ཕམ་པར་འགྱུར་བ་བཞི་པ་བཤད་པ།
སངས་རྒྱས་བཅོམ་ལྡན་འདས་ཡངས་པ་ཅན་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་ན་ཉ་པ་ལྔ་བརྒྱ་ཆུ་ཀླུང་ཡིད་འོང་ལྡན་ལ་རྟེན་ཅིང་འཁོད་དོ། །དེ་དག་ལ་རྒྱ་མོ་སྤྱོད་པ་དང་། སྤྱོད་པ་ཆེན་མོ་ཞེས་བྱ་བ་གཉིས་ཤིག་ཡོད་དོ། །དེ་དག་ལན་འགའ་ནི་རྒྱ་མོ་སྤྱོད་པ་འཇུད་པར་བྱེད་ལ། ལན་འགའ་ནི་སྤྱོད་པ་ཆེན་མོ་འཇུད་པར་བྱེད་དེ། གང་གི་ཚེ་ཉ་དག་ཉོ་བ་མེད་པ་དེའི་ཚེ་ན་རྒྱ་མོ་སྤྱོད་པ་འཇུད་པར་བྱེད་ལ། གང་གི་ཚེ་ཉ་དག་ཉོ་བ་ཡོད་པ་དེའི་ཚེ་ནི་སྤྱོད་པ་ཆེན་མོ་འཇུད་པར་བྱེད་དོ། །ཇི་ཙམ་དུས་གཞན་ཞིག་ན་ཡངས་པ་ཅན་དུ་དུས་སྟོན་བྱུང་ནས། དེ་དག་གིས་རྒྱ་མོ་གཉིས་ཀ་བཅུག་སྟེ། ཉིས་བརྒྱ་ལྔ་བཅུས་ནི་རྒྱ་མོ་སྤྱོད་པ་བཅུག །ཉིས་བརྒྱ་ལྔ་བཅུས་ནི་སྤྱོད་པ་ཆེན་པོ་བཅུག་གོ་།གང་དག་གིས་རྒྱ་མོ་སྤྱོད་པ་བཅུག་པ་དེ་དག་གིས་ནི་ཉ་དང་། རུས་སྦལ་དང་། སྦལ་པ་དང་། ཆུ་སྲིན་བྱིས་པ་གསོད་དང་། ཉ་ཁྱི་པ་ལ་སོགས་མང་པོ་དག་འདི་ལྟ་སྟེ། དཔེར་ན་ཏིལ་དང་། འབྲས་ཐུག་པོ་ཆེ་དང་། རྒྱ་ཤུག་དང་། རྒྱ་སྲན་ལ་སོགས་པ་བཞིན་དུ་ཕུང་པོ་ཆེན་པོར་རྣམ་པར་བཞག་གོ་།གང་དག་གིས་རྒྱ་མོ་སྤྱོད་པ་ཆེན་མོ་བཅུག་པ་དེ་དག་གིས་ནི་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པ་ཆུ་སྲིན་ཉའི་རིགས་བོང་ཚོད་ཆེན་པོ་ཉལ་བ་ཟིན་ནས། དེ་དག་གིས་དེ་དྲང་བར་བརྩམས་སོ། །དེ་དག་གིས་དྲངས་པ་ན་དེ་སད་ནས་ཉ་པ་ཉིས་བརྒྱ་ལྔ་བཅུ་པོ་དེ་དག་དང་། རྒྱ་མོ་སྤྱོད་པ་ཆེན་མོ་ཁྱེར་ཏེ། རྒྱུན་ཕྱོགས་སུ་ཞུགས་སོ། །ཉ་པ་དེ་དག་གིས་ཉ་པ་ཉིས་བརྒྱ་ལྔ་བཅུ་པོ་གཞན་དག་ལ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང་། བདག་ཅག་ཁྱེར་གྱིས་ར་མདའ་ཟློག་ཅིག །ཅེས་བྱས་སོ། །དེ་དག་གིས་ཐོས་ནས་ཉ་པ་ཉིས་བརྒྱ་ལྔ་བཅུ་པོ་གཞན་དག་ཀྱང་ལྷགས་ཏེ། དེ་ཉིད་ལ་རུབ་པ་དང་། དེས་ཉ་པ་ལྔ་བརྒྱ་དང་། རྒྱ་མོ་སྤྱོད་པ་ཆེན་མོ་ཁྱེར་ཏེ་རྒྱུན་ཕྱོགས་སུ་
ཞུགས་ནས་གཟུང་བར་མ་ནུས་སོ། །སྐྱབས་མེད་པ་དེ་དག་གིས་ཀུན་ཏུ་ཤེས་ལྡན་དག་རྒྱ་མོ་སྤྱོད་པ་ཆེན་མོ་དང་བདག་ཅག་ཁྱེར་གྱིས་གྲོགས་གྱིས་ཤིག་ཅེས་ར་མདའ་བཟློག་པ་དང་། ལས་མ་མཐོང་བའི་མི་བ་ལང་རྫི་དག་དང་ཕྱུགས་རྫི་དག་དང་ཤིང་ཐུན་དག་དང་རྩྭ་ཐུན་དག་དང་། ལམ་གྱིས་འཚོ་བ་དག་དང་། ལམ་གོལ་བས་འཚོ་བའི་མི་དག་དང་། གཞན་ཡང་སྲོག་ཆགས་བརྒྱ་སྟོང་ཕྲག་དུ་མ་དག་ལོག་ནས། དེ་དག་གིས་ལུས་སྨས་པ་དང་། རྣམ་པར་སྨས་པ་དག་གིས་རྒྱ་མོ་རལ་བ་དང་། རབ་ཏུ་རལ་པས་ཆུ་སྲིན་དེ་ཆུ་ནས་སྐམ་ལ་ཕྱུང་ངོ་། །དེ་ལ་མགོ་བཅོ་བརྒྱད་དང་མིག་སུམ་ཅུ་རྩ་དྲུག་ཡོད་དེ། དེའི་མགོ་ལ་ལ་ནི་གླང་པོ་ཆེའི་མགོ་འདྲ། ལ་ལ་ནི་རྟའི་མགོ་འདྲ། ལ་ལ་ནི་རྔ་མོའི་མགོ་དང་། བོང་བུའི་མགོ་དང་། བ་ལང་གི་མགོ་དང་། སྤྲེའུ་ཡི་མགོ་དང་། སེང་གེའི་མགོ་དང་། སྟག་གི་མགོ་དང་། དོམ་གྱི་མགོ་དང་། དྲེད་མོའི་མགོ་དང་། གུང་གི་མགོ་དང་། བྱི་ལའི་མགོ་དང་། རའི་མགོ་དང་། ལུག་གི་མགོ་དང་། རི་དྭགས་ཀྱི་མགོ་དང་། མ་ཧེའི་མགོ་དང་། ཕག་གི་མགོ་དང་། ཁྱིའི་མགོ་འདྲའོ། །ཀུན་དུ་ཆུ་ཀླུང་ཡིད་འོང་ལྡན་པའི་ཉ་པ་ལྔ་བརྒྱས་རྒྱ་མཚོ་ཆེན་པོ་ནས་ཆུ་ཀླུང་ཡིད་འོང་ལྡན་དུ་ཞུགས་པའི་ཆུ་སྲིན་ཉའི་རིགས་བོང་ཚོད་ཆེན་པོ་ཞིག་རྒྱ་མོ་སྤྱོད་པ་ཆེན་མོས་ཟིན་ཏེ། ཆུ་ནས་སྐམ་ལ་ཕྱུང་ཞིང་དེ་ལ་མགོ་བཅོ་བརྒྱད་དང་། མིག་སུམ་ཅུ་རྩ་དྲུག་ཡོད་དོ་ཞེས་སྒྲས་ཁྱབ་པར་གྱུར་ཏོ། །དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མ་དག་ཆུ་ཀླུང་ཡིད་འོང་ལྡན་གྱི་འགྲམ་དུ་ལྷགས་ཏེ། ཁ་ཅིག་ནི་ལྟད་མོ་སྐྱེས་པར་གྱུར། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་པར་གྱུར་ཏོ། །རྫོགས་བྱེད་ལ་སོགས་པའི་སྟོན་པ་དྲུག་པོ་ཡངས་པ་ཅན་ན་རྟེན་ཅིང་གནས་པ་དག་ཀྱང་ལྟད་མོ་སྐྱེས་ཏེ་དེར་ལྷགས་སོ། །སྐྱེ་བོའི་ཚོགས་ཆེན་པོ་ཡང་ཡ་མཚན་སྐྱེས་ཏེ་མིག་ཚུགས་སུ་རྟོག་ཅིང་། ཤེས་ལྡན་དག་འདིའི་མགོ་ལ་ལ་ནི་གླང་པོ་ཆེའི་མགོ་འདྲ་ལ་དེ་ནས་རྟོག་པར་བྱེད། དེའི་མགོ་ལ་ལ་ནི་ཁྱིའི་བར་གྱི་མགོ་འདྲ་ལ་དེ་ནས་རྟོག་པར་བྱེད་དོ་ཞེས་ཀྱང་ཟེར་རོ། །དེའི་སྐབས་སུ་སངས་རྒྱས་བཅོམ་
ལྡན་འདས་རྣམས་ལ་ནི་མི་མཁྱེན་པ་དང་། མ་གཟིགས་པ་དང་། མ་རིག་པ་དང་། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས། སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་བཞུགས་པ། བསྲུང་བ་གཅིག་པུ་བ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་། ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱངས་པ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་འགྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ནས་བསླང་སྟེ། མཐོ་རིས་དང་ཐར་པ་དང་། འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་པ་གང་གི་ལག་ནས་ནི་དྲང་བར་བྱ། འཕགས་
པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་རྣམས་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་གོ་།སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་འདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །གཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་འབྱམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ་ཆུ་སྲིན་ཉའི་རིགས་གནོད་པ་དང་ཉམ་ང་བ་མི་བདེ་བ་ཐོབ་པར་གྱུར་པ་འདི་ནི། སྔོན་གྱི་སངས་རྒྱས་དག་ལ་བྱ་བ་ལྷག་པར་བྱས་པ་ཡིན་གྱིས། ངས་ཆུ་སྲིན་ཉའི་རིགས་འདི་ལ་རྟེན་ཏེ་གདུལ་བར་གྱུར་པའི་རྒྱ་མོ་ཆེན་མོ་དྲང་བར་བྱས། དེའི་ཕྱིར་ཆུ་ཀླུང་ཡིད་འོང་ལྡན་གྱི་འགྲམ་དུ་འགྲོའོ་སྙམ་མོ། །སངས་རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་རྣམས་ཀྱི་ཆོས་ཉིད་ནི་གདུལ་བར་གྱུར་པའི་སྐྱེ་བོ་ལ་རྗེས་སུ་ཐུགས་བརྩེ་བས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང་། དུད་འགྲོ་རྒྱུ་བ་དང་། ཡི་དྭགས་རྒྱུ་བ་དང་། ལྷ་རྒྱུ་བ་དང་། ལྗོངས་རྒྱུ་བ་དང་། ཆུ་ཀླུང་རྒྱུ་བ་དང་། རི་རྒྱུ་བ་དང་། དུར་ཁྲོད་རྒྱུ་བ་དང་། གཙུག་ལག་ཁང་རྒྱུར་གཤེགས་པས། དོན་འདིར་ནི་སངས་རྒྱས་བཅོམ་ལྡན་འདས་ཀླུང་རྒྱུར་གཤེགས་པར་བཞེད་ནས་འཛུམ་པ་མཛད་དོ། །
ཆོས་ཉིད་ཀྱིས་ནི་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཁ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས། ཁ་ཅིག་ནི་འོག་ལོགས་སུ་དོང་། ཁ་ཅིག་ནི་སྟེང་ལོགས་སུ་འདོང་བས། གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་བ་དང་། སོ་ཐམས་ཐམས་དང་། ཀྱེ་ཧུད་ཟེར་བ་དང་། ཨ་ཆུ་ཟེར་བ་དང་། ཨུཏྤལ་ལྟར་གས་པ་དང་། པདྨ་ལྟར་གས་པ་དང་། པདྨ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང་དག་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས། གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་དོང་བ་དེ་དག་ནི་རྒྱལ་ཆེན་བཞི་པ་དང་། སུམ་ཅུ་རྩ་གསུམ་པ་དང་།
འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་དོང་ནས། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོག་པར་བྱེད་ཅིང་ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས། བཅོམ་ལྡན་འདས་ཉིད་ཀྱི་སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལུང་སྟོན་པར་བཞེད་ན་ནི། བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་ལོང་བུར་ནུབ་པར་འགྱུར། ཡི་དྭགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་
ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་ཏུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ལྟེ་བར་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ། བཅོམ་ལྡན་འདས་ལ་ཞུས་པ། བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས། རྐྱེན་མ་མཆིས་པར་འཛུམ་པ་མི་མཛད་ན། བཙུན་པ་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། ཚིགས་སུ་བཅད་པ་ཡང་གསོལ་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོས་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བདལ་བར་གྱུར་པ་ཇི་བཞིན་ནོ། །རྒོད་བྲལ་ཞུམ་དང་རྒྱགས་པ་རབ་སྤངས་པ། །སངས་རྒྱས་འགྲོ་བ་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བསྟན་པ་རང་བློས་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་དགེ་བ་དག་གིས་བསལ་དུ་གསོལ། །ཚ་ཆུ་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་རྣམས་གློ་བུར་འཛུམ་མི་སྟོན། །བསྟན་པ་ཅི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཅོམ་ལྡན་འདས་ཀྱིས་་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་
རྐྱེན་མེད་པར་འཛུམ་པ་མི་མཛད་ཀྱིས། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ཆུ་ཀླུང་རྒྱུར་གཤེགས་བཞེད་ཀྱིས། ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ཏུ་ཆུ་ཀླུང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཞིག་ཅེས་བསྒོ་ཞིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཆུ་ཀླུང་རྒྱུར་གཤེགས་བཞེད་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་ཅིག་ཏུ་ཆུ་ཀླུང་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཞིག །།། །འདུལ་བ་རྣམ་པར་འབྱེད་པ། བམ་པོ་བཅུ་གཉིས་པ། དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་བའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་བའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་
བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་བཟང་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་ཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་ཏུ་དུལ་བ་དང་། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུས་སྐུ་རྣམ་པར་མཛེས་པ། འོད་འདོམ་གང་གི་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་ཏུ་བཟང་བ། སྟོབས་བཅུ་དང་མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ་ཀུན་ཤེས་ཀཽ་ཎྜིནྱ་དང་། རླངས་པ་དང་། མིང་ཆེན་དང་། མ་འགགས་པ་དང་། ཤཱ་རིའི་བུ་དང་། མོའུ་འགལ་གྱི་བུ་དང་། འོད་སྲུང་དང་། ཀུན་དགའ་བོ་དང་། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང་། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ། ཆུ་ཀླུང་ཡིད་འོང་ལྡན་ག་ལ་བ་དེར་རྒྱུ་ཞིང་གཤེགས་སོ། །འཁོར་དེས་ཐག་རིང་པོ་ཁོ་
ན་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་མཐོང་ངོ་། །མཐོང་ནས་ཀྱང་གང་དག་མ་དད་པ་དེ་དག་ནི་དགེ་སྦྱོང་གོའུ་ཏ་མ་ལྟད་མོ་དང་བྲལ་ལོ་ཞེས་གྲག་ན། དེ་ཡང་ལྟད་མོ་སྐྱེས་ཏེ་ཆུ་སྲིན་ཉའི་རིགས་བལྟ་བའི་ཕྱིར་ཉེ་བར་འོངས་སོ་ཞེས་ཟེར་རོ། །གང་དག་དད་པ་དང་ལྡན་པ་དེ་དག་ནི་མ་དད་པ་དེ་དག་ལ་ཤེས་ལྡན་དག་སངས་རྒྱས་བཅོམ་ལྡན་འདས་རྣམས་ནི་ལྟད་མོ་དང་བྲལ་བ་ཁོ་ན་ཡིན་ཏེ། བཅོམ་ལྡན་འདས་ཆུ་སྲིན་ཉའི་རིགས་ལས་བརྩམས་ཏེ། སྐྱེ་བོའི་ཚོགས་ཆེན་པོ་ལ་ངོ་མཚར་རྨད་དུ་བྱུང་བའི་ཆོས་ཅུང་ཞིག་སྟོན་པར་བཞེད་གོར་མ་ཆག་གོ་ཞེས་ཟེར་ཞིང་འདི་སྐད་ཅེས་ཀྱང་སྨྲས་སོ། །ཐུབ་པ་ལྟད་མོ་བྲལ་བའི་དགོངས་ལྡན་པ། །ལྟད་མོ་མེད་ལ་སྐྱེ་ངན་དོན་མེད་སྨྲ། །གཞན་ཕན་དེ་ལ་གཞོལ་བའི་རྒྱལ་བ་འདི། །ལུས་ཅན་ཕན་ཕྱིར་ངེས་པར་འདིར་གཤེགས་སོ། །དེ་ནས་འཁོར་དེས་བཅོམ་ལྡན་འདས་མཐོང་ནས་འཕྲལ་ཁོ་ནས་མངོན་པར་ལངས་ཏེ། འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་པས། ཡབ་དང་། ཡུམ་དང་། མཁན་པོ་དང་། སློབ་དཔོན་དང་། བླ་མ་དང་། བླ་མའི་གནས་ལྟ་བུ་དག་ལ་མངོན་པར་བཞེངས་པ་མཛད་མཛད་པའི་ཕྱིར་རོ། །དེ་ནས་བཅོམ་ལྡན་འདས་འཁོར་དེའི་དབུས་སུ་གཤེགས་ཏེ། དགེ་སློང་གི་དགེ་འདུན་གྱི་གོང་དུ་གདན་གཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཉ་པ་ལྔ་བརྒྱ་པོ་དེ་དག་ལ་བཀའ་སྩལ་པ། བཞིན་བཟང་དག་རེ་ཞིག་ཁྱེད་ཅག་ནི་ཉེས་པར་བྱས་པའི་ལས་བྱེད་པ་ཡིན་ཏེ། དེས་ན་ད་ལྟ་ཉ་པའི་སྐྱེ་གནས་དམན་པར་སྐྱེས་ཤིང་ཁྱེད་ཅག་ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང་རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱེད་ཅག་གི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེ་དག་གིས་གསོལ་པ།
བཅོམ་ལྡན་འདས་བདག་ཅག་གིས་ཅི་ཞིག་བགྱི་པ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཉ་དང་། རུས་སྦལ་དང་། སྦལ་པ་དང་། ཆུ་སྲིན་བྱིས་པ་གསོད་དང་། ཉ་ཁྱི་བ་ལ་སོགས་ཆུ་ནས་བཏོན་པ་འདི་དག་ཐོང་ཞིག །བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་བཏང་བར་བགྱིའོ་ཞེས་དེ་དག་གིས་བཅོམ་ལྡན་འདས་ཀྱི་བཀའ་སྩལ་པའི་དུས་ཀྱི་མཇུག་ཐོགས་སུ་དེ་དག་བཏང་ངོ་། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངས་ཅི་ནས་ཀྱང་ཆུ་སྲིན་ཉའི་རིགས་མ་གཏོགས་པ། ཉ་དང་། རུས་སྦལ་དང་། སྦལ་པ་དང་། ཆུ་སྲིན་བྱིས་པ་གསོད་དང་། ཉ་ཁྱི་བ་ལ་སོགས་པའི་སྲོག་ཆགས་འདི་དག་ཆུ་ཇི་ལྟ་བ་ཁོ་ན་བཞིན་དུ་ཆུ་ཀླུང་ཡིད་འོང་ལྡན་དུ་འཇུག་པར་འགྱུར་བ་དང་། ཆུ་སྲིན་ཉའི་རིགས་ཀྱང་སྔོན་གྱི་སྐྱེ་བ་རྗེས་སུ་དྲན་ཞིང་མིའི་སྐད་བརྗོད་པར་འགྱུར་ལ། ང་དང་ཐབས་ཅིག་སྨྲ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་ཅི་ནས་ཀྱང་ཆུ་སྲིན་ཉའི་རིགས་མ་གཏོགས་པ་ཉ་དང་རུས་སྦལ་དང་སྦལ་པ་དང་། ཆུ་སྲིན་བྱིས་པ་གསོད་དང་། ཉ་ཁྱི་བ་ལ་སོགས་པའི་སྲོག་ཆགས་དེ་དག་ཆུ་ཇི་ལྟ་བ་ཁོ་ན་བཞིན་དུ་ཆུ་ཀླུང་ཡིད་འོང་ལྡན་དུ་འཇུག་པར་འགྱུར་བ་དང་། ཆུ་སྲིན་ཉའི་རིགས་ཀྱང་སྔོན་གྱི་སྐྱེ་བ་རྗེས་སུ་དྲན་ཞིང་མིའི་སྐད་བརྗོད་པར་འགྱུར་ལ། བཅོམ་ལྡན་འདས་དང་ཐབས་ཅིག་སྨྲ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་བཅོམ་ལྡན་འདས་ཀྱིས་ཆུ་སྲིན་ཉའི་རིགས་ལ་བཀའ་སྩལ་པ། བུ་ཁྱོད་སེར་སྐྱ་ཡིན་ནམ། བཅོམ་ལྡན་འདས་བདག་སེར་སྐྱ་ལགས་སོ། །བུ་ཁྱོད་སེར་སྐྱ་ཡིན་ནམ། བདེ་བར་གཤེགས་པ་བདག་སེར་སྐྱ་ལགས་སོ། །བུ་ཁྱོད་ལ་ལུས་ཀྱིས་ཉེས་པར་སྤྱད་པ་ཡོད་དམ། བཅོམ་ལྡན་འདས་མཆིས་ལགས་སོ། །བུ་ཁྱོད་ལ་ངག་དང་ཡིད་གཉིས་ཀྱིས་ཉེས་པར་སྤྱད་པ་ཡོད་དམ། བདེ་བར་གཤེགས་པ་མཆིས་
སོ། །བུ་ཁྱོད་ཀྱིས་ལུས་ཀྱིས་ཉེས་པར་སྤྱད་པའི་རྣམ་པར་སྨིན་པ་ཉམས་སུ་མྱོང་ངམ། བཅོམ་ལྡན་འདས་ཉམས་སུ་མྱོང་ངོ་། །བུ་ཁྱོད་ཀྱིས་ངག་དང་ཡིད་ཀྱི་ཉེས་པར་སྤྱད་པའི་རྣམ་པར་སྨིན་པ་ཉམས་སུ་མྱོང་ངམ། བདེ་བར་གཤེགས་པ་ཉམས་སུ་མྱོང་ངོ་། །འོ་ན་ཁྱོད་ཀྱི་མི་དགེ་བའི་བཤེས་གཉེན་སུ་ཡིན། བདག་གི་མ་ལགས་སོ། །དེ་གང་དུ་སྐྱེས། སེམས་ཅན་དམྱལ་བ་རྣམས་སུའོ། །ཁྱོད་གང་དུ་སྐྱེས། དུད་འགྲོར་རོ། །ཇི་སྙམ་དུ་སེམས། ཁྱོད་འདི་ནས་ཤི་འཕོས་ནས་གང་དུ་སྐྱེ་བར་འགྱུར། བཅོམ་ལྡན་འདས་སེམས་ཅན་དམྱལ་བ་རྣམས་སུའོ། །བདེ་བར་གཤེགས་པ་སེམས་ཅན་དམྱལ་བ་རྣམས་སུའོ་ཞེས་གསོལ་ནས་ངུ་བ་ལ་ཞུགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། ཁྱོད་ནི་དུད་འགྲོའི་སྐྱེ་གནས་སྐྱེས། མི་ཁོམ་ཞུགས་པར་གྱུར་པ་ལ། །དེ་ལྟར་ངས་ཀྱང་ཅི་བྱར་མེད། །དོན་མེད་ངུས་པས་ཅི་ལ་ཕན། །ཐུགས་རྗེ་ལྡན་རྒྱལ་ང་ལ་ནི། །ལེགས་པར་སེམས་ནི་དད་གྱིས་དང་། །དུད་འགྲོའི་སྐྱེ་འདིར་ཆགས་བྲལ་ཞིང་། །དེ་ནས་མཐོ་རིས་འགྲོ་བར་འགྱུར། །དེས་བཅོམ་ལྡན་འདས་ལ་སེམས་དད་པར་བྱས་ནས། དེ་ནས་བཅོམ་ལྡན་འདས་ཀྱི་དེ་ལ་བཞིན་བཟང་འདི་ལྟར་འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་ཚིག་གསུམ་གྱིས་ཆོས་བསྟན་ཏོ། །དེ་ནས་འཁོར་དེ་མཆོག་ཏུ་ངོ་མཚར་སྐྱེས་ནས། ཤེས་ལྡན་དག་བཅོམ་ལྡན་འདས་ཀྱིས་བཀའ་སྩལ་པས་སྔོན་གྱི་སྐྱེ་བ་དྲན་པར་བྱས་ཤིང་མིའི་སྐད་ཀྱང་རྗོད་པར་བྱེད་ལ་བཅོམ་ལྡན་འདས་དང་ཐབས་ཅིག་སྨྲ་བར་བྱེད་པ་འདི་སུ་ཞིག་ཡིན། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང་བཟོད་པར་དཀའ་བ་ཡིན་པས་བདག་ཅག་གིས་བཅོམ་ལྡན་འདས་ལ་དོན་དེ་ཞུ་བར་ནི་མི་ནུས་ཀྱིས་བདག་ཅག་འཕགས་པ་ཀུན་དགའ་བོ་ག་ལ་བ་དེར་དོང་སྟེ་ཕྱིན་ནས་འཕགས་པ་ཀུན་དགའ་བོ་ལ་དོན་དེ་ཞུ་བར་བྱ་ཞིང་འཕགས་པ་
