ཁྲུས་ཇི་ལྟ་བུས་ཁྲུས་བྱས་པ་དང་། དྲི་དང་ཕྲེང་བ་རྒྱུ་དང་བདུག་སྤོས་དང་། ཕྱེ་མ་དང་། གོས་དང་རྒྱན་ཇི་ལྟ་བུ་དག་གིས་བརྒྱན་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་སྔོན་ཁྱིམ་པ་ཉིད་ན་དགའ་བ་དང་། ཡིད་དུ་འོང་བར་གྱུར་པ་དེ་ལྟ་བུའི་སྐུ་མཉེས་སྐུ་མཉེ་བྱས། དེ་ལྟ་བུའི་ཁྲུས་ཀྱིས་ཁྲུས་བྱས། དེ་ལྟ་བུའི་དྲི་དང་ཕྲེང་བ་རྒྱུ་དང་བདུག་སྤོས་དང་། ཕྱེ་མ་དང་། གོས་དང་བརྒྱན་དག་གིས་བརྒྱན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ག་ལ་བ་དེར་སོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་ལ་འདི་སྐད་ཅེས་སྨྲས་སོ། །ཡུམ་ངན་བུ་འདི་དྲ་ན་བདག་གིས་ཅི་ཞིག་བགྱི། དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མ་མནའ་མ་དང་ཤིང་
རྟ་གཅིག་ཏུ་ཞུགས་ཏེ། ཀ་ལན་ད་ཀའི་གྲེང་ཆས་བྱུང་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་གནས་ག་ལ་བ་དེར་སོང་སྟེ་ཕྱིན་ནས་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས། རྐང་པ་དག་ཁོ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་དྲུང་དུ་སོང་ངོ་། །དེའི་ཚེ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གནས་ཀྱི་ཕྱི་རོལ་བླ་གབ་མེད་པའི་འཆགས་ས་ན་འཆག་ས་ན་འཆག་གོ་།ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་མས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས། ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །བུ་བཟང་བྱིན་གལ་ཏེ་ཁྱོད་མི་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་པར་མི་འགྱུར་ཞིང་། དགེ་སྦྱོང་གི་ཚུལ་དོན་དུ་མི་གཉེར་བ་མ་ཡིན་པའམ། དགེ་སྦྱོང་གི་ཚུལ་གྱིས་སྒྱིད་ལུག་པ་མ་ཡིན་པའམ། མུས་བྱུང་བ་མ་ཡིན་པའམ། ཐེ་ཚོམ་ཟ་བ་མ་ཡིན་པའམ། སྨོད་པ་མ་ཡིན་པའམ། ཁྱོད་དགེ་སྦྱོང་གི་ཚུལ་ཡོངས་སུ་གཏོང་འདོད་པ་མ་ཡིན་པ་ལྟ་ན། བུ་ཁྱོད་ཀྱི་བག་སར་འདི་དུས་ལ་བབ་ཅིང་ཟླ་མཚན་དང་ལྡན་པར་གྱུར་གྱིས་འདི་ལ་ས་བོན་གྱི་ཆོས་ཅུང་ཞིག་རྗེས་སུ་བྱིན་ཅིག །ཁྱོད་ལ་བུ་མེད་པའི་ཕྱིར་དབང་པའི་རྫས་ཐམས་ཅད་དེ་བཞིན་དུའམ་ཇི་ལྟར་ཡང་རུང་བས་རྒྱལ་པོས་དབང་དུ་བྱས་པར་གྱུར་ན་མི་རུང་ངོ་། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་སྔར་བསླབ་པའི་གཞི་མ་བཅས་ཤིང་ཉེས་པ་མ་མཐོང་ལ་བུད་མེད་ཀྱི་ཡུལ་གཞོན་ནུ་ཁ་དོག་བཟང་བ་ཆགས་པར་གྱུར་པ་མཐོང་ནས། འདོད་ཆགས་ཀྱིས་སེམས་ཟིལ་གྱིས་ནོན་ཅིང་དེ་འདོད་ཆགས་ཀྱིས་སེམས་ཟིལ་གྱིས་ནོན་པས་ཡོངས་སུ་གདུང་བའི་ལུས་དང་། ཡོངས་སུ་གདུང་བའི་སེམས་དང་ལྡན་ཞིང་དེ་ཡོངས་སུ་གདུང་བཞིན་པའི་ལུས་དང་ཡོངས་སུ་གདུང་བཞིན་པའི་སེམས་ཀྱིས་མ་ལ་འདི་སྐད་ཅེས་སྨྲས་སོ། །ཡུམ་བདག་གིས་
དེ་ལྟར་བགྱིར་རུང་ངམ། བུ་བཟང་བྱིན་འདི་ལྟ་སྟེ། ས་བོན་གྱི་ཆོས་ལ་བརྟེན་ནས་ཤིན་ཏུ་རུང་ངོ་། །དེ་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱིས་མ་ལས་མཉན་ཏེ། སྔོན་གྱི་ཆུང་མའི་ལག་པ་གཉིས་ནས་བཟུང་སྟེ། ཕྱོགས་གཅིག་ཏུ་སོང་ནས་ཆོས་གོས་དག་བཞག་སྟེ། དེ་དང་ལྷན་ཅིག་ཏུ་མི་ཚངས་པར་སྤྱོད་པ་འཁྲིག་པའི་ཆེས་ལན་གཉིས་ལན་གསུམ་དུ་བསྟེན་ཏོ། །སེམས་ཅན་སྲིད་པ་ཐ་མས་སྤྱོད་པ་ཚོལ་བ་ཐར་པའི་སྙིང་པོ་བཟུང་བ་མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང་། སྐྱེ་བ་དོན་དུ་མི་གཉེར་བ་ལུས་ཐ་མ་འཛིན་པ་ཞིག་ཀྱང་ལྷའི་རིས་བཟང་པོ་ཞིག་ནས་ཤི་འཕོས་ཏེ། དེ་སྐྱེ་རྒུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པས་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་། མངལ་ན་གནས་པ་ཞུགས་པ་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་སྒྱུག་མོ་ལ་སྨྲས་པ། ཡུམ་མཁྱེན་པར་མཛོད་ཅིག །བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་རོ། །དེ་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས། ཁོ་མོ་ཡུན་རིང་པོ་ནས་མངོན་པར་འདོད་པ་ཚ་བོའི་ངོ་མཐོང་བ་དང་། ཁོ་མོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང་། ཁོ་མོའི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་སྤྱོད་པ་དང་། ཁོ་མོའི་རིགས་བརྒྱུད་ཡུན་རིང་དུ་གནས་པར་འགྱུར་པ་དང་། བདག་ཅག་ཤི་ཞིང་དུས་ལ་བབ་པ་དག་ལ་ཉུང་དུའམ།
མང་པོ་ཡང་རུང་བའི་སྦྱིན་པ་དག་སྦྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར། སྟེང་གི་ཁང་བཟང་གི་གཞིར་གཏོགས་པར་གྲང་བ་ན་གྲང་བའི་ཡོ་བྱད་དག་དང་། དྲོ་བ་ན་དྲོ་བའི་ཡོ་བྱད་དག་དང་། སྨན་པས་བཅས་པའི་ཁ་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ཅང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་མི་ཚབ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་རྣམ་པར་སྤངས་པའི་ཟས་དག་དང་། དོ་ཤལ་དང་སེ་མོ་དོ་དང་རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང་། ཁྲི་ནས་ཁྲིར་དང་། ཁྲིའུ་ནས་ཁྲིའུར་དང་། ཤོད་ཀྱིས་གཞིར་མི་འབབ་པ་དང་། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུད་དོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་གཟུགས་བཟང་བ་བལྟ་ན་སྡུག་པ་མཛེས་པ་གསལ་བ་གསེར་གྱི་མདོག་འདྲ་བ་མགོ་གདུགས་ལྟ་བུ་དང་ལྡན་པ་ལག་པ་རིང་བ་དཔྲལ་བའི་དབྱེས་ཆེ་བ་སྨིན་མ་འཛར་བ་སྣའི་གཟེངས་མཐོ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ་གང་གི་ཕྱིར་ཁྱེའུ་འདི་ས་བོན་གྱི་ཆོས་ལ་བརྟེན་ཏེ་རྙེད་པ་དེའི་ཕྱིར་ཁྱེའུ་ཡི་མིང་ས་བོན་པ་ཞེས་བྱའོ་ཞེས་དེའི་མིང་ས་བོན་པ་ཞེས་བྱ་བར་བཏགས་སོ། །ཁྱེའུ་ས་བོན་པ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་བསྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེད་གྲོགས་
ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་ཞོ་དང་། མར་དང་ཞུན་མར་དང་མར་གྱི་ཉིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་། རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །ད་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་གྲངས་དང་རྩིས་དང་ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ནས། དེ་ཡི་གེའི་མཐར་ཕྱིན་ཅིང་འབྱེད་པ་དང་ཀློག་པ་དང་། མཁས་པ་དང་སྤྱོད་པ་གསལ་བ་དང་། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང་། གཞི་བརྟག་པ་དང་། གོས་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིང་། དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག །མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལོག་གོ་།དེ་ཕ་ལས་བྱུང་བའི་དད་པ་སྔ་མ་དེ་ཉིད་རྗེས་སུ་སྤེལ་ཞིང་ལེགས་པར་གསུངས་པའི་ཆོས་འདུལ་བ་ལ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་དེ་ལྟར་རབ་ཏུ་བྱུང་ནས་གཅིག་བུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་གཏང་བར་གནས་སོ། །གཅིག་པུ་དབེན་པ་བག་ཡོད་པ་བརྟུན་པ་དང་ལྡན་པ་བདག་ཉིད་བཏང་བར་གནས་པ་ན། རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་
བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་པ། ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང་མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ་དབང་པོ་དང་ཉེ་དབང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ས་བོན་པས་དགྲ་བཅོམ་པ་ཐོབ་ཅིང་རྣམ་པར་གྲོལ་བའི་དགའ་བ་དང་བདེ་བ་སོ་སོར་ཡང་དག་པར་རིག་པ་ན་དེའི་ཚེ་ཚིགས་སུ་བཅད་པ་སྨྲས་པ། ཆོས་རྣམས་ལས་ནི་སྐལ་བ་ཐོབ། །ཡབ་ནི་དཀོར་གྱིས་བདག་མི་གཏོང་། །བདག་གིས་ཧ་ཅང་ཕྱིན་ནས་ཤེས། །བདག་ནི་ཆུ་ངུས་ཤིན་ཏུ་འདས། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་མདུན་ན་བཞུགས་ཤིང་ཉན་ཐོས་རྣམས་ལ་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བ་དང་གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །དེའི་ཚེ་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་འཁོར་དེ་ཉིད་དུ་འདུག་ཅིང་མཐུན་པར་གྱུར་ཏོ། །བཅོམ་ལྡན་འདས་ཇི་ལྟ་ཇི་ལྟར་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་
རྣམ་པར་གྲོལ་བའི་ཆོས་སྟོན་པ་དང་། ཞེ་སྡང་འདོད་ཆགས་དང་བྲལ་བར་བྱ་བ་དང་། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་བར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་པ་དེ་ལྟ་དེ་ལྟར་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱོད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ་ཅིང་ཅང་མི་སྨྲ་བར་གྱུར། ཡུལ་ཡུལ་ཕོར་གྱུར། ཕྲག་པ་གློད། གདོང་སྨད་སྤོབས་པ་མེད། སེམས་ཁོང་དུ་ཆུད་ཅིང་འདུག་གོ། དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་དག་གནས་ཉུལ་ཞིང་རྒྱུ་བ་ན་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་གྱི་གནས་ག་ལ་བ་དེར་དོང་སྟེ་ཕྱིན་ནས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་དགེ་སློང་རབ་ཏུ་མང་པོ་དག་གིས་ཀ་ལན་ད་ཀའི་བུ་ཚེ་དང་ལྡན་པ་བཟང་བྱིན་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བཟང་ཕྱིན་ཁྱོད་སྔོན་ཆད་དགེ་སློང་གློ་བུར་དུ་ལྷགས་པ་དག་མཐོང་ན་བཤེས་པ་དང་བཅས་པ་ཉིད་ཀྱི་ཚིག་གིས་བསུ་ནས་ལྷུང་བཟེད་དང་ཆོས་གོས་དང་། འཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོག་གུ་ཅན་དང་། མཆིལ་ལྷམ་དག་ལེན་པར་བྱེད་ན། ཁྱོད་ད་ལྟར་དགེ་སློང་གློ་བུར་དུ་ལྷགས་པ་དག་མཐོང་ན་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱོད་པར་གྱུར་ཅིང་འདུག་ལ་འགྱོད་པ་དང་ལྡན། འགྱོད་པ་ཐོབ་ཅིང་མི་སྨྲ་བར་གྱུར། ཡུལ་ཡུལ་བོར་གྱུར། ཕྲག་པ་གློད། གདོང་སྨད། སྤོབས་པ་མེད། སེམས་ཁོང་དུ་ཆུད་ཅིང་འདུག་ན། ཚེ་དང་ལྡན་པ་བཟང་བྱིན་དེ་ལྟར་ཁྱོད་ལ་ལུས་ཀྱི་གནོད་པའམ། སེམས་ཀྱི་ཡོངས་སུ་གདུང་བ་འགའ་ཞིག་མེད་གྲང་། ཚེ་དང་ལྡན་པ་དག་བདག་ལ་ད་ལྟར་ལུས་ཀྱི་གནོད་པ་ནི་
འགའ་ཡང་མེད་མོད་ཀྱི། འོན་ཀྱང་བདག་ལ་སེམས་ཀྱི་ཡོངས་སུ་གདུང་བ་ཡོད་དོ། །ཚེ་དང་ལྡན་པ་ཁྱོད་ཀྱི་སེམས་ཀྱི་ཡོངས་སུ་གདུང་བ་གང་ཡིན། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་པ་དང་། དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་སྟན་དག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་ཏོ། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་དགེ་སློང་རབ་ཏུ་མང་པོ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཟག་པའི་གནས་ལྟ་བུའི་ཆོས་མང་པོ་རྣམས་ཀྱི་དང་པོ་ནི་ཀ་ལན་ད་ཀའི་བུ་བཟང་བྱིན་གྱིས་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང་། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པར་མི་རྨེད་པས། སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་བཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཀ་ལན་ད་ཀའི་
