ལྟུང་བྱེད་ཀྱི་ཆོས་བརྒྱ་དང་བརྒྱད་ཅུ་ཆད་པ།

---

^{[མ་དཔེ་གཟིགས་ན་འདིར་གནོན།]}

དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅོ་ལྔ་པ། ད་ནི་ལྟུང་བྱེད་རྣམས་སྨྲ་བར་བྱ་སྟེ། བསྡུས་པའི་སྡོམ་ནི། ཤེས་བཞིན་དང་ནི་ས་བོན་དང། །དེ་བཞིན་ཁུར་བ་ཉིད་དང་ནི། །ཐལ་མོས་རྡེབས་དང་ཆེས་བསམས་དང། །རྐུན་མ་བང་ཆེན་ཉིད་དང་ངོ། །སྡོམ་ནི། ཤེས་བཞིན་དང་ནི་སྐྱོན་ནས་འདྲུ། །ཕྲ་མ་དང་ནི་སྐྱོ་སྡོགས་དང། །སྐྱེས་པ་ལ་སྟོན་ཆོས་དང་ནི། །ཡིད་འོང་བསླབ་པར་ཁྱད་གསོད་པའོ། །སངས་རྒྱས་བཅོམ་ལྡན་འདས་

---

^{[མ་དཔེ་གཟིགས་ན་འདིར་གནོན།]}

རྒྱལ་བུ་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་ཀྱིས་ཤེས་བཞིན་དུ་དགེ་སློང་མ་རྣམས་ལ་རྫུན་སྨྲས་པས་མཐོ་འཚམ་པར་བྱེད་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་ཏེ། བཅོམ་ལྡན་འདས་ལ་གསོལ་པ་དང། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཤེས་བཞིན་དུ་རྫུན་སྨྲ་ན་ལྟུང་བྱེད་དོ། །ཤེས་བཞིན་དུ་ཞེས་བྱ་བ་ནི་རྣམ་པར་དཔྱད་ནས་སོ། །བརྫུན་དུ་སྨྲ་ན་ཞེས་བྱ་བ་ལ། བརྫུན་དུ་སྨྲ་བ་རྣམ་པ་བརྒྱད་ཀྱང་ཡོད། བརྫུན་དུ་སྨྲ་བ་རྣམ་པ་བདུན་ཡང་ཡོད། བརྫུན་དུ་སྨྲ་བ་རྣམ་པ་དྲུག་ཀྱང་ཡོད། བརྫུན་དུ་སྨྲ་བ་རྣམ་པ་ལྔ་ཡང་ཡོད། བརྫུན་དུ་སྨྲ་བ་རྣམ་པ་བཞི་ཡང་ཡོད། བརྫུན་དུ་སྨྲ་བ་རྣམ་པ་གསུམ་ཡང་ཡོད། བརྫུན་དུ་སྨྲ་བ་རྣམ་པ་གཉིས་ཀྱང་ཡོད་དོ། །བརྫུན་དུ་སྨྲ་བ་རྣམ་པ་བརྒྱད་གང་ཞེན། གཞི་མེད་པར་ཕས་ཕམ་པར་འགྱུར་བ་དང། དགེ་འདུན་ལྷག་མ་དང། ལྟུང་བྱེད་དང། སོ་སོར་བཤགས་པར་བྱ་བ་དང། ཉེས་བྱས་དང། གཞི་མེད་པར་མཐོང་བ་དང། ཐོས་པ་དང། དོགས་པ་སྟེ་འདི་ནི་བརྫུན་དུ་སྨྲ་བ་རྣམ་པ་བརྒྱད་ཡིན་ནོ། །བརྫུན་དུ་སྨྲ་བ་རྣམ་པ་བདུན་གང་ཞེ་ན། གཞི་མེད་པར་ཚུལ་ཁྲིམས་ཉམས་པ་དང། ལྟ་བ་ཉམས་པ་དང། ཆོ་ག་ཉམས་པ་དང། འཚོ་བ་ཉམས་པ་དང། གཞི་མེད་པར་མཐོང་བ་དང། ཐོས་པ་དང། དོགས་པ་སྟེ། འདི་ནི་བརྫུན་དུ་སྨྲ་བ་རྣམ་པ་བདུན་ཡིན་ནོ། །བརྫུན་དུ་སྨྲ་བ་རྣམ་པ་དྲུག་གང་ཞེ་ན། དགེ་སློང་མ་རྣམས་བརྫུན་དུ་སྨྲ་བར་འདོད་པ་འདི་སྙམ་དུ་བརྫུན་དུ་སྨྲ་བར་བྱའོ་སྙམ་པ་དང། བརྫུན་དུ་སྨྲའོ་སྙམ་པ་དང། རྫུན་སྨྲས་སོ་སྙམ་པ་དང། གཞི་མེད་པར་མཐོང་བ་དང། ཐོས་པ་དང། དོགས་པ་སྟེ། འདི་ནི་བརྫུན་དུ་སྨྲ་བ་རྣམ་པ་དྲུག་ཡིན་ནོ། །བརྫུན་དུ་སྨྲ་བ་རྣམ་པ་ལྔ་གང་ཞེ་ན། གཞི་མེད་པར་ཕས་

---

^{[མ་དཔེ་གཟིགས་ན་འདིར་གནོན།]}

ཕམ་པར་འགྱུར་པ་དང། དགེ་འདུན་ལྷག་མ་དང། ལྟུང་བྱེད་དང། སོ་སོར་བཤགས་པར་བྱ་བ་དང། ཉེས་བྱས་ཀྱིས་ཏེ། འདི་ནི་བརྫུན་དུ་སྨྲ་བ་རྣམ་པ་ལྔ་ཡིན་ནོ། །བརྫུན་དུ་སྨྲ་བ་རྣམ་པ་བཞི་གང་ཞེ་ན། གཞི་མེད་པར་ཚུལ་ཁྲིམས་ཉམས་པ་དང། ལྟ་བ་ཉམས་པ་དང། ཆོ་ག་ཉམས་པ་དང། འཚོ་བ་ཉམས་པ་སྟེ། འདི་ནི་བརྫུན་དུ་སྨྲ་བ་རྣམ་པ་བཞི་ཡིན་ནོ། །བརྫུན་དུ་སྨྲ་བ་རྣམ་པ་གསུམ་གང་ཞེ་ན། གཞི་མེད་པར་མཐོང་བ་དང། ཐོས་པ་དང། དོགས་པ་སྟེ། འདི་ནི་བརྫུན་དུ་སྨྲ་བ་རྣམ་པ་གསུམ་ཡིན་ནོ། །གཞན་ཡང་བརྫུན་དུ་སྨྲ་བ་རྣམ་པ་གསུམ་སྟེ། བརྫུན་དུ་སྨྲ་བར་འདོད་པ་ན། འདི་སྙམ་དུ་བདག་གིས་བརྫུན་སྨྲ་བར་བྱའོ་སྙམ་པ་དང། སྨྲ་བ་ན་འདི་སྙམ་དུ་བདག་གིས་རྫུན་སྨྲའོ་སྙམ་པ་དང། རྫུན་སྨྲས་པ་ན་འདི་སྙམ་དུ་བདག་གིས་རྫུན་སྨྲས་སོ་སྙམ་པ་སྟེ། འདི་ནི་བརྫུན་དུ་སྨྲ་བ་རྣམ་པ་གསུམ་ཡིན་ནོ། །བརྫུན་དུ་སྨྲ་བ་རྣམ་པ་གཉིས་གང་ཞེ་ན། རྫུན་སྨྲ་བ་ན་འདི་སྙམ་དུ་རྫུན་སྨྲའོ་སྙམ་པ་དང། རྫུན་སྨྲས་བ་ན་དེ་འདི་སྙམ་དུ་བདག་གིས་རྫུན་སྨྲས་སོ་སྙམ་པ་སྟེ། འདི་ནི་བརྫུན་དུ་སྨྲ་བ་རྣམ་པ་གཉིས་ཡིན་ནོ། །བརྫུན་དུ་སྨྲ་བ་ལ་རྣམ་པ་གཅིག་པུ་འབའ་ཞིག་ནི་མེད་དོ། །བརྫུན་དུ་སྨྲ་བ་ལས་ཕས་ཕམ་པར་འགྱུར་བ་ཡང་ཡོད། བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་ཡང་ཡོད། བརྫུན་དུ་སྨྲ་བ་སྦོམ་པོར་འགྱུར་བ་ཡང་ཡོད། བརྫུན་དུ་སྨྲ་བ་ལྟུང་བྱེད་དུ་འགྱུར་བ་ཡང་ཡོད་དོ། །བརྫུན་དུ་སྨྲ་བ་ཉེས་བྱས་སུ་འགྱུར་བ་ཡང་ཡོད་དོ། །བརྫུན་དུ་སྨྲ་བ་ཕས་ཕམ་པར་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མས་མིའི་ཆོས་བླ་མ་མེད་བཞིན་དུ་སྨྲ་བ་སྟེ། འདི་ནི་བརྫུན་དུ་སྨྲ་བ་ཕས་ཕམ་པར་འགྱུར་བ་ཡིན་ནོ། །བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མས་གཞི་མེད་པར་དགེ་སློང་མ་དག་པ་ལ་ཕས་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་པ་སྟེ། འདི་ནི་བརྫུན་དུ་སྨྲ་བ་དགེ་འདུན་ལྷག་མར་འགྱུར་བ་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

བརྫུན་དུ་སྨྲ་བ་སྦོམ་པོར་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མས་ཆེད་དུ་བསམས་ཏེ། དགེ་འདུན་གྱི་ནང་དུ་ཆོས་མ་ཡིན་པ་ལ་ཆོས་དང། ཆོས་ལ་ཆོས་མ་ཡིན་པ་དང། འདུལ་བ་མ་ཡིན་པ་ལ་འདུལ་བ་དང། འདུལ་བ་ལ་འདུལ་བ་མ་ཡིན་པར་སྟོན་པ་སྟེ། འདི་ནི་བརྫུན་དུ་སྨྲ་བ་སྦོམ་པོར་འགྱུར་བ་ཡིན་ནོ། །བརྫུན་དུ་སྨྲ་བ་ལྟུང་བྱེད་དུ་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མ་བཅུ་གཉིས་སྡེ་རྣམས་ཀྱིས་ཤེས་བཞིན་དུ་བརྫུན་སྨྲ་བས་མཐོ་འཚམས་པར་བྱེད་པ་སྟེ། འདི་ནི་བརྫུན་དུ་སྨྲ་བ་ལྟུང་བྱེད་དུ་འགྱུར་བ་ཡིན་ནོ། །བརྫུན་དུ་སྨྲ་བ་ཉེས་བྱས་སུ་འགྱུར་བ་གང་ཞེ་ན། འདི་ལྟ་སྟེ། ཡང་དགེ་སློང་མས་གསོ་སྦྱོང་བཅོ་ལྔ་པ་དེ་ཉིད་ལ་སོ་སོར་ཐར་པའི་མདོ་འདོན་པས། ཅི་འདི་ན་ཡོངས་སུ་དག་གམ། ཞེས་དྲིས་པ་ན། དེ་ཡོངས་སུ་མ་དག་བཞིན་དུ་ཅང་མི་སྨྲ་བས་དང་དུ་ལེན་པ་སྟེ། འདི་ནི་བརྫུན་དུ་སྨྲ་བ་ཉེས་བྱས་སུ་འགྱུར་བ་ཡིན་ཏེ། དེ་ལ་རྣམ་པ་བཞི་མ་གཏོགས་པ་དེ་ལས་གཞན་པའི་རྫུན་གང་ཡིན་པ་དེ་ཐམས་ཅད་དོ། །ལྟུང་བྱེད་དོ་ཞེས་བྱ་བ་ནི་དམྱལ་བ་དང། དུད་འགྲོ་དང། ཡི་དྭགས་དང། ངན་སོང་ངན་འགྲོར་ལོག་པར་ལྟུང་བ་རྣམས་སུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། བར་སྡོམ་ནི། མ་བརྗེད་པ་དང་ཡིད་གཉིས་དང། འདུ་ཤེས་མུ་བཞིར་སྦྱར་བའོ། །འདིས་མ་མཐོང་བ་དང། མ་ཐོས་པ་དང། མ་རྟོགས་པ་དང། རྣམ་པར་མི་ཤེས་ལ། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་ངོ། །ཐོས་སོ། །རྟོགས་སོ། །རྣམ་པར་ཤེས་སོ། །ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །མཐོང་ལ་བརྗེད་ཅིང་བདག་གིས་ཐོས་པ་དང། རྟོགས་པ་དང། རྣམ་པར་ཤེས་ལ་བརྗེད་ནས་དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ནས། འདི་སྐད་ཅེས་ངས་མཐོང་སྟེ་མ་བརྗེད་དོ། །ཐོས་རྟོགས་རྣམ་པར་ཤེས་ཏེ་མ་བརྗེད་

---

^{[མ་དཔེ་གཟིགས་ན་འདིར་གནོན།]}

དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་བླ་ཡིད་གཉིས་ཟ་བ་དང། བདག་གིས་མཐོང་བ་དང། རྟོགས་པ་དང། བདག་གིས་རྣམ་པར་ཤེས་ལ་ཡིད་གཉིས་ཟ་བ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ནས་འདི་སྐད་ཅེས་ངས་མཐོང་སྟེ་ཡིད་གཉིས་མི་ཟའོ། །ངས་རྟོགས། རྣམ་པར་ཤེས་ཏེ་ཡིད་གཉིས་མི་ཟའོ། །ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མཐོང་ལ་མ་མཐོང་བར་འདུ་ཤེས་ཤིང། ཐོས་རྟོགས་རྣམ་པར་ཤེས་ལ། རྣམ་པར་མ་ཤེས་པར་འདུ་ཤེས་པ་ལས་དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མ་མཐོང་ངོ། །ཁོ་མོས་མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མ་མཐོང་མོད་ཀྱི། ཐོས་རྟོགས་རྣམ་པར་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས་ངས་མ་མཐོང་ངོ། །མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མ་ཐོས་མོད་ཀྱི། མཐོང་རྟོགས་རྣམ་པར་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་ཐོས་ཀྱི་མ་མཐོང་ངོ། །མ་རིག་གོ་།རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མ་རྟོགས་མོད་ཀྱི། མཐོང་ཐོས་རྣམ་པར་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཀྱི་མ་མཐོང་ངོ། །མ་ཐོས་སོ། །རྣམ་པར་མི་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་རྣམ་པར་མ་ཤེས་མོད་ཀྱི། མཐོང་ཐོས་རྟོགས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྣམ་པར་ཤེས་ཀྱི། མ་མཐོང་ངོ། །མ་ཐོས་སོ། །མ་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་མ་བརྗེད་ཅིང། བདག་གིས་ཐོས་པ་དང། རྟོགས་པ་དང། རྣམ་པར་ཤེས་ལ་མ་བརྗེད་པ་ལས། དེས་འདུ་ཤེས་བསྒྱུར་ནས་ཞེས་བྱ་བ་ནས། ངས་མཐོང་སྟེ་བརྗེད་

---

^{[མ་དཔེ་གཟིགས་ན་འདིར་གནོན།]}

དོ། །ཁོ་མོས་ཐོས་རྟོགས་རྣམ་པར་ཤེས་ཏེ། བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་ཐོས་ལ་བརྗེད་ཅིང་བདག་གིས་མཐོང་བ་དང། རྟོགས་པ་དང། རྣམ་པར་ཤེས་ལ་བརྗེད་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་ཐོས་ཏེ་མ་བརྗེད་དོ། །ངས་མཐོང་རྟོགས་རྣམ་པར་ཤེས་ཏེ། མ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་མ་བརྗེད་ཅིང་བདག་གིས་མཐོང་བ་དང། ཐོས་པ་དང། རྣམ་པར་ཤེས་ལ་མ་བརྗེད་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཏེ་བརྗེད་དོ། །ངས་མཐོང་རྟོགས་རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ། མ་བརྗེད་ཅིང། བདག་གིས་མཐོང་བ་དང། ཐོས་པ་དང། རྟོགས་ལ་མ་བརྗེད་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྣམ་པར་ཤེས་ཏེ་བརྗེད་དོ། །ཁོ་མོས་མཐོང། ཐོས་རྟོགས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་ཟ་ཞིང། བདག་གིས་ཐོས་པ་དང། རྟོགས་པ་དང། རྣམ་པར་ཤེས་ལ་ཡིད་གཉིས་ཟ་བ་ལས་ཞེས་བྱ་བ་ནས། ངས་མཐོང་སྟེ་ཡིད་གཉིས་མི་ཟའོ། །ཁོ་མོས་ཐོས་རྟོགས་རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་ཐོས་ལ་ཡིད་གཉིས་ཟ་ཞིང། བདག་གིས་མཐོང་བ་དང། རྟོགས་པ་དང། རྣམ་པར་ཤེས་ལ་ཡིད་གཉིས་ཟ་བ་ལས་ཞེས་བྱ་བ་ནས། ངས་ཐོས་ཏེ་ཡིད་གཉིས་མི་ཟའོ། །ཁོ་མོས་མཐོང་རྟོགས་རྣམ་པར་ཤེས་ཏེ་ཡིད་གཉིས་མི་ཟའོ། །ཞེས་ཟེར་ན། སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་ཡིད་གཉིས་ཟ་ཞིང། བདག་གིས་མཐོང་བ་དང། ཐོས་པ་དང། རྣམ་པར་ཤེས་ལ་ཡིད་གཉིས་ཟ་བ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཏེ་ཡིད་གཉིས་མི་ཟའོ། །ཁོ་མོས་མཐོང་ཐོས་ལ། རྣམ་པར་ཤེས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ་ཡིད་གཉིས་ཟ་ཞིང།

---

^{[མ་དཔེ་གཟིགས་ན་འདིར་གནོན།]}

བདག་གིས་མཐོང་བ་དང། ཐོས་པ་དང། རྟོགས་ལ་ཡིད་གཉིས་ཟ་བ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྣམ་པར་ཤེས་ཏེ་ཡིད་གཉིས་མི་ཟའོ། །ཁོ་མོས་མཐོང་ཐོས། རྟོགས་ཏེ་ཡིད་གཉིས་མི་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །དེས་མཐོང་ལ་མ་མཐོང་བར་འདུ་ཤེས་ཤིང། ཐོས་པ་དང། རྟོགས་པ་དང། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་མཐོང་གི་མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །དེས་ཐོས་ལ་མ་ཐོས་པར་འདུ་ཤེས་ཤིང་མཐོང་བ་དང། རྟོགས་པ་དང། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་ཐོས་ཀྱི་མ་མཐོང་ངོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །རྟོགས་ལ་མ་རྟོགས་པར་འདུ་ཤེས་ཤིང། མཐོང་བ་དང། ཐོས་པ་དང། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས་དེས་འདུ་ཤེས་བསྒྱུར་ཏེ་ཞེས་བྱ་བ་ནས། ཁོ་མོས་རྟོགས་ཀྱི་མ་མཐོང་ངོ། །མ་ཐོས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །རྣམ་པར་ཤེས་ལ་རྣམ་པར་མ་ཤེས་པར་འདུ་ཤེས་ཤིང། མཐོང་བ་དང། ཐོས་པ་དང། རྟོགས་པ་ལ་རྟོགས་པར་འདུ་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྣམ་པར་ཤེས་ཀྱི་མ་མཐོང་ངོ། །མ་ཐོས་སོ། །མ་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མཐོང་བར་གྱུར་ཅིང་ཐོས་པ་དང། རྟོགས་པ་དང། རྣམ་པར་ཤེས་པར་གྱུར་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ང་མ་མཐོང་ངོ། །མ་ཐོས་སོ། །མ་རིག་གོ་།རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མཐོང་བར་གྱུར་ལ་མ་བརྗེད་པ་དང། ཐོས་པ་དང། རྟོགས་པ་དང། རྣམ་པར་ཤེས་ལ་མ་བརྗེད་པ་ལས། དེས་འདུ་ཤེས་དང། བཟོད་པ་དང། འདོད་པ་དང།

---

^{[མ་དཔེ་གཟིགས་ན་འདིར་གནོན།]}

བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་བརྗེད་དོ། །ངས་ཐོས་ཏེ་བརྗེད་དོ། །ངས་རྟོགས་ཏེ་བརྗེད་དོ། །ངས་རམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་མི་ཟ་ཞིང། བདག་གིས་ཐོས་པ་དང། རྟོགས་པ་དང། རྣམ་པར་ཤེས་ལ་ཡིད་གཉིས་མི་ཟ་བ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ། འདི་སྐད་ཅེས་ངས་མཐོང་སྟེ་ཡིད་གཉིས་ཟའོ། །ངས་ཐོས་རྟོགས་རྣམ་པར་ཤེས་ཏེ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མཐོང་ལ་མཐོང་བར་འདུ་ཤེས་ཤིང། ཐོས་པ་དང། རྟོགས་པ་དང། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ། འདི་སྐད་ཅེས་ངས་མ་མཐོང་ངོ། །མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་མཐོང་མོད་ཀྱི། མ་ཐོས། མ་རྟོགས། རྣམ་པར་མ་ཤེས་པ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་མ་མཐོང་སྟེ་འོན་ཀྱང་ཐོས་སོ། །རྟོགས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་ཐོས་མོད་ཀྱི། མ་མཐོང། མ་རྟོགས། རྣམ་པར་མ་ཤེས་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མ་ཐོས་ཏེ་འོན་ཀྱང་མཐོང་ངོ། །རྟོགས་སོ། །རྣམ་པར་ཤེས་སོ། །ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདིས་རྟོགས་མོད་ཀྱི་མ་མཐོང་བ་དང། མ་ཐོས་པ་དང། རྣམ་པར་མ་ཤེས་པ་ལས་དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མ་རྟོགས་ཏེ་འོན་ཀྱང་མཐོང་ངོ། །ཐོས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །འདི་རྣམ་པར་ཤེས་མོད་ཀྱི་མ་མཐོང་མ་ཐོས། མ་རྟོགས་པ་ལས་དེས་

---

^{[མ་དཔེ་གཟིགས་ན་འདིར་གནོན།]}

བསྒྱུར་ཏེ་ཞེས་བྱ་བ་ནས། འདི་སྐད་ཅེས་ངས་རྣམ་པར་མ་ཤེས་ཏེ་འོན་ཀྱང་ངས་མཐོང་ངོ། །ངས་ཐོས་སོ། །ངས་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་མ་བརྗེད་ཅིང། བདག་གིས་ཐོས་པ་དང། རྟོགས་པ་དང། རྣམ་པར་ཤེས་ལ་བརྗེད་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མ་མཐོང་སྟེ། འོན་ཀྱང་ཐོས་སོ། །རྟོགས་སོ། །རྣམ་པར་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་མ་བརྗེད། བདག་གིས་ཐོས་ལ་མ་བརྗེད། བདག་གིས་རྟོགས་ལ་མ་བརྗེད། བདག་གིས་རྣམ་པར་ཤེས་ལ་མ་བརྗེད་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་བརྗེད་དོ། །ངས་ཐོས་ཏེ་བརྗེད་དོ། །ངས་རྟོགས་ཏེ་བརྗེད་དོ། །ངས་རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་མ་བརྗེད། བདག་གིས་མཐོང་ལ་མ་བརྗེད། བདག་གིས་ཐོས་ལ་མ་བརྗེད། བདག་གིས་རྣམ་པར་ཤེས་ལ་མ་བརྗེད་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་རྟོགས་ཏེ་བརྗེད་དོ། །ངས་མཐོང་ཏེ་བརྗེད་དོ། །ངས་ཐོས་ཏེ་བརྗེད་དོ། །ངས་རྣམ་པར་ཤེས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ་མ་བརྗེད། བདག་གིས་མཐོང་ལ་མ་བརྗེད། བདག་གིས་ཐོས་ལ་མ་བརྗེད། བདག་གིས་རྟོགས་ལ་མ་བརྗེད་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས། ངས་རྣམ་པར་ཤེས་ཏེ་བརྗེད་དོ། །ངས་མཐོང་སྟེ་བརྗེད་དོ། །ངས་ཐོས་ཏེ་བརྗེད་དོ། །ངས་རྟོགས་ཏེ་བརྗེད་དོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་མཐོང་ལ་ཡིད་གཉིས་མི་ཟ། བདག་གིས་ཐོས་ལ་ཡིད་གཉིས་མི་ཟ། བདག་གིས་རྟོགས་ལ་ཡིད་གཉིས་མི་ཟ།

---

^{[མ་དཔེ་གཟིགས་ན་འདིར་གནོན།]}

བདག་གིས་རྣམ་པར་ཤེས་ལ་ཡིད་གཉིས་མི་ཟ་བ་ལས། དེས་འདུ་ཤེས་པ་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་མཐོང་སྟེ་ཡིད་གཉིས་ཟའོ། །ངས་ཐོས་ཏེ་ཡིད་གཉིས་ཟའོ། །ངས་རྟོགས་ཏེ་ཡིད་གཉིས་ཟའོ། །ངས་རྣམ་པར་ཤེས་ཏེ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་ཐོས་ལ་ཡིད་གཉིས་མི་ཟ། བདག་གིས་མཐོང་ལ་ཡིད་གཉིས་མི་ཟ། བདག་གིས་རྟོགས་ལ་ཡིད་གཉིས་མི་ཟ། བདག་གིས་རྣམ་པར་ཤེས་ལ་ཡིད་གཉིས་མི་ཟ་བ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ། འདི་སྐད་ཅེས་ངས་ཐོས་ཏེ་ཡིད་གཉིས་ཟའོ། །ངས་མཐོང་སྟེ་ཡིད་གཉིས་ཟའོ། །ངས་རྟོགས་ཏེ་ཡིད་གཉིས་ཟའོ། །ངས་རྣམ་པར་ཤེས་ཏེ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྟོགས་ལ་ཡིད་གཉིས་མི་ཟ། བདག་གིས་མཐོང་ལ་ཡིད་གཉིས་མི་ཟ། བདག་གིས་ཐོས་ལ་ཡིད་གཉིས་མི་ཟ། བདག་གིས་རྣམ་པར་ཤེས་ལ་ཡིད་གཉིས་མི་ཟ་བ་ལས། དེས་འདུ་ཤེས་བསྒྱུར་ཏེ་ཞེས་བྱ་བ་ནས། ངས་རྟོགས་ཏེ་ཡིད་གཉིས་ཟའོ། །ངས་མཐོང་ཐོས་རྣམ་པར་ཤེས་ཏེ་ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །བདག་གིས་རྣམ་པར་ཤེས་ལ་ཡིད་གཉིས་མི་ཟ་ཞིང། མཐོང་བ་དང། ཐོས་པ་དང། རྟོགས་ལ་ཡིད་གཉིས་མི་ཟ་བ་ལས། དེས་ཞེས་བྱ་བ་ནས། ངས་རྣམ་པར་ཤེས་ཏེ་ཡིད་གཉིས་ཟའོ། །ངས་མཐོང་ཐོས་རིག་སྟེ། ཡིད་གཉིས་ཟའོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མ་མཐོང་ལ་མ་མཐོང་བར་འདུ་ཤེས་ཤིང། ཐོས་པ་དང། རྟོགས་པ་དང། རྣམ་པར་ཤེས་ལ་རྣམ་པར་ཤེས་པར་འདུ་ཤེས་པ་ལས། དེས་བསྒྱུར་ཏེ་ཞེས་བྱ་བ་ནས་ངས་མཐོང་གི་མ་ཐོས་སོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མ་ཐོས་ལ་ཐོས་པར་འདུ་ཤེས་ཤིང་མཐོང་བ་དང། རྟོགས་པ་དང།

---

^{[མ་དཔེ་གཟིགས་ན་འདིར་གནོན།]}

རྣམ་པར་ཤེས་པར་འདུ་ཤེས་པ་ལས་ངས་ཐོས་ཀྱི་མ་མཐོང་ངོ། །མ་རྟོགས་སོ། །རྣམ་པར་མ་ཤེས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དོ། །མ་རྟོགས་པ་ལ་རྟོགས་པར་འདུ་ཤེས་ཤིང། མཐོང་བ་ལ་མཐོང་བར་འདུ་ཤེས། ཐོས་པ་ལ་ཐོས་པར་འདུ་ཤེས། རྣམ་པར་ཤེས་པ་ལ་རྣམ་པར་ཤེས་པར་འདུ་ཤེས་པ་ལས། དེས་བསྒྱུར་ཏེ་ཞེས་བྱ་བ་ནས། ངས་རྟོགས་ཀྱི་མ་མཐོང་ངོ། །མ་ཐོས་སོ། །རྣམ་པར་མ་ཤེས་སོ་ཞེས་ཟེར་ན། སྨྲས་སོ་ཅོག་ལྟུང་བྱེད་དུ་འགྱུར་རོ། །རྣམ་པར་ཤེས་པ་ལ་རྣམ་པར་ཤེས་པར་འདུ་ཤེས་ཤིང། བདག་གིས་མཐོང་བ་དང། བདག་གིས་ཐོས་པ་དང། བདག་གིས་རྟོགས་པ་ལས། འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ་འདི་སྐད་ཅེས་ངས་རྣམ་པར་ཤེས་ཀྱི། མ་མཐོང་ངོ། །མ་ཐོས་སོ། །མ་རྟོགས་སོ་ཞེས་ཟེར་ན་སྨྲས་སོ་ཅོག་ལྟུང་བྱེད་དུ་འགྱུར་རོ། །ལྟུང་བྱེད་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་ཀྱིས་འདི་སྐད་ཅེས་ཞར་མ། ཐེང་མོ། སྒུར་མོ། མིའུ་ཐུང་མོ། མཆུ་འཕྱངས་མོ། མགོ་མོ་ཆེ། ལག་ཞ་མོ་ཞེས་བུད་མེད་ཀྱིས་སྐྱོན་ནས་འདྲུ་ཞིང། སྨྲ་བའི་ཀུན་ཏུ་སྤྱོད་པས་ཀུན་ཏུ་སྤྱོད་པར་བྱེད་པ་ན། དེ་རྣམས་དེ་ལྟར་བུད་མེད་ཀྱི་སྐྱོན་ནས་འདྲུ་ཞིང་སྨྲ་བའི་ཀུན་ཏུ་སྤྱོད་པས་སྡུག་བསྔལ་ཞིང། ཡིད་མི་བདེ་བ་མང་བར་གྱུར་ཏེ། ལུང་མནོད་པ་དང། བཀླག་པ་དང། ཁ་ཏོན་དང། རྣལ་འབྱོར་དང། ཡིད་ལ་བྱེད་པ་གཏོང་ཞིང། ཆོས་འདུལ་བ་འདི་ལ། ཆོས་དང་ལྡན་པའི་སྣུམ་བག་ཉུང་དུ་དག་བྱུང་བ་ཡང་བར་ཆད་དུ་གྱུར་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་སྔོན་བྱུང་བ་ལྗོངས་ཤིག་ན། ཁྱིམ་བདག་ཞིང་པ་ཞིག་ཡོད་པའི་དྲུང་དུ་ཁྱེའུ་ཞིག་འོངས་ཏེ་ཞེས་བྱ་བ་ནས། དེས་དེའི་སེམས་མགུ་བར་བྱས་སོ་ཞེས་བྱ་བའི་བར་རོ། །དེས་

---

^{[མ་དཔེ་གཟིགས་ན་འདིར་གནོན།]}

ཁྱེའུ་དེ་ལ་བུ་མོ་བྱིན་ནོ་ཞེས་བྱ་བ་ནས། ཞིང་པ་དེས་ཆུང་མའི་ཚིག་མཉན་ནས། ཡང་མ་བྱིན་ནོ་ཞེས་བྱ་བའི་བར་རོ། །དེས་དེའི་གླང་དེ་དག་བརྡེགས་པ་ལས། གླང་དེ་གཉིས་ཀྱིས་ཁྱེའུ་དེ་ལ་དྲིས་པ་དང། དེས་ཀྱང་སྨྲས་སོ། །དེ་ན་དེ་དག་ལས་གླང་གཉིས་ཤིག་གིས་རྒྱལ་པོའི་ཕོ་བྲང་དུ་སོང་ཞིག་དང། ཁོ་བོ་ཅག་གིས་དབང་བྱའོ་ཞེས་སྨྲས་སོ་ཞེས་བྱ་བ་ནས། དེས་ཡང་དང་ཡང་དུ་རྭ་ཆག །མཇུག་རྡུམ། ཞར་བ་ཞེས་ཀུན་ཏུ་སྨྲས་པ། གཅིག་ཅིག་ཡོད་པ་དེ་ལ་མ་བཏུབ་བོ་ཞེས་བྱ་བའི་བར་དང། རྒྱལ་པོ་འཁོར་དང་བཅས་པའི་ཞེས་བྱ་བ་ནས། མོན་སྲན་གྲེའུའི་ཞིང་ཕུན་སུམ་ཚོགས་པ་ལ་ཉི་མ་བདུན་དུ་མ་གཟན་པར་བཀྱེ་ཡང་ཅུང་ཟད་ཀྱང་མ་ཟོས་སོ་ཞེས་བྱ་བའི་བར་རོ། །དགེ་སློང་མ་དག །རེ་ཞིག་དུད་འགྲོའི་སྐྱེ་གནས་སུ་སོང་བའི་སྲོག་ཆགས་དེ་དག་ཀྱང་མིའི་སྐྱོན་ནས་སྨྲ་བས་ཀུན་ཏུ་སྤྱད་པ་ན། གནོད་པར་བྱ་བར་སེམས་པར་བྱེད་ན་མིར་གྱུར་པ་རྣམས་ལྟ་སྨོས་ཀྱང་ཅི་དགོས་ཞེས་བྱ་བ་ནས། སྔོན་གྱི་སྦྱོང་བ་འདི་རྒྱས་པར་བརྗོད་པར་བྱའོ། །ཡང་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག་སྔོན་བྱུང་བ་འདས་པ་ན། ཤིང་རྟས་སྤྱོད་པའི་མི་ཞིག་ལ། དགའ་བྱེད་མ་དང། ས་རི་མོ་ཞེས་བྱ་བའི་བ་བཞོན་གཉིས་ཤིག་ཡོད་པ་ལས་ཞེས་བྱ་བ་ནས། བེའུ་གཉིས་ཡོད་པའི་བར་རོ། །དེ་གཉིས་འཐབ་པ་ལས་གཅིག་གི་རྭ་ནི་ཆག་པར་གྱུར་ཏོ། །ཅིག་ཤོས་ཀྱི་ནི་དེང་བར་གྱུར་ནས། དེས་རུ་རྡུམ་དང། རུ་འདེལ་ཞེས་བྱ་བའི་བར་རོ། །ཤིང་རྟ་སྤྱོད་པས་འདྲེན་པ་ན་ཞེས་བྱ་བ་ནས། སྐུགས་ཡལ་ལོ་ཞེས་བྱ་བའི་བར་རོ། །དགའ་བྱེད་དང། ས་རི་ཞེས་སྨྲས་ནས་ཞེས་བྱ་བ་ནས། ཉིས་འགྱུར་ཐོབ་བོ་ཞེས་བྱ་བའི་བར་དང། ཚིགས་སུ་བཅད་པས་སྨྲས་པ། གང་ཚེ་ལམ་ནི་ཆེས་དམའ་ལ། །གང་ཚེ་ཁལ་ནི་ཆེས་ལྕི་བ། །དེ་ཚེ་ཁལ་དག་ཁྱེར་བྱེད་ཅིང། །དེ་ཚེ་སྣ་ལ་འདྲེན་པར་བྱེད། །ཡིད་དུ་འོང་བ་སྨྲས་པ་ན། །ཁུར་ལྕི་བ་ཡང་སྒྲོལ་བར་བྱེད། །ཅེས་བྱ་བའི་བར་དུའོ། །དུད་འགྲོའི་སྐྱེས་གནས་སུ་སོང་བའི་སྲོག་ཆགས་དག་ཀྱང་མིའི་སྐྱོན་ནས་སྨྲས་པ་ན། གནོད་པར་བྱ་བར་སེམས་པར་བྱེད་ན་མིར་

---

^{[མ་དཔེ་གཟིགས་ན་འདིར་གནོན།]}

གྱུར་པ་ལྟ་སྨོས་ཀྱང་ཅི་དགོས། དགེ་སློང་མ་དག་དེ་ལྟ་བས་ནས། བུད་མེད་ཀྱི་སྐྱོན་ནས་སྨྲ་ན་ལྟུང་བྱེད་དོ། །བུད་མེད་ཀྱི་སྐྱོན་ནས་སྨྲ་བའི་བསམ་པ་ཅན་གྱི་ངག་དང། །ཚིག་དང། ཐ་སྙད་དང། བརྗོད་པ་དང། སྐད་དང། ངེས་པའི་ཚིག་དང། ཚིག་གི་ལམ་དང། ཚིག་གི་སྒྲ་དང། རྗོད་བྱེད་དང། རྗོད་པའི་ལས་དང། ངག་གི་རྣམ་པར་རིག་བྱེད་གང་ཡིན་པ་དག་གོ།། །།དེ་ལ་ལྟུང་བར་ཇི་ལྟར་འགྱུར་ཞེ་ན། བར་སྡོམ་ནི། རིགས་དང་བཟོ་དང་ལས་དང་ནི། །རྟགས་ནས་ལྟུང་བ་སྡེ་ལྔ་དང། །ཉེ་བའི་ཉོན་མོངས་རྣམས་དང་ནི། །སྤྱོ་བར་བྱེད་པ་ཐ་མ་ཡིན། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས། འཕགས་མ་ཁྱོད་ནི་བྲམ་ཟེ་མོ་ལས་རབ་ཏུ་བྱུང་བ་ཡིན་ན། དགེ་སྦྱོང་གི་ཚུལ་གྱིས་ནི་ཅི་ཞིག་བྱ། ཚངས་པའི་ཚུལ་གྱིས་ནི་ཅི་ཞིག་བྱ། ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ཞེས་བྱ་བ་ནས། ལྟུང་བྱེད་དུ་འགྱུར་རོ་ཞེས་བྱ་བའི་བར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཁྱོད་ནི་རྒྱལ་རིགས་མོ་ལས་རབ་ཏུ་བྱུང་བ་ཡིན་ན། ཁྱོད་ལ་དགེ་སྦྱོང་གི་ཚུལ་ལམ། ཚངས་པའི་ཚུལ་གྱིས་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་རྗེའུ་རིགས་མོ་ལས་རབ་ཏུ་བྱུང་བ་ཡིན་ན། ཁྱོད་ལ་དགེ་སྦྱོང་གི་ཚུལ་ལམ། བྲམ་ཟེའི་ཚུལ་གྱིས་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་དམངས་རིགས་མོ་ལས་རབ་ཏུ་བྱུང་བ་ཡིན་ན། དགེ་སྦྱོང་གི་ཚུལ་ལམ། ཚངས་པའི་ཚུལ་གྱིས་ཅི་ཞིག་བྱ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་ཏེ། འདི་ནི་རིགས་ཞེས་བྱ་བ་ཡིན་ནོ།། །།དེ་ལ་བཟོ་ལས་བརྗོད་པ་ནི། བར་སྡོམ་ལ། བྲམ་ཟེའི་རིགས་དང་རྒྱལ་རིགས་དང། །རྗེའུ་རིགས་དམངས་རིགས་བཟོ་དག་དང། །ཐ་ག་པ་དང་སྐུད་རིས་མཁན། །བཟང་

---

^{[མ་དཔེ་གཟིགས་ན་འདིར་གནོན།]}

མཁན་མགར་བ་ལྕགས་མགར་དང། །ལྷམ་མཁན་རྫ་མཁན་འདྲེག་མཁན་དང། །ཤིང་མཁན་སྨིག་མཁན་བྲན་རིགས་སོ། །དགེ་སློང་མས་དགེ་སློང་མས་དགེ་སློང་མའི་དྲུང་དུ་སོང་ནས། འདི་སྐད་ཅེས་ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས། རང་གི་གཞུང་ལུགས་འདི་ལྟ་སྟེ། བྲམ་ཟེ་རྣམས་ཀྱི་སྤྱོད་ཚུལ་དང། སྤྱོད་པ་དང། གཙང་སྦྲ་དང། ཀུན་ཏུ་སྤྱོད་པ་དང། ཐལ་བ་བླངས་པ་དང། བྱ་མ་བུམ་བླང་བ་དང། ས་བླང་བ་དང། རབ་བསྔགས་བྱ་བ་དང། ཀྱེ་ཞེས་བྱ་བ་དང། རྒྱལ་བར་གྱུར་ཅིག་ཅེས་བྱ་བ་དང། ཀུན་ཏུ་བཟླས་བརྗོད་དང། བཟླས་བརྗོད་དང། དུས་ཀྱི་བསྙེན་པ་དང། ངེས་བརྗོད་ཀྱི་རིག་བྱེད་དང། མཆོད་སྦྱིན་གྱི་རིག་བྱེད་དང། སྙན་ཚིག་གི་རིག་བྱེད་དང། སྲིད་སྲུང་གི་རིག་བྱེད་དང། མཆོད་སྦྱིན་བྱེད་པ་དང། མཆོད་སྦྱིན་བྱེད་དུ་འཇུག་པ་དང། ཀློག་པ་དང། ཀློག་ཏུ་འཇུག་པ་དང། སྦྱིན་པ་དང། ལེན་པ་ཁོ་ན་བསླབ་དགོས་ཏེ་ལས་དྲུག་ལ་བརྩོན་པའི་བྲམ་ཟེ་མོ་ནི་ཚངས་པ་ཡིན་ནོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་རྒྱལ་རིགས་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ། བྲོ་དང། གླུ་དང། པི་ཝང་དང། པི་ཝང་རྒྱུད་གཅིག་པ་དང། བབ་བྷི་ས་གེ་ཞེས་བྱ་བ་དང། མ་ནི་ཀ་བྲེ་བ་ནེ་ཞེས་བྱ་བ་དང། དྲི་བཏགས་པ་དང། མགོའི་བྱི་དོར་དང། གོས་བལྟབ་པ་དང། གདོང་བྱི་དོར་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་སྟེ་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་རྗེའུ་རིགས་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་འདི་ལྟ་སྟེ། ཡི་གེ་དང། རྩིས་དང། གྲངས་དང། ལག་རྩིས་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་དམངས་རིགས་ལས་རབ་ཏུ་བྱུང་བ་ཡིན་པས་རང་གི་གཞུང་ལུགས་

---

^{[མ་དཔེ་གཟིགས་ན་འདིར་གནོན།]}

འདི་ལྟ་སྟེ། འདྲུ་བ་དང། འཐག་པ་དང། རྟུན་དང་རྟུན་ཤིང་དང་ཞེས་བྱ་བ་ནས། སེལ་བ་དང། རྨེལ་བ་དང། འཁལ་བའི་བར་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཁྱོད་ནི་ཐ་ག་མ་ལས་རབ་ཏུ་བྱུང་བ་ཡིན་པས། ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། དར་དང། རས་ཡུག་པོ་ཆེ་དང། གོས་དང། དར་ལ་དང། མོན་དར་དག་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་སྐུད་རིས་མཁན་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། ཀླམ་དང། པར་ཏང་དང། རྒྱབ་རྟེན་དང། གོར་ཆེན་ནང་ཚངས་ཅན་དང། ཞྭ་འདྲུབ་པ་དང། ལྒོ་ཏོ་དག་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དེ་བཞིན་དུ་བཟང་མཁན་ལས་རབ་ཏུ་བྱུང་བ་ལ་བུས་པའི་གོས་དང། ཞྭ་དང། ཡན་ལག་ལྔ་ཁེབས་པ་དང། འཐབ་བེར་དག་ཅེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་མགར་བ་ལས་རབ་ཏུ་བྱུང་བ་ལ་ལྷུང་བཟེད་དང། ལྷུང་བཟེད་ཆུང་ངུ་དང། མཚོན་ཆ་དང། ཁབ་དང། གསོར་བུ་དང་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ལྕགས་མགར་ལས་རབ་ཏུ་བྱུང་བ་ལ་ཞུགས་གླིང་དང། གྲི་གུ་དང། ཕོར་བུ་དང། ཁ་གཟར་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ལྷམ་མཁན་ལས་རབ་ཏུ་བྱུང་བ་ལ་ལྷམ་དང་ལྷམ་ཡུ་ཆད་དང། མཆིལ་ལྷམ་དང། སྲབ་དང། སྒ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་རྫ་མཁན་ལས་རབ་བྱུང་བ་ལ་རྫ་མ་དང། རིལ་བ་དང། བྱ་བོ་དང། ཁམ་ཕོར་དང། ལྷུང་བཟེད་དང། ལྷུང་བཟེད་ཆུང་ངུ་དག་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་འདྲེག་

---

^{[མ་དཔེ་གཟིགས་ན་འདིར་གནོན།]}

མཁན་ལས་རབ་ཏུ་བྱུང་བ་ལ་ཁ་སྤུ་བྲེག་པ་དང། བྱིན་སྤུ་བྲེག་པ་དང། སེན་མོ་བཅོས་པ་དང། སེན་མོ་བྲེག་པ་དང། སྐྲ་བྲག་པ་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཤིང་མཁན་ལས་རབ་ཏུ་བྱུང་བ་ལ་ཁྲི་དང། ཁྲིའུ་དང། མལ་ཁྲི་དང། འདུག་ཁྲི་དང། སྒོ་ཆ་དང། སྒོ་འཕར་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་སྨིག་མ་མཁན་ལས་རབ་ཏུ་བྱུང་བ་ལ། གདུགས་དང། བསིལ་ཡབ་དང། དིར་དང། སྐོན་བུ་དང། དུད་གཟེབ་དང། སྤ་ཁྲིའུ་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་དགེ་སློང་མའི་དྲུང་དུ་སོང་ནས་འདི་སྐད་ཅེས། ཁྱོད་ནི་བྲན་མོ་ལས་རབ་ཏུ་བྱུང་བ་ཡིན་པས་ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། སྐུ་མཉེ་དང། ཁྲུས་དང། དྲིལ་ཕྱི་དང། བང་ཆེན་དུ་འགྲོ་བ་དར། འོང་བ་དང། མངག་གཞུག་བསླབ་དགོས་སོ་ཞེས་སྨྲས་ན། དགེ་སློང་མ་སྤ་གསོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་ཏེ། འདི་ནི་བཟོ་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་ནས་འདི་སྐད་ཅེས། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས། ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། བླུགས་གཟར་དང། ཟངས་བུ་དང། སྦྱིན་སྲེག་དང། ཡམ་སྲེག་ཤིང་དང། རྩྭ་དང། མེ་དང། བའི་ལྕི་བ་དག་གི་ལས་བྱ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་ནས་འདི་སྐད་ཅེས། ཁྱོད་རྒྱལ་རིགས་ལས་རབ་ཏུ་བྱུང་བ་ཡིན་པས། ཁྱོད་ཀྱིས་རང་གི་གཞུང་ལུགས་འདི་ལྟ་སྟེ། པི་ཝང་དང། པི་ཝང་རྒྱུད་གཅིག་པ་དང། བབ་བྷི་ས་ཀེའི་ལས་བྱ་དགོས་སོ་ཞེས་སྨྲས་ན། དགེ་སློང་མ་སྤ་གོང་བ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ལྟུང་བྱེད་དོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ཡི་གེ་དང། རྩིས་དང། ལག་རྩིས་དང། ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། སེལ་བ་

---

^{[མ་དཔེ་གཟིགས་ན་འདིར་གནོན།]}

དང། རྨེལ་བ་དང། འཁལ་བ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཐ་ག་པ་ལས་རབ་ཏུ་བྱུང་བ་ལ་ཞེས་བྱ་བ་ནས། འདི་ལྟ་སྟེ། ཐག་ཟངས་དང་སོན་མ་དང། དྲུ་བུ་དང། སྣས་དང། སྣས་གྲི་དང། སྐུད་པ་དང། འབྲས་ཐུག་ཏུ་གཞུག་པ་དང། བརྒྱད་ཐག་གི་ལས་བྱ་དགོས་སོ་ཞེས་སྨྲས་ན་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་སྐུད་རིས་མཁན་ལས་རབ་ཏུ་བྱུང་བ་ལ་རྒྱང་ཤིང་དང། ཐག་ཟངས་དང། སྤུན་གྱི་སྨྱིག་མ་དང། སོ་མངས་དང། ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་བཟང་མཁན་ལས་རབ་ཏུ་བྱུང་བ་ལ། དྲ་གྲི་དང། ཁབ་དང། ལྕིབ་མོ་དང། མཐེབ་ལྕིབ་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་མགར་བ་ལས་རབ་ཏུ་བྱུང་བ་ལ། སྦུད་རུ་དང། སོ་མལ་དང། གྲི་དང། ཐེའུ་དང། ཐོ་ཆེན་དང། སྦུད་པ་དང། སྐམ་པ་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་རྫ་མཁན་ལས་རབ་ཏུ་བྱུང་བ་ལ། འཁོར་ལོ་དང། དབྱུག་གུ་དང། འཁོར་ལོའི་རྟེན་མ་དང། གཞག་པ་དང། དྲ་བའི་ཐེ་གུ་དང། ཆུ་སྣོད་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་འདྲེག་མཁན་ལས་རབ་ཏུ་བྱུང་བ་ལ། ཆན་པ་དང། སྤུ་གྲི་དང། སྨད་ཚེར་དང། སེན་མོ་བྲེག་པ་དང། གདར་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་ཤིང་མཁན་ལས་རབ་ཏུ་བྱུང་བ་ལ། སྟེའུ་དང། གཞི་དང། གཟོང་དང། སྟ་རེ་དང། སོག་ལེ་དང། སོག་ཆུང་དང། གསོར་བུ་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་སྨྱུག་མཁན་ལས་རབ་ཏུ་བྱུང་བ་ལ། སྨྱུག་མ་དང། སྐུད་པ་དང། གཤེགས་གྲི་དང། ཚོན་རྩི་དང། ལྷང་ཚེར་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་བྲན་མོའི་རིགས་ལས་རབ་ཏུ་བྱུང་བ་ལ། ཐག་པ་དང། བུམ་པ་དང། འབྲུ་མར་དང། བསྐུ་མཉེ་དང། ཁྲུས་དང་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་ཏེ། འདི་ནི་ལས་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ་འདི་སྐད་ཅེས་ཐེང་མོ་ཞེས་སྨྲས་ན་ལྟུང་བྱེད་དོ། །སྒུར་མོ་དང། མིའུ་ཐུང་མོ་དང། རྐང་ཞ་མོ་དང། ཝ་བ་ཅན་མོ་དང། ལྐུག་མ་དང། ཐེང་མོ་དང། འོན་མ་དང། རྟེན་འཕྱེ་མོ་དང། རྐང་བམ་མོ་ཞེས་སྨྲ་ན་ཐམས་ཅད་དུ་ལྟུང་བྱེད་དུ་འགྱུར་ཏོ། འདི་ནི་རྟགས་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་མཛེ་ཅན་མ་ཞེས་སྨྲས་ན་ལྟུང་བྱེད་དོ། །ཤུ་བ་དང། འབྲུམ་བུ་ཕྲ་མོ་དང། ངལ་སྐྱེན་པ་དང། གཡའ་བ་དང། ཁྱི་རྡོ་དང། གཡན་པ་དང། ཤུ་བ་གཡའ་བ་དང། རྐང་ཤུ་དང། སྐྱིགས་བུ་དང། སྐྱུགས་བྲོ་བ་དང། རིམས་དང། ཁོང་སྐེམ་དང། ལུ་བ་དང། དབུགས་མི་བདེ་བ་དང། ཁ་སྐམ་པ་དང། བརྗེད་བྱེད་དང། བཀྲེས་དབ་དང། སྐྱ་རྦབ་དང། སྐྲན་དང། ཁྲག་ནད་དང། མ་བྲིས་ནད་དང། མཚན་པར་རྡོལ་མ་ཞེས་དེ་ལ་སོགས་པ་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་ཏེ། འདི་ནི་ནད་ལས་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ནི་ཕས་ཕམ་པར་འགྱུར་བ་དང། དགེ་འདུན་ལྷག་མ་ཅན་ཡིན་ནོ་ཞེས་སྨྲས་ན་ལྟུང་བྱེད་དོ། །སོ་སོར་བཤགས་པ་དང། ཉེས་བྱས་ཅན་ཡིན་ནོ་ཞེས་སྨྲས་ན་ཐམས་ཅད་དུ་གཞི་ཇི་ལྟ་བ་བཞིན་དུ་འགྱུར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྲོ་བ་དང། ཁོན་དུ་འཛིན་པ་དང། འཆབ་པ་དང། འཚིག་པ་དང། ཕྲག་དོག་དང། སེར་སྣ་དང། གཡོ་དང། སྒྱུ་མཁན་མ་ཞེས་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་ཏེ། འདི་ནི་ཉེ་བའི་ཉོན་མོངས་པ་ཞེས་བྱ་བ་ཡིན་ནོ། །དགེ་སློང་མས་དགེ་སློང་མའི་དྲུང་དུ་སོང་ནས་སྤྱོ་བ་ན། རྒྱ་ཞེས་བྱ་བ་དང། མངལ་ཞེས་བྱ་བ་དང། བོང་བུ་དང་ལྡན་པ་དག་གིས་སྤྱོས་པ་ན། དགེ་སློང་མ་སྤ་གོང་པ་ཉིད་དུ་གྱུར་ཀྱང་རུང། མ་གྱུར་ཀྱང་རུང་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་མང་པོ་ཞིག་མིང་མཐུན་ན་ལྟུང་བ་མེད་དོ། །དེ་ལ་ཡང་དམིགས་ཀྱིས་བསལ་བ་མེད་པར་མི་བརྗོད་ཀྱི། རྒྱུའི་ཆེད་ཀྱིས་མིང་ནས་

---

^{[མ་དཔེ་གཟིགས་ན་འདིར་གནོན།]}

བརྗོད་པར་བྱའོ། །ལས་དང་པོ་པལ་སོགས་པ་ལ་ནི་ལྟུང་བ་མེད་དོ། །ལྟུང་བྱེད་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་ཕྲ་མས་ཀུན་ཏུ་སྤྱོད་པར་བྱེད་དེ། ཚུ་བི་ལས་ཐོས་ནས་ཕ་བི་དག་ལ་རྗོད་པར་བྱེད། ཕ་བི་ལས་ཐོས་ནས་ཚུ་བི་དག་ལ་བརྗོད་པར་བྱེད་པ་ན། དེ་དག་ཕྱེ་སྟེ་ཕྱོགས་གཉིས་སུ་གྱུར་པས་ཕན་ཚུན་སྡུག་བསྔལ་ཞིང་ཡིད་མི་བདེ་བ་སྐྱེས་ལ། ལུང་མནོད་པ་དང། བཀླག་པ་དང། ཁ་ཏོན་དང། རྣལ་འབྱོར་དང། ཡིད་ལ་བྱ་བ་དང། ནང་གི་སེམས་ཀྱིས་ཞི་གནས་ཀྱང་གཏོང་བར་བྱེད་ཅིང་གནས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མ་དག །ཁྱོད་གཅིག་ལ་གཅིག་ཕྲ་མས་ཀུན་ཏུ་སྤྱོད་པར་མ་བྱེད་ཅིག །དེ་ཅིའི་ཕྱིར་ཞེ་ན། དགེ་སློང་མ་དག་སྔོན་བྱུང་བ་ན་ནགས་ཚང་ཚིང་ཞིག་ན་སེང་གེ་མོ་སྦྲུམ་མ་ཞིག་ཡོད་དེ། དེ་རྣམས་ཀྱི་རང་བཞིན་ནི། བདག་གི་ཕྲུག་གུས་ནུ་མ་ཟ་བའམ། ལྟོགས་པར་གྱུར་ན་མི་རུང་ངོ་ཞེས་དེ་ཉིད་ཁ་ཟས་སུ་བྱ་བའི་ཕྱིར། ཤ་ཁོ་ནའི་ཚོགས་བྱས་ཏེ་འབྲང་བར་བྱེད་དོ་ཞེས་བྱ་བ་ནས། བ་ཞིག་བསད་དེ་འབྲངས་སོ། །བ་དེ་ལ་ཡང་བེའུ་ཞིག་ཡོད་པ་སེང་གེ་མོ་དེ་ཉིད་ཀྱི་ནུ་མ་ལ་འཐུང་ངོ་ཞེས་བྱ་བའི་བར་དུའོ། །ཇི་ཙམ་ན་གཉིས་ཀ་ཆེན་པོར་གྱུར་ནས། དེ་ཡང་འཆི་བའི་དུས་ཀྱི་ཚེ་ཞེས་བྱ་བ་ནས། མཛའ་བ་འབྱེད་པ་ནི་མང་དུ་ཡོད་དོ་ཞེས་ཡང་དག་པར་གཏམས་ནས་ཞེས་བྱ་བའི་བར་རོ། །ཝ་ཞིག་གིས་གཉིས་ཀ་ཕྱེ་ནས་ཞེས་བྱ་བ་ནས། དེ་གཉིས་ཀྱང་གཅིག་གིས་གཅིག་སྲོག་དང་ཕྲལ་ལོ་ཞེས་བྱ་བའི་བར་རོ། །ཇི་ཙམ་ན་ལྷས་ཚིགས་སུ་བཅད་དེ་སྨྲས་པ། སྐྱེ་བོ་སྡིག་ཅན་འགྲོགས་པ་ལས། །མི་ཡིས་བཟང་པོ་མཐོང་མི་འགྱུར། །སེང་གེ་ཁྱུ་མཆོག་མཛའ་བ་ལས། །ཝ་ཡིས་ཐ་དད་ཕྱེ་ལ་ལྟོས། །དགེ་སློང་མ་དག་རེ་ཞིག་དུད་འགྲོའི་སྐྱེ་

---

^{[མ་དཔེ་གཟིགས་ན་འདིར་གནོན།]}

གནས་སུ་སོང་བའི་སྲོག་ཆགས་དེ་དག་ཀྱང་ཕྲ་མས་ཀུན་ཏུ་སྤྱད་པ་ན། ཇི་ཙམ་ན་གཅིག་ལ་གཅིག་བསོད་པར་བྱེད་ན། བུད་མེད་ལྷག་པར་ཁྲོ་བ་ལྟ་སྨོས་ཀྱང་ཅི་དགོས་ཞེས་སྔོན་གྱི་སྦྱོར་བ་འདི་རྒྱས་པར་བརྗོད་པར་བྱའོ། །གཞན་ཡང་སྔོན་གྱི་སྦྱོར་བ་ནི། དགེ་སློང་མ་དག་སྔོན་བྱུང་བ་སེང་གེ་ཕྲུ་གུ་བཙས་ནས་རིང་པོ་མ་ལོན་པ་ཞིག །མ་སྤྱོད་ཡུལ་དུ་སོང་བ་དང། ལྟོགས་ཤིང་འཕྱིན་པ་ན་དེ་དང་ཧ་ཅང་ཡང་མི་རིང་བ་ཞིག་ན། སྟག་མོ་ཞིག་འབྲངས་སོ། །དེ་འཕྱན་པ་ན་སྟག་མོ་ཞིག་དང་ཕྲད་ནས་ནུ་མ་བསྣུན་པར་བརྩམས་སོ་ཞེས་བྱ་བ་ནས། གནས་གཅིག་ཏུ་འཁོད་དོ་ཞེས་བྱ་བའི་བར་རོ། །དེ་ལ་ཡང་སེང་གེའི་མིང་ནི་མཆེ་བཟང་ཞེས་བྱའོ། །སྟག་གི་མིང་ནི་དཔུང་བཟང་ཞེས་བྱའོ། །ཞེས་བྱ་བ་ནས་དེ་གཉིས་ལ་ཡང་ཝ་ཞིག་གིས་དབྱེན་བྱ་བར་བརྩམས་སོ་ཞེས་བྱ་བའི་བར་རོ། །ཇི་ཙམ་ན་སེང་གེས་ཚིགས་སུ་བཅད་དེ་སྨྲས་པ། ཆུ་ཞེང་ཕུན་སུམ་ཚོགས་པ་དང། །རྩལ་དང་ཤུགས་དང་ལྡན་པ་ཡི། །མཆེ་བཟང་ལ་ནི་རྒོལ་བྱེད་པ། །དཔུང་བཟང་དེ་ནི་ལེགས་པ་མིན། །དཔུང་བཟང་གིས་སྨྲས་པ། ཆུ་ཞེང་ཕུན་སུམ་ཚོགས་པ་དང། །རྩལ་དང་ཤུགས་སུ་ལྡན་པ་ཡི། །དཔུང་བཟང་ལ་ནི་རྒོལ་བྱེད་པ། །མཆེ་བཟང་དེ་ནི་ལེགས་པ་མིན། །དེ་གཉིས་ཀྱིས་གཅིག་ལ་གཅིག་དྲིས་ནས་ཞེས་བྱ་བ་ནས། ཝ་བསད་དོ་ཞེས་བྱ་བའི་བར་རོ། །ཇི་ཙམ་ན་ལྷས་ཚིགས་སུ་བཅད་དེ་སྨྲས་པ། གཞན་གྱི་ཚིག་གིས་གྲོགས་པོ་མི་སྤང་སྟེ། །གཞན་གྱིས་སྨྲས་པ་དག་ནི་བརྟག་པར་བྱ། །དབྱེ་བར་འདོད་པ་རྣམས་ནི་གླགས་ཚོལ་བྱེད། །དེ་བས་སྐྱེ་བོ་ཕྲ་མ་ཡིད་མ་རྟོན། །གྲོགས་པོ་འབྱེད་པའི་ཕྲ་མ་ཅན། །བརྫུན་དུ་སྨྲ་བའི་ཝ་སྐྱེས་པོ། །གྲོང་རྒྱུན་སྐྱེས་ཏེ་རོ་འདི་ནི། །བསད་ནས་བདེ་བས་དགའ་བར་བྱེད། །དགེ་སློང་མ་དག །རེ་ཞིག་དུད་འགྲོའི་སྐྱེ་གནས་སུ་སོང་སོང་བའི་སྲོག་ཆགས་དེ་དག་ཀྱང། །གཅིག་ལ་གཅིག་ཕྲ་མས་ཀུན་ཏུ་སྤྱོད་པ་ན། སྡུག་བསྔལ་དང། ཡིད་མི་བདེ་བ་མང་པོས་གནས་པར་བྱེད་ན། བུད་མེད་ལྷགས་པར་ཁྲོ་བ་ལྟ་སྨོས་ཀྱང་ཅི་དགོས།

---

^{[མ་དཔེ་གཟིགས་ན་འདིར་གནོན།]}

དགེ་སློང་མ་དག །དེ་ལྟ་བས་ན་ཕྲ་མས་ཀུན་ཏུ་སྤྱད་པར་མི་བྱའོ། །ཀུན་ཏུ་སྤྱོད་ན་ལྟུང་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་ཕྲ་མ་སྨྲས་ན་ལྟུང་བྱེད་དོ། །ཕྲ་མའི་བསམ་པ་ཅན་གྱི་གང་ཞེས་བྱ་བ་ནས། ངག་དང་ཚིག་དང་ཞེས་བྱ་བའི་བར་སྔ་མ་བཞིན་ནོ། །ལྟུང་བྱེད་དོ་ཞེས་བྱ་བ་ནི་ལྟུང་བ་བར་བྱེད་ཅེས་བྱ་བའི་བར་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་བྲམ་ཟེ་ལས་རབ་ཏུ་བྱུང་བའི་དྲུང་དུ་སོང་སྟེ། འདི་སྐད་ཅེས་འཕགས་མ་ཁྱོད་ལ་དགེ་སློང་མ་ཆེ་གེ་མོ་ཞིག་འདི་སྐད་ཅེས་ཁྱོད་ལ་དགེ་སྦྱོང་གི་ཚུལ་དང། ཚངས་པའི་ཆུལ་གྱི་ཅི་ཞིག་བྱ། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་ནོ་ཞེས་ཟེར་རོ། །ཞེས་སྨྲ་ཞིང་རིགས་སྒྲོགས་པར་བྱེད་ན་ཉེས་བྱས་སོ། །རུས་སྒྲོགས་པར་བྱེད་ན་ཡང་ཉེས་བྱས་སོ། །དེ་བཞིན་དུ་རྒྱལ་རིགས་ལས་རབ་ཏུ་བྱུང་བ་ཞེས་བྱ་བ་ནས། ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་ཏེ། འདི་ནི་རིགས་ཞེས་བྱ་བ་ཡིན་ནོ། །དགེ་སློང་མས་བྲམ་ཟེ་ལས་རབ་ཏུ་བྱུང་བའི་དྲུང་དུ་སོང་སྟེ། འདི་སྐད་ཅེས། འཕགས་མ་ཁྱོད་ལ་དགེ་སློང་མ་ཆེ་གེ་མོ་ཞིག་འདི་སྐད་ཅེས་ཁྱོད་ལ་དགེ་སྦྱོང་གི་ཚུལ་དང། ཚངས་པའི་ཚུལ་གྱིས་ཅི་ཞིག་བྱ། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས་ཁྱོད་ནི་རང་གི་གཞུང་ལུགས་ལ་བསླབ་དགོས་སོ་ཞེས་ཟེར་རོ། །ཞེས་སྨྲ་ཞིང་བཟོ་སྒྲོགས་པར་བྱེད་ན་ཉེས་བྱས་སོ། །དེ་བཞིན་དུ་རྒྱལ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ལ་ཞེས་བྱ་བ་ན་ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ལྟུང་བྱེད་དོ་ཞེས་བྱ་བའི་བར་ཏེ། དེ་ལྟར་བར་སྡོམ་དེ་ཇི་ལྟར་

---

^{[མ་དཔེ་གཟིགས་ན་འདིར་གནོན།]}

གོང་དུ་བཤད་པ་བཞིན་དུ་རྒྱས་པར་བརྗོད་པར་བྱའོ། །དེ་ལ། སྐུད་རིས་མཁན་དང་བཟང་མཁན་དང། །ལྕགས་མགར་དང་ནི་ལྷམ་མཁན་དང། །རྫ་མཁན་འདྲེག་མཁན་ཤིང་མཁན་དང། །སྨིག་མ་མཁན་དང་བྲན་མོའོ། །འདི་ནི་བཟོ་ཞེས་བྱ་བ་ཡིན་ནོ། །དགེ་སློང་མས་བྲམ་ཟེ་ལས་རབ་ཏུ་བྱུང་བའི་དགེ་སློང་མའི་དྲུང་དུ་སོང་སྟེ་འདི་སྐད་ཅེས། འཕགས་མ་ཁྱོད་ལ་དགེ་སློང་མ་ཆེ་གེ་མོ་ཞིག་འདི་སྐད་ཅེས་ཁྱོད་ལ་དགེ་སྦྱོང་གི་ཚུལ་དང། ཚངས་པའི་ཚུལ་གྱིས་ཅི་ཞིག་བྱ། ཁྱོད་ནི་བྲམ་ཟེ་ལས་རབ་ཏུ་བྱུང་བ་ཡིན་པས། ཁྱོད་ཀྱིས་རང་གི་གཞུང་ལུགས་ཀྱི་ལས་བྱ་དགོས་སོ་ཞེས་ཟེར་རོ། །ཞེས་སྨྲ་ཞིང་ལས་སྒྲོགས་པར་བྱེད་ན་ཉེས་བྱས་སོ། །དེ་བཞིན་དུ་རྒྱལ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས་ཉེས་བྱས་སོ་ཞེས་བྱ་བའི་བར་རོ། །དེ་བཞིན་དུ་རྗེའུ་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་དམངས་རིགས་ལས་རབ་ཏུ་བྱུང་བ་ལ་ཞེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་ཏེ། ཇི་ལྟར་གོང་དུ་བཤད་པ་བཞིན་བར་སྡོམ་དེ་རྒྱས་པར་བརྗོད་པར་བྱའོ། །རིགས་དང་བཟོ་དང་ལས་དང་ནི། །རྟགས་དང་ནད་ནི་ལྔ་པ་ཡིན། །ལྟུང་བ་དང་ནི་ཉེ་ཉོན་མོངས། །སྤྱོ་བར་བྱེད་པ་ཐ་མ་ཡིན། །ལྟུང་བྱེད་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱི་རྩོད་པ་ཉེ་བར་ཞི་བར་བྱས་པ་རྣམས་རྩོད་པ་འདི་ནི་ཤད་ཀྱིས་མ་བྱང་སྟེ། ཡང་ཤད་ཀྱིས་སྦྱངས་པར་བྱའོ། །རྩོད་པ་འདི་ནི་ངེས་པར་མ་བརྟགས་ཏེ། ཡང་ངེས་པར་བརྟག་པར་བྱའོ། །རྩོད་པ་འདི་ནི་ལེགས་པར་གཏན་ལ་མ་ཕབ་སྟེ། ཡང་ལེགས་པར་གཏན་ལ་དབབ་པར་བྱའོ། །རྩོད་པ་འདི་ནི་ཉེ་བར་ཞི་བར་བྱ་མ་བྱས་ཏེ། ཡང་ཉེ་བར་ཞི་བར་བྱའོ། །ཞེས་ཡང་དང་ཡང་དུ་སྐྱོ་སྔོགས་བྱེད་དོ། །དེ་ནས་དགེ་སློང་མ་དེ་རྣམས་འཐབ་མོ་དང། མཚང་འདྲུ་བ་དང། རྩོད་པ་བྱུང་ཞིང། མཚང་འདྲུ་བར་གྱུར་པས་གནས་ཤིང། ལུང་མནོད་པ་དང། ཀློག་པ་དང། ཁ་ཏོན་དང། རྣལ་འབྱོར་དང། ཡིད་ལ་བྱེད་པ་དང། ནང་གི་

---

^{[མ་དཔེ་གཟིགས་ན་འདིར་གནོན།]}

སེམས་ཀྱི་ཞི་གནས་གཏོང་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་མཐུན་པས་ཆོས་བཞིན་དུ་རྩོད་པ་སྦྱངས་པར་ཤེས་བཞིན་དུ། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ་།ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་སོ། །ཆོས་བཞིན་དུ་ཞེས་བྱ་བ་ནི་འདུལ་བ་ཇི་ལྟ་བ་བཞིན་དང། སྟོན་པའི་བསྟན་པ་ཇི་ལྟ་བཞིན་དུའོ། །རྩོད་པ་ཞེས་བྱ་བ་ནི། རྩོད་པ་བཞི་པོ་འཐབ་པའི་ཕྱིར་རྩོད་པ་དང། མི་གདམས་པའི་ཕྱིར་རྩོད་པ་དང། ལྟུང་བའི་ཕྱིར་རྩོད་པ་དང། བྱ་བའི་ཕྱིར་རྩོད་པའོ། །ཆོས་བཞིན་དུ་སྦྱངས་པ་ལས་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ཡང་ལས་ཀྱི་སྐྱོ་སྔོགས་བྱེད་ན་ཞེས་བྱ་བ་ནི་ཡང་བྱེད་འདོད་པའི་ཕྱིར་རོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་འཐབ་པའི་ཕྱིར་རྩོད་པ་ལ་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །དགེ་སློང་མས་ཤད་ཀྱིས་བྱང་བ་ལ་ཡིད་གཉིས་ཟན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་

---

^{[མ་དཔེ་གཟིགས་ན་འདིར་གནོན།]}

བར་འདུ་ཤེས་ཤིང། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་འཐབ་པའི་ཕྱིར་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བར་འདུ་ཤེས་ཤིང། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟན་ལྟུང་བྱེད་དོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་འཐབ་པའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས་ཤད་ཀྱིས་བྱང་བར་འདུ་ཤེས་ཤིང། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་འཐབ་པའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་མི་གདམས་པའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ཤིང། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ཤད་ཀྱིས་བྱང་བ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་མི་གདམས་པའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །མི་གདམས་པའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །ཤད་ཀྱིས་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཤད་ཀྱིས་མ་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་ལྟུང་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་

---

^{[མ་དཔེ་གཟིགས་ན་འདིར་གནོན།]}

ཤེས་ན། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་བྱང་བ་ལ་ཤད་ཀྱིས་མ་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་ལྟུང་བའི་ཕྱིར་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ལྟུང་བའི་ཕྱིར་རྩོད་པ་ལ་བྱ་བའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་བྱ་བའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་བྱ་བའི་ཕྱིར་རྩོད་པ་ལ་མི་གདམས་པའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མས་བྱ་བའི་ཕྱིར་རྩོད་པ་ལ་ལྟུང་བའི་ཕྱིར་རྩོད་པར་འདུ་ཤེས་ནས། ཤད་ཀྱིས་བྱང་བ་ལ་ཤད་ཀྱིས་བྱང་བར་འདུ་ཤེས་ན་ལྟུང་བྱེད་དོ། །ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཤད་ཀྱིས་མ་བྱང་བ་ལ་ཤད་ཀྱིས་བྱང་བར་འདུ་ཤེས་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མ་ནི་ལྟ་སྟེ། ལྔ་གང་ཞེ་ན། དགེ་སློང་མ་གཉུག་མར་གནས་པ་དང། ལས་བྱེད་པ་དང། འདུན་པ་འབུལ་བ་དང། ལྟ་བ་སྨྲ་བ་དང། ལྔ་པ་ནི་གློ་བུར་དུ་འོངས་པའོ། །དགེ་སློང་མ་གཉུག་མར་གནས་པ་གང་ཞེ་ན། གང་གིས་རྩོད་པ་དེའི་ཐོག་མ་དང། བར་དང། ཐ་མ་དག་ཤེས་པའོ། །ལས་བྱེད་པ་གང་ཞེ་ན། གང་གིས་དེར་ལས་བྱས་པར་གྱུར་བའོ། །འདུན་པ་འབུལ་བ་གང་ཞེ་ན། གང་གིས་དེར་རང་གིས་འདུན་པ་འབུལ་བར་གྱུར་བའོ། །ལྟ་བ་སྨྲ་བ་གང་ཞེ་ན། གང་གིས་དེར་འདི་ནི་བདག་བཟོད་དོ། །འདི་ནི་མི་བཟོད་དོ། །འདི་ནི་བདག་འདོད་

---

^{[མ་དཔེ་གཟིགས་ན་འདིར་གནོན།]}

དོ། །འདི་ནི་བདག་མི་འདོད་དོ་ཞེས་རང་གི་ལྟ་བ་བརྗོད་པར་གྱུར་པའོ། །གློ་བུར་དུ་འོངས་པ་གང་ཞེ་ན། དེར་གང་གིས་ཐོག་མ་དང། བར་དང། ཐ་མ་དག་མི་ཤེས་པའོ། །དང་པོའི་གསུམ་པོ་གང་ཡིན་པ་གཉུག་མར་གནས་པ་དང། ལས་བྱེད་པ་དང། འདུན་པ་འབུལ་བ་སྟེ། འདི་དག་གིས་ཆོས་བཞིན་དུ་རྩོད་པ་སྦྱངས་པ་ལས། ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དུ་འགྱུར་རོ། །ཐ་མ་གཉིས་ཀྱི་སྐྱོ་སྔོགས་བྱེད་ན་ཉེས་བྱས་སོ། །གལ་ཏེ་ཤད་ཀྱིས་ཉེས་པར་སྦྱངས་པ་ཡིན་ན་ལྟུང་བ་མེད་དོ། ལྟུང་བྱེད་བཞི་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་དྲུག་པ། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ཁྱིམ་བདག་གི་ཁྱིམ་དེ་དང། དེ་རྣམས་སུ་བསོད་སྙོམས་ཀྱི་ཕྱིར་ཞུགས་ཏེ། བྲམ་ཟེ་དང། ཁྱིམ་བདག་དེ་དག་ལ་གཅིག་པུ་འདུག་ཅིང་ཆོས་སྟོན་པ་ན། དེས་བུད་མེད་རྣམས་ཀྱི་བུད་མེད་ཀྱི་གསང་བ་དང། བུད་མེད་ཀྱི་གསང་ཆེན་གང་ཡིན་པ་ཐམས་ཅད་སྐྱེས་པ་དེ་དག་ལ་བསྟན་ཏོ། །སྐྱེས་པ་དེ་དག་གིས་ཀྱང་ཆུང་མ་དེ་དག་ལ་སྨྲས་སོ། །བུད་མེད་ནི་ཕྲག་དོག་ཅན་ཡིན་པས། དེ་ནས་དགེ་སློང་མ་གནས་བརྟན་གནས་བརྟན་དག་བསོད་སྙོམས་ལ་རྒྱུ་བ་ན། འཇིག་རྟེན་ལ་ཅོ་འདྲི་བ་བྱེད་པ་ཁྱོད་ཅག་ལ་སུ་ཞིག་བསོད་སྙོམས་སྦྱིན་པ་བྱེད་པར་སེམས་པར་འགྱུར་ཞེས་ཁ་ཟེར་བ་དང། ཨེ་མའོ་ཕུ་ནུ་མོ་དག །འདི་ཅི་ཉེས་ན་གཤེ་བར་གྱུར། དེ་དག་གིས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོས་བདག་ཅག་ཁྱིམ་ཐབ་དག་གི་མདུན་དུ་ཅོ་དྲིས་སོ། །དེ་རྣམས་ཀྱིས་བསོད་སྙོམས་མ་རྙེད་དེ། དེ་རྣམས་ཀྱིས་བསོད་སྙོམས་མ་རྙེད་པ་ན་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་དེ་ཐམས་ཅད་ནི་ཆོས་བསྟན་པ་ལས་གྱུར་གྱི། དེ་ལྟ་བས་ན་ཆོས་བསྟན་པར་མི་བྱའོ། །དེ་དག་ཡང་བསོད་སྙོམས་ཀྱི་ཕྱིར་ཞུགས་པ་ན། བྲམ་ཟེ་དང། ཁྱིམ་

---

^{[མ་དཔེ་གཟིགས་ན་འདིར་གནོན།]}

བདག་རྣམས་ཀྱིས་སྨྲས་པ། འཕགས་མ་དག་ཆོས་ཤོད་ཅིག །དེ་རྣམས་ཀྱིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀག་གོ་།བྲམ་ཟེ་དང། ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །བདག་ཅག་གི་སྡུམ་པའི་བསོད་སྙོམས་ཀྱང་དགག་ལགས་མོད། དེ་རྣམས་ཡང་བསོད་སྙོམས་ཀྱིས་ཕོངས་པར་གྱུར་པ་ནས། བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཚིག་ལྔའི་ཆོས་བསྟན་པར་བྱའོ། །བཅོམ་ལྡན་འདས་ཀྱི་ཚིག་ལྔའི་ཆོས་བསྟན་པར་བཀའ་སྩལ་པ་ན། དེ་རྣམས་ཀྱིས་མ་ཤེས་ན། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གཟུགས་ནི་མི་རྟག་གོ་།ཚོར་བ་དང། འདུ་ཤེས་དང། འདུ་བྱེད་རྣམས་དང། རྣམ་པར་ཤེས་པ་ནི་མི་རྟག་གོ་ཞེས་བྱ་བའོ། །གང་གི་ཚེ་དེ་རྣམས་ཀྱིས་ཚིག་ལྔའི་ཆོས་བསྟན་པར་བརྩམས་པ་དང། དེ་ནས་བྲམ་ཟེ་དང། ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་དག །ཅིའི་སླད་དུ་ཁྱེད་ཀྱིས་ཆོས་མང་དུ་མི་བཤད། ཁྱིམ་བདག་བཅོམ་ལྡན་འདས་ཀྱིས། དེ་ཙམ་ཞིག་བཅའ་བ་མཛད་དོ། །འཕགས་མ་དག །ཅི་ཁྱེད་སྤྲིག་ཀའི་རིན་གྱི་ཆོས་ཤིག་བསྟན་པར་རྩོམ་མམ། དེ་ནས་བྲམ་ཟེ་དང། ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །ཇི་ལྟར་བདག་ཅག་ལ་ཆོས་ཉུང་ངུ་བསྟན་པ་དེ་ལྟར་བདག་གིས་བསོད་སྙོམས་ཀྱང། ཉུང་ངུ་འབུལ་ལོ། །དེ་ལྟ་བསོད་སྙོམས་ཀྱིས་ཕོངས་པར་གྱུར་པའི་སྐབས་དེ། བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། ཚིག་དྲུག་གི་ཆོས་བསྟན་པར་བྱའོ་ཞེས། བཅོམ་ལྡན་འདས་ཀྱིས་བཀའ་སྩལ་པ་ན། དེ་རྣམས་ཀྱིས་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག །མིག་ནི་མི་རྟག་གོ་།ཁྱིམ་བདག །རྣ་བ་དང། སྣ་དང། ལྕེ་དང། ལུས་དང། ཡིད་ནི་མི་རྟག་གོ་ཞེས་བྱ་བའོ། །གང་གི་ཚེ་དགེ་སློང་མ་དེ་རྣམས་ཀྱིས་ཚིག་དྲུག་གི་ཆོས་བསྟན་པར་བརྩམས་པ་དང།

---

^{[མ་དཔེ་གཟིགས་ན་འདིར་གནོན།]}

དེ་ནས་བཅུ་གཉིས་སྡེ་དེ་རྣམས་ཀྱིས་འདི་སྐད་ཅེས་སྨྲས་སོ། །ཚིག་ལྔ་གང་ཡིན་པ་དེ་དྲུག་པར་བྱས་འདོད་ཅིག །ཚིག་དྲུག་པས་ཆང་ནི་མ་འཐུངས། སྒོག་སྐྱ་ནི་མ་ཟོས་ན། ཉེས་པ་ཅི་ཡོད། དེ་བཞིན་དུ་ཆེད་དུ་བསམས་ཏེ་ཚིག་དྲུག་བྱས་པ་ལ། ཚིག་བདུན་པར་འདས་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། མི་བསྟན་ཏོ། །ཞེས་བྱ་བ་ནས། བསོད་སྙོམས་ཀྱིས་ཕོངས་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྐྱེས་པ་ལ་བུད་མེད་དང་བཤད་པར་བྱའོ་ཞེས་བྱ་བའི་བར་རོ། །བཅུ་གཉིས་སྡེ་དེ་རྣམས་བསོད་སྙོམས་ལ་རྒྱུ་བ་ན། ཁྱིམ་བདག་གིས་ཁྱིམ་དེ་དག་ཏུ། ཁྱིམ་བདག་རྣམས་ལ་འདི་སྐད་ཅེས་སྨྲས་སོ། །ཁྱིམ་བདག་ཆོས་ཉོན་ཅིག །འཕགས་མ་རེ་ཞིག་བུད་མེད་དག་གྲོགས་སུ་དགུག་གི་གཞེས་ཤིག །བཅུ་གཉིས་སྡེ་དེ་དག་གིས་འདི་སྐད་ཅེས་སྨྲས་སོ། །བྱ་གག་མོའམ། སྤྲ་མོའམ། ལུག་མ་མོའམ། བྱི་ལ་མོ་འདི་དག་མོ་མ་ཡིན་ནམ་ཞེས། དེ་རྣམས་ཀྱིས་རུང་བར་བྱེད་པ་འདིས་སྐྱེས་པ་རྣམས་ལ་ཆོས་སྟོན་པར་བྱེད་དོ། །དེ་ནས་སྐྱེ་དགུའི་བདག་མོ་ཆེན་མོ་གོའུ་ཏ་མི་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ནས་སྤྱོད་ཡུལ་དུ་ཞུགས་ཏེ། དེ་ཁྱིམ་བདག་གི་ཁྱིམ་དེ་དག་ཏུ་བསོད་སྙོམས་ཀྱི་ཕྱིར་ཞུགས་པ་དང། དེ་ནས་ཁྱིམ་བདག་དེ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་ཆོས་བཤད་དུ་གསོལ། སོང་ལ་བུད་མེད་དག་གྲོགས་སུ་ཁྲིད་དེ་ཤོག་ཅིག །ཁྱིམ་བདག་དེས་ཡང་འདི་སྐད་ཅེས་སྨྲས་སོ། །བྱ་གག་མོ་འདི་མོ་མ་ལགས་སམ། དེ་ནས་སྐྱེ་དགུའི་བདག་མོ་གོའུ་ཏ་མིས། ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱེད་ལ་དེ་ལྟ་བུའི་ཆོས་སྟོན་པ་དེ་སུ་ཡིན། དེ་དག་གིས་འདི་སྐད་ཅེས་སྨྲས་སོ། །བཅུ་གཉིས་སྡེ་དག་གོ། །དེ་འདི་སྐད་ཅེས་དེས་ན་ཁོ་མོ་ཅག་ལ་ཡང་གནས་སྐབས་འདི་བྱུང་ངོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པ་ནས་ཞེས་བྱ་བ་ནས། བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ་། ཡང་དགེ་སློང་མ་གང་བུད་མེད་མེད་པར་

---

^{[མ་དཔེ་གཟིགས་ན་འདིར་གནོན།]}

སྐྱེས་པའི་མདུན་དུ་ཚིག་ལྔའམ། དྲུག་གི་ཆོས་སྟོན་ན། རིག་པའི་བུད་མེད་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ་།ཚིག་ལྔ་ཞེས་བྱ་བ་ནི་གཟུགས་ལ་སོགས་པའོ། །ཚིག་དྲུག་གི་ཞེས་བྱ་བ་ནི་མིག་ལ་སོགས་པའོ། །རིག་པའི་བུད་མེད་མ་གཏོགས་ཏེ། ཞེས་བྱ་བ་ནི་རིག་པའི་བུད་མེད་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་ཆེད་དུ་བསམས་ཏེ། སྐྱེས་པ་ལ་ཚིག་ལྔའི་ཆོས་སྟོན་པ་ན་ཚིག་དྲུག་པར་ཐལ་བར་བྱེད་ན་ལྟུང་བྱེད་དོ། །དེ་བཞིན་དུ་སྟེང་གི་སར་བཤད་ནས་ཞེས་བྱ་བ་ནས། ཁྱིམ་དུ་ཞེས་བྱ་བའི་བར་ཏེ། ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་ཆེད་དུ་བསམས་ཏེ། ཚིག་དྲུག་གི་ཆོས་སྟོན་པ་ན། ཚིག་བདུན་པར་ཐལ་བར་བྱེད་ན་ལྟུང་བྱེད་དོ། །གལ་ཏེ་དྲི་བ་དྲི་ན་ལྟུང་བ་མེད་དོ། །ལས་དང་པོ་པ་ལ་སོགས་པ་ལ་ལྟུང་བ་མེད་དོ། །ལྟུང་བྱེད་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་བསྙེན་པར་མ་རྫོགས་པའི་བུད་མེད་དང། སྐྱེས་པ་དང། ཁྱེའུ་དང། བུ་མོ་ལ་སོགས་པ་ལ་ཁ་བསྟམས་ཏེ། ཆོས་འདོན་དུ་འཇུག་གོ་།དེ་ནས་དབྱར་ཁང་དེ་ན། དཔེར་ན། རྩིས་ས་ན་རྩིས་ཀྱི་སློབ་དཔོན་རྣམས་ཀྱི་བཞིན་དུ་སྒྲ་མཐོན་པོ་དང། སྒྲ་ཆེན་པོ་བྱུང་བ་ན། དོན་ཉུང་བའི་དགེ་སློང་མ་དག་སྨོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གང་ཟག་བསྙེན་པར་མ་རྫོགས་པ་རྣམས་ལ་ཁ་བསྟམས་ཏེ། ཆོས་འདོན་དུ་འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།གང་ཟག་བསྙེན་པར་མ་རྫོགས་པ་ཞེས་བྱ་བ་ལ། བསྙེན་པར་རྫོགས་པ་ནི་གཉིས་ཏེ་དགེ་སློང་དང། དགེ་སློང་མའོ། །ལྷག་མ་རྣམས་ནི། བསྙེན་པར་མ་རྫོགས་པའོ། །ཁ་བསྟམས་ཏེ། ཞེས་བྱ་བ་ནི་ཚིག་མཉམ་པ་དང། ཚིག་ལྷག་པ་དང། ཡི་གེ་མཉམ་པ་དང།

---

^{[མ་དཔེ་གཟིགས་ན་འདིར་གནོན།]}

ཡི་གེ་ལྷག་པར་རོ། །དེ་ལ་ཚིག་མཉམ་པ་ཞེས་བྱ་བ་ནི་ཇི་སྲིད་དུ། སྡིག་པ་ཐམས་ཅད་མི་བྱ་སྟེ། །ཞེས་སྨྲ་བ་དེ་སྲིད་དུ་དེ་ཡང། སྡིག་པ་ཐམས་ཅད་མི་བྱ་སྟེ། །ཞེས་སྨྲ་བ་སྟེ། འདི་ནི་ཚིག་མཉམ་པ་ཞེས་བྱའོ། །ཚིག་ལྷག་པ་ཞེས་བྱ་བ་ནི་ཇི་སྲིད་དུ། སྡིག་པ་ཐམས་ཅད་མི་བྱ་སྟེ། །ཞེས་མ་སྨྲས་པ་དེ་སྲིད་དུ་དེ། དགེ་བ་ཕུན་སུམ་ཚོགས་པར་བྱ། །ཞེས་སྨྲས་པ་སྟེ། འདི་ནི་ཚིག་ལྷག་པ་ཞེས་བྱའོ། །ཡི་གེ་མཉམ་པ་ཞེས་བྱ་བ་ནི། ཇི་སྲིད་དུ་ཨ་ཞེས་སྨྲས་པ་དེ་སྲིད་དུ། དེ་ཡང་ཨ་ཞེས་སྨྲ་བ་སྟེ། འདི་ནི་ཡི་གེ་མཉམ་པ་ཞེས་བྱའོ། །ཡི་གེ་ལྷག་པ་ཞེས་བྱ་བ་ནི་ཇི་སྲིད་དུ་ཨ་ཞེས་མ་སྨྲས་པ་དེ་སྲིད་དུ། དེ་ཡང་ཨ་ཞེས་སྨྲ་བའོ། །ཆོས་འདོན་དུ་འཇུག་ན་ཞེས་བྱ་བ་ནི། སངས་རྒྱས་ཀྱིས་གསུངས་པའམ། ཉན་ཐོས་ཀྱིས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གང་ཟག་བསྙེན་པར་མ་རྫོགས་པ་ལ་ཁ་བསྟམས་ཏེ། ཆོས་འདོན་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ལྡ་བ་ལྡིབ་ཅན་དང། སྨྲ་མྱུར་བ་དང། དྲན་པར་བྱ་བ་དང། འདྲི་བ་གསོལ་བ་ལ་སྦྱིན་པ་ལ་ལྟུང་བ་མེད་དོ། །ལྟུང་བྱེད་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །ཉོན་མོངས་པ་རྣམས་མ་སྤངས་པའི་ཕྱིར་དང། མི་ཤེས་པའི་ཕྱིར་ལྟུང་བ་དག་འབྱུང་ཞིང། སྔོན་གྱི་ལྟུང་བ་དག་འཆགས་པར་བྱེད་པས་དེ་རྣམས་བཀུར་སྟི་བྱ་བ་སྤྱོད་དེ། དེ་རྣམས་ནང་པར་སྔར་ལངས་ཤིང་སངས་རྒྱས་དང། ཆོས་དང། དགེ་འདུན་ལ་བསྙེན་བཀུར་བྱེད། ཆག་ཆག་དང། ཕྱག་དར་དང། ཕྱི་བདར་བྱེད་དོ། །བཅུ་གཉིས་སྡེ་དེ་དག་ནི་། སེམས་ལས་ཆུང་ངུར་འདུག་ཅིང་འཁོད་དོ། །དེར་ཡང་ཁྱིམ་བདག་ལྷགས་ཏེ། དེ་རྣམས་ཀྱིས་དེ་དག་མཐོང་ནས་འདི་སྙམ་དུ། དགེ་སློང་མ་རྒན་མོ་འདི་དག་ནི་རིན་པོ་ཆེ་ཤེས་ཤིང། རིན་པོ་ཆེ་གསོག་པར་བྱེད་དོ། །བཅུ་གཉིས་སྡེ་འདི་དག་ནི་རིན་པོ་ཆེ་མི་ཤེས་ཤིང། རིན་པོ་ཆེ་གསོག་པར་མི་བྱེད་དོ་སྙམ་སེམས་སོ། །དེ་ནས་བཅུ་གཉིས་སྡེ་དག་གིས་ཁྱིམ་བདག་ལས་ཐོས་ནས། འདི་སྐད་ཅེས་སྨྲས་སོ། །ཁྱོད་འདི་ལྟ་བུ་རིན་པོ་ཆེ་

---

^{[མ་དཔེ་གཟིགས་ན་འདིར་གནོན།]}

གསོག་ཅིག །དེ་དག་གིས་འདི་སྐད་ཅེས་སྨྲས་སོ། །ཅིའི་ཕྱིར་འདི་དག་སངས་རྒྱས་དང། ཆོས་དང། དགེ་འདུན་ལ་སོགས་པ་ལ་། མཆོད་པའི་དོན་དུ་བརྩོན་པར་བྱེད། དེ་དག་གིས་འདི་སྐད་ཅེས་སྨྲས་སོ། །ལྟུང་བ་འདི་དང་འདི་དག་བྱུང་ངོ། །དེ་དག་གིས་ཐོས་ནས། གང་ལ་རྒན་མོ་རྣམས་ཀྱང་འདི་འདྲ་བའི་གནས་སྐབས་སུ་གྱུར་ན། གཞོན་ནུ་མ་རྣམས་ལ་ཇི་ལྟ་ཇི་ལྟ་བུ་ཞིག་ཏུ་འགྱུར་ཞེས་ཡིད་ལ་གཅགས་པར་གྱུར་ཏོ། །བཅུ་གཉིས་སྡེ་དག་གིས་དོན་དེ་རྟོགས་པར་བྱས་ནས། དེ་དག་གིས་དགེ་ཚུལ་གཞོན་ནུ་མ་རྣམས་ལ་དྲིས་པ། ཁྱེད་ཀྱི་མཁན་མོ་དང། སློབ་དཔོན་དག་ཅི་བྱེད། དེ་རྣམས་ཀྱིས་འདི་སྐད་ཅེས་སྨྲས་སོ། །བསོད་ནམས་བགྱིད་དོ། །དེ་ནས་བཅུ་གཉིས་སྡེ་དེ་དག་གིས་འདི་སྐད་ཅེས་སྨྲས་སོ། །ཁྱེད་བསོད་ནམས་འདི་འདྲ་བ་བྱོས་ཤིག །དགེ་ཚུལ་མ་དེ་རྣམས་ཀྱིས་འདི་སྐད་ཅེས་སྨྲས་སོ། །དེ་ཅི་ལགས། དེ་ནས་བཅུ་གཉིས་སྡེ་དེ་དག་གིས་དེ་དག་གི་དགེ་ཚུལ་མ་རྣམས་ལ་འདི་སྐད་ཅེས་སྨྲས་སོ། །ཅི་ཁྱོད་ཀྱི་སྙིང་ལམ་ན། ཁྱེད་ཀྱི་མཁན་མོ་དང། སློབ་དཔོན་འདི་དག །འདི་ལ་ཆོས་བཟང་ངོ་ཞེས་སངས་རྒྱས་དང། ཆོས་དང། དགེ་འདུན་ལ་སོགས་པ་ལ་བསྙེན་བཀུར་བྱེད་སྙམ་མམ། དེ་ལྟ་མོད་ཀྱི་ལྟུང་བ་འདི་དང་འདི་དག་བྱུང་ངོ། །གང་གི་ཚེ་དགེ་སློང་མ་དེ་དག་ལྟུང་བ་དེ་ལས་ལངས་པར་གྱུར་པ་དེའི་ཚེ། དེ་དག་གིས་དགེ་ཚུལ་གཞོན་ནུ་མ་དེ་དག་ལ། དགེ་ཚུལ་མ་དག །ལས་དག་གྱིས་ཤིག་ཅེས་བསྒོ་བ་ན། དེ་དག་གིས་སྨྲས་པ། ཁྱེད་ཅག་ཅིའི་ཕྱིར་མི་མཛད། གནས་བརྟན་མོ་དེ་དག་གིས་འདི་སྐད་ཅེས་སྨྲས་སོ། །ཁོ་མོ་ཅག་གིས་མི་རུང་ངོ། །དགེ་ཚུལ་མ་རྣམས་ཀྱིས་ཡང་འདི་སྐད་ཅེས་སྨྲས་སོ། །ཁ་ཅིག་རུང་ན། ཁ་ཅིག་མི་རུང་ངམ། དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །ཁྱེད་ལ་སུས་སྨྲས། དེ་དག་གིས་འདི་སྐད་ཅེས་བཅུ་གཉིས་སྡེ་དག་གིས་སོ། །ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ།