ཀུན་དགའ་བོས་བདག་ཅག་ལ་ཇི་སྐད་ལུང་སྟོན་པར་འགྱུར་བ་དེ་དེ་ཁོ་ན་བཞིན་དུ་གཟུང་བར་བྱའོ་ཞེས་ཟེར་རོ། །དེ་ནས་འཁོར་དེ་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །འཕགས་པ་ཀུན་དགའ་བོ་བཅོམ་ལྡན་འདས་ཀྱིས་བཀའ་སྩལ་པས། སྔོན་གྱི་སྐྱེ་བ་དྲན་པར་བགྱིས་ཤིང་མིའི་སྐད་ཀྱང་རྗོད་པར་བགྱིད་ལ། བཅོམ་ལྡན་འདས་དང་ཐབས་ཅིག་སྨྲ་བར་བགྱིད་པ་འདི་སུ་ཞིག་ལགས། ཀུན་དགའ་བོས་སྨྲས་པ། ཤེས་ལྡན་ངག་བཅོམ་ལྡན་འདས་ཉིད་ལ་དོན་དེ་ཞུས་ཤིག །འཕགས་པ་ཀུན་དགའ་བོ། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང་། བཟོད་པར་དཀའ་བ་ལགས་པས། བདག་ཅག་གིས་བཅོམ་ལྡན་འདས་ལ་དོན་དེ་ཞུ་བར་རྔོ་མི་ཐོག་ལགས་སོ། །ཤེས་ལྡན་དག་ཁོ་བོ་ལ་ཡང་སངས་རྒྱས་བཅོམ་ལྡན་འདས་རྣམས་བསྙེན་པར་དཀའ་བ་དང་། བཟོད་པར་དཀའ་བ་ཡིན་པས་ཁོ་བོས་ཀྱང་བཅོམ་ལྡན་འདས་ལ་དོན་དེ་ཞུ་བར་མི་ནུས་མོད་ཀྱི། །འོན་ཀྱང་ཁྱོད་ཀྱི་དོན་དུ་ཞུ་བར་བྱའོ་ཞེས་སྨྲས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་བཀའ་སྩལ་པས། སྔོན་གྱི་སྐྱེ་བ་དྲན་པར་བགྱིས་ཤིང་མིའི་སྐད་ཀྱང་རྗོད་པར་བགྱིས་ལ། བཅོམ་ལྡན་འདས་དང་ཐབས་ཅིག་སྨྲ་བར་བགྱིད་པ་འདི་སུ་ཞིག་ལགས། ཀུན་དགའ་བོ་འདི་ནི་ཆུ་སྲིན་ཉའི་རིགས་ཡིན་ནོ། །ཀུན་དགའ་བོ། །ཁྱོད་ཆུ་སྲིན་ཉའི་རིགས་ཀྱི་སྔོན་གྱི་ལས་ཀྱི་རྒྱུ་བ་ལས་བརྩམས་ཏེ། ཆོས་དང་ལྡན་པའི་གཏམ་ཉན་པར་འདོད་དམ། བཅོམ་ལྡན་འདས་ཀྱིས་ཆུ་སྲིན་ཉའི་རིགས་ཀྱི་སྔོན་གྱི་ལས་ཀྱི་རྒྱུ་བ་ལས་བརྩམས་ཏེ། དགེ་སློང་རྣམས་དང་སྐྱེ་བོའི་ཚོགས་ལ་ཆོས་དང་ལྡན་པའི་བཀའ་མཆིད་བཀའ་སྩལ་པར་གྱུར་ན། བཅོམ་ལྡན་འདས་ལས་ཐོས་ནས་དགེ་སློང་རྣམས་དང་སྐྱེ་བོའི་ཚོགས་དག་
འཛིན་པར་འགྱུར་བས། བཅོམ་ལྡན་འདས་དེ་ནི་དུས་ལགས་སོ། །བདེ་བར་གཤེགས་པ་དེ་ནི་དུས་ལགས་སོ། །ཀུན་དགའ་བོ་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་གྱིས་ཤིག་དང་བཤད་པར་བྱའོ། །ཀུན་དགའ་བོ་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ། སྐྱེས་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་ཝཱ་ར་ཎཱ་སི་ན་དྲང་སྲོང་སྨྲ་བ་རི་དྭགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་ཚེ་གྲོང་ཁྱེར་ཝཱ་ར་ཎཱ་སི་ན་རྒྱལ་པོ་ཀྲི་ཀྲི་ཞེས་བྱ་བས་རྒྱལ་སྲིད་འབྱོར་པ། རྒྱས་པ་བདེ་བ། ལོ་ལེགས་པ། སྐྱེ་བོ་དང་། མི་མང་པོས་གང་བ། འཐབ་མོ་དང་འཐབ་པ་དང་། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་། ནད་དང་བྲལ་བ། སཱ་ལུ་དང་བུ་རམ་ཤིང་གི་ཕྲེང་བ་དང་། བ་ལང་དང་མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ་།དེ་ནས་ཤེད་བུ་གསང་ཚིག་འདོད་པ། གསང་ཚིག་ཚོལ་བ་ཞིག་ཡུལ་དབུས་ནས་ལྷོ་ལམ་དུ་སོང་ངོ་། །དེ་ན་བྲམ་ཟེ་རིག་བྱེད་དང་། རིག་བྱེད་ཀྱི་ཡན་ལག་གི་ཕ་རོལ་ཏུ་སོན་པ། ཡུལ་ཐ་དད་པ་ན་གནས་པའི་བྲམ་ཟེ་རྣམས་ཀྱིས་སྟོན་པར་གྱུར་པ་ཞིག་འདུག་ནས། ཤེད་བུ་དེ་བྲམ་ཟེ་དེའི་དྲུང་དུ་སོང་སྟེ་ཕྱིན་ནས། ཞི་བ་དང་སྤྱོད་ལམ་ཞི་བས་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །དེ་ནས་བྲམ་ཟེ་དེས་ཤེད་བུ་དེ་ལ་འོངས་པ་ལེགས་སོ། །ཞེས་བྱ་བའི་ཚིག་གིས་ཀུན་ཏུ་སྤྱད་ནས་སྨྲས་པ། ཀྱེ་ཤེད་བུ་ཁྱོད་ག་ལས་འོངས། ཅི་ཞིག་འདོད། ཤེད་བུས་སྨྲས་པ། བདག་ཡུལ་དབུས་ནས་མཆིས་ཏེ། མཁན་པོའི་ཞབས་ལ་སྲི་ཞུ་བགྱིད་པར་འཚལ་ལོ། །ཅི་ཞིག་གི་ཕྱིར། རིག་བྱེད་བཀླག་པའི་སླད་དུའོ། །ཤེད་བུ་ལེགས་ཀྱིས་དེ་བཞིན་གྱིས་ཤིག །དེ་ནི་བྲམ་ཟེས་བྱ་བ་ཡིན་ནོ། །
ཤེད་བུ་དེས་བྲམ་ཟེའི་དྲུང་དུ་རིག་བྱེད་བཀླག་པར་བྱ་བར་བརྩམས་སོ། །ཤེད་བུ་རྣམས་ཀྱི་ཀུན་ཏུ་སྤྱོད་པ་ནི་འདི་ཡིན་ཏེ། གང་གི་ཚེ་མི་ཀློག་པར་གྱུར་པ་དེའི་ཚེ་ན་ལན་དགའ་ནི་ཆུ་ངོགས་སུ་ཉེ་རེག་བྱེད་དུ་འདོང་ངོ་། །ལན་འགའ་ནི་གྲོང་ཁྱེར་ལྟར་འདོང་ངོ་། །ལན་འགའ་ནི་ཡམ་སྲོག་ཤིང་ཐུར་འདོང་ངོ་། །ཅི་ཙམ་དུས་གཞན་ཞིག་ན་དེ་དག་མི་ཀློག་པར་གྱུར་ནས། དེའི་ཚེ་དེ་དག་ཡམ་སྲེག་ཤིང་ཐུར་དོང་བ་དང་། དེ་དག་ལ་ལམ་གྱི་བར་དུ་བར་སྐབས་ཀྱི་གཏམ་རྗོད་པ་འདི་ལྟ་བུ་འདི་བྱུང་སྟེ། ཀྱེ་ཀུད་སའི་རིགས་དག །བད་སའི་རིགས་དག །ཤན་དི་ལའི་རིགས་དག །བར་དྭ་ཛའི་རིགས་དག །ལྔ་པའི་རིགས་དག །ཉེ་ལྔའི་རིགས་དག་ཇེ་ཁྱེད་ཅག་ལས་གང་ནི་ཡུལ་ག་ལས་འོངས་པ་དྲི་བར་བྱའོ། །དེ་ན་ཤེད་བུ་གཅིག་གིས་སྨྲས་པ། ཁོ་བོ་ནི་ཡུལ་ཤར་ནས་སོ། །གཞན་ཞིག་གིས་སྨྲས་པ། ཁོ་བོ་ནི་ལྷོ་ལམ་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་ནུབ་ཀྱི་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་བྱང་ལམ་ནས་སོ། །ཤེད་བུ་དེས་སྨྲས་པ། ཁོ་བོ་ནི་ཡུལ་དབུས་ནས་སོ། །དེ་དག་གིས་སྨྲས་པ། ཤེས་ལྡན་དག་བདག་ཅག་གིས་ཡུལ་ཐམས་ཅད་མཐོང་ཞིང་ཐོས་ནས་ཡུལ་དབུས་མ་མཐོང་མ་ཐོས་སོ། །ཤར་ན་བློ་ཅན་གནས་པ་སྟེ། ལྷོ་ལམ་ན་ནི་ཡོན་བྱེད་འདུག །ནུབ་ཀྱི་ཡུལ་ན་ཕྲ་མ་ཅན། །བྱང་ལམ་ན་ནི་ཚིག་རྩུབ་པོ། །ཞེས་ཚིགས་སུ་བཅད་པ་ཡང་སྨྲས་སོ། །དེ་ནས་དྲིས་པ། ཤེད་པུ་ཡུལ་དབུས་ཅི་འདྲ། ཤེས་ལྡན་དག་ཡུལ་དབུས་ནི་ཡུལ་རྣམས་ཀྱི་མཆོག་ཡིན་ཏེ། སཱ་ལུ་དང་བུ་རམ་ཤིང་གི་ཕྲེང་བ་དང་། བ་ལང་དང་མ་ཧེ་ཕུན་སུམ་ཚོགས་པ། སློང་མོ་བ་བརྒྱས་ཁྱབ་པ། དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པ། དེ་ན་ཆུ་ཀླུང་གངྒཱ་ཁ་རྗེ་དང་བསོད་ནམས་དང་། བཀྲ་ཤིས་དང་གཙང་བ་དང་། གཙང་བ་ཉིད་ཀྱི་གནས་སུ་གྲགས་པ། འགྲམ་གཉིས་ནས་རླན་འཕྱོ་བ། དྲང་སྲོང་རྣམས་ཀྱི་བསྟི་གནས་ཞེས་བྱ་བ་ཆུ་དགུར་བཅོ་བརྒྱད་འབབ་པ་ཡོད་དེ། དེར་དྲང་སྲོང་རྣམས་ཀྱིས་དཀའ་ཐུབ་སྤྱད་ན། རང་གི་ལུས་ཉིད་ཀྱིས་མཐོ་རིས་སུ་འདོང་བ་ཡིན་ནོ། །ཀྱེ་ཤེད་བུ་དེ་ནི་མཇལ་གྱིས་གཞན་འདི་འདྲིའོ། །ཡུལ་དབུས་ན་མཁས་པར་
བགྲང་བ་དག་ཡོད་དམ། ཤེས་ལྡན་དག་ཁོ་བོས་དང་པོ་ཉིད་ནས། ཤས་ལྡན་དག་ཡུལ་དབུས་ནི་དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པའོ་ཞེས་མ་སྨྲས་སམ། ཤེད་བུ་ཁྱོད་ཀྱིས་དེ་སྐད་སྨྲས་སོ། །ཤེད་བུ་ཡུལ་དབུས་ན་འདི་ལྟ་སྟེ། དཔེར་ན་བདག་ཅག་གི་མཁན་པོ་དང་འདྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དམ། ཤེས་ལྡན་དག་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་ཡོད་དོ། །ཤེད་བུ་དེ་དག་ལ་དེ་ལྟ་དེ་ལྟར་ཡུལ་དབུས་ཀྱི་བསྔགས་པ་བརྗོད་པ་དང་། འདི་ལྟར་དེ་དག་ཐམས་ཅད་ཡུལ་དབུས་སུ་འདོང་འདོད་པར་གྱུར་ཏོ། །དེ་ནས་ཤེད་བུ་དེ་དག་གིས་ཡམ་སྲེག་ཤིང་དག་བཙལ་ཏེ། ཡམ་སྲེག་ཤིང་གི་ཁུར་ཐོགས་ནས་བྲམ་ཟེ་དེའི་ཁྱིམ་གལ་བ་དེར་དོང་སྟེ་ཕྱིན་ནས། ཡམ་སྲེག་ཤིང་གི་ཁུར་མཐའ་གཅིག་ཏུ་བཞག་སྟེ། བྲམ་ཟེ་དེ་ག་ལ་བར་དོང་སྟེ་ཕྱིན་པ་དང་། བྲམ་ཟེ་དེ་ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག །ཤེད་བུ་འདིས་ཅི་ནས་ཀྱང་བདག་ཅག་ཐམས་ཅད་ཡུལ་དབུས་སུ་མཆི་འཚལ་བར་གྱུར་པ་དེ་ལྟར་ཡུལ་དབུས་ཀྱི་བསྔགས་པ་བརྗོད་དོ། །བྲམ་ཟེ་དེས་སྨྲས་པ། བུ་དག་ཅི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། འདི་ལྟར་ཡུལ་དག་ནི་ཐོས་ནས་དགའ་བར་འགྱུར་བ་ཡིན་པས་མཉན་པར་བྱའི་བགྲོད་པར་ནི་མི་བྱའོ། །མཁན་པོ་ཤེད་བུ་འདིའི་མཆིད་ནས་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་མཆིས་སོ་ཞེས་མཆིའོ། །བུ་དག་ཅི་ཁོ་བོ་ན་རེ། སའི་སྟེང་ན་ཁོ་བོ་གཅིག་པུ་ཁོ་ན་སྨྲ་བ་ཡིན་གྱི་སྨྲ་བ་གཞན་འགའ་ཡང་མེད་དོ་ཞེས་ཟེར་རམ། ས་ནི་རིན་པོ་ཆེ་མང་པོ་འཛིན་པ་ཡིན་པས། ས་གཞི་ནི་མཛེས་པ་མཛེས་པ་དག་གིས་གང་བ་ཡིན་ནོ། །མཁན་པོ་རེ་ཞིག་ཡུལ་དེ་ཡང་མཐོང་བར་འགྱུར་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལ་ཡང་བསྙེན་བཀུར་བགྱི། རྒོལ་བ་དག་ཀྱང་ཚར་གཅད་པར་བགྱི། རང་གི་གྲགས་པ་ཡང་བསྒྲག་པར་བགྱི། རྙེད་པ་ཡང་བསྒྲུབ་པར་བགྱིས། བདག་ཅག་ཡུལ་དབུས་སུ་མཆིའོ། །བྲམ་ཟེ་དེ་སློབ་མ་ལ་རྗེས་
སུ་ཆགས་པ་དང་བཅས་པ་དང་འཁོར་ཉུང་བ་ཡིན་པས། དེས་ཤེད་བུ་དེ་དག་ལ་འདི་སྐད་ཅེས་སྨྲས་སོ། །བུ་དག་གལ་ཏེ་དེ་ལྟ་ན་གཡང་གཞི་དག་དང་ཤིང་ཤུན་དག་དང་དབྱུག་གུ་དག་དང་། བླུགས་གཟར་དག་དང་དགང་གཟར་དག་དང་རིལ་བ་དག་ལོང་ཞིག་དང་ཡུལ་དབུས་སུ་འདོང་ངོ་། །དེ་དག་གིས་དེ་དག་བླངས་ནས་བྲམ་ཟེ་དེ་ཤེད་བུ་དེ་དག་དང་ལྷན་ཅིག་ཡུལ་དབུས་སུ་འཕགས་པ་དང་། དེས་རྒོལ་བ་ཁ་ཅིག་ནི་ཚར་བཅད་དེ་རྒོལ་བའི་ཤིང་རྟ་ལ་སྦྱོར་བར་བྱེད། ཁ་ཅིག་ནི་མགོར་ཐལ་བའི་བུམ་པ་དག་གིས་བསྣུན། ཁ་ཅིག་ནི་འཕོང་གི་དཔོང་སར་ཁྭ་བཞིན་དུ་ཐག་རིང་པོ་ནས་ཡོངས་སུ་སྤོང་བར་བྱེད། ཁ་ཅིག་ནི་གདུགས་དང་རྒྱལ་མཚན་དང་བ་དན་དག་གིས་བསུ་བར་བྱེད། ཁ་ཅིག་ནི་སློབ་མ་ཉིད་དུ་ཁས་ལེན་པར་བྱེད་ཅིང་དེ་མཐར་གྱིས་གྲོང་དང་གྲོང་ཁྱེར་དང་གྲོང་རྡལ་དང་། དབྱེ་ཚོངས་དང་། ཚོང་རྡལ་དག་ཏུ་རྒོལ་བ་འདུལ་ཞིང་ཝཱ་ར་ཎཱ་སིར་ཕྱིན་ཏོ། །བྲམ་ཟེ་དེས་བསམས་པ། བདག་གིས་ཅིའི་ཕྱིར་རྩ་བ་སྤངས་ཏེ་ཡལ་ག་དང་འདབ་མ་དང་ལོ་མ་ལ་ཉུག་པར་བྱ། རྒོལ་བ་གང་དག་དང་མཁས་པར་བགྲང་བ་གང་ཇི་སྙེད་པ་དེ་དག་ཐམས་ཅད་ཀྱང་རྒྱལ་པོ་དང་ཉེ་བ་ཡིན་གྱིས་བདག་ཀྱང་རྒྱལ་པོའི་གན་དུ་འགྲོའོ་སྙམ་ནས། བྲམ་ཟེ་དེ་རྒྱལ་པོ་ཀྲི་ཀྲི་ག་ལ་བ་དེར་སོང་སྟེ་ཕྱིན་ནས། རྒྱལ་པོ་ཀྲི་ཀྲི་ལ་རྒྱལ་བ་དང་ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་རྒྱལ་པོ་ཀྲི་ཀྲི་ལ་འདི་སྐད་ཅེས་སྨྲས་སོ། །ལྷ་བདག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ་དེའི་སླད་དུ་ལྷའི་སྤྱན་སྔར་རྒོལ་བ་དག་དང་ལྷན་ཅིག་བཀའ་མཆིད་རྣམ་པར་གཏན་ལ་དབབ་པར་འཚལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཡུལ་ན་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་འབེབས་པར་བྱེད་པའི་རྒོལ་བ་འགའ་ཡོད་དམ། བློན་པོ་རྣམས་ཀྱིས་སྨྲས་པ། ལྷ་རི་བྲགས་ཆེ་གེ་མོ་ཞིག་ན་བྲམ་ཟེ་སེར་སྐྱ་ཞི་བ་ཞེས་བགྱི་བ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་ཕྱིན་པ། ཞུགས་ལྟ་བུའི་ཤེས་པས་རང་གི་སྨྲ་བ་གསལ་བར་བགྱིད་པ། གཞན་གྱི་སྨྲ་བ་ཚར་གཅོད་པར་རྔོ་ཐོག་པ་ཞིག་མཆིས་སོ། །
མཁན་པོ་དེ་བོས་ཤིག །ལྷ་བོད་པར་བགྱིའོ་ཞེས་དེ་དག་གིས་དེ་བོས་ནས། དེ་རྒྱལ་པོ་ཀྲི་ཀྲི་ག་ལ་བ་དེར་སོང་སྟེ་ཕྱིན་ནས། རྒྱལ་པོ་ཀྲི་ཀྲི་ལ་རྒྱལ་བ་དང་ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་པ་དང་། བློན་པོ་རྣམས་ཀྱིས་སྨྲས་པ། ལྷ་མཁན་པོ་དེ་འདི་ལགས་སོ། །རྒྱལ་པོས་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། མཁན་པོ་ཁྱོད་ཁོ་བོའི་མདུན་དུ་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་དབབ་པར་བྱེད་ནུས་སམ། སེར་སྐྱ་ཞི་བས་སྨྲས་པ། བདག་གིས་རྡོ་ཅི་ཐོག་པས་རྒྱལ་པོ་དགྱེས་པར་བགྱིའོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒོལ་བའི་དཀྱིལ་འཁོར་ཤོམས་ཤིག །ཕྱོགས་དང་གཞན་གྱི་ཕྱོགས་དག་རྣམ་པར་ཞོག་ཅིག །བློན་པོ་རྣམས་ཀྱིས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་དག་རྣམ་པར་བཞག་གོ་།དེ་ནས་བློན་པོ་རྣམས་ཀྱིས་རྒྱལ་པོའི་རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཕྱོགས་སྔ་མ་གང་བགྱིད་དུ་སྩལ། རྒྱལ་པོས་སྨྲས་པ། བྲམ་ཟེ་འདི་མགྲོན་པ་ཡིན་གྱིས་འདི་ཕྱོགས་སྔ་མ་བྱེད་དུ་ཆུག་ཅིག །བྲམ་ཟེ་དེ་ཕྱོགས་སྔ་མ་བྱེད་དུ་བཅུག་ནས་དེས་རྒྱུད་ཆགས་ལྔ་བརྒྱ་བཟླས་སོ། །སེར་སྐྱ་ཞི་བས་ཕྱིར་བཟླས་ཏེ་ཁྱོད་ཀྱི་འདི་ནི་རིགས་པ་མེད་པ་ཡིན་ནོ། །འདི་ནི་མི་མཐུན་པ་ཡིན་ནོ། །འདི་ནི་མི་འཐད་པ་ཡིན་ནོ་ཞེས་སྐྱོན་བཏགས་པ་དང་བྲམ་ཟེ་དེ་ཅང་མི་སྨྲ་བར་འདུག་གོ་།ཚར་གཅད་པའི་གནས་རྣམས་ཀྱི་ནང་ན་འདི་ལྟ་སྟེ། ལན་ལ་སྤོབས་པ་མེད་པ་འདི་ནི་ཐ་ཆད་ཡིན་ནོ། །དེ་ནས་རྒྱལ་པོ་མངོན་པར་དགའ་ནས་སྨྲས་པ། མཁན་པོ་ཁྱོད་གནས་གང་དུ་གནས། སེར་སྐྱ་ཞི་བས་སྨྲས་པ། ལྷ་རི་བྲགས་ཆེ་གེ་མོ་ཞིག་ཏུའོ། །ཁྱོད་སོང་ལ་རི་བྲགས་དེ་ཁྱོད་ཀྱི་རྒོལ་བའི་ལོངས་སྤྱོད་གྱིས་ཤིག །སེར་སྐྱ་ཞི་བ་རངས་པ་དང་དགའ་བ་དང་། མཆོག་ཏུ་དགའ་བར་གྱུར་ནས་སྐྱེ་བོ་མཁས་པ་དག་གིས་ཡོངས་སུ་བསྐོར་ཏེ་རི་བྲགས་དེར་སོང་ངོ་། །འཇིག་རྟེན་ནི་འབྱོར་པ་འདོད་པ་ཡིན་པས་སེར་སྐྱ་ཞི་བ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་
བར་བྱེད། དགའ་བར་བྱེད་དགུར་སྤྱོད་པར་བྱེད་པ་དེའི་ཆུང་མ་བུ་རལ་པ་སེར་སྐྱ་ཅན་ཞིག་བཙས་ནས། ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ཏེ། ཁྱེའུ་ཡི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། ཁྱེའུ་འདི་བྲམ་ཟེ་སེར་སྐྱ་ཞི་བའི་བུ་ཡིན་ལ། འདིའི་རལ་པ་ཡང་སེར་སྐྱར་འདུག་པས་ཁྱེའུ་འདིའི་མིང་སེར་སྐྱར་གདགས་སོ་ཞེས་དེའི་མིང་སེར་སྐྱར་བཏགས་སོ། །དེ་འོ་མ་དང་ཞོ་དང་མར་དང་། ཞུན་མར་དང་མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པདྨ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ན་ཡི་གེ་དང་གྲངས་དང་། རྩིས་དང་། ལག་རྩིས་དང་། བ་བྱུང་བ་དང་། གཞུག་པ་དང་། གཞག་པ་དང་། འབྱེད་པ་དང་། ཀློག་་པའི་ཕ་རོལ་ཏུ་སོན་ཅིང་། དེའི་ཚེ་ན་བྲམ་ཟེའི་སྤྱོད་ཚུལ་དང་། སྤྱོད་པ་དང་། གཙང་སྦྲ་དང་། ཀུན་ཏུ་སྤྱོད་པ་དང་། ཐལ་བ་བླང་བ་དང་། བྱ་མ་བུམ་བླང་བ་དང་། ས་བླང་བ་དང་། ལག་སྟངས་དང་། ཐོར་ཚུགས་དང་། ར་བ་བསྔགས་བྱེ་བ་དང་། ཀྱེ་ཞེས་བྱ་བ་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྙན་ཚིག་གི་རིག་བྱེད་དང་། སྲིད་སྲུང་གི་རིག་བྱེད་དང་། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང་། མཆོད་སྦྱིན་བྱེད་དུ་འཛུད་པ་དང་། ཀློག་པ་དང་ཀློག་ཏུ་འཛུད་པ་དང་། སྦྱིན་པ་དང་ལེན་པ་ལ་མཁས་པའི་བྲམ་ཟེའི་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་སོན་པ་མེ་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེའི་ཚེ་བྲམ་ཟེ་སེར་སྐྱ་ཞི་བས་བྲམ་ཟེའི་ཁྱེའུ་ལྔ་བརྒྱ་ཙམ་དག་བྲམ་ཟེའི་གསང་ཚིག་དག་འདོན་དུ་བཅུག་གོ་།ཇི་ཙམ་དུས་གཞན་ཞིག་ན་ཤེད་བུ་སེར་སྐྱ་ཀློག་པར་བྱེད་པས་ཕ་ལ་སྨྲས་པ། ཡབ་རི་ཙ་ཞེས་བགྱི་བ་འདིའི་དོན་ཅི་ལགས། སེར་སྐྱ་ཞི་བས་སྨྲས་པ། བུ་ཡི་གེ་དག་ནི་ཡུན་རིང་པོ་ནས་བྲལ་བ་དག་སྟེ། བླ་མའི་ཚིག་ཤེས་པར་དཀའ་བ་ཡིན་པས། དྲང་སྲོང་དེ་དག་གིས་དོན་དང་བྲལ་བའི་བསྟན་བཅོས་ཉེ་བར་སྦྱར་བ་འདི་ཅི་ཡིན་མི་ཤེས་སོ། །
སེར་སྐྱས་སྨྲས་པ། ཡབ་བདག་གིས་རི་ཙ་ཞེས་བགྱི་བ་འདིའི་དོན་དེ་འཚལ་ཏོ། །བྲམ་ཟེ་སེར་སྐྱ་ཞི་བས་བསམས་པ། འདི་ལྟར་ཕས་བུ་ལ་བདག་དང་མཉམ་པའམ། ཁྱད་པར་དུ་འཕགས་པ་དེ་ནི་འདོད་པར་བྱ་བ་ཡིན་པས། དེའི་ཕྱིར་འང་བདག་པས་ཆེས་ཁྱད་པར་དུ་འཕགས་པ་ཡིན་གྱིས། བདག་གིས་འདི་ལ་བྲམ་ཟེའི་ཁྱེའུ་ལྔ་བརྒྱ་པོ་འདི་དག་གཏད་པར་བྱའོ་སྙམ་དུ་རིག་ནས། བྲམ་ཟེའི་ཁྱེའུ་སེར་སྐྱ་ལ་སྨྲས་པ། བུ་འདི་ལྟར་ཕས་བུ་ལ་བདག་དང་མཉམ་པའམ་ཁྱད་པར་དུ་འཕགས་པ་དེ་ནི་འདོད་པར་བྱ་བ་ཡིན་པས་དེའི་ཕྱིར་ཁྱོད་ཁོ་བོ་བས་ཆེས་ཁྱད་པར་དུ་འཕགས་པ་ཡིན་གྱིས། ཁྱོད་ཀྱིས་བྲམ་ཟེའི་ཁྱེའུ་ལྔ་བརྒྱ་པོ་འདི་དག་བྲམ་ཟེའི་གསང་ཚིག་དག་འདོན་དུ་ཆུག་ཅིག །སེར་སྐྱས་སྨྲས་པ། བཀའ་བཞིན་འཚལ་འདོན་དུ་སྩལ་ཏེ་ཞེས་དེས་བྲམ་ཟེའི་ཁྱེའུ་ལྔ་བརྒྱ་པོ་དེ་དག་བྲམ་ཟེའི་གསང་ཚིག་དག་འདོན་དུ་གཞུག་པར་བརྩམས་སོ། །བྲམ་ཟེ་སེར་སྐྱ་ཞི་བ་ཡང་བྱ་བ་མེད་ཅིང་ཅིར་དགར་འགྲོ་བ་དང་སྤྱོད་པས་དགའ་མགུར་སྤྱོད་པར་བརྩམས་སོ། །དེ་དུས་གཞན་ཞིག་ན་དྲང་སྲོང་སྨྲ་བར་སོང་སྟེ། དེར་དགེ་སློང་ཞིག་གི་གན་དུ་སོང་ནས་སྨྲས་པ། སློབ་དཔོན་ཚིག་འདིའི་དོན་ཅི་ལགས། དགེ་སློང་དེས་སྨྲས་པ། ཚེ་དང་ལྡན་པ་དྲི་བ་དེ་ནི་དེ་སྐད་དྲི་བར་མི་བྱ་སྟེ། དྲི་བ་དེ་དེ་སྐད་དྲིས་ན་ཡོངས་སུ་རྫོགས་པར་མི་འགྱུར་རོ། །འདི་ལྟར་དྲི་བ་དེ་ནི་འདི་སྐད་དྲི་བར་བྱ་སྟེ། དྲི་བ་དེ་འདི་སྐད་དྲིས་ན་ཚིག་འདིའི་དོན་འདི་ཡིན་ནོ་ཞེས་ཡོངས་སུ་རྫོགས་པར་འགྱུར་རོ། །བྲམ་ཟེ་སེར་སྐྱ་ཞི་བས་བསམས་པ། བདག་གིས་འདི་དག་ལ་དྲི་བ་ཡང་འདྲི་བར་མི་ནུས་ན་བདག་གིས་འདི་དག་དང་ལྷན་ཅིག་ཇི་ལྟར་སྨྲ་བར་འགྱུར་སྙམ་ནས། དེ་དགེ་སློང་རྣམས་ལ་ཤིན་ཏུ་མངོན་པར་དད་པར་གྱུར་ནས། དུས་དང་དུས་སུ་དགེ་སློང་དག་མགྲོན་དུ་པོས་ཏེ་ཁྱིམ་གཞན་དུ་ཟན་སྦྱིན་པར་བྱེད་དོ། །དེ་དུས་གཞན་ཞིག་ནན་པར་གྱུར་ནས་དེས་ཤེད་བུ་སེར་སྐྱ་ལ་སྨྲས་པ། བུ་ཇི་ཙམ་ན་ཉི་མ་འཆར་བ་དང་། ཇི་ཙམ་ན་ནུབ་པ་དེའི་བར་དུ་ཁྱོད་དང་འདྲ་བའི་སྨྲ་བ་གཞན་མེད་ཀྱིས་དེའི་ཕྱིར་ཁྱོད་ཀྱིས་ཁོ་བོ་འདས་ནས། སྨྲ་བ་ཐམས་ཅད་དང་ལྷན་ཅིག་འཇིགས་པ་མེད་པ་དང་། བག་ཚ་བ་མེད་པར་སྨྲ་བར་བྱའོ། །འོད་སྲུང་གི་དགེ་
སྦྱོང་རྣམས་ནི་མ་གཏོགས་ཏེ། དེ་དག་ནི་རྒྱུད་རྒྱ་ཆེན་པོ་དང་ལྡན་པ། རྒྱུད་ཟབ་མོ་དང་ལྡན་པ། རྒྱུད་བཟང་པོ་དང་ལྡན་པ། འཇིག་རྟེན་པ་ལས་ཕམ་པར་མི་ནུས་པ། འཇིག་རྟེན་ལས་འདས་པ་ལ་གཏིང་མེད་པ་ཡིན་ཏེ། དེ་དག་ནི་མང་བ་དང་། མཐུན་པ་དང་། ལོངས་སྤྱོད་དག་དོན་དུ་མི་གཉེར་བ་ཡིན་ནོ། །སེར་སྐྱས་སྨྲས་པ་ཡབ་དེ་བཞིན་བགྱིའོ། །བྲམ་ཟེ་སེར་སྐྱ་ཞི་བ་ན་བ་ལས་མ་ལངས་ཏེ་དེ་རྩ་བ་དང་སྡོང་བུ་དང་འདབ་མ་དང་། མེ་ཏོག་དང་འབྲས་བུའི་སྨན་དག་གིས་བསྙེན་བཀུར་བྱས་ཀྱང་ཉམས་པ་ཉིད་དུ་གྱུར་ནས། ཅི་ཙམ་ན། བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་རྣམས་དང་ལྡན་པར་གྱུར་ཏོ། །དེ་ཤེད་བུ་སེར་སྐྱ་དང་། ནང་མིས་གོས་སྔོན་པོ་དང་སེར་པོ་དང་། དམར་པོ་དང་། དཀར་པོ་དག་གིས་ཁྱོགས་སྤྱིལ་བརྒྱན་ཏེ། དུར་ཁྲོད་དུ་བསྐྱལ་ནས། བསྲེགས་ཏེ་དེའི་འོག་ཏུ་མྱ་ངན་བསངས་པ་བྱས་ནས་འཁོད་དོ། །ལྷོ་ཕྱོགས་ནས་ལྷགས་པའི་སྨྲ་བ་དེ་དག་གིས་བྲམ་ཟེ་སེར་སྐྱ་ཞི་བ་དུས་ལ་བབ་ཅེས་ཐོས་སོ། །ཐོས་ནས་ཀྱང་ཕན་ཚུན་སྨྲ་བར་བརྩམས་པ། ཤེས་ལྡན་དག་བྲམ་ཟེ་སྨྲ་བ་དེ་དུས་ལ་བབ་གྱིས། ད་ནི་འདོང་བར་བྱའོ་ཞེས་དེ་དག་ཐམས་ཅད་འདུས་ཏེ་རྒྱལ་པོ་ཀྲི་ཀྲིའི་གན་དུ་དོང་ངོ་། །དེ་ནས་རྒྱལ་པོ་ལ་རྒྱལ་བ་དང་། ཚེ་སྤེལ་བ་བྱས་ཏེ་སྨྲས་པ། ལྷ་བདག་ཅག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ་བདག་ཅག་ལྷའི་སྤྱན་སྔར་བཀའ་མཆིད་རྣམ་པར་གཏན་ལ་དབབ་པར་བགྱིད་པར་འཚལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་མཁན་པོ་དེ་བོས་ཤིག །བློན་པོ་རྣམས་ཀྱིས་སྨྲས་པ། ལྷ་བྲམ་ཟེ་སྨྲ་བ་དེ་དུས་ལ་བབ་བོ། །རྒྱལ་པོས་སྨྲས་པ། དེའི་ཕྱིར་འདི་དག་གཡུལ་དུ་ཕུག་རོན་བཞིན་དུ་འདུས་ཏེ་ངའི་དྲུང་དུ་ལྷགས་ཀྱིས་བྲམ་ཟེ་དེའི་བུའམ་ཕུ་ནུ་པོ་འགའ་ཅི་ཡོད། ལྷ་དེའི་བུ་ཤེད་བུ་སེར་སྐྱ་ཞེས་བགྱི་