བུ་ཚེ་དང་ལྡན་པ་བཟང་བྱིན་ལ་རྨས་པ། བཟང་བྱིན་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །བཟང་བྱིན་ངས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བའི་ཆོས་བསྟན་པ་དང་། ཞེ་སྡང་འདོད་ཆགས་དང་བྲལ་བར་བྱ་བ་དང་། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བའི་ཆོས་བསྟན་པ་ལ། ཁྱོད་ཀྱིས་ཅིའི་ཕྱིར་མི་མཛེས་པ་དེ་ལྟ་བུ་དེ་བྱས་པར་གྱུར། མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ་དུག་དྲག་པོ་དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི། དེ་ལྟར་གྱུར་པས་བུད་མེད་ཀྱི་ཡུལ་ལ་ནི་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་དང་། དགེ་འདུན་ལེགས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནོང་མི་བཀུར་བའི་གང་ཟག་རྣམས་ཚར་གཅད་པའི་ཕྱིར་དང་། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང་། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང་། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང་། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང་། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་། མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་བྱ་བའི་ཕྱིར། ངའི་ཉན་ཐོས་
རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་དགེ་སློང་ཞིག་རྒྱལ་པོའི་ཁབ་ན་དགོན་པའི་སྤྱིལ་བུ་ན་འདུག་གོ་།དེ་ནས་དགེ་སློང་དེས་དགོན་པའི་སྤྲ་མོ་ཞིག་ཟས་ཀྱིས་བརྔོད་བརྗོད་ནས། དེ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏོ། །དེ་ནས་དགེ་སློང་རབ་ཏུ་མང་པོ་དག་གནས་ཉུལ་ཞིང་རྒྱུ་བ་ན་དགེ་སློང་དེའི་སྤྱིལ་བུ་ག་ལ་བ་དེར་དོང་སྟེ་ཕྱིན་ནས། དགེ་སློང་དེ་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། །དེ་ནས་སྤྲ་མོ་དེ་སྔོན་གྱི་སྡིག་པ་ཅན་དམ་པ་མ་ཡིན་པའི་ཆོས་དེ་ཉིད་རྗེས་སུ་དྲན་ནས་དགེ་སློང་དེ་ག་ལ་བ་དེར་སོང་སྟེ་ཕྱིན་ནས་དགེ་སློང་དེའི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་དགེ་སློང་དེ་འདི་ལྟ་སྟེ། དགེ་སློང་དེ་དག་ལ་ངོ་ཚ་བས་དེ་ཟློག་པར་བྱེད་དོ། །སྤྲ་མོ་དེ་ལན་གཉིས་ལན་གསུམ་དུ་དགེ་སློང་དེའི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས། དགེ་སློང་དེ་འདི་ལྟ་སྟེ་དགེ་སློང་དེ་དག་ལ་ངོ་ཚ་བ། ལན་གཉིས་ལན་གསུམ་དུ་དེ་ཟློག་པར་བྱེད་དོ། །དེ་ནས་སྤྲ་མོ་དེ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས། དགེ་སློང་དེའི་གདོང་དང་སྣ་དང་ཆོས་གོས་རྐང་པའི་སེན་མོ་དག་གིས་མངོན་པར་བྲད་དེ་མཐའ་གཅིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག་གོ་།དེ་ནས་དགེ་སློང་དེ་དག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅིའི་ཕྱིར་དགོན་པའི་སྤྲ་མོ་འདི་ཁྱོད་ཀྱི་གདོང་དུ་རྣམ་པར་
ལྟ་བར་བྱེད། རོ་སྨད་སྟོབས་པར་བྱེད་ནས། ཁྱོད་འདི་ལྟ་སྟེ། ཁོ་བོ་ཅག་ལ་ངོ་ཚ་བས་དེ་ཟློག་པར་བྱེད། ཅིའི་ཕྱིར་དགོན་པའི་སྤྲ་མོ་འདི་ལན་གཉིས་ལན་གསུམ་དུ་ཁྱོད་ཀྱི་གདོང་དུ་རྣམ་པར་ལྟ་བར་བྱེད། རོ་སྨད་སྟོབས་པར་བྱེད་ནས་ཁྱོད་འདི་ལྟ་སྟེ། ཁོ་བོ་ཅག་ལ་ངོ་ཚ་བས་དེ་ཟློག་པར་བྱེད། འོན་ཀྱང་དགོན་པའི་སྤྲ་མོ་འདི་ཁྱོད་ལ་ཁྲོས་འཁྲུགས་རྔམ་པར་གྱུར་ཅིང་ཡིད་མི་དགའ་ནས། ཁྱོད་ཀྱི་གདོང་དང་སྣ་དང་ཆོས་གོས་རྐང་པའི་སེན་མོ་དག་གིས་མངོན་པར་བྲད་དེ་མཐའ་གཅིག་ཏུ་སོང་ནས་ངུ་རུ་རུ་ཟེར་ཞིང་ཁྱི་ཚུགས་སུ་འདུག །དེས་སྐབས་དེ་དགེ་སློང་དེ་དག་ལ་རྒྱས་པར་བརྗོད་དོ། །དེ་སྐད་ཅེས་སྨྲས་པ་དང་། དགེ་སློང་དེ་དག་གིས་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ། དེ་ཡང་མི་ཉིད་ལ་ཡིན་གྱི། དུད་འགྲོར་སྐྱེས་པ་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པ་ཡང་མ་བྱས་པར་སྟན་དག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཞིག་མི་ལ་ཡང་བཀག་ན་དུད་འགྲོར་སྐྱེས་པ་ལྟ་ལ་ཅི་སྨོས་ཏེ། དགེ་སློང་དག་མི་གཏི་མུག་ཅན་དེ་ནི་ཕམ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་ཞེས་བྱ་བ་ནས་སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་
པ་མེད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་ཞེས་བྱ་བ་ནས་མི་གཏི་མུག་ཅན་ཁྱོད་ཀྱིས་སྦྲུལ་ནག་པོ་དུག་མྱུར་དུ་ཁྱབ་པ་དུག་དྲག་པ་རྩུབ་པ་དུག་རྣོ་བའི་ཁར་རང་གི་ཡན་ལག་གི་རྣམ་པ་བཅུག་པར་གྱུར་པ་ནི་བླའི། དེ་ལྟར་གྱུར་པས་དུད་འགྲོའི་སྐྱེ་གནས་སུ་སྐྱེས་པ་ལ་ནི་མ་ཡིན་ནོ་ཞེས་བྱ་བའི་བར་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པའོ། །འདི་ནི་རྗེས་སུ་བཅས་པའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེ་གནས་སུ་སྐྱེ་པ་དང་ལྷན་ཅིག་ཀྱང་རུང་སྟེ་དགེ་སློང་དེ་ཕམ་པར་གྱུར་བ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་རྣམ་པ་བཞི་པོ་མིང་གི་དགེ་སློང་དང་། ཁས་འཆེ་བའི་དགེ་སློང་དང་། སློང་བའི་ཕྱིར་དགེ་སློང་དང་། ཉོན་མོངས་པ་བཅོམ་པའི་ཕྱིར་དགེ་སློང་ལས་མིང་གི་དགེ་སློང་གང་ཞེ་ན། གང་གི་མིང་དང་མིང་དུ་བརྗོད་པ་དང་། ཚིག་གཉིས་པ་དང་། ཚིག་བླ་དྭགས་དང་འདུ་ཤེས་དང་། བོད་པ་དང་གདགས་པ་དང་། ཐ་སྙད་དགེ་སློང་ཞེའམ་དགེ་སློང་གི་རིགས་ཞེས་སམ། དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང་། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་དགེ་སློང་གང་ཞེ་ན། གང་ཆོས་དང་ལྡན་པས་སློང་མོ་སྤྱོད་པས་འཚོ་བར་བྱེད་པ་ནི་སློང་བའི་ཕྱིར་དགེ་སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན། གང་གི་ཟག་
པ་ཀུན་ནས་ཉོན་མོངས་པར་བྱེད་པ་ཡང་སྲིད་པར་བྱེད་པ་རིམས་ནད་དང་བཅས་པ་རྣམ་པར་སྨིན་པ་སྡུག་བསྔལ་བ་ཕྱི་མ་ལ་སྐྱེ་བ་དང་རྒ་བ་དང་འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང་། ཡོངས་སུ་ཤེས་པ་དང་། རྩ་བ་ནས་བཅད་པ་དང་། ཤིང་ཏ་ལའི་མགོ་བཞིན་དུ་གཞི་མི་སྣང་བ་དང་། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང་། བཞིའི་ལས་མི་གཡོ་བ་གཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །དགེ་སློང་རྣམས་དང་ལྷན་ཅིག་ཅེས་བྱ་བ་ནི། དེ་ལས་གཞན་པ་ཆོས་མཐུན་པ་ཚངས་པ་མཚུངས་པར་སྤྱོད་པ་རྣམས་དང་ངོ་། །བསླབ་པ་མཚུངས་པར་གྱུར་པས་ཞེས་བྱ་བ་ནི། བསླབ་པ་གང་ལ་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པར་བྱ་བ་དེ་ལ་དེང་བསྙེན་པར་རྫོགས་པས་དང་། དེང་བསྙེན་པར་རྫོགས་པས་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་ངོ་ཞེས་འདི་ལ་ཚུལ་ཁྲིམས་ཉིད་ཀྱིས་མཉམ་པ་དང་། བསླབ་པ་ཉིད་ཀྱིས་མཉམ་པ་དང་། སོ་སོར་ཐར་པའི་མདོ་གདོན་པ་ཉིད་ཀྱིས་མཉམ་པ་གང་ཡིན་པ་དེ་ནི་བསླབ་པ་མཚུངས་པར་གྱུར་པས་ཞེས་བྱ་སྟེ། དེས་ན་བསླབ་པ་མཚུངས་པར་གྱུར་པས་ཞེས་གསུངས་སོ། །བསླབ་པ་མ་ཕུལ་ཞེས་བྱ་བ་ལ། ཇི་ཙམ་གྱིས་ན་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་ཁྲོས་ཤིང་ཁྲོ་བའི་ཟིལ་གྱིས་ནོན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །མྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སྨྱོན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གླེན་པ་དང་ལྐུགས་པ་དང་འོན་པ་
ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབེན་པར་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབེན་པར་མི་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །མི་དབེན་པར་དབེན་པར་འདུ་ཤེས་པས་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ། དབུས་པས་གལ་ཏེ་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་ལ། མཐའ་འཁོབ་པས་གལ་ཏེ་དབུས་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མཐའ་འཁོབ་པས་མཐའ་འཁོབ་པའི་ཚིག་གིས་དབུས་པ་ལ་བསླབ་པ་འབུལ་བར་བྱེད་ལ་དབུས་པས་གལ་ཏེ་མཐའ་འཁོབ་པའི་ཚིག་སྨྲས་པ་དེ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །དབུས་པས་དབུས་པའི་ཚིག་གིས་མཐའ་འཁོབ་པ་ལ་བསླབ་པ་འབུལ་བར་བྱེད་པ་ལ་མཐའ་འཁོབ་པས་གལ་ཏེ་དབུས་པའི་ཚིག་སྨྲས་པ་མ་ཤེས་ན་བསླབ་པ་མ་ཕུལ་བར་བརྗོད་པར་བྱའོ། །མི་གཉིད་ལོག་པ་དང་སྙོམས་པར་ཞུགས་པ་དང་ལྷ་དང་སྤྲུལ་པ་དང་དུད་འགྲོ་དང་གཟུགས་བརྙན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །ཀླག་ཅོར་ཅན་གྱིས་ཀླག་ཅོར་ཅན་ལ་བསླབ་པ་འབུལ་ན་བསླབ་པ་མ་ཕུལ་བར་བརྗོད་པར་བྱའོ། །གཏོང་བའི་སེམས་མེད་པ་དང་། དགེ་སྦྱོང་གི་ཚུལ་འདོད་པ་དང་། ཁྱིམ་ན་གནས་པར་མི་འདོད་པ་དང་། མི་རང་བཞིན་དུ་གནས་པ་ཤེས་པས་འགའ་ལ་ཡང་རྣམ་པར་རིག་པར་མི་བྱེད་ན་བསླབ་པ་མ་ཕུལ་བར་བརྗོད་པར་བྱ་སྟེ། དེས་ན་བསླབ་པ་མ་ཕུལ་ཞེས་གསུངས་སོ། །བསླབ་པ་ཉམས་པར་མ་བྱས་པར་ཞེས་བྱ་བ་ལ། བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཡང་ཡོད། བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡང་ཡོད། བསླབ་པ་ཉམས་པར་ཡང་བྱས་ལ་
བསླབ་པ་ཕུལ་བ་ཡང་ཡོད། བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཡང་ཡོད་དོ། །དེ་ལ་རེ་ཞིག་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ནི་འདི་ལྟ་སྟེ། དགེ་སློང་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་། དགེ་སློང་གི་ཚུལ་དོན་དུ་མི་གཉེར་བའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །སངས་རྒྱས་དང་ཆོས་དང་དགེ་འདུན་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །མདོ་སྡེ་དང་འདུལ་བ་དང་མ་མོ་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །མཁན་པོ་དང་སློབ་དཔོན་འབུལ་ལོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱའོ། །བདག་ཁྱིམ་པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་པར་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། ཐ་ན་འདི་སྐད་ཅེས་བདག་ཁྱེད་ལྟ་བུ་ཆོས་མཐུན་པ་ཚངས་པ་མཚུངས་པ་སྤྱོད་པ་དག་གིས་ཆོག་གོ་ཞེས་ཟེར་ན་བསླབ་པ་ཕུལ་བར་བརྗོད་པར་བྱ་སྟེ། དེ་ལྟར་ན་བསླབ་པ་ཕུལ་ལ་བསླབ་པ་ཉམས་པར་མ་བྱས་པ་ཡིན་ནོ། །ཇི་ལྟར་ན་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡིན་ཞེ་ན། འདི་ལྟ་སྟེ། དགེ་སློང་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པའམ། དགེ་
སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་ན་དགེ་སློང་གི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་མཁྱེན་པར་མཛོད་ཅིག །ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱའོ། །གཅིག་པུ་ཉིད་ལ་མངོན་པར་དགའ་བ་དཀའོ། །གནས་མལ་དགོན་པ་ནགས་ཁྲོད་དང་། རི་དྲུང་དང་བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང་ཕུ་ནུ་དང་བུ་སྲིང་དྲན་ནོ། །བདག་བཟོ་དག་སློབ་ཏུ་ཆུག་ཅིག །བདག་གི་ལས་ཀྱི་མཐའ་དག་ཚོལ་ཅིག །བདག་ཁྱིམ་བཟང་པོ་དག་ཏུ་གཏོད་ཅིག་ཅེས་དེ་ལྟར་དེ་ལ་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའི་ངག་དང་ཚིག་དང་ཐ་སྙད་དང་སྐད་དང་བརྗོད་པ་དང་ངེས་པའི་ཚིག་དང་། ཚིག་གི་ལམ་དང་། ཚིག་གི་སྒྲ་དང་། ངག་གི་ལས་དང་། ངག་གི་རྣམ་པར་རིག་བྱེད་གང་ཡིན་པ་དག་ནི་རྗོད་པར་བྱེད་ལ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེའམ། སངས་རྒྱས་དང་ཆོས་དང་དགེ་འདུན་འབུལ་ལོ་ཞེའམ། མདོ་སྡེ་དང་འདུལ་བ་དང་མ་མོ་འབུལ་ལོ་ཞེའམ། མཁན་པོ་དང་སློབ་དཔོན་འབུལ་ལོ་ཞེའམ། བདག་ཁྱིམ་པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་པར་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། ཐ་ན་འདི་སྐད་ཅེས་བདག་ཁྱོད་
