ཉི་ཤུ་གཉིས་པ། ལྷུན་བཟེད་འཚོལ་བའི་སྤང་བ་བསྟན་པ།
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་སྤོས་འཚོང་གི་ཁྱེའུ་ཞིག་འདུག་པ་དེས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་དོ། །བསོད་སྙོམས་པ་ཞིག་ཀྱང་སྔ་དྲོ་ཤམ་ཐབས་བགོས་ལྷུང་བཟེད་དང་། ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེས་བསོད་སྙོམས་བརྒྱུས་ཏེ་སྲང་དུ་ཕྱིན་པ་དང་། སྤོས་འཚོང་གི་ཁྱེའུ་དེས་དེ་མཐོང་ནས་སྨྲས་པ། འཕགས་པ་བདག་གིས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་ཀྱིས་གལ་ཏེ་བཞེད་ན་སྣོམས་ཤིག་བཞིན་བཟངས་བདག་ལ་ལྟུང་བཟེད་ཡོད་དོ། །འཕགས་པ་གལ་ཏེ་དགེ་སློང་གཞན་འགའ་ཞིག་ལྷུང་བཟེད་འཚལ་བ་མཆིས་ན་དེ་གཏང་དུ་གསོལ། གཏང་བར་བྱའོ། །དེ་ནས་བསོད་སྙོམས་པ་དེས་མཉན་ཡོད་དུ་བསོད་སྙོམས་ལ་བརྒྱུས་ནས་རྒྱལ་བྱེད་ཀྱི་ཚལ་དུ་སོང་སྟེ། དེས་ཟན་ཟོས་ནས་ལྷུང་བཟེད་འཁྲུ་བ་ན་དགེ་སློང་རྣམས་ལ་སྨྲས་པ། ཚེ་དང་
ལྡན་པ་དག་སྲང་ག་གེ་མོ་ཞིག་ན་སྤོས་འཚོང་གི་ཁྱེའུ་ཞིག་འདུག་པ་དེས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེད་ཀྱིས་ཁྱེད་ཅག་ལས་གང་ལྷུང་བཟེད་འདོད་པ་དེ་སོང་ཤིག །དེ་དང་ཧ་ཅང་ཐག་མི་རིང་བ་ན་ཉེ་དགའ་འདུག་པ་དེས་ཐོས་ནས་དེས་བསམས་པ། དེ་ལྷུང་བཟེད་ནག་པོ་ཅན་འགའ་ཞིག་གིས་ཐོས་ནས་རབ་ཏུ་རྒྱུག་པར་གྱུར་ན་མི་རུང་གིས་སྨད་པར་བྱའོ་སྙམ་ནས་དེས་དེ་ལ་སྨྲས་པ། ཚེ་དང་ལྡན་པ་ཁྱོད་དད་པས་བྱིན་བ་ཟོས་ནས་ལྷུང་བཟེད་ཀྱི་གཏམ་དང་། ཆོས་གོས་ཀྱི་གཏམ་ལས་གཞན་པའི་གཏམ་འགའ་ཡང་མེད་མོད། དེས་བསམས་པ། འཇིག་རྟེན་ན་འདོད་པའི་བདག་ཉིད་ཅན་གང་ཇི་སྙེད་པ་དེ་དག་དང་ཉེ་དགའ་མཚུངས་པ་ཡིན་ན་འདིས་ཀྱང་རེ་ཞིག་བདག་སྨད་པར་གྱུར་ན་གལ་ཏེ་དགེ་སློང་གནས་བརྟན་གཞན་འགའ་ཞིག་གིས་ཐོས་པར་གྱུར་ན་དེས་རྒྱ་ཆེར་སྨད་པར་འགྱུར་རོ་སྙམ་ནས་དེ་ཅང་མི་སྨྲ་བར་འདུག་གོ །ཉེ་དགས་དེ་བཀར་ཏེ་སྨས་པ། ཚེ་དང་ལྡན་པ་ཁྱོད་ཀྱི་མཁན་པོ་དང་ཁོ་བོ་བཤེས་པས་དེའི་ཕྱིར་ཁྱོད་སྨད་ཀྱིས་མ་གཤེ་ཤིག །གནས་བརྟན་གལ་ཏེ་བདག་ཡང་སྨྲ་བར་གྱུར་ན་ཁྱོད་ཀྱིས་བདག་ལ་ཡང་སྨད་པར་མཛོད་ཅིག །ཚེ་དང་ལྡན་པ་ཁོ་བོ་ཡང་ཉེ་བར་མ་ཞིབ་ཙམ་དུ་ཟད་ཀྱི་ཅི་ལྷུང་བཟེད་དེ་ལྷུང་བཟེད་མ་ཡིན་ནམ། གནས་བརྟན་སྔ་མ་ཉིད་ཀྱང་སྨྲ་བར་མི་བགྱི་བ་ལགས་ཀྱིས་འཚལ་ཏོ། །ཚེ་དང་ལྡན་པ་དེ་ལྟ་མོད་ཀྱི་འོན་ཀྱང་རེ་ཞིག་སྨྲོས་ཤིག །གནས་བརྟན་སྲང་ཆེ་གེ་མོ་ཞིག་ན་སྤོས་འཚོང་གི་ཁྱེའུ་ཞིག་མཆིས་པ་དེས་ལྷུང་བཟེད་ཤིན་དུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ཞིག་རྙེར་ནས་དེའི་མཆིང་ནས་གལ་ཏེ་དགེ་སློང་ལྷུང་བཟེད་འཚལ་བ་འཇའ་ཞིག་མཆིས་ན་དེ་བཏང་དུ་གསོལ་ཞེས་མཆིའོ། དེ་ནི་དེ་ཙམ་དུ་ཟད་དེ། དེ་ཡང་ཉེ་བར་མ་ཞི་བ་ཙམ་ཁོ་ནར་ཟད་དོ། །དེ་ནས་ཉེ་དགའ་སྣམ་སྦྱར་གྱོན་ཏེ་འགྲོས་བསྐྱེད་ནས་ཕྱ་ར་ར་སོང་བ་དང་། སྤོས་འཚོང་གི་ཁྱེའུ་དེས་དེ་འགྲོས་བསྐྱེད་དེ་འོང་བ་ཐག་རིང་པོ་ཁོ་ན་ནས་མཐོང་ནས་དེས་བསམས་པ། དགེ་སྦྱོང་ཧྲུལ་པོ་འགྲོས་འདི་ལྟ་བུས་འོང་བ་འདིས་བདག་གི་ལྷུང་