བ་མཆིས་སོ། །མཁན་པོའི་བུ་དེ་བོས་ཤིག །དེ་དག་གིས་དེ་བོས་ནས། དེས་རྒྱལ་པོ་ལ་རྒྱལ་བ་དང་། ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་པ་དང་། བློན་པོ་རྣམས་ཀྱིས་སྨྲས་པ། ལྷ་དེའི་བུ་ཤེད་བུ་སེར་སྐྱ་ཞེས་བགྱི་བ་འདི་ལགས་སོ། །རྒྱལ་པོས་དེ་ལ་འོངས་པ་ལེགས་སོ། །ཞེས་བྱ་བའི་ཚིག་གིས་ཀུན་ཏུ་སྤྱད་ནས་སྨྲས་པ། མཁན་པོའི་བུ་བྲམ་ཟེ་སྨྲ་བར་འདོད་པ་ཡུལ་ཐ་དད་པ་ན་གནས་པ་འདི་དག་ངའི་དྲུང་དུ་ལྷགས་ན། ཁྱོད་འདི་དག་དང་ལྷན་ཅིག་སྨྲ་བར་བྱེད་པར་ནུས་སམ། རྔོ་ཅི་ཐོགས་ཀྱིས་ལྷ་དགྱེས་པར་བགྱིའོ། །དེ་ནས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་དག་རྣམ་པར་བཞག་སྟེ། དེ་དག་ཕྱོགས་སྔ་མ་བྱེད་དུ་བཅུག་པ་དང་། སྨྲ་བ་དེ་དག་བྲམ་ཟེ་སེར་སྐྱ་དང་ལྷན་ཅིག་གཞི་གང་དང་གང་ལ་སྨྲ་བ་དེ་དང་དེ་ལ་བྲམ་ཟེ་སེར་སྐྱས་སྤོབས་པ་མེད་པར་བྱས་ནས། དེ་དག་ཅང་མི་སྨྲ་བར་འཁོད་དོ། །ཚར་གཅད་པའི་གནས་རྣམས་ཀྱི་ནང་ན་འདི་ལྟ་སྟེ། ལན་ལ་སྤོབས་པ་མེད་པ་ཉིད་ནི་ཐ་ཆད་ཡིན་ནོ། །རྒྱལ་པོ་ངོ་མཚར་སྐྱེས་ཏེ། ཨེ་མན་ཚོད་གཞོན་ལ་ཤེས་རབ་ཀྱི་སྤོབས་པ་འདི་དང་འདི་ལྟ་བུ་ཡོད་དོ་ཞེས་ངོ་མཚར་སྐྱེས་ནས། དེའི་འོག་ཏུ་མངོན་པར་དད་པས་གླང་པོ་ཆེའི་གཤུལ་དུ་བསྐྱོན་ཏེ་སྨྲ་བའི་རྒྱལ་སྲིད་ལ་དབང་བསྐུར་རོ། །སེར་སྐྱ་དེའི་མ་སེམས་ཁོང་དུ་ཆུད་ཅིང་རྣམ་པར་རྟོག་པ་བཟང་པོ་མ་ཡིན་པ་དག་ལ་རྣམ་པར་རྟོག་པར་བྱེད་དེ། སེར་སྐྱ་དེས་ཧབ་ཤུར་གྱིས་རྒོལ་བའི་ལོངས་སྤྱོད་འཕྲོག་ཏུ་བཅུག་སྟེ་འོང་བར་མི་འགྱུར་རམ་སྙམ་དུ་དེ་དེ་ལྟར་སེམས་ཁོང་དུ་ཆུད་ཅིང་རྣམ་པར་རྟོག་པ་བཟང་པོ་མ་ཡིན་པ་དག་ལ་རྣམ་པར་རྟོག་པར་བྱེད་ཅིང་འདུག་པ་ན། ཤེད་བུ་སེར་སྐྱ་སྨྲ་བའི་རྒྱལ་སྲིད་ལ་དབང་བསྐུར་བས་དབང་བསྐུར་ཏེ། སྐྱེ་བོ་མཁས་པས་ཡོངས་སུ་བསྐོར་ནས་རང་གི་སྡུམ་པར་འོངས་སོ། །དེ་ནས་དེའི་མས་གུས་པར་བསྒྲིམས་པ་དང་བཅས་པས་སྨྲས་པ། བུ་ཁྱོད་ཀྱིས་སྨྲ་བ་ཐམས་ཅད་ཚར་བཅད་དམ། སེར་སྐྱས་སྨྲས་པ།
ཡུམ་ཚར་བཅད་དེ། འོད་སྲུང་གི་དགེ་སྦྱོང་རྣམས་ནི་མ་གཏོགས་སོ། །སེར་སྐྱའི་མེད་བཞིན་སྒྱུར་བར་བྱེད། ལག་མཐིལ་གཉིས་འདྲི་བར་བྱེད་དོ། །ཤེད་བུ་སེར་སྐྱས་སྨྲས་པ། ཡུམ་ཁྱོད་ཅིའི་སླད་དུ་བཞིན་སྒྱུར་བ་མཛད། ལག་མཐིལ་གཉིས་འདྲི་བར་མཛད། མས་སྨྲས་པ། བུ་ད་དུང་ཡང་ཁྱོད་འགྲན་ཟླ་དང་བཅས་པ་ཡིན་པས། འོད་སྲུང་གི་དགེ་སྦྱོང་དེ་དག་གིས་རྒོལ་བའི་ལོངས་སྤྱོད་དག་ཕྲོགས་པར་འགྱུར་བའི་གནས་དེ་ལྟ་བུ་ཡོད་ཀྱིས་སོང་ལ་འདི་དག་ཚར་ཆོད་ཅིག །སེར་སྐྱས་སྨྲས་པ། ཡུམ་བདག་ལ་ཕའི་མཆིད་ནས་བུ་ཇི་ཙམ་ན་ཉི་མ་འཆར་པ་དང་། ཇི་ཙམ་ན་ནུབ་པ་དེའི་བར་དུ་ཁྱོད་དང་འདྲ་བའི་སྨྲ་བ་གཞན་མེད་ཀྱིས་དེའི་ཕྱིར་ཁྱོད་ཀྱིས་ཁོ་བོ་འདས་ནས་སྨྲ་བ་ཐམས་ཅད་དང་ལྷན་ཅིག་འཇིགས་པ་མེད་པ་དང་། བག་ཚ་བ་མེད་པར་སྨྲ་བར་བྱའོ། །འོད་སྲུང་གི་དགེ་སྦྱོང་རྣམས་ནི་མ་གཏོགས་ཏེ་དེ་དག་ནི་རྒྱུད་རྒྱ་ཆེན་པོ་དང་ལྡན་པ། རྒྱུད་ཟབ་མོ་དང་ལྡན་པ། རྒྱུད་བཟང་པོ་དང་ལྡན་པ། འཇིག་རྟེན་པ་ལས་ཕམ་པར་མི་ནུས་པ། འཇིག་རྟེན་ལས་འདས་པ་ལ་གཏིང་མེད་པ་ཡིན་ཏེ། དེ་དག་ནི་མང་བ་དང་མཐུན་པ་དང་ལོངས་སྤྱོད་དང་དོན་དུ་མི་གཉེར་བ་ཡིན་ནོ་ཞེས་མཆིའོ། །མས་སྨྲས་པ། བུ་ཁྱོད་ཀྱི་ཕ་ནི་དགེ་སྦྱོང་གི་བྲན་དུ་གྱུར་པ་ཡིན་ན། ཅི་ཁྱོད་ཀྱང་དགེ་སྦྱོང་གི་བྲན་དུ་འགྱུར་རམ། སོང་ལ་དེ་དག་ཚར་ཆོད་ཅིག །སེར་སྐྱ་དེ་མ་ལ་གུས་པ་ཡིན་པས། དེས་མའི་ཚིག་མདུན་དུ་བྱས་ཏེ། དྲང་སྲོང་སྨྲ་བར་འཕགས་པ་དང་། དགེ་སློང་ཞིག་ཀྱང་ཝཱ་ར་ཎཱ་སིར་འཕགས་ནས། སེར་སྐྱས་དགེ་སློང་དེ་ལམ་གྱི་བར་དུ་མཐོང་ནས་སྨྲས་པ། ཀྱེ་དགེ་སློང་ག་ལས་འོངས། དྲང་སྲོང་སྨྲ་བ་ནས་སོ། །དྲང་སྲོང་སྨྲ་བ་ན་དགེ་སློང་ཇི་སྙེད་ཡོད། དགེ་སློང་ཉི་ཁྲི་ལྷག་ཙམ་མོ། །རེ་ཞིག་དགེ་སློང་དག་ནི་མང་ན་བསྟན་བཅོས་ཀྱི་ཚད་ཇི་ཙམ། སྡེ་སྣོད་གསུམ་མོ། །སྡེ་སྣོད་གསུམ་གྱི་ཚད་ཇི་ཙམ་སྟོང་ཕྲག་བརྒྱའོ། །ཁྱིམ་པས་གཟུང་དུ་རུང་ངམ། མདོ་སྡེ་དང་ཆོས་མངོན་པ་གཉིས་ནི་རུང་ངོ་། །འདུལ་བ་ནི་ཆོ་གའི་གཞུང་ཡིན་པས་མི་རུང་ངོ་། །སེར་སྐྱས་བསམས་པ། འདི་དག་གི་སྨྲ་བའི་བསྟན་བཅོས་གང་ཡིན་པ་དེ་ནི་ཁྱིམ་པ་ལ་མི་སྟོན་ཏོ་སྙམ་དུ་རིག་ནས་སྨྲས་པ། ཀྱེ་དགེ་སློང་ཇེ་སངས་རྒྱས་ཀྱི་བཀའ་ལས་ཅུང་ཞིག་སྨྲོས་ཤིག །དགེ་སློང་དེས་བསམས་པ། བྲམ་ཟེ་འདི་ནི་སྨྲ་བ་ཡིན་པས་ཅི་འདི་འཇལ་བར་འདོད་པས་དྲི་བ་འདྲིའམ། འོན་ཏེ་ཀུན་ཤེས་པར་འདོད་པས་དྲི་བ་འདྲི་བ་དེ་ཇེ་ལྟའོ་སྙམ་ནས། དེས་ཚིགས་སུ་བཅད་པ་སྨྲས་པ། མཚོ་རྣམས་གང་དུ་ལྡོག་པར་འགྱུར། །ལམ་ནི་གང་དུ་ལྡོག་པར་འགྱུར། །གང་དུ་འཇིག་རྟེན་བདེ་སྡུག་བསྔལ། །མ་ལུས་པར་ནི་འགག་པར་འགྱུར། །ཞེས་བརྗོད་དེ་སྨྲས་པ། བྲམ་ཟེ་ཚིགས་སུ་བཅད་པ་འདིའི་དོན་ཅི་ཡིན་སྨྲོས་ཤིག །བྲམ་ཟེས་རིག་པའི་གནས་ཐམས་ཅད་ལ་རྣམ་
པར་དཔྱད་པར་བརྩམས་ན། མཚོ་ཡང་མ་ཤེས། ལམ་ཡང་མ་ཤེས། ལྡོག་པ་ཡང་མ་ཤེས་ནས། དེ་བདག་ལ་ལས་མཐོང་བར་མ་གྱུར་ཏམ་སྙམ་དུ་ཕྱོགས་བཞིར་རྣམ་པར་ལྟ་བར་བྱེད་ཅིང་བསམས་པ། གལ་ཏེ་འདི་ན་གཟུ་བོ་འགའ་ཞིག་ཡོད་པར་གྱུར་དུ་ཟིན་ན། བདག་དེང་ཉིད་དུ་ཚར་གཅད་པར་འགྱུར་བས། རྣམ་པ་ཐམས་ཅད་དུ་སྤང་བར་བྱའོ་སྙམ་དུ་རིག་ནས་སྨྲས་པ། ཀྱེ་དགེ་སློང་ཚིགས་སུ་བཅད་པ་དེ་ནི་རྒྱུད་རྒྱ་ཆེན་པོ་དང་ལྡན་པ། དོན་ཟབ་མོ་ཉིད་དང་ལྡན་པ་ཡིན་ལ་ཁྱོད་ཀྱང་ཝཱ་ར་ཎཱ་སིར་འཕགས་པ་ཡིན། ཁོ་བོ་ཡང་དྲང་སྲོང་སྨྲ་བར་འཕགས་པ་ཡིན་པས། འདིའི་དོན་འཕྲལ་ཁོ་ནར་སྨྲ་བར་མི་ནུས་ཀྱིས་སོང་ཞིག་དང་ཕྱིས་ཀྱང་འདིའི་དོན་སྨྲ་བར་མི་དཀའོ་ཞེས་དེ་དྲང་སྲོང་སྨྲ་བར་སོང་བ་དང་། དགེ་སློང་ཀློག་པ་དང་། ཁ་ཏོན་ཡིད་ལ་བྱེད་པའི་སྦྱོར་བའི་རྗེས་སུ་བརྩོན་པ་དག་མཐོང་ངོ་། །མཐོང་མ་ཐག་ཏུ་དེ་སེམས་མངོན་པར་དད་པར་གྱུར་ནས་བསམས་པ། སུ་ཞིག་སྙིང་རྗེ་མེད་ཅིང་འཇིག་རྟེན་ཕ་རོལ་བཏང་སྟེ། འདི་དག་ལ་རབ་ཏུ་སྡང་བའི་སེམས་བསྐྱེད་ཅིང་འདི་དག་དང་ལྷན་ཅིག་རྩོད་པ་སྐྱེད་པར་འགྱུར་སྙམ་དུ་རིག་ནས་རང་གི་ཁྱིམ་དུ་སོང་བ་དང་། དེ་ལ་མས་སྨྲས་པ། བུ་ཁྱོད་ཀྱིས་འོད་སྲུང་གི་དགེ་སློང་དག་ཚར་བཅད་དམ། སེར་སྐྱས་སྨྲས་པ། ཡུམ་ཁྱོད་བདག་གི་རྒོལ་བའི་ལོངས་སྤྱོད་དག་གིས་མི་དགྱེས་སམ། འདི་ལྟར་ཁྱོད་ནི་རྒོལ་བའི་ལོངས་སྤྱོད་དག་འཕྲོག་ཏུ་སྩོལ་བར་བཞེད་པར་གདའོ། །བུ་ཇི་སྐད་ཟེར། ཡུམ་བདག་དེང་དྲང་སྲོང་སྨྲ་བར་འཕགས་པ་དང་། ཇི་ཙམ་ན་བདག་གིས་ཤུལ་གྱི་བར་དུ་དགེ་སློང་ཞིག་མཐོང་ནས་བདག་གིས་དེ་ལ་ཀྱེ་དགེ་སློང་ཇེ་སངས་རྒྱས་ཀྱི་བཀའ་ལས་ཅུང་ཞིག་སྨྲོས་ཤིག་ཅེས་བགྱིས་པ་དང་། དེས་ཚིགས་སུ་བཅད་པ། མཚོ་རྣམས་གང་དུ་ལྡོག་པར་འགྱུར། །ལམ་ནི་གང་དུ་ལྡོག་པར་འགྱུར། །གང་དུ་འཇིག་རྟེན་བདེ་སྡུག་བསྔལ། །མ་ལུས་པར་ནི་འགག་པར་འགྱུར། །ཞེས་བརྗོད་ནས་བདག་གིས་རིག་པའི་གནས་ཐམས་ཅད་ལ་རྣམ་པར་དཔྱད་པར་བརྩམས་ན། མཚོ་ཡང་མ་འཚལ། ལམ་ཡང་མ་འཚལ། ལྡོག་པ་ཡང་མ་འཚལ་ནས་གལ་ཏེ་དེ་ན་གཟུ་བོ་འགའ་ཞིག་མཆིས་པར་གྱུར་ཏུ་ལགས་ན། བདག་དེང་ཉིད་དུ་ཚར་བཀུམ་པར་ཡང་འགྱུར་རོ། །བུ་གལ་
ཏེ་དེ་ལྟ་ན་སོང་ལ་སངས་རྒྱས་ཀྱི་བཀའ་ལྷོགས་ཤིག །ཡུམ་ཅི་ཞིག་བཀླག་པར་བགྱི་སྟེ། དེ་དག་གི་སྨྲ་བའི་བསྟན་བཅོས་གང་ལགས་པ་དེ་ནི་ཁྱིམ་པ་ལ་མི་སྟོན་ཏོ། །བུ་སོང་ལ་རབ་ཏུ་བྱུང་སྟེ་ལྷོགས་ཤིག །ཡུམ་རིགས་མཆོག་ཏུ་གྱུར་ནས། རིགས་ཐ་དད་པ་རྣམས་ཀྱི་ནང་དུ་ཇི་ལྟར་རབ་ཏུ་འབྱུང་བར་བགྱི། བུ་ཅི་ཁྱོད་ཀྱི་མགོ་བོ་ལ་སྨིག་མ་དང་རྩྭ་དག་སྐྱེ་བར་འགྱུར་རམ། ཡང་ཕྱིར་ཕོབས་ཤིག །དེ་མ་ལ་གུས་པས་ནན་གྱིས་མནན་པ་ན་རབ་ཏུ་འབྱུང་ངོ་ཞེས་དྲང་སྲོང་སྨྲ་བར་སོང་སྟེ་དགེ་སློང་གི་དྲུང་དུ་སོང་ནས་སྨྲས་པ། ཀྱེ་དགེ་སློང་བདག་རབ་ཏུ་འབྱུང་བར་འཚལ་ལོ། །དགེ་སློང་གིས་བསམས་པ། བྲམ་ཟེ་སྨྲ་བ་འདི་རབ་ཏུ་བྱུང་ན་བསྟན་པ་ལ་གཅེས་པ་བསྟབས་པར་འགྱུར་རོ་སྙམ་དུ་རིག་ནས་སྨྲས་པ། བྲམ་ཟེ་ལེགས་ཀྱིས་དེ་ལྟར་བྱའོ། །ལོངས་སྤྱོད་དག་ནི་མི་རྟག་པ་ཡིན་པས་རབ་ཏུ་བྱུང་ཞིག །སེར་སྐྱས་སྨྲས་པ། ཀྱེ་དགེ་སློང་བདག་ནི་རབ་ཏུ་ཤེས་པའི་བྲམ་ཟེ་ལགས་པས་བདག་གིས་འདིར་རབ་ཏུ་འབྱུང་བར་རྔོ་མི་ཐོག་གིས་ལྗོངས་སུ་བཞུད་དོ། །དགེ་སློང་དེས་བྲམ་ཟེ་དེ་ལྗོངས་སུ་ཁྲིད་ནས་རབ་ཏུ་ཕྱུང་རྫོགས་པར་བསྙེན་པར་བྱས་ཏེ། བཀླག་པ་དང་། ཁ་ཏོན་དག་ལ་ངེས་པར་སྦྱར་ཏེ། སེར་སྐྱ་དེས་བཀླག་པ་དང་། ཁ་ཏོན་འདོན་པ་ན་སྡེ་སྣོད་གསུམ་པོ་དག་བཀླགས་ཤིང་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །གང་གི་ཚེ་ཆོས་མཉན་པ་སྦྱིན་པར་འདོད་པ་དེའི་ཚེ་ན། སེང་གེའི་ཁྲི་རིན་པོ་ཆེ་སྣ་ཚོགས་ཀྱིས་བརྒྱན་པ་ཤོམ་པར་བྱེད། དུང་སྒྲིལ་མ་འབུད་དུ་འཇུད་པར་བྱེད། རྔ་བོ་ཆེ་རྡུང་དུ་འཇུད་པར་བྱེད་ཅིང་། རྒྱལ་པོ་དང་བཅས་པའི་འཁོར་སྡུད་པར་བྱེད། སྐྱེ་བོ་ཕལ་པོ་ཆེའི་ཚོགས་ཀྱང་མངོན་པར་དད་པར་བྱེད་དོ། །ཆོས་སྒྲོག་པ་སེར་སྐྱས་བསམས་པ། བདག་གིས་ཐོས་པས་ཐོབ་པར་བྱ་བ་གང་ཡིན་པ་དེ་ཐོབ་ཀྱིས་བདག་ཝཱ་ར་ཎཱ་སིར་སོང་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱའོ་སྙམ་ནས་དེ་ལྗོངས་སུ་ཅི་དགར་འདུག་སྟེ་ཝཱ་ར་ཎཱ་སི་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་རྒྱུ་ཞིང་འགྲོ་བའི་ཆེ་ཝཱ་ར་ཎཱ་སིར་ཕྱིན་ཏོ། །དེ་ནས་དེའི་མས་ཐོས་ནས་མ་དེ་བུ་ཚོལ་ཞིང་དྲང་སྲོང་སྨྲ་བར་སོང་
བ་དང་། དེས་བུ་མཐོང་ནས་སྨྲས་པ། བུ་ཁྱོད་ཀྱིས་འོད་སྲུང་གི་དགེ་སྦྱོང་རྣམས་ཚར་བཅད་དམ། ཡུམ་བདག་ནི་ལུང་ཙམ་དང་ལྡན་པ་ལགས་ལ་དེ་དག་ནི་ལུང་དང་རྟོགས་པ་དང་ལྡན་པ་ལགས་པས་དེའི་སླད་དུ་བདག་གིས་དེ་དག་ཚར་དགུམ་པར་ཇི་ལྟར་རྔོ་ཐོག །བུ་ཁྱོད་ཀྱིས་དེ་དག་གདོན་མི་ཟ་བར་ཚར་གཅད་པར་བྱ་བ་དག་ཡིན་གྱིས་ཚར་ཆོད་ཅིག །སེར་སྐྱ་དེ་མ་ལ་གུས་པས་མས་ནན་གྱིས་མནན་པ་ན། དང་དུ་བླངས་ཏེ་སྨྲས་པ། ཡུམ་གང་གི་ཚེ་སེང་གེའི་ཁྲི་བཤམས་པར་གྱུར། དུང་སྒྲིལ་མ་བུས་པར་གྱུར། རྔ་བོ་ཆེ་བརྡུངས་པར་གྱུར་ཅིང་། རྒྱལ་པོ་དང་བཅས་པའི་འཁོར་འདུས་པར་གྱུར་པ་དེའི་ཚེ་ཁྱོད་སྤྱོན་ཅིག །བུ་ལེགས་ཀྱིས་འོང་བར་བྱའོ། །ཇི་ཙམ་དུས་གཞན་ཞིག་ན་སེར་སྐྱ་ལ་ཆོས་སྒྲོག་པར་གསོལ་བ་བཏབ་ནས་སེང་གེའི་ཁྲི་བཤམས་པར་གྱུར། དུང་སྒྲིལ་མ་བུས་པར་གྱུར། རྔ་བོ་ཆེ་བརྡུངས་པར་གྱུར་ཅིང་། རྒྱལ་པོ་དང་བཅས་པའི་འཁོར་འདུས་པར་གྱུར་ཏོ། །དེ་ནས་སེར་སྐྱའི་མས་དུང་དང་རྔ་བོ་ཆེའི་སྒྲ་ཐོས་ནས་རིངས་པ་རིངས་པར་དྲང་སྲོང་སྨྲ་བར་སོང་སྟེ། གཙུག་ལག་ཁང་དུ་ཞུགས་ནས་སེང་གེའི་ཁྲིའི་རྒྱབ་ལོགས་སུ་འདུག་གོ་།ཆོས་སྒྲོག་པ་སེར་སྐྱ་ཡང་སེང་གེའི་ཁྲི་ལ་འཛེགས་ཏེ་ཆོས་བསྟན་པར་བརྩམས་ནས་དེས་ཆོས་ཇི་ཙམ་པ་དེ་ཙམ་ཞིག་བསྟན་ནས་ཆོས་མ་ཡིན་པ་བསྟན་པར་བརྩམས་པ་དང་། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པ་མ་བྱེད་ཅིག །ཆོས་ཀྱི་ཁྲིད་བྱེད་རྣམ་པར་དཀྲུག་པར་མ་བྱེད་ཅིག །ཆོས་ཀྱི་མངལ་མ་རྟོལ་ཅིག །ཆོས་ཀྱི་རྒྱལ་མཚན་མ་རྟིབ་ཅིག །བདུད་ཀྱི་རྒྱལ་མཚན་མ་སྒྲེངས་ཤིག །སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག །སེར་སྐྱ་དེ་ཉམ་ང་ནས་བབས་ཏེ་དེའི་འོག་ཏུ་མ་ལ་སྨྲས་པ། ཡུམ་ཁྱོད་ཀྱིས་གཟིགས་སམ། བུ་མཐོང་ངོ་། །བདག་གིས་དང་པོ་ནས་ཁྱོད་ལ་ཡུམ་བདག་ནི་ལུང་ཙམ་དང་ལྡན་པ་ལགས་ལ་དེ་དག་ནི་ལུང་དང་རྟོགས་པ་དང་ལྡན་པ་ལགས་པས་དེའི་སླད་དུ་བདག་གིས་དེ་དག་ཚར་དགུམ་པར་ཇི་ལྟར་རྔོ་ཐོག་ཅེས་མ་བགྱིས་སམ། བུ་གང་གི་ཚེ་ཁྱོད་ཆོས་སྟོན་པ་དེའི་ཚེ་ནི། ཆོས་ཇི་ཙམ་དེ་ཙམ་ཞིག་བསྟན་ནས་ཆོས་མ་
ཡིན་པ་སྟོན་ཅིག །གལ་ཏེ་ཁྱོད་ལ་དེ་དག་ན་རེ། ཚེ་དང་ལྡན་པ་མདོ་སྡེའི་མཐའ་ལ་གནོད་པར་མ་བྱེད་ཅིག །ཆོས་ཀྱི་ཁྲིད་བྱེད་རྣམས་པར་དཀྲུག་པར་མ་བྱེད་ཅིག །ཆོས་ཀྱི་མངལ་མ་རྟོལ་ཅིག །ཆོས་ཀྱི་རྒྱལ་མཚན་མ་རྟིབ་ཅིག །བདུད་ཀྱི་རྒྱལ་མཚན་མ་སྒྲེངས་ཤིག །སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག་ཅེས་ཟེར་ན། དེའི་ཚེ་ཁྱོད་ཀྱིས་ཚིག་གི་མཚོན་གྱིས་གདབ་པར་བྱ་སྟེ། དེ་དག་ནི་ལེགས་པ་མ་ཡིན་པ་བྱེད་པས་འཇིགས་པ་ཡིན་པས་ཅང་མི་སྨྲ་བར་འདུག་པར་འགྱུར་ཏེ། དེས་ན་འཇིག་རྟེན་དག་གི་སྙིང་ལམ་ན་ཚར་བཅད་དོ་སྙམ་དུ་ཤེས་པར་འགྱུར་རོ། །ཡུམ་ཐབས་དེ་ནི་བཟང་སྟེ། འོན་ཀྱང་དེའི་ཚེ་ཁྱོད་ཀྱང་ཡང་སྤྱོན་ཅིག །བུ་དེ་ལྟར་བྱ་སྟེ་ཁོ་མོ་ཡང་འོང་ངོ་། །ཇི་ཙམ་ན་ཡང་ཆོས་མཉན་པའི་སེང་གེའི་ཁྲི་བཤམས་ནས་སེར་སྐྱ་ལ་ཆོས་སྒྲོག་པར་གསོལ་བ་བཏབ་སྟེ། དུང་སྒྲིལ་མ་ཡང་བུས། རྔ་བོ་ཆེ་ཡང་བརྡུངས་ཤིང་། རྒྱལ་པོ་དང་བཅས་པའི་འཁོར་འདུས་པ་དང་། སེར་སྐྱའི་མ་དེ་ཡང་སྔ་མ་བཞིན་དུ་འོངས་ཏེ། སེང་གེའི་ཁྲིའི་རྒྱབ་ལོགས་སུ་འདུག་གོ་།ཆོས་སྒྲོག་པ་སེར་སྐྱ་ཡང་སེང་གེའི་ཁྲི་ལ་འཛེགས་ཏེ་ཆོས་བསྟན་པར་བརྩམས་ནས། དེས་ཆོས་ཇི་ཙམ་པ་དེ་ཙམ་ཞིག་བསྟན་ནས་ཡང་ཆོས་མ་ཡིན་པ་བསྟན་པར་བརྩམས་པ་དང་། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པར་མ་བྱེད་ཅིག །ཆོས་ཀྱི་ཁྲིད་བྱེད་རྣམ་པར་དཀྲུག་པར་མ་བྱེད་ཅིག །ཆོས་ཀྱི་མངལ་མ་རྟོལ་ཅིག །ཆོས་ཀྱི་རྒྱལ་མཚན་མ་རྟིབ་ཅིག །བདུད་ཀྱི་རྒྱལ་མཚན་སྒྲེངས་ཤིག །སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག །སེར་སྐྱ་དེ་མས་བསླུས་པས་མི་བཟོད་པ་སྐྱེས་ནས། ཚིག་གི་མཚོན་གྱིས་གདབ་པར་བརྩམས་ཏེ། གླང་པོ་ཆེའི་མགོ་ཅན་ཁྱོད་ཀྱིས་རེ་ཞིག་ཆོས་སམ། ཆོས་མ་ཡིན་པའམ། འདུལ་བའམ། འདུལ་བ་མ་ཡིན་པ་ཅི་ཤེས། རྟ་མགོ་ཅན། རྔ་མོའི་མགོ་ཅན། བོང་བུའི་མགོ་ཅན། བ་ལང་གི་མགོ་ཅན། སྤྲེའུའི་མགོ་ཅན། སེང་གེའི་མགོ་ཅན། སྟག་མགོ་ཅན། དོམ་མགོ་ཅན། དྲེད་མགོ་ཅན། གུང་མགོ་ཅན། བྱི་ལའི་མགོ་ཅན། ར་མགོ་ཅན། ལུག་མགོ་ཅན། རི་དྭགས་ཀྱི་མགོ་ཅན། མ་ཧེའི་
མགོ་ཅན། ཕག་གི་མགོ་ཅན། ཁྱི་མགོ་ཅན་ཁྱེད་ཀྱིས་ཆོས་སམ། ཆོས་མ་ཡིན་པའམ། འདུལ་བའམ་འདུལ་བ་མ་ཡིན་པ་ཅི་ཤེས་ཞེས་སྨྲས་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་འདིས་ཚིག་གི་མཚོན་གྱིས་གདབ་པར་བརྩམས་ཀྱིས་འདོང་ངོ་ཞེས་ཟེར་རོ། །དེ་ན་གང་འདི་དག་སོ་སོར་རྟོག་པ་མི་མང་བ་དེ་དག་ནི་འདོང་ངོ་། །གང་དག་སྤྲོ་རིང་བ་དེ་དག་ནི་གལ་ཏེ་རེ་ཞིག་ཆོས་སྟོན་པར་འགྱུར་ན་ནི་མཉན་པར་བྱའོ། །འོན་ཏེ་ཆོས་མ་ཡིན་པ་སྟོན་པར་འགྱུར་ན་ནི་འདི་ཉིད་ཀྱིས་འགྱུར་བར་ཟད་དོ་ཞེས་དེ་ཉིད་ན་འཁོད་དོ། །དེ་ནས་ཆོས་སྒྲོག་པ་སེར་སྐྱས་དགེ་སློང་སློབ་པ་དང་། མི་སློབ་པ་དག་ལ་ངག་གིས་ཉེས་པར་སྤྱད་པ་བཅོ་བརྒྱད་བྱས་ནས་སེང་གེའི་ཁྲི་ལས་བབས་ཏེ་མ་ལ་སྨྲས་པ། ཡུམ་ཁྱོད་དགྱེས་པར་གྱུར་ཏམ། བུ་ཁོ་མོ་དགའ་བར་གྱུར་གྱིས་ཚུར་ཤོག་ཁྱིམ་དུ་འདོང་ངོ་། །སེར་སྐྱས་སྨྲས་པ། ཡུམ་བདག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་གི་གསུང་རབ་ལ་མངོན་པར་དགའ་བས་མི་མཆིའོ། །བུ་ཁྱོད་ཀྱིས་མའི་ཚིག་ཚིག་མ་ཡིན་པར་མི་བྱའོ་ཞེས་བྱ་བ་མ་ཐོས་སམ་ཚུར་ཤོག་འདོང་ངོ་། །སེར་སྐྱས་སྨྲས་པ། ཁོ་བོ་འཁོར་བ་ན་ཁྱོད་འདྲ་བའི་མ་ཡོད་པར་མ་གྱུར་ཅིག །དེང་མི་དགེ་བའི་བཤེས་གཉེན་ཁྱོད་ལ་བརྟེན་ནས་ཁོ་བོས་གང་ཟག་སློབ་པ་དང་མི་སློབ་པ་དག་ལ་ངག་གི་ལས་རྩུབ་པོ་བརྗོད་པས་དེ་ནི་རྣམ་པར་སྨིན་པ་མི་འདོད་པ་སོ་སོར་མྱོང་བར་འགྱུར་རོ། །སེར་སྐྱའི་མ་དེས་ཝཱ་ར་ཎཱ་སིའི་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་ཏུ་ཝཱ་ར་ཎཱ་སིན་གནས་པ་དང་། ཕོ་བྲང་འཁོར་བ་དང་། ཡུལ་མི་ཤེས་ལྡན་དག་ཉོན་ཅིག །འོད་སྲུང་གི་དགེ་སྦྱོང་རྣམས་ཀྱིས་ཁོ་མོའི་བུ་ཕྲོགས་ཀྱིས་གྲོགས་གྱིས་ཤིག་ཅེས་ཀུ་ཅོ་གདོན་པར་བརྩམས་སོ། །དེ་ན་གང་དག་དད་པ་ཅན་དེ་དག་ནི་ཡང་དག་པར་དབུགས་འབྱིན་པར་བྱེད་དོ། །གང་དག་མ་དད་པ་དེ་དག་ནི་མཐོ་འཚམ་པར་བྱེད་དོ། །སེར་སྐྱའི་མ་དེ་ལ་མཐོ་བཙམས་པ་ན་འདི་ལྟ་བུའི་ཀུན་ནས་དཀྲིས་པ་བྱུང་སྟེ། དེས་ཁྲག་ཚ་བ་སྐྱུགས་ནས་དུས་ལ་བབས་ཏེ། སེམས་ཅན་དམྱལ་བ་རྣམས་ཀྱི་ནང་དུ་སྐྱེས་སོ། །ཆོས་སྒྲོག་པ་སེར་སྐྱ་ཡང་དགེ་སློང་སློབ་པ་དང་མི་སློབ་
པ་རྣམས་ལ་ངག་གི་ཉེས་པར་སྤྱད་པ་བཅོ་བརྒྱད་བྱས་པས་དུས་ལ་བབ་སྟེ། དུད་འགྲོ་རྣམས་ཀྱི་ནང་དུ་ཆུ་སྲིན་ཉའི་རིགས་འཇིགས་སུ་རུང་བ་འདིར་སྐྱེས་སོ། །དེ་ནས་འཁོར་དེ་ཡིད་ལ་གཅགས་ཏེ། ཤེས་ལྡན་དག་ཆོས་སྒྲོག་པ་སེར་སྐྱ་སྡེ་སྣོད་གསུམ་དང་ལྡན་པ་རིག་པ་དང་གྲོལ་བའི་སྤོབས་པ་ཅན་གྱིས་སྲོག་ཆགས་བརྒྱ་སྟོང་ཕྲག་དུ་མ་དག་གི་རྣ་བའི་སྤུབས་དག་ཚིམ་པར་བྱས་ནས། ངག་གི་ཉེས་པར་སྤྱད་པ་ཙམ་གྱིས་དུད་འགྲོའི་སྐྱེ་གནས་ངན་པར་སྐྱེས་པར་གྱུར་ན། བདག་ཅག་འདི་ནས་ཤི་འཕོས་པ་རྣམས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་དེའི་བསམ་པ་དང་བག་ལ་ཉལ་དང་ཁམས་དང་རང་བཞིན་ཐུགས་སུ་ཆུད་ནས། གང་ཐོས་ནས་ཁ་ཅིག་གིས་དྲི་བར་གྱུར་པ་དག་རྟོགས་པ་དང་། ཁ་ཅིག་གིས་རྩེ་མོ་དག་དང་། ཁ་ཅིག་གིས་བཟོད་པ་དག་དང་། ཁ་ཅིག་གིས་འཇིག་རྟེན་པའི་ཆོས་ཀྱི་མཆོག་དག་རྟོགས་པ་དང་། ཁ་ཅིག་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དང་། ཁ་ཅིག་གིས་ལན་ཅིག་ཕྱིར་འོང་བའི་འབྲས་བུ་དང་། །ཁ་ཅིག་གིས་ནི་ཕྱིར་མི་འོང་བའི་འབྲས་བུ་དང་། ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་པ་དང་། ཁ་ཅིག་གིས་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་པ་དང་། ཁ་ཅིག་གིས་རང་སངས་རྒྱས་ཀྱི་བྱང་ཆུབ་དང་། ཁ་ཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང་། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་གཞག་པ་དེ་ལྟ་བུའི་ཆོས་བསྟན་པ་མཛད་དོ། །དེ་ནས་བཅོམ་ལྡན་འདས་གདུལ་བའི་དོན་ཆེན་པོ་མཛད་ནས་གཤེགས་སོ། །དེ་ནས་ཆུ་སྲིན་ཉའི་རིགས་འདི་སྙམ་དུ་སེམས་ཏེ། གང་གི་ཕྱིར་བདག་གིས་བཅོམ་ལྡན་འདས་ཀྱི་སྤྱན་སྔར་ཚིག་གསུམ་གྱི་ཆོས་ཐོས་ནས། ཟས་ཟ་བར་བྱེད་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། དེས་ཟས་མི་ཟ་བ་ལ་ཞུགས་སོ། །དུད་འགྲོའི་སྐྱེ་གནས་སུ་སྐྱེས་པ་རྣམས་ཀྱི་མེ་ནི་རྣོ་བ་ཡིན་པས་དེ་བཀྲེས་པས་