ལྟ་བུ་ཆོས་མཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ནི་མི་ཟེར་བ་སྟེ། དེ་ལྟར་ན་བསླབ་པ་ཉམས་པར་བྱས་ལ་བསླབ་པ་མ་ཕུལ་བ་ཡིན་ནོ། །ཇི་ལྟར་ན་བསླབ་པ་ཉམས་པར་ཡང་བྱས་ལ། བསླབ་པ་ཕུལ་བ་ཡང་ཡིན་ཞེ་ན། འདི་ལྟ་སྟེ། དགེ་སློང་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པ་དང་། དགེ་སློང་གི་དྲུང་དུ་སོང་སྟེ་འདི་སྐད་ཅེས་ཚེ་དང་ལྡན་པ་མཁྱེན་པར་མཛོད་ཅིག །ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་རི་དྲུང་དང་། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཕ་མ་དང་ཕུ་ནུ་དང་བུ་སྲིང་དྲན་ནོ། །བདག་བཟོ་དག་སློབ་ཏུ་ཆུག་ཅིག །བདག་གིས་ལས་ཀྱི་མཐའ་དག་ཚོལ་ཅིག །བདག་ཁྱིམ་བཟང་པོ་དག་ཏུ་གཏོད་ཅིག་ཅེས་དེ་ལྟར་དེ་ལ་འདོད་པའམ། མངོན་པར་མི་དགའ་བའམ། རྣམ་པར་འཁྱམ་འདོད་པར་གྱུར་ཅིང་དགེ་སྦྱོང་གི་ཚུལ་མི་འདོད་པའམ། དགེ་སྦྱོང་གི་ཚུལ་གྱིས་སྒྱིད་ལུག་པའམ། མུས་བྱུང་བའམ། ཐེ་ཚོམ་ཟ་བའམ། སྨོད་པའམ། དགེ་སྦྱོང་གི་ཚུལ་ཡོངས་སུ་གཏོང་འདོད་པའི་ངག་དང་ཚིག་དང་ཐ་སྙད་དང་སྐད་དང་བརྗོད་པ་དང་། ངེས་པའི་ཚིག་དང་། ཚིག་གི་ལམ་དང་། ཚིག་གི་སྒྲ་དང་། ངག་གི་ལས་དང་། ངག་གི་རྣམ་པར་རིག་བྱེད་གང་ཡིན་པ་དག་ཀྱང་རྗོད་པར་བྱེད་ལ། འདི་སྐད་ཅེས་ཚེ་དང་ལྡན་པ་དགོངས་སུ་གསོལ། བདག་མིད་འདི་ཞེས་བགྱི་བ་བསླབ་པ་འབུལ་ལོ་ཞེའམ། སངས་རྒྱས་དང་ཆོས་དང་དགེ་འདུན་འབུལ་ལོ་ཞེའམ། མདོ་སྡེ་དང་འདུལ་བ་དང་། མ་མོ་འབུལ་ལོ་ཞེའམ། མཁན་པོ་དང་སློབ་དཔོན་འབུལ་ལོ་ཞེའམ། བདག་ཁྱིམ་
པའམ། དགེ་ཚུལ་ལམ། ཟ་མའམ། མ་ནིང་ངམ། དགེ་སློང་མ་སུན་ཕྱུང་བའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། རྐུ་ཐབས་སུ་གནས་པའམ། ཐ་དད་པར་གནས་པའམ། གནས་པར་མི་བྱ་བར་གཟུང་དུ་གསོལ་ཞེའམ། ཐ་ན་འདི་སྐད་ཅེས་བདག་ཁྱེད་ཅག་ལྟ་བུ་ཆོས་མཐུན་པ་ཚངས་པ་མཚུངས་པར་སྤྱོད་པ་དག་གིས་ཆོག་གོ་ཞེས་ཀྱང་ཟེར་ན་བསླབ་པ་ཕུལ་བར་བརྗོད་པར་བྱ་སྟེ། དེ་ལྟར་ན་བསླབ་པ་ཉམས་པར་ཡང་བྱས་ལ་བསླབ་པ་ཕུལ་པ་ཡང་ཡིན་ནོ། །ཇི་ལྟར་ན་བསླབ་པ་མ་ཕུལ་ཞིང་བསླབ་པ་ཉམས་པར་མ་བྱས་པ་ཡང་ཡིན་ཞེ་ན། རྣམ་པ་དེ་དག་མ་གཏོགས་པ་སྟེ། དེས་ན་བསླབ་པ་ཉམས་པར་མ་བྱས་པར་ཞེས་གསུངས་སོ། །མི་ཚངས་པར་སྤྱོད་པ་ཞེས་བྱ་བ་ནི། གཉིས་ཀྱི་གཉིས་སྤྲོད་པའོ། །འཁྲིག་པ་ཞེས་བྱ་བ་ནི་མི་ཚངས་པར་སྤྱོད་པ་གང་ཡིན་པ་དེ་འཁྲིག་པ་ཡང་ཡིན་ནོ། །ཆོས་ཤེས་བྱ་བ་ནི་ཆོས་མ་ཡིན་པ་དེ་ཆོས་ཀྱི་སྒྲར་གསུངས་པའོ། །བརྟེན་ན་ཞེས་བྱ་བ་ནི་ལྷག་པར་སྤྱད་ནའོ། །ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ་ཞེས་བྱ་བ་ནི་སྤྲ་མོའམ་སྤྲ་མོ་དང་འདྲ་བར་གཏོགས་པ་དང་ངོ་། །དགེ་སློང་ཞེས་བྱ་བ་ནི། གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང་། རྟོག་པ་ཉིད་དང་། ཡང་དག་པར་རྟོག་པ་ཉིད་དང་། མཐར་ཕྱིན་པར་བྱེད་པ་ཉིད་དང་། ཡང་དག་པར་མཐར་བྱིན་པར་བྱེད་པ་ཉིད་གང་ཡིན་པ་དང་། གང་ཟག་དེའི་ཁས་ལེན་པ་དང་། མངོན་པར་ཁས་ལེན་པ་དང་། ཕྱིར་མི་ཟློག་པ་དང་། ཕྱིར་མི་འགོག་པ་ཉིད་དང་། ངག་དང་ཚིག་དང་། ཐ་སྙད་དང་། སྐད་དང་བརྗོད་པ་དང་། ངེས་པའི་ཚིག་དང་། ཚིག་གི་ལམ་དང་། ཚིག་གི་སྒྲ་དང་། ངག་གི་
ལས་དང་། ངག་གི་རྣམ་པར་རིག་བྱེད་གང་ཡིན་པའོ། །དེ་ཞེས་བྱ་བ་ནི། ཉེ་བར་བསྟན་པ་དང་། ཀུན་ཏུ་བསྟན་པའི་ཚིག་བླ་དྭགས་དེའོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི། དེ་མཐའ་གྱུར་པ་དང་། ལྟུང་བ་དང་། དམན་པ་དང་། མཇུག་ན་འདུག་པ་དང་། ཐ་ཆད་དང་ཡིད་དང་མི་མཐུན་པ་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སྦྱོང་གི་དངོས་པོ་ལས་ཉམས་པར་འགྱུར་པ་སྟེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ། བཅོམ་པ། ལྟུང་བ་ཕམ་པར་གྱུར་པ་སྟེ། དེའི་དགེ་སློང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན། ཤིང་ཏ་ལའི་མགོ་བཅད་སྔོན་པོར་འགྱུར་དུ་མི་རུང་བ་འཕེལ་ཞིང་རྒྱས་པ་དང་། ཡངས་པར་འགྱུར་དུ་མི་རུང་བ་དེ་བཞིན་དུ་དགེ་སློང་གིས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ། བཅོམ་པ། ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་བས། དེས་ན་ཕམ་པར་གྱུར་པ་ཡིན་གྱིས་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི། དགེ་སློང་རྣམས་ཀྱིས་དེ་དང་གསོ་སྦྱོང་དང་དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་ལ་གནས་པར་མི་བྱའོ། །གང་ཟག་བཅུ་གཉིས་པོ་དག་ཏུ་བསྐོ་བས་བསྐོ་བར་མི་བྱ་བ་སྟེ་དེས་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། སྡོམ་ལ། འབའ་ཞིག་དང་ནི་གནས་གསུམ་དང་། །བུད་མེད་སྐྱེས་པ་མ་ནིང་དང་། །སྟེན་ལ་གཞོལ་དང་རྩོལ་པ་དང་། །མྱོས་པར་བྱས་དང་མཐུས་འཛིན་པའོ། །དགེ་སློང་གིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །དགེ་སློང་གིས་གནས་གསུམ་གྱིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་
འགྱུར་རོ། །ཟག་བྱེད་ཟག་བྱེད་དམ་ཁའམ། བཤང་བའི་ལམ་དུ་འཛུད་ན། བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གིས་བུད་མེད་དང་སྐྱེས་པ་དང་མ་ནིང་གསུམ་དང་ལྷན་ཅིག་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་སྟེན་པ་ལ་འབབ་པ་དང་སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པས་མིའི་བུད་མེད་གསོན་པོ་མ་ཉམས་པ་ལ་ཟག་བྱེད་པར་དང་བཅས་བར་ཆད་དང་བཅས་པ་དང་། བར་དང་བཅས་པས་བར་ཆད་མེད་པ་དང་། བར་མེད་པས་བར་ཆད་དང་བཅས་པ་དང་། བར་མེད་པས་བར་ཆད་མེད་པ། ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པས་མིའི་བུད་མེད་གསོན་པོ་ཉམས་པ་ལ། ཟག་བྱེད་པར་དང་བཅས་པས་བར་ཆད་དང་བཅས་པ་དང་། བར་དང་བཅས་པས་བར་ཆད་མེད་པ་དང་། བར་མེད་པས་བར་ཆད་དང་བཅས་པ་དང་། བར་མེད་པས་བར་ཆད་མེད་པ། ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཉེས་པ་སྦོམ་པོར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་
ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པས་མིའི་བུད་མེད་ཤི་བ་མ་ཉམས་པ་ལ། ཟག་བྱེད་བར་དང་བཅས་པས་བར་ཆད་དང་བཅས་པ་དང་། བར་དང་བཅས་པས་བར་ཆད་མེད་པ་དང་། བར་མེད་པས་བར་ཆད་དང་བཅས་པ་དང་། བར་མེད་པས་བར་ཆད་མེད་པ། ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཕམ་པར་འགྱུར་རོ། །དགེ་སློང་གི་སེམས་སྟེན་པ་ལ་གཞོལ་བ་དང་སྟེན་པ་ལ་འབབ་པ་དང་། སྟེན་པ་ལ་བབ་པར་གྱུར་ཅིང་། དེ་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པས་མིའི་བུད་མེད་ཤི་བ་ཉམས་པ་ལ། ཟག་བྱེད་བར་དང་བཅས་པས་བར་ཆད་དང་བཅས་པ་དང་། བར་དང་བཅས་པས་བར་ཆད་མེད་པ་དང་། བར་མེད་པས་བར་ཆད་དང་བཅས་པ་དང་། བར་མེད་པས་བར་ཆད་མེད་པ་ཟག་བྱེད་དམ་ཁའམ་བཤང་བའི་ལམ་དུ་འཛུད་ན། བཅུག་མ་ཐག་ཏུ་ཉེས་པ་སྦོམ་པོར་འགྱུར་རོ། །མིའི་བུད་མེད་གསོན་པོ་དང་ཤི་བ་ལ་ཇི་ལྟ་བ་དེ་བཞིན་དུ་མི་མ་ཡིན་པ་མོ་གསོན་པོ་དང་ཤི་བ་དང་། དུད་འགྲོའི་སྐྱེས་གནས་སུ་སྐྱེས་པ་མོ་གསོན་པོ་དང་ཤི་བ་ལ་ཡང་དེ་བཞིན་ནོ། །སྐྱེས་པ་གསོན་པོ་དང་ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །སྐྱེས་པ་གསོན་པོ་དང་ཤི་བ་ལ་རྨའི་སྒོ་གཉིས་སུ་ཇི་ལྟ་བ་དེ་བཞིན་དུ། མི་མ་ཡིན་པ་ཕོ་གསོན་པོ་དང་ཤི་བ་ལ་རྨའི་སྒོ་གཉིས་དང་། དུད་འགྲོའི་སྐྱེ་གནས་སུ་སྐྱེས་པ་ཕོག་གསོན་པོ་དང་ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །སྐྱེས་པ་ལ་ཇི་ལྟ་བ་དེ་བཞིན་དུ་མིའི་མ་ནིང་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་དང་། མི་མ་ཡིན་པའི་མ་ནིང་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་དང་། དུད་འགྲོའི་སྐྱེ་གནས་སུ་སྐྱེས་པའི་མ་ནིང་ཕོ་གསོན་པོ་དང་ཤི་བ་ལ་རྨའི་སྒོ་གཉིས་སུ་ཡང་དེ་བཞིན་ནོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང་། གལ་ཏེ་དགེ་སློང་གིས་
དེ་དང་པོར་ཡང་མ་ཤེས། བར་དུ་ཡང་མ་ཤེས། ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང་། གལ་ཏེ་དགེ་སློང་གིས་དེ་དང་པོར་ཤེས་ཤིང་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང་། གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཤིང་ཐ་མར་མ་ཤེས་ན། གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བར་བྱེད་ཅིང་། གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ། ཤེས་ནས་ཀྱང་བདག་གིར་མི་བྱེད་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་ཉལ་བ་ལ་རྩོལ་བ་བྱེད་ཅིང་། གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ་ཤེས་ནས་ཀྱང་བདག་གིར་བྱེད་ན་གཉི་ག་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་དང་། དགེ་སློང་མས་དགེ་སློང་དང་། དགེ་ཚུལ་ལ་དང་། དགེ་སློབ་མས་དགེ་སློང་དང་། དགེ་ཚུལ་ལ་དང་། དགེ་ཚུལ་མས་དགེ་སློང་དང་། དགེ་ཚུལ་ལ་དང་། དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ཡང་དེ་བཞིན་ནོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་། གལ་ཏེ་དགེ་སློང་གིས་དེ་དང་པོར་ཡང་མ་ཤེས་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཤེས་ཤིང་བར་དུ་ཡང་མ་ཤེས་ཐ་མར་ཡང་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཡང་ཤེས་པར་དུ་ཡང་ཤེས་ཤིང་ཐ་མར་མ་ཤེས་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ་ཤེས་ནས་ཀྱང་བདག་གིར་མི་བྱེད་ན་གང་རྩོལ་བར་བྱེད་པ་དེ་བསྙིལ་བར་བྱའོ། །དགེ་སློང་གིས་དགེ་སློང་འབྲུའི་ཆང་གིས་མྱོས་པར་བྱེད་དུ་བཅུག་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་དང་པོར་ཡང་ཤེས་བར་དུ་ཡང་ཤེས་ཐ་མར་ཡང་ཤེས་ལ་ཤེས་ནས་ཀྱང་བདག་གིར་བྱེད་ན་གཉི་ག་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ། དགེ་སློང་གིས་དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་དང་། དགེ་སློང་མས་དགེ་སློང་དང་། དགེ་ཚུལ་དང་། དགེ་སློབ་མས་དགེ་སློང་དང་། དགེ་ཚུལ་དང་། དགེ་ཚུལ་མས་དགེ་སློང་དང་དགེ་ཚུལ་དང་། དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ཡང་དེ་བཞིན་ནོ། །
འབྲུའི་ཆང་གིས་ཇི་ལྟ་བ་དེ་བཞིན་དུ་བཅོས་པའི་ཆང་དང་། སྦྱར་བའི་ཆང་དང་། རྩ་བའི་བཏུང་བ་དང་། སྡོང་བུའི་བཏུང་བ་དང་། འདབ་མའི་བཏུང་བ་དང་། མེ་ཏོག་གི་བཏུང་བ་དང་། འབྲས་བུའི་བཏུང་བས་སམ། གསང་སྔགས་དག་དང་རིག་སྔགས་དག་དང་། སྨན་གྱིས་སེམས་འཁྲུགས་པར་བྱས་པའམ། གཉིད་ལོག་པར་བྱས་ཏེ་ཡང་དེ་བཞིན་ནོ། །དགེ་སློང་གིས་དགེ་སློང་གྱ་ཚོམ་དུ་མཐུས་བཟུང་སྟེ། རྩོལ་བར་བྱེད་ཅིང་གལ་ཏེ་དགེ་སློང་གིས་དེ་འཛུད་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཛུད་པ་ན་མི་བྱེད་ཀྱང་བཅུག་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཛུད་པ་ན་ཡང་མི་བྱེད། བཅུག་པ་ན་ཡང་མི་བྱེད་མོད་ཀྱི་འབྱིན་པ་ན་བདག་གིར་བྱེད་ན་གཉི་ག་བསྙིལ་བར་བྱའོ། །འཛུད་པ་ན་ཡང་བདག་གིར་མི་བྱེད། བཅུག་པ་ན་ཡང་མི་བྱེད། འབྱིན་པ་ན་ཡང་མི་བྱེད་ན་གང་རྩོལ་བ་དེ་བསྙིལ་བར་བྱའོ། །དགེ་སློང་གིས་དགེ་སློང་ལ་ཇི་ལྟ་བ་བཞིན་དུ་དགེ་སློང་གིས་དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་དང་། དགེ་སློང་མས་དགེ་སློང་དང་། དགེ་ཚུལ་དང་། དགེ་སློབ་མས་དགེ་སློང་དང་། དགེ་ཚུལ་དང་། དགེ་ཚུལ་མས་དགེ་སློང་དང་། དགེ་ཚུལ་དང་། དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ཡང་དེ་བཞིན་ནོ། །། །འདུལ་བ་རྣམ་པར་འབྱེད་པ། བམ་པོ་གཉིས་པ། སྡོམ་ལ། རྒྱབ་གཉེན་དང་ནི་འཕྱང་བ་ཅན། །མཛེས་དགའ་ཚོགས་ཅན་རྒན་མོ་དང་། །དགེ་སློང་གཉིད་ཀྱིས་ལོག་པ་ལ། །ལྕི་ཐུན་མས་བརྩལ་ཉེས་མེད་པའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་