---

^{[མ་དཔེ་གཟིགས་ན་འདིར་གནོན།]}

བརྗོད་པར་མི་བྱའོ་ཞེས་དེ་ལྟར་དགག་པ་མཛད་དོ། །དེ་ནས་དགེ་སློང་མ་དྲང་མོ་ཞེས་བྱ་བ། ཅི་ནས་ཀྱང་སྐྱེ་བོའི་ཚོགས་ཆེན་པོ་མ་དད་པར་རིག་པར་འགྱུར་པ། དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་དུ་སོ་སོར་གོ་བར་བྱེད་པའི་དགེ་སློང་མ་བསྐོ་བར་བྱའོ། །བཅོམ་ལྡན་འདས་ཀྱིས་བཀའ་སྩལ་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཆོས་ལྔ་དང་ལྡན་པ་ཁྱིམ་དུ་སོ་སོར་གོ་བར་བྱེད་པ་བསྐོ་བར་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང། ཞེ་སྡང་གིས་མི་འགྲོ་བ་དང། གཏི་མུག་གིས་མི་འགྲོ་བ་དང། འཇིགས་པས་མི་འགྲོ་བ་དང། སོ་སོར་གོ་བར་བྱེད་པ་བྱས་པ་དང། སོ་སོར་གོ་བར་མ་བྱས་པའི་ཁྱིམ་ཤེས་པའོ། །བསྐོ་བ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་དྲང་མོ་འདི་གང་གིས་ན་སྐྱེ་བོའི་ཚོགས་ཆེན་པོ་མ་དད་པར་རིག་པར་འགྱུར་བ་དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད་དེ། མིང་འདི་ཞེས་བགྱི་བ་འདི་ཁྱིམ་རྣམས་སུ་སོ་སོར་གོ་བར་བགྱིད་པར་སྤྲོ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། མིང་འདི་ཞེས་བགྱི་བ་གང་ལགས་པ་འདི། དགེ་སློང་མ་དྲང་མོའི་སླད་དུ་ཁྱིམ་དུ་སོ་སོར་གོ་བར་བགྱིད་པར་བསྐོ་བར་བགྱི་སྟེ། མིང་འདི་ཞེས་བགྱི་བ་གང་ལགས་པས། དགེ་སློང་མ་དྲང་མོའི་སླད་དུ་ཁྱིམ་རྣམས་སུ་ཕུ་ནུ་མོ་དག །ཁྱེད་ཅག་དགེ་སློང་མ་དྲང་མོ་ས་བོན་ཚིག་པ་ལྟ་བུ། ས་བོན་ཉམས་པ་ལྟ་བུ་འདིས་བསྟན་པ་ལ་ཚོ་ད་མ་འཛིན་ཅིག །འཕགས་མ་སྐྱེ་དགུའི་བདག་མོ་ཆེན་པོས་བསྟན་པའི་ཚད་ཟུང་ཞིག །གོའུ་ཏ་མའི་སྐེམ་མོ་དང། ཨུཏྤ་ལའི་མདོག་དང། ཆོས་སྦྱིན་དང། འཕགས་མ་ཚུལ་ལྡན་གྱིས་ཆེད་ཟུང་ཞིག་ཅེས་སོ་སོར་གོ་བར་བགྱིད་པར་འགྱུར་རོ། །འདི་ནི་གསོལ་བའོ། །ལས་ནི་འདི་ལྟར་

---

^{[མ་དཔེ་གཟིགས་ན་འདིར་གནོན།]}

བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཞེས་བྱ་བ་ནས་འཕགས་མའི་དགེ་འདུན་གྱིས་བཟོད་ཅིང་གནང་ནས། འདི་ལྟར་ཅང་མི་གསུང་བས། དེ་དེ་བཞིན་དུ་འཛིན་ཏོ། །ཞེས་བྱ་བའི་བར་རོ། །དེ་ནས་དགེ་སློང་མ་དྲང་མོས་ཁྱོད་ཀྱི་ཕྱིར་ཁྱིམ་དུ་སོ་སོར་གོ་བར་བྱེད་པའི་དགེ་སློང་མ་སྤྲོ་བར་བྱས་སོ་ཞེས་ཐོས་སོ། །ཐོས་ནས་ཀྱང་དགེ་སློང་མ་དྲང་མོ་ཁྱིམ་དུ་སོ་སོ་གོ་བར་བྱེད་པའི་དགེ་སློང་མ་གང་ན་བ་དེར་སོང་སྟེ། ཕྱིན་ནས་དགེ་སློང་མ་དེ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་དགེ་འདུན་གྱིས་ཁོ་མོའི་ཕྱིར་ཁྱིམ་དུ་སོ་སོར་གོ་བར་བྱེད་པར་བསྐོས་སམ། དེས་འདི་སྐད་ཅེས་སྨྲས་སོ། །དེ་ཡིན་ནོ། །ཕུ་ནུ་མོ། ཁྱོད་ཀྱིས་ཁོ་མོ་འདི་ལྟར་ཁྱིམ་རྣམས་སུ་མ་དད་པ་མང་དུ་བྱས་པ་ཡིད་ཆེས་སམ། དེས་འདི་སྐད་ཅེས་སྨྲས་སོ། །ཡིད་ཆེས་སོ། །དྲང་མོས་འདི་སྐད་ཅེས་སྨྲས་སོ། །ཇི་ལྟར་གཅིག་ལ་ཡིད་ཆེས་པ་ལྟར་ཅིག་ཤོས་ལ་ཡང་དེ་དང་འདྲ་བས་ཁོ་མོས་ཁྱོད་ཀྱིས་ལྟོ་དྲལ་ལ་རྒྱུ་མས་དབྱར་ཁང་འཁོར་བར་བསྐོར་རོ། །དེ་ནས་དགེ་སློང་མ་དེ་སྐྲག་ནས། སྐབས་དེ་དགེ་སློང་མའི་དགེ་འདུན་ལ་རྒྱས་པར་སྨྲས་སོ། །དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་གསོལ་བ་འབའ་ཞིག་པ་བྱའོ། །བཅོམ་ལྡན་འདས་ཀྱིས་གསོལ་བ་འབའ་ཞིག་པ་བྱའོ་ཞེས་བཀའ་སྩལ་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ནས་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་དྲང་མོ་འདི་ཅི་ནས་ཀྱང་སྐྱེ་བོའི་ཚོགས་ཆེན་པོ་མ་དད་པར་རིག་པར་འགྱུར་བ། དེ་ལྟ་དེ་ལྟར་ཁྱིམ་རྣམས་སུ་སྤྱོད་པར་བགྱིད་དེ། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། གསོལ་བ་འབའ་ཞིག་བགྱིས་ནས། དགེ་སློང་མ་དྲང་མོས་ཇི་ལྟར་སྣང་བ་དང། གང་དུ་ད་སྣང་བ་དེ་ཁོ་ནར་འདི་

---

^{[མ་དཔེ་གཟིགས་ན་འདིར་གནོན།]}

སྐད་ཅེས་ཕུ་ནུ་མོ་དག་ཁྱེད་དགེ་སློང་མ་སྡིག་ཅན་ས་བོན་ཚིག་པ་བཞིན་དུ་སྐྱེ་བའི་མཐུ་མེད་པ་འདིས་བསྟན་པ་ལ་ཚོད་མ་འཛིན་ཅིག །དེ་ལྟ་མོད་ཀྱི་དགེ་སློང་མ་གནས་བརྟན་གནས་བརྟན་དག་གིས་བསྟན་པ་འདི་ལ་ཚད་ཟུང་ཞིག་ཅེས་བསྒོ་བར་བགྱི་སྟེ། འདི་ནི་གསོལ་བའོ། །དེ་ལྟར་གསོལ་བ་འབའ་ཞིག་པ་བྱས་ནས་དགེ་སློང་མ་དེ་རྣམས་ཀྱིས་གང་དུ་སྐྱེ་བོའི་ཚོགས་ཆེན་པོ་ཡོད་པ་དེར་སོ་སོར་གོ་བར་བྱའོ། །གང་དུ་མ་དད་པར་བྱས་པ་དེར་བརྗོད་པར་བྱའི། ལྟོགས་པ་ཁོ་ནས་ཤི་བར་གྱུར་ན་མ་རུང་བས་གཞན་དུ་ནི་བརྗོད་པར་མི་བྱའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གང་ཟག་བསྙེན་པར་མ་རྫོགས་པ་རྣམས་ལ། གནས་ངན་ལེན་གྱི་ལྟུང་བ་བརྗོད་ན་དགེ་འདུན་གྱིས་གནང་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་ཆོས་འདི་པའོ། །བརྗོད་ན་ཞེས་བྱ་བ་ནི་སྨྲ་ནའོ། །དགེ་འདུན་གྱིས་གནང་བ་མ་གཏོགས་ཏེ་ཞེས་བྱ་བ་ནི། དགེ་འདུན་གྱིས་གནང་བ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ལ་མཐར་འགྱུར་བའི་ལྟུང་བ་མཐོང་ལ། དེས་མ་རིག་པ་ལ་མ་རིག་པའི་འདུ་ཤེས་ཀྱིས་བརྗོད་ན་ལྟུང་བྱེད་དོ། །དེ་བཞིན་དུ་མ་རིག་པ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་མཐར་འགྱུར་བའི་ལྟུང་བ་མཐོང་ལ། དེས་རིག་པ་ལ་མ་རིག་པར་འདུ་ཤེས་ན་ཉེས་བྱས་སོ། །དེ་བཞིན་དུ་རིག་པ་ལ་ཡིད་གཉིས་ཟ་ན་ཉེས་བྱས་སོ། །རས་ལ་རི་མོར་བྲིས་པ་ལྟར་ཇི་ལྟར་བདག་གིས་ཤེས་པ་དེ་བཞིན་དུ་འཇིག་རྟེན་ཐམས་ཅད་ཀྱིས་ཤེས་པ་ལ་ནི་ལྟུང་བ་མེད་དོ། །ལྟུང་བྱེད་བདུན་པ་རྫོགས་སོ།། །།སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟང་ན་བཞུགས་སོ། །དེའི་ཚེ་མུ་གེ་མི་བཟད་པ་དགོན་པ་སློང་མོ་པས་ཟས་རྙེད་པར་དཀའ་བ་བྱུང་ངོ། །དེ་ནས་དགེ་སློང་མ་རབ་ཏུ་མང་པོ་ལྗོངས་ཤིག་ཏུ་དོང་བ་དང། བསོད་

---

^{[མ་དཔེ་གཟིགས་ན་འདིར་གནོན།]}

སྙོམས་ཀྱིས་ཕོངས་པར་གྱུར་ཏོ། །དེ་ནས་དེ་རྣམས་ཕན་ཚུན་དུ་བགྲོས་པ། ཅིའི་ཕྱིར་བདག་ཅག་གི་ཡོན་ཏན་བསྒྲག་པར་མི་བྱ། དེ་དག་གིས་འདི་སྐད་ཅེས་སྨྲས་སོ། །ཅི་ཡང་དག་པས་སམ། ཡང་དག་པ་མ་ཡིན་པས། དེ་དག་གིས་འདི་སྐད་ཅེས་སྨྲས་སོ། །ཡང་དག་པས་སོ། །དེ་དག་གིས་ཕན་ཚུན་དུ་ཡོན་ཏན་ཡང་དག་པར་བསྒྲགས་པ་བྱས་པ་དང། འཇིག་རྟེན་ནི་ཡོན་ཏན་ལ་དགའ་བ་ཡིན་པས། དེ་རྣམས་ཀྱིས་དེ་དག་བསོད་སྙོམས་ཀྱིས་མ་ཕོངས་པར་བྱས་སོ། །གང་གི་ཚེ་དགེ་སློང་མ་དེ་དག་ལྗོངས་རྒྱུ་ཞིང་དོང་ནས་ཡངས་པ་ཅན་དུ་ཕྱིན་ནོ། །དེ་ན་གནས་པ་དང། གཉུག་མར་གནས་པའི་དགེ་སློང་མ་རྣམས་ཀྱིས་མཐོང་ནས། འདི་སྐད་ཅེས་སྨྲས་སོ། །སངས་རྒྱས་ལྡན། ཆོས་ལྡན། དགེ་འདུན་ལྡན་དག་འོངས་པ་ལེགས་སོ། །འོངས་པ་ལེགས་སོ། །ཇི་ག་ལེགས་པར་སྤྱད་དམ། དེ་དག་གིས་འདི་སྐད་ཅེས་སྨྲས་སོ། །ལེགས་པར་སྤྱད་དོ། །ཚེ་དང་ལྡན་མ་དག་བསོད་སྙོམས་ཀྱིས་ཕོངས་པར་མ་གྱུར་གྲང། དེ་དག་གིས་འདི་སྐད་ཅེས་སྨྲས་སོ། །མ་གྱུར་ཏོ། །གནས་བརྟན་གནས་བརྟན་འདི་དག་ནི་བསོད་སྙོམས་ཀྱིས་ཕོངས་པར་གྱུར་ན། ཁྱེད་ཀྱིས་ཐབས་ཅི་ཞིག་བྱས་ན་མ་གྱུར། དེ་དག་གིས་འདི་སྐད་སྨྲས་སོ། །ཕན་ཚུན་ཡོན་ཏན་བསྒྲགས་པ་བྱས་པས་སོ། །ཁྱེད་མིའི་ཆོས་བླ་མ་བརྗོད་དུ་རུང་ངམ། དེ་དག་གིས་འདི་སྐད་ཅེས་བདག་ཅག་གིས་བརྗོད་དོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གང་ཟག་བསྙེན་པར་མ་རྫོགས་པ་ལ་མིའི་ཆོས་བླ་མ་བདེན་པ་བརྗོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། ཆོས་འདི་པའོ། །བསྙེན་པར་མ་རྫོགས་པ་ལ་ཞེས་བྱ་བ་ལ། བསྙེན་པར་རྫོགས་པ་ནི་གཉིས་སོ། །ལྷག་མ་རྣམས་ནི། བསྙེན་པར་མ་རྫོགས་པའོ། །བདེན་པ་ཞེས་བྱ་བ་ནི། ཡང་དག་པར་ཡོད་པའོ། །ལྟུང་བྱེད་དོ་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བ་ནི། གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། བར་སྡོམ་ལ། མཐོང་དང་འདུ་ཤེས་དགོན་པ་དང། ཁྱིམ་རྣམས་སུ་ནི་སྟན་བཀྲ་དང། །རང་གི་མཚན་ཉིད་འཛིན་བྱེད་དང། །བདག་ཉིད་ཉེ་བར་སྟོན་པའོ། །དགེ་སློང་མས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་མ་བསྒྱུར་པར་འདི་སྐད་ཅེས་ལྷ་མཐོང་ངོ་ཞེས་ཟེར་ལ། བདེན་པ་ཡིན་ན་ལྟུང་བྱེད་དོ། །དེ་བཞིན་དུ་གནོད་སྦྱིན་རྣམས་དང། ཀླུ་རྣམས་དང། དྲི་ཟ་རྣམས་དང། མིའམ་ཅི་རྣམས་དང། ལྟོ་འཕྱེ་ཆེན་པོ་རྣམས་དང། གྲུལ་བུམ་རྣམས་དང། ཡི་དྭགས་རྣམས་དང། ཤ་ཟ་རྣམས་དང། སྲུལ་པོ་རྣམས་ཀྱང་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དེ་བཞིན་དུ་ལྷ་རྣམས་ལ་བལྟ་བའི་ཕྱིར་འགྲོའོ་ཞེས་བྱ་བ་ནས་ལུས་སྲུལ་པོ་རྣམས་ལ་ཞེས་བྱ་བའི་བར་ཏེ། བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །ཁོ་མོའི་དྲུང་དུ་ལྷ་ལ་སོགས་པ་ཉེ་བར་འོང་བ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དེ་བཞིན་དུ་ལྷ་ལ་སོགས་པའི་སྒྲ་ཐོས་པ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །ལྷ་རྣམས་དང་ལྷན་ཅིག་གཏམ་འདྲ་བར་བྱེད། རྣམ་པར་གཏན་ལ་འབེབས་པར་བྱེད་པ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ་།དེ་བཞིན་དུ་ལྷ་ཡང་ཁོ་མོ་དང་ལྷན་ཅིག་གཏམ་འདྲེ་བར་བྱེད། རྣམ་པར་གཏན་ལ་འབེབས་པར་བྱེད་པ་བདེན་ན་ལྟུང་བྱེད་དོ། །ཐ་ན་ཕྱག་དར་ཁྲོད་ཀྱི་ཤ་ཟ་ཡང་བདེན་ན་ཉེས་བྱས་སོ། །དགེ་སློང་མས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་མ་བསྒྱུར་བར་འདི་སྐད་ཅེས་མི་རྟག་པའི་འདུ་ཤེས་ཐོབ་བོ་ཞེས་ཟེར་ལ་བདེན་པ་ཡིན་ན་ལྟུང་བྱེད་དོ། །དེ་བཞིན་དུ་མི་རྟག་པ་ལ་སྡུག་བསྔལ་བའི་འདུ་ཤེས་དང། སྡུག་བསྔལ་ལ་བདག་མེད་པའི་འདུ་ཤེས་དང། ཟས་ལ་མི་མཐུན་

---

^{[མ་དཔེ་གཟིགས་ན་འདིར་གནོན།]}

པའི་འདུ་ཤེས་དང། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང། ཉེས་དམིགས་ཀྱི་འདུ་ཤེས་དང། སྤང་བའི་འདུ་ཤེས་དང། འདོད་ཆགས་དང་བྲལ་བའི་འདུ་ཤེས་དང། འགོག་པའི་འདུ་ཤེས་དང། འཆི་བའི་འདུ་ཤེས་དང། མི་གཙང་བའི་འདུ་ཤེས་དང། རྣམ་པར་བམ་པའི་འདུ་ཤེས་དང། རྣམ་པར་སྔོས་པའི་འདུ་ཤེས་དང། རྣམ་པར་རུལ་བའི་འདུ་ཤེས་དང། རྣམ་པར་དམར་བའི་འདུ་ཤེས་དང། རྣམ་པར་ཟོས་པའི་འདུ་ཤེས་དང། རྣམ་པར་ཞིགས་པའི་འདུ་ཤེས་དང། རྣམ་པར་འཐོར་བའི་འདུ་ཤེས་དང། རུས་པའི་འདུ་ཤེས་དང། སྟོང་པ་ཉིད་དུ་སོ་སོར་རྟོགས་པའི་འདུ་ཤེས་དང། ཁོ་མོས་བསམ་གཏན་དང་པོ་དང། གཉིས་པ་དང། གསུམ་པ་དང། བཞི་པ་ཞེས་བྱ་བ་ནས། རྣམ་པར་ཐར་པ་བརྒྱད་ཀྱི་བསམ་གཏན་ཁོ་མོས་ཐོབ་བོ་ཞེས་ཟེར་ལ་བདེན་ན་ལྟུང་བྱེད་དོ། །དགེ་སློང་མས་འདུ་ཤེས་མ་བསྒྱུར་བར་ཞེས་བྱ་བ་ནས་འདི་སྐད་ཅེས་བྱ་བའི་བར་ཏེ། དགེ་སློང་མ་རབ་ཏུ་མང་པོ་དགོན་པ་ན་གནས་ན། དེ་དག་ལ་མི་མ་ཡིན་པ་རྣམས་ཀྱིས་རྣམ་པར་མི་འཚེ་ན་ཁོ་མོ་ཡང་དེ་ན་གནས་ན་རྣམ་པར་མི་འཚེའོ། །ཞེས་སྨྲས་ལ་བདེན་ན་ལྟུང་བྱེད་དོ། །དེ་བཞིན་དུ་ཁྱིམ་རྣམས་སུ་སྟན་བཀྲ་ཞིང་བཀྲ་བ་རྣམས་ལ་ཡང་བརྗོད་པར་བྱའོ། །དགེ་སློང་མས་འདུ་ཤེས་མ་བསྒྱུར་བར་ཞེས་བྱ་བ་ནས། འདི་སྐད་ཅེས་བྱ་བའི་བར་ཏེ། དགེ་སློང་མ་གང་གིས་རང་གི་མཚན་ཉིད་འཛིན་པ་ཞི་གནས་ཀྱི་མཚན་མ་ལ་བརྟེན་ནས། འཇིག་རྟེན་པའི་ཡིད་ལ་བྱེད་པའི་ཉོན་མོངས་པ་དག་རྣམ་པར་མནན་པས། འདོད་པའི་འདོད་ཆགས་དང། གནོད་སེམས་ལ་སོགས་པ་ཀུན་ཏུ་མི་སྤྱོད་པ་དེ་ཡོད་དོ་ཞེས་བྱ་བ་ནས། ཁོ་མོས་ཀྱང་ཞེས་བྱ་བའི་བར་དུ་ཟེར་ན་ལྟུང་བྱེད་དོ། །དགེ་སློང་མས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་མ་བསྒྱུར་བར་འདི་སྐད་ཅེས་དགེ་སློང་མ་ལྷ་མཐོང་བ་གང་ཡིན་པ་དེ་ཡོད་དོ་ཞེས་སྨྲས་ཀྱི། ཁོ་མོས་སོ་ཞེས་དེ་སྐད་མ་སྨྲས་ན་ཉེས་བྱས་སོ། །

---

^{[མ་དཔེ་གཟིགས་ན་འདིར་གནོན།]}

དེ་བཞིན་དུ་གནོད་སྦྱིན་རྣམས་དང། ཀླུ་རྣམས་དང། དྲི་ཟ་རྣམས་དང། མིའམ་ཅི་རྣམས་དང། ལྟོ་འཕྱེ་ཆེན་པོ་རྣམས་དང། གྲུལ་བུམ་རྣམས་དང། ཡི་དྭགས་རྣམས་དང། ཤ་ཟ་རྣམས་དང། ལུས་སྲུལ་པོ་རྣམས་བདག་གིས་སོ་སོ་ཞེས་དེ་སྐད་མ་སྨྲས་ན་ཉས་བྱས་སོ། །ཐ་ན་ཕྱག་དར་ཁྲོད་ཀྱི་ཤ་ཟ་ལ་ཡང་བདག་གིས་སོ་ཞེས་མ་སྨྲས་ན་ཉེས་བྱས་སོ། །དེ་བཞིན་དུ་རིམ་པ་འདིས་སྡོམ་གྱི་ཚིགས་བཅད་འདི་བརྗོད་པར་བྱའོ། །ཡང་དགེ་སློང་མ་གང་ཞིག་འདུ་ཤེས་མ་བསྒྱུར་བར་ཞེས་བྱ་བ་ནས་འདི་སྐད་ཅེས་བྱ་བའི་བར་ཏེ། དགེ་སློང་མ་རང་གི་མཚན་ཉིད་འཛིན་པ་ཞི་གནས་ཀྱི་མཚན་མ་ལ་བརྟེན་ནས། འཇིག་རྟེན་པའི་ཡིད་བྱེད་པས་ཉོན་མོངས་པ་རྣམས་རྣམ་པར་མནན་ནས། འདོད་པ་ལ་འདོད་ཆགས་དང། གནོད་སེམས་ལ་སོགས་པ་ཀུན་ཏུ་མི་སྤྱོད་པ་གང་ཡིན་པ་དེ་ཡོད་དོ་ཞེས་ཟེར་གྱི། ཁོ་མོ་ཡིན་ནོ་ཞེས་དེ་སྐད་མ་སྨྲས་ན་ཉེས་བྱས་སོ། །ལྟུང་བྱེད་བརྒྱད་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་ཆོས་སྦྱིན་ཕོ་ཉས་བསྙེན་པར་རྫོགས་པ་ཐོབ་ཅིང་བདེན་པ་རྣམས་མཐོང་བ་དེའི་ཚེ། དེ་རང་གི་དབྱར་ཁང་ན་དགེ་སློང་མ་རྣམས་ཀྱི་ཆོས་དང་ལྡན་པའི་ཞལ་ཏ་བྱེད་པ་ལ་བརྩོན་པར་བྱེད་དོ། །དེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཡིན་པས། འདི་ལྟ་སྟེ། སངས་རྒྱས་སམ། ཆོས་སམ། དགེ་འདུན་ནམ། དགེ་སློང་མ་བཤེས་པ་རྣམས་ལ་མི་འབུལ་བའམ། ཡོངས་སུ་མི་གཏང་བ་ཅི་ཡང་མེད་དོ། །དེ་དེ་ལྟར་ཕུལ་ཞིང་དེ་ལྟར་ཡོངས་སུ་བཏང་བས། ཆོས་གོས་རྙིངས་ཤིང་སྣམ་སྦྱར་ཡང་དེངས་པར་གྱུར་ཏོ། །དེ་ནས་དགེ་སློང་མའི་དགེ་འདུན་འདི་སྙམ་དུ་དགེ་སློང་མ་ཆོས་སྦྱིན་འདི་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཡིན་པས། བསམ་གཏན་དང། རྣམ་པར་ཐར་པ་དང། ཏིང་ངེ་འཛིན་དང། སྙོམས་པར་འཇུག་པ་སྤངས་ནས། དགེ་སློང་མ་རྣམས་ཀྱི་ཆོས་དང་ལྡན་པའི་ཞལ་ཏ་བྱེད་པ་ལ་བརྩོན་པར་བྱེད་ལ། དེ་མི་དབུལ་བའམ་ཡོངས་སུ་མི་གཏོང་བ་ཅི་ཡང་མེད་དོ་ཞེས་བྱ་བ་ནས་སྣམ་སྦྱར་དེངས་པར་གྱུར་གྱི་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བའི་བར་རོ། །བདག་ཅག་གིས་རས་ཡུག་ཆེན་ཞིག་གྲུབ་དང། དེ་བདག་ཅག་གིས་ཆོས་སྦྱིན་ལ་སྦྱིན་ནོ་སྙམ་དུ་སེམས་སོ། །དེ་ནས་དུས་གཞན་ཞིག་ན། རས་ཡུག་ཆེན་ཞིག་རྙེད་ནས། དེ་རྣམས་ཀྱིས་ཆོས་སྦྱིན་ལ་བྱིན་ནོ། །དེས་སྐབས་དེ་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། གསོལ་བ་བྱས་ཏེ་སྦྱིན་ནོ། །འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་ཆོས་སྦྱིན་འདི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ལགས་པས་འདི་ལྟ་སྟེ། སངས་རྒྱས་སམ། ཆོས་སམ། དགེ་འདུན་ནམ། དགེ་སློང་མ་བཤེས་པ་རྣམས་ལ་མི་དབུལ་བའམ། ཡོངས་སུ་མ་བཏང་བ་ཅི་ཡང་མ་མཆིས་སོ། །དེ་དེ་ལྟར་ཡོངས་སུ་བཏང་བས་ཆོས་གོས་ལྔ་རྙིངས་ཤིང་སྣམ་སྦྱར་ཡང་དེངས་པར་གྱུར་ལགས་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་ཆོས་སྦྱིན་ལ་རས་ཡུག་ཆེན་སྩོལ་བར་མཛད་དོ། །འདི་ནི་གསོལ་བའོ། །གང་གི་ཚེ་དེ་དག་གིས་གསོལ་བ་བྱས་ཏེ། ཆོས་སྦྱིན་ལ་རས་ཡུག་ཆེན་བྱིན་པ་དེའི་ཚེ། སྦོམ་དགའ་མོས་བཅུ་གཉིས་སྡེ་ལྷག་མ་རྣམས་ལ། ཀྱེ་ཕུ་ནུ་མོ་དག །གང་དུ་དགེ་འདུན་གྱི་རྙེད་པ་བཤེས་ངོར་སྔོ་བར་བྱེད་པས་དགེ་སློང་མའི་དགེ་འདུན་གྱི་རྙེད་པ་འགྲུབ་པར་ག་ལ་འགྱུར་ཞེས་སྨྲས་པ་ན། དོན་ཉུང་བའི་དགེ་སློང་རྣམས་སྨོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྔར་ལེགས་པར་རུང་བར་བྱས་ནས་དེའི་འོག་ཏུ་དགེ་སློང་མ་རྣམས་ལ་འདི་སྐད་ཅེས་ཕུ་ནུ་མོ་དག་དགེ་སློང་མ་རྣམས་ཀྱིས་བཤེས་ངོར་བྱས་ཏེ། དགེ་འདུན་གྱི་རྙེད་པར་བསྔོས་པ་གང་ཟག་གིར་སྔོ་བར་བྱེད་དོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །སྔར་ལེགས་པར་རུང་བར་བྱས་

---

^{[མ་དཔེ་གཟིགས་ན་འདིར་གནོན།]}

ནས་ཞེས་བྱ་བ་ནི་བློ་གྲོས་མཐུན་པར་བྱས་པའོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །རྙེད་པ་ཞེས་བྱ་བ་ལ། རྙེད་པ་ནི་གཉིས་ཏེ། ཟས་ཀྱི་རྙེད་པ་དང། གོས་ཀྱི་རྙེད་པ་དང། དོན་འདི་ལ་ནི་གོས་ཀྱི་རྙེད་པ་ཡིན་པར་དགོངས་སོ། །བཤེས་ངོར་ཞེས་བྱ་བ་ལ་གང་གི་བཤེས་གང་ཡིན་ཞེ་ན། ལྷན་ཅིག་གནས་པའི་བཤེས་པ་ནི་མཁན་མོ་ཡིན་ལ། མཁན་མོ་ཡི་ནི་ལྷན་ཅིག་གནས་པ་ཡིན་ནོ། །ཉེ་གནས་ཀྱི་ནི་སློབ་དཔོན་ཡིན་ལ། སློབ་དཔོན་གྱི་ཡང་ཉེ་གནས་ཡིན་ནོ། །འགྲོགས་བཤེས་ཀྱི་ཡང་འགྲོགས་བཤེས་ཡིན་ནོ། །སྨོས་པ་དྲིན་གྱི་ཡང་སྨོས་འདྲིན་ཡིན་ནོ། །གནས་གཅིག་པའི་ཡང་གནས་གཅིག་པ་ཡིན་ནོ། །སྔོན་ཞེས་བྱ་བ་ནི་སྒྱུར་ནའོ། །གང་ཟག་ལ་ཞེས་བྱ་བ་ནི་གང་ཟག་ལ་སྦྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་དུ་སྔར་ལེགས་པར་རུང་བར་བྱས་ནས། དེའི་འོག་ཏུ་དགེ་སློང་མ་རྣམས་ལ་འདི་སྐད་ཅེས། དགེ་སློང་མས་བཤེས་ངོར་དགེ་འདུན་གྱི་རྙེད་པར་བསྔོས་པ་གང་ཟག་གིར་སྒྱུར་བར་བྱེད་དོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་བདེན་པ་ཁོ་ན་ཡིན་ན་ལྟུང་བ་མེད་དོ། །ལྟུང་བྱེད་དགུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་སོ་སོར་ཐར་པའི་མདོ་གདོན་པར་འདོན་པ་ན། འདི་སྐད་ཅེས་ཕུ་ནུ་མོ་དག །ཇི་ཙམ་གྱིས་དགེ་སློང་མ་རྣམས་འགྱོད་པ་དང། ཡིད་ལ་གཅགས་པ་དང། ཡིད་མི་བདེ་བ་དང། གནོད་པ་དང། གདུང་བར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་གང་ལ་གཞི་ཡང་མངོན་ལ་གང་ཟག་དང། གྲོང་དང། ཞིང་ཡང་མངོན་པར་དེ་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལས་བཏོན་པས་ཅི་ཞིག་བྱ་ཞེས་སྨྲས་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན། འདི་སྐད་ཅེས་འཕགས་མ་དག་ཇི་ཙམ་དགེ་སློང་མ་རྣམས་འགྱོད་པ་དང། ཡིད་ལ་གཅགས་པ་དང། ཡིད་མི་བདེ་བ་དང། གནོད་པ་དང། གདུང་བར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལས་བཏོན་པས་ཅི་ཞིག་བྱ་ཞེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི། ཟླ་བ་ཕྱེད་ཕྱེད་ཅིང་ངོ། །སོ་སོ་ཐར་པ་ཞེས་བྱ་བ་ནི། ཕས་ཕམ་པར་འགྱུར་བ་བརྒྱད་དང། དགེ་འདུན་ལྷག་མ་ཉི་ཤུ་དང་ཞེས་བྱ་བ་ནས་ལྟུང་བྱེད་བརྒྱ་བརྒྱད་ཅུ་དང། སོ་སོར་བཤགས་པར་བྱ་བ་བཅུ་གཅིག་དང། བསླབ་པ་མང་པོ་དང། རྩོད་པ་ཞི་བར་བྱེད་པ་བདུན་དང། འདུལ་བ་གཞི་བཅུ་བདུན་དང། ཕྲན་ཚེགས་དང། སིལ་བུ་དང། གླེང་གཞི་དང། འདུལ་བ་མ་མོ་དང། འདུལ་བ་གཅིག་ལས་འཕྲོས་པ་དང། འདུལ་བ་ལྔ་པ་དང། འདུལ་བ་བཅུ་དྲུག་པ་དང། ཉེ་བར་འཁོར་གྱིས་ཞུས་པ་ལས་འབྱུང་བའོ། །མདོ་ཞེས་བྱ་བ་ནི་ལེགས་པར་སྦྱར་བའོ། །འདོན་པ་ཞེས་བྱ་བ་ནི་རབ་ཏུ་སྟོན་པའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲས་ནའོ། །ཕུ་ནུ་མོ་དག་འདི་དག་ཅི་དགོས་ཞེས་བྱ་བ་ནི། གང་ལ་གང་ཟག་མངོན་ཞིང་གྲོང་དང། ཞིང་དང། གཞི་ཡང་མངོན་པ་ཇི་ཙམ་གྱིས་དགེ་སློང་མ་རྣམས་འགྱོད་པ་དང། ཡིད་ལ་གཅགས་པ་དང། ཡིད་མི་བདེ་བ་དང། གནོད་པ་དང། གདུང་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན། དགེ་སློང་མ་རྣམས་ལ་འདི་སྐད་ཅེས་ཕུ་ནུ་མོ་ཇི་ཙམ་གྱིས་དགེ་སློང་མ་རྣམས་འགྱོད་པར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་ཅི་དགོས་ཞེས་བྱ་བའི་བར་དུ་ཟེར་ན་ལྟུང་བྱེད་དོ། །ཡིད་ལ་

---

^{[མ་དཔེ་གཟིགས་ན་འདིར་གནོན།]}

གཅགས་པ་དང། ཡིད་མི་བདེ་བ་ཞེས་ཟེར་ན་ལྟུང་བྱེད་དོ། །དེ་བཞིན་དུ་གདུང་བ་དང། ཀུན་ཏུ་གདུང་བ་དང། ཡོངས་སུ་གདུང་བ་དང། དེ་བཞིན་དུ་བསླབ་པའི་གཞི་དང་ལྡན་པའི་མདོ་འདོན་པ་ན་ཁྱད་དུ་གསོད་ན་ལྟུང་བྱེད་དོ། །དེ་བཞིན་དུ་བསླབ་པའི་གཞི་དང་ལྡན་པའི་ཚིགས་སུ་བཅད་པ་འདོན་པ་ན་ཁྱད་དུ་གསོད་ན་ཐམས་ཅད་དུ་ཉེས་བྱས་སུ་འགྱུར་རོ། །གལ་ཏེ་ཉམས་པ་ཡིན་པ་དང། གལ་ཏེ་དགེ་སློང་མའི་དགེ་འདུན་ན་བར་གྱུར་ན་ལྟུང་བ་མེད་དོ། །ལྟུང་བྱེད་དང་པོའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། རྔ་ཞིང་རྔར་འཇུག་འཕྱ་བ་དང། །རྣ་ལ་གཟོན་དང་གནས་མལ་དང། །གདིང་བ་ དག་ནི་ལྔ་པ་ཡིན། །ཡང་ཐོག་ཁྲི་རྩ་འབྱུང་བ་དང། །རྩྭ་དག་དང་ནི་ཁང་ཆེན་དང། །གནས་གཅིག་དེ་བཞིན་འཁོད་པའོ། །གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་སྔོན་གྱི་ཤིང་མཁན་བྱེད་བྱེད་པའི་དགེ་སློང་ལས་བརྟེན་ནས། ས་བོན་གྱི་ཚོགས་དང། འབྱུང་པོའི་གནས་འཇིག་པའི་བསླབ་པའི་གཞི་བཅའ་བ་མཛད་དོ། །དེའི་ཚེ་དགེ་སློང་མ་བཅུ་གཉིས་སྡེ་རྣམས་རང་གི་ལག་གིས་རྩྭ་སྔོན་པོ་རྔ་ཞིང་རྔར་འཇུག་པར་བྱེད་པ་དང། དེ་རྣམས་ལ་རང་བཞིན་དུ་གནས་པའི་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག །བཅོམ་ལྡན་འདས་ཀྱིས་འདི་ལྟ་བུའི་བསླབ་པའི་གཞི་བཅའ་བ་མཛད་ཀྱི། ཁྱེད་རྩྭ་སྔོན་པོ་མ་གཅོད། གཅོད་དུ་མ་གཞུག་ཅིག །དེ་ནས་བཅུ་གཉིས་སྡེ་དེ་རྣམས་ཀྱིས་དགེ་སློང་མ་དེ་དག་ལ་འདི་སྐད་ཅེས་བསླབ་པའི་གཞི་འདི་དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ས་བོན་གྱི་ཚོགས་དང། འབྱུང་པོའི་གནས་འཇིག་གམ་འཇིག་ཏུ་འཇུག་ན་ལྟུང་བྱེད་དོ། །ས་བོན་གྱི་ཚོགས་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ལ། ས་བོན་ནི་ལྔ་སྟེ། རྩ་བའི་ས་བོན་དང། སྡོང་བུའི་ས་བོན་དང། ཐོར་ཏོའི་ས་བོན་དང། འགས་པའི་ས་བོན་དང། ས་བོན་གྱི་ས་བོན་ནི་ལྔ་པའོ། །དེ་ལ་རྩ་བའི་ས་བོན་ནི་གླ་སྒང་དང། ཤུ་དག་དང། ཡུང་དང། སྒེའུ་གཤེར་དང། བོ་ང་དཀར་པོ་དང། གཞན་ཡང་དེ་ལྟ་བུའི་རྩ་བ་སྟེ་རྩ་བ་ཉིད་ས་བོན་དུ་འགྱུར་བ་གང་ཡིན་པ་འདི་ནི་རྩ་བའི་ས་བོན་ཞེས་བྱའོ། །སྡོང་བུའི་ས་བོན་གང་ཞེ་ན། ཤིང་ཀན་ཙ་ན་དང། པི་ཏ་ལ་དང། ཨ་ཤྭང་ཐ་དང། ཨུ་དུམ་ཝཱ་ར་དང། ནྱ་གྲོ་དྷ་དང། གཞན་ཡང་དེ་ལྟ་བུའི་སྡོང་བུ་སྟེ། སྡོང་བུ་ཉིད་ས་བོན་དུ་འགྱུར་བ་གང་ཡིན་པ་འདི་ནི་སྡོང་བུའི་ས་བོན་ཞེས་བྱའོ། །ཐོར་ཏོའི་ས་བོན་གང་ཞེ་ན། བུ་རམ་གྱི་ཤིང་དང། འདམ་བུ་དང། སྨིག་མ་དང། རྒྱ་མཚོ་བ་དང། རྩྭ་ཀ་ཤ་དང། གཞན་ཡང་དེ་ལྟ་བུའི་ཐོར་ཏོ་སྟེ། ཐོར་ཏོ་ཉིད་ས་བོན་དུ་འགྱུར་བ་གང་ཡིན་པ་ནི་ཐོར་ཏོའི་ས་བོན་ཞེས་བྱའོ། །འགས་པའི་ས་བོན་གང་ཞེ་ན། ཨརྫ་ཀ་དང། སརྫ་ཀ་དང། སེ་ཡབ་དང། རྩྭ་མ་ཁྲིས་དང། བྷུ་དྲི་ན་ཀ་དང། གཞན་ཡང་དེ་ལྟ་བུ་འགས་ཤིང་ས་བོན་དུ་འགྱུར་བ་གང་ཡིན་པ་འདི་ནི་འགས་པའི་ས་བོན་ཞེས་བྱའོ། །ས་བོན་གྱི་ས་བོན་གང་ཞེ་ན། ནས་དང། གྲོ་དང། སཱ་ལུ་དང། མོན་སྲན་སྡེའུ་ལ་སོགས་པ་དང། གཞན་ཡང་ས་བོན་གྱི་ས་བོན་དུ་འགྱུར་བ་གང་ཡིན་པ་འདི་ནི་ས་བོན་གྱི་ས་བོན་ཞེས་བྱ་སྟེ། །ལྔ་པ་ཉིད་ཡིན་ནོ། །འབྱུང་པོའི་གནས་ཞེས་བྱ་བ་ལ། འབྱུང་པོའི་ཞེས་བྱ་བ་ནི་སྦྲུལ་དང། སྡིག་སྦྲུལ་དང། ཏྲེ་མ་བུ་ཀ་དང། ཏྲེ་ལ་ཏ་དང། སྲིན་བུ་དང། ཕྱེ་མ་ལེབ་དང། ཏིལ་གྱི་ཕུབ་མ་ཟ་བ་སྟེ། དེ་དག་གི་ཤིང་གང་ཡིན་པ་ནི་འབྱུང་པོའི་གནས་ཞེས་བྱའོ། །གཅོད་དམ་ཞེས་བྱ་བ་ནི་རང་གིས་སོ། །གཅོད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས། གཅོད་དམ་གཅོད་དུ་འཇུག་ན་ལྟུང་བྱེད་དོ། །དགེ་

---

^{[མ་དཔེ་གཟིགས་ན་འདིར་གནོན།]}

སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང་སྔོན་པོ་ལ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང། སྐམ་པོ་ལ་སྤོན་པོར་འདུ་ཤེས་ན་ཉེས་བྱས་སོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང། སྐམ་པོ་ལ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་ཐོར་ཏོའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཐོར་ཏོའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་རྩ་བའི་ས་བོན་

---

^{[མ་དཔེ་གཟིགས་ན་འདིར་གནོན།]}

ལ་སྡོང་བུའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། ། རྩ་བའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་རྩ་བའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །རྩ་བའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་དུ་སྦྱར་རོ། །དགེ་སློང་མས་སྡོང་བུའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྡོང་བུའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །སྡོང་བུའི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་དུ་སྦྱར་རོ། །སྡོང་བུའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་དུ་སྦྱར་རོ། །སྡོང་བུའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་ཐོར་ཏོའི་ས་བོན་ལ་འགས་པའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་ཐོར་ཏོའི་ས་བོན་ལ་འགས་པའི་ས་བོན་དུ་འདུ་ཤེས་ཤིང། སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ཐོར་ཏོའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་དུ་སྦྱར་རོ། །དགེ་སློང་མས་རྩ་བའི་ས་བོན་ལ་རྩ་བའི་ས་བོན་དུ་འདུ་ཤེས་ཤིང།

---

^{[མ་དཔེ་གཟིགས་ན་འདིར་གནོན།]}

སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །རྩ་བའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །རྩ་བའི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། །རྩ་བའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ། །རྩ་བའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་སྡོང་བུའི་ས་བོན་ལ་སྡོང་བུའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། ། སྡོང་བུའི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་དུ་སྦྱར་རོ། །སྡོང་བུའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ། །སྡོང་བུའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་དུ་སྦྱར་རོ། །དགེ་སློང་མས་ཐོར་ཏོའི་ས་བོན་ལ་ཐོར་ཏོའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ཐོར་ཏོའི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་སྦྱར་རོ། །ཐོར་ཏོའི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །ཐོར་ཏོའི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ། །ཐོར་ཏོའི་ས་བོན་གྱིས་ས་བོན་གྱི་ས་བོན་ལ་ཡང་དེ་བཞིན་སྦྱར་རོ། །དགེ་སློང་མས་འགས་པའི་ས་བོན་ལ་འགས་པའི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་

---

^{[མ་དཔེ་གཟིགས་ན་འདིར་གནོན།]}

སོ། །ས་བོན་གྱིས་རྩ་བའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། ། ས་བོན་གྱིས་ས་བོན་ལ་ཡང་དེ་བཞིན་སྦྱར་རོ། །ས་བོན་གྱི་ས་བོན་ལ་ས་བོན་གྱི་ས་བོན་དུ་འདུ་ཤེས་ཤིང། སྔོན་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་ནས་གཅོད་དམ་གཅོད་དུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ས་བོན་གྱི་ས་བོན་གྱིས་རྩ་བའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱི་ས་བོན་གྱིས་སྡོང་བུའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱི་ས་བོན་གྱིས་ཐོར་ཏོའི་ས་བོན་ལ་ཡང་དེ་བཞིན་སྦྱར་རོ། །ས་བོན་གྱི་ས་བོན་གྱིས་འགས་པའི་ས་བོན་ལ་ཡང་དེ་བཞིན་སྦྱར་རོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་བདུན་པ། བར་སྡོམ་ལ། རྩ་བ་ས་བོན་ལྔ་དག་དང། །ལྗོན་ཤིང་རྩྭ་གཅོད་དེ་བཞིན་དུ། །འཆགས་དང་རྩྭ་རྒྱུན་ཉ་ལྕིབས་དང། །ཆུ་དྲེག་མེ་ཏོག་རྒྱས་པའོ། །དགེ་སློང་མས་ས་བོན་རྣམས་ཉམས་པར་གྱུར་ཅིག་སྙམ་པའི་བསམ་པས། ས་བོན་གྱི་རིགས་ལྔ་གཏུན་སྒྱུར་བླུགས་ནས། གཏུན་མགོས་བརྡུངས་ཤིང་ས་བོན་ཉམས་པར་གྱུར་ཅིག །རྣམ་པར་ཉམས་པར་གྱུར་ཅིག་ཅེས་དྲག་ཏུ་བརྡུངས་པ་ལས། ས་བོན་ཉམས་ན་ལྟུང་བྱེད་དུ་འགྱུར་རོ། །ས་བོན་མ་ཉམས་ཤིང་ས་བོན་རྣམ་པར་མ་ཉམས་ན་ཉེས་བྱས་སུ་འགྱུར་རོ། །དེ་བཞིན་དུ་མེ་དང་ཐབ་དང་ཞུགས་ལིང་དང། སླ་ང་དང། མེ་ཐབ་དང། མེ་དོང་དང། མེ་དོང་ཆེན་པོ་དང། ས་དང། ཐུག་པ་དང། ཁུ་ཚན་དང། འབྲས་ཁུར་ལྡུགས་པ་དང། དེ་བཞིན་དུ་ས་བོན་ཉམས་པར་གྱུར་ཅིག་རབ་ཏུ་ཉམས་པར་གྱུར་ཅིག་ཅེས། མཚོ་ཆེན་པོ་དང། འབབ་ཆུ་ཆེན་པོ་དང། ཞེས་བྱ་བ་ནས། ཆུ་ཉུང་ངུ་དང། ལྕི་བ་དང། ཚ་རྒོད་དང།

---

^{[མ་དཔེ་གཟིགས་ན་འདིར་གནོན།]}

འགྱུར་བྱེད་དང། ས་དང་ལྷན་ཅིག་བསྲེས་པ་ལས། དེ་ཡང་ཉམས་ན་ལྟུང་བྱེད་དོ། །མ་ཉམས་ན་ཉེས་བྱས་སོ་ཞེས་བྱ་བའི་བར་རོ། །དགེ་སློང་མས་སྦྱོར་བ་གཅིག་གིས་ཤིང་ལྗོན་པ་གཅིག་གཅོད་དམ་གཅོད་དུ་འཇུག་ན་ཉེས་བྱས་གཅིག་དང། ལྟུང་བྱེད་གཅིག་གོ་།དེ་བཞིན་དུ་སྦྱོར་བ་གཉིས་ཀྱིས་ཤིང་ལྗོན་ཕ་གཅིག་གཅོད་ན་དེ་ལ་ཉེས་བྱས་གཉིས་དང། ལྟུང་བྱེད་གཅིག་གོ་།དེ་བཞིན་དུ་སྦྱོར་བ་མང་པོས་ཤིང་ལྗོན་པ་གཅིག་གཅོད་ན། དེ་ལ་ཉེས་བྱས་མང་པོ་དང། ལྟུང་བྱེད་གཅིག་གོ་།དགེ་སློང་མས་སྦྱོར་བ་གཅིག་གིས་ཤིང་ལྗོན་པ་གཉིས་གཅོད་ན། དེ་ལ་ཉེས་བྱས་གཅིག་དང། ལྟུང་བྱེད་གཉིས་སོ། །དེ་བཞིན་དུ་སྦྱོར་བ་གཉིས་ཀྱིས་ཤིང་ལྗོན་པ་གཉིས་གཅོད་ན། དེ་ལ་ཉེས་བྱས་གཉིས་དང་ལྟུང་བྱེད་གཉིས་སོ། །དགེ་སློང་མས་སྦྱོར་བ་མང་པོས་ཤིང་ལྗོན་པ་གཉིས་གཅོད་ན། དེ་ལ་ཉེས་བྱས་མང་པོ་དང། ལྟུང་བྱེད་གཉིས་སོ། །དགེ་སློང་མས་སྦྱོར་བ་གཅིག་གིས་ཤིང་ལྗོན་པ་མང་པོ་གཅོད་ན། དེ་ལ་ཉེས་བྱས་གཅིག་དང། ལྟུང་བྱེད་མང་པོར་འགྱུར་རོ། །དེ་བཞིན་དུ་སྦྱོར་བ་གཉིས་ཀྱིས་ཤིང་ལྗོན་པ་མང་པོ་གཅོད་ན། དེ་ལ་ཉེས་བྱས་གཉིས་དང། ལྟུང་བྱེད་མང་པོར་འགྱུར་རོ། །དེ་བཞིན་དུ་སྦྱོར་བ་མང་པོས་ཤིང་ལྗོན་པ་མང་པོ་གཅོད་ན། དེ་ལ་ཉེས་བྱས་མང་པོ་དང། ལྟུང་བྱེད་མང་པོར་འགྱུར་རོ། །དགེ་སློང་མས་རྩྭ་སྔོན་པོ་ལ་སྔོན་པོར་འདུ་ཤེས་པས་རྔ་ན་ལྟུང་བྱེད་དོ། །རྔར་འཇུག་ན་ལྟུང་བྱེད་དོ། །སྔོན་པོ་ལ་ཡིད་གཉིས་ཟ་བས་རྔ་ན་ལྟུང་བྱེད་དོ། །རྔར་འཇུག་ན་ལྟུང་བྱེད་དོ། །སྐམ་པོ་ལ་སྔོན་པོར་འདུ་ཤེས་པས་རྔ་ན་ཉེས་བྱས་སོ། །རྔར་འཇུག་ན་ཉེས་བྱས་སོ། །སྐམ་པོ་ལ་ཡིད་གཉིས་ཟ་བས་རྔ་ན་ཉེས་བྱས་སོ། །རྔར་འཇུག་ན་ཉེས་བྱས་སོ། །དགེ་སློང་མས་སྦྱོར་བ་གཅིག་གིས་རྩྭ་གཅིག་རྔ་ན་དེ་ལ་ཉེས་བྱས་གཅིག་དང། ལྟུང་བྱེད་གཅིག་གོ་།དེ་བཞིན་དུ་གཉིས་ལ་ཡང་བརྗོད་པར་བྱའོ། །དེ་བཞིན་དུ་མང་པོས་རྩྭ་གཉིས་ལ་ཡང་བརྗོད་པར་བྱའོ། །ཇི་ལྟར་ཤིང་ལྗོན་པ་ལ་བརྗོད་པ་དེ་བཞིན་དུ་རྒྱས་པར་རྩྭ་མང་པོ་ལ་ཡང་བརྗོད་པར་བྱའོ། །དགེ་

---

^{[མ་དཔེ་གཟིགས་ན་འདིར་གནོན།]}

སློང་མས་ཤིང་ལྗོན་པའི་རྩྭ་རྒྱུན་འབྱིན་ན་ཉེས་བྱས་སོ། །ཕྱི་ཤུན་འཆུ་ན་ཉེས་བྱས་སོ། །ཕྲི་འཆུ་ན་ཉེས་བྱས་སོ། །ནང་ཤུན་འཆུ་ན་ཉེས་བྱས་སོ། །སྙིང་པོ་འབྱིན་ན་ལྟུང་བྱེད་དོ། །ལོ་མ་སྐྱ་བོ་ན་ཉེས་བྱས་སོ། །ལོ་མ་རློན་ན་ལྟུང་བྱེད་དོ། །མེ་ཏོག་ཁ་བྱེ་ན་ཉེས་བྱས་སོ། །ཁ་མ་བྱེ་ན་ལྟུང་བྱེད་དོ། །འབྲས་བུ་སྨིན་ན་ཉེས་བྱས་སོ། །འབྲས་བུ་མ་སྨིན་ན་ལྟུང་བྱེད་དོ། །རྩྭ་ཉམས་པར་གྱུར་ཅིག །རྩྭ་རབ་ཏུ་ཉམས་པར་གྱུར་ཅིག་ཅེས་རྩྭ་སྔོན་པོའི་སྟེང་དུ་འཆག་པར་བྱེད་ན་ལྟུང་བྱེད་དོ། །དེ་བཞིན་དུ་ཁུ་ཚན་ལ་སོགས་པ་ལ་ཡང་ལྟུང་བྱེད་དོ། །ཉམས་པར་གྱུར་ཅིག་རབ་ཏུ་ཉམས་པར་གྱུར་ཅིག་ཅེས་ཤིང་ངམ་ཡལ་ག་འདྲེན་ན་ལྟུང་བྱེད་དོ། །འདྲེན་པའི་བསམ་པ་དང་འཆག་པའི་བསམ་པ་ཡིན་ན་ལྟུང་བ་མེད་དོ། །ཆུ་དྲེག་ཉམས་པར་གྱུར་ཅིག་ཅེས་འཆག་ན་ཉེས་བྱས་སོ། །ཁུ་ཚན་དང། ཤིང་ལ་སོགས་པ་ལ་ཡང་ངོ། །འཆག་པའི་བསམ་པས་ཡིན་ན་ལྟུང་བ་མེད་དོ། །ཉ་ལྕིབས་ཆུ་ནས་ཇི་སྲིད་མ་བཏོན་པ་དེ་སྲིད་དུ་ཉེས་བྱས་སོ། །བཏོན་ན་ལྟུང་བྱེད་དོ། །རྩ་བ་མེད་པའི་ས་བོན་གྱི་ཁམས་འབྱིན་ན་ཉེས་བྱས་སོ། །ཉ་ཚང་དང་ཕ་བ་ལྒོ་ལྒོ་དང། ཤ་མོ་འབྱིན་ན་ཉེས་བྱས་སོ། །བུམ་པའི་འདམ་སྐྱ་བོ་འཕྱི་ན་ཉེས་བྱས་སོ། །ཁ་ཟས་འདམ་སྐྱ་བོ་ཟ་ན་ཉེས་བྱས་སོ། །གལ་ཏེ་རུང་བར་བྱས་པ་ཡིན་ན་ལྟུང་བ་མེད་དོ། །ལྟུང་བྱེད་གཉིས་པའི་དང་པོ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་མཛའ་བོ་དང། ས་ལ་སྐྱེས་ཀྱིས་དྲུག་སྡེ་རྣམས་ཀྱི་མདུན་དུ། ཚེ་དང་ལྡན་པ་གྱད་བུ་ནོར་ལ་འཕྱ་བར་བྱེད་པ་ན། དེ་བཞིན་དུ་དགེ་སློང་མ་མཛའ་མོ་ཞེས་བྱ་བ་ཡང་བཅུ་གཉིས་སྡེ་རྣམས་ཀྱི་མདུན་དུ་གྱད་བུ་ནོར་ལ་འཕྱ་བར་བྱེད་དོ། །དེ་ནས་དགེ་སློང་མ་གནས་བརྟན་གནས་བརྟན་དག་གིས་འདི་སྐད་ཅེས་སྨྲས་སོ། །མཛའ་མོ་འཁོར་གྱིས་གཙོ་བོ་ལ་མ་འཕྱ་ཞིག །དེ་ལ་དེ་སྐད་དུ་བསྒོ་བ་ན། འོན་ཀྱང་འཕྱ་བར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་

---

^{[མ་དཔེ་གཟིགས་ན་འདིར་གནོན།]}

པ། དགེ་སློང་མས་དགེ་སློང་མ་མཛའ་མོ་ངོར་འཕྱ་བའི་གྲངས་སུ་ཆུག་ཅིག །གྲངས་སུ་གཞུག་པ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ནས་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་མཛའ་མོ་འདི་ཚེ་དང་ལྡན་པ་གྱད་བུ་ནོར་ལ་ངོར་འཕྱ་ལགས་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། དགེ་སློང་མ་མཛའ་མོ་ངོར་འཕྱ་བའི་གྲངས་སུ་སྩལ་ཏོ། །འདི་ནི་གསོལ་བའོ། །དེ་བཞིན་དུ་ལས་ཀྱང་བརྗོད་པར་བྱའོ། །འོན་ཀྱང་གཞོག་འཕྱས་ཀྱིས་འཕྱ་བར་བྱེད་པ་ནས་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་མཛའ་མོ་གཞོག་འཕྱས་བྱེད་པའི་གྲངས་སུ་ཆུག་ཅིག་ཅེས་བྱ་བའི་བར་ཏེ། འདི་ནི་གསོལ་བའོ། །ལས་ཀྱང་བརྗོད་པར་བྱའོ། །ཕྱི་ནས་གཞོག་འཕྱས་དང། ངོར་འཕྱ་བ་གཉིས་ཀ་བྱེད་ནས་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་མཛའ་མོ་གཉི་གར་འཕྱ་བའི་གྲངས་སུ་ཆུག་ཅིག་ཅེས་བྱ་བའི་བར་ཏེ། གསོལ་བ་དང། ལས་ཀྱང་བརྗོད་པར་བྱའོ། །དེ་དེ་ལྟར་བསྒོ་ཡང་འཕྱ་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། འཕྱའམ་གཞོག་འཕྱས་བྱེད་ན་ལྟུང་བྱེད་དོ། །འཕྱའམ་ཞེས་བྱ་བ་ནི་འཕྱ་བའི་བསམ་པ་ཅན་གྱི་གང་དག་དང། ཚིག་དང། བརྗོད་པ་ཞེས་བྱ་བའི་བར་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མ་གྲངས་སུ་བཅུག་པར་གྱུར་པས་ཡང་དགེ་འདུན་གྱིས་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་གྱུར་

---

^{[མ་དཔེ་གཟིགས་ན་འདིར་གནོན།]}

པས་ཡང་དགེ་འདུན་གྱིས་མ་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང། གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་གྱུར་པས་ཡང་དགེ་འདུན་གྱིས་མ་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་གྱུར་པས་ཡོང། དགེ་འདུན་གྱིས་མ་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་བཏང་བ་རྣམས་ལ་འཕྱ་ན་ལྟུང་བྱེད་དོ། །གཞོག་འཕྱས་བྱེད་ན་ལྟུང་བྱེད་དོ། །འཕྱ་བ་དང་གཞོག་འཕྱས་བྱེད་ན་ལྟུང་བྱེད་དོ། །དགེ་སློང་མ་གྲངས་སུ་བཅུག་པར་མ་གྱུར་པས་ཀྱང་དགེ་འདུན་གྱིས་བསྐོས་པའི་དགེ་སློང་མ་བཅུ་གཉིས་པོ་སྦྱོར་བ་མ་བཏང་བ་རྣམས་ལ་འཕྱ་ན་ཉེས་བྱས་སོ། །གཞོག་འཕྱས་བྱས་ན་ཉེས་བྱས་སོ། །འཕྱ་བ་དང། གཞོག་འཕྱས་བྱེད་ན་ཉེས་བྱས་སོ། །དེ་བཞིན་དུ་མུ་གཞན་གསུམ་རྒྱས་པར་བརྗོད་པར་བྱའོ། །ལྟུང་བྱེད་གཉིས་པའི་གཉིས་པ་རྫོགས་སོ། །གླེང་གཞི་ནི་ཀོའུ་ཤམྦི་ནའོ། །དེ་ནས་དགེ་སློང་མ་འདུན་མ་ལ་ལྟུང་བ་བྱུང་བ་དང། དེ་ལ་ཚངས་པ་མཚུངས་པར་སྤྱོད་པ་དོན་འདོད་པ། ཕན་པར་འདོད་པ། བདེ་བར་འདོད་པ། རེག་པར་འདོད་པ། གྲུབ་པ་དང་བདེ་བར་འདོད་པ་རྣམས་ཀྱིས་སྨྲས་པ། ཕུ་ནུ་མོ་ཁྱོད་ལ་ལྟུང་བ་བྱུང་གི་དེ་ཤོག་ཅིག །དེ་དགེ་སློང་མ་དེ་རྣམས་ཀྱི་བསྒོ་བ་བཅག་པའི་སྐབས་དེ་དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་འདུན་མ་བསྒོ་བ་གཅོག་པའི་གྲངས་སུ་ཆུག་ཅིག །གྲངས་སུ་གཞུག་པ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ནས་ཞེས་བྱ་བ་ནས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འདུན་མ་འདི་ལྟུང་བ་བྱུང་ནས། དེ་ལ་ཚངས་པ་མཚུངས་པར་སྤྱོད་པ་དོན་

---

^{[མ་དཔེ་གཟིགས་ན་འདིར་གནོན།]}

འཚལ་བ། སྨན་པར་འཚལ་བ། བདེ་བར་འཚལ་བ། རེག་པར་འཚལ་བ། གྲུབ་པ་དང་བདེ་བར་འཚལ་བ་རྣམས་ཀྱིས་སྨྲས་པ། འདུན་མ་ཁྱོད་ལ་ལྟུང་བ་བྱུང་གི་དེ་ཤོག་ཅིག་ཅེས་བགྱི་ན། དེ་དགེ་སློང་མ་རྣམས་ཀྱི་བསྒོ་བ་གཅོག་པར་བགྱིད་པར་ལགས་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འདི་ལྟར་འཕགས་མའི་དགེ་འདུན་གྱིས་གནང་བ་མཛོད་ཅིག་དང། དགེ་སློང་མ་འདུན་མ་བསྒོ་བ་གཅོག་པའི་གྲངས་སུ་སྩལ་ཏོ་།འདི་ནི་གསོལ་བའོ། །དེ་ཁོ་ན་བཞིན་ལས་ཀྱང་བྱའོ། །དེ་འདི་སྙམ་དུ་མ་ལ་བདག་གིས་ཁ་རོག་པའམ། བདག་གིས་མ་སྨྲས་པར་གྱུར་ན་བདག་གྲངས་སུ་བཅུག་པར་མི་འགྱུར་བ་ཞིག་སྟེ། འདི་ལྟར་ལ་ལས་ཀྱང། སྐྱེས་བུ་མཁས་པར་ལྡན་པ་ཡིས། །ངག་རྣམ་བཞི་པོ་བསྲུང་བྱ་སྟེ། །ནགས་ཀྱི་ནང་ན་གོས་མ་བསྲེག །སྒྲ་འབྱིན་པས་ནི་ཟིན་ལ་ལྟོས། །ཞེས་སྨྲས་སོ་སྙམ་དུ་བསམས་ནས། དེ་ཅང་མི་སྨྲ་བས་དགེ་སློང་མ་རྣམས་ཀྱི་བསྒོ་བ་གཅོག་གོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། གཉིས་ཀས་གཅོག་པའི་གྲངས་སུ་གཞུག་པར་བྱ་སྟེ། གསོལ་བ་དང་ལས་བྱའོ། །དེ་ལ་བསྒོ་བ་ན་འོན་ཀྱང་གཅོག་པར་བྱེད་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། བསྒོ་བ་གཅོག་ན་ལྟུང་བྱེད་དོ། །བསྒོ་བ་གཅོག་པ་ཞེས་བྱ་བ་ནི། བསྒོ་བ་གཅོག་པའི་བསམ་པ་ཅན་གྱི་གང་ངག་དང། ཚིག་དང། བརྗོད་པ་ཞེས་བྱ་བའི་བར་གོང་མ་བཞིན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མ་དགེ་སློང་མའི་དྲུང་དུ་སོང་ནས་འདི་སྐད་ཅེས་ཁྱོད་ཀྱིས། དགེ་སློང་མ་སྐྲ་བྲེགས་ནས་རིང་པོར་མ་ལོན་པ་སྣམ་སྦྱར་དམར་སེར་ཅན་ལྷུང་བཟེད་ཞ་ཉེ་དབྱར་འདབ་ཅན། མར་གྱིས་ལྷུང་བཟེད་བཀང་བའམ། སྤྲང་རྩིས་ལྷུང་བཟེད་བཀང་

---

^{[མ་དཔེ་གཟིགས་ན་འདིར་གནོན།]}

བའམ། འོ་མས་ལྷུང་བཟེད་བཀང་བས་འགྲོ་བ་ཞིག་མཐོང་ངམ་ཞེས་ཟེར་བ་དེ་ལ་དེས་འདི་སྐད་ཅེས་དགེ་སློང་མ་རྐང་གིས་འགྲོ་བ་ཞིག་མཐོང་ངོ་ཞེས་ཟེར་ཏེ། གཞན་དྲིས་ན་ལན་གཞན་ལྡོན་པར་བྱེད་ཅིང་བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ། །དགེ་སློང་མ་དགེ་སློང་མའི་དྲུང་དུ་སོང་སྟེ། འདི་སྐད་ཅེས་ཁྱོད་ཀྱིས་དགེ་སློང་མ་སྐྲ་བྲེགས་ནས་རིང་པོ་མ་ལོན་པ་སྣམ་སྦྱར་དམར་སེར་ཅན་ལྷུང་བཟེད་ཞ་ཉེའི་དབྱར་འདབ་ཅན་འཁར་གསིལ་ལྕགས་ཀྱིས་དཀྲིས་ནས་བྱུང་བ་ཞིག་མཐོང་ངམ་ཞེས་ཟེར་བ་ན་ཞེས་བྱ་བ་ནས། གཞན་ཐམས་ཅད་བརྗོད་དེ་བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ་ཞེས་བྱ་བའི་བར་རོ། །དགེ་སློང་མས་དགེ་སློང་མའི་དྲུང་དུ་སོང་སྟེ་ཁྱོད་ཀྱིས་ལམ་འདི་ནས་ཁྱིམ་པ་བུ་རམ་ཤིང་གི་ཁུར་རམ། འདམ་བུའམ། སྨིག་མའམ། མདའི་ཁུར་རམ། མར་གྱི་བུམ་པའམ། འབྲུ་མར་རམ། སྦྲང་རྩིའམ། བུ་རམ་གྱི་དབུ་པའི་བུམ་པས་འགྲོ་བ་མཐོང་ངམ། ཞེས་ཟེར་བ་ན། དེ་འདི་སྐད་ཅེས་ཁོ་མོས་ཁྱིམ་པ་རྐང་པས་འོང་བ་ཞིག་མཐོང་གི་།རྒྱུ་གཞན་དག་གིས་ནི་མ་ཡིན་ནོ་ཞེས་ཟེར་ཏེ་གཞན་དྲིས་ན་ལན་གཞན་ལྡོན་པར་བྱེད་ཅིང། བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ། །དགེ་སློང་མ་དགེ་སློང་མའི་དྲུང་དུ་སོང་ནས་འདི་སྐད་ཅེས་ཁྱོད་ཀྱིས་ལམ་འདི་ནས་ཁྱིམ་པ་མོ་ཐམས་ཅད་སྡོ་བའམ། ཐམས་ཅད་སེར་བའམ། ཐམས་ཅད་དམར་བའམ། ཐམས་ཅད་དཀར་བ་བགོས་པས་འགྲོ་བ་མཐོང་ངམ་ཞེས་འདྲི་བ་ན་ཁོ་མོས་ཁྱིམ་པ་མོ་རྐང་གིས་འགྲོ་བ་ཞིག་མཐོང་ངོ་ཞེས་ཟེར་ཏེ་གཞན་དྲིས་ན་ལན་གཞན་ལྡོན་པར་བྱེད་ཅིང། བསྒོ་བ་གཅོག་པའི་བསམ་པས་ཡིན་ན་ལྟུང་བྱེད་དུ་འགྱུར་རོ། །གལ་ཏེ་གཤེད་མའི་དྲུང་ནས་བྲོས་པ་ཞིག །གཤེད་མས་རྗེས་ཐོགས་ལ། དེ་དགེ་སློང་མའི་དྲུང་དུ་སོང་ནས་འདི་སྐད་ཅེས་འཕགས་མ་ཁྱོད་ཀྱིས་ལམ་འདི་ནས་གསད་པ་ཞིག་བྲོས་པ་གཟིགས་སམ་ཞེས་དྲིས་ན། དེས་དེ་ལ་གསོད་པའི་གཤེད་མ་ལ་རིགས་པས་བརྗོད་པར་བྱ་སྟེ། གལ་ཏེ་ཚ་བའི་དུས་

---

^{[མ་དཔེ་གཟིགས་ན་འདིར་གནོན།]}

ཡིན་ན་བཞིན་བཟང་རེ་ཞིག་ཡུད་ཙམ་ཞིག་ངལ་སོས་ཤིག །རེ་ཞིག་ཆུ་གྲང་མོ་དག་འཐུངས་ཤིག །ཅེས་བསིལ་ཡབ་དག་གིས་གཡབ་པར་བྱའོ། །གལ་ཏེ་གྲང་བའི་དུས་ཡིན་ན། འདི་སྐད་ཅེས་བཞིན་བཟང་རེ་ཞིག་བསྲོ་ཁང་དུ་ཞུགས་ཤིག །ཡུད་ཙམ་ཞིག་གནས་དྲོན་པོར་ངལ་སོས་ཤིག་ཅེས་བརྗོད་པར་བྱའོ། །གལ་ཏེ་གཤེད་མ་དེ་འདི་སྐད་ཅེས་བདག་རིངས་ཀྱི། ཐོང་ཞིག་ཅེས་ཟེར་ན། དེ་ལ་འདི་སྐད་ཅེས་ནམ་མཁའ་ལ་བལྟས་ཏེ། ནམ་མཁའ་མཐོང་ངོ་ཞེས་བརྗོད་པར་བྱའོ། །དེ་བཞིན་དུ་སེན་མོ་ལ་བལྟས་ཏེ། སེན་མོ་མཐོང་ངོ་ཞེས་བརྗོད་པར་བྱའོ། །གལ་ཏེ་གཤེད་མ་ཟིན་པོ་ཞིག་སྟེ། འདི་སྐད་ཅེས་བདག་རྣམ་པ་འདི་དག་མི་འདྲིའོ། །བདག་ནི་གསད་པ་འདྲིའོ་ཞེས་ཟེར་ན། དགེ་སློང་མ་དེས་འདུ་བྱེད་ཐམས་ཅད་སྟོང་པ་ཉིད་དུ་ལྷག་པར་མོས་པར་བྱས་ལ་ཅུང་ཟད་ཀྱང་མཐོང་བ་མེད་དོ། ཞེས་བརྗོད་པར་བྱའོ། །དགེ་སློང་མ་དགེ་སློང་མའི་དྲུང་དུ་སོང་སྟེ་དེ་སྐད་ཅེས་འདྲི་བ་ལ་གལ་ཏེ་དགེ་སློང་མས་ཅང་མི་སྨྲ་བས་གཅོག་ན་ལྟུང་བྱེད་དུ་འགྱུར་རོ། །གལ་ཏེ་ན་བའི་སྨན་ཁར་བཅུག་པར་གྱུར་པའམ། ཁའི་ནད་ཀྱིས་ཐེབས་པ་ལ་ལྟུང་བ་མེད་དོ། །ལྟུང་བྱེད་གཉིས་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་རྣམས་ཀྱི་བླ་གབ་མེད་པའི་གནས་མལ་རབ་ཏུ་མང་པོ་གཟིགས་ནས་བསླབ་པའི་གཞི་བཅའ་བ་མཛད་པ་དང། དེ་ན་རང་བཞིན་དུ་གནས་པའི་དགེ་སློང་མ་གང་དག་ཡིན་པ་དེ་དག་ནི་བསླབ་པའི་གཞི་དེའི་རྗེས་སུ་སྒྲུབ་པར་བྱེད་དོ། །དེ་ནས་དགེ་སློང་མ་བཅུ་གཉིས་སྡེ་རྣམས་ཀྱིས་བླ་གབ་མེད་པའི་གནས་མལ་རྣམས་མ་བརྟུལ་བར་མཚམས་ཀྱི་ཕྱི་རོལ་ཏུ་དོང་ངོ། །དེ་ནས་དགེ་སློང་མ་གནས་བརྟན་གནས་བརྟན་དེ་དག་གིས། བཅུ་གཉིས་སྡེ་དེ་རྣམས་ལ་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག །བཅོམ་ལྡན་འདས་ཀྱིས་བསླབ་པའི་གཞི་མ་བཅས་སམ། དེ་དག་གིས་འདི་སྐད་ཅེས་བསླབ་པའི་གཞི་བཅའ་བ་མཛད་པ་དེ་ནི། དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ངས་བསླབ་པའི་གཞི་བཅའ་བ་མཛད་པ་དེ་ནི་གཉི་གའི་ཐུན་མོང་ཡིན་ནོ། །བཅོམ་ལྡན་འདས་ཀྱིས་དེ་ལྟར་བླ་གབ་མེད་པར་གནས་མལ་གཞག་པར་མི་བྱའོ་ཞེས་བཅའ་བ་མཛད་པ་དང། དེ་ནས་དུས་གཞན་ཞིག་ན། དགེ་སློང་མ་རྣམས་དོན་མཐུན་དང་ལྷན་ཅིག་འགྲོགས་ཏེ། རི་བོར་ཞིག་ཏུ་ཕྱིན་པ་དང། དེ་རྣམས་ཀྱིས་གཙུག་ལག་ཁང་དེར་གནས་མལ་རྙེད་ནས་ཕྱི་དེ་ཉིན་པར་གནས་མལ་གཏོད་པ་ན། དོན་མཐུན་དང་ཡང་བྲལ་ནས། དེ་དག་འབའ་ཞིག་དོང་བ་ལས། ཆོམ་རྐུན་པ་རྣམས་ཀྱིས་བཏོགས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། བཅོལ་ཏེ་འདོང་བར་བྱའོ། །བཅོམ་ལྡན་འདས་ཀྱིས་གསུངས་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གཙུག་ལག་ཁང་ན་གནས་ན་། དགེ་སློང་ལ་བཅོལ་བར་བྱའོ། །དབྱར་ཁང་ན་གནས་ན་དགེ་སློང་མ་ལ་བཅོལ་བར་བྱའོ། །དེ་དག་དེ་རྣམས་ལ་འཆོལ་བ་ན་ཡང་ཐོགས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཅོལ་བ་ནི་ལྔ་སྟེ། ལྔ་གང་ཞེ་ན། གཙུག་ལག་ཁང་འདི་རེ་ཞེས་བྱ་བ་དང། གཙུག་ལག་ཁང་ལྟོས་ཤིག་ཅེས་བྱ་བ་དང། གནས་མལ་འདི་རེ་ཞེས་བྱ་བ་དང། གནས་མལ་ལྟོས་ཤིག་ཅེས་བྱ་བ་དང། སྒོ་ལྕགས་གཞུག་པ་ཉིད་ནི་ལྔ་པ་ཡིན་ཏེ། དེ་ལྟར་བྱས་ནས་དེའི་འོག་ཏུ་འདོང་བར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདེད་པ་དང། བསླབ་པ་ལ་གུས་པའི་བསྔགས་པ་བརྗོད་ནས་འདི་སྐད་ཅེས་བཀའ་སྩལ་ཏོ། །ཡང་དགེ་སློང་མ་གང་ཤེས་བཞིན་དུ། དགེ་འདུན་གྱི་ཁྲིའམ་ཁྲིའུ་འམ། སྟན་ནང་ཚངས་ཅན་ནམ། ལ་བའམ། སྔས་སམ། གོར་བུ་བཏིང་བ་མ་བསྡུས་སམ། སྡུད་དུ་མ་བཅུག་གམ། དགེ་སློང་མ་ཡོད་པ་ལ་

---

^{[མ་དཔེ་གཟིགས་ན་འདིར་གནོན།]}

མ་བཅོལ་བར་དེའི་འོག་ཏུ་དོང་ན། དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། ཆོས་འདི་བའོ། །དགེ་འདུན་གྱི། ཞེས་བྱ་བ་ནི། དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །གཙུག་ལག་ཁང་ཞེས་བྱ་བ་ནི། གང་དུ་སྤྱོད་ལམ་བཞི་ཤོང་བའོ། །ཁྲི་ཞེས་བྱ་བ་ནི་ཉལ་བའི་འོ། །ཁྲིའུ་ཞེས་བྱ་བ་ནི་འདུག་པའི་འོ། །སྟན་ནང་ཚངས་ཅན་ཞེས་བྱ་བ་ནི། ཤིང་བལ་ཅན་ནོ། །ལ་བ་ཞེས་བྱ་བ་ནི་ལ་བའོ། །སྔས་ཞེས་བྱ་བ་ནི་སྔས་སུ་གཞུག་པའོ། །གོར་བུ་ཞེས་བྱ་བ་ནི་གྲུ་བཞི་པའོ། །བླ་གབ་མེད་པར་ཞེས་བྱ་བ་ནི་བར་སྣང་ངོ། །བཏིང་བ་ཞེས་བྱ་བ་ནི་རང་ཉིད་ཀྱིས་སོ། །འདིང་དུ་བཅུག་པ་ཞེས་བྱ་བ་ནི་གཞན་ནོ། །མ་བསྡུས་སམ་ཞེས་བྱ་བ་ནི་རང་གིས་སོ། །སྡུད་དུ་མ་བཅུག་པར་ཞེས་བྱ་བ་ནི་གཞན་ནོ། །དེའི་འོག་ཏུ་དོང་ན་ཞེས་བྱ་བ་ནི་ཉེ་འཁོར་སྤངས་ནས་སོ། །གནས་མལ་གྱི་ཉེ་འཁོར་གང་ཞེ་ན། བཅོམ་ལྡན་འདས་ཀྱིས་བཀའ་སྩལ་པ། འདོམ་བཞི་བཅུ་རྩ་དགུའོ། །ཕན་ཕུན་དུ་འགྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །སངས་རྒྱས་བཅོམ་ལྡན་འདས་ལ། ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ་གནས་མལ་ཕན་ཕུན་དུ་འགྱུར་བ་དུ་མཆིས། ཉེ་བར་འཁོར་གཉིས་ཏེ། གཉིས་གང་ཞེ་ན། ཆར་གྱིས་ཕན་ཕུན་དུ་འགྱུར་བ་དང། རླུང་གིས་ཕན་ཕུན་དུ་འགྱུར་བའོ། །ཆར་གྱིས་ཕན་ཕུན་དུ་འགྱུར་བ་གང་ཞེ་ན། ཉེ་བར་འཁོར་གལ་ཏེ་ཆར་གྱིས་ཆུས་གནས་མལ་རིམ་པ་གཉིས་རླན་པར་གྱུར་ན། ལྟུང་བྱེད་དུ་འགྱུར་རོ། །མ་རླན་ན་ཉེས་བྱས་ཏེ། འདི་ནི་ཆར་གྱིས་ཕན་ཕུན་དུ་འགྱུར་བ་ཞེས་བྱའོ། །གལ་ཏེ་རླུང་གིས་རིམ་པ་གཉིས་བཟློག་པར་གྱུར་ན། ལྟུང་བྱེད་དུ་འགྱུར་རོ། །མ་བཟློག་ན་ཉེས་བྱས་སོ། །གལ་ཏེ་ལམ་དུ་ཞུགས་པ་ན་དྲན་ན་དེས་སེམས་བསྐྱེད་པར་བྱ་ཞིང། ཚིག་ཏུ་ཡང་བདག་གིས་གནས་འདི་འདྲ་བ་ཞིག་ཏུ་གནས་མལ་བཞག་པ་ཚངས་པ་མཚུངས་པར་སྤྱོད་པ་རྣམས་ཀྱིས་བརྟུལ་གྲང་ཞེས་བརྗོད་པར་བྱ་ལ། ལྟུང་བ་དེ་ཡང་སླར་ཆོས་བཞིན་བྱའོ། །ལམ་དུ་དགེ་སློང་མ་

---

^{[མ་དཔེ་གཟིགས་ན་འདིར་གནོན།]}

མཐོང་ན་ཐ་ན་བཏའ་བར་བྱ་ཞིང། གར་སོན་ཡང་ཐ་ན་བཏའ་བར་བྱ་བ་ལ་ལྟུང་བ་དེ་ཡང་སླར་ཆོས་བཞིན་དུ་བྱའོ། །དགེ་སློང་མ་ཡོད་པ་ལ་མ་བཅོལ་བར་ཞེས་བྱ་བ་ནི། དེ་ན་ཡོད་པའི་དགེ་སློང་མ་གང་ཡིན་པའོ། །དེ་ལྟ་བུ་མ་གཏོགས་ཏེ་ཞེས་བྱ་བ་ནི། དེའི་སྲོག་གི་བར་ཆད་དུ་འགྱུར་བ་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་གྱི་གཙུག་ལག་ཁང་དུ་དགེ་འདུན་གྱི་ཁྲི་དང། ཁྲིའུ་དང། སྟན་ནང་ཚངས་ཅན་དང་ཞེས་བྱ་བ་ནས། གནས་མལ་བླ་གབ་མེད་པར་བཏིང་ངམ། གདིང་དུ་བཅུག་པ་མ་བསྡུས་སམ། སྡུད་དུ་མ་བཅུག་པར་སོང་ན། ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་མས་དགེ་འདུན་གྱི་གཙུག་ལག་ཁང་དུ་གནས་མལ་བླ་གབ་མེད་པར་བཏིང་ངམ། འདིང་དུ་བཅུག་ལ། གཙུག་ལག་ཁང་དུ་ཞུགས་ནས། དྲན་པ་ཉེ་བར་མ་བཞག་པ་ཉེ་བར་གཞག་པའམ། སེམས་མཉམ་པར་མ་བཞག་པ་མཉམ་པར་གཞག་པའམ། སེམས་རྣམ་པར་མ་གྲོལ་བ་རྣམ་པར་གྲོལ་བར་བྱའོ་ཞེས་ནང་དུ་ཡང་དག་གཞག་ལ། ཐུན་དང་པོ་ཕྱེད་ཁོ་ན་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་དང་པོ་ལ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་དབུ་མ་ལ་ཕྱེད་ཁོར་ན་བྱུང་བ་ན། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་དབུ་མ་ལ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་དུ་ཐ་མ་ལ་ཕྱེད་ཁོར་ན་བྱུང་བ་ན། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་དུ་མ་གྱུར་ན་ཉེས་བྱས་སོ། །དེ་བཞིན་དུ་ཐུན་ཐ་མ་ལ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་སྐྱ་རེངས་ཤར་ཀའི་དུས་ཀྱི་ཚེ་བྱུང་བ་ན་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དེ་བཞིན་དུ་སྐྱ་རེངས་ཐ་མ་དང། དེ་བཞིན་དུ་གླང་པོ་ཆེ་འདོན་པའི་དུས་ཀྱི་ཚེ་དང། དེ་བཞིན་དུ་

---

^{[མ་དཔེ་གཟིགས་ན་འདིར་གནོན།]}

གླང་པོ་ཆེ་བཏོན་པ་དང། དེ་བཞིན་དུ་ནམ་ཕན་ཕུན་དང། དེ་བཞིན་དུ་ནམ་ནངས་པ་དང། དེ་བཞིན་དུ་ཉི་མ་འཆར་ཀའི་དུས་ཀྱི་ཚེ་དང། དེ་བཞིན་དུ་ཉི་མ་རྩེ་དང། དེ་བཞིན་དུ་དྲོས་བུ་ཆུང་དང། དེ་བཞིན་དུ་དྲོས་ཆེན་དང། དེ་བཞིན་དུ་ཕྱེད་ཡོལ་ན་བྱུང་བ་ན། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །དགེ་སློང་མས་དགེ་འདུན་གྱི་གཙུག་ལག་ཁང་ཞེས་བྱ་བ་ནས། སེམས་རྣམ་པར་མ་གྲོལ་བ་རྣམ་པར་གྲོལ་བར་བྱའོ་ཞེས་ནང་དུ་ཡང་དག་པར་འཇོག་གི་ཕྱིར་ཞུགས་ནས། ཞེས་བྱ་བའི་བར་རོ། །དུང་འབུད་པ་གསུམ་པ་ལ་བྱུང་ནས་ཞེས་བྱ་བ་ནས། ཉི་མ་ནུབ་ཀ་ན་བྱུང་ནས་ཞེས་བྱ་བའི་བར་ཏེ། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །གཞུང་བླ་མའི་བསྡུས་པའི་སྡོམ་ནི། ཆོས་མཉན་པ་དང་དེ་བཞིན་དུ། །ཟན་ཟ་བ་དང་དེ་བཞིན་གྲོང། །གཙུག་ལག་ཁང་དུ་བཅོལ་བ་དང། །ནད་པ་དང་ནི་གནས་མལ་དང། །ལྔ་ལ་བཅོལ་བར་མི་བྱ་དང། །ཁྲི་གཅིག་ལ་ནི་གཉིས་འདུག་པའོ། །དེ་ནས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དགེ་སློང་མའི་དབྱར་ཁང་དུ་ལྷགས་པ་དང། དགེ་སློང་མ་དེ་རྣམས་ཀྱིས་ལྷན་ཅིག་འདུ་འཛིའི་གཏམ་གྱིས་དུས་འདའ་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་འདུ་འཛིའི་གཏམ་སྨྲ་བ་ནི་འཚམ་པ་མ་ཡིན་ནོ། །དེ་ལྟ་མོད་ཀྱི་ཆོས་ཤོད་ཅིག །དེ་དག་ལངས་ཏེ་གུས་ཤིང་མདུན་དུ་འདུག་ནས་ཆོས་འཆད་པར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། འདུག་ལ་ཆོས་བཤད་པར་བྱ་སྟེ། ཁྱིམ་པ་མོ་དེ་རྣམས་ལ་ཡང་སྟན་བསྟབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་འདུག་ལ་ཆོས་བཤད་པར་བྱའོ་ཞེས་བཀའ་སྩལ་པ་དང། དེ་ནས་དགེ་སློང་མ་དེ་རྣམས་ཀྱིས་གྲལ་རིམས་སུ་ཤོམ་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་རྣམ་པ་གཉིས་པོ་ཟླ་གམ་ལྟ་བུའམ། གྲུ་བཞི་པ་གདིང་བར་བྱའོ། །གང་གི་ཚེ་བཅོམ་ལྡན་འདས་ཀྱིས་ཆོས་བཤད་པར་བྱའོ་ཞེས་བཀའ་སྩལ་པ་ན། དེ་དག་གིས་

---

^{[མ་དཔེ་གཟིགས་ན་འདིར་གནོན།]}

གང་གིས་བཤད་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྤོབས་པའི་མཐུ་དང་ལྡན་པར་གྱུར་པ་གང་ཡིན་པ་དེས་བཤད་པར་བྱའོ། །དེ་ནས་རྒན་རིམས་མཐུ་དང་ལྡན་པ་མ་ཡིན་པར་གྱུར་ནས། འོག་མ་གཞོན་རིམས་དག་འཆད་པར་བྱེད་པ་ན་དེ་དག་རྒན་རིམས་ནས་གཞོན་རིམས་སུ་དོང་ནས་ཉན་པར་བྱེད་པས། རྒན་རིམས་དེ་དག་མི་བརྗིད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཆོས་སྨྲ་བའི་སེང་གེའི་ཁྲི་བཤམ་པར་བྱ་ཞིང། སེང་གེའི་ཁྲི་ལས་སྨྲ་བར་བྱའོ། །གང་གི་ཚེ་བཅོམ་ལྡན་འདས་ཀྱིས་སེང་གེའི་ཁྲི་ལས་སྨྲ་བར་བྱའོ་ཞེས་བཀའ་སྩལ་པ་དེའི་ཚེ། མདོ་རིང་པོ་དག་རྒྱས་པར་སྨྲ་བར་བྱེད་པ་ན་ཁྱིམ་པ་མོ་རྣམས་སྐྱོ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཆ་གསུམ་པ་དང། ལྔ་པ་ནས་ཆ་གསུམ་པ་དང། སྟོན་པ་ཡོངས་སུ་བསྒྲགས་པ་ལ་ཚར་བསྲང་སྟེ། སྨྲ་བར་གནང་ངོ་ཞེས་བྱ་བའི་བར་རོ། །ཇི་ཙམ་ན་ཁྱིམ་བདག་མོ་རྣམས་ཟས་དག་གཡོ་བར་བྱེད་པ་ན་དེ་རྣམས་སྣོད་སྤྱད་དག་རྙེད་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། རྙོས་ཤིག །སྟན་དག་རྙེན་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། རྙོས་ཤིག །དེ་ནས་དེ་དག་གྲོང་དུ་མགྲོན་དུ་འབོད་ནས། བཅོམ་ལྡན་འདས་ཀྱིས་བཀའ་སྩལ་པ། དེར་ཡང་དོང་ལ་ལོངས་ཀྱང་སྤྱད་པར་བྱའོ། །དེ་ནས་ཁྱིམ་བདག་མོ་རྣམས་ཀྱིས་དེ་དག་ལ། འདི་སྐད་ཅེས་འཕགས་མ་དག་ཁྱེད་ཅག་ཅིའི་སླད་དུ། ཆབ་སྣོད་དག་སྣོམས་ཏེ་མ་བྱོན་ཞེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་པ། དེར་ཡང་བུམ་པ་དང། རིལ་བ་དང། སྟན་དང། སེང་གེའི་ཁྲི་དག་བཀུར་བར་བྱའོ། །ཇི་ཙམ་ན་དགེ་སློང་མ་ནད་པ་ཞིག་ཡོད་པ་དེས་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག་འཆི་བར་འགྱུར་རོ། །དེ་དག་གིས་འདི་སྐད་ཅེས་སྨྲས་སོ། །ཅི་སྟེ། དེས་འདི་སྐད་ཅེས་སྨྲས་སོ། །ཁོ་མོ་ནད་པ་ལ་འདྲི་བ་འགའ་ཡང་མེད་དོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་བལྟ་བར་བྱའོ། །ལྟ་བར་མི་བྱེད་ན་འགལ་ཚབས་ཅན་དུ་འགྱུར་རོ། །གང་

---

^{[མ་དཔེ་གཟིགས་ན་འདིར་གནོན།]}

གི་ཚེ་བཅོམ་ལྡན་འདས་ཀྱིས། ནད་པ་ལ་བལྟ་བར་བྱའོ་ཞེས་བཀའ་སྩལ་པ་དང། དེ་ཕྱིན་ཆད་གཎྜཱི་བརྡུངས་ཏེ། དགེ་འདུན་ཐམས་ཅད་ནད་པ་ལ་ལྟ་བའི་ཕྱིར་འདོང་བ་ན། དེ་ནས་ནད་པས་མཐོང་ནས་གང་གི་ཕྱིར་དགེ་འདུན་ཐམས་ཅད་ལྷགས་པ་ལས་ན། བདག་ནི་འཆི་བར་འགྱུར་གོར་མ་ཆག་གོ་།སྙམ་ནས་སྐྲག་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གཅིག་གམ་གཉིས་འགྲོ་བར་བྱའོ། །དེར་དོང་བ་ན་སྟན་དག་མེད་ནས། བཅོམ་ལྡན་འདས་ཀྱིས་བཀའ་སྩལ་པ། ནད་འདྲི་བའི་ཆེད་དུ་སྟན་དག་གདིང་བར་བྱའོ་།གང་གི་ཚེ་བཏིང་བ་དེའི་ཚེ་དེ་དག་འདི་སྙམ་དུ་བཅོམ་ལྡན་འདས་ཀྱིས་བླ་གབ་མེད་པར་གནས་མལ་དོར་བར་མི་བྱའོ་ཞེས་གསུངས་སོ་སྙམ་དུ་སེམས་ཤིང། དེ་དེ་དག་དེ་ཉིད་ན་སྲུང་ཞིང་འཁོད་པ་ན། དེ་དག་གིས་སངས་རྒྱས་དང། ཆོས་དང། དགེ་འདུན་དང། མཁན་པོ་དང། སློབ་དཔོན་གྱི་བྱ་བ་གང་ཡིན་པ་དེ་དེས་ཉམས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། བཅོལ་ལ་འདོང་བར་བྱའོ། །དེ་དག་ནད་པ་ལ་འཆོལ་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཞེས་བྱ་བ་ནས་རྐྱེན་ལྔས་གནས་མལ་བླ་གབ་མེད་པར་བོར་ཏེ་འདོང་བར་མི་བྱའོ། །ཞེས་བྱ་བའི་བར་རོ། །ལྔ་པོ་དེ་དག་གང་ཞེ་ན་ཞེས་བྱ་བ་ནས། རྒས་པ་དང། ངོ་ཚ་མེད་པ་དང། བར་ཆད་དང་བཅས་པ་དང། འགྱོད་པ་མེད་པ་དང། བསྙེན་པར་མ་རྫོགས་པའོ་ཞེས་བྱ་བའི་བར་དེ། དེ་དག་རྐྱེན་དུ་བྱས་ནས་དོང་བར་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ། །གཉིས་ཁྲི་གཅིག་ལ་འདུག་ན། གང་གིས་ཁྲི་བརྟུལ་བར་བྱ། བཅོམ་ལྡན་འདས་ཀྱིས་བཀའ་སྩལ་པ། གཞོན་པས་སོ། །གཉིས་ཀ་གཞོན་པར་གྱུར་ན། གལ་ཏེ་བཟོད་ན་གཅིག་གིས་སོ། །ལྟུང་བྱེད་གཉིས་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ལྷོ་ལམ་ནས་འོངས་པའི་དགེ་སློང་ཞིག་ལ་བརྟེན་ནས། རྩྭའི་གདིང་བའི་བསླབ་པའི་གཞི་བཅའ་བར་མཛད་པ་དེའི་ཚེ་རང་བཞིན་དུ་གནས་

---

^{[མ་དཔེ་གཟིགས་ན་འདིར་གནོན།]}

པའི་དགེ་སློང་མ་དེ་རྣམས་ཀྱིས་ནི་ཐོས་ནས་རྗེས་སུ་སྒྲུབ་པར་བྱེད་དོ། །བཅུ་གཉིས་སྡེ་རྣམས་ཀྱིས་ནི་གདིང་བ་དག་བཏིང་ཞིང། འདིང་དུ་བཅུག་ནས་མི་སྡུད་ཅིང་སྡུད་དུ་མ་བཅུག་གོ་།དེ་ནས་བཅུ་གཉིས་སྡེ་རྣམས་ལ་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག །བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། ཅིའི་ཕྱིར་རྩྭའི་གདིང་པ་དག་མི་བརྟུལ། དེ་དག་གིས་འདི་སྐད་ཅེས་བསླབ་པའི་གཞི་བཅའ་བ་མཛད་པ་དེ་ནི་དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་གྱི་གཙུག་ལག་ཁང་དུ་རྩྭའི་གདིང་བའམ། ལོ་མའི་གདིང་བ་བཏིང་ངམ། འདིང་དུ་གཅུག་ནས་མ་བསྡུས་སམ། སྡུད་དུ་མ་བཅུག་གམ། དགེ་སློང་མ་ཡོད་པ་ལ་མ་བཅོལ་བར་དེ་ནས་སོང་ན་དེ་ལྟ་བུ་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་གོང་མ་བཞིན་ནོ། །རྩྭའི་གདིང་བ་ཞེས་པ་ལ་རྩྭ་ཞེས་བྱ་བ་ནི་རྩྭ་ཉིད་དོ། །ལོ་མ་ཞེས་བྱ་བ་ནི་ལོ་མ་དག་ཉིད་དོ། །བཏིང་ངམ་ཞེས་བྱ་བ་ནི་རང་ཉིད་ཀྱིས་སོ། །གདིང་དུ་བཅུག་པ་ཞེས་བྱ་བ་ནི་གཞན་གྱིས་སོ། །མ་བསྡུས་སམ་ཞེས་བྱ་བ་ནི་རང་གིས་སོ། །སྡུད་དུ་མ་བཅུག་གམ་ཞེས་བྱ་བ་ནི་གཞན་ནོ། །དེ་ནས་སོང་ན་ཞེས་བྱ་བ་ནི་ཉེ་འཁོར་སྤངས་ནའོ། །གདིང་བའི་ཉེ་འཁོར་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འདོམ་བཞི་བཅུ་རྩ་དགུ་སྟེ། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །ཉེ་བར་འཁོར་གྱིས་ཞུས་པ། གདིང་བ་ལ་ཕན་ཕུན་དུ་འགྱུར་བ་དུ་མཆིས། ཉེ་བར་འཁོར་གཉིས་ཏེ། རླུང་གིས་ཕན་ཕུན་དུ་འགྱུར་བ་དང། སྲིན་གྱིས་ཕན་ཕུན་དུ་འགྱུར་བའོ། །རླུང་གིས་ཕན་ཕུན་དུ་འགྱུར་

---

^{[མ་དཔེ་གཟིགས་ན་འདིར་གནོན།]}

བ་གང་ཞེ་ན། རླུང་གིས་གདིང་བ་རིམ་གཉིས་བཟློག་པར་གྱུར་པ་སྟེ། ལྟུང་བྱེད་དུ་འགྱུར་རོ། །མ་བཟློག་ན་ཉེས་བྱས་ཏེ། འདི་ནི་རླུང་གིས་ཕན་ཕུན་དུ་གྱུར་པ་ཞེས་བྱའོ། །སྲིན་གྱི་ཕན་ཕུན་དུ་གྱུར་པ་གང་ཞེ་ན། གལ་ཏེ་སྲིན་རྣམས་ཀྱིས་གདིང་བ་རིམ་གཉིས་གློངས་པར་གྱུར་པ་སྟེ། གློངས་ན་ལྟུང་བྱེད་དོ། །མ་གློངས་ན་ཉེས་བྱས་སོ། །ལམ་དུ་དོང་བ་ན་དྲན་ན་ཞེས་བྱ་བ་ནས་གནས་མལ་ལ་ཇི་ལྟ་བ་བཞིན་དུ་རྒྱས་པར་སྦྱར་བར་བྱའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གང་ཡང་དགེ་སློང་མས་དགེ་འདུན་གྱི་གཙུག་ལག་ཁང་དུ་རྩྭའི་གདིང་བའམ། ལོ་མའི་གདིང་བ་བཏིང་ངམ། འདིང་དུ་བཅུག་ནས་མ་བསྡུས་སམ། སྡུད་དུ་མ་བཅུག་པར་དེ་ཇི་སྲིད་དུ་ཉེ་འཁོར་སྤངས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཡང་དགེ་སློང་མ་གང་ཞིག་དགེ་འདུན་གྱི་གཙུག་ལག་ཁང་དུ་རྩྭའི་གདིང་བའམ། ལོ་མའི་གདིང་བ་བླ་ག་བ་མེད་པར་བཏིང་ངམ། འདིང་དུ་བཅུག་ནས། གཙུག་ལག་ཁང་དུ་ཞུགས་ཏེ། དྲན་པ་ཉེ་བར་མ་བཞག་པ་ཉེ་བར་གཞག་པ་དང། སེམས་མཉམ་པར་མ་བཞག་པ་མཉམ་པར་གཞག་པ་དང། སེམས་རྣམ་པར་མ་གྲོལ་བ་རྣམ་པར་གྲོལ་བར་བྱའོ་ཞེས་ནང་དུ་ཡང་དག་གཞག་ལ་ཐུན་དང་པོ་ཕྱེད་ཁོར་ན་བྱུང་ལ། ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ། །ཉི་མ་ནུབ་ཀ་ན་ཞེས་བྱ་བ་ནས་ཕན་ཕུན་དུ་གྱུར་ན་ལྟུང་བྱེད་དོ། །ཕན་ཕུན་དུ་མ་གྱུར་ན་ཉེས་བྱས་སོ་ཞེས་བྱ་བའི་བར་གནས་མལ་ལ་ཇི་ལྟ་བ་བཞིན་དུ་རྒྱས་པར་སྦྱར་བར་བྱའོ། །ལམ་ཀར་གནས་མལ་བཏིང་བ་ལ་ཉལ་བ་དེ་དག་འགྱོད་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། གློང་བར་བྱའོ། །གློང་བར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་ཕྱིས་དབྱར་ཁང་དུ་ཚོན་རྩིའི་ལས་དག་བྱེད་པ་ན་དགེ་སློང་མ་རྣམས་ཀྱིས་རྩྭ་དག་བཀྲམ་པར་གྱུར་པ་དང། བསླབ་པ་འདོད་པ་དེ་དག་གིས་རྩྭ་དེ་དག་བསྡུས་ནས་དབྱར་ཁང་གི་ཕྱི་རོལ་ཏུ་བོར་བ་དང། གཞན་