ཉམས་དམས་པ་ན། བཅོམ་ལྡན་འདས་ལ་སེམས་མངོན་པར་དད་པར་བྱས་ནས་དུས་ལ་བབ་པ་དང་། རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུའམ་ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། །ལས་གང་གིས་སྐྱེས་པའོ། །དེས་དུད་འགྲོ་རྣམས་ཀྱི་ནང་ནས་ཤི་འཕོས་པ་དང་། རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པ་དང་། བཅོམ་ལྡན་འདས་ལ་སེམས་མངོན་པར་དད་པར་བྱས་པས་སྐྱེས་པ་མཐོང་ངོ་། །དེ་ནས་སྔོན་ཆུ་སྲིན་ལྷའི་བུ་དེ་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟན་ཏེ། བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་སྔོན་ཆུ་སྲིན་ལྷའི་བུ་རྣ་ཆ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ་དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང་པདྨ་དང་ཀུ་མུ་ཏ་དང་། པདྨ་དཀར་པོ་དག་གིས་ཐུབ་བཀང་སྟེ། ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་མེ་ཏོག་དག་གིས་མངོན་བར་གཏོར་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་པ་དང་། འདི་ལྟར་སྔོན་ཆུ་སྲིན་ལྷའི་བུའི་ཁ་དོག་གིས་མཐུས་ཁང་པ་བརྩེགས་པའི་ཁང་བཟང་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྔོན་ཆུ་སྲིན་ལྷའི་བུའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཐུགས་སུ་ཆུད་ནས་གང་ཐོས་ནས་སྔོན་ཆུ་སྲིན་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་
མཐོང་ནས། བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་དག་གིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམ། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ་མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་ཡི་དྭགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་འདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་ཆུ་སྲིན་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཐོག་འབྱོར་པ་ལྟ་བུ་དང་། དཔའ་བོ་གཡུལ་ལས་རྣམ་པར་རྒྱལ་པ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ་། །དགེ་སློང་དག་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་པའི་རྗེས་སུ་བརྩོན་པར་གནས་པ་དེ་དག་
གིས་བཅོམ་ལྡན་འདས་ཀྱི་སྤྱན་སྔར་སྣང་བ་རྒྱ་ཆེན་པོས་ཁྱབ་པར་གྱུར་པ་མཐོང་ངོ་། །མཐོང་ནས་ཐེ་ཚོམ་ཟ་བའི་ཡིད་ཀྱིས་མཚན་མོ་ནམ་ནངས་པ་དང་། བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་མི་མཇེད་ཀྱི་བདག་པོ་ཚངས་པའམ། ལྷའི་དབང་པོ་བརྒྱ་བྱིན་ནམ། འཇིག་རྟེན་སྐྱོང་པ་བཞིའམ། ལྷའི་བུ་འབྱོར་པ་ཆེ་བ། མཐུ་ཆེ་བ་གཞན་ཞིག་བཅོམ་ལྡན་འདས་ལ་བལྟ་བའི་སླད་དུ་ཉེ་བར་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མི་མཇེད་ཀྱི་བདག་པོ་ཚངས་པ་ང་ལ་བལྟ་བའི་ཕྱིར་ཉེ་བར་འོངས་པ་ཡང་མ་ཡིན། ལྷའི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ཡང་མ་ཡིན། ལྷའི་བུ་འབྱོར་པ་ཆེ་བ་མཐུ་ཆེ་བ་གཞན་མ་ཡིན་ཏེ། དགེ་སློང་དག་འདི་ལྟར་ཁྱེད་ཀྱིས་ངས་ཆུ་སྲིན་ཉའི་རིགས་གང་ལ་ཚིག་གསུམ་གྱི་ཆོས་བསྟན་པ་དེ་མཐོང་ངམ། བཅོམ་ལྡན་འདས་མཐོང་ངོ་། །དགེ་སློང་དག་དེ་དེ་ནས་ཤི་འཕོས་ཏེ་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་ནས་དེ་མདང་སུམ་ངའི་གན་དུ་འོངས་ཏེ། ངས་དེ་ལ་ཆོས་བསྟན་ནས་དེས་བདེན་པ་མཐོང་སྟེ། རང་གི་གནས་སུ་སོང་ངོ་། །ཡང་དགེ་སློང་རྣམས་ཀྱིས་བཅོམ་ལྡན་འདས་ལ་ཞུས་པ། བཙུན་པ་སྔོན་ཆུ་སྲིན་ལྷའི་བུས་ལས་ཅི་བགྱིས་ན། དེས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པར་གྱུར། ལས་ཅི་བགྱིས་ན་དེས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བར་བགྱིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་ཆུ་སྲིན་ལྷའི་བུ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་པ་འོང་བ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། སྔོན་ཆུ་སྲིན་ལྷའི་བུས་ལས་བྱས་ཤིང་བསགས་པ་དག་གཞན་སུ་ཞིག་གིས་ཉམས་སུ་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར། རླུང་གི་ཁམས་ལ་མི་འགྱུར། འདི་ལྟར་ལས་དགེ་བ་དང་མི་དགེ་བ་བྱས་ཤིང་
བསགས་པ་དག་ནི་ཟིན་པའི་ཕུང་པོ་དང་ཁམས་དང་། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྐྱེས་ནས་མྱོང་བར་འགྱུར་བའི་ལས་ཀྱང་ཡོད། ལན་གྲངས་གཞན་ལ་མྱོང་བར་འགྱུར་བའི་ལས་ཀྱང་ཡོད་དོ། །སྐྱེས་ནས་མྱོང་བར་འགྱུར་པའི་ལས་གང་ཞེ་ན། འདིས་ཆུ་སྲིན་དུ་གྱུར་པ་ན་ང་ལ་སེམས་མངོན་པར་དད་པ་བྱས་པ་གང་ཡིན་པ་དེ་ནི་སྐྱེས་ནས་མྱོང་བར་འགྱུར་བའི་ལས་ཞེས་བྱ་སྟེ། དེའི་རྣམ་པར་སྨིན་པས་རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པར་གྱུར་ཏོ། །ལན་གྲངས་གཞན་ལ་མྱོང་བར་འགྱུར་བའི་ལས་གང་ཞེ་ན། སེར་སྐྱས་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བ་དང་། ལུང་ཕོག་པ་དང་བཀླགས་པ་དང་། ཁ་ཏོན་བྱས་པ་དང་། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱས་པ་གང་ཡིན་པ་དེ་ནི་ལན་གྲངས་གཞན་ལ་མྱོང་བར་འགྱུར་བའི་ལས་ཞེས་བྱ་སྟེ། ལས་དེའི་ཚོགས་ཀྱི་དངོས་པོས་ད་ལྟར་ལྷའི་བུར་གྱུར་པས་ངའི་སྤྱན་སྔར་བདེན་པ་མཐོང་བར་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འདུལ་བ་རྣམ་པར་འབྱེད་པ། བམ་པོ་བཅུ་གསུམ་པ། དེ་ནས་རིགས་ཀྱི་བུ་ལྔ་བརྒྱ་པོ་དེ་དག་
འདི་སྙམ་དུ་སེམས་ཏེ། ཤེས་ལྡན་དག་རེ་ཞིག་ཆོས་སྒྲོག་པ་སེར་སྐྱ་དེ་སྡེ་སྣོད་གསུམ་དང་ལྡན་པ། རིག་པ་དང་གྲོལ་པའི་སྤོབས་པ་ཅན་དུ་གྱུར་ཏོ། །སྲོག་ཆགས་བརྒྱ་སྟོང་ཕྲག་དུ་མ་དག་གི་རྣ་བའི་སྦུབས་དག་ཚིམ་པར་བྱས་ནས། ངག་གིས་ཉེས་པར་སྤྱད་པ་ཙམ་གྱིས་དུད་འགྲོའི་སྐྱེ་བས་་ངན་པར་སྐྱེས་པར་གྱུར་ན། བདག་ཅག་ད་ལྟར་དྲག་ཤུལ་ཅན་ལག་པ་དམར་པ། སྣུན་པ་དང་རབ་ཏུ་སྣུན་པ་ལ་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་འཛུད་པ། གཞན་གྱི་སྲོག་གཅོད་པས་འཚོ་བར་བྱེད་པ་དག་ཡིན་པས། བདག་ཅག་འདི་ནས་ཤི་འཕོས་པ་རྣམས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། གལ་ཏེ་བདག་ཅག་རིགས་དམའ་བར་སྐྱེས་པར་མ་གྱུར་ན། བདག་ཅག་གིས་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་། ཆུ་བོ་རྣམས་ལས་རྒལ་བར་བྱ་བ་དང་། སྦྱོར་བ་རྣམས་ལས་ཡང་དག་པར་འདའ་བར་བྱ་བའི་ཕྱིར་སྤྲོ་བར་བྱ། འབད་པར་བྱ། བརྩལ་བར་བྱ་བ་ཞིག་ན་སྙམ་མོ། །སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ། འཚོ་ཞིང་གཞེས་པ་རྣམས་ཀྱི་ཆོས་ཉིད་ནི་འདུལ་བར་གྱུར་པའི་སྐྱེ་བོ་ལ་ཐུགས་བརྩེ་བས་ཉིན་ལན་གསུམ། མཚན་ལན་གསུམ། སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་པ་མཛད་དོ། །ཉན་ཐོས་ཆེན་པོ་རྣམས་ཀྱང་དེ་བཞིན་པས། ཚེ་དང་ལྡན་པ་ཤཱ་རིའི་བུས་ཉན་ཐོས་ཀྱི་མིག་གི་འཇིག་རྟེན་ལ་རྣམ་པར་བལྟས་པ་ན། རིགས་ཀྱི་བུ་ལྔ་བརྒྱ་པོ་དེ་དག་ཤིན་ཏུ་ཡིད་ལ་གཅགས་ཤིང་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འཁོད་པ་དག་མཐོང་ངོ་། །མཐོང་ནས་ཀྱང་རིགས་ཀྱི་བུ་ལྔ་བརྒྱ་པོ་དེ་དག་ག་ལ་བ་དེར་སོང་སྟེ་ཕྱིན་ནས་དེ་དག་ལ་འདི་སྐད་ཅེས་སྨྲས་སོ། །བཞིན་བཟང་དག་ཁྱེད་ཅག་ཅིའི་ཕྱིར་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འཁོད། དེ་དག་གིས་སྨྲས་པ། འཕགས་པ་འདི་ལྟར་ཆོས་སྒྲོག་པ་སེར་སྐྱ་དེ་སྡེ་སྣོད་གསུམ་དང་ལྡན་པ། རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏེ། སྲོག་ཆགས་བརྒྱ་སྟོང་ཕྲག་དུ་མ་དག་གི་རྣ་བའི་སྦུབས་དག་ཚིམ་པར་བགྱིས་ནས། ངག་གིས་ཉེས་པར་སྤྱད་པ་ཙམ་གྱིས་
དུད་འགྲོའི་སྐྱེ་གནས་ངན་པར་སྐྱེས་པར་གྱུར། བདག་ཅག་ད་ལྟར་དྲག་ཤུལ་ཅན་སུག་པ་དམར་བ། སྣུན་པ་དང་རབ་ཏུ་སྣུན་པ་ལ་ཞུགས་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་དུ་སྩོལ་བ། གཞན་གྱི་སྲོག་གཅོད་པས་འཚོ་བར་བགྱིད་པ་དག་ལགས་པས། བདག་ཅག་འདི་ནས་ཤི་འཕོས་པ་རྣམས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། གལ་ཏེ་བདག་ཅག་རིགས་དམའ་བར་སྐྱེས་པར་མ་གྱུར་ན། བདག་ཅག་གིས་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་། ཆུ་བོ་རྣམས་ལས་རྒལ་བར་བགྱི་བ་དང་། སྦྱོར་བ་རྣམས་ལས་ཡང་དག་པར་འདའ་བར་བགྱི་བའི་སླད་དུ་སྤྲོ་བར་བགྱི། འབད་པར་བགྱི། བརྩལ་བར་བགྱི་བ་ཞིག་ན་སྙམ་པས་བདག་ཅག་ཇི་ལྟར་སེམས་ཁོང་དུ་ཆུད་ཅིང་མི་མཆིས་སུ་རུང་། བཞིན་བཟང་དག་ཐུབ་པའི་དབང་པོའི་གསུང་རབ་འདི་ལ་ནི་རིགས་གཅེས་པ་མ་ཡིན། ཁྱིམ་གཅེས་པ་མ་ཡིན། རུས་གཅེས་པ་མ་ཡིན་གྱི། ཐུབ་པའི་དབང་པོའི་གསུང་རབ་འདི་ལ་ནི་སྒྲུབ་པ་གཅེས་པ་ཡིན་ནོ། །ཡང་སྨྲས་པ། དེ་བཞིན་གཤེགས་རྣམས་རིགས་དང་ནི། །ཁྱིམ་དང་རུས་དག་རྟོག་མི་མཛད། །ཡུན་རིང་བྱས་པར་གྱུར་ཀྱང་ནི། །ལས་རྣམས་ལ་ནི་ཡོངས་རྟོག་མཛད། །གལ་ཏེ་ཁྱེད་ཅག་ལེགས་པར་གསུགནས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པ་འདོད་ན་ཚུར་ཤེག །ཡུ་བུ་ཅག་བཅོམ་ལྡན་འདས་ག་ལ་བ་དེར་འདོང་དང་། བཅོམ་ལྡན་འདས་ཀྱིས་ཁྱེད་ཅག་རབ་ཏུ་འབྱིན་པར་འགྱུར་རོ། །འཕགས་པ་ལེགས་ཏེ། གལ་ཏེ་དེ་ལྟ་ན་བདག་ཅག་བཅོམ་ལྡན་འདས་ཀྱི་སྤྱན་སྔར་རབ་ཏུ་འབྱུང་དུ་མཆིའོ། །དེ་ནས་ཚེ་དང་ལྡན་པ་ཤཱ་རིའི་བུས་རིགས་ཀྱི་བུ་ལྔ་བརྒྱ་པོ་དེ་དག་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས། ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རིགས་ཀྱི་བུ་ལྔ་བརྒྱ་པོ་འདི་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་།
བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་དག་རབ་ཏུ་དབྱུང་དུ་གསོལ། བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག །ཅེས་པས་རབ་ཏུ་ཕྱུང་ཞིང་དགེ་སློང་དག་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང་། དེ་དག་བཅོམ་ལྡན་འདས་ཀྱི་བཀའ་མཇུག་ཁོ་ནར་སྐྲ་བྱི་བ་དང་། སྣམ་སྦྱར་གྱོན་པར་གྱུར་ཏོ། །སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ལྷུང་བཟེད་དང་བྱ་མ་བུམ་གྱིས་བྲེལ་བ་དང་། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོར་བཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་བཅོམ་ལྡན་འདས་ཀྱིས་རིགས་ཀྱི་བུ་ལྔ་བརྒྱ་པོ་དེ་དག་རབ་ཏུ་བྱུང་བསྙེན་པར་རྫོགས་པར་མཛད་ནས། ཡངས་པ་ཅན་དུ་ཅི་དགྱེས་པར་བཞུགས་ཏེ། འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་གཤེགས་ནས་མཐར་གྱིས་རྒྱུ་ཞིང་གཤེགས་པ་ན། འོད་མ་ཅན་གྱི་གྲོང་དུ་བྱོན་ནས་འོད་མ་ཅན་གྱི་གྲོང་ན་གྲོང་གི་བྱང་ཕྱོགས་ཤིང་ཤ་བའི་ཚལ་ན་བཞུགས་སོ། །དེའི་ཚེ་ན་མུ་གེ་ཉམ་ང་བ་དགོན་པ་སློང་མོ་བས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་། བྱ་བར་སེམས་པ་དཀའ་ན་སློང་མོ་བདག་ལྟ་ལ་སྨོས་ཀྱང་ཅི་དགོས་པ་བྱུང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ལྟར་མུ་གེ་ཉམ་ང་བ་དགོན་པ་སློང་མོ་བས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་། བྱ་བར་སེམས་པ་དཀའ་ན་སློང་མོ་བ་དག་ལྟ་ལ་སྨོས་ཀྱང་ཅི་དགོས་པ་བྱུང་གིས་དགེ་སློང་དག་ཁྱེད་ཅག་ཚུར་ཤོག་ལ་སྨོས་འདྲིན་ཅི་ལྟ་བ་དང་། ཕེབས་པར་སྨྲ་བ་ཅི་ལྟ་བ་དང་། འགྲོགས་བ་ཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་ལོང་ཞིག །ང་ཡང་འོད་མ་ཅན་གྱི་གྲོང་འདི་ཉིད་
དུ་བསྙེན་བཀུར་བ་དགེ་སློང་ཀུན་དགའ་བོ་དང་དབྱར་གནས་པར་ཁས་ལེན་གྱིས། ཐམས་ཅད་ཉིད་ནི་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ་། །དགེ་སློང་དེ་དག་གིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་སྨོས་འདྲིན་ཇི་ལྟ་བ་དང་། ཕེབས་པར་སྨྲ་བ་ཇི་ལྟ་བ་དང་། འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་སོ། །བཅོམ་ལྡན་འདས་ཀྱང་འོད་མ་ཅན་གྱི་གྲོང་དེ་ཉིད་དུ་བསྙེན་བཀུར་བ་ཚེ་དང་ལྡན་པ་ཀུན་དགའ་བོ་དང་དབྱར་གནས་པར་ཞལ་གྱིས་བཞེས་སོ། །དེ་ནས་དགེ་སློང་ལྔ་བརྒྱ་པོ་དེ་དག་འདི་སྙམ་དུ་སེམས་ཏེ། ཚེ་དང་ལྡན་པ་དག་ཤེས་པར་གྱིས་ཤིག །བཅོམ་ལྡན་འདས་ཀྱིས་འདི་སྐད་ཅེས་དགེ་སློང་དག་ད་ལྟར་མུ་གེ་ཉམ་ང་བ་དགོན་པ་སློང་མོ་བས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་། བྱ་བ་སེམས་པ་དཀའ་ན་སློང་མོ་བ་དག་ལྟ་ལ་སྨོས་ཀྱང་ཅི་དགོས་པ་དག་བྱུང་གིས། དགེ་སློང་དག་ཁྱེད་ཅག་ཚུར་ཤོག་ལ་སྨོས་འདྲིན་ཇི་ལྟ་བ་དང་། ཕེབས་པར་སྨྲ་བ་ཇི་ལྟ་བ་དང་། འགྲོགས་བཤེས་ཇི་ལྟ་བས་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་ལོང་ཞིག །ང་ཡང་འོད་མ་ཅན་གྱི་གྲོང་འདི་ཉིད་དུ་བསྙེན་བཀུར་བ་དགེ་སློང་ཀུན་དགའ་བོ་དང་དབྱར་གནས་པར་ཁས་ལེན་གྱིས། ཐམས་ཅད་ཉིད་ནི་བསོད་སྙོམས་ཀྱིས་ཉོན་མོངས་པར་གྱུར་ན་མི་རུང་ངོ་ཞེས་བཀའ་སྩལ་ན། འདི་ན་བདག་ཅག་ལ་ཉེ་དུ་འགའ་ཡང་མེད་དེ། ཉ་བའི་གྲོང་ན་བདག་ཅག་གི་ཉེ་དུ་དག་འཁོད་ཀྱིས་བདག་ཅག་ཉ་པའི་གྲོང་དུ་དོང་སྟེ་ཉེ་དུ་རྣམས་བལྟས་ནས། ཉ་བའི་གྲོང་གི་ཉེ་འཁོར་དུ་ལོ་མ་དང་འདབ་མའི་སྤྱིལ་བུ་དག་བྱས་ཏེ། དབྱར་གནས་པར་ཁས་བླང་བར་བྱ་གོར་མ་ཆག་སྙམ་མོ། །དེ་ནས་དགེ་སློང་ལྔ་བརྒྱ་པོ་དེ་དག་ཉ་པའི་གྲོང་དུ་དོང་སྟེ་ཉེ་དུ་དག་ལ་བལྟས་ནས་ཉ་བའི་གྲོང་གི་ཉེ་འཁོར་དུ་ལོ་མ་དང་། འདབ་མའི་སྤྱིལ་བུ་དག་བྱས་ཏེ་དབྱར་གནས་པར་ཁས་བླངས་སོ། །དེ་དག་འདི་སྙམ་དུ་སེམས་ཏེ། ཚེ་དང་ལྡན་པ་ཤེས་པར་གྱིས་ཤིག །བདག་ཅག་ནི་ཐོས་པ་ཉུང་བ་ཐོས་པ་ཉུང་ངུ་དང་ལྡན་པ་དག་ཡིན་པས་བདག་ཅག་གི་ཉེ་དུ་དག་ཉེ་བར་འོངས་
པར་གྱུར་ན། བདག་ཅག་གིས་ཉེ་བར་འོངས་པ་དེ་དག་ལ་ཆོས་སྟོན་པར་མི་ནུས་ཀྱིས། བདག་ཅག་གི་ཉེ་དུ་འོངས་པ་དག་ལ་ཉེ་དུ་དག་ཁྱེད་ཅག་གང་དག་གི་གྲོང་ཚིགས་ན་དགེ་སློང་གི་དགེ་འདུན་འདི་འདི་ལྟར་དབྱར་གནས་པར་ཁས་བླངས་པར་གྱུར་པའི་ཉེ་དུ་དེ་དག་གིས་ནི་རྙེད་པ་ལེགས་པ་རྙེད་པ་ཡིན་ཏེ། དགེ་སློང་འདི་ནི་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་པ་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་། རྣམ་པར་སྔོས་པའི་འདུ་ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིགས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཡོངས་སུ་ཤེས་པ་དང་། སྔོན་གྱི་གནས་དང་། འཆི་འཕོ་དང་སྐྱེ་བ་དང་། ཟག་པ་བཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉི་གའི་ཆ་ལས་རྣམ་པར་གྲོལ་བ་ཡིན་ནོ། །ཞེས་གཅིག་གིས་གཅིག་གི་ཡོན་
ཏན་བསྒྲག་པར་བྱ་གོར་མ་ཆག་སྙམ་མོ། །དེ་དག་གི་ཉེ་དུ་དག་ཉེ་བར་འོངས་པར་གྱུར་ནས། དེ་དག་གིས་ཉེ་དུ་དག་ཉེ་བར་འོངས་པ་དེ་དག་ལ་གཅིག་གིས་གཅིག་གི་ཡོན་ཏན་བསྒྲག་པར་བརྩམས་ཏེ། ཉེ་དུ་དག་ཁྱེད་ཅག་གང་དག་གི་གྲོང་ཚིགས་ན་དགེ་སློང་གི་དགེ་འདུན་ཡོན་གྱི་གནས་འདི་ལྟ་བུ་འདི་ལྟར་དབྱར་གནས་པར་ཁས་བླངས་པར་གྱུར་པའི་ཉེ་དུ་དེ་དག་གིས་ནི་རྙེད་པ་ལེགས་པར་རྙེད་པ་ཡིན་ཏེ། དགེ་སློང་འདི་ནི་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་། རྣམ་པར་སྔོས་པའི་འདུ་ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིགས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཡོངས་སུ་ཤེས་པ་དང་། སྔོན་གྱི་གནས་དང་། འཆི་འཕོ་དང་སྐྱེ་བ་དང་། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉི་གའི་ཆ་ལས་རྣམ་