པ་ལས་ཁྱེའུ་ཞིག་བྱུང་བ་དེའི་རྒྱབ་འདི་ལྟ་སྟེ། དཔེར་ན་རི་བོང་ངམ་བྱི་ལའི་ལྟར་མཉེན་པ་དང་། ཤིན་ཏུ་མཉེན་པར་གྱུར་ཏོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཅས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ་གང་གི་ཕྱིར་ཁྱེའུ་འདིའི་རྒྱབ་འདི་ལྟ་སྟེ། དཔེར་ན་རི་བོང་ངམ་བྱི་ལའི་ལྟར་མཉེན་པ་དང་ཤིན་ཏུ་མཉེན་པ་དེའི་ཕྱིར་ཁྱེའུ་འདིའི་མིང་རྒྱབ་མཉེན་ཞེས་བྱའོ། །ཞེས་དེའི་མིང་རྒྱབ་མཉེན་ཞེས་བྱ་བར་བཏགས་སོ། །དེ་འོ་མ་དང་ཞོ་དང་མར་དང་ཞུན་མར་དང་མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིད་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་དེ་ལྟར་རབ་ཏུ་བྱུང་ནས་དེ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ། གྲོང་ངམ་གྲོང་རྡལ་གང་ན་ཉེ་བར་རྟེན་ཅིང་གནས་པའི་གྲོང་ངམ་གྲོང་རྡལ་དེ་ཉིད་དུ་ལུས་མ་བསྲུངས་དབང་པོ་དག་མ་བསྡམས་དྲན་པ་ཉེ་བར་མ་བཞག་པར་བསོད་སྙོམས་ལ་ཞུགས་སོ། །དེས་གྲོང་ངམ། གྲོང་རྡལ་དེ་ཉིད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་ནང་དུ་ཡང་དག་འཇོག་གི་ཕྱིར་གནས་སུ་ཞུགས་སོ། །དེའི་སེམས་གང་གི་ཚེ་འདོད་པ་ལ་འདོད་ཆགས་ཀྱིས་ཀུན་ནས་བཀྲིས་པར་གྱུར་པ་དེའི་ཚེ། དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ་རང་གི་ཁར་བཅུག་ནས་རྩོལ་བ་བྱེད་དོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་གནས་ཉུལ་ཞིང་རྒྱུ་བ་དག་དགེ་སློང་དེའི་གནས་ག་ལ་བ་དེར་ཕྱིན་པ་དང་། དགེ་སློང་དེ་དག་གིས་དགེ་སློང་དེ་དེ་ལྟར་བྱེད་པ་མཐོང་ངོ་། །མཐོང་ནས་ཀྱང་ཡིད་མི་དགའ་ཞིང་མངོན་པར་མ་མགུ་ནས་དགེ་སློང་དེ་ལ་འདི་སྐད་ཅེས་སྨྲས་སོ། །
ཚེ་དང་ལྡན་པ་ཅི་བྱེད། རེག་པ་བདག་གིར་བྱེད་དོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ། དེ་ནི་གཞན་གྱི་ལ་ཡིན་གྱི་རང་གི་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་དོང་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཞིག་གཞན་གྱི་ལ་ཡང་བཀག་ན་རང་གི་ལ་ལྟ་སྨོས་ཀྱང་ཅི་དགོས་ཏེ། མི་གཏི་མུག་ཅན་དེ་ནི་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པར་གྱུར་ཅིང་དེ་སེམས་སྟེན་པ་ལ་གཞོལ་བ་དང་། སྟེན་པ་འབབ་པ་དང་། སྟེན་པ་ལ་བབ་པས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། རང་གིའམ་གཞན་གྱི་ཁར་བཅུག་ནས་རྩོལ་བར་བྱེད་ན་བཅུག་མ་ཐག་ཏུ་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཡན་ལག་གི་རྣམ་པ་ཚད་ལས་ཤིན་ཏུ་འདས་པ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་
སེམས་ཏེ་གང་གི་ཕྱིར་ཁྱེའུ་འདིའི་ཡན་ལག་གི་རྣམ་པ་ཚད་ལས་ཤིན་ཏུ་འདས་པ་དེའི་ཕྱིར་ཁྱེའུ་འདི་འཕྱང་བ་ཅན་ཞེས་བྱའོ་ཞེས་དེའི་མིང་འཕྱང་བ་ཅན་ཞེས་བྱ་བར་བཏགས་སོ། །དེ་འོ་མ་དང་ཞོ་དང་མར་དང་ཞུན་མར་དང་མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་དེ་ལྟར་རབ་ཏུ་བྱུང་ནས་དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། གྲོང་ངམ་གྲོང་རྡལ་གང་ན་ཉེ་བར་རྟེན་ཅིང་གནས་པའི་གྲོང་ངམ་གྲོང་རྡལ་དེ་ཉིད་དུ་ལུས་མ་བསྲུངས། དབང་པོ་དག་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་ཞུགས་སོ། །དེས་གྲོང་ངམ་གྲོང་རྡལ་དེ་ཉིད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས། ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་ནང་དུ་ཡང་དག་འཇོག་གི་ཕྱིར་གནས་སུ་ཞུགས་སོ། །དེའི་སེམས་གང་གི་ཚེ་འདོད་པ་ལ་འདོད་ཆགས་ཀྱི་ཀུན་ནས་དཀྲིས་པར་གྱུར་པ་དེའི་ཚེ། དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ་རང་གི་བཤང་བའི་ལམ་དུ་བཅུག་ནས་རྩོལ་བར་བྱེད་དོ། །དེ་ནས་དུས་གཞན་ཞིག་ན་དགེ་སློང་རབ་ཏུ་མང་པོ་གནས་ཉུལ་ཞིང་རྒྱུ་བ་དག་དགེ་སློང་དེའི་གནས་ག་ལ་བ་དེར་ཕྱིན་པ་དང་། དགེ་སློང་དེ་དག་གིས་དགེ་སློང་དེ་དེ་ལྟར་བྱེད་པ་མཐོང་ངོ་། །མཐོང་ནས་ཀྱང་ཡིད་མི་དགའ་ཞིང་མངོན་པར་མ་མགུ་ནས། དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཅི་བྱེད། རེག་པ་བདག་གིར་བྱེད་དོ། །ཚེ་དང་ལྡན་པ་འོ་ན་བཅོམ་ལྡན་འདས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་མ་བཀག་གམ། ཚེ་དང་ལྡན་པ་དག་བཀག་སྟེ་དེ་ནི་གཞན་གྱི་ལ་ཡིན་གྱི་རང་གི་ལ་ནི་མ་ཡིན་ནོ། །དགེ་སློང་དེ་དག་དེ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་། མངོན་པར་བསྟོད་པར་ཡང་མ་བྱས། ཕྱིར་བཟློག་པར་ཡང་མ་བྱས་པར་དོང་ནས་བཅོམ་ལྡན་འདས་
ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས། བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་སྐབས་དེ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་རེ་ཞིག་གཞན་གྱི་ལ་ཡང་བཀག་ན་རང་གི་ལ་ལྟ་སྨོས་ཀྱང་ཅི་དགོས་ཏེ། མི་གཏི་མུག་ཅན་དེ་ནི་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པར་གྱུར་ཅིང་། དེ་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། རང་གིའམ་གཞན་གྱི་བཤང་བའི་ལམ་དུ་བཅུག་ནས་རྩོལ་བར་བྱེད་ན། བཅུག་མ་ཐག་ཏུ་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། དེའི་ཚེ་ན་འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ་རྣམས་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེ་ལ་བུ་ཡང་མེད། བུ་མོ་ཡང་མེད་ནས། དེ་བུ་མེད་ཅིང་བུ་མངོན་པར་འདོད་པས་ཞི་བ་དང་ཆུ་ལྷ་དང་ལུས་ངན་དང་བརྒྱ་བྱིན་དང་ཚངས་པ་ལ་སོགས་པ་དག་ལ་གསོལ་བ་འདེབས་ཤིང་། ལྷའི་བྱེ་བྲག་གཞན་འདི་ལྟ་སྟེ། ཀུན་དགའ་ར་བའི་ལྷ་དག་དང་། ཚལ་གྱི་ལྷ་དག་དང་། བཞི་མདོའི་ལྷ་དང་། སུམ་མདོའི་ལྷ་དག་དང་། གཏོར་མ་ལེན་པའི་ལྷ་དག་དང་། ལྷན་ཅིག་སྐྱེས་པ་དག་དང་། ཆོས་མཐུན་པ་དག་དང་། རྟག་ཏུ་རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་རྟེན་ན་གང་གསོལ་བ་འདེབས་པའི་རྒྱུ་ལས་
བུ་དག་དང་བུ་མོ་དག་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་མ་ཡིན་ཏེ་གལ་ཏེ་དེ་ལྟར་གྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕ་དང་མ་གཉིས་ཆགས་པར་གྱུར་ཅིང་འདུས་པ་དང་། མ་དུས་ལ་བབ་ཅིང་ཟླ་མཚན་དང་ལྡན་པ་དང་། དྲི་ཟ་ཉེ་བར་གནས་ཤིང་འཇུག་འདོད་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ན། སེམས་ཅན་ཞིག་ཀྱང་ལྷའི་རིས་ནས་ཤི་འཕོས་ཏེ། དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་། མངལ་ན་གནས་པ་ཞུགས་པ་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་ནི་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས། ཁྱིམ་ཐབ་ལ་སྨྲས་པ། རྗེའི་སྲས། བདག་ལ་སེམས་ཅན་ཞུགས་པར་གྱུར་པ་ནི། འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་གྱིས། དགྱེས་པ་བསྐྱེད་དུ་གསོལ། དེ་ཡང་ཡིད་དགའ་ཞིང་ཡིད་དགའ་ནས་རོ་སྟོད་བསྲང་སྟེ་ལག་པ་གཡས་པ་བརྐྱངས་ནས། འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང་། ཁོ་བོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང་། ཁོ་བོའི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང་། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུའམ་མང་
པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིང་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟང་གི་གཞིར་གཏོགས་པ་ན་གྲང་བ་ན་གྲང་བའི་ཡོ་བྱད་དག་དང་། དྲོ་བ་ན་དྲོ་བའི་ཡོ་བྱད་དག་དང་། སྨན་པས་བཅས་པའི་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ཅང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་རྣམ་པར་སྤངས་པའི་ཟས་དག་དང་། དོ་ཤལ་དང་། སེ་མོ་དོ་དང་། རྒྱན་གྱིས་ཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང་། ཁྲི་ནས་ཁྲིར་དང་། ཁྲིའུ་ནས་ཁྲིའུར་རྒྱུ་ཞིང་། ཤོད་ཀྱི་ས་གཞིར་མི་འབབ་པ་དང་། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུད་དོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས། ཁྱེའུ་གཟུགས་བཟང་བ་བལྟ་ན་སྡུག་པ་མཛེས་པ་གསལ་བ། གསེར་གྱི་མདོག་འདྲ་བ། མགོ་བོ་གདུགས་ལྟ་བུ་དང་ལྡན་པ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཛར་བ། སྣའི་གཟེངས་མཐོ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །ཡུལ་དབུས་ན་གང་གཟུགས་བཟང་བ་བལྟ་ན་སྡུག་པ་མཛེས་པ་དེ་ལ་མཛེས་པ་ཞེས་བྱའོ་ཞེས་ཀུན་ཏུ་སྤྱོད་པས་དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་གཟུགས་བཟང་བ་བལྟ་ན་སྡུག་པ་མཛེས་པ་ཡིན་ལ། དེ་དེད་དཔོན་དགའ་བོའི་བུ་ཡིན་པ་དེའི་ཕྱིར་ཁྱེའུ་ཡི་མིང་མཛེས་དགའ་ཞེས་བྱའོ་ཞེས་དེའི་མིང་མཛེས་དགའ་ཞེས་བྱ་བར་བཏགས་སོ། །
ཁྱེའུ་མཛེས་དགའ་མ་མ་བརྒྱད་པོ། པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེད་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དེ་དག་གིས་འོ་མ་དང་ཞོ་དང་མར་དང་ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེ་པར་བྱེད་དོ། དེ་གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང་གྲངས་དང་། རྩིས་དང་ལག་རྩིས་དང་དབྱུང་བ་དང་། གཞུག་པ་དང་གཞག་པ་ལ་ཉེ་བར་ཞུགས་ནས། དེ་ཡི་གེའི་མཐར་ཕྱིན་ཅིང་འབྱེད་པ་དང་། ཀློག་པ་དང་མཁས་པ་དང་སྤྱོད་པ་གསལ་བ་དང་། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང་། གཞི་བརྟག་པ་དང་། གོས་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །ཕས་དེའི་ཆུང་མའི་འཁོར་གསུམ་པོ་རབ་དང་། འབྲིང་དང་། ཐ་མ་དག་རྣམ་པར་བཞག་གོ་།འདུག་པའི་གནས་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་དག་བྱེད་དུ་བཅུག་གོ་།སྐྱེད་མོས་ཚལ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་དག་བྱེད་དུ་བཅུག་གོ་།དེ་སྟེང་གི་ཁང་བཟང་གི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱི་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེད་དཔོན་དགའ་བོ་རྟག་ཏུ་རྩིས་ལ་ཆགས་ཤིང་འདུ་བ་དང་འགོད་པ་དག་ཀྱང་སྦྱོང་བར་བྱེད་ནས། མཛེས་དགས་སྨྲས་པ། ཡབ་ཁྱོད་ཅིའི་སླད་དུ་རྟག་ཏུ་རྩིས་ལ་ཆགས་ཤིང་བཞུགས། དེས་སྨྲས་པ། བུ་ཅི་སྟེང་གི་ཁང་བཟང་གི་གཞིར་གཏོགས་པ་ན། རྩེ་བ་ཉིད་ཀྱིས་ནོར་བསྒྲུབ་པར་བྱར་ནུས་སམ། ང་ཁྱིམ་གྱི་བྱ་བ་ལོས་ཀྱང་བསམ་དགོས་སོ། །མཛེས་དགས་དོན་གྱིས་འདིས་བདག་ལ་བསྐུལ་ཏོ་སྙམ་དུ་རིག་ནས། དེས་དེའི་རྐང་པ་གཉིས་ལ་གཏུགས་ཏེ་སྨྲས་པ། ཡབ་གལ་ཏེ་དེ་ལྟར་རྗེས་སུ་གནང་ན་ཡུལ་གཞན་དུ་མཆིས་ལ་ནོར་བསྒྲུབ་པར་
བགྱིའོ། །དེས་སྨྲས་པ། བུ་ནོར་གྱི་རྣམ་པ་མང་པོ་ཡོད་ན་ཅིའི་ཕྱིར་ཡུལ་གཞན་དུ་འགྲོ། འདུག་ཅིག །དེས་སྨྲས་པ། ཡབ་ངན་བུ་གོར་མ་བཀུམ་པར་མཆིའོ། །དེད་དཔོན་དགའ་བོས་འདི་འདོད་པ་ལ་བབ་པར་བྱའོ་སྙམ་དུ་བསམས་ནས་དེས་ལྡེ་མིག་དང་ལྡེ་མིག་ཀྱོག་པོ་ལ་སོགས་པ་བླངས་ཏེ། དབྱིག་དང་གསེར་བྱས་པ་དང་མ་བྱས་པ་དེའི་མཛོད་གང་བ་བདུན་ཕྱེ་སྟེ་བསྟན་ནས་སྨྲས་པ། བུ་མཛེས་དགའ་ནོར་གྱི་རྣམ་པ་འདི་སྙེད་ཡོད་ཀྱིས་ཁྱོད་འདི་ཉིད་དུ་འདུག་ལ་འདོད་པ་ལ་ཡང་ལོངས་སྤྱོད་ཅིག །སྦྱིན་པ་དག་ཀྱང་བྱིན་ཅིག །བསོད་ནམས་དག་ཀྱང་གྱིས་ཤིག །ཡུལ་གཞན་དུ་འགྲོ་མི་དགོས་སོ། །དེས་སྨྲས་པ། ཡང་ཁྱོད་ངན་བུ་ལ་སྟོན་པར་མཛད་ན། ངན་བུས་བུ་རྣམས་ལ་ཅི་ཞིག་བསྟན་པར་བགྱི། དེད་དཔོན་དགའ་བོས་དེ་ཟེར་བ་བཟང་སྟེ། བདག་འདས་ནས་འདིས་ཁྱིམ་གྱི་བྱ་བ་སྦྱོང་བར་འགྱུར་བས། དེའི་ཕྱིར་ཇི་སྲིད་བདག་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་འདི་ལ་ཕའི་གྲོགས་དག་ཀྱང་མངོན་དུ་གྱུར་པས་དེ་ལྟ་ན་བདག་འདས་ནས་འདིའི་འགོ་བའི་ཕྱོགས་མུན་པ་མེད་པར་འགྱུར་རོ་སྙམ་དུ་ཤེས་ཤིང་རིག་ནས་ཆུང་མ་ལ་སྨྲས་པ། བཟང་མོ་ཁོ་བོ་འདས་ནས་མཛེས་དགས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་ཁོ་བོ་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ་ཡུལ་གཞན་དུ་འདི་ལ་ཕའི་གྲོགས་དག་ཀྱང་མངོན་དུ་གྱུར་པས། དེ་ལྟར་ན་ཁོ་བོ་འདས་ནས་འདིའི་འགྲོ་བའི་ཕྱོགས་མུན་པ་མེད་པར་འགྱུར་རོ། །དེས་སྨྲས་པ། རྗེའི་སྲས། མ་ནོངས་ཏེ་དེ་བཞིན་མཆི་ལ་རག་གོ་།དེ་ནས་དེད་དཔོན་