---

^{[མ་དཔེ་གཟིགས་ན་འདིར་གནོན།]}

དག་ཕོངས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་འགའ་ཞིག་སེམས་ལས་ཆུང་བར་གྱིས་ཤིག་ཅེས་ཟེར་ན་མི་དོར་རོ། །ལྟུང་བྱེད་གཉིས་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་དབྱར་གྱི་ཐལ་ནས་རྒྱུ་ཞིང་སོང་བ་དང། དེ་ནས་དགེ་སློང་མ་གཞོན་ནུ་རྣམས་ཀྱིས། མཁན་མོ་དང། སློབ་དཔོན་མ་དག་ལ་འདི་སྐད་ཅེས་སྨྲས་སོ། །འཕགས་མ་དག །བདག་ཅག་ཀྱང་རྒྱུ་ཞིང་མཆི་ལགས་སོ། །དེ་དག་གིས་དྲིས་པ། སུ་དང་ལྷན་ཅིག །དེ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོ་དང་ངོ། །དེ་དག་གིས་འདི་སྐད་ཅེས་སྨྲས་སོ། །མ་འདོང་ཞིག །ཅིའི་སླད་དུ། དེ་དག་གིས་འདི་སྐད་ཅེས་སྨྲས་སོ། །སྦོམ་དགའ་མོ་ནི་གནས་ངན་ལེན་ཀུན་ཏུ་སྤྱོད་པ་ཡིན་ནོ་ཞེས་དེ་དག་གིས་དེ་ལྟར་བཟློག་ཀྱང། དེ་དང་ལྷན་ཅིག་རྒྱུ་ཞིང་དོང་སྟེ། དེ་དག་རྒྱུ་ཞིང་དོང་བ་ན་རི་བོར་ཞིག་ཏུ་ཕྱིན་ཏོ། །དེ་ནས་གཞོན་ནུ་དེ་རྣམས་ཀྱིས་རྩྭ་དག་བསླངས་ཏེ་གདིང་བ་བཤམས་ནས། དེ་དག་ཉལ་བ་དང། སྦོམ་དགའ་མོས་དབུས་སུ་མཆོངས་ནས་སྣད་པར་བྱས་ཤིང་བུལ་ཏེ་གོ་བཤུགས་ནས། འདི་སྐད་ཅེས་སུ་ལ་གནོད་པར་འགྱུར་པ་དེ་དག་འདོང་བར་འགྱུར་གྲང་ཞེས་སྨྲས་སོ། །དེ་ནས་དགེ་སློང་མ་དེ་རྣམས་ཕྱི་དེ་ཉིན་པར་སླར་ལོག་པ་དང། དེ་ནས་དགེ་སློང་མ་སྦོམ་དགའ་མོས་དེ་དག་ལ་འདི་སྐད་ཅེས་སྨྲས་སོ། །ཁོ་མོས་ཁྱོད་ལ་ནད་ཀྱི་སྨན་ལ་སོགས་པ་སྦྱར་བར་བྱའོ་ཞེས་བྱ་བ་ནས། གཞོན་ནུ་མ་དེ་དག་གིས་སྐབས་དེ་མཁན་མོ་དང། སློབ་དཔོན་མ་དག་ལ་རྒྱས་པར་སྨྲས་སོ་ཞེས་བྱ་བའི་བར་རོ། །དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་སྔ་ནས་འཁོད་པར་ཤེས་བཞིན་དུ། དེའི་འོག་ཏུ་འོངས་ནས། སུ་ལ་གནོད་པར་འགྱུར་བ་དེ་འགྲོ་བར་འགྱུར་བ་དེ་ཉིད་རྐྱེན་དུ་བྱས་

---

^{[མ་དཔེ་གཟིགས་ན་འདིར་གནོན།]}

ཏེ་ཕྱིས་གནོན་བྱས་ནས་སྟན་ལ་འདུག་པར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། བདག་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །སྔ་ནས་འཁོད་པར་ཞེས་བྱ་བ་ནི། སྔ་ནས་འདུག་པར་རོ། །ཕྱིས་གནོན་བྱས་ནས་ཞེས་བྱ་བ་ནི། འཕྲལ་དུ་མཐུས་སོ། །སྟན་ལས་ཞེས་བྱ་བ་ནི་གདིང་བ་ལའོ། །འདུག་པར་བྱེད་ན་ཞེས་བྱ་བ་ནི། འདུག་པར་བྱེད་པའམ། ལུས་སྙོལ་པར་བྱེད་པའོ། །སུ་ལ་གནོད་པར་འགྱུར་པ་ཞེས་བྱ་བ་ནི། གོ་མི་ཚུགས་པ་གང་ཡིན་པའོ། །དེ་འགྲོ་བར་འགྱུར་གྲང་ཞེས་བྱ་བ་ནི། དེ་ལངས་ཏེ་འགྲོ་བའོ། །དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི། གཞན་མ་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་དག་སྔ་ནས་འཁོད་པར་ཤེས་བཞིན་དུ་སུ་ལ་གནོད་པར་འགྱུར་བ་དེ་འགྲོ་བར་འགྱུར་གྲང་ཞེས་ཕྱིས་གནོན་བྱས་ནས་སྟན་ལ་འདུག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ནད་པ་ཡིན་ན་ལྟུང་བ་མེད་དོ། །གལ་ཏེ་སྐྲག་པ་ཡིན་ན་ལྟུང་བ་མེད་དོ། །ལྟུང་བྱེད་གཉིས་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་དང་བཅས་ཏེ། ལྗོངས་རྒྱུ་ཞིང་སོང་བ་ན་མཉན་ཡོད་དུ་ཕྱིན་ཏོ། །བཅོམ་ལྡན་འདས་ཀྱི་བསྟན་པ་ལ་དགེ་སློང་དང། དགེ་སློང་མ་རྣམས་གནས་མལ་འགེད་པར་བྱེད་པ་འདི་ནི་ལུགས་ཡིན་པས། དེ་ནས་དགེ་སློང་མའི་དབྱར་ཁང་གི་གནས་མལ་འགེད་པ་ན་སྦོམ་དགའ་མོའི་སྐལ་པར་སྟེང་གི་ཡང་ཐོག་ཅིག་བབ་པ་ལས། དེ་ཤེས་བཞིན་དང་མི་ལྡན་པར་གནས་མལ་ལ་འདུག་སྟེ། དེ་འདུག་པ་ན་ཁྲིའི་རྐང་པས་རྐང་བས་ཁང་ཐོག་རྡོལ་བར་བྱས་ཏེ། ཁྲིའི་རྐང་པ་ལྟུང་བས། དེའི་འོག་ན་དགེ་སློང་མ་ཞིག་ཡོད་པའི་མགོ་བོ་བརྟོལ་བ་དང། དོན་ཉུང་བའི་དགེ་སློང་མ་དེ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་

---

^{[མ་དཔེ་གཟིགས་ན་འདིར་གནོན།]}

པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྟེང་གི་ཡང་ཐོག་ཏུ་ཁྲིའམ། ཁྲིའུ་རྩ་བ་འབྱུང་བ་ལ་ལྗིད་ཀྱིས་མནན་ཏེ་ཉལ་ལམ་འདུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །དགེ་འདུན་གྱིས་ཞེས་བྱ་བ་ནི། དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །གཙུག་ལག་ཁང་ཞེས་བྱ་བ་ནི། གང་དུ་སྤྱོད་ལམ་བཞི་ཤོང་བའོ། །སྟེང་གི་ཞེས་བྱ་བ་ནི་ཁང་ཐོག་གི་སྟེང་ངོ། །ཡང་ཐོག་ཅེས་བྱ་བ་ནི་གནས་ཁང་ངོ། །རྩ་བ་འབྱུང་བ་ལ་ཞེས་བྱ་བ་ནི་རྐང་པ་འབྱུང་བའོ། །འདུག་གམ་ཞེས་བྱ་བ་ནི་འདུག་པར་བྱེད་པའོ། །ཉལ་ལམ་ཞེས་བྱ་བ་ནི་ལུས་སྙོལ་བར་བྱེད་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྟེང་གི་ཁང་ཐོག་གི་ཡང་ཐོག་ཏུ་ཁྲིའམ། ཁྲིའུའི་རྩ་བ་འབྱུང་བ་ལ་འདུག་གམ་ཉལ་ན་ཐམས་ཅད་དུ་ལྟུང་བྱེད་དུ་གྱུར་རོ། །གལ་ཏེ་སོ་ཕག་གིས་གཡོགས་པའམ། སྤང་ལེབ་ཀྱིས་གཡོགས་པའམ། དྲལ་བུའམ། ཤིང་ལེབ་བམ། ཤིང་ལེབ་ཆུང་དུས་གཡོག་པའམ། ཞལ་ཞལ་བྱས་པའམ། རྐང་རྟེན་བཅུག་པ་ལ་ནི་ལྟུང་བ་མེད་དོ། །ལྟུང་བྱེད་གཉིས་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ཚེ་སྦོམ་དགའ་མོ་སྲོག་ཆགས་དང་བཅས་པའི་ཆུས་རྩྭ་ལ་འདེབས་པར་བྱེད། ས་དང། ལྕི་བ་ལ་ཡང་འདེབས་པར་བྱེད་ནས། དེ་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་སྲོག་ཆགས་དང་བཅས་པའི་ཆུས་རྩྭའམ་ལྕི་བ་ལ་མ་འདེབས་ཤིང། དེས་འདི་སྐད་ཅེས་ཅི་ཁོ་མོ་ལ་བགྲངས་ཏེ་གཏད་དམ། ཤར་གྱི་རྒྱ་མཚོ་ཆེན་པོར་འདོང་ན་ཅི་ཉེས། ལྷོ་དང། ནུབ་དང། བྱང་གི་རྒྱ་ཆེན་པོར་འདོང་ན་ཅི་ཉེས་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་མཛད་དེ། ཡང་དགེ་སློང་མ་གང་སྲོག་ཆགས་དང་བཅས་པའི་ཆུས། རྩྭའམ། ལྕིའམ། ས་ལ་འདེབས་སམ། འདེབས་སུ་

---

^{[མ་དཔེ་གཟིགས་ན་འདིར་གནོན།]}

འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །སྲོག་ཆགས་དང་བཅས་པས་ཞེས་བྱ་བ་ལ། སྲོག་ཆགས་ནི་གཉིས་ཏེ། གང་དག་མིག་ལམ་དུ་སྣང་བར་གྱུར་བ་དང། གང་དག་ན་ཚགས་ཀྱིས་ཟིན་པར་འགྱུར་བའོ། །ཆུས་ཞེས་བྱ་བ་ནི་ཆུས་རྩྭའམ་སའམ། འཇི་བའམ། ལྕི་བའམ། ལུད་ལའོ། །འདེབས་སམ་ཞེས་བྱ་བ་ནི་བདག་ཉིད་ཀྱིས་སོ། །འདེབས་སུ་བཅུག་ན་ཞེས་བྱ་བ་ནི་གཞན་དག་གོ་།ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། སྲོག་ཆགས་དང་བཅས་པའི་ཆུ་ལ། སྲོག་ཆགས་དང་བཅས་པའི་ཆུར་འདུ་ཤེས་ཏེ། འདེབས་སམ། འདེབས་སུ་འཇུག་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྲོག་ཆགས་མེད་པའི་ཆུ་ལ་སྲོག་ཆགས་དང་བཅས་པར་འདུ་ཤེས་ནས་འདེབས་སམ། འདེབས་སུ་འཇུག་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དགེ་སློང་མས་ཡུར་བ་འདྲེན་པར་བྱེད་ན། དེར་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བྱེད་དུ་འགྱུར་རོ། །ཇི་སྙེད་མ་ཤི་བ་དེ་སྙེད་ཀྱི་ཉེས་བྱས་སུ་འགྱུར་རོ། །དེ་བཞིན་དུ་རྒྱུན་གཅོད་པར་བྱེད་པ་དང། ཞིང་གི་དཀའ་གཅོད་པ་དང། འགོག་ཅིང་གཏོང་བ་སྟེ། ཐམས་ཅད་དུ་གཞི་ཇི་ལྟ་བ་བཞིན་དུ་འགྱུར་རོ། །ལྟུང་བྱེད་གཉིས་པའི་བརྒྱད་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅོ་བརྒྱད་པ། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། བསོད་ནམས་དག་ནི་བྱ་བ་སྟེ། །བསོད་ནམས་མ་བྱས་སྡུག་བསྔལ་འགྱུར། །འཇིག་རྟེན་འདི་དང་ཕ་རོལ་ཏུ། །བསོད་ནམས་བྱས་པ་དགའ་བར་འགྱུར། །ཞེས་བཀའ་སྩལ་པ་དེའི་ཚེ། དགེ་སློང་མ་དེ་དག་གིས་གནས་ཁང་དང། ར་བ་དང། སྒོ་ཁང་ལ་སོགས་པ་བྱ་བར་བརྩམས། སོ། །དེ་ནས་སྦོམ་དགའ་མོས་བསམས་པ། བདག་གིས་འདི་ལྟ་བུའི་བསོད་ནམས་ཀྱི་ཕུང་པོ་ལས་ཡོངས་སུ་ཉམས་སོ་སྙམ་དུ་བསམས་ནས། སྔ་དྲོ་ཤམ་ཐབས་བགོས། ལྷུང་བཟེད་

---

^{[མ་དཔེ་གཟིགས་ན་འདིར་གནོན།]}

དང་། ཆོས་གོས་བླངས་ཏེ། ཚོང་དཔོན་གྱི་ཆུང་མ་ཞིག་གི་དྲུང་དུ་སོང་ནས་སོན་པ་དང། འདི་སྐད་ཅེས་སྨྲས་སོ། །མཚན་བཟང་མ་ནད་མེད་པར་གྱུར་ཅིག །དེ་ནས་ཁྱིམ་བདག་གི་ཆུང་མ་དེས་སྦོམ་དགའ་མོའི་ཕྱིར་སྟན་བཏིང་ངོ། །དེ་ནས་སྦོམ་དགའ་མོ་སྟན་བཏིང་བ་ལ་འདུག་གོ་།འདུག་ནས་རྫས་ལས་བྱུང་བའི་བསོད་ནམས་བྱ་བའི་དངོས་པོ་བདུན་གྱི་མདོ་རྒྱས་པ་རྣམ་པར་ཕྱེ་བས་ཁྱིམ་བདག་གི་ཆུང་མ་དེ་དད་པར་བྱས་ནས། སྐབས་འབྱེད་དུ་བཅུག་གོ་ཞེས་བྱ་བ་ནས། དེས་སྨྲས་པ། གཙུག་ལག་ཁང་གི་རྒྱུ་ཅུང་ཟད་ཅིག་བྱིན་ཅིག་ཅེས་བྱ་བའི་བར་རོ། །དེ་ནས་སྦོམ་དགའ་མོས་དབྱར་ཁང་དེ་ལ་སྟོར་ཁུང་ཡང་མེད། ཆུ་ཁུང་ཡང་མེད་པ་སྦྱང་གི་དབྱིབས་ལྟ་བུ་ཞིག་བརྩིག་པར་བརྩམས་པ་དང། དེ་ནས་དགེ་སློང་མ་དེ་རྣམས་ཀྱིས་སྦོམ་དགའ་མོ་ལ་འདི་སྐད་སྨྲས་སོ། །འཕགས་མ། བཅོམ་ལྡན་འདས་ཀྱི་སྒོ་ཁང་དང། གཏན་པའི་གནས་ཇི་སྲིད་པར་འཇི་བའི་རིམ་པ་གཉིས་སམ། གསུམ་བརྩིག་པར་བྱའོ་ཞེས་བཀའ་སྩལ་པ་མ་ཡིན་ནམ། དེས་འདི་སྐད་ཅེས་དགེ་སློང་རྣམས་ལ་བཀའ་སྩལ་ཀྱི། དགེ་སློང་མ་རྣམས་ལ་ནི་མ་ཡིན་ནོ། །དེ་ལྟ་མོད་ཀྱི་བུ་ཟན་གྱི་བུ་མོ་དག །ཀྱེ་ཁོ་མོ་སྡེ་སྣོད་གསུམ་པ་ཡིན་པས་གཙུག་ལག་ཁང་ཅི་འདྲ་བར་བརྩིག་པ་ཤེས་སོ་ཞེས་སྨྲས་པ་དང། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་གཙུག་ལག་ཁང་ཆེན་པོ་ཞིག་བརྩིག་ཏུ་འཇུག་ན། སྒོ་ཁང་དང། གཏན་པ་དང། སྣང་བའི་གནས་ཇི་ཙམ་པའི་འདུ་ཤེས་ཀྱིས་ས་བརྟག་པ་ནས་བཟུང་སྟེ། འཇི་བའི་རིམ་པ་གཉིས་སམ་གསུམ་པ་བརྩིག་པར་བྱའོ། །དེ་ལས་ལྷག་པར་བརྩིག་ན་ལྟུང་བྱེད་དོ། །ཆེན་པོ་ཞེས་བྱ་བ་ལ། ཆེན་པོ་ནི་གཉིས་ཏེ། སྦྱིན་པར་བྱ་བ་ལས་དང། ཚད་ལས་ཏེ། དོན་འདི་ལ་ནི་སྦྱིན་པར་བྱ་བ་ལས་ཡིན་པར་

---

^{[མ་དཔེ་གཟིགས་ན་འདིར་གནོན།]}

དགོངས་སོ། །གཙུག་ལག་ཁང་ཞེས་བྱ་བ་ནི། གང་དུ་སྤྱོད་ལམ་བཞི་ཤོང་བའོ། །བརྩིག་ཏུ་འཇུག་ན་ཞེས་བྱ་བ་ནི། བདག་ཉིད་དམ། གཞན་ནོ། །སྒོ་ཁང་དང། གཏན་པའི་གནས་ཞེས་བྱ་བ་ནི་སྒོ་ཁང་དང། སྐར་ཁུང་གི་འདུ་ཤེས་དང། ཆུ་ཁུང་གི་འདུ་ཤེས་སོ། །འཇི་བའི་རིམ་པ་གཉིས་སམ་གསུམ་ཞེས་བྱ་བ་ལ། འཇི་བ་ཞེས་བྱ་བ་ནི་འཇིམ་པའོ། །རིམ་པ་ཞེས་བྱ་བ་ནི་རྩེག་མའོ། །བརྩིག་པར་བྱའོ་ཞེས་བྱ་བ་ནི་བསླང་བར་བྱའོ། །དེ་ལས་ལྷག་པར་ཞེས་བྱ་བ་ནི་དེ་ལས་གོང་དུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཇི་བའི་རིམ་པ་གཉིས་སམ། གསུམ་ལས་ལྷག་པར་བརྩིག་ན། ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་གཙུག་ལག་ཁང་རྡོ་བའི་རྒྱུ་ལས་བརྩིག་གམ། གཙུག་ལག་ཁང་གི་བདག་པོ་རིངས་ན་ལྟུང་བ་མེད་དོ། །ལྟུང་བྱེད་གཉིས་པའི་དགུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་ཚེ་དང་ལྡན་པ་ཤཱ་རིའི་བུ་གཅེར་བུ་པའི་འདུག་གནས་སུ་འདུག་ནས། ཁྱིམ་བདག་ཆུང་མ་འཁོར་དང་བཅས་པ་རྒྱུན་དུ་ཞུགས་པའི་འབྲས་བུ་ལ་རབ་ཏུ་བཞག་གོ་།དེ་ཉིད་ལ་རབ་ཏུ་བརྟེན་ནས། སྲོག་ཆགས་ཁྲི་ཉིས་སྟོང་བདེན་པ་མཐོང་བར་བྱས་པ་ན། ཚེ་དང་ལྡན་པ་ཤཱ་རིའི་བུ་ལས་བརྟེན་ཏེ་ལེགས་པར་བརྟགས་ནས། བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་རྣམས་འདུག་གནས་གཅིག་ཏུ་ཉལ་བར་བྱེད། འདུག་གནས་གཅིག་ཏུ་ཟོས་ནས། བསོད་སྙོམས་ཕྱི་མ་ཤོས་ཀྱང་ཟ་བར་བྱེད་པ་དང། རང་བཞིན་དུ་གནས་པའི་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག །བཅོམ་ལྡན་འདས་ཀྱིས་འདུག་གནས་ཀྱི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས། བཅོམ་ལྡན་འདས་ཀྱིས་བཅས་པ་དེ་ནི། དགེ་སློང་རྣམས་ཀྱི་ཡིན་གྱི། དགེ་སློང་མ་རྣམས་ཀྱི་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དོ། །དགེ་སློང་མ་གང་ཡིན་པར་འདུག་གནས་གཅིག་ན་འདུག་པས། བསོད་སྙོམས་ལན་ཅིག་བཟའ་བར་བྱ་སྟེ། དེ་ལས་ལྷག་པར་ཟ་ན་ལྟུང་བྱེད་དོ། །འདུག་གནས་གཅིག་ཏུ་ཉལ་ན་ཞེས་བྱ་བ་ནི། མུ་སྟེགས་ཅན་གྱི་གནས་སུ་ཉལ་ནའོ། །དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།མིན་བར་ཞེས་བྱ་བ་ནི། ན་བ་མ་གཏོགས་པའོ། །བསོད་སྙོམས་ལན་ཅིག་བཟའ་བར་བྱ་སྟེ། ཞེས་བྱ་བ་ནི། ཕྱི་མ་ཤོས་མ་ཡིན་པའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདུག་གནས་སུ་གནས་སམ། འདུག་གནས་སུ་ཟ་བ་ན། གནས་པ་དེ་ལ་ཉེས་བྱས་སོ། །ཟ་ན་ལྟུང་བྱེད་དོ། །འདུག་གནས་སུ་གནས་ཤིང་གཞན་དུ་ཟ་ན། འདུག་གནས་སུ་གནས་པ་ན་དེ་ལ་ཉེས་བྱས་སོ། །གཞན་དུ་ཟ་ན་ལྟུང་བ་མེད་དོ། །འདུག་གནས་སུ་ཟ་ལ། གཞན་དུ་གནས་པར་བྱེད་ན། འདུག་གནས་སུ་ཟ་བར་བྱེད་ན་དེ་ལ་ལྟུང་བྱེད་དོ། །གཞན་དུ་གནས་པར་བྱེད་པ་ལ་ལྟུང་བ་མེད་དོ། །གཞན་དུ་གནས་པར་བྱེད་ཅིང། གཞན་དུ་ཟ་ན་གཉི་ག་ལ་ལྟུང་བ་མེད་དོ། །ལྟུང་བྱེད་གཉིས་པའི་བཅུ་པ་རྫོགས་སོ།། །།སྡོམ་ནི། འཁུར་བ་འདུས་དང་དུས་མིན་དང། །གསོག་འཇོག་མ་བྱིན་ལྔ་པ་ཡིན། །སྲོག་ཆགས་བཅས་པ་དག་དང་ནི། །ཉལ་པོ་བྱེད་པར་ཤོམ་པ་གཉིས། །གཅེར་བུ་དམག་ལ་ཞག་གཉིས་ལྷག་ཚོགས་ལ་ལྟ་བར་བྱེད་པའོ། །གླེང་གཞི་ནི་མཉན་ཡོད་ནའོ། །དེའི་ཚེ་ཁྱིམ་བདག་ཅིག་གིས་རིགས་མཉམ་པ་ལས་ཆུང་མ་བླངས་ཏེ། དེ་ཆུང་མ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། ཇི་ཙམ་ན་བུ་མོ་གཡས་ཞར་མ་ཞིག་བཙས་ཏེ་ཞེས་བྱ་བ་ནས། ཆུང་མ་གསོད་པ་ཞེས་བྱ་བས་བསླངས་ཏེ། ཞག་དུས་བཏབ་བོ་ཞེས་བྱ་བའི་བར་རོ། །ཇི་ཙམ་ན་དེའི་ཆེད་དུ་

---

^{[མ་དཔེ་གཟིགས་ན་འདིར་གནོན།]}

ཕལ་མོ་ཆེ་དག་སྟ་གོན་བྱེད་དོ། །ཅི་ཙམ་ན་ཁྱིམ་དེར་དགའ་བོ་དང། ཉེ་དགའ་བོ་བསོད་སྙོམས་ཀྱི་ཕྱིར་ཞུགས་ནས། དེ་གཉིས་ཀྱིས་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག །དེས་འདི་སྐད་ཅེས་སྨྲས་སོ། །བདག་གློབ་བྲེལ་བ་ཞིག་མཆིས་སོ། །དེ་གཉིས་ཀྱིས་འདི་སྐད་ཅེས་སྨྲས་སོ། །ཁྱོད་ཅི་ཞིག་བྲེལ། དེས་འདི་སྐད་ཅེས་སྨྲས་སོ། གཡས་ཞར་མ་རྫོང་བ་ལ་བབ་ལགས་སོ། །དེ་གཉིས་ཀྱིས་འདི་སྐད་ཅེས་སྨྲས་སོ། །དེ་རིང་ཁོ་བོ་ཅག་གི་སྲིང་མོ་རྫོང་ན། ཁོ་བོ་ཅག་གིས་དེ་རིང་ཁོ་ན་བསོད་སྙོམས་མི་རྙེད་དམ། དེ་དགའ་བ་དང། མགུ་བ་དང། རབ་ཏུ་དགའ་བའི་ཡོད་ཀྱིས་བསོད་སྙོམས་མང་དུ་བྱིན་ནོ། །དེ་གཉིས་ཀྱིས་བསོད་སྙོམས་བླངས་ནས་དོང་ངོ། །དེའི་འོག་ཏུ་སྦོམ་དགའ་མོ་དང། གཙུག་དགའ་མོ་འོངས་ནས་དེ་གཉིས་ཀྱིས་ཀྱང་བསོད་སྙོམས་བླངས་ཏེ་འདོང་ངོ། །ཇི་ཙམ་ན་རྒྱལ་དང། ཉེ་རྒྱལ་གྱིས་སྦོམ་དགའ་མོ་དང། གཙུག་དགའ་མོ་ལག་པ་གང་ཞིང། ལྷུང་བཟེད་གང་བ་མཐོང་ངོ། །མཐོང་ནས་ཀྱང་འདི་སྐད་ཅེས་སྨྲས་སོ། །ཕུ་ནུ་མོ་དག །གཡས་ཞར་མ་དེ་རིང་རྫོང་བ་ལ་བབ་ཀྱི་དེང་ཞིག །དེ་ནས་རྒྱལ་དང། ཉེ་རྒྱལ་ཡང་བསོད་སྙོམས་ཀྱི་ཕྱིར་དེ་ཉིད་དུ་དོང་ངོ། །དེ་བཞིན་དུ་རྒྱལ་གྲོགས་མ་དང། རྒྱལ་སྐྱོང་མ་དང། དེ་བཞིན་དུ་བཟང་མོ་དང། ཤིན་ཏུ་བཟང་མོ་དང། དེ་བཞིན་དུ་མཛེས་དགའ་མོ་དང། རྒྱལ་ལྡན་མ་ཡང་དོང་ནས། ཁྱིམ་དེ་ནས་གཡས་ཞར་མ་རྫོང་བའི་ཆེད་དུ་སྟ་གོན་བྱས་པ། ཅུང་ཟད་ཅི་ཡོད་པ་དེ་ཐམས་ཅད་བཅུ་གཉིས་སྡེ་རྣམས་ལ་བྱིན་ནོ། །ཇི་ཙམ་ན་ཡང་སྟ་གོན་བྱ་བར་བརྩམས་པ་དང། དེ་ནས་ཆུང་མ་གསོད་པ་དེའི་ནེའུ་ཟླ་ཞིག་ཡོད་པ་དེས་སྨྲས་པ། གཡས་ཞར་མ་ནི་སྐྱོན་མང་པོ་ཅན་ཡིན་ཏེ། རྒྱ་སྐྱེགས་ཤིང་གི་སོ་ཤིང་དང། །ནུབ་ཏུ་སྔས་བསྟན་ཉལ་བ་དང། །དགོངས་ཀའི་ཞོ་འཐུང་གཡས་ཞར་ལེན། །ཞི་བ་ཡང་ནི་གནས་ནས་འཕོ། །ཞེས་སྨྲས་ཏེ། དེ་ལྟར་གཡས་ཞར་མ་དེ་ལེན་པའི་བར་ཆད་བྱས་པར་གྱུར་ཏོ། །བྲམ་ཟེ་དང། ཁྱིམ་བདག་རྣམས་དགེ་སྦྱོང་ཤཱཀྱའི་

---

^{[མ་དཔེ་གཟིགས་ན་འདིར་གནོན།]}

སྲས་རྣམས་ཀྱི་དགེ་སྦྱོང་གི་ཚུལ་དང། ཚངས་བའི་ཚུལ་ནི་ཚིག་པ་ཡིན་ཏེ། གང་གི་ཕྱིར་བུ་མོ་ལེན་པའི་བར་ཆད་བྱེད་དོ་ཞེས་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་རབ་ཏུ་མང་པོ་ཁྱིམ་རྣམས་སུ་དོང་བ་ན། དེ་དག་ལ་གལ་ཏེ་བྲམ་ཟེ་དང། ཁྱིམ་བདག་དད་པ་ཅན་རྣམས་སྐྱོ་མའམ་སྣུམ་འཁུར་དག་གིས་ཤིན་ཏུ་སྟོབས་པ་བྱེད་ལ། འདོད་ན་དགེ་སློང་མ་དེས་ལྷུང་བཟེད་དོའམ་གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །ལྷུང་བཟེད་དོའམ་གསུམ་བླངས་ནས་ཁྱིམ་གྱི་ཕྱིར་རོལ་ཀུན་དགའ་ར་བར་སོང་ལ། དགེ་སློང་མ་འཁོད་པ་རྣམས་དང་བགོ་བར་བྱ་སྟེ། དེ་ལ་ཆོ་ག་ནི་དེ་ཡིན་ནོ། །ཡང་དགེ་སློང་མ་ཞེས་བྱ་བ་ནི། བཅུ་གཉིས་སྡེ་དག་གོ་།ཁྱིམ་རྣམས་སུ་དོང་བ་ན་ཞེས་བྱ་བ་ནི། བྲམ་ཟེ་དང་ཁྱིམ་བདག་གི་ཁྱིམ་རྣམས་སུའོ། །དེ་དག་ལ་གལ་ཏེ་བྲམ་ཟེ་དང་ཁྱིམ་བདག་དད་པ་ཅན་དག་ཅེས་བྱ་བ་ལ། དད་པ་ཅན་ཞེས་བྱ་བ་ནི། སངས་རྒྱས་ལ་མངོན་པར་དད་པ་དང། ཆོས་དང་དགེ་འདུན་ལ་མངོན་པར་དད་པ་ཞེས་བྱ་བ་ནས། འབྲས་བུ་ཐོབ་པ་ཞེས་བྱ་བའི་བར་གང་ཡིན་པའོ། །ཤིན་ཏུ་ཞེས་བྱ་བ་ནི་ཆོག་པར་རོ། །སྟོབས་པར་བྱེད་ན་ཞེས་བྱ་བ་ནི་མགྲོན་དུ་གཉེར་ནའོ། །སྐྱོ་མ་ཞེས་བྱ་བ་ནི་ཕྱེའིའོ། །སྣུམ་འཁུར་ཞེས་བྱ་བ་ནི་འཁུར་བའོ། །འདོད་ན་ཞེས་བྱ་བ་ནི་དོན་དུ་གཉེར་ནའོ། །དོའམ་གསུམ་ཞེས་བྱ་བ་ལ། དོ་ཞེས་བྱ་བ་ནི་ཆེན་པོའིའོ། །གསུམ་ཞེས་བྱ་བ་ནི་ཆུང་ངུ་དང་འབྲིང་དང་ཆེན་པོའིའོ། །དེ་ལ་ཆེན་པོ་ནི། ཡུལ་མ་ག་དྷའི་བྲེའུ་ཆུང་གང་ངོ། །ཆུང་ངུ་ནི་བྲེའུ་ཆུང་ཕྱེད་དོ། །དེའི་བར་མ་ནི་བར་མའོ། །བླངས་ནས་ཁྱིམ་གྱི་ཕྱི་རོལ་ཀུན་དགའ་ར་བར་སོང་ནས། གཙུག་ལག་ཁང་ན་དགེ་སློང་མ་འཁོད་པ་རྣམས་དང་བགོ་བར་བྱ་སྟེ། ཞེས་བྱ་བ་ནི། དེ་ན་ཡོད་པའི་དགེ་སློང་མ་དག་དོང་ངོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །

---

^{[མ་དཔེ་གཟིགས་ན་འདིར་གནོན།]}

ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ལྷུང་བཟེད་ཆེན་པོ་གསུམ་བླངས་ན་ལྟུང་བྱེད་དོ། །ཆེན་པོ་གཉིས་དང། བར་མ་གཅིག་བླངས་ན་ལྟུང་བྱེད་དོ། །བར་མ་གཉིས་དང་ཆེན་པོ་གཅིག་ལེན་ན་ལྟུང་བྱེད་དོ། །དགེ་སློང་མས་ཇི་ཙམ་ཅུང་ཟད་བྲེའུ་ཆུང་དོ་ལས་ལྷག་པར་ལེན་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་དང་པོ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་བཅོམ་ལྡན་འདས་ཀྱིས་ལྷ་སྦྱིན་ལས་བརྟེན་ཏེ། ཚོགས་ཤིང་ཟ་བ་བཀག་པ་དང། དེ་ནས་དགེ་སློང་མ་དེ་དག་གིས་གཉི་གའི་ཐུན་མོང་ཡིན་ནོ་ཞེས་རྗེས་སུ་སྒྲུབ་པར་བྱེད་དོ། །དེ་ནས་ཕྱིས་ན་བ་དག་ཏུ་གྱུར་ཏེ། ཟས་གཅིག་གིས་འཚོ་བར་མ་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། ན་བ་དུས་ཡིན་ནོ་ཞེས་བྱས་ཏེ་བཟའ་བར་བྱའོ། །དེ་བཞིན་དུ་ལམ་དུ་ཞུགས་པ་བཀྲེས་ནས། དགེ་བའི་ཕྱོགས་བྱེད་མི་ནུས་པར་གྱུར་ནས་ཞེས་བྱ་བ་ནས། བཟའ་བར་བྱའོ་ཞེས་བྱ་བའི་བར་རོ། །དེ་བཞིན་དུ་ལས་བྱེད་པ་དང། དེ་བཞིན་དུ་གྲུར་ཞུགས་པས་ཀྱང་བཟའ་བར་བྱའོ། །དེ་བཞིན་དུ་མང་པོ་འདུས་པའི་དུས་སུ་རྙེད་པ་བྱུང་བ་ནས། བཅོམ་ལྡན་འདས་ཀྱིས་བཀའ་སྩལ་པ། བཟའ་བར་བྱའོ། །དེ་བཞིན་དུ་ཀུན་ཏུ་རྒྱུའམ་ཀུན་ཏུ་རྒྱུ་མོ། །སངས་རྒྱས་ཀྱི་བསྟན་པ་ལ་དད་པ་རྙེད་པ་དེ་ལས་ཀྱང་བཟའ་བར་བྱ་སྟེ། དགེ་སློང་མ་དག་ཀུན་ཏུ་རྒྱུ་སངས་རྒྱས་ཀྱི་བསྟན་པ་ལ་དད་པ་རྙེད་པ་ནི་དཀོན་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས། དགེ་སློང་མ་རྣམས་ལ་བསླབ་པ་འདོད་པ་དང། བསླབ་པ་ལ་གུས་པ་དང། བསླབ་པ་ལ་ཡོ་བྱད་བསྙུངས་བའི་བསྔགས་པ་བརྗོད་ནས་འདི་སྐད་ཅེས་བཀའ་སྩལ་ཏོ། །དུས་མ་གཏོགས་ཏེ་འདུས་ཤིང་ཟན་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་དང། ལས་དུས་དང། ལམ་དུས་དང། གྲུར་ཞུགས་པ་དང། འདུས་པ་ཆེན་པོ་དང། དགེ་སྦྱོང་གི་ཟས་དུས་སོ། །འདུས་ཤིང་ཟ་བ་ཞེས་བྱ་བ་ནི་མི་མཐུན་ཞིང་ཟ་བའོ། །དུས་མ་

---

^{[མ་དཔེ་གཟིགས་ན་འདིར་གནོན།]}

གཏོགས་ཏེ་ཞེས་བྱ་བ་ནི། འདི་ལྟར་ཡང་ན་བ་དག་ཏུ་གྱུར་ལ་ཟས་གཅིག་གིས་འཚོ་བར་མི་ནུས་པ་ལྟ་བུའོ། །ལམ་དུས་ཞེས་བྱ་བ་ནི། ལམ་དུ་ཞུགས་པ་ལ་སྦྱིན་བདག་གིས་བྱིན་པའོ། །གྲུར་ཞུགས་པ་ཞེས་བྱ་བ་ནི། གྲུར་འཇུག་པ་ན་སྦྱིན་བདག་གིས་བསོད་སྙོམས་བྱིན་པའོ། །འདུས་པ་ཆེན་པོ་ཞེས་བྱ་བ་ནི། མང་པོ་འདུས་པའི་ཟས་སོ། །དགེ་སྦྱོང་གི་ཟས་དུས་སོ་ཞེས་བྱ་བ་ནི། འདི་ལས་ཕྱི་རོལ་གྱི་རབ་ཏུ་བྱུང་བ་ལ་དགེ་སྦྱོང་ཞེས་བྱའོ། །དེ་ལ་དུས་ནི་དེ་ཡིན་ནོ་ཞེས་བྱ་བ་ནི། དེ་ལ་དེ་ནི་མཐུན་པའི་ཆོས་ཡིན་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་པས་འདུས་ཤིང་ཤིང་ཟས་ཟ་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མ་མཚམས་ཀྱི་ཕྱི་རོལ་ལ་མཚམས་ཀྱི་ནང་དུ་འདུ་ཤེས་པས་འདུས་ཤིང་ཟས་ཟ་ན་ཉེས་བྱས་སོ། །ཡིད་གཉིས་ཟ་ན་ཉེས་བྱས་སོ། །དགེ་སློང་མའི་དབྱར་ཁང་གི་ཁམས་དག་ཡོད་ལ་གལ་ཏེ། དགེ་སློང་མ་ཁ་ཅིག་དབྱར་ཁང་དུ་ཟ་ལ། ཁ་ཅིག་ཁྱམས་དག་ཏུ་ཟ་ན། དེ་ལ་དབྱར་ཁང་ན་ཟ་བ་གང་ཡིན་པ་དེ་དག་གིས། ཇི་ག་ཁ་ཟས་ཀྱིས་བསྲུལ་ཏམ། ཞེས་བྲི་བར་བྱའོ། །མ་དྲིས་པར་ཟ་ན་ལྟུང་བྱེད་དུ་འགྱུར་རོ། །ཁྱམས་རྣམས་ལ་ནི་ཉེས་བྱས་སུ་འགྱུར་རོ། །དེ་བཞིན་དུ་གནས་ཁང་དང། སྒོ་ཁང་ལ་སོགས་པ་ལ་ཡང་བརྗོད་པར་བྱའོ། །གལ་ཏེ་ཁ་ཟས་ཀྱིས་བསྲུལ་ན་ཆུང་ངུ་ན་རིལ་བའི་ཆུའམ། ལན་ཚྭ་ཁ་གཟར་གང་ཙམ་ཡང་བསྲུལ་ན་ལྟུང་བ་མེད་དོ། །ལྟུང་བྱེད་གསུམ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། བཅུ་བདུན་སྡེ་རྣམས་ལས་བརྟེན་ནས། དུས་མ་ཡིན་པའི་ཟས་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་རྣམས་དུས་སུ་ཡང་ཟ་བར་བྱེད། དུས་མ་ཡིན་པར་ཡང་ཟ་བར་བྱེད་པ་དང། དགེ་སློང་མ་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་དུས་མ་ཡིན་པའི་ཟས་ཀྱི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་བཅའ་

---

^{[མ་དཔེ་གཟིགས་ན་འདིར་གནོན།]}

བ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དུས་མ་ཡིན་པར་བཟའ་བ་དང་བཅའ་བ་འཆོས་སམ་ཟོས་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།དུས་མ་ཡིན་པ་ཞེས་བྱ་བ་ལ། དུས་མ་ཡིན་པ་ནི་གཉིས་ཏེ། དུས་མ་ཡིན་པ་ཕྱེད་ཡོལ་བ་དང། དུས་མ་ཡིན་པ་སྐྱ་རེངས་མ་ཤར་བའོ། །བཅའ་བ་དང་བཟའ་བ་ཞེས་བྱ་བ་ནི། བཅའ་བ་ལྔ་དང། བཟའ་བ་ལྔ་པོ་དག་གོ་། འཆོས་སམ་ཟོས་ན་ཞེས་བྱ་བ་ནི། ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དུས་མ་ཡིན་པ་ལ་དུས་མ་ཡིན་པར་འདུ་ཤེས་ནས་འཆོས་སམ་ཟོས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་དུས་ལ་དུས་མ་ཡིན་པར་འདུ་ཤེས་ནས་འཆོས་སམ་ཟོས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་གསུམ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ནག་པོ་འཆར་ཀ་ལས་བརྟེན་ཏེ། གསོག་འཇོག་བྱས་པའི་ཟས་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་རྣམས་ཀྱིས། བསོད་སྙོམས་ལ་བརྒྱུས་ནས། འབྲས་ཆན་སྐམ་པོ་ཡང་ལོགས་ཤིག་ཏུ་ལེན་པར་བྱེད། འབྲས་ཆན་གཤེར་བ་ཡང་ལོགས་ཤིག་ཏུ་ལེན་པར་བྱེད་ཅིང་ཇི་སྙེད་ལོངས་སྤྱད་པའི་ལྷག་མ་དེ་དག་སྐེམས་པར་བྱེད་དེ། དེ་དག་བསྐམས་ནས་འཇོག་པར་བྱེད་དོ། །གང་གི་ཚེ། རླུང་ལངས་པར་གྱུར་པའམ། ཡུལ་ངན་བྱུང་བ་དེའི་ཚེ། དེ་དག་ཆུས་སྤངས་ནས་མེས་བཙོས་ཏེ། ལོངས་སྤྱོད་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གསོག་འཇོག་བྱས་པའི་བཅའ་བ་དང། བཟའ་བ་འཆོས་སམ་ཟོས་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།གསོག་འཇོག་བྱས་པ་ཞེས་བྱ་བ་ལ། གསོག་འཇོག་བྱས་པ་ནི་གཉིས་ཏེ། སྔ་མའི་ཟས་བྱིན་ལེན་བྱས་ཤིང། ཕྱི་མའི་ཟས་གསོག་འཇོག་བྱས་པའམ། ཕྱི་མའི་ཟས་བྱིན་ལེན་བྱེད་ཅིང། དུས་ཚོད་ལས་འདས་པར་གསོག་འཇོག་བྱས་པའོ། །བཅའ་བ་དང་བཟའ་བ་ཞེས་བྱ་བ་ནི་སྔ་མ་བཞིན་ནོ། །ལྟུང་བྱེད་དོ་ཞེས་བྱ་བ་ནི། ལྟུང་བར་བྱེད་དོ་ཞེས་བྱ་བའི་བར་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་གསོག་འཇོག་བྱས་པ་ལ་གསོག་འཇོག་བྱས་པར་འདུ་ཤེས་ན་ལྟུང་བྱེད་དོ། །གསོག་འཇོག་མ་བྱས་པ་ལ་གསོག་འཇོག་བྱས་པར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །གོས་ཀྱི་གསོག་འཇོག་བྱེད་ན་ལྟུང་བྱེད་དོ། །ལྷུང་བཟེད་ཀྱི་གསོག་འཇོག་བྱེད་ན་ལྟུང་བྱེད་དོ། །བྱ་མ་བུམ་གསོག་འཇོག་བྱེད་ན་ལྟུང་བྱེད་དོ། །སྒོ་ལྕགས་གསོག་འཇོག་བྱེད་ན་ཉེས་བྱས་སོ། །ལྡེ་མིག་ཀྱོག་པོ་གསོག་འཇོག་བྱེད་ན་ཉེས་བྱས་སོ། །སྒོ་ལྕགས་གཟེ་མ་གསོག་འཇོག་བྱས་ན་ཉེས་བྱས་སོ། །ལྟུང་བྱེད་གསུམ་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། དུར་ཁྲོད་ཐམས་ཅད་པའི་དགེ་སློང་ནག་པོ་ཆེན་པོ་ལ་བརྟེན་ནས་བྱིན་ལེན་བྱ་བའི་བསླབ་པའི་གཞི་བཅའ་བ་མཛད་པ་དེའི་ཚེ། དགེ་སློང་མ་དེ་དག་གིས་བྱིན་ལེན་ཇི་ལྟ་བུ་ཡིན་པ་དང། བྱིན་ལེན་དུ་ཡོད་པ་མ་ཤེས་པར་གྱུར་པའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་ནི་ལྔ་སྟེ། ལྔ་གང་ཞེ་ན། ལུས་ཀྱི་ལུས་དང་འབྲེལ་བར་དང། ལུས་ལ་ལུས་ཀྱིས་དང། ལུས་དང་འབྲེལ་བ་ལ་ལུས་དང་འབྲེལ་བས་དང། ལུས་ལ་ལུས་ཀྱིས་འབྲེལ་བ་དང། བཞག་པའི་ཆོ་ག་ཉིད་ནི་ལྔ་པ་ཡིན་ནོ། །སྨད་

---

^{[མ་དཔེ་གཟིགས་ན་འདིར་གནོན།]}

པ་ཞེས་བྱ་བའི་ཡུལ་ཡོད་དེ། དེ་དག་མ་ལ་ཡང་ཉལ་བར་བྱེད་པ་ཡིན་ནོ་ཞེས་བྱ་བ་ནས། དེར་ས་ལ་དཀྱིལ་འཁོར་བྱས་ཏེ་བྱིན་ལེན་བྱའོ། །འབྲས་བུ་དག་རྙེད་ན་དེ་དག་གིས་ཇི་ལྟར་བྱིན་ལེན་བྱ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་ནི་ལྔ་སྟེ། གཞོང་པ་དང། ཁྲི་དང། ཁྲིའུ་དང། ཐུ་བ་དང། ལྷུང་བཟེད་ཀྱི་སྣོད་དེ། ལག་པས་རེག་པས་བྱིན་ལེན་བྱའོ། །བྱིན་ལེན་བྱས་པ་དེ་དག་འདྲིལ་ན་གལ་ཏེ་མ་ལངས་པར་ཟིན་ན་དེ་ཉིད་བྱིན་ལེན་བྱས་པ་ཡིན་ནོ། །གལ་ཏེ་རྒྱང་རིང་པོར་གྱུར་ན་ཡང་བྱིན་ལེན་བྱའོ། །དེ་དག་རུང་བར་བྱིན་ལེན་བྱའོ། །དེ་དག་རུང་བར་བྱ་དགོས་ན། རུང་བ་དུ་ཡོད་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རུང་བ་ནི་ལྔ་སྟེ། ལྔ་གང་ཞེ་ན། མེས་རུང་བ་དང། མཚོན་གྱིས་རུང་བ་དང། ནེ་ཙོས་རུང་བ་དང། སེན་མོས་རུང་བ་དང། རྙིས་པས་རུང་བ་ཉིད་ནི་ལྔ་པའོ། །ཡང་རུང་བ་ནི་ལྔ་སྟེ། ཕྱུང་བ་དང། གཤེགས་པ་དང། བཅད་པ་དང། ཕུག་པ་དང། ས་བོན་གྱི་ཆོས་མེད་པ་ནི་ལྔ་སྟེ། སྔོན་པོ་ལ་ཡང་དེ་ཉིད་ཀྱིས་རུང་བར་བྱས་པ་ཡིན་ནོ། །ཕྱིས་དེ་དག་ལ་བྲམ་ཟེ་དང། ཁྱིམ་བདག་རྣམས་འབྲིམ་པར་འདོད་པ་ན་མ་བྱིན་ནས། བཅོམ་ལྡན་འདས་ཀྱིས་བཀའ་སྩལ་པ། སྦྱིན་པར་བྱའོ། །དགེ་སློང་མ་དག་ལམ་དུ་ཞུགས་ནས་དགོན་པའི་གནས་ཤིག་ཏུ་འཁོད་པ་ན། ནགས་ཀྱི་སེང་གེ་དང། སྤྲེའུ་དང། དོམ་ལ་སོགས་པ་ལས་བྱིན་ལེན་བྱས་ཏེ། གང་དག་ལ་འཛིན་མངོན་པ་དེ་དག་ལ་བྱིན་ལེན་ཡང་མངོན་ནོ། །དེ་དག་ལམ་དུ་ཞུགས་པ་ན། ཆུ་དང། སོ་ཤིག་གིས་ཕོངས་པར་གྱུར་པའི་སྐབས་ཏེ། དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་དག་གིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། ཆུ་དང་སོ་ཤིང་མ་གཏོགས་སོ་ཞེས་རྗེས་སུ་གནང་ངོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པ་འདོད་པ་དང། བསླབ་པ་ལ་གུས་པ་དང། བསླབ་པ་ལ་ཡོ་བྱད་བསྙུངས་པའི་བསྔགས་པ་

---

^{[མ་དཔེ་གཟིགས་ན་འདིར་གནོན།]}

བརྗོད་ནས། འདི་སྐད་ཅེས་བཀའ་སྩལ་ཏོ། །ཡང་དགེ་སློང་མ་གང་ཆུ་དང་སོ་ཤིང་མ་གཏོགས་ཏེ་མ་བྱིན་པར་ཁའི་སྒོ་ནས་མིད་པའི་ཟས་ཟ་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། ཆོས་འདི་པ་དག་གོ་།མ་བྱིན་པར་ཞེས་བྱ་བ་ནི། དེ་ལ་སུས་ཀྱང་མ་བྱིན་པར་གྱུར་པའོ། །ཁའི་སྒོར་ཞེས་བྱ་བ་ནི་ཁར་ཟ་བའོ། །བཅའ་བ་ཞེས་བྱ་བ་ནི་སྔ་མ་བཞིན་ནོ། །ཆུ་དང་སོ་ཤིང་མ་གཏོགས་པར་ཞེས་བྱ་བ་ནི། ཆུ་དང་སོ་ཤིང་བཞིན་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་བྱིན་ལེན་མ་བྱས་པ་ལ་བྱིན་ལེན་བྱས་པར་འདུ་ཤེས་ནས་འཆོས་སམ་ཟོས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་བྱིན་ལེན་བྱས་པ་ལ་བྱིན་ལེན་མ་བྱས་པར་འདུ་ཤེས་ནས་ཟོས་སམ་འཆེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །བར་སྡོམ་ལ། བྱིན་ལེན་ལྔ་དང་འབྲས་བུ་དང། དེ་བཞིན་རུང་བ་ལྔ་དང་ནི། །སེང་གེ་སྤྲེའུ་དང་དོམ་དག་གི་།དེ་བཞིན་གཤེགས་པས་རྗེས་གནང་སྟེ། །བར་གྱི་སྡོམ་དུ་བསྡུས་པ་ཡིན། །ལྟུང་བྱེད་གསུམ་པའི་ལྔ་པ་རྫོགས་སོ།། །།གླེང་གཞི་ནི་ཀོའུ་ཤམྦི་ནའོ། །དེའི་ཚེ་རྒྱལ་དང། ཉེ་རྒྱལ། སྲོག་ཆགས་དང་བཅས་པའི་ཆུ་ལ་སྤྱོད་པ་དང། དགེ་སློང་མ་དེ་རྣམས་ཀྱིས་སྨྲས་པ། ཕུ་ནུ་མོ་དག །སྲོག་ཆགས་དང་བཅས་པའི་ཆུ་ལ་སྤྱོད་པར་མ་བྱེད་ཅིག །དེ་དག་གིས་འདི་སྐད་ཅེས་ཅི་ཁོ་མོ་ཅག་ལ་བགྲངས་ཏེ་གཏད་དམ། ཤར་གྱི་རྒྱ་མཚོ་ཆེན་པོར་འདོང་ན་ཅི་ཉེས། ལྷོ་དང། ནུབ་དང། བྱང་གི་རྒྱ་མཚོ་ཆེན་པོར་འདོང་ན་ཅི་ཉེས་ཞེས་སྨྲས་པ་དང། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་རྒྱལ་དང་ཉེ་རྒྱལ་ལོ། །སྲོག་ཆགས་དང་བཅས་པའི་ཆུ་ལ་ཞེས་བྱ་བ་ལ་

---

^{[མ་དཔེ་གཟིགས་ན་འདིར་གནོན།]}

སྲོག་ཆགས་ནི་གཉིས་ཏེ། གང་དག་མིག་ལམ་དུ་སྣང་བ་དང། གང་དག་ཆུ་ཚགས་ཀྱིས་ཟིན་པར་འགྱུར་བའོ། །སྤྱོད་ན་ཞེས་བྱ་བ་ལ། སྤྱོད་པ་ནི་གཉིས་ཏེ། ནང་གི་དང། ཕྱིའི་འོ། །ཕྱིའི་ནི་ཁྲུས་བྱེད་པ་དང་ཆག་ཆག་དང། གོས་ལ་སོགས་པའི་བཀུར་བཤལ་དང། སྲ་བ་དང། འཚེད་པར་བྱེད་པ་དང། བྱེད་དུ་འཇུག་པ་སྟེ། འདི་ནི་ཕྱིའི་སྤྱོད་པ་ཞེས་བྱའོ། །སོ་ཤིང་བཅའ་བ་དང། བཏུང་བ་ཡང་་ངོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པའི་ཆུར་འདུ་ཤེས་ནས་གཉིས་་པོ་གང་ཡང་རུང་བར་སྤྱོད་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་སྲོག་ཆགས་མེད་པའི་ཆུ་ལ་སྲོག་ཆགས་དང་བཅས་པར་འདུ་ཤེས་ནས་གཉིས་པོ་གང་ཡང་རུང་་བར་སྤྱོད་པར་བྱེད་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །དེ་བཞིན་དུ་སྲོག་ཆགས་དང་བཅས་པའི་ཡལ་ག་དང། ལོ་མ་དང། འབྲས་བུ་ལ་སོགས་པ་ལ་ཡང་བརྗོད་པར་་བྱའོ། །ལྟུང་བྱེད་གསུམ་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྤོད་འཚོང་གི་ཁྱེའུ་ཆུང་མ་བླངས་ནས་རིང་པོར་མ་ལོན་པ་ཞིག་ཡོད་པ་དེ། ནུབ་མོ་་བསྲུང་བའི་ཕྱིར་ཚོང་ཁང་དུ་འདུག་ནས། དེ་ནང་བར་གྱི་དུས་སུ་ཚོང་ཁང་གི་སྒོ་བཅད་དེ། ཁྱིམ་དུ་ཆས་པ་དེ་སྦོམ་དགའ་མོ་སྤྱོད་ཡུལ་དུ་ཞུགས་པས་མཐོང་ངོ། །མཐོང་ནས་ཀྱང་ཟེ་མའོ་ཁྱེའུ་དེ་་ནི་འདོད་ཆགས་ཀྱི་སེམས་ཀྱིས་ཁྱིམ་དུ་སོང་ངོ་སྙམ་དུ་རིག་ནས་དེ་རིངས་པར་སོང་སྟེ། ཚོང་པའི་ཁྱེའུ་དེའི་ཁྱིམ་དུ་ཞུགས་ཏེ། སྟན་ལ་འདུག་ནས་བསྡད་དོ། །དེ་ནས་ཚོང་་བའི་ཁྱེའུ་དེ་ཁྱིམ་དུ་འོངས་ནས། ཆུང་མ་ལ་བལྟ་བར་བརྩམས་པ་དང། དེས་འདི་སྐད་ཅེས་སྨྲས་སོ། །རྗེའི་སྲས། འཕགས་མ་སྡོད་ཅིང་བཞུགས་སོ། །དེ་ནས་ཁྱེའུ་དེས་སྦོམ་དགའ་་མོ་མཐོང་ནས། ཤཱཀྱའི་སྲས་ཀྱི་དགེ་སྦྱོང་མ་རྣམས་ཀྱི་དགེ་སྦྱོང་གི་ཚུལ་དང། ཚངས་པའི་ཚུལ་ཚིག་པ་ཡིན་ཏེ། གང་གི་ཕྱིར་འདི་ལྟར་རང་གི་ཆུང་མ་དང་ལྷན་ཅིག་དབེན་པ་ན་འདུག་པའི་སྐབས་ཀྱང་མི་རྙེད་དོ་

---

^{[མ་དཔེ་གཟིགས་ན་འདིར་གནོན།]}

ཞེས་འཕྱ་བར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ཉལ་བོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ། སྟན་ལ་འདུག་པར་་བྱེད་ན་ལྟུང་བྱེད་དོ། །དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཉལ་པོ་བྱེད་པར་ཤོམ་པའི་ཞེས་བྱ་བ་ནི། བུད་མེད་ནི་སྐྱེས་པའི་ཉལ་པོ་བྱ་བ་ཡིན་ནོ། །ཁྱིམ་དུ་ཞེས་བྱ་བ་ནི། ཁྱིམ་བདག་རྣམས་ཀྱི་ཁྱིམ་དུའོ། །ཕྱིས་གནོན་བྱས་ཏེ་ཞེས་བྱ་བ་ནི་འཕྲལ་ལའོ། །འདུག་པར་བྱེད་ན་ཞེས་བྱ་བ་ནི། འདུག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། ། དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉལ་པོ་བྱེད་པར་ཤོམ་པའི་ཁྱིམ་རྣམས་སུ་མཐུས་གནན་ཏེ། སྟན་ལ་འདུག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། ། ལྟུང་བྱེད་གསུམ་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས། ཆོས་གོས་དང་ལྟུང་བཟེད་ཐོགས་ཏེ། སྤྱོད་ཡུལ་དུ་ཞུགས་་པ་དང། སྦོམ་དགའ་མོས་ཡང་སྦོས་འཚོང་གི་ཁྱེའུ་དེ་ཁྱིམ་དུ་འགྲོ་བ་མཐོང་ངོ། །དེ་ནས་སྦོམ་དགའ་མོས་བསམས་པ། བཅོམ་ལྡན་འདས་ཀྱིས་འདུག་པའི་བསླབ་པའི་གཞི་བཅའ་བ་་མཛད་ཀྱི། མ་ལ་བདག་གིས་སྒོ་རྒྱབ་ཏུ་འགྲེང་ལ་བསྡད་དོ་སྙམ་ནས། སྤོས་འཚོང་གི་ཁྱེའུ་ཡིས་མཐོང་སྟེ་སྨོད་པར་བྱེད་པ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབས་ཡོད་པ་ན་འགྲེང་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་་བ་ནི་རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །གཞན་ནི་སྔ་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉལ་བོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབས་ཡོད་

---

^{[མ་དཔེ་གཟིགས་ན་འདིར་གནོན།]}

པ་ན་འགྲེང་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་སྐྲག་པར་གྱུར་པའམ། བར་ཆད་ཡོད་པ་ཡིན་ན་ལྟུང་བ་མེད་དོ། །ལྟུང་བྱེད་གསུམ་པའི་བརྒྱད་པ་རྫོགས་་སོ།། །།གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་བཅོམ་ལྡན་འདས་ཀྱིས། ཀུན་དགའ་བོ་ལ་བརྟེན་ནས། གཅེར་བུ་པ་དང་གཅེར་བུ་མའི་བསླབ་པའི་་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་རྣམས་རང་གི་ལག་གིས་བཟའ་བ་དང། བཅའ་བ་གཅེར་བུ་པ་དང། གཅེར་བུ་མ་རྣམས་ལ་སྦྱིན་པར་བྱེད་པ་དང། དོན་ཉུང་བའི་དགེ་སློང་མ་་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་་སློང་མ་གང་རང་གི་ལག་གིས་བཟའ་བ་དང། བཅའ་བ་གཅེར་བུ་པའམ། གཅེར་བུ་མའམ། ཀུན་ཏུ་རྒྱུའམ། ཀུན་ཏུ་རྒྱུ་མོ་ལ་སྦྱིན་པར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་་བྱ་བ་ནི། བཅུ་གཉིས་སྡེ་དག་གོ་།གཅེར་བུ་པ་ཞེས་བྱ་བ་ནི། གོས་མེད་པའོ། །གཅེར་བུ་མ་ཞེས་བྱ་བ་ཡང་གོས་མེད་པའོ། །དེ་བཞིན་དུ་ཀུན་ཏུ་རྒྱུ་ཞེས་བྱ་བ་ནི་གྲངས་ཅན་ནོ། །ཀུན་ཏུ་་རྒྱུ་མོ་ཡང་དེ་བཞིན་ནོ། །རང་གི་ལག་གིས་ཞེས་བྱ་བ་ནི་ལག་པས་ལག་པར་རོ། །བཟའ་བ་དང། བཅའ་བ་ཞེས་བྱ་བ་ནས། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་གི་ལག་གིས་བཟའ་བ་དང། བཅའ་བ་གཅེར་བུ་པའམ་ཞེས་བྱ་བ་ནས། ཀུན་ཏུ་རྒྱུ་མོའི་བར་ལ་སྦྱིན་པ་བྱེད་ན་ལྟུང་བྱེད་དོ། ། གལ་ཏེ་ཕ་དང་མ་ཡིན་ན་ལྟུང་བ་མེད་དོ། །གལ་ཏེ་ལྟ་བར་སོང་བ་ཞིག་དབྲལ་བར་འདོད་ན་ལྟུང་བ་མེད་དོ། །གལ་ཏེ་སློང་ན་དེ་ལ་འདི་སྐད་ཅེས་སློང་ཕོར་ས་ལ་ཞོག་ཅིག་།ཅེས་བརྗོད་པར་བྱའོ། གལ་ཏེ་བཞག་ན་སྦྱིན་པར་བྱའོ། །འོན་ཏེ་མ་བཞག་ན་སྦྱིན་པར་མི་བྱའོ། །ལྟུང་བྱེད་གསུམ་པའི་དགུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་

---

^{[མ་དཔེ་གཟིགས་ན་འདིར་གནོན།]}

ལ་བརྟེན་ནས་དམག་ཤོམ་པའི་བསླབ་པའི་གཞི་བཅའ་བ་མཛད་པ་དང། དེ་ནས་བཅུ་གཉིས་སྡེ་དག་དམག་ཤོམ་པ་ལ་ལྟ་བའི་ཕྱིར་དོང་བ་དང་ཞེས་བྱ་བ་ནས། དོན་ཉུང་བའི་་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་་དགེ་སློང་མ་གང་དམག་ཤོམ་པ་ལ་ལྟ་བའི་ཕྱིར་འགྲོ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།ཤོམ་པ་ཞེས་བྱ་བ་ནི། དམག་ལ་མངོན་པར་དགའ་་བའོ། །དམག་ཅེས་བྱ་བ་ལ། དམག་ནི་བཞི་སྟེ། དམག་ཡན་ལག་གཅིག་པ་ཡང་ཡོད། དམག་ཡན་ལག་གཉིས་པ་དང། ཡན་ལག་གསུམ་པ་དང། ཡན་ལག་བཞི་པ་ཡང་ཡོད་དོ། དམག་ཡན་ལག་གཅིག་པ་ནི་གླང་པོ་ཆེ་བའིའོ། །ཡན་ལག་གཉིས་པ་ནི་གླང་པོ་ཆེ་བ་དང། རྟ་པའིའོ། །ཡན་ལག་གསུམ་པ་ནི། གླང་པོ་ཆེ་བ་དང། རྟ་པ་དང། ཤིང་རྟའིའོ། །ཡན་་ལག་བཞི་པ་ནི། གླང་པོ་ཆེ་བ་དང། རྟ་བ་དང། ཤིང་རྟ་པ་དང། དཔུང་བུ་ཆུང་གི་དམག་གོ་།བལྟ་བའི་ཕྱིར་ཞེས་བྱ་བ་ནི། བལྟ་བའི་ཕྱིར་རོ། །འགྲོ་ན་ཞེས་་བྱ་བ་ནི་འགྲོ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དམག་ཤོམ་པ་བལྟ་བའི་ཕྱིར་འགྲོ་ན་་ཐམས་ཅད་དུ་ལྟུང་བྱེད་དུ་འགྱུར་རོ། །དབྱར་ཁང་ལམ་ཀ་ན་འདུག་ན་ལྟུང་བ་མེད་དོ། །ལྟུང་བྱེད་གསུམ་པའི་བཅུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་་ཚེ་རྒྱལ་པོ་གསལ་རྒྱལ་ལ། རི་བོར་པ་དག་ལོག་པ་དེའི་ཚེ། ཁྱིམ་བདག་མགོན་མེད་ཟས་སྦྱིན་ལ་སོགས་ཏེ། དགེ་བསྙེན་རྣམས་ཀྱང་རྒྱལ་པོས་སྤྲིང་ནས་དེར་དོང་ངོ། །དེའི་འོག་ཏུ་་དགེ་འདུན་ལ་གསོལ་བ་བཏབ་ནས། དྲུག་སྡེ་རྣམས་དོང་ངོ། །དེའི་ཚེ་དྲུག་སྡེ་དེ་རྣམས་ལ་ཞག་གཉིས་ཀྱི་མཐའི་བསླབ་པའི་གཞི་བཅའ་བ་མཛད་དོ། །དེ་ནས་དུས་གཞན་ཞིག་ན་་བཅུ་གཉིས་སྡེ་རྣམས་དམག་ཤོམ་པར་ཞག་གཉིས་ཀྱི་མཐར་

---

^{[མ་དཔེ་གཟིགས་ན་འདིར་གནོན།]}

གནས་པར་བྱེད་དོ། །གང་གི་ཚེ་དེ་དག་མངོན་དུ་ལྷགས་པ་དེའི་ཚེ། དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། ། དགའ་མོ། ཉེ་དགའ་མོ། སྦོམ་དགའ་མོ་དག་འོངས་པ་ལེགས་སོ། །འོངས་པ་ལེགས་སོ། །ཁྱེད་ཅག་གང་ནས་འདིར་འོངས། གང་དུ་གནས། དེ་དག་གིས་འདི་སྐད་ཅེས་སྨྲས་སོ། །ཁོ་་མོ་ཅག་དམག་ཤོམ་པ་ལ་ཆོས་འཆད་དུ་དོང་སྟེ། དེ་ཉིད་དུ་གནས་སོ། །དེ་ནས་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་ཞག་གཉིས་ཀྱི་མཐའི་བསླབ་པའི་གཞི་་བཅའ་བ་མ་མཛད་དམ། དེ་རྣམས་ཀྱིས་འདི་སྐད་ཅེས་དགེ་སློང་རྣམས་ལ་བཅའ་བ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས། བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མས་དམག་ཤོམ་་པ་ལ་བལྟ་དགོས་པའི་རྐྱེན་དེ་ལྟ་བུ་བྱུང་ན། ཞག་གཉིས་ཀྱི་མཐར་དམག་དེའི་ནང་དུ་དགེ་སློང་མ་དེས་གནས་པར་བྱའོ། །དེ་ལས་ལྷག་པར་གནས་ན་ལྟུང་བྱེད་དོ། །དགེ་སློང་མས་ཞེས་བྱ་བ་་ནི། བཅུ་གཉིས་སྡེ་དག་གོ་།དེ་ལྟ་བུའི་རྐྱེན་བྱུང་ན་ཞེས་བྱ་བ་ནི། དེ་ལྟ་བུའི་རྐྱེན་བྱུང་བ་མ་གཏོགས་པའོ། །ཤོམ་པ་ཞེས་བྱ་བ་ནི། དམག་ལ་མངོན་པར་དགའ་བའོ། །དམག་ཅེས་བྱ་བ་ནི། ཞེས་་བྱ་བ་ནས་རྣམ་བཞིའོ་ཞེས་བྱ་བའི་བར་རོ། །ཞག་གཉིས་ཀྱི་མཐར་ཞེས་བྱ་བ་ནི་ཉིན་ཞག་གཉིས་སུའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེན། དགེ་སློང་མས་ཇི་ཙམ་ཅུང་ཟད་ཞག་གཉིས་ལས་ལྷག་པར་དམག་གི་ནང་དུ་གནས་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་་པའི་བཅུ་གཅིག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་ཡང་ཁྱིམ་བདག་མགོན་མེད་ཟས་སྦྱིན་ལ་སྤྲིང་ནས་ཞེས་བྱ་བ་ནས། ཞག་་གཉིས་ཀྱི་མཐར་ཐུག་པར་དམག་དེའི་ནང་དུ་

---

^{[མ་དཔེ་གཟིགས་ན་འདིར་གནོན།]}

གནས་སོ་ཞེས་བྱ་བའི་བར་རོ། །དེའི་ཚེ་བཅོམ་ལྡན་འདས་ཀྱིས་དེ་རྣམས་ལ་གཡུལ་བཤམས་པ་དང། རྒྱལ་མཚན་གྱི་མཆོག་གི་བསླབ་པའི་་གཞི་བཅའ་བ་མཛད་དོ། །དེ་ནས་བཅུ་གཉིས་སྡེ་དེ་དག་ཡང་གཡུལ་བཤམས་པ་དང། རྒྱལ་མཚན་གྱི་མཆོག་དང། དཔུང་གི་མཆོག་གི་ནང་དུ་དོང་བ་དང། དགེ་སློང་མ་དེ་རྣམས་ཀྱིས་་སྨྲས་པ། ཀྱེ་ཕུ་ནུ་མོ་དག་།བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་སྨྲས་སོ། །དགེ་སློང་རྣམས་ལ་བཅའ་བ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་་བཅའ་བའི་བར་དུ་མཛད་དེ། ཡང་གལ་ཏེ་དགེ་སློང་མ་དམག་དེའི་ནང་དུ་ཞག་གཉིས་གནས་པ་ན། གཡུལ་བཤམས་པ་དང། རྒྱལ་མཚན་གྱི་མཆོག་དང། དཔུང་གི་མཆོག་དང། དཔུང་་བཀོད་པའི་ཚོགས་ལ་ལྟ་བ་སོ་སོར་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞིག་ཅེས་བྱ་བ་ནི། བཅུ་གཉིས་སྡེ་དག་གོ་།བཀོད་པའི་ཚོགས་ལ་བལྟ་བ་ཞེས་བྱ་བ་ལ་་བཀོད་པ་ཞེས་བྱ་བ་ནི། ཤིང་རྟའི་དབྱིབས་ལྟ་བུ་དང། ནམ་མཁའ་ལྡིང་གི་འདབ་མའི་དབྱིབས་ལྟ་བུ་དང། འབྲུའི་ཁ་ལྟ་བུ་དང། པདྨའི་དབྱིབས་ལྟ་བུ་དང། ཟླ་བ་ཁམ་པའི་དབྱིབས་ལྟ་བུའོ། ། ཚོགས་ཞེས་བྱ་བ་ནི། དཔུང་གི་མཆོག་དག་གོ་།ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཡུལ་བཤམས་པའི་ནང་་དུ་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་བཅུ་གཉིས་པ་རྫོགས་སོ།། །།སྡོམ་ནི། རྡེག་པ་དང་ནི་ཐལ་མོ་དང། །འཁྲུ་དང་སྦེད་དང་བསོད་པ་། སློང། །གནས་ངན་ལེན་འཆབ་ཁྱིམ་དང་མེ། །འདུན་པ་དང་ནི་ནུབ་གཉིས་དང། །བར་ཆད་དང་ནི་ཤེས་བཞིན་དང། །དགེ་ཚུལ་མ་གཉིས་ཁ་དོག་བསྒྱུར། །གླེང་གཞི་ནི་མཉན་ཡོད་ནའོ། ། དེའི་ཚེ་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་འཐབ་མོ་དང་མཚང་

---

^{[མ་དཔེ་གཟིགས་ན་འདིར་གནོན།]}

འདྲུ་བར་བྱེད་དོ། །བུད་མེད་ནི་རང་བཞིན་གྱིས་ཁྲོ་བ་ཡིན་པས། དེ་རང་བཞིན་གྱིས་ཁྲོས་པས། ཁྲོས་འཁྲུགས་་རྔམ་པར་གྱུར་ནས་དགེ་སློང་མ་རྣམས་ལ་ལྟག་དབྱུག་དང། ཐལ་ལྕག་གིས་བརྡེགས་པ་དང། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས། དགེ་་སློང་མ་ལ་རྡེག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཁྲོས་ཞེས་བྱ་བ་ནི་ཀུན་ནས་དཀྲིས་པའོ། །འཁྲུགས་རྔམ་པར་གྱུར་ཏེ་ཞེས་བྱ་བ་་ནི་ལྷག་པར་ཞེན་ནས་སོ། །ཡི་མ་རངས་ནས་ཞེས་བྱ་བ་ནི་ཡིད་མི་བདེ་བ་སྐྱེས་པའོ། །དགེ་སློང་མ་ལ་ཞེས་བྱ་བ་ནི་ཆོས་འདི་པ་ལའོ། །བརྡེགས་ན་ཞེས་བྱ་བ་ནི་སོར་མོ་ལྔས་རྡེག་ནའོ། ། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཁྲོས་ནས། དགེ་སློང་མ་རྣམས་ལ་སོར་མོ་གཅིག་གིས་བརྡེགས་ན་ལྟུང་བྱེད་དུ་་འགྱུར་རོ། །དེ་བཞིན་སོར་མོ་ལྔས་ནི་ལྟུང་བྱེད་ལྔའོ། །དེ་བཞིན་དུ་ལག་པ་དང། མཛུབ་མོ་དང། མགོ་བོ་དང། ལྟག་པ་དང། ལུས་དང། གྲུ་མོ་དང། བརླ་དང། བྱིན་པ་དང། རྐང་པ་དང། རྐང་པའི་མཐེ་བོས་བརྡེགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་དབྱུག་པ་དང། གསེག་མ་དང། བོང་བ་ལ་སོགས་པས་བརྡེགས་ན་ཐམས་ཅད་དུ་ལྟུང་བྱེད་དུ་འགྱུར་རོ། ། གལ་ཏེ་ཕྱགས་མས་བརྡེགས་ན་ཕྱགས་མའི་ཉག་མ་ཇི་སྙེད་ཕོག་པ་དེ་སྙེད་ཀྱི་ལྟུང་བྱེད་དོ། །ཇི་སྙེད་མ་ཕོག་པ་དེ་སྙེད་ནི་ཉེས་བྱས་སོ། །དེ་བཞིན་དུ་མོན་སྲན་སྡེའུའི་སྤར་བས་བརྡེགས་ན། མོན་སྲན་སྡེའུའི་འབྲུ་ཇི་སྙེད་ལུས་ལ་ཕོག་པ་དེ་སྙེད་ཀྱི་ལྟུང་བྱེད་དོ། །ཇི་སྙེད་མ་ཕོག་པ་དེ་སྙེད་ཀྱི་ཉེས་བྱས་སོ། །ལས་དང་པོ་པ་ལ་སོགས་པ་ལ་ནི་ལྟུང་བ་མེད་དོ། །ལྟུང་བྱེད་བཞི་པའི། དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །བྱུང་བ་སྔ་མ་དེ་ཉིད་ལ་

---

^{[མ་དཔེ་གཟིགས་ན་འདིར་གནོན།]}

ཁྱད་པར་ནི་འདི་ཡོད་དེ། དགེ་སློང་མ་དེ་རྣམས་ཁོ་ན་ལ་ཞེས་བྱ་བ་ནས། ཐལ་མོ་གཟས་པ་དང་ཞེས་བྱ་་བའི་བར་རོ། །ཇི་ཙམ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་་པ་བཅའ་བའི་བར་དུ་མཛད་དེ་ཡང་དགེ་སློང་མ་གང་ཁྲོས་འཁྲུགས་རྔམ་པར་གྱུར་ཏེ་ཡི་མ་རངས་ནས། དགེ་སློང་མ་ལ་བརྡེག་པར་གཟས་ན། ཐ་ན་ཐལ་མོས་ཀྱང་རུང་སྟེ་ལྟུང་བྱེད་དོ། ། ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །གཞན་ནི་སྔ་མ་བཞིན་ནོ། །ཁྱད་པར་ནི་འདི་ཡོད་དེ། གཟས་ན་ཞེས་བྱ་བ་ནི། གདེངས་ནས་མ་བརྒྱབ་པའོ། །ལྟུང་བྱེད་དོ་ཞེས་བྱ་བ་ནི་་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེ་ཁོ་ན་བཞིན་དུ་ལྟུང་བའི་རིམ་པ་བརྗོད་པར་བྱ་སྟེ། དགེ་སློང་མས་ཇི་ཙམ་ཅུང་ཟད་དགེ་སློང་མ་ལ་གཟས་ན་ཐམས་ཅད་དུ་ལྟུང་བྱེད་དུ་་འགྱུར་རོ། །ལྟུང་བྱེད་བཞི་པའི་གཉིས་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་བཅུ་དགུ་པ། གླེང་གཞི་ནི་མཉན་ཡོད་ནའོ། །དེ་ནས་ཚེ་དང་ལྡན་པ་་འཆར་ཀ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ནས། མཉན་ཡོད་དུ་བསོད་སྙོམས་ཀྱི་ཕྱིར་ཞུགས་ཏེ། མཉན་ཡོད་དུ་བསོད་སྙོམས་སྤྱད་ནས། སྦེད་མའི་ཁྱིམ་གང་ན་བ་དེར་་སོང་བ་དང། སྦེད་མས་འཆར་ཀ་རྒྱང་རིང་པོ་ཁོ་ན་ནས་འོང་བ་མཐོང་ངོ། །མཐོང་ནས་ཀྱང་འདི་སྐད་ཅེས་སྨྲས་སོ། །འཆར་ཀ་རབ་ཏུ་བྱུང་ན་ད་བདག་གིས་ཅི་དག་་བགྱིས། དེ་ནས་འཆར་ཀས་སྦེད་མ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་བཙུན་མོ་དྲུག་ཁྲི་སྤངས་ཏེ་རབ་ཏུ་བྱུང་ན་ཁྱོད་ཀྱིས་དེ་དག་གི་རྐང་པ་འཁྲུ་བར་ཡང་མི་ལོན་ན། དེ་་དག་ཅི་བྱེད། དེས་འདི་སྐད་ཅེས་སྨྲས་སོ། །བདག་ཀྱང་རབ་ཏུ་བྱུང་ལགས་གྲངས། དེ་ནས་འཆར་ཀས་སྦེད་མ་ལ་འདི་སྐད་ཅེས་སྨྲས་སོ། །ཁྱིམ་གྱི་བྱ་བ་དག་ལེགས་པར་སྤོངས་ཤིག་།དེས་་ལེགས་པར་སྤངས་ནས་འཆར་ཀ་དང་རྒྱལ་པོའི་ཁབ་ཏུ་སོང་སྟེ་དབྱར་གནས་སོ། །དེ་ནས་སྦེད་མ་རྒྱལ་

---

^{[མ་དཔེ་གཟིགས་ན་འདིར་གནོན།]}

བྱེད་ཀྱི་ཚལ་དུ་སོང་བ་དང། ཉེ་དགས་འདི་སྐད་ཅེས་སྨྲས་སོ། །དགོས་པ་ཅི་ཞིག་ལ་་འོངས། དེ་ནས་སྦེད་མས་འདི་སྐད་ཅེས་སྨྲས་སོ། །རབ་ཏུ་བྱུང་ངོ། །ཉེ་དགས་འདི་སྐད་ཅེས་སྨྲས་སོ། །འཆར་ཀ་ནི་ཡུལ་ཀོ་ས་ལའི་སྤུ་གྲི་རྟུལ་བས། ཡུལ་མ་ག་དྷར་སྤུ་གྲིའི་ཕྱིར་སོང་་ངོ། །དེ་ནས་སྦེད་མ་དེ་བདག་རབ་ཏུ་ཡང་མ་བྱུང་ལ། ཁྱིམ་ན་གནས་པར་ཡང་མ་གྱུར་ཏོ། །སྙམ་དུ་སེམས་ཁོང་དུ་ཆུད་ཅིང་འདུག་པ་དང། དགེ་སློང་མ་འཆག་པ་གཞན་ཞིག་གིས་སྦེད་་མ། སྐྱེ་དགུའི་བདག་མོ་ལ་གཏད་ནས་ཞེས་བྱ་བ་ནས། རབ་ཏུ་ཕྱུང་ངོ་ཞེས་བྱ་བའི་བར་རོ། །དེ་ནས་འཆར་ཀ་དབྱར་གྱི་ཟླ་བ་གསུམ་པོ་དག་འདས་ནས། མཉན་ཡོད་དུ་ཕྱིན་པ་དང། སྦེད་མས་འཆར་ཀ་འོངས་སོ་ཞེས་ཐོས་ནས། དེ་ནས་དགེ་སློང་མ་སྦེད་མ་འཆར་ཀ་གང་ན་བ་དེར་སོང་སྟེ། སོན་པ་དང། གནས་ཁང་གི་སྒོ་ལ་བརྡེགས་སོ། །དེ་ནས་འཆར་ཀས་འདི་སུ་ཞིག་ཅེས་་དྲིས་སོ། །དེས་འདི་སྐད་ཅེས་སྨྲས་སོ། །བདག་སྦེད་མ་ལགས་སོ། །དེ་ནས་འཆར་ཀས་འདི་སྐད་ཅེས་སྨྲས་སོ། །ཁྱིམ་བདག་གི་ཆུང་མ་ནང་དུ་ཞུགས་ཤིག་།དེས་འདི་སྐད་ཅེས་སྨྲས་སོ། ། བདག་ཁྱིམ་བདག་གི་མཆིས་བྲང་མ་ལགས་ཏེ། བདག་རབ་ཏུ་བྱུང་བ་ལགས་སོ། །དེས་ཁྱོད་སུས་གནང་ན་འདི་ལྟར་ཁྱེད་རབ་ཏུ་བྱུང་ཞེས་སྤྱོས་པ་དང། དེ་ནས་སྦེད་མས་འཆར་ཀ་ལ་བཟོད་་པ་གསོལ་ཏོ། །དེ་ནས་དེའི་འོག་ཏུ་འཆར་ཀས་སྦེད་མ་ལ་ཆོས་བཤད་པར་བརྩམས་པ་དང། ཇི་ཙམ་ན་ཀུན་ཏུ་ཆགས་པར་གྱུར་ཏོ། །བཅོམ་ལྡན་འདས་ཀྱིས་བུད་མེད་མཁས་པའི་རང་་བཞིན་ཅན་ནི། སྐྱེས་པ་ཆགས་པ་ཤེས་སོ་ཞེས་གསུངས་པ་ཡིན་པས། ཇི་ཙམ་ན་འཕྲིགས་ནས། གཅི་བའི་བརྔ་བྱས་ཏེ་བྲོས་སོ། །འཆར་ཀ་ཡང་རྐང་པའི་སྒྲ་ལ་མཁས་པ་ཡིན་པས་་རིག་ནས། ཕྱི་བཞིན་བརྒྱུགས་པ་དང། དེའི་བརླ་ལ་རེག་པས་སྨད་གཡོགས་གཤེར་ཏོ། །སྦེད་མས་འདོད་ཆགས་དང་བྲལ་བར་རིག་ནས། འཆར་ཀ་གང་ན་བ་དེར་སོང་སྟེ་ཕྱིན་ནས། སྦེད་་མས་འཆར་ཀ་ལ་འདི་སྐད་ཅེས་སྨྲས་སོ། །འཕགས་པ་འཆར་ཀ་གལ་ཏེ་བདག་གིས་དེ་ལྟར་མ་

---

^{[མ་དཔེ་གཟིགས་ན་འདིར་གནོན།]}

བགྱིས་ན། ངེས་པར་འོ་ཀོལ་གཉིས་ཀ་དགེ་སྦྱོང་གི་ཚུལ་ལས་ཉམས་པར་འགྱུར་རོ་ཞེས་་དེ་སྐད་སྨྲས་པ་དང། འཆར་ཀས་སྦེད་མ་ལ་འདི་སྐད་ཅེས་སྨྲས་སོ། །སྦེད་མ་ལེགས་སོ་ལེགས་སོ། །བཅོམ་ལྡན་འདས་ཀྱིས་གང་བདག་སྲུང་བ་དེ་ནི་གཞན་སྲུང་བ་ཡིན་་ལ། གང་གཞན་སྲུང་བ་དེ་ནི། བདག་སྲུང་བ་ཡིན་ནོ་ཞེས་གསུངས་པ་ནི་ཐོག་ཏུ་བབ་སྟེ། འདི་ལྟར་ཡང་སྦེད་མ་ཁྱོད་ཀྱིས་རང་ཡང་བསྲུངས། ཁོ་བོ་ཡང་བསྲུངས་སོ། །དེ་ནས་སྦེད་མས་་འཆར་ཀ་ལ་འདི་སྐད་ཅེས་སྨྲས་སོ། །ཁྱོད་ལམ་གྱིས་དུབ་སྟེ་བྱོན་གྱི། གོས་དག་བདག་ལ་གཏོད་ཅིག་།བཀྲུའོ། །དེ་ནས་བྱིན་པ་དང་སྦེད་མས་མཐོང་ནས། འགྱོད་པ་སྐྱེས་ཏེ་བདག་གིས་་ནི་བུད་མེད་ཀྱི་མི་བརྟན་པ་བྱས། བདག་གིས་ནི་དགེ་སྦྱོང་གི་མི་བརྟན་པ་དང། བྲམ་ཟེའི་མི་བརྟན་པ་བྱས་ཏེ། བདག་གི་ལུས་ཀྱི་ཡན་ལག་དེ་འདི་ལྟ་སྟེ། འཆར་ཀས་མ་མཐོང་བའམ། མ་རེག་པའམ། སུས་ཀྱང་མི་ཤེས་པ་དེ་གང་ཞིག་ཡོད་ཅེས། དེ་ལྟར་སྨྲེ་སྔགས་མང་དུ་བཏོན་ནས། མི་གཙང་བ་རྨའི་ནང་དུ་བླུགས་སོ། །དེ་ནས་སྦེད་མས་འཆར་ཀའི་གོས་དག་བཀྲུས་་ནས་དགེ་སློང་མའི་དབྱར་ཁང་གང་ན་བ་དེར་སོང་ངོ། །དེ་ནས་སྦེད་མ་དུས་གཞན་ཞིག་ན། སེམས་ཅན་དང་ལྡན་པར་གྱུར་ཏོ། །དེ་ནས་དགེ་སློང་མ་རྣམས་ཀྱིས། སྦེད་མའི་ལུས་ཀྱི་་གྱུར་པ་དག་མཐོང་ནས་ཞེས་བྱ་བ་ནས། སྐབས་དེ་དགེ་སློང་མ་རྣམས་ཀྱིས་དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི། དགེ་སློང་མ་དག་དགེ་སློང་ཉེ་དུ་མ་ཡིན་པའི་གོས་དག་འཁྲུ་བ་དང། ཁ་དོག་སྒྱུར་བ་དང། འཆག་པ་ལས་གྱུར་ཏོ་སྙམ་མོ། །དེ་ནས་བཅོམ་་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་ཉེ་དུ་མ་ཡིན་པའི་གོས་རྙིང་པ་འཁྲུའམ། ཁ་དོག་སྒྱུར་རམ། འཆག་་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦེད་མའོ། །ཉེ་དུ་མ་ཡིན་པ་ཞེས་བྱ་བ་ནི་མ་མེས་དང། ཕ་མེས་བདུན་རྒྱུད་

---

^{[མ་དཔེ་གཟིགས་ན་འདིར་གནོན།]}

ཚུན་ཆད་ནི་ཉེ་དུ་ཡིན་ནོ། །དགེ་སློང་མ་ཞེས་བྱ་བ་ནི་ཆོས་འདི་་པའོ། །རྙིང་པ་དག་ཅེས་བྱ་བ་ནི། དུས་ཚིགས་གསུམ་པོ་དགུན་དང་དཔྱིད་དང་དབྱར་གང་ཡང་རུང་བའི་དུས་ཚིགས་སུ་ལོངས་སྤྱད་པར་གྱུར་པའོ། །གོས་ཞེས་བྱ་བ་ནི། བདུན་པོ་གང་ཡང་་རུང་བའོ། །འཁྲུའམ་ཞེས་བྱ་བ་ནི་ཐ་ན་ཆུ་ལན་ཅིག་ལྡུགས་པ་ཡང་ངོ། །ཁ་བསྒྱུར་རམ་ཞེས་བྱ་བ་ནི། ཐ་ན་ཚོན་གྱི་ནང་དུ་ལན་ཅིག་འཇུག་པ་ཡང་ངོ། །འཆག་ན་ཞེས་བྱ་བ་ནི། ཐ་ན་་ལག་མཐིལ་གྱིས་ལན་ཅིག་བརྡེབས་ན་ཡང་ངོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཉེ་དུ་མ་ཡིན་པའི་འདུ་ཤེས་ཀྱིས། དགེ་་སློང་ཉེ་དུ་མ་ཡིན་པའི་གོས་འཁྲུ་ན་ལྟུང་བྱེད་དོ། །ཁ་སྒྱུར་ན་ལྟུང་བྱེད་དོ། །འཆག་ན་ལྟུང་བྱེད་དོ། །དེ་བཞིན་དུ་ཉེ་དུ་མ་ཡིན་པ་ལ་ཡིད་གཉིས་ཀྱིས་འཁྲུ་ན་ལྟུང་བྱེད་དོ། །ཁ་སྒྱུར་ན་་ལྟུང་བྱེད་དོ། །འཆག་ན་ལྟུང་བྱེད་དོ། །དགེ་སློང་མས་དགེ་སློང་ཉེ་དུ་ལ་ཉེ་དུ་མ་ཡིན་པའི་འདུ་ཤེས་ཀྱིས་འཁྲུ་ན་ཉེས་བྱས་སོ། །ཁ་སྒྱུར་ན་ཉེས་བྱས་སོ། །འཆག་་ན་ཉེས་བྱས་སོ། །དེ་བཞིན་དུ་ཉེ་དུ་ལ་ཡིད་གཉིས་ཀྱིས་འཁྲུ་ན་ཉེས་བྱས་སོ། །ཁ་སྒྱུར་ན་ཉེས་བྱས་སོ། །འཆག་ན་ཉེས་བྱས་སོ། །ཕ་དང་བུ་དང་མིང་པོ་དག་གི་ལ་ལྟུང་བ་མེད་དོ། །ལྟུང་་བྱེད་བཞི་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅུ་བདུན་སྡེ་རྣམས་ལ་བརྟེན་ནས། བཅོམ་ལྡན་འདས་ཀྱིས་དགེ་སློང་རྣམས་ལ་སྦེད་པའི་་བསླབ་པའི་གཞི་བཅའ་བ་མཛད་པ་དང། དེ་ནས་བཅུ་གཉིས་སྡེ་རྣམས་རྒོད་པའི་བསམ་པས། དགེ་སློང་མ་རྣམས་ཀྱི་གོས་དག་སྦེད་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་་གང་དགེ་སློང་གིའམ། དགེ་སློང་མའིའམ། དགེ་སློབ་མའི་འམ། དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། ཆོས་གོས་སམ། དྲ་བའམ། ཚྭ་ཁུག་གམ། སྐ་རགས་སྦེད་དམ། སྦེད་དུ་འཇུག་ན་ལྟུང་བྱེད་དོ། །ཡང་དགེ་སློང་

---

^{[མ་དཔེ་གཟིགས་ན་འདིར་གནོན།]}

མ་གང་ཞེས་བྱ་བ་ནི་བཅུ་གཉིས་སྡེ་དག་གོ་།དགེ་སློང་ངམ་ཞེས་བྱ་བ་ནི་ཆོས་འདི་པའོ། །དགེ་སློང་མའམ་ཞེས་བྱ་བ་ནི། བཅོམ་ལྡན་འདས་་ཀྱི་ཉན་ཐོས་མའིའོ། །དགེ་སློབ་མའམ་ཞེས་བྱ་བ་ནི། དགེ་སློབ་མའི་བསླབ་པ་ལ་སློབ་པ་གང་ཡིན་པའོ། །དགེ་ཚུལ་དང་ཞེས་བྱ་བ་ནི་གཞོན་ནུའོ། །དགེ་ཚུལ་མ་ཞེས་བྱ་བ་ནི་གཞོན་ནུ་མའོ། །ལྷུང་་བཟེད་དམ་ཞེས་བྱ་བ་ནི། བྱིན་གྱིས་བརླབས་པ་ལ་སོགས་ཏེ་ཐ་ན་སྣོད་ཅིག་ཤོས་ཀྱང་ཡིན་ནོ། །ཆོས་གོས་སམ་ཞེས་བྱ་བ་ནི། བདུན་པོ་གང་ཡང་རུང་བའོ། །དྲ་བའམ་ཞེས་བྱ་བ་ནི་དྲ་བ་ཉིད་དོ།། ཚྭ་ཁུག་གམ་ཞེས་བྱ་བ་ནི་ལན་ཚའི་སྣོད་དོ། །སྐ་རགས་ཞེས་བྱ་བ་ནི་ལྕག་པོད་དམ། རྒྱ་ཅང་གང་ཡང་རུང་བ་སྟེ། དགེ་སྦྱོང་གི་འཚོ་བའི་ཡོ་བྱད་ཅི་གང་ཡང་རུང་བ་སྦས་ན་རྐྱེན་དེ་ལྟ་བུ་མ་་གཏོགས་ཏེ་ལྟུང་བྱེད་དོ། །རྐྱེན་དེ་ལྟ་བུ་མ་གཏོགས་ཏེ་ཞེས་བྱ་བ་ནི། རྐྱེན་དེ་ལྟ་བུ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་་མས་ཇི་ཙམ་ཅུང་ཟད་དགེ་སྦྱོང་གི་འཚོ་བའི་ཡོ་བྱད་སྦེད་ན་རྐྱེན་མ་གཏོགས་ཏེ་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ།། དེའི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ནས། ཁ་ཟས་བསོད་པའི་དགག་པ་མཛད་ནས། ནད་པ་ལ་ནི་རྗེས་སུ་གནང་ངོ། །དེ་ནས་བཅུ་གཉིས་སྡེ་དག་བྲམ་ཟེ་དང། ཁྱིམ་བདག་་གི་ཁྱིམ་རྣམས་སུ་ཁ་ཟས་བསོད་པ་བསླངས་ནས། ན་བ་ཡང་ལོངས་སྤྱོད་པར་བྱེད། མི་ན་བ་ཡང་ལོངས་སྤྱོད་པར་བྱེད་པ་དང། དགེ་སློང་མ་རྣམས་ཀྱིས་བསྒོ་བ་ན། དེ་དག་གིས་འདི་་སྐད་ཅེས། བསླབ་པའི་གཞི་དེ་ནི་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མ་ན་བ་རྣམས་ལ་ཁ་་ཟས་བསོད་པ་རྗེས་སུ་གནང་བ་གང་ཡིན་པ་དེ་དག་ནི་འདི་