པར་གྲོལ་བ་ཡིན་ནོ། །དེ་དག་གིས་སྨྲས་པ། འཕགས་པ་དག་ཁྱེད་ཀྱིས་ཡོན་ཏན་གྱི་ཚོགས་དེ་ལྟ་བུ་དག་ཐོབ་བམ། ཐོབ་བོ། འཇིག་རྟེན་ནི་ཡོན་ཏན་ལ་དགའ་བ་ཡིན་པས། རེ་ཞིག་རང་གི་བུ་དག་ལས་ཀྱང་ཕྲོགས་ཏེ་དེ་དག་ལ་བསོད་སྙོམས་སྦྱིན་པ་དང་བྱ་བར་སེམས་སོ། །སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ། འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་ཉན་ཐོས་རྣམས་ཀྱིས་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་དབྱར་ཉེ་བར་སྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཟླ་བ་ཉ་ལའོ། །དེ་ལ་གང་དག་དབྱར་ཟླ་འབྲིང་པོའི་ཉ་ལ་དབྱར་ཉེ་བར་སྒྲུབ་པའི་ཚེ་གདམས་ངག་མནོས་ཏེ། གྲོང་དང་གྲོང་རྡལ་དང་། ཡུལ་འཁོར་དང་རྒྱལ་པོའི་ཕོ་བྲང་དག་ཏུ་དབྱར་གནས་པར་ཁས་ལེན་པ་དེ་དག་ནི་སྟོན་ཟླ་འབྲིང་པོའི་ཟླ་བ་ཉ་ལ་ལྷགས་ནས། ཇི་ལྟར་ཐོབ་པ་ནི་རྗོད་པར་བྱེད། མ་ཐོབ་པ་ནི་ཐོབ་པར་བྱ་བའི་ཕྱིར་འོག་ཏུ་འདྲི་བར་བྱེད་དོ། །དེ་ནས་དགེ་སློང་གང་དག་ཡངས་པ་ཅན་གྱི་ཉེན་ཀོར་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་པ་དེ་དག་དབྱར་གྱི་ཟླ་བ་གསུམ་པོ་འདས་ནས། ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པས་ལྷུང་བཟེད་དང་། ཆོས་གོས་ཐོགས་ཏེ། འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་འདོང་བ་ན་མཐར་གྱིས་རྒྱུ་ཞིང་འདོང་བའི་ཚེ་འོད་མ་ཅན་གྱི་གྲོང་དུ་ཕྱིན་པ་དང་། ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པ་དང་བཅས་པ་ཉིད་ཀྱིས་ཚིག་གིས་བསུ་ནས་ལྷུང་བཟེད་དང་། ཆོས་གོས་དང་། འཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་ལྷམ་ཡུ་ཆད་དང་། མཆིལ་ལྷམ་ལེན་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་ཚུར་ཤེག་འོངས་པ་ལེགས་སོ། །ཚེ་དང་ལྡན་པ་དག་ཁྱེད་ཅག་གང་ནས་ད་ལྟར་འདིར་འོངས། ཁྱེད་ཅག་གང་དུ་དབྱར་གནས་པར་ཁས་བླངས། ཚེ་དང་ལྡན་པ་ཀུན་དགའ་བོ་བདག་ཅག་སྤོང་བྱེད་ཀྱི་གྲོང་ནས་
འདིར་འོངས་སོ། །བདག་ཅག་སྤོང་བྱེད་ཀྱི་གྲོང་དུ་དབྱར་གནས་པར་ཁས་བླངས་སོ། །ཚེ་དང་ལྡན་པ་དག་ཇི་ལྟར་སྤོང་བྱེད་ཀྱི་གྲོང་དུ་བདེ་བ་ལ་རེག་པར་དབྱར་གནས་པར་ཁས་བླངས་སམ། ཁྱེད་ཅག་བསོད་སྙོམས་ཀྱིས་ངལ་བར་མ་གྱུར་ཏམ། ཚེ་དང་ལྡན་པ་ཀུན་དགའ་བོ་བདག་ཅག་སྤོང་བྱེད་ཀྱི་གྲོང་དུ་ཏེ་བོར་བདེ་བ་ལ་རེག་པར་དབྱར་གནས་པར་ཁས་བླངས་མོད་ཀྱི་བདག་ཅག་བསོད་སྙོམས་ཀྱིས་ངལ་བར་གྱུར་ཏེ། ཚེ་དང་ལྡན་པ་དག་དེ་ཁོ་ན་ལྟར་སྣང་སྟེ། འདི་ལྟར་བསོད་སྙོམས་ཀྱིས་བྲེལ་བས་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པ་དང་། པགས་པ་དང་། ཤ་དང་ཁྲག་བྲི་བར་གྱུར་ཏོ། །དགེ་སློང་གང་དག་ཉ་པའི་གྲོང་གི་ཉེ་འཁོར་དུ་དབྱར་གནས་པར་ཁས་བླངས་པ་དེ་དག་ཀྱང་དབྱར་གྱི་ཟླ་བ་གསུམ་པོ་དག་འདས་ནས། ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ཚོ་བ་དང་། པགས་པ་དང་། ཤ་དང་ཁྲག་རྒྱས་པས་ལྷུང་བཟེད་དང་། ཆོས་གོས་ཐོགས་ཏེ། འོད་མ་ཅན་གྱི་གྲོང་ག་ལ་བ་དེར་རྒྱུ་ཞིང་འདོང་བ་ན་མཐར་གྱིས་རྒྱུ་ཞིང་འདོད་བའི་ཚེ་འོད་མ་ཅན་གྱི་གྲོང་དུ་ཕྱིན་པ་དང་། ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཚངས་པ་མཚུངས་པར་སྤྱོད་པ་ལ་མཉེས་གཤིན་པས་བཤེས་པ་དང་བཅས་པ་ཉིད་ཀྱིས་ཚིག་གིས་བསུ་ནས་ལྷུང་བཟེད་དང་ཆོས་གོས་དང་། འཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་ལྷམ་ཡུ་ཆད་དང་། མཆིལ་ལྷམ་ལེན་པར་བྱེད་ཅིང་། འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་ཚུར་ཤེག་འོངས་པ་ལེགས་སོ། །ཚེ་དང་ལྡན་པ་དག་ཁྱེད་ཅག་གང་ནས་ད་ལྟར་འདིར་འོངས། ཁྱེད་ཅག་དབྱར་གང་དུ་གནས་པར་ཁས་བླངས། ཚེ་དང་ལྡན་པ་ཀུན་དགའ་བོ་བདག་ཅག་ཁས་བླངས་དབྱར་གནས་པར་ཁས་བླངས་སོ། །ཚེ་དང་ལྡན་པ་དག་ཇི་ལྟར་ཉ་བའི་གྲོང་དུ་བདེ་བ་ལ་རེག་པར་དབྱར་གནས་པར་ཁས་བླངས་མ། ཁྱེད་ཅག་བསོད་སྙོམས་ཀྱིས་ངལ་བར་
མ་གྱུར་ཏམ། ཚེ་དང་ལྡན་པ་ཀུན་དགའ་བོ་བདག་ཅག་ཉ་བའི་གྲོང་དུ་ཏེ་པོར་བདེ་བ་ལ་རེག་པར་དབྱར་གནས་པར་ཁས་བླངས་ཏེ། བདག་ཅག་བསོད་སྙོམས་ཀྱིས་ཀྱང་ངལ་བར་མ་གྱུར་ཏོ། །ཚེ་དང་ལྡན་པ་དག་དེ་ཁོ་ན་ལྟར་སྣང་སྟེ། འདི་ལྟར་བསོད་སྙོམས་ཀྱིས་བྲེལ་བ་མེད་པས་ཚོ་བ་དང་། པགས་པ་དང་། ཤ་དང་ཁྲག་རྒྱས་པར་གྱུར་ཏོ། །ཚེ་དང་ལྡན་པ་དག་ད་ལྟར་མུ་གེ་ཉམ་ང་བ་དགོན་པ་སློང་མོ་བས་ཟས་རྙེད་པར་དཀའ་ཞིང་ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་། བྱ་བར་སེམས་བར་དཀའ་ན་སློང་མོ་བ་ལྟ་ལ་སྨོས་ཀྱང་ཅི་དགོས་པ་བྱུང་ན་འདིར། ཚེ་དང་ལྡན་པ་དག་ཁྱེད་ཅག་བསོད་སྙོམས་ཀྱིས་བྲེལ་བ་མེད་པར་གྱུར་བའི་རྒྱུ་ནི་གང་ཡིན། རྐྱེན་ནི་གང་ཡིན། ཚེ་དང་ལྡན་པ་ཀུན་དགའ་བོ་བདག་ཅག་གིས་ཉེ་དུ་རྣམས་ཀྱི་མདུན་དུ་གཅིག་གིས་གཅིག་གི་ཡོན་ཏན་བསྒྲགས་པར་བྱས་ཏེ། དགེ་སློང་འདི་ནི་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་བའི་འདུ་ཤེས་དང་། རྣམ་པར་སྔོས་པའི་འདུ་ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིག་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་པའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་གོང་གི་འདུ་ཤེས་དང་། སྟེང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་པ་ཡིན་ནོ། །དགེ་སློང་འདི་ནི་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་།
རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཡོངས་སུ་ཤེས་པ་དང་། སྔོན་གྱི་གནས་དང་། འཆི་འཕོ་དང་སྐྱེ་བ་དང་། ཟག་པ་ཟད་པ་ཐོབ་པ་ཡིན་ནོ། །དགེ་སློང་འདི་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་ཡིན་ནོ། །དགེ་སློང་འདི་ནི་གཉི་གའི་ཆ་ལས་རྣམ་པར་གྲོལ་བ་ཡིན་ནོ་ཞེས་གཅིག་གིས་གཅིག་གི་ཡོན་ཏན་བསྒྲག་པར་བྱས་སོ། །ཅི་ཡང་དག་པས་སམ། ཡང་དག་པ་མ་ཡིན་པས། ཡང་དག་པ་མ་ཡིན་པས་སོ། །ཁྱེད་ཅག་ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་བླ་མ་མེད་ལ་མེད་བཞིན་དུ་སྨྲར་རུང་ངམ། རུང་ཡང་སྲིད་མི་རུང་ཡང་སྲིད་དེ། འདི་ལྟར་བདག་ཅག་གིས་སྨྲས་སོ། །དགེ་སློང་དོན་ཉུང་དུ་དག་ཅིའི་ཕྱིར་དགེ་སློང་དག་ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་བླ་མ་མེད་ལ་མེད་བཞིན་དུ་སྨྲ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ཀྱིས་ཆུ་ཀླུང་ཡིད་འོང་ལྡན་གྱི་འགྲམ་ན་གནས་པའི་དགེ་སློང་རྣམས་ལ་རྨས་པ། དགེ་སློང་དག་ཁྱོད་ཀྱིས་ཟང་ཟིང་ཅུང་ཟད་ཙམ་གྱི་ཕྱིར་མིའི་ཆོས་བླ་མ་མེད་ལ་མེད་བཞིན་དུ་སྨྲས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་དོ། །དགེ་སློང་དག་གསུམ་པོ་འདི་དག་ནི་འཇིག་རྟེན་ན་ཡོད་ཅིང་། སྲིད་པའི་རྐུན་པོ་རྐུན་པོ་ཆེན་པོ་ཡིན་ཏེ། གསུམ་གང་ཞེ་ན། དགེ་སློང་དག་འདི་ལ་རྐུན་པོ་འཁོར་བརྒྱ་དང་ལྡན་པའམ། འཁོར་སྟོང་དང་ལྡན་
པ་དེ་བརྒྱའམ་སྟོང་གི་མདུན་དུ་སོང་སྟེ། ཁྱིམ་འབུགས་པར་བྱེད། མདུད་པ་འགྲོལ་མ་ཡིན་ལ། དེ་བརྒྱའམ་སྟོང་གི་མདུན་དུ་སོང་སྟེ། ཁྱིམ་འབུགས་བྱེད། མེ་གཏོང་བར་བྱེད། ལམ་པ་འཇོམས་པར་བྱེད། རྒྱལ་པོའི་མཛོད་རྐུ་བར་བྱེད། གྲོང་འཇོམས་པར་བྱེད། གྲོང་ཁྱེར་འཇོམས་པར་བྱེད། ཡུལ་འཇོམས་པར་བྱེད་པ་དེ་ནི། དགེ་སློང་དག་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་དང་པོ་ཡིན་ནོ། །དགེ་སློང་དག་གཞན་ཡང་རྐུན་པོ་རྐུན་པོ་ཆེན་པོ་འཁོར་བརྒྱ་དང་ལྡན་པ་ཡང་མ་ཡིན། འཁོར་སྟོང་དང་ཡང་ལྡན་པ་མ་ཡིན་ལ། དེ་བརྒྱའམ་སྟོང་གི་མདུན་དུ་སོང་སྟེ། ཁྱིམ་འབུགས་པར་མི་བྱེད། མདུད་པ་འགྲོལ་བར་མི་བྱེད། རིལ་གྱིས་འཕྲོགས་པར་མི་བྱེད། ལམ་སྒུགས་ཤིང་འདུག་པར་མི་བྱེད། མེ་གཏོང་བར་མི་བྱེད། ལམ་པ་འཇོམས་པར་མི་བྱེད། རྒྱལ་པོའི་མཛོད་རྐུ་བར་མི་བྱེད། གྲོང་འཇོམས་པར་མི་བྱེད། གྲོང་ཁྱེར་འཇོམས་པར་མི་བྱེད། ཡུལ་འཇོམས་པར་མི་བྱེད་མོད་ཀྱི་འོན་ཀྱང་དགེ་འདུན་གྱི་རྩའམ། ཤིང་ངམ། མེ་ཏོག་གམ། འབྲས་བུའམ། འོད་མའམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་བྱེད་པ་དང་། དེས་ཁྱིམ་མི་གསོ་བར་བྱེད་པ་འདི་ནི་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་གཉིས་པ་ཡིན་ནོ། །དགེ་སློང་དག་གཞན་ཡང་རྐུན་པོ་རྐུན་པོ་ཆེན་པོ་འཁོར་བརྒྱ་དང་ལྡན་པ་ཡང་མ་ཡིན། འཁོར་སྟོང་དང་ལྡན་པ་ཡང་མ་ཡིན་ལ། དེ་བརྒྱའམ་སྟོང་གི་མདུན་དུ་སོང་སྟེ། ཁྱིམ་འབུགས་པར་མི་བྱེད། མདུད་པ་འགྲོལ་བར་མི་བྱེད། རིལ་གྱིས་འཕྲོག་པར་མི་བྱེད། ལམ་སྒུགས་ཤིང་འདུག་པར་མི་བྱེད། མེ་གཏོང་བར་མི་བྱེད། ལམ་པ་འཇོམས་པར་མི་བྱེད། རྒྱལ་པོའི་མཛོད་རྐུ་བར་མི་བྱེད། གྲོང་འཇོམས་པར་མི་བྱེད། གྲོང་ཁྱེར་འཇོམས་པར་མི་བྱེད། ཡུལ་འཇོམས་པར་མི་བྱེད་ཅིང་། དགེ་འདུན་གྱི་རྩྭའམ། ཤིང་ངམ། མེ་ཏོག་གམ། འབྲས་བུའམ། འོད་མའམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་མི་བྱེད་ལ། དེས་ཁྱིམ་མི་གསོ་བར་མི་བྱེད་མོད་ཀྱི་འོན་ཀྱང་མི་ཆོས་བླ་མ་མེད་ལ་མེད་བཞིན་
དུ་སྨྲ་བར་བྱེད་པ་འདི་ནི་འཇིག་རྟེན་ན་ཡོད་ཅིང་སྲིད་པའི་རྐུན་པོ་རྐུན་པོ་ཆེན་པོ་གསུམ་པ་ཡིན་ནོ། །དགེ་སློང་དག་རྐུན་པོ་རྣམས་ཀྱི་ནང་ན་རྐུན་པོ་གང་འཁོར་བརྒྱ་དང་ལྡན་པའམ། འཁོར་སྟོང་དང་ལྡན་པའམ། བརྒྱའམ་སྟོང་གི་མདུན་དུ་སོང་སྟེ། ཁྱིམ་འབུགས་པར་བྱེད། མདུད་པ་འགྲོལ་བར་བྱེད། རིལ་གྱིས་འཕྲོག་པར་བྱེད། ལམ་སྒུགས་ཤིང་འདུག་པར་བྱེད། མེ་གཏོང་བར་བྱེད། ལམ་པ་འཇོམས་པར་བྱེད། རྒྱལ་པོའི་མཛོད་རྐུ་བར་བྱེད། གྲོང་འཇོམས་པར་བྱེད། གྲོང་ཁྱེར་འཇོམས་པར་བྱེད། ཡུལ་འཇོམས་པར་བྱེད་པ་དེ་ནི་ཅུང་ཟད་ཙམ་ཡིན་ནོ། །རྐུན་པོ་རྣམས་ཀྱི་ནང་ན་རྐུན་པོ་གང་དགེ་འདུན་གྱི་རྩྭའམ། ཤིང་ངམ། མེ་ཏོག་གམ། འབྲས་བུའམ། འོད་མའམ། གཞལ་བ་གང་ཡང་རུང་བ་དེ་བཙོངས་ཤིང་བཙོངས་ཤིང་འཚོ་བར་བྱེད་པ་དང་། དེས་ཁྱིམ་མི་གསོ་བར་བྱེད་པ་དེ་ཡང་ཅུང་ཟད་ཙམ་ཡིན་ནོ། །དགེ་སློང་དག་རྐུན་པོ་རྣམས་ཀྱི་ནང་ན་གང་མིའི་ཆོས་བླ་མ་མེད་ལ་མེད་བཞིན་དུ་སྨྲ་བར་བྱེད་པ་དེ་ནི། འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་མིར་བཅས་པའི་ནང་ན་རྐུན་པོ་རྐུན་པོ་ཆེན་པོ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །འདི་ན་གང་ཞིག་དགྲ་བཅོམ་མ་གྱུར་པར། །བདག་ཉིད་དགྲ་བཅོམ་པར་ཡང་རྗོད་བྱེད་པ། །དེ་ནི་ཚངས་བཅས་འཇིག་རྟེན་རྐུན་པོ་སྟེ། །ཚུལ་ཁྲིམས་འཆལ་བ་ཡིན་པར་བརྗོད་པར་བྱ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན། ཕན་ཡོན་བཅུ་ཡང་དག་པར་གཟིགས་པས་ངས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ། དགེ་འདུན་བསྡུ་བའི་ཕྱིར་ཞེས་བྱ་བ་ནས། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་བྱ་བའི་ཕྱིར་ཞེས་བྱ་བའི་
བར་དུ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་མཐོང་བ་དང་། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས། དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་མཛད་དོ། །དགེ་སློང་རབ་ཏུ་མང་པོ་གནས་མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ན་རྣལ་འབྱོར་གྱི་རྗེས་སུ་བརྩོན་པར་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ཡིད་ལ་བྱེད་པས། ཉོན་མོངས་པ་དག་རྣམ་པར་མནན་པས་དེས་ན་འདོད་པ་ལ་འདོད་ཆགས་དང་། གནོད་སེམས་དག་དེ་དག་གི་རྒྱུད་ལ་ཀུན་ཏུ་མི་འབྱུང་ནས་དེའི་འོག་ཏུ་དེ་དག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག །དགོན་པ་པ་དག་གིས་ཐོབ་པར་བྱ་བ་གང་ཡིན་པ་དེ་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད། ཚངས་པར་སྤྱད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། དེ་དག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང་། དེར་དེ་དག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བའི་དགེ་ཚུལ་རྣམས་དང་ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་བྱུང་བར་གྱུར་ནས་དེ་དག་འདི་སྙམ་དུ་སེམས་ཏེ། ཚེ་དང་
ལྡན་པ་དག་ཤེས་པར་གྱིས་ཤིག །བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱིས་བསླབ་་པའི་གཞི་འདི་ལྟར་བཅའ་བ་མཛད་དེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ་འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས། དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ་ཞེས་བཅའ་བ་མཛད་ན། བདག་ཅག་གནས་མལ་དགོན་པ་ནགས་ཁྲོད་དང་རི་དྲུང་བས་མཐའ་དག་ན་གནས་པ་དག་གིས་ཞི་གནས་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས། འཇིག་རྟེན་པའི་ཡིད་ལ་བྱེད་པས་ཉོན་མོངས་པ་དག་རྣམ་པར་མནན་པས་འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་མི་འབྱུང་ནས། བདག་ཅག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག །དགོན་པ་དག་གིས་ཐོབ་པར་བྱ་བ་གང་ཡིན་པ་དེ་དག་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད། ཚངས་པར་སྤྱད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། བདག་ཅག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང་། དེར་བདག་ཅག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བའི་དགེ་ཚུལ་རྣམས་དང་ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་བྱུང་བར་མ་གྱུར་ན། བདག་ཅག་ལ་ཕམ་པར་གྱུར་པའི་ལྟུང་བ་
བྱུང་བར་མ་གྱུར་ཏམ། ཚུར་ཤེག་བདག་ཅག་ཚེ་དང་ལྡན་པ་ཀུན་དགའ་བོ་ག་ལ་བ་དེར་དོང་ཞིང་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་དོན་དེ་ཡོངས་སུ་དྲི་བར་བྱས་ཏེ། བདག་ཅག་ལ་ཚེ་དང་ལྡན་པ་ཀུན་དགའ་བོས་ཇི་སྐད་དུ་ལུང་སྟོན་པར་འགྱུར་བ་དེ་ཁོ་ན་བཞིན་དུ་གཟུང་བར་བྱའོ་སྙམ་ནས། དེ་དག་ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་མཁྱེན་པར་མཛོད་ཅིག །བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འདི་ལྟར་བཅའ་བ་མཛད་དེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་མཐོང་བ་དང་། རེག་པར་སྤྱོད་པ་མེད་པས་མེད་བཞིན་དུ་འདི་ཤེས་སོ་འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས། གནས་པར་མི་བྱའོ་ཞེས་བཅའ་བ་མཛད་ན། བདག་ཅག་གནས་མལ་དགོན་པ་ནགས་ཁྲོད་དང་། རི་དྲུང་དང་བས་མཐའ་དག་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ཡིད་ལ་བྱེད་པས་ཉོན་མོངས་པ་དག་རྣམ་པར་མནན་པས། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་མི་འབྱུང་ནས། བདག་ཅག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག །དགོན་པ་པ་དག་གིས་ཐོབ་པར་བྱ་བ་གང་ཡིན་པ་དེ་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད་།ཚངས་པར་སྤྱོད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་
བརྗོད་ནས། བདག་ཅག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང་། དེར་བདག་ཅག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བའི་དགེ་ཚུལ་རྣམས་དང་ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་བྱུང་བར་གྱུར་ན། བདག་ཅག་ལ་ཕམ་པར་གྱུར་པའི་ལྟུང་བ་བྱུང་བར་མ་གྱུར་ཏམ། ཚུར་ཤེག་བདག་ཅག་ཚེ་དང་ལྡན་པ་ཀུན་དགའ་བོ་ག་ལ་བ་དེར་འདོང་ཞིང་ཕྱིན་ནས། ཚེ་དང་ལྡན་པ་ཀུན་དགའ་བོ་ལ་དོན་དེ་ཡོངས་སུ་དྲི་བར་བྱ་སྟེ། བདག་ཅག་ལ་ཚེ་དང་ལྡན་པ་ཀུན་དགའ་བོས་ཇི་སྐད་དུ་ལུང་སྟོན་པར་འགྱུར་བ་དེ་ཁོ་ན་བཞིན་དུ་གཟུང་བར་བྱའོ་སྙམ་ནས། བདག་ཅག་ཚེ་དང་ལྡན་པ་ཀུན་དགའ་བོ་ལ་དོན་དེ་ཡོངས་སུ་འདྲི་ན། ཚེ་དང་ལྡན་པ་བདག་ཅག་ལ་ཕམ་པར་གྱུར་པའི་ལྟུང་བ་འབྱུང་བར་མ་གྱུར་ཏམ། དེ་ནས་ཚེ་དང་ལྡན་པ་ཀུན་དགའ་བོས་དགེ་སློང་རབ་ཏུ་མང་པོ་དེ་དག་ཁྲིད་དེ། བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འདི་ལྟར་བཅའ་བ་མཛད་དེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་མཐོང་བ་དང་། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ་འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ། །ཞེས་སྨྲས། མ་མཐོང་བར་མཐོང་ངོ་ཞེས་སྨྲས་སྟེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས།
བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་ན། ཚེ་དང་ལྡན་པ་གནས་མལ། དགོན་པ་ནགས་ཁྲོད་དང་རི་དྲུང་དང་། བས་མཐའ་དག་ན་གནས་པ་འདི་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས། འཇིག་རྟེན་པའི་ཡིད་ལ་བགྱིད་པས་ཉོན་མོངས་པ་དག་རྣམ་པར་མནན་པས། གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་རྒྱུད་ལ་ཀུན་དུ་མི་འབྱུང་ནས། འདི་དག་གིས་གཅིག་ལ་གཅིག་ཚེ་དང་ལྡན་པ་དག་ཤེས་པར་གྱིས་ཤིག །དགོན་པ་པ་དག་གིས་ཐོབ་པར་བྱ་བ་གང་ཡིན་པ་དེ་བདག་ཅག་གིས་ཐོབ་སྟེ། བདག་ཅག་སྐྱེ་བ་ནི་ཟད། ཚངས་བར་སྤྱོད་པ་ནི་བསྟེན། བྱ་བ་ནི་བྱས། སྲིད་པ་འདི་ལས་གཞན་ནི་མི་ཤེས་ཀྱིས། ཚུར་ཤེག་བདག་ཅག་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་འཇུག་པར་བྱའོ་ཞེས་བརྗོད་ནས། འདི་དག་གིས་གནས་མལ་དགོན་པ་དག་བཏང་སྟེ། གནས་མལ་གྲོང་མཐའ་བ་དག་ཏུ་ཞུགས་པ་དང་། དེར་འདི་དག་ཡང་དང་ཡང་དུ་བུད་མེད་ཀྱི་ཡུལ་མཐོང་ཞིང་ཀུན་དགའ་ར་བ་བའི་དགེ་ཚུལ་རྣམས་དང་ལྷན་ཅིག་འདྲེ་ཞིང་གནས་པ་དག་ལ་ཡང་ཉོན་མོངས་པ་དག་བྱུང་བར་གྱུར་ཏེ། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་བྱུང་བར་གྱུར་ནས། འདི་དག་བདག་ཅག་ལ་ཕམ་པར་གྱུར་བའི་ལྟུང་བ་བྱུང་བར་མ་གྱུར་ཏམ་སྙམ་དུ་འགྱོད་པ་སྐྱེས་པར་གྱུར་ན། དེའི་སླད་དུ་བདག་བཅོམ་ལྡན་འདས་ལ་དོན་འདི་ཡོངས་སུ་ཞུ་སྟེ། འདི་དག་ལ་ཕམ་པར་གྱུར་བའི་ལྟུང་བ་བྱུང་བར་མ་གྱུར་ཏམ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་ལྟ་བས་ན། མངོན་པའི་ང་རྒྱལ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་རྗེས་སུ་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ།