དགའ་བོས། མཛེས་དགའ་བོས་ཏེ་སྨྲས་པ། བུ་ཁྱོད་ཀྱིས་ཟོང་མནོས་ཏེ་ཡུལ་གཞན་དུ་འགྲོའོ་སྙམ་དུ་སེམས་བསྐྱེད་པ་མ་ཉེས་ཏེ། ཁོ་བོ་འདས་ནས་ཁྱོད་ཀྱིས་ཁྱིམ་གྱི་བྱ་བ་སྦྱོང་བར་འགྱུར་བས་དེའི་ཕྱིར་ཇི་སྲིད་ཁོ་བོ་གསོན་པ་དེ་སྲིད་དུ་ཟོང་མནོས་ཤིང་ཡུལ་གཞན་དུ་འགྲོ་ལ་རག་སྟེ། ཡུལ་གཞན་དུ་ཁྱོད་ལ་ཕའི་གྲོགས་དག་ཀྱང་མངོན་དུ་གྱུར་པས་དེ་ལྟ་ན་ཁོ་བོ་འདས་ནས་ཁྱོད་ཀྱིས་འགྲོ་བའི་ཕྱོགས་མུན་པ་མེད་པར་འགྱུར་རོ། །མཛེས་དགས་སྨྲས་པ། ཡབ་བཀའ་བཞིན་འཚལ་མཆིའོ། །དེ་ནས་དེད་དཔོན་དགའ་བོས་འཕགས་རྒྱལ་དུ་དྲིལ་བསྒྲག་པ་བྱེད་དུ་བཅུག་སྟེ་འཕགས་རྒྱལ་ན་གནས་པ་དང་། ཕྱོགས་གཞན་ཐ་དད་པ་ནས་ལྷགས་པའི་ཚོང་པ་རྣམས་ལ་ཤེས་ལྡན་དག་ཉོན་ཅིག །དེད་དཔོན་མཛེས་དགས་ཟོང་མནོས་ཤིང་ཡུལ་གཞན་དུ་འགྲོའི། ཁྱེད་ཅག་ལས་དེད་དཔོན་མཛེས་དགའ་དང་ལྷན་ཅིག་ཏུ་ཤོ་གམ་མེད་པ་དང་། ལ་གཅན་མེད་པ་དང་། གྲུ་བཙས་མེད་པར་ཡུལ་གཞན་དུ་འགྲོ་བར་སྤྲོ་བ་གང་ཡིན་པ་དེས་ཡུལ་གཞན་དུ་འགྲོ་བ་དང་མཐུན་པའི་ཟོང་བསྡོགས་ཤིག །ཚོང་པ་ལྔ་བརྒྱས་ཡུལ་གཞན་དུ་འགྲོ་བ་དང་མཐུན་པའི་ཟོང་བསྡོགས་སོ། །དེད་དཔོན་དགའ་བོས་ཚོང་པ་དེ་དག་མགྲོན་དུ་བོས་ཏེ་ཟན་བྱིན་ནས་སྨྲས་པ། ཤེས་ལྡན་དག་ཇི་ལྟར་མཛེས་དགའ་འདི་ཁོ་བོའི་བུ་ཡིན་པ་དེ་ཁོ་ན་བཞིན་དུ་ཁྱེད་ཅག་གི་ཡང་ཡིན་གྱིས། ཚོང་པ་ཡུལ་གཞན་དུ་དོང་བ་རྣམས་ཀྱི་བར་ཆད་ནི་གསུམ་ཡོད་དེ། རྒྱན་པོ་དང་། འཇུད་མཐུན་མ་དང་། ཆང་གི་གནས་སོ། །ཁྱེད་ཅག་གི་འདི་གནོད་པ་ལས་ངེས་པར་བཟློག་པར་བྱ་ཞིང་ཕན་པ་ལ་ཡང་དག་པར་སྦྱར་བར་བྱའོ། གལ་ཏེ་གནོད་པ་ལས་ངེས་པར་བཟློག་ཅིང་ཕན་པ་ལ་ཡང་དག་པར་སྦྱོར་བར་བྱེད་པ་ན་རབ་ཏུ་གནས་པར་གྱུར་ན་དེ་ལྟ་ན་ལེགས། གལ་ཏེ་རབ་ཏུ་མི་གནས་པར་གྱུར་ན་ཁྱེད་ཀྱིས་ཟོང་རྣམ་པར་སྤངས་ཤིང་རིན་མནོས་ཏེ་འགྲོ་བར་བྱའོ། །མཛེས་དགའ་ལ་ཡང་སྨྲས་པ། བུ་མཛེས་དགའ་ཇི་ལྟར་ཁྱོད་ཁོ་བོའི་བུ་ཡིན་པ་དེ་ཁོ་ན་བཞིན་དུ་ཚོང་པ་འདི་དག་གི་ཡང་ཡིན་གྱིས། ཁྱོད་ཀྱིས་འདི་དག་གི་ཚིག་དད་པས་མཉན་ཅིང་བྱ་བར་སོམས་ཤིག །དེད་དཔོན་མཛེས་དགས་ཡབ་བཀའ་བཞིན་འཚལ་ཞེས་དེད་དཔོན་དགའ་བོ་ལས་མཉན་ནས། དགེ་མཚན་དང་བཀྲ་ཤིས་དང་བདེ་ལེགས་སུ་འགྱུར་བ་བྱས་ཏེ། ཤིང་རྟ་དག་དང་། ཁུར་དག་དང་། སྦྱང་དག་དང་། གླེང་བ་དག་དང་། རྔ་མོ་དག་དང་། བ་ལང་དག་དང་། བོང་བུ་དག་གིས་ཟོང་མང་པོ་བླངས་ཏེ། ཚོང་པ་ལྔ་བརྒྱ་དང་ལྷན་ཅིག་ཡུལ་གཞན་དུ་འཕགས་སོ། །དེ་མཐར་གྱིས་གྲོང་དང་གྲོང་རྡལ་དང་ཡུལ་འཁོར་དང་། རྒྱལ་པོའི་ཕོ་བྲང་གི་གནས་དག་ཏུ་ཁད་ཀྱིས་རྒྱུ་བ་ན་མཉན་ཡོད་དུ་ཕྱིན་ནས། མཉན་ཡོད་དུ་མཛོད་
ཅིག་ཏུ་ཟོང་བཙུད་དེ་འདུག་གོ། །དེའི་ཚེ་ན་མཉན་ཡོད་ན་གཟུགས་འཚོ་མ་བཟང་མོ་ཞེས་བྱ་བ་གཟུགས་བཟང་བ་བལྟ་ན་སྡུག་པ་མཛེས་པ་སྐྱེས་བུ་དགའ་བ་ཞིག་འདུག་སྟེ། དེ་ཀར་ཤ་པ་ཎ་ལྔ་བརྒྱས་སྐྱེས་པ་དང་ལྷན་ཅིག་དགའ་མགུར་སྤྱོད་པར་བྱེད་དོ། །དེས་འཕགས་རྒྱལ་ན་དེད་དཔོན་དགའ་བོ་ཞེས་བྱ་བ་འདུག་པ་དེའི་བུ་མཛེས་དགའ་ཞེས་བྱ་བ་གཟུགས་བཟང་བ་བལྟ་ན་སྡུག་པ་མཛེས་པ་དེ་ཚོང་པ་ལྔ་བརྒྱ་དང་ལྷན་ཅིག་ཏུ་འདིར་ཕྱིན་ནས་མཛོད་ཆེ་གེ་མོ་ཞིག་ཏུ་ཟོང་མཁོས་སུ་ཕབ་སྟེ། འདུག་གོ་ཞེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། གལ་ཏེ་བདག་གིས་དེའི་ཟོང་ཐམས་ཅད་མ་འཕྲོགས་ན་བཟང་མོ་ཞེས་བྱ་བའི་མིང་མི་བཟུང་ངོ་སྙམ་མོ། །དེས་བུ་མོ་མངག་གཞུག་མ་ལ་སྨྲས་པ། བུ་མོ་དེད་དཔོན་མཛེས་དགའ་ཞེས་བྱ་བ་འབྱོར་བ་རྒྱ་ཆེན་པོ་དང་ལྡན་པས་ཟོང་ཁྱེར་ཏེ་འོངས་ནས་མཛོད་ཆེ་གེ་མོ་ཞིག་ཏུ་བཙུད་ཀྱིས། དྲི་དང་ཕྲེང་བ་རྒྱུ་ཐོགས་ཏེ་དེའི་དྲུང་དུ་སོང་ལ་འདི་སྐད་ཅེས་ཇོ་མོ་བཟང་མོ་ཁྱོད་ཀྱི་ཞབས་ལ་ཕྱག་འཚལ་ཞིང་། རྗེའི་སྲས་ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ་མི་ཕལ་བ་བཞིན་དུ་མཛོད་ན་བཞུགས། འདི་ནི་ཁྱོད་ཉིད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ་ཞེས་གྱིས་ཤིག །ཇོ་མོ་བཀའ་བཞིན་དུ་འཚལ་ཞེས་བུ་མོ་མངག་གཞུག་མ་དེས་གཟུགས་འཚོ་མ་བཟང་མོ་ལས་མཉན་ཏེ། དྲི་དང་ཕྲེང་བ་རྒྱུ་ཐོགས་ནས་དེད་དཔོན་མཛེས་དགའ་ག་ལ་བ་དེར་སོང་སྟེ་ཕྱིན་ནས། དེད་དཔོན་མཛེས་དགའ་ལ་འདི་སྐད་ཅེས་སྨྲས་སོ། །ཇོ་མོ་བཟང་མོ་ཁྱོད་ཀྱི་ཞབས་ལ་ཕྱག་འཚལ་ཞིང་དྲི་དང་ཕྲེང་བ་རྒྱུ་འདི་ཡང་བསྐུར། རྗེའི་སྲས་ཀྱིས་ཅིའི་སླད་དུ་རང་གི་ཕོ་བྲང་སྤངས་ཏེ་མི་ཕལ་བ་བཞིན་དུ་མཛོད་ན་བཞུགས། འདི་ནི་ཁྱོད་ཉིད་ཀྱི་ཕོ་བྲང་ལགས་ཀྱིས་ཚུར་སྤྱོན་ཅིག་ཅེས་ཀྱང་མཆིའོ། །མཛེས་དགས་སྨྲས་པ། བུ་མོ་སོང་ཞིག་དང་། ཁོ་བོ་དྲི་དང་ཕྲེང་བ་རྒྱུ་འདི་བཏགས་ཏེ་འོང་ངོ་། །དེ་ནས་བུ་མོ་མངག་གཞུག་མ་དེ་གཟུགས་འཚོ་མ་བཟང་མོ་ག་ལ་བ་དེར་སོང་སྟེ་ཕྱིན་ནས། དེས་དེད་དཔོན་མཛེས་དགའ་དང་ལྷན་ཅིག་སྐབས་ཀྱི་གཏམ་ཇི་སྙེད་བྱས་པར་གྱུར་པ་དེ་དག་ཐམས་ཅད་གཟུགས་འཚོ་མ་བཟང་མོ་ལ་བསྙད་དོ། །དེ་
ནས་གཟུགས་འཚོ་མ་བཟང་མོས་བུ་མོ་མངག་གཞུག་མ་ལས་ཐོས་ནས་དགའ་བ་དང་ཡིད་བདེ་བ་སྐྱེས་ཏེ། ཁྱིམ་བྱུག་པས་བསྐུས་ཤིང་། བྱི་དོར་བྱེད་དུ་བཅུག་ནས་མེ་ཏོག་སྣ་ཚོགས་བཀྲམ་ཞིང་འདུག་སྤོས་ཞིམ་པོས་བདུགས་ཏེ། བླ་རེས་བྲེས་པ་དང་བཅས་པའི་མལ་བཤམས་ནས་གཙོ་ཆེར་དེད་དཔོན་མཛེས་དགའ་ལ་སྡོད་ཅིང་འདུག་གོ་།དེད་དཔོན་མཛེས་དགའ་ཡང་དྲི་དང་ཕྲེང་བ་རྒྱུ་དང་རྒྱན་གྱིས་ཀླུབས་ཏེ་བཞོན་པ་ལ་ཞོན་ནས། ཁྱེའུ་མངག་གཞུག་པས་ཡོངས་སུ་བསྐོར་ཅིང་ལང་ཚོའི་གཟུགས་མཆོག་ཏུ་སྡུག་པས་རྣམ་པར་མཛེས་ཤིང་གཟུགས་འཚོ་མ་བཟང་མོའི་གནས་ག་ལ་བ་དེར་སོང་ངོ་། །གཟུགས་འཚོ་མ་བཟང་མོ་དེད་དཔོན་མཛེས་དགའ་ལང་ཚོའི་གཟུགས་མཆོག་ཏུ་སྡུག་པས། རྣམ་པར་མཛེས་པ་མཐོང་ངོ་། །མཐོང་ནས་ཀྱང་བྲན་མོ་མངག་གཞུག་མ་ལ་དྲིས་པ། བུ་མོ་འདི་དེད་དཔོན་མཛེས་དགའ་ཡིན་ནམ། དེས་སྨྲས་པ། ཇོ་མོ་དེད་དཔོན་མཛེས་དགའ་ནི་འདི་ཁོ་ན་ལགས་སོ། །དེ་ནས་གཟུགས་འཚོ་མ་བཟང་མོ་དགའ་བ་དང་ཡིད་བདེ་བ་སྐྱེས་ནས། ཚིགས་སུ་བཅད་པ་སྨྲས་པ། རིགས་སྐྱེས་རིགས་མིན་སྐྱེས་པའམ། ནོར་ཉམས་ནོར་ཀྱིས་འབྱོར་བའང་རུང་། །གཟུགས་ཀྱིས་ཕྱུག་པ་མཐོང་བས་ནི། །བུད་མེད་རྣམས་ཀྱི་ཡིད་འཕྲོག་བྱེད། །དེ་བཞོན་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་དག་ཁོ་ནས་གཟུགས་འཚོ་མ་བཟང་མོའི་ཁྱིམ་དུ་འཇུག་པར་བརྩམས་པ་དང་། དེས་མྱུར་བ་མྱུར་བར་ཁང་ཐོག་ནས་བབས་ཏེ་དེ་བསུ་ནས་ཡན་ལག་ཐམས་ཅད་ཀྱིས་འཁྱུད་དེ། ཁྱིམ་གྱི་ནང་དུ་ཁྲིད་ནས་བུད་མེད་ཀྱི་ཁྲི་ལ་བཞག་སྟེ་སྨྲས་པ། རྗེའི་སྲས་ཀྱི་མཚན་ཅི། དེས་སྨྲས་པ། མཛེས་དགའོ། །དེས་སྨྲས་པ། ཨེ་མའོ་ཁྱོད་ཀྱི་མཚན་ནི་གཟུགས་དང་འདྲ་ལ་གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་དག་གིས་ཁྱོད་ཀྱི་མཚན་མཛེས་དགའ་ཞེས་བགྱི་བར་མ་གསོལ་བར་གྱུར་ན། དེང་བདག་གིས་ཁྱོད་ཀྱི་མཚན་མཛེས་དགའ་ཞེས་བགྱི་པར་གསོལ་པར་འགྱུར་རོ། །དེས་སྨྲས་པ། ཁྱོད་ཀྱི་མཚན་ཅི། དེས་སྨྲས་པ། བཟང་མོའོ། །དེས་སྨྲས་པ། ཨེ་མའོ་ཁྱོད་ཀྱི་
མཚན་ནི་གཟུགས་དང་འདྲ་ལ་གཟུགས་ཀྱང་མཚན་དང་འདྲ་སྟེ། གལ་ཏེ་ཡབ་ཡུམ་དག་གིས་ཁྱོད་ཀྱི་མཚན་བཟང་མོ་ཞེས་བགྱི་བར་མ་གསོལ་བར་གྱུར་ན། དེང་བདག་གིས་ཁྱོད་ཀྱི་མཚན་བཟང་མོ་ཞེས་བགྱི་བར་གསོལ་བར་འགྱུར་རོ། །མཛེས་དགས་སྨྲས་པ། བཟང་མོ་དགུང་གཅིག་གི་གླ་ཇི་ཙམ། དེས་སྨྲས་པ། རྗེའི་སྲས་ཀྱིས་མི་ཕལ་བ་བཞིན་དུ་མི་གཤའ་བ་ཞིག་བཀའ་སྩལ་ཏོ། །དེའི་བུ་མོ་མངག་གཞུག་མས་སྨྲས་པ། དགུང་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱའོ། །དེས་མི་ལ་ཁྱོད་ཀྱིས་ཉིན་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱ་བསྐུར་བར་བྱའོ་ཞེས་བསྒོ་ནས། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །འདོད་པ་དག་ནི་བསྟེན་པ་ན་ལོག་པའམ་ངོམས་པའམ། མཐར་ཐུག་པ་མེད་པས། དེ་ཉི་མ་མང་པོ་འདས་ཀྱང་ངོམས་པར་མ་གྱུར་ཅིང་། མིས་ཀྱང་ཉིན་རེ་ཞིང་ཀར་ཤ་པ་ཎ་ལྔ་བརྒྱ་ལྔ་བརྒྱ་འབུལ་བ་ཁོ་ནར་བྱེད་དོ། །ཚོང་པ་དག་གིས་སྨྲས་པ། ཤེས་ལྡན་དག་དེད་དཔོན་མཛེས་དགའ་མི་སྣང་ན། དེ་བདག་ཅག་ལ་གྲོགས་པོས་གཏད་པས་ཀུན་ཏུ་བཙལ་བར་བྱའོ། །ཚོང་པ་དག་གིས་དེའི་གཡོག་དག་ལ་དྲིས་པ། དེད་དཔོན་གར་བཞུད། དེ་དག་གིས་སྨྲས་པ། དེད་དཔོན་ཉི་མ་གང་ཁོ་ན་ལ་མཉན་ཡོད་དུ་ཕྱིན་པའི་ཉི་མ་དེ་ཉིད་ལ་འཇུད་མཐུན་མའི་ཁྱིམ་དུ་ཞུགས་ཏེ་འདུག་ན་ཁྱེད་ཅག་གིས་དེང་གཟོད་དྲན་ནམ། ཚོང་པ་དག་གིས་སྨྲས་པ། ཤེས་ལྡན་དག་ཡུ་བུ་ཅག་གིས་དེད་དཔོན་མཛེས་དགའ་ཡལ་བར་བོར་བ་ནི་མ་ལེགས་པར་བྱས་ཏེ། འདིའི་ཕས་ཡུ་བུ་ཅག་ལ་ཀླན་ཀར་འགྱུར་རོ། །ཚོང་པ་དག་གིས་མཛེས་དགའ་ལ་དོན་མཐུན་རྣམས་ཀྱི་མཆིད་ནས་ཚུར་སྤྱོན་ཅིག་ཅེས་མཆིའོ་ཞེས་བང་ཆེན་བཏང་ངོ་། །བང་ཆེན་དེས་མཛེས་དགའ་ལ་བསྒོ་ནས། མཛེས་དགས་འབྱུང་བར་བརྩམས་པ་དང་། བཟང་མོས་གོས་ཀྱི་མཐའ་ནས་བཟུང་སྟེ་སྨྲས་པ། རྗེའི་སྲས་འདོད་པ་དག་ནི་རྒྱུ་གཉིས་ཀྱིས་བསྟེན་པར་བགྱི་སྟེ། གཟུགས་བཟང་བ་ཉིད་དང་། ལང་ཚོ་ཉིད་ཀྱིས་སོ། །ཁྱོད་ནི་གཟུགས་བཟང་བ་དང་། ལང་ཚོ་ལ་བབ་པ་ལེགས་ན། གཞོན་པའི་གནས་སྐབས་སུ་རེ་ཞིག་རྩེ་བ་དང་དགའ་བ་དང་དགའ་མགུར་སྤྱོད་པ་མཛོད་ལ་བགྲེས་པའི་
གནས་སྐབས་སུ་ནོར་བསྒྲུབ་པ་མཛོད་ཅིག །མཛེས་དགས་པང་ཆེན་དེ་ལ་སྨྲས་པ། ཀྱེ་ཁྱོ་ག་སོང་ཞིག་དང་། འོང་ངོ་། །བང་ཆེན་དེ་སོང་སྟེ་ཚོང་པ་རྣམས་ལ་སྨྲས་པ། དེད་དཔོན་གྱི་ཞལ་ནས་སོང་ཞིག་དང་འོང་ངོ་ཞེས་གསུང་ངོ་། །ཚོང་པ་དེ་དག་འདུས་ཏེ་སྡོད་པ་ན་མཛེས་དགའ་ཐོགས་ནས། ཚོང་པ་དེ་དག་ཐམས་ཅད་འདུས་ཏེ་འཇུད་མཐུན་མའི་ཁྱིམ་དུ་དོང་ནས་ཚོང་པ་དེ་དག་གིས་སྒོར་བསྡད་དེ། མི་ལ་སྨྲས་པ། ཀྱེ་ཁྱོ་ག་སོང་ལ་དེད་དཔོན་ལ་ཚོང་པའི་ཚོགས་རྣམས་སྒོ་ན་སྡོད་ཅིང་དེད་དཔོན་ལྟ་བར་འཚལ་ལོ་ཞེས་གྱིས་ཤིག །མི་དེས་སོང་སྟེ་མཛེས་དགའ་ལ་བརྗོད་ནས། མཛེས་དགས་འབྱུང་བར་བརྩམས་པ་དང་། ཡང་གཟུགས་འཚོ་མ་བཟང་མོས་གོས་ཀྱི་མཐའ་ནས་བཟུང་སྟེ་སྨྲས་པ། རྗེའི་སྲས་ཚོང་བ་དེ་དག་ཀྱང་བདག་དང་ལྷན་ཅིག་དགའ་མགུར་སྤྱོད་འཚལ་ཏེ། དེ་དག་དང་ལྷན་ཅིག་དགའ་མགུར་སྤྱད་དུ་ག་ལ་རུང་བཞུགས་ཤིག །འདོད་པ་དག་ནི་བསྟེན་པ་ན་ཀུན་ཏུ་སྦྱོར་བ་དག་འཕེལ་བར་བྱེད་པ་ཡིན་པས། མཛེས་དགས་སྨྲས་པ། གང་གི་ཚེ་ཁོ་བོ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་འབྱུང་བར་འགྱུར་རོ། །མི་དེས་སོང་སྟེ་ཚོང་པའི་ཚོགས་རྣམས་ལ་སྨྲས་པ། དེད་དཔོན་གྱི་ཞལ་ནས་གང་གི་ཚེ་ཁོ་བོ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་འབྱུང་ངོ་ཞེས་གསུང་ངོ་། །ཚོང་པ་དག་གིས་སྨྲས་པ། ཀྱེ་མ་མཛེས་དགའ་འདི་བྱ་བ་མ་ཡིན་པ་ལ་ཞུགས་ཀྱིས་འདོང་ངོ་ཞེས་དེ་དག་གིས་ཟོང་རྣམ་པར་སྤངས་ནས་རིན་བླངས་ཏེ་འཕགས་སོ། །དེ་ནས་མི་གང་གིས་ཉི་མ་རེ་རེ་ཞིང་བཟང་མོ་ལ་ཀར་ཤ་པ་ཎ་ལྔ་བརྒྱ་ཕུལ་བར་གྱུར་པ་དེས་ཕྱིན་ཆད་འབུལ་བར་མི་བྱེད་དོ། །དེ་ནས་དུས་གཞན་ཞིག་ན་བཟང་མོས་མི་དེ་ལ་དྲིས་ཤིང་སྨྲས་པ། ཀྱེ་ཁྱོ་ག་ཅིའི་ཕྱིར་ཕྱིན་ཆད་ཀར་ཤ་པ་ཎ་དག་འབུལ་བར་མི་བྱེད། དེས་སྨྲས་པ། དོན་མཐུན་དག་དོང་བས་བདག་གིས་ག་ལས་དབུལ། ཅི་དོན་མཐུན་དག་གིས་མཛེས་དགའི་ཟོང་ཡང་ཁྱེར་རམ། ཁྱེར་རོ། །བཟང་མོས་མཛེས་དགའ་དང་ལྷན་ཅིག་ཉི་མ་གཉིས་སམ་གསུམ་དགའ་མགུར་སྤྱད་ནས་སྨྲས་པ། རྗེའི་སྲས་བདག་ལ་ཞིང་ཡང་མ་མཆིས། ལས་ཀྱི་མཐའ་བགྱིད་པ་དག་ཀྱང་
