བཅུ་ཚན་བརྒྱད་པ། འགྲོན་མང་རྐུན་མ་སོགས་ཀྱི་སྡེ་ཚན།
སྡོམ་ལ། རྐུ་དང་ཉི་ཤུ་མ་ལོན་དང་། །རྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མི་གུས་ཆང་འཐུང་དུས་མིན་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་སུ་དབྱར་གནས་པར་ཁས་བླངས་སོ། །དེ་ནས་དགེ་སློང་དེས་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ལྷུང་བཟེད་དང་ཆོས་གོས་ཐོགས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འཕགས་ནས་མཉན་ཡོད་དུ་འགྲོ་བའི་དོན་མཐུན་བཙལ་བ་དང་། དེས་ཚོང་པ་ཤོ་གམ་འདྲལ་བ་དག་མཐོང་ནས་དེས་སྨྲས་པ། ཤེས་ལྡན་དག་གར་འདོང་། དེ་དག་གིས་སྨྲས་པ། འཕགས་པ་མཉན་ཡོད་དུ་མཆིའོ། །དེས་
སྨྲས་པ། ཤེས་ལྡན་དག་ཁོ་བོ་ཡང་ཁྱེད་དང་ལྷན་ཅིག་མཉན་ཡོད་དུ་འགྲོའོ། །དེ་དག་གིས་སྨྲས་པ། འཕགས་པ་དེ་ལྟར་མཛོད་ཅིག །དེ་དག་གིས་ཐབས་ཡིན་ནོ་ཞེས་བྱས་ནས་འགྱོད་པ་སྐྱེས་ཏེ་དེ་དག་གིས་སྨྲས་པ། འཕགས་པ་བདག་ཅག་ནི་ཚོང་པ་ཤོ་གམ་འདྲལ་བ་དག་ལགས་པས་དུས་སུ་ཡང་མཆི། དུས་མ་ལགས་པར་ཡང་མཆི། ཤུལ་དུ་ཡང་མཆི། ཤུལ་གོལ་བར་ཡང་མཆི་བས་ཁྱོད་ཀྱིས་བདག་ཅག་དང་ལྷན་ཅིག་བཞུད་མི་སྤྱོད་དོ། །དེས་སྨྲས་པ། ཅི་ཁྱེད་ཅག་སྟོང་པར་འདོང་ངམ། འོན་ཏེ་ཁུར་དག་གིས་འདོང་། དེ་དག་གིས་སྨྲས་པ། ཁུར་དག་གིས་མཆིའོ། །དེས་སྨྲས་པ། ཁྱེད་ཅག་ཁུར་དག་གིས་འདོང་ན་ཁོ་བོ་སྟོང་པར་འགྲོ་བ་ཅིའི་ཕྱིར་ཁྱེད་ཀྱི་ཕྱི་བཞིན་འགྲོ་མི་ནུས། དེ་དག་གིས་སྨྲས་པ། གལ་ཏེ་སྤྱོད་ན་བཞུད་ཀྱིས་ཕྱོགས་འདིར་བཞུད་ལ་བདག་ཅག་མ་མཆིས་ཀྱི་བར་དུ་གཞེས་ཤིག །དེ་དེར་སོང་སྟེ་བསྡད་པ་དང་། ཇི་ཙམ་ན་ཚོང་པ་ཤོ་གམ་འདྲལ་བ་དེ་དག་འོངས་ནས་དེ་དེ་དག་དང་ལྷན་ཅིག་འཕགས་སོ། །ཇི་ཙམ་ན་རི་བྲགས་ཤིག་ཏུ་ཤོ་གམ་གྱི་གནས་སུ་ཕྱིན་པ་དང་། ཚོང་པ་ཤོ་གམ་འདྲལ་བ་དེ་དག་ཤོ་གམ་གཅོད་པ་དག་གིས་འཇིགས་པས་ལམ་གོལ་བ་ནས་འགྲོ་བར་བརྩམས་པ་དང་། དགེ་སློང་དེ་ཡང་མདུན་དུ་སོང་ངོ་། །དེ་དག་ལམ་གོལ་བ་ནས་འདོང་བ་ན་དེ་དག་ཤོ་གམ་པ་དག་གིས་མཐོང་ནས། དེ་དག་གིས་སྨྲས་པ། ཀྭའི་ཚོང་པ་ཤོ་གམ་འདྲལ་བ་དག་གར་འདོང་། དེ་དག་གིས་དགེ་སློང་དེ་མདུན་དུ་འགྲོ་བ་མཐོང་ནས། དེ་དག་གིས་སྨྲས་པ། ཤེས་ལྡན་དག་ཚོང་པ་ཤོ་གམ་འདྲལ་བ་འདི་དག་གིས་མ་ཉེས་ཀྱི་ཤཱཀྱའི་བུའི་དགེ་སྦྱོང་མདུན་དུ་འགྲོ་བ་འདིས་ཉེས་ཀྱིས་འདི་གསད་པར་བྱའོ་ཞེས་དེ་དག་གིས་དགེ་སློང་དེ་ཤིན་ཏུ་བརྡེགས་ཏེ་ལྷུང་བཟེད་ཀྱང་བཅག །ཕོར་བུ་དང་། ཁར་བ་དག་ཀྱང་བཅག །ཆོས་གོས་དག་ཀྱང་དྲལ་ཏེ་ཤིའོ་སྙམ་ནས་བོར་རོ། །ཚོང་པ་ཤོ་གམ་འདྲལ་བ་དེ་དག་གིས་དགེ་སློང་དེ་
ལ་སྨྲས་པ། འཕགས་པ་ཁྱེད་ཀྱིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པ་ལགས་ཀྱིས་རྒྱལ་པོའི་གན་དུ་བཞུད་དེ་གསུངས་ལ། ཤོ་གམ་པ་འདི་དག་གི་ལག་པ་དང་རྐང་པ་དག་གཅོད་དུ་སྩོལ་ཅིག །ཤོ་གམ་པ་དེ་དག་སྐྲག་ནས་དགེ་སློང་དེ་ལ་བཟོད་པ་གསོལ་བར་བརྩམས་ཏེ་སྨྲས་པ། འཕགས་པ་བདག་ཅག་ལ་བཟོད་པ་མཛད་དུ་གསོལ། དགེ་སློང་གི་སེམས་ནི་མར་དང་འདྲ་བས་དེས་སྨྲས་པ། བཟོད་དོ། །ཚོང་པ་ཤོ་གམ་འདྲལ་བ་དག་གིས་སྨྲས་པ། གལ་ཏེ་འཕགས་པས་བཟོད་ཀྱང་བདག་ཅག་གིས་མི་བཟོད་དོ། །ཤོ་གམ་པ་དག་གིས་སྨྲས་པ། ཁྱེད་ཀྱང་བཟོད་པར་གྱིས་ཤིག །ཤོ་གམ་འདྲལ་བ་དག་གིས་སྨྲས་པ། དམ་ཚིག་གིས་བཟོད་པར་བྱ་སྟེ། ཁྱེད་ཅག་ཤོ་གམ་པ་ཇི་སྙེད་པ་དག་གིས་ཁོ་བོ་ཅག་ཚོང་པ་ཇི་སྙེད་པ་དག་ཤོ་གམ་འཇལ་དུ་མི་འཇུག་ན་ཁོ་བོ་ཅག་གིས་ཀྱང་བཟོད་པར་བྱའོ། །ཤོ་གམ་པ་དེ་དག་གིས་ཚོང་པ་དེ་དག་ལ་གནང་ངོ་། །དགེ་སློང་དེ་ཡང་མཐར་གྱིས་མཉན་ཡོད་དུ་ཕྱིན་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་འོངས་པ་ལེགས་སོ་འོངས་པ་ལེགས་སོ། །ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། ཁོ་བོ་ཤོ་གམ་པ་དག་གིས་ཧད་པོར་དེའུ་བསད་དོ། །ཅིའི་ཕྱིར། དེས་སྐབས་དེ་རྒྱས་པར་བརྗོད་པ་དང་། དགེ་སློང་རྣམས་ཀྱིས་སྨྲས་པ། ཁྱོད་དོན་མཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོར་རུང་ངམ། གང་གི་ཕྱིར་མི་རུང་བ་དེ་ཉིད་ཀྱི་ཕྱིར་ཉེས་དམིགས་འདི་ལྟ་བུ་དག་བྱུང་བར་གྱུར་ཏོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དོན་མཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་།
སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་དོན་མཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དོན་མཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའམ། གཞན་ཡང་དེ་ལྟ་བུ་གང་ཡིན་པའོ། །དོན་མཐུན་རྐུན་མ་དང་ལྷན་ཅིག་ཅེས་བྱ་བ་ལ། རྐུན་མ་ཞེས་བྱ་བ་ནི་ཆོམ་རྐུན་པ་དང་གྲོང་འཇོམས་པར་བྱེད་པ་དག་དང་། ཚོང་པ་ཤོ་གམ་འདྲལ་བ་དག་གོ །འགྲོན་ལམ་དུ་འགྲོ་ན་ཞེས་བྱ་བ་ནི་དགོན་པའི་ལམ་དུ་འགྲོ་ནའོ། །ཐ་ན་གྲོང་བར་དུ་ཡང་རུང་སྟེ་ཞེས་བྱ་བ་ནི་ཐ་ན་རྒྱང་གྲགས་ཀྱི་བར་དུ་ཡང་རུང་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་
མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དོན་མཐུན་རྐུན་མ་དང་ལྷན་ཅིག་འགྲོན་ལམ་དུ་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །གྲོང་བདུན་པོ་རྒྱང་གྲགས་ཀྱིས་བར་དུ་ཆོད་པ་དག་ལས་དགེ་སློང་གྲོང་ནས་དགོན་པར་འགྲོ་ན་རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་ལ། རྒྱང་གྲགས་རེ་རེར་ནི་ལྟུང་བྱེད་དུ་འགྱུར་རོ། །དགོན་པ་ནས་གྲོང་དུ་འགྲོ་ན་ཡང་རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་ལ། རྒྱང་གྲགས་རེ་རེར་ནི་ལྟུང་བྱེད་དུ་འགྱུར་རོ། །རྐུན་མ་བསེལ་བྱེད་དུ་འཇུད་པ་དང་། ལམ་ནོར་བ་རྐུན་མས་ལམ་དུ་འཇུད་པ་དང་། འགྲོ་མི་ནུས་པ་རྐུན་མས་ཁྲིད་དུ་འཇུད་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྐུན་མ་དང་ལྷན་ཅིག་འགྲོ་བའི་ལྟུང་བྱེད་དེ་བདུན་བཅུ་རྩ་གཅིག་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན་དེ་དག་མཚན་མོའི་ཐོ་རངས་ཀྱི་དུས་ཀྱི་ཚེ་བཀྲེས་པའི་ཉམ་ཆུང་བས་ཡོངས་སུ་གཟིར་ནས་ངུའོ། །བཅོམ་ལྡན་འདས་ཀྱིས་མཚན་མོའི་ཐོ་རངས་ཀྱི་དུས་ཀྱི་ཚེ་ཀུན་དགའ་ར་བའི་ནང་ན་བྱིས་པ་ཁྱེའུ་རབ་ཏུ་མང་པོ་དག་ངུ་བའི་སྒྲ་གསན་ཏོ། །གསན་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ་ཀུན་དགའ་བོ་མཚན་མོའི་ཐོ་རངས་ཀྱི་དུས་ཀྱི་ཚེ་ཀུན་དགའ་ར་བའི་ནང་ན་བྱིས་པ་ཁྱེའུ་རབ་ཏུ་མང་པོ་ངུ་བ་འདི་དག་སུ། བཙུན་པ་འདི་དག་ནི་ཚེ་དང་
ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བགྱིས་པ་དེ་དག་མཚན་མོའི་ཐོ་རངས་ཀྱི་དུས་ཀྱི་ཚེ་བཀྲེས་པའི་ཉམ་ཆུང་བས་ཡོངས་སུ་གཟིར་ཏེ་ངུ་བ་ལགས་སོ། །ཀུན་དགའ་བོ་དགེ་སློང་དག་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་དམ། བཙུན་པ་བགྱིད་དོ། །ཀུན་དགའ་བོ་གང་ཟག་ལོ་ཉི་ཤུ་མ་ལོན་པས་ནི་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། རླུང་དང་། ཉི་མ་དང་། ཤ་སྦྲང་དང་། སྦྲང་བུ་མཆུ་རིངས་དང་། སྡིག་སྦྲུལ་དག་གིས་རེག་པ་དག་དང་། གཞན་ལས་ཚིག་གི་ལམ་ངན་པ་སྨྲས་པ་དང་། ངན་པ་འོངས་པ་དག་དང་། ལུས་ཀྱི་ཚོར་བ་སྡུག་བསྔལ་མི་བཟད་པ། རྩུབ་པ། ཚ་བ། ཡིད་དུ་མི་འོང་བ་སྲོག་འཕྲོག་པར་བྱེད་པ་བྱུང་ངོ་ཅོག་དག་མི་བཟོད་ཅིང་། ཟག་པ་དག་ལ་ཅི་མི་སྙམ་པར་བྱ་བ་ཡང་མི་བཟོད་ཅིང་དང་དུ་ལེན་མི་ནུས་པའི་རང་བཞིན་ཅན་ཡིན་ནོ། །གང་ཟག་ལོ་ཉི་ཤུ་ལོན་པས་ནི་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། རླུང་དང་། ཉི་མ་དང་། ཤ་སྦྲང་དང་། སྦྲང་བུ་མཆུ་རིངས་དང་། སྡིག་སྦྲུལ་གྱི་རེག་པ་དག་དང་། གཞན་ལས་ཚིག་གི་ལམ་ངན་པ་སྨྲས་པ་དང་། ངན་པ་འོངས་པ་དག་དང་། ལུས་ཀྱི་ཚོར་བ་སྡུག་བསྔལ་མི་བཟད་པ་དང་། རྩུབ་པ། ཚ་བ། ཡིད་དུ་མི་འོང་བ་སྲོག་འཕྲོག་པར་བྱེད་པ་བྱུང་ངོ་ཅོག་བཟོད་ཅིང་ཟག་པ་དག་ལ་ཅི་མི་སྙམ་པར་བྱ་བ་ཡང་བཟོད་ཅིང་དང་དུ་ལེན་ནུས་པའི་རང་བཞིན་ཅན་ཡིན་ནོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་རྨས་པ། མཽད་
གལ་གྱི་བུ་ཁྱོད་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང་། མི་སྦྱོར་བ་དང་། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང་། སྦྱོར་བ་དང་། བརྟགས་ཏེ་སྤྱོད་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་ལྟུང་བྱེད་དོ། །གང་ཟག་དེ་ཡང་རྫོགས་པར་བསྙེན་པར་མི་འགྱུར་ལ། དགེ་སློང་དེ་དག་ཀྱང་སྨད་པར་འགྱུར་ཏེ། དེ་ལ་དེ་ནི་ཆོ་ག་ཡིན་ནོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའམ། གཞན་ཡང་དེ་ལྟ་བུ་གང་ཡིན་པའོ། །གང་ཟག་ཅེས་བྱ་བ་ནི་དགེ་སློང་དུ་བྱ་བ་གང་ཡིན་པ་དེའོ། །ལོ་ཉི་ཤུ་མ་ལོན་པ་ཞེས་བྱ་བ་ནི་ལོ་ཉི་ཤུར་མ་ལོན་པའོ། །དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །གང་ཟག་དེ་ཡང་རྫོགས་པར་བསྙེན་པར་མི་འགྱུར་ལ་ཞེས་བྱ་བ་ནི་གང་ཟག་གང་ཡིན་པ་དེའོ། །དགེ་སློང་དེ་དག་ཀྱང་སྨད་པར་འགྱུར་ཏེ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་དེ་དག་གོ །དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ལོ་ཉི་ཤུ་མ་
ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན། དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་རྫོགས་པར་མ་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ཡང་མ་ལོན་ལ་ལོ་ཉི་ཤུ་མ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ཤེས་ཤིང་དྲན་ལ་ཡིད་གཉིས་མི་ཟ་སྟེ་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་རྫོགས་པར་མ་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །ལོ་ཉི་ཤུ་མ་ལོན་ལ་ལོ་ཉི་ཤུ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ལོ་ཉི་ཤུ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ལ་དེའི་མོད་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཆགས་ཤིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །ལོ་ཉི་ཤུ་མ་ལོན་ལ་ལོ་ཉི་ཤུ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ཤེས་ཤིང་དྲན་ལ་ཡིད་གཉིས་མི་ཟ་སྟེ་བདག་ལོ་ཉི་ཤུ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ལ་དེའི་མོད་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཆགས་ཤིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་
རོ། །ལོ་ཉི་ཤུ་མ་ལོན་ལ་དེས་མི་ཤེས། མི་དྲན། ཡིད་གཉིས་མི་ཟ་ཞིང་དེ་ལ་དགེ་སློང་རྣམས་ཀྱིས་མ་དྲིས་སམ། དྲིས་ཀྱང་ལན་མི་འདེབས་པ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་ལ་དེའི་མོད་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཆགས་ཤིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ལོན་ལ་ལོ་ཉི་ཤུ་མ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན་དེ་འདི་སྐད་ཅེས་བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ལོན་ལ་ལོ་ཉི་ཤུ་མ་ལོན་པར་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་བདག་གིས་ཤེས་ཤིང་དྲན་ལ་ཡིད་གཉིས་མི་ཟ་སྟེ། བདག་ལོ་ཉི་ཤུ་མ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །ལོ་ཉི་ཤུ་ཡང་ལོན་ལ་ལོ་ཉི་ཤུ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་བདག་ལོ་ཉི་ཤུ་ལོན་ནོ་ཞེས་ཟེར་བ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །ལོ་ཉི་ཤུ་ཡང་ལོན་ལ་ལོ་
ཉི་ཤུ་ལོན་པར་ཡང་འདུ་ཤེས་ཤིང་དེ་ལ་དགེ་སློང་རྣམས་ཀྱིས་ཁྱོད་ལོ་ཉི་ཤུ་ལོན་ནམ་ཞེས་དྲིས་པ་ན། དེ་འདི་སྐད་ཅེས་བདག་ཤེས་ཤིང་དྲན་ལ་ཡིད་གཉིས་མི་ཟ་སྟེ་བདག་ལོ་ཉི་ཤུ་ལོན་ནོ་ཞེས་ཟེར་བ་ན། དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །ལོ་ཉི་ཤུ་ལོན་ལ་དེས་མི་ཤེས། མི་དྲན། ཡིད་གཉིས་མི་ཟ་ཞིང་དེ་ལ་དགེ་སློང་རྣམས་ཀྱིས་མ་དྲིས་སམ། དྲིས་ཀྱང་ལན་མི་འདེབས་པ་ན་དགེ་སློང་རྣམས་ཀྱིས་གང་ཟག་དེ་དགེ་སློང་གི་དངོས་པོར་རྫོགས་པར་བསྙེན་པར་བྱེད་ན་གང་ཟག་དེ་དང་པོ་ཉིད་ནས་ལེགས་པར་རྫོགས་པར་བསྙེན་ཅིང་འགྲོགས་པ་དང་ལོངས་སྤྱོད་པ་ལ་ཡང་ལྟུང་བར་མི་འགྱུར་ལ། དེས་དགེ་འདུན་ལ་ནི་འགལ་ཚབས་ཅན་དུ་འགྱུར་རོ། །དེ་ལ་གང་ཟག་དང་པོ་གཉིས་པོ་གང་དག་ཡིན་པ་དེ་དག་ནི་དང་པོ་འཁྲུགས་པ་ཡིན་པས་དང་པོ་ཉིད་ནས་རྫོགས་པར་མ་བསྙེན་པ་ཡིན་ཏེ། གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་དག་ཡིན་ནོ། །དེ་ལ་གང་ཟག་ལོ་ཉི་ཤུ་མ་ལོན་ལ་ལོ་ཉི་ཤུ་ལོན་པར་འདུ་ཤེས་པ་རྫོགས་པར་བསྙེན་པ་གང་ཡིན་པ་དེའི་ཉེ་དུ་དག་འོངས་ཤིང་ལྷགས་ནས་མིང་འདི་ཞེས་བྱ་བ་དེ་རྫོགས་པར་བསྙེན་ཏམ། ཞེས་འདྲི་ཞིང་དེ་ནི་ལོ་ཉི་ཤུ་མ་ལོན་ནོ་ཞེས་ཟེར་ན་དེའི་མངལ་ན་གནས་པའི་ཟླ་བ་དང་། ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བའམ། ཡང་ན་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་
གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །དེ་ལ་གང་ཟག་ལོ་བཅུ་དགུ་ལོན་ན་རྫོགས་པར་བསྙེན་པ་གང་ཡིན་པ་དེས་གལ་ཏེ་ལོ་མ་ཚང་བའི་དྲན་པ་རྙེད་པར་གྱུར་ན་དེས་མངལ་ན་གནས་པའི་ཟླ་བ་དག་དང་ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བའམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །གལ་ཏེ་ལོ་གཅིག་གི་དྲན་པ་རྙེད་ན་དེ་ལྟར་རྫོགས་པར་བསྙེན་པ་ནི་ལེགས་པར་རྫོགས་པར་བསྙེན་པ་ཡིན་ཏེ། འདི་ལྟར་གང་ཟག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་པ་ནི་དཀོན་པའི་ཕྱིར་རོ། །དེ་ལ་གང་ཟག་ལོ་བཅྭ་བརྒྱད་ལོན་ན་རྫོགས་པར་བསྙེན་པ་གང་ཡིན་པ་དེས་གལ་ཏེ་ལོ་མ་ཚང་བའི་དྲན་པ་རྙེད་པར་གྱུར་ན་དེས་ས་སྤོ་བར་བྱ་བའམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་
ཡིན་ནོ། །གལ་ཏེ་ལོ་གཅིག་གི་དྲན་པ་རྙེད་པར་གྱུར་ན་དེས་མངལ་ན་གནས་པའི་ཟླ་བ་དག་དང་། ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བའམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །གལ་ཏེ་ལོ་གཉིས་ཀྱི་དྲན་པ་རྙེད་པར་གྱུར་ན་དེ་ལྟར་རྫོགས་པར་བསྙེན་པ་ནི་ལེགས་པར་རྫོགས་པར་བསྙེན་པ་ཡིན། འདི་ལྟར་གང་ཟག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་པ་ནི་དཀོན་པའི་ཕྱིར་རོ། །དེ་ལ་གང་ཟག་ལོ་ཉི་ཤུ་མ་ལོན་ལ་དེས་མི་ཤེས། མི་དྲན། ཡིད་གཉིས་ཟ་ཞིང་རྫོགས་པར་བསྙེན་པ་གང་ཡིན་པ་དེ་ལ་ནི་ཤེས་པར་བྱ། དྲན་པར་བྱ། ཡིད་གཉིས་སྤང་བར་བྱ་སྟེ། གང་གི་ཚེ་དེས་ཤེས་པ་དང་། དྲན་པ་དང་། ཡིད་གཉིས་སྤངས་པར་གྱུར་པ་ན། དེའི་མངལ་ན་གནས་པའི་ཟླ་བ་དག་དང་། ཤོལ་གྱི་ཟླ་བ་དག་ཀྱང་བརྩི་བར་བྱ་སྟེ། གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བའམ། ཡང་རྫོགས་པར་བསྙེན་པར་བྱའོ། །ས་སྤོ་བར་མི་བྱེད་དམ། ཡང་རྫོགས་པར་བསྙེན་པར་མི་བྱེད་པར་གང་ཟག་རང་བཞིན་དུ་གནས་པ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་ངམ། ལས་ཉམས་སུ་མྱོང་བར་བྱེད་ན་རྐུ་ཐབས་སུ་གནས་པ་ཡིན་ཏེ། གང་ཟག་བསྙིལ་བར་འོས་པ་ཡིན་ནོ། །དེ་ལ་གང་ཟག་ལོ་ཉི་ཤུ་ལོན་ལ། ལོ་ཉི་ཤུ་མ་ལོན་པར་འདུ་ཤེས་པས་རྫོགས་པར་བསྙེན་པ་གང་ཡིན་པ་དེ་ནི་དང་པོ་ཉིད་ནས་ལེགས་པར་རྫོགས་པར་བསྙེན་པ་ཡིན་ནོ། །དེ་ལ་གང་ཟག་ལོ་ཉི་ཤུ་ལོན་ལ་ལོ་ཉི་ཤུ་ལོན་པར་འདུ་ཤེས་པས་རྫོགས་པར་བསྙེན་པ་གང་ཡིན་པ་དེ་ཡང་དང་པོ་ཉིད་ནས་ལེགས་པར་རྫོགས་པར་བསྙེན་པ་ཡིན་ནོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལོ་ཉི་ཤུ་མ་ལོན་པར་རྫོགས་པར་བསྙེན་པར་བྱེད་པའི་ལྟུང་བྱེད་དེ་བདུན་བཅུ་རྩ་གཉིས་པ་རྫོགས་སྷོ།། །