འདི་ནི་རྗེས་སུ་གནད་བ་ཡིན་ཏེ། ངའི་ཉན་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ། མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རེག་པར་སྤྱོད་པ་མེད་ལ་མེད་བཞིན་དུ་འདི་ཤེས་སོ་འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན། མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི་དགེ་སློང་བཞི་པོ་དག་ལས་ཞེས་བྱ་བ་ནས་དོན་གྱི་སྐབས་འདིར་ནི། གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་བསྙེན་པར་རྫོགས་པ་གང་ཡིན་པ་དེ་དགེ་སློང་དུ་དགོངས་ཏེ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་ཡང་དགེ་སློང་གང་ཞེས་གསུངས་སོ། །མངོན་པར་མི་ཤེས་ཤིང་ཞེས་བྱ་བ་ལ་ཅི་ཞིག་མངོན་པར་མི་ཤེས་ཤིང་ཞེ་ན་གཟུགས་མངོན་པར་མི་ཤེས་པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མངོན་པར་མི་ཤེས་ཤིང་། ཡོངས་སུ་མི་ཤེས་ལ་ཞེས་བྱ་བ་ལ་ཅི་ཞིག་ཡོངས་སུ་མི་ཤེས་ལ་ཞེ་ན། གཟུགས་ཉིད་ཡོངས་སུ་མི་ཤེས་པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་མི་ཤེས་པའོ། །མིའི་ཆོས་ཞེས་བྱ་བ་ནི་མི་རྣམས་ཀྱི་ཆོས་མྱ་ངན་ལས་འདས་པ་སྟེ། དེ་མི་རྣམས་ཀྱིས་འཐོབ་ཀྱི་ཟ་མ་དང་མ་ནིང་དང་མཚན་གཉིས་པ་དག་གིས་ཀྱང་མི་འཐོབ་ན། སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་རྣམས་གྱིས་ལྟ་སྨོས་ཀྱང་ཅི་དགོས་པའི་ཕྱིར་རོ། །བླ་མ་ཞེས་བྱ་བ་ནི་འདོད་པའི་ཁམས་པས་གཟུགས་ཀྱི་ཁམས་བླ་མ་ཡིན་ལ། གཟུགས་ཀྱི་ཁམས་པས་གཟུགས་མེད་པའི་ཁམས་བླ་མ་
ཡིན་པའོ། །ཡང་ན་མིའི་ཆོས་ཞེས་བྱ་བ་ནི་སྒྲིབ་པ་ལྔ་པོ་དག་གོ་།བླ་མ་ཞེས་བྱ་བ་ནི་དེ་དག་སྤངས་པ་གང་ཡིན་པའོ། །མཐའ་ཞེས་བྱ་བ་ལ་མཐའ་ཞེས་བྱ་བ་ནི་མྱ་ངན་ལས་འདས་པའོ། །འཕགས་པ་ཞེས་བྱ་བ་ལ་འཕགས་པ་ནི་སངས་རྒྱས་རྣམས་དང་སངས་རྒྱས་ཀྱི་ཉན་ཐོས་རྣམས་སོ། །བྱེ་བྲག་ཐོབ་པ་ཞེས་བྱ་བ་ལ་བྱེ་བྲག་ཐོབ་པ་ནི་དགེ་སྦྱོང་གི་ཚུལ་གྱི་འབྲས་བུ་བཞི་པོ་དག་སྟེ། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དོ། །ཤེས་པ་ཞེས་བྱ་བ་ནི་ཤེས་པ་བཞི་པོ་དག་སྟེ། སྡུག་བསྔལ་ཤེས་པ་དང་། ཀུན་འབྱུང་བ་ཤེས་པ་དང་། འགོག་པ་ཤེས་པ་དང་། ལམ་ཤེས་པའོ། །མཐོང་བ་ཞེས་བྱ་བ་ནི་མཐོང་བ་བཞི་པོ་དག་སྟེ། སྡུག་བསྔལ་མཐོང་བ་དང་། ཀུན་འབྱུང་བ་མཐོང་བ་དང་། འགོག་པ་མཐོང་བ་དང་། ལམ་མཐོང་བའོ། །རེག་པར་སྤྱོད་པ་ཞེས་བྱ་བ་ལ་རེག་པར་སྤྱོད་པ་ནི་བསམ་གཏན་བཞི་པོ་དག་སྟེ། སྙོམས་པར་འཇུག་པ་ལས་ཡིན་གྱི་སྐྱེ་བ་ལས་ནི་མ་ཡིན་ནོ། །མེད་ལ་ཞེས་བྱ་བ་ནི་དེའི་དངོས་པོ་མེད་ལའོ། །མེད་བཞིན་དུ་ཞེས་བྱ་བ་ནི་བདག་ཉིད་ལའོ། །འདི་ཤེས་སོ་ཞེས་བྱ་བ་ལ་ཅི་ཞིག་ཤེས་སོ་ཞེ་ན། སྡུག་བསྔལ་ཤེས་པ་དང་། ཀུན་འབྱུང་བ་དང་། འགོག་པ་དང་། ལམ་ཤེས་སོ་ཞེས་སོ། །འདི་མཐོང་ངོ་ཞེས་བྱ་བ་ལ་ཅི་ཞིག་མཐོང་ངོ་ཞེས་ཤེ་ན། ལྷ་རྣམས་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་མཐོང་ངོ་། །ལྷ་རྣམས་ཀྱིས་ཀྱང་བདག་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་
སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་མཐོང་ངོ་། །ལྷ་རྣམས་ཀྱི་སྒྲ་ཐོས་སོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་གི་སྒྲ་ཐོས་སོ། །ལྷ་རྣམས་བལྟ་བའི་ཕྱིར་འགྲོའོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ། །ལྷ་རྣམས་བདག་བལྟ་བའི་ཕྱིར་འོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་བདག་བལྟ་བའི་ཕྱིར་འོང་ངོ་། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། ཀུན་དུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་
བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །མ་ཐོས་བཞིན་དུ་བདག་གིས་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་། རྣམ་པར་སྔོས་པའི་འདུ་ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིགས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་འཐོར་པའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་བོ། མ་ཐོབ་བཞིན་དུ་བདག་གིས་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་
སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་ཀྱི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཡོངས་སུ་ཤེས་པ་དང་། སྔོན་གྱི་གནས་དང་། འཆི་འཕོ་དང་སྐྱེ་བ་དང་། ཟག་པ་ཟད་པ་ཐོབ་བོ། །བདག་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང་། གཉི་གའི་ཆ་ལས་རྣམ་པར་གྲོལ་བ་ཡིན་ནོ་ཞེས་པའོ། །ཁས་འཆེས་པ་ལས་ཞེས་བྱ་བ་ནི་ཁས་བླངས་པ་ལས་སོ། །དེ་ལྟུང་བ་བྱུང་བ་ཞེས་བྱ་བ་ནི་གཞི་དེའིའོ། །རྣམ་པར་དག་པར་འདོད་ནས་ཞེས་བྱ་བ་ནི། རྣམ་པར་ལྡང་པར་འདོད་ནས་སོ། །དུས་གཞན་ཞིག་ན་ཞེས་བྱ་བ་ནི་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་དེ་བདག་ཉིད་ལ་འགྱོད་པ་དང་། ཅུང་ཟད་འགྱོད་པ་དང་། རྣམ་པར་འགྱོད་པ་དང་། རབ་ཏུ་འགྱོད་པ་སྐྱེས་པས་སོ། །འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས་ཞེས་བྱ་བ་ནི་ཡིད་ཀྱི་རྣམ་པར་ཤེས་པས་སོ། །མ་མཐོང་བར་མཐོང་ངོ་ཞེས་སྨྲས་ཏེ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །གསོབ་གསོག་བརྫུན་དུ་སྨྲས་སོ་ཞེས་བྱ་བ་དེ་དག་ནི། སྨྲས་པའི་རྣམ་གྲངས་ཀྱི་ཚིག་ཡིན་ནོ་ཟེར་ན་ཞེས་བྱ་བ་ནི་བརྗོད་ནའོ། །མངོན་པའི་ང་རྒྱལ་མ་གཏོགས་ཏེ་ཞེས་བྱ་བ་ནི་མངོན་པའི་ང་རྒྱལ་བཞག་སྟེའོ། །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་སྟེ་སྔ་མ་བཞིན་ནོ། །དེ་ཡང་ཞེས་བྱ་བ་དེ་ནི་ཉེ་བར་བསྟན་པ་དང་། ཀུན་ཏུ་བསྟན་པའི་ཚིག་བླ་དྭགས་ཡིན་ནོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི་སྔ་མ་བཞིན་ནོ། །གནས་པར་མི་བྱའོ་ཞེས་བྱ་བ་ཡང་གང་ཟག་བཅུ་གཉིས་པོ་དག་གི་བསྒོ་བས་བསྒོ་བར་མི་བྱའོ་ཞེས་བྱ་བའི་བར་དུ་སྔ་མ་བཞིན་ཏེ། དེས་ན་གནས་པར་མི་བྱའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེས། སྡོམ་ལ། འདུ་ཤེས་བསྒྱུར་དང་དགོན་པ་དང་། །ཁྱིམ་རྣམས་སུ་ནི་སྟན་བཀྲ་དང་། །རང་གི་
མཚན་ཉིད་འཛིན་པ་དང་། །བདག་ཉིད་ཉེ་བར་སྟོན་པའོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་འདོད་པ་དང་། བློ་གྲོས་དང་རྟོག་པ་དང་། ལྟ་བ་བསྒྱུར་ཏེ་འདི་སྐད་ཅེས་ལྷ་རྣམས་མཐོང་ངོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་ངོ་ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་བ་རྣམས་མཐོང་ངོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་འདོད་པ་དང་། བློ་གྲོས་དང་རྟོག་པ་དང་ལྟ་བ་བསྒྱུར་ཏེ། འདི་སྐད་ཅེས་ལྷ་རྣམས་ཀྱི་སྒྲ་ཐོས་སོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་གྱི་སྒྲ་ཐོས་སོ་ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་ལྷ་རྣམས་བལྟ་བའི་ཕྱིར་འགྲོའོ་ཞེས་ཟེར་ན་ཕམ་པར་འགྱུར་རོ། །ཀླུ་རྣམས་དང་། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འགྲོའོ། །ཞེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ་ཞེས་ཟེར་ན། ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་ལྷ་རྣམས་དང་།
ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཀླུ་རྣམས་དང་། གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་ཡང་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱང་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་ཐོབ་བོ་ཞེས་ཟེར་ན་ཕམ་པར་འགྱུར་རོ། །མི་རྟག་པ་ལ་སྡུག་བསྔལ་བའི་འདུ་ཤེས་ནས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་བར་དུ་ཐོབ་བོ་ཞེས་ཟེར་ན་ཕམ་པར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཕམ་པར་འགྱུར་རོ། །ཐ་ན་འདི་སྐད་ཅེས་རྡུལ་ཁྲོད་ཀྱི་ཤ་ཟ་རྣམས་ཀྱང་བདག་དང་ལྷན་ཅིག་ཏུ་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་ཅེས་ཟེར་ན་ཉེས་པར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་ཐོབ་བོ་ཞེས་ཟེར་ན་ཕམ་པར་འགྱུར་རོ། །མི་རྟག་པ་ལ་སྡུག་བསྔལ་བའི་འདུ་ཤེས་ནས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་བར་དུ་ཐོབ་བོ་ཞེས་ཟེར་ན་ཕམ་པར་འགྱུར་རོ། །དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་
དང་། ལྟ་བ་བསྒྱུར་ཏེ། འདི་སྐད་ཅེས་མ་ཐོབ་བཞིན་དུ་བདག་གིས་བསམ་གཏན་དང་པོ་ཐོབ་བོ་ཞེས་ཟེར་ན་ཕམ་པར་འགྱུར་རོ། །དེ་བཞིན་དུ་གཉིས་པ་དང་། གསུམ་པ་དང་། བཞི་པ་དང་། སྔ་མ་བཞིན་དུ་བདག་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་དང་། གཉི་གའི་ཆ་ལས་རྣམ་པར་གྲོལ་བའོ་ཞེས་ཟེར་ན་ཕམ་པར་འགྱུར་རོ།། །།འདུལ་བ་རྣམ་པར་འབྱེད་པ། བམ་པོ་བཅུ་བཞི་པ། འདི་ལྟར་དགེ་སློང་རབ་ཏུ་མང་པོ་དག །གྲོང་མེད་པའི་དགོན་པའི་གནས་ཤིག་ན་གནས་ཤིང་། དེ་ན་དེ་དག་ལ་མི་མ་ཡིན་པ་དག་གིས་འཚེ་བ་ན། དེ་ན་དགེ་སློང་གང་དག་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པ་དེ་ལ་དེ་ན་མི་མ་ཡིན་པ་དག་གིས་འཚེ་བར་མི་བྱེད་ནས། དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་དེ་ན་གནས་ཏེ། དེ་ན་བདག་ལ་མི་མ་ཡིན་པ་རྣམ་པར་འཚེ་བར་མི་བྱེད་དོ་ཞེས་ཟེར་ན་ཕམ་པར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་ཁྱིམ་རྣམས་སུ་མགྲོན་དུ་བོས་ཏེ་ཟ་བར་བྱེད་ཅིང་། དེ་ན་དེ་དག་ལ་སྟན་ཁྲ་བོ་ཉེ་བར་བཀྲ་བ་དག་བཤམས་ཤིང་། དེ་ན་དགེ་སློང་གང་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས། དགེ་སློང་གིས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་བདག་ཀྱང་ཁྱིམ་དེར་མགྲོན་དུ་བོས་ཤིང་ཟོས་ཏེ་དེ་ན་བདག་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་དོ་ཞེས་ཟེར་ན་ཕམ་པར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དགོན་པ་ན་གནས་པ་དག་གིས་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་མི་འབྱུང་ནས། དགེ་སློང་གིས་འདུ་ཤེས་བསྒྱུར་
ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་དེ་ན་གནས་ཤིང་བདག་གིས་ཀྱང་དེ་ན་གནས་པ་ན་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས་འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས། འདོད་པ་ལ་འདོད་ཆགས་དང་། གནོད་སེམས་དག་བདག་གི་རྒྱུད་ལ་ཡང་ཀུན་ཏུ་མི་འབྱུང་ངོ་ཞེས་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང་། འདོད་པ་དང་བློ་གྲོས་དང་། རྟོག་པ་དང་ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་གིས་ལྷ་རྣམས་མཐོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་མཐོང་བ་ཡོད་དོ་ཞེས་ཟེར་ཞིང་། འདི་སྐད་ཅེས་ཁོ་བོའི་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་གིས་རྡུལ་ཁྲོད་ཀྱི་ཤ་ཟ་རྣམས་མཐོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་གིས་ལྷ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་གྱི་སྒྲ་ཐོས་པ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་གིས་རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན། ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་ལྷ་
རྣམས་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང་། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོ་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་ལ་ལྷ་རྣམས་བལྟ་བའི་ཕྱིར་འོང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དུ་བལྟ་བའི་ཕྱིར་འོང་བ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་ལ་རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འོང་བ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། །འདི་སྐད་ཅེས་དགེ་སློང་གང་ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྤོམ་པོར་འགྱུར་རོ། །ཐ་ན་
འདི་སྐད་ཅེས་དགེ་སློང་གང་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། །སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཀླུ་རྣམས་དང་གནོད་སྦྱིན་རྣམས་ནས་སྔ་མ་བཞིན་དུ་ལུས་སྲུལ་པོ་རྣམས་ཀྱི་བར་ཡང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །ཐ་ན་འདི་སྐད་ཅེས་དགེ་སློང་གང་དང་ལྷན་ཅིག་རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། །སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །དགེ་སློང་གི་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཞེས་དགེ་སློང་གང་གིས་མི་རྟག་པའི་འདུ་ཤེས་ཐོབ་པ་དེ་ཡོད་དོ་ཞེས་ཟེར་ཞིང་། འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །མི་རྟག་པའི་འདུ་ཤེས་ཇི་ལྟ་བ་དེ་བཞིན་དུ་གང་གིས་སྔ་མ་བཞིན་དུ་སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཀྱི་པར་དུ་ཐོབ་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་བཟོད་པ་དང་། འདོད་པ་
དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་གིས་བསམ་གཏན་དང་པོ་ཐོབ་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །བསམ་གཏན་དང་པོ་ཇི་ལྟ་བ་དེ་བཞིན་དུ་གང་གིས་སྔ་མ་བཞིན་དུ་གཉིས་པ་དང་། གསུམ་པ་དང་། བཞི་པ་ནས་དགེ་སློང་གང་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང་། གཉི་གའི་ཆ་ལས་རྣམ་པར་གྲོལ་བའི་བར་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་གྲོང་མེད་པའི་དགོན་པའི་གནས་ཤིག་ན་གནས་ཤིང་དེ་ལ་དེ་དག་ན་མི་མ་ཡིན་པ་དག་གིས་འཚེ་བ་ན། དགེ་སློང་གང་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པ་དེ་ལ་དེ་ན་མི་མ་ཡིན་པ་དག་གིས་འཚེ་བར་མི་བྱེད་ནས། དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་གྲོང་མེད་པའི་དགོན་པའི་གནས་དེ་ན་གནས་པ་དེ་ལ་དེ་ན་མི་མ་ཡིན་པ་རྣམས་འཚེ་བར་མི་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་རབ་ཏུ་མང་པོ་དག་ཁྱིམ་རྣམས་སུ་མགྲོན་དུ་བོས་ཏེ་ཟ་བར་བྱེད་ཅིང་དེ་ན་དེ་དག་ལ་སྟན་ཁྲ་བོ་ཉེ་བར་བཀྲ་བདག་བཤམས་ཤིང་དེ་ན་དགེ་སློང་གང་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས། དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་ཁྱིམ་དེར་མགྲོན་དུ་བོས་ཤིང་ཟོས་ཏེ་དེ་ན་དེ་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་པ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་པ་སྦོམ་པོར་འགྱུར་རོ། །འདི་ལྟར་དགེ་སློང་
རབ་ཏུ་མང་པོ་དག་དགོན་པ་ན་གནས་པ་དག་གིས་ཞིག་ནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས། འཇིག་རྟེན་པའི་ལམ་གྱིས་ཉོན་མོངས་པ་དག་རྣམས་པར་མནན་པས། འདོད་པ་ལ་འདོད་ཆགས་དང་། གནོད་སེམས་དག་རྒྱུད་ལ་ཀུན་ཏུ་མི་འབྱུང་ནས། དགེ་སློང་གིས་བདག་ཉིད་ལ་ཉེ་བར་སྟོན་པས་འདུ་ཤེས་བསྒྱུར་ཅིང་། བཟོད་པ་དང་། འདོད་པ་དང་། བློ་གྲོས་དང་། རྟོག་པ་དང་། ལྟ་བ་བསྒྱུར་ཏེ། འདི་སྐད་ཅེས་དགེ་སློང་གང་གིས་གྲོང་མེད་པའི་དགོན་པའི་གནས་དེ་ན་གནས་ཤིང་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཅུང་ཟད་ཅིག་ལ་བརྟེན་ནས། འཇིག་རྟེན་པའི་ལམ་གྱིས་ཉོན་མོངས་པ་དག་རྣམ་པར་མནན་པས། འདོད་པ་ལ་འདོད་ཆགས་དང་། གནོད་སེམས་ངག་རྒྱུད་ལ་ཀུན་ཏུ་མི་འབྱུང་བ་དེ་ཡོད་དོ་ཞེས་ཟེར་ཞིང་འདི་སྐད་ཅེས་ཁོ་བོའོ་ཞེས་ནི་མི་ཟེར་ན་ཉེས་བྱས་སུ་འགྱུར་རོ། །སྡོམ་ལ་ཕན་ཚུན་ཞེ་ནི་འགྲས་པ་དང་། །ཆར་འབབ་པ་དང་མཚན་གྱུར་དང་། །རྒྱལ་པོ་ཁབ་ཀྱི་ཆུ་དྲོན་དང་། །གླང་ཆེན་རྣམས་ཀྱི་སྒྲ་སྐད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུའི་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་ན་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་དང་ཡངས་པ་ཅན་གྱི་ལི་ཙ་བྱི་རྣམས་ཕན་ཚུན་ཞེ་འགྲས་པར་གྱུར་ཏོ། །དེ་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་བའི་ཚོགས་དང་དཔུང་བུ་ཆུང་གི་ཚོགས་གོ་བསྐོན་ཏེ། ཡུལ་སྤོང་བྱེད་གཞོ་མ་པར་བརྩམས་པ་དང་། ཡུལ་སྤོང་བྱེད་ན་གནས་པའི་སྐྱེ་བོའི་ཚོགས་ཀྱིས་ཡངས་པ་ཅན་གྱི་ལི་ཙ་བྱི་རྣམས་ལ། ཤེས་ལྡན་དག་ལུས་འཕགས་མའི་བུམ་ག་དྷར་བྱུང་བའི་རྒྱལ་པོ་མ་སྐྱེས་དགྲས་དཔུང་གི་ཚོགས་ཡན་ལག་པ་ཞི་བ་གླང་པོ་ཆེ་བའི་ཚོགས་དང་། རྟ་བའི་ཚོགས་དང་། ཤིང་རྟ་བའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། ཡུལ་སྤོང་བྱེད་འཇོམས་པར་བྱེད་དོ་ཞེས་ར་མདའ་བ་བཟློག་གོ། །ཡངས་པ་ཅན་གྱི་ལི་ཙ་བྱི་རྣམས་ཀྱིས་ཐོས་ནས་དེ་དག་གིས་ཀྱང་དཔུང་
གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང་། རྟ་བའི་ཚོགས་དང་། ཤིང་རྟ་བའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། ཡངས་པ་ཅན་ནས་འབྱུང་བར་བརྩམས་པ་དང་། དེ་དག་འབྱུང་བ་ན་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་། ཆོས་གོས་ཐོགས་ཏེ། ཡངས་བ་ཅན་དུ་བསོད་སྙོམས་ལ་ཞུགས་སོ། །ཡངས་པ་ཅན་གྱི་ལི་ཙ་བྱི་རྣམས་ཀྱིས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། ཤེས་ལྡན་དག་འདི་ནི་མཆོག་གསུམ་པ་ཡིན་ཏེ། འདིས་མི་ཤེས་པའམ། མི་མཐོང་བའམ། མ་རིག་པའམ། རྣམ་པར་མི་ཤེས་པ་ཅུང་ཟད་ཀྱང་མེད་དོ་ཞེས་གྲག་གིས། བདག་ཅག་གིས་འདི་ལ་བདག་ཅག་གང་རྒྱལ་བར་འགྱུར་བ་དྲི་བར་བྱའོ་སྙམ་ནས། དེ་དག་གིས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་དྲིས་པ། འཕགས་པ། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཡུལ་སྤོང་བྱེད་འཇོམས་པར་བགྱིད་པས། བདག་ཅག་གཡུལ་འགྱེད་པའི་སླད་དུ་མངོན་དུ་མཆི་ན། བདག་ཅག་གང་རྒྱལ་བར་འགྱུར། མོའུ་འགལ་གྱི་བུ་ཆེན་པོས་སྨྲས་པ། བ་སིཥྛའི་རིགས་དག་ཁྱེད་ཅག་རྒྱལ་བར་འགྱུར་རོ། །དེ་དག་འཕགས་པ་མོའུ་འགལ་གྱི་བུ་ཆེན་པོས་བདག་ཅག་རྒྱལ་བར་ལུང་བསྟན་ཏོ། །ཞེས་རངས་པ་དང་། དགའ་བ་དང་། མཆོག་ཏུ་དགའ་བ་དང་མགུ་བ་དང་། ཡིད་བདེ་བ་སྐྱེས་པ་ནས། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་མ་བརྩིས་པ་ཚམ་ཚོམ་མེད་པ་ཁོ་ནར་དེའི་སྟེང་དུ་བརྟུལ་བ་དང་། དེ་ནས་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་ཕམ་པ་དང་། སྐྲག་པ་དང་བཅོམ་པ་དང་། གཞན་རྒྱལ་པ་དང་། རྒྱབ་ཀྱིས་ཕྱོགས་པར་བྱས་ཏེ། ཆུ་ཀླུང་གངྒཱའི་འགྲམ་དུ་ཕྱིན་ཏོ། །ཡངས་པ་ཅན་གྱི་ལི་ཙ་བྱི་རྣམས་རྒྱ་ཆེར་རབ་ཏུ་དགའ་བའི་ཡིད་ཀྱིས་ཕྱི་བཞིན་ཁོ་ནར་འབྲང་བ་དང་། ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་བསམས་པ། ཡངས་པ་ཅན་གྱི་ལི་ཙ་བྱི་འདི་དག་ནི་གདུག་ཅིང་རྣམ་པར་གནོན་པ་ཡིན་པས། གལ་ཏེ་དེ་བདག་གངྒཱའི་
ནང་དུ་ཞུགས་ན་ཡང་འདི་དག་གིས་རྒྱ་མོའམ། མཆིལ་བས་དབྱུང་བས་འབྱིན་པར་བྱེད་ཅིང་ཚུལ་མ་ཡིན་པས་སྡུག་བསྔལ་བར་འགྱུར་བའི་གནས་ཡོད་ཀྱིས་བདག་མངོན་དུ་ཕྱོགས་ཏེ་ཤི་བ་ནི་ལེགས་སོ་སྙམ་དུ་རིག་ནས། དེས་འཆི་བའི་ཤུགས་ཀྱིས་བསྔོས་པ་དང་། དཔུང་ཐམས་ཅད་ཕྱིར་ལོག་ནས། ཡངས་པ་ཅན་གྱི་ལི་ཙ་བྱི་རྣམས་ཕམ་པ་དང་། སྐྲག་པ་དང་བཅོམ་པ་དང་། གཞན་རྒྱལ་བ་དང་། རྒྱབ་ཀྱིས་ཕྱོགས་པར་བྱས་ནས། གར་ཡང་མ་འཁོར་བར་ཡངས་པ་ཅན་དུ་ཞུགས་ནས་སྒོ་དག་བཅད་དེ། ར་བའི་ཁར་སྦྲེངས་ནས་འདུག་གོ་།ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲ་གཡུལ་ལས་རྣམ་པར་རྒྱལ་ཞིལ། །ཡུལ་སྤོང་བྱེད་བཅོམ་ནས་རྒྱལ་པོའི་ཁབ་ཏུ་སོང་ངོ་། །དེ་ནས་ཡངས་པ་ཅན་གྱི་ལི་ཙ་བྱི་རྣམས་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་དག་ན། འཕགས་པ་མོའུ་འགལ་གྱི་བུ་ཆེན་པོས་ཁྱེད་ཅག་རྒྱལ་བར་འགྱུར་རོ་ཞེས་བདག་ཅག་ལ་ལུང་བསྟན་ན། དེ་ཅི་གལ་ཏེ་བདག་ཅག་གི་ཡངས་པ་ཅན་ཕྲོགས་པར་གྱུར་ན། དེ་ལྟ་ན་རྒྱལ་བར་འགྱུར་རམ་ཞེས་སྨོད་པར་བྱེད། ཕྱར་ཀ་གཏོང་བར་ཕྱེད། ཁ་ཟེར་བར་བྱེད་དོ། །དེ་དག་སྨོད་པར་བྱེད་པ་ན། དྲུག་སྡེ་དག་ཀྱང་བསོད་སྙོམས་ལ་ཞུགས་ནས། དེ་དག་གིས་དེ་དག་ལ་འཕྱ་བ་ཐོས་ནས། དྲུག་སྟེ་དག་གིས་སྨྲས་པ། ཤེས་ལྡན་ངག་ཁྱོད་ཅག་སུ་ལ་སྨོད། ཁྱེད་ཅག་ལའོ། །ངེད་ཀྱིས་ཅི་བྱས། འཕགས་པ་མོའུ་འགལ་གྱི་བུ་ཆེན་པོས་ཁྱེད་ཅག་རྒྱལ་བར་འགྱུར་རོ་ཞེས་བདག་ཅག་ལ་ལུང་བསྟན་ན། དེ་ཅི་གལ་ཏེ་བདག་ཅག་གི་ཡངས་པ་ཅན་ཕྲོགས་པར་གྱུར་ན་དེ་ལྟ་ན་རྒྱལ་བར་འགྱུར་རམ། དྲུག་སྡེ་དག་གིས་སྨྲས་པ། ཤེས་ལྡན་དག་དང་པོར་གཡུལ་སྤྲད་པ་གང་ཡིན་པ་དེར་སུ་རྒྱལ། ཁོ་བོ་ཅག་གོ། །གལ་ཏེ་ཁྱེད་ཅག་རྒྱལ་ན་དེའི་འོག་ཏུ་ཅིའི་ཕྱིར་ཁྱེད་ཅག་ཕྱིར་ལྡོག་པར་མི་བྱེད། ཅི་ཡུལ་མ་ག་དྷ་བཅོམ་སྟེ་རྒྱལ་པོ་ཁབ་ལེན་པར་འདོད་དམ། ཁྱེད་ཅག་གི་ཧ་ཅང་མནན་ན་ཝ་ཡང་སེང་གེ་ལྟ་བུར་འགྱུར་རོ་ཞེས་བྱ་བ་མ་ཐོས་སམ། དེ་དག་སྤོབས་པ་མེད་པར་གྱུར་ནས་ཅང་མི་སྨྲ་བར་འཁོད་པ་དང་། དྲུག་སྟེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་ཟིན་མོད་
ཀྱི་འོན་ཀྱང་དོན་ཉུང་དུ་དེ་ལ་ལྟུང་བ་བྱུང་གིས། ཚུར་ཤེག་དེའི་གན་དུ་དོང་ལ་འཆགས་སུ་གཞུག་གོ་ཞེས་དེ་དག་ཟས་ཀྱི་བྱ་བ་བྱས་ནས་ཕྱག་འཚལ་ཏེ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང་། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་གྱ། གནས་བརྟན་ཇེ་སྐབས་ཕྱེ་ཤིག །ཚེ་དང་ལྡན་པ་དག་ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཡངས་པ་ཅན་གྱི་ལི་ཙ་བྱི་རྣམས་ལ་རྒྱལ་བར་ལུང་བསྟན་ཏམ། ལུང་བསྟན་ཏོ། །ཅི་གལ་ཏེ་དེ་དག་གི་ཡངས་པ་ཅན་ཕྲོགས་པར་གྱུར་ན་དེ་ལྟ་ན་རྒྱལ་བར་འགྱུར་རམ། ཁྱོད་ལྷུང་བཟེད་ནག་པོས་འཚོ་བར་མི་བྱེད་པས། དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས་ཁྱེད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག །ཚེ་དང་ལྡན་པ་དག་ལྟུང་བ་མ་མཐོང་ངོ་། །དྲུག་སྡེ་རྣམས་ཀྱིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ་།བོས་ཤིག །བོས་སོ། །ཚེ་དང་ལྡན་པ་གཎྜཱི་རྡུངས་ཤིག །མོའུ་འགལ་གྱི་བུ་ཆེན་པོ་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར། གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང་། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ་། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎྜཱི་བརྡུངས་པ་ན། ཚེ་དང་ལྡན་པ་སུ་ཞིག །ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་རྨེད་པར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་
བར་བྱ་བའམ། གཞི་ནས་མགུ་བར་བྱ་བའམ། འབྱིན་པ་མི་བགྱིད་དེ། འདི་ལྟར་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདྲུམས་པ་ལྟུང་བས། བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས་དེས་ན་མིའི་ཆོས་བླ་མ་དམ་བཅའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་མཐོ་མ་བཙམས་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་སྤྱན་སྔར་དེང་ལ་དོན་འདི་ཞུས་ཤིག །བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་དུ་ཟུང་ཞིག །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གཡུལ་ངོར་དང་པོ་མི་མ་ཡིན་པ་དག་གཡུལ་འགྱེད་ཅིང་། དེའི་འོག་ཏུ་མི་རྣམས་གཡུལ་འགྱེད་དེ། གང་དུ་མི་མ་ཡིན་པ་རྣམས་རྒྱལ་བར་འགྱུར་བ་དེར་མི་རྣམས་ཀྱང་རྒྱལ་བར་འགྱུར་བས་དེའི་ཕྱིར་དགེ་སློང་མོའུ་འགལ་གྱི་བུ་ཆེན་པོས་ཡངས་པ་ཅན་གྱི་ལི་ཙ་བྱི་རྣམས་ལ་ལུང་བསྟན་པ་དེའི་ཚེ་ན། ཡངས་པ་ཅན་པའི་མི་མ་ཡིན་པ་རྣམས་ཀྱིས་རྒྱལ་པོའི་ཁབ་པའི་མི་མ་ཡིན་པ་རྣམས་ཕམ་པར་བྱས་སོ། །གང་གི་ཚེ་དེ་དག་གངྒཱའི་འགྲམ་དུ་ཕྱིན་པ་དེའི་ཚེ་ན། རྒྱལ་པོ་ཁབ་པའི་མི་མ་ཡིན་པ་དག་གིས་ཡངས་པ་ཅན་པའི་མི་མ་ཡིན་པ་དག་ཕམ་པར་བྱས་སོ། །གལ་ཏེ་དགེ་སློང་མོའུ་འགལ་གྱི་བུ་ཆེན་པོ་ལ་དེ་ཡང་དྲིས་པར་གྱུར་ན། དགེ་སློང་མོའུ་འགལ་གྱི་བུ་ཆེན་པོས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མོའུ་འགལ་གྱི་བུ་ཆེན་པོ་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །ཇི་ལྟར་ཡངས་པ་ཅན་པ་དག་གིས་སྔར་རྒྱལ་
བར་བྱས་ནས། ཕྱིས་རྒྱལ་པོ་མ་སྐྱེས་དགྲས་གངྒཱའི་འགྲམ་དུ་འཆི་བའི་ཤུགས་ཀྱིས་བསྡོས་པས་ཕམ་པར་བྱས་པ་དེ་བཞིན་དུ་རྒྱལ་པོ་མ་སྐྱེས་དགྲས་སྔར་རྒྱལ་བ་བྱས་ནས། ཕྱིས་ཡངས་པ་ཅན་པ་དག་གིས་གངྒཱའི་འགྲམ་དུ་འཆི་བའི་ཤུགས་ཀྱིས་བསྔོས་ནས་ཕམ་པར་བྱས་པ་ཡང་དེ་བཞིན་རྒྱས་པར་སྦྱར་བར་བྱའོ། །སངས་རྒྱས་བཅོམ་ལྡན་འདས་ཡངས་པ་ཅན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་ན་མུ་སྟེགས་ཅན་རྣམས་ཀྱིས་ལོ་བཅུ་གཉིས་སུ་ཐན་པ་འབྱུང་བར་བསྟན་ཏོ། །ཚེ་དང་ལྡན་པ་མོའུ་འགལ་གྱི་བུ་ཆེན་པོ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་ཡངས་པ་ཅན་དུ་བསོད་སྙོམས་ལ་ཞུགས་པ་དང་། དེ་ལ་ཡངས་པ་ཅན་གྱི་ལི་ཙ་བྱི་རྣམས་ཀྱིས་དྲིས་པ། འཕགས་པ་ཡུན་ཇི་སྲིད་ཀྱིས་ལྷས་ཆར་འབེབས་པར་འགྱུར། དེས་སྨྲས་པ། ཤེས་ལྡན་དག་ཉི་མ་བདུན་འདས་ནས་སོ། །དེ་དག་འཕགས་པ་མོའུ་འགལ་གྱི་བུ་ཆེན་པོས་ཉི་མ་བདུན་འདས་ནས་ལྷས་ཆར་འབེབས་པར་འགྱུར་རོ་ཞེས་ལུང་བསྟན་ཏོ་ཞེས་དེ་དག་གི་ཁྱིམ་དང་བང་བ་ན་འདུག་པའི་འབྲུ་གང་དག་ཡིན་པ་དེ་དག་ཀྱང་ཕྱི་རོལ་ཏུ་ཁྱེར་ཏེ་བོར་རོ། །ཇི་ཙམ་ན་ཉི་མ་བདུན་འདས་ནས་ལྷས་འབྲུག་བསྒྲགས་ཤིང་སྒྲ་ཕྱུང་ནས་ས་རྒྱས་བཏབ་སྟེ་བཏང་བ་དང་། དེ་དག་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་ན། ཤེས་ལྡན་དག་མུ་སྟེགས་ཅན་རྣམས་དམ་པ་ཡིན་གྱིས་ཤཱཀྱའི་བུའི་དགེ་སྦྱོང་རྣམས་ནི་དེ་ལྟ་མ་ཡིན་ཏེ། རྟག་ཏུ་འགྲོ་བའི་ཤིང་ལྗོན་པ་བཞིན་དུ་ངུར་སྨྲིག་དག་གིས་ལུས་དག་དཀྲིས་ཤིང་འཁོད་པར་ཟད་ཀྱི་ཆུང་ཟད་ཀྱང་མི་ཤེས་སོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དེ་དག་སྨོད་པར་བྱེད་པ་ན་དྲུག་སྡེ་དག་ཀྱང་བསོད་སྙོམས་ལ་ཞུགས་ནས་དེ་དག་གིས་དེ་དག་སྨོད་པ་ཐོས་ནས་དྲུག་སྡེ་དག་གིས་སྨྲས་པ། ཤེས་ལྡན་དག་ཁྱེད་ཅག་སུ་ལ་སྨོད། ཁྱེད་ཅག་ལའོ། །ངེད་ཀྱིས་ཅི་བྱས། མུ་སྟེགས་ཅན་རྣམས་ཀྱིས་ལོ་བཅུ་གཉིས་སུ་ཐན་པ་འབྱུང་བ་བསྟན་ན་འཕགས་པ་མོའུ་འགལ་གྱི་བུ་ཆེན་པོས་ཉི་མ་བདུན་འདས་
ནས་ལྷས་ཆར་འབེབས་པར་འགྱུར་རོ་ཞེས་ལུང་བསྟན་ནས། བདག་ཅག་གིས་ཁྱིམ་དང་བང་བ་ན་འདུག་པའི་འབྲུ་གང་དག་ཡིན་པ་དེ་དག་ཀྱང་ཕྱི་རོལ་ཏུ་ཁྱེར་ཏེ་བོར་ན་ལྷས་ཆར་མ་ཕབ་བོ། །དྲུག་སྡེ་དག་གིས་སྨྲས་པ། ཤེས་ལྡན་དག་མུ་སྟེགས་ཅན་རྣམས་ཀྱི་ཀུན་དུ་སྤྱོད་པ་ནི་གལ་ཏེ་སྤྲིན་ཀྱང་ཡོད། སྤྲིན་ལས་འབྲུག་ཀྱང་གྲག །གློག་ཀྱང་འབྱུང་། ཕྱོགས་བཞི་ནས་རླུང་བསིལ་བ་དག་ཀྱང་ལྡང་། ལྷས་ཁད་ཀྱིས་དལ་བུ་དལ་བུས་ཆར་ཅུང་ཟད་ཀྱང་འབེབས་པ་དེའི་ཚེ་ན། དེ་དག་དང་འཇིག་རྟེན་དག་ཀྱང་ལྷས་གདོན་མི་ཟ་བར་ཆར་འབེབས་སོ་ཞེས་ཟེར་ན། ཆར་ཆེར་བབ་ཅིང་ས་རྒྱས་བཏབ་པར་གྱུར་ན་ལྟ་སྨོས་ཀྱང་ཅི་དགོས་པ་ཡིན་ནོ། །འདི་ལྟར་ཅི་འཕགས་པ་མོའུ་འགལ་གྱི་བུ་ཆེན་པོས་ལོ་ཏོག་ཐམས་ཅད་འགྲུབ་པར་འགྱུར་རོ་ཞེས་ལུང་བསྟན་ཏམ། དེ་དག་སྤོབས་པ་མེད་པར་གྱུར་ནས་ཅང་མི་སྨྲ་བར་འཁོད་པ་དང་། དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་ཟིན་མོད་ཀྱི། འོན་ཀྱང་དོན་ཉུང་དུ་དེ་ལ་ལྟུང་བ་བྱུང་གིས་ཚུར་ཤེག་དེའི་གན་དུ་དོང་ལ་འཆགས་སུ་གཞུག་གོ་ཞེས་དེ་དག་ཟས་ཀྱི་བྱ་བ་བྱས་ནས་ཕྱག་འཚལ་ཏེ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང་། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་གྱ། གནས་བརྟན་ཇེ་སྐབས་ཕྱེ་ཤིག །ཚེ་དང་ལྡན་པ་དག་ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །མུ་སྟེགས་ཅན་རྣམས་ཀྱིས་ལོ་བཅུ་གཉིས་སུ་ཐན་པ་འབྱུང་ངོ་ཞེས་བསྟན་ན། ཁྱོད་ཀྱིས་ཆར་འབབ་པར་འགྱུར་རོ་ཞེས་ལུང་བསྟན་གྱིས། ཆོས་གོས་ཀྱི་གྲྭ་རྫབ་ཀྱིས་མ་རུངས་པར་གྱུར་ན་མི་རུང་གིས་ཐེག་ཅིག །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གི་བསོད་སྙོམས་ཀྱང་མི་རྙེད་ཀྱིས། ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག །ཚེ་དང་ལྡན་པ་དག་ལྟུང་བ་མ་མཐོང་ངོ་། །དྲུག་སྡེ་རྣམས་ཀྱིས་སྨྲས་པ། ཚེ་དང་ལྡན་པ་དག་བཅོམ་
ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་དབྱུང་བའི་ལས་བྱའོ་ཞེས་གསུངས་པས། དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ་།བོས་ཤིག །བོས་སོ། །ཚེ་དང་ལྡན་པ་དག་གཎྜཱི་རྡུངས་ཤིག །མོའུ་འགལ་གྱི་བུ་ཆེན་པོ་དོན་ཉུང་དུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང་། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ་། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎྜཱི་བརྡུངས་པ་ན། ཚེ་དང་ལྡན་པ་སུ་ཞིག་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་རྨེད་པར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་མི་བྱེད་དེ། འདི་ལྟར་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འདྲལ་བར་བགྱིད། ལྷུང་བཟེད་ནག་པོས་འཚོ་བར་མི་བགྱིད་པས། དེས་ན་མིའི་ཆོས་བླ་མ་དམ་བཅའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས་དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས། དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་མཐོ་མ་བཙམས་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས། དེའི་སྤྱན་སྔར་དེང་ལ་དོན་འདི་ཞུས་ཤིག །བཅོམ་ལྡན་འདས་ཀྱིས་ཁྱེད་ལ་ཇི་ལྟར་ལུང་སྟོན་པ་དེ་དེ་ཁོ་ན་བཞིན་ཟུངས་ཤིག །སྐབས་
དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་ལྔ་དང་། རྐྱེན་ལྔ་ཡིན་ཏེ། ལྔ་གང་ཞེ་ན། འདི་ལྟར་སྤྲིན་ཡང་ཡོད་གློག་ཀྱང་འབྱུང་། སྤྲིན་ལས་འབྲུག་ཀྱང་གག །ཕྱོགས་བཞི་ནས་རླུང་བསིལ་བ་དག་ཀྱང་ལྡང་། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་ས་གཞི་ཆེན་པོ་འདི་ལས་མེའི་ཁམས་མངོན་པར་འཕགས་ནས། དེས་ཆར་པ་དེ་བར་མ་དོ་ཁོ་ནར་སྐམ་པར་བྱེད་དེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་དང་པོ་དང་རྐྱེན་དང་པོ་ཡིན་ནོ། །གཞན་ཡང་སྤྲིན་ཡང་ཡོད། གློག་ཀྱང་འབྱུང་། སྤྲིན་ལས་འབྲུག་ཀྱང་གྲག །ཕྱོགས་བཞི་ནས་རླུང་བསིལ་བ་དག་ཀྱང་ལྡང་། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་ནམ་མཁའ་ལ་མི་མཉམ་པའི་རླུང་དག་ལྡང་ཞིང་དེས་ཆར་པ་དེ་ཌ་ན་ད་ཀའི་དགོན་པ་དག་དང་། ཀ་ལིང་ཀའི་དགོན་པ་དག་དང་། མ་ཏང་ཀའི་དགོན་པ་དག་ཏུ་འབེབས་པར་བྱེད་དེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་། མི་རྟོག་པ་ཐན་པ་ཆེན་པོའི་རྒྱུ་གཉིས་པ་དང་རྐྱེན་གཉིས་པ་ཡིན་ནོ། །གཞན་ཡང་སྤྲིན་ཡང་ཡོད་གློག་ཀྱང་འབྱུང་། སྤྲིན་ལས་འབྲུག་ཀྱང་གྲག །ཕྱོགས་
བཞི་ནས་རླུང་བསིལ་བ་དག་ཀྱང་ལྡང་། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་ལྷའི་བུ་ཆར་གྱི་ཤུགས་ཅན་དག་རབ་ཏུ་མྱོས་པར་གནས་པ་དང་། བག་མེད་པར་གནས་ཤིང་། དེ་དག་རབ་ཏུ་མྱོས་པར་གནས་པ་དང་། བག་མེད་པར་གནས་པས་ལྷས་དུས་དང་དུས་སུ་ཆུའི་རྒྱུན་ལེགས་པར་འབེབས་སུ་མི་སྟེར་ཏེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་གསུམ་པ་དང་། རྐྱེན་གསུམ་པ་ཡིན་ནོ། །གཞན་ཡང་སྤྲིན་ཡང་ཡོད་གློག་ཀྱང་འབྱུང་། སྤྲིན་ལས་འབྲུག་ཀྱང་གྲག །ཕྱོགས་བཞི་ནས་རླུང་བསིལ་བ་དག་ཀྱང་ལྡང་། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་མི་རྣམས་ཆོས་མ་ཡིན་པའི་འདོད་ཆགས་ཀྱིས་ཆགས་པ་དང་། འདོད་པ་དཀའ་བས་ཟིལ་གྱིས་ནོན་པ་དང་། ཆོས་ལོག་པས་དཀྲིས་པར་གྱུར་ན། ཆོས་མ་ཡིན་པའི་འདོད་ཆགས་ཀྱིས་ཆགས་པ་དང་། འདོད་པ་དཀའ་བས་ཟིལ་གྱིས་ནོན་པ་དང་། ཆོས་ལོག་པས་དཀྲིས་པ་དེ་དག་ལ་ལྷས་དུས་དང་དུས་སུ་ཆུའི་རྒྱུན་ལེགས་པར་འབབ་ཏུ་མི་སྟེར་ཏེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་བཞི་པ་དང་། རྐྱེན་བཞི་པ་ཡིན་ནོ། །གཞན་ཡང་སྤྲིན་ཡང་ཡོད་གློག་ཀྱང་འབྱུང་། སྤྲིན་ལས་འབྲུག་ཀྱང་གྲག །ཕྱོགས་བཞི་ནས་རླུང་བསིལ་བ་དག་ཀྱང་ལྡང་། ལྟས་མཁན་དག་ཀྱང་ལྷས་ཆར་འབེབས་པར་འགྱུར་རོ་ཞེས་སྟོན་མོད་ཀྱི། འོན་ཀྱང་ལྷ་མ་ཡིན་གྱི་དབང་པོ་སྒྲ་གཅན་རྒྱ་མཚོ་ཆེན་པོ་ནས་མངོན་པར་འཕགས་ནས། དེས་ཆར་པ་དེ་ལག་པ་གཉིས་ཀྱིས་བཟེད་ཅིང་རྒྱ་མཚོ་ཆེན་པོར་ལྡུགས་པར་བྱེད་དེ། འདི་ནི་ལྟས་མཁན་དག་གིས་ལྷས་ཆར་འབེབས་པར་འགྱུར་རོ་ཞེས་སྟོན་ཀྱང་མི་རྟོག་པ་ཐན་པ་ཆེན་པོའི་རྒྱུ་ལྔ་པ་དང་། རྐྱེན་ལྔ་པ་ཡིན་ནོ། །དགེ་སློང་དག་འདི་ལྟར་དེའི་ཚེ་ལྷས་ཆར་ཕབ་མོད་ཀྱི། དེ་ན་ལྷ་མ་ཡིན་གྱི་དབང་པོ་སྒྲ་གཅན་རྒྱ་མཚོ་ཆེན་པོ་ནས་མངོན་པར་འཕགས་ནས། དེས་ཆར་པ་དེ་ལག་པ་གཉིས་ཀྱིས་བཟེད་ཅིང་རྒྱ་མཚོ་ཆེན་པོར་བླུགས་སོ། །ཅི་དེ་དག་གིས་ལོ་ཏོག་ཐམས་ཅད་གྲུབ་པར་འགྱུར་རམ་ཞེས་དྲིས་སམ། གལ་ཏེ་དགེ་སློང་མོའུ་འགལ་གྱི་བུ་ཆེན་པོ་ལ་དེ་ཡང་དྲིས་པར་གྱུར་ན། དགེ་སློང་མོའུ་འགལ་གྱི་བུ་ཆེན་པོས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མོའུ་འགལ་གྱི་བུ་ཆེན་པོས་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་ན་ཡངས་པ་ཅན་ན་གཅེར་བུ་པའི་ཉན་ཐོས་ཤིག་འདུག་པ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་
མོའུ་འགལ་གྱི་བུ་ཆེན་པོ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། ཡངས་པ་ཅན་དུ་བསོད་སྙོམས་ལ་ཞུགས་སོ། །དེ་མཐར་གྱིས་བསོད་སྙོམས་རྒྱུ་བ་ན། དེའི་ཁྱིམ་དུ་ཞུགས་པ་དང་། དེས་བསམས་པ་འཕགས་པ་མོའུ་འགལ་གྱི་བུ་ཆེན་པོ་འདི་ནི་མཆོག་གསུམ་པ་སྟེ། འདིས་མི་ཤེས་པའམ། མ་མཐོང་བའམ། མ་རིག་པའམ། རྣམ་པར་མི་ཤེས་པ་ཅུང་ཟད་ཀྱང་མེད་དོ་ཞེས་གྲག་གིས་བདག་གིས་འདི་ལ་བདག་གི་ཆུང་མ་སྦྲུམ་པ་འདི་ལས་ཁྱེའུའམ། བུ་མོའམ་ཅི་ཞིག་སྐྱེ་བར་འགྱུར་བ་གསུངས་ཤིག་ཅེས་དྲི་བར་བྱའོ་སྙམ་དུ་རིག་ནས། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བདག་གི་མཆིས་བྲང་འདི་སྦྲུམ་ན་ཅི་འདིའི་མངལ་ན་ཁྱེའུ་མཆིས་སམ་འོན་ཏེ་བུ་མོ་མཆིས། དེས་སྨྲས་པ། བཞིན་བཟང་ཁྱེའུའོ། །འཇིག་རྟེན་ནི་འབྱོར་པ་འདོད་པས་དེ་རངས་པ་དང་། དགའ་བ་དང་། རབ་ཏུ་དགའ་བས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་བཟའ་བ་དང་བཅའ་བ་གཙང་བ་གསོད་པས་ལྷུང་བཟེད་བཀང་སྟེ་བྱིན་ནས་སྨྲས་པ། འཕགས་པ་ཡང་གཤེགས་སུ་གསོལ། ཚེ་དང་ལྡན་པ་མོའུ་འགལ་གྱི་བུ་ཆེན་པོས་ཨ་རོག་གྱ་ཞེས་སྨྲས་ཏེ་སོང་ངོ་། །དེའི་ཁྱིམ་དང་ཧ་ཅང་མི་རིང་བ་ན་གཅེར་བུ་པ་ཞིག་འདུག་པ་དེས། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལྷུང་བཟེད་བཀང་སྟེ་སོང་པ་མཐོང་ནས་། དེས་བསམས་པ། བདག་གི་སློང་མོ་སྟེར་བའི་ཁྱིམ་གཅིག་པུ་ཡོད་པ་གང་ཡིན་པ་དེར་ཤཱཀྱའི་བུ་དགེ་སྦྱོང་དག་རྒྱུ་བར་འགྱུར་བ་ནི་མ་ལེགས་ཀྱིས་དེའི་ཕྱིར་ཇེ་ཁྱིམ་བདག་དེའི་གན་དུ་སོང་ལ་དེས་ཁྱིམ་བདག་དང་ལྷན་ཅིག་གཏམ་ཅི་ཞིག་བྱས་པར་གྱུར་པ་དྲིའོ་སྙམ་ནས་དེ་མྱུར་བ་མྱུར་བར་ཁྱིམ་བདག་གི་གན་དུ་སོང་སྟེ་སྨྲས་པ། ཁྱིམ་བདག་དགེ་སྦྱོང་མོའུ་འགལ་གྱི་བུ་ཆེན་པོ་འོངས་སམ། འོངས་སོ། ཁྱོད་ཀྱིས་ཅུང་ཟད་དྲིས་སམ། དྲིས་སོ། །ཅི་དྲིས་བདག་གི་མཆིས་བྲང་འདི་སྦྲུམ་ན་ཅི་འདིའི་མངལ་ན་ཁྱེའུ་མཆིས་སམ། འོན་ཏེ་བུ་མོ་མཆིས་ཤེས་དྲིས་པ་དང་། དེ་ན་རེ། ཁྱེའུའོ་ཞེས་ཟེར་རོ། །གཅེར་བུ་པ་དེ་རྟོག་གེའི་ཤེས་པ་ལ་མཁས་པས་བརྩི་བར་བརྩམས་པ་དང་།
ཇི་ཙམ་ན་བུ་མོར་མཐོང་ནས། དེ་བཞིན་སྒྱུར་བར་བྱེད། ལག་པ་གཉིས་འདྲིལ་བར་བྱེད་དོ། །ཁྱིམ་བདག་དེས་གཅེར་བུ་པ་དེ་ལ་དྲིས་པ། ཅིའི་ཕྱིར་བཞིན་སྒྱུར་བར་བྱེད། ལག་པ་གཉིས་འདྲིལ་བར་བྱེད། གཅེར་པུས་སྨྲས་པ། ཁོ་བོས་བུ་མོར་མཐོང་གི་ཁྱེའུར་མ་མཐོང་ངོ་། །ཁྱིམ་བདག་དེས་སྤྱོས་ནས་དཔྲལ་བར་དཔྲལ་རྩ་གསུམ་བསྒྲེང་ཞིང་ཁྲོ་གཉེར་བྱས་ཏེ། སྨྲས་པ། གཅེར་བུ་པ་སྒྲེ་བྱི་ཁྱོད་ཅི་ཤེས། ཁྱོད་པས་འཕགས་པ་མོའུ་འགལ་གྱི་བུ་ཆེན་པོའི་མཁྱེན་པ་ཆེས་དྲི་མ་ཅན་ཡིན་ནམ། འཕགས་པ་མོའུ་འགལ་གྱི་བུ་ཆེན་པོས་ཁྱེའུའོ་ཞེས་ལུང་བསྟན་ན་ཁྱོད་བུ་མོའོ་ཞེས་ཟེར་རམ། དེ་དེ་ལྟར་ཚར་བཅད་ནས་ཡང་བརྩི་བར་བརྩམས་པ་དང་། བུ་མོ་ཉིད་དུ་མཐོང་ནས། ཀུན་ནས་དཀྲིས་པས་སྨྲས་པ། གལ་ཏེ་དགེ་སྦྱོང་ཤཱཀྱའི་བུའི་ཉིད་ཀྱིས་ལུང་བསྟན་དུ་ཟིན་ཀྱང་། དེ་ལྟ་ན་ཡང་འདི་ནི་བུ་མོ་ཉིད་ཡིན་གྱི། ཁྱེའུ་མ་ཡིན་ནོ། །ཇི་ཙམ་ན་དེ་ཟླ་བ་དགུ་འདས་ཏེ་བཙས་པ་ལས་བུ་མོ་ཞིག་སྐྱེས་ནས་ཁྱིམ་བདག་དེ་ནང་མི་དང་བཅས་བ་གཅེར་བུ་པ་དག་དམ་པ་ཡིན་གྱི་ཤཱཀྱའི་བུའི་དགེ་སྦྱོང་རྣམས་ནི་དེ་ལྟ་མ་ཡིན་ཏེ། འཕགས་པ་མོའུ་འགལ་གྱི་བུ་ཆེན་པོས་ཁྱེའུའོ་ཞེས་ལུང་བསྟན་ན། འདི་བུ་མོར་གྱུར་ཏོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །ཐོས་པ་གཅིག་ནས་གཅིག་ཏུ་བརྒྱུད་པས་ཡངས་པ་ཅན་ན་གནས་པའི་སྐྱེ་བོའི་ཚོགས་ཀྱང་ལམ་པོ་ཆེ་དང་སྲང་དང་བཞི་མདོ་དང་། སུམ་མདོ་དག་ན་སྨོད་པ་ལ་ཞུགས་པར་གྱུར་ཏོ། །དེ་དག་སྨོད་པར་བྱེད་པ་ན་དྲུག་སྡེ་དག་སྔ་དྲོ་ཤམ་ཐབས་དགོས། ལྷུང་བཟེད་དང་ཆོས་གོས་ཐོགས་ཏེ། ཡངས་པ་ཅན་དུ་བསོད་སྙོམས་ལ་ཞུགས་པ་དང་། དེ་དག་གིས་དེ་དག་སྨོད་པ་ཐོས་སོ། །ཐོས་ནས་སྨྲས་པ། ཤེས་ལྡན་དག་ཁྱེད་ཅག་སུ་ལ་སྨོད། ཁྱེད་ཅག་ལའོ། །ངེད་ཀྱིས་ཅི་བྱས། འཕགས་པ་མོའུ་འགལ་གྱི་བུ་ཆེན་པོས་གཅེར་བུ་པའི་ཉན་ཐོས་ཀྱི་ཆུང་མའི་མངལ་ན་ཁྱེའུ་ཡོད་དོ་ཞེས་ལུང་བསྟན་ན། དེ་ལས་ད་བུ་མོ་བཙས་སོ། །དྲུག་སྡེ་དག་གིས་སྨྲས་པ། ཤེས་ལྡན་དག་འཇིག་རྟེན་ཐམས་ཅད་ཤེས་པ་རྒྱ་མཚོལ་འཁྲུལ་པ་ཡོད་ཀྱིས། བཅོམ་ལྡན་འདས་ཉག་གཅིག་ཆོས་རྣམས་ལ་སྐྱོབ་པ་ཡིན་གྱི། སྐྱོབ་པ་གཞན་
མེད་དོ། །གཞན་ཡང་མིའི་སྐྱེ་དགུ་རྣམས་ལ་ཁྱེའུའམ་བུ་མོ་བཙའ་བར་ཟད་ཀྱི་གཞན་ཅི་ཞིག་ཏུ་འགྱུར། ཅི་ཁྱི་ཞིག་གམ། འོན་ཏེ་སྤྲེའུ་ཞིག་ཏུ་འགྱུར་སྙམ་མམ། དེ་དག་སྤོབས་པ་མེད་པར་གྱུར་ཏེ། ཅང་མི་སྨྲ་བར་འཁོད་པ་དང་དྲུག་སྡེ་དག་གིས་སྨྲས་པ། དགའ་བོ་ཉེ་དགའ་དེ་དག་ལ་གོ་བར་བྱས་ཟིན་མོད་ཀྱི་དོན་ཉུང་ངུ་དེ་ལ་ལྟུང་བ་བྱུང་གིས་ཚུར་ཤེག་དེའི་གན་དུ་དོང་ལ་འཆགས་སུ་གཞུག་གོ་ཞེས་དེ་དག་ཟས་ཀྱི་བྱ་བ་བྱས་ནས་ཕྱག་འཚལ་ཏེ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ག་ལ་བ་དེར་དོང་ནས་ཕྱིན་པ་དང་། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །གནས་བརྟན་ཕྱག་འཚལ་ལོ། །ཚེ་དང་ལྡན་པ་དག་ཨ་རོག་ཁྱ་ནང་མེད་པར་གྱུར་ཅིག གནས་བརྟན་ཇེ་སྐབས་ཕྱེད་ཤིག །ཚེ་དང་ལྡན་པ་དག་ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །གནས་བརྟན་གྱིས་ཅི་གཅེར་བུ་པའི་ཉན་ཐོས་ཀྱི་ཆུང་མའི་མངལ་ན་ཁྱེའུ་ཡོད་དོ་ཞེས་ལུང་བསྟན་ཏམ། ལུང་བསྟན་ཏོ། །བཞུད་ཅིག་དང་དགའ་བ་འཕེལ་བ་ཉམས་སུ་མྱོང་ཞིང་འབྲུ་མར་དང་བུ་རམ་ཡང་ཐོབ་པར་འགྱུར་རོ། །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས། དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་། དེ་ཡང་འབྲས་བུ་མེད་པར་གྱུར་ཏོ། །ཁྱོད་ཀྱིས་སྤྱོད་ཡུལ་བསྲེགས་པས་ཁོ་བོ་ཅག་གིས་བསོད་སྙོམས་ཀྱང་མི་ཐོབ་ཀྱིས་ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག །ཚེ་དང་ལྡན་པ་དག་ལྟུང་བ་མ་མཐོང་ངོ་། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ་།བོས་ཤིག །བོས་སོ། །ཚེ་དང་ལྡན་པ་གཎྜཱི་རྡུངས་ཤིག །མོའུ་འགལ་གྱི་བུ་ཆེན་པོ་དོན་ཉུང་དུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང་། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ་། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎྜཱི་བརྡུངས་པ་ན་ཚེ་
དང་ལྡན་པ་དག་སུ་ཞིག །ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་འདྲི་བར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདྲུམས་པ་ལྟུང་བས། བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས། དེས་ན་མིའི་ཆོས་བླ་མ་དམ་བཅའ་ཞིང་ཀུན་ཤེས་པ་བརྡ་སྤྲོད་པར་བགྱིད། དེ་ཡང་འབྲས་བུ་མ་མཆིས་པར་གྱུར་ནས། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས་དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག །བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་ཟུང་ཞིག་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གནས་བཞི་པོ་འདི་དག་ནི་བསམ་པར་མི་བྱ་བ་དག་ཡིན་ཏེ། གང་དག་སེམས་པར་བྱེད་པ་དག་མྱོས་པ་དང་། རྨོངས་པར་འགྱུར་ཞིང་སེམས་རྣམ་པར་གཡེངས་པ་ཐོབ་པར་འགྱུར་པ་ཡིན་ནོ། བཞི་གང་ཞེ་ན་འདི་ལྟ་སྟེ། བདག་ལ་སེམས་པ་དང་། འཇིག་རྟེན་ལ་སེམས་པ་དང་། སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་དང་། སངས་རྒྱས་རྣམས་ཀྱི་སངས་རྒྱས་ཀྱི་ཡུལ་ལོ། །འདི་ལྟར་གང་གི་ཚེ་དགེ་སློང་མོའུ་འགལ་གྱི་བུས་ལུང་བསྟན་པ་དེའི་ཚེ་ན། དེ་ཁྱེའུར་ཡོད་པ་ཡིན་ལ། ཕྱིས་དེའི་ལས་ཀྱི་རྣམ་པར་སྨིན་པས་མཚན་གྱུར་ཏོ། །གལ་ཏེ་དགེ་སློང་མོའུ་འགལ་གྱི་བུ་ལ་དེ་ཡང་དྲིས་པར་གྱུར་ན། དགེ་
སློང་མོའུ་འགལ་གྱི་བུས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མོའུ་འགལ་གྱི་བུས་འདུ་ཤེས་དེ་ལྟ་བུས། ལུང་བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན། འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་ཁྱིམ་བདག་ཅིག་འདུག་པ་དེས། གང་དགེ་སློང་གི་དགེ་འདུན་ལ་སོ་སོར་རིག་པར་མ་བྱས་པར་ཟས་སྦྱིན་པ་དེ་འཕྲལ་ཁོ་ན་ལོངས་སྤྱོད་དག་གིས་མངོན་པར་འཕེལ་ལོ་ཞེས་ཐོས་སོ། །ཐོས་ ནས་ཀྱང་དེ་འདི་སྙམ་དུ་སེམས་ཏེ། དེ་ནི་ནོར་གྲུབ་པའི་ཐབས་བཟང་པོ་ཡིན་གྱིས། བདག་གིས་ཀྱང་དགེ་སློང་གི་དགེ་འདུན་ལ་སོ་སོར་རིག་པར་མ་བྱས་པར་ཟས་སྦྱིན་པར་བྱའོ་སྙམས་ནས་དེས་སྲང་དུ་སོང་སྟེ། ཤ་མང་པོ་ཉོས་ནས། དེའི་འོག་ཏུ་ཟངས་ཀྱི་ནང་དུ་ཞུན་མར་མང་པོ་དང་སྦྱར་བའི་ཐུག་པ་བསྐོལ་ནས་གྲོང་ཁྱེར་གྱི་སྒོར་སྒོ་བ་ལ་ཀྱེ་ནང་རྗེ་དགེ་སློང་གང་ལ་ལ་ཞིག་བསོད་སྙོམས་ལ་འཇུག་ན་དེ་ཁོ་བོའི་ཁྱིམ་དུ་ཐོང་ཞིག །ཅེས་སྤྲིང་པ་དང་། སྒོ་བ་དེས་སྨྲས་པ། ཁྱིམ་བདག་དེ་བཞིན་དུ་བཏང་ངོ་ཞེས་དགེ་སློང་བསོད་སྙོམས་ལ་འཇུག་པ་གང་མཐོང་བ་དེ་ལ་འཕགས་པ་ཁྱིམ་བདག་ཆེ་གེ་མོ་ཞིག་དེང་། དགེ་སློང་རྣམས་ལ་བསོད་སྙོམས་འབུལ་གྱིས་དེའི་སྡུམ་པར་བཞུད་ཅིག་ཅེས་སྨྲས་པ་དང་། དེ་དེའི་ཁྱིམ་དུ་སོད་ངོ་། །དེ་བཞིན་དུ་སྒོ་བས་བསོད་སྙོམས་པ་ཐམས་ཅད་ལ་བསྒོ་བ་དང་། བསོད་སྙོམས་པ་ཐམས་ཅད་ཁྱིམ་བདག་དེའི་ཁྱིམ་དུ་དོང་ངོ་། །དེ་ནས་ཁྱིམ་བདག་དེས་ཤིན་ཏུ་སྣུམ་པའི་ཤའི་ཐུག་པ་དག་གིས་དེ་དག་སོ་སོའི་ལྷུང་བཟེད་བཀང་སྟེ་བྱིན་ནོ། །དེའི་ཉིན་མོ་ནམ་མཁའ་སྤྲིན་གྱིས་ཁེབས་ཤིང་ཡུལ་ངན་་བྱུང་བར་གྱུར་ནས། དགེ་སློང་དག་ཟན་ཟོས་ནས་ལྷུང་བཟེད་སྣུམ་པོ་འདི་དག་རྩུབ་པར་བྱ་མི་ནུས་ཀྱིས་དེ་ན་ཆུ་དྲོན་ཡིད་ཀྱིས་ཆུ་དྲོན་གྱི་གན་དུ་སོང་སྟེ། བཀྲུ་བར་བྱའོ་ཞེས་དེ་དག་ཆུ་དྲོན་གྱི་གན་དུ་སོང་སྟེ། བཀྲུ་བར་བརྩམས་པ་དང་། ཇི་ཙམ་ན་དགེ་སློང་གཞོན་ནུ་ཞིག་ལ་ཆུ་དྲོན་འདི་གང་ནས་འོང་སྙམ་པའི་ཚུལ་བཞིན་ཡིད་ལ་བྱེད་པ་བྱུང་ནས། དེ་དང་ཡང་ཧ་ཅང་མི་རིང་བ་ན་ཚེ་དང་ལྡན་
པ་ཉེ་དགའ་ལྷུང་བཟེད་འཁྲུ་བར་བྱེད་དེ། དེའི་གན་དུ་སོང་ནས་བཙུན་པ་ཉེ་དགའ་ཆུ་དྲོན་འདི་གང་ནས་འོང་ཞེས་དྲིས་པ་དང་། དེ་དང་ཡང་ཧ་ཅང་མི་རིང་པ་ནས། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལྷུང་བཟེད་འཁྲུ་བར་བྱེད་ནས་ཉེ་དགས་སོང་ལ་དོན་ཉུང་ངུ་འདི་ལ་དྲིས་ཤིག་ཅེས་གཞོན་ནུ་ཚེ་དང་ལྡན་པ་མོའུ་འགལ་གྱི་བུ་ཆེན་པོའི་གན་དུ་བཏང་བ་དང་། གཞོན་ནུ་དེ་སྤྱོད་ལམ་ཞི་བ་རྒྱ་ཆེན་པོས་དེའི་གན་དུ་སོང་སྟེ། གུས་པ་དང་བཅས་པས་དྲིས་པ། གནས་བརྟན་ཆབ་དྲོན་འདི་ག་ལས་མཆི། དེས་སྨྲས་པ། ཚེ་དང་ལྡན་པ་མཚོ་ཆེན་པོ་མ་དྲོས་པ་ནས་སོ། །ཉེ་དགས་ཐོས་ནས་དེས་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པར་མ་བྱེད་ཅིག །ཆོས་ཀྱི་ཁྲིད་བྱེད་རྣམ་པར་མ་དཀྲུགས་ཤིག །ཆོས་ཀྱི་མངལ་མ་རྟོལ་ཅིག །འདི་ལྟར་ཁོ་བོ་ཅག་ལ་རྟོག་པ་མེད་ཀྱང་ཅི་ལུང་ཡང་མེད་དམ། བཅོམ་ལྡན་འདས་ཀྱིས་མཚོ་ཆེན་པོ་མ་དྲོས་པའི་ཆུ་ནི་ཡན་ལག་བརྒྱད་དང་ལྡན་པ་ཡིན་ཏེ། བསིལ་བ་དང་། མངར་བ་དང་། ཡང་བ་དང་། འཇམ་པ་དང་། དང་བ་དང་། དྲིང་བ་མེད་པ་དང་། འཐུང་བ་ན་མགུལ་པ་ལ་མི་གནོད་པ་དང་། འཐུངས་ན་ལྟོ་ལ་མི་གནོད་པའོ་ཞེས་གསུངས་ན། དེའི་ཕྱིར་ཁྱོད་ཀྱིས་ཡན་ལག་དང་པོ་ཉིད་ཀྱིས་བསླུས་སོ། །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག །ཚེ་དང་ལྡན་པ་ལྟུང་བ་མ་མཐོང་ངོ་། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་འབྱུང་བའི་ལས་བྱའོ་ཞེས་གསུངས་པས་དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ་།བོས་ཤིག །བོས་སོ། །ཚེ་དང་ལྡན་པ་གཎྜཱི་རྡུངས་ཤིག །མོའུ་དགལ་གྱི་བུ་ཆེན་པོ་དོན་ཉུང་ངུ་ལ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་པས། དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང་། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ་། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎྜཱི་བརྡུངས་པ་ན་ཚེ་དང་ལྡན་པ་
དག་སུ་ཞིག་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་འདྲི་བར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདྲུམས་པ་ལྟུང་བས། བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས། དེས་ན་མིའི་ཆོས་བླ་མ་དམ་བཅའ་ཞིང་ཀུན་ཤེས་པ་བརྡ་སྤྲོད་པ་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ན། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས། དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར། སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག །བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་ཟུང་ཞིག །སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ནོ། །དེ་དེ་བཞིན་ཏེ། ཆུ་དྲོན་དེ་ནི་མཚོ་ཆེན་པོ་མ་དྲོས་པ་ཁོ་ན་ལས་འོང་ངོ་། །དགེ་སློང་རྣམས་ཀྱིས་གསོལ་པ། བཅོམ་ལྡན་འདས་གལ་ཏེ་ཆབ་དེ་མཚོ་ཆེན་པོ་མ་དྲོས་པ་ལས་མཆི་ན། ཅིའི་སླད་དུ་དྲོ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ཆུ་དེ་ཉིད་ཚ་བའི་སེམས་ཅན་དམྱལ་བ་ལྔ་བརྒྱའི་སྟེང་ནས་འོང་བའི་ཕྱིར་རོ། །གལ་ཏེ་དགེ་སློང་མོའུ་འགལ་གྱི་བུ་ལ་དེ་ཡང་དྲིས་པར་གྱུར་ན། དགེ་སློང་མོའུ་འགལ་གྱི་བུས་དེ་ཡང་ལུང་སྟོན་པར་འགྱུར་རོ། །དགེ་སློང་དག་དགེ་སློང་མོའུ་འགལ་གྱི་བུས་འདུ་ཤེས་དེ་ལྟ་བུས་ལུང་
བསྟན་པ་ལ་ལྟུང་བ་མེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོ་ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པས་རྫིང་བུ་དལ་གྱིས་འབབ་ཀྱི་འགྲམ་ན་གླང་པོ་ཆེ་གཙོ་བོ་རབ་ཏུ་མང་པོ་དག་གིས་སྒྲ་སྐད་ཐོས་སོ། །དེའི་ཚེ་ཚེ་དང་ལྡན་པ་ཉེ་དགའ་འཁོར་དེ་ཉིད་ན་འདུག་ཅིང་མཐུན་པར་གྱུར་ནས་དེས་སྨྲས་པ། ཚེ་དང་ལྡན་པ་མདོ་སྡེའི་མཐའ་ལ་གནོད་པ་མ་བྱེད་ཅིག །ཆོས་ཀྱི་ཁྲིད་བྱེད་རྣམ་པར་མ་དཀྲུགས་ཤིག །ཆོས་ཀྱི་མངལ་མ་རྟོལ་ཅིག །འདི་ལྟར་བདག་ཅག་ལ་རྟོགས་པ་མེད་ཀྱང་ཅི་ལུང་ཡང་མེད་དམ། བཅོམ་ལྡན་འདས་ཀྱིས་ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པའི་གཟུགས་ཀྱི་འདུ་ཤེས་རྣམ་པར་བཤིག་ཅིང་སྒྲའི་འདུ་ཤེས་དང་བྲལ་ལོ་ཞེས་གསུངས་ན། དེའི་ཕྱིར་ཇི་ལྟར་གཟུགས་ཀྱི་འདུ་ཤེས་རྣམ་པར་བཤིག་ཅིང་། སྒྲའི་འདུ་ཤེས་དང་བྲལ་བ་དེས་གཟུགས་དག་མཐོང་བར་འགྱུར་ཞིང་། སྒྲ་དག་ཐོས་པར་འགྱུར་ཏེ། དེ་ནི་གནས་མེད་དོ། །ཁྱོད་ལྷུང་བཟེད་ནག་པོས་འཚོ་བར་མི་བྱེད་པས་དེས་ན་ཀུན་ཤེས་པ་བརྡ་སྤྲོད་པར་བྱེད་ཅིང་དེ་ཡང་འབྲས་བུ་མེད་པར་གྱུར་ཏེ། ཁྱོད་ཀྱིས་སྤྱོད་ཡུལ་བསྲེགས་པས། བདག་ཅག་གིས་བསོད་སྙོམས་ཀྱང་མི་རྙེད་ཀྱིས། ཁྱོད་ལ་ལྟུང་བ་བྱུང་བ་དེ་ཆོས་བཞིན་དུ་སླར་མཛོད་ཅིག །ཚེ་དང་ལྡན་པ་ལྟུང་བ་མ་མཐོང་ངོ་། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྟུང་བ་མ་མཐོང་བའི་ཕྱིར་གནས་ནས་དབྱུང་བའི་ལས་བྱའོ་ཞེས་གསུངས་པས། དེའི་ཕྱིར་འདི་ལ་ཅིའི་ཕྱིར་ལྷག་པར་བཏང་སྙོམས་སུ་བྱ། ཁང་སྐྱོང་སུ་ཡིན། ཆེ་གེ་མོ་ཞིག་གོ་།བོས་ཤིག །བོས་སོ། །ཚེ་དང་ལྡན་པ་གཎྜཱའི་རྡུངས་ཤིག །མོའུ་འགལ་གྱི་བུ་དོན་ཉུང་དུ་ལ་ལྟུང་བ་ཆོས་བཞིན་དུ་ཕྱིར་མི་བྱེད་པས་དེ་ལྟུང་བ་མ་མཐོང་བའི་ཕྱིར་གནས་ནས་དབྱུང་བར་བྱའོ། །ཁང་སྐྱོང་དགེ་འདུན་གྱི་གནས་བརྟན་གྱི་གན་དུ་སོང་བ་དང་། དྲུག་སྡེ་དག་ཀྱང་དེ་དང་ལྷན་ཅིག་དོང་ངོ་། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་
དགེ་འདུན་གྱི་གནས་བརྟན་བྱེད་དེ། དེ་རྟག་ཏུ་གཎྜཱའི་བརྡུངས་པ་ན། ཚེ་དང་ལྡན་པ་དག །སུ་ཞིག །ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་བྱེད་ཅེས་ཆོས་ཀྱི་དབང་དུ་བྱས་པ་འདྲི་བར་བྱེད་དོ། །དྲུག་སྡེ་དག་གིས་སྨྲས་པ། གནས་བརྟན་སུ་ཡང་ཡོངས་སུ་གནས་པའམ། གཞི་ནས་ཡོངས་སུ་གནས་པའམ། མགུ་བར་བྱ་བའམ། གཞི་ནས་མགུ་བར་བྱ་བའམ། འབྱིན་པར་མི་བགྱིད་དེ། འདི་ལྟར་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདྲུམས་པ་ལྟུང་བས། བཅོམ་ལྡན་འདས་ཀྱི་བསྟན་པ་འདྲལ་བར་བགྱིད་དེ། ལྷུང་བཟེད་ནག་པོས་འཚོ་བར་མི་བགྱིད་པས། དེས་ན་མིའི་ཆོས་བླ་མ་དམ་བཅའ་ཞིང་ཀུན་ཤེས་པ་བརྡ་སྤྲོད་པར་བགྱིད་དེ། དེ་ཡང་འབྲས་བུ་མ་མཆིས་པར་གྱུར་ནས། དེས་སྤྱོད་ཡུལ་བསྲེགས་པས་བདག་ཅག་གིས་བསོད་སྙོམས་ཀྱང་མི་རྙེད་དེ། དེ་ལ་ལྟུང་བ་བྱུང་བ་ཆོས་བཞིན་དུ་སླར་མི་བགྱིད་པས། དེ་ལྟུང་བ་མ་མཐོང་བའི་སླད་དུ་གནས་ནས་དབྱུང་བའི་ལས་བགྱིའོ། །ཚེ་དང་ལྡན་པ་དག་དགེ་སློང་གནས་བརྟན་ལ་མཐོ་མ་འཚམ་པར་འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་དག་ལ་བླ་ན་མེད་པའི་མངའ་བརྙེས་པ། ཐེ་ཚོམ་ཐམས་ཅད་གཅོད་པར་མཛད་པ་ཡིན་གྱིས་དེའི་གན་དུ་དེང་ལ་དོན་འདི་ཞུས་ཤིག །བཅོམ་ལྡན་འདས་ཀྱིས་ཁྱེད་ལ་ཇི་སྐད་ལུང་སྟོན་པ་དེ་དེ་ཁོ་ན་བཞིན་དུ་ཟུང་ཞིག །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ནོ། །དེ་དེ་བཞིན་ཏེ། ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་པའི་གཟུགས་ཀྱི་འདུ་ཤེས་རྣམ་པར་བཤིག་ཅིང་། སྒྲའི་འདུ་ཤེས་དང་བྲལ་བས། གཟུགས་ཀྱི་འདུ་ཤེས་རྣམ་པར་བཤིག་ཅིང་སྒྲའི་འདུ་ཤེས་དང་བྲལ་བ་དེས་གཟུགས་དག་མཐོང་བར་མི་འགྱུར་ཞིང་། སྒྲ་དག་ཐོས་པར་མི་འགྱུར་ཏེ་དེ་ནི་གནས་མེད་དོ། །འདི་ལྟར་དགེ་སློང་མོའུ་འགལ་གྱི་བུ་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་
པ་དག་ཐོབ་པ་ཡིན་ཏེ། དེ་ནི་མྱུར་དུ་སྙོམས་པར་འཇུག་ཅིང་རྣམ་པར་ལྡང་བར་བྱེད་པས། དེས་སྙོམས་པར་ཞུགས་པའི་སེམས་ཉེ་བར་རྟོགས་ཤིང་རྣམ་པར་ལངས་པའི་སེམས་ནི་མ་རྟོགས་ཏེ། དགེ་སློང་དག་དགེ་སློང་མོའུ་འགལ་གྱི་བུ་རྣམ་པར་ལངས་པས་སྒྲ་དེ་ཐོས་སོ། །དགེ་སློང་དག་དགེ་སློང་མོའུ་འགལ་གྱི་བུས་འདུ་ཤེས་དེ་ལྟ་བུས་ལུང་བསྟན་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གི་ཉེན་པ་ལ་ལྟུང་བ་མེད་དོ། །ཕམ་པར་འགྱུར་བ་བཞི་པ་རྫོགས་ཏེ། ཕམ་པར་འགྱུར་བ་རྣམས་རྫོགས་སོ།། །།