མ་མཆིས། གྲོང་མི་ཟོང་མ་ནོས་ཏེ་ཡུལ་གཞན་དུ་མཆི་བ་དག་ཀྱང་མ་མཆིས་ཏེ། ཁྱོད་ལྟ་བུ་དག་གི་དྲུང་ནས་གང་ཐོབ་བ་དེས་བདག་འཚོ་བར་འགྱུར་བ་ཁོ་ནར་བས་ན། ཡང་ན་ནི་ཀར་ཤ་པ་ཎ་དག་སྩོལ་ཅིག །ཡང་ན་ནི་སྐྱེས་པ་གཞན་གྱི་སྐབས་དབྱེ་བ་མཛོད་ཅིག །མཛེས་དགས་སྨྲས་པ། བཟང་མོ་ཁྱོད་ལ་སྡུག་པ་འགའ་ཡང་མེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ཚོགས་ཅན་རྣམས་ལ་སྡུག་པ་མེད། དེ་དག་རང་བཞིན་རིང་མི་གནས། བྱ་རྣམས་འབྲས་མེད་ལྗོན་པ་བཞིན། །དེ་དག་རྙིང་པ་རྣམ་པར་སྤོང་། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་ལ་ཇི་སྲིད་དུ་ནོར་སྦྱིན་པར་བྱེད་པ་དེ་སྲིད་དུ་ཁྱོད་སྐྱེས་པའི་དབང་དུ་འགྱུར་རམ། བཟང་མོ་སྨྲས་པ། རྗེའི་སྲས་ཁྱོད་ཀྱིས། ཇི་སྲིད་བརྒྱ་བྱིན་ཆར་འབེབས་པ། །དེ་སྲིད་རི་ཀླུང་ཆུ་འབེབས་ལྟར། །ཇི་སྲིད་ནོར་ནི་སྦྱིན་བྱེད་པ། །དེ་སྲིད་འཇུད་མཐུན་སྐྱེས་བུ་དབང་། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་སུ་ལ་ཡང་ཡིད་འབེབས་པར་མི་བྱེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། འཇུད་མཐུན་དགོངས་ཀར་རང་ལུས་བཞིན། །གཅུགས་དང་གཏམ་གྱིས་དགའ་བར་བྱེད། །དེ་ནས་ནམ་ཕྱེད་དབུས་གནས་ཤིང་། །ནམ་ལངས་ཕན་ཆད་རྩྭ་བཞིན་སྤོང་། །ཞེས་བགྱི་བ་མ་གསན་ཏམ། མཛེས་དགས་སྨྲས་པ། བཟང་མོ་ཁྱོད་ནོར་དང་བཅས་པའི་མི་དག་ལ་སྤྱོད་པར་བྱེད་དམ། བཟང་མོས་སྨྲས་པ། རྗེའི་སྲས་ཁྱོད་ཀྱིས། ནོར་དང་བཅས་པའི་མི་དག་དང་། །ནོར་མ་སྤྱད་པ་རྣམས་ལ་ཡང་། །སར་པའི་རྩྭ་ལ་བ་ལང་བཞིན། །བདག་ཅག་རྣམས་ཀྱིས་སྤྱད་པར་བྱ། །ཞེས་བགྱི་བ་མ་གསན་ཏམ། མཛེས་དགས་འབྱུང་བར་བརྩམས་པ་དང་། བཟང་མོས་བསམས་པ། མཛེས་དགའ་འདི་ནི་གཟུགས་བཟང་བ་བལྟ་ན་སྡུག་པ་མཛེས་པ་ཡིན་པས་ཤིན་ཏུ་ཐག་རིང་བར་སོང་ཡང་སྐྱེས་བུ་འདི་ལྟ་བུ་འདི་ལྟ་བུ་དང་ལྷན་ཅིག་རྩེ་བར་བྱ། དགའ་བར་བྱ། དགའ་མགུར་སྤྱོད་པར་བྱ་བ་ཡིན་པས། དེའི་ཕྱིར་ཇི་སྲིད་དུ་གཞན་ཀར་ཤ་པ་ན་དག་ཐོགས་ཏེ། མི་འོང་བ་དེ་སྲིད་དུ་འདི་དང་ལྷན་
ཅིག་རྩེ་བར་བྱ། དགའ་བར་བྱ། དགའ་མགུར་སྤྱད་པར་བྱའོ་སྙམ་དུ་ཤེས་ཤིང་རིག་ནས། བཟང་མོས་མཛེས་དགའི་གོས་ཀྱི་མཐའ་ནས་བཟུང་སྟེ། འཛིན་ཅིང་སྨྲས་པ། རྗེའི་སྲས་ཁྱོད་ལ་ཁབ་ན་བཞད་གད་དག་མི་བགྱིད་དམ། དེ་ནི་བདག་གིས་བཞད་གད་བགྱིས་པ་ལགས་ཀྱིས་བཞེས་ཤིག །མ་བཞུད་ཅིག །མཛེས་དགའ་འདོད་ཆགས་ཤས་ཆེན་པོས་འདུག་པ་དང་། སྐྱེས་པ་གཞན་ཞིག་ཀར་ཤ་པ་ན་ལྔ་བརྒྱ་ཐོགས་ཏེ་དེར་ཞུགས་ནས། དེས་བཟང་མོ་དགའ་མགུར་སྤྱད་ཀྱིས་བཞུད་ཅེས་སྨྲས་པ་དང་། བཟང་མོ་མཛེས་དགའ་ཉིད་ཀྱི་མདུན་དུ་ཡོལ་བས་བཅད་དེ་དགའ་མགུར་སྤྱད་པར་བརྩམས་ནས། མཛེས་དགས་འདི་བདག་ཁོ་ནའི་མདུན་དུ་སྐྱེས་པ་འདི་དང་ལྷན་ཅིག་དགའ་མགུར་སྤྱོད་པར་བྱེད་དོ་སྙམ་དུ་ཤེས་ཤིང་རིག་ནས་སོང་ངོ་། །མཛེས་དགའ་ལམ་པོ་ཆེ་ལ་མི་མཁས་པས་གང་དུ་འགྲོ་བར་བྱ་བ་མི་ཤེས་ནས། ཇི་ཙམ་ན་དགེ་སློང་ཞིག་མཉན་ཡོད་དུ་བསོད་སྙོམས་ལ་བརྒྱུས་ནས་ཕྱིར་བྱུང་བ་དེ་མཛེས་དགས་མཐོང་ནས་དགེ་སློང་དེའི་ཕྱི་ཐོག་ཐག་རྗེས་སུ་སོང་ངོ་། །དེ་ནས་དགེ་སློང་དེ་གཙུག་ལག་ཁང་དུ་སོང་སྟེ། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་ནས། སྣམ་སྦྱར་སྤྲུགས་ཏེ་རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱ་བར་བརྩམས་པ་དང་། མཛེས་དགའ་དེའི་མདུན་ན་འགྲེང་ངོ་། །དགེ་སློང་དེས་མཛེས་དགའ་ལ་སྨྲས་པ། བཞིན་བཟང་ལྷུང་བཟེད་ཀྱི་ལྷག་མ་འདོད་དམ། མཛེས་དགས་གལ་ཏེ་མ་ཟོས་ན་བཀྲེས་པས་འཆི་བར་འགྱུར་བར་ཤེས་ཤིང་རིག་ནས་སྨྲས་པ། འཕགས་པ་འཚལ་ལོ། །དགེ་སློང་དེས་མཛེས་དགའ་ལ་ལྷུང་བཟེད་ཀྱི་ལྷག་མ་བྱིན་པ་དང་། མཛེས་དགས་ཟོས་སོ། །ཟོས་ནས་དྲིས་པ། བཞིན་བཟང་ཁྱོད་ག་ལ་འོངས། མཛེས་དགས་སྨྲས་པ། འཕགས་པ་བདག་ནི་ཡུལ་སྲུང་བྱེད་དག་ན་གྲོང་ཁྱེར་འཕགས་རྒྱལ་ཞེས་བགྱི་བ་དེ་ན་དེད་དཔོན་དགའ་བོ་ཞེས་བགྱི་བ་མཆིས་པ་དེའི་བུ་མཛེས་དགའ་ཞེས་བགྱི་བ་ལགས་ཏེ་བདག་ཟོང་མང་པོ་འཚལ་ཏེ་མཆིས་
པ་ལས་འཇུད་མཐུན་མས་ཚུལ་མ་ལགས་པས་གནོད་པ་བསྒྲུབས་པར་གྱུར་ཏོ། །དགེ་སློང་དེས་སྨྲས་པ། བཞིན་བཟང་ཅིའི་ཕྱིར་རབ་ཏུ་མི་འབྱུང་། མཛེས་དགས་གལ་ཏེ་བདག་འཕགས་རྒྱལ་དུ་སོང་བར་གྱུར་ན། སུ་ཞིག་མཆིལ་མ་དག་ས་ལ་འདོར་བར་འགྱུར་ཏེ། བདག་ཁོ་ནའི་སྟེང་འབའ་ཞིག་ཏུའོ་སྙམ་དུ་ཤེས་ཤིང་རིག་ནས་སྨྲས་པ། འཕགས་པ་བདག་རབ་ཏུ་འབྱུང་ངོ་། །དགེ་སློང་དེས་མཛེས་དགའ་རབ་ཏུ་ཕྱུང་བསྙེན་པར་རྫོགས་པར་བྱས་ནས་དེའི་འོག་ཏུ་ཉི་མ་གཉིས་སམ་གསུམ་དུ་ཀུན་ཏུ་སྤྱད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟང་རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་བསྒྲུབས་ལ་འཚོ་བར་གྱིས་ཤིག །མཛེས་དགའ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་ཞུགས་སོ། །གཟུགས་འཚོ་མ་བཟང་མོ་ཡང་འགྱོད་པ་སྐྱེས་ཏེ་བདག་གིས་ཀར་ཤ་པ་ན་འདོད་པའི་རྒྱུས་དེད་དཔོན་མཛེས་དགའ་དེ་ཙམ་དུ་མཛེས་ཤིང་ལང་ཚོ་ལ་བབ་པ་དེ་བསྐྲད་པ་ནི་མ་ལེགས་པ་བྱས་ཏེ། ཤིན་ཏུ་ཐག་རིང་བར་སོང་ཡང་སྐྱེས་བུ་དེ་ལྟ་བུ་ལྷན་ཅིག་དགའ་མགུར་སྤྱད་པར་བྱ་བ་ཡིན་པར་ཤེས་ཤིང་རིག་ནས། བུ་མོ་མངག་གཞུག་མ་ལ་བུ་མོ་གལ་ཏེ་དེད་དཔོན་མཛེས་དགའ་མཐོང་ན་ཡང་འཇུག་ཏུ་ཆུག་ཅིག་ཅེས་བསྒོའོ། །མཛེས་དགའ་སྤྱོད་ཡུལ་ལ་མི་མཁས་པས་བསོད་སྙོམས་སྒྲུབ་པ་ན་འཇུད་མཐུན་མའི་ཁྱིམ་དེ་ཉིད་དུ་ཕྱིན་པ་དང་། བུ་མོ་མངག་གཞུག་མ་དེས་མཐོང་ནས་ཡོངས་སུ་དགའ་བས་བཟང་མོ་ལ་ཇོ་མོ་མཛེས་དགའ་ཁབ་སྒོར་མཆིས་སོ་ཞེས་སྦྲན་ཏོ། །བཟང་མོས་སྨྲས་པ། འཇུག་ཏུ་ཆུག་ཅིག །བུ་མོས་སྨྲས་པ། རབ་ཏུ་བྱུང་ངོ་། །བཟང་མོས་སྨྲས་པ། རབ་ཏུ་བྱུང་ཡང་འཇུག་ཏུ་ཆུག་ཅིག །མངག་གཞུག་མ་དེས་མཛེས་དགའ་འཇུག་ཏུ་བཅུག་ནས་གཟུགས་འཚོ་མ་བཟང་མོས་མཐོང་བ་དང་། བཟང་མོས་བྲང་བརྡུངས་ཏེ་སྨྲས་པ། མཛེས་དགའ་ཁྱོད་ཀྱིས་ཅིའི་སླད་དུ་ངན་བུ་སྤངས་ཏེ་རབ་ཏུ་བྱུང་། མཛེས་དགས་སྨྲས་པ། སྐལ་ཆད་མ་ཁྱོད་ཁོ་བོ་ཁོ་ནའི་མདུན་དུ་
སྐྱེས་པ་གཞན་དང་ལྷན་ཅིག་དགའ་མགུར་སྤྱོད་པར་བྱེད་ན་ཁོ་བོ་ཇི་ལྟར་རབ་ཏུ་མི་འབྱུང་། བཟང་མོས་སྨྲས་པ། རྗེའི་སྲས་བུད་མེད་ཀྱི་ཡུལ་ནི་རྟག་ཏུ་ནོངས་པ་མཆིས་པས་བདག་ནོངས་པ་མཆིས་པ་དེ་བཟོད་པར་མཛད་ཅིང་། ད་ནི་བདག་དང་རྫས་ཀྱང་ཁྱོད་ཀྱི་ལགས་ཀྱིས་ཚུར་སྤྱོན་བདག་དང་ལྷན་ཅིག་དགའ་མགུར་སྤྱད་དུ་གསོལ། མཛེས་དགས་སྨྲས་པ། དེའི་ཡང་ཁྱོད་ཀྱིས་ཁོ་བོ་རེ་ཞིག་ནོར་དང་དོན་མཐུན་དག་ལས་ཡོངས་སུ་ཉམས་པ་བྱས་ན། ཅི་ད་ཚུལ་ཁྲིམས་ལས་ཀྱང་ཡོངས་སུ་ཉམས་པར་བྱེད་འདོད་དམ། བཟང་མོས་སྨྲས་པ། འཕགས་པ་སླད་རོལ་དུ་དྲུད་ཅིང་ནང་དུ་ཕོ་ལ་ནང་དུ་དྲུད་ཅིང་སླད་རོལ་ཏུ་ཕོ་ཞིག་དང་། འདི་ལ་ཚུལ་ཁྲིམས་འཆལ་བ་ཅི་མཆིས། མཛེས་དགས་དགེ་སློང་གནས་བརྟན་ནོ་ཅོག་འདིར་བསོད་སྙོམས་ལ་འཇུག་པ་དེ་དག་ཀྱང་གོར་མ་ཆག་པར་འདི་ལྟར་བྱེད་པས་དེས་ན་འདི་སྐད་ཟེར་རོ་སྙམ་དུ་ཤེས་ཤིང་རིག་ནས། མཛེས་དགས་ལྷུང་བཟེད་དང་ཆོས་གོས་མཐའ་གཅིག་ཏུ་གཞག་སྟེ། ཕྱི་རོལ་དུ་དྲུད་ཅིང་ནང་དུ་ཕོ་ནང་དུ་དྲུད་ཅིང་ཕྱི་རོལ་དུ་ཕོ་ནས་ཡ་མཚན་དང་བྲལ་བར་གྱུར་ཏོ། །དེ་ནས་བཟང་མོས་བཅའ་བ་དང་། བཟའ་བ་གཙང་མ་བསོད་པས་ལྷུང་བཟེད་འགེངས་སུ་བཅུག་སྟེ་བྱིན་ནས། འཕགས་པ་གལ་ཏེ་ཡང་བཞེད་པར་གྱུར་ན་སྤྱོན་ཅིག་ཅེས་ཀྱང་སྨྲས་སོ། །མཛེས་དགས་བསོད་སྙོམས་བླངས་ཏེ་སོང་ངོ་། །ཇི་ཙམ་ན་བཅོམ་ལྡན་འདས་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །ཞེ་སྡང་འདོད་ཆགས་དང་བྲལ་བར་བྱ་བའི་ཕྱིར་དང་། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་ཏོ། །བཅོམ་ལྡན་འདས་ཇི་ལྟ་ཇི་ལྟར་འདོད་ཆགས་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བའི་ཆོས་སྟོན་པ་དང་། ཞེ་སྡང་འདོད་ཆགས་དང་བྲལ་བར་བྱ་བའི་ཕྱིར་དང་། གཏི་མུག་འདོད་ཆགས་དང་བྲལ་བར་བྱ་བའི་ཕྱིར་སེམས་རྣམ་པར་གྲོལ་བ་དང་། ཤེས་
རབ་རྣམ་པར་གྲོལ་བའི་ཆོས་སྟོན་པ་དེ་ལྟ་དེ་ལྟར། ཚེ་དང་ལྡན་པ་མཛེས་དགའ་ཅུང་ཟད་འགྱོད་པར་གྱུར། རྣམ་པར་འགྱོད་པར་གྱུར། རབ་ཏུ་འགྱེད་པར་གྱུར་ཅིང་འདུག་ལ། འགྱོད་པ་དང་ལྡན། འགྱོད་པ་ཐོབ། ཅང་མི་སྨྲ་བར་གྱུར། ཡུལ་ཡུལ་པོར་གྱུར། ཕྲག་པ་གློད། གདོང་སྨད། སྤོབས་པ་མེད། སེམས་ཁོང་དུ་ཆུད་ཅིང་འདམ་བུ་སྔོན་པོ་བརྔས་པ་རྙིངས་པར་འགྱུར། སྐམ་པར་འགྱུར་བ་ལྟར་འདུག་གོ་།དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མཛེས་དགའ་ཁྱོད་ལ་ལུས་ཀྱི་གནོད་པའམ། སེམས་ཀྱི་ཡོངས་སུ་གདུང་བ་འགའ་ཞིག་མེད་དམ། དེ་ངོ་ཚ་བས་སྨྲ་བར་མི་བྱེད་ཅིང་འགའ་ཡང་མེད་དོ་ཞེས་ཟེར་རོ། །སྨན་པ་ཞིག་ཕྱོགས་དེར་འོངས་པ་དེ་ལ་དགེ་སློང་རྣམས་ཀྱིས་སྨྲས་པ། བཞིན་བཟང་གཞོན་ནུ་འདི་ནད་ཅི་ཡིན་པ་དེ་ལྟོས་ཤིག །སྨན་པ་དེས་དེ་བརྟག་པར་བརྩམས་པ་དང་། དབང་པོ་གསལ་བ་མཐོང་ནས་སྨྲས་པ། འཕགས་པ་དག་འདིའི་དབང་པོ་དག་གསལ་བས། འདི་ལ་ལུས་ཀྱི་ནད་ནི་འགའ་ཡང་མ་མཆིས་གྱི། འདི་ལ་སེམས་ཀྱི་ཡོངས་སུ་གདུང་བ་ནི་གོར་མ་བཀུམ་པར་མཆིས་སོ། །དགེ་སློང་རྣམས་ཀྱིས་སྨྲས་པ། བཞིན་བཟང་འདིའི་སེམས་ཀྱི་ཡོངས་སུ་གདུང་བ་ཇི་ལྟ་བུ་ཡིན། སྨན་པས་སྨྲས་པ། འཕགས་པ་བདག་ཅག་སྨན་པ་དག་ནི་ལུས་གསོ་བར་བགྱིད་པ་ལགས་ཀྱི་སེམས་གསོ་བར་བགྱིད་པ་མ་ལགས་ཏེ། འདི་ལྟར་འཕགས་པ་དག་ཉིད་སེམས་གསོ་བར་མཛད་པ་ལགས་པས། འཕགས་པ་དག་ཉིད་ཀྱིས་མཁྱེན་པར་འགྱུར་རོ་ཞེས་སྨྲས་ཏེ་སོང་ངོ་། །དགེ་སློང་རྣམས་ཀྱིས་མཛེས་དགའ་ལ་སྨྲས་པ། ཚེ་དང་ལྡན་པ་འདི་ན་ཁྱོད་ཀྱི་ཕ་ཡང་མེད་མ་ཡང་མེད་རྩ་ལག་གཞན་ཡང་མེད་དེ། ཚངས་པ་མཚུངས་པར་སྤྱོད་པ་ངེད་ཅག་ཁོ་ནར་ཟད་པས་ངེས་ཀྱིས་ཁྱོད་ཀྱི་བསྙེན་བཀུར་བྱས། ཇི་ལྟར་གྱུར་པ་སྨྲོས་ཤིག །མཛེས་དགས་དགེ་སློང་དེ་དག་ལ་སྐབས་དེ་རྒྱས་པར་བརྗོད་དོ། །དགེ་སློང་དེ་དག་གིས་སྨྲས་པ། ཚེ་དང་ལྡན་པ་ནི་འབྲས་བུ་ཁོ་ནས་ཚ་བར་གྱུར་ཏེ། ཚེ་དང་ལྡན་པས་རབ་ཏུ་བྱུང་བ་ཙམ་ཉིད་ཀྱིས་བསྟན་པ་ལ་ཆུ་བུར་ཕྱུང་བར་གྱུར་ཏོ་ཞེས་དགེ་
སློང་དེ་དག་མཛེས་དགས་སྨྲས་པ་ལ་མངོན་པར་བསྟོད་པར་ཡང་མི་བྱེད། ཕྱིར་ཟློག་པར་ཡང་མི་བྱེད་ཅིང་། མངོན་པར་བསྟོད་པ་ཡང་མ་བྱས། ཕྱིར་བཟློག་པ་ཡང་མ་བྱས་པར་དོང་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་དེ་དག་གི་སྐབས་དེ་རྒྱས་པར་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེས་ཀྱང་མི་གཏི་མུག་ཅན་དེ་ཕམ་པར་གྱུར་ཏོ། །དགེ་སློང་གི་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པར་གྱུར་ཅིང་། དེ་སེམས་སྟེན་པ་ལ་གཞོལ་བ་དང་། སྟེན་པ་ལ་འབབ་པ་དང་། སྟེན་པ་ལ་བབ་པས་ཟག་བྱེད་ཟག་བྱེད་ཀྱི་ཕྱི་རོལ་ཏུ་དྲུད་ཅིང་ནང་དུ་འབོ་བ་དང་། ནང་དུ་དྲུད་ཅིང་ཕྱི་རོལ་ཏུ་འབོ་བར་བྱེད་ན་ཕམ་པར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་པ་དང་ཆུང་མ་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་ཆུང་མ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །ཁྱིམ་ཐབ་དེ་ཡང་སྐུར་པ་གདབ་པར་འགྱུར་བའི་ལས་དག་གིས་ཆུང་མ་གསོད་པ་ཆུང་མ་གསོད་ཅེས་བྱ་བའི་མིང་དུ་གྱུར་ཏོ། །ཁྱིམ་བདག་དེས་ཡང་བུ་མོ་བླངས་པ་དང་། མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང་། མི་སྦྱིན་ནོ་ཞེས་ཀྱང་ཟེར་རོ། །ཁྱིམ་བདག་དེས་ཡུགས་མོ་དག་བླངས་པ་དང་། ཡུག་ས་མོ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེ་རྣམ་པ་ཐམས་ཅད་དུ་ཡི་ཆད་ནས། རང་ཉིད་ཀྱིས་ཁྱིམ་གྱི་སོ་ཚིས་དག་བྱ་བར་བརྩམས་པ་དང་། དུས་གཞན་ཞིག་ན་ཁྱིམ་བདག་དེའི་ཆུང་པོ་གྲོགས་ཤིག་འོངས་ནས་དེས་ཁྱིམ་བདག་དེ་མཐོང་ནས་དྲིས་པ་ཁྱོད་ཅི་བྱེད།
ཁྱིམ་གྱི་སོ་ཚིས་དག་བྱེད་དོ། །དེས་སྨྲས་པ། ཁྱོད་ཅིའི་ཕྱིར་རང་ཉིད་ཀྱིས་ཁྱིམ་གྱི་སོ་ཚིས་དག་བྱེད། ཁྱིམ་བདག་གིས་སྨྲས་པ། ཁོ་བོས་ཆུང་མ་གཅིག་བླངས་པ་དང་། དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །དེས་སྨྲས་པ། གཞན་དག་ཅིའི་ཕྱིར་མི་སློང་། ཁྱིམ་བདག་གིས་སྨྲས་པ། བསླངས་ན་མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང་། མི་སྦྱིན་ནོ་ཞེས་ཟེར་རོ། །དེས་སྨྲས་པ། ཡུག་ས་མོ་དག་ཅིའི་ཕྱིར་མི་སློང་། ཁྱིམ་བདག་གིས་སྨྲས་པ། བསླངས་ཏེ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་གཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེའི་ཁྱིམ་གྱི་ཧ་ཅང་ཡང་མི་རིང་བ་ན་ཚོགས་ཅན་མ་རྒན་མོ་ཞིག་འདུག་ནས་ཆུང་པོ་གྲོགས་དེས་ཁྱིམ་བདག་ལ་སྨྲས་པ། ཚོགས་ཅན་མ་རྒན་མོ་དེ་ཅིའི་ཕྱིར་འཇུག་ཏུ་མི་གཞུག །ཁྱིམ་བདག་གིས་སྨྲས་པ། ཅི་ཁོ་བོས་འཇུད་མཐུན་མའི་ཁྱིམ་བྱའམ། དེས་སྨྲས་པ། ཚོགས་ཅན་མ་དེ་སྡིག་པ་ཅན་དམ་པ་མ་ཡིན་པའི་ཆོས་དེ་ལས་ཕྱིར་ལྡོག་གིས་འཇུག་ཏུ་ཆུག་ཅིག །ཁྱིམ་བདག་དེ་ཆུང་པོ་གྲོགས་དེས་ནན་གྱི་མནན་པ་ན་ཚོགས་ཅན་མ་དེའི་གན་དུ་སོང་སྟེ། བདེ་ལེགས་བདེ་ལེགས་ཞེས་སྨྲས་པ་དང་། རྒན་མོས་སྨྲས་པ། བྱོན་པ་ལེགས་སོ་ཅི་བཞེད། ཁྱིམ་བདག་གིས་སྨྲས་པ། ཁྱོད་འཚལ་ན་ཁྱོད་སུའི། རྒན་མོས་སྨྲས་པ། བདག་ལ་ཟས་དང་གོས་སྦྱིན་པ་གང་ལགས་པའིའོ། །ཁྱིམ་བདག་གིས་སྨྲས་པ། ཁྱོད་སྔོན་གྱི་ཉོན་མོངས་པ་དག་ཀུན་ཏུ་མི་སྤྱོད་དམ། རྒན་མོས་སྨྲས་པ། ཅི་བདག་གིས་སྐྱེས་པ་མ་མཐོང་ངམ། བདག་སྡིག་པ་ཅན་དམ་པ་མ་ལགས་པའི་ཆོས་དེ་ལས་ནི་ཕྱིར་ལོག་གོ་།ཁྱིམ་བདག་གིས་སྨྲས་པ། ཚུར་སྦྱོན་བཞུད་བདག་གིས་ཁྱོད་ཀྱི་ན་བཟའ་དང་བཤོས་གསོལ་གྱིས། ཁྱོད་ཀྱིས་བདག་གི་ཁྱིམ་གྱི་སོ་ཚིས་དག་མཛོད་ཅིག །ཁྱིམ་བདག་དེས་ཚོགས་ཅན་མ་རྒན་མོ་དེ་ཁྱིམ་དུ་བཅུག་སྟེ། ལྡེ་མིག་དང་། ལྡེ་མིག་འཁྱོག་པོ་དག་གཏད་ནས་སྨྲས་པ། འདི་ཁྱོད་ཀྱི་ཁྱིམ་ཡིན་གྱིས་ཁྱོད་ཀྱིས་བྱིན་པས་ཁོ་བོ་བྱ་བ་བྱེད་དོ། །ཚོགས་