---

^{[མ་དཔེ་གཟིགས་ན་འདིར་གནོན།]}

ལྟ་སྟེ། འོ་མ་དང། ཞོ་དང། མར་སར་དང། ཉ་དང། ཤ་དང། ཤ་སྐམ་མོ། །ཡང་དགེ་སློང་མ་གང་མི་ན་པར་བདག་ཉིད་ཀྱི་་ཆེད་དུ་བཅའ་བ་དང་བཟའ་བ་དེ་ལྟ་བུ་གཞན་གྱི་ཁྱིམ་དག་ནས་བསླངས་ཏེ་འཆའམ། ཟ་ན་ལྟུང་བྱེད་དོ། །གང་ཡིན་པ་དེ་དག་ནི་ཞེས་བྱ་བ་ནི། བཅོམ་ལྡན་འདས་དེ་བཞིན་གཤེགས་་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །ནད་པ་རྣམས་ཀྱི་ཞེས་བྱ་བ་ནི། ནད་ཀྱིས་ཐེབས་པ་རྣམས་ཀྱིའོ། །དགེ་སློང་མ་རྣམས་ཞེས་བྱ་བ་ནི། དེ་བཞིན་གཤེགས་་པའི་ཉན་ཐོས་མ་རྣམས་སོ། །བསོད་པ་ཞེས་བྱ་བ་ནི་ཞིམ་པོའོ། །བཅའ་བ་དང་བཟའ་བ་ཞེས་བྱ་བ་ནི། བཅའ་བ་ལྔ་དང། བཟའ་བ་ལྔའོ། །འོ་མ་ཞེས་བྱ་བ་ནི་འོ་མ་ཉིད་དོ། །ཞོ་ཞེས་་བྱ་བ་ནི་ཞོ་ཉིད་དོ། །མར་སར་ཞེས་བྱ་བ་ནི་མར་རོ། །ཤ་ཞེས་བྱ་བ་ནི་ཤ་ཉིད་དོ། །ཉ་ཞེས་བྱ་བ་ནི་ཉ་ཉིད་དོ། །ཤ་སྐམ་ཞེས་བྱ་བ་ནི་ཤ་སྐམ་པའོ། །འདི་ལྟར་ཁྱིམ་དག་ནས་སློང་ན་ཞེས་བྱ་བ་ནི་རང་གིས་སོ། །སློང་དུ་འཇུག་ན་ཞེས་བྱ་བ་ནི་གཞན་ནོ། །ཟོས་སམ་འཆོས་ན་ཞེས་བྱ་བ་ནི། ལྐོག་མར་ཁམ་གྱིས་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །མི་ན་བར་སློང་ཞིང་མི་ན་བར་ཟ་ན། སློང་བ་ན་དེ་ལ་ཉེས་བྱས་སོ། །ཟ་བ་ན་ལྟུང་བྱེད་དོ། །མི་ན་བར་སློང་ཞིང་ན་བ་ན་ཟ་ན། སློང་བ་ན་དེ་ལ་ཉེས་བྱས་སོ། །ཟ་བ་ན་ལྟུང་བ་མེད་དོ། །དེ་བཞིན་དུ་ན་བ་ན་བསླངས་ལ། མི་ན་བ་ན་ཟ་ན། སློང་བ་དེ་ལ་ལྟུང་བ་མེད་དོ། །ཟ་བ་ན་ལྟུང་བྱེད་དོ། །དེ་བཞིན་དུ་ན་བན་སློང་ཞིང་ན་བ་ན་ཟ་ན། གཉི་ག་ལ་ལྟུང་བ་མེད་དོ། །ལྟུང་བྱེད་བཞི་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་གནས་ངན་ལེན་གྱི་ལྟུང་བ་བྱུང་ནས། ཕན་ཚུན་འཆབ་པར་བྱེད་ཅིང་དེ་དག་འཐབ་པ་དང། མཚང་འདྲུ་བར་བྱེད་ཅིང། ཕན་ཚུན་དུ་གཞི་དེས་གླེང་བར་བྱེད་པ་དེ་དག་དོན་ཉུང་བའི་དགེ་སློང་མ་རྣམས་ཀྱིས་ཐོས་ནས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ།

---

^{[མ་དཔེ་གཟིགས་ན་འདིར་གནོན།]}

ཡང་དགེ་སློང་མ་གང་ཤེས་བཞིན་དུ་དགེ་སློང་མའི་གནས་ངན་ལེན་གྱི་ལྟུང་བ་འཆབ་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།གནས་ངན་ལེན་ཞེས་བྱ་བ་ནི། གནས་ངན་ལེན་གཉིས་ཏེ། ཕས་ཕམ་པར་འགྱུར་བས་ཀུན་ནས་བསླང་བ་དང། དགེ་འདུན་ལྷག་མས་ཀུན་ནས་བསླང་བའོ། །འཆབ་ན་ཞེས་བྱ་བ་ནི་གཞན་ལ་མི་སྨྲ་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ལ་ཕས་ཕམ་པར་འགྱུར་བས་ཀུན་ནས་བསླང་བའི་ལྟུང་བ་བྱུང་བ་མཐོང་ལ། དེས་དེ་བཅབ་པར་སེམས་བསྐྱེད་ན་ལྟུང་བྱེད་དོ། །དེ་བཞིན་དུ་དགེ་འདུན་ལྷག་མ་དང། དེ་བཞིན་དུ་ལྟུང་བྱེད་དང། སོ་སོར་བཤགས་པར་བྱ་བ་དང། ཉེས་བྱས་ལ་ནི་ཉེས་བྱས་སོ། །གལ་ཏེ་འཐབ་མོར་གྱུར་ན་ལྟུང་བ་མེད་དོ། །ལྟུང་བྱེད་བཞི་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་ཀྱིས་བསམས་པ། ཚེམ་བུ་བ་ལྷུང་བཟེད་ནག་པོ་ཅན་འདི་དག་གིས་ཁོ་བོ་ཅག་དགེ་སློང་མ་རྣམས་ཀྱིས་མདུན་དུ་མཐོ་བཙམས་ན་ཁོ་མོ་ཅག་གིས་འདི་དག་ལ་གནོད་པ་ཅི་ཞིག་བྱ་སྙམ་མོ། །དེ་ནས་སྦོམ་དགའ་མོ་དང། གཙུག་དགའ་མོས་འདི་སྐད་ཅེས་སྨྲས་སོ། །ལན་དུ་མཐོ་བཙམ་པར་བྱ་བ་ལྟ་བླའོ་ཞེས་དེ་དག་གིས་དགེ་སློང་མ་རྒན་མོ་རྒན་མོ་རྣམས་སྲང་དང། སུམ་མདོ་དང། བཞི་མདོ་རྣམས་སུ་མགྲོན་དུ་བོས་ནས། ཇི་སྲིད་ཀྱིས་ཟན་འཆད་པ་དེ་སྲིད་འཁྱམ་དུ་བཅུག་གོ་།བཅུ་གཉིས་སྡེ་རྣམས་ཀྱིས་ནི་གཉིས་ཤིང་གཉིས་ཤིང་གསང་ནས། བྲམ་ཟེ་དང། ཁྱིམ་བདག་གི་ཁྱིམ་རྣམས་སུ་སོང་སྟེ་བསོད་སྙོམས་ཟོས་སོ། །དེ་ནས་དགེ་སློང་མ་རྒན་མོ་རྒན་མོ་དེ་དག་དབྱར་ཁང་དུ་འོངས་ནས། འཕྲེས་ཏེ་འདུག་པ་དང། དེ་དག་གི་ལྷན་ཅིག་གནས་པ་དང། ཉེ་གནས་རྣམས་ཀྱིས་སྨྲས་པ། འཕགས་མ་དག །གལ་ཏེ་ཟས་གཞན་གྱི་ལགས་ཞེས་ཏེ། ལྟོ་ཡང་གཞན་གྱི་ལགས་སམ་ཅི། དེ་དག་གིས་འདི་སྐད་ཅེས་སྨྲས་སོ། །དེ་རིང་སུས་ཟོས་པ་ཡིན་གྲང། དེ་དག་གིས་

---

^{[མ་དཔེ་གཟིགས་ན་འདིར་གནོན།]}

འདི་སྐད་ཅེས་བཤོས་མ་བཀུམ་གྲང་ཞེས་སྨྲས་པ་དང། དེ་དག་གིས་སྐབས་དེ་དག་དགེ་སློང་མ་རྣམས་ལ་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཀླན་ཀ་ཚོལ་བས་ཅི་ནས་ཀྱང་དགེ་སློང་མ་འདི་ལ་ཀླན་ཀ་བཙལ་བར་འགྱུར་རོ་སྙམ་པ་དེ་ཉིད་རྐྱེན་དུ་བྱས་ཏེ། དགེ་སློང་མ་ལ་འདི་སྐད་ཅེས་འཕགས་མ་ཁྱོད་ཚུར་ཁྱིམ་དག་ཏུ་བཞུད་དོ། །དེར་ཁྱོད་ལ་བཟའ་བ་དང་བཅའ་བ་བསོད་པ་དག་ཇི་ཙམ་འདོད་པ་སྦྱིན་དུ་གཞུག་གོ་ཞེས་སྨྲས་ནས། དེས་དེ་ལ་བཟའ་བ་དང་བཅའ་བ་བསོད་པ་དག་ཇི་ཙམ་འདོད་པར་སྦྱིན་དུ་མ་བཅུག་པར་དེའི་འོག་ཏུ་འདི་སྐད་ཅེས། འཕགས་མ་ཁྱོད་དང་ཁོ་མོ་ལྷན་ཅིག་སྨྲ་བའམ། འདུག་པ་བདེ་བ་མ་ཡིན་ནོ། །དེ་ལྟ་མོད་ཀྱི་ཁོ་མོ་གཅིག་པུ་སྨྲའམ་འདུག་ན་བདེས། ཁྱོད་སོང་ཞིག་ཅེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ། དགེ་སློང་མ་ལ་ཞེས་བྱ་བ་ནི། བཅོམ་ལྡན་འདས་ཀྱི་ཉན་ཐོས་མ་ལའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །ཚུར་ཁྱིམ་དག་ཏུ་བཞུད་དང་ཞེས་བྱ་བ་ནི། བྲམ་ཟེ་དང། ཁྱིམ་བདག་གི་ཁྱིམ་རྣམས་སུའོ། །དེར་ཁྱོད་ལ་བཟའ་བ་དང་བཅའ་བ་བསོད་པ་དག་སྦྱིན་དུ་གཞུག་གོ་།ཞེས་བྱ་བ་ནི་བཅའ་བ་ལྔ་དང། བཟའ་བ་ལྔའོ། །ཇི་ཙམ་འདོད་པར་ཞེས་བྱ་བ་ནི་ཇི་ཙམ་ཟ་འདོད་པའོ། །དེས་དེ་ལ་སྦྱིན་དུ་མ་བཅུག་པར་འདི་སྐད་ཅེས་ཁྱོད་དང་ཁོ་མོ་ལྷན་ཅིག་བདེ་བ་མ་ཡིན་ནོ་ཞེས་བྱ་བ་ནི། ཁྱོད་དང་ལྷན་ཅིག་དགའ་བ་མ་ཡིན་པའོ། །སྨྲའམ་ཞེས་བྱ་བ་ནི་ཚིག་གོ་།འདུག་པའམ་ཞེས་བྱ་བ་ནི་འཁོད་པའོ། །ཀླན་ཀ་ཚོལ་བ་ཞེས་བྱ་བ་ནི་མཐོ་བཙམ་པའི་གླགས་ཚོལ་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཀླན་ཀ་ཚོལ་བས་དེ་སྐད་ཅེས་སྨྲས་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་སྨན་པའི་ལུང་ཡོད་

---

^{[མ་དཔེ་གཟིགས་ན་འདིར་གནོན།]}

པའམ། དེ་ལ་བརྟེན་ནས་དགེ་འདུན་གྱི་ཟན་བཅད་པར་གྱུར་ན་མི་རུང་བ་ཞིག་ཡིན་ན་ལྟུང་བ་མེད་དོ། །ལྟུང་བྱེད་བཞི་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ་བླ་གབ་མེད་པར་མེ་འབུད་བའི་བསླབ་པའི་གཞི་བཅའ་བ་མཛད་ལ། དེ་ཡང་ནད་པ་རྣམས་ལ་བརྟེན་ནས་ནི་རྗེས་སུ་གནང་བ་དེའི་ཚེ། བཅུ་གཉིས་སྡེ་རྣམས་རང་གི་ལག་གིས་མེ་སྤོར་བར་བྱེད། སྤོར་དུ་འཇུག་པར་བྱེད་པ་དང། ཇི་ཙམ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མི་ན་བར་བདག་ཉིད་ཀྱི་ཕྱིར་བདེ་བར་འདོད་ནས། མེ་སྤོར་རམ་སྤོར་དུ་འཇུག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།མི་ན་བར་ཞེས་བྱ་བ་ནི། ནད་པ་མ་གཏོགས་པའོ། །བདག་ཉིད་ཀྱི་ཕྱིར་ཞེས་བྱ་བ་ནི་རང་གི་ཆེད་དུའོ། །མེ་སྤོར་རམ་ཞེས་བྱ་བ་ནི་མེ་འབུད་པའོ། །བདག་ཉིད་ཀྱིས་ཞེས་བྱ་བ་ནི་རང་གིས་སོ། །སྤོར་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་མདག་མ་ལེན་ཏམ། དྲིའི་ཆེད་དུ་མེས་འགེངས་པར་བྱེད་ན། དེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ལྟུང་བྱེད་དོ། །དེ་བཞིན་དུ་དྲི་དག་དེའི་ཆེད་དུ་ལྡུགས་ན་ཡང་སངས་རྒྱས་ཀྱི་ཆེད་དུ་ཡིན་ནོ་ཞེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ལྟུང་བྱེད་དོ། །དེ་བཞིན་དུ་མཁན་པོའི་ཕྱིར་ཡང་བྱིན་གྱིས་མ་བརླབས་ན་ལྟུང་བྱེད་དོ། །དེ་བཞིན་དུ་དགེ་འདུན་གྱི་ཕྱིར་མེ་སྤོར་ན། ཇི་ཙམ་དགོས་པ་མ་རྫོགས་ཀྱི་བར་དུ་དུས་རིང་པོར་བྱིན་གྱིས་བརླབ་པར་བྱའོ། །བྱིན་གྱིས་རློབ་ན་དེ་ལྟ་ན་ལེགས། གལ་ཏེ་བྱིན་གྱིས་མི་རློབ་ན་ལྟུང་བྱེད་དོ། །ཤིང་རེ་རེ་ནས་འཇུག་ན་ཡང་དུས་བྱིན་གྱིས་བརླབ་པར་བྱའོ། །བྱིན་གྱིས་རློབ་ན་དེ་ལྟ་ན་ལེགས། གལ་ཏེ་བྱིན་གྱིས་མ་རློབ་ན་ལྟུང་བྱེད་དོ། །དེ་

---

^{[མ་དཔེ་གཟིགས་ན་འདིར་གནོན།]}

བཞིན་དུ་མེ་འཐོར་བར་བྱེད་དམ། སྦུད་པར་བྱེད་ན་ཡང་ལྟུང་བྱེད་དོ། །དགེ་སློང་མས་མགལ་མེ་བླངས་ཏེ། མགལ་མེའི་འཁོར་ལོ་སྐོར་བར་བྱེད་ན་ལྟུང་བྱེད་དོ་ཞེས་བྱ་བ་ནས། དེ་བཞིན་དུ་མདག་མ་ལ་རི་མོར་འདྲི་བར་བྱེད་ན་ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་མདག་མ་ལེན་ན། གལ་ཏེ་དུས་བྱིན་གྱིས་རློབ་ན་དེ་ལྟ་ན་ལེགས། གལ་ཏེ་མི་བྱེད་ན་ཉེས་བྱས་སོ། །གལ་ཏེ་ནད་པའི་ཕྱིར་བླ་གབ་མེད་པར་སྣོད་དུ་བཙོ་བར་ཚོད་དམ། དེ་བཞིན་དུ་ཚོན་རྩིའི་ལས་དང་ལྷུང་བཟེད་ཀྱི་ལས་བྱེད་པ་སྟེ། ཐམས་ཅད་དུ་དུས་བྱིན་གྱིས་བརླབས་ན་ལྟུང་བ་མེད་དོ། །ལྟུང་བྱེད་བཞི་པའི་བརྒྱད་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅུ་བདུན་སྡེ་རྣམས་ལ་བརྟེན་ནས་དགེ་འདུན་གྱི་བྱ་བ་ཆོས་དང་ལྡན་པའི་བསླབ་པའི་གཞི་བཅའ་བ་མཛད་པ་དེའི་ཚེ། རང་བཞིན་དུ་གནས་པའི་དགེ་སློང་མ་རྣམས་དགེ་འདུན་གྱི་བྱ་བ་ཆོས་དང་ལྡན་པས་དགེ་འདུན་གྱི་བྱ་བ་བྱེད་དོ། །དེའི་ཚེ་བཅུ་གཉིས་སྡེ་དེ་རྣམས་ཀྱིས་དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་བྱིན་ཟིན་ནས། མི་སྦྱིན་ནོ། །ཉེས་པར་བྱིན་ནོ། །མི་མཐུན་པས་བྱས་ཀྱི་མཐུན་པས་མ་ཡིན་ནོ་ཞེས་སྨྲ་བ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་བྱིན་ནས། དེའི་འོག་ཏུ་སྤོང་བའི་ཆོས་སུ་བྱེད་ཅིང། དགེ་སློང་མ་འདུན་པ་ཕྱིར་བྱིན་ཅིག །ཁྱོད་ལ་མི་སྦྱིན་ནོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ་།དགེ་འདུན་གྱི་བྱ་བ་ཆོས་དང་ལྡན་པ་ལ་ཞེས་བྱ་བ་ནི། དགེ་འདུན་གྱི་ཆོས་དང་ལྡན་པའི་དགེ་འདུན་གྱི་བྱ་བ་ལ་གསོལ་བ་དང། གསོལ་བ་དང་གཉིས་དང། གསོལ་བ་དང་བཞིའི་ལས་དག་གོ་།འདུན་པ་བྱིན་ནས་ཞེས་བྱ་བ་ནི་བློ་གྲོས་བྱིན་ནས་སོ། །དེའི་འོག་ཏུ་ཞེས་བྱ་བ་ནི་དུས་གཞན་ནོའོ། །སྤོང་བའི་ཆོས་སུ་བྱེད་ཅིང་ཞེས་བྱ་བ་ནི། འདི་སྐད་ཅེས་ཁོ་མོས་འདུན་པ་མ་

---

^{[མ་དཔེ་གཟིགས་ན་འདིར་གནོན།]}

བྱིན་ནོ་ཞེས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་གྱི་བྱ་བ་ཆོས་དང་ལྡན་པ་ལ་འདུན་པ་བྱིན་ནས། སྤོང་བའི་ཆོས་སུ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་བདེན་པ་ཉིད་དམ། ཉེས་པར་བྱིན་པ་ཡིན་ན་ལྟུང་བ་མེད་དོ། །ལྟུང་བྱེད་བཞི་པའི་དགུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། དགེ་སློང་རྒན་ཞུགས་ཤིག་ལ་བརྟེན་ནས། བསྙེན་པར་མ་རྫོགས་པ་དང་ལྷན་ཅིག་ཐམས་ཅད་དུ་གནས་པར་མི་བྱའོ། །གནས་ན་ལྟུང་བྱེད་དོ། །ཡང་དགེ་ཚུལ་སྒྲ་གཅན་ཟིན་ལ་བརྟེན་ནས། ནུབ་གཉིས་ཚུན་ཆད་རྗེས་སུ་གནང་ངོ། །དེ་ནས་བཅུ་གཉིས་སྡེ་རྣམས་ཀྱིས་འདི་སྐད་ཅེས་གང་དུ་ནུབ་གཉིས་ཡིན་པ་དེ་ལ་ནི་གསུམ་དུ་འགྱུར་འདོད་ཅིག །གང་དུ་གསུམ་ཡིན་པ་དེ་ལ་ནི་བཞིར་འགྱུར་འདོད་ཅིག་ཅེས་སྨྲ་བའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། གནས་པར་མི་བྱའོ། །གནས་ན་ལྟུང་བྱེད་དོ། །དེ་ནས་དགེ་སློང་མ་དེ་རྣམས་ཀྱིས། དགེ་ཚུལ་མ་དག་དགེ་ཚུལ་གྱི་ཀུན་དགའ་ར་བའི་ཕྱི་རོལ་ཏུ་བྱུང་བ་ན་དེ་དག་མི་སྦེད་ཅིང་མ་བསྲུངས་པར་གྱུར་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཀུན་དགའ་ར་བའི་ཕྱི་རོལ་ཏུ་དབྱུང་བར་མི་བྱའོ། །དེ་ལྟ་མོད་ཀྱི་གཞི་སྤང་བར་བྱའོ། །དེ་ལྟར་བྱས་པ་དང། དགེ་སློང་མ་ཞིག་གིས་དགེ་ཚུལ་མ་ནད་པ་ཞིག་ཡོད་པ་དེ་ལ་ཁ་ཟས་ཙམ་བྱིན་ནས། བདག་གི་ལག་པས་བྱིན་ལེན་མ་བྱས་པར་མ་གྱུར་གྲང་ཞེས་སླར་ཡང་རེག་པར་མི་བྱེད་པ་དང། ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། རང་གི་ལག་གིས་བསྙོད་པར་བྱ་སྟེ། དེ་ལ་འགྱོད་པར་མི་བྱའོ། །དེ་ནས་དགེ་ཚུལ་མ་ནད་པ་དེ་དག་ཟས་ཀྱི་དུས་སུ་འདུག་པར་གྱུར་པ་ན་དགེ་སློང་མ་དེ་དག་རྟེན་པར་མི་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་གཅིག་ཏུ་

---

^{[མ་དཔེ་གཟིགས་ན་འདིར་གནོན།]}

འདུག་ལ་བརྟེན་པར་བྱ་སྟེ། དེ་ལ་འགྱོད་པར་མི་བྱའོ། །དེ་ནས་ཡང་ནུབ་མོར་གྱུར་པ་ན། དགེ་ཚུལ་མ་དེ་དག་བོར་ཏེ་དོང་བ་དང། ནད་པ་དེ་ཡང་ནུབ་མོ་སྐོམ་སློང་བ་དང་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ཁོ་ནར་ལྷན་ཅིག་གནས་པར་བྱ་སྟེ། དེ་ལ་འགྱོད་པར་མི་བྱའོ། །དེ་བཞིན་དུ་དགེ་སློང་མ་ན་ན་ཡང་དེར་དགེ་ཚུལ་མའམ། ནད་གཡོག་དག་གནས་པར་བྱ་ཞིང། སྣང་བ་དང་བཅས་པར་ཡང་གནས་པར་བྱ་སྟེ། དེ་ལ་འགྱོད་པར་མི་བྱའོ། །དེ་ནས་བཅོམ་ལྡན་འདས་ཀྱིས། དགེ་སློང་མ་རྣམས་བསླབ་པ་འདོད་པ་དང། བསླབ་པ་ལ་གུས་པ་དང། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས། སྔ་མ་ནི་བཅས་པའོ། །འདི་ནི་རྗེས་སུ་གནང་བ་སྟེ། ཉན་ཐོས་མ་རྣམས་ཀྱིས་ཡང་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་ལྷག་པར་གནས་གཅིག་ཏུ་ཉལ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།བསྙེན་པར་མ་རྫོགས་པ་དང་ཞེས་བྱ་བ་ལ། བསྙེན་པར་རྫོགས་པ་ནི་གཉིས་ཏེ། དགེ་སློང་དང། དགེ་སློང་མའོ། །ལྷག་མ་ནི་བསྙེན་པར་མ་རྫོགས་པའོ། །ནུབ་གཉིས་ལས་ལྷག་པར་ཞེས་བྱ་བ་ནི། ནུབ་གཉིས་འདས་པར་རོ། །གནས་གཅིག་ཏུ་ཉལ་བར་བྱེད་ན་ཞེས་བྱ་བ་ལ་གནས་བཞི་པོ་དག་ཏུ་ཉལ་བར་བྱེད་པ་སྟེ། ཐམས་ཅད་གཡོགས་ཤིང་ཐམས་ཅད་བསྐོར་བ་དང། ཐམས་ཅད་གཡོགས་ཤིང་ཕལ་ཆེར་མ་བསྐོར་བ་དང། ཐམས་ཅད་ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་དང། ཐམས་ཅད་ཕལ་ཆེར་གཡོགས་ཤིང་ཕལ་ཆེར་བསྐོར་བའོ། །ཐམས་ཅད་གཡོགས་ཤིང་ཐམས་ཅད་བསྐོར་བ་ནི། གནས་ཁང་ངམ། འཁོར་གྱི་ཁྱམས་སམ། ཁང་པ་རྩེག་མ་དག་གོ་།ཐམས་ཅད་གཡོགས་ཤིང་ཕལ་ཆེར་མ་བསྐོར་བ་ནི། ཁྱམས་ཟླུམ་པོའམ། རིམ་གྲོའི་གནས་དག་གོ་།ཐམས་ཅད་ཕལ་ཆེར་མ་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ངོས་གསུམ་པའོ། །ཕལ་

---

^{[མ་དཔེ་གཟིགས་ན་འདིར་གནོན།]}

ཆེར་མ་གཡོགས་ཤིང་ཕལ་ཆེར་མ་བསྐོར་བ་ནི་ཁྱམས་ངོས་བཞི་པའོ། །སྐྱ་རེངས་ཤར་ན་ཞེས་བྱ་བ་ནི། སྐྱ་རེངས་གསུམ་པོ་སྐྱ་རེངས་དང་པོའམ། བར་མའམ། ཐ་མ་གང་ཡང་རུང་བ་ཤར་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བསྙེན་པར་མ་རྫོགས་པ་དང་ལྷན་ཅིག་ནུབ་གཉིས་ལས་འདས་ཏེ། ནུབ་གསུམ་པར་གནས་གཅིག་ཏུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་བཅུ་པ་རྫོགས་སོ། །།གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་དགེ་སློང་མ་འཆི་ལྟས་ལ། སྡིག་པ་ཅན་གྱི་ལྟ་བར་སོང་བའི་རྣམ་པ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་ཟེར་བའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་སློང་མ་འཆི་ལྟས་ལ་བཞམས་ཏེ་བསྒོ་ཞིག །དེ་ལ་བཞམས་ཏེ་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས། འདི་ཉིད་ནི་བདེན་གྱི། གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་སློང་མ་འཆི་ལྟས་ལ་གསོལ་པ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ཏེ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ཞེས་བྱ་བའི་བར་རོ་ཞེས་བྱ་བ་ནི། འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་

---

^{[མ་དཔེ་གཟིགས་ན་འདིར་གནོན།]}

པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས། བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དེ་ལ། དགེ་སློང་མ་མང་པོས་བཞམས་ཏེ་བསྒོ་སྟེ། དེ་ལ་བཞམས་ཏེ་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས། འདི་ཉིད་བདེན་གྱི། གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་དགེ་སློང་མ་འཆི་ལྟས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །དེ་བཞིན་དུ་ལས་ཀྱང་ལན་གསུམ་གྱི་བར་དུ་བྱའོ། །དེ་ལ་གསོལ་བ་དང་བཞིའི་ལས་ཀྱིས་བསྒོ་བ་ན། འདི་སྐད་ཅེས་འདི་ཉིད་བདེན་གྱི། གཞན་ནི་གཏི་མུག་གོ་ཞེས་སྨྲ་བའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་དང། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གནས་ནས་དབྱུང་བའི་ལས་བྱོས་ཤིག །ལས་ནི་འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་ལགས་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་དགེ་སློང་མ་འཆི་

---

^{[མ་དཔེ་གཟིགས་ན་འདིར་གནོན།]}

ལྟས་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་ལ་གནས་ནས་དབྱུང་བའི་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་དེ་སྲིད་དུ་དེ་ལ། དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི་སོ་སོ་ཡང་དག་པར་དགའ་བར་མི་བགྱི་ཞིང། དཔེར་ན་གདོལ་བའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱིའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དང། དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་གཏོང་དུ་མི་བཏུབ་པ་ལ་གནས་ནས་དབྱུང་བའི་འཕྲིན་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་གཏོང་དུ་མི་བཏུབ་པ་དེ་སྲིད་དུ་འདི་ལ་དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོ་ཡང་དག་པར་དགའ་བར་མི་བགྱི་ཞིང། དཔེར་ན་གདོལ་པའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱི་ན། ཕུ་ནུ་མོ་གང་དག་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ། གཏོང་དུ་མི་བཏུབ་པ་ལ་གནས་ནས་དབྱུང་བའི་ལས་བགྱི་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། ལན་གཉིས་སུ་ཡང་དོན་འདི་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་

---

^{[མ་དཔེ་གཟིགས་ན་འདིར་གནོན།]}

གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དང། དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་གཏོང་དུ་མི་བཏུབ་པ་ལ་གནས་ནས་དབྱུང་བའི་འཕྲིན་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་གཏོང་དུ་མི་བཏུབ་པ་དེ་སྲིད་དུ་འདི་ལ་དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོ་ཡང་དག་པར་དགའ་བར་མི་བགྱི་ཞིང། གདོལ་པའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱི་ན། ཕུ་ནུ་མོ་གང་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་དེ། འདོར་ནུ་མི་བཏུབ་པ་ལ་གནས་ནས་དབྱུང་བའི་ལས་བགྱི་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་གཉིས་པ་སྟེ། ལན་གསུམ་དུ་ཡང་དོན་དེ་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་འཆི་ལྟས་འདི་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་དང། དགེ་འདུན་གྱིས་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བར་སོང་བ་གཏོང་དུ་མི་བཏུབ་པ་ལ་གནས་ནས་དབྱུང་བའི་འཕྲིན་ལས་མཛད་དེ། ཇི་སྲིད་དུ་དགེ་སློང་མ་འཆི་ལྟས་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་གཏོང་དུ་མི་བཏུབ་པ་དེ་སྲིད་དུ་འདི་ལ། དགེ་སློང་མ་རྣམས་ཀྱིས་གཏམ་འདྲེ་བར་མི་བགྱི། ཕེབས་པར་སྨྲ་བར་མི་བགྱི། སོ་སོར་ཡང་དག་པར་དགའ་བར་མི་བགྱི་ཞིང། གདོལ་པའི་བུ་མོ་བཞིན་དུ་ཤིན་ཏུ་སྨད་པས་སྨད་པར་བགྱིའོ། །འདི་ནི་ལས་བརྗོད་པ་གསུམ་པ་སྟེ། འཕགས་མའི་དགེ་འདུན་གྱིས་བཟོད་ཅིང་གནང་ནས། འདི་ལྟར་ཅང་མི་གསུང་པས་དེ་དེ་བཞིན་དུ་འཛིན་ཏོ། །དེ་དེ་ལྟར་གནས་ནས་དབྱུང་བའི་ལས་བྱས་

---

^{[མ་དཔེ་གཟིགས་ན་འདིར་གནོན།]}

ཀྱང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས། འདི་ཉིད་བདེན་གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏེ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་ཟེར་ན། དགེ་སློང་མ་དེ་ལ་དགེ་སློང་མ་རྣམས་ཀྱིས། འདི་སྐད་ཅེས་ཕུ་ནུ་མོ་ཁྱོད་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་བརྗོད་པར་མ་སྨྲ་ཞིག །བཅོམ་ལྡན་འདས་ལ་སྐུར་པ་མ་འདེབས་ཤིག །བཅོམ་ལྡན་འདས་ལ་སྐུར་པ་བཏབ་པས་ནི། ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་ཀྱང་མི་གསུང་ངོ། །བར་དུ་གཅོད་པའི་ཆོས་ཡིན་པ་ལས། བཅོམ་ལྡན་འདས་ཀྱིས་རྣམ་གྲངས་དུ་མར་བར་དུ་གཅོད་པའི་ཆོས་སུ་གསུངས་ཏེ། དེ་དག་སོ་སོར་བསྟེན་ན་བར་དུ་གཅོད་པར་ཡང་འགྱུར་གྱི། ཕུ་ནུ་མོ་ཁྱོད་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་ཐོང་ཞིག་ཅེས་བརྗོད་པར་བྱའོ། །གལ་ཏེ་དགེ་སློང་མ་དེ་ལ་དགེ་སློང་མ་རྣམས་ཀྱིས་དེ་སྐད་སྨྲས་པ་ན། གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །གཞི་དེ་གཏོང་བར་བྱ་བའི་ཕྱིར། ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན། གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་འཆི་ལྟས་སོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །དེ་ལྟར་ཁོ་མོས་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ཀྱིས་ཆོས་བསྟན་པ་ཤེས་སོ་ཞེས་བྱ་བ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སོ། །དེ་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་ཞེས་བྱ་བ་ནི། དགེ་སྦྱོང་གི་ཚུལ་གྱི་བར་དུ་གཅོད་པ་འདི་ལྟ་སྟེ། ཕས་ཕམ་པར་འགྱུར་བའི་ཆོས་བརྒྱད་དང། དགེ་འདུན་ལྷག་མ་ཉི་ཤུ་དང། སྤང་བའི་ལྟུང་བྱེད་སུམ་ཅུ་རྩ་གསུམ་དང། ལྟུང་བྱེད་བརྒྱ་བརྒྱད་ཅུ་དང། སོ་སོར་བཤགས་པར་བྱ་བ་བཅུ་གཅིག་དང། བསླབ་པ་མང་པོ་དང། རྩོད་པ་ཞི་བར་བྱ་བའི་ཆོས་བདུན་ཏེ། ཆོས་མ་ཡིན་པ་འདི་ལ་ཆོས་ཀྱི་སྒྲར་གསུངས་སོ། །དེ་ལ་སོ་སོར་བསྟེན་ཀྱང་ཞེས་བྱ་བ་ནི། ལྷག་པར་སྤྱད་ནའོ། །བར་དུ་གཅོད་པར་མི་འགྱུར་ཞེས་བྱ་བ་ནི། དགེ་སྦྱོང་གི་ཚུལ་གྱི་བར་དུ་གཅོད་པར་མི་འགྱུར་བའོ། །དགེ་སློང་མ་དེ་ལ་ཞེས་བྱ་བ་ནི། འཆི་ལྟས་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི། ཆོས་འདི་པ་དག་གིས་སོ། །འདི་སྐད་ཅེས་བརྗོད་པར་བྱའོ་ཞེས་བྱ་བ་ནི། འདི་སྐད་ཅེས་སྨྲ་བར་བྱ་བའོ། །ཕུ་ནུ་མོ་ཁྱོད་འདི་སྐད་ཅེས། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་བརྗོད་པར་མ་སྨྲ་ཞིག་ཞེས་བྱ་བ་ནས། བཞམས་ཏེ་བསྒོ་བ་ནི་ཞེས་བྱ་བའི་བར་རོ། །གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གཉིས་ལན་གསུམ་དུ་ཡང་དག་པར་བསྟན་པར་བྱ། ཡང་དག་པར་བསྒོ་བར་བྱའོ་ཞེས་བྱ་བ་ནས། གསོལ་པ་དང་བཞིའི་ལས་ཀྱིས་བསྒོ་བར་བྱའོ། །ཞེས་བྱ་བའི་བར་རོ་ཞེས་བྱ་བ་ནི། བསྒོ་བ་སྔ་མ་ཇི་ལྟ་བ་བཞིན་དུའོ། །ཡང་དག་པར་བསྒོ་བ་ནི་དེ་ཡིན་ནོ། །ཡང་དག་པར་བསྟན་པ་ནི་དེ་ཡིན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདི་སྐད་ཅེས། དེ་ལྟར་ཁོ་མོས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་སྨྲས་ན་ཐམས་

---

^{[མ་དཔེ་གཟིགས་ན་འདིར་གནོན།]}

ཅད་དུ་ཉེས་བྱས་སུ་འགྱུར་རོ། །བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་བྱས་སོ། །ལས་དང་པོ་བརྗོད་པ་སྨྲས་པ་ན། གལ་ཏེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ཉེས་བྱས་སོ། །ལས་བརྗོད་པ་གཉིས་པ་སྨྲས་པ་མ་རྫོགས་པར་གལ་ཏེ་གཏོང་ན་དེ་ལྟ་ན་ལེགས། གལ་ཏེ་སྨྲས་པ་རྫོགས་ཀྱང་མི་གཏོང་ན་ཉེས་བྱས་སོ། །ལས་བརྗོད་པ་གསུམ་པ་སྨྲས་པ་མ་རྫོགས་པར་མི་མཐུན་པ་དག་ཆོས་མ་ཡིན་པར་བྱེད་པ་དང། མཐུན་པ་དག་ཆོས་མ་ཡིན་པར་བྱེད་པ་དང། མི་མཐུན་པ་དག་ཆོས་མ་ཡིན་པ་ལྟར་བཅོས་པ་དང། མཐུན་པ་དག་ཆོས་མ་ཡིན་པ་ལྟར་བཅོས་པ་དང། ཆོས་ཇི་ལྟ་བ་བཞིན་མ་ཡིན་པ་དང། འདུལ་བ་ཇི་ལྟ་བ་བཞིན་མ་ཡིན་པ་དང། སྟོན་པའི་བསྟན་པ་ཇི་ལྟ་བ་བཞིན་མ་ཡིན་པས་དེ་ལྟར་བྱེད་ན་ལྟུང་བ་མེད་དོ། །ཆོས་ཇི་ལྟ་བ་དང། འདུལ་བ་ཇི་ལྟ་བ་དང། སྟོན་པའི་བསྟན་པ་ཇི་ལྟ་བ་ལས་བརྗོད་པ་བཞི་པ་སྨྲས་པ་རྫོགས་ན་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་བཅུ་གཅིག་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དེའི་ཚེ་བཅུ་གཉིས་སྡེ་རྣམས་ཀྱིས། འཆི་ལྟས་དེ་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་ཏུ་ལོངས་སྤྱོད་པར་བྱེད། །གནས་གཅིག་ཏུ་ཉལ་བར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ། དེ་སྐད་ཟེར་བའི་དགེ་སློང་མ་ཆོས་བཞིན་མ་བྱས་པ་སྡིག་པ་ཅན་གྱི་ལྟ་བར་སོང་བ་དེ་མ་སྤངས་པ་དང། གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཀུན་ཏུ་ལོངས་སྤྱོད་པར་བྱེད། ཀུན་ཏུ་གནས་པར་བྱེད། གནས་གཅིག་ཏུ་ལྷན་ཅིག་ཉལ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། །

---

^{[མ་དཔེ་གཟིགས་ན་འདིར་གནོན།]}

ཆོས་བཞིན་མ་བྱས་པ་ཞེས་བྱ་བ་ནི། གསོལ་བ་དང་བཞིའི་ལས་ཀྱིས་མ་ཕྱུང་བའོ། །གཏམ་འདྲེ་བར་བྱེད་ཅེས་བྱ་བ་ནི། ལུང་དབོག་པ་སྦྱིན་པར་བྱེད་པའོ། །ཕེབས་པར་སྨྲ་བར་བྱེད་ཅེས་བྱ་བ་ནི། བརྗེད་པ་དྲན་པ་སྦྱིན་པར་བྱེད་པའོ། །ཀུན་ཏུ་ལོངས་སྤྱོད་པར་བྱེད་ཅེས་བྱ་བ་ནི། བསྙེན་བཀུར་རང་གིར་བྱེད་པའོ། །ཀུན་ཏུ་གནས་པར་བྱེད། གནས་གཅིག་ཏུ་ཉལ་བར་བྱེད་ཅེས་བྱ་བ་ནི། གནས་བཞི་པོ་དག་ཏུ་སྐྱ་རེངས་འཆར་བ་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལྷན་ཅིག་གནས་གཅིག་ཏུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ལྟ་བར་སོང་བ་དེ་དང་དབྲལ་བར་འདོད་པར་གྱུར་ན་ལྟུང་བ་མེད་དོ། །ལྟུང་བྱེད་བཞི་པའི་བཅུ་གཉིས་པ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །སྦོམ་དགའ་མོ་ལ་དགེ་ཚུལ་མ་མཛེས་མ་དང། རྒྱལ་མ་གཉིས་ཡོད་དེ། དེ་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས། བཅོམ་ལྡན་འདས་ཀྱིས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་སྨྲ་བའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་ཚུལ་མ་མཛེས་མ་དང། རྒྱལ་མ་གཉིས་ལ་བཞམས་ཏེ་བསྒོ་བ་བྱོས་ཤིག །དེ་གཉིས་ལ་བཞམས་ཏེ་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི། གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཁྱེད་ཀྱིས་དགེ་ཚུལ་མ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་བྱོས་ཤིག །བསྒོ་བ་ནི་འདི་ལྟར་

---

^{[མ་དཔེ་གཟིགས་ན་འདིར་གནོན།]}

བྱ་སྟེ། གནས་མལ་བཤམས་པ་བྱས་ནས་ཞེས་བྱ་བ་ནི། དགེ་སློང་མ་རྣམས་ལ་དྲིས་པའི་ལན་ཡང་དག་པར་བསྒོ་ལ། དགེ་ཚུལ་མ་ཐོས་པའི་ཉེ་འཁོར་ནས་བཀར་ཏེ། མཐོང་བའི་ཉེ་འཁོར་དུ་འདུག་ཏུ་བཅུ་གནས་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་ཚུལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོ་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར། ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་ན་དེ་གཉིས་ལ། དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ། དེ་གཉིས་ལ་དགེ་སློང་མ་རབ་ཏུ་མང་པོས་བཞམས་ཏེ་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི། གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། དགེ་ཚུལ་མ་མཛེས་མ་དང། རྒྱལ་མ་འདི་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་ཚུལ་མ་མཛེས་མ་དང། རྒྱལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་བ་ན། དེ་གཉིས་ལ་དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ། དེ་དག་ལ་བཞམས་ནས་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་

---

^{[མ་དཔེ་གཟིགས་ན་འདིར་གནོན།]}

གྱི་གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བགྱིད་ཀྱི། འཕགས་མའི་དགེ་འདུན་གྱིས་མཛེས་མ་དང། རྒྱལ་མ་འདི་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་ཕུ་ནུ་མོ་གང་དག་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་གཉིས་པ་དང། གསུམ་པ་ཡང་བརྗོད་པར་བྱའོ། །འཕགས་མའི་དགེ་འདུན་གྱིས་བཟོད་ཅིང་གནང་ནས་ཞེས་བྱ་བ་ནས། འདི་ལྟར་ཅང་མི་གསུང་བས། དེ་དེ་བཞིན་དུ་འཛིན་ཏོ་ཞེས་བྱ་བའི་བར་རོ། །དེ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་ན། གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི། གཞན་ནི་གཏི་མུག་གོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་ཚུལ་མ་མཛེས་མ་དང། རྒྱལ་མ་ལ་བསྙིལ་བའི་ལས་བྱོས་ཤིག །བྱ་བ་ནི་འདི་ལྟ་བུ་ཡིན་ཏེ། གནས་མལ་བཤམས་པ་བྱས་ལ་ཞེས་བྱ་བ་ནས། དགེ་ཚུལ་མ་མཛེས་མ་དང། རྒྱལ་མ་ཐོས་པའི་ཉེ་འཁོར་ནས་བཀར་ཏེ། མཐོང་བའི་ཉེ་འཁོར་དུ་འདུག་ཏུ་བཅུག་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་ཚུལ་མ་མཛེས་མ་དང། རྒྱལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་པ་དེ་ལྟར་ཁོ་མོ་ཅག་གིས་བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་ནས། དགེ་ཚུལ་མ་མཛེས་མ་དང། རྒྱལ་མ་དེ་གཉིས་ལ། དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ། དེ་གཉིས་ལ་བཞམས་ནས་བསྒོ་བ་ན་ཞེས་བྱ་བ་ནས་འདི་ཉིད་བདེན་གྱི། གཞན་ནི་གཏི་མུག་གོ་ཞེས་བྱ་བའི་བར་

---

^{[མ་དཔེ་གཟིགས་ན་འདིར་གནོན།]}

རོ། །དེ་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་སྟེ། དེ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་ན་ཞེས་བྱ་བ་ནས། འདི་ཉིད་བདེན་གྱི་གཞན་ནི་གཏི་མུག་གོ་ཞེས་བྱ་བའི་བར་དུ་མཆི་ལགས་ཀྱི། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་དགེ་ཚུལ་མ་མཛེས་མ་དང། རྒྱལ་མ་འདི་གཉིས་ལ་ཕུ་ནུ་མོ་དག་ཁྱེད་ཅག་དེང་ཕན་ཆད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཅིག །ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱིར་བཞིན་དུ་ཡང་མ་འགྲོ་ཞིག །དགེ་ཚུལ་མ་གཞན་དག་དགེ་སློང་མ་རྣམས་དང་ལྷན་ཅིག་ནུབ་གཉིས་ཚུན་ཆད་གནས་གཅིག་ཏུ་ཉལ་བར་གནང་བ་གང་ཡིན་པ་དེ་ཡང་དེང་ཕྱིན་ཆད་ཁྱེད་ལ་མེད་ཀྱི། བུད་མེད་གཏི་མུག་ཅན་ཁྱེད་གཉིས་གཞན་དུ་དེང་ཞིག་ཅེས་བསྙིལ་བའི་ལས་མཛད་དོ། །འདི་ནི་གསོལ་བའོ། །དེའི་འོག་ཏུ་དེ་གཉིས་ལ་བསྙིལ་བའི་གསོལ་བ་མཛད་ཟིན་གྱི། སྡིག་པ་ཅན་གྱི་ལྟ་བ་དེ་ཐོང་ཞིག་ཅེས་བསྒོ་བར་བྱའོ། །གལ་ཏེ་གཏོང་ན་དེ་ལྟ་ན་ལགས། གལ་ཏེ་མི་གཏོང་ན་དེའི་འོག་ཏུ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་ཚུལ་མ་མཛེས་མ་དང། རྒྱལ་མ་འདི་གཉིས་ལ་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་བྱུང་སྟེ། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས། བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མཆི་ནས། དགེ་ཚུལ་མ་མཛེས་མ་དང། རྒྱལ་མ་གཉིས་ལ་དགེ་སློང་མ་རབ་ཏུ་མང་པོས་བཞམས་ནས་བསྒོ་སྟེ། དེ་གཉིས་ལ་བཞམས་ནས་བསྒོ་བ་ན་ཞེས་བྱ་བ་ནས་འདི་ཉིད་བདེན་

---

^{[མ་དཔེ་གཟིགས་ན་འདིར་གནོན།]}

གྱི་གཞན་ནི་གཏི་མུག་གོ་ཞེས་བྱ་བའི་བར་རོ། །དེ་གཉིས་ལ་དགེ་འདུན་གྱིས་གསོལ་བ་དང་བཞིའི་ལས་ཀྱིས་བསྒོ་སྟེ། དེ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་ན། འདི་ཉིད་བདེན་གྱི་གཞན་ནི་གཏི་མུག་གོ་ཞེས་བྱ་བའི་བར་དུ་མཆི་ནས། འཕགས་མའི་དགེ་འདུན་གྱིས་དགེ་ཚུལ་མ་མཛེས་མ་དང། རྒྱལ་མ་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་དེ་གཉིས་ལ་བསྙིལ་བའི་འཕྲིན་ལས་མཛད་པ་གང་དག་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་ཡིན་ནོ། །དེའི་འོག་ཏུ་དེ་གཉིས་ལ་བསྒོ་བར་བྱ་སྟེ། གལ་ཏེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གཉིས་སུ་ཡང་དོན་དེ་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཞེས་བྱ་བ་ནས་ལན་གཉིས་པ་ཉིད་བརྗོད་པར་བྱས་ནས་ཡང་བསྒོ་བར་བྱ་སྟེ། གལ་ཏེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གསུམ་དུ་ཡང་དོན་དེ་ཉིད་བརྗོད་པར་བྱའོ། །འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཞེས་བྱ་བ་ནས། འཕགས་མའི་དགེ་འདུན་གྱིས་དགེ་ཚུལ་མ་མཛེས་མ་དང། རྒྱལ་མ་སྡིག་པ་ཅན་གྱི་ལྟ་བར་སོང་བ་དེ་གཏོང་དུ་མི་བཏུབ་པ་ལ་བསྙིལ་བའི་འཕྲིན་ལས་མཛད་པར། འཕགས་མའི་དགེ་འདུན་གྱིས་བཟོད་ཅིང་གནང་ནས། འདི་ལྟར་ཅང་མི་གསུངས་པས་དེ་དེ་བཞིན་དུ་འཛིན་ཏོ། །དེ་ནས་དགེ་ཚུལ་མ་དེ་གཉིས་ངུ་ཞིང་མཁན་མོའི་དྲུང་དུ་དོང་སྟེ། ཕྱིན་ནས་མཁན་མོ་ལ་འདི་སྐད་ཅེས་སྨྲས་སོ། །མཁན་མོ་བདག་ཅག་ལ་དགེ་སློང་མའི་དགེ་འདུན་གྱིས་བསྙིལ་བའི་འཕྲིན་ལས་མཛད་ལགས་སོ། །དེ་ནས་སྦོམ་དགའ་མོས་དགེ་ཚུལ་མ་དེ་གཉིས་ལ་འདི་སྐད་ཅེས་སྨྲས་སོ། །བསྙིལ་བའི་ལས་བྱས་པ་རྣམས་ལ་ཅི། ཁམས་གསུམ་ཡང་མ་ལུས་སམ། གྲོང་དང་ལྗོངས་དག་ཀྱང་མེད་དམ་ཅི། ཞེས་དེ་བསྙིལ་བའི་ལས་བྱས་པ་དེ་གཉིས་དང་ལྷན་ཅིག་གཏམ་འདྲེ་བར་བྱེད། ཕེབས་པར་

---

^{[མ་དཔེ་གཟིགས་ན་འདིར་གནོན།]}

སྨྲ་བར་བྱེད། ཀུན་ཏུ་ལོངས་སྤྱོད་པར་བྱེད། གནས་གཅིག་ཏུ་ཉལ་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་ཚུལ་མ་ལ་འདི་སྐད་ཅེས། ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ་སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས། བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་ཟེར་བའི་དགེ་ཚུལ་མ་དེ་ལ། དགེ་སློང་མ་རྣམས་ཀྱིས་འདི་སྐད་ཅེས། དགེ་ཚུལ་མ་ཁྱོད་འདི་སྐད་ཅེས་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས། བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་མ་སྨྲ་ཞིག །བཅོམ་ལྡན་འདས་ལ་སྐུར་པ་མ་འདེབས་ཤིག །བཅོམ་ལྡན་འདས་ལ་སྐུར་པ་བཏབ་པས་ནི་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་ཀྱང་མི་གསུང་ངོ། །དགེ་ཚུལ་མ་དག་འདོད་པ་རྣམས་ནི་བར་དུ་གཅོད་པར་བྱེད་པ་ཁོ་ན་ཡིན་པ་ལས་བཅོམ་ལྡན་འདས་ཀྱིས་རྣམ་གྲངས་དུ་མར་བར་དུ་གཅོད་པར་བྱེད་པར་གསུངས་ཏེ། དེ་དག་སོ་སོར་བསྟེན་ན་པར་དུ་གཅོད་པར་ཡང་འགྱུར་བས་དགེ་ཚུལ་མ་དག་སྡིག་པ་ཅན་གྱི་ལྟ་བའི་རྣམ་པར་སོང་བ་འདི་ལྟ་བུ་འདི་ཐོང་ཞིག་ཅེས་དེ་སྐད་དུ་དགེ་ཚུལ་མ་དེ་ལ་དགེ་སློང་མ་རྣམས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་དགེ་ཚུལ་མ་དེ་ལ་ དགེ་སློང་མ་རྣམས་ཀྱིས་འདི་སྐད་ཅེས་དགེ་ཚུལ་མ་ཁྱོད་དེང་ཕན་ཆད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་དེ་

---

^{[མ་དཔེ་གཟིགས་ན་འདིར་གནོན།]}

ལ་སྟོན་པ་ཞེས་ཀྱང་མ་ཟེར་ཅི་།ཚངས་པ་མཚུངས་པར་སྤྱོད་མཁས་པ་གང་ཡང་རུང་བ་དག་གི་རྗེས་བཞིན་རྗེས་བཞིན་དུ་ཡང་མ་འགྲོ་ཞིག །དགེ་ཚུལ་མ་གཞན་དག་དགེ་སློང་མ་རྣམས་དང། ནུབ་གཉིས་ཚུན་ཆད་གནས་གཅིག་ཏུ་ཉལ་བར་གནང་བ་གང་ཡིན་པ་དེ་ཡང། ཁྱོད་ལ་དེང་ཕན་ཆད་མེད་ཀྱི། །དགེ་ཚུལ་མ་དག་ཕར་སོང་ཞིག་ཅེས་བརྗོད་པར་བྱའོ། །ཡང་དགེ་སློང་མ་གང་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་ཉེ་བར་འཇོག་པར་བྱེད་དམ། ཉེ་བར་སྟོན་པར་བྱེད་དམ། ཀུན་ཏུ་ལོངས་སྤྱོད་པར་བྱེད་དམ། གནས་གཅིག་ཏུ་ལྷན་ཅིག་ཉལ་བར་བྱེད་ན་ལྟུང་བྱེད་དོ། །དགེ་ཚུལ་མ་ཞེས་བྱ་བ་ནི་མཛེས་མ་དང། རྒྱལ་མའོ། །དགེ་སློང་མ་རྣམས་ཞེས་བྱ་བ་ནི། ཆོས་འདི་པ་དག་གོ་།འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པ་ཡིན་ནོ་ཞེས་གསུངས་པ་གང་ཡིན་པ་དེ་ལ། སོ་སོར་བསྟེན་ཀྱང་བར་དུ་གཅོད་པར་མི་འགྱུར་བ་དེ་ལྟར་ཁོ་མོ་ཅག་གིས། བཅོམ་ལྡན་འདས་ཀྱིས་ཆོས་བསྟན་པ་ཤེས་སོ་ཞེས་བྱ་བ་ནི། ལྷག་པར་སྤྱད་ཀྱང། དགེ་སྦྱོང་གི་ཚུལ་གྱི་བར་ཆད་དུ་མི་འགྱུར་བའོ། །དེ་དག་ལ་ཞེས་བྱ་བ་ནི། དགེ་ཚུལ་མ་མཛེས་མ་དང། རྒྱལ་མ་ལའོ། །དགེ་སློང་མ་རྣམས་ཀྱིས་ཞེས་བྱ་བ་ནི་ཆོས་འདི་པ་དག་གིས་སོ། །འདི་སྐད་ཅེས་བརྗོད་པར་བྱའོ་ཞེས་བྱ་བ་ནི། བཞམས་ཏེ་བསྒོ་བས་སྔ་མ་ཇི་ལྟ་བ་བཞིན་དུ་བསྒོ་བའོ། །ཡང་དག་པར་བསྟན་པ་ནི་དེ་ཡིན། ཡང་དག་པར་བསྒོ་བ་ནི་དེ་ཡིན་ནོ། །དེ་གཉིས་ལ་དེ་ལྟར་རྗེས་སུ་བསྟན་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་བསྙིལ་བའི་ལས་བྱོས་ཤིག་ཅེས་བྱ་བ་ནི། གོང་མ་ཇི་ལྟ་བ་བཞིན་དུ་བྱ་བའོ། །ཡང་དགེ་སློང་མ་གང་ཞིག་ཅེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། བདག་ཉིད་དམ་གཞན་གྱིས་སྨྲས་པར་གྱུར་པའོ། །དེ་ལྟར་བསྙིལ་བ་ཞེས་བྱ་བ་ནི། བསྙིལ་བའི་ལས་བྱས་པའོ། །དགེ་ཚུལ་མ་ཞེས་བྱ་བ་ནི། མཛེས་མ་དང་རྒྱལ་མའོ། །

---

^{[མ་དཔེ་གཟིགས་ན་འདིར་གནོན།]}

ཉེ་བར་འཇོག་པར་བྱེད་དམ་ཞེས་བྱ་བ་ནི། གནས་སྦྱིན་པར་བྱེད་པའོ། །ཉེ་བར་སྟོན་པར་བྱེད་དམ་ཞེས་བྱ་བ་ནི། འདྲི་བ་སྦྱིན་པར་བྱེད་པའོ། །ཀུན་ཏུ་ལོངས་སྤྱོད་པར་བྱེད་དམ་ཞེས་བྱ་བ་ནི། བཀུར་སྟི་རང་གིར་བྱེད་པའོ། །ཀུན་ཏུ་གནས་པར་བྱེད། གནས་གཅིག་ཏུ་ཉལ་བར་བྱེད་ཅེས་བྱ་བ་ནས། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་མ་ཉེ་བར་འཇོག་པར་བྱེད་དམ། ཉེ་བར་སྟོན་པར་བྱེད་དམ་ཞེས་བྱ་བ་ནས། གནས་གཅིག་ཏུ་ཉལ་བར་བྱེད་དམ་ཞེས་བྱ་བའི་བར་ཏེ། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཞི་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། ཁ་དོག་ལེན་དང་ཟླ་ཕྱེད་དང། །ཆེད་དུ་བསམས་དང་འགྱོད་པ་དང། ག་ག་ཚིལ་དང་ཆུར་རྩེ་དང། །སྐྱེས་པ་ཉལ་དང་སྡངས་མི་བྱ། །གོས་སྦྱིན་གཞི་མེད་ལམ་དུ་ནི། །སྐྱེས་པར་འགྲོགས་ཏེ་འགྲོ་མི་བྱ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་ཞུགས་སོ། །གང་གི་ཚེ་རྒྱལ་པོ་གཟུགས་ཅན་སྙིང་པོས། ཀླུའི་རྒྱལ་པོ་རི་བོ་དང། ཡིད་འོང་ལྡན་གཉིས་ཀྱི་དུས་མཆོད་བཙུགས་པ་དང། དེ་ནས་དུས་གཞན་ཞིག་ན་ལྷོ་ལམ་ནས་གར་མཁན་གྱི་སློབ་དཔོན་ཆེན་པོ་ཞིག་འོངས་ཏེ་དེས། སངས་རྒྱས་ཀྱི་སྤྱོད་པ་ཞེས་བྱ་བའི་གར་ཐབས་བྱས་པ་དང། དད་པ་ཅན་རྣམས་ལས་བྱ་དགའ་ཆེར་ཐོབ་བོ་ཞེས་བྱ་བ་ནས། དྲུག་སྡེ་རྣམས་སུན་ཕྱུང་ངོ་ཞེས་བྱ་བའི་བར་རོ། །དེ་ནས་དེའི་འོག་ཏུ་དྲུག་སྡེ་རྣམས་དང། དགེ་སློང་མ་བཅུ་གཉིས་སྡེ་རྣམས་ཀྱིས་གར་གྱི་བརྡ་ཐབས་དག་སྦྱར་ནས། གར་བྱས་པ་དང་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ཐམས་ཅད་ནི་དགེ་སློང་མ་གང་དག་ཁྱིམ་པ་གོན་པའི་གོས་དཀར་པོ་གྱོན་པ་ལས་གྱུར་ཏོ་སྙམ་ནས། དེ་ནས་བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་གོས་སར་པ་རྙེད་ན། ཁ་དོག་བསྒྱུར་བ་གསུམ་པོ་སྔོན་པོའམ། འདམ་ཁའམ། ངུར་སྨྲིག་གང་ཡང་རུང་བའི་ཁ་དོག་དུ་བསྒྱུར་བར་བྱའོ། །གལ་ཏེ་དགེ་སློང་མས་ཁ་དོག་བསྒྱུར་བ་གསུམ་པོ་གང་ཡང་རུང་བའི་ཁ་དོག་མ་བསྒྱུར་བའི་གོས་སར་པ་གྱོན་ན་ལྟུང་བྱེད་དོ། །སར་པ་ཞེས་བྱ་བ་ལ། སར་པ་ནི་གཉིས་ཏེ། གསར་པ་དང། གསར་དུ་རྙེད་པ་སྟེ། དོན་འདི་ལ་ནི། གསར་དུ་རྙེད་པ་ལ་བྱ་བར་དགོངས་སོ། །གོས་ཞེས་བྱ་བ་ནི་བདུན་པོ་གང་ཡང་རུང་བའོ། །དགེ་སློང་མ་ཞེས་བྱ་བ་ནི་ཆོས་འདི་པ་དག་གོ་།ཁ་དོག་བསྒྱུར་བ་གསུམ་པོ་གང་ཡང་རུང་བར་མ་བསྒྱུར་ན་ཞེས་བྱ་བ་ནི། ཁ་དོག་མ་བསྒྱུར་ནའོ། །གོས་སར་པ་གྱོན་ན་ཞེས་བྱ་བ་ནི་བགོས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁ་དོག་བསྒྱུར་བ་གསུམ་པོ་གང་ཡང་རུང་བའི་ཁ་དོག་མ་བསྒྱུར་བའི་གོས་སར་པ་གྱོན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཐ་ན་ལྷུང་བཟེད་ཀྱི་སྣོད་ཙམ་མ་བསྒྱུར་ན་ཡང་ཉེས་བྱས་སོ། །ལྟུང་བྱེད་ལྔ་པའི་དང་པོ་རྫོགས་སོ།། །།སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ཡངས་པ་ཅན་དུ་དྲུག་སྡེ་རྣམས་ལ་བརྟེན་ནས། ལག་པས་ལེན་པའི་བསླབ་པའི་གཞི་བཅའ་བ་མཛད་ལ། མཉན་ཡོད་དུ་ནི་ཀུན་དགའ་བོ་ལ་བརྟེན་ནས་རྗེས་སུ་གནང་ངོ། །དེ་ནས་བཅུ་གཉིས་སྡེ་དེ་དག་གིས་ཀུན་དགའ་ར་བར་གཏོགས་པའམ། ཀུན་དགའི་ར་བར་མ་གཏོགས་པ་ན་རིན་པོ་ཆེའམ། རིན་པོ་ཆེར་སྨོས་པ་དག་འདུག་པ་རང་གི་ལག་གིས་ལེན་པར་བྱེད། ལེན་དུ་འཇུག་པར་བྱེད་པ་[?]། གང་གི་ཡིན་པ་དེ་ལ་ཡང་སྦྱིན་པར་མི་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་

---

^{[མ་དཔེ་གཟིགས་ན་འདིར་གནོན།]}

དུ་མཛད་དེ། ཡང་དགེ་སློང་མ་གང་རིན་པོ་ཆེའམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ། ལེན་དུ་འཇུག་ན། ཀུན་དགའི་ར་བར་གཏོགས་པ་ན་འདུག་པའམ། གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ལྟུང་བྱེད་དོ། །དགེ་སློང་མ་གང་ཞིག་གིས་ཀུན་དགའི་ར་བར་གཏོགས་པའམ། གནས་ཁང་དུ་གཏོགས་པ་ན་རིན་པོ་ཆེའམ། རིན་པོ་ཆེར་སྨོས་པ་འདུག་ན་འདི་སྙམ་དུ་འདི་སུའི་ཡིན་པ་དེ་ཉིད་ལེན་པར་འགྱུར་གྲང་ཞེས་བསམས་ནས་བླང་བར་བྱ་སྟེ། དེ་ལ་ཆོ་ག་ནི་དེ་ཡིན་ནོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ་།རིན་པོ་ཆེའམ། རིན་པོ་ཆེར་སྨོས་པ་ནི། གཡུལ་ངོར་སྤྱད་པའི་ཡོ་བྱད་ཐམས་ཅད་དང། སྐྱེད་མོས་ཚལ་གྱི་ཡོ་བྱད་ཐམས་ཅད་དོ། །ལེན་ན་ཞེས་བྱ་བ་ནི་རང་གིས་སོ། །ལེན་དུ་འཇུག་ན་ཞེས་བྱ་བ་ནི་གཞན་ནོ། །ཀུན་དགའ་ར་བར་གཏོགས་པ་ན་འདུག་པ་ནི་སྐྱེད་མོས་ཚལ་ན་འདུག་པའོ། །གནས་ཁང་དུ་གཏོགས་པ་ན་འདུག་པ་མ་གཏོགས་ཏེ་ཞེས་བྱ་བ་ནི། གཙུག་ལག་ཁང་གི་ནང་ནའོ། །དེས་འདི་སྙམ་དུ་འདི་སུའི་ཡིན་པ་དེ་ཉིད་ལེན་པར་འགྱུར་གྲང་ཞེས་དེ་ཉིད་རྐྱེན་དུ་བྱས་ནས་བླང་བར་བྱའོ་ཞེས་བྱ་བ་ནི། དེ་ཉིད་རྗེས་སུ་མཐུན་པར་བྱས་པའི་ཆོས་ཡིན་ནོ། །དུས་མ་གཏོགས་ཏེ་ཞེས་བྱ་བ་ནི་གཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ནོར་བུ་ལེན་པར་བྱེད་ན་མིག་ཕུག་པ་ལེན་ན་ལྟུང་བྱེད་དོ། །མིག་མ་ཕུག་པ་ལེན་ན་ཉེས་བྱས་སོ། །ནོར་བུ་ལ་ཇི་ལྟ་བ་དེ་བཞིན་དུ་མུ་ཏིག་དང། རྡོ་རྗེ་དང། བཻ་ཌཱུརྱ་དང། དུང་དང། མན་ཤེལ་དང། བྱུ་རུ་དང། དངུལ་དང། རིན་པོ་ཆེ་དང། དམར་པོ་དང། དུང་གཡས་སུ་འཁྱིལ་བ་ཕུག་པ་ལེན་ན་ལྟུང་བྱེད་དོ། །མ་ཕུག་པ་ལེན་ན་ཉེས་བྱས་སོ། །ཐ་ན་ནོར་བུ་མཆིང་བུ་ལེན་ན་ཡང་ཉེས་བྱས་སོ། །མགུལ་གདུབ་ལེན་ན་ལྟུང་བྱེད་དོ། །དེ་བཞིན་དུ་གདུབ་བུ་རྒྱན་ཅན་དང། དཔུང་རྒྱན་དང། དོ་ཤལ་དང། སེ་མོ་དོ་ལ་སོགས་པ་ལ་ཡང་ལྟུང་བྱེད་དོ། །ཐ་ན་ནོར་བུ་དོ་ཟན་ལེན་ན་ཡང་

---

^{[མ་དཔེ་གཟིགས་ན་འདིར་གནོན།]}

ཉེས་བྱས་སོ་ཞེས་བྱ་བའི་བར་རོ། །དགེ་སློང་མས་དངུལ་གྱི་ནོར་བུ་ལེན་ན་མངོན་མཚན་ཅན་ཡིན་ན་ལྟུང་བྱེད་དོ། །མངོན་མཚན་ཅན་མ་ཡིན་ན་ཉེས་བྱས་སོ། །ཐ་ན་ཀོ་ལྷམ་བཅོས་བུ་ལེན་ན་ཡང་ཉེས་བྱས་སོ། །དགེ་སློང་མས་པི་ཝང་རྒྱུད་དང་བཅས་པ་ལེན་ན་ལྟུང་བྱེད་དོ། །རྒྱུད་མེད་པ་ལེན་ན་ཉེས་བྱས་སོ། །དེ་བཞིན་དུ་བ་བྷི་ས་ཀ་དང། པི་ཝང་རྒྱུད་གཅིག་པ་དང། འཁར་རྔ་དང། རྔ་བོ་ཆེ་དང། རྫ་རྔ་དང། རྔ་པ་ཊ་ཧ་ལ་སོགས་པ་རྒྱུད་དང་བཅས་པ་ལེན་ན་ལྟུང་བྱེད་དོ། །རྒྱུད་མེད་པ་ལེན་ན་ཉེས་བྱས་སོ། །ཐ་ན་རྩྭ་ལས་བྱས་པའི་པི་ཝང་རྒྱུད་དང་བཅས་པ་ལེན་ན་ལྟུང་བྱེད་དོ། །རྒྱུད་མེད་པ་ལེན་ན་ཉེས་བྱས་སོ། །དེ་བཞིན་དུ་རྡོ་རྗེ་རྩེ་གཅིག་པ་དང། འཁོར་ལོ་དང། མཚོན་རྩེ་གཅིག་པ་དང། རལ་གྲི་དང། མདུང་ཐུང་དང། མདའ་བོ་དང། མདུང་དང། མདུང་ཕྱེད་ལྕགས་ལས་བྱས་པ་དང། ལྕགས་མདའ་དང། མདའ་ཕྱེད་ལྕགས་ལས་བྱས་པ་འཕང་དུ་རུང་བ་ལེན་ན་ལྟུང་བྱེད་དོ། །འཕང་དུ་མི་རུང་བ་ལེན་ན་ཉེས་བྱས་སོ། །དགེ་སློང་མས་མདའ་མདེའུ་དང་བཅས་པ་ལེན་ན་ལྟུང་བྱེད་དོ། །མདེའུ་མེད་པ་ལེན་ན་ཉེས་བྱས་སོ། །ཐ་ན་རྩྭའི་གཞུ་ལེན་ན་ཡང་ཉེས་བྱས་སོ། །དགེ་སློང་མས་སངས་རྒྱས་ཀྱི་སྐུ་གཟུགས་བརྙན་རིང་བསྲེལ་དང་བཅས་པ་ལེན་ན་ལྟུང་བྱེད་དོ། །རིང་བསྲེལ་མེད་པ་ཡིན་ན་ཉེས་བྱས་སོ། །གལ་ཏེ་སྟོན་པ་ལ་མཆོད་པའི་འདུ་ཤེས་ཀྱིས་ལེན་པར་བྱེད་ཅིང། དགེ་ཚུལ་མའམ། རུང་བར་བྱེད་པའི་ལག་ཏུ་བཞག་པ་ལ་ནི་ལྟུང་བ་མེད་དོ། །བར་སྡོམ་ནི། ནོར་བུ་མགུལ་གདུབ་པི་ཝང་དང། །མདུང་དང་གཞུ་དང་མདའ་དག་དང། །རིང་བསྲེལ་བཅས་པའི་སྐུ་གཟུགས་ཏེ། །འདིར་ནི་ཡང་དག་བསྡུས་པ་ཡིན། །ལྟུང་བྱེད་ལྔ་པའི་གཉིས་པ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་རྒྱལ་པོ་གཟུགས་ཅན་སྙིང་པོ་ལ་དཀའ་ཐུབ་ཀྱི་ཆུ་གྲང་བ་ན་དྲོ་བར་ཚོར་བ་དང། དྲོ་བ་ན་བསིལ་བར་ཚོར་བ་གསུམ་ཡོད་པ་དེ། གཅིག་ལ་ནི་རྒྱལ་པོ་རང་ཉིད་ཁྲུས་

---

^{[མ་དཔེ་གཟིགས་ན་འདིར་གནོན།]}

བྱེད་དོ། །གཉིས་པར་ནི་བཙུན་མོའོ། །གསུམ་པར་ནི་འཇིག་རྟེན་ཐམས་ཅད་ཀྱི་ཐུན་མོང་ངོ། །དེ་ནས་རྒྱལ་པོ་གཟུགས་ཅན་སྙིང་པོས་བསམས་པ། བདག་གིས་བཅོམ་ལྡན་འདས་དང། ཉན་ཐོས་ཀྱི་དགེ་འདུན་ལ་ཐམས་ཅད་དུ་ཡོ་བྱད་ཐམས་ཅད་ཀྱིས་བཀུར་སྟི་མང་དུ་ནི་བྱས་ན་དཀའ་ཐུབ་ཀྱི་ཆུའི་ཁྲུས་ཀྱིས་མ་བྱས་ཀྱི། མ་ལ་བདག་གིས་བཅོམ་ལྡན་འདས་དང། དགེ་སློང་དང། དགེ་སློང་མ་རྣམས་ལ་དཀའ་ཐུབ་ཀྱི་ཆུ་གཉིས་ཅི་བདེར་དབུལ་ལོ། །སྙམ་དུ་བསམས་ནས། རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་པ་དང། བཅོམ་ལྡན་འདས་ཀྱིས་རྒྱལ་པོ་གཟུགས་ཅན་གྱི་སྙིང་པོ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད་ཅེས་བྱ་བ་ནས། སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཉན་ཐོས་མའི་དགེ་འདུན་དང་ཐབས་ཅིག་ལ། བདག་དཀའ་ཐུབ་ཀྱི་ཆབ་ཉིད་དབུལ་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཁྲུས་བགྱིད་པ་གང་ལགས་པ་དེར་ནི་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཁྲུས་མཛད་དུ་གསོལ། གང་དུ་མཆིས་བྲང་འཁོར་དང་བཅས་པ་ཁྲུས་བགྱིད་པ་དེར་ནི། དེ་བཞིན་གཤེགས་པའི་ཉན་ཐོས་མའི་དགེ་འདུན་ཅི་བདེར་ཁྲུས་བགྱི་ཞིང་བཞེས་སུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་རྒྱལ་པོ་གཟུགས་ཅན་སྙིང་པོ་ལས་འདི་ལྟ་སྟེ། དཀའ་ཐུབ་ཀྱི་ཆུའི་ཁྲུས་བཞེས་པར་གནང་ངོ། །དེ་ནས་ཇི་ཙམ་ན་རྒྱལ་པོ་ཞེས་བྱ་བ་ནས། སོང་ངོ་ཞེས་བྱ་བའི་བར་རོ། །དེ་ནས་བཅུ་གཉིས་སྡེ་རྣམས་ཀྱིས། བཅོམ་ལྡན་འདས་རྒྱལ་པོ་གཟུགས་ཅན་སྙིང་པོས་དཀའ་ཐུབ་ཀྱི་ཆུའི་ཁྲུས་ལ་སྤྱན་དྲངས་པ་ལས། བཅོམ་ལྡན་འདས་ཀྱིས་ཀྱང་

---

^{[མ་དཔེ་གཟིགས་ན་འདིར་གནོན།]}

གནང་ངོ་ཞེས་ཐོས་སོ། །ཐོས་ནས་བཅུ་གཉིས་སྡེ་དེ་རྣམས་རྒྱལ་པོ་གཟུགས་ཅན་སྙིང་པོའི་བཙུན་མོའི་ཁྲུས་བྱེད་པའི་དཀའ་ཐུབ་ཀྱི་ཆུ་གང་ན་བ་དེར་ཁྲུས་ཀྱི་ཕྱིར་དོང་ངོ། །དེའི་ཚེ་རྒྱལ་པོ་གཟུགས་ཅན་སྙིང་པོའི་བཙུན་མོ་ཁྲུས་བྱེད་པར་འདོད་ནས། དེ་དཀའ་ཐུབ་ཀྱི་ཆུ་གང་ན་བ་དེར་སོང་བ་ན་ཞེས་བྱ་བ་ནས། བཅུ་གཉིས་སྡེ་རྣམས་ལས་སྐབས་མ་རྙེད་དོ་ཞེས་བྱ་བའི་བར་རོ། །དེ་ནས་དགེ་སློང་མ་རྣམས་ཀྱི་མདུན་དུ་སྨོད་པར་བྱེད་པ་ན། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྲུས་མི་བྱའོ། །དེ་རྣམས་ཁྲུས་མ་བྱས་པས། ལུས་ཤིན་ཏུ་དྲི་མི་ཞིམ་ཞིང་བསོད་སྙོམས་ལ་ཞུགས་པ་ན། ཁྱིམ་པ་མོ་རྣམས་ཀྱིས་འདི་སྐད་ཅེས་སྨྲས་སོ། །དྲི་ངན་པ་ཞིག་མནམ་ལགས་སོ། །དགེ་སློང་མ་དྲང་པོ་དྲང་བའི་རང་བཞིན་ཅན་དེ་རྣམས་ཀྱིས་འདི་སྐད་ཅེས་སྨྲས་སོ། །དྲི་ངན་པ་དེ་ནི་ཁོ་མོ་ཅག་གི་ལུས་ཀྱི་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །ཁྱེད་ཅག་གིས་ཁྲུས་མ་བགྱིས་སམ། དེ་དག་གིས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་ཁྲུས་མི་བྱའོ་ཞེས་དགག་པ་མཛད་དོ་ཞེས་བྱ་བའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཟླ་བ་ཕྱེད་ཕྱེད་ཅིང་ཁྲུས་བྱའོ། །དེ་ནས་ཚ་བས་གདུངས་ནས་ཞེས་བྱ་བ་ནས། ཟླ་བ་ཕྱེད་དང་གསུམ་ནི་ཚ་བའི་དུས་སོ་ཞེས་བྱས་ཏེ། ཁྲུས་བྱའོ་ཞེས་བྱ་བའི་བར་རོ། །དེ་བཞིན་དུ་ན་བ་དུས་སོ་ཞེས་བྱིན་གྱིས་བརླབས་ཏེ་ཁྲུས་བྱའོ། །དེ་བཞིན་དུ་ལས་དུས་སོ། །ལམ་དུས་སོ། །རླུང་དང། ཆར་པ་དུས་སོ། །ཞེས་བྱིན་གྱིས་བརླབས་ཏེ་ཁྲུས་བྱའོ། །དེ་ནས་བཅུ་གཉིས་སྡེ་དེ་རྣམས་ཚ་བ་དུས་སོ། །ཞེས་བྱས་ནས་དུས་ཐམས་ཅད་དུ་ཁྲུས་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་

---

^{[མ་དཔེ་གཟིགས་ན་འདིར་གནོན།]}

བའི་བར་དུ་མཛད་དེ། བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་བྱའོ་ཞེས་གསུངས་པ་དེ་ལས་འདུམས་པར་བྱེད་པ་ན། དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། སོ་ག་རྣམས་ཀྱིས་ཟླ་བ་ཕྱེད་དང་གཉིས་དང། དབྱར་རྣམས་ཀྱི་ཟླ་བ་དང་པོ་དང། ཟླ་བ་ཕྱེད་དང་གསུམ་པོ་དེ་དག་ནི་ཚ་བའི་དུས་སོ། །ལྷག་མ་ནི་ན་བ་དུས་སོ། །ལས་དུས་སོ། །ལམ་དུས་སོ། །རླུང་དུས་སོ། །ཆར་དུས་སོ། །རྫི་ཆར་དུས་ཏེ། དེ་ལ་དེ་ནི་དུས་ཡིན་ནོ། །ཟླ་བ་ཕྱེད་ཅིང་ཞེས་བྱ་བ་ནི། ཟླ་བའི་ངོ་ཕྱེད་ཅིང་ངོ། །ཁྲུས་ཞེས་བྱ་བ་ལ། ཁྲུས་ནི་རྣམ་པ་གཉིས་ཏེ་དབང་བསྐུར་བའི་ཁྲུས་དང། འཇུག་པའི་ཁྲུས་སོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི། སོ་ག་རྣམས་ཀྱི་ལྷག་མ་ཟླ་བ་ཕྱེད་དང་གཉིས་དང། དབྱར་རྣམས་ཀྱི་དང་པོ་ཞེས་བྱ་བ་ནི། ཐོག་མའི་ཟླ་བ་སྟེ། དབྱར་ཟླ་ར་བ་དང། ཟླ་བ་ཕྱེད་དང་གསུམ་པོ་འདི་དག་ནི་ཚ་བའི་དུས་སོ། །ལྷག་མ་ནི་ན་བ་དུས་སོ་ཞེས་བྱ་བ་ནི། ཁྲུས་མ་བྱས་ན་ན་བར་འགྱུར་བའོ། །ལས་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི། ལས་དག་བྱས་པས་དེ་དག་དུབ་པར་གྱུར་པའོ། །ལམ་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི། དཔག་ཚད་ཕྱེད་དམ། དཔག་ཚད་གཅིག་གི་ལམ་ནས་འོངས་པས་དེ་དག་དུབ་པར་གྱུར་པའོ། །རླུང་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི། རླུང་གིས་དཀྲུགས་པར་གྱུར་པ་སྟེ། ཐ་ན་ཆོས་གོས་ཀྱི་གྲ་ཙམ་རླུང་གིས་བསྒུལ་བར་གྱུར་པའོ། །ཆར་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི། ཆར་གྱི་ཐིགས་པ་གཉིས་སམ། གསུམ་ལུས་ལ་བབ་པར་གྱུར་པ་ནི་ཆར་གྱི་དུས་ཡིན་ནོ། །རྫི་ཆར་དུས་སོ་ཞེས་བྱས་ཏེ་ཁྲུས་བྱའོ་ཞེས་བྱ་བ་ནི། དེ་རླུང་གིས་ཀྱང་བསྒུལ་ལ། ཆར་གྱི་ཐིགས་པ་གཉིས་སམ། གསུམ་ཡང་ལུས་ལ་བབ་པར་གྱུར་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། དགེ་སློང་མས་དབང་བསྐུར་བའི་ཁྲུས་ཀྱིས་ཁྲུས་བྱེད་ན་དེ་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན། ཇི་སྲིད་དུ་ཆུས་ལྟེ་བར་སོན་གྱི་བར་དུ་ནི་ཉེས་བྱས་སོ། །ཆུ་ལྟེ་བ་ལས་འདས་ན་ལྟུང་བྱེད་དོ། །དགེ་སློང་མས་འཇུག་པའི་ཁྲུས་ཀྱིས་ཁྲུས་བྱེད་ན། དེས་དུས་བྱིན་གྱིས་བརླབ་པར་བྱའོ། །

---

^{[མ་དཔེ་གཟིགས་ན་འདིར་གནོན།]}

བྱིན་གྱིས་མ་བརླབས་ན། ཇི་སྲིད་དུ་ཆུ་ལྟེ་བར་སོན་གྱི་བར་དུ་ཉེས་བྱས་སོ། །ཆུ་ལྟེ་བ་ལས་འདས་ན་ལྟུང་བྱེད་དོ། །དེ་བཞིན་དུ་དབང་བསྐུར་བའི་ཁྲུས་ཀྱིས་ཁྲུས་བྱས་ནས་འཇུག་པའི་ཁྲུས་འདོད་ན་དུས་གཞན་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་ན་ཇི་སྲིད་དུ་ཆུ་ལྟེ་བར་སོན་གྱི་བར་དུ་ནི་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་འཇུག་པའི་ཁྲུས་ཀྱིས་ཁྲུས་བྱས་ནས། དབང་བསྐུར་བའི་ཁྲུས་ཀྱིས་ཁྲུས་བྱེད་པར་འདོད་ན་དེ་ཡང་ཞེས་བྱ་བ་ནས་ཇི་སྲིད་དུ་ཆུས་ལྟེ་བར་སོན་གྱི་བར་དུ་ནི་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་དྲོན་མོའི་ཁྲུས་བྱས་ནས་བསིལ་བའི་ཁྲུས་འདོད་ན། དེ་ཡང་ཞེས་བྱ་བ་ནས་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་བསིལ་བའི་ཁྲུས་བྱས་ནས་དྲོན་མོའི་ཁྲུས་འདོད་ན། དེ་ཡང་ཞེས་བྱ་བ་ནས་ཉེས་བྱས་སོ། །འདས་ན་ལྟུང་བྱེད་དོ། །དེ་བཞིན་དུ་གལ་ཏེ་ཁྲུས་དེ་ཉིད་ཀྱིས་ཡང་བྱེད་པར་འདོད་ན། དེ་སྲིད་དུ་དུས་གཞན་བྱིན་གྱིས་བརླབ་པར་བྱའོ། །གལ་ཏེ་བརྒྱལ་བ་ལ་ཆུས་གཏོར་བ་དང། རྒལ་ཏེ་འགྲོ་བ་དང། མཆོངས་པ་ན་ཆུར་ལྟུང་བ་དང། ཆུ་བོ་རྒལ་བའམ། མཚོ་ཆེན་པོ་རྒལ་བ་ན་ཆུར་ནུབ་པ་ལ་ནི་ལྟུང་བ་མེད་དོ། །ལྟུང་བྱེད་ལྔ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་འཆར་ཀ་ལས་བརྟེན་ཏེ། ཆེད་དུ་བསམས་པའི་དུད་འགྲོའི། །གནས་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་དེ་དག་གིས་ཆེད་དུ་བསམས་པ་དང། ཆེད་དུ་མ་བསམས་པར་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་རྣམས་ཀྱི་སྲོག་གཅོད་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་

---

^{[མ་དཔེ་གཟིགས་ན་འདིར་གནོན།]}

བར་དུ་མཛད་དེ། ཡང་དགེ་སློང་མ་གང་ཆེད་དུ་བསམས་ཏེ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ཀྱི་སྲོག་གཅོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་། ཆེད་དུ་བསམས་ནས་ཞེས་བྱ་བ་ནི། རྣམ་པར་བརྟགས་ནས་སོ། །དུད་འགྲོའི་སྐྱེ་གནས་སུ་གཏོགས་པ་ཞེས་བྱ་བ་ནི། ཐ་ན་གྲོག་སྦུར་ཙམ་ཡང་ངོ། །སྲོག་གཅོད་ན་ཞེས་བྱ་བ་ནི། དེའི་སྲོག་ལ་གནོད་པ་བྱེད་པའོ། །ལྟུང་བྱེད་དོ། །ཞེས་བྱ་བ་ནི། གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཆེད་དུ་བསམ་སྟེ། དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ཀྱི་སྲོག་བཅད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ལྔ་པའི་བཞི་པ་རྫོགས་སོ།། །།གླེང་གཞི་ནི། མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱིས་ཆེད་དུ་བསམ་བཞིན་དུ་དགེ་སློང་མ་རྣམས་ལ་འགྱོད་པ་སྐྱེད་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆེད་དུ་བསམ་སྟེ་དགེ་སློང་མ་ལ་ཅི་ནས་ཀྱང་འདི་ཡུད་ཙམ་ཞིག་ཀྱང་རེག་པར་མི་འགྱུར་བར་བྱའོ། །ཞེས་དེ་ཉིད་རྐྱེན་དུ་བྱས་ཏེ་དགེ་སློང་མ་ལ་འགྱོད་པ་སྐྱེད་ན། ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། བཅུ་གཉིས་སྡེ་དག་གོ་།ཆེད་དུ་བསམ་སྟེ་ཞེས་བྱ་བ་ནི། རྣམ་པར་བརྟགས་ནས་སོ། །འགྱོད་པ་སྐྱེད་ན་ཞེས་བྱ་བ་ནི། འགྱོད་པ་སྐྱེད་པའི་བསམ་པ་ཅན་གྱི་ངག་དང། ཚིག་དང། རྗོད་པ་དང་ཞེས་བྱ་བ་ནས་ངག་གི་རྣམ་པར་རིག་བྱེད་ཅེས་བྱ་བའི་བར་གང་ཡིན་པའོ། །ལྟུང་བྱེད་དོ། ཞེས་བྱ་བ་ནི། གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཆེད་དུ་བསམ་སྟེ་འགྱོད་པ་སྐྱེད་པའི་བསམ་པས་དགེ་སློང་མའི་དྲུང་དུ་སོང་སྟེ་འདི་སྐད་ཅེས། ཕུ་ནུ་མོ། རྒྱལ་པོ་ཆེ་གེ་མོའམ། ཚོང་དཔོན་ཆེ་གེ་མོའམ། ས་གཡོས་པའམ་ཟླ་

---

^{[མ་དཔེ་གཟིགས་ན་འདིར་གནོན།]}

བ་གཟས་ཟིན་པའམ། ཉི་མ་གཟས་ཟིན་པའམ། ཕྱོགས་ཚིག་པ་དྲན་ནམ་ཞེས་དྲིས་པ་ན། དེ་འདི་སྐད་ཅེས། མི་དྲན་ནོ། །ཞེས་ཟེར་བ་དང། དེ་འདི་སྐད་ཅེས། དུས་སྔར་བྱུང་བ་ཡིན་པས་ཕུ་ནུ་མོ་ཁྱོད་ནི། ལོ་ཉི་ཤུ་མ་ལོན་པར་བསྙེན་པར་རྫོགས་པར་གྱུར་ཏེ། ཕུ་ནུ་མོ་ཁྱོད་བསྙེན་པར་རྫོགས་པ་མ་ཡིན་པས། སླར་ཡང་བསྙེན་པར་རྫོགས་དགོས་སོ། །ཞེས་སྨྲས་ནས། དགེ་སློང་མ་འགྱོད་པ་སྐྱེས་ཀྱང་རུང། མ་སྐྱེས་ཀྱང་རུང། འགྱོད་པ་སྐྱེད་པ་གང་ཡིན་པ་དེ་ལ་ལྟུང་བྱེད་དུ་འགྱུར་རོ། །དེ་བཞིན་དུ་ཕུ་ནུ་མོ་ཁྱོད་ཀྱི་མཁན་མོ་སུ་ཡིན། དེ་འདི་སྐད་ཅེས། ཆེ་གེ་མོ་ཡིན་ནོ་ཞེས་ཟེར་བ་ན། དེ་འདི་སྐད་ཅེས། དགེ་སློང་མ་ཆེ་གེ་མོ་ཞེས་བྱ་བ་དེ་ནི། དགེ་འདུན་གྱིས་གནས་ནས་ད་བྱུང་བའི་འཕྲིན་ལས་མཛད་པ་ཡིན་ནོ། །ཞེས་སྨྲས་པ་ན། དགེ་སློང་མ་དེ་འགྱོད་པ་སྐྱེས་ཀྱང་རུང། མ་སྐྱེས་ཀྱང་རུང་ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་ཚུལ་ཁྲིམས་འཆལ་བ་ཡིན་ནོ། །ཞེས་ཟེར་ན། ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ་གནས་གང་དུ་བསྙེན་པར་རྫོགས། དེ་འདི་སྐད་ཅེས། གནས་ནི། ག་ག་མོ་ཞིག་ཏུ་བསྙེན་པར་རྫོགས་སོ། །ཞེས་ཟེར་བ་ན། དེ་འདི་སྐད་ཅེས། གནས་དེ་ནི། མཚམས་མ་བཅད་པ། དེ་ནི། དཀྱིལ་འཁོར་བར་མི་མངོན་པ། མི་མཐུན་པ་འཁྲུགས་པས། ཁྱོད་བསྙེན་པར་རྫོགས་ཀྱི་མཐུན་པས་མ་ཡིན་པས་ཕུ་ནུ་མོ་ཁྱོད་ནི། བསྙེན་པར་མ་རྫོགས་པ་ཡིན་གྱི་ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ། མཁན་མོ་དང་སློབ་དཔོན་གྱི་གོས་དག་ལེན་ནམ། དེ་འདི་སྐད་ཅེས། ལེན་ནོ། །ཞེས་ཟེར་བ་ན། དེ་འདི་སྐད་ཅེས། ཁྱོད་ནི། ཕས་ཕམ་པར་འགྱུར་བའི་ལྟུང་བ་བྱུང་བ་ཡིན་ནོ་ཞེས་སྨྲས་ན་ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ། འདུ་བྱེད་ཐམས་ཅད་མི་རྟག་པ་དང། ཆོས་ཐམས་ཅད་བདག་མེད་པ་དང། མྱ་ངན་ལས་འདས་པ་ནི། ཞི་བའོ། །ཞེས་རབ་ཏུ་སྟོན་ཏམ། དེ་འདི་སྐད་ཅེས། རབ་ཏུ་སྟོན་ཏོ། །ཞེས་ཟེར་བ་ན། དེ་འདི་སྐད་ཅེས། ཁྱོད་ཀྱིས་མིའི་ཆོས་བླ་མ་སྨྲས་པས་ཁྱོད་ཕས་ཕམ་པར་འགྱུར་བའི་ལྟུང་བ་བྱུང་བ་ཡིན་ནོ། །ཞེས་ཟེར་བ་

---

^{[མ་དཔེ་གཟིགས་ན་འདིར་གནོན།]}

ཡང་ངོ། །དེ་བཞིན་དུ་ཕུ་ནུ་མོ། ཕྱོགས་ག་གེ་མོ་ཞིག་ཏུ་འགྲོའམ། དེ་འདི་སྐད་ཅེས། འགྲོའོ། །ཞེས་ཟེར་བ་ན། དེ་འདི་སྐད་ཅེས། གཏུམ་པོ་རྣམས་ཀྱིས་གནས་བཏབ་པའི་ཕྱོགས་ཡིན་པས། ཁྱོད་ཕས་ཕམ་པར་འགྱུར་བའི་ལྟུང་བ་བྱུང་བར་འགྱུར་དུ་འོང་ངོ། །ཞེས་སྨྲས་ནས་ཞེས་བྱ་བ་ནས་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་ཕུ་ནུ་མོ་ཤ་དང། ཉ་དང་ཤ་སྐམ་དང། ཆུར་བ་དང། འོ་མ་དང། ཞོ་དང། མར་གསར་ཟའམ། དེས་འདི་སྐད་ཅེས། ཟའོ། །ཞེས་སྨྲས་པ་ན། དེ་འདི་སྐད་ཅེས། ཁྱོད་ཁ་ཟས་དེ་ལྟ་བུ་ཟ་ན། མཛེ་དང། འབྲུམ་བུ་ཕྲ་མོ་དང། ཤ་བཀྲ་དང། ཤ་གཟིག་གུ་དང། ཤུ་བ་དང། གཡའ་བ་དང། ཁྱི་རྔོ་དང། སྐྱུག་བྲོ་བ་དང། སྐྱ་རྦབ་དང། སྐེམ་ནད་དང། ལུད་པ་དང། དབུགས་མི་བདེ་བ་དང། སྐེམ་པ་སྟེ། ནད་ཀྱི་རྣམ་པ་དེ་ལྟ་བུ་དག་ཁྱོད་ལ་འབྱུང་བར་འགྱུར་རོ། །ཞེས་སྨྲས་ན། དགེ་སློང་མ་འགྱོད་པར་གྱུར་ཀྱང་རུང། མ་གྱུར་ཀྱང་རུང། ལྟུང་བྱེད་དུ་འགྱུར་རོ། །དོན་གཞན་དང་འདུལ་བའི་ཡོ་བྱད་ཀྱིས་ནི། ལྟུང་བ་མེད་དོ། །དེ་ལ་དོན་གཞན་ཞེས་བྱ་བ་ནི། ཕུ་ནུ་མོ་རྒྱལ་པོ་ཆེ་གེ་མོ་དྲན་ནམ། དེ་འདི་སྐད་ཅེས། དྲན་ནོ། །ཞེས་ཟེར་ན། དེ་འདི་སྐད་ཅེས། རྒྱལ་པོ་དེ་ནི། ཡུན་རིང་མོ་ཞིག་ལོན་པས་ཕུ་ནུ་མོ་ཁྱོད་ལོ་ཉི་ཤུ་ཚང་ཞིང་ལེགས་པར་བསྙེན་པར་རྫོགས་པ་ཡིན་གྱི། ཁྱོད་སུས་ཅི་སྨྲས་ཀྱང་འགྱོད་པར་མ་བྱེད་ཅིག་ཅེས་བྱ་བ་དང། དེ་བཞིན་དུ་ཕྱོགས་ཚིག་པ་དང་ཞེས་བྱ་བ་ནས་དེ་བཞིན་དུ་ཁྱོད་ཀྱི་མཁན་མོ་ནི། ཚུལ་ཁྲིམས་དང་ལྡན་པ་མང་དུ་ཐོས་པ་ཡིན་ནོ། །ཞེས་བྱ་བ་དང། ཁྱོད་བསྙེན་པར་རྫོགས་པའི་གནས་ནི། མཚམས་བཅད་པ་དེ་ནི། དཀྱིལ་འཁོར་བར་མངོན་པ་ཡིན་ནོ། །ཞེས་བྱ་བ་དང། ཁྱོད་ཀྱིས་ལྷག་པར་ཉའམ། ཤའམ་ཞེས་བྱ་བ་ནས་མར་གསར་གྱི་བར་དག་མ་ཟོས་གྲང། ཁྱོད་ན་བར་འགྱུར་དུ་འོང་ཞེས་བྱ་བ་སྟེ། དེ་ལྟ་བུ་ནི། དོན་གཞན་ཡིན་ནོ། །འདུལ་བའི་ཡོ་བྱད་ཇི་ལྟ་བུ་ཞེ་ན། ཕུ་ནུ་མོ། ཁྱོད་ཀྱིས་རྐུ་སེམས་ཀྱིས་མཁན་མོ་དང། སློབ་དཔོན་དག་གི་གོས་

---

^{[མ་དཔེ་གཟིགས་ན་འདིར་གནོན།]}

བླངས་པར་མ་གྱུར་གྲང་ཞེས་བྱ་བ་དང། ལྟུང་བ་དང་བཅས་པར་མ་གྱུར་གྲང་ཞེས་བྱ་བ་དང། ཁྱོད་མིའི་ཆོས་བླ་མའི་གཏམ་སྨྲ་བའི་བསམ་པས་གཏམ་མ་སྨྲས་གྲང་ཞེས་བྱ་བ་དང། ཁྱོད་གནས་དེར་མ་སོང་ངམ། ཁྱོད་ཚངས་པ་མཚུངས་པར་སྤྱོད་པ་རྣམས་དང་མི་མཐུན་པར་མ་གྱུར་གྲང་ཞེས་བྱ་བ་སྟེ། དེ་ལྟ་བུ་ནི་འདུལ་བའི་ཡོ་བྱད་ཡིན་ནོ། །བར་སྡོམ་ནི། རིགས་དང་བསྙེན་པར་རྫོགས་པ་དང། །མཁན་མོ་ཉིད་དང་དེ་འཕྲོགས་དང། །འགྲོ་བ་དང་ནི་སྨྲ་བ་དང། །དོན་ཉིད་དང་ནི་འདུལ་བའོ། །ལྟུང་བྱེད་ལྔ་བའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་རྒོད་པའི་བསམ་པས་སོར་མོས། དགེ་སློང་མ་རྣམས་ཀྱི་མཆན་ཁུང་དག་ཏུ་འཛུགས་ཤིང་ག་ག་ཚིལ་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ་སོར་མོས་ག་ག་ཚིལ་བྱེད་ན་ལྟུང་བྱེད་དོ། །སོར་མོས་ཞེས་བྱ་བ་ནི་ག་ག་ཚིལ་བྱ་བའི་བསམ་པ་ཅན་གྱི་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སོར་མོ་གཅིག་གིས་ག་ག་ཚིལ་བྱེད་ན་ལྟུང་བྱེད་དོ། །དེ་བཞིན་དུ་གཉིས་དང། ལྔའི་བར་གྱིས་བྱེད་ན་ལྟུང་བྱེད་ལྔའོ། །གལ་ཏེ་སྨེ་བའམ་ནག་ནོག་སྟོན་ན་ལྟུང་བ་མེད་དོ། །ལྟུང་བྱེད་ལྔ་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅུ་བདུན་སྡེ་རྣམས་ལས་བརྟེན་ཏེ། ཆུ་ལ་རྩེ་བའི་བསླབ་པའི་གཞི་བཅའ་བ་མཛད་པ་དང། དེ་ནས་བཅུ་གཉིས་སྡེ་དེ་དག་ཆུར་ཞུགས་ནས་རྩེ་བར་བྱེད། རྩེར་འཇུག་པར་བྱེད་པ་དང། དེ་དག་ལ་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བམ་མཛད་དམ།