བཟེད་འདི་ཕྲོགས་པར་འགྱུར་དུ་འོང་ངོ་སྙམ་ནས་དེས་ལྷུང་བཟེད་དེ་བླངས་ཏེ་མཛོད་ཚེའི་འོག་ཏུ་བཅུག་སྟེ་བཞག་པ་དང་ཉེ་དགས་དེ་སྦེད་པའི་ཚེ་མཐོང་ནས་དེས་སྨྲས་པ། བཞིན་བཟངས་ཅི་ལྷུང་བཟེད་འདི་ནལ་གྱི་བུ་ཡིན་ནམ་ཅིན་དེ་ཕྱིར་སྦེད་པར་བྱེད་ཅེས་དེས་ལག་པ་བརྐྱང་སྟེ་ལྷུང་བཟེད་བླངས་ནས་སྨྲས་པ། བཞིན་བཟངས་ཨ་རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣམ་འབྱོར་གྱི་ཚོགས་དང་། དོན་གྱི་མཆོག་ཐོབ་པ་དང་། ལྷ་དང་མི་རྣམས་ཀྱི་ནང་ན་སྣོད་དུ་འགྱུར་བར་གྱུར་ཅིག །འཕགས་པ་བདག་ཅག་ཚོང་པ་དག་ནི་ཁེ་སྤོགས་འཚལ་བས་འཚོ་བ་ལགས་པས་འདི་རིན་མ་མཆིས་པར་མི་དབུལ་ཏེ་འདི་ལྟར་རིན་གྱི་ཕྱིར་འབུལ་ལོ། །བཞིན་བཟངས་ཅི་ཁྱོད་དྲང་སྲོང་གི་སྣོད་འཚོང་བར་བྱེད་དམ། ཚིགས་སུ་བཅད་པ་ཡང་སྨྲས་པ། གལ་ཏེ་སྐྱེས་བུ་ས་སྣོད་ཀྱིས། །གསེར་གྱི་སྣོད་ནི་ཐོབ་གྱུར་ན། །དེ་ཡིས་མྱ་ངན་ཅི་ཕྱིར་བྱ། །བསླུས་པ་མེད་པར་ཁོ་བོས་མཐོང་། །འཕགས་པ་ཁྱོད་མང་དུ་གསུང་མོད་ཀྱི་འོན་ཀྱང་རིན་མ་མཆིས་པར་མི་འབུལ་ལོ། །ཉེ་དགའས་སྨྲས་པ། ཁྱོད་ཀྱི་ལྷུང་བཟེད་ལ་ལྷག་པར་ཆགས་པ་འདིས་ཡི་དགས་ལྐོག་ལྦ་ཅན་དག་གི་ནང་དུ་སྐྱེ་བར་བྱ་དགོས་སོ་ཞེས་དེ་དེ་སྐད་སྤྱོ་བར་བྱེད་པ་ན་ཁྱིམ་བདག་ཅིག་ཕྱོགས་དེར་འོགས་ནས་དེས་སྨྲས་པ། འཕགས་པ་ཕྱག་འཚལ་ལོ། །བཙུན་པ་ཉེ་དགའ་ཕྱག་འཚལ་ལོ། །ཉེ་དགས་སྨྲས་པ། བཞིན་བཟངས་ཁྱོད་ཀྱི་ཕྱག་སྐམ་པོ་འདིས་ཅི་བྱ། འཕགས་པ་བདག་ལ་བཙུན་པ་ཉེ་དགས་བཀའ་སྩལ་པ་གང་ཞིག་བདག་གིས་མ་བསྒྲུབས། ལྷུང་བཟེད་འདི་ཉོས་ཏེ་བྱིན་ཅིག །ཁྱིམ་བདག་དེས་སྤོས་འཚོང་གི་ཁྱེའུ་དེལ་སྨྲས་པ། བཞིན་བཟངས་ལྷུང་བཟེད་འདིརིན་ཅི་ཙམ། འདི་དང་འདི་ཙམ་མོ། །ཁོ་བོས་ཁྱོད་ལ་སྦྱིན་ནོ། །སྤེས་འཚོང་གི་ཁྱེའུ་དེས་ལྷུང་བཟེད་དེ་ཁྱིམ་བདག་དེ་ལ་བྱིན་ནས་ཁྱིམ་བདག་དེས་ཀྱང་ཉེ་དགའ་ལ་ཕུལ་ལོ། །ཉེ་དགའས་སྨྲས་པ། ཨ་རོག་ཁྱ་སྦྱིན་པ་འདིས་ཁྱོད་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་
མཆོག་ཐོབ་པ་དང་། ལྷ་དང་མི་རྣམས་ཀྱི་ནང་ན་སྣོད་དུ་འགྱུར་བར་གྱུར་ཅིག །ཁྱིམ་བདག་དེ་སོང་བ་དང་། ཉེ་དགས་སྤོས་འཚོང་གི་ཁྱེའུ་དེ་ལ་སྨྲས་པ། བཀྲེན་བ་ཁྱོད་ཀྱིས་ཉེ་དགས་ལྷུང་བཟེད་ཀྱི་རིན་སྤྱོད་དུ་འཇུད་མི་ནུས་སྙམ་དུ་ཤེས་སམ། ཁྱོད་ཀྱི་ལྷུང་བཟེད་ལ་ལྷག་པར་ཆགས་པ་འདིས་ཡི་དགས་ལྦ་བ་ཅན་དག་གི་ནང་དུ་སྐྱེ་བར་བྱ་དགོས་སོ། །འཕགས་པ་ཅི་ཞིག་སྦྱོར་མཆིས། ཁྱོད་ཀྱིས་ཀྱང་ལྷུང་བཟེད་ཐོབ་ལ། བདག་གིས་ཀྱང་རིན་ཐོབ་ཀྱིས་བཞུད་ཅིག །ཉེ་དགའ་ཡང་ལྷུང་བཟེད་ཁྱེར་ཏེ་གཙུག་ལག་ཁང་དུ་སོང་ནས་དེས་ལྷུང་བཟེད་དེ་དགེ་སློང་རྣམས་ལ་བསྟན་ཏེ་སྨྲས་པ། ཚེ་དང་ལྡན་པ་དག་ལྟོས་ཤིག །ཁོ་བོའ་ལྷུང་བཟེད་ཅི་འདྲ། གཞོན་ནུ་ཞིག་གིས་སྨྲས་པ། གནས་བརྟན་ཅི་ཁྱོད་ལ་ལྷུང་བཟེད་གཞན་མ་མཆིས་སམ། ཡོད་དོ། །འོ་ན་གནས་བརྟན་གྱིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་དུ་རུང་ངམ། དགྲ་བོ་རྣམས་ཀྱི་གྲེ་བར་རྐང་པས་མནན་ནས་སོ། །གནས་བརྟན་ལ་དགྲ་བོ་དག་ཀྱང་མཆིས་སམ། གང་གི་ཕྱིར་ཁྱོད་ཁོ་བོའ་ལྷུང་བཟེད་གཉིས་པ་ཡང་མི་བཟོད་བས་ཇེ་ཁྱོད་ཁོ་བོའ་དགྲ་བོ་ཐུ་བོ་ཡིན་ནོ། །དགེ་སློང་དོན་ཉུང་དུ་དག་ཅིའི་ཕྱིར་དགེ་སློང་དག་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་ཚོལ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་ འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་ཚོལ་བ་བདེན་ནམ། བཙུན་པ་མད་དོ། སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་
ཡིན་ནོ་ཞེེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློག་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་གིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་བར་མི་བྱའོ། །འདུལ་བ་རྣམ་པར་འབྱེད་པ། བམ་པོ་སུམ་བཅུ་རྩ་བཞི་པ། བཅོམ་ལྡན་འདས་ཀྱིས་དགེ་སློང་གིས་ལྷུང་བཟེད་ཡོད་ཅིང་བདོག་བཞིན་དུ་ལྷུང་བཟེད་གཞན་བཙལ་བར་མི་བྱའོ་ཞེས་བཀའ་སྩལ་ནས་བསོད་སྙོམས་པ་ཞིག་གི་ལྷུང་བཟེད་ཅུང་ཞིག་རྡོལ་ནས་དེས་དེ་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང་དེས་ཕྱེ་དག་རྙེད་ནས་དེས་དེ་དག་ལྷུང་བཟེད་ཀྱི་སྣོད་ཀྱིས་མནོས་སོ། །འབྲས་ཅན་གཤེར་བ་རྙེད་ནས་དེས་དེ་དག་ལྷུང་བཟེད་ཀྱིས་མནོས་པ་དང་དེ་ནས་ཟགས་པས་ཕྱེ་དག་གཤེར་བར་གྱུར་ཏེ་དེ་དག་གིས་ལྷུང་བཟེད་ཀྱི་སྣོད་མ་རུང་བར་གྱུར་ནས་དེ་སྦྲང་བུ་དག་གིས་ཡོངས་སུ་བསྐོར་བར་གྱུར་པ་དང་། དེ་ལ་ཁྱེའུ་དང་། བུ་མོ་དག་གིས་སྨྲས་པ། འཕགས་པས་ནོར་ཅན་དང་། ཚོང་དཔོན་དང་། དེད་དཔོན་དག་བཞིན་དུ་འཁོར་མང་པོར་འགྱུར་བའི་ལས་བྱས་བས་སྦྲང་བུ་དག་གིས་ཡོངས་སུ་བསྐོར་ཅིང་བཞུད་དོ། །ཁྱིམ་བདག་མགོན་མེད་ཟས་སྦྱིན་གྱིས་དེ་མཐོང་ནས་སྨྲས་པ། བྱིས་པ་དག་ཅིའི་ཕྱིར་འཕགས་པ་ལ་མཐོ་འཚམ་པར་བྱེད། ཁྱིམ་བདག་འཕགས་པ་ལ་ཐོ་བ་ཙམ་དུ་ཅིམ་ཆིས། འཕགས་པས་ནོར་ཅན་དང་། ཚོར་དཔོན་དང་། དེད་དཔོན་དག་བཞིན་དུ་འཁོར་མང་པོ་འགྱུར་བའི་ལས་བགྱིས་པས་སྦྲང་བུ་དག་གིས་ཡོངས་སུ་བསྐོར་ཅིང་བཞུད་དོ། །ཁྱིམ་བདག་མགོན་མེད་ཟས་སྦྱིན་གྱིས་དགེ་སློང་དེ་ལ་སྨྲས་པ། འཕགས་པ་བཅོམ་ལྡན་འདས་ཀྱིས་བསྟན་པ་ཀུན་དུ་མཛེས་པ་ལ་ཁྱོད་ཅི་ཅམ་ཅོལ་བྱེད་། ཁྱིམ་བདག་འདི་ལ་ཅལ་ཅོལ་དུ་གྱུར་པ་ཅི་ཡོད། ཁྱོད་ཀྱིས་ཁོ་བོ་རོལ་མོ་མཁན་གྱི་ཁྱིམ་དང་། འཇུད་མཐུན་མའི་ཁྱིམ་དང་། ཆང་པའི་ཁྱིམ་དང་། རྒྱལ་པོའ་ཕོ་བྲང་དང་། གདོལ་པའི་ཁྱིམ་དུ་ཞུགས་པར་མཐོང་ངམ། འཕགས་བ་འོ་ན་ཅིའི་ཕྱིར་ཁྱོད་བྱིས་པ་དག་གིས་བསྐོར་ཏེ་འཕགས་པར་བྱེད། ཁྱིམ་བདག་ཁོ་བོའ་ལྷུང་བཟེད་འདི་ཟག་གོ །འོ་ན་ཅིའི་ཕྱིར་ལྷུང་བཟེད་གཞན་མི་ཚོལ། བཅོམ་ལྡན་འདས་ཀྱིས་དགེ་སློང་གིས་ལྷུང་བཟེད་ཡོད་
ཅིང་བདོག་བཞིན་དུ་ལྷུང་བཟེད་གཞན་བཙལ་བར་མི་བྱའོ་ཞེས་གསུངས་སོ། །འཕགས་པ་ཁྱོད་ཀྱི་ལྷུང་བཟེད་འདི་འདྲ་བ་ཡོད་ཅིང་བདོག་པ་ཡིན་ནམ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གད་གི་ལྷུང་བཟེད་རྡོལ་བ་དེས་ཀླན་པར་བྱའོ། །བཅོམ་ལྡན་འདས་ཀྱིས་གང་གི་ལྷུང་བཟེད་རྡོལ་བ་དེས་ཀླན་པར་བྱའོ། །ཞེས་བཅའ་བ་མཛད་ནས། དགེ་སློང་དག་ལྷན་པ་སྙི་བ་ལྔ་པོ་བུ་རམ་དང་། རྒྱ་སྐྱེགས་ཀྱི་ཚིགས་མ་དང་། སྤྲ་ཚིལ་དང་། རོ་ཉེ་དང་། ཚོན་མོ་སྟེང་དག་གིས་གློན་པར་བྱེད་ནས། དེ་དག་ཚ་བ་དང་ཕྲད་ནས་ཡང་ཟགས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལྷན་པ་སྙི་བ་ལྔ་པོ་དེ་དག་སྤངས་ཏེ་ལྷན་པ་སྲ་བ་ལྔ་པོ་གཞན་དག་གིས་ཀླན་པར་བྱའོ། །དགེ་སློང་དག་གིས་ལྷན་པ་སྲ་བ་ལྔ་པོ་དག་ཅི་འདྲ་བ་མི་ཤེས་ནས་བཅོམ་ལྡན་འདས་ཀྱིས་བཀལ་སྩལ་པ། ལྷན་རིངས་དང་། ཐམ་ཕྲན་དང་། ལྷན་པ་དང་། ཆུ་སྲིན་གྱི་སོ་ལྟ་བུ་དང་། ཕྱེ་མས་སོ། །དགེ་སློང་རྣམས་ཀྱིས་ཕྱེ་མ་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། །ཕྱེ་མ་གཉིས་ཏེ། ལྕགས་ཀྱི་ཕྱེ་དང་། རྡོའི་ཕྱེ་མའོ། །ལྕགས་ཀྱི་ལྷུང་བཟེད་ལ་ནི་ལྕགས་ཀྱི་ཕྱེ་མས་ཀླན་པར་བྱའོ། །སའི་ལྷུང་བཟེད་ལ་ནི་རྡོའི་ཕྱེ་མས་ཀླན་པར་བྱའོ། །དེ་དག་ཆུར་ཕྱེ་མ་བདར་ཏེ་གློན་པར་བྱེད་ནས་དེ་དེ་བཞིན་དུ་འགོགས་ནས་བཅོམ་ལྡན་འདས་ཀྱིས་བཀའ་སྩལ་པ། འབྲུ་མར་དུ་བདར་བས་ཀླན་པར་བྱའོ། །དེ་དག་ཧ་ཅང་དྲག་ཏུ་སྲེག་པས་དེ་འགོགས་པ་དང་། ཧ་ཅང་ཆུང་དུང་སྲོས་པས་མི་འཆགས་ནས་བཅོམ་ལྡན་འདས་ཀྱིས་བཀའ་སྩལ་པ། ཅི་རན་ཙམ་དུ་བསྲོ་བར་བྱའོ། །ཧ་ཅང་རྩུབ་པོར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བདར་བར་བྱའོ། །དེ་དག་ཆུས་བླུགས་ཏེ་བདར་བར་བྱེད་པས་དེ་ཡང་འགོགས་ནས་བཅོམ་ལྡན་འདས་ཀྱིས་བཀའ་སྩལ་པ། འབྲུ་མར་བླུགས་ཏེ་བདར་བར་བྱའོ། །ས་ལས་བྱས་པའི་ལྷུང་བཟེད་དག་རྡོལ་ནས་བཅོམ་ལྡན་འདས་ཀྱིས་བཀའ་སྩལ་པ། བུར་མ་དང་། འཇིམ་པས་ཀླན་ནས་དེ་དག་བསྲོ་བར་བྱའོ། །བཅོམ་ལྡན་
འདས་ཀྱིས་དེ་ལྟར་ལྷན་པ་ལྔ་པོ་དག་གིས་ཀླན་པར་བྱའོ། །ཞེས་བཅའ་བར་མཛད་ནས། དགེ་སློང་བསོད་སྙོམས་པ་ཞིག་གིས་ས་ལས་བྱས་བའི་ལྷུང་བཟེད་ལག་པ་ནས་ཤོར་ཏེ་གྱོ་དུམ་ལྔར་གྱུར་ནས། དེས་དེ་དག་བུ་གུ་ཕུག་སྟེ་གྱོ་དུམ་དག་སྐུད་པས་བརྒྱུས་ནས་བསོད་སྙོམས་ལ་རྒྱུ་བར་བྱེད་དོ། །བཅོམ་ལྡན་འདས་ཀྱིས་ལྷུང་བཟེད་ལ་ཟས་མེད་པར་བྱའོ་ཞེས་བཀའ་སྩལ་ནས་དེས་དེ་རུང་བར་བྱེད་པ་ན་བཤིག་ཅིང་རྒྱུད་པར་བྱེད་པས་སྔ་དྲོ་ཐམས་ཅད་ཟད་པར་གྱུར་ནས་དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཅི་ཁྱོད་ཀྱི་དགེ་བའི་ཕྱོགས་འདི་ལྟ་སྟེ། བཅིངས་པ་འགྲོ་ལ་བ་འདི་ཁོ་ན་ཡིན་ནམ། དེས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྷུང་བཟེད་ཆག་པ་ལ་ལྷན་པ་སྲ་བལྔ་པོ་དག་གིས་ཀླན་པར་བྱའོ། །ཞེས་བཅའ་བར་མཛད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་རྗེས་སུ་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །དའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ལྷུང་བཟེད་ལྷན་པ་ལྔ་མེད་པ། སྤྱད་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར་ལྷུང་བཟེད་སར་པ་གཞན་ཚོལ་ཞིང་ལྷུང་བཟེད་གྲུབ་ན་སྤང་བའི་ལྟུང་བྱེད་དོ། །དགེ་སློང་དེས་ལྷུང་བཟེད་དེ་དགེ་སློང་གི་འཁོར་ལ་དབུལ་བར་བྱའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་པའི་པར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །ལྷུ་བཟེད་
ལྷན་པ་ལྔ་མེད་པ་ཞེས་བྱ་བ་ནི་ལྷུང་བཟེད་ལྷན་པ་ལྔར་མ་ཚང་བའོ། །སྤྱད་བཟོད་པ་ཡོད་བཞིན་དུ་ཞེས་བྱ་བ་ནི་ཡོངས་སུ་ལོངས་སྤྱད་པར་བཟོད་པ་ཡོད་བཞིན་དུའོ། །བཟང་པོ་འདོད་པའི་ཕྱིར་ཞེས་བྱ་བ་ནི་མཆོག་འདོད་པའི་ཕྱིར་རམ། ཡང་དང་ཡང་འདོད་པའི་ཕྱིར་རོ། །ལྷུང་བཟེད་སར་པ་ཞེས་བྱ་བ་ནི་སར་པ་གཉིས་ཏེ་གསར་པས་སར་པ་དང་། རྙེད་བས་སར་པ་སྟེ། དོན་འདིར་ནི་གཉིས་ཀ་ཡིན་པར་དགོངས་སོ། །གཞན་ཞེས་བྱ་བ་ནི་གཉིས་པའོ། །ཚོལ་ཞིང་ཞེས་བྱ་བ་ནི་ཚོལ་བར་བྱེད་ཅིང་ངོ་། །ལྷུང་བཟེད་གྲུབ་ན་ཞེས་བྱ་བ་ནི་ལྷུང་བཟེད་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དགེ་སློང་དེས་ཞེས་བྱ་བ་ནི་དགེ་སློང་གང་ཡིན་པ་དེས་སོ། །ལྷུང་བཟེད་དེ་ཞེས་བྱ་བ་ནི་ལྷུང་བཟེད་འབྲེལ་པ་མེད་པ་དེའོ། །དགེ་སློང་གི་འཁོར་ལ་དབུལ་བར་བྱའོ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་ལའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་གི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ་ཞེས་བྱ་བ་ལ། དགེ་སློང་གི་དགེ་འདུན་གྱིས་ཀྱང་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་བསྐོ་བར་བྱ་སྟེ། ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱས་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་བས་འགྲོ་བ་དང་། ཞེ་སྔང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། ལྷུང་བཟེད་འབྲེལ་པ་མེད་པ་བྲིམས་པ་དང་མ་བྲིམས་པ་མི་ཤེས་པའོ། །ལྷུང་བཟེད་འབྲེལ་བ་མེད་པ་འབྲིམ་པའི་དགེ་སློང་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང་། ཞེས་སྔང་གིས་མི་འགྲོ་བ་དང་། གཏི་མུག་གིས་མི་འགྲོ་བ་དང་། འཇིགས་པས་མི་འགྲོ་བ་དང་། ལྷུང་བཟེད་འབྲེལ་པ་
མེད་པ་བྲིམས་པ་དང་མ་བྲིམས་པ་ཤེས་པའོ། །འདི་ལྟར་བསྐོ་བར་བྱ་སྟེ། ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྤྲོའམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དེས་གནས་མལ་བཤམ་པ་བྱས་ཏེ། གཎྜཱིབརྡུངས་ནས་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་སྟེ། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་ལལྷུང་བཟེད་འབྲེལ་པ་མེད་པ་འབྲིམ་པར་བསྐོའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྤྲོ་སྟེ། དེའི་སླད་དུ་དགེ་འདུན་གྱིས་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་བསྐོ་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་སྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏེ། །ངས་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་ཚོགས་པའི་དུས་སུ་དགེ་འདུན་ལ་ཚེ་དང་ལྡན་པ་དག་བདག་སང་དགེ་འདུན་ལ་ལྷུང་བཟེད་འབྲེལ་པ་མེད་པ་འབྲིམ་པར་འགྱུར་གྱིས། ཁྱེད་ཅག་ནང་པར་གཎྜཱིབརྡུངས་པ་ན་རང་རང་གི་ལྷུང་བཟེད་དག་ཐོགས་ལ་དགེ་འདུན་གྱི་ནང་དུ་གཤེགས་པར་མཛོད་
ཅིག་ཅེས་བསྒོ་བར་བྱའོ། །དེ་ནས་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་ཕྱི་དེ་ཉིན་པར་གནས་མལ་བཤམ་པ་བྱས་ཏེ། གཎྜཱིབརྡུངས་ནས་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་བར་བྱའོ། །དགེ་སློང་རྣམས་ཀྱིས་ཀྱང་རང་རངགི་ལྷུང་བཟེད་དག་བྱིན་གྱིས་བརླབས་པ་ཕྱུང་ཞིང་ཐོགས་ཏེ་དགེ་འདུན་གྱི་ནང་དུ་འཇུག་པར་བྱའོ། །དེ་ནས་ལྷུང་བཟེད་འབྲེལ་པ་མེད་པ་འབྲིམ་པའི་དགེ་སློང་གིས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་ལྷུང་བཟེད་འབྲེལ་པ་མེད་པ་ཐོགས་ཏེ་རྒན་པའི་མཐའ་ལོགས་སུ་ཕྱག་འཚལ་ནས་དགེ་འདུན་གྱི་གནས་བརྟན་གྱིས་མདུན་དུ་འདུག་སྟེ། གནས་བརྟན་ལྷུང་བཟེད་འདི་ནི་ཤིན་ཏུ་གསལ་བ། དབྱིབས་ལེགས་པ། ལོངས་སྤྱད་པར་བཟོད་པ་ལགས་ཀྱིས་གལ་ཏེ་བཞེད་ན་སྣོམས་ཤིག་ཅེས་ཡོན་ཏན་ཇི་ལྟ་བ་བཞིན་དུ་ལྷུང་བཟེད་འབྲེལ་པ་མེད་པའི་བསྔགས་པ་བརྗོད་དེ་དབུལ་བར་བྱའོ། །དགེ་འདུན་གྱི་གནས་བརྟན་གྱིས་ཀྱང་གལ་ཏེ་འདོད་ན་བླང་བར་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་ལྷུང་བཟེད་དེ་བླངས་ན་དགེ་འདུན་གྱི་གནས་བརྟན་གྱི་ལྷུང་བཟེད་གང་ཡིན་པ་དེ་གནས་བརྟན་གཉིས་བ་ལ་དབུལ་བར་བྱའོ། །གནས་བརྟན་གཉིས་པའི་ལྷུང་བཟེད་གང་ཡིན་པ་དེ་གནས་བརྟན་གསུམ་པ་ལ་དབུལ་བར་བྱའོ། །དེ་བཞིན་དུ་དགེ་འདུན་གྱི་གསར་བུ་གཉིས་པའི་ལྷུང་བཟེད་གང་ཡིན་པ་དེ་དགེ་འདུན་གྱི་སར་བུ་ལ་དབུལ་བའི་བར་དུ་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་མ་བླངས་ན་གནས་བརྟན་གཉིས་པ་ལ་དབུལ་བར་བྱའོ། །གལ་ཏེ་གནས་བརྟན་གཉིས་པས་མ་བླངས་ན་གནས་བརྟན་གསུམ་པ་ལ་དབུལ་བར་བྱའོ། །གལ་ཏེ་གནས་བརྟན་གསུམ་པས་མ་བླངས་ན་དགེ་འདུན་གྱི་གནས་བརྟན་སློང་བར་བྱེད་ན་བརྗོད་པ་དང་པོ་ལ་སྦྱིན་པར་མི་བྱ་ཞིང་བརྗོད་པ་གཉིས་པ་ལ་ཡང་སྦྱིན་པར་མི་བྱའོ། །བརྗོད་པ་གསུམ་པ་ལ་སྦྱིན་པར་བྱ་སྟེ། དགེ་འདུན་གྱི་གནས་བརྟན་གྱི་འདུལ་བ་དང་འགའ་བའི་ཉེས་བྱས་ཀྱི་ལྟུང་བ་བཤགས་པར་བྱའོ། །དེ་བཞིན་དུ་དགེ་འདུན་གྱི་གསར་བུ་གསུམ་པས་མ་བླངས་ན་གསར་བུ་གཉིས་པ་ལ་དབུལ་བར་བྱའོ། །གལ་ཏེ་གསར་བུ་གཉིས་པས་མ་བླངས་ན་གསར་བུ་ལ་དབུལ་བར་བྱའོ། །གལ་ཏེ་དགེ་འདུན་གྱི་གསར་བུས་
བླངས་པ་ན་གསར་བུ་གསུམ་པ་སློང་བར་བྱེད་ན་བརྗོད་པ་དང་པོ་ལ་སྦྱིན་པར་མི་བྱ་ཞིང་། བརྗོད་པ་གཉིས་པ་ལ་ཡང་སྦྱིན་པར་མི་བྱའོ། །བརྗོད་པ་གསུམ་པ་ལ་སྦྱིན་པར་བྱ་སྟེ། དགེ་འདུན་གྱི་གསར་བུ་གསུམ་པས་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་པའི་བར་དུ་བྱའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཏང་བར་མི་བྱ། གཞན་ལ་སྦྱིན་པར་མི་བྱ་བར་ཆག་པའི་མཐར་ཐུག་གི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱའོ། །ལྷུང་བཟེད་འདྲེལ་པ་མེད་པ་འབྲིམ་པའི་དགེ་སློང་གིས་ཀུན་ཏུ་སྤྱད་པར་བྱ་བའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །ངས་ལྷུང་བཟེད་འབྲེལ་པ་མེད་པ་འཆང་བའི་དགེ་སློང་གི་ཀུན་ཏུ་སྤྱད་པར་བྱ་བའི་ཆོས་དག་བཅའ་བར་བྱ་སྟེ་ལྷུང་བཟེད་འབྲེལ་པ་མེད་པ་འཆང་བའི་དགེ་སློང་གིས་ལྷུང་བཟེད་ཀྱི་སྣོད་གཉིས་ཉེ་བར་གཞན་པར་བྱ་ཞིང་དེ་ལ་བཟང་པོ་གང་ཡིན་པ་དེར་ལྷུང་བཟེད་འབྲེལ་པ་མེད་པ་གཞུག་པར་བྱ་ཞིང་། ཅིག་ཤོས་སུ་ལྷུང་བཟེད་བྱིན་གྱིས་བརླབས་པ་གཞུག་པར་བྱའོ། །དེས་ལྷུང་བཟེད་གཉིག་ཐོགས་ཏེ་བསོད་སྙོམས་ལ་འཇུག་པར་བྱ་ཞིང་གལ་ཏེ་འབྲས་ཆན་སྐམ་པོ་རྙེད་ན་ལྷུང་བཟེད་འབྲེལ་པ་མེད་པས་བླང་བར་བྱའོ། །གལ་ཏེ་འབྲས་ཆན་གཤེར་བ་རྙེད་ན་ལྷུང་བཟེད་བྱིན་གྱིས་བརླབས་པས་བླང་བར་བྱའོ། །གཙུག་ལག་ཁང་དུ་འོངས་ནས་དཀྱིལ་འཁོར་བྱས་ཏེ་ལྷུང་བཟེད་འབྲེལ་བ་མེད་པ་མདུན་དུ་བཞག་ནས་ལྷུང་བཟེད་བྱིན་གྱིས་བརླབས་པར་བཟའ་བར་བྱའོ། །ཟོས་ཟིན་ནས་བྱི་དོར་དང་། ཁ་ཟས་འབགས་པའི་དྲིལ་ཕྱི་བྱ་བ་ཡང་དང་པོར་ལྷུང་བཟེད་འབྲེལ་པ་མེད་བ་ལ་བྱ་ཞིང་། དེའི་འོག་ཏུ་ལྷུང་བཟེད་བྱིན་གྱིས་བརླབས་པ་ལ་བྱའོ། །བཀྲུ་བ་དང་། བསྐམ་པ་དང་། ལྕིབས་བྲུད་བ་ལ་ཡང་དེ་བཞིན་དུ་བྱའོ། །གལ་ཏེ་ལྷུང་བཟེད་ཀྱི་ངོས་ཁུང་གཉིས་ཡོད་ན་བཟང་པོ་གང་ཡིན་པ་དེར་ལྷུང་བ་ཟེད་འབྲེལ་པ་མེད་པ་གཞུག་པར་བྱ་ཞིང་། ཅིག་ཤོས་སུ་ལྷུང་བཟེད་བྱིན་གྱིས་བརླབས་པ་གཞུག་པར་བྱའོ། །གལ་ཏེ་ངོས་ཁུང་གཅིག་ཡོད་ལ་གལ་ཏེ་ཤོད་བཟང་ན་ཤོད་དུ་ལྷུང་བཟེད་འབྲེལ་པ་མེད་པ་གཞག་པར་བྱ་ཞིང་། ངོས་ཁུང་དུ་
ལྷུང་བཟེད་བྱིན་གྱིས་བརླབས་པ་གཞུག་པར་བྱའོ། །གལ་ཏེ་ངོས་ཁུང་བཟང་ན་ངོས་ཁུང་དུ་ལྷུང་བཟེད་འབྲེལ་པ་མེད་པ་གཞུག་བར་བྱ་ཞིང་། ཤོད་དུ་ལྷུང་བཟེད་བྱིན་གྱིས་བརླབས་པ་གཞག་པར་བྱའོ། །ལྷུང་བཟེད་ཀྱི་ལས་བྱེད་པ་ན་གལ་ཏེ་རྫ་བོ་གཉིས་ཡོད་ན་རྫ་བོ་བཟང་པོ་གང་ཡིན་པ་དེར་ལྷུང་བཟེད་འབྲེལ་བ་མེད་པ་བསྲེག་པར་བྱ་ཞིང་། ཅིག་ཤོས་སུ་ལྷུང་བཟེད་བྱིན་གྱིས་བརླབས་པ་བསྲེག་བར་བྱའོ། །གལ་ཏེ་རྫ་བོ་གཅིག་ཡོད་ན་གལ་ཏེ་འོག་མ་ལེགས་པར་ཚོས་པར་འགྱུར་ན་འོག་ཏུ་ལྷུང་བཟེད་འབྲེལ་པ་མེད་པ་གཞག་པར་བྱ་ཞིང་། སྟེང་དུ་ལྷུང་བཟེད་བྱིན་གྱིས་བརླབས་པ་གཞག་པར་བྱའོ། །གལ་ཏེ་སྟེང་དུ་བཞག་པ་ལེགས་པར་ཆོས་པར་འགྱུར་ན་སྟེང་དུ་ལྷུང་བཟེད་འབྲེལ་པ་མེད་པ་གཞག་པར་བྱ་ཞིང་། འོག་ཏུ་ལྷུང་བཟེད་བྱིན་གྱིས་བརླབས་པ་གཞག་པར་བྱའོ། །ལམ་དུ་འགྲོ་བ་ན་ལྷུང་བཟེད་ཀྱི་སྣོད་གཉིས་བསྐུར་བར་བྱ་སྟེ། དེ་ལ་བཟང་པོ་གང་ཡིན་པ་དེར་ལྷུང་བཟེད་འབྲེལ་པ་མེད་པ་གཞུག་པར་བྱ་ཞིང་། ཅིག་ཤོས་སུ་ལྷུང་ཟེད་བྱིན་གྱིས་བརླབས་པ་གཞུག་པར་བྱའོ། །གལ་ཏེ་ཁུར་ཚ་བ་འགའ་ཞིག་ཡོད་ན་དེ་ལ་ལུང་བཟེད་འབྲེལ་པ་མེད་པ་བསྐུར་བར་བྱ་ཞིང་། བདག་ཉིད་ཀྱིས་ལྷུང་བཟེད་བྱིན་གྱིས་བརླབས་པ་བསྐུར་བར་བྱའོ། །གལ་ཏེ་ཁུར་ཚ་བ་འགའ་ཡང་མེད་ན་ཕྲག་པ་གཡོན་པས་ལྷུང་བཟེད་འབྲེལ་པ་མེད་པ་བསྐུར་བར་བྱ་ཞིང་། ཕྲག་པ་གཡས་པས་ལྷུང་བཟེད་བྱིན་གྱིས་བརླབས་པ་བསྐུར་བར་བྱའོ། །འདི་ནི་རེ་ཞིག་ཆད་པའི་ལས་ཡིན་ཏེ་ཚུལ་ཁྲིམས་ཡང་དག་པར་རྗེས་སུ་སྲུང་བས་ཇི་སྲིད་འཚོའ་བར་དུ་སྤྱད་པར་བྱའོ། །ལྷུང་བཟེད་འབྲེལ་པ་མེད་པ་འཆང་བའི་དགེ་སློང་གིས་ཀུན་དུ་སྤྱད་བའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་བར་མི་བྱེད་ན་འགའ་ཚབས་ཅན་དུ་འགྱུར་རོ། །དེ་ལ་དེ་ནི་ཆོག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གི་ལྷུང་བཟེད་ཆག་ཀྱང་ལྷན་བ་གཅིག་གིས་ཀླན་པར་འོས་ཤིང་མ་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་
བཟེད་ཆག་ཀྱང་ལྷན་པ་གཉིས་ཀྱིས་ཀླན་པར་འོས་ཤིང་མ་ཀླན་ལ་སྤྱད་བཟོད་བ་ཡིན་ན། དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གསུམ་གྱིས་ཀླན་པར་འོས་ཤིང་མ་ཀླན་ལ་སྤྱད་བཟོད་བ་ཡིན་ན། དེ་ལ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་བཞིས་ཀླན་པར་འོས་ཤིང་མ་ཀླན་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གཅིག་གིས་ཀླན་བར་འོས་ཤིང་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གཉིས་ཀྱིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གི་ལྷུང་བཟེད་ཆག་ཀྱང་ལྷན་པ་གསུམ་གྱིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡོད་བཞིན་དུ་ལྷུང་བཟེད་སར་བ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། དགེ་སློང་གི་ལྷུང་བཟེད་ཆག་ཀྱང་ལྷན་པ་བཞིས་ཀླན་པར་འོས་ཤིང་ཀླན་ལ་སྤྱད་བཟོད་པ་ཡིན་ན། དེ་ལྷུང་བཟེད་སྤྱད་བཟོད་པ་དེ་ཡོད་བཞིན་དུ་ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། དགེ་སློང་གི་ལྷུང་བཟེད་ཆག་ཅིང་ལྷན་པ་ལྔས་ཀླན་པར་འོས་བ་ཡིན་ན་དེ་དེས་ཀླན་ཀྱང་རུང་། མ་ཀླན་ཀྱང་རུང་།
སྤྱད་བཟོད་ཀྱང་རུང་། །སྤྱད་མི་བཟོད་ཀྱང་རུང་། ལྷུང་བཟེད་སར་པ་གཞན་ཚོལ་བར་བྱེད་ན་དེ་ཚོལ་བ་ལ་ཡང་ལྟུང་བ་མེད་ལ། ཐོབ་ན་ཡང་ལྟུང་བ་མེད་དོ། །རིན་གྱིས་ལེན་པ་དང་། བརྗེ་བས་ལེན་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལྷུང་བཟེད་ཚོལ་བའི་སྤང་བ་སྟེ་ཉི་ཤུ་གཉིས་པ་རྫོགས་སྷོ། །