ཅན་མ་རྒན་མོ་དེས་ཁྱིམ་བདག་དེའི་ཁྱིམ་གྱི་སོ་ཚིས་དག་བྱ་བར་བརྩམས་ནས། དེའི་འོག་ཏུ་གོས་དང་ཟས་བཟང་པོས་དུས་ཡུན་མི་རིང་བ་ཞིག་གིས་པགས་པ་དང་ཤ་དང་ཁྲག་དག་རྟས་པར་གྱུར་ཏོ། །དེའི་སྒོའི་ཉེ་འཁོར་ནས་བུ་མོ་རབ་ཏུ་མང་པོ་དག་ཅིག་རྒྱལ་བྱེད་ཀྱི་ཚལ་དུ་འདོང་བ་ཚོགས་ཅན་མ་རྒན་མོས་མཐོང་ནས། གར་འདོང་ཞེས་དྲིས་པ་དང་། བུ་མོ་དག་གིས་སྨྲས་པ། རྒྱལ་བྱེད་ཀྱི་ཚལ་དུ་འདོང་ངོ་། །རྒན་མོས་སྨྲས་པ། ཁོ་མོ་གོས་དང་རྒྱན་ཐོགས་ཀྱི་བར་དུ་རེ་ཞིག་སྡོད་ཅིག །རྒན་མོ་གོས་དང་རྒྱན་ཐོགས་པ་དེའི་བར་དུ་བུ་མོ་དག་ཐལ་ཏེ་དོང་ངོ་། །རྒན་མོ་ཡང་གོས་དང་རྒྱན་ཐོགས་ནས་ཕྱི་བཞིན་མྱུར་བ་མྱུར་བར་འཕགས་སོ། །ཇི་ཙམ་ན་བུ་མོ་དེ་དག་གཙུག་ལག་ཁང་དུ་ཞུགས་པ་ན། གཙུག་ལག་ཁང་དེ་ན་དགེ་སློང་ཞིག་གནས་ཁང་སྒོ་མ་བཅད་པ་ན་གཉིད་ལོག་པར་གྱུར་པ་དེའི་གོས་རྣམ་པར་འཐོར་བར་གྱུར་ཅིང་། དེའི་ཡན་ལག་གི་རྣམ་པ་ཡང་ལས་སུ་རུང་བར་གྱུར་པ་བུ་མོ་དེ་དག་གིས་མཐོང་ནས། བུ་མོ་དེ་དག་དགོད་ཅིང་གཙུག་ལག་ཁང་ནས་ཕྱིར་བྱུང་ངོ་། །ཚོགས་ཅན་མ་རྒན་མོ་ཡང་འཇུག་ཅིང་རྒན་མོས་བུ་མོ་དེ་དག་མཐོང་ནས་སྨྲས་པ། ཁྱེད་ཅག་ཅི་ལ་དགོད། གང་བསྟི་གནས་སུ་དགོད་པ་དེ་སོ་སྟོ་མར་འགྱུར་རོ་ཞེས་བྱ་བ་ཁྱེད་ཀྱིས་མ་ཐོས་སམ། བུ་མོ་དེ་དག་ཅང་མི་སྨྲ་བར་ཉིད་དུ་བྱུང་སྟེ་དོང་ངོ་། །ཚོགས་ཅན་རྒན་མོས་བུ་མོ་དེ་དག་གིས་འདིར་བྱ་གག་གམ་སྤྲེའུ་ཞིག་མཐོང་བར་གྱུར་གོར་མ་ཆག་སྙམ་དུ་ཤེས་ཤིང་རིག་ནས་སེམས་གཏོད་ཅིང་ངེས་པར་རྟོག་བཞིན་དུ་ཞུགས་པ་དང་། ཇི་ཙམ་ན་དགེ་སློང་དེ་དེ་ལྟར་རྣམ་པར་གྱུར་པ་མཐོང་ངོ་། །མཐོང་ནས་ཀྱང་དེ་ལ་འདོད་པའི་ཆོས་སྐྱེས་ནས། ཚོགས་ཅན་མ་རྒན་མོ་དེས་དགེ་སློང་དེའི་སྟེང་དུ་བགྲད་དེ་བརྩལ་བར་བརྩམས་པ་དང་། དགེ་སློང་དེ་གཉིད་སྟུག་པོས་ནོན་པས་ཕྱིར་མ་སད་དོ། །ཚོགས་ཅན་མ་རྒན་མོས་བདག་ཅག་ཚོགས་ཅན་མ་དག་གིས་ནི་སྒྱུ་རྩལ་དྲུག་ཅུ་རྩ་བཞི་མངོན་པར་ཤེས་ན་རབ་ཏུ་བྱུང་བ་འདིས་ཀོ་སྒྱུ་རྩལ་དྲུག་ཅུ་རྩ་ལྔ་ཤེས་ཏེ་འདི་ལྟར་རེག་པ་ནི་བདག་གིར་བྱེད་ལ་ཚིག་ནི་མི་སྟེར་ཏོ་སྙམ་དུ་ཤེས་ཤིང་རིག་ནས། གང་གི་ཚེ་ཚོགས་
ཅན་མ་རྒན་མོ་དེས་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་དགེ་སློང་དེ་སད་པར་བྱས་ཏེ་སྨྲས་པ། འཕགས་པ་བདག་གི་སྡུམ་པ་ཕྱོགས་ག་གེ་མོ་ཞིག་ན་མཆིས་ཀྱིས། གལ་ཏེ་ཡང་བཞེད་པར་གྱུར་ན་སྤྱོན་ཅིག །དགེ་སློང་དེས་སྨྲས་པ། སྐལ་ཆད་མ་བསྟི་གནས་སུ་ན་པར་བྱེད་པ་དེ་ཡང་རེ་ཞིག་ཁོ་བོ་བདག་གིར་མི་བྱེད་ན། ཁྱོད་ཀྱི་ཁྱིམ་དུ་འོང་བར་འགྱུར་རེ་སྐན། དགེ་སློང་དེ་བདག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས་དེས་དགེ་སློང་རྣམས་ལ་སྐབས་དེ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ། དེས་གསོལ་པ། བཙུན་པ་བདག་གིས་རེག་པ་བདག་གིར་མ་བགྱིས་ཏེ། བདག་དང་པོ་ཉིད་ནས་གཉིད་སྟུག་པོས་ནོན་པས་བདག་རེག་པ་བདག་གིར་བགྱིད་པར་ག་ལ་འགྱུར། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་རེག་པ་བདག་གིར་མ་བྱས་པ་འདི་ལ་ནི་ལྟུང་བ་མེད་མོད་ཀྱི་འོན་ཀྱང་ངས་དགེ་སློང་གྲོང་མཐའ་བའི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་གྲོང་མཐའ་པ་ཉིན་པར་གློས་ཕབ་སྟེ་གཉིད་ལོག་པས་སྒོ་སྒོ་གཏན་གྱིས་གཅད་པར་བྱ་བའམ། སྲུང་མ་དགེ་སློང་གཞག་པར་བྱ་བའམ། གོས་བཅིང་བར་བྱའོ། །སྒོ་སྒོ་གཏན་གྱིས་གཅོད་པར་མི་བྱེད་དམ། སྲུང་མ་དགེ་སློང་འཇོག་པར་མི་བྱེད་དམ། གོས་འཆིང་བར་མི་བྱེད་པར་ཉིན་པར་དེ་བཞིན་དུ་གློས་ཕབ་སྟེ། གཉིད་ལོག་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་དགོན་པ་པ་བསམ་གཏན་བཞི་པ་ཐོབ་པ་ཞིག་འདུག་པ་དེ་ཡང་དང་ཡང་དུ་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་བྱ་བའི་ཕྱིར་ཉེ་བར་འགྲོ་བས་དེ་དགེ་སློང་གསར་བུ་གསར་བུ་དག་གིས་ངོ་ཤེས་པར་བྱས་སོ། །དེ་ལ་དུས་གཞན་ཞིག་ན་གཡན་པའི་ནད་བྱུང་ནས་དེ་ལ་དགེ་སློང་གསར་བུ་
གསར་བུ་དེ་དག་གིས་སྨྲས་པ། གནས་བརྟན་ཁྱོད་ལ་གཡན་པའི་སྙུན་བྱུང་ངམ། དེས་སྨྲས་པ། བཞིན་བཟང་དག་དེ་དེ་བཞིན་ནོ། །དེ་དག་གིས་སྨྲས་པ། གནས་བརྟན་ཅིའི་སླད་དུ་སྨན་པ་ལ་རྨས་ཏེ་བྱ་བ་མི་མཛད། དེས་སྨྲས་པ། བཞིན་བཟང་དག་སྐྱེ་བོ་མང་པོ་མི་འདོད་པ་དང་། སྐྱེ་བོ་མང་པོ་མི་དགའ་བ་དང་། སྐྱེ་བོ་མང་པོ་ལ་མི་སྡུག་བ་དང་། སྐྱེ་བོ་མང་པོའི་ཡིད་དུ་མི་འོང་བ་འཇིག་རྟེན་ཐམས་ཅད་དང་ཐུན་མོང་བ་འདི་ལྟ་སྟེ། འཆི་བ་ཞེས་བྱ་བའི་ཆོས་དེ་འོང་བར་འགྱུར་ཞིང་དེས་ནད་འདི་དང་ཁོ་བོ་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་ཁྲིད་པར་འགྱུར་བས་བྱ་བ་བྱར་ཅི་ཡོད། དེ་དག་གིས་སྨྲས་པ། གནས་བརྟན་འོ་ན་བཅོམ་ལྡན་འདས་ཀྱིས་སྐྱེས་བུ་གང་ཟག་ཚུལ་ཁྲིམས་དང་ལྡན་པ་ཡུན་རིང་པོ་ཇི་སྲིད་དུ་འཚོ་བ་དེ་སྲིད་དུ་བསོད་ནམས་མང་པོ་འཕེལ་ཞིང་ཇི་སྲིད་དུ་བསོད་ནམས་མང་པོ་འཕེལ་བ་དེ་སྲིད་དུ་ཡུན་རིང་པོར་མཐོ་རིས་དག་ཏུ་དགའ་བར་འགྱུར་རོ་ཞེས་མ་གསུངས་སམ། བཞུད་ལ་བྱ་བ་མཛོད་ཅིག །དེ་དེ་དག་གིས་ནན་གྱིས་མནན་པ་ན་སྨན་པའི་གན་དུ་སོང་བ་དང་། སྨན་པས་དེ་མཐོང་ནས་སྨྲས་པ། འཕགས་པ་ཁྱོད་ལ་གཡན་པའི་སྙུན་བྱུང་ངམ། དེས་སྨྲས་པ། བཞིན་བཟང་དེ་བཞིན་ཏེ། དེའི་དོན་ཁོ་ནར་ཁོ་བོ་འོངས་ཀྱིས་བདག་ལ་སྨན་སྟོན་ཅིག །འཕགས་པ་བཤོས་བསོད་པ་གསོལ་ལ་ཡུངས་མར་གྱིས་སྐུ་དག་བསྐུས་ཏེ། གདུགས་ལ་བཞུགས་ཤིག་དང་ཁྱོད་སོས་པར་འགྱུར་རོ། །བཞིན་བཟང་ཁོ་བོ་ལ་ཡུངས་མར་སྩོལ་ཅིག །འཕགས་པ་བདག་ཅག་སྨན་པ་དག་ནི་སྨན་སྟོན་པ་ལགས་ཀྱི་འབུལ་བ་ནི་མ་ལགས་ཏེ། གལ་ཏེ་རེ་རེ་ལ་ཡང་འབུལ་ན་བདག་ཅག་ལ་འཚལ་མ་ཡང་མ་མཆིས། རད་པ་ཡང་མ་མཆིས་པར་འགྱུར་རོ། །འདི་ལྟར་ཁྱིམ་བདག་ཆེ་གེ་མོ་ཞིག་ལ་བྲོ་ནད་འདི་ལྟ་བུ་བྱུང་བར་གྱུར་ནས། བདག་གིས་དེའི་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་བསྐོལ་གྱིས། དེའི་གན་དུ་བཞུད་ལ་སློངས་ཤིག །བཞིན་བཟང་མི་སྟེར་བར་འགྱུར་རོ། །འཕགས་པ་བཞུད་ཅིག་དང་། དེ་དད་པ་ཅན་ལགས་པས་འབུལ་བར་འགྱུར་རོ། །བཞིན་བཟང་ཨ་རོག་གྱ། དོན་གྱིས་ན་ཁྱོད་ཉིད་ཀྱིས་བྱིན་ནོ་ཞེས་སྨྲས་
ཏེ་སོང་ནས་ཁྱིམ་བདག་དེའི་ཁྱིམ་ག་ལ་བ་དེར་སོང་བ་དང་། ཁྱིམ་བདག་དེས་དེ་ཐག་རིང་པོ་ནས་མཐོང་ནས་སྨྲས་པ། འཕགས་པ་ཁྱོད་ལ་གཡན་པའི་སྙུན་བྱུང་ངམ། བཞིན་བཟང་དེ་དེ་བཞིན་ནོ། །འཕགས་པ་ཡུངས་མར་གྱིས་སྐུ་དག་བསྐུས་ཏེ་གདུགས་ལ་བཞུགས་ཤིག་དང་ཁྱོད་སོས་པར་འགྱུར་རོ། །བཞིན་བཟང་དེའི་དོན་ཁོ་ནར་ཁོ་བོ་འོངས་ཏེ། ཁོ་བོས་ཁྱོད་ལ་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་ཡོད་པར་ཤེས་ཀྱིས་དེ་བྱིན་ཅིག་དང་། ཁྱོད་ལ་བསོད་ནམས་སུ་འགྱུར་རོ། །འཕགས་པ་དམ་ཚིག་ལ་དབུལ་བར་བགྱི་སྟེ། གལ་ཏེ་བདག་ལས་བསོད་སྙོམས་གསོལ་བར་འགྱུར་ནའོ། །བཞིན་བཟང་བཟའ་བར་བྱའོ། །ཁྱིམ་བདག་དེས་དེ་ཟས་བསོད་པས་ཚིམ་པར་བྱས་ནས་གཡན་པའི་ནད་རབ་ཏུ་ཞི་བར་འགྱུར་བའི་ཡུངས་མར་གྱིས་ལྷུང་བཟེད་ཆུང་ངུ་འགེངས་སུ་བཅུག་སྟེ་བྱིན་ནོ། །དགེ་སློང་དེས་ཨ་རོག་གྱ་ཞེས་བརྗོད་དེ་སོང་ནས། དགོན་པའི་གནས་སུ་སོང་སྟེ་དམ་དུམ་དག་གྱོན་ནས་ཡུངས་མར་དེས་ལུས་དག་བསྐུས་ཏེ་ཉི་མ་ལ་འདུག་པ་དང་དེ་ལ་བདེ་བའི་འདུ་ཤེས་སྐྱེས་པར་གྱུར་ནས་གཉིད་ལོག་པ་དང་། དེའི་ཡན་ལག་གི་རྣམ་པ་སྲོག་ཆགས་ཨུད་ཙ་ཏིང་གས་ཟིན་ཅིང་ལས་སུ་རུང་བར་གྱུར་ནས། དེའི་གོས་ཀྱང་འཐོར་བར་གྱུར་པ་དང་། ཇི་ཙམ་ན་གཞོན་ནུ་མ་ཆེན་མོ་ཞིག་ལྕི་བ་ཐུ་བ་ན་ཕྱོགས་དེར་སོན་པ་དང་། དེས་དགེ་སློང་དེ་དེ་ལྟར་རྣམ་པར་གྱུར་པ་མཐོང་ངོ་། །མཐོང་ནས་དེ་ལ་འདོད་པ་ལ་འདོད་ཆགས་ཀྱི་ཀུན་ནས་དཀྲིས་པ་སྐྱེས་ནས། དེས་དགེ་སློང་དེའི་སྟེང་དུ་བརྩལ་བར་བརྩམས་པ་དང་། དགེ་སློང་དེ་སད་ན་ཉམས་ཆུང་བས་ཕྱིར་བཟློག་པར་མ་ནུས་སོ། །གང་གི་ཚེ་དེ་ཀུན་ནས་དཀྲིས་པ་དང་བྲལ་བར་གྱུར་པ་དེའི་ཚེ་སྨྲས་པ། འཕགས་པ་བདག་གི་སྡུམ་བ་ཕྱོགས་ག་གེ་མོ་ཞིག་ན་མཆིས་ཀྱིས་གལ་ཏེ་ཡང་བཞེད་པར་གྱུར་ན་སྤྱོན་ཅིག །དགེ་སློང་དེས་སྨྲས་པ། སྐལ་ཆད་མ་བསྟི་གནས་སུན་པར་བྱེད་པ། ཁོ་བོ་རེ་ཞིག་དེ་ཡང་བདག་གིར་མི་བྱེད་ན། ཁྱོད་ཀྱི་ཁྱིམ་དུ་འོང་བར་འགྱུར་རེ་སྐན། དགེ་སློང་དེ་བདག་ལ་ཕམ་པར་གྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་དགེ་སློང་རྣམས་ལ་སྐབས་དེ་རྒྱས་པར་བརྗོད་པ་དང་། དགེ་སློང་རྣམས་
ཀྱིས་བཅོམ་ལྡན་འདས་ལ་གསོལ་ནས། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང་ཁྱོད་ཀྱིས་རེག་པ་བདག་གིར་མ་བྱས་སམ། དེས་གསོལ་པ། བཙུན་པ་བདག་གིས་རེག་པ་བདག་གིར་མ་བགྱིས་ཏེ། བདག་དང་པོ་ཉིད་ནས་འདོད་པ་ལས་འདོད་ཆགས་དང་བྲལ་བས་བདག་རེག་པ་བདག་གིར་ག་ལ་བགྱིད། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་རེག་པ་བདག་གིར་མི་བྱེད་པ་འདི་ལ་ནི་ལྟུང་བ་མེད་མོད་ཀྱིས། འོན་ཀྱང་ངས་དགེ་སློང་དགོན་པ་པའི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་དགོན་པ་པ་ཉིན་པར་གློས་ཕབ་སྟེ་གཉིད་ལོག་པས་ཕྱོགས་དེ་ཡལ་ག་དག་གམ། སེག་དག་གམ། རེ་ལྡེ་དག་གིས་བསྐོར་བར་བྱ་བའམ། སྲུང་མ་དགེ་སློང་གཞག་པར་བྱ་བའམ། གོས་བཅིང་བྱའོ། །ཕྱོགས་དེ་ཡལ་ག་དག་གམ། སེག་དག་གམ། རེ་ལྡེ་དག་གིས་བསྐོར་བར་མི་བྱེད་དམ། སྲུང་མ་དགེ་སློང་འཇོག་པར་མི་བྱེད་དམ། གོས་འཆིང་བར་མི་བྱེད་པ་དེ་བཞིན་དུ་གློས་ཕབ་སྟེ་གཉིད་ལོག་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གལ་ཏེ་དགེ་སློང་འདི་རེ་ཞིག་འདོད་པ་ལས་འདོད་ཆགས་དང་བྲལ་བ་ལགས་ན་ཅིའི་སླད་དུ་དེའི་ཡན་ལག་གི་རྣམ་པ་ལས་སུ་རུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདོད་ཆགས་དང་མ་བྲལ་བའི་ཡན་ལག་གི་རྣམ་པ་ནི་རྒྱུ་ལྔས་ལས་སུ་རུང་བར་འགྱུར་ལ། འདོད་ཆགས་དང་བྲལ་བའི་ནི་རྒྱུ་བཞིས་སོ། །འདོད་ཆགས་དང་མ་བྲལ་བའི་རྒྱུ་ལྔ་གང་ཞེ་ན། བཤང་བས་ཉེ་བར་ནོན་པ་དང་། གཅི་བས་ཉེ་བར་ནོན་པ་དང་། རླུང་གིས་ཉེ་བར་ནོན་པ་དང་། སྲོག་ཆགས་ཨུ་ཙ་ཏིང་གས་ཟིན་པ་དང་། འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པ་ཉིད་ནི་ལྔ་པ་སྟེ། འདོད་ཆགས་དང་མ་བྲལ་བ་ནི་རྒྱུ་ལྔ་པོ་དེ་དག་གིས་སོ། །འདོད་ཆགས་དང་བྲལ་བའི་རྒྱུ་བཞི་པོ་གང་ཞེ་ན། བཤང་བས་ཉེ་བར་ནོན་པ་དང་། གཅི་བས་ཉེ་བར་ནོན་པ་དང་། རླུང་གིས་ཉེ་བར་ནོན་པ་དང་། སྲོག་ཆགས་ཨུ་ཙ་ཏིང་གས་ཟིན་པ་སྟེ། འདོད་ཆགས་དང་བྲལ་བའི་རྒྱུ་ནི་བཞི་པོ་དེ་དག་གིས་སོ། །དགེ་སློང་འདིའི་ཡན་ལག་གི་རྣམ་པ་ནི་དེའི་ཚེ་ན་སྲོག་ཆགས་
ཨུ་ཙ་ཏིང་གས་ཟིན་པས་དེས་ན་འདིའི་ལས་སུ་རུང་བར་གྱུར་ཏོ།། །།འདུལ་བ་རྣམ་པར་འབྱེད་པ། བམ་པོ་གསུམ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀ་ལན་དཀའི་བུ་ཚེ་དང་ལྡན་པ་བཟང་བྱིན་གྱིས་དགེ་སློང་གི་དགེ་འདུན་སྐྱོན་མ་མཆིས་ཤིང་ཆུ་བུར་མ་མཆིས་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཀྱི་འདི་ལྟར་འདས་པའི་དུས་ན་ཡང་འདིས་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་སྟེ། དེ་ཉོན་ཅིག །དགེ་སློང་དག་འཇིག་རྟེན་འདི་འཇིག་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཇིག་པ་ན། སེམས་ཅན་དག་ཕལ་ཆེར་འོད་གསལ་གྱི་ལྷའི་རིས་སུ་སྐྱེའོ། །དེ་དག་དེ་ནི་གཟུགས་ཅན་ཡིད་ལས་བྱུང་། མ་ཚང་བ་མེད་པ། དབང་པོ་མ་ཉམས་པ། ཡན་ལག་ཉིང་ལག་ཐམས་ཅད་དང་ལྡན་པ། བཟང་བ་ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་ས་ཆེན་པོ་འདི་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་ཏེ། ས་ཆེན་པོ་ཆུ་འབའ་ཞིག་དང་། རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དེ། འདི་ལྟ་སྟེ་དཔེར་ན་འོ་མ་བསྐོལ་བ་གྲང་པར་གྱུར་པའི་སྟེང་དུ་ཡང་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་པ་དེ་བཞིན་དུ། ས་ཆེན་པོ་ཆུ་འབའ་ཞིག་དང་རྒྱ་མཚོ་འབའ་ཞིག་ཏུ་གྱུར་པའི་སྟེང་དུ་ཡང་རླུང་གིས་སྤྲིས་མ་ཀུན་ཏུ་འཆགས་པར་བྱེད། ཀུན་ཏུ་འཐས་པར་བྱེད། ཀུན་ཏུ་ཁྱབ་པར་བྱེད་དོ། །དེ་ནི་སའི་བཅུད་ཁ་དོག་ཕུན་སུམ་ཚོགས་པ་དྲི་ཕུན་སུམ་ཚོགས་པ་རོ་ཕུན་སུམ་ཚོགས་པ་ཡིན་ཏེ། ཁ་དོག་
གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན་མར་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན་སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དགེ་སློང་དག་འཇིག་རྟེན་འདི་འཆགས་པའི་དུས་གང་ཡིན་པ་དེ་ཡང་ཡོད་དེ། འཇིག་རྟེན་འཆགས་པ་ན་འོད་གསལ་གྱི་ལྷའི་རིས་དེ་ནས་སེམས་ཅན་ཁ་ཅིག་ཚེ་ཟད་ལས་ཟད་བསོད་ནམས་ཟད་པས་ཤི་འཕོས་ཏེ། འདི་ལྟ་བུ་ཉིད་དུ་མི་རྣམས་དང་སྐལ་བ་མཐུན་པ་ཉིད་དུ་འོང་ཞིང་འདིར་ཡང་གཟུགས་ཅན་ཡིད་ལས་བྱུང་བ། མ་ཚང་བ་མེད་པ། དབང་པོ་མ་ཉམས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། བཟང་བ། ཁ་དོག་དང་ལྡན་པ། རང་ལས་འོད་འབྱུང་བ། ནམ་མཁའ་ལ་འགྲོ་བ། དགའ་བ་ཟ་བ། དགའ་བའི་ཟས་དང་ལྡན་པ། ཚེ་རིང་ཞིང་ཡུན་རིང་དུ་གནས་སོ། །དེའི་ཚེ་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་མ་བྱུང་ངོ་། །འཇིག་རྟེན་དུ་རྒྱུ་སྐར་དག་ཀྱང་མ་བྱུང་། མཚན་མོ་དང་ཉིན་མོ་དག་ཀྱང་མ་བྱུང་། སྐད་ཅིག་དང་ཐང་ཅིག་དང་ཡུད་ཙམ་དག་ཀྱང་མ་བྱུང་ངོ་། །ཟླ་བ་དང་། ཟླ་བ་ཕྱེད་དང་དུས་ཚིགས་དང་ལོ་དག་ཀྱང་མ་བྱུང་ངོ་། །བུད་མེད་ཀྱང་མེད། སྐྱེས་པ་ཡང་མེད་དེ། སེམས་ཅན་སེམས་ཅན་ཞེས་བྱ་བ་འབའ་ཞིག་གི་གྲངས་སུ་འགྲོའོ། །དེ་ནས་སེམས་ཅན་བརྐམ་པའི་རང་བཞིན་ཅན་ཞིག་གི་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་པར་གྱུར་ཏོ། །སེམས་ཅན་གཞན་དག་གིས་ཀྱང་སེམས་ཅན་དེ་སོར་མོའི་རྩེ་མོས་སའི་བཅུད་མྱང་བར་བྱེད་པ་ན། ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་པ་དང་། ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམ་གྱི་ཟས་ཀྱི་རྩོམ་པས་ཟོས་
པར་གྱུར་པ་མཐོང་ངོ་། །མཐོང་ནས་སེམས་ཅན་དེ་དག་ཀྱང་སོར་མོའི་རྩེ་མོས་སའི་བཅུད་མྱང་བར་བྱེད་དོ། །ཇི་ལྟ་ཇི་ལྟར་མྱང་བར་བྱེད་པ་དེ་ལྟ་དེ་ལྟར་འདོད་པར་བྱེད་དོ། །ཇི་ལྟ་ཇི་ལྟར་འདོད་པར་བྱེད་པ་དེ་ལྟ་དེ་ལྟར་ཁམས་ཀྱི་ཟས་ཀྱི་རྩོམ་པས་ཟོས་པར་གྱུར་ཏོ། །གང་གི་ཕྱིར་སེམས་ཅན་དེ་དག་གིས་སའི་བཅུད་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་གི་ལུས་ལ་སྲ་བ་ཉིད་དང་། ལྕི་བ་ཉིད་བྱུང་ཞིང་དེ་དག་གི་ཁ་དོག་གསལ་བ་བཟང་པོ་གང་ཡིན་པ་དེ་ཡང་མེད་པར་གྱུར། འཇིག་རྟེན་དུ་མུན་པ་ཡང་བྱུང་བར་གྱུར་ཏོ། །དགེ་སློང་དག་ཆོས་ཉིད་ཀྱིས་ན་འཇིག་རྟེན་དུ་མུན་པ་བྱུང་ན་འཇིག་རྟེན་དུ་ཉི་མ་དང་ཟླ་བ་དག་ཀྱང་འབྱུང་བར་འགྱུར་རོ། །འཇིག་རྟེན་དུ་རྒྱུ་སྐར་དག་དང་། མཚན་མོ་དང་། ཉིན་མོ་དག་དང་། སྐད་ཅིག་དང་ཐང་གཅིག་དང་ཡུད་ཙམ་དག་དང་། ཟླ་བ་དང་ཟླ་བ་ཕྱེད་དང་། དུས་ཚིགས་དང་ལོ་དག་ཀྱང་འབྱུང་བར་འགྱུར་རོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ། ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་སའི་བཅུད་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་སའི་བཅུད་མེད་པར་གྱུར་པ་ན། འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཀྱེ་མའོ་བཅུད་ཀྱེ་མའོ་བཅུད་ཅེས་ཀྱང་ཟེར་ཅིང་འདི་ལྟ་སྟེ་དཔེར་ན། དེང་སང་མི་དག་ཟས་ཞིམ་པ་བཟང་པོ་ཅུང་ཞིག་རྙེད་ནས། ཡི་གེ་དང་སྦྱར་བ་དང་། ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་འདི་སྐད་ཅེས་ཀྱེ་མའོ་བཅུད་ཀྱེ་མའོ་བཅུད་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་སའི་བཅུད་མེད་པར་གྱུར་པ་རྣམས་འདུས་ཤིང་ལྷགས་ནས། མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཀྱེ་མའོ་བཅུད་ཀྱེ་མའོ་བཅུད་ཅེས་ཟེར་ཡང་། སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་གི་སའི་བཅུད་མེད་པར་གྱུར་པ་ནས་ཞག་ཁ་དོག་ཕུན་སུམ་ཚོགས་
པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། དོང་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་འདི་ལྟ་སྟེ་དཔེར་ན། སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་གྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན། སེམས་ཅན་གྱིས་སེམས་ཅན་ལ། ཀྭའེ་སེམས་ཅན་ང་ནི་ཁ་དོག་དང་ལྡན་པ་ཡིན་ལ། ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་ས་ཞག་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་ས་ཞག་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་ཏེ། འདི་ལྟ་སྟེ་དཔེར་ན། དེང་སང་མི་དག་སྡུག་བསྔལ་དང་ཡིད་མི་བདེ་བ་འགའ་ཞིག་གིས་རེག་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་ས་ཞག་མེད་པར་གྱུར་པ་ན། འདུས་ཤིང་ལྷགས་ནས། མྱ་ངན་བྱེད་སྒྱིད་ལུག་པར་བྱེད་སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཀྱེ་མའོ་ཀྱེ་མའོ་ཞེས་ཟེར་ཡང་། སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་ནི་མི་ཤེས་སོ། །དགེ་སློང་དག་སེམས་ཅན་དེ་དག་ས་ཞག་མེད་པར་པར་གྱུར་པ་ན། མྱུ་གུའི་ཚལ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ་བྱུང་བར་གྱུར་ཏེ། ཁ་དོག་གིས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། ཀ་དམ་བུ་ཀའི་མེ་ཏོག་ལྟ་བུའོ། །རོས་ནི་འདི་ལྟ་བུ་སྟེ། འདི་ལྟ་སྟེ་དཔེར་ན། སྦྲང་བུའི་སྦྲང་རྩི་མ་བསྐོལ་བ་ལྟ་བུའོ། །དེ་དག་དེ་ཟ་ཞིང་ཟས་དེ་དང་ལྡན་པ་ཚེ་རིང་ཞིང་ཡུན་རིང་དུ་གནས་
སོ། །དེ་དག་ལས་གང་ཟས་ཆེས་ཆུང་ངུ་ཟ་བ་དེ་ནི་ཁ་དོག་དང་ལྡན་པར་འགྱུར་ལ། གང་ཟས་ཆེས་ཆེར་ཟ་བ་དེ་ནི་ཁ་དོག་ངན་པར་འགྱུར་རོ། །དེ་ལྟར་ཟས་རྣམ་གཉིས་ཉིད་ལ་བརྟེན་ནས་ཁ་དོག་རྣམ་གཉིས་ཉིད་དུ་མངོན་ལ། ཁ་དོག་རྣམ་གཉིས་ཉིད་དུ་གྱུར་པ་ན་སེམས་ཅན་གྱིས་སེམས་ཅན་ལ། ཀྭའི་སེམས་ཅན་ང་ནི་ཁ་དོག་དང་ལྡན་པ་ཡིན་ལ་ཁྱོད་ནི་ཁ་དོག་ངན་པ་ཡིན་ནོ་ཞེས་ཁྱད་དུ་གསོད་པར་བྱེད་དོ། །དེ་དག་ཁ་དོག་གིས་མངོན་པའི་ང་རྒྱལ་ཅན་དུ་གྱུར་པ་ན། སྡིག་པ་ཅན་མི་དགེ་བའི་ཆོས་དེ་དག་ཉིད་ཡང་དག་པར་བླངས་པའི་རྒྱུས་མྱུ་གུའི་ཚལ་མེད་པར་གྱུར་ཏོ། །དགེ་སློང་དག་སེམས་ཅན་དེ་དག་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་ཏེ། འདི་ལྟ་སྟེ་དཔེར་ན། དེང་སང་མི་དག་སྨད་པ་རྣོན་པོ་འབའ་ཞིག་གིས་སྨད་པ་ན་ཡི་གེ་དང་སྦྱར་བ་དང་ཚིག་རྙིང་པ་དེ་དག་ཉིད་ཀྱིས་རྗེས་སུ་ཐ་སྙད་འདོགས་ཤིང་། འདི་སྐད་ཅེས་ཕར་སོང་ཕར་སོང་ཞེས་ཀྱང་ཟེར་བ་དེ་བཞིན་དུ། སེམས་ཅན་དེ་དག་ཀྱང་མྱུ་གུའི་ཚལ་མེད་པར་གྱུར་པ་ན་འདུས་ཤིང་ལྷགས་ནས་མྱ་ངན་བྱེད། སྒྱིད་ལུག་པར་བྱེད། སྨྲེ་སྔགས་འདོན་པར་བྱེད་ཅིང་། འདི་སྐད་ཅེས་ཕར་སོང་ཕར་སོང་ཞེས་ཟེར་ཡང་སྨྲས་པ་འདིའི་དོན་ནི་འདིའོ། །སྨྲས་པ་འདིའི་དོན་ནི་འདིའོ་ཞེས་སྨྲས་པ་དེའི་དོན་མི་ཤེས་སོ། །དགེ་སློང་དག་སེམས་ཅན་དེ་དག་གི་མྱུ་གུའི་ཚལ་མེད་པར་གྱུར་པ་ན་མ་རྨོས་མ་བཏབ་པའི་འབྲས་སཱ་ལུའི་འབྲུ། སོ་བ་མེད་པ། སྦུན་པ་མེད་པ། དག་པ་གཙང་བ། སོར་བཞི་པ། ཀུན་ནས་མ་དཀྲིས་པ་ནུབ་བརྔས་ན་ནང་རྒྱས་ཤིང་ཕྱིར་སྐྱེ་ལ། ནང་བརྔས་ན་ནུབ་རྒྱས་ཤིང་ཕྱིར་སྐྱེ་བ། བརྔས་སོ་ཅོག་ཕྱིར་སྐྱེ་བ། བརྔས་པར་ཡང་མི་མངོན་པ་བྱུང་བར་གྱུར་ཏེ། དེ་དག་དེ་ཟ་ཞིང་ཟས་དེ་དང་ལྡན་ལ་ཚེ་རིང་ཞིང་ཡུན་རིང་དུ་གནས་སོ། །གང་གི་ཕྱིར་སེམས་ཅན་དེ་དག་གིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཁམ་གྱི་ཟས་ཀྱི་རྩོམ་པས་ཟོས་པར་གྱུར་པ་དེའི་ཕྱིར་དེ་དག་ལ་དབང་པོ་ཐ་དད་པ་བྱུང་བར་གྱུར་ཏེ། ཁ་ཅིག་ནི་ཕོའི་དབང་པོ་དང་ལྡན། ཁ་ཅིག་ནི་མོའི་དབང་པོ་དང་ལྡན་ནོ། །དེ་ན་གང་དག་ཕོའི་དབང་པོ་དང་ལྡན་པ་དང་།
གང་དག་མེའི་དབང་པོ་དང་ལྡན་པ་དེ་དག་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་དོ། །ཇི་ལྟ་ཇི་ལྟར་གཅིག་ལ་གཅིག་མིག་གིས་མིག་ལ་བརྟེན་ཏེ་ལྟ་བར་བྱེད་པ་དེ་ལྟ་དེ་ལྟར་ཀུན་ཏུ་ཆགས་སོ། །ཇི་ལྟ་ཇི་ལྟར་ཀུན་ཏུ་ཆགས་པ་དེ་ལྟ་དེ་ལྟར་བྲལ་ཏོ། །ཇི་ལྟ་ཇི་ལྟར་བྲལ་བ་དེ་ལྟ་དེ་ལྟར་ལོག་པར་ཞུགས་སོ། །སེམས་ཅན་གཞན་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ངོ་། །མཐོང་ནས་སས་ཀྱང་འཐོར་བར་བྱེད། བོང་བ་དང་། གསེག་མ་དང་གྱོ་མོ་དང་གྱོ་དུམ་དག་ཀྱང་འཕེན་པར་བྱེད་ཅིང་། འདི་སྐད་ཅེས་སེམས་ཅན་ངན་བ་གྲོང་བ་བྱ་བ་མ་ཡིན་པ་བྱེད། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀྭའེ་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་ཏེ་འདི་ལྟ་སྟེ་དཔེར་ན། དེང་སང་སེམས་ཅན་དག་བག་སར་བག་མར་ལེན་པ་ན་ཕྱེ་མས་ཀྱང་འཐོར་བར་བྱེད་། དྲི་དང་མེ་ཏོག་དང་འབྲས་ཡོས་དག་གིས་ཀྱང་འཐོར་བར་བྱེད་ཅིང་། འདི་སྐད་ཅེས་སྲུ་བདེ་བར་གྱུར་ཅིག་ཅེས་ཀྱང་ཟེར་བ་དེ་བཞིན་དུ། སེམས་ཅན་དེ་དང་དེ་དག་གིས་ཀྱང་སེམས་ཅན་སེམས་ཅན་ལ་ལོག་པར་ཞུགས་པ་མཐོང་ནས་སས་ཀྱང་འཐོར་བར་བྱེད། བོང་བ་དང་གསེག་མ་དང་། གྱོ་མོ་དང་གྱོ་དུམ་དག་ཀྱང་འཕེན་པར་བྱེད་ཅིང་འདི་སྐད་ཅེས་སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། སེམས་ཅན་ངན་པ་གྲོང་པ་བྱ་བ་མ་ཡིན་པ་བྱེད་པ། ཀྭའི་སེམས་ཅན་ཁྱོད་ཅིའི་ཕྱིར་སེམས་ཅན་སུན་པར་བྱེད་ཅེས་ཀྱང་ཟེར་རོ། །དགེ་སློང་དག་དེ་ལྟར་ན་སྔོན་ཆོས་མ་ཡིན་པར་གྲགས་པ་གང་ཡིན་པ་དེ་ནི་དེང་སང་ཆོས་སུ་གྲགས་ལ། སྔོན་འདུལ་བ་མ་ཡིན་པར་གྲགས་པ་གང་ཡིན་པ་དེ་ནི་དེང་སང་འདུལ་བར་གྲགས། སྔོན་སྨད་པར་བྱ་བ་གང་ཡིན་པ་དེ་ནི་དེང་སངས་བསྟོད་པར་བྱ་བ་ཡིན་ནོ། །དེ་ཉི་མ་གཅིག་ཙམ་སྤོང་བར་བྱེད། ཉི་མ་གཉིས་སམ་གསུམ་མམ་བདུན་ཙམ་སྤོང་བར་བྱེད་དོ། །གང་གི་ཕྱིར་སེམས་ཅན་དེ་དག་སྡིག་པ་ཅན་དམ་པ་མ་ཡིན་པའི་ཆོས་དེ་ལ་ཤིན་ཏུ་སྡང་བར་བྱེད་པས་བརྟུལ་ཞུགས་ལ་ཞུགས་པ་དེའི་ཕྱིར། དེ་དག་ཁྱིམ་རྩིག་པ་ལ་ཞུགས་ཏེ་བདག་ཅག་གིས་འདིར་བྱ་བ་མ་ཡིན་པ་བྱའོ། །བདག་ཅག་གིས་འདིར་བྱ་བ་མ་ཡིན་པ་
བྱའོ་ཞེས་ཟེར་བ་ལས་ཁྱིམ་ཁྱིམ་ཞེས་བྱ་བའི་མིང་བྱུང་ངོ་། །དགེ་སློང་དག་འདི་ནི་ཁྱིམ་གྱི་ལས་ཀྱི་མཐའ་དག་འཇིག་རྟེན་དུ་འབྱུང་བའི་དང་པོ་རྩོམ་པ་ཡིན་ཏེ། དེ་ཡང་ཆོས་ཀྱིས་ཡིན་གྱི་ཆོས་མ་ཡིན་པས་ནི་མ་ཡིན་ནོ། །དེ་ལ་ཆོས་ནི་འདི་ཡིན་ཏེ། རྒྱལ་བ་དབང་པོ་རྣམས་ཀྱི་ཆོས་མཆོག་ཡིན་ནོ། །དགེ་སློང་དག་དེ་ལ་དེའི་ཚེ་དེའི་དུས་ན་གང་གིས་དེའི་དང་པོར་སེམས་ཅན་སུན་ཕྱུང་བར་གྱུར་པའི་སེམས་ཅན་གང་ཡིན་པ་དེ་ནི་ཀ་ལན་ད་ཀའི་བུ་བཟང་བྱིན་ཡིན་ཏེ། འདིས་དེའི་ཚེ་ཡང་འཇིག་རྟེན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་བྱུང་ངོ་། །འདིས་ད་ལྟར་ཡང་དགེ་སློང་གི་དགེ་འདུན་སྐྱོན་མེད་ཅིང་ཆུ་བུར་མེད་པ་ལ་དེའི་དང་པོར་འདི་ལྟ་སྟེ། མི་ཚངས་པར་སྤྱོད་པའི་རྐྱེན་གྱིས་ཆུ་བུར་ཕྱུང་ངོ་། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤང་བའི་ཕྱིར་འབད་པར་བྱའོ། །ཞེ་སྡང་སྤང་བའི་ཕྱིར་དང་། གཏི་མུག་སྤང་བར་བྱ་བའི་ཕྱིར་འབད་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ནི་ལྟུང་བ་མེད་དོ། །ཕམ་པར་འགྱུར་བ་དང་པོ་རྫོགས་སོ།། །།