---

^{[མ་དཔེ་གཟིགས་ན་འདིར་གནོན།]}

དེ་དག་གིས་འདི་སྐད་ཅེས་དགེ་སློང་དག་ལ་ཡིན་གྱི། དགེ་སློང་མ་རྣམས་ལ་ནི་མ་ཡིན་ནོ། །ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཆུ་ལ་རྩེ་ན་ལྟུང་བྱེད་དོ། །ཆུ་ལ་ཞེས་བྱ་བ་ནི། དགེ་སློང་མས་རྩེ་བའི་བསམ་པ་ཅན་གྱི་ངག་དང། ཚིག་དང་ཞེས་བྱ་བ་ནས། ངག་གི་རྣམ་པར་རིག་བྱེད་ཅེས་བྱ་བའི་བར་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གཞི་དགུ་ལས་ཏེ། དགེ་སློང་མས་ཆུར་རྩེ་བའི་བསམ་པས། ཆུར་འཇུག་པར་འདོད་པ་དང། རས་ཀྱིས་འཆིང་བ་དང། ཆུར་འཇུག་པ་དང། བྱིའུ་ཟུལ་བྱེད་ན་ལྟུང་བྱེད་དོ། །དེ་བཞིན་དུ་སྟེང་དུ་འབྱུང་བར་བྱེད་པ་དང། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བ་དང། རྒྱུན་ཕྱོགས་ནས་བཟློག་ཕྱོགས་སུ་རྩོལ་བར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ཆུ་ལ་རྔའི་སྒྲ་འབྱིན་ན་ལྟུང་བྱེད་དོ། །དེ་བཞིན་དུ་ཆུ་ལ་རྫ་རྔ་ཁ་ཅིག་པའི་བར་གྱི་སྒྲ་འབྱིན་ན། ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་མས་ཆུ་ཕན་ཚུན་དུ་འཐོར་བར་བྱེད་ན་ལྟུང་བྱེད་དོ། །དགེ་སློང་མས་ཆུ་ལ་དགའ་བར་བྱེད་ན་ལྟུང་བྱེད་དོ། །དགའ་བར་བྱེད་དུ་འཇུག་ན་ལྟུང་བྱེད་དོ། །དེ་བཞིན་དུ་རྩེ་བ་དང། རྩེར་འཇུག་པ་དང། མགུ་བར་བྱེད་པ་དང། མགུ་བར་བྱེད་དུ་འཇུག་ན། ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་རྒོད་པ་དང། འཕྱར་གཡེང་གིས་ལུས་ཀྱིས་སྙོམས་པར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ཐ་ན་བུམ་པའི་ཆུ་ལ་སོར་མོའི་བེམ་ཏོལ་གྱིས་རྡེག་ན་ཡང་ཉེས་བྱས་སོ། །དེ་བཞིན་དུ་ཆུ་སྣོད་དང། ཤ་ཁུ་དང་འབྲས་ཁུ་དང། ཐུག་པ་ཡང་ངོ། །ནད་པས་རྩེ་བའི་བསམ་པས་ཐུག་པའམ། ཤ་ཁུ་ལ་བེམ་ཏོལ་གྱིས་རྡེག་པ་ལ་ནི་ལྟུང་བ་མེད་དོ། །ལྟུང་བྱེད་ལྔ་པའི་བདུན་པ་རྫོགས་སོ།། །།གླེང་

---

^{[མ་དཔེ་གཟིགས་ན་འདིར་གནོན།]}

གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། ཚེ་དང་ལྡན་པ་མ་འགགས་པ་ལ་བརྟེན་ཏེ། བུད་མེད་དང་གནས་གཅིག་ཏུ་ཉལ་བའི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་རྣམས་སྐྱེས་པ་དག་དང། གནས་གཅིག་ཏུ་ཉལ་བར་བྱེད་དོ། །དེ་ནས་དགེ་སློང་མ་དེ་རྣམས་ཀྱིས་བཅུ་གཉིས་སྡེ་དག་ལ་འདི་སྐད་ཅེས་སྨྲས་སོ། །ཕུ་ནུ་མོ་དག་བཅོམ་ལྡན་འདས་ཀྱིས་གནས་གཅིག་ཏུ་ལྷན་ཅིག་ཉལ་བའི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས། དགེ་སློང་རྣམས་ལ་ཡིན་གྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྱེས་པ་དང་གནས་གཅིག་ཏུ་ཉལ་བར་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་བཅུ་གཉིས་སྡེ་དག་གོ། སྐྱེས་པ་དང་ལྷན་ཅིག་ཅེས་བྱ་བ་ནི། སྐྱེས་པའི་དབང་པོ་དང་ལྡན་པ་དང་ངོ། །གནས་གཅིག་ཏུ་ཉལ་ན་ཞེས་བྱ་བ་ནི། གནས་བཞི་པོ་དག་ཏུ་སྐྱ་རེངས་འཆར་པར་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་སྟེང་ཁང་གི་གཞི་ན་ཉལ་བར་བྱེད་ལ། སྐྱེས་པ་ནི་ཤོད་ན་ཉལ་ན། དགེ་སློང་མ་དེས་སྐས་བརྟུལ་བར་བྱའོ། །གལ་ཏེ་ཐེམ་སྐས་ཡིན་ན། དེར་ཡང་གཏན་པས་སྒོ་བཅད་ལ། དེའི་འོག་ཏུ་ཉལ་བར་བྱའོ། །གལ་ཏེ་སྐས་མ་བརྟུལ་ཏམ། གཏན་པས་སྒོ་མ་བཅད་པར་གློས་ཕབ་སྟེ་ཉལ་བར་བྱེད་ན་ལྟུང་བྱེད་དུ་འགྱུར་རོ། །དེ་བཞིན་དུ་བར་ཁང་ན་སྐྱེས་པ་ཉལ་ལ། ཤོད་ན་དགེ་སློང་མ་ཉལ་བར་བྱེད་ན་ཡང་ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་སྟེང་ཁང་ན་སྐྱེས་པ་ཉལ་ལ། ཤོད་དུ་དགེ་སློང་མ་ཉལ་བར་བྱེད་ན། སྐས་བརྟུལ་བར་བྱ་བའམ། གཏན་པས་སྒོ་གཅད་པར་བྱའོ། །མ་བྱས་པར་ཉལ་བར་བྱེད་ན་ལྟུང་བྱེད་

---

^{[མ་དཔེ་གཟིགས་ན་འདིར་གནོན།]}

དོ། །དེ་བཞིན་དུ་བར་ཁང་ན་སྐྱེས་པ་ཉལ་ལ། ཤོད་ན་དགེ་སློང་མ་ཉལ་བར་བྱེད་ན་ཡང་ལྟུང་བྱེད་དོ། །དེ་བཞིན་དུ་ཕྱུགས་རལ་སོགས་པ་དག་ཏུ་ཡང་ཞེས་བྱ་བ་ནས། དེར་ཡང་ཤིང་དང། སབ་མོ་དང། རེ་ལྡེ་དག་གིས་འཁོར་བར་བསྐོར་བར་བྱའོ། །ཞེས་བྱ་བ་ནས་མ་བྱས་ན་ལྟུང་བྱེད་དོ། །ཞེས་བྱ་བའི་བར་རོ། །དགེ་སློང་མས་ཇི་ཙམ་ཅུང་ཟད་སྐྱེས་པ་དང་ལྷན་ཅིག་གནས་གཅིག་ཏུ་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ལྔ་པའི་བརྒྱད་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་གཅིག་པ། གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་རྒོད་པའི་བསམ་པས་མི་སྡུག་ཅིང་མི་སྡུག་པ་དག་གིས་དགེ་སློང་མ་གཞོན་ནུ་རྣམས་ལ་སྡངས་པར་བྱེད། སྡངས་སུ་འཇུག་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་ལ་སྡངས་པར་བྱེད་དམ། སྡངས་པར་བྱེད་དུ་འཇུག་ན། ཐ་ན་བཞད་བགད་ཀྱི་བསམ་པས་ཀྱང་རུང་སྟེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །སྡངས་པར་བྱེད་ངམ་ཞེས་བྱ་བ་ནི་རང་གིས་སོ། །སྔགས་པར་བྱེད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་དགེ་སློང་མ་རྣམས་ལ་སྡངས་པར་བྱ་བའི་བསམ་པས་མི་སྡུག་ཅིང་མི་སྡུག་པ་དག་ཉེ་བར་དོང་ཞིང། གནག་ཅིང་གནག་པ། སོལ་བའི་ཁ་དོག་འདྲ་བ་ཡིད་དུ་མི་འོང་བ་འདི་ལྟ་སྟེ། སྡོང་དུམ་ཚིག་པ་འདྲ་བ་དག་ཉེ་བར་དོང་ནས། འདི་སྐད་ཅེས་གཟུགས་འདི་འདྲ་བ་དག་གི་གནོད་སྦྱིན་དང། ཡི་དྭགས་དང། ཤ་ཟ་དང། འབྱུང་པོ་དང། གྲུལ་བུམ་དང། ལུས་སྲུལ་པོ་དང། སྲུལ་པོ་

---

^{[མ་དཔེ་གཟིགས་ན་འདིར་གནོན།]}

རྣམས་ཁྱོད་ཀྱི་དྲུང་དུ་འོངས་ནས་དེ་དག་གིས་གསོད་པར་འགྱུར། སྲོག་དང་ཕྲལ་བར་འགྱུར་རོ་ཞེས་སྨྲས་ན། དགེ་སློང་མ་སྡངས་པར་གྱུར་ཀྱང་རུང། མ་གྱུར་ཀྱང་རུང། ལྟུང་བྱེད་དུ་འགྱུར་རོ། །དེ་བཞིན་དུ་སྒྲ་འབྱིན་པར་བྱེད་པ་འདི་ལྟ་སྟེ། སེངྒེ་དང། སྟག་དང། སྤྱང་གི་རྣམས་ཀྱི་དང། དེ་བཞིན་དུ་ཡི་དྭགས་དང། ཤ་ཟ་རྣམས་ཀྱི་སྒྲ་སྣ་ཚོགས་དག་ཅེས་བྱ་བ་ནས། ལྟུང་བྱེད་དོ། །ཞེས་བྱ་བའི་བར་རོ། །དེ་བཞིན་དུ་དྲི་འབྱིན་པར་བྱེད་པ་འདི་ལྟ་སྟེ། ངན་སྐྱུགས་དང། གཅིན་གྱི་དང། རའི་དང། ར་རལ་པ་ཅན་རྣམས་ཀྱི་དང། དེ་བཞིན་དུ་ཡི་དྭགས་ལ་སོགས་པའི་དྲི་སྣ་ཚོགས་དག་ཅེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དེ་བཞིན་དུ་རེག་པ་སྣ་ཚོགས་འབྱིན་པར་བྱེད་པ་འདི་ལྟ་སྟེ། ཤིང་དང། སབ་མོ་དང། རེ་ལྡེ་དང། ཕྱར་བ་རྣམས་ཀྱི་དང། དེ་བཞིན་དུ་ཡི་དྭགས་ལ་སོགས་པའི་རེག་པ་སྣ་ཚོགས་དག་ཅེས་བྱ་བ་ནས། ལྟུང་བྱེད་དོ་ཞེས་བྱ་བའི་བར་རོ། །དགེ་སློང་མས་དགེ་སློང་མ་ལ་སྤངས་པར་བྱ་བའི་བསམ་པས་ཡིད་དུ་འོང་བའི་གཟུགས་དག་སྟོན་པར་བྱེད་པ། འདི་ལྟ་སྟེ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དང། བྲམ་ཟེ་ཤིང་སཱ་ལ་ཆེན་པོ་ལྟ་བུ་དང། ཁྱིམ་བདག་ཤིང་སཱ་ལ་ཆེན་པོ་ལྟ་བུ་རྣམས་ཏེ། གཟུགས་འདི་འདྲ་བའི་ལྷ་དང། དྲི་ཟ་དང། མིའམ་ཅི་དང། ལྟོ་འཕྱོ་ཆེན་པོ་རྣམས་ཏེ། དགེ་སློང་མ་སྡངས་པར་གྱུར་ཀྱང་རུང། མ་གྱུར་ཀྱང་རུང་ཉེས་བྱས་སུ་འགྱུར་རོ། །དེ་བཞིན་དུ་སྒྲ་ཡིད་དུ་འོང་བ་འབྱིན་པར་བྱེད་པ་འདི་ལྟ་སྟེ། པི་ཝང་དང། ལྕགས་ཀྱི་སིལ་ཁྲོལ་དང། འཁར་རྔ་དང། ཤིན་ཏུ་དབྱངས་སྙན་རྣམས་ཀྱི་སྟེ། སྒྲ་འདི་ལྟ་བུའི་ལྷ་ལ་སོགས་པ་ཞེས་བྱ་བ་ནས། ཉེས་བྱས་སོ། །ཞེས་བྱ་བའི་བར་རོ། །དེ་བཞིན་དུ་དྲི་ཡིད་དུ་འོང་བ་འབྱིན་པར་བྱེད་པ་འདི་ལྟ་སྟེ། ཨ་ཀ་རུ་དང། ཙན་དན་དང། དུ་རུ་ཀ་དང། ག་པུར་ལ་སོགས་པའི་སྟེ། དྲི་འདི་ལྟ་བུའི་ལྷ་ལ་སོགས་པ་ཞེས་བྱ་བ་ནས། ཉེས་བྱས་སོ་ཞེས་བྱ་བའི་བར་རོ། །

---

^{[མ་དཔེ་གཟིགས་ན་འདིར་གནོན།]}

དེ་བཞིན་དུ་རེག་པ་ཡིད་དུ་འོང་བ་འབྱིན་པར་བྱེད་པ་འདི་ལྟ་སྟེ། དར་དང། རས་དང། གོས་དང། དར་ལ་དེང། དུ་གུ་ལའི་གོས་རྣམས་ཀྱི་སྟེ། རེག་པ་འདི་ལྟ་བུའི་ལྷ་ལ་སོགས་པ་ཞེས་བྱ་བ་ནས། ཉེས་བྱས་སོ་ཞེས་བྱ་བའི་བར་རོ། །ལྟུང་བྱེད་ལྔ་པའི་དགུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་མང་དུ་ཡོད་པས། དེ་ཡང་མང་དུ་ཟ་ཞིང་མང་དུ་འཐུང་བས་རྡུལ་གྱིས་དེའི་གོས་དག་མ་རུང་བར་གྱུར་པ་ན། དེས་གོས་དེ་དག་འཁྲུ་ཞིང་ཁ་སྒྱུར་མ་ནུས་ནས། དེས་ལྷན་ཅིག་གནས་པ་དང། ཉེ་གནས་དེ་དག་ལ་གཏན་བྱིན་ནོ། །དེ་དག་གིས་ཆོས་གོས་དེ་དག་བཀྲུས་ཤིང་ཁ་བསྒྱུར་ཏེ། གཏུར་བུ་དག་གི་ནང་དུ་བཅུག་ནས་དེ་ཉིད་ཀྱི་ལག་ཏུ་བཅོལ་ཏེ། ལྗོངས་རྒྱུ་ཞིང་དོང་ངོ། །དེ་དག་ལྗོངས་རྒྱུ་ཞིང་དོང་བ་དང། དེས་ཕྱིར་བླང་ངོ་སྙམ་ནས་གོས་དག་སྤྱད་དོ། །དེས་དེ་དག་ཡང་སླར་དྲི་མས་གོས་པར་བྱས་ནས། གཏུར་བུ་དེ་དག་ཉིད་ཀྱི་ནང་དུ་བཅུག་གོ། འདི་དག་ལྷགས་ནས་གོས་དེ་དག་དྲི་མ་ཅན་དུ་བྱས་པ་མཐོང་ནས། སྨོད་པར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་ལ་གོས་དག་བྱིན་ནས། དེའི་འོག་ཏུ་ཕྱིར་མ་བླངས་པར་སྤྱོད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །གོས་ཞེས་བྱ་བ་ནི། བདུན་པོ་གང་ཡང་རུང་བའི་བར་དག་གོ། ཕྱིར་མ་བླངས་པར་ཞེས་བྱ་བ་ནི། གདེང་མ་བཅད་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གོས་བྱིན་ནས་དེའི་འོག་ཏུ་ཕྱིར་མ་བླངས་པར་སྤྱོད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་འགྲོགས་བཤེས་ཡིན་པ་དང། ཐོས་ནས་དགའ་བར་འགྱུར་བ་ཡིན་ན་ལྟུང་བ་མེད་དོ། ལྟུང་བྱེད་ལྔ་པའི་བཅུ་པ་རྫོགས་སོ།། །།གླེང་གཞི་ནི་

---

^{[མ་དཔེ་གཟིགས་ན་འདིར་གནོན།]}

མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་དང། དགེ་སློང་མ་རྣམས་འཐབ་ཅིང་མཚང་འདྲུ་བར་བྱེད་དེ། ཁྲོས་ཤིང་ཞེ་སྡང་བའི་ཟིལ་གྱིས་ནོན་ནས། གཞི་མེད་པར་དགེ་སློང་མ་རྣམས་ལ་དགེ་འདུན་ལྷག་མས་གླེང་པར་བྱེ་དཔ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་ཤིང་ཞེ་སྡང་ལ་མི་དགའ་བར་གྱུར་ནས། དགེ་སློང་མ་དག་པ་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་ཀྱིས་སྐུར་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་དག་ནི་བཅུ་གཉིས་སྡེ་དག་གོ། ཁྲོས་ནས་ཞེས་བྱ་བ་ནི་སྔ་མ་ཇི་ལྟ་བ་བཞིན་ནོ། །དགེ་འདུན་ལྷག་མས་ཞེས་བྱ་བ་ནི་ཉི་ཤུ་པོ་གང་ཡང་རུང་བས་སོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེས་དེ་ལ་ལྟུང་བ་མ་བྱུང་བའི་ལྟ་བ་ཐོབ་པ་ལས་དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ། འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ། །ཞེས་སྨྲས་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེས་དེ་ལ་ལྟུང་བྱེད་ཀྱི་ལྟ་བ་ཐོབ་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ཏེ། འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ། །ཞེས་སྨྲས་ན་ལྟུང་བྱེད་དོ། །དགེ་སློང་མས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེ་དེ་ལ་སོ་སོར་བཤགས་པར་བྱ་བའི་ལྟ་བ་ཐོབ་པ་ལས། དེས་འདུ་ཤེས་དང། བཟོད་པ་དང། འདོད་པ་དང། བློ་གྲོས་དང། རྟོག་པ་དང། ལྟ་བ་བསྒྱུར་ནས་འདི་སྐད་ཅེས་ཁོ་མོས་དགེ་སློང་

---

^{[མ་དཔེ་གཟིགས་ན་འདིར་གནོན།]}

མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ་ཞེས་སྨྲས་ན་ལྟུང་བྱེད་དོ། །དགེ་སློང་མས་དགེ་སློང་མ་ལ། དགེ་འདུན་ལྷག་མའི་ལྟུང་བ་བྱུང་བ་མཐོང་ལ། དེས་དེ་ལ་ཉེས་བྱས་ཀྱི་ལྟ་བ་ཐོབ་པ་ལས། དེས་འདུ་ཤེས་དང། བཟོད་པ་དང། འདོད་པ་དང་བློ་གྲོས་དང། རྟོག་པ་དང། ལྟ་བ་བསྒྱུར་ཏེ། འདི་སྐད་ཅེས་ཁོ་མོས་དགེ་སློང་མ་ལ་དགེ་འདུན་ལྷག་མའི་ལྟུང་བ་བྱུང་བ་མཐོང་ངོ། །ཞེས་སྨྲས་ན་ལྟུང་བྱེད་དོ། །དེ་བཞིན་དུ་རིམ་པ་འདིས་དགེ་འདུན་གྱི་ལྷག་མའི་བག་ཙམ་གྱི་བསླབ་པའི་གཞི་ལ་དེ་བཞིན་དུ་རྒྱས་པར་བརྗོད་པར་བྱའོ། །དེ་ལྟ་མོད་ཀྱི་དགེ་སློང་མས་ཇི་ཙམ་ཅུང་ཟད་ཁྲོས་ཤིང་ཞེ་སྡང་ལ་མི་དགའ་བས། གཞི་མེད་པར་དགེ་འདུན་ལྷག་མས་སྐུར་བ་འདེབས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ལྔ་པའི་བཅུ་གཅིག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་ཡུལ་ཙམ་པ་ཀའི་ཐ་ག་པའི་ཁྱེའུ་ཞིག་ཆུང་མ་བླངས་ནས་རིང་པོ་མ་ལོན་པར། དེ་རང་གི་ཆུང་མ་ལ་ཁྲོས་ནས་སླར་ཡང་ཙམ་པར་ཆས་པ་ན། དེའི་ཚེ་སྦོམ་དགའ་མོ་ལམ་ཀ་ན་འདུག་པ་དེས། ཁྱེའུ་དེ་མཐོང་ནས་འདི་སྐད་ཅེས་སྨྲས་སོ། །བཞིན་བཟང་གར་འགྲོ། དེས་འདི་སྐད་ཅེས་སྨྲས་སོ། །ཙམ་པར་མཆིའོ། །དེ་ནས་སྦོམ་དགའ་མོ་དེ་དང་ལྷན་ཅིག་ཆས་པ་དང། ཐ་ག་པའི་ཆུང་མ་ཁང་ཐོག་ན་འདུག་པ་དེས། ཁྱིམ་ཐབ་དགེ་སློང་མ་ཞིག་དང་འགྲོགས་ཏེ། མགྲོན་པོ་ལམ་དུ་ཞུགས་ཏེ་སོང་བ་མཐོང་ངོ། །མཐོང་ནས་ཀྱང་སྐད་ཆེན་པོར། ཁོ་མོའི་ཁྱིམ་ཐབ་ཀྱིས་དགེ་སློང་མ་ཞིག་ཁྲིད་ནས་བྲོས་སོ། །ཞེས་བསྒྲགས་པ་དང། དེ་ནས་ཐ་ག་པ་རབ་ཏུ་ཡང་པོས་སྦོམ་དགའ་མོ་ལ་བརྡེགས་སོ། །དེ་ནས་མིག་ཕུབས་སྐྲངས་ཤིང་དབྱར་ཁང་དུ་སོང་བ་དང། དགེ་སློང་མ་རྣམས་ཀྱིས་དྲིས་པ་ལས། དེས་སྐབས་དེ་རྒྱས་པར་སྨྲས་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་

---

^{[མ་དཔེ་གཟིགས་ན་འདིར་གནོན།]}

སློང་མ་གང་བུད་མེད་མེད་པར་སྐྱེས་པ་དང་ལྷན་ཅིག་མགྲོན་ལམ་དུ་ཞུགས་ཏེ་འགྲོ་ན། ཐ་ན་གྲོང་བར་དུ་ཡང་རུང་སྟེ་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །བུད་མེད་མེད་པར་སྐྱེས་པ་དང་ལྷན་ཅིག་ཅེས་བྱ་བ་ནི། གང་དུ་བུད་མེད་མེད་པར་རོ། །མགྲོན་ལམ་དུ་ཞུགས་ཏེ་འགྲོ་ན་ཞེས་བྱ་བ་ནི། དགོན་པའི་ལམ་དུ་འགྲོ་ནའོ། །ཐ་ན་གྲོང་བར་དུ་ཡང་རུང་སྟེ་ཞེས་བྱ་བ་ནི་གྲོང་ནས་གྲོང་དུ་འགྲོ་ནའོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་མེད་པར་སྐྱེས་པ་དང་ལྷན་ཅིག་གྲོང་ནས་གྲོང་བར་དུ་འགྲོ་ན། རྒྱང་གྲགས་ཕྱེད་ཕྱེད་དུ་སོང་ན་དེ་ལ་ཉེས་བྱས་སོ། །རྒྱང་གྲངས་རྒྱངས་གྲགས་སུ་ནི་ལྟུང་བྱེད་དོ། །ལྟུང་བྱེད་ལྔ་པའི་བཅུ་གཉིས་པ་རྫོགས་སོ།། །།སྡོམ་ལ། རྐུན་མ་ལྷན་ཅིག་ཉི་ཤུ་མིན། །མི་བརྐོ་མགྲོན་པོས་བསླབ་པ་དང། །ཉན་རྣ་ལྡང་དང་མ་གུས་དང། །ཆང་འཐུང་དུས་མིན་རྒྱུ་བའོ། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་རྒྱལ་པོའི་ཁབ་ནས་ཤོ་གམ་འདྲལ་བའི་ཚོང་པ་རྣམས་དང་ལྷན་ཅིག་མཉན་ཡོད་དུ་ཆས་ཏེ། དེ་ནས་ཤོ་གམ་འདྲལ་བའི་ཚོང་པ་དང་ལམ་གོལ་པ་ནས་དོང་བ་ན། ཤོ་གམ་པ་དག་གིས་སླེབས་ནས། དེར་སྦོམ་དགའ་མོ་ཡང་བརྡེགས་སོ། །དེ་རིམ་གྱིས་མཉན་ཡོད་དུ་ཕྱིན་པ་དང། དེ་ལ་དགེ་སློང་མ་རྣམས་ཀྱིས། འཕགས་མ་བྱོན་པ་ལེགས་སོ། །ཤོ་གམ་པ་དག་གིས་མ་གཅེས་གྲང་[?]། ཞེས་དྲིས་པ་དང། དེས་སྐབས་དེ་རྒྱས་པར་སྨྲས་པ་ལས། དགེ་སློང་མ་རྣམས་ཀྱིས་སྐབས་དེ། བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ཐམས་ཅད་ནི། དགེ་སློང་མ་གང་རྐུན་པོའི་དོན་མཐུན་དང་ལྷན་ཅིག་མགྲོན་ལམ་དུ་འགྲོ་བ་ལས་གྱུར་ཏོ་སྙམ་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་

---

^{[མ་དཔེ་གཟིགས་ན་འདིར་གནོན།]}

རྐུན་པོའི་དོན་མཐུན་དང་ལྷན་ཅིག་མགྲོན་ལམ་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རྐུན་པོའི་དོན་མཐུན་དང་ཞེས་བྱ་བ་ནི། ཤོ་གམ་འདྲལ་བའི་ཚོང་པའམ། རྐུན་པོ་དང་ངོ། །མགྲོན་ལམ་དུ་ཞེས་བྱ་བ་ནི་དགོན་པའི་ལམ་དུ་ཞུགས་ཏེ་འདོང་ནའོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྐུན་པོའི་དོན་མཐུན་དང་མགྲོན་ལམ་དུ་འཇུག་ན་ལྟུང་བྱེད་དོ། །རྒྱང་གྲགས་ཕྱེད་ཕྱེད་དུ་ནི་ཉེས་བྱས་སུ་འགྱུར་རོ། །རྒྱང་གྲགས་རྒྱང་གྲགས་སུ་ནི་ལྟུང་བྱེད་དོ། །ལྟུང་བྱེད་དྲུག་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་འདོད་པས། དེས་ལོ་ཉི་ཤུ་མ་ལོན་པ་དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ན། དེ་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། དེས་འདི་སྐད་ཅེས་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ། །ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་པའི་བར་དུ་མཛད་དེ། ཡང་དགེ་སློང་མ་གང་ལོ་ཉི་ཤུ་མ་ལོན་པ་གསོལ་བ་དང་བཞིའི་ལས་ཀྱིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དེ་ནི་བསྙེན་པར་མ་རྫོགས་པ་ཡིན་ལ། དེ་དག་ཀྱང་ལྟུང་བ་དང་བཅས་པས་སྨད་པར་འགྱུར་རོ། །དེ་ལ་དེ་ནི་ངེས་པ་ཡིན་ནོ། །དེ་ལ་དེ་ནི་རྗེས་སུ་མཐུན་པའི་ཆོས་ཡིན་ནོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གལ་ཏེ་ལོ་ཉི་ཤུ་མ་ལོན་པར་གྱུར་ཅིང། ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་དང། དེ་འདི་སྐད་ཅེས་ཁོ་མོ་ཉི་ཤུ་མ་ལོན་ནོ་ཞེས་སྨྲས་པ་ན། དེ་དགེ་སློང་

---

^{[མ་དཔེ་གཟིགས་ན་འདིར་གནོན།]}

མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དག་དགེ་སློང་མ་དེ་ཡང་དང་པོ་ཉིད་ནས་བསྙེན་པར་མ་རྫོགས་པ་ཡིན་ལ་འགྲོགས་པ་དང། ལོངས་སྤྱད་པས་ལྟུང་བར་ཡང་འགྱུར། དགེ་སློང་མའི་དགེ་འདུན་ཡང་དེས་འགལ་ཆབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ཅིང། ལོ་ཉི་ཤུ་མ་ལོན་པར་འདུ་ཤེས་པ་དེ་ལ་དགེ་སློང་མ་རྣམས་ཀྱིས་ལ་ཉི་ཤུ་ལོན་ནམ། ཞེས་དྲིས་པ་དང། དེ་འདི་སྐད་ཅེས་ཁོ་མོས་ཇི་ལྟར་ཡང་ལོ་ཉི་ཤུ་ལོན་པར་མི་ཤེས་ཤིང་མི་དྲན་ཏེ། ཁོ་མོ་ནི་ཡིད་གཉིས་ཟའོ། །ཞེས་སྨྲས་པ་ན། དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག །དགེ་སློང་མ་དེ་ཡང་དང་པོ་ཉིད་ནས་བསྙེན་པར་མ་རྫོགས་པ་ཡིན་ལ། འགྲོགས་པ་དང། ལོངས་སྤྱད་པས་ལྟུང་བ་ཡང་འགྱུར། དགེ་སློང་མའི་དགེ་འདུན་ཡང་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ཅིང། ལོ་ཉི་ཤུ་མ་ལོན་པར་འདུ་ཤེས་པ་ལ། དེ་ཡང་མི་ཤེས་པ་དང། མི་དྲན་པ་དང། ཡིད་གཉིས་ཟ་བར་གྱུར་ཀྱང་རུང། དེ་ལ་དགེ་སློང་མས་ཅི་ཡང་མ་དྲིས་པའམ། ལན་མ་བྱིན་པར། དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག །དགེ་སློང་མ་དེ་དེའི་འོག་ཏུ་བསྙེན་པར་རྫོགས་པ་ནི་འཆགས་ཏེ། དགེ་འདུན་དང་འགྲོགས་པ་དང། ལོངས་སྤྱོད་པས་ལྟུང་བར་ཡང་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་མ་ལོན་པར་གྱུར་ལ། ལོ་ཉི་ཤུ་མ་ལོན་པར་འདུ་ཤེས་པ་དེ་ལ། དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་དང། དེ་འདི་སྐད་ཅེས་ལོ་ཉི་ཤུ་ལོན་ནོ་ཞེས་སྨྲས་པ་ན་དེ་ལ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན་དགེ་སློང་མ་དག་དགེ་སློང་མ་དེ་དེའི་འོག་ཏུ་བསྙེན་པར་རྫོགས་པ་འཆགས་ཏེ་དགེ་འདུན་དང་།

---

^{[མ་དཔེ་གཟིགས་ན་འདིར་གནོན།]}

འགྲོགས་ཤིང་ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །གལ་ཏེ། ལོ་ཉི་ཤུ་མ་ལོན་པར་གྱུར་ཅིང། ལོ་ཉི་ཤུ་ལོན་པར་འདུ་ཤེས་པ་དེ་ལ། དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་ན། དེ་འདི་སྐད་ཅེས་ཁོ་མོས་ཇི་ལྟར་ཡང་ལོ་ཉི་ཤུ་ལོན་པ་ཤེས་ཤིང། དྲན་ཏེ་ཁོ་མོ་ནི་ཡིད་གཉིས་མི་ཟའོ། །ཞེས་སྨྲས་པ་ན། དེ་ལ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དག་དགེ་སློང་མ་དེའི་འོག་ཏུ་བསྙེན་པར་རྫོགས་པར་འཆགས་ཤིང། འགྲོགས་པ་དང། ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །གལ་ཏེ་ལོ་ཉི་ཤུ་ལོན་པར་གྱུར་ཅིང། ལོ་ཉི་ཤུ་མ་ལོན་པར་འདུ་ཤེས་པ་དེ་ལ། དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་དང། དེ་འདི་སྐད་ཅེས་ཁོ་མོས་ལོ་ཉི་ཤུར་མ་ལོན་ནོ། །ཞེས་སྨྲས་པ་ན་དེ་ལ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དག་དགེ་སློང་མ་དེ་དང་པོ་ཉིད་ལེགས་པར་བསྙེན་པར་རྫོགས་པ་ཡིན་ཞིང་འགྲོགས་པ་དང། ལོངས་སྤྱོད་པས་ལྟུང་བར་ཡང་མི་འགྱུར་ལ། དགེ་འདུན་ནི་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་ལོན་པར་གྱུར་ཅིང། ལོ་ཉི་ཤུ་མ་ལོན་པར་འདུ་ཤེས་པ་དེ་ལ། དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་ན། དེ་འདི་སྐད་ཅེས་ཁོ་མོས་ཇི་ལྟར་ཡང་ལོ་ཉི་ཤུ་མ་ལོན་པར་ཤེས་ཤིང་དྲན་ཏེ། ཁོ་མོ་ཡིད་གཉིས་ཟའོ་ཞེས་སྨྲས་པ་ན། དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དག །དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང། འགྲོགས་པ་དང། ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ནི་དེས་འགལ་ཚབས་ཅན་དུ་འགྱུར་རོ། །གལ་ཏེ་ལོ་ཉི་ཤུ་ལོན་ལ་དེ་མ་ཤེས་ཤིང་མི་དྲན་ནམ། ཡིད་གཉིས་ཟ་བར་གྱུར་

---

^{[མ་དཔེ་གཟིགས་ན་འདིར་གནོན།]}

ཀྱང་རུང། དེ་ལ་དགེ་སློང་མས་མ་དྲིས་སམ། དྲིས་པའི་ལན་མ་བྱིན་པར་དེ་དགེ་སློང་མ་དག་གིས་དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། དགེ་སློང་མ་དག་དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང། འགྲོགས་པ་དང། ལོངས་སྤྱད་པས་ལྟུང་བར་མི་འགྱུར་ལ། དགེ་འདུན་ནི་དེས་འགལ་ཚབས་ཅན་དུ་འགྱུར་ཏོ། །གལ་ཏེ་ལོ་ཉི་ཤུ་ཚང་བར་གྱུར་ཅིང། ལོ་ཉི་ཤུ་ཚང་བར་འདུ་ཤེས་པ་དེ་ལ། དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་དང། དེ་འདི་སྐད་ཅེས་ལོ་ཉི་ཤུ་ལོན་ནོ་ཞེས་སྨྲས་པ་ན། དེ་དགེ་སློང་མ་དག་གིས། དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང། འགྲོགས་པ་དང། ལོངས་སྤྱོད་པས་ལྟུང་བར་ཡང་མི་འགྱུར་ཞིང། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །གལ་ཏེ་ལོ་ཉི་ཤུ་ལོན་པར་གྱུར་ཅིང། ལོ་ཉི་ཤུ་ལོན་པར་འདུ་ཤེས་པ་དང། ཤེས་ཤིང་དྲན་ཏེ། ཡིད་གཉིས་མི་ཟ་བ་དེ་ལ། དགེ་སློང་མ་རྣམས་ཀྱིས་ལོ་ཉི་ཤུ་ལོན་ནམ། ཞེས་དྲིས་པ་ན། དེ་འདི་སྐད་ཅེས་ཇི་ལྟར་ཁོ་མོས་ལོ་ཉི་ཤུ་ལོན་པར་ཤེས་ཤིང་དྲན་ཏེ། ཁོ་མོ་ཡིད་གཉིས་མི་ཟའོ་ཞེས་སྨྲས་པ་ན། དེ་དགེ་སློང་མ་དག་གིས། དགེ་སློང་མའི་དངོས་པོར་བསྙེན་པར་རྫོགས་པར་བྱེད་པ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དེ་དང་པོ་ཉིད་ནས་ལེགས་པར་བསྙེན་པར་རྫོགས་པ་ཡིན་ཞིང། འགྲོགས་པ་དང། ལོངས་སྤྱད་པས་ལྟུང་བར་ཡང་མི་འགྱུར་ལ། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་རོ། །དགེ་སློང་མ་དག་དེ་ལ་དགེ་སློང་མ་བཞི་པོ་གང་ཡིན་པ་དེ་དག་ནི་དང་པོ་འཁྲུགས་པ་ཡིན་ཏེ། དེ་དག་དང་པོ་ཉིད་ནས་བསྙེན་པར་མ་རྫོགས་པས། བསྙིལ་བར་འོས་པ་ཡིན་ནོ། །དགེ་སློང་མ། དེ་ལ་དགེ་སློང་མ་མི་ཤེས་ཤིང་མི་དྲན་ལ། ཡིད་གཉིས་ཟ་བ་གང་ཡིན་པ་དེ་ལ་ནི་ཤེས་པར་བྱ། དྲན་པར་བྱ། སོམ་ཉི་

---

^{[མ་དཔེ་གཟིགས་ན་འདིར་གནོན།]}

དང་ཡིད་གཉིས་སྤང་བར་བྱ་སྟེ། གང་གི་ཚེ་ཤེས་པར་གྱུར་ཏམ། དྲན་པར་གྱུར་ཏམ། སོམ་ཉི་དང་ཡིད་གཉིས་སྤངས་པར་གྱུར་ལ། གལ་ཏེ་རེ་ཞིག་ཚང་ན་ཇི་ལྟར་བསྙེན་པར་རྫོགས་པ་དེ་བཞིན་དུ་བསྙེན་པར་རྫོགས་པ་ཡིན་ནོ། །གལ་ཏེ་མ་ཚང་ནས་སྤོ་བར་བྱ་བའམ། སླར་ཡང་བསྙེན་པར་རྫོགས་པར་བྱའོ། །ས་སྤོ་བར་མི་བྱེད་དམ། སླར་ཡང་བསྙེན་པར་རྫོགས་པར་མི་བྱེད་ལ། གལ་ཏེ་རང་བཞིན་དུ་གནས་པའི་དགེ་སློང་མ་རྣམས་དང་ལྷན་ཅིག་ལན་གཉིས་སམ། གསུམ་གསོ་སྦྱོང་གི་ལས་དག་ཉམས་སུ་མྱོང་བར་བྱེད་ན། དགེ་སློང་མ་དག་རྐུ་ཐབས་སུ་གནས་པ་ཡིན་ཏེ། དགེ་སློང་མ་དེ་བསྙིལ་བར་འོས་པ་ཡིན་ནོ། །དགེ་སློང་མ་དག་དེ་ལ། དགེ་སློང་མ་ལོ་ཉི་ཤུ་མ་ལོན་པར་གྱུར་པ་ལོ་ཉི་ཤུ་ལོན་པའི་འདུ་ཤེས་ཀྱིས་བསྙེན་པར་རྫོགས་པ་དང། དེའི་གཉེན་དག་ལྷགས་ཏེ། འདི་སྐད་ཅེས་སྨྲས་སོ། །མིང་འདི་ཞེས་བྱ་བ་ཡོད་དམ། དེ་དག་གིས་འདི་སྐད་ཅེས་སྨྲས་སོ། །དེ་ནི་བསྙེན་པར་རྫོགས་སོ། །དེ་དག་གིས་འདི་སྐད་ཅེས་སྨྲས་སོ། །དེ་ནི་ལོ་ཉི་ཤུ་མ་ལོན་ནོ། །ཞེས་དེ་སྐད་སྨྲས་པ་ན། བཅོམ་ལྡན་འདས་ཀྱིས་བཀའ་སྩལ་པ། དེའི་ཤོལ་གྱི་ཟླ་བ་དང། མངལ་གྱི་ཟླ་བ་ཡང་བརྩི་བར་བྱའོ། །གལ་ཏེ་ཚང་ན་དེ་ལྟ་ན་ལེགས། །དེ་སྟེ་མ་ཚང་ན་ས་སྤོ་བར་བྱ་བའམ། སླར་ཡང་བསྙེན་པར་རྫོགས་པར་བྱའོ། །ས་སྤོ་བར་མི་བྱེད་དམ། སླར་ཡང་བསྙེན་པར་རྫོགས་པར་མི་བྱེད་ན་ཞེས་བྱ་བ་ནས། བསྙིལ་བར་འོས་པ་ཡིན་ནོ་ཞེས་བྱ་བའི་བར་རོ། །དགེ་སློང་མ་དག་དེ་ལ་དགེ་སློང་མ་ལོ་བཅོ་བརྒྱད་ལོན་པ་གང་ཡིན་པ་དེ། ལོ་ཉི་ཤུའི་འདུ་ཤེས་ཀྱིས་བསྙེན་པར་རྫོགས་པར་གྱུར་ལ། གལ་ཏེ་ལོ་གཉིས་ཀྱི་དྲན་པ་རྙེད་ན། ཇི་ལྟར་བསྙེན་པར་རྫོགས་པ་དེ་བཞིན་དུ་བསྙེན་པར་རྫོགས་པ་ཡིན་ཏེ། དགེ་སློང་མ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང། བསྙེན་པར་རྫོགས་པ་དགེ་སློང་གི་དངོས་པོ་རྙེད་པར་དཀའ་བའི་ཕྱིར་རོ། །གལ་ཏེ་ལོ་གཅིག་གི་དྲན་པ་རྙེད་ན། མངལ་གྱི་ཟླ་བ་དང་ཤོལ་གྱི་ཟླ་བ་བརྩི་བར་བྱའོ། །གལ་ཏེ་ཚང་ན་དེ་ལྟ་ན་ལེགས། དེ་སྟེ་མ་ཚང་ན་ཞེས་བྱ་བ་ནས། བསྙིལ་བར་འོས་པ་ཡིན་ནོ། །ཞེས་བྱ་བའི་བར་རོ། །དགེ་སློང་མ་དག་དེ་ལ་དགེ་སློང་མ་ལོ་བཅུ་དགུ་ལོན་པ་གང་ཡིན་པ་དེ། ལོ་ཉི་ཤུའི་འདུ་ཤེས་ཀྱིས་བསྙེན་པར་རྫོགས་པར་གྱུར་ལ། གལ་ཏེ་ལོ་གཅིག་གི་དྲན་པ་རྙེད་ན། ཇི་ལྟར་བསྙེན་པར་རྫོགས་པ་དེ་བཞིན་དུ་བསྙེན་པར་རྫོགས་པ་ཡིན་ཏེ། དགེ་སློང་མ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང། བསྙེན་པར་རྫོགས་པ་དགེ་སློང་གི་དངོས་པོར་རྙེད་པར་དཀའ་བའི་ཕྱིར་རོ། །གལ་ཏེ་ལོ་མ་ཚང་བར་དྲན་པ་རྙེད་ན། མངལ་གྱི་ཟླ་བ་དང་ཤོལ་

---

^{[མ་དཔེ་གཟིགས་ན་འདིར་གནོན།]}

གྱི་ཟླ་བ་བརྩི་བར་བྱའོ། །གལ་ཏེ་ཚང་ན་དེ་ལྟ་ན་ལེགས། གལ་ཏེ་མ་ཚང་ན་ས་སྤོ་བར་བྱ་བའམ། སླར་ཡང་བསྙེན་པར་རྫོགས་པར་བྱའོ། །ཞེས་བྱ་བ་ནས་བསྙིལ་བར་འོས་པ་ཡིན་ནོ་ཞེས་བྱ་བའི་བར་རོ། །ལྟུང་བྱེད་དྲུག་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ། རང་གི་ལག་གིས་ས་རྐོ་བའི་བསླབ་པའི་གཞི་བཅའ་བ་མཛད་པ་དང། དེ་ནས་བཅུ་གཉིས་སྡེ་དེ་དག་རང་གི་ལག་གིས་ས་རྐོ་བར་བྱེད། རྐོར་འཇུག་པར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ས་རྐོའམ། རྐོར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ་།ས་ཞེས་བྱ་བ་ལས་ནི་གཉིས་ཏེ། རང་བཞིན་ཅན་དང། རང་བཞིན་ཅན་མ་ཡིན་པའོ། །དེ་ལ་རང་བཞིན་ཅན་ཞེས་བྱ་བ་ནི། ཆར་ཆུ་ཞོད་པའི་དུས་སུ་ཟླ་བ་གསུམ་གྱིས་ས་རྟས་པར་གྱུར་པ་སྟེ། འདི་ནི་རང་བཞིན་ཅན་གྱི་ས་ཞེས་བྱའོ། །རང་བཞིན་ཅན་མ་ཡིན་པའི་ས་གང་ཞེ་ན། གང་གི་ཚེ་ཆར་མ་བབ་པ་དེའི་ཚེ། ས་མ་རྟས་པར་གྱུར་པ་སྟེ། འདི་ནི་ས་རང་བཞིན་ཅན་མ་ཡིན་པ་ཞེས་བྱའོ། །རྐོ་ན་ཞེས་བྱ་བ་ནི་རང་གིས་སོ། །རྐོར་

---

^{[མ་དཔེ་གཟིགས་ན་འདིར་གནོན།]}

འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་རང་བཞིན་ཅན་གྱི་ས་རྐོ་ན། རྐོ་བ་ན་དེ་ལ་ལྟུང་བྱེད་དོ། །རང་བཞིན་ཅན་མ་ཡིན་པ་རྐོ་ན་ཉེས་བྱས་སོ། །དགེ་སློང་མས་ས་ལ་ཕུར་པ་འདེབས་ན་ལྟུང་བྱེད་དོ། །འབྱིན་ན་ཉེས་བྱས་སོ། །དགེ་སློང་མས་ས་ཞག་འགོགས་པར་བྱེད་ན། གལ་ཏེ་སའི་ཁམས་ནི་ཆེས་མང་ལ། སའི་ཞག་ནི་ཆེས་སྲབ་པར་གྱུར་ན་ལྟུང་བྱེད་དོ། །ས་ཞག་གི་ཁམས་ནི་ཆེས་སྟུག་ལ་སའི་ཁམས་ནི་ཆེས་སྲབ་པར་གྱུར་ན་ཉེས་བྱས་སོ། །དེ་བཞིན་དུ་ལྕི་བ་ནི་ཆེས་མང་ལ། སའི་ཁམས་སམ། བྱེ་མ་ནི་ཆེས་ཉུང་ན་ཉེས་བྱས་སོ། །དགེ་སློང་མས་ས་ལ་བྱེ་ཞག་འགོགས་པར་བྱེད་ན། སའི་ཁམས་ནི་ཆེས་སྟུག་ལ། བྱེ་མའི་ཁམས་ནི་ཆེས་སྲབ་ན་ལྟུང་བྱེད་དོ། །བྱེ་མའི་ཁམས་ཆེས་མང་ལ། སའི་ཁམས་ནི་ཆེས་སྲབ་བ་ན་ཉེས་བྱས་སོ། །དོག་ས་མ་གྲུབ་པ་རྟིབ་པར་བྱེད་ན་ལྟུང་བྱེད་དོ། །གྲུམ་པ་ལ་ནི་ཉེས་བྱས་སོ། །རྩིག་པ་མ་གྲུམ་པ་འཇིག་པར་བྱེད་ན་ལྟུང་བྱེད་དོ། །གྲུམ་པ་ལ་ནི་ཉེས་བྱས་སོ། །རྩིག་པ་ལ་ཕུར་པས་འདེབས་ན་ལྟུང་བྱེད་དོ། །འབྱིན་ན་ཉེས་བྱས་སོ། །ཞལ་ཞལ་མ་གྲུམ་པ་འགོགས་ན་ལྟུང་བྱེད་དོ། །གྲུམ་པ་ལ་ནི་ཉེས་བྱས་སོ། །ཐ་ན་རླམས་འདྲལ་བར་བྱེད་ན་ཡང་ཉེས་བྱས་སོ། །འདམ་རྫབ་ལ་ཕུར་པས་སམ། ཕུར་བུས་འདེབས་ན་ཉེས་བྱས་སོ། །འཁྲུག་ན་ཉེས་བྱས་སོ། །ཕུར་པ་རྙིང་པའི་མཚན་དུ་ཕུར་པ་འདེབས་ན་ཉེས་བྱས་སོ། །ས་ལ་རི་མོ་འདྲི་ན་ཉེས་བྱས་སོ། །གལ་ཏེ་ལག་གི་བླ་ཞིག་རྩིས་བྱེད་ན་ལྟུང་བ་མེད་དོ། །ལྟུང་བྱེད་དྲུག་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། དྲུག་སྡེ་རྣམས་ལ་བརྟེན་ཏེ། ཟླ་བ་བཞིར་མགྲོན་དུ་པོས་པའི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་དེ་དག་གིས་ཟླ་བ་ལྔ་དང། ཟླ་བ་དྲུག་ཏུ་མགྲོན་དུ་བོས་པ་ཡང་བདག་གིར་བྱེད་པ་དང། དེ་ནས་དེ་དག་ལ་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་ཀྱིས་ཟླ་བ་བཞིའི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དེ་ནི་དགེ་སློང་རྣམས་ལ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ། །ཞེས་སྨྲས་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་ཟླ་བ་བཞིར་མགྲོན་དུ་བོས་པ་བདག་གིར་བྱའོ། །དེ་ལས་འདས་པར་བྱེད་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་འདི་ནི་དུས་ཡིན་ཏེ། སོ་སོར་མགྲོན་དུ་བོས་པ་དང། ཡང་དང་ཡང་མགྲོན་དུ་བོས་པ་དང། ལྷག་པར་མགྲོན་དུ་བོས་པ་དང། རྟག་ཏུ་མགྲོན་དུ་བོས་པའོ། །ཟླ་བ་བཞི་ཞེས་བྱ་བ་ནི་ཟླ་བ་བཞིའོ། །དེ་ལས་ལྷག་པར་མགྲོན་དུ་བོས་པ་ཞེས་བྱ་བ་ནི། མགྲོན་དུ་གཉེར་བའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །སོ་སོར་ཞེས་བྱ་བ་ནི་ཐ་དད་པར་རོ། །ཡང་དང་ཡང་ཞེས་བྱ་བ་ནི་ཕྱིར་ཞིང་ཕྱིར་ཞིང་ངོ། །ལྷག་པར་ཞེས་བྱ་བ་ནི་ཆོག་པར་རོ། །རྟག་ཏུ་ཞེས་བྱ་བ་ནི་རྒྱུན་དུའོ། །དེ་ལ་འདི་ནི་དུས་ཡིན་ཏེ། ཞེས་བྱ་བ་ནི། དེ་ལ་འདི་ནི་རྗེས་སུ་མཐུན་པའི་ཆོས་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཁྱིམ་བདག་གི་ཁྱིམ་རྣམས་སུ་ཚོད་མ་ལ་མགྲོན་དུ་བོས་ལ། ཁུ་བ་སློང་ན་ལྟུང་བྱེད་དོ། །དེ་བཞིན་དུ་ཕལ་པ་ལ་མགྲོན་དུ་བོས་པ་ལ། བསོད་པ་སློང་ན་ཞེས་བྱ་བ་ནས། ཐམས་ཅད་དུ་ལྟུང་བྱེད་དུ་འགྱུར་རོ། །ཞེས་བྱ་བའི་བར་རོ། །བསོད་པ་ལ་ཞེས་བྱ་བ་ནས། ཕལ་པ་སློང་ན་ཉེས་བྱས་སོ། །གལ་ཏེ་ནད་པ་ཡིན་ནམ། བསོད་པ་རྙེད་ལ། ཕལ་པ་སློང་ངམ། བསྟབས་པ་ཡིན་ན་ལྟུང་བ་མེད་དོ། །ལྟུང་བྱེད་དྲུག་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །བཅོམ་ལྡན་འདས་ཀྱིས་ཁ་ཅིག་ནི་དགེ་སློང་ཐུན་མོང་པའི་བསླབ་པའི་གཞི་བཅའ་བ་མཛད་པ་ཡང་ཡོད། ཁ་ཅིག་ནི་དགེ་སློང་མ་དང། ཐུན་མོང་བ་ཡང་ཡོད། ཁ་ཅིག་ནི་གཉི་གའི་ཐུན་མོང་བ་ཡང་ཡོད་པས། གང་གི་ཚེ་བཅོམ་ལྡན་འདས་ཀྱིས་གཉི་གའི་ཐུན་མོང་གི་བསླབ་པའི་གཞི་

---

^{[མ་དཔེ་གཟིགས་ན་འདིར་གནོན།]}

བཅའ་བ་མཛད་པ་དེའི་ཚེ། དགེ་སློང་མའི་དབྱར་ཁང་དུ་དགེ་སློང་སྒོར་བཏང་ངོ། །གང་གི་ཚེ་དགེ་སློང་གིས་དགེ་སློང་མ་རྣམས་ལ་བསྒོ་བ་དེའི་ཚེ། དགེ་སློང་མ་དག་གིས། དགེ་སློང་མ་གཞན་དང་གཞན་དག་ལ་ཡང་བསྒོའོ། །དེ་ནས་ཡང་དགེ་སློང་མ་དེ་རྣམས་ཀྱིས་བཅུ་གཉིས་སྡེ་རྣམས་ལ་བསྒོ་བ་དང། དེ་དག་གིས་འདི་སྐད་ཅེས། ཁོ་མོ་ཅག་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཅག་ལ་བསླབ་པ་མི་སློབ་ཀྱི། ཞེས་བྱ་བ་ནས། ཁོ་མོ་ཅག་ནི་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ། གཞན་དག་ལ་འདྲིའོ། །ཞེས་སྨྲས་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་ཀྱིས་འདི་སྐད་ཅེས། འཕགས་མ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན། དེ་དེ་དག་ལ་འདི་སྐད་ཅེས་ཁོ་མོ་བྱིས་པ། རྨོངས་པ། མི་གསལ་བ། མི་མཁས་པ་ཁྱེད་ཀྱི་ཚིག་གིས་བསླབ་པ་ལ་མི་སློབ་ཀྱི་ཞེས་བྱ་བ་ནས། དགེ་སློང་མ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ། གཞན་དག་ལ་འདྲིའོ། །ཞེས་སྨྲས་ན་ལྟུང་བྱེད་དོ། །དགེ་སློང་མ་ཀུན་ཤེས་པར་འདོད་པས་བསླབ་པ་དེ་ལ་ཡང་བསླབ་པར་བྱ་ཞིང། དགེ་སློང་མ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ་ལ་ཡང་དྲི་བར་བྱ་སྟེ། དེ་ནི་དེ་ལ་ཆོ་ག་ཡིན་ནོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་ལའོ། །དགེ་སློང་མ་རྣམས་ཀྱིས་བསྒོ་བ་ན་ཞེས་བྱ་བ་ནི་ཆོས་འདི་པ་དག་གིས་སོ། །བསླབ་པ་དེ་ལ་ཁྱོད་ཀྱིས་བསླབ་པར་བྱའོ་ཞེས་བྱ་བ་ནི། ཕས་ཕམ་པར་འགྱུར་བ་བརྒྱད་ཅེས་བྱ་བ་ནས། རྩོད་པ་ཞི་བར་བྱ་བའི་ཆོས་བདུན་ཞེས་བྱ་བའི་བར་རོ། །བྱིས་པ་ཞེས་བྱ་བ་ནི། མདོ་སྡེ་མི་འཛིན། འདུལ་བ་མི་འཛིན། མ་མོ་མི་འཛིན་པ་ནི་བྱིས་པ་ཞེས་བྱའོ། །མི་མཁས་པ་ཞེས་བྱ་བ་ནི། མདོ་སྡེ་ལ་མི་མཁས། འདུལ་བ་ལ་མི་མཁས། མ་མོ་ལ་མི་མཁས་པ་ནི་མི་མཁས་པ་ཞེས་བྱའོ། །མི་གསལ་བ་ཞེས་བྱ་

---

^{[མ་དཔེ་གཟིགས་ན་འདིར་གནོན།]}

བ་ནི། མདོ་སྡེ་ལ་མི་གསལ། འདུལ་བ་ལ་མི་གསལ། མ་མོ་ལ་མི་གསལ་བ་ནི་མི་གསལ་བ་ཞེས་བྱའོ། །འདི་ལྟར་དགེ་སློང་མ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ་གཞན་ལ་འདྲིའོ། །ཞེས་བྱ་བ་ནས་མདོ་སྡེ་ལ་གསལ་བ། འདུལ་བ་ལ་གསལ་བ། མ་མོ་ལ་གསལ་བ་ཞེས་བྱ་བའི་བར་རོ། །དགེ་སློང་མ་ཀུན་ཤེས་པར་འདོད་པ་ཞེས་བྱ་བ་ནི། བསླབ་པ་འདོད་པས་སོ། །བསླབ་པ་དེ་ལ་ཡང་བསླབ་པར་བྱའོ་ཞེས་བྱ་བ་ནི། དགེ་སློང་མ་དག་གང་ལ་སློབ་པ་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་རྣམས་ཀྱིས་བསྒོ་བ་ན། འདི་སྐད་ཅེས་བུས་པ་ཞེས་ཟེར་ན་ལྟུང་བྱེད་དོ། །རྨོངས་པ་ཞེས་ཟེར་ན་ལྟུང་བྱེད་དོ། །མི་གསལ་བ་ཞེས་ཟེར་ན་ལྟུང་བྱེད་དོ། །མི་མཁས་པ་ཞེས་ཟེར་ན་ལྟུང་བྱེད་དོ། །ལྟུང་བྱེད་དྲུག་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་རྣམས་ཀྱིས། དགེ་སློང་མ་དག་འཐབ་མོ་བྱུང་བ་ལ་ཉན་རྣ་བར་སྒོར་བསྡད་ནས། དེ་དག་གིས་ཅུང་ཟད་ཅི་ཐོས་པ། ཚུ་བི་ལས་ཐོས་པ་དེ་ཕ་བི་དག་ལ་སྦྲོན་པར་བྱེད་ཅིང། ཕ་བི་དག་ལས་ཐོས་པ་དེ་ཚུ་བི་དག་ལ་སྦྲོན་པར་བྱེད་པས། དེས་ན་དགེ་འདུན་འཐབ་པ་དང། མཚང་འདྲུ་བ་དང། རྩོད་པ་དང། འགྱེད་པ་བྱུང་བ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། ཤེས་བཞིན་དུ་དགེ་སློང་མ་རྣམས་འཐབ་མོ་བྱུང་བར་གྱུར་ལ། མཚང་འདྲུ་བ་དང། འགྱེད་པ་དང། རྩོད་པ་བྱུང་ཞིང་འཁོད་པ་ལ། དགེ་སློང་མ་དེ་དག་ཅི་སྨྲ་བ་དེ་བདག་གིས་མཉན་ལ། དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ། །ཞེས་ཅང་མི་སྨྲ་བས་ཉན་རྣ་བྱེད་ཅིང་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། ཉན་རྣ་བྱེད་ཅིང་འདུག་ན་ཞེས་བྱ་བ་ནི་ཐོས་པར་འདོད་པས་སྒོ་ན་སྡོད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན།

---

^{[མ་དཔེ་གཟིགས་ན་འདིར་གནོན།]}

དགེ་སློང་མ་ནང་ན་འདུག་པར་གྱུར་ལ། གཞན་ཕྱི་ལོག་ནས་ནང་དུ་འཇུག་ན། དེས་སྐད་གསལ་བའམ། རྟིང་སྒྲའམ། སེ་གོལ་བྱའོ། །མི་བྱེད་དམ། གལ་ཏེ་སྒྲ་ཡང་མ་གོ། དོན་ཀྱང་མ་གོ་ན་ཉེས་བྱས་སོ། །སྒྲ་ཡང་གོ། དོན་ཀྱང་གོ་བར་གྱུར་ན་ལྟུང་བྱེད་དོ། །དེ་བཞིན་དུ་གང་ན་འདུག་པ་ལ་ཡང་རུང་སྟེ་ལྟུང་བྱེད་དོ། །གལ་ཏེ་ཐོས་ན་ཉེ་བར་ཞི་བར་བྱའོ་སྙམ་ན་ལྟུང་བ་མེད་དོ། །ལྟུང་བྱེད་དྲུག་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་བཅུ་གཉིས་སྡེ་དག་དགེ་སློང་མའི་དགེ་འདུན་ཆོས་ཀྱི་གཏམ་རྣམ་པར་གཏན་ལ་འབེབས་པ་ན་ཅང་མི་སྨྲ་བར་ལངས་ཏེ་དོང་བའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། འདོང་བར་མི་བྱའོ། །དེ་དག་ན་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ལ་གོ་བར་བྱས་ཏེ་འདོང་བར་བྱའོ། །དེ་ནས་བཅོམ་ལྡན་འདས་ཀྱིས། དགེ་སློང་མ་རྣམས་བསླབ་པ་འདོད་པ་དང་ཞེས་བྱ་བ་ནས། ཡོ་བྱད་བསྙུངས་པ་ཞེས་བྱ་བའི་བར་རོ། །ཡང་ཉན་ཐོས་མ་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་ན། ཅང་མི་སྨྲ་བར་སྟན་ལས་ལངས་ཏེ། དགེ་སློང་མ་འཁོད་པ་ལ་གོ་བར་མ་བྱས་པར་འགྲོ་ན། རྐྱེན་དེ་ལྟ་བུ་མ་གཏོགས་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། ཆོས་ཀྱི་གཏམ་རྣམ་པར་གཏན་ལ་འབེབས་པ་ཞེས་བྱ་བ་ནི། ཆོས་ཀྱི་གཏམ་རྣམ་པར་གཏན་ལ་འབེབས་པ་འདི་ལྟ་སྟེ། གསོལ་པ་དང། གསོལ་བ་དང་གཉིས་དང། གསོལ་བ་དང་བཞིའི་ལས་དག་གོ། ཅང་མི་སྨྲ་བར་ལངས་ཏེ་ཞེས་བྱ་བ་ནི་ཁ་རོག་སྟེའོ། །དགེ་སློང་མ་འཁོད་པ་ལ་གོ་བར་མ་བྱས་པར་ཞེས་བྱ་བ་ནི་འདུན་པ་མ་འབྱིན་པར་རོ། །རྐྱེན་དེ་ལྟ་བུ་མ་གཏོགས་ཏེ་ཞེས་བྱ་བ་ནི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཆོས་

---

^{[མ་དཔེ་གཟིགས་ན་འདིར་གནོན།]}

ཀྱི་གཏམ་རྣམ་པར་གཏན་ལ་འབེབས་པ་ན། ཅང་མི་སྨྲ་བས་ལངས་ཏེ་འགྲོ་ན་ཞེས་བྱ་བ་ན། དོན་མ་གོ་ན་ཉེས་བྱས་སོ། །སྒྲ་མ་གོ་ལ། དོན་གོ་ན་ལྟུང་བྱེད་དོ། །ལྟུང་བྱེད་དྲུག་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་དང་བཅས་པ་སངས་རྒྱས་ལ་མ་གུས། ཆོས་དང་དགེ་འདུན་ལ་མ་གུས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། གུས་པར་མི་བྱེད་ན་ལྟུང་བྱེད་དོ། །གུས་པར་མི་བྱེད་ན་ཞེས་བྱ་བ་ལ་གུས་པར་མི་བྱེད་པ་ནི་གཉིས་ཏེ། དགེ་འདུན་དང། གང་ཟག་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ལ་ཁང་སྐྱོང་གིས་གནས་མལ་ལོང་ཞིག་ཅེས་བསྒོ་བ་ན། མི་ལེན་ན་ལྟུང་བྱེད་དོ། །གལ་ཏེ་ཆོས་དང་ལྡན་པའི་འདུ་ཤེས་ཀྱིས་གསོལ་བ་འདེབས་ཤིང། དེ་མ་བླངས་པ་ལ་ལྟུང་བ་མེད་དོ། །དེ་བཞིན་དུ་སོང་ཞིག །སྨྲོས་ཤིག་ཅེས་བྱ་བ་དེ་ལྟ་བུ་ལ་སོགས་པ་ཐམས་ཅད་ལ་ལྟུང་བྱེད་དུ་འགྱུར་ཏེ། འདི་ནི་དགེ་འདུན་ལ་ཡིན་ནོ། །གང་ཟག་གི་མཁན་མོ་དང། སློབ་དཔོན་གྱིས་གནས་མལ་ལོང་ཞིག་ཅེས་བསྒོ་བ་ན་མི་ལེན་ན་ཉེས་བྱས་སོ། །མ་སོང་ན་ཉེས་བྱས་སོ། །སྨྲས་ན་ཉེས་བྱས་སོ། །མ་སྨྲས་ན་ཉེས་བྱས་ཏེ། དེ་བཞིན་དུ་ཐམས་ཅད་ལ་ཉེས་བྱས་སོ། །གལ་ཏེ་ཆོས་དང་ལྡན་པའི་འདུ་ཤེས་ཀྱིས་གསོལ་བ་འདེབས་པ་ལ་ནི་ལྟུང་བ་མེད་དོ། །ལྟུང་བྱེད་དྲུག་པའི་བརྒྱད་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ལེགས་འོངས་ལ་བརྟེན་ཏེ། བག་མེད་པའི་གནས་མྱོས་པར་འགྱུར་བ་འབྲུའི་ཆང་དང། བཅོས་པའི་ཆང་གི་བསླབ་པའི་གཞི་བཅའ་བ་མཛད་པ་དེའི་ཚེ། དགེ་སློང་མའི་དགེ་འདུན་དག་འདི་སྙམ་དུ་སེམས་ཏེ། བདག་ཅག་གིས་བསླབ་པའི་གཞི་འདི་ཇི་ལྟར་གདོན་པར་བྱ་སྙམ་དུ་བསམས་ནས་དགེ་སློང་མའི་དགེ་

---

^{[མ་དཔེ་གཟིགས་ན་འདིར་གནོན།]}

འདུན། བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་ཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། བཅོམ་ལྡན་འདས་ལ་དགེ་སློང་མ་རབ་ཏུ་མང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་མ་རྣམས་ཀྱིས་འབྲུའི་སྐྱེམས་དང། བཅོས་པའི་སྐྱེམས་ཀྱི་བསླབ་པའི་གཞི་ལ་ཇི་ལྟར་གཟུང་བར་བགྱི། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང། བསླབ་པ་ལ་གུས་པ་དང། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་འདི་སྐད་ཅེས་བཀའ་སྩལ་ཏོ། །འབྲུའི་ཆང་དང། བཅོས་པའི་ཆང་འཐུང་ན་ལྟུང་བྱེད་དོ། །འབྲུའི་ཆང་ཞེས་བྱ་བ་ནི་ཕབས་དང་སྦྱར་བ་དང། ཟས་དང་སྦྱར་བའོ། །བཅོས་པའི་ཆང་ཞེས་བྱ་བ་ནི། དགུན་ཆང་དང། བུ་རམ་ཆང་དང། རྫས་གཞན་དག་སྦྱར་བའི་འོ། །འཐུང་ན་ཞེས་བྱ་བ་ནི་ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཆང་གི་ཁ་དོག་དང། ཆང་གི་དྲི་དང། ཆང་གི་རོ་འཐུང་ངམ། འཐུང་དུ་འཇུག་ན་ལྟུང་བྱེད་དོ། །བཅོས་པའི་ཆང་འཐུང་ན་ལྟུང་བྱེད་དོ། །བསྲེས་པའི་ཆང་འཐུང་ན་ལྟུང་བྱེད་དོ། །ཆང་གི་ཁ་དོག་ན་ཉེས་བྱས་སོ། ཆང་གི་དྲི་ན་ཉེས་བྱས་སོ། །ཆང་གི་རོ་ན་ཉེས་བྱས་སོ། །གླུམ་ཟ་ན་ཉེས་བྱས་སོ། །གལ་ཏེ་མཛེ་བྱུང་ནས། ཡན་ལག་སྐུད་པ་དང། ཁ་ནད་ཀྱི་ཕྱིར་ཁར་བླུགས་ཏེ་འཛིན་པ་དང། བསྐོལ་བ་ལ་ནི་ལྟུང་བ་མེད་དོ། །ལྟུང་བྱེད་དྲུག་པའི་དགུ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་བརྟེན་ནས། དུས་མ་ཡིན་པར་རྒྱུ་བའི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་རྣམས་གྲོང་དུ་དུས་སུ་ཡང་རྒྱུ་བར་བྱེད། དུས་མ་ཡིན་པར་ཡང་རྒྱུ་བར་བྱེད་པ་དང། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག །བཅོམ་ལྡན་འདས་ཀྱིས་དུས་མ་ཡིན་པར་རྒྱུ་བའི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ་མཛད་

---

^{[མ་དཔེ་གཟིགས་ན་འདིར་གནོན།]}

ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་གོ་བར་བྱ་སྟེ། འགྲོ་བར་བྱའོ། །དེ་ནས་དགེ་སློང་མ་ཞིག་ཁྱིམ་བདག་ཅིག་གི་ཁྱིམ་དུ་ལྷུང་བཟེད་དང། ཆོས་གོས་བཞག་པ་ལས། ཁྱིམ་བདག་གི་ཁྱིམ་དེ་མེ་ཤོར་ཏོ། །ཞེས་དགེ་སློང་མ་དེས་ཐོས་ནས་དེ་འདི་སྙམ་དུ། བཅོམ་ལྡན་འདས་ཀྱིས་དགེ་སློང་མ་འཁོད་པ་ལ་གོ་བར་བྱ་སྟེ། འགྲོ་བར་བྱའོ། །ཞེས་གསུངས་སོ། །སྙམ་ནས་ཇི་སྲིད་དུ་དགེ་སློང་མ་ལ་གོ་བར་བྱེད་པ་དེ་སྲིད་དུ། ལྷུང་བཟེད་དང། ཆོས་གོས་ཚིག་པར་གྱུར་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང་ཞེས་བྱ་བ་ནས། བསླབ་པ་ལ་ཡོ་བྱད་བསྙུངས་པ་ཞེས་བྱ་བའི་བར་ཏེ། སྔ་མ་ནི་བཅས་པ་ཡིན་ལ་འདི་ནི་རྗེས་སུ་གནང་བ་ཡིན་ཏེ། ཡང་ཉན་ཐོས་མ་རྣམས་ཀྱིས་འདུལ་བའི་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་མ་གང་དུས་མ་ཡིན་པར་དགེ་སློང་མ་འཁོད་པ་ལ་གོ་བར་མ་བྱས་པར་གྲོང་དུ་འགྲོ་ན། རྐྱེན་དེ་ལྟ་བུ་མ་གཏོགས་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའི་དགེ་སློང་མའོ། །དུས་མ་ཡིན་པར་ཞེས་བྱ་བ་ལ་དུས་མ་ཡིན་པ་ནི་གང། དུས་ནི་གང་ཞེ་ན། ཕྱེད་ཡོལ་ཕན་ཆད་ནས་སྐྱ་རེངས་མ་ཤར་བའི་བར་འདི་ནི་དུས་མ་ཡིན་པའོ། །ལྷག་མ་ནི་དུས་སོ། །གྲོང་དུ་འགྲོ་ན་ཞེས་བྱ་བ་ནི། ཁྱིམ་བདག་གི་ཁྱིམ་རྣམས་སུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་དུས་མ་ཡིན་པ་ལ་དུས་མ་ཡིན་པར་འདུ་ཤེས་པས་འགྲོ་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དུས་ལ་དུས་མ་ཡིན་པའི་འདུ་ཤེས་ཀྱིས་འགྲོ་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་དྲུག་པའི་ཚིགས་སུ་བཅད་པའི་སྡོམ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་

---

^{[མ་དཔེ་གཟིགས་ན་འདིར་གནོན།]}

པ། བམ་པོ་ཉི་ཤུ་གཉིས་པ། སྡོམ་ལ། རྒྱུ་དང་རྒྱལ་པོའི་ཕོ་བྲང་དང། །ད་གདོང་རུས་པ་སོར་བརྒྱད་དང། ཁྲིའུ་བདལ་གདིང་དང་གཡན་པ་དང། །བདེ་བར་གཤེགས་པའི་ཆོས་གོས་སོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་དགའ་མོ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་བླངས་ཏེ། ཕྱི་བཞིན་འབྲང་བའི་དགེ་སློང་མ་ཞིག་དང་ལྷན་ཅིག་སྦྱིན་བདག་ཅིག་གི་ཁྱིམ་དུ་སོང་ནས། དེས་རྗེས་སུ་མཐུན་པའི་ཆོས་བསྟན་པས་མངོན་པར་དད་པར་བྱས་ནས། དེས་དགེ་སློང་མའི་དགེ་འདུན་གྱི་ཆེད་དུ་ཟས་དག་སྦྱོར་དུ་བཅུག་གོ། དེ་ནས་ཕྱི་དེ་ཉིན་པར། དགེ་སློང་མའི་དགེ་འདུན་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ། ཁྱིམ་བདག་དེའི་བཀད་ས་གང་ན་བ་དེར་སོང་ནས་ཞེས་བྱ་བ་ནས། སྟན་བཤམས་པ་ཁོ་ན་ལ་འདུག་གོ་ཞེས་བྱ་བའི་བར་རོ། །དགེ་སློང་མ་དགའ་མོ་ནི་བྱ་བ་མང་ཞིང་བསྒྲུབ་པ་མང་བས། གཎྜིའི་དུས་ལས་ཡོལ་བར་གྱུར་ཏོ། །དགེ་སློང་མ་དེ་རྣམས་ཀྱིས། ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་དགེ་སློང་མའི་དགེ་འདུན་གྱི་དུས་ལ་བབ་ཀྱི། བྲིམས་ཤིག །དེས་འདི་སྐད་ཅེས་སྨྲས་སོ། །འཕགས་མ་དང། བདག་ནི་མ་འཚལ་མོད་ཀྱི། ཟས་ལ་བསྐོ་བར་བགྱིད་པ་དགའ་མོ་མཁྱེན་ཏོ་ཞེས་བྱ་བ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དག་ཟས་སྔ་མ་དང། ཟས་ཕྱི་མ་ལ་ཁྱིམ་དག་ཏུ་རྒྱུ་བར་མི་བྱའོ། །དེ་ནས་ཞལ་ཏ་བྱེད་པ་དག་གམ། ཟས་བསྒྲུབ་པ་དེ་དག་གི་དགེ་འདུན་གྱི་བྱ་བ་དང། དགེ་འདུན་གྱི་བསྒྲུབ་པ་དེ་དག་ཉམས་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། ཟས་སྔ་མ་ལ་ཁྱིམ་གཉིས་སུ། ཟས་ཕྱི་མ་ལ་ཁྱིམ་གསུམ་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང། ཞེས་བྱ་བ་ནས། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས། འདི་སྐད་ཅེས་བཀའ་སྩལ་ཏོ། །ཡང་དགེ་སློང་མ་གང་ཟས་དང་བཅས་པའི་

---

^{[མ་དཔེ་གཟིགས་ན་འདིར་གནོན།]}

ཁྱིམ་དུ་མགྲོན་དུ་བོས་ལ། ཟས་སྔ་མ་དང། ཟས་ཕྱི་མ་ལ་ཁྱིམ་དག་ཏུ་ཁྱིམ་བདག་འཁོད་པ་ལ་གོ་བར་མ་བྱས་པར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་དགའ་མོའོ། །ཟས་དང་བཅས་པ་ཞེས་བྱ་བ་ནི་སྟོན་མོ་ཅན་གྱི་ཁྱིམ་དུའོ། །ཁྱིམ་དག་ཏུ་ཞེས་བྱ་བ་ནི་ཁྱིམ་བདག་གི་ཁྱིམ་དག་ཏུ་མགྲོན་དུ་བོས་པའོ། །ཟས་སྔ་མ་ཞེས་བྱ་བ་ནི་སྔ་དྲོའི་དུས་སོ། །ཕྱི་མ་ཞེས་བྱ་བ་ནི་ཕྱི་དྲོའི་དུས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་མ་ལ། ཁྱིམ་གཉིས་སུ་སོང་ལ་ཆེད་དུ་བསམས་ཏེ། ཁྱིམ་གསུམ་པར་འགྲོ་ན་ལྟུང་བྱེད་དོ། །ཟས་ཕྱི་མ་ལ་ཁྱིམ་གསུམ་དུ་སོང་ལ། ཆེད་དུ་བསམས་ཏེ། ཁྱིམ་བཞི་པར་འགྲོ་ན་ལྟུང་བྱེད་དོ། །ཁྱིམ་བདག་གི་མི་ལ་གོ་བར་བྱས་ན་ལྟུང་བ་མེད་དོ། །ལྟུང་བྱེད་བདུན་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲུག་སྡེ་རྣམས་ལ་བརྟེན་ཏེ། སྒོ་གཏན་གྱི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་དེ་དག་གིས་དགེ་སློང་གི་བསླབ་པའི་གཞི་ཡིན་ནོ་ཞེས་བྱ་བ་ནས། བསླབ་པའི་གཞི་དེ་ལ་རྗེས་སུ་སྒྲུབ་པར་མི་བྱེད་པའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་གྱིས་བཀའ་སྩལ་པ། དེ་ལྟ་བས་ན་དགེ་སློང་མ་རྣམས་ཀྱིས་ཀྱང་ནམ་མ་ནངས་ཤིང། སྐྱ་རེངས་མ་ཤར་གྱི་བར་དུའོ། །གང་གི་ཚེ་རྒྱལ་པོ་འཆར་ཀས་དཔལ་ལྡན་མའི་ཕྱིར། ཁྱིམ་བདག་གདངས་ཅན་ལ་ཁྱོད་ཀྱི་བུ་མོ་དགེ་སློང་རྣམས་ལྟ་བར་འདོད་དོ། །ཞེས་རྒྱལ་པོས་བསྒོ་བ་དེའི་ཚེ། ཁྱིམ་བདག་གདངས་ཅན་གྱིས། དགེ་སློང་ཤཱ་རིའི་བུ་ལ། དཔལ་ལྡན་མ་གདུལ་བའི་ཆེད་དུ་གསོལ་བ་བཏབ་ནས་རྒྱལ་པོའི་ཕོ་བྲང་དུ་བཏང་བ་དང། བཅོམ་ལྡན་འདས་ཀྱིས་ཀྱང་གནང་ངོ། །དེས་དུས་གཞན་ཞིག་ན། གདངས་ཅན་གྱི་བུ་མོ་ཡང་དགེ་སློང་མ་རྣམས་ལྟ་བར་འདོད་པ་དེའི་ཚེ། ཁྱིམ་བདག་གདངས་ཅན་གྱིས། སྐྱེ་དགུའི་བདག་མོ་ཆེན་མོ་ལ་གསོལ་བ་བཏབ་པ་དང། དེས་རྒྱལ་པོའི་ཕོ་བྲང་དུ་

---

^{[མ་དཔེ་གཟིགས་ན་འདིར་གནོན།]}

འཇུག་པ་ནི་ཉེས་དམིགས་བཅུ་ཡོད་དོ། །ཞེས་བྱ་བ་ནས། མ་བཏུབ་པ་དང། དེའི་འོག་ཏུ་རྒྱལ་པོ་འཆར་ཀས་གསོལ་བ་བཏབ་བོ། །དེ་ནས་སྐྱེ་དགུའི་བདག་མོ་ཆེན་མོས་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། གཽ་ཏ་མི། དྲུག་པོ་དག་གི་ཚིག་ནི་གཅག་ཏུ་མི་རུང་སྟེ། དྲུག་པོ་གང་གི་ཞེ་ན། སློབ་དཔོན་དང། མཁན་པོ་དང། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དང། དགེ་འདུན་དང། དགེ་འདུན་གྱི་གནས་བརྟན་དང། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིའོ་ཞེས་བཅོམ་ལྡན་འདས་ཀྱིས་དེ་ལ་ཡང་བཀས་བསྒོ་ནས། རྒྱལ་པོའི་ཕོ་བྲང་དུ་ཞུགས་སོ། །གང་གི་ཚེ་སྐྱེ་དགུའི་བདག་མ་ཆེན་མོ་རྒྱལ་པོའི་ཕོ་བྲང་དུ་ཞུགས་པ་དེའི་ཚེ། བཅུ་གཉིས་སྡེ་རྣམས་གལ་ཏེ་བདག་ཅག་དོང་བར་གྱུར་ན། དེ་རིང་ཉིད་དུ་དགེ་སྦྱོང་གི་ཚུལ་མ་ཡིན་པ་དང། རུང་བ་མ་ཡིན་པའི་ཁུར་ཁྱེར་བར་འགྱུར་བ་ཞིག །ཅེས་ཁ་ཟེར་བར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ནམ་མ་ནངས། སྐྱ་རེངས་མ་ཤར་བར་རིན་པོ་ཆེ་དག་གམ། རིན་པོ་ཆེར་སྨོས་བ་དག་མ་བརྟུལ་བར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་ཞིང་འདུག་ན། དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། རྒྱལ་པོ་རྒྱལ་རིགས་སྤྱི་བོས་ནས་དབང་བསྐུར་བ་ཞེས་བྱ་བ་ནི་བུད་མེད་དམ། སྐྱེས་པའམ། མ་ནིང་རྒྱལ་པོར་དབང་བསྐུར་ན། དེ་ནི་རྒྱལ་པོ་ཡང་ཡིན། རྒྱལ་རིགས་ཀྱང་ཡིན། དེ་ནི་སྤྱི་བོ་ནས་དབང་བསྐུར་བ་ཡང་ཡིན་ནོ། །ནམ་མ་ནངས་པ་ཞེས་བྱ་བ་ནི། ནམ་ནངས་པར་མ་གྱུར་བའོ། །སྐྱ་རེངས་མ་ཤར་བར་ཞེས་བྱ་བ་ནི། སྐྱ་རེངས་གསུམ་པོ་ཞེས་བྱ་བ་སྔ་མ་བཞིན་ནོ། །རིན་པོ་ཆེ་དག་གམ། རིན་པོ་ཆེར་སྨོས་པ་མ་བརྟུལ་པར་ཞེས་བྱ་བ་ནི་མ་བསྡུས་པར་རོ། །སྒོ་གཏན་ཞེས་བྱ་བ་ལ། སྒོ་གཏན་ནི་

---

^{[མ་དཔེ་གཟིགས་ན་འདིར་གནོན།]}

གསུམ་སྟེ་། གསུམ་གང་ཞེ་ན་[?]། གྲོང་ཁྱེར་གྱི་སྒོ་གཏན་དང། རྒྱལ་པོའི་ཕོ་བྲང་གི་སྒོ་གཏན་དང། བཙུན་མོའི་གཉེན་རིས་ཀྱི་སྒོ་གཏན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཞིག་སྐྱ་རེངས་མ་ཤར་བ་ལ་སྐྱ་རེངས་མ་ཤར་བའི་འདུ་ཤེས་ཀྱིས་སྒོ་གཏན་ལས་འདའ་བར་བྱེད་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །ཡང་དགེ་སློང་མ་གང་ཞིག་སྐྱ་རེངས་ཤར་བ་ལ་སྐྱ་རེངས་མ་ཤར་བར་འདུ་ཤེས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །གལ་ཏེ་རྒྱལ་པོ་དང། བཙུན་མོ་དང། བློན་པོའི་བར་ཆད་དུ་འགྱུར་བ་ཞིག་ཡིན་ན་ལྟུང་བ་མེད་དོ། །ལྟུང་བྱེད་བདུན་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སོ་སོར་ཐར་པའི་མདོ་གདོན་པ་འདོན་པའི་ཚེ། བཅུ་གཉིས་སྡེ་རྣམས་ཀྱིས་འདི་སྐད་ཅེས། །ཀྱེ་འཕགས་མ་དག །ཁོ་མོ་ཅག་གིས་འདི་ལྟར་ཆོས་འདི་ཡང་མདོར་གཏོགས་ཤིང་མདོར་འདུས་པར་ད་གདོད་ཤེས་སོ། །ཞེས་ཟེར་བ་ན། དེ་ལ་དགེ་སློང་མ་རྣམས་ཀྱིས་སྔོན་དགེ་སློང་མ་དེ་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ན་ལན་མང་དུ་ལྟ་ཅི་སྨོས་ན་དེ་ལ། དགེ་སློང་མ་རྣམས་ཀྱིས་ཕུ་ནུ་མོ། དེ་སྐད་མ་སྨྲ་ཞིག་ཅེས་བསྒོ་བ་དང། དེ་དག་ལ་འདི་སྐད་ཅེས་ཁོ་མོ་ཅག །ཇི་སྐད་སྨྲ་བ་དེ་ནི་དེ་བཞིན་ནོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན། འདི་སྐད་ཅེས། ཀྱ་འཕགས་མ་དག །ཁོ་མོ་ཅག་གིས་འདི་ལྟར། ཆོས་འདི་ཡང་མདོར་གཏོགས་ཤིག །མདོར་འདུས་པར་ད་གདོད་ཤེས་སོ་ཞེས་ཟེར་བ་ན། གལ་ཏེ་དགེ་སློང་མ་རྣམས་ཀྱིས་སྔོན་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ན། ལན་མང་དུ་ལྟ་ཅི་སྨོས་ན། དེ་ལ་འཕགས་མ་མི་ཤེས་པས། མི་འགྲོལ་བས་དེ་ལྟུང་བ་གང་

---

^{[མ་དཔེ་གཟིགས་ན་འདིར་གནོན།]}

བྱུང་བ་དེ། ཆོས་བཞིན་དུ་བྱེད་དུ་གཞུག་པའི་སྟེང་དུ། འཕགས་མ་ཁྱོད་ཀྱིས་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་པ་ཡིན་ཏེ། ཁྱོད་ཀྱིས་གང་གི་ཕྱིར་སོ་སོར་ཐར་པའི་མདོ་གདོན་པ་འདོན་པའི་ཚེ། གུས་པར་བྱས་ཏེ། ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། རྩེ་གཅིག་ཏུ་རྣ་བླགས་ཏེ་ཉན་པར་མི་བྱེད། སེམས་ཐམས་ཅད་ཀྱིས་བསམས་ཏེ། ཆོས་ཉན་པར་མི་བྱེད་དོ། །ཞེས་སྤྱོ་བར་བྱའོ། །དེའི་སྤྱོ་བར་བྱ་བ་ནི་འདི་ཡིན་ཏེ་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། ཟླ་བ་ཕྱེད་ཕྱེད་ཅིང་ཞེས་བྱ་བ་ནི། ཟླ་བ་ཕྱེད་ཕྱེད་ཅིང་ངོ། །སོ་སོར་ཐར་པའི་མདོ་གདོན་པ་འདོན་པའི་ཚེ་ཞེས་བྱ་བ་ནི། ཕས་ཕམ་པར་འགྱུར་བ་བརྒྱད་ཅེས་བྱ་བ་ནས། རྩོད་པ་ཞི་བར་བྱ་བའི་ཆོས་བདུན་ཞེས་བྱ་བའི་བར་རོ། །སྔ་མ་བཞིན་དུ་བརྗོད་པར་བྱའོ་ཞེས་བྱ་བ་ནི། རིམ་པ་བཞིན་དུ་བརྗོད་པར་བྱའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཟླ་བ་ཕྱེད་ཕྱེད་ཅིང། སོ་སོར་ཐར་པའི་མདོ་གདོན་པ་འདོན་པའི་ཚེ། འདི་སྐད་ཅེས་ཆོས་འདི་ཡང་མདོར་གཏོགས་པར་ཞེས་ཟེར་ན་ལྟུང་བྱེད་དོ། །མདོར་འདུས་པར་ཞེས་ཟེར་ན་ལྟུང་བྱེད་དོ། །གཞི་ན་མ་འདུག་པ་དང། ཚོགས་ལས་གར་བ་ལ་ནི་ལྟུང་བ་མེད་དོ། །ལྟུང་བྱེད་བདུན་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་གཅེར་བུ་པའི་ཉན་ཐོས་ཆོས་ཞེས་བྱ་བ་སོ་མཁན་ཞིག་གནས་པ་དེ། བསོད་སྙོམས་པ་ཞིག་གིས། སངས་རྒྱས་ཀྱི་བསྟན་པ་ལ་མངོན་པར་དད་པར་བྱས་ནས། དེ་གཉི་གའི་དགེ་འདུན་ལ་ཁབ་རལ་དག་དབུལ་དུ་བཅུག་གོ། དེ་ནས་བཅུ་གཉིས་སྡེ་རྣམས་ཀྱིས་བ་སོ་དང། རུས་པ་དང། རྭ་ལས་བྱས་པའི་ཁབ་རལ་དབྱིབས་སྣ་ཚོགས་དག་བྱེད་དུ་བཅུག་གོ། དེ་རང་གི་ཟན་ཟོས་ཤིང། གཞན་གྱི་ལས་བྱས་པས། དེ་རིང་པོ་མ་ལོན་པར་དབུལ་པོར་གྱུར་ཏོ། །དེ་ནས་མུ་སྟེགས་པ་རྣམས་ཀྱིས། ལག་བཟོ་ཆོས་མཐོང་ནས། འདི་སྐད་ཅེས། ལག་གཟོ་ཆོས་གང་གི་ཚེ། ཁོ་བོ་ཅག་ལ་མངོན་པར་དད་པར་གྱུར་པ་དེའི་ཚེ་འབྱོར་པར་

---

^{[མ་དཔེ་གཟིགས་ན་འདིར་གནོན།]}

གྱུར་པ་ལ། གང་གི་ཚེ་ཤཱཀྱའི་སྲས་ཀྱི་དགེ་སྦྱོང་མ་རྣམས་ལ་མངོན་པར་དད་པར་གྱུར་པ་དེའི་ཚེ་བཀྲེན་པར་གྱུར་ཏོ་ཞེས་སྨྲས་པ། དགེ་སློང་མ་རྣམས་ཀྱིས་ཐོས་སོ། །ཐོས་ནས་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བ་སོའམ། རུས་པའམ། རྭའི་ཁབ་རལ་ལས་སར་པ་བྱེད་དུ་འཇུག་ན། བཅག་ནས་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། བ་སོའམ་ཞེས་བྱ་བ་ནི་བ་སོ་ཉིད་དོ། །རུས་པའམ་ཞེས་བྱ་བ་ནི་རུས་པ་ཉིད་དོ། །རྭ་ལས་བྱས་པ་ཞེས་བྱ་བ་ནི་རྭ་ཉིད་དོ། །ཁབ་རལ་ཞེས་བྱ་བ་ལ། ཁབ་རལ་ནི་གཉིས་ཏེ། སྤུ་བུ་ཅན་དང། ཆང་བ་ལྟ་བུའོ། །བྱེད་དམ་ཞེས་བྱ་བ་ནི། བདག་ཉིད་ཀྱིས་སོ། །བྱེད་དུ་བཅུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི། གོང་མ་བཞིན་ནོ། །དེ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བ་སོའམ་ཞེས་བྱ་བ་ནས། རྭའི་བར་གྱི་ཁབ་རལ་སར་པ་བྱེད་དམ། བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་དེ་འཆགས་པར་བྱེད་ན། དེས་གཅིག་བཅག་གམ། ཞེས་དྲི་བར་བྱའོ། །མ་དྲིས་པར་འཆགས་པར་བྱེད་ན། ལྟུང་བ་དེ་ཡང་མ་བཤགས་ཤིང། གང་གི་མདུན་དུ་འཆགས་པར་བྱེད་པ་དེ་ལ་ཡང་ཉེས་བྱས་སུ་འགྱུར་རོ། །ལྟུང་བྱེད་བདུན་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། དྲུག་སྡེ་རྣམས་ལ་བརྟེན་ནས་ཁྲི་དང། ཁྲིའུ་དག་གི་ཚད་བདེ་བར་གཤེགས་པའི་སོར་བརྒྱད་ཀྱི་བསླབ་པའི་གཞི་བཅའ་བ་མཛད་པ་དེའི་ཚེ། བཅུ་གཉིས་སྡེ་དེ་དག་གིས། ཚད་ལས་འདས་པའི་ཁྲི་དང། ཁྲིའུ་དག་བྱེད་དུ་འཇུག་པ་དང། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས། བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས། དགེ་སློང་རྣམས་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་ན། དོན་ཉུང་བའི་

---

^{[མ་དཔེ་གཟིགས་ན་འདིར་གནོན།]}

དགེ་སློང་མ་དག་སྨེད་པར་བྱེད་པའི་སྐབས་ད། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་དགེ་འདུན་གྱི་ཁྲིའམ་ཁྲིའུ་བྱེད་དུ་འཇུག་ན། རྩ་བ་བུ་གར་གཞུག་པ་མ་གཏོགས་བར། བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ། །དེ་ལས་ལྷག་པར་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་འདུན་གྱི་ཞེས་བྱ་བ་ནི། དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །དགེ་སློང་མ་ཞེས་བྱ་བ་ནི། བཅུ་གཉིས་སྡེ་དག་གོ། ཁྲིའམ་ཞེས་བྱ་བ་ནི་ཉལ་བའིའོ། ཁྲིའམ་ཞེས་བྱ་བ་ནི། ཁྲིའུ་ཉིད་དོ། །བདེ་བར་གཤེགས་པའི་ཞེས་བྱ་བ་ནི། སྟོན་པའིའོ། །བདེ་བར་གཤེགས་པའི་སོར་བརྒྱད་གང་ཡིན་པ་དེ་ལ་ནི། ཚད་དང་ལྡན་པའི་ལག་པའི་ཁྲུ་གང་ངོ། །བུ་གར་གཞུག་པ་མ་གཏོགས་ཏེ་ཞེས་བྱ་བ་ནི་བཞག་སྟེའོ། །དེ་ལས་ལྷག་པར་བྱེད་པ་ཞེས་བྱ་བ་ནི། དེ་ལས་འདས་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་དུ་ཟད་པ་བདེ་བར་གཤེགས། པའི་སོར་བརྒྱད་ཀྱི་ཚད་ཀྱི་ཚད་ལས་ལྷག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་ན་ཞེས་བྱ་བ་ནི་སྔ་མ་བཞིན་ནོ། །ལྟུང་བྱེད་བདུན་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། དགེ་སློང་དང། དགེ་སློང་མ་རྣམས་ཀྱི་གནས་མལ་བསྐོ་བར་བྱའོ་ཞེས་བསྒོ་བ་མཛད་པ་ན། དེ་ནས་དུས་གཞན་ཞིག་གི་ཚེ། དགེ་སློང་མ་རྣམས་གནས་མལ་སྐོ་བར་བྱེད་པ་དང། དེའི་འོག་ཏུ་བཅུ་གཉིས་སྡེ་རྣམས་ཀྱིས་དགེ་འདུན་གྱི་ཁྲི་དང། ཁྲིའུ་ལ་ཤིང་བལ་དག་བཏིང་བ་དེའི་ཚེ། གཞན་གྱིས་བསྡུས་ནས་བླངས་པ་དང། དོན་ཉུང་བའི་དགེ་སློང་མ་དག་སྨེད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས། བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་འདུན་གྱི་ཁྲིའམ། ཁྲིའུ་

---

^{[མ་དཔེ་གཟིགས་ན་འདིར་གནོན།]}

ལ་ཤིང་བལ་འདིང་ངམ། འདིང་དུ་འཇུག་ན། བསྡུས་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ་།དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིའོ། །ཁྲི་ཞེས་བྱ་བ་ཉལ་བའི་འོ། །ཁྲིའུ་ཞེས་བྱ་བ་ནི་ཁྲིའུ་ཉིད་དོ། །ཤིང་བལ་ཞེས་བྱ་བ་ལ། ཤིང་བལ་ནི་ལྔ་སྟེ། ལྔ་གང་ཞེ་ན། ཨར་ཀའི་ཤིང་བལ་དང། ཤམ་མ་ལའི་ཤིང་བལ་དང། ཀ་སའི་ཤིང་བལ་དང། ལུག་གི་བལ་དང། ལྔ་གཉིད་ནི་ཤ་ནའི་ཤིང་བལ་ལོ། །འདིང་ངམ་འདིང་དུ་འཇུག་ན་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་གྱི་ཁྲིའམ། ཁྲིའུ་ཞེས་བྱ་བ་ནས་འདིང་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་ལྟ་མོད་ཀྱི་གང་གི་མདུན་དུ་འཆགས་པར་བྱེད་པ་དེས། བསྡུས་སམ་མ་བསྡུས་ཞེས་དྲི་བར་བྱ་སྟེ། གཞན་ནི་སྔ་མ་བཞིན་ནོ། །ལྟུང་བྱེད་བདུན་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་མ་རྣམས་ལ་འདི་ལྟ་བུའི་གདིང་བ་མང་པོ་བྱུང་སྟེ། གདིང་བ་འདི་ནི་ཧ་ཅང་རིང་ཆེས་སོ། །ཞེས་དེ་བོར་ནས་གཞན་བྱེད་དུ་འཇུག །གདིང་བ་འདི་ནི་ཧ་ཅང་ཐུང་ཆེས་སོ་ཞེས་དེ་བོར་ཏེ་གཞན་བྱེད་དུ་འཇུག །དེ་བཞིན་དུ་ཧ་ཅང་རྒྱ་ཆེ་བ་དང། ཧ་ཅང་ཆུང་བ་སྟེ། དེ་དག་དེ་ལྟ་བུ་བྱེད་པས་བྱ་བ་མང་ཞིང། བྱེད་པ་མང་བས། ལུང་མནོད་པ་དང། བཀླག་པ་དང། ཁ་ཏོན་དང། རྣལ་འབྱོར་དང། ཡིད་ལ་བྱེད་པ་དང། ནང་གི་སེམས་ཀྱི་ཞི་གནས་དག་གཏོང་བ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མས་གདིང་བ་བྱེད་ན། ཚད་བཞིན་དུ་བྱེད་དུ་གཞུག་གོ་།དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོའོ། །ཞེང་དུ་ཕྱེད་དང་དོའོ། །སྲིད་དུ་མཐོ་གང་གིས་བསྲིངས་ཤིང། དེ་ལས་ལྷག་པར་བྱེད་ན། བཅད་ནས་ལྟུང་བྱེད་དོ། །གདིང་བ་ཞེས་བྱ་བ་ནི་གདིང་བའོ། །

---

^{[མ་དཔེ་གཟིགས་ན་འདིར་གནོན།]}

དགེ་སློང་མ་ཞེས་བྱ་བ་ནི། ཆོས་འདི་པའོ། །བྱེད་དམ་ཞེས་བྱ་བ་ནི། བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནི། །སྲིད་དུ་ཞེས་བྱ་བ་ནི། དེའི་ཆུ་གང་ཡིན་པའོ། །བདེ་བར་གཤེགས་པའི་མཐོ་གང་གིས་ཞེས་བྱ་བ་ལ། བདེ་བར་གཤེགས་པ་ཞེས་བྱ་བ་ནི་སྟོན་པའོ། །བདེ་བར་གཤེགས་པའི་མཐོ་གང་གང་ཡིན་པ་དེ་ལ་ནི། ཚད་དང་ལྡན་པའི་ཁྲུ་ཕྱེད་དང་དོ་སྟེ། བདེ་བར་གཤེགས་པའི་མཐོ་གསུམ་གང་ཡིན་པ་དེ་ལ། ཚད་དང་ལྡན་པའི་འཁྲུའི་ཁྲུ་ཕྱེད་དང་ལྔའོ། །ཞེང་དུ་མཐོ་བྱེད་དང་དོའོ་ཞེས་བྱ་བ་ནི། ཚད་དང་ལྡན་པའི་ཁྲུ་དོ་དང། སོར་དྲུག་གོ་།དེ་ལས་ལྷག་པར་ཞེས་བྱ་བ་ནི། དེ་ལས་འདས་པར་རོ། །བྱེད་དམ་ཞེས་བྱ་བ་ནི། བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གདིང་བ་ཁྲུ་ཕྱེད་དང་ལྔ་ལས་ལྷག་པར་བྱེད་དམ། བྱེད་དུ་འཇུག་ན་ཐམས་ཅད་དུ་བཅད་ནས་ལྟུང་བྱེད་དོ། །གང་གི་མདུན་དུ་ལྟུང་བ་འཆགས་པར་བྱེད་ན་ཞེས་བྱ་བ་ནས། ལྟུང་བའི་རིམ་པ་སྔ་མ་བཞིན་ནོ། །གལ་ཏེ་བྱས་ཟིན་པ་རྙེད་ན། བྱས་ཟིན་པ་ཉིད་ལོངས་སྤྱད་པར་བྱའོ། །ལྟུང་བྱེད་བདུན་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས། དགེ་སློང་དང། དགེ་སློང་མ་རྣམས་ཀྱིས་གཡན་པ་དགབ་པའི་གོས་བཅང་བར་བྱའོ་ཞེས་བཀའ་སྩལ་པ་དེའི་ཚེ། དགེ་སློང་མ་དེ་དག་གིས། ཅི་འདྲ་བཆད་ཇི་ཙམ་པ་བཅང་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ་།སྲིད་དུ་བདེ་བར་གཤེགས་པའི་མཐོ་བཞིའོ། །ཞེང་དུ་མཐོ་དོའོ། །གང་གི་ཚེ་བཅོམ་ལྡན་འདས་ཀྱིས་ཚད་བཀའ་སྩལ་པ་དེའི་ཚེ། བཅུ་གཉིས་སྡེ་དེ་དག་ཚད་ལས་ལྷག་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དགེ་སློང་མ་གཡན་པ་དགབ་པའི་གོས་བྱེད་པས། ཚད་བཞིན་བྱེད་དུ་གཞུག་

---

^{[མ་དཔེ་གཟིགས་ན་འདིར་གནོན།]}

གོ། །དེ་ལ་གཡན་པ་དག་བ་པའི་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞིའོ། །ཞེང་དུ་མཐོ་དོའོ། །དེ་ལས་ལྷག་པར་བྱེད་ན་བཅད་ནས་ལྟུང་བྱེད་དོ། །གཡན་པ་དགབ་པའི་གོས་ཞེས་བྱ་བ་ནི། ན་བའི་གོས་སོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །སྲིད་དུ་བདེ་བར་གཤེགས་པའི་མཐོའི་མཐོ་བཞི་ཞེས་བྱ་བ་ནི། དེའི་ཆུ་གང་ཡིན་པ་ཚད་དང་ལྡན་པའི་ཁྲུའི་ཁྲུ་དྲུག་གོ། བདེ་བར་གཤེགས་པ་ཞེས་བྱ་བ་ནི་སྟོན་པའོ། །ཞེང་དུ་མཐོ་དོའོ་ཞེས་བྱ་བ་ནི། ཚད་དང་ལྡན་པའི་ཁྲུ་གསུམ་མོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །བྱེད་དམ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་འཇུག་ན་ཞེས་བྱ་བ་ནི་གཞན་ནོ། །བཅད་ནས་ཞེས་བྱ་བ་ནི་མཉམ་པོར་བྱས་ནས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཡན་པ་དགབ་པའི་གོས་ཁྲུ་དྲུག་ལས་ལྷག་པར་བྱེད་དུ་འཇུག་ན། ཐམས་ཅད་དུ་བཅད་ནས་ལྟུང་བྱེད་དོ། །གང་གི་མདུན་དུ་འཆགས་པར་བྱེད་ན་ཞེས་བྱ་བའི་བར་གོང་ནས་འབྱུང་བ་བཞིན་ནོ། །ལྟུང་བྱེད་བདུན་པའི་བརྒྱད་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་ཉེ་དགས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཚད་བྱེད་དུ་བཅུག་ལ། བཅོམ་ལྡན་འདས་ཀྱིས་ནི་བཀག་པ་དེའི་ཚེ། སྦོམ་དགའ་མོས་ཀྱང་ཉེ་དགའ་མཐོང་ནས། བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་བཅུག་ནས། བགོས་ཏེ། དགེ་སློང་མའི་དབྱར་ཁང་དུ་སོང་ནས། དེས་བདེ་བར་གཤེགས་པའི་ཆོས་གོས་ཀྱི་ཚད་ཁ་ཅིག་ནི། མཆན་ཁུང་དུ་བརྟུལ། ཁ་ཅིག་ནི་ཕྲག་པ་ལ་གཟར། ཁ་ཅིག་ནི་ལུས་ལ་བགོས། ཁ་ཅིག་ནི་འཇོལ་ཞིང་འདུག་པ་དང། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ལྷུང་བཟེད་དང། ཆོས་གོས་བླངས་ཏེ་གང་དུ་འགྲོ། དེས་འདི་སྐད་ཅེས་སྨྲས་སོ། །ཁོ་མོ་ལྷུང་བཟེད་དང་ཆོས་གོས་བླངས་ཏེ་གང་དུ་ཡང་

---

^{[མ་དཔེ་གཟིགས་ན་འདིར་གནོན།]}

མི་འགྲོའོ། །དེ་ལྟ་མོད་ཀྱི་ཁོ་མོས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་བཅུག་པ་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །ཕུ་ནུ་མོ། བཅོམ་ལྡན་འདས་ཀྱིས་དགག་པ་མ་མཛད་དམ། དེས་འདི་སྐད་ཅེས། དགེ་སློང་རྣམས་ལ་དགག་པ་མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་གམ། བདེ་བར་གཤེགས་པའི་ཆོས་གོས་ལས་ལྷག་པར་བྱེད་དུ་འཇུག་ན་བཅད་ནས་ལྟུང་བྱེད་དོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཅུའོ། །ཞེང་དུ་མཐོ་དྲུག་སྟེ། དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་ཡིན་ནོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་གམ་ཞེས་བྱ་བ་ནི། སངས་རྒྱས་ཀྱི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་པའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་ཡིན་ནོ་ཞེས་བྱ་བ་ནི། གྲངས་རྣམ་པར་བཤད་པ་ཡིན་ནོ། །སྲིད་དུ་ཞེས་བྱ་བ་ནི་དེའི་ཆུ་གང་ཡིན་པའོ། །མཐོ་བཅུ་ཞེས་བྱ་བ་ནི། བདེ་བར་གཤེགས་པའི་མཐོ་བཅུ་གང་ཡིན་པ་སྟེ། དེ་ནི་ཚད་དང་ལྡན་པའི་ཁྲུའི་ཁྲུ་བཅོ་ལྔ་པའོ། །ཞེང་དུ་མཐོ་དྲུག་གོ་ཞེས་བྱ་བ་གང་ཡིན་པ་དེ་ནི་ཚད་དང་ལྡན་པའི་ཁྲུའི་ཁྲུ་དགུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དམ། བདེ་བར་གཤེགས་པའི་ཆོས་གོས་ལས་ལྷག་པ་དག་བྱེད་དུ་འཇུག་ན། ཐམས་ཅད་དུ་བཅད་ནས་ལྟུང་བྱེད་དོ། །གང་གི་མདུན་དུ་འཆགས་པར་བྱེད་ན་ཞེས་བྱ་བའི་བར་གོང་ནས་འབྱུང་བ་བཞིན་ནོ། །

---

^{[མ་དཔེ་གཟིགས་ན་འདིར་གནོན།]}

ལྟུང་བྱེད་བདུན་པའི་ཚིགས་སུ་བཅད་པའི་སྡོམ་རྫོགས་སོ།། །།བསྡུས་པའི་སྡོམ་ལ། སྒོག་སྐྱ་རྗེན་པ་སྐྱབས་ཡོད་དང། །རྣར་གཤུབ་མུན་ཁུང་སྔ་ནས་འདུག །དབྱར་ནང་ལོ་ནི་བཅུ་གཉིས་དང། འདོད་ཆེན་སྡོམ་པ་གཞོན་ནུ་མའོ། །སྡོམ་ལ། སྒོག་སྐྱ་མདོམས་སྤུ་འབྲེག་པ་དང། སོར་མོའི་ཚིགས་གཉིས་འཇུག་པ་དང། །ཐལ་མོས་བརྡེག་པར་མི་བྱའོ། །གླེང་གཞི་ནི་མཉན་ཡོད་ནའོ། །དེའི་ཚེ་མུ་གེ་མི་བཟད་པ་དགོན་པ་སློང་མོ་པས་ཟས་རྙེད་པར་དཀའ་བ་བྱུང་ནས་ཞེས་བྱ་བ་ནས། མི་ཞིག་ལ་སྒོག་སྐྱའི་ལྡུམ་ར་ཞིག་ཡོད་དོ་ཞེས་བྱ་བའི་བར་ཏེ། དེ་ན་ཚོད་སྔོན་དག་མང་དུ་སྐྱེའོ། །དེ་ནས་མི་དེ་ལ། དགེ་སློང་མ་རྣམས་ཀྱིས་ཚོད་སྔོན་བསླངས་པ་དང། དེས་སྨྲས་པ། ཅི་བདེ་བ་ཁོ་ནར་མཛོད་ཅིག །དེ་ལྟ་མོད་ཀྱི། སྒོག་སྐྱ་དེ་དག་ནི་མ་གདོན་ཅིག་ཅེས། དེ་དག་ཉི་མ་རེ་རེ་ཞིང་ཚོད་སྔོན་དག་བླངས་ནས་དགེ་སློང་མའི་དབྱར་ཁང་དུ་འདོང་ངོ། །དེ་ནས་སྡོམ་དགའ་མོས་དགེ་སློང་མ་དེ་རྣམས་ལ་དྲིས་པ། ཕུ་ནུ་མོ་དག་ཁྱོད་ཀྱིས་ཚོད་སྔོན་གང་ནས་བླངས་ཞེས་བྱ་བ་ནས། སྦོམ་དགའ་མོ་ཡང་སྒོག་སྐྱའི་ལྡུམ་རར་སོང་ནས། དེས་ཚོད་སྔོན་དང། སྒོག་སྐྱ་ལྷན་ཅིག་བཏོན་ཏོ། །དེ་ནས་སྒོག་སྐྱའི་བདག་པོ་དེས་འཕྲིགས་ཏེ། འཕྲིགས་ནས་ཀྱང་སྒོག་སྐྱའི་ལྡུམ་ར་གཞན་ཞིག་གི་ལག་ཏུ་བཙོངས་ཏེ། བཙོངས་ནས་དགེ་སློང་མ་རྣམས་ལ་སྨྲས་པ། ཀྱེ་འཕགས་མ་དག །བདག་གིས་གཞན་ཞིག་གི་སུག་པར་བཙོངས་ལགས་ཀྱི། དེ་ལས་ཚོད་སྔོན་སློངས་ཤིག་ཅེས་བྱ་བ་ནས། དེས་ཀྱང་སྲུང་མའི་ཁྱེའུ་ཞིག་བཞག་སྟེ། ཅི་བདེར་བྱེད་དུ་བཅུག་ནས། དགེ་སློང་མ་དེ་དག་ཚོད་མ་རྔ་བ་ན། སྦོམ་དགའ་མོ་སྒོག་སྐྱ་འབའ་ཞིག་འབྱིན་པར་བྱེད་དོ། །དེ་ནས་ཁྱེའུ་ཡིས་སྦོམ་དགའ་མོ་ལ་སྒོག་སྐྱ་འབྱིན་པ་བཟློག་པ་དང། དེ་ནས་སྦོམ་དགའ་མོས་ཁྱེའུ་དེ་བརྡེགས་སོ། །དེ་ནས་ཁྱེའུ་དེས་ཕ་ལ་སྨྲས་པ་དང། དེའི་ཕྱིར་དེ་ཉིན་པར་སྒོག་སྐྱའི་ནང་ཞིག་ཏུ་གབ་ནས་བསྡད་དོ། །དེ་ནས་སྦོམ་དགའ་མོ་ཡང་འོངས་ནས། སྒོག་སྐྱ་འབྱིན་པ་ལས། ཁྱེའུ་དེས་བཟློག་པ་དང་ཞེས་བྱ་བ་ནས། ཁྱིམ་བདག་དེས་ཀྱང་སྦོམ་དགའ་མོ་བརྡེགས་སོ་ཞེས་བྱ་བའི་བར་རོ། །དེ་ཡང་མིག་ཕུབས་སྐྲངས་ཤིང་

---

^{[མ་དཔེ་གཟིགས་ན་འདིར་གནོན།]}

དབྱར་ཁང་དུ་འོངས་པ་དང། དགེ་སློང་མ་རྣམས་ཀྱིས་དྲིས་པ་ལས། དེས་སྐབས་དེ་རྒྱས་པར་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྒོག་སྐྱ་ཟ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྒོག་སྐྱ་ཞེས་བྱ་བ་ནི་བྱི་སྐུའོ། །ཟ་ན་ཞེས་བྱ་བ་ནི་ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྒོག་སྐྱ་ཟ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཞེས་དེ་ལྟར་བསླབ་པའི་གཞི་བཅའ་བ་མཛད་པ་དང། དགེ་སློང་མ་ནད་པ་ཞིག་ཡོད་པ་དེས་སྨན་པ་ལ་དྲིས་པ་དང། སྨན་པས་སྒོག་སྐྱ་བསྟན་ཏོ། །དེས་འདི་སྐད་ཅེས་སྨྲས་སོ། །བཞིན་བཟང་སྨན་པ། ཁོ་མོ་ང་ནི་ཤི་ཟིན་ནོ། །སྨན་པས་སྨྲས་པ། ཅི་ཉེས། དེས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀག་གོ་།དེས་འདི་སྐད་ཅེས་སྨྲས་སོ། །ཁྱོད་ཀྱི་སྟོན་པ་ཐུགས་རྗེ་ཅན་ཡིན་པས་རྗེས་སུ་གནང་བར་འགྱུར་རོ་ཞེས་བྱ་བའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། སྨན་པའི་ལུང་གིས། ནད་པ་ལ་ནི་ལྟུང་བ་མེད་དོ་ཞེས་བྱ་བ་ནས། སྒོག་སྐྱ་དང། ཀིའུ་ལ་སོགས་པ་ཀུན་ཏུ་སྤྱད་པར་བྱའོ། །དགེ་སློང་རྣམས་ཐེ་ཚོམ་སྐྱས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྦོམ་དགའ་མོ་ལྷག་པར་ཆགས་པའི་ཟིལ་གྱིས་ནོན་པས། སྒོག་སྐྱའི་ཕྱིར་བརྡེག་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག །ད་ལྟར་འབའ་ཞིག་མ་ཡིན་གྱི། འོན་ཀྱང་འདས་པའི་དུས་ན་ཡང་ལྷག་པར་ཆགས་པས་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག །ཅེས་བྱ་བ་ནས། གྲོང་ཁྱེར་ཝཱ་ར་ཎཱ་སིར་རྒྱལ་པོ་ཚངས་བྱིན་ཞེས་བྱ་བ་ཞིག་བྱུང་ངོ་ཞེས་བྱ་བའི་བར་རོ། །ཇི་ཙམ་ན་རྐུན་པོ་ཞིག་གིས་རྒྱལ་པོའི་ཕོ་བྲང་ཕུག་པ་དང་ཞེས་བྱ་བ་ནས། ཕུ་གུའི་སྒོར་དངུལ་སྐྱོགས་

---

^{[མ་དཔེ་གཟིགས་ན་འདིར་གནོན།]}

ཤིག་བརྗེད་དེ་ལུས་པ་དང། རྐུན་པོ་དེས་སླར་ཡང་སོང་སྟེ་བླང་ངོ་སྙམ་ནས་ཞེས་བྱ་བ་ནས། རྒྱལ་པོའི་བཀྲབས་པ་དག་གིས་བཟུང་ནས། ཚུལ་མ་ཡིན་པས་སྡུག་བསྔལ་བར་བྱས་སོ། །དེ་ནས་ལྷ་ཞིག་གིས་དེའི་ཚེ་ཚིགས་སུ་བཅད་དེ་སྨྲས་པ། ལྷག་པར་ཆགས་པས་ཟིལ་ནོན་ན། །དོན་གྲུབ་པ་ཡང་ཉམས་གྱུར་ཏེ། །ཕྱིར་དོན་གཉེར་བར་བྱེད་པའོ། །རྐུན་མའི་སྐྱོགས་ནེ་ཇི་བཞིན་ནོ། །དགེ་སློང་དག་གཞན་ཡང་ལྷག་པར་ཆགས་པ་ཁོ་ནས་རིན་པོ་ཆེ་དག་ལས་ཡོངས་སུ་ཉམས་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་ཝཱ་ར་ཎཱ་སི་ན་ཁྱིམ་བདག་ཅིག་ཡོད་པ་དེ་ཞེས་བྱ་བ་ནས། དེ་ལ་བུ་མོ་ཞིག་བཙས་པ་དང། ཤི་ནས་ངང་པའི་རྒྱལ་པོ་རང་བཞིན་གྱིས་སྐྱེ་བ་དྲན་པ་ཞིག་ཏུ་སྐྱེས་སོ་ཞེས་བྱ་བའི་བར་རོ། །ཇི་ཙམ་ན་དེ་བུ་མོའི་དོན་དུ་ཉི་མ་རེ་རེ་ཞིང་རིན་པོ་ཆེ་དག་སྐྱེལ་བར་བྱེད་དོ། །དེ་ནས་བུ་མོས་བསམས་པ། ངང་པའི་རྒྱལ་པོ་ཡང་བཟུང་ལ། རིན་པོ་ཆེ་ཡང་བླང་ངོ་སྙམ་པ་དང། དེ་བྲོས་ནས་ཕྱིན་ཆད་མི་འོང་བར་གྱུར་ཏོ། །ཇི་ཙམ་ན་ལྷ་ཞིག་གིས་ཚིགས་སུ་བཅད་དེ་སྨྲས་པ། ལྷག་པར་ཆགས་པར་མི་བྱ་སྟེ། །ཆོས་མིན་ཆགས་པ་སྡིག་པ་ཅན། །ངང་པའི་རྒྱལ་པོ་གཟུང་སྙམ་པས། །རིན་ཆེན་རྣམས་ལས་ཡོངས་སུ་ཉམས། །དགེ་སློང་དག་ཇི་སྙམ་དུ་སེམས། དེའི་ཚེ་རྐུན་པོ་དང། བུ་མོ་གང་ཡིན་པ་དེ་ནི། སྦོམ་དགའ་མོ་འདི་ཉིད་ཡིན་ཏེ། དེ་ནས་ཡང་ལྷག་པར་ཆགས་པ་ཁོ་ནར་གྱུར་ཏོ། །ད་ལྟར་ཡང་ལྷག་པར་ཆགས་པ་ཁོ་ནར་གྱུར་ཏོ། །དེ་ལྟ་བས་ན་ལྷག་པར་ཆགས་པར་མི་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །ལྟུང་བྱེད་བརྒྱད་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་མདོམས་ཀྱི་ཕྱོགས་ཀྱི་སྤུའི་ལས་བྱེད་ཅིང། དེ་ཁྲུས་བྱེད་པ་ན། བྲམ་ཟེ་དང། ཁྱིམ་བདག་གི་ཆུང་མ་རྣམས་ལ་བསྟེན་ཏེ། ཏིལ་འབྲས་ཁྲ་བོར་བྱས་པའི་པེན་ཙེ་ལྟར་འདུག་པ་འདི་ལ་ལྟོས། དེ་དག་གིས་འདི་སྐད་ཅེས་སྨྲས་སོ། །འཕགས་མ་རེ་ཞིག །ཁོ་མོ་ཅག་ནི་སྡུམ་ཐབ་ཀྱི་སེམས་མགུ་བར་བགྱིད་པའི་ཕྱིར་བགྱིད་ན། ཁྱོད་ཀྱི་འདི་ཅིར་འཚལ། ཁྱོད་ཀྱིས་

---

^{[མ་དཔེ་གཟིགས་ན་འདིར་གནོན།]}

སུ་ཞིག་མགུ་བར་བགྱི། འདི་ནི་རབ་ཏུ་བྱུང་བ་དང་འཚམ་པ་མ་ལགས་སོ་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མདོམས་ཀྱི་ཕྱོགས་ཀྱི་སྤུའི་ལས་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མདོམས་ཀྱི་ཕྱོགས་ཞེས་བྱ་བ་ནི་གསང་བའི་གནས་སོ། །སྤུའི་ལས་བྱེད་དམ་ཞེས་བྱ་བ་ནི་རྨངས་འདྲེག་ནའོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེ་དགེ་སློང་མས་ཇི་ཙམ་ཅུང་ཟད་མདོམས་ཀྱི་ཕྱོགས་ཀྱི་སྤུའི་ལས་བྱེད་ན་ཡང་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་རྨ་བྱུང་བའི་ཕྱིར་བྱེད་ན་ལྟུང་བ་མེད་དོ། །ལྟུང་བྱེད་བརྒྱད་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས་གསང་བའི་གནས་སུ་ལག་པ་བཅུག་ནས། ཇི་ཙམ་ཉོན་མོངས་པ་ཞི་བར་གྱུར་གྱི་བར་དུ་བཀྲུས་པས། དེའི་གསང་བའི་གནས་སྐྲངས་པར་གྱུར་ཏོ། །དེས་པུ་ཤེལ་ཙི་དང། ཙནྡན་ལ་སོགས་པའི་བྱུག་པ། ལྷན་ཅིག་གནས་པ་དང། ཉེ་གནས་རྣམས་ལ་བསླངས་པ་དང། དེ་དག་གིས་འདི་སྐད་ཅེས་སྨྲས་སོ། །ཁྱོད་ཅི་སྙུང། དེས་སྐབས་དེ་རྒྱས་པར་སྨྲས་པ་དང་ཞེས་བྱ་བ་ནས། བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ་དེ་ལྟ་བས་ན། དགེ་སློང་མས་ཁྲུས་མི་བྱའོ། །དེ་དག་ཁྲུས་མ་བྱས་པས་དྲི་ངན་པ་སྐྱེས་པར་གྱུར་ཏོ། །དེ་ནས་དུས་གཞན་ཞིག་ན། སྐྱེ་དགུའི་བདག་མོ་ཆེན་པོ་གོའུ་ཏ་མི་ཁྱིམ་བདག་གི་ཆུང་མ་རབ་ཏུ་མང་པོ་ལ་ཆོས་འཆད་པ་ན། དེ་དག་ཕན་ཚུན་དུ་འདི་སྐད་ཅེས། དྲི་ངན་པ་མནམ་མོ། །ཞེས་ཟེར་རོ། །དེ་ནས་སྐྱེ་དགུའི་བདག་མོ་ཆེན་པོ་གོའུ་ཏ་མི། རང་བཞིན་གྱིས་དྲང་པ་ཡིན་པས་འདི་སྐད་ཅེས་སྨྲས་སོ། །ཕུ་ནུ་མོ་དག །དྲི་ངན་བ་དེ་ནི་ཁོ་མོའི་ཡིན་ནོ། །དེ་དག་གིས་འདི་སྐད་ཅེས་སྨྲས་སོ། །ཁྱོད་ཅིའི་སླད་དུ་ཁྲུས་མི་མཛད། སྐྱེ་དགུའི་བདག་མོ་ཆེན་

---

^{[མ་དཔེ་གཟིགས་ན་འདིར་གནོན།]}

མོས་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་བཀག་གོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སོར་མོའི་ཚིགས་གཉིས་ཀྱིས་ཁྲུས་བྱའོ། །ཇི་ཙམ་ན་དེ་ཉིད་ཉེས་དམིགས་སུ་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པར་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲུས་བྱེད་པ་ན། སོར་མོའི་ཚིགས་གཉིས་ལས་འདའ་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྲུས་བྱེད་ན་ཞེས་བྱ་བ་ནི་ཆུ་བླངས་ནས་སོ། །སོར་མོའི་ཚིགས་གཉིས་ལས་འདས་པར་འཇུག་ན་ཞེས་བྱ་བ་ནི་དེ་ལས་ལྷག་པར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྲུས་བྱེད་པ་ན། སོར་མོའི་ཚིགས་གཉིས་ལས་འདས་པར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བརྒྱད་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་ཉོན་མོངས་པས་ཉེན་ནས། ཇི་སྲིད་ཚིམ་གྱི་བར་དུ་གསང་བའི་ཕྱོགས་སུ་ཐལ་མོས་བརྒྱབ་པས་ཇི་ཙམ་ན་སྐྲངས་པར་གྱུར་ཏོ། །གང་གི་ཚེ་འདོད་ཆགས་ཞི་བར་གྱུར་པ་དེའི་ཚེ། ན་ནས་ཆོ་ངེས་འདེབས་སོ། །དེ་ནས་ལྷན་ཅིག་གནས་པ་དང། ཉེ་གནས་རྣམས་ཀྱིས་དྲིས་པ་ལས། དེས་སྐབས་དེ་རྒྱས་པར་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུད་མེད་ཀྱི་ཡུལ་ལ་ཐལ་མོས་རྡེག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །བུད་མེད་ཀྱི་ཡུལ་ལ་ཐལ་མོས་རྡེག་ན་ཞེས་བྱ་བ་ནི་མོ་མཚན་ལ་ཐལ་ལྕག་གིས་རྡེག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་ཀྱི་ཡུལ་ལ་ཐལ་མོས་རྡེག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བརྒྱད་པའི་ཚིགས་

---

^{[མ་དཔེ་གཟིགས་ན་འདིར་གནོན།]}

སུ་བཅད་པའི་སྡོམ་རྫོགས་སོ།། །།སྡོམ་ནི། རྗེན་པ་བཙོ་བར་མི་བྱ་དང། །ཆུས་ནི་གཏོར་བར་མི་བྱ་དང། །སྔོན་པོར་བཤང་བ་མི་དོར་དང། །རྩིག་པའི་རྒྱ་བ་ཏུ་མི་དོར་བའོ། །གླེང་གཞི་ནི་མཉན་ཡོད་ནའོ། །གྲོང་ཁྱེར་བ་དག་ལྡུམ་ར་དང། སྐྱེད་མོས་ཚལ་ལ་དགའ་བས་དེ་དག་གི་ཀུན་ཏུ་སྤྱོད་པ་ནི། གང་གི་ཚེ་སྐྱེད་མོས་ཚལ་དག་ཏུ་འདོང་བ་ན། གཡོས་མཁན་གྱིས་བཅའ་བ་འཚེད་པར་བྱེད་པ་ཡིན་པས། དེ་དག་གིས་ཡང་གཡོས་མཁན་ལ། སང་ནང་པར་སྔར་ཤོག་ཅིག་ཅེས་བསྒོ་བ་ལས། དེ་མ་འོངས་པར་སྦོམ་དགའ་མོ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་བླངས་ཏེ། བསོད་སྙོམས་ཀྱི་ཕྱིར་སྤྱོད་ཡུལ་དུ་ཞུགས་ནས། ཁྱིམ་བདག་གཅིག་གི་ཁྱིམ་དུ་ཞུགས་ཏེ། འདི་སྐད་ཅེས་སྨྲས་སོ། །མཚན་བཟང་མ། བསོད་སྙོམས་བྱིན་ཅིག །དེས་འདི་སྐད་ཅེས་སྨྲས་སོ། །འཕགས་མ་བདག་གློ་བ་མི་དགའ་ལགས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཁྱོད་ཅི་སྟེ་མི་དགའ། དེས་སྐབས་དེ་རྒྱས་པར་སྨྲས་པ་དང། དེས་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་རང་ཉིད་མི་འཚེད། དེས་འདི་སྐད་ཅེས་སྨྲས་སོ། །བདག་གིས་རྔོ་མི་ཐོག་ལགས་སོ། །དེ་ནས་སྦོམ་དགའ་མོས་ཁྱིམ་བདག་གི་ཆུང་མ་ལ་འདི་སྐད་ཅེས་སྨྲས་སོ། །ཅི་ཁྱོད་ཀྱང་ཁབ་བཞིན་དུ་ལས་སྣ་གཅིག་པ་ཞིག་ཡིན་ནམ། དེས་འདི་སྐད་ཅེས་སྨྲས་སོ། །འཕགས་མ་དེ་ལ་མཁྱེན་པ་མངའམ། སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང་ལས་ཀྱི་གནས་གང་ལ་མཁས་པར་མ་བྱས་པ་གང་ཞིག་ཡོད། དེ་ནས་ཁྱིམ་བདག་གི་ཆུང་མ་དེས། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ད་ནི་ཁྱོད་ལ་བདག་གསོལ་བ་འདེབས་ཀྱི། བཅའ་བ་སྒྲོལ་ལ་བདག་ལ་སྩོལ་ཅིག །དེས་འདི་སྐད་ཅེས་སྨྲས་སོ། །ཁོ་མོ་ལ་སུ་བསོད་སྙོམས་སྟེར་བར་འགྱུར། ཁྱིམ་བདག་གི་ཆུང་མས་འདི་སྐད་ཅེས། སླད་ཀྱིས་བདག་གིས་ཕྱི་བཞིན་འབྲང་བའི་དགེ་སྦྱོང་མ་ལ། བདག་གིས་སློབ་དཔོན་ལ། བདག་གིས་མཁན་མོ་ལ། བདག་གིས་ཁང་སྐྱོང་མའི་བར་ལ་སླད་ཀྱིས་དབུལ་ལོ་ཞེས་སྨྲས་པ་དང། དེས་ལྷུང་བཟེད་དང། ཆོས་གོས་མཐའ་གཅིག་ཏུ་བཞག །གོས་གཞན་དག་བརྫེས་ཏེ་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བ་ནས། དེས་དོག་ལེ་བཀྲུས་བཤལ་བསྲེགས་ཏེ། མར་ཁུས་བཀང་ནས་ཇི་ཙམ་ན་རིམ་བཞིན་དུ་ཀུན་ཏུ་གཡོས་པ་དང། ལེགས་པར་གཡོས་པ་དང། འབྲས་བུ་ལས་གཡོས་པ་དང། ལ་དུ་དང། ཁོང་ཚངས་ཅན་དང། ཅེ་ཀུན་དང། རིམ་བརྒྱ་པ་དང། སྲིན་བུའི་དབྱིབས་ལྟ་བུ་སྟེ། དེ་ལྟ་བུ་དག་བཙོས་ཏེ། དེས་གྲོང་རྡལ་དེའི་ཕྱེད་དྲི་ཡིས་ཁྱབ་པར་བྱས་སོ། །ཇི་ཙམ་ན་དེས་གྲོང་རྡལ་གྱི་ཕྱེད་ན་འདུག་པ་དག་འོངས་ནས་དྲིས་པ། ཅི་ཁྱོད་ཀྱི་ཁྱིམ་དུ་གཡོས་མཁན་འོངས་སམ། དེས་འདི་སྐད་ཅེས་སྨྲས་སོ། །མ་འོངས་ཏེ་དེ་ལྟར་མོད་ཀྱི། འཕགས་མ་སྦོམ་དགའ་མོ་འཚོད་དོ། །དེ་དག་ཀྱང་འོངས་ནས་གསོལ་བ་བཏབ་པ་དང། དེས་འདི་སྐད་ཅེས་སྨྲས་སོ། །ཁོ་མོ་ལ་སུ་བསོད་སྙོམས་སྟེར་བར་འགྱུར། དེ་དག་གིས་འདི་སྐད་ཅེས་བདག་ཅག་གིས་ཁང་སྐྱོང་གི་བར་ལ་དབུལ་ལོ་ཞེས་སྨྲས་པ་དང། དེ་བཞིན་དུ་སྦོམ་དགའ་མོས། གྲོང་ཁྱེར་ཕྱེད་ཀྱི་བཅའ་བ་ཐམས་ཅད་བཙོས་ཏེ། དེ་ནས་བཙོས་ནས་བསོད་སྙོམས་ཀྱིས་ཁུར་བསླང་ནས་དབྱར་ཁང་དུ་སོང་ངོ། །དེའི་འོག་ཏུ་གཡོས་མཁན་འོངས་ཏེ། འོངས་ནས་སྒོ་སྒོར་འདི་སྐད་ཅེས་སྨྲས་སོ། །ཁྱིམ་བདག་མོ་དག །བཙུན་མོ་དག །བཅའ་བ་དག་བཙོས་སྣོམས་ཏེ་སྤྱོན་ཅིག །དེ་དག་གིས་འདི་སྐད་ཅེས་སྨྲས་སོ། །ཁོ་མོ་དག་གིས་བཙོས་ཟིན་ཏོ། །རྒྱ་ཚོས་མཁན་གྱིས་འདི་སྐད་ཅེས་སྨྲས་སོ། །སུ་ཞིག་གིས་དེ་དག་གིས་འདི་སྐད་ཅེས་སྨྲས་སོ། །སྦོམ་དགའ་མོས་སོ། །ཞེས་གྲོང་རྡལ་ཕྱེད་པོ་ཐམས་ཅད་ཀྱི་བར་གྱིས་གོ་བར་བྱས་པ་དང། དེ་འདི་སྐད་ཅེས་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ཚུལ་དང། ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་འདི་ལྟར་འཚོ་བ་ཡང་བཅད་དོ་ཞེས་འཕྱ་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྗེན་པ་འཚེད་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རྗེན་པ་འཚོད་ན་ཞེས་བྱ་བ་ནི། བཅའ་བ་འཚོད་ནའོ། །ལྟུང་བྱེད་དོ་ཞེས་བྱ་བ་ནི་

---

^{[མ་དཔེ་གཟིགས་ན་འདིར་གནོན།]}

གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྗེན་པ་འཚོད་པར་བྱེད་ན་ཐམས་ཅད་དུ་ལྟུང་བྱེད་དོ། །དེ་ནས་དགེ་འདུན་གྱི་བྲེལ་བ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་དབེན་པར་འདུག་ནས་བཙོ་བར་བྱ་སྟེ་ལྟུང་བ་མེད་དོ། །ལྟུང་བྱེད་དགུ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་ཁྱིམ་བདག་ཅིག་ཆུང་མ་དང་ལྷན་ཅིག་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཞེས་བྱ་བ་ནས། དགེ་སྦྱོང་མ་རྣམས་ལ་བལྟ་བའི་ཕྱིར་དབྱར་ཁང་དུ་དོང་ངོ། །ཇི་ཙམ་ན་དེ་དེ་ན་ནང་པར་ཐུག་པ་ཞིག་འཐུང་བ་དང། དགེ་སློང་མ་དེ་ཡང་ཆུ་སྣོད་ཅིག་ཐོགས་ཏེ། མདུན་ན་སྡོད་ཅིང་འདུག་གོ་།དེ་ནས་དགེ་སློང་མ་དེ་རྒོད་ནས་འདི་སྐད་ཅེས། ཁོ་མོ་ཁྱིམ་པར་གྱུར་པ་ན་ཁྱོད་དེ་ལྟར་མདུན་ན་སྡོད་དོ་ཞེས་སྨྲས་པ་དང། དེས་ཆུ་སྣོད་དེ་ནས་མགོར་གཏོར་ནས། འདི་སྐད་ཅེས་སྨྲས་སོ། །ཁོ་མོ་ཁྱོད་ཀྱི་ཡོན་ཏན་ཡང་དག་པར་སྒྲོགས་ན། ཁྱོད་ཁོ་མོའི་སྐྱོན་རྣམས་ལ་འཇུག་པར་བྱེད་དམ། ཞེས་སྨྲས་ནས་བྲོས་པ་དང། དེ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་ཀྱིས་ཅིའི་ཕྱིར་འཁོར་གྱི་གཙོ་བོའི་མགོ་ལ་ཆུས་གཏོར་ཞེས་བྱ་བ་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆུ་འཐོར་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའོ། །འཁོར་གྱི་གཙོ་བོ་ཞེས་བྱ་བ་ནི། འཁོར་གྱི་མཆོག་གོ་།ཆུས་འཐོར་ན་ཞེས་བྱ་བ་ནི་ཆུས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་གྱི་གཙོ་བོ་ལ་ཆུས་གཏོར་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་བརྒྱལ་བ་ལ་གདོང་དུ་ཆུ་ལྕག་གིས་འཐོར་བ་ལ་ནི་ལྟུང་བ་མེད་དོ། །ལྟུང་བྱེད་དགུ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་དབྱར་ཁང་

---

^{[མ་དཔེ་གཟིགས་ན་འདིར་གནོན།]}

དང་མི་རིང་བ་ཞིག་ན། ནེའུ་གསིང་སྔོན་པོ་ཞིག་ཡོད་པ་དེ་ན། བྲམ་ཟེ་ཞིག་བྲམ་ཟེའི་ཁྱེའུ་ལྔ་བརྒྱ་ལ་བྲམ་ཟེའི་གསང་ཚིག་ཀློག་ཏུ་འཇུག་གོ་།དེ་ནས་བྲམ་ཟེའི་ཁྱེའུ་དེ་རྣམས་ཀྱིས་སྦོམ་དགའ་མོ་སྤྱོད་ཡུལ་དུ་འཇུག་པ་མཐོང་ནས་མཐོ་བཙམས་སོ། །ཇི་ཙམ་ན་སྦོམ་དགའ་མོས་འཁྲུ་བར་འགྱུར་བའི་སྨན་ཟོས་པས། དེ་མང་དུ་འཁྲུས་ནས། འཁྲུས་པ་དེ་ཕྱགས་ཏེ། ནེའུ་གསིང་སྔོན་པོའི་སྟེང་དུ་སོང་ནས། དེས་འཁྲུ་བས་ནེའུ་གསིང་སྔོན་པོ་ཐམས་ཅད་སྦགས་སོ། །དེ་ནས་ཡང་བྲམ་ཟེའི་ཁྱེའུ་རྣམས་ལྷགས་ནས་འདུག་སྟེ། དེ་དག་འདི་སྐད་ཅེས། ཀུད་སའི་བུ་དག་བད་སའི་བུ་དག །བྷ་ར་དྭ་ཙའི་བུ་དག །ངན་སྐྱུགས་ཀྱི་དྲི་མནམ་མོ། །ཞེས་སྨྲས་པ་ལས། ཇི་ཙམ་ན་དེ་དག་གི་ལག་པ་དང། རྐང་པ་དང། གོས་རྣམས་ངན་སྐྱུགས་ཀྱིས་འབགས་པར་གྱུར་ཏོ། །བྲམ་ཟེ་རྣམས་ནི། གཙང་སྦྲ་འདོད་པ་ཡིན་པས། དེ་ནས་བྲམ་ཟེའི་བུ་དེ་རྣམས་ཡིད་མི་བདེ་ཞིང་འདུག་གོ་།དེ་ནས་ཡང་སྦོམ་དགའ་མོ་བསོད་སྙོམས་ལས་སླར་ལོག་པ་ན། བྲམ་ཟེའི་ཁྱེའུ་དེ་རྣམས་ཡིད་མི་བདེ་ཞིང་འདུག་པ་མཐོང་ནས་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་དག །ཅི་མང་དུ་གདོན་པར་བྱས་སམ། ཇི་ཙམ་ན་རྒོད་ནས་འདི་སྐད་ཅེས་ཁྱེད་དེ་ལྟར་བཅོས་སོ་ཞེས་བྱ་བ་ནས། སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། དགེ་སློང་མ་གང་ནེའུ་གསིང་སྔོན་པོ་ལ་བཤང་བ་འདོར་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ནེའུ་གསིང་སྔོན་པོ་ལ་ཞེས་བྱ་བ་ནི་རྩྭ་སྔོན་པོ་ལའོ། །བཤང་བ་འདོར་ན་ཞེས་བྱ་བ་ནི་མི་གཙང་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདི་སྙམ་དུ། ནེའུ་གསིང་སྔོན་པོ་ལ་དོར་རོ་སྙམ་ནས་བཤང་བ་འདོར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་དགུ་པའི་གསུམ་པ་རྫོགས་སོ།། །།དགེ་སློང་མའི་རྣམ་པར་འབྱེད་པ། བམ་པོ་ཉི་ཤུ་གསུམ་པ།

---

^{[མ་དཔེ་གཟིགས་ན་འདིར་གནོན།]}

གླེང་གཞི་ནི་མཉན་ཡོད་ནའོ། །སྦོམ་དགའ་མོ་མང་དུ་ཟོས་ཤིང། མང་དུ་འཐུངས་པས། དེ་མཚན་མོ་གཅི་བས་ཐེབས་ནས། དེས་ཆོལ་ཟངས་བཞག་སྟེ་གཅིས་སོ། །དེ་ནས་ཡང་གླང་པོའི་སྣ་ཆེན་པོ་ལ་གཏོགས་པ་དཔལ་སྐྱེད་ཅེས་བྱ་བ། རྒྱལ་པོ་གསལ་རྒྱལ་གྱི་ཆད་པས་བཅད་པ་ཞིག་ཡོད་པ་དེ། ནང་པར་གྱི་དུས་སུ་དབྱར་ཁང་དང་ཉེ་བ་ཞིག་ནས་རྒྱལ་པོའི་ཕོ་བྲང་དུ་སོང་བ་ལས། སྦོམ་དགའ་མོ་དེས། ཆོལ་ཟངས་གཅིན་གྱིས་བཀང་པ་མ་བརྟགས་པར་གཏོར་བས་མགོ་ལ་ཕོག་པར་གྱུར་ཏོ་ཞེས་བྱ་བ་ནས། དེ་རིང་བདག་ལ་བཀྲ་ཤིས་པར་འགྱུར་རམ། འོན་ཏེ་བཀྲ་མི་ཤིས་པར་འགྱུར་སྙམ་པ་ལས། ཇི་ཙམ་ན་རི་དྭགས་འཛིན་གྱིས་རྒྱལ་པོ་དཔལ་སྐྱེད་ལ་བཟོད་པ་བྱེད་དུ་བཅུག་ནས། འདི་ལྟར་རྒྱལ་པོས་གླང་པོ་ཆེ་པདྨ་དཀར་པོ་ཞེས་བྱ་བ་གཅིག་དང། དེའི་དབང་ཐང་ཉིད་ཀྱང་སླར་བྱིན་ནོ། །དེ་ནས་དཔལ་སྐྱེད་ཀྱིས་རས་ཡུག་པོ་ཆེ་ཞིག་ཁྱེར་ཏེ། དགེ་སློང་མའི་དབྱར་ཁང་དུ་ཕྱིན་པ་ཇི་ཙམ་ན། སྦོམ་དགའ་མོས་ཐོས་ནས་སྐྲག་པར་གྱུར་པ་དང། ཞེས་བྱ་བ་ནས། དཔལ་སྐྱེད་ཀྱིས་འདི་སྐད་ཅེས་སྨྲས་སོ། །གང་གིས་ནང་པར་གྱི་དུས་སུ་ཁོ་བོ་ལ་གཅིན་གཏོར་བའི། དེའི་གཅིན་ནི་བཀྲ་ཤིས་པ། དགའ་བར་བྱེད་པ་ཡིན་པས། དེ་ལ་ཁོ་བོ་དེ་རིང་བསྐོན་པ་རས་ཡུག་པོ་ཆེ་འབུལ་ན། དགེ་སློང་མ་དེ་གང་ལགས། དེ་ནས་སྦོམ་དགའ་མོས་འདི་སྐད་ཅེས། ཁོ་མོ་ཡིན་ནོ་ཞེས་སྨྲས་པ་དང། དེས་དེ་ལ་རས་ཡུག་པོ་ཆེ་ཞིག་བསྐོན་ནོ། །ཇི་ཙམ་ན་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་འཐབ་མོ་བྱུང་བ་དེའི་ཚེ། དེ་ན་རེ། ངན་སྐྱུགས་ཀྱང་ཁྱེད་དང་མི་མཚུངས་སོ་ཞེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། མ་བརྟགས་པར་དོར་བར་མི་བྱའོ། །འདོར་ན་ལྟུང་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མ་བརྟགས་པར་བཤང་བ་དང། གཅི་བ་འདོར་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མ་བརྟགས་པར་ཞེས་བྱ་བ་ནི་བརྟགས་པ་མ་བྱས་པར་རོ། །བཤང་བའམ། གཅི་བ་འདོར་ན་ཞེས་བྱ་བ་ནི་འདོར་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་

---

^{[མ་དཔེ་གཟིགས་ན་འདིར་གནོན།]}

ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མ་བརྟགས་པར་བཤང་བའམ། གཅི་བ་འདོར་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ཁང་སྟོང་ངམ། རྩིག་པ་རལ་པ་ཡིན་ན་ལྟུང་བ་མེད་དོ། །ལྟུང་བྱེད་དགུ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། སྐྱབས་ཡོད་པར་ནི་སྐྱེས་པ་དང། དགེ་སློང་མ་དང་འདུག་མི་བྱ། །བླག་པ་མེད་པར་སྐྱེས་པ་དང། །དགེ་སློང་གཉིས་ནི་མ་ཡིན་དང། །འབའ་ཞིག་གནས་པར་མི་བྱའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྐྱེས་པ་དང་ལྷན་ཅིག་སྐྱབས་ཡོད་པ་ན་གཏམ་བྱེད་པ་དང། བྲམ་ཟེ་དང། ཁྱིམ་བདག་གི་ཆུང་མ་རྣམས་ཀྱིས་འདི་སྐད་ཅེས་ད་ལྟར་བརྡ་བྱས་ནས། མཚན་མོ་ཉེས་པར་སྤྱད་པ་སྤྱོད་པར་འགྱུར་རོ། །ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་སྐྱེས་པ་དང་ལྷན་ཅིག་དབེན་པ་སྐྱབས་ཡོད་པ་ན་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྐྱེས་པ་དང་ལྷན་ཅིག་ཅེས་བྱ་བ་ནི་ཕོ་དང་ངོ། །གཅིག་པུ་ཞེས་བྱ་བ་ནི་གང་ན་གསུམ་པ། སྐྱེས་པའམ། བུད་མེད་དམ། མ་ནིང་མེད་པར་རོ། །དབེན་པ་སྐྱབས་ཡོད་པ་ཞེས་བྱ་བ་ལ། སྐྱབས་ཡོད་པ་ནི་གསུམ་སྟེ། རྩིག་པའི་སྐྱབས་ཡོད་པ་དང། སབ་མོའི་སྐྱབས་ཡོད་པ་དང། ཡོལ་བའི་སྐྱབས་ཡོད་པའོ། །འདུག་ན་ཞེས་བྱ་བ་ནི་གཏམ་ཟེར་ཞིང་ངོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་སྐྱེས་པ་དང་ལྷན་ཅིག་སྐྱབས་ཡོད་པ་ན་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་འཆར་ཀ་དང། སྦེད་མ་རབ་ཏུ་བྱུང་བ་དེའི་ཚེ། འཆར་ཀ་དགེ་སློང་མའི་དབྱར་ཁང་གང་ན་བ་དེར་སོང་སྟེ། ཕྱིན་ནས་སྦེད་མ་དང་ལྷན་ཅིག་དབེན་པ་སྐྱབས་ཡོད་པ་ན་འདུག་པ་ན། དོན་ཉུང་བའི་དགེ་སློང་མ་དག་སྨོད་པར་བྱད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །

---

^{[མ་དཔེ་གཟིགས་ན་འདིར་གནོན།]}

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་དགེ་སློང་གཅིག་དང་ལྷན་ཅིག་དབེན་པ་སྐྱབས་ཡོད་པ་ན་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦེད་མའོ། །གཅིག་པུ་དགེ་སློང་གཅིག་དང་ལྷན་ཅིག་ཅེས་བྱ་བ་ནི་གང་ན་གསུམ་པ། སྐྱེས་པ་དང། བུད་མེད་དང། མ་ནིང་མེད་པར་འཆར་ཀ་དང་ངོ། །དབེན་བ་སྐྱབས་ཡོད་པ་ན་ཞེས་བྱ་བའི་བར་གོང་མ་བཞིན་ནོ། །འདུག་ན་ཞེས་བྱ་བ་ནི་གཏམ་སྨྲ་ཞིང་ངོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་དང་ལྷན་ཅིག་དབེན་པ་སྐྱབས་ཡོད་པ་ན་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་གྲོགས་གཉིས་པ་ཡོད་ན་ལྟུང་བ་མེད་དོ། །ལྟུང་བྱེད་བཅུ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྐྱེས་པ་ཞིག་དང་ལྷན་ཅིག་བླ་གབ་མེད་པར་འདུག་ནས། རྐུན་ལ་རྩེད་མོ་ཞེས་བརྡའི་ཚིག་སྨྲའོ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དོ། །ཡང་དགེ་སློང་མ་གང་གཅིག་པུ་སྐྱེས་པ་གཅིག་དང་ལྷན་ཅིག་བླ་གབ་མེད་པར་དབེན་པར་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཞན་ནི་སྔ་མ་བཞིན་ནོ། །བླ་གབ་མེད་པར་ཞེས་བྱ་བ་ནི་ཐང་ལའོ། །དབེན་པར་འདུག་ན་ཞེས་བྱ་བ་ནི་གཏམ་ཟེར་ཞིང་སྟེ། ཁྱད་པར་ནི་འདི་ཡོད་དོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་སྐྱེས་པ་དང་ལྷན་ཅིག་བླ་གབ་མེད་པར་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གྲོགས་ཡོད་ན་ལྟུང་བ་མེད་དོ། །ལྟུང་བྱེད་བཅུ་པའི་གསུམ་པ་རྫོགས་སོ།། །།དེ་བཞིན་དུ་སྦེད་མ་དང། འཆར་ཀ་དབེན་པ་བླ་གབ་མེད་པ་ན་འདུག་ནས་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་དགེ་སློང་གཅིག་དང་ལྷན་ཅིག་བླ་གབ་མེད་པར་དབེན་པར་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦེད་མའོ། །དགེ་སློང་ནི་འཆར་ཀའོ། །གཞན་ནི་གོང་ནས་འབྱུང་བ་བཞིན་

---

^{[མ་དཔེ་གཟིགས་ན་འདིར་གནོན།]}

ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཅེས་བྱ་བ་སྔ་མ་བཞིན་ནོ། །གྲོགས་ཡོད་ན་ལྟུང་བ་མེད་དོ། །ལྟུང་བྱེད་བཅུ་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །སྦོམ་དགའ་མོས་སྐྱེས་པ་ཞིག་ལ་བརྡ་བྱས་པ་དང། དེས་འདི་སྐད་ཅེས་སྨྲས་སོ། །འཕགས་མ་ཁྱོད་ནི་རབ་ཏུ་བྱུང་བ་ལགས་ལ། བདག་ཀྱང་ཁྱིམ་པའི་ནང་དུ་དགེ་བསྙེན་ལགས་ཏེ། གལ་ཏེ་འགའ་ཞིག་གིས་ཤེས་པར་གྱུར་ན་གཉིས་ཀ་སྨད་པར་འགྱུར་རོ། །དེས་འདི་སྐད་ཅེས་སྨྲས་སོ། །ཁྱོད་ཇི་སྙམ་དུ་སེམས། དུང་དང། རྔ་པ་ཊ་ཧ་འབུད་ཅིང་འོང་དགོས་སམ། དེ་ལྟ་མོད་ཀྱི་དབྱར་ཁང་གི་གནས་ཁང་དུ་ཤོག་ཅིག །ཇི་ཙམ་ན་སྐྱེས་པ་དེ་གནས་ཁང་དུ་འོངས་སོ། །དེ་ནས་སྦོམ་དགའ་མོས་སྐྱེས་པ་དེ་སྐྱབས་ཡོད་པར་ཁྲི་སྟེང་དུ་འདུག་ཏུ་བཅུག་ནས། འདི་སྐད་ཅེས་སྨྲས་སོ། །ཁོ་མོ་མཁན་མོའི་ཞབས་བཀྲུ་བའི་ཆེད་དུ་ལྟ་ཞིང་འགྲོའོ་ཞེས་སྨྲས་ནས་སོང་ངོ། །དེས་ཀྱང་མཁན་མོ་ལ་ཞུས་ནས། ལུང་ཡང་མནོས། གཞོན་ནུ་མ་རྣམས་ལ་ཡང་ལུང་ཕོག །གཏམ་དག་གླང་པ་ཡང་བྱས་ཏེ། དེ་ལྟར་བྱ་བ་མང་ཞིང། བསྒྲུབ་པ་མང་པས། ཇི་ཙམ་ན་སྐྱེས་པ་དེ་བརྗེད་དོ། །དེ་གཙུག་ལག་ཁང་གི་ཕྱི་རོལ་ཏུ་རྐང་པ་བཀྲུས་ནས། གནས་ཁང་གི་ནང་དུ་ཞུགས་ཏེ། ཁྲི་སྟེང་དུ་འདུག་པ་དང། སྐྱེས་པ་དེ་ཡང་འགུལ་བར་བརྩམས་སོ། །དེས་འགུལ་བས་ཁྲི་ལྡེགས་པ་དང། དེས་རྐུན་པོ་བྱུང་ངོ། །རྐུན་པོ་བྱུང་ངོ་ཞེས་ཁུས་བཏབ་པ་དང། དེ་ནས་སྐྱེས་པ་དེ་ཡང་ཁ་ཟེར་ཞིང་བྲོས་སོ། །དགེ་སློང་མ་རྣམས་ཀྱིས་འཕྲིགས་ཏེ། འཕྲིགས་ནས་ཀྱང་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མས་གང་གཅིག་པུ་གཉིས་སུ་མེད་པས། དགེ་སློང་མ་མེད་པའི་གནས་ཁང་དུ་མཚན་མོ་གནས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཅིག་པུ་གཉིས་སུ་མེད་པར་དགེ་སློང་མའི་གནས་ཁང་དུ་གནས་པར་བྱེད་ན་ཞེས་བྱ་བ་ནི་ཉལ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་

---

^{[མ་དཔེ་གཟིགས་ན་འདིར་གནོན།]}

བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་གཅིག་པུ་གཉིས་སུ་མེད་པར་གནས་ཁང་དུ་ཉལ་བར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། རྣ་བར་གཤུབས་པ་གཉིས་པ་དང་ནི། བདག་ཉིད་ལ་ནི་མཐོ་འཚམ་དང། །ཚངས་པར་སྤྱོད་ལ་མནའ་མིན་དང། །ཉེས་པར་མཐོང་བས་གི་གླེང་བའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་སྐྱེས་པ་ཞིག་གི་རྣ་བ་ར་ག་ཤུབས་པ་དང། བྲམ་ཟེ་དང། ཁྱིམ་བདག་དག་ན་རེ། གང་གི་ཕྱིར་རབ་འབྱུང་བ་ཡང་ཁྱིམ་ན་གནས་པའི་རྣ་བར་ག་ཤུནབས་ལ། ཁྱིམ་ན་གནས་པ་ཡང་གཤུབ་པར་བྱེད་ན། འདི་གཉིས་ལ་ཁྱད་པར་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད་ཅེས་འཕྱ་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྱེས་པའི་རྣ་བར་གཤུབ་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རྣ་བར་གཤུབ་པར་བྱེད་ན་ཞེས་བྱ་བ་ནི། རྣ་བར་གཏམ་སྨྲ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྐྱེས་པའི་རྣ་བར་གཤུབ་པར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་སྦེད་མ། འཆར་ཀའི་རྣ་བར་གཤུབ་པར་བྱེད་པ་ནས། དོན་ཉུང་བའི་དགེ་སློང་མ་རྣམས། འཕྱ་བར་བྱེད་པའི་བར་གྱི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་དང་ལྷན་ཅིག་རྣ་བར་གཤུབ་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦེད་མའོ། །དགེ་སློང་ཞེས་བྱ་བ་ནི་འཆར་ཀའོ། །ལྷན་ཅིག་རྣ་བར་གཤུབ་པར་བྱེད་ན་ཞེས་བྱ་བ་ནི། རྣ་བར་གཏམ་སྨྲ་བར་བྱེད་ནའོ། །

---

^{[མ་དཔེ་གཟིགས་ན་འདིར་གནོན།]}

ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་གི་རྣ་བར་གཤུབ་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ། དགེ་སློང་མ་རྣམས་དང་ལྷན་ཅིག་འཐབ་མོ་བྱུང་བ་ན། དེ་ལ་དགེ་སློང་མ་རྣམས་ཀྱིས་རྩོད་པ་འགའ་ཞིག་ལ་གླེང་བར་བྱེད་དེ། དེ་གླེངས་པ་ན་རང་ལ་འཚོག་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འཁྲུགས་ནས་རང་ལ་རྡེག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །རང་ལ་རྡེག་ན་ཞེས་བྱ་བ་ནི། རང་ལ་འཚོག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་གི་ལུས་ལ་རྡེག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་གང་དུ་ཁ་མི་འདུན་པ་ཅི་བྱུང་བ་ཡང་རུང། ཐམས་ཅད་དུ་སངས་རྒྱས་ལ་མནའ་འདོར་བར་བྱེད། ཆོས་དང། དགེ་འདུན་དང། ཚངས་པར་སྤྱོད་པ་ལ་གནས་པ་དང། མཁན་པོ་དང་སློབ་དཔོན་ལ་མནའ་འདོར་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཚངས་པར་སྤྱོད་པ་ལ་མནའ་འདོར་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། ཚངས་པར་སྤྱོད་པར་ཞེས་བྱ་བ་ནི། ཚུལ་ཁྲིམས་ལ་མནའ་འདོར་བའོ། །མནའ་འདོར་བར་བྱེད་ན་ཞེས་བྱ་བ་ནི། ཡིད་ཆེས་པར་བྱ་བའི་ཕྱིར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་

---

^{[མ་དཔེ་གཟིགས་ན་འདིར་གནོན།]}

ཅུང་ཟད་སངས་རྒྱས་ལ་མནའ་འདོར་བར་བྱེད་ན་ལྟུང་བྱེད་དོ། །ཆོས་ལ་ནི་ལྟུང་བྱེད་དོ། །དགེ་འདུན་ལ་ནི་ལྟུང་བྱེད་དོ། །ཚངས་པར་སྤྱོད་པ་ལ་གནས་པ་ལ་ནི་ལྟུང་བྱེད་དོ། །མཁན་མོ་དང། སློབ་དཔོན་ལ་ནི་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཅིག་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས་དགེ་སློང་མ་རྣམས་དང་ལྷན་ཅིག་འཐབ་མོ་བྱུང་སྟེ། དེ་དག་འཐབ་མོ་བྱུང་བ་ན། དགེ་སློང་མ་རྣམས་ལ་གླེང་བར་བྱེད་དོ། །གང་གི་ཚེ་ལྕོགས་པར་མི་ནུས་པ་དེའི་ཚེ། དེ་དག་དགེ་སློང་མ་རྣམས་ལ་ཉེས་པར་མཐོང་བས་གླེང་བར་བྱེད། ཉེས་པར་ཐོས་པ་དང། ཉེས་པར་དོགས་པས་གླེང་བར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། དགེ་སློང་མ་རྣམས་ལ། ཉེས་པར་མཐོང་བ་དང། ཉེས་པར་ཐོས་པ་དང། ཉེས་པར་དོགས་པས། གླེང་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ་།དགེ་སློང་མ་རྣམས་ལ་ཞེས་བྱ་བ་ནི་ཆོས་འདི་པ་རྣམས་ལའོ། །ཉེས་པར་མཐོང་བས་གླེང་ན་ལྟུང་བྱེད་དོ། །ཉེས་པར་ཐོས་པ་དང། ཉེས་པར་དོགས་པས་མ་བརྟགས་པར་གླེང་བར་བྱེད་ན་ཞེས་བྱ་བ་ནི་གཤེ་ནའོ། །ལྟུང་བྱེད་དོ་ཞེས་བྱ་བ་ནི། གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉེས་པར་མཐོང་བས་གླེང་ན་ལྟུང་བྱེད་དོ། །ཉེས་པར་ཐོས་པས་ན། ལྟུང་བྱེད་དོ། །ཉེས་པར་དོགས་པས་ན། ལྟུང་བྱེད་དོ། །ལྟུང་བྱེད་བཅུ་གཅིག་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། མུན་པར་རྒྱ་སྐྱེགས་བཅངས་པ་དང། །མ་གཏད་པར་ནི་འགྲོ་བ་དང། །ཁྱིམ་པའི་སྟན་ནི་བཤམས་པ་དང། །དེང་ནི་ཉལ་བར་མི་བྱའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ལྗོངས་རྒྱབ་ན་རི་བར་ཞིག་ཏུ་ཕྱིན་ནས། དེ་དག་གིས་དེར་ཁྱིམ་བདག་ཅིག་ལ། གནས་ཞིག་བརྙས་ཏེ། དེ་དག་ནུབ་མོ་དེ་ན་

---

^{[མ་དཔེ་གཟིགས་ན་འདིར་གནོན།]}

རྟེན་ཕྱིད་འཁོད་པ་ལས། ཇི་ཙམ་ན་མཚན་མོ་ནམ་སྲོས་པ་ན། ཆར་བབ་ནས་དེ་དག་ཕུགས་ལོགས་སུ་ནུར་རྟེ་ཞུགས་པ་དང། དེ་ན་ཡང་སྐྱེས་པ་ཞིག་སྔར་ཞུགས་པ་ཞིག་ཡོད་པ་དེས། དགེ་སློང་མ་བཟུང་བ་དང། དེས་ཁས་བཏབ་བོ། །ཇི་ཙམ་ན་དགེ་སློང་མ་རྣམས་ཀྱིས་གསོལ་བ་བྱས་ཏེ་བརྟང་བ་ནས། མཉན་ཡོད་དུ་ལྷགས་མ་དང། སྐབས་དེ་དགེ་སློང་མ་རྣམས་ལ་རྒྱས་པར་སྨྲས་པའི་བར། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་བྱུང་བ་དེ་ནི་དགེ་སློང་མ་དག་ཁྱིམ་དུ་མ་བརྟགས་པར་གནས་འཆའ་བ་ལས་གྱུར་ཏོ་སྙམ་ནས། དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གནས་མ་བརྟགས་པར་གནས་སུ་གནས་འཆའ་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པ་དག་གིའོ། །གནས་ལ་མ་བརྟགས་པར་ཞེས་བྱ་བ་ནི་བརྟག་པ་མ་བྱས་པར་རོ། །གནས་པར་བྱེད་ན་ཞེས་བྱ་བ་ནི་ཁྱིམ་པའི་ཁྱིམ་དུ་ཉལ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མུན་ཁུང་དུ་ཁྱིམ་པའི་ཁྱིམ་དུ་མ་བརྟགས་པར་ཉལ་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ཁྱིམ་ཐབ་བྱེས་སུ་སོང་བའི་ཆུང་མ་ཞིག་གི་དྲུང་དུ་སོང་ནས་དྲིས་པ། ཁྱོད་དེའི་བར་དུ་ཇི་ལྟ་བུ་ཞིག་གིས་ཉོན་མོངས་པ་སེལ་བར་བྱེད། ཁྱོད་ནི་རབ་ཏུ་བྱུང་བ་ལགས་ན། འདྲི་ཅིར་འཚལ་ཞེས་བྱ་བ་ནས། རྒྱ་སྐྱེགས་བཅངས་པས་ལགས་སོ་ཞེས་བྱ་བའི་བར་རོ། །དེ་ནས་སྦོམ་དགའ་མོས་ཇི་ཙམ་ན་བཙུན་མོ་ཕྲེང་ལྡན་མའི་དྲུང་དུ་སོང་ནས་དྲིས་པ། བཙུན་མོ་གལ་ཏེ་གསུས་པོ་ཆེ་ཡུལ་གཞན་དུ་གཤེགས་ན། དེའི་བར་དུ་ཇི་ལྟ་བུ་ཞིག་གིས་ཉོན་མོངས་པ་སེལ་བར་མཛད། དེས་འདི་སྐད་ཅེས་ཁྱོད་ནི་རབ་ཏུ་བྱུང་བ་ཡིན་ན། འདྲི་ཅི་དགོས་ཞེས་བྱ་བ་ནས་རྒྱ་སྐྱེགས་བཅངས་པས་ཡིན་ནོ་ཞེས་བྱ་བའི་བར་རོ། །དེ་

---

^{[མ་དཔེ་གཟིགས་ན་འདིར་གནོན།]}

ནས་སྦོམ་དགའ་མོ་རྒྱ་སྐྱེགས་ཀྱི་ཚིགས་མ་མཁན་གྱི་དྲུང་དུ་སོང་སྟེ་ཞེས་བྱ་བ་ན། རྒྱ་སྐྱེགས་བཅངས་པ་ཞིག་ཉོས་ཏེ། ཇི་ཙམ་ན་དབྱར་ཁང་དུ་འོངས་ནས། མཚན་མོ་རྐང་པའི་རྟིང་པ་ལ་བཅིང་ནས། ཉོན་མོངས་པ་སེལ་བར་བྱེད་པ་དང། ཇི་ཙམ་ན་དབྱར་ཁང་དུ་མེ་ཤོར་བར་གྱུར་ཏོ། །དེ་ནས་སྦོམ་དགའ་མོ་སྡངས་ཤིང་བརྟགས་པས། གཅེར་བུ་སྒྲེན་མོར་སྐས་ལས་བ་བས་པ་དང། ཀྲོལ་ཀྲོལ་ཟེར་བའི་སྒྲ་བྱུང་བ་ན། སྐྱེ་བོའི་ཚོགས་ཆེན་པོས་བགད་དོ་ཞེས་བྱ་བ་ནས། དེས་འདི་སྐད་ཅེས་མ་ལ་དྲིས་ཤིག །སྲིང་མོ་ལ་དྲིས་ཤིག །བུ་མོ་ལ་དྲིས་ཤིག་ཅེས་སྨྲས་སོ་ཞེས་བྱ་བའི་བར་རོ། །ཇི་ཙམ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྒྱ་སྐྱེགས་བཅངས་པ་འཆང་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །བཅངས་པ་ཞེས་བྱ་བ་ནི། རྒྱ་སྐྱེགས་ལས་བཅོས་པའོ། །འཆང་ན་ཞེས་བྱ་བ་ནི་རང་གིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྒྱ་སྐྱེགས་བཅངས་པ་འཆང་ན་ཐམས་ཅད་དུ་ལྟུང་བྱེད་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཞེས་བྱ་བ་ནས། བཙུན་པ་སྦོམ་དགའ་མོས་སྐྱེ་བོའི་ཚོགས་ཆེན་པོ་གད་མོ་བཏོན་པ་ལ་གཟིགས་ཞེས་བྱ་བའི་བར་རོ། །བཅོམ་ལྡན་འདས་ཀྱིས་བཀའ་སྩལ་པ་།དགེ་སློང་དག་ད་ལྟར་གྱི་འདིར་མ་ཟད་ཀྱི། འདས་པའི་དུས་ན་ཡང་སྦོམ་དགའ་མོས་སྐྱེ་བོའི་ཚོགས་ཆེན་པོ་གད་མོ་བཏོན་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པ་ན། གྲོང་ཁྱེར་ཝཱ་ར་ཎཱ་སིར་རྒྱལ་པོ་ཚངས་བྱིན་ཞེས་བྱ་བ་རྒྱལ་སྲིད་བྱེད་དུ་འཇུག་གོ། ཇི་ཙམ་ན་བྲམ་ཟེ་གཅིག་གིས། ལྗོངས་ཀྱི་བྲམ་ཟེ་ཞིག་གི་བུ་མོ་ཆུང་མར་བླངས་པ་དང་ཞེས་བྱ་བ་ནས། བྲམ་ཟེའི་བུ་མོ་དེ་བྲམ་ཟེ་དེ་ལ་འཇར་དུ་མ་བཏུབ་ནས་ཞེས་བྱ་བའི་བར་ཏེ། གྱོས་པོའི་ཁྱིམ་དུ་བསྐྱལ་བའི་ཕྱིར། བུ་མོ་དེ་བོང་བུ་ཞིག་ལ་ཞོན་ཏེ། བུ་མོ་དེའི་ཕའི་ཁྱིམ་

---

^{[མ་དཔེ་གཟིགས་ན་འདིར་གནོན།]}

གང་ན་བ་དེར་ཆས་པ་དང། ཇི་ཙམ་ན་བུ་མོ་དེས་དྲིས་པ་ལས། དེས་ཀྱང་སྨྲས་སོ་ཞེས་བྱ་བ་ནས། བུ་མོ་དེས་དྲིས་པ་ན་ཐ་སྙད་ཇི་ལྟ་བ་བཞིན་དུ་བྲམ་ཟེ་དེས་ཉལ་བར་བརྩམས་སོ་ཞེས་བྱ་བ་ནས། བྲམ་ཟེ་ཅི་གཙང་སྒྲ་འདོད་པ་ཡིན་པས་ཆུ་ལེན་པར་བྱེད་པ་ན་ཇི་ཙམ་ན་བྱ་མ་བུམ་འཁྲོགས་པའི་སྒྲས་བོང་བུ་འདྲོགས་ཏེ། དེ་འཁྲོགས་པས་བུ་མོ་དེ་ཆ་བྱད་དེ་ཉིད་ཀྱིས་གྲོང་ཁྱེར་དུ་སོང་བ་ན་སྐྱེ་བོའི་ཚོགས་ཆེན་པོས་གད་མོས་བཏབ་པའི་བར་རོ། །དེ་ནས་བྲམ་ཟེ་དེས་དེའི་ཚེ་ཚིགས་སུ་བཅད་དེ་སྨྲས་པ། བྱ་མ་བུམ་ནི་འཁྲོགས་པ་ཡིས། །བུང་བུ་རབ་ཏུ་འདྲོགས་གྱུར་ཏེ། །བུ་མེད་འདི་ཡི་ལས་དག་གིས། །བདག་ཀྱང་འདིར་ནི་ངོ་ཚའོ། །དགེ་སློང་དག །ཇི་སྙམ་དུ་སེམས། བྲམ་ཟེའི་བུ་མོ་གང་ཡིན་པ་དེ་ནི། སྦོམ་དགའ་མོ་འདི་ཉིད་ཡིན་ཏེ། ཞེས་བྱ་བ་ནས་སྔོན་དང་ད་ལྟར་ཡང་ཞེས་བྱ་བའི་བར་རོ། །ལྟུང་བྱེད་བཅུ་གཉིས་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་ཁྱིམ་བདག་གི་ཆུང་མ་རབ་ཏུ་མང་པོས་སྦོམ་དགའ་མོ་ལ་འཕགས་མ་ཆོས་བཤད་དུ་གསོལ། ཞེས་གསོལ་བ་བཏབ་པ་དང། དེས་འདི་སྐད་ཅེས་སྟན་ཤོམས་ཤིག །ཅེས་སྨྲས་སོ། །དེ་དག་གིས་དེའི་ཆེད་དུ་སྟན་བཤམས་པ་དང། དེ་སྟན་བཤམས་པ་ཉིད་ལ་འདུག་ནས་ཁ་རྩིག་པ་ལ་བལྟས་ཏེ་མདོ་རིང་པོ་བཟུང་སྟེ་འཆད་པ་ལ་ཞུགས་སོ། །དེ་ནས་བྲམ་ཟེ་དང། ཁྱིམ་བདག་གི་ཆུང་མ་དེ་དག་འདི་སྙམ་དུ་སེམས་ཏེ། དགེ་སློང་མ་རྣམས་ཀྱིས་ལས་ནི་བཀླག་པར་བྱ་བ་དང། དྲན་པར་བྱ་བ་འདི་ཁོ་ནར་ཟད་ཀྱི། བདག་ཅག་ནི་ཁྱིམ་གྱི་བྱ་བ་དག་ཉམས་པར་འགྱུར་རོ། །སྙམ་དུ་བསམས་ནས་དོང་ངོ། །ཕྱི་བཞིན་འབྲང་བའི་དགེ་སྦྱོང་མ་དེས་སྨྲས་པ། འཕགས་མ་སུ་ལ་ཆོས་འཆད། དེས་འདི་སྐད་ཅེས་སྨྲས་སོ། །བྲམ་ཟེ་དང། ཁྱིམ་བདག་གི་ཆུང་མ་རྣམས་ལའོ། །དེ་དག་ནི་སྐྱོ་ནས་དོང་ལགས་སོ་ཞེས་བྱ་བ་ནས། སྦོམ་དགའ་མོས་ཀྱང་སྟན་བོར་ཏེ་སོང་ངོ་ཞེས་བྱ་བའི་བར་རོ། །སྟན་དེ་མ་བྱིན་པར་ལེན་པ་དག་གིས་བརྐུས་སོ་ཞེས་བྱ་བ་ནས། བྲམ་ཟེ་དང་ཁྱིམ་བདག་གི་ཆུང་མ་རྣམས་ཁ་ཟེར་བར་བྱེད་པའི་སྐབས་དེ་བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆོས་འཆད་པ་ན། ཁྱིམ་པ་ལ་སྟན་མ་གཏད་པར་བོར་ཏེ་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །སྟན་མ་གཏད་པར་ཞེས་བྱ་བ་ནི་བདག་པོ་ལ་མ་གཏད་པར་རོ། །འགྲོ་ན་ཞེས་བྱ་བ་ནི་སོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྟན་བདག་པོ་ལ་མ་གཏང་བར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་ཡུལ་དབུས་པའི་ཡུལ་ཆོས་ཀྱིས་བྲམ་ཟེ་དང། ཁྱིམ་བདག་རྣམས་ཀྱི་ཁྱིམ་ན་སྟན་བཤམས་པ་དག་མི་རྟུལ་བ་ཡིན་པས། བྲམ་ཟེ་ཞིག་གིས་སྟན་བཤམས་ནས། དེར་སྲུང་མ་ཞིག་བཞག་གོ་།སྦོམ་དགའ་མོ་ཡང་ཁྱིམ་དེར་བསོད་སྙོམས་ཀྱི་ཕྱིར་ཞུགས་ཏེ། དེས་འདི་སྐད་ཅེས་སྨྲས་སོ། །མཚན་བཟང་མ། བསོད་སྙོམས་བྱིན་ཅིག །དེ་ནས་བུད་མེད་དེས་འདི་སྐད་ཅེས་སྨྲས་སོ། །འཕགས་མ་སྟན་སྲུང་ལགས་སོ། །ཁོ་མོས་བསྲུང་གི །ཁྱོད་སོང་ལ་བསོད་སྙོམས་ཁྱེར་ཏེ་ཤོག་ཅིག །བུད་མེད་དེ་ཡང་བསོད་སྙོམས་ཀྱི་ཕྱིར་ནང་དུ་ཞུགས་པ་དང། སྦོམ་དགའ་མོས་ཀྱང་བྲམ་ཟེའི་སྟན་ལ་འདུག་གོ། བྲམ་ཟེ་དེ་འོངས་ནས་སྦོམ་དགའ་མོ་སྟན་དེའི་སྟེང་ན་འདུག་པ་མཐོང་ནས། སྨོད་པར་བྱེད་དོ། །ཞེས་བྱ་བའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་མ་གནང་བར་ཁྱིམ་གྱི་ནང་དུ་སྟན་ལ་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །མ་གནང་བར་ཞེས་བྱ་བ་ནི་ཁྱིམ་གྱི་བདག་པོ་ལ་མ་བརྟག་པར་རོ། །ཁྱིམ་གྱི་ནང་དུ་ཁྱིམ་པའི་སྟན་ལ་འདུག་ན་ཞེས་བྱ་བ་ནི་བསྡད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མ་གནང་བར་ཁྱིམ་

---

^{[མ་དཔེ་གཟིགས་ན་འདིར་གནོན།]}

པའི་སྟན་ལ་འདུག་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རབ་ཏུ་མང་པོ་ལྗོངས་རྒྱུ་ཞིང་དོང་བ་དང། ཐ་ག་པ་ཞིག་གི་ཁྱིམ་དུ་ནུབ་མོ་བྲང་བཏབ་སྟེ་འདུག་གོ། དེའི་འོག་ཏུ་མུན་སྲོས་པ་དང། ཁྱིམ་བདག་འོངས་ན་དེས་དགེ་སློང་མ་དེ་དག་མ་མཐོང་མ་ཐོས་སོ། །དེ་ནས་ཁྱིམ་བདག་དེ་ཆུང་མ་དང་ལྷན་ཅིག་ཀུན་ཏུ་སྤྱོད་པ་ལ་ཞུགས་པ་ན། དེས་སྐད་ངན་ཤོར་བ། གཞོན་ནུ་རབ་ཏུ་བྱུང་བའི་དགེ་སློང་མ་ཞིག་ཡོད་པ་དེས་ཐོས་ནས་བགད་དོ། །དེ་ནས་ཁྱིམ་བདག་གིས། ཁྱིམ་བདག་གི་ཆུང་མ་དེ་ལ་འདི་སྐད་ཅེས་སྨྲས་སོ། །དེ་སུ་ཞིག །དེས་སྨྲས་པ། དགེ་སློང་མའོ། །ཁྱིམ་བདག་དེས་ཐོས་ནས། ཁྲོས་ཏེ་འདི་སྐད་ཅེས་ཅིའི་ཕྱིར་ཁྱོད་ཀྱིས། འཇིག་རྟེན་ལ་ཅོ་འདྲི་བ་རྣམས་ཀྱི་གནས་སྦྱིན། ཞེས་སྨྲས་ནས། དེ་ཁྲོས་ཏེ། ནམ་ཕྱེད་ན་སྒོར་བཏོན་པ་དང། དེ་དག་གིས་གསོལ་བ་བཏབ་པ་དང། ཞེས་བྱ་བ་ནས། སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་གྱི་བདག་པོ་ལ་མ་བརྟགས་པར་ཁྱིམ་གྱི་ནང་དུ་ནུབ་མོ་གནས་བཅས་ཏེ་འདུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་ཆོས་འདི་པའོ། །ཐ་ག་པའི་ཁྱིམ་གྱི་བདག་པོ་ལ་མ་བརྟགས་པར་ཁྱིམ་གྱི་ནང་དུ་ཞེས་བྱ་བ་ནི། ཐ་ག་པའི་ཁྱིམ་དུའོ། །ནུབ་མོ་གནས་བཅས་ཏེ་འདུག་ན་ཞེས་བྱ་བ་ནི། ཉལ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་གྱི་བདག་པོ་ལ་མ་བརྟགས་པར་ཁྱིམ་གྱི་ནང་དུ་ནུབ་མོ་གནས་འཆའ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གཉིས་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། སྔ་ནས་འདུག་པར་ཤེས་པ་དང། །ནད་པའི་རིམ་གྲོ་བྱ་བ་དང། །དབྱར་ཁང་ནས་ནི་མི་བསྐྲད་དང། །ཁྲི་དང་གདིང་བ་གཅིག་ལ་མིན། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་ལྗོངས་རྒྱུ་ཞིང་ཁྱིམ་བདག་གཅིག་གི་ཁྱིམ་དུ་ཞུགས་པ་དང། དེ་ན་ཡང་དགེ་སློང་མ་སྔ་ནས་

---

^{[མ་དཔེ་གཟིགས་ན་འདིར་གནོན།]}

འཁོད་པ་དག་ཡོད་པ་དེ་དག་གིས། དེ་ལ་འཇིག་རྟེན་པའི་ཚུལ་དག་མ་བྱས་པ་དང། དེས་དེ་དག་ཐབས་ཀྱིས་ཁྱིམ་དེ་ནས་བསྐྲད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་དག་སྔ་ནས་འདུག་པར་ཤེས་བཞིན་དུ། དེའི་འོག་ཏུ་འོངས་ནས། ཁྱིམ་ནས་སྐྲོད་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྔ་ནས་འདུག་པར་ཞེས་བྱ་བ་ནི། ཐོག་མ་ནས་གནས་པར་རོ། །ཤེས་བཞིན་དུ་ཞེས་བྱ་བ་ནི། རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །དགེ་སློང་མ་རྣམས་ཞེས་བྱ་བ་ནི། ཆོས་འདི་པ་དག་གོ་།དེའི་འོག་ཏུ་འོངས་ནས་ཞེས་བྱ་བ་ནི། དུས་གཞན་ནའོ། །ཁྱིམ་ནས་སྐྲོད་ན་ཞེས་བྱ་བ་ནི་གནས་ནས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཅི་ཙམ་ཅུང་ཟད་དགེ་སློང་མ་སྔ་ནས་འཁོད་པ་དག་ཁྱིམ་ནས་སྐྲོད་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གསུམ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོས། ལྷན་ཅིག་གནས་པ་དང། ཉེ་གནས་དག་ཉེ་བར་བཞག་ནས། ན་བ་ན་རིམ་གྲོ་མི་བྱེད་དོ། །དེ་དག་མགོན་མེད་པས་ཚུལ་མ་ཡིན་པར་སྡུག་བསྔལ་བར་གྱུར་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལྷན་ཅིག་གནས་པ་དང། ཉེ་གནས་དག་ཉེ་བར་གཞག་ནས། ན་བ་ན་རིམ་གྲོ་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ལྷན་ཅིག་གནས་པ་དང། ཉེ་གནས་དག་ཉེ་བར་བཞག་ནས་ཞེས་བྱ་བ་ནི། རབ་ཏུ་ཕྱུང་སྟེ་བཞག་ནས་སོ། །ན་བ་ན་ཞེས་བྱ་བ་ནི། ནད་ཀྱིས་ཐེབས་ནའོ། །རིམ་གྲོ་མི་བྱེད་ན་ཞེས་བྱ་བ་ནི། རྩ་བའི་སྨན་ལ་སོགས་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་

---

^{[མ་དཔེ་གཟིགས་ན་འདིར་གནོན།]}

ཉེ་བར་བཞག་ནས། ན་བ་ན་རིམ་གྲོ་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་གསུམ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམས་པ། བདག་གིས་དགེ་སློང་མ་གང་ཞིག་དབྱར་ཁང་འདི་ནས་བསྐྲད་པར་བྱ་སྙམ་པ་ལས། འདི་སྙམ་དུ་སྐྱེ་དགུའི་བདག་མོ་ཆེན་མོ་འདི་ནི་སྤོང་བ་པ་འཁོར་རྒྱ་ཆེན་པོ་ཅན་ཡིན་ནོ། །ཆོས་སྦྱིན་མ་འདི་ཡང་ལུང་འབོགས་པ་པ་འཁོར་རྒྱ་ཆེན་པོ་ཅན་ཡིན་ནོ། །གོའུ་ཏ་མི་སྐེམ་མོ་འདི་ནི་དོན་ཉུང་བ་ཅན་ཡིན་གྱི། གོའུ་ཏ་མི་ཆུང་ངུ་བསྐྲད་པར་བྱའོ་སྙམ་དུ་དེས་བསམས་སོ། །དེ་ནས་སྦོམ་དགའ་མོ་སྔ་དྲོའི་ཚེ། ལྟོའི་གཏམ་དག་གླེངས་ནས། སྔ་དྲོ་ཤམ་ཐབས་བགོས་ཏེ། མ་ལུས་པར་ཆས་ཏེ་དོང་ངོ། །ཇི་ཙམ་ན་གོའུ་ཏ་མི་སྐེམ་མོས་དགེ་སློང་མ་དེ་དག་དགེ་བའི་ཕྱོགས་ལ་སྤྱར་ནས། དེ་ནས་གོའུ་ཏ་མི་སྐེམ་མོ་འདི་སྙམ་དུ། མ་ལ་བདག་གིས་སྦོམ་དགའ་མོ་ལ་ཡང་ཆོས་བཤད་པར་བྱའོ་སྙམ་དུ་བསམས་སོ། །དེ་ནས་གོའུ་ཏ་མི་སྐེམ་སྦོམ་དགའ་མོ་ལ་ཕུ་ནུ་མོ་ཅི་ཁྱོད་ལྟོ་ཁོ་ན་སེམས་ཤིང་འདུག་གི་།དགེ་བའི་ལ་མ་ཡིན་ནམ་ཞེས་ཆོས་བཤད་པ་བརྩམས་པ་དང། དེ་ནས་སྦོམ་དགའ་མོ་འདི་སྙམ་དུ་བདག་གིས་ཡུན་རིང་མོ་ཞིག་ལོན་ནས་གླགས་རྙེ་དོ། །སྙམ་དུ་བསམས་ཏེ། དེས་དེ་ལ་བུའི་ཤེ་ཟན་མོ། སེམས་འཁྲུགས་མ། དུར་དུ་བཅུག་མ་ཞེས་སྤྱོས་ནས། དབྱར་གྱི་ནང་ལོགས་སུ་དབྱར་ཁང་ནས་བསྐྲད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས། འཁྲུགས། རྔམ། ཡི་མ་རངས་པར་གྱུར་ནས། དགེ་སློང་མ་དབྱར་ཁང་ནས་སྐྲོད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། ཁྲོས་འཁྲུགས་རྔམ་ཞེས་བྱ་བ་ནི། ཁྲོ་བའི་ཀུན་ནས་དཀྲིས་པར་གནས་ནས་སོ། །དགེ་སློང་མ་ཞེས་བྱ་བ་ནི། གོའུ་ཏ་མི་སྐེམ་མོའོ། །དབྱར་ཁང་ནས་ཞེས་བྱ་བ་ནི། གནས། ནས་སོ། །སྐྲོད་ན་ཞེས་བྱ་བ་ནི་འབྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ལུས་སྐྱོད་

---

^{[མ་དཔེ་གཟིགས་ན་འདིར་གནོན།]}

པར་བྱེད་པའམ། ཚིག་ཏུ་སྨྲ་བར་བྱེད་པའམ། གཉི་ག་ལྡན་པས་ཏེ། པའི་ལྟུང་བྱེད་ལས་ཇི་སྐད་འབྱུང་བ་བཞིན་ནོ། །ལྟུང་བ་བྱེད་བཅུ་གསུམ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་འཆི་ལྟས་མ་དང། ཉེ་བའི་འཆི་ལྟས་མ་ཁྲི་གཅིག་ལ་ཉལ་བར་བྱེད་དོ་།དེ་གཉིས་ཁྲི་གཅིག་ལ་ཉལ་བ་ན། དཔེར་ན་སྐྱེས་པ་དང་བུད་མེད་ལྷན་ཅིག་འཁོད་པ་བཞིན་དུ། རྒོད་པ་དང། འཕྱར་གཡེང་དང། ལུས་ཀྱི་རྩབ་ཧྲལ་བྱེད་པ་དང། དོན་ཉུང་བའི་དགེ་སློང་མ་རྣམས་འཕྱ་བར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་དང་ལྷན་ཅིག་ཁྲི་གཅིག་ལ་ཉལ་ན་ལྟུང་བྱེད་དོ། །ཡང་གང་ཞེས་བྱ་བ་ནི། འཆི་ལྟས་མ་དང། ཉེ་བའི་འཆི་ལྟས་མའོ། །ཁྲི་གཅིག་ལ་ཞེས་བྱ་བ་ནི། མལ་གཅིག་ཏུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་དང་ལྷན་ཅིག་ཁྲི་གཅིག་ལ་ཉལ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་ནས་ཡང་དགེ་སློང་མ་དག་རྒྱུ་ཞིང་དོང་བ་ན་ཁྲི་ཆེན་པོ་དག་རྙེད་ནས། དེ་དག་རེ་རེ་བཟུང་སྟེ། ཉལ་བ་ན། ལྷག་མ་དག་སྡུག་བསྔལ་བར་གྱུར་པ་དང། ཁྱིམ་པ་མོ་དག་གིས་འདི་སྐད་ཅེས་སྨྲས་སོ། །འཕགས་མ་དག །ཁྱེད་ཅག་གི་ཁྲི་འདི་ཐམས་ཅད་ཞུགས་ཤིང་ལགས་ན། ཅིའི་སླད་དུ་ཁྱེད་ཅག་རེ་རེ་གཟིམས། དེ་དག་གིས་འདི་སྐད་ཅེས། བཅོམ་ལྡན་འདས་ཀྱིས་བཀག་གོ་ཞེས་སྨྲས་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། ལྷག་པར་ངོ་ཚ་བ་དང། འཛེམ་པ་ཉེ་བར་བཞག་སྟེ། གཏུར་བུ་དང། ལྷུང་བཟེད་ཀྱི་གདུ་བུ་ལ་སོགས་པ་བར་དུ་བཞག་ནས་རང་རང་གི་ལུས་གོས་ཀྱིས་དཀྲིས་ཤིང་ཉལ་བར་བྱ་སྟེ། དེ་ལ་འགྱོད་པར་མི་བྱའོ། །ལྟུང་བྱེད་བཅུ་གསུམ་པའི་བཞི་པ་རྫོགས་སོ།། །།དེ་བཞིན་དུ་གདིང་བ་ལ་ཡང་རྒྱས་པར་བརྗོད་པར་བྱའོ། །བསླབ་པ་བཅའ་བའི་བར་དུ་མཛད་དོ། ཡང་དགེ་སློང་མ་གང་དགེ་སློང་མ་དང་ལྷན་ཅིག་གདིང་བ་

---

^{[མ་དཔེ་གཟིགས་ན་འདིར་གནོན།]}

གཅིག་ལ་བར་དུ་མ་བཅད་པར་ཉལ་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི། འཆི་ལྟས་མ་དང་། ཉེ་བའི་འཆི་ལྟས་མའོ། །གདིང་བ་ཞེས་བྱ་བ་ནི། སྟེང་རིམ་དུ་གདིང་བའོ། །བར་དུ་མ་བཅད་པར་ཞེས་བྱ་བ་ནི། ལུས་ཀྱིས་ལུས་ཀྱི་རེག་པ་རང་གིར་བྱེད་པའོ། །ཉལ་ན་ཞེས་བྱ་བ་ནི། མཚན་མོ་གནས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་དང་ལྷན་ཅིག་གདིང་བ་ལ་བར་དུ་མ་བཅད་པར་ཉལ་ན་ཐམས་ཅད་དུ་ལྟུང་བྱེད་དུ་འགྱུར་ཏེ། གཞུང་བླ་མ་ལས་ཇི་སྐད་འབྱུང་བ་བཞིན་ནོ། །ལྟུང་བྱེད་བཅུ་གསུམ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། དབྱར་གྱི་ནང་དུ་འགྲོ་མི་བྱ། །དབྱར་རྫོགས་ནས་ནི་འགྲོ་བ་དང། །དོགས་དང་བཅས་པའི་ཡུལ་འཁོར་གཉིས། །ལྷ་ཁང་དག་ནི་ཕྱི་མ་ཡིན། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་འཁོར་དང་བཅས་པ། དབྱར་གྱི་ནང་ལོགས་སུ་རྒྱུ་ཞིང་འདོང་བ་ན། དགེ་སློང་མ་དེ་རྣམས་ལ། དགེ་སློང་མ་རྣམས་ཀྱིས་དྲིས་པ། ཕུ་ནུ་མོ་དག །ཁྱེད་ཅིའི་ཕྱིར། དབྱར་གྱི་ནང་ལོགས་སུ་རྒྱུ་ཞིང་འདོང། དེ་དག་གིས་འདི་སྐད་ཅེས། འཕགས་མ་སྦོམ་དགའ་མོ་ན་རེ། ཁོ་མོ་སྡེ་སྣོད་གསུམ་ཤེས་ཀྱི། འདོང་ངོ་ཞེས་ཟེར་རོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་གྱི་ནང་ལོགས་སུ་རྒྱུ་ཞིང་འདོང་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དབྱར་གྱི་ནང་ལོགས་སུ་ཞེས་བྱ་བ་ནི། དགག་དབྱེ་མ་བྱས་པར་རོ། །འདོང་ན་ཞེས་བྱ་བ་ནི། གྲོང་རྡལ་ལམ། གྲོང་ཁྱེར་རམ། ཡུལ་འཁོར་རམ། རྒྱལ་པོའི་ཕོ་བྲང་དག་ཏུ་འདོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དབྱར་གྱི་ནང་ལོགས་སུ་རྒྱུ་ཞིང་འདོད་ན་ལྟུང་བྱེད་དོ། །ལྟུང་བྱེད་བཅུ་བཞི་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ལ། དགེ་སློང་མ་རྣམས་ཀྱིས་སྨྲས་པ།

---

^{[མ་དཔེ་གཟིགས་ན་འདིར་གནོན།]}

འཕགས་མ། དགག་དབྱེ་བགྱིས་ལགས་ཀྱི། རྒྱུ་ཞིང་བཞུད་དོ། །དེས་འདི་སྐད་ཅེས་སྨྲས་སོ། །ཁོ་མོ་སྡེ་སྣོད་གསུམ་པ་ཡིན་ཏེ། ད་དུང་རྒྱུ་བའི་དུས་ལ་མ་བབ་བོ། །དགེ་སློང་མ་དེ་དག་ལ། དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་ཁྱེད་ཅག་དགག་བྱེད་ནི་བྱ་ཟིན་ན། ཅིའི་ཕྱིར་རྒྱུ་ཞིང་མི་འདོང། དེ་དག་གིས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོ་ན་རེ། ཁོ་མོས་སྡེ་སྣོད་གསུམ་ཤེས་ཏེ། ད་དུང་རྒྱུ་བའི་དུས་ལ་མ་བབ་བོ་ཞེས་ཟེར་རོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་གནས་ནས་རྒྱུ་ཞིང་མི་འདོང་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དབྱར་གནས་ནས་རྒྱུ་ཞིང་མི་འདོང་ན་ཞེས་བྱ་བ་ནི་དགག་དབྱེ་བྱས་ནས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགག་དབྱེ་བྱས་ནས། རྒྱུ་ཞིང་མི་འདོང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཐ་ན་དབྱར་ཁང་གཅིག་ནས་ཅིག་ཤོས་སུ་ཡང་འདོང་བར་བྱའོ། །ལྟུང་བྱེད་བཅུ་བཞི་པའི་གཉིས་པ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་མ་སྐྱེས་དགྲས་སུ་ཡང་ཡངས་པ་ཅན་དུ་མ་འགྲོ་ཞིག་ཅེས་དྲིལ་བསྒྲགས་པ་བྱས་སོ། །དེ་ནས་དགེ་སློང་མ་རྣམས་རྒྱལ་པོའི་ཁབ་ནས་ཡངས་པ་ཅན་གང་ན་བ་དེར་རྒྱུ་ཞིང་འདོང་ངོ། །དེ་དག་དོང་བ་ན་ལམ་ཀར་ཚེམ་རྐུན་པ་དག་གིས་སུན་ཕྱུང་བའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་དོགས་པ་དང་བཅས་པའི་ཡུལ་འཁོར་དུ་འདོང་བར་མི་བྱའོ། །དེ་ནས་བཅོམ་ལྡན་འདས་ཀྱིས་བྱུང་བ་འི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དོགས་པ་དང་བཅས་པའི་ལམ་ནས་ནང་གི་ཡུལ་འཁོར་དུ་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི། ཆོས་འདི་པའོ། །དོགས་པ་དང་བཅས་པའི་ལམ་ཞེས་བྱ་

---

^{[མ་དཔེ་གཟིགས་ན་འདིར་གནོན།]}

བ་ནི། འཇིགས་པ་དང་བཅས་པར་གྲགས་པའོ། །ནང་གི་ཡུལ་འཁོར་ཞེས་བྱ་བ་ནི། ཕན་ཚུན་མི་མཐུན་པའི་འོ། །འགྲོ་ན་ཞེས་བྱ་བ་ནི། རྒྱུ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་དུ་ཅུང་ཟད་ཕན་ཚུན་མི་མཐུན་པའི་ཡུལ་འཁོར་གཉིས་སུ་རྒྱུ་ཞིང་འགྲོ་ན་ལྟུང་བྱེད་དོ། །ལྟུང་བྱེད་བཅུ་བཞི་པའི་གསུམ་པ་རྫོགས་སོ།། །།གླེང་གཞི་ནི་ཡངས་པ་ཅན་ནོ། །ཡངས་པ་ཅན་པ་དག་གིས། སུ་ཡང་རྒྱལ་པོའི་ཁབ་ཏུ་མ་འགྲོ་ཞིག་ཅེས་དྲིལ་བསྒྲགས་པ་བྱས་སོ་ཞེས་བྱ་བ་ནས། བསླབ་པ་བཅའ་བར་དུ་མཛད་དེ། ཡང་དགེ་སློང་མ་གང་དོགས་པ་དང་བཅས་པའི་ལམ་ནས་ཕྱི་རོལ་གྱི་ཡུལ་འཁོར་དུ་རྒྱུ་ཞིང་འགྲོ་ན་ལྟུང་བྱེད་དོ། །གཞུང་གོང་མ་ཇི་ལྟ་བ་བཞིན་དུ་ལྟུང་བ་ནི་རྗེས་སུ་མཐུན་པར་བྱའོ། །ལྟུང་བྱེད་བཅུ་བཞི་པའི་བཞི་པ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །དེ་ནས་སྦོམ་དགའ་མོ་ལྷ་ཁང་དུ་སོང་ནས། ལྷ་ཁང་པ་དག་དང། གཞན་ཡང་རྩོད་པ་བ་དག་དང་ལྷན་ཅིག་ཏུ་རྩོད་པ་བྱེད་ཅིང། དེའི་འོག་ཏུ་ཉི་མ་ཡོལ་ནས། དབྱར་ཁང་དུ་འོངས་ཏེ་རྒྱབ་དང་རྐེད་པར་ཚིར་ཅིག་ཅེས་ཟེར་བ་དང། དེ་དག་གིས་འདི་སྐད་ཅེས་སྨྲས་སོ། །ཁྱོད་གང་དུ་སོན། དེས་འདི་སྐད་ཅེས་སྨྲས་སོ། །ཁོ་མོས་ལྷ་ཁང་དུ་རྩོད་པ་རྣམས་ཚར་བཅད་དོ། །དེ་དག་གིས་འདི་སྐད་ཅེས་སྨྲས་སོ། །ཁྱོད་ཀྱི་ཕྱི་བཞིན་འབྲང་བའི་དགེ་སྦྱོང་མ་གང་ཞིག །དེས་འདི་སྐད་ཅེས་ཁོ་མོ་འབའ་ཞིག་སོང་ངོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བར་དུ་མཛད་དེ་ཡང་དགེ་སློང་མ་གང་ལྷ་ཁང་དུ་སོང་ནས་རྩོད་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྷ་ཁང་དུ་ཞེས་བྱ་བ་ནི། གཞན་མུ་སྟེགས་ཅན་གྱི་ལྷ་ཁང་ངོ། །སོང་ནས་ཞེས་བྱ་བ་ནི་ཞུགས་ནས་སོ། །རྩོད་པར་བྱེད་ན་ཞེས་བྱ་བ་ནི་འཐབ་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལྷ་ཁང་དུ་སོང་ནས་མུ་སྟེགས་

---

^{[མ་དཔེ་གཟིགས་ན་འདིར་གནོན།]}

ཅན་དག་དང་རྩོད་པར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བཞི་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་ལྷ་ཁང་ལྟ་བ་དགག་པ་མཛད་པ་དེའི་ཚེ། རི་མོ་མཁན་གྱི་ཁང་པ་བལྟ་བའི་ཕྱིར་འགྲོ་བ་དང། གར་མཁན་གྱི་ཁང་བ་བལྟ་བའི་ཕྱིར་འགྲོ་བ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རི་མོ་མཁན་གྱི་ཁང་པའམ། གར་མཁན་གྱི་ཁང་པ་བལྟ་བའི་ཕྱིར་འགྲོ་ན་ལྟུང་བྱེད་དོ། །གང་ཞེས་བྱ་བ་ནི་སྦོམ་དགའ་མོའོ། །རི་མོ་མཁན་གྱི་ཁང་པའམ། གར་མཁན་གྱི་ཁང་པ་ཞེས་བྱ་བ་ནི། དགེ་སློང་མ་རྣམས་འཇུག་པར་བྱ་བ་མ་ཡིན་པའི་ཁྱིམ་གང་དག་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རི་མོ་མཁན་གྱི་ཁང་པའམ། གར་མཁན་གྱི་ཁང་པ་བལྟ་བའི་ཕྱིར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བཞི་པའི་ཚིགས་སུ་བཅད་པའི་སྡོམ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་བཞི་པ། སྡོམ་ལ། ལོ་ནི་བཅུ་གཉིས་མ་ལོན་དང། །ལོན་ཡང་བསྒོ་བ་མ་བྱས་པར། །ཁྱིམ་སོ་བཟུང་བ་ལོ་བཅུ་གཉིས། །དེ་ཡང་དགེ་འདུན་མ་བསྐོས་ནའོ། །གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་གིས་དགེ་སློང་རྣམས་ལ་དྲིས་པ། ཁྱེད་ཅག་ལོ་དུ་ལོན་ན་བསྙེན་པར་རྫོགས་པར་བྱེད། དེ་དག་གིས་འདི་སྐད་ཅེས་སྨྲས་སོ། །ལོ་བཅུ་ལོན་ནའོ། །དེ་ནས་བཅུ་གཉིས་སྡེ་རྣམས་ཀྱིས། དགེ་སློང་རྣམས་ལ་འདི་སྐད་ཅེས་ཁོ་མོ་ཅག་ཀྱང་ལོ་བཅུ་ལོན་ན་བསྙེན་པར་རྫོགས་པར་བྱེད་ལ། ཁྱེད་ཀྱང་ལོ་བཅུ་ལོན་ན་བསྙེན་པར་རྫོགས་པར་བྱེད་ན། འདི་ལ་ཁྱེད་ཅག་དང། ཁོ་མོ་ཅག་ཏུ་ཁྱད་པར་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། ཅེས་སྨྲ་བའི་སྐབས་དེ་དགེ་སློང་རྣམས་ཀྱིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་

---

^{[མ་དཔེ་གཟིགས་ན་འདིར་གནོན།]}

སུ་གནང་སྟེ། དགེ་སློང་མ་ལོ་བཅུ་གཉིས་ལོན་ནས་བསྙེན་པར་རྫོགས་པར་བྱའོ། །དེ་ནས་སྦོམ་དགའ་མོ་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་པ་ན། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལོ་བཅུ་གཉིས་མ་ལོན་པར་ཞེས་བྱ་བ་ནི། བསྙེན་པར་རྫོགས་པར་བྱ་བ་ལོ་བཅུ་གཉིས་མ་ལོན་པ་གང་ཡིན་པའོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི། འཁོར་དུ་འཇོག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལོ་བཅུ་གཉིས་མ་ལོན་པར་འཁོར་དུ་འཇོག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅོ་ལྔ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ། བཅོམ་ལྡན་འདས་ཀྱིས་ལོ་བཅུ་གཉིས་མ་ལོན་པ་འཁོར་དུ་གཞག་པར་མི་བྱའོ། །ཞེས་གསུངས་པ་དེའི་ཚེ། དེ་དག་ཁྱད་པར་མེད་པ་ཁོ་ནར་འཁོར་དུ་འཇོག་ཅིང་བྱིས་པ། རྨོངས་པ། མི་གསལ་བ། མི་མཁས་པ་གང་དག་ཡིན་པ་དེ་དག་ཀྱང་འཁོར་དུ་འཇོག་པས། དེ་རྣམས་ཀྱང་མ་དུལ་བ་མ་བྱང་བར་གྱུར་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། འཁོར་འཇོག་པར་འདོད་པ་གང་ཡིན་པ་དེས་དགེ་འདུན་ལས་འཁོར་གཞག་པའི་སྡོམ་པ་གསོལ་པར་བྱའོ། །གསོལ་པ་ནི་འདི་ལྟར་བྱ་སྟེ། གནས་མལ་བཤམས་པ་བྱས་ལ་ཞེས་བྱ་བ་ནས། གཎྜཱི་བརྡུངས་ཏེ་དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། དགེ་སློང་མ་དེས་རྒན་པའི་མཐར་འདུག་ནས་དགེ་སློང་མའི་དགེ་འདུན་ལ་འདུད་པ་དང་བཅས་པས། ཐལ་མོ་སྦྱར་བ་བྱས་ནས་ཚིག་འདི་སྐད་ཅེས་འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་དགེ་སློང་མ་མིང་འདི་ཞེས་བགྱི་བ། འཕགས་མའི་དགེ་འདུན་ལས་འཁོར་

---

^{[མ་དཔེ་གཟིགས་ན་འདིར་གནོན།]}

གཞག་པའི་སྡོམ་པ་གསོལ་ལགས་ན། འཕགས་མའི་དགེ་འདུན་གྱིས་ཐུགས་བརྩེ་བ་ཉེར་བར་བཟུང་སྟེ། བདག་དགེ་སློང་མ་མིང་འདི་ཞེས་བགྱི་བ་ལ། འཁོར་གཞག་པའི་སྡོམ་པ་སྩལ་དུ་གསོལ་ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །གསོལ་བ་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། །དགེ་སློང་མ་མིང་འདི་ཞེས་བགྱི་བ་འདི་འཕགས་མའི་དགེ་འདུན་གྱི་སྤྱན་སྔར་མཆིས་ནས་འཁོར་གཞག་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བ་ལ་འཁོར་འཇོག་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། དགེ་སློང་མ་མིང་འདི་ཞེས་བགྱི་བ་འདི་འཕགས་མའི་དགེ་འདུན་གྱི་སྤྱན་སྔར་མཆིས་ནས་འཁོར་གཞག་པའི་སྡོམ་པ་གསོལ་ནས་འཕགས་མའི་དགེ་འདུན་གྱིས། དགེ་སློང་མ་མིང་འདི་ཞེས་བགྱི་བ་ལ། འཁོར་གཞག་པའི་སྡོམ་པ་སྩོལ་བར་མཛད་ན། འཕགས་མའི་དགེ་འདུན་གྱིས། དགེ་སློང་མ་མིང་འདི་ཞེས་བགྱི་བ་ལ་འཁོར་གཞག་པའི་སྡོམ་པ་སྩོལ་པར་བཟོད་པ་གང་དག་ལགས་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས། དགེ་སློང་མ་མིང་འདི་ཞེས་བགྱི་བ་ལ་འཁོར་གཞག་པའི་སྡོམ་པ་སྩལ་ལགས་ཏེ། འདི་ལྟར་ཅང་མི་གསུང་པས་དེ་དེ་བཞིན་དུ་འཛིན་ཏོ། །དེ་ནས་སྦོམ་དགའ་མོ་དགེ་འདུན་གྱིས་མ་གནང་བཞིན་དུ་འཁོར་འཇོག་པར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། དགེ་འདུན་ལས་དགེ་སློང་མའི་འཁོར་གཞག་པའི་སྡོམ་པ་མ་གསོལ་བར་འཁོར་འཇོག་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་འདུན་གྱིས་ཞེས་བྱ་བ་ནི། དེ་བཞིན་གཤེགས་པའི་ཉན་ཐོས་མའི་དགེ་འདུན་གྱིས་སོ། །འཁོར་འཇོག་པའི་སྡོམ་པ་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །མ་གསོལ་བར་ཞེས་བྱ་བ་ནི། མ་བསླངས་པར་རོ། །འཁོར་འཇོག་པར་བྱེད་ན་ཞེས་བྱ་བ་ནི། རབ་ཏུ་དབྱུང་བའམ་བསྙེན་པར་རྫོགས་པའམ། གནས་སྦྱིན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་གཞག་པའི་སྡོམ་པ་མ་གསོལ་པར། འཁོར་འཇོག་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅོ་ལྔ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་ཁྱིམ་སོ་བཟུང་བ་ལོ་བཅུ་གཉིས་ལོན་པ་དག་འོངས་པ་དང། རབ་ཏུ་བྱུང་ནས་དེ་དག་ལོ་ཉི་ཤུའི་པར་དུ་བཞག་པ་ལས་དེ་དག་གིས་འདི་སྐད་ཅེས་སྨྲས་སོ། །བདག་ཅག་ཅིའི་སླད་དུ་བསྙེན་པར་རྫོགས་པར་མི་བགྱིད། དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ད་དུང་ཁྱོད་ཀྱིས་མ་གོམས་སོ། །དེ་དག་གིས་འདི་སྐད་ཅེས། འཕགས་མ་དག་བདག་ཅག་སྡུམ་པ་ན་མཆིས་པ་ན། སྡུམ་ཐབ་ཀྱི་སེམས་གཟུང་བ་དང། ཁྱིམ་གྱི་ནང་མིའི་སེམས་གཟུང་བ་དང། དེ་བཞིན་དུ་ཁྱིམ་གྱི་བགྱི་བ་མང་པོ་དག་བགྱིས་ན། ད་བདག་ཅག་གིས་དགེ་སློང་མའི་དགེ་འདུན་གྱི་ཐུགས་མཉེས་པར་མི་འགྱུར་རམ་ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ཁྱིམ་སོ་བཟུང་བ་ལོ་བཅུ་གཉིས་ལོན་པ་ཡིན་ན། དེ་བསྙེན་པར་རྫོགས་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཁྱིམ་སོ་བཟུང་བ་ལོ་བཅུ་གཉིས་ལོན་པ་ཡིན་ན། བསྙེན་པར་རྫོགས་པར་བྱའོ། །ཞེས་བཀའ་སྩལ་པ་དེའི་ཚེ་སྦོམ་དགའ་མོས་ལོ་བཅུ་

---

^{[མ་དཔེ་གཟིགས་ན་འདིར་གནོན།]}

གཉིས་མ་ལོན་པ་དག་བསྙེན་པར་རྫོགས་པར་བྱེད་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དོ། །ཡང་དགེ་སློང་མ་གང་ཤེས་བཞིན་དུ་ཁྱིམ་སོ་བཟུང་བ་ལོ་བཅུ་གཉིས་སུ་མ་ལོན་པ་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི་རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །ཁྱིམ་སོ་བཟུང་བ་ཞེས་བྱ་བ་ནི་ཁྱིམ་གྱི་ཆོས་ལ་ལོ་བཅུ་གཉིས་སུ་གནས་པའོ། །ལོ་བཅུ་གཉིས་མ་ལོན་པ་ཞེས་བྱ་བ་ནི་ལོ་བཅུ་གཅིག་ལོན་པའོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི། དགེ་སློང་མའི་དངོས་པོར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མས་ཇི་ཙམ་ཅུང་ཟད་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ལྟུང་བྱེད་བཅོ་ལྔ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་སྐྱེས་བུ་གཏི་མུག་ཅན་འཕགས་སྐྱེས་པོ། །མི་དགེ་བའི་བཤེས་གཉེན་སྡུག་བསྔལ་གྱི་མ་མོ་ལ་བརྟེན་ནས་ཤཱཀྱ་རྣམས་ཁ་བཏག་པ་དེའི་ཚེ། ཤཱཀྱ་མོ་རབ་ཏུ་མང་པོ་དག །ཁྱིམ་ཐབ་དང། བུའི་མྱ་ངན་གྱིས་གདུངས་ནས་རབ་ཏུ་བྱུང་ངོ། །གང་གི་ཚེ་ཁྱིམ་ཐབ་དང། བུའི་མྱ་ངན་གྱིས་གདུངས་ནས་རབ་ཏུ་བྱུང་བ་དེའི་ཚེ། དེ་དག་ཉོན་མོངས་པས་མ་གདུངས་སོ། །གང་གི་ཚེ་དེ་དག་མྱ་ངན་སངས་པ་དེའི་ཚེ། དེ་དག་ཉོན་མོངས་པས་གདུངས་པར་གྱུར་ཏོ། །དེ་ནས་ཤཱཀྱ་མོ་རྣམས་ཀྱིས་སྐབས་དེ་སྦོམ་དགའ་མོ་ལ་སྨྲས་པ་དང། སྦོམ་དགའ་མོས་འདི་སྐད་ཅེས། ཁོ་མོ་ནི་ད་རྒས་པའི་གནས་སྐབས་ལ་བབ་པས་ཅི་བྱར་ཡོད། ཁྱེད་ཅག་ནི་གཟུགས་བཟང་བ། བལྟ་ན་སྡུག་པ། མཛེས་པ་ཡིན་གྱི། ད་སོ་སོར་ཤེས་པར་གྱིས་ལ། ནོར་ཅན་ནམ། ཚོང་དཔོན་ནམ། དེད་དཔོན་དག་དང་ལྷན་ཅིག་རྩེ་བར་གྱིས་ཤིག །དགའ་བར་གྱིས་ཤིག །དགའ་མགུར་སྤྱོད་པར་གྱིས་ཤིག་ཅེས་སྨྲས་སོ། །ཇི་ཙམ་ན་གོའུ་

---

^{[མ་དཔེ་གཟིགས་ན་འདིར་གནོན།]}

ཏ་མི་སྐེམ་མོའི་དྲུང་དུ་སོང་ནས། དེ་དག་གིས་གོའུ་ཏ་མི་སྐེམ་མོ་ལ་སྦོམ་དགའ་མོས་བསྟན་པ་དག་རྒྱས་པར་སྨྲས་པ་དང། དེས་འདི་སྐད་ཅེས་སྨྲས་སོ། །ཕུ་ནུ་མོ་དག །རེ་ཞིག་འཇིག་རྟེན་ཕ་རོལ་གྱི་སྡུག་བསྔལ་ལྟ་ཞོག་གི །ཁོ་མོས་འཇིག་རྟེན་འདིར་སྡུག་བསྔལ་ཉམས་སུ་མྱོང་བ་གང་ཡིན་པ་དེ་ཉོན་ཅིག །ཁྱིམ་ཐབ་ཤི་བ་དང། བུ་དང་བྲལ་བ་དང། ཕ་དང། མ་ཐོག་གིས་བསད་པ་དང། བུའི་ཤ་ཟོས་པ་དང། དུར་དུ་བཅུག་པ་དང། སེམས་འཁྲུགས་པ་དང། སྒྲེན་མོར་འཕྱན་པ་སྟེ། འདི་དག་དང་གཞན་ཡང་འཇིག་རྟེན་འདི་ཁོ་ན་ལ་སྡུག་བསྔལ་ཁོ་ན་ཉམས་སུ་མྱོང་ན། འཇིག་རྟེན་ཕ་རོལ་ལྟ་སྨོས་ཀྱང་ཅི་དགོས། ཕུ་ནུ་མོ་དག་དེ་ལྟ་བུ་མ་བྱེད་ཅིག་ཅེས། གོའུ་ཏ་མི་སྐེམ་མོས། ཤཱཀྱའི་བུ་མོ་རབ་ཏུ་མང་པོ་དེ་དག །མི་དགེ་བ་ལས་སེམས་བཟློག་སྟེ། དགེ་བ་ལ་སེམས་བཀོད་པ་དང། དེ་དག་གིས་འདི་སྐད་ཅེས། བདག་ཅག་སྦོམ་དགའ་མོས་ཕྱིར་མི་གཙང་བའི་དོང་དུ་བཅུག་གོ། ཞེས་སྨྲས་པའི་སྐབས་དེ། དགེ་སློང་དག་གིས། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྦྱིན་ཅིག །དེ་དག་ལོ་གཉིས་སུ་བསླབས་པ་དང། མངོན་པར་དགའ་བར་གྱུར་ཏོ། །གང་གི་ཚེ་བཅོམ་ལྡན་འདས་ཀྱིས། ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྦྱིན་ཅིག །ཅེས་གསུངས་པ་ན། དེ་དག་གིས་ཇི་ལྟར་བྱིན་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ལ་གཎྜཱི་བརྡུངས་ཏེ་ཞེས་བྱ་བ་ནས། དྲིས་པའི་ལན་གྱིས། དགེ་སློང་མ་རྣམས་ལ་ཡང་དག་པར་བསྒོ་ལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་དེས། རྒན་པའི་མཐར་འདུག་སྟེ་འདུད་པ་དང་བཅས་པས་ཐལ་མོ་སྦྱར་བ་བྱས་ཏེ། ཚིག་འདི་སྐད་ཅེས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་མིང་འདི་ཞེས་བགྱི་བ་མཁན་མོ་མིང་འདི་ཞེས་བགྱི་བས། བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ་མཁན་མོ་མིང་

---

^{[མ་དཔེ་གཟིགས་ན་འདིར་གནོན།]}

འདི་ཞེས་བགྱི་བས། འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་གསོལ་ལགས་ན། འཕགས་མའི་དགེ་འདུན་ཐུགས་བརྩེ་བ་ཅན། བརྩེ་བ་ཉེ་བར་བཟུང་སྟེ། བདག་མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་དུ་གསོལ། ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་འདུག་ཏུ་བཅུག་ནས། དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས། འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་མིང་འདི་ཞེས་བགྱི་བ། མཁན་པོ་མ་མིང་འདི་ཞེས་བགྱི་བས། ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་མིང་འདི་ཞེས་བགྱི་བ་འདི། མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་གསོལ་ཏེ། འཕགས་མའི་དགེ་འདུན་གྱིས། མིང་འདི་ཞེས་བགྱི་བ་འདི་ལ། མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྩོལ་བར་མཛད་ན། འཕགས་མའི་དགེ་འདུན་ལས་གང་དག་མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང་རྗེས་

---

^{[མ་དཔེ་གཟིགས་ན་འདིར་གནོན།]}

སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ། མཁན་མོ་མིང་འདི་ཞེས་བགྱི་བས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་རྗེས་སུ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་གི་ཚེ་དེ་དག་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་པ་དེའི་ཚེ། དེ་དག་བསླབ་པས་མངོན་པར་དགའ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དེའི་འོག་ཏུ་ཚངས་པར་སྤྱད་པ་ཉེ་བར་གནས་པའི་སྡོམ་པ་སྦྱིན་ཅིག །བཅོམ་ལྡན་འདས་ཀྱིས་ཚངས་པར་སྤྱད་པ་ཉེ་བར་གནས་པའི་སྡོམ་པ་བྱིན་ཅིག་ཅེས་གསུངས་ན། དེ་དག་གིས་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམ་པ་བྱ་སྟེ་ཞེས་བྱ་བ་ནས། དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། ཁྱིམ་སོ་བཟུང་བ་ལོ་བཅུ་གཉིས་ལོན་པ་དེས། རྒན་པའི་མཐར་འདུག་སྟེ། འདུད་པ་དང་བཅས་པས་དགེ་སློང་མའི་དགེ་འདུན་ལ་ཐལ་མོ་སྦྱར་བ་བྱས་ཏེ། ཚིག་འདི་སྐད་ཅེས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ཚངས་པར་སྤྱོད་པ་ཉེ་བར་གནས་པའི་སྡོམ་པ་གསོལ་ན། འཕགས་པའི་དགེ་འདུན་ཐུགས་བརྩེ་བ་ཅན། ཐུགས་བརྩེ་བས་ཉེ་བར་བཟུང་སྟེ། བདག་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་དུ་གསོལ། ཞེས་དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བས་བསྙེན་

---

^{[མ་དཔེ་གཟིགས་ན་འདིར་གནོན།]}

པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི། མཁན་མོ་མིང་འདི་ཞེས་བགྱི་བས། འཕགས་མའི་དགེ་འདུན་ལས་ཚངས་པར་སྤྱད་པ་ཉེ་བར་གནས་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ། མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ཚངས་པར་སྤྱད་པར་ཉེ་བར་གནས་པའི་སྡོམ་པ་གསོལ་ཏེ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་འདི་ལ་མཁན་མོ་མིང་འདི་ཞེས་བགྱི་བས། ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་བར་མཛད་ན། འཕགས་མའི་དགེ་འདུན་ལས་གང་དག་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་བས། ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འཕགས་མའི་དགེ་འདུན་གྱིས་བཟོད་ཅིང་གནང་ནས་འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ། མཁན་མོ་འདི་ཞེས་བགྱི་བས། ཚངས་པར་སྤྱད་པ་ཉ་བར་གནས་པའི་སྡོམ་པ་སྩལ་ལགས་ཏེ། འདི་ལྟར་ཅང་མ་གསུང་བས་དེ་དེ་བཞིན་དུ་འཛིན་ཏོ། །དེ་ལྟར་དགེ་སློང་མའི་དགེ་འདུན་གྱིས། སུ་ཡང་རུང་བ་འགའ་ཞིག་ལ་ཚངས་པར་སྤྱད་པ་ཉེ་བར་གནས་པའི་སྡོམ་པ་ཕོག་ན། དགེ་སློང་མ་དེས་ཅི་བདེར་བསྙེན་པར་རྫོགས་པར་བྱ་སྟེ། འདི་ལ་འགྱོད་པར་མི་བྱའོ། །དེ་ནས་ཡང་སྦོམ་དགའ་མོས་ཁྱིམ་སོ་བཟུང་བ་ལོ་བཅུ་གཉིས་ལོན་ཕ་དག །མ་གསོལ་བར་ཚངས་པར་སྤྱད་པ་ཉི་བར་གནས་པའི་སྡོམ་པ་དང། བསྙེན་པར་རྫོགས་པར་བྱེད་པ་ན། དོན་ཉུང་བའི་དགེ་སློང་མ་རྣམས་སྨོད་

---

^{[མ་དཔེ་གཟིགས་ན་འདིར་གནོན།]}

པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་སོ་བཟུང་བ་ལོ་བཅུ་གཉིས་ལོན་པ་མ་གསོལ་བར་ཚངས་པར་སྤྱད་པ་ཉེ་བར་གནས་པའི་སྡོམ་པ་དང། བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་སོ་བཟུང་བ་ལོ་བཅུ་གཉིས་ལོན་པ་ཞེས་བྱ་བ་ནི། ལོ་བཅུ་གཉིས་སུ་ཁྱིམ་ན་གནས་པར་གྱུར་པ་གང་ཡིན་པའོ། །ཚངས་པར་སྤྱད་པ་ཉེ་བར་གནས་པའི་སྡོམ་པ་ཞེས་བྱ་བ་ནི། གསོལ་བ་དང་གཉིས་ཀྱི་ལས་ཀྱིས་སོ། །མ་གསོལ་བར་ཞེས་བྱ་བ་ནི། མ་བསླངས་པར་རོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་སོ་བཟུང་བ་ལོ་བཅུ་གཉིས་ལོན་པ་མ་གསོལ་བར་ཚངས་པར་སྤྱོད་པ་ཉེ་བར་གནས་པའི་སྡོམ་པ་དང། བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅོ་ལྔ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། འདོད་ཆེན་སྡོམ་པ་བྱིན་པ་དང། །སྦྲུམ་པ་དང་ནི་བསླབ་པ་དང། །བཞག་ནས་ཕན་མི་འདོགས་པ་དང། །བཀར་བར་བྱ་བ་ཐ་མ་ཡིན། །གླེང་གཞི་ནི། མཉན་ཡོད་ནའོ། །དེའི་ཚེ་སྦོམ་དགའ་མོས། འདོད་ཆེན་གྱི་འཁོར་བཞག་ནས་མི་འཛིན། མི་སྟོན། གདམས་ངག་མི་སྟེར་བས། དེ་དག་མ་དུལ་བ་དང། མ་ཞི་བ་དང། མ་སྤས་པ་དང། མ་བསྲུངས་པར་གྱུར་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང། ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། འདོད་ཆེན་གྱི་འཁོར་བཞག་ནས་རྗེས་སུ་སྐྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །འདོད་ཆེན་ཞེས་བྱ་བ་ནི་ཆོག་མི་ཤེས་

---

^{[མ་དཔེ་གཟིགས་ན་འདིར་གནོན།]}

པའོ། །འཁོར་ཞེས་བྱ་བ་ནི། ལྷན་ཅིག་གནས་པ་དང། ཉེ་གནས་སོ། །བཞག་ནས་ཞེས་བྱ་བ་ནི་བཟུང་ནས་སོ། །རྗེས་སུ་སྐྱོང་བར་མི་བྱེད་ན། ཞེས་བྱ་བ་ནི། རྗེས་སུ་འཛིན་པར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདོད་ཆེན་གྱི་འཁོར་འཇོག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །རང་བཞིན་དུ་གནས་པའི་དགེ་སློང་མ་གང་ཡིན་པ་དེ་དག །འདོད་ཆེན་གྱི་འཁོར་འཇོག་པར་སྤྲོ་བའི་སྐབས་དེ། དགེ་སློང་མ་དེ་རྣམས་ཀྱིས། དགེ་སློང་དག་ལ་སྨྲས་པ་དང། དགེ་སློང་དག་གིས་བཅོམ་ལྡན་འདས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་དེས་དགེ་སློང་མའི་དགེ་འདུན་ལ། འདོད་ཆེན་གྱི་འཁོར་འཇོག་པའི་སྡོམ་པ་གསོལ་བར་བྱའོ་ཞེས་བཅོམ་ལྡན་འདས་ཀྱིས་གསུངས་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ཏེ་ཞེས་བྱ་བ་ནས། དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། དགེ་སློང་མ་དེས་རྒན་རིམས་ཀྱིས་མཐར་འདུད་པ་དང་བཅས་པར་བྱས་ཏེ། དགེ་སློང་མའི་དགེ་འདུན་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚིག་འདི་སྐད་ཅེས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་དགེ་སློང་མ་མིང་འདི་ཞེས་བགྱི་བ། འཕགས་མའི་དགེ་འདུན་ལས། འདོད་ཆེན་གྱི་འཁོར་འཇོག་པའི་སྡོམ་པ་གསོལ་ན། འཕགས་མའི་དགེ་འདུན་ཐུགས་བརྩེ་བ་ཅན་ཐུགས་བརྩེ་བ་ཉེ་བར་བཟུང་སྟེ། བདག་མིང་འདི་ཞེས་བགྱི་བ་ལ། འདོད་ཆེན་གྱི་འཁོར་འཇོག་པའི་སྡོམ་པ་སྩལ་དུ་གསོལ། དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ། ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི། འཕགས་མའི་དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་གསོལ་ན། གལ་ཏེ་འཕགས་མའི་

---

^{[མ་དཔེ་གཟིགས་ན་འདིར་གནོན།]}

དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འཕགས་མའི་དགེ་འདུན་གྱིས། མིང་འདི་ཞེས་བགྱི་བ་ལ། འདོད་ཆེན་གྱི་འཁོར་འཇོག་པའི་སྡོམ་པ་སྩོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། མིང་འདི་ཞེས་བགྱི་བ་འདི། འཕགས་མའི་དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་གསོལ་ཏེ། འཕགས་མའི་དགེ་འདུན་གྱིས་མིང་འདི་ཞེས་བགྱི་བ་ལ། འདོད་ཆེན་གྱི་འཁོར་འཇོག་པའི་སྡོམ་པ་སྩོལ་པར་མཛད་ན། གང་དག་མིང་འདི་ཞེས་བགྱི་བ་ལ། འདོད་ཆེན་གྱི་འཁོར་འཇོག་པའི་སྡོམ་པ་སྩལ་པར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །འཕགས་མའི་དགེ་འདུན་གྱིས་བཟོད་ཅིང་གནང་ནས། འཕགས་མའི་དགེ་འདུན་གྱིས། མིང་འདི་ཞེས་བགྱི་བ་ལ། འདོད་ཆེན་གྱི་འཁོར་འཇོག་པའི་སྡོམ་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ལྟར་དགེ་སློང་མ་གང་སུ་ཡང་རུང་བ་འདོད་ཆེན་གྱི་འཁོར་འཇོག་པའི་སྡོམ་པ་ཕོག་པར་གྱུར་པ་དེས། ཅི་བདེ་བ་ཁོ་ནར་འདོད་ཆེན་གྱི་འཁོར་གཞག་པར་བྱ་སྟེ། འདི་ལ་འགྱོད་པར་མི་བྱའོ། །དེ་ནས་སྦོམ་དགའ་མོས། དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་མ་གསོལ་བར་འདོད་ཆེན་གྱི་འཁོར་བཞག་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། དགེ་འདུན་ལས་འདོད་ཆེན་གྱི་འཁོར་འཇོག་པའི་སྡོམ་པ་མ་གསོལ་བར་འདོད་ཆེན་གྱི་འཁོར་འཇོག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའི། །འདོད་ཆེན་གྱི་སྡོམ་པ་ཞེས་བྱ་བ་ནི། གསོལ་བ་དང་གཉིས་ཀྱི་ལས་ཀྱིས་སོ། །དགེ་འདུན་ལས་འདོད་ཆེན་གྱི་འཁོར་འཇོག་པས་གསོལ་བར་རབ་ཏུ་འབྱིན་པའམ། བསྙེན་པར་རྫོགས་པའམ། གནས་སྦྱིན་པ་ཅི་འདོད་པར་བྱེད་ན་སྟེ། ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་

---

^{[མ་དཔེ་གཟིགས་ན་འདིར་གནོན།]}

ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདོད་ཆེན་གྱི་སྡོམ་པ་མ་གསོལ་བར། འདོད་ཆེན་གྱི་འཁོར་འཇོག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་གཉིས་བ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས། བུད་མེད་སྦུམ་མ་ཞིག་རབ་ཏུ་ཕྱུང་བ་དེ། བྲམ་ཟེ་དང། ཁྱིམ་བདག་གི་ཆུང་མ་རྣམས་ཀྱིས་མཐོང་ནས། དགེ་སློང་མ་འདི་དག་ནི་འདྲེན་མ་འདྲེན་མར་ཚངས་པར་སྤྱད་པ་ལ་སྤྱོད་དོ་ཞེས་ཁ་ཟེར་བའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་སྦྲུམ་མ་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྦྲུམ་མ་ཞེས་བྱ་བ་ནི། སེམས་ཅན་དང་ལྡན་པའོ། །བུད་མེད་ཅེས་བྱ་བ་ནི། བུད་མེད་དོ། །རབ་ཏུ་འབྱིན་ན་ཞེས་བྱ་བ་ནི། ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་སྦྲུམ་མ་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་རབ་ཏུ་ཕྱུང་ནས་སློབ་བར་མི་བྱེད་པ་དང། དེ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་ཀྱིས་འཁོར་དུ་བཞག་ནས། ཅིའི་ཕྱིར་མི་བསླབ། དེས་སྨྲས་པ། འདི་ཉིད་དུ་སློབ་གྲང། གལ་ཏེ་མི་སློབ་ན་འདི་ཉིད་དུ་སློབ་གྲང་ཞེས་ཟེར་བའི་སྐབས་ཏེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རབ་ཏུ་ཕྱུང་ནས། མི་སློབ་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །རབ་ཏུ་ཕྱུང་ནས་ཞེས་བྱ་བ་ནི། ཆོས་འདུལ་བ་འདི་ལའོ། །མི་སློབ་ན་ཞེས་བྱ་བ་ནི། དགེ་སློང་མའི་བསླབ་པ་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རབ་ཏུ་ཕྱུང་ནས་མི་སློབ་ན་ལྟུང་བྱེད་དུ་འགྱུར་རོ། །ལྟུང་བྱེད་

---

^{[མ་དཔེ་གཟིགས་ན་འདིར་གནོན།]}

བཅུ་དྲུག་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་རབ་ཏུ་ཕྱུང་ནས་གདམས་ངག་མི་འབོགས། མི་སྟོན། ཕན་མི་འདོགས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རབ་ཏུ་ཕྱུང་ནས་ཕན་མི་འདོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །རབ་ཏུ་ཕྱུང་ནས་ཞེས་བྱ་བ་ནི། ཆོས་འདུལ་བ་འདི་ལའོ། །ཕན་མི་འདོགས་ན་ཞེས་བྱ་བ་ནི། ལྷུང་བཟེད་དང། ཆོས་གོས་དང། ལྷུང་བཟེད་ཀྱི་སྣོད་དང། རྒྱ་ཅང་དང། སྐ་རགས་དང། ལུང་དབོག་པ་དང། ཀློག་པ་དང། ཁ་ཏོན་དང། རྣལ་འབྱོར་དང། ཡིད་ལ་བྱེད་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རབ་ཏུ་བྱུང་ནས་འཁོར་ལ་ཕན་མི་འདོགས་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་ལྔ་བ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ཁྱིམ་ཐབ་བྱེས་སུ་སོང་བའི་ཆུང་མ་ཞིག་རབ་ཏུ་ཕྱུང་བ་ལས་དུས་གཞན་ཞིག་ན། དེའི་ཁྱིམ་ཐབ་འོངས་པ་དང། བུད་མེད་དེས་ཀྱང་བདག་གི་ཁྱིམ་ཐབ་འོངས་སོ་ཞེས་ཐོས་སོ། །ཐོས་ནས་ཀྱང་བུད་མེད་དེ་སྦོམ་དགའ་མོ་གང་ན་བ་དེར་སོང་སྟེ་ཕྱིན་ནས། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ། བདག་གི་སྡུམ་ཐབ་མཆིས་ཀྱི། རེ་ཞིག་བདག་ཕྱོགས་གཞན་ཞིག་ཏུ་བཀར་དུ་གསོལ། དེས་མ་བཀར་བ་དང། དེ་ནས་ཁྱིམ་ཐབ་དེ་འོངས་ནས་བཟུང་སྟེ། འདི་སྐད་ཅེས་སྨྲས་སོ། །འདི་སུས་གནང་སྟེ་རབ་ཏུ་ཕྱུང། དེས་དེ་ཉིད་དུ་འཕགས་མ་ཁྱོད་ཀྱིས་བདག་བཀར་བར་གྱུར་ནས་བསྡུམ་ཐབ་ཀྱིས་བདག་ཟིན་པར་མི་འགྱུར་བ་ཞིག་ཅེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ།

---

^{[མ་དཔེ་གཟིགས་ན་འདིར་གནོན།]}

ཡང་དགེ་སློང་མ་གང་རབ་ཏུ་ཕྱུང་ནས། མ་བཀར་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །རབ་ཏུ་བྱུང་ནས་ཞེས་བྱ་བ་ནི། ཆོས་འདུལ་བ་འདི་ལའོ། །མ་བཀར་ན་ཞེས་བྱ་བ་ནི། གནས་གཞན་དུའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཁོར་དུ་བཞུག་སྟེ་མ་བགར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དྲུག་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། ལོ་ནི་ཉི་ཤུར་མ་ལོན་དང། །ལོན་ཡང་གསོལ་བ་མ་བྱས་དང། །གཏུམ་མོ་མྱ་ངན་གྱིས་གདུངས་དང། །ཆོས་དྲུག་དག་ལ་མ་བསླབས་པའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ཀྱིས་གཞོན་ནུ་མ་ལོ་ཉི་ཤུ་མ་ལོན་པ་དག་བསྙེན་པར་རྫོགས་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ་མ་ལོ་ཉི་ཤུ་མ་ལོན་པ་བསྙེན་པར་རྫོགས་པར་མི་བྱའོ། །དེ་ནས་སྦོམ་དགའ་མོས་ལོ་ཉི་ཤུ་མ་ལོན་པ་དག་བསྙེན་པར་རྫོགས་པར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཞོན་ནུ་མ་ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ལོ་ཉི་ཤུ་མ་ལོན་པར་ཞེས་བྱ་བར་ནི། གང་གི་ལོ་ཉི་ཤུར་མ་ཚང་བའོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི། གསོལ་བ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་པར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཞོན་ནུ་མ་ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་དང་པོ་རྫོགས་སོ།། །།གློང་གཞི་ནི་མཉན་ཡོད་ནའོ། །དེ་ནས་དགེ་སློང་མ་དེ་དག་གིས། དགེ་སློང་དེ་དག་ལ་འདི་སྐད་ཅེས་ཁྱེད་ཀྱང་ལོ་ཉི་ཤུ་ལོན་ནས་བསྙེན་པར་རྫོགས་པར་མཛད་ན། བདག་ཅག་ཀྱང་ལོ་ཉི་ཤུ་ལོན་ནས། བསྙེན་པར་རྫོགས་པར་བགྱིད་པ་མ་ལགས་སམ། འདི་ལ་ཁྱེད་དང། བདག་ཅག་ཁྱད་པར་ནི་ཅི་མཆིས།

---

^{[མ་དཔེ་གཟིགས་ན་འདིར་གནོན།]}

བསམ་པ་ནི་ཅི་མཆིས། ཐ་དད་དུ་བགྱི་བ་ནི་ཅི་མཆིས། ཞེས་སྨྲ་བའི་སྐབས་དེ། བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། གཞོན་ནུ་མ་ལོ་ཉི་ཤུ་ལོན་ན་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག །གང་གི་ཚེ་བཅོམ་ལྡན་འདས་ཀྱིས། གཞོན་ནུ་མ་ལོ་ཉི་ཤུ་ལོན་ན་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག །ཅེས་གསུངས་པ་སྐྱེ་དགུའི་བདག་མོ་ཆེན་མོ་གོའུ་ཏ་མིས་ཐོས་ནས། བཅོམ་ལྡན་འདས་གང་ན་བ་དེར་སོང་སྟེ། ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་པ་དང། བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གོའུ་ཏ་མི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཅེས་བྱ་བ་ནས། ཅང་མི་གསུང་ངོ་ཞེས་བྱ་བའི་བར་རོ། །དེ་ནས་སྐྱེ་དགུའི་བདག་མོ་ཆེན་མོ་གོའུ་ཏ་མིས། བཅོམ་ལྡན་འདས་ཀྱིས་བཀའ་སྩལ་པའི་རྗེས་ཆད་པར་རིག་ནས། སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་དམ་པ་གནང་བའི་རིགས་སོ། །བདེ་བར་གཤེགས་པ་བདག་ལ་དམ་པ་གནང་བའི་རིགས་སོ། །གོའུ་ཏ་མི། ཁྱོད་དམ་པ་ཅི་གསོལ། དེས་འདི་སྐད་ཅེས་གསོལ་ཏོ། །བཙུན་པ་སྡུམ་སོ་བཟུང་བ་ལོ་བཅུ་གཉིས་ལོན་པ་འདི་དག་དང། གཞོན་ནུ་མ་ལོ་ཉི་ཤུ་ལོན་པ་འདི་དག་གིས་རབ་ཏུ་བྱུང་བ་ནི་ལེགས་པར་རྙེད་ལགས་ན། ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་ལགས་ན། ཧ་ཅང་ཐོགས་པར་གྱུར་ན། གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན། སྡུམ་སོ་བཟུང་བ་ལོ་བཅུ་ལོན་པ་དང། གཞོན་ནུ་མ་ལོ་བཅོ་བརྒྱད་ལོན་པ་ན། དེ་དག་ལ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྩལ་པར་གསོལ། དེ་ལྟར་མཛད་ན་འདི་གཉི་གས་ཀྱང་ཚང་བར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་

---

^{[མ་དཔེ་གཟིགས་ན་འདིར་གནོན།]}

སྩལ་པ། དེ་ལྟ་བས་ན་རྗེས་སུ་གནང་སྟེ། ཁྱིམ་སོ་བཟུང་བ་ལོ་བཅུ་ལོན་པ་དང། གཞོན་ནུ་མ་ལོ་བཅོ་བརྒྱད་ལོན་པ་ལ་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག །དེ་ལྟ་མོད་ཀྱི་ཁྱིམ་སོ་བཟུང་བ་ལོ་བཅུ་ལོན་པ་དང། གཞོན་ནུ་མ་ལོ་བཅོ་བརྒྱད་ལོན་པས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་སྤྱད་ཟིན་པ་དང། དེའི་འོག་ཏུ་ཚངས་པར་སྤྱད་པ་ཉེ་བར་གནས་པའི་སྡོམ་པ་སྦྱིན་པར་བྱའོ། །གང་གི་ཚེ་བཅོམ་ལྡན་འདས་ཀྱིས་གཞོན་ནུ་མ་ལོ་ཉི་ཤུ་ལོན་པ་ལ། ཚངས་པར་སྤྱད་པ་ཉེ་བར་གནས་པའི་སྡོམ་པ་བྱིན་ཅིག་ཅེས་བཀའ་སྩལ་པ་ན། དེ་དག་གིས་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ཏེ་ཞེས་བྱ་བ་ནས། གཞོན་ནུ་མ་ལོ་ཉི་ཤུ་ལོན་པ་དེས་རྒན་པའི་མཐའ་ནས་འདུད་པ་དང་བཅས་པར་བྱས་ཏེ། དགེ་སློང་མའི་དགེ་འདུན་ལ་ཐལ་མོ་སྦྱར་བ་བཏུད་ནས། ཚིག་འདི་སྐད་ཅེས། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། བདག་གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ། མཁན་མོ་མིང་འདི་ཞེས་བགྱི་བས། དགེ་འདུན་ལས་ཚངས་པར་སྤྱད་པ་ཉེ་བར་གནས་པའི་སྡོམ་པ་གསོལ་ན། འཕགས་མའི་དགེ་འདུན་ཐུགས་བརྩེ་བ་ཅན། ཐུགས་བརྩེ་བ་ཉེ་བར་བཟུང་སྟེ། བདག་གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ་ལ། མཁན་མོ་མིང་འདི་ཞེས་བགྱི་བས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྩལ་དུ་གསོལ་ཞེས། དེ་ལྟར་ལན་གཉིས་ལན་གསུམ་གྱི་བར་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །བྱ་བ་ནི་འདི་ལྟ་བུ་ཡིན་ཏེ། འཕགས་མའི་དགེ་འདུན་ཕུ་ནུ་མོ་དག་པ་དག་ལ་གསན་དུ་གསོལ། གཞོན་ནུ་མ་ལོ་ཉི་ཤུ་ལོན་པ་མིང་འདི་ཞེས་བགྱི་བ་འདི། མཁན་མོ་མིང་འདི་ཞེས་བགྱི་བ་འདིས། དགེ་འདུན་ལས་ཚངས་པར་སྤྱད་པ་ཉེ་བར་གནས་པའི་སྡོམ་པ་གསོལ་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན། འཕགས་མའི་དགེ་འདུན་གྱིས་གནང་བར་མཛོད་ཅིག་དང། འཕགས་མའི་དགེ་འདུན་གྱིས་གཞོན་ནུ་མ་ལོ་ཉི་ཤུ་

---

^{[མ་དཔེ་གཟིགས་ན་འདིར་གནོན།]}

ལོན་པ་མིང་འདི་ཞེས་བགྱི་བ་ལ། མཁན་མོ་མིང་འདི་ཞེས་བགྱི་བས། ཚངས་པར་སྤྱད་པ་ཉེ་བར་གནས་པའི་སྡོམ་པ་སྩོལ་པར་མཛད་དོ། །འདི་ནི་གསོལ་བའོ། །དེ་བཞིན་དུ་ལས་ཀྱང་རྒྱས་པར་བརྗོད་པར་བྱའོ། །དེ་ནས་སྦོམ་དགའ་མོས་ཚངས་པར་སྤྱད་པ་ཉེ་བར་གནས་པའི་སྡོམ་པ་མ་གསོལ་བར་བསྙེན་པར་རྫོགས་པར་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། གཞོན་ནུ་མ་ལོ་ཉི་ཤུ་ལོན་པ་ཚངས་པར་སྤྱད་པ་ཉེ་བར་གནས་པའི་སྡོམ་པ་མ་གསོལ་བར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །གཞོན་ནུ་མ་ཞེས་བྱ་བ་ནི། གཞོན་ནུ་མ་རབ་ཏུ་བྱུང་བའོ། །ལོ་ཉི་ཤུ་ལོན་པ་ཞེས་བྱ་བ་ནི། གང་གིས་ལོ་ཉི་ཤུར་ཚང་བར་གྱུར་བའོ། །ཚངས་པར་སྤྱད་པ་ཉེ་བར་གནས་པའི་སྡོམ་པ་ཞེས་བྱ་བ་ནི། གསོལ་བ་དང་གཉིས་ཀྱི་ལས་ཀྱིས་སོ། །མ་གསོལ་བར་ཞེས་བྱ་བ་ནི། དགེ་འདུན་ལས་སོ། །བསྙེན་པར་རྫོགས་པར་བྱེད་ན་ཞེས་བྱ་བ་ནི་གསོལ་བ་དང། བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གཞོན་ནུ་མ་ལོ་ཉི་ཤུ་ལོན་པ་ཚངས་པར་སྤྱད་པ་ཉེ་བར་གནས་པའི་སྡོམ་པ་མ་གསོལ་བར། དགེ་སློང་མའི་དངོས་པོར་བསྙེན་པར་རྫོགས་པར་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས་ནས། སྤྱོད་ཡུལ་དུ་ཞུགས་པ་ན། སྦོམ་དགའ་མོས། ལམ་པོ་ཆེ་ཞིག་ན་བུད་མེད་གཅིག་པུ་མེད་དག་ཅིག་དང་ལྷན་ཅིག་འཐབ་མོ་བྱུང་བ་མཐོང་ཞིང། སྦོམ་དགའ་མོས་བུད་མེད་དེ་ཁྲོས་པས་སྐྲ་འགྲེང་བར་གྱུར་པ་མཐོང་ངོ། །དེ་ནས་སྦོམ་དགའ་མོས་འདི་སྙམ་དུ་བསམས་ཏེ། གང་གི་ཚེ་བདག་འཐབ་མོ་འགྱེད་པའི་གྲོགས་སུ་འགྱུར་བའི་གྲོགས་མོ་ཞིག་བདག་གིས་རྙེད་དོ་སྙམ་དུ་བསམས་ནས། སྦོམ་

---

^{[མ་དཔེ་གཟིགས་ན་འདིར་གནོན།]}

དགའ་མོས་བུད་མེད་དེ་ལ་འདི་སྐད་ཅེས་སྨྲས་སོ། །ཕུ་ནུ་མོ་ཁྱོད་ཅིའི་ཕྱིར་རབ་ཏུ་མི་འབྱུང། དེས་འདི་སྐད་ཅེས་སྨྲས་སོ། །བདག་ནི་ཤིན་ཏུ་གཏུམ་མོ་ལགས་ན། སུ་ཞིག་གིས་བདག་རབ་ཏུ་འབྱིན་པར་འགྱུར། དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་ཁྱོད་རབ་ཏུ་དབྱུང་ངོ། །ཞེས་དེས་དེ་རབ་ཏུ་ཕྱུང། བསྙེན་པར་རྫོགས་པར་བྱས་སོ། །དེ་ནས་སྦོམ་དགའ་མོ་དུས་གཞན་ཞིག་ན་དགེ་སློང་མ་རྣམས་དང་ལྷན་ཅིག་འཐབ་མོ་བྱུང་བ་ན། དེའི་གྲོགས་མོ་དེ་ཡང་སེམས་ལས་བསྟུངས་ཏེ། ཅང་མི་སྨྲའོ། །དེ་ནས་སྦོམ་དགའ་མོས། དགེ་སློང་མ་དེ་ལ་འདི་སྐད་ཅེས་སྨྲས་སོ། །ཁོ་མོས་ཁྱོད་དོན་འདིའི་ཕྱིར་རབ་ཏུ་ཕྱུང། བསྙེན་པར་རྫོགས་པར་བྱས་ན། ད་ལྟར་ཁྱོད་བསམ་གཏན་བཞི་པ་ལ་སྙོམས་པར་ཞུགས་པ་བཞིན་དུ་འདུག་གམ། ཁྱོད་ཁོ་མོ་འཐབ་མོ་བྱུང་བའི་གྲོགས་གྱིས་ཤིག །དེས་འདི་སྐད་ཅེས་སྨྲས་སོ། །བདག་གིས་ཁྱིམ་པ་མོ་དེ་དག་གི་ཁ་ན་མ་ཐོ་བ་ནི་ཤེས་ཀྱི། བདག་གིས་དགེ་སློང་མ་འདི་དག་གི་ཁ་ན་མ་ཐོ་བ་ནི་མི་ཤེས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་ཁྱོད་ལ་དེ་དག་གི་མཚང་བསྟན་གྱི། རེ་ཞིག་སྐྱེ་དགུའི་བདག་མོ་ཆེན་མོ་འདི་ནི་རང་ཞུགས་ཡིན་ནོ། །ཨུཏྤ་ལའི་མདོག་འདི་ནི་གྲོང་ཁྱེར་ཆེན་པོ་དྲུག་དག་ཏུ་སྨད་འཚོང་བྱས་པ་ཡིན་ནོ། །གོའུ་ཏ་མི་སྐེམ་མོ་འདི་ནི་བུའི་ཤ་ཟོས་པ་དང། དུར་དུ་བཅུག་པ་དང། སེམས་འཁྲུགས་པ་ཡིན་ནོ། །དེ་ནས་དུས་གཞན་ཞིག་ན། དགེ་སློང་མ་རྣམས་དང་འཐབ་མོ་བྱུང་བ་ན། དགེ་སློང་མ་ཤིན་ཏུ་གཏུམ་མོ་དེས། དགེ་སློང་མ་རྣམས་ལ་ཁ་ན་མ་ཐོ་བ་རབ་ཏུ་བསྒྲགས་པས་སྤྱོ་བར་བརྩམས་སོ། །དེ་ནས་སྐྱེ་དགུའི་བདག་མོ་ཆེན་མོས། དགེ་སློང་མ་ཤིན་ཏུ་གཏུམ་མོ་དེ་མཐོང་ནས་འདི་སྐད་ཅེས་སྨྲས་སོ། །ཤིན་ཏུ་གཏུམ་མོ་འདི་སུས་རབ་ཏུ་ཕྱུང། དེ་དག་གིས་འདི་སྐད་ཅེས་སྦོམ་དགའ་མོ་ལགས་སོ། །ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་གཏུམ་མོ་

---

^{[མ་དཔེ་གཟིགས་ན་འདིར་གནོན།]}

རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། རང་གིས་སམ། གཞན་གྱིས་སྨྲས་པར་གྱུར་བའོ། །བུད་མེད་གཏུམ་མོ་ཞེས་བྱ་བ་ནི། ཁྲོ་བ་འཐབ་ཀྲོལ་ཅན་ནོ། །རབ་ཏུ་འབྱིན་ན་ཞེས་བྱ་བ་ནི། ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་གཏུམ་མོ་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་གསུམ་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་ལྔ་པ། གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ་སྤྱོད་ཡུལ་དུ་ཞུགས་པ་དང་ཞེས་བྱ་བ་ནས། སྦོམ་དགའ་མོས་བུད་མེད་མྱ་ངན་གྱིས་གདུངས་པ་ཞིག་རབ་ཏུ་ཕྱུང་ངོ་ཞེས་བྱ་བའི་བར་རོ། །དེ་ཐོ་རངས་སྔར་ལངས་ཏེ་དུ་ཞིང་འདི་སྐད་ཅེས། ཀྱི་ཧུད་བུ། ཀྱི་ཧུད་བུ་མོ། རེ་ཞིག་རྨི་ལམ་ཙམ་དུ་ཡང་སྟོན་ཅིག་ཅེས་སྨྲ་ཞིང་།སྨྲེ་སྔགས་འདོན་ལ། བྲང་རྡུང་ཞིང་ཆོ་ངེས་འདེབས་སོ། །དེ་ནས་སྐྱེ་དགུའི་བདག་མོ་ཆེན་མོས་སྒྲ་དེ་ཐོས་ནས། འདི་སྐད་ཅེས་སྨྲས་སོ། །མྱ་ངན་གྱིས་ནོན་པའི་བུད་མེད་འདི་སུས་རབ་ཏུ་ཕྱུང། དེ་དག་གིས་འདི་སྐད་ཅེས་སྦོམ་དགའ་མོས་སོ་ཞེས་སྨྲས་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་མྱ་ངན་གྱིས་གདུངས་པ་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། རང་ཉིད་ཀྱིས་སམ། གཞན་གྱིས་སྨྲས་པར་གྱུར་པའོ། །མྱ་ངན་གྱིས་གདུངས་པ་ཞེས་བྱ་བ་ནི། སྡུག་པ་ཉེ་དུ་དང། རང་གི་སྐྱེ་བོ་དང་བྲལ་བའོ། །རབ་ཏུ་འབྱིན་ན་ཞེས་བྱ་བ་ནི། ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཤེས་བཞིན་དུ་བུད་མེད་མྱ་ངན་གྱིས་གདུངས་པ་

---

^{[མ་དཔེ་གཟིགས་ན་འདིར་གནོན།]}

རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་དགེ་སློང་མ་རྣམས་ཀྱིས་དེ་དག་དེ་བཞིན་དུ་རབ་ཏུ་ཕྱུང་བར་གྱུར་པ་དེའི་ཚེ། དེ་དག་བདག་ཅག་གིས། ལྷན་ཅིག་གནས་པ་དང། ཉེ་གནས་དག་ཇི་ཙམ་ན། ཇི་ལྟར་བསྙེན་པར་རྫོགས་པར་བྱ་བ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་སོ་བཟུང་བ་ལོ་བཅུ་ལོན་པ་པ་དང། གཞོན་ནུ་མ་ལོ་བཅོ་བརྒྱད་ལོན་པ་ལ་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་བྱིན་ཅིག །དེ་དག་གིས་ཆོས་དྲུག་པོ་གང་དག་ཡིན་པ་དང། རྗེས་སུ་མཐུན་པའི་ཆོས་དྲུག་པོ་གང་དག་ཡིན་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གཅིག་པུ་ལམ་དུ་འགྲོ་མི་བྱ། །ཆུ་བོའི་ཕ་རོལ་རྒལ་མི་བྱ། །སྐྱེས་པ་ལ་ནི་རེག་མི་བྱ། །སྐྱེས་པ་དང་ནི་འདུག་མི་བྱ། །སྨྱན་དུ་འགྱུར་བ་མི་བྱ་ཞིང། །ཁ་ན་མ་ཐོ་བཅབ་མི་བྱ། །འདི་དག་ནི་ཆོས་དྲུག་ཅེས་བྱའོ། །རྗེས་སུ་མཐུན་པའི་ཆོས་དྲུག་གང་ཞེ་ན། གསེར་ལ་གཟུང་བར་མི་བྱ་སྟེ། །སྤུ་ཡི་ལས་ནི་མི་བྱའོ། །ས་ཡང་རྐོ་བར་མི་བྱ་སྟེ། །རྩྭ་སྔོན་དག་ཀྱང་གཅད་མི་བྱ། །བྱིན་ལེན་མ་བྱས་མི་བཟའ་སྟེ། །བཞག་པ་བཟའ་བར་མི་བྱའོ། །ཆོས་དྲུག་པོ་འདི་དག་ནི་རྗེས་སུ་མཐུན་པའི་ཆོས་དྲུག་ཅེས་བྱ་སྟེ། ལོ་གཉིས་སུ་བསླབས་ནས་ཚངས་པར་སྤྱད་པ་ཉེ་བར་གནས་པའི་སྡོམ་པ་སྦྱིན་ཏེ། དེའི་འོག་ཏུ་བསྙེན་པར་རྫོགས་པར་བྱའོ། །དེ་ནས་སྦོམ་དགའ་མོས་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་མ་གསོལ་བར་བསྙེན་པར་རྫོགས་པར་བྱེད་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་ལ་མ་བསླབས་པར་བསྙེན་པར་རྫོགས་པར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །

---

^{[མ་དཔེ་གཟིགས་ན་འདིར་གནོན།]}

ཤེས་བཞིན་དུ་ཞེས་བྱ་བ་ནི། རང་གིས་སམ། གཞན་གྱིས་སྨྲས་པར་གྱུར་པའོ། །ཆོས་དྲུག་དང། རྗེས་སུ་མཐུན་པའི་ཆོས་དྲུག་ཅེས་བྱ་བ་ནི། ཇི་སྐད་བསྟན་པ་ཡིན་ནོ། །ལོ་གཉིས་སུ་མ་བསླབས་པར་ཞེས་བྱ་བ་ནི། དགེ་སློབ་མར་འགྱུར་བའི་བསླབ་པ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་མ་གསོལ་པར་བསྙེན་པར་རྫོགས་པར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་བདུན་པའི་ཚིགས་སུ་བཅད་པའི་སྡོམ་རྫོགས་སོ།། །།བསྡུས་པའི་སྡོམ་ལ། བསླབ་པ་དང་ནི་ལོ་རེ་དང། །ཚོགས་དང་རྨེ་གབ་ཀྱི་ལྔ་དང། །ཉེར་ཞི་ཁྱིམ་གྱི་གོ་རེ་ལོང། །དཔུང་པ་དང་ནི་ཁྱིམ་པ་མོ། །སྐབས་མ་ཕྱེ་བར་འདྲི་བ་དང། །བཤང་བར་གཅིག་པུ་འགྲོ་མི་བྱ། །སྡོམ་ལ། ཆོས་དྲུག་དང་ནི་བསླབས་པ་དང། །ཁྱིམ་ཐབ་ཀྱིས་ནི་མ་གནང་དང། །གལ་ཏེ་བདག་ལ་གོས་བྱིན་དང། །ཕྱི་ནས་ཁྱོད་དགའ་མ་ཡིན་ནོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ལྷན་ཅིག་གནས་པ་དང། ཉེ་གནས་དག་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་ལ་བསླབས་ནས། དེས་དེ་དག་བསྙེན་པར་རྫོགས་པར་མི་བྱེད་པ་དང། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཀྱིས་བསླབས་ནས་ཅིའི་ཕྱིར་བསྙེན་པར་རྫོགས་པར་མི་བྱེད། དེས་འདི་སྐད་ཅེས་འདི་དག་ཁོ་མོ་ལ། འདི་སྐད་ཅེས་སྦོམ་དགའ་མོ་ནི། མ་བསླབས་པར་བསྙེན་པར་རྫོགས་པར་བྱེད་དོ་ཞེས་ཟེར་བས། ཁོ་མོ་འདི་སྙམ་དུ་རེ་ཞིག་ཤིན་ཏུ་སློབ་པ་ལ་རག་གོ་སྙམ་དུ་སེམས་སོ། །ཞེས་སྨྲས་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་འཁོར་ལོ་གཉིས་སུ་ཆོས་དྲུག་དང། རྗེས་སུ་མཐུན་པའི་ཆོས་དྲུག་ལ་བསླབས་ནས་བསྙེན་པར་རྫོགས་པར་མི་བྱེད་ན་ལྟུང་བྱེད་

---

^{[མ་དཔེ་གཟིགས་ན་འདིར་གནོན།]}

དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། རང་གིས་སམ། གཞན་གྱིས་སྨྲས་པར་གྱུར་པའོ། །བསླབས་ནས་ཞེས་བྱ་བ་ནི། དགེ་སློབ་མར་འགྱུར་བའི་བསླབ་པ་ལའོ། །བསྙེན་པར་རྫོགས་པར་མི་བྱེད་ན་ཞེས་བྱ་བ་ནི། གསོལ་པ་དང་བཞིའི་ལས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཤེས་བཞིན་དུ་ལོ་གཉིས་ཀྱི་བར་དུ་བསླབས་ཏེ། དེ་ལས་ལྷག་པར་འཇོག་ཅིང། བསྙེན་པར་རྫོགས་པར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅོ་བརྒྱད་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་བཤམ་ཐབས་བགོས་ཏེ། ཁྱིམ་བདག་ཅག་གི་ཁྱིམ་དུ་ཞུགས་པ་ལས། དེ་ན་བུད་མེད་ཅིག་ཁྱིམ་ཐབ་དང་ལྷན་ཅིག་རྩོད་ཅིང་འདུག་པ་དང། དེས་འདི་སྐད་ཅེས་སྨྲས་སོ། །ཅི་ཞིག་ཡིད་མི་བདེ་ཞིང་འདུག །དེས་སྐབས་དེ་རྒྱས་པར་སྨྲས་པ་དང། དེ་ནས་སྦོམ་དགའ་མོས། བུད་མེད་དེ་ལ་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་རབ་ཏུ་མི་འབྱུང། དེས་འདི་སྐད་ཅེས་སྨྲས་སོ། །བདག་སུ་ཞིག་གིས་རབ་ཏུ་འབྱིན་པར་འགྱུར། དེས་འདི་སྐད་ཅེས་ཁོ་མོས་བྱའོ་ཞེས་སྨྲས་ནས། ཇི་ཙམ་ན་དེས་རབ་ཏུ་ཕྱུང་ངོ། །དེའི་འོག་ཏུ་ཁྱིམ་ཐབ་འོངས་ནས་དེས་ཁྱིམ་མཚེས་ལ་དྲིས་པ། ཁོ་བོའི་ཆུང་མ་གང་དུ་སོང། དེས་འདི་སྐད་ཅེས་སྨྲས་སོ། །སྦོམ་དགའ་མོས་རབ་ཏུ་ཕྱུང་ངོ། །དེ་ནས་ཁྱིམ་བདག་དེ་སྦོམ་དགའ་མོ་གང་ན་བ་དེར་སོང་སྟེ། ཕྱིན་ནས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་བདག་གི་མཆིས་བྲང་འདི་སུས་རབ་ཏུ་ཕྱུང། སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་སོ། །དེ་ནས་ཁྱིམ་བདག་དེས་འདི་སྐད་ཅེས། འཕགས་མ་ཁྱོད་ཁྱིམ་ཐབ་ཀྱིས་མ་གནང་བ་རབ་ཏུ་འབྱིན་པར་མཛད་པར་རིགས་སམ་ཞེས་སྨྲས་ནས་ཞེས་བྱ་བ་ནས། ཁྱིམ་བདག་དེས་ཁ་བྱས་ཏེ་སོང་བ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་

---

^{[མ་དཔེ་གཟིགས་ན་འདིར་གནོན།]}

དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཤེས་བཞིན་དུ་ཁྱིམ་ཐབ་ཀྱིས་མ་གནང་བར་རབ་ཏུ་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། རང་ཉིད་ཀྱིས་སམ། གཞན་གྱིས་སྨྲས་པར་གྱུར་བའོ། །ཁྱིམ་ཐབ་ཀྱིས་ཞེས་བྱ་བ་ནི་ཁྱོས་སོ། །མ་གནང་བ་ཞེས་བྱ་བ་ནི་མ་བཏང་བའོ། །རབ་ཏུ་འབྱིན་ན་ཞེས་བྱ་བ་ནི། ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་ཐབ་ཀྱིས་མ་གནང་བ་རབ་ཏུ་འབྱིན་ན་ལྟུང་བྱེད་དོ། །ལྟུང་བྱེད་བཅོ་བརྒྱད་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ལ་དགེ་སློང་མས་སྨྲས་པ། འཕགས་མ་བདག་བསྙེན་པར་རྫོགས་པར་མཛད་དུ་གསོལ། དེས་འདི་སྐད་ཅེས་གལ་ཏེ་ཁོ་མོ་ལ་གོས་བྱིན་ན། དེའི་འོག་ཏུ་ཁྱོད་བསྙེན་པར་རྫོགས་པར་བྱའོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མས་དེ་སྐད་ཅེས་སྨྲས་པ་ན། གལ་ཏེ་ཁོ་མོ་ལ་གོས་བྱིན་ན་དེའི་འོག་ཏུ་བསྙེན་པར་རྫོགས་པར་བྱའོ་ཞེས་ཟེར་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དགེ་སློང་མས་དེ་སྐད་ཅེས་སྨྲས་པ་ན་ཞེས་བྱ་བ་ནི་ཟེར་ནའོ། །གལ་ཏེ་ཁོ་མོ་ལ་གོས་ཞེས་བྱ་བ་ནི། བདུན་པོ་གང་ཡང་རུང་བའི་འོ། །བྱིན་ན་ཞེས་བྱ་བ་ནི་ཕུལ་ནའོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །བསྙེན་པར་རྫོགས་པར་བྱའོ་ཞེས་བྱ་བ་ནི། དགེ་སློང་མའི་དངོས་པོར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མས་དེ་སྐད་ཅེས་སྨྲས་པ་ན། གལ་ཏེ་ཁོ་མོ་ལ་གོས་བྱིན་ན། དེའི་འོག་ཏུ་ཁྱོད་བསྙེན་པར་རྫོགས་པར་བྱའོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་

---

^{[མ་དཔེ་གཟིགས་ན་འདིར་གནོན།]}

བཅོ་བརྒྱད་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བུད་མེད་ཅིག་གོའུ་ཏ་མི་སྐེམ་མོ་གང་ན་བ་དེར་སོང་སྟེ་ཕྱིན་ནས། གོའུ་ཏ་མི་སྐེམ་མོ་ལ་འདི་སྐད་ཅེས་སྨྲས་སོ། །འཕགས་མ་གལ་ཏེ་ཁྱོད་ཀྱིས་བདག་རབ་ཏུ་བྱུང་ན། བདག་རབ་ཏུ་འབྱུང་བར་འཚལ་ལོ། །དེས་འདི་སྐད་ཅེས་སྨྲས་སོ། །ཁྱོད་ཀྱིས་ཁྱིམ་གྱི་བྱ་བ་མངོན་པར་སྤངས་དང། དེའི་འོག་ཏུ་དཀའ་བར་མི་འགྱུར་རོ། །དེ་ནས་ཁྱིམ་བདག་གི་ཆུང་མ་དེས། ཁྱིམ་གྱི་བྱ་བ་མངོན་པར་སྤངས་ཏེ། འོངས་པ་ན། གོའུ་ཏ་མི་སྐེམ་མོ་དེས་ཀྱང་རབ་ཏུ་མ་ཕྱུང་ངོ། །དེ་བདག་ནི་ཁྱིམ་ན་གནས་པ་ཡང་མ་ཡིན་ལ། རབ་ཏུ་བྱུང་བ་ཡང་མ་ཡིན་ནོ་ཞེས་ཟེར་བའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་མོས་དེ་སྐད་སྨྲས་པ་ན། ཁྱོད་ཀྱིས་ཁྱིམ་ཀྱི་བྱ་བ་མངོན་པར་སྤངས་དང། དེའི་འོག་ཏུ་དཀའ་བར་མི་འགྱུར་རོ། །ཞེས་སྨྲས་ལ། འོངས་ནས་རབ་ཏུ་མི་འབྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི། གོའུ་ཏ་མི་སྐེམ་མོའོ། །ཁྱིམ་པ་མོ་ཞེས་བྱ་བ་ནི། ཁྱིམ་བདག་གི་ཆུང་མའོ། །ཁྱོད་ཀྱིས་ཁྱིམ་གྱི་བྱ་བ་མངོན་པར་སྤངས་དང། དེའི་འོག་ཏུ་ཁྱོད་ལ་དཀའ་བར་མི་འགྱུར་རོ་ཞེས་བྱ་བ་ནི། རབ་ཏུ་འབྱུང་བར་འགྱུར་བ་ལའོ། །དེའི་འོག་ཏུ་རབ་ཏུ་མི་འབྱིན་ན་ཞེས་བྱ་བ་ནི། ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདི་སྐད་ཅེས། ཁྱིམ་གྱི་བྱ་བ་མངོན་པར་སྤངས་དང། དེའི་འོག་ཏུ་དཀའ་བར་མི་འགྱུར་རོ་ཞེས་སྨྲས་ལ། འོངས་ནས་རབ་ཏུ་མི་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅོ་བརྒྱད་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། ལོ་རེ་རེ་ནི་བཀག་པ་དང། །ཞག་ལོན་བདུན་པ་མ་ཡིན་དང། །ཟླ་བ་ཕྱེད་ཕྱེད་གདམས་པ་དང། །དགེ་སློང་མེད་པའི་གསོ་སྦྱོང་དང། །དགེ་སློང་མེད་པར་དབྱར་གནས་མིན། །དབྱར་གནས་པས་ནི་དགག་དབྱེ་བྱའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་

---

^{[མ་དཔེ་གཟིགས་ན་འདིར་གནོན།]}

ལོ་རེ་རེ་ཞིང་རབ་ཏུ་ཕྱུང་ནས། ཕྱིས་གང་གི་ཚེ་དེ་དག་ལ་འབོད་པ་དེའི་ཚེ་འདི་སྐད་ཅེས་ལོ་གཅིག་པ། ལོ་གཉིས་པ་ཞེས་བྱ་བ་ནས། ལོ་ལྔ་པ་ཞེས་བྱ་བའི་བར་དག་ཏུ་འབོད་པ་དང། དེ་ནས་དེ་ལ་དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །འཕགས་མ་ཅི། ཁྱོད་ཀྱིས་འདི་རྣམས་ཀྱི་མིང་མི་ཤེས་སམ། དེས་འདི་སྐད་ཅེས་འདི་སྙེད་ཀྱི་མིང་སུས་ཤེས་པར་འགྱུར་ཞེས་སྨྲས་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། དེ་ཡང་དགེ་སློང་མ་གང་ལོ་རེ་རེ་ཞིང་འཁོར་འཇོག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ལོ་རེ་རེ་ཞིང་ཞེས་བྱ་བ་ནི། ལོ་རེ་རེའོ། །འཁོར་འཇོག་ན་ཞེས་བྱ་བ་ནི་རབ་ཏུ་འབྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ལོ་རེ་ཞིང་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས། བཅོ་ལྔ་པ་སྔ་མའི་འདུན་པ་བླངས་པས། བཅོ་ལྔ་པ་ཕྱི་མའི་གསོ་སྦྱོང་ཡང་ཉམས་སུ་མྱོང་བར་བྱེད་པ་དང། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཅིའི་ཕྱིར་དེ་ལྟར་བྱེད། དེ་ན་འདི་སྐད་ཅེས་ཁོ་མོ་སྡེ་སྣོད་གསུམ་པ་ཡིན་པས། ཇི་ལྟར་འགྱུར་བ་ཤེས་སོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་འདུན་པ་ཞག་ལོན་པས་གསོ་སྦྱོང་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཞག་ལོན་པས་ཞེས་བྱ་བ་ནི། སྤྱད་ཟིན་པའོ། །འདུན་པ་ཞེས་བྱ་བ་ནི། བློ་གྲོས་སོ། །གསོ་སྦྱོང་ཉམས་སུ་མྱོང་བར་བྱེད་ན་ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འདུན་པ་ཞག་ལོན་པས་སོ་

---

^{[མ་དཔེ་གཟིགས་ན་འདིར་གནོན།]}

སོར་ཐར་པ་ཉམས་སུ་མྱོང་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅོ་ལྔ་པའི་འདུན་པ་ལེན་པའི་དགེ་སློང་མས་དགེ་སློང་མ་རྣམས་ཀྱི་དྲུང་དུ་འགྲོ་བར་བྱ་ཞིང། དགེ་སློང་རྣམས་ལས་ཚེས་ཤིང་གདམས་ངག་དང། རྗེས་སུ་བསྟན་པ་ཉམས་སུ་མྱོང་བར་བྱའོ་ཞེས་གསུངས་པ་དང། འོན་ཀྱང་བཅུ་གཉིས་སྡེ་དེ་དག །གདམས་ངག་དང། རྗེས་སུ་བསྟན་པ་ཉམས་སུ་མྱོང་བར་མི་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་གདམས་ངག་དང། རྗེས་སུ་བསྟན་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གི་བར་རོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི། ཟླ་བ་ཕྱེད་ཅིང་ངོ། །གདམས་ངག་དང་རྗེས་སུ་བསྟན་པ་ཉམས་སུ་མྱོང་བར་མི་བྱེད་ན་ཞེས་བྱ་བ་ནི། དགེ་སློང་མ་རྣམས་དང་ལྷན་ཅིག་རྗེས་སུ་སྒྲུབ་པར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཟླ་བ་ཕྱེད་ཕྱེད་ཅིང་གདམས་ངག་དང། རྗེས་སུ་བསྟན་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ལྗོངས་རྒྱུ་ཞིང་དོང་བ་ན། དགེ་སློང་མ་ཞིག་གི་དབྱར་ཁང་དུ་ཕྱིན་ནས། དེར་དེ་དག་གིས་དགེ་སློང་མེད་པའི་གནས་སུ་གསོ་སྦྱོང་བྱས་ཏེ། དེ་དག་རིམ་གྱིས་རྒྱུ་ཞིང་མཉན་ཡོད་དུ་ཕྱིན་ནས། དེ་དག་གང་གི་ཚེ་དབྱར་ཁང་དུ་འོངས་པ་དེའི་ཚེ། དགེ་སློང་མ་རྣམས་ཀྱིས་སྨྲས་པ། སངས་རྒྱས་ལྡན། ཆོས་ལྡན། དགེ་འདུན་ལྡན་འོངས་པ་ལེགས་སོ། །ཁྱེད་ཅག་གིས་གང་དུ་གསོ་སྦྱོང་བྱས། དེ་དག་གིས་འདི་སྐད་ཅེས་སྨྲས་སོ། །གནས་ག་གེ་མོ་ཞིག་ཏུའོ། །དེ་ནས་དགེ་སློང་མ་དེ་རྣམས་ཀྱིས། དགེ་སློང་མ་དེ་དག་ལ་འདི་སྐད་ཅེས། ཁྱེད་ཅག་གིས་ཅིའི་ཕྱིར་དགེ་སློང་མེད་པའི་གནས་སུ། །གསོ་སྦྱོང་བྱས་ཞེས་སྨྲས་པའི་སྐབས་དེ་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མེད་པའི་གནས་སུ་གསོ་སྦྱོང་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། ཆོས་འདི་པ་དག་གིའོ། །དགེ་སློང་མེད་པའི་གནས་སུ་ཞེས་བྱ་བ་ནི། གང་ན་དགེ་སློང་མེད་པར་གྱུར་པའོ། གསོ་སྦྱོང་ཞེས་བྱ་བ་ནི། སོ་སོར་ཐར་པ་ཉམས་སུ་མྱོང་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མེད་པའི་གནས་སུ་གསོ་སྦྱོང་ཉམས་སུ་མྱོང་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མས་དགེ་སློང་མེད་པའི་གནས་སུ་དབྱར་གནས་པར་ཁས་བླང་བར་མི་བྱའོ་ཞེས་གསུངས་པ་དང། དེ་ནས་ཡང་དགེ་སློང་མ་རྣམས་ལྗོངས་ཤིག་ནས་ལྷགས་ནས། དགེ་སློང་མེད་པའི་གནས་སུ་དབྱར་གནས་པར་ཁས་བླངས་ཏེ། དེ་ནས་དེ་དག་གིས་དབྱར་གནས་ནས་མཉན་ཡོད་དུ་ཕྱིན་པ་དང། ཇི་ཙམ་ན་དགེ་སློང་མ་རྣམས་ཀྱིས་སྨྲས་པ། ཁྱེད་ཅག་གང་དུ་དབྱར་གནས། དེ་དག་གིས་འདི་སྐད་ཅེས་སྨྲས་སོ། །གནས་ག་གེ་མོ་ཞིག་ཏུའོ། །དེ་དག་ལ་དགེ་སློང་མ་རྣམས་ཀྱིས་དྲིས་པ། ཅི་རེ་ཞིག་དགེ་སློང་དང་བཅས་པ་ཡིན་ནམ། འོན་ཏེ་དགེ་སློང་མེད་པ་ཡིན། དེ་དག་གིས་འདི་སྐད་ཅེས་དགེ་སློང་མེད་པ་ཡིན་ནོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པ་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང། ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མེད་པའི་གནས་སུ་དབྱར་གནས་པར་ཁས་ལེན་ན་ལྟུང་བྱེད་དོ། །ཡང་གང་ཞེས་བྱ་བ་ནི། ཆོས་འདི་པ་དག་གིའོ། །དགེ་སློང་མེད་པའི་ཞེས་བྱ་བ་ནི། གང་ན་དགེ་སློང་མེད་པར་གྱུར་པའོ། །གནས་ཞེས་བྱ་བ་ནི། གང་ན་ལས་ཐམས་ཅད་མངོན་པའོ། །དབྱར་གནས་པར་ཁས་ལེན་ན་ཞེས་བྱ་བ་ནི། ཟླ་བ་གསུམ་དམ་འཆའ་བར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་

---

^{[མ་དཔེ་གཟིགས་ན་འདིར་གནོན།]}

མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མེད་པའི་གནས་སུ་དབྱར་གནས་པར་ཁས་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དབྱར་གནས་པའི་དགེ་སློང་མ་རྣམས་ཀྱིས་གཉི་གའི་དགེ་འདུན་ལ་དགག་དབྱེ་བའོ་ཞེས་གསུངས་པ་དང། དེ་ནས་དགེ་སློང་མ་དེ་རྣམས་ཀྱིས། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་གཉི་གའི་དགེ་འདུན་ལ་དགག་དབྱེ་བྱས། ཚུར་སྤྱོན། དེས་འདི་སྐད་ཅེས་སྨྲས་སོ། །ཁོ་མོ་དེར་མི་འགྲོའོ། །ཅིའི་ཕྱིར། རེ་ཞིག་ཁོ་མོ་ནི་སྡེ་སྣོད་གསུམ་པ་ཡིན་པས། ཁོ་མོས་དགག་དབྱེ་ཇི་ལྟར་བྱ་བ་ཤེས་ཏེ། དགེ་སློང་གི་དགེ་འདུན་ལ་ལྕག་ཕོད་དང། ཤུར་བུ་དང། ཤུར་བུ་ཕྲེའུ་ཕལ་མོ་ཆེ་དབུལ་དགོས་པས། ཁྱེད་ཅག་དང་ཞིག །ཁོ་མོ་ནི་དེར་མི་འགྲོའོ་ཞེས་ཟེར་བའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་གནས་ནས་གཉི་གའི་དགེ་འདུན་ལ་དགག་དབྱེ་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དབྱར་གནས་ནས་ཞེས་བྱ་བ་ནི། ཟླ་བ་གསུམ་གྱི་མཐར་ཕྱིན་ནས་སོ། །གཉི་གའི་དགེ་འདུན་ལ་ཞེས་བྱ་བ་ནི། དགེ་སློང་དང་དགེ་སློང་མའི་དགེ་འདུན་ལའོ། །དགག་དབྱེ་མི་བྱེད་ན་ཞེས་བྱ་བ་ནི། མཐོང་བ་དང། ཐོས་པ་དང། དོགས་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་མ་ཇི་ཙམ་ཅུང་ཟད་དབྱར་གནས་ནས་གཉིས་ཀའི་དགེ་འདུན་ལ་དགག་དབྱེ་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བཅུ་དགུ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ལ། ཚོགས་ལ་སྤྱོ་བར་མི་བྱ་དང། །མི་སྙན་པ་དང་སེར་སྣ་ལྔ། །སྤངས་ནས་བཟའ་བར་མི་བྱ་དང། །བཙས་པ་བླང་བར་མི་བྱའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་ཚོགས་ལ་སྤྱོས་པ་དང། དེ་ལ་ལྷན་ཅིག་གནས་པ་དང། ཉེ་གནས་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱིས་སྨྲས་པ། འཕགས་མ་དགེ་སློང་མའི་ཚོགས་ལ་སྤྱོ་བ་མི་རིགས་སོ། །དེས་འདི་སྐད་ཅེས་རིགས་ཀྱང་རུང། མི་རིགས་ཀྱང་རུང། ཁོ་མོས་ནི་སྤྱོད་སོ། །ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་ད། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཚོགས་ལ་སྤྱོ་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཚོགས་ལ་ཞེས་བྱ་བ་ནི། དགེ་སློང་མའི་དགེ་འདུན་ལའོ། །སྤྱོས་ན། ཞེས་བྱ་བ་ནི་ཚར་བཅད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཚོགས་ལ་སྤྱོས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དགེ་སློང་མའི་ཚོགས་ལ་མི་སྙན་པ་ཁྱིམ་ཞེས་བྱ་བ་དང། ནལ་ཞེས་བྱ་བ་དང། བོང་བུ་དག་དང་ལྡན་པའི་གཤེ་བ་དག་གིས་གཤེ་བའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཚོགས་ལ་གཤེ་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཚོགས་ལ་ཞེས་བྱ་བ་ནི། དགེ་སློང་མའི་དགེ་འདུན་མ་ལའོ། །གཤེ་ན་ཞེས་བྱ་བ་ནི། ཁྱིམ་པ་མོའི་ཚིག་དང་ལྡན་པའི་གཤེ་བས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཚོགས་ན་གཤེ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས། དགེ་སློང་མ་གློ་བུར་བ་རྣམས་ཀྱིས་དབྱར་ཁང་དུ་གནས་བྱིན་ནས་དེ་དག་ལ་རྙེད་པ་དང་བཀུར་སྟི་རབ་ཏུ་མང་པོ་དང་ལྡན་པ་དང། དེས་སེར་སྣས་དེ་དག་བསྐྲད་པ་ན། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཅི་སེར་སྣས་གནོད་པར་མ་

---

^{[མ་དཔེ་གཟིགས་ན་འདིར་གནོན།]}

གྱུར་གྲང། དེས་འདི་སྐད་ཅེས་ཁོ་མོ་གྲང་བའི་ཚེ་ན་གྲང་བས་ཉེན། ཚ་བའི་ཚེ་ན་ཚ་བས་ཉན་བཞིན་དུ་སྡུག་བསྔལ་ཆེན་པོས་བསྒྲུབས་པའི་དབྱར་ཁང་ཁོ་མོས་ཁ་འཇམ་ཅན་འདི་རྣམས་ལ་སྐབས་དབྱེའམ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གནས་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །གནས་ལ་ཞེས་བྱ་བ་ནི། དབྱར་ཁང་ལའོ། །སེར་སྣ་ཞེས་བྱ་བ་ནི། དེ་དག་དང་ལྷན་ཅིག་ཏུ་མངོན་པར་མི་དགའ་བའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གནས་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། དེ་ནས་དགེ་སློང་མ་རྣམས་ཀྱིས་བྲམ་ཟེ་དང། ཁྱིམ་བདག་གི་ཁྱིམ་དག་ཏུ་སྐྱེ་དགུའི་བདག་མོ་ཆེན་མོའི་བསྔགས་པ་དག་རྗོད་པར་བྱེད་དེ། སྐྱེ་དགུའི་བདག་མོ་ཆེན་མོ་ནི་བསོད་ནམས་དང་ལྡན་པ། སངས་རྒྱས་ཀྱི་ཡུམ། བཅོམ་ལྡན་འདས་ཀྱིས་ཀྱང་གནས་བརྟན་མའི་རྒྱལ་མོ་རྣམས་ཀྱི་ནང་ན་མཆོག་ཏུ་བསྟན་པ་ཡིན་ནོ། །ཨུཏྤ་ལའི་མདོག་ཀྱང་རྫུ་འཕྲུལ་དང་ལྡན་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །གོའུ་ཏ་མི་སྐེམ་མོ་ཡང་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །ཆོས་སྦྱིན་ཡང་མདོ་སྡེ་རྣམ་པར་འབྱེད་པ་རྣམས་ཀྱི་མཆོག་ཏུ་བསྟན་པ་ཡིན་ནོ། །དེ་ནས་སྦོམ་དགའ་མོས་ཚིག་དེ་ཐོས་ནས། ཀྱེ་བུ་ཟན་མོའི་བུ་མོ་དག །རེ་ཞིག་སྐྱེ་དགུའི་བདག་མོ་ཆེན་མོ་འདི་ནི་རང་ཞུགས་ཡིན་ཏེ། འདི་ལ་མཁན་མོ་དང། སློབ་དཔོན་ཡང་མེད་དོ། །ཨུཏྤ་ལའི་མདོག་འདི་ནི་སྨད་འཚོང་མ་ཡིན་ནོ། །གོའུ་ཏ་མི་སྐེམ་མོ་འདི་ནི་བུའི་ཤ་ཟོས་པ་ཡིན་ན། ཁྱེད་ཅག་དེ་དག་གི་བསྔགས་པ་བརྗོད་པ་ལྟ་ཞེས་སྨོད་པར་བྱེད་པ་དང། དེ་དག་གིས་འདི་སྐད་ཅེས་སྨྲས་སོ། །འཕགས་མ་བསྔགས་པའི་སེར་

---

^{[མ་དཔེ་གཟིགས་ན་འདིར་གནོན།]}

སྣས་གནོད་པར་མ་གྱུར་གྲང། དེས་འདི་སྐད་ཅེས་ཁོ་མོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་པ་ཡིན་ན། བསྔགས་པར་མི་འོས་པ་དེ་དག་གི་བསྔགས་པ་བརྗོད་ཀྱི། ཁོ་མོའི་མིང་མི་བརྗོད་ན། ཅིའི་ཕྱིར་ཁོ་མོ་ལ་གནོད་པར་མི་འགྱུར་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། བསྔགས་པ་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །བསྔགས་པ་ཞེས་བྱ་བ་ནི། ལུང་དང་རྟོགས་པ་དག་བརྗོད་པ་ན་སེར་སྣ་དང། ཕྲག་དོག་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཡང་དག་པར་བསྔགས་པ་ཇི་ལྟ་བ་བཞིན་སྨྲས་པ་ན། བསྔགས་པ་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས། དགེ་སློང་མ་རྣམས་ལ་འདི་སྐད་ཅེས་སྨྲས་སོ། །ཀྱེ་ཕུ་ནུ་མོ་དག །ཁྱིམ་ག་གེ་མོར་ནི་མ་འདེང་ཞིག །དེ་དག་གིས་འདི་སྐད་ཅེས་སྨྲས་སོ། །ཅིའི་ཕྱིར། དེས་འདི་སྐད་སྨྲས་སོ། །ཁོ་མོས་ཁྱིམ་དེ་ངལ་བ་ཆེན་པོས་ཆོས་བཤད་ནས་དད་པར་བྱས་པ་ཡིན་ནོ། །དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཁྱིམ་གྱི་སེར་སྣས་གནོད་བར་མ་གྱུར་གྲང། དེས་འདི་སྐད་ཅེས་གྱུར་ཏོ། །ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཁྱིམ་ལ་ཞེས་བྱ་བ་ནི། བྲམ་ཟེ་དང་ཁྱིམ་བདག་གི་ཁྱིམ་ལའོ། །སེར་སྣ་བྱེད་ན་ཞེས་བྱ་བ་ནི། ཕྲག་དོག་བསྐྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་

---

^{[མ་དཔེ་གཟིགས་ན་འདིར་གནོན།]}

སློང་མས་ཇི་ཙམ་ཅུང་ཟད་ཁྱིམ་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དགེ་སློང་མ་རྣམས་ལ་གདམས་ངག་འབོགས་པ་ན་ཕུ་ནུ་མོ་དག་བྲམ་ཟེ་ཡ་མཚན་དུ་འཛིན་པ་རྣམས་ཀྱི་ཁུ་ཚུར་དང། ཐལ་ལྕག་གིས་བརྒྱབས་ནས་ཀླད་པ་གས་པར་གྱུར་ན་མི་རུང་གི །ཧ་ཅང་སྔར་བསོད་སྙོམས་ལ་མ་འདོང་ཞིག །ཅེས་དེས་གཞན་དག་བཟློག་ནས་རང་ཉིད་ནང་བར་ཆེས་སྔ་བ་ཞིག་ཏུ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ། སྤྱོད་ཡུལ་དུ་ཞུགས་པ་དང། བྲམ་ཟེ་ཡ་མཚན་དུ་འཛིན་པ་ཞིག་གིས་མཐོང་ནས། དེས་དེ་བཟུང་སྟེ། ཁུ་ཚུར་དང་ཐལ་ལྕག་གིས་ཏེ་བོར་བརྡེགས་པས། དེ་མིག་ཕུགས་སྣད་ཅིང། དབྱར་ཁང་དུ་སོང་བ་དང། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་སུས་བརྡེགས། དེས་སྐབས་དེ་རྒྱས་པར་སྨྲས་པ་དང། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་རྙེད་པའི་སེར་སྣས་གནོད་པར་མ་གྱུར་གྲང། དེས་འདི་སྐད་ཅེས་གྱུར་ཏོ། །ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྙེད་པ་ལ་སེར་སྣ་བྱེད་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །རྙེད་པ་ལ་སེར་སྣ་བྱེད་ན་ཞེས་བྱ་བ་ལ། རྙེད་པ་ནི་གཉིས་ཏེ། ཟས་ཀྱི་རྙེད་པ་དང། གོས་ཀྱི་རྙེད་པ་ཡིན་ཏེ། དོན་འདི་ལ་ནི་ཟས་ཀྱི་རྙེད་པ་ཡིན་པར་དགོངས་སོ། །སེར་སྣ་བསྐྱེད་ན་ཞེས་བྱ་བ་ནི། ཕྲག་དོག་བསྐྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྙེད་བ་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་ནས་སྔོན་གྱི་སྦྱོར་བ་ནི། དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྦོམ་དགའ་མོ། གཞན་དག་ལ་རྗེས་སུ་སྟོན་ཅིང། རང་མི་བསྒྲུབ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་འདས་པའི་དུས་ན་ཡང་སྦོམ་དགའ་མོ་གཞན་ལ་རྗེས་སུ་སྟོན་ཅིང། རང་མི་

---

^{[མ་དཔེ་གཟིགས་ན་འདིར་གནོན།]}

སྒྲུབ་པས་ཚུལ་མ་ཡིན་པས་སྡུག་བསྔལ་དུ་གྱུར་བ་ཡིན་ཏེ། དགེ་སློང་དག་སྔོན་བྱུང་བ་འདས་པའི་དུས་ན་ལམ་པོ་ཆེ་ཞིག་ནས་རི་སྐེགས་མོ་རབ་ཏུ་མང་པོ་རྒྱུས་པ་དང། དེ་ན་རི་སྐེགས་མོ་ཞིག་ཡོད་པ་རི་སྐེགས་མོ་རྣམས་ལ། ཕུ་ནུ་མོ་དག་ཁྱེད་མཁྲིས་པའི་ནད་ཀྱིས་སྨྱོས་པར་གྱུར་དང་མི་རུང་གི །ཁྱེད་ཅག་ཏིལ་ལམ་ཟ་ཞིག་ཅེས་རྗེས་སུ་བསྟན་ནས། དེ་རང་ཉིད་ཤིང་རྟ་འོངས་པའི་ལམ་ཀ་ན་ཏིལ་ཟ་ཟ་བ་ལས་ཤིང་རྟའི་འཁོར་ལོས་མགོ་བཅད་པར་གྱུར་ཏོ། །དེ་ནས་ལྷ་ཞིག་གིས་དེའི་ཚེ་ཚིགས་སུ་བཅད་དེ་སྨྲས་པ། གཞན་ལ་རྗེས་སུ་སྟོན་བྱེད་ཅིང། །རང་ཉིད་སྒྲུབ་པར་མི་བྱེད་པ། །བརྐམ་ཆགས་པ་ཡི་རང་བཞིན་ཅན། །རི་སྐེགས་མོ་འདི་འཁོར་ལོས་བཅོམ། །དགེ་སློང་དག་ཇི་སྙམ་དུ་སེམས། རི་སྐེགས་མོ་གང་ཡིན་པ་དེ་ནི། སྦོམ་དགའ་མོ་འདི་ཉིད་ཡིན་ཏེ། དེ་ན་ཡང་འདི་གཞན་དག་ལ་རྗེས་སུ་སྟོན་ཅིང། བདག་ཉིད་མི་སྒྲུབ་པས་ཚུལ་བཞིན་མ་ཡིན་པས་སྡུག་བསྔལ་བར་གྱུར་ལ། ད་ལྟར་ཡང་གཞན་དག་ལ་རྗེས་སུ་སྟོན་ཅིང། བདག་ཉིད་མི་སྒྲུབ་པས་ཚུལ་བཞིན་མ་ཡིན་པས་སྡུག་བསྔལ་བར་གྱུར་ཏོ། །དེ་ལྟ་བས་ན་དགེ་སློང་དག་འདི་ལྟར་བསླབ་པར་བྱ་སྟེ། མཐུན་པ་གང་ལ་བདག་ཉིད་སྒྲུབ་པ་ལ་གཞན་དག་ཀྱང་རྗེས་སུ་བསྟན་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །ལྟུང་བྱེད་ཉི་ཤུ་པའི་དྲུག་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ན་སྦོམ་དགའ་མོ་ལ། ལྷན་ཅིག་གནས་པ་དང། ཉེ་གནས་རྣམས་ཀྱི་ལུང་བླངས་པ་དང། དེས་འདི་སྐད་ཅེས་དེང་ལ་རེ་ཞིག་ཁོ་མོའི་སྣོད་དུ་ཆོས་ཤིག །བུ་རམ་དང། སེ་འབྲུ་དག་ཉེས་ཤིག་ཅེས་སྨྲས་ནས། དེ་ཕན་ཚུན་བསྒྱངས་ཏེ། དེ་དག་ལ་ལུང་མ་བྱིན་པ་དང། དེ་དག་གིས་འདི་སྐད་ཅེས་སྨྲས་སོ། །འཕགས་མ་ཁྱོད་ཆོས་ལ་སེར་སྣ་མི་བྱེད་གྲང། དེས་འདི་སྐད་ཅེས་།ཀྱེ་བུ་ཟན་མོའི་བུ་མོ་དག །ཁོ་མོ་དྲུག་སྡེ་རྣམས་ལ་ལུང་གི་ཆེད་དུ་སེའུ་འབྲུ་མཉེས་པས་ནི།

---

^{[མ་དཔེ་གཟིགས་ན་འདིར་གནོན།]}

ལག་པ་ལ་སེར་ག་བྱུང། བཟོད་པ་གསོལ་བས་ནི་མགོ་བོ་བྱི། པུས་མོ་བཙུགས་ནས་ལུང་གསོལ་བས་ནི་ལྕེ་གསན། ཁོ་མོ་ཅིའི་ཕྱིར་སེར་སྣ་མི་བྱེད་ཅེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཆོས་ལ་སེར་སྣ་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཆོས་ལ་སེར་སྣ་བྱེད་ན་ཞེས་བྱ་བ་ལ། ཆོས་ཞེས་བྱ་བ་ནི། སངས་རྒྱས་ཀྱིས་གསུངས་པའམ། ཉན་ཐོས་ཀྱིས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཆོས་ལ་སེར་སྣ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །སེར་སྣ་ལྔའི་བར་སྡོམ་ནི། གནས་དང་བསྔགས་དང་ཁྱིམ་དང་ནི། །རྙེད་པ་ཉིད་དང་ཆོས་ལའོ། །ལྟུང་བྱེད་ཉི་ཤུ་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་རྣམས། རྙེད་པ་གནས་གཅིག་ཏུ་ཟོས་ནས། ཅིག་ཤོས་སུ་ཡང་ཟ་བར་བྱེད་དེ། དེ་ལྟར་སྤངས་པ་དང། མ་སྤངས་པ་ཟ་བ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟོས་ཏེ་སྤངས་ཟིན་ནས། བཅའ་བ་དང་བཟའ་བ་འཆོས་སམ་ཟོས་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ། ཟོས་ཟིན་ནས་ཞེས་བྱ་བ་ནི། གནས་གཅིག་ཏུ་སྤངས་ནས་སྤྱོད་ལམ་བཤིག་པའོ། །བཅའ་བ་དང་བཟའ་བ་ཞེས་བྱ་བ་ནི། བཅའ་བ་ལྔ་དང་བཟའ་བ་ལྔའོ། །འཆོས་སམ་ཟོས་ན་ཞེས་བྱ་བ་ནི། ལྐོག་མར་ཁམ་གྱིས་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སྤངས་པ་ལ་སྤངས་པའི་འདུ་ཤེས་ཀྱིས་འཆོས་སམ་ཟོས་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་མ་སྤངས་

---

^{[མ་དཔེ་གཟིགས་ན་འདིར་གནོན།]}

པ་ལ་སྤངས་པའི་འདུ་ཤེས་ཀྱིས་འཆོས་སམ་ཟོས་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་ཉི་ཤུ་པའི་བརྒྱད་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས། ལྷུང་བཟེད་དང། ཆོས་གོས་བླངས་ནས་བསོད་སྙོམས་ཀྱི་ཕྱིར་བྱུང་སྟེ། ཁྱིམ་བདག་གཅིག་གི་ཁྱིམ་དུ་ཞུགས་པ་དང། ཁྱིམ་བདག་དེའི་ཆུང་མ་བུ་ཐོན་བུ་བཙས་པས། རང་གིས་ཁྱེའུ་བཀྲུ་བ་མ་ཤེས་སོ། །དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག །དེས་འདི་སྐད་ཅེས་སྨྲས་སོ། །འཕགས་མ་བདག་གློབ་མི་དགའ་ལགས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅིའི་ཕྱིར། བདག་གི་ཁྱེའུ་སུས་ཀྱང་མ་བཀྲུས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་མི་འཁྲུ་མ་འཚལ་ཏོ། །སྤོམ་དགའ་མོས་འདི་སྐད་ཅེས་སྨྲས་སོ། །ཅི་ཁྱོད་ཀྱང་ཁབ་བཞིན་དུ་ལས་སྣ་གཅིག་པ་ཡིན་ནམ། དེས་འདི་སྐད་ཅེས་སྨྲས་སོ། །འཕགས་མ་འདི་ལ་བྱང་བ་ཅུང་ཟད་མངའ་མ། སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང། ལས་ཀྱི་གནས་གང་ལ་མ་བྱང་བ་ཅུང་ཟད་ཡོད་དམ། དེས་འདི་སྐད་ཅེས་སྨྲས་སོ། །འཕགས་མ་བདག་གི་ཁྱེའུ་ཁྲུས་གྱིས་ལ་སྩོལ་ཅིག །དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོ་ལ་སུས་བསོད་སྙོམས་སྦྱིན་པར་འགྱུར་རོ། །དེས་འདི་སྐད་ཅེས་སྨྲས་སོ། །བདག་གིས་ཕྱི་བཞིན་འབྲང་བའི་དགེ་སྦྱོང་མ་དང། བདག་གིས་མཁན་མོ་དང། ཁང་སྐྱོང་མ་ལ་དབུལ་ལོ། །དེ་ནས་སྦོམ་དགའ་མོས་ལྷུང་བཟེད་བཞག །གོས་དག་བ་རྫེས་ནས་ཁྱེའུ་བླངས་ཏེ། ཡུད་ཙམ་ཞིག་བསྐྱོད་ནས། དེའི་འོག་ཏུ་འདག་རྫས་དག་གིས་བཀྲུས་དྲིལ་ཏེ། དེ་ནས་ཆུ་དྲོན་གྱིས་བཀྲུས། མིག་ཏུ་མིག་སྨན་བླུགས། ས་ཞག་གིས་ཐིག་ལེ་བྲིས། སྐྲའི་བྱི་དོར་བྱས། སྦྲང་རྩི་དང་མར་སར་གྱིས་བསྙོད་ནས་ཁུལ་ཞོར་བཅུག་སྟེ་བསྙལ་ནས་འདི་སྐད་ཅེས་ཁྱོད་ཀྱིས་འདི་བཞིན་དུ་ཉི་མ་རེ་རེ་ཞིང་ཁྲུས་བྱོས་ཤིག་ཅེས་བསྒོ་ནས། དེས་

---

^{[མ་དཔེ་གཟིགས་ན་འདིར་གནོན།]}

བསོད་སྙོམས་ཀྱིས་ཁུར་བསླང་སྟེ། དབྱར་ཁང་དུ་སོང་ངོ། །དེ་ནས་ཁྱིམ་བདག་དེ་འོངས་ནས། ཆུང་མ་དེ་ལ་འདི་སྐད་ཅེས་སྨྲས་སོ། །བཟང་མོ་ཁྱོད་ཀྱིས་དེ་རིང་ཁྱེའུ་ཁྲུས་བྱས་པ་ལེགས་སོ། །འོར་ཆེའོ་ཞེས་བྱ་བ་ནས། སྦོམ་དགའ་མོས་བཀྲུས་སོ། །ཞེས་བྱ་བ་དང། བསོད་སྙོམས་རབ་ཏུ་མང་དུ་ཕུལ་ལོ་ཞེས་བྱ་བའི་བར་རོ། །དེ་ནས་དུས་གཞན་ཞིག་ན་སྐྱེ་དགུའི་བདག་མོ་ཆེན་མོ་གོའུ་ཏ་མི་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ། ཁྱིམ་བདག་གི་ཁྱིམ་དེར་བསོད་སྙོམས་ཀྱི་ཕྱིར་ཞུགས་ནས་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག །དེས་འདི་སྐད་ཅེས་སྨྲས་སོ། །འཕགས་མ་བདག་གི་ཁྱེའུ་ཁྲུས་གྱིས་ལ་སྩོལ་ཅིག །དེ་ནས་སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །ཕུ་ནུ་མོ་ཁོ་མོས་བྱང་ཆུབ་སེམས་དཔའ་བཀྲུས་ཏེ། དེ་ལས་ཁྱེའུ་གཞན་ནི་མ་བཀྲུས་སོ། །ཕུ་ནུ་མོ་ཁྱོད་དགེ་སློང་མ་ཚུལ་ཁྲིམས་དང་ལྡན་པ་ལ་མཆིད་སྩོལ་བས། ཕྱིར་ཡང་བྲན་མོར་འགྱུར་བའི་ལས་གསོག་གམ། དེ་ལྟ་མོད་ཀྱི། ཕུ་ནུ་ཁྱོད་ཀྱིས་འདི་ལྟར་དགེ་སློང་མ་ཁྱེའུ་འཁྲུ་བ་ག་ལས་མཐོང་ངམ་ཐོས་དེས་འདི་སྐད་ཅེས་སྨྲས་སོ། །འཕགས་མ་སྦོམ་དགའ་མོས་བཀྲུས་སོ། །སྐྱེ་དགུའི་བདག་མོ་ཆེན་མོས་འདི་སྐད་ཅེས་དེ་ཁོ་ནས་ཁོ་མོ་ཅག་ལ་ཡང་གནས་སྐབས་འདི་བྱུང་ངོ་ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུ་ལེན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །བུ་ཞེས་བྱ་བ་ནི་བུ་ཆུང་ངུའོ། །ལེན་ན་ཞེས་བྱ་བ་ནི་རྩེ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཅི་ཡང་རུང་བུ་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། ཁྲུས་རས་དག་ནི་བྱ་བ་དང། །གོས་དང་བཀྲུ་བར་བྱ་བ་དང། སྣམ་སྦྱར་དག་ནི་བརྗེ་བ་དང། དགེ་ཚུལ་ཆོས་གོས་སྦྱིན་པའོ། །གླེང་གཞི་

---

^{[མ་དཔེ་གཟིགས་ན་འདིར་གནོན།]}

ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག །ཁྱིམ་བདག་གི་ཆུང་མ་རབ་ཏུ་མང་པོ་དང་ལྷན་ཅིག་སྒྲེན་མོར་བྱུང་ནས། ཁྲུས་བྱེད་པ་དང། དེ་ནས་སྦོམ་དགའ་མོས། ཁོ་མོའི་རྨོངས་ཀྱི་ཚོགས་ཤིན་ཏུ་གང་ལ། ལེགས་པར་འཁྱིལ་བ། དཔེར་ན། སྲན་མ་ཤའི་འབྲས་བུ་ལྟར་འདུག་པ་ལ་ལྟོས་ཞེས་སྟོན་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་མས་ཁྲུས་རས་བཅང་བར་བྱའོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་ཀྱིས་ཁྲུས་རས་བཅང་བར་བྱའོ། །ཞེས་བཀའ་སྩལ་པ་དེའི་ཚེ། སྦོམ་དགའ་མོ་མི་ཐོགས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲུས་རས་མེད་པར་ཁྲུས་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཁྲུས་རས་ཞེས་བྱ་བ་ནི། ཁྲུས་ཀྱི་རས་ཏེ། དེ་མེད་པར་རོ། །ཁྲུས་བྱེད་ན་ཞེས་བྱ་བ་ལ། ཁྲུས་ནི་གཉིས་ཏེ། འཇུག་པའི་ཁྲུས་དང། དབང་བསྐུར་བའི་ཁྲུས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྲུས་གཉིས་བྱེད་ན། ཁྲུས་ཀྱི་ཁྲུས་རས་མི་འཆང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་མི་གཙང་བས་གོས་པའི་གོས་དག་བཙོ་བླག་མཁན་འཁྲུར་བཅུག་པ་དང། བྲམ་ཟེ་དང་ཁྱིམ་བདག་དག་བདག་ཅག་གི་གོས་དག་ཀྱང་འདིས་ནི་མི་གཙང་བར་འགྱུར་རོ་ཞེས་ཁ་ཟེར་བར་བྱེད་པའི་སྐབས་དེ། དགེ་སློང་མ་རྣམས་ཀྱིས། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང། བཙོ་བླག་མཁན་ལ་གོས་འཁྲུར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །གཙོ་བླག་

---

^{[མ་དཔེ་གཟིགས་ན་འདིར་གནོན།]}

མཁན་ཞེས་བྱ་བ་ནི། ཁྱིམ་པ་མོའོ། །གོས་ཞེས་བྱ་བ་ནི། བདུན་པོ་གང་ཡང་རུང་བའོ། །འཁྲུར་འཇུག་ན་ཞེས་བྱ་བ་ནི། བཀྲུ་བཤལ་བྱེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་མི་གཙང་བས་གོས་པའི་གོས་འཁྲུར་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་གཉིས་པ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་དྲུག་པ། གླེང་གཞི་ནི་མཉན་ཡོད་ནའོ། །བུད་མེད་ནི་བརྗེད་ངས་པ་ཡིན་པས། དགེ་སློང་མ་རྣམས་ཀྱིས་ཆོས་གོས་བྱིན་གྱིས་བརླབས་པ་བརྗེད་ནས་དེ་དག་གིས་བདག་ཅག་གིས་གང་དག་ནི་བྱིན་གྱིས་བརླབས། གང་དག་ནི་བྱིན་གྱིས་མ་བརླབས་པ་མ་ཤེས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དེང་ཕྱིན་ཆད། དགེ་སློང་མ་རྣམས་ཀྱིས་ཚེས་བཅོ་ལྔ་བཅོ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་བྱའོ། །དེ་ནས་སྦོམ་དགའ་མོས་ཚེས་བཅོ་ལྔ་བཅོ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད་ནས། དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཁྱོད་ཅིའི་ཕྱིར། ཚེས་བཅོ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད། དེས་འདི་སྐད་ཅེས་ཁོ་མོས་སྡེ་སྣོད་གསུམ་དྲན་ན། ཅིའི་ཕྱིར་ཁོ་མོས་ཆོས་གོས་བྱིན་གྱིས་བརླབ་པ་མི་དྲན། ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཟླ་བ་ཕྱེད་ཕྱེད་ཅིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཟླ་བ་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཅིང་ངོ། །ཆོས་གོས་ཞེས་བྱ་བ་ནི་ལྔ་པོ་གང་ཡང་རུང་བའོ། །བྱིན་གྱིས་བརླབ་པ་ཞེས་བྱ་བ་ནི། བྱིན་གྱིས་བརླབ་པར་བྱ་བ་དྲན་པར་བྱའོ། །ཉམས་སུ་མྱོང་བར་མི་བྱེད་ན་ཞེས་བྱ་བ་ནི། སྟོན་པའི་བསླབ་པ་ཉམས་སུ་མྱོང་བར་མི་

---

^{[མ་དཔེ་གཟིགས་ན་འདིར་གནོན།]}

བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད། ཚེས་བཅོ་ལྔ་བཅོ་ལྔ་ཞིང་ཆོས་གོས་བྱིན་གྱིས་བརླབ་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་གསུམ་པ་རྫོགས་སོ།། །།གླེང་གཞི་ནི་རྒྱལ་པོའི་ཁབ་ནའོ། །གང་གི་ཚེ་སྦོམ་དགའ་མོས། གར་མཁན་མོ་ལས་སླར་བཅའ་བ་བླངས་ཏེ། ཆོས་གོས་བྱིན་པ་དང། དེས་བགོས་ནས་གར་བྱས་ཏེ། དེ་ཉིད་དུ་དྲུག་སྡེ་དག་སུན་ཕྱུང་ངོ། །དེ་ནས་དྲུག་སྡེ་རྣམས་ཀྱིས་ཐོས་ནས། སྦོམ་དགའ་མོའི་དྲུང་དུ་སོང་སྟེ། སྦོམ་དགའ་མོ་དང་གཏུགས་ནས་སྣད་པར་བརྡེགས་སོ། །དེ་ཡང་མིག་ཕུགས་སྐྲངས་ཤིང་དབྱར་ཁང་དུ་སོང་བ་དང། དེ་ལ་དགེ་སློང་མ་རྣམས་ཀྱིས་སྨྲས་པ། ཁྱོད་སུས་བརྡེགས། དེས་འདི་སྐད་ཅེས་སྨྲས་སོ། །ཁོ་མོ་མིང་པོ་དག་གིས་བརྡེགས་ཀྱི་མི་དགར་མ་བྱེད་ཅིག །དེ་དག་གིས་འདི་སྐད་ཅེས་སྨྲས་སོ། །ཅིའི་ཕྱིར། དེས་སྐབས་དེ་རྒྱས་པར་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་མོ་ལ་དགེ་སྦྱོང་གི་ཆོས་གོས་བྱིན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཁྱིམ་པ་མོ་ཞེས་བྱ་བ་ནི། ཁྱིམ་ན་གནས་པའོ། །དགེ་སྦྱོང་གི་ཆོས་གོས་ཞེས་བྱ་བ་ནི། ངུར་སྨྲིག་གོ་།སྦྱིན་ན་ཞེས་བྱ་བ་ནི་གཏོང་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སྦྱོང་གི་ཆོས་གོས་ཁྱིམ་པ་མོ་ལ་བྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཅིག་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། སྨེ་གབ་ཚོགས་ཀྱི་སྨེ་གབ་དང། །བཀྲེན་པ་ཡི་རང་འཇུག་པ་དང། །སྲ་བརྐྱང་དབྱུང་བར་བྱ་བ་དང། །གོས་དག་བགོ་བར་བྱ་བའོ། །གླེང་གཞི་ནི་མཉན་ཡོད་ནའོ། །དེ་ནས་བུད་མེད་ནི་སྔོན་གྱི་

---

^{[མ་དཔེ་གཟིགས་ན་འདིར་གནོན།]}

ལས་ཀྱིས་འཕངས་པའི་ཤུགས་ཡོད་པས། དགེ་སློང་མ་རྣམས་ཟླ་བ་ངོ་རེ་ཞིང་ཟླ་མཚན་འཛག་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྨེ་གབ་བཅང་བར་བྱའོ། །གང་གི་ཚེ་བཅོམ་ལྡན་འདས་ཀྱིས་སྨེ་གབ་བཅང་བར་བྱའོ་ཞེས་གསུངས་པ་དེའི་ཚེ། དེ་དག་ཐོགས་ཤིང་རྒྱུ་བ་ན་ལྟུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྲད་བུས་བསྡམ་པར་བྱའོ། །ཡང་སྦོམ་དགའ་མོ་མི་ཐོགས་པས། དེ་བྱིན་པ་ལ་ཁྲག་འཛག་ཅིང་བསོད་སྙོམས་ལ་སོང་བ་བྲམ་ཟེ་དང། ཁྱིམ་བདག་རྣམས་ཀྱིས་མཐོང་ནས་དྲིས་པ། འཕགས་མ་བྱིན་པ་ལ་ཁྲག་འཛག་པའོ་ནི་ཅི་ལགས། དེས་འདི་སྐད་ཅེས་མ་ལ་དྲིས་ཤིག །སྲིང་མོ་ལ་དྲིས་ཤིག །བུ་མོ་ལ་དྲིས་ཤིག་ཅེས་སྨྲས་པ་ན། དེ་དག་བདག་ཅག་གི་ཁྱིམ་ཐམས་ཅད་ཀྱང་བཙོག་པར་འགྱུར་རོ་ཞེས་ཕྱར་ཀ་གཏོང་བར་བྱེད། ཁ་ཟེར་བར་བྱེད། སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བར་དུ་མཛད་དེ། ཡང་དགེ་སློང་མ་སྨེ་གབ་མི་འཆང་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྨེ་གབ་ཅེས་བྱ་བ་ནི། བུད་མེད་ཀྱི་མི་བདེ་བ་དགག་པའོ། །མི་འཆང་ན་ཞེས་བྱ་བ་ནི། རང་གིར་མི་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལྟ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྨེ་གབ་མི་འཆང་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་ཕྲེང་ལྡན་མས། བཅོམ་ལྡན་འདས་ཀྱིས་དགེ་སློང་མ་རྣམས་ལ་

---

^{[མ་དཔེ་གཟིགས་ན་འདིར་གནོན།]}

སྨེ་གབ་རྗེས་སུ་གནང་ངོ་ཞེས་ཐོས་ནས་དེ་འདི་སྙམ་དུ། ཀྱེ་མའོ་བདག་གིས་དགེ་སློང་མའི་དགེ་འདུན་ཐམས་ཅད་ལ་སྨེ་གབ་དབུལ་ལོ་སྙམ་དུ་བསམས་སོ། །དེ་ནས་སྦོམ་དགའ་མོ་བཙུན་མོ་ཕྲེང་ལྡན་མ་གང་ན་བདེར་སོང་སྟེ་ཕྱིན་ནས། བཙུན་མོ་ཕྲེང་ལྡན་མ་ལ་འདི་སྐད་ཅེས་སྨྲས་སོ། །བཙུན་མོ། །བཅོམ་ལྡན་འདས་ཀྱིས། དགེ་སློང་མ་རྣམས་ལ་སྨེ་གབ་རྗེས་སུ་གནང་ངོ། །དེ་ནས་བཙུན་མོ་ཕྲེང་ལྡན་མས། ནང་མི་ལ་བསྒོ་བ་དང། དེ་དག་གིས་གོས་སྣ་ཚོགས་ཀྱི་སྒྲོམ་དག་མདུན་དུ་བཞག་གོ་།དེ་ནས་བཙུན་མོ་ཕྲེང་ལྡན་མས། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་གོས་འདི་དགེ་སློང་མའི་ཚོགས་ཐམས་ཅད་ལ་སྨེ་གབ་ཏུ་བྲིམས་ཤིག །དེ་ནས་སྦོམ་དགའ་མོས་གོས་འདི་དག་ཐམས་ཅད་རང་གིར་བྱས་པ་དང། དགེ་སློང་མ་གཞན་ཞིག་བཙུན་མོ་ཕྲེང་ལེན་མ་གང་ན་བ་དེར་སོང་སྟེ་ཕྱིན་ནས། བཙུན་མོ་ཕྲེང་ལྡན་མ་ལ་འདི་སྐད་ཅེས་སྨྲས་སོ། །བཙུན་མོ་བདག་ལ་ཡང་སྨེ་གབ་སྩོལ་ཅིག །དེ་ནས་བཙུན་མོ་ཕྲེང་ལྡན་མས། དགེ་སློང་མ་དེ་ལ་འདི་སྐད་ཅེས་སྨྲས་སོ། །འཕགས་མ་བདག་གིས་དགེ་སློང་མའི་ཚོགས་ཐམས་ཅད་ཀྱི་སྨེ་གབ་སྦོམ་དགའ་མོའི་ལག་ཏུ་གཏད་ལགས་སོ། །ཇི་ཙམ་ན་སྦོམ་དགའ་མོ་ལ་བསླངས་པ་ལས་མ་བྱིན་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྨེ་གབ་ཅན་གྱི་ཚོགས་ཀྱི་སྨེ་གབ་གང་ཟག་རང་གིར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྨེ་གབ་ཅན་ཞེས་བྱ་བ་ནི་བུད་མེད་ན་བའོ། །ཚོགས་ཀྱི་སྨེ་གབ་ཅེས་བྱ་བ་ནི། དགེ་སློང་མའི་དགེ་འདུན་དང་ཐུན་མོང་པའོ། །གང་ཟག་ཅེས་བྱ་བ་ནི་གཅིག་པུའོ། །རང་གིར་བྱེད་ན་ཞེས་བྱ་བ་ནི། བདག་གིར་རྣོན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྨེ་གབ་ཅན་གྱི་ཚོགས་ཀྱི་སྨེ་གབ་གང་ཟག་རང་གིར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་ཁྱིམ་བདག་ནད་པ་སྦྱོར་མི་བཟོད་པ་ཞིག་ཡོད་དོ། །དེ་ནས་སྦོམ་དགའ་མོ་ཁྱིམ་བདག་དེ་གང་ན་བ་དེར་སོང་སྟེ་ཕྱིན་ནས། ཁྱིམ་བདག་ལ་འདི་སྐད་ཅེས་སྨྲས་སོ། །བཞིན་བཟང་སྲ་བརྐྱང་གི་

---

^{[མ་དཔེ་གཟིགས་ན་འདིར་གནོན།]}

དུས་ལ་བབ་ཀྱི་སྲ་བརྐྱང་བྱིན་ཅིག །དེས་འདི་སྐད་ཅེས་སྨྲས་སོ། །འཕགས་མ་བདག་ནི་བྲོ་འཚལ་བ་ཞིག་སྟེ། ཅི་ཡང་མ་མཆིས་སོ། །དེ་ནས་སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོས་ཁྱོད་ལ་བསྟན་གྱི། བཞིན་བཟང་ཚོང་ཁང་ནས་སྐྱིན་པོ་ལོང་ལ་ཕྱིས་སྐྱིན་པ་བྱིན་ཅིག །དེ་ནས་སྦོམ་དགའ་མོས་ཉམ་ཆུང་ངུ་སྲ་བརྐྱང་ལ་རྗེས་སུ་ཡི་རང་བར་བྱེད་དུ་བཅུག་ནས་བླངས་ཏེ་དབྱར་ཁང་དུ་སོང་ངོ། །དེ་ནས་ཁྱིམ་བདག་དེ་དུས་གཞན་ཞིག་ན་ཚོང་པ་དེས་བཟུང་ནས། །ཀར་ཤ་པ་ཎ་དག་མ་བྱིན་གྱི་བར་དུ་གང་ཡང་མ་འགྲོ་ཞིག་ཅེས་བཟུང་ངོ། །དེ་ནས་ནེའུ་ཟླ་དག་གིས་ཁྱིམ་བདག་དེ་ལ་སྨྲས་པ། གནས་འདི་ན་ཅི་བྱེད། དེས་འདི་སྐད་ཅེས་བུ་ལོན་པ་དག་གིས་བཟུང་ངོ། །ཞེས་སྨྲས་སོ། །དེ་དག་གིས་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་བུ་ལོན་པ་དག་གིས་བཟུང། དེས་སྐབས་དེ་རྒྱས་པར་སྨྲས་པ་དང། དེ་དག་འདི་སྐད་ཅེས། ཤཱཀྱའི་སྲས་ཀྱི་དགེ་སློང་རྣམས་ཀྱི་དགེ་སྦྱོང་གི་ཚུལ་དང་ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་ནད་པ་ལ་ཡང་རྗེས་སུ་ཡི་རང་བར་བྱེད་དུ་འཇུག་གོ་ཞེས་ཁ་ཟེར་བར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཉམ་ཆུང་དུ་ལ་སྲ་བརྐྱང་དབུལ་དུ་འཇུག་གམ། རྗེས་སུ་ཡི་རང་བར་བྱེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཉམ་ཆུང་ངུ་ཞེས་བྱ་བ་ནི་ནད་པའོ། །སྲ་བརྐྱང་དབུལ་དུ་འཇུག་གམ་ཞེས་བྱ་བ་ནི། དགེ་འདུན་གྱི་ཆོས་གོས་སོ། །རྗེས་སུ་ཡི་རང་བར་བྱེད་དུ་འཇུག་ན་ཞེས་བྱ་བ་ནི། སྐྱིན་པོ་ལེན་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཉམ་ཆུང་ངུ་ལ་སྲ་བརྐྱང་རྗེས་སུ་ཡི་རང་བར་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གཉིས་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་གནས་སུ་སྲ་བརྐྱང་བཏིང་བ་ལས། དགེ་སློང་མཆོ་མ་རྐུན་

---

^{[མ་དཔེ་གཟིགས་ན་འདིར་གནོན།]}

པས་བཏོགས་པ་རབ་ཏུ་མང་བ་དག་ལྷགས་ཏེ་དེ་དག་གིས་འདི་སྐད་ཅེས། གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་སྲ་བརྐྱང་དབྱུང་བར་བྱའོ་ཞེས་སྨྲས་པའི་སྐབས་དེ། བཅོམ་ལྡན་འདས་ལ་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་སྟེ། སྲ་བརྐྱང་དབྱུང་བར་བྱའོ། །བཅོམ་ལྡན་འདས་ཀྱིས་གསུངས་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་མལ་བཤམས་པ་བྱས་ཏེ་ཞེས་བྱ་བ་ནས། དྲིས་པའི་ལན་གྱིས་དགེ་སློང་མ་རྣམས་ལ་ཡང་དག་པར་བསྒོ་ལ། དེའི་འོག་ཏུ་དགེ་སློང་མ་གཅིག་གིས་གསོལ་བ་བྱས་ཏེ་ལས་བྱའོ། །ལས་ནི་འདི་ལྟར་བྱ་སྟེ། འཕགས་མའི་དགེ་འདུན་ཕུ་ནུ་མོ་དག་བདག་ལ་གསན་དུ་གསོལ། གནས་འདིར་དགེ་སློང་མ་ཆོམ་རྐུན་པས་བཏོགས་པ་རབ་ཏུ་མང་པོ་དག་མཆིས་ལགས་ན། གལ་ཏེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་གྱིས་གནང་བར་མཛོད་ཅིག་དང། འདི་ལྟར་འཕགས་མའི་དགེ་འདུན་གྱིས་དགེ་སློང་མ་ཆོམ་རྐུན་པས་བཏོགས་པ་རབ་ཏུ་མང་པོའི་སླད་དུ་སྲ་བརྐྱང་དབྱུང་བར་མཛད་དོ། །འདི་ནི་གསོལ་བའོ། །དེ་བཞིན་དུ་ལས་ཀྱང་རྒྱས་པར་བརྗོད་པར་བྱའོ། །དེ་ནས་སྦོམ་དགའ་མོ་སྲ་བརྐྱང་འབྱིན་པ་ཉམས་སུ་མྱོང་བར་མི་བྱེད་པ་ནས་དགེ་སློང་མ་རྣམས་ཀྱི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྲ་བརྐྱང་འབྱིན་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྲ་བརྐྱང་འབྱིན་པ་ཞེས་བྱ་བ་ནི། དགེ་འདུན་གྱི་ཆོས་གོས་སོ། །འབྱིན་པ་ཉམས་སུ་མྱོང་བར་མི་བྱེད་ན་ཞེས་བྱ་བ་ནི། མཐུན་པ་མི་སྦྱིན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་འདུན་དང་ལྷན་ཅིག་སྲ་བརྐྱང་འབྱིན་པ་ཉམས་སུ་མྱོང་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་

---

^{[མ་དཔེ་གཟིགས་ན་འདིར་གནོན།]}

ཉི་ཤུ་གཉིས་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་སྲ་བརྐྱང་ཕྱུང་ནས། དེར་གོས་ཀྱི་རྙེད་པ་གང་ཡིན་པ་དེ་བགོ་བར་བྱའོ་ཞེས་གསུངས་པ་དང། དེ་ནས་སྦོམ་དགའ་མོ་གོས་ཀྱི་རྙེད་པ་འགེད་པ་ཉམས་སུ་མྱོང་བར་མི་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། །ཡང་དགེ་སློང་མ་གང་སྲ་བརྐྱང་གི་རྙེད་པ་འགེད་པ་ཉམས་སུ་མྱོང་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྲ་བརྐྱང་གི་རྙེད་པ་འགེད་པ་ཞེས་བྱ་བ་ནི། གོས་འགེད་པའོ། །ཉམས་སུ་མྱོང་བར་མི་བྱེད་ན་ཞེས་བྱ་བ་ནི་མི་འདུན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གོས་ཀྱི་རྙེད་པར་འགེད་པ་ཉམས་སུ་མྱོང་བར་མི་བྱེད་ན། ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ལེན་འདོད་པ་ཉིད་མ་ཡིན་ན་ལྟུང་བ་མེད་དོ། །ལྟུང་བྱེད་ཉི་ཤུ་གཉིས་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། ཚུར་ཤོག་ཉེ་བར་ཞི་བྱ་དང། །བཅོལ་ནས་འགྲོ་བར་བྱ་བ་དང། །རིག་པ་མི་བླང་མི་གཞུག་དང། །ཁ་ཟས་བཙོང་བར་མི་བྱ་བའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་མ་རྣམས་ཀྱི་ལྷན་ཅིག་གནས་པ་དང། ཉེ་གནས་དག་ཕན་ཚུན་འཐབ་པ་ན། སྦོམ་དགའ་མོས་དེ་ལ་རྐྱེན་དག་ཉེ་བར་བསྒྲུབས་བས་དེས་ན་འཐབ་མོ་ཆེ་ཐང་དུ་བྱུང་ནས། དགེ་སློང་མ་རྣམས་ཀྱིས་འདི་སྐད་ཅེས་འཕགས་མ་ཚུར་སྤྱོན། འཐབ་མོ་ཉེ་བར་ཞི་བར་བགྱིའོ་ཞེས་སྨྲས་པ་དང། སྦོམ་དགའ་མོས་འདི་སྐད་ཅེས་མགོས་མགོ་ཅིའི་ཕྱིར་མ་བཙལ། རེ་ཞིག་ཁོ་མོ་ནི་འཐབ་མོ་བྱེད་ཀྱི། ཉེ་བར་ཞི་བར་མི་བྱེད་དོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་

---

^{[མ་དཔེ་གཟིགས་ན་འདིར་གནོན།]}

བར་དུ་མཛད་དེ། ཡང་དགེ་སློང་མ་གང་འཐབ་མོ་ཉེ་བར་ཞི་བར་བྱ་བའི་མཐུ་ཡོད་པར་གྱུར་ལ། ཉེ་བར་ཞི་བར་མི་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །མཐུ་ཡོད་པར་གྱུར་ལ་ཞེས་བྱ་བ་ནི་མཐུ་དང་ལྡན་པའོ། །འཐབ་མོ་ཞེས་བྱ་བ་ནི་མཚང་འདྲུ་བའོ། །ཉེ་བར་ཞི་བ་ཞེས་བྱ་བ་ནི་རབ་ཏུ་ཞི་བའོ། །ཉེ་བར་ཞི་བར་མི་བྱེད་ན་ཞེས་བྱ་བ་ནི་མི་ཟློག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཐབ་མོ་དང། མཚང་འདྲུ་བ་ཉེ་བར་ཞི་བར་བྱ་བར་ནུས་ཤིང་མཐུ་ཡོད་པར་གྱུར་ལ། ཉེ་བར་ཞི་བར་མི་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གསུམ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་དབྱར་ཁང་སྒོ་བཅད་ནས། ལྡེ་མིག་ཁྱེར་ཏེ་ལྗོངས་རྒྱུ་ཞིང་སོང་བ་ལས། དབྱར་ཁང་དེར་མེ་ཤོར་ཏེ། །དགེ་སློང་མ་རྣམས་ཀྱིས་གསད་པར་འདོད་ན་སྒོ་དབྱེར་ལྡེ་མིག་མ་རྙེད་ནས། མེས་ཚིག་པར་གྱུར་པ་དེའི་ཚེ། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དབྱར་ཁང་མ་བཅོལ་བར་ལྗོངས་རྒྱུ་ཞིང་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །དབྱར་ཁང་ཞེས་བྱ་བ་ནི་གཙུག་ལག་ཁང་ངོ། །མ་བཅོལ་བར་ཞེས་བྱ་བ་ནི། དགེ་སློང་མ་རྣམས་ལ་ལྡེ་མིག་མ་གཏད་པར་རོ། །ལྗོངས་རྒྱུ་ཞིང་འགྲོ་ན་ཞེས་བྱ་བ་ནི། མཚམས་ཀྱི་ཕྱི་རོལ་ཏུ་འགྲོ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་མཚམས་ཀྱི་ནང་ལ། མཚམས་ཀྱི་ནང་དུ་འདུ་ཤེས་པས་དགེ་སློང་མ་རྣམས་ལ་ལྡེ་མིག་མ་གཏད་པར་མཚམས་ཀྱི་ཕྱི་རོལ་དུ་བྱུང་ན་ལྟུང་བྱེད་དོ། །དེ་བཞིན་དུ་ཡིད་གཉིས་ཟ་ན་ལྟུང་བྱེད་དོ། །དགེ་སློང་མས་མཚམས་ཀྱི་ཕྱི་རོལ་ལ། མཚམས་ཀྱི་ནང་དུ་འདུ་ཤེས་པས། དགེ་སློང་མ་རྣམས་ལ་ལྡེ་མིག་མ་གཏད་

---

^{[མ་དཔེ་གཟིགས་ན་འདིར་གནོན།]}

པར་མཚམས་ཀྱི་ཕྱི་རོལ་ཏུ་བྱུང་ན་ཉེས་བྱས་སོ། །དེ་བཞིན་དུ་ཡིད་གཉིས་ཟ་ན་ཉེས་བྱས་སོ། །ལྟུང་བྱེད་ཉི་ཤུ་གསུམ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་ཆགས་པས་སྐྱེས་པ་འདོད་ནས། དེ་སྦོམ་འཚོང་གི་ཁྱེའུ་ཞིག་གི་དྲུང་དུ་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །བཞིན་བཟང་རིག་པ་ཅུང་ཟད་ཀློག་གམ། དེས་འདི་སྐད་ཅེས་སྨྲས་ཏེ་ཀློག་གོ། སྦོམ་དགའ་མོས། འདི་སྐད་ཅེས་སྨྲས་ཏེ་ཐོན་ཅིག་དང། བཀླག་གོ། དེས་འདི་སྐད་ཅེས། སི་རི་ཕུ། བི་སི་རི་བུ། སི་རི་བི་སྭཱཧཱ། ཞེས་སྨྲས་སོ། །སྦོམ་དགའ་མོས་འདི་སྐད་ཡང་དང་ཡང་དུ་བརྗོད་ཅིག་ཅེས་སྨྲས་པ་དང། ཇི་ཙམ་ན་ཁྲོས་ནས་མགོ་རེག་སློ་ངན་པ་ཞེས་སྤྱོས་སོ། །ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས་སྨྲས་སོ། །འདི་ལྟར་ཁྱོད་ཀྱིས་ཚིག་གཉིས་ཀྱང་མི་ཟིན་ན། ཇི་ལྟར་ཁྱོད་ཀྱིས་སྡེ་སྣོད་གསུམ་བཟུང། དེས་འདི་སྐད་ཅེས་སྨྲས་སོ། །ཁོ་མོས་བརྗོད་པ་དང་པོ་ལ་བཟུང་ཟིན་མོད་ཀྱི། ཚིག་ཙམ་རང་གིར་བྱེད་དོ། །ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས། འཕགས་མ་ཁྱོད་འདོད་ཆགས་ཀྱིས་རབ་ཏུ་མེ་འབར་བ་ངོ་མཚར་ཏོ། །ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་ལས་རིག་པ་ཀློག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཁྱིམ་པ་ལས་ཞེས་བྱ་བ་ནི། ཁྱིམ་ན་གནས་པ་ལས་སོ། །རིག་པ་ཞེས་བྱ་བ་ནི། སེལ་བར་བྱེད་པའོ། །ཀློག་ན་ཞེས་བྱ་བ་ནི། ཀུན་ཆུབ་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་པ་ལས་རིག་པ་ཀློག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གསུམ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་སྐྱེས་བ་ཞིག་རིག་པ་ཀློག་ཏུ་བཅུག་ནས། ཀྱེ་ནང་རྗེ། སི་རི་ཕུ། བི་སི་རི་བུ། སི་རི་བི་སི་རི་བུ་

---

^{[མ་དཔེ་གཟིགས་ན་འདིར་གནོན།]}

སྭཱཧཱ། ཟུང་ཞིག་ཅེས་དེ་ལྟར་ལན་གཉིས་ལན་གསུམ་གྱི་བར་དུ་བཏོན་པ་དང། དེ་ནས་མི་དེས་འདི་སྐད་ཅེས་སྨྲས་སོ། །འཕགས་མ་བདག་གིས་ཀུན་ཆུང་བར་བཟུང་ལགས་སོ། །སྦོམ་དགའ་མོས་ཡང་དང་ཡང་དུ་ཟུང་ཞིག་ཅེས་སྨྲས་པ་དང། དེ་ནས་མི་དེ་ཁྲོས་ནས་འདི་སྐད་ཅེས་མགོ་རེག་མོ་ངན་པ་ཁྱོད་ཀྱང་མ་མཐོང་ཡང་བླ། རིག་པ་ཡང་མེད་དུ་ཟད་དོ་ཞེས་སྨྲས་པ་དང། ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས་སྨྲས་སོ། །འཕགས་མ་ཁྱོད་ཅིའི་ཕྱིར་དེ་ལྟར་བྱེད། སྦོམ་དགའ་མོས་འདི་སྐད་ཅེས་སྨྲས་སོ། །ཁོ་མོ་ཚིག་ཙམ་རང་གིར་བྱེད་དོ། །ཕྱི་བཞིན་འབྲང་བའི་དགེ་སྦྱོང་མས་འདི་སྐད་ཅེས། འཕགས་མ་ཁྱོད་ཉོན་མོངས་པས་མ་གོས་པ་ངོ་མཚར་ཆེའོ་ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྱེས་པ་ལ་རིག་པ་ཀློག་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྐྱེས་པ་ལ་ཞེས་བྱ་བ་ནི་མི་ལའོ། །རིག་པ་ཞེས་བྱ་བ་ནི། རིག་པ་མ་ཡིན་པ་ལ་རིག་པའི་སྒྲར་གསུངས་པའོ། །ཀློག་ཏུ་འཇུག་ན་ཞེས་བྱ་བ་ནི་འདོན་དུ་འཇུག་ནའོ། །ལྟུང་བྱེད་དེ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྐྱེས་པ་ལ་རིག་པ་ཀློག་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་གསུམ་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསོད་སྙོམས་མང་དུ་རྙེད་པ་དང། དེས་བསོད་པ་གང་ཡིན་པ་དེ་ནི་ཟས་སོ། །ཕྱེ་དང་འབྲས་ཆན་ལ་སོགས་པ་ངན་པ་གང་ཡིན་པ་དེ་ནི་བཙོངས་སོ། །དེ་ནས་དུས་གཞན་ཞིག་ན། སྦོམ་དགའ་མོ་དགོས་པ་འགའ་ཞིག་གི་ཕྱིར་ཕྱི་རོལ་དུ་སོང་བ་དང། ཕྱེ་ཉོ་བ་ཞིག་འོངས་ནས། དེ་སྐྱེ་དགུའི་བདག་མོ་ཆེན་མོའི་དྲུང་དུ་སོང་སྟེ། སོང་ནས་འདི་སྐད་ཅེས་སྨྲས་སོ། །འཕགས་མ་ཇི་ག་ཕྱེ་དག་མངའ་

---

^{[མ་དཔེ་གཟིགས་ན་འདིར་གནོན།]}

འམ་སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །བཞིན་བཟང་ཅི། ཁོ་མོ་ཕྱེའི་ཚོང་ཁང་གིས་བསྐོར་ཏམ། དེ་ནས་མི་དེས་འདི་སྐད་ཅེས་སྨྲས་སོ། །འཕགས་མ་དགེ་སློང་མ་དག་ཕྱེ་འཚོང་ལགས་སོ། །དེས་འདི་སྐད་ཅེས་སྨྲས་སོ། །བཞིན་བཟང་ཕྱེ་འཚོང་བའི་དགེ་སློང་མ་དེ་གང་ཡིན། དེ་ནས་མི་དེས་འདི་སྐད་ཅེས་སྨྲས་སོ། །སྦོམ་དགའ་མོ་ལགས་སོ། །སྐྱེ་དགུའི་བདག་མོ་ཆེན་མོ་གོའུ་ཏ་མིས། འདི་སྐད་ཅེས་དེ་ཁྲོ་ནས་ཁོ་མོ་ཅག་ལ་ཡང་གནས་སྐབས་འདི་བྱུང་ངོ། །ཞེས་སྨྲས་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁ་ཟས་འཚོང་ན་།ཁ་ཟས་ཞེས་བྱ་བ་ནི། ཕྱེ་ལ་སོགས་པའོ། །འཚོང་ན་ཞེས་།ཁ་ཟས་ཞེས་བྱ་བ་ནི། ཕྱེ་ལ་སོགས་པའོ། །འཚོང་ན་ཞེས་བྱ་བ་ནི་རིན་ལེན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁ་ཟས་འཚོང་ན་ཇི་སྲིད་དུ་རིན་རང་གིར་མ་བྱས་པ་དེ་སྲིད་དུ་ཉེས་བྱས་སོ། །རང་གིར་བྱས་ན་ལྟུང་བྱེད་དོ། །ལྟུང་བྱེད་ཉི་ཤུ་གསུམ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། ཁྱིམ་གྱི་གོ་རེ་ལོང་མི་བྱ། །སྟན་ནི་སྐྱེད་དུ་མི་གཞུག་ཅིང། །སྐུད་པའང་བཀལ་བར་མི་བྱ་སྟེ། །གདུགས་དང་མཆིལ་ལྷམ་མི་བཅང་བའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ། ཁྱིམ་བདག་ཅིག་གི་ཁྱིམ་དུ་བསོད་སྙོམས་ལ་ཞུགས་ནས། དེ་ནས་ཁྱིམ་བདག་གི་ཆུང་མ་དེ་ལ་འདི་སྐད་ཅེས་སྨྲས་སོ། །མཚན་བཟང་མ། བསོད་སྙོམས་བྱིན་ཅིག །དེས་འདི་སྐད་ཅེས་སྨྲས་སོ། །འཕགས་མ་བདག་སློ་བ་མི་དགའ་ལགས་སོ། །སྦོམ་དགའ་མོས་འདི་སྐད་ཅེས་སྨྲས་སོ། །ཅི་དེ་རིང་ཁྱོད་ཀྱིས་བེའུས་འོ་མ་ཐམས་ཅད་འཐུངས་སམ། དེས་འདི་སྐད་ཅེས་སྨྲས་སོ། །འཕགས་མ་ཁྱིམ་གྱི་གོ་རེ་ལོང་བགྱིད་

---

^{[མ་དཔེ་གཟིགས་ན་འདིར་གནོན།]}

རྔོ་མི་ཐོགས་ལགས་མོད། སྦོམ་དགའ་མོས་ཡང་འདི་སྐད་ཅེས་སྨྲས་སོ། །ཅི་ཁྱོད་ཀྱང་ཁབ་ཇི་ལྟ་བར་ལས་སྣ་གཅིག་པ་ཡིན་ནམ་ཁྱིམ་བདག་གི་ཆུང་མས་ཀྱང་འདི་སྐད་ཅེས་སྨྲས་སོ། །འཕགས་མ་ཁྱོད་འདི་ལ་བྱང་བ་ཅུང་ཟད་མངའམ། སྦོམ་དགའ་མོས་ཀྱང་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང། ལས་ཀྱི་གནས་གང་ལ་མ་བྱང་བ་ནི་གང་ཞིག་ཡོད། དེ་ནས་ཁྱིམ་བདག་གི་ཆུང་མ་དེས་སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་བདག་གི་གོ་རེ་ལོང་མཛོད་ཅིག །དེས་འདི་སྐད་ཅེས་སྨྲས་སོ། །ཁོ་མོ་ལ་སུས་བསོད་སྙོམས་སྦྱིན་པར་འགྱུར། ཁྱིམ་བདག་གི་ཆུང་མས་འདི་སྐད་ཅེས་སྨྲས་སོ་ཞེས་བྱ་བ་ནས། ཁང་སྐྱོང་ལ་ཡང་དབུལ་ལོ་ཞེས་བྱ་བའི་བར་རོ། །དེ་ནས་སྦོམ་དགའ་མོས་ལྷུང་བཟེད་མཐའ་གཅིག་ཏུ་བཞག་ནས་གོས་དག་བརྫེས་ཏེ་ཁྱིམ་དེ་ཐམས་ཅད་ཆག་ཆག་ལེགས་པར་བཏབ། ཕྱག་དར་ལེགས་པར་བྱས་ནས་མལ་བཅས། ལྕགས་ཀྱི་སྣོད་དང། དངུལ་གྱི་སྣོད་དང། གསེར་གྱི་སྣོད་དག་བྱི་དོར་བྱས་ནས་བཞག་སྟེ། ཁྱིམ་དེ་ཐམས་ཅད་ཤིན་ཏུ་མཛེས་པར་བྱས་སོ། །དེ་ཡང་བསོད་སྙོམས་ཀྱི་ཁུར་བླངས་ནས་དབྱར་ཁང་དུ་སོང་ངོ། །དེ་ནས་ཁྱིམ་བདག་དེས་མཐོང་ནས་འདི་སྐད་ཅེས་སྨྲས་སོ། །བཟང་མོ་ཁྱོད་ཀྱིས་དེ་རིང་ཁྱིམ་གྱི་བྱི་དོར་གཙང་གཙོང་ལྟར་བྱས་སོ། །དེས་འདི་སྐད་ཅེས་སྨྲས་ཏེ། འཕགས་མ་སྦོམ་དགའ་མོས་བགྱིས་ཀྱི་བདག་གིས་མ་བགྱིས་སོ། །དེས་འདི་སྐད་ཅེས་སྨྲས་སོ། །ཁྱོད་ཀྱིས་དེ་ལ་ཉི་མ་རེ་རེ་ཞིང་བསོད་སྙོམས་བྱིན་ཤིག་དང། ཁྱོད་ཀྱི་ཁྱིམ་གྱི་གོ་རེ་ལོང་བྱེད་པར་འགྱུར་རོ། །དེ་ནས་དུས་གཞན་ཞིག་ན་སྐྱེ་དགུའི་བདག་མོ་ཆེན་མོ་གོའུ་ཏ་མི་ཁྱིམ་དེར་བསོད་སྙོམས་ལ་ཞུགས་པ་དང། དེ་ནས་ཁྱིམ་བདག་གི་ཆུང་མ་དེས། སྐྱེ་དགུའི་བདག་མོ་ཆེན་མོ་ལ་འདི་སྐད་ཅེས་སྨྲས་སོ། །འཕགས་མ་བདག་གི་ཁྱིམ་གྱི་གོ་རེ་ལོང་མཛོད་དེ་སྩོལ། དེས་འདི་སྐད་ཅེས་སྨྲས་སོ། །ཕུ་ནུ་མོ་ཁོ་མོས་ཟས་གཙང་གི་ཁྱིམ་གྱི་གོ་རེ་ལོང་ཡང་མ་བྱས་ན།་ད་རབ་ཏུ་བྱུང་ནས་

---

^{[མ་དཔེ་གཟིགས་ན་འདིར་གནོན།]}

བྱའམ། དེ་ལྟ་མོད་ཀྱི། ཕུ་ནུ་མོ་ཁྱོད་ཚུལ་ཁྲིམས་དང་ལྡན་པ་ལ་མཆིང་སྩོལ་བ་ནི་བསོད་ནམས་མ་ཡིན་པ་མང་དུ་བསགས་ནས་བྲན་མོར་འགྱུར་པའི་ས་བོན་བསྐྱེད་དམ། གཞན་ཡང་ཁྱོད་ཀྱིས་རབ་ཏུ་བྱུང་བ་ཁྱིམ་གྱི་གོ་རེ་ལོང་བྱེད་པ་མཐོང་བའམ། ཐོས་པ་སུ་ཡོད། དེས་འདི་སྐད་ཅེས་སྨྲས་སོ། །སྦོམ་དགའ་མོ་ལགས་སོ། །སྐྱེ་དགུའི་བདག་མོ་ཆེན་མོས་ཀྱང་འདི་སྐད་ཅེས་དེ་ཁོ་ནས་བདག་ཅག་ལ་ཡང་གནས་སྐབས་འདི་བྱུང་ངོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་གྱི་གོ་རེ་ལོང་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཁྱིམ་གྱི་གོ་རེ་ལོང་ཞེས་བྱ་བ་ནི། རང་གི་ཁྱིམ་གྱི་བྱང་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་གྱི་གོ་རེ་ལོང་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བཞི་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། དེ་ནས་སྦོམ་དགའ་མོ་དགེ་སློང་མ་རྣམས་ལ་ལུང་ཀློག་ཏུ་འཇུག་པ་ན། དེའི་ཕྱི་བཞིན་དགེ་སློང་མ་སྟན་བསྐྱེད་དུ་བཅུག་ཅིང། འདི་སྐད་ཅེས་ཁྱེར་ལ་གནས་ག་གེ་མོ་ཞིག་ཏུ་ཐོང་ཞིག་ཅེས་བསྒོ་བར་བྱེད་བ་དང། དགེ་སློང་མ་རྣམས་ཀྱིས། ཁྱེད་དགེ་སློང་མ་རྣམས་སྟན་བསྐྱེད་དུ་བཅུག་ཅིང་ཉམས་སུ་མྱོང་བར་བྱེད་པ་ནི། བསོད་ནམས་མ་ཡིན་པ་མང་དུ་སྐྱེད་དོ། །ཞེས་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་རྣམས་ལས་སྟན་སྐྱེད་པ་ཉམས་སུ་མྱོང་བར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དགེ་སློང་མ་རྣམས་ཞེས་བྱ་བ་ནི་ཆོས་འདི་པའོ། །ལས་ཞེས་བྱ་བ་ནི་ལས་སོ། །སྟན་ཞེས་བྱ་བ་ནི་ཁྲིའུ་དག་གོ། །

---

^{[མ་དཔེ་གཟིགས་ན་འདིར་གནོན།]}

སྟན་སྐྱེད་དུ་བཅུག་ཅིང་ཞེས་བྱ་བ་ནི། ཕྱི་བཞིན་ཁྱེར་དུ་བཅུག་ཅིང་ངོ། །ཉམས་སུ་མྱོང་བར་བྱེད་ན་ཞེས་བྱ་བ་ནི་རང་གིར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་མ་རྣམས་ལས་སྟན་སྐྱེད་པ་ཉམས་སུ་མྱོང་བར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་རྒས་བ་སྦྱོར་མི་བཟོད་པའམ། ནད་པ་ཞིག་ཆོས་འཆད་པ་ཡིན་ན་ལྟུང་བ་མེད་དོ། ལྟུང་བྱེད་ཉི་ཤུ་བཞི་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ། ཁྱིམ་བདག་གཅིག་གི་ཁྱིམ་དུ་བསོད་སྙོམས་ལ་ཞུགས་ནས་ཁྱིམ་བདག་གི་ཆུང་མ་དེ་ལ་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག །དེས་འདི་སྐད་ཅེས་སྨྲས་སོ། །འཕགས་མ་བདག་སྐུད་པ་འཁལ་བས། གློ་བ་བྲེལ་ལོ། །གཙུག་དགའ་མོས་འདི་སྐད་ཅེས་སྨྲས་སོ། །ཁྱོད་སོང་ལ་བསོད་སྙོམས་ཁྱེར་ཏེ་ཤོག་ཅིག་དང། ཁོ་མོས་བཀལ་ལོ་ཞེས་བསོད་སྙོམས་ཀྱི་ཕྱིར་བཀའ་ལོ། །དེ་ནས་དུས་གཞན་ཞིག་ན། སྐྱེ་དགུའི་བདག་མོ་ཁྱིམ་དེར་བསོད་སྙོམས་ལ་ཞུགས་ཏེ་འདི་སྐད་ཅེས་སྨྲས་སོ། །ཕུ་ནུ་མོ་བསོད་སྙོམས་བྱིན་ཅིག །ཁྱིམ་བདག་གི་ཆུང་མས་འདི་སྐད་ཅེས་སྨྲས་སོ། །འཕགས་མ་སྐུད་པ་ཁོལ་མཛོད་ཅིག་དང། དེའི་བར་དུ་བསོད་སྙོམས་འཚལ་ཏེ་མཆིའོ། །སྐྱེ་དགུའི་བདག་མོ་ཆེན་མོས་འདི་སྐད་ཅེས་སྨྲས་སོ། །ཕུ་ནུ་མོ་ཁོ་མོ་ཁྱིམ་པར་འགྱུར་བ་ན་ཡང་འཁལ་མ་མྱོང་ན། ད་རབ་ཏུ་བྱུང་ནས་འཁལ་ལམ། དེ་ལྟ་མོད་ཀྱི་ཞེས་བྱ་བ་དང། བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐུད་པ་འཁལ་ན་ལྟུང་བྱེད་དོ། །ཡང་གང་ཞེས་བྱ་བ་ནི། གཙུག་དགའ་མོའོ། །སྐུད་པ་ཞེས་བྱ་བ་ནི། བདུན་པོ་གང་ཡང་རུང་བའོ། །འཁལ་ན་ཞེས་བྱ་བ་ནི། ཕུང་བུར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་སྐུད་པ་འཁལ་

---

^{[མ་དཔེ་གཟིགས་ན་འདིར་གནོན།]}

ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་སོ་སོའི་གནས་དབེན་པར་ཤུར་བུ་དང། ལྕག་ཕོད་དང། རྒྱ་ཅང་གི་ཕྱིར་ནི་ལྟུང་བ་མེད་དོ། །ལྟུང་བྱེད་ཉི་ཤུ་བཞི་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོ་མཆིལ་ལྷམ་བགོས། གདུགས་ཐོགས་ཏེ། བསོད་སྙོམས་ལ་རྒྱུ་བ་དང། དེ་སྐྱེ་བོ་མང་པོ་དགོང་ཅིང་བྲམ་ཟེ་དང་ཁྱིམ་བདག་རྣམས་འཕྱ་བའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གདུགས་དང། མཆིལ་ལྷམ་ཐོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི། གཙུག་དགའ་མོའོ། །གདུགས་ཞེས་བྱ་བ་ནི་ཚ་བའི་སྐྱབས་སོ། །མཆིལ་ལྷམ་ཞེས་བྱ་བ་ནི་ལྷམ་མོ། །ཐོགས་ན་ཞེས་བྱ་བ་ནི་བདག་ཉིད་དོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད། གདུགས་དང། མཆིལ་ལྷམ་ཐོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །དབྱར་ཁང་དུ་གནས་མལ་བསྲུང་བའི་ཕྱིར་མཆིལ་ལྷམ་འཆང་བ་ལ་ནི་ལྟུང་བ་མེད་དོ། །ལྟུང་བྱེད་ཉི་ཤུ་བཞི་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། དཔུང་བར་ཕོལ་མིག་བྱུང་བ་དང། །སྨད་འཚོང་མ་ཡི་དགེ་སློང་དང། དགེ་སློང་མ་དང་དགེ་སློབ་མ། །དགེ་ཚུལ་མ་ཡིས་མཉེ་མི་བྱ། །གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོའི་དཔུང་པར་ཕོལ་མིག་བྱུང་ནས། དེ་སྨན་པས་བཅིངས་ཏེ་དེ་ལྟར་བཅིངས་ཟིན་པ་དང། དེའི་འོག་ཏུ་འདི་སྐད་ཅེས་བཞིན་བཟང་བཅིང་བ་ཧ་ཅང་དམ་ཆེས་སོ་ཞེས་སྨྲས་སོ། །ལྷོད་པར་བྱས་པ་ལས་ཧ་ཅང་ལྷོད་ཆེས་སོ། །ཞེས་དེ་ལྟར་འཆིང་དུ་འཇུག་ཅིང། འགྲོལ་དུ་འཇུག་པ་དང། དེ་ནས་སྨན་པ་དེས་འདི་སྐད་ཅེས་སྨྲས་སོ། །ཁྱོད་འོན་ཀྱང་མ་མཐོང་ཡང་བླ། ཕོལ་མིག་ཀྱང་མ་སོས་སུ་ཟད་མོད་ཅེས་སྨྲས་ནས་སོང་ངོ། །དེ་ལ་དགེ་སློང་མ་རྣམས་ཀྱིས་སྨྲས་པ། འཕགས་མ་ཅིའི་ཕྱིར་ཁྱོད་དེ་ལྟར་བྱེད། དེས་འདི་སྐད་ཅེས་

---

^{[མ་དཔེ་གཟིགས་ན་འདིར་གནོན།]}

སྨྲས་སོ། །ཁོ་མོས་དམ་པ་དང། ལྷོད་པ་ཤེས་མོད་ཀྱི། རེག་པ་ཙམ་རང་གིར་བྱའོ། །དགེ་སློང་མ་རྣམས་ཀྱིས་འདི་སྐད་ཅེས་གང་གི་ཕྱིར་གནས་སྐབས་དེར་ཡང། ཁྱོད་འདོད་ཆགས་ཀྱི་བློ་སྐྱེས་ན་ཁྱོད་ཤིང་སྐམ་ཇི་ལྟ་བ་བཞིན་དུ་འདོད་ཆགས་ཀྱིས་རབ་ཏུ་མི་འབར་བ་ངོ་མཚར་ཆེའོ། །ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དཔུང་པར་ཕོལ་མིག་བྱུང་བ་སྐྱེས་པ་ཡང་དང་ཡང་དུ་འཆིང་ཞིང། འགྲོལ་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། གཙུག་དགའ་མོའོ། །དཔུང་བར་ཕོལ་མིག་བྱུང་བ་ཞེས་བྱ་བ་ནི་རྨ་ཞིག་གོ། ཡང་དང་ཡང་དུ་ཞེས་བྱ་བ་ནི་ལན་དུ་མར་རོ། །སྐྱེས་པས་འཆིང་ཞིང་འགྲོལ་དུ་འཇུག་ན་ཞེས་བྱ་བ་ནི་ཁྱིམ་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རྨ་བྱུང་བ་སྐྱེས་པ་འཆིང་དུ་འཇུག་གམ། འགྲོལ་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་རྨ་ཉིད་ཡིན་ཏེ། བུའམ། མིང་པོའམ། ཕའི་དྲན་པ་བཞག་སྟེ་འཆིང་ན་ལྟུང་བ་མེད་དོ། །ལྟུང་བྱེད་ཉི་ཤུ་ལྔ་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བུད་མེད་སྨད་འཚོང་མ་ཞིག་རབ་ཏུ་ཕྱུང་ངོ། །དེ་ནས་གཡོན་ཅན་དང། ནལ་ཕྲུག་དང། རྒྱན་པོ་དག་སྨད་འཚོང་མ་དེ་ཚོལ་བ་ན། དེ་དག་གིས་སྦོམ་དགའ་མོས་རབ་ཏུ་ཕྱུང་ངོ་ཞེས་ཐོས་ནས། དེ་དག་གིས་བློ་སྐྱེས་པ། ད་ནི་ལེགས་པ་ཞིག་བྱས་ཀྱི་བདག་ཅག་གིས་དེའི་ཟན་དང། གོས་སྦྱིན་མི་དགོས་ཏེ། དེ་ལྟ་མོད་ཀྱི། དགའ་མགུར་ནི་སྤྱད་པར་བྱའོ་སྙམ་ནས། དེ་དག་གནས་དེར་དོང་ཞིང། ཆ་མ་ཡིན་པའི་ཚིག་དག་འབྱིན་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་

---

^{[མ་དཔེ་གཟིགས་ན་འདིར་གནོན།]}

དུ་མཛད་དེ། ཡང་དགེ་སློང་མ་གང་ཤེས་བཞིན་དུ་བུད་མེད་སྨད་འཚོང་མ་རབ་ཏུ་འབྱིན་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི། སྦོམ་དགའ་མོའོ། །ཤེས་བཞིན་དུ་ཞེས་བྱ་བ་ནི། རང་གིས་སམ། གཞན་གྱིས་སྨྲས་པར་གྱུར་པའོ། །བུད་མེད་སྨད་འཚོང་མ་ཞེས་བྱ་བ་ནི། ཀུན་གྱིས་སྤྱད་པར་བྱ་བའོ། །རབ་ཏུ་འབྱིན་ན་ཞེས་བྱ་བ་ནི། ཆོས་འདུལ་བ་འདི་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་སྨད་འཚོང་མ་རབ་ཏུ་འབྱིན་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ཡུལ་གཞན་དུ་བཀར་ནས་རབ་ཏུ་འབྱིན་ན་ལྟུང་བ་མེད་དོ། །ལྟུང་བྱེད་ཉི་ཤུ་ལྔ་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་རང་ལ་དགེ་སློང་མ་དག་མཉེད་དུ་བཅུག་པ་དང། དེ་ལ་དགེ་སློང་མ་དག་གིས་སྨྲས་པ། དུར་ཁྲོད་སྟེན་པ་འདི་མཉེས་ཏེ་ཅི་ཞིག་བྱ། དེས་འདི་སྐད་ཅེས་ཕགས་པའི་མདོག་འདི་འཚེར་ཞིང་གསལ་བར་བྱས་པ་དང། རྒྱན་པོ་པ་དང། ནལ་ཕྲུག་རྣམས་ཀྱི་སྙིང་འགས་པར་འགྱུར་རོ་ཞེས་བྱ་བའི་བར་དུ་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་ལ་དགེ་སློང་མ་དག་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །རང་ལ་མཉེད་དུ་འཇུག་ན་ཞེས་བྱ་བ་ནི་ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་ལྔ་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམས་པ། བཅོམ་ལྡན་འདས་ཀྱིས་དགེ་སློང་མ་དག་གིས་མཉེ་བར་མི་བྱའོ་ཞེས་གསུངས་པས་མ་ལ་བདག་གིས་དགེ་སློང་

---

^{[མ་དཔེ་གཟིགས་ན་འདིར་གནོན།]}

མ་མཉེད་དུ་གཞུག་གོ་སྙམ་ནས། དེས་རང་ལ་དགེ་སློབ་མ་མཉེད་དུ་བཅུག་པ་དང། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་མ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དགེ་སློབ་མ་ཞེས་བྱ་བ་ནི། ཆོས་འདུལ་བ་འདི་ལ་དགེ་སློབ་མར་འགྱུར་བའི་བསླབ་པ་ལ་སློབ་པར་འགྱུར་བའོ། །རང་ལ་མཉེད་དུ་འཇུག་ན་ཞེས་བྱ་བ་ནི། ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད། རང་ལ་དགེ་སོང་མ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་ལྔ་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་གཞོན་ནུ་མ་ལ་ཡང་རྒྱས་པར་བརྗོད་པར་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་ལ་གཞོན་ནུ་མ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གཞོན་ནུ་མ་ཞེས་བྱ་བ་ནི་དགེ་ཚུལ་མའོ། །རང་ལ་མཉེད་དུ་འཇུག་ན་ཞེས་བྱ་བ་ནི་ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་དགེ་ཚུལ་མ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་ལྔ་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། ཁྱིམ་པ་མོ་ཡང་མཉེད་མི་གཞུག །ཀུན་ཏུ་རྒྱུ་མོའང་དེ་བཞིན་ནོ། །དྲི་དང་ཏིལ་གྱི་ཚིགས་མ་དང། །གནག་པའི་རྫས་ཀྱིས་འཕྱི་བའོ། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམས་པ། བཅོམ་ལྡན་འདས་ཀྱིས་གཞོན་ནུ་མའི་བར་གྱིས་མཉེད་དུ་གཞུག་པ་བཀག་གི་།མ་ལ་བདག་གིས་ཁྱིམ་པ་མོ་མཉེད་དུ་གཞུག་གོ་སྙམ་ནས་དེས་

---

^{[མ་དཔེ་གཟིགས་ན་འདིར་གནོན།]}

ཁྱིམ་པ་མོ་མཉེད་དུ་བཅུག་པ་དང་ཞེས་བྱ་བ་ནས། སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པ་མོ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ཁྱིམ་པ་མོ་ཞེས་བྱ་བ་ནི་ཁྱིམ་ན་གནས་པའོ། །མཉེད་དུ་བཅུག་ན་ཞེས་བྱ་བ་ནི། །སྐུ་མཉེ་བྱེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་པ་མོ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ནད་པ་སྦྱོར་མི་བཟོད་པའམ། མའམ། བུའམ། བུ་མོའམ། མིང་པོས་མཉེད་ན་ལྟུང་བ་མེད་དོ། །ལྟུང་བྱེད་ཉི་ཤུ་དྲུག་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་ཀུན་ཏུ་རྒྱུ་མོ་ལ་ཡང་རྒྱས་པར་བརྗོད་པར་བྱ་སྟེ། ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རང་ལ་ཀུན་ཏུ་རྒྱུ་མོ་མཉེད་དུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཀུན་ཏུ་རྒྱུ་མོ་ཞེས་བྱ་བ་ནི། གྲངས་ཅན་གྱི་རབ་ཏུ་བྱུང་བའོ། །རང་ལ་མཉེད་དུ་འཇུག་ན་ཞེས་བྱ་བ་ནི། ལུས་མཉེད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རང་ལ་ཀུན་ཏུ་རྒྱུ་མོ་མཉེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་དྲིས་སྐུད་པར་བྱེད་པ་དང། དགེ་སློང་མ་རྣམས་ཀྱིས་སྨྲས་པ། འཕགས་མ་འདི་ཅི་བྱ། དེས་འདི་སྐད་ཅེས་སྨྲས་སོ། །ལུས་དྲི་ཞིམ་པར་བྱའོ། །དེ་དག་གིས་འདི་སྐད་ཅེས་སྨྲས་སོ། །རང་བཞིན་གྱིས་དྲི་མི་ཞིམ་པའི་ལུས་འདི་ཁྱོད་སུའི་ཆེད་དུ་དྲི་ཞིམ་པར་བྱེད་ཅེས་བྱ་བ་ནས་འདོད་ཆགས་ཅན་གྱིས་མཐོང་ན། འདོད་ཆགས་ཀྱིས་གོས་པར་འགྱུར་རོ་ཞེས་བྱ་བའི་བར་དུ་སྨྲས་པའི་སྐབས་དེ་དགེ་སློང་མ་རྣམས་

---

^{[མ་དཔེ་གཟིགས་ན་འདིར་གནོན།]}

ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དྲིས་སྐུད་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དྲིས་སྐུད་ན་ཞེས་བྱ་བ་ནི། ཙན་དན་དང། དུ་རུ་ཀ་ལ་སོགས་ཏེ་དྲི་ཞིམ་པོས་སོ། །སྐུད་ན་ཞེས་བྱ་བ་ནི། རང་ངམ་གཞན་སྐུད་དུ་འཇུག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དྲིས་སྐུད་དམ། སྐུད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་དྲིས་སྐུད་པ་བཀག་པ་དང་ཞེས་བྱ་བ་ནས། དེ་བཞིན་དུ་ཏིལ་གྱི་ཚིགས་མས་འཕྱི་བ་ལ་ཡང་བརྗོད་པར་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཏིལ་གྱི་ཚིགས་མས་འཕྱིར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཏིལ་གྱི་ཚིགས་མས་འཕྱི་བར་བྱེད་ན་ཐམས་ཅད་དུ་ཞེས་བྱ་བ་ནི། ཏིལ་མར་ཕྱུང་བའི་ཚིགས་མས་ལུས་འཕྱིར་འཇུག་ནའོ། །ལྟུང་བྱེད་དོ། །ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཏིལ་གྱི་ཚིགས་མས་འཕྱིར་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་གནིག་པའི་རྫས་ཀྱིས་ལུས་ཀྱི་དྲི་མ་འཕྱི་བ་ན་དེ་ཉིད་ཉེས་དམིགས་སུ་གྱུར་ནས། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གནིག་པའི་རྫས་ཀྱིས་འཕྱིར་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ། །གནིག་པའི་རྫས་ཞེས་བྱ་བ་ནི་ལུས་

---

^{[མ་དཔེ་གཟིགས་ན་འདིར་གནོན།]}

ཀྱི་དྲི་མ་འཕྱི་ཞིང་གནིག་པར་བྱེད་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གནིག་པའི་རྫས་ཀྱིས་འཕྱིར་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་དྲུག་པའི་ཚིགས་སུ་བཅད་པའི་སྡོམ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ། བམ་པོ་ཉི་ཤུ་བདུན་པ། སྡོམ་ནི། སྐབས་མ་ཕྱེ་བར་འདྲི་བ་དང། །ཁྱིམ་པའི་རྒྱན་ནི་ཐོགས་པ་དང། །སྦྲེལ་ཅིང་ཁྲུས་ནི་བྱེད་པ་དང། །གར་དང་གླུ་དང་རོལ་མོ་མིན། །གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོ་གཙུག་ལག་ཁང་དུ་སོང་ནས། དགེ་སློང་ལ་སྐབས་མ་ཕྱེ་བར་དྲི་བ་དྲིས་པ་དང། དགེ་སློང་དེས་དྲིས་པ་དེ་དགྲོལ་བར་མ་ནུས་ནས། ཞུམ་ཞུམ་པོར་གྱུར་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་དགེ་སློང་ལ་སྐབས་མ་ཕྱེ་བར་དྲི་བ་འདྲི་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དགེ་སློང་ལ་ཞེས་བྱ་བ་ནི། འཁོར་གྱི་གཙོ་བོ་ལའོ། །སྐབས་མ་ཕྱེ་བར་ཞེས་བྱ་བ་ནི། གསོལ་བ་མ་བྱས་པར་རོ། །དྲི་བ་འདྲི་ན་ཞེས་བྱ་བ་ནི། སངས་རྒྱས་ཀྱིས་གསུངས་པའམ། ཉན་ཐོས་ཀྱིས་སྨྲས་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་དགེ་སློང་ལ་སྐབས་མི་ཕྱེ་བར་དྲི་བ་འདྲི་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་དང་པོ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་བླངས་ཏེ། ཕྱུག་པོ་ཞིག་གི་ཁྱིམ་དུ་བསོད་སྙོམས་ལ་ཞུགས་པ་དང། དེ་དག་གི་ལུས་ཀྱི་རྒྱན་གྱི་སྣོད་སྤྲོག་མ་དག་ཏུ་རྒྱན་རྣམས་བཞག་ནས། སྐྲའི་བྱི་དོར་བྱེད་པ་ཡིན་པས། དེ་ནས་སྦོམ་དགའ་མོས། མགུལ་གདུབ་དང། གདུ་བུ་རྒྱན་ཅན་དང། དཔུང་རྒྱན་ལ་སོགས་པ་མཐོང་ནས་བླངས་ཏེ་ཐོགས་པ་དང། བུད་མེད་དེ་དག་གིས་སྨྲས་པ།

---

^{[མ་དཔེ་གཟིགས་ན་འདིར་གནོན།]}

འཕགས་མ་འདི་ཅི་མཛད། དེས་འདི་སྐད་ཅེས་སྨྲས་སོ། །ཁོ་མོའི་ལུས་རྒྱན་གྱིས་མཛེས་སམ་ཅི་ལྟ་མོད། དེ་དག་གིས་སྨྲས་པ། མགོ་རེག་ཚུལ་གཞན་དུ་ཁས་བླངས་པ་ཁྱོད་ལ་མཛེས་སུ་ཅི་ཡོད། ཅེས་བུད་མེད་དེ་དག་དེ་ལྟར་ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྱིམ་པའི་རྒྱན་ཐོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ཁྱིམ་པའི་རྒྱན་ཞེས་བྱ་བ་ནི། མགུལ་གདུབ་དང། གདུ་བུ་རྒྱན་ཅན་དང། དཔུང་རྒྱན་ལ་སོགས་པའོ། །ཐོགས་ན་ཞེས་བྱ་བ་ནི། རྒྱན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཁྱིམ་པའི་རྒྱན་ཐོགས་ན་ཐམས་ཅད་དུ། ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་གཉིས་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག་མཉན་ཡོད་ཀྱི་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དང། ལག་པ་སྦྲེལ་ནས་འབབ་ཆུ་ཨ་ཛི་ར་བ་ཏིར་ལུས་ཁྲུས་བྱེད་པ་ན། དེ་དག་གཅིག་ལ་གཅིག་མཛུབ་མོས་འཛུགས་ཤིང་དེ་དག་དགའ་བར་བྱེད། དགའ་བར་བྱེད་དུ་འཇུག །རྩེ་བར་བྱེད། རྩེར་འཇུག་པར་བྱེད་ཅིང། རྒོད་པ་དང། འཕྱར་གཡེང་དང། ལུས་ཀྱི་རྩབ་ཧྲལ་བྱེད་པ་ཉེ་བར་སྟོན་པ་བྱེད་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ལག་པ་སྦྲེལ་ནས་ཁྲུས་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ་།ལག་པ་སྦྲེལ་ནས་ཞེས་བྱ་བ་ནི་ལག་པ་སྦྲེལ་ཏེའོ། །ཁྲུས་བྱེད་ན་ཞེས་བྱ་བ་ལ། ཁྲུས་ནི་གཉིས་ཏེ། དབང་བསྐུར་བའི་ཁྲུས་དང། འཇུག་པའི་ཁྲུས་ལས། དོན་འདི་ལ་ནི་འཇུག་པའི་ཁྲུས་ལ་བྱ་བར་དགོངས་སོ། །ལྟུང་བྱེད་དོ་ཞེས་བྱ་

---

^{[མ་དཔེ་གཟིགས་ན་འདིར་གནོན།]}

བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཇུག་པའི་ཁྲུས་ལ་ལག་པ་སྦྲེལ་ནས་ཁྲུས་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་གསུམ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་དགའ་སྡེའི་ཚོགས་གཉིས་པོ་གཅིག་ནི་རྒྱལ་རིགས་ཀྱི་དགའ་སྡེའོ། །ཅིག་ཤོས་ནི་བྲམ་ཟེའི་དགའ་སྡེའོ། །དེ་ལ་རྒྱལ་རིགས་ཀྱི་དགའ་སྡེ་ནི་གཡུལ་ལ་བྱང་བ་ཡིན་ནོ། །བྲམ་ཟེའི་དགའ་སྡེ་ནི་གར་ལ་བྱང་བ་ཡིན་ནོ། །གང་གི་ཚེ་དགའ་སྡེའི་ཚོགས་གཉིས་ལས་གཡུལ་འབྱེད་པས་འགྲན་པ་དེའི་ཚེ་ནི། རྒྱལ་རིགས་ཀྱི་དགའ་སྡེ་རྒྱལ་བར་འགྱུར་ལ། གང་གི་ཚེ་གར་གྱི་ཚེ་ནི། བྲམ་ཟེའི་དགའ་སྡེ་རྒྱལ་བར་འགྱུར་རོ། །དེ་ནས་རྒྱལ་རིགས་ཀྱི་དགའ་སྡེ་རྣམས་འདི་སྙམ་དུ་སེམས་ཏེ། བདག་ཅག་གིས་སུ་ཞིག་ལ་གར་བསླབ་སྙམ་པ་ལས། དེ་དག་འདི་སྙམ་དུ་སེམས་ཏེ། འཕགས་མ་སྦོམ་དགའ་མོ་འདི་ནི་ཤཱཀྱའི་རིགས་ལས་རབ་ཏུ་བྱུང་བ་བཟོའི་གནས་ཐམས་ཅད་དང། ལས་ཀྱི་གནས་ཐམས་ཅད་ལ་བྱང་བ་ཡིན་ནོ་སྙམ་དུ་བསམས་ནས། སྦོམ་དགའ་མོ་གང་ན་བ་དེར་དོང་སྟེ་ཕྱིན་པ་དང། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་གར་ལ་བྱང་བ་ཅུང་ཟད་མངའ་མ། དེས་འདི་སྐད་ཅེས་སྨྲས་སོ། །ཁོ་མོས་བཟོའི་གནས་དང། ལས་ཀྱི་གནས་གང་ལ་མ་བྱང་བ་དེ་གང་ཞིག་ཡོད། དེ་དག་གིས་འདི་སྐད་ཅེས་སྨྲས་སོ། །རེ་ཞིག་བདག་ཅག་གིས་སླར་བཅའ་བ་སྦྱིན་གྱི། བདག་ཅག་ལ་གར་སློབས་ཤིག །དེས་སྨྲས་པ། འདི་ལྟར་ལག་པ་སྒྱུར་ཅིག །འདི་ལྟར་རྐེད་པ་སྒྱུར་ཅིག །འདི་ལྟར་རྐང་བ་ཞོག་ཅིག །ཅེས་བྱ་བ་ནས། རྒྱལ་རིགས་ཀྱི་དགའ་སྡེ་རྣམས་གར་སློབ་ཏུ་བཅུག་གོ་ཞེས་བྱ་བའི་བར་རོ། །དེ་ནས་རྒྱལ་རིགས་ཀྱི་དགའ་སྡེ་དེ་དག་གིས། བྲམ་ཟེའི་དགའ་སྡེ་རྣམས་གར་གྱིས་ཕམ་པར་བྱས་སོ། །དེ་ནས་བྲམ་ཟེའི་དགའ་སྡེ་རྣམས་ཀྱིས་འདི་སྐད་ཅེས་སྨྲས་སོ། །ཁྱེད་ཅག་ལ་སུས་བསླབས། དེ་དག་གིས་འདི་སྐད་ཅེས་སྦོམ་དགའ་མོས་སོ། །ཞེས་སྨྲས་པ་ན། དེ་དག་ཤཱཀྱའི་སྲས་ཀྱི་དགེ་

---

^{[མ་དཔེ་གཟིགས་ན་འདིར་གནོན།]}

སྦྱོང་རྣམས་ཀྱི་དགེ་སྦྱོང་གི་ཚུལ་དང། ཚངས་པའི་ཚུལ་ནི་ཚིག་པ་ཡིན་ཏེ། གང་གི་ཕྱིར་འདི་ལྟར་གར་ཡང་སློབ་ཏུ་འཇུག་གོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གར་སློབ་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །གར་ཞེས་བྱ་བ་ནི། ལག་པ་དང་རྐང་པ་སྒྱུར་བའོ། །སློབ་ཏུ་འཇུག་ན་ཞེས་བྱ་བ་ནི་སྟོན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གར་སློབ་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ་ལྟུང་བྱེད་ཉི་ཤུ་བདུན་པའི་བཞི་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་གར་སློབ་ཏུ་གཞུགས་པར་མི་བྱའོ་ཞེས་དགག་པར་མཛད་པ་དང། དེའི་འོག་ཏུ་སྦོམ་དགའ་མོ་དགའ་སྡེའི་དྲུང་དུ་སོང་ནས་གར་སྟོན་པར་བྱེད་དོ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གར་སྟོན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །དེ་བཞིན་དུ་གར་སྟོན་ན་ཞེས་བྱ་བ་ནི་ཉེ་བར་སྟོན་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གར་སྟོན་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་ལྔ་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་གར་ལ་ལྟར་འགྲོ་བའི་བར་དུ་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གར་ལ་ལྟར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །གར་ལ་ལྟར་འགྲོན་ཞེས་བྱ་བ་ནི། ལྟད་མོ་འདོད་དེ་འགྲོ་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་གར་ལ་ལྟར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་དྲུག་པ་རྫོགས་སོ།། །།

---

^{[མ་དཔེ་གཟིགས་ན་འདིར་གནོན།]}

གླེང་གཞི་ནི་མཉན་ཡོད་ནའོ། །གང་གི་ཚེ་དགའ་སྡེ་གཉིས་ལས་གླེངས་ནས། དེ་ནས་བྲམ་ཟེའི་དགའ་སྡེ་རྣམས་གླུའི་ཆེད་དུ་སྦོམ་དགའ་མོ་གང་ན་བ་དེར་དོང་སྟེ་ཞེས་བྱ་བ་ནས། འཕགས་མ་བདག་ཅག་ལ་ཡང་གླུ་སློབས་ཤིག་ཅེས་བྱ་བའི་བར་རོ། །དེས་ཡང་དྲུག་ལྡན་དང་ཞེས་བྱ་བ་ནས། ཤེས་གསལ་ཞེས་བྱ་བ་དང། ཀོའུ་ཤི་ཀ་ཞེས་བྱ་བ་དང། ས་འཛིན་པ་དག་གི་བར་དེ་ལྟ་བུ་རོལ་མོའི་དབྱངས་བདུན་རྒྱས་པར་བསླབས་པ་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གླུ་སློབ་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །གླུ་ཞེས་བྱ་བ་ནི། ཁར་འབྱིན་པའོ། །སློབ་ཏུ་འཇུག་ན་ཞེས་བྱ་བ་ནི་སྟོན་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་པར་ཇི་ལྟར་འགྱུར་ཞེ་ན། དེ་དགེ་སློང་མས་ཇི་ཙམ་ཅུང་ཟད་གླུ་སློབ་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་བདུན་པ་རྫོགས་སོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་གླུ་སྟོན་པ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གླུ་སྟོན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ལྟུང་བའི་རིམ་པ་ནི། གོང་མ་ཇི་ལྟ་བ་དེ་བཞིན་དུ་རྗེས་སུ་མཐུན་པར་བྱའོ། ། ལྟུང་བྱེད་ཉི་ཤུ་བདུན་པའི་བརྒྱད་པའོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་གླུ་ལ་ལྟར་འགྲོ་བ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གླུ་ལ་ལྟར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོའོ། །ལྟུང་བའི་རིམ་པ་ནི། གོང་མ་ཇི་ལྟར་བདེ་བཞིན་དུ་རྗེས་སུ་མཐུན་པར་བྱའོ། །ལྟུང་བྱེད་ཉི་ཤུ་བདུན་པའི་དགུ་པའོ།། །།གླེང་གཞི་ནི་མཉན་ཡོད་ནའོ། །ཞེས་བྱ་བ་ནས་རྒྱལ་རིགས་ཀྱི་དགའ་སྡེ་དག་རོལ་མོའི་ཆེད་དུ་སྦོམ་དགའ་མོ་གང་ན་བ་དེར་སོང་སྟེ་ཕྱིན་ནས། འདི་སྐད་ཅེས་སྨྲས་སོ། །འཕགས་མ་བདག་ཅག་ལ་རོལ་མོ་དག་སློབས་ཤིག །དེས་པི་ཝང་དང། གླིང་བུ་དང། རྫ་རྔ་དང། པི་ཝང་རྒྱུད་གཅིག་པ་དང། བ་བྷི་ས་ཀེ་དང། ལྕགས་ཀྱི་སིལ་ཀྲོལ་དང། ཤིན་ཏུ་དབྱངས་སྙན་ལ་སོགས་པ་དབྱངས་བདུན་པོ་དག་བསླབས་ནས་ཞེས་བྱ་བ་

---

^{[མ་དཔེ་གཟིགས་ན་འདིར་གནོན།]}

ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རོལ་མོ་སློབ་ཏུ་འཇུག་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སློབ་ཏུ་འཇུག་ན་ཞེས་བྱ་བ་ནི། འདོད་པའི་ཡོན་ཏན་དང་ལྡན་པའི་སྒྲ་ལའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་རོལ་མོ་སློབ་ཏུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་བཅུ་པའོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་རོལ་མོ་སྟོན་པ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རོལ་མོ་སྟོན་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ལྟུང་བའི་རིམ་པ་ནི། གོང་མ་ཇི་ལྟ་བ་དེ་བཞིན་དུ་རྗེས་སུ་མཐུན་པར་བྱའོ། །ལྟུང་བྱེད་ཉི་ཤུ་བདུན་པའི་བཅུ་གཅིག་པའོ།། །།གླེང་གཞི་ནི་མཉན་ཡོད་ནའོ། །དེ་བཞིན་དུ་རོལ་མོ་ལ་ལྟར་འགྲོ་བ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རོལ་མོ་ལ་ལྟར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །ལྟུང་བའི་རིམ་པ་ནི། གོང་མ་ཇི་ལྟ་བ་དེ་བཞིན་དུ་རྗེས་སུ་མཐུན་པར་བྱའོ། །ལྟུང་བྱེད་ཉི་ཤུ་བདུན་པའི་ཚིགས་སུ་བཅད་པའི་སྡོམ་རྫོགས་སོ།། །།སྡོམ་ནི། དགེ་སློང་བཅས་པའི་གནས་དག་ནས། །འབའ་ཞིག་བཤང་བར་འགྲོ་མི་བྱ། །པུ་ཤེལ་ཙི་དང་སོ་མངས་དང། །རྩ་ཐུམ་སྐྲ་བརྙན་བཅང་མི་བྱ། །གླེང་གཞི་ནི་མཉན་ཡོད་ནའོ། །དེ་ནས་གཙུག་དགའ་མོས། སྐྱེས་པ་ཞིག་ལ་འདི་སྐད་ཅེས་ཚུར་ཤོག་འདི་དང་འདི་དག་བྱའོ་ཞེས་སྨྲས་ཏེ། ཇི་ཙམ་ན་དབྱར་ཁང་དུ་ཤོག་ཅིག་པའི་བརྡ་བྱས་སོ། །དེ་ནས་སྐྱེས་པ་དེ་ནུབ་མོ་དབྱར་ཁང་དུ་འོངས་པ་དང། དེས་དེ་ཆབ་ཀུང་སར་བཞག་ནས། བྱ་བ་མང་པོ་དང། བསྒྲུབ་པ་མང་པོ་གང་ཡིན་པ་དེ་དག་བྱས་ནས། ཆབ་ཀུང་སར་སོང་སྟེ། སོན་ནས་སྐྱེས་པ་དེ་ལ་འདི་སྐད་ཅེས་སྨྲས་སོ། །གནས་འདི་ནི་མི་གཙང་གི་གནས་གཞན་དུ་འདོང་ངོ། །དེས་འདི་སྐད་ཅེས་སྨྲས་སོ། །གང་དུ་གཙུག་དགའ་མོས་འདི་སྐད་ཅེས་སྨྲས་ཏེ། ཁྱོད་ཀྱི་ཁྱིམ་དུའོ། །དེ་ནས་སྐྱེས་པ་དེས་འདི་སྐད་ཅེས་སྨྲས་སོ། །ཇི་ལྟར་འདོང། གཙུག་དགའ་མོས་འདི་སྐད་ཅེས་སྨྲས་ཏེ། ཀྱེ་རེ་ཞིག་ཁོ་མོའི་ཕྲག་པ་ལ་ཞོན་ཅིག་

---

^{[མ་དཔེ་གཟིགས་ན་འདིར་གནོན།]}

ཅེས་སྐྱེས་པ་དེ་ཕྲག་པ་ལ་ཞོན་པ་དང། དེ་ནས་གཙུག་དགའ་མོ་འདི་སྙམ་དུ་སེམས་ཏེ། བདག་དགེ་སློང་མ་རྣམས་ཀྱི་སྣ་ལ་འགྲོ་བ་གང་ཅི་ཡང་རུང་བ་དེ་ཐམས་ཅད་ནི། ཚུལ་ཁྲིམས་ཙམ་གྱིས་ཡིན་ན། གལ་ཏེ་བདག་དགེ་སློང་མའི་དངོས་པོ་ཞིག་པར་གྱུར་ན། བདག་གིས་ཚིག་ཙམ་ཡང་སྨྲ་བར་ག་ལ་ནུས་ཏེ། ཇི་སྐད་དུ། གཙང་མས་འཇིག་རྟེན་ཟིལ་གནོན་ཏེ། །གཙོག་པས་འཇིག་རྟེན་ཟིལ་མི་གནོན། །ཅེས་ཟེར་བ་ལྟ་བུའོ་སྙམ་དུ་བསམས་ནས། གཙུག་དགའ་མོས་ཁྲོས་ཏེ། འཕགས་མ་ཆོམ་རྐུན་པས་ཁྲིད་དོ་ཞེས་སྨྲས་པ་དང། སྐྱེས་པ་དེས་ཕྲག་པ་ལས་ས་ལ་མཆོངས་ཏེ། འདི་སྐད་ཅེས་མགོ་རེག་མོ་ངན་པ། རང་གིས་བརྡ་བྱས་ལ། འདི་སྐད་ཅེས་ཆོམ་རྐུན་པས་ཁྲིད་དོ་ཞེས་སྨྲའམ། ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་གཅིག་པུ་ཆབ་ཀུང་སར་འགྲོ་ན་ལྟུང་བྱེད་དོ། །ཡང་གང་ཞེས་བྱ་བ་ནི་གཙུག་དགའ་མོའོ། །གཅིག་པུ་ཞེས་བྱ་བ་ནི། གཉིས་པ་ཤོས་མེད་པར་རོ། །ཆབ་ཀུང་སར་འགྲོ་ན་ཞེས་བྱ་བ་ནི། བཤང་བའི་སར་རོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མ་ཇི་ཙམ་ཅུང་ཟད་གཅིག་ཏུ་ཆབ་ཀུང་སར་འགྲོ་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བརྒྱད་པའི་དང་པོའོ།། །།གླེང་གཞི་ནི་མཉན་ཡོད་ནའོ། །དེ་ནས་བཅུ་གཉིས་སྡེ་དག །པུ་ཤེལ་ཙིས་སྐྲ་འཆོས་ཤིང་མཉམ་པར་འཆང་བ་ན། དགེ་སློང་མ་རྣམས་ཀྱིས་འདི་སྐད་ཅེས་སྨྲས་སོ། །ཕུ་ནུ་མོ་དག་འདི་ཅི་བྱེད། དེ་དག་གིས་འདི་སྐད་ཅེས་སྨྲས་སོ། །སྐྲ་མ་འཛིངས་པར་སྐྱེད་མོད། དགེ་སློང་མ་རྣམས་ཀྱིས་འདི་སྐད་ཅེས་ཁྱེད་ཅག་དེ་ལྟར་བྱེད་པ་ནི། སྐྲ་མ་ཡིན་གྱི་ཉོན་མོངས་པ་སྐྱེད་དོ། །ཞེས་སྨྲས་པའི་སྐབས་དེ། དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུ་ཤེལ་ཙིས་སྐྲ་བྱི་དོར་བྱེད་ན་ལྟུང་བྱེད་དོ། །ཡང་གང་

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ནི། བཅུ་གཉིས་སྡེ་དག་གོ་།བུ་ཤེལ་ཙིས་ཞེས་བྱ་བ་ནི། བྷི་ར་[Vi]འི་རྩ་བས་སོ། །སྐྲའི་བྱི་དོར་བྱེད་ན་ཞེས་བྱ་བ་ནི། མགོ་སྐྲ་འཆོས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་པུ་ཤེལ་ཙིས་སྐྲའི་བྱི་དོར་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བརྒྱད་པའི་གཉིས་པའོ།། །།གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བུ་ཤེལ་ཙིས་སྐྲའི་བྱི་དོར་མི་བྱའོ་ཞེས་དགག་པ་མཛད་པ་དེའི་ཚེ། སོ་མངས་ཀྱིས་བྱི་དོར་བྱེད་པ་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སོ་མངས་ཀྱིས་སྐྲའི་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ་།སོ་མངས་ཀྱིས་ཞེས་བྱ་བ་ནི། སོ་མངས་ཀྱིས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཞེས་བྱ་བའི་བར་གོང་ནས་འབྱུང་བ་བཞིན་ནོ། །ལྟུང་བྱེད་ཉི་ཤུ་བརྒྱད་པའི་གསུམ་པའོ།། །།གླེང་གཞི་ནི་མཉན་ཡོད་ནའོ། །ཡང་རྩྭའི་ཐུམ་པོས་སྐྲའི་བྱི་དོར་བྱེད་པ་དང། ཞེས་བྱ་བའི་བར་གྱི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་རྩྭའི་ཐུམ་པོས་སྐྲའི་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ་།རྩྭའི་ཐུམ་པོས་ཞེས་བྱ་བ་ནི། སྡོང་བུ་བཤིབས་པས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཞེས་བྱ་བའི་བར་གོང་ནས་འབྱུང་བ་བཞིན་ནོ། །ལྟུང་བྱེད་ཉི་ཤུ་བརྒྱད་པའི་བཞི་པའོ།། །།གླེང་གཞི་ནི་མཉན་ཡོད་ནའོ། །ཡང་སོ་མངས་དང་རྩྭའི་ཐུམ་པོས་སྐྲའི་བྱི་དོར་བྱེད་པའི་བར་དུ་བྱ་སྟེ་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སོ་མངས་དང། རྩྭའི་ཐུམ་པོས་བྱི་དོར་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི། བཅུ་གཉིས་སྡེ་དག་གོ་།སོ་མངས་དང་རྩྭའི་ཐུམ་པོས་ཞེས་བྱ་བ་ནི། གཉིས་གས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཞེས་བྱ་བའི་བར་དུ་གོང་ནས་འབྱུང་བ་

---

^{[མ་དཔེ་གཟིགས་ན་འདིར་གནོན།]}

བཞིན་ནོ། །ལྟུང་བྱེད་ཉི་ཤུ་བརྒྱད་པའི་ལྔ་པའོ།། །།གླེང་གཞི་ནི་མཉན་ཡོད་ནའོ། །དེ་ནས་སྦོམ་དགའ་མོས་བསམས་པ། བདག་གིས་བྱས་སོ་ཅོག་ཐམས་ཅད་ནི་ཕུལ་ཕྱིན་པར་བྱས་ཀྱི། མ་ལ་རེ་ཞིག་བདག་གིས་སྐྲ་བརྙན་ཡང་ཐོགས་པར་བྱའོ་སྙམ་དུ་བསམས་ནས། རོལ་མོ་མཁན་གྱི་རྒྱན་དང། རོལ་མོ་མཁན་གྱི་གོས་དང། རོལ་མོ་མཁན་གྱི་ལྷམ་ཟུང་གཅིག་བརྙས། གར་མཁན་ཞིག་ལས་སྐྲ་བརྙན་བརྙས་ཏེ། དེ་ནས་སྦོམ་དགའ་མོས་རྒྱན་ཐམས་ཅད་བགོས་ནས། སྨད་འཚོང་མ་ཡོད་པའི་རྟགས་བཙུགས་ཏེ། གནས་གཅིག་ཏུ་བསྡད་པ་དང། དེ་ནས་སྐྱེས་པ་ཞིག་འོངས་ནས། དེས་དྲིས་པ། ཉི་མ་གཅིག་ལ་གླ་ཅི་ཙམ། དེས་འདི་སྐད་ཅེས་སྨྲས་ཏེ། ཀརྴ་པ་ཎ་ལྔ་བརྒྱའོ། །སྐྱེས་པ་དེས་འདི་སྐད་ཅེས་སྨྲས་སོ། །ཧ་ཅང་མང་ཆེས་སོ། །དེས་འདི་སྐད་ཅེས། རེ་ཞིག་གཟུགས་བཟང་བ་ལ་ལྟོས་ཤིག །གང་གི་ཚེ་བྱེད་ཚུལ་དག་མཐོང་ནས་མགུ་བར་གྱུར་ནས། ལྷག་པར་གཞལ་དགོས་པའི་གནས་འདི་ཡོད། ཅེས་སྨྲས་པ་དང། དེ་ནས་སྐྱེས་པ་དེས་ཀརྴ་པ་ཎ་ལྔ་བརྒྱ་བྱིན་ནོ། །དེས་སྨྲས་པ། ནང་དུ་ཞུགས་ཤིག །དེ་ནས་སྦོམ་དགའ་མོས་བསམས་པ། བདག་དགེ་སློང་མའི་སྣ་ལ་འགྲོ་བ་གང་ཅི་ཡང་རུང་བ་དེ་ཐམས་ཅད་ནི་ཚུལ་ཁྲིམས་དང་བརྟུལ་ཞུགས་ཙམ་གྱིས་ཡིན་ན་གལ་ཏེ་བདག་དགེ་སློང་མའི་དངོས་པོ་ཞིག་ན་ཚུལ་ཁྲིམས་རལ་པ་ཡིན་ནོ་ཞེས་བྱ་བ་ནས། སྣོད་ཆག་པ་ཇི་ལྟ་བ་བཞིན་དུ་བདག་ལ་སུ་ཞིག་འདྲི་བར་འགྱུར་སྙམ་དུ་བསམས་ནས། སྦོམ་དགའ་མོས་རོ་ལ་མོ་མཁན་གྱི་རྒྱན་ཕུད་ནས་བྲོས་སོ། །སྐྱེས་པ་དེས་ཀྱང་འཕྲིགས་ནས་སྦོམ་དགའ་མོ་གང་ན་བ་དེར་བརྒྱུགས་ཏེ། དེས་སྐྲ་བརྙན་ནས་བཟུང་བ་དང། སྐྲ་བརྙན་བུད་ནས། སྐྲ་བརྙན་དེ་ཡང་སྐྱེས་པའི་ལག་ཏུ་འོངས་ནས། འདི་སྐད་ཅེས་མགོ་རེག་མོ་ངན་པ་མོ་ཞེས་སྨྲས་སོ། །དེ་ནས་སྦོམ་དགའ་མོས་སྐྱེས་པ་དེ་ལ་འདི་སྐད་ཅེས་སྨྲས་སོ། །བུ་ཟན་མོའི་བུ། རྒྱལ་པོ་གསལ་རྒྱལ་གྱིས། དགེ་སློང་མ་རྣམས་བཙུན་མོའི་ཐབས་སུ་གནང་བར་ཁྱོད་ཀྱིས་མ་ཤེས་སམ། གལ་ཏེ་ཁོ་མོ་ལ་ལག་པས་རེག་པར་གྱུར་ན། ལག་པ་མཁྲིག་མའི་དྲུང་དུ་གཅོད་དུ་གཞུག་གོ་།དེས་འདི་སྐད་མགོ་རེག་མོ་ངན་པ་མོ་ཁྱོད་འདྲ་བ་ནི་གནང་བ་མ་

---

^{[མ་དཔེ་གཟིགས་ན་འདིར་གནོན།]}

ཡིན་ཏེ། གནང་བ་ནི་སྐྱེ་དགུའི་བདག་མོ་ཆེན་མོ་དང། གོའུ་ཏ་མི་སྐེམ་མོ་དང། ཨུཏྤ་ལའི་མདོག་དང། ཆོས་སྦྱིན་དང། བཟང་ལྡན་མ་དང། སེར་སྐྱ་མོ་དག་ཡིན་གྱི། མགོ་རེག་མོ་ཁྱོད་འདྲ་བ་མ་ཡིན་ནོ་ཞེས་སྨྲས་པ་ན། དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ། བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་སྐྲ་བརྙན་ཐོགས་ན་ལྟུང་བྱེད་དོ། །ཡང་གང་ཞེས་བྱ་བ་ནི། སྦོམ་དགའ་མོའོ། །སྐྲ་བརྙན་ཐོགས་ན་ཞེས་བྱ་བ་ནི། གར་མཁན་གྱི་སྐྲ་བརྙན་ནོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་སྐྲ་བརྙན་ཐོགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བརྒྱད་པའི་ཚིགས་སུ་བཅད་པའི་སྡོམ་རྫོགས་སོ།། །།དགེ་སློང་མའི་འདུལ་བ་རྣམ་པར་འབྱེད་པ་ལས་ལྟུང་བྱེད་རྣམས་རྫོགས་སོ།། །།