ཕས་ཕམ་པར་གྱུར་པ་ལྔ་པ་འཆད་པ།
སྔོན་བྱུང་བའི་རབས་ཀྱི་བར་སྡོམ་ལ། འདོད་ཆགས་ཆུང་དང་གཉིས་ཀ་དང། །མདོག་བཟང་ཚངས་སྤྱོད་མངོན་ཤེས་དང། །ཕྱུག་དང་རིགས་མཐོར་སྐྱེས་པ་དང། །འདོད་པ་ཆུང་དང་འོད་སྲུང་ངོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་འོད་སྲུང་ཆེན་པོ་དང། སེར་སྐྱའི་བུ་མོ་དང་གཉིས་འདོད་ཆགས་ཆུང་བ་ལ་གཟིགས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་ཏུ་མ་ཟད་དེ། འདས་པའི་དུས་ན་ཡང་ཞེས་བྱ་བའི་བར་དུའོ། །དགེ་སློང་དག་འདི་གཉིས་ཀྱིས་ལས་བྱས་ཤིང་ཉེ་བར་བསགས་པ་ཞེས་བྱ་བའི་བར་ནས་རྒྱས་པར་བྱའོ། །དགེ་སློང་དག་སྔོན་འདས་པའི་དུས་ན། རྒྱལ་པོའི་ཕོ་བྲང་ཞིག་ན། ཞིང་པ་ཞིག་འདུག་པ་དེ་ནང་པར་སྔར་ལངས་ནས། སྨོད་པ་དང་གཤོལ་བླངས་ཏེ། ཞིང་རྨེད་དུ་འགྲོ་ཀར། ཆུང་མ་ལ་ཉི་མ་ཤར་བ་དང་གཡར་ཚུས་ཁྱེར་ལ་ཤོག་ཅིག་ཅེས་བསྒོའོ། །དེའི་ཆུང་མས་གཡར་ཚུས་ཁྱེར་ཏེ་འོངས་པ་དང། དེ་མ་ཐག་ཏུ་རང་སངས་རྒྱས་བསེ་རུ་ལྟ་བུ་ཞིག་ཀྱང་འོངས་ནས། དེ་ན་དེས་དེའི་རྐང་པ་ལ་ཕྱག་འཚལ་ཏེ་ལངས་པ་དང། དེས་སྨྲས་པ་ཞེས་བྱ་བའི་བར་དང། རང་སངས་རྒྱས་ནམ་མཁའ་ལ་འདུག་གོ་ཞེས་བྱ་བ་ནས་བསོད་སྙོམས་ཕུལ་ཏེ། སྨོན་ལམ་དག་བཏབ་པ། འདི་ལྟར་ཉོན་མོངས་པ་ཀུན་གྱི་དབང་དུ་གྱུར་པས། ནོངས་པ་གང་བགྱིས་པ་དེ་ཞེས་བྱ་བའི་བར་ནས། བདག་ཅག་གཉིས་འདོད་ཆགས་ཆུང་བར་གྱུར་ཅིག་ཅེས་བྱ་བའི་བར་དུའོ། །དགེ་སློང་དག་དེའི་ཚེ་དེའི་དུས་ན་ཞིང་པར་གྱུར་པ་གང་ཡིན་པ་དེ་ནི་འོད་སྲུང་འདི་ཡིན་ནོ། །དེའི་ཚེ་དེའི་དུས་ན། ཞིང་པའི་ཆུང་མར་གྱུར་པ་གང་ཡིན་པ་དེ་ནི། སེར་སྐྱ་བཟང་མོ་འདི་ཡིན་ཏེ། དེ་གཉིས་ཀྱིས་དེའི་ཚེ་རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་བཏབ་པའི་ཕྱིར་འདི་གཉིས་པ་དོད་ཆགས་ཆུང་བར་གྱུར་ཏོ་ཞེས་བྱ་བའི་བར་དུའོ། །དེའི་ཕྱིར་དགེ་སློང་དག་འདོད་ཆགས་སྤང་
བའི་ཕྱིར། འབད་བར་བྱའོ། །དེ་ལྟ་ན་ཁྱོད་ཀྱིས་ཡོན་ཏན་གྱི་ཚེགས་ རྣམས་བསྐྱེད་པར་འགྱུར་ཏེ། དགེ་སློང་དག་དེ་ལྟར་བསླབ་པར་བྱའོ་ཞེས་བྱ་བའི་བར་དུའོ། །ཡང་དགེ་སློང་རྣམས་ཞེས་བྱ་བ་ནས། ཚེ་དང་ལྡན་པ་འོད་སྲུང་ཆེན་པོ་དང། སེར་སྐྱའི་བུ་མོ་བཟང་མོས་ལས་ཅི་ཞིག་བགྱིས་ན། གང་གི་སླད་དུ་གཉིས་ཀ་རབ་ཏུ་བྱུང་བར་གྱུར་ཅེས་གསོལ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །གང་དུ་ལགས། དགེ་སློང་དག་སྔོན་བྱུང་བ་འདས་པའི་དུས་ན། གྲོང་ཁྱེར་ཆེན་པོའི་ཕྱི་རོལ་གྱི་གྲོང་ཁྱེར་ན། རྫ་མཁན་གྱི་དཔོང་སའི་ཁང་པ་ཞིག་ཡོད་པར་གྱུར་ཏོ། །སངས་རྒྱས་མི་བཞུགས་པའི་ཚེ་ན། རང་སངས་རྒྱས་ཕོངས་པ་དང་དམན་པ་ལ་སྙིང་རྗེ་པ། སེམས་ཅན་ལ་ཕན་འདོགས་པར་ཞུགས་པ་འབྱུང་ངོ། །དེ་ནས་རང་སངས་རྒྱས་ཞིག་རྫ་མཁན་གྱི་དཔོང་སའི་ཁང་པ་གང་ན་བ་དེར་སོང་སྟེ་ཕྱིན་ནས་རྫ་མཁན་ལ་འདི་སྐད་ཅེས་སྨྲས་སོ། །བཞིན་བཟང་གལ་ཏེ་ཁྱོད་ལ་མི་བདེ་བ་མེད་ན། དཔོང་སའི་ཁང་པའི་ཕྱོགས་གཅིག་ཏུ་གནས་བཅའོ། །དེ་སྐད་ཅེས་སྨྲས་པ་དང། རྫ་མཁན་གྱིས་རང་སངས་རྒྱས་ལ་འདི་སྐད་ཅེས་སྨྲས་སོ། །འཕགས་པ་ཅི་བདེར་བཞུགས་ཤིག །དེ་ནས་རང་སངས་རྒྱས་དེ་དཔོང་སའི་ཁང་པའི་ཕྱོགས་གཅིག་ཏུ་རྩྭའི་གདིང་བ་བཤམས་ནས། སྤྲུལ་གྱི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟ་བུར་སྐྱིལ་མོ་ཀྲུང་བཅས་ནས་འདུག་གོ་།དེ་ནས་རང་སངས་རྒྱས་གཉིས་པ་ཞིག་ཀྱང་འོངས་ཏེ་ཞེས་བྱ་བའི་བར་ནས་རྫ་མཁན་དེ་ལས་བརྙས་ཏེ། དཔོང་སའི་ཁང་པ་དེ་ཉིད་ཀྱི་གྲྭ་གཉིས་པར་འདུག་གོ་ཞེས་བྱ་བའི་བར་དུའོ། །གསུམ་པ་ཞིག་ཀྱང་འོངས་ནས་གྲྭ་གསུམ་པར་འདུག་གོ་ཞེས་བྱ་བའི་བར་དང། དེ་བཞིན་དུ་བཞི་པ་ཞིག་ཀྱང་འོངས་ནས་གྲྭ་བཞི་པར་འདུག་གོ་ཞེས་བྱ་བའི་བར་དུའོ། །དེ་ནས་ཉི་མ་ནུབ་ནས་ནམ་སྲོས་པར་རིག་པ་དང། རང་སངས་རྒྱས་བཞི་པོ་དེ་དག་ཉིད་མེའི་ཁམས་ལ་སྙོམས་པར་ཞུགས་པ་དང། རྫ་མཁན་གྱིས་སྒོ་གསེབ་ནས་དཔོང་སའི་ཁང་པ་དེ་ཐམས་ཅད་འབར། རབ་ཏུ་འབར། ཀུན་ཏུ་འབར། རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པར་མཐོང་ནས་དེས་བསམས་པ།
ཡོན་གནས་ འདི་ལྟ་བུ་དག་བྱོན་ནས་བདག་གིས་དཔོང་སའི་ཁང་པ་གང་ཡིན་པར་གནས་པར་གྱུར་པ་དེ་ནི། བདག་དབང་ཐང་ཆེ་བ་དང། ཕན་འདོགས་པ་དང་ལྡན་པ་ཡིན་ནོ་སྙམ་མོ། །ཡང་སྨྲས་པ། ཀྱཻ་མའོ་ཡོན་གནས་བྱོན་པ་དག །རིང་མོ་ཞིག་ནི་མཐོང་གྱུར་པས། །འཇིག་རྟེན་འདི་དང་ཕ་རོལ་ཏུ། །བདག་ནི་བདེ་བ་ཉིད་དུ་གྱུར། །རང་སངས་རྒྱས་དེ་དག་ཀྱང་ཡོན་བདག་གི་དགེ་བའི་རྩ་བ་བསྐྱེད་པའི་ཕྱིར་བསམ་གཏན་དང། རྣམ་པར་ཐར་པ་དང། ཏིང་ངེ་འཛིན་དང། སྙོམས་པར་འཇུག་པ་དག་གིས་མཚན་མོ་འདས་པར་མཛད་ནས་གཅིག་ལ་གཅིག་ཀུན་དགའ་བར་འགྱུར་བ་རྩོམ་མོ། །དེ་ནས་རང་སངས་རྒྱས་དེ་རྣམས་ཀྱིས་གཅིག་ལ་སྨྲས་པ། ཁྱོད་སུ་ཞིག །གང་དུ། ཅིའི་ཕྱིར། ཇི་ལྟར་རབ་ཏུ་བྱུང། དེ་རྣམས་ཀྱིས་དེ་སྐད་ཅེས་སྨྲས་པ་དང། དེས་དེ་རྣམས་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རྣམས་ཀྱིས་ཡུལ་ཀ་ལིང་ཀ་ན་རྒྱལ་པོ་རྣ་ལག་ཅན་ཞེས་བྱ་བ་བྱུང་བ་ཐོས་སམ། དེ་དག་གིས་སྨྲས་པ། ཐོས་ཏེ་གཞན་ཡང་བདག་ཅག་གིས་རྒྱལ་པོ་རྣ་ལག་ཅན་དེ་ནི་འབྱོར་པ་དང། ཡོངས་སུ་གཟུང་བ་རྒྱ་ཆེ་བ། བཞོན་པ་གླང་པོ་ཆེ་དུ་མ་ཡོད་དོ་ཞེས་ཀྱང་ཐོས་སོ། །དེས་འདི་སྐད་ཅེས་སྨྲས་སོ། །ཁྱེད་ཅག་གིས་ཇི་ལྟར་ཐོས་པ་དེ་བཞིན་མོད་ཀྱི། འོན་ཀྱང་བདག་གིས་ནི་རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ། །དེ་དག་གིས་སྨྲས་པ། ཁྱོད་ཀྱིས་རྒྱལ་སྲིད་ཀྱི་ཉེས་དམིགས་ཅི་ཞིག་མཐོང་ནས་རབ་ཏུ་བྱུང། དེས་སྨྲས་པ། ཉེས་དམིགས་ཡོད་ན། དེ་ཡང་མི་ཆེ་བ་ཞིག་གོ་།ཇི་ལྟ་བུ་ཞིག །བཙུན་པ་དག་ཉོན་ཅིག །བདག་འདི་ན་སྟེང་གི་ཁང་བཟང་གི་ཐོག་ན་འདུག་པའི་ཚེ། དེ་ན་བྱ་ཞིག་ཤའི་དུམ་བུ་ཞིག་ཁྱེར་ནས་ནམ་མཁའ་ལ་ཕུར་བ་ན། དོན་དེའི་ཕྱིར་དེ་གཞན་མང་པོ་ཞིག་གིས་གཙེས་སོ། །དེས་དེ་བོར་པ་དང་གཞན་གྱིས་བླངས་ཏེ། གང་གིས་དབོར་བ་དེ་ནི་བཏང་ལ། གང་གིས་བླངས་པ་དེ་ནི་ཀུན་ནས་བསྐོར་ཏེ། དེ་ལྟར་ཕན་ཚུན་དུ་འཕྲོག་པར་བྱེད་པ། བདག་ཚུལ་བཞིན་ཡིད་ལ་བྱེད་པར་སྐྱེས་པར་གྱུར་ཏེ། ལེན་པ་གང་ཡིན་པ་དེ་ནི་བཅིངས་ལ། འདོར་བ་གང་ཡིན་པ་
དེ་ནི་གཏོང་བར་བྱེད་ན། བདག་རྒྱལ་སྲིད་རྒྱས་པ་ཡོངས་སུ་ལོངས་སྤྱོད་པ་འདིའི་རྒྱུས། བདག་དང་ཉི་འོག་གི་རྒྱལ་པོ་དང་ལྷན་ཅིག་ཏུ་འཐབ་པ་དང། རྩོད་པ་དང། འགྱེད་པར་འགྱུར་བར་གདོན་མ་ཟོས་ཏེ། བདག་ནི་རྒྱལ་སྲིད་ཀྱི་བདེ་བ་དེས་ཆོག་གོ། །སྙམ་ནས་རྒྱུ་དེ་དང་རྐྱེན་དེ་རྙེད་པས། བདག་ངེས་པར་བྱུང་སྟེ། དཀའ་ཐུབ་ཀྱི་ནགས་ཚལ་དུ་ཡང། དག་པར་བརྟེན་ནས། དེར་བདག་གིས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཡང་སྨྲས་པ། བྱ་ཡིས་ཤ་ཡི་དུམ་བུ་ཁྱེར་བ་ན། །བྱ་གཞན་ཀུན་ནས་བསྐོར་ཞིང་འབྲང་བ་མཐོང། །དེ་ལྟར་འདོད་བའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་འགྱུར། དེ་རྣམས་ཀྱིས་སྨྲས་པ། དེའི་ཚིག་ཐོས་ནས་གཉིས་པ་ལ་ཇི་ལྟར་རབ་ཏུ་བྱུང་ཞེས་དྲིས་པའི་བར་ནས། ཚེ་དང་ལྡན་པ་རྣམས་ཀྱིས་ཡུལ་མི་ཐི་ལར་རྒྱལ་པོ་གདོང་མ་ལེགས་ཞེས་བྱ་བ་བྱུང་བ་ཐོས་སམ་ཞེས་བྱ་བའི་བར་ནས། སྟེང་གི་ཁང་བཟང་གི་ཐོག་ན་འདུག་པའི་ཚེ་ཞེས་བྱ་བའི་བར་དུའོ། །ཇི་ཙམ་ན་གླང་ཁྱུ་པ་གཉིས་འདོད་པའི་རྒྱུས། ཕན་ཚུན་སྣད་ཅིང་སྨས་པ་མཐོང་བ་ན། བདག་ཚུལ་བཞིན་ཡིད་ལ་བྱེད་པ་སྐྱེས་པར་གྱུར་ཏེ། འདི་ལྟར་རེ་ཞིག་དུད་འགྲོའི་སྐྱེས་གནས་སུ་གྱུར་པ་འདི་གཉིས་ཀྱང། འདོད་པའི་རྒྱུས་ཕན་ཚུན་སྣད་པ་དང། སྨས་པར་གྱུར་ན་ཞེས་བྱ་བའི་བར་ནས། བདག་ཉི་འོག་གི་རྒྱལ་པོ་དང་ལྷན་ཅིག་ཏུ་འཐབ་པ་དང། རྩོད་པ་དང། མཚང་འབྲུ་བ་དང། འགྱེད་པ་ཞེས་བྱ་བའི་བར་དང། རབ་ཏུ་བྱུང་སྟེ། རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ་ཞེས་བྱ་བའི་བར་དུའོ། །ཡང་སྨྲས་པ། འདོད་པའི་གཞི་དང་རྒྱུ་ཡིས་ནོག་གཡོ་ཞིང། །སྣད་དང་ཅིག་ཤོས་སྨྲས་པར་གྱུར་མཐོང་བས། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་བུ་སྤྱོད་པར་གྱུར། །དེའི་ཚིག་ཀྱང་ཐོས་པ་དང། གསུམ་པ་ལ་ཁྱོད་ག་ལས་ཇི་ལྟར་རབ་ཏུ་བྱུང་ཞེས་དྲིས་སོ། །དེས་སྨྲས་པ། བདག་ཡུལ་ཝཱ་ར་ཎཱ་སིའི་གྲོང་ཁྱེར་གྱི་ཕོ་བྲང་འདི་ཉིད་དུ། རྒྱལ་པོ་ཚངས་སྦྱིན་ཞེས་བྱ་བ་ནས། བཞོན་པ་གླང་པོ་ཆེ་བརྒྱ་ཕྲག་དུ་མ་བདོག་པར་གྱུར་
ཏོ། །ཞེས་བྱ་བའི་བར་དུའོ། །དེ་དག་གིས་སྨྲས་པ། ཁྱོད་ཀྱིས་རྒྱལ་སྲིད་ཀྱི་ཉེས་དམིགས་ནི་ཅི་ཞིག་མཐོང། འདོད་པ་ལ་སྐྱོན་ནི་ཅི་ཞིག་མཐོང། དེས་སྨྲས་པ། ཁྱེད་ཉོན་ཅིག །བདག་འདི་ན་དགུན་གྱི་དུས་སུ་བུ་ཡུག་ལྡང་བ་འདས་ཏེ། སོས་ཀའི་དུས་ལ་བབ་པ་ན། ཤིང་རྣམས་ཀྱི་མེ་ཏོག་ནི་ལེགས་པར་རྒྱས། བུང་པ་རྣམས་ འཕུར་བའི་ལང་ལོང་གིས་མེ་ཏོག་གི་མགོ་ལྕོགས་སྔུག་གུ་རྣམས་ནི་ལྡེམ། ཙནྡན་བསྟེན་པ་དང་ནི་རྗེས་སུ་མཐུན། ཁུ་བྱུག་གི་སྒྲ་ནི་འབྱིན། ནགས་ཚལ་གྱི་ནང་ན་ངང་པ་དང། ཁྲུང་ཁྲུང་དང། རྨ་བྱ་དང། ནེ་ཙོ་དང། རི་སྐེགས་རྣམས་ཀྱི་སྐད་འབྱིན་པ་ན། སླས་ཀྱི་བཙུན་མོ་དང་ལྷན་ཅིག་ཏུ་སྐྱེད་མོས་ཚལ་གྱི་སར་སོང་བ་ན། དེར་བདག་གིས་ཨ་མྲའི་ཤིང་གི་མེ་ཏོག་ཤིན་ཏུ་སྤ་བ་མཐོང་པ་དང། སླས་ཀྱི་བཙུན་མོ་དེ་དག་མེ་ཏོག་ལ་ཆགས་པས། སྐད་ཅིག་ཏུ་དེ་དག་ཡལ་ག་རྣམས་བཅག་སྟེ་བཞག་གོ་།དེ་ལ་བདག་འདི་སྙམ་དུ་རེ་ཞིག་ཕྱི་རོལ་གྱི་དངོས་པོ་འདི་དག་ནི་ཕུན་སུམ་ཚོགས་པ་ན་མཛེས་པ་ཡིན་ལ། ཉམས་པ་ན་མི་མཛེས་པ་ཡིན་ན། བདག་གི་རྒྱལ་སྲིད་འབྱོར་པ་ཡོངས་སུ་ལོངས་སྤྱོད་པ་ཞེས་བྱ་བའི་བར་ལྟ་གདོན་མི་ཟ་བར་སྙམ་དུ་བསམས་ནས་རབ་ཏུ་བྱུང་སྟེ། རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཡང་སྨྲས་པ། ཨ་མྲའི་ཤིང་རྩེ་མེ་ཏོག་ལེགས་རྒྱས་པ། །ཡིད་འོང་གཟུགས་ལྡན་ཆགས་པ་མཐོང་བ་ན། །དེ་ལྟར་འདོད་པའི་ཡོན་ཏན་རིགས་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་གྱུར། །བཞི་པ་དེ་ལ་ཡང་དྲིས་པ། ཁྱོད་སུ་ཞིག །ཇི་ལྟར་རབ་ཏུ་བྱུང། དེས་སྨྲས་པ། ཡུལ་བྲང་གིས་ཉལ་ན། བདག་རྒྱལ་པོ་གཅེར་བུ་ཐུལ་ཅེས་བྱ་བར་གྱུར་ཏོ་ཞེས་བྱ་བའི་བར་ནས། སྟེང་གི་ཁང་བཟང་གི་ཐོག་ཏུ་སོང་སྟེ། དགའ་བའི་རྩེད་མོ་ཉམས་སུ་མྱོང་བར་བྱེད་ཅིང་གནས་སོ། །དེ་ན་སླས་ཀྱི་བཙུན་མོ་ཞིག་གསེར་གྱི་གདུ་བུས་བརྒྱན་ནས་ཚོན་རྩི་འཐག་གོ། །དེ་འཐག་པ་ན་སྒྲ་བྱུང་བ་ལས་ཞེས་བྱ་བའི་བར་ནས། བདག་གིས་འདི་སྙམ་དུ་ཕྱི་རོལ་གྱི་དངོས་པོ་འདི་ནི་སེམས་མེད་པ་ཡིན་
ཡང་། ཡང་དག་པར་བརྡུངས་པ་ན་སྒྲ་འབྱུང་བར་འགྱུར་བར་འགྱུར་ན། བདག་གི་རྒྱལ་སྲིད་འབྱོར་བ་གང་ཡིན་པ་ལོངས་སྤྱོད་པ་ཞེས་བྱ་བའི་བར་ལྟ་སྨོས་ཀྱང་ཅི་དགོས་པས། རྒྱལ་སྲིད་ཀྱིས་ཆོག་གོ་སྙམ་དུ་བསམས་ཏེ། བདག་གིས་རྒྱལ་སྲིད་སྤངས་ནས་ཉེས་པ་དང་སྐྱོན་ཆུང་ངུ་མཐོང་བའི་རྐྱེན་རྙེད་པས། ངེས་པར་བྱུང་སྟེ་རབ་ཏུ་བྱུང་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །ཡང་སྨྲས་པ། གསེར་མགར་གྱིས་ནི་ལེགས་པར་བརྡུངས་པ་ཡི། །གསེར་གྱི་འོད་གསལ་ལག་པའི་མཁྲིག་མ་གཉིས། །བརྡུངས་པ་ཐོས་པ་དེ་ལྟར་བདག་དང་ནི། །གཞན་དང་ལྷན་ཅིག་ གླེང་གཞི་འདི་ཡི་རྒྱུས། །ཚིག་ངན་སྣ་ཚོགས་འཐོན་ཅིང་སེམས་འཁྲུགས་པ། །དེ་ལྟར་འདོད་པའི་ཡོན་ཏན་རིག་བྱས་ཏེ། །བསེ་རུ་ལྟ་བུར་གཅིག་པུ་སྤྱོད་པར་འགྱུར། །དེ་ལྟར་དེ་དག་གཅིག་ལ་གཅིག་སྨྲས་ནས་འདུག་གོ་།དེ་ནས་རྫ་མཁན་དང་ཆུང་མ་ལྷན་ཅིག་ཏུ་འདི་སྙམ་དུ། བདག་ཉིད་ཆེན་པོ་འདི་དག་གིས་རིགས་རྒྱུད་རྒྱ་ཆེ་བའི་རྒྱལ་སྲིད་ཡངས་པ་ཡང་སྤངས་ནས། རབ་ཏུ་བྱུང་བར་གྱུར་ན། བདག་ཅག་གིས་ཅིའི་ཕྱིར་ཁྱིམ་དང། ཕྲུ་རྟོག་དང། གཟར་བུ་དང། བྲལ་བྲུལ་གྱིས་ཁྱིམ་གྱི་འཚོ་ཚིས་བྱས་པ་ལ། ལོངས་སྤྱོད་ཀྱི་འདུ་ཤེས་འབྱུང་བའི་རྣམ་པ་འདི་ལྟ་བུ་ཡོངས་སུ་སྤངས་ནས། བདག་ཅག་ཅིའི་ཕྱིར་རབ་ཏུ་འབྱུང་བར་མི་བྱ་སྙམ་དུ་བསམས་སོ། །ཡང་སྨྲས་པ། གྲོང་དང་ཡུལ་འཁོར་རིགས་རྒྱུད་འབྱོར་བའི་ས་སྤངས་ནས། །ཆགས་མེད་སེམས་ཀྱིས་མི་ཡི་འཇིག་རྟེན་རྒྱུ་བྱེད་ན། །བདག་ཅག་ཅི་ཕྱིར་བཀྲེན་པའི་ཚུལ་གྱིས་བསྒྲུབས་པའི་ཡུལ། །ཆུ་ཡིས་ཁྱེར་བ་ལྟ་བུ་མངོན་དུ་སྤྱོད་པར་བྱེད། །དེ་ལྟར་དེ་དག་ནམ་ནངས་ཏེ་མཚན་མོ་ཟད་ནས་ནམ་ནངས་པ་དང། རྫ་མཁན་ཁྱོ་ཤུག་གིས་ཞེ་སའི་སེམས་བསྐྱེད་དེ། རང་སངས་རྒྱས་དེ་དག་སྤྱན་དྲངས་ནས་བསོད་སྙོམས་ཕུལ་ཏེ་ཞེས་བྱ་བའི་བར་དང། དེ་དག་སྟེང་གི་ནམ་མཁའ་ལ་འཕགས་སོ་ཞེས་བྱ་བའི་བར་ནས། རྫ་མཁན་ཁྱོ་ཤུག་གིས་སྨོན་ལམ་བཏབ་པ། ཨ་ལ་ལ་བདག་ཅག་གིས་སྦྱིན་པར་བྱ་བའི་ཆོས་ཡོངས་སུ་བཏང་བ་དང། སེམས་བསྐྱེད་
པའི་དགེ་བའི་རྩ་བ་འདིས། ནམ་དུ་ཡང་དབུལ་པོའི་ཁྱིམ་དུ་སྐྱེས་པར་མ་གྱུར་ཅིག །བདག་ཅག་ཀྱང་འདི་ལྟ་བུའི་ཆོས་དང་ལྡན་པའི་སྐལ་བ་ཅན་དུ་ཤོག་ཅིག །བདག་ཅག་གིས་སྟོན་པ་ཁྱད་པར་དུ་འཕགས་པ་འདི་ལྟ་བུ་མཉེས་པར་བགྱིད་ཅིང། མི་མཉེས་པར་མི་བགྱིད་པར་གྱུར་ཅིག །ཅེས་བྱས་ནས། དེ་གཉིས་རབ་ཏུ་འབྱུང་བ་ལ་མངོན་པར་དགའ་བར་གྱུར་ཏོ། །རེ་ཞིག་ན་རྫ་མཁན་བུམ་པ་ཐོགས་ནས་ཆུ་ཆུར་སོང་ངོ། །ཞེས་བྱ་བའི་བར་དང། ཆུང་མས་འཕྲིགས་ནས་སླར་བཟློག་སྟེ་ཞེས་བྱ་བའི་བར་ནས། ཆུང་མ་རབ་ཏུ་བྱུང་བ་དང། དེས་བསམས་པ། བདག་ནི་བསླུས་ཀྱི། མེད་ན་ད་ཇི་ལྟར་བྱ། བྱིས་ པ་ཁྱེའུ་འདི་གཉིས་སྐྱེད་པར་བྱ་ཞིང། བསྲིང་བར་བྱའོ་སྙམ་ནས། དེས་དེ་གཉིས་བསྐྱེད་བསྲིངས་ཏེ། ཆེན་པོར་གྱུར་པ་དེའི་ཚེ། རྫ་མཁན་གྱིས་སྨིན་པ་དང། མ་སྨིན་པ་དང། ལན་ཚྭ་བྲོ་བ་དང། ལན་ཚྭ་མི་བྲོ་བ་དག་གིས་བརྟག་པར་བྱས་ཏེ། འདི་སྐད་ཅེས་ཀྱང་སྨྲས་སོ། །སྨིན་དང་མ་སྨིན་དེ་བཞིན་དུ། །ལན་ཚྭ་བྲོ་དང་མི་བྲོ་བ། །ཤེས་པར་བྱིས་པ་གཉིས་སྐྱེས་ན། །བདག་ནི་རབ་ཏུ་འབྱུང་བའི་དུས། །དེ་བྱིས་པ་དེ་གཉིས་ལས་ནི་འདི་ལྟར་བརྐོ་བར་བྱའོ། །སྣོད་སྤྱད་ནི་འདི་ལྟར་བཅོང་ངོ་ཞེས་བྱ་བའི་བར་དུ་བསླབས་ནས། རབ་ཏུ་བྱུང་ངོ་ཞེས་བྱ་བའི་བར་དུའོ། །རྫ་མཁན་བསོད་སྙོམས་བྱེད་པ་མཐོང་སྟེ་ཞེས་བྱ་བའི་བར་ནས། ཚིགས་སུ་བཅད་པ་སྨྲས་པ། སྨིན་དང་མ་སྨིན་དེ་བཞིན་དུ། །ལན་ཚྭ་བྲོ་དང་མི་བྲོ་བ། །ཤེས་པར་བྱིས་པ་གཉིས་སྐྱེས་ཀྱི། །བཟང་མོའང་སོང་ཞིག་བདག་ཀྱང་འགྲོ། །ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཚེ་དེའི་དུས་ན། རྫ་མཁན་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ནོ། །རྫ་མཁན་གྱི་ཆུང་མ་གང་ཡིན་པ་དེ་ནི་སེར་སྐྱ་བཟང་མོ་འདི་ཡིན་ཏེ། དེའི་ཚེ་ཡང་འདི་དག་ཡིད་བྱུང་བ་ཆུང་ངུས་རབ་ཏུ་བྱུང་ངོ། །ད་ལྟར་ཡང་ཆུང་ངུས་སོ། །དེ་ལྟ་བས་ན་ཅི་ཞིག་བྱ་ཞེ་ན། ངེས་པར་འབྱུང་བའི་རྒྱུ་བསྟན་པས་འདི་ལྟ་བུའི་ཡོན་ཏན་གྱི་ཚོགས་ཅན་དུ་འགྱུར་ཏེ། འོད་སྲུང་ཆེན་པོ་དང། སེར་སྐྱ་བཟང་མོ་ཇི་ལྟ་བ་དེ་བཞིན་དུ་དགེ་སློང་རྣམས་ཀྱིས་
བསླབ་པར་བྱའོ།། །།བར་སྡོམ་ལ། ཀ་ལིང་ཀ་དང་ལག་རྣ་ཅན། །མི་ཐི་ལ་དང་བཞིན་མ་ལེགས། །ཀ་ཤི་དང་ནི་ཚངས་སྦྱིན་དང། །བྲང་གིས་ཉལ་དང་གཅེར་བུ་ཐུལ། །ཡང་དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་གསོལ་པ། བཅོམ་ལྡན་འདས་སེར་སྐྱ་བཟང་མོས་ལས་ཅི་ཞིག་བགྱིས་ཤིང་བསགས་ན། འདི་ལྟར་རྣམ་པར་སྨིན་པས་གཟུགས་བཟང་ཞིང་མཛེས་ལ། བལྟ་ན་སྡུག་པར་གྱུར་ཅེས་བྱ་བའི་བར་དུའོ། །དགེ་སློང་དག་སྔོན་བྱུང་བ་འདས་པའི་དུས་ན། རྒྱལ་པོའི་ཕོ་བྲང་ཞིག་ན། རྒྱལ་པོ་ཞིག་རྒྱལ་སྲིད་བྱེད་པ་ནས། ཚོང་དཔོན་ཕྱུག་པ་ནོར་མང་བ། ལོངས་སྤྱོད་ཚེ་བ་ཞེས་བྱ་བའི་བར་དུའོ། །དེ་ཡང་སྐྱེ་བོའི་ཚོགས་རྣམས་ལ་བལྟ་བ་ན། སེམས་ཅན་བརྒྱ་སྟོང་དུ་མ་རྐང་ལག་རྩུབ་པ། ལུས་སེར་གཅན་ མགོ་ཡོགས་པ། རྡུལ་གྱིས་ཡོགས་པ། ཁ་མིག་ཉམས་པ། ཚ་བ་དང་ལྷགས་པས་ཉམ་ཐག་པ། སྡུག་བསྔལ་དང་ལྡན་པ་མཐོང་ངོ། །གཞན་དག་ནི་ལུས་ལ་གོས་བཟང་པོ་དང། རྒྱན་གྱི་ཁྱབ་པར་གྱིས་ཀླུབས་པ། རྟ་དང། གླང་པོ་དང། མི་དང། ཤིང་རྟའི་བཞོན་པ་ཅན། འབྱོར་པ་མཆོག་དང་ལྡན་པ་ཡང་མཐོང་ནས། དེ་འདི་སྙམ་དུ་སེམས་ཅན་སྡུག་བསྔལ་བ་འདི་རྣམས་ཀྱིས་འདི་ལྟར་སྦྱིན་པ་མ་བྱིན་པའི་ལས་དེས། རྣམ་པ་འདི་ལྟ་བུར་གྱུར་ལ། དེ་ལྟར་ཡང་འདི་དག་གིས་རབ་ཏུ་སྦྱིན་མི་ནུས་པའི་ཕྱིར། འདི་ནས་ཤི་ཕོས་ནས་འགྲོ་བ་ཤིན་ཏུ་དམན་པ་གང་ཡང་རུང་བར་སྐྱེ་བར་འགྱུར་བའི་གནས་སྐབས་དེ་ལྟ་བུ་དག་ཡོད་དོ། །སྦྱིན་པ་ཁྱད་པར་ཅན་གྱིས་ནི། ལོངས་སྤྱོད་ཅན་འདི་དག་ཏུ་གྱུར་ཏོ། །བདག་གིས་ཀྱང་གདོན་མི་ཟ་བར་སྐྱེ་བོ་གཞན་དག་ལ་སྦྱིན་པ་བྱིན་པ་དེས་ན། རྣམ་པ་འདི་ལྟ་བུའི་འབྱོར་པ་རྙེད་པར་གྱུར་ཏོ། །དེ་ཡང་བདག་གིས་བྱིན་ལ། ཚེ་རབས་གཞན་དུ་སྡུག་བསྔལ་བར་མི་འགྱུར་བར་བྱའོ་སྙམ་དུ་བསམས་སོ། །དེས་དེ་ལྟར་བསམས་ནས། ཁྱིམ་དུ་སོང་སྟེ་རང་གི་ཆུང་མ་ལ་འདི་སྐད་ཅེས་སྨྲས་སོ། །བཟང་མོ་འཇིག་རྟེན་ཕ་རོལ་ཏུ་ནོར་བསགས་པ་རྣམས་ཁྱེར་ལ་
འདོང་ངོ། །དེས་སྨྲས་པ། དེ་ལྟར་བགྱི་ཡི་བཞོན་པ་རྟ་དང། རྔ་མོང་དང། བོང་བུ་དག་སྟ་གོན་མཛོད་ཅིག །དེས་སྨྲས་པ། བཞོན་པ་འདི་དག་གིས་ཅི་ཞིག་བྱ། ཐུན་མོང་གི་ནོར་དག་འཇིག་རྟེན་ཕ་རོལ་ཏུ་བཀུར་མི་ནུས་པ་ཉིད་དོ། །འོན་ཀྱང་ཕོངས་པ་དང། བཀྲེན་པ་དང། ལོང་བ་དང། ཚོང་པ་རྣམས་ཁྱིམ་དུ་འོངས་པ་རྣམས་ཀྱི་རེ་ཐག་མི་ཆད་པ་ཇི་ལྟ་བར་སྦྱིན་པ་བྱིན་ཅིག །དེས་སྨྲས་པ། དེ་བཞིན་དུ་བགྱིའོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ། རང་སངས་རྒྱས་འཇིག་རྟེན་དུ་འབྱུང་བར་འགྱུར་བས། རང་སངས་རྒྱས་རྐེ་ཞིང་ཉམ་ཆུང་བ་ཆོས་གོས་ཧྲུལ་པོ་ཅན་ཞིག་རྒྱལ་པོའི་ཕོ་བྲང་འཁོར་དུ་བསོད་སྙོམས་ལ་ཞུགས་པ་ལས། དེ་ཚོང་དབོན་དེའི་ཁྱིམ་སྒོ་ན་འདུག་པ་དང། བྲན་དང་བྲན་མོ་དག་ཆུ་གཅུ་བའི་ཕྱིར་ཁྱིམ་དེ་ནས་བྱུང་བ་དང། དེ་དག་གིས་རྐེ་ཞིང་ཉམ་ཆུང་བ་ཆོས་གོས་ཆུལ་པོ་ཅན་དེ་མཐོང་ནས། དེ་དག་གིས་འདི་སྙམ་དུ་སྡུག་བསྔལ་བ་གང་ཡིན་པ་དེ་ལ། གང་འདོད་པ་དེ་བྱིན་ཅིག །ཅེས་ཇོ་བོས་བསྒོ་བས། འཕགས་ པ་སློང་མོ་པ་འདི་ལ་ཡང་དེ་བསྟན་པར་བྱའོ། །སྙམ་དུ་བསམས་ནས། དེ་དག་གིས་བཙུན་པ་དེ་ལ་འདི་སྐད་ཅེས་སྨྲས་སོ། །ཁྱིམ་འདིར་བཞུད་ཅིག་དང། སློང་མོ་རྙེད་པར་འགྱུར་རོ། །དེ་སོང་བ་དང། ཚོང་དཔོན་གྱི་ཆུང་མས་དེ་མཐོང་ན། རྐེ་ཞིང་ཉམ་ཆུང་ལ་ཆོས་གོས་ཧྲུལ་པོ་ཅན་ཞིག་གོ་སྙམ་དུ་བསམས་ནས། སློང་མོ་མ་བྱིན་པ་དང། དེ་དེ་ནས་ཕྱིར་བྱུང་ངོ། །བྲན་མོ་དེ་དག་ཀྱང་བུམ་པ་ཆུས་བཀང་ནས་སླར་འོངས་པ་དང། དེ་དག་གིས་ལྷུང་བཟེད་སྟོང་པར་མཐོང་ནས། དེ་དག་གིས་དྲིས་པ། ཁྱོད་ཅི་ཁྱིམ་འདིར་མ་བྱོན་ནམ། དེས་སྨྲས་པ། འོངས་ཀྱང་སློང་མོ་མ་རྙེད་དོ། །དེ་དག་གིས་དེ་ཕྱིར་བཟློག་སྟེ་ཁྲིད་ནས། དེ་དག་གིས་ཇོ་མོ་ལ་སྨྲས་པ། ཅིའི་སླད་དུ་འདི་ལ་བསོད་སྙོམས་མ་སྩལ། དེས་སྨྲས་པ། འདི་ལ་ང་མ་དད་པས་སོ། །དེ་དག་གིས་སྨྲས་པ། ཅི་ཇོ་བོས་ཁ་དོག་བཟང་བ་དང། དད་ན་བྱིན་ཅིག །ཅེས་ཁྱོད་ལ་བསྒོའམ། དེས་སྨྲས་པ། འདི་ལ་ང་མ་དད་པ་ཕན་ཆད་མང་དུ་སྨྲས་ཀྱང་ཅི་ཕན།
བྲན་མོས་འདི་སྙམ་དུ་བདག་གིས་དགེ་སློང་འདི་བཟུང་ནས་ལན་གཉིས་ཀྱི་བར་དུ་བཟློག་ན་ད་རེ་ཐག་བཅད་ནས་ཇི་ལྟར་བཏང་བར་བྱ་སྙམ་དུ་བསམས་ནས། དེས་ཇོ་མོ་ལ་སྨྲས་པ། བདག་གི་འཚལ་མ་ནར་མ་གང་ལགས་པ་དེ་བདག་ལ་སྩལ་དུ་གསོལ། དེས་ཀྱང་བྱིན་པ་དང། བྲན་མོ་དེས་ཉིན་པར་གྱི་ཟན་ཕྱེ་བྲེའུ་ཆུང་གང་བླངས་ནས། དེ་ལ་ཕུལ་ཏེ། དེས་ཡང་འདི་སྙམ་དུ་འཕགས་པ་དེ་ནི་ཆོས་གོས་ཧྲུལ་པོར་འདུག་པས་ཁྱད་དུ་བསད་པ་ཡིན་གྱི། བདག་གི་རས་ཡུག་དེ་ལ་དབུལ་ལོ་སྙམ་དུ་བསམས་ནས། དེས་དེ་ལ་རས་ཡུག་དཀར་པོ་ཡང་ཕུལ་ལོ། །རང་སངས་རྒྱས་དེས་ཀྱང་འདིས་བསོད་ནམས་མང་པོ་བསྒྲུབས་པར་འགྱུར་བར་བྱའོ་སྙམ་དུ་བསམས་ནས། དེ་ཉིད་ཀྱི་དད་པ་བསྐྱེད་པའི་ཕྱིར་ངང་པའི་རྒྱལ་པོ་འདབ་མ་བརྐྱང་པ་ལྟ་བུར་ནམ་མཁའི་དཀྱིལ་དུ་འཕགས་སོ། །དེས་དེ་མཐོང་མ་ཐག་ཏུ་སེམས་དད་པར་གྱུར་ནས། དགའ་བ་དང། མགུ་བ་དང། རངས་པའི་བསམ་པས་པུས་མོ་ས་ལ་བཙུགས་ཏེ། ཞབས་ལ་ཕྱག་འཚལ་ནས། ཇི་ལྟར་འཕགས་པ་འདི་ལ་ཅུང་ཟད་ཁྱད་དུ་བསད་པ་གང་ཡིན་པ་དེ་ཡང་ཁ་དོག་ངན་པ་ ལས་གྱུར་ཏོ་སྙམ་ནས་སྨོན་ལམ་བཏབ་པ། ཨ་ལ་ལ་བདག་གིས་སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས། གང་དང་གང་དུ་སྐྱེས་པའི་ཆེ་རབས་དེ་དང་དེར་གཟུགས་མཛེས་ཤིང་མདོག་བཟང་བ་ཤིན་ཏུ་བལྟ་ན་སྡུག་པར་གྱུར་ཅིག །ནམ་དུ་ཡང་རྐེ་བ་དང། ཁ་དོག་ངན་པར་མ་གྱུར་ཅིག །ཅེས་བྱས་སོ། །དེའི་ཚེ་རྒྱལ་བུ་ཞིག་བློན་པོའི་ཚོགས་ཀྱིས་བསྐོར་ནས། སྐྱེས་བུ་བརྒྱ་སྟོང་དུ་མས་བསྐོར་ཅིང་འདུག་པ་དེའི་སྟེང་དུ། རང་སངས་རྒྱས་དེའི་གྲིབ་མ་བབ་པ་དང། དེས་སྟེང་དུ་བལྟས་ན། རང་སངས་རྒྱས་ཆོས་གོས་བགོས་པ། རས་ཡུག་ཐོགས་པ། རིལ་བ་སྤྱི་བླུགས་དང། ལྷུང་བཟེད་ནག་པོ་ཐོགས་པ། གཅིག་ཏུ་སྤ་ཞིང་མཛེས་པ་ཞིག་ནམ་མཁའ་ལ་འགྲོ་བ་མཐོང་ནས། དེས་འདི་སྙམ་དུ་རྣམ་པ་འདི་ལྟ་བུའི་བདག་ཉིད་ཆེན་པོ། ཡུལ་གྱི་བསོད་ནམས་སོ་སོར་ལེན་པ་གང་ཡིན་པ་དེ་ནི་བདག་དབང་ཐང་ཆེ་བ་དང། ཕན་འདོགས་པ་དང་བཅས་པ་ཡིན་ནོ་
སྙམ་དུ་བསམས་ནས་དེས་སྨྲས་པ། དེང་འདི་ལ་བསོད་སྙོམས་འབུལ་བར་བྱེད་པ་གང་ཡིན་པ་དེ་ལ་ནི། དེར་གྲོང་ཁྱེར་གྱི་མཆོག་སྦྱིན་པར་བྱའོ། །ཚོང་དཔོན་དེ་ཡང་འཁོར་དེ་ཉིད་དུ་འདུས་ཏེ་འདུག་པས། དེས་འདི་སྙམ་དུ་བདག་གིས་བསོད་སྙོམས་པ་ཐམས་ཅད་ལ་སྦྱིན་པ་བྱིན་ཅིག །ཅེས་ཁྱིམ་དུ་བསྒོ་བས། གདོན་མི་ཟ་བར་བདག་གི་ཁྱིམ་ནས་བསོད་སྙོམས་ཕུལ་བ་ཡིན་གྱི། སོང་ལ་བརྟག་པར་བྱའོ་སྙམ་དུ་བསམས་ནས། དེ་ལངས་ནས་རིངས་པར་ཁྱིམ་དུ་སོང་ངོ། །ཆུང་མ་དེས་ཀྱང་དེའི་རྫུ་འཕྲུལ་མཐོང་སྟེ། སེམས་དད་པར་གྱུར་ནས། བྲན་མོ་ལ་སྨྲས་པ། བྲན་མོ་བསོད་ནམས་ནི་ང་ཡིར་བྱའོ། །ཁྱོད་ལ་ནི་ངས་ཁ་ཟས་མཆོག་ཏུ་བསོད་པ་དག་སྦྱིན་ནོ། །དེས་དེ་ལ་སྨྲས་པ། ཁྱོད་ཇོ་མོ་ཡིན་པས་བདག་གི་སྲོག་ལ་དབང་གི །བསོད་ནམས་ལ་ནི་མ་ཡིན་པས་མི་སྦྱིན་ནོ། །དེ་ཁྲོས་ཤིང་འཁྲུག་པས་ཀུན་ནས་དཀྲིས་ཤིང་འདུག་པས། ལག་པའི་མཁྲིག་མ་གདུ་བུ་དང་བཅས་པས་དེའི་མགོར་བརྒྱབ་པ་དང། གདུ་བུ་ཕོག་པས་དེའི་མགོ་སྣད་ནས་ཁྲག་བྱུང་བར་གྱུར་པ་དང། ཚོང་དཔོན་ཡང་འོངས་ཏེ། དེས་འདི་ཅི་ཉེས་དྲིས་སོ། །དེས་ཀྱང་ཇི་ལྟར་གྱུར་པ་དེ་ལ་རྒྱ་ཆེར་སྨྲས་པ་དང། ཚོང་དཔོན་དེ་ཁྲོས་ནས། བྲན་མོ་དེ་རྒྱན་ཐམས་ཅད་ཀྱིས་ བརྒྱན་ཏེ། ཁྱིམ་དག་ཏུ་བཅུག་ནས་དེས་ཀྱང་ཇི་ལྟར་གྱུར་པ་རྒྱལ་པོ་ལ་གསོལ་པ་དང། རྒྱལ་པོས་སྨྲས་པ། དེ་ནི་ཇོ་མོར་འོས་ཏེ། ཁྱོད་ཀྱིས་ལེགས་པ་ཞིག་བྱས་སོ། །གལ་ཏེ་ཁྱོད་ཀྱིས་དེ་ལྟར་མ་བྱས་སུ་ཟིན་ན། ངས་བྲན་མོ་མ་ཡིན་པར་བྱས་པར་འགྱུར་རོ། །འོན་ཀྱང་ངས་དེ་ལ་གྲོང་ཁྱེར་གྱི་མཆོག་སྦྱིན་ནོ། །དེ་དད་པ་ཐོབ་པ་དང། རྐྱེན་རྙེད་པས་དགེ་སྦྱོང་དང། བྲམ་ཟེ་དང། ཚོང་པ་རྣམས་ལ་སྦྱིན་པ་ནི་བྱིན། བསོད་ནམས་ནི་བྱས། ཚུལ་ཁྲིམས་ཀྱང་བསྲུངས་ནས་འཆི་བའི་དུས་བྱས་ཏེ། སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་སོ། །དེ་གཟུགས་ཕུན་སུམ་ཚོགས་པ་འོད་དང། གཟི་མདངས་དང། སྣང་བ་རྒྱ་ཆེན་པོ་ཅན་དེ་ལྟ་བུར་གྱུར་པ་དང། ལྷའི་ཚོགས་གང་ཡིན་པ་དེ་དག་ཐམས་
ཅད་ཀྱང་ངོ་མཚར་དུ་གྱུར་ཏོ། །ཉེ་དབང་པོ་བཞི་དང། བརྒྱ་བྱིན་ཡང་ཡ་ཡ་པོར་གྱུར་ཏེ། དེ་དག་ཕན་ཚུན་དུ་འདི་ནི་བདག་གི་ཡིན་ནོ། །འདི་ནི་བདག་གི་ཡིན་ནོ། །ཞེས་སྨྲ་བར་གྱུར་ཏོ། །དེ་ནས་བརྒྱ་བྱིན་གྱིས་སྨྲས་པ། བདག་ཅག་འདོད་ཆགས་ཀྱི་སྐྱོན་གྱིས་སེམས་ལྷག་པར་གདུངས་པས་ཚིགས་སུ་བཅད་པ་སྨྲ་བར་བྱེད་པ་གང་ཡིན་པ་དེའི་ཡིན་པར་འགྱུར་རོ། །དེ་དག་ལས་གཅིག་གིས་སྨྲས་པ། བློང་ཞིང་རབ་ཏུ་བློང་གྱུར་པས། །བདག་ལ་ཕྱོགས་ནི་སྣང་བ་མེད། །དེ་ལ་སེམས་ནི་གནས་གྱུར་པ། །དེ་ཕྱིར་གྲོགས་དག་འདི་འདོད་དོ། །གཉིས་པས་སྨྲས་པ། ཀྱེ་མའོ་ལྷ་དབང་གང་ཞིག་ནི། །ཚིགས་བཅད་སྨྲ་བ་དེ་རེ་བདེ། །གཡུལ་ངོའི་སྣ་ལ་རྔ་བརྡུངས་པ། །དེ་ལྟར་བདག་ནི་འདོད་ཆགས་སྐྱེས། །གསུམ་པས་སྨྲས་པ། རྔ་ཆེན་བརྡུངས་པར་གྱུར་ཀྱང་ནི། །དེ་དང་དེར་ནི་ངལ་གསོར་ཡོད། །ཆུ་ཀླུང་ཆེན་པོ་མི་བཟད་ལྟར། །དེ་ལྟར་བདག་གི་འདོད་ཆགས་སྐྱེས། །བཞི་པས་སྨྲས་པ། མི་བཟད་པ་ཡིས་ཁྱེར་གྱུར་ཀྱང། །དེ་དང་དེར་ནི་ཐོགས་གྱུར་གྱི། །ཕྱེ་མ་ལེབ་ལྟར་བདག་གི་མིག །རྟག་ཏུ་འཛུམ་པ་མེད་པར་གྱུར། །བརྒྱ་བྱིན་གྱིས་སྨྲས་པ། ཚིགས་བཅད་རབ་ཏུ་སྨྲ་བའི་ཕྱིར། །ཁྱེད་ཅག་ཐམས་ཅད་བདེ་བ་ཡིན། །བདག་ནི་ཇི་ག་འཆི་འགྱུར་བའམ། །གསོན་པར་འགྱུར་བའང་མི་ཤེས་སོ། །དེ་དག་གིས་འདི་ སྙམ་དུ་ཡུལ་འདི་ནི་བརྒྱ་བྱིན་འདོད་པས་གནས་འདི་ནས་ཤི་འཕོས་ན་མི་རུང་ངོ་སྙམ་དུ་བསམས་ནས། དེ་དག་གིས་བརྒྱ་བྱིན་ལ་བྱིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཚེ་དེའི་དུས་ན་བྲན་མོར་གྱུར་པ་གང་ཡིན་པ་དེ་ནི། སེར་སྐྱ་བཟང་མོ་འདི་ཡིན་ཏེ། རང་སངས་རྒྱས་དེ་ལ་བསོད་སྙོམས་རབ་ཏུ་ཕུལ་བ་དང། རས་ཡུག་ཕུལ་བར་གྱུར་པ་ཞེས་བྱ་བའི་བར་ནས་རྒྱུ་དེས་གཟུགས་བཟང་བ་དང། མཛེས་པར་གྱུར་ཏོ། །ཡང་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་རེ་ཞིག་ལྷའི་བུ་མོས་ཉེ་དབང་པོ་བཞི་དང། བརྒྱ་བྱིན་ཡ་ཡ་བོར་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་
པ། དགེ་སློང་དག །འདི་ན་དེས་གང་གི་ཕྱིར་ཉེ་དབང་པོ་བཞི་དང། བརྒྱ་བྱིན་ཡ་ཡ་བོར་བྱས་པ་ངོ་མཚར་མི་ཆེའོ། །འོན་ཀྱང་དགེ་སློང་དག་སྔོན་འདས་པའི་དུས་ན། འདི་ཉིད་ཀྱི་གྲོང་གི་བཀྲབས་པ་བཞི་དང། མཆོག་ཏུ་བཀྲབས་པ་རྣམས་ཡ་ཡ་བོར་བྱས་པ་དེ་བཤད་ཀྱི། ཉོན་ཅིག་ཅེས་བྱ་བའི་བར་ནས། ལྷའི་བུ་མོ་འདི་ཉིད་ཅེས་བྱ་བའི་བར་ནས། འཛམ་བུའི་གླིང་དུ་རིགས་མཐོ་བ། ནོར་ཆེ་བ། རྫས་ཀྱི་ཚོགས་མང་པོ་ཞིག་ཏུ་སྐྱེས་ནས་འདོད་པ་སྤྱོད་པ་ཞིག་ཏུ་གྱུར་ཏོ། །ཞེས་རྒྱ་ཆེར་བརྗོད་དོ། །ཚོང་དཔོན་ཞིག་གིས་ཆུང་མར་བླངས་པ་དང། དེ་ལ་གྲོང་གི་བཀྲབས་པ་བཞི་དང། མཆོག་ཏུ་བཀྲབས་པ་དང་ལྔ་པོ་དེ་དག་གིས་དེ་མཐོང་བ་དང། འདོད་ཆགས་ཀྱིས་ལྷག་པར་གདུངས་པར་གྱུར་ནས། དེ་ལ་ཡང་སོ་སོ་ནས་བར་མི་དག་བཏང་བ་དང། དེས་ཀྱང་ཉན་ཏོ། །དེ་ནས་དེ་ཁྱོད་ལ་རག་ལས་པས་དེ་རིང་སོང་ཞེས་སྨྲ་ཞིང། དེ་རྣམས་ཀྱི་སེམས་བསྲུང་ཞིང་འདུག་གོ། དེ་ནས་དེ་དག་ལ་གཅིག་གིས་འདི་སྙམ་དུ་བསམས་ཏེ། ཉི་མ་ཡང་མང་ཞིག་ཐལ་བས་དེའི་ཕྱིར། བདག་གིས་ཞེས་བྱ་བའི་བར་དུའོ། །དེས་ཀྱང་དེ་དག་ལ་བདག་དེ་རིང་འོང་ངོ་ཞེས་དུས་བཏབ་པ་དང། དེ་དག་གིས་ཁྱོད་གང་འོང། ཁོ་བོ་ཅག་གར་འོང་ཞེས་དྲིས་སོ། །དེས་ཀྱང་གྲོང་ཁྱེར་འདི་ནས་ཧ་ཅང་ཡང་མི་རིང་བ་ཞིག་ན། ཤིང་ནྱ་གྲོ་དྷ་གནམ་འཕར་དུ་མཐོ་བ། ཡལ་ག་རབ་ཏུ་འཕྱང་བ། ལོ་མ་སྟུག་པོ་ཡོད་པར་དེང་ལ། ཤིང་དེ་ལ་ འཛེགས་ཏེ་འདུག་ཅིག་དང། བདག་དེའུ་རེ་འོང་ངོ་ཞེས་སོ་སོར་བསྟན་ནས། དེ་ཁྱོ་ལ་སྐབས་ཚོལ་ཞིང་འདུག་གོ། དེས་ཀྱང་དེ་ལ་འདི་ནི་འདི་ལྟར་སེམས་སོ། །ཞེས་བྱ་བར་འཕྲིགས་ནས། དེས་དེ་བརྡེགས་ནས་ཀ་བ་ལ་བཅིངས་སོ། །དེ་ན་གཅིག་ལ་སྨྲས་པ། སོང་ལ་ཤིང་དེ་ལ་འཛེགས་ཏེ། ཤར་ཕྱོགས་ཀྱི་ཤིང་གི་ཡལ་ག་ལ་འཛེགས་ལ་འདུག་ཅིག་དང། བདག་དེའུ་རེ་འོང་ངོ་ཞེས་བྱས་པ་དང། དེ་དགའ་མགུ་ནས་དེ་བཞིན་དུ་བྱས་སོ། །དེ་བཞིན་དུ་རྒྱས་པར་བརྗོད་དོ། །གཉིས་པ་ནི། ཤིང་དེའི་ལྷོ་ཕྱོགས་ཀྱི་ཡལ་ག་ལ་འཛེགས་ཏེ་འདུག་གོ། །གསུམ་པ་ནི། ནུབ་
ཕྱོགས་ཀྱི་ཡལ་ག་ལ་འཛེགས་ཏེ་འདུག་གོ། །བཞི་པ་ནི། བྱང་ཕྱོགས་ཀྱི་ཡལ་ག་ལ་འཛེགས་ཏེ་འདུག་གོ་།མཆོག་ཏུ་བཀྲབས་པ་དེས་ཀྱང་དེ་བཞིན་དུ་བྱས་ཏེ། ཤིང་དེའི་དབུས་ཀྱི་ཡལ་ག་ལ་འཛེགས་ཏེ་འདུག་གོ་།དེ་ནས་དེ་རྣམས་དེ་ན་མཚན་གཅིག་ཏུ་ལྷགས་པར་བྲེད་བཞིན་དུ་དེ་འོང་ངོ་སྙམ་པ་ལས། ནམ་ནངས་ཀྱི་བར་དུ་བུད་མེད་དེ་ཡང་མ་འོངས་སོ། །མཚན་མོ་ཟད་དེ་ནམ་ནངས་པ་དང། ཤར་ཕྱོགས་ཀྱི་ཡལ་ག་ལ་འདུག་པ་དེས་ཚིགས་སུ་བཅད་དེ་སྨྲས་པ། འདི་ལྟར་ཉི་མ་ཤར་ཟིན་ལ། །ཞིང་པ་གྲོང་ནས་དོང་ཟིན་ཀྱང། །རྫུན་ཅན་མ་ནི་མ་འོངས་པར། །ནྱ་གྲོ་དྷ་ཡིས་ཤེས་པར་གྱིས། །ལྷོ་ཕྱོགས་ཀྱི་ཡལ་ག་ལ་འདུག་པས་སྨྲས་པ། བུད་མེད་དེ་ནི་འོངས་གྱུར་ཏེ། །དེ་ནི་རྫུན་ཅན་མ་ཡིན་ཡང། །ལེགས་ལྡན་ཉི་མ་འདི་ཉིད་ནི། །ཤིན་ཏུ་མྱུར་བར་ཤར་བར་གྱུར། །ཤར་ཕྱོགས་པས་སྨྲས་པ། རེམ་པའང་འོངས་སམ། སྨྲས་པ། ལོས་མོད། དེ་ནས་ནུབ་ཕྱོགས་ཀྱི་ཡལ་ག་ལ་འདུག་པས་ཚིགས་སུ་བཅད་དེ་སྨྲས་པ། ཉི་མ་དུས་སུ་ཤར་བས་ན། །ཞིང་པ་རྣམས་ཀྱང་གྲོང་ནས་དོང། །བདག་གིས་དུས་ནི་མ་ཤེས་པས། །མཚན་གཅིག་མིག་གི་རྩེ་མ་སྦྱར། །རེ་ཞིག་ན་བྱང་ཕྱོགས་ཀྱི་ཡལ་ག་ལ་འདུག་པས་སྨྲས་པ། བདག་གིས་འདིར་ནི་དུས་ཤེས་མ་གྱུར་པས། །མཚན་གཅིག་ཐོག་ཐག་ལྷགས་པས་དོ་སོད་དོ། །གང་ཞིག་གཞན་གྱི་བུད་མེད་ལ་ཆགས་པ། །དེ་ནི་འདི་དང་གཞན་དག་ཐོབ་པར་འགྱུར། །དེ་ནས་ མཆོག་ཏུ་བཀྲབས་པས་སྨྲས་པ། ཁྱེད་ཅག་ལྷགས་པས་ངོ་སོད་ལ། །ཁོ་བོ་མྱ་ངན་མི་བྱེད་ཀྱི། །ནྱ་གྲོ་དྷ་ནི་ཉེས་མེད་པར། །བཅག་པ་ལ་ནི་མྱ་ངན་བྱེད། །རེ་ཞིག་ན་ཤིང་ལ་གནས་པའི་ལྷས། དེ་དག་བསླུས་པ་མཐོང་ནས། སྔར་སྤྱོས་ཏེ། འདི་སྐད་ཅེས་སྨྲས་སོ། །བདག་ཉིད་དང་ནི་དེ་བཞིན་དུ། །མི་འདི་བཞི་ལ་མྱ་ངན་ན་བྱོས། །དཔྱིད་ཟླ་ཐ་ཆུང་བྱུང་བ་ན། །གང་དག་བཅད་པ་སྐྱེ་བར་འགྱུར། །དེ་དག་བུད་མེད་ལ་རེ་ཐག་ཆད་ནས། ཤོད་དུ་བབས་ཏེ་རང་རང་གི་ཁྱིམ་དུ་དོང་ངོ། །
བུད་མེད་དེ་ཡང་ཁྱིམ་ཐབ་ཀྱིས་དཀྲོལ་པ་དང། དེ་མི་མངོན་པར་ཤིང་དེ་གང་ན་བ་དེར་སོང་བ་དང། དེ་དག་གིས་མཐོང་ནས་སྨྲས་པ། ཅིའི་ཕྱིར་ཁྱོད་ཀྱིས་ངེད་ཅག་བསླུས། དེས་ཇི་ལྟར་གྱུར་པའི་ལོ་རྒྱུས་རྣམས་དེ་དག་ལ་སྨྲས་སོ། །དེ་ནས་དེ་དག་གིས་སྨྲས་པ། ཁྱོད་མིག་སྔར་འོངས་སོ། །དེས་འདི་སྙམ་དུ་བདག་སྐྱེས་པ་ལྔ་དང། འདི་ལྟར་ཁྱིའི་ཆོས་བྱ་བར་ག་ལ་ནུས་སྙམ་དུ་བསམས་ནས། དེས་དེ་དག་ལ་སྨྲས་པ། ཁྱེད་ཅག་ལས་གང་ཞིག་མེ་ཏོག་མཛེས་པ་ཐམས་ཅད་ཁྱེར་ཏེ་འོང་བ་དེ་དང་ལྷན་ཅིག་དགའ་བ་ཉམས་སུ་མྱོང་བར་བྱའོ། །རྒྱལ་པོའི་ཕོ་བྲང་འཁོར་དེ་ན་ཡང། རྒྱལ་པོའི་པདྨ་རྣམས་སྲུང་ཞིང་རམ་བྱེད་པ། རྣ་བ་དང། སྣ་བཅད་པ་ཞིག་རམ་བྱེད་དོ། །དེ་དག་དེར་སོང་ནས་འདི་སྙམ་དུ་ཟོང་དག་ཁྱེར་ཏེ་མ་འོངས་མོད་ཀྱི། འོན་ཀྱང་མི་དེའི་བསྔགས་པ་བརྗོད་པ་དང་དགའ་བར་གྱུར་ནས། བདག་ཅག་ལ་མེ་ཏོག་དག་སྟེར་རོ་སྙམ་དུ་བསམས་སོ། །དེ་ནས་དེ་དག་ལས་གཅིག་གིས་དེ་ལ་སྨྲས་པ། ཇི་ལྟར་སྨིག་མ་འདམ་བུ་དག །བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེས་ཤོག །མེ་ཏོག་སློང་གིས་སྩལ་བར་མཛོད། །གཉིས་པས་སྨྲས་པ། ཇི་ལྟར་ཀུ་ཤ་ཀ་ཤ་དག །བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེས་ཤིག །པདྨ་སློང་གིས་སྩལ་བར་མཛོད། །གསུམ་པས་སྨྲས་པ། ཇི་ལྟར་དུར་བ་འཇགས་མ་དག །བཅད་ཅིང་གཏུབས་ཀྱང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེས་ཤིག །མེ་ཏོག་སློང་གིས་སྩལ་བར་མཛོད། །བཞི་པས་སྨྲས་པ། ཇི་ལྟར་སྐྲ་དང་ཨག་ཚོམ་དག །བྲེགས་ཤིང་ཕྱིར་ཡང་སླར་སྐྱེ་བ། །དེ་ལྟར་ཁྱོད་ཀྱི་སྣ་སྐྱེས་ ཤིག །མེ་ཏོག་སློང་གི་སྩལ་བར་མཛོད། །ལྔ་པས་སྨྲས་པ། མི་གང་པདྨ་སློང་བྱེད་པ། །དེ་ཀུན་ཁྱོད་ལ་ཀྱལ་པ་ཟེར། །པདྨ་བྱིན་རུང་མ་བྱིན་རུང། །ཁྱོད་ཀྱི་སྣ་ནི་སྐྱེ་མི་འགྱུར། །མི་དེས་འདི་སྙམ་དུ་བཞི་པོས་ནི་བདག་ལ་བྱིན་ཞིག་སྨྲས་ཀྱི། མི་ལྔ་པས་ནི་ཇི་ལྟ་བ་བཞིན་དུ་སྙིང་ནས་སྨྲས་ཀྱི། བདག་གིས་དེ་ལ་པདྨ་སྦྱིན་པར་བྱའོ་སྙམ་དུ་བསམས་ནས། དེས་དེ་ལ་
པདྨ་ཇི་སྙེད་དགོས་པ་བྱིན་པ་དང། དེ་དགའ་བ་དང་མགུ་བ་དང་རངས་པའི་བསམ་པས། པདྨ་བླངས་ཏེ་དེ་བུད་མེད་གང་ན་བ་དེར་སོང་ནས། དགའ་བ་ཉམས་སུ་མྱོང་བར་བྱས་སོ། །དེ་ནས་དེ་གཉིས་ཀྱིས་འདི་སྙམ་དུ་བདག་ཅག་འདོད་པའི་རྒྱུས། ཀུན་ནས་ཉོན་མོངས་པར་གྱུར་པ་གང་ཡིན་པ་ལ་ལྟོས། འདོད་ཆགས་ཀྱི་སྡུག་བསྔལ་མི་འབྱུང་བར་ཇི་ལྟར་བྱ་སྙམ་དུ་བསམས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ། རང་སངས་རྒྱས་འཇིག་རྟེན་དུ་འབྱུང་བས། དེ་དང་ཧ་ཅང་མི་རིང་བ་ཞིག་ན། རང་སངས་རྒྱས་ཀྱི་མཆོད་རྟེན་ཞིག་ཡོད་པ་དེ་ལ་པདྨ་དེ་དག་ཕུལ་ནས་སྨོན་ལམ་བཏབ་པ། སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས། བདག་གང་དང་གང་དུ་སྐྱེས་པའི་ཚེ་རབས་དེ་དང་དེར་ཉོན་མོངས་པ་ཆུང་བར་གྱུར་ཅིག །ཅེས་བྱས་སོ། །དེའི་ཚེ་པདྨ་ལེན་པའི་མི་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ནོ། །དེའི་ཚེ་དེའི་དུས་ན་བུད་མེད་གང་ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཡིན་ནོ། །དེ་ལ་པདྨ་ཕུལ་བ་གང་ཡིན་པ་དེའི་ལས་ཀྱི་རྣམ་པར་སྨིན་པས། འདོད་ཆགས་ཆུང་བར་གྱུར་ཏོ། །ཡང་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ། བཅོམ་ལྡན་འདས་སེར་སྐྱའི་བུ་མོ་བཟང་མོས་ལས་ཅི་ཞིག་བགྱིས་ཤིང་བསགས་ན། གང་གི་སླད་དུ་དེས་འཛམ་བུ་ཆུ་བོའི་གསེར་ལས་བགྱིས་པའི་གཟུགས་བརྙན་རང་གི་འོད་ཀྱིས་མོག་མོག་པོར་བགྱིས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ཉིད་ཀྱིས་ལས་གང་དག་བྱས་ཤིང་བསགས་པ་ཞེས་བྱ་བའི་བར་རྒྱས་པར་བྱའོ། །དགེ་སློང་དག་སྔོན་བྱུང་བ་འདས་པའི་དུས་བསྐལ་པ་ དགུ་བཅུ་རྩ་གཅིག་ན། སྐྱེ་རྒུ་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཞེས་བྱ་བ་ནས། སངས་རྒྱས་བཅོམ་ལྡན་འདས་ཞེས་བྱ་བའི་བར་བྱུང་ངོ། །དེ་གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེའི་ཚེ། རྒྱལ་པོའི་ཕོ་བྲང་གཉེན་ལྡན་དུ་བྱོན་ནས་ཞེས་བྱ་བ་ནས། རྒྱལ་པོའི་ཕོ་བྲང་དུ་ཞལ་
ཟས་ཡོངས་སུ་ལོངས་སྤྱོད་པར་ཞུགས་སོ། །ཞེས་བྱ་བའི་བར་དུའོ། །དེ་དེར་བྱོན་པ་དང། རེ་ཞིག་ན་བུ་མོ་ཞིག་རྔ་ཡབ་འཛམ་བུའི་ཆུ་བོའི་གསེར་གྱི་ཡུ་བ་ཅན་ཞིག་ཐོགས་ནས། སྣམ་ལོགས་སུ་འདུག་སྟེ་གཡོབ་པ་ན་སངས་རྒྱས་ཀྱི་འོད་ཀྱིས་འཛམ་བུའི་ཆུ་བོའི་གསེར་མོག་མོག་པོར་བྱས་སོ། །ཇི་ཙམ་ན་བུ་མོ་དེ། འདི་སྙམ་དུ་བདག་ལྕགས་ལས་བྱས་པའི་ཡུ་བ་ཅན་ཐོགས་སམ། ཇི་སྙམ་དུ་ཐེ་ཚོམ་སྐྱེས་སོ། །དེ་ནས་རྣམ་པར་གཟིགས་བཤོས་གསོལ་ནས་ཕྱིར་གཤེགས་པར་གྱུར་པ་དང། དེས་ཡང་འཛམ་བུའི་ཆུ་བོའི་གསེར་མཆོག་ལས་བྱས་པའི་ཡུ་བར་མཐོང་ངོ། །དེ་ནས་ཟླ་བ་གསུམ་འདས་ནས་ཞེས་བྱ་བ་ནས། ལྗོངས་རྒྱུར་གཤེགས་སོ་ཞེས་བྱ་བའི་བར་དུའོ། །དེ་ནས་རྒྱལ་པོ་གཉེན་ལྡན་གྱིས་འཛམ་བུའི་ཆུ་བོའི་གསེར་ལས་སྐུ་གཟུགས་ཤིག་བྱས་སོ། །རེ་ཞིག་ན་བུ་མོ་དེས་གསེར་ལས་བྱས་པའི་སྐུ་གཟུགས་དེ་ཁྱེར་ཏེ་འོངས་པ་དང། རྣམ་པར་གཟིགས་ཀྱི་འོད་ཀྱིས་མོག་མོག་པོར་བྱས། ཁ་དོག་མི་འདྲ་བར་མཐོང་ནས་ཞེས་བྱ་བའི་བར་ནས། སྨོན་ལམ་བཏབ་པ། བདག་གིས་སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས་ཞེས་བྱ་བ་ནས། འདི་ལྟ་བུའི་ལུས་ཀྱི་འོད་ཅན་དུ་འགྱུར་བ་དང་ཞེས་བྱ་བ་ནས། རང་གི་འོད་ཀྱིས་མོག་མོག་པོར་བྱེད་པར་གྱུར་ཅིག་ཅེས་བྱ་བའི་བར་དུའོ། །འདིས་ཀྱང་སྨོན་ལམ་གྱི་དབང་གིས་ང་མཉེས་པར་བྱས་ཏེ། མི་མཉེས་པར་མ་བྱས། དགེ་སློང་དག་དེ་ལྟ་བས་ན་སངས་རྒྱས་དང། ཆོས་དང། དགེ་འདུན་ལ་བྱ་བ་བྱས་པ་དང། ཡང་དག་པའི་སྨོན་ལམ་ཡང་གདབ་པར་བྱ་སྟེ། ཞེས་བྱ་བ་ནས། སེར་སྐྱའི་བུ་མོ་བཟང་མོ་ལྟ་བུའོ། །ཞེས་བྱ་བའི་བར་དུའོ།། །། དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ལྔ་པ། ཡང་ཞེས་བྱ་བའི་བར་ནས། དགེ་སློང་དག་སྔོན་འབྱུང་བ་ཞེས་བྱ་བ་ནས། རྒྱལ་པོ་ཞིག་རྒྱལ་སྲིད་བྱེད་དོ་ཞེས་བྱ་བའི་བར་དང། ཚོང་དཔོན་ཞིག་ཅེས་བྱ་བ་ནས། རེ་ཞིག་ན་གྲོང་ཁྱེར་གྱི་ཕྱི་རོལ་ན། དེའི་ཚེ་སྐྱེད་མོས་ཚལ་མཚེའུ་དང། མེ་ཏོག་མང་བ། ཤིང་གིས་ཡོངས་སུ་བསྐོར་བས་གཏིབས་པ། མེ་ཏོག་དང། འབྲས་བུ་སྣ་
ཚོགས་ཀྱི་ལྗོན་ཤིང་མཆོག་ཏུ་མཛེས་པ་དང་ལྡན་པ། ཞེས་བྱ་བའི་བར་དུའོ། །སངས་རྒྱས་བཅོམ་ལྡན་འདས་འཇིག་རྟེན་དུ་མི་འབྱུང་བའི་ཚེ། རང་སངས་རྒྱས་འཇིག་རྟེན་དུ་འབྱུང་བར་གྱུར་ཏེ། ཞེས་བྱ་བ་ནས། རང་སངས་རྒྱས་ནད་པ་ཞིག་ཅེས་བྱ་བའི་བར་ནས་སྨན་པའི་གན་དུ་སོང་སྟེ་ཞེས་བྱ་བའི་བར་ཏེ། སྨན་པས་སྨྲས་པ། གྲོང་དུ་བཞུད་ཅིག་ཅེས་བྱ་བ་ནས། ཚོང་དཔོན་གྱི་སྐྱེད་མོས་ཚལ་དུ་འདུག་གོ་ཞེས་བྱ་བའི་བར་དུའོ། །རེ་ཞིག་ན་ཚོང་དཔོན་གྱིས་མཐོང་ནས་ཡོ་བྱད་ཐམས་ཅད་སྦྱར་ཏེ་ཞེས་བྱ་བ་ནས། ནད་སོས་པར་གྱུར་ཏོ་ཞེས་བྱ་བའི་བར་དུའོ། །ཡོངས་སུ་མྱ་ངན་ལས་འདས་པར་གྱུར་ཅེས་བྱ་བ་ནས། སྐུ་གདུང་གི་མཆོད་རྟེན་བྱས་སོ། ཞེས་བྱ་བའི་བར་དུའོ། །རེ་ཞིག་ན་ཚོང་དཔོན་གྱིས་མཆོད་རྟེན་སྐྱ་བོར་མཐོང་སྟེ་ཞེས་བྱ་བ་ནས། ཆུང་མ་ལ་སྨྲས་པ་ཞེས་བྱ་བའི་བར་དུའོ། །དེས་དེ་ལ་ཡུང་གིས་བྱུགས་ནས་མེ་ཏོག་བཀྲམ་སྟེ་སྨོན་ལམ་བཏབ་པ། ཀྱེ་མའོ་ཨ་ལ་ལ་འཕགས་པ་ཇི་སྲིད་འཚོའི་བར་དུ་བསྙེན་བཀུར་བགྱིས་པ་དང། ཡོངས་སུ་མྱ་ངན་ལས་འདས་ནས་ཀྱང་མཆོད་རྟེན་བརྩིགས་ཏེ། སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས། ཕྱུག་པ་དང། ནོར་ཆེ་བ་དང། ལོངས་སྤྱོད་ཆེ་བའི་ཁྱིམ་དུ་སྐྱེ་བར་གྱུར་ཅིག །འདིས་ཇི་ལྟ་བུའི་ཆོས་རྙེད་པ་དེ་ལྟ་བུའི་ཆོས་ཁོང་དུ་ཆུད་པར་འགྱུར་བ་དང། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བགྱིད་ཀྱི། མི་མཉེས་པར་བགྱིད་པར་མ་གྱུར་ཅིག་ཅེས་བྱས་སོ། །དགེ་སློང་དག་དེའི་ཚེ་ཚོང་དཔོན་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ ནོ། །དེའི་ཚེ་དེའི་དུས་ན་ཚོང་དཔོན་གྱི་ཆུང་མ་གང་ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཉིད་ཡིན་པར་གྱུར་ཏོ། །ཞེས་བྱ་བ་ནས། ཡུང་གིས་བྱུགས་པས་གསེར་གྱིས་མདོག་ཏུ་གྱུར་ཏོ་ཞེས་བྱ་བའི་བར་དང། དགེ་སློང་དག་དེ་ལྟར་བསླབ་པར་བྱའོ་ཞེས་བྱ་བའི་བར་དུའོ། །ཡང་དགེ་སློང་དག་ཅེས་བྱ་བ་ནས། བཅོམ་ལྡན་འདས་བཟང་མོས་ལས་ཅི་ཞིག་བགྱིས་ན། འོད་སྲུང་ཆེན་པོ་དང་ལྷན་ཅིག་ལོ་བཅུ་གཉིས་ཀྱི་བར་དུ་མལ་གཅིག་ན་མཆིས་པའི་ཚེ་ཡང་འཁྲིག་པའི་སྦྱོར་བ་མ་བགྱིས་པར་གྱུར་ཅེས་
བྱ་བའི་བར་དུའོ། །དགེ་སློང་དག །དེ་གཉིས་ཀྱིས་ལས་བྱས་ཤིང་ཞེས་བྱ་བ་ནས། གྲོང་ཁྱེར་ཝཱ་ར་ཎཱ་སི་ན། རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དོ་ཞེས་བྱ་བའི་བར་དུའོ། །རེ་ཞིག་ན་རྒྱལ་པོའི་ཕོ་བྲང་དེ་ན་གཟུགས་ཀྱིས་འཚོ་བ་བཟང་མོ་ཞེས་བྱ་བ་རྒྱུ་རྩལ་དྲུག་ཅུ་དང་ལྡན་པ། ཀརྴ་པ་ཎ་ལྔ་བརྒྱ་ལས་མི་ཉུང་བར་སྤྱོད་པ་ཞིག་གནས་སོ། །དེ་ནས་དུས་གཞན་ཞིག་ན། རྒྱལ་པོའི་ཕོ་བྲང་དེའི་དགའ་འདུན་པ་ལྔ་བརྒྱ་རྣམས་ཀྱིས་བཟའ་བ་དང། བཏུང་བ་རབ་ཏུ་མང་པོ་ཁྱེར་ཏེ་ཞེས་བྱ་བ་ནས། རྒྱལ་པོའི་བུས་ཁྲིད་དེ་སོང་ངོ་ཞེས་བྱ་བའི་བར་དུའོ། །རེ་ཞིག་ན་དགའ་འདུན་པ་རྣམས་ཀྱིས། རང་སངས་རྒྱས་ལ་བསོད་སྙོམས་ཕུལ་ཏེ། སྨོན་ལམ་བཏབ་པ་ཞེས་བྱ་བ་ནས། དེའི་ཚེ་གཟུགས་ཀྱིས་འཚོ་མ་གང་ཡིན་པ་དེ་ནི་བཟང་མོ་འདི་ཡིན་ཏེ། དེའི་ཚེ་དེའི་དུས་ན་སེར་སྐྱའི་བུ་མོ་འདི་ཉིད་དེར་གྱུར་ཏོ་ཞེས་བྱ་བ་དང། དགའ་འདུན་པ་ལྔ་བརྒྱ་གང་ཡིན་པ་དེ་ནི། གཅེར་བུ་པ་ལྔ་བརྒྱ་འདི་ཡིན་ཏེ་ཞེས་བྱ་བའི་བར་དང། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན་ལ། ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན་པར་བལྟ་བར་བྱའོ། །ཞེས་བྱ་བའི་བར་དུའོ། །ཡང་དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་གསོལ་པ་ཞེས་བྱ་བ་ནས། དགྲ་བཅོམ་པ་ཉིད་ཐོབ་ནས་ཀྱང་རྒྱལ་པོ་མ་སྐྱེས་དགྲས་སུན་ཕྱུང་བར་གྱུར་ཅེས་བྱ་བའི་བར་དུའོ། །དགེ་སློང་དག །སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ། སྐྱེ་དགུའི་ཚེ་ལོ་ཉི་ཁྲི་ཐུབ་ པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ་བྱུང་སྟེ། ཝཱ་ར་ཎཱ་སི་ན་དྲང་སོང་སྨྲ་བ་རི་དྭགས་ཀྱི་ནགས་ན་བཞུགས་སོ། །དེའི་ཚེ་དེའི་དུས་ན་གྲོང་ཁྱེར་ཝཱ་ར་ཎཱ་སི་ན་ཚོང་དཔོན་ནོར་མང་བ། ལོངས་སྤྱོད་ཆེ་བ་ཞིག་ཅེས་བྱ་བ་ནས། བུ་མེད་པར་གྱུར་ཏོ་ཞེས་བྱ་བའི་བར་དང། བདག་ཤི་ནས་རྒྱལ་པོའི་ཕོ་བྲང་དུ་བསྡུས་པར་འགྱུར་རོ་སྙམ་ཞེས་བྱ་བའི་བར་དུའོ། །དེས་དེ་ལ་སྨྲས་པ། རྗེའི་སྲས་འདི་ལྟར་ཐུགས་མི་དགྱེས་པར་མ་བཞུགས་ཤིག་ཅེས་བྱ་བ་ནས།
ཆུང་མ་གཉིས་བླངས་ན། བདེ་བ་ཉམས་སུ་མྱོང་བར་མི་འགྱུར་རོ་ཞེས་བྱ་བའི་བར་དུའོ། །ཆུང་མ་ལ་ནི་བུ་མོའི་འདུ་ཤེས་འཇོག་ལ་ཞེས་བྱ་བ་ནས། སྔ་མ་ཟིལ་གྱིས་གནོན་པ་ཡིན་པས། སྔ་མ་གང་ཡིན་པ་ལ་འདྲི་བར་ཡང་མི་བྱེད་དོ་ཞེས་བྱ་བའི་བར་དུའོ། །བདག་འདི་ལྟར་ཅིའི་ཕྱིར་འདུག་ཅེས་བྱ་བ་ནས། དེས་ཁྱོད་ལ་སྨྲས་པ། བདག་སྐྱབས་སུ་མཆི་ཞིང་བསླབ་པའི་གཞི་ལེན་དུ་མཆི་ཡི་མཁྱེན་པར་མཛོད་ཅིག་ཅེས་སྨྲས་པ་དང། དེས་ཀྱང་གནང་ངོ། །དེ་ཡང་སྐྱབས་སུ་སོང་ནས་བསླབ་པའི་གཞི་བླང་བར་བྱས་སོ། །དེ་ནས་མི་དེ་སེམས་པ་ལ་ཞུགས་པ་ན་འདི་སྙམ་དུ་འདི་ལྟར་བདག་གིས་ཡོན་གནས་ནི་འདི་ཡིན་ནོ་ཞེས་བསམས་ཏེ་ཞེས་བྱ་བ་ནས། མེ་ཏོག་དང། འབྲས་བུ་དང། བཟའ་བ་ཆེས་སྔར་སྦྱིན་པར་བྱེད་ཅིང། །ཕྱིས་ནི་ཆུན་མ་དེ་ལའོ་ཞེས་བྱ་བའི་བར་དུའོ། །དེས་འདི་སྙམ་དུ་ཁྱིམ་གྱི་བྱ་བ་ཅུང་ཟད་གང་ཡིན་པ་དེ་དག་ཐམས་ཅད་ནི་བདག་བྱེད་ལ། འདི་ནི་ཉལ་ཞིང་ཟ་བ་ཡིན་པ་སྙམ་དུ་བསམས་ཏེ་ཞེས་བྱ་བ་ནས། མི་དེས་ཆུན་མ་ལ་ཀུན་ཏུ་སྦྱོར་བ་བྱ་བའི་ཕྱིར་བོས་པ་དང་ཞེས་བྱ་བ་ནས། དེས་སྨྲས་པ། ཆེན་མ་དང་ལྷན་ཅིག་མཛོད་ཅིག་ཅེས་སྨྲས་པའི་བར་དུའོ། །བསླབ་པའི་གཞི་བླངས་སོ་ཞེས་བྱ་བ་ནས། ཉོན་མོངས་པ་ནི་ཤིན་ཏུ་སྟོབས་ཆེ་བ་ཉིད་ཀྱི་ཕྱིར་ཆུང་མ་སྔ་མའི་གན་དུ་སོང་སྟེ། འཁྱུད་པ་དང། དེས་སྨྲས་པ། རྗེའི་སྲས་ཁྱོད་ཀྱིས་བདག་འདི་ལྟར་བསླབ་པའི་གཞི་ལེན་པར་གནང་བར་བགྱིས་པ་ཉིད་མ་ལགས་སམ། ད་ལྟར་གྱི་འདི་ལྟ་བུ་ནི་རུང་བ་མ་ལགས་སོ། །དེས་དེ་ལ་ནན་གྱིས་དགའ་མགུར་སྤྱོད་དོ་ཞེས་བྱ་བའི་བར་དུའོ། །དེའི་ཚེ་ཆུན་མར་གྱུར་པ་གང་ ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཡིན་ཏེ། འདིས་དེའི་ཚེ་ཆེན་མའི་བརྟུལ་ཞུགས་གང་ཡིན་པ་ཉམས་པར་བྱས་པའི་ལས་དེའི་རྣམ་པར་སྨིན་པས་དགྲ་བཅོམ་པ་ཉིད་ཐོབ་ཀྱང་མ་སྐྱེས་དགྲས་ཞག་བདུན་དུ་སྤྱད་པར་གྱུར་ཏོ། །བཅོམ་ལྡན་འདས་ལས་ཅི་ཞིག་བགྱིས་ན། གང་གི་སླད་དུ་འདིས་དགྲ་བཅོམ་པ་ཉིད་ཐོབ་ཅིང་མངོན་པར་ཤེས་པ་མྱུར་བ་རྣམས་ཀྱི་མཆོག་ཏུ་བསྟན་ཅེས་
བྱ་བ་ནས། འདིས་ལས་བྱས་ཤིང་ཞེས་བྱ་བ་དང། ཆུང་མ་ཆུན་མར་གྱུར་ཅིང་ཁྱོ་ཤི་བར་གྱུར་ནས། ཁྱིམ་ནས་བྱུང་སྟེ། བཅོམ་ལྡན་འདས་འོད་སྲུང་གི་གསུང་རབ་ལ། ཁྱིམ་མེད་པར་རབ་ཏུ་བྱུང་ནས་དེར་འདིས་ལོ་སྟོང་ཕྲག་བཅུའི་བར་དུ་ཚངས་པར་སྤྱོད་པ་ལ་གནས་ཤིང་ཡོངས་སུ་བསྲུངས་ཏེ། ཕུང་པོ་དང། ཁམས་དང། སྐྱེ་མཆེད་ལ་མཁས་པ་དང། གནས་དང་གནས་མ་ཡིན་པ་ལ་མཁས་པ་དང། རྟེན་ཅིང་འབྲེལ་པར་འབྱུང་བ་ལ་མཁས་པར་གྱུར་ཀྱང། ཡེ་ཤེས་མཐར་ཐུག་པ་ཁོང་དུ་ཆུད་པར་མ་གྱུར་མོད་ཀྱི། འོན་ཀྱང་དེའི་ཚེ་སྨོན་ལམ་བཏབ་པ། བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་རྫོགས་པའི་བྱང་ཆུབ་ཏུ་ལུང་བསྟན་པ་དེ་བདག་གིས་མཉེས་པར་བྱེད་ཀྱི། མི་མཉེས་པར་བྱེད་པར་མ་གྱུར་ཅིག་ཅེས་བྱས་པས་འདིས་ང་མཉེས་པར་བྱས་ཏེ། མི་མཉེས་པར་མ་བྱས་ལ། ཚངས་པར་སྤྱོད་པ་གང་ཡིན་པ་ལ་གནས་ཤིང་དེ་ཡོངས་སུ་བསྐྱང་བའི་ལས་དེའི་རྣམ་པར་སྨིན་པས་དགྲ་བཅོམ་པ་ཉིད་ཐོབ་པར་གྱུར་ཏོ། །གསུང་རབ་དེ་ལ་ཡང་དགེ་སློང་མ་གང་གི་དྲུང་དུ་རབ་ཏུ་འབྱུང་བར་བྱེད་པ་དེ། བཅོམ་ལྡན་འདས་འོད་སྲུང་གིས་དེ་མངོན་པར་ཤེས་པ་མྱུར་བ་རྣམས་ཀྱི་མཆོག་ཏུ་བསྟན་པ་དེའི་ཚེ་ཡང་འདིས་སྨོན་ལམ་བཏབ་པ། བཅོམ་ལྡན་འདས་འོད་སྲུང་གིས་བདག་གི་མཁན་པོ་མངོན་པར་ཤེས་པ་མྱུར་བའི་མཆོག་ཏུ་བསྟན་པ་ཇི་ལྟ་བ་བཞིན་དུ་བྲམ་ཟེའི་ཁྱེའུ་བླ་མ་རྫོགས་པར་བྱང་ཆུབ་པ་ཐོབ་པ་ན། བདག་ཀྱང་མངོན་པར་ཤེས་པ་མྱུར་བའི་མཆོག་ཏུ་བསྟན་པར་ཤོག་ཅིག་ཅེས་བྱ་བ་ནས། དགེ་སློང་དག་དེ་ལྟར་བསླབ་པར་བྱའོ་ཞེས་བྱ་བའི་བར་དུའོ། །ཡང་དགེ་སློང་རྣམས་ཐེ་ཚོམ་སྐྱེས་ཏེ་ཞེས་བྱ་བ་ནས། ཚེ་དང་ལྡན་པ་ འོད་སྲུང་ཆེན་པོས་ལས་ཅི་ཞིག་བགྱིས་ཤིང་བསགས་ན། འདི་ལྟར་ལས་ཀྱི་རྣམ་པར་སྨིན་པས་ནོར་མང་བ་དང། ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང། དེའི་འབྱོར་པ་འདི་ལྟར་ལས་ཀྱི་མཐའ་བའི་གྲོང་སུམ་ཅུ་དང་ཞེས་བྱ་བ་ནས། གསེར་གྱི་ནས་ཀྱིས་གང་བའི་སྦྱང་བ་བརྒྱད་ཅུ་དང། རྨོན་པ་དོར་དགུ་བརྒྱ་དགུ་བཅུ་རྩ་དགུ་ཞེས་བྱ་བའི་བར་དུའོ། །དགེ་སློང་
དག་འདིས་ལས་བྱས་ཤིང་བསགས་པ་ཞེས་བྱ་བའི་བར་རྒྱས་པར་བྱའོ། །དགེ་སློང་དག་སྔོན་བྱུང་བ་འདས་པའི་དུས་ན། བསྟི་གནས་ཞིག་ན་དྲང་སྲོང་ལྔ་བརྒྱ་གནས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ། རང་སངས་རྒྱས་ཕོངས་པ་དང། དམན་པ་ལ་ཕན་འདོགས་པ་འཇིག་རྟེན་དུ་བྱུང་སྟེ། བསྟི་གནས་དེ་དང་ཧ་ཅང་ཡང་མི་རིང་བ་ཞིག་ན། རང་སངས་རྒྱས་ཞིག་ཀྱང་གནས་སོ། །དེ་ནས་དྲང་སྲོང་དེ་དག་ཉིན་གཅིག་བཞིན་དུ་སྔར་ལངས་ཏེ། གནས་སྲུང་བའི་དྲང་སྲོང་བཞག་ནས། ཡམ་སྲེག་ཤིང་དང། འབྲས་བུའི་ཕྱིར་ཕྱོགས་བཞིར་འགྲོ་བར་བྱེད་དོ། །དེ་ནས་དྲང་སྲོང་ཞིག་རང་སངས་རྒྱས་དེ་དང་ཉེ་བ་ན་ཡང་དང་ཡང་དུ་འགྲོ་བ་ན། རང་སངས་རྒྱས་དེ་སྐྱིལ་མོ་ཀྲུང་བཅས་ཏེ་འདུག་པ་མཐོང་ངོ། །ལྡོག་པ་ན་ཡང་དེ་བཞིན་འདུག་པར་མཐོང་ནས། འདི་སྙམ་དུ་དགེ་སློང་འདི་ཉིན་པར་སྐྱིལ་མོ་ཀྲུང་འཇིག་པར་མི་བྱེད་ན། ཁ་ཟས་གང་ནས་ཇི་ལྟར་བྱེད། མ་ལ་བདག་གིས་དེ་ལ་དྲིའོ་སྙམ་དུ་བསམས་སོ། །དེས་ཡང་འདི་སྙམ་དུ་ད་ལྟར་ཉེ་བར་སོང་སྟེ་དྲིར་ན་དྲང་སྲོང་དེ་དག་གིས་བདག་དགེ་སློང་དང་ལྷན་ཅིག་འགྲོགས་པ་མཐོང་བ་དང་འཕྱ་བར་འགྱུར་བས། གང་གི་ཚེ་བདག་བསྟི་གནས་སྲུང་བར་གྱུར་པ་དེའི་ཚེ། བག་ཚ་བ་མེད་པར་དྲིའོ་སྙམ་དུ་བསམས་སོ། །དེ་ནས་དུས་གཞན་ཞིག་ན་དེ་ལ་བསྟི་གནས་སྲུང་བ་བབ་སྟེ། དྲང་སྲོང་དེ་དག་དོང་བ་དང། རངས་སངས་རྒྱས་གང་ན་བ་དེར་སོང་སྟེ་ཕྱིན་ནས། དེ་ལ་དྲིས་པ། འཕགས་པ་བདག་ཉིན་གཅིག་བཞིན་དུ་ཁ་ཟས་དང། འབྲས་བུའི་དོན་དུ་ཕན་ཚུན་དུ་འགྲོ་བར་བྱེད་པ་ན། ཁྱོད་སྐྱིལ་མོ་ཀྲུང་བཤིག་པའམ། བསོད་སྙོམས་ཀྱི་དོན་དུ་འགྲོ་བར་བདག་གིས་ལན་འགའ་ཡང་མ་མཐོང་ན། ཁྱོད་དགའ་བ་ཟའམ་ཅི། དེས་ སྨྲས་པ། དགའ་བ་ཟ་བ་མ་ཡིན་ཏེ། གང་གི་ཚེ་ཟས་ཀྱི་དུས་ལ་བབ་པ་དེའི་ཚེ། བསོད་སྙོམས་ཀྱི་དོན་དུ་སོང་སྟེ་འདིར་ཁྱེར་ཏེ་འོངས་ནས་ཟ་བར་བྱེད་དོ། །དེས་དྲིས་པ། བསོད་སྙོམས་ཀྱི་ཕྱིར་གང་དུ་འགྲོ་བར་བྱེད། དེས་སྨྲས་པ། བྱང་གི་སྒྲ་མི་སྙན་དུའོ། །སྒྲ་མི་སྙན་ཅི་འདྲ། དེས་སྨྲས་པ།
བདག་གིས་ཡོངས་སུ་འཛིན་པ་མེད་པ་ཆེས་དེས་པ། ཁྱད་པར་ཅན་དུ་འགྲོ་ཞིང། དེ་ནས་ཤི་འཕོས་ནས་ཀྱང་ཁྱད་པར་ཅན་དུ་འགྲོ་བར་འགྱུར་བའོ། །འོན་ཏེ་བྱང་གི་སྒྲ་མི་སྙན་དུ་མི་འགྲོ་བ་དེའི་ཚེ་ནི། སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་ཁ་ཟས་བསོད་སྙོམས་བྱེད་དོ། །དེས་དྲིས་པ། སུམ་ཅུ་རྩ་གསུམ་གྱི་ལྷ་རྣམས་ཅི་འདྲ། དེས་སྨྲས་པ། ཁ་དོག་དང་ལྡན་པ། བདེ་བ་མང་བ། གཞལ་མེད་ཁང་མཐོན་པོ་ཅན། ཚེ་རིང་བ། ཡུན་རིང་དུ་གནས་པ། དུས་རིང་པོར་གནས་པ་ཡིན་ནོ། །དེས་འདི་སྙམ་དུ་འདི་ནི་བདག་ཉིད་ཆེན་པོ་ཞིག་ཡིན་པས། མ་ལ་དེ་རིང་གི་བསོད་སྙོམས་བདག་གིས་དབུལ་ལོ་སྙམ་དུ་སེམས་ནས། དེས་རང་སངས་རྒྱས་དེ་ལ་སྨྲས་པ། འཕགས་པ། དེང་བདག་གིས་བསོད་སྙོམས་འབུལ་གྱི་རྗེས་སུ་གཟུང་དུ་གསོལ། དེས་སྨྲས་པ། ཁྱོད་ཀྱང་ཁྱིམ་གྱི་གནས་ནས་ངེས་པར་བྱུང་བ་ཡིན་ན། ཁྱོད་ཀྱིས་ཇི་ལྟར་ང་ལ་བསོད་སྙོམས་སྦྱིན་པར་སེམས། དེས་སྨྲས་པ། དེ་ལྟ་ལགས་མོད་ཀྱི། འོན་ཀྱང་ངེས་པར་བདག་ལ་ཕན་གདགས་པར་མཇད་དུ་གསོལ། ཁྱོད་ནི་དཔལ་དང་བསོད་ནམས་ཡིན། །ཁྱོད་ནི་ཆོས་འཆད་རྣམས་ཀྱི་མཆོག །ཁྱོད་ཀྱི་བརྩོན་པས་འཇིག་རྟེན་འདི། །ཀུན་ནས་བརྒྱན་པ་བཞིན་དུ་གྱུར། །དེས་ཀྱང་ཁས་བླངས་སོ། །དེ་ནས་དྲང་སྲོང་གིས་དེས་ཅང་མི་སྨྲ་བས་ཁས་བླངས་པར་རིག་ནས། རང་གི་བསྟི་གནས་སུ་སོང་ངོ། །དེ་ན་ཡང་དེས་སྔ་ན་ཁྲེ་རྒོད་བྲེའུ་ཆུང་གང་ཞིག་དྲུས་ཏེ་བཞག་སྟེ། དེས་བཀྲབས་ནས་བསྟི་གནས་དེ་དང་ཧ་ཅང་མི་རིང་བ་ན་ཕྱུགས་ལྷས་ཞིག་ཡོད་པ་དེར་སོང་སྟེ། དེ་ནས་འོ་མ་བླངས་ཏེ། འོ་མའི་ནང་དུ་བཙོས་ནས། བཙོས་ཟིན་པ་དང། རང་སངས་རྒྱས་དེ་ལ་བསོད་སྙོམས་ཕུལ་ལོ། །བཙུན་པ། དེས་ཀྱང་དེ་ལ་ཕན་གདགས་པའི་དོན་དུ་བསོད་སྙོམས་དེ་བླངས་ནས་ལུས་ཀྱིས་ཆོས་བསྟན་པའི་ཕྱིར། ངང་པའི་རྒྱལ་པོ་འདབ་མ་བརྐྱང་བ་ལྟ་བུར་ནམ་མཁའི་དཀྱིལ་དུ་འཕགས་སོ། །དེས་ དེ་མཐོང་ནས་མཆོག་ཏུ་དད་པར་གྱུར་ཏེ། དགའ་བ་དང། མགུ་བ་དང། རངས་པའི་ཡིད་ཀྱིས་པུས་མོ་ས་ལ་བཙུགས་ཏེ། སྨོན་ལམ་བཏབ་པ།
བསོད་སྙོམས་ཕུལ་ཏེ་སྦྱིན་པར་བྱ་བའི་ཆོས་ཡོངས་སུ་བཏང་བ་འདིས། བདག་ནམ་དུ་ཡང་སེམས་ཅན་དམྱལ་བ་དང། དུད་འགྲོ་དང། ཡི་དྭགས་སུ་སྐྱེ་བར་མ་གྱུར་ཅིག །རྟག་ཏུ་ལྷ་རྣམས་ཀྱི་ནང་དུ་སྐྱེ་ཞིང། དེ་ནས་ཤི་འཕོས་ན་ཡང་བྱང་གི་སྒྲ་མི་སྙན་དུ་སྐྱེ་བ་དང། དེ་ནས་ཀྱང་སླར་ལྷ་རྣམས་ཀྱི་ནང་དུ་དང། འདིས་ཡོན་ཏན་གྱི་ཚོགས་ཐུགས་སུ་ཆུད་པ་གང་ཡིན་པ་དེ་དག་ཀྱང་ཁོང་དུ་ཆུད་པར་འགྱུར་བ་དང། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང། མི་མཉེས་པར་བྱེད་པར་མ་གྱུར་ཅིག །ཅེས་བྱས་སོ། །དགེ་སློང་དག །དེའི་ཚེ་དེའི་དུས་ན་དྲང་སྲོང་དུ་གྱུར་པ་གང་ཡིན་པ་དེ་ནི་འོད་སྲུང་ཆེན་པོ་འདི་ཡིན་ནོ། །དེའི་ཚེ་དེའི་དུས་ན་འདིས་ཁྲེ་རྒོད་བྲེའུ་ཆུང་གང་ཕུལ་བའི་ལས་དེའི་རྣམ་པར་སྨིན་པས། ལན་སྟོང་དུ་བྱང་གི་སྒྲ་མི་སྙན་དུ་སྐྱེས་སོ། །ལན་སྟོང་དུ་ལྷ་རྣམས་ཀྱི་ནང་དུ་སྐྱེས་སོ། །ལྷ་རྣམས་ནས་ཤི་འཕོས་ནས་ཀྱང་བྲམ་ཟེའི་རིགས་སུ་སྐྱེས་པར་གྱུར་ཏོ། །སྨོན་ལམ་གྱི་དབང་གིས་རང་སངས་རྒྱས་བྱེ་བ་བརྒྱ་སྟོང་ལས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང། འདིས་ཡོན་ཏན་གྱི་ཚོགས་དེ་ཡང་ཐོབ་པར་གྱུར་ཏོ། །དགེ་སློང་དག་དེ་ལྟ་བས་ན། སངས་རྒྱས་དང། ཆོས་དང། དགེ་འདུན་ལ་བཀུར་སྟི་བྱ་ཞིང། སྦྱིན་པ་དབུལ་བ་དང། བསོད་ནམས་ཀྱང་བྱའོ། །དེ་ལྟར་བྱས་ན་རྣམ་པ་འདི་ལྟ་བུའི་ཡོན་ཏན་གྱི་ཚོགས་ཅན་དུ་འགྱུར་ཏེ། འོད་སྲུང་ཇི་ལྟ་བ་དེ་བཞིན་དུ་དགེ་སློང་ཁྱེད་ཀྱིས་བསླབ་པར་བྱའོ། །ཡང་དགེ་སློང་རྣམས་ཐེ་ཚོམ་སྐྱེས་བ་དེ། བཅོམ་ལྡན་འདས་ལ་གསོལ་པ། བཅོམ་ལྡན་འདས་ཚེ་དང་ལྡན་པ་འོད་སྲུང་ཆེན་པོས་ལས་ཅི་ཞིག་བགྱིས་ཤིང་བསགས་པའི་ལས་ཀྱི་རྣམ་པར་སྨིན་པས། འདི་ལྟར་རབ་ཏུ་བྱུང་ཞིང་ཉོན་མོངས་པ་ཐམས་ཅད་སྤང་བ་ནས་དགྲ་བཅོམ་པ་ཉིད་ཐོབ་ཅིང། བཅོམ་ལྡན་འདས་ཀྱིས་འདོད་པ་ཆུང་བ་དང། ཆོག་ཤེས་པ་དང། སྦྱངས་བའི་ཡོན་ཏན་སྨྲ་བ་རྣམས་ཀྱི་མཆོག་ཏུ་བསྟན། བཅོམ་ལྡན་འདས་ཀྱིས་ བཀའ་སྩལ་པ། དགེ་སློང་དག །འདིས་ལས་བྱས་ཤིང་བསགས་པ་ཞེས་རྒྱས་པར་བྱའོ། །དགེ་སློང་
དག་སྔོན་བྱུང་བ་འདས་པའི་དུས་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བྱུང་ངོ། །དེའི་གསུང་རབ་ལ་འདི་རབ་ཏུ་བྱུང་བར་གྱུར་ཏེ། དེར་འདིས་ལ་སྟོང་ཕྲག་བཅུའི་བར་དུ་ཚངས་པར་སྤྱོད་པ་ལ་གནས་ཤིང། ཡོངས་སུ་བསྲུངས་ཀྱང། མཐར་ཐུག་པའི་ཡེ་ཤེས་མ་སྐྱེད་མོད་ཀྱི། འོན་ཀྱང་འཆི་བའི་དུས་ཀྱི་ཚེ་སྨོན་ལམ་བཏབ་པ། བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་ཁྱོད་མ་འོངས་པའི་དུས་ན་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་པ་གང་ཡིན་པ་དེ་བདག་གིས་མཉེས་པར་བྱེད་ཀྱི། མི་མཉེས་པར་བྱེད་པར་མ་གྱུར་ཅིག །ཅེས་བྱས་སོ། །དེ་ན་ཡང་དགེ་སློང་གང་གི་དྲུང་དུ་རབ་ཏུ་འབྱུང་བར་བྱེད་པ་དེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་འདོད་པ་ཆུང་བ་དང། ཆོག་ཤེས་པ་དང། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་བསྟན་པ་དེ་ན་ཡང་འདིས་སྨོན་ལམ་བཏབ་པ། ཡང་དག་པར་རྫོགས་པའི་སངས་རྒྱས་འོད་སྲུང་གིས། བདག་གི་མཁན་པོ་འདོད་པ་ཆུང་བ་དང། ཆོག་ཤེས་པ་དང། སྦྱངས་པའི་ཡོན་ཏན་སྨྲ་བ་རྣམས་ཀྱི་མཆོག་ཏུ་ལུང་བསྟན་པ་དེ་བཞིན་དུ། བྲམ་ཟེའི་ཁྱེའུ་བླ་མས་རྫོགས་པའི་བྱང་ཆུབ་ཐོབ་པ་ན། བདག་ཀྱང་ལུང་བསྟན་པ་ཐོབ་པར་ཤོག་ཅིག །ཅེས་བྱས་སོ། །དགེ་སློང་དག །དེར་ཚངས་པར་སྤྱོད་པ་ལ་གནས་པས། དེ་འདི་ལ་འབྲས་བུ་ཐོབ་པར་གྱུར་ཏོ། །དེར་དབང་པོ་ཡོངས་སུ་སྨིན་པར་བྱས་པས། དེ་འདི་ལ་རྣམ་པར་གྲོལ་ལོ། །དེར་སྨོན་ལམ་བཏབ་པ་གང་ཡིན་པ་དེས་དེ་འདི་ལ་ལུང་བསྟན་པར་གྱུར་ཏེ། དགེ་སློང་དག །དེ་ལྟ་བས་ན་གུས་པར་ལུང་དབོག་པར་བྱ། བཀླག་པར་བྱ། ཕུང་པོ་དང། ཁམས་དང། སྐྱེ་མཆོད་དང། གནས་དང་གནས་མ་ཡིན་པ་དང།
རྟེན་ཅིང་འབྲེལ་བར་འབྱུང་བ་ལ་མཁས་པར་བྱའོ། །དེ་བཞིན་དུ་ཡང་ དག་པའི་སྨོན་ལམ་གདབ་སྟེ། དེས་ན་ཁྱེད་ཅག་གི་ཡོན་ཏན་གྱི་ཚོགས་བསྐྱེད་པར་འགྱུར་བ། དགེ་སློང་དག །ཁྱེད་ཀྱིས་དེ་ལྟར་བསླབ་པར་བྱའོ།། །།བར་སྡོམ་ལ། ཞིང་པ་དང་ནི་རྫ་མཁན་དང། །ཚོང་དཔོན་རས་ཡུག་འཚོ་བ་དང། །མཆོད་རྟེན་ཡུང་གིས་བྱུགས་པ་དང། །སྨད་འཚོང་མ་དང་ཆེན་ཆུན་དང། །ཕྱུག་དང་འདོད་པ་ཆུང་བ་ཡིན། །སྡེ་ཚན་དུ་ནི་བསྟན་པ་ཡིན། །ཕས་ཕམ་པ་བརྒྱད་ཀྱི་སྡོམ་གྱི་ཚིགས་སུ་བཅད་པ་སྟེ། སྡོམ་ལ། མི་ཚངས་སྤྱོད་དང་རྐུ་བ་དང། །མི་གསོད་པ་དང་བརྫུན་སྨྲ་དང། །རི་དྭགས་འཛིན་དང་སྤོས་འཚོང་དང། །མཛའ་ཅན་མ་དང་གྲེ་ལས་སྐྱེས། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན། འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །གང་གི་ཚེ་ཨུཏྤ་ལའི་མདོག་གྲོང་ཁྱེར་ཆེན་པོ་དྲུག་ན། སྨད་འཚོང་མ་བྱེད་པར་གྱུར་པ་དེའི་ཚེ། བྲམ་ཟེ་ཞིག་དེ་ལ་སེམས་ལྷག་པར་ཆགས་པར་གྱུར་ནས། དེར་སོང་སྟེ་མེ་ཏོག་དང། འབྲས་བུ་དང། སོ་ཤིང་རྣམས་ཀྱིས་བསྙེན་བཀུར་བྱེད་པར་གྱུར་ཏོ། །དེ་ནས་ཨུཏྤ་ལའི་མདོག་གིས་བྲམ་ཟེ་དེ་ལ་འདི་སྐད་ཅེས་སྨྲས་སོ། །ཁྱོད་ནི་རིགས་མཐོ་བ་ཡིན་ལ། བདག་ནི་དམའ་བ་ཡིན་ན། ཅིའི་ཕྱིར་འདིར་འོངས། དེ་སྐད་ཅེས་སྨྲས་པ་དང། བྲམ་ཟེས་ཨུཏྤ་ལའི་མདོག་ལ་འདི་སྐད་ཅེས་སྨྲས་སོ། །བདག་ཁྱོད་དང་ལྷན་ཅིག་ཕྲག་འདོད་པའི་ཕྱིར་རོ། །དེས་འདི་སྐད་ཅེས་སྨྲས་སོ། །གལ་ཏེ་ཁྱོད་ལ་ཀརྴ་པ་ཎ་དག་ཡོད་ན་ཕྱིས་ནས་ལྷག་ཅིག་ཕྲད་པར་བྱའོ། །དེ་ནས་བྲམ་ཟེ་དེས་ཨུཏྤ་ལའི་མདོག་ལས་ཚིག་དེ་ཐོས་ནས། ཀརྴ་པ་ཎའི་དོན་དུ་ལྗོངས་དག་ཏུ་སོང་ངོ། །དེ་ནས་ཨུཏྤ་ལའི་མདོག་དུས་གཞན་ཞིག་ན། དགེ་བའི་བཤེས་གཉེན་ཚེ་དང་ལྡན་པ་མོའུ་དག་ལ་གྱི་བུ་ཆེན་པོ་ལ་བརྟེན་ནས། སྨད་པའི་ལས་རྣམས་སྤངས་ཏེ། དགྲ་བཅོམ་པ་ཉིད་ཀྱང་ཐོབ་པར་གྱུར་ཏོ། །དེ་ཡང་ཉིན་པར་ནགས་ཚལ་ཐིབས་པོར་འདུག་ཨ་ལ་གོམས་པ་ཡིན་པས། དེ་ནས་ཨུཏྤ་ལའི་མདོག་ནགས་ཚལ་ཐིབས་པོར་ཉིན་པར་འདུག་ཏུ་སོང་ངོ། །བྲམ་ཟེ་
དེ་ཡང་ཀརྴ་པ་ཎ་ཁྱེར་ཏེ། གྲོང་དང། གྲོང་ཁྱེར་དང། ཡུལ་འཁོར་དང། རྒྱལ་པོའི་ཕོ་བྲང་འཁོར་དུ་སོང་ནས། འདྲི་ཞིང་འདྲི་ཞིང་མཉན་ཡོད་དུ་ཕྱིན་ཏོ། །དེ་ནས་བྲམ་ཟེ་དེ་ཨུཏྤ་ལའི་མདོག་གང་ན་བ་དེར་སོང་སྟེ་ཕྱིན་ནས། ཨུཏྤ་ལའི་མདོག་ལ་རྒྱལ་བ་དང་ཚེ་སྤེལ་བ་བྱས་ཏེ་འདི་སྐད་ཅེས་སྨྲས་སོ། །ཀྱེ་ཀརྴ་པ་ཎ་དག་བཞེས་ཤིག །དེས་ཀྱང་བསམས་ནས། བྲམ་ཟེ་ལ་འདི་སྐད་ཅེས་སྨྲས་སོ། །བྲམ་ཟེ་བདག་གིས་ནི་དམ་པའི་ཆོས་མ་ཡིན་པ་དེ་སྤངས་སོ། །དེ་སྐད་ཅེས་སྨྲས་པ་དང། བྲམ་ཟེས་ཨུཏྤ་ལའི་མདོག་ལ་འདི་སྐད་ཅེས་སྨྲས་སོ། །གལ་ཏེ་ཁྱོད་ཀྱིས་སྤངས་ཀྱང་བདག་གིས་ནི་མ་སྤངས་སོ། །དེ་ནས་ཨུཏྤ་ལའི་མདོག་གིས་བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཁྱོད་བདག་གི་ཡན་ལག་གི་ཆ་གང་ལ་སེམས་ལྷག་པར་ཆགས་པར་གྱུར། དེས་འདི་སྐད་ཅེས་སྨྲས་ཏེ། མིག་ལའོ། །དེས་མིག་དེ་རྫུ་འཕྲུལ་གྱིས་ལག་མཐིལ་དུ་བཞག་སྟེ། བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་གལ་ཏེ་འདོད་ན་ལོང་ཞིག །དེ་ནས་བྲམ་ཟེས་མིག་དེ་མཐོང་བ་དན།ག་ཁྲོས་འཁྲུགས་རྔམ་པར་གྱུར་ཏེ། དེ་སློང་མ་ཨུཏྤ་ལའི་མདོག་གི་ཀླད་དུ་ཁུ་ཚུར་གཅིག་བསྣུན་ནས་སོང་ངོ། །དེ་ནས་ཨུཏྤ་ལའི་མདོག་གིས་སྐབས་དེ་དགེ་སློང་མ་རྣམས་ལ་སྨྲས་སོ། །དགེ་སློང་མ་རྣམས་ཀྱིས་དགེ་སློང་དག་ལ་སྨྲས་སོ། །དེ་དགེ་སློང་རྣམས་ཀྱིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག །བུད་མེད་ནི་མཐུ་སྟོབས་ཆུང་བ། གཡོན་ཅན་དང། འཕྱོན་མ་དང། ཟོལ་བ་ལ་སོགས་པས་འདོད་པར་བྱ་བ་ཡིན་པས། དེའི་ཕྱིར་དེང་ཕྱིན་ཆད་དགེ་སློང་མས་དགོན་པར་གནས་པར་མི་བྱའོ། །བཅོམ་ལྡན་འདས་ཀྱིས་གང་གི་ཚེ་དགེ་སློང་མ་ལ་དགོན་པ་བཀག་པ་དེའི་ཚེ། སྲང་དང། བཞི་མདོ་དང། སུམ་མདོ་དག་ཏུ་གནས་པ་ན། གཡོན་ཅན་ལ་སོགས་པས་ཀྱང་བགྲོད་པར་གྱུར་ཏོ། །རེ་ཞིག་ན་དེ་དག་དེ་ན་གནས་པར་གྱུར་བ་དེའི་ཚེ། མཉན་ཡོད་ན་རི་དྭགས་འཛིན་གྱི་བུ་དགེ་བསྙེན་ས་ག་ཞེས་བྱ་བ་དད་པ་དང་ལྡན་པ། དགེ་བའི་བསམ་པ་བཟང་བ་བསླབ་པའི་གཞི་ལྔ་
དང་ལྡན་པ་དེས། དགེ་སློང་མ་བབ་བབ་ཏུ་འདུག་པ་དེ་དག་མཐོང་ནས། དེས་དེ་དག་ལ་གནས་བཙལ་ཏེ་བྱིན་ནས། འཕགས་མ་དག །འདིར་ཅི་བདེར་བཞུགས་ཤིག །ཅེས་བྱས་པ་དང། དེ་དག་ཀྱང་དེར་ འདུག་གོ་།དེའི་ཚེ་དགེ་སློང་མའི་དབྱར་ཁང་ན་དགེ་སློང་སྦོམ་དགའ་མོ་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། འདོད་ཆགས་ཆེ་བ། སྐྱེས་པའི་ཡིད་དུ་འོང་བ་ཞིག་འདུག་གོ་།དེ་ནས་དུས་གཞན་ཞིག་ན་དགེ་སློང་མ་དགེ་སྐོས་བཞག་སྟེ། དགེ་སློང་མའི་དགེ་འདུན་སྔ་དྲོའི་དུས་ཀྱི་ཚེ། ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །དེ་ནས་དགེ་སློང་སྦོམ་དགའ་མོ་ནའོ་ཞེས་བྱས་ཏེ་དེ་ཉིད་ནས་སླར་ལོག་སྟེ། དེ་རི་དྭགས་འཛིན་གྱི་བུ་འདུག་པ་དེ་ལ་ཆགས་པ་ཡིན་པས། དེས་དེ་ལ་བརྡ་བྱས་པ་དང། དེ་མ་འདོད་ནས། དེས་འདི་སྐད་ཅེས་སྨྲས་སོ། །གང་འདོད་པ་ན་གང་མི་འདོད་པ་དེ་དག་ནི་དེ་བཞིན་དུ་འགྱུར་རོ། །དེ་ནས་རི་དྭགས་འཛིན་གྱི་བུས་སྦོམ་དགའ་མོ་ལ་འདི་སྐད་ཅེས་སྨྲས་སོ། །སྲིང་མོ་ཁྱོད་ནི་རབ་ཏུ་བྱུང་བ་ཡིན་ལ། བདག་ནི་དགེ་བསྙེན་ཡིན་པའི་སྟེང་དུ། ཁྱོད་ཀྱང་རྒྱལ་པོས་སླས་ཀྱི་བཙུན་མོའི་ཐབས་ཐོབ་པ་ཡིན་ལ། གལ་ཏེ་བདག་གིས་ཀྱང་ཉེས་པར་སྤྱོད་པ་འདི་ལྟ་བུ་སྤྱད་པ་རྒྱལ་པོས་ཤེས་པར་གྱུར་ན། དེས་བདག་མཚན་མོ་འདི་ཉིད་ནས་སྡུག་བསྔལ་གྱི་སྐལ་བ་ཅན་དུ་འགྱུར་རོ། །དེ་ནས་སྦོམ་དགའ་མོས་རི་དྭགས་འཛིན་གྱི་བུ་དེ་ལ་འདི་སྐད་ཅེས་སྨྲས་སོ། །ཁྱིམ་བདག་གི་བུ། རྒྱལ་པོའི་རྟོག་ཆེན་པོ་བདག་ཅག་གི་ཕྱི་བཞིན་དུ་འབྲང་ངམ་ཅི། གལ་ཏེ་བདག་ཅག་ཀྱང་འདོད་ལ། ཁྱོད་ཀྱང་འདོད་པར་གྱུར་པ་དེ་ལྟར་འདུག་པ་ལ། སུ་ཞིག་བདག་ལ་འཕྲིགས་པར་འགྱུར། དེ་སྐད་ཅེས་སྨྲས་ཀྱང། རི་དྭགས་འཛིན་གྱི་བུ་མ་བཏུབ་པོ། །དེ་ནས་དགེ་སློང་སྦོམ་དགའ་མོས་འདི་སྙམ་དུ་ཅི་བདག་ལུས་ཞིག་ནས་འཆི་བར་བྱ་བའམ། མ་ལ་བདག་གི་ཡན་ལག་དང་སྤྲད་པ་ཙམ་བདག་གིར་བྱའོ་སྙམ་བསམས་ཤིང་བརྟགས་ནས། རི་དྭགས་འཛིན་གྱི་བུ་ལ་འདི་སྐད་ཅེས། གལ་ཏེ་ཁྱིམ་བདག་གི་བུ་མི་འདོད་ན། ཡན་ལག་དང་ཡན་
ལག་ཙམ་རེག་པར་བྱའོ་ཞེས་སྨྲས་ནས། དེས་དེ་པང་དུ་བླངས་ཏེ། པུས་མོ་ཡན་ཆད་དང། མིག་མན་ཆད་སྤྲད། ཀུན་ཏུ་སྤྲད་པར་བྱས་པ་ལས། སྦྱོར་བ་དེ་ཡང་དགེ་སློང་མ་དགེ་སྐོས་མས་ཚོར་བར་གྱུར་ཏོ། །དགེ་སློང་མའི་དགེ་འདུན་མ་ཡང་མཉན་ཡོད་དུ་བསོད་སྙོམས་བྱས་ནས། ཟས་ཀྱི་བྱ་བ་བྱས་ཏེ། ཟས་ཕྱི་མའི་བསོད་སྙོམས་སྤངས་ནས་ སླར་ལོག་པ་ན། རི་དྭགས་འཛིན་གྱི་བུའི་གནས་གང་ཡིན་པ་དེར་སོང་ངོ། །དེ་ནས་དགེ་སློང་མ་དགེ་སྐོས་མ་དེས་དེ་དག་ལ་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག །རི་དྭགས་འཛིན་གྱི་བུ་འདིས་བདག་ཅག་ལ་ཆོས་ཀྱི་དོན་དུ་གནས་དབེན་པ་རབ་ཏུ་བྱིན་སྙམ་ན། འདིས་ནི་མགོ་རེག་མོ་རྣམས་སླས་ཀྱི་བཙུན་མོ་ལྟ་བུར་བཞག་པར་བདག་གི་འཕྲིགས་ཀྱི། ཀྱེ་ཕུ་ནུ་མོ་དག །ཁྱེད་གང་ལ་ཚུལ་ཁྲིམས་དགོས་པ་དེ་དག་གཞན་དུ་དེངས་ཤིག །དེ་དག་གིས་དེ་ལ་དྲིས་པ། དེ་ཇི་ཞིག །དེས་དགེ་སློང་མ་རྣམས་ལ་སྐབས་དེ་རྒྱས་པར་སྨྲས་སོ། །དགེ་སློང་མ་རྣམས་ཀྱིས་ཀྱང་དགེ་སློང་དག་ལ་སྨྲས་སོ། །དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ངའི་གཉི་གའི་དགེ་འདུན་གྱིས་དོན་ཤེས་པ་དང། ངས་བསླབ་པའི་གཞི་ཡང་ལེགས་པར་བཅས་པར་འགྱུར་རོ་སྙམ་ནས། བྱུང་བ་འདི་དང། གླེང་གཞི་འདི་དང། དངོས་པོ་འདི་དང། སྐབས་འདི་ལ་གཉི་གའི་དགེ་འདུན་བསྡུ་བ་མཛད་དོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་ཀྱི། མི་མཁྱེན་པར་མ་ཡིན། དུས་སུ་ཡིན་གྱི། དུས་སུ་མ་ཡིན་པར་མ་ཡིན། དོན་དང་ལྡན་པར་ཡིན་གྱི། དོན་དང་མི་ལྡན་པར་མ་ཡིན་ཏེ། སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་མི་ལྡན་པར་རྨེད་པ་ནི་ཆུ་ལོན་གྱི་བཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་འདི་ལྟ་སྟེ། དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་དགེ་སློང་མ་སྦོམ་དགའ་མོ་ལ་བཀའ་སྩལ་པ། དགེ་སློང་མ་ཁྱོད་ཀྱིས་འདི་ལྟར་ཚུལ་མ་ཡིན་པ། མི་མཛེས་པར་བྱས་པ་བདེན་
ནམ། བཅོམ་ལྡན་འདས། བགྱིས་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱི་རྣམ་གྲངས་དུ་མས་རྣམ་པར་སྨད་ནས། དགེ་སློང་མའི་དགེ་འདུན་ལ་བཀའ་སྩལ་པ། དགེ་སློང་མ་དག །དེ་ལྟ་བས་ན་ཕན་ཡོན་བཅུ་པོ་འདི་ལྟ་སྟེ། དགེ་འདུན་བསྡུ་བར་བྱ་བའི་ཕྱིར་དང། དགེ་འདུན་ལེགས་པར་བྱ་བའི་ཕྱིར། དགེ་ འདུན་མཐུན་པར་བྱ་བའི་ཕྱིར་དང། དགེ་འདུན་བདེ་བར་གནས་པར་བྱ་བའི་ཕྱིར་དང། གནོང་མི་བཀུར་བའི་གང་ཟག་ཚར་གཅད་པའི་ཕྱིར་དང། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང། མ་དད་པ་རྣམས་དད་པར་བྱ་བའི་ཕྱིར་དང། དད་པ་རྣམས་ཕྱིར་ཞིང་རྒྱས་པར་བྱ་བའི་ཕྱིར་དང། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང། ཚེ་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང། ཚངས་པར་སྤྱོད་པ་རྗེས་སུ་གཟུང་བར་བྱ་བའི་ཕྱིར་དང། ཚངས་པར་སྤྱོད་པ་ཡོངས་སུ་རྫོགས་པར་བྱ་བའི་ཕྱིར་དང། བསྟན་པ་མཐུན་པར་བྱ་བའི་ཕྱིར་དང། ངའི་བསྟན་པ་ཡངས་པར་གྱུར་པ། སྐྱེ་བོ་མང་པོ་ལ་ཕན་པ། ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ། ཡུན་རིང་དུ་གནས་པར་འགྱུར་བ་ལ་ཡང་དག་པར་གཟིགས་ནས། འདུལ་བ་ལ་ཉན་ཐོས་མ་རྣམས་ཀྱི་བསླབ་པའི་གཞི་བཅའ་བར་བྱའོ། །ངའི་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་ཆགས་པར་གྱུར་པས་སྐྱེས་པ་ཆགས་པ་དང་ལྷན་ཅིག་པུས་མོ་ཡན་ཆད་མིག་མན་ཆད་སྤྲད། ཀུན་ཏུ་སྤྲད་པ་ཉམས་སུ་མྱོང་བར་བྱེད་ན། དགེ་སློང་མ་དེ་ཕས་ཕམ་པར་གྱུར་པ་ཡིན་པས་གནས་པར་མི་བྱའོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །ཆགས་པར་གྱུར་པས་ཞེས་བྱ་བ་ནི་ཆགས་པས་དང། ཡང་དག་པར་ཞེན་པས་དང། ཀུན་ནས་དཀྲིས་པས་སོ། །སྐྱེས་པ་ཞེས་བྱ་བ་ནི་རི་དྭགས་འཛིན་གྱི་བུའམ། དེ་
ལས་གཞན་པ་གང་ཡང་རུང་བའོ། །ཆགས་པ་ཞེས་བྱ་བ་ནི་ཆགས་པ་དང། ཡང་དག་པར་ཞེན་པ་དང། ཀུན་ནས་དཀྲིས་པའོ། །མིག་མན་ཆད་དང་པུས་མོ་ཡན་ཆད་ཅེས་བྱ་བ་ནི་དེའི་བར་དུའོ། །སྤྲད་ཀུན་ཏུ་སྤྲད་པ་ཞེས་བྱ་བ་ནི་གཏུགས་ཤིང་ཀུན་ཏུ་གཏུགས་པའོ། །བདག་གིར་བྱེད་པ་ཞེས་བྱ་བ་ནི་ཀུན་ནས་ཉམས་སུ་མྱོང་བར་བྱེད་པའོ། །དགེ་སློང་མ་ཞེས་བྱ་བ་ནི། གང་ལ་དགེ་སློང་མའི་དངོས་པོ་ཡོད་པའོ། །དགེ་སློང་མའི་དངོས་པོ་གང་ཞེ་ན་བསྙེན་པར་རྫོགས་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང། རྟོག་པ་ཉིད་དང། ཡང་དག་པར་རྟོག་པ་ཉིད་དང། མཐར་ཕྱིན་པར་བྱེད་པ་ཉིད་དང། དེའི་ཁས་ལེན་པ་དང། མངོན་པར་ཁས་ལེན་པ་དང། དེ་ཡང་བསྙེན་པར་རྫོགས་པའི་ཚེ། ངག་ དང། ཚིག་དང། ཐ་སྙད་དང། སྐད་དང། བརྗོད་པ་དང། ངེས་པའི་ཚིག་དང། ཚིག་གི་ལམ་དང། ཚིག་ཏུ་བརྗོད་པ་དང། ངག་གི་ལས་དང། ངག་གི་རྣམ་པར་རིག་བྱེད་ཀྱིས་ཁས་ལེན་པ་གང་ཡིན་པ་འདི་ནི། བསྙེན་པར་རྫོགས་པ་ཞེས་བྱའོ། །དེ་ཞེས་བྱ་བ་འདི་ནི་ཉེ་བར་བསྟན་པ་དང། ཀུན་ཏུ་བསྟན་པའི་ཚིགས་བླ་དྭགས་སོ། །ཕས་ཕམ་པར་གྱུར་པ་ཡིན་པས་ཞེས་བྱ་བ་ནི། དེ་ཐ་མ་དང། ལྟུང་བ་དང། དམན་པ་དང། ཐ་ཆད་དང། བསྙིལ་བ་དང། ཡིད་དང་མི་མཐུན་པའོ། །ཡང་གང་གིས་ལྟུང་བ་དེ་བྱས་ན། བྱས་མ་ཐག་ཏུ་དགེ་སློང་མར་མི་རུང་བར་འགྱུར། ཤཱཀྱའི་སྲས་སུ་མི་རུང། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང། ཉམས་པ། བཅོམ་པ། ལྟུང་བ། ཕམ་པ། རྒྱབ་ཀྱིས་ཕྱོགས་པར་བྱས་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་བྱས་པ་ཡིན་ནོ། །འདི་ལྟ་སྟེ། ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང། ཡངས་པར་འགྱུར་དུ་མི་རུང་བ་དེ་བཞིན་དུ། དགེ་སློང་མ་གང་གིས་ལྟུང་བ་དེ་བྱས་ན། བྱས་མ་ཐག་ཏུ་ཞེས་བྱ་བ་སྔ་མ་བཞིན་ནོ། །གནས་པར་མི་བྱའོ་ཞེས་བྱ་བ་ནི་དགེ་སློང་མ་རྣམས་ཀྱིས་དེ་དང། གསོ་སྦྱོང་དང། དགག་དབྱེ་དང། གསོལ་བ་དང། གསོལ་
བ་དང་། གཉིས་དང། གསོལ་བ་དང་བཞིའི་ལས་ཉམས་སུ་མྱོང་བར་མི་བྱའོ། །ཡང་དགེ་སློང་མ་བཅུ་གཉིས་པོ་དག་ཏུ་དེ་བསྐོ་བར་མི་བྱའོ། །དེ་ལ་ལྟུང་བར་མི་ལྟར་འགྱུར་ཞེ་ན། སྡོམ་ལ། ཆགས་པ་སྐྱེས་པ་ཆགས་པ་ཡི། །ལུས་དང་མིག་ནི་མན་ཆད་དང། །པུས་མོའི་གོང་ནི་ཡན་ཆད་ཀྱིས། །སྤྲད་ན་ཕས་ཕམ་འགྱུར་པ་ཡིན། །སྐྱེས་པ་ཆགས་པར་མ་གྱུར་པ། །དེ་ནི་སྤོམ་པོ་ཉིད་དུ་འགྱུར། །བྱིན་པ་དང་ནི་དཔྲལ་བ་རྣམས། །དེ་དག་ཉེས་བྱས་ཉིད་དུ་འགྱུར། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་དང་ལྷན་ཅིག་མིག་མན་ཆད། པུས་མོ་ཡན་ཆད་སྤྲད། ཀུན་ཏུ་སྤྲད་པ་ཉམས་སུ་མྱོང་བར་བྱེད་ན་ཕས་ཕམ་པར་འགྱུར་རོ། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་མེད་པ་དང་ལྷན་ཅིག་མིག་མན་ཆད། པུས་མོ་ཡན་ཆད་སྤྲད། ཀུན་ཏུ་སྤྲད་པ་ཉམས་སུ་མྱོང་བར་བྱེད་ན་སྦོམ་པོར་འགྱུར་རོ། །ཡང་དགེ་སློང་མ་གང་ཆགས་པ་མེད་ པས། སྐྱེས་པ་ཆགས་པ་དང་ལྷན་ཅིག་མིག་མན་ཆད། པུས་མོ་ཡན་ཆད་སྤྲད། ཀུན་ཏུ་སྤྲད་པ་ཉམས་སུ་མྱོང་བར་བྱེད་ན་སྤོམ་པོར་འགྱུར་རོ། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་དང་ལྷན་ཅིག་དཔྲལ་བ་ཡན་ཆད། བྱིན་པ་མན་ཆད་སྤྲད། ཀུན་ཏུ་སྤྲད་པ་བདག་གིར་བྱེད་ན་སྤོམ་པོར་འགྱུར་རོ། །ཡང་དགེ་སློང་མ་གང་ཆགས་པ་མེད་པས་སྐྱེས་པ་དང་ལྷན་ཅིག་དཔྲལ་བ་ཡན་ཆད། བྱིན་པ་མན་ཆད་སྤྲད། ཀུན་ཏུ་སྤྲད་པ་བདག་གིར་བྱེད་ན་ཉེས་བྱས་སུ་འགྱུར་རོ། །ཡང་དགེ་སློང་མ་གང་ཆགས་པས་སྐྱེས་པ་ཆགས་པ་མེད་པ་དང་ལྷན་ཅིག་དཔྲལ་བ་ཡན་ཆད། བྱིན་པ་མན་ཆད་སྤྲད། ཀུན་ཏུ་སྤྲད་པ་བདག་གིར་བྱེད་ན་ཉེས་བྱས་སུ་འགྱུར་རོ། །ཡང་དགེ་སློང་མ་གང་ཆགས་པ་མེད་པས་སྐྱེས་པ་ཆགས་པ་མེད་པ་དང་ལྷན་ཅིག་དཔྲལ་བ་ཡན་ཆད། བྱིན་པ་མན་ཆད་སྤྲད། ཀུན་ཏུ་སྤྲད་པ་བདག་གིར་བྱེད་ན་ཉེས་བྱས་སུ་འགྱུར་རོ། །ཕས་ཕམ་པར་གྱུར་པ་ལྔ་པ་རྫོགས་སོ